ꦣꦩ꧀ꦩꦢꦱ꧀ꦱꦷ ꦧꦸꦢ꧀ꦣꦺꦴ

ꦠꦱ꧀ꦱ ꦄꦥꦫꦨꦴꦒꦺ ꦣꦩ꧀ꦩꦢꦱ꧀ꦱꦷ ꦤꦴꦩ ꦱꦠ꧀ꦡꦴ ꦈꦢꦥꦴꦢꦶ. ꦠꦱ꧀ꦱꦴꦥꦶ ꦠꦪꦺꦴ ꦱꦴꦮꦏꦱꦤ꧀ꦤꦶꦥꦴꦠꦴ. ꦥꦜꦩꦺ ꦏꦺꦴꦛꦶꦱꦠꦁ ꦨꦶꦏ꧀ꦑꦹ ꦄꦲꦺꦱꦸꦁ, ꦢꦸꦠꦶꦪꦺ ꦤꦮꦸꦠꦶꦏꦺꦴꦛꦶꦪꦺꦴ, ꦠꦠꦶꦪꦺ ꦄꦱꦷꦠꦶꦏꦺꦴꦛꦶꦪꦺꦴ. ꦠꦢꦴ ꦧꦺꦴꦣꦶꦱꦠ꧀ꦠꦺꦴ ꦱꦏ꧀ꦏꦺꦴ ꦢꦺꦮꦫꦴꦗꦴ ꦲꦸꦠ꧀ꦮꦴ ꦢꦶꦧ꧀ꦧꦒꦤ꧀ꦣꦥꦸꦥ꧀ꦦꦺꦲꦶ ꦕ ꦢꦶꦧ꧀ꦧꦠꦹꦫꦶꦪꦺꦲꦶ ꦕ ꦥꦹꦗꦁ ꦄꦏꦴꦱꦶ, ꦱꦺꦴꦥꦶ ꦤꦁ ꦱꦠ꧀ꦡꦴ ‘‘ꦄꦤꦴꦒꦠꦺ ꦧꦸꦢ꧀ꦣꦺꦴ ꦨꦮꦶꦱ꧀ꦱꦠꦷ’’ꦠꦶ ꦧ꧀ꦪꦴꦏꦴꦱꦶ. ꦠꦱ꧀ꦱ ꦨꦒꦮꦠꦺꦴ ꦱꦫꦟꦁ ꦤꦴꦩ ꦤꦒꦫꦁ ꦄꦲꦺꦴꦱꦶ, ꦥꦶꦠꦴ ꦱꦫꦟꦺꦴ ꦤꦴꦩ ꦫꦴꦗꦴ, ꦩꦴꦠꦴ ꦱꦸꦤꦤ꧀ꦢꦴ ꦤꦴꦩ ꦢꦺꦮꦷ, ꦥꦢꦸꦩꦺꦴ ꦕ ꦦꦸꦱ꧀ꦱꦢꦺꦮꦺꦴ ꦕ ꦢ꧀ꦮꦺ ꦄꦒ꧀ꦒꦱꦴꦮꦏꦴ, ꦱꦸꦤꦺꦠ꧀ꦠꦺꦴ ꦤꦴꦩꦸꦥꦛ꧀ꦜꦴꦏꦺꦴ, ꦑꦺꦩꦴ ꦕ ꦱꦧ꧀ꦧꦤꦴꦩꦴ ꦕ ꦢ꧀ꦮꦺ ꦄꦒ꧀ꦒꦱꦴꦮꦶꦏꦴ, ꦫꦠ꧀ꦠꦔ꧀ꦏꦸꦫꦫꦸꦏ꧀ꦑꦺꦴ ꦧꦺꦴꦣꦶ, ‘‘ꦧꦶꦩ꧀ꦧꦶꦗꦴꦭꦺꦴ’’ꦠꦶꦥꦶ ꦮꦸꦕ꧀ꦕꦠꦶ, ꦱꦫꦷꦫꦁ ꦥꦤꦱ꧀ꦱ ꦄꦱꦷꦠꦶꦲꦠ꧀ꦡꦸꦧ꧀ꦧꦺꦣꦁ ꦄꦲꦺꦴꦱꦶ, ꦮꦱ꧀ꦱꦱꦠꦱꦲꦱ꧀ꦱꦁ ꦄꦴꦪꦹꦠꦶ.

‘‘ꦠꦠ꧀ꦡꦺꦮ ꦩꦟ꧀ꦝꦏꦥ꧀ꦥꦩ꧀ꦲꦶ, ꦣꦩ꧀ꦩꦢꦱ꧀ꦱꦷ ꦩꦲꦴꦪꦱꦺꦴ;

ꦠꦩꦤ꧀ꦣꦏꦴꦫꦁ ꦮꦶꦣꦩꦶꦠ꧀ꦮꦴ, ꦄꦠꦶꦫꦺꦴꦕꦠꦶ ꦱꦢꦺꦮꦏꦺ’’ꦠꦶ. (ꦧꦸ. ꦮꦁ. ꧑꧗.꧑);