꧔. ꦱꦺꦴꦟꦢꦟ꧀ꦝꦱꦸꦠ꧀ꦠꦮꦟ꧀ꦟꦤꦴ

꧓꧐꧐. ꦌꦮꦁ ꦩꦺ ꦱꦸꦠꦁ…ꦥꦺ… ꦄꦔ꧀ꦒꦺꦱꦹꦠꦶ ꦱꦺꦴꦟꦢꦟ꧀ꦝꦱꦸꦠ꧀ꦠꦁ. ꦠꦠ꧀ꦫꦴꦪꦁ ꦄꦥꦸꦧ꧀ꦧꦥꦢꦮꦟ꧀ꦟꦤꦴ. ꦄꦔ꧀ꦒꦺꦱꦹꦠꦶ ꦄꦔ꧀ꦒꦴ ꦤꦴꦩ ꦄꦔ꧀ꦒꦥꦴꦱꦴꦢꦶꦏꦠꦴꦪ ꦌꦮꦁ ꦭꦢ꧀ꦣꦮꦺꦴꦲꦴꦫꦴ ꦗꦴꦤꦥꦢꦶꦤꦺꦴ ꦫꦴꦗꦏꦸꦩꦴꦫꦴ, ꦠꦺꦱꦁ ꦤꦶꦮꦴꦱꦺꦴ ꦌꦏꦺꦴꦥꦶ ꦗꦤꦥꦢꦺꦴ ꦫꦹꦭ꦳꧀ꦲꦶꦱꦢ꧀ꦢꦺꦤ ꦄꦔ꧀ꦒꦴꦠꦶ ꦮꦸꦕ꧀ꦕꦠꦶ, ꦠꦱ꧀ꦩꦶꦁ ꦄꦔ꧀ꦒꦺꦱꦸ ꦗꦤꦥꦢꦺ. ꦕꦴꦫꦶꦏꦤ꧀ꦠꦶ ꦆꦣꦴꦥꦶ ꦄꦠꦸꦫꦶꦠꦕꦴꦫꦶꦏꦴ ꦕꦺꦮ ꦤꦶꦧꦢ꧀ꦣꦕꦴꦫꦶꦏꦴ ꦕ ꦄꦣꦶꦥ꧀ꦥꦺꦠꦴ. ꦠꦢꦴ ꦏꦶꦫ ꦨꦒꦮꦠꦺꦴ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦁ ꦎꦭꦺꦴꦏꦺꦤ꧀ꦠꦱ꧀ꦱ ꦱꦺꦴꦟꦢꦟ꧀ꦝꦺꦴ ꦧ꧀ꦫꦴꦲ꧀ꦩꦟꦺꦴ ꦚꦴꦟꦗꦴꦭꦱ꧀ꦱ ꦄꦤ꧀ꦠꦺꦴ ꦥꦚ꧀ꦚꦴꦪꦶꦠ꧀ꦡ. ꦄꦡ ꦨꦒꦮꦴ ꦄꦪꦁ ꦧ꧀ꦫꦴꦲ꧀ꦩꦟꦺꦴ ꦩꦪ꧀ꦲꦁ ꦚꦴꦟꦗꦴꦭꦺ ꦥꦚ꧀ꦚꦴꦪꦠꦶ. ‘ꦄꦠ꧀ꦡꦶ ꦤꦸ ꦑ꧀ꦮꦱ꧀ꦱꦸꦥꦤꦶꦱ꧀ꦱꦪꦺꦴ’ꦠꦶ ꦮꦷꦩꦁꦱꦤ꧀ꦠꦺꦴ ꦄꦢ꧀ꦢꦱ. ‘ꦩꦪꦶ ꦠꦠ꧀ꦡ ꦒꦠꦺ ꦌꦠꦱ꧀ꦱ ꦄꦤ꧀ꦠꦺꦮꦴꦱꦶꦤꦺꦴ ꦢ꧀ꦮꦴꦢꦱꦲꦴꦏꦴꦫꦺꦲꦶ ꦧ꧀ꦫꦴꦲ꧀ꦩꦟꦱ꧀ꦱ ꦮꦟ꧀ꦟꦁ ꦨꦴꦱꦶꦠ꧀ꦮꦴ ꦩꦩ ꦱꦤ꧀ꦠꦶꦏꦺ ꦄꦴꦒꦤ꧀ꦠꦸꦁ ꦤ ꦢꦱ꧀ꦱꦤ꧀ꦠꦶ. ꦱꦺꦴ ꦥꦤ ꦠꦺꦱꦁ ꦮꦴꦢꦁ ꦨꦶꦤ꧀ꦢꦶꦠ꧀ꦮꦴ ꦌꦏꦹꦤꦠꦶꦁꦱ ꦄꦴꦏꦴꦫꦺꦲꦶ ꦩꦩ ꦮꦟ꧀ꦟꦁ ꦨꦴꦱꦶꦠ꧀ꦮꦴ ꦩꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦲꦁ ꦥꦸꦕ꧀ꦖꦶꦱ꧀ꦱꦠꦶ. ꦱꦺꦴ ꦥꦚ꧀ꦲꦮꦶꦱ꧀ꦱꦗ꧀ꦗꦤꦥꦫꦶꦪꦺꦴꦱꦴꦤꦺ ꦱꦫꦟꦁ ꦒꦩꦶꦱ꧀ꦱꦠꦷ’ꦠꦶ, ꦢꦶꦱ꧀ꦮꦴ ꦥꦚ꧀ꦕꦱꦠꦨꦶꦏ꧀ꦑꦸꦥꦫꦶꦮꦴꦫꦺꦴ ꦠꦁ ꦗꦤꦥꦢꦁ ꦥꦛꦶꦥꦤ꧀ꦤꦺꦴ. ꦠꦺꦤ ꦮꦸꦠ꧀ꦠꦁ – ꦄꦔ꧀ꦒꦺꦱꦸ ꦕꦴꦫꦶꦏꦁ ꦕꦫꦩꦴꦤꦺꦴ…ꦥꦺ… ꦪꦺꦤ ꦕꦩ꧀ꦥꦴ ꦠꦢꦮꦱꦫꦷꦠꦶ.

ꦒꦒ꧀ꦒꦫꦴꦪ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺꦠꦶ ꦠꦱ꧀ꦱ ꦕꦩ꧀ꦥꦴꦤꦒꦫꦱ꧀ꦱ ꦄꦮꦶꦢꦹꦫꦺ ꦒꦒ꧀ꦒꦫꦴꦪ ꦤꦴꦩ ꦫꦴꦗꦒ꧀ꦒꦩꦲꦺꦱꦶꦪꦴ ꦑꦟꦶꦠꦠ꧀ꦠꦴ ꦒꦒ꧀ꦒꦫꦴꦠꦶ ꦭꦢ꧀ꦣꦮꦺꦴꦲꦴꦫꦴ ꦥꦺꦴꦏ꧀ꦑꦫꦟꦷ ꦄꦠ꧀ꦡꦶ. ꦠꦱ꧀ꦱꦴ ꦠꦷꦫꦺ ꦱꦩꦤ꧀ꦠꦠꦺꦴ ꦤꦷꦭꦴꦢꦶꦥꦚ꧀ꦕꦮꦟ꧀ꦟꦏꦸꦱꦸꦩꦥꦛꦶꦩꦟ꧀ꦝꦶꦠꦁ ꦩꦲꦤ꧀ꦠꦁ ꦕꦩ꧀ꦥꦏꦮꦤꦁ. ꦠꦱ꧀ꦩꦶꦁ ꦨꦒꦮꦴ ꦏꦸꦱꦸꦩꦒꦤ꧀ꦣꦱꦸꦒꦤ꧀ꦣꦺ ꦕꦩ꧀ꦥꦏꦮꦤꦺ ꦮꦶꦲꦫꦠꦶ. ꦠꦁ ꦱꦤ꧀ꦣꦴꦪ ꦒꦒ꧀ꦒꦫꦴꦪ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺꦠꦶ ꦮꦸꦠ꧀ꦠꦁ. ꦩꦴꦒꦣꦺꦤ ꦱꦺꦤꦶꦪꦺꦤ ꦧꦶꦩ꧀ꦧꦶꦱꦴꦫꦺꦤꦴꦠꦶ ꦌꦠ꧀ꦡ ꦱꦺꦴ ꦫꦴꦗꦴ ꦩꦒꦣꦴꦤꦁ ꦆꦱ꧀ꦱꦫꦠ꧀ꦠꦴ ꦩꦴꦒꦣꦺꦴ. ꦩꦲꦠꦶꦪꦴ ꦱꦺꦤꦴꦪ ꦱꦩꦤ꧀ꦤꦴꦒꦠꦠ꧀ꦠꦴ ꦱꦺꦤꦶꦪꦺꦴ. ꦧꦶꦩ꧀ꦧꦷꦠꦶ ꦱꦸꦮꦟ꧀ꦟꦁ. ꦠꦱ꧀ꦩꦴ ꦱꦴꦫꦱꦸꦮꦟ꧀ꦟꦱꦢꦶꦱꦮꦟ꧀ꦟꦠꦴꦪ ꦧꦶꦩ꧀ꦧꦶꦱꦴꦫꦺꦴꦠꦶ ꦮꦸꦕ꧀ꦕꦠꦶ.

꧓꧐꧑-꧓꧐꧒. ꦧꦲꦹ ꦧꦲꦹ ꦲꦸꦠ꧀ꦮꦴ ꦱꦁꦲꦠꦴꦠꦶ ꦱꦔ꧀ꦓꦴ. ꦌꦏꦺꦏꦶꦱ꧀ꦱꦴꦪ ꦢꦶꦱꦴꦪ ꦱꦔ꧀ꦓꦺꦴ ꦌꦠꦺꦱꦁ ꦄꦠ꧀ꦡꦷꦠꦶ ꦱꦔ꧀ꦓꦷ. ꦥꦸꦧ꧀ꦧꦺ ꦤꦒꦫꦱ꧀ꦱ ꦄꦤ꧀ꦠꦺꦴ ꦄꦒꦟꦴ ꦧꦲꦶ ꦤꦶꦏ꧀ꦑꦩꦶꦠ꧀ꦮꦴ ꦒꦟꦠꦁ ꦥꦠ꧀ꦠꦴꦠꦶ ꦒꦟꦷꦨꦹꦠꦴ. ꦑꦠ꧀ꦠꦁ ꦄꦴꦩꦤ꧀ꦠꦺꦱꦷꦠꦶ. ꦑꦠ꧀ꦠꦴ ꦮꦸꦕ꧀ꦕꦠꦶ ꦥꦸꦕ꧀ꦖꦶꦠꦥꦚ꧀ꦲꦺ ꦧ꧀ꦪꦴꦏꦫꦟꦱꦩꦠ꧀ꦡꦺꦴ ꦩꦲꦴꦩꦠ꧀ꦠꦺꦴ, ꦠꦁ ꦄꦴꦩꦤ꧀ꦠꦺꦱꦶ ꦄꦴꦒꦩꦺꦤ꧀ꦠꦹꦠꦶ ꦩꦸꦲꦸꦠ꧀ꦠꦁ ꦥꦛꦶꦩꦴꦤꦺꦤ꧀ꦠꦸ, ꦩꦴ ꦒꦕ꧀ꦖꦤ꧀ꦠꦹꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦱꦺꦴꦟꦢꦟ꧀ꦝꦒꦸꦟꦏꦡꦴ

꧓꧐꧓. ꦤꦴꦤꦴꦮꦺꦫꦗ꧀ꦗꦏꦴꦤꦤ꧀ꦠꦶ ꦤꦴꦤꦴꦮꦶꦣꦺꦱꦸ ꦫꦗ꧀ꦗꦺꦱꦸ, ꦄꦚ꧀ꦚꦺꦱꦸ ꦄꦚ꧀ꦚꦺꦱꦸ ꦏꦴꦱꦶꦏꦺꦴꦱꦭꦴꦢꦷꦱꦸ ꦫꦗ꧀ꦗꦺꦱꦸ ꦗꦴꦠꦴ, ꦠꦴꦤꦶ ꦮꦴ ꦠꦺꦱꦁ ꦤꦶꦮꦴꦱꦴ, ꦠꦠꦺꦴ ꦮꦴ ꦄꦴꦒꦠꦴꦠꦶ ꦤꦴꦤꦴꦮꦺꦫꦗ꧀ꦗꦏꦴ, ꦠꦺꦱꦁ ꦤꦴꦤꦴꦮꦺꦫꦗ꧀ꦗꦏꦴꦤꦁ. ꦏꦺꦤꦕꦶꦢꦺꦮ ꦏꦫꦟꦷꦪꦺꦤꦴꦠꦶ ꦠꦱ꧀ꦩꦶꦁ ꦏꦶꦫ ꦤꦒꦫꦺ ꦢ꧀ꦮꦷꦲꦶ ꦏꦫꦟꦷꦪꦺꦲꦶ ꦧ꧀ꦫꦴꦲ꧀ꦩꦟꦴ ꦱꦤ꧀ꦤꦶꦥꦠꦤ꧀ꦠꦶ – ꦪꦚ꧀ꦚꦴꦤꦸꦨꦮꦤꦠ꧀ꦡꦁ ꦮꦴ ꦩꦤ꧀ꦠꦱꦗ꧀ꦙꦴꦪꦤꦠ꧀ꦡꦁ ꦮꦴ. ꦠꦢꦴ ꦕ ꦠꦱ꧀ꦩꦶꦁ ꦤꦒꦫꦺ ꦪꦩꦚ꧀ꦚꦴ ꦤꦠ꧀ꦡꦶ. ꦱꦺꦴꦟꦢꦟ꧀ꦝꦱ꧀ꦱ ꦥꦤ ꦱꦤ꧀ꦠꦶꦏꦺ ꦩꦤ꧀ꦠꦱꦗ꧀ꦙꦴꦪꦤꦠ꧀ꦡꦁ ꦌꦠꦺ ꦱꦤ꧀ꦤꦶꦥꦠꦶꦠꦴ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ – ‘‘ꦏꦺꦤꦕꦶꦢꦺꦮ ꦏꦫꦟꦷꦪꦺꦤꦴ’’ꦠꦶ. ꦠꦺ ꦠꦱ꧀ꦱ ꦒꦩꦤꦁ ꦱꦸꦠ꧀ꦮꦴ ꦕꦶꦤ꧀ꦠꦺꦱꦸꦁ – ‘‘ꦄꦪꦁ ꦱꦺꦴꦟꦢꦟ꧀ꦝꦺꦴ ꦈꦒ꧀ꦒꦠꦧ꧀ꦫꦴꦲ꧀ꦩꦟꦺꦴ ꦪꦺꦨꦸꦪ꧀ꦪꦺꦤ ꦕ ꦄꦚ꧀ꦚꦺ ꦧ꧀ꦫꦴꦲ꧀ꦩꦟꦴ ꦱꦩꦟꦁ ꦒꦺꦴꦠꦩꦁ ꦱꦫꦟꦁ ꦒꦠꦴ, ꦄꦪꦩꦺꦮ ꦤ ꦒꦠꦺꦴ. ꦱ꧀ꦮꦴꦪꦁ ꦱꦕꦺ ꦠꦠ꧀ꦡ ꦒꦩꦶꦱ꧀ꦱꦠꦶ, ꦄꦢ꧀ꦣꦴ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦄꦴꦮꦛ꧀ꦛꦤꦶꦪꦴ ꦩꦴꦪꦴꦪ ꦄꦴꦮꦛ꧀ꦛꦶꦠꦺꦴ, ꦠꦁ ꦱꦫꦟꦁ ꦒꦩꦶꦱ꧀ꦱꦠꦶ. ꦠꦠꦺꦴ ꦌꦠꦱ꧀ꦱꦴꦥꦶ ꦒꦺꦲꦢ꧀ꦮꦴꦫꦺ ꦧ꧀ꦫꦴꦲ꧀ꦩꦟꦴꦤꦁ ꦱꦤ꧀ꦤꦶꦥꦴꦠꦺꦴ ꦤ ꦨꦮꦶꦱ꧀ꦱꦠꦷ’’ꦠꦶ. ‘‘ꦲꦤ꧀ꦢꦱ꧀ꦱ ꦒꦩꦤꦤ꧀ꦠꦫꦴꦪꦁ ꦏꦫꦺꦴꦩꦴ’’ꦠꦶ ꦱꦩ꧀ꦩꦤ꧀ꦠꦪꦶꦠ꧀ꦮꦴ ꦠꦠ꧀ꦡ ꦄꦒꦩꦁꦱꦸ. ꦠꦁ ꦱꦤ꧀ꦣꦴꦪ – ꦄꦡ ꦑꦺꦴ ꦠꦺ ꦧ꧀ꦫꦴꦲ꧀ꦩꦟꦴꦠꦶꦄꦴꦢꦶ ꦮꦸꦠ꧀ꦠꦁ.

ꦠꦠ꧀ꦡ ꦆꦩꦶꦤꦴꦥꦔ꧀ꦒꦺꦤꦴꦠꦶ ꦆꦩꦶꦤꦴꦥꦶ ꦏꦴꦫꦟꦺꦤ. ꦌꦮꦁ ꦌꦠꦁ ꦏꦴꦫꦟꦁ ꦮꦠ꧀ꦮꦴ ꦥꦸꦤ – ‘‘ꦄꦠ꧀ꦠꦤꦺꦴ ꦮꦟ꧀ꦟꦺ ꦨꦚ꧀ꦚꦩꦴꦤꦺ ꦄꦠꦸꦱ꧀ꦱꦤꦏꦱꦠ꧀ꦠꦺꦴ ꦤꦴꦩ ꦤꦠ꧀ꦡꦶ. ꦲꦤ꧀ꦢꦱ꧀ꦱ ꦮꦟ꧀ꦟꦁ ꦨꦟꦤꦺꦤ ꦒꦩꦤꦁ ꦤꦶꦮꦴꦫꦺꦱ꧀ꦱꦴꦩꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦨꦮꦚ꧀ꦲꦶ ꦱꦺꦴꦟꦢꦟ꧀ꦝꦺꦴ ꦈꦨꦠꦺꦴ ꦱꦸꦗꦴꦠꦺꦴꦠꦶꦄꦴꦢꦷꦤꦶ ꦏꦴꦫꦟꦴꦤꦶ ꦄꦴꦲꦁꦱꦸ.

ꦈꦨꦠꦺꦴꦠꦶ ꦢ꧀ꦮꦷꦲꦶ ꦥꦏ꧀ꦑꦺꦲꦶ. ꦩꦴꦠꦶꦠꦺꦴ ꦕ ꦥꦶꦠꦶꦠꦺꦴ ꦕꦴꦠꦶ ꦨꦺꦴꦠꦺꦴ ꦩꦴꦠꦴ ꦧ꧀ꦫꦴꦲ꧀ꦩꦟꦷ, ꦩꦴꦠꦸꦩꦴꦠꦴ ꦧ꧀ꦫꦴꦲ꧀ꦩꦟꦷ, ꦠꦱ꧀ꦱꦴꦥꦶ ꦩꦴꦠꦴ ꦧ꧀ꦫꦴꦲ꧀ꦩꦟꦷ; ꦥꦶꦠꦴ ꦧ꧀ꦫꦴꦲ꧀ꦩꦟꦺꦴ, ꦥꦶꦠꦸꦥꦶꦠꦴ ꦧ꧀ꦫꦴꦲ꧀ꦩꦟꦺꦴ, ꦠꦱ꧀ꦱꦴꦥꦶ ꦥꦶꦠꦴ ꦧ꧀ꦫꦴꦲ꧀ꦩꦟꦺꦴꦠꦶ, ꦌꦮꦁ ꦨꦮꦁ ꦈꦨꦠꦺꦴ ꦱꦸꦗꦴꦠꦺꦴ ꦩꦴꦠꦶꦠꦺꦴ ꦕ ꦥꦶꦠꦶꦠꦺꦴ ꦕ. ꦱꦁꦱꦸꦢ꧀ꦣꦒꦲꦟꦶꦏꦺꦴꦠꦶ ꦱꦁꦱꦸꦢ꧀ꦣꦴ ꦠꦺ ꦩꦴꦠꦸꦒꦲꦟꦷ ꦏꦸꦕ꧀ꦖꦷꦠꦶ ꦄꦠ꧀ꦡꦺꦴ. ꦱꦩꦮꦺꦥꦴꦏꦶꦤꦶꦪꦴ ꦒꦲꦟꦶꦪꦴꦠꦶ ꦌꦠ꧀ꦡ ꦥꦤ ꦏꦩ꧀ꦩꦗꦠꦺꦗꦺꦴꦣꦴꦠꦸ ‘‘ꦒꦲꦟꦷ’’ꦠꦶ ꦮꦸꦕ꧀ꦕꦠꦶ.

ꦪꦴꦮ ꦱꦠ꧀ꦠꦩꦴ ꦥꦶꦠꦴꦩꦲꦪꦸꦒꦴꦠꦶ ꦌꦠ꧀ꦡ ꦥꦶꦠꦸꦥꦶꦠꦴ ꦥꦶꦠꦴꦩꦲꦺꦴ, ꦥꦶꦠꦴꦩꦲꦱ꧀ꦱ ꦪꦸꦒꦁ ꦥꦶꦠꦴꦩꦲꦪꦸꦒꦁ. ꦪꦸꦒꦤ꧀ꦠꦶ ꦄꦴꦪꦸꦥ꧀ꦥꦩꦴꦟꦁ ꦮꦸꦕ꧀ꦕꦠꦶ. ꦄꦨꦶꦭꦴꦥꦩꦠ꧀ꦠꦩꦺꦮ ꦕꦺꦠꦁ. ꦄꦠ꧀ꦡꦠꦺꦴ ꦥꦤ ꦥꦶꦠꦴꦩꦲꦺꦴꦪꦺꦮ ꦥꦶꦠꦴꦩꦲꦪꦸꦒꦁ. ꦠꦠꦺꦴ ꦈꦢ꧀ꦣꦁ ꦱꦧ꧀ꦧꦺꦥꦶ ꦥꦸꦧ꧀ꦧꦥꦸꦫꦶꦱꦴ ꦥꦶꦠꦴꦩꦲꦒ꧀ꦒꦲꦟꦺꦤꦺꦮ ꦒꦲꦶꦠꦴ. ꦌꦮꦁ ꦪꦴꦮ ꦱꦠ꧀ꦠꦩꦺꦴ ꦥꦸꦫꦶꦱꦺꦴ, ꦠꦴꦮ ꦱꦁꦱꦸꦢ꧀ꦣꦒꦲꦟꦶꦏꦺꦴ. ꦄꦡ ꦮꦴ ꦄꦏ꧀ꦑꦶꦠ꧀ꦠꦺꦴ ꦄꦤꦸꦥꦏꦸꦛ꧀ꦜꦺꦴ ꦗꦴꦠꦶꦮꦴꦢꦺꦤꦴꦠꦶ ꦢꦱ꧀ꦱꦺꦤ꧀ꦠꦶ. ꦄꦏ꧀ꦑꦶꦠ꧀ꦠꦺꦴꦠꦶ – ‘‘ꦄꦥꦤꦺꦡ ꦌꦠꦁ, ꦏꦶꦁ ꦆꦩꦶꦤꦴ’’ꦠꦶ ꦌꦮꦁ ꦄꦏ꧀ꦑꦶꦠ꧀ꦠꦺꦴ ꦄꦤꦮꦏ꧀ꦑꦶꦠ꧀ꦠꦺꦴ. ꦄꦤꦸꦥꦏꦸꦛ꧀ꦜꦺꦴꦠꦶ ꦤ ꦈꦥꦏꦸꦛ꧀ꦜꦺꦴ, ꦤ ꦄꦏ꧀ꦏꦺꦴꦱꦁ ꦮꦴ ꦤꦶꦤ꧀ꦢꦁ ꦮꦴ ꦭꦢ꧀ꦣꦥꦸꦧ꧀ꦧꦺꦴ. ꦏꦺꦤ ꦏꦴꦫꦟꦺꦤꦴꦠꦶ? ꦗꦴꦠꦶꦮꦴꦢꦺꦤ. ꦆꦠꦶꦥꦶ – ‘‘ꦲꦷꦤꦗꦴꦠꦶꦏꦺꦴ ꦌꦱꦺꦴ’’ꦠꦶ ꦌꦮꦫꦹꦥꦺꦤ ꦮꦕꦤꦺꦤꦴꦠꦶ ꦄꦠ꧀ꦡꦺꦴ.

ꦄꦝ꧀ꦞꦺꦴꦠꦶ ꦆꦱ꧀ꦱꦫꦺꦴ. ꦩꦲꦢ꧀ꦣꦤꦺꦴꦠꦶ ꦩꦲꦠꦴ ꦣꦤꦺꦤ ꦱꦩꦤ꧀ꦤꦴꦒꦠꦺꦴ. ꦨꦮꦠꦺꦴ ꦲꦶ ꦒꦺꦲꦺ ꦥꦡꦮꦶꦪꦁ ꦥꦁꦱꦸꦮꦴꦭꦶꦏꦴ ꦮꦶꦪ ꦧꦲꦸꦣꦤꦁ, ꦱꦩꦟꦺꦴ ꦥꦤ ꦒꦺꦴꦠꦩꦺꦴ ꦄꦣꦤꦺꦴ ꦨꦶꦏ꧀ꦑꦴꦪ ꦈꦢꦫꦁ ꦥꦹꦫꦺꦠ꧀ꦮꦴ ꦪꦴꦥꦺꦠꦷꦠꦶ ꦢꦱ꧀ꦱꦺꦤ꧀ꦠꦶ. ꦩꦲꦴꦨꦺꦴꦒꦺꦴꦠꦶ ꦥꦚ꧀ꦕꦏꦴꦩꦒꦸꦟꦮꦱꦺꦤ ꦩꦲꦴꦈꦥꦨꦺꦴꦒꦺꦴ. ꦌꦮꦁ ꦪꦁ ꦪꦁ ꦒꦸꦟꦁ ꦮꦢꦤ꧀ꦠꦶ, ꦠꦱ꧀ꦱ ꦠꦱ꧀ꦱ ꦥꦛꦶꦥꦏ꧀ꦑꦮꦱꦺꦤ ꦨꦒꦮꦠꦺꦴ ꦄꦒꦸꦟꦁꦪꦺꦮ ꦢꦱ꧀ꦱꦺꦩꦴꦠꦶ ꦩꦚ꧀ꦚꦩꦴꦤꦴ ꦮꦢꦤ꧀ꦠꦶ.

ꦄꦨꦶꦫꦹꦥꦺꦴꦠꦶ ꦄꦚ꧀ꦚꦺꦲꦶ ꦩꦤꦸꦱ꧀ꦱꦺꦲꦶ ꦄꦨꦶꦫꦹꦥꦺꦴ ꦄꦣꦶꦏꦫꦹꦥꦺꦴ. ꦢꦱ꧀ꦱꦤꦷꦪꦺꦴꦠꦶ ꦢꦶꦮꦱꦩ꧀ꦥꦶ ꦥꦱ꧀ꦱꦤ꧀ꦠꦴꦤꦁ ꦄꦠꦶꦠ꧀ꦠꦶꦏꦫꦟꦠꦺꦴ ꦢꦱ꧀ꦱꦤꦪꦺꦴꦒ꧀ꦒꦺꦴ. ꦢꦱ꧀ꦱꦤꦺꦤꦺꦮ ꦕꦶꦠ꧀ꦠꦥꦱꦴꦢꦗꦤꦤꦠꦺꦴ ꦥꦴꦱꦴꦢꦶꦏꦺꦴ. ꦥꦺꦴꦏ꧀ꦑꦫꦠꦴ ꦮꦸꦕ꧀ꦕꦠꦶ ꦱꦸꦤ꧀ꦢꦫꦨꦴꦮꦺꦴ, ꦮꦟ꧀ꦟꦱ꧀ꦱ ꦥꦺꦴꦏ꧀ꦑꦫꦠꦴ ꦮꦟ꧀ꦟꦥꦺꦴꦏ꧀ꦑꦫꦠꦴ, ꦠꦴꦪ ꦮꦟ꧀ꦟꦱꦩ꧀ꦥꦠ꧀ꦠꦶꦪꦴ ꦪꦸꦠ꧀ꦠꦺꦴꦠꦶ ꦄꦠ꧀ꦡꦺꦴ. ꦥꦺꦴꦫꦴꦟꦴ ꦥꦤꦴꦲꦸ – ‘‘ꦥꦺꦴꦏ꧀ꦑꦫꦤ꧀ꦠꦶ ꦱꦫꦷꦫꦁ ꦮꦢꦤ꧀ꦠꦶ, ꦮꦟ꧀ꦟꦁ ꦮꦟ꧀ꦟꦩꦺꦮꦴ’’ꦠꦶ. ꦠꦺꦱꦁ ꦩꦠꦺꦤ ꦮꦟ꧀ꦟꦚ꧀ꦕ ꦥꦺꦴꦏ꧀ꦑꦫꦚ꧀ꦕ ꦮꦟ꧀ꦟꦥꦺꦴꦏ꧀ꦑꦫꦴꦤꦶ. ꦠꦺꦱꦁ ꦨꦴꦮꦺꦴ ꦮꦟ꧀ꦟꦥꦺꦴꦏ꧀ꦑꦫꦠꦴ. ꦆꦠꦶ ꦥꦫꦩꦴꦪ ꦮꦟ꧀ꦟꦥꦺꦴꦏ꧀ꦑꦫꦠꦴꦪꦴꦠꦶ ꦈꦠ꧀ꦠꦩꦺꦤ ꦥꦫꦶꦱꦸꦢ꧀ꦣꦺꦤ ꦮꦟ꧀ꦟꦺꦤ ꦕꦺꦮ ꦱꦫꦷꦫꦱꦟ꧀ꦜꦴꦤꦱꦩ꧀ꦥꦠ꧀ꦠꦶꦪꦴ ꦕꦴꦠꦶ ꦄꦠ꧀ꦡꦺꦴ. ꦧ꧀ꦫꦲ꧀ꦩꦮꦟ꧀ꦟꦷꦠꦶ ꦱꦺꦛ꧀ꦜꦮꦟ꧀ꦟꦷ. ꦥꦫꦶꦱꦸꦢ꧀ꦣꦮꦟ꧀ꦟꦺꦱꦸꦥꦶ ꦱꦺꦛ꧀ꦜꦺꦤ ꦱꦸꦮꦟ꧀ꦟꦮꦟ꧀ꦟꦺꦤ ꦱꦩꦤ꧀ꦤꦴꦒꦠꦺꦴꦠꦶ ꦄꦠ꧀ꦡꦺꦴ. ꦧ꧀ꦫꦲ꧀ꦩꦮꦕ꧀ꦖꦱꦷꦠꦶ ꦩꦲꦴꦧ꧀ꦫꦲ꧀ꦩꦸꦤꦺꦴ ꦱꦫꦷꦫꦱꦢꦶꦱꦺꦤꦺꦮ ꦱꦫꦷꦫꦺꦤ ꦱꦩꦤ꧀ꦤꦴꦒꦠꦺꦴ. ꦄꦑꦸꦢ꧀ꦢꦴꦮꦏꦴꦱꦺꦴ ꦢꦱ꧀ꦱꦤꦴꦪꦴꦠꦶ ‘‘ꦨꦺꦴꦠꦺꦴ ꦱꦫꦷꦫꦺ ꦢꦱ꧀ꦱꦤꦱ꧀ꦱ ꦎꦏꦴꦱꦺꦴ ꦤ ꦑꦸꦢ꧀ꦢꦏꦺꦴ ꦩꦲꦴ, ꦱꦧ꧀ꦧꦴꦤꦺꦮ ꦠꦺ ꦄꦔ꧀ꦒꦥꦕ꧀ꦕꦔ꧀ꦒꦴꦤꦶ ꦢꦱ꧀ꦱꦤꦷꦪꦴꦤꦺꦮ, ꦠꦴꦤꦶ ꦕꦴꦥꦶ ꦩꦲꦤ꧀ꦠꦴꦤꦺꦮꦴ’’ꦠꦶ ꦢꦷꦥꦺꦤ꧀ꦠꦶ.

ꦱꦷꦭꦩꦱ꧀ꦱ ꦄꦠ꧀ꦡꦷꦠꦶ ꦱꦷꦭꦮꦴ. ꦮꦸꦢ꧀ꦣꦁ ꦮꦢ꧀ꦣꦶꦠꦁ ꦱꦷꦭꦩꦱ꧀ꦱꦴꦠꦶ ꦮꦸꦢ꧀ꦣꦱꦷꦭꦷ. ꦮꦸꦢ꧀ꦣꦱꦷꦭꦺꦤꦴꦠꦶ ꦮꦸꦢ꧀ꦣꦺꦤ ꦮꦢ꧀ꦣꦶꦠꦺꦤ ꦱꦷꦭꦺꦤ. ꦱꦩꦤ꧀ꦤꦴꦒꦠꦺꦴꦠꦶ ꦪꦸꦠ꧀ꦠꦺꦴ. ꦆꦢꦁ ꦮꦸꦢ꧀ꦣꦱꦷꦭꦷꦥꦢꦱ꧀ꦱꦺꦮ ꦮꦺꦮꦕꦤꦁ. ꦱꦧ꧀ꦧꦩꦺꦠꦁ ꦥꦚ꧀ꦕꦱꦷꦭꦩꦠ꧀ꦠꦩꦺꦮ ꦱꦤ꧀ꦣꦴꦪ ꦮꦢꦤ꧀ꦠꦶ.

ꦏꦭ꧀ꦪꦴꦟꦮꦴꦕꦺꦴꦠꦶꦄꦴꦢꦷꦱꦸ ꦏꦭ꧀ꦪꦴꦟꦴ ꦱꦸꦤ꧀ꦢꦫꦴ ꦥꦫꦶꦩꦟ꧀ꦝꦭꦥꦢꦧ꧀ꦪꦚ꧀ꦗꦤꦴ ꦮꦴꦕꦴ ꦄꦱ꧀ꦱꦴꦠꦶ ꦏꦭ꧀ꦪꦴꦟꦮꦴꦕꦺꦴ. ꦏꦭ꧀ꦪꦴꦟꦁ ꦩꦣꦸꦫꦁ ꦮꦴꦏ꧀ꦏꦫꦟꦁ ꦄꦱ꧀ꦱꦴꦠꦶ ꦏꦭ꧀ꦪꦴꦟꦮꦴꦏ꧀ꦏꦫꦟꦺꦴ. ꦮꦴꦏ꧀ꦏꦫꦟꦤ꧀ꦠꦶ ꦈꦢꦴꦲꦫꦟꦓꦺꦴꦱꦺꦴ. ꦒꦸꦟꦥꦫꦶꦥꦸꦟ꧀ꦟꦨꦴꦮꦺꦤ ꦥꦸꦫꦺ ꦨꦮꦴꦠꦶ ꦥꦺꦴꦫꦷ. ꦥꦸꦫꦺ ꦮꦴ ꦨꦮꦠ꧀ꦠꦴ ꦥꦺꦴꦫꦷ. ꦥꦺꦴꦫꦶꦪꦴ ꦤꦴꦒꦫꦶꦏꦶꦠ꧀ꦡꦶꦪꦴ ꦱꦸꦑꦸꦩꦴꦭꦠ꧀ꦠꦤꦺꦤ ꦱꦢꦶꦱꦴꦠꦶ ꦥꦺꦴꦫꦷ, ꦠꦴꦪ ꦥꦺꦴꦫꦶꦪꦴ. ꦮꦶꦱ꧀ꦱꦛ꧀ꦜꦴꦪꦴꦠꦶ ꦄꦥꦭꦶꦧꦸꦢ꧀ꦣꦴꦪ ꦱꦤ꧀ꦢꦶꦛ꧀ꦜꦮꦶꦭꦩ꧀ꦧꦶꦠꦴꦢꦶꦢꦺꦴꦱꦫꦲꦶꦠꦴꦪ. ꦄꦤꦺꦭꦒꦭꦴꦪꦴꦠꦶ ꦌꦭꦒꦭ꦳ꦺꦤꦮꦶꦫꦲꦶꦠꦴꦪ. ꦪꦱ꧀ꦱ ꦏꦱ꧀ꦱꦕꦶ ꦲꦶ ꦏꦡꦺꦤ꧀ꦠꦱ꧀ꦱ ꦌꦭꦴ ꦒꦭ꦳ꦤ꧀ꦠꦶ, ꦭꦴꦭꦴ ꦮꦴ ꦥꦒ꧀ꦓꦫꦤ꧀ꦠꦶ, ꦑꦺꦭ꦳ꦦꦸꦱꦶꦠꦴꦤꦶ ꦮꦴ ꦤꦶꦏ꧀ꦑꦩꦤ꧀ꦠꦶ, ꦠꦱ꧀ꦱ ꦮꦴꦕꦴ ꦌꦭꦒꦭ꦳ꦁ ꦤꦴꦩ ꦲꦺꦴꦠꦶ, ꦠꦧ꧀ꦧꦶꦥꦫꦶꦠꦴꦪꦴꦠꦶ ꦄꦠ꧀ꦡꦺꦴ. ꦄꦠ꧀ꦡꦱ꧀ꦱ ꦮꦶꦚ꧀ꦚꦴꦥꦤꦶꦪꦴꦠꦶ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦁ ꦥꦴꦏꦛꦁ ꦏꦠ꧀ꦮꦴ ꦨꦴꦱꦶꦠꦠ꧀ꦡꦱ꧀ꦱ ꦮꦶꦚ꧀ꦚꦴꦥꦤꦱꦩꦠ꧀ꦡꦴꦪ.

ꦗꦶꦟ꧀ꦟꦺꦴꦠꦶ ꦗꦫꦴꦗꦶꦟ꧀ꦟꦠꦴꦪ ꦗꦶꦟ꧀ꦟꦺꦴ. ꦮꦸꦢ꧀ꦣꦺꦴꦠꦶ ꦄꦔ꧀ꦒꦥꦕ꧀ꦕꦔ꧀ꦒꦴꦤꦁ ꦮꦸꦢ꧀ꦣꦶꦨꦴꦮꦩꦫꦶꦪꦴꦢꦥ꧀ꦥꦠ꧀ꦠꦺꦴ. ꦩꦲꦭ꧀ꦭꦏꦺꦴꦠꦶ ꦗꦴꦠꦶꦩꦲꦭ꧀ꦭꦏꦠꦴꦪ ꦱꦩꦤ꧀ꦤꦴꦒꦠꦺꦴ. ꦕꦶꦫꦏꦴꦭꦥ꧀ꦥꦱꦸꦠꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦢ꧀ꦣꦒꦠꦺꦴꦠꦶ ꦄꦢ꧀ꦣꦴꦤꦁ ꦒꦠꦺꦴ, ꦢ꧀ꦮꦺ ꦠꦪꦺꦴ ꦫꦴꦗꦥꦫꦶꦮꦛ꧀ꦛꦺ ꦄꦠꦷꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦮꦪꦺꦴꦄꦤꦸꦥ꧀ꦥꦠ꧀ꦠꦺꦴꦠꦶ ꦥꦕ꧀ꦖꦶꦩꦮꦪꦁ ꦱꦩ꧀ꦥꦠ꧀ꦠꦺꦴ, ꦥꦕ꧀ꦖꦶꦩꦮꦪꦺꦴ ꦤꦴꦩ ꦮꦱ꧀ꦱꦱꦠꦱ꧀ꦱ ꦥꦕ꧀ꦖꦶꦩꦺꦴ ꦠꦠꦶꦪꦨꦴꦒꦺꦴ.

ꦄꦥꦶ ꦕ ꦗꦶꦟ꧀ꦟꦺꦴꦠꦶ ꦥꦺꦴꦫꦴꦟꦺꦴ, ꦕꦶꦫꦏꦴꦭꦥ꧀ꦥꦮꦠ꧀ꦠꦏꦸꦭꦤ꧀ꦮꦪꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦮꦸꦢ꧀ꦣꦺꦴꦠꦶ ꦱꦷꦭꦴꦕꦴꦫꦴꦢꦶꦒꦸꦟꦮꦸꦢ꧀ꦣꦶꦪꦴ ꦪꦸꦠ꧀ꦠꦺꦴ. ꦩꦲꦭ꧀ꦭꦏꦺꦴꦠꦶ ꦮꦶꦨꦮꦩꦲꦤ꧀ꦠꦴꦪ ꦱꦩꦤ꧀ꦤꦴꦒꦠꦺꦴ. ꦄꦢ꧀ꦣꦒꦠꦺꦴꦠꦶ ꦩꦒ꧀ꦒꦥ꧀ꦥꦛꦶꦥꦤ꧀ꦤꦺꦴ ꦧ꧀ꦫꦴꦲ꧀ꦩꦟꦴꦤꦁ ꦮꦠꦕꦫꦶꦪꦴꦢꦶꦩꦫꦶꦪꦴꦢꦁ ꦄꦮꦷꦠꦶꦏ꧀ꦏꦩ꧀ꦩ ꦕꦫꦟꦱꦷꦭꦺꦴ. ꦮꦪꦺꦴꦄꦤꦸꦥ꧀ꦥꦠ꧀ꦠꦺꦴꦠꦶ ꦗꦴꦠꦶꦮꦸꦢ꧀ꦣꦨꦴꦮꦩ꧀ꦥꦶ ꦄꦤ꧀ꦠꦶꦩꦮꦪꦁ ꦄꦤꦸꦥ꧀ꦥꦠ꧀ꦠꦺꦴ.

ꦧꦸꦢ꧀ꦣꦒꦸꦟꦏꦡꦴ

꧓꧐꧔. ꦌꦮꦁ ꦮꦸꦠ꧀ꦠꦺꦠꦶ ꦌꦮꦁ ꦠꦺꦲꦶ ꦧ꧀ꦫꦴꦲ꧀ꦩꦟꦺꦲꦶ ꦮꦸꦠ꧀ꦠꦺ. ꦱꦺꦴꦟꦢꦟ꧀ꦝꦺꦴ – ‘‘ꦆꦩꦺ ꦧ꧀ꦫꦴꦲ꧀ꦩꦟꦴ ꦗꦴꦠꦶꦄꦴꦢꦷꦲꦶ ꦩꦩ ꦮꦟ꧀ꦟꦁ ꦮꦢꦤ꧀ꦠꦶ, ꦤ ꦑꦺꦴ ꦥꦤ ꦩꦺꦠꦁ ꦪꦸꦠ꧀ꦠꦁ ꦄꦠ꧀ꦠꦤꦺꦴ ꦮꦟ꧀ꦟꦺ ꦫꦗ꧀ꦗꦶꦠꦸꦁ. ꦲꦤ꧀ꦢꦴꦲꦁ ꦌꦠꦺꦱꦁ ꦮꦴꦢꦁ ꦨꦶꦤ꧀ꦢꦶꦠ꧀ꦮꦴ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦩꦲꦤ꧀ꦠꦨꦴꦮꦁ ꦚꦴꦥꦺꦠ꧀ꦮꦴ ꦌꦠꦺꦱꦁ ꦠꦠ꧀ꦡ ꦒꦩꦤꦁ ꦏꦫꦺꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦠꦺꦤ ꦲꦶ – ꦨꦺꦴ ꦩꦩꦥꦶ ꦱꦸꦟꦴꦡꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦪꦺꦥꦶ ꦈꦨꦠꦺꦴ ꦱꦸꦗꦴꦠꦺꦴꦠꦶ ꦄꦴꦢꦪꦺꦴ ꦄꦠ꧀ꦠꦤꦺꦴ ꦒꦸꦟꦺꦲꦶ ꦱꦢꦶꦱꦴ ꦒꦸꦟꦴ ꦠꦺꦥꦶ; ‘‘ꦏꦺꦴ ꦕꦴꦲꦁ ꦏꦺ ꦕ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦗꦴꦠꦶꦱꦩ꧀ꦥꦠ꧀ꦠꦶꦄꦴꦢꦪꦺꦴ ꦒꦸꦟꦴ’’ꦠꦶ ꦄꦠ꧀ꦠꦤꦺꦴ ꦒꦸꦟꦺꦲꦶ ꦈꦠ꧀ꦠꦫꦶꦠꦫꦺꦪꦺꦮ ꦩꦚ꧀ꦚꦩꦴꦤꦺꦴ, ꦆꦠꦫꦺ ꦥꦤ ꦌꦏꦤ꧀ꦠꦺꦤꦺꦮ ꦨꦒꦮꦠꦺꦴ ꦩꦲꦤ꧀ꦠꦨꦴꦮꦢꦷꦥꦤꦠ꧀ꦡꦁ ꦥꦏꦴꦱꦺꦠꦶ.

ꦩꦪꦩꦺꦮ ꦄꦫꦲꦴꦩꦴꦠꦶ ꦌꦮꦁ ꦤꦶꦪꦴꦩꦺꦤ꧀ꦠꦺꦴꦮꦺꦠ꧀ꦡ ꦆꦢꦁ ꦢꦷꦥꦺꦠꦶ – ‘‘ꦪꦢꦶ ꦒꦸꦟꦩꦲꦤ꧀ꦠꦠꦴꦪ ꦈꦥꦱꦔ꧀ꦏꦩꦶꦠꦧ꧀ꦧꦺꦴ ꦤꦴꦩ ꦲꦺꦴꦠꦶ. ꦪꦡꦴ ꦲꦶ ꦱꦶꦤꦺꦫꦸꦁ ꦈꦥꦤꦶꦣꦴꦪ ꦱꦴꦱꦥꦺꦴ, ꦩꦲꦴꦱꦩꦸꦢ꧀ꦢꦁ ꦈꦥꦤꦶꦣꦴꦪ ꦒꦺꦴꦥꦢꦏꦁ, ꦱꦠ꧀ꦠꦱꦸ ꦩꦲꦴꦱꦫꦺꦱꦸ ꦈꦢꦏꦁ ꦈꦥꦤꦶꦣꦴꦪ ꦈꦱ꧀ꦱꦴꦮꦧꦶꦤ꧀ꦢꦸ ꦥꦫꦶꦠ꧀ꦠꦺꦴ ꦭꦴꦩꦏꦺꦴ. ꦌꦮꦩꦺꦮ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦗꦴꦠꦶꦱꦩ꧀ꦥꦠ꧀ꦠꦶꦄꦴꦢꦪꦺꦴꦥꦶ ꦒꦸꦟꦺ ꦈꦥꦤꦶꦣꦴꦪ ꦄꦩ꧀ꦲꦴꦏꦁ ꦒꦸꦟꦴ ꦥꦫꦶꦠ꧀ꦠꦴ ꦭꦴꦩꦏꦴ; ꦠꦱ꧀ꦩꦴ ꦩꦪꦩꦺꦮ ꦄꦫꦲꦴꦩ ꦠꦁ ꦨꦮꦤ꧀ꦠꦁ ꦒꦺꦴꦠꦩꦁ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸ’’ꦤ꧀ꦠꦶ.

ꦩꦲꦤ꧀ꦠꦁ ꦚꦴꦠꦶꦱꦁꦓꦁ ꦎꦲꦴꦪꦴꦠꦶ ꦩꦴꦠꦶꦥꦏ꧀ꦑꦺ ꦄꦱꦷꦠꦶꦏꦸꦭꦱꦲꦱ꧀ꦱꦴꦤꦶ, ꦥꦶꦠꦶꦥꦏ꧀ꦑꦺ ꦄꦱꦷꦠꦶꦏꦸꦭꦱꦲꦱ꧀ꦱꦴꦤꦷꦠꦶ ꦌꦮꦁ ꦱꦛ꧀ꦜꦶꦏꦸꦭꦱꦠꦱꦲꦱ꧀ꦱꦁ ꦎꦲꦴꦪ ꦥꦧ꧀ꦧꦗꦶꦠꦺꦴ.

ꦨꦹꦩꦶꦒꦠꦚ꧀ꦕ ꦮꦺꦲꦴꦱꦛ꧀ꦜꦚ꧀ꦕꦴꦠꦶ ꦌꦠ꧀ꦡ ꦫꦴꦗꦔ꧀ꦒꦟꦺ ꦕꦺꦮ ꦈꦪ꧀ꦪꦴꦤꦺ ꦕ ꦱꦸꦣꦴꦩꦛ꧀ꦜꦥꦺꦴꦏ꧀ꦑꦫꦟꦶꦪꦺꦴ ꦱꦠ꧀ꦠꦫꦠꦤꦴꦤꦁ ꦥꦹꦫꦺꦠ꧀ꦮꦴ ꦨꦹꦩꦶꦪꦁ ꦜꦥꦶꦠꦁ ꦣꦤꦁ ꦨꦹꦩꦶꦒꦠꦁ ꦤꦴꦩ. ꦥꦴꦱꦴꦢꦤꦶꦪꦹꦲꦴꦢꦪꦺꦴ ꦥꦫꦶꦥꦹꦫꦺꦠ꧀ꦮꦴ ꦜꦥꦶꦠꦁ ꦮꦺꦲꦴꦱꦛ꧀ꦜꦁ ꦤꦴꦩ. ꦌꦠꦁ ꦠꦴꦮ ꦏꦸꦭꦥꦫꦶꦪꦴꦪꦺꦤ ꦄꦴꦒꦠꦁ. ꦠꦡꦴꦒꦠꦱ꧀ꦱ ꦥꦤ ꦗꦴꦠꦢꦶꦮꦱꦺꦪꦺꦮ ꦱꦔ꧀ꦑꦺꦴ, ꦌꦭꦺꦴ, ꦈꦥ꧀ꦥꦭꦺꦴ, ꦥꦸꦟ꧀ꦝꦫꦷꦏꦺꦴꦠꦶ ꦕꦠ꧀ꦠꦴꦫꦺꦴ ꦤꦶꦣꦪꦺꦴ ꦈꦒ꧀ꦒꦠꦴ. ꦠꦺꦱꦸ ꦱꦔ꧀ꦑꦺꦴ ꦒꦴꦮꦸꦠꦶꦏꦺꦴ, ꦌꦭꦺꦴ ꦄꦝ꧀ꦞꦪꦺꦴꦗꦤꦶꦏꦺꦴ, ꦈꦥ꧀ꦥꦭꦺꦴ ꦠꦶꦒꦴꦮꦸꦠꦶꦏꦺꦴ, ꦥꦸꦟ꧀ꦝꦫꦷꦏꦺꦴ ꦪꦺꦴꦗꦤꦶꦏꦺꦴ. ꦠꦺꦱꦸꦥꦶ ꦒꦲꦶꦠꦁ ꦒꦲꦶꦠꦁ ꦥꦹꦫꦠꦶꦪꦺꦮ, ꦆꦠꦶ ꦨꦒꦮꦴ ꦥꦲꦹꦠꦁ ꦲꦶꦫꦚ꧀ꦚꦱꦸꦮꦟ꧀ꦟꦁ ꦎꦲꦴꦪ ꦥꦧ꧀ꦧꦗꦶꦠꦺꦴꦠꦶ ꦮꦺꦢꦶꦠꦧ꧀ꦧꦺꦴ.

ꦢꦲꦫꦺꦴꦮ ꦱꦩꦴꦤꦺꦴꦠꦶ ꦠꦫꦸꦟꦺꦴꦮ ꦱꦩꦴꦤꦺꦴ. ꦱꦸꦱꦸꦏꦴꦭ꦳ꦏꦺꦱꦺꦴꦠꦶ ꦱꦸꦛ꧀ꦜꦸ ꦏꦴꦭ꦳ꦏꦺꦱꦺꦴ, ꦄꦚ꧀ꦗꦤꦮꦟ꧀ꦟꦱꦢꦶꦱꦏꦺꦱꦺꦴ ꦲꦸꦠ꧀ꦮꦴ ꦮꦴꦠꦶ ꦄꦠ꧀ꦡꦺꦴ. ꦨꦢ꧀ꦫꦺꦤꦴꦠꦶ ꦨꦢ꧀ꦢꦏꦺꦤ. ꦥꦜꦩꦺꦤ ꦮꦪꦱꦴꦠꦶ ꦠꦶꦟ꧀ꦟꦁ ꦮꦪꦴꦤꦁ ꦥꦜꦩꦮꦪꦺꦤ. ꦄꦏꦴꦩꦏꦴꦤꦤ꧀ꦠꦶ ꦄꦤꦶꦕ꧀ꦖꦩꦴꦤꦴꦤꦁ. ꦄꦤꦴꦢꦫꦠ꧀ꦡꦺ ꦱꦴꦩꦶꦮꦕꦤꦁ. ꦄꦱ꧀ꦱꦹꦤꦶ ꦩꦸꦑꦺ ꦌꦠꦺꦱꦤ꧀ꦠꦶ ꦄꦱ꧀ꦱꦸꦩꦸꦑꦴ, ꦠꦺꦱꦁ ꦄꦱ꧀ꦱꦸꦩꦸꦑꦴꦤꦁ, ꦄꦱ꧀ꦱꦹꦲꦶ ꦏꦶꦭꦶꦤ꧀ꦤꦩꦸꦑꦴꦤꦤ꧀ꦠꦶ ꦄꦠ꧀ꦡꦺꦴ. ꦫꦸꦢꦤ꧀ꦠꦴꦤꦤ꧀ꦠꦶ ꦏꦤ꧀ꦢꦶꦠ꧀ꦮꦴ ꦫꦺꦴꦢꦩꦴꦤꦴꦤꦁ. ꦄꦑꦸꦢ꧀ꦢꦴꦮꦏꦴꦱꦺꦴꦠꦶ ꦌꦠ꧀ꦡ ꦨꦒꦮꦠꦺꦴ ꦄꦥꦫꦶꦩꦴꦟꦺꦴꦪꦺꦮ ꦢꦱ꧀ꦱꦤꦴꦪ ꦎꦏꦴꦱꦺꦴꦠꦶ ꦮꦺꦢꦶꦠꦧ꧀ꦧꦺꦴ.

ꦠꦠ꧀ꦫꦶꦢꦁ ꦮꦠ꧀ꦡꦸ – ꦫꦴꦗꦒꦲꦺ ꦏꦶꦫ ꦄꦚ꧀ꦚꦠꦫꦺꦴ ꦧ꧀ꦫꦴꦲ꧀ꦩꦟꦺꦴ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦥꦩꦴꦟꦁ ꦒꦲꦺꦠꦸꦁ ꦤ ꦱꦏ꧀ꦏꦺꦴꦠꦷꦠꦶ ꦱꦸꦠ꧀ꦮꦴ ꦨꦒꦮꦠꦺꦴ ꦥꦶꦟ꧀ꦝꦴꦪ ꦥꦮꦶꦱꦤꦏꦴꦭꦺ ꦱꦛ꧀ꦜꦶꦲꦠ꧀ꦡꦁ ꦮꦺꦭ꦳ꦸꦁ ꦒꦲꦺꦠ꧀ꦮꦴ ꦤꦒꦫꦢ꧀ꦮꦴꦫꦱ꧀ꦱ ꦧꦲꦶ ꦜꦠ꧀ꦮꦴ ꦱꦩ꧀ꦥꦠ꧀ꦠꦺ ꦨꦒꦮꦠꦶ ꦮꦺꦭ꦳ꦸꦁ ꦒꦲꦺꦠ꧀ꦮꦴ ꦱꦩꦷꦥꦺ ꦄꦛ꧀ꦜꦴꦱꦶ. ꦮꦺꦭ꦳ꦸ ꦨꦒꦮꦠꦺꦴ ꦗꦴꦟꦸꦏꦩꦠ꧀ꦠꦁ ꦥꦴꦥꦸꦟꦶ. ꦥꦸꦤ ꦢꦶꦮꦱꦺ ꦢ꧀ꦮꦺ ꦮꦺꦭ꦳ꦹ ꦓꦛꦺꦠ꧀ꦮꦴ ꦱꦩꦷꦥꦺ ꦄꦛ꧀ꦜꦴꦱꦶ. ꦨꦒꦮꦴꦥꦶ ꦢ꧀ꦮꦶꦤ꧀ꦤꦁ ꦮꦺꦭ꦳ꦹꦤꦁ ꦈꦥꦫꦶ ꦏꦛꦶꦩꦠ꧀ꦠꦩꦺꦮ ꦥꦚ꧀ꦚꦴꦪꦩꦴꦤꦺꦴ – ‘‘ꦧ꧀ꦫꦴꦲ꧀ꦩꦟ, ꦏꦶꦁ ꦏꦫꦺꦴꦱꦷ’’ꦠꦶ ꦄꦴꦲ. ꦠꦸꦩ꧀ꦲꦴꦏꦁ ꦥꦩꦴꦟꦁ ꦒꦟ꧀ꦲꦴꦩꦷꦠꦶ. ‘‘ꦧ꧀ꦫꦴꦲ꧀ꦩꦟ, ꦱꦕꦺꦥꦶ ꦠ꧀ꦮꦁ ꦱꦏꦭꦕꦏ꧀ꦏꦮꦴꦭ꦳ꦒꦧ꧀ꦨꦁ ꦥꦹꦫꦺꦠ꧀ꦮꦴ ꦜꦶꦠꦺ ꦮꦺꦭ꦳ꦹ ꦓꦛꦺꦠ꧀ꦮꦴ ꦄꦴꦒꦩꦶꦱ꧀ꦱꦱꦶ, ꦤꦺꦮ ꦩꦺ ꦥꦩꦴꦟꦁ ꦒꦲꦺꦠꦸꦁ ꦱꦏ꧀ꦑꦶꦱ꧀ꦱꦱꦶ. ꦤ ꦲꦶ ꦩꦪꦴ ꦕꦠ꧀ꦠꦴꦫꦶ ꦄꦱꦔ꧀ꦑ꧀ꦪꦺꦪꦴꦤꦶ ꦏꦥ꧀ꦥꦱꦠꦱꦲꦱ꧀ꦱꦚ꧀ꦕ ꦠꦡꦴ ꦥꦴꦫꦩꦶꦪꦺꦴ ꦥꦹꦫꦶꦠꦴ, ꦪꦡꦴ ꦩꦺ ꦥꦫꦺꦴ ꦥꦩꦴꦟꦁ ꦒꦟ꧀ꦲꦺꦪ꧀ꦪ, ꦄꦠꦸꦭꦺꦴ, ꦧ꧀ꦫꦴꦲ꧀ꦩꦟ, ꦠꦡꦴꦒꦠꦺꦴ ꦄꦥ꧀ꦥꦩꦺꦪ꧀ꦪꦺꦴ’’ꦠꦶ ꦮꦠ꧀ꦮꦴ ꦣꦩ꧀ꦩꦥꦢꦺ ꦒꦴꦡꦩꦴꦲ –

‘‘ꦠꦺ ꦠꦴꦢꦶꦱꦺ ꦥꦹꦗꦪꦠꦺꦴ, ꦤꦶꦧ꧀ꦧꦸꦠꦺ ꦄꦏꦸꦠꦺꦴꦨꦪꦺ;

ꦤ ꦱꦏ꧀ꦏꦴ ꦥꦸꦚ꧀ꦚꦁ ꦱꦔ꧀ꦑꦴꦠꦸꦁ, ꦆꦩꦺꦠ꧀ꦠꦩꦥꦶ ꦏꦺꦤꦕꦷ’’ꦠꦶ. (ꦣ. ꦥ. ꧓꧖);

ꦒꦴꦡꦴꦥꦫꦶꦪꦺꦴꦱꦴꦤꦺ ꦕꦠꦸꦫꦴꦱꦷꦠꦶꦥꦴꦟꦱꦲꦱ꧀ꦱꦴꦤꦶ ꦄꦩꦠꦁ ꦥꦶꦮꦶꦁꦱꦸ.

ꦄꦥꦫꦩ꧀ꦥꦶ ꦮꦠ꧀ꦡꦸ – ꦫꦴꦲꦸ ꦏꦶꦫ ꦄꦱꦸꦫꦶꦤ꧀ꦢꦺꦴ ꦕꦠ꧀ꦠꦴꦫꦶ ꦪꦺꦴꦗꦤꦱꦲꦱ꧀ꦱꦴꦤꦶ ꦄꦛ꧀ꦜ ꦕ ꦪꦺꦴꦗꦤꦱꦠꦴꦤꦶ ꦈꦕ꧀ꦕꦺꦴ. ꦧꦴꦲꦤ꧀ꦠꦫꦩꦱ꧀ꦱ ꦢ꧀ꦮꦴꦢꦱꦪꦺꦴꦗꦤꦱꦠꦴꦤꦶ. ꦧꦲꦭꦤ꧀ꦠꦫꦺꦤ ꦖ ꦪꦺꦴꦗꦤꦱꦠꦴꦤꦶ. ꦲꦠ꧀ꦡꦠꦭꦥꦴꦢꦠꦭꦴꦤꦁ ꦥꦸꦡꦸꦭꦠꦺꦴ ꦠꦷꦟꦶ ꦪꦺꦴꦗꦤꦱꦠꦴꦤꦶ. ꦄꦔ꧀ꦒꦸꦭꦶꦥꦧ꧀ꦧꦴꦤꦶ ꦥꦟ꧀ꦟꦴꦱꦪꦺꦴꦗꦤꦴꦤꦶ. ꦨꦩꦸꦏꦤ꧀ꦠꦫꦁ ꦥꦟ꧀ꦟꦴꦱꦪꦺꦴꦗꦤꦁ. ꦩꦸꦑꦁ ꦢ꧀ꦮꦶꦪꦺꦴꦗꦤꦱꦠꦁ ꦠꦶꦪꦺꦴꦗꦤꦱꦠꦒꦩ꧀ꦨꦷꦫꦁ ꦠꦶꦪꦺꦴꦗꦤꦱꦠꦥꦫꦶꦩꦟ꧀ꦝꦭꦁ. ꦒꦷꦮꦴ ꦠꦶꦪꦺꦴꦗꦤꦱꦠꦁ. ꦤꦭꦴꦛꦁ ꦠꦶꦪꦺꦴꦗꦤꦱꦠꦁ. ꦱꦷꦱꦁ ꦤꦮꦪꦺꦴꦗꦤꦱꦠꦁ. ‘‘ꦱꦺꦴ ꦄꦲꦁ ꦈꦕ꧀ꦕꦺꦴꦱ꧀ꦩꦶ, ꦱꦠ꧀ꦡꦴꦫꦁ ꦎꦤꦩꦶꦠ꧀ꦮꦴ ꦎꦭꦺꦴꦏꦺꦠꦸꦁ ꦤ ꦱꦏ꧀ꦑꦶꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦤꦴꦒꦕ꧀ꦖꦶ. ꦱꦺꦴ ꦌꦏꦢꦶꦮꦱꦁ ꦨꦒꦮꦠꦺꦴ ꦮꦟ꧀ꦟꦁ ꦱꦸꦠ꧀ꦮꦴ – ‘‘ꦪꦡꦴꦏꦡꦚ꧀ꦕ ꦎꦭꦺꦴꦏꦺꦱ꧀ꦱꦴꦩꦷ’’ꦠꦶ ꦄꦴꦒꦠꦺꦴ.

ꦄꦡ ꦨꦒꦮꦴ ꦠꦱ꧀ꦱꦗ꧀ꦙꦴꦱꦪꦁ ꦮꦶꦢꦶꦠ꧀ꦮꦴ – ‘‘ꦕꦠꦹꦱꦸ ꦆꦫꦶꦪꦴꦥꦡꦺꦱꦸ ꦏꦠꦫꦺꦤ ꦢꦱ꧀ꦱꦺꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ‘‘ꦜꦶꦠꦏꦺꦴ ꦤꦴꦩ ꦤꦷꦕꦺꦴꦥꦶ ꦈꦕ꧀ꦕꦺꦴ ꦮꦶꦪ ꦥꦚ꧀ꦚꦴꦪꦠꦶ. ꦤꦶꦥꦤ꧀ꦤꦺꦴꦮꦱ꧀ꦱ ꦄꦠ꧀ꦠꦴꦤꦁ ꦢꦱ꧀ꦱꦺꦱ꧀ꦱꦴꦩꦷ’’ꦠꦶ ‘‘ꦄꦴꦤꦤ꧀ꦢ, ꦒꦤ꧀ꦣꦏꦸꦛꦶꦥꦫꦶꦮꦺꦟꦺ ꦩꦚ꧀ꦕꦏꦁ ꦥꦚ꧀ꦚꦴꦥꦺꦲꦷ’’ꦠꦶ ꦮꦠ꧀ꦮꦴ ꦠꦠ꧀ꦡ ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦱꦶ. ꦫꦴꦲꦸ ꦄꦴꦒꦤ꧀ꦠ꧀ꦮꦴ ꦤꦶꦥꦤ꧀ꦤꦁ ꦨꦒꦮꦤ꧀ꦠꦁ ꦒꦷꦮꦁ ꦈꦤ꧀ꦤꦴꦩꦺꦠ꧀ꦮꦴ ꦤꦨꦩꦗ꧀ꦙꦺ ꦥꦸꦟ꧀ꦟꦕꦤ꧀ꦢꦁ ꦮꦶꦪ ꦈꦭ꧀ꦭꦺꦴꦏꦺꦱꦶ. ꦏꦶꦩꦶꦢꦁ ꦄꦱꦸꦫꦶꦤ꧀ꦢꦴꦠꦶ ꦕ ꦮꦸꦠ꧀ꦠꦺ – ‘‘ꦨꦒꦮꦴ ꦎꦤꦩꦶꦠ꧀ꦮꦴ ꦎꦭꦺꦴꦏꦺꦠꦸꦁ ꦤ ꦱꦏ꧀ꦑꦶꦱ꧀ꦱꦴꦩꦷ’’ꦠꦶ ꦤꦴꦒꦕ꧀ꦖꦶꦤ꧀ꦠꦶ. ꦤ ꦩꦪꦴ, ꦄꦱꦸꦫꦶꦤ꧀ꦢ, ꦄꦣꦺꦴꦩꦸꦑꦺꦤ ꦥꦴꦫꦩꦶꦪꦺꦴ ꦥꦹꦫꦶꦠꦴ. ꦈꦢ꧀ꦣꦒ꧀ꦒꦩꦺꦮ ꦏꦠ꧀ꦮꦴ ꦢꦴꦤꦁ ꦢꦶꦤ꧀ꦤꦤ꧀ꦠꦶ. ꦠꦁ ꦢꦶꦮꦱꦁ ꦫꦴꦲꦸ ꦱꦫꦟꦁ ꦄꦒꦩꦴꦱꦶ. ꦌꦮꦁ ꦨꦒꦮꦴ ꦄꦑꦸꦢ꧀ꦢꦴꦮꦏꦴꦱꦺꦴ ꦢꦱ꧀ꦱꦤꦴꦪ.

ꦕꦠꦸꦥꦴꦫꦶꦱꦸꦢ꧀ꦣꦶꦱꦷꦭꦺꦤ ꦱꦷꦭꦮꦴ, ꦠꦁ ꦥꦤ ꦱꦷꦭꦁ ꦄꦫꦶꦪꦁ ꦈꦠ꧀ꦠꦩꦁ ꦥꦫꦶꦱꦸꦢ꧀ꦣꦁ. ꦠꦺꦤꦴꦲ – ‘‘ꦄꦫꦶꦪꦱꦷꦭꦷ’’ꦠꦶ. ꦠꦢꦺꦠꦁ ꦄꦤꦮꦗ꧀ꦗꦛ꧀ꦜꦺꦤ ꦏꦸꦱꦭꦁ. ꦠꦺꦤꦴꦲ – ‘‘ꦏꦸꦱꦭꦱꦷꦭꦷ’’ꦠꦶ. ꦏꦸꦱꦭꦱꦷꦭꦺꦤꦴꦠꦶ ꦆꦢꦩꦱ꧀ꦱ ꦮꦺꦮꦕꦤꦁ.

ꦧꦲꦹꦤꦁ ꦄꦴꦕꦫꦶꦪꦥꦴꦕꦫꦶꦪꦺꦴꦠꦶ ꦨꦒꦮꦠꦺꦴ ꦌꦏꦺꦏꦴꦪ ꦣꦩ꧀ꦩꦢꦺꦱꦤꦴꦪ ꦕꦠꦸꦫꦴꦱꦷꦠꦶꦥꦴꦟꦱꦲꦱ꧀ꦱꦴꦤꦶ ꦄꦥꦫꦶꦩꦴꦟꦴꦥꦶ ꦢꦺꦮꦩꦤꦸꦱ꧀ꦱꦴ ꦩꦒ꧀ꦒꦦꦭꦴꦩꦠꦁ ꦥꦶꦮꦤ꧀ꦠꦶ, ꦠꦱ꧀ꦩꦴ ꦧꦲꦹꦤꦁ ꦄꦴꦕꦫꦶꦪꦺꦴ. ꦱꦴꦮꦏꦮꦺꦤꦺꦪ꧀ꦪꦴꦤꦁ ꦥꦤ ꦥꦴꦕꦫꦶꦪꦺꦴꦠꦶ.

ꦑꦷꦟꦏꦴꦩꦫꦴꦒꦺꦴꦠꦶ ꦌꦠ꧀ꦡ ꦏꦴꦩꦁ ꦨꦒꦮꦠꦺꦴ ꦱꦧ꧀ꦧꦺꦥꦶ ꦏꦶꦭꦺꦱꦴ ꦑꦷꦟꦴ. ꦧ꧀ꦫꦴꦲ꧀ꦩꦟꦺꦴ ꦥꦤ ꦠꦺ ꦤ ꦗꦴꦤꦴꦠꦶ. ꦄꦠ꧀ꦠꦤꦺꦴ ꦗꦴꦤꦤꦛ꧀ꦜꦴꦤꦺꦪꦺꦮ ꦒꦸꦟꦁ ꦏꦡꦺꦠꦶ. ꦮꦶꦒꦠꦕꦴꦥꦭ꧀ꦭꦺꦴꦠꦶ – ‘‘ꦥꦠ꧀ꦠꦩꦟ꧀ꦝꦤꦴ ꦕꦷꦮꦫꦩꦟ꧀ꦝꦤꦴ ꦱꦺꦤꦴꦱꦤꦩꦟ꧀ꦝꦤꦴ ꦆꦩꦱ꧀ꦱ ꦮꦴ ꦥꦹꦠꦶꦏꦴꦪꦱ꧀ꦱ…ꦥꦺ… ꦏꦺꦭꦤꦴ ꦥꦛꦶꦏꦺꦭꦤꦴ’’ꦠꦶ (ꦮꦶꦨ. ꧘꧕꧔) ꦌꦮꦁ ꦮꦸꦠ꧀ꦠꦕꦴꦥꦭ꧀ꦭꦴ ꦮꦶꦫꦲꦶꦠꦺꦴ.

ꦄꦥꦴꦥꦥꦸꦫꦺꦏ꧀ꦑꦴꦫꦺꦴꦠꦶ ꦄꦥꦴꦥꦺ ꦤꦮ ꦭꦺꦴꦏꦸꦠ꧀ꦠꦫꦣꦩ꧀ꦩꦺ ꦥꦸꦫꦠꦺꦴ ꦏꦠ꧀ꦮꦴ ꦮꦶꦕꦫꦠꦶ. ꦧ꧀ꦫꦲ꧀ꦩꦚ꧀ꦚꦴꦪ ꦥꦗꦴꦪꦴꦠꦶ ꦱꦴꦫꦶꦥꦸꦠ꧀ꦠꦩꦺꦴꦒ꧀ꦒꦭ꧀ꦭꦴꦤꦩꦲꦴꦏꦱ꧀ꦱꦥꦴꦢꦶꦨꦺꦢꦴꦪ ꦧ꧀ꦫꦴꦲ꧀ꦩꦟꦥꦗꦴꦪ, ꦌꦠꦶꦱ꧀ꦱꦴꦪ ꦕ ꦥꦗꦴꦪ ꦥꦸꦫꦺꦏ꧀ꦑꦴꦫꦺꦴ. ꦄꦪꦚ꧀ꦲꦶ ꦥꦗꦴ ꦱꦩꦟꦁ ꦒꦺꦴꦠꦩꦁ ꦥꦸꦫꦏ꧀ꦑꦠ꧀ꦮꦴ ꦕꦫꦠꦷꦠꦶ ꦄꦠ꧀ꦡꦺꦴ. ꦄꦥꦶ ꦕ ꦄꦥꦴꦥꦥꦸꦫꦺꦏ꧀ꦑꦴꦫꦺꦴꦠꦶ ꦤ ꦥꦴꦥꦁ ꦥꦸꦫꦺꦏ꧀ꦑꦴꦫꦺꦴ ꦤ ꦥꦴꦥꦁ ꦥꦸꦫꦠꦺꦴ ꦏꦠ꧀ꦮꦴ ꦕꦫꦠꦶ, ꦤ ꦥꦴꦥꦁ ꦆꦕ꧀ꦖꦠꦷꦠꦶ ꦄꦠ꧀ꦡꦺꦴ. ꦏꦱ꧀ꦱ? ꦧ꧀ꦫꦲ꧀ꦩꦚ꧀ꦚꦴꦪ ꦥꦗꦴꦪ. ꦄꦠ꧀ꦠꦤꦴ ꦱꦢ꧀ꦣꦶꦁ ꦥꦛꦶꦮꦶꦫꦸꦢ꧀ꦣꦴꦪꦥꦶ ꦧ꧀ꦫꦴꦲ꧀ꦩꦟꦥꦗꦴꦪ ꦄꦮꦶꦫꦸꦢ꧀ꦣꦺꦴ ꦲꦶꦠꦱꦸꦑꦠ꧀ꦡꦶꦏꦺꦴ ꦪꦺꦮꦴꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦠꦶꦫꦺꦴꦫꦛ꧀ꦜꦴꦠꦶ ꦥꦫꦫꦛ꧀ꦜꦠꦺꦴ. ꦠꦶꦫꦺꦴꦗꦤꦥꦢꦴꦠꦶ ꦥꦫꦗꦤꦥꦢꦠꦺꦴ. ꦥꦚ꧀ꦲꦁ ꦥꦸꦕ꧀ꦖꦶꦠꦸꦁ ꦄꦴꦒꦕ꧀ꦖꦤ꧀ꦠꦷꦠꦶ ꦑꦠ꧀ꦠꦶꦪꦥꦟ꧀ꦝꦶꦠꦴꦢꦪꦺꦴ ꦕꦺꦮ ꦢꦺꦮꦧ꧀ꦫꦲ꧀ꦩꦤꦴꦒꦒꦤ꧀ꦣꦧ꧀ꦧꦴꦢꦪꦺꦴ ꦕ – ‘‘ꦥꦚ꧀ꦲꦺ ꦄꦨꦶꦱꦔ꧀ꦑꦫꦶꦠ꧀ꦮꦴ ꦥꦸꦕ꧀ꦖꦶꦱ꧀ꦱꦴꦩꦴ’’ꦠꦶ ꦄꦴꦒꦕ꧀ꦖꦤ꧀ꦠꦶ. ꦠꦠ꧀ꦡ ꦏꦺꦕꦶ ꦥꦸꦕ꧀ꦖꦴꦪ ꦮꦴ ꦢꦺꦴꦱꦁ ꦮꦶꦱ꧀ꦱꦗ꧀ꦗꦤꦱꦩ꧀ꦥꦛꦶꦕ꧀ꦖꦤꦺ ꦮꦴ ꦄꦱꦩꦠ꧀ꦡꦠꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦄꦥꦸꦕ꧀ꦖꦶꦠ꧀ꦮꦴꦮ ꦠꦸꦟ꧀ꦲꦷ ꦤꦶꦱꦷꦢꦤ꧀ꦠꦶ. ꦏꦺꦕꦶ ꦥꦸꦕ꧀ꦖꦤ꧀ꦠꦶ. ꦏꦺꦱꦚ꧀ꦕꦶ ꦨꦒꦮꦴ ꦥꦸꦕ꧀ꦖꦴꦪ ꦈꦱ꧀ꦱꦴꦲꦁ ꦗꦤꦺꦠ꧀ꦮꦴ ꦮꦶꦱ꧀ꦱꦗ꧀ꦗꦺꦠꦶ. ꦌꦮꦁ ꦱꦧ꧀ꦧꦺꦱꦩ꧀ꦥꦶ ꦠꦺꦱꦁ ꦮꦶꦩꦠꦶꦪꦺꦴ ꦠꦷꦫꦁ ꦥꦠ꧀ꦮꦴ ꦩꦲꦴꦱꦩꦸꦢ꧀ꦢꦱ꧀ꦱ ꦈꦴꦩꦶꦪꦺꦴ ꦮꦶꦪ ꦨꦒꦮꦤ꧀ꦠꦁ ꦥꦠ꧀ꦮꦴ ꦨꦶꦗ꧀ꦗꦤ꧀ꦠꦶ.

ꦌꦲꦶ ꦱ꧀ꦮꦴꦒꦠꦮꦴꦢꦷꦠꦶ ꦢꦺꦮꦩꦤꦸꦱ꧀ꦱꦥꦧ꧀ꦧꦗꦶꦠꦒꦲꦛ꧀ꦜꦺꦱꦸ ꦠꦁ ꦠꦁ ꦄꦠ꧀ꦠꦤꦺꦴ ꦱꦤ꧀ꦠꦶꦏꦁ ꦄꦴꦒꦠꦁ – ‘‘ꦌꦲꦶ ꦱ꧀ꦮꦴꦒꦠ’’ꦤ꧀ꦠꦶ ꦌꦮꦁ ꦮꦢꦠꦷꦠꦶ ꦄꦠ꧀ꦡꦺꦴ. ꦱꦑꦶꦭꦺꦴꦠꦶ ꦠꦠ꧀ꦡ ꦏꦠꦩꦁ ꦱꦴꦑꦭ꧀ꦪꦁ? ‘‘ꦪꦴ ꦱꦴ ꦮꦴꦕꦴ ꦤꦺꦭꦴ ꦏꦟ꧀ꦟꦱꦸꦑꦴ’’ꦠꦶꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦱꦴꦑꦭ꧀ꦪꦺꦤ ꦱꦩꦤ꧀ꦤꦴꦒꦠꦺꦴ, ꦩꦸꦢꦸꦮꦕꦤꦺꦴꦠꦶ ꦄꦠ꧀ꦡꦺꦴ. ꦱꦩ꧀ꦩꦺꦴꦢꦏꦺꦴꦠꦶ ꦥꦛꦶꦱꦤ꧀ꦡꦴꦫꦏꦸꦱꦭꦺꦴ, ꦄꦴꦒꦠꦴꦒꦠꦴꦤꦁ ꦕꦠꦸꦤ꧀ꦤꦁ ꦥꦫꦶꦱꦴꦤꦁ – ‘‘ꦏꦕ꧀ꦕꦶ, ꦨꦶꦏ꧀ꦑꦮꦺ, ꦑꦩꦤꦷꦪꦁ, ꦏꦕ꧀ꦕꦶ ꦪꦴꦥꦤꦷꦪ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦱꦧ꧀ꦧꦁ ꦄꦢ꧀ꦣꦴꦤꦢꦫꦡꦁ ꦮꦹꦥꦱꦩꦺꦤ꧀ꦠꦺꦴ ꦮꦶꦪ ꦥꦜꦩꦠꦫꦁ ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦏꦠ꧀ꦠꦴꦠꦶ ꦄꦠ꧀ꦡꦺꦴ. ꦄꦧ꧀ꦨꦴꦏꦸꦛꦶꦏꦺꦴꦠꦶ ꦪꦡꦴ ꦌꦏꦕ꧀ꦕꦺ ꦥꦫꦶꦱꦁ ꦥꦠ꧀ꦮꦴ ꦡꦢ꧀ꦣꦩꦸꦑꦴ ꦱꦔ꧀ꦏꦸꦛꦶꦠꦩꦸꦑꦴ ꦲꦺꦴꦤ꧀ꦠꦶ, ꦤ ꦌꦢꦶꦱꦺꦴ, ꦥꦫꦶꦱꦢꦱ꧀ꦱꦤꦺꦤ ꦥꦤꦱ꧀ꦱ ꦧꦴꦭꦴꦠꦥꦱꦩ꧀ꦦꦱ꧀ꦱꦺꦤ ꦮꦶꦪ ꦥꦢꦸꦩꦁ ꦩꦸꦑꦥꦢꦸꦩꦁ ꦮꦶꦏꦱꦠꦶ ꦥꦸꦟ꧀ꦟꦕꦤ꧀ꦢꦱꦱ꧀ꦱꦶꦫꦶꦏꦁ ꦲꦺꦴꦠꦶ. ꦈꦠ꧀ꦠꦴꦤꦩꦸꦑꦺꦴꦠꦶ ꦪꦡꦴ ꦌꦏꦕ꧀ꦕꦺ ꦤꦶꦏꦸꦗ꧀ꦗꦶꦠꦩꦸꦑꦴ ꦮꦶꦪ ꦱꦩ꧀ꦥꦠ꧀ꦠꦴꦪ ꦥꦫꦶꦱꦴꦪ ꦤ ꦏꦶꦚ꧀ꦕꦶ ꦏꦡꦺꦤ꧀ꦠꦶ, ꦄꦠꦶꦢꦸꦭ꧀ꦭꦨꦏꦡꦴ ꦲꦺꦴꦤ꧀ꦠꦶ, ꦤ ꦌꦮꦫꦹꦥꦺꦴ. ꦱꦩꦟꦺꦴ ꦥꦤ ꦒꦺꦴꦠꦩꦺꦴ ꦱꦸꦭꦨꦏꦡꦺꦴ. ꦤ ꦠꦱ꧀ꦱ ꦱꦤ꧀ꦠꦶꦏꦁ ꦄꦴꦒꦠꦴꦒꦠꦴꦤꦁ – ‘‘ꦏꦱ꧀ꦩꦴ ꦩꦪꦁ ꦆꦣꦴꦒꦠꦴ’’ꦠꦶ ꦮꦶꦥ꧀ꦥꦛꦶꦱꦴꦫꦺꦴ ꦈꦥ꧀ꦥꦗ꧀ꦗꦠꦶ ꦣꦩ꧀ꦩꦁ ꦥꦤ ꦱꦸꦠ꧀ꦮꦴ ꦄꦠ꧀ꦠꦩꦤꦴꦮ ꦲꦺꦴꦤ꧀ꦠꦷꦠꦶ ꦢꦱ꧀ꦱꦺꦠꦶ. ꦥꦸꦧ꧀ꦧꦨꦴꦱꦷꦠꦶ ꦨꦴꦱꦤ꧀ꦠꦺꦴ ꦕ ꦥꦜꦩꦠꦫꦁ ꦨꦴꦱꦠꦶ, ꦠꦚ꧀ꦕ ꦑꦺꦴ ꦏꦴꦭꦪꦸꦠ꧀ꦠꦁ ꦥꦩꦴꦟꦪꦸꦠ꧀ꦠꦁ ꦄꦠ꧀ꦡꦤꦶꦱ꧀ꦱꦶꦠꦩꦺꦮ ꦨꦴꦱꦠꦶ, ꦤ ꦤꦶꦫꦠ꧀ꦡꦏꦏꦡꦁ.

ꦤ ꦠꦱ꧀ꦩꦶꦁ ꦒꦴꦩꦺ ꦮꦴꦠꦶ ꦪꦠ꧀ꦡ ꦏꦶꦫ ꦨꦒꦮꦴ ꦥꦛꦶꦮꦱꦠꦶ, ꦠꦠ꧀ꦡ ꦩꦲꦺꦱꦏ꧀ꦑꦴ ꦢꦺꦮꦠꦴ ꦄꦴꦫꦏ꧀ꦑꦁ ꦒꦟ꧀ꦲꦤ꧀ꦠꦶ, ꦠꦁ ꦤꦶꦱ꧀ꦱꦴꦪ ꦩꦤꦸꦱ꧀ꦱꦴꦤꦁ ꦈꦥꦢ꧀ꦢꦮꦺꦴ ꦤ ꦲꦺꦴꦠꦶ, ꦥꦁꦱꦸꦥꦶꦱꦴꦕꦏꦴꦢꦪꦺꦴꦪꦺꦮ ꦲꦶ ꦩꦤꦸꦱ꧀ꦱꦺ ꦮꦶꦲꦺꦜꦺꦤ꧀ꦠꦶ, ꦠꦺ ꦠꦴꦱꦁ ꦄꦴꦤꦸꦨꦴꦮꦺꦤ ꦢꦹꦫꦁ ꦄꦥꦏ꧀ꦏꦩꦤ꧀ꦠꦶ. ꦄꦥꦶ ꦕ ꦨꦒꦮꦠꦺꦴ ꦩꦺꦠ꧀ꦠꦴꦧꦭꦺꦤꦥꦶ ꦤ ꦄꦩꦤꦸꦱ꧀ꦱꦴ ꦩꦤꦸꦱ꧀ꦱꦺ ꦮꦶꦲꦺꦜꦺꦤ꧀ꦠꦶ.

ꦱꦔ꧀ꦓꦷꦠꦶꦄꦴꦢꦷꦱꦸ ꦄꦤꦸꦱꦴꦱꦶꦠꦧ꧀ꦧꦺꦴ ꦱꦪꦁ ꦮꦴ ꦈꦥ꧀ꦥꦴꦢꦶꦠꦺꦴ ꦱꦔ꧀ꦓꦺꦴ ꦄꦱ꧀ꦱ ꦄꦠ꧀ꦡꦷꦠꦶ ꦱꦔ꧀ꦓꦷ. ꦠꦴꦢꦶꦱꦺꦴ ꦕꦱ꧀ꦱ ꦒꦟꦺꦴ ꦄꦠ꧀ꦡꦷꦠꦶ ꦒꦟꦷ. ꦥꦸꦫꦶꦩꦥꦢꦱ꧀ꦱꦺꦮ ꦮꦴ ꦮꦺꦮꦕꦤꦩꦺꦠꦁ. ꦄꦴꦕꦴꦫꦱꦶꦏ꧀ꦑꦴꦥꦤꦮꦱꦺꦤ ꦒꦟꦱ꧀ꦱ ꦄꦴꦕꦫꦶꦪꦺꦴꦠꦶ ꦒꦟꦴꦕꦫꦶꦪꦺꦴ. ꦥꦸꦡꦸꦠꦶꦠ꧀ꦡꦏꦫꦴꦤꦤ꧀ꦠꦶ ꦧꦲꦹꦤꦁ ꦠꦶꦠ꧀ꦡꦏꦫꦴꦤꦁ. ꦪꦡꦴ ꦮꦴ ꦠꦡꦴ ꦮꦴꦠꦶ ꦪꦺꦤ ꦮꦴ ꦠꦺꦤ ꦮꦴ ꦄꦕꦺꦭꦏꦴꦢꦶꦩꦠ꧀ꦠꦏꦺꦤꦴꦥꦶ ꦏꦴꦫꦟꦺꦤ. ꦱꦩꦸꦢꦴꦒꦕ꧀ꦖꦠꦷꦠꦶ ꦱꦩꦤ꧀ꦠꦠꦺꦴ ꦈꦥꦒꦕ꧀ꦖꦠꦶ ꦄꦨꦶꦮꦝ꧀ꦞꦠꦶ.

ꦄꦠꦶꦡꦶ ꦤꦺꦴ ꦠꦺ ꦲꦺꦴꦤ꧀ꦠꦷꦠꦶ ꦠꦺ ꦄꦩ꧀ꦲꦴꦏꦁ ꦄꦴꦒꦤ꧀ꦠꦸꦏꦴ, ꦤꦮꦏꦴ ꦥꦴꦲꦸꦤꦏꦴ ꦲꦺꦴꦤ꧀ꦠꦷꦠꦶ ꦄꦠ꧀ꦡꦺꦴ. ꦥꦫꦶꦪꦴꦥꦸꦟꦴꦩꦷꦠꦶ ꦗꦴꦤꦴꦩꦶ. ꦄꦥꦫꦶꦩꦴꦟꦮꦟ꧀ꦟꦺꦴꦠꦶ ꦠꦡꦴꦫꦹꦥꦺꦤꦺꦮ ꦱꦧ꧀ꦧꦚ꧀ꦚꦸꦤꦴꦥꦶ ꦄꦥ꧀ꦥꦩꦺꦪ꧀ꦪꦮꦟ꧀ꦟꦺꦴ – ‘‘ꦥꦒꦺꦮ ꦩꦴꦢꦶꦱꦺꦤꦴ’’ꦠꦶ ꦢꦱ꧀ꦱꦺꦠꦶ. ꦮꦸꦠ꧀ꦠꦩ꧀ꦥꦶ ꦕꦺꦠ꧀ꦠꦁ –

‘‘ꦧꦸꦢ꧀ꦣꦺꦴꦥꦶ ꦧꦸꦢ꧀ꦣꦱ꧀ꦱ ꦨꦟꦺꦪ꧀ꦪ ꦮꦟ꧀ꦟꦁ,

ꦏꦥ꧀ꦥꦩ꧀ꦥꦶ ꦕꦺ ꦄꦚ꧀ꦚꦩꦨꦴꦱꦩꦴꦤꦺꦴ;

ꦑꦷꦪꦺꦡ ꦏꦥ꧀ꦥꦺꦴ ꦕꦶꦫꦢꦷꦓꦩꦤ꧀ꦠꦫꦺ,

ꦮꦟ꧀ꦟꦺꦴ ꦤ ꦑꦷꦪꦺꦡ ꦠꦡꦴꦒꦠꦱ꧀ꦱꦴ’’ꦠꦶ.

꧓꧐꧕. ꦆꦩꦁ ꦥꦤ ꦱꦠ꧀ꦡꦸ ꦒꦸꦟꦏꦡꦁ ꦱꦸꦠ꧀ꦮꦴ ꦠꦺ ꦧ꧀ꦫꦴꦲ꧀ꦩꦟꦴ ꦕꦶꦤ꧀ꦠꦪꦶꦁꦱꦸ – ꦪꦡꦴ ꦱꦺꦴꦟꦢꦟ꧀ꦝꦺꦴ ꦧ꧀ꦫꦴꦲ꧀ꦩꦟꦺꦴ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦮꦟ꧀ꦟꦺ ꦨꦟꦠꦶ, ꦄꦤꦺꦴꦩꦒꦸꦟꦺꦴ ꦱꦺꦴ ꦨꦮꦁ ꦒꦺꦴꦠꦩꦺꦴ; ꦌꦮꦁ ꦠꦱ꧀ꦱ ꦒꦸꦟꦺ ꦗꦴꦤꦩꦴꦤꦺꦤ ꦑꦺꦴ ꦥꦤ ꦄꦴꦕꦫꦶꦪꦺꦤ ꦄꦠꦶꦕꦶꦫꦁ ꦄꦣꦶꦮꦴꦱꦶꦠꦁ, ꦲꦤ꧀ꦢ ꦤꦁ ꦄꦤꦸꦮꦠ꧀ꦠꦴꦩꦴꦠꦶ ꦄꦤꦸꦮꦠ꧀ꦠꦶꦁꦱꦸ. ꦠꦱ꧀ꦩꦴ ꦌꦮꦁ ꦮꦸꦠ꧀ꦠꦺ ‘‘ꦠꦺ ꦧ꧀ꦫꦴꦲ꧀ꦩꦟꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦭꦩꦺꦮꦴꦠꦶ ꦪꦸꦠ꧀ꦠꦩꦺꦮ. ꦄꦥꦶ ꦥꦸꦛꦺꦴꦱꦺꦤꦴꦠꦶ ꦥꦸꦛꦺꦴꦱꦁ ꦮꦸꦕ꧀ꦕꦠꦶ ꦥꦴꦡꦺꦪ꧀ꦪꦁ, ꦠꦁ ꦒꦲꦺꦠ꧀ꦮꦴꦥꦶ ꦈꦥꦱꦔ꧀ꦏꦩꦶꦠꦸꦁ ꦪꦸꦠ꧀ꦠꦩꦺꦮꦴꦠꦶ ꦄꦠ꧀ꦡꦺꦴ. ꦥꦸꦛꦁꦱꦺꦤꦴꦠꦶꦥꦶ ꦥꦴꦜꦺꦴ, ꦠꦱ꧀ꦱꦠ꧀ꦡꦺꦴ, ꦥꦸꦛꦺꦴ ꦄꦁꦱꦺ ꦄꦱ꧀ꦱꦴꦠꦶ ꦥꦸꦛꦁꦱꦺꦴ, ꦠꦺꦤ ꦥꦸꦛꦁꦱꦺꦤ. ꦄꦁꦱꦺꦤ ꦲꦶ ꦥꦴꦡꦺꦪ꧀ꦪꦥꦸꦛꦁ ꦮꦲꦤ꧀ꦠꦺꦤꦴꦥꦷꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦱꦺꦴꦟꦢꦟ꧀ꦝꦥꦫꦶꦮꦶꦠꦏ꧀ꦏꦮꦟ꧀ꦟꦤꦴ

꧓꧐꧖-꧓꧐꧘. ꦠꦶꦫꦺꦴꦮꦤꦱꦟ꧀ꦝꦒꦠꦱ꧀ꦱꦴꦠꦶ ꦄꦤ꧀ꦠꦺꦴꦮꦤꦱꦟ꧀ꦝꦺ ꦒꦠꦱ꧀ꦱ, ꦮꦶꦲꦴꦫꦧ꧀ꦨꦤ꧀ꦠꦫꦁ ꦥꦮꦶꦛ꧀ꦜꦱ꧀ꦱꦴꦠꦶ ꦄꦠ꧀ꦡꦺꦴ. ꦄꦚ꧀ꦗꦭꦶꦁ ꦥꦟꦴꦩꦺꦠ꧀ꦮꦴꦠꦶ ꦌꦠꦺ ꦈꦨꦠꦺꦴꦥꦏ꧀ꦑꦶꦏꦴ, ꦠꦺ ꦌꦮꦁ ꦕꦶꦤ꧀ꦠꦪꦶꦁꦱꦸ – ‘‘ꦱꦕꦺ ꦤꦺꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦴ ꦕꦺꦴꦢꦺꦱ꧀ꦱꦤ꧀ꦠꦶ – ‘ꦏꦱ꧀ꦩꦴ ꦠꦸꦩ꧀ꦲꦺ ꦱꦩꦟꦁ ꦒꦺꦴꦠꦩꦁ ꦮꦤ꧀ꦢꦶꦠ꧀ꦡꦴ’ꦠꦶ? ꦠꦺꦱꦁ – ‘ꦏꦶꦁ ꦄꦚ꧀ꦗꦭꦶꦩꦠ꧀ꦠꦏꦫꦟꦺꦤꦴꦥꦶ ꦮꦤ꧀ꦢꦤꦁ ꦤꦴꦩ ꦲꦺꦴꦠꦷ’ꦠꦶ ꦮꦏ꧀ꦑꦴꦩ. ꦱꦕꦺ ꦤꦺꦴ ꦱꦩ꧀ꦩꦴꦢꦶꦛ꧀ꦜꦶꦏꦴ ꦕꦺꦴꦢꦺꦱ꧀ꦱꦤ꧀ꦠꦶ – ‘ꦏꦱ꧀ꦩꦴ ꦠꦸꦩ꧀ꦲꦺ ꦨꦒꦮꦤ꧀ꦠꦁ ꦤ ꦮꦤ꧀ꦢꦶꦠ꧀ꦡꦴ’ꦠꦶ. ‘ꦏꦶꦁ ꦱꦷꦱꦺꦤ ꦨꦹꦩꦶꦪꦁ ꦥꦲꦫꦤ꧀ꦠꦺꦤꦺꦮ ꦮꦤ꧀ꦢꦤꦁ ꦤꦴꦩ ꦲꦺꦴꦠꦶ, ꦤꦤꦸ ꦄꦚ꧀ꦗꦭꦶꦏꦩ꧀ꦩꦩ꧀ꦥꦶ ꦮꦤ꧀ꦢꦤꦁ ꦌꦮꦴ’ꦠꦶ ꦮꦏ꧀ꦑꦴꦩꦴ’’ꦠꦶ. ꦤꦴꦩꦒꦺꦴꦠ꧀ꦠꦤ꧀ꦠꦶ ‘‘ꦨꦺꦴ, ꦒꦺꦴꦠꦩ, ꦄꦲꦁ ꦄꦱꦸꦏꦱ꧀ꦱ ꦥꦸꦠ꧀ꦠꦺꦴ ꦢꦠ꧀ꦠꦺꦴ ꦤꦴꦩ, ꦩꦶꦠ꧀ꦠꦺꦴ ꦤꦴꦩ, ꦆꦣꦴꦒꦠꦺꦴ’’ꦠꦶ ꦮꦢꦤ꧀ꦠꦴ ꦤꦴꦩꦁ ꦱꦴꦮꦺꦤ꧀ꦠꦶ ꦤꦴꦩ. ‘‘ꦨꦺꦴ, ꦒꦺꦴꦠꦩ, ꦄꦲꦁ ꦮꦴꦱꦺꦛ꧀ꦜꦺꦴ ꦤꦴꦩ, ꦏꦕ꧀ꦕꦴꦤꦺꦴ ꦤꦴꦩ, ꦆꦣꦴꦒꦠꦺꦴ’’ꦠꦶ ꦮꦢꦤ꧀ꦠꦴ ꦒꦺꦴꦠ꧀ꦠꦁ ꦱꦴꦮꦺꦤ꧀ꦠꦶ ꦤꦴꦩ. ꦌꦠꦺ ꦏꦶꦫ ꦢꦭꦶꦢ꧀ꦢꦴ ꦗꦶꦟ꧀ꦟꦴ ꦏꦸꦭꦥꦸꦠ꧀ꦠꦴ ‘‘ꦥꦫꦶꦱꦩꦗ꧀ꦙꦺ ꦤꦴꦩꦒꦺꦴꦠ꧀ꦠꦮꦱꦺꦤ ꦥꦴꦏꦛꦴ ꦨꦮꦶꦱ꧀ꦱꦴꦩꦴ’’ꦠꦶ ꦌꦮꦩꦏꦁꦱꦸ. ꦪꦺ ꦥꦤ ꦠꦸꦟ꧀ꦲꦷꦨꦹꦠꦴ ꦤꦶꦱꦷꦢꦶꦁꦱꦸ, ꦠꦺ ꦏꦺꦫꦴꦛꦶꦏꦴ ꦕꦺꦮ ꦄꦤ꧀ꦣꦧꦴꦭꦴ ꦕ. ꦠꦠ꧀ꦡ ꦏꦺꦫꦴꦛꦶꦏꦴ – ‘‘ꦌꦏꦁ ꦢ꧀ꦮꦺ ꦏꦡꦴꦱꦭ꧀ꦭꦴꦥꦺꦥꦶ ꦏꦫꦺꦴꦤ꧀ꦠꦺꦴ ꦮꦶꦱ꧀ꦱꦴꦱꦶꦏꦺꦴ ꦲꦺꦴꦠꦶ, ꦄꦡ ꦮꦶꦱ꧀ꦱꦴꦱꦺ ꦱꦠꦶ ꦌꦏꦁ ꦢ꧀ꦮꦺ ꦨꦶꦏ꧀ꦑꦴ ꦄꦢꦴꦠꦸꦁ ꦤ ꦪꦸꦠ꧀ꦠ’’ꦤ꧀ꦠꦶ ꦠꦠꦺꦴ ꦄꦠ꧀ꦠꦴꦤꦁ ꦩꦺꦴꦕꦺꦠ꧀ꦮꦴ ꦠꦸꦟ꧀ꦲꦷ ꦤꦶꦱꦷꦢꦤ꧀ꦠꦶ. ꦄꦤ꧀ꦣꦧꦴꦭꦴ ꦄꦚ꧀ꦚꦴꦟꦠꦴꦪꦺꦮ ꦄꦮꦏ꧀ꦑꦶꦠ꧀ꦠꦩꦠ꧀ꦠꦶꦏꦴꦥꦶꦟ꧀ꦝꦺꦴ ꦮꦶꦪ ꦪꦠ꧀ꦡ ꦏꦠ꧀ꦡꦕꦶ ꦠꦸꦟ꧀ꦲꦷꦨꦹꦠꦴ ꦤꦶꦱꦷꦢꦤ꧀ꦠꦶ.

ꦧ꧀ꦫꦴꦲ꧀ꦩꦟꦥꦚ꧀ꦚꦠ꧀ꦠꦶꦮꦟ꧀ꦟꦤꦴ

꧓꧐꧙-꧓꧑꧐. ꦕꦺꦠꦱꦴ ꦕꦺꦠꦺꦴꦥꦫꦶꦮꦶꦠꦏ꧀ꦏꦤ꧀ꦠꦶ ꦨꦒꦮꦴ – ‘‘ꦄꦪꦁ ꦧ꧀ꦫꦴꦲ꧀ꦩꦟꦺꦴ ꦄꦴꦒꦠꦏꦴꦭꦠꦺꦴ ꦥꦛ꧀ꦜꦴꦪ ꦄꦣꦺꦴꦩꦸꦑꦺꦴ ꦡꦢ꧀ꦣꦒꦠ꧀ꦠꦺꦴ ꦏꦶꦁ ꦕꦶꦤ꧀ꦠꦪꦩꦴꦤꦺꦴ ꦤꦶꦱꦶꦤ꧀ꦤꦺꦴ, ꦏꦶꦁ ꦤꦸ ꦑꦺꦴ ꦕꦶꦤ꧀ꦠꦺꦠꦷ’’ꦠꦶ ꦄꦴꦮꦗ꧀ꦗꦤ꧀ꦠꦺꦴ ꦄꦠ꧀ꦠꦤꦺꦴ ꦕꦺꦠꦱꦴ ꦠꦱ꧀ꦱ ꦕꦶꦠ꧀ꦠꦁ ꦄꦚ꧀ꦚꦴꦱꦶ. ꦠꦺꦤ ꦮꦸꦠ꧀ꦠꦁ – ‘‘ꦕꦺꦠꦱꦴ ꦕꦺꦠꦺꦴꦥꦫꦶꦮꦶꦠꦏ꧀ꦏꦩꦚ꧀ꦚꦴꦪꦴ’’ꦠꦶ. ꦮꦶꦲꦚ꧀ꦚꦠꦷꦠꦶ ꦮꦶꦓꦴꦠꦁ ꦄꦴꦥꦗ꧀ꦗꦠꦶ. ꦄꦤꦸꦮꦶꦭꦺꦴꦏꦺꦠ꧀ꦮꦴ ꦥꦫꦶꦱꦤ꧀ꦠꦶ ꦨꦒꦮꦠꦺꦴ ꦱꦏꦱꦩꦪꦺ ꦥꦚ꧀ꦲꦥꦸꦕ꧀ꦖꦤꦺꦤ ꦈꦢꦏꦺ ꦩꦶꦪꦩꦴꦤꦺꦴ ꦈꦏ꧀ꦑꦶꦥꦶꦠ꧀ꦮꦴ ꦡꦭꦺ ꦜꦥꦶꦠꦺꦴ ꦮꦶꦪ ꦱꦩꦥꦱ꧀ꦱꦢ꧀ꦣꦏꦴꦪꦕꦶꦠ꧀ꦠꦺꦴ ꦲꦸꦠ꧀ꦮꦴ ꦥꦫꦶꦱꦁ ꦱꦔ꧀ꦒꦟ꧀ꦲꦤꦠ꧀ꦡꦁ ꦢꦶꦛ꧀ꦜꦶꦱꦚ꧀ꦗꦴꦤꦺꦤꦺꦮ ‘‘ꦈꦥꦣꦴꦫꦺꦤ꧀ꦠꦸ ꦩꦺ ꦨꦺꦴꦤ꧀ꦠꦺꦴ ꦮꦕꦤ’’ꦤ꧀ꦠꦶ ꦮꦢꦤ꧀ꦠꦺꦴ ꦮꦶꦪ ꦄꦤꦸꦮꦶꦭꦺꦴꦏꦺꦠ꧀ꦮꦴ ꦥꦫꦶꦱꦁ ꦨꦒꦮꦤ꧀ꦠꦁ ꦌꦠꦢꦮꦺꦴꦕ.

꧓꧑꧑-꧓꧑꧓. ꦱꦸꦗꦁ ꦥꦒ꧀ꦒꦟ꧀ꦲꦤ꧀ꦠꦴꦤꦤ꧀ꦠꦶ ꦪꦚ꧀ꦚꦪꦗꦤꦠ꧀ꦡꦴꦪ ꦱꦸꦗꦁ ꦒꦟ꧀ꦲꦤ꧀ꦠꦺꦱꦸ ꦧ꧀ꦫꦴꦲ꧀ꦩꦟꦺꦱꦸ ꦥꦜꦩꦺꦴ ꦮꦴ ꦢꦸꦠꦶꦪꦺꦴ ꦮꦴꦠꦶ ꦄꦠ꧀ꦡꦺꦴ. ꦱꦸꦗꦴꦪ ꦢꦶꦪ꧀ꦪꦩꦴꦤꦁ ꦩꦲꦴꦪꦴꦒꦁ ꦥꦛꦶꦒ꧀ꦒꦟ꧀ꦲꦤ꧀ꦠꦴꦤꦤ꧀ꦠꦶ ꦥꦺꦴꦫꦴꦟꦴ. ꦆꦠꦶ ꦧ꧀ꦫꦴꦲ꧀ꦩꦟꦺꦴ ꦱꦏꦱꦩꦪꦮꦱꦺꦤ ꦱꦩ꧀ꦩꦢꦺꦮ ꦥꦚ꧀ꦲꦁ ꦮꦶꦱ꧀ꦱꦗ꧀ꦗꦺꦱꦶ. ꦨꦒꦮꦴ ꦥꦤ ꦮꦶꦱꦺꦱꦠꦺꦴ ꦈꦠ꧀ꦠꦩꦧ꧀ꦫꦴꦲ꧀ꦩꦟꦱ꧀ꦱ ꦢꦱ꧀ꦱꦤꦠ꧀ꦡꦁ – ‘‘ꦆꦩꦺꦱꦁ ꦥꦤꦴ’’ꦠꦶꦄꦴꦢꦶꦩꦴꦲ. ꦌꦠꦢꦮꦺꦴꦕꦸꦤ꧀ꦠꦶ ꦱꦕꦺ ꦗꦴꦠꦶꦮꦟ꧀ꦟꦩꦤ꧀ꦠꦱꦩ꧀ꦥꦤ꧀ꦤꦺꦴ ꦧ꧀ꦫꦴꦲ꧀ꦩꦟꦺꦴ ꦤ ꦲꦺꦴꦠꦶ, ꦄꦡ ꦏꦺꦴ ꦕꦫꦲꦶ ꦭꦺꦴꦏꦺ ꦧ꧀ꦫꦴꦲ꧀ꦩꦟꦺꦴ ꦨꦮꦶꦱ꧀ꦱꦠꦶ? ꦤꦴꦱꦺꦠꦶ ꦤꦺꦴ ꦄꦪꦁ ꦱꦺꦴꦟꦢꦟ꧀ꦝꦺꦴ, ꦲꦤ꧀ꦢꦱ꧀ꦱ ꦮꦴꦢꦁ ꦥꦛꦶꦏ꧀ꦑꦶꦥꦶꦱ꧀ꦱꦴꦩꦴꦠꦶ ꦕꦶꦤ꧀ꦠꦺꦠ꧀ꦮꦴ ꦌꦠꦢꦮꦺꦴꦕꦸꦁ. ꦄꦥꦮꦢꦠꦷꦠꦶ ꦥꦛꦶꦏ꧀ꦑꦶꦥꦠꦶ. ꦄꦤꦸꦥꦏ꧀ꦑꦤ꧀ꦢꦠꦷꦠꦶ ꦄꦤꦸꦥꦮꦶꦱꦠꦶ. ꦆꦢꦁ – ‘‘ꦱꦕꦺ ꦠ꧀ꦮꦁ ꦥꦱꦴꦢꦮꦱꦺꦤ ꦱꦩꦟꦁ ꦒꦺꦴꦠꦩꦁ ꦱꦫꦟꦁ ꦒꦤ꧀ꦠꦸꦏꦴꦩꦺꦴ, ꦒꦕ꧀ꦖ; ꦩꦴ ꦧ꧀ꦫꦴꦲ꧀ꦩꦟꦱ꧀ꦱ ꦱꦩꦪꦁ ꦨꦶꦤ꧀ꦢꦷ’’ꦠꦶ ꦄꦣꦶꦥ꧀ꦥꦴꦪꦺꦤ ꦄꦴꦲꦁꦱꦸ.

꧓꧑꧔. ꦌꦠꦢꦮꦺꦴꦕꦴꦠꦶ ꦆꦩꦺꦱꦸ ꦧ꧀ꦫꦴꦲ꧀ꦩꦟꦺꦱꦸ ꦌꦮꦁ ꦌꦏꦥ꧀ꦥꦲꦴꦫꦺꦤꦺꦮ ꦮꦶꦫꦮꦤ꧀ꦠꦺꦱꦸ ‘‘ꦄꦪꦁ ꦏꦡꦴ ꦥꦫꦶꦪꦺꦴꦱꦴꦤꦁ ꦤ ꦒꦩꦶꦱ꧀ꦱꦠꦶ, ꦲꦤ꧀ꦢ ꦤꦺ ꦤꦶꦱ꧀ꦱꦢ꧀ꦢꦺ ꦏꦠ꧀ꦮꦴ ꦱꦺꦴꦟꦢꦟ꧀ꦝꦺꦤꦺꦮ ꦱꦢ꧀ꦣꦶꦁ ꦏꦡꦺꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ – ‘‘ꦌꦠꦁ ꦱꦕꦺ ꦑꦺꦴ ꦠꦸꦩ꧀ꦲꦴꦏ’’ꦤ꧀ꦠꦶꦄꦴꦢꦶꦏꦁ ꦮꦕꦤꦁ ꦄꦮꦺꦴꦕ.

꧓꧑꧕-꧓꧑꧖. ꦱꦲꦣꦩ꧀ꦩꦺꦤꦴꦠꦶ ꦱꦏꦴꦫꦟꦺꦤ. ꦱꦩꦱꦩꦺꦴꦠꦶ ꦜꦥꦺꦠ꧀ꦮꦴ ꦌꦏꦢꦺꦱꦱꦩꦠ꧀ꦠꦁ ꦱꦩꦨꦴꦮꦺꦤ ꦱꦩꦺꦴ, ꦱꦧ꧀ꦧꦴꦏꦴꦫꦺꦤ ꦱꦩꦺꦴꦠꦶ ꦄꦠ꧀ꦡꦺꦴ. ꦄꦲꦩꦱ꧀ꦱ ꦩꦴꦠꦴꦥꦶꦠꦫꦺꦴ ꦗꦴꦤꦴꦩꦷꦠꦶ ꦨꦒꦶꦤꦶꦪꦴ ꦥꦸꦠ꧀ꦠꦱ꧀ꦱ ꦩꦴꦠꦴꦥꦶꦠꦫꦺꦴ ꦏꦶꦁ ꦤ ꦗꦴꦤꦶꦱ꧀ꦱꦠꦶ, ꦏꦸꦭꦏꦺꦴꦛꦶꦥꦫꦶꦢꦷꦥꦤꦁ ꦱꦤ꧀ꦣꦴꦪꦺꦮ ꦮꦢꦠꦶ. ꦩꦸꦱꦴꦮꦴꦢꦩ꧀ꦥꦶ ꦨꦟꦺꦪ꧀ꦪꦴꦠꦶ ꦄꦠ꧀ꦡꦨꦚ꧀ꦗꦤꦏꦁ ꦩꦸꦱꦴꦮꦴꦢꦁ ꦏꦡꦺꦪ꧀ꦪ. ꦏꦶꦁ ꦮꦟ꧀ꦟꦺꦴ ꦏꦫꦶꦱ꧀ꦱꦠꦷꦠꦶ ꦄꦧ꧀ꦨꦤ꧀ꦠꦫꦺ ꦒꦸꦟꦺ ꦄꦱꦠꦶ ꦏꦶꦁ ꦏꦫꦶꦱ꧀ꦱꦠꦶ? ꦏꦶꦩꦱ꧀ꦱ ꦧ꧀ꦫꦴꦲ꧀ꦩꦟꦨꦴꦮꦁ ꦫꦏ꧀ꦑꦶꦠꦸꦁ ꦱꦏ꧀ꦑꦶꦱ꧀ꦱꦠꦷꦠꦶ ꦄꦠ꧀ꦡꦺꦴ. ꦄꦡꦴꦥꦶ ꦱꦶꦪꦴ ꦥꦸꦤ – ‘‘ꦥꦏꦠꦶꦱꦷꦭꦺ ꦜꦶꦠꦱ꧀ꦱ ꦧ꧀ꦫꦴꦲ꧀ꦩꦟꦨꦴꦮꦁ ꦱꦴꦣꦺꦤ꧀ꦠꦷ’’ꦠꦶ ꦌꦮꦩ꧀ꦥꦶ ꦱꦷꦭꦩꦺꦮ ꦱꦴꦣꦺꦱ꧀ꦱꦠꦶ, ꦠꦱ꧀ꦩꦶꦁ ꦲꦶꦱ꧀ꦱ ꦄꦱꦠꦶ ꦧ꧀ꦫꦴꦲ꧀ꦩꦟꦨꦴꦮꦺꦴ ꦤꦴꦲꦺꦴꦱꦷꦠꦶ ꦱꦩ꧀ꦩꦺꦴꦲꦩꦠ꧀ꦠꦁ ꦮꦟ꧀ꦟꦴꦢꦪꦺꦴ. ꦆꦢꦁ ꦥꦤ ꦱꦸꦠ꧀ꦮꦴ ꦠꦺ ꦧ꧀ꦫꦴꦲ꧀ꦩꦟꦴ – ‘‘ꦱꦨꦴꦮꦁ ꦄꦴꦕꦫꦶꦪꦺꦴ ꦄꦴꦲ, ꦄꦏꦴꦫꦟꦴꦮ ꦩꦪꦁ ꦈꦗ꧀ꦙꦴꦪꦶꦩ꧀ꦲꦴ’’ꦠꦶ ꦠꦸꦟ꧀ꦲꦷ ꦄꦲꦺꦱꦸꦁ.

ꦱꦷꦭꦥꦚ꧀ꦚꦴꦏꦡꦴꦮꦟ꧀ꦟꦤꦴ

꧓꧑꧗. ꦠꦠꦺꦴ ꦨꦒꦮꦴ ‘ꦏꦡꦶꦠꦺꦴ ꦧ꧀ꦫꦴꦲ꧀ꦩꦟꦺꦤ ꦥꦚ꧀ꦲꦺꦴ, ꦏꦶꦁ ꦥꦤꦺꦠ꧀ꦡ ꦥꦠꦶꦛ꧀ꦜꦴꦠꦸꦁ ꦱꦏ꧀ꦑꦶꦱ꧀ꦱꦠꦶ, ꦤ ꦱꦏ꧀ꦑꦶꦱ꧀ꦱꦠꦷ’ꦠꦶ? ꦠꦱ꧀ꦱ ꦮꦷꦩꦁꦱꦤꦠ꧀ꦡꦁ – ‘‘ꦆꦩꦺꦱꦁ ꦥꦤ ꦧ꧀ꦫꦴꦲ꧀ꦩꦟꦴ’’ꦠꦶꦄꦴꦢꦶꦩꦴꦲ. ꦱꦷꦭꦥꦫꦶꦣꦺꦴꦠꦴꦠꦶ ꦱꦷꦭꦥꦫꦶꦱꦸꦢ꧀ꦣꦴ. ꦪꦠ꧀ꦡ ꦱꦷꦭꦁ ꦠꦠ꧀ꦡ ꦥꦚ꧀ꦚꦴꦠꦶ ꦪꦱ꧀ꦩꦶꦁ ꦥꦸꦒ꧀ꦒꦭꦺ ꦱꦷꦭꦁ, ꦠꦠ꧀ꦡꦺꦮ ꦥꦚ꧀ꦚꦴ, ꦏꦸꦠꦺꦴ ꦢꦸꦱ꧀ꦱꦷꦭꦺ ꦥꦚ꧀ꦚꦴ? ꦥꦚ꧀ꦚꦴꦫꦲꦶꦠꦺ ꦮꦴ ꦗꦭ꦳ꦺ ꦌꦭ꦳ꦩꦹꦒꦺ ꦏꦸꦠꦺꦴ ꦱꦷꦭꦤ꧀ꦠꦶ? ꦱꦷꦭꦥꦚ꧀ꦚꦴꦟꦤ꧀ꦠꦶ ꦱꦷꦭꦚ꧀ꦕ ꦥꦚ꧀ꦚꦴꦟꦚ꧀ꦕ ꦱꦷꦭꦥꦚ꧀ꦚꦴꦟꦁ. ꦥꦚ꧀ꦚꦴꦟꦤ꧀ꦠꦶ ꦥꦚ꧀ꦚꦴꦪꦺꦮ. ꦌꦮꦩꦺꦠꦁ ꦧ꧀ꦫꦴꦲ꧀ꦩꦟꦴꦠꦶ ꦨꦒꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦮꦕꦤꦁ ꦄꦤꦸꦗꦴꦤꦤ꧀ꦠꦺꦴ ꦄꦴꦲ. ꦠꦠ꧀ꦡ ꦱꦷꦭꦥꦫꦶꦣꦺꦴꦠꦴ ꦥꦚ꧀ꦚꦴꦠꦶ ꦕꦠꦸꦥꦴꦫꦶꦱꦸꦢ꧀ꦣꦶꦱꦷꦭꦺꦤ ꦣꦺꦴꦠꦴ. ꦏꦡꦁ ꦥꦤ ꦱꦷꦭꦺꦤ ꦥꦚ꧀ꦚꦁ ꦣꦺꦴꦮꦠꦷꦠꦶ? ꦪꦱ꧀ꦱ ꦥꦸꦡꦸꦗ꧀ꦗꦤꦱ꧀ꦱ ꦱꦷꦭꦁ ꦱꦛ꧀ꦜꦶꦄꦱꦷꦠꦶꦮꦱ꧀ꦱꦴꦤꦶ ꦄꦑꦟ꧀ꦝꦁ ꦲꦺꦴꦠꦶ, ꦱꦺꦴ ꦩꦫꦟꦏꦴꦭꦺꦥꦶ ꦱꦧ꧀ꦧꦏꦶꦭꦺꦱꦺ ꦓꦴꦠꦺꦠ꧀ꦮꦴ ꦱꦷꦭꦺꦤ ꦥꦚ꧀ꦚꦁ ꦣꦺꦴꦮꦶꦠ꧀ꦮꦴ ꦄꦫꦲꦠ꧀ꦠꦁ ꦒꦟ꧀ꦲꦴꦠꦶ. ꦏꦤ꧀ꦢꦫꦱꦴꦭꦥꦫꦶꦮꦺꦟꦺ ꦩꦲꦴꦱꦛ꧀ꦜꦶꦮꦱ꧀ꦱꦠ꧀ꦡꦺꦫꦺꦴ ꦮꦶꦪ. ꦡꦺꦫꦺ ꦏꦶꦫ ꦩꦫꦟꦩꦚ꧀ꦕꦺ ꦤꦶꦥꦗ꧀ꦗꦶꦠ꧀ꦮꦴ ꦧꦭꦮꦮꦺꦢꦤꦴꦪ ꦤꦶꦠ꧀ꦡꦸꦤꦤ꧀ꦠꦺ, ꦠꦶꦱ꧀ꦱꦩꦲꦴꦫꦴꦗꦴ ‘‘ꦡꦺꦫꦁ ꦥꦱ꧀ꦱꦶꦱ꧀ꦱꦴꦩꦷ’’ꦠꦶ ꦒꦤ꧀ꦠ꧀ꦮꦴ ꦥꦫꦶꦮꦺꦟꦢ꧀ꦮꦴꦫꦺ ꦜꦶꦠꦺꦴ ꦠꦁ ꦱꦢ꧀ꦢꦁ ꦱꦸꦠ꧀ꦮꦴ ꦥꦸꦕ꧀ꦖꦶ – ‘‘ꦏꦱ꧀ꦱ ꦱꦢ꧀ꦢꦺꦴ ꦄꦪ’’ꦤ꧀ꦠꦶ? ꦡꦺꦫꦱ꧀ꦱ ꦤꦶꦠ꧀ꦡꦸꦤꦤꦱꦢ꧀ꦢꦺꦴꦠꦶ. ‘‘ꦥꦧ꧀ꦧꦗ꧀ꦗꦴꦪ ꦱꦛ꧀ꦜꦶꦮꦱ꧀ꦱꦺꦤ ꦮꦺꦢꦤꦴꦥꦫꦶꦒ꧀ꦒꦲꦩꦠ꧀ꦠꦩ꧀ꦥꦶ ꦤ ꦏꦠꦁ, ꦤ ꦢꦴꦤꦶ ꦤꦁ ꦮꦤ꧀ꦢꦶꦱ꧀ꦱꦴꦩꦷ’’ꦠꦶ ꦤꦶꦮꦠ꧀ꦠꦶꦠ꧀ꦮꦴ ꦩꦲꦴꦧꦺꦴꦣꦶꦁ ꦮꦤ꧀ꦢꦶꦠꦸꦁ ꦒꦠꦺꦴ. ꦠꦠꦺꦴ ꦈꦥꦛ꧀ꦜꦴꦏꦢꦲꦫꦺꦴ ꦡꦺꦫꦁ ꦄꦴꦲ – ‘‘ꦏꦶꦁ ꦤꦺꦴ, ꦨꦤ꧀ꦠꦺ, ꦭꦗ꧀ꦗꦴꦥꦺꦡ, ꦱꦢ꧀ꦣꦺꦴꦥꦶ ꦫꦴꦗꦴ ꦮꦶꦥ꧀ꦥꦛꦶꦱꦴꦫꦷ ꦲꦸꦠ꧀ꦮꦴ ꦤ ꦮꦤ꧀ꦢꦶꦱ꧀ꦱꦴꦩꦷ’’ꦠꦶ ꦒꦠꦺꦴꦠꦶ. ꦏꦱ꧀ꦩꦴ ꦄꦴꦮꦸꦱꦺꦴꦠꦶ? ꦠꦸꦩ꧀ꦲꦴꦏꦁ ꦤꦶꦠ꧀ꦡꦸꦤꦤꦱꦢ꧀ꦢꦁ ꦱꦸꦠ꧀ꦮꦴꦠꦶ. ‘‘ꦠꦺꦤ ꦲꦶ ꦩꦺ ꦎꦏꦴꦱꦁ ꦏꦫꦺꦴꦡꦴ’’ꦠꦶ ꦮꦠ꧀ꦮꦴ ꦮꦺꦢꦤꦁ ꦮꦶꦏ꧀ꦑꦩ꧀ꦨꦶꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦢꦲꦫꦱ꧀ꦱ ꦱꦚ꧀ꦚꦁ ꦄꦢꦴꦱꦶ – ‘‘ꦒꦕ꧀ꦖꦴꦮꦸꦱꦺꦴ, ꦆꦢꦴꦤꦶ ꦫꦴꦗꦴꦤꦁ ꦄꦩ꧀ꦲꦺ ꦮꦤ꧀ꦢꦴꦥꦺꦲꦷ’’ꦠꦶ. ꦢꦲꦫꦺꦴ ꦒꦤ꧀ꦠ꧀ꦮꦴ – ‘‘ꦆꦢꦴꦤꦶ ꦏꦶꦫ ꦡꦺꦫꦁ, ꦮꦤ꧀ꦢꦡꦴ’’ꦠꦶ ꦄꦴꦲ. ꦫꦴꦗꦴ ꦱꦁꦱꦸꦩꦴꦫꦥꦠꦶꦠꦺꦤ ꦡꦺꦫꦁ ꦮꦤ꧀ꦢꦤ꧀ꦠꦺꦴ – ‘‘ꦤꦴꦲꦁ ꦄꦪ꧀ꦪꦱ꧀ꦱ ꦄꦫꦲꦠ꧀ꦠꦁ ꦮꦤ꧀ꦢꦴꦩꦶ, ꦥꦸꦡꦸꦗ꧀ꦗꦤꦨꦹꦩꦶꦪꦁ ꦥꦤ ꦜꦠ꧀ꦮꦴ ꦫꦏ꧀ꦑꦶꦠꦱꦷꦭꦩꦺꦮ ꦮꦤ꧀ꦢꦴꦩꦷ’’ꦠꦶ ꦄꦴꦲ, ꦌꦮꦁ ꦱꦷꦭꦺꦤ ꦥꦚ꧀ꦚꦁ ꦣꦺꦴꦮꦠꦶ ꦤꦴꦩ. ꦪꦱ꧀ꦱ ꦥꦤ ꦄꦧ꧀ꦨꦤ꧀ꦠꦫꦺ ꦱꦷꦭꦱꦁꦮꦫꦺꦴ ꦤꦠ꧀ꦡꦶ, ꦈꦒ꧀ꦓꦴꦛꦶꦠꦚ꧀ꦚꦸꦠꦴꦪ ꦥꦤ ꦕꦠꦸꦥ꧀ꦥꦢꦶꦏꦒꦴꦡꦴꦥꦫꦶꦪꦺꦴꦱꦴꦤꦺ ꦥꦚ꧀ꦚꦴꦪ ꦱꦷꦭꦁ ꦣꦺꦴꦮꦶꦠ꧀ꦮꦴ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦴꦠꦶ. ꦄꦪꦁ ꦥꦚ꧀ꦚꦴꦪ ꦱꦷꦭꦁ ꦣꦺꦴꦮꦠꦶ ꦤꦴꦩ. ꦱꦺꦪ꧀ꦪꦡꦴꦥꦶ ꦱꦤ꧀ꦠꦠꦶꦩꦲꦴꦩꦠ꧀ꦠꦺꦴ.

꧓꧑꧘. ꦏꦠꦩꦁ ꦥꦤ ꦠꦁ ꦧ꧀ꦫꦴꦲ꧀ꦩꦟꦴꦠꦶ ꦏꦱ꧀ꦩꦴ ꦄꦴꦲ? ꦨꦒꦮꦴ ꦏꦶꦫ ꦕꦶꦤ꧀ꦠꦺꦱꦶ – ‘‘ꦧ꧀ꦫꦴꦲ꧀ꦩꦟꦴ ꦧ꧀ꦫꦴꦲ꧀ꦩꦟꦱꦩꦪꦺ ꦥꦚ꧀ꦕꦱꦷꦭꦴꦤꦶ ‘ꦱꦷꦭ’ꦤ꧀ꦠꦶ ꦥꦚ꧀ꦚꦴꦥꦺꦤ꧀ꦠꦶ, ꦮꦺꦢꦠ꧀ꦠꦪꦈꦒ꧀ꦒꦲꦟꦥꦚ꧀ꦚꦴ ꦥꦚ꧀ꦚꦴꦠꦶ. ꦈꦥꦫꦶꦮꦶꦱꦺꦱꦁ ꦤ ꦗꦴꦤꦤ꧀ꦠꦶ. ꦪꦁꦤꦹꦤꦴꦲꦁ ꦧ꧀ꦫꦴꦲ꧀ꦩꦟꦱ꧀ꦱ ꦈꦠ꧀ꦠꦫꦶꦮꦶꦱꦺꦱꦨꦹꦠꦁ ꦩꦒ꧀ꦒꦱꦷꦭꦁ, ꦦꦭꦱꦷꦭꦁ, ꦩꦒ꧀ꦒꦥꦚ꧀ꦚꦁ, ꦦꦭꦥꦚ꧀ꦚꦚ꧀ꦕ ꦢꦱ꧀ꦱꦺꦠ꧀ꦮꦴ ꦄꦫꦲꦠ꧀ꦠꦤꦶꦏꦹꦛꦺꦤ ꦢꦺꦱꦤꦁ ꦤꦶꦛ꧀ꦜꦥꦺꦪ꧀ꦪ’’ꦤ꧀ꦠꦶ. ꦄꦡ ꦤꦁ ꦏꦡꦺꦠꦸꦏꦩ꧀ꦪꦠꦴꦪ ꦥꦸꦕ꧀ꦖꦤ꧀ꦠꦺꦴ – ‘‘ꦏꦠꦩꦁ ꦥꦤ ꦠꦁ, ꦧ꧀ꦫꦴꦲ꧀ꦩꦟ, ꦱꦷꦭꦁ ꦏꦠꦩꦴ ꦱꦴ ꦥꦚ꧀ꦚꦴ’’ꦠꦶ ꦄꦴꦲ. ꦄꦡ ꦧ꧀ꦫꦴꦲ꧀ꦩꦟꦺꦴ – ‘‘ꦩꦪꦴ ꦱꦏꦱꦩꦪꦮꦱꦺꦤ ꦥꦚ꧀ꦲꦺꦴ ꦮꦶꦱ꧀ꦱꦗ꧀ꦗꦶꦠꦺꦴ. ꦱꦩꦟꦺꦴ ꦥꦤ ꦩꦁ ꦒꦺꦴꦠꦩꦺꦴ ꦥꦸꦤ ꦤꦶꦮꦠ꧀ꦠꦶꦠ꧀ꦮꦴ ꦥꦸꦕ꧀ꦖꦠꦶ, ꦆꦢꦴꦤꦶꦱ꧀ꦱꦴꦲꦁ ꦕꦶꦠ꧀ꦠꦁ ꦥꦫꦶꦠꦺꦴꦱꦺꦠ꧀ꦮꦴ ꦮꦶꦱ꧀ꦱꦗ꧀ꦗꦶꦠꦸꦁ ꦱꦏ꧀ꦏꦸꦟꦺꦪ꧀ꦪꦁ ꦮꦴ ꦤ ꦮꦴ? ꦱꦕꦺ ꦤ ꦱꦏ꧀ꦑꦶꦱ꧀ꦱꦁ ꦥꦜꦩꦁ ꦈꦥ꧀ꦥꦤ꧀ꦤꦴꦥꦶ ꦩꦺ ꦭꦗ꧀ꦗꦴ ꦨꦶꦗ꧀ꦗꦶꦱ꧀ꦱꦠꦶ. ꦄꦱꦏ꧀ꦏꦺꦴꦤ꧀ꦠꦱ꧀ꦱ ꦥꦤ ꦤ ꦱꦏ꧀ꦏꦺꦴꦩꦷꦠꦶ ꦮꦕꦤꦺ ꦢꦺꦴꦱꦺꦴ ꦤꦠ꧀ꦡꦷ’’ꦠꦶ ꦥꦸꦤ ꦤꦶꦮꦠ꧀ꦠꦶꦠ꧀ꦮꦴ ꦨꦒꦮꦠꦺꦴꦪꦺꦮ ꦨꦴꦫꦁ ꦏꦫꦺꦴꦤ꧀ꦠꦺꦴ ‘‘ꦌꦠ꧀ꦠꦏꦥꦫꦩꦴꦮ ꦩꦪ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦌꦠ꧀ꦠꦏꦥꦫꦩꦴꦠꦶ ꦌꦠ꧀ꦠꦏꦁ ꦱꦷꦭꦥꦚ꧀ꦚꦴꦟꦤ꧀ꦠꦶ ꦮꦕꦤꦩꦺꦮ ꦥꦫꦩꦁ ꦄꦩ꧀ꦲꦴꦏꦁ, ꦠꦺ ꦩꦪꦁ ꦌꦠ꧀ꦠꦏꦥꦫꦩꦴ, ꦆꦠꦺꦴ ꦥꦫꦁ ꦌꦠꦱ꧀ꦱ ꦨꦴꦱꦶꦠꦱ꧀ꦱ ꦄꦠ꧀ꦡꦁ ꦤ ꦗꦴꦤꦴꦩꦴꦠꦶ ꦄꦠ꧀ꦡꦺꦴ.

ꦄꦡꦱ꧀ꦱ ꦨꦒꦮꦴ ꦱꦷꦭꦥꦚ꧀ꦚꦴꦪ ꦩꦹꦭꦨꦹꦠꦱ꧀ꦱ ꦠꦡꦴꦒꦠꦱ꧀ꦱ ꦈꦥ꧀ꦥꦴꦢꦠꦺꦴ ꦥꦨꦸꦠꦶ ꦱꦷꦭꦥꦚ꧀ꦚꦴꦟꦁ ꦢꦱ꧀ꦱꦺꦠꦸꦁ – ‘‘ꦆꦣ ꦧ꧀ꦫꦴꦲ꧀ꦩꦟ, ꦠꦡꦴꦒꦠꦺꦴ’’ꦠꦶꦄꦴꦢꦶꦩꦴꦲ. ꦠꦱ꧀ꦱꦠ꧀ꦡꦺꦴ ꦱꦴꦩꦚ꧀ꦚꦦꦭꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ, ꦄꦪꦁ ꦥꦤ ꦮꦶꦱꦺꦱꦺꦴ, ꦆꦣ ꦠꦶꦮꦶꦣꦩ꧀ꦥꦶ ꦱꦷꦭꦁ – ‘‘ꦆꦢꦩ꧀ꦥꦶꦱ꧀ꦱ ꦲꦺꦴꦠꦶ ꦱꦷꦭꦱ꧀ꦩꦶ’’ꦤ꧀ꦠꦶ ꦌꦮꦁ ꦱꦷꦭꦩꦶꦕ꧀ꦕꦺꦮ ꦤꦶꦪ꧀ꦪꦴꦠꦶꦠꦁ ꦥꦜꦩꦗ꧀ꦙꦴꦤꦴꦢꦷꦤꦶ ꦕꦠ꧀ꦠꦴꦫꦶ ꦙꦴꦤꦴꦤꦶ ꦄꦠ꧀ꦡꦠꦺꦴ ꦥꦚ꧀ꦚꦴꦱꦩ꧀ꦥꦢꦴ. ꦌꦮꦁ ꦥꦚ꧀ꦚꦴꦮꦱꦺꦤ ꦥꦤ ꦄꦤꦶꦪ꧀ꦪꦴꦠꦺꦠ꧀ꦮꦴ ꦮꦶꦥꦱ꧀ꦱꦤꦴꦥꦚ꧀ꦚꦴꦪ ꦥꦢꦛ꧀ꦜꦴꦤꦨꦴꦮꦩꦠ꧀ꦠꦺꦤ ꦢꦱ꧀ꦱꦺꦠ꧀ꦮꦴ ꦮꦶꦥꦱ꧀ꦱꦤꦴꦥꦚ꧀ꦚꦴꦠꦺꦴ ꦥꦛ꧀ꦜꦴꦪ ꦥꦚ꧀ꦚꦴ ꦤꦶꦪ꧀ꦪꦴꦠꦶꦠꦴꦠꦶ.

ꦱꦺꦴꦟꦢꦟ꧀ꦝꦈꦥꦴꦱꦏꦠ꧀ꦠꦥꦛꦶꦮꦺꦢꦤꦴꦏꦡꦴ

꧓꧑꧙-꧓꧒꧒. ꦱ꧀ꦮꦴꦠꦤꦴꦪꦴꦠꦶ ꦥꦢꦱ꧀ꦱ ꦄꦠ꧀ꦡꦺꦴ ꦄꦗ꧀ꦗꦠꦤꦴꦪꦴꦠꦶ ꦌꦠ꧀ꦡ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ. ꦠꦺꦤ ꦩꦁ ꦱꦴ ꦥꦫꦶꦱꦴ ꦥꦫꦶꦨꦮꦺꦪ꧀ꦪꦴꦠꦶ ꦠꦺꦤ ꦠꦸꦩ꧀ꦲꦺ ꦢꦹꦫꦠꦺꦴꦮ ꦢꦶꦱ꧀ꦮꦴ ꦄꦴꦱꦤꦴ ꦮꦸꦛ꧀ꦜꦶꦠꦏꦴꦫꦟꦺꦤ ꦩꦁ ꦱꦴ ꦥꦫꦶꦱꦴ – ‘‘ꦄꦪꦁ ꦱꦺꦴꦟꦢꦟ꧀ꦝꦺꦴ ꦥꦕ꧀ꦖꦶꦩꦮꦪꦺ ꦜꦶꦠꦺꦴ ꦩꦲꦭ꧀ꦭꦏꦺꦴ, ꦒꦺꦴꦠꦩꦺꦴ ꦥꦤ ꦢꦲꦫꦺꦴ ꦪꦸꦮꦴ ꦤꦠ꧀ꦠꦴꦥꦶꦱ꧀ꦱ ꦤꦥ꧀ꦥꦲꦺꦴꦠꦶ, ꦱꦺꦴ ꦤꦴꦩ ꦄꦠ꧀ꦠꦤꦺꦴ ꦤꦠ꧀ꦠꦸꦩꦠ꧀ꦠꦨꦴꦮꦩ꧀ꦥꦶ ꦄꦥ꧀ꦥꦠ꧀ꦠꦱ꧀ꦱ ꦄꦴꦱꦤꦴ ꦮꦸꦛ꧀ꦜꦴꦠꦷ’’ꦠꦶ ꦥꦫꦶꦨꦮꦺꦪ꧀ꦪ. ꦄꦴꦱꦤꦴ ꦩꦺ ꦠꦁ ꦨꦮꦁ ꦒꦺꦴꦠꦩꦺꦴ ꦥꦕ꧀ꦕꦸꦛ꧀ꦜꦴꦤꦤ꧀ꦠꦶ ꦩꦩ ꦄꦒꦴꦫꦮꦺꦤ ꦄꦮꦸꦛ꧀ꦜꦴꦤꦁ ꦤꦴꦩ ꦤꦠ꧀ꦡꦶ, ꦨꦺꦴꦒꦤꦴꦱꦤꦨꦪꦺꦤ ꦥꦤ ꦤ ꦮꦸꦛ꧀ꦜꦲꦶꦱ꧀ꦱꦴꦩꦶ, ꦠꦁ ꦠꦸꦩ꧀ꦲꦺ ꦲꦶ ꦕꦺꦮ ꦩꦪꦴ ꦕ ꦚꦴꦠꦸꦁ ꦮꦛ꧀ꦛꦠꦶ. ꦠꦱ꧀ꦩꦴ ꦄꦴꦱꦤꦴ ꦩꦺ ꦌꦠꦁ ꦨꦮꦁ ꦒꦺꦴꦠꦩꦺꦴ ꦥꦕ꧀ꦕꦸꦛ꧀ꦜꦴꦤꦁ ꦣꦴꦫꦺꦠꦹꦠꦶ, ꦆꦩꦶꦤꦴ ꦏꦶꦫ ꦱꦢꦶꦱꦺꦴ ꦏꦸꦲꦏꦺꦴ ꦢꦸꦭ꧀ꦭꦨꦺꦴ, ꦨꦒꦮꦠꦶ ꦥꦤꦱ꧀ꦱ ꦄꦒꦴꦫꦮꦁ ꦤꦴꦩ ꦤꦠ꧀ꦡꦶ, ꦠꦱ꧀ꦩꦴ ꦨꦺꦴꦒꦤꦴꦱꦤꦨꦪꦴ ꦏꦸꦲꦤꦮꦱꦺꦤ ꦌꦮꦁ ꦮꦢꦠꦶ. ꦥꦫꦥꦢꦺꦱꦸꦥꦶ ꦌꦱꦺꦮ ꦤꦪꦺꦴ. ꦣꦩ꧀ꦩꦶꦪꦴ ꦏꦡꦴꦪꦴꦠꦶꦄꦴꦢꦷꦱꦸ ꦠꦔ꧀ꦑꦟꦴꦤꦸꦫꦹꦥꦴꦪ ꦣꦩ꧀ꦩꦶꦪꦴ ꦏꦡꦴꦪ ꦢꦶꦛ꧀ꦜꦣꦩ꧀ꦩꦶꦏꦱꦩ꧀ꦥꦫꦴꦪꦶꦏꦁ ꦄꦠ꧀ꦡꦁ ꦱꦤ꧀ꦢꦱ꧀ꦱꦺꦠ꧀ꦮꦴ ꦏꦸꦱꦭꦺ ꦣꦩ꧀ꦩꦺ ꦱꦩꦴꦢꦥꦺꦠ꧀ꦮꦴ ꦒꦟ꧀ꦲꦴꦥꦺꦠ꧀ꦮꦴ. ꦠꦠ꧀ꦡ ꦤꦁ ꦱꦩꦸꦠ꧀ꦠꦺꦗꦺꦠ꧀ꦮꦴ ꦱꦈꦱ꧀ꦱꦴꦲꦁ ꦏꦠ꧀ꦮꦴ ꦠꦴꦪ ꦕ ꦱꦈꦱ꧀ꦱꦴꦲꦠꦴꦪ ꦄꦚ꧀ꦚꦺꦲꦶ ꦕ ꦮꦶꦗ꧀ꦗꦩꦴꦤꦒꦸꦟꦺꦲꦶ ꦱꦩ꧀ꦥꦲꦁꦱꦺꦠ꧀ꦮꦴ ꦣꦩ꧀ꦩꦫꦠꦤꦮꦱ꧀ꦱꦁ ꦮꦱ꧀ꦱꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ. ꦧ꧀ꦫꦴꦲ꧀ꦩꦟꦺꦴ ꦥꦤ ꦄꦠ꧀ꦠꦤꦺꦴ ꦏꦸꦲꦏꦠꦴꦪ ꦌꦮꦩ꧀ꦥꦶ ꦨꦒꦮꦠꦶ ꦣꦩ꧀ꦩꦮꦱ꧀ꦱꦁ ꦮꦱ꧀ꦱꦶꦠꦺ ꦮꦶꦱꦺꦱꦁ ꦤꦶꦧ꧀ꦧꦠ꧀ꦠꦺꦠꦸꦁ ꦤꦴꦱꦏ꧀ꦑꦶ. ꦏꦺꦮꦭꦩꦱ꧀ꦱ ꦄꦴꦪꦠꦶꦁ ꦤꦶꦧ꧀ꦧꦴꦤꦠ꧀ꦡꦴꦪ ꦮꦴꦱꦤꦴꦨꦴꦒꦶꦪꦴꦪ ꦕ ꦱꦧ꧀ꦧꦴ ꦥꦸꦫꦶꦩꦥꦕ꧀ꦖꦶꦩꦏꦡꦴ ꦄꦲꦺꦴꦱꦷꦠꦶ.

ꦆꦠꦶ ꦱꦸꦩꦔ꧀ꦒꦭꦮꦶꦭꦴꦱꦶꦤꦶꦪꦴ ꦢꦷꦓꦤꦶꦏꦴꦪꦛ꧀ꦜꦏꦡꦴꦪꦁ

ꦱꦺꦴꦟꦢꦟ꧀ꦝꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.