꧑꧐. ꦏꦸꦩꦸꦢꦢꦴꦪꦏꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦲꦶꦩꦮꦤ꧀ꦠꦱ꧀ꦱꦴꦮꦶꦢꦹꦫꦺꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦺꦴ ꦏꦸꦩꦸꦢꦢꦴꦪꦏꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦄꦪꦩ꧀ꦥꦶ ꦡꦺꦫꦺꦴ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦄꦤꦺꦏꦺꦱꦸ ꦨꦮꦺꦱꦸ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦴꦤꦶ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦺꦴ ꦥꦢꦸꦩꦸꦠ꧀ꦠꦫꦱ꧀ꦱ ꦨꦒꦮꦠꦺꦴ ꦏꦴꦭꦺ ꦲꦶꦩꦮꦤ꧀ꦠꦱ꧀ꦱ ꦄꦴꦱꦤ꧀ꦤꦺ ꦩꦲꦤ꧀ꦠꦺ ꦗꦴꦠꦱ꧀ꦱꦫꦺ ꦏꦸꦏꦸꦠ꧀ꦡꦺꦴ ꦤꦴꦩ ꦥꦏ꧀ꦑꦷ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦺꦴ ꦏꦺꦤꦕꦶ ꦄꦏꦸꦱꦭꦺꦤ ꦥꦏ꧀ꦑꦷ ꦱꦩꦴꦤꦺꦴꦥꦶ ꦥꦸꦧ꧀ꦧꦺ ꦏꦠꦱꦩ꧀ꦨꦴꦫꦺꦤ ꦧꦸꦢ꧀ꦣꦶꦱꦩ꧀ꦥꦤ꧀ꦤꦺꦴ ꦥꦸꦚ꧀ꦚꦴꦥꦸꦚ꧀ꦚꦺꦱꦸ ꦖꦺꦏꦺꦴ ꦱꦷꦭꦮꦴ ꦥꦴꦟꦒꦺꦴꦕꦫꦠꦺꦴ ꦥꦛꦶꦮꦶꦫꦠꦺꦴ ꦄꦲꦺꦴꦱꦶ. ꦠꦱ꧀ꦩꦶꦁ ꦱꦩꦪꦺ ꦥꦢꦸꦩꦸꦠ꧀ꦠꦫꦺꦴ ꦨꦒꦮꦴ ꦄꦴꦏꦴꦱꦺꦤꦴꦒꦤ꧀ꦠ꧀ꦮꦴ ꦠꦱ꧀ꦱ ꦱꦩꦷꦥꦺ ꦕꦔ꧀ꦏꦩꦠꦶ. ꦄꦡ ꦱꦺꦴ ꦱꦏꦸꦟꦺꦴ ꦨꦒꦮꦤ꧀ꦠꦁ ꦢꦶꦱ꧀ꦮꦴ ꦥꦱꦤ꧀ꦤꦕꦶꦠ꧀ꦠꦺꦴ ꦏꦸꦩꦸꦢꦥꦸꦥ꧀ꦦꦁ ꦝꦁꦱꦶꦠ꧀ꦮꦴ ꦨꦒꦮꦠꦺꦴ ꦥꦴꦢꦩꦹꦭꦺ ꦥꦹꦗꦺꦱꦶ. ꦨꦒꦮꦴ ꦠꦱ꧀ꦱ ꦱꦺꦴꦩꦤꦱ꧀ꦱꦸꦥ꧀ꦥꦴꦢꦤꦠ꧀ꦡꦁ ꦥꦛꦶꦒ꧀ꦒꦲꦺꦠ꧀ꦮꦴ ꦄꦤꦸꦩꦺꦴꦢꦤꦩꦏꦴꦱꦶ.

꧕꧑. ꦱꦺꦴ ꦠꦺꦤ ꦥꦸꦚ꧀ꦚꦺꦤ ꦢꦺꦮꦩꦤꦸꦱ꧀ꦱꦺꦱꦸ ꦈꦨꦪꦱꦩ꧀ꦥꦠ꧀ꦠꦶꦱꦸꦑꦁ ꦄꦤꦸꦨꦮꦶꦠ꧀ꦮꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦱꦴꦮꦠ꧀ꦡꦶꦪꦁ ꦄꦚ꧀ꦚꦠꦫꦱ꧀ꦩꦶꦁ ꦏꦸꦭꦺ ꦤꦶꦧ꧀ꦧꦠ꧀ꦠꦺꦴ ꦮꦸꦢ꧀ꦣꦶꦩꦤ꧀ꦮꦴꦪ ꦩꦲꦢ꧀ꦣꦤꦺꦴ ꦩꦲꦴꦨꦺꦴꦒꦺꦴ ꦫꦠꦤꦠ꧀ꦠꦪꦺ ꦥꦱꦤ꧀ꦤꦺꦴ ꦱꦠ꧀ꦡꦸ ꦣꦩ꧀ꦩꦢꦺꦱꦤꦁ ꦱꦸꦠ꧀ꦮꦴ ꦥꦛꦶꦭꦢ꧀ꦣꦱꦢ꧀ꦣꦺꦴ ꦥꦧ꧀ꦧꦗꦶꦠ꧀ꦮꦴ ꦤꦕꦶꦫꦱ꧀ꦱꦺꦮ ꦄꦫꦲꦴ ꦲꦸꦠ꧀ꦮꦴ ꦄꦠ꧀ꦠꦤꦺꦴ ꦥꦸꦧ꧀ꦧꦏꦩ꧀ꦩꦁ ꦥꦕ꧀ꦕꦏ꧀ꦑꦠꦺꦴ ꦚꦠ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦲꦶꦩꦮꦤ꧀ꦠꦱ꧀ꦱꦴꦮꦶꦢꦹꦫꦺꦠꦶꦄꦴꦢꦶꦩꦴꦲ. ꦥꦢꦸꦩꦸꦥ꧀ꦥꦭꦱꦚ꧀ꦖꦤ꧀ꦤꦺꦴꦠꦶ ꦌꦠ꧀ꦡ ꦱꦠꦥꦠ꧀ꦠꦺꦲꦶ ꦱꦩ꧀ꦥꦸꦟ꧀ꦟꦺꦴ ꦱꦺꦠꦥꦢꦸꦩꦺꦴ ꦕ ꦠꦷꦟꦶ ꦤꦷꦭꦫꦠ꧀ꦠꦱꦺꦠꦸꦥ꧀ꦥꦭꦴꦤꦶ ꦕ ꦥꦢꦸꦩꦸꦥ꧀ꦥꦭꦴꦤꦶ ꦠꦺꦲꦶ ꦱꦚ꧀ꦖꦤ꧀ꦤꦺꦴ ꦒꦲꦤꦷꦨꦹꦠꦺꦴ ꦱꦩ꧀ꦥꦸꦟ꧀ꦟꦺꦴ ꦩꦲꦴꦗꦴꦠꦱ꧀ꦱꦫꦺꦴ ꦄꦲꦹꦠꦶ ꦱꦩ꧀ꦧꦤ꧀ꦣꦺꦴ. ꦥꦸꦟ꧀ꦝꦫꦷꦏꦱꦩꦺꦴꦠ꧀ꦡꦛꦺꦴꦠꦶ ꦥꦸꦟ꧀ꦝꦫꦷꦏꦺꦲꦶ ꦫꦠ꧀ꦠꦥꦢꦸꦩꦺꦲꦶ ꦎꦠ꧀ꦡꦛꦺꦴ ꦱꦩ꧀ꦥꦸꦟ꧀ꦟꦺꦴꦠꦶ ꦄꦠ꧀ꦡꦺꦴ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮꦴꦠꦶ.

ꦏꦸꦩꦸꦢꦢꦴꦪꦏꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.

ꦱꦺꦴꦭ꦳ꦱꦩꦮꦒ꧀ꦒꦮꦟ꧀ꦟꦤꦴ ꦱꦩꦠ꧀ꦠꦴ.