꧔. ꦌꦏꦴꦱꦤꦶꦪꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦮꦫꦸꦟꦺꦴ ꦤꦴꦩ ꦤꦴꦩꦺꦤꦴꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦺꦴ ꦌꦏꦴꦱꦤꦶꦪꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦴꦤꦶ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦺꦴ ꦄꦠ꧀ꦡꦢꦱ꧀ꦱꦶꦱ꧀ꦱ ꦨꦒꦮꦠꦺꦴ ꦏꦴꦭꦺ ꦮꦫꦸꦟꦺꦴ ꦤꦴꦩ ꦢꦺꦮꦫꦴꦗꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶ. ꦱꦺꦴ ꦨꦒꦮꦤ꧀ꦠꦁ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ꦒꦤ꧀ꦣꦩꦴꦭꦴꦢꦷꦲꦶ ꦒꦷꦠꦮꦴꦢꦶꦠꦺꦲꦶ ꦕ ꦈꦥꦛ꧀ꦜꦪꦩꦴꦤꦺꦴ ꦱꦥꦫꦶꦮꦴꦫꦺꦴ ꦥꦹꦗꦺꦱꦶ. ꦠꦠꦺꦴ ꦄꦥꦫꦨꦴꦒꦺ ꦨꦒꦮꦠꦶ ꦥꦫꦶꦤꦶꦧ꧀ꦧꦸꦠꦺ ꦠꦱ꧀ꦱ ꦩꦲꦴꦧꦺꦴꦣꦶꦫꦸꦏ꧀ꦑꦁ ꦧꦸꦢ꧀ꦣꦢꦱ꧀ꦱꦤꦁ ꦮꦶꦪ ꦱꦧ꧀ꦧꦠꦹꦫꦶꦪꦠꦴꦭ꦳ꦴꦮꦕꦫꦺꦲꦶ ꦱꦥꦫꦶꦮꦴꦫꦺꦴ ꦈꦥꦲꦴꦫꦩꦏꦴꦱꦶ. ꦱꦺꦴ ꦠꦺꦤ ꦥꦸꦚ꧀ꦚꦺꦤ ꦠꦠꦺꦴ ꦏꦴꦭꦔ꧀ꦏꦠ꧀ꦮꦴ ꦤꦶꦩ꧀ꦩꦴꦤꦫꦠꦶꦢꦺꦮꦭꦺꦴꦏꦺ ꦈꦥ꧀ꦥꦗ꧀ꦗꦶ. ꦌꦮꦁ ꦢꦺꦮꦱꦩ꧀ꦥꦠ꧀ꦠꦶꦩꦤꦸꦨꦮꦶꦠ꧀ꦮꦴ ꦩꦤꦸꦱ꧀ꦱꦺꦱꦸ ꦕ ꦩꦤꦸꦱ꧀ꦱꦨꦹꦠꦺꦴ ꦕꦏ꧀ꦏꦮꦠ꧀ꦠꦶꦱꦩ꧀ꦥꦠ꧀ꦠꦶꦁ ꦄꦤꦸꦨꦮꦶꦠ꧀ꦮꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦺꦴ ꦮꦶꦚ꧀ꦚꦸꦠꦁ ꦥꦠ꧀ꦮꦴ ꦱꦠ꧀ꦡꦸ ꦱꦴꦱꦤꦺ ꦥꦧ꧀ꦧꦗꦶꦠ꧀ꦮꦴ ꦤꦕꦶꦫꦱ꧀ꦱꦺꦮ ꦄꦫꦲꦴ ꦄꦲꦺꦴꦱꦶ.

꧓꧑. ꦱꦺꦴ ꦥꦕ꧀ꦖꦴ ꦱꦏꦏꦩ꧀ꦩꦁ ꦱꦫꦶꦠ꧀ꦮꦴ ꦠꦁ ꦠꦡꦠꦺꦴ ꦚꦠ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦮꦫꦸꦟꦺꦴ ꦤꦴꦩ ꦤꦴꦩꦺꦤꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦪꦢꦴ ꦄꦲꦁ ꦱꦩ꧀ꦧꦺꦴꦣꦤꦠ꧀ꦡꦴꦪ ꦧꦸꦢ꧀ꦣꦁ ꦧꦺꦴꦣꦶꦚ꧀ꦕ ꦥꦹꦗꦺꦱꦶꦁ, ꦠꦢꦴ ꦮꦫꦸꦟꦺꦴ ꦤꦴꦩ ꦢꦺꦮꦫꦴꦗꦴ ꦄꦲꦺꦴꦱꦶꦤ꧀ꦠꦶ ꦱꦩ꧀ꦧꦤ꧀ꦣꦺꦴ.

꧓꧔. ꦣꦫꦟꦷꦫꦸꦲꦥꦴꦢꦥꦤ꧀ꦠꦶ ꦌꦠ꧀ꦡ ꦫꦸꦏ꧀ꦑꦭꦠꦴꦥꦧ꧀ꦧꦠꦱꦠ꧀ꦡꦫꦠꦤꦴꦢꦪꦺꦴ ꦣꦴꦫꦺꦠꦷꦠꦶ ꦣꦫꦟꦷ, ꦠꦱ꧀ꦩꦶꦁ ꦫꦸꦲꦠꦶ ꦥꦠꦶꦛ꧀ꦜꦲꦠꦷꦠꦶ ꦣꦫꦟꦷꦫꦸꦲꦺꦴ. ꦥꦴꦢꦺꦤ ꦥꦶꦮꦠꦷꦠꦶ ꦥꦴꦢꦥꦺꦴ, ꦱꦶꦚ꧀ꦕꦶꦠꦱꦶꦚ꧀ꦕꦶꦠꦺꦴꦢꦏꦁ ꦥꦴꦢꦺꦤ ꦩꦹꦭꦺꦤ ꦥꦶꦮꦠꦶ ꦫꦸꦏ꧀ꦑꦏ꧀ꦑꦤ꧀ꦣꦱꦴꦑꦴꦮꦶꦛꦥꦺꦲꦶ ꦄꦴꦥꦺꦴꦫꦱꦁ ꦥꦠ꧀ꦡꦫꦶꦪꦠꦷꦠꦶ ꦄꦠ꧀ꦡꦺꦴ, ꦠꦁ ꦣꦫꦟꦷꦫꦸꦲꦥꦴꦢꦥꦁ ꦧꦺꦴꦣꦶꦫꦸꦏ꧀ꦑꦤ꧀ꦠꦶ ꦱꦩ꧀ꦧꦤ꧀ꦣꦺꦴ.

꧓꧕. ꦱꦏꦏꦩ꧀ꦩꦴꦨꦶꦫꦢ꧀ꦣꦺꦴꦠꦶ ꦄꦠ꧀ꦠꦤꦺꦴ ꦏꦸꦱꦭꦏꦩ꧀ꦩꦺꦤ ꦄꦨꦶꦫꦢ꧀ꦣꦺꦴ ꦥꦱꦤ꧀ꦤꦺꦴ ꦈꦠ꧀ꦠꦩꦺ ꦧꦺꦴꦣꦶꦩ꧀ꦲꦶ ꦥꦱꦤ꧀ꦤꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.

ꦌꦏꦴꦱꦤꦶꦪꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.