(꧓.) ꦠꦶꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧙꧐꧙. ꦠꦶꦏꦤꦶꦢ꧀ꦢꦺꦱꦺ ꦠꦷꦲꦶ ꦄꦏꦸꦱꦭꦩꦹꦭꦺꦲꦶ ꦮꦛ꧀ꦛꦩꦹꦭꦱꦩꦸꦢꦴꦕꦴꦫꦺꦴ ꦏꦡꦶꦠꦺꦴ. ꦄꦏꦸꦱꦭꦮꦶꦠꦏ꧀ꦏꦴꦢꦷꦱꦸ ꦮꦶꦠꦏ꧀ꦏꦤꦮꦱꦺꦤ ꦮꦶꦠꦏ꧀ꦏꦺꦴ, ꦱꦚ꧀ꦗꦴꦤꦤꦮꦱꦺꦤ ꦱꦚ꧀ꦚꦴ, ꦱꦨꦴꦮꦛ꧀ꦜꦺꦤ ꦣꦴꦠꦹꦠꦶ ꦮꦺꦢꦶꦠꦧ꧀ꦧꦴ. ꦢꦸꦕ꧀ꦕꦫꦶꦠꦤꦶꦢ꧀ꦢꦺꦱꦺ ꦥꦜꦩꦤꦪꦺꦴ ꦏꦩ꧀ꦩꦥꦡꦮꦱꦺꦤ ꦮꦶꦨꦠ꧀ꦠꦺꦴ, ꦢꦸꦠꦶꦪꦺꦴ ꦱꦧ꧀ꦧꦱꦔ꧀ꦒꦴꦲꦶꦏꦏꦩ꧀ꦩꦮꦱꦺꦤ, ꦠꦠꦶꦪꦺꦴ ꦤꦶꦧ꧀ꦧꦠ꧀ꦠꦶꦠꦕꦺꦠꦤꦴꦮꦱꦺꦤꦺꦮ.

꧙꧑꧔. ꦄꦴꦱꦮꦤꦶꦢ꧀ꦢꦺꦱꦺ ꦱꦸꦠ꧀ꦠꦤ꧀ꦠꦥꦫꦶꦪꦴꦪꦺꦤ ꦠꦪꦺꦴꦮ ꦄꦴꦱꦮꦴ ꦏꦡꦶꦠꦴ.

꧙꧑꧙. ꦌꦱꦤꦴꦤꦶꦢ꧀ꦢꦺꦱꦺ ꦱꦔ꧀ꦑꦺꦥꦠꦺꦴ ꦠꦠ꧀ꦡ ꦏꦠꦩꦴ ꦏꦴꦩꦺꦱꦤꦴꦠꦶ ꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦺꦴ ꦏꦴꦩꦒꦮꦺꦱꦤꦫꦴꦒꦺꦴ ꦏꦴꦩꦺꦱꦤꦴ. ꦪꦺꦴ ꦨꦮꦺꦱꦸ ꦨꦮꦕ꧀ꦖꦤ꧀ꦢꦺꦴꦠꦶꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦺꦴ ꦨꦮꦒꦮꦺꦱꦤꦫꦴꦒꦺꦴ ꦨꦮꦺꦱꦤꦴ. ꦱꦱ꧀ꦱꦠꦺꦴ ꦭꦺꦴꦏꦺꦴꦠꦶꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦴ ꦢꦶꦛ꧀ꦜꦶꦒꦠꦶꦏꦱꦩ꧀ꦩꦠꦱ꧀ꦱ ꦧ꧀ꦫꦲ꧀ꦩꦕꦫꦶꦪꦱ꧀ꦱ ꦒꦮꦺꦱꦤꦴ ꦢꦶꦛ꧀ꦜꦶ ꦧ꧀ꦫꦲ꧀ꦩꦕꦫꦶꦪꦺꦱꦤꦴꦠꦶ ꦮꦺꦢꦶꦠꦧ꧀ꦧꦴ. ꦪꦱ꧀ꦩꦴ ꦕ ꦤ ꦏꦺꦮꦭꦁ ꦫꦴꦒꦢꦶꦛ꧀ꦜꦶꦪꦺꦴ ꦌꦮ ꦌꦱꦤꦴ, ꦠꦢꦺꦏꦛ꧀ꦜꦁ ꦥꦤ ꦏꦩ꧀ꦩꦩ꧀ꦥꦶ ꦌꦱꦤꦴ ꦌꦮ, ꦠꦱ꧀ꦩꦴ ꦠꦁ ꦢꦱ꧀ꦱꦺꦠꦸꦁ ꦢꦸꦠꦶꦪꦤꦪꦺꦴ ꦮꦶꦨꦠ꧀ꦠꦺꦴ. ꦠꦠ꧀ꦡ ꦠꦢꦺꦏꦛ꧀ꦜꦤ꧀ꦠꦶ ꦱꦩ꧀ꦥꦪꦸꦠ꧀ꦠꦺꦏꦛ꧀ꦜꦁ ꦮꦺꦢꦶꦠꦧ꧀ꦧꦁ. ꦠꦠ꧀ꦡ ꦏꦴꦩꦫꦴꦒꦺꦏꦛ꧀ꦜꦁ ꦏꦴꦩꦴꦮꦕꦫꦱꦠ꧀ꦠꦴꦤꦩꦺꦮ ꦥꦮꦠ꧀ꦠꦠꦶ; ꦨꦮꦫꦴꦒꦺꦏꦛ꧀ꦜꦁ ꦥꦤ ꦩꦲꦴꦧ꧀ꦫꦲ꧀ꦩꦴꦤꦁ. ꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦪ ꦕꦔ꧀ꦏꦩꦤ꧀ꦠꦴꦤꦁ ꦙꦴꦤꦔ꧀ꦒꦴꦤꦁ ꦄꦱ꧀ꦱꦴꦢꦤꦏꦴꦭꦺ ꦄꦏꦸꦱꦭꦏꦴꦪꦏꦩ꧀ꦩꦁ ꦲꦺꦴꦠꦶ, ‘ꦄꦲꦺꦴ ꦱꦸꦑꦁ ꦄꦲꦺꦴ ꦱꦸꦑ’ꦤ꧀ꦠꦶ ꦮꦴꦕꦁ ꦨꦶꦤ꧀ꦢꦶꦠ꧀ꦮꦴ ꦄꦱ꧀ꦱꦴꦢꦤꦏꦴꦭꦺ ꦮꦕꦷꦏꦩ꧀ꦩꦁ, ꦏꦴꦪꦔ꧀ꦒꦮꦴꦕꦔ꧀ꦒꦴꦤꦶ ꦄꦕꦺꦴꦥꦺꦠ꧀ꦮꦴ ꦩꦤꦱꦴꦮ ꦄꦱ꧀ꦱꦴꦢꦤꦏꦴꦭꦺ ꦩꦤꦺꦴꦏꦩ꧀ꦩꦁ. ꦄꦤ꧀ꦠꦒ꧀ꦒꦴꦲꦶꦏꦢꦶꦛ꧀ꦜꦶꦮꦱꦺꦤ ꦱꦧ꧀ꦧꦺꦱꦩ꧀ꦥꦶ ꦢꦶꦛ꧀ꦜꦶꦒꦠꦶꦏꦴꦤꦁ ꦕꦔ꧀ꦏꦩꦤꦴꦢꦶꦮꦱꦺꦤ ꦠꦴꦤꦶ ꦲꦺꦴꦤ꧀ꦠꦶꦪꦺꦮ.

꧙꧒꧐. ꦮꦶꦣꦴꦤꦶꦢ꧀ꦢꦺꦱꦺ ‘‘ꦏꦡꦁꦮꦶꦣꦁ ꦱꦷꦭꦮꦤ꧀ꦠꦁ ꦮꦢꦤ꧀ꦠꦶ, ꦏꦡꦁꦮꦶꦣꦁ ꦥꦚ꧀ꦚꦮꦤ꧀ꦠꦁ ꦮꦢꦤ꧀ꦠꦷ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧑.꧙꧕) ꦄꦴꦏꦴꦫꦱꦟ꧀ꦜꦴꦤꦁ ꦮꦶꦣꦴ ꦤꦴꦩ. ‘‘ꦌꦏꦮꦶꦣꦺꦤ ꦚꦴꦟꦮꦠ꧀ꦡꦹ’’ꦠꦶꦄꦴꦢꦷꦱꦸ (ꦮꦶꦨ. ꧗꧕꧑) ꦏꦺꦴꦛ꧀ꦜꦴꦱꦺꦴ. ‘‘ꦮꦶꦣꦴꦱꦸ ꦤ ꦮꦶꦏꦩ꧀ꦥꦠꦷ’’ꦠꦶꦄꦴꦢꦷꦱꦸ (ꦡꦺꦫꦒꦴ. ꧑꧐꧗꧙) ꦩꦴꦤꦺꦴ. ꦆꦣꦴꦥꦶ ꦩꦴꦤꦺꦴꦮ ꦮꦶꦣꦴ ꦤꦴꦩ. ꦱꦺꦴ ꦲꦶ ꦱꦺꦪ꧀ꦪꦴꦢꦶꦮꦱꦺꦤ ꦮꦶꦢꦲꦤꦠꦺꦴ ꦮꦶꦣꦴꦠꦶ ꦮꦸꦕ꧀ꦕꦠꦶ. ꦜꦥꦤꦛ꧀ꦜꦺꦤ ꦮꦴ ꦮꦶꦣꦴ. ꦠꦱ꧀ꦩꦴ ‘ꦱꦺꦪ꧀ꦪꦺꦴꦲꦩꦱ꧀ꦩꦷ’ꦠꦶ ꦌꦮꦁ ꦈꦥ꧀ꦥꦤ꧀ꦤꦴ ꦩꦴꦤꦮꦶꦣꦴ ꦩꦴꦤꦜꦥꦤꦴ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦮꦶꦣꦴꦠꦶ ꦮꦺꦢꦶꦠꦧ꧀ꦧꦴ. ꦱꦺꦱꦥꦢꦢ꧀ꦮꦪꦺꦱꦸꦥꦶ ꦌꦱꦺꦮ ꦤꦪꦺꦴ.

꧙꧒꧑. ꦨꦪꦤꦶꦢ꧀ꦢꦺꦱꦺ ꦗꦴꦠꦶꦁ ꦥꦛꦶꦕ꧀ꦕ ꦨꦪꦤ꧀ꦠꦶ ꦗꦴꦠꦶꦥꦕ꧀ꦕꦪꦴ ꦈꦥ꧀ꦥꦤ꧀ꦤꦨꦪꦁ. ꦨꦪꦴꦤꦏꦤ꧀ꦠꦶ ꦄꦴꦏꦴꦫꦤꦶꦢ꧀ꦢꦺꦱꦺꦴ. ꦖꦩ꧀ꦨꦶꦠꦠ꧀ꦠꦤ꧀ꦠꦶ ꦨꦪꦮꦱꦺꦤ ꦒꦠ꧀ꦠꦕꦭꦤꦁ. ꦭꦺꦴꦩꦲꦁꦱꦺꦴꦠꦶ ꦭꦺꦴꦩꦴꦤꦁ ꦲꦁꦱꦤꦁ, ꦈꦢ꧀ꦣꦒ꧀ꦒꦨꦴꦮꦺꦴ. ꦆꦩꦶꦤꦴ ꦥꦢꦢ꧀ꦮꦪꦺꦤ ꦏꦶꦕ꧀ꦕꦠꦺꦴ ꦨꦪꦁ ꦢꦱ꧀ꦱꦺꦠ꧀ꦮꦴ ꦥꦸꦤ ꦕꦺꦠꦱꦺꦴ ꦈꦠ꧀ꦫꦴꦱꦺꦴꦠꦶ ꦱꦨꦴꦮꦠꦺꦴ ꦢꦱ꧀ꦱꦶꦠꦁ.

꧙꧒꧒. ꦠꦩꦤꦶꦢ꧀ꦢꦺꦱꦺ ꦮꦶꦕꦶꦏꦶꦕ꧀ꦖꦴꦱꦷꦱꦺꦤ ꦄꦮꦶꦗ꧀ꦗꦴ ꦏꦡꦶꦠꦴ. ‘‘ꦠꦩꦤ꧀ꦣꦏꦴꦫꦺꦴ ꦱꦩ꧀ꦩꦺꦴꦲꦺꦴ, ꦄꦮꦶꦗ꧀ꦗꦺꦴꦓꦺꦴ ꦩꦲꦧ꧀ꦨꦪꦺꦴ’’ꦠꦶ ꦮꦕꦤꦠꦺꦴ ꦲꦶ ꦄꦮꦶꦗ꧀ꦗꦴ ꦠꦩꦺꦴ ꦤꦴꦩ. ꦠꦶꦟ꧀ꦟꦁ ꦥꦤ ꦄꦢ꧀ꦣꦴꦤꦁ ꦮꦱꦺꦤ ꦢꦺꦱꦤꦴꦱꦸꦑꦠꦴꦪ ꦮꦶꦕꦶꦏꦶꦕ꧀ꦖꦴꦱꦷꦱꦺꦤ ꦢꦺꦱꦤꦴ ꦏꦠꦴ. ꦠꦠ꧀ꦡ ‘ꦏꦶꦁ ꦤꦸ ꦑꦺꦴ ꦄꦲꦁ ꦄꦠꦷꦠꦺ ꦑꦠ꧀ꦠꦶꦪꦺꦴ ꦄꦲꦺꦴꦱꦶꦁ ꦈꦢꦴꦲꦸ ꦧ꧀ꦫꦴꦲ꧀ꦩꦟꦺꦴ ꦮꦺꦱ꧀ꦱꦺꦴ ꦱꦸꦢ꧀ꦢꦺꦴ ꦏꦴꦭ꦳ꦺꦴ ꦎꦢꦴꦠꦺꦴ ꦫꦱ꧀ꦱꦺꦴ ꦢꦷꦓꦺꦴ’ꦠꦶ ꦏꦔ꧀ꦑꦤ꧀ꦠꦺꦴ ꦄꦠꦷꦠꦁ ꦄꦢ꧀ꦣꦴꦤꦁ ꦄꦴꦫꦧ꧀ꦨ ꦏꦔ꧀ꦑꦠꦶ ꦤꦴꦩ. ‘ꦏꦶꦁ ꦤꦸ ꦑꦺꦴ ꦄꦲꦁ ꦄꦤꦴꦒꦠꦺ ꦑꦠ꧀ꦠꦶꦪꦺꦴ ꦨꦮꦶꦱ꧀ꦱꦴꦩꦶ ꦈꦢꦴꦲꦸ ꦧ꧀ꦫꦴꦲ꧀ꦩꦟꦺꦴ ꦮꦺꦱ꧀ꦱꦺꦴ…ꦥꦺ… ꦢꦷꦓꦺꦴ’ꦠꦶ ꦏꦔ꧀ꦑꦤ꧀ꦠꦺꦴ ꦄꦤꦴꦒꦠꦁ ꦄꦢ꧀ꦣꦴꦤꦁ ꦄꦴꦫꦧ꧀ꦨ ꦏꦔ꧀ꦑꦠꦶ ꦤꦴꦩ. ‘ꦏꦶꦁ ꦤꦸ ꦑꦺꦴ ꦄꦲꦁ ꦌꦠꦫꦲꦶ ꦑꦠ꧀ꦠꦶꦪꦺꦴ ꦈꦢꦴꦲꦸ ꦧ꧀ꦫꦴꦲ꧀ꦩꦟꦺꦴ ꦮꦺꦱ꧀ꦱꦺꦴ ꦱꦸꦢ꧀ꦢꦺꦴ; ꦏꦶꦁ ꦮꦴ ꦄꦲꦁ ꦫꦹꦥꦁ ꦈꦢꦴꦲꦸ ꦮꦺꦢꦤꦴ ꦱꦚ꧀ꦚꦴ ꦱꦔ꧀ꦑꦴꦫꦴ ꦮꦶꦚ꧀ꦚꦴꦟ’ꦤ꧀ꦠꦶ ꦏꦔ꧀ꦑꦤ꧀ꦠꦺꦴ ꦥꦕ꧀ꦕꦸꦥ꧀ꦥꦤ꧀ꦤꦁ ꦄꦢ꧀ꦣꦴꦤꦁ ꦄꦴꦫꦧ꧀ꦨ ꦏꦔ꧀ꦑꦠꦶ ꦤꦴꦩ.

ꦠꦠ꧀ꦡ ꦏꦶꦚ꧀ꦕꦴꦥꦶ ꦑꦠ꧀ꦠꦶꦪꦺꦴ ꦮꦴ ꦄꦠ꧀ꦠꦤꦺꦴ ꦑꦠ꧀ꦠꦶꦪꦨꦴꦮꦁ, ꦧ꧀ꦫꦴꦲ꧀ꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦨꦴꦮꦁ, ꦮꦺꦱ꧀ꦱꦺꦴ ꦮꦴ ꦮꦺꦱ꧀ꦱꦨꦴꦮꦁ, ꦱꦸꦢ꧀ꦢꦺꦴ ꦮꦴ ꦱꦸꦢ꧀ꦢꦨꦴꦮꦁ ꦄꦗꦴꦤꦤꦏꦺꦴ ꦤꦴꦩ ꦤꦠ꧀ꦡꦶ, ꦗꦷꦮꦭꦢ꧀ꦣꦶꦏꦺꦴ ꦥꦤ ꦱꦠ꧀ꦠꦺꦴ ꦑꦠ꧀ꦠꦶꦪꦗꦷꦮꦴꦢꦷꦤꦁ ꦮꦟ꧀ꦟꦴꦢꦶꦨꦺꦢꦁ ꦱꦸꦠ꧀ꦮꦴ ‘ꦏꦷꦢꦶꦱꦺꦴ ꦤꦸ ꦑꦺꦴ ꦄꦩ꧀ꦲꦴꦏꦁ ꦄꦧ꧀ꦨꦤ꧀ꦠꦫꦺ ꦗꦷꦮꦺꦴ – ꦏꦶꦁ ꦤꦸ ꦑꦺꦴ ꦤꦷꦭꦏꦺꦴ ꦈꦢꦴꦲꦸ ꦥꦷꦠꦏꦺꦴ ꦭꦺꦴꦲꦶꦠꦏꦺꦴ ꦎꦢꦴꦠꦺꦴ ꦕꦠꦸꦫꦁꦱꦺꦴ ꦖꦭ꦳ꦁꦱꦺꦴ ꦄꦛ꧀ꦜꦁꦱꦺꦴ’ꦠꦶ ꦏꦔ꧀ꦑꦤ꧀ꦠꦺꦴ ꦌꦮꦁ ꦏꦔ꧀ꦑꦠꦶ ꦤꦴꦩ.

꧙꧒꧓. ꦠꦶꦠ꧀ꦡꦴꦪꦠꦤꦴꦤꦷꦠꦶ ꦠꦶꦠ꧀ꦡꦨꦹꦠꦴꦤꦶ ꦄꦴꦪꦠꦤꦴꦤꦶ, ꦠꦶꦠ꧀ꦡꦶꦪꦴꦤꦁ ꦮꦴ ꦄꦴꦪꦠꦤꦴꦤꦶ. ꦠꦠ꧀ꦡ ꦠꦶꦠ꧀ꦡꦁ ꦤꦴꦩ ꦢ꧀ꦮꦴꦱꦛ꧀ꦜꦶ ꦢꦶꦛ꧀ꦜꦶꦪꦺꦴ. ꦠꦶꦠ꧀ꦡꦶꦪꦴ ꦤꦴꦩ ꦪꦺꦱꦁ ꦠꦴ ꦢꦶꦛ꧀ꦜꦶꦪꦺꦴ ꦫꦸꦕ꧀ꦕꦤ꧀ꦠꦶ ꦑꦩꦤ꧀ꦠꦶ. ꦄꦴꦪꦠꦤꦛ꧀ꦜꦺꦴ ꦲꦺꦛ꧀ꦜꦴ ꦮꦸꦠ꧀ꦠꦺꦴꦪꦺꦮ. ꦠꦠ꧀ꦡ ꦪꦱ꧀ꦩꦴ ꦱꦧ꧀ꦧꦺꦥꦶ ꦢꦶꦛ꧀ꦜꦶꦒꦠꦶꦏꦴ ꦱꦚ꧀ꦗꦴꦪꦩꦴꦤꦴ ꦆꦩꦺꦱꦸꦪꦺꦮ ꦠꦷꦱꦸ ꦜꦴꦤꦺꦱꦸ ꦱꦚ꧀ꦗꦴꦪꦤ꧀ꦠꦶ, ꦱꦩꦺꦴꦱꦫꦩꦴꦤꦴꦥꦶ ꦌꦠꦺꦱꦸꦪꦺꦮ ꦱꦩꦺꦴꦱꦫꦤ꧀ꦠꦶ ꦱꦤ꧀ꦤꦶꦥꦠꦤ꧀ꦠꦶ, ꦢꦶꦛ꧀ꦜꦶꦒꦠꦶꦏꦨꦴꦮꦺ ꦕ ꦤꦺꦱꦁ ꦌꦠꦴꦤꦶꦪꦺꦮ ꦏꦴꦫꦟꦴꦤꦶ, ꦠꦱ꧀ꦩꦴ ꦠꦶꦠ꧀ꦡꦴꦤꦶ ꦕ ꦠꦴꦤꦶ ꦱꦚ꧀ꦗꦴꦠꦴꦤꦷꦠꦶꦄꦴꦢꦶꦤꦴ ꦄꦠ꧀ꦡꦺꦤ ꦄꦴꦪꦠꦤꦴꦤꦶ ꦕꦴꦠꦶ ꦠꦶꦠ꧀ꦡꦴꦪꦠꦤꦴꦤꦶ; ꦠꦺꦤꦺꦮꦠ꧀ꦡꦺꦤ ꦠꦶꦠ꧀ꦡꦶꦪꦴꦤꦁ ꦄꦴꦪꦠꦤꦴꦤꦷꦠꦶꦥꦶ ꦠꦶꦠ꧀ꦡꦴꦪꦠꦤꦴꦤꦶ. ꦥꦸꦫꦶꦱꦥꦸꦒ꧀ꦒꦭꦺꦴꦠꦶ ꦱꦠ꧀ꦠꦺꦴ. ꦏꦴꦩꦚ꧀ꦕ ꦥꦸꦫꦶꦱꦺꦴꦠꦶꦥꦶ ꦥꦸꦒ꧀ꦒꦭꦺꦴꦠꦶꦥꦶ ꦮꦸꦠ꧀ꦠꦺ ꦱꦠ꧀ꦠꦺꦴꦪꦺꦮ ꦮꦸꦠ꧀ꦠꦺꦴ, ꦄꦪꦁ ꦥꦤ ꦱꦩ꧀ꦩꦸꦠꦶꦏꦡꦴ ꦤꦴꦩ ꦪꦺꦴ ꦪꦡꦴ ꦗꦴꦤꦴꦠꦶ ꦠꦱ꧀ꦱ ꦠꦡꦴ ꦮꦸꦕ꧀ꦕꦠꦶ. ꦥꦛꦶꦱꦁꦮꦺꦢꦺꦠꦷꦠꦶ ꦄꦠ꧀ꦠꦤꦺꦴ ꦱꦤ꧀ꦠꦴꦤꦺ ꦈꦥ꧀ꦥꦤ꧀ꦤꦁ ꦗꦴꦤꦴꦠꦶ, ꦥꦛꦶꦱꦁꦮꦶꦢꦶꦠꦁ ꦏꦫꦺꦴꦠꦶ ꦄꦤꦸꦨꦮꦠꦶ ꦮꦴ. ꦥꦸꦧ꧀ꦧꦺꦏꦠꦲꦺꦠꦹꦠꦶ ꦥꦸꦧ꧀ꦧꦺ ꦏꦠꦏꦴꦫꦟꦴ, ꦥꦸꦧ꧀ꦧꦺ ꦏꦠꦏꦩ꧀ꦩꦥꦕ꧀ꦕꦪꦺꦤꦺꦮ ꦥꦛꦶꦱꦁꦮꦺꦢꦺꦠꦷꦠꦶ ꦄꦠ꧀ꦡꦺꦴ. ꦄꦪꦁ ꦤꦶꦒꦟ꧀ꦜꦱꦩꦪꦺꦴ. ꦌꦮꦁꦮꦴꦢꦶꦤꦺꦴ ꦥꦤ ꦠꦺ ꦏꦩ꧀ꦩꦮꦺꦢꦤꦚ꧀ꦕ ꦏꦶꦫꦶꦪꦮꦺꦢꦤꦚ꧀ꦕ ꦥꦛꦶꦏ꧀ꦑꦶꦥꦶꦠ꧀ꦮꦴ ꦌꦏꦁ ꦮꦶꦥꦴꦏꦮꦺꦢꦤꦩꦺꦮ ꦱꦩ꧀ꦥꦛꦶꦕ꧀ꦖꦤ꧀ꦠꦶ. ꦥꦶꦠ꧀ꦠꦱꦩꦸꦛ꧀ꦜꦴꦤꦴꦢꦷꦱꦸ (ꦩꦲꦴꦤꦶ. ꧕) ꦕ ꦄꦛ꧀ꦜꦱꦸ ꦄꦴꦧꦴꦣꦺꦱꦸ ꦱꦠ꧀ꦠ ꦥꦛꦶꦏ꧀ꦑꦶꦥꦶꦠ꧀ꦮꦴ ꦄꦛ꧀ꦜꦩꦁꦪꦺꦮ ꦱꦩ꧀ꦥꦛꦶꦕ꧀ꦖꦤ꧀ꦠꦶ, ꦢꦶꦛ꧀ꦜꦣꦩ꧀ꦩꦮꦺꦢꦤꦷꦪꦴꦢꦷꦱꦸ ꦕ ꦠꦷꦱꦸ ꦏꦩ꧀ꦩꦺꦱꦸ ꦢ꧀ꦮꦺ ꦥꦛꦶꦏ꧀ꦑꦶꦥꦶꦠ꧀ꦮꦴ ꦌꦏꦁ ꦄꦥꦫꦴꦥꦫꦶꦪꦮꦺꦢꦤꦷꦪꦩꦺꦮ ꦱꦩ꧀ꦥꦛꦶꦕ꧀ꦖꦤ꧀ꦠꦶ, ꦏꦸꦱꦭꦴꦏꦸꦱꦭꦮꦶꦥꦴꦏꦏꦶꦫꦶꦪꦱꦔ꧀ꦑꦴꦠꦴꦱꦸ ꦕ ꦕꦠꦹꦱꦸ ꦕꦺꦠꦤꦴꦱꦸ ꦮꦶꦥꦴꦏꦕꦺꦠꦤꦁꦪꦺꦮ ꦱꦩ꧀ꦥꦛꦶꦕ꧀ꦖꦤ꧀ꦠꦶ.

ꦆꦱ꧀ꦱꦫꦤꦶꦩ꧀ꦩꦴꦤꦲꦺꦠꦹꦠꦶ ꦆꦱ꧀ꦱꦫꦤꦶꦩ꧀ꦩꦴꦤꦏꦴꦫꦟꦴ; ꦧ꧀ꦫꦲ꧀ꦩꦸꦤꦴ ꦮꦴ ꦥꦗꦴꦥꦠꦶꦤꦴ ꦮꦴ ꦆꦱ꧀ꦱꦫꦺꦤ ꦤꦶꦩ꧀ꦩꦶꦠꦠ꧀ꦠꦴ ꦥꦛꦶꦱꦁꦮꦺꦢꦺꦠꦷꦠꦶ ꦄꦠ꧀ꦡꦺꦴ. ꦄꦪꦁ ꦧ꧀ꦫꦴꦲ꧀ꦩꦟꦱꦩꦪꦺꦴ. ꦄꦪꦚ꧀ꦲꦶ ꦤꦺꦱꦁ ꦄꦣꦶꦥ꧀ꦥꦴꦪꦺꦴ – ꦆꦩꦴ ꦠꦶꦱ꧀ꦱꦺꦴ ꦮꦺꦢꦤꦴ ꦥꦕ꧀ꦕꦸꦥ꧀ꦥꦤ꧀ꦤꦺ ꦄꦠ꧀ꦠꦤꦴ ꦏꦠꦩꦹꦭꦏꦺꦤ ꦮꦴ ꦄꦴꦟꦠ꧀ꦠꦶꦩꦹꦭꦏꦺꦤ ꦮꦴ ꦥꦸꦧ꧀ꦧꦺ ꦏꦠꦺꦤ ꦮꦴ ꦄꦲꦺꦠꦸꦄꦥ꧀ꦥꦕ꧀ꦕꦪꦴ ꦮꦴ ꦥꦛꦶꦱꦁꦮꦺꦢꦺꦠꦸꦁ ꦤꦴꦩ ꦤ ꦱꦏ꧀ꦏꦴ; ꦆꦱ꧀ꦱꦫꦤꦶꦩ꧀ꦩꦴꦤꦏꦴꦫꦟꦴ ꦌꦮ ꦥꦤ ꦆꦩꦴ ꦥꦛꦶꦱꦁꦮꦺꦢꦺꦠꦷꦠꦶ. ꦌꦮꦁꦮꦴꦢꦶꦤꦺꦴ ꦥꦤꦺꦠꦺ ꦲꦺꦛ꧀ꦜꦴ ꦮꦸꦠ꧀ꦠꦺꦱꦸ ꦄꦛ꧀ꦜꦱꦸ ꦄꦴꦧꦴꦣꦺꦱꦸ ꦌꦏꦩ꧀ꦥꦶ ꦄꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦱꦧ꧀ꦧꦁ ꦥꦛꦶꦧꦴꦲꦤ꧀ꦠꦶ. ꦠꦡꦴ ꦢꦶꦛ꧀ꦜꦣꦩ꧀ꦩꦮꦺꦢꦤꦷꦪꦴꦢꦷꦱꦸꦥꦶ ꦱꦧ꧀ꦧꦏꦺꦴꦛ꧀ꦜꦴꦱꦺꦱꦸ ꦌꦏꦩ꧀ꦥꦶ ꦄꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦱꦧ꧀ꦧꦁ ꦥꦛꦶꦧꦴꦲꦤ꧀ꦠꦶ.

ꦄꦲꦺꦠꦸ ꦄꦥ꧀ꦥꦕ꧀ꦕꦪꦴꦠꦶ ꦲꦺꦠꦸꦚ꧀ꦕ ꦥꦕ꧀ꦕꦪꦚ꧀ꦕ ꦮꦶꦤꦴ ꦄꦏꦴꦫꦟꦺꦤꦺꦮ ꦥꦛꦶꦱꦁꦮꦺꦢꦺꦠꦷꦠꦶ ꦄꦠ꧀ꦡꦺꦴ. ꦄꦪꦁ ꦄꦴꦗꦷꦮꦏꦱꦩꦪꦺꦴ. ꦌꦮꦁ ꦮꦴꦢꦶꦤꦺꦴ ꦌꦠꦺꦥꦶ ꦲꦺꦛ꧀ꦜꦴ ꦮꦸꦠ꧀ꦠꦺꦱꦸ ꦏꦴꦫꦟꦺꦱꦸ ꦕ ꦧ꧀ꦪꦴꦣꦷꦱꦸ ꦕ ꦌꦏꦩ꧀ꦥꦶ ꦄꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦱꦧ꧀ꦧꦁ ꦥꦛꦶꦏ꧀ꦑꦶꦥꦤ꧀ꦠꦶ.

꧙꧒꧔. ꦏꦶꦚ꧀ꦕꦤꦴꦠꦶ ꦥꦭꦶꦧꦺꦴꦣꦴ. ꦫꦴꦒꦺꦴ ꦏꦶꦚ꧀ꦕꦤꦤ꧀ꦠꦶ ꦫꦴꦒꦺꦴ ꦈꦥ꧀ꦥꦗ꧀ꦗꦩꦴꦤꦺꦴ ꦱꦠ꧀ꦠꦺ ꦧꦤ꧀ꦣꦠꦶ ꦥꦭꦶꦧꦸꦤ꧀ꦣꦺꦠꦶ, ꦠꦱ꧀ꦩꦴ ꦏꦶꦚ꧀ꦕꦤꦤ꧀ꦠꦶ ꦮꦸꦕ꧀ꦕꦠꦶ. ꦢꦺꦴꦱꦩꦺꦴꦲꦺꦱꦸꦥꦶ ꦌꦱꦺꦮ ꦤꦪꦺꦴ. ꦄꦔ꧀ꦒꦟꦴꦤꦷꦠꦶ ‘‘ꦈꦢꦔ꧀ꦒꦟꦺ ꦠꦠ꧀ꦡ ꦥꦥꦁ ꦄꦮꦶꦤ꧀ꦢꦸ’’ꦤ꧀ꦠꦶ (ꦗꦴ. ꧑.꧑.꧒) ꦄꦴꦒꦠꦛ꧀ꦜꦴꦤꦺ ꦨꦹꦩꦶꦥ꧀ꦥꦢꦺꦱꦺꦴ ꦄꦔ꧀ꦒꦟꦁ. ‘‘ꦠꦱ꧀ꦱꦺꦮ ꦫꦗꦱ꧀ꦱ ꦮꦴ ꦄꦔ꧀ꦒꦟꦱ꧀ꦱ ꦮꦴ ꦥꦲꦴꦤꦴꦪ ꦮꦴꦪꦩꦠꦷ’’ꦠꦶ (ꦩ. ꦤꦶ. ꧑.꧑꧘꧔; ꦄ. ꦤꦶ. ꧑꧐.꧕꧑) ꦄꦴꦒꦠꦛ꧀ꦜꦴꦤꦺ ꦪꦁ ꦏꦶꦚ꧀ꦕꦶ ꦩꦭꦁ ꦮꦴ ꦥꦔ꧀ꦏꦺꦴ ꦮꦴ. ‘‘ꦱꦴꦔ꧀ꦒꦟꦺꦴꦮ ꦱꦩꦴꦤꦺꦴ’’ꦠꦶ (ꦩ. ꦤꦶ. ꧑.꧕꧗) ꦄꦴꦒꦠꦛ꧀ꦜꦴꦤꦺ ꦤꦴꦤꦥ꧀ꦥꦏꦴꦫꦺꦴ ꦠꦶꦧ꧀ꦧꦏꦶꦭꦺꦱꦺꦴ. ꦆꦣꦴꦥꦶ ꦠꦢꦺꦮ ꦏꦶꦭꦺꦱꦔ꧀ꦒꦟꦁ ꦄꦣꦶꦥ꧀ꦥꦺꦠꦁ. ꦠꦺꦤꦺꦮ ꦫꦴꦒꦺꦴ ꦄꦔ꧀ꦒꦟꦤ꧀ꦠꦶꦄꦴꦢꦶꦩꦴꦲ.

ꦩꦭꦴꦤꦷꦠꦶ ꦩꦭꦶꦤꦨꦴꦮꦏꦫꦟꦴꦤꦶ. ꦫꦴꦒꦺꦴ ꦩꦭꦤ꧀ꦠꦶ ꦫꦴꦒꦺꦴ ꦈꦥ꧀ꦥꦗ꧀ꦗꦩꦴꦤꦺꦴ ꦕꦶꦠ꧀ꦠꦁ ꦩꦭꦶꦤꦁ ꦏꦫꦺꦴꦠꦶ, ꦩꦭꦁ ꦒꦴꦲꦴꦥꦺꦠꦶ, ꦠꦱ꧀ꦩꦴ ꦩꦭꦤ꧀ꦠꦶ ꦮꦸꦕ꧀ꦕꦠꦶ. ꦆꦠꦫꦺꦱꦸꦥꦶ ꦢ꧀ꦮꦷꦱꦸ ꦌꦱꦺꦮ ꦤꦪꦺꦴ.

ꦮꦶꦱꦩꦤꦶꦢ꧀ꦢꦺꦱꦺ ꦪꦱ꧀ꦩꦴ ꦫꦴꦒꦴꦢꦷꦱꦸ ꦕꦺꦮ ꦏꦴꦪꦢꦸꦕ꧀ꦕꦫꦶꦠꦴꦢꦷꦱꦸ ꦕ ꦱꦠ꧀ꦠꦴ ꦥꦏ꧀ꦑꦭꦤ꧀ꦠꦶ, ꦥꦏ꧀ꦑꦭꦶꦠꦴ ꦕ ꦥꦤ ꦱꦴꦱꦤꦠꦺꦴꦥꦶ ꦱꦸꦒꦠꦶꦠꦺꦴꦥꦶ ꦥꦠꦤ꧀ꦠꦶ, ꦠꦱ꧀ꦩꦴ ꦥꦏ꧀ꦑꦭꦤꦥꦴꦠꦲꦺꦠꦸꦠꦺꦴ ꦫꦴꦒꦺꦴ ꦮꦶꦱꦩꦤ꧀ꦠꦶꦄꦴꦢꦶ ꦮꦸꦠ꧀ꦠꦁ.

ꦄꦒ꧀ꦒꦷꦠꦶ ꦄꦤꦸꦢꦲꦤꦛ꧀ꦜꦺꦤ ꦄꦒ꧀ꦒꦶ. ꦫꦴꦒꦒ꧀ꦒꦷꦠꦶ ꦫꦴꦒꦺꦴ ꦈꦥ꧀ꦥꦗ꧀ꦗꦩꦴꦤꦺꦴ ꦱꦠ꧀ꦠꦺ ꦄꦤꦸꦢꦲꦠꦶ ꦙꦴꦥꦺꦠꦶ, ꦠꦱ꧀ꦩꦴ ꦄꦒ꧀ꦒꦷꦠꦶ ꦮꦸꦕ꧀ꦕꦠꦶ. ꦢꦺꦴꦱꦩꦺꦴꦲꦺꦱꦸꦥꦶ ꦌꦱꦺꦮ ꦤꦪꦺꦴ. ꦠꦠ꧀ꦡ ꦮꦠ꧀ꦡꦹꦤꦶ – ꦌꦏꦴ ꦏꦶꦫ ꦢꦲꦫꦨꦶꦏ꧀ꦑꦸꦤꦷ ꦕꦶꦠ꧀ꦠꦭꦥꦧ꧀ꦧꦠꦮꦶꦲꦴꦫꦺ ꦈꦥꦺꦴꦱꦡꦴꦒꦴꦫꦁ ꦒꦤ꧀ꦠ꧀ꦮꦴ ꦢ꧀ꦮꦴꦫꦥꦴꦭꦏꦫꦹꦥꦁ ꦎꦭꦺꦴꦏꦪꦩꦴꦤꦴ ꦜꦶꦠꦴ. ꦄꦡꦱ꧀ꦱꦴ ꦄꦤ꧀ꦠꦺꦴ ꦫꦴꦒꦺꦴ ꦈꦥ꧀ꦥꦤ꧀ꦤꦺꦴ. ꦱꦴ ꦠꦺꦤꦺꦮ ꦙꦴꦪꦶꦠ꧀ꦮꦴ ꦏꦴꦭꦩꦏꦴꦱꦶ. ꦨꦶꦏ꧀ꦑꦸꦤꦶꦪꦺꦴ ꦒꦕ꧀ꦖꦩꦴꦤꦴ ‘ꦄꦪꦁ ꦢꦲꦫꦴ ꦜꦶꦠꦴ, ꦥꦏ꧀ꦏꦺꦴꦱꦡ ꦤ’ꦤ꧀ꦠꦶ ꦄꦴꦲꦁꦱꦸ. ꦌꦏꦴ ꦒꦤ꧀ꦠ꧀ꦮꦴ ‘ꦏꦱ꧀ꦩꦴ ꦜꦶꦠꦴꦱꦷ’ꦠꦶ ꦲꦠ꧀ꦡꦺ ꦒꦟ꧀ꦲꦶ. ꦒꦲꦶꦠꦩꦠ꧀ꦠꦴ ꦥꦫꦶꦮꦠ꧀ꦠꦶꦠ꧀ꦮꦴ ꦥꦠꦶꦠꦴ. ꦆꦢꦁ ꦠꦴꦮ ꦫꦴꦒꦱ꧀ꦱ ꦄꦤꦸꦢꦲꦤꦠꦴꦪ ꦮꦠ꧀ꦡꦸ. ꦢꦺꦴꦱꦱ꧀ꦱ ꦥꦤ ꦄꦤꦸꦢꦲꦤꦠꦴꦪ ꦩꦤꦺꦴꦥꦢꦺꦴꦱꦶꦏꦴ ꦢꦺꦮꦴ ꦢꦛ꧀ꦜꦧ꧀ꦧꦴ. ꦩꦺꦴꦲꦱ꧀ꦱ ꦄꦤꦸꦢꦲꦤꦠꦴꦪ ꦑꦶꦝ꧀ꦝꦴꦥꦢꦺꦴꦱꦶꦏꦴ ꦢꦺꦮꦴ ꦢꦛ꧀ꦜꦧ꧀ꦧꦴ. ꦩꦺꦴꦲꦤꦮꦱꦺꦤ ꦲꦶ ꦠꦺꦱꦁ ꦱꦠꦶꦱꦩ꧀ꦩꦺꦴꦱꦺꦴ ꦲꦺꦴꦠꦶ. ꦠꦱ꧀ꦩꦴ ꦑꦶꦝ꧀ꦝꦴꦮꦱꦺꦤ ꦄꦴꦲꦴꦫꦏꦴꦭꦁ ꦄꦠꦶꦮꦠ꧀ꦠꦶꦠ꧀ꦮꦴ ꦏꦴꦭꦁ ꦏꦫꦺꦴꦤ꧀ꦠꦶ. ꦏꦱꦴꦮꦴꦠꦶ ꦏꦱꦛꦴ ꦤꦶꦫꦺꦴꦗꦴ. ꦫꦴꦒꦴꦢꦷꦱꦸ ꦕ ꦏꦴꦪꦢꦸꦕ꧀ꦕꦫꦶꦠꦴꦢꦷꦱꦸ ꦕ ꦌꦏꦩ꧀ꦥꦶ ꦥꦟꦷꦠꦁ ꦎꦗꦮꦤ꧀ꦠꦁ ꦤꦠ꧀ꦡꦶ, ꦠꦱ꧀ꦩꦴ ꦫꦴꦒꦺꦴ ꦏꦱꦴꦮꦺꦴꦠꦶꦄꦴꦢꦶ ꦮꦸꦠ꧀ꦠꦁ.

꧙꧒꧕. ꦄꦱ꧀ꦱꦴꦢꦢꦶꦛ꧀ꦜꦷꦠꦶ ꦄꦱ꧀ꦱꦴꦢꦱꦩ꧀ꦥꦪꦸꦠ꧀ꦠꦴ ꦢꦶꦛ꧀ꦜꦶ. ꦤꦠ꧀ꦡꦶ ꦏꦴꦩꦺꦱꦸ ꦢꦺꦴꦱꦺꦴꦠꦶ ꦏꦶꦭꦺꦱꦏꦴꦩꦺꦤ ꦮꦠ꧀ꦡꦸꦏꦴꦩꦥꦛꦶꦱꦺꦮꦤꦢꦺꦴꦱꦺꦴ ꦤꦠ꧀ꦡꦷꦠꦶ ꦮꦢꦠꦶ. ꦥꦴꦠꦧ꧀ꦪꦠꦤ꧀ꦠꦶ ꦥꦴꦠꦧ꧀ꦧꦨꦴꦮꦁ ꦥꦫꦶꦨꦸꦚ꧀ꦗꦤꦁ ꦄꦗ꧀ꦙꦺꦴꦲꦫꦟꦁ. ꦌꦮꦁꦮꦴꦢꦷ ꦲꦶ ꦱꦺꦴ ꦮꦠ꧀ꦡꦸꦏꦴꦩꦺꦱꦸ ꦏꦶꦭꦺꦱꦏꦴꦩꦁ ꦥꦶꦮꦤ꧀ꦠꦺꦴ ꦮꦶꦪ ꦄꦗ꧀ꦙꦺꦴꦲꦫꦤ꧀ꦠꦺꦴ ꦮꦶꦪ ꦥꦫꦶꦨꦸꦚ꧀ꦗꦠꦶ. ꦄꦠ꧀ꦠꦴꦤꦸꦢꦶꦛ꧀ꦜꦷꦠꦶ ꦄꦠ꧀ꦠꦴꦤꦁ ꦄꦤꦸꦒꦠꦴ ꦢꦶꦛ꧀ꦜꦶ. ꦩꦶꦕ꧀ꦖꦴꦢꦶꦛ꧀ꦜꦷꦠꦶ ꦭꦴꦩꦏꦴ ꦢꦶꦛ꧀ꦜꦶ. ꦆꦢꦴꦤꦶ ꦪꦱ꧀ꦩꦴ ꦌꦠ꧀ꦡ ꦥꦜꦩꦴ ꦱꦱ꧀ꦱꦠꦢꦶꦛ꧀ꦜꦶ ꦲꦺꦴꦠꦶ, ꦢꦸꦠꦶꦪꦴ ꦱꦏ꧀ꦏꦴꦪꦢꦶꦛ꧀ꦜꦶ, ꦠꦠꦶꦪꦴ ꦈꦕ꧀ꦖꦺꦢꦢꦶꦛ꧀ꦜꦶ, ꦠꦱ꧀ꦩꦴ ꦠꦩꦠ꧀ꦡꦁ ꦢꦱ꧀ꦱꦺꦠꦸꦁ ꦱꦱ꧀ꦱꦠꦢꦶꦛ꧀ꦜꦶ ꦄꦱ꧀ꦱꦴꦢꦢꦶꦛ꧀ꦜꦷꦠꦶꦄꦴꦢꦶꦩꦴꦲ.

꧙꧒꧖. ꦄꦫꦠꦶꦤꦶꦢ꧀ꦢꦺꦱꦺꦴ ꦕ ꦮꦶꦲꦺꦱꦴꦤꦶꦢ꧀ꦢꦺꦱꦺꦴ ꦕ ꦮꦸꦠ꧀ꦠꦠ꧀ꦡꦺꦴꦪꦺꦮ. ꦄꦣꦩ꧀ꦩꦱ꧀ꦱ ꦕꦫꦶꦪꦴ ꦄꦣꦩ꧀ꦩꦕꦫꦶꦪꦴ, ꦄꦣꦩ꧀ꦩꦏꦫꦟꦤ꧀ꦠꦶ ꦄꦠ꧀ꦡꦺꦴ. ꦮꦶꦱꦩꦴ ꦕꦫꦶꦪꦴ, ꦮꦶꦱꦩꦱ꧀ꦱ ꦮꦴ ꦏꦩ꧀ꦩꦱ꧀ꦱ ꦕꦫꦶꦪꦴꦠꦶ ꦮꦶꦱꦩꦕꦫꦶꦪꦴ. ꦢꦺꦴꦮꦕꦱ꧀ꦱꦠꦴꦥꦴꦥꦩꦶꦠ꧀ꦠꦠꦴ ꦤꦶꦢ꧀ꦢꦺꦱꦴ ꦮꦸꦠ꧀ꦠꦠ꧀ꦡꦴ ꦌꦮ. ꦥꦸꦡꦸꦤꦶꦩꦶꦠ꧀ꦠꦴꦫꦩ꧀ꦩꦟꦺꦱꦸ ꦥꦮꦠ꧀ꦠꦶꦠꦺꦴ ꦤꦴꦤꦠ꧀ꦠꦺꦱꦸ ꦱꦚ꧀ꦚꦴ ꦤꦴꦤꦠ꧀ꦠꦱꦚ꧀ꦚꦴ. ꦪꦱ꧀ꦩꦴ ꦮꦴ ꦄꦚ꧀ꦚꦴꦮ ꦏꦴꦩꦱꦚ꧀ꦚꦴ, ꦄꦚ꧀ꦚꦴ ꦧ꧀ꦪꦴꦥꦴꦢꦴꦢꦶꦱꦚ꧀ꦚꦴ, ꦠꦱ꧀ꦩꦴ ꦤꦴꦤꦠ꧀ꦠꦴ ꦱꦚ꧀ꦚꦴꦠꦶꦥꦶ ꦤꦴꦤꦠ꧀ꦠꦱꦚ꧀ꦚꦴ. ꦏꦺꦴꦱꦗ꧀ꦗꦥꦩꦴꦢꦤꦶꦢ꧀ꦢꦺꦱꦺꦱꦸ ꦥꦚ꧀ꦕꦱꦸ ꦏꦴꦩꦒꦸꦟꦺꦱꦸ ꦮꦶꦱ꧀ꦱꦛ꧀ꦜꦕꦶꦠ꧀ꦠꦱ꧀ꦱ ꦏꦸꦱꦭꦣꦩ꧀ꦩꦨꦴꦮꦤꦴꦪ ꦄꦤꦤꦸꦪꦺꦴꦒꦮꦱꦺꦤ ꦭꦷꦤꦮꦸꦠ꧀ꦠꦶꦠꦴ ꦏꦺꦴꦱꦗ꧀ꦗꦁ, ꦥꦩꦗ꧀ꦗꦤꦮꦱꦺꦤ ꦥꦩꦠ꧀ꦠꦨꦴꦮꦺꦴ ꦥꦩꦴꦢꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦄꦱꦤ꧀ꦠꦸꦛ꧀ꦜꦶꦠꦴꦢꦶꦤꦶꦢ꧀ꦢꦺꦱꦴ ꦮꦸꦠ꧀ꦠꦠ꧀ꦡꦴ ꦌꦮ.

꧙꧓꧑. ꦄꦤꦴꦢꦫꦶꦪꦤꦶꦢ꧀ꦢꦺꦱꦺ ꦎꦮꦴꦢꦱ꧀ꦱ ꦄꦤꦴꦢꦶꦪꦤꦮꦱꦺꦤ ꦄꦤꦴꦢꦫꦨꦴꦮꦺꦴ ꦄꦤꦴꦢꦫꦶꦪꦁ. ꦄꦤꦴꦢꦫꦶꦪꦤꦴꦏꦴꦫꦺꦴ ꦄꦤꦴꦢꦫꦠꦴ. ꦱꦒꦫꦸꦮꦴꦱꦁ ꦄꦮꦱꦤꦛ꧀ꦜꦺꦤ ꦄꦒꦴꦫꦮꦨꦴꦮꦺꦴ ꦄꦒꦴꦫꦮꦠꦴ. ꦱꦗꦺꦛ꧀ꦜꦏꦮꦴꦱꦁ ꦄꦮꦱꦤꦛ꧀ꦜꦺꦤ ꦄꦥ꧀ꦥꦠꦶꦱ꧀ꦱꦮꦠꦴ. ꦄꦤꦢ꧀ꦢꦴꦠꦶ ꦄꦤꦴꦢꦶꦪꦤꦴ. ꦄꦤꦢ꧀ꦢꦴꦪꦤꦴꦠꦶ ꦄꦤꦴꦢꦶꦪꦤꦴꦏꦴꦫꦺꦴ. ꦄꦤꦢ꧀ꦢꦴꦪ ꦄꦪꦶꦠꦱ꧀ꦱ ꦨꦴꦮꦺꦴ ꦄꦤꦢ꧀ꦢꦴꦪꦶꦠꦠ꧀ꦠꦁ. ꦄꦱꦷꦭꦱ꧀ꦱ ꦨꦴꦮꦺꦴ ꦄꦱꦷꦭ꧀ꦪꦁ. ꦄꦕꦶꦠ꧀ꦠꦷꦏꦴꦫꦺꦴꦠꦶ ꦒꦫꦸꦕꦶꦠ꧀ꦠꦷꦏꦴꦫꦱ꧀ꦱ ꦄꦏꦫꦟꦁ.

꧙꧓꧒. ꦄꦱ꧀ꦱꦢ꧀ꦣꦨꦴꦮꦺꦴ ꦄꦱ꧀ꦱꦢ꧀ꦣꦶꦪꦁ. ꦄꦱꦢ꧀ꦢꦲꦤꦴꦏꦴꦫꦺꦴ ꦄꦱꦢ꧀ꦢꦲꦤꦴ. ꦎꦏꦥ꧀ꦥꦺꦠ꧀ꦮꦴ ꦄꦤꦸꦥꦮꦶꦱꦶꦠ꧀ꦮꦴ ꦄꦒ꧀ꦒꦲꦟꦁ ꦄꦤꦺꦴꦏꦥ꧀ꦥꦤꦴ. ꦄꦥ꧀ꦥꦱꦷꦢꦤꦛ꧀ꦜꦺꦤ ꦄꦤꦨꦶꦥ꧀ꦥꦱꦴꦢꦺꦴ.

ꦄꦮꦢꦚ꧀ꦚꦸꦠꦴꦠꦶ ꦡꦢ꧀ꦣꦩꦕ꧀ꦖꦫꦶꦪꦮꦱꦺꦤ ‘ꦢꦺꦲꦶ, ꦏꦫꦺꦴꦲꦷ’ꦠꦶ ꦮꦕꦤꦱ꧀ꦱ ꦄꦗꦴꦤꦠꦴ.

꧙꧓꧔. ꦧꦸꦢ꧀ꦣꦴ ꦕ ꦧꦸꦢ꧀ꦣꦱꦴꦮꦏꦴ ꦕꦴꦠꦶ ꦌꦠ꧀ꦡ ꦧꦸꦢ꧀ꦣꦒ꧀ꦒꦲꦟꦺꦤ ꦥꦕ꧀ꦕꦺꦏꦧꦸꦢ꧀ꦣꦴꦥꦶ ꦒꦲꦶꦠꦴꦮ. ꦄꦱꦩꦺꦠꦸꦏꦩ꧀ꦪꦠꦴꦠꦶ ꦠꦺꦱꦁ ꦱꦩꦷꦥꦁ ꦄꦒꦤ꧀ꦠꦸꦏꦴꦩꦠꦴ. ꦱꦢ꧀ꦣꦩ꧀ꦩꦁ ꦄꦱꦺꦴꦠꦸꦏꦩ꧀ꦪꦠꦴꦠꦶ ꦱꦠ꧀ꦠꦠꦶꦁꦱ ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴ ꦱꦢ꧀ꦣꦩ꧀ꦩꦺꦴ ꦤꦴꦩ, ꦠꦁ ꦄꦱꦸꦟꦶꦠꦸꦏꦴꦩꦠꦴ. ꦄꦤꦸꦒ꧀ꦒꦲꦺꦠꦸꦏꦩ꧀ꦪꦠꦴꦠꦶ ꦤ ꦈꦒ꧀ꦒꦲꦺꦠꦸꦏꦴꦩꦠꦴ.

ꦈꦥꦴꦫꦩ꧀ꦨꦕꦶꦠ꧀ꦠꦠꦴꦠꦶ ꦈꦥꦴꦫꦩ꧀ꦨꦕꦶꦠ꧀ꦠꦨꦴꦮꦺꦴ. ꦪꦱ꧀ꦩꦴ ꦥꦤ ꦱꦺꦴ ꦄꦠ꧀ꦡꦠꦺꦴ ꦈꦥꦴꦫꦩ꧀ꦨꦺꦴꦮ ꦲꦺꦴꦠꦶ, ꦠꦱ꧀ꦩꦴ ꦠꦁ ꦢꦱ꧀ꦱꦺꦠꦸꦁ ꦠꦠ꧀ꦡ ꦏꦠꦩꦺꦴ ꦈꦥꦴꦫꦩ꧀ꦨꦺꦴꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦈꦥꦴꦫꦩ꧀ꦨꦤꦮꦱꦺꦤ ꦈꦥꦴꦫꦩ꧀ꦨꦺꦴ. ꦥꦸꦤꦥ꧀ꦥꦸꦤꦁ ꦈꦥꦴꦫꦩ꧀ꦨꦺꦴ ꦄꦤꦸꦥꦴꦫꦩ꧀ꦨꦺꦴ ꦈꦥꦴꦫꦩ꧀ꦨꦤꦴꦏꦴꦫꦺꦴ ꦈꦥꦴꦫꦩ꧀ꦨꦤꦴ. ꦥꦸꦤꦥ꧀ꦥꦸꦤꦁ ꦈꦥꦴꦫꦩ꧀ꦨꦤꦴ ꦄꦤꦸꦥꦴꦫꦩ꧀ꦨꦤꦴ. ꦄꦤꦸꦥꦴꦫꦩ꧀ꦨꦶꦠꦱ꧀ꦱ ꦨꦴꦮꦺꦴ ꦄꦤꦸꦥꦴꦫꦩ꧀ꦨꦶꦠꦠ꧀ꦠꦁ. ꦈꦚ꧀ꦚꦴꦠꦶ ꦲꦺꦛ꧀ꦜꦴ ꦏꦠ꧀ꦮꦴ ꦗꦴꦤꦤꦴ. ꦄꦮꦚ꧀ꦚꦴꦠꦶ ꦄꦮꦗꦴꦤꦤꦴ. ꦥꦫꦶꦨꦮꦤꦁ ꦥꦫꦶꦨꦮꦺꦴ. ꦫꦤ꧀ꦣꦱ꧀ꦱ ꦒꦮꦺꦱꦶꦠꦴ ꦫꦤ꧀ꦣꦒꦮꦺꦱꦶꦠꦴ. ꦫꦤ꧀ꦣꦁ ꦮꦴ ꦒꦮꦺꦱꦠꦷꦠꦶ ꦫꦤ꧀ꦣꦒꦮꦺꦱꦷ, ꦠꦱ꧀ꦱ ꦨꦴꦮꦺꦴ ꦫꦤ꧀ꦣꦒꦮꦺꦱꦶꦠꦴ. ꦄꦪꦁ ꦮꦸꦕ꧀ꦕꦠꦷꦠꦶ ꦄꦪꦁ ꦥꦫꦮꦗ꧀ꦗꦴꦤꦸꦥꦱ꧀ꦱꦤꦭꦏ꧀ꦑꦟꦺꦴ ꦈꦥꦴꦫꦩ꧀ꦨꦺꦴ ꦤꦴꦩ ꦮꦸꦕ꧀ꦕꦠꦶ, ꦪꦺꦤ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ, ꦪꦡꦴ ꦤꦴꦩ ꦠꦸꦤ꧀ꦤꦏꦴꦫꦺꦴ ꦱꦴꦛꦏꦁ ꦥꦱꦴꦫꦺꦠ꧀ꦮꦴ ꦖꦶꦢ꧀ꦢꦩꦺꦮ ꦎꦭꦺꦴꦏꦺꦠꦶ, ꦌꦮꦩꦺꦮ ꦥꦫꦱ꧀ꦱ ꦱꦧ꧀ꦧꦺꦥꦶ ꦒꦸꦟꦺ ꦩꦏ꧀ꦑꦺꦠ꧀ꦮꦴ ꦄꦒꦸꦟꦺꦱꦸꦪꦺꦮ ꦥꦠꦶꦛ꧀ꦜꦴꦠꦶ.

꧙꧓꧖. ꦄꦪꦺꦴꦤꦶꦱꦺꦴ ꦩꦤꦱꦶꦏꦴꦫꦺꦴꦠꦶ ꦄꦤꦸꦥꦴꦪꦩꦤꦱꦶꦏꦴꦫꦺꦴ. ꦄꦤꦶꦕ꧀ꦕꦺ ꦤꦶꦕ꧀ꦕꦤ꧀ꦠꦶ ꦄꦤꦶꦕ꧀ꦕꦺꦪꦺꦮ ꦮꦠ꧀ꦡꦸꦱ꧀ꦩꦶꦁ ‘ꦆꦢꦁ ꦤꦶꦕ꧀ꦕ’ꦤ꧀ꦠꦶ ꦌꦮꦁ ꦥꦮꦠ꧀ꦠꦺꦴ. ꦢꦸꦏ꧀ꦑꦺ ꦱꦸꦑꦤ꧀ꦠꦶꦄꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦱꦕ꧀ꦕꦮꦶꦥ꧀ꦥꦛꦶꦏꦸꦭꦺꦤ ꦕꦴꦠꦶ ꦕꦠꦸꦤ꧀ꦤꦁ ꦱꦕ꧀ꦕꦴꦤꦁ ꦄꦤꦤꦸꦭꦺꦴꦩꦮꦱꦺꦤ. ꦕꦶꦠ꧀ꦠꦱ꧀ꦱ ꦄꦴꦮꦛ꧀ꦛꦤꦴꦠꦶꦄꦴꦢꦷꦤꦶ ꦱꦧ꧀ꦧꦴꦤꦶꦥꦶ ꦄꦴꦮꦗ꧀ꦗꦤꦱ꧀ꦱꦺꦮ ꦮꦺꦮꦕꦤꦴꦤꦺꦮ. ꦄꦴꦮꦗ꧀ꦗꦤꦚ꧀ꦲꦶ ꦨꦮꦔ꧀ꦒꦕꦶꦠ꧀ꦠꦁ ꦄꦴꦮꦛ꧀ꦛꦺꦠꦷꦠꦶ ꦕꦶꦠ꧀ꦠꦱ꧀ꦱ ꦄꦴꦮꦛ꧀ꦛꦤꦴ. ꦄꦤꦸꦄꦤꦸ ꦄꦴꦮꦛ꧀ꦛꦺꦠꦷꦠꦶ ꦄꦤꦴꦮꦛ꧀ꦛꦤꦴ. ꦄꦴꦨꦸꦗꦠꦷꦠꦶ ꦄꦴꦨꦺꦴꦒꦺꦴ. ꦨꦮꦔ꧀ꦒꦴꦫꦩ꧀ꦩꦟꦠꦺꦴ ꦄꦚ꧀ꦚꦁ ꦄꦴꦫꦩ꧀ꦩꦟꦁ ꦱꦩꦤ꧀ꦤꦴꦲꦫꦠꦷꦠꦶ ꦱꦩꦤ꧀ꦤꦴꦲꦴꦫꦺꦴ. ꦠꦢꦺꦮꦴꦫꦩ꧀ꦩꦟꦁ ꦄꦠ꧀ꦠꦴꦤꦁ ꦄꦤꦸꦧꦤ꧀ꦣꦶꦠ꧀ꦮꦴ ꦈꦥ꧀ꦥꦗ꧀ꦗꦩꦴꦤꦺ ꦩꦤꦱꦶꦏꦫꦺꦴꦠꦷꦠꦶ ꦩꦤꦱꦶꦏꦴꦫꦺꦴ. ꦏꦫꦺꦴꦠꦷꦠꦶ ꦜꦥꦺꦠꦶ. ꦄꦪꦁ ꦮꦸꦕ꧀ꦕꦠꦷꦠꦶ ꦄꦪꦁ ꦄꦤꦸꦥꦴꦪꦩꦤꦱꦶꦏꦴꦫꦺꦴ ꦈꦥ꧀ꦥꦡꦩꦤꦱꦶꦏꦴꦫꦭꦏ꧀ꦑꦟꦺꦴ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦺꦴ ꦤꦴꦩ ꦮꦸꦕ꧀ꦕꦠꦶ. ꦠꦱ꧀ꦱ ꦮꦱꦺꦤ ꦥꦸꦒ꧀ꦒꦭꦺꦴ ꦢꦸꦏ꧀ꦑꦴꦢꦷꦤꦶ ꦱꦕ꧀ꦕꦴꦤꦶ ꦪꦴꦡꦴꦮꦠꦺꦴ ꦄꦴꦮꦗ꧀ꦗꦶꦠꦸꦁ ꦤ ꦱꦏ꧀ꦏꦺꦴꦠꦶ.

ꦏꦸꦩ꧀ꦩꦒ꧀ꦒꦱꦺꦮꦤꦴꦤꦶꦢ꧀ꦢꦺꦱꦺ ꦪꦁ ꦏꦸꦩ꧀ꦩꦒ꧀ꦒꦁ ꦱꦺꦮꦠꦺꦴ ꦱꦺꦮꦤꦴ ꦏꦸꦩ꧀ꦩꦒ꧀ꦒꦱꦺꦮꦤꦴꦠꦶ ꦮꦸꦕ꧀ꦕꦠꦶ, ꦠꦁ ꦢꦱ꧀ꦱꦺꦠꦸꦁ ꦠꦠ꧀ꦡ ꦏꦠꦩꦺꦴ ꦏꦸꦩ꧀ꦩꦒ꧀ꦒꦺꦴꦠꦶ ꦢꦸꦠꦶꦪꦥꦸꦕ꧀ꦖꦴ ꦏꦠꦴ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.

ꦠꦶꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.