꧑꧑. ꦩꦒ꧀ꦒꦔ꧀ꦒꦮꦶꦨꦔ꧀ꦒꦺꦴ

꧑. ꦱꦸꦠ꧀ꦠꦤ꧀ꦠꦨꦴꦗꦤꦷꦪꦮꦟ꧀ꦟꦤꦴ

꧔꧘꧖. ꦆꦢꦴꦤꦶ ꦠꦢꦤꦤ꧀ꦠꦫꦺ ꦩꦒ꧀ꦒꦮꦶꦨꦔ꧀ꦒꦺ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴꦠꦶꦄꦴꦢꦶ ꦱꦧ꧀ꦧꦁ ꦱꦕ꧀ꦕꦮꦶꦨꦔ꧀ꦒꦺ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷꦥꦛꦶꦥꦢꦴꦤꦶꦢ꧀ꦢꦺꦱꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦨꦴꦮꦤꦴꦮꦱꦺꦤ ꦥꦴꦛꦶꦪꦺꦏ꧀ꦏꦁ ꦢꦱ꧀ꦱꦶꦠꦺ ꦢꦸꦠꦶꦪꦤꦪꦺꦥꦶ ꦱꦩ꧀ꦩꦴꦢꦶꦛ꧀ꦜꦶꦁ ꦨꦴꦮꦺꦠꦶ ꦮꦶꦮꦺꦏꦤꦶꦱ꧀ꦱꦶꦠꦤ꧀ꦠꦶꦄꦴꦢꦶ ꦱꦧ꧀ꦧꦁ ꦧꦺꦴꦗ꧀ꦙꦔ꧀ꦒꦮꦶꦨꦔ꧀ꦒꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦌꦮꦩꦶꦢꦁ ꦢ꧀ꦮꦶꦤ꧀ꦤꦩ꧀ꦥꦶ ꦤꦪꦴꦤꦁ ꦮꦱꦺꦤ ꦱꦸꦠ꧀ꦠꦤ꧀ꦠꦨꦴꦗꦤꦷꦪꦁ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦩꦶꦱ꧀ꦱꦏꦩꦺꦮ ꦏꦡꦶꦠꦁ.

꧒. ꦄꦨꦶꦣꦩ꧀ꦩꦨꦴꦗꦤꦷꦪꦮꦟ꧀ꦟꦤꦴ

꧔꧙꧐. ꦄꦨꦶꦣꦩ꧀ꦩꦨꦴꦗꦤꦷꦪꦺ ‘ꦄꦫꦶꦪꦺꦴ’ꦠꦶ ꦄꦮꦠ꧀ꦮꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴꦠꦶ ꦮꦸꦠ꧀ꦠꦁ. ꦌꦮꦁ ꦄꦮꦸꦠ꧀ꦠꦺꦥꦶ ꦄꦪꦁ ꦄꦫꦶꦪꦺꦴ ꦌꦮ. ꦪꦡꦴ ꦲꦶ ꦩꦸꦢ꧀ꦣꦴꦨꦶꦱꦶꦠ꧀ꦠꦱ꧀ꦱ ꦫꦚ꧀ꦚꦺꦴ ꦩꦸꦢ꧀ꦣꦴꦨꦶꦱꦶꦠ꧀ꦠꦴꦪ ꦢꦺꦮꦶꦪꦴ ꦏꦸꦕ꧀ꦖꦶꦱ꧀ꦩꦶꦁ ꦗꦴꦠꦺꦴ ꦥꦸꦠ꧀ꦠꦺꦴ ꦫꦴꦗꦥꦸꦠ꧀ꦠꦺꦴꦠꦶ ꦄꦮꦸꦠ꧀ꦠꦺꦥꦶ ꦫꦴꦗꦥꦸꦠ꧀ꦠꦺꦴꦪꦺꦮ ꦲꦺꦴꦠꦶ, ꦌꦮꦩꦪꦩ꧀ꦥꦶ ꦄꦫꦶꦪꦺꦴꦠꦶ ꦄꦮꦸꦠ꧀ꦠꦺꦥꦶ ꦄꦫꦶꦪꦺꦴ ꦌꦮꦴꦠꦶ ꦮꦺꦢꦶꦠꦧ꧀ꦧꦺꦴ. ꦱꦺꦱꦩꦶꦣꦴꦥꦶ ꦱꦕ꧀ꦕꦮꦶꦨꦔ꧀ꦒꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ.

꧔꧙꧓. ꦥꦚ꧀ꦕꦔ꧀ꦒꦶꦏꦮꦴꦫꦺꦥꦶ ꦄꦛ꧀ꦜꦔ꧀ꦒꦶꦏꦺꦴꦠꦶ ꦄꦮꦸꦠ꧀ꦠꦺꦥꦶ ꦄꦛ꧀ꦜꦔ꧀ꦒꦶꦏꦺꦴ ꦌꦮ ꦮꦺꦢꦶꦠꦧ꧀ꦧꦺꦴ. ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴ ꦲꦶ ꦥꦚ꧀ꦕꦔ꧀ꦒꦶꦏꦺꦴ ꦤꦴꦩ ꦤꦠ꧀ꦡꦶ. ꦄꦪꦩꦺꦠ꧀ꦡ ꦄꦴꦕꦫꦶꦪꦴꦤꦁ ꦱꦩꦴꦤꦠ꧀ꦡꦏꦡꦴ. ꦮꦶꦠꦟ꧀ꦝꦮꦴꦢꦷ ꦥꦤꦴꦲ – ‘‘ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴ ꦄꦛ꧀ꦜꦔ꧀ꦒꦶꦏꦺꦴ ꦤꦴꦩ ꦤꦠ꧀ꦡꦶ, ꦥꦚ꧀ꦕꦔ꧀ꦒꦶꦏꦺꦴꦪꦺꦮ ꦲꦺꦴꦠꦷ’’ꦠꦶ. ꦱꦺꦴ ‘‘ꦱꦸꦠ꧀ꦠꦁ ꦄꦴꦲꦫꦴꦲꦷ’’ꦠꦶ ꦮꦸꦠ꧀ꦠꦺꦴ ꦄꦢ꧀ꦣꦴ ꦄꦚ꧀ꦚꦁ ꦄꦥꦱ꧀ꦱꦤ꧀ꦠꦺꦴ ꦆꦩꦁ ꦩꦲꦴꦱꦭ꦳ꦴꦪꦠꦤꦠꦺꦴ ꦱꦸꦠ꧀ꦠꦥ꧀ꦥꦢꦺꦱꦁ ꦄꦴꦲꦫꦶꦱ꧀ꦱꦠꦶ ‘‘ꦪꦴ ꦠꦡꦴꦨꦹꦠꦱ꧀ꦱ ꦢꦶꦛ꧀ꦜꦶ, ꦱꦴꦱ꧀ꦱ ꦲꦺꦴꦠꦶ ꦱꦩ꧀ꦩꦴꦢꦶꦛ꧀ꦜꦶ. ꦪꦺꦴ ꦠꦡꦴꦨꦹꦠꦱ꧀ꦱ ꦱꦔ꧀ꦏꦥ꧀ꦥꦺꦴ, ꦮꦴꦪꦴꦩꦺꦴ, ꦱꦠꦶ, ꦪꦺꦴ ꦠꦡꦴꦨꦹꦠꦱ꧀ꦱ ꦱꦩꦴꦣꦶ, ꦱ꧀ꦮꦴꦱ꧀ꦱ ꦲꦺꦴꦠꦶ ꦱꦩ꧀ꦩꦴꦱꦩꦴꦣꦶ. ꦥꦸꦧ꧀ꦧꦺꦮ ꦑꦺꦴ ꦥꦤꦱ꧀ꦱ ꦏꦴꦪꦏꦩ꧀ꦩꦁ ꦮꦕꦷꦏꦩ꧀ꦩꦁ ꦄꦴꦗꦷꦮꦺꦴ ꦱꦸꦥꦫꦶꦱꦸꦢ꧀ꦣꦺꦴ ꦲꦺꦴꦠꦷ’’ꦠꦶ.

ꦠꦠꦺꦴ ‘‘ꦌꦠꦱ꧀ꦱ ꦄꦤꦤ꧀ꦠꦫꦁ ꦱꦸꦠ꧀ꦠꦥꦢꦁ ꦄꦴꦲꦫꦴ’’ꦠꦶ ꦮꦠ꧀ꦠꦧ꧀ꦧꦺꦴ. ꦱꦕꦺ ꦄꦴꦲꦫꦠꦶ ꦆꦕ꧀ꦕꦺꦠꦁ ꦏꦸꦱꦭꦁ, ꦤꦺꦴ ꦕꦺ ꦄꦴꦲꦫꦠꦶ ꦱꦪꦁ ꦄꦴꦲꦫꦶꦠ꧀ꦮꦴ ‘‘ꦌꦮꦩꦱ꧀ꦱꦴꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦤꦴꦥꦴꦫꦶꦥꦹꦫꦶꦁ ꦒꦕ꧀ꦖꦠꦷ’’ꦠꦶ (ꦩ. ꦤꦶ. ꧓.꧔꧓꧑) ‘‘ꦆꦩꦶꦤꦴ ꦠꦺ ꦱꦠ꧀ꦡꦸꦱꦴꦱꦤꦺꦤ ꦮꦴꦢꦺꦴ ꦨꦶꦤ꧀ꦤꦺꦴ; ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴ ꦥꦚ꧀ꦕꦔ꧀ꦒꦶꦏꦺꦴ ꦤꦴꦩ ꦤꦠ꧀ꦡꦶ, ꦄꦛ꧀ꦜꦔ꧀ꦒꦶꦏꦺꦴꦮ ꦲꦺꦴꦠꦷ’’ꦠꦶ ꦮꦠ꧀ꦠꦧ꧀ꦧꦺꦴ.

ꦆꦩꦴꦤꦶ ꦥꦤ ꦠꦷꦟꦶ ꦄꦔ꧀ꦒꦴꦤꦶ ꦥꦸꦧ꧀ꦧꦺ ꦥꦫꦶꦱꦸꦢ꧀ꦣꦴꦤꦶ ꦮꦠ꧀ꦠꦤ꧀ꦠꦶ, ꦭꦺꦴꦏꦸꦠ꧀ꦠꦫꦩꦒ꧀ꦒꦏ꧀ꦑꦟꦺ ꦥꦫꦶꦱꦸꦢ꧀ꦣꦠꦫꦴꦤꦶ ꦲꦺꦴꦤ꧀ꦠꦶ. ꦄꦡ ‘ꦥꦚ꧀ꦕꦔ꧀ꦒꦶꦏꦺꦴ ꦩꦒ꧀ꦒꦺꦴ’ꦠꦶ ꦆꦢꦁ ꦏꦶꦩꦠ꧀ꦡꦁ ꦒꦲꦶꦠꦤ꧀ꦠꦶ? ꦄꦠꦶꦫꦺꦏꦏꦶꦕ꧀ꦕꦢꦱ꧀ꦱꦤꦠ꧀ꦡꦁ. ꦪꦱ꧀ꦩꦶꦚ꧀ꦲꦶ ꦱꦩꦪꦺ ꦩꦶꦕ꧀ꦖꦴꦮꦴꦕꦁ ꦥꦗꦲꦠꦶ, ꦱꦩ꧀ꦩꦴꦮꦴꦕꦁ ꦥꦹꦫꦺꦠꦶ, ꦠꦱ꧀ꦩꦶꦁ ꦱꦩꦪꦺ ꦱꦩ꧀ꦩꦴꦏꦩ꧀ꦩꦤ꧀ꦠꦱꦩ꧀ꦩꦴꦄꦴꦗꦷꦮꦴ ꦤꦠ꧀ꦡꦶ. ꦆꦩꦴꦤꦶ ꦥꦚ꧀ꦕꦏꦴꦫꦴꦥꦏꦔ꧀ꦒꦴꦤꦺꦮ ꦩꦶꦕ꧀ꦖꦴꦮꦴꦕꦁ ꦥꦗꦲꦤ꧀ꦠꦶ; ꦱꦩ꧀ꦩꦴꦮꦴꦕꦴ ꦥꦤ ꦱꦪꦁ ꦮꦶꦫꦠꦶꦮꦱꦺꦤ ꦥꦹꦫꦺꦠꦶ. ꦪꦱ꧀ꦩꦶꦁ ꦱꦩꦪꦺ ꦩꦶꦕ꧀ꦖꦴꦏꦩ꧀ꦩꦤ꧀ꦠꦁ ꦥꦗꦲꦠꦶ, ꦱꦩ꧀ꦩꦴꦏꦩ꧀ꦩꦤ꧀ꦠꦁ ꦥꦹꦫꦺꦠꦶ, ꦠꦱ꧀ꦩꦶꦁ ꦱꦩꦪꦺ ꦱꦩ꧀ꦩꦴꦮꦴꦕꦴꦱꦩ꧀ꦩꦴꦄꦴꦗꦷꦮꦴ ꦤꦠ꧀ꦡꦶ. ꦆꦩꦴꦤꦶ ꦥꦚ꧀ꦕ ꦏꦴꦫꦴꦥꦏꦔ꧀ꦒꦴꦤꦺꦮ ꦩꦶꦕ꧀ꦖꦴꦏꦩ꧀ꦩꦤ꧀ꦠꦁ ꦥꦗꦲꦤ꧀ꦠꦶ; ꦱꦩ꧀ꦩꦴꦏꦩ꧀ꦩꦤ꧀ꦠꦺꦴ ꦥꦤ ꦱꦪꦁ ꦮꦶꦫꦠꦶꦮꦱꦺꦤ ꦥꦹꦫꦺꦠꦶ. ꦪꦱ꧀ꦩꦶꦁ ꦱꦩꦪꦺ ꦩꦶꦕ꧀ꦖꦴꦄꦴꦗꦷꦮꦁ ꦥꦗꦲꦠꦶ, ꦱꦩ꧀ꦩꦴꦄꦴꦗꦷꦮꦁ ꦥꦹꦫꦺꦠꦶ, ꦠꦱ꧀ꦩꦶꦁ ꦱꦩꦪꦺ ꦱꦩ꧀ꦩꦴꦮꦴꦕꦴꦱꦩ꧀ꦩꦴꦏꦩ꧀ꦩꦤ꧀ꦠꦴ ꦤꦠ꧀ꦡꦶ. ꦆꦩꦴꦤꦶ ꦥꦚ꧀ꦕ ꦏꦴꦫꦴꦥꦏꦔ꧀ꦒꦴꦤꦺꦮ ꦩꦶꦕ꧀ꦖꦴꦄꦴꦗꦷꦮꦁ ꦥꦗꦲꦤ꧀ꦠꦶ; ꦱꦩ꧀ꦩꦴꦄꦴꦗꦷꦮꦺꦴ ꦥꦤ ꦱꦪꦁ ꦮꦶꦫꦠꦶꦮꦱꦺꦤ ꦥꦹꦫꦺꦠꦶ. ꦆꦩꦁ ꦌꦠꦺꦱꦁ ꦥꦚ꧀ꦕꦤ꧀ꦤꦁ ꦏꦴꦫꦴꦥꦏꦔ꧀ꦒꦴꦤꦁ ꦏꦶꦕ꧀ꦕꦴꦠꦶꦫꦺꦏꦠꦁ ꦢꦱ꧀ꦱꦺꦠꦸꦁ ꦥꦚ꧀ꦕꦔ꧀ꦒꦶꦏꦺꦴ ꦩꦒ꧀ꦒꦺꦴꦠꦶ ꦒꦲꦶꦠꦁ. ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴ ꦥꦤ ꦄꦛ꧀ꦜꦔ꧀ꦒꦶꦏꦺꦴꦮ ꦲꦺꦴꦠꦶ, ꦥꦚ꧀ꦕꦔ꧀ꦒꦶꦏꦺꦴ ꦤꦴꦩ ꦤꦠ꧀ꦡꦶ.

‘‘ꦪꦢꦶ ꦱꦩ꧀ꦩꦴꦮꦴꦕꦴꦢꦷꦲꦶ ꦱꦢ꧀ꦣꦶꦁ ꦄꦛ꧀ꦜꦔ꧀ꦒꦶꦏꦺꦴꦠꦶ ꦮꦢꦡ, ꦕꦠꦱ꧀ꦱꦺꦴ ꦱꦩ꧀ꦩꦴꦮꦴꦕꦴꦕꦺꦠꦤꦴ, ꦠꦶꦱ꧀ꦱꦺꦴ ꦱꦩ꧀ꦩꦴꦏꦩ꧀ꦩꦤ꧀ꦠꦕꦺꦠꦤꦴ, ꦱꦠ꧀ꦠ ꦱꦩ꧀ꦩꦴꦄꦴꦗꦷꦮꦕꦺꦠꦤꦴꦠꦶ ꦆꦩꦩ꧀ꦲꦴ ꦕꦺꦠꦤꦴꦧꦲꦸꦠ꧀ꦠꦴ ꦏꦡꦁ ꦩꦸꦕ꧀ꦕꦶꦱ꧀ꦱꦡ? ꦠꦱ꧀ꦩꦴ ꦥꦚ꧀ꦕꦔ꧀ꦒꦶꦏꦺꦴꦮ ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴ’’ꦠꦶ. ‘‘ꦕꦺꦠꦤꦴꦧꦲꦸꦠ꧀ꦠꦴ ꦕ ꦥꦩꦸꦕ꧀ꦕꦶꦱ꧀ꦱꦴꦩ; ꦄꦛ꧀ꦜꦔ꧀ꦒꦶꦏꦺꦴꦮ ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴꦠꦶ ꦕ ꦮꦏ꧀ꦑꦴꦩ’’. ‘‘ꦠ꧀ꦮꦁ ꦠꦴꦮ ꦩꦲꦴꦕꦠ꧀ꦠꦴꦫꦷꦱꦏꦨꦴꦟꦏꦺꦴ ꦲꦺꦴꦱꦶ, ꦤ ꦲꦺꦴꦱꦷ’’ꦠꦶ ꦥꦸꦕ꧀ꦖꦶꦠꦧ꧀ꦧꦺꦴ. ꦱꦕꦺ ‘‘ꦤ ꦲꦺꦴꦩꦷ’’ꦠꦶ ꦮꦢꦠꦶ, ‘‘ꦠ꧀ꦮꦁ ꦄꦨꦴꦟꦏꦠ꧀ꦠꦴ ꦤ ꦗꦴꦤꦴꦱꦷ’’ꦠꦶ ꦮꦠ꧀ꦠꦧ꧀ꦧꦺꦴ. ꦱꦕꦺ ‘‘ꦨꦴꦟꦏꦺꦴꦱ꧀ꦩꦷ’’ꦠꦶ ꦮꦢꦠꦶ, ‘‘ꦱꦸꦠ꧀ꦠꦁ ꦄꦴꦲꦫꦴ’’ꦠꦶ ꦮꦠ꧀ꦠꦧ꧀ꦧꦺꦴ. ꦱꦕꦺ ꦱꦸꦠ꧀ꦠꦁ ꦄꦴꦲꦫꦠꦶ ꦆꦕ꧀ꦕꦺꦠꦁ ꦏꦸꦱꦭꦁ, ꦤꦺꦴ ꦕꦺ ꦄꦴꦲꦫꦠꦶ ꦱꦪꦁ ꦈꦥꦫꦶꦥꦟ꧀ꦟꦴꦱꦠꦺꦴ ꦄꦴꦲꦫꦶꦠꦧ꧀ꦧꦁ –

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦱꦩ꧀ꦩꦴꦮꦴꦕꦴ? ꦱꦩ꧀ꦩꦴꦮꦴꦕꦁꦥꦲꦁ, ꦨꦶꦏ꧀ꦑꦮꦺ, ꦢ꧀ꦮꦴꦪꦁ ꦮꦢꦴꦩꦶ – ꦄꦠ꧀ꦡꦶ, ꦨꦶꦏ꧀ꦑꦮꦺ, ꦱꦩ꧀ꦩꦴꦮꦴꦕꦴ ꦱꦴꦱꦮꦴ ꦥꦸꦚ꧀ꦚꦨꦴꦒꦶꦪꦴ ꦈꦥꦣꦶꦮꦺꦥꦏ꧀ꦏꦴ; ꦄꦠ꧀ꦡꦶ, ꦨꦶꦏ꧀ꦑꦮꦺ, ꦱꦩ꧀ꦩꦴꦮꦴꦕꦴ ꦄꦫꦶꦪꦴ ꦄꦤꦴꦱꦮꦴ ꦭꦺꦴꦏꦸꦠ꧀ꦠꦫꦴ ꦩꦒ꧀ꦒꦔ꧀ꦒꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦱꦩ꧀ꦩꦴꦮꦴꦕꦴ ꦱꦴꦱꦮꦴ ꦥꦸꦚ꧀ꦚꦨꦴꦒꦶꦪꦴ ꦈꦥꦣꦶꦮꦺꦥꦏ꧀ꦏꦴ? ꦩꦸꦱꦴꦮꦴꦢꦴ ꦮꦺꦫꦩꦟꦷ, ꦥꦶꦱꦸꦟꦴꦪ ꦮꦴꦕꦴꦪ ꦮꦺꦫꦩꦟꦷ, ꦦꦫꦸꦱꦴꦪ ꦮꦴꦕꦴꦪ ꦮꦺꦫꦩꦟꦷ, ꦱꦩ꧀ꦦꦥ꧀ꦥꦭꦴꦥꦴ ꦮꦺꦫꦩꦟꦷ – ꦄꦪꦁ, ꦨꦶꦏ꧀ꦑꦮꦺ, ꦱꦩ꧀ꦩꦴꦮꦴꦕꦴ ꦱꦴꦱꦮꦴ ꦥꦸꦚ꧀ꦚꦨꦴꦒꦶꦪꦴ ꦈꦥꦣꦶꦮꦺꦥꦏ꧀ꦏꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦱꦩ꧀ꦩꦴꦮꦴꦕꦴ ꦄꦫꦶꦪꦴ ꦄꦤꦴꦱꦮꦴ ꦭꦺꦴꦏꦸꦠ꧀ꦠꦫꦴ ꦩꦒ꧀ꦒꦔ꧀ꦒꦴ? ꦪꦴ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦕꦶꦠ꧀ꦠꦱ꧀ꦱ ꦄꦤꦴꦱꦮꦕꦶꦠ꧀ꦠꦱ꧀ꦱ ꦄꦫꦶꦪꦩꦒ꧀ꦒꦱꦩꦔ꧀ꦒꦶꦤꦺꦴ ꦄꦫꦶꦪꦩꦒ꧀ꦒꦁ ꦨꦴꦮꦪꦠꦺꦴ ꦕꦠꦹꦲꦶ ꦮꦕꦷꦢꦸꦕ꧀ꦕꦫꦶꦠꦺꦲꦶ ꦄꦴꦫꦠꦶ ꦮꦶꦫꦠꦶ ꦥꦛꦶꦮꦶꦫꦠꦶ ꦮꦺꦫꦩꦟꦷ – ꦄꦪꦁ, ꦨꦶꦏ꧀ꦑꦮꦺ, ꦱꦩ꧀ꦩꦴꦮꦴꦕꦴ ꦄꦫꦶꦪꦴ ꦄꦤꦴꦱꦮꦴ ꦭꦺꦴꦏꦸꦠ꧀ꦠꦫꦴ ꦩꦒ꧀ꦒꦔ꧀ꦒꦴ…ꦥꦺ….

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦱꦩ꧀ꦩꦴꦏꦩ꧀ꦩꦤ꧀ꦠꦺꦴ? ꦱꦩ꧀ꦩꦴꦏꦩ꧀ꦩꦤ꧀ꦠꦁꦥꦲꦁ, ꦨꦶꦏ꧀ꦑꦮꦺ, ꦢ꧀ꦮꦪꦁ ꦮꦢꦴꦩꦶ…ꦥꦺ… ꦈꦥꦣꦶꦮꦺꦥꦏ꧀ꦏꦺꦴ.

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦱꦩ꧀ꦩꦴꦏꦩ꧀ꦩꦤ꧀ꦠꦺꦴ ꦄꦫꦶꦪꦺꦴ ꦄꦤꦴꦱꦮꦺꦴ ꦭꦺꦴꦏꦸꦠ꧀ꦠꦫꦺꦴ…ꦥꦺ….

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦱꦩ꧀ꦩꦴꦄꦴꦗꦷꦮꦺꦴ? ꦱꦩ꧀ꦩꦴꦄꦴꦗꦷꦮꦁꦥꦲꦁ, ꦨꦶꦏ꧀ꦑꦮꦺ, ꦢ꧀ꦮꦴꦪꦁ ꦮꦢꦴꦩꦶ…ꦥꦺ… ꦈꦥꦣꦶꦮꦺꦥꦏ꧀ꦏꦺꦴ.

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦱꦩ꧀ꦩꦴꦄꦴꦗꦷꦮꦺꦴ ꦄꦫꦶꦪꦺꦴ ꦄꦤꦴꦱꦮꦺꦴ ꦭꦺꦴꦏꦸꦠ꧀ꦠꦫꦺꦴ ꦩꦒ꧀ꦒꦔ꧀ꦒꦺꦴ? ꦪꦴ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦕꦶꦠ꧀ꦠꦱ꧀ꦱ ꦄꦤꦴꦱꦮꦕꦶꦠ꧀ꦠꦱ꧀ꦱ ꦄꦫꦶꦪꦩꦒ꧀ꦒꦱꦩꦔ꧀ꦒꦶꦤꦺꦴ ꦄꦫꦶꦪꦩꦒ꧀ꦒꦁ ꦨꦴꦮꦪꦠꦺꦴ ꦩꦶꦕ꧀ꦖꦴꦄꦴꦗꦷꦮꦴ ꦄꦴꦫꦠꦶ ꦮꦶꦫꦠꦶ ꦥꦛꦶꦮꦶꦫꦠꦶ ꦮꦺꦫꦩꦟꦷ – ꦄꦪꦁ, ꦨꦶꦏ꧀ꦑꦮꦺ, ꦱꦩ꧀ꦩꦴꦄꦴꦗꦷꦮꦺꦴ ꦄꦫꦶꦪꦺꦴ ꦄꦤꦴꦱꦮꦺꦴ ꦭꦺꦴꦏꦸꦠ꧀ꦠꦫꦺꦴ ꦩꦒ꧀ꦒꦔ꧀ꦒꦺꦴ’’ꦠꦶ (ꦩ. ꦤꦶ. ꧓.꧑꧓꧘ ꦄꦴꦢꦪꦺꦴ).

ꦌꦮꦩꦺꦠ꧀ꦡ ꦕꦠꦹꦲꦶ ꦮꦕꦷꦢꦸꦕ꧀ꦕꦫꦶꦠꦺꦲꦶ, ꦠꦷꦲꦶ ꦏꦴꦪꦢꦸꦕ꧀ꦕꦫꦶꦠꦺꦲꦶ, ꦩꦶꦕ꧀ꦖꦴꦗꦷꦮꦠꦺꦴ ꦕꦴꦠꦶ ꦌꦏꦺꦏꦴꦮ ꦮꦶꦫꦠꦶ ꦄꦫꦶꦪꦴ ꦄꦤꦴꦱꦮꦴ ꦭꦺꦴꦏꦸꦠ꧀ꦠꦫꦴ ꦩꦒ꧀ꦒꦔ꧀ꦒꦴꦠꦶ ꦮꦸꦠ꧀ꦠꦴ. ‘‘ꦏꦸꦠꦺꦴ ꦌꦠ꧀ꦡ ꦕꦺꦠꦤꦴꦧꦲꦸꦠ꧀ꦠꦁ? ꦏꦸꦠꦺꦴ ꦥꦚ꧀ꦕꦔ꧀ꦒꦶꦏꦺꦴ ꦩꦒ꧀ꦒꦺꦴ? ꦆꦢꦁ ꦠꦺ ꦱꦸꦠ꧀ꦠꦁ ꦄꦏꦴꦩꦏꦱ꧀ꦱ ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴ ꦄꦛ꧀ꦜꦔ꧀ꦒꦶꦏꦺꦴꦠꦶ ꦢꦷꦥꦺꦠꦶ’’. ꦱꦕꦺ ꦌꦠ꧀ꦠꦏꦺꦤ ꦱꦭ꧀ꦭꦏ꧀ꦑꦺꦠꦶ ꦆꦕ꧀ꦕꦺꦠꦁ ꦏꦸꦱꦭꦁ, ꦤꦺꦴ ꦕꦺ ꦱꦭ꧀ꦭꦏ꧀ꦑꦺꦠꦶ ꦄꦚ꧀ꦚꦴꦤꦶꦥꦶ ꦏꦴꦫꦟꦴꦤꦶ ꦄꦴꦲꦫꦶꦠ꧀ꦮꦴ ꦱꦚ꧀ꦚꦴꦥꦺꦠꦧ꧀ꦧꦺꦴ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ –

‘‘ꦪꦱ꧀ꦩꦶꦁ ꦑꦺꦴ, ꦱꦸꦨꦢ꧀ꦢ, ꦣꦩ꧀ꦩꦮꦶꦤꦪꦺ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦤ ꦈꦥꦭꦧ꧀ꦨꦠꦶ, ꦱꦩꦟꦺꦴꦥꦶ ꦠꦠ꧀ꦡ ꦤ ꦈꦥꦭꦧ꧀ꦨꦠꦶ…ꦥꦺ… ꦆꦩꦱ꧀ꦩꦶꦁ ꦑꦺꦴ, ꦱꦸꦨꦢ꧀ꦢ, ꦣꦩ꧀ꦩꦮꦶꦤꦪꦺ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦈꦥꦭꦧ꧀ꦨꦠꦶ; ꦆꦣꦺꦮ, ꦱꦸꦨꦢ꧀ꦢ, ꦱꦩꦟꦺꦴ…ꦥꦺ… ꦱꦸꦚ꧀ꦚꦴ ꦥꦫꦥ꧀ꦥꦮꦴꦢꦴ ꦱꦩꦟꦺꦲꦶ ꦄꦚ꧀ꦚꦺꦲꦷꦠꦶ (ꦢꦷ. ꦤꦶ. ꧒.꧒꧑꧔).

ꦄꦚ꧀ꦚꦺꦱꦸꦥꦶ ꦄꦤꦺꦏꦺꦱꦸ ꦱꦸꦠ꧀ꦠꦱꦠꦺꦱꦸ ꦄꦛ꧀ꦜꦔ꧀ꦒꦶꦏꦺꦴꦮ ꦩꦒ꧀ꦒꦺꦴ ꦄꦴꦒꦠꦺꦴ. ꦏꦡꦴꦮꦠ꧀ꦡꦸꦥ꧀ꦥꦏꦫꦟꦺꦥꦶ ꦮꦸꦠ꧀ꦠꦁ –

‘‘ꦩꦒ꧀ꦒꦴꦤꦁ ꦄꦛ꧀ꦜꦔ꧀ꦒꦶꦏꦺꦴ ꦱꦺꦛ꧀ꦜꦺꦴ, ꦱꦕ꧀ꦕꦴꦤꦁ ꦕꦠꦸꦫꦺꦴ ꦥꦢꦴ;

ꦮꦶꦫꦴꦒꦺꦴ ꦱꦺꦛ꧀ꦜꦺꦴ ꦣꦩ꧀ꦩꦴꦤꦁ, ꦢ꧀ꦮꦶꦥꦢꦴꦤꦚ꧀ꦕ ꦕꦏ꧀ꦑꦸꦩꦴ’’ꦠꦶ (ꦏꦡꦴ. ꧘꧗꧒) –

‘‘ꦄꦠ꧀ꦡꦺꦮ ꦱꦸꦠ꧀ꦠꦤ꧀ꦠꦺꦴꦠꦶ’’? ‘‘ꦄꦴꦩꦤ꧀ꦠꦴ’’‘‘ꦠꦺꦤ ꦲꦶ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ’’ꦠꦶ. ꦱꦕꦺ ꦥꦤ ꦌꦠ꧀ꦠꦏꦺꦤꦴꦥꦶ ꦱꦚ꧀ꦚꦠ꧀ꦠꦶꦁ ꦤ ꦒꦕ꧀ꦖꦠꦶ, ‘‘ꦒꦕ꧀ꦖ, ꦮꦶꦲꦴꦫꦁ ꦥꦮꦶꦱꦶꦠ꧀ꦮꦴ ꦪꦴꦒꦸꦁ ꦥꦶꦮꦴꦲꦷ’’ꦠꦶ ꦈꦪ꧀ꦪꦺꦴꦗꦺꦠꦧ꧀ꦧꦺꦴ. ꦈꦠ꧀ꦠꦫꦶꦩ꧀ꦥꦤ ꦏꦴꦫꦟꦁ ꦮꦏ꧀ꦑꦠꦷꦠꦶ ꦄꦛ꧀ꦜꦴꦤꦩꦺꦠꦁ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮ.

ꦤꦪꦴ ꦥꦤꦺꦠ꧀ꦡ ꦒꦟꦺꦠꦧ꧀ꦧꦴ. ꦄꦛ꧀ꦜꦔ꧀ꦒꦶꦏꦩꦒ꧀ꦒꦱ꧀ꦩꦶꦚ꧀ꦲꦶ ꦌꦏꦠꦺꦴ ꦥꦸꦕ꧀ꦖꦶꦠ꧀ꦮꦴ ꦌꦏꦠꦺꦴ ꦮꦶꦱ꧀ꦱꦗ꧀ꦗꦤꦺ ꦕꦠꦹꦱꦸ ꦩꦒ꧀ꦒꦺꦱꦸ ꦕꦠ꧀ꦠꦴꦫꦶ ꦤꦪꦱꦲꦱ꧀ꦱꦴꦤꦶ ꦮꦶꦨꦠ꧀ꦠꦴꦤꦶ. ꦥꦚ꧀ꦕꦔ꧀ꦒꦶꦏꦩꦒ꧀ꦒꦺ ꦌꦏꦠꦺꦴ ꦥꦸꦕ꧀ꦖꦶꦠ꧀ꦮꦴ ꦌꦏꦠꦺꦴ ꦮꦶꦱ꧀ꦱꦗ꧀ꦗꦤꦺ ꦕꦠ꧀ꦠꦴꦫꦶ; ꦥꦴꦛꦶꦪꦺꦏ꧀ꦏꦁ ꦥꦸꦕ꧀ꦖꦶꦠ꧀ꦮꦴ ꦥꦴꦛꦶꦪꦺꦏ꧀ꦏꦁ ꦮꦶꦱ꧀ꦱꦗ꧀ꦗꦤꦺ ꦕꦠ꧀ꦠꦴꦫꦶ ꦕꦠ꧀ꦠꦴꦫꦷꦠꦶ ꦥꦚ꧀ꦕꦱꦸ ꦄꦔ꧀ꦒꦺꦱꦸ ꦮꦷꦱꦠꦶ. ꦆꦠꦶ ꦥꦸꦫꦶꦩꦴꦤꦶ ꦄꦛ꧀ꦜ ꦆꦩꦴꦤꦶ ꦕ ꦮꦷꦱꦠꦷꦠꦶ ꦱꦧ꧀ꦧꦴꦤꦶꦥꦶ ꦩꦒ꧀ꦒꦮꦶꦨꦔ꧀ꦒꦺ ꦄꦛ꧀ꦜꦮꦷꦱꦠꦶ ꦤꦪꦱꦲꦱ꧀ꦱꦴꦤꦶ ꦮꦶꦨꦠ꧀ꦠꦴꦤꦶ. ꦠꦴꦤꦶ ꦕ ꦑꦺꦴ ꦤꦶꦧ꧀ꦧꦠ꧀ꦠꦶꦠꦭꦺꦴꦏꦸꦠ꧀ꦠꦫꦴꦤꦶ ꦏꦸꦱꦭꦴꦤꦺꦮ. ꦮꦶꦥꦴꦏꦺ ꦥꦤ ꦏꦸꦱꦭꦠꦺꦴ ꦠꦶꦒꦸꦟꦴ ꦤꦪꦴ ꦏꦴꦠꦧ꧀ꦧꦴꦠꦶ.

ꦄꦨꦶꦣꦩ꧀ꦩꦨꦴꦗꦤꦷꦪꦮꦟ꧀ꦟꦤꦴ.

꧓. ꦥꦚ꧀ꦲꦴꦥꦸꦕ꧀ꦖꦏꦮꦟ꧀ꦟꦤꦴ

꧕꧐꧔. ꦥꦚ꧀ꦲꦴꦥꦸꦕ꧀ꦖꦏꦺ ꦥꦴꦭ꦳ꦶꦄꦤꦸꦱꦴꦫꦺꦤꦺꦮ ꦩꦒ꧀ꦒꦔ꧀ꦒꦴꦤꦁ ꦏꦸꦱꦭꦴꦢꦶꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ. ꦄꦴꦫꦩ꧀ꦩꦟꦠ꧀ꦠꦶꦏꦺꦱꦸ ꦥꦤ ꦱꦧ꧀ꦧꦴꦤꦶꦥꦺꦠꦴꦤꦶ ꦄꦥ꧀ꦥꦩꦴꦟꦁ ꦤꦶꦧ꧀ꦧꦴꦤꦁ ꦄꦴꦫꦧ꧀ꦨ ꦥꦮꦠ꧀ꦠꦶꦠꦺꦴ ꦄꦥ꧀ꦥꦩꦴꦟꦴꦫꦩ꧀ꦩꦟꦴꦤꦺꦮ, ꦤ ꦩꦒ꧀ꦒꦴꦫꦩ꧀ꦩꦟꦴꦤꦶ. ꦤꦺꦮ ꦲꦶ ꦩꦒ꧀ꦒꦺꦴ ꦤ ꦦꦭꦁ ꦩꦒ꧀ꦒꦁ ꦄꦴꦫꦩ꧀ꦩꦟꦁ ꦏꦫꦺꦴꦠꦶ. ꦱꦲꦗꦴꦠꦲꦺꦠꦸꦮꦱꦺꦤ ꦥꦤꦺꦠ꧀ꦡ ꦏꦸꦱꦭꦴꦤꦶ ꦩꦒ꧀ꦒꦲꦺꦠꦸꦏꦴꦤꦶ; ꦮꦷꦫꦶꦪꦁ ꦮꦴ ꦮꦷꦩꦁꦱꦁ ꦮꦴ ꦗꦺꦛ꧀ꦜꦏꦁ ꦏꦠ꧀ꦮꦴ ꦩꦒ꧀ꦒꦨꦴꦮꦤꦴꦏꦴꦭꦺ ꦩꦒ꧀ꦒꦴꦣꦶꦥꦠꦷꦤꦶ; ꦖꦤ꧀ꦢꦕꦶꦠ꧀ꦠꦗꦺꦛ꧀ꦜꦶꦏꦴꦪ ꦩꦒ꧀ꦒꦨꦴꦮꦤꦴꦪ ꦤ ꦮꦠ꧀ꦠꦧ꧀ꦧꦴꦤꦶ ꦩꦒ꧀ꦒꦴꦣꦶꦥꦠꦷꦤꦷꦠꦶ; ꦦꦭꦏꦴꦭꦺꦥꦶ ꦤ ꦮꦠ꧀ꦠꦧ꧀ꦧꦴꦤꦺꦮ.

ꦄꦠꦷꦠꦴꦢꦷꦱꦸ ꦌꦏꦴꦫꦩ꧀ꦩꦟꦨꦴꦮꦺꦤꦥꦶ ꦤ ꦮꦠ꧀ꦠꦧ꧀ꦧꦴꦤꦶ; ꦤꦶꦧ꧀ꦧꦴꦤꦱ꧀ꦱ ꦥꦤ ꦧꦲꦶꦢ꧀ꦣꦴꦣꦩ꧀ꦩꦠ꧀ꦠꦴ ꦧꦲꦶꦢ꧀ꦣꦴꦫꦩ꧀ꦩꦟꦴꦤꦶ ꦤꦴꦩ ꦲꦺꦴꦤ꧀ꦠꦷꦠꦶ ꦌꦮꦩꦺꦠꦱ꧀ꦩꦶꦁ ꦥꦚ꧀ꦲꦴꦥꦸꦕ꧀ꦖꦏꦺꦥꦶ ꦤꦶꦧ꧀ꦧꦠ꧀ꦠꦶꦠꦭꦺꦴꦏꦸꦠ꧀ꦠꦫꦴꦤꦺꦮ ꦩꦒ꧀ꦒꦔ꧀ꦒꦴꦤꦶ ꦏꦡꦶꦠꦴꦤꦶ. ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦲꦶ ꦱꦸꦠ꧀ꦠꦤ꧀ꦠꦨꦴꦗꦤꦷꦪꦱ꧀ꦩꦶꦁꦪꦺꦮ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴꦤꦶ ꦩꦒ꧀ꦒꦔ꧀ꦒꦴꦤꦶ ꦏꦡꦶꦠꦴꦤꦶ; ꦄꦨꦶꦣꦩ꧀ꦩꦨꦴꦗꦤꦷꦪꦺ ꦥꦤ ꦥꦚ꧀ꦲꦴꦥꦸꦕ꧀ꦖꦏꦺ ꦕ ꦭꦺꦴꦏꦸꦠ꧀ꦠꦫꦴꦤꦺꦮꦴꦠꦶ ꦌꦮꦩꦪꦁ ꦩꦒ꧀ꦒꦮꦶꦨꦔ꧀ꦒꦺꦴꦥꦶ ꦠꦺꦥꦫꦶꦮꦛ꧀ꦛꦁ ꦤꦷꦲꦫꦶꦠ꧀ꦮꦴꦮ ꦨꦴꦗꦺꦠ꧀ꦮꦴ ꦢꦱ꧀ꦱꦶꦠꦺꦴꦠꦶ.

ꦱꦩ꧀ꦩꦺꦴꦲꦮꦶꦤꦺꦴꦢꦤꦶꦪꦴ ꦮꦶꦨꦔ꧀ꦒꦛ꧀ꦜꦏꦡꦴꦪ

ꦩꦒ꧀ꦒꦔ꧀ꦒꦮꦶꦨꦔ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.