꧒. ꦡꦩ꧀ꦨꦴꦫꦺꦴꦥꦏꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦤꦶꦧ꧀ꦧꦸꦠꦺ ꦭꦺꦴꦏꦤꦴꦡꦩ꧀ꦲꦷꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦺꦴ ꦡꦩ꧀ꦨꦴꦫꦺꦴꦥꦏꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦴꦤꦶ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦺꦴ ꦣꦩ꧀ꦩꦢꦱ꧀ꦱꦶꦱ꧀ꦱ ꦨꦒꦮꦠꦺꦴ ꦏꦴꦭꦺ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦺꦴ ꦱꦢ꧀ꦣꦺꦴ ꦥꦱꦤ꧀ꦤꦺꦴ ꦥꦫꦶꦤꦶꦧ꧀ꦧꦸꦠꦺ ꦨꦒꦮꦠꦶ ꦠꦱ꧀ꦱ ꦨꦒꦮꦠꦺꦴ ꦣꦴꦠꦸꦒꦧ꧀ꦨꦩꦴꦭ꦳ꦏꦺ ꦡꦩ꧀ꦨꦁ ꦤꦶꦑꦤꦶꦠ꧀ꦮꦴ ꦣꦗꦁ ꦄꦴꦫꦺꦴꦥꦺꦱꦶ. ꦧꦲꦹꦤꦶ ꦗꦴꦠꦶꦱꦸꦩꦤꦥꦸꦥ꧀ꦦꦴꦤꦶ ꦒꦤ꧀ꦡꦶꦠ꧀ꦮꦴ ꦤꦶꦱ꧀ꦱꦺꦟꦶꦪꦴ ꦄꦴꦫꦺꦴꦲꦶꦠ꧀ꦮꦴ ꦥꦹꦗꦺꦱꦶ.

꧕. ꦱꦺꦴ ꦪꦴꦮꦠꦴꦪꦸꦏꦁ ꦜꦠ꧀ꦮꦴ ꦏꦴꦭꦁ ꦏꦠ꧀ꦮꦴ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦈꦨꦪꦱꦩ꧀ꦥꦠ꧀ꦠꦶꦪꦺꦴ ꦄꦤꦸꦨꦮꦶꦠ꧀ꦮꦴ ꦱꦧ꧀ꦧꦠ꧀ꦡ ꦥꦹꦗꦶꦠꦺꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦌꦏꦱ꧀ꦩꦶꦁ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦺꦴ ꦢꦲꦫꦏꦴꦭꦠꦺꦴ ꦥꦨꦸꦠꦶ ꦥꦹꦗꦤꦷꦪꦺꦴ ꦱꦴꦱꦤꦺ ꦧꦢ꧀ꦣꦱꦢ꧀ꦣꦺꦴ ꦥꦧ꧀ꦧꦗꦶꦠ꧀ꦮꦴ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦠ꧀ꦠꦺꦴ ꦄꦠ꧀ꦠꦤꦺꦴ ꦥꦸꦧ꧀ꦧꦏꦩ꧀ꦩꦁ ꦱꦫꦶꦠ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦤꦶꦧ꧀ꦧꦸꦠꦺ ꦭꦺꦴꦏꦤꦴꦡꦩ꧀ꦲꦷꦠꦶꦄꦴꦢꦶꦩꦴꦲ. ꦠꦠ꧀ꦡ ꦤꦶꦧ꧀ꦧꦸꦠꦺ ꦭꦺꦴꦏꦤꦴꦡꦩ꧀ꦲꦷꦠꦶ ꦱꦏꦭꦭꦺꦴꦏꦱ꧀ꦱ ꦤꦴꦡꦺ ꦥꦣꦴꦤꦨꦹꦠꦺ ꦥꦛꦶꦱꦫꦟꦺ ꦕ ꦱꦠ꧀ꦡꦫꦶ ꦑꦤ꧀ꦣꦥꦫꦶꦤꦶꦧ꧀ꦧꦴꦤꦺꦤ ꦤꦶꦧ꧀ꦧꦸꦠꦺ ꦤꦶꦧ꧀ꦧꦸꦠꦢꦷꦥꦱꦶꦑꦴ ꦮꦶꦪ ꦄꦢꦱ꧀ꦱꦤꦁ ꦒꦠꦺꦠꦶ ꦄꦠ꧀ꦡꦺꦴ. ꦣꦩ꧀ꦩꦢꦱ꧀ꦱꦷꦤꦫꦴꦱꦨꦺꦠꦶ ꦕꦠꦸꦱꦕ꧀ꦕꦣꦩ꧀ꦩꦁ ꦥꦱ꧀ꦱꦠꦷꦠꦶ ꦣꦩ꧀ꦩꦢꦱ꧀ꦱꦷ, ꦄꦡ ꦮꦴ ꦱꦠꦶꦥꦛ꧀ꦜꦴꦤꦴꦢꦶꦏꦺ ꦱꦠ꧀ꦠꦠꦶꦁꦱꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦺ ꦢꦱ꧀ꦱꦤꦱꦷꦭꦺꦴ ꦥꦱ꧀ꦱꦤꦱꦷꦭꦺꦴꦠꦶ ꦣꦩ꧀ꦩꦢꦱ꧀ꦱꦷ, ꦤꦫꦴꦤꦁ ꦄꦴꦱꦨꦺꦴ ꦥꦮꦫꦺꦴ ꦈꦠ꧀ꦠꦩꦺꦴꦠꦶ ꦤꦫꦴꦱꦨꦺꦴ, ꦣꦩ꧀ꦩꦢꦱ꧀ꦱꦷ ꦕ ꦱꦺꦴ ꦤꦫꦴꦱꦨꦺꦴ ꦕꦺꦠꦶ ꦣꦩ꧀ꦩꦢꦱ꧀ꦱꦷꦤꦫꦴꦱꦨꦺꦴ, ꦠꦱ꧀ꦩꦶꦁ ꦣꦩ꧀ꦩꦢꦱ꧀ꦱꦷꦤꦫꦴꦱꦨꦺ. ꦄꦴꦫꦺꦴꦥꦺꦱꦶꦁ ꦣꦗꦁ ꦡꦩ꧀ꦨꦤ꧀ꦠꦶ ꦕꦺꦠꦶꦪꦩꦴꦭ꦳ꦏꦺ ꦡꦩ꧀ꦨꦁ ꦤꦶꦑꦤꦶꦠ꧀ꦮꦴ ꦠꦠ꧀ꦡ ꦣꦗꦁ ꦄꦴꦫꦺꦴꦥꦺꦱꦶꦁ ꦧꦤ꧀ꦣꦶꦠ꧀ꦮꦴ ꦜꦥꦺꦱꦶꦤ꧀ꦠꦶ ꦄꦠ꧀ꦡꦺꦴ.

꧖. ꦤꦶꦱ꧀ꦱꦺꦟꦶꦁ ꦩꦴꦥꦪꦶꦠ꧀ꦮꦴꦤꦴꦠꦶ ꦤꦶꦱ꧀ꦱꦴꦪ ꦠꦁ ꦆꦟꦤ꧀ꦠꦶ ꦒꦕ꧀ꦖꦤ꧀ꦠꦶ ꦄꦴꦫꦺꦴꦲꦤ꧀ꦠꦶ ꦈꦥꦫꦷꦠꦶ ꦤꦶꦱ꧀ꦱꦺꦟꦶ, ꦠꦁ ꦤꦶꦱ꧀ꦱꦺꦟꦶꦁ ꦩꦴꦥꦪꦶꦠ꧀ꦮꦴ ꦏꦴꦫꦺꦠ꧀ꦮꦴ ꦧꦤ꧀ꦣꦶꦠ꧀ꦮꦴ ꦡꦹꦥꦱꦺꦛ꧀ꦜꦁ ꦱꦩꦴꦫꦸꦲꦶꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦗꦴꦠꦶꦥꦸꦥ꧀ꦦꦁ ꦒꦲꦺꦠ꧀ꦮꦴꦤꦴꦠꦶ ꦗꦴꦪꦩꦴꦤꦩꦺꦮ ꦗꦤꦴꦤꦁ ꦱꦸꦤ꧀ꦢꦫꦁ ꦩꦤꦁ ꦏꦫꦺꦴꦠꦷꦠꦶ ꦗꦴꦠꦶꦱꦸꦩꦤꦁ, ꦗꦴꦠꦶꦱꦸꦩꦤꦩꦺꦮ ꦥꦸꦥ꧀ꦦꦁ ‘‘ꦗꦴꦠꦶꦱꦸꦩꦤꦥꦸꦥ꧀ꦦ’’ꦤ꧀ꦠꦶ ꦮꦠ꧀ꦠꦧ꧀ꦧꦺ ꦒꦴꦡꦴꦧꦤ꧀ꦣꦱꦸꦑꦠ꧀ꦡꦁ ꦱꦸꦩꦤꦱꦢ꧀ꦢꦱ꧀ꦱ ꦭꦺꦴꦥꦁ ꦏꦠ꧀ꦮꦴ ‘‘ꦗꦴꦠꦶꦥꦸꦥ꧀ꦦ’’ꦤ꧀ꦠꦶ ꦮꦸꦠ꧀ꦠꦁ, ꦠꦁ ꦗꦴꦠꦶꦱꦸꦩꦤꦥꦸꦥ꧀ꦦꦁ ꦒꦲꦺꦠ꧀ꦮꦴ ꦒꦤ꧀ꦡꦶꦠ꧀ꦮꦴ ꦡꦹꦥꦩ꧀ꦲꦶ ꦄꦴꦫꦺꦴꦥꦪꦶꦁ, ꦄꦴꦫꦺꦴꦥꦺꦠ꧀ꦮꦴ ꦥꦹꦗꦺꦱꦶꦤ꧀ꦠꦶ ꦄꦠ꧀ꦡꦺꦴ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮꦴꦠꦶ.

ꦡꦩ꧀ꦨꦴꦫꦺꦴꦥꦏꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.