꧑. ꦧ꧀ꦫꦲ꧀ꦩꦗꦴꦭꦱꦸꦠ꧀ꦠꦮꦟ꧀ꦟꦤꦴ

ꦥꦫꦶꦧ꧀ꦧꦴꦗꦏꦏꦡꦴꦮꦟ꧀ꦟꦤꦴ

ꦆꦩꦶꦱ꧀ꦱꦴ ꦥꦜꦩꦩꦲꦴꦱꦔ꧀ꦒꦷꦠꦶꦪꦴ ꦮꦠ꧀ꦠꦩꦴꦤꦴꦪ ꦮꦶꦤꦪꦱꦔ꧀ꦒꦲꦴꦮꦱꦴꦤꦺ ꦱꦸꦠ꧀ꦠꦤ꧀ꦠꦥꦶꦛꦏꦺ ꦄꦴꦢꦶꦤꦶꦏꦴꦪꦱ꧀ꦱ ꦄꦴꦢꦶꦱꦸꦠ꧀ꦠꦁ ꦧ꧀ꦫꦲ꧀ꦩꦗꦴꦭꦁ ꦥꦸꦕ꧀ꦖꦤ꧀ꦠꦺꦤ ꦄꦴꦪꦱ꧀ꦩꦠꦴ ꦩꦲꦴꦏꦱ꧀ꦱꦥꦺꦤ – ‘‘ꦧ꧀ꦫꦲ꧀ꦩꦗꦴꦭꦁ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦏꦠ꧀ꦡ ꦨꦴꦱꦶꦠ’’ꦤ꧀ꦠꦶ, ꦌꦮꦩꦴꦢꦶꦮꦸꦠ꧀ꦠꦮꦕꦤꦥꦫꦶꦪꦺꦴꦱꦴꦤꦺ ꦪꦠ꧀ꦡ ꦕ ꦨꦴꦱꦶꦠꦁ, ꦪꦚ꧀ꦕꦴꦫꦧ꧀ꦨ ꦨꦴꦱꦶꦠꦁ, ꦠꦁ ꦱꦧ꧀ꦧꦁ ꦥꦏꦴꦱꦺꦤ꧀ꦠꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦌꦮꦁ ꦩꦺ ꦱꦸꦠꦤ꧀ꦠꦶꦄꦴꦢꦶꦩꦴꦲ. ꦠꦺꦤ ꦮꦸꦠ꧀ꦠꦁ ‘‘ꦧ꧀ꦫꦲ꧀ꦩꦗꦴꦭꦱ꧀ꦱꦴꦥꦶ ꦌꦮꦁ ꦩꦺ ꦱꦸꦠꦤ꧀ꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦴ ꦄꦴꦤꦤ꧀ꦢꦺꦤ ꦥꦜꦩꦩꦲꦴꦱꦔ꧀ꦒꦷꦠꦶꦏꦴꦭꦺ ꦮꦸꦠ꧀ꦠꦁ ꦤꦶꦢꦴꦤꦩꦴꦢꦷ’’ꦠꦶ.

꧑. ꦠꦠ꧀ꦡ ꦌꦮꦤ꧀ꦠꦶ ꦤꦶꦥꦴꦠꦥꦢꦁ. ꦩꦺꦠꦶꦄꦴꦢꦷꦤꦶ ꦤꦴꦩꦥꦢꦴꦤꦶ. ꦥꦛꦶꦥꦤ꧀ꦤꦺꦴ ꦲꦺꦴꦠꦷꦠꦶ ꦌꦠ꧀ꦡ ꦥꦛꦷꦠꦶ ꦈꦥꦱꦒ꧀ꦒꦥꦢꦁ, ꦲꦺꦴꦠꦷꦠꦶ ꦄꦴꦑ꧀ꦪꦴꦠꦥꦢꦤ꧀ꦠꦶ. ꦆꦩꦶꦤꦴ ꦠꦴꦮ ꦤꦪꦺꦤ ꦥꦢꦮꦶꦨꦴꦒꦺꦴ ꦮꦺꦢꦶꦠꦧ꧀ꦧꦺꦴ.

ꦄꦠ꧀ꦡꦠꦺꦴ ꦥꦤ ꦌꦮꦁ-ꦱꦢ꧀ꦢꦺꦴ ꦠꦴꦮ ꦈꦥꦩꦹꦥꦢꦺꦱꦱꦩ꧀ꦥꦲꦁꦱꦤꦒꦫꦲꦟꦮꦕꦤꦱꦩ꧀ꦥꦛꦶꦒ꧀ꦒꦲꦴꦏꦴꦫꦤꦶꦢꦱ꧀ꦱꦤꦴꦮꦣꦴꦫꦟꦴꦢꦶꦄꦤꦺꦏꦠ꧀ꦡꦥ꧀ꦥꦨꦺꦢꦺꦴ. ꦠꦡꦴꦲꦺꦱ – ‘‘ꦌꦮꦁ ꦗꦴꦠꦺꦤ ꦩꦕ꧀ꦕꦺꦤ, ꦏꦠ꧀ꦠꦧ꧀ꦧꦁ ꦏꦸꦱꦭꦁ ꦧꦲꦸ’’ꦤ꧀ꦠꦶ (ꦣ. ꦥ. ꧕꧓) ꦌꦮꦩꦴꦢꦷꦱꦸ ꦈꦥꦩꦴꦪꦁ ꦄꦴꦒꦠꦺꦴ. ‘‘ꦌꦮꦁ ꦠꦺ ꦄꦨꦶꦏ꧀ꦏꦩꦶꦠꦧ꧀ꦧꦁ, ꦌꦮꦁ ꦠꦺ ꦥꦛꦶꦏ꧀ꦏꦩꦶꦠꦧ꧀ꦧ’’ꦤ꧀ꦠꦶꦄꦴꦢꦷꦱꦸ (ꦄ. ꦤꦶ. ꧔.꧑꧒꧒) ꦈꦥꦢꦺꦱꦺ. ‘‘ꦌꦮꦩꦺꦠꦁ ꦨꦒꦮꦴ, ꦌꦮꦩꦺꦠꦁ ꦱꦸꦒꦠꦴ’’ꦠꦶꦄꦴꦢꦷꦱꦸ (ꦄ. ꦤꦶ. ꧓.꧖꧖) ꦱꦩ꧀ꦥꦲꦁꦱꦤꦺ. ‘‘ꦌꦮꦩꦺꦮꦁ ꦥꦤꦴꦪꦁ ꦮꦱꦭꦷ ꦪꦱ꧀ꦩꦶꦁ ꦮꦴ ꦠꦱ꧀ꦩꦶꦁ ꦮꦴ ꦠꦱ꧀ꦱ ꦩꦸꦟ꧀ꦝꦏꦱ꧀ꦱ ꦱꦩꦟꦏꦱ꧀ꦱ ꦮꦟ꧀ꦟꦁ ꦨꦴꦱꦠꦷ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧑.꧑꧘꧗) ꦒꦫꦲꦟꦺ. ‘‘ꦌꦮꦁ, ꦨꦤ꧀ꦠꦺꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸ’’ꦤ꧀ꦠꦶꦄꦴꦢꦷꦱꦸ (ꦩ. ꦤꦶ. ꧑.꧑) ꦮꦕꦤꦱꦩ꧀ꦥꦛꦶꦒ꧀ꦒꦲꦺ. ‘‘ꦌꦮꦁ ꦧ꧀ꦪꦴ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦴ ꦣꦩ꧀ꦩꦁ ꦢꦺꦱꦶꦠꦁ ꦄꦴꦗꦴꦤꦴꦩꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧓꧙꧘) ꦄꦴꦏꦴꦫꦺ. ‘‘ꦌꦲꦶ ꦠ꧀ꦮꦁ, ꦩꦴꦟꦮꦏ, ꦪꦺꦤ ꦱꦩꦟꦺꦴ ꦄꦴꦤꦤ꧀ꦢꦺꦴ ꦠꦺꦤꦸꦥꦱꦔ꧀ꦏꦩ, ꦈꦥꦱꦔ꧀ꦏꦩꦶꦠ꧀ꦮꦴ ꦩꦩ ꦮꦕꦤꦺꦤ ꦱꦩꦟꦁ ꦄꦴꦤꦤ꧀ꦢꦁ ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ ꦥꦸꦕ꧀ꦖ. ‘‘ꦱꦸꦨꦺꦴ ꦩꦴꦟꦮꦺꦴ ꦠꦺꦴꦢꦺꦪ꧀ꦪꦥꦸꦠ꧀ꦠꦺꦴ ꦨꦮꦤ꧀ꦠꦁ ꦄꦴꦤꦤ꧀ꦢꦁ ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ ꦥꦸꦕ꧀ꦖꦠꦷ’’ꦠꦶ. ‘‘ꦌꦮꦚ꧀ꦕ ꦮꦢꦺꦲꦶ, ꦱꦴꦣꦸ ꦏꦶꦫ ꦨꦮꦁ ꦄꦴꦤꦤ꧀ꦢꦺꦴ ꦪꦺꦤ ꦱꦸꦨꦱ꧀ꦱ ꦩꦴꦟꦮꦱ꧀ꦱ ꦠꦺꦴꦢꦺꦪ꧀ꦪꦥꦸꦠ꧀ꦠꦱ꧀ꦱ ꦤꦶꦮꦺꦱꦤꦁ, ꦠꦺꦤꦸꦥꦱꦔ꧀ꦏꦩꦠꦸ ꦄꦤꦸꦏꦩ꧀ꦥꦁ ꦈꦥꦴꦢꦴꦪꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧔꧔꧕) ꦤꦶꦢꦱ꧀ꦱꦤꦺ. ‘‘ꦠꦁ ꦏꦶꦁ ꦩꦚ꧀ꦚꦡ, ꦏꦴꦭꦴꦩꦴ, ꦆꦩꦺ ꦣꦩ꧀ꦩꦴ ꦏꦸꦱꦭꦴ ꦮꦴ ꦄꦏꦸꦱꦭꦴ ꦮꦴꦠꦶ? ꦄꦏꦸꦱꦭꦴ, ꦨꦤ꧀ꦠꦺ. ꦱꦴꦮꦗ꧀ꦗꦴ ꦮꦴ ꦄꦤꦮꦗ꧀ꦗꦴ ꦮꦴꦠꦶ? ꦱꦴꦮꦗ꧀ꦗꦴ, ꦨꦤ꧀ꦠꦺ. ꦮꦶꦚ꧀ꦚꦸꦒꦫꦲꦶꦠꦴ ꦮꦴ ꦮꦶꦚ꧀ꦚꦸꦥ꧀ꦥꦱꦠ꧀ꦡꦴ ꦮꦴꦠꦶ? ꦮꦶꦚ꧀ꦚꦸꦒꦫꦲꦶꦠꦴ, ꦨꦤ꧀ꦠꦺ. ꦱꦩꦠ꧀ꦠꦴ ꦱꦩꦴꦢꦶꦤ꧀ꦤꦴ ꦄꦲꦶꦠꦴꦪ ꦢꦸꦏ꧀ꦑꦴꦪ ꦱꦁꦮꦠ꧀ꦠꦤ꧀ꦠꦶ ꦤꦺꦴ ꦮꦴ, ꦏꦡꦁ ꦮꦺꦴ ꦌꦠ꧀ꦡ ꦲꦺꦴꦠꦷꦠꦶ? ꦱꦩꦠ꧀ꦠꦴ, ꦨꦤ꧀ꦠꦺ, ꦱꦩꦴꦢꦶꦤ꧀ꦤꦴ ꦄꦲꦶꦠꦴꦪ ꦢꦸꦏ꧀ꦑꦴꦪ ꦱꦁꦮꦠ꧀ꦠꦤ꧀ꦠꦶ, ꦌꦮꦁ ꦤꦺꦴ ꦌꦠ꧀ꦡ ꦲꦺꦴꦠꦷ’’ꦠꦶꦄꦴꦢꦷꦱꦸ (ꦄ. ꦤꦶ. ꧓.꧖꧖) ꦄꦮꦣꦴꦫꦟꦺ. ꦱ꧀ꦮꦴꦪꦩꦶꦣ ꦄꦴꦏꦴꦫꦤꦶꦢꦱ꧀ꦱꦤꦴꦮꦣꦴꦫꦟꦺꦱꦸ ꦢꦛ꧀ꦜꦧ꧀ꦧꦺꦴ.

ꦠꦠ꧀ꦡ ꦄꦴꦏꦴꦫꦠ꧀ꦡꦺꦤ ꦌꦮꦁ-ꦱꦢ꧀ꦢꦺꦤ ꦌꦠꦩꦠ꧀ꦡꦁ ꦢꦷꦥꦺꦠꦶ, ꦤꦴꦤꦴꦤꦪꦤꦶꦥꦸꦟꦩꦤꦺꦏꦗ꧀ꦙꦴꦱꦪꦱꦩꦸꦛ꧀ꦜꦴꦤꦁ, ꦄꦠ꧀ꦡꦧ꧀ꦪꦚ꧀ꦗꦤꦱꦩ꧀ꦥꦤ꧀ꦤꦁ, ꦮꦶꦮꦶꦣꦥꦴꦛꦶꦲꦴꦫꦶꦪꦁ, ꦣꦩ꧀ꦩꦠ꧀ꦡꦢꦺꦱꦤꦴꦥꦛꦶꦮꦺꦣꦒꦩ꧀ꦨꦷꦫꦁ, ꦱꦧ꧀ꦧꦱꦠ꧀ꦠꦴꦤꦁ ꦱꦏꦱꦏꦨꦴꦱꦴꦤꦸꦫꦹꦥꦠꦺꦴ ꦱꦺꦴꦠꦥꦡꦩꦴꦒꦕ꧀ꦖꦤ꧀ꦠꦁ ꦠꦱ꧀ꦱ ꦨꦒꦮꦠꦺꦴ ꦮꦕꦤꦁ ꦱꦧ꧀ꦧꦥ꧀ꦥꦏꦴꦫꦺꦤ ꦏꦺꦴ ꦱꦩꦠ꧀ꦡꦺꦴ ꦮꦶꦚ꧀ꦚꦴꦠꦸꦁ, ꦱꦧ꧀ꦧꦡꦴꦩꦺꦤ ꦥꦤ ꦱꦺꦴꦠꦸꦏꦴꦩꦠꦁ ꦗꦤꦺꦠ꧀ꦮꦴꦥꦶ ‘ꦌꦮꦁ ꦩꦺ ꦱꦸꦠꦁ’ ꦩꦪꦴꦥꦶ ꦌꦏꦺꦤꦴꦏꦴꦫꦺꦤ ꦱꦸꦠꦤ꧀ꦠꦶ.

ꦤꦶꦢꦱ꧀ꦱꦤꦠ꧀ꦡꦺꦤ – ‘‘ꦤꦴꦲꦁ ꦱꦪꦩ꧀ꦨꦹ, ꦤ ꦩꦪꦴ ꦆꦢꦁ ꦱꦕ꧀ꦖꦶꦏꦠ’’ꦤ꧀ꦠꦶ ꦄꦠ꧀ꦠꦴꦤꦁ ꦥꦫꦶꦩꦺꦴꦕꦺꦤ꧀ꦠꦺꦴ – ‘ꦌꦮꦁ ꦩꦺ ꦱꦸꦠꦁ’, ‘ꦩꦪꦴꦥꦶ ꦌꦮꦁ ꦱꦸꦠ’ꦤ꧀ꦠꦶ ꦆꦢꦴꦤꦶ ꦮꦠ꧀ꦠꦧ꧀ꦧꦁ ꦱꦏꦭꦁ ꦱꦸꦠ꧀ꦠꦁ ꦤꦶꦢꦱ꧀ꦱꦺꦠꦶ.

ꦄꦮꦣꦴꦫꦟꦠ꧀ꦡꦺꦤ – ‘‘ꦌꦠꦢꦒ꧀ꦒꦁ, ꦨꦶꦏ꧀ꦑꦮꦺ, ꦩꦩ ꦱꦴꦮꦏꦴꦤꦁ ꦨꦶꦏ꧀ꦑꦹꦤꦁ ꦧꦲꦸꦱ꧀ꦱꦸꦠꦴꦤꦁ ꦪꦢꦶꦢꦁ ꦄꦴꦤꦤ꧀ꦢꦺꦴ, ꦒꦠꦶꦩꦤ꧀ꦠꦴꦤꦁ, ꦱꦠꦶꦩꦤ꧀ꦠꦴꦤꦁ, ꦣꦶꦠꦶꦩꦤ꧀ꦠꦴꦤꦁ, ꦈꦥꦛ꧀ꦜꦴꦏꦴꦤꦁ ꦪꦢꦶꦢꦁ ꦄꦴꦤꦤ꧀ꦢꦺꦴ’’ꦠꦶ (ꦄ. ꦤꦶ. ꧑.꧒꧒꧓). ꦌꦮꦁ ꦨꦒꦮꦠꦴ – ‘‘ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦄꦠ꧀ꦡꦏꦸꦱꦭꦺꦴ, ꦣꦩ꧀ꦩꦏꦸꦱꦭꦺꦴ, ꦧ꧀ꦪꦚ꧀ꦗꦤꦏꦸꦱꦭꦺꦴ, ꦤꦶꦫꦸꦠ꧀ꦠꦶꦏꦸꦱꦭꦺꦴ, ꦥꦸꦧ꧀ꦧꦴꦥꦫꦏꦸꦱꦭꦺꦴ’’ꦠꦶ (ꦄ. ꦤꦶ. ꧕.꧑꧖꧙). ꦌꦮꦁ ꦣꦩ꧀ꦩꦱꦺꦤꦴꦥꦠꦶꦤꦴ ꦕ ꦥꦱꦠ꧀ꦡꦨꦴꦮꦴꦤꦸꦫꦹꦥꦁ ꦄꦠ꧀ꦠꦤꦺꦴ ꦣꦴꦫꦟꦧꦭꦁ ꦢꦱ꧀ꦱꦺꦤ꧀ꦠꦺꦴ ꦱꦠ꧀ꦠꦴꦤꦁ ꦱꦺꦴꦠꦸꦏꦴꦩꦠꦁ ꦗꦤꦺꦠꦶ – ‘ꦌꦮꦁ ꦩꦺ ꦱꦸꦠꦁ’, ꦠꦚ꧀ꦕ ꦑꦺꦴ ꦄꦠ꧀ꦡꦠꦺꦴ ꦮꦴ ꦧ꧀ꦪꦚ꧀ꦗꦤꦠꦺꦴ ꦮꦴ ꦄꦤꦹꦤꦩꦤꦣꦶꦏꦁ, ꦌꦮꦩꦺꦮ ꦤ ꦄꦚ꧀ꦚꦡꦴ ꦢꦛ꧀ꦜꦧ꧀ꦧ’’ꦤ꧀ꦠꦶ.

ꦩꦺ-ꦱꦢ꧀ꦢꦺꦴ ꦠꦷꦱꦸ ꦄꦠ꧀ꦡꦺꦱꦸ ꦢꦶꦱ꧀ꦱꦠꦶ. ꦠꦡꦴ ꦲꦶꦱ꧀ꦱ – ‘‘ꦒꦴꦡꦴꦨꦶꦒꦷꦠꦁ ꦩꦺ ꦄꦨꦺꦴꦗꦤꦺꦪ꧀ꦪ’’ꦤ꧀ꦠꦶꦄꦴꦢꦷꦱꦸ (ꦱꦸ. ꦤꦶ. ꧘꧑) ꦩꦪꦴꦠꦶ ꦄꦠ꧀ꦡꦺꦴ. ‘‘ꦱꦴꦣꦸ ꦩꦺ, ꦨꦤ꧀ꦠꦺ, ꦨꦒꦮꦴ ꦱꦔ꧀ꦑꦶꦠ꧀ꦠꦺꦤ ꦣꦩ꧀ꦩꦁ ꦢꦺꦱꦺꦠꦹ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧔.꧘꧘) ꦩꦪ꧀ꦲꦤ꧀ꦠꦶ ꦄꦠ꧀ꦡꦺꦴ. ‘‘ꦣꦩ꧀ꦩꦢꦴꦪꦴꦢꦴ ꦩꦺ, ꦨꦶꦏ꧀ꦑꦮꦺ, ꦨꦮꦡꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧒꧙) ꦩꦩꦴꦠꦶ ꦄꦠ꧀ꦡꦺꦴ. ꦆꦣ ꦥꦤ ꦩꦪꦴ ꦱꦸꦠꦤ꧀ꦠꦶ ꦕ, ꦩꦩ ꦱꦸꦠꦤ꧀ꦠꦶ ꦕ ꦄꦠ꧀ꦡꦢ꧀ꦮꦪꦺ ꦪꦸꦗ꧀ꦗꦠꦶ.

ꦱꦸꦠꦤ꧀ꦠꦶ ꦄꦪꦁ ꦱꦸꦠ-ꦱꦢ꧀ꦢꦺꦴ ꦱꦈꦥꦱꦒ꧀ꦒꦺꦴ ꦕ ꦄꦤꦸꦥꦱꦒ꧀ꦒꦺꦴ ꦕ – ꦒꦩꦤꦮꦶꦱ꧀ꦱꦸꦠꦏꦶꦭꦶꦤ꧀ꦤ-ꦈꦥꦕꦶꦠꦴꦤꦸꦪꦺꦴꦒ-ꦱꦺꦴꦠꦮꦶꦚ꧀ꦚꦺꦪ꧀ꦪ-ꦱꦺꦴꦠꦢ꧀ꦮꦴꦫꦴꦤꦸꦱꦴꦫ-ꦮꦶꦚ꧀ꦚꦴꦠꦴꦢꦶꦄꦤꦺꦏꦠ꧀ꦡꦥ꧀ꦥꦨꦺꦢꦺꦴ, ꦠꦡꦴ ꦲꦶꦱ꧀ꦱ ‘‘ꦱꦺꦤꦴꦪ ꦥꦱꦸꦠꦺꦴ’’ꦠꦶꦄꦴꦢꦷꦱꦸ ꦒꦕ꧀ꦖꦤ꧀ꦠꦺꦴꦠꦶ ꦄꦠ꧀ꦡꦺꦴ. ‘‘ꦱꦸꦠꦣꦩ꧀ꦩꦱ꧀ꦱ ꦥꦱ꧀ꦱꦠꦺꦴ’’ꦠꦶꦄꦴꦢꦷꦱꦸ (ꦈꦢꦴ. ꧑꧑) ꦮꦶꦱ꧀ꦱꦸꦠꦣꦩ꧀ꦩꦱ꧀ꦱꦴꦠꦶ ꦄꦠ꧀ꦡꦺꦴ. ‘‘ꦄꦮꦱ꧀ꦱꦸꦠꦴ ꦄꦮꦱ꧀ꦱꦸꦠꦱ꧀ꦱꦴ’’ꦠꦶꦄꦴꦢꦷꦱꦸ (ꦥꦴꦕꦶ. ꧖꧕꧗) ꦏꦶꦭꦶꦤ꧀ꦤꦴꦏꦶꦭꦶꦤ꧀ꦤꦱ꧀ꦱꦴꦠꦶ ꦄꦠ꧀ꦡꦺꦴ. ‘‘ꦠꦸꦩ꧀ꦲꦺꦲꦶ ꦥꦸꦚ꧀ꦚꦁ ꦥꦱꦸꦠꦁ ꦄꦤꦥ꧀ꦥꦏ’’ꦤ꧀ꦠꦶꦄꦴꦢꦷꦱꦸ (ꦑꦸ. ꦥꦴ. ꧗.꧑꧒) ꦈꦥꦕꦶꦠꦤ꧀ꦠꦶ ꦄꦠ꧀ꦡꦺꦴ. ‘‘ꦪꦺ ꦙꦴꦤꦥꦱꦸꦠꦴ ꦣꦷꦫꦴ’’ꦠꦶꦄꦴꦢꦷꦱꦸ (ꦣ. ꦥ. ꧑꧘꧑) ꦙꦴꦤꦴꦤꦸꦪꦸꦠ꧀ꦠꦴꦠꦶ ꦄꦠ꧀ꦡꦺꦴ. ‘ꦢꦶꦛ꧀ꦜꦁ ꦱꦸꦠꦁ ꦩꦸꦠ’ꦤ꧀ꦠꦶꦄꦴꦢꦷꦱꦸ (ꦩ. ꦤꦶ. ꧑.꧒꧔꧑) ꦱꦺꦴꦠꦮꦶꦚ꧀ꦚꦺꦪ꧀ꦪꦤ꧀ꦠꦶ ꦄꦠ꧀ꦡꦺꦴ. ‘‘ꦱꦸꦠꦣꦫꦺꦴ ꦱꦸꦠꦱꦤ꧀ꦤꦶꦕꦪꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧓꧓꧙) ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦮꦶꦚ꧀ꦚꦴꦠꦣꦫꦺꦴꦠꦶ ꦄꦠ꧀ꦡꦺꦴ. ꦆꦣ ꦥꦤꦱ꧀ꦱ ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦺꦤ ꦈꦥꦣꦴꦫꦶꦠꦤ꧀ꦠꦶ ꦮꦴ ꦈꦥꦣꦴꦫꦟꦤ꧀ꦠꦶ ꦮꦴꦠꦶ ꦄꦠ꧀ꦡꦺꦴ. ‘ꦩꦺ’ ꦱꦢ꧀ꦢꦱ꧀ꦱ ꦲꦶ ‘ꦩꦪꦴ’ꦠꦶ ꦄꦠ꧀ꦡꦺ ꦱꦠꦶ ‘ꦌꦮꦁ ꦩꦪꦴ ꦱꦸꦠꦁ’ ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦺꦤ ꦈꦥꦣꦴꦫꦶꦠꦤ꧀ꦠꦶ ꦪꦸꦗ꧀ꦗꦠꦶ. ‘ꦩꦩꦴ’ꦠꦶ ꦄꦠ꧀ꦡꦺ ꦱꦠꦶ ꦌꦮꦁ ꦩꦩ ꦱꦸꦠꦁ ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦺꦤ ꦈꦥꦣꦴꦫꦟꦤ꧀ꦠꦶ ꦪꦸꦗ꧀ꦗꦠꦶ.

ꦌꦮꦩꦺꦠꦺꦱꦸ ꦠꦷꦱꦸ ꦥꦢꦺꦱꦸ ꦌꦮꦤ꧀ꦠꦶ ꦱꦺꦴꦠꦮꦶꦚ꧀ꦚꦴꦟꦴꦢꦶꦮꦶꦚ꧀ꦚꦴꦟꦏꦶꦕ꧀ꦕꦤꦶꦢꦱ꧀ꦱꦤꦁ. ꦩꦺꦠꦶ ꦮꦸꦠ꧀ꦠꦮꦶꦚ꧀ꦚꦴꦟꦱꦩꦔ꧀ꦒꦶꦥꦸꦒ꧀ꦒꦭꦤꦶꦢꦱ꧀ꦱꦤꦁ. ꦱꦸꦠꦤ꧀ꦠꦶ ꦄꦱ꧀ꦱꦮꦤꦨꦴꦮꦥꦛꦶꦏ꧀ꦑꦺꦥꦠꦺꦴ ꦄꦤꦹꦤꦴꦣꦶꦏꦴꦮꦶꦥꦫꦷꦠꦒ꧀ꦒꦲꦟꦤꦶꦢꦱ꧀ꦱꦤꦁ. ꦠꦡꦴ ꦌꦮꦤ꧀ꦠꦶ ꦠꦱ꧀ꦱꦴ ꦱꦺꦴꦠꦢ꧀ꦮꦴꦫꦴꦤꦸꦱꦴꦫꦺꦤ ꦥꦮꦠ꧀ꦠꦴꦪ ꦮꦶꦚ꧀ꦚꦴꦟꦮꦷꦡꦶꦪꦴ ꦤꦴꦤꦥ꧀ꦥꦏꦴꦫꦺꦤ ꦄꦴꦫꦩ꧀ꦩꦟꦺ ꦥꦮꦠ꧀ꦠꦶꦨꦴꦮꦥ꧀ꦥꦏꦴꦱꦤꦁ. ꦩꦺꦠꦶ ꦄꦠ꧀ꦠꦥ꧀ꦥꦏꦴꦱꦤꦁ. ꦱꦸꦠꦤ꧀ꦠꦶ ꦣꦩ꧀ꦩꦥ꧀ꦥꦏꦴꦱꦤꦁ. ꦄꦪꦚ꧀ꦲꦺꦠ꧀ꦡ ꦱꦔ꧀ꦑꦺꦥꦺꦴ – ‘‘ꦤꦴꦤꦥ꧀ꦥꦏꦴꦫꦺꦤ ꦄꦴꦫꦩ꧀ꦩꦟꦺ ꦥꦮꦠ꧀ꦠꦴꦪ ꦮꦶꦚ꧀ꦚꦴꦟꦮꦷꦡꦶꦪꦴ ꦩꦪꦴ ꦤ ꦄꦚ꧀ꦚꦁ ꦏꦠꦁ, ꦆꦢꦁ ꦥꦤ ꦏꦠꦁ, ꦄꦪꦁ ꦣꦩ꧀ꦩꦺꦴ ꦱꦸꦠꦺꦴ’’ꦠꦶ.

ꦠꦡꦴ ꦌꦮꦤ꧀ꦠꦶ ꦤꦶꦢ꧀ꦢꦶꦱꦶꦠꦧ꧀ꦧꦣꦩ꧀ꦩꦥ꧀ꦥꦏꦴꦱꦤꦁ. ꦩꦺꦠꦶ ꦥꦸꦒ꧀ꦒꦭꦥ꧀ꦥꦏꦴꦱꦤꦁ. ꦱꦸꦠꦤ꧀ꦠꦶ ꦥꦸꦒ꧀ꦒꦭꦏꦶꦕ꧀ꦕꦥ꧀ꦥꦏꦴꦱꦤꦁ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ. ‘‘ꦪꦁ ꦱꦸꦠ꧀ꦠꦁ ꦤꦶꦢ꧀ꦢꦶꦱꦶꦱ꧀ꦱꦴꦩꦶ, ꦠꦁ ꦩꦪꦴ ꦌꦮꦁ ꦱꦸꦠ’’ꦤ꧀ꦠꦶ.

ꦠꦡꦴ ꦌꦮꦤ꧀ꦠꦶ ꦪꦱ꧀ꦱ ꦕꦶꦠ꧀ꦠꦱꦤ꧀ꦠꦴꦤꦱ꧀ꦱ ꦤꦴꦤꦴꦏꦴꦫꦥ꧀ꦥꦮꦠ꧀ꦠꦶꦪꦴ ꦤꦴꦤꦠ꧀ꦡꦧ꧀ꦪꦚ꧀ꦗꦤꦒ꧀ꦒꦲꦟꦁ ꦲꦺꦴꦠꦶ, ꦠꦱ꧀ꦱ ꦤꦴꦤꦴꦏꦴꦫꦤꦶꦢ꧀ꦢꦺꦱꦺꦴ. ꦌꦮꦤ꧀ꦠꦶ ꦲꦶ ꦄꦪꦩꦴꦏꦴꦫꦥꦚ꧀ꦚꦠ꧀ꦠꦶ. ꦩꦺꦠꦶ ꦏꦠ꧀ꦠꦸꦤꦶꦢ꧀ꦢꦺꦱꦺꦴ. ꦱꦸꦠꦤ꧀ꦠꦶ ꦮꦶꦱꦪꦤꦶꦢ꧀ꦢꦺꦱꦺꦴ. ꦌꦠ꧀ꦠꦴꦮꦠꦴ ꦤꦴꦤꦴꦏꦴꦫꦥ꧀ꦥꦮꦠ꧀ꦠꦺꦤ ꦕꦶꦠ꧀ꦠꦱꦤ꧀ꦠꦴꦤꦺꦤ ꦠꦁ ꦱꦩꦔ꧀ꦒꦶꦤꦺꦴ ꦏꦠ꧀ꦠꦸ ꦮꦶꦱꦪꦒ꧀ꦒꦲꦟꦱꦤ꧀ꦤꦶꦛ꧀ꦜꦴꦤꦁ ꦏꦠꦁ ꦲꦺꦴꦠꦶ.

ꦄꦡꦮꦴ ꦌꦮꦤ꧀ꦠꦶ ꦥꦸꦒ꧀ꦒꦭꦏꦶꦕ꧀ꦕꦤꦶꦢ꧀ꦢꦺꦱꦺꦴ. ꦱꦸꦠꦤ꧀ꦠꦶ ꦮꦶꦚ꧀ꦚꦴꦟꦏꦶꦕ꧀ꦕꦤꦶꦢ꧀ꦢꦺꦱꦺꦴ. ꦩꦺꦠꦶ ꦈꦨꦪꦏꦶꦕ꧀ꦕꦪꦸꦠ꧀ꦠꦥꦸꦒ꧀ꦒꦭꦤꦶꦢ꧀ꦢꦺꦱꦺꦴ. ꦄꦪꦁ ꦥꦤꦺꦠ꧀ꦡ ꦱꦔ꧀ꦑꦺꦥꦺꦴ, ‘‘ꦩꦪꦴ ꦱꦮꦤꦏꦶꦕ꧀ꦕꦮꦶꦚ꧀ꦚꦴꦟꦱꦩꦔ꧀ꦒꦶꦤꦴ ꦥꦸꦒ꧀ꦒꦭꦺꦤ ꦮꦶꦚ꧀ꦚꦴꦟꦮꦱꦺꦤ ꦭꦢ꧀ꦣꦱꦮꦤꦏꦶꦕ꧀ꦕꦮꦺꦴꦲꦴꦫꦺꦤ ꦱꦸꦠ’’ꦤ꧀ꦠꦶ.

ꦠꦠ꧀ꦡ ꦌꦮꦤ꧀ꦠꦶ ꦕ ꦩꦺꦠꦶ ꦕ ꦱꦕ꧀ꦕꦶꦏꦛ꧀ꦜꦥꦫꦩꦠ꧀ꦡꦮꦱꦺꦤ ꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ. ꦏꦶꦚ꧀ꦲꦺꦠ꧀ꦡ ꦠꦁ ꦥꦫꦩꦠ꧀ꦡꦠꦺꦴ ꦄꦠ꧀ꦡꦶ, ꦪꦁ ꦌꦮꦤ꧀ꦠꦶ ꦮꦴ ꦩꦺꦠꦶ ꦮꦴ ꦤꦶꦢ꧀ꦢꦺꦱꦁ ꦭꦨꦺꦡ? ꦱꦸꦠꦤ꧀ꦠꦶ ꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ. ꦪꦚ꧀ꦲꦶ ꦠꦁ ꦌꦠ꧀ꦡ ꦱꦺꦴꦠꦺꦤ ꦈꦥꦭꦢ꧀ꦣꦁ, ꦠꦁ ꦥꦫꦩꦠ꧀ꦡꦠꦺꦴ ꦮꦶꦗ꧀ꦗꦩꦴꦤꦤ꧀ꦠꦶ. ꦠꦡꦴ ‘ꦌꦮ’ꦤ꧀ꦠꦶ ꦕ, ꦩꦺꦠꦶ ꦕ, ꦠꦁ ꦠꦁ ꦈꦥꦴꦢꦴꦪ ꦮꦠ꧀ꦠꦧ꧀ꦧꦠꦺꦴ ꦈꦥꦴꦢꦴꦥꦚ꧀ꦚꦠ꧀ꦠꦶ. ‘ꦱꦸꦠ’ꦤ꧀ꦠꦶ ꦢꦶꦛ꧀ꦜꦴꦢꦷꦤꦶ ꦈꦥꦤꦶꦣꦴꦪ ꦮꦠ꧀ꦠꦧ꧀ꦧꦠꦺꦴ ꦈꦥꦤꦶꦣꦴꦥꦚ꧀ꦚꦠ꧀ꦠꦶ. ꦌꦠ꧀ꦡ ꦕ ꦌꦮꦤ꧀ꦠꦶ ꦮꦕꦤꦺꦤ ꦄꦱꦩ꧀ꦩꦺꦴꦲꦁ ꦢꦷꦥꦺꦠꦶ. ꦤ ꦲꦶ ꦱꦩ꧀ꦩꦹꦭ꦳꧀ꦲꦺꦴ ꦤꦴꦤꦥ꧀ꦥꦏꦴꦫꦥꦛꦶꦮꦺꦣꦱꦩꦠ꧀ꦡꦺꦴ ꦲꦺꦴꦠꦶ. ‘ꦱꦸꦠ’ꦤ꧀ꦠꦶ ꦮꦕꦤꦺꦤ ꦱꦸꦠꦱ꧀ꦱ ꦄꦱꦩ꧀ꦩꦺꦴꦱꦁ ꦢꦷꦥꦺꦠꦶ. ꦪꦱ꧀ꦱ ꦲꦶ ꦱꦸꦠꦁ ꦱꦩ꧀ꦩꦸꦛ꧀ꦜꦁ ꦲꦺꦴꦠꦶ, ꦤ ꦱꦺꦴ ꦏꦴꦭꦤ꧀ꦠꦫꦺꦤ ꦩꦪꦴ ꦱꦸꦠꦤ꧀ꦠꦶ ꦥꦛꦶꦗꦴꦤꦴꦠꦶ. ꦆꦕ꧀ꦕꦱ꧀ꦱ ꦄꦱꦩ꧀ꦩꦺꦴꦲꦺꦤ ꦥꦚ꧀ꦚꦴꦱꦶꦢ꧀ꦣꦶ, ꦄꦱꦩ꧀ꦩꦺꦴꦱꦺꦤ ꦥꦤ ꦱꦠꦶꦱꦶꦢ꧀ꦣꦶ. ꦠꦠ꧀ꦡ ꦥꦚ꧀ꦚꦴꦥꦸꦧ꧀ꦧꦔ꧀ꦒꦩꦴꦪ ꦱꦠꦶꦪꦴ ꦧ꧀ꦪꦚ꧀ꦗꦤꦴꦮꦣꦴꦫꦟꦱꦩꦠ꧀ꦡꦠꦴ, ꦱꦠꦶꦥꦸꦧ꧀ꦧꦔ꧀ꦒꦩꦴꦪ ꦥꦚ꧀ꦚꦴꦪ ꦄꦠ꧀ꦡꦥꦛꦶꦮꦺꦣꦱꦩꦠ꧀ꦡꦠꦴ. ꦠꦢꦸꦨꦪꦱꦩꦠ꧀ꦡꦠꦴꦪꦺꦴꦒꦺꦤ ꦄꦠ꧀ꦡꦧ꧀ꦪꦚ꧀ꦗꦤꦱꦩ꧀ꦥꦤ꧀ꦤꦱ꧀ꦱ ꦣꦩ꧀ꦩꦏꦺꦴꦱꦱ꧀ꦱ ꦄꦤꦸꦥꦴꦭꦤꦱꦩꦠ꧀ꦡꦠꦺꦴ ꦣꦩ꧀ꦩꦨꦟ꧀ꦝꦴꦒꦴꦫꦶꦏꦠ꧀ꦠꦱꦶꦢ꧀ꦣꦶ.

ꦄꦥꦫꦺꦴ ꦤꦪꦺꦴ, ꦌꦮꦤ꧀ꦠꦶ ꦮꦕꦤꦺꦤ ꦪꦺꦴꦤꦶꦱꦺꦴ ꦩꦤꦱꦶꦏꦴꦫꦁ ꦢꦷꦥꦺꦠꦶ. ꦄꦪꦺꦴꦤꦶꦱꦺꦴ ꦩꦤꦱꦶꦏꦫꦺꦴꦠꦺꦴ ꦲꦶ ꦤꦴꦤꦥ꧀ꦥꦏꦴꦫꦥꦛꦶꦮꦺꦣꦴꦨꦴꦮꦠꦺꦴ. ꦱꦸꦠꦤ꧀ꦠꦶ ꦮꦕꦤꦺꦤ ꦄꦮꦶꦏ꧀ꦑꦺꦥꦁ ꦢꦷꦥꦺꦠꦶ, ꦮꦶꦏ꧀ꦑꦶꦠ꧀ꦠꦕꦶꦠ꧀ꦠꦱ꧀ꦱ ꦱꦮꦤꦴꦨꦴꦮꦠꦺꦴ. ꦠꦡꦴ ꦲꦶ ꦮꦶꦏ꧀ꦑꦶꦠ꧀ꦠꦕꦶꦠ꧀ꦠꦺꦴ ꦥꦸꦒ꧀ꦒꦭꦺꦴ ꦱꦧ꧀ꦧꦱꦩ꧀ꦥꦠ꧀ꦠꦶꦪꦴ ꦮꦸꦕ꧀ꦕꦩꦴꦤꦺꦴꦥꦶ ‘‘ꦤ ꦩꦪꦴ ꦱꦸꦠꦁ, ꦥꦸꦤ ꦨꦟꦡꦴ’’ꦠꦶ ꦨꦟꦠꦶ. ꦪꦺꦴꦤꦶꦱꦺꦴ ꦩꦤꦱꦶꦏꦴꦫꦺꦤ ꦕꦺꦠ꧀ꦡ ꦄꦠ꧀ꦠꦱꦩ꧀ꦩꦴꦥꦟꦶꦣꦶꦁ ꦥꦸꦧ꧀ꦧꦺ ꦕ ꦏꦠꦥꦸꦚ꧀ꦚꦠꦁ ꦱꦴꦣꦺꦠꦶ, ꦱꦩ꧀ꦩꦴ ꦄꦥ꧀ꦥꦟꦶꦲꦶꦠꦠ꧀ꦠꦱ꧀ꦱ ꦥꦸꦧ꧀ꦧꦺ ꦄꦏꦠꦥꦸꦚ꧀ꦚꦱ꧀ꦱ ꦮꦴ ꦠꦢꦨꦴꦮꦠꦺꦴ. ꦄꦮꦶꦏ꧀ꦑꦺꦥꦺꦤ ꦱꦢ꧀ꦣꦩ꧀ꦩꦱ꧀ꦱꦮꦤꦁ ꦱꦥ꧀ꦥꦸꦫꦶꦱꦹꦥꦤꦶꦱ꧀ꦱꦪꦚ꧀ꦕ ꦱꦴꦣꦺꦠꦶ. ꦤ ꦲꦶ ꦮꦶꦏ꧀ꦑꦶꦠ꧀ꦠꦕꦶꦠ꧀ꦠꦺꦴ ꦱꦺꦴꦠꦸꦁ ꦱꦏ꧀ꦏꦺꦴꦠꦶ, ꦤ ꦕ ꦱꦥ꧀ꦥꦸꦫꦶꦱꦺ ꦄꦤꦸꦥꦱ꧀ꦱꦪꦩꦴꦤꦱ꧀ꦱ ꦱꦮꦤꦁ ꦄꦠ꧀ꦡꦷꦠꦶ.

ꦄꦥꦫꦺꦴ ꦤꦪꦺꦴ, ꦪꦱ꧀ꦩꦴ ꦌꦮꦤ꧀ꦠꦶ ꦪꦱ꧀ꦱ ꦕꦶꦠ꧀ꦠꦱꦤ꧀ꦠꦴꦤꦱ꧀ꦱ ꦤꦴꦤꦴꦏꦴꦫꦥ꧀ꦥꦮꦠ꧀ꦠꦶꦪꦴ ꦤꦴꦤꦠ꧀ꦡꦧ꧀ꦪꦚ꧀ꦗꦤꦒ꧀ꦒꦲꦟꦁ ꦲꦺꦴꦠꦶ, ꦠꦱ꧀ꦱ ꦤꦴꦤꦴꦏꦴꦫꦤꦶꦢ꧀ꦢꦺꦱꦺꦴꦠꦶ ꦮꦸꦠ꧀ꦠꦁ, ꦱꦺꦴ ꦕ ꦌꦮꦁ ꦨꦢ꧀ꦢꦏꦺꦴ ꦄꦴꦏꦴꦫꦺꦴ ꦤ ꦱꦩ꧀ꦩꦴꦄꦥ꧀ꦥꦟꦶꦲꦶꦠꦠ꧀ꦠꦤꦺꦴ ꦥꦸꦧ꧀ꦧꦺ ꦄꦏꦠꦥꦸꦚ꧀ꦚꦱ꧀ꦱ ꦮꦴ ꦲꦺꦴꦠꦶ, ꦠꦱ꧀ꦩꦴ ꦌꦮꦤ꧀ꦠꦶ ꦆꦩꦶꦤꦴ ꦨꦢ꧀ꦢꦏꦺꦤꦴꦏꦴꦫꦺꦤ ꦥꦕ꧀ꦖꦶꦩꦕꦏ꧀ꦏꦢ꧀ꦮꦪꦱꦩ꧀ꦥꦠ꧀ꦠꦶꦩꦠ꧀ꦠꦤꦺꦴ ꦢꦷꦥꦺꦠꦶ. ꦱꦸꦠꦤ꧀ꦠꦶ ꦱꦮꦤꦪꦺꦴꦒꦺꦤ ꦥꦸꦫꦶꦩꦕꦏ꧀ꦏꦢ꧀ꦮꦪꦱꦩ꧀ꦥꦠ꧀ꦠꦶꦁ. ꦤ ꦲꦶ ꦄꦥ꧀ꦥꦠꦶꦫꦹꦥꦢꦺꦱꦺ ꦮꦱꦠꦺꦴ ꦱꦥ꧀ꦥꦸꦫꦶꦱꦹꦥꦤꦶꦱ꧀ꦱꦪꦮꦶꦫꦲꦶꦠꦱ꧀ꦱ ꦮꦴ ꦱꦮꦤꦁ ꦄꦠ꧀ꦡꦶ. ꦆꦕ꧀ꦕꦱ꧀ꦱ ꦥꦕ꧀ꦖꦶꦩꦕꦏ꧀ꦏꦢ꧀ꦮꦪꦱꦶꦢ꧀ꦣꦶꦪꦴ ꦄꦴꦱꦪꦱꦸꦢ꧀ꦣꦶꦱꦶꦢ꧀ꦣꦴ ꦲꦺꦴꦠꦶ, ꦥꦸꦫꦶꦩꦕꦏ꧀ꦏꦢ꧀ꦮꦪꦱꦶꦢ꧀ꦣꦶꦪꦴ ꦥꦪꦺꦴꦒꦱꦸꦢ꧀ꦣꦶ, ꦠꦴꦪ ꦕ ꦄꦴꦱꦪꦱꦸꦢ꧀ꦣꦶꦪꦴ ꦄꦣꦶꦒꦩꦧ꧀ꦪꦠ꧀ꦠꦶꦱꦶꦢ꧀ꦣꦶ, ꦥꦪꦺꦴꦒꦱꦸꦢ꧀ꦣꦶꦪꦴ ꦄꦴꦒꦩꦧ꧀ꦪꦠ꧀ꦠꦶꦱꦶꦢ꧀ꦣꦶ. ꦆꦠꦶ ꦥꦪꦺꦴꦒꦴꦱꦪꦱꦸꦢ꧀ꦣꦱ꧀ꦱ ꦄꦴꦒꦩꦴꦣꦶꦒꦩꦱꦩ꧀ꦥꦤ꧀ꦤꦱ꧀ꦱ ꦮꦕꦤꦁ ꦄꦫꦸꦟꦸꦒ꧀ꦒꦁ ꦮꦶꦪ ꦱꦹꦫꦶꦪꦱ꧀ꦱ ꦈꦢꦪꦠꦺꦴ ꦪꦺꦴꦤꦶꦱꦺꦴ ꦩꦤꦱꦶꦏꦴꦫꦺꦴ ꦮꦶꦪ ꦕ ꦏꦸꦱꦭꦏꦩ꧀ꦩꦱ꧀ꦱ ꦄꦫꦲꦠꦶ ꦨꦒꦮꦠꦺꦴ ꦮꦕꦤꦱ꧀ꦱ ꦥꦸꦧ꧀ꦧꦔ꧀ꦒꦩꦁ ꦨꦮꦶꦠꦸꦤ꧀ꦠꦶ ꦜꦴꦤꦺ ꦤꦶꦢꦴꦤꦁ ꦜꦥꦺꦤ꧀ꦠꦺꦴ – ‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶꦄꦴꦢꦶꦩꦴꦲ.

ꦄꦥꦫꦺꦴ ꦤꦪꦺꦴ, ‘ꦌꦮ’ꦤ꧀ꦠꦶ ꦆꦩꦶꦤꦴ ꦤꦴꦤꦥ꧀ꦥꦏꦴꦫꦥꦛꦶꦮꦺꦣꦢꦷꦥꦏꦺꦤ ꦮꦕꦤꦺꦤ ꦄꦠ꧀ꦠꦤꦺꦴ ꦄꦠ꧀ꦡꦥꦛꦶꦨꦴꦤꦥꦛꦶꦱꦩ꧀ꦨꦶꦢꦴꦱꦩ꧀ꦥꦠ꧀ꦠꦶꦱꦧ꧀ꦨꦴꦮꦁ ꦢꦷꦥꦺꦠꦶ. ‘ꦱꦸꦠ’ꦤ꧀ꦠꦶ ꦆꦩꦶꦤꦴ ꦱꦺꦴꦠꦧ꧀ꦧꦥ꧀ꦥꦨꦺꦢꦥꦛꦶꦮꦺꦣꦢꦷꦥꦏꦺꦤ ꦣꦩ꧀ꦩꦤꦶꦫꦸꦠ꧀ꦠꦶꦥꦛꦶꦱꦩ꧀ꦨꦶꦢꦴꦱꦩ꧀ꦥꦠ꧀ꦠꦶꦱꦧ꧀ꦨꦴꦮꦁ. ‘ꦌꦮ’ꦤ꧀ꦠꦶ ꦕ ꦆꦢꦁ ꦪꦺꦴꦤꦶꦱꦺꦴ ꦩꦤꦱꦶꦏꦴꦫꦢꦷꦥꦏꦁ ꦮꦕꦤꦁ ꦨꦴꦱꦩꦴꦤꦺꦴ – ‘‘ꦌꦠꦺ ꦩꦪꦴ ꦣꦩ꧀ꦩꦴ ꦩꦤꦱꦴꦤꦸꦥꦺꦏ꧀ꦑꦶꦠꦴ, ꦢꦶꦛ꧀ꦜꦶꦪꦴ ꦱꦸꦥ꧀ꦥꦛꦶꦮꦶꦢ꧀ꦣꦴ’’ꦠꦶ ꦢꦷꦥꦺꦠꦶ. ‘ꦱꦸꦠ’ꦤ꧀ꦠꦶ ꦆꦢꦁ ꦱꦮꦤꦪꦺꦴꦒꦢꦷꦥꦏꦁ ꦮꦕꦤꦁ ꦨꦴꦱꦩꦴꦤꦺꦴ – ‘‘ꦧꦲꦹ ꦩꦪꦴ ꦣꦩ꧀ꦩꦴ ꦱꦸꦠꦴ ꦣꦴꦠꦴ ꦮꦕꦱꦴ ꦥꦫꦶꦕꦶꦠꦴ’’ꦠꦶ ꦢꦷꦥꦺꦠꦶ. ꦠꦢꦸꦨꦪꦺꦤꦴꦥꦶ ꦄꦠ꧀ꦡꦧ꧀ꦪꦚ꧀ꦗꦤꦥꦴꦫꦶꦥꦹꦫꦶꦁ ꦢꦷꦥꦺꦤ꧀ꦠꦺꦴ ꦱꦮꦤꦺ ꦄꦴꦢꦫꦁ ꦗꦤꦺꦠꦶ. ꦄꦠ꧀ꦡꦧ꧀ꦪꦚ꧀ꦗꦤꦥꦫꦶꦥꦸꦟ꧀ꦟꦚ꧀ꦲꦶ ꦣꦩ꧀ꦩꦁ ꦄꦴꦢꦫꦺꦤ ꦄꦱ꧀ꦱꦸꦟꦤ꧀ꦠꦺꦴ ꦩꦲꦠꦴ ꦲꦶꦠꦴ ꦥꦫꦶꦧꦴꦲꦶꦫꦺꦴ ꦲꦺꦴꦠꦷꦠꦶ, ꦠꦱ꧀ꦩꦴ ꦄꦴꦢꦫꦁ ꦗꦤꦺꦠ꧀ꦮꦴ ꦱꦏ꧀ꦏꦕ꧀ꦕꦁ ꦄꦪꦁ ꦣꦩ꧀ꦩꦺꦴ ꦱꦺꦴꦠꦧ꧀ꦧꦺꦴꦠꦶ.

‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶ ꦆꦩꦶꦤꦴ ꦥꦤ ꦱꦏꦭꦺꦤ ꦮꦕꦤꦺꦤ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦡꦴꦒꦠꦥ꧀ꦥꦮꦺꦢꦶꦠꦁ ꦣꦩ꧀ꦩꦁ ꦄꦠ꧀ꦠꦤꦺꦴ ꦄꦢꦲꦤ꧀ꦠꦺꦴ ꦄꦱꦥ꧀ꦥꦸꦫꦶꦱꦨꦹꦩꦶꦁ ꦄꦠꦶꦏ꧀ꦏꦩꦠꦶ. ꦱꦴꦮꦏꦠ꧀ꦠꦁ ꦥꦛꦶꦗꦴꦤꦤ꧀ꦠꦺꦴ ꦱꦥ꧀ꦥꦸꦫꦶꦱꦨꦹꦩꦶꦁ ꦎꦏ꧀ꦏꦩꦠꦶ. ꦠꦡꦴ ꦄꦱꦢ꧀ꦣꦩ꧀ꦩꦴ ꦕꦶꦠ꧀ꦠꦁ ꦮꦸꦛ꧀ꦜꦴꦥꦺꦠꦶ, ꦱꦢ꧀ꦣꦩ꧀ꦩꦺ ꦕꦶꦠ꧀ꦠꦁ ꦥꦠꦶꦛ꧀ꦜꦴꦥꦺꦠꦶ. ‘‘ꦏꦺꦮꦭꦁ ꦱꦸꦠꦩꦺꦮꦺꦠꦁ ꦩꦪꦴ, ꦠꦱ꧀ꦱꦺꦮ ꦨꦒꦮꦠꦺꦴ ꦮꦕꦤ’’ꦤ꧀ꦠꦶ ꦢꦷꦥꦺꦤ꧀ꦠꦺꦴ ꦄꦠ꧀ꦠꦴꦤꦁ ꦥꦫꦶꦩꦺꦴꦕꦺꦠꦶ, ꦱꦠ꧀ꦡꦴꦫꦁ ꦄꦥꦢꦶꦱꦠꦶ, ꦗꦶꦤꦮꦕꦤꦁ ꦄꦥ꧀ꦥꦺꦠꦶ, ꦣꦩ꧀ꦩꦤꦺꦠ꧀ꦠꦶꦁ ꦥꦠꦶꦛ꧀ꦜꦴꦥꦺꦠꦶ.

ꦄꦥꦶꦕ ‘‘ꦌꦮꦁ ꦩꦺ ꦱꦸꦠ’’ꦤ꧀ꦠꦶ ꦄꦠ꧀ꦠꦤꦴ ꦈꦥ꧀ꦥꦴꦢꦶꦠꦨꦴꦮꦁ ꦄꦥ꧀ꦥꦛꦶꦗꦴꦤꦤ꧀ꦠꦺꦴ ꦥꦸꦫꦶꦩꦮꦕꦤꦁ ꦮꦶꦮꦫꦤ꧀ꦠꦺꦴ – ‘‘ꦱꦩ꧀ꦩꦸꦑꦴ ꦥꦛꦶꦒ꧀ꦒꦲꦶꦠꦩꦶꦢꦁ ꦩꦪꦴ ꦠꦱ꧀ꦱ ꦨꦒꦮꦠꦺꦴ ꦕꦠꦸꦮꦺꦱꦴꦫꦗ꧀ꦗꦮꦶꦱꦴꦫꦢꦱ꧀ꦱ ꦢꦱꦧꦭꦣꦫꦱ꧀ꦱ ꦄꦴꦱꦨꦛ꧀ꦜꦴꦤꦛ꧀ꦜꦴꦪꦶꦤꦺꦴ ꦱꦷꦲꦤꦴꦢꦤꦴꦢꦶꦤꦺꦴ ꦱꦧ꧀ꦧꦱꦠ꧀ꦠꦸꦠ꧀ꦠꦩꦱ꧀ꦱ ꦣꦩ꧀ꦩꦶꦱ꧀ꦱꦫꦱ꧀ꦱ ꦣꦩ꧀ꦩꦫꦴꦗꦱ꧀ꦱ ꦣꦩ꧀ꦩꦴꦣꦶꦥꦠꦶꦤꦺꦴ ꦣꦩ꧀ꦩꦢꦷꦥꦱ꧀ꦱ ꦣꦩ꧀ꦩꦱꦫꦟꦱ꧀ꦱ ꦱꦢ꧀ꦣꦩ꧀ꦩꦮꦫꦕꦏ꧀ꦏꦮꦠ꧀ꦠꦶꦤꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦮꦕꦤꦁ, ꦤ ꦌꦠ꧀ꦡ ꦄꦠ꧀ꦡꦺ ꦮꦴ ꦣꦩ꧀ꦩꦺ ꦮꦴ ꦥꦢꦺ ꦮꦴ ꦧ꧀ꦪꦚ꧀ꦗꦤꦺ ꦮꦴ ꦏꦔ꧀ꦑꦴ ꦮꦴ ꦮꦶꦩꦠꦶ ꦮꦴ ꦏꦴꦠꦧ꧀ꦧꦴ’’ꦠꦶ ꦱꦧ꧀ꦧꦺꦱꦁ ꦢꦺꦮꦩꦤꦸꦱ꧀ꦱꦴꦤꦁ ꦆꦩꦱ꧀ꦩꦶꦁ ꦣꦩ꧀ꦩꦺ ꦄꦱ꧀ꦱꦢ꧀ꦣꦶꦪꦁ ꦮꦶꦤꦴꦱꦺꦠꦶ, ꦱꦢ꧀ꦣꦴꦱꦩ꧀ꦥꦢꦁ ꦈꦥ꧀ꦥꦴꦢꦺꦠꦶ. ꦠꦺꦤꦺꦠꦁ ꦮꦸꦕ꧀ꦕꦠꦶ –

‘‘ꦮꦶꦤꦴꦱꦪꦠꦶ ꦄꦱ꧀ꦱꦢ꧀ꦣꦁ, ꦱꦢ꧀ꦣꦁ ꦮꦝ꧀ꦞꦺꦠꦶ ꦱꦴꦱꦤꦺ;

ꦌꦮꦁ ꦩꦺ ꦱꦸꦠꦩꦶꦕ꧀ꦕꦺꦮꦁ, ꦮꦢꦁ ꦒꦺꦴꦠꦩꦱꦴꦮꦏꦺꦴ’’ꦠꦶ.

ꦌꦏꦤ꧀ꦠꦶ ꦒꦟꦤꦥꦫꦶꦕ꧀ꦖꦺꦢꦤꦶꦢ꧀ꦢꦺꦱꦺꦴ. ꦱꦩꦪꦤ꧀ꦠꦶ ꦥꦫꦶꦕ꧀ꦖꦶꦤ꧀ꦤꦤꦶꦢ꧀ꦢꦺꦱꦺꦴ. ꦌꦏꦁ ꦱꦩꦪꦤ꧀ꦠꦶ ꦄꦤꦶꦪꦩꦶꦠꦥꦫꦶꦢꦷꦥꦤꦁ. ꦠꦠ꧀ꦡ ꦱꦩꦪꦱꦢ꧀ꦢꦺꦴ –

‘‘ꦱꦩꦮꦴꦪꦺ ꦑꦟꦺ ꦏꦴꦭꦺ, ꦱꦩꦹꦲꦺ ꦲꦺꦠꦸꦢꦶꦛ꧀ꦜꦶꦱꦸ;

ꦥꦛꦶꦭꦴꦨꦺ ꦥꦲꦴꦤꦺ ꦕ, ꦥꦛꦶꦮꦺꦣꦺ ꦕ ꦢꦶꦱ꧀ꦱꦠꦶ’’.

ꦠꦡꦴ ꦲꦶꦱ꧀ꦱ – ‘‘ꦄꦥ꧀ꦥꦺꦮꦤꦴꦩ ꦱ꧀ꦮꦺꦥꦶ ꦈꦥꦱꦔ꧀ꦏꦩꦺꦪ꧀ꦪꦴꦩ ꦏꦴꦭꦚ꧀ꦕ ꦱꦩꦪꦚ꧀ꦕ ꦈꦥꦴꦢꦴꦪꦴ’’ꦠꦶ ꦌꦮꦩꦴꦢꦷꦱꦸ (ꦢꦷ. ꦤꦶ. ꧑.꧔꧔꧗) ꦱꦩꦮꦴꦪꦺꦴ ꦄꦠ꧀ꦡꦺꦴ. ‘‘ꦌꦏꦺꦴꦮ ꦑꦺꦴ ꦨꦶꦏ꧀ꦑꦮꦺ, ꦑꦟꦺꦴ ꦕ ꦱꦩꦪꦺꦴ ꦕ ꦧ꧀ꦫꦲ꧀ꦩꦕꦫꦶꦪꦮꦴꦱꦴꦪꦴ’’ꦠꦶꦄꦴꦢꦷꦱꦸ (ꦄ. ꦤꦶ. ꧘.꧒꧙) ꦑꦟꦺꦴ. ‘‘ꦈꦟ꧀ꦲꦱꦩꦪꦺꦴ ꦥꦫꦶꦭ꦳ꦴꦲꦱꦩꦪꦺꦴ’’ꦠꦶꦄꦴꦢꦷꦱꦸ (ꦥꦴꦕꦶ. ꧓꧕꧘) ꦏꦴꦭꦺꦴ. ‘‘ꦩꦲꦴꦱꦩꦪꦺꦴ ꦥꦮꦤꦱ꧀ꦩꦶ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧓꧓꧒) ꦱꦩꦹꦲꦺꦴ. ‘‘ꦱꦩꦪꦺꦴꦥꦶ ꦑꦺꦴ ꦠꦺ, ꦨꦢ꧀ꦢꦴꦭꦶ, ꦄꦥ꧀ꦥꦛꦶꦮꦶꦢ꧀ꦣꦺꦴ ꦄꦲꦺꦴꦱꦶ, ꦨꦒꦮꦴ ꦑꦺꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ, ꦨꦒꦮꦴꦥꦶ ꦩꦁ ꦗꦴꦤꦶꦱ꧀ꦱꦠꦶ, ꦨꦢ꧀ꦢꦴꦭꦶ ꦤꦴꦩ ꦨꦶꦏ꧀ꦑꦸ ꦱꦠ꧀ꦡꦸꦱꦴꦱꦤꦺ ꦱꦶꦏ꧀ꦑꦴꦪ ꦄꦥꦫꦶꦥꦹꦫꦏꦴꦫꦷ’ꦠꦶ. ꦄꦪꦩ꧀ꦥꦶ ꦑꦺꦴ, ꦠꦺ ꦨꦢ꧀ꦢꦴꦭꦶ, ꦱꦩꦪꦺꦴ ꦄꦥ꧀ꦥꦛꦶꦮꦶꦢ꧀ꦣꦺꦴ ꦄꦲꦺꦴꦱꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧑꧓꧕) ꦲꦺꦠꦸ. ‘‘ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦈꦒ꧀ꦒꦲꦩꦴꦤꦺꦴ ꦥꦫꦶꦧ꧀ꦧꦴꦗꦏꦺꦴ ꦱꦩꦟꦩꦸꦟ꧀ꦝꦶꦏꦴꦥꦸꦠ꧀ꦠꦺꦴ ꦱꦩꦪꦥ꧀ꦥꦮꦴꦢꦏꦺ ꦠꦶꦤ꧀ꦢꦸꦏꦴꦕꦷꦫꦺ ꦌꦏꦱꦴꦭꦏꦺ ꦩꦭ꧀ꦭꦶꦏꦴꦪ ꦄꦴꦫꦴꦩꦺ ꦥꦛꦶꦮꦱꦠꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧒꧖꧐) ꦢꦶꦛ꧀ꦜꦶ.

‘‘ꦢꦶꦛ꧀ꦜꦺ ꦣꦩ꧀ꦩꦺ ꦕ ꦪꦺꦴ ꦄꦠ꧀ꦡꦺꦴ, ꦪꦺꦴ ꦕꦠ꧀ꦡꦺꦴ ꦱꦩ꧀ꦥꦫꦴꦪꦶꦏꦺꦴ;

ꦄꦠ꧀ꦡꦴꦨꦶꦱꦩꦪꦴ ꦣꦷꦫꦺꦴ, ꦥꦟ꧀ꦝꦶꦠꦺꦴꦠꦶ ꦥꦮꦸꦕ꧀ꦕꦠꦷ’’ꦠꦶ. (ꦱꦁ. ꦤꦶ. ꧑.꧑꧒꧘) –

ꦄꦴꦢꦷꦱꦸ ꦥꦛꦶꦭꦴꦨꦺꦴ. ‘‘ꦱꦩ꧀ꦩꦴ ꦩꦴꦤꦴꦨꦶꦱꦩꦪꦴ ꦄꦤ꧀ꦠꦩꦏꦴꦱꦶ ꦢꦸꦏ꧀ꦑꦱ꧀ꦱꦴ’’ꦠꦶꦄꦴꦢꦷꦱꦸ (ꦄ. ꦤꦶ. ꧗.꧙) ꦥꦲꦴꦤꦁ. ‘‘ꦢꦸꦏ꧀ꦑꦱ꧀ꦱ ꦥꦷꦭ꦳ꦤꦛ꧀ꦜꦺꦴ ꦱꦔ꧀ꦑꦠꦛ꧀ꦜꦺꦴ ꦱꦤ꧀ꦠꦴꦥꦛ꧀ꦜꦺꦴ ꦮꦶꦥꦫꦶꦟꦴꦩꦛ꧀ꦜꦺꦴ ꦄꦨꦶꦱꦩꦪꦛ꧀ꦜꦺꦴ’’ꦠꦶꦄꦴꦢꦷꦱꦸ (ꦥꦛꦶ. ꧑꧐꧘) ꦥꦛꦶꦮꦺꦣꦺꦴ. ꦆꦣ ꦥꦤꦱ꧀ꦱ ꦏꦴꦭꦺꦴ ꦄꦠ꧀ꦡꦺꦴ. ꦠꦺꦤ ꦱꦁꦮꦕ꧀ꦖꦫꦈꦠꦸꦩꦴꦱꦝ꧀ꦞꦩꦴꦱꦫꦠ꧀ꦠꦶꦢꦶꦮꦥꦸꦧ꧀ꦧꦟ꧀ꦲꦩꦗ꧀ꦙꦤ꧀ꦲꦶꦏꦱꦴꦪꦤ꧀ꦲꦥꦜꦩꦩꦗ꧀ꦙꦶ-ꦩꦥꦕ꧀ꦖꦶꦩꦪꦴꦩꦩꦸꦲꦸꦠ꧀ꦠꦴꦢꦷꦱꦸ ꦏꦴꦭꦥ꧀ꦥꦨꦺꦢꦨꦹꦠꦺꦱꦸ ꦱꦩꦪꦺꦱꦸ ꦌꦏꦁ ꦱꦩꦪꦤ꧀ꦠꦶ ꦢꦷꦥꦺꦠꦶ.

ꦠꦠ꧀ꦡ ꦏꦶꦚ꧀ꦕꦴꦥꦶ ꦌꦠꦺꦱꦸ ꦱꦁꦮꦕ꧀ꦖꦫꦴꦢꦷꦱꦸ ꦱꦩꦪꦺꦱꦸ ꦪꦁ ꦪꦁ ꦱꦸꦠ꧀ꦠꦁ ꦪꦱ꧀ꦩꦶꦁ ꦪꦱ꧀ꦩꦶꦁ ꦱꦁꦮꦕ꧀ꦖꦫꦺ ꦈꦠꦸꦩ꧀ꦲꦶ ꦩꦴꦱꦺ ꦥꦏ꧀ꦑꦺ ꦫꦠ꧀ꦠꦶꦨꦴꦒꦺ ꦮꦴ ꦢꦶꦮꦱꦨꦴꦒꦺ ꦮꦴ ꦮꦸꦠ꧀ꦠꦁ, ꦱꦧ꧀ꦧꦁ ꦠꦁ ꦡꦺꦫꦱ꧀ꦱ ꦱꦸꦮꦶꦢꦶꦠꦁ ꦱꦸꦮꦮꦠ꧀ꦡꦴꦥꦶꦠꦁ ꦥꦚ꧀ꦚꦴꦪ. ꦪꦱ꧀ꦩꦴ ꦥꦤ – ‘‘ꦌꦮꦁ ꦩꦺ ꦱꦸꦠꦁ’’ ꦄꦱꦸꦏꦱꦁꦮꦕ꧀ꦖꦫꦺ ꦄꦱꦸꦏꦈꦠꦸꦩ꧀ꦲꦶ ꦄꦱꦸꦏꦩꦴꦱꦺ ꦄꦱꦸꦏꦥꦏ꧀ꦑꦺ ꦄꦱꦸꦏꦫꦠ꧀ꦠꦶꦨꦴꦒꦺ ꦄꦱꦸꦏꦢꦶꦮꦱꦨꦴꦒꦺ ꦮꦴꦠꦶ ꦌꦮꦁ ꦮꦸꦠ꧀ꦠꦺ ꦤ ꦱꦏ꧀ꦏꦴ ꦱꦸꦑꦺꦤ ꦣꦴꦫꦺꦠꦸꦁ ꦮꦴ ꦈꦢ꧀ꦢꦶꦱꦶꦠꦸꦁ ꦮꦴ ꦈꦢ꧀ꦢꦶꦱꦴꦥꦺꦠꦸꦁ ꦮꦴ, ꦧꦲꦸ ꦕ ꦮꦠ꧀ꦠꦧ꧀ꦧꦁ ꦲꦺꦴꦠꦶ, ꦠꦱ꧀ꦩꦴ ꦌꦏꦺꦤꦺꦮ ꦥꦢꦺꦤ ꦠꦩꦠ꧀ꦡꦁ ꦱꦩꦺꦴꦣꦴꦤꦺꦠ꧀ꦮꦴ ‘‘ꦌꦏꦁ ꦱꦩꦪ’’ꦤ꧀ꦠꦶ ꦄꦴꦲ. ꦪꦺ ꦮꦴ ꦆꦩꦺ ꦒꦧ꧀ꦨꦺꦴꦏ꧀ꦏꦤ꧀ꦠꦶꦱꦩꦪꦺꦴ, ꦗꦴꦠꦶꦱꦩꦪꦺꦴ, ꦱꦁꦮꦺꦒꦱꦩꦪꦺꦴ, ꦄꦨꦶꦤꦶꦏ꧀ꦑꦩꦤꦱꦩꦪꦺꦴ, ꦢꦸꦏ꧀ꦏꦫꦏꦴꦫꦶꦏꦱꦩꦪꦺꦴ, ꦩꦴꦫꦮꦶꦗꦪꦱꦩꦪꦺꦴ, ꦄꦨꦶꦱꦩ꧀ꦧꦺꦴꦣꦶꦱꦩꦪꦺꦴ ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦱꦩꦪꦺꦴ, ꦢꦺꦱꦤꦴꦱꦩꦪꦺꦴ, ꦥꦫꦶꦤꦶꦧ꧀ꦧꦴꦤꦱꦩꦪꦺꦴꦠꦶ, ꦌꦮꦩꦴꦢꦪꦺꦴ ꦨꦒꦮꦠꦺꦴ ꦢꦺꦮꦩꦤꦸꦱ꧀ꦱꦺꦱꦸ ꦄꦠꦶꦮꦶꦪ ꦥꦏꦴꦱꦴ ꦄꦤꦺꦏꦏꦴꦭꦥ꧀ꦥꦨꦺꦢꦴ ꦌꦮ ꦱꦩꦪꦴ. ꦠꦺꦱꦸ ꦱꦩꦪꦺꦱꦸ ꦢꦺꦱꦤꦴꦱꦩꦪꦱꦔ꧀ꦑꦴꦠꦁ ꦌꦏꦁ ꦱꦩꦪꦤ꧀ꦠꦶ ꦢꦷꦥꦺꦠꦶ. ꦪꦺꦴ ꦕꦴꦪꦁ ꦚꦴꦟꦏꦫꦸꦟꦴꦏꦶꦕ꧀ꦕꦱꦩꦪꦺꦱꦸ ꦏꦫꦸꦟꦴꦏꦶꦕ꧀ꦕꦱꦩꦪꦺꦴ, ꦄꦠ꧀ꦠꦲꦶꦠꦥꦫꦲꦶꦠꦥꦛꦶꦥꦠ꧀ꦠꦶꦱꦩꦪꦺꦱꦸ ꦥꦫꦲꦶꦠꦥꦛꦶꦥꦠ꧀ꦠꦶꦱꦩꦪꦺꦴ, ꦱꦤ꧀ꦤꦶꦥꦠꦶꦠꦴꦤꦁ ꦏꦫꦟꦷꦪꦢ꧀ꦮꦪꦱꦩꦪꦺꦱꦸ ꦣꦩ꧀ꦩꦶꦏꦡꦴꦱꦩꦪꦺꦴ ꦢꦺꦱꦤꦴꦥꦛꦶꦥꦠ꧀ꦠꦶꦱꦩꦪꦺꦱꦸ ꦢꦺꦱꦤꦴꦱꦩꦪꦺꦴ, ꦠꦺꦱꦸꦥꦶ ꦱꦩꦪꦺꦱꦸ ꦄꦚ꧀ꦚꦠꦫꦁ ꦱꦩꦪꦁ ꦱꦤ꧀ꦣꦴꦪ ‘‘ꦌꦏꦁ ꦱꦩꦪ’’ꦤ꧀ꦠꦶ ꦄꦴꦲ.

ꦏꦱ꧀ꦩꦴ ꦥꦤꦺꦠ꧀ꦡ ꦪꦡꦴ ꦄꦨꦶꦣꦩ꧀ꦩꦺ ‘‘ꦪꦱ꧀ꦩꦶꦁ ꦱꦩꦪꦺ ꦏꦴꦩꦴꦮꦕꦫ’’ꦤ꧀ꦠꦶ (ꦣ. ꦱ. ꧑) ꦕ, ꦆꦠꦺꦴ ꦄꦚ꧀ꦚꦺꦱꦸ ꦕ ꦱꦸꦠ꧀ꦠꦥꦢꦺꦱꦸ – ‘‘ꦪꦱ꧀ꦩꦶꦁ ꦱꦩꦪꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦷ’’ꦠꦶ ꦕ ꦨꦸꦩ꧀ꦩꦮꦕꦤꦤꦶꦢ꧀ꦢꦺꦱꦺꦴ ꦏꦠꦺꦴ, ꦮꦶꦤꦪꦺ ꦕ – ‘‘ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ’’ꦠꦶ ꦏꦫꦟꦮꦕꦤꦺꦤ, ꦠꦡꦴ ꦄꦏꦠ꧀ꦮꦴ ‘‘ꦌꦏꦁ ꦱꦩꦪ’’ꦤ꧀ꦠꦶ ꦈꦥꦪꦺꦴꦒꦮꦕꦤꦤꦶꦢ꧀ꦢꦺꦱꦺꦴ ꦏꦠꦺꦴꦠꦶ? ꦠꦠ꧀ꦡ ꦠꦡꦴ ꦆꦣ ꦕ ꦄꦚ꧀ꦚꦡꦴ ꦄꦠ꧀ꦡꦱꦩ꧀ꦨꦮꦠꦺꦴ. ꦠꦠ꧀ꦡ ꦲꦶ ꦄꦨꦶꦣꦩ꧀ꦩꦺ ꦆꦠꦺꦴ ꦄꦚ꧀ꦚꦺꦱꦸ ꦱꦸꦠ꧀ꦠꦥꦢꦺꦱꦸ ꦕ ꦄꦣꦶꦏꦫꦟꦠ꧀ꦡꦺꦴ ꦨꦴꦮꦺꦤ ꦨꦴꦮꦭꦏ꧀ꦑꦟꦠ꧀ꦡꦺꦴ ꦕ ꦱꦩ꧀ꦨꦮꦠꦶ. ꦄꦣꦶꦏꦫꦟꦚ꧀ꦲꦶ ꦏꦴꦭꦠ꧀ꦡꦺꦴ, ꦱꦩꦹꦲꦠ꧀ꦡꦺꦴ ꦕ ꦱꦩꦪꦺꦴ, ꦠꦠ꧀ꦡ ꦠꦠ꧀ꦡ ꦮꦸꦠ꧀ꦠꦴꦤꦁ ꦦꦱ꧀ꦱꦴꦢꦶꦣꦩ꧀ꦩꦴꦤꦁ ꦑꦟꦱꦩꦮꦴꦪꦲꦺꦠꦸꦱꦔ꧀ꦑꦴꦠꦱ꧀ꦱ ꦕ ꦱꦩꦪꦱ꧀ꦱ ꦨꦴꦮꦺꦤ ꦠꦺꦱꦁ ꦨꦴꦮꦺꦴ ꦭꦏ꧀ꦑꦷꦪꦠꦶ, ꦠꦱ꧀ꦩꦴ ꦠꦢꦠ꧀ꦡꦗꦺꦴꦠꦤꦠ꧀ꦡꦁ ꦠꦠ꧀ꦡ ꦨꦸꦩ꧀ꦩꦮꦕꦤꦤꦶꦢ꧀ꦢꦺꦱꦺꦴ ꦏꦠꦺꦴ.

ꦮꦶꦤꦪꦺ ꦕ ꦲꦺꦠꦸꦄꦠ꧀ꦡꦺꦴ ꦏꦫꦟꦠ꧀ꦡꦺꦴ ꦕ ꦱꦩ꧀ꦨꦮꦠꦶ. ꦪꦺꦴ ꦲꦶ ꦱꦺꦴ ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦱꦩꦪꦺꦴ ꦱꦴꦫꦶꦥꦸꦠ꧀ꦠꦴꦢꦷꦲꦶꦥꦶ ꦢꦸꦧ꧀ꦧꦶꦚ꧀ꦚꦺꦪ꧀ꦪꦺꦴ, ꦠꦺꦤ ꦱꦩꦪꦺꦤ ꦲꦺꦠꦸꦨꦹꦠꦺꦤ ꦏꦫꦟꦨꦹꦠꦺꦤ ꦕ ꦱꦶꦏ꧀ꦑꦴꦥꦢꦴꦤꦶ ꦥꦚ꧀ꦚꦴꦥꦪꦤ꧀ꦠꦺꦴ ꦱꦶꦏ꧀ꦑꦴꦥꦢꦥꦚ꧀ꦚꦠ꧀ꦠꦶꦲꦺꦠꦸꦚ꧀ꦕ ꦄꦥꦺꦏ꧀ꦑꦩꦴꦤꦺꦴ ꦨꦒꦮꦴ ꦠꦠ꧀ꦡ ꦠꦠ꧀ꦡ ꦮꦶꦲꦴꦱꦶ, ꦠꦱ꧀ꦩꦴ ꦠꦢꦠ꧀ꦡꦗꦺꦴꦠꦤꦠ꧀ꦡꦁ ꦠꦠ꧀ꦡ ꦏꦫꦟꦮꦕꦤꦺꦤ ꦤꦶꦢ꧀ꦢꦺꦱꦺꦴ ꦏꦠꦺꦴ.

ꦆꦣ ꦥꦤ ꦄꦚ꧀ꦚꦱ꧀ꦩꦶꦚ꧀ꦕ ꦌꦮꦁ ꦗꦴꦠꦶꦏꦺ ꦄꦕ꧀ꦕꦤ꧀ꦠꦱꦁꦪꦺꦴꦒꦠ꧀ꦡꦺꦴ ꦱꦩ꧀ꦨꦮꦠꦶ. ꦪꦚ꧀ꦲꦶ ꦱꦩꦪꦁ ꦨꦒꦮꦴ ꦆꦩꦁ ꦄꦚ꧀ꦚꦁ ꦮꦴ ꦱꦸꦠ꧀ꦠꦤ꧀ꦠꦁ ꦢꦺꦱꦺꦱꦶ, ꦄꦕ꧀ꦕꦤ꧀ꦠꦩꦺꦮ ꦠꦁ ꦱꦩꦪꦁ ꦏꦫꦸꦟꦴꦮꦶꦲꦴꦫꦺꦤ ꦮꦶꦲꦴꦱꦶ, ꦠꦱ꧀ꦩꦴ ꦠꦢꦠ꧀ꦡꦗꦺꦴꦠꦤꦠ꧀ꦡꦁ ꦆꦣ ꦈꦥꦪꦺꦴꦒꦮꦕꦤꦤꦶꦢ꧀ꦢꦺꦱꦺꦴ ꦏꦠꦺꦴꦠꦶ.

ꦠꦺꦤꦺꦠꦁ ꦮꦸꦕ꧀ꦕꦠꦶ –

‘‘ꦠꦁ ꦠꦁ ꦄꦠ꧀ꦡꦩꦥꦺꦏ꧀ꦑꦶꦠ꧀ꦮꦴ, ꦨꦸꦩ꧀ꦩꦺꦤ ꦏꦫꦟꦺꦤ ꦕ;

ꦄꦚ꧀ꦚꦠ꧀ꦫ ꦱꦩꦪꦺꦴ ꦮꦸꦠ꧀ꦠꦺꦴ, ꦈꦥꦪꦺꦴꦒꦺꦤ ꦱꦺꦴ ꦆꦣꦴ’’ꦠꦶ.

ꦥꦺꦴꦫꦴꦟꦴ ꦥꦤ ꦮꦟ꧀ꦟꦪꦤ꧀ꦠꦶ – ‘‘ꦠꦱ꧀ꦩꦶꦁ ꦱꦩꦪꦺ’’ꦠꦶ ꦮꦴ, ‘‘ꦠꦺꦤ ꦱꦩꦪꦺꦤꦴ’’ꦠꦶ ꦮꦴ, ‘‘ꦌꦏꦁ ꦱꦩꦪ’’ꦤ꧀ꦠꦶ ꦮꦴ, ꦄꦨꦶꦭꦴꦥꦩꦠ꧀ꦠꦨꦺꦢꦺꦴ ꦌꦱ, ꦱꦧ꧀ꦧꦠ꧀ꦡ ꦨꦸꦩ꧀ꦩꦩꦺꦮꦠ꧀ꦡꦺꦴꦠꦶ. ꦠꦱ꧀ꦩꦴ ‘‘ꦌꦏꦁ ꦱꦩꦪ’’ꦤ꧀ꦠꦶ ꦮꦸꦠ꧀ꦠꦺꦥꦶ ‘‘ꦌꦏꦱ꧀ꦩꦶꦁ ꦱꦩꦪꦺ’’ꦠꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦨꦒꦮꦴꦠꦶ ꦒꦫꦸ. ꦒꦫꦸꦚ꧀ꦲꦶ ꦭꦺꦴꦏꦺ ꦨꦒꦮꦴꦠꦶ ꦮꦢꦤ꧀ꦠꦶ. ꦄꦪꦚ꧀ꦕ ꦱꦧ꧀ꦧꦒꦸꦟꦮꦶꦱꦶꦛ꧀ꦜꦠꦴꦪ ꦱꦧ꧀ꦧꦱꦠ꧀ꦠꦴꦤꦁ ꦒꦫꦸ, ꦠꦱ꧀ꦩꦴ ꦨꦒꦮꦴꦠꦶ ꦮꦺꦢꦶꦠꦧ꧀ꦧꦺꦴ. ꦥꦺꦴꦫꦴꦟꦺꦲꦶꦥꦶ ꦮꦸꦠ꧀ꦠꦁ –

‘‘ꦨꦒꦮꦴꦠꦶ ꦮꦕꦤꦁ ꦱꦺꦛ꧀ꦜꦁ, ꦨꦒꦮꦴꦠꦶ ꦮꦕꦤꦩꦸꦠ꧀ꦠꦩꦁ;

ꦒꦫꦸ ꦒꦴꦫꦮꦪꦸꦠ꧀ꦠꦺꦴ ꦱꦺꦴ, ꦨꦒꦮꦴ ꦠꦺꦤ ꦮꦸꦕ꧀ꦕꦠꦷ’’ꦠꦶ.

ꦄꦥꦶ ꦕ –

‘‘ꦨꦴꦒ꧀ꦪꦮꦴ ꦨꦒ꧀ꦒꦮꦴ ꦪꦸꦠ꧀ꦠꦺꦴ, ꦨꦒꦺꦲꦶ ꦕ ꦮꦶꦨꦠ꧀ꦠꦮꦴ;

ꦨꦠ꧀ꦠꦮꦴ ꦮꦤ꧀ꦠꦒꦩꦤꦺꦴ, ꦨꦮꦺꦱꦸ ꦨꦒꦮꦴ ꦠꦠꦺꦴ’’ꦠꦶ.

ꦆꦩꦶꦱ꧀ꦱꦴ ꦒꦴꦡꦴꦪ ꦮꦱꦺꦤꦱ꧀ꦱ ꦥꦢꦱ꧀ꦱ ꦮꦶꦠ꧀ꦡꦴꦫꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦱꦺꦴ ꦕ ꦮꦶꦱꦸꦢ꧀ꦣꦶꦩꦒ꧀ꦒꦺ ꦧꦸꦢ꧀ꦣꦴꦤꦸꦱ꧀ꦱꦠꦶꦤꦶꦢ꧀ꦢꦺꦱꦺ ꦮꦸꦠ꧀ꦠꦺꦴꦪꦺꦮ.

ꦌꦠ꧀ꦠꦴꦮꦠꦴ ꦕꦺꦠ꧀ꦡ ꦌꦮꦁ ꦩꦺ ꦱꦸꦠꦤ꧀ꦠꦶ ꦮꦕꦤꦺꦤ ꦪꦡꦴꦱꦸꦠꦁ ꦣꦩ꧀ꦩꦁ ꦢꦱ꧀ꦱꦺꦤ꧀ꦠꦺꦴ ꦨꦒꦮꦠꦺꦴ ꦣꦩ꧀ꦩꦏꦴꦪꦁ ꦥꦕ꧀ꦕꦏ꧀ꦑꦁ ꦏꦫꦺꦴꦠꦶ. ꦠꦺꦤ ‘‘ꦤꦪꦶꦢꦁ ꦄꦠꦶꦏ꧀ꦏꦤ꧀ꦠꦱꦠ꧀ꦡꦸꦏꦁ ꦥꦴꦮꦕꦤꦁ, ꦄꦪꦁ ꦮꦺꦴ ꦱꦠ꧀ꦡꦴ’’ꦠꦶ ꦱꦠ꧀ꦡꦸ ꦄꦢꦱ꧀ꦱꦤꦺꦤ ꦈꦏ꧀ꦏꦟ꧀ꦜꦶꦠꦁ ꦗꦤꦁ ꦱꦩꦱ꧀ꦱꦴꦱꦺꦠꦶ.

ꦌꦏꦁ ꦱꦩꦪꦁ ꦨꦒꦮꦴꦠꦶ ꦮꦕꦤꦺꦤ ꦠꦱ꧀ꦩꦶꦁ ꦱꦩꦪꦺ ꦨꦒꦮꦠꦺꦴ ꦄꦮꦶꦗ꧀ꦗꦩꦴꦤꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ꦫꦹꦥꦏꦴꦪꦥꦫꦶꦤꦶꦧ꧀ꦧꦴꦤꦁ ꦱꦴꦣꦺꦠꦶ. ꦠꦺꦤ ‘‘ꦌꦮꦁꦮꦶꦣꦱ꧀ꦱ ꦤꦴꦩ ꦄꦫꦶꦪꦣꦩ꧀ꦩꦱ꧀ꦱ ꦢꦺꦱꦏꦺꦴ ꦢꦱꦧꦭꦣꦫꦺꦴ ꦮꦗꦶꦫꦱꦔ꧀ꦓꦴꦠ ꦱꦩꦴꦤꦏꦴꦪꦺꦴ ꦱꦺꦴꦥꦶ ꦨꦒꦮꦴ ꦥꦫꦶꦤꦶꦧ꧀ꦧꦸꦠꦺꦴ, ꦏꦺꦤ ꦄꦚ꧀ꦚꦺꦤ ꦗꦷꦮꦶꦠꦺ ꦄꦴꦱꦴ ꦗꦤꦺꦠꦧ꧀ꦧꦴ’’ꦠꦶ ꦗꦷꦮꦶꦠꦩꦢꦩꦠ꧀ꦠꦁ ꦗꦤꦁ ꦱꦁꦮꦺꦗꦺꦠꦶ, ꦱꦢ꧀ꦣꦩ꧀ꦩꦺ ꦕꦱ꧀ꦱ ꦈꦱ꧀ꦱꦴꦲꦁ ꦗꦤꦺꦠꦶ.

ꦌꦮꦤ꧀ꦠꦶ ꦕ ꦨꦟꦤ꧀ꦠꦺꦴ ꦢꦺꦱꦤꦴꦱꦩ꧀ꦥꦠ꧀ꦠꦶꦁ ꦤꦶꦢ꧀ꦢꦶꦱꦠꦶ. ꦩꦺ ꦱꦸꦠꦤ꧀ꦠꦶ ꦱꦴꦮꦏꦱꦩ꧀ꦥꦠ꧀ꦠꦶꦁ. ꦌꦏꦁ ꦱꦩꦪꦤ꧀ꦠꦶ ꦏꦴꦭꦱꦩ꧀ꦥꦠ꧀ꦠꦶꦁ. ꦨꦒꦮꦴꦠꦶ ꦢꦺꦱꦏꦱꦩ꧀ꦥꦠ꧀ꦠꦶꦁ.

ꦄꦤ꧀ꦠꦫꦴ ꦕ ꦫꦴꦗꦒꦲꦁ ꦄꦤ꧀ꦠꦫꦴ ꦕ ꦤꦴꦭ꦳ꦤ꧀ꦢꦤ꧀ꦠꦶ ꦄꦤ꧀ꦠꦫꦴ-ꦱꦢ꧀ꦢꦺꦴ ꦏꦴꦫꦟꦑꦟꦕꦶꦠ꧀ꦠꦮꦺꦩꦗ꧀ꦙꦮꦶꦮꦫꦴꦢꦷꦱꦸ ꦢꦶꦱ꧀ꦱꦠꦶ. ‘‘ꦠꦢꦤ꧀ꦠꦫꦁ ꦏꦺꦴ ꦗꦴꦤꦺꦪ꧀ꦪ ꦄꦚ꧀ꦚꦠ꧀ꦫ ꦠꦡꦴꦒꦠꦴ’’ꦠꦶ (ꦄ. ꦤꦶ. ꧖.꧔꧔) ꦕ, ‘‘ꦗꦤꦴ ꦱꦔ꧀ꦒꦩ꧀ꦩ ꦩꦤ꧀ꦠꦺꦤ꧀ꦠꦶ ꦩꦚ꧀ꦕ ꦠꦚ꧀ꦕ ꦏꦶꦩꦤ꧀ꦠꦫ’’ꦤ꧀ꦠꦶ (ꦱꦁ. ꦤꦶ. ꧑.꧒꧒꧘) ꦕ ꦄꦴꦢꦷꦱꦸ ꦲꦶ ꦏꦴꦫꦟꦺ ꦄꦤ꧀ꦠꦫꦴ-ꦱꦢ꧀ꦢꦺꦴ. ‘‘ꦄꦢ꧀ꦢꦱ ꦩꦁ, ꦨꦤ꧀ꦠꦺ, ꦄꦚ꧀ꦚꦠꦫꦴ ꦆꦠ꧀ꦡꦷ ꦮꦶꦗ꧀ꦗꦤ꧀ꦠꦫꦶꦏꦴꦪ ꦨꦴꦗꦤꦁ ꦣꦺꦴꦮꦤ꧀ꦠꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧑꧔꧙) ꦑꦟꦺ. ‘‘ꦪꦱ꧀ꦱꦤ꧀ꦠꦫꦠꦺꦴ ꦤ ꦱꦤ꧀ꦠꦶ ꦏꦺꦴꦥꦴ’’ꦠꦶꦄꦴꦢꦷꦱꦸ (ꦈꦢꦴ. ꧒꧐) ꦕꦶꦠ꧀ꦠꦺ. ‘‘ꦄꦤ꧀ꦠꦫꦴ ꦮꦺꦴꦱꦴꦤꦩꦴꦥꦴꦢꦷ’’ꦠꦶꦄꦴꦢꦷꦱꦸ (ꦕꦹꦭ꦳ꦮ. ꧓꧕꧐) ꦮꦺꦩꦗ꧀ꦙꦺ. ‘‘ꦄꦥꦶ ꦕꦴꦪꦁ, ꦨꦶꦏ꧀ꦑꦮꦺ, ꦠꦥꦺꦴꦢꦴ ꦢ꧀ꦮꦶꦤ꧀ꦤꦁ ꦩꦲꦴꦤꦶꦫꦪꦴꦤꦁ ꦄꦤ꧀ꦠꦫꦶꦏꦴꦪ ꦄꦴꦒꦕ꧀ꦖꦠꦷ’’ꦠꦶꦄꦴꦢꦷꦱꦸ (ꦥꦴꦫꦴ. ꧒꧓꧑) ꦮꦶꦮꦫꦺ. ꦱ꧀ꦮꦴꦪꦩꦶꦣ ꦮꦶꦮꦫꦺ ꦮꦠ꧀ꦠꦠꦶ, ꦠꦱ꧀ꦩꦴ ꦫꦴꦗꦒꦲꦱ꧀ꦱ ꦕ ꦤꦴꦭ꦳ꦤ꧀ꦢꦴꦪ ꦕ ꦮꦶꦮꦫꦺꦠꦶ ꦌꦮꦩꦺꦠ꧀ꦡꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦄꦤ꧀ꦠꦫꦴ-ꦱꦢ꧀ꦢꦺꦤ ꦥꦤ ꦪꦸꦠ꧀ꦠꦠ꧀ꦠꦴ ꦈꦥꦪꦺꦴꦒꦮꦕꦤꦁ ꦏꦠꦁ. ꦇꦢꦶꦱꦺꦱꦸ ꦕ ꦜꦴꦤꦺꦱꦸ ꦄꦏ꧀ꦑꦫꦕꦶꦤ꧀ꦠꦏꦴ ‘‘ꦄꦤ꧀ꦠꦫꦴ ꦒꦴꦩꦚ꧀ꦕ ꦤꦢꦶꦚ꧀ꦕ ꦪꦴꦠꦷ’’ꦠꦶ ꦌꦮꦁ ꦌꦏꦩꦺꦮ ꦄꦤ꧀ꦠꦫꦴꦱꦢ꧀ꦢꦁ ꦥꦪꦸꦗ꧀ꦗꦤ꧀ꦠꦶ, ꦱꦺꦴ ꦢꦸꦠꦶꦪꦥꦢꦺꦤꦥꦶ ꦪꦺꦴꦗꦺꦠꦧ꧀ꦧꦺꦴ ꦲꦺꦴꦠꦶ, ꦄꦪꦺꦴꦗꦶꦪꦩꦴꦤꦺ ꦈꦥꦪꦺꦴꦒꦮꦕꦤꦁ ꦤ ꦥꦴꦥꦸꦟꦴꦠꦶ. ꦆꦣ ꦥꦤ ꦪꦺꦴꦗꦺꦠ꧀ꦮꦴꦪꦺꦮ ꦮꦸꦠ꧀ꦠꦺꦴꦠꦶ.

ꦄꦢ꧀ꦣꦴꦤꦩꦒ꧀ꦒꦥ꧀ꦥꦛꦶꦥꦤ꧀ꦤꦺꦴ ꦲꦺꦴꦠꦷꦠꦶ ꦄꦢ꧀ꦣꦴꦤꦱꦔ꧀ꦑꦴꦠꦁ ꦩꦒ꧀ꦒꦁ ꦥꦛꦶꦥꦤ꧀ꦤꦺꦴ ꦲꦺꦴꦠꦶ, ‘‘ꦢꦷꦓꦩꦒ꧀ꦒ’’ꦤ꧀ꦠꦶ ꦄꦠ꧀ꦡꦺꦴ. ꦄꦢ꧀ꦣꦴꦤꦒꦩꦤꦱꦩꦪꦱ꧀ꦱ ꦲꦶ ꦮꦶꦨꦔ꧀ꦒꦺ ‘‘ꦄꦝ꧀ꦞꦪꦺꦴꦗꦤꦁ ꦒꦕ꧀ꦖꦶꦱ꧀ꦱꦴꦩꦷꦠꦶ ꦨꦸꦚ꧀ꦗꦶꦠꦧ꧀ꦧ’’ꦤ꧀ꦠꦶꦄꦴꦢꦶꦮꦕꦤꦠꦺꦴ (ꦥꦴꦕꦶ. ꧒꧑꧘) ꦄꦝ꧀ꦞꦪꦺꦴꦗꦤꦩ꧀ꦥꦶ ꦄꦢ꧀ꦣꦴꦤꦩꦒ꧀ꦒꦺꦴ ꦲꦺꦴꦠꦶ. ꦫꦴꦗꦒꦲꦠꦺꦴ ꦥꦤ ꦤꦴꦭ꦳ꦤ꧀ꦢꦴ ꦪꦺꦴꦗꦤꦩꦺꦮ.

ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦤ꧀ꦠꦶ ‘ꦩꦲꦠꦴ’ꦠꦶ ꦒꦸꦟꦩꦲꦠ꧀ꦠꦺꦤꦥꦶ ꦩꦲꦠꦴ, ꦱꦔ꧀ꦑ꧀ꦪꦴꦩꦲꦠ꧀ꦠꦺꦤꦥꦶ ꦩꦲꦠꦴ. ꦱꦺꦴ ꦲꦶ ꦨꦶꦏ꧀ꦑꦸꦱꦔ꧀ꦓꦺꦴ ꦒꦸꦟꦺꦲꦶꦥꦶ ꦩꦲꦴ ꦄꦲꦺꦴꦱꦶ, ꦄꦥ꧀ꦥꦶꦕ꧀ꦖꦠꦴꦢꦶꦒꦸꦟꦱꦩꦤ꧀ꦤꦴꦒꦠꦠ꧀ꦠꦴ. ꦱꦔ꧀ꦑ꧀ꦪꦴꦪꦥꦶ ꦩꦲꦴ, ꦥꦚ꧀ꦕꦱꦠꦱꦔ꧀ꦑ꧀ꦪꦠ꧀ꦠꦴ. ꦨꦶꦏ꧀ꦑꦹꦤꦁ ꦱꦔ꧀ꦓꦺꦴ ‘ꦨꦶꦏ꧀ꦑꦸꦱꦔ꧀ꦓꦺꦴ’, ꦠꦺꦤ ꦨꦶꦏ꧀ꦑꦸꦱꦔ꧀ꦓꦺꦤ. ꦢꦶꦛ꧀ꦜꦶꦱꦷꦭꦱꦴꦩꦚ꧀ꦚꦱꦔ꧀ꦓꦴꦠꦱꦔ꧀ꦑꦴꦠꦺꦤ ꦱꦩꦟꦒꦟꦺꦤꦴꦠꦶ ꦄꦠ꧀ꦡꦺꦴ. ꦱꦢ꧀ꦣꦶꦤ꧀ꦠꦶ ꦌꦏꦠꦺꦴ.

ꦥꦚ꧀ꦕꦩꦠ꧀ꦠꦺꦲꦶ ꦨꦶꦏ꧀ꦑꦸꦱꦠꦺꦲꦷꦠꦶ ꦥꦚ꧀ꦕꦩꦠ꧀ꦠꦴ ꦌꦠꦺꦱꦤ꧀ꦠꦶ ꦥꦚ꧀ꦕꦩꦠ꧀ꦠꦴꦤꦶ. ꦩꦠ꧀ꦠꦴꦠꦶ ꦥꦩꦴꦟꦁ ꦮꦸꦕ꧀ꦕꦠꦶ, ꦠꦱ꧀ꦩꦴ ꦪꦡꦴ ‘‘ꦨꦺꦴꦗꦤꦺ ꦩꦠ꧀ꦠꦚ꧀ꦚꦹ’’ꦠꦶ ꦮꦸꦠ꧀ꦠꦺ ‘‘ꦨꦺꦴꦗꦤꦺ ꦩꦠ꧀ꦠꦁ ꦗꦴꦤꦴꦠꦶ, ꦥꦩꦴꦟꦁ ꦗꦴꦤꦴꦠꦷ’’ꦠꦶ ꦄꦠ꧀ꦡꦺꦴ ꦲꦺꦴꦠꦶ, ꦌꦮꦩꦶꦣꦴꦥꦶ – ‘‘ꦠꦺꦱꦁ ꦨꦶꦏ꧀ꦑꦸꦱꦠꦴꦤꦁ ꦥꦚ꧀ꦕꦩꦠ꧀ꦠꦴ ꦥꦚ꧀ꦕꦥꦩꦴꦟ’’ꦤ꧀ꦠꦶ ꦌꦮꦩꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦨꦶꦏ꧀ꦑꦹꦤꦁ ꦱꦠꦴꦤꦶ ꦨꦶꦏ꧀ꦑꦸꦱꦠꦴꦤꦶ, ꦠꦺꦲꦶ ꦥꦚ꧀ꦕꦩꦠ꧀ꦠꦺꦲꦶ ꦨꦶꦏ꧀ꦑꦸꦱꦠꦺꦲꦶ.

ꦱꦸꦥ꧀ꦥꦶꦪꦺꦴꦥꦶ ꦑꦺꦴ ꦥꦫꦶꦧ꧀ꦧꦴꦗꦏꦺꦴꦠꦶ ꦱꦸꦥ꧀ꦥꦶꦪꦺꦴꦠꦶ ꦠꦱ꧀ꦱ ꦤꦴꦩꦁ. ꦥꦶ-ꦏꦴꦫꦺꦴ ꦩꦒ꧀ꦒꦥ꧀ꦥꦛꦶꦥꦤ꧀ꦤꦱꦨꦴꦒꦠꦴꦪ ꦥꦸꦒ꧀ꦒꦭꦱꦩ꧀ꦥꦶꦟ꧀ꦝꦤꦠ꧀ꦡꦺꦴ. ꦑꦺꦴ-ꦏꦴꦫꦺꦴ ꦥꦢꦱꦤ꧀ꦣꦶꦏꦫꦺꦴ, ꦧ꧀ꦪꦚ꧀ꦗꦤꦱꦶꦭꦶꦛ꧀ꦜꦠꦴꦮꦱꦺꦤ ꦮꦸꦠ꧀ꦠꦺꦴ. ꦥꦫꦶꦧ꧀ꦧꦴꦗꦏꦺꦴꦠꦶ ꦱꦚ꧀ꦗꦪꦱ꧀ꦱ ꦄꦤ꧀ꦠꦺꦮꦴꦱꦷ ꦖꦤ꧀ꦤꦥꦫꦶꦧ꧀ꦧꦴꦗꦏꦺꦴ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ‘‘ꦪꦢꦴ ꦨꦒꦮꦴ ꦠꦁ ꦄꦢ꧀ꦣꦴꦤꦩꦒ꧀ꦒꦁ ꦥꦛꦶꦥꦤ꧀ꦤꦺꦴ, ꦠꦢꦴ ꦱꦸꦥ꧀ꦥꦶꦪꦺꦴꦥꦶ ꦥꦫꦶꦧ꧀ꦧꦴꦗꦏꦺꦴ ꦥꦛꦶꦥꦤ꧀ꦤꦺꦴ ꦄꦲꦺꦴꦱꦷ’’ꦠꦶ. ꦄꦠꦷꦠꦏꦴꦭꦠ꧀ꦡꦺꦴ ꦲꦺꦠ꧀ꦡ ꦲꦺꦴꦠꦶ-ꦱꦢ꧀ꦢꦺꦴ.

ꦱꦢ꧀ꦣꦶꦁ ꦄꦤ꧀ꦠꦺꦮꦴꦱꦶꦤꦴ ꦧ꧀ꦫꦲ꧀ꦩꦢꦠ꧀ꦠꦺꦤ ꦩꦴꦟꦮꦺꦤꦴꦠꦶ – ꦌꦠ꧀ꦡ ꦄꦤ꧀ꦠꦺ ꦮꦱꦠꦷꦠꦶ ꦄꦤ꧀ꦠꦺꦮꦴꦱꦷ. ꦱꦩꦷꦥꦕꦴꦫꦺꦴ ꦱꦤ꧀ꦠꦶꦏꦴꦮꦕꦫꦺꦴ ꦱꦶꦱ꧀ꦱꦺꦴꦠꦶ ꦄꦠ꧀ꦡꦺꦴ. ꦧ꧀ꦫꦲ꧀ꦩꦢꦠ꧀ꦠꦺꦴꦠꦶ ꦠꦱ꧀ꦱ ꦤꦴꦩꦁ. ꦩꦴꦟꦮꦺꦴꦠꦶ ꦱꦠ꧀ꦠꦺꦴꦥꦶ ꦕꦺꦴꦫꦺꦴꦥꦶ ꦠꦫꦸꦟꦺꦴꦥꦶ ꦮꦸꦕ꧀ꦕꦠꦶ.

‘‘ꦕꦺꦴꦢꦶꦠꦴ ꦢꦺꦮꦢꦹꦠꦺꦲꦶ, ꦪꦺ ꦥꦩꦗ꧀ꦗꦤ꧀ꦠꦶ ꦩꦴꦟꦮꦴ;

ꦠꦺ ꦢꦷꦓꦫꦠ꧀ꦠꦁ ꦱꦺꦴꦕꦤ꧀ꦠꦶ, ꦲꦷꦤꦏꦴꦪꦹꦥꦒꦴ ꦤꦫꦴ’’ꦠꦶ. (ꦩ. ꦤꦶ. ꧓.꧒꧗꧑) –

ꦄꦴꦢꦷꦱꦸ ꦲꦶ ꦱꦠ꧀ꦠꦺꦴ ꦩꦴꦟꦮꦺꦴꦠꦶ ꦮꦸꦠ꧀ꦠꦺꦴ. ‘‘ꦩꦴꦟꦮꦺꦲꦶꦥꦶ ꦱꦩꦴꦒꦕ꧀ꦖꦤ꧀ꦠꦶ ꦏꦠꦏꦩ꧀ꦩꦺꦲꦶꦥꦶ ꦄꦏꦠꦏꦩ꧀ꦩꦺꦲꦶꦥꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧑꧔꧙) ꦕꦺꦴꦫꦺꦴ. ‘‘ꦄꦩ꧀ꦧꦛ꧀ꦜꦺꦴ ꦩꦴꦟꦮꦺꦴ, ꦄꦔ꧀ꦒꦏꦺꦴ ꦩꦴꦟꦮꦺꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧓꧑꧖) ꦠꦫꦸꦟꦺꦴ ‘ꦩꦴꦟꦮꦺꦴ’ꦠꦶ ꦮꦸꦠ꧀ꦠꦺꦴ. ꦆꦣꦴꦥꦶ ꦄꦪꦩꦺꦮꦠ꧀ꦡꦺꦴ. ꦆꦢꦚ꧀ꦲꦶ ꦮꦸꦠ꧀ꦠꦁ ꦲꦺꦴꦠꦶ – ꦧ꧀ꦫꦲ꧀ꦩꦢꦠ꧀ꦠꦺꦤ ꦤꦴꦩ ꦠꦫꦸꦟꦤ꧀ꦠꦺꦮꦴꦱꦶꦤꦴ ꦱꦢ꧀ꦣꦶꦤ꧀ꦠꦶ.

ꦠꦠ꧀ꦫꦴꦠꦶ ꦠꦱ꧀ꦩꦶꦁ ꦄꦢ꧀ꦣꦴꦤꦩꦒ꧀ꦒꦺ, ꦠꦺꦱꦸ ꦮꦴ ꦢ꧀ꦮꦷꦱꦸ ꦗꦤꦺꦱꦸ. ꦱꦸꦢꦤ꧀ꦠꦶ ꦤꦶꦥꦴꦠꦩꦠ꧀ꦠꦁ. ꦄꦤꦺꦏꦥꦫꦶꦪꦴꦪꦺꦤꦴꦠꦶ ꦥꦫꦶꦪꦴꦪ-ꦱꦢ꧀ꦢꦺꦴ ꦠꦴꦮ ꦮꦴꦫꦢꦺꦱꦤꦴꦏꦴꦫꦟꦺꦱꦸ ꦮꦠ꧀ꦠꦠꦶ. ‘‘ꦏꦱ꧀ꦱ ꦤꦸ ꦑꦺꦴ, ꦄꦴꦤꦤ꧀ꦢ, ꦄꦗ꧀ꦗ ꦥꦫꦶꦪꦴꦪꦺꦴ ꦨꦶꦏ꧀ꦑꦸꦤꦶꦪꦺꦴ ꦎꦮꦢꦶꦠꦸ’’ꦤ꧀ꦠꦶꦄꦴꦢꦷꦱꦸ (ꦩ. ꦤꦶ. ꧓.꧓꧙꧘) ꦲꦶ ꦮꦴꦫꦺ ꦥꦫꦶꦪꦴꦪꦱꦢ꧀ꦢꦺꦴ ꦮꦠ꧀ꦠꦠꦶ. ‘‘ꦩꦣꦸꦥꦶꦟ꧀ꦝꦶꦏꦥꦫꦶꦪꦴꦪꦺꦴꦠ꧀ꦮꦺꦮ ꦤꦁ ꦣꦴꦫꦺꦲꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧒꧐꧕) ꦢꦺꦱꦤꦴꦪꦁ. ‘‘ꦆꦩꦶꦤꦴꦥꦶ ꦑꦺꦴ, ꦠꦺ ꦫꦴꦗꦚ꧀ꦚ, ꦥꦫꦶꦪꦴꦪꦺꦤ ꦌꦮꦁ ꦲꦺꦴꦠꦹ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧔꧑꧑) ꦏꦴꦫꦟꦺ. ꦱ꧀ꦮꦴꦪꦩꦶꦣꦴꦥꦶ ꦏꦴꦫꦟꦺ ꦮꦠ꧀ꦠꦠꦶ, ꦠꦱ꧀ꦩꦴ ꦄꦪꦩꦺꦠ꧀ꦡ ꦄꦠ꧀ꦡꦺꦴ – ‘‘ꦄꦤꦺꦏꦮꦶꦣꦺꦤ ꦏꦴꦫꦟꦺꦤꦴ’’ꦠꦶ, ‘‘ꦧꦲꦹꦲꦶ ꦏꦴꦫꦟꦺꦲꦷ’’ꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦧꦸꦢ꧀ꦣꦱ꧀ꦱ ꦄꦮꦟ꧀ꦟꦁ ꦨꦴꦱꦠꦷꦠꦶ ꦄꦮꦟ꧀ꦟꦮꦶꦫꦲꦶꦠꦱ꧀ꦱ ꦄꦥꦫꦶꦩꦴꦟꦮꦟ꧀ꦟꦱꦩꦤ꧀ꦤꦴꦒꦠꦱ꧀ꦱꦴꦥꦶ ꦧꦸꦢ꧀ꦣꦱ꧀ꦱ ꦨꦒꦮꦠꦺꦴ – ‘‘ꦪꦁ ꦭꦺꦴꦏꦺ ꦗꦴꦠꦶꦮꦸꦝ꧀ꦞꦺꦱꦸ ꦏꦠ꧀ꦠꦧ꧀ꦧꦁ ꦄꦨꦶꦮꦴꦢꦤꦴꦢꦶꦱꦴꦩꦷꦕꦶꦏꦩ꧀ꦩꦁ ‘ꦱꦴꦩꦒ꧀ꦒꦶꦫꦱꦺꦴ’ꦠꦶ ꦮꦸꦕ꧀ꦕꦠꦶ, ꦠꦁ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦤꦠ꧀ꦡꦶ ꦠꦱ꧀ꦩꦴ ꦄꦫꦱꦫꦹꦥꦺꦴ ꦱꦩꦟꦺꦴ ꦒꦺꦴꦠꦩꦺꦴ, ꦤꦶꦧ꧀ꦨꦺꦴꦒꦺꦴ, ꦄꦏꦶꦫꦶꦪꦮꦴꦢꦺꦴ, ꦈꦕ꧀ꦖꦺꦢꦮꦴꦢꦺꦴ, ꦗꦺꦒꦸꦕ꧀ꦖꦷ, ꦮꦺꦤꦪꦶꦏꦺꦴ, ꦠꦥꦱ꧀ꦱꦷ, ꦄꦥꦒꦧ꧀ꦨꦺꦴ. ꦤꦠ꧀ꦡꦶ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺꦴ ꦄꦭꦩꦫꦶꦪꦚꦴꦟꦢꦱ꧀ꦱꦤꦮꦶꦱꦺꦱꦺꦴ. ꦠꦏ꧀ꦏꦥꦫꦶꦪꦴꦲꦠꦁ ꦱꦩꦟꦺꦴ ꦒꦺꦴꦠꦩꦺꦴ ꦣꦩ꧀ꦩꦁ ꦢꦺꦱꦺꦠꦶ, ꦮꦷꦩꦁꦱꦴꦤꦸꦕꦫꦶꦠꦁ, ꦱꦪꦁꦥꦛꦶꦨꦴꦤꦁ. ꦱꦩꦟꦺꦴ ꦒꦺꦴꦠꦩꦺꦴ ꦤ ꦱꦧ꧀ꦧꦚ꧀ꦚꦹ, ꦤ ꦭꦺꦴꦏꦮꦶꦢꦹ, ꦤ ꦄꦤꦸꦠ꧀ꦠꦫꦺꦴ, ꦤ ꦄꦒ꧀ꦒꦥꦸꦒ꧀ꦒꦭꦺꦴ’’ꦠꦶ. ꦌꦮꦁ ꦠꦁ ꦠꦁ ꦄꦏꦴꦫꦟꦩꦺꦮ ꦏꦴꦫꦟꦤ꧀ꦠꦶ ꦮꦠ꧀ꦮꦴ ꦠꦡꦴ ꦠꦡꦴ ꦄꦮꦟ꧀ꦟꦁ ꦢꦺꦴꦱꦁ ꦤꦶꦤ꧀ꦢꦁ ꦨꦴꦱꦠꦶ.

ꦪꦡꦴ ꦕ ꦧꦸꦢ꧀ꦣꦱ꧀ꦱ, ꦌꦮꦁ ꦣꦩ꧀ꦩꦱ꧀ꦱꦴꦥꦶ ꦠꦁ ꦠꦁ ꦄꦏꦴꦫꦟꦩꦺꦮ ꦏꦴꦫꦟꦠꦺꦴ ꦮꦠ꧀ꦮꦴ – ‘‘ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦣꦩ꧀ꦩꦺꦴ ꦢꦸꦫꦏ꧀ꦑꦴꦠꦺꦴ, ꦢꦸꦥ꧀ꦥꦛꦶꦮꦺꦢꦶꦠꦺꦴ, ꦄꦤꦶꦪ꧀ꦪꦴꦤꦶꦏꦺꦴ, ꦄꦤꦸꦥꦱꦩꦱꦁꦮꦠ꧀ꦠꦤꦶꦏꦺꦴ’’ꦠꦶ ꦠꦡꦴ ꦠꦡꦴ ꦄꦮꦟ꧀ꦟꦁ ꦨꦴꦱꦠꦶ.

ꦪꦡꦴ ꦕ ꦣꦩ꧀ꦩꦱ꧀ꦱ, ꦌꦮꦁ ꦱꦔ꧀ꦓꦱ꧀ꦱꦴꦥꦶ ꦪꦁ ꦮꦴ ꦠꦁ ꦮꦴ ꦄꦏꦴꦫꦟꦩꦺꦮ ꦏꦴꦫꦟꦠꦺꦴ ꦮꦠ꧀ꦮꦴ – ‘‘ꦩꦶꦕ꧀ꦖꦴꦥꦛꦶꦥꦤ꧀ꦤꦺꦴ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦱꦴꦮꦏꦱꦔ꧀ꦓꦺꦴ, ꦏꦸꦛꦶꦭꦥꦛꦶꦥꦤ꧀ꦤꦺꦴ, ꦥꦕ꧀ꦕꦤꦷꦏꦥꦛꦶꦥꦢꦁ ꦄꦤꦤꦸꦭꦺꦴꦩꦥꦛꦶꦥꦢꦁ ꦄꦣꦩ꧀ꦩꦴꦤꦸꦭꦺꦴꦩꦥꦛꦶꦥꦢꦁ ꦥꦛꦶꦥꦤ꧀ꦤꦺꦴ’’ꦠꦶ ꦠꦡꦴ ꦠꦡꦴ ꦄꦮꦟ꧀ꦟꦁ ꦨꦴꦱꦠꦶ.

ꦄꦤ꧀ꦠꦺꦮꦴꦱꦷ ꦥꦤꦱ꧀ꦱ – ‘‘ꦄꦩ꧀ꦲꦴꦏꦁ ꦄꦴꦕꦫꦶꦪꦺꦴ ꦄꦥꦫꦴꦩꦱꦶꦠꦧ꧀ꦧꦁ ꦥꦫꦴꦩꦱꦠꦶ, ꦄꦤꦏ꧀ꦏꦩꦶꦠꦧ꧀ꦧꦁ ꦄꦏ꧀ꦏꦩꦠꦶ, ꦱ꧀ꦮꦴꦪꦁ ꦄꦒ꧀ꦒꦶꦁ ꦒꦶꦭꦤ꧀ꦠꦺꦴ ꦮꦶꦪ, ꦲꦠ꧀ꦡꦺꦤ ꦄꦱꦶꦣꦴꦫꦁ ꦥꦫꦴꦩꦱꦤ꧀ꦠꦺꦴ ꦮꦶꦪ, ꦩꦸꦛ꧀ꦜꦶꦤꦴ ꦱꦶꦤꦺꦫꦸꦁ ꦥꦢꦴꦭꦺꦠꦸꦏꦴꦩꦺꦴ ꦮꦶꦪ, ꦏꦏꦕꦢꦤ꧀ꦠꦥꦤ꧀ꦠꦶꦪꦁ ꦏꦷꦭ꦳ꦩꦴꦤꦺꦴ ꦮꦶꦪ, ꦥꦨꦶꦤ꧀ꦤꦩꦢꦁ ꦕꦟ꧀ꦝꦲꦠ꧀ꦡꦶꦁ ꦲꦠ꧀ꦡꦺꦤ ꦒꦟ꧀ꦲꦤ꧀ꦠꦺꦴ ꦮꦶꦪ ꦕ ꦮꦟ꧀ꦟꦴꦫꦲꦱ꧀ꦱꦺꦮ ꦫꦠꦤꦠ꧀ꦠꦪꦱ꧀ꦱ ꦄꦮꦟ꧀ꦟꦁ ꦨꦴꦱꦩꦴꦤꦺꦴ ꦄꦤꦪꦧ꧀ꦪꦱꦤꦁ ꦥꦴꦥꦸꦟꦶꦱ꧀ꦱꦠꦶ. ꦄꦴꦕꦫꦶꦪꦺ ꦑꦺꦴ ꦥꦤ ꦒꦹꦡꦁ ꦮꦴ ꦄꦒ꧀ꦒꦶꦁ ꦮꦴ ꦏꦟ꧀ꦛꦏꦁ ꦮꦴ ꦏꦟ꧀ꦲꦱꦥ꧀ꦥꦁ ꦮꦴ ꦄꦏ꧀ꦏꦩꦤ꧀ꦠꦺ, ꦱꦹꦭꦁ ꦮꦴ ꦄꦨꦶꦫꦹꦲꦤ꧀ꦠꦺ, ꦲꦭꦴꦲꦭꦁ ꦮꦴ ꦮꦶꦱꦁ ꦑꦴꦢꦤ꧀ꦠꦺ, ꦑꦴꦫꦺꦴꦢꦏꦁ ꦮꦴ ꦥꦏ꧀ꦑꦭꦤ꧀ꦠꦺ, ꦤꦫꦏꦥꦥꦴꦠꦁ ꦮꦴ ꦥꦥꦠꦤ꧀ꦠꦺ, ꦤ ꦄꦤ꧀ꦠꦺꦮꦴꦱꦶꦤꦴ ꦠꦁ ꦱꦧ꧀ꦧꦩꦤꦸꦏꦴꦠꦧ꧀ꦧꦁ ꦲꦺꦴꦠꦶ. ꦏꦩ꧀ꦩꦱ꧀ꦱꦏꦴ ꦲꦶ ꦱꦠ꧀ꦠꦴ ꦄꦠ꧀ꦠꦤꦺꦴ ꦏꦩ꧀ꦩꦴꦤꦸꦫꦹꦥꦩꦺꦮ ꦒꦠꦶꦁ ꦒꦕ꧀ꦖꦤ꧀ꦠꦶ. ꦤꦺꦮ ꦥꦶꦠꦴ ꦥꦸꦠ꧀ꦠꦱ꧀ꦱ ꦏꦩ꧀ꦩꦺꦤ ꦒꦕ꧀ꦖꦠꦶ, ꦤ ꦥꦸꦠ꧀ꦠꦺꦴ ꦥꦶꦠꦸ ꦏꦩ꧀ꦩꦺꦤ, ꦤ ꦩꦴꦠꦴ ꦥꦸꦠ꧀ꦠꦱ꧀ꦱ, ꦤ ꦥꦸꦠ꧀ꦠꦺꦴ ꦩꦴꦠꦸꦪꦴ, ꦤ ꦨꦴꦠꦴ ꦨꦒꦶꦤꦶꦪꦴ, ꦤ ꦨꦒꦶꦤꦷ ꦨꦴꦠꦸ, ꦤ ꦄꦴꦕꦫꦶꦪꦺꦴ ꦄꦤ꧀ꦠꦺꦮꦴꦱꦶꦤꦺꦴ, ꦤ ꦄꦤ꧀ꦠꦺꦮꦴꦱꦷ ꦄꦴꦕꦫꦶꦪꦱ꧀ꦱ ꦏꦩ꧀ꦩꦺꦤ ꦒꦕ꧀ꦖꦠꦶ. ꦩꦪ꧀ꦲꦚ꧀ꦕ ꦄꦴꦕꦫꦶꦪꦺꦴ ꦠꦶꦟ꧀ꦟꦁ ꦫꦠꦤꦴꦤꦁ ꦄꦮꦟ꧀ꦟꦁ ꦨꦴꦱꦠꦶ, ꦩꦲꦴꦱꦴꦮꦗ꧀ꦗꦺꦴ ꦑꦺꦴ ꦥꦤꦴꦫꦶꦪꦹꦥꦮꦴꦢꦺꦴꦠꦶ. ꦌꦮꦁ ꦪꦺꦴꦤꦶꦱꦺꦴ ꦈꦩ꧀ꦩꦸꦗ꧀ꦗꦶꦠ꧀ꦮꦴ ꦄꦴꦕꦫꦶꦪꦮꦴꦢꦁ ꦩꦢ꧀ꦢꦩꦴꦤꦺꦴ ꦱꦩ꧀ꦩꦴꦏꦴꦫꦟꦩꦺꦮ ꦏꦴꦫꦟꦠꦺꦴ ꦄꦥꦢꦶꦱꦤ꧀ꦠꦺꦴ ꦄꦤꦺꦏꦥꦫꦶꦪꦴꦪꦺꦤ ꦠꦶꦟ꧀ꦟꦁ ꦫꦠꦤꦴꦤꦁ ꦮꦟ꧀ꦟꦁ ꦨꦴꦱꦶꦠꦸꦩꦴꦫꦢ꧀ꦣꦺꦴ, ꦪꦡꦴ ꦠꦁ ꦥꦟ꧀ꦝꦶꦠꦗꦴꦠꦶꦏꦺꦴ ꦏꦸꦭꦥꦸꦠ꧀ꦠꦺꦴ’’. ꦠꦺꦤ ꦮꦸꦠ꧀ꦠꦁ – ‘‘ꦱꦸꦥ꧀ꦥꦶꦪꦱ꧀ꦱ ꦥꦤ ꦥꦫꦶꦧ꧀ꦧꦴꦗꦏꦱ꧀ꦱ ꦄꦤ꧀ꦠꦺꦮꦴꦱꦷ ꦧ꧀ꦫꦲ꧀ꦩꦢꦠ꧀ꦠꦺꦴ ꦩꦴꦟꦮꦺꦴ ꦄꦤꦺꦏꦥꦫꦶꦪꦴꦪꦺꦤ ꦧꦸꦢ꧀ꦣꦱ꧀ꦱ ꦮꦟ꧀ꦟꦁ ꦨꦴꦱꦠꦶ, ꦣꦩ꧀ꦩꦱ꧀ꦱ ꦮꦟ꧀ꦟꦁ ꦨꦴꦱꦠꦶ, ꦱꦔ꧀ꦓꦱ꧀ꦱ ꦮꦟ꧀ꦟꦁ ꦨꦴꦱꦠꦷ’’ꦠꦶ.

ꦠꦠ꧀ꦡ ꦮꦟ꧀ꦟꦤ꧀ꦠꦶ ꦮꦟ꧀ꦟ-ꦱꦢ꧀ꦢꦺꦴ ꦱꦟ꧀ꦜꦴꦤ-ꦗꦴꦠꦶ-ꦫꦹꦥꦴꦪꦠꦤ-ꦏꦴꦫꦟ-ꦥꦩꦴꦟ-ꦒꦸꦟ-ꦥꦱꦁꦱꦴꦢꦷꦱꦸ ꦢꦶꦱ꧀ꦱꦠꦶ. ꦠꦠ꧀ꦡ ‘‘ꦩꦲꦤ꧀ꦠꦁ ꦱꦥ꧀ꦥꦫꦴꦗꦮꦟ꧀ꦟꦁ ꦄꦨꦶꦤꦶꦩ꧀ꦩꦶꦤꦶꦠ꧀ꦮꦴ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧑.꧑꧔꧒) ꦱꦟ꧀ꦜꦴꦤꦁ ꦮꦸꦕ꧀ꦕꦠꦶ. ‘‘ꦧ꧀ꦫꦴꦲ꧀ꦩꦟꦺꦴꦮ ꦱꦺꦛ꧀ꦜꦺꦴ ꦮꦟ꧀ꦟꦺꦴ, ꦲꦷꦤꦺꦴ ꦄꦚ꧀ꦚꦺꦴ ꦮꦟ꧀ꦟꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧔꧐꧒) ꦗꦴꦠꦶ. ‘‘ꦥꦫꦩꦴꦪ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦱꦩꦤ꧀ꦤꦴꦒꦠꦺꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧓꧐꧓) ꦫꦹꦥꦴꦪꦠꦤꦁ.

‘‘ꦤ ꦲꦫꦴꦩꦶ ꦤ ꦨꦚ꧀ꦗꦴꦩꦶ, ꦄꦴꦫꦴ ꦱꦶꦔ꧀ꦓꦴꦩꦶ ꦮꦴꦫꦶꦗꦁ;

ꦄꦡ ꦏꦺꦤ ꦤꦸ ꦮꦟ꧀ꦟꦺꦤ, ꦒꦤ꧀ꦣꦠ꧀ꦡꦺꦤꦺꦴꦠꦶ ꦮꦸꦕ꧀ꦕꦠꦷ’’ꦠꦶ. (ꦱꦁ. ꦤꦶ. ꧑.꧒꧓꧔) –

ꦄꦴꦢꦷꦱꦸ ꦏꦴꦫꦟꦁ. ‘‘ꦠꦪꦺꦴ ꦥꦠ꧀ꦠꦱ꧀ꦱ ꦮꦟ꧀ꦟꦴ’’ꦠꦶꦄꦴꦢꦷꦱꦸ (ꦥꦴꦫꦴ. ꧖꧐꧒) ꦥꦩꦴꦟꦁ. ‘‘ꦏꦢꦴ ꦱꦚ꧀ꦚꦹꦭ꦳꧀ꦲꦴ ꦥꦤ, ꦠꦺ ꦒꦲꦥꦠꦶ, ꦆꦩꦺ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦮꦟ꧀ꦟꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧗꧗) ꦒꦸꦟꦺꦴ. ‘‘ꦮꦟ꧀ꦟꦴꦫꦲꦱ꧀ꦱ ꦮꦟ꧀ꦟꦁ ꦨꦴꦱꦠꦷ’’ꦠꦶꦄꦴꦢꦷꦱꦸ (ꦄ. ꦤꦶ. ꧒.꧑꧓꧕) ꦥꦱꦁꦱꦴ. ꦆꦣ ꦒꦸꦟꦺꦴꦥꦶ ꦥꦱꦁꦱꦴꦥꦶ. ꦄꦪꦁ ꦏꦶꦫ ꦠꦁ ꦠꦁ ꦨꦹꦠꦩꦺꦮ ꦏꦴꦫꦟꦁ ꦄꦥꦢꦶꦱꦤ꧀ꦠꦺꦴ ꦄꦤꦺꦏꦥꦫꦶꦪꦴꦪꦺꦤ ꦫꦠꦤꦠ꧀ꦠꦪꦱ꧀ꦱ ꦒꦸꦟꦹꦥꦱꦚ꧀ꦲꦶꦠꦁ ꦥꦱꦁꦱꦁ ꦄꦨꦴꦱꦶ. ꦠꦠ꧀ꦡ – ‘‘ꦆꦠꦶꦥꦶ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ’’ꦠꦶꦄꦴꦢꦶꦤꦴ (ꦥꦴꦫꦴ. ꧑) ꦤꦪꦺꦤ, ‘‘ꦪꦺ ꦨꦶꦏ꧀ꦑꦮꦺ, ꦧꦸꦢ꧀ꦣꦺ ꦥꦱꦤ꧀ꦤꦴ ꦄꦒ꧀ꦒꦺ ꦠꦺ ꦥꦱꦤ꧀ꦤꦴ’’ꦠꦶꦄꦴꦢꦶꦤꦴ ‘‘ꦌꦏꦥꦸꦒ꧀ꦒꦭꦺꦴ, ꦨꦶꦏ꧀ꦑꦮꦺ, ꦭꦺꦴꦏꦺ ꦈꦥ꧀ꦥꦗ꧀ꦗꦩꦴꦤꦺꦴ ꦈꦥ꧀ꦥꦗ꧀ꦗꦠꦶ…ꦥꦺ… ꦄꦱꦩꦺꦴ ꦄꦱꦩꦱꦩꦺꦴ’’ꦠꦶꦄꦴꦢꦶꦤꦴ (ꦄ. ꦤꦶ. ꧑.꧑꧗꧔) ꦕ ꦤꦪꦺꦤ ꦧꦸꦢ꧀ꦣꦱ꧀ꦱ ꦮꦟ꧀ꦟꦺꦴ ꦮꦺꦢꦶꦠꦧ꧀ꦧꦺꦴ. ‘‘ꦱ꧀ꦮꦴꦏ꧀ꦑꦴꦠꦺꦴ ꦨꦒꦮꦠꦴ ꦣꦩ꧀ꦩꦺꦴ’’ꦠꦶ (ꦢꦷ. ꦤꦶ. ꧒.꧑꧕꧙) ꦕ ‘‘ꦄꦴꦭꦪꦱꦩꦸꦒ꧀ꦓꦴꦠꦺꦴ ꦮꦛ꧀ꦛꦸꦥꦕ꧀ꦖꦺꦢꦺꦴ’’ꦠꦶ (ꦆꦠꦶ. ꧙꧐, ꦄ. ꦤꦶ. ꧔.꧓꧔) ꦕ, ‘‘ꦪꦺ ꦨꦶꦏ꧀ꦑꦮꦺ, ꦄꦫꦶꦪꦺ ꦄꦛ꧀ꦜꦔ꧀ꦒꦶꦏꦺ ꦩꦒ꧀ꦒꦺ ꦥꦱꦤ꧀ꦤꦴ, ꦄꦒ꧀ꦒꦺ ꦠꦺ ꦥꦱꦤ꧀ꦤꦴ’’ꦠꦶ ꦕ ꦌꦮꦩꦴꦢꦷꦲꦶ ꦤꦪꦺꦲꦶ ꦣꦩ꧀ꦩꦱ꧀ꦱ ꦮꦟ꧀ꦟꦺꦴ ꦮꦺꦢꦶꦠꦧ꧀ꦧꦺꦴ. ‘‘ꦱꦸꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ’’ꦠꦶ (ꦢꦷ. ꦤꦶ. ꧒.꧑꧕꧙) ꦕ, ‘‘ꦪꦺ, ꦨꦶꦏ꧀ꦑꦮꦺ, ꦱꦔ꧀ꦓꦺ ꦥꦱꦤ꧀ꦤꦴ, ꦄꦒ꧀ꦒꦺ ꦠꦺ ꦥꦱꦤ꧀ꦤꦴ’’ꦠꦶ (ꦄ. ꦤꦶ. ꧔.꧓꧔) ꦕ ꦌꦮꦩꦴꦢꦷꦲꦶ ꦥꦤ ꦤꦪꦺꦲꦶ ꦱꦔ꧀ꦓꦱ꧀ꦱ ꦮꦟ꧀ꦟꦺꦴ ꦮꦺꦢꦶꦠꦧ꧀ꦧꦺꦴ. ꦥꦲꦺꦴꦤ꧀ꦠꦺꦤ ꦥꦤ ꦣꦩ꧀ꦩꦏꦡꦶꦏꦺꦤ ꦥꦚ꧀ꦕꦤꦶꦏꦴꦪꦺ ꦤꦮꦔ꧀ꦒꦁ ꦱꦠ꧀ꦡꦸꦱꦴꦱꦤꦁ ꦕꦠꦸꦫꦴꦱꦷꦠꦶꦣꦩ꧀ꦩꦏ꧀ꦑꦤ꧀ꦣꦱꦲꦱ꧀ꦱꦴꦤꦶ ꦎꦒꦴꦲꦶꦠ꧀ꦮꦴ ꦧꦸꦢ꧀ꦣꦴꦢꦷꦤꦁ ꦮꦟ꧀ꦟꦺꦴ ꦥꦏꦴꦱꦺꦠꦧ꧀ꦧꦺꦴ. ꦆꦩꦱ꧀ꦩꦶꦚ꧀ꦲꦶ ꦜꦴꦤꦺ ꦧꦸꦢ꧀ꦣꦴꦢꦷꦤꦁ ꦒꦸꦟꦺ ꦥꦏꦴꦱꦺꦤ꧀ꦠꦺꦴ ꦄꦠꦶꦠ꧀ꦡꦺꦤ ꦥꦏ꧀ꦑꦤ꧀ꦢꦺꦴ ꦣꦩ꧀ꦩꦏꦡꦶꦏꦺꦴꦠꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ. ꦇꦢꦶꦱꦺꦱꦸ ꦲꦶ ꦜꦴꦤꦺꦱꦸ ꦣꦩ꧀ꦩꦏꦡꦶꦏꦱ꧀ꦱ ꦡꦴꦩꦺꦴ ꦮꦺꦢꦶꦠꦧ꧀ꦧꦺꦴ. ꦧ꧀ꦫꦲ꧀ꦩꦢꦠ꧀ꦠꦺꦴ ꦥꦤ ꦩꦴꦟꦮꦺꦴ ꦄꦤꦸꦱ꧀ꦱꦮꦴꦢꦶꦩꦠ꧀ꦠꦱꦩ꧀ꦧꦤ꧀ꦣꦶꦠꦺꦤ ꦄꦠ꧀ꦠꦤꦺꦴ ꦡꦴꦩꦺꦤ ꦫꦠꦤꦠ꧀ꦠꦪꦱ꧀ꦱ ꦮꦟ꧀ꦟꦁ ꦨꦴꦱꦠꦶ.

ꦆꦠꦶꦲ ꦠꦺ ꦈꦨꦺꦴ ꦄꦴꦕꦫꦶꦪꦤ꧀ꦠꦺꦮꦴꦱꦷꦠꦶ ꦌꦮꦁ ꦠꦺ ꦢ꧀ꦮꦺ ꦄꦴꦕꦫꦶꦪꦤ꧀ꦠꦺꦮꦴꦱꦶꦏꦴ. ꦄꦚ꧀ꦚꦩꦚ꧀ꦚꦱ꧀ꦱꦴꦠꦶ ꦄꦚ꧀ꦚꦺꦴ ꦄꦚ꧀ꦚꦱ꧀ꦱ. ꦈꦗꦸꦮꦶꦥꦕ꧀ꦕꦤꦷꦏꦮꦴꦢꦴꦠꦶ ꦇꦱꦏꦩ꧀ꦥꦶ ꦄꦥꦫꦶꦲꦫꦶꦠ꧀ꦮꦴ ꦈꦗꦸꦩꦺꦮ ꦮꦶꦮꦶꦣꦥꦕ꧀ꦕꦤꦷꦏꦮꦴꦢꦴ, ꦄꦤꦺꦏꦮꦴꦫꦁ ꦮꦶꦫꦸꦢ꧀ꦣꦮꦴꦢꦴ ꦌꦮ ꦲꦸꦠ꧀ꦮꦴꦠꦶ ꦄꦠ꧀ꦡꦺꦴ. ꦄꦴꦕꦫꦶꦪꦺꦤ ꦲꦶ ꦫꦠꦤꦠ꧀ꦠꦪꦱ꧀ꦱ ꦄꦮꦟ꧀ꦟꦺ ꦨꦴꦱꦶꦠꦺ ꦄꦤ꧀ꦠꦺꦮꦴꦱꦷ ꦮꦟ꧀ꦟꦁ ꦨꦴꦱꦠꦶ, ꦥꦸꦤ ꦆꦠꦫꦺꦴ ꦄꦮꦟ꧀ꦟꦁ, ꦆꦠꦫꦺꦴ ꦮꦟ꧀ꦟꦤ꧀ꦠꦶ ꦌꦮꦁ ꦄꦴꦕꦫꦶꦪꦺꦴ ꦱꦴꦫꦦꦭꦏꦺ ꦮꦶꦱꦫꦸꦏ꧀ꦑꦄꦴꦟꦶꦁ ꦄꦴꦏꦺꦴꦛꦪꦩꦴꦤꦺꦴ ꦮꦶꦪ ꦥꦸꦤꦥ꧀ꦥꦸꦤꦁ ꦫꦠꦤꦠ꧀ꦠꦪꦱ꧀ꦱ ꦄꦮꦟ꧀ꦟꦁ ꦨꦴꦱꦠꦶ. ꦄꦤ꧀ꦠꦺꦮꦴꦱꦷ ꦥꦤ ꦱꦸꦮꦟ꧀ꦟꦫꦗꦠꦩꦟꦶꦩꦪꦴꦪ ꦄꦴꦟꦶꦪꦴ ꦠꦁ ꦄꦴꦟꦶꦁ ꦥꦛꦶꦧꦴꦲꦪꦩꦴꦤꦺꦴ ꦮꦶꦪ ꦥꦸꦤꦥ꧀ꦥꦸꦤꦁ ꦫꦠꦤꦠ꧀ꦠꦪꦱ꧀ꦱ ꦮꦟ꧀ꦟꦁ ꦨꦴꦱꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦈꦗꦸꦮꦶꦥꦕ꧀ꦕꦤꦷꦏꦮꦴꦢꦴ’’ꦠꦶ.

ꦨꦒꦮꦤ꧀ꦠꦁ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦄꦤꦸꦧꦤ꧀ꦣꦴ ꦲꦺꦴꦤ꧀ꦠꦶ ꦨꦶꦏ꧀ꦑꦸꦱꦔ꧀ꦓꦚ꧀ꦕꦴꦠꦶ ꦨꦒꦮꦤ꧀ꦠꦚ꧀ꦕ ꦨꦶꦏ꧀ꦑꦸꦱꦔ꧀ꦓꦚ꧀ꦕ ꦥꦕ꧀ꦖꦠꦺꦴ ꦥꦕ꧀ꦖꦠꦺꦴ ꦢꦱ꧀ꦱꦤꦁ ꦄꦮꦶꦗꦲꦤ꧀ꦠꦴ ꦆꦫꦶꦪꦴꦥꦡꦴꦤꦸꦧꦤ꧀ꦣꦤꦺꦤ ꦄꦤꦸꦧꦤ꧀ꦣꦴ ꦲꦺꦴꦤ꧀ꦠꦶ, ꦱꦷꦱꦴꦤꦸꦭꦺꦴꦏꦶꦤꦺꦴ ꦲꦸꦠ꧀ꦮꦴ ꦄꦤꦸꦒꦠꦴ ꦲꦺꦴꦤ꧀ꦠꦷꦠꦶ ꦄꦠ꧀ꦡꦺꦴ.

ꦏꦱ꧀ꦩꦴ ꦥꦤ ꦨꦒꦮꦴ ꦠꦁ ꦄꦢ꧀ꦣꦴꦤꦁ ꦥꦛꦶꦥꦤ꧀ꦤꦺꦴ? ꦏꦱ꧀ꦩꦴ ꦕ ꦱꦸꦥ꧀ꦥꦶꦪꦺꦴ ꦄꦤꦸꦧꦤ꧀ꦣꦺꦴ? ꦏꦱ꧀ꦩꦴ ꦕ ꦱꦺꦴ ꦫꦠꦤꦠ꧀ꦠꦪꦱ꧀ꦱ ꦄꦮꦟ꧀ꦟꦁ ꦨꦴꦱꦠꦷꦠꦶ? ꦨꦒꦮꦴ ꦠꦴꦮ ꦠꦱ꧀ꦩꦶꦁ ꦏꦴꦭꦺ ꦫꦴꦗꦒꦲꦥꦫꦶꦮꦠ꧀ꦠꦏꦺꦱꦸ ꦄꦛ꧀ꦜꦴꦫꦱꦱꦸ ꦩꦲꦴꦮꦶꦲꦴꦫꦺꦱꦸ ꦄꦚ꧀ꦚꦠꦫꦱ꧀ꦩꦶꦁ ꦮꦱꦶꦠ꧀ꦮꦴ ꦥꦴꦠꦺꦴꦮ ꦱꦫꦷꦫꦥ꧀ꦥꦛꦶꦗꦒ꧀ꦒꦤꦁ ꦏꦠ꧀ꦮꦴ ꦨꦶꦏ꧀ꦑꦴꦕꦴꦫꦮꦺꦭꦴꦪꦁ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ ꦫꦴꦗꦒꦲꦺ ꦥꦶꦟ꧀ꦝꦴꦪ ꦕꦫꦠꦶ. ꦱꦺꦴ ꦠꦁ ꦢꦶꦮꦱꦁ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦱꦸꦭꦨꦥꦶꦟ꧀ꦝꦥꦴꦠꦁ ꦏꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦨꦶꦏ꧀ꦑꦸꦱꦔ꧀ꦓꦁ ꦥꦠ꧀ꦠꦕꦷꦮꦫꦁ ꦒꦴꦲꦴꦥꦺꦠ꧀ꦮꦴ – ‘‘ꦤꦴꦭ꦳ꦤ꧀ꦢꦁ ꦒꦩꦶꦱ꧀ꦱꦴꦩꦷ’’ꦠꦶ, ꦫꦴꦗꦒꦲꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦠꦁ ꦄꦢ꧀ꦣꦴꦤꦁ ꦥꦛꦶꦥꦤ꧀ꦤꦺꦴ. ꦱꦸꦥ꧀ꦥꦶꦪꦺꦴꦥꦶ ꦑꦺꦴ ꦠꦱ꧀ꦩꦶꦁ ꦏꦴꦭꦺ ꦫꦴꦗꦒꦲꦥꦫꦶꦮꦠ꧀ꦠꦏꦺ ꦄꦚ꧀ꦚꦠꦫꦱ꧀ꦩꦶꦁ ꦥꦫꦶꦧ꧀ꦧꦴꦗꦏꦴꦫꦴꦩꦺ ꦮꦱꦶꦠ꧀ꦮꦴ ꦥꦫꦶꦧ꧀ꦧꦴꦗꦏꦥꦫꦶꦮꦸꦠꦺꦴ ꦫꦴꦗꦒꦲꦺ ꦨꦶꦏ꧀ꦑꦴꦪ ꦕꦫꦠꦶ. ꦱꦺꦴꦥꦶ ꦠꦁ ꦢꦶꦮꦱꦁ ꦥꦫꦶꦧ꧀ꦧꦴꦗꦏꦥꦫꦶꦱꦴꦪ ꦱꦸꦭꦨꦨꦶꦏ꧀ꦑꦁ ꦏꦠ꧀ꦮꦴ ꦨꦸꦠ꧀ꦠꦥꦴꦠꦫꦴꦱꦺꦴ ꦥꦫꦶꦧ꧀ꦧꦴꦗꦏꦺ ꦥꦫꦶꦧ꧀ꦧꦴꦗꦏꦥꦫꦶꦏ꧀ꦑꦴꦫꦁ ꦒꦴꦲꦴꦥꦺꦠ꧀ꦮꦴ – ꦤꦴꦭ꦳ꦤ꧀ꦢꦁ ꦒꦩꦶꦱ꧀ꦱꦴꦩꦶꦕ꧀ꦕꦺꦮ ꦨꦒꦮꦠꦺꦴ ꦠꦁ ꦩꦒ꧀ꦒꦁ ꦥꦛꦶꦥꦤ꧀ꦤꦨꦴꦮꦁ ꦄꦗꦴꦤꦤ꧀ꦠꦺꦴꦮ ꦄꦤꦸꦧꦤ꧀ꦣꦺꦴ. ꦱꦕꦺ ꦥꦤ ꦗꦴꦤꦺꦪ꧀ꦪ ꦤꦴꦤꦸꦧꦤ꧀ꦣꦺꦪ꧀ꦪ. ꦱꦺꦴ ꦄꦗꦴꦤꦶꦠ꧀ꦮꦴꦮ ꦒꦕ꧀ꦖꦤ꧀ꦠꦺꦴ ꦒꦷꦮꦁ ꦈꦏ꧀ꦑꦶꦥꦶꦠ꧀ꦮꦴ ꦎꦭꦺꦴꦏꦪꦩꦴꦤꦺꦴ ꦨꦒꦮꦤ꧀ꦠꦁ ꦄꦢ꧀ꦢꦱ ꦧꦸꦢ꧀ꦣꦱꦶꦫꦶꦪꦴ ꦱꦺꦴꦨꦩꦴꦤꦁ ꦫꦠ꧀ꦠꦏꦩ꧀ꦧꦭꦥꦫꦶꦏ꧀ꦑꦶꦠ꧀ꦠꦩꦶꦮ ꦗꦔ꧀ꦒꦩꦏꦤꦏꦒꦶꦫꦶꦱꦶꦑꦫꦁ.

ꦠꦱ꧀ꦩꦶꦁ ꦏꦶꦫ ꦱꦩꦪꦺ ꦢꦱꦧꦭꦱ꧀ꦱ ꦱꦫꦷꦫꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦖꦧ꧀ꦧꦟ꧀ꦟꦫꦱ꧀ꦩꦶꦪꦺꦴ ꦱꦩꦤ꧀ꦠꦴ ꦄꦱꦷꦠꦶꦲꦠ꧀ꦡꦥ꧀ꦥꦩꦴꦟꦺ ꦥꦢꦺꦱꦺ ꦄꦴꦣꦴꦮꦤ꧀ꦠꦶ ꦮꦶꦣꦴꦮꦤ꧀ꦠꦶ ꦫꦠꦤꦴꦮꦺꦭ꦳ꦫꦠꦤꦢꦴꦩꦫꦠꦤꦕꦸꦟ꧀ꦟꦮꦶꦥ꧀ꦥꦏꦶꦟ꧀ꦟꦁ ꦮꦶꦪ, ꦥꦱꦴꦫꦶꦠꦫꦠꦤꦕꦶꦠ꧀ꦠꦏꦚ꧀ꦕꦤꦥꦛꦩꦶꦮ, ꦫꦠ꧀ꦠꦱꦸꦮꦟ꧀ꦟꦫꦱꦤꦶꦱꦶꦚ꧀ꦕꦩꦴꦤꦩꦶꦮ, ꦈꦏ꧀ꦏꦴꦱꦠꦤꦶꦥꦴꦠꦱꦩꦴꦏꦸꦭꦩꦶꦮ, ꦤꦶꦫꦤ꧀ꦠꦫꦮꦶꦥ꧀ꦥꦏꦶꦟ꧀ꦟꦏꦟꦶꦏꦴꦫꦥꦸꦥ꧀ꦦꦩꦶꦮ ꦮꦴꦪꦸꦮꦺꦒꦏ꧀ꦑꦶꦠ꧀ꦠꦕꦷꦤꦥꦶꦛ꧀ꦜꦕꦸꦟ꧀ꦟꦩꦶꦮ, ꦆꦤ꧀ꦢꦣꦤꦸꦮꦶꦗ꧀ꦗꦸꦭꦠꦴꦠꦴꦫꦴꦒꦟꦥ꧀ꦥꦨꦴꦮꦶꦱꦫꦮꦶꦥ꧀ꦦꦸꦫꦶꦠꦮꦶꦕ꧀ꦖꦫꦶꦠꦩꦶꦮ ꦕ ꦠꦁ ꦮꦤꦤ꧀ꦠꦫꦁ ꦲꦺꦴꦠꦶ.

ꦄꦱꦷꦠꦶ ꦄꦤꦸꦧ꧀ꦪꦚ꧀ꦗꦤꦴꦤꦸꦫꦚ꧀ꦗꦶꦠꦚ꧀ꦕ ꦥꦤ ꦨꦒꦮꦠꦺꦴ ꦱꦫꦷꦫꦁ ꦮꦶꦏꦱꦶꦠꦏꦩꦭꦸꦥ꧀ꦥꦭꦩꦶꦮ, ꦱꦫꦁ ꦱꦧ꧀ꦧꦥꦴꦭꦶꦦꦸꦭ꧀ꦭꦩꦶꦮ ꦥꦴꦫꦶꦕ꧀ꦖꦠ꧀ꦠꦏꦁ, ꦠꦴꦫꦴꦩꦫꦷꦕꦶꦮꦶꦏꦱꦶꦠꦩꦶꦮ, ꦒꦒꦤꦠꦭꦁ ꦱꦶꦫꦶꦪꦴ ꦄꦮꦲꦱꦤ꧀ꦠꦩꦶꦮ, ꦧ꧀ꦪꦴꦩꦥ꧀ꦥꦨꦴꦥꦫꦶꦏ꧀ꦑꦺꦥꦮꦶꦭꦴꦱꦶꦤꦷ ꦕꦱ꧀ꦱ ꦢ꧀ꦮꦠ꧀ꦠꦶꦁꦱꦮꦫꦭꦏ꧀ꦑꦟꦩꦴꦭꦴ ꦒꦤ꧀ꦡꦺꦠ꧀ꦮꦴ ꦜꦥꦶꦠꦢ꧀ꦮꦠ꧀ꦠꦶꦁꦱꦕꦤ꧀ꦢꦩꦴꦭꦴꦪ ꦢ꧀ꦮꦠ꧀ꦠꦶꦁꦱꦱꦹꦫꦶꦪꦩꦴꦭꦴꦪ ꦥꦛꦶꦥꦴꦛꦶꦪꦴ ꦜꦥꦶꦠꦢ꧀ꦮꦠ꧀ꦠꦶꦁꦱꦕꦏ꧀ꦏꦮꦠ꧀ꦠꦶꦢ꧀ꦮꦠ꧀ꦠꦶꦁꦱꦱꦏ꧀ꦏꦢꦺꦮꦫꦴꦗꦢ꧀ꦮꦠ꧀ꦠꦶꦁꦱꦩꦲꦴꦧ꧀ꦫꦲ꧀ꦩꦴꦤꦁ ꦱꦶꦫꦶꦁ ꦱꦶꦫꦶꦪꦴ ꦄꦨꦶꦨꦮꦤ꧀ꦠꦶꦩꦶꦮ. ꦠꦚ꧀ꦕ ꦥꦤ ꦨꦒꦮꦤ꧀ꦠꦁ ꦥꦫꦶꦮꦴꦫꦺꦠ꧀ꦮꦴ ꦜꦶꦠꦴ ꦨꦶꦏ꧀ꦑꦹ ꦱꦧ꧀ꦧꦺꦮ ꦄꦥ꧀ꦥꦶꦕ꧀ꦖꦴ ꦱꦤ꧀ꦠꦸꦛ꧀ꦜꦴ ꦥꦮꦶꦮꦶꦠ꧀ꦠꦴ ꦄꦱꦁꦱꦛ꧀ꦜꦴ ꦕꦺꦴꦢꦏꦴ ꦥꦴꦥꦒꦫꦲꦶꦤꦺꦴ ꦮꦠ꧀ꦠꦴꦫꦺꦴ ꦮꦕꦤꦏ꧀ꦑꦩꦴ ꦱꦷꦭꦱꦩ꧀ꦥꦤ꧀ꦤꦴ ꦱꦩꦴꦣꦶꦥꦚ꧀ꦚꦴꦮꦶꦩꦸꦠ꧀ꦠꦶꦮꦶꦩꦸꦠ꧀ꦠꦶꦚ꧀ꦚꦴꦟꦢꦱ꧀ꦱꦤꦱꦩ꧀ꦥꦤ꧀ꦤꦴ. ꦠꦺꦱꦁ ꦩꦗ꧀ꦙꦺ ꦨꦒꦮꦴ ꦫꦠ꧀ꦠꦏꦩ꧀ꦧꦭꦥꦴꦏꦴꦫꦥꦫꦶꦏ꧀ꦑꦶꦠ꧀ꦠꦺꦴ ꦮꦶꦪ ꦏꦚ꧀ꦕꦤꦡꦩ꧀ꦨꦺꦴ, ꦫꦠ꧀ꦠꦥꦢꦸꦩꦱꦟ꧀ꦝꦩꦗ꧀ꦙꦒꦠꦴ ꦮꦶꦪ ꦱꦸꦮꦟ꧀ꦟꦤꦴꦮꦴ, ꦥꦮꦴꦭ꦳ꦮꦺꦢꦶꦏꦴꦥꦫꦶꦏ꧀ꦑꦶꦠ꧀ꦠꦺꦴ ꦮꦶꦪ ꦄꦒ꧀ꦒꦶꦏ꧀ꦑꦤ꧀ꦣꦺꦴ, ꦠꦴꦫꦴꦒꦟꦥꦫꦶꦮꦴꦫꦶꦠꦺꦴ ꦮꦶꦪ ꦥꦸꦟ꧀ꦟꦕꦤ꧀ꦢꦺꦴ ꦩꦶꦒꦥꦏ꧀ꦑꦷꦤꦩ꧀ꦥꦶ ꦕꦏ꧀ꦑꦹꦤꦶ ꦥꦷꦟꦪꦠꦶ, ꦥꦒꦺꦮ ꦢꦺꦮꦩꦤꦸꦱ꧀ꦱꦴꦤꦁ. ꦠꦱ꧀ꦩꦶꦚ꧀ꦕ ꦥꦤ ꦢꦶꦮꦱꦺ ꦪꦺꦨꦸꦪ꧀ꦪꦺꦤ ꦄꦱꦷꦠꦶꦩꦲꦴꦡꦺꦫꦴ ꦩꦺꦓꦮꦟ꧀ꦟꦁ ꦥꦁꦱꦸꦏꦹꦭꦁ ꦌꦏꦁꦱꦁ ꦏꦫꦶꦠ꧀ꦮꦴ ꦏꦠ꧀ꦠꦫꦢꦟ꧀ꦝꦁ ꦄꦴꦢꦴꦪ ꦱꦸꦮꦩ꧀ꦩꦮꦩ꧀ꦩꦶꦠꦴ ꦮꦶꦪ ꦒꦤ꧀ꦣꦲꦠ꧀ꦡꦶꦤꦺꦴ ꦮꦶꦒꦠꦢꦺꦴꦱꦴ ꦮꦤ꧀ꦠꦢꦺꦴꦱꦴ ꦨꦶꦤ꧀ꦤꦏꦶꦭꦺꦱꦴ ꦮꦶꦗꦛꦶꦠꦗꦛꦴ ꦖꦶꦤ꧀ꦤꦧꦤ꧀ꦣꦤꦴ ꦨꦒꦮꦤ꧀ꦠꦁ ꦥꦫꦶꦮꦴꦫꦪꦶꦁꦱꦸ. ꦱꦺꦴ ꦱꦪꦁ ꦮꦷꦠꦫꦴꦒꦺꦴ ꦮꦷꦠꦫꦴꦒꦺꦲꦶ, ꦱꦪꦁ ꦮꦷꦠꦢꦺꦴꦱꦺꦴ ꦮꦷꦠꦢꦺꦴꦱꦺꦲꦶ, ꦱꦪꦁ ꦮꦷꦠꦩꦺꦴꦲꦺꦴ ꦮꦷꦠꦩꦺꦴꦲꦺꦲꦶ, ꦱꦪꦁ ꦮꦷꦠꦠꦟ꧀ꦲꦺꦴ ꦮꦷꦠꦠꦟ꧀ꦲꦺꦲꦶ, ꦱꦪꦁ ꦤꦶꦏ꧀ꦏꦶꦭꦺꦱꦺꦴ ꦤꦶꦏ꧀ꦏꦶꦭꦺꦱꦺꦲꦶ, ꦱꦪꦁ ꦧꦸꦢ꧀ꦣꦺꦴ ꦄꦤꦸꦧꦸꦢ꧀ꦣꦺꦲꦶ ꦥꦫꦶꦮꦴꦫꦶꦠꦺꦴ; ꦥꦠ꧀ꦠꦥꦫꦶꦮꦴꦫꦶꦠꦁ ꦮꦶꦪ ꦏꦺꦱꦫꦁ, ꦏꦺꦱꦫꦥꦫꦶꦮꦴꦫꦶꦠꦴ ꦮꦶꦪ ꦏꦟ꧀ꦟꦶꦏꦴ, ꦄꦛ꧀ꦜꦤꦴꦒꦱꦲꦱ꧀ꦱꦥꦫꦶꦮꦴꦫꦶꦠꦺꦴ ꦮꦶꦪ ꦖꦢ꧀ꦢꦤ꧀ꦠꦺꦴ ꦤꦴꦒꦫꦴꦗꦴ, ꦤꦮꦸꦠꦶꦲꦁꦱꦱꦲꦱ꧀ꦱꦥꦫꦶꦮꦴꦫꦶꦠꦺꦴ ꦮꦶꦪ ꦣꦠꦫꦛ꧀ꦜꦺꦴ ꦲꦁꦱꦫꦴꦗꦴ, ꦱꦺꦤꦔ꧀ꦒꦥꦫꦶꦮꦴꦫꦶꦠꦺꦴ ꦮꦶꦪ ꦕꦏ꧀ꦏꦮꦠ꧀ꦠꦶꦫꦴꦗꦴ, ꦢꦺꦮꦒꦟꦥꦫꦶꦮꦴꦫꦶꦠꦺꦴ ꦮꦶꦪ ꦱꦏ꧀ꦏꦺꦴ ꦢꦺꦮꦫꦴꦗꦴ, ꦧ꧀ꦫꦲ꧀ꦩꦒꦟꦥꦫꦶꦮꦴꦫꦶꦠꦺꦴ ꦮꦶꦪ ꦲꦴꦫꦶꦠꦺꦴ ꦩꦲꦴꦧ꧀ꦫꦲ꧀ꦩꦴ, ꦄꦥꦫꦶꦩꦶꦠꦏꦴꦭꦱꦚ꧀ꦕꦶꦠꦥꦸꦚ꧀ꦚꦧꦭꦤꦶꦧ꧀ꦧꦠ꧀ꦠꦴꦪ ꦄꦕꦶꦤ꧀ꦠꦺꦪ꧀ꦪꦴꦪ ꦄꦤꦺꦴꦥꦩꦴꦪ ꦧꦸꦢ꧀ꦣꦭꦷꦭꦴꦪ ꦕꦤ꧀ꦢꦺꦴ ꦮꦶꦪ ꦒꦒꦤꦠꦭꦁ ꦠꦁ ꦩꦒ꧀ꦒꦁ ꦥꦛꦶꦥꦤ꧀ꦤꦺꦴ ꦲꦺꦴꦠꦶ.

ꦄꦡꦺꦮꦁ ꦨꦒꦮꦤ꧀ꦠꦁ ꦄꦤꦺꦴꦥꦩꦴꦪ ꦧꦸꦢ꧀ꦣꦭꦷꦭꦴꦪ ꦒꦕ꧀ꦖꦤ꧀ꦠꦁ ꦨꦶꦏ꧀ꦑꦹ ꦕ ꦎꦏ꧀ꦑꦶꦠ꧀ꦠꦕꦏ꧀ꦑꦹ ꦱꦤ꧀ꦠꦶꦤ꧀ꦢ꧀ꦫꦶꦪꦺ ꦱꦤ꧀ꦠꦩꦴꦤꦱꦺ ꦈꦥꦫꦶꦤꦨꦺ ꦜꦶꦠꦁ ꦥꦸꦟ꧀ꦟꦕꦤ꧀ꦢꦁ ꦮꦶꦪ ꦨꦒꦮꦤ꧀ꦠꦁꦪꦺꦮ ꦤꦩꦱ꧀ꦱꦩꦴꦤꦺ ꦢꦶꦱ꧀ꦮꦴꦮ ꦥꦫꦶꦧ꧀ꦧꦴꦗꦏꦺꦴ ꦄꦠ꧀ꦠꦤꦺꦴ ꦥꦫꦶꦱꦁ ꦄꦮꦭꦺꦴꦏꦺꦱꦶ. ꦱꦴ ꦲꦺꦴꦠꦶ ꦏꦴꦗꦢꦟ꧀ꦝꦏꦺ ꦎꦭꦩ꧀ꦧꦺꦠ꧀ꦮꦴ ꦒꦲꦶꦠꦺꦴꦭꦸꦒ꧀ꦒꦮꦶꦭꦸꦒ꧀ꦒꦥꦶꦛ꧀ꦜꦏꦠꦶꦢꦟ꧀ꦝꦩꦺꦴꦫꦥꦶꦚ꧀ꦖꦩꦠ꧀ꦠꦶꦏꦴꦥꦠ꧀ꦠꦥꦱꦶꦧ꧀ꦧꦏꦏꦸꦟ꧀ꦝꦶꦏꦴꦢꦶꦄꦤꦺꦏꦥꦫꦶꦏ꧀ꦑꦴꦫꦨꦴꦫꦨꦫꦶꦠꦴ. ‘‘ꦄꦱꦸꦏꦱ꧀ꦱ ꦲꦠ꧀ꦡꦴ ꦱꦺꦴꦨꦟꦴ, ꦄꦱꦸꦏꦱ꧀ꦱ ꦥꦴꦢꦴ’’ꦠꦶ ꦌꦮꦩꦴꦢꦶꦤꦶꦫꦠ꧀ꦡꦏꦮꦕꦤꦴ ꦩꦸꦑꦫꦴ ꦮꦶꦏꦶꦟ꧀ꦟꦮꦴꦕꦴ ꦄꦢꦱ꧀ꦱꦤꦷꦪꦴ ꦄꦥꦴꦱꦴꦢꦶꦏꦴ. ꦠꦱ꧀ꦱ ꦠꦁ ꦢꦶꦱ꧀ꦮꦴ ꦮꦶꦥ꧀ꦥꦛꦶꦱꦴꦫꦺꦴ ꦈꦢꦥꦴꦢꦶ.

ꦆꦢꦴꦤꦶ ꦠꦺꦤ ꦨꦒꦮꦠꦺꦴ ꦮꦟ꧀ꦟꦺꦴ ꦮꦠ꧀ꦠꦧ꧀ꦧꦺꦴ ꦨꦮꦺꦪ꧀ꦪ. ꦪꦱ꧀ꦩꦴ ꦥꦤꦺꦱ ꦭꦴꦨꦱꦏ꧀ꦏꦴꦫꦲꦴꦤꦶꦪꦴ ꦕꦺꦮ ꦥꦏ꧀ꦑꦲꦴꦤꦶꦪꦴ ꦕ ꦤꦶꦕ꧀ꦕꦩ꧀ꦥꦶ ꦨꦒꦮꦤ꧀ꦠꦁ ꦈꦱꦹꦪꦠꦶ. ꦄꦚ꧀ꦚꦠꦶꦠ꧀ꦡꦶꦪꦴꦤꦚ꧀ꦲꦶ ꦪꦴꦮ ꦧꦸꦢ꧀ꦣꦺꦴ ꦭꦺꦴꦏꦺ ꦤꦸꦥ꧀ꦥꦗ꧀ꦗꦠꦶ, ꦠꦴꦮꦢꦺꦮ ꦭꦴꦨꦱꦏ꧀ꦏꦴꦫꦴ ꦤꦶꦧ꧀ꦧꦠ꧀ꦠꦤ꧀ꦠꦶ, ꦧꦸꦢ꧀ꦣꦸꦥ꧀ꦥꦴꦢꦠꦺꦴ ꦥꦤ ꦥꦛ꧀ꦜꦴꦪ ꦥꦫꦶꦲꦷꦤꦭꦴꦨꦱꦏ꧀ꦏꦴꦫꦴ ꦲꦺꦴꦤ꧀ꦠꦶ, ꦱꦹꦫꦶꦪꦸꦒ꧀ꦒꦩꦤꦺ ꦑꦗ꧀ꦗꦺꦴꦥꦤꦏꦴ ꦮꦶꦪ ꦤꦶꦱ꧀ꦱꦶꦫꦷꦏꦠꦁ ꦄꦴꦥꦗ꧀ꦗꦤ꧀ꦠꦶ. ꦈꦥꦠꦶꦱ꧀ꦱꦏꦺꦴꦭꦶꦠꦴꦤꦚ꧀ꦕ ꦱꦚ꧀ꦗꦪꦱ꧀ꦱ ꦱꦤ꧀ꦠꦶꦏꦺ ꦥꦧ꧀ꦧꦗꦶꦠꦏꦴꦭꦺꦪꦺꦮ ꦥꦫꦶꦧ꧀ꦧꦴꦗꦏꦴ ꦩꦲꦴꦥꦫꦶꦱꦴ ꦄꦲꦺꦱꦸꦁ, ꦠꦺꦱꦸ ꦥꦤ ꦥꦏ꧀ꦏꦤ꧀ꦠꦺꦱꦸ ꦱꦴꦥꦶ ꦠꦺꦱꦁ ꦥꦫꦶꦱꦴ ꦨꦶꦤ꧀ꦤꦴ. ꦆꦠꦶ ꦆꦩꦺꦲꦶ ꦢ꧀ꦮꦷꦲꦶ ꦏꦴꦫꦟꦺꦲꦶ ꦄꦪꦁ ꦥꦫꦶꦧ꧀ꦧꦴꦗꦏꦺꦴ ꦪꦱ꧀ꦩꦴ ꦤꦶꦕ꧀ꦕꦩ꧀ꦥꦶ ꦨꦒꦮꦤ꧀ꦠꦁ ꦈꦱꦹꦪꦠꦶ, ꦠꦱ꧀ꦩꦴ ꦠꦁ ꦈꦱꦹꦪꦮꦶꦱꦸꦒ꧀ꦒꦴꦫꦁ ꦈꦒ꧀ꦒꦶꦫꦤ꧀ꦠꦺꦴ ꦫꦠꦤꦠ꧀ꦠꦪꦱ꧀ꦱ ꦄꦮꦟ꧀ꦟꦩꦺꦮ ꦨꦴꦱꦠꦷꦠꦶ ꦮꦺꦢꦶꦠꦧ꧀ꦧꦺꦴ.

꧒. ꦄꦡ ꦑꦺꦴ ꦨꦒꦮꦴ ꦄꦩ꧀ꦧꦭꦛ꧀ꦜꦶꦏꦴꦪꦁ ꦫꦴꦗꦴꦒꦴꦫꦏꦺ ꦌꦏꦫꦠ꧀ꦠꦶꦮꦴꦱꦁ ꦈꦥꦒꦕ꧀ꦖꦶ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤꦴꦠꦶ ꦨꦒꦮꦴ ꦠꦴꦪ ꦧꦸꦢ꧀ꦣꦭꦷꦭꦴꦪ ꦒꦕ꧀ꦖꦩꦴꦤꦺꦴ ꦄꦤꦸꦥꦸꦧ꧀ꦧꦺꦤ ꦄꦩ꧀ꦧꦭꦛ꧀ꦜꦶꦏꦴꦢ꧀ꦮꦴꦫꦁ ꦥꦴꦥꦸꦟꦶꦠ꧀ꦮꦴ ꦱꦹꦫꦶꦪꦁ ꦎꦭꦺꦴꦏꦺꦠ꧀ꦮꦴ – ‘‘ꦄꦏꦴꦭꦺꦴ ꦢꦴꦤꦶ ꦒꦤ꧀ꦠꦸꦁ, ꦄꦠ꧀ꦡꦱꦩꦷꦥꦁ ꦒꦠꦺꦴ ꦱꦹꦫꦶꦪꦺꦴ’’ꦠꦶ ꦄꦩ꧀ꦧꦭꦛ꧀ꦜꦶꦏꦴꦪꦁ ꦫꦴꦗꦴꦒꦴꦫꦏꦺ ꦌꦏꦫꦠ꧀ꦠꦶꦮꦴꦱꦁ ꦈꦥꦒꦕ꧀ꦖꦶ.

ꦠꦠ꧀ꦡ ꦄꦩ꧀ꦧꦭꦛ꧀ꦜꦶꦏꦴꦠꦶ ꦫꦚ꧀ꦚꦺꦴ ꦈꦪ꧀ꦪꦴꦤꦁ. ꦠꦱ꧀ꦱ ꦏꦶꦫ ꦢ꧀ꦮꦴꦫꦱꦩꦷꦥꦺ ꦠꦫꦸꦟꦄꦩ꧀ꦧꦫꦸꦏ꧀ꦑꦺꦴ ꦄꦠ꧀ꦡꦶ, ꦠꦁ ‘‘ꦄꦩ꧀ꦧꦭꦛ꧀ꦜꦶꦏꦴ’’ꦠꦶ ꦮꦢꦤ꧀ꦠꦶ. ꦠꦱ꧀ꦱ ꦄꦮꦶꦢꦹꦫꦺ ꦨꦮꦠ꧀ꦠꦴ ꦈꦪ꧀ꦪꦴꦤꦩ꧀ꦥꦶ ꦄꦩ꧀ꦧꦭꦛ꧀ꦜꦶꦏꦴ ꦠ꧀ꦮꦺꦮ ꦱꦔ꧀ꦑ꧀ꦪꦁ ꦒꦠꦁ. ꦠꦁ ꦖꦴꦪꦹꦢꦏꦱꦩ꧀ꦥꦤ꧀ꦤꦁ ꦥꦴꦏꦴꦫꦥꦫꦶꦏ꧀ꦑꦶꦠ꧀ꦠꦁ ꦱꦸꦪꦺꦴꦗꦶꦠꦢ꧀ꦮꦴꦫꦁ ꦩꦚ꧀ꦗꦸꦱꦴ ꦮꦶꦪ ꦱꦸꦒꦸꦠ꧀ꦠꦁ. ꦠꦠ꧀ꦡ ꦫꦚ꧀ꦚꦺꦴ ꦏꦷꦭ꦳ꦤꦠ꧀ꦡꦁ ꦥꦛꦶꦨꦴꦤꦕꦶꦠ꧀ꦠꦮꦶꦕꦶꦠ꧀ꦠꦁ ꦄꦒꦴꦫꦁ ꦄꦏꦁꦱꦸ. ꦠꦁ ‘‘ꦫꦴꦗꦴꦒꦴꦫꦏ’’ꦤ꧀ꦠꦶ ꦮꦸꦕ꧀ꦕꦠꦶ.

ꦱꦸꦥ꧀ꦥꦶꦪꦺꦴꦥꦶ ꦑꦺꦴꦠꦶ ꦱꦸꦥ꧀ꦥꦶꦪꦺꦴꦥꦶ ꦠꦱ꧀ꦩꦶꦁ ꦜꦴꦤꦺ ꦱꦹꦫꦶꦪꦁ ꦎꦭꦺꦴꦏꦺꦠ꧀ꦮꦴ – ‘‘ꦄꦏꦴꦭꦺꦴ ꦢꦴꦤꦶ ꦒꦤ꧀ꦠꦸꦁ, ꦧꦲꦹ ꦑꦸꦢ꧀ꦢꦏꦩꦲꦭ꧀ꦭꦏꦴ ꦥꦫꦶꦧ꧀ꦧꦴꦗꦏꦴ, ꦧꦲꦸꦥꦫꦶꦱ꧀ꦱꦪꦺꦴ ꦕ ꦄꦪꦁ ꦩꦒ꧀ꦒꦺꦴ ꦕꦺꦴꦫꦺꦲꦶꦥꦶ ꦮꦴꦭ꦳ꦪꦏ꧀ꦑꦺꦲꦶꦥꦶ ꦮꦴꦭ꦳ꦩꦶꦒꦺꦲꦶꦥꦶ. ꦄꦪꦁ ꦑꦺꦴ ꦥꦤ ꦱꦩꦟꦺꦴ ꦒꦺꦴꦠꦩꦺꦴ ꦈꦪ꧀ꦪꦴꦤꦁ ꦥꦮꦶꦛ꧀ꦜꦺꦴ, ꦱꦩꦟꦱ꧀ꦱ ꦕ ꦒꦺꦴꦠꦩꦱ꧀ꦱ ꦮꦱꦤꦛ꧀ꦜꦴꦤꦺ ꦢꦺꦮꦠꦴ ꦄꦴꦫꦏ꧀ꦑꦁ ꦒꦟ꧀ꦲꦤ꧀ꦠꦶ, ꦲꦤ꧀ꦢꦴꦲꦩ꧀ꦥꦶ ꦆꦣ ꦌꦏꦫꦠ꧀ꦠꦶꦮꦴꦱꦁ ꦈꦥꦒꦤ꧀ꦠ꧀ꦮꦴ ꦱ꧀ꦮꦺꦮ ꦒꦩꦶꦱ꧀ꦱꦴꦩꦷ’’ꦠꦶ ꦠꦢꦺꦮꦸꦪ꧀ꦪꦴꦤꦁ ꦥꦴꦮꦶꦱꦶ. ꦠꦠꦺꦴ ꦨꦶꦏ꧀ꦑꦸꦱꦔ꧀ꦓꦺꦴ ꦨꦒꦮꦠꦺꦴ ꦮꦠ꧀ꦠꦁ ꦢꦱ꧀ꦱꦺꦠ꧀ꦮꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦮꦱꦤꦛ꧀ꦜꦴꦤꦁ ꦱꦭ꧀ꦭꦏ꧀ꦑꦺꦱꦶ. ꦥꦫꦶꦧ꧀ꦧꦴꦗꦏꦺꦴꦥꦶ ꦈꦪ꧀ꦪꦴꦤꦱ꧀ꦱ ꦌꦏꦥꦱ꧀ꦱꦺ ꦥꦫꦶꦧ꧀ꦧꦴꦗꦏꦥꦫꦶꦏ꧀ꦑꦴꦫꦺ ꦎꦠꦴꦫꦺꦠ꧀ꦮꦴ ꦮꦴꦱꦁ ꦈꦥꦒꦕ꧀ꦖꦶ ꦱꦢ꧀ꦣꦶꦁ ꦄꦠ꧀ꦠꦤꦺꦴ ꦥꦫꦶꦱꦴꦪ. ꦥꦴꦭ꦳ꦶꦪꦩꦴꦫꦹꦭ꦳꧀ꦲꦮꦱꦺꦤꦺꦮ ꦥꦤ – ‘‘ꦱꦢ꧀ꦣꦶꦁ ꦄꦠ꧀ꦠꦤꦺꦴ ꦄꦤ꧀ꦠꦺꦮꦴꦱꦶꦤꦴ ꦧ꧀ꦫꦲ꧀ꦩꦢꦠ꧀ꦠꦺꦤ ꦩꦴꦟꦮꦺꦤꦴ’’ꦠꦶ ꦮꦸꦠ꧀ꦠꦁ.

ꦌꦮꦁ ꦮꦴꦱꦁ ꦈꦥꦒꦠꦺꦴ ꦥꦤ ꦱꦺꦴ ꦥꦫꦶꦧ꧀ꦧꦴꦗꦏꦺꦴ ꦫꦠ꧀ꦠꦶꦨꦴꦒꦺ ꦢꦱꦧꦭꦁ ꦎꦭꦺꦴꦏꦺꦱꦶ. ꦠꦱ꧀ꦩꦶꦚ꧀ꦕ ꦱꦩꦪꦺ ꦱꦩꦤ꧀ꦠꦴ ꦮꦶꦥ꧀ꦥꦏꦶꦟ꧀ꦟꦠꦴꦫꦏꦴ ꦮꦶꦪ ꦥꦢꦷꦥꦴ ꦗꦭꦤ꧀ꦠꦶ, ꦩꦗ꧀ꦙꦺ ꦨꦒꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ, ꦨꦶꦏ꧀ꦑꦸꦱꦔ꧀ꦓꦺꦴ ꦕ ꦨꦒꦮꦤ꧀ꦠꦁ ꦥꦫꦶꦮꦴꦫꦺꦠ꧀ꦮꦴ. ꦠꦠ꧀ꦡ ꦌꦏꦨꦶꦏ꧀ꦑꦸꦱ꧀ꦱꦥꦶ ꦲꦠ꧀ꦡꦏꦸꦏ꧀ꦏꦸꦕ꧀ꦕꦁ ꦮꦴ ꦥꦴꦢꦏꦸꦏ꧀ꦏꦸꦕ꧀ꦕꦁ ꦮꦴ ꦈꦏ꧀ꦏꦴꦱꦶꦠꦱꦢ꧀ꦢꦺꦴ ꦮꦴ ꦑꦶꦥꦶꦠꦱꦢ꧀ꦢꦺꦴ ꦮꦴ ꦤꦠ꧀ꦡꦶ. ꦱꦴ ꦲꦶ ꦥꦫꦶꦱꦴ ꦄꦠ꧀ꦠꦤꦺꦴ ꦕ ꦱꦶꦏ꧀ꦑꦶꦠꦱꦶꦏ꧀ꦑꦠꦴꦪ ꦱꦠ꧀ꦡꦫꦶ ꦕ ꦒꦴꦫꦮꦺꦤꦴꦠꦶ ꦢ꧀ꦮꦷꦲꦶ ꦏꦴꦫꦟꦺꦲꦶ ꦤꦶꦮꦴꦠꦺ ꦥꦢꦷꦥꦱꦶꦑꦴ ꦮꦶꦪ ꦤꦶꦕ꧀ꦕꦭꦴ ꦱꦤ꧀ꦤꦶꦱꦶꦤ꧀ꦤꦴꦮ ꦄꦲꦺꦴꦱꦶ. ꦥꦫꦶꦧ꧀ꦧꦴꦗꦏꦺꦴ ꦠꦁ ꦮꦶꦨꦹꦠꦶꦁ ꦢꦶꦱ꧀ꦮꦴ ꦄꦠ꧀ꦠꦤꦺꦴ ꦥꦫꦶꦱꦁ ꦎꦭꦺꦴꦏꦺꦱꦶ. ꦠꦠ꧀ꦡ ꦏꦺꦕꦶ ꦲꦠ꧀ꦡꦁ ꦑꦶꦥꦤ꧀ꦠꦶ, ꦏꦺꦕꦶ ꦥꦴꦢꦁ, ꦏꦺꦕꦶ ꦮꦶꦥ꧀ꦥꦭꦥꦤ꧀ꦠꦶ, ꦏꦺꦕꦶ ꦤꦶꦭ꧀ꦭꦴꦭꦶꦠꦗꦶꦮ꧀ꦲꦴ ꦥꦒ꧀ꦓꦫꦶꦠꦑꦺꦭ꦳ꦴ, ꦢꦤ꧀ꦠꦺ ꦑꦴꦢꦤ꧀ꦠꦴ ꦏꦴꦏꦕ꧀ꦖꦩꦴꦤꦴ ꦓꦫꦸꦓꦫꦸꦥꦱ꧀ꦱꦴꦱꦶꦤꦺꦴ ꦱꦪꦤ꧀ꦠꦶ. ꦱꦺꦴ ꦫꦠꦤꦠ꧀ꦠꦪꦱ꧀ꦱ ꦒꦸꦟꦮꦟ꧀ꦟꦺ ꦮꦠ꧀ꦠꦧ꧀ꦧꦺꦥꦶ ꦆꦱ꧀ꦱꦴꦮꦱꦺꦤ ꦥꦸꦤ ꦄꦮꦟ꧀ꦟꦩꦺꦮ ꦄꦴꦫꦨꦶ. ꦧ꧀ꦫꦲ꧀ꦩꦢꦠ꧀ꦠꦺꦴ ꦥꦤ ꦮꦸꦠ꧀ꦠꦤꦪꦺꦤꦺꦮ ꦮꦟ꧀ꦟꦁ. ꦠꦺꦤ ꦮꦸꦠ꧀ꦠꦁ – ‘‘ꦠꦠ꧀ꦫꦴꦥꦶ ꦱꦸꦢꦁ ꦱꦸꦥ꧀ꦥꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ’’ꦠꦶ ꦱꦧ꧀ꦧꦁ ꦮꦠ꧀ꦠꦧ꧀ꦧꦁ. ꦠꦠ꧀ꦡ ꦠꦠ꧀ꦫꦴꦥꦷꦠꦶ ꦠꦱ꧀ꦩꦶꦩ꧀ꦥꦶ, ꦄꦩ꧀ꦧꦭꦛ꧀ꦜꦶꦏꦴꦪꦁ ꦈꦪ꧀ꦪꦴꦤꦺꦠꦶ ꦄꦠ꧀ꦡꦺꦴ.

꧓. ꦱꦩ꧀ꦧꦲꦸꦭꦴꦤꦤ꧀ꦠꦶ ꦧꦲꦸꦏꦴꦤꦁ. ꦠꦠ꧀ꦡ ꦮꦶꦤꦪꦥꦫꦶꦪꦴꦪꦺꦤ ꦠꦪꦺꦴ ꦗꦤꦴ ‘‘ꦱꦩ꧀ꦧꦲꦸꦭꦴ’’ꦠꦶ ꦮꦸꦕ꧀ꦕꦤ꧀ꦠꦶ. ꦠꦠꦺꦴ ꦥꦫꦁ ꦱꦔ꧀ꦓꦺꦴ. ꦱꦸꦠ꧀ꦠꦤ꧀ꦠꦥꦫꦶꦪꦴꦪꦺꦤ ꦥꦤ ꦠꦪꦺꦴ ꦠꦪꦺꦴꦮ ꦠꦠꦺꦴ ꦥꦛ꧀ꦜꦴꦪ ꦱꦩ꧀ꦧꦲꦸꦭꦴ. ꦆꦣ ꦱꦸꦠ꧀ꦠꦤ꧀ꦠꦥꦫꦶꦪꦴꦪꦺꦤ ‘‘ꦱꦩ꧀ꦧꦲꦸꦭꦴ’’ꦠꦶ ꦮꦺꦢꦶꦠꦧ꧀ꦧꦴ. ꦩꦟ꧀ꦝꦭꦩꦴꦭ꦳ꦺꦠꦶ ꦏꦠ꧀ꦡꦕꦶ ꦢ꧀ꦮꦺ ꦏꦟ꧀ꦟꦶꦏꦴ ꦒꦲꦺꦠ꧀ꦮꦴ ꦲꦁꦱꦮꦛ꧀ꦛꦏꦕ꧀ꦖꦤ꧀ꦤꦺꦤ ꦏꦠꦴ ꦏꦹꦛꦴꦒꦴꦫꦱꦴꦭꦴꦥꦶ ‘‘ꦩꦟ꧀ꦝꦭꦩꦴꦭ꦳ꦺꦴ’’ꦠꦶ ꦮꦸꦕ꧀ꦕꦠꦶ, ꦏꦠ꧀ꦡꦕꦶ ꦌꦏꦁ ꦏꦟ꧀ꦟꦶꦏꦁ ꦒꦲꦺꦠ꧀ꦮꦴ ꦡꦩ꧀ꦨꦥꦤ꧀ꦠꦶꦁ ꦥꦫꦶꦏ꧀ꦑꦶꦥꦶꦠ꧀ꦮꦴ ꦏꦠꦴ ꦈꦥꦛ꧀ꦜꦴꦤꦱꦴꦭꦴꦥꦶ ‘‘ꦩꦟ꧀ꦝꦭꦩꦴꦭ꦳ꦺꦴ’’ꦠꦶ ꦮꦸꦕ꧀ꦕꦠꦶ. ꦆꦣ ꦥꦤ ꦤꦶꦱꦷꦢꦤꦱꦴꦭꦴ ‘‘ꦩꦟ꧀ꦝꦭꦩꦴꦭ꦳ꦺꦴ’’ꦠꦶ ꦮꦺꦢꦶꦠꦧ꧀ꦧꦺꦴ. ꦱꦤ꧀ꦤꦶꦱꦶꦤ꧀ꦤꦴꦤꦤ꧀ꦠꦶ ꦤꦶꦱꦗ꧀ꦗꦤꦮꦱꦺꦤ. ꦱꦤ꧀ꦤꦶꦥꦠꦶꦠꦴꦤꦤ꧀ꦠꦶ ꦱꦩꦺꦴꦣꦴꦤꦮꦱꦺꦤ. ꦄꦪꦁ ꦱꦔ꧀ꦑꦶꦪꦣꦩ꧀ꦩꦺꦴꦠꦶ ꦱꦔ꧀ꦑꦶꦪꦴ ꦮꦸꦕ꧀ꦕꦠꦶ ꦏꦡꦴ, ꦏꦡꦴꦣꦩ꧀ꦩꦺꦴꦠꦶ ꦄꦠ꧀ꦡꦺꦴ. ꦈꦢꦥꦴꦢꦷꦠꦶ ꦈꦥ꧀ꦥꦤ꧀ꦤꦺꦴ. ꦏꦠꦩꦺꦴ ꦥꦤ ꦱꦺꦴꦠꦶ? ꦄꦕ꧀ꦖꦫꦶꦪꦁ ꦄꦴꦮꦸꦱꦺꦴꦠꦶ ꦌꦮꦩꦴꦢꦶ. ꦠꦠ꧀ꦡ ꦄꦤ꧀ꦣꦱ꧀ꦱ ꦥꦧ꧀ꦧꦠꦴꦫꦺꦴꦲꦟꦁ ꦮꦶꦪ ꦤꦶꦕ꧀ꦕꦁ ꦤ ꦲꦺꦴꦠꦷꦠꦶ ꦄꦕ꧀ꦖꦫꦶꦪꦁ. ꦄꦪꦁ ꦠꦴꦮ ꦱꦢ꧀ꦢꦤꦪꦺꦴ. ꦄꦪꦁ ꦥꦤ ꦄꦛ꧀ꦜꦏꦡꦴꦤꦪꦺꦴ – ꦄꦕ꧀ꦖꦫꦴꦪꦺꦴꦒ꧀ꦒꦤ꧀ꦠꦶ ꦄꦕ꧀ꦖꦫꦶꦪꦁ. ꦄꦕ꧀ꦖꦫꦁ ꦥꦲꦫꦶꦠꦸꦁ ꦪꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦄꦨꦹꦠꦥꦸꦧ꧀ꦧꦁ ꦨꦹꦠꦤ꧀ꦠꦶ ꦄꦧ꧀ꦨꦸꦠꦁ. ꦈꦨꦪꦁ ꦥꦺꦠꦁ ꦮꦶꦩ꧀ꦲꦪꦱ꧀ꦱꦺꦮꦴꦣꦶꦮꦕꦤꦁ. ꦪꦴꦮꦚ꧀ꦕꦶꦢꦤ꧀ꦠꦶ ꦪꦴꦮ ꦕ ꦆꦢꦁ ꦠꦺꦤ ꦱꦸꦥ꧀ꦥꦛꦶꦮꦶꦢꦶꦠꦠꦴꦪ ꦄꦥ꧀ꦥꦩꦺꦪ꧀ꦪꦠ꧀ꦠꦁ ꦢꦱ꧀ꦱꦺꦠꦶ.

ꦠꦺꦤ ꦨꦒꦮꦠꦴ ꦗꦴꦤꦠꦴ…ꦥꦺ… ꦱꦸꦥ꧀ꦥꦛꦶꦮꦶꦢꦶꦠꦴꦠꦶ ꦌꦠ꧀ꦡꦴꦪꦁ ꦱꦔ꧀ꦑꦺꦥꦠ꧀ꦡꦺꦴ. ꦪꦺꦴ ꦱꦺꦴ ꦨꦒꦮꦴ ꦱꦩꦠꦶꦁꦱ ꦥꦴꦫꦩꦶꦪꦺꦴ ꦥꦹꦫꦺꦠ꧀ꦮꦴ ꦱꦧ꧀ꦧꦏꦶꦭꦺꦱꦺ ꦨꦚ꧀ꦗꦶꦠ꧀ꦮꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴ, ꦠꦺꦤ ꦨꦒꦮꦠꦴ ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦁ ꦄꦴꦱꦪꦴꦤꦸꦱꦪꦁ ꦗꦴꦤꦠꦴ, ꦲꦠ꧀ꦡꦠꦭꦺ ꦜꦥꦶꦠꦁ ꦄꦴꦩꦭꦏꦁ ꦮꦶꦪ ꦱꦧ꧀ꦧꦚꦺꦪ꧀ꦪꦣꦩ꧀ꦩꦁ ꦥꦱ꧀ꦱꦠꦴ.

ꦄꦥꦶ ꦕ ꦥꦸꦧ꧀ꦧꦺꦤꦶꦮꦴꦱꦴꦢꦷꦲꦶ ꦗꦴꦤꦠꦴ, ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦥꦱ꧀ꦱꦠꦴ. ꦠꦷꦲꦶ ꦮꦶꦗ꧀ꦗꦴꦲꦶ ꦖꦲꦶ ꦮꦴ ꦥꦤ ꦄꦨꦶꦚ꧀ꦚꦴꦲꦶ ꦗꦴꦤꦠꦴ, ꦱꦧ꧀ꦧꦠ꧀ꦡ ꦄꦥ꧀ꦥꦛꦶꦲꦠꦺꦤ ꦱꦩꦤ꧀ꦠꦕꦏ꧀ꦑꦸꦤꦴ ꦥꦱ꧀ꦱꦠꦴ. ꦱꦧ꧀ꦧꦣꦩ꧀ꦩꦗꦴꦤꦤꦱꦩꦠ꧀ꦡꦴꦪ ꦮꦴ ꦥꦚ꧀ꦚꦴꦪ ꦗꦴꦤꦠꦴ, ꦱꦧ꧀ꦧꦱꦠ꧀ꦠꦴꦤꦁ ꦕꦏ꧀ꦑꦸꦮꦶꦱꦪꦴꦠꦷꦠꦴꦤꦶ ꦠꦶꦫꦺꦴꦏꦸꦛ꧀ꦛꦴꦢꦶꦒꦠꦴꦤꦶꦥꦶ ꦫꦹꦥꦴꦤꦶ ꦄꦠꦶꦮꦶꦱꦸꦢ꧀ꦣꦺꦤ ꦩꦁꦱꦕꦏ꧀ꦑꦸꦤꦴ ꦥꦱ꧀ꦱꦠꦴ. ꦄꦠ꧀ꦠꦲꦶꦠꦱꦴꦣꦶꦏꦴꦪ ꦮꦴ ꦱꦩꦴꦣꦶꦥꦢꦛ꧀ꦜꦴꦤꦴꦪ ꦥꦛꦶꦮꦺꦣꦥꦚ꧀ꦚꦴꦪ ꦗꦴꦤꦠꦴ, ꦥꦫꦲꦶꦠꦱꦴꦣꦶꦏꦴꦪ ꦏꦫꦸꦟꦴꦥꦢꦛ꧀ꦜꦴꦤꦴꦪ ꦢꦺꦱꦤꦴꦥꦚ꧀ꦚꦴꦪ ꦥꦱ꧀ꦱꦠꦴ.

ꦄꦫꦷꦤꦁ ꦲꦠꦠ꧀ꦠꦴ ꦥꦕ꧀ꦕꦪꦴꦢꦷꦤꦚ꧀ꦕ ꦄꦫꦲꦠ꧀ꦠꦴ ꦄꦫꦲꦠꦴ. ꦱꦩ꧀ꦩꦴ ꦱꦴꦩꦚ꧀ꦕ ꦱꦧ꧀ꦧꦣꦩ꧀ꦩꦴꦤꦁ ꦧꦸꦢ꧀ꦣꦠ꧀ꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦄꦤ꧀ꦠꦫꦴꦪꦶꦏꦣꦩ꧀ꦩꦺ ꦮꦴ ꦗꦴꦤꦠꦴ, ꦤꦶꦪ꧀ꦪꦴꦤꦶꦏꦣꦩ꧀ꦩꦺ ꦥꦱ꧀ꦱꦠꦴ, ꦏꦶꦭꦺꦱꦴꦫꦷꦤꦁ ꦲꦠꦠ꧀ꦠꦴ ꦄꦫꦲꦠꦴ. ꦱꦩ꧀ꦩꦴ ꦱꦴꦩꦚ꧀ꦕ ꦱꦧ꧀ꦧꦣꦩ꧀ꦩꦴꦤꦁ ꦧꦸꦢ꧀ꦣꦠ꧀ꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤꦴꦠꦶ. ꦌꦮꦁ ꦕꦠꦹꦮꦺꦱꦴꦫꦗ꧀ꦗꦮꦱꦺꦤ ꦕꦠꦹꦲꦴꦏꦴꦫꦺꦲꦶ ꦡꦺꦴꦩꦶꦠꦺꦤ ꦱꦠ꧀ꦠꦴꦤꦁ ꦤꦴꦤꦴꦣꦶꦩꦸꦠ꧀ꦠꦶꦏꦠꦴ ꦤꦴꦤꦗ꧀ꦙꦴꦱꦪꦠꦴ ꦱꦸꦥ꧀ꦥꦛꦶꦮꦶꦢꦶꦠꦴ ꦪꦴꦮ ꦕ ꦱꦸꦛ꧀ꦜꦸ ꦥꦛꦶꦮꦶꦢꦶꦠꦴ.

ꦆꦢꦴꦤꦶꦱ꧀ꦱ ꦱꦸꦥ꧀ꦥꦛꦶꦮꦶꦢꦶꦠꦨꦴꦮꦁ ꦢꦱ꧀ꦱꦺꦠꦸꦁ ꦄꦪꦚ꧀ꦲꦷꦠꦶꦄꦴꦢꦶꦩꦴꦲ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ ꦪꦴ ꦕ ꦄꦪꦁ ꦨꦒꦮꦠꦴ ‘‘ꦣꦴꦠꦸꦱꦺꦴ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦱꦁꦱꦤ꧀ꦢꦤ꧀ꦠꦶ ꦱꦩꦺꦤ꧀ꦠꦶ, ꦲꦷꦤꦴꦣꦶꦩꦸꦠ꧀ꦠꦶꦏꦴ ꦲꦷꦤꦴꦣꦶꦩꦸꦠ꧀ꦠꦶꦏꦺꦲꦶ ꦱꦢ꧀ꦣꦶꦁ ꦱꦁꦱꦤ꧀ꦢꦤ꧀ꦠꦶ ꦱꦩꦺꦤ꧀ꦠꦶ, ꦏꦭ꧀ꦪꦴꦟꦴꦣꦶꦩꦸꦠ꧀ꦠꦶꦏꦴ ꦏꦭ꧀ꦪꦴꦟꦴꦣꦶꦩꦸꦠ꧀ꦠꦶꦏꦺꦲꦶ ꦱꦢ꧀ꦣꦶꦁ ꦱꦁꦱꦤ꧀ꦢꦤ꧀ꦠꦶ ꦱꦩꦺꦤ꧀ꦠꦶ. ꦄꦠꦷꦠꦩ꧀ꦥꦶ ꦑꦺꦴ, ꦨꦶꦏ꧀ꦑꦮꦺ, ꦄꦢ꧀ꦣꦴꦤꦁ ꦣꦴꦠꦸꦱꦺꦴꦮ ꦱꦠ꧀ꦠꦴ ꦱꦁꦱꦤ꧀ꦢꦶꦁꦱꦸ ꦱꦩꦶꦁꦱꦸ, ꦲꦷꦤꦴꦣꦶꦩꦸꦠ꧀ꦠꦶꦏꦴ ꦲꦷꦤꦴꦣꦶꦩꦸꦠ꧀ꦠꦶꦏꦺꦲꦶ…ꦥꦺ… ꦏꦭ꧀ꦪꦴꦟꦴꦣꦶꦩꦸꦠ꧀ꦠꦶꦏꦴ ꦏꦭ꧀ꦪꦴꦟꦴꦣꦶꦩꦸꦠ꧀ꦠꦶꦏꦺꦲꦶ ꦱꦢ꧀ꦣꦶꦁ ꦱꦁꦱꦤ꧀ꦢꦶꦁꦱꦸ ꦱꦩꦶꦁꦱꦸ, ꦄꦤꦴꦒꦠꦩ꧀ꦥꦶ ꦑꦺꦴ, ꦨꦶꦏ꧀ꦑꦮꦺ, ꦄꦢ꧀ꦣꦴꦤꦁ…ꦥꦺ… ꦱꦁꦱꦤ꧀ꦢꦶꦱ꧀ꦱꦤ꧀ꦠꦶ ꦱꦩꦺꦱ꧀ꦱꦤ꧀ꦠꦶ, ꦌꦠꦫꦲꦶꦥꦶ ꦑꦺꦴ, ꦨꦶꦏ꧀ꦑꦮꦺ, ꦥꦕ꧀ꦕꦸꦥ꧀ꦥꦤ꧀ꦤꦁ ꦄꦢ꧀ꦣꦴꦤꦁ ꦣꦴꦠꦸꦱꦺꦴꦮ ꦱꦠ꧀ꦠꦴ ꦱꦁꦱꦤ꧀ꦢꦤ꧀ꦠꦶ ꦱꦩꦺꦤ꧀ꦠꦶ, ꦲꦷꦤꦴꦣꦶꦩꦸꦠ꧀ꦠꦶꦏꦴ ꦲꦷꦤꦴꦣꦶꦩꦸꦠ꧀ꦠꦶꦏꦺꦲꦶ…ꦥꦺ… ꦏꦭ꧀ꦪꦴꦟꦴꦣꦶꦩꦸꦠ꧀ꦠꦶꦏꦴ ꦏꦭ꧀ꦪꦴꦟꦴꦣꦶꦩꦸꦠ꧀ꦠꦶꦏꦺꦲꦶ ꦱꦢ꧀ꦣꦶꦁ ꦱꦁꦱꦤ꧀ꦢꦤ꧀ꦠꦶ ꦱꦩꦺꦤ꧀ꦠꦷ’’ꦠꦶ ꦌꦮꦁ ꦱꦠ꧀ꦠꦴꦤꦁ ꦤꦴꦤꦴꦣꦶꦩꦸꦠ꧀ꦠꦶꦏꦠꦴ, ꦤꦴꦤꦗ꧀ꦙꦴꦱꦪꦠꦴ, ꦤꦴꦤꦴꦢꦶꦛ꧀ꦜꦶꦏꦠꦴ, ꦤꦴꦤꦴꦑꦤ꧀ꦠꦶꦠꦴ, ꦤꦴꦤꦴꦫꦸꦕꦶꦠꦴ, ꦤꦴꦭ꦳ꦶꦪꦴ ꦩꦶꦤꦤ꧀ꦠꦺꦤ ꦮꦶꦪ ꦠꦸꦭꦴꦪ ꦠꦸꦭꦪꦤ꧀ꦠꦺꦤ ꦮꦶꦪ ꦕ ꦤꦴꦤꦴꦣꦶꦩꦸꦠ꧀ꦠꦶꦏꦠꦴꦚꦴꦟꦺꦤ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦺꦤ ꦮꦶꦢꦶꦠꦴ, ꦱꦴ ꦪꦴꦮ ꦱꦸꦥ꧀ꦥꦛꦶꦮꦶꦢꦶꦠꦴ. ꦢ꧀ꦮꦺꦥꦶ ꦤꦴꦩ ꦱꦠ꧀ꦠꦴ ꦌꦏꦗ꧀ꦙꦴꦱꦪꦴ ꦢꦸꦭ꧀ꦭꦨꦴ ꦭꦺꦴꦏꦱ꧀ꦩꦶꦁ. ꦌꦏꦱ꧀ꦩꦶꦁ ꦒꦤ꧀ꦠꦸꦏꦴꦩꦺ ꦌꦏꦺꦴ ꦜꦴꦠꦸꦏꦴꦩꦺꦴ ꦲꦺꦴꦠꦶ, ꦌꦏꦱ꧀ꦩꦶꦁ ꦥꦶꦮꦶꦠꦸꦏꦴꦩꦺ ꦌꦏꦺꦴ ꦨꦸꦚ꧀ꦗꦶꦠꦸꦏꦴꦩꦺꦴ. ꦆꦩꦺꦱꦸ ꦕꦴꦥꦶ ꦢ꧀ꦮꦷꦱꦸ ꦄꦴꦕꦫꦶꦪꦤ꧀ꦠꦺꦮꦴꦱꦷꦱꦸ ꦄꦪꦚ꧀ꦲꦶ ‘‘ꦱꦸꦥ꧀ꦥꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ…ꦥꦺ… ꦨꦒꦮꦤ꧀ꦠꦁ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦄꦤꦸꦧꦤ꧀ꦣꦴ ꦲꦺꦴꦤ꧀ꦠꦶ ꦨꦶꦏ꧀ꦑꦸꦱꦔ꧀ꦓꦚ꧀ꦕꦴ’’ꦠꦶ. ꦠꦠ꧀ꦡ ꦆꦠꦶꦲꦩꦺꦠꦶ ꦆꦠꦶꦲ ꦆꦩꦺ, ꦌꦮꦁ ꦆꦩꦺꦠꦶ ꦄꦠ꧀ꦡꦺꦴ. ꦱꦺꦱꦁ ꦮꦸꦠ꧀ꦠꦤꦪꦩꦺꦮ.

꧔. ꦄꦡ ꦑꦺꦴ ꦨꦒꦮꦴ ꦠꦺꦱꦁ ꦨꦶꦏ꧀ꦑꦹꦤꦁ ꦆꦩꦁ ꦱꦔ꧀ꦑꦶꦪꦣꦩ꧀ꦩꦁ ꦮꦶꦢꦶꦠ꧀ꦮꦴꦠꦶ ꦌꦠ꧀ꦡ ꦮꦶꦢꦶꦠ꧀ꦮꦴꦠꦶ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦺꦤ ꦗꦴꦤꦶꦠ꧀ꦮꦴ. ꦨꦒꦮꦴ ꦲꦶ ꦏꦠ꧀ꦡꦕꦶ ꦩꦁꦱꦕꦏ꧀ꦑꦸꦤꦴ ꦢꦶꦱ꧀ꦮꦴ ꦗꦴꦤꦴꦠꦶ – ‘‘ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦩꦲꦤ꧀ꦠꦁ ꦢꦴꦫꦸꦏ꧀ꦑꦤ꧀ꦣꦁ ꦒꦔ꧀ꦒꦴꦪ ꦤꦢꦶꦪꦴ ꦱꦺꦴꦠꦺꦤ ꦮꦸꦪ꧀ꦲꦩꦴꦤ’’ꦤ꧀ꦠꦶꦄꦴꦢꦷꦱꦸ (ꦱꦁ. ꦤꦶ. ꧔.꧒꧔꧑) ꦮꦶꦪ. ꦏꦠ꧀ꦡꦕꦶ ꦢꦶꦧ꧀ꦧꦕꦏ꧀ꦑꦸꦤꦴ ꦢꦶꦱ꧀ꦮꦴ ꦗꦴꦤꦴꦠꦶ – ‘‘ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦠꦴ ꦢꦺꦮꦠꦴꦪꦺꦴ ꦱꦲꦱ꧀ꦱꦱ꧀ꦱꦺꦮ ꦥꦴꦛꦭꦶꦒꦴꦩꦺ ꦮꦠ꧀ꦡꦹꦤꦶ ꦥꦫꦶꦒꦟ꧀ꦲꦤ꧀ꦠꦶꦪꦺꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧑꧕꧒) ꦮꦶꦪ. ꦏꦠ꧀ꦡꦕꦶ ꦥꦏꦠꦶꦱꦺꦴꦠꦺꦤ ꦱꦸꦠ꧀ꦮꦴ ꦗꦴꦤꦴꦠꦶ – ‘‘ꦄꦱ꧀ꦱꦺꦴꦱꦶ ꦑꦺꦴ ꦨꦒꦮꦴ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦱꦸꦨꦢ꧀ꦢꦺꦤ ꦥꦫꦶꦧ꧀ꦧꦴꦗꦏꦺꦤ ꦱꦢ꧀ꦣꦶꦁ ꦆꦩꦁ ꦏꦡꦴꦱꦭ꧀ꦭꦴꦥ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧒꧑꧓) ꦮꦶꦪ. ꦏꦠ꧀ꦡꦕꦶ ꦢꦶꦧ꧀ꦧꦱꦺꦴꦠꦺꦤ ꦱꦸꦠ꧀ꦮꦴ ꦗꦴꦤꦴꦠꦶ – ‘‘ꦄꦱ꧀ꦱꦺꦴꦱꦶ ꦑꦺꦴ ꦨꦒꦮꦴ ꦢꦶꦧ꧀ꦧꦴꦪ ꦱꦺꦴꦠꦣꦴꦠꦸꦪꦴ ꦮꦶꦱꦸꦢ꧀ꦣꦴꦪ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦶꦏꦴꦪ ꦱꦤ꧀ꦣꦴꦤꦱ꧀ꦱ ꦒꦲꦥꦠꦶꦱ꧀ꦱ ꦤꦶꦒ꧀ꦫꦺꦴꦣꦺꦤ ꦥꦫꦶꦧ꧀ꦧꦴꦗꦏꦺꦤ ꦱꦢ꧀ꦣꦶꦁ ꦆꦩꦁ ꦏꦡꦴꦱꦭ꧀ꦭꦴꦥ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧓.꧕꧔) ꦮꦶꦪ. ꦆꦣ ꦥꦤ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦺꦤ ꦱꦸꦠ꧀ꦮꦴ ꦄꦚ꧀ꦚꦴꦱꦶ. ꦏꦶꦁ ꦏꦫꦺꦴꦤ꧀ꦠꦺꦴ ꦄꦚ꧀ꦚꦴꦱꦶ? ꦥꦕ꧀ꦖꦶꦩꦪꦴꦩꦏꦶꦕ꧀ꦕꦁ, ꦏꦶꦕ꧀ꦕꦚ꧀ꦕ ꦤꦴꦩꦺꦠꦁ ꦱꦴꦠ꧀ꦡꦏꦁ, ꦤꦶꦫꦠ꧀ꦡꦏꦤ꧀ꦠꦶ ꦢꦸꦮꦶꦣꦁ ꦲꦺꦴꦠꦶ. ꦠꦠ꧀ꦡ ꦤꦶꦫꦠ꧀ꦡꦏꦏꦶꦕ꧀ꦕꦁ ꦨꦒꦮꦠꦴ ꦧꦺꦴꦣꦶꦥꦭ꧀ꦭꦔ꧀ꦏꦺꦪꦺꦮ ꦄꦫꦲꦠ꧀ꦠꦩꦒ꧀ꦒꦺꦤ ꦱꦩꦸꦒ꧀ꦓꦴꦠꦁ ꦏꦠꦁ. ꦱꦴꦠ꧀ꦡꦏꦁꦪꦺꦮ ꦥꦤ ꦨꦒꦮꦠꦺꦴ ꦏꦶꦕ꧀ꦕꦁ ꦲꦺꦴꦠꦶ. ꦠꦁ ꦥꦚ꧀ꦕꦮꦶꦣꦁ – ꦥꦸꦫꦺꦨꦠ꧀ꦠꦏꦶꦕ꧀ꦕꦁ, ꦥꦕ꧀ꦖꦴꦨꦠ꧀ꦠꦏꦶꦕ꧀ꦕꦁ, ꦥꦸꦫꦶꦩꦪꦴꦩꦏꦶꦕ꧀ꦕꦁ, ꦩꦗ꧀ꦙꦶꦩꦪꦴꦩꦏꦶꦕ꧀ꦕꦁ, ꦥꦕ꧀ꦖꦶꦩꦪꦴꦩꦏꦶꦕ꧀ꦕꦤ꧀ꦠꦶ.

ꦠꦠ꧀ꦫꦶꦢꦁ ꦥꦸꦫꦺꦨꦠ꧀ꦠꦏꦶꦕ꧀ꦕꦁ –

ꦨꦒꦮꦴ ꦲꦶ ꦥꦴꦠꦺꦴꦮ ꦈꦛ꧀ꦜꦴꦪ ꦈꦥꦛ꧀ꦜꦴꦏꦴꦤꦸꦒ꧀ꦒꦲꦠ꧀ꦡꦁ ꦱꦫꦷꦫꦦꦴꦱꦸꦏꦠ꧀ꦡꦚ꧀ꦕ ꦩꦸꦑꦣꦺꦴꦮꦤꦴꦢꦶꦱꦫꦷꦫꦥꦫꦶꦏꦩ꧀ꦩꦁ ꦏꦠ꧀ꦮꦴ ꦪꦴꦮ ꦨꦶꦏ꧀ꦑꦴꦕꦴꦫꦮꦺꦭꦴ ꦠꦴꦮ ꦮꦶꦮꦶꦠ꧀ꦠꦴꦱꦤꦺ ꦮꦷꦠꦶꦤꦴꦩꦺꦠ꧀ꦮꦴ, ꦨꦶꦏ꧀ꦑꦴꦕꦴꦫꦮꦺꦭꦴꦪꦁ ꦤꦶꦮꦴꦱꦺꦠ꧀ꦮꦴ ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ ꦕꦷꦮꦫꦁ ꦥꦴꦫꦸꦥꦶꦠ꧀ꦮꦴ ꦥꦠ꧀ꦠꦩꦴꦢꦴꦪ ꦏꦢꦴꦕꦶ ꦌꦏꦏꦺꦴ, ꦏꦢꦴꦕꦶ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ, ꦒꦴꦩꦁ ꦮꦴ ꦤꦶꦒꦩꦁ ꦮꦴ ꦥꦶꦟ꧀ꦝꦴꦪ ꦥꦮꦶꦱꦠꦶ; ꦏꦢꦴꦕꦶ ꦥꦏꦠꦶꦪꦴ, ꦏꦢꦴꦕꦶ ꦄꦤꦺꦏꦺꦲꦶ ꦥꦴꦛꦶꦲꦴꦫꦶꦪꦺꦲꦶ ꦮꦠ꧀ꦠꦩꦴꦤꦺꦲꦶ. ꦱꦺꦪ꧀ꦪꦡꦶꦢꦁ, ꦥꦶꦟ꧀ꦝꦴꦪ ꦥꦮꦶꦱꦠꦺꦴ ꦭꦺꦴꦏꦤꦴꦡꦱ꧀ꦱ ꦥꦸꦫꦠꦺꦴ ꦥꦸꦫꦠꦺꦴ ꦒꦤ꧀ꦠ꧀ꦮꦴ ꦩꦸꦢꦸꦒꦠꦮꦴꦠꦴ ꦥꦡꦮꦶꦁ ꦱꦺꦴꦣꦺꦤ꧀ꦠꦶ, ꦮꦭꦴꦲꦏꦴ ꦈꦢꦏꦦꦸꦱꦶꦠꦴꦤꦶ ꦩꦸꦚ꧀ꦕꦤ꧀ꦠꦴ ꦩꦒ꧀ꦒꦺ ꦫꦺꦟꦸꦁ ꦮꦹꦥꦱꦩꦺꦠ꧀ꦮꦴ ꦈꦥꦫꦶ ꦮꦶꦠꦴꦤꦁ ꦲꦸꦠ꧀ꦮꦴ ꦠꦶꦛ꧀ꦜꦤ꧀ꦠꦶ, ꦄꦥꦫꦺ ꦮꦴꦠꦴ ꦥꦸꦥ꧀ꦦꦴꦤꦶ ꦈꦥꦱꦁꦲꦫꦶꦠ꧀ꦮꦴ ꦩꦒ꧀ꦒꦺ ꦎꦏꦶꦫꦤ꧀ꦠꦶ, ꦈꦤ꧀ꦤꦠꦴ ꦨꦹꦩꦶꦥ꧀ꦥꦢꦺꦱꦴ ꦎꦤꦩꦤ꧀ꦠꦶ, ꦎꦤꦠꦴ ꦈꦤ꧀ꦤꦩꦤ꧀ꦠꦶ, ꦥꦴꦢꦤꦶꦏ꧀ꦑꦺꦥꦱꦩꦪꦺ ꦱꦩꦴꦮ ꦨꦹꦩꦶ ꦲꦺꦴꦠꦶ, ꦱꦸꦑꦱꦩ꧀ꦦꦱ꧀ꦱꦴꦤꦶ ꦥꦢꦸꦩꦥꦸꦥ꧀ꦦꦴꦤꦶ ꦮꦴ ꦥꦴꦢꦺ ꦱꦩ꧀ꦥꦛꦶꦕ꧀ꦖꦤ꧀ꦠꦶ. ꦆꦤ꧀ꦢꦑꦷꦭꦱ꧀ꦱ ꦄꦤ꧀ꦠꦺꦴ ꦜꦥꦶꦠꦩꦠ꧀ꦠꦺ ꦢꦏ꧀ꦑꦶꦟꦥꦴꦢꦺ ꦱꦫꦷꦫꦠꦺꦴ ꦖꦧ꧀ꦧꦟ꧀ꦟꦫꦱ꧀ꦩꦶꦪꦺꦴ ꦤꦶꦏ꧀ꦑꦩꦶꦠ꧀ꦮꦴ ꦱꦸꦮꦟ꧀ꦟꦫꦱꦥꦶꦚ꧀ꦗꦫꦴꦤꦶ ꦮꦶꦪ ꦕꦶꦠ꧀ꦫꦥꦛꦥꦫꦶꦏ꧀ꦑꦶꦠ꧀ꦠꦴꦤꦶ ꦮꦶꦪ ꦕ ꦥꦴꦱꦴꦢꦏꦹꦛꦴꦒꦴꦫꦴꦢꦷꦤꦶ ꦄꦭꦔ꧀ꦏꦫꦺꦴꦤ꧀ꦠꦶꦪꦺꦴ ꦆꦠꦺꦴ ꦕꦶꦠꦺꦴ ꦕ ꦣꦴꦮꦤ꧀ꦠꦶ, ꦲꦠ꧀ꦡꦶꦄꦱ꧀ꦱꦮꦶꦲꦔ꧀ꦒꦴꦢꦪꦺꦴ ꦱꦏꦱꦏꦛ꧀ꦜꦴꦤꦺꦱꦸ ꦜꦶꦠꦴꦪꦺꦮ ꦩꦣꦸꦫꦺꦤꦴꦏꦴꦫꦺꦤ ꦱꦢ꧀ꦢꦁ ꦏꦫꦺꦴꦤ꧀ꦠꦶ, ꦠꦡꦴ ꦨꦺꦫꦶꦮꦷꦟꦴꦢꦷꦤꦶ ꦠꦹꦫꦶꦪꦴꦤꦶ ꦩꦤꦸꦱ꧀ꦱꦴꦤꦚ꧀ꦕ ꦏꦴꦪꦹꦥꦒꦴꦤꦶ ꦄꦴꦨꦫꦟꦴꦤꦶ. ꦠꦺꦤ ꦱꦚ꧀ꦚꦴꦟꦺꦤ ꦩꦤꦸꦱ꧀ꦱꦴ ꦗꦴꦤꦤ꧀ꦠꦶ – ‘‘ꦄꦗ꧀ꦗ ꦨꦒꦮꦴ ꦆꦣ ꦥꦶꦟ꧀ꦝꦴꦪ ꦥꦮꦶꦛ꧀ꦜꦺꦴ’’ꦠꦶ. ꦠꦺ ꦱꦸꦤꦶꦮꦠ꧀ꦡꦴ ꦱꦸꦥꦴꦫꦸꦠꦴ ꦒꦤ꧀ꦣꦥꦸꦥ꧀ꦦꦴꦢꦷꦤꦶ ꦄꦴꦢꦴꦪ ꦓꦫꦴ ꦤꦶꦏ꧀ꦑꦩꦶꦠ꧀ꦮꦴ ꦄꦤ꧀ꦠꦫꦮꦷꦡꦶꦁ ꦥꦛꦶꦥꦗ꧀ꦗꦶꦠ꧀ꦮꦴ ꦨꦒꦮꦤ꧀ꦠꦁ ꦒꦤ꧀ꦣꦥꦸꦥ꧀ꦦꦴꦢꦷꦲꦶ ꦱꦏ꧀ꦏꦕ꧀ꦕꦁ ꦥꦹꦗꦺꦠ꧀ꦮꦴ ꦮꦤ꧀ꦢꦶꦠ꧀ꦮꦴ – ‘‘ꦄꦩ꧀ꦲꦴꦏꦁ, ꦨꦤ꧀ꦠꦺ, ꦢꦱ ꦨꦶꦏ꧀ꦑꦹ, ꦄꦩ꧀ꦲꦴꦏꦁ ꦮꦷꦱꦠꦶ, ꦥꦚ꧀ꦚꦴꦱꦁ…ꦥꦺ… ꦱꦠꦁ ꦢꦺꦡꦴ’’ꦠꦶ ꦪꦴꦕꦶꦠ꧀ꦮꦴ ꦨꦒꦮꦠꦺꦴꦥꦶ ꦥꦠ꧀ꦠꦁ ꦒꦲꦺꦠ꧀ꦮꦴ ꦄꦴꦱꦤꦁ ꦥꦚ꧀ꦚꦥꦺꦠ꧀ꦮꦴ ꦱꦏ꧀ꦏꦕ꧀ꦕꦁ ꦥꦶꦟ꧀ꦝꦥꦴꦠꦺꦤ ꦥꦛꦶꦩꦴꦤꦺꦤ꧀ꦠꦶ. ꦨꦒꦮꦴ ꦏꦠꦨꦠ꧀ꦠꦏꦶꦕ꧀ꦕꦺꦴ ꦠꦺꦱꦁ ꦱꦠ꧀ꦠꦴꦤꦁ ꦕꦶꦠ꧀ꦠꦱꦤ꧀ꦠꦴꦤꦴꦤꦶ ꦎꦭꦺꦴꦏꦺꦠ꧀ꦮꦴ ꦠꦡꦴ ꦣꦩ꧀ꦩꦁ ꦢꦺꦱꦺꦠꦶ, ꦪꦡꦴ ꦏꦺꦕꦶ ꦱꦫꦟꦒꦩꦤꦺꦱꦸ ꦥꦠꦶꦛ꧀ꦜꦲꦤ꧀ꦠꦶ, ꦏꦺꦕꦶ ꦥꦚ꧀ꦕꦱꦸ ꦱꦷꦭꦺꦱꦸ, ꦏꦺꦕꦶ ꦱꦺꦴꦠꦴꦥꦠ꧀ꦠꦶꦱꦏꦢꦴꦒꦴꦩꦶꦄꦤꦴꦒꦴꦩꦶꦦꦭꦴꦤꦁ ꦄꦚ꧀ꦚꦠꦫꦱ꧀ꦩꦶꦁ; ꦏꦺꦕꦶ ꦥꦧ꧀ꦧꦗꦶꦠ꧀ꦮꦴ ꦄꦒ꧀ꦒꦦꦭꦺ ꦄꦫꦲꦠ꧀ꦠꦺꦠꦶ. ꦌꦮꦁ ꦩꦲꦴꦗꦤꦁ ꦄꦤꦸꦒ꧀ꦒꦲꦺꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦮꦶꦲꦴꦫꦁ ꦒꦕ꧀ꦖꦠꦶ. ꦠꦠ꧀ꦡ ꦒꦤ꧀ꦠ꧀ꦮꦴ ꦩꦟ꧀ꦝꦭꦩꦴꦭ꦳ꦺ ꦥꦚ꧀ꦚꦠ꧀ꦠꦮꦫꦧꦸꦢ꧀ꦣꦴꦱꦤꦺ ꦤꦶꦱꦷꦢꦠꦶ, ꦨꦶꦏ꧀ꦑꦹꦤꦁ ꦨꦠ꧀ꦠꦏꦶꦕ꧀ꦕꦥꦫꦶꦪꦺꦴꦱꦴꦤꦁ ꦄꦴꦒꦩꦪꦩꦴꦤꦺꦴ. ꦠꦠꦺꦴ ꦨꦶꦏ꧀ꦑꦹꦤꦁ ꦨꦠ꧀ꦠꦏꦶꦕ꧀ꦕꦥꦫꦶꦪꦺꦴꦱꦴꦤꦺ ꦈꦥꦛ꧀ꦜꦴꦏꦺꦴ ꦨꦒꦮꦠꦺꦴ ꦤꦶꦮꦺꦢꦺꦠꦶ. ꦄꦡ ꦨꦒꦮꦴ ꦒꦤ꧀ꦣꦏꦸꦛꦶꦁ ꦥꦮꦶꦱꦠꦶ. ꦆꦢꦁ ꦠꦴꦮ ꦥꦸꦫꦺꦨꦠ꧀ꦠꦏꦶꦕ꧀ꦕꦁ.

ꦄꦡ ꦨꦒꦮꦴ ꦌꦮꦁ ꦏꦠꦥꦸꦫꦺꦨꦠ꧀ꦠꦏꦶꦕ꧀ꦕꦺꦴ ꦒꦤ꧀ꦣꦏꦸꦛꦶꦪꦴ ꦈꦥꦛ꧀ꦜꦴꦤꦺ ꦤꦶꦱꦷꦢꦶꦠ꧀ꦮꦴ ꦥꦴꦢꦺ ꦥꦏ꧀ꦑꦴꦭꦺꦠ꧀ꦮꦴ ꦥꦴꦢꦥꦷꦜꦺ ꦜꦠ꧀ꦮꦴ ꦨꦶꦏ꧀ꦑꦸꦱꦔ꧀ꦓꦁ ꦎꦮꦢꦠꦶ – ‘‘ꦨꦶꦏ꧀ꦑꦮꦺ, ꦄꦥ꧀ꦥꦩꦴꦢꦺꦤ ꦱꦩ꧀ꦥꦴꦢꦺꦡ, ꦢꦸꦭ꧀ꦭꦨꦺꦴ ꦧꦸꦢ꧀ꦣꦸꦥ꧀ꦥꦴꦢꦺꦴ ꦭꦺꦴꦏꦱ꧀ꦩꦶꦁ, ꦢꦸꦭ꧀ꦭꦨꦺꦴ ꦩꦤꦸꦱ꧀ꦱꦠ꧀ꦠꦥꦛꦶꦭꦴꦨꦺꦴ, ꦢꦸꦭ꧀ꦭꦨꦴ ꦱꦩ꧀ꦥꦠ꧀ꦠꦶ, ꦢꦸꦭ꧀ꦭꦨꦴ ꦥꦧ꧀ꦧꦗ꧀ꦗꦴ, ꦢꦸꦭ꧀ꦭꦨꦁ ꦱꦢ꧀ꦣꦩ꧀ꦩꦱ꧀ꦱꦮꦤ’’ꦤ꧀ꦠꦶ. ꦠꦠ꧀ꦡ ꦏꦺꦕꦶ ꦨꦒꦮꦤ꧀ꦠꦁ ꦏꦩ꧀ꦩꦛ꧀ꦜꦴꦤꦁ ꦥꦸꦕ꧀ꦖꦤ꧀ꦠꦶ. ꦨꦒꦮꦴꦥꦶ ꦠꦺꦱꦁ ꦕꦫꦶꦪꦴꦤꦸꦫꦹꦥꦁ ꦏꦩ꧀ꦩꦛ꧀ꦜꦴꦤꦁ ꦢꦺꦠꦶ. ꦠꦠꦺꦴ ꦱꦧ꧀ꦧꦺꦥꦶ ꦨꦒꦮꦤ꧀ꦠꦁ ꦮꦤ꧀ꦢꦶꦠ꧀ꦮꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦫꦠ꧀ꦠꦶꦛ꧀ꦜꦴꦤꦢꦶꦮꦴꦛ꧀ꦜꦴꦤꦴꦤꦶ ꦒꦕ꧀ꦖꦤ꧀ꦠꦶ. ꦏꦺꦕꦶ ꦄꦫꦚ꧀ꦚꦁ, ꦏꦺꦕꦶ ꦫꦸꦏ꧀ꦑꦩꦹꦭꦁ, ꦏꦺꦕꦶ ꦥꦧ꧀ꦧꦠꦴꦢꦷꦤꦁ ꦄꦚ꧀ꦚꦠꦫꦁ, ꦏꦺꦕꦶ ꦕꦴꦠꦸꦩꦲꦴꦫꦴꦗꦶꦏꦨꦮꦤꦁ…ꦥꦺ… ꦏꦺꦕꦶ ꦮꦱꦮꦠ꧀ꦠꦶꦨꦮꦤꦤ꧀ꦠꦶ. ꦠꦠꦺꦴ ꦨꦒꦮꦴ ꦒꦤ꧀ꦣꦏꦸꦛꦶꦁ ꦥꦮꦶꦱꦶꦠ꧀ꦮꦴ ꦱꦕꦺ ꦄꦴꦏꦔ꧀ꦑꦠꦶ, ꦢꦏ꧀ꦑꦶꦟꦺꦤ ꦥꦱ꧀ꦱꦺꦤ ꦱꦠꦺꦴ ꦱꦩ꧀ꦥꦗꦴꦤꦺꦴ ꦩꦸꦲꦸꦠ꧀ꦠꦁ ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦠꦶ. ꦄꦡ ꦱꦩꦱ꧀ꦱꦴꦱꦶꦠꦏꦴꦪꦺꦴ ꦮꦸꦛ꧀ꦜꦲꦶꦠ꧀ꦮꦴ ꦢꦸꦠꦶꦪꦨꦴꦒꦺ ꦭꦺꦴꦏꦁ ꦮꦺꦴꦭꦺꦴꦏꦺꦠꦶ. ꦠꦠꦶꦪꦨꦴꦒꦺ ꦪꦁ ꦒꦴꦩꦁ ꦮꦴ ꦤꦶꦒꦩꦁ ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦠꦶ ꦠꦠ꧀ꦡ ꦩꦲꦴꦗꦤꦺꦴ ꦥꦸꦫꦺꦨꦠ꧀ꦠꦁ ꦢꦴꦤꦁ ꦢꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦱꦸꦤꦶꦮꦠ꧀ꦡꦺꦴ ꦱꦸꦥꦴꦫꦸꦠꦺꦴ ꦒꦤ꧀ꦣꦥꦸꦥ꧀ꦦꦴꦢꦷꦤꦶ ꦄꦴꦢꦴꦪ ꦮꦶꦲꦴꦫꦺ ꦱꦤ꧀ꦤꦶꦥꦠꦠꦶ. ꦠꦠꦺꦴ ꦨꦒꦮꦴ ꦱꦩ꧀ꦥꦠ꧀ꦠꦥꦫꦶꦱꦴꦪ ꦄꦤꦸꦫꦹꦥꦺꦤ ꦥꦴꦛꦶꦲꦴꦫꦶꦪꦺꦤ ꦒꦤ꧀ꦠ꧀ꦮꦴ ꦣꦩ꧀ꦩꦱꦨꦴꦪꦁ ꦥꦚ꧀ꦚꦠ꧀ꦠꦮꦫꦧꦸꦢ꧀ꦣꦴꦱꦤꦺ ꦤꦶꦱꦗ꧀ꦗ ꦣꦩ꧀ꦩꦁ ꦢꦺꦱꦺꦠꦶ ꦏꦴꦭꦪꦸꦠ꧀ꦠꦁ ꦱꦩꦪꦪꦸꦠ꧀ꦠꦁ, ꦄꦡ ꦏꦴꦭꦁ ꦮꦶꦢꦶꦠ꧀ꦮꦴ ꦥꦫꦶꦱꦁ ꦈꦪ꧀ꦪꦺꦴꦗꦺꦠꦶ, ꦩꦤꦸꦱ꧀ꦱꦴ ꦨꦒꦮꦤ꧀ꦠꦁ ꦮꦤ꧀ꦢꦶꦠ꧀ꦮꦴ ꦥꦏ꧀ꦏꦩꦤ꧀ꦠꦶ. ꦆꦢꦁ ꦥꦕ꧀ꦖꦴꦨꦠ꧀ꦠꦏꦶꦕ꧀ꦕꦁ.

ꦱꦺꦴ ꦌꦮꦁ ꦤꦶꦛ꧀ꦜꦶꦠꦥꦕ꧀ꦖꦴꦨꦠ꧀ꦠꦏꦶꦕ꧀ꦕꦺꦴ ꦱꦕꦺ ꦒꦠ꧀ꦠꦴꦤꦶ ꦎꦱꦶꦚ꧀ꦕꦶꦠꦸꦏꦴꦩꦺꦴ ꦲꦺꦴꦠꦶ, ꦧꦸꦢ꧀ꦣꦴꦱꦤꦴ ꦮꦸꦛ꧀ꦜꦴꦪ ꦤ꧀ꦲꦴꦤꦏꦺꦴꦛ꧀ꦜꦏꦁ ꦥꦮꦶꦱꦶꦠ꧀ꦮꦴ ꦈꦥꦛ꧀ꦜꦴꦏꦺꦤ ꦥꦛꦶꦪꦴꦢꦶꦠꦈꦢꦏꦺꦤ ꦒꦠ꧀ꦠꦴꦤꦶ ꦈꦠꦸꦁ ꦒꦟ꧀ꦲꦴꦥꦺꦠꦶ. ꦈꦥꦛ꧀ꦜꦴꦏꦺꦴꦥꦶ ꦧꦸꦢ꧀ꦣꦴꦱꦤꦁ ꦄꦴꦤꦺꦠ꧀ꦮꦴ ꦒꦤ꧀ꦣꦏꦸꦛꦶꦥꦫꦶꦮꦺꦟꦺ ꦥꦚ꧀ꦚꦥꦺꦠꦶ. ꦨꦒꦮꦴ ꦱꦸꦫꦠ꧀ꦠꦢꦸꦥꦛ꧀ꦛꦁ ꦤꦶꦮꦴꦱꦺꦠ꧀ꦮꦴ ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ ꦈꦠ꧀ꦠꦫꦴꦱꦔ꧀ꦒꦁ ꦌꦏꦁꦱꦁ ꦏꦫꦶꦠ꧀ꦮꦴ ꦠꦠ꧀ꦡ ꦒꦤ꧀ꦠ꧀ꦮꦴ ꦤꦶꦱꦷꦢꦠꦶ ꦌꦏꦏꦺꦴꦮ ꦩꦸꦲꦸꦠ꧀ꦠꦁ ꦥꦛꦶꦱꦭ꧀ꦭꦷꦤꦺꦴ, ꦄꦡ ꦨꦶꦏ꧀ꦑꦹ ꦠꦠꦺꦴ ꦠꦠꦺꦴ ꦄꦴꦒꦩ꧀ꦩ ꦨꦒꦮꦠꦺꦴ ꦈꦥꦛ꧀ꦜꦴꦤꦁ ꦄꦴꦒꦕ꧀ꦖꦤ꧀ꦠꦶ. ꦠꦠ꧀ꦡ ꦌꦏꦕ꧀ꦕꦺ ꦥꦚ꧀ꦲꦁ ꦥꦸꦕ꧀ꦖꦤ꧀ꦠꦶ, ꦌꦏꦕ꧀ꦕꦺ ꦏꦩ꧀ꦩꦛ꧀ꦜꦴꦤꦁ, ꦌꦏꦕ꧀ꦕꦺ ꦣꦩ꧀ꦩꦱ꧀ꦱꦮꦤꦁ ꦪꦴꦕꦤ꧀ꦠꦶ. ꦨꦒꦮꦴ ꦠꦺꦱꦁ ꦄꦣꦶꦥ꧀ꦥꦴꦪꦁ ꦱꦩ꧀ꦥꦴꦢꦺꦤ꧀ꦠꦺꦴ ꦥꦸꦫꦶꦩꦪꦴꦩꦁ ꦮꦷꦠꦶꦤꦴꦩꦺꦠꦶ. ꦆꦢꦁ ꦥꦸꦫꦶꦩꦪꦴꦩꦏꦶꦕ꧀ꦕꦁ.

ꦥꦸꦫꦶꦩꦪꦴꦩꦏꦶꦕ꧀ꦕꦥꦫꦶꦪꦺꦴꦱꦴꦤꦺ ꦥꦤ ꦨꦶꦏ꧀ꦑꦹꦱꦸ ꦨꦒꦮꦤ꧀ꦠꦁ ꦮꦤ꧀ꦢꦶꦠ꧀ꦮꦴ ꦥꦏ꧀ꦏꦤ꧀ꦠꦺꦱꦸ ꦱꦏꦭꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦢꦺꦮꦠꦴꦪꦺꦴ ꦎꦏꦴꦱꦁ ꦭꦨꦩꦴꦤꦴ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦲꦁ ꦥꦸꦕ꧀ꦖꦤ꧀ꦠꦶ, ꦪꦡꦴꦨꦶꦱꦔ꧀ꦑꦠꦁ ꦄꦤ꧀ꦠꦩꦱꦺꦴ ꦕꦠꦸꦫꦏ꧀ꦑꦫꦩ꧀ꦥꦶ. ꦨꦒꦮꦴ ꦠꦴꦱꦁ ꦢꦺꦮꦠꦴꦤꦁ ꦥꦚ꧀ꦲꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦩꦗ꧀ꦙꦶꦩꦪꦴꦩꦁ ꦮꦷꦠꦶꦤꦴꦩꦺꦠꦶ. ꦆꦢꦁ ꦩꦗ꧀ꦙꦶꦩꦪꦴꦩꦏꦶꦕ꧀ꦕꦁ.

ꦥꦕ꧀ꦖꦶꦩꦪꦴꦩꦁ ꦥꦤ ꦠꦪꦺꦴ ꦏꦺꦴꦛ꧀ꦜꦴꦱꦺ ꦏꦠ꧀ꦮꦴ ꦥꦸꦫꦺꦨꦠ꧀ꦠꦠꦺꦴ ꦥꦛ꧀ꦜꦴꦪ ꦤꦶꦱꦗ꧀ꦗꦴꦪ ꦥꦷꦭ꦳ꦶꦠꦱ꧀ꦱ ꦱꦫꦷꦫꦱ꧀ꦱ ꦏꦶꦭꦴꦱꦸꦨꦴꦮꦩꦺꦴꦕꦤꦠ꧀ꦡꦁ ꦌꦏꦁ ꦏꦺꦴꦛ꧀ꦜꦴꦱꦁ ꦕꦔ꧀ꦏꦩꦺꦤ ꦮꦷꦠꦶꦤꦴꦩꦺꦠꦶ. ꦢꦸꦠꦶꦪꦏꦺꦴꦛ꧀ꦜꦴꦱꦺ ꦒꦤ꧀ꦣꦏꦸꦛꦶꦁ ꦥꦮꦶꦱꦶꦠ꧀ꦮꦴ ꦢꦏ꧀ꦑꦶꦟꦺꦤ ꦥꦱ꧀ꦱꦺꦤ ꦱꦠꦺꦴ ꦱꦩ꧀ꦥꦗꦴꦤꦺꦴ ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦠꦶ. ꦠꦠꦶꦪꦏꦺꦴꦛ꧀ꦜꦴꦱꦺ ꦥꦕ꧀ꦕꦸꦛ꧀ꦜꦴꦪ ꦤꦶꦱꦷꦢꦶꦠ꧀ꦮꦴ ꦥꦸꦫꦶꦩꦧꦸꦢ꧀ꦣꦴꦤꦁ ꦱꦤ꧀ꦠꦶꦏꦺ ꦢꦴꦤꦱꦷꦭꦴꦢꦶꦮꦱꦺꦤ ꦏꦠꦴꦣꦶꦏꦴꦫꦥꦸꦒ꧀ꦒꦭꦢꦱ꧀ꦱꦤꦠ꧀ꦡꦁ ꦧꦸꦢ꧀ꦣꦕꦏ꧀ꦑꦸꦤꦴ ꦭꦺꦴꦏꦁ ꦮꦺꦴꦭꦺꦴꦏꦺꦠꦶ. ꦆꦢꦁ ꦥꦕ꧀ꦖꦶꦩꦪꦴꦩꦏꦶꦕ꧀ꦕꦁ.

ꦠꦱ꧀ꦩꦶꦁ ꦥꦤ ꦢꦶꦮꦱꦺ ꦨꦒꦮꦴ ꦥꦸꦫꦺꦨꦠ꧀ꦠꦏꦶꦕ꧀ꦕꦁ ꦫꦴꦗꦒꦲꦺ ꦥꦫꦶꦪꦺꦴꦱꦴꦥꦺꦠ꧀ꦮꦴ ꦥꦕ꧀ꦖꦴꦨꦠ꧀ꦠꦺ ꦩꦒ꧀ꦒꦁ ꦄꦴꦒꦠꦺꦴ, ꦥꦸꦫꦶꦩꦪꦴꦩꦺ ꦨꦶꦏ꧀ꦑꦹꦤꦁ ꦏꦩ꧀ꦩꦛ꧀ꦜꦴꦤꦁ ꦏꦡꦺꦠ꧀ꦮꦴ, ꦩꦗ꧀ꦙꦶꦩꦪꦴꦩꦺ ꦢꦺꦮꦠꦴꦤꦁ ꦥꦚ꧀ꦲꦁ ꦮꦶꦱ꧀ꦱꦗ꧀ꦗꦺꦠ꧀ꦮꦴ, ꦥꦕ꧀ꦖꦶꦩꦪꦴꦩꦺ ꦕꦔ꧀ꦏꦩꦁ ꦄꦴꦫꦸꦪ꧀ꦲ ꦕꦔ꧀ꦏꦩꦩꦴꦤꦺꦴ ꦥꦚ꧀ꦕꦤ꧀ꦤꦁ ꦨꦶꦏ꧀ꦑꦸꦱꦠꦴꦤꦁ ꦆꦩꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦄꦴꦫꦧ꧀ꦨ ꦥꦮꦠ꧀ꦠꦁ ꦏꦡꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦺꦤꦺꦮ ꦱꦸꦠ꧀ꦮꦴ ꦄꦚ꧀ꦚꦴꦱꦷꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦥꦕ꧀ꦖꦶꦩꦪꦴꦩꦏꦶꦕ꧀ꦕꦁ ꦏꦫꦺꦴꦤ꧀ꦠꦺꦴ ꦄꦚ꧀ꦚꦴꦱꦷ’’ꦠꦶ.

ꦚꦠ꧀ꦮꦴ ꦕ ꦥꦤꦱ꧀ꦱ ꦌꦠꦢꦲꦺꦴꦱꦶ – ‘‘ꦆꦩꦺ ꦨꦶꦏ꧀ꦑꦹ ꦩꦪ꧀ꦲꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦄꦴꦫꦧ꧀ꦨ ꦒꦸꦟꦁ ꦏꦡꦺꦤ꧀ꦠꦶ, ꦌꦠꦺꦱꦚ꧀ꦕ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦏꦶꦕ꧀ꦕꦁ ꦤ ꦥꦴꦏꦛꦁ, ꦩꦪ꧀ꦲꦩꦺꦮ ꦥꦴꦏꦛꦁ. ꦩꦪꦶ ꦥꦤ ꦒꦠꦺ ꦌꦠꦺ ꦄꦠ꧀ꦠꦤꦺꦴ ꦏꦡꦁ ꦤꦶꦫꦤ꧀ꦠꦫꦁ ꦄꦴꦫꦺꦴꦕꦺꦱ꧀ꦱꦤ꧀ꦠꦶ, ꦠꦠꦺꦴ ꦤꦺꦱꦁ ꦄꦲꦁ ꦠꦁ ꦄꦛ꧀ꦜꦸꦥ꧀ꦥꦠ꧀ꦠꦶꦁ ꦏꦠ꧀ꦮꦴ ꦠꦶꦮꦶꦣꦁ ꦱꦷꦭꦁ ꦮꦶꦨꦗꦤ꧀ꦠꦺꦴ, ꦢ꧀ꦮꦴꦱꦛ꧀ꦜꦶꦪꦴ ꦜꦴꦤꦺꦱꦸ ꦄꦥ꧀ꦥꦛꦶꦮꦠ꧀ꦠꦶꦪꦁ ꦱꦷꦲꦤꦴꦢꦁ ꦤꦢꦤ꧀ꦠꦺꦴ, ꦥꦕ꧀ꦕꦪꦴꦏꦴꦫꦁ ꦱꦩꦺꦴꦣꦴꦤꦺꦠ꧀ꦮꦴ ꦧꦸꦢ꧀ꦣꦒꦸꦟꦺ ꦥꦴꦏꦛꦺ ꦏꦠ꧀ꦮꦴ, ꦱꦶꦤꦺꦫꦸꦁ ꦈꦏ꧀ꦑꦶꦥꦺꦤ꧀ꦠꦺꦴ ꦮꦶꦪ ꦱꦸꦮꦟ꧀ꦟꦏꦹꦛꦺꦤ ꦤꦨꦁ ꦥꦲꦫꦤ꧀ꦠꦺꦴ ꦮꦶꦪ ꦕ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦏꦩ꧀ꦥꦤꦁ ꦧ꧀ꦫꦲ꧀ꦩꦗꦴꦭꦱꦸꦠ꧀ꦠꦤ꧀ꦠꦁ ꦄꦫꦲꦠ꧀ꦠꦤꦶꦏꦹꦛꦺꦤ ꦤꦶꦛ꧀ꦜꦴꦥꦺꦤ꧀ꦠꦺꦴ ꦢꦺꦱꦺꦱ꧀ꦱꦴꦩꦶ, ꦱꦴ ꦩꦺ ꦢꦺꦱꦤꦴ ꦥꦫꦶꦤꦶꦧ꧀ꦧꦸꦠꦱ꧀ꦱꦴꦥꦶ ꦥꦚ꧀ꦕꦮꦱ꧀ꦱꦱꦲꦱ꧀ꦱꦴꦤꦶ ꦱꦠ꧀ꦠꦴꦤꦁ ꦄꦩꦠꦩꦲꦴꦤꦶꦧ꧀ꦧꦴꦤꦁ ꦱꦩ꧀ꦥꦴꦥꦶꦏꦴ ꦨꦮꦶꦱ꧀ꦱꦠꦷ’’ꦠꦶ. ꦌꦮꦁ ꦕꦶꦤ꧀ꦠꦺꦠ꧀ꦮꦴ ꦪꦺꦤ ꦩꦟ꧀ꦝꦭꦩꦴꦭ꦳ꦺꦴ ꦠꦺꦤꦸꦥꦱꦔ꧀ꦏꦩꦷꦠꦶ. ꦪꦺꦤꦴꦠꦶ ꦪꦺꦤ ꦢꦶꦱꦴꦨꦴꦒꦺꦤ, ꦱꦺꦴ ꦈꦥꦱꦔ꧀ꦏꦩꦶꦠꦧ꧀ꦧꦺꦴ. ꦨꦸꦩ꧀ꦩꦠ꧀ꦡꦺ ꦮꦴ ꦌꦠꦁ ꦏꦫꦟꦮꦕꦤꦁ, ꦪꦱ꧀ꦩꦶꦁ ꦥꦢꦺꦱꦺ ꦱꦺꦴ ꦩꦟ꧀ꦝꦭꦩꦴꦭ꦳ꦺꦴ, ꦠꦠ꧀ꦡ ꦒꦠꦺꦴꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴ.

ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦷꦠꦶ ꦧꦸꦢ꧀ꦣꦏꦴꦭꦺ ꦏꦶꦫ ꦪꦠ꧀ꦡ ꦪꦠ꧀ꦡ ꦌꦏꦺꦴꦥꦶ ꦨꦶꦏ꧀ꦑꦸ ꦮꦶꦲꦫꦠꦶ ꦱꦧ꧀ꦧꦠ꧀ꦡ ꦧꦸꦢ꧀ꦣꦴꦱꦤꦁ ꦥꦚ꧀ꦚꦠ꧀ꦠꦩꦺꦮ ꦲꦺꦴꦠꦶ. ꦏꦱ꧀ꦩꦴ? ꦨꦒꦮꦴ ꦏꦶꦫ ꦄꦠ꧀ꦠꦤꦺꦴ ꦱꦤ꧀ꦠꦶꦏꦺ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦦꦴꦱꦸꦏꦛ꧀ꦜꦴꦤꦺ ꦮꦶꦲꦫꦤ꧀ꦠꦺ ꦩꦤꦱꦶ ꦏꦫꦺꦴꦠꦶ – ‘‘ꦄꦱꦸꦏꦺꦴ ꦩꦪ꧀ꦲꦁ ꦱꦤ꧀ꦠꦶꦏꦺ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦒꦠꦺꦴ, ꦱꦏ꧀ꦑꦶꦱ꧀ꦱꦠꦶ ꦤꦸ ꦑꦺꦴ ꦮꦶꦱꦺꦱꦁ ꦤꦶꦧ꧀ꦧꦠ꧀ꦠꦺꦠꦸꦁ ꦤꦺꦴ ꦮꦴ’’ꦠꦶ. ꦄꦡ ꦤꦁ ꦥꦱ꧀ꦱꦠꦶ ꦏꦩ꧀ꦩꦛ꧀ꦜꦴꦤꦁ ꦮꦶꦱ꧀ꦱꦗ꧀ꦗꦺꦠ꧀ꦮꦴ ꦄꦏꦸꦱꦭꦮꦶꦠꦏ꧀ꦏꦁ ꦮꦶꦠꦏ꧀ꦏꦪꦩꦴꦤꦁ, ꦠꦠꦺꦴ ‘‘ꦏꦡꦚ꧀ꦲꦶ ꦤꦴꦩ ꦩꦴꦢꦶꦱꦱ꧀ꦱ ꦱꦠ꧀ꦡꦸ ꦱꦤ꧀ꦠꦶꦏꦺ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦮꦶꦲꦫꦤ꧀ꦠꦁ ꦆꦩꦁ ꦏꦸꦭꦥꦸꦠ꧀ꦠꦁ ꦄꦏꦸꦱꦭꦮꦶꦠꦏ꧀ꦏꦴ ꦄꦨꦶꦨꦮꦶꦠ꧀ꦮꦴ ꦄꦤꦩꦠꦒ꧀ꦒꦺ ꦮꦛ꧀ꦛꦢꦸꦏ꧀ꦑꦺ ꦱꦁꦱꦴꦫꦺꦱ꧀ꦱꦤ꧀ꦠꦷ’’ꦠꦶ ꦠꦱ꧀ꦱ ꦄꦤꦸꦒ꧀ꦒꦲꦠ꧀ꦡꦁ ꦠꦠ꧀ꦡꦺꦮ ꦄꦠ꧀ꦠꦴꦤꦁ ꦢꦱ꧀ꦱꦺꦠ꧀ꦮꦴ ꦠꦁ ꦏꦸꦭꦥꦸꦠ꧀ꦠꦁ ꦎꦮꦢꦶꦠ꧀ꦮꦴ ꦄꦴꦏꦴꦱꦁ ꦈꦥ꧀ꦥꦠꦶꦠ꧀ꦮꦴ ꦥꦸꦤ ꦄꦠ꧀ꦠꦤꦺꦴ ꦮꦱꦤꦛ꧀ꦜꦴꦤꦩꦺꦮ ꦒꦕ꧀ꦖꦠꦶ. ꦄꦡꦺꦮꦁ ꦎꦮꦢꦶꦪꦩꦴꦤꦴ ꦠꦺ ꦨꦶꦏ꧀ꦑꦹ ꦕꦶꦤ꧀ꦠꦪꦶꦁꦱꦸ – ‘‘ꦱꦠ꧀ꦡꦴ ꦄꦩ꧀ꦲꦴꦏꦁ ꦩꦤꦁ ꦗꦴꦤꦶꦠ꧀ꦮꦴ ꦄꦴꦒꦤ꧀ꦠ꧀ꦮꦴ ꦄꦩ꧀ꦲꦴꦏꦁ ꦱꦩꦷꦥꦺ ꦜꦶꦠꦁꦪꦺꦮ ꦄꦠ꧀ꦠꦴꦤꦁ ꦢꦱ꧀ꦱꦺꦠꦶ’’. ꦠꦱ꧀ꦩꦶꦁ ꦑꦟꦺ – ‘‘ꦨꦤ꧀ꦠꦺ, ꦆꦣ ꦤꦶꦱꦷꦢꦡ, ꦆꦣ ꦤꦶꦱꦷꦢꦡꦴ’’ꦠꦶ ꦄꦴꦱꦤꦥꦫꦶꦪꦺꦱꦤꦁ ꦤꦴꦩ ꦨꦴꦫꦺꦴꦠꦶ. ꦠꦺ ꦄꦴꦱꦤꦁ ꦥꦚ꧀ꦚꦥꦺꦠ꧀ꦮꦴꦮ ꦮꦶꦲꦫꦤ꧀ꦠꦶ. ꦪꦱ꧀ꦱ ꦥꦷꦜꦁ ꦄꦠ꧀ꦡꦶ, ꦱꦺꦴ ꦠꦁ ꦥꦚ꧀ꦚꦥꦺꦠꦶ. ꦪꦱ꧀ꦱ ꦤꦠ꧀ꦡꦶ, ꦱꦺꦴ ꦩꦚ꧀ꦕꦁ ꦮꦴ ꦦꦭꦏꦁ ꦮꦴ ꦏꦛ꧀ꦜꦁ ꦮꦴ ꦥꦴꦱꦴꦟꦁ ꦮꦴ ꦮꦴꦭꦸꦏꦥꦸꦚ꧀ꦗꦁ ꦮꦴ ꦥꦚ꧀ꦚꦥꦺꦠꦶ. ꦠꦁ ꦄꦭꦨꦩꦴꦤꦴ ꦥꦸꦫꦴꦟꦥꦟ꧀ꦟꦴꦤꦶꦥꦶ ꦱꦔ꧀ꦏꦝ꧀ꦞꦶꦠ꧀ꦮꦴ ꦠꦠ꧀ꦡ ꦥꦁꦱꦸꦏꦹꦭꦁ ꦥꦠ꧀ꦡꦫꦶꦠ꧀ꦮꦴ ꦜꦥꦺꦤ꧀ꦠꦶ. ꦆꦣ ꦥꦤ ꦫꦚ꧀ꦚꦺꦴ ꦤꦶꦱꦷꦢꦤꦴꦱꦤꦩꦺꦮ ꦄꦠ꧀ꦡꦶ, ꦠꦁ ꦥꦥ꧀ꦦꦺꦴꦛꦺꦠ꧀ꦮꦴ ꦥꦚ꧀ꦚꦥꦺꦠ꧀ꦮꦴ ꦥꦫꦶꦮꦴꦫꦺꦠ꧀ꦮꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦄꦣꦶꦩꦸꦠ꧀ꦠꦶꦏꦚꦴꦟꦩꦴꦫꦧ꧀ꦨ ꦒꦸꦟꦁ ꦡꦺꦴꦩꦪꦩꦴꦤꦴ ꦤꦶꦱꦷꦢꦶꦁꦱꦸ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ – ‘‘ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦷ’’ꦠꦶ.

ꦌꦮꦁ ꦤꦶꦱꦶꦤ꧀ꦤꦺꦴ ꦥꦤ ꦗꦴꦤꦤ꧀ꦠꦺꦴꦪꦺꦮ ꦏꦡꦴꦱꦩꦸꦛ꧀ꦜꦴꦥꦤꦠ꧀ꦡꦁ ꦨꦶꦏ꧀ꦑꦹ ꦥꦸꦕ꧀ꦖꦶ. ꦠꦺ ꦕꦱ꧀ꦱ ꦱꦧ꧀ꦧꦁ ꦏꦡꦪꦶꦁꦱꦸ. ꦠꦺꦤ ꦮꦸꦠ꧀ꦠꦁ – ‘‘ꦤꦶꦱꦗ꧀ꦗ ꦑꦺꦴ ꦨꦒꦮꦴ’’ꦠꦶꦄꦴꦢꦶ. ꦠꦠ꧀ꦡ ꦏꦴꦪ ꦤꦸꦠ꧀ꦡꦴꦠꦶ ꦏꦠꦩꦴꦪ ꦤꦸ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ ꦨꦮꦡꦴꦠꦶ ꦄꦠ꧀ꦡꦺꦴ. ꦏꦴꦪ ꦤꦺꦠ꧀ꦡꦴꦠꦶꦥꦶ ꦥꦴꦭ꦳ꦶ, ꦠꦱ꧀ꦱꦴ ꦏꦠꦩꦴꦪ ꦤꦸ ꦌꦠ꧀ꦡꦴꦠꦶ ꦄꦠ꧀ꦡꦺꦴ ꦏꦴꦪ ꦤꦺꦴꦠ꧀ꦡꦴꦠꦶꦥꦶ ꦥꦴꦭ꦳ꦶ. ꦠꦱ꧀ꦱꦴꦥꦶ ꦥꦸꦫꦶꦩꦺꦴꦪꦺꦮ ꦄꦠ꧀ꦡꦺꦴ.

ꦄꦤ꧀ꦠꦫꦴꦏꦡꦴꦠꦶ, ꦏꦩ꧀ꦩꦛ꧀ꦜꦴꦤꦩꦤꦱꦶꦏꦴꦫꦈꦢ꧀ꦢꦺꦱꦥꦫꦶꦥꦸꦕ꧀ꦖꦴꦢꦷꦤꦁ ꦄꦤ꧀ꦠꦫꦴ ꦄꦚ꧀ꦚꦴ ꦌꦏꦴ ꦏꦡꦴ. ꦮꦶꦥ꧀ꦥꦏꦠꦴꦠꦶ, ꦩꦩ ꦄꦴꦒꦩꦤꦥꦕ꧀ꦕꦪꦴ ꦄꦥꦫꦶꦤꦶꦛ꧀ꦜꦶꦠꦴ ꦱꦶꦑꦁ ꦄꦥ꧀ꦥꦠ꧀ꦠꦴ. ꦠꦺꦤ ꦏꦶꦁ ꦢꦱ꧀ꦱꦺꦠꦶ? ‘‘ꦤꦴꦲꦁ ꦠꦸꦩ꧀ꦲꦴꦏꦁ ꦏꦡꦴꦨꦔ꧀ꦒꦠ꧀ꦡꦁ ꦄꦴꦒꦠꦺꦴ, ꦄꦲꦁ ꦥꦤ ꦱꦧ꧀ꦧꦚ꧀ꦚꦸꦠꦴꦪ ꦠꦸꦩ꧀ꦲꦴꦏꦁ ꦏꦡꦁ ꦤꦶꦛ꧀ꦜꦴꦥꦺꦠ꧀ꦮꦴ ꦩꦠ꧀ꦡꦏꦥ꧀ꦥꦠ꧀ꦠꦁ ꦏꦠ꧀ꦮꦴ ꦢꦱ꧀ꦱꦴꦩꦷꦠꦶ ꦄꦴꦒꦠꦺꦴ’’ꦠꦶ ꦤꦶꦱꦗ꧀ꦗꦺꦮ ꦱꦧ꧀ꦧꦚ꧀ꦚꦸꦥꦮꦴꦫꦟꦁ ꦥꦮꦴꦫꦺꦠꦶ. ꦄꦪꦁ ꦑꦺꦴ ꦤꦺꦴ, ꦨꦤ꧀ꦠꦺ, ꦄꦤ꧀ꦠꦫꦴꦏꦡꦴ ꦮꦶꦥ꧀ꦥꦏꦠꦴ, ꦄꦡ ꦨꦒꦮꦴ ꦄꦤꦸꦥ꧀ꦥꦠ꧀ꦠꦺꦴꦠꦶ ꦌꦠ꧀ꦡꦴꦥꦶ ꦄꦪꦩꦣꦶꦥ꧀ꦥꦴꦪꦺꦴ. ꦄꦪꦁ ꦨꦤ꧀ꦠꦺ ꦄꦩ꧀ꦲꦴꦏꦁ ꦨꦒꦮꦠꦺꦴ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦄꦴꦫꦧ꧀ꦨ ꦒꦸꦟꦏꦡꦴ ꦮꦶꦥ꧀ꦥꦏꦠꦴ, ꦤ ꦫꦴꦗꦏꦡꦴꦢꦶꦏꦴ ꦠꦶꦫꦕ꧀ꦖꦴꦤꦏꦡꦴ, ꦄꦡ ꦨꦒꦮꦴ ꦄꦤꦸꦥ꧀ꦥꦠ꧀ꦠꦺꦴ; ꦠꦁ ꦤꦺꦴ ꦆꦢꦴꦤꦶ ꦤꦶꦛ꧀ꦜꦴꦥꦺꦠ꧀ꦮꦴ ꦢꦺꦱꦺꦡꦴꦠꦶ.

ꦌꦠ꧀ꦠꦴꦮꦠꦴ ꦕ ꦪꦁ ꦄꦴꦪꦱ꧀ꦩꦠꦴ ꦄꦴꦤꦤ꧀ꦢꦺꦤ ꦏꦩꦭꦏꦸꦮꦭꦪꦸꦗ꧀ꦗꦭꦮꦶꦩꦭꦱꦴꦣꦸꦫꦱꦱꦭꦶꦭꦴꦪ ꦥꦺꦴꦏ꧀ꦑꦫꦟꦶꦪꦴ ꦱꦸꦑꦴꦮꦠꦫꦟꦠ꧀ꦡꦁ ꦤꦶꦩ꧀ꦩꦭꦱꦶꦭꦴꦠꦭꦫꦕꦤꦮꦶꦭꦴꦱꦱꦺꦴꦨꦶꦠꦫꦠꦤꦱꦺꦴꦥꦴꦤꦁ, ꦮꦶꦥ꧀ꦥꦏꦶꦟ꧀ꦟꦩꦸꦠ꧀ꦠꦴꦠꦭꦱꦢꦶꦱꦮꦴꦭꦸꦏꦴꦏꦶꦟ꧀ꦟꦥꦟ꧀ꦝꦫꦨꦹꦩꦶꦨꦴꦒꦁ ꦠꦶꦠ꧀ꦡꦁ ꦮꦶꦪ ꦱꦸꦮꦶꦨꦠ꧀ꦠꦨꦶꦠ꧀ꦠꦶꦮꦶꦕꦶꦠ꧀ꦫꦮꦺꦢꦶꦏꦴꦥꦫꦶꦏ꧀ꦑꦶꦠ꧀ꦠꦱ꧀ꦱ ꦤꦏ꧀ꦑꦠ꧀ꦠꦥꦡꦁ ꦦꦸꦱꦶꦠꦸꦏꦴꦩꦠꦴꦪ ꦮꦶꦪ, ꦮꦶꦗꦩ꧀ꦨꦶꦠꦱꦩꦸꦱ꧀ꦱꦪꦱ꧀ꦱ ꦥꦴꦱꦴꦢꦮꦫꦱ꧀ꦱ ꦱꦸꦑꦴꦫꦺꦴꦲꦟꦠ꧀ꦡꦁ ꦢꦤ꧀ꦠꦩꦪꦱꦟ꧀ꦲꦩꦸꦢꦸꦦꦭꦏꦏꦚ꧀ꦕꦤꦭꦠꦴꦮꦶꦤꦢ꧀ꦣꦩꦟꦶꦒꦟꦥ꧀ꦥꦨꦴꦱꦩꦸꦢꦪꦸꦗ꧀ꦗꦭꦱꦺꦴꦨꦁ ꦱꦺꦴꦥꦴꦤꦁ ꦮꦶꦪ, ꦱꦸꦮꦟ꧀ꦟꦮꦭꦪꦤꦹꦥꦸꦫꦴꦢꦶꦱꦔ꧀ꦓꦛ꧀ꦛꦤꦱꦢ꧀ꦢꦱꦩ꧀ꦩꦶꦱ꧀ꦱꦶꦠꦏꦡꦶꦠꦲꦱꦶꦠꦩꦣꦸꦫꦱ꧀ꦱꦫꦒꦺꦲꦗꦤꦮꦶꦕꦫꦶꦠꦱ꧀ꦱ ꦈꦭ꦳ꦴꦫꦶꦱ꧀ꦱꦫꦶꦮꦶꦨꦮꦱꦺꦴꦨꦶꦠꦱ꧀ꦱ ꦩꦲꦴꦓꦫꦱ꧀ꦱ ꦱꦸꦑꦥ꧀ꦥꦮꦺꦱꦤꦠ꧀ꦡꦁ ꦱꦸꦮꦟ꧀ꦟꦫꦗꦠꦩꦟꦶꦩꦸꦠ꧀ꦠꦥꦮꦴꦭ꦳ꦴꦢꦶꦗꦸꦠꦶꦮꦶꦱ꧀ꦱꦫꦮꦶꦗ꧀ꦗꦺꦴꦠꦶꦠꦱꦸꦥ꧀ꦥꦠꦶꦛ꧀ꦜꦶꦠꦮꦶꦱꦴꦭꦢ꧀ꦮꦴꦫꦧꦴꦲꦁ ꦩꦲꦴꦢ꧀ꦮꦴꦫꦁ ꦮꦶꦪ ꦕ ꦄꦠ꧀ꦡꦧ꧀ꦪꦚ꧀ꦗꦤꦱꦩ꧀ꦥꦤ꧀ꦤꦱ꧀ꦱ ꦧꦸꦢ꧀ꦣꦒꦸꦟꦴꦤꦸꦨꦴꦮꦱꦁꦱꦹꦕꦏꦱ꧀ꦱ ꦆꦩꦱ꧀ꦱ ꦱꦸꦠ꧀ꦠꦱ꧀ꦱ ꦱꦸꦑꦴꦮꦒꦲꦟꦠ꧀ꦡꦁ ꦏꦴꦭꦢꦺꦱꦢꦺꦱꦏꦮꦠ꧀ꦡꦸꦥꦫꦶꦱꦴꦥꦢꦺꦱꦥꦛꦶꦩꦟ꧀ꦝꦶꦠꦁ ꦤꦶꦢꦴꦤꦁ ꦨꦴꦱꦶꦠꦁ, ꦠꦱ꧀ꦱꦠ꧀ꦡꦮꦟ꧀ꦟꦤꦴ ꦱꦩꦠ꧀ꦠꦴꦠꦶ.

꧕. ꦆꦢꦴꦤꦶ – ‘‘ꦩꦩꦁ ꦮꦴ, ꦨꦶꦏ꧀ꦑꦮꦺ, ꦥꦫꦺ ꦄꦮꦟ꧀ꦟꦁ ꦨꦴꦱꦺꦪ꧀ꦪꦸ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦨꦒꦮꦠꦴ ꦤꦶꦏ꧀ꦑꦶꦠ꧀ꦠꦱ꧀ꦱ ꦱꦸꦠ꧀ꦠꦱ꧀ꦱ ꦮꦟ꧀ꦟꦤꦴꦪ ꦎꦏꦴꦱꦺꦴ ꦄꦤꦸꦥ꧀ꦥꦠ꧀ꦠꦺꦴ. ꦱꦴ ꦥꦤꦺꦱꦴ ꦱꦸꦠ꧀ꦠꦮꦟ꧀ꦟꦤꦴ. ꦪꦱ꧀ꦩꦴ ꦱꦸꦠ꧀ꦠꦤꦶꦏ꧀ꦑꦺꦥꦁ ꦮꦶꦕꦴꦫꦺꦠ꧀ꦮꦴ ꦮꦸꦕ꧀ꦕꦩꦴꦤꦴ ꦥꦴꦏꦛꦴ ꦲꦺꦴꦠꦶ, ꦠꦱ꧀ꦩꦴ ꦱꦸꦠ꧀ꦠꦤꦶꦏ꧀ꦑꦺꦥꦁ ꦠꦴꦮ ꦮꦶꦕꦴꦫꦪꦶꦱ꧀ꦱꦴꦩ. ꦕꦠ꧀ꦠꦴꦫꦺꦴ ꦲꦶ ꦱꦸꦠ꧀ꦠꦤꦶꦏ꧀ꦑꦺꦥꦴ – ꦄꦠ꧀ꦠꦗ꧀ꦙꦴꦱꦪꦺꦴ, ꦥꦫꦗ꧀ꦙꦴꦱꦪꦺꦴ, ꦥꦸꦕ꧀ꦖꦴꦮꦱꦶꦏꦺꦴ, ꦄꦛ꧀ꦜꦸꦥ꧀ꦥꦠ꧀ꦠꦶꦏꦺꦴꦠꦶ.

ꦠꦠ꧀ꦡ ꦪꦴꦤꦶ ꦱꦸꦠ꧀ꦠꦴꦤꦶ ꦨꦒꦮꦴ ꦥꦫꦺꦲꦶ ꦄꦤꦗ꧀ꦙꦶꦛ꧀ꦜꦺꦴ ꦏꦺꦮꦭꦁ ꦄꦠ꧀ꦠꦤꦺꦴ ꦄꦗ꧀ꦙꦴꦱꦪꦺꦤꦺꦮ ꦏꦡꦺꦱꦶ; ꦱꦺꦪ꧀ꦪꦡꦶꦢꦁ, ꦄꦴꦏꦔ꧀ꦑꦺꦪ꧀ꦪꦱꦸꦠ꧀ꦠꦁ, ꦮꦠ꧀ꦡꦱꦸꦠ꧀ꦠꦁ, ꦩꦲꦴꦱꦠꦶꦥꦛ꧀ꦜꦴꦤꦁ, ꦩꦲꦴꦱꦭ꦳ꦴꦪꦠꦤꦮꦶꦨꦔ꧀ꦒꦱꦸꦠ꧀ꦠꦁ, ꦄꦫꦶꦪꦮꦁꦱꦱꦸꦠ꧀ꦠꦁ, ꦱꦩ꧀ꦩꦥ꧀ꦥꦣꦴꦤꦱꦸꦠ꧀ꦠꦤ꧀ꦠꦲꦴꦫꦏꦺꦴ, ꦆꦢ꧀ꦣꦶꦥꦴꦢꦆꦤ꧀ꦢ꧀ꦫꦶꦪꦧꦭꦧꦺꦴꦗ꧀ꦙꦔ꧀ꦒꦩꦒ꧀ꦒꦔ꧀ꦒꦱꦸꦠ꧀ꦠꦤ꧀ꦠꦲꦴꦫꦏꦺꦴꦠꦶ ꦌꦮꦩꦴꦢꦷꦤꦶ; ꦠꦺꦱꦁ ꦄꦠ꧀ꦠꦗ꧀ꦙꦴꦱꦪꦺꦴ ꦤꦶꦏ꧀ꦑꦺꦥꦺꦴ.

ꦪꦴꦤꦶ ꦥꦤ ‘‘ꦥꦫꦶꦥꦏ꧀ꦏꦴ ꦑꦺꦴ ꦫꦴꦲꦸꦭꦱ꧀ꦱ ꦮꦶꦩꦸꦠ꧀ꦠꦶꦥꦫꦶꦥꦴꦕꦤꦶꦪꦴ ꦣꦩ꧀ꦩꦴ; ꦪꦁꦤꦹꦤꦴꦲꦁ ꦫꦴꦲꦸꦭꦁ ꦈꦠ꧀ꦠꦫꦶꦁ ꦄꦴꦱꦮꦴꦤꦁ ꦑꦪꦺ ꦮꦶꦤꦺꦪ꧀ꦪ’’ꦤ꧀ꦠꦶ; (ꦱꦁ. ꦤꦶ. ꧔.꧑꧒꧑) ꦌꦮꦁ ꦥꦫꦺꦱꦁ ꦄꦗ꧀ꦙꦴꦱꦪꦁ ꦑꦤ꧀ꦠꦶꦁ ꦩꦤꦁ ꦄꦨꦶꦤꦷꦲꦴꦫꦁ ꦧꦸꦗ꧀ꦙꦤꦨꦴꦮꦚ꧀ꦕ ꦄꦮꦺꦏ꧀ꦑꦶꦠ꧀ꦮꦴ ꦥꦫꦗ꧀ꦙꦴꦱꦪꦮꦱꦺꦤ ꦏꦡꦶꦠꦴꦤꦶ; ꦱꦺꦪ꧀ꦪꦡꦶꦢꦁ, ꦕꦹꦭ꦳ꦫꦴꦲꦸꦭꦺꦴꦮꦴꦢꦱꦸꦠ꧀ꦠꦁ, ꦩꦲꦴꦫꦴꦲꦸꦭꦺꦴꦮꦴꦢꦱꦸꦠ꧀ꦠꦁ, ꦣꦩ꧀ꦩꦕꦏ꧀ꦏꦥ꧀ꦥꦮꦠ꧀ꦠꦤꦁ, ꦣꦴꦠꦸꦮꦶꦨꦔ꧀ꦒꦱꦸꦠ꧀ꦠꦤ꧀ꦠꦶ ꦌꦮꦩꦴꦢꦷꦤꦶ; ꦠꦺꦱꦁ ꦥꦫꦗ꧀ꦙꦴꦱꦪꦺꦴ ꦤꦶꦏ꧀ꦑꦺꦥꦺꦴ.

ꦨꦒꦮꦤ꧀ꦠꦁ ꦥꦤ ꦈꦥꦱꦔ꧀ꦏꦩꦶꦠ꧀ꦮꦴ ꦕꦠꦱ꧀ꦱꦺꦴ ꦥꦫꦶꦱꦴ, ꦕꦠ꧀ꦠꦴꦫꦺꦴ ꦮꦟ꧀ꦟꦴ, ꦤꦴꦒꦴ, ꦱꦸꦥꦟ꧀ꦟꦴ, ꦒꦤ꧀ꦣꦧ꧀ꦧꦴ, ꦄꦱꦸꦫꦴ, ꦪꦏ꧀ꦑꦴ, ꦩꦲꦴꦫꦴꦗꦴꦤꦺꦴ, ꦠꦴꦮꦠꦶꦁꦱꦴꦢꦪꦺꦴ ꦢꦺꦮꦴ, ꦩꦲꦴꦧ꧀ꦫꦲ꧀ꦩꦴꦠꦶ ꦌꦮꦩꦴꦢꦪꦺꦴ – ‘‘ꦧꦺꦴꦗ꧀ꦙꦔ꧀ꦒꦴ ꦧꦺꦴꦗ꧀ꦙꦔ꧀ꦒꦴ’’ꦠꦶ, ꦨꦤ꧀ꦠꦺ, ꦮꦸꦕ꧀ꦕꦤ꧀ꦠꦶ. ‘‘ꦤꦷꦮꦫꦟꦴ ꦤꦷꦮꦫꦟꦴ’’ꦠꦶ, ꦨꦤ꧀ꦠꦺ, ꦮꦸꦕ꧀ꦕꦤ꧀ꦠꦶ; ‘‘ꦆꦩꦺ ꦤꦸ ꦑꦺꦴ, ꦨꦤ꧀ꦠꦺ, ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴ’’. ‘‘ꦏꦶꦁ ꦱꦹꦣ ꦮꦶꦠ꧀ꦠꦁ ꦥꦸꦫꦶꦱꦱ꧀ꦱ ꦱꦺꦛ꧀ꦜ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦥꦚ꧀ꦲꦁ ꦥꦸꦕ꧀ꦖꦤ꧀ꦠꦶ. ꦌꦮꦁ ꦥꦸꦛ꧀ꦜꦺꦤ ꦨꦒꦮꦠꦴ ꦪꦴꦤꦶ ꦏꦡꦶꦠꦴꦤꦶ ꦧꦺꦴꦗ꧀ꦙꦔ꧀ꦒꦱꦁꦪꦸꦠ꧀ꦠꦴꦢꦷꦤꦶ, ꦪꦴꦤꦶ ꦮꦴ ꦥꦤꦚ꧀ꦚꦴꦤꦶꦥꦶ ꦢꦺꦮꦠꦴꦱꦁꦪꦸꦠ꧀ꦠ-ꦩꦴꦫꦱꦁꦪꦸꦠ꧀ꦠ-ꦧ꧀ꦫꦲ꧀ꦩꦱꦁꦪꦸꦠ꧀ꦠ-ꦱꦏ꧀ꦏꦥꦚ꧀ꦲ-ꦕꦹꦭ꦳ꦮꦺꦢꦭ꧀ꦭ-ꦩꦲꦴꦮꦺꦢꦭ꧀ꦭ-ꦱꦴꦩꦚ꧀ꦚꦦꦭ-ꦄꦴꦭ꦳ꦮꦏ-ꦱꦹꦕꦶꦭꦺꦴꦩ-ꦑꦫꦭꦺꦴꦩꦱꦸꦠ꧀ꦠꦴꦢꦷꦤꦶ; ꦠꦺꦱꦁ ꦥꦸꦕ꧀ꦖꦴꦮꦱꦶꦏꦺꦴ ꦤꦶꦏ꧀ꦑꦺꦥꦺꦴ.

ꦪꦴꦤꦶ ꦥꦤ ꦠꦴꦤꦶ ꦈꦥ꧀ꦥꦤ꧀ꦤꦁ ꦏꦴꦫꦟꦁ ꦥꦛꦶꦕ꧀ꦕ ꦏꦡꦶꦠꦴꦤꦶ, ꦱꦺꦪ꧀ꦪꦡꦶꦢꦁ – ꦣꦩ꧀ꦩꦢꦴꦪꦴꦢꦁ, ꦕꦹꦭ꦳ꦱꦷꦲꦤꦴꦢꦁ, ꦕꦤ꧀ꦢꦹꦥꦩꦁ, ꦥꦸꦠ꧀ꦠꦩꦁꦱꦹꦥꦩꦁ, ꦢꦴꦫꦸꦏ꧀ꦑꦤ꧀ꦣꦹꦥꦩꦁ, ꦄꦒ꧀ꦒꦶꦏ꧀ꦑꦤ꧀ꦣꦹꦥꦩꦁ, ꦦꦺꦟꦥꦶꦟ꧀ꦝꦹꦥꦩꦁ, ꦥꦴꦫꦶꦕ꧀ꦖꦠ꧀ꦠꦏꦹꦥꦩꦤ꧀ꦠꦶ ꦌꦮꦩꦴꦢꦷꦤꦶ; ꦠꦺꦱꦁ ꦄꦛ꧀ꦜꦸꦥ꧀ꦥꦠ꧀ꦠꦶꦏꦺꦴ ꦤꦶꦏ꧀ꦑꦺꦥꦺꦴ.

ꦌꦮꦩꦺꦠꦺꦱꦸ ꦕꦠꦹꦱꦸ ꦤꦶꦏ꧀ꦑꦺꦥꦺꦱꦸ ꦆꦩꦱ꧀ꦱ ꦱꦸꦠ꧀ꦠꦱ꧀ꦱ ꦄꦛ꧀ꦜꦸꦥ꧀ꦥꦠ꧀ꦠꦶꦏꦺꦴ ꦤꦶꦏ꧀ꦑꦺꦥꦺꦴ. ꦄꦛ꧀ꦜꦸꦥ꧀ꦥꦠ꧀ꦠꦶꦪꦴ ꦲꦶ ꦆꦢꦁ ꦨꦒꦮꦠꦴ ꦤꦶꦏ꧀ꦑꦶꦠ꧀ꦠꦁ. ꦏꦠꦫꦴꦪ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴ? ꦮꦟ꧀ꦟꦴꦮꦟ꧀ꦟꦺ. ꦄꦴꦕꦫꦶꦪꦺꦴ ꦫꦠꦤꦠ꧀ꦠꦪꦱ꧀ꦱ ꦄꦮꦟ꧀ꦟꦁ ꦄꦨꦴꦱꦶ, ꦄꦤ꧀ꦠꦺꦮꦴꦱꦷ ꦮꦟ꧀ꦟꦁ. ꦆꦠꦶ ꦆꦩꦁ ꦮꦟ꧀ꦟꦴꦮꦟ꧀ꦟꦁ ꦄꦛ꧀ꦜꦸꦥ꧀ꦥꦠ꧀ꦠꦶꦁ ꦏꦠ꧀ꦮꦴ ꦢꦺꦱꦤꦴꦏꦸꦱꦭꦺꦴ ꦨꦒꦮꦴ – ‘‘ꦩꦩꦁ ꦮꦴ, ꦨꦶꦏ꧀ꦑꦮꦺ, ꦥꦫꦺ ꦄꦮꦟ꧀ꦟꦁ ꦨꦴꦱꦺꦪ꧀ꦪꦸ’’ꦤ꧀ꦠꦶ ꦢꦺꦱꦤꦁ ꦄꦴꦫꦨꦶ. ꦠꦠ꧀ꦡ ꦩꦩꦤ꧀ꦠꦶ, ꦱꦴꦩꦶꦮꦕꦤꦁ, ꦩꦩꦴꦠꦶ ꦄꦠ꧀ꦡꦺꦴ. ꦮꦴꦱꦢ꧀ꦢꦺꦴ ꦮꦶꦏꦥ꧀ꦥꦤꦠ꧀ꦡꦺꦴ. ꦥꦫꦺꦠꦶ, ꦥꦛꦶꦮꦶꦫꦸꦢ꧀ꦣꦴ ꦱꦠ꧀ꦠꦴ. ꦠꦠ꧀ꦫꦴꦠꦶ ꦪꦺ ꦄꦮꦟ꧀ꦟꦁ ꦮꦢꦤ꧀ꦠꦶ ꦠꦺꦱꦸ.

ꦤ ꦄꦴꦓꦴꦠꦺꦴꦠꦶꦄꦴꦢꦷꦲꦶ ꦏꦶꦚ꧀ꦕꦴꦥꦶ ꦠꦺꦱꦁ ꦨꦶꦏ꧀ꦑꦹꦤꦁ ꦄꦴꦓꦴꦠꦺꦴꦪꦺꦮ ꦤꦠ꧀ꦡꦶ, ꦄꦡ ꦑꦺꦴ ꦄꦴꦪꦠꦶꦁ ꦏꦸꦭꦥꦸꦠ꧀ꦠꦴꦤꦁ ꦇꦢꦶꦱꦺꦱꦸꦥꦶ ꦜꦴꦤꦺꦱꦸ ꦄꦏꦸꦱꦭꦸꦥ꧀ꦥꦠ꧀ꦠꦶꦁ ꦥꦛꦶꦱꦺꦣꦺꦤ꧀ꦠꦺꦴ ꦣꦩ꧀ꦩꦤꦺꦠ꧀ꦠꦶꦁ ꦜꦥꦺꦠꦶ. ꦠꦠ꧀ꦡ ꦄꦴꦲꦤꦠꦶ ꦕꦶꦠ꧀ꦠꦤ꧀ꦠꦶ ‘ꦄꦴꦓꦴꦠꦺꦴ’; ꦏꦺꦴꦥꦱ꧀ꦱꦺꦠꦁ ꦄꦣꦶꦮꦕꦤꦁ. ꦄꦥ꧀ꦥꦠꦷꦠꦴ ꦲꦺꦴꦤ꧀ꦠꦶ ꦠꦺꦤ ꦄꦠꦸꦛ꧀ꦜꦴ ꦄꦱꦺꦴꦩꦤꦱ꧀ꦱꦶꦏꦴꦠꦶ ꦄꦥ꧀ꦥꦕ꧀ꦕꦪꦺꦴ; ꦢꦺꦴꦩꦤꦱ꧀ꦱꦱ꧀ꦱꦺꦠꦁ ꦄꦣꦶꦮꦕꦤꦁ. ꦤꦺꦮ ꦄꦠ꧀ꦠꦤꦺꦴ ꦤ ꦥꦫꦺꦱꦁ ꦲꦶꦠꦁ ꦄꦨꦶꦫꦴꦣꦪꦠꦷꦠꦶ ꦄꦤꦨꦶꦫꦢ꧀ꦣꦶ; ꦏꦺꦴꦥꦱ꧀ꦱꦺꦠꦁ ꦄꦣꦶꦮꦕꦤꦁ. ꦌꦮꦩꦺꦠ꧀ꦡ ꦢ꧀ꦮꦷꦲꦶ ꦥꦢꦺꦲꦶ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ, ꦌꦏꦺꦤ ꦮꦺꦢꦤꦴꦏ꧀ꦑꦤ꧀ꦣꦺꦴꦠꦶ ꦢ꧀ꦮꦺ ꦑꦤ꧀ꦣꦴ ꦮꦸꦠ꧀ꦠꦴ. ꦠꦺꦱꦁ ꦮꦱꦺꦤ ꦱꦺꦱꦴꦤꦩ꧀ꦥꦶ ꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦤꦁ ꦏꦴꦫꦟꦁ ꦥꦛꦶꦏ꧀ꦑꦶꦠ꧀ꦠꦩꦺꦮ.

ꦌꦮꦁ ꦥꦜꦩꦺꦤ ꦤꦪꦺꦤ ꦩꦤꦺꦴꦥꦢꦺꦴꦱꦁ ꦤꦶꦮꦴꦫꦺꦠ꧀ꦮꦴ, ꦢꦸꦠꦶꦪꦺꦤ ꦤꦪꦺꦤ ꦠꦠ꧀ꦡ ꦄꦴꦢꦷꦤꦮꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ – ‘‘ꦠꦠ꧀ꦫ ꦕꦺ ꦠꦸꦩ꧀ꦲꦺ ꦄꦱ꧀ꦱꦡ ꦏꦸꦥꦶꦠꦴ ꦮꦴ ꦄꦤꦠ꧀ꦠꦩꦤꦴ ꦮꦴ, ꦠꦸꦩ꧀ꦲꦁ ꦪꦺꦮꦱ꧀ꦱ ꦠꦺꦤ ꦄꦤ꧀ꦠꦫꦴꦪꦺꦴ’’ꦠꦶ. ꦠꦠ꧀ꦡ ‘ꦠꦠ꧀ꦫ ꦕꦺ ꦠꦸꦩ꧀ꦲꦺ ꦄꦱ꧀ꦱꦡꦴ’ꦠꦶ ꦠꦺꦱꦸ ꦄꦮꦟ꧀ꦟꦨꦴꦱꦏꦺꦱꦸ, ꦠꦱ꧀ꦩꦶꦁ ꦮꦴ ꦄꦮꦟ꧀ꦟꦺ ꦠꦸꦩ꧀ꦲꦺ ꦨꦮꦺꦪ꧀ꦪꦴꦡ ꦕꦺ; ꦪꦢꦶ ꦨꦮꦺꦪ꧀ꦪꦴꦡꦴꦠꦶ ꦄꦠ꧀ꦡꦺꦴ. ‘ꦏꦸꦥꦶꦠꦴ’ ꦏꦺꦴꦥꦺꦤ, ꦄꦤꦠ꧀ꦠꦩꦤꦴ ꦢꦺꦴꦩꦤꦱ꧀ꦱꦺꦤ. ‘ꦠꦸꦩ꧀ꦲꦁ ꦪꦺꦮꦱ꧀ꦱ ꦠꦺꦤ ꦄꦤ꧀ꦠꦫꦴꦪꦺꦴ’ꦠꦶ ꦠꦸꦩ꧀ꦲꦴꦏꦁꦪꦺꦮ ꦠꦺꦤ ꦏꦺꦴꦥꦺꦤ, ꦠꦴꦪ ꦕ ꦄꦤꦠ꧀ꦠꦩꦤꦠꦴꦪ ꦥꦜꦩꦗ꧀ꦙꦴꦤꦴꦢꦷꦤꦁ ꦄꦤ꧀ꦠꦫꦴꦪꦺꦴ ꦨꦮꦺꦪ꧀ꦪ.

ꦌꦮꦁ ꦢꦸꦠꦶꦪꦺꦤ ꦤꦪꦺꦤ ꦄꦴꦢꦷꦤꦮꦁ ꦢꦱ꧀ꦱꦺꦠ꧀ꦮꦴ, ꦠꦠꦶꦪꦺꦤ ꦤꦪꦺꦤ ꦮꦕꦤꦠ꧀ꦡꦱꦭ꧀ꦭꦏ꧀ꦑꦟꦩꦠ꧀ꦠꦺꦥꦶ ꦄꦱꦩꦠ꧀ꦡꦠꦁ ꦢꦱ꧀ꦱꦺꦤ꧀ꦠꦺꦴ – ‘‘ꦄꦥꦶ ꦤꦸ ꦠꦸꦩ꧀ꦲꦺ ꦥꦫꦺꦱ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦥꦫꦺꦱꦤ꧀ꦠꦶ ꦪꦺꦱꦁ ꦏꦺꦱꦁ ꦕꦶ. ꦏꦸꦥꦶꦠꦺꦴ ꦲꦶ ꦤꦺꦮ ꦧꦸꦢ꧀ꦣꦥꦕ꧀ꦕꦺꦏꦧꦸꦢ꧀ꦣꦄꦫꦶꦪꦱꦴꦮꦏꦴꦤꦁ, ꦤ ꦩꦴꦠꦴꦥꦶꦠꦹꦤꦁ, ꦤ ꦥꦕ꧀ꦕꦠ꧀ꦡꦶꦏꦴꦤꦁ ꦱꦸꦨꦴꦱꦶꦠꦢꦸꦧ꧀ꦨꦴꦱꦶꦠꦱ꧀ꦱ ꦄꦠ꧀ꦡꦁ ꦄꦴꦗꦴꦤꦴꦠꦶ. ꦪꦡꦴꦲ –

‘‘ꦏꦸꦢ꧀ꦣꦺꦴ ꦄꦠ꧀ꦡꦁ ꦤ ꦗꦴꦤꦴꦠꦶ, ꦏꦸꦢ꧀ꦣꦺꦴ ꦣꦩ꧀ꦩꦁ ꦤ ꦥꦱ꧀ꦱꦠꦶ;

ꦄꦤ꧀ꦣꦁ ꦠꦩꦁ ꦠꦢꦴ ꦲꦺꦴꦠꦶ, ꦪꦁ ꦏꦺꦴꦣꦺꦴ ꦱꦲꦠꦺ ꦤꦫꦁ.

ꦄꦤꦠ꧀ꦡꦗꦤꦤꦺꦴ ꦏꦺꦴꦣꦺꦴ, ꦏꦺꦴꦣꦺꦴ ꦕꦶꦠ꧀ꦠꦥ꧀ꦥꦏꦺꦴꦥꦤꦺꦴ;

ꦨꦪꦩꦤ꧀ꦠꦫꦠꦺꦴ ꦗꦴꦠꦁ, ꦠꦁ ꦗꦤꦺꦴ ꦤꦴꦮꦧꦸꦗ꧀ꦙꦠꦷ’’ꦠꦶ. (ꦄ. ꦤꦶ. ꧗.꧖꧔);

ꦌꦮꦁ ꦱꦧ꧀ꦧꦡꦴꦥꦶ ꦄꦮꦟ꧀ꦟꦺ ꦩꦤꦺꦴꦥꦢꦺꦴꦱꦁ ꦤꦶꦱꦺꦣꦺꦠ꧀ꦮꦴ ꦆꦢꦴꦤꦶ ꦥꦛꦶꦥꦗ꧀ꦗꦶꦠꦧ꧀ꦧꦴꦏꦴꦫꦁ ꦢꦱ꧀ꦱꦺꦤ꧀ꦠꦺꦴ – ‘‘ꦠꦠ꧀ꦫ ꦠꦸꦩ꧀ꦲꦺꦲꦶ ꦄꦨꦹꦠꦁ ꦄꦨꦹꦠꦠꦺꦴ’’ꦠꦶꦄꦴꦢꦶꦩꦴꦲ.

ꦠꦠ꧀ꦡ ꦠꦠ꧀ꦫ ꦠꦸꦩ꧀ꦲꦺꦲꦷꦠꦶ, ꦠꦱ꧀ꦩꦶꦁ ꦄꦮꦟ꧀ꦟꦺ ꦠꦸꦩ꧀ꦲꦺꦲꦶ. ꦄꦨꦹꦠꦁ ꦄꦨꦹꦠꦠꦺꦴ ꦤꦶꦧ꧀ꦧꦺꦜꦺꦠꦧ꧀ꦧꦤ꧀ꦠꦶ ꦪꦁ ꦄꦨꦹꦠꦁ, ꦠꦁ ꦄꦨꦹꦠꦨꦴꦮꦺꦤꦺꦮ ꦄꦥꦤꦺꦠꦧ꧀ꦧꦁ. ꦏꦡꦁ? ꦆꦠꦶꦥꦺꦠꦁ ꦄꦨꦹꦠꦤ꧀ꦠꦶꦄꦴꦢꦶꦤꦴ ꦤꦪꦺꦤ. ꦠꦠ꧀ꦫꦴꦪꦁ ꦪꦺꦴꦗꦤꦴ – ‘‘ꦠꦸꦩ꧀ꦲꦴꦏꦁ ꦱꦠ꧀ꦡꦴ ꦤ ꦱꦧ꧀ꦧꦚ꧀ꦚꦹ, ꦣꦩ꧀ꦩꦺꦴ ꦢꦸꦫꦏ꧀ꦑꦴꦠꦺꦴ, ꦱꦔ꧀ꦓꦺꦴ ꦢꦸꦥ꧀ꦥꦛꦶꦥꦤ꧀ꦤꦺꦴ’’ꦠꦶꦄꦴꦢꦷꦤꦶ ꦱꦸꦠ꧀ꦮꦴ ꦤ ꦠꦸꦟ꧀ꦲꦷ ꦨꦮꦶꦠꦧ꧀ꦧꦁ. ꦌꦮꦁ ꦥꦤ ꦮꦠ꧀ꦠꦧ꧀ꦧꦁ – ‘‘ꦆꦠꦶ ꦥꦺꦠꦁ ꦄꦨꦹꦠꦁ, ꦪꦁ ꦠꦸꦩ꧀ꦲꦺꦲꦶ ꦮꦸꦠ꧀ꦠꦁ, ꦠꦁ ꦆꦩꦶꦤꦴꦥꦶ ꦏꦴꦫꦟꦺꦤ ꦄꦨꦹꦠꦁ, ꦆꦩꦶꦤꦴꦥꦶ ꦏꦴꦫꦟꦺꦤ ꦄꦠꦕ꧀ꦖꦁ, ‘ꦤꦠ꧀ꦡꦶ ꦕꦺꦠꦁ ꦄꦩ꧀ꦲꦺꦱꦸ’, ‘ꦤ ꦕ ꦥꦤꦺꦠꦁ ꦄꦩ꧀ꦲꦺꦱꦸ ꦱꦁꦮꦶꦗ꧀ꦗꦠꦶ’, ꦱꦧ꧀ꦧꦚ꧀ꦚꦹꦪꦺꦮ ꦄꦩ꧀ꦲꦴꦏꦁ ꦱꦠ꧀ꦡꦴ, ꦱ꧀ꦮꦴꦏ꧀ꦑꦴꦠꦺꦴ ꦣꦩ꧀ꦩꦺꦴ, ꦱꦸꦥ꧀ꦥꦛꦶꦥꦤ꧀ꦤꦺꦴ ꦱꦔ꧀ꦓꦺꦴ, ꦠꦠ꧀ꦫ ꦆꦢꦚ꧀ꦕꦶꦢꦚ꧀ꦕ ꦏꦴꦫꦟ’’ꦤ꧀ꦠꦶ. ꦌꦠ꧀ꦡ ꦕ ꦢꦸꦠꦶꦪꦁ ꦥꦢꦁ ꦥꦜꦩꦱ꧀ꦱ, ꦕꦠꦸꦠ꧀ꦡꦚ꧀ꦕ ꦠꦠꦶꦪꦱ꧀ꦱ ꦮꦺꦮꦕꦤꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦆꦢꦚ꧀ꦕ ꦄꦮꦟ꧀ꦟꦺꦪꦺꦮ ꦤꦶꦧ꧀ꦧꦺꦜꦤꦁ ꦏꦴꦠꦧ꧀ꦧꦁ, ꦤ ꦱꦧ꧀ꦧꦠ꧀ꦡ. ꦪꦢꦶ ꦲꦶ ‘‘ꦠ꧀ꦮꦁ ꦢꦸꦱ꧀ꦱꦷꦭꦺꦴ, ꦠꦮꦴꦕꦫꦶꦪꦺꦴ ꦢꦸꦱ꧀ꦱꦷꦭꦺꦴ, ꦆꦢꦚ꧀ꦕꦶꦢꦚ꧀ꦕ ꦠꦪꦴ ꦏꦠꦁ, ꦠꦮꦴꦕꦫꦶꦪꦺꦤ ꦏꦠ’’ꦤ꧀ꦠꦶ ꦮꦸꦠ꧀ꦠꦺ ꦠꦸꦟ꧀ꦲꦷꦨꦹꦠꦺꦴ ꦄꦣꦶꦮꦴꦱꦺꦠꦶ, ꦄꦴꦱꦔ꧀ꦏꦤꦷꦪꦺꦴ ꦲꦺꦴꦠꦶ. ꦠꦱ꧀ꦩꦴ ꦩꦤꦺꦴꦥꦢꦺꦴꦱꦁ ꦄꦏꦠ꧀ꦮꦴ ꦄꦮꦟ꧀ꦟꦺꦴ ꦤꦶꦧ꧀ꦧꦺꦜꦺꦠꦧ꧀ꦧꦺꦴ. ‘‘ꦎꦛ꧀ꦜꦺꦴꦱꦶ, ꦒꦺꦴꦟꦺꦴꦱꦷ’’ꦠꦶꦄꦴꦢꦶꦤꦴ ꦥꦤ ꦤꦪꦺꦤ ꦢꦱꦲꦶ ꦄꦏ꧀ꦏꦺꦴꦱꦮꦠ꧀ꦡꦹꦲꦶ ꦄꦏ꧀ꦏꦺꦴꦱꦤ꧀ꦠꦁ ꦥꦸꦒ꧀ꦒꦭꦁ ꦄꦗ꧀ꦙꦸꦥꦺꦏ꧀ꦑꦶꦠ꧀ꦮꦴ ꦄꦣꦶꦮꦴꦱꦤꦑꦤ꧀ꦠꦶꦪꦺꦮ ꦠꦠ꧀ꦡ ꦏꦴꦠꦧ꧀ꦧꦴ.

꧖. ꦌꦮꦁ ꦄꦮꦟ꧀ꦟꦨꦹꦩꦶꦪꦁ ꦠꦴꦢꦶꦭꦏ꧀ꦑꦟꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦮꦟ꧀ꦟꦨꦹꦩꦶꦪꦁ ꦢꦱ꧀ꦱꦺꦠꦸꦁ ‘‘ꦩꦩꦁ ꦮꦴ, ꦨꦶꦏ꧀ꦑꦮꦺ, ꦥꦫꦺ ꦮꦟ꧀ꦟꦁ ꦨꦴꦱꦺꦪ꧀ꦪꦸ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦥꦫꦺꦠꦶ ꦪꦺ ꦏꦺꦕꦶ ꦥꦱꦤ꧀ꦤꦴ ꦢꦺꦮꦩꦤꦸꦱ꧀ꦱꦴ. ꦄꦴꦤꦤ꧀ꦢꦤ꧀ꦠꦶ ꦌꦠꦺꦤꦴꦠꦶ ꦄꦴꦤꦤ꧀ꦢꦺꦴ, ꦥꦷꦠꦶꦪꦴ ꦌꦠꦁ ꦄꦣꦶꦮꦕꦤꦁ. ꦱꦸꦩꦤꦱ꧀ꦱ ꦨꦴꦮꦺꦴ ꦱꦺꦴꦩꦤꦱ꧀ꦱꦁ, ꦕꦺꦠꦱꦶꦏꦱꦸꦑꦱ꧀ꦱꦺꦠꦁ ꦄꦣꦶꦮꦕꦤꦁ. ꦈꦥ꧀ꦥꦶꦭꦴꦮꦶꦤꦺꦴ ꦨꦴꦮꦺꦴ ꦈꦥ꧀ꦥꦶꦭꦴꦮꦶꦠꦠ꧀ꦠꦁ. ꦏꦱ꧀ꦱ ꦈꦥ꧀ꦥꦶꦭꦴꦮꦶꦠꦠ꧀ꦠꦤ꧀ꦠꦶ? ꦕꦺꦠꦱꦺꦴꦠꦶ. ꦈꦢ꧀ꦣꦕ꧀ꦕꦴꦮꦲꦴꦪ ꦈꦥ꧀ꦥꦶꦭꦴꦥꦤꦥꦷꦠꦶꦪꦴ ꦌꦠꦁ ꦄꦣꦶꦮꦕꦤꦁ. ꦆꦣꦴꦥꦶ ꦢ꧀ꦮꦷꦲꦶ ꦥꦢꦺꦲꦶ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ, ꦌꦏꦺꦤ ꦮꦺꦢꦤꦴꦏ꧀ꦑꦤ꧀ꦣꦺꦴ ꦮꦸꦠ꧀ꦠꦺꦴ.

ꦌꦮꦁ ꦥꦜꦩꦤꦪꦺꦤ ꦈꦥ꧀ꦥꦶꦭꦴꦮꦶꦠꦠ꧀ꦠꦁ ꦤꦶꦮꦴꦫꦺꦠ꧀ꦮꦴ, ꦢꦸꦠꦶꦪꦺꦤ ꦠꦠ꧀ꦡ ꦄꦴꦢꦷꦤꦮꦁ ꦢꦱ꧀ꦱꦺꦤ꧀ꦠꦺꦴ – ‘‘ꦠꦠ꧀ꦫ ꦕꦺ ꦠꦸꦩ꧀ꦲꦺ ꦄꦱ꧀ꦱꦡꦴ’’ꦠꦶꦄꦴꦢꦶꦩꦴꦲ. ꦆꦣꦴꦥꦶ ꦠꦸꦩ꧀ꦲꦁ ꦪꦺꦮꦱ꧀ꦱ ꦠꦺꦤ ꦄꦤ꧀ꦠꦫꦴꦪꦺꦴꦠꦶ ꦠꦺꦤ ꦈꦥ꧀ꦥꦶꦭꦴꦮꦶꦠꦠ꧀ꦠꦺꦤ ꦠꦸꦩ꧀ꦲꦴꦏꦁꦪꦺꦮ ꦥꦜꦩꦗ꧀ꦙꦴꦤꦴꦢꦷꦤꦁ ꦄꦤ꧀ꦠꦫꦴꦪꦺꦴ ꦨꦮꦺꦪ꧀ꦪꦴꦠꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦏꦱ꧀ꦩꦴ ꦥꦤꦺꦠꦁ ꦮꦸꦠ꧀ꦠꦁ? ꦤꦤꦸ ꦨꦒꦮꦠꦴ –

‘‘ꦧꦸꦢ꧀ꦣꦺꦴꦠꦶ ꦏꦶꦠ꧀ꦠꦪꦤ꧀ꦠꦱ꧀ꦱ, ꦏꦴꦪꦺ ꦨꦮꦠꦶ ꦪꦴ ꦥꦷꦠꦶ;

ꦮꦫꦩꦺꦮ ꦲꦶ ꦱꦴ ꦥꦷꦠꦶ, ꦏꦱꦶꦟꦺꦤꦴꦥꦶ ꦗꦩ꧀ꦧꦸꦢꦷꦥꦱ꧀ꦱ.

ꦣꦩ꧀ꦩꦺꦴꦠꦶ ꦏꦶꦠ꧀ꦠꦪꦤ꧀ꦠꦱ꧀ꦱ, ꦏꦴꦪꦺ ꦨꦮꦠꦶ ꦪꦴ ꦥꦷꦠꦶ;

ꦮꦫꦩꦺꦮ ꦲꦶ ꦱꦴ ꦥꦷꦠꦶ, ꦏꦱꦶꦟꦺꦤꦴꦥꦶ ꦗꦩ꧀ꦧꦸꦢꦷꦥꦱ꧀ꦱ.

ꦱꦔ꧀ꦓꦺꦴꦠꦶ ꦏꦶꦠ꧀ꦠꦪꦤ꧀ꦠꦱ꧀ꦱ, ꦏꦴꦪꦺ ꦨꦮꦠꦶ ꦪꦴ ꦥꦷꦠꦶ;

ꦮꦫꦩꦺꦮ ꦲꦶ ꦱꦴ ꦥꦷꦠꦶ, ꦏꦱꦶꦟꦺꦤꦴꦥꦶ ꦗꦩ꧀ꦧꦸꦢꦷꦥꦱ꧀ꦱꦴ’’ꦠꦶ ꦕ.

‘‘ꦪꦺ, ꦨꦶꦏ꧀ꦑꦮꦺ, ꦧꦸꦢ꧀ꦣꦺ ꦥꦱꦤ꧀ꦤꦴ, ꦄꦒ꧀ꦒꦺ ꦠꦺ ꦥꦱꦤ꧀ꦤꦴ’’ꦠꦶ ꦕ ꦌꦮꦩꦴꦢꦷꦲꦶ ꦄꦤꦺꦏꦱꦠꦺꦲꦶ ꦱꦸꦠ꧀ꦠꦺꦲꦶ ꦫꦠꦤꦠ꧀ꦠꦪꦺ ꦥꦷꦠꦶꦱꦺꦴꦩꦤꦱ꧀ꦱꦩꦺꦮ ꦮꦟ꧀ꦟꦶꦠꦤ꧀ꦠꦶ. ꦱꦕ꧀ꦕꦁ ꦮꦟ꧀ꦟꦶꦠꦁ, ꦠꦁ ꦥꦤ ꦤꦺꦏ꧀ꦑꦩ꧀ꦩꦤꦶꦱ꧀ꦱꦶꦠꦁ. ꦆꦣ – ‘‘ꦄꦩ꧀ꦲꦴꦏꦁ ꦧꦸꦢ꧀ꦣꦺꦴ, ꦄꦩ꧀ꦲꦴꦏꦁ ꦣꦩ꧀ꦩꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦄꦴꦪꦱ꧀ꦩꦠꦺꦴ ꦖꦤ꧀ꦤꦱ꧀ꦱ ꦈꦥ꧀ꦥꦤ꧀ꦤꦱꦢꦶꦱꦁ ꦒꦺꦲꦱ꧀ꦱꦶꦠꦁ ꦥꦷꦠꦶꦱꦺꦴꦩꦤꦱ꧀ꦱꦁ ꦄꦣꦶꦥ꧀ꦥꦺꦠꦁ. ꦆꦢꦚ꧀ꦲꦶ ꦙꦴꦤꦴꦢꦶꦥꦛꦶꦭꦴꦨꦴꦪ ꦄꦤ꧀ꦠꦫꦴꦪꦏꦫꦁ ꦲꦺꦴꦠꦶ. ꦠꦺꦤꦺꦮꦴꦪꦱ꧀ꦩꦴ ꦖꦤ꧀ꦤꦺꦴꦥꦶ ꦪꦴꦮ ꦧꦸꦢ꧀ꦣꦺꦴ ꦤ ꦥꦫꦶꦤꦶꦧ꧀ꦧꦴꦪꦶ, ꦠꦴꦮ ꦮꦶꦱꦺꦱꦁ ꦤꦶꦧ꧀ꦧꦠ꧀ꦠꦺꦠꦸꦁ ꦤꦴꦱꦏ꧀ꦑꦶ, ꦥꦫꦶꦤꦶꦧ꧀ꦧꦴꦤꦏꦴꦭꦺ ꦥꦚ꧀ꦚꦠ꧀ꦠꦺꦤ ꦥꦤ ꦧ꧀ꦫꦲ꧀ꦩꦢꦟ꧀ꦝꦺꦤ ꦠꦗ꧀ꦗꦶꦠꦺꦴ ꦠꦁ ꦥꦷꦠꦶꦱꦺꦴꦩꦤꦱ꧀ꦱꦁ ꦥꦲꦴꦪ ꦮꦶꦱꦺꦱꦁ ꦤꦶꦧ꧀ꦧꦠ꧀ꦠꦺꦱꦶ. ꦠꦱ꧀ꦩꦴ ꦄꦤ꧀ꦠꦫꦴꦪꦏꦫꦁꦪꦺꦮ ꦱꦤ꧀ꦣꦴꦪ ꦆꦢꦁ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦄꦪꦚ꧀ꦲꦶ ꦭꦺꦴꦨꦱꦲꦒꦠꦴ ꦥꦷꦠꦶ. ꦭꦺꦴꦨꦺꦴ ꦕ ꦏꦺꦴꦣꦱꦢꦶꦱꦺꦴꦮ. ꦪꦡꦴꦲ –

‘‘ꦭꦸꦢ꧀ꦣꦺꦴ ꦄꦠ꧀ꦡꦁ ꦤ ꦗꦴꦤꦴꦠꦶ, ꦭꦸꦢ꧀ꦣꦺꦴ ꦣꦩ꧀ꦩꦁ ꦤ ꦥꦱ꧀ꦱꦠꦶ;

ꦄꦤ꧀ꦣꦁ ꦠꦩꦁ ꦠꦢꦴ ꦲꦺꦴꦠꦶ, ꦪꦁ ꦭꦺꦴꦨꦺꦴ ꦱꦲꦠꦺ ꦤꦫꦁ.

ꦄꦤꦠ꧀ꦡꦗꦤꦤꦺꦴ ꦭꦺꦴꦨꦺꦴ, ꦭꦺꦴꦨꦺꦴ ꦕꦶꦠ꧀ꦠꦥ꧀ꦥꦏꦺꦴꦥꦤꦺꦴ;

ꦨꦪꦩꦤ꧀ꦠꦫꦠꦺꦴ ꦗꦴꦠꦁ, ꦠꦁ ꦗꦤꦺꦴ ꦤꦴꦮꦧꦸꦗ꧀ꦙꦠꦷ’’ꦠꦶ. (ꦆꦠꦶꦮꦸ. ꧘꧘);

ꦠꦠꦶꦪꦮꦴꦫꦺꦴ ꦥꦤ ꦆꦣ ꦄꦤꦴꦒꦠꦺꦴꦥꦶ ꦄꦠ꧀ꦡꦠꦺꦴ ꦄꦴꦒꦠꦺꦴ ꦪꦺꦮꦴꦠꦶ ꦮꦺꦢꦶꦠꦧ꧀ꦧꦺꦴ. ꦪꦡꦺꦮ ꦲꦶ ꦏꦸꦢ꧀ꦣꦺꦴ, ꦌꦮꦁ ꦭꦸꦢ꧀ꦣꦺꦴꦥꦶ ꦄꦠ꧀ꦡꦁ ꦤ ꦗꦴꦤꦴꦠꦷꦠꦶ.

ꦥꦛꦶꦥꦗ꧀ꦗꦶꦠꦧ꧀ꦧꦴꦏꦴꦫꦢꦱ꧀ꦱꦤꦮꦴꦫꦺ ꦥꦤꦴꦪꦁ ꦪꦺꦴꦗꦤꦴ – ‘‘ꦠꦸꦩ꧀ꦲꦴꦏꦁ ꦱꦠ꧀ꦡꦴ ꦱꦧ꧀ꦧꦚ꧀ꦚꦹ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ, ꦣꦩ꧀ꦩꦺꦴ ꦱ꧀ꦮꦴꦏ꧀ꦑꦴꦠꦺꦴ, ꦱꦔ꧀ꦓꦺꦴ ꦱꦸꦥ꧀ꦥꦛꦶꦥꦤ꧀ꦤꦺꦴ’’ꦠꦶꦄꦴꦢꦷꦤꦶ ꦱꦸꦠ꧀ꦮꦴ ꦤ ꦠꦸꦟ꧀ꦲꦷ ꦨꦮꦶꦠꦧ꧀ꦧꦁ. ꦌꦮꦁ ꦥꦤ ꦥꦛꦶꦗꦴꦤꦶꦠꦧ꧀ꦧꦁ – ‘‘ꦆꦠꦶꦥꦺꦠꦁ ꦨꦹꦠꦁ, ꦪꦁ ꦠꦸꦩ꧀ꦲꦺꦲꦶ ꦮꦸꦠ꧀ꦠꦁ, ꦠꦁ ꦆꦩꦶꦤꦴꦥꦶ ꦏꦴꦫꦟꦺꦤ ꦨꦹꦠꦁ, ꦆꦩꦶꦤꦴꦥꦶ ꦏꦴꦫꦟꦺꦤ ꦠꦕ꧀ꦖꦁ. ꦱꦺꦴ ꦲꦶ ꦨꦒꦮꦴ ꦆꦠꦶꦥꦶ ꦄꦫꦲꦁ, ꦆꦠꦶꦥꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ; ꦣꦩ꧀ꦩꦺꦴ ꦆꦠꦶꦥꦶ ꦱ꧀ꦮꦴꦏ꧀ꦑꦴꦠꦺꦴ, ꦆꦠꦶꦥꦶ ꦱꦤ꧀ꦢꦶꦛ꧀ꦜꦶꦏꦺꦴ; ꦱꦔ꧀ꦓꦺꦴ ꦆꦠꦶꦥꦶ ꦱꦸꦥ꧀ꦥꦛꦶꦥꦤ꧀ꦤꦺꦴ, ꦆꦠꦶꦥꦶ ꦈꦗꦸꦥ꧀ꦥꦛꦶꦥꦤ꧀ꦤꦺꦴ’’ꦠꦶ. ‘‘ꦠ꧀ꦮꦁ ꦱꦷꦭꦮꦴ’’ꦠꦶ ꦥꦸꦕ꧀ꦖꦶꦠꦺꦤꦴꦥꦶ ꦱꦕꦺ ꦱꦷꦭꦮꦴ, ‘‘ꦱꦷꦭꦮꦴꦲꦩꦱ꧀ꦩꦷ’’ꦠꦶ ꦥꦛꦶꦗꦴꦤꦶꦠꦧ꧀ꦧꦩꦺꦮ. ‘‘ꦠ꧀ꦮꦁ ꦥꦜꦩꦱ꧀ꦱ ꦙꦴꦤꦱ꧀ꦱ ꦭꦴꦨꦷ…ꦥꦺ… ꦄꦫꦲꦴ’’ꦠꦶ ꦥꦸꦛ꧀ꦜꦺꦤꦴꦥꦶ ꦱꦨꦴꦒꦴꦤꦁ ꦨꦶꦏ꧀ꦑꦹꦤꦁꦪꦺꦮ ꦥꦛꦶꦗꦴꦤꦶꦠꦧ꧀ꦧꦁ. ꦌꦮꦚ꧀ꦲꦶ ꦥꦴꦥꦶꦕ꧀ꦖꦠꦴ ꦕꦺꦮ ꦥꦫꦶꦮꦗ꧀ꦗꦶꦠꦴ ꦲꦺꦴꦠꦶ, ꦱꦴꦱꦤꦱ꧀ꦱ ꦕ ꦄꦩꦺꦴꦓꦠꦴ ꦢꦷꦥꦶꦠꦴ ꦲꦺꦴꦠꦷꦠꦶ. ꦱꦺꦱꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ.

ꦕꦹꦭ꦳ꦱꦷꦭꦮꦟ꧀ꦟꦤꦴ

꧗. ꦄꦥ꧀ꦥꦩꦠ꧀ꦠꦏꦁ ꦑꦺꦴ ꦥꦤꦺꦠꦁ, ꦨꦶꦏ꧀ꦑꦮꦺꦠꦶ ꦏꦺꦴ ꦄꦤꦸꦱꦤ꧀ꦣꦶ? ꦆꦢꦁ ꦱꦸꦠ꧀ꦠꦁ ꦢ꧀ꦮꦷꦲꦶ ꦥꦢꦺꦲꦶ ꦄꦴꦧꦢ꧀ꦣꦁ ꦮꦟ꧀ꦟꦺꦤ ꦕ ꦄꦮꦟ꧀ꦟꦺꦤ ꦕ. ꦠꦠ꧀ꦡ ꦄꦮꦟ꧀ꦟꦺꦴ – ‘‘ꦆꦠꦶ ꦥꦺꦠꦁ ꦄꦨꦹꦠꦁ ꦆꦠꦶ ꦥꦺꦠꦁ ꦄꦠꦕ꧀ꦖ’’ꦤ꧀ꦠꦶ, ꦌꦠ꧀ꦡꦺꦮ ꦈꦢꦏꦤ꧀ꦠꦁ ꦥꦠ꧀ꦮꦴ ꦄꦒ꧀ꦒꦶꦮꦶꦪ ꦤꦶꦮꦠ꧀ꦠꦺꦴ. ꦮꦟ꧀ꦟꦺꦴ ꦥꦤ ꦨꦹꦠꦁ ꦨꦹꦠꦠꦺꦴ ꦥꦛꦶꦗꦴꦤꦶꦠꦧ꧀ꦧꦁ – ‘‘ꦆꦠꦶ ꦥꦺꦠꦁ ꦨꦹꦠ’’ꦤ꧀ꦠꦶ ꦌꦮꦁ ꦄꦤꦸꦮꦠ꧀ꦠꦠꦶꦪꦺꦮ. ꦱꦺꦴ ꦥꦤ ꦢꦸꦮꦶꦣꦺꦴ ꦧ꧀ꦫꦲ꧀ꦩꦢꦠ꧀ꦠꦺꦤ ꦨꦴꦱꦶꦠꦮꦟ꧀ꦟꦺꦴ ꦕ ꦨꦶꦏ꧀ꦑꦸꦱꦔ꧀ꦓꦺꦤ ꦄꦕ꧀ꦖꦫꦶꦪꦁ ꦄꦴꦮꦸꦱꦺꦴꦠꦶꦄꦴꦢꦶꦤꦴ ꦤꦪꦺꦤ ꦄꦴꦫꦢ꧀ꦣꦮꦟ꧀ꦟꦺꦴ ꦕ. ꦠꦺꦱꦸ ꦨꦶꦏ꧀ꦑꦸꦱꦔ꧀ꦓꦺꦤ ꦮꦸꦠ꧀ꦠꦮꦟ꧀ꦟꦱ꧀ꦱ ꦈꦥꦫꦶ ꦱꦸꦚ꧀ꦚꦠꦴꦥꦏꦴꦱꦤꦺ ꦄꦤꦸꦱꦤ꧀ꦣꦶꦁ ꦢꦱ꧀ꦱꦺꦱ꧀ꦱꦠꦶ. ꦆꦣ ꦥꦤ ꦧ꧀ꦫꦲ꧀ꦩꦢꦠ꧀ꦠꦺꦤ ꦮꦸꦠ꧀ꦠꦮꦟ꧀ꦟꦱ꧀ꦱ ꦄꦤꦸꦱꦤ꧀ꦣꦶꦁ ꦢꦱ꧀ꦱꦺꦠꦸꦁ ‘‘ꦄꦥ꧀ꦥꦩꦠ꧀ꦠꦏꦁ ꦑꦺꦴ ꦥꦤꦺꦠꦁ, ꦨꦶꦏ꧀ꦑꦮꦺ’’ꦠꦶ ꦢꦺꦱꦤꦴ ꦄꦴꦫꦢ꧀ꦣꦴ.

ꦠꦠ꧀ꦡ ꦄꦥ꧀ꦥꦩꦠ꧀ꦠꦏꦤ꧀ꦠꦶ ꦥꦫꦶꦠ꧀ꦠꦱ꧀ꦱ ꦤꦴꦩꦁ. ꦎꦫꦩꦠ꧀ꦠꦏꦤ꧀ꦠꦶ ꦠꦱ꧀ꦱꦺꦮ ꦮꦺꦮꦕꦤꦁ. ꦩꦠ꧀ꦠꦴꦠꦶ ꦮꦸꦕ꧀ꦕꦠꦶ ꦥꦩꦴꦟꦁ. ꦄꦥ꧀ꦥꦁ ꦩꦠ꧀ꦠꦴ ꦌꦠꦱ꧀ꦱꦴꦠꦶ ꦄꦥ꧀ꦥꦩꦠ꧀ꦠꦏꦁ. ꦎꦫꦁ ꦩꦠ꧀ꦠꦴ ꦌꦠꦱ꧀ꦱꦴꦠꦶ ꦎꦫꦩꦠ꧀ꦠꦏꦁ. ꦱꦷꦭꦩꦺꦮ ꦱꦷꦭꦩꦠ꧀ꦠꦏꦁ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ‘ꦄꦥ꧀ꦥꦩꦠ꧀ꦠꦏꦁ ꦑꦺꦴ, ꦥꦤꦺꦠꦁ ꦨꦶꦏ꧀ꦑꦮꦺ, ꦎꦫꦩꦠ꧀ꦠꦏꦁ ꦱꦷꦭꦩꦠ꧀ꦠꦏꦁ’ ꦤꦴꦩ ꦪꦺꦤ ‘‘ꦠꦡꦴꦒꦠꦱ꧀ꦱ ꦮꦟ꧀ꦟꦁ ꦮꦢꦴꦩꦷ’’ꦠꦶ ꦈꦱ꧀ꦱꦴꦲꦁ ꦏꦠ꧀ꦮꦴꦥꦶ ꦮꦟ꧀ꦟꦁ ꦮꦢꦩꦴꦤꦺꦴ ꦥꦸꦡꦸꦗ꧀ꦗꦤꦺꦴ ꦮꦢꦺꦪ꧀ꦪꦴꦠꦶ. ꦠꦠ꧀ꦡ ꦱꦶꦪꦴ – ꦤꦤꦸ ꦆꦢꦁ ꦱꦷꦭꦁ ꦤꦴꦩ ꦪꦺꦴꦒꦶꦤꦺꦴ ꦄꦒ꧀ꦒꦮꦶꦨꦹꦱꦤꦁ? ꦪꦡꦴꦲꦸ ꦥꦺꦴꦫꦴꦟꦴ –

‘‘ꦱꦷꦭꦁ ꦪꦺꦴꦒꦶꦱ꧀ꦱ’ꦭꦔ꧀ꦏꦴꦫꦺꦴ, ꦱꦷꦭꦁ ꦪꦺꦴꦒꦶꦱ꧀ꦱ ꦩꦟ꧀ꦝꦤꦁ;

ꦱꦷꦭꦺꦲꦶ’ꦭꦔ꧀ꦏꦠꦺꦴ ꦪꦺꦴꦒꦷ, ꦩꦟ꧀ꦝꦤꦺ ꦄꦒ꧀ꦒꦠꦁ ꦒꦠꦺꦴ’’ꦠꦶ.

ꦨꦒꦮꦠꦴꦥꦶ ꦕ ꦄꦤꦺꦏꦺꦱꦸ ꦱꦸꦠ꧀ꦠꦱꦠꦺꦱꦸ ꦱꦷꦭꦁ ꦩꦲꦤ꧀ꦠꦩꦺꦮ ꦏꦠ꧀ꦮꦴ ꦏꦡꦶꦠꦁ. ꦪꦡꦴꦲ – ‘‘ꦄꦴꦏꦔ꧀ꦑꦺꦪ꧀ꦪ ꦕꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ‘ꦱꦧ꧀ꦫꦲ꧀ꦩꦕꦴꦫꦷꦤꦁ ꦥꦶꦪꦺꦴ ꦕꦱ꧀ꦱꦁ ꦩꦤꦴꦥꦺꦴ ꦕ ꦒꦫꦸ ꦕ ꦨꦴꦮꦤꦷꦪꦺꦴ ꦕꦴ’ꦠꦶ, ꦱꦷꦭꦺꦱ꧀ꦮꦺꦮꦱ꧀ꦱ ꦥꦫꦶꦥꦹꦫꦏꦴꦫꦷ’’ꦠꦶ (ꦩ. ꦤꦶ. ꧑.꧖꧕) ꦕ.

‘‘ꦏꦶꦏꦷꦮ ꦄꦟ꧀ꦝꦁ, ꦕꦩꦫꦷꦮ ꦮꦴꦭꦣꦶꦁ;

ꦥꦶꦪꦁꦮ ꦥꦸꦠ꧀ꦠꦁ, ꦤꦪꦤꦁꦮ ꦌꦏꦏꦁ.

ꦠꦡꦺꦮ ꦱꦷꦭꦁ, ꦄꦤꦸꦫꦏ꧀ꦑꦩꦴꦤꦴ;

ꦱꦸꦥꦺꦱꦭꦴ ꦲꦺꦴꦡ, ꦱꦢꦴ ꦱꦒꦴꦫꦮꦴ’’ꦠꦶ ꦕ.

‘‘ꦤ ꦥꦸꦥ꧀ꦦꦒꦤ꧀ꦣꦺꦴ ꦥꦛꦶꦮꦴꦠꦩꦺꦠꦶ;

ꦤ ꦕꦤ꧀ꦢꦤꦁ ꦠꦒ꧀ꦒꦫꦩꦭ꧀ꦭꦶꦏꦴ ꦮꦴ.

ꦱꦠꦚ꧀ꦕ ꦒꦤ꧀ꦣꦺꦴ ꦥꦛꦶꦮꦴꦠꦩꦺꦠꦶ;

ꦱꦧ꧀ꦧꦴ ꦢꦶꦱꦴ ꦱꦥ꧀ꦥꦸꦫꦶꦱꦺꦴ ꦥꦮꦴꦪꦠꦶ.

ꦕꦤ꧀ꦢꦤꦁ ꦠꦒꦫꦁ ꦮꦴꦥꦶ, ꦈꦥ꧀ꦥꦭꦁ ꦄꦡ ꦮꦱ꧀ꦱꦶꦏꦷ;

ꦌꦠꦺꦱꦁ ꦒꦤ꧀ꦣꦗꦴꦠꦴꦤꦁ, ꦱꦷꦭꦒꦤ꧀ꦣꦺꦴ ꦄꦤꦸꦠ꧀ꦠꦫꦺꦴ.

ꦄꦥ꧀ꦥꦩꦠ꧀ꦠꦺꦴ ꦄꦪꦁ ꦒꦤ꧀ꦣꦺꦴ, ꦪ꧀ꦮꦴꦪꦁ ꦠꦒꦫꦕꦤ꧀ꦢꦤꦁ;

ꦪꦺꦴ ꦕ ꦱꦷꦭꦮꦠꦁ ꦒꦤ꧀ꦣꦺꦴ, ꦮꦴꦠꦶ ꦢꦺꦮꦺꦱꦸ ꦈꦠ꧀ꦠꦩꦺꦴ.

ꦠꦺꦱꦁ ꦱꦩ꧀ꦥꦤ꧀ꦤꦱꦷꦭꦴꦤꦁ, ꦄꦥ꧀ꦥꦩꦴꦢꦮꦶꦲꦴꦫꦶꦤꦁ;

ꦱꦩ꧀ꦩꦢꦚ꧀ꦚꦴ ꦮꦶꦩꦸꦠ꧀ꦠꦴꦤꦁ, ꦩꦴꦫꦺꦴ ꦩꦒ꧀ꦒꦁ ꦤ ꦮꦶꦤ꧀ꦢꦠꦷ’’ꦠꦶ ꦕ. (ꦣ. ꦥ. ꧕꧗);

‘‘ꦱꦷꦭꦺ ꦥꦠꦶꦛ꧀ꦜꦴꦪ ꦤꦫꦺꦴ ꦱꦥꦚ꧀ꦚꦺꦴ, ꦕꦶꦠ꧀ꦠꦁ ꦥꦚ꧀ꦚꦚ꧀ꦕ ꦨꦴꦮꦪꦁ;

ꦄꦴꦠꦴꦥꦷ ꦤꦶꦥꦏꦺꦴ ꦨꦶꦏ꧀ꦑꦸ, ꦱꦺꦴ ꦆꦩꦁ ꦮꦶꦗꦛꦪꦺ ꦗꦛ’’ꦤ꧀ꦠꦶ ꦕ. (ꦱꦁ. ꦤꦶ. ꧑.꧒꧓);

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦪꦺ ꦏꦺꦕꦶ ꦧꦷꦗꦒꦴꦩꦨꦹꦠꦒꦴꦩꦴ ꦮꦸꦝ꧀ꦞꦶꦁ ꦮꦶꦫꦹꦭ꦳꧀ꦲꦶꦁ ꦮꦺꦥꦸꦭ꧀ꦭꦁ ꦄꦴꦥꦗ꧀ꦗꦤ꧀ꦠꦶ, ꦱꦧ꧀ꦧꦺ ꦠꦺ ꦥꦡꦮꦶꦁ ꦤꦶꦱ꧀ꦱꦴꦪ, ꦥꦡꦮꦶꦪꦁ ꦥꦠꦶꦛ꧀ꦜꦴꦪ; ꦌꦮꦩꦺꦠꦺ ꦧꦷꦗꦒꦴꦩꦨꦹꦠꦒꦴꦩꦴ ꦮꦸꦝ꧀ꦞꦶꦁ ꦮꦶꦫꦹꦭ꦳꧀ꦲꦶꦁ ꦮꦺꦥꦸꦭ꧀ꦭꦁ ꦄꦴꦥꦗ꧀ꦗꦤ꧀ꦠꦶ. ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦷꦭꦁ ꦤꦶꦱ꧀ꦱꦴꦪ ꦱꦷꦭꦺ ꦥꦠꦶꦛ꧀ꦜꦴꦪ ꦱꦠ꧀ꦠꦧꦺꦴꦗ꧀ꦙꦔ꧀ꦒꦺ ꦨꦴꦮꦺꦤ꧀ꦠꦺꦴ ꦱꦠ꧀ꦠꦧꦺꦴꦗ꧀ꦙꦔ꧀ꦒꦺ ꦧꦲꦸꦭꦷꦏꦫꦺꦴꦤ꧀ꦠꦺꦴ ꦮꦸꦝ꧀ꦞꦶꦁ ꦮꦶꦫꦹꦭ꦳꧀ꦲꦶꦁ ꦮꦺꦥꦸꦭ꧀ꦭꦁ ꦥꦴꦥꦸꦟꦴꦠꦶ ꦣꦩ꧀ꦩꦺꦱꦹ’’ꦠꦶ (ꦱꦁ. ꦤꦶ. ꧕.꧑꧕꧐) ꦕ. ꦌꦮꦁ ꦄꦚ꧀ꦚꦴꦤꦶꦥꦶ ꦄꦤꦺꦏꦴꦤꦶ ꦱꦸꦠ꧀ꦠꦴꦤꦶ ꦢꦛ꧀ꦜꦧ꧀ꦧꦴꦤꦶ. ꦌꦮꦩꦤꦺꦏꦺꦱꦸ ꦱꦸꦠ꧀ꦠꦱꦠꦺꦱꦸ ꦱꦷꦭꦁ ꦩꦲꦤ꧀ꦠꦩꦺꦮ ꦏꦠ꧀ꦮꦴ ꦏꦡꦶꦠꦁ. ꦠꦁ ‘‘ꦏꦱ꧀ꦩꦴ ꦆꦩꦱ꧀ꦩꦶꦁ ꦜꦴꦤꦺ ꦄꦥ꧀ꦥꦩꦠ꧀ꦠꦏ’’ꦤ꧀ꦠꦶ ꦄꦴꦲꦴꦠꦶ? ꦈꦥꦫꦶ ꦒꦸꦟꦺ ꦈꦥꦤꦶꦣꦴꦪ. ꦱꦷꦭꦚ꧀ꦲꦶ ꦱꦩꦴꦣꦶꦁ ꦤ ꦥꦴꦥꦸꦟꦴꦠꦶ, ꦱꦩꦴꦣꦶ ꦥꦚ꧀ꦚꦁ ꦤ ꦥꦴꦥꦸꦟꦴꦠꦶ, ꦠꦱ꧀ꦩꦴ ꦈꦥꦫꦶꦩꦁ ꦈꦥꦤꦶꦣꦴꦪ ꦲꦺꦛ꧀ꦜꦶꦩꦁ ꦎꦫꦩꦠ꧀ꦠꦏꦁ ꦤꦴꦩ ꦲꦺꦴꦠꦶ. ꦏꦡꦁ ꦱꦷꦭꦁ ꦱꦩꦴꦣꦶꦁ ꦤ ꦥꦴꦥꦸꦟꦴꦠꦶ? ꦨꦒꦮꦴ ꦲꦶ ꦄꦨꦶꦱꦩ꧀ꦧꦺꦴꦣꦶꦠꦺꦴ ꦱꦠ꧀ꦠꦩꦺ ꦱꦁꦮꦕ꧀ꦖꦫꦺ ꦱꦴꦮꦠ꧀ꦡꦶꦤꦒꦫ – ꦢ꧀ꦮꦴꦫꦺ ꦏꦟ꧀ꦝꦩ꧀ꦧꦫꦸꦏ꧀ꦑꦩꦹꦭꦺ ꦢ꧀ꦮꦴꦢꦱꦪꦺꦴꦗꦤꦺ ꦫꦠꦤꦩꦟ꧀ꦝꦥꦺ ꦪꦺꦴꦗꦤꦥ꧀ꦥꦩꦴꦟꦺ ꦫꦠꦤꦥꦭ꧀ꦭꦔ꧀ꦏꦺ ꦤꦶꦱꦷꦢꦶꦠ꧀ꦮꦴ ꦠꦶꦪꦺꦴꦗꦤꦶꦏꦺ ꦢꦶꦧ꧀ꦧꦱꦺꦠꦕ꧀ꦖꦠ꧀ꦠꦺ ꦣꦴꦫꦶꦪꦩꦴꦤꦺ ꦢ꧀ꦮꦴꦢꦱꦪꦺꦴꦗꦤꦴꦪ ꦥꦫꦶꦱꦴꦪ ꦄꦠ꧀ꦠꦴꦢꦴꦤꦥꦫꦶꦢꦷꦥꦤꦁ ꦠꦶꦠ꧀ꦡꦶꦪꦩꦢ꧀ꦢꦤꦁ – ‘‘ꦈꦥꦫꦶꦩꦏꦴꦪꦠꦺꦴ ꦄꦒ꧀ꦒꦶꦏ꧀ꦑꦤ꧀ꦣꦺꦴ ꦥꦮꦠ꧀ꦠꦠꦶ, ꦲꦺꦛ꧀ꦜꦶꦩꦏꦴꦪꦠꦺꦴ ꦈꦢꦏꦣꦴꦫꦴ ꦥꦮꦠ꧀ꦠꦠꦶ…ꦥꦺ… ꦌꦏꦺꦏꦭꦺꦴꦩꦏꦹꦥꦠꦺꦴ ꦄꦒ꧀ꦒꦶꦏ꧀ꦑꦤ꧀ꦣꦺꦴ ꦥꦮꦠ꧀ꦠꦠꦶ, ꦌꦏꦺꦏꦭꦺꦴꦩꦏꦹꦥꦠꦺꦴ ꦈꦢꦏꦣꦴꦫꦴ ꦥꦮꦠ꧀ꦠꦠꦶ, ꦖꦤ꧀ꦤꦁ ꦮꦟ꧀ꦟꦴꦤ’’ꦤ꧀ꦠꦶꦄꦴꦢꦶꦤꦪꦥ꧀ꦥꦮꦠ꧀ꦠꦁ ꦪꦩꦏꦥꦴꦛꦶꦲꦴꦫꦶꦪꦁ ꦢꦱ꧀ꦱꦺꦠꦶ. ꦠꦱ꧀ꦱ ꦱꦸꦮꦟ꧀ꦟꦮꦟ꧀ꦟꦱꦫꦷꦫꦠꦺꦴ ꦱꦸꦮꦟ꧀ꦟꦮꦟ꧀ꦟꦴ ꦫꦱ꧀ꦩꦶꦪꦺꦴ ꦈꦒ꧀ꦒꦤ꧀ꦠ꧀ꦮꦴ ꦪꦴꦮ ꦨꦮꦒ꧀ꦒꦴ ꦒꦕ꧀ꦖꦤ꧀ꦠꦶ, ꦱꦏꦭꦢꦱꦱꦲꦱ꧀ꦱꦕꦏ꧀ꦏꦮꦴꦭ꦳ꦱ꧀ꦱ ꦄꦭꦔ꧀ꦏꦫꦟꦏꦴꦭꦺꦴ ꦮꦶꦪ ꦲꦺꦴꦠꦶ, ꦢꦸꦠꦶꦪꦴ ꦢꦸꦠꦶꦪꦴ ꦫꦱ꧀ꦩꦶꦪꦺꦴ ꦥꦸꦫꦶꦩꦴꦪ ꦥꦸꦫꦶꦩꦴꦪ ꦪꦩꦏꦪꦩꦏꦴ ꦮꦶꦪ ꦌꦏꦏ꧀ꦑꦟꦺ ꦮꦶꦪ ꦥꦮꦠ꧀ꦠꦤ꧀ꦠꦶ.

ꦢ꧀ꦮꦶꦤ꧀ꦤꦚ꧀ꦕ ꦕꦶꦠ꧀ꦠꦴꦤꦁ ꦌꦏꦏ꧀ꦑꦟꦺ ꦥꦮꦠ꧀ꦠꦶ ꦤꦴꦩ ꦤꦠ꧀ꦡꦶ. ꦧꦸꦢ꧀ꦣꦴꦤꦁ ꦥꦤ ꦨꦒꦮꦤ꧀ꦠꦴꦤꦁ ꦨꦮꦔ꧀ꦒꦥꦫꦶꦮꦴꦱꦱ꧀ꦱ ꦭꦲꦸꦏꦠꦴꦪ ꦥꦚ꧀ꦕꦲꦴꦏꦴꦫꦺꦲꦶ ꦄꦴꦕꦶꦟ꧀ꦟꦮꦱꦶꦠꦴꦪ ꦕ, ꦠꦴ ꦌꦏꦏ꧀ꦑꦟꦺ ꦮꦶꦪ ꦥꦮꦠ꧀ꦠꦤ꧀ꦠꦶ. ꦠꦱ꧀ꦱꦴ ꦠꦱ꧀ꦱꦴ ꦥꦤ ꦫꦱ꧀ꦩꦶꦪꦴ ꦄꦴꦮꦗ꧀ꦗꦤꦥꦫꦶꦏꦩ꧀ꦩꦴꦣꦶꦛ꧀ꦜꦴꦤꦴꦤꦶ ꦮꦶꦱꦸꦁ ꦮꦶꦱꦸꦁꦪꦺꦮ.

ꦤꦷꦭꦫꦱ꧀ꦩꦶꦄꦠ꧀ꦡꦴꦪ ꦲꦶ ꦨꦒꦮꦴ ꦤꦷꦭꦏꦱꦶꦟꦁ ꦱꦩꦴꦥꦗ꧀ꦗꦠꦶ, ꦥꦷꦠꦫꦱ꧀ꦩꦶꦄꦠ꧀ꦡꦴꦪ ꦥꦷꦠꦏꦱꦶꦟꦁ, ꦭꦺꦴꦲꦶꦠꦎꦢꦴꦠꦫꦱ꧀ꦩꦶꦄꦠ꧀ꦡꦴꦪ ꦭꦺꦴꦲꦶꦠꦎꦢꦴꦠꦏꦱꦶꦟꦁ, ꦄꦒ꧀ꦒꦶꦏ꧀ꦑꦤ꧀ꦣꦠ꧀ꦡꦴꦪ ꦠꦺꦗꦺꦴꦏꦱꦶꦟꦁ, ꦈꦢꦏꦣꦴꦫꦠ꧀ꦡꦴꦪ ꦄꦴꦥꦺꦴꦏꦱꦶꦟꦁ ꦱꦩꦴꦥꦗ꧀ꦗꦠꦶ. ꦱꦠ꧀ꦡꦴ ꦕꦔ꧀ꦏꦩꦠꦶ, ꦤꦶꦩ꧀ꦩꦶꦠꦺꦴ ꦠꦶꦛ꧀ꦜꦠꦶ ꦮꦴ ꦤꦶꦱꦷꦢꦠꦶ ꦮꦴ ꦱꦺꦪ꧀ꦪꦁ ꦮꦴ ꦏꦥ꧀ꦥꦺꦠꦷꦠꦶ ꦱꦧ꧀ꦧꦁ ꦮꦶꦠ꧀ꦡꦴꦫꦺꦠꦧ꧀ꦧꦁ. ꦌꦠ꧀ꦡ ꦌꦏꦩ꧀ꦥꦶ ꦱꦷꦭꦱ꧀ꦱ ꦏꦶꦕ꧀ꦕꦁ ꦤꦠ꧀ꦡꦶ, ꦱꦧ꧀ꦧꦁ ꦱꦩꦴꦣꦶꦏꦶꦕ꧀ꦕꦩꦺꦮ. ꦌꦮꦁ ꦱꦷꦭꦁ ꦱꦩꦴꦣꦶꦁ ꦤ ꦥꦴꦥꦸꦟꦴꦠꦶ.

ꦪꦁ ꦥꦤ ꦨꦒꦮꦴ ꦏꦥ꧀ꦥꦱꦠꦱꦲꦱ꧀ꦱꦴꦣꦶꦏꦴꦤꦶ ꦕꦠ꧀ꦠꦴꦫꦶ ꦄꦱꦔ꧀ꦑ꧀ꦪꦺꦪ꧀ꦪꦴꦤꦶ ꦥꦴꦫꦩꦶꦪꦺꦴ ꦥꦹꦫꦺꦠ꧀ꦮꦴ, ꦌꦏꦹꦤꦠꦶꦁꦱꦮꦱ꧀ꦱꦏꦴꦭꦺ ꦕꦏ꧀ꦏꦮꦠ꧀ꦠꦶꦱꦶꦫꦷꦤꦶꦮꦴꦱꦨꦹꦠꦴ ꦨꦮꦤꦴ ꦤꦶꦏ꧀ꦑꦩ꧀ꦩ ꦄꦤꦺꦴꦩꦴꦤꦢꦷꦠꦷꦫꦺ ꦥꦧ꧀ꦧꦗꦶꦠ꧀ꦮꦴ, ꦖꦧ꧀ꦧꦱ꧀ꦱꦴꦤꦶ ꦥꦣꦴꦤꦪꦺꦴꦒꦁ ꦏꦠ꧀ꦮꦴ, ꦮꦶꦱꦴꦑꦥꦸꦟ꧀ꦟꦩꦴꦪꦁ ꦈꦫꦸꦮꦺꦭꦒꦴꦩꦺ ꦱꦸꦗꦴꦠꦴꦪ ꦢꦶꦤ꧀ꦤꦁ ꦥꦏ꧀ꦑꦶꦠ꧀ꦠꦢꦶꦧ꧀ꦧꦺꦴꦗꦁ ꦩꦣꦸꦥꦴꦪꦴꦱꦁ ꦥꦫꦶꦨꦸꦚ꧀ꦗꦶꦠ꧀ꦮꦴ, ꦱꦴꦪꦤ꧀ꦲꦱꦩꦪꦺ ꦢꦏ꧀ꦑꦶꦟꦸꦠ꧀ꦠꦫꦺꦤ ꦧꦺꦴꦣꦶꦩꦟ꧀ꦝꦁ ꦥꦮꦶꦱꦶꦠ꧀ꦮꦴ ꦄꦱ꧀ꦱꦠ꧀ꦡꦢꦸꦩꦫꦴꦗꦴꦤꦁ ꦠꦶꦏ꧀ꦑꦠ꧀ꦠꦸꦁ ꦥꦢꦏ꧀ꦑꦶꦟꦁ ꦏꦠ꧀ꦮꦴ, ꦥꦸꦧ꧀ꦧꦸꦠ꧀ꦠꦫꦨꦴꦒꦺ ꦜꦶꦠꦺꦴ ꦠꦶꦟꦱꦤ꧀ꦡꦴꦫꦁ ꦱꦤ꧀ꦡꦫꦶꦠ꧀ꦮꦴ, ꦠꦶꦱꦤ꧀ꦣꦶꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ, ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦁ ꦩꦺꦠ꧀ꦠꦴꦏꦩ꧀ꦩꦛ꧀ꦜꦴꦤꦁ ꦥꦸꦧ꧀ꦧꦔ꧀ꦒꦩꦁ ꦏꦠ꧀ꦮꦴ, ꦮꦷꦫꦶꦪꦴꦣꦶꦛ꧀ꦜꦴꦤꦁ ꦄꦣꦶꦛ꧀ꦜꦴꦪ, ꦕꦸꦢ꧀ꦢꦱꦲꦠ꧀ꦡꦥꦭ꧀ꦭꦔ꧀ꦏꦮꦫꦒꦠꦺꦴ ꦱꦸꦮꦟ꧀ꦟꦥꦷꦜꦺ ꦜꦥꦶꦠꦁ ꦫꦗꦠꦏ꧀ꦑꦤ꧀ꦣꦁ ꦮꦶꦪ ꦥꦚ꧀ꦚꦴꦱꦲꦠ꧀ꦡꦁ ꦧꦺꦴꦣꦶꦏ꧀ꦑꦤ꧀ꦣꦁ ꦥꦶꦛ꧀ꦜꦶꦠꦺꦴ ꦏꦠ꧀ꦮꦴ, ꦈꦥꦫꦶ ꦩꦟꦶꦖꦠ꧀ꦠꦺꦤ ꦮꦶꦪ ꦧꦺꦴꦣꦶꦱꦴꦑꦴꦪ ꦣꦴꦫꦶꦪꦩꦴꦤꦺꦴ, ꦱꦸꦮꦟ꧀ꦟꦮꦟ꧀ꦟꦺ ꦕꦷꦮꦫꦺ ꦥꦮꦴꦭ꦳ꦱꦢꦶꦱꦺꦱꦸ ꦧꦺꦴꦣꦶꦄꦔ꧀ꦏꦸꦫꦺꦱꦸ ꦥꦠꦩꦴꦤꦺꦱꦸ, ꦱꦹꦫꦶꦪꦺ ꦄꦠ꧀ꦡꦁ ꦈꦥꦒꦕ꧀ꦖꦤ꧀ꦠꦺ ꦩꦴꦫꦧꦭꦁ ꦮꦶꦣꦩꦶꦠ꧀ꦮꦴ, ꦥꦜꦩꦪꦴꦩꦺ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦶꦠ꧀ꦮꦴ, ꦩꦗ꧀ꦙꦶꦩꦪꦴꦩꦺ ꦢꦶꦧ꧀ꦧꦕꦏ꧀ꦑꦸꦁ ꦮꦶꦱꦺꦴꦣꦺꦠ꧀ꦮꦴ, ꦥꦕ꧀ꦕꦹꦱꦏꦴꦭꦺ ꦱꦧ꧀ꦧꦧꦸꦢ꧀ꦣꦴꦤꦩꦴꦕꦶꦟ꧀ꦟꦺ ꦥꦕ꧀ꦕꦪꦴꦏꦴꦫꦺ ꦚꦴꦟꦁ ꦎꦠꦴꦫꦺꦠ꧀ꦮꦴ, ꦄꦴꦤꦴꦥꦴꦤꦕꦠꦸꦠ꧀ꦡꦗ꧀ꦙꦴꦤꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ, ꦠꦢꦺꦮ ꦥꦴꦢꦏꦁ ꦏꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ, ꦩꦒ꧀ꦒꦥꦛꦶꦥꦴꦛꦶꦪꦴ ꦄꦣꦶꦒꦠꦺꦤ ꦕꦠꦸꦠ꧀ꦡꦩꦒ꧀ꦒꦺꦤ ꦱꦧ꧀ꦧꦏꦶꦭꦺꦱꦺ ꦑꦺꦥꦺꦠ꧀ꦮꦴ ꦱꦧ꧀ꦧꦧꦸꦢ꧀ꦣꦒꦸꦟꦺ ꦥꦛꦶꦮꦶꦗ꧀ꦙꦶ, ꦆꦢꦩꦱ꧀ꦱ ꦥꦚ꧀ꦚꦴꦏꦶꦕ꧀ꦕꦁ. ꦌꦮꦁ ꦱꦩꦴꦣꦶ ꦥꦚ꧀ꦚꦁ ꦤ ꦥꦴꦥꦸꦟꦴꦠꦶ.