꧓. ꦱꦤ꧀ꦠꦶꦏꦺꦤꦶꦢꦴꦤꦏꦡꦴ

‘‘ꦱꦤ꧀ꦠꦶꦏꦺꦤꦶꦢꦴꦤꦁ ꦥꦤ ‘ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ’. ‘ꦮꦺꦱꦴꦭꦶꦪꦁ ꦮꦶꦲꦫꦠꦶ ꦩꦲꦴꦮꦤꦺ ꦏꦹꦛꦴꦒꦴꦫꦱꦴꦭꦴꦪ’ꦤ꧀ꦠꦶ ꦕ ꦌꦮꦁ ꦠꦱ꧀ꦩꦶꦁ ꦠꦱ꧀ꦩꦶꦁ ꦜꦴꦤꦺꦪꦺꦮ ꦭꦧ꧀ꦨꦠꦷ’’ꦠꦶ ꦮꦸꦠ꧀ꦠꦁ. ꦏꦶꦚ꧀ꦕꦴꦥꦶ ꦌꦮꦁ ꦮꦸꦠ꧀ꦠꦁ, ꦄꦡ ꦑꦺꦴ ꦥꦤ ꦠꦩ꧀ꦥꦶ ꦄꦴꦢꦶꦠꦺꦴ ꦥꦛ꧀ꦜꦴꦪ ꦌꦮꦁ ꦮꦺꦢꦶꦠꦧ꧀ꦧꦁ – ꦈꦢꦴꦤꦚ꧀ꦲꦶ ꦈꦢꦴꦤꦺꦠ꧀ꦮꦴ ꦗꦪꦥꦭ꧀ꦭꦔ꧀ꦏꦺ ꦤꦶꦱꦶꦤ꧀ꦤꦱ꧀ꦱ ꦨꦒꦮꦠꦺꦴ ꦌꦠꦢꦲꦺꦴꦱꦶ – ‘‘ꦄꦲꦁ ꦏꦥ꧀ꦥꦱꦠꦱꦲꦱ꧀ꦱꦴꦣꦶꦏꦴꦤꦶ ꦕꦠ꧀ꦠꦴꦫꦶ ꦄꦱꦔ꧀ꦑ꧀ꦪꦺꦪ꧀ꦪꦴꦤꦶ ꦆꦩꦱ꧀ꦱ ꦥꦭ꧀ꦭꦔ꧀ꦏꦱ꧀ꦱ ꦏꦴꦫꦟꦴ ꦱꦤ꧀ꦣꦴꦮꦶꦁ, ꦌꦠ꧀ꦠꦏꦁ ꦩꦺ ꦏꦴꦭꦁ ꦆꦩꦱ꧀ꦱꦺꦮ ꦥꦭ꧀ꦭꦔ꧀ꦏꦱ꧀ꦱ ꦏꦴꦫꦟꦴ ꦄꦭꦔ꧀ꦏꦠꦱꦷꦱꦁ ꦒꦷꦮꦴꦪ ꦖꦶꦤ꧀ꦢꦶꦠ꧀ꦮꦴ ꦢꦶꦤ꧀ꦤꦁ, ꦱꦸꦄꦚ꧀ꦗꦶꦠꦴꦤꦶ ꦄꦏ꧀ꦑꦷꦤꦶ ꦲꦢꦪꦩꦁꦱꦚ꧀ꦕ ꦈꦥ꧀ꦥꦴꦛꦺꦮꦴ ꦢꦶꦤ꧀ꦤꦁ, ꦗꦴꦭꦷꦏꦸꦩꦴꦫꦱꦢꦶꦱꦴ ꦥꦸꦠ꧀ꦠꦴ, ꦏꦟ꧀ꦲꦴꦗꦶꦤꦏꦸꦩꦴꦫꦶꦱꦢꦶꦱꦴ ꦣꦷꦠꦫꦺꦴ, ꦩꦢ꧀ꦢꦷꦢꦺꦮꦶꦱꦢꦶꦱꦴ ꦨꦫꦶꦪꦴꦪꦺꦴ ꦕ ꦥꦫꦺꦱꦁ ꦢꦴꦱꦠ꧀ꦡꦴꦪ ꦢꦶꦤ꧀ꦤꦴ. ꦄꦪꦁ ꦩꦺ ꦥꦭ꧀ꦭꦔ꧀ꦏꦺꦴ ꦗꦪꦥꦭ꧀ꦭꦔ꧀ꦏꦺꦴ ꦡꦶꦫꦥꦭ꧀ꦭꦔ꧀ꦏꦺꦴ, ꦌꦠ꧀ꦡ ꦩꦺ ꦤꦶꦱꦶꦤ꧀ꦤꦱ꧀ꦱ ꦱꦔ꧀ꦏꦥ꧀ꦥꦴ ꦥꦫꦶꦥꦸꦟ꧀ꦟꦴ, ꦤ ꦠꦴꦮ ꦆꦠꦺꦴ ꦮꦸꦛ꧀ꦜꦲꦶꦱ꧀ꦱꦴꦩꦷ’’ꦠꦶ ꦄꦤꦺꦏꦏꦺꦴꦛꦶꦱꦠꦱꦲꦱ꧀ꦱꦱꦩꦴꦥꦠ꧀ꦠꦶꦪꦺꦴ ꦱꦩꦴꦥꦗ꧀ꦗꦤ꧀ꦠꦺꦴ ꦱꦠ꧀ꦠꦴꦲꦁ ꦠꦠ꧀ꦡꦺꦮ ꦤꦶꦱꦷꦢꦶ. ꦪꦁ ꦱꦤ꧀ꦣꦴꦪ ꦮꦸꦠ꧀ꦠꦁ – ‘‘ꦄꦡ ꦑꦺꦴ ꦨꦒꦮꦴ ꦱꦠ꧀ꦠꦴꦲꦁ ꦌꦏꦥꦭ꧀ꦭꦔ꧀ꦏꦺꦤ ꦤꦶꦱꦷꦢꦶ ꦮꦶꦩꦸꦠ꧀ꦠꦶꦱꦸꦑꦥꦛꦶꦱꦁꦮꦺꦢꦷ’’ꦠꦶ (ꦩꦲꦴꦮ. ꧑; ꦈꦢꦴ. ꧑).

ꦄꦡ ꦌꦏꦕ꧀ꦕꦴꦤꦁ ꦢꦺꦮꦠꦴꦤꦁ ‘‘ꦄꦗ꧀ꦗꦴꦥꦶ ꦤꦹꦤ ꦱꦶꦢ꧀ꦣꦠ꧀ꦡꦱ꧀ꦱ ꦏꦠ꧀ꦠꦧ꧀ꦧꦏꦶꦕ꧀ꦕꦁ ꦄꦠ꧀ꦡꦶ, ꦥꦭ꧀ꦭꦔ꧀ꦏꦱ꧀ꦩꦶꦚ꧀ꦲꦶ ꦄꦴꦭꦪꦁ ꦤ ꦮꦶꦗꦲꦠꦷ’’ꦠꦶ ꦥꦫꦶꦮꦶꦠꦏ꧀ꦏꦺꦴ ꦈꦢꦥꦴꦢꦶ. ꦱꦠ꧀ꦡꦴ ꦢꦺꦮꦠꦴꦤꦁ ꦥꦫꦶꦮꦶꦠꦏ꧀ꦏꦁ ꦚꦠ꧀ꦮꦴ ꦠꦴꦱꦁ ꦮꦶꦠꦏ꧀ꦏꦮꦹꦥꦱꦩꦠ꧀ꦡꦁ ꦮꦺꦲꦴꦱꦁ ꦄꦧ꧀ꦨꦸꦒ꧀ꦒꦤ꧀ꦠ꧀ꦮꦴ ꦪꦩꦏꦥꦴꦛꦶꦲꦴꦫꦶꦪꦁ ꦢꦱ꧀ꦱꦺꦱꦶ. ꦩꦲꦴꦧꦺꦴꦣꦶꦩꦟ꧀ꦝꦺ ꦲꦶ ꦏꦠꦥꦴꦛꦶꦲꦴꦫꦶꦪꦚ꧀ꦕ ꦚꦴꦠꦶꦱꦩꦴꦒꦩꦺ ꦏꦠꦥꦴꦛꦶꦲꦴꦫꦶꦪꦚ꧀ꦕ ꦥꦴꦡꦶꦏꦥꦸꦠ꧀ꦠꦱꦩꦴꦒꦩꦺ ꦏꦠꦥꦴꦛꦶꦲꦴꦫꦶꦪꦚ꧀ꦕ ꦱꦧ꧀ꦧꦁ ꦏꦟ꧀ꦝꦩ꧀ꦧꦫꦸꦏ꧀ꦑꦩꦹꦭꦺ ꦏꦠꦪꦩꦏꦥꦴꦛꦶꦲꦴꦫꦶꦪꦱꦢꦶꦱꦁ ꦄꦲꦺꦴꦱꦶ.

ꦌꦮꦁ ꦱꦠ꧀ꦡꦴ ꦆꦩꦶꦤꦴ ꦥꦴꦛꦶꦲꦴꦫꦶꦪꦺꦤ ꦢꦺꦮꦠꦴꦤꦁ ꦮꦶꦠꦏ꧀ꦏꦁ ꦮꦹꦥꦱꦩꦺꦠ꧀ꦮꦴ ꦥꦭ꧀ꦭꦔ꧀ꦏꦠꦺꦴ ꦇꦱꦏꦁ ꦥꦴꦕꦷꦤꦤꦶꦱ꧀ꦱꦶꦠꦺ ꦈꦠ꧀ꦠꦫꦢꦶꦱꦴꦨꦴꦒꦺ ꦜꦠ꧀ꦮꦴ ‘‘ꦆꦩꦱ꧀ꦩꦶꦁ ꦮꦠ ꦩꦺ ꦥꦭ꧀ꦭꦔ꧀ꦏꦺ ꦱꦧ꧀ꦧꦚ꧀ꦚꦸꦠꦁ ꦥꦛꦶꦮꦶꦢ꧀ꦣ’’ꦤ꧀ꦠꦶ ꦕꦠ꧀ꦠꦴꦫꦶ ꦄꦱꦔ꧀ꦑ꧀ꦪꦺꦪ꧀ꦪꦴꦤꦶ ꦏꦥ꧀ꦥꦱꦠꦱꦲꦱ꧀ꦱꦚ꧀ꦕ ꦥꦹꦫꦶꦠꦴꦤꦁ ꦥꦴꦫꦩꦷꦤꦁ ꦧꦭꦴꦣꦶꦒꦩꦛ꧀ꦜꦴꦤꦁ ꦥꦭ꧀ꦭꦔ꧀ꦏꦁ ꦧꦺꦴꦣꦶꦫꦸꦏ꧀ꦑꦚ꧀ꦕ ꦄꦤꦶꦩꦶꦱꦺꦲꦶ ꦄꦏ꧀ꦑꦷꦲꦶ ꦎꦭꦺꦴꦏꦪꦩꦴꦤꦺꦴ ꦱꦠ꧀ꦠꦴꦲꦁ ꦮꦷꦠꦶꦤꦴꦩꦺꦱꦶ, ꦠꦁ ꦜꦴꦤꦁ ꦄꦤꦶꦩꦶꦱꦕꦺꦠꦶꦪꦁ ꦤꦴꦩ ꦗꦴꦠꦁ. ꦄꦡ ꦱꦠ꧀ꦡꦴ ꦥꦭ꧀ꦭꦔ꧀ꦏꦱ꧀ꦱ ꦕ ꦜꦶꦠꦛ꧀ꦜꦴꦤꦱ꧀ꦱ ꦕ ꦄꦤ꧀ꦠꦫꦴ ꦕꦔ꧀ꦏꦩꦁ ꦩꦴꦥꦺꦠ꧀ꦮꦴ ꦥꦸꦫꦠ꧀ꦡꦶꦩꦥꦕ꧀ꦖꦶꦩꦠꦺꦴ ꦄꦴꦪꦠꦺ ꦫꦠꦤꦕꦔ꧀ꦏꦩꦺ ꦕꦔ꧀ꦏꦩꦤ꧀ꦠꦺꦴ ꦱꦠ꧀ꦠꦴꦲꦁ ꦮꦷꦠꦶꦤꦴꦩꦺꦱꦶ. ꦠꦁ ꦜꦴꦤꦁ ꦫꦠꦤꦕꦔ꧀ꦏꦩꦕꦺꦠꦶꦪꦁ ꦤꦴꦩ ꦗꦴꦠꦁ.

ꦕꦠꦸꦠ꧀ꦡꦺ ꦥꦤ ꦱꦠ꧀ꦠꦴꦲꦺ ꦧꦺꦴꦣꦶꦠꦺꦴ ꦥꦕ꧀ꦖꦶꦩꦸꦠ꧀ꦠꦫꦢꦶꦱꦴꦨꦴꦒꦺ ꦢꦺꦮꦠꦴ ꦫꦠꦤꦓꦫꦁ ꦩꦴꦥꦪꦶꦁꦱꦸ. ꦠꦠ꧀ꦡ ꦨꦒꦮꦴ ꦥꦭ꧀ꦭꦔ꧀ꦏꦺꦤ ꦤꦶꦱꦷꦢꦶꦠ꧀ꦮꦴ ꦄꦨꦶꦣꦩ꧀ꦩꦥꦶꦛꦏꦁ ꦮꦶꦱꦺꦱꦠꦺꦴ ꦕꦺꦠ꧀ꦡ ꦄꦤꦤ꧀ꦠꦤꦪꦱꦩꦤ꧀ꦠꦥꦛ꧀ꦜꦴꦤꦁ ꦮꦶꦕꦶꦤꦤ꧀ꦠꦺꦴ ꦱꦠ꧀ꦠꦴꦲꦁ ꦮꦷꦠꦶꦤꦴꦩꦺꦱꦶ. ꦄꦴꦨꦶꦣꦩ꧀ꦩꦶꦏꦴ ꦥꦤꦴꦲꦸ – ‘‘ꦫꦠꦤꦓꦫꦁ ꦤꦴꦩ ꦤ ꦱꦠ꧀ꦠꦫꦠꦤꦩꦪꦁ ꦒꦺꦲꦁ, ꦱꦠ꧀ꦠꦤ꧀ꦤꦁ ꦥꦤ ꦥꦏꦫꦟꦴꦤꦁ ꦱꦩ꧀ꦩꦱꦶꦠꦛ꧀ꦜꦴꦤꦁ ‘ꦫꦠꦤꦓꦫ’ꦤ꧀ꦠꦶ ꦮꦸꦕ꧀ꦕꦠꦷ’’ꦠꦶ. ꦪꦱ꧀ꦩꦴ ꦥꦤꦺꦠ꧀ꦡ ꦈꦨꦺꦴꦥꦺꦠꦺ ꦥꦫꦶꦪꦴꦪꦺꦤ ꦪꦸꦗ꧀ꦗꦤ꧀ꦠꦶ, ꦠꦱ꧀ꦩꦴ ꦈꦨꦪꦩ꧀ꦥꦺꦠꦁ ꦒꦲꦺꦠꦧ꧀ꦧꦩꦺꦮ. ꦠꦠꦺꦴ ꦥꦛ꧀ꦜꦴꦪ ꦥꦤ ꦠꦁ ꦜꦴꦤꦁ ꦫꦠꦤꦓꦫꦕꦺꦠꦶꦪꦁ ꦤꦴꦩ ꦗꦴꦠꦁ. ꦌꦮꦁ ꦱꦠ꧀ꦡꦴ ꦧꦺꦴꦣꦶꦱꦩꦷꦥꦺꦪꦺꦮ ꦕꦠ꧀ꦠꦴꦫꦶ ꦱꦠ꧀ꦠꦴꦲꦴꦤꦶ ꦮꦷꦠꦶꦤꦴꦩꦺꦠ꧀ꦮꦴ ꦥꦚ꧀ꦕꦩꦺ ꦱꦠ꧀ꦠꦴꦲꦺ ꦧꦺꦴꦣꦶꦫꦸꦏ꧀ꦑꦩꦹꦭꦴ ꦪꦺꦤ ꦄꦗꦥꦴꦭꦤꦶꦒ꧀ꦫꦺꦴꦣꦺꦴ ꦠꦺꦤꦸꦥꦱꦔ꧀ꦏꦩꦶ. ꦠꦠ꧀ꦫꦴꦥꦶ ꦣꦩ꧀ꦩꦁ ꦮꦶꦕꦶꦤꦤ꧀ꦠꦺꦴ ꦮꦶꦩꦸꦠ꧀ꦠꦶꦱꦸꦑꦚ꧀ꦕ ꦥꦛꦶꦱꦁꦮꦺꦢꦺꦤ꧀ꦠꦺꦴ ꦤꦶꦱꦷꦢꦶ.

ꦠꦱ꧀ꦩꦶꦁ ꦱꦩꦪꦺ ꦩꦴꦫꦺꦴ ꦥꦴꦥꦶꦩꦴ ‘‘ꦌꦠ꧀ꦠꦏꦁ ꦏꦴꦭꦁ ꦄꦤꦸꦧꦤ꧀ꦣꦤ꧀ꦠꦺꦴ ꦎꦠꦴꦫꦴꦥꦺꦏ꧀ꦑꦺꦴꦥꦶ ꦆꦩꦱ꧀ꦱ ꦤ ꦏꦶꦚ꧀ꦕꦶ ꦑꦭꦶꦠꦁ ꦄꦢ꧀ꦢꦱꦁ, ꦄꦠꦶꦏ꧀ꦏꦤ꧀ꦠꦺꦴꦢꦴꦤꦶ ꦌꦱ ꦩꦩ ꦮꦱ’’ꦤ꧀ꦠꦶ ꦢꦺꦴꦩꦤꦱ꧀ꦱꦥ꧀ꦥꦠ꧀ꦠꦺꦴ ꦩꦲꦴꦩꦒ꧀ꦒꦺ ꦤꦶꦱꦷꦢꦶꦠ꧀ꦮꦴ ꦱꦺꦴꦭ꦳ꦱ ꦏꦴꦫꦟꦴꦤꦶ ꦕꦶꦤ꧀ꦠꦺꦤ꧀ꦠꦺꦴ ꦨꦹꦩꦶꦪꦁ ꦱꦺꦴꦭ꦳ꦱ ꦭꦺꦑꦴ ꦄꦴꦏꦝ꧀ꦞꦶ – ‘‘ꦄꦲꦁ ꦌꦱꦺꦴ ꦮꦶꦪ ꦢꦴꦤꦥꦴꦫꦩꦶꦁ ꦤ ꦥꦹꦫꦺꦱꦶꦁ, ꦠꦺꦤꦩ꧀ꦲꦶ ꦆꦩꦶꦤꦴ ꦱꦢꦶꦱꦺꦴ ꦤ ꦗꦴꦠꦺꦴ’’ꦠꦶ ꦌꦏꦁ ꦭꦺꦑꦁ ꦄꦴꦏꦝ꧀ꦞꦶ. ꦠꦡꦴ ‘‘ꦄꦲꦁ ꦌꦱꦺꦴ ꦮꦶꦪ ꦱꦷꦭꦥꦴꦫꦩꦶꦁ…ꦥꦺ… ꦤꦺꦏ꧀ꦑꦩ꧀ꦩꦥꦴꦫꦩꦶꦁ, ꦥꦚ꧀ꦚꦴꦥꦴꦫꦩꦶꦁ, ꦮꦷꦫꦶꦪꦥꦴꦫꦩꦶꦁ, ꦑꦤ꧀ꦠꦶꦥꦴꦫꦩꦶꦁ, ꦱꦕ꧀ꦕꦥꦴꦫꦩꦶꦁ, ꦄꦣꦶꦛ꧀ꦜꦴꦤꦥꦴꦫꦩꦶꦁ, ꦩꦺꦠ꧀ꦠꦴꦥꦴꦫꦩꦶꦁ, ꦈꦥꦺꦏ꧀ꦑꦴꦥꦴꦫꦩꦶꦁ ꦤ ꦥꦹꦫꦺꦱꦶꦁ, ꦠꦺꦤꦩ꧀ꦲꦶ ꦆꦩꦶꦤꦴ ꦱꦢꦶꦱꦺꦴ ꦤ ꦗꦴꦠꦺꦴ’’ꦠꦶ ꦢꦱꦩꦁ ꦭꦺꦑꦁ ꦄꦴꦏꦝ꧀ꦞꦶ. ꦠꦡꦴ ‘‘ꦄꦲꦁ ꦌꦱꦺꦴ ꦮꦶꦪ ꦄꦱꦴꦣꦴꦫꦟꦱ꧀ꦱ ꦆꦤ꧀ꦢ꧀ꦫꦶꦪꦥꦫꦺꦴꦥꦫꦶꦪꦠ꧀ꦠꦚꦴꦟꦱ꧀ꦱ ꦥꦛꦶꦮꦺꦣꦴꦪ ꦈꦥꦤꦶꦱ꧀ꦱꦪꦨꦹꦠꦴ ꦢꦱ ꦥꦴꦫꦩꦶꦪꦺꦴ ꦤ ꦥꦹꦫꦺꦱꦶꦁ, ꦠꦺꦤꦩ꧀ꦲꦶ ꦆꦩꦶꦤꦴ ꦱꦢꦶꦱꦺꦴ ꦤ ꦗꦴꦠꦺꦴ’’ꦠꦶ ꦌꦏꦴꦢꦱꦩꦁ ꦭꦺꦑꦁ ꦄꦴꦏꦝ꧀ꦞꦶ. ꦠꦡꦴ ‘‘ꦄꦲꦁ ꦌꦱꦺꦴ ꦮꦶꦪ ꦄꦱꦴꦣꦴꦫꦟꦱ꧀ꦱ ꦄꦴꦱꦪꦴꦤꦸꦱꦪꦚꦴꦟꦱ꧀ꦱ…ꦥꦺ… ꦩꦲꦴꦏꦫꦸꦟꦴꦱꦩꦴꦥꦠ꧀ꦠꦶꦚꦴꦟꦱ꧀ꦱ, ꦪꦩꦏꦥꦴꦛꦶꦲꦴꦫꦶꦪꦚꦴꦟꦱ꧀ꦱ, ꦄꦤꦴꦮꦫꦟꦚꦴꦟꦱ꧀ꦱ, ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦱ꧀ꦱ ꦥꦛꦶꦮꦺꦣꦴꦪ ꦈꦥꦤꦶꦱ꧀ꦱꦪꦨꦹꦠꦴ ꦢꦱ ꦥꦴꦫꦩꦶꦪꦺꦴ ꦤ ꦥꦹꦫꦺꦱꦶꦁ, ꦠꦺꦤꦩ꧀ꦲꦶ ꦆꦩꦶꦤꦴ ꦱꦢꦶꦱꦺꦴ ꦤ ꦗꦴꦠꦺꦴ’’ꦠꦶ ꦱꦺꦴꦭ꦳ꦱꦩꦁ ꦭꦺꦑꦁ ꦄꦴꦏꦝ꧀ꦞꦶ. ꦌꦮꦁ ꦩꦴꦫꦺꦴ ꦆꦩꦺꦲꦶ ꦏꦴꦫꦟꦺꦲꦶ ꦩꦲꦴꦩꦒ꧀ꦒꦺ ꦱꦺꦴꦭ꦳ꦱ ꦭꦺꦑꦴ ꦄꦴꦏꦝ꧀ꦞꦶꦠ꧀ꦮꦴ ꦤꦶꦱꦷꦢꦶ.

ꦠꦱ꧀ꦩꦶꦚ꧀ꦕ ꦱꦩꦪꦺ ꦠꦟ꧀ꦲꦴ, ꦄꦫꦠꦶ, ꦫꦒꦴ ꦕꦴꦠꦶ ꦠꦶꦱ꧀ꦱꦺꦴ ꦩꦴꦫꦣꦷꦠꦫꦺꦴ (ꦱꦁ. ꦤꦶ. ꧑.꧑꧖꧑) ‘‘ꦥꦶꦠꦴ ꦤꦺꦴ ꦤ ꦥꦚ꧀ꦚꦴꦪꦠꦶ, ꦏꦲꦁ ꦤꦸ ꦑꦺꦴ ꦌꦠꦫꦲꦷ’’ꦠꦶ ꦎꦭꦺꦴꦏꦪꦩꦴꦤꦴ ꦠꦁ ꦢꦺꦴꦩꦤꦱ꧀ꦱꦥ꧀ꦥꦠ꧀ꦠꦁ ꦨꦹꦩꦶꦁ ꦭꦺꦑꦩꦴꦤꦁ ꦤꦶꦱꦶꦤ꧀ꦤꦁ ꦢꦶꦱ꧀ꦮꦴ ꦥꦶꦠꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ‘‘ꦏꦱ꧀ꦩꦴ, ꦠꦴꦠ, ꦠ꧀ꦮꦁ ꦢꦸꦏ꧀ꦑꦷ ꦢꦸꦩ꧀ꦩꦤꦺꦴ’’ꦠꦶ ꦥꦸꦕ꧀ꦖꦶꦁꦱꦸ. ‘‘ꦄꦩ꧀ꦩꦴ, ꦄꦪꦁ ꦩꦲꦴꦱꦩꦟꦺꦴ ꦩꦪ꧀ꦲꦁ ꦮꦱꦁ ꦄꦠꦶꦏ꧀ꦏꦤ꧀ꦠꦺꦴ, ꦌꦠ꧀ꦠꦏꦁ ꦏꦴꦭꦁ ꦎꦭꦺꦴꦏꦺꦤ꧀ꦠꦺꦴ ꦎꦠꦴꦫꦩꦱ꧀ꦱ ꦢꦛ꧀ꦜꦸꦁ ꦤꦴꦱꦏ꧀ꦑꦶꦁ, ꦠꦺꦤꦩ꧀ꦲꦶ ꦢꦸꦏ꧀ꦑꦷ ꦢꦸꦩ꧀ꦩꦤꦺꦴ’’ꦠꦶ. ‘‘ꦪꦢꦶ ꦌꦮꦁ ꦩꦴ ꦕꦶꦤ꧀ꦠꦪꦶꦠ꧀ꦡ, ꦩꦪꦩꦺꦠꦁ ꦄꦠ꧀ꦠꦤꦺꦴ ꦮꦱꦺ ꦏꦠ꧀ꦮꦴ ꦄꦴꦢꦴꦪ ꦄꦴꦒꦩꦶꦱ꧀ꦱꦴꦩꦴ’’ꦠꦶ ꦄꦴꦲꦁꦱꦸ. ‘‘ꦤ ꦱꦏ꧀ꦏꦴ, ꦄꦩ꧀ꦩꦴ, ꦌꦱ ꦏꦺꦤꦕꦶ ꦮꦱꦺ ꦏꦴꦠꦸꦁ, ꦄꦕꦭꦴꦪ ꦱꦢ꧀ꦣꦴꦪ ꦥꦠꦶꦛ꧀ꦜꦶꦠꦺꦴ ꦌꦱ ꦥꦸꦫꦶꦱꦺꦴ’’ꦠꦶ. ‘‘ꦠꦴꦠ, ꦩꦪꦁ ꦆꦠ꧀ꦡꦶꦪꦺꦴ ꦤꦴꦩ, ꦆꦢꦴꦤꦺꦮ ꦤꦁ ꦫꦴꦒꦥꦴꦱꦴꦢꦷꦲꦶ ꦧꦤ꧀ꦣꦶꦠ꧀ꦮꦴ ꦄꦴꦤꦺꦱ꧀ꦱꦴꦩ, ꦠꦸꦩ꧀ꦲꦺ ꦩꦴ ꦕꦶꦤ꧀ꦠꦪꦶꦠ꧀ꦡꦴ’’ꦠꦶ ꦮꦠ꧀ꦮꦴ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦥꦴꦢꦺ ꦠꦺ, ꦱꦩꦟ, ꦥꦫꦶꦕꦴꦫꦺꦩꦴ’’ꦠꦶ ꦄꦴꦲꦁꦱꦸ. ꦨꦒꦮꦴ ꦤꦺꦮ ꦠꦴꦱꦁ ꦮꦕꦤꦁ ꦩꦤꦱꦶ ꦄꦏꦴꦱꦶ, ꦤ ꦄꦏ꧀ꦑꦷꦤꦶ ꦈꦩ꧀ꦩꦷꦭꦺꦠ꧀ꦮꦴ ꦎꦭꦺꦴꦏꦺꦱꦶ, ꦄꦤꦸꦠ꧀ꦠꦫꦺ ꦈꦥꦣꦶꦱꦔ꧀ꦑꦪꦺ ꦮꦶꦩꦸꦠ꧀ꦠꦶꦪꦴ ꦮꦶꦮꦺꦏꦱꦸꦑꦚ꧀ꦚꦺꦮ ꦄꦤꦸꦨꦮꦤ꧀ꦠꦺꦴ ꦤꦶꦱꦷꦢꦶ.

ꦥꦸꦤ ꦩꦴꦫꦣꦷꦠꦫꦺꦴ ‘‘ꦈꦕ꧀ꦕꦴꦮꦕꦴ ꦑꦺꦴ ꦥꦸꦫꦶꦱꦴꦤꦁ ꦄꦣꦶꦥ꧀ꦥꦴꦪꦴ, ꦏꦺꦱꦚ꧀ꦕꦶ ꦏꦸꦩꦴꦫꦶꦏꦴꦱꦸ ꦥꦺꦩꦁ ꦲꦺꦴꦠꦶ, ꦏꦺꦱꦚ꧀ꦕꦶ ꦥꦜꦩꦮꦪꦺ ꦜꦶꦠꦴꦱꦸ, ꦏꦺꦱꦚ꧀ꦕꦶ ꦩꦗ꧀ꦙꦶꦩꦮꦪꦺ ꦜꦶꦠꦴꦱꦸ, ꦏꦺꦱꦚ꧀ꦕꦶ ꦥꦕ꧀ꦖꦶꦩꦮꦪꦺ ꦜꦶꦠꦴꦱꦸ, ꦪꦁꦤꦹꦤ ꦩꦪꦁ ꦤꦴꦤꦥ꧀ꦥꦏꦴꦫꦺꦲꦶ ꦫꦹꦥꦺꦲꦶ ꦥꦭꦺꦴꦨꦺꦠ꧀ꦮꦴ ꦒꦟ꧀ꦲꦺꦪ꧀ꦪꦴꦩꦴ’’ꦠꦶ ꦌꦏꦩꦺꦏꦴ ꦏꦸꦩꦴꦫꦶꦏꦮꦟ꧀ꦟꦴꦢꦶꦮꦱꦺꦤ ꦱꦏꦁ ꦱꦏꦁ ꦄꦠ꧀ꦠꦨꦴꦮꦁ ꦄꦨꦶꦤꦶꦩ꧀ꦩꦶꦤꦶꦠ꧀ꦮꦴ ꦏꦸꦩꦴꦫꦶꦏꦴ, ꦄꦮꦶꦗꦴꦠꦴ, ꦱꦏꦶꦁꦮꦶꦗꦴꦠꦴ, ꦢꦸꦮꦶꦗꦴꦠꦴ, ꦩꦗ꧀ꦙꦶꦩꦶꦠ꧀ꦡꦶꦪꦺꦴ, ꦩꦲꦶꦠ꧀ꦡꦶꦪꦺꦴ ꦕ ꦲꦸꦠ꧀ꦮꦴ ꦖꦏ꧀ꦑꦠ꧀ꦠꦸꦁ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦥꦴꦢꦺ ꦠꦺ, ꦱꦩꦟ, ꦥꦫꦶꦕꦴꦫꦺꦩꦴ’’ꦠꦶ ꦄꦴꦲꦁꦱꦸ. ꦠꦩ꧀ꦥꦶ ꦨꦒꦮꦴ ꦤ ꦩꦤꦱꦴꦏꦴꦱꦶ, ꦪꦡꦴ ꦠꦁ ꦄꦤꦸꦠ꧀ꦠꦫꦺ ꦈꦥꦣꦶꦱꦔ꧀ꦑꦪꦺ ꦮꦶꦩꦸꦠ꧀ꦠꦺꦴ. ꦏꦺꦕꦶ ꦥꦤꦴꦕꦫꦶꦪꦴ ꦮꦢꦤ꧀ꦠꦶ – ‘‘ꦠꦴ ꦩꦲꦶꦠ꧀ꦡꦶꦨꦴꦮꦺꦤ ꦈꦥꦒꦠꦴ ꦢꦶꦱ꧀ꦮꦴ ꦨꦒꦮꦴ – ‘ꦌꦠꦴ ꦑꦟ꧀ꦝꦢꦤ꧀ꦠꦴ ꦥꦭꦶꦠꦏꦺꦱꦴ ꦲꦺꦴꦤ꧀ꦠꦹ’ꦠꦶ ꦄꦣꦶꦛ꧀ꦜꦴꦱꦷ’’ꦠꦶ. ꦠꦁ ꦤ ꦒꦲꦺꦠꦧ꧀ꦧꦁ. ꦤ ꦲꦶ ꦨꦒꦮꦴ ꦌꦮꦫꦹꦥꦁ ꦄꦣꦶꦛ꧀ꦜꦴꦤꦁ ꦄꦏꦴꦱꦶ. ꦨꦒꦮꦴ ꦥꦤ ‘‘ꦄꦥꦺꦡ ꦠꦸꦩ꧀ꦲꦺ, ꦏꦶꦁ ꦢꦶꦱ꧀ꦮꦴ ꦌꦮꦁ ꦮꦴꦪꦩꦡ, ꦌꦮꦫꦹꦥꦁ ꦤꦴꦩ ꦄꦮꦷꦠꦫꦴꦒꦴꦢꦷꦤꦁ ꦥꦸꦫꦠꦺꦴ ꦏꦴꦠꦸꦁ ꦮꦛ꧀ꦛꦠꦶ. ꦠꦡꦴꦒꦠꦱ꧀ꦱ ꦥꦤ ꦫꦴꦒꦺꦴ ꦥꦲꦷꦤꦺꦴ, ꦢꦺꦴꦱꦺꦴ ꦥꦲꦷꦤꦺꦴ, ꦩꦺꦴꦲꦺꦴ ꦥꦲꦷꦤꦺꦴ’’ꦠꦶ ꦄꦠ꧀ꦠꦤꦺꦴ ꦏꦶꦭꦺꦱꦥ꧀ꦥꦲꦴꦤꦁ ꦄꦴꦫꦧ꧀ꦨ –

‘‘ꦪꦱ꧀ꦱ ꦗꦶꦠꦁ ꦤꦴꦮꦗꦷꦪꦠꦶ, ꦗꦶꦠꦩꦱ꧀ꦱ ꦤꦺꦴꦪꦴꦠꦶ ꦏꦺꦴꦕꦶ ꦭꦺꦴꦏꦺ;

ꦠꦁ ꦧꦸꦢ꧀ꦣꦩꦤꦤ꧀ꦠꦒꦺꦴꦕꦫꦁ, ꦄꦥꦢꦁ ꦏꦺꦤ ꦥꦢꦺꦤ ꦤꦺꦱ꧀ꦱꦡ.

‘‘ꦪꦱ꧀ꦱ ꦗꦴꦭꦶꦤꦷ ꦮꦶꦱꦠ꧀ꦠꦶꦏꦴ, ꦠꦟ꧀ꦲꦴ ꦤꦠ꧀ꦡꦶ ꦏꦸꦲꦶꦚ꧀ꦕꦶ ꦤꦺꦠꦮꦺ;

ꦠꦁ ꦧꦸꦢ꧀ꦣꦩꦤꦤ꧀ꦠꦒꦺꦴꦕꦫꦁ, ꦄꦥꦢꦁ ꦏꦺꦤ ꦥꦢꦺꦤ ꦤꦺꦱ꧀ꦱꦡꦴ’’ꦠꦶ. (ꦣ. ꦥ. ꧑꧗꧙-꧑꧘꧐) –

ꦆꦩꦴ ꦣꦩ꧀ꦩꦥꦢꦺ ꦧꦸꦢ꧀ꦣꦮꦒ꧀ꦒꦺ ꦢ꧀ꦮꦺ ꦒꦴꦡꦴ ꦮꦢꦤ꧀ꦠꦺꦴ ꦣꦩ꧀ꦩꦁ ꦢꦺꦱꦺꦱꦶ. ꦠꦴ ‘‘ꦱꦕ꧀ꦕꦁ ꦏꦶꦫ ꦤꦺꦴ ꦥꦶꦠꦴ ꦄꦮꦺꦴꦕ, ‘ꦄꦫꦲꦁ ꦱꦸꦒꦠꦺꦴ ꦭꦺꦴꦏꦺ, ꦤ ꦫꦴꦒꦺꦤ ꦱꦸꦮꦴꦤꦪꦺꦴ’’’ꦠꦶꦄꦴꦢꦷꦤꦶ (ꦱꦁ. ꦤꦶ. ꧑.꧑꧖꧑) ꦮꦠ꧀ꦮꦴ ꦥꦶꦠꦸ ꦱꦤ꧀ꦠꦶꦏꦁ ꦄꦴꦒꦩꦶꦁꦱꦸ.

ꦨꦒꦮꦴꦥꦶ ꦠꦠ꧀ꦡꦺꦮ ꦱꦠ꧀ꦠꦴꦲꦁ ꦮꦷꦠꦶꦤꦴꦩꦺꦠ꧀ꦮꦴ ꦠꦠꦺꦴ ꦩꦸꦕꦭꦶꦤ꧀ꦢꦩꦹꦭꦁ ꦄꦒꦩꦴꦱꦶ. ꦠꦠ꧀ꦡ ꦱꦠ꧀ꦠꦴꦲꦮꦢ꧀ꦢꦭꦶꦏꦴꦪ ꦈꦥ꧀ꦥꦤ꧀ꦤꦴꦪ ꦱꦷꦠꦴꦢꦶꦥꦛꦶꦧꦴꦲꦤꦠ꧀ꦡꦁ ꦩꦸꦕꦭꦶꦤ꧀ꦢꦺꦤ ꦤꦴꦩ ꦤꦴꦒꦫꦴꦗꦺꦤ ꦱꦠ꧀ꦠꦏ꧀ꦑꦠ꧀ꦠꦸꦁ ꦨꦺꦴꦒꦺꦲꦶ ꦥꦫꦶꦏ꧀ꦑꦶꦠ꧀ꦠꦺꦴ ꦄꦱꦩ꧀ꦧꦴꦣꦴꦪ ꦒꦤ꧀ꦣꦏꦸꦛꦶꦪꦁ ꦮꦶꦲꦫꦤ꧀ꦠꦺꦴ ꦮꦶꦪ ꦮꦶꦩꦸꦠ꧀ꦠꦶꦱꦸꦑꦁ ꦥꦛꦶꦱꦁꦮꦺꦢꦶꦪꦩꦴꦤꦺꦴ ꦱꦠ꧀ꦠꦴꦲꦁ ꦮꦷꦠꦶꦤꦴꦩꦺꦠ꧀ꦮꦴ ꦫꦴꦗꦴꦪꦠꦤꦁ ꦈꦥꦱꦔ꧀ꦏꦩꦶꦠ꧀ꦮꦴ ꦠꦠ꧀ꦡꦥꦶ ꦮꦶꦩꦸꦠ꧀ꦠꦶꦱꦸꦑꦁ ꦥꦛꦶꦱꦁꦮꦺꦢꦶꦪꦩꦴꦤꦺꦴꦪꦺꦮ ꦱꦠ꧀ꦠꦴꦲꦁ ꦮꦷꦠꦶꦤꦴꦩꦺꦱꦶ. ꦌꦠ꧀ꦠꦴꦮꦠꦴ ꦱꦠ꧀ꦠ ꦱꦠ꧀ꦠꦴꦲꦴꦤꦶ ꦥꦫꦶꦥꦸꦟ꧀ꦟꦴꦤꦶ. ꦌꦠ꧀ꦡꦤ꧀ꦠꦫꦺ ꦤꦺꦮ ꦩꦸꦑꦣꦺꦴꦮꦤꦁ, ꦤ ꦱꦫꦷꦫꦥꦛꦶꦗꦒ꧀ꦒꦤꦁ, ꦤ ꦄꦴꦲꦴꦫꦏꦶꦕ꧀ꦕꦁ ꦄꦲꦺꦴꦱꦶ, ꦙꦴꦤꦱꦸꦑꦦꦭꦱꦸꦑꦺꦤꦺꦮ ꦕ ꦮꦷꦠꦶꦤꦴꦩꦺꦱꦶ.

ꦄꦡꦱ꧀ꦱ ꦠꦱ꧀ꦩꦶꦁ ꦱꦠ꧀ꦠꦱꦠ꧀ꦠꦴꦲꦩꦠ꧀ꦡꦏꦺ ꦌꦏꦹꦤꦥꦚ꧀ꦚꦴꦱꦠꦶꦩꦺ ꦢꦶꦮꦱꦺ ꦠꦠ꧀ꦡ ꦤꦶꦱꦶꦤ꧀ꦤꦱ꧀ꦱ ‘‘ꦩꦸꦑꦁ ꦣꦺꦴꦮꦶꦱ꧀ꦱꦴꦩꦷ’’ꦠꦶ ꦕꦶꦠ꧀ꦠꦁ ꦈꦢꦥꦴꦢꦶ. ꦱꦏ꧀ꦏꦺꦴ ꦢꦺꦮꦴꦤꦩꦶꦤ꧀ꦢꦺꦴ ꦄꦒꦢꦲꦫꦷꦠꦏꦁ ꦄꦴꦲꦫꦶꦠ꧀ꦮꦴ ꦄꦢꦴꦱꦶ, ꦱꦠ꧀ꦡꦴ ꦠꦁ ꦥꦫꦶꦨꦸꦚ꧀ꦗꦶ, ꦠꦺꦤꦱ꧀ꦱ ꦱꦫꦷꦫꦮꦭ꦳ꦚ꧀ꦗꦺꦴ ꦄꦲꦺꦴꦱꦶ. ꦄꦡꦱ꧀ꦱ ꦱꦏ꧀ꦏꦺꦴꦪꦺꦮ ꦤꦴꦒꦭꦠꦴꦢꦤ꧀ꦠꦏꦛ꧀ꦜꦚ꧀ꦕꦺꦮ ꦩꦸꦑꦣꦺꦴꦮꦤꦺꦴꦢꦏꦚ꧀ꦕ ꦄꦢꦴꦱꦶ. ꦱꦠ꧀ꦡꦴ ꦠꦁ ꦢꦤ꧀ꦠꦏꦛ꧀ꦜꦁ ꦑꦴꦢꦶꦠ꧀ꦮꦴꦮ ꦄꦤꦺꦴꦠꦠ꧀ꦠꦢꦲꦺꦴꦢꦏꦺꦤ ꦩꦸꦑꦁ ꦣꦺꦴꦮꦶꦠ꧀ꦮꦴ ꦠꦠ꧀ꦡꦺꦮ ꦫꦴꦗꦴꦪꦠꦤꦩꦹꦭꦺ ꦤꦶꦱꦷꦢꦶ.

ꦠꦱ꧀ꦩꦶꦁ ꦱꦩꦪꦺ ꦠꦥꦸꦱ꧀ꦱ ꦨꦭ꧀ꦭꦶꦏꦴ ꦤꦴꦩ ꦢ꧀ꦮꦺ ꦮꦴꦟꦶꦗꦴ ꦥꦚ꧀ꦕꦲꦶ ꦱꦏꦛꦱꦠꦺꦲꦶ ꦈꦏ꧀ꦏꦭꦴ ꦗꦤꦥꦢꦴ ꦩꦗ꧀ꦙꦶꦩꦢꦺꦱꦁ ꦒꦕ꧀ꦖꦤ꧀ꦠꦴ ꦥꦸꦧ꧀ꦧꦺ ꦄꦠ꧀ꦠꦤꦺꦴ ꦚꦴꦠꦶꦱꦴꦭꦺꦴꦲꦶꦠꦴꦪ ꦢꦺꦮꦠꦴꦪ ꦱꦏꦛꦴꦤꦶ ꦱꦤ꧀ꦤꦶꦫꦸꦩ꧀ꦨꦶꦠ꧀ꦮꦴ ꦱꦠ꧀ꦡꦸ ꦄꦴꦲꦴꦫꦱꦩ꧀ꦥꦴꦢꦤꦺ ꦈꦱ꧀ꦱꦴꦲꦶꦠꦴ ꦩꦤ꧀ꦡꦚ꧀ꦕ ꦩꦣꦸꦥꦶꦟ꧀ꦝꦶꦏꦚ꧀ꦕ ꦄꦴꦢꦴꦪ – ‘‘ꦥꦛꦶꦒ꧀ꦒꦟ꧀ꦲꦴꦠꦸ ꦤꦺꦴ, ꦨꦤ꧀ꦠꦺ, ꦨꦒꦮꦴ ꦆꦩꦁ ꦄꦴꦲꦴꦫꦁ ꦄꦤꦸꦏꦩ꧀ꦥꦁ ꦈꦥꦴꦢꦴꦪꦴ’’ꦠꦶ ꦱꦠ꧀ꦡꦴꦫꦁ ꦈꦥꦤꦴꦩꦺꦠ꧀ꦮꦴ ꦄꦛ꧀ꦜꦁꦱꦸ. ꦨꦒꦮꦴ ꦥꦴꦪꦴꦱꦥꦛꦶꦒ꧀ꦒꦲꦟꦢꦶꦮꦱꦺꦪꦺꦮ ꦥꦠ꧀ꦠꦱ꧀ꦱ ꦄꦤ꧀ꦠꦫꦲꦶꦠꦠ꧀ꦠꦴ ‘‘ꦤ ꦑꦺꦴ ꦠꦡꦴꦒꦠꦴ ꦲꦠ꧀ꦡꦺꦱꦸ ꦥꦛꦶꦒ꧀ꦒꦟ꧀ꦲꦤ꧀ꦠꦶ, ꦏꦶꦩ꧀ꦲꦶ ꦤꦸ ꦑꦺꦴ ꦄꦲꦁ ꦥꦛꦶꦒ꧀ꦒꦟ꧀ꦲꦺꦪ꧀ꦪ’’ꦤ꧀ꦠꦶ ꦕꦶꦤ꧀ꦠꦺꦱꦶ. ꦄꦡꦱ꧀ꦱ ꦕꦶꦠ꧀ꦠꦁ ꦚꦠ꧀ꦮꦴ ꦕꦠꦹꦲꦶ ꦢꦶꦱꦴꦲꦶ ꦕꦠ꧀ꦠꦴꦫꦺꦴ ꦩꦲꦴꦫꦴꦗꦴꦤꦺꦴ ꦆꦤ꧀ꦢꦤꦷꦭꦩꦟꦶꦩꦪꦺ ꦥꦠ꧀ꦠꦺ ꦈꦥꦤꦴꦩꦺꦱꦸꦁ, ꦨꦒꦮꦴ ꦠꦺ ꦥꦛꦶꦏ꧀ꦑꦶꦥꦶ. ꦥꦸꦤ ꦩꦸꦒ꧀ꦒꦮꦟ꧀ꦟꦱꦺꦭꦩꦪꦺ ꦕꦠ꧀ꦠꦴꦫꦺꦴ ꦥꦠ꧀ꦠꦺ ꦈꦥꦤꦴꦩꦺꦱꦸꦁ. ꦨꦒꦮꦴ ꦕꦠꦸꦤ꧀ꦤꦩ꧀ꦥꦶ ꦩꦲꦴꦫꦴꦗꦴꦤꦁ ꦱꦢ꧀ꦣꦴꦤꦸꦫꦏ꧀ꦑꦟꦠ꧀ꦡꦴꦪ ꦕꦠ꧀ꦠꦴꦫꦺꦴꦥꦶ ꦥꦠ꧀ꦠꦺ ꦥꦛꦶꦒ꧀ꦒꦲꦺꦠ꧀ꦮꦴ ꦈꦥꦫꦹꦥꦫꦶ ꦜꦥꦺꦠ꧀ꦮꦴ ‘‘ꦌꦏꦺꦴ ꦲꦺꦴꦠꦹ’’ꦠꦶ ꦄꦣꦶꦛ꧀ꦜꦴꦱꦶ. ꦕꦠ꧀ꦠꦴꦫꦺꦴꦥꦶ ꦩꦸꦑꦮꦛ꧀ꦛꦶꦪꦁ ꦥꦚ꧀ꦚꦴꦪꦩꦴꦤꦭꦺꦑꦴ ꦲꦸꦠ꧀ꦮꦴ ꦩꦗ꧀ꦙꦶꦩꦥ꧀ꦥꦩꦴꦟꦺꦤ ꦌꦏꦠ꧀ꦠꦁ ꦈꦥꦒꦩꦶꦁꦱꦸ. ꦨꦒꦮꦴ ꦠꦱ꧀ꦩꦶꦁ ꦥꦕ꧀ꦕꦒ꧀ꦓꦺ ꦱꦺꦭꦩꦪꦺ ꦥꦠ꧀ꦠꦺ ꦄꦴꦲꦴꦫꦁ ꦥꦛꦶꦒ꧀ꦒꦲꦺꦠ꧀ꦮꦴ ꦥꦫꦶꦨꦸꦚ꧀ꦗꦶꦠ꧀ꦮꦴ ꦄꦤꦸꦩꦺꦴꦢꦤꦁ ꦄꦏꦴꦱꦶ. ꦠꦺ ꦢ꧀ꦮꦺ ꦨꦴꦠꦫꦺꦴ ꦮꦴꦟꦶꦗꦴ ꦧꦸꦢ꧀ꦣꦚ꧀ꦕ ꦣꦩ꧀ꦩꦚ꧀ꦕ ꦱꦫꦟꦁ ꦒꦤ꧀ꦠ꧀ꦮꦴ ꦢ꧀ꦮꦺꦮꦴꦕꦶꦏꦴ ꦈꦥꦴꦱꦏꦴ ꦄꦲꦺꦱꦸꦁ. ꦄꦡ ꦤꦺꦱꦁ ‘‘ꦌꦏꦁ ꦤꦺꦴ, ꦨꦤ꧀ꦠꦺ, ꦥꦫꦶꦕꦫꦶꦠꦧ꧀ꦧꦛ꧀ꦜꦴꦤꦁ ꦢꦺꦡꦴ’’ꦠꦶ ꦮꦢꦤ꧀ꦠꦴꦤꦁ ꦢꦏ꧀ꦑꦶꦟꦲꦠ꧀ꦡꦺꦤ ꦄꦠ꧀ꦠꦤꦺꦴ ꦱꦷꦱꦁ ꦥꦫꦴꦩꦱꦶꦠ꧀ꦮꦴ ꦏꦺꦱꦣꦴꦠꦸꦪꦺꦴ ꦄꦢꦴꦱꦶ. ꦠꦺ ꦄꦠ꧀ꦠꦤꦺꦴ ꦤꦒꦫꦺ ꦠꦴ ꦣꦴꦠꦸꦪꦺꦴ ꦱꦸꦮꦟ꧀ꦟꦱꦩꦸꦒ꧀ꦒꦱ꧀ꦱ ꦄꦤ꧀ꦠꦺꦴ ꦥꦏ꧀ꦑꦶꦥꦶꦠ꧀ꦮꦴ ꦕꦺꦠꦶꦪꦁ ꦥꦠꦶꦛ꧀ꦜꦴꦥꦺꦱꦸꦁ.

ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦥꦤ ꦠꦠꦺꦴ ꦮꦸꦛ꧀ꦜꦴꦪ ꦥꦸꦤ ꦄꦗꦥꦴꦭꦤꦶꦒ꧀ꦫꦺꦴꦣꦩꦺꦮ ꦒꦤ꧀ꦠ꧀ꦮꦴ ꦤꦶꦒ꧀ꦫꦺꦴꦣꦩꦹꦭꦺ ꦤꦶꦱꦷꦢꦶ. ꦄꦡꦱ꧀ꦱ ꦠꦠ꧀ꦡ ꦤꦶꦱꦶꦤ꧀ꦤꦩꦠ꧀ꦠꦱ꧀ꦱꦺꦮ ꦄꦠ꧀ꦠꦤꦴ ꦄꦣꦶꦒꦠꦣꦩ꧀ꦩꦱ꧀ꦱ ꦒꦩ꧀ꦨꦷꦫꦠꦁ ꦥꦕ꧀ꦕꦮꦺꦏ꧀ꦑꦤ꧀ꦠꦱ꧀ꦱ ꦱꦧ꧀ꦧꦧꦸꦢ꧀ꦣꦴꦤꦁ ꦄꦴꦕꦶꦟ꧀ꦟꦺꦴ – ‘‘ꦏꦶꦕ꧀ꦖꦺꦤ ꦄꦣꦶꦒꦠꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ’’ꦠꦶ ꦥꦫꦺꦱꦁ ꦄꦢꦺꦱꦺꦠꦸꦏꦴꦩꦠꦴꦏꦴꦫꦥ꧀ꦥꦠ꧀ꦠꦺꦴ ꦮꦶꦠꦏ꧀ꦏꦺꦴ ꦈꦢꦥꦴꦢꦶ. ꦄꦡ ꦑꦺꦴ ꦧ꧀ꦫꦲ꧀ꦩꦴ ꦱꦲꦩ꧀ꦥꦠꦶ ‘‘ꦤꦱ꧀ꦱꦠꦶ ꦮꦠ ꦨꦺꦴ ꦭꦺꦴꦏꦺꦴ, ꦮꦶꦤꦱ꧀ꦱꦠꦶ ꦮꦠ ꦨꦺꦴ ꦭꦺꦴꦏꦺꦴ’’ꦠꦶ ꦢꦱꦲꦶ ꦕꦏ꧀ꦏꦮꦴꦭ꦳ꦱꦲꦱ꧀ꦱꦺꦲꦶ ꦱꦏ꧀ꦏꦱꦸꦪꦴꦩꦱꦤ꧀ꦠꦸꦱꦶꦠꦤꦶꦩ꧀ꦩꦴꦤꦫꦠꦶꦮꦱꦮꦠ꧀ꦠꦶꦩꦲꦴꦧ꧀ꦫꦲ꧀ꦩꦴꦤꦺꦴ ꦄꦴꦢꦴꦪ ꦱꦠ꧀ꦡꦸ ꦱꦤ꧀ꦠꦶꦏꦁ ꦄꦴꦒꦤ꧀ꦠ꧀ꦮꦴ ‘‘ꦢꦺꦱꦺꦠꦸ, ꦨꦤ꧀ꦠꦺ, ꦨꦒꦮꦴ ꦣꦩ꧀ꦩ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦣꦩ꧀ꦩꦢꦺꦱꦤꦁ ꦄꦴꦪꦴꦕꦶ.

ꦱꦠ꧀ꦡꦴ ꦠꦱ꧀ꦱ ꦥꦛꦶꦚ꧀ꦚꦁ ꦢꦠ꧀ꦮꦴ ‘‘ꦏꦱ꧀ꦱ ꦤꦸ ꦑꦺꦴ ꦄꦲꦁ ꦥꦜꦩꦁ ꦣꦩ꧀ꦩꦁ ꦢꦺꦱꦺꦪ꧀ꦪ’’ꦤ꧀ꦠꦶ ꦕꦶꦤ꧀ꦠꦺꦤ꧀ꦠꦺꦴ ‘‘ꦄꦴꦭ꦳ꦴꦫꦺꦴ ꦥꦟ꧀ꦝꦶꦠꦺꦴ, ꦱꦺꦴ ꦆꦩꦁ ꦣꦩ꧀ꦩꦁ ꦑꦶꦥ꧀ꦥꦁ ꦄꦴꦗꦴꦤꦶꦱ꧀ꦱꦠꦷ’’ꦠꦶ ꦕꦶꦠ꧀ꦠꦁ ꦈꦥ꧀ꦥꦴꦢꦺꦠ꧀ꦮꦴ ꦥꦸꦤ ꦎꦭꦺꦴꦏꦺꦤ꧀ꦠꦺꦴ ꦠꦱ꧀ꦱ ꦱꦠ꧀ꦠꦴꦲꦏꦴꦭꦔ꧀ꦏꦠꦨꦴꦮꦁ ꦚꦠ꧀ꦮꦴ ꦈꦢꦏꦁ ꦄꦴꦮꦗ꧀ꦗꦺꦱꦶ. ꦠꦱ꧀ꦱꦴꦥꦶ ꦄꦨꦶꦢꦺꦴꦱꦏꦴꦭꦔ꧀ꦏꦠꦨꦴꦮꦁ ꦚꦠ꧀ꦮꦴ ‘‘ꦧꦲꦹꦥꦏꦴꦫꦴ ꦑꦺꦴ ꦩꦺ ꦥꦚ꧀ꦕꦮꦒ꧀ꦒꦶꦪꦴ ꦨꦶꦏ꧀ꦑꦹ’’ꦠꦶ ꦥꦚ꧀ꦕꦮꦒ꧀ꦒꦶꦪꦺ ꦄꦴꦫꦧ꧀ꦨ ꦩꦤꦱꦶ ꦏꦠ꧀ꦮꦴ ‘‘ꦏꦲꦁ ꦤꦸ ꦑꦺꦴ ꦠꦺ ꦌꦠꦫꦲꦶ ꦮꦶꦲꦫꦤ꧀ꦠꦷ’’ꦠꦶ ꦄꦴꦮꦗ꧀ꦗꦺꦤ꧀ꦠꦺꦴ ‘‘ꦧꦴꦫꦴꦟꦱꦶꦪꦁ ꦆꦱꦶꦥꦠꦤꦺ ꦩꦶꦒꦢꦴꦪꦺ’’ꦠꦶ ꦚꦠ꧀ꦮꦴ ꦏꦠꦶꦥꦴꦲꦁ ꦧꦺꦴꦣꦶꦩꦟ꧀ꦝꦱꦴꦩꦤ꧀ꦠꦴꦪꦺꦮ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦮꦶꦲꦫꦶꦠ꧀ꦮꦴ ‘‘ꦄꦴꦱꦴꦭ꦳꧀ꦲꦶꦥꦸꦟ꧀ꦟꦩꦴꦪꦁ ꦧꦴꦫꦴꦟꦱꦶꦁ ꦒꦤ꧀ꦠ꧀ꦮꦴ ꦣꦩ꧀ꦩꦕꦏ꧀ꦏꦁ ꦥꦮꦠ꧀ꦠꦺꦱ꧀ꦱꦴꦩꦷ’’ꦠꦶ ꦥꦏ꧀ꦑꦱ꧀ꦱ ꦕꦴꦠꦸꦢ꧀ꦢꦱꦶꦪꦁ ꦥꦕ꧀ꦕꦹꦱꦱꦩꦪꦺ ꦥꦕ꧀ꦕꦸꦛ꧀ꦜꦴꦪ ꦥꦨꦴꦠꦴꦪ ꦫꦠ꧀ꦠꦶꦪꦴ ꦏꦴꦭꦱ꧀ꦱꦺꦮ ꦥꦠ꧀ꦠꦕꦷꦮꦫꦩꦴꦢꦴꦪ ꦄꦛ꧀ꦜꦴꦫꦱꦪꦺꦴꦗꦤꦩꦒ꧀ꦒꦁ ꦥꦛꦶꦥꦤ꧀ꦤꦺꦴ ꦄꦤ꧀ꦠꦫꦴꦩꦒ꧀ꦒꦺ ꦈꦥꦏꦁ ꦤꦴꦩ ꦄꦴꦗꦷꦮꦏꦁ ꦢꦶꦱ꧀ꦮꦴ ꦠꦱ꧀ꦱ ꦄꦠ꧀ꦠꦤꦺꦴ ꦧꦸꦢ꧀ꦣꦨꦴꦮꦁ ꦄꦴꦕꦶꦏ꧀ꦑꦶꦠ꧀ꦮꦴ ꦠꦁ ꦢꦶꦮꦱꦩꦺꦮ ꦱꦴꦪꦤ꧀ꦲꦱꦩꦪꦺ ꦆꦱꦶꦥꦠꦤꦁ ꦱꦩ꧀ꦥꦴꦥꦸꦟꦶ.

ꦥꦚ꧀ꦕꦮꦒ꧀ꦒꦶꦪꦴ ꦠꦡꦴꦒꦠꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ‘‘ꦄꦪꦁ ꦄꦴꦮꦸꦱꦺꦴ, ꦱꦩꦟꦺꦴ ꦒꦺꦴꦠꦩꦺꦴ ꦥꦕ꧀ꦕꦪꦧꦴꦲꦸꦭ꧀ꦭꦴꦪ ꦄꦴꦮꦠ꧀ꦠꦶꦠ꧀ꦮꦴ ꦥꦫꦶꦥꦸꦟ꧀ꦟꦏꦴꦪꦺꦴ ꦥꦷꦟꦶꦤ꧀ꦢ꧀ꦫꦶꦪꦺꦴ ꦱꦸꦮꦟ꧀ꦟꦮꦟ꧀ꦟꦺꦴ ꦲꦸꦠ꧀ꦮꦴ ꦄꦴꦒꦕ꧀ꦖꦠꦶ. ꦆꦩꦱ꧀ꦱ ꦮꦤ꧀ꦢꦤꦴꦢꦷꦤꦶ ꦤ ꦏꦫꦶꦱ꧀ꦱꦴꦩ, ꦩꦲꦴꦏꦸꦭꦥ꧀ꦥꦱꦸꦠꦺꦴ ꦑꦺꦴ ꦥꦤꦺꦱ ꦄꦴꦱꦤꦴꦨꦶꦲꦴꦫꦁ ꦄꦫꦲꦠꦶ, ꦠꦺꦤꦱ꧀ꦱ ꦄꦴꦱꦤꦩꦠ꧀ꦠꦁ ꦥꦚ꧀ꦚꦴꦥꦺꦱ꧀ꦱꦴꦩꦴ’’ꦠꦶ ꦏꦠꦶꦏꦁ ꦄꦏꦁꦱꦸ. ꦨꦒꦮꦴ ꦱꦢꦺꦮꦏꦱ꧀ꦱ ꦭꦺꦴꦏꦱ꧀ꦱ ꦕꦶꦠ꧀ꦠꦴꦕꦴꦫꦗꦴꦤꦤꦱꦩꦠ꧀ꦡꦺꦤ ꦚꦴꦟꦺꦤ ‘‘ꦏꦶꦁ ꦤꦸ ꦑꦺꦴ ꦆꦩꦺ ꦕꦶꦤ꧀ꦠꦪꦶꦁꦱꦹ’’ꦠꦶ ꦄꦴꦮꦗ꧀ꦗꦺꦠ꧀ꦮꦴ ꦕꦶꦠ꧀ꦠꦁ ꦄꦚ꧀ꦚꦴꦱꦶ. ꦄꦡ ꦠꦺꦱꦸ ꦱꦧ꧀ꦧꦢꦺꦮꦩꦤꦸꦱ꧀ꦱꦺꦱꦸ ꦄꦤꦺꦴꦢꦶꦱ꧀ꦱꦏꦮꦱꦺꦤ ꦦꦫꦟꦱꦩꦠ꧀ꦡꦁ ꦩꦺꦠ꧀ꦠꦕꦶꦠ꧀ꦠꦁ ꦱꦔ꧀ꦑꦶꦥꦶꦠ꧀ꦮꦴ ꦎꦢꦶꦱ꧀ꦱꦏꦮꦱꦺꦤ ꦩꦺꦠ꧀ꦠꦕꦶꦠ꧀ꦠꦺꦤ ꦦꦫꦶ. ꦠꦺ ꦨꦒꦮꦠꦴ ꦩꦺꦠ꧀ꦠꦕꦶꦠ꧀ꦠꦺꦤ ꦱꦁꦦꦸꦛ꧀ꦜꦴ ꦠꦡꦴꦒꦠꦺ ꦈꦥꦱꦔ꧀ꦏꦩꦤ꧀ꦠꦺ ꦱꦏꦴꦪ ꦏꦠꦶꦏꦴꦪ ꦱꦟ꧀ꦜꦴꦠꦸꦁ ꦄꦱꦏ꧀ꦏꦺꦴꦤ꧀ꦠꦴ ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦄꦨꦶꦮꦴꦢꦤꦴꦢꦷꦤꦶ ꦱꦧ꧀ꦧꦏꦶꦕ꧀ꦕꦴꦤꦶ ꦄꦏꦁꦱꦸ. ꦱꦩ꧀ꦩꦴꦱꦩ꧀ꦧꦸꦢ꧀ꦣꦨꦴꦮꦁ ꦥꦤꦱ꧀ꦱ ꦄꦗꦴꦤꦤ꧀ꦠꦴ ꦏꦺꦮꦭꦁ ꦤꦴꦩꦺꦤ ꦕ ꦄꦴꦮꦸꦱꦺꦴꦮꦴꦢꦺꦤ ꦕ ꦱꦩꦸꦢꦴꦕꦫꦶꦁꦱꦸ.

ꦄꦡ ꦤꦺ ꦨꦒꦮꦴ – ‘‘ꦩꦴ, ꦨꦶꦏ꧀ꦑꦮꦺ, ꦠꦡꦴꦒꦠꦁ ꦤꦴꦩꦺꦤ ꦕ ꦄꦴꦮꦸꦱꦺꦴꦮꦴꦢꦺꦤ ꦕ ꦱꦩꦸꦢꦴꦕꦫꦡ. ꦄꦫꦲꦁ, ꦨꦶꦏ꧀ꦑꦮꦺ, ꦠꦡꦴꦒꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ’’ꦠꦶ ꦄꦠ꧀ꦠꦤꦺꦴ ꦧꦸꦢ꧀ꦣꦨꦴꦮꦁ ꦚꦴꦥꦺꦠ꧀ꦮꦴ ꦥꦚ꧀ꦚꦠ꧀ꦠꦮꦫꦧꦸꦢ꧀ꦣꦴꦱꦤꦺ ꦤꦶꦱꦶꦤ꧀ꦤꦺꦴ ꦈꦠ꧀ꦠꦫꦴꦱꦴꦭ꦳꧀ꦲꦤꦏ꧀ꦑꦠ꧀ꦠꦪꦺꦴꦒꦺ ꦮꦠ꧀ꦠꦩꦴꦤꦺ ꦄꦛ꧀ꦜꦴꦫꦱꦲꦶ ꦧ꧀ꦫꦲ꧀ꦩꦏꦺꦴꦛꦷꦲꦶ ꦥꦫꦶꦮꦸꦠꦺꦴ ꦥꦚ꧀ꦕꦮꦒ꧀ꦒꦶꦪꦠ꧀ꦡꦺꦫꦺ ꦄꦴꦩꦤ꧀ꦠꦺꦠ꧀ꦮꦴ ꦠꦶꦥꦫꦶꦮꦛ꧀ꦛꦁ ꦢ꧀ꦮꦴꦢꦱꦴꦏꦴꦫꦁ ꦖꦚꦴꦟꦮꦶꦗꦩ꧀ꦨꦤꦁ ꦄꦤꦸꦠ꧀ꦠꦫꦁ ꦣꦩ꧀ꦩꦕꦏ꧀ꦏꦥ꧀ꦥꦮꦠ꧀ꦠꦤꦱꦸꦠ꧀ꦠꦤ꧀ꦠꦁ (ꦩꦲꦴꦮ. ꧑꧓ ꦄꦴꦢꦪꦺꦴ; ꦱꦁ. ꦤꦶ. ꧕.꧑꧐꧘꧑) ꦢꦺꦱꦺꦱꦶ. ꦠꦺꦱꦸ ꦏꦺꦴꦟ꧀ꦝꦚ꧀ꦚꦠ꧀ꦡꦺꦫꦺꦴ ꦢꦺꦱꦤꦴꦤꦸꦱꦴꦫꦺꦤ ꦚꦴꦟꦁ ꦥꦺꦱꦺꦤ꧀ꦠꦺꦴ ꦱꦸꦠ꧀ꦠꦥꦫꦶꦪꦺꦴꦱꦴꦤꦺ ꦄꦛ꧀ꦜꦴꦫꦱꦲꦶ ꦧ꧀ꦫꦲ꧀ꦩꦏꦺꦴꦛꦷꦲꦶ ꦱꦢ꧀ꦣꦶꦁ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦱꦶ. ꦱꦠ꧀ꦡꦴ ꦠꦠ꧀ꦡꦺꦮ ꦮꦱ꧀ꦱꦁ ꦈꦥꦒꦤ꧀ꦠ꧀ꦮꦴ ꦥꦸꦤꦢꦶꦮꦱꦺ ꦮꦥ꧀ꦥꦠ꧀ꦡꦺꦫꦁ ꦎꦮꦢꦤ꧀ꦠꦺꦴ ꦮꦶꦲꦴꦫꦺꦪꦺꦮ ꦤꦶꦱꦷꦢꦶ, ꦱꦺꦱꦴ ꦕꦠ꧀ꦠꦴꦫꦺꦴꦥꦶ ꦥꦶꦟ꧀ꦝꦴꦪ ꦕꦫꦶꦁꦱꦸ. ꦮꦥ꧀ꦥꦠ꧀ꦡꦺꦫꦺꦴ ꦥꦸꦧ꧀ꦧꦟ꧀ꦲꦺꦪꦺꦮ ꦱꦺꦴꦠꦴꦥꦠ꧀ꦠꦶꦦꦭꦁ ꦥꦴꦥꦸꦟꦶ. ꦌꦠꦺꦤꦺꦮꦸꦥꦴꦪꦺꦤ ꦥꦸꦤꦢꦶꦮꦱꦺ ꦨꦢ꧀ꦢꦶꦪꦠ꧀ꦡꦺꦫꦁ, ꦥꦸꦤꦢꦶꦮꦱꦺ ꦩꦲꦴꦤꦴꦩꦠ꧀ꦡꦺꦫꦁ, ꦥꦸꦤꦢꦶꦮꦱꦺ ꦄꦱ꧀ꦱꦗꦶꦠ꧀ꦡꦺꦫꦤ꧀ꦠꦶ ꦱꦧ꧀ꦧꦺ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦥꦺꦠ꧀ꦮꦴ ꦥꦚ꧀ꦕꦩꦶꦪꦁ ꦥꦏ꧀ꦑꦱ꧀ꦱ ꦥꦚ꧀ꦕꦥꦶ ꦡꦺꦫꦺ ꦱꦤ꧀ꦤꦶꦥꦴꦠꦺꦠ꧀ꦮꦴ ꦄꦤꦠ꧀ꦠꦭꦏ꧀ꦑꦟꦱꦸꦠ꧀ꦠꦤ꧀ꦠꦁ (ꦩꦲꦴꦮ. ꧒꧐ ꦄꦴꦢꦪꦺꦴ; ꦱꦁ. ꦤꦶ. ꧓.꧕꧙) ꦢꦺꦱꦺꦱꦶ. ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦥꦚ꧀ꦕꦥꦶ ꦡꦺꦫꦴ ꦄꦫꦲꦠ꧀ꦠꦺ ꦥꦠꦶꦛ꧀ꦜꦲꦶꦁꦱꦸ. ꦄꦡ ꦱꦠ꧀ꦡꦴ ꦪꦱꦱ꧀ꦱ ꦏꦸꦭꦥꦸꦠ꧀ꦠꦱ꧀ꦱ ꦈꦥꦤꦶꦱ꧀ꦱꦪꦁ ꦢꦶꦱ꧀ꦮꦴ ꦠꦁ ꦫꦠ꧀ꦠꦶꦨꦴꦒꦺ ꦤꦶꦧ꧀ꦧꦶꦗ꧀ꦗꦶꦠ꧀ꦮꦴ ꦒꦺꦲꦁ ꦥꦲꦴꦪ ꦤꦶꦏ꧀ꦑꦤ꧀ꦠꦁ ‘‘ꦌꦲꦶ ꦪꦱꦴ’’ꦠꦶ ꦥꦏ꧀ꦏꦺꦴꦱꦶꦠ꧀ꦮꦴ ꦠꦱ꧀ꦩꦶꦁꦪꦺꦮ ꦫꦠ꧀ꦠꦶꦨꦴꦒꦺ ꦱꦺꦴꦠꦴꦥꦠ꧀ꦠꦶꦦꦭꦺ, ꦥꦸꦤꦢꦶꦮꦱꦺ ꦄꦫꦲꦠ꧀ꦠꦺ ꦥꦠꦶꦛ꧀ꦜꦴꦥꦺꦠ꧀ꦮꦴ, ꦄꦥꦫꦺꦥꦶ ꦠꦱ꧀ꦱ ꦱꦲꦴꦪꦏꦺ ꦕꦠꦸꦥꦚ꧀ꦚꦴꦱꦗꦤꦺ ꦌꦲꦶꦨꦶꦏ꧀ꦑꦸꦥꦧ꧀ꦧꦗ꧀ꦗꦴꦪ ꦥꦧ꧀ꦧꦴꦗꦺꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦺꦱꦶ.

ꦌꦮꦁ ꦭꦺꦴꦏꦺ ꦌꦏꦱꦛ꧀ꦜꦶꦪꦴ ꦄꦫꦲꦤ꧀ꦠꦺꦱꦸ ꦗꦴꦠꦺꦱꦸ ꦱꦠ꧀ꦡꦴ ꦮꦸꦛ꧀ꦜꦮꦱ꧀ꦱꦺꦴ ꦥꦮꦴꦫꦺꦠ꧀ꦮꦴ ‘‘ꦕꦫꦡ ꦨꦶꦏ꧀ꦑꦮꦺ ꦕꦴꦫꦶꦏ’’ꦤ꧀ꦠꦶ ꦱꦛ꧀ꦜꦶꦨꦶꦏ꧀ꦑꦹ ꦢꦶꦱꦴꦱꦸ ꦥꦺꦱꦺꦠ꧀ꦮꦴ ꦱꦪꦁ ꦈꦫꦸꦮꦺꦭꦁ ꦒꦕ꧀ꦖꦤ꧀ꦠꦺꦴ ꦄꦤ꧀ꦠꦫꦴꦩꦒ꧀ꦒꦺ ꦏꦥ꧀ꦥꦴꦱꦶꦏꦮꦤꦱꦟ꧀ꦝꦺ ꦠꦶꦁꦱꦨꦢ꧀ꦢꦮꦒ꧀ꦒꦶꦪꦏꦸꦩꦴꦫꦺ ꦮꦶꦤꦺꦱꦶ. ꦠꦺꦱꦸ ꦱꦧ꧀ꦧꦥꦕ꧀ꦖꦶꦩꦏꦺꦴ ꦱꦺꦴꦠꦴꦥꦤ꧀ꦤꦺꦴ, ꦱꦧ꧀ꦧꦸꦠ꧀ꦠꦩꦺꦴ ꦄꦤꦴꦒꦴꦩꦷ ꦄꦲꦺꦴꦱꦶ. ꦠꦺꦥꦶ ꦱꦧ꧀ꦧꦺ ꦌꦲꦶꦨꦶꦏ꧀ꦑꦸꦨꦴꦮꦺꦤꦺꦮ ꦥꦧ꧀ꦧꦴꦗꦺꦠ꧀ꦮꦴ ꦢꦶꦱꦴꦱꦸ ꦥꦺꦱꦺꦠ꧀ꦮꦴ ꦈꦫꦸꦮꦺꦭꦁ ꦒꦤ꧀ꦠ꧀ꦮꦴ ꦄꦝ꧀ꦞꦸꦝ꧀ꦞꦥꦴꦛꦶꦲꦴꦫꦶꦪꦱꦲꦱ꧀ꦱꦴꦤꦶ ꦢꦱ꧀ꦱꦺꦠ꧀ꦮꦴ ꦈꦫꦸꦮꦺꦭꦏꦱ꧀ꦱꦥꦴꦢꦪꦺꦴ ꦱꦲꦱ꧀ꦱꦗꦛꦶꦭꦥꦫꦶꦮꦴꦫꦺ ꦠꦺꦨꦴꦠꦶꦏꦗꦛꦶꦭꦺ ꦮꦶꦤꦺꦠ꧀ꦮꦴ ꦌꦲꦶꦨꦶꦏ꧀ꦑꦸꦨꦴꦮꦺꦤ ꦥꦧ꧀ꦧꦴꦗꦺꦠ꧀ꦮꦴ ꦒꦪꦴꦱꦷꦱꦺ ꦤꦶꦱꦷꦢꦴꦥꦺꦠ꧀ꦮꦴ ꦄꦴꦢꦶꦠ꧀ꦠꦥꦫꦶꦪꦴꦪꦢꦺꦱꦤꦴꦪ (ꦩꦲꦴꦮ. ꧕꧔) ꦄꦫꦲꦠ꧀ꦠꦺ ꦥꦠꦶꦛ꧀ꦜꦴꦥꦺꦠ꧀ꦮꦴ ꦠꦺꦤ ꦄꦫꦲꦤ꧀ꦠꦱꦲꦱ꧀ꦱꦺꦤ ꦥꦫꦶꦮꦸꦠꦺꦴ ‘‘ꦧꦶꦩ꧀ꦧꦶꦱꦴꦫꦫꦚ꧀ꦚꦺꦴ ꦢꦶꦤ꧀ꦤꦥꦛꦶꦚ꧀ꦚꦁ ꦩꦺꦴꦕꦺꦱ꧀ꦱꦴꦩꦷ’’ꦠꦶ ꦫꦴꦗꦒꦲꦤꦒꦫꦹꦥꦕꦴꦫꦺ ꦭꦛ꧀ꦜꦶꦮꦤꦸꦪ꧀ꦪꦴꦤꦁ ꦄꦒꦩꦴꦱꦶ. ꦫꦴꦗꦴ ꦈꦪ꧀ꦪꦴꦤꦥꦴꦭꦱ꧀ꦱ ꦱꦤ꧀ꦠꦶꦏꦴ ‘‘ꦱꦠ꧀ꦡꦴ ꦄꦴꦒꦠꦺꦴ’’ꦠꦶ ꦱꦸꦠ꧀ꦮꦴ ꦢ꧀ꦮꦴꦢꦱꦤꦲꦸꦠꦺꦲꦶ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦺꦲꦶ ꦥꦫꦶꦮꦸꦠꦺꦴ ꦱꦠ꧀ꦡꦴꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕꦏ꧀ꦏꦮꦶꦕꦶꦠ꧀ꦠꦠꦭꦺꦱꦸ ꦱꦸꦮꦟ꧀ꦟꦥꦛ꧀ꦛꦮꦶꦠꦴꦤꦁ ꦮꦶꦪ ꦥꦨꦴꦱꦩꦸꦢꦪꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦱꦸ ꦠꦡꦴꦒꦠꦱ꧀ꦱ ꦥꦴꦢꦺꦱꦸ ꦱꦶꦫꦱꦴ ꦤꦶꦥꦠꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ ꦱꦢ꧀ꦣꦶꦁ ꦥꦫꦶꦱꦴꦪ.

ꦄꦡ ꦑꦺꦴ ꦠꦺꦱꦁ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴꦤꦁ ꦌꦠꦢꦲꦺꦴꦱꦶ – ‘‘ꦏꦶꦁ ꦤꦸ ꦑꦺꦴ ꦩꦲꦴꦱꦩꦟꦺꦴ ꦈꦫꦸꦮꦺꦭꦏꦱ꧀ꦱꦥꦺ ꦧ꧀ꦫꦲ꧀ꦩꦕꦫꦶꦪꦁ ꦕꦫꦠꦶ, ꦈꦢꦴꦲꦸ ꦈꦫꦸꦮꦺꦭꦏꦱ꧀ꦱꦥꦺꦴ ꦩꦲꦴꦱꦩꦟꦺ’’ꦠꦶ. ꦨꦒꦮꦴ ꦠꦺꦱꦁ ꦕꦺꦠꦱ꧀ꦱꦴ ꦕꦺꦠꦺꦴꦥꦫꦶꦮꦶꦠꦏ꧀ꦏꦩꦚ꧀ꦚꦴꦪ ꦈꦫꦸꦮꦺꦭꦏꦱ꧀ꦱꦥꦁ ꦒꦴꦡꦴꦪ ꦄꦗ꧀ꦙꦨꦴꦱꦶ –

‘‘ꦏꦶꦩꦺꦮ ꦢꦶꦱ꧀ꦮꦴ ꦈꦫꦸꦮꦺꦭꦮꦴꦱꦶ, ꦥꦲꦴꦱꦶ ꦄꦒ꧀ꦒꦶꦁ ꦏꦶꦱꦏꦺꦴꦮꦢꦴꦤꦺꦴ;

ꦥꦸꦕ꧀ꦖꦴꦩꦶ ꦠꦁ ꦏꦱ꧀ꦱꦥ ꦌꦠꦩꦠ꧀ꦡꦁ, ꦏꦡꦁ ꦥꦲꦷꦤꦁ ꦠꦮ ꦄꦒ꧀ꦒꦶꦲꦸꦠ꧀ꦠ’’ꦤ꧀ꦠꦶ. –

ꦡꦺꦫꦺꦴꦥꦶ ꦨꦒꦮꦠꦺꦴ ꦄꦣꦶꦥ꧀ꦥꦴꦪꦁ ꦮꦶꦢꦶꦠ꧀ꦮꦴ –

‘‘ꦫꦹꦥꦺ ꦕ ꦱꦢ꧀ꦢꦺ ꦕ ꦄꦡꦺꦴ ꦫꦱꦺ ꦕ, ꦏꦴꦩꦶꦠ꧀ꦡꦶꦪꦺꦴ ꦕꦴꦨꦶꦮꦢꦤ꧀ꦠꦶ ꦪꦚ꧀ꦚꦴ;

ꦌꦠꦁ ꦩꦭꦤ꧀ꦠꦷ ꦈꦥꦣꦷꦱꦸ ꦚꦠ꧀ꦮꦴ, ꦠꦱ꧀ꦩꦴ ꦤ ꦪꦶꦛ꧀ꦜꦺ ꦤ ꦲꦸꦠꦺ ꦄꦫꦚ꧀ꦗꦶ’’ꦤ꧀ꦠꦶ. (ꦩꦲꦴꦮ. ꧕꧕) –

ꦆꦩꦁ ꦒꦴꦡꦁ ꦮꦠ꧀ꦮꦴ ꦄꦠ꧀ꦠꦤꦺꦴ ꦱꦴꦮꦏꦨꦴꦮꦥ꧀ꦥꦏꦴꦱꦤꦠ꧀ꦡꦁ ꦠꦡꦴꦒꦠꦱ꧀ꦱ ꦥꦴꦢꦥꦶꦛ꧀ꦜꦺ ꦱꦷꦱꦁ ꦜꦥꦺꦠ꧀ꦮꦴ ‘‘ꦱꦠ꧀ꦡꦴ ꦩꦺ, ꦨꦤ꧀ꦠꦺ ꦨꦒꦮꦴ, ꦱꦴꦮꦏꦺꦴꦲꦩꦱ꧀ꦩꦷ’’ꦠꦶ ꦮꦠ꧀ꦮꦴ ꦌꦏꦠꦴꦭꦁ ꦢ꧀ꦮꦶꦠꦴꦭꦁ ꦠꦶꦠꦴꦭꦤ꧀ꦠꦶ ꦪꦴꦮ ꦱꦠ꧀ꦠꦠꦴꦭꦥ꧀ꦥꦩꦴꦟꦁ ꦱꦠ꧀ꦠꦏ꧀ꦑꦠ꧀ꦠꦸꦁ ꦮꦺꦲꦴꦱꦁ ꦄꦧ꧀ꦨꦸꦒ꧀ꦒꦤ꧀ꦠ꧀ꦮꦴ ꦎꦫꦸꦪ꧀ꦲ ꦠꦡꦴꦒꦠꦁ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦠꦁ ꦥꦴꦛꦶꦲꦴꦫꦶꦪꦁ ꦢꦶꦱ꧀ꦮꦴ ꦩꦲꦴꦗꦤꦺꦴ ‘‘ꦄꦲꦺꦴ ꦩꦲꦴꦤꦸꦨꦴꦮꦴ ꦧꦸꦢ꧀ꦣꦴ, ꦌꦮꦚ꧀ꦲꦶ ꦡꦴꦩꦒꦠꦢꦶꦛ꧀ꦜꦶꦏꦺꦴ ꦤꦴꦩ ‘ꦄꦫꦲꦴ’ꦠꦶ ꦩꦚ꧀ꦚꦩꦴꦤꦺꦴ ꦈꦫꦸꦮꦺꦭꦏꦱ꧀ꦱꦥꦺꦴꦥꦶ ꦢꦶꦛ꧀ꦜꦶꦗꦴꦭꦁ ꦨꦶꦤ꧀ꦢꦶꦠ꧀ꦮꦴ ꦠꦡꦴꦒꦠꦺꦤ ꦢꦩꦶꦠꦺꦴ’’ꦠꦶ ꦱꦠ꧀ꦡꦸ ꦒꦸꦟꦏꦡꦁꦪꦺꦮ ꦏꦡꦺꦱꦶ. ꦨꦒꦮꦴ ‘‘ꦤꦴꦲꦁ ꦆꦢꦴꦤꦶꦪꦺꦮ ꦈꦫꦸꦮꦺꦭꦏꦱ꧀ꦱꦥꦁ ꦢꦩꦺꦩꦶ, ꦄꦠꦷꦠꦺꦥꦶ ꦌꦱ ꦩꦪꦴ ꦢꦩꦶꦠꦺꦴ’’ꦠꦶ ꦮꦠ꧀ꦮꦴ ꦆꦩꦶꦱ꧀ꦱꦴ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴ ꦩꦲꦴꦤꦴꦫꦢꦏꦱ꧀ꦱꦥꦗꦴꦠꦏꦁ (ꦗꦴ. ꧒.꧒꧒.꧑꧑꧕꧓ ꦄꦴꦢꦪꦺꦴ) ꦏꦡꦺꦠ꧀ꦮꦴ ꦕꦠ꧀ꦠꦴꦫꦶ ꦱꦕ꧀ꦕꦴꦤꦶ ꦥꦏꦴꦱꦺꦱꦶ. ꦫꦴꦗꦴ ꦌꦏꦴꦢꦱꦲꦶ ꦤꦲꦸꦠꦺꦲꦶ ꦱꦢ꧀ꦣꦶꦁ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦱꦶ, ꦌꦏꦤꦲꦸꦠꦁ ꦈꦥꦴꦱꦏꦠ꧀ꦠꦁ ꦥꦛꦶꦮꦺꦢꦺꦱꦶ. ꦫꦴꦗꦴ ꦱꦠ꧀ꦡꦸ ꦱꦤ꧀ꦠꦶꦏꦺ ꦤꦶꦱꦶꦤ꧀ꦤꦺꦴꦪꦺꦮ ꦥꦚ꧀ꦕ ꦄꦱ꧀ꦱꦴꦱꦏꦺ ꦥꦮꦺꦢꦺꦠ꧀ꦮꦴ ꦱꦫꦟꦁ ꦒꦤ꧀ꦠ꧀ꦮꦴ ꦱ꧀ꦮꦴꦠꦤꦴꦪ ꦤꦶꦩꦤ꧀ꦠꦺꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦏ꧀ꦏꦩꦶ.

ꦥꦸꦤꦢꦶꦮꦱꦺ ꦪꦺꦲꦶ ꦕ ꦨꦒꦮꦴ ꦲꦶꦪ꧀ꦪꦺꦴ ꦢꦶꦛ꧀ꦜꦺꦴ, ꦪꦺꦲꦶ ꦕ ꦄꦢꦶꦛ꧀ꦜꦺꦴ, ꦠꦺ ꦱꦧ꧀ꦧꦺꦥꦶ ꦫꦴꦗꦒꦲꦮꦴꦱꦶꦤꦺꦴ ꦄꦛ꧀ꦜꦴꦫꦱꦏꦺꦴꦛꦶꦱꦔ꧀ꦑꦴ ꦩꦤꦸꦱ꧀ꦱꦴ ꦠꦡꦴꦒꦠꦁ ꦢꦛ꧀ꦜꦸꦏꦴꦩꦴ ꦥꦴꦠꦺꦴꦮ ꦫꦴꦗꦒꦲꦠꦺꦴ ꦭꦛ꧀ꦜꦶꦮꦤꦸꦪ꧀ꦪꦴꦤꦁ ꦄꦒꦩꦁꦱꦸ. ꦠꦶꦒꦴꦮꦸꦠꦺꦴ ꦩꦒ꧀ꦒꦺꦴ ꦤꦥ꧀ꦥꦲꦺꦴꦱꦶ, ꦱꦏꦭꦭꦛ꧀ꦜꦶꦮꦤꦸꦪ꧀ꦪꦴꦤꦁ ꦤꦶꦫꦤ꧀ꦠꦫꦁ ꦦꦸꦛꦁ ꦄꦲꦺꦴꦱꦶ. ꦩꦲꦴꦗꦤꦺꦴ ꦢꦱꦧꦭꦱ꧀ꦱ ꦫꦹꦥꦱꦺꦴꦨꦒ꧀ꦒꦥ꧀ꦥꦠ꧀ꦠꦁ ꦄꦠ꧀ꦠꦨꦴꦮꦁ ꦥꦱ꧀ꦱꦤ꧀ꦠꦺꦴꦥꦶ ꦠꦶꦠ꧀ꦠꦶꦁ ꦏꦴꦠꦸꦁ ꦤꦴꦱꦏ꧀ꦑꦶ. ꦮꦟ꧀ꦟꦨꦹꦩꦶ ꦤꦴꦩꦺꦱꦴ. ꦌꦮꦫꦹꦥꦺꦱꦸ ꦲꦶ ꦜꦴꦤꦺꦱꦸ ꦨꦒꦮꦠꦺꦴ ꦭꦏ꧀ꦑꦟꦴꦤꦸꦧ꧀ꦪꦚ꧀ꦗꦤꦴꦢꦶꦥ꧀ꦥꦨꦺꦢꦴ ꦱꦧ꧀ꦧꦴꦥꦶ ꦫꦹꦥꦏꦴꦪꦱꦶꦫꦷ ꦮꦟ꧀ꦟꦺꦠꦧ꧀ꦧꦴ. ꦌꦮꦁ ꦫꦹꦥꦱꦺꦴꦨꦒ꧀ꦒꦥ꧀ꦥꦠ꧀ꦠꦁ ꦢꦱꦧꦭꦱ꧀ꦱ ꦱꦫꦷꦫꦁ ꦥꦱ꧀ꦱꦩꦴꦤꦺꦤ ꦩꦲꦴꦗꦤꦺꦤ ꦤꦶꦫꦤ꧀ꦠꦫꦁ ꦦꦸꦛꦺ ꦈꦪ꧀ꦪꦴꦤꦺ ꦕ ꦒꦩꦤꦩꦒ꧀ꦒꦺ ꦕ ꦌꦏꦨꦶꦏ꧀ꦑꦸꦱ꧀ꦱꦥꦶ ꦤꦶꦏ꧀ꦑꦩꦤꦺꦴꦏꦴꦱꦺꦴ ꦤꦴꦲꦺꦴꦱꦶ. ꦠꦁ ꦢꦶꦮꦱꦁ ꦏꦶꦫ ꦨꦒꦮꦠꦺꦴ ꦨꦠ꧀ꦠꦁ ꦖꦶꦤ꧀ꦤꦁ ꦨꦮꦺꦪ꧀ꦪ, ꦠꦱ꧀ꦩꦴ ‘‘ꦠꦁ ꦩꦴ ꦄꦲꦺꦴꦱꦷ’’ꦠꦶ ꦱꦏ꧀ꦏꦱ꧀ꦱ ꦤꦶꦱꦶꦤ꧀ꦤꦴꦱꦤꦁ ꦈꦟ꧀ꦲꦴꦏꦴꦫꦁ ꦢꦱ꧀ꦱꦺꦱꦶ. ꦱꦺꦴ ꦄꦴꦮꦗ꧀ꦗꦩꦴꦤꦺꦴ ꦠꦁ ꦏꦴꦫꦟꦁ ꦚꦠ꧀ꦮꦴ ꦩꦴꦟꦮꦏꦮꦟ꧀ꦟꦁ ꦄꦨꦶꦤꦶꦩ꧀ꦩꦶꦤꦶꦠ꧀ꦮꦴ ꦧꦸꦢ꧀ꦣꦣꦩ꧀ꦩꦱꦔ꧀ꦓꦥꦛꦶꦱꦁꦪꦸꦠ꧀ꦠꦴ ꦡꦸꦠꦶꦪꦺꦴ ꦮꦢꦩꦴꦤꦺꦴ ꦢꦱꦧꦭꦱ꧀ꦱ ꦥꦸꦫꦠꦺꦴ ꦎꦠꦫꦶꦠ꧀ꦮꦴ ꦢꦺꦮꦴꦤꦸꦨꦴꦮꦺꦤ ꦎꦏꦴꦱꦁ ꦏꦠ꧀ꦮꦴ –

‘‘ꦢꦤ꧀ꦠꦺꦴ ꦢꦤ꧀ꦠꦺꦲꦶ ꦱꦲ ꦥꦸꦫꦴꦟꦗꦛꦶꦭꦺꦲꦶ, ꦮꦶꦥ꧀ꦥꦩꦸꦠ꧀ꦠꦺꦴ ꦮꦶꦥ꧀ꦥꦩꦸꦠ꧀ꦠꦺꦲꦶ;

ꦱꦶꦔ꧀ꦒꦷꦤꦶꦏ꧀ꦑꦱꦮꦟ꧀ꦟꦺꦴ, ꦫꦴꦗꦒꦲꦁ ꦥꦴꦮꦶꦱꦶ ꦨꦒꦮꦴ.

‘‘ꦩꦸꦠ꧀ꦠꦺꦴ ꦩꦸꦠ꧀ꦠꦺꦲꦶ…ꦥꦺ….

‘‘ꦠꦶꦟ꧀ꦟꦺꦴ ꦠꦶꦟ꧀ꦟꦺꦲꦶ…ꦥꦺ….

‘‘ꦱꦤ꧀ꦠꦺꦴ ꦱꦤ꧀ꦠꦺꦲꦶ…ꦥꦺ… ꦫꦴꦗꦒꦲꦁ ꦥꦴꦮꦶꦱꦶ ꦨꦒꦮꦴ.

‘‘ꦢꦱꦮꦴꦱꦺꦴ ꦢꦱꦧꦭꦺꦴ, ꦢꦱꦣꦩ꧀ꦩꦮꦶꦢꦹ ꦢꦱꦨꦶ ꦕꦸꦥꦺꦠꦺꦴ;

ꦱꦺꦴ ꦢꦱꦱꦠꦥꦫꦶꦮꦴꦫꦺꦴ, ꦫꦴꦗꦒꦲꦁ ꦥꦴꦮꦶꦱꦶ ꦨꦒꦮꦴ’’ꦠꦶ. (ꦩꦲꦴꦮ. ꧕꧘) –

ꦆꦩꦴꦲꦶ ꦒꦴꦡꦴꦲꦶ ꦱꦠ꧀ꦡꦸ ꦮꦟ꧀ꦟꦁ ꦮꦢꦩꦴꦤꦺꦴ ꦥꦸꦫꦠꦺꦴ ꦥꦴꦪꦴꦱꦶ. ꦠꦢꦴ ꦩꦲꦴꦗꦤꦺꦴ ꦩꦴꦟꦮꦏꦱ꧀ꦱ ꦫꦹꦥꦱꦶꦫꦶꦁ ꦢꦶꦱ꧀ꦮꦴ ‘‘ꦄꦠꦶꦮꦶꦪ ꦄꦨꦶꦫꦹꦥꦺꦴ ꦮꦠꦴꦪꦁ ꦩꦴꦟꦮꦏꦺꦴ, ꦤ ꦑꦺꦴ ꦥꦤ ꦄꦩ꧀ꦲꦺꦲꦶ ꦢꦶꦛ꧀ꦜꦥꦸꦧ꧀ꦧꦺꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ ‘‘ꦏꦸꦠꦺꦴ ꦄꦪꦁ ꦩꦴꦟꦮꦏꦺꦴ, ꦏꦱ꧀ꦱ ꦮꦴ ꦄꦪ’’ꦤ꧀ꦠꦶ ꦄꦴꦲ. ꦠꦁ ꦱꦸꦠ꧀ꦮꦴ ꦩꦴꦟꦮꦺꦴ –

‘‘ꦪꦺꦴ ꦣꦷꦫꦺꦴ ꦱꦧ꧀ꦧꦣꦶ ꦢꦤ꧀ꦠꦺꦴ, ꦱꦸꦢ꧀ꦣꦺꦴ ꦄꦥ꧀ꦥꦛꦶꦥꦸꦒ꧀ꦒꦭꦺꦴ;

ꦄꦫꦲꦁ ꦱꦸꦒꦠꦺꦴ ꦭꦺꦴꦏꦺ, ꦠꦱ꧀ꦱꦴꦲꦁ ꦥꦫꦶꦕꦴꦫꦏꦺꦴ’’ꦠꦶ. – ꦒꦴꦡꦩꦴꦲ;

ꦱꦠ꧀ꦡꦴ ꦱꦏ꧀ꦏꦺꦤ ꦏꦠꦺꦴꦏꦴꦱꦁ ꦩꦒ꧀ꦒꦁ ꦥꦛꦶꦥꦗ꧀ꦗꦶꦠ꧀ꦮꦴ ꦨꦶꦏ꧀ꦑꦸꦱꦲꦱ꧀ꦱꦥꦫꦶꦮꦸꦠꦺꦴ ꦫꦴꦗꦒꦲꦁ ꦥꦴꦮꦶꦱꦶ. ꦫꦴꦗꦴ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦱꦔ꧀ꦓꦱ꧀ꦱ ꦩꦲꦴꦢꦴꦤꦁ ꦢꦠ꧀ꦮꦴ ‘‘ꦄꦲꦁ, ꦨꦤ꧀ꦠꦺ, ꦠꦷꦟꦶ ꦫꦠꦤꦴꦤꦶ ꦮꦶꦤꦴ ꦮꦱꦶꦠꦸꦁ ꦤ ꦱꦏ꧀ꦑꦶꦱ꧀ꦱꦴꦩꦶ, ꦮꦺꦭꦴꦪ ꦮꦴ ꦄꦮꦺꦭꦴꦪ ꦮꦴ ꦨꦒꦮꦠꦺꦴ ꦱꦤ꧀ꦠꦶꦏꦁ ꦄꦴꦒꦩꦶꦱ꧀ꦱꦴꦩꦶ, ꦭꦛ꧀ꦜꦶꦮꦤꦸꦪ꧀ꦪꦴꦤꦚ꧀ꦕ ꦤꦴꦩ ꦄꦠꦶꦢꦹꦫꦺ, ꦆꦢꦁ ꦥꦤ ꦄꦩ꧀ꦲꦴꦏꦁ ꦮꦺꦭ꦳ꦸꦮꦤꦸꦪ꧀ꦪꦴꦤꦁ ꦤꦴꦠꦶꦢꦹꦫꦁ ꦤꦕ꧀ꦕꦴꦱꦤ꧀ꦤꦁ ꦒꦩꦤꦴꦒꦩꦤꦱꦩ꧀ꦥꦤ꧀ꦤꦁ ꦧꦸꦢ꧀ꦣꦴꦫꦲꦁ ꦱꦺꦤꦴꦱꦤꦁ. ꦆꦢꦁ ꦩꦺ, ꦨꦤ꧀ꦠꦺ, ꦨꦒꦮꦴ ꦥꦛꦶꦒ꧀ꦒꦟ꧀ꦲꦴꦠꦹ’’ꦠꦶ ꦱꦸꦮꦟ꧀ꦟꦨꦶꦔ꧀ꦒꦴꦫꦺꦤ ꦥꦸꦥ꧀ꦦꦒꦤ꧀ꦣꦮꦴꦱꦶꦠꦁ ꦩꦟꦶꦮꦟ꧀ꦟꦁ ꦈꦢꦏꦩꦴꦢꦴꦪ ꦮꦺꦭ꦳ꦸꦮꦤꦸꦪ꧀ꦪꦴꦤꦁ ꦥꦫꦶꦕ꧀ꦕꦗꦤ꧀ꦠꦺꦴ ꦢꦱꦧꦭꦱ꧀ꦱ ꦲꦠ꧀ꦡꦺ ꦈꦢꦏꦁ ꦥꦴꦠꦺꦱꦶ. ꦠꦱ꧀ꦩꦶꦁ ꦄꦴꦫꦴꦩꦺ ꦥꦛꦶꦒ꧀ꦒꦲꦶꦠꦺꦪꦺꦮ ‘‘ꦧꦸꦢ꧀ꦣꦱꦴꦱꦤꦱ꧀ꦱ ꦩꦹꦭꦴꦤꦶ ꦎꦠꦶꦟ꧀ꦟꦴꦤꦷ’’ꦠꦶ ꦩꦲꦴꦥꦡꦮꦷ ꦏꦩ꧀ꦥꦶ. ꦗꦩ꧀ꦧꦸꦢꦷꦥꦠꦭꦱ꧀ꦩꦶꦚ꧀ꦲꦶ ꦜꦥꦺꦠ꧀ꦮꦴ ꦮꦺꦭ꦳ꦸꦮꦤꦁ ꦄꦚ꧀ꦚꦁ ꦩꦲꦴꦥꦡꦮꦶꦁ ꦏꦩ꧀ꦥꦺꦠ꧀ꦮꦴ ꦒꦲꦶꦠꦱꦺꦤꦴꦱꦤꦁ ꦤꦴꦩ ꦤꦠ꧀ꦡꦶ. ꦠꦩ꧀ꦧꦥꦟ꧀ꦟꦶꦢꦷꦥꦺꦥꦶ ꦜꦥꦺꦠ꧀ꦮꦴ ꦩꦲꦴꦮꦶꦲꦴꦫꦁ ꦄꦚ꧀ꦚꦁ ꦥꦡꦮꦶꦁ ꦏꦩ꧀ꦥꦺꦠ꧀ꦮꦴ ꦒꦲꦶꦠꦱꦺꦤꦴꦱꦤꦁ ꦤꦴꦩ ꦤꦠ꧀ꦡꦶ. ꦱꦠ꧀ꦡꦴ ꦮꦺꦭ꦳ꦸꦮꦤꦴꦫꦴꦩꦁ ꦥꦛꦶꦒ꧀ꦒꦲꦺꦠ꧀ꦮꦴ ꦫꦚ꧀ꦚꦺꦴ ꦄꦤꦸꦩꦺꦴꦢꦤꦁ ꦏꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ ꦮꦺꦭ꦳ꦸꦮꦤꦁ ꦄꦒꦩꦴꦱꦶ.

ꦠꦱ꧀ꦩꦶꦁ ꦑꦺꦴ ꦥꦤ ꦱꦩꦪꦺ ꦱꦴꦫꦶꦥꦸꦠ꧀ꦠꦺꦴ ꦕ ꦩꦺꦴꦒ꧀ꦒꦭ꧀ꦭꦴꦤꦺꦴ ꦕꦴꦠꦶ ꦢ꧀ꦮꦺ ꦥꦫꦶꦧ꧀ꦧꦴꦗꦏꦴ ꦫꦴꦗꦒꦲꦁ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ ꦄꦩꦠꦁ ꦥꦫꦶꦪꦺꦱꦩꦴꦤꦴ. ꦠꦺꦱꦸ ꦱꦴꦫꦶꦥꦸꦠ꧀ꦠꦺꦴ ꦄꦱ꧀ꦱꦗꦶꦠ꧀ꦡꦺꦫꦁ ꦥꦶꦟ꧀ꦝꦴꦪ ꦥꦮꦶꦛ꧀ꦜꦁ ꦢꦶꦱ꧀ꦮꦴ ꦥꦱꦤ꧀ꦤꦕꦶꦠ꧀ꦠꦺꦴ ꦥꦪꦶꦫꦸꦥꦴꦱꦶꦠ꧀ꦮꦴ ‘‘ꦪꦺ ꦣꦩ꧀ꦩꦴ ꦲꦺꦠꦸꦥ꧀ꦥꦨꦮꦴ’’ꦠꦶꦄꦴꦢꦶꦒꦴꦡꦁ (ꦩꦲꦴꦮ. ꧖꧐; ꦄꦥ. ꦡꦺꦫ ꧑.꧑.꧒꧘꧖) ꦱꦸꦠ꧀ꦮꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦪ ꦄꦠ꧀ꦠꦤꦺꦴ ꦱꦲꦴꦪꦏꦱ꧀ꦱ ꦩꦺꦴꦒ꧀ꦒꦭ꧀ꦭꦴꦤꦱ꧀ꦱꦥꦶ ꦠꦩꦺꦮ ꦒꦴꦡꦁ ꦄꦨꦴꦱꦶ. ꦱꦺꦴꦥꦶ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶ. ꦠꦺ ꦈꦨꦺꦴꦥꦶ ꦱꦚ꧀ꦕꦪꦁ ꦎꦭꦺꦴꦏꦺꦠ꧀ꦮꦴ ꦄꦠ꧀ꦠꦤꦺꦴ ꦥꦫꦶꦱꦴꦪ ꦱꦢ꧀ꦣꦶꦁ ꦨꦒꦮꦠꦺꦴ ꦱꦤ꧀ꦠꦶꦏꦺ ꦥꦧ꧀ꦧꦗꦶꦁꦱꦸ. ꦠꦺꦱꦸ ꦩꦺꦴꦒ꧀ꦒꦭ꧀ꦭꦴꦤꦺꦴ ꦱꦠ꧀ꦠꦴꦲꦺꦤ ꦄꦫꦲꦠ꧀ꦠꦁ ꦥꦴꦥꦸꦟꦶ, ꦱꦴꦫꦶꦥꦸꦠ꧀ꦠꦺꦴ ꦄꦝ꧀ꦞꦩꦴꦱꦺꦤ. ꦈꦨꦺꦴꦥꦶ ꦠꦺ ꦱꦠ꧀ꦡꦴ ꦄꦒ꧀ꦒꦱꦴꦮꦏꦛ꧀ꦜꦴꦤꦺ ꦜꦥꦺꦱꦶ. ꦱꦴꦫꦶꦥꦸꦠ꧀ꦠꦠ꧀ꦡꦺꦫꦺꦤ ꦕ ꦄꦫꦲꦠ꧀ꦠꦁ ꦥꦠ꧀ꦠꦢꦶꦮꦱꦺꦪꦺꦮ ꦱꦤ꧀ꦤꦶꦥꦴꦠꦁ ꦄꦏꦴꦱꦶ.

ꦠꦡꦴꦒꦠꦺ ꦥꦤ ꦠꦱ꧀ꦩꦶꦚ꧀ꦚꦺꦮ ꦮꦺꦭ꦳ꦸꦮꦤꦸꦪ꧀ꦪꦴꦤꦺ ꦮꦶꦲꦫꦤ꧀ꦠꦺ ꦱꦸꦢ꧀ꦣꦺꦴꦢꦤꦩꦲꦴꦫꦴꦗꦴ ‘‘ꦥꦸꦠ꧀ꦠꦺꦴ ꦏꦶꦫ ꦩꦺ ꦖꦧ꧀ꦧꦱ꧀ꦱꦴꦤꦶ ꦢꦸꦏ꧀ꦏꦫꦏꦴꦫꦶꦏꦁ ꦕꦫꦶꦠ꧀ꦮꦴ ꦥꦫꦩꦴꦨꦶꦱꦩ꧀ꦧꦺꦴꦣꦶꦁ ꦥꦠ꧀ꦮꦴ ꦥꦮꦠ꧀ꦠꦮꦫꦣꦩ꧀ꦩꦕꦏ꧀ꦏꦺꦴ ꦫꦴꦗꦒꦲꦁ ꦈꦥꦤꦶꦱ꧀ꦱꦴꦪ ꦮꦺꦭ꦳ꦸꦮꦤꦺ ꦮꦶꦲꦫꦠꦷ’’ꦠꦶ ꦱꦸꦠ꧀ꦮꦴ ꦄꦚ꧀ꦚꦠꦫꦁ ꦄꦩꦕ꧀ꦕꦁ ꦄꦴꦩꦤ꧀ꦠꦺꦱꦶ – ‘‘ꦌꦲꦶ ꦨꦟꦺ, ꦠ꧀ꦮꦁ ꦥꦸꦫꦶꦱꦱꦲꦱ꧀ꦱꦥꦫꦶꦮꦴꦫꦺꦴ ꦫꦴꦗꦒꦲꦁ ꦒꦤ꧀ꦠ꧀ꦮꦴ ꦩꦩ ꦮꦕꦤꦺꦤ ‘ꦥꦶꦠꦴ ꦠꦺ ꦱꦸꦢ꧀ꦣꦺꦴꦢꦤꦩꦲꦴꦫꦴꦗꦴ ꦢꦛ꧀ꦜꦸꦏꦴꦩꦺꦴ’ꦠꦶ ꦮꦠ꧀ꦮꦴ ꦩꦩ ꦥꦸꦠ꧀ꦠꦁ ꦒꦟ꧀ꦲꦶꦠ꧀ꦮꦴ ꦌꦲꦷ’’ꦠꦶ ꦄꦴꦲ. ꦱꦺꦴ ‘‘ꦌꦮꦁ, ꦢꦺꦮꦴ’’ꦠꦶ ꦫꦚ꧀ꦚꦺꦴ ꦮꦕꦤꦁ ꦱꦶꦫꦱꦴ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦥꦸꦫꦶꦱꦱꦲꦱ꧀ꦱꦥꦫꦶꦮꦴꦫꦺꦴ ꦑꦶꦥ꧀ꦥꦩꦺꦮ ꦱꦛ꧀ꦜꦶꦪꦺꦴꦗꦤꦩꦒ꧀ꦒꦁ ꦒꦤ꧀ꦠ꧀ꦮꦴ ꦢꦱꦧꦭꦱ꧀ꦱ ꦕꦠꦸꦥꦫꦶꦱꦩꦗ꧀ꦙꦺ ꦤꦶꦱꦷꦢꦶꦠ꧀ꦮꦴ ꦣꦩ꧀ꦩꦢꦺꦱꦤꦴꦮꦺꦭꦴꦪꦁ ꦮꦶꦲꦴꦫꦁ ꦥꦴꦮꦶꦱꦶ. ꦱꦺꦴ ‘‘ꦠꦶꦛ꧀ꦜꦠꦸ ꦠꦴꦮ ꦫꦚ꧀ꦚꦴ ꦥꦲꦶꦠꦱꦴꦱꦤ’’ꦤ꧀ꦠꦶ ꦥꦫꦶꦱꦥꦫꦶꦪꦤ꧀ꦠꦺ ꦜꦶꦠꦺꦴ ꦱꦠ꧀ꦡꦸ ꦣꦩ꧀ꦩꦢꦺꦱꦤꦁ ꦱꦸꦠ꧀ꦮꦴ ꦪꦡꦴꦜꦶꦠꦺꦴꦮ ꦱꦢ꧀ꦣꦶꦁ ꦥꦸꦫꦶꦱꦱꦲꦱ꧀ꦱꦺꦤ ꦄꦫꦲꦠ꧀ꦠꦁ ꦥꦠ꧀ꦮꦴ ꦥꦧ꧀ꦧꦗ꧀ꦗꦁ ꦪꦴꦕꦶ. ꦨꦒꦮꦴ ‘‘ꦌꦡ ꦨꦶꦏ꧀ꦑꦮꦺꦴ’’ꦠꦶ ꦲꦠ꧀ꦡꦁ ꦥꦱꦴꦫꦺꦱꦶ. ꦱꦧ꧀ꦧꦺ ꦠꦔ꧀ꦑꦟꦚ꧀ꦚꦺꦮ ꦆꦢ꧀ꦣꦶꦩꦪꦥꦠ꧀ꦠꦕꦷꦮꦫꦣꦫꦴ ꦱꦛ꧀ꦜꦶꦮꦱ꧀ꦱꦶꦏꦠ꧀ꦡꦺꦫꦴ ꦮꦶꦪ ꦄꦲꦺꦱꦸꦁ. ꦄꦫꦲꦠ꧀ꦠꦁ ꦥꦠ꧀ꦠꦏꦴꦭꦠꦺꦴ ꦥꦛ꧀ꦜꦴꦪ ꦥꦤ ꦄꦫꦶꦪꦴ ꦤꦴꦩ ꦩꦗ꧀ꦙꦠ꧀ꦠꦴꦮ ꦲꦺꦴꦤ꧀ꦠꦷꦠꦶ, ꦱꦺꦴ ꦫꦚ꧀ꦚꦴ ꦥꦲꦶꦠꦱꦴꦱꦤꦁ ꦢꦱꦧꦭꦱ꧀ꦱ ꦤ ꦏꦡꦺꦱꦶ. ꦫꦴꦗꦴ – ‘‘ꦤꦺꦮ ꦒꦠꦺꦴ ꦄꦴꦒꦕ꧀ꦖꦠꦶ, ꦤ ꦱꦴꦱꦤꦁ ꦱꦸꦪ꧀ꦪꦠꦷ’’ꦠꦶ ‘‘ꦌꦲꦶ ꦨꦟꦺ, ꦠ꧀ꦮꦁ ꦒꦕ꧀ꦖꦴ’’ꦠꦶ ꦌꦠꦺꦤꦺꦮ ꦤꦶꦪꦴꦩꦺꦤ ꦄꦚ꧀ꦚꦁ ꦄꦩꦕ꧀ꦕꦁ ꦥꦺꦱꦺꦱꦶ. ꦱꦺꦴꦥꦶ ꦒꦤ꧀ꦠ꧀ꦮꦴ ꦥꦸꦫꦶꦩꦤꦪꦺꦤꦺꦮ ꦱꦢ꧀ꦣꦶꦁ ꦥꦫꦶꦱꦴꦪ ꦄꦫꦲꦠ꧀ꦠꦁ ꦥꦠ꧀ꦮꦴ ꦠꦸꦟ꧀ꦲꦷ ꦄꦲꦺꦴꦱꦶ. ꦥꦸꦤ ꦫꦴꦗꦴ ‘‘ꦌꦲꦶ ꦨꦟꦺ, ꦠ꧀ꦮꦁ ꦒꦕ꧀ꦖ, ꦠ꧀ꦮꦁ ꦒꦕ꧀ꦖꦴ’’ꦠꦶ ꦌꦠꦺꦤꦺꦮ ꦤꦶꦪꦴꦩꦺꦤ ꦄꦥꦫꦺꦥꦶ ꦱꦠ꧀ꦠ ꦄꦩꦕ꧀ꦕꦺ ꦥꦺꦱꦺꦱꦶ. ꦠꦺ ꦱꦧ꧀ꦧꦺ ꦤꦮ ꦥꦸꦫꦶꦱꦱꦲꦱ꧀ꦱꦥꦫꦶꦮꦴꦫꦴ ꦤꦮ ꦄꦩꦕ꧀ꦕꦴ ꦄꦠ꧀ꦠꦤꦺꦴ ꦏꦶꦕ꧀ꦕꦁ ꦤꦶꦛ꧀ꦜꦴꦥꦺꦠ꧀ꦮꦴ ꦠꦸꦟ꧀ꦲꦷꦨꦹꦠꦴ ꦠꦠ꧀ꦡꦺꦮ ꦮꦶꦲꦫꦶꦁꦱꦸ.

ꦫꦴꦗꦴ ꦱꦴꦱꦤꦩꦠ꧀ꦠꦩ꧀ꦥꦶ ꦄꦴꦲꦫꦶꦠ꧀ꦮꦴ ꦄꦴꦕꦶꦏ꧀ꦑꦤ꧀ꦠꦁ ꦄꦭꦨꦶꦠ꧀ꦮꦴ ꦕꦶꦤ꧀ꦠꦺꦱꦶ – ‘‘ꦌꦠ꧀ꦠꦏꦴꦥꦶ ꦗꦤꦴ ꦩꦪꦶ ꦱꦶꦤꦺꦲꦴꦨꦴꦮꦺꦤ ꦱꦴꦱꦤꦩꦠ꧀ꦠꦩ꧀ꦥꦶ ꦤ ꦥꦕ꧀ꦕꦴꦲꦫꦶꦁꦱꦸ, ꦏꦺꦴ ꦤꦸ ꦑꦺꦴ ꦩꦺ ꦱꦴꦱꦤꦁ ꦏꦫꦶꦱ꧀ꦱꦠꦷ’’ꦠꦶ ꦱꦧ꧀ꦧꦁ ꦫꦴꦗꦧꦭꦁ ꦎꦭꦺꦴꦏꦺꦤ꧀ꦠꦺꦴ ꦏꦴꦭ꦳ꦸꦢꦴꦪꦶꦁ ꦄꦢ꧀ꦢꦱ. ꦱꦺꦴ ꦏꦶꦫ ꦫꦚ꧀ꦚꦺꦴ ꦱꦧ꧀ꦧꦠ꧀ꦡꦱꦴꦣꦏꦺꦴ ꦄꦧ꧀ꦨꦤ꧀ꦠꦫꦶꦏꦺꦴ ꦄꦠꦶꦮꦶꦪ ꦮꦶꦱ꧀ꦱꦴꦱꦶꦏꦺꦴ ꦄꦩꦕ꧀ꦕꦺꦴ ꦧꦺꦴꦣꦶꦱꦠ꧀ꦠꦺꦤ ꦱꦢ꧀ꦣꦶꦁ ꦌꦏꦢꦶꦮꦱꦺ ꦗꦴꦠꦺꦴ ꦱꦲꦥꦁꦱꦸꦏꦷꦭ꦳ꦏꦺꦴ ꦱꦲꦴꦪꦺꦴ. ꦄꦡ ꦤꦁ ꦫꦴꦗꦴ ꦄꦴꦩꦤ꧀ꦠꦺꦱꦶ – ‘‘ꦠꦴꦠ ꦏꦴꦭ꦳ꦸꦢꦴꦪꦶ, ꦄꦲꦁ ꦩꦩ ꦥꦸꦠ꧀ꦠꦁ ꦢꦛ꧀ꦜꦸꦏꦴꦩꦺꦴ ꦤꦮꦥꦸꦫꦶꦱꦱꦲꦱ꧀ꦱꦥꦫꦶꦮꦴꦫꦺꦤ ꦤꦮ ꦄꦩꦕ꧀ꦕꦺ ꦥꦺꦱꦺꦱꦶꦁ, ꦠꦺꦱꦸ ꦌꦏꦺꦴꦥꦶ ꦄꦴꦒꦤ꧀ꦠ꧀ꦮꦴ ꦱꦴꦱꦤꦩꦠ꧀ꦠꦁ ꦄꦴꦫꦺꦴꦕꦺꦤ꧀ꦠꦺꦴ ꦤꦴꦩ ꦤꦠ꧀ꦡꦶ. ꦢꦸꦗ꧀ꦗꦴꦤꦺꦴ ꦑꦺꦴ ꦥꦤ ꦩꦺ ꦗꦷꦮꦶꦠꦤ꧀ꦠꦫꦴꦪꦺꦴ, ꦗꦷꦮꦩꦴꦤꦺꦴꦪꦺꦮꦴꦲꦁ ꦥꦸꦠ꧀ꦠꦁ ꦢꦛ꧀ꦜꦸꦏꦴꦩꦺꦴ. ꦱꦏ꧀ꦑꦶꦱ꧀ꦱꦱꦶ ꦤꦸ ꦑꦺꦴ ꦩꦺ ꦥꦸꦠ꧀ꦠꦁ ꦢꦱ꧀ꦱꦺꦠꦸ’’ꦤ꧀ꦠꦶ? ‘‘ꦱꦏ꧀ꦑꦶꦱ꧀ꦱꦴꦩꦶ, ꦢꦺꦮ, ꦱꦕꦺ ꦥꦧ꧀ꦧꦗꦶꦠꦸꦁ ꦭꦨꦶꦱ꧀ꦱꦴꦩꦷ’’ꦠꦶ. ‘‘ꦠꦴꦠ, ꦠ꧀ꦮꦁ ꦥꦧ꧀ꦧꦗꦶꦠꦺꦴ ꦮꦴ ꦄꦥꦧ꧀ꦧꦗꦶꦠꦺꦴ ꦮꦴ ꦩꦪ꧀ꦲꦁ ꦥꦸꦠ꧀ꦠꦁ ꦢꦱ꧀ꦱꦺꦲꦷ’’ꦠꦶ. ꦱꦺꦴ ‘‘ꦱꦴꦣꦸ, ꦢꦺꦮꦴ’’ꦠꦶ ꦫꦚ꧀ꦚꦺꦴ ꦱꦴꦱꦤꦁ ꦄꦴꦢꦴꦪ ꦫꦴꦗꦒꦲꦁ ꦒꦤ꧀ꦠ꧀ꦮꦴ ꦱꦠ꧀ꦡꦸ ꦣꦩ꧀ꦩꦢꦺꦱꦤꦴꦮꦺꦭꦴꦪ ꦥꦫꦶꦱꦥꦫꦶꦪꦤ꧀ꦠꦺ ꦜꦶꦠꦺꦴ ꦣꦩ꧀ꦩꦁ ꦱꦸꦠ꧀ꦮꦴ ꦱꦥꦫꦶꦮꦴꦫꦺꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦌꦲꦶꦨꦶꦏ꧀ꦑꦸꦨꦴꦮꦺꦤ ꦥꦧ꧀ꦧꦗꦶꦠ꧀ꦮꦴ ꦮꦶꦲꦴꦱꦶ.

ꦱꦠ꧀ꦡꦴ ꦧꦸꦢ꧀ꦣꦺꦴ ꦲꦸꦠ꧀ꦮꦴ ꦥꦜꦩꦁ ꦄꦤ꧀ꦠꦺꦴꦮꦱ꧀ꦱꦁ ꦆꦱꦶꦥꦠꦤꦺ ꦮꦱꦶꦠ꧀ꦮꦴ ꦮꦸꦛ꧀ꦜꦮꦱ꧀ꦱꦺꦴ ꦥꦮꦴꦫꦺꦠ꧀ꦮꦴ ꦈꦫꦸꦮꦺꦭꦁ ꦒꦤ꧀ꦠ꧀ꦮꦴ ꦠꦠ꧀ꦡ ꦠꦪꦺꦴ ꦩꦴꦱꦺ ꦮꦱꦤ꧀ꦠꦺꦴ ꦠꦺꦨꦴꦠꦶꦏꦗꦛꦶꦭꦺ ꦮꦶꦤꦺꦠ꧀ꦮꦴ ꦨꦶꦏ꧀ꦑꦸꦱꦲꦱ꧀ꦱꦥꦫꦶꦮꦴꦫꦺꦴ ꦦꦸꦱ꧀ꦱꦩꦴꦱꦥꦸꦟ꧀ꦟꦩꦴꦪꦁ ꦫꦴꦗꦒꦲꦁ ꦒꦤ꧀ꦠ꧀ꦮꦴ ꦢ꧀ꦮꦺ ꦩꦴꦱꦺ ꦮꦱꦶ. ꦌꦠ꧀ꦠꦴꦮꦠꦴ ꦧꦴꦫꦴꦟꦱꦶꦠꦺꦴ ꦤꦶꦏ꧀ꦑꦤ꧀ꦠꦱ꧀ꦱ ꦥꦚ꧀ꦕ ꦩꦴꦱꦴ ꦗꦴꦠꦴ, ꦱꦏꦭꦺꦴ ꦲꦺꦩꦤ꧀ꦠꦺꦴ ꦄꦠꦶꦏ꧀ꦏꦤ꧀ꦠꦺꦴ. ꦏꦴꦭ꦳ꦸꦢꦴꦪꦶꦠ꧀ꦡꦺꦫꦱ꧀ꦱ ꦄꦴꦒꦠꦢꦶꦮꦱꦠꦺꦴ ꦱꦠ꧀ꦠꦛ꧀ꦜꦢꦶꦮꦱꦴ ꦮꦷꦠꦶꦮꦠ꧀ꦠꦴ. ꦡꦺꦫꦺꦴ ꦦꦒ꧀ꦒꦸꦟꦩꦴꦱꦥꦸꦟ꧀ꦟꦩꦴꦪꦁ ꦕꦶꦤ꧀ꦠꦺꦱꦶ – ‘‘ꦄꦠꦶꦏ꧀ꦏꦤ꧀ꦠꦺꦴ ꦢꦴꦤꦶ ꦲꦺꦩꦤ꧀ꦠꦺꦴ, ꦮꦱꦤ꧀ꦠꦱꦩꦪꦺꦴ ꦄꦤꦸꦥ꧀ꦥꦠ꧀ꦠꦺꦴ, ꦩꦤꦸꦱ꧀ꦱꦺꦲꦶ ꦱꦱ꧀ꦱꦴꦢꦷꦤꦶ ꦈꦢ꧀ꦣꦫꦶꦠ꧀ꦮꦴ ꦱꦩ꧀ꦩꦸꦑꦱꦩ꧀ꦩꦸꦑꦛ꧀ꦜꦴꦤꦺꦲꦶ ꦩꦒ꧀ꦒꦴ ꦢꦶꦤ꧀ꦤꦴ, ꦲꦫꦶꦠꦠꦶꦟꦱꦚ꧀ꦖꦤ꧀ꦤꦴ ꦥꦡꦮꦷ, ꦱꦸꦥꦸꦥ꧀ꦦꦶꦠꦴ ꦮꦤꦱꦟ꧀ꦝꦴ, ꦥꦛꦶꦥꦗ꧀ꦗꦤꦏ꧀ꦑꦩꦴ ꦩꦒ꧀ꦒꦴ, ꦏꦴꦭꦺꦴ ꦢꦱꦧꦭꦱ꧀ꦱ ꦚꦴꦠꦶꦱꦔ꧀ꦒꦲꦁ ꦏꦴꦠꦸ’’ꦤ꧀ꦠꦶ. ꦄꦡ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ –

‘‘ꦄꦔ꧀ꦒꦴꦫꦶꦤꦺꦴ ꦢꦴꦤꦶ ꦢꦸꦩꦴ ꦨꦢꦤ꧀ꦠꦺ, ꦦꦭꦺꦱꦶꦤꦺꦴ ꦖꦢꦤꦁ ꦮꦶꦥ꧀ꦥꦲꦴꦪ;

ꦠꦺ ꦄꦕ꧀ꦕꦶꦩꦤ꧀ꦠꦺꦴꦮ ꦥꦨꦴꦱꦪꦤ꧀ꦠꦶ, ꦱꦩꦪꦺꦴ ꦩꦲꦴꦮꦷꦫ ꦨꦴꦒꦷ ꦫꦱꦴꦤꦁ…ꦥꦺ…. (ꦡꦺꦫꦒꦴ. ꧕꧒꧗);

‘‘ꦤꦴꦠꦶꦱꦷꦠꦁ ꦤꦴꦠꦶꦈꦟ꧀ꦲꦁ, ꦤꦴꦠꦶꦢꦸꦧ꧀ꦨꦶꦏ꧀ꦑꦖꦴꦠꦏꦁ;

ꦱꦢ꧀ꦢꦭꦴ ꦲꦫꦶꦠꦴ ꦨꦹꦩꦶ, ꦌꦱ ꦏꦴꦭꦺꦴ ꦩꦲꦴꦩꦸꦤꦷ’’ꦠꦶ. –

ꦱꦛ꧀ꦜꦶꦩꦠ꧀ꦠꦴꦲꦶ ꦒꦴꦡꦴꦲꦶ ꦢꦱꦧꦭꦱ꧀ꦱ ꦏꦸꦭꦤꦒꦫꦒꦩꦤꦮꦟ꧀ꦟꦁ ꦮꦟ꧀ꦟꦺꦱꦶ. ꦄꦡ ꦤꦁ ꦱꦠ꧀ꦡꦴ – ‘‘ꦏꦶꦁ ꦤꦸ ꦑꦺꦴ, ꦈꦢꦴꦪꦶ, ꦩꦣꦸꦫꦱ꧀ꦱꦫꦺꦤ ꦒꦩꦤꦮꦟ꧀ꦟꦁ ꦮꦟ꧀ꦟꦺꦱꦷ’’ꦠꦶ ꦄꦴꦲ. ‘‘ꦠꦸꦩ꧀ꦲꦴꦏꦁ, ꦨꦤ꧀ꦠꦺ, ꦥꦶꦠꦴ ꦱꦸꦢ꧀ꦣꦺꦴꦢꦤꦩꦲꦴꦫꦴꦗꦴ ꦠꦸꦩ꧀ꦲꦺ ꦥꦱ꧀ꦱꦶꦠꦸꦏꦴꦩꦺꦴ, ꦏꦫꦺꦴꦡ ꦚꦴꦠꦏꦴꦤꦁ ꦱꦔ꧀ꦒꦲ’’ꦤ꧀ꦠꦶ. ‘‘ꦱꦴꦣꦸ, ꦈꦢꦴꦪꦶ, ꦏꦫꦶꦱ꧀ꦱꦴꦩꦶ ꦚꦴꦠꦏꦴꦤꦁ ꦱꦔ꧀ꦒꦲꦁ, ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦄꦴꦫꦺꦴꦕꦺꦲꦶ, ꦒꦩꦶꦪꦮꦠ꧀ꦠꦁ ꦥꦫꦶꦥꦹꦫꦺꦱ꧀ꦱꦤ꧀ꦠꦷ’’ꦠꦶ. ‘‘ꦱꦴꦣꦸ, ꦨꦤ꧀ꦠꦺ’’ꦠꦶ ꦡꦺꦫꦺꦴ ꦠꦺꦱꦁ ꦄꦴꦫꦺꦴꦕꦺꦱꦶ.

ꦨꦒꦮꦴ ꦄꦔ꧀ꦒꦩꦒꦣꦮꦴꦱꦷꦤꦁ ꦏꦸꦭꦥꦸꦠ꧀ꦠꦴꦤꦁ ꦢꦱꦲꦶ ꦱꦲꦱ꧀ꦱꦺꦲꦶ, ꦏꦥꦶꦭꦮꦠ꧀ꦡꦸꦮꦴꦱꦷꦤꦁ ꦢꦱꦲꦶ ꦱꦲꦱ꧀ꦱꦺꦲꦷꦠꦶ ꦱꦧ꧀ꦧꦺꦲꦺꦮ ꦮꦷꦱꦠꦶꦱꦲꦱ꧀ꦱꦺꦲꦶ ꦑꦷꦟꦴꦱꦮꦨꦶꦏ꧀ꦑꦹꦲꦶ ꦥꦫꦶꦮꦸꦠꦺꦴ ꦫꦴꦗꦒꦲꦴ ꦤꦶꦏ꧀ꦑꦩꦶꦠ꧀ꦮꦴ ꦢꦶꦮꦱꦺ ꦢꦶꦮꦱꦺ ꦪꦺꦴꦗꦤꦁ ꦒꦕ꧀ꦖꦠꦶ. ‘‘ꦫꦴꦗꦒꦲꦠꦺꦴ ꦱꦛ꧀ꦜꦶꦪꦺꦴꦗꦤꦁ ꦏꦥꦶꦭꦮꦠ꧀ꦡꦸꦁ ꦢ꧀ꦮꦷꦲꦶ ꦩꦴꦱꦺꦲꦶ ꦥꦴꦥꦸꦟꦶꦱ꧀ꦱꦴꦩꦷ’’ꦠꦶ ꦄꦠꦸꦫꦶꦠꦕꦴꦫꦶꦏꦁ ꦥꦏ꧀ꦏꦴꦩꦶ. ꦡꦺꦫꦺꦴꦥꦶ ‘‘ꦨꦒꦮꦠꦺꦴ ꦤꦶꦏ꧀ꦑꦤ꧀ꦠꦨꦴꦮꦁ ꦫꦚ꧀ꦚꦺꦴ ꦄꦴꦫꦺꦴꦕꦺꦱ꧀ꦱꦴꦩꦷ’’ꦠꦶ ꦮꦺꦲꦴꦱꦁ ꦄꦧ꧀ꦨꦸꦒ꧀ꦒꦤ꧀ꦠ꧀ꦮꦴ ꦫꦚ꧀ꦚꦺꦴ ꦤꦶꦮꦺꦱꦤꦺ ꦥꦴꦠꦸꦫꦲꦺꦴꦱꦶ. ꦫꦴꦗꦴ ꦡꦺꦫꦁ ꦢꦶꦱ꧀ꦮꦴ ꦠꦸꦛ꧀ꦜꦕꦶꦠ꧀ꦠꦺꦴ ꦩꦲꦴꦫꦲꦺ ꦥꦭ꧀ꦭꦔ꧀ꦏꦺ ꦤꦶꦱꦷꦢꦴꦥꦺꦠ꧀ꦮꦴ ꦄꦠ꧀ꦠꦤꦺꦴ ꦥꦛꦶꦪꦴꦢꦶꦠꦱ꧀ꦱ ꦤꦴꦤꦒ꧀ꦒꦫꦱꦨꦺꦴꦗꦤꦱ꧀ꦱ ꦥꦠ꧀ꦠꦁ ꦥꦹꦫꦺꦠ꧀ꦮꦴ ꦄꦢꦴꦱꦶ. ꦡꦺꦫꦺꦴ ꦈꦛ꧀ꦜꦴꦪ ꦒꦩꦤꦴꦏꦴꦫꦁ ꦢꦱ꧀ꦱꦺꦱꦶ. ‘‘ꦤꦶꦱꦷꦢꦶꦠ꧀ꦮꦴ ꦨꦸꦚ꧀ꦗ, ꦠꦴꦠꦴ’’ꦠꦶ. ‘‘ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦨꦸꦚ꧀ꦗꦶꦱ꧀ꦱꦴꦩꦶ, ꦩꦲꦴꦫꦴꦗꦴ’’ꦠꦶ. ‘‘ꦏꦲꦁ ꦥꦤ, ꦠꦴꦠ, ꦱꦠ꧀ꦡꦴ’’ꦠꦶ? ‘‘ꦮꦷꦱꦠꦶꦱꦲꦱ꧀ꦱꦨꦶꦏ꧀ꦑꦸꦥꦫꦶꦮꦴꦫꦺꦴ ꦠꦸꦩ꧀ꦲꦴꦏꦁ ꦢꦱ꧀ꦱꦤꦠ꧀ꦡꦴꦪ ꦕꦴꦫꦶꦏꦁ ꦤꦶꦏ꧀ꦑꦤ꧀ꦠꦺꦴ, ꦩꦲꦴꦫꦴꦗꦴ’’ꦠꦶ. ꦫꦴꦗꦴ ꦠꦸꦛ꧀ꦜꦩꦴꦤꦱꦺꦴ ꦄꦴꦲ – ‘‘ꦠꦸꦩ꧀ꦲꦺ ꦆꦩꦁ ꦥꦫꦶꦨꦸꦚ꧀ꦗꦶꦠ꧀ꦮꦴ ꦪꦴꦮ ꦩꦩ ꦥꦸꦠ꧀ꦠꦺꦴ ꦆꦩꦁ ꦤꦒꦫꦁ ꦥꦴꦥꦸꦟꦴꦠꦶ, ꦠꦴꦮꦱ꧀ꦱ ꦆꦠꦺꦴꦮ ꦥꦶꦟ꧀ꦝꦥꦴꦠꦁ ꦥꦫꦶꦲꦫꦡꦴ’’ꦠꦶ. ꦡꦺꦫꦺꦴ ꦄꦣꦶꦮꦴꦱꦺꦱꦶ. ꦫꦴꦗꦴ ꦡꦺꦫꦁ ꦥꦫꦶꦮꦶꦱꦶꦠ꧀ꦮꦴ ꦥꦠ꧀ꦠꦁ ꦒꦤ꧀ꦣꦕꦸꦟ꧀ꦟꦺꦤ ꦈꦧ꧀ꦧꦛ꧀ꦛꦺꦠ꧀ꦮꦴ ꦈꦠ꧀ꦠꦩꦱ꧀ꦱ ꦨꦺꦴꦗꦤꦱ꧀ꦱ ꦥꦹꦫꦺꦠ꧀ꦮꦴ ‘‘ꦠꦡꦴꦒꦠꦱ꧀ꦱ ꦢꦺꦡꦴ’’ꦠꦶ ꦡꦺꦫꦱ꧀ꦱ ꦲꦠ꧀ꦡꦺ ꦥꦠꦶꦛ꧀ꦜꦴꦥꦺꦱꦶ. ꦡꦺꦫꦺꦴ ꦱꦧ꧀ꦧꦺꦱꦁ ꦥꦱ꧀ꦱꦤ꧀ꦠꦴꦤꦁꦪꦺꦮ ꦥꦠ꧀ꦠꦁ ꦄꦴꦏꦴꦱꦺ ꦑꦶꦥꦶꦠ꧀ꦮꦴ ꦱꦪꦩ꧀ꦥꦶ ꦮꦺꦲꦴꦱꦁ ꦄꦧ꧀ꦨꦸꦒ꧀ꦒꦤ꧀ꦠ꧀ꦮꦴ ꦥꦶꦟ꧀ꦝꦥꦴꦠꦁ ꦄꦴꦲꦫꦶꦠ꧀ꦮꦴ ꦱꦠ꧀ꦡꦸ ꦲꦠ꧀ꦡꦺ ꦜꦥꦺꦱꦶ. ꦱꦠ꧀ꦡꦴ ꦠꦁ ꦥꦫꦶꦨꦸꦚ꧀ꦗꦶ. ꦌꦠꦺꦤꦺꦮ ꦈꦥꦴꦪꦺꦤ ꦡꦺꦫꦺꦴ ꦢꦶꦮꦱꦺ ꦢꦶꦮꦱꦺ ꦥꦶꦟ꧀ꦝꦥꦴꦠꦁ ꦄꦴꦲꦫꦶ. ꦱꦠ꧀ꦡꦴꦥꦶ ꦄꦤ꧀ꦠꦫꦴꦩꦒ꧀ꦒꦺ ꦫꦚ꧀ꦚꦺꦴꦪꦺꦮ ꦥꦶꦟ꧀ꦝꦥꦴꦠꦁ ꦥꦫꦶꦨꦸꦚ꧀ꦗꦶ. ꦡꦺꦫꦺꦴꦥꦶ ꦨꦠ꧀ꦠꦏꦶꦕ꧀ꦕꦴꦮꦱꦴꦤꦺ ꦢꦶꦮꦱꦺ ꦢꦶꦮꦱꦺ ‘‘ꦄꦗ꧀ꦗ ꦨꦒꦮꦴ ꦌꦠ꧀ꦠꦏꦁ ꦄꦴꦒꦠꦺꦴ, ꦄꦗ꧀ꦗ ꦌꦠ꧀ꦠꦏ’’ꦤ꧀ꦠꦶ ꦧꦸꦢ꧀ꦣꦒꦸꦟꦥꦛꦶꦱꦁꦪꦸꦠ꧀ꦠꦴꦪ ꦕ ꦏꦡꦴꦪ ꦱꦏꦭꦁ ꦫꦴꦗꦏꦸꦭꦁ ꦱꦠ꧀ꦡꦸꦢꦱ꧀ꦱꦤꦁ ꦮꦶꦤꦴꦪꦺꦮ ꦱꦠ꧀ꦡꦫꦶ ꦱꦚ꧀ꦗꦴꦠꦥ꧀ꦥꦱꦴꦢꦁ ꦄꦏꦴꦱꦶ. ꦠꦺꦤꦺꦮ ꦤꦁ ꦨꦒꦮꦴ ‘‘ꦌꦠꦢꦒ꧀ꦒꦁ, ꦨꦶꦏ꧀ꦑꦮꦺ, ꦩꦩ ꦱꦴꦮꦏꦴꦤꦁ ꦨꦶꦏ꧀ꦑꦹꦤꦁ ꦏꦸꦭꦥ꧀ꦥꦱꦴꦢꦏꦴꦤꦁ ꦪꦢꦶꦢꦁ ꦏꦴꦭ꦳ꦸꦢꦴꦪꦷ’’ꦠꦶ (ꦄ. ꦤꦶ. ꧑.꧒꧑꧙, ꧒꧒꧕) ꦌꦠꦢꦒ꧀ꦒꦺ ꦜꦥꦺꦱꦶ.

ꦱꦴꦏꦶꦪꦴꦥꦶ ꦑꦺꦴ ꦄꦤꦸꦥ꧀ꦥꦠ꧀ꦠꦺ ꦨꦒꦮꦠꦶ ‘‘ꦄꦩ꧀ꦲꦴꦏꦁ ꦚꦴꦠꦶꦱꦺꦛ꧀ꦜꦁ ꦥꦱ꧀ꦱꦶꦱ꧀ꦱꦴꦩꦴ’’ꦠꦶ ꦱꦤ꧀ꦤꦶꦥꦠꦶꦠ꧀ꦮꦴ ꦨꦒꦮꦠꦺꦴ ꦮꦱꦤꦛ꧀ꦜꦴꦤꦁ ꦮꦷꦩꦁꦱꦩꦴꦤꦴ ‘‘ꦤꦶꦒ꧀ꦫꦺꦴꦣꦱꦏ꧀ꦏꦱ꧀ꦱ ꦄꦴꦫꦴꦩꦺꦴ ꦫꦩꦟꦷꦪꦺꦴ’’ꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ꦠꦠ꧀ꦡ ꦱꦧ꧀ꦧꦁ ꦥꦛꦶꦗꦒ꧀ꦒꦤꦮꦶꦣꦶꦁ ꦏꦴꦫꦺꦠ꧀ꦮꦴ ꦒꦤ꧀ꦣꦥꦸꦥ꧀ꦦꦲꦠ꧀ꦡꦴ ꦥꦕ꧀ꦕꦸꦒ꧀ꦒꦩꦤꦁ ꦏꦫꦺꦴꦤ꧀ꦠꦴ ꦱꦧ꧀ꦧꦴꦭꦔ꧀ꦏꦴꦫꦥꦛꦶꦩꦟ꧀ꦝꦶꦠꦺ ꦢꦲꦫꦢꦲꦫꦺ ꦤꦴꦒꦫꦢꦴꦫꦏꦺ ꦕ ꦤꦴꦒꦫꦢꦴꦫꦶꦏꦴꦪꦺꦴ ꦕ ꦥꦜꦩꦁ ꦥꦲꦶꦟꦶꦁꦱꦸ, ꦠꦠꦺꦴ ꦫꦴꦗꦏꦸꦩꦴꦫꦺ ꦕ ꦫꦴꦗꦏꦸꦩꦴꦫꦶꦏꦴꦪꦺꦴ ꦕ, ꦠꦺꦱꦁ ꦄꦤꦤ꧀ꦠꦫꦴ ꦱꦴꦩꦁ ꦒꦤ꧀ꦣꦥꦸꦥ꧀ꦦꦴꦢꦷꦲꦶ ꦥꦹꦗꦪꦩꦴꦤꦴ ꦨꦒꦮꦤ꧀ꦠꦁ ꦒꦲꦺꦠ꧀ꦮꦴ ꦤꦶꦒ꧀ꦫꦺꦴꦣꦴꦫꦴꦩꦩꦺꦮ ꦄꦒꦩꦁꦱꦸ. ꦠꦠ꧀ꦡ ꦨꦒꦮꦴ ꦮꦷꦱꦠꦶꦱꦲꦱ꧀ꦱꦑꦷꦟꦴꦱꦮꦥꦫꦶꦮꦸꦠꦺꦴ ꦥꦚ꧀ꦚꦠ꧀ꦠꦮꦫꦧꦸꦢ꧀ꦣꦴꦱꦤꦺ ꦤꦶꦱꦷꦢꦶ. ꦱꦴꦏꦶꦪꦴ ꦤꦴꦩ ꦩꦴꦤꦗꦴꦠꦶꦏꦴ ꦩꦴꦤꦠ꧀ꦡꦢ꧀ꦣꦴ, ꦠꦺ ‘‘ꦱꦶꦢ꧀ꦣꦠ꧀ꦡꦏꦸꦩꦴꦫꦺꦴ ꦄꦩ꧀ꦲꦺꦲꦶ ꦢꦲꦫꦠꦫꦺꦴ, ꦄꦩ꧀ꦲꦴꦏꦁ ꦏꦤꦶꦛ꧀ꦜꦺꦴ, ꦨꦴꦒꦶꦤꦺꦪ꧀ꦪꦺꦴ, ꦥꦸꦠ꧀ꦠꦺꦴ, ꦤꦠ꧀ꦠꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦢꦲꦫꦢꦲꦫꦺ ꦫꦴꦗꦏꦸꦩꦴꦫꦺ ꦄꦴꦲꦁꦱꦸ – ‘‘ꦠꦸꦩ꧀ꦲꦺ ꦮꦤ꧀ꦢꦡ, ꦩꦪꦁ ꦠꦸꦩ꧀ꦲꦴꦏꦁ ꦥꦶꦛ꧀ꦜꦶꦠꦺꦴ ꦤꦶꦱꦷꦢꦶꦱ꧀ꦱꦴꦩꦴ’’ꦠꦶ.

ꦠꦺꦱꦸ ꦌꦮꦁ ꦄꦮꦤ꧀ꦢꦶꦠ꧀ꦮꦴ ꦤꦶꦱꦶꦤ꧀ꦤꦺꦱꦸ ꦨꦒꦮꦴ ꦠꦺꦱꦁ ꦄꦗ꧀ꦙꦴꦱꦪꦁ ꦎꦭꦺꦴꦏꦺꦠ꧀ꦮꦴ ‘‘ꦤ ꦩꦁ ꦚꦴꦠꦪꦺꦴ ꦮꦤ꧀ꦢꦤ꧀ꦠꦶ, ꦲꦤ꧀ꦢ ꦢꦴꦤꦶ ꦠꦺ ꦮꦤ꧀ꦢꦴꦥꦺꦱ꧀ꦱꦴꦩꦷ’’ꦠꦶ ꦄꦨꦶꦚ꧀ꦚꦴꦥꦴꦢꦏꦁ ꦕꦠꦸꦠ꧀ꦡꦁ ꦙꦴꦤꦁ ꦱꦩꦴꦥꦗ꧀ꦗꦶꦠ꧀ꦮꦴ ꦠꦠꦺꦴ ꦮꦸꦛ꧀ꦜꦴꦪ ꦄꦴꦏꦴꦱꦁ ꦄꦧ꧀ꦨꦸꦒ꧀ꦒꦤ꧀ꦠ꧀ꦮꦴ ꦠꦺꦱꦁ ꦱꦷꦱꦺ ꦥꦴꦢꦥꦁꦱꦸꦁ ꦎꦏꦶꦫꦩꦴꦤꦺꦴ ꦮꦶꦪ ꦏꦟ꧀ꦝꦩ꧀ꦧꦫꦸꦏ꧀ꦑꦩꦹꦭꦺ ꦪꦩꦏꦥꦴꦛꦶꦲꦴꦫꦶꦪꦱꦢꦶꦱꦁ ꦥꦴꦛꦶꦲꦴꦫꦶꦪꦁ ꦄꦏꦴꦱꦶ. ꦫꦴꦗꦴ ꦠꦁ ꦄꦕ꧀ꦖꦫꦶꦪꦁ ꦢꦶꦱ꧀ꦮꦴ ꦄꦴꦲ – ‘‘ꦨꦤ꧀ꦠꦺ, ꦠꦸꦩ꧀ꦲꦴꦏꦁ ꦗꦴꦠꦢꦶꦮꦱꦺ ꦏꦴꦭꦢꦺꦮꦭꦱ꧀ꦱ ꦮꦤ꧀ꦢꦤꦠ꧀ꦡꦁ ꦈꦥꦤꦷꦠꦴꦤꦁ ꦮꦺꦴꦥꦴꦢꦺ ꦥꦫꦶꦮꦠ꧀ꦠꦺꦠ꧀ꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦩꦠ꧀ꦡꦏꦺ ꦥꦠꦶꦛ꧀ꦜꦶꦠꦺ ꦢꦶꦱ꧀ꦮꦴꦥꦶ ꦄꦲꦁ ꦠꦸꦩ꧀ꦲꦴꦏꦁ ꦥꦴꦢꦺ ꦮꦤ꧀ꦢꦶꦁ, ꦄꦪꦁ ꦩꦺ ꦥꦜꦩꦮꦤ꧀ꦢꦤꦴ. ꦮꦥ꧀ꦥꦩꦔ꧀ꦒꦭꦢꦶꦮꦱꦺ ꦕ ꦗꦩ꧀ꦧꦸꦕ꧀ꦖꦴꦪꦴꦪ ꦱꦶꦫꦶꦱꦪꦤꦺ ꦤꦶꦥꦤ꧀ꦤꦴꦤꦁ ꦮꦺꦴꦗꦩ꧀ꦧꦸꦕ꧀ꦖꦴꦪꦴꦪ ꦄꦥꦫꦶꦮꦠ꧀ꦠꦤꦁ ꦢꦶꦱ꧀ꦮꦴꦥꦶ ꦥꦴꦢꦺ ꦮꦤ꧀ꦢꦶꦁ, ꦄꦪꦁ ꦩꦺ ꦢꦸꦠꦶꦪꦮꦤ꧀ꦢꦤꦴ. ꦆꦢꦴꦤꦶ ꦥꦤ ꦆꦩꦁ ꦄꦢꦶꦛ꧀ꦜꦥꦸꦧ꧀ꦧꦁ ꦥꦴꦛꦶꦲꦴꦫꦶꦪꦁ ꦢꦶꦱ꧀ꦮꦴꦥꦶ ꦄꦲꦁ ꦠꦸꦩ꧀ꦲꦴꦏꦁ ꦥꦴꦢꦺ ꦮꦤ꧀ꦢꦴꦩꦶ, ꦄꦪꦁ ꦩꦺ ꦠꦠꦶꦪꦮꦤ꧀ꦢꦤꦴ’’ꦠꦶ. ꦫꦚ꧀ꦚꦴ ꦥꦤ ꦮꦤ꧀ꦢꦶꦠꦺ ꦨꦒꦮꦤ꧀ꦠꦁ ꦄꦮꦤ꧀ꦢꦶꦠ꧀ꦮꦴ ꦜꦴꦠꦸꦁ ꦱꦩꦠ꧀ꦡꦺꦴ ꦤꦴꦩ ꦌꦏꦱꦴꦏꦶꦪꦺꦴꦥꦶ ꦤꦴꦲꦺꦴꦱꦶ, ꦱꦧ꧀ꦧꦺ ꦮꦤ꧀ꦢꦶꦁꦱꦸꦪꦺꦮ.

ꦆꦠꦶ ꦨꦒꦮꦴ ꦚꦴꦠꦪꦺꦴ ꦮꦤ꧀ꦢꦴꦥꦺꦠ꧀ꦮꦴ ꦄꦴꦏꦴꦱꦠꦺꦴ ꦎꦠꦫꦶꦠ꧀ꦮꦴ ꦥꦚ꧀ꦚꦠ꧀ꦠꦴꦱꦤꦺ ꦤꦶꦱꦷꦢꦶ. ꦤꦶꦱꦶꦤ꧀ꦤꦺ ꦨꦒꦮꦠꦶ ꦱꦶꦑꦴꦥꦠ꧀ꦠꦺꦴ ꦚꦴꦠꦶꦱꦩꦴꦒꦩꦺꦴ ꦄꦲꦺꦴꦱꦶ, ꦱꦧ꧀ꦧꦺ ꦌꦏꦒ꧀ꦒꦕꦶꦠ꧀ꦠꦴ ꦲꦸꦠ꧀ꦮꦴ ꦤꦶꦱꦷꦢꦶꦁꦱꦸ. ꦠꦠꦺꦴ ꦩꦲꦴꦩꦺꦓꦺꦴ ꦥꦺꦴꦏ꧀ꦑꦫꦮꦱ꧀ꦱꦁ ꦮꦱ꧀ꦱꦶ. ꦠꦩ꧀ꦧꦮꦟ꧀ꦟꦁ ꦈꦢꦏꦁ ꦲꦺꦛ꧀ꦜꦴ ꦮꦶꦫꦮꦤ꧀ꦠꦁ ꦒꦕ꧀ꦖꦠꦶ, ꦠꦺꦩꦶꦠꦸꦏꦴꦩꦺꦴꦮ ꦠꦺꦩꦺꦠꦶ, ꦄꦠꦺꦩꦶꦠꦸꦏꦴꦩꦱ꧀ꦱ ꦱꦫꦷꦫꦺ ꦌꦏꦧꦶꦤ꧀ꦢꦸꦩꦠ꧀ꦠꦩ꧀ꦥꦶ ꦤ ꦥꦠꦠꦶ. ꦠꦁ ꦢꦶꦱ꧀ꦮꦴ ꦱꦧ꧀ꦧꦺ ꦄꦕ꧀ꦖꦫꦶꦪꦧ꧀ꦨꦸꦠꦕꦶꦠ꧀ꦠꦴ ꦗꦴꦠꦴ ‘‘ꦄꦲꦺꦴ ꦄꦕ꧀ꦖꦫꦶꦪꦁ, ꦄꦲꦺꦴ ꦄꦧ꧀ꦨꦸꦠ’’ꦤ꧀ꦠꦶ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ. ꦱꦠ꧀ꦡꦴ ‘‘ꦤ ꦆꦢꦴꦤꦺꦮ ꦩꦪ꧀ꦲꦁ ꦚꦴꦠꦶꦱꦩꦴꦒꦩꦺ ꦥꦺꦴꦏ꧀ꦑꦫꦮꦱ꧀ꦱꦁ ꦮꦱ꧀ꦱꦠꦶ, ꦄꦠꦷꦠꦺꦥꦶ ꦮꦱ꧀ꦱꦷ’’ꦠꦶ ꦆꦩꦶꦱ꧀ꦱꦴ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴ ꦮꦺꦱ꧀ꦱꦤ꧀ꦠꦫꦗꦴꦠꦏꦁ (ꦗꦴ. ꧒.꧒꧒.꧑꧖꧕꧕ ꦄꦴꦢꦪꦺꦴ) ꦏꦡꦺꦱꦶ. ꦣꦩ꧀ꦩꦏꦡꦁ ꦱꦸꦠ꧀ꦮꦴ ꦱꦧ꧀ꦧꦺ ꦈꦛ꧀ꦜꦴꦪ ꦮꦤ꧀ꦢꦶꦠ꧀ꦮꦴ ꦥꦏ꧀ꦏꦩꦶꦁꦱꦸ. ꦌꦏꦺꦴꦥꦶ ꦫꦴꦗꦴ ꦮꦴ ꦫꦴꦗꦩꦲꦴꦩꦠ꧀ꦠꦺꦴ ꦮꦴ ‘‘ꦱ꧀ꦮꦺ ꦄꦩ꧀ꦲꦴꦏꦁ ꦨꦶꦏ꧀ꦑꦁ ꦒꦟ꧀ꦲꦡꦴ’’ꦠꦶ ꦮꦠ꧀ꦮꦴ ꦒꦠꦺꦴ ꦤꦴꦩ ꦤꦠ꧀ꦡꦶ.

ꦱꦠ꧀ꦡꦴ ꦥꦸꦤꦢꦶꦮꦱꦺ ꦮꦷꦱꦠꦶꦨꦶꦏ꧀ꦑꦸꦱꦲꦱ꧀ꦱꦥꦫꦶꦮꦸꦠꦺꦴ ꦏꦥꦶꦭꦮꦠ꧀ꦡꦸꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦠꦁ ꦤ ꦏꦺꦴꦕꦶ ꦒꦤ꧀ꦠ꧀ꦮꦴ ꦤꦶꦩꦤ꧀ꦠꦺꦱꦶ, ꦤ ꦥꦠ꧀ꦠꦁ ꦮꦴ ꦄꦒ꧀ꦒꦲꦺꦱꦶ. ꦨꦒꦮꦴ ꦆꦤ꧀ꦢꦑꦷꦭꦺ ꦜꦶꦠꦺꦴꦮ ꦄꦴꦮꦗ꧀ꦗꦺꦱꦶ – ‘‘ꦏꦡꦁ ꦤꦸ ꦑꦺꦴ ꦥꦸꦧ꧀ꦧꦧꦸꦢ꧀ꦣꦴ ꦏꦸꦭꦤꦒꦫꦺ ꦥꦶꦟ꧀ꦝꦴꦪ ꦕꦫꦶꦁꦱꦸ, ꦏꦶꦁ ꦈꦥ꧀ꦥꦛꦶꦥꦴꦛꦶꦪꦴ ꦆꦱ꧀ꦱꦫꦗꦤꦴꦤꦁ ꦓꦫꦴꦤꦶ ꦄꦒꦩꦁꦱꦸ, ꦈꦢꦴꦲꦸ ꦱꦥꦢꦴꦤꦕꦴꦫꦶꦏꦁ ꦕꦫꦶꦁꦱꦹ’’ꦠꦶ? ꦠꦠꦺꦴ ꦌꦏꦧꦸꦢ꧀ꦣꦱ꧀ꦱꦥꦶ ꦈꦥ꧀ꦥꦛꦶꦥꦴꦛꦶꦪꦴ ꦒꦩꦤꦁ ꦄꦢꦶꦱ꧀ꦮꦴ ‘‘ꦩꦪꦴꦥꦶ ꦢꦴꦤꦶ ꦄꦪꦩꦺꦮ ꦠꦺꦱꦁ ꦮꦁꦱꦺꦴ ꦥꦒ꧀ꦒꦲꦺꦠꦧ꧀ꦧꦺꦴ, ꦄꦴꦪꦠꦶꦚ꧀ꦕ ꦩꦩ ꦱꦴꦮꦏꦴ ꦩꦩꦚ꧀ꦚꦺꦮ ꦄꦤꦸꦱꦶꦏ꧀ꦑꦤ꧀ꦠꦴ ꦥꦶꦟ꧀ꦝꦕꦴꦫꦶꦏꦮꦠ꧀ꦠꦁ ꦥꦫꦶꦥꦹꦫꦺꦱ꧀ꦱꦤ꧀ꦠꦷ’’ꦠꦶ ꦏꦺꦴꦛꦶꦪꦁ ꦤꦶꦮꦶꦛ꧀ꦜꦒꦺꦲꦠꦺꦴ ꦥꦛ꧀ꦜꦴꦪ ꦱꦥꦢꦴꦤꦁ ꦥꦶꦟ꧀ꦝꦴꦪ ꦕꦫꦶ. ‘‘ꦄꦪ꧀ꦪꦺꦴ ꦏꦶꦫ ꦱꦶꦢ꧀ꦣꦠ꧀ꦡꦏꦸꦩꦴꦫꦺꦴ ꦥꦶꦟ꧀ꦝꦴꦪ ꦕꦫꦠꦷ’’ꦠꦶ ꦢ꧀ꦮꦶꦨꦹꦩꦶꦏꦠꦶꦨꦹꦩꦶꦏꦴꦢꦷꦱꦸ ꦥꦴꦱꦴꦢꦺꦱꦸ ꦱꦷꦲꦥꦚ꧀ꦗꦫꦁ ꦮꦶꦮꦫꦶꦠ꧀ꦮꦴ ꦩꦲꦴꦗꦤꦺꦴ ꦢꦱ꧀ꦱꦤꦧ꧀ꦪꦴꦮꦛꦺꦴ ꦄꦲꦺꦴꦱꦶ.

ꦫꦴꦲꦸꦭꦩꦴꦠꦴꦥꦶ ꦢꦺꦮꦷ – ‘‘ꦄꦪ꧀ꦪꦥꦸꦠ꧀ꦠꦺꦴ ꦏꦶꦫ ꦆꦩꦱ꧀ꦩꦶꦁꦪꦺꦮ ꦤꦒꦫꦺ ꦩꦲꦤ꧀ꦠꦺꦤ ꦫꦴꦗꦴꦤꦸꦨꦴꦮꦺꦤ ꦱꦸꦮꦟ꧀ꦟꦱꦶꦮꦶꦏꦴꦢꦷꦲꦶ ꦮꦶꦕꦫꦶꦠ꧀ꦮꦴ ꦆꦢꦴꦤꦶ ꦏꦺꦱꦩꦱ꧀ꦱꦸꦁ ꦎꦲꦴꦫꦺꦠ꧀ꦮꦴ ꦏꦴꦱꦴꦪꦮꦠ꧀ꦡꦤꦶꦮꦴꦱꦤꦺꦴ ꦏꦥꦴꦭꦲꦠ꧀ꦡꦺꦴ ꦥꦶꦟ꧀ꦝꦴꦪ ꦕꦫꦠꦶ, ꦱꦺꦴꦨꦠꦶ ꦤꦸ ꦑꦺꦴ’’ꦠꦶ ꦱꦷꦲꦥꦚ꧀ꦗꦫꦁ ꦮꦶꦮꦫꦶꦠ꧀ꦮꦴ ꦎꦭꦺꦴꦏꦪꦩꦴꦤꦴ ꦨꦒꦮꦤ꧀ꦠꦁ ꦤꦴꦤꦴꦮꦶꦫꦴꦒꦱꦩꦸꦗ꧀ꦗꦭꦴꦪ ꦱꦫꦷꦫꦥ꧀ꦥꦨꦴꦪ ꦤꦒꦫꦮꦷꦡꦶꦪꦺꦴ ꦎꦨꦴꦱꦺꦠ꧀ꦮꦴ ꦧ꧀ꦪꦴꦩꦥ꧀ꦥꦨꦴꦥꦫꦶꦏ꧀ꦑꦺꦥꦱꦩꦸꦥꦧ꧀ꦪꦹꦭ꦳꧀ꦲꦴꦪ ꦄꦱꦷꦠꦴꦤꦸꦧ꧀ꦪꦚ꧀ꦗꦤꦥ꧀ꦥꦨꦴꦱꦶꦠꦴꦪ ꦢ꧀ꦮꦠ꧀ꦠꦶꦁꦱꦩꦲꦴꦥꦸꦫꦶꦱꦭꦏ꧀ꦑꦟꦥꦛꦶꦩꦟ꧀ꦝꦶꦠꦴꦪ ꦄꦤꦺꦴꦥꦩꦴꦪ ꦧꦸꦢ꧀ꦣꦱꦶꦫꦶꦪꦴ ꦮꦶꦫꦺꦴꦕꦩꦴꦤꦁ ꦢꦶꦱ꧀ꦮꦴ ꦈꦟ꧀ꦲꦷꦱꦠꦺꦴ ꦥꦛ꧀ꦜꦴꦪ ꦪꦴꦮ ꦥꦴꦢꦠꦭꦴ –

‘‘ꦱꦶꦤꦶꦢ꧀ꦣꦤꦷꦭꦩꦸꦢꦸꦏꦸꦚ꧀ꦕꦶꦠꦏꦺꦱꦺꦴ, ꦱꦹꦫꦶꦪꦤꦶꦩ꧀ꦩꦭꦠꦭꦴꦨꦶꦤꦭꦴꦛꦺꦴ;

ꦪꦸꦠ꧀ꦠꦠꦸꦔ꧀ꦒꦩꦸꦢꦸꦏꦴꦪꦠꦤꦴꦱꦺꦴ, ꦫꦁꦱꦶꦗꦴꦭꦮꦶꦏꦱꦶꦠꦺꦴ ꦤꦫꦱꦷꦲꦺꦴ’’ꦠꦶ. –

ꦌꦮꦩꦴꦢꦶꦏꦴꦲꦶ ꦢꦱꦲꦶ ꦤꦫꦱꦷꦲꦒꦴꦡꦴꦲꦶ ꦄꦨꦶꦠ꧀ꦡꦮꦶꦠ꧀ꦮꦴ ‘‘ꦠꦸꦩ꧀ꦲꦴꦏꦁ ꦥꦸꦠ꧀ꦠꦺꦴ ꦥꦶꦟ꧀ꦝꦴꦪ ꦕꦫꦠꦷ’’ꦠꦶ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ. ꦫꦴꦗꦴ ꦱꦁꦮꦶꦒ꧀ꦒꦲꦢꦪꦺꦴ ꦲꦠ꧀ꦡꦺꦤ ꦱꦴꦛꦏꦁ ꦱꦟ꧀ꦝꦥꦺꦤ꧀ꦠꦺꦴ ꦠꦸꦫꦶꦠꦠꦸꦫꦶꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦮꦺꦒꦺꦤ ꦒꦤ꧀ꦠ꧀ꦮꦴ ꦨꦒꦮꦠꦺꦴ ꦥꦸꦫꦠꦺꦴ ꦜꦠ꧀ꦮꦴ ꦄꦴꦲ – ‘‘ꦏꦶꦤ꧀ꦤꦸ ꦑꦺꦴ, ꦨꦤ꧀ꦠꦺ, ꦄꦩ꧀ꦲꦺ ꦭꦗ꧀ꦗꦴꦥꦺꦡ, ꦏꦶꦩꦠ꧀ꦡꦁ ꦥꦶꦟ꧀ꦝꦴꦪ ꦕꦫꦡ, ꦏꦶꦁ ‘ꦌꦠ꧀ꦠꦏꦴꦤꦁ ꦨꦶꦏ꧀ꦑꦹꦤꦁ ꦤ ꦱꦏ꧀ꦏꦴ ꦨꦠ꧀ꦠꦁ ꦭꦢ꧀ꦣꦸ’ꦤ꧀ꦠꦶ ꦱꦚ꧀ꦚꦁ ꦏꦫꦶꦠ꧀ꦡꦴ’’ꦠꦶ? ‘‘ꦮꦁꦱꦕꦴꦫꦶꦠ꧀ꦠꦩꦺꦠꦁ, ꦩꦲꦴꦫꦴꦗ, ꦄꦩ꧀ꦲꦴꦏ’’ꦤ꧀ꦠꦶ. ‘‘ꦤꦤꦸ, ꦨꦤ꧀ꦠꦺ, ꦄꦩ꧀ꦲꦴꦏꦁ ꦮꦁꦱꦺꦴ ꦤꦴꦩ ꦩꦲꦴꦱꦩ꧀ꦩꦠꦑꦠ꧀ꦠꦶꦪꦮꦁꦱꦺꦴ, ꦌꦠ꧀ꦡ ꦕ ꦌꦏꦑꦠ꧀ꦠꦶꦪꦺꦴꦥꦶ ꦨꦶꦏ꧀ꦑꦴꦕꦫꦏꦺꦴ ꦤꦴꦩ ꦤꦠ꧀ꦡꦷ’’ꦠꦶ. ‘‘ꦄꦪꦁ, ꦩꦲꦴꦫꦴꦗ, ꦑꦠ꧀ꦠꦶꦪꦮꦁꦱꦺꦴ ꦤꦴꦩ ꦠꦮ ꦮꦁꦱꦺꦴ. ꦄꦩ꧀ꦲꦴꦏꦁ ꦥꦤ ‘ꦢꦷꦥꦔ꧀ꦏꦫꦺꦴ ꦏꦺꦴꦟ꧀ꦝꦚ꧀ꦚꦺꦴ…ꦥꦺ… ꦏꦱ꧀ꦱꦥꦺꦴ’ꦠꦶ ꦄꦪꦁ ꦧꦸꦢ꧀ꦣꦮꦁꦱꦺꦴ ꦤꦴꦩ. ꦌꦠꦺ ꦕ ꦄꦚ꧀ꦚꦺ ꦕ ꦄꦤꦺꦏꦱꦲꦱ꧀ꦱꦱꦔ꧀ꦑꦴ ꦧꦸꦢ꧀ꦣꦴ ꦨꦶꦏ꧀ꦑꦴꦕꦴꦫꦺꦤꦺꦮ ꦗꦷꦮꦶꦏꦁ ꦏꦥ꧀ꦥꦺꦱꦸ’’ꦤ꧀ꦠꦶ ꦄꦤ꧀ꦠꦫꦮꦷꦡꦶꦪꦁ ꦜꦶꦠꦺꦴꦮ –

‘‘ꦈꦠ꧀ꦠꦶꦛ꧀ꦜꦺ ꦤꦥ꧀ꦥꦩꦗ꧀ꦗꦺꦪ꧀ꦪ, ꦣꦩ꧀ꦩꦁ ꦱꦸꦕꦫꦶꦠꦁ ꦕꦫꦺ;

ꦣꦩ꧀ꦩꦕꦴꦫꦷ ꦱꦸꦑꦁ ꦱꦺꦠꦶ, ꦄꦱ꧀ꦩꦶꦁ ꦭꦺꦴꦏꦺ ꦥꦫꦩ꧀ꦲꦶ ꦕꦴ’’ꦠꦶ. (ꦣ. ꦥ. ꧑꧖꧘) –

ꦆꦩꦁ ꦒꦴꦡꦩꦴꦲ. ꦒꦴꦡꦴꦥꦫꦶꦪꦺꦴꦱꦴꦤꦺ ꦫꦴꦗꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦱꦶ.

‘‘ꦣꦩ꧀ꦩꦚ꧀ꦕꦫꦺ ꦱꦸꦕꦫꦶꦠꦁ, ꦤ ꦤꦁ ꦢꦸꦕ꧀ꦕꦫꦶꦠꦁ ꦕꦫꦺ;

ꦣꦩ꧀ꦩꦕꦴꦫꦷ ꦱꦸꦑꦁ ꦱꦺꦠꦶ, ꦄꦱ꧀ꦩꦶꦁ ꦭꦺꦴꦏꦺ ꦥꦫꦩ꧀ꦲꦶ ꦕꦴ’’ꦠꦶ. (ꦣ. ꦥ. ꧑꧖꧙) –

ꦆꦩꦁ ꦒꦴꦡꦁ ꦱꦸꦠ꧀ꦮꦴ ꦱꦏꦢꦴꦒꦴꦩꦶꦦꦭꦺ ꦥꦠꦶꦛ꧀ꦜꦴꦱꦶ, ꦩꦲꦴꦣꦩ꧀ꦩꦥꦴꦭꦗꦴꦠꦏꦁ (ꦗꦴ. ꧑.꧑꧐.꧙꧒ ꦄꦴꦢꦪꦺꦴ) ꦱꦸꦠ꧀ꦮꦴ ꦄꦤꦴꦒꦴꦩꦶꦦꦭꦺ ꦥꦠꦶꦛ꧀ꦜꦴꦱꦶ, ꦩꦫꦟꦱꦩꦪꦺ ꦱꦺꦠꦕ꧀ꦖꦠ꧀ꦠꦱ꧀ꦱ ꦲꦺꦛ꧀ꦜꦴ ꦱꦶꦫꦶꦱꦪꦤꦺ ꦤꦶꦥꦤ꧀ꦤꦺꦴꦪꦺꦮ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦄꦫꦚ꧀ꦚꦮꦴꦱꦺꦤ ꦥꦣꦴꦤꦴꦤꦸꦪꦺꦴꦒꦏꦶꦕ꧀ꦕꦁ ꦫꦚ꧀ꦚꦺꦴ ꦤꦴꦲꦺꦴꦱꦶ. ꦱꦺꦴ ꦱꦺꦴꦠꦴꦥꦠ꧀ꦠꦶꦦꦭꦁ ꦱꦕ꧀ꦖꦶꦏꦠ꧀ꦮꦴꦪꦺꦮ ꦥꦤ ꦨꦒꦮꦠꦺꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦱꦥꦫꦶꦱꦁ ꦨꦒꦮꦤ꧀ꦠꦁ ꦩꦲꦴꦥꦴꦱꦴꦢꦁ ꦄꦴꦫꦺꦴꦥꦺꦠ꧀ꦮꦴ ꦥꦟꦷꦠꦺꦤ ꦑꦴꦢꦤꦷꦪꦺꦤ ꦨꦺꦴꦗꦤꦷꦪꦺꦤ ꦥꦫꦶꦮꦶꦱꦶ. ꦨꦠ꧀ꦠꦏꦶꦕ꧀ꦕꦥꦫꦶꦪꦺꦴꦱꦴꦤꦺ ꦱꦧ꧀ꦧꦁ ꦆꦠ꧀ꦡꦴꦒꦴꦫꦁ ꦄꦴꦒꦤ꧀ꦠ꧀ꦮꦴ ꦨꦒꦮꦤ꧀ꦠꦁ ꦮꦤ꧀ꦢꦶ ꦜꦥꦺꦠ꧀ꦮꦴ ꦫꦴꦲꦸꦭꦩꦴꦠꦫꦁ. ꦱꦴ ꦥꦤ ‘‘ꦒꦕ꧀ꦖ, ꦄꦪ꧀ꦪꦥꦸꦠ꧀ꦠꦁ ꦮꦤ꧀ꦢꦴꦲꦷ’’ꦠꦶ ꦥꦫꦶꦗꦤꦺꦤ ꦮꦸꦕ꧀ꦕꦩꦴꦤꦴꦥꦶ ‘‘ꦱꦕꦺ ꦩꦪ꧀ꦲꦁ ꦒꦸꦟꦺꦴ ꦄꦠ꧀ꦡꦶ, ꦱꦪꦩꦺꦮ ꦩꦩ ꦱꦤ꧀ꦠꦶꦏꦁ ꦄꦪ꧀ꦪꦥꦸꦠ꧀ꦠꦺꦴ ꦄꦴꦒꦩꦶꦱ꧀ꦱꦠꦶ, ꦄꦴꦒꦠꦩꦺꦮ ꦤꦁ ꦮꦤ꧀ꦢꦶꦱ꧀ꦱꦴꦩꦷ’’ꦠꦶ ꦮꦠ꧀ꦮꦴ ꦤ ꦄꦒꦩꦴꦱꦶ.

ꦨꦒꦮꦴ ꦫꦴꦗꦴꦤꦁ ꦥꦠ꧀ꦠꦁ ꦒꦴꦲꦴꦥꦺꦠ꧀ꦮꦴ ꦢ꧀ꦮꦷꦲꦶ ꦄꦒ꧀ꦒꦱꦴꦮꦏꦺꦲꦶ ꦱꦢ꧀ꦣꦶꦁ ꦫꦴꦗꦣꦷꦠꦴꦪ ꦱꦶꦫꦶꦒꦧ꧀ꦨꦁ ꦒꦤ꧀ꦠ꧀ꦮꦴ ‘‘ꦫꦴꦗꦣꦷꦠꦴ ꦪꦡꦴꦫꦸꦕꦶ ꦮꦤ꧀ꦢꦩꦴꦤꦴ ꦤ ꦏꦶꦚ꧀ꦕꦶ ꦮꦠ꧀ꦠꦧ꧀ꦧꦴ’’ꦠꦶ ꦮꦠ꧀ꦮꦴ ꦥꦚ꧀ꦚꦠ꧀ꦠꦴꦱꦤꦺ ꦤꦶꦱꦷꦢꦶ. ꦱꦴ ꦮꦺꦒꦺꦤꦴꦒꦤ꧀ꦠ꧀ꦮꦴ ꦒꦺꦴꦥ꧀ꦦꦏꦺꦱꦸ ꦒꦲꦺꦠ꧀ꦮꦴ ꦥꦴꦢꦥꦶꦛ꧀ꦜꦶꦪꦁ ꦱꦷꦱꦁ ꦥꦫꦶꦮꦠ꧀ꦠꦺꦠ꧀ꦮꦴ ꦪꦡꦴꦗ꧀ꦙꦴꦱꦪꦁ ꦮꦤ꧀ꦢꦶ. ꦫꦴꦗꦴ ꦫꦴꦗꦣꦷꦠꦴꦪ ꦨꦒꦮꦠꦶ ꦱꦶꦤꦺꦲꦧꦲꦸꦩꦴꦤꦴꦢꦶꦒꦸꦟꦱꦩ꧀ꦥꦠ꧀ꦠꦶꦁ ꦏꦡꦺꦱꦶ – ‘‘ꦨꦤ꧀ꦠꦺ, ꦩꦩ ꦣꦷꦠꦴ ‘ꦠꦸꦩ꧀ꦲꦺꦲꦶ ꦏꦴꦱꦴꦪꦴꦤꦶ ꦮꦠ꧀ꦡꦴꦤꦶ ꦤꦶꦮꦴꦱꦶꦠꦴꦤꦷ’ꦠꦶ ꦱꦸꦠ꧀ꦮꦴ ꦠꦠꦺꦴ ꦥꦛ꧀ꦜꦴꦪ ꦏꦴꦱꦴꦪꦮꦠ꧀ꦡꦤꦶꦮꦠ꧀ꦡꦴ ꦗꦴꦠꦴ, ꦠꦸꦩ꧀ꦲꦴꦏꦁ ꦌꦏꦨꦠ꧀ꦠꦶꦏꦨꦴꦮꦁ ꦱꦸꦠ꧀ꦮꦴ ꦌꦏꦨꦠ꧀ꦠꦶꦏꦴꦮ ꦗꦴꦠꦴ, ꦠꦸꦩ꧀ꦲꦺꦲꦶ ꦩꦲꦴꦱꦪꦤꦱ꧀ꦱ ꦖꦝ꧀ꦝꦶꦠꦨꦴꦮꦁ ꦱꦸꦠ꧀ꦮꦴ ꦥꦛ꧀ꦛꦶꦏꦴꦩꦚ꧀ꦕꦏꦺꦪꦺꦮ ꦤꦶꦥꦤ꧀ꦤꦴ, ꦠꦸꦩ꧀ꦲꦴꦏꦁ ꦩꦴꦭꦴꦒꦤ꧀ꦣꦴꦢꦷꦲꦶ ꦮꦶꦫꦠꦨꦴꦮꦁ ꦚꦠ꧀ꦮꦴ ꦮꦶꦫꦠꦩꦴꦭꦴꦒꦤ꧀ꦣꦴꦮ ꦗꦴꦠꦴ, ꦄꦠ꧀ꦠꦤꦺꦴ ꦚꦴꦠꦏꦺꦲꦶ ‘ꦩꦪꦁ ꦥꦛꦶꦗꦒ꧀ꦒꦶꦱ꧀ꦱꦴꦩꦴ’ꦠꦶ ꦱꦴꦱꦤꦺ ꦥꦺꦱꦶꦠꦺꦥꦶ ꦠꦺꦱꦸ ꦌꦏꦚꦴꦠꦏꦩ꧀ꦥꦶ ꦤ ꦎꦭꦺꦴꦏꦺꦱꦶ, ꦌꦮꦁ ꦒꦸꦟꦱꦩ꧀ꦥꦤ꧀ꦤꦴ ꦩꦺ, ꦨꦤ꧀ꦠꦺ, ꦣꦷꦠꦴ’’ꦠꦶ. ‘‘ꦄꦤꦕ꧀ꦖꦫꦶꦪꦁ, ꦩꦲꦴꦫꦴꦗ, ꦄꦪꦁ ꦆꦢꦴꦤꦶ ꦠꦪꦴ ꦫꦏ꧀ꦑꦶꦪꦩꦴꦤꦴ ꦫꦴꦗꦣꦷꦠꦴ ꦥꦫꦶꦥꦏ꧀ꦏꦺ ꦚꦴꦟꦺ ꦄꦠ꧀ꦠꦴꦤꦁ ꦫꦏ꧀ꦑꦺꦪ꧀ꦪ, ꦌꦱꦴ ꦥꦸꦧ꧀ꦧꦺ ꦄꦤꦴꦫꦏ꧀ꦑꦴ ꦥꦧ꧀ꦧꦠꦥꦴꦢꦺ ꦮꦶꦕꦫꦩꦴꦤꦴ ꦄꦥꦫꦶꦥꦏ꧀ꦏꦺꦥꦶ ꦚꦴꦟꦺ ꦄꦠ꧀ꦠꦴꦤꦁ ꦫꦏ꧀ꦑꦷ’’ꦠꦶ ꦮꦠ꧀ꦮꦴ ꦕꦤ꧀ꦢꦏꦶꦤ꧀ꦤꦫꦷꦗꦴꦠꦏꦁ (ꦗꦴ. ꧑.꧑꧔.꧑꧘ ꦄꦴꦢꦪꦺꦴ) ꦏꦡꦺꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ.

ꦥꦸꦤꦢꦶꦮꦱꦺ ꦥꦤ ꦤꦤ꧀ꦢꦱ꧀ꦱ ꦫꦴꦗꦏꦸꦩꦴꦫꦱ꧀ꦱ ꦄꦨꦶꦱꦺꦏꦒꦺꦲꦥ꧀ꦥꦮꦺꦱꦤꦮꦶꦮꦴꦲꦩꦔ꧀ꦒꦭꦺꦱꦸ ꦮꦠ꧀ꦠꦩꦴꦤꦺꦱꦸ ꦠꦱ꧀ꦱ ꦒꦺꦲꦁ ꦒꦤ꧀ꦠ꧀ꦮꦴ ꦏꦸꦩꦴꦫꦁ ꦥꦠ꧀ꦠꦁ ꦒꦴꦲꦴꦥꦺꦠ꧀ꦮꦴ ꦥꦧ꧀ꦧꦴꦗꦺꦠꦸꦏꦴꦩꦺꦴ ꦩꦔ꧀ꦒꦭꦁ ꦮꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ. ꦗꦤꦥꦢꦏꦭ꧀ꦪꦴꦟꦷ ꦏꦸꦩꦴꦫꦁ ꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ‘‘ꦠꦸꦮꦛꦁ ꦑꦺꦴ, ꦄꦪ꧀ꦪꦥꦸꦠ꧀ꦠ, ꦄꦴꦒꦕ꧀ꦖꦺꦪ꧀ꦪꦴꦱꦷ’’ꦠꦶ ꦮꦠ꧀ꦮꦴ ꦒꦷꦮꦁ ꦥꦱꦴꦫꦺꦠ꧀ꦮꦴ ꦎꦭꦺꦴꦏꦺꦱꦶ. ꦱꦺꦴ ꦨꦒꦮꦤ꧀ꦠꦁ ‘‘ꦥꦠ꧀ꦠꦁ ꦒꦟ꧀ꦲꦡꦴ’’ꦠꦶ ꦮꦠ꧀ꦠꦸꦁ ꦄꦮꦶꦱꦲꦩꦴꦤꦺꦴ ꦮꦶꦲꦴꦫꦁꦪꦺꦮ ꦄꦒꦩꦴꦱꦶ. ꦠꦁ ꦄꦤꦶꦕ꧀ꦖꦩꦴꦤꦁꦪꦺꦮ ꦨꦒꦮꦴ ꦥꦧ꧀ꦧꦴꦗꦺꦱꦶ. ꦆꦠꦶ ꦨꦒꦮꦴ ꦏꦥꦶꦭꦮꦠ꧀ꦡꦸꦁ ꦒꦤ꧀ꦠ꧀ꦮꦴ ꦠꦠꦶꦪꦢꦶꦮꦱꦺ ꦤꦤ꧀ꦢꦁ ꦥꦧ꧀ꦧꦴꦗꦺꦱꦶ.

ꦱꦠ꧀ꦠꦩꦺ ꦢꦶꦮꦱꦺ ꦫꦴꦲꦸꦭꦩꦴꦠꦴꦥꦶ ꦏꦸꦩꦴꦫꦁ ꦄꦭꦔ꧀ꦏꦫꦶꦠ꧀ꦮꦴ ꦨꦒꦮꦠꦺꦴ ꦱꦤ꧀ꦠꦶꦏꦁ ꦥꦺꦱꦺꦱꦶ – ‘‘ꦥꦱ꧀ꦱ, ꦠꦴꦠ, ꦌꦠꦁ ꦮꦷꦱꦠꦶꦱꦲꦱ꧀ꦱꦱꦩꦟꦥꦫꦶꦮꦸꦠꦁ ꦱꦸꦮꦟ꧀ꦟꦮꦟ꧀ꦟꦁ ꦧ꧀ꦫꦲ꧀ꦩꦫꦹꦥꦮꦟ꧀ꦟꦁ ꦱꦩꦟꦁ, ꦄꦪꦁ ꦠꦺ ꦥꦶꦠꦴ, ꦌꦠꦱ꧀ꦱ ꦩꦲꦤ꧀ꦠꦴ ꦤꦶꦣꦪꦺꦴ ꦄꦲꦺꦱꦸꦁ ꦠ꧀ꦪꦱ꧀ꦱ ꦤꦶꦏ꧀ꦑꦩꦤꦏꦴꦭꦠꦺꦴ ꦥꦛ꧀ꦜꦴꦪ ꦤ ꦥꦱ꧀ꦱꦴꦩ, ꦒꦕ꧀ꦖ, ꦤꦁ ꦢꦴꦪꦗ꧀ꦗꦁ ꦪꦴꦕꦴꦲꦶ – ‘ꦄꦲꦁ, ꦠꦴꦠ, ꦏꦸꦩꦴꦫꦺꦴ ꦄꦨꦶꦱꦺꦏꦁ ꦥꦠ꧀ꦮꦴ ꦕꦏ꧀ꦏꦮꦠ꧀ꦠꦷ ꦨꦮꦶꦱ꧀ꦱꦴꦩꦶ, ꦣꦤꦺꦤ ꦩꦺ ꦄꦠ꧀ꦡꦺꦴ, ꦣꦤꦁ ꦩꦺ ꦢꦺꦲꦶ. ꦱꦴꦩꦶꦏꦺꦴ ꦲꦶ ꦥꦸꦠ꧀ꦠꦺꦴ ꦥꦶꦠꦸꦱꦤ꧀ꦠꦏꦱ꧀ꦱꦴ’’’ꦠꦶ. ꦏꦸꦩꦴꦫꦺꦴ ꦕ ꦨꦒꦮꦠꦺꦴ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴꦮ ꦥꦶꦠꦸꦱꦶꦤꦺꦲꦁ ꦭꦨꦶꦠ꧀ꦮꦴ ꦲꦛ꧀ꦜꦕꦶꦠ꧀ꦠꦺꦴ ‘‘ꦱꦸꦑꦴ ꦠꦺ, ꦱꦩꦟ, ꦖꦴꦪꦴ’’ꦠꦶ ꦮꦠ꧀ꦮꦴ ꦄꦚ꧀ꦚꦚ꧀ꦕ ꦧꦲꦸꦁ ꦄꦠ꧀ꦠꦤꦺꦴ ꦄꦤꦸꦫꦹꦥꦁ ꦮꦢꦤ꧀ꦠꦺꦴ ꦄꦛ꧀ꦜꦴꦱꦶ. ꦨꦒꦮꦴ ꦏꦠꦨꦠ꧀ꦠꦏꦶꦕ꧀ꦕꦺꦴ ꦄꦤꦸꦩꦺꦴꦢꦤꦁ ꦮꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ. ꦏꦸꦩꦴꦫꦺꦴꦥꦶ ‘‘ꦢꦴꦪꦗ꧀ꦗꦁ ꦩꦺ, ꦱꦩꦟ, ꦢꦺꦲꦶ, ꦢꦴꦪꦗ꧀ꦗꦁ ꦩꦺ, ꦱꦩꦟ, ꦢꦺꦲꦷ’’ꦠꦶ ꦨꦒꦮꦤ꧀ꦠꦁ ꦄꦤꦸꦧꦤ꧀ꦣꦶ. ꦤ ꦨꦒꦮꦴ ꦏꦸꦩꦴꦫꦁ ꦤꦶꦮꦠ꧀ꦠꦴꦥꦺꦱꦶ, ꦥꦫꦶꦗꦤꦺꦴꦥꦶ ꦨꦒꦮꦠꦴ ꦱꦢ꧀ꦣꦶꦁ ꦒꦕ꧀ꦖꦤ꧀ꦠꦁ ꦤꦶꦮꦠ꧀ꦠꦺꦠꦸꦁ ꦤꦴꦱꦏ꧀ꦑꦶ. ꦆꦠꦶ ꦱꦺꦴ ꦨꦒꦮꦠꦴ ꦱꦢ꧀ꦣꦶꦁ ꦄꦴꦫꦴꦩꦩꦺꦮ ꦄꦒꦩꦴꦱꦶ.

ꦠꦠꦺꦴ ꦨꦒꦮꦴ ꦕꦶꦤ꧀ꦠꦺꦱꦶ – ‘‘ꦪꦁ ꦄꦪꦁ ꦥꦶꦠꦸꦱꦤ꧀ꦠꦏꦁ ꦣꦤꦁ ꦆꦕ꧀ꦖꦠꦶ, ꦠꦁ ꦮꦛ꧀ꦛꦴꦤꦸꦒꦠꦁ ꦱꦮꦶꦓꦴꦠꦁ, ꦲꦤ꧀ꦢꦱ꧀ꦱ ꦩꦺ ꦧꦺꦴꦣꦶꦩꦟ꧀ꦝꦺ ꦥꦛꦶꦭꦢ꧀ꦣꦁ ꦱꦠ꧀ꦠꦮꦶꦣꦁ ꦄꦫꦶꦪꦣꦤꦁ ꦢꦺꦩꦶ, ꦭꦺꦴꦏꦸꦠ꧀ꦠꦫꦢꦴꦪꦗ꧀ꦗꦱ꧀ꦱ ꦤꦁ ꦱꦴꦩꦶꦏꦁ ꦏꦫꦺꦴꦩꦷ’’ꦠꦶ ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦄꦴꦩꦤ꧀ꦠꦺꦱꦶ – ‘‘ꦠꦺꦤ ꦲꦶ, ꦱꦴꦫꦶꦥꦸꦠ꧀ꦠ, ꦫꦴꦲꦸꦭꦁ ꦥꦧ꧀ꦧꦴꦗꦺꦲꦷ’’ꦠꦶ. ꦡꦺꦫꦺꦴ ꦠꦁ ꦥꦧ꧀ꦧꦴꦗꦺꦱꦶ. ꦥꦧ꧀ꦧꦗꦶꦠꦺ ꦕ ꦥꦤ ꦏꦸꦩꦴꦫꦺ ꦫꦚ꧀ꦚꦺꦴ ꦄꦣꦶꦩꦠ꧀ꦠꦁ ꦢꦸꦏ꧀ꦑꦁ ꦈꦥ꧀ꦥꦗ꧀ꦗꦶ, ꦠꦁ ꦄꦣꦶꦮꦴꦱꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦱꦴꦣꦸ, ꦨꦤ꧀ꦠꦺ, ꦄꦪ꧀ꦪꦴ ꦩꦴꦠꦴꦥꦶꦠꦹꦲꦶ ꦄꦤꦤꦸꦚ꧀ꦚꦴꦠꦁ ꦥꦸꦠ꧀ꦠꦁ ꦤ ꦥꦧ꧀ꦧꦴꦗꦺꦪ꧀ꦪꦸ’’ꦤ꧀ꦠꦶ ꦮꦫꦁ ꦪꦴꦕꦶ. ꦨꦒꦮꦴ ꦕ ꦠꦱ꧀ꦱ ꦮꦫꦁ ꦢꦠ꧀ꦮꦴ ꦥꦸꦤꦺꦏꦢꦶꦮꦱꦺ ꦫꦴꦗꦤꦶꦮꦺꦱꦤꦺ ꦏꦠꦨꦠ꧀ꦠꦏꦶꦕ꧀ꦕꦺꦴ ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦤ ꦫꦚ꧀ꦚꦴ ‘‘ꦨꦤ꧀ꦠꦺ, ꦠꦸꦩ꧀ꦲꦴꦏꦁ ꦢꦸꦏ꧀ꦏꦫꦏꦴꦫꦶꦏꦏꦴꦭꦺ ꦌꦏꦴ ꦢꦺꦮꦠꦴ ꦩꦁ ꦈꦥꦱꦔ꧀ꦏꦩꦶꦠ꧀ꦮꦴ ‘ꦥꦸꦠ꧀ꦠꦺꦴ ꦠꦺ ꦏꦴꦭꦔ꧀ꦏꦠꦺꦴ’ꦠꦶ ꦄꦴꦲ, ꦠꦱ꧀ꦱꦴ ꦮꦕꦤꦁ ꦄꦱꦢ꧀ꦢꦲꦤ꧀ꦠꦺꦴ ‘ꦤ ꦩꦪ꧀ꦲꦁ ꦥꦸꦠ꧀ꦠꦺꦴ ꦱꦩ꧀ꦧꦺꦴꦣꦶꦁ ꦄꦥ꧀ꦥꦠ꧀ꦮꦴ ꦏꦴꦭꦁ ꦏꦫꦺꦴꦠꦷ’ꦠꦶ ꦠꦁ ꦥꦛꦶꦏ꧀ꦑꦶꦥꦶ’’ꦤ꧀ꦠꦶ ꦮꦸꦠ꧀ꦠꦺ ‘‘ꦠꦸꦩ꧀ꦲꦺ ꦆꦢꦴꦤꦶ ꦏꦶꦁ ꦱꦢ꧀ꦢꦲꦶꦱ꧀ꦱꦡ, ꦪꦺ ꦠꦸꦩ꧀ꦲꦺ ꦥꦸꦧ꧀ꦧꦺꦥꦶ ꦄꦛ꧀ꦜꦶꦏꦴꦤꦶ ꦢꦱ꧀ꦱꦺꦠ꧀ꦮꦴ ‘ꦥꦸꦠ꧀ꦠꦺꦴ ꦠꦺ ꦩꦠꦺꦴ’ꦠꦶ ꦮꦸꦠ꧀ꦠꦺ ꦤ ꦱꦢ꧀ꦢꦲꦶꦠ꧀ꦡꦴ’’ꦠꦶ ꦆꦩꦶꦱ꧀ꦱꦴ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴ ꦩꦲꦴꦣꦩ꧀ꦩꦥꦴꦭꦗꦴꦠꦏꦁ ꦏꦡꦺꦱꦶ. ꦏꦡꦴꦥꦫꦶꦪꦺꦴꦱꦴꦤꦺ ꦫꦴꦗꦴ ꦄꦤꦴꦒꦴꦩꦶꦦꦭꦺ ꦥꦠꦶꦛ꧀ꦜꦲꦶ.

ꦆꦠꦶ ꦨꦒꦮꦴ ꦥꦶꦠꦫꦁ ꦠꦷꦱꦸ ꦦꦭꦺꦱꦸ ꦥꦠꦶꦛ꧀ꦜꦴꦥꦺꦠ꧀ꦮꦴ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ ꦥꦸꦤꦢꦺꦮ ꦫꦴꦗꦒꦲꦁ ꦒꦤ꧀ꦠ꧀ꦮꦴ ꦱꦷꦠꦮꦤꦺ ꦮꦶꦲꦴꦱꦶ. ꦠꦱ꧀ꦩꦶꦁ ꦱꦩꦪꦺ ꦄꦤꦴꦡꦥꦶꦟ꧀ꦝꦶꦏꦺꦴ ꦒꦲꦥꦠꦶ ꦥꦚ꧀ꦕꦲꦶ ꦱꦏꦛꦱꦠꦺꦲꦶ ꦨꦟ꧀ꦝꦁ ꦄꦴꦢꦴꦪ ꦫꦴꦗꦒꦲꦁ ꦒꦤ꧀ꦠ꧀ꦮꦴ ꦄꦠ꧀ꦠꦤꦺꦴ ꦥꦶꦪꦱꦲꦴꦪꦏꦱ꧀ꦱ ꦱꦺꦛ꧀ꦜꦶꦤꦺꦴ ꦒꦺꦲꦁ ꦒꦤ꧀ꦠ꧀ꦮꦴ ꦠꦠ꧀ꦡ ꦧꦸꦢ꧀ꦣꦱ꧀ꦱ ꦨꦒꦮꦠꦺꦴ ꦈꦥ꧀ꦥꦤ꧀ꦤꦨꦴꦮꦁ ꦱꦸꦠ꧀ꦮꦴ ꦧꦭꦮꦥꦕ꧀ꦕꦹꦱꦺ ꦢꦺꦮꦠꦴꦤꦸꦨꦴꦮꦺꦤ ꦮꦶꦮꦛꦺꦤ ꦢ꧀ꦮꦴꦫꦺꦤ ꦱꦠ꧀ꦡꦴꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ꦣꦩ꧀ꦩꦁ ꦱꦸꦠ꧀ꦮꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦪ, ꦢꦸꦠꦶꦪꦺ ꦢꦶꦮꦱꦺ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦱꦔ꧀ꦓꦱ꧀ꦱ ꦩꦲꦴꦢꦴꦤꦁ ꦢꦠ꧀ꦮꦴ ꦱꦴꦮꦠ꧀ꦡꦶꦁ ꦄꦴꦒꦩꦤꦠ꧀ꦡꦴꦪ ꦱꦠ꧀ꦡꦸ ꦥꦛꦶꦚ꧀ꦚꦁ ꦒꦲꦺꦠ꧀ꦮꦴ ꦄꦤ꧀ꦠꦫꦴꦩꦒ꧀ꦒꦺ ꦥꦚ꧀ꦕꦕꦠ꧀ꦠꦴꦭꦷꦱꦪꦺꦴꦗꦤꦛ꧀ꦜꦴꦤꦺ ꦱꦠꦱꦲꦱ꧀ꦱꦁ ꦢꦠ꧀ꦮꦴ ꦪꦺꦴꦗꦤꦶꦏꦺ ꦪꦺꦴꦗꦤꦶꦏꦺ ꦮꦶꦲꦴꦫꦁ ꦏꦴꦫꦺꦠ꧀ꦮꦴ ꦗꦺꦠꦮꦤꦁ ꦏꦺꦴꦛꦶꦱꦤ꧀ꦡꦴꦫꦺꦤ ꦄꦛ꧀ꦜꦴꦫꦱꦲꦶ ꦲꦶꦫꦚ꧀ꦚꦏꦺꦴꦛꦷꦲꦶ ꦏꦶꦟꦶꦠ꧀ꦮꦴ ꦤꦮꦏꦩ꧀ꦩꦁ ꦥꦛ꧀ꦜꦥꦺꦱꦶ. ꦱꦺꦴ ꦩꦗ꧀ꦙꦺ ꦢꦱꦧꦭꦱ꧀ꦱ ꦒꦤ꧀ꦣꦏꦸꦛꦶꦁ ꦏꦴꦫꦺꦱꦶ, ꦠꦁ ꦥꦫꦶꦮꦴꦫꦺꦠ꧀ꦮꦴ ꦄꦱꦷꦠꦶꦪꦴ ꦩꦲꦴꦡꦺꦫꦴꦤꦁ ꦥꦴꦛꦶꦪꦺꦏ꧀ꦏꦁ ꦌꦏꦱꦤ꧀ꦤꦶꦮꦺꦱꦤꦺ ꦄꦴꦮꦴꦱꦺ ꦌꦏꦏꦸꦛꦶꦏꦢ꧀ꦮꦶꦏꦸꦛꦶꦏꦲꦁꦱꦮꦛ꧀ꦛꦏꦢꦷꦓꦫꦱ꧀ꦱꦱꦴꦭꦴꦩꦟ꧀ꦝꦥꦴꦢꦶꦮꦱꦺꦤ ꦱꦺꦱꦱꦺꦤꦴꦱꦤꦴꦤꦶ ꦥꦺꦴꦏ꧀ꦑꦫꦟꦶꦕꦔ꧀ꦏꦩꦤꦫꦠ꧀ꦠꦶꦛ꧀ꦜꦴꦤꦢꦶꦮꦴꦛ꧀ꦜꦴꦤꦴꦤꦶ ꦕꦴꦠꦶ ꦄꦛ꧀ꦜꦴꦫꦱꦏꦺꦴꦛꦶꦥꦫꦶꦕ꧀ꦕꦴꦒꦺꦤ ꦫꦩꦟꦷꦪꦺ ꦨꦹꦩꦶꦨꦴꦒꦺ ꦩꦤꦺꦴꦫꦩꦁ ꦮꦶꦲꦴꦫꦁ ꦏꦴꦫꦺꦠ꧀ꦮꦴ ꦢꦱꦧꦭꦱ꧀ꦱ ꦄꦴꦒꦩꦤꦠ꧀ꦡꦴꦪ ꦢꦹꦠꦁ ꦥꦴꦲꦺꦱꦶ. ꦱꦠ꧀ꦡꦴ ꦠꦱ꧀ꦱ ꦮꦕꦤꦁ ꦱꦸꦠ꧀ꦮꦴ ꦩꦲꦴꦨꦶꦏ꧀ꦑꦸꦱꦔ꧀ꦓꦥꦫꦶꦮꦴꦫꦺꦴ ꦫꦴꦗꦒꦲꦴ ꦤꦶꦏ꧀ꦑꦩꦶꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦱꦴꦮꦠ꧀ꦡꦶꦤꦒꦫꦁ ꦥꦴꦥꦸꦟꦶ.

ꦩꦲꦴꦱꦺꦛ꧀ꦜꦶꦥꦶ ꦑꦺꦴ ꦮꦶꦲꦴꦫꦩꦲꦁ ꦱꦗ꧀ꦗꦺꦠ꧀ꦮꦴ ꦠꦡꦴꦒꦠꦱ꧀ꦱ ꦗꦺꦠꦮꦤꦁ ꦥꦮꦶꦱꦤꦢꦶꦮꦱꦺ ꦥꦸꦠ꧀ꦠꦁ ꦱꦧ꧀ꦧꦴꦭꦔ꧀ꦏꦴꦫꦥꦛꦶꦩꦟ꧀ꦝꦶꦠꦁ ꦏꦠ꧀ꦮꦴ ꦄꦭꦔ꧀ꦏꦠꦥꦛꦶꦪꦠ꧀ꦠꦺꦲꦺꦮ ꦥꦚ꧀ꦕꦲꦶ ꦏꦸꦩꦴꦫꦱꦠꦺꦲꦶ ꦱꦢ꧀ꦣꦶꦁ ꦥꦺꦱꦺꦱꦶ. ꦱꦺꦴ ꦱꦥꦫꦶꦮꦴꦫꦺꦴ ꦥꦚ꧀ꦕꦮꦟ꧀ꦟꦮꦠ꧀ꦡꦱꦩꦸꦗ꧀ꦗꦭꦴꦤꦶ ꦥꦚ꧀ꦕ ꦣꦗꦱꦠꦴꦤꦶ ꦒꦲꦺꦠ꧀ꦮꦴ ꦢꦱꦧꦭꦱ꧀ꦱ ꦥꦸꦫꦠꦺꦴ ꦄꦲꦺꦴꦱꦶ, ꦠꦺꦱꦁ ꦥꦕ꧀ꦖꦠꦺꦴ ꦩꦲꦴꦱꦸꦨꦢ꧀ꦢꦴ ꦕꦹꦭ꦳ꦱꦸꦨꦢ꧀ꦢꦴꦠꦶ ꦢ꧀ꦮꦺ ꦱꦺꦛ꧀ꦜꦶꦣꦷꦠꦫꦺꦴ ꦥꦚ꧀ꦕꦲꦶ ꦏꦸꦩꦴꦫꦶꦏꦴꦱꦠꦺꦲꦶ ꦱꦢ꧀ꦣꦶꦁ ꦥꦸꦟ꧀ꦟꦓꦛꦺ ꦒꦲꦺꦠ꧀ꦮꦴ ꦤꦶꦏ꧀ꦑꦩꦶꦁꦱꦸ, ꦠꦴꦱꦁ ꦥꦕ꧀ꦖꦠꦺꦴ ꦱꦺꦛ꧀ꦜꦶꦨꦫꦶꦪꦴ ꦱꦧ꧀ꦧꦴꦭꦔ꧀ꦏꦴꦫꦥꦛꦶꦩꦟ꧀ꦝꦶꦠꦴ ꦥꦚ꧀ꦕꦲꦶ ꦩꦴꦠꦸꦒꦴꦩꦱꦠꦺꦲꦶ ꦱꦢ꧀ꦣꦶꦁ ꦥꦸꦟ꧀ꦟꦥꦴꦠꦶꦪꦺꦴ ꦒꦲꦺꦠ꧀ꦮꦴ ꦤꦶꦏ꧀ꦑꦩꦶ, ꦱꦧ꧀ꦧꦺꦱꦁ ꦥꦕ꧀ꦖꦠꦺꦴ ꦩꦲꦴꦱꦺꦛ꧀ꦜꦶ ꦄꦲꦠꦮꦠ꧀ꦡꦤꦶꦮꦠ꧀ꦡꦺꦴ ꦄꦲꦠꦮꦠ꧀ꦡꦤꦶꦮꦠ꧀ꦡꦺꦲꦺꦮ ꦥꦚ꧀ꦕꦲꦶ ꦱꦺꦛ꧀ꦜꦶꦱꦠꦺꦲꦶ ꦱꦢ꧀ꦣꦶꦁ ꦨꦒꦮꦤ꧀ꦠꦁ ꦄꦧ꧀ꦨꦸꦒ꧀ꦒꦚ꧀ꦖꦶ. ꦨꦒꦮꦴ ꦆꦩꦁ ꦈꦥꦴꦱꦏꦥꦫꦶꦱꦁ ꦥꦸꦫꦠꦺꦴ ꦏꦠ꧀ꦮꦴ ꦩꦲꦴꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ ꦄꦠ꧀ꦠꦤꦺꦴ ꦱꦫꦷꦫꦥ꧀ꦥꦨꦴꦪ ꦱꦸꦮꦟ꧀ꦟꦫꦱꦱꦺꦏꦱꦶꦚ꧀ꦕꦤꦴꦤꦶ ꦮꦶꦪ ꦮꦤꦤ꧀ꦠꦫꦴꦤꦶ ꦏꦸꦫꦸꦩꦴꦤꦺꦴ ꦄꦤꦤ꧀ꦠꦴꦪ ꦧꦸꦢ꧀ꦣꦭꦷꦭꦴꦪ ꦄꦥꦫꦶꦩꦴꦟꦴꦪ ꦧꦸꦢ꧀ꦣꦱꦶꦫꦶꦪꦴ ꦗꦺꦠꦮꦤꦮꦶꦲꦴꦫꦁ ꦥꦴꦮꦶꦱꦶ.

ꦄꦡ ꦤꦁ ꦄꦤꦴꦡꦥꦶꦟ꧀ꦝꦶꦏꦺꦴ ꦄꦴꦥꦸꦕ꧀ꦖꦶ – ‘‘ꦏꦡꦴꦲꦁ, ꦨꦤ꧀ꦠꦺ, ꦆꦩꦱ꧀ꦩꦶꦁ ꦮꦶꦲꦴꦫꦺ ꦥꦛꦶꦥꦗ꧀ꦗꦴꦩꦷ’’ꦠꦶ? ‘‘ꦠꦺꦤ ꦲꦶ, ꦒꦲꦥꦠꦶ, ꦆꦩꦁ ꦮꦶꦲꦴꦫꦁ ꦄꦴꦒꦠꦴꦤꦴꦒꦠꦱ꧀ꦱ ꦕꦴꦠꦸꦢ꧀ꦢꦶꦱꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦥꦠꦶꦛ꧀ꦜꦴꦥꦺꦲꦷ’’ꦠꦶ. ‘‘ꦱꦴꦣꦸ, ꦨꦤ꧀ꦠꦺ’’ꦠꦶ ꦩꦲꦴꦱꦺꦛ꧀ꦜꦶ ꦱꦸꦮꦟ꧀ꦟꦨꦶꦔ꧀ꦒꦴꦫꦁ ꦄꦴꦢꦴꦪ ꦢꦱꦧꦭꦱ꧀ꦱ ꦲꦠ꧀ꦡꦺ ꦈꦢꦏꦁ ꦥꦴꦠꦺꦠ꧀ꦮꦴ ‘‘ꦆꦩꦁ ꦗꦺꦠꦮꦤꦮꦶꦲꦴꦫꦁ ꦄꦴꦒꦠꦴꦤꦴꦒꦠꦱ꧀ꦱ ꦕꦴꦠꦸꦢ꧀ꦢꦶꦱꦱ꧀ꦱ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦢꦩ꧀ꦩꦷ’’ꦠꦶ ꦄꦢꦴꦱꦶ. ꦱꦠ꧀ꦡꦴ ꦮꦶꦲꦴꦫꦁ ꦥꦛꦶꦒ꧀ꦒꦲꦺꦠ꧀ꦮꦴ ꦄꦤꦸꦩꦺꦴꦢꦤꦁ ꦏꦫꦺꦴꦤ꧀ꦠꦺꦴ –

‘‘ꦱꦷꦠꦁ ꦈꦟ꧀ꦲꦁ ꦥꦛꦶꦲꦤ꧀ꦠꦶ, ꦠꦠꦺꦴ ꦮꦴꦭ꦳ꦩꦶꦒꦴꦤꦶ ꦕ;

ꦱꦫꦷꦱꦥꦺ ꦕ ꦩꦏꦱꦺ, ꦱꦶꦱꦶꦫꦺ ꦕꦴꦥꦶ ꦮꦸꦛ꧀ꦜꦶꦪꦺꦴ.

‘‘ꦠꦠꦺꦴ ꦮꦴꦠꦴꦠꦥꦺꦴ ꦓꦺꦴꦫꦺꦴ, ꦱꦚ꧀ꦗꦴꦠꦺꦴ ꦥꦛꦶꦲꦚ꧀ꦚꦠꦶ;

ꦭꦺꦟꦠ꧀ꦡꦚ꧀ꦕ ꦱꦸꦑꦠ꧀ꦡꦚ꧀ꦕ, ꦙꦴꦪꦶꦠꦸꦚ꧀ꦕ ꦮꦶꦥꦱ꧀ꦱꦶꦠꦸꦁ.

‘‘ꦮꦶꦲꦴꦫꦢꦴꦤꦁ ꦱꦔ꧀ꦓꦱ꧀ꦱ, ꦄꦒ꧀ꦒꦁ ꦧꦸꦢ꧀ꦣꦺꦤ ꦮꦟ꧀ꦟꦶꦠꦁ;

ꦠꦱ꧀ꦩꦴ ꦲꦶ ꦥꦟ꧀ꦝꦶꦠꦺꦴ ꦥꦺꦴꦱꦺꦴ, ꦱꦩ꧀ꦥꦱ꧀ꦱꦁ ꦄꦠ꧀ꦡꦩꦠ꧀ꦠꦤꦺꦴ.

‘‘ꦮꦶꦲꦴꦫꦺ ꦏꦴꦫꦪꦺ ꦫꦩ꧀ꦩꦺ, ꦮꦴꦱꦪꦺꦠ꧀ꦡ ꦧꦲꦸꦱ꧀ꦱꦸꦠꦺ;

ꦠꦺꦱꦁ ꦄꦤ꧀ꦤꦚ꧀ꦕ ꦥꦴꦤꦚ꧀ꦕ, ꦮꦠ꧀ꦡꦱꦺꦤꦴꦱꦤꦴꦤꦶ ꦕ.

‘‘ꦢꦢꦺꦪ꧀ꦪ ꦈꦗꦸꦨꦹꦠꦺꦱꦸ, ꦮꦶꦥ꧀ꦥꦱꦤ꧀ꦤꦺꦤ ꦕꦺꦠꦱꦴ;

ꦠꦺ ꦠꦱ꧀ꦱ ꦣꦩ꧀ꦩꦁ ꦢꦺꦱꦺꦤ꧀ꦠꦶ, ꦱꦧ꧀ꦧꦢꦸꦏ꧀ꦑꦴꦥꦤꦹꦢꦤꦁ;

ꦪꦁ ꦱꦺꦴ ꦣꦩ꧀ꦩꦁ ꦆꦣꦚ꧀ꦚꦴꦪ, ꦥꦫꦶꦤꦶꦧ꧀ꦧꦴꦠꦶ ꦄꦤꦴꦱꦮꦺꦴ’’ꦠꦶ. (ꦕꦹꦭ꦳ꦮ. ꧒꧙꧕) –

ꦮꦶꦲꦴꦫꦴꦤꦶꦱꦁꦱꦁ ꦏꦡꦺꦱꦶ. ꦄꦤꦴꦡꦥꦶꦟ꧀ꦝꦶꦏꦺꦴ ꦢꦸꦠꦶꦪꦢꦶꦮꦱꦠꦺꦴ ꦥꦛ꧀ꦜꦴꦪ ꦮꦶꦲꦴꦫꦩꦲꦁ ꦄꦴꦫꦨꦶ. ꦮꦶꦱꦴꦑꦴꦪ ꦮꦶꦲꦴꦫꦩꦲꦺꦴ ꦕꦠꦹꦲꦶ ꦩꦴꦱꦺꦲꦶ ꦤꦶꦛ꧀ꦜꦶꦠꦺꦴ, ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦥꦤ ꦮꦶꦲꦴꦫꦩꦲꦺꦴ ꦤꦮꦲꦶ ꦩꦴꦱꦺꦲꦶ ꦤꦶꦛ꧀ꦜꦴꦱꦶ. ꦮꦶꦲꦴꦫꦩꦲꦺꦥꦶ ꦄꦛ꧀ꦜꦴꦫꦱꦺꦮ ꦏꦺꦴꦛꦶꦪꦺꦴ ꦥꦫꦶꦕ꧀ꦕꦴꦒꦁ ꦄꦒꦩꦁꦱꦸ. ꦆꦠꦶ ꦌꦏꦱ꧀ꦩꦶꦁꦪꦺꦮ ꦮꦶꦲꦴꦫꦺ ꦕꦠꦸꦥꦟ꧀ꦟꦴꦱꦏꦺꦴꦛꦶꦱꦔ꧀ꦑꦁ ꦣꦤꦁ ꦥꦫꦶꦕ꧀ꦕꦗꦶ.

ꦄꦠꦷꦠꦺ ꦥꦤ ꦮꦶꦥꦱ꧀ꦱꦶꦱ꧀ꦱ ꦨꦒꦮꦠꦺꦴ ꦏꦴꦭꦺ ꦥꦸꦤꦧ꧀ꦧꦱꦸꦩꦶꦠ꧀ꦠꦺꦴ ꦤꦴꦩ ꦱꦺꦛ꧀ꦜꦶ ꦱꦸꦮꦟ꧀ꦟꦶꦛ꧀ꦜꦏꦴꦱꦤ꧀ꦡꦴꦫꦺꦤ ꦏꦶꦟꦶꦠ꧀ꦮꦴ ꦠꦱ꧀ꦩꦶꦁꦪꦺꦮ ꦜꦴꦤꦺ ꦪꦺꦴꦗꦤꦥ꧀ꦥꦩꦴꦟꦁ ꦱꦔ꧀ꦓꦴꦫꦴꦩꦁ ꦏꦴꦫꦺꦱꦶ. ꦱꦶꦑꦶꦱ꧀ꦱ ꦥꦤ ꦨꦒꦮꦠꦺꦴ ꦏꦴꦭꦺ ꦱꦶꦫꦶꦮꦝ꧀ꦞꦺꦴ ꦤꦴꦩ ꦱꦺꦛ꧀ꦜꦶ ꦱꦸꦮꦟ꧀ꦟꦦꦴꦭꦱꦤ꧀ꦡꦴꦫꦺꦤ ꦏꦶꦟꦶꦠ꧀ꦮꦴ ꦠꦱ꧀ꦩꦶꦁꦪꦺꦮ ꦜꦴꦤꦺ ꦠꦶꦒꦴꦮꦸꦠꦥ꧀ꦥꦩꦴꦟꦁ ꦱꦔ꧀ꦓꦴꦫꦴꦩꦁ ꦏꦴꦫꦺꦱꦶ. ꦮꦺꦱ꧀ꦱꦨꦸꦱ꧀ꦱ ꦨꦒꦮꦠꦺꦴ ꦏꦴꦭꦺ ꦱꦺꦴꦠ꧀ꦡꦶꦪꦺꦴ ꦤꦴꦩ ꦱꦺꦛ꧀ꦜꦶ ꦱꦸꦮꦟ꧀ꦟꦲꦠ꧀ꦡꦶꦥꦢꦱꦤ꧀ꦡꦴꦫꦺꦤ ꦏꦶꦟꦶꦠ꧀ꦮꦴ ꦠꦱ꧀ꦩꦶꦁꦪꦺꦮ ꦜꦴꦤꦺ ꦄꦝ꧀ꦞꦪꦺꦴꦗꦤꦥ꧀ꦥꦩꦴꦟꦁ ꦱꦔ꧀ꦓꦴꦫꦴꦩꦁ ꦏꦴꦫꦺꦱꦶ. ꦏꦏꦸꦱꦤ꧀ꦣꦱ꧀ꦱ ꦨꦒꦮꦠꦺꦴ ꦏꦴꦭꦺ ꦄꦕ꧀ꦕꦸꦠꦺꦴ ꦤꦴꦩ ꦱꦺꦛ꧀ꦜꦶ ꦱꦸꦮꦟ꧀ꦟꦶꦛ꧀ꦜꦏꦴꦱꦤ꧀ꦡꦴꦫꦺꦤ ꦏꦶꦟꦶꦠ꧀ꦮꦴ ꦠꦱ꧀ꦩꦶꦁꦪꦺꦮ ꦜꦴꦤꦺ ꦒꦴꦮꦸꦠꦥ꧀ꦥꦩꦴꦟꦁ ꦱꦔ꧀ꦓꦴꦫꦴꦩꦁ ꦏꦴꦫꦺꦱꦶ. ꦏꦺꦴꦟꦴꦒꦩꦤꦱ꧀ꦱ ꦨꦒꦮꦠꦺꦴ ꦏꦴꦭꦺ ꦈꦒ꧀ꦒꦺꦴ ꦤꦴꦩ ꦱꦺꦛ꧀ꦜꦶ ꦱꦸꦮꦟ꧀ꦟꦏꦕ꧀ꦖꦥꦱꦤ꧀ꦡꦴꦫꦺꦤ ꦏꦶꦟꦶꦠ꧀ꦮꦴ ꦠꦱ꧀ꦩꦶꦁꦪꦺꦮ ꦜꦴꦤꦺ ꦄꦝ꧀ꦞꦒꦴꦮꦸꦠꦥ꧀ꦥꦩꦴꦟꦁ ꦱꦔ꧀ꦓꦴꦫꦴꦩꦁ ꦏꦴꦫꦺꦱꦶ. ꦏꦱ꧀ꦱꦥꦱ꧀ꦱ ꦨꦒꦮꦠꦺꦴ ꦏꦴꦭꦺ ꦱꦸꦩꦔ꧀ꦒꦭꦺꦴ ꦤꦴꦩ ꦱꦺꦛ꧀ꦜꦶ ꦱꦸꦮꦟ꧀ꦟꦪꦛ꧀ꦜꦶꦱꦤ꧀ꦡꦴꦫꦺꦤ ꦏꦶꦟꦶꦠ꧀ꦮꦴ ꦠꦱ꧀ꦩꦶꦁꦪꦺꦮ ꦜꦴꦤꦺ ꦱꦺꦴꦭ꦳ꦱꦏꦫꦷꦱꦥ꧀ꦥꦩꦴꦟꦁ ꦱꦔ꧀ꦓꦴꦫꦴꦩꦁ ꦏꦴꦫꦺꦱꦶ. ꦄꦩ꧀ꦲꦴꦏꦁ ꦥꦤ ꦨꦒꦮꦠꦺꦴ ꦏꦴꦭꦺ ꦄꦤꦴꦡꦥꦶꦟ꧀ꦝꦶꦏꦺꦴ ꦤꦴꦩ ꦱꦺꦛ꧀ꦜꦶ ꦏꦲꦴꦥꦟꦏꦺꦴꦛꦶꦱꦤ꧀ꦡꦴꦫꦺꦤ ꦏꦶꦟꦶꦠ꧀ꦮꦴ ꦠꦱ꧀ꦩꦶꦁꦪꦺꦮ ꦜꦴꦤꦺ ꦄꦛ꧀ꦜꦏꦫꦷꦱꦥ꧀ꦥꦩꦴꦟꦁ ꦱꦔ꧀ꦓꦴꦫꦴꦩꦁ ꦏꦴꦫꦺꦱꦶ. ꦆꦢꦁ ꦏꦶꦫ ꦜꦴꦤꦁ ꦱꦧ꧀ꦧꦧꦸꦢ꧀ꦣꦴꦤꦁ ꦄꦮꦶꦗꦲꦶꦠꦛ꧀ꦜꦴꦤꦩꦺꦮ.

ꦆꦠꦶ ꦩꦲꦴꦧꦺꦴꦣꦶꦩꦟ꧀ꦝꦺ ꦱꦧ꧀ꦧꦚ꧀ꦚꦸꦠꦥ꧀ꦥꦠ꧀ꦠꦶꦠꦺꦴ ꦪꦴꦮ ꦩꦲꦴꦥꦫꦶꦤꦶꦧ꧀ꦧꦴꦤꦩꦚ꧀ꦕꦴ ꦪꦱ꧀ꦩꦶꦁ ꦪꦱ꧀ꦩꦶꦁ ꦜꦴꦤꦺ ꦨꦒꦮꦴ ꦮꦶꦲꦴꦱꦶ, ꦆꦢꦁ ꦱꦤ꧀ꦠꦶꦏꦺꦤꦶꦢꦴꦤꦁ ꦤꦴꦩꦴꦠꦶ ꦮꦺꦢꦶꦠꦧ꧀ꦧꦁ.

ꦱꦤ꧀ꦠꦶꦏꦺꦤꦶꦢꦴꦤꦏꦡꦴ ꦤꦶꦛ꧀ꦜꦶꦠꦴ.

ꦤꦶꦢꦴꦤꦏꦡꦴ ꦤꦶꦛ꧀ꦜꦶꦠꦴ.