꧑. ꦑꦤ꧀ꦣꦮꦶꦨꦔ꧀ꦒꦺꦴ

꧑. ꦱꦸꦠ꧀ꦠꦤ꧀ꦠꦨꦴꦗꦤꦷꦪꦮꦟ꧀ꦟꦤꦴ

ꦕꦠꦸꦱꦕ꧀ꦕꦢꦱꦺꦴ ꦤꦴꦡꦺꦴ, ꦕꦠꦸꦣꦴ ꦣꦩ꧀ꦩꦱꦔ꧀ꦒꦟꦶꦁ;

ꦥꦏꦴꦱꦪꦶꦠ꧀ꦮꦴ ꦱꦩ꧀ꦧꦸꦢ꧀ꦣꦺꦴ, ꦠꦱ꧀ꦱꦺꦮ ꦱꦩꦤꦤ꧀ꦠꦫꦁ.

ꦈꦥꦺꦠꦺꦴ ꦧꦸꦢ꧀ꦣꦣꦩ꧀ꦩꦺꦲꦶ, ꦄꦛ꧀ꦜꦴꦫꦱꦲꦶ ꦤꦴꦪꦏꦺꦴ;

ꦄꦛ꧀ꦜꦴꦫꦱꦤ꧀ꦤꦁ ꦑꦤ꧀ꦣꦴꦢꦶ-ꦮꦶꦨꦔ꧀ꦒꦴꦤꦁ ꦮꦱꦺꦤ ꦪꦁ.

ꦮꦶꦨꦔ꧀ꦒꦁ ꦢꦺꦱꦪꦷ ꦱꦠ꧀ꦡꦴ, ꦠꦱ꧀ꦱ ꦱꦁꦮꦟ꧀ꦟꦤꦴꦏ꧀ꦏꦩꦺꦴ;

ꦆꦢꦴꦤꦶ ꦪꦱ꧀ꦩꦴ ꦱꦩ꧀ꦥꦠ꧀ꦠꦺꦴ, ꦠꦱ꧀ꦩꦴ ꦠꦱ꧀ꦱꦠ꧀ꦡꦮꦟ꧀ꦟꦤꦁ.

ꦏꦫꦶꦱ꧀ꦱꦴꦩꦶ ꦮꦶꦒꦴꦲꦺꦠ꧀ꦮꦴ, ꦥꦺꦴꦫꦴꦟꦛ꧀ꦜꦏꦡꦴꦤꦪꦁ;

ꦱꦢ꧀ꦣꦩ꧀ꦩꦺ ꦒꦴꦫꦮꦁ ꦏꦠ꧀ꦮꦴ, ꦠꦁ ꦱꦸꦟꦴꦡ ꦱꦩꦴꦲꦶꦠꦴꦠꦶ.

꧑. ꦥꦚ꧀ꦕꦏ꧀ꦑꦤ꧀ꦣꦴ – ꦫꦹꦥꦏ꧀ꦑꦤ꧀ꦣꦺꦴ…ꦥꦺ… ꦮꦶꦚ꧀ꦚꦴꦟꦏ꧀ꦑꦤ꧀ꦣꦺꦴꦠꦶ ꦆꦢꦁ ꦮꦶꦨꦔ꧀ꦒꦥ꧀ꦥꦏꦫꦟꦱ꧀ꦱ ꦄꦴꦢꦶꦨꦹꦠꦺ ꦑꦤ꧀ꦣꦮꦶꦨꦔ꧀ꦒꦺ ꦱꦸꦠ꧀ꦠꦤ꧀ꦠꦨꦴꦗꦤꦷꦪꦁ ꦤꦴꦩ. ꦠꦠ꧀ꦡ ꦥꦚ꧀ꦕꦴꦠꦶ ꦒꦟꦤꦥꦫꦶꦕ꧀ꦖꦺꦢꦺꦴ. ꦠꦺꦤ ꦤ ꦠꦠꦺꦴ ꦲꦺꦛ꧀ꦜꦴ ꦤ ꦈꦢ꧀ꦣꦤ꧀ꦠꦶ ꦢꦱ꧀ꦱꦺꦠꦶ. ꦑꦤ꧀ꦣꦴꦠꦶ ꦥꦫꦶꦕ꧀ꦖꦶꦤ꧀ꦤꦣꦩ꧀ꦩꦤꦶꦢꦱ꧀ꦱꦤꦁ. ꦠꦠ꧀ꦫꦴꦪꦁ ꦑꦤ꧀ꦣ-ꦱꦢ꧀ꦢꦺꦴ ꦱꦩ꧀ꦧꦲꦸꦭꦺꦱꦸ ꦜꦴꦤꦺꦱꦸ ꦢꦶꦱ꧀ꦱꦠꦶ – ꦫꦴꦱꦶꦩ꧀ꦲꦶ, ꦒꦸꦟꦺ, ꦥꦟ꧀ꦟꦠ꧀ꦠꦶꦪꦁ, ꦫꦸꦭ꦳꧀ꦲꦶꦪꦤ꧀ꦠꦶ. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦩꦲꦴꦱꦩꦸꦢ꧀ꦢꦺ ꦤ ꦱꦸꦏꦫꦁ ꦈꦢꦏꦱ꧀ꦱ ꦥꦩꦴꦟꦁ ꦒꦲꦺꦠꦸꦁ – ꦌꦠ꧀ꦠꦏꦴꦤꦶ ꦈꦢꦏꦴꦭ꦳꧀ꦲꦏꦴꦤꦷꦠꦶ ꦮꦴ ꦌꦠ꧀ꦠꦏꦴꦤꦶ ꦈꦢꦏꦴꦭ꦳꧀ꦲꦏꦱꦠꦴꦤꦷꦠꦶ ꦮꦴ ꦌꦠ꧀ꦠꦏꦴꦤꦶ ꦈꦢꦏꦴꦭ꦳꧀ꦲꦏꦱꦲꦱ꧀ꦱꦴꦤꦷꦠꦶ ꦮꦴ ꦌꦠ꧀ꦠꦏꦴꦤꦶ ꦈꦢꦏꦴꦭ꦳꧀ꦲꦏꦱꦠꦱꦲꦱ꧀ꦱꦴꦤꦷꦠꦶ ꦮꦴ, ꦄꦡ ꦑꦺꦴ ꦄꦱꦔ꧀ꦑ꧀ꦪꦺꦪ꧀ꦪꦺꦴ ꦄꦥ꧀ꦥꦩꦺꦪ꧀ꦪꦺꦴ ꦩꦲꦴꦈꦢꦏꦏ꧀ꦑꦤ꧀ꦣꦺꦴꦠ꧀ꦮꦺꦮ ꦱꦔ꧀ꦑ꧀ꦪꦁ ꦒꦕ꧀ꦖꦠꦷ’’ꦠꦶꦄꦴꦢꦷꦱꦸ (ꦄ. ꦤꦶ. ꧔.꧕꧑; ꧖.꧓꧗) ꦲꦶ ꦫꦴꦱꦶꦠꦺꦴ ꦑꦤ꧀ꦣꦺꦴ ꦤꦴꦩ. ꦤꦲꦶ ꦥꦫꦶꦠ꧀ꦠꦏꦁ ꦈꦢꦏꦁ ꦈꦢꦏꦏ꧀ꦑꦤ꧀ꦣꦺꦴꦠꦶ ꦮꦸꦕ꧀ꦕꦠꦶ, ꦧꦲꦸꦏꦩꦺꦮ ꦮꦸꦕ꧀ꦕꦠꦶ. ꦠꦡꦴ ꦤ ꦥꦫꦶꦠ꧀ꦠꦏꦺꦴ ꦫꦗꦺꦴ ꦫꦗꦏ꧀ꦑꦤ꧀ꦣꦺꦴ, ꦤ ꦄꦥ꧀ꦥꦩꦠ꧀ꦠꦏꦴ ꦒꦴꦮꦺꦴ ꦒꦮꦏ꧀ꦑꦤ꧀ꦣꦺꦴ, ꦤ ꦄꦥ꧀ꦥꦩꦠ꧀ꦠꦏꦁ ꦧꦭꦁ ꦧꦭꦏ꧀ꦑꦤ꧀ꦣꦺꦴ, ꦤ ꦄꦥ꧀ꦥꦩꦠ꧀ꦠꦏꦁ ꦥꦸꦚ꧀ꦚꦁ ꦥꦸꦚ꧀ꦚꦏ꧀ꦑꦤ꧀ꦣꦺꦴꦠꦶ ꦮꦸꦕ꧀ꦕꦠꦶ. ꦧꦲꦸꦏꦩꦺꦮ ꦲꦶ ꦫꦗꦺꦴ ꦫꦗꦏ꧀ꦑꦤ꧀ꦣꦺꦴ, ꦧꦲꦸꦏꦴꦮ ꦒꦮꦴꦢꦪꦺꦴ ꦒꦮꦏ꧀ꦑꦤ꧀ꦣꦺꦴ, ꦧꦭꦏ꧀ꦑꦤ꧀ꦣꦺꦴ, ꦥꦸꦚ꧀ꦚꦏ꧀ꦑꦤ꧀ꦣꦺꦴꦠꦶ ꦮꦸꦕ꧀ꦕꦤ꧀ꦠꦶ. ‘‘ꦱꦷꦭꦏ꧀ꦑꦤ꧀ꦣꦺꦴ ꦱꦩꦴꦣꦶꦏ꧀ꦑꦤ꧀ꦣꦺꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧓.꧓꧕꧕) ꦥꦤ ꦒꦸꦟꦠꦺꦴ ꦑꦤ꧀ꦣꦺꦴ ꦤꦴꦩ. ‘‘ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦩꦲꦤ꧀ꦠꦁ ꦢꦴꦫꦸꦏ꧀ꦑꦤ꧀ꦣꦁ ꦒꦔ꧀ꦒꦴꦪ ꦤꦢꦶꦪꦴ ꦱꦺꦴꦠꦺꦤ ꦮꦸꦪ꧀ꦲꦩꦴꦤ’’ꦤ꧀ꦠꦶ (ꦱꦁ. ꦤꦶ. ꧔.꧒꧔꧑). ꦌꦠ꧀ꦡ ꦥꦟ꧀ꦟꦠ꧀ꦠꦶꦠꦺꦴ ꦑꦤ꧀ꦣꦺꦴ ꦤꦴꦩ. ‘‘ꦪꦁ ꦕꦶꦠ꧀ꦠꦁ ꦩꦤꦺꦴ ꦩꦴꦤꦱꦁ…ꦥꦺ… ꦮꦶꦚ꧀ꦚꦴꦟꦁ ꦮꦶꦚ꧀ꦚꦴꦟꦏ꧀ꦑꦤ꧀ꦣꦺꦴ’’ꦠꦶꦄꦴꦢꦷꦱꦸ (ꦣ. ꦱ. ꧖꧓, ꧖꧕) ꦫꦸꦭ꦳꧀ꦲꦶꦠꦺꦴ ꦑꦤ꧀ꦣꦺꦴ ꦤꦴꦩ. ꦱ꧀ꦮꦴꦪꦩꦶꦣ ꦫꦴꦱꦶꦠꦺꦴ ꦄꦣꦶꦥ꧀ꦥꦺꦠꦺꦴ. ꦄꦪꦚ꧀ꦲꦶ ꦑꦤ꧀ꦣꦛ꧀ꦜꦺꦴ ꦤꦴꦩ ꦥꦶꦟ꧀ꦝꦛ꧀ꦜꦺꦴ ꦥꦹꦒꦛ꧀ꦜꦺꦴ ꦓꦛꦛ꧀ꦜꦺꦴ ꦫꦴꦱꦛ꧀ꦜꦺꦴ. ꦠꦱ꧀ꦩꦴ ‘ꦫꦴꦱꦶꦭꦏ꧀ꦑꦟꦴ ꦑꦤ꧀ꦣꦴ’ꦠꦶ ꦮꦺꦢꦶꦠꦧ꧀ꦧꦴ. ꦏꦺꦴꦛ꧀ꦜꦴꦱꦛ꧀ꦜꦺꦴꦠꦶꦥꦶ ꦮꦠ꧀ꦠꦸꦁ ꦮꦛ꧀ꦛꦠꦶ; ꦭꦺꦴꦏꦱ꧀ꦩꦶꦚ꧀ꦲꦶ ꦆꦟꦁ ꦒꦲꦺꦠ꧀ꦮꦴ ꦕꦺꦴꦢꦶꦪꦩꦴꦤꦴ ‘ꦢ꧀ꦮꦷꦲꦶ ꦑꦤ꧀ꦣꦺꦲꦶ ꦢꦱ꧀ꦱꦴꦩ, ꦠꦷꦲꦶ ꦑꦤ꧀ꦣꦺꦲꦶ ꦢꦱ꧀ꦱꦴꦩꦴ’ꦠꦶ ꦮꦢꦤ꧀ꦠꦶ. ꦆꦠꦶ ‘ꦏꦺꦴꦛ꧀ꦜꦴꦱꦭꦏ꧀ꦑꦟꦴ ꦑꦤ꧀ꦣꦴ’ꦠꦶꦥꦶ ꦮꦠ꧀ꦠꦸꦁ ꦮꦛ꧀ꦛꦠꦶ. ꦌꦮꦩꦺꦠ꧀ꦡ ꦫꦹꦥꦏ꧀ꦑꦤ꧀ꦣꦺꦴꦠꦶ ꦫꦹꦥꦫꦴꦱꦶ ꦫꦹꦥꦏꦺꦴꦛ꧀ꦜꦴꦱꦺꦴ, ꦮꦺꦢꦤꦴꦏ꧀ꦑꦤ꧀ꦣꦺꦴꦠꦶ ꦮꦺꦢꦤꦴꦫꦴꦱꦶ ꦮꦺꦢꦤꦴꦏꦺꦴꦛ꧀ꦜꦴꦱꦺꦴꦠꦶ ꦆꦩꦶꦤꦴ ꦤꦪꦺꦤ ꦱꦚ꧀ꦚꦴꦏ꧀ꦑꦤ꧀ꦣꦴꦢꦷꦤꦁ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦌꦠ꧀ꦠꦴꦮꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦪ꧀ꦮꦴꦪꦁ ‘‘ꦕꦠ꧀ꦠꦴꦫꦺꦴ ꦕ ꦩꦲꦴꦨꦹꦠꦴ ꦕꦠꦸꦤ꧀ꦤꦚ꧀ꦕ ꦩꦲꦴꦨꦹꦠꦴꦤꦁ ꦈꦥꦴꦢꦴꦪꦫꦹꦥ’’ꦤ꧀ꦠꦶ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦴꦢꦷꦱꦸ ꦌꦏꦴꦢꦱꦱꦸ ꦎꦏꦴꦱꦺꦱꦸ ꦮꦶꦨꦠ꧀ꦠꦺꦴ ‘ꦥꦚ꧀ꦕꦮꦷꦱꦠꦶ ꦫꦹꦥꦏꦺꦴꦛ꧀ꦜꦴꦱꦴ’ꦠꦶ ꦕ ‘ꦖꦤ꧀ꦤꦮꦸꦠꦶ ꦫꦹꦥꦏꦺꦴꦛ꧀ꦜꦴꦱꦴ’ꦠꦶ ꦕ ꦌꦮꦁꦥꦨꦺꦢꦺꦴ ꦫꦹꦥꦫꦴꦱꦶ, ꦠꦁ ꦱꦧ꧀ꦧꦁ ꦥꦫꦶꦥꦶꦟ꧀ꦝꦺꦠ꧀ꦮꦴ ꦫꦹꦥꦏ꧀ꦑꦤ꧀ꦣꦺꦴ ꦤꦴꦩꦴꦠꦶ ꦢꦱ꧀ꦱꦺꦱꦶ. ꦪꦺꦴ ꦥꦤꦴꦪꦁ ‘‘ꦱꦸꦑꦴ ꦮꦺꦢꦤꦴ, ꦢꦸꦏ꧀ꦑꦴ ꦮꦺꦢꦤꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ’’ꦠꦶ ꦠꦺꦱꦸꦪꦺꦮ ꦌꦏꦴꦢꦱꦱꦸ ꦎꦏꦴꦱꦺꦱꦸ ꦮꦶꦨꦠ꧀ꦠꦺꦴ ꦕꦠꦸꦨꦹꦩꦶꦏꦮꦺꦢꦤꦴꦫꦴꦱꦶ, ꦠꦁ ꦱꦧ꧀ꦧꦁ ꦥꦫꦶꦥꦶꦟ꧀ꦝꦺꦠ꧀ꦮꦴ ꦮꦺꦢꦤꦴꦏ꧀ꦑꦤ꧀ꦣꦺꦴ ꦤꦴꦩꦴꦠꦶ ꦢꦱ꧀ꦱꦺꦱꦶ. ꦪꦺꦴ ꦥꦤꦴꦪꦁ ‘‘ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ…ꦥꦺ… ꦩꦤꦺꦴꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ’’ꦠꦶ ꦠꦺꦱꦸꦪꦺꦮ ꦌꦏꦴꦢꦱꦱꦸ ꦎꦏꦴꦱꦺꦱꦸ ꦮꦶꦨꦠ꧀ꦠꦺꦴ ꦕꦠꦸꦨꦹꦩꦶꦏꦱꦚ꧀ꦚꦴꦫꦴꦱꦶ, ꦠꦁ ꦱꦧ꧀ꦧꦁ ꦥꦫꦶꦥꦶꦟ꧀ꦝꦺꦠ꧀ꦮꦴ ꦱꦚ꧀ꦚꦴꦏ꧀ꦑꦤ꧀ꦣꦺꦴ ꦤꦴꦩꦴꦠꦶ ꦢꦱ꧀ꦱꦺꦱꦶ. ꦪꦺꦴ ꦥꦤꦴꦪꦁ ‘‘ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦕꦺꦠꦤꦴ…ꦥꦺ… ꦩꦤꦺꦴꦱꦩ꧀ꦦꦱ꧀ꦱꦗꦴ ꦕꦺꦠꦤꦴ’’ꦠꦶ ꦠꦺꦱꦸꦪꦺꦮ ꦌꦏꦴꦢꦱꦱꦸ ꦎꦏꦴꦱꦺꦱꦸ ꦮꦶꦨꦠ꧀ꦠꦺꦴ ꦕꦠꦸꦨꦹꦩꦶꦏꦕꦺꦠꦤꦴꦫꦴꦱꦶ, ꦠꦁ ꦱꦧ꧀ꦧꦁ ꦥꦫꦶꦥꦶꦟ꧀ꦝꦺꦠ꧀ꦮꦴ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ ꦤꦴꦩꦴꦠꦶ ꦢꦱ꧀ꦱꦺꦱꦶ. ꦪꦺꦴ ꦥꦤꦴꦪꦁ ‘‘ꦕꦏ꧀ꦑꦸꦮꦶꦚ꧀ꦚꦴꦟꦁ, ꦱꦺꦴꦠꦓꦴꦤꦗꦶꦮ꧀ꦲꦴꦏꦴꦪꦮꦶꦚ꧀ꦚꦴꦟꦁ, ꦩꦤꦺꦴꦣꦴꦠꦸ, ꦩꦤꦺꦴꦮꦶꦚ꧀ꦚꦴꦟꦣꦴꦠꦹ’’ꦠꦶ ꦠꦺꦱꦸꦪꦺꦮ ꦌꦏꦴꦢꦱꦱꦸ ꦎꦏꦴꦱꦺꦱꦸ ꦮꦶꦨꦠ꧀ꦠꦺꦴ ꦕꦠꦸꦨꦹꦩꦶꦏꦕꦶꦠ꧀ꦠꦫꦴꦱꦶ, ꦠꦁ ꦱꦧ꧀ꦧꦁ ꦥꦫꦶꦥꦶꦟ꧀ꦝꦺꦠ꧀ꦮꦴ ꦮꦶꦚ꧀ꦚꦴꦟꦏ꧀ꦑꦤ꧀ꦣꦺꦴ ꦤꦴꦩꦴꦠꦶ ꦢꦱ꧀ꦱꦺꦱꦶ.

ꦄꦥꦶꦕꦺꦠ꧀ꦡ ꦱꦧ꧀ꦧꦩ꧀ꦥꦶ ꦕꦠꦸꦱꦩꦸꦛ꧀ꦜꦴꦤꦶꦏꦁ ꦫꦹꦥꦁ ꦫꦹꦥꦏ꧀ꦑꦤ꧀ꦣꦺꦴ, ꦏꦴꦩꦴꦮꦕꦫꦄꦛ꧀ꦜꦏꦸꦱꦭꦕꦶꦠ꧀ꦠꦴꦢꦷꦲꦶ ꦌꦏꦹꦤꦤꦮꦸꦠꦶꦕꦶꦠ꧀ꦠꦺꦲꦶ ꦱꦲꦗꦴꦠꦴ ꦮꦺꦢꦤꦴ ꦮꦺꦢꦤꦴꦏ꧀ꦑꦤ꧀ꦣꦺꦴ, ꦱꦚ꧀ꦚꦴ ꦱꦚ꧀ꦚꦴꦏ꧀ꦑꦤ꧀ꦣꦺꦴ, ꦦꦱ꧀ꦱꦴꦢꦪꦺꦴ ꦣꦩ꧀ꦩꦴ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ, ꦌꦏꦹꦤꦤꦮꦸꦠꦶ ꦕꦶꦠ꧀ꦠꦴꦤꦶ ꦮꦶꦚ꧀ꦚꦴꦟꦏ꧀ꦑꦤ꧀ꦣꦺꦴꦠꦶ. ꦌꦮꦩ꧀ꦥꦶ ꦥꦚ꧀ꦕꦱꦸ ꦑꦤ꧀ꦣꦺꦱꦸ ꦣꦩ꧀ꦩꦥꦫꦶꦕ꧀ꦖꦺꦢꦺꦴ ꦮꦺꦢꦶꦠꦧ꧀ꦧꦺꦴ.

꧑. ꦫꦹꦥꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ

꧒. ꦆꦢꦴꦤꦶ ꦠꦺ ꦫꦹꦥꦏ꧀ꦑꦤ꧀ꦣꦴꦢꦪꦺꦴ ꦮꦶꦨꦗꦶꦠ꧀ꦮꦴ ꦢꦱ꧀ꦱꦺꦠꦸꦁ ꦠꦠ꧀ꦡ ꦏꦠꦩꦺꦴ ꦫꦹꦥꦏ꧀ꦑꦤ꧀ꦣꦺꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦠꦠ꧀ꦡꦴꦠꦶ ꦠꦺꦱꦸ ꦥꦚ꧀ꦕꦱꦸ ꦑꦤ꧀ꦣꦺꦱꦸ. ꦏꦠꦩꦺꦴꦠꦶ ꦏꦡꦺꦠꦸꦏꦩ꧀ꦪꦠꦴꦥꦸꦕ꧀ꦖꦴ. ꦫꦹꦥꦏ꧀ꦑꦤ꧀ꦣꦺꦴꦠꦶ ꦥꦸꦕ꧀ꦖꦶꦠꦣꦩ꧀ꦩꦤꦶꦢꦱ꧀ꦱꦤꦁ. ꦆꦢꦴꦤꦶ ꦠꦁ ꦮꦶꦨꦗꦤ꧀ꦠꦺꦴ ꦪꦁ ꦏꦶꦚ꧀ꦕꦶ ꦫꦹꦥꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦪꦁ ꦏꦶꦚ꧀ꦕꦷꦠꦶ ꦄꦤꦮꦱꦺꦱꦥꦫꦶꦪꦴꦢꦴꦤꦁ. ꦫꦹꦥꦤ꧀ꦠꦶ ꦄꦠꦶꦥ꧀ꦥꦱꦔ꧀ꦒꦤꦶꦪꦩꦤꦁ. ꦌꦮꦁ ꦥꦢꦢ꧀ꦮꦪꦺꦤꦴꦥꦶ ꦫꦹꦥꦱ꧀ꦱ ꦄꦤꦮꦱꦺꦱꦥꦫꦶꦒ꧀ꦒꦲꦺꦴ ꦏꦠꦺꦴ ꦲꦺꦴꦠꦶ.

ꦠꦠ꧀ꦡ ꦏꦺꦤꦛ꧀ꦜꦺꦤ ꦫꦹꦥꦤ꧀ꦠꦶ? ꦫꦸꦥ꧀ꦥꦤꦛ꧀ꦜꦺꦤ ꦫꦹꦥꦁ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ –

‘‘ꦏꦶꦚ꧀ꦕ, ꦨꦶꦏ꧀ꦑꦮꦺ, ꦫꦹꦥꦁ ꦮꦢꦺꦡ? ꦫꦸꦥ꧀ꦥꦠꦷꦠꦶ ꦑꦺꦴ, ꦨꦶꦏ꧀ꦑꦮꦺ, ꦠꦱ꧀ꦩꦴ ꦫꦹꦥꦤ꧀ꦠꦶ ꦮꦸꦕ꧀ꦕꦠꦶ. ꦏꦺꦤ ꦫꦸꦥ꧀ꦥꦠꦶ? ꦱꦷꦠꦺꦤꦥꦶ ꦫꦸꦥ꧀ꦥꦠꦶ, ꦈꦟ꧀ꦲꦺꦤꦥꦶ ꦫꦸꦥ꧀ꦥꦠꦶ, ꦗꦶꦓꦕ꧀ꦖꦴꦪꦥꦶ ꦫꦸꦥ꧀ꦥꦠꦶ, ꦥꦶꦥꦴꦱꦴꦪꦥꦶ ꦫꦸꦥ꧀ꦥꦠꦶ, ꦝꦁꦱꦩꦏꦱꦮꦴꦠꦴꦠꦥꦱꦫꦶꦱꦥꦱꦩ꧀ꦦꦱ꧀ꦱꦺꦤꦥꦶ ꦫꦸꦥ꧀ꦥꦠꦶ. ꦫꦸꦥ꧀ꦥꦠꦷꦠꦶ ꦑꦺꦴ, ꦨꦶꦏ꧀ꦑꦮꦺ, ꦠꦱ꧀ꦩꦴ ꦫꦹꦥꦤ꧀ꦠꦶ ꦮꦸꦕ꧀ꦕꦠꦷ’’ꦠꦶ (ꦱꦁ. ꦤꦶ. ꧓.꧗꧙).

ꦠꦠ꧀ꦡ ꦏꦶꦤ꧀ꦠꦶ ꦏꦴꦫꦟꦥꦸꦕ꧀ꦖꦴ; ꦏꦺꦤ ꦏꦴꦫꦟꦺꦤ ꦫꦹꦥꦁ ꦮꦢꦺꦡ, ꦏꦺꦤ ꦏꦴꦫꦟꦺꦤ ꦠꦁ ꦫꦹꦥꦁ ꦤꦴꦩꦴꦠꦶ ꦄꦠ꧀ꦡꦺꦴ. ꦫꦸꦥ꧀ꦥꦠꦷꦠꦶ ꦌꦠ꧀ꦡ ꦆꦠꦷꦠꦶ ꦏꦴꦫꦟꦸꦢ꧀ꦢꦺꦱꦺꦴ. ꦪꦱ꧀ꦩꦴ ꦫꦸꦥ꧀ꦥꦠꦶ ꦠꦱ꧀ꦩꦴ ꦫꦹꦥꦤ꧀ꦠꦶ ꦮꦸꦕ꧀ꦕꦠꦷꦠꦶ ꦄꦠ꧀ꦡꦺꦴ. ꦫꦸꦥ꧀ꦥꦠꦷꦠꦶ ꦏꦸꦥ꧀ꦥꦠꦶ ꦓꦛ꧀ꦛꦷꦪꦠꦶ ꦥꦷꦭ꦳ꦶꦪꦠꦶ ꦨꦶꦗ꧀ꦗꦠꦷꦠꦶ ꦄꦠ꧀ꦡꦺꦴ. ꦌꦮꦁ ꦆꦩꦶꦤꦴ ꦌꦠ꧀ꦠꦏꦺꦤ ꦜꦴꦤꦺꦤ ꦫꦸꦥ꧀ꦥꦤꦛ꧀ꦜꦺꦤ ꦫꦹꦥꦁ ꦮꦸꦠ꧀ꦠꦁ. ꦫꦸꦥ꧀ꦥꦤꦭꦏ꧀ꦑꦟꦺꦤ ꦫꦹꦥꦤ꧀ꦠꦶꦥꦶ ꦮꦠ꧀ꦠꦸꦁ ꦮꦛ꧀ꦛꦠꦶ. ꦫꦸꦥ꧀ꦥꦤꦭꦏ꧀ꦑꦟꦚ꧀ꦲꦺꦠꦁ.

ꦱꦷꦠꦺꦤꦥꦶ ꦫꦸꦥ꧀ꦥꦠꦷꦠꦶꦄꦴꦢꦷꦱꦸ ꦥꦤ ꦱꦷꦠꦺꦤ ꦠꦴꦮ ꦫꦸꦥ꧀ꦥꦤꦁ ꦭꦺꦴꦏꦤ꧀ꦠꦫꦶꦏꦤꦶꦫꦪꦺ ꦥꦴꦏꦛꦁ. ꦠꦶꦟ꧀ꦟꦁ ꦠꦶꦟ꧀ꦟꦚ꧀ꦲꦶ ꦕꦏ꧀ꦏꦮꦴꦭ꦳ꦴꦤꦁ ꦄꦤ꧀ꦠꦫꦺ ꦌꦏꦺꦏꦺꦴ ꦭꦺꦴꦏꦤ꧀ꦠꦫꦶꦏꦤꦶꦫꦪꦺꦴ ꦤꦴꦩ ꦲꦺꦴꦠꦶ ꦄꦛ꧀ꦜꦪꦺꦴꦗꦤꦱꦲꦱ꧀ꦱꦥ꧀ꦥꦩꦴꦟꦺꦴ, ꦪꦱ꧀ꦱ ꦤꦺꦮ ꦲꦺꦛ꧀ꦜꦴ ꦥꦡꦮꦷ ꦄꦠ꧀ꦡꦶ, ꦤ ꦈꦥꦫꦶ ꦕꦤ꧀ꦢꦶꦩꦱꦹꦫꦶꦪꦢꦷꦥꦩꦟꦶꦄꦴꦭꦺꦴꦏꦺꦴ, ꦤꦶꦕ꧀ꦕꦤ꧀ꦣꦏꦴꦫꦺꦴ. ꦠꦠ꧀ꦡ ꦤꦶꦧ꧀ꦧꦠ꧀ꦠꦱꦠ꧀ꦠꦴꦤꦁ ꦠꦶꦒꦴꦮꦸꦠꦺꦴ ꦄꦠ꧀ꦠꦨꦴꦮꦺꦴ ꦲꦺꦴꦠꦶ. ꦠꦺ ꦮꦒ꧀ꦒꦸꦭꦶꦪꦺꦴ ꦮꦶꦪ ꦥꦧ꧀ꦧꦠꦥꦴꦢꦺ ꦢꦷꦓꦥꦸꦡꦸꦭꦺꦲꦶ ꦤꦑꦺꦲꦶ ꦭꦒ꧀ꦒꦶꦠ꧀ꦮꦴ ꦄꦮꦁꦱꦶꦫꦴ ꦎꦭꦩ꧀ꦧꦤ꧀ꦠꦶ. ꦪꦢꦴ ꦱꦁꦱꦥ꧀ꦥꦤ꧀ꦠꦴ ꦄꦚ꧀ꦚꦩꦚ꧀ꦚꦱ꧀ꦱ ꦲꦠ꧀ꦡꦥꦴꦱꦒꦠꦴ ꦲꦺꦴꦤ꧀ꦠꦶ ꦄꦡ ‘ꦨꦏ꧀ꦑꦺꦴ ꦤꦺꦴ ꦭꦢ꧀ꦣꦺꦴ’ꦠꦶ ꦩꦚ꧀ꦚꦩꦴꦤꦴ ꦠꦠ꧀ꦡ ꦧ꧀ꦪꦴꦮꦛꦴ ꦮꦶꦥꦫꦶꦮꦠ꧀ꦠꦶꦠ꧀ꦮꦴ ꦭꦺꦴꦏꦱꦤ꧀ꦣꦴꦫꦏꦺ ꦈꦢꦏꦺ ꦥꦠꦤ꧀ꦠꦶ, ꦱꦷꦠꦮꦴꦠꦺ ꦥꦲꦫꦤ꧀ꦠꦺꦥꦶ ꦥꦏ꧀ꦏꦩꦣꦸꦏꦦꦭꦴꦤꦶ ꦮꦶꦪ ꦖꦶꦗ꧀ꦗꦶꦠ꧀ꦮꦴ ꦈꦢꦏꦺ ꦥꦠꦤ꧀ꦠꦶ. ꦥꦠꦶꦠꦩꦠ꧀ꦠꦴꦮ ꦄꦕ꧀ꦕꦤ꧀ꦠꦑꦴꦫꦺꦤ ꦱꦷꦠꦺꦴꦢꦏꦺꦤ ꦖꦶꦤ꧀ꦤꦕꦩ꧀ꦩꦤ꧀ꦲꦴꦫꦸꦩꦁꦱꦄꦛ꧀ꦜꦷꦲꦶ ꦨꦶꦗ꧀ꦗꦩꦴꦤꦺꦲꦶ ꦠꦠ꧀ꦠꦠꦺꦭꦺ ꦥꦠꦶꦠꦥꦶꦛ꧀ꦜꦥꦶꦟ꧀ꦝꦶ ꦮꦶꦪ ꦥꦛꦥꦛꦴꦪꦩꦴꦤꦴ ꦮꦶꦭꦷꦪꦤ꧀ꦠꦶ. ꦌꦮꦁ ꦱꦷꦠꦺꦤ ꦫꦸꦥ꧀ꦥꦤꦁ ꦭꦺꦴꦏꦤ꧀ꦠꦫꦶꦏꦤꦶꦫꦪꦺ ꦥꦴꦏꦛꦁ. ꦩꦲꦶꦁꦱꦏꦫꦛ꧀ꦜꦴꦢꦷꦱꦸꦥꦶ ꦲꦶꦩꦥꦴꦠꦱꦷꦠꦭꦺꦱꦸ ꦥꦢꦺꦱꦺꦱꦸ ꦌꦠꦁ ꦥꦴꦏꦛꦩꦺꦮ. ꦠꦠ꧀ꦡ ꦲꦶ ꦱꦠ꧀ꦠꦴ ꦱꦷꦠꦺꦤ ꦨꦶꦤ꧀ꦤꦕ꧀ꦖꦶꦤ꧀ꦤꦱꦫꦷꦫꦴ ꦗꦷꦮꦶꦠꦏ꧀ꦑꦪꦩ꧀ꦥꦶ ꦥꦴꦥꦸꦟꦤ꧀ꦠꦶ.

ꦈꦟ꧀ꦲꦺꦤ ꦫꦸꦥ꧀ꦥꦤꦁ ꦄꦮꦷꦕꦶꦩꦲꦴꦤꦶꦫꦪꦺ ꦥꦴꦏꦛꦁ. ꦠꦠ꧀ꦡ ꦲꦶ ꦠꦠ꧀ꦠꦴꦪ ꦭꦺꦴꦲꦥꦡꦮꦶꦪꦴ ꦤꦶꦥꦗ꧀ꦗꦴꦥꦺꦠ꧀ꦮꦴ ꦥꦚ꧀ꦕꦮꦶꦣꦧꦤ꧀ꦣꦤꦴꦢꦶꦏꦫꦟꦏꦴꦭꦺ ꦱꦠ꧀ꦠꦴ ꦩꦲꦴꦢꦸꦏ꧀ꦑꦁ ꦄꦤꦸꦨꦮꦤ꧀ꦠꦶ.

ꦗꦶꦓꦕ꧀ꦖꦴꦪ ꦫꦸꦥ꧀ꦥꦤꦁ ꦥꦺꦠ꧀ꦠꦶꦮꦶꦱꦪꦺ ꦕꦺꦮ ꦢꦸꦧ꧀ꦨꦶꦏ꧀ꦑꦏꦴꦭꦺ ꦕ ꦥꦴꦏꦛꦁ. ꦥꦺꦠ꧀ꦠꦶꦮꦶꦱꦪꦱ꧀ꦩꦶꦚ꧀ꦲꦶ ꦱꦠ꧀ꦠꦴ ꦢ꧀ꦮꦺ ꦠꦷꦟꦶ ꦧꦸꦢ꧀ꦣꦤ꧀ꦠꦫꦴꦤꦶ ꦏꦶꦚ꧀ꦕꦶꦢꦺꦮ ꦄꦴꦩꦶꦱꦁ ꦲꦠ꧀ꦡꦺꦤ ꦒꦲꦺꦠ꧀ꦮꦴ ꦩꦸꦑꦺ ꦥꦏ꧀ꦑꦶꦥꦤ꧀ꦠꦴ ꦤꦴꦩ ꦤ ꦲꦺꦴꦤ꧀ꦠꦶ. ꦄꦤ꧀ꦠꦺꦴꦈꦢꦫꦁ ꦄꦴꦢꦶꦠ꧀ꦠꦱꦸꦱꦶꦫꦫꦸꦏ꧀ꦑꦺꦴ ꦮꦶꦪ ꦲꦺꦴꦠꦶ. ꦢꦸꦧ꧀ꦨꦶꦏ꧀ꦑꦺ ꦏꦚ꧀ꦗꦶꦏꦩꦠ꧀ꦠꦩ꧀ꦥꦶ ꦄꦭꦨꦶꦠ꧀ꦮꦴ ꦩꦫꦟꦥ꧀ꦥꦠ꧀ꦠꦴꦤꦁ ꦥꦩꦴꦟꦁ ꦤꦴꦩ ꦤꦠ꧀ꦡꦶ.

ꦥꦶꦥꦴꦱꦴꦪ ꦫꦸꦥ꧀ꦥꦤꦁ ꦏꦴꦭꦏꦚ꧀ꦗꦶꦏꦴꦢꦷꦱꦸ ꦥꦴꦏꦛꦁ. ꦠꦠ꧀ꦡ ꦲꦶ ꦱꦠ꧀ꦠꦴ ꦢ꧀ꦮꦺ ꦠꦷꦟꦶ ꦧꦸꦢ꧀ꦣꦤ꧀ꦠꦫꦴꦤꦶ ꦲꦢꦪꦠꦺꦩꦤꦩꦠ꧀ꦠꦁ ꦮꦴ ꦗꦶꦮ꧀ꦲꦴꦠꦺꦩꦤꦩꦠ꧀ꦠꦁ ꦮꦴ ꦈꦢꦏꦧꦶꦤ꧀ꦢꦸꦁ ꦭꦢ꧀ꦣꦸꦁ ꦤ ꦱꦏ꧀ꦏꦺꦴꦤ꧀ꦠꦶ. ‘ꦥꦴꦤꦷꦪꦁ ꦥꦶꦮꦶꦱ꧀ꦱꦴꦩꦴ’ꦠꦶ ꦤꦢꦶꦁ ꦒꦠꦴꦤꦩ꧀ꦥꦶ ꦤꦢꦷ ꦮꦴꦭꦶꦏꦴꦠꦭꦁ ꦱꦩ꧀ꦥꦗ꧀ꦗꦠꦶ. ꦩꦲꦴꦱꦩꦸꦢ꧀ꦢꦁ ꦥꦏ꧀ꦑꦤ꧀ꦠꦴꦤꦩ꧀ꦥꦶ ꦩꦲꦴꦱꦩꦸꦢ꧀ꦢꦺꦴ ꦥꦶꦛ꧀ꦜꦶꦥꦴꦱꦴꦟꦺꦴ ꦲꦺꦴꦠꦶ. ꦠꦺ ꦱꦸꦱ꧀ꦱꦤ꧀ꦠꦴ ꦧꦭꦮꦢꦸꦏ꧀ꦑꦥꦷꦭ꦳ꦶꦠꦴ ꦮꦶꦕꦫꦤ꧀ꦠꦶ.

ꦌꦏꦺꦴ ꦏꦶꦫ ꦏꦴꦭꦏꦚ꧀ꦗꦶꦏꦄꦱꦸꦫꦺꦴ ꦥꦶꦥꦴꦱꦁ ꦄꦣꦶꦮꦴꦱꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦪꦺꦴꦗꦤꦒꦩ꧀ꦨꦷꦫꦮꦶꦠ꧀ꦡꦴꦫꦁ ꦩꦲꦴꦒꦔ꧀ꦒꦁ ꦎꦠꦫꦶ. ꦠꦱ꧀ꦱ ꦒꦠꦒꦠꦛ꧀ꦜꦴꦤꦺ ꦈꦢꦏꦁ ꦖꦶꦗ꧀ꦗꦠꦶ, ꦣꦹꦩꦺꦴ ꦈꦒ꧀ꦒꦕ꧀ꦖꦠꦶ, ꦠꦠ꧀ꦠꦺ ꦥꦶꦛ꧀ꦜꦶꦥꦴꦱꦴꦟꦺ ꦕꦔ꧀ꦏꦩꦤꦏꦴꦭꦺꦴ ꦮꦶꦪ ꦲꦺꦴꦠꦶ. ꦠꦱ꧀ꦱ ꦈꦢꦏꦱꦢ꧀ꦢꦁ ꦱꦸꦠ꧀ꦮꦴ ꦆꦠꦺꦴ ꦕꦶꦠꦺꦴ ꦕ ꦮꦶꦕꦫꦤ꧀ꦠꦱ꧀ꦱꦺꦮ ꦫꦠ꧀ꦠꦶ ꦮꦶꦨꦴꦪꦶ. ꦄꦡ ꦤꦁ ꦥꦴꦠꦺꦴꦮ ꦨꦶꦏ꧀ꦑꦴꦕꦴꦫꦁ ꦒꦕ꧀ꦖꦤ꧀ꦠꦴ ꦠꦶꦁꦱꦩꦠ꧀ꦠꦴ ꦥꦶꦟ꧀ꦝꦕꦴꦫꦶꦏꦨꦶꦏ꧀ꦑꦹ ꦢꦶꦱ꧀ꦮꦴ – ‘‘ꦏꦺꦴ ꦤꦴꦩ ꦠ꧀ꦮꦁ, ꦱꦥ꧀ꦥꦸꦫꦶꦱꦴ’’ꦠꦶ ꦥꦸꦕ꧀ꦖꦶꦁꦱꦸ. ‘‘ꦥꦺꦠꦺꦴꦲꦩꦱ꧀ꦩꦶ, ꦨꦤ꧀ꦠꦺ’’ꦠꦶ. ‘‘ꦏꦶꦁ ꦥꦫꦶꦪꦺꦱꦱꦷ’’ꦠꦶ? ‘‘ꦥꦴꦤꦷꦪꦁ, ꦨꦤ꧀ꦠꦺ’’ꦠꦶ. ‘‘ꦄꦪꦁ ꦒꦔ꧀ꦒꦴ ꦥꦫꦶꦥꦸꦟ꧀ꦟꦴ, ꦏꦶꦁ ꦠ꧀ꦮꦁ ꦤ ꦥꦱ꧀ꦱꦱꦷ’’ꦠꦶ? ‘‘ꦤ ꦈꦥꦏꦥ꧀ꦥꦠꦶ, ꦨꦤ꧀ꦠꦺ’’ꦠꦶ. ‘‘ꦠꦺꦤ ꦲꦶ ꦒꦔ꧀ꦒꦴꦥꦶꦛ꧀ꦜꦺ ꦤꦶꦥꦗ꧀ꦗ, ꦩꦸꦑꦺ ꦠꦺ ꦥꦴꦤꦷꦪꦁ ꦄꦴꦱꦶꦚ꧀ꦕꦶꦱ꧀ꦱꦴꦩꦴ’’ꦠꦶ. ꦱꦺꦴ ꦮꦴꦭꦶꦏꦴꦥꦸꦭ꦳ꦶꦤꦺ ꦈꦠ꧀ꦠꦴꦤꦺꦴ ꦤꦶꦥꦗ꧀ꦗꦶ. ꦨꦶꦏ꧀ꦑꦹ ꦠꦶꦁꦱꦩꦠ꧀ꦠꦺ ꦥꦠ꧀ꦠꦺ ꦤꦷꦲꦫꦶꦠ꧀ꦮꦴ ꦈꦢꦏꦁ ꦄꦴꦲꦫꦶꦠ꧀ꦮꦴ ꦄꦴꦲꦫꦶꦠ꧀ꦮꦴ ꦠꦱ꧀ꦱ ꦩꦸꦑꦺ ꦄꦴꦱꦶꦚ꧀ꦕꦶꦁꦱꦸ. ꦠꦺꦱꦁ ꦠꦡꦴ ꦏꦫꦺꦴꦤ꧀ꦠꦴꦤꦁꦪꦺꦮ ꦮꦺꦭꦴ ꦈꦥꦏꦛ꧀ꦜꦴ ꦗꦴꦠꦴ. ꦠꦠꦺꦴ ‘‘ꦨꦶꦏ꧀ꦑꦴꦕꦴꦫꦏꦴꦭꦺꦴ ꦄꦩ꧀ꦲꦴꦏꦁ, ꦱꦥ꧀ꦥꦸꦫꦶꦱ; ꦏꦕ꧀ꦕꦶ ꦠꦺ ꦄꦱ꧀ꦱꦴꦢꦩꦠ꧀ꦠꦴ ꦭꦢ꧀ꦣꦴ’’ꦠꦶ ꦄꦴꦲꦁꦱꦸ. ꦥꦺꦠꦺꦴ ‘‘ꦱꦕꦺ ꦩꦺ, ꦨꦤ꧀ꦠꦺ, ꦠꦶꦁꦱꦩꦠ꧀ꦠꦴꦤꦁ ꦄꦪ꧀ꦪꦴꦤꦁ ꦠꦶꦁꦱꦩꦠ꧀ꦠꦺꦲꦶ ꦥꦠ꧀ꦠꦺꦲꦶ ꦄꦴꦱꦶꦠ꧀ꦠꦈꦢꦏꦠꦺꦴ ꦄꦝ꧀ꦞꦥꦱꦠꦩꦠ꧀ꦠꦩ꧀ꦥꦶ ꦥꦫꦒꦭꦒꦠꦁ, ꦥꦺꦠꦠ꧀ꦠꦨꦴꦮꦠꦺꦴ ꦩꦺꦴꦏ꧀ꦑꦺꦴ ꦩꦴ ꦲꦺꦴꦠꦹ’’ꦠꦶ ꦄꦴꦲ. ꦌꦮꦁ ꦥꦶꦥꦴꦱꦴꦪ ꦫꦸꦥ꧀ꦥꦤꦁ ꦥꦺꦠ꧀ꦠꦶꦮꦶꦱꦪꦺ ꦥꦴꦏꦛꦁ.

ꦝꦁꦱꦴꦢꦷꦲꦶ ꦫꦸꦥ꧀ꦥꦤꦁ ꦝꦁꦱꦩꦏ꧀ꦑꦶꦏꦴꦢꦶꦱꦩ꧀ꦧꦧꦲꦸꦭꦺꦱꦸ ꦥꦢꦺꦱꦺꦱꦸ ꦥꦴꦏꦛꦁ. ꦌꦠ꧀ꦡ ꦕ ꦝꦁꦱꦴꦠꦶ ꦥꦶꦔ꧀ꦒꦭꦩꦏ꧀ꦑꦶꦏꦴ, ꦩꦏꦱꦴꦠꦶ ꦩꦏꦱꦴꦮ ꦮꦴꦠꦴꦠꦶ ꦏꦸꦕ꧀ꦖꦶꦮꦴꦠꦥꦶꦛ꧀ꦜꦶꦮꦴꦠꦴꦢꦶꦮꦱꦺꦤ ꦮꦺꦢꦶꦠꦧ꧀ꦧꦴ. ꦱꦫꦷꦫꦱ꧀ꦩꦶꦚ꧀ꦲꦶ ꦮꦴꦠꦫꦺꦴꦒꦺꦴ ꦈꦥ꧀ꦥꦗ꧀ꦗꦶꦠ꧀ꦮꦴ ꦲꦠ꧀ꦡꦥꦴꦢꦥꦶꦛ꧀ꦜꦶꦄꦴꦢꦷꦤꦶ ꦨꦶꦤ꧀ꦢꦠꦶ, ꦏꦴꦟꦁ ꦏꦫꦺꦴꦠꦶ, ꦑꦸꦗ꧀ꦗꦁ ꦏꦫꦺꦴꦠꦶ, ꦥꦷꦜꦱꦥ꧀ꦥꦶꦁ ꦏꦫꦺꦴꦠꦶ. ꦄꦴꦠꦥꦺꦴꦠꦶ ꦱꦹꦫꦶꦪꦴꦠꦥꦺꦴ. ꦠꦺꦤ ꦫꦸꦥ꧀ꦥꦤꦁ ꦩꦫꦸꦏꦤ꧀ꦠꦴꦫꦴꦢꦷꦱꦸ ꦥꦴꦏꦛꦁ. ꦌꦏꦴ ꦏꦶꦫ ꦆꦠ꧀ꦡꦷ ꦩꦫꦸꦏꦤ꧀ꦠꦴꦫꦺ ꦫꦠ꧀ꦠꦶꦁ ꦱꦠ꧀ꦡꦠꦺꦴ ꦎꦲꦷꦤꦴ ꦢꦶꦮꦴ ꦱꦹꦫꦶꦪꦺ ꦈꦒ꧀ꦒꦕ꧀ꦖꦤ꧀ꦠꦺ ꦮꦴꦭꦶꦏꦴꦪ ꦠꦥ꧀ꦥꦩꦴꦤꦴꦪ ꦥꦴꦢꦺ ꦜꦥꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦷ ꦱꦷꦱꦠꦺꦴ ꦥꦕ꧀ꦖꦶꦁ ꦎꦠꦴꦫꦺꦠ꧀ꦮꦴ ꦄꦏ꧀ꦏꦩꦶ. ꦏꦩꦺꦤ ꦥꦕ꧀ꦖꦶꦪꦴ ꦈꦟ꧀ꦲꦴꦨꦶꦠꦠ꧀ꦠꦴꦪ ꦜꦴꦠꦸꦁ ꦄꦱꦏ꧀ꦏꦺꦴꦤ꧀ꦠꦷ ꦠꦱ꧀ꦱꦴ ꦈꦥꦫꦶ ꦱꦴꦛꦏꦁ ꦜꦥꦺꦠ꧀ꦮꦴ ꦄꦏ꧀ꦏꦩꦶ. ꦠꦱ꧀ꦩꦶꦩ꧀ꦥꦶ ꦱꦤ꧀ꦠꦠ꧀ꦠꦺ ꦄꦔ꧀ꦏꦺꦤ ꦒꦲꦶꦠꦁ ꦥꦸꦠ꧀ꦠꦏꦁ ꦄꦣꦺꦴꦩꦸꦑꦁ ꦤꦶꦥꦗ꧀ꦗꦴꦥꦺꦠ꧀ꦮꦴ ꦏꦤ꧀ꦢꦤ꧀ꦠꦁ ꦏꦤ꧀ꦢꦤ꧀ꦠꦁ ꦄꦏ꧀ꦏꦩꦶꦠ꧀ꦮꦴ ꦱꦢ꧀ꦣꦶꦁ ꦠꦺꦤ ꦠꦱ꧀ꦩꦶꦁꦪꦺꦮ ꦜꦴꦤꦺ ꦈꦟ꧀ꦲꦴꦨꦶꦠꦠ꧀ꦠꦴ ꦏꦴꦭꦩꦏꦴꦱꦶ.

ꦱꦫꦷꦱꦥꦴꦠꦶ ꦪꦺ ꦏꦺꦕꦶ ꦢꦷꦓꦗꦴꦠꦶꦏꦴ ꦱꦫꦤ꧀ꦠꦴ ꦒꦕ꧀ꦖꦤ꧀ꦠꦶ. ꦠꦺꦱꦁ ꦱꦩ꧀ꦦꦱ꧀ꦱꦺꦤ ꦫꦸꦥ꧀ꦥꦤꦁ ꦄꦴꦱꦷꦮꦶꦱꦢꦛ꧀ꦜꦴꦢꦷꦤꦁ ꦮꦱꦺꦤ ꦮꦺꦢꦶꦠꦧ꧀ꦧꦁ.

ꦆꦢꦴꦤꦶ ‘ꦪꦁ ꦏꦶꦚ꧀ꦕꦶ ꦫꦹꦥ’ꦤ꧀ꦠꦶ ꦥꦢꦺꦤ ꦱꦁꦒꦲꦶꦠꦁ ꦥꦚ꧀ꦕꦮꦷꦱꦠꦶꦏꦺꦴꦛ꧀ꦜꦴꦱꦖꦤ꧀ꦤꦮꦸꦠꦶꦏꦺꦴꦛ꧀ꦜꦴꦱꦥ꧀ꦥꦨꦺꦢꦁ ꦱꦧ꧀ꦧꦩ꧀ꦥꦶ ꦫꦹꦥꦁ ꦄꦠꦷꦠꦴꦢꦶꦏꦺꦴꦛ꧀ꦜꦴꦱꦺꦱꦸ ꦥꦏ꧀ꦑꦶꦥꦶꦠ꧀ꦮꦴ ꦢꦱ꧀ꦱꦺꦠꦸꦁ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦤ꧀ꦠꦶ ꦄꦴꦲ. ꦠꦠꦺꦴ ꦥꦫꦁ ꦠꦢꦺꦮ ꦄꦗ꧀ꦙꦠ꧀ꦠꦢꦸꦏꦴꦢꦷꦱꦸ ꦕꦠꦹꦱꦸ ꦢꦸꦏꦺꦱꦸ ꦥꦏ꧀ꦑꦶꦥꦶꦠ꧀ꦮꦴ ꦢꦱ꧀ꦱꦺꦠꦸꦁ ꦄꦗ꧀ꦙꦠ꧀ꦠꦁ ꦮꦴ ꦧꦲꦶꦢ꧀ꦣꦴ ꦮꦴꦠꦶꦄꦴꦢꦶ ꦮꦸꦠ꧀ꦠꦁ. ꦠꦠꦺꦴ ꦥꦫꦁ ꦱꦧ꧀ꦧꦩ꧀ꦥꦺꦠꦁ ꦌꦏꦴꦢꦱꦱꦸ ꦥꦢꦺꦱꦺꦱꦸ ꦥꦫꦶꦪꦴꦢꦶꦪꦶꦠ꧀ꦮꦴ ꦢꦱ꧀ꦱꦶꦠꦁ ꦫꦹꦥꦁ ꦌꦏꦠꦺꦴ ꦥꦶꦟ꧀ꦝꦁ ꦏꦠ꧀ꦮꦴ ꦢꦱ꧀ꦱꦺꦠꦸꦁ ꦠꦢꦺꦏꦗ꧀ꦙꦤ꧀ꦠꦶꦄꦴꦢꦶ ꦮꦸꦠ꧀ꦠꦁ.

ꦠꦠ꧀ꦡ ꦠꦢꦺꦏꦗ꧀ꦙꦤ꧀ꦠꦶ ꦠꦁ ꦌꦏꦗ꧀ꦙꦁ; ꦄꦨꦶꦱꦚ꧀ꦚꦹꦲꦶꦠ꧀ꦮꦴꦠꦶ ꦄꦨꦶꦱꦁꦲꦫꦶꦠ꧀ꦮꦴ; ꦄꦨꦶꦱꦔ꧀ꦑꦶꦥꦶꦠ꧀ꦮꦴꦠꦶ ꦱꦔ꧀ꦑꦺꦥꦁ ꦏꦠ꧀ꦮꦴ; ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦱꦧ꧀ꦧꦩ꧀ꦥꦺꦠꦁ ꦮꦸꦠ꧀ꦠꦥ꧀ꦥꦏꦴꦫꦁ ꦫꦹꦥꦁ ꦫꦸꦥ꧀ꦥꦤꦭꦏ꧀ꦑꦟꦱꦔ꧀ꦑꦴꦠꦺ ꦌꦏꦮꦶꦣꦨꦴꦮꦺ ꦥꦚ꧀ꦚꦴꦪ ꦫꦴꦱꦶꦁ ꦏꦠ꧀ꦮꦴ ꦫꦹꦥꦏ꧀ꦑꦤ꧀ꦣꦺꦴ ꦤꦴꦩꦴꦠꦶ ꦮꦸꦕ꧀ꦕꦠꦷꦠꦶ. ꦌꦠꦺꦤ ꦱꦧ꧀ꦧꦩ꧀ꦥꦶ ꦫꦹꦥꦁ ꦫꦸꦥ꧀ꦥꦤꦭꦏ꧀ꦑꦟꦺ ꦫꦴꦱꦶꦨꦴꦮꦹꦥꦒꦩꦤꦺꦤ ꦫꦹꦥꦏ꧀ꦑꦤ꧀ꦣꦺꦴꦠꦶ ꦢꦱ꧀ꦱꦶꦠꦁ ꦲꦺꦴꦠꦶ. ꦤ ꦲꦶ ꦫꦹꦥꦠꦺꦴ ꦄꦚ꧀ꦚꦺꦴ ꦫꦹꦥꦏ꧀ꦑꦤ꧀ꦣꦺꦴ ꦤꦴꦩ ꦄꦠ꧀ꦡꦶ. ꦪꦡꦴ ꦕ ꦫꦹꦥꦁ, ꦌꦮꦁ ꦮꦺꦢꦤꦴꦢꦪꦺꦴꦥꦶ ꦮꦺꦢꦪꦶꦠꦭꦏ꧀ꦑꦟꦴꦢꦷꦱꦸ ꦫꦴꦱꦶꦨꦴꦮꦹꦥꦒꦩꦤꦺꦤ. ꦤ ꦲꦶ ꦮꦺꦢꦤꦴꦢꦷꦲꦶ ꦄꦚ꧀ꦚꦺ ꦮꦺꦢꦤꦴꦏ꧀ꦑꦤ꧀ꦣꦴꦢꦪꦺꦴ ꦤꦴꦩ ꦄꦠ꧀ꦡꦶ.

꧓. ꦆꦢꦴꦤꦶ ꦌꦏꦺꦏꦱ꧀ꦩꦶꦁ ꦎꦏꦴꦱꦺ ꦥꦏ꧀ꦑꦶꦠ꧀ꦠꦁ ꦫꦹꦥꦁ ꦮꦶꦱꦸꦁ ꦮꦶꦱꦸꦁ ꦨꦴꦗꦺꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ꦠꦠ꧀ꦡ ꦏꦠꦩꦁ ꦫꦹꦥꦁ ꦄꦠꦷꦠꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦠꦠ꧀ꦡꦴꦠꦶ ꦌꦏꦴꦢꦱꦱꦸ ꦎꦏꦴꦱꦺꦱꦸ ꦥꦏ꧀ꦑꦶꦥꦶꦠ꧀ꦮꦴ ꦜꦥꦶꦠꦩꦴꦠꦶꦏꦴꦪ ꦨꦸꦩ꧀ꦩꦁ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦜꦥꦶꦠꦴꦪ ꦩꦴꦠꦶꦏꦴꦪ ꦪꦁ ꦄꦠꦷꦠꦁ ꦫꦹꦥꦤ꧀ꦠꦶ ꦮꦸꦠ꧀ꦠꦁ, ꦠꦁ ꦏꦠꦩꦤ꧀ꦠꦶ? ꦆꦩꦶꦤꦴ ꦈꦥꦴꦪꦺꦤ ꦱꦧ꧀ꦧꦥꦸꦕ꧀ꦖꦴꦱꦸ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦄꦠꦷꦠꦁ ꦤꦶꦫꦸꦢ꧀ꦣꦤ꧀ꦠꦶꦄꦴꦢꦷꦤꦶ ꦥꦢꦴꦤꦶ ꦤꦶꦏ꧀ꦑꦺꦥꦏꦟ꧀ꦝꦱ꧀ꦱ ꦄꦠꦷꦠꦠ꧀ꦠꦶꦏꦨꦴꦗꦤꦷꦪꦮꦟ꧀ꦟꦤꦴꦪꦁ (ꦣ. ꦱ. ꦄꦛ꧀ꦜ. ꧑꧐꧔꧔) ꦮꦸꦠ꧀ꦠꦴꦤꦺꦮ. ꦕꦠ꧀ꦠꦴꦫꦺꦴ ꦕ ꦩꦲꦴꦨꦹꦠꦴꦠꦶ ꦆꦢꦁ ꦄꦠꦷꦠꦤ꧀ꦠꦶ ꦮꦸꦠ꧀ꦠꦫꦹꦥꦱ꧀ꦱ ꦱꦨꦴꦮꦢꦱ꧀ꦱꦤꦁ. ꦪꦡꦴ ꦕꦺꦠ꧀ꦡ ꦌꦮꦁ ꦱꦧ꧀ꦧꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦆꦩꦶꦤꦴ ꦆꦢꦁ ꦢꦱ꧀ꦱꦺꦠꦶ – ꦄꦠꦷꦠꦫꦹꦥꦩ꧀ꦥꦶ ꦨꦹꦠꦴꦤꦶ ꦕꦺꦮ ꦨꦹꦠꦴꦤꦶ ꦈꦥꦴꦢꦴꦪ ꦤꦶꦧ꧀ꦧꦠ꧀ꦠꦫꦹꦥꦚ꧀ꦕ, ꦄꦤꦴꦒꦠꦩ꧀ꦥꦶ…ꦥꦺ… ꦢꦹꦫꦱꦤ꧀ꦠꦶꦏꦩ꧀ꦥꦶ. ꦤ ꦲꦶ ꦨꦹꦠꦺꦲꦶ ꦕꦺꦮ ꦨꦹꦠꦴꦤꦶ ꦈꦥꦴꦢꦴꦪ ꦥꦮꦠ꧀ꦠꦫꦹꦥꦠꦺꦴ ꦕ ꦄꦚ꧀ꦚꦁ ꦫꦹꦥꦁ ꦤꦴꦩ ꦄꦠ꧀ꦡꦷꦠꦶ.

ꦄꦥꦫꦺꦴ ꦤꦪꦺꦴ – ꦄꦠꦷꦠꦁꦱꦺꦤ ꦱꦔ꧀ꦒꦲꦶꦠꦤ꧀ꦠꦶ ꦄꦠꦷꦠꦏꦺꦴꦛ꧀ꦜꦴꦱꦺꦤꦺꦮ ꦱꦔ꧀ꦒꦲꦶꦠꦁ, ꦌꦠ꧀ꦡꦺꦮ ꦒꦟꦤꦁ ꦒꦠꦁ. ꦏꦶꦤ꧀ꦠꦶ? ꦕꦠ꧀ꦠꦴꦫꦺꦴ ꦕ ꦩꦲꦴꦨꦹꦠꦴ ꦕꦠꦸꦤ꧀ꦤꦚ꧀ꦕ ꦩꦲꦴꦨꦹꦠꦴꦤꦁ ꦈꦥꦴꦢꦴꦪꦫꦹꦥꦤ꧀ꦠꦶ. ꦌꦮꦁ ꦱꦧ꧀ꦧꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦄꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦤꦶꦢ꧀ꦢꦺꦱꦥꦢꦴꦤꦶꦥꦶ ꦲꦺꦛ꧀ꦜꦴ ꦮꦸꦠ꧀ꦠꦠ꧀ꦡꦴꦤꦺꦮ.

ꦆꦢꦁ ꦥꦤ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦁ ꦤꦴꦩ ꦱꦸꦠ꧀ꦠꦤ꧀ꦠꦥꦫꦶꦪꦴꦪꦠꦺꦴ ꦄꦨꦶꦣꦩ꧀ꦩꦤꦶꦢ꧀ꦢꦺꦱꦠꦺꦴꦠꦶ ꦢꦸꦮꦶꦣꦁ. ꦠꦁ ꦱꦸꦠ꧀ꦠꦤ꧀ꦠꦥꦫꦶꦪꦴꦪꦺ ꦨꦮꦺꦤ ꦥꦫꦶꦕ꧀ꦖꦶꦤ꧀ꦤꦁ. ꦥꦛꦶꦱꦤ꧀ꦣꦶꦠꦺꦴ ꦲꦶ ꦥꦛ꧀ꦜꦴꦪ ꦄꦠꦷꦠꦨꦮꦺꦱꦸ ꦤꦶꦧ꧀ꦧꦠ꧀ꦠꦁ ꦫꦹꦥꦁ, ꦄꦤꦤ꧀ꦠꦫꦨꦮꦺ ꦮꦴ ꦤꦶꦧ꧀ꦧꦠ꧀ꦠꦁ ꦲꦺꦴꦠꦸ ꦏꦥ꧀ꦥꦏꦺꦴꦛꦶꦱꦠꦱꦲꦱ꧀ꦱꦩꦠ꧀ꦡꦏꦺ ꦮꦴ, ꦱꦧ꧀ꦧꦁ ꦄꦠꦷꦠꦩꦺꦮ ꦤꦴꦩ. ꦕꦸꦠꦶꦠꦺꦴ ꦥꦛ꧀ꦜꦴꦪ ꦄꦤꦴꦒꦠꦨꦮꦺꦱꦸ ꦤꦶꦧ꧀ꦧꦠ꧀ꦠꦤꦏꦫꦹꦥꦁ, ꦄꦤꦤ꧀ꦠꦫꦨꦮꦺ ꦮꦴ ꦤꦶꦧ꧀ꦧꦠ꧀ꦠꦁ ꦲꦺꦴꦠꦸ ꦏꦥ꧀ꦥꦏꦺꦴꦛꦶꦱꦠꦱꦲꦱ꧀ꦱꦩꦠ꧀ꦡꦏꦺ ꦮꦴ, ꦱꦧ꧀ꦧꦁ ꦄꦤꦴꦒꦠꦩꦺꦮ ꦤꦴꦩ. ꦕꦸꦠꦶꦥꦛꦶꦱꦤ꧀ꦣꦶꦄꦤꦤ꧀ꦠꦫꦺ ꦥꦮꦠ꧀ꦠꦫꦹꦥꦁ ꦥꦕ꧀ꦕꦸꦥ꧀ꦥꦤ꧀ꦤꦁ ꦤꦴꦩ. ꦄꦨꦶꦣꦩ꧀ꦩꦤꦶꦢ꧀ꦢꦺꦱꦺ ꦥꦤ ꦑꦟꦺꦤ ꦥꦫꦶꦕ꧀ꦖꦶꦤ꧀ꦤꦁ. ꦠꦪꦺꦴ ꦲꦶ ꦫꦹꦥꦱ꧀ꦱ ꦑꦟꦴ – ꦈꦥ꧀ꦥꦴꦢꦺꦴ, ꦜꦶꦠꦶ, ꦨꦔ꧀ꦒꦺꦴꦠꦶ. ꦆꦩꦺ ꦠꦪꦺꦴ ꦑꦟꦺ ꦥꦠ꧀ꦮꦴ ꦤꦶꦫꦸꦢ꧀ꦣꦁ ꦫꦹꦥꦁ, ꦱꦩꦤꦤ꧀ꦠꦫꦤꦶꦫꦸꦢ꧀ꦣꦁ ꦮꦴ ꦲꦺꦴꦠꦸ ꦄꦠꦷꦠꦺ ꦏꦥ꧀ꦥꦏꦺꦴꦛꦶꦱꦠꦱꦲꦱ꧀ꦱꦩꦠ꧀ꦡꦏꦺ ꦮꦴ, ꦱꦧ꧀ꦧꦁ ꦄꦠꦷꦠꦩꦺꦮ ꦤꦴꦩ. ꦠꦪꦺꦴ ꦑꦟꦺ ꦄꦱꦩ꧀ꦥꦠ꧀ꦠꦁ ꦫꦹꦥꦁ, ꦌꦏꦕꦶꦠ꧀ꦠꦏ꧀ꦑꦟꦩꦠ꧀ꦠꦺꦤ ꦮꦴ ꦄꦱꦩ꧀ꦥꦠ꧀ꦠꦁ ꦲꦺꦴꦠꦸ ꦄꦤꦴꦒꦠꦺ ꦏꦥ꧀ꦥꦏꦺꦴꦛꦶꦱꦠꦱꦲꦱ꧀ꦱꦩꦠ꧀ꦡꦏꦺ ꦮꦴ, ꦱꦧ꧀ꦧꦁ ꦄꦤꦴꦒꦠꦩꦺꦮ ꦤꦴꦩ. ꦆꦩꦺ ꦠꦪꦺꦴ ꦑꦟꦺ ꦱꦩ꧀ꦥꦠ꧀ꦠꦁ ꦫꦹꦥꦁ ꦥꦤ ꦥꦕ꧀ꦕꦸꦥ꧀ꦥꦤ꧀ꦤꦁ ꦤꦴꦩ. ꦠꦠ꧀ꦡ ꦏꦶꦚ꧀ꦕꦴꦥꦶ ꦆꦢꦁ ꦱꦸꦠ꧀ꦠꦤ꧀ꦠꦨꦴꦗꦤꦷꦪꦁ, ꦌꦮꦁ ꦱꦤ꧀ꦠꦺꦥꦶ ꦄꦨꦶꦣꦩ꧀ꦩꦤꦶꦢ꧀ꦢꦺꦱꦺꦤꦺꦮ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦫꦹꦥꦁ ꦤꦶꦢ꧀ꦢꦶꦛ꧀ꦜꦤ꧀ꦠꦶ ꦮꦺꦢꦶꦠꦧ꧀ꦧꦁ.

ꦄꦥꦫꦺꦴ ꦤꦪꦺꦴ – ꦆꦢꦚ꧀ꦲꦶ ꦫꦹꦥꦁ ꦄꦢ꧀ꦣꦴꦱꦤ꧀ꦠꦠꦶꦱꦩꦪꦑꦟꦮꦱꦺꦤ ꦕꦠꦸꦣꦴ ꦄꦠꦷꦠꦁ ꦤꦴꦩ ꦲꦺꦴꦠꦶ. ꦠꦡꦴ ꦄꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦁ. ꦄꦢ꧀ꦣꦴꦮꦱꦺꦤ ꦠꦴꦮ ꦌꦏꦱ꧀ꦱ ꦌꦏꦱ꧀ꦩꦶꦁ ꦨꦮꦺ ꦥꦛꦶꦱꦤ꧀ꦣꦶꦠꦺꦴ ꦥꦸꦧ꧀ꦧꦺ ꦄꦠꦷꦠꦁ, ꦕꦸꦠꦶꦠꦺꦴ ꦈꦢ꧀ꦣꦁ ꦄꦤꦴꦒꦠꦁ, ꦈꦨꦶꦤ꧀ꦤꦩꦤ꧀ꦠꦫꦺ ꦥꦕ꧀ꦕꦸꦥ꧀ꦥꦤ꧀ꦤꦁ. ꦱꦤ꧀ꦠꦠꦶꦮꦱꦺꦤ ꦱꦨꦴꦒꦌꦏꦈꦠꦸꦱꦩꦸꦛ꧀ꦜꦴꦤꦁ ꦌꦏꦴꦲꦴꦫꦱꦩꦸꦛ꧀ꦜꦴꦤꦚ꧀ꦕ ꦥꦸꦧ꧀ꦧꦴꦥꦫꦶꦪꦮꦱꦺꦤ ꦥꦮꦠ꧀ꦠꦩꦴꦤꦩ꧀ꦥꦶ ꦥꦕ꧀ꦕꦸꦥ꧀ꦥꦤ꧀ꦤꦁ. ꦠꦠꦺꦴ ꦥꦸꦧ꧀ꦧꦺ ꦮꦶꦱꦨꦴꦒꦈꦠꦸꦄꦴꦲꦴꦫꦱꦩꦸꦛ꧀ꦜꦴꦤꦁ ꦄꦠꦷꦠꦁ, ꦥꦕ꧀ꦖꦴ ꦄꦤꦴꦒꦠꦁ. ꦕꦶꦠ꧀ꦠꦗꦁ ꦌꦏꦮꦷꦡꦶꦌꦏꦗꦮꦤꦌꦏꦱꦩꦴꦥꦠ꧀ꦠꦶꦱꦩꦸꦛ꧀ꦜꦴꦤꦁ ꦥꦕ꧀ꦕꦸꦥ꧀ꦥꦤ꧀ꦤꦁ. ꦠꦠꦺꦴ ꦥꦸꦧ꧀ꦧꦺ ꦄꦠꦷꦠꦁ, ꦥꦕ꧀ꦖꦴ ꦄꦤꦴꦒꦠꦁ. ꦏꦩ꧀ꦩꦱꦩꦸꦛ꧀ꦜꦴꦤꦱ꧀ꦱ ꦥꦴꦛꦶꦪꦺꦏ꧀ꦏꦁ ꦱꦤ꧀ꦠꦠꦶꦮꦱꦺꦤ ꦄꦠꦷꦠꦴꦢꦶꦨꦺꦢꦺꦴ ꦤꦠ꧀ꦡꦶ. ꦠꦺꦱꦚ꧀ꦚꦺꦮ ꦥꦤ ꦈꦠꦸꦄꦴꦲꦴꦫꦕꦶꦠ꧀ꦠꦱꦩꦸꦛ꧀ꦜꦴꦤꦴꦤꦁ ꦈꦥꦠ꧀ꦡꦩ꧀ꦨꦏꦮꦱꦺꦤ ꦠꦱ꧀ꦱ ꦄꦠꦷꦠꦴꦢꦶꦨꦺꦢꦺꦴ ꦮꦺꦢꦶꦠꦧ꧀ꦧꦺꦴ. ꦱꦩꦪꦮꦱꦺꦤ ꦌꦏꦩꦸꦲꦸꦠ꧀ꦠꦥꦸꦧ꧀ꦧꦟ꧀ꦲꦱꦴꦪꦤ꧀ꦲꦫꦠ꧀ꦠꦶꦢꦶꦮꦴꦢꦷꦱꦸ ꦱꦩꦪꦺꦱꦸ ꦱꦤ꧀ꦠꦴꦤꦮꦱꦺꦤ ꦥꦮꦠ꧀ꦠꦩꦴꦤꦁ ꦠꦁ ꦠꦁ ꦱꦩꦪꦁ ꦥꦕ꧀ꦕꦸꦥ꧀ꦥꦤ꧀ꦤꦁ ꦤꦴꦩ. ꦠꦠꦺꦴ ꦥꦸꦧ꧀ꦧꦺ ꦄꦠꦷꦠꦁ, ꦥꦕ꧀ꦖꦴ ꦄꦤꦴꦒꦠꦁ. ꦑꦟꦮꦱꦺꦤ ꦈꦥ꧀ꦥꦴꦢꦴꦢꦶꦏ꧀ꦑꦟꦠ꧀ꦠꦪꦥꦫꦶꦪꦴꦥꦤ꧀ꦤꦁ ꦥꦕ꧀ꦕꦸꦥ꧀ꦥꦤ꧀ꦤꦁ ꦤꦴꦩ. ꦠꦠꦺꦴ ꦥꦸꦧ꧀ꦧꦺ ꦄꦠꦷꦠꦁ, ꦥꦕ꧀ꦖꦴ ꦄꦤꦴꦒꦠꦁ.

ꦄꦥꦶꦕ ꦄꦠꦶꦏ꧀ꦏꦲꦺꦠꦸꦥꦕ꧀ꦕꦪꦏꦶꦕ꧀ꦕꦁ ꦄꦠꦷꦠꦁ. ꦤꦶꦛ꧀ꦜꦶꦠꦲꦺꦠꦸꦏꦶꦕ꧀ꦕꦁ ꦄꦤꦶꦛ꧀ꦜꦶꦠꦥꦕ꧀ꦕꦪꦏꦶꦕ꧀ꦕꦁ ꦥꦕ꧀ꦕꦸꦥ꧀ꦥꦤ꧀ꦤꦁ. ꦈꦨꦪꦏꦶꦕ꧀ꦕꦩꦱꦩ꧀ꦥꦠ꧀ꦠꦁ ꦄꦤꦴꦒꦠꦁ. ꦱꦏꦶꦕ꧀ꦕꦏ꧀ꦑꦟꦺ ꦮꦴ ꦥꦕ꧀ꦕꦸꦥ꧀ꦥꦤ꧀ꦤꦁ. ꦠꦠꦺꦴ ꦥꦸꦧ꧀ꦧꦺ ꦄꦠꦷꦠꦁ, ꦥꦕ꧀ꦖꦴ ꦄꦤꦴꦒꦠꦁ. ꦌꦠ꧀ꦡ ꦕ ꦑꦟꦴꦢꦶꦏꦡꦴꦮ ꦤꦶꦥ꧀ꦥꦫꦶꦪꦴꦪꦴ, ꦱꦺꦱꦴ ꦱꦥꦫꦶꦪꦴꦪꦴ. ꦠꦴꦱꦸ ꦤꦶꦥ꧀ꦥꦫꦶꦪꦴꦪꦏꦡꦴ ꦆꦣ ꦄꦣꦶꦥ꧀ꦥꦺꦠꦴ. ꦄꦗ꧀ꦙꦠ꧀ꦠꦢꦸꦏꦱ꧀ꦱꦴꦥꦶ ꦤꦶꦢ꧀ꦢꦺꦱꦥꦢꦴꦤꦶ ꦲꦺꦛ꧀ꦜꦴ ꦄꦗ꧀ꦙꦠ꧀ꦠꦠ꧀ꦠꦶꦏꦤꦶꦢ꧀ꦢꦺꦱꦺ (ꦣ. ꦱ. ꦄꦛ꧀ꦜ. ꧑꧐꧕꧐) ꦮꦸꦠ꧀ꦠꦠ꧀ꦡꦴꦤꦺꦮ. ꦎꦭ꦳ꦴꦫꦶꦏꦴꦢꦷꦤꦶ ꦫꦹꦥꦏꦟ꧀ꦝꦮꦟ꧀ꦟꦤꦴꦪꦁ (ꦣ. ꦱ. ꦄꦛ꧀ꦜ. ꧖꧗꧔) ꦮꦸꦠ꧀ꦠꦠ꧀ꦡꦴꦤꦺꦮ.

꧖. ꦲꦷꦤꦢꦸꦏꦤꦶꦢ꧀ꦢꦺꦱꦺ ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦤ꧀ꦠꦶ ꦧꦲꦹꦱꦸ ꦱꦠ꧀ꦠꦺꦱꦸ ꦱꦴꦩꦶꦮꦕꦤꦁ. ꦄꦥꦫꦱ꧀ꦱꦴꦥꦶ ꦄꦥꦫꦱ꧀ꦱꦴꦥꦷꦠꦶ ꦲꦶ ꦮꦸꦕ꧀ꦕꦩꦴꦤꦺ ꦢꦶꦮꦱꦩ꧀ꦥꦶ ꦏꦥ꧀ꦥꦱꦠꦱꦲꦱ꧀ꦱꦩ꧀ꦥꦶ ꦮꦢꦤ꧀ꦠꦺꦴ ꦌꦠ꧀ꦠꦏꦩꦺꦮ ꦮꦢꦺꦪ꧀ꦪ. ꦆꦠꦶ ꦱꦠ꧀ꦡꦴ ꦢ꧀ꦮꦷꦲꦺꦮ ꦥꦢꦺꦲꦶ ꦄꦤꦮꦱꦺꦱꦺ ꦱꦠ꧀ꦠꦺ ꦥꦫꦶꦪꦴꦢꦶꦪꦤ꧀ꦠꦺꦴ ‘ꦠꦺꦱꦁ ꦠꦺꦱꦁ ꦱꦠ꧀ꦠꦴꦤ’ꦤ꧀ꦠꦶ ꦄꦴꦲ. ꦌꦠ꧀ꦠꦏꦺꦤ ꦲꦶ ꦱꦧ꧀ꦧꦩ꧀ꦥꦶ ꦄꦥꦫꦢꦷꦥꦤꦁ ꦱꦶꦢ꧀ꦣꦁ ꦲꦺꦴꦠꦶ. ꦈꦚ꧀ꦚꦴꦠꦤ꧀ꦠꦶ ꦄꦮꦩꦠꦁ. ꦄꦮꦚ꧀ꦚꦴꦠꦤ꧀ꦠꦶ ꦮꦩ꧀ꦨꦺꦠ꧀ꦮꦴ ꦚꦴꦠꦁ. ꦫꦹꦥꦤ꧀ꦠꦶꦥꦶ ꦤ ꦮꦶꦢꦶꦠꦁ. ꦲꦷꦭ꦳ꦶꦠꦤ꧀ꦠꦶ ꦄꦒꦲꦺꦠꦧ꧀ꦧꦛ꧀ꦜꦺꦤ ꦑꦶꦠ꧀ꦠꦁ ꦖꦝ꧀ꦝꦶꦠꦁ, ꦗꦶꦒꦸꦕ꧀ꦖꦶꦠꦤ꧀ꦠꦶꦥꦶ ꦮꦢꦤ꧀ꦠꦶ. ꦥꦫꦶꦨꦹꦠꦤ꧀ꦠꦶ ꦏꦶꦩꦺꦠꦺꦤꦴꦠꦶ ꦮꦴꦕꦴꦪ ꦥꦫꦶꦨꦮꦶꦠꦁ. ꦄꦕꦶꦠ꧀ꦠꦷꦏꦠꦤ꧀ꦠꦶ ꦤ ꦒꦫꦸꦏꦠꦁ. ꦲꦷꦤꦤ꧀ꦠꦶ ꦭꦴꦩꦏꦁ. ꦲꦷꦤꦩꦠꦤ꧀ꦠꦶ ꦲꦷꦤꦤ꧀ꦠꦶ ꦩꦠꦁ, ꦭꦴꦩꦏꦁ ꦏꦠ꧀ꦮꦴ ꦚꦴꦠꦁ. ꦲꦷꦤꦱꦩ꧀ꦩꦠꦤ꧀ꦠꦶ ꦲꦷꦤꦤ꧀ꦠꦶ ꦭꦺꦴꦏꦺ ꦱꦩ꧀ꦩꦠꦁ, ꦲꦷꦤꦺꦲꦶ ꦮꦴ ꦱꦩ꧀ꦩꦠꦁ, ꦒꦹꦡꦨꦏ꧀ꦑꦺꦲꦶ ꦒꦹꦡꦺꦴ ꦮꦶꦪ. ꦄꦤꦶꦛ꧀ꦜꦤ꧀ꦠꦶ ꦄꦥ꧀ꦥꦶꦪꦁ, ꦥꦛꦶꦭꦴꦨꦠ꧀ꦡꦴꦪ ꦮꦴ ꦄꦥꦫꦶꦪꦺꦱꦶꦠꦁ. ꦱꦕꦺꦥꦶ ꦤꦁ ꦏꦺꦴꦕꦶ ꦥꦫꦶꦪꦺꦱꦺꦪ꧀ꦪ, ꦥꦫꦶꦪꦺꦱꦠꦸ. ꦌꦠꦱ꧀ꦱ ꦥꦤ ꦄꦴꦫꦩ꧀ꦩꦟꦱ꧀ꦱ ꦌꦠꦢꦺꦮ ꦤꦴꦩꦁ. ꦄꦏꦤ꧀ꦠꦤ꧀ꦠꦶ ꦄꦏꦴꦩꦶꦠꦁ, ꦤꦶꦱ꧀ꦱꦶꦫꦶꦏꦁ ꦮꦴ. ꦄꦩꦤꦴꦥꦤ꧀ꦠꦶ ꦩꦤꦱ꧀ꦩꦶꦁ ꦤ ꦄꦥ꧀ꦥꦶꦠꦁ. ꦠꦴꦢꦶꦱꦚ꧀ꦲꦶ ꦄꦴꦫꦩ꧀ꦩꦟꦁ ꦩꦤꦱ꧀ꦩꦶꦁ ꦤ ꦄꦥ꧀ꦥꦷꦪꦠꦶ. ꦄꦡ ꦮꦴ ꦩꦤꦁ ꦄꦥ꧀ꦥꦴꦪꦠꦶ ꦮꦝ꧀ꦞꦺꦠꦷꦠꦶ ꦩꦤꦴꦥꦁ, ꦤ ꦩꦤꦴꦥꦁ ꦄꦩꦤꦴꦥꦁ.

ꦄꦥꦫꦺꦴ ꦤꦪꦺꦴ – ꦄꦤꦶꦛ꧀ꦜꦁ ꦱꦩ꧀ꦥꦠ꧀ꦠꦶꦮꦶꦫꦲꦠꦺꦴ. ꦠꦁ ꦌꦏꦤ꧀ꦠꦺꦤ ꦏꦩ꧀ꦩꦱꦩꦸꦛ꧀ꦜꦴꦤꦺꦱꦸ ꦄꦏꦸꦱꦭꦏꦩ꧀ꦩꦱꦩꦸꦛ꧀ꦜꦴꦤꦁ. ꦄꦏꦤ꧀ꦠꦁ ꦱꦸꦑꦱ꧀ꦱ ꦄꦲꦺꦠꦸꦨꦴꦮꦠꦺꦴ. ꦄꦩꦤꦴꦥꦁ ꦢꦸꦏ꧀ꦑꦱ꧀ꦱ ꦲꦺꦠꦸꦨꦴꦮꦠꦺꦴ. ꦫꦹꦥꦴ ꦱꦢ꧀ꦢꦴꦠꦶ ꦆꦢꦩꦱ꧀ꦱ ꦱꦨꦴꦮꦢꦷꦥꦤꦁ. ꦆꦩꦱ꧀ꦩꦶꦚ꧀ꦲꦶ ꦥꦢꦺ ꦄꦏꦸꦱꦭꦏꦩ꧀ꦩꦗꦮꦱꦺꦤ ꦄꦤꦶꦛ꧀ꦜꦴ ꦥꦚ꧀ꦕ ꦏꦴꦩꦒꦸꦟꦴ ꦮꦶꦨꦠ꧀ꦠꦴ. ꦏꦸꦱꦭꦏꦩ꧀ꦩꦗꦁ ꦥꦤ ꦄꦤꦶꦛ꧀ꦜꦁ ꦤꦴꦩ ꦤꦠ꧀ꦡꦶ, ꦱꦧ꧀ꦧꦁ ꦆꦛ꧀ꦜꦩꦺꦮ.

ꦥꦟꦷꦠꦥꦢꦤꦶꦢ꧀ꦢꦺꦱꦺꦴ ꦮꦸꦠ꧀ꦠꦥꦛꦶꦥꦏ꧀ꦑꦤꦪꦺꦤ ꦮꦺꦢꦶꦠꦧ꧀ꦧꦺꦴ. ꦆꦩꦱ꧀ꦩꦶꦁ ꦥꦤ ꦥꦢꦺ ꦏꦸꦱꦭꦏꦩ꧀ꦩꦗꦮꦱꦺꦤ ꦆꦛ꧀ꦜꦴ ꦥꦚ꧀ꦕ ꦏꦴꦩꦒꦸꦟꦴ ꦮꦶꦨꦠ꧀ꦠꦴ. ꦏꦸꦱꦭꦏꦩ꧀ꦩꦗꦚ꧀ꦲꦶ ꦄꦤꦶꦛ꧀ꦜꦁ ꦤꦴꦩ ꦤꦠ꧀ꦡꦶ, ꦱꦧ꧀ꦧꦁ ꦆꦛ꧀ꦜꦩꦺꦮ. ꦪꦡꦴ ꦕ ꦏꦩ꧀ꦩꦗꦺꦱꦸ ꦌꦮꦁ ꦈꦠꦸꦱꦩꦸꦛ꧀ꦜꦴꦤꦴꦢꦷꦱꦸꦥꦶ ꦆꦛ꧀ꦜꦴꦤꦶꦛ꧀ꦜꦠꦴ ꦄꦠ꧀ꦡꦶ ꦌꦮꦴꦠꦶ ꦆꦩꦱ꧀ꦩꦶꦁ ꦢꦸꦏꦺ ꦆꦛ꧀ꦜꦴꦤꦶꦛ꧀ꦜꦴꦫꦩ꧀ꦩꦟꦁ ꦥꦛꦶꦮꦶꦨꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦄꦪꦁ ꦠꦴꦮ ꦄꦴꦕꦫꦶꦪꦴꦤꦁ ꦱꦩꦴꦤꦠ꧀ꦡꦏꦡꦴ. ꦮꦶꦠꦟ꧀ꦝꦮꦴꦢꦷ ꦥꦤꦴꦲ – ꦆꦛ꧀ꦜꦴꦤꦶꦛ꧀ꦜꦁ ꦤꦴꦩ ꦥꦴꦛꦶꦪꦺꦏ꧀ꦏꦁ ꦥꦛꦶꦮꦶꦨꦠ꧀ꦠꦁ ꦤꦠ꧀ꦡꦶ, ꦠꦺꦱꦁ ꦠꦺꦱꦁ ꦫꦸꦕꦶꦮꦱꦺꦤ ꦏꦡꦶꦠꦁ.

ꦪꦡꦴꦲ –

‘‘ꦩꦤꦴꦥꦥꦫꦶꦪꦤ꧀ꦠꦁ ꦑ꧀ꦮꦴꦲꦁ, ꦩꦲꦴꦫꦴꦗ, ꦥꦚ꧀ꦕꦱꦸ ꦏꦴꦩꦒꦸꦟꦺꦱꦸ ꦄꦒ꧀ꦒꦤ꧀ꦠꦶ ꦮꦢꦴꦩꦶ. ꦠꦺꦮ, ꦩꦲꦴꦫꦴꦗ, ꦫꦹꦥꦴ ꦌꦏꦕ꧀ꦕꦱ꧀ꦱ ꦩꦤꦴꦥꦴ ꦲꦺꦴꦤ꧀ꦠꦶ, ꦌꦏꦕ꧀ꦕꦱ꧀ꦱ ꦄꦩꦤꦴꦥꦴ ꦲꦺꦴꦤ꧀ꦠꦶ. ꦠꦺꦮ, ꦩꦲꦴꦫꦴꦗ, ꦱꦢ꧀ꦢꦴ, ꦒꦤ꧀ꦣꦴ, ꦫꦱꦴ, ꦦꦺꦴꦛ꧀ꦜꦧ꧀ꦧꦴ ꦌꦏꦕ꧀ꦕꦱ꧀ꦱ ꦩꦤꦴꦥꦴ ꦲꦺꦴꦤ꧀ꦠꦶ, ꦌꦏꦕ꧀ꦕꦱ꧀ꦱ ꦄꦩꦤꦴꦥꦴ ꦲꦺꦴꦤ꧀ꦠꦷ’’ꦠꦶ (ꦱꦁ. ꦤꦶ. ꧑.꧑꧒꧓).

ꦌꦮꦁ ꦪꦱ꧀ꦩꦴ ꦠꦺꦪꦺꦮ ꦫꦹꦥꦴꦢꦪꦺꦴ ꦌꦏꦺꦴ ꦄꦱ꧀ꦱꦴꦢꦺꦠꦶ ꦄꦨꦶꦤꦤ꧀ꦢꦠꦶ, ꦠꦠ꧀ꦡ ꦭꦺꦴꦨꦁ ꦈꦥ꧀ꦥꦴꦢꦺꦠꦶ. ꦌꦏꦺꦴ ꦏꦸꦗ꧀ꦙꦠꦶ ꦥꦛꦶꦲꦚ꧀ꦚꦠꦶ, ꦠꦠ꧀ꦡ ꦢꦺꦴꦱꦁ ꦈꦥ꧀ꦥꦴꦢꦺꦠꦶ. ꦌꦏꦱ꧀ꦱ ꦆꦛ꧀ꦜꦴ ꦲꦺꦴꦤ꧀ꦠꦶ ꦏꦤ꧀ꦠꦴ ꦩꦤꦴꦥꦴ, ꦌꦏꦱ꧀ꦱ ꦄꦤꦶꦛ꧀ꦜꦴ ꦄꦏꦤ꧀ꦠꦴ ꦄꦩꦤꦴꦥꦴ. ꦌꦏꦺꦴ ꦕꦺꦠꦺ ‘ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ’ꦠꦶ ꦢꦏ꧀ꦑꦶꦟꦠꦺꦴ ꦒꦟ꧀ꦲꦴꦠꦶ, ꦌꦏꦺꦴ ‘ꦄꦤꦶꦛ꧀ꦜꦴ ꦄꦏꦤ꧀ꦠꦴ ꦄꦩꦤꦴꦥꦴ’ꦠꦶ ꦮꦴꦩꦠꦺꦴ. ꦠꦱ꧀ꦩꦴ ꦆꦛ꧀ꦜꦴꦤꦶꦛ꧀ꦜꦁ ꦤꦴꦩ ꦥꦴꦛꦶꦪꦺꦏ꧀ꦏꦁ ꦥꦛꦶꦮꦶꦨꦠ꧀ꦠꦁ ꦤꦴꦩ ꦤꦠ꧀ꦡꦶ. ꦥꦕ꧀ꦕꦤ꧀ꦠꦮꦴꦱꦷꦤꦚ꧀ꦲꦶ ꦒꦟ꧀ꦝꦸꦥ꧀ꦥꦴꦢꦴꦥꦶ ꦆꦛ꧀ꦜꦴ ꦲꦺꦴꦤ꧀ꦠꦶ ꦏꦤ꧀ꦠꦴ ꦩꦤꦴꦥꦴ, ꦩꦗ꧀ꦙꦶꦩꦢꦺꦱꦮꦴꦱꦷꦤꦁ ꦄꦠꦶꦗꦺꦒꦸꦕ꧀ꦖꦴ. ꦠꦺꦱꦚ꧀ꦕ ꦩꦺꦴꦫꦩꦁꦱꦴꦢꦷꦤꦶ ꦆꦛ꧀ꦜꦴꦤꦶ ꦲꦺꦴꦤ꧀ꦠꦶ, ꦆꦠꦫꦺꦱꦁ ꦠꦴꦤꦶ ꦄꦠꦶꦗꦺꦒꦸꦕ꧀ꦖꦴꦤꦷꦠꦶ.

ꦱꦺꦴ ꦮꦠ꧀ꦠꦧ꧀ꦧꦺꦴ – ‘‘ꦏꦶꦁ ꦥꦤ ꦠ꧀ꦮꦁ ꦆꦛ꧀ꦜꦴꦤꦶꦛ꧀ꦜꦴꦫꦩ꧀ꦩꦟꦁ ꦥꦴꦛꦶꦪꦺꦏ꧀ꦏꦁ ꦥꦛꦶꦮꦶꦨꦠ꧀ꦠꦁ ꦤꦴꦩ ꦤꦠ꧀ꦡꦷꦠꦶ ꦮꦢꦺꦱꦷ’’ꦠꦶ? ‘‘ꦄꦴꦩ ꦤꦠ꧀ꦡꦷ’’ꦠꦶ ꦮꦢꦴꦩꦶ. ꦥꦸꦤ ꦠꦡꦺꦮ ꦪꦴꦮꦠꦠꦶꦪꦁ ꦥꦠꦶꦛ꧀ꦜꦴꦥꦺꦠ꧀ꦮꦴ ꦥꦚ꧀ꦲꦺꦴ ꦥꦸꦕ꧀ꦖꦶꦠꦧ꧀ꦧꦺꦴ – ‘‘ꦤꦶꦧ꧀ꦧꦴꦤꦁ ꦤꦴꦩ ꦆꦛ꧀ꦜꦁ ꦈꦢꦴꦲꦸ ꦄꦤꦶꦛ꧀ꦜ’’ꦤ꧀ꦠꦶ? ꦗꦴꦤꦩꦴꦤꦺꦴ ‘‘ꦆꦛ꧀ꦜ’’ꦤ꧀ꦠꦶ ꦮꦏ꧀ꦑꦠꦶ. ꦱꦕꦺꦥꦶ ꦤ ꦮꦢꦺꦪ꧀ꦪ, ꦩꦴ ꦮꦢꦠꦸ. ꦤꦶꦧ꧀ꦧꦴꦤꦁ ꦥꦤ ꦌꦏꦤ꧀ꦠꦆꦛ꧀ꦜꦩꦺꦮ. ‘‘ꦤꦤꦸ ꦌꦏꦺꦴ ꦤꦶꦧ꧀ꦧꦴꦤꦱ꧀ꦱ ꦮꦟ꧀ꦟꦺ ꦏꦡꦶꦪꦩꦴꦤꦺ ꦏꦸꦗ꧀ꦙꦶꦠ꧀ꦮꦴ – ‘ꦠ꧀ꦮꦁ ꦤꦶꦧ꧀ꦧꦴꦤꦱ꧀ꦱ ꦮꦟ꧀ꦟꦁ ꦏꦡꦺꦱꦶ, ꦏꦶꦁ ꦠꦠ꧀ꦡ ꦄꦤ꧀ꦤꦥꦴꦤꦩꦴꦭꦴꦒꦤ꧀ꦣꦮꦶꦭꦺꦥꦤꦱꦪꦤꦕ꧀ꦖꦴꦢꦤꦱꦩꦶꦢ꧀ꦣꦴ ꦥꦚ꧀ꦕ ꦏꦴꦩꦒꦸꦟꦴ ꦄꦠ꧀ꦡꦷ’ꦠꦶ ꦮꦠ꧀ꦮꦴ ‘ꦤꦠ꧀ꦡꦷ’ꦠꦶ ꦮꦸꦠ꧀ꦠꦺ ‘ꦄꦭꦁ ꦠꦮ ꦤꦶꦧ꧀ꦧꦴꦤꦺꦤꦴ’ꦠꦶ ꦤꦶꦧ꧀ꦧꦴꦤꦱ꧀ꦱ ꦮꦟ꧀ꦟꦺ ꦏꦡꦶꦪꦩꦴꦤꦺ ꦏꦸꦗ꧀ꦙꦶꦠ꧀ꦮꦴ ꦈꦨꦺꦴ ꦏꦟ꧀ꦟꦺ ꦡꦏꦺꦠꦷꦠꦶ ꦆꦛ꧀ꦜꦺꦠꦁ. ꦌꦠꦱ꧀ꦱ ꦥꦤ ꦮꦱꦺꦤ ꦠꦮ ꦮꦴꦢꦺ ꦤꦶꦧ꧀ꦧꦴꦤꦁ ꦄꦤꦶꦛ꧀ꦜꦁ ꦤꦴꦩ ꦲꦺꦴꦠꦶ. ꦤ ꦥꦤꦺꦠꦁ ꦌꦮꦁ ꦒꦲꦺꦠꦧ꧀ꦧꦁ. ꦌꦱꦺꦴ ꦲꦶ ꦮꦶꦥꦫꦷꦠꦱꦚ꧀ꦚꦴꦪ ꦏꦡꦺꦠꦶ. ꦱꦚ꧀ꦚꦴꦮꦶꦥꦭ꧀ꦭꦴꦱꦺꦤ ꦕ ꦠꦢꦺꦮ ꦄꦴꦫꦩ꧀ꦩꦟꦁ ꦌꦏꦱ꧀ꦱ ꦆꦛ꧀ꦜꦁ ꦲꦺꦴꦠꦶ, ꦌꦏꦱ꧀ꦱ ꦄꦤꦶꦛ꧀ꦜꦁ’’.

ꦆꦛ꧀ꦜꦴꦤꦶꦛ꧀ꦜꦴꦫꦩ꧀ꦩꦟꦁ ꦥꦤ ꦥꦴꦛꦶꦪꦺꦏ꧀ꦏꦁ ꦮꦶꦨꦠ꧀ꦠꦁ ꦄꦠ꧀ꦡꦷꦠꦶ. ꦏꦱ꧀ꦱ ꦮꦱꦺꦤ ꦮꦶꦨꦠ꧀ꦠꦤ꧀ꦠꦶ? ꦩꦗ꧀ꦙꦶꦩꦏꦱꦠ꧀ꦠꦱ꧀ꦱ. ꦆꦢꦚ꧀ꦲꦶ ꦤ ꦄꦠꦶꦆꦱ꧀ꦱꦫꦴꦤꦁ ꦩꦲꦴꦱꦩ꧀ꦩꦠꦩꦲꦴꦱꦸꦢꦱ꧀ꦱꦤꦣꦩ꧀ꦩꦴꦱꦺꦴꦏꦴꦢꦷꦤꦁ ꦮꦱꦺꦤ ꦮꦶꦨꦠ꧀ꦠꦁ. ꦠꦺꦱꦚ꧀ꦲꦶ ꦢꦶꦧ꧀ꦧꦏꦥ꧀ꦥꦩ꧀ꦥꦶ ꦄꦴꦫꦩ꧀ꦩꦟꦁ ꦄꦩꦤꦴꦥꦁ ꦈꦥꦛ꧀ꦜꦴꦠꦶ. ꦤ ꦄꦠꦶꦢꦸꦒ꧀ꦒꦠꦴꦤꦁ ꦢꦸꦭ꧀ꦭꦨꦤ꧀ꦤꦥꦴꦤꦴꦤꦁ ꦮꦱꦺꦤ ꦮꦶꦨꦠ꧀ꦠꦁ. ꦠꦺꦱꦚ꧀ꦲꦶ ꦏꦟꦴꦗꦏꦨꦠ꧀ꦠꦱꦶꦠ꧀ꦡꦴꦤꦶꦥꦶ ꦥꦹꦠꦶꦩꦁꦱꦫꦱꦺꦴꦥꦶ ꦄꦠꦶꦩꦣꦸꦫꦺꦴ ꦄꦩꦠꦱꦢꦶꦱꦺꦴ ꦕ ꦲꦺꦴꦠꦶ. ꦩꦗ꧀ꦙꦶꦩꦏꦴꦤꦁ ꦥꦤ ꦒꦟꦏꦩꦲꦴꦩꦠ꧀ꦠꦱꦺꦛ꧀ꦜꦶꦏꦸꦛꦸꦩ꧀ꦧꦶꦏꦮꦴꦟꦶꦗꦴꦢꦷꦤꦁ ꦏꦴꦭꦺꦤ ꦆꦛ꧀ꦜꦁ ꦏꦴꦭꦺꦤ ꦄꦤꦶꦛ꧀ꦜꦁ ꦭꦨꦩꦴꦤꦴꦤꦁ ꦮꦱꦺꦤ ꦮꦶꦨꦠ꧀ꦠꦁ. ꦌꦮꦫꦹꦥꦴ ꦲꦶ ꦆꦛ꧀ꦜꦴꦤꦶꦛ꧀ꦜꦁ ꦥꦫꦶꦕ꧀ꦖꦶꦤ꧀ꦢꦶꦠꦸꦁ ꦱꦏ꧀ꦏꦺꦴꦤ꧀ꦠꦷꦠꦶ.

ꦠꦶꦥꦶꦛꦏꦕꦹꦭ꦳ꦤꦴꦒꦠ꧀ꦡꦺꦫꦺꦴ ꦥꦤꦴꦲ – ‘‘ꦆꦛ꧀ꦜꦴꦤꦶꦛ꧀ꦜꦁ ꦤꦴꦩ ꦮꦶꦥꦴꦏꦮꦱꦺꦤꦺꦮ ꦥꦫꦶꦕ꧀ꦖꦶꦤ꧀ꦤꦁ, ꦤ ꦗꦮꦤꦮꦱꦺꦤ. ꦗꦮꦤꦁ ꦥꦤ ꦱꦚ꧀ꦚꦴꦮꦶꦥꦭ꧀ꦭꦴꦱꦮꦱꦺꦤ ꦆꦛ꧀ꦜꦱ꧀ꦩꦶꦁꦪꦺꦮ ꦫꦗ꧀ꦗꦠꦶ, ꦆꦛ꧀ꦜꦱ꧀ꦩꦶꦁꦪꦺꦮ ꦢꦸꦱ꧀ꦱꦠꦶ; ꦄꦤꦶꦛ꧀ꦜꦱ꧀ꦩꦶꦁꦪꦺꦮ ꦫꦗ꧀ꦗꦠꦶ, ꦄꦤꦶꦛ꧀ꦜꦱ꧀ꦩꦶꦁꦪꦺꦮ ꦢꦸꦱ꧀ꦱꦠꦷ’’ꦠꦶ. ꦮꦶꦥꦴꦏꦮꦱꦺꦤꦺꦮ ꦥꦤꦺꦠꦁ ꦌꦏꦤ꧀ꦠꦠꦺꦴ ꦥꦫꦶꦕ꧀ꦖꦶꦗ꧀ꦗꦠꦶ. ꦤ ꦲꦶ ꦱꦏ꧀ꦏꦴ ꦮꦶꦥꦴꦏꦕꦶꦠ꧀ꦠꦁ ꦮꦚ꧀ꦕꦺꦠꦸꦁ. ꦱꦕꦺ ꦄꦴꦫꦩ꧀ꦩꦟꦁ ꦆꦛ꧀ꦜꦁ ꦲꦺꦴꦠꦶ, ꦏꦸꦱꦭꦮꦶꦥꦴꦏꦁ ꦈꦥ꧀ꦥꦗ꧀ꦗꦠꦶ. ꦱꦕꦺ ꦄꦤꦶꦛ꧀ꦜꦁ, ꦄꦏꦸꦱꦭꦮꦶꦥꦴꦏꦁ ꦈꦥ꧀ꦥꦗ꧀ꦗꦠꦶ. ꦏꦶꦚ꧀ꦕꦴꦥꦶ ꦲꦶ ꦩꦶꦕ꧀ꦖꦴꦢꦶꦛ꧀ꦜꦶꦏꦴ ꦧꦸꦢ꧀ꦣꦁ ꦮꦴ ꦱꦔ꧀ꦓꦁ ꦮꦴ ꦩꦲꦴꦕꦺꦠꦶꦪꦴꦢꦷꦤꦶ ꦮꦴ ꦈꦭ꦳ꦴꦫꦴꦤꦶ ꦄꦴꦫꦩ꧀ꦩꦟꦴꦤꦶ ꦢꦶꦱ꧀ꦮꦴ ꦄꦏ꧀ꦑꦷꦤꦶ ꦥꦶꦢꦲꦤ꧀ꦠꦶ, ꦢꦺꦴꦩꦤꦱ꧀ꦱꦁ ꦄꦴꦥꦗ꧀ꦗꦤ꧀ꦠꦶ, ꦣꦩ꧀ꦩꦱꦢ꧀ꦢꦁ ꦱꦸꦠ꧀ꦮꦴ ꦏꦟ꧀ꦟꦺ ꦡꦏꦺꦤ꧀ꦠꦶ, ꦕꦏ꧀ꦑꦸꦮꦶꦚ꧀ꦚꦴꦟꦱꦺꦴꦠꦮꦶꦚ꧀ꦚꦴꦟꦴꦤꦶ ꦥꦤ ꦤꦺꦱꦁ ꦏꦸꦱꦭꦮꦶꦥꦴꦏꦴꦤꦺꦮ ꦲꦺꦴꦤ꧀ꦠꦶ.

ꦏꦶꦚ꧀ꦕꦴꦥꦶ ꦒꦹꦡꦱꦹꦏꦫꦴꦢꦪꦺꦴ ꦒꦹꦡꦒꦤ꧀ꦣꦁ ꦓꦴꦪꦶꦠ꧀ꦮꦴ ‘ꦑꦴꦢꦶꦠꦸꦁ ꦭꦨꦶꦱ꧀ꦱꦴꦩꦴ’ꦠꦶ ꦱꦺꦴꦩꦤꦱ꧀ꦱꦗꦴꦠꦴ ꦲꦺꦴꦤ꧀ꦠꦶ, ꦒꦹꦡꦢꦱ꧀ꦱꦤꦺ ꦥꦤ ꦠꦺꦱꦁ ꦕꦏ꧀ꦑꦸꦮꦶꦚ꧀ꦚꦴꦟꦁ, ꦠꦱ꧀ꦱ ꦒꦤ꧀ꦣꦓꦴꦪꦤꦺ ꦓꦴꦤꦮꦶꦚ꧀ꦚꦴꦟꦁ, ꦫꦱꦱꦴꦪꦤꦺ ꦗꦶꦮ꧀ꦲꦴꦮꦶꦚ꧀ꦚꦴꦟꦚ꧀ꦕ ꦄꦏꦸꦱꦭꦮꦶꦥꦴꦏꦩꦺꦮ ꦲꦺꦴꦠꦶ. ꦧꦤ꧀ꦣꦶꦠ꧀ꦮꦴ ꦮꦫꦱꦪꦤꦺ ꦱꦪꦴꦥꦶꦠꦱꦹꦏꦫꦺꦴ ꦕ ꦏꦶꦚ꧀ꦕꦴꦥꦶ ꦮꦶꦫꦮꦠꦶ, ꦱꦚ꧀ꦚꦴꦮꦶꦥꦭ꧀ꦭꦴꦱꦺꦤ ꦥꦤꦱ꧀ꦱ ꦗꦮꦤꦱ꧀ꦩꦶꦁꦪꦺꦮ ꦢꦺꦴꦩꦤꦱ꧀ꦱꦁ ꦈꦥ꧀ꦥꦗ꧀ꦗꦠꦶ, ꦏꦴꦪꦮꦶꦚ꧀ꦚꦴꦟꦁ ꦏꦸꦱꦭꦮꦶꦥꦴꦏꦩꦺꦮ. ꦏꦱ꧀ꦩꦴ? ꦄꦴꦫꦩ꧀ꦩꦟꦱ꧀ꦱ ꦆꦛ꧀ꦜꦠꦴꦪ.

ꦄꦥꦶꦕ ꦢ꧀ꦮꦴꦫꦮꦱꦺꦤꦴꦥꦶ ꦆꦛ꧀ꦜꦴꦤꦶꦛ꧀ꦜꦠꦴ ꦮꦺꦢꦶꦠꦧ꧀ꦧꦴ. ꦱꦸꦑꦱꦩ꧀ꦦꦱ꧀ꦱꦚ꧀ꦲꦶ ꦒꦹꦡꦏꦭꦭꦁ ꦕꦏ꧀ꦑꦸꦢ꧀ꦮꦴꦫꦓꦴꦤꦢ꧀ꦮꦴꦫꦺꦱꦸ ꦄꦤꦶꦛ꧀ꦜꦁ, ꦏꦴꦪꦢ꧀ꦮꦴꦫꦺ ꦆꦛ꧀ꦜꦁ ꦲꦺꦴꦠꦶ. ꦕꦏ꧀ꦏꦮꦠ꧀ꦠꦶꦤꦺꦴ ꦩꦟꦶꦫꦠꦤꦺꦤ ꦥꦺꦴꦡꦶꦪꦩꦴꦤꦱ꧀ꦱ, ꦱꦸꦮꦟ꧀ꦟꦱꦹꦭꦺ ꦈꦠ꧀ꦠꦴꦱꦶꦠꦱ꧀ꦱ ꦕ ꦩꦟꦶꦫꦠꦤꦱꦸꦮꦟ꧀ꦟꦱꦹꦭꦴꦤꦶ ꦕꦏ꧀ꦑꦸꦢ꧀ꦮꦴꦫꦺ ꦆꦛ꧀ꦜꦴꦤꦶ ꦲꦺꦴꦤ꧀ꦠꦶ, ꦏꦴꦪꦢ꧀ꦮꦴꦫꦺ ꦄꦤꦶꦛ꧀ꦜꦴꦤꦶ. ꦏꦱ꧀ꦩꦴ? ꦩꦲꦴꦢꦸꦏ꧀ꦑꦱ꧀ꦱ ꦈꦥ꧀ꦥꦴꦢꦤꦠꦺꦴ. ꦌꦮꦁ ꦆꦛ꧀ꦜꦴꦤꦶꦛ꧀ꦜꦁ ꦌꦏꦤ꧀ꦠꦠꦺꦴ ꦮꦶꦥꦴꦏꦺꦤꦺꦮ ꦥꦫꦶꦕ꧀ꦖꦶꦗ꧀ꦗꦠꦷꦠꦶ ꦮꦺꦢꦶꦠꦧ꧀ꦧꦁ.

ꦠꦁ ꦠꦁ ꦮꦴ ꦥꦤꦴꦠꦶ ꦌꦠ꧀ꦡ ꦤ ꦲꦺꦛ꧀ꦜꦶꦩꦤꦪꦺꦴ ꦎꦭꦺꦴꦏꦺꦠꦧ꧀ꦧꦺꦴ. ꦤ ꦲꦶ ꦨꦒꦮꦴ ꦱꦩ꧀ꦩꦸꦠꦶꦩꦤꦴꦥꦁ ꦨꦶꦤ꧀ꦢꦠꦶ, ꦥꦸꦒ꧀ꦒꦭꦩꦤꦴꦥꦁ ꦥꦤ ꦨꦶꦤ꧀ꦢꦠꦶ. ꦠꦱ꧀ꦩꦴ ꦠꦁꦠꦁꦮꦴꦥꦤꦮꦱꦺꦤꦺꦮ ꦈꦥꦴꦢꦴꦪꦸꦥꦴꦢꦴꦪ ꦲꦷꦤꦥ꧀ꦥꦟꦷꦠꦠꦴ ꦮꦺꦢꦶꦠꦧ꧀ꦧꦴ. ꦤꦺꦫꦪꦶꦏꦴꦤꦚ꧀ꦲꦶ ꦫꦹꦥꦁ ꦏꦺꦴꦛꦶꦥ꧀ꦥꦠ꧀ꦠꦁ ꦲꦷꦤꦁ ꦤꦴꦩ; ꦠꦁ ꦈꦥꦴꦢꦴꦪ ꦠꦶꦫꦕ꧀ꦖꦴꦤꦺꦱꦸ ꦤꦴꦒꦱꦸꦥꦟ꧀ꦟꦴꦤꦁ ꦫꦹꦥꦁ ꦥꦟꦷꦠꦁ ꦤꦴꦩ. ꦠꦺꦱꦁ ꦫꦹꦥꦁ ꦲꦷꦤꦁ; ꦠꦁ ꦈꦥꦴꦢꦴꦪ ꦥꦺꦠꦴꦤꦁ ꦫꦹꦥꦁ ꦥꦟꦷꦠꦁ ꦤꦴꦩ. ꦠꦺꦱꦩ꧀ꦥꦶ ꦲꦷꦤꦁ; ꦠꦁ ꦈꦥꦴꦢꦴꦪ ꦗꦴꦤꦥꦢꦴꦤꦁ ꦫꦹꦥꦁ ꦥꦟꦷꦠꦁ ꦤꦴꦩ. ꦠꦺꦱꦩ꧀ꦥꦶ ꦲꦷꦤꦁ; ꦠꦁ ꦈꦥꦴꦢꦴꦪ ꦒꦴꦩꦨꦺꦴꦗꦏꦴꦤꦁ ꦫꦹꦥꦁ ꦥꦟꦷꦠꦁ ꦤꦴꦩ. ꦠꦺꦱꦩ꧀ꦥꦶ ꦲꦷꦤꦁ; ꦠꦁ ꦈꦥꦴꦢꦴꦪ ꦗꦤꦥꦢꦱꦴꦩꦶꦏꦴꦤꦁ ꦫꦹꦥꦁ ꦥꦟꦷꦠꦁ ꦤꦴꦩ. ꦠꦺꦱꦩ꧀ꦥꦶ ꦲꦷꦤꦁ; ꦠꦁ ꦈꦥꦴꦢꦴꦪ ꦥꦢꦺꦱꦫꦴꦗꦹꦤꦁ ꦫꦹꦥꦁ ꦥꦟꦷꦠꦁ ꦤꦴꦩ. ꦠꦺꦱꦩ꧀ꦥꦶ ꦲꦷꦤꦁ; ꦠꦁ ꦈꦥꦴꦢꦴꦪ ꦕꦏ꧀ꦏꦮꦠ꧀ꦠꦶꦫꦚ꧀ꦚꦺꦴ ꦫꦹꦥꦁ ꦥꦟꦷꦠꦁ ꦤꦴꦩ. ꦠꦱ꧀ꦱꦴꦥꦶ ꦲꦷꦤꦁ; ꦠꦁ ꦈꦥꦴꦢꦴꦪ ꦨꦸꦩ꧀ꦩꦢꦺꦮꦴꦤꦁ ꦫꦹꦥꦁ ꦥꦟꦷꦠꦁ ꦤꦴꦩ. ꦠꦺꦱꦩ꧀ꦥꦶ ꦲꦷꦤꦁ; ꦠꦁ ꦈꦥꦴꦢꦴꦪ ꦕꦴꦠꦸꦩꦲꦴꦫꦴꦗꦶꦏꦴꦤꦁ ꦢꦺꦮꦴꦤꦁ ꦫꦹꦥꦁ ꦥꦟꦷꦠꦁ ꦤꦴꦩ. ꦠꦺꦱꦩ꧀ꦥꦶ ꦲꦷꦤꦁ; ꦠꦁ ꦈꦥꦴꦢꦴꦪ ꦠꦴꦮꦠꦶꦁꦱꦴꦤꦁ ꦢꦺꦮꦴꦤꦁ ꦫꦹꦥꦁ ꦥꦟꦷꦠꦁ ꦤꦴꦩ…ꦥꦺ… ꦄꦏꦤꦶꦛ꧀ꦜꦢꦺꦮꦴꦤꦁ ꦥꦤ ꦫꦹꦥꦁ ꦩꦠ꧀ꦡꦏꦥ꧀ꦥꦠ꧀ꦠꦁ ꦥꦟꦷꦠꦁ ꦤꦴꦩ.

꧗. ꦢꦹꦫꦢꦸꦏꦤꦶꦢ꧀ꦢꦺꦱꦺ ꦆꦠ꧀ꦡꦶꦤ꧀ꦢ꧀ꦫꦶꦪꦴꦢꦷꦤꦶ ꦲꦺꦛ꧀ꦜꦴ ꦮꦶꦨꦠ꧀ꦠꦴꦤꦺꦮ. ꦆꦩꦱ꧀ꦩꦶꦁ ꦥꦤ ꦢꦸꦏꦺ ꦢꦸꦥ꧀ꦥꦫꦶꦒ꧀ꦒꦲꦛ꧀ꦜꦺꦤ ꦭꦏ꧀ꦑꦟꦢꦸꦥ꧀ꦥꦛꦶꦮꦶꦗ꧀ꦙꦠꦴꦪ ꦱꦸꦑꦸꦩꦫꦹꦥꦁ ꦢꦹꦫꦺꦠꦶ ꦏꦡꦶꦠꦁ. ꦱꦸꦑꦥꦫꦶꦒ꧀ꦒꦲꦛ꧀ꦜꦺꦤ ꦭꦏ꧀ꦑꦟꦱꦸꦥ꧀ꦥꦛꦶꦮꦶꦗ꧀ꦙꦠꦴꦪ ꦎꦭ꦳ꦴꦫꦶꦏꦫꦹꦥꦁ ꦱꦤ꧀ꦠꦶꦏꦺꦠꦶ. ꦏꦧꦭ꦳ꦷꦏꦴꦫꦴꦲꦴꦫꦥꦫꦶꦪꦺꦴꦱꦴꦤꦺ ꦕ ꦤꦶꦪ꧀ꦪꦴꦠꦤꦛ꧀ꦜꦴꦤꦺꦥꦶ ‘ꦆꦢꦁ ꦮꦸꦕ꧀ꦕꦠꦶ ꦫꦹꦥꦁ ꦢꦹꦫꦺ’ꦠꦶ ꦤ ꦤꦷꦪ꧀ꦪꦴꦠꦶꦠꦁ. ꦏꦱ꧀ꦩꦴ? ꦢꦸꦮꦶꦣꦚ꧀ꦲꦶ ꦢꦹꦫꦺ ꦤꦴꦩ – ꦭꦏ꧀ꦑꦟꦠꦺꦴ ꦕ ꦎꦏꦴꦱꦠꦺꦴ ꦕꦴꦠꦶ. ꦠꦠ꧀ꦡ ꦭꦏ꧀ꦑꦟꦠꦺꦴ ꦢꦹꦫꦺꦠꦶ ꦤ ꦏꦡꦶꦠꦁ, ꦠꦁ ꦎꦏꦴꦱꦠꦺꦴ ꦏꦡꦺꦠꦧ꧀ꦧꦁ. ꦠꦱ꧀ꦩꦴ ꦢꦹꦫꦺꦠꦶ ꦄꦏꦡꦶꦠꦁ. ꦎꦭ꦳ꦴꦫꦶꦏꦫꦹꦥꦁ ꦎꦏꦴꦱꦠꦺꦴ ꦢꦹꦫꦺꦠꦶ ꦢꦱ꧀ꦱꦺꦠꦸꦁ ꦄꦤꦶꦪ꧀ꦪꦴꦠꦺꦠ꧀ꦮꦴꦮ ꦪꦁ ꦮꦴ ꦥꦤꦚ꧀ꦚꦩ꧀ꦥꦷꦠꦶꦄꦴꦢꦶꦩꦴꦲ. ꦱꦤ꧀ꦠꦶꦏꦥꦢꦤꦶꦢ꧀ꦢꦺꦱꦺꦥꦶ ꦌꦱꦺꦮ ꦤꦪꦺꦴ. ꦠꦠ꧀ꦡ ꦄꦤꦴꦱꦤ꧀ꦤꦺꦠꦶ ꦤ ꦄꦴꦱꦤ꧀ꦤꦺ, ꦄꦤꦸꦥꦏꦛ꧀ꦜꦺꦠꦶ ꦤꦶꦱ꧀ꦱꦛꦺ, ꦢꦹꦫꦺꦠꦶ ꦢꦹꦫꦩ꧀ꦲꦶ, ꦄꦱꦤ꧀ꦠꦶꦏꦺꦠꦶ ꦤ ꦱꦤ꧀ꦠꦶꦏꦺ. ꦆꦢꦁ ꦮꦸꦕ꧀ꦕꦠꦶ ꦫꦹꦥꦁ ꦢꦹꦫꦺꦠꦶ ꦆꦢꦁ ꦥꦟ꧀ꦟꦫꦱꦮꦶꦣꦁ ꦱꦸꦑꦸꦩꦫꦹꦥꦁ ꦭꦏ꧀ꦑꦟꦠꦺꦴ ꦢꦹꦫꦺ, ꦢꦱꦮꦶꦣꦁ ꦥꦤ ꦎꦭ꦳ꦴꦫꦶꦏꦫꦹꦥꦁ ꦪꦺꦮꦴꦥꦤꦏꦮꦱꦺꦤ ꦎꦏꦴꦱꦠꦺꦴ ꦢꦹꦫꦺꦠꦶ ꦮꦸꦕ꧀ꦕꦠꦶ. ꦱꦤ꧀ꦠꦶꦏꦥꦢꦤꦶꦢ꧀ꦢꦺꦱꦺꦴ ꦈꦠ꧀ꦠꦴꦤꦠ꧀ꦡꦺꦴꦪꦺꦮ.

ꦆꦢꦁ ꦮꦸꦕ꧀ꦕꦠꦶ ꦫꦹꦥꦁ ꦱꦤ꧀ꦠꦶꦏꦺꦠꦶ ꦆꦢꦁ ꦢꦱꦮꦶꦣꦁ ꦎꦭ꦳ꦴꦫꦶꦏꦫꦹꦥꦁ ꦭꦏ꧀ꦑꦟꦠꦺꦴ ꦱꦤ꧀ꦠꦶꦏꦺ, ꦥꦚ꧀ꦕꦢꦱꦮꦶꦣꦁ ꦥꦤ ꦱꦸꦑꦸꦩꦫꦹꦥꦁ ꦪꦺꦮꦴꦥꦤꦏꦮꦱꦺꦤ ꦎꦏꦴꦱꦠꦺꦴ ꦱꦤ꧀ꦠꦶꦏꦺꦠꦶ ꦮꦸꦕ꧀ꦕꦠꦶ. ꦏꦶꦠ꧀ꦠꦏꦠꦺꦴ ꦥꦛ꧀ꦜꦴꦪ ꦥꦤ ꦫꦹꦥꦁ ꦎꦏꦴꦱꦮꦱꦺꦤ ꦱꦤ꧀ꦠꦶꦏꦺ ꦤꦴꦩ? ꦏꦶꦠ꧀ꦠꦏꦠꦺꦴ ꦥꦛ꧀ꦜꦴꦪ ꦢꦹꦫꦺ ꦤꦴꦩꦴꦠꦶ? ꦥꦏꦠꦶꦏꦡꦴꦪ ꦏꦡꦺꦤ꧀ꦠꦴꦤꦁ ꦢ꧀ꦮꦴꦢꦱꦲꦠ꧀ꦡꦺꦴ ꦱꦮꦤꦹꦥꦕꦴꦫꦺꦴ ꦤꦴꦩ ꦲꦺꦴꦠꦶ. ꦠꦱ꧀ꦱ ꦎꦫꦠꦺꦴ ꦫꦹꦥꦁ ꦱꦤ꧀ꦠꦶꦏꦺ, ꦥꦫꦠꦺꦴ ꦢꦹꦫꦺ. ꦠꦠ꧀ꦡ ꦱꦸꦑꦸꦩꦫꦹꦥꦁ ꦢꦹꦫꦺ ꦲꦺꦴꦤ꧀ꦠꦁ ꦭꦏ꧀ꦑꦟꦠꦺꦴꦥꦶ ꦎꦏꦴꦱꦠꦺꦴꦥꦶ ꦢꦹꦫꦺ ꦲꦺꦴꦠꦶ; ꦱꦤ꧀ꦠꦶꦏꦺ ꦲꦺꦴꦤ꧀ꦠꦁ ꦥꦤ ꦎꦏꦴꦱꦠꦺꦴꦮ ꦱꦤ꧀ꦠꦶꦏꦺ ꦲꦺꦴꦠꦶ, ꦤ ꦭꦏ꧀ꦑꦟꦠꦺꦴ. ꦎꦭ꦳ꦴꦫꦶꦏꦫꦹꦥꦁ ꦱꦤ꧀ꦠꦶꦏꦺ ꦲꦺꦴꦤ꧀ꦠꦁ ꦭꦏ꧀ꦑꦟꦠꦺꦴꦥꦶ ꦎꦏꦴꦱꦠꦺꦴꦥꦶ ꦱꦤ꧀ꦠꦶꦏꦺ ꦲꦺꦴꦠꦶ; ꦢꦹꦫꦺ ꦲꦺꦴꦤ꧀ꦠꦁ ꦎꦏꦴꦱꦠꦺꦴꦮ ꦢꦹꦫꦺ ꦲꦺꦴꦠꦶ, ꦤ ꦭꦏ꧀ꦑꦟꦠꦺꦴ.

ꦠꦁ ꦠꦁ ꦮꦴ ꦥꦤꦴꦠꦶ ꦌꦠ꧀ꦡ ꦤ ꦲꦺꦛ꧀ꦜꦶꦩꦤꦪꦺꦴ ꦎꦭꦺꦴꦏꦺꦠꦧ꧀ꦧꦺꦴ. ꦲꦺꦛ꧀ꦜꦴ ꦲꦶ ꦨꦶꦤ꧀ꦢꦩꦴꦤꦺꦴ ꦒꦠꦺꦴ. ꦆꦣ ꦥꦤ ꦤ ꦭꦏ꧀ꦑꦟꦠꦺꦴ ꦢꦹꦫꦁ ꦨꦶꦤ꧀ꦢꦠꦶ, ꦎꦏꦴꦱꦠꦺꦴ ꦢꦹꦫꦩꦺꦮ ꦨꦶꦤ꧀ꦢꦠꦶ. ꦈꦥꦴꦢꦴꦪꦸꦥꦴꦢꦴꦪ ꦢꦹꦫꦱꦤ꧀ꦠꦶꦏꦚ꧀ꦲꦶ ꦌꦠ꧀ꦡ ꦢꦱ꧀ꦱꦶꦠꦁ. ꦄꦠ꧀ꦠꦤꦺꦴ ꦲꦶ ꦫꦹꦥꦁ ꦱꦤ꧀ꦠꦶꦏꦺ ꦤꦴꦩ; ꦄꦤ꧀ꦠꦺꦴꦏꦸꦕ꧀ꦖꦶꦒꦠꦱ꧀ꦱꦴꦥꦶ ꦥꦫꦱ꧀ꦱ ꦢꦹꦫꦺ. ꦄꦤ꧀ꦠꦺꦴꦏꦸꦕ꧀ꦖꦶꦒꦠꦱ꧀ꦱ ꦱꦤ꧀ꦠꦶꦏꦺ; ꦧꦲꦶꦜꦶꦠꦱ꧀ꦱ ꦢꦹꦫꦺ. ꦌꦏꦩꦚ꧀ꦕꦺ ꦱꦪꦶꦠꦱ꧀ꦱ ꦱꦤ꧀ꦠꦶꦏꦺ; ꦧꦲꦶꦥꦩꦸꦑꦺ ꦜꦶꦠꦱ꧀ꦱ ꦢꦹꦫꦺ. ꦄꦤ꧀ꦠꦺꦴꦥꦫꦶꦮꦺꦟꦺ ꦫꦹꦥꦁ ꦱꦤ꧀ꦠꦶꦏꦺ; ꦧꦲꦶꦥꦫꦶꦮꦺꦟꦺ ꦢꦹꦫꦺ. ꦄꦤ꧀ꦠꦺꦴꦱꦔ꧀ꦓꦴꦫꦴꦩꦺ ꦫꦹꦥꦁ ꦱꦤ꧀ꦠꦶꦏꦺ; ꦧꦲꦶꦱꦔ꧀ꦓꦴꦫꦴꦩꦺ ꦢꦹꦫꦺ. ꦄꦤ꧀ꦠꦺꦴꦱꦷꦩꦴꦪ ꦫꦹꦥꦁ ꦱꦤ꧀ꦠꦶꦏꦺ; ꦧꦲꦶꦱꦷꦩꦴꦪ ꦢꦹꦫꦺ. ꦄꦤ꧀ꦠꦺꦴꦒꦴꦩꦑꦺꦠ꧀ꦠꦺ ꦫꦹꦥꦁ ꦱꦤ꧀ꦠꦶꦏꦺ; ꦧꦲꦶꦒꦴꦩꦏ꧀ꦑꦺꦠ꧀ꦠꦺ ꦢꦹꦫꦺ. ꦄꦤ꧀ꦠꦺꦴꦗꦤꦥꦢꦺ ꦫꦹꦥꦁ ꦱꦤ꧀ꦠꦶꦏꦺ; ꦧꦲꦶꦗꦤꦥꦢꦺ ꦢꦹꦫꦺ. ꦄꦤ꧀ꦠꦺꦴꦫꦗ꧀ꦗꦱꦷꦩꦴꦪ ꦫꦹꦥꦁ ꦱꦤ꧀ꦠꦶꦏꦺ; ꦧꦲꦶꦫꦗ꧀ꦗꦱꦷꦩꦴꦪ ꦢꦹꦫꦺ. ꦄꦤ꧀ꦠꦺꦴꦱꦩꦸꦢ꧀ꦢꦺ ꦫꦹꦥꦁ ꦱꦤ꧀ꦠꦶꦏꦺ; ꦧꦲꦶꦱꦩꦸꦢ꧀ꦢꦺꦫꦹꦥꦁ ꦢꦹꦫꦺ. ꦄꦤ꧀ꦠꦺꦴꦕꦏ꧀ꦏꦮꦴꦭ꦳ꦺ ꦫꦹꦥꦁ ꦱꦤ꧀ꦠꦶꦏꦺ; ꦧꦲꦶꦕꦏ꧀ꦏꦮꦴꦭ꦳ꦺ ꦢꦹꦫꦺꦠꦶ.

ꦄꦪꦁ ꦫꦹꦥꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ.

꧒. ꦮꦺꦢꦤꦴꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ

꧘. ꦮꦺꦢꦤꦴꦏ꧀ꦑꦤ꧀ꦣꦤꦶꦢ꧀ꦢꦺꦱꦴꦢꦷꦱꦸ ꦲꦺꦛ꧀ꦜꦴ ꦮꦸꦠ꧀ꦠꦱꦢꦶꦱꦁ ꦥꦲꦴꦪ ꦄꦥꦸꦧ꧀ꦧꦩꦺꦮ ꦮꦟ꧀ꦟꦪꦶꦱ꧀ꦱꦴꦩ. ꦪꦴ ꦏꦴꦕꦶ ꦮꦺꦢꦤꦴꦠꦶ ꦕꦠꦸꦨꦹꦩꦶꦏꦮꦺꦢꦤꦁ ꦥꦫꦶꦪꦴꦢꦶꦪꦠꦶ. ꦱꦸꦑꦴ ꦮꦺꦢꦤꦴꦠꦶꦄꦴꦢꦷꦤꦶ ꦄꦠꦷꦠꦴꦢꦶꦮꦱꦺꦤ ꦤꦶꦢ꧀ꦢꦶꦛ꧀ꦜꦮꦺꦢꦤꦁ ꦱꦨꦴꦮꦠꦺꦴ ꦢꦱ꧀ꦱꦺꦠꦸꦁ ꦮꦸꦠ꧀ꦠꦴꦤꦶ. ꦠꦠ꧀ꦡ ꦱꦸꦑꦴ ꦮꦺꦢꦤꦴ ꦄꦠ꧀ꦡꦶ ꦏꦴꦪꦶꦏꦴ, ꦄꦠ꧀ꦡꦶ ꦕꦺꦠꦱꦶꦏꦴ. ꦠꦡꦴ ꦢꦸꦏ꧀ꦑꦴ ꦮꦺꦢꦤꦴ. ꦄꦢꦸꦏ꧀ꦑꦩꦱꦸꦑꦴ ꦥꦤ ꦕꦏ꧀ꦑꦴꦢꦪꦺꦴ ꦥꦱꦴꦢꦏꦴꦪꦺ ꦱꦤ꧀ꦣꦴꦪ ꦥꦫꦶꦪꦴꦪꦺꦤ ‘ꦄꦠ꧀ꦡꦶ ꦏꦴꦪꦶꦏꦴ, ꦄꦠ꧀ꦡꦶ ꦕꦺꦠꦱꦶꦏꦴ’. ꦠꦠ꧀ꦡ ꦱꦧ꧀ꦧꦴꦥꦶ ꦏꦴꦪꦶꦏꦴ ꦏꦴꦩꦴꦮꦕꦫꦴ. ꦠꦡꦴ ꦕꦺꦠꦱꦶꦏꦴ ꦢꦸꦏ꧀ꦑꦴ ꦮꦺꦢꦤꦴ. ꦕꦺꦠꦱꦶꦏꦴ ꦱꦸꦑꦴ ꦥꦤ ꦠꦺꦨꦹꦩꦶꦏꦴ. ꦄꦢꦸꦏ꧀ꦑꦩꦱꦸꦑꦴ ꦕꦠꦸꦨꦹꦩꦶꦏꦴ. ꦠꦱ꧀ꦱꦴ ꦱꦧ꧀ꦧꦥ꧀ꦥꦏꦴꦫꦴꦪꦥꦶ ꦱꦤ꧀ꦠꦠꦶꦮꦱꦺꦤ, ꦑꦟꦴꦢꦶꦮꦱꦺꦤ ꦕ ꦄꦠꦷꦠꦴꦢꦶꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ.

ꦠꦠ꧀ꦡ ꦱꦤ꧀ꦠꦠꦶꦮꦱꦺꦤ ꦌꦏꦮꦷꦡꦶꦌꦏꦗꦮꦤꦌꦏꦱꦩꦴꦥꦠ꧀ꦠꦶꦥꦫꦶꦪꦴꦥꦤ꧀ꦤꦴ, ꦌꦏꦮꦶꦣꦮꦶꦱꦪꦱꦩꦴꦪꦺꦴꦒꦥ꧀ꦥꦮꦠ꧀ꦠꦴ ꦕ ꦥꦕ꧀ꦕꦸꦥ꧀ꦥꦤ꧀ꦤꦴ. ꦠꦠꦺꦴ ꦥꦸꦧ꧀ꦧꦺ ꦄꦠꦷꦠꦴ, ꦥꦕ꧀ꦖꦴ ꦄꦤꦴꦒꦠꦴ. ꦑꦟꦴꦢꦶꦮꦱꦺꦤ ꦑꦟꦠ꧀ꦠꦪꦥꦫꦶꦪꦴꦥꦤ꧀ꦤꦴ ꦥꦸꦧ꧀ꦧꦤ꧀ꦠꦴꦥꦫꦤ꧀ꦠꦩꦗ꧀ꦙꦒꦠꦴ ꦱꦏꦶꦕ꧀ꦕꦚ꧀ꦕ ꦏꦸꦫꦸꦩꦴꦤꦴ ꦮꦺꦢꦤꦴ ꦥꦕ꧀ꦕꦸꦥ꧀ꦥꦤ꧀ꦤꦴ. ꦠꦠꦺꦴ ꦥꦸꦧ꧀ꦧꦺ ꦄꦠꦷꦠꦴ, ꦥꦕ꧀ꦖꦴ ꦄꦤꦴꦒꦠꦴ. ꦠꦠ꧀ꦡ ꦑꦟꦴꦢꦶꦮꦱꦺꦤ ꦄꦠꦷꦠꦴꦢꦶꦨꦴꦮꦁ ꦱꦤ꧀ꦣꦴꦪ ꦄꦪꦁ ꦤꦶꦢ꧀ꦢꦺꦱꦺꦴ ꦏꦠꦺꦴꦠꦶ ꦮꦺꦢꦶꦠꦧ꧀ꦧꦺꦴ.

꧑꧑. ꦎꦭ꦳ꦴꦫꦶꦏꦱꦸꦑꦸꦩꦤꦶꦢ꧀ꦢꦺꦱꦺ ꦄꦏꦸꦱꦭꦴ ꦮꦺꦢꦤꦴꦠꦶꦄꦴꦢꦷꦤꦶ ꦗꦴꦠꦶꦠꦺꦴ ꦎꦭ꦳ꦴꦫꦶꦏꦱꦸꦑꦸꦩꦨꦴꦮꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦴꦤꦶ. ꦢꦸꦏ꧀ꦑꦴ ꦮꦺꦢꦤꦴ ꦎꦭ꦳ꦴꦫꦶꦏꦴꦠꦶꦄꦴꦢꦷꦤꦶ ꦱꦨꦴꦮꦠꦺꦴ. ꦄꦱꦩꦴꦥꦤ꧀ꦤꦱ꧀ꦱ ꦮꦺꦢꦤꦴꦠꦶꦄꦴꦢꦷꦤꦶ ꦥꦸꦒ꧀ꦒꦭꦠꦺꦴ. ꦱꦴꦱꦮꦴꦠꦶꦄꦴꦢꦷꦤꦶ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦠꦺꦴ ꦎꦭ꦳ꦴꦫꦶꦏꦱꦸꦑꦸꦩꦨꦴꦮꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦴꦤꦶ. ꦠꦠ꧀ꦡ ꦄꦏꦸꦱꦭꦴ ꦠꦴꦮ ꦱꦢꦫꦡꦛ꧀ꦜꦺꦤ ꦢꦸꦏ꧀ꦑꦮꦶꦥꦴꦏꦛ꧀ꦜꦺꦤ ꦕ ꦎꦭ꦳ꦴꦫꦶꦏꦴ. ꦏꦸꦱꦭꦴ ꦤꦶꦢ꧀ꦢꦫꦡꦛ꧀ꦜꦺꦤ ꦱꦸꦑꦮꦶꦥꦴꦏꦛ꧀ꦜꦺꦤ ꦕ ꦱꦸꦑꦸꦩꦴ. ꦄꦧ꧀ꦪꦴꦏꦠꦴ ꦤꦶꦫꦸꦱ꧀ꦱꦴꦲꦛ꧀ꦜꦺꦤ ꦄꦮꦶꦥꦴꦏꦛ꧀ꦜꦺꦤ ꦕ ꦱꦸꦑꦸꦩꦴ. ꦏꦸꦱꦭꦴꦏꦸꦱꦭꦴ ꦱꦈꦱ꧀ꦱꦴꦲꦛ꧀ꦜꦺꦤ ꦱꦮꦶꦥꦴꦏꦛ꧀ꦜꦺꦤ ꦕ ꦎꦭ꦳ꦴꦫꦶꦏꦴ. ꦄꦧ꧀ꦪꦴꦏꦠꦴ ꦮꦸꦠ꧀ꦠꦤꦪꦺꦤꦺꦮ ꦱꦸꦑꦸꦩꦴ.

ꦢꦸꦏ꧀ꦑꦴ ꦄꦱꦴꦠꦛ꧀ꦜꦺꦤ ꦢꦸꦏ꧀ꦑꦛ꧀ꦜꦺꦤ ꦕ ꦎꦭ꦳ꦴꦫꦶꦏꦴ. ꦱꦸꦑꦴ ꦱꦴꦠꦛ꧀ꦜꦺꦤ ꦱꦸꦑꦛ꧀ꦜꦺꦤ ꦕ ꦱꦸꦑꦸꦩꦴ. ꦄꦢꦸꦏ꧀ꦑꦩꦱꦸꦑꦴ ꦱꦤ꧀ꦠꦛ꧀ꦜꦺꦤ ꦥꦟꦷꦠꦛ꧀ꦜꦺꦤ ꦕ ꦱꦸꦑꦸꦩꦴ. ꦱꦸꦑꦢꦸꦏ꧀ꦑꦴ ꦑꦺꦴꦨꦤꦛ꧀ꦜꦺꦤ ꦦꦫꦟꦛ꧀ꦜꦺꦤ ꦕ ꦎꦭ꦳ꦴꦫꦶꦏꦴ. ꦱꦸꦑꦮꦺꦢꦤꦴꦥꦶ ꦲꦶ ꦑꦺꦴꦨꦺꦠꦶ ꦦꦫꦠꦶ. ꦠꦡꦴ ꦢꦸꦏ꧀ꦑꦮꦺꦢꦤꦴꦥꦶ. ꦱꦸꦑꦚ꧀ꦲꦶ ꦈꦥ꧀ꦥꦗ꧀ꦗꦩꦴꦤꦁ ꦱꦏꦭꦱꦫꦷꦫꦁ ꦑꦺꦴꦨꦺꦤ꧀ꦠꦁ ꦄꦴꦭꦸꦭ꦳ꦺꦤ꧀ꦠꦁ ꦄꦨꦶꦱꦤ꧀ꦢꦪꦩꦴꦤꦁ ꦩꦢ꧀ꦢꦪꦩꦴꦤꦁ ꦖꦴꦢꦪꦩꦴꦤꦁ ꦱꦷꦠꦺꦴꦢꦏꦓꦛꦺꦤ ꦄꦴꦱꦶꦚ꧀ꦕꦪꦩꦴꦤꦁ ꦮꦶꦪ ꦈꦥ꧀ꦥꦗ꧀ꦗꦠꦶ. ꦢꦸꦏ꧀ꦑꦁ ꦈꦥ꧀ꦥꦗ꧀ꦗꦩꦴꦤꦁ ꦠꦠ꧀ꦠꦦꦴꦭꦁ ꦄꦤ꧀ꦠꦺꦴ ꦥꦮꦺꦱꦤ꧀ꦠꦁ ꦮꦶꦪ ꦠꦶꦟꦸꦏ꧀ꦏꦴꦪ ꦧꦲꦶ ꦙꦴꦥꦪꦩꦴꦤꦁ ꦮꦶꦪ ꦈꦥ꧀ꦥꦗ꧀ꦗꦠꦶ. ꦄꦢꦸꦏ꧀ꦑꦩꦱꦸꦑꦴ ꦥꦤ ꦮꦸꦠ꧀ꦠꦤꦪꦺꦤꦺꦮ ꦱꦸꦑꦸꦩꦴ. ꦄꦱꦩꦴꦥꦤ꧀ꦤꦱ꧀ꦱ ꦮꦺꦢꦤꦴ ꦤꦴꦤꦴꦫꦩ꧀ꦩꦟꦺ ꦮꦶꦏ꧀ꦑꦶꦠ꧀ꦠꦨꦴꦮꦠꦺꦴ ꦎꦭ꦳ꦴꦫꦶꦏꦴ. ꦱꦩꦴꦥꦤ꧀ꦤꦱ꧀ꦱ ꦮꦺꦢꦤꦴ ꦌꦏꦠ꧀ꦠꦤꦶꦩꦶꦠ꧀ꦠꦺꦪꦺꦮ ꦕꦫꦠꦷꦠꦶ ꦱꦸꦑꦸꦩꦴ. ꦱꦴꦱꦮꦴ ꦄꦴꦱꦮꦸꦥ꧀ꦥꦠ꧀ꦠꦶꦲꦺꦠꦸꦠꦺꦴ ꦎꦭ꦳ꦴꦫꦶꦏꦴ. ꦄꦴꦱꦮꦕꦴꦫꦺꦴ ꦤꦴꦩ ꦌꦏꦤ꧀ꦠꦎꦭ꦳ꦴꦫꦶꦏꦺꦴ. ꦄꦤꦴꦱꦮꦴ ꦮꦸꦠ꧀ꦠꦮꦶꦥꦫꦶꦪꦴꦪꦺꦤ ꦱꦸꦑꦸꦩꦴ.

ꦠꦠ꧀ꦡ ꦌꦏꦺꦴ ꦤꦺꦮ ꦏꦸꦱꦭꦠ꧀ꦠꦶꦏꦺ ꦏꦺꦴꦮꦶꦢꦺꦴ ꦲꦺꦴꦠꦶ, ꦤ ꦮꦺꦢꦤꦴꦠ꧀ꦠꦶꦏꦺ. ꦱꦺꦴ ‘ꦏꦸꦱꦭꦠ꧀ꦠꦶꦏꦁ ꦫꦏ꧀ꦑꦴꦩꦷ’ꦠꦶ ꦮꦺꦢꦤꦴꦠ꧀ꦠꦶꦏꦁ ꦨꦶꦤ꧀ꦢꦠꦶ; ‘ꦮꦺꦢꦤꦴꦠ꧀ꦠꦶꦏꦁ ꦫꦏ꧀ꦑꦴꦩꦷ’ꦠꦶ ꦏꦸꦱꦭꦠ꧀ꦠꦶꦏꦁ ꦨꦶꦤ꧀ꦢꦠꦶ. ꦌꦏꦺꦴ ‘ꦠꦶꦏꦁ ꦫꦏ꧀ꦑꦴꦩꦷ’ꦠꦶ ꦨꦹꦩꦤ꧀ꦠꦫꦁ ꦨꦶꦤ꧀ꦢꦠꦶ. ꦌꦏꦺꦴ ꦤ ꦨꦶꦤ꧀ꦢꦠꦶ. ꦏꦡꦁ? ‘‘ꦱꦸꦑꦢꦸꦏ꧀ꦑꦴ ꦮꦺꦢꦤꦴ ꦎꦭ꦳ꦴꦫꦶꦏꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ ꦱꦸꦑꦸꦩꦴ’’ꦠꦶ ꦲꦶ ꦮꦺꦢꦤꦴꦠ꧀ꦠꦶꦏꦺ ꦮꦸꦠ꧀ꦠꦁ. ꦠꦁ ꦌꦏꦺꦴ ꦥꦛꦶꦏ꧀ꦑꦶꦥꦠꦶ – ꦤ ꦱꦧ꧀ꦧꦴ ꦄꦢꦸꦏ꧀ꦑꦩꦱꦸꦑꦴ ꦱꦸꦑꦸꦩꦴ. ꦱꦴ ꦲꦶ ꦏꦸꦱꦭꦴꦥꦶ ꦄꦠ꧀ꦡꦶ ꦄꦏꦸꦱꦭꦴꦥꦶ ꦄꦧ꧀ꦪꦴꦏꦠꦴꦥꦶ. ꦠꦠ꧀ꦡ ꦏꦸꦱꦭꦴꦏꦸꦱꦭꦴ ꦎꦭ꦳ꦴꦫꦶꦏꦴ, ꦄꦧ꧀ꦪꦴꦏꦠꦴ ꦱꦸꦑꦸꦩꦴ. ꦏꦱ꧀ꦩꦴ? ꦏꦸꦱꦭꦠ꧀ꦠꦶꦏꦺ ꦥꦴꦭ꦳ꦶꦪꦁ ꦄꦴꦒꦠꦠ꧀ꦠꦴꦠꦶ. ꦌꦮꦁ ꦏꦸꦱꦭꦠ꧀ꦠꦶꦏꦺꦴ ꦫꦏ꧀ꦑꦶꦠꦺꦴ ꦲꦺꦴꦠꦶ, ꦮꦺꦢꦤꦴꦠ꧀ꦠꦶꦏꦺꦴ ꦥꦤ ꦨꦶꦤ꧀ꦤꦺꦴ.

ꦏꦸꦱꦭꦴꦏꦸꦱꦭꦴ ꦮꦺꦢꦤꦴ ꦎꦭ꦳ꦴꦫꦶꦏꦴ, ꦄꦧ꧀ꦪꦴꦏꦠꦴ ꦮꦺꦢꦤꦴ ꦱꦸꦑꦸꦩꦴ’’ꦠꦶ ꦪꦁ ꦥꦤ ꦏꦸꦱꦭꦠ꧀ꦠꦶꦏꦺ ꦮꦸꦠ꧀ꦠꦁ, ꦠꦁ ꦌꦏꦺꦴ ꦥꦛꦶꦏ꧀ꦑꦶꦥꦠꦶ – ꦤ ꦱꦧ꧀ꦧꦴ ꦄꦧ꧀ꦪꦴꦏꦠꦴ ꦱꦸꦑꦸꦩꦴ. ꦱꦴ ꦲꦶ ꦱꦸꦑꦴꦥꦶ ꦄꦠ꧀ꦡꦶ ꦢꦸꦏ꧀ꦑꦴꦥꦶ ꦄꦢꦸꦏ꧀ꦑꦩꦱꦸꦑꦴꦥꦶ. ꦠꦠ꧀ꦡ ꦱꦸꦑꦢꦸꦏ꧀ꦑꦴ ꦎꦭ꦳ꦴꦫꦶꦏꦴ, ꦄꦢꦸꦏ꧀ꦑꦩꦱꦸꦑꦴ ꦱꦸꦑꦸꦩꦴ. ꦏꦱ꧀ꦩꦴ? ꦮꦺꦢꦤꦴꦠ꧀ꦠꦶꦏꦺ ꦥꦴꦭ꦳ꦶꦪꦁ ꦄꦴꦒꦠꦠ꧀ꦠꦴꦠꦶ. ꦌꦮꦁ ꦮꦺꦢꦤꦴꦠ꧀ꦠꦶꦏꦺꦴ ꦫꦏ꧀ꦑꦶꦠꦺꦴ ꦲꦺꦴꦠꦶ, ꦏꦸꦱꦭꦠ꧀ꦠꦶꦏꦺꦴ ꦥꦤ ꦨꦶꦤ꧀ꦤꦺꦴ. ꦏꦸꦱꦭꦠ꧀ꦠꦶꦏꦱ꧀ꦱ ꦥꦤ ꦄꦴꦒꦠꦛ꧀ꦜꦴꦤꦺ ꦮꦺꦢꦤꦴꦠ꧀ꦠꦶꦏꦁ ꦄꦤꦺꦴꦭꦺꦴꦏꦺꦠ꧀ꦮꦴ ꦮꦺꦢꦤꦴꦠ꧀ꦠꦶꦏꦱ꧀ꦱ ꦄꦴꦒꦠꦛ꧀ꦜꦴꦤꦺ ꦏꦸꦱꦭꦠ꧀ꦠꦶꦏꦁ ꦄꦤꦺꦴꦭꦺꦴꦏꦺꦠ꧀ꦮꦴ ꦏꦸꦱꦭꦴꦢꦷꦤꦁ ꦏꦸꦱꦭꦠ꧀ꦠꦶꦏꦭꦏ꧀ꦑꦟꦺꦤ, ꦱꦸꦑꦴꦢꦷꦤꦁ ꦮꦺꦢꦤꦴꦠ꧀ꦠꦶꦏꦭꦏ꧀ꦑꦟꦺꦤ ꦎꦭ꦳ꦴꦫꦶꦏꦱꦸꦑꦸꦩꦠꦁ ꦏꦡꦺꦤ꧀ꦠꦺꦴ ꦤ ꦨꦶꦤ꧀ꦢꦠꦶ ꦤꦴꦩ.

ꦪꦩ꧀ꦥꦶ ‘‘ꦏꦸꦱꦭꦴꦏꦸꦱꦭꦴ ꦮꦺꦢꦤꦴ ꦎꦭ꦳ꦴꦫꦶꦏꦴ, ꦄꦧ꧀ꦪꦴꦏꦠꦴ ꦮꦺꦢꦤꦴ ꦱꦸꦑꦸꦩꦴ’’ꦠꦶ ꦏꦸꦱꦭꦠ꧀ꦠꦶꦏꦺ ꦮꦸꦠ꧀ꦠꦁ, ꦠꦠ꧀ꦡꦺꦏꦺꦴ ‘ꦏꦸꦱꦭꦴ ꦭꦺꦴꦏꦸꦠ꧀ꦠꦫꦮꦺꦢꦤꦴꦥꦶ ꦱꦩꦴꦤꦴ ꦎꦭ꦳ꦴꦫꦶꦏꦴ ꦤꦴꦩ, ꦮꦶꦥꦴꦏꦴ ꦄꦤ꧀ꦠꦩꦱꦺꦴ ꦢ꧀ꦮꦶꦥꦚ꧀ꦕꦮꦶꦚ꧀ꦚꦴꦟꦱꦲꦗꦴꦠꦴꦥꦶ ꦱꦩꦴꦤꦴ ꦱꦸꦑꦸꦩꦴ ꦤꦴꦩ ꦲꦺꦴꦠꦷ’ꦠꦶ ꦮꦢꦠꦶ. ꦱꦺꦴ ꦌꦮꦫꦹꦥꦁ ꦱꦤ꧀ꦠꦁ ꦥꦟꦷꦠꦁ ꦭꦺꦴꦏꦸꦠ꧀ꦠꦫꦮꦺꦢꦤꦁ ꦎꦭ꦳ꦴꦫꦶꦏꦁ ꦤꦴꦩ ꦏꦫꦺꦴꦤ꧀ꦠꦺꦴ, ꦢ꧀ꦮꦶꦥꦚ꧀ꦕꦮꦶꦚ꧀ꦚꦴꦟꦱꦩ꧀ꦥꦪꦸꦠ꧀ꦠꦁ ꦄꦲꦺꦠꦸꦏꦁ ꦲꦷꦤꦁ ꦗꦭ꦳ꦁ ꦮꦺꦢꦤꦁ ꦱꦸꦑꦸꦩꦁ ꦤꦴꦩ ꦏꦫꦺꦴꦤ꧀ꦠꦺꦴ ‘ꦠꦶꦏꦁ ꦫꦏ꧀ꦑꦶꦱ꧀ꦱꦴꦩꦷ’ꦠꦶ ꦨꦹꦩꦤ꧀ꦠꦫꦁ ꦨꦶꦤ꧀ꦢꦠꦶ ꦤꦴꦩ. ꦠꦠ꧀ꦡ ꦠꦠ꧀ꦡ ꦨꦹꦩꦶꦪꦁ ꦏꦸꦱꦭꦁ ꦥꦤ ꦠꦁꦠꦁꦨꦹꦩꦶꦮꦶꦥꦴꦏꦺꦤꦺꦮ ꦱꦢ꧀ꦣꦶꦁ ꦪꦺꦴꦗꦺꦠ꧀ꦮꦴ ꦏꦡꦺꦤ꧀ꦠꦺꦴ ꦤ ꦨꦶꦤ꧀ꦢꦠꦶ ꦤꦴꦩ. ꦠꦠ꧀ꦫꦴꦪꦁ ꦤꦪꦺꦴ – ꦏꦴꦩꦴꦮꦕꦫꦏꦸꦱꦭꦴ ꦲꦶ ꦎꦭ꦳ꦴꦫꦶꦏꦴ; ꦏꦴꦩꦴꦮꦕꦫꦮꦶꦥꦴꦏꦴ ꦱꦸꦑꦸꦩꦴ. ꦫꦹꦥꦴꦮꦕꦫꦴꦫꦹꦥꦴꦮꦕꦫꦭꦺꦴꦏꦸꦠ꧀ꦠꦫꦏꦸꦱꦭꦴ ꦎꦭ꦳ꦴꦫꦶꦏꦴ; ꦫꦹꦥꦴꦮꦕꦫꦴꦫꦹꦥꦴꦮꦕꦫꦭꦺꦴꦏꦸꦠ꧀ꦠꦫꦮꦶꦥꦴꦏꦴ ꦱꦸꦑꦸꦩꦴꦠꦶ. ꦆꦩꦶꦤꦴ ꦤꦷꦲꦴꦫꦺꦤ ꦏꦡꦺꦤ꧀ꦠꦺꦴ ꦤ ꦨꦶꦤ꧀ꦢꦠꦶ ꦤꦴꦩ.

ꦠꦶꦥꦶꦛꦏꦕꦹꦭ꦳ꦤꦴꦒꦠ꧀ꦡꦺꦫꦺꦴ ꦥꦤꦴꦲ – ‘‘ꦄꦏꦸꦱꦭꦺ ꦎꦭ꦳ꦴꦫꦶꦏꦱꦸꦑꦸꦩꦠꦴ ꦤꦴꦩ ꦤ ꦈꦢ꧀ꦣꦫꦶꦠꦧ꧀ꦧꦴ. ꦠꦚ꧀ꦲꦶ ꦌꦏꦤ꧀ꦠꦎꦭ꦳ꦴꦫꦶꦏꦩꦺꦮ. ꦭꦺꦴꦏꦸꦠ꧀ꦠꦫꦺꦥꦶ ꦎꦭ꦳ꦴꦫꦶꦏꦱꦸꦑꦸꦩꦠꦴ ꦤ ꦈꦢ꧀ꦣꦫꦶꦠꦧ꧀ꦧꦴ. ꦠꦚ꧀ꦲꦶ ꦌꦏꦤ꧀ꦠꦱꦸꦑꦸꦩ’’ꦤ꧀ꦠꦶ. ꦆꦩꦁ ꦏꦡꦁ ꦄꦴꦲꦫꦶꦠ꧀ꦮꦴ ꦠꦶꦥꦶꦛꦏꦕꦹꦭ꦳ꦴꦨꦪꦠ꧀ꦡꦺꦫꦱ꧀ꦱ ꦏꦡꦪꦶꦁꦱꦸ – ꦌꦮꦁ ꦡꦺꦫꦺꦤ ꦏꦡꦶꦠꦤ꧀ꦠꦶ. ꦠꦶꦥꦶꦛꦏꦕꦹꦭ꦳ꦴꦨꦪꦠ꧀ꦡꦺꦫꦺꦴ ꦄꦴꦲ – ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦄꦨꦶꦣꦩ꧀ꦩꦁ ꦥꦠ꧀ꦮꦴ ꦌꦏꦥꦢꦱ꧀ꦱꦴꦥꦶ ꦢ꧀ꦮꦶꦤ꧀ꦤꦩ꧀ꦥꦶ ꦥꦢꦴꦤꦁ ꦄꦴꦒꦠꦛ꧀ꦜꦴꦤꦺ ꦤꦪꦁ ꦢꦴꦠꦸꦁ ꦪꦸꦠ꧀ꦠꦛ꧀ꦜꦴꦤꦺ ꦤꦪꦺꦴ ꦄꦢꦶꦤ꧀ꦤꦺꦴ ꦤꦴꦩ ꦤꦠ꧀ꦡꦶ, ꦤꦪꦁ ꦏꦴꦠꦸꦁ ꦪꦸꦠ꧀ꦠꦛ꧀ꦜꦴꦤꦺ ꦤꦪꦺꦴ ꦄꦏꦠꦺꦴ ꦤꦴꦩ ꦤꦠ꧀ꦡꦶ. ꦆꦣ ꦥꦤꦺꦏꦕ꧀ꦕꦺꦴ ‘ꦄꦴꦕꦫꦶꦪꦺꦴ ꦄꦱ꧀ꦩꦷ’ꦠꦶ ꦮꦶꦕꦫꦤ꧀ꦠꦺꦴ ꦄꦏꦸꦱꦭꦺ ꦎꦭ꦳ꦴꦫꦶꦏꦱꦸꦑꦸꦩꦠꦁ ꦈꦢ꧀ꦣꦫꦩꦴꦤꦺꦴ ꦏꦸꦏ꧀ꦏꦸꦕ꧀ꦕꦴꦪꦠꦶ. ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦥꦤ ꦭꦺꦴꦏꦸꦠ꧀ꦠꦫꦺꦥꦶ ꦎꦭ꦳ꦴꦫꦶꦏꦱꦸꦑꦸꦩꦠꦴ ꦈꦢ꧀ꦣꦫꦶꦠꦴ’’ꦠꦶ. ꦌꦮꦚ꧀ꦕ ꦥꦤ ꦮꦠ꧀ꦮꦴ ꦆꦢꦁ ꦱꦸꦠ꧀ꦠꦁ ꦄꦴꦲꦫꦶ – ‘‘ꦠꦠ꧀ꦫ, ꦨꦤ꧀ꦠꦺ, ꦪꦴꦪꦁ ꦥꦛꦶꦥꦢꦴ ꦢꦸꦏ꧀ꦑꦴ ꦢꦤ꧀ꦣꦴꦨꦶꦚ꧀ꦚꦴ, ꦄꦪꦁ, ꦨꦤ꧀ꦠꦺ, ꦥꦛꦶꦥꦢꦴ ꦈꦨꦪꦺꦤꦺꦮ ꦲꦷꦤꦴ ꦄꦏ꧀ꦑꦴꦪꦠꦶ – ꦢꦸꦏ꧀ꦑꦠ꧀ꦠꦴ ꦢꦤ꧀ꦣꦠ꧀ꦠꦴ ꦕꦴ’’ꦠꦶ (ꦢꦷ. ꦤꦶ. ꧓.꧑꧕꧒). ꦌꦠ꧀ꦡ ꦲꦶ ꦕꦠꦱ꧀ꦱꦺꦴ ꦥꦛꦶꦥꦢꦴ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦩꦶꦱ꧀ꦱꦏꦴ ꦏꦡꦶꦠꦴ.

ꦠꦁ ꦠꦁ ꦮꦴ ꦥꦤꦴꦠꦶ ꦌꦠ꧀ꦡ ꦤ ꦲꦺꦛ꧀ꦜꦶꦩꦤꦪꦺꦴ ꦎꦭꦺꦴꦏꦺꦠꦧ꧀ꦧꦺꦴ. ꦠꦁꦠꦁꦮꦴꦥꦤꦮꦱꦺꦤꦺꦮ ꦏꦡꦺꦠꦧ꧀ꦧꦁ. ꦢꦸꦮꦶꦣꦴ ꦲꦶ ꦄꦏꦸꦱꦭꦴ – ꦭꦺꦴꦨꦱꦲꦒꦠꦴ ꦢꦺꦴꦱꦱꦲꦒꦠꦴ ꦕ. ꦠꦠ꧀ꦡ ꦢꦺꦴꦱꦱꦲꦒꦠꦴ ꦎꦭ꦳ꦴꦫꦶꦏꦴ, ꦭꦺꦴꦨꦱꦲꦒꦠꦴ ꦱꦸꦑꦸꦩꦴ. ꦢꦺꦴꦱꦱꦲꦒꦠꦴꦥꦶ ꦢꦸꦮꦶꦣꦴ – ꦤꦶꦪꦠꦴ ꦄꦤꦶꦪꦠꦴ ꦕ. ꦠꦠ꧀ꦡ ꦤꦶꦪꦠꦴ ꦎꦭ꦳ꦴꦫꦶꦏꦴ, ꦄꦤꦶꦪꦠꦴ ꦱꦸꦑꦸꦩꦴ. ꦤꦶꦪꦠꦴꦥꦶ ꦏꦥ꧀ꦥꦛ꧀ꦜꦶꦠꦶꦏꦴ ꦎꦭ꦳ꦴꦫꦶꦏꦴ, ꦤꦺꦴꦏꦥ꧀ꦥꦛ꧀ꦜꦶꦠꦶꦏꦴ ꦱꦸꦑꦸꦩꦴ. ꦏꦥ꧀ꦥꦛ꧀ꦜꦶꦠꦶꦏꦴꦥꦶ ꦄꦱꦔ꧀ꦑꦴꦫꦶꦏꦴ ꦎꦭ꦳ꦴꦫꦶꦏꦴ, ꦱꦱꦔ꧀ꦑꦴꦫꦶꦏꦴ ꦱꦸꦑꦸꦩꦴ. ꦭꦺꦴꦨꦱꦲꦒꦠꦴꦥꦶ ꦢ꧀ꦮꦶꦣꦴ – ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦴ ꦢꦶꦛ꧀ꦜꦶꦮꦶꦥ꧀ꦥꦪꦸꦠ꧀ꦠꦴ ꦕ. ꦠꦠ꧀ꦡ ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦴ ꦎꦭ꦳ꦴꦫꦶꦏꦴ, ꦢꦶꦛ꧀ꦜꦶꦮꦶꦥ꧀ꦥꦪꦸꦠ꧀ꦠꦴ ꦱꦸꦑꦸꦩꦴ. ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦴꦥꦶ ꦤꦶꦪꦠꦴ ꦎꦭ꦳ꦴꦫꦶꦏꦴ, ꦄꦤꦶꦪꦠꦴ ꦱꦸꦑꦸꦩꦴ. ꦱꦴꦥꦶ ꦄꦱꦔ꧀ꦑꦴꦫꦶꦏꦴ ꦎꦭ꦳ꦴꦫꦶꦏꦴ, ꦱꦱꦔ꧀ꦑꦴꦫꦶꦏꦴ ꦱꦸꦑꦸꦩꦴ.

ꦱꦔ꧀ꦑꦺꦥꦠꦺꦴ ꦄꦏꦸꦱꦭꦁ ꦥꦠ꧀ꦮꦴ ꦪꦴ ꦮꦶꦥꦴꦏꦁ ꦧꦲꦸꦁ ꦢꦺꦠꦶ ꦱꦴ ꦎꦭ꦳ꦴꦫꦶꦏꦴ, ꦪꦴ ꦄꦥ꧀ꦥꦁ ꦱꦴ ꦱꦸꦑꦸꦩꦴ. ꦏꦸꦱꦭꦁ ꦥꦠ꧀ꦮꦴ ꦥꦤ ꦄꦥ꧀ꦥꦮꦶꦥꦴꦏꦴ ꦎꦭ꦳ꦴꦫꦶꦏꦴ, ꦧꦲꦸꦮꦶꦥꦴꦏꦴ ꦱꦸꦑꦸꦩꦴ. ꦕꦠꦸꦧ꧀ꦧꦶꦣꦺ ꦏꦸꦱꦭꦺ ꦏꦴꦩꦴꦮꦕꦫꦏꦸꦱꦭꦴ ꦎꦭ꦳ꦴꦫꦶꦏꦴ, ꦫꦹꦥꦴꦮꦕꦫꦏꦸꦱꦭꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦄꦫꦹꦥꦴꦮꦕꦫꦏꦸꦱꦭꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦭꦺꦴꦏꦸꦠ꧀ꦠꦫꦏꦸꦱꦭꦴ ꦱꦸꦑꦸꦩꦴ. ꦄꦪꦁ ꦠꦴꦮ ꦨꦹꦩꦷꦱꦸ ꦄꦨꦺꦢꦠꦺꦴ ꦤꦪꦺꦴ.

ꦨꦺꦢꦠꦺꦴ ꦥꦤ ꦏꦴꦩꦴꦮꦕꦫꦴ ꦢꦴꦤꦱꦷꦭꦨꦴꦮꦤꦴꦩꦪꦮꦱꦺꦤ ꦠꦶꦮꦶꦣꦴ. ꦠꦠ꧀ꦡ ꦢꦴꦤꦩꦪꦴ ꦎꦭ꦳ꦴꦫꦶꦏꦴ, ꦱꦷꦭꦩꦪꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦨꦴꦮꦤꦴꦩꦪꦴ ꦱꦸꦑꦸꦩꦴ. ꦱꦴꦥꦶ ꦢꦸꦲꦺꦠꦸꦏꦴ ꦠꦶꦲꦺꦠꦸꦏꦴꦠꦶ ꦢꦸꦮꦶꦣꦴ. ꦠꦠ꧀ꦡ ꦢꦸꦲꦺꦠꦸꦏꦴ ꦎꦭ꦳ꦴꦫꦶꦏꦴ, ꦠꦶꦲꦺꦠꦸꦏꦴ ꦱꦸꦑꦸꦩꦴ. ꦠꦶꦲꦺꦠꦸꦏꦴꦥꦶ ꦱꦱꦔ꧀ꦑꦴꦫꦶꦏꦄꦱꦔ꧀ꦑꦴꦫꦶꦏꦨꦺꦢꦠꦺꦴ ꦢꦸꦮꦶꦣꦴ. ꦠꦠ꧀ꦡ ꦱꦱꦔ꧀ꦑꦴꦫꦶꦏꦴ ꦎꦭ꦳ꦴꦫꦶꦏꦴ, ꦄꦱꦔ꧀ꦑꦴꦫꦶꦏꦴ ꦱꦸꦑꦸꦩꦴ. ꦫꦹꦥꦴꦮꦕꦫꦺ ꦥꦜꦩꦗ꧀ꦙꦴꦤꦏꦸꦱꦭꦮꦺꦢꦤꦴ ꦎꦭ꦳ꦴꦫꦶꦏꦴ, ꦢꦸꦠꦶꦪꦗ꧀ꦙꦴꦤꦏꦸꦱꦭꦮꦺꦢꦤꦴ ꦱꦸꦑꦸꦩꦴ…ꦥꦺ… ꦕꦠꦸꦠ꧀ꦡꦗ꧀ꦙꦴꦤꦏꦸꦱꦭꦮꦺꦢꦤꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦄꦴꦏꦴꦱꦴꦤꦚ꧀ꦕꦴꦪꦠꦤꦏꦸꦱꦭꦮꦺꦢꦤꦴ ꦱꦸꦑꦸꦩꦴ ꦄꦴꦏꦴꦱꦴꦤꦚ꧀ꦕꦴꦪꦠꦤꦏꦸꦱꦭꦮꦺꦢꦤꦴ ꦎꦭ꦳ꦴꦫꦶꦏꦴ…ꦥꦺ…. ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦏꦸꦱꦭꦮꦺꦢꦤꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦮꦶꦥꦱ꧀ꦱꦤꦴꦱꦲꦗꦴꦠꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦱꦺꦴꦠꦴꦥꦠ꧀ꦠꦶꦩꦒ꧀ꦒꦱꦲꦗꦴꦠꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ…ꦥꦺ… ꦄꦫꦲꦠ꧀ꦠꦩꦒ꧀ꦒꦱꦲꦗꦴꦠꦴ ꦱꦸꦑꦸꦩꦴ.

ꦕꦠꦸꦧ꧀ꦧꦶꦣꦺ ꦮꦶꦥꦴꦏꦺ ꦏꦴꦩꦴꦮꦕꦫꦮꦶꦥꦴꦏꦮꦺꦢꦤꦴ ꦎꦭ꦳ꦴꦫꦶꦏꦴ, ꦫꦹꦥꦴꦮꦕꦫꦮꦶꦥꦴꦏꦮꦺꦢꦤꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ…ꦥꦺ… ꦭꦺꦴꦏꦸꦠ꧀ꦠꦫꦮꦶꦥꦴꦏꦮꦺꦢꦤꦴ ꦱꦸꦑꦸꦩꦴ. ꦌꦮꦁ ꦠꦴꦮ ꦄꦨꦺꦢꦠꦺꦴ.

ꦨꦺꦢꦠꦺꦴ ꦥꦤ ꦏꦴꦩꦴꦮꦕꦫꦮꦶꦥꦴꦏꦴ ꦄꦠ꧀ꦡꦶ ꦄꦲꦺꦠꦸꦏꦴ, ꦄꦠ꧀ꦡꦶ ꦱꦲꦺꦠꦸꦏꦴ. ꦱꦲꦺꦠꦸꦏꦴꦥꦶ ꦄꦠ꧀ꦡꦶ ꦢꦸꦲꦺꦠꦸꦏꦴ, ꦄꦠ꧀ꦡꦶ ꦠꦶꦲꦺꦠꦸꦏꦴ. ꦠꦠ꧀ꦡ ꦄꦲꦺꦠꦸꦏꦴ ꦎꦭ꦳ꦴꦫꦶꦏꦴ, ꦱꦲꦺꦠꦸꦏꦴ ꦱꦸꦑꦸꦩꦴ. ꦱꦴꦥꦶ ꦢꦸꦲꦺꦠꦸꦏꦴ ꦎꦭ꦳ꦴꦫꦶꦏꦴ, ꦠꦶꦲꦺꦠꦸꦏꦴ ꦱꦸꦑꦸꦩꦴ. ꦠꦠ꧀ꦡꦴꦥꦶ ꦱꦱꦔ꧀ꦑꦴꦫꦶꦏꦴ ꦎꦭ꦳ꦴꦫꦶꦏꦴ, ꦄꦱꦔ꧀ꦑꦴꦫꦶꦏꦴ ꦱꦸꦑꦸꦩꦴ. ꦥꦜꦩꦗ꧀ꦙꦴꦤꦮꦶꦥꦴꦏꦴ ꦎꦭ꦳ꦴꦫꦶꦏꦴ, ꦢꦸꦠꦶꦪꦗ꧀ꦙꦴꦤꦮꦶꦥꦴꦏꦴ ꦱꦸꦑꦸꦩꦴ…ꦥꦺ… ꦕꦠꦸꦠ꧀ꦡꦗ꧀ꦙꦴꦤꦮꦶꦥꦴꦏꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦄꦴꦏꦴꦱꦴꦤꦚ꧀ꦕꦴꦪꦠꦤꦮꦶꦥꦴꦏꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ…ꦥꦺ… ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦮꦶꦥꦴꦏꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦱꦺꦴꦠꦴꦥꦠ꧀ꦠꦶꦦꦭꦮꦺꦢꦤꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦱꦏꦢꦴꦒꦴꦩꦶ…ꦥꦺ… ꦄꦫꦲꦠ꧀ꦠꦦꦭꦮꦺꦢꦤꦴ ꦱꦸꦑꦸꦩꦴ.

ꦠꦷꦱꦸ ꦏꦶꦫꦶꦪꦴꦱꦸ ꦏꦴꦩꦴꦮꦕꦫꦏꦶꦫꦶꦪꦮꦺꦢꦤꦴ ꦎꦭ꦳ꦴꦫꦶꦏꦴ, ꦫꦹꦥꦴꦮꦕꦫꦏꦶꦫꦶꦪꦮꦺꦢꦤꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦄꦫꦹꦥꦴꦮꦕꦫꦏꦶꦫꦶꦪꦮꦺꦢꦤꦴ ꦱꦸꦑꦸꦩꦴ. ꦌꦮꦁ ꦠꦴꦮ ꦄꦨꦺꦢꦠꦺꦴ. ꦨꦺꦢꦠꦺꦴ ꦥꦤ ꦄꦲꦺꦠꦸꦏꦴꦢꦶꦮꦱꦺꦤ ꦨꦶꦤ꧀ꦤꦴꦪ ꦏꦴꦩꦴꦮꦕꦫꦏꦶꦫꦶꦪꦴꦪ ꦄꦲꦺꦠꦸꦏꦏꦶꦫꦶꦪꦮꦺꦢꦤꦴ ꦎꦭ꦳ꦴꦫꦶꦏꦴ, ꦱꦲꦺꦠꦸꦏꦴ ꦱꦸꦑꦸꦩꦴ. ꦱꦴꦥꦶ ꦢꦸꦲꦺꦠꦸꦏꦴ ꦎꦭ꦳ꦴꦫꦶꦏꦴ, ꦠꦶꦲꦺꦠꦸꦏꦴ ꦱꦸꦑꦸꦩꦴ. ꦠꦠ꧀ꦡꦴꦥꦶ ꦱꦱꦔ꧀ꦑꦴꦫꦶꦏꦴ ꦎꦭ꦳ꦴꦫꦶꦏꦴ, ꦄꦱꦔ꧀ꦑꦴꦫꦶꦏꦴ ꦱꦸꦑꦸꦩꦴ. ꦥꦜꦩꦗ꧀ꦙꦴꦤꦺ ꦏꦶꦫꦶꦪꦮꦺꦢꦤꦴ ꦎꦭ꦳ꦴꦫꦶꦏꦴ, ꦢꦸꦠꦶꦪꦗ꧀ꦙꦴꦤꦺ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦠꦠꦶꦪꦺ…ꦥꦺ… ꦕꦠꦸꦠ꧀ꦡꦺ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦄꦴꦏꦴꦱꦴꦤꦚ꧀ꦕꦴꦪꦠꦤꦏꦶꦫꦶꦪꦮꦺꦢꦤꦴ ꦱꦸꦑꦸꦩꦴ. ꦱꦴꦥꦶ ꦎꦭ꦳ꦴꦫꦶꦏꦴ, ꦮꦶꦚ꧀ꦚꦴꦟꦚ꧀ꦕꦴ…ꦥꦺ… ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦏꦶꦫꦶꦪꦮꦺꦢꦤꦴ ꦱꦸꦑꦸꦩꦴ. ꦪꦴ ꦎꦭ꦳ꦴꦫꦶꦏꦴ ꦱꦴ ꦲꦷꦤꦴ. ꦪꦴ ꦱꦸꦑꦸꦩꦴ ꦱꦴ ꦥꦟꦷꦠꦴ.

꧑꧓. ꦢꦹꦫꦢꦸꦏꦤꦶꦢ꧀ꦢꦺꦱꦺ ꦄꦏꦸꦱꦭꦮꦺꦢꦤꦴ ꦮꦶꦱꦨꦴꦒꦛ꧀ꦜꦺꦤ ꦮꦶꦱꦁꦱꦛ꧀ꦜꦺꦤ ꦕ ꦏꦸꦱꦭꦴꦧ꧀ꦪꦴꦏꦠꦴꦲꦶ ꦢꦹꦫꦺ. ꦆꦩꦶꦤꦴ ꦤꦪꦺꦤ ꦱꦧ꧀ꦧꦥꦢꦺꦱꦸ ꦢꦹꦫꦠꦴ ꦮꦺꦢꦶꦠꦧ꧀ꦧꦴ. ꦱꦕꦺꦥꦶ ꦲꦶ ꦄꦏꦸꦱꦭꦴꦢꦶꦮꦺꦢꦤꦴꦱꦩꦔ꧀ꦒꦶꦤꦺꦴ ꦢꦸꦏ꧀ꦑꦴꦢꦶꦮꦺꦢꦤꦴꦱꦩꦔ꧀ꦒꦶꦤꦺꦴ ꦕ ꦠꦪꦺꦴ ꦠꦪꦺꦴ ꦗꦤꦴ ꦌꦏꦩꦚ꧀ꦕꦺ ꦤꦶꦱꦶꦤ꧀ꦤꦴ ꦲꦺꦴꦤ꧀ꦠꦶ, ꦠꦺꦱꦩ꧀ꦥꦶ ꦠꦴ ꦮꦺꦢꦤꦴ ꦮꦶꦱꦨꦴꦒꦛ꧀ꦜꦺꦤ ꦮꦶꦱꦁꦱꦛ꧀ꦜꦺꦤ ꦕ ꦢꦹꦫꦺꦪꦺꦮ ꦤꦴꦩ. ꦱꦩꦴꦥꦤ꧀ꦤꦮꦺꦢꦤꦴꦢꦶꦱꦩꦔ꧀ꦒꦷꦱꦸꦥꦶ ꦌꦱꦺꦮ ꦤꦪꦺꦴ. ꦄꦏꦸꦱꦭꦴ ꦥꦤ ꦄꦏꦸꦱꦭꦴꦪ ꦱꦨꦴꦒꦛ꧀ꦜꦺꦤ ꦱꦫꦶꦏ꧀ꦑꦛ꧀ꦜꦺꦤ ꦕ ꦱꦤ꧀ꦠꦶꦏꦺ ꦤꦴꦩ. ꦆꦩꦶꦤꦴ ꦤꦪꦺꦤ ꦱꦧ꧀ꦧꦥꦢꦺꦱꦸ ꦱꦤ꧀ꦠꦶꦏꦠꦴ ꦮꦺꦢꦶꦠꦧ꧀ꦧꦴ. ꦱꦕꦺꦥꦶ ꦲꦶ ꦄꦏꦸꦱꦭꦴꦢꦶꦮꦺꦢꦤꦴꦱꦩꦔ꧀ꦒꦷꦱꦸ ꦠꦷꦱꦸ ꦗꦤꦺꦱꦸ ꦌꦏꦺꦴ ꦏꦴꦩꦨꦮꦺ, ꦌꦏꦺꦴ ꦫꦹꦥꦨꦮꦺ, ꦌꦏꦺꦴ ꦄꦫꦹꦥꦨꦮꦺ, ꦠꦺꦱꦩ꧀ꦥꦶ ꦠꦴ ꦮꦺꦢꦤꦴ ꦱꦨꦴꦒꦛ꧀ꦜꦺꦤ ꦱꦫꦶꦏ꧀ꦑꦛ꧀ꦜꦺꦤ ꦕ ꦱꦤ꧀ꦠꦶꦏꦺꦪꦺꦮ ꦤꦴꦩ. ꦏꦸꦱꦭꦴꦢꦶꦮꦺꦢꦤꦴꦱꦩꦔ꧀ꦒꦷꦱꦸꦥꦶ ꦌꦱꦺꦮ ꦤꦪꦺꦴ.

ꦠꦁ ꦠꦁ ꦮꦴ ꦥꦤꦴꦠꦶ ꦌꦠ꧀ꦡ ꦲꦺꦛ꧀ꦜꦶꦩꦤꦪꦁ ꦄꦤꦺꦴꦭꦺꦴꦏꦺꦠ꧀ꦮꦴ ꦠꦁ ꦠꦁ ꦮꦴꦥꦤꦮꦱꦺꦤꦺꦮ ꦏꦡꦺꦠꦧ꧀ꦧꦁ. ꦏꦡꦺꦤ꧀ꦠꦺꦤ ꦕ ꦤ ꦢꦹꦫꦠꦺꦴ ꦱꦤ꧀ꦠꦶꦏꦁ ꦈꦢ꧀ꦣꦫꦶꦠꦧ꧀ꦧꦁ, ꦱꦤ꧀ꦠꦶꦏꦠꦺꦴ ꦥꦤ ꦢꦹꦫꦁ ꦈꦢ꧀ꦣꦫꦶꦠꦧ꧀ꦧꦁ. ꦢꦸꦮꦶꦣꦴ ꦲꦶ ꦄꦏꦸꦱꦭꦴ – ꦭꦺꦴꦨꦱꦲꦒꦠꦴ ꦢꦺꦴꦱꦱꦲꦒꦠꦴ ꦕ. ꦠꦠ꧀ꦡ ꦭꦺꦴꦨꦱꦲꦒꦠꦴ ꦭꦺꦴꦨꦱꦲꦒꦠꦴꦪ ꦱꦤ꧀ꦠꦶꦏꦺ ꦤꦴꦩ, ꦢꦺꦴꦱꦱꦲꦒꦠꦴꦪ ꦢꦹꦫꦺ ꦤꦴꦩ. ꦢꦺꦴꦱꦱꦲꦒꦠꦴ ꦢꦺꦴꦱꦱꦲꦒꦠꦴꦪ ꦱꦤ꧀ꦠꦶꦏꦺ ꦤꦴꦩ, ꦭꦺꦴꦨꦱꦲꦒꦠꦴꦪ ꦢꦹꦫꦺ ꦤꦴꦩ. ꦢꦺꦴꦱꦱꦲꦒꦠꦴꦥꦶ ꦤꦶꦪꦠꦴ ꦤꦶꦪꦠꦴꦪ ꦱꦤ꧀ꦠꦶꦏꦺ ꦤꦴꦩꦴꦠꦶ. ꦌꦮꦁ ꦄꦤꦶꦪꦠꦴ. ꦏꦥ꧀ꦥꦛ꧀ꦜꦶꦠꦶꦏꦄꦱꦔ꧀ꦑꦴꦫꦶꦏꦱꦱꦔ꧀ꦑꦴꦫꦶꦏꦨꦺꦢꦁ ꦭꦺꦴꦨꦱꦲꦒꦠꦴꦢꦷꦱꦸ ꦕ ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦴꦢꦶꦨꦺꦢꦁ ꦱꦧ꧀ꦧꦁ ꦎꦭ꦳ꦴꦫꦶꦏꦢꦸꦏꦤꦶꦢ꧀ꦢꦺꦱꦺ ꦮꦶꦠ꧀ꦡꦴꦫꦶꦠꦮꦱꦺꦤ ꦄꦤꦸꦒꦤ꧀ꦠ꧀ꦮꦴ ꦌꦏꦺꦏꦏꦺꦴꦛ꧀ꦜꦴꦱꦮꦺꦢꦤꦴ ꦠꦁꦠꦁꦏꦺꦴꦛ꧀ꦜꦴꦱꦮꦺꦢꦤꦴꦪ ꦌꦮ ꦱꦤ꧀ꦠꦶꦏꦺ, ꦆꦠꦫꦴ ꦆꦠꦫꦴꦪ ꦢꦹꦫꦺꦠꦶ ꦮꦺꦢꦶꦠꦧ꧀ꦧꦴꦠꦶ.

ꦄꦪꦁ ꦮꦺꦢꦤꦴꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ.

꧓. ꦱꦚ꧀ꦚꦴꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ

꧑꧔. ꦱꦚ꧀ꦚꦴꦏ꧀ꦑꦤ꧀ꦣꦤꦶꦢ꧀ꦢꦺꦱꦺ ꦪꦴ ꦏꦴꦕꦶ ꦱꦚ꧀ꦚꦴꦠꦶ ꦕꦠꦸꦨꦹꦩꦶꦏꦱꦚ꧀ꦚꦁ ꦥꦫꦶꦪꦴꦢꦶꦪꦠꦶ. ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴꦠꦶꦄꦴꦢꦷꦤꦶ ꦄꦠꦷꦠꦴꦢꦶꦮꦱꦺꦤ ꦤꦶꦢ꧀ꦢꦶꦛ꧀ꦜꦱꦚ꧀ꦚꦁ ꦱꦨꦴꦮꦠꦺꦴ ꦢꦱ꧀ꦱꦺꦠꦸꦁ ꦮꦸꦠ꧀ꦠꦴꦤꦶ. ꦠꦠ꧀ꦡ ꦕꦏ꧀ꦑꦸꦱꦩ꧀ꦦꦱ꧀ꦱꦠꦺꦴ ꦕꦏ꧀ꦑꦸꦱꦩ꧀ꦦꦱ꧀ꦱꦱ꧀ꦩꦶꦁ ꦮꦴ ꦗꦴꦠꦴ ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦤꦴꦩ. ꦱꦺꦱꦴꦱꦸꦥꦶ ꦌꦱꦺꦮ ꦤꦪꦺꦴ. ꦌꦠ꧀ꦡ ꦕ ꦥꦸꦫꦶꦩꦴ ꦥꦚ꧀ꦕ ꦕꦏ꧀ꦑꦸꦥꦱꦴꦢꦴꦢꦶꦮꦠ꧀ꦡꦸꦏꦴꦮ. ꦩꦤꦺꦴꦱꦩ꧀ꦦꦱ꧀ꦱꦗꦴ ꦲꦢꦪꦮꦠ꧀ꦡꦸꦏꦴꦥꦶ ꦄꦮꦠ꧀ꦡꦸꦏꦴꦥꦶ. ꦱꦧ꧀ꦧꦴ ꦕꦠꦸꦨꦹꦩꦶꦏꦱꦚ꧀ꦚꦴ.

꧑꧗. ꦎꦭ꦳ꦴꦫꦶꦏꦢꦸꦏꦤꦶꦢ꧀ꦢꦺꦱꦺ ꦥꦛꦶꦓꦱꦩ꧀ꦦꦱ꧀ꦱꦗꦴꦠꦶ ꦱꦥ꧀ꦥꦛꦶꦓꦺ ꦕꦏ꧀ꦑꦸꦥꦱꦴꦢꦴꦢꦪꦺꦴ ꦮꦠ꧀ꦡꦸꦁ ꦏꦠ꧀ꦮꦴ ꦱꦥ꧀ꦥꦛꦶꦓꦺ ꦫꦹꦥꦴꦢꦪꦺꦴ ꦄꦴꦫꦧ꧀ꦨ ꦈꦥ꧀ꦥꦤ꧀ꦤꦺꦴ ꦦꦱ꧀ꦱꦺꦴ ꦥꦛꦶꦓꦱꦩ꧀ꦦꦱ꧀ꦱꦺꦴ ꦤꦴꦩ. ꦠꦠꦺꦴ ꦠꦱ꧀ꦩꦶꦁ ꦮꦴ ꦗꦴꦠꦴ ꦥꦛꦶꦓꦱꦩ꧀ꦦꦱ꧀ꦱꦗꦴ ꦤꦴꦩ. ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ…ꦥꦺ… ꦏꦴꦪꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴꦠꦶꦥꦶ ꦠꦱ꧀ꦱꦴꦪꦺꦮ ꦮꦠ꧀ꦡꦸꦠꦺꦴ ꦤꦴꦩꦁ. ꦫꦹꦥꦱꦚ꧀ꦚꦴ…ꦥꦺ… ꦦꦺꦴꦛ꧀ꦜꦧ꧀ꦧꦱꦚ꧀ꦚꦴꦠꦶꦥꦶ ꦠꦱ꧀ꦱꦴꦪꦺꦮ ꦄꦴꦫꦩ꧀ꦩꦟꦠꦺꦴ ꦤꦴꦩꦁ. ꦆꦢꦁ ꦥꦤ ꦮꦠ꧀ꦡꦴꦫꦩ꧀ꦩꦟꦠꦺꦴ ꦤꦴꦩꦁ. ꦱꦥ꧀ꦥꦛꦶꦓꦴꦤꦶ ꦲꦶ ꦮꦠ꧀ꦡꦹꦤꦶ ꦤꦶꦱ꧀ꦱꦴꦪ, ꦱꦥ꧀ꦥꦛꦶꦓꦴꦤꦶ ꦕ ꦄꦴꦫꦩ꧀ꦩꦟꦴꦤꦶ ꦄꦴꦫꦧ꧀ꦨ ꦈꦥ꧀ꦥꦠ꧀ꦠꦶꦠꦺꦴ ꦌꦱꦴ ꦥꦛꦶꦓꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴꦠꦶ ꦮꦸꦠ꧀ꦠꦴ. ꦩꦤꦺꦴꦱꦩ꧀ꦦꦱ꧀ꦱꦗꦴꦠꦶꦥꦶ ꦥꦫꦶꦪꦴꦪꦺꦤ ꦌꦠꦶꦱ꧀ꦱꦴ ꦤꦴꦩꦁ ꦲꦺꦴꦠꦶꦪꦺꦮ. ꦕꦏ꧀ꦑꦸꦮꦶꦚ꧀ꦚꦴꦟꦚ꧀ꦲꦶ ꦩꦤꦺꦴ ꦤꦴꦩ. ꦠꦺꦤ ꦱꦲꦗꦴꦠꦺꦴ ꦦꦱ꧀ꦱꦺꦴ ꦩꦤꦺꦴꦱꦩ꧀ꦦꦱ꧀ꦱꦺꦴ ꦤꦴꦩ. ꦠꦱ꧀ꦩꦶꦁ ꦩꦤꦺꦴꦱꦩ꧀ꦦꦱ꧀ꦱꦺ, ꦠꦱ꧀ꦩꦴ ꦮꦴ ꦩꦤꦺꦴꦱꦩ꧀ꦦꦱ꧀ꦱꦴ ꦗꦴꦠꦴꦠꦶ ꦩꦤꦺꦴꦱꦩ꧀ꦦꦱ꧀ꦱꦗꦴ. ꦠꦡꦴ ꦱꦺꦴꦠꦓꦴꦤꦗꦶꦮ꧀ꦲꦴꦏꦴꦪꦮꦶꦚ꧀ꦚꦴꦟꦁ ꦩꦤꦺꦴ ꦤꦴꦩ. ꦠꦺꦤ ꦱꦲꦗꦴꦠꦺꦴ ꦦꦱ꧀ꦱꦺꦴ ꦩꦤꦺꦴꦱꦩ꧀ꦦꦱ꧀ꦱꦺꦴ ꦤꦴꦩ. ꦠꦱ꧀ꦩꦶꦁ ꦩꦤꦺꦴꦱꦩ꧀ꦦꦱ꧀ꦱꦺ, ꦠꦱ꧀ꦩꦴ ꦮꦴ ꦩꦤꦺꦴꦱꦩ꧀ꦦꦱ꧀ꦱꦴ ꦗꦴꦠꦴꦠꦶ ꦩꦤꦺꦴꦱꦩ꧀ꦦꦱ꧀ꦱꦗꦴ.

ꦄꦣꦶꦮꦕꦤꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴꦠꦶꦥꦶ ꦥꦫꦶꦪꦴꦪꦺꦤ ꦌꦠꦶꦱ꧀ꦱꦴ ꦤꦴꦩꦁ ꦲꦺꦴꦠꦶꦪꦺꦮ. ꦠꦪꦺꦴ ꦲꦶ ꦄꦫꦹꦥꦶꦤꦺꦴ ꦑꦤ꧀ꦣꦴ ꦱꦪꦁ ꦥꦶꦛ꧀ꦜꦶꦮꦛ꧀ꦛꦏꦴ ꦲꦸꦠ꧀ꦮꦴ ꦄꦠ꧀ꦠꦤꦴ ꦱꦲꦗꦴꦠꦴꦪ ꦱꦚ꧀ꦚꦴꦪ ꦄꦣꦶꦮꦕꦤꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴꦠꦶꦥꦶ ꦤꦴꦩꦁ ꦏꦫꦺꦴꦤ꧀ꦠꦶ. ꦤꦶꦥ꧀ꦥꦫꦶꦪꦴꦪꦺꦤ ꦥꦤ ꦥꦛꦶꦓꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ ꦤꦴꦩ ꦥꦚ꧀ꦕꦢ꧀ꦮꦴꦫꦶꦏꦱꦚ꧀ꦚꦴ, ꦄꦣꦶꦮꦕꦤꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ ꦤꦴꦩ ꦩꦤꦺꦴꦢ꧀ꦮꦴꦫꦶꦏꦱꦚ꧀ꦚꦴ. ꦠꦠ꧀ꦡ ꦥꦚ꧀ꦕꦢ꧀ꦮꦴꦫꦶꦏꦱꦚ꧀ꦚꦴ ꦎꦭꦺꦴꦏꦺꦠ꧀ꦮꦴꦥꦶ ꦗꦴꦤꦶꦠꦸꦁ ꦱꦏ꧀ꦏꦴꦠꦶ ꦎꦭ꦳ꦴꦫꦶꦏꦴ. ꦫꦗ꧀ꦗꦶꦠ꧀ꦮꦴ ꦈꦥꦤꦶꦗ꧀ꦙꦴꦪꦤ꧀ꦠꦚ꧀ꦲꦶ ‘ꦫꦗ꧀ꦗꦶꦠ꧀ꦮꦴ ꦈꦥꦤꦶꦗ꧀ꦙꦴꦪꦠꦷ’ꦠꦶ, ꦏꦸꦗ꧀ꦙꦶꦠ꧀ꦮꦴ ꦈꦥꦤꦶꦗ꧀ꦙꦴꦪꦤ꧀ꦠꦁ ‘ꦏꦸꦗ꧀ꦙꦶꦠ꧀ꦮꦴ ꦈꦥꦤꦶꦗ꧀ꦙꦴꦪꦠꦷ’ꦠꦶ ꦎꦭꦺꦴꦏꦺꦠ꧀ꦮꦴꦮ ꦗꦴꦤꦤ꧀ꦠꦶ.

ꦠꦠ꧀ꦫꦶꦢꦁ ꦮꦠ꧀ꦡꦸ – ꦢ꧀ꦮꦺ ꦏꦶꦫ ꦆꦠ꧀ꦡꦶꦪꦺꦴ ꦤꦶꦱꦷꦢꦶꦠ꧀ꦮꦴ ꦱꦸꦠ꧀ꦠꦁ ꦏꦤ꧀ꦠꦤ꧀ꦠꦶ. ꦢ꧀ꦮꦷꦱꦸ ꦢꦲꦫꦺꦱꦸ ꦒꦴꦩꦺ ꦕꦫꦤ꧀ꦠꦺꦱꦸ ꦌꦏꦺꦴ ꦥꦸꦫꦠꦺꦴ ꦒꦕ꧀ꦖꦤ꧀ꦠꦺꦴ ꦌꦏꦁ ꦆꦠ꧀ꦡꦶꦁ ꦎꦭꦺꦴꦏꦺꦱꦶ. ꦆꦠꦫꦴ ꦠꦁ ꦥꦸꦕ꧀ꦖꦶ ‘ꦏꦱ꧀ꦩꦴ ꦤꦸ ꦑꦺꦴ ꦠꦁ ꦌꦱꦺꦴ ꦎꦭꦺꦴꦏꦺꦱꦷ’ꦠꦶ? ‘ꦤ ꦌꦱꦺꦴ ꦨꦶꦏ꧀ꦑꦸ ꦩꦁ ꦮꦶꦱꦨꦴꦒꦕꦶꦠ꧀ꦠꦺꦤ ꦎꦭꦺꦴꦏꦺꦱꦶ, ꦏꦤꦶꦛ꧀ꦜꦨꦒꦶꦤꦷꦱꦚ꧀ꦚꦴꦪ ꦥꦤ ꦎꦭꦺꦴꦏꦺꦱꦷ’ꦠꦶ. ꦠꦺꦱꦸꦥꦶ ꦒꦴꦩꦺ ꦕꦫꦶꦠ꧀ꦮꦴ ꦄꦴꦱꦤꦱꦴꦭꦴꦪ ꦤꦶꦱꦶꦤ꧀ꦤꦺꦱꦸ ꦆꦠꦫꦺꦴ ꦨꦶꦏ꧀ꦑꦸ ꦠꦁ ꦨꦶꦏ꧀ꦑꦸꦁ ꦥꦸꦕ꧀ꦖꦶ – ‘ꦠꦪꦴ ꦱꦴ ꦆꦠ꧀ꦡꦷ ꦎꦭꦺꦴꦏꦶꦠꦴ’ꦠꦶ? ‘ꦄꦴꦩ ꦎꦭꦺꦴꦏꦶꦠꦴ’. ‘ꦏꦶꦩꦠ꧀ꦡꦴꦪꦴ’ꦠꦶ? ‘ꦩꦪ꧀ꦲꦁ ꦨꦒꦶꦤꦷꦱꦫꦶꦏ꧀ꦑꦠ꧀ꦠꦴ ꦠꦁ ꦎꦭꦺꦴꦏꦺꦱꦶ’ꦤ꧀ꦠꦶ ꦄꦴꦲ. ꦌꦮꦁ ꦥꦚ꧀ꦕꦢ꧀ꦮꦴꦫꦶꦏꦱꦚ꧀ꦚꦴ ꦎꦭꦺꦴꦏꦺꦠ꧀ꦮꦴꦥꦶ ꦗꦴꦤꦶꦠꦸꦁ ꦱꦏ꧀ꦏꦴꦠꦶ ꦮꦺꦢꦶꦠꦧ꧀ꦧꦴ. ꦱꦴ ꦥꦤꦺꦱꦴ ꦥꦱꦴꦢꦮꦠ꧀ꦡꦸꦏꦴ ꦌꦮ. ꦏꦺꦕꦶ ꦥꦤ ꦗꦮꦤꦥ꧀ꦥꦮꦠ꧀ꦠꦴꦠꦶ ꦢꦷꦥꦺꦤ꧀ꦠꦶ. ꦩꦤꦺꦴꦢ꧀ꦮꦴꦫꦶꦏꦱꦚ꧀ꦚꦴ ꦥꦤ ꦌꦏꦩꦚ꧀ꦕꦺ ꦮꦴ ꦌꦏꦥꦷꦜꦺ ꦮꦴ ꦤꦶꦱꦷꦢꦶꦠ꧀ꦮꦴꦥꦶ ꦄꦚ꧀ꦚꦁ ꦕꦶꦤ꧀ꦠꦺꦤ꧀ꦠꦁ ꦮꦶꦠꦏ꧀ꦏꦺꦤ꧀ꦠꦚ꧀ꦕ ‘ꦏꦶꦁ ꦕꦶꦤ꧀ꦠꦺꦱꦶ, ꦏꦶꦁ ꦮꦶꦠꦏ꧀ꦏꦺꦱꦷ’ꦠꦶ ꦥꦸꦕ꧀ꦖꦶꦠ꧀ꦮꦴ ꦠꦱ꧀ꦱ ꦮꦕꦤꦮꦱꦺꦤꦺꦮ ꦗꦴꦤꦶꦠꦧ꧀ꦧꦠꦺꦴ ꦱꦸꦑꦸꦩꦴ. ꦱꦺꦱꦁ ꦮꦺꦢꦤꦴꦏ꧀ꦑꦤ꧀ꦣꦱꦢꦶꦱꦩꦺꦮꦴꦠꦶ.

ꦄꦪꦁ ꦱꦚ꧀ꦚꦴꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ.

꧔. ꦱꦔ꧀ꦑꦴꦫꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ

꧒꧐. ꦱꦔ꧀ꦑꦴꦫꦏ꧀ꦑꦤ꧀ꦣꦤꦶꦢ꧀ꦢꦺꦱꦺ ꦪꦺ ꦏꦺꦕꦶ ꦱꦔ꧀ꦑꦴꦫꦴꦠꦶ ꦕꦠꦸꦨꦹꦩꦶꦏꦱꦔ꧀ꦑꦴꦫꦺ ꦥꦫꦶꦪꦴꦢꦶꦪꦠꦶ. ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦕꦺꦠꦤꦴꦠꦶꦄꦴꦢꦷꦤꦶ ꦄꦠꦷꦠꦴꦢꦶꦮꦱꦺꦤ ꦤꦶꦢ꧀ꦢꦶꦛ꧀ꦜꦱꦔ꧀ꦑꦴꦫꦺ ꦱꦨꦴꦮꦠꦺꦴ ꦢꦱ꧀ꦱꦺꦠꦸꦁ ꦮꦸꦠ꧀ꦠꦴꦤꦶ. ꦕꦏ꧀ꦑꦸꦱꦩ꧀ꦦꦱ꧀ꦱꦗꦴꦠꦶꦄꦴꦢꦷꦤꦶ ꦮꦸꦠ꧀ꦠꦠ꧀ꦡꦴꦤꦺꦮ. ꦕꦺꦠꦤꦴꦠꦶ ꦲꦺꦛ꧀ꦜꦶꦩꦏꦺꦴꦛꦶꦪꦴ ꦥꦣꦴꦤꦱꦔ꧀ꦑꦴꦫꦮꦱꦺꦤ ꦮꦸꦠ꧀ꦠꦁ. ꦲꦺꦛ꧀ꦜꦶꦩꦏꦺꦴꦛꦶꦪꦴ ꦲꦶ ꦄꦤ꧀ꦠꦩꦱꦺꦴ ꦕꦏ꧀ꦑꦸꦮꦶꦚ꧀ꦚꦴꦟꦺꦤ ꦱꦢ꧀ꦣꦶꦁ ꦥꦴꦭ꦳ꦶꦪꦁ ꦄꦴꦒꦠꦴ ꦕꦠ꧀ꦠꦴꦫꦺꦴ ꦱꦔ꧀ꦑꦴꦫꦴ ꦈꦥ꧀ꦥꦗ꧀ꦗꦤ꧀ꦠꦶ. ꦠꦺꦱꦸ ꦕꦺꦠꦤꦴ ꦥꦣꦴꦤꦴ ꦄꦴꦪꦹꦲꦤꦛ꧀ꦜꦺꦤ ꦥꦴꦏꦛꦠ꧀ꦠꦴ. ꦠꦱ꧀ꦩꦴ ꦄꦪꦩꦺꦮ ꦒꦲꦶꦠꦴ. ꦠꦁꦱꦩ꧀ꦥꦪꦸꦠ꧀ꦠꦱꦔ꧀ꦑꦴꦫꦴ ꦥꦤ ꦠꦴꦪ ꦒꦲꦶꦠꦴꦪ ꦒꦲꦶꦠꦴꦮ ꦲꦺꦴꦤ꧀ꦠꦶ. ꦆꦣꦴꦥꦶ ꦥꦸꦫꦶꦩꦴ ꦥꦚ꧀ꦕ ꦕꦏ꧀ꦑꦸꦥꦱꦴꦢꦴꦢꦶꦮꦠ꧀ꦡꦸꦏꦴꦮ. ꦩꦤꦺꦴꦱꦩ꧀ꦦꦱ꧀ꦱꦗꦴ ꦲꦢꦪꦮꦠ꧀ꦡꦸꦏꦴꦥꦶ ꦄꦮꦠ꧀ꦡꦸꦏꦴꦥꦶ. ꦱꦧ꧀ꦧꦴ ꦕꦠꦸꦨꦹꦩꦶꦏꦕꦺꦠꦤꦴ. ꦱꦺꦱꦁ ꦮꦺꦢꦤꦴꦏ꧀ꦑꦤ꧀ꦣꦱꦢꦶꦱꦩꦺꦮꦴꦠꦶ.

ꦄꦪꦁ ꦱꦔ꧀ꦑꦴꦫꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ.

꧕. ꦮꦶꦚ꧀ꦚꦴꦟꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ

꧒꧖. ꦮꦶꦚ꧀ꦚꦴꦟꦏ꧀ꦑꦤ꧀ꦣꦤꦶꦢ꧀ꦢꦺꦱꦺ ꦪꦁ ꦏꦶꦚ꧀ꦕꦶ ꦮꦶꦚ꧀ꦚꦴꦟꦤ꧀ꦠꦶ ꦕꦠꦸꦨꦹꦩꦏꦮꦶꦚ꧀ꦚꦴꦟꦁ ꦥꦫꦶꦪꦴꦢꦶꦪꦠꦶ. ꦕꦏ꧀ꦑꦸꦮꦶꦚ꧀ꦚꦴꦟꦤ꧀ꦠꦶꦄꦴꦢꦷꦤꦶ ꦄꦠꦷꦠꦴꦢꦶꦮꦱꦺꦤ ꦤꦶꦢ꧀ꦢꦶꦛ꧀ꦜꦮꦶꦚ꧀ꦚꦴꦟꦁ ꦱꦨꦴꦮꦠꦺꦴ ꦢꦱ꧀ꦱꦺꦠꦸꦁ ꦮꦸꦠ꧀ꦠꦴꦤꦶ. ꦠꦠ꧀ꦡ ꦕꦏ꧀ꦑꦸꦮꦶꦚ꧀ꦚꦴꦟꦴꦢꦷꦤꦶ ꦥꦚ꧀ꦕ ꦕꦏ꧀ꦑꦸꦥꦱꦴꦢꦴꦢꦶꦮꦠ꧀ꦡꦸꦏꦴꦤꦺꦮ, ꦩꦤꦺꦴꦮꦶꦚ꧀ꦚꦴꦟꦁ ꦲꦢꦪꦮꦠ꧀ꦡꦸꦏꦩ꧀ꦥꦶ ꦄꦮꦠ꧀ꦡꦸꦏꦩ꧀ꦥꦶ. ꦱꦧ꧀ꦧꦁ ꦕꦠꦸꦨꦹꦩꦏꦮꦶꦚ꧀ꦚꦴꦟꦁ. ꦱꦺꦱꦁ ꦮꦺꦢꦤꦴꦏ꧀ꦑꦤ꧀ꦣꦱꦢꦶꦱꦩꦺꦮꦴꦠꦶ.

ꦄꦪꦁ ꦮꦶꦚ꧀ꦚꦴꦟꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ.

ꦥꦏꦶꦟ꧀ꦟꦏꦏꦡꦴ

ꦆꦢꦴꦤꦶ ꦥꦚ꧀ꦕꦱꦸꦥꦶ ꦑꦤ꧀ꦣꦺꦱꦸ ꦱꦩꦸꦒ꧀ꦒꦩꦠꦺꦴ, ꦥꦸꦧ꧀ꦧꦴꦥꦫꦠꦺꦴ, ꦄꦢ꧀ꦣꦴꦤꦥꦫꦶꦕ꧀ꦖꦺꦢꦠꦺꦴ, ꦌꦏꦸꦥ꧀ꦥꦴꦢꦤꦴꦤꦴꦤꦶꦫꦺꦴꦣꦠꦺꦴ, ꦤꦴꦤꦸꦥ꧀ꦥꦴꦢꦌꦏꦤꦶꦫꦺꦴꦣꦠꦺꦴ, ꦌꦏꦸꦥ꧀ꦥꦴꦢꦌꦏꦤꦶꦫꦺꦴꦣꦠꦺꦴ, ꦤꦴꦤꦸꦥ꧀ꦥꦴꦢꦤꦴꦤꦴꦤꦶꦫꦺꦴꦣꦠꦺꦴ, ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦠꦺꦴ, ꦄꦗ꧀ꦙꦠ꧀ꦠꦶꦏꦧꦴꦲꦶꦫꦠꦺꦴ, ꦎꦭ꦳ꦴꦫꦶꦏꦱꦸꦑꦸꦩꦠꦺꦴ, ꦲꦷꦤꦥꦟꦷꦠꦠꦺꦴ, ꦢꦹꦫꦱꦤ꧀ꦠꦶꦏꦠꦺꦴ, ꦥꦕ꧀ꦕꦪꦠꦺꦴ, ꦱꦩꦸꦛ꧀ꦜꦴꦤꦠꦺꦴ, ꦥꦫꦶꦤꦶꦥ꧀ꦦꦤ꧀ꦤꦠꦺꦴ, ꦱꦔ꧀ꦑꦠꦠꦺꦴꦠꦶ ꦱꦺꦴꦭ꦳ꦱꦲꦴꦏꦴꦫꦺꦲꦶ ꦥꦏꦶꦟ꧀ꦟꦏꦁ ꦮꦺꦢꦶꦠꦧ꧀ꦧꦁ.

ꦠꦠ꧀ꦡ ꦢꦸꦮꦶꦣꦺꦴ ꦱꦩꦸꦒ꧀ꦒꦩꦺꦴ – ꦒꦧ꧀ꦨꦱꦺꦪ꧀ꦪꦏꦱꦩꦸꦒ꧀ꦒꦩꦺꦴ, ꦎꦥꦥꦴꦠꦶꦏꦱꦩꦸꦒ꧀ꦒꦩꦺꦴꦠꦶ. ꦠꦠ꧀ꦡ ꦒꦧ꧀ꦨꦱꦺꦪ꧀ꦪꦏꦱꦩꦸꦒ꧀ꦒꦩꦺꦴ ꦌꦮꦁ ꦮꦺꦢꦶꦠꦧ꧀ꦧꦺꦴ – ꦒꦧ꧀ꦨꦱꦺꦪ꧀ꦪꦏꦱꦠ꧀ꦠꦴꦤꦚ꧀ꦲꦶ ꦥꦛꦶꦱꦤ꧀ꦣꦶꦏ꧀ꦑꦟꦺ ꦥꦚ꧀ꦕꦏ꧀ꦑꦤ꧀ꦣꦴ ꦄꦥꦕ꧀ꦖꦴꦄꦥꦸꦫꦺ ꦌꦏꦠꦺꦴ ꦥꦴꦠꦸꦨꦮꦤ꧀ꦠꦶ. ꦠꦱ꧀ꦩꦶꦁ ꦑꦟꦺ ꦥꦴꦠꦸꦨꦹꦠꦴ ꦏꦭꦭꦱꦔ꧀ꦑꦴꦠꦴ ꦫꦹꦥꦱꦤ꧀ꦠꦠꦶ ꦥꦫꦶꦠ꧀ꦠꦴ ꦲꦺꦴꦠꦶ. ꦑꦸꦢ꧀ꦢꦏꦩꦏ꧀ꦑꦶꦏꦴꦪ ꦌꦏꦮꦴꦪꦴꦩꦺꦤ ꦥꦴꦠꦧ꧀ꦧꦩꦠ꧀ꦠꦴꦠꦶ ꦮꦠ꧀ꦮꦴ ꦥꦸꦤ ‘ꦄꦠꦶꦧꦲꦸꦁ ꦌꦠꦁ, ꦱꦟ꧀ꦲꦱꦹꦕꦶꦪꦴ ꦠꦺꦭꦺ ꦥꦏ꧀ꦑꦶꦥꦶꦠ꧀ꦮꦴ ꦈꦏ꧀ꦑꦶꦠ꧀ꦠꦴꦪ ꦥꦒ꧀ꦓꦫꦶꦠ꧀ꦮꦴ ꦄꦒ꧀ꦒꦺ ꦜꦶꦠꦧꦶꦤ꧀ꦢꦸꦩꦠ꧀ꦠ’ꦤ꧀ꦠꦶ ꦮꦸꦠ꧀ꦠꦁ. ꦠꦩ꧀ꦥꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ‘ꦌꦏꦏꦺꦱꦺ ꦠꦺꦭꦠꦺꦴ ꦈꦢ꧀ꦣꦫꦶꦠ꧀ꦮꦴ ꦒꦲꦶꦠꦺ ꦠꦱ꧀ꦱ ꦥꦒ꧀ꦓꦫꦶꦠ꧀ꦮꦴ ꦄꦒ꧀ꦒꦺ ꦜꦶꦠꦧꦶꦤ꧀ꦢꦸꦩꦠ꧀ꦠ’ꦤ꧀ꦠꦶ ꦮꦸꦠ꧀ꦠꦁ. ꦠꦩ꧀ꦥꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ‘ꦆꦩꦱ꧀ꦩꦶꦁ ꦗꦤꦥꦢꦺ ꦩꦤꦸꦱ꧀ꦱꦴꦤꦁ ꦏꦺꦱꦺ ꦄꦛ꧀ꦜꦣꦴ ꦦꦴꦭꦶꦠꦺ ꦠꦠꦺꦴ ꦌꦏꦏꦺꦴꦛ꧀ꦜꦴꦱꦥ꧀ꦥꦩꦴꦟꦺꦴ ꦈꦠ꧀ꦠꦫꦏꦸꦫꦸꦏꦴꦤꦁ ꦏꦺꦱꦺꦴ; ꦠꦱ꧀ꦱ ꦥꦱꦤ꧀ꦤꦠꦶꦭꦠꦺꦭꦠꦺꦴ ꦈꦢ꧀ꦣꦛꦱ꧀ꦱ ꦄꦒ꧀ꦒꦺ ꦜꦶꦠꦧꦶꦤ꧀ꦢꦸꦩꦠ꧀ꦠ’ꦤ꧀ꦠꦶ ꦮꦸꦠ꧀ꦠꦁ. ꦠꦩ꧀ꦥꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ‘ꦌꦠꦁ ꦧꦲꦸ, ꦗꦴꦠꦶꦈꦟ꧀ꦟꦴ ꦤꦴꦩ ꦱꦸꦑꦸꦩꦴ; ꦠꦱ꧀ꦱꦴ ꦌꦏꦄꦁꦱꦸꦤꦺꦴ ꦥꦱꦤ꧀ꦤꦠꦶꦭꦠꦺꦭꦺ ꦥꦏ꧀ꦑꦶꦥꦶꦠ꧀ꦮꦴ ꦈꦢ꧀ꦣꦛꦱ꧀ꦱ ꦥꦒ꧀ꦓꦫꦶꦠ꧀ꦮꦴ ꦄꦒ꧀ꦒꦺ ꦜꦶꦠꦧꦶꦤ꧀ꦢꦸꦩꦠ꧀ꦠ’ꦤ꧀ꦠꦶ ꦮꦸꦠ꧀ꦠꦁ. ꦠꦁ ꦥꦤꦺꦠꦁ ꦄꦕ꧀ꦖꦁ ꦲꦺꦴꦠꦶ ꦮꦶꦥ꧀ꦥꦱꦤ꧀ꦤꦁ ꦄꦤꦴꦮꦶꦭꦁ ꦥꦫꦶꦱꦸꦢ꧀ꦣꦁ ꦥꦱꦤ꧀ꦤꦠꦶꦭꦠꦺꦭꦧꦶꦤ꧀ꦢꦸꦱꦩꦴꦤꦮꦟ꧀ꦟꦁ. ꦮꦸꦠ꧀ꦠꦩ꧀ꦥꦶ ꦕꦺꦠꦁ –

ꦠꦶꦭꦠꦺꦭꦱ꧀ꦱ ꦪꦡꦴ ꦧꦶꦤ꧀ꦢꦸ, ꦱꦥ꧀ꦥꦶꦩꦟ꧀ꦝꦺꦴ ꦄꦤꦴꦮꦶꦭꦺꦴ;

ꦌꦮꦁ ꦮꦟ꧀ꦟꦥꦛꦶꦨꦴꦒꦁ, ꦏꦭꦭꦤ꧀ꦠꦶ ꦥꦮꦸꦕ꧀ꦕꦠꦷꦠꦶ.

ꦌꦮꦁ ꦥꦫꦶꦠ꧀ꦠꦴꦪ ꦫꦹꦥꦱꦤ꧀ꦠꦠꦶꦪꦴ ꦠꦷꦟꦶ ꦱꦤ꧀ꦠꦠꦶꦱꦷꦱꦴꦤꦶ ꦲꦺꦴꦤ꧀ꦠꦶ – ꦮꦠ꧀ꦡꦸꦢꦱꦏꦁ, ꦏꦴꦪꦢꦱꦏꦁ, ꦆꦠ꧀ꦡꦶꦪꦴ ꦆꦠ꧀ꦡꦶꦤ꧀ꦢ꧀ꦫꦶꦪꦮꦱꦺꦤ ꦥꦸꦫꦶꦱꦱ꧀ꦱ ꦥꦸꦫꦶꦱꦶꦤ꧀ꦢ꧀ꦫꦶꦪꦮꦱꦺꦤ ꦨꦴꦮꦢꦱꦏꦤ꧀ꦠꦶ. ꦠꦠ꧀ꦡ ꦮꦠ꧀ꦡꦸꦫꦹꦥꦁ, ꦠꦱ꧀ꦱ ꦤꦶꦱ꧀ꦱꦪꦴꦤꦶ ꦕꦠ꧀ꦠꦴꦫꦶ ꦩꦲꦴꦨꦹꦠꦴꦤꦶ, ꦠꦁꦤꦶꦱ꧀ꦱꦶꦠꦴ ꦮꦟ꧀ꦟꦒꦤ꧀ꦣꦫꦱꦺꦴꦗꦴ, ꦗꦷꦮꦶꦠꦤ꧀ꦠꦶ – ꦆꦢꦁ ꦮꦠ꧀ꦡꦸꦢꦱꦏꦁ ꦤꦴꦩ. ꦏꦴꦪꦥꦱꦴꦢꦺꦴ, ꦠꦱ꧀ꦱ ꦤꦶꦱ꧀ꦱꦪꦴꦤꦶ ꦕꦠ꧀ꦠꦴꦫꦶ ꦩꦲꦴꦨꦹꦠꦴꦤꦶ, ꦠꦤ꧀ꦤꦶꦱ꧀ꦱꦶꦠꦴ ꦮꦟ꧀ꦟꦒꦤ꧀ꦣꦫꦱꦺꦴꦗꦴ, ꦗꦷꦮꦶꦠꦤ꧀ꦠꦶ – ꦆꦢꦁ ꦏꦴꦪꦢꦱꦏꦁ ꦤꦴꦩ. ꦆꦠ꧀ꦡꦶꦪꦴ ꦆꦠ꧀ꦡꦶꦨꦴꦮꦺꦴ, ꦥꦸꦫꦶꦱꦱ꧀ꦱ ꦥꦸꦫꦶꦱꦨꦴꦮꦺꦴ, ꦠꦱ꧀ꦱ ꦤꦶꦱ꧀ꦱꦪꦴꦤꦶ ꦕꦠ꧀ꦠꦴꦫꦶ ꦩꦲꦴꦨꦹꦠꦴꦤꦶ, ꦠꦤ꧀ꦤꦶꦱ꧀ꦱꦶꦠꦴ ꦮꦟ꧀ꦟꦒꦤ꧀ꦣꦫꦱꦺꦴꦗꦴ, ꦗꦷꦮꦶꦠꦤ꧀ꦠꦶ – ꦆꦢꦁ ꦨꦴꦮꦢꦱꦏꦁ ꦤꦴꦩ.

ꦌꦮꦁ ꦒꦧ꧀ꦨꦱꦺꦪ꧀ꦪꦏꦴꦤꦁ ꦥꦛꦶꦱꦤ꧀ꦣꦶꦪꦁ ꦈꦏ꧀ꦏꦛ꧀ꦜꦥꦫꦶꦕ꧀ꦖꦺꦢꦺꦤ ꦱꦩꦠꦶꦁꦱ ꦏꦩ꧀ꦩꦗꦫꦹꦥꦴꦤꦶ ꦫꦹꦥꦏ꧀ꦑꦤ꧀ꦣꦺꦴ ꦤꦴꦩ ꦲꦺꦴꦠꦶ. ꦥꦛꦶꦱꦤ꧀ꦣꦶꦕꦶꦠ꧀ꦠꦺꦤ ꦥꦤ ꦱꦲꦗꦴꦠꦴ ꦮꦺꦢꦤꦴ ꦮꦺꦢꦤꦴꦏ꧀ꦑꦤ꧀ꦣꦺꦴ, ꦱꦚ꧀ꦚꦴ ꦱꦚ꧀ꦚꦴꦏ꧀ꦑꦤ꧀ꦣꦺꦴ, ꦱꦔ꧀ꦑꦴꦫꦴ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ, ꦥꦛꦶꦱꦤ꧀ꦣꦶꦕꦶꦠ꧀ꦠꦁ ꦮꦶꦚ꧀ꦚꦴꦟꦏ꧀ꦑꦤ꧀ꦣꦺꦴꦠꦶ. ꦌꦮꦁ ꦒꦧ꧀ꦨꦱꦺꦪ꧀ꦪꦏꦴꦤꦁ ꦥꦛꦶꦱꦤ꧀ꦣꦶꦏ꧀ꦑꦟꦺ ꦥꦚ꧀ꦕꦏ꧀ꦑꦤ꧀ꦣꦴ ꦥꦫꦶꦥꦸꦟ꧀ꦟꦴ ꦲꦺꦴꦤ꧀ꦠꦶ. ꦱꦕꦺ ꦥꦤ ꦤꦥꦸꦁꦱꦏꦥꦛꦶꦱꦤ꧀ꦣꦶ ꦲꦺꦴꦠꦶ, ꦨꦴꦮꦢꦱꦏꦁ ꦲꦴꦪꦠꦶ. ꦢ꧀ꦮꦶꦤ꧀ꦤꦁ ꦢꦱꦏꦴꦤꦁ ꦮꦱꦺꦤ ꦱꦩꦮꦷꦱꦠꦶ ꦏꦩ꧀ꦩꦗꦫꦹꦥꦴꦤꦶ ꦫꦹꦥꦏ꧀ꦑꦤ꧀ꦣꦺꦴ ꦤꦴꦩ ꦲꦺꦴꦠꦶ. ꦮꦺꦢꦤꦴꦏ꧀ꦑꦤ꧀ꦣꦴꦢꦪꦺꦴ ꦮꦸꦠ꧀ꦠꦥ꧀ꦥꦏꦴꦫꦴ ꦌꦮꦴꦠꦶ. ꦌꦮꦩ꧀ꦥꦶ ꦒꦧ꧀ꦨꦱꦺꦪ꧀ꦪꦏꦴꦤꦁ ꦥꦛꦶꦱꦤ꧀ꦣꦶꦏ꧀ꦑꦟꦺ ꦥꦚ꧀ꦕꦏ꧀ꦑꦤ꧀ꦣꦴ ꦥꦫꦶꦥꦸꦟ꧀ꦟꦴ ꦲꦺꦴꦤ꧀ꦠꦶ.

ꦆꦩꦱ꧀ꦩꦶꦁ ꦜꦴꦤꦺ ꦠꦶꦱꦩꦸꦛ꧀ꦜꦴꦤꦶꦏꦥ꧀ꦥꦮꦺꦟꦷ ꦏꦡꦺꦠꦧ꧀ꦧꦴ ꦨꦮꦺꦪ꧀ꦪ. ꦠꦁ ꦥꦤ ꦄꦏꦡꦺꦠ꧀ꦮꦴ ‘ꦎꦥꦥꦴꦠꦶꦏꦱꦩꦸꦒ꧀ꦒꦩꦺꦴ’ ꦤꦴꦩ ꦢꦱ꧀ꦱꦶꦠꦺꦴ. ꦎꦥꦥꦴꦠꦶꦏꦴꦤꦚ꧀ꦲꦶ ꦥꦫꦶꦥꦸꦟ꧀ꦟꦴꦪꦠꦤꦴꦤꦁ ꦥꦛꦶꦱꦤ꧀ꦣꦶꦏ꧀ꦑꦟꦺ ꦲꦺꦛ꧀ꦜꦴ ꦮꦸꦠ꧀ꦠꦴꦤꦶ ꦠꦷꦟꦶ, ꦕꦏ꧀ꦑꦸꦱꦺꦴꦠꦓꦴꦤꦗꦶꦮ꧀ꦲꦴꦢꦱꦏꦴꦤꦶ ꦕꦴꦠꦶ ꦱꦠ꧀ꦠ ꦫꦹꦥꦱꦤ꧀ꦠꦠꦶꦱꦷꦱꦴꦤꦶ ꦥꦴꦠꦸꦨꦮꦤ꧀ꦠꦶ. ꦠꦠ꧀ꦡ ꦕꦏ꧀ꦑꦸꦢꦱꦏꦴꦢꦷꦤꦶ ꦏꦴꦪꦢꦱꦏꦱꦢꦶꦱꦴꦤꦺꦮ. ꦤꦥꦸꦁꦱꦏꦱ꧀ꦱ ꦥꦤ ꦨꦴꦮꦢꦱꦏꦁ ꦤꦠ꧀ꦡꦶ. ꦌꦮꦁ ꦥꦫꦶꦥꦸꦟ꧀ꦟꦴꦪꦠꦤꦴꦤꦁ ꦎꦥꦥꦴꦠꦶꦏꦴꦤꦁ ꦱꦩꦱꦠ꧀ꦠꦠꦶ ꦕꦺꦮ ꦱꦩꦱꦛ꧀ꦜꦶ ꦕ ꦏꦩ꧀ꦩꦗꦫꦹꦥꦴꦤꦶ ꦫꦹꦥꦏ꧀ꦑꦤ꧀ꦣꦺꦴ ꦤꦴꦩ. ꦮꦺꦢꦤꦴꦏ꧀ꦑꦤ꧀ꦣꦴꦢꦪꦺꦴ ꦮꦸꦠ꧀ꦠꦥ꧀ꦥꦏꦴꦫꦴ ꦌꦮꦴꦠꦶ. ꦌꦮꦁ ꦎꦥꦥꦴꦠꦶꦏꦴꦤꦁ ꦥꦛꦶꦱꦤ꧀ꦣꦶꦏ꧀ꦑꦟꦺ ꦥꦚ꧀ꦕꦏ꧀ꦑꦤ꧀ꦣꦴ ꦥꦫꦶꦥꦸꦟ꧀ꦟꦴ ꦲꦺꦴꦤ꧀ꦠꦶ. ꦄꦪꦁ ‘ꦎꦥꦥꦴꦠꦶꦏꦱꦩꦸꦒ꧀ꦒꦩꦺꦴ’ ꦤꦴꦩ. ꦌꦮꦁ ꦠꦴꦮ ꦥꦚ꧀ꦕꦏ꧀ꦑꦤ꧀ꦣꦴ ‘ꦱꦩꦸꦒ꧀ꦒꦩꦠꦺꦴ’ ꦮꦺꦢꦶꦠꦧ꧀ꦧꦴ.

‘ꦥꦸꦧ꧀ꦧꦴꦥꦫꦠꦺꦴ’ꦠꦶ ꦌꦮꦁ ꦥꦤ ꦒꦧ꧀ꦨꦱꦺꦪ꧀ꦪꦏꦴꦤꦁ ꦄꦥꦕ꧀ꦖꦴꦄꦥꦸꦫꦺ ꦈꦥ꧀ꦥꦤ꧀ꦤꦺꦱꦸ ꦥꦚ꧀ꦕꦱꦸ ꦑꦤ꧀ꦣꦺꦱꦸ ꦏꦶꦁ ꦫꦹꦥꦁ ꦥꦜꦩꦁ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ ꦈꦢꦴꦲꦸ ꦄꦫꦹꦥꦤ꧀ꦠꦶ? ꦫꦹꦥꦁ ꦫꦹꦥꦩꦺꦮ ꦱꦩꦸꦛ꧀ꦜꦴꦥꦺꦠꦶ, ꦤ ꦄꦫꦹꦥꦁ. ꦏꦱ꧀ꦩꦴ? ꦥꦛꦶꦱꦤ꧀ꦣꦶꦕꦶꦠ꧀ꦠꦱ꧀ꦱ ꦤ ꦫꦹꦥꦗꦤꦏꦠ꧀ꦠꦴ. ꦱꦧ꧀ꦧꦱꦠ꧀ꦠꦴꦤꦚ꧀ꦲꦶ ꦥꦛꦶꦱꦤ꧀ꦣꦶꦕꦶꦠ꧀ꦠꦁ, ꦑꦷꦟꦴꦱꦮꦱ꧀ꦱ ꦕꦸꦠꦶꦕꦶꦠ꧀ꦠꦁ, ꦢ꧀ꦮꦶꦥꦚ꧀ꦕꦮꦶꦚ꧀ꦚꦴꦟꦴꦤꦶ, ꦕꦠ꧀ꦠꦴꦫꦶ ꦄꦫꦹꦥ꧀ꦥꦮꦶꦥꦴꦏꦴꦤꦷꦠꦶ ꦱꦺꦴꦭ꦳ꦱ ꦕꦶꦠ꧀ꦠꦴꦤꦶ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦤ꧀ꦠꦶ. ꦠꦠ꧀ꦡ ꦥꦛꦶꦱꦤ꧀ꦣꦶꦕꦶꦠ꧀ꦠꦁ ꦠꦴꦮ ꦮꦠ꧀ꦡꦸꦤꦺꦴ ꦢꦸꦧ꧀ꦧꦭꦠꦴꦪ ꦄꦥ꧀ꦥꦠꦶꦛ꧀ꦜꦶꦠꦠꦴꦪ ꦥꦕ꧀ꦕꦪꦮꦺꦏꦭ꧀ꦭꦠꦴꦪ ꦄꦴꦒꦤ꧀ꦠꦸꦏꦠꦴꦪ ꦕ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦠꦶ. ꦠꦠ꧀ꦡ ꦲꦶ ꦱꦲꦗꦴꦠꦁ ꦮꦠ꧀ꦡꦸ ꦈꦥ꧀ꦥꦴꦢꦏ꧀ꦑꦟꦺ ꦢꦸꦧ꧀ꦧꦭꦁ ꦲꦺꦴꦠꦷꦠꦶ ꦮꦠ꧀ꦡꦸꦤꦺꦴ ꦢꦸꦧ꧀ꦧꦭꦠꦴꦪ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦠꦶ. ꦪꦡꦴ ꦕ ꦥꦥꦴꦠꦺ ꦥꦠꦤ꧀ꦠꦺꦴ ꦥꦸꦫꦶꦱꦺꦴ ꦄꦚ꧀ꦚꦱ꧀ꦱ ꦤꦶꦱ꧀ꦱꦪꦺꦴ ꦨꦮꦶꦠꦸꦁ ꦤ ꦱꦏ꧀ꦏꦺꦴꦠꦶ, ꦌꦮꦁ ꦌꦠꦩ꧀ꦥꦶ ꦏꦩ꧀ꦩꦮꦺꦒꦏ꧀ꦑꦶꦠ꧀ꦠꦠ꧀ꦠꦴ ꦥꦥꦴꦠꦺ ꦥꦠꦩꦴꦤꦁ ꦮꦶꦪ ꦄꦥ꧀ꦥꦠꦶꦛ꧀ꦜꦶꦠꦁ. ꦆꦠꦶ ꦏꦩ꧀ꦩꦮꦺꦒꦏ꧀ꦑꦶꦠ꧀ꦠꦠ꧀ꦠꦴ, ꦄꦥ꧀ꦥꦠꦶꦛ꧀ꦜꦶꦠꦠꦴꦪꦥꦶ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦠꦶ.

ꦥꦛꦶꦱꦤ꧀ꦣꦶꦕꦶꦠ꧀ꦠꦚ꧀ꦕ ꦮꦠ꧀ꦡꦸꦤꦴ ꦱꦢ꧀ꦣꦶꦁ ꦄꦥꦕ꧀ꦖꦴꦄꦥꦸꦫꦺ ꦈꦥ꧀ꦥꦤ꧀ꦤꦁ. ꦠꦱ꧀ꦱ ꦮꦠ꧀ꦡꦸ ꦥꦸꦫꦺꦗꦴꦠꦁ ꦲꦸꦠ꧀ꦮꦴ ꦥꦕ꧀ꦕꦪꦺꦴ ꦨꦮꦶꦠꦸꦁ ꦤ ꦱꦏ꧀ꦏꦺꦴꦠꦶ. ꦱꦕꦺ ꦱꦏ꧀ꦏꦸꦟꦺꦪ꧀ꦪ, ꦫꦹꦥꦁ ꦱꦩꦸꦛ꧀ꦜꦴꦥꦺꦪ꧀ꦪ. ꦪꦠ꧀ꦫꦴꦥꦶ ꦮꦠ꧀ꦡꦸ ꦥꦸꦫꦺꦗꦴꦠꦁ ꦲꦸꦠ꧀ꦮꦴ ꦥꦕ꧀ꦕꦪꦺꦴ ꦨꦮꦶꦠꦸꦁ ꦱꦏ꧀ꦏꦺꦴꦠꦶ, ꦥꦮꦺꦟꦷ ꦓꦛꦶꦪꦠꦶ, ꦠꦠ꧀ꦫꦴꦥꦶ ꦕꦶꦠ꧀ꦠꦁ ꦄꦔ꧀ꦒꦠꦺꦴ ꦄꦥꦫꦶꦲꦷꦤꦁꦪꦺꦮ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ. ꦪꦢꦶ ꦲꦶ ꦕꦶꦠ꧀ꦠꦁ ꦜꦴꦤꦏ꧀ꦑꦟꦺ ꦮꦴ ꦨꦔ꧀ꦒꦏ꧀ꦑꦟꦺ ꦮꦴ ꦫꦹꦥꦁ ꦱꦩꦸꦛ꧀ꦜꦴꦥꦺꦪ꧀ꦪ, ꦥꦛꦶꦱꦤ꧀ꦣꦶꦕꦶꦠ꧀ꦠꦩ꧀ꦥꦶ ꦫꦹꦥꦁ ꦱꦩꦸꦛ꧀ꦜꦴꦥꦺꦪ꧀ꦪ. ꦤ ꦥꦤ ꦕꦶꦠ꧀ꦠꦁ ꦠꦱ꧀ꦩꦶꦁ ꦑꦟꦢ꧀ꦮꦪꦺ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ. ꦪꦡꦴ ꦥꦤ ꦄꦲꦶꦕ꧀ꦖꦠ꧀ꦠꦏꦩꦏꦸꦭꦁ ꦥꦡꦮꦶꦠꦺꦴ ꦈꦛ꧀ꦜꦲꦤ꧀ꦠꦁ ꦥꦁꦱꦸꦕꦸꦟ꧀ꦟꦁ ꦒꦲꦺꦠ꧀ꦮꦴꦮ ꦈꦛ꧀ꦜꦲꦠꦶ, ꦌꦮꦁ ꦕꦶꦠ꧀ꦠꦁ ꦥꦸꦫꦺꦗꦴꦠꦁ ꦮꦠ꧀ꦡꦸꦁ ꦤꦶꦱ꧀ꦱꦴꦪ ꦈꦥ꧀ꦥꦴꦢꦏ꧀ꦑꦟꦺ ꦄꦛ꧀ꦜ ꦫꦹꦥꦴꦤꦶ ꦒꦲꦺꦠ꧀ꦮꦴꦮ ꦈꦛ꧀ꦜꦲꦠꦶ. ꦥꦛꦶꦱꦤ꧀ꦣꦶꦏ꧀ꦑꦟꦺ ꦕ ꦮꦠ꧀ꦡꦸ ꦥꦸꦫꦺꦗꦴꦠꦁ ꦲꦸꦠ꧀ꦮꦴ ꦥꦕ꧀ꦕꦪꦺꦴ ꦨꦮꦶꦠꦸꦁ ꦤ ꦱꦏ꧀ꦏꦺꦴꦠꦷꦠꦶ ꦥꦕ꧀ꦕꦪꦮꦺꦏꦭ꧀ꦭꦠꦴꦪꦥꦶ ꦥꦛꦶꦱꦤ꧀ꦣꦶꦕꦶꦠ꧀ꦠꦁ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦠꦶ.

ꦪꦡꦴ ꦕ ꦄꦴꦒꦤ꧀ꦠꦸꦏꦥꦸꦫꦶꦱꦺꦴ ꦄꦒꦠꦥꦸꦧ꧀ꦧꦁ ꦥꦢꦺꦱꦁ ꦒꦠꦺꦴ ꦄꦚ꧀ꦚꦺꦱꦁ – ‘ꦌꦡ ꦨꦺꦴ, ꦄꦤ꧀ꦠꦺꦴꦒꦴꦩꦺ ꦮꦺꦴ ꦄꦤ꧀ꦤꦥꦴꦤꦒꦤ꧀ꦣꦩꦴꦭꦴꦢꦷꦤꦶ ꦢꦱ꧀ꦱꦴꦩꦷ’ꦠꦶ ꦮꦠ꧀ꦠꦸꦁ ꦤ ꦱꦏ꧀ꦏꦺꦴꦠꦶ, ꦄꦠ꧀ꦠꦤꦺꦴ ꦄꦮꦶꦱꦪꦠꦴꦪ ꦄꦥ꧀ꦥꦲꦸꦠꦠꦴꦪ, ꦌꦮꦩꦺꦮ ꦥꦛꦶꦱꦤ꧀ꦣꦶꦕꦶꦠ꧀ꦠꦁ ꦄꦴꦒꦤ꧀ꦠꦸꦏꦤ꧀ꦠꦶ ꦄꦠ꧀ꦠꦤꦺꦴ ꦄꦴꦒꦤ꧀ꦠꦸꦏꦠꦴꦪꦥꦶ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦠꦶ. ꦄꦥꦶꦕ ꦱꦩꦠꦶꦁꦱ ꦏꦩ꧀ꦩꦗꦫꦹꦥꦴꦤꦶ ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦴꦤꦁ ꦜꦴꦤꦁ ꦒꦲꦺꦠ꧀ꦮꦴ ꦜꦶꦠꦴꦤꦷꦠꦶꦥꦶ ꦥꦛꦶꦱꦤ꧀ꦣꦶꦕꦶꦠ꧀ꦠꦁ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦠꦶ.

ꦑꦷꦟꦴꦱꦮꦱ꧀ꦱ ꦥꦤ ꦕꦸꦠꦶꦕꦶꦠ꧀ꦠꦁ ꦮꦛ꧀ꦛꦩꦹꦭꦱ꧀ꦱ ꦮꦹꦥꦱꦤ꧀ꦠꦠ꧀ꦠꦴ ꦤ ꦱꦩꦸꦛ꧀ꦜꦴꦥꦺꦠꦶ. ꦠꦱ꧀ꦱ ꦲꦶ ꦱꦧ꧀ꦧꦨꦮꦺꦱꦸ ꦮꦛ꧀ꦛꦩꦹꦭꦁ ꦮꦹꦥꦱꦤ꧀ꦠꦁ ꦄꦨꦧ꧀ꦧꦸꦥ꧀ꦥꦠ꧀ꦠꦶꦏꦁ ꦥꦸꦤꦧ꧀ꦨꦮꦺ ꦥꦮꦺꦟꦷ ꦤꦴꦩ ꦤꦠ꧀ꦡꦶ. ꦱꦺꦴꦠꦴꦥꦤ꧀ꦤꦱ꧀ꦱ ꦥꦤ ꦱꦠ꧀ꦠ ꦨꦮꦺ ꦜꦥꦺꦠ꧀ꦮꦴ ꦄꦛ꧀ꦜꦩꦺꦮ ꦮꦛ꧀ꦛꦩꦹꦭꦁ ꦮꦹꦥꦱꦤ꧀ꦠꦁ. ꦠꦱ꧀ꦩꦴ ꦠꦱ꧀ꦱ ꦕꦸꦠꦶꦕꦶꦠ꧀ꦠꦁ ꦱꦠ꧀ꦠꦱꦸ ꦨꦮꦺꦱꦸ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ, ꦱꦏꦢꦴꦒꦴꦩꦶꦤꦺꦴ ꦢ꧀ꦮꦷꦱꦸ, ꦄꦤꦴꦒꦴꦩꦶꦤꦺꦴ ꦌꦏꦱ꧀ꦩꦶꦁ. ꦑꦷꦟꦴꦱꦮꦱ꧀ꦱ ꦱꦧ꧀ꦧꦨꦮꦺꦱꦸ ꦮꦛ꧀ꦛꦩꦹꦭꦱ꧀ꦱ ꦮꦹꦥꦱꦤ꧀ꦠꦠ꧀ꦠꦴ ꦤꦺꦮ ꦱꦩꦸꦛ꧀ꦜꦴꦥꦺꦠꦶ.

ꦢ꧀ꦮꦶꦥꦚ꧀ꦕꦮꦶꦚ꧀ꦚꦴꦟꦺꦱꦸ ꦥꦤ ꦙꦴꦤꦔ꧀ꦒꦁ ꦤꦠ꧀ꦡꦶ, ꦩꦒ꧀ꦒꦔ꧀ꦒꦁ ꦤꦠ꧀ꦡꦶ, ꦲꦺꦠꦸ ꦤꦠ꧀ꦡꦷꦠꦶ ꦕꦶꦠ꧀ꦠꦔ꧀ꦒꦁ ꦢꦸꦧ꧀ꦧꦭꦁ ꦲꦺꦴꦠꦷꦠꦶ ꦕꦶꦠ꧀ꦠꦔ꧀ꦒꦢꦸꦧ꧀ꦧꦭꦠꦴꦪ ꦠꦴꦤꦶ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦤ꧀ꦠꦶ. ꦕꦠ꧀ꦠꦴꦫꦶ ꦄꦫꦹꦥꦮꦶꦥꦴꦏꦴꦤꦶ ꦠꦱ꧀ꦩꦶꦁ ꦨꦮꦺ ꦫꦹꦥꦱ꧀ꦱ ꦤꦠ꧀ꦡꦶꦠꦴꦪ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦤ꧀ꦠꦶ. ꦤ ꦏꦺꦮꦭꦚ꧀ꦕ ꦠꦴꦤꦺꦮ, ꦪꦴꦤꦶ ꦄꦚ꧀ꦚꦴꦤꦶꦥꦶ ꦠꦱ꧀ꦩꦶꦁ ꦨꦮꦺ ꦄꦛ꧀ꦜ ꦏꦴꦩꦴꦮꦕꦫꦏꦸꦱꦭꦴꦤꦶ, ꦢꦱ ꦄꦏꦸꦱꦭꦴꦤꦶ, ꦤꦮ ꦏꦶꦫꦶꦪꦕꦶꦠ꧀ꦠꦴꦤꦶ, ꦕꦠ꧀ꦠꦴꦫꦶ ꦄꦴꦫꦸꦥ꧀ꦥꦏꦸꦱꦭꦴꦤꦶ, ꦕꦠꦱ꧀ꦱꦺꦴ ꦄꦴꦫꦸꦥ꧀ꦥꦏꦶꦫꦶꦪꦴ, ꦠꦷꦟꦶ ꦩꦒ꧀ꦒꦕꦶꦠ꧀ꦠꦴꦤꦶ, ꦕꦠ꧀ꦠꦴꦫꦶ ꦦꦭꦕꦶꦠ꧀ꦠꦴꦤꦷꦠꦶ ꦢ꧀ꦮꦺꦕꦠ꧀ꦠꦴꦭꦷꦱ ꦕꦶꦠ꧀ꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ, ꦠꦴꦤꦶꦥꦶ ꦠꦠ꧀ꦡ ꦫꦹꦥꦱ꧀ꦱ ꦤꦠ꧀ꦡꦶꦠꦴꦪ ꦌꦮ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦤ꧀ꦠꦶ. ꦌꦮꦁ ꦥꦛꦶꦱꦤ꧀ꦣꦶꦕꦶꦠ꧀ꦠꦁ ꦫꦹꦥꦁ ꦤ ꦱꦩꦸꦛ꧀ꦜꦴꦥꦺꦠꦶ.

ꦈꦠꦸ ꦥꦤ ꦥꦜꦩꦁ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ. ꦏꦺꦴ ꦌꦱ ꦈꦠꦸ ꦤꦴꦩꦴꦠꦶ? ꦥꦛꦶꦱꦤ꧀ꦣꦶꦏ꧀ꦑꦟꦺ ꦈꦥ꧀ꦥꦤ꧀ꦤꦴꦤꦁ ꦱꦩꦠꦶꦁꦱꦏꦩ꧀ꦩꦗꦫꦹꦥꦴꦤꦁ ꦄꦧ꧀ꦨꦤ꧀ꦠꦫꦴ ꦠꦺꦗꦺꦴꦣꦴꦠꦸ. ꦱꦴ ꦜꦴꦤꦁ ꦥꦠ꧀ꦮꦴ ꦄꦛ꧀ꦜ ꦫꦹꦥꦴꦤꦶ ꦱꦩꦸꦛ꧀ꦜꦴꦥꦺꦠꦶ. ꦈꦠꦸ ꦤꦴꦩ ꦕꦺꦱ ꦢꦤ꧀ꦣꦤꦶꦫꦺꦴꦣꦺꦴ; ꦕꦶꦠ꧀ꦠꦁ ꦑꦶꦥ꧀ꦥꦤꦶꦫꦺꦴꦣꦁ. ꦠꦱ꧀ꦩꦶꦁ ꦣꦫꦤ꧀ꦠꦺꦪꦺꦮ ꦱꦺꦴꦭ꦳ꦱ ꦕꦶꦠ꧀ꦠꦴꦤꦶ ꦈꦥ꧀ꦥꦗ꧀ꦗꦶꦠ꧀ꦮꦴ ꦤꦶꦫꦸꦗ꧀ꦙꦤ꧀ꦠꦶ. ꦠꦺꦱꦸ ꦥꦛꦶꦱꦤ꧀ꦣꦶꦄꦤꦤ꧀ꦠꦫꦁ ꦥꦜꦩꦨꦮꦔ꧀ꦒꦕꦶꦠ꧀ꦠꦁ ꦈꦥ꧀ꦥꦴꦢꦏ꧀ꦑꦟꦺꦪꦺꦮ ꦄꦛ꧀ꦜ ꦫꦹꦥꦴꦤꦶ ꦱꦩꦸꦛ꧀ꦜꦴꦥꦺꦠꦶ. ꦪꦢꦴ ꦥꦤ ꦱꦢ꧀ꦢꦱ꧀ꦱ ꦈꦥ꧀ꦥꦠ꧀ꦠꦶꦏꦴꦭꦺꦴ ꦨꦮꦶꦱ꧀ꦱꦠꦶ, ꦠꦢꦴ ꦈꦠꦸꦕꦶꦠ꧀ꦠꦴꦤꦶ ꦱꦢ꧀ꦢꦤꦮꦏꦁ ꦤꦴꦩ ꦱꦩꦸꦛ꧀ꦜꦴꦥꦺꦱ꧀ꦱꦤ꧀ꦠꦶ. ꦏꦧꦭ꦳ꦷꦏꦴꦫꦴꦲꦴꦫꦺꦴꦥꦶ ꦜꦴꦤꦁ ꦥꦠ꧀ꦮꦴ ꦄꦛ꧀ꦜ ꦫꦹꦥꦴꦤꦶ ꦱꦩꦸꦛ꧀ꦜꦴꦥꦺꦠꦶ. ꦏꦸꦠꦺꦴ ꦥꦤꦱ꧀ꦱ ꦏꦧꦭ꦳ꦷꦏꦴꦫꦴꦲꦴꦫꦺꦴꦠꦶ? ꦩꦴꦠꦶꦠꦺꦴ. ꦮꦸꦠ꧀ꦠꦩ꧀ꦥꦶ ꦕꦺꦠꦁ –

‘‘ꦪꦚ꧀ꦕꦱ꧀ꦱ ꦨꦸꦚ꧀ꦗꦠꦷ ꦩꦴꦠꦴ, ꦄꦤ꧀ꦤꦁ ꦥꦴꦤꦚ꧀ꦕ ꦨꦺꦴꦗꦤꦁ;

ꦠꦺꦤ ꦱꦺꦴ ꦠꦠ꧀ꦡ ꦪꦴꦥꦺꦠꦶ, ꦩꦴꦠꦸꦏꦸꦕ꧀ꦖꦶꦒꦠꦺꦴ ꦤꦫꦺꦴ’’ꦠꦶ. (ꦱꦁ. ꦤꦶ. ꧑.꧒꧓꧕);

ꦌꦮꦁ ꦏꦸꦕ꧀ꦖꦶꦒꦠꦺꦴ ꦢꦴꦫꦏꦺꦴ ꦩꦴꦠꦫꦴ ꦄꦗ꧀ꦙꦺꦴꦲꦛꦄꦤ꧀ꦤꦥꦴꦤꦎꦗꦴꦪ ꦪꦴꦥꦺꦠꦶ. ꦱꦴꦮ ꦜꦴꦤꦥ꧀ꦥꦠ꧀ꦠꦴ ꦄꦛ꧀ꦜ ꦫꦹꦥꦴꦤꦶ ꦱꦩꦸꦛ꧀ꦜꦴꦥꦺꦠꦶ. ꦤꦤꦸ ꦕ ꦱꦴ ꦎꦗꦴ ꦑꦫꦴ? ꦮꦠ꧀ꦡꦸ ꦱꦸꦑꦸꦩꦁ? ꦏꦡꦁ ꦠꦠ꧀ꦡ ꦥꦠꦶꦛ꧀ꦜꦴꦠꦷꦠꦶ? ꦥꦜꦩꦁ ꦠꦴꦮ ꦤ ꦥꦠꦶꦛ꧀ꦜꦴꦠꦶ; ꦌꦏꦱ꧀ꦱ ꦮꦴ ꦢ꧀ꦮꦶꦤ꧀ꦤꦁ ꦮꦴ ꦱꦠ꧀ꦠꦴꦲꦴꦤꦁ ꦒꦠꦏꦴꦭꦺ ꦥꦠꦶꦛ꧀ꦜꦴꦠꦶ. ꦠꦠꦺꦴ ꦥꦤ ꦥꦸꦫꦺ ꦮꦴ ꦥꦠꦶꦛ꧀ꦜꦴꦠꦸ ꦥꦕ꧀ꦖꦴ ꦮꦴ; ꦪꦢꦴ ꦩꦴꦠꦫꦴ ꦄꦗ꧀ꦙꦺꦴꦲꦛꦄꦤ꧀ꦤꦥꦴꦤꦎꦗꦴ ꦢꦴꦫꦏꦱ꧀ꦱ ꦱꦫꦷꦫꦺ ꦥꦠꦶꦛ꧀ꦜꦴꦠꦶ, ꦠꦢꦴ ꦄꦛ꧀ꦜ ꦫꦹꦥꦴꦤꦶ ꦱꦩꦸꦛ꧀ꦜꦴꦥꦺꦠꦶ.

ꦎꦥꦥꦴꦠꦶꦏꦱ꧀ꦱꦴꦥꦶ ꦥꦏꦠꦶꦥꦛꦶꦪꦠ꧀ꦠꦴꦤꦁ ꦑꦴꦢꦤꦷꦪꦨꦺꦴꦗꦤꦷꦪꦴꦤꦁ ꦄꦠ꧀ꦡꦶꦛ꧀ꦜꦴꦤꦺ ꦤꦶꦧ꧀ꦧꦠ꧀ꦠꦱ꧀ꦱ ꦠꦴꦤꦶ ꦒꦲꦺꦠ꧀ꦮꦴ ꦄꦗ꧀ꦙꦺꦴꦲꦫꦠꦺꦴ ꦜꦴꦤꦥ꧀ꦥꦠ꧀ꦠꦴ ꦎꦗꦴ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ. ꦌꦏꦺꦴ ꦄꦤ꧀ꦤꦥꦴꦤꦫꦲꦶꦠꦺ ꦄꦫꦚ꧀ꦚꦺ ꦤꦶꦧ꧀ꦧꦠ꧀ꦠꦠꦶ, ꦩꦲꦴꦖꦴꦠꦏꦺꦴ ꦲꦺꦴꦠꦶ, ꦄꦠ꧀ꦠꦤꦺꦴꦮ ꦗꦶꦮ꧀ꦲꦴꦪ ꦑꦺꦭ꦳ꦁ ꦥꦫꦶꦮꦠ꧀ꦠꦺꦠ꧀ꦮꦴ ꦒꦶꦭꦠꦶ. ꦠꦠ꧀ꦫꦴꦥꦶꦱ꧀ꦱ ꦜꦴꦤꦥ꧀ꦥꦠ꧀ꦠꦴ ꦎꦗꦴ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ.

ꦌꦮꦁ ꦥꦚ꧀ꦕꦮꦷꦱꦠꦶꦪꦴ ꦏꦺꦴꦛ꧀ꦜꦴꦱꦺꦱꦸ ꦢ꧀ꦮꦺꦮ ꦫꦹꦥꦴꦤꦶ ꦫꦹꦥꦁ ꦱꦩꦸꦛ꧀ꦜꦴꦥꦺꦤ꧀ꦠꦶ – ꦠꦺꦗꦺꦴꦣꦴꦠꦸ ꦕ ꦏꦧꦭ꦳ꦷꦏꦴꦫꦴꦲꦴꦫꦺꦴ ꦕ. ꦄꦫꦹꦥꦺꦥꦶ ꦢ꧀ꦮꦺꦪꦺꦮ ꦣꦩ꧀ꦩꦴ ꦫꦹꦥꦁ ꦱꦩꦸꦛ꧀ꦜꦴꦥꦺꦤ꧀ꦠꦶ – ꦕꦶꦠ꧀ꦠꦚ꧀ꦕꦺꦮ ꦏꦩ꧀ꦩꦕꦺꦠꦤꦴ ꦕ. ꦠꦠ꧀ꦡ ꦫꦹꦥꦁ ꦈꦥ꧀ꦥꦴꦢꦏ꧀ꦑꦟꦺ ꦕ ꦨꦔ꧀ꦒꦏ꧀ꦑꦟꦺ ꦕ ꦢꦸꦧ꧀ꦧꦭꦁ, ꦜꦴꦤꦏ꧀ꦑꦟꦺ ꦧꦭꦮꦤ꧀ꦠꦶ ꦜꦴꦤꦏ꧀ꦑꦟꦺ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ. ꦕꦶꦠ꧀ꦠꦁ ꦜꦴꦤꦏ꧀ꦑꦟꦺ ꦕ ꦨꦔ꧀ꦒꦏ꧀ꦑꦟꦺ ꦕ ꦢꦸꦧ꧀ꦧꦭꦁ, ꦈꦥ꧀ꦥꦴꦢꦏ꧀ꦑꦟꦺꦪꦺꦮ ꦧꦭꦮꦤ꧀ꦠꦶ ꦈꦥ꧀ꦥꦴꦢꦏ꧀ꦑꦟꦺꦪꦺꦮ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ. ꦏꦩ꧀ꦩꦕꦺꦠꦤꦴ ꦤꦶꦫꦸꦢ꧀ꦣꦴꦮ ꦥꦕ꧀ꦕꦪꦺꦴ ꦲꦺꦴꦠꦶ. ꦄꦠꦷꦠꦺ ꦏꦥ꧀ꦥꦏꦺꦴꦛꦶꦱꦠꦱꦲꦱ꧀ꦱꦩꦠ꧀ꦡꦏꦺꦥꦶ ꦲꦶ ꦄꦴꦪꦹꦲꦶꦠꦁ ꦏꦩ꧀ꦩꦁ ꦌꦠꦫꦲꦶ ꦥꦕ꧀ꦕꦪꦺꦴ ꦲꦺꦴꦠꦶ. ꦌꦠꦫꦲꦶ ꦄꦴꦪꦹꦲꦶꦠꦁ ꦄꦤꦴꦒꦠꦺ ꦏꦥ꧀ꦥꦏꦺꦴꦛꦶꦱꦠꦱꦲꦱ꧀ꦱꦥꦫꦶꦪꦺꦴꦱꦴꦤꦺꦥꦶ ꦥꦕ꧀ꦕꦪꦺꦴ ꦲꦺꦴꦠꦷꦠꦶ. ꦌꦮꦁ ‘ꦥꦸꦧ꧀ꦧꦴꦥꦫꦠꦺꦴ’ ꦮꦺꦢꦶꦠꦧ꧀ꦧꦴ.

‘ꦄꦢ꧀ꦣꦴꦤꦥꦫꦶꦕ꧀ꦖꦺꦢꦠꦺꦴ’ꦠꦶ ꦫꦹꦥꦁ ꦏꦶꦠ꧀ꦠꦏꦁ ꦄꦢ꧀ꦣꦴꦤꦁ ꦠꦶꦛ꧀ꦜꦠꦶ? ꦄꦫꦹꦥꦁ ꦏꦶꦠ꧀ꦠꦏꦤ꧀ꦠꦶ? ꦫꦹꦥꦁ ꦒꦫꦸꦥꦫꦶꦟꦴꦩꦁ ꦢꦤ꧀ꦣꦤꦶꦫꦺꦴꦣꦁ. ꦄꦫꦹꦥꦁ ꦭꦲꦸꦥꦫꦶꦟꦴꦩꦁ ꦑꦶꦥ꧀ꦥꦤꦶꦫꦺꦴꦣꦁ. ꦫꦹꦥꦺ ꦣꦫꦤ꧀ꦠꦺꦪꦺꦮ ꦱꦺꦴꦭ꦳ꦱ ꦕꦶꦠ꧀ꦠꦴꦤꦶ ꦈꦥ꧀ꦥꦗ꧀ꦗꦶꦠ꧀ꦮꦴ ꦤꦶꦫꦸꦗ꧀ꦙꦤ꧀ꦠꦶ. ꦠꦁ ꦥꦤ ꦱꦠ꧀ꦠꦫꦱꦩꦺꦤ ꦕꦶꦠ꧀ꦠꦺꦤ ꦱꦢ꧀ꦣꦶꦁ ꦤꦶꦫꦸꦗ꧀ꦙꦠꦶ. ꦪꦡꦴ ꦲꦶ ꦥꦸꦫꦶꦱꦺꦴ ‘ꦦꦭꦁ ꦥꦴꦠꦺꦱ꧀ꦱꦴꦩꦷ’ꦠꦶ ꦩꦸꦒ꧀ꦒꦫꦺꦤ ꦫꦸꦏ꧀ꦑꦱꦴꦑꦁ ꦥꦲꦫꦺꦪ꧀ꦪ, ꦦꦭꦴꦤꦶ ꦕ ꦥꦠ꧀ꦠꦴꦤꦶ ꦕ ꦌꦏꦏ꧀ꦑꦟꦺꦪꦺꦮ ꦮꦟ꧀ꦛꦠꦺꦴ ꦩꦸꦕ꧀ꦕꦺꦪ꧀ꦪꦸꦁ. ꦠꦠ꧀ꦡ ꦦꦭꦴꦤꦶ ꦄꦠ꧀ꦠꦤꦺꦴ ꦨꦴꦫꦶꦏꦠꦴꦪ ꦥꦜꦩꦠꦫꦁ ꦥꦡꦮꦶꦪꦁ ꦥꦠꦤ꧀ꦠꦶ, ꦥꦠ꧀ꦠꦴꦤꦶ ꦭꦲꦸꦏꦠꦴꦪ ꦥꦕ꧀ꦖꦴ. ꦌꦮꦩꦺꦮ ꦩꦸꦒ꧀ꦒꦫꦥ꧀ꦥꦲꦴꦫꦺꦤ ꦥꦠ꧀ꦠꦴꦤꦚ꧀ꦕ ꦦꦭꦴꦤꦚ꧀ꦕ ꦌꦏꦏ꧀ꦑꦟꦺ ꦮꦟ꧀ꦛꦠꦺꦴ ꦩꦸꦠ꧀ꦠꦏꦴꦭꦺꦴ ꦮꦶꦪ ꦥꦛꦶꦱꦤ꧀ꦣꦶꦏ꧀ꦑꦟꦺ ꦫꦹꦥꦴꦫꦹꦥꦣꦩ꧀ꦩꦴꦤꦁ ꦌꦏꦏ꧀ꦑꦟꦺ ꦥꦴꦠꦸꦨꦴꦮꦺꦴ; ꦦꦭꦴꦤꦁ ꦨꦴꦫꦶꦏꦠꦴꦪ ꦥꦜꦩꦠꦫꦁ ꦥꦡꦮꦶꦪꦁ ꦥꦠꦤꦁ ꦮꦶꦪ ꦫꦹꦥꦺ ꦣꦫꦤ꧀ꦠꦺꦪꦺꦮ ꦱꦺꦴꦭ꦳ꦱꦤ꧀ꦤꦁ ꦕꦶꦠ꧀ꦠꦴꦤꦁ ꦈꦥ꧀ꦥꦗ꧀ꦗꦶꦠ꧀ꦮꦴ ꦤꦶꦫꦸꦗ꧀ꦙꦤꦁ; ꦥꦠ꧀ꦠꦴꦤꦁ ꦭꦲꦸꦏꦠꦴꦪ ꦥꦕ꧀ꦖꦴ ꦥꦡꦮꦶꦪꦁ ꦥꦠꦤꦁ ꦮꦶꦪ ꦫꦹꦥꦱ꧀ꦱ ꦱꦠ꧀ꦠꦫꦱꦩꦺꦤ ꦕꦶꦠ꧀ꦠꦺꦤ ꦱꦲ ꦤꦶꦫꦸꦗ꧀ꦙꦤꦁ.

ꦠꦠ꧀ꦡ ꦏꦶꦚ꧀ꦕꦴꦥꦶ ꦫꦹꦥꦁ ꦢꦤ꧀ꦣꦤꦶꦫꦺꦴꦣꦁ ꦒꦫꦸꦥꦫꦶꦟꦴꦩꦁ, ꦕꦶꦠ꧀ꦠꦁ ꦑꦶꦥ꧀ꦥꦤꦶꦫꦺꦴꦣꦁ ꦭꦲꦸꦥꦫꦶꦟꦴꦩꦁ, ꦫꦹꦥꦁ ꦥꦤ ꦄꦫꦹꦥꦁ ꦄꦫꦹꦥꦁ ꦮꦴ ꦫꦹꦥꦁ ꦎꦲꦴꦪ ꦥꦮꦠ꧀ꦠꦶꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ. ꦢ꧀ꦮꦶꦤ꧀ꦤꦩ꧀ꦥꦶ ꦌꦏꦥ꧀ꦥꦩꦴꦟꦴꦮ ꦥꦮꦠ꧀ꦠꦶ. ꦠꦠ꧀ꦫꦴꦪꦁ ꦈꦥꦩꦴ – ꦌꦏꦺꦴ ꦥꦸꦫꦶꦱꦺꦴ ꦭꦏꦸꦟ꧀ꦛꦏꦥꦴꦢꦺꦴ, ꦌꦏꦺꦴ ꦢꦷꦓꦥꦴꦢꦺꦴ. ꦠꦺꦱꦸ ꦌꦏꦠꦺꦴ ꦩꦒ꧀ꦒꦁ ꦒꦕ꧀ꦖꦤ꧀ꦠꦺꦱꦸ ꦪꦴꦮ ꦢꦷꦓꦥꦴꦢꦺꦴ ꦌꦏꦥꦢꦮꦴꦫꦁ ꦄꦏ꧀ꦏꦩꦠꦶ, ꦠꦴꦮ ꦆꦠꦫꦺꦴ ꦥꦢꦺ ꦥꦢꦁ ꦄꦏ꧀ꦏꦩꦶꦠ꧀ꦮꦴ ꦱꦺꦴꦭ꦳ꦱꦥꦢꦮꦴꦫꦺꦤ ꦒꦕ꧀ꦖꦠꦶ. ꦢꦷꦓꦥꦴꦢꦺꦴ ꦭꦏꦸꦟ꧀ꦛꦏꦥꦴꦢꦱ꧀ꦱ ꦱꦺꦴꦭ꦳ꦱ ꦥꦢꦮꦴꦫꦺ ꦄꦠ꧀ꦠꦤꦺꦴ ꦥꦴꦢꦁ ꦄꦚ꧀ꦖꦶꦠ꧀ꦮꦴ ꦄꦴꦏꦝ꧀ꦞꦶꦠ꧀ꦮꦴ ꦌꦏꦩꦺꦮ ꦥꦢꦮꦴꦫꦁ ꦏꦫꦺꦴꦠꦶ. ꦆꦠꦶ ꦌꦏꦺꦴꦥꦶ ꦌꦏꦁ ꦄꦠꦶꦏ꧀ꦏꦩꦶꦠꦸꦁ ꦤ ꦱꦏ꧀ꦏꦺꦴꦠꦶ. ꦢ꧀ꦮꦶꦤ꧀ꦤꦩ꧀ꦥꦶ ꦒꦩꦤꦁ ꦌꦏꦥ꧀ꦥꦩꦴꦟꦩꦺꦮ ꦲꦺꦴꦠꦶ. ꦌꦮꦁꦱꦩ꧀ꦥꦢꦩꦶꦢꦁ ꦢꦛ꧀ꦜꦧ꧀ꦧꦁ. ꦭꦏꦸꦟ꧀ꦛꦏꦥꦴꦢꦥꦸꦫꦶꦱꦺꦴ ꦮꦶꦪ ꦄꦫꦹꦥꦁ; ꦢꦷꦓꦥꦴꦢꦥꦸꦫꦶꦱꦺꦴ ꦮꦶꦪ ꦫꦹꦥꦁ; ꦢꦷꦓꦥꦴꦢꦱ꧀ꦱ ꦌꦏꦁ ꦥꦢꦮꦴꦫꦁ ꦄꦏ꧀ꦏꦩꦟꦏꦴꦭꦺ ꦆꦠꦫꦱ꧀ꦱ ꦱꦺꦴꦭ꦳ꦱꦥꦢꦮꦴꦫꦄꦏ꧀ꦏꦩꦤꦁ ꦮꦶꦪ ꦫꦹꦥꦺ ꦣꦫꦤ꧀ꦠꦺꦪꦺꦮ ꦄꦫꦹꦥꦣꦩ꧀ꦩꦺꦱꦸ ꦱꦺꦴꦭ꦳ꦱꦤ꧀ꦤꦁ ꦕꦶꦠ꧀ꦠꦴꦤꦁ ꦈꦥ꧀ꦥꦗ꧀ꦗꦶꦠ꧀ꦮꦴ ꦤꦶꦫꦸꦗ꧀ꦙꦤꦁ; ꦢ꧀ꦮꦶꦤ꧀ꦤꦁ ꦥꦸꦫꦶꦱꦴꦤꦁ ꦭꦏꦸꦟ꧀ꦛꦏꦥꦴꦢꦥꦸꦫꦶꦱꦱ꧀ꦱ ꦱꦺꦴꦭ꦳ꦱ ꦥꦢꦮꦴꦫꦺ ꦆꦠꦫꦱ꧀ꦱ ꦄꦠ꧀ꦠꦤꦺꦴ ꦥꦴꦢꦁ ꦄꦚ꧀ꦖꦶꦠ꧀ꦮꦴ ꦄꦴꦏꦝ꧀ꦞꦶꦠ꧀ꦮꦴ ꦌꦏꦥꦢꦮꦴꦫꦏꦫꦟꦁ ꦮꦶꦪ ꦫꦹꦥꦱ꧀ꦱ ꦱꦠ꧀ꦠꦫꦱꦩꦺꦤ ꦕꦶꦠ꧀ꦠꦺꦤ ꦱꦢ꧀ꦣꦶꦁ ꦤꦶꦫꦸꦗ꧀ꦙꦤꦁ; ꦢ꧀ꦮꦶꦤ꧀ꦤꦁ ꦥꦸꦫꦶꦱꦴꦤꦁ ꦄꦚ꧀ꦚꦩꦚ꧀ꦚꦁ ꦄꦤꦺꦴꦲꦴꦪ ꦌꦏꦥ꧀ꦥꦩꦴꦟꦺꦤꦺꦮ ꦒꦩꦤꦁ ꦮꦶꦪ ꦄꦫꦹꦥꦱ꧀ꦱ ꦫꦹꦥꦁ ꦫꦹꦥꦱ꧀ꦱ ꦄꦫꦹꦥꦁ ꦄꦤꦺꦴꦲꦴꦪ ꦌꦏꦥ꧀ꦥꦩꦴꦟꦺꦤꦺꦮ ꦥꦮꦠ꧀ꦠꦤꦤ꧀ꦠꦶ. ꦌꦮꦁ ‘ꦄꦢ꧀ꦣꦴꦤꦥꦫꦶꦕ꧀ꦖꦺꦢꦠꦺꦴ’ ꦮꦺꦢꦶꦠꦧ꧀ꦧꦴ.

‘ꦌꦏꦸꦥ꧀ꦥꦴꦢꦤꦴꦤꦴꦤꦶꦫꦺꦴꦣꦠꦺꦴ’ꦠꦶ ꦆꦢꦁ ꦥꦕ꧀ꦖꦶꦩꦏꦩ꧀ꦩꦗꦁ ꦜꦥꦺꦠ꧀ꦮꦴ ꦢꦷꦥꦺꦠꦧ꧀ꦧꦁ. ꦥꦜꦩꦚ꧀ꦲꦶ ꦥꦛꦶꦱꦤ꧀ꦣꦶꦕꦶꦠ꧀ꦠꦁ, ꦢꦸꦠꦶꦪꦁ ꦨꦮꦔ꧀ꦒꦁ, ꦠꦠꦶꦪꦁ ꦨꦮꦔ꧀ꦒꦁ…ꦥꦺ… ꦱꦺꦴꦭ꦳ꦱꦩꦁ ꦨꦮꦔ꧀ꦒꦁ. ꦠꦺꦱꦸ ꦌꦏꦺꦏꦱ꧀ꦱ ꦈꦥ꧀ꦥꦴꦢꦛ꧀ꦜꦶꦠꦶꦨꦔ꧀ꦒꦮꦱꦺꦤ ꦠꦪꦺꦴ ꦠꦪꦺꦴ ꦑꦟꦴ. ꦠꦠ꧀ꦡ ꦌꦏꦺꦏꦱ꧀ꦱ ꦕꦶꦠ꧀ꦠꦱ꧀ꦱ ꦠꦷꦱꦸ ꦠꦷꦱꦸ ꦑꦟꦺꦱꦸ ꦱꦩꦠꦶꦁꦱ ꦱꦩꦠꦶꦁꦱ ꦏꦩ꧀ꦩꦗꦫꦹꦥꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ. ꦠꦺꦱꦸ ꦥꦛꦶꦱꦤ꧀ꦣꦶꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ ꦱꦩꦸꦛ꧀ꦜꦶꦠꦁ ꦏꦩ꧀ꦩꦗꦫꦹꦥꦁ ꦱꦠ꧀ꦠꦫꦱꦩꦱ꧀ꦱ ꦨꦮꦔ꧀ꦒꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺꦪꦺꦮ ꦤꦶꦫꦸꦗ꧀ꦙꦠꦶ; ꦜꦶꦠꦶꦏ꧀ꦑꦟꦺ ꦱꦩꦸꦛ꧀ꦜꦶꦠꦁ ꦜꦶꦠꦶꦏ꧀ꦑꦟꦺꦪꦺꦮ; ꦨꦔ꧀ꦒꦏ꧀ꦑꦟꦺ ꦱꦩꦸꦛ꧀ꦜꦶꦠꦁ ꦨꦔ꧀ꦒꦏ꧀ꦑꦟꦺꦪꦺꦮ ꦤꦶꦫꦸꦗ꧀ꦙꦠꦶ. ꦌꦮꦁ ꦢꦸꦠꦶꦪꦨꦮꦔ꧀ꦒꦕꦶꦠ꧀ꦠꦁ ꦄꦴꦢꦶꦁ ꦏꦠ꧀ꦮꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦱꦠ꧀ꦠꦫꦱꦩꦺꦤ ꦕꦶꦠ꧀ꦠꦺꦤ ꦱꦢ꧀ꦣꦶꦁ ꦪꦺꦴꦗꦺꦠ꧀ꦮꦴ ꦤꦪꦺꦴ ꦤꦺꦠꦧ꧀ꦧꦺꦴ. ꦆꦠꦶ ꦱꦺꦴꦭ꦳ꦱ ꦠꦶꦏꦴ ꦄꦛ꧀ꦜꦕꦠ꧀ꦠꦴꦭꦷꦱ ꦲꦺꦴꦤ꧀ꦠꦶ. ꦄꦪꦁ ꦄꦛ꧀ꦜꦕꦠ꧀ꦠꦴꦭꦷꦱꦏꦩ꧀ꦩꦗꦫꦹꦥꦥꦮꦺꦟꦷ ꦤꦴꦩ. ꦱꦴ ꦥꦤꦺꦱꦴ ꦫꦠ꧀ꦠꦶꦚ꧀ꦕ ꦢꦶꦮꦴ ꦕ ꦑꦴꦢꦤ꧀ꦠꦴꦤꦩ꧀ꦥꦶ ꦨꦸꦚ꧀ꦗꦤ꧀ꦠꦴꦤꦩ꧀ꦥꦶ ꦱꦸꦠ꧀ꦠꦴꦤꦩ꧀ꦥꦶ ꦥꦩꦠ꧀ꦠꦴꦤꦩ꧀ꦥꦶ ꦤꦢꦷꦱꦺꦴꦠꦺꦴ ꦮꦶꦪ ꦌꦏꦤ꧀ꦠꦁ ꦥꦮꦠ꧀ꦠꦠꦶ ꦪꦺꦮꦴꦠꦶ. ꦌꦮꦁ ‘ꦌꦏꦸꦥ꧀ꦥꦴꦢꦤꦴꦤꦴꦤꦶꦫꦺꦴꦣꦠꦺꦴ’ ꦮꦺꦢꦶꦠꦧ꧀ꦧꦴ.

‘ꦤꦴꦤꦸꦥ꧀ꦥꦴꦢꦌꦏꦤꦶꦫꦺꦴꦣꦠꦴ’ ꦥꦕ꧀ꦖꦶꦩꦏꦩ꧀ꦩꦗꦺꦤ ꦢꦷꦥꦺꦠꦧ꧀ꦧꦴ. ꦠꦠ꧀ꦡ ꦄꦴꦪꦸꦱꦁꦑꦴꦫꦥꦫꦶꦪꦺꦴꦱꦴꦤꦺ ꦱꦺꦴꦭ꦳ꦱꦤ꧀ꦤꦁ ꦕꦶꦠ꧀ꦠꦴꦤꦁ ꦮꦴꦫꦺ ꦱꦠꦶ ꦲꦺꦛ꧀ꦜꦴꦱꦺꦴꦭ꦳ꦱꦏꦁ ꦈꦥꦫꦶꦱꦺꦴꦭ꦳ꦱꦏꦤ꧀ꦠꦶ ꦢ꧀ꦮꦺ ꦌꦏꦠꦺꦴ ꦪꦺꦴꦗꦺꦠꦧ꧀ꦧꦴꦤꦶ. ꦲꦺꦛ꧀ꦜꦴꦱꦺꦴꦭ꦳ꦱꦏꦱ꧀ꦩꦶꦚ꧀ꦲꦶ ꦥꦜꦩꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ ꦱꦩꦸꦛ꧀ꦜꦶꦠꦁ ꦱꦩꦠꦶꦁꦱꦏꦩ꧀ꦩꦗꦫꦹꦥꦁ ꦈꦥꦫꦶꦱꦺꦴꦭ꦳ꦱꦏꦱ꧀ꦩꦶꦁ ꦥꦜꦩꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺꦪꦺꦮ ꦤꦶꦫꦸꦗ꧀ꦙꦠꦶ; ꦜꦶꦠꦶꦏ꧀ꦑꦟꦺ ꦱꦩꦸꦛ꧀ꦜꦶꦠꦁ ꦠꦱ꧀ꦱ ꦜꦶꦠꦶꦏ꧀ꦑꦟꦺꦪꦺꦮ ꦨꦔ꧀ꦒꦏ꧀ꦑꦟꦺ ꦱꦩꦸꦛ꧀ꦜꦶꦠꦁ ꦠꦱ꧀ꦱ ꦨꦔ꧀ꦒꦏ꧀ꦑꦟꦺꦪꦺꦮ ꦤꦶꦫꦸꦗ꧀ꦙꦠꦶ. ꦲꦺꦛ꧀ꦜꦶꦩꦱꦺꦴꦭ꦳ꦱꦏꦱ꧀ꦩꦶꦁ ꦥꦤ ꦢꦸꦠꦶꦪꦕꦶꦠ꧀ꦠꦱ꧀ꦱ…ꦥꦺ… ꦱꦺꦴꦭ꦳ꦱꦩꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ ꦱꦩꦸꦛ꧀ꦜꦶꦠꦁ ꦱꦩꦠꦶꦁꦱꦏꦩ꧀ꦩꦗꦫꦹꦥꦁ ꦕꦸꦠꦶꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺꦪꦺꦮ ꦤꦶꦫꦸꦗ꧀ꦙꦠꦶ; ꦠꦱ꧀ꦱ ꦜꦶꦠꦶꦏ꧀ꦑꦟꦺ ꦱꦩꦸꦛ꧀ꦜꦶꦠꦁ ꦕꦸꦠꦶꦕꦶꦠ꧀ꦠꦱ꧀ꦱ ꦜꦶꦠꦶꦏ꧀ꦑꦟꦺꦪꦺꦮ; ꦨꦔ꧀ꦒꦏ꧀ꦑꦟꦺ ꦱꦩꦸꦛ꧀ꦜꦶꦠꦁ ꦕꦸꦠꦶꦕꦶꦠ꧀ꦠꦱ꧀ꦱ ꦨꦔ꧀ꦒꦏ꧀ꦑꦟꦺꦪꦺꦮ ꦤꦶꦫꦸꦗ꧀ꦙꦠꦶ. ꦠꦠꦺꦴ ꦥꦛ꧀ꦜꦴꦪ ꦏꦩ꧀ꦩꦗꦫꦹꦥꦥꦮꦺꦟꦷ ꦤ ꦥꦮꦠ꧀ꦠꦠꦶ. ꦪꦢꦶ ꦥꦮꦠ꧀ꦠꦺꦪ꧀ꦪ, ꦱꦠ꧀ꦠꦴ ꦄꦏ꧀ꦑꦪꦴ ꦄꦮꦪꦴ ꦄꦗꦫꦴ ꦄꦩꦫꦴ ꦤꦴꦩ ꦨꦮꦺꦪ꧀ꦪꦸꦁ.

ꦌꦠ꧀ꦡ ꦥꦤ ꦪꦢꦺꦠꦁ ‘ꦱꦠ꧀ꦠꦫꦱꦩꦱ꧀ꦱ ꦨꦮꦔ꧀ꦒꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺꦪꦺꦮ ꦤꦶꦫꦸꦗ꧀ꦙꦠꦷ’ꦠꦶꦄꦴꦢꦶꦤꦴ ꦤꦪꦺꦤ ‘ꦌꦏꦱ꧀ꦱ ꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ ꦈꦥ꧀ꦥꦤ꧀ꦤꦁ ꦫꦹꦥꦁ ꦄꦚ꧀ꦚꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ ꦤꦶꦫꦸꦗ꧀ꦙꦠꦷ’ꦠꦶ ꦄꦛ꧀ꦜꦏꦡꦴꦪꦁ ꦄꦴꦒꦠꦠ꧀ꦠꦴ ꦮꦸꦠ꧀ꦠꦁ, ꦠꦁ ‘‘ꦪꦱ꧀ꦱ ꦏꦴꦪꦱꦔ꧀ꦑꦴꦫꦺꦴ ꦤꦶꦫꦸꦗ꧀ꦙꦠꦶ, ꦠꦱ꧀ꦱ ꦕꦶꦠ꧀ꦠꦱꦔ꧀ꦑꦴꦫꦺꦴ ꦤꦶꦫꦸꦗ꧀ꦙꦠꦷ’’ꦠꦶ? ‘‘ꦄꦴꦩꦤ꧀ꦠꦴ’’ꦠꦶ (ꦪꦩ. ꧒.ꦱꦔ꧀ꦑꦴꦫꦪꦩꦏ.꧗꧙) ꦆꦩꦴꦪ ꦥꦴꦭ꦳ꦶꦪꦴ ꦮꦶꦫꦸꦗ꧀ꦙꦠꦶ. ꦏꦡꦁ? ꦏꦴꦪꦱꦔ꧀ꦑꦴꦫꦺꦴ ꦲꦶ ꦕꦶꦠ꧀ꦠꦱꦩꦸꦛ꧀ꦜꦴꦤꦺꦴ ꦄꦱ꧀ꦱꦴꦱꦥꦱ꧀ꦱꦴꦱꦮꦴꦠꦺꦴ. ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦚ꧀ꦕ ꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ ꦈꦥ꧀ꦥꦗ꧀ꦗꦶꦠ꧀ꦮꦴ ꦪꦴꦮ ꦄꦚ꧀ꦚꦴꦤꦶ ꦱꦺꦴꦭ꦳ꦱ ꦕꦶꦠ꧀ꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ ꦠꦴꦮ ꦠꦶꦛ꧀ꦜꦠꦶ. ꦠꦺꦱꦁ ꦱꦺꦴꦭ꦳ꦱꦤ꧀ꦤꦁ ꦱꦧ꧀ꦧꦥꦕ꧀ꦖꦶꦩꦺꦤ ꦱꦢ꧀ꦣꦶꦁ ꦤꦶꦫꦸꦗ꧀ꦙꦠꦶ. ꦆꦠꦶ ꦪꦺꦤ ꦕꦶꦠ꧀ꦠꦺꦤ ꦱꦢ꧀ꦣꦶꦁ ꦈꦥ꧀ꦥꦗ꧀ꦗꦠꦶ, ꦠꦠꦺꦴ ꦥꦛ꧀ꦜꦴꦪ ꦱꦠ꧀ꦠꦫꦱꦩꦺꦤ ꦱꦢ꧀ꦣꦶꦁ ꦤꦶꦫꦸꦗ꧀ꦙꦠꦶ; ꦤ ꦏꦱ꧀ꦱꦕꦶ ꦕꦶꦠ꧀ꦠꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ ꦮꦴ ꦜꦶꦠꦶꦏ꧀ꦑꦟꦺ ꦮꦴ ꦤꦶꦫꦸꦗ꧀ꦙꦠꦶ, ꦤꦴꦥꦶ ꦜꦶꦠꦶꦏ꧀ꦑꦟꦺ ꦮꦴ ꦨꦔ꧀ꦒꦏ꧀ꦑꦟꦺ ꦮꦴ ꦈꦥ꧀ꦥꦗ꧀ꦗꦠꦶ. ꦌꦱꦴ ꦕꦶꦠ꧀ꦠꦱꦩꦸꦛ꧀ꦜꦴꦤꦫꦹꦥꦱ꧀ꦱ ꦣꦩ꧀ꦩꦠꦴꦠꦶ ꦤꦶꦪꦩꦠꦺꦴ ꦕꦶꦠ꧀ꦠꦱꦔ꧀ꦑꦴꦫꦺꦤ ꦱꦢ꧀ꦣꦶꦁ ꦌꦏꦏ꧀ꦑꦟꦺ ꦤꦶꦫꦸꦗ꧀ꦙꦤꦠꦺꦴ ‘‘ꦄꦴꦩꦤ꧀ꦠꦴ’’ꦠꦶ ꦮꦸꦠ꧀ꦠꦁ.

ꦪꦺꦴ ꦕꦴꦪꦁ ꦕꦶꦠ꧀ꦠꦱꦩꦸꦛ꧀ꦜꦴꦤꦱ꧀ꦱ ꦑꦟꦤꦶꦪꦩꦺꦴ ꦮꦸꦠ꧀ꦠꦺꦴ ꦏꦩ꧀ꦩꦴꦢꦶꦱꦩꦸꦛ꧀ꦜꦴꦤꦱ꧀ꦱꦴꦥꦶ ꦄꦪꦩꦺꦮ ꦑꦟꦤꦶꦪꦩꦺꦴ. ꦠꦱ꧀ꦩꦴ ꦥꦛꦶꦱꦤ꧀ꦣꦶꦕꦶꦠ꧀ꦠꦺꦤ ꦱꦲꦸꦥ꧀ꦥꦤ꧀ꦤꦁ ꦏꦩ꧀ꦩꦗꦫꦹꦥꦁ ꦠꦠꦺꦴ ꦥꦛ꧀ꦜꦴꦪ ꦱꦠ꧀ꦠꦫꦱꦩꦺꦤ ꦱꦢ꧀ꦣꦶꦁ ꦤꦶꦫꦸꦗ꧀ꦙꦠꦶ. ꦥꦛꦶꦱꦤ꧀ꦣꦶꦕꦶꦠ꧀ꦠꦱ꧀ꦱ ꦜꦶꦠꦶꦏ꧀ꦑꦟꦺ ꦈꦥ꧀ꦥꦤ꧀ꦤꦁ ꦄꦛ꧀ꦜꦴꦫꦱꦩꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ ꦤꦶꦫꦸꦗ꧀ꦙꦠꦶ. ꦥꦛꦶꦱꦤ꧀ꦣꦶꦕꦶꦠ꧀ꦠꦱ꧀ꦱ ꦨꦔ꧀ꦒꦏ꧀ꦑꦟꦺ ꦈꦥ꧀ꦥꦤ꧀ꦤꦁ ꦄꦛ꧀ꦜꦴꦫꦱꦩꦱ꧀ꦱ ꦜꦴꦤꦏ꧀ꦑꦟꦺ ꦤꦶꦫꦸꦗ꧀ꦙꦠꦷꦠꦶ ꦆꦩꦶꦤꦴ ꦤꦪꦺꦤꦺꦠ꧀ꦡ ꦪꦺꦴꦗꦤꦴ ꦏꦴꦠꦧ꧀ꦧꦴ. ꦠꦠꦺꦴ ꦥꦫꦁ ꦥꦤ ꦈꦠꦸꦱꦩꦸꦛ꧀ꦜꦴꦤꦶꦏꦥꦮꦺꦟꦷꦪꦺꦮ ꦠꦶꦛ꧀ꦜꦠꦶ. ‘ꦤꦷꦲꦫꦶꦠ꧀ꦮꦴ ꦙꦴꦥꦺꦡꦴ’ꦠꦶ ꦮꦠ꧀ꦠꦧ꧀ꦧꦁ ꦲꦺꦴꦠꦶ. ꦌꦮꦁ ‘ꦤꦴꦤꦸꦥ꧀ꦥꦴꦢꦌꦏꦤꦶꦫꦺꦴꦣꦠꦺꦴ’ ꦮꦺꦢꦶꦠꦧ꧀ꦧꦴ.

‘ꦌꦏꦸꦥ꧀ꦥꦴꦢꦌꦏꦤꦶꦫꦺꦴꦣꦠꦺꦴ’ꦠꦶ ꦫꦹꦥꦁ ꦥꦤ ꦫꦹꦥꦺꦤ ꦱꦲ ꦌꦏꦸꦥ꧀ꦥꦴꦢꦁ ꦌꦏꦤꦶꦫꦺꦴꦣꦁ. ꦄꦫꦹꦥꦁ ꦄꦫꦹꦥꦺꦤ ꦱꦲ ꦌꦏꦸꦥ꧀ꦥꦴꦢꦁ ꦌꦏꦤꦶꦫꦺꦴꦣꦁ. ꦌꦮꦁ ‘ꦌꦏꦸꦥ꧀ꦥꦴꦢꦌꦏꦤꦶꦫꦺꦴꦣꦠꦺꦴ’ ꦮꦺꦢꦶꦠꦧ꧀ꦧꦴ.

‘ꦤꦴꦤꦸꦥ꧀ꦥꦴꦢꦤꦴꦤꦴꦤꦶꦫꦺꦴꦣꦠꦴ’ ꦥꦤ ꦕꦠꦸꦱꦤ꧀ꦠꦠꦶꦫꦹꦥꦺꦤ ꦢꦷꦥꦺꦠꦧ꧀ꦧꦴ. ꦆꦩꦱ꧀ꦱ ꦲꦶ ꦈꦢ꧀ꦣꦁ ꦥꦴꦢꦠꦭꦴ ꦄꦣꦺꦴ ꦏꦺꦱꦩꦠ꧀ꦡꦏꦴ ꦠꦕꦥꦫꦶꦪꦤ꧀ꦠꦱ꧀ꦱ ꦱꦫꦷꦫꦱ꧀ꦱ ꦠꦠ꧀ꦡ ꦠꦠ꧀ꦡ ꦕꦠꦸꦱꦤ꧀ꦠꦠꦶꦫꦹꦥꦁ ꦓꦤꦥꦸꦚ꧀ꦗꦨꦴꦮꦺꦤ ꦮꦠ꧀ꦠꦠꦶ. ꦌꦮꦁ ꦮꦠ꧀ꦠꦩꦴꦤꦱ꧀ꦱꦴꦥꦶꦱ꧀ꦱ ꦤ ꦌꦏꦸꦥ꧀ꦥꦴꦢꦴꦢꦶꦠꦴ ꦱꦭ꧀ꦭꦏ꧀ꦑꦺꦠꦧ꧀ꦧꦴ. ꦪꦡꦴ ꦥꦤ ꦈꦥꦕꦶꦏꦫꦴꦗꦶ ꦮꦴ ꦏꦶꦥꦶꦭ꧀ꦭꦶꦏꦫꦴꦗꦶ ꦮꦴ ꦎꦭꦺꦴꦏꦶꦪꦩꦴꦤꦴ ꦌꦏꦴꦧꦢ꧀ꦣꦴ ꦮꦶꦪ ꦲꦺꦴꦠꦶ, ꦤ ꦥꦤ ꦌꦏꦴꦧꦢ꧀ꦣꦴ. ꦄꦚ꧀ꦚꦶꦱ꧀ꦱꦴ ꦲꦶ ꦱꦷꦱꦱꦤ꧀ꦠꦶꦏꦺ ꦄꦚ꧀ꦚꦶꦱ꧀ꦱꦴ ꦱꦷꦱꦩ꧀ꦥꦶ ꦈꦢꦫꦩ꧀ꦥꦶ ꦥꦴꦢꦴꦥꦶ, ꦄꦚ꧀ꦚꦶꦱ꧀ꦱꦴ ꦈꦢꦫꦱꦤ꧀ꦠꦶꦏꦺ ꦄꦚ꧀ꦚꦶꦱ꧀ꦱꦴ ꦱꦷꦱꦩ꧀ꦥꦶ ꦈꦢꦫꦩ꧀ꦥꦶ ꦥꦴꦢꦴꦥꦶ, ꦄꦚ꧀ꦚꦶꦱ꧀ꦱꦴ ꦥꦴꦢꦱꦤ꧀ꦠꦶꦏꦺ ꦄꦚ꧀ꦚꦶꦱ꧀ꦱꦴ ꦱꦷꦱꦩ꧀ꦥꦶ ꦈꦢꦫꦩ꧀ꦥꦶ ꦥꦴꦢꦴꦥꦶ ꦲꦺꦴꦤ꧀ꦠꦶ. ꦌꦮꦩꦺꦮ ꦕꦠꦸꦱꦤ꧀ꦠꦠꦶꦫꦹꦥꦴꦤꦩ꧀ꦥꦶ ꦄꦚ꧀ꦚꦱ꧀ꦱ ꦈꦥ꧀ꦥꦴꦢꦏ꧀ꦑꦟꦺ ꦄꦚ꧀ꦚꦱ꧀ꦱ ꦈꦥ꧀ꦥꦴꦢꦺꦴꦥꦶ ꦲꦺꦴꦠꦶ ꦜꦶꦠꦶꦥꦶ ꦨꦔ꧀ꦒꦺꦴꦥꦶ, ꦄꦚ꧀ꦚꦱ꧀ꦱ ꦜꦶꦠꦶꦏ꧀ꦑꦟꦺ ꦄꦚ꧀ꦚꦱ꧀ꦱ ꦈꦥ꧀ꦥꦴꦢꦺꦴꦥꦶ ꦲꦺꦴꦠꦶ ꦜꦶꦠꦶꦥꦶ ꦨꦔ꧀ꦒꦺꦴꦥꦶ, ꦄꦚ꧀ꦚꦱ꧀ꦱ ꦨꦔ꧀ꦒꦏ꧀ꦑꦟꦺ ꦄꦚ꧀ꦚꦱ꧀ꦱ ꦈꦥ꧀ꦥꦴꦢꦺꦴꦥꦶ ꦲꦺꦴꦠꦶ ꦜꦶꦠꦶꦥꦶ ꦨꦔ꧀ꦒꦺꦴꦥꦶ. ꦌꦮꦩꦺꦠ꧀ꦡ ‘ꦤꦴꦤꦸꦥ꧀ꦥꦴꦢꦤꦴꦤꦴꦤꦶꦫꦺꦴꦣꦠꦴ’ ꦮꦺꦢꦶꦠꦧ꧀ꦧꦴ.

‘ꦄꦠꦷꦠꦴꦢꦷꦤꦶ’ ꦥꦤ ꦢꦹꦫꦢꦸꦏꦥꦫꦶꦪꦺꦴꦱꦴꦤꦴꦤꦶ ꦥꦴꦭ꦳ꦶꦪꦁ ꦄꦴꦒꦠꦴꦤꦺꦮ. ‘ꦥꦕ꧀ꦕꦪꦱꦩꦸꦛ꧀ꦜꦴꦤꦴꦤꦶ’ꦥꦶ ‘‘ꦏꦩ꧀ꦩꦗꦁ, ꦏꦩ꧀ꦩꦥꦕ꧀ꦕꦪꦁ, ꦏꦩ꧀ꦩꦥꦕ꧀ꦕꦪꦈꦠꦸꦱꦩꦸꦛ꧀ꦜꦴꦤ’’ꦤ꧀ꦠꦶꦄꦴꦢꦶꦤꦴ (ꦣ. ꦱ. ꦄꦛ꧀ꦜ. ꧙꧗꧕) ꦤꦪꦺꦤ ꦲꦺꦛ꧀ꦜꦴ ꦏꦡꦶꦠꦴꦤꦶꦪꦺꦮ. ꦥꦚ꧀ꦕꦥꦶ ꦥꦤ ꦑꦤ꧀ꦣꦴ ꦥꦫꦶꦤꦶꦥ꧀ꦦꦤ꧀ꦤꦴꦮ ꦲꦺꦴꦤ꧀ꦠꦶ, ꦤꦺꦴ ꦄꦥꦫꦶꦤꦶꦥ꧀ꦦꦤ꧀ꦤꦴ; ꦱꦔ꧀ꦑꦠꦴꦮ ꦤꦺꦴ ꦄꦱꦔ꧀ꦑꦠꦴ; ꦄꦥꦶꦕ ꦤꦶꦥ꧀ꦦꦤ꧀ꦤꦴꦥꦶ ꦲꦺꦴꦤ꧀ꦠꦶꦪꦺꦮ. ꦱꦨꦴꦮꦣꦩ꧀ꦩꦺꦱꦸ ꦲꦶ ꦤꦶꦧ꧀ꦧꦴꦤꦩꦺꦮꦺꦏꦁ ꦄꦥꦫꦶꦤꦶꦥ꧀ꦦꦤ꧀ꦤꦁ ꦄꦤꦶꦥ꧀ꦦꦤ꧀ꦤꦚ꧀ꦕ. ꦤꦶꦫꦺꦴꦣꦱꦩꦴꦥꦠ꧀ꦠꦶ ꦥꦤ ꦤꦴꦩꦥꦚ꧀ꦚꦠ꧀ꦠꦶ ꦕ ꦏꦡꦤ꧀ꦠꦶ? ꦤꦶꦫꦺꦴꦣꦱꦩꦴꦥꦠ꧀ꦠꦶ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴꦠꦶ ꦮꦴ ꦱꦔ꧀ꦑꦠꦴꦱꦔ꧀ꦑꦠꦴꦠꦶ ꦮꦴ ꦥꦫꦶꦤꦶꦥ꧀ꦦꦤ꧀ꦤꦴꦥꦫꦶꦤꦶꦥ꧀ꦦꦤ꧀ꦤꦴꦠꦶ ꦮꦴ ꦤ ꦮꦠ꧀ꦠꦧ꧀ꦧꦴ. ꦤꦶꦥ꧀ꦦꦤ꧀ꦤꦴ ꦥꦤ ꦲꦺꦴꦠꦶ ꦱꦩꦴꦥꦗ꧀ꦗꦤ꧀ꦠꦺꦤ ꦱꦩꦴꦥꦗ꧀ꦗꦶꦠꦧ꧀ꦧꦠꦺꦴ. ꦠꦡꦴ ꦤꦴꦩꦥꦚ꧀ꦚꦠ꧀ꦠꦶ. ꦱꦴꦥꦶ ꦲꦶ ꦭꦺꦴꦏꦶꦪꦴꦢꦶꦨꦺꦢꦁ ꦤ ꦭꦨꦠꦶ; ꦤꦶꦥ꧀ꦦꦤ꧀ꦤꦴ ꦥꦤ ꦲꦺꦴꦠꦶ ꦤꦺꦴ ꦄꦤꦶꦥ꧀ꦦꦤ꧀ꦤꦴ; ꦤꦴꦩꦒ꧀ꦒꦲꦟꦚ꧀ꦲꦶ ꦒꦟ꧀ꦲꦤ꧀ꦠꦺꦴꦮ ꦒꦟ꧀ꦲꦴꦠꦷꦠꦶ.

ꦏꦩꦴꦢꦶꦮꦶꦤꦶꦕ꧀ꦖꦪꦏꦡꦴ

ꦌꦮꦁ ꦥꦏꦶꦟ꧀ꦟꦏꦠꦺꦴ ꦑꦤ꧀ꦣꦺ ꦮꦶꦢꦶꦠ꧀ꦮꦴ ꦥꦸꦤ ꦌꦠꦺꦱꦸꦪꦺꦮ –

ꦑꦤ꧀ꦣꦺꦱꦸ ꦚꦴꦟꦨꦺꦢꦠ꧀ꦡꦁ, ꦏꦩꦠꦺꦴꦡ ꦮꦶꦱꦺꦱꦠꦺꦴ;

ꦄꦤꦹꦤꦴꦣꦶꦏꦠꦺꦴ ꦕꦺꦮ, ꦈꦥꦩꦴꦠꦺꦴ ꦠꦡꦺꦮ ꦕ.

ꦢꦛ꧀ꦜꦧ꧀ꦧꦠꦺꦴ ꦢ꧀ꦮꦶꦣꦴ ꦌꦮꦁ, ꦥꦱ꧀ꦱꦤ꧀ꦠꦱ꧀ꦱꦠ꧀ꦡꦱꦶꦢ꧀ꦣꦶꦠꦺꦴ;

ꦮꦶꦤꦶꦕ꧀ꦖꦪꦤꦪꦺꦴ ꦱꦩ꧀ꦩꦴ, ꦮꦶꦚ꧀ꦚꦴꦠꦧ꧀ꦧꦺꦴ ꦮꦶꦨꦴꦮꦶꦤꦴ.

ꦠꦠ꧀ꦡ ‘ꦏꦩꦠꦺꦴ’ꦠꦶ ꦆꦣ ꦈꦥ꧀ꦥꦠ꧀ꦠꦶꦏ꧀ꦏꦩꦺꦴ, ꦥꦲꦴꦤꦏ꧀ꦏꦩꦺꦴ, ꦥꦛꦶꦥꦠ꧀ꦠꦶꦏ꧀ꦏꦩꦺꦴ, ꦨꦹꦩꦶꦏ꧀ꦏꦩꦺꦴ, ꦢꦺꦱꦤꦴꦏ꧀ꦏꦩꦺꦴꦠꦶ ꦧꦲꦸꦮꦶꦣꦺꦴ ꦏꦩꦺꦴ.

ꦠꦠ꧀ꦡ ‘‘ꦥꦜꦩꦁ ꦏꦭꦭꦁ ꦲꦺꦴꦠꦶ, ꦏꦭꦭꦴ ꦲꦺꦴꦠꦶ ꦄꦧ꧀ꦧꦸꦢ’’ꦤ꧀ꦠꦶ (ꦱꦁ. ꦤꦶ. ꧑.꧒꧓꧕) ꦌꦮꦩꦴꦢꦶ ꦈꦥ꧀ꦥꦠ꧀ꦠꦶꦏ꧀ꦏꦩꦺꦴ. ‘‘ꦢꦱ꧀ꦱꦤꦺꦤ ꦥꦲꦴꦠꦧ꧀ꦧꦴ ꦣꦩ꧀ꦩꦴ, ꦨꦴꦮꦤꦴꦪ ꦥꦲꦴꦠꦧ꧀ꦧꦴ ꦣꦩ꧀ꦩꦴ’’ꦠꦶ (ꦣ. ꦱ. ꦠꦶꦏꦩꦴꦠꦶꦏꦴ ꧘) ꦌꦮꦩꦴꦢꦶ ꦥꦲꦴꦤꦏ꧀ꦏꦩꦺꦴ. ‘‘ꦱꦷꦭꦮꦶꦱꦸꦢ꧀ꦣꦶ, ꦕꦶꦠ꧀ꦠꦮꦶꦱꦸꦢ꧀ꦣꦷ’’ꦠꦶ (ꦩ. ꦤꦶ. ꧑.꧒꧕꧙; ꦥꦛꦶ. ꦩ. ꧓.꧔꧑) ꦌꦮꦩꦴꦢꦶ ꦥꦛꦶꦥꦠ꧀ꦠꦶꦏ꧀ꦏꦩꦺꦴ. ‘‘ꦏꦴꦩꦴꦮꦕꦫꦴ, ꦫꦹꦥꦴꦮꦕꦫꦴ’’ꦠꦶ ꦌꦮꦩꦴꦢꦶ ꦨꦹꦩꦶꦏ꧀ꦏꦩꦺꦴ. ‘‘ꦕꦠ꧀ꦠꦴꦫꦺꦴ ꦱꦠꦶꦥꦛ꧀ꦜꦴꦤꦴ, ꦕꦠ꧀ꦠꦴꦫꦺꦴ ꦱꦩ꧀ꦩꦥ꧀ꦥꦣꦴꦤꦴ’’ꦠꦶ (ꦢꦷ. ꦤꦶ. ꧓.꧑꧔꧕) ꦮꦴ ‘‘ꦢꦴꦤꦏꦡꦁ ꦱꦷꦭꦏꦡ’’ꦤ꧀ꦠꦶ (ꦩ. ꦤꦶ. ꧒.꧖꧙; ꦢꦷ. ꦤꦶ. ꧑.꧒꧙꧘) ꦮꦴ ꦌꦮꦩꦴꦢꦶ ꦢꦺꦱꦤꦴꦏ꧀ꦏꦩꦺꦴ. ꦠꦺꦱꦸ ꦆꦣ ꦈꦥ꧀ꦥꦠ꧀ꦠꦶꦏ꧀ꦏꦩꦺꦴ ꦠꦴꦮ ꦤ ꦪꦸꦗ꧀ꦗꦠꦶ, ꦏꦭꦭꦴꦢꦷꦤꦁ ꦮꦶꦪ ꦑꦤ꧀ꦣꦴꦤꦁ ꦥꦸꦧ꧀ꦧꦴꦥꦫꦶꦪꦮꦮꦠ꧀ꦡꦴꦤꦺꦤ ꦄꦤꦸꦥ꧀ꦥꦠ꧀ꦠꦶꦠꦺꦴ; ꦤ ꦥꦲꦴꦤꦏ꧀ꦏꦩꦺꦴ ꦏꦸꦱꦭꦴꦧ꧀ꦪꦴꦏꦠꦴꦤꦁ ꦄꦥ꧀ꦥꦲꦴꦠꦧ꧀ꦧꦠꦺꦴ; ꦤ ꦥꦛꦶꦥꦠ꧀ꦠꦶꦏ꧀ꦏꦩꦺꦴ ꦄꦏꦸꦱꦭꦴꦤꦁ ꦄꦥ꧀ꦥꦛꦶꦥꦗ꧀ꦗꦤꦷꦪꦠꦺꦴ; ꦤ ꦨꦹꦩꦶꦏ꧀ꦏꦩꦺꦴ ꦮꦺꦢꦤꦴꦢꦷꦤꦁ ꦕꦠꦸꦨꦹꦩꦏꦥꦫꦶꦪꦴꦥꦤ꧀ꦤꦠ꧀ꦠꦴ.

ꦢꦺꦱꦤꦴꦏ꧀ꦏꦩꦺꦴ ꦥꦤ ꦪꦸꦗ꧀ꦗꦠꦶ. ꦄꦨꦺꦢꦺꦤ ꦲꦶ ꦪꦁ ꦥꦚ꧀ꦕꦱꦸ ꦑꦤ꧀ꦣꦺꦱꦸ ꦄꦠ꧀ꦠꦒ꧀ꦒꦴꦲꦥꦠꦶꦠꦁ ꦮꦺꦤꦺꦪ꧀ꦪꦗꦤꦁ ꦱꦩꦹꦲꦓꦤꦮꦶꦤꦶꦧ꧀ꦨꦺꦴꦒꦢꦱ꧀ꦱꦤꦺꦤ ꦄꦠ꧀ꦠꦒ꧀ꦒꦴꦲꦠꦺꦴ ꦩꦺꦴꦕꦺꦠꦸꦏꦴꦩꦺꦴ ꦨꦒꦮꦴ ꦲꦶꦠꦏꦴꦩꦺꦴ ꦠꦱ꧀ꦱ ꦗꦤꦱ꧀ꦱ ꦱꦸꦑꦒ꧀ꦒꦲꦟꦠ꧀ꦡꦁ ꦕꦏ꧀ꦑꦸꦄꦴꦢꦷꦤꦩ꧀ꦥꦶ ꦮꦶꦱꦪꦨꦹꦠꦁ ꦎꦭ꦳ꦴꦫꦶꦏꦁ ꦥꦜꦩꦁ ꦫꦹꦥꦏ꧀ꦑꦤ꧀ꦣꦁ ꦢꦺꦱꦺꦱꦶ. ꦠꦠꦺꦴ ꦆꦛ꧀ꦜꦴꦤꦶꦛ꧀ꦜꦫꦹꦥꦱꦁꦮꦺꦢꦶꦠꦁ ꦮꦺꦢꦤꦁ, ꦪꦁ ꦮꦺꦢꦪꦠꦶ ꦠꦁ ꦱꦚ꧀ꦗꦴꦤꦴꦠꦷꦠꦶ ꦌꦮꦁ ꦮꦺꦢꦤꦴꦮꦶꦱꦪꦱ꧀ꦱ ꦄꦴꦏꦴꦫꦒ꧀ꦒꦴꦲꦶꦏꦁ ꦱꦚ꧀ꦚꦁ, ꦱꦚ꧀ꦚꦴꦮꦱꦺꦤ ꦄꦨꦶꦱꦔ꧀ꦑꦴꦫꦏꦺ ꦱꦔ꧀ꦑꦴꦫꦺ, ꦠꦺꦱꦁ ꦮꦺꦢꦤꦴꦢꦷꦤꦁ ꦤꦶꦱ꧀ꦱꦪꦁ ꦄꦣꦶꦥꦠꦶꦨꦹꦠꦚ꧀ꦕ ꦮꦶꦚ꧀ꦚꦴꦟꦤ꧀ꦠꦶ ꦌꦮꦁ ꦠꦴꦮ ‘ꦏꦩꦠꦺꦴ’ ꦮꦶꦤꦶꦕ꧀ꦖꦪꦤꦪꦺꦴ ꦮꦶꦚ꧀ꦚꦴꦠꦧ꧀ꦧꦺꦴ.

‘ꦮꦶꦱꦺꦱꦠꦺꦴ’ꦠꦶ ꦑꦤ꧀ꦣꦴꦤꦚ꧀ꦕ ꦈꦥꦴꦢꦴꦤꦏ꧀ꦑꦤ꧀ꦣꦴꦤꦚ꧀ꦕ ꦮꦶꦱꦺꦱꦠꦺꦴ. ꦏꦺꦴ ꦥꦤ ꦠꦺꦱꦁ ꦮꦶꦱꦺꦱꦺꦴ? ꦑꦤ꧀ꦣꦴ ꦠꦴꦮ ꦄꦮꦶꦱꦺꦱꦠꦺꦴ ꦮꦸꦠ꧀ꦠꦴ, ꦈꦥꦴꦢꦴꦤꦏ꧀ꦑꦤ꧀ꦣꦴ ꦱꦴꦱꦮꦈꦥꦴꦢꦴꦤꦷꦪꦨꦴꦮꦺꦤ ꦮꦶꦱꦺꦱꦺꦠ꧀ꦮꦴ. ꦪꦡꦴꦲ –

‘‘ꦥꦚ꧀ꦕ, ꦨꦶꦏ꧀ꦑꦮꦺ, ꦑꦤ꧀ꦣꦺ ꦢꦺꦱꦺꦱ꧀ꦱꦴꦩꦶ ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦺ ꦕ, ꦠꦁ ꦱꦸꦟꦴꦡ. ꦏꦠꦩꦺ ꦕ, ꦨꦶꦏ꧀ꦑꦮꦺ, ꦥꦚ꧀ꦕꦏ꧀ꦑꦤ꧀ꦣꦴ? ꦪꦁ ꦏꦶꦚ꧀ꦕꦶ, ꦨꦶꦏ꧀ꦑꦮꦺ, ꦫꦹꦥꦁ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦁ…ꦥꦺ… ꦱꦤ꧀ꦠꦶꦏꦺ ꦮꦴ – ꦄꦪꦁ ꦮꦸꦕ꧀ꦕꦠꦶ, ꦫꦹꦥꦏ꧀ꦑꦤ꧀ꦣꦺꦴ. ꦪꦴ ꦏꦴꦕꦶ ꦮꦺꦢꦤꦴ…ꦥꦺ… ꦪꦴ ꦏꦴꦕꦶ ꦱꦚ꧀ꦚꦴ…ꦥꦺ… ꦪꦺ ꦏꦺꦕꦶ ꦱꦔ꧀ꦑꦴꦫꦴ…ꦥꦺ… ꦪꦁ ꦏꦶꦚ꧀ꦕꦶ ꦮꦶꦚ꧀ꦚꦴꦟꦁ …ꦥꦺ… ꦱꦤ꧀ꦠꦶꦏꦺ ꦮꦴ – ꦄꦪꦁ ꦮꦸꦕ꧀ꦕꦠꦶ, ꦮꦶꦚ꧀ꦚꦴꦟꦏ꧀ꦑꦤ꧀ꦣꦺꦴ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦥꦚ꧀ꦕꦏ꧀ꦑꦤ꧀ꦣꦴ. ꦏꦠꦩꦺ ꦕ, ꦨꦶꦏ꧀ꦑꦮꦺ, ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴ? ꦪꦁ ꦏꦶꦚ꧀ꦕꦶ, ꦨꦶꦏ꧀ꦑꦮꦺ, ꦫꦹꦥꦁ…ꦥꦺ… ꦱꦤ꧀ꦠꦶꦏꦺ ꦮꦴ ꦱꦴꦱꦮꦁ ꦈꦥꦴꦢꦴꦤꦶꦪꦁ – ꦄꦪꦁ ꦮꦸꦕ꧀ꦕꦠꦶ, ꦫꦹꦥꦹꦥꦴꦢꦴꦤꦏ꧀ꦑꦤ꧀ꦣꦺꦴ. ꦪꦴ ꦏꦴꦕꦶ ꦮꦺꦢꦤꦴ…ꦥꦺ… ꦪꦁ ꦏꦶꦚ꧀ꦕꦶ ꦮꦶꦚ꧀ꦚꦴꦟꦁ…ꦥꦺ… ꦱꦤ꧀ꦠꦶꦏꦺ ꦮꦴ ꦱꦴꦱꦮꦁ ꦈꦥꦴꦢꦴꦤꦶꦪꦁ – ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦮꦶꦚ꧀ꦚꦴꦟꦸꦥꦴꦢꦴꦤꦏ꧀ꦑꦤ꧀ꦣꦺꦴ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴ’’ꦠꦶ (ꦱꦁ. ꦤꦶ. ꧓.꧔꧘).

ꦌꦠ꧀ꦡ ꦕ ꦪꦡꦴ ꦮꦺꦢꦤꦴꦢꦪꦺꦴ ꦄꦤꦴꦱꦮꦴꦥꦶ ꦱꦴꦱꦮꦴꦥꦶ ꦄꦠ꧀ꦡꦶ, ꦤ ꦌꦮꦁ ꦫꦹꦥꦁ. ꦪꦱ꧀ꦩꦴ ꦥꦤꦱ꧀ꦱ ꦫꦴꦱꦛ꧀ꦜꦺꦤ ꦑꦤ꧀ꦣꦨꦴꦮꦺꦴ ꦪꦸꦗ꧀ꦗꦠꦶ ꦠꦱ꧀ꦩꦴ ꦑꦤ꧀ꦣꦺꦱꦸ ꦮꦸꦠ꧀ꦠꦁ. ꦪꦱ꧀ꦩꦴ ꦫꦴꦱꦛ꧀ꦜꦺꦤ ꦕ ꦱꦴꦱꦮꦛ꧀ꦜꦺꦤ ꦕ ꦈꦥꦴꦢꦴꦤꦏ꧀ꦑꦤ꧀ꦣꦨꦴꦮꦺꦴ ꦪꦸꦗ꧀ꦗꦠꦶ ꦠꦱ꧀ꦩꦴ ꦈꦥꦴꦢꦴꦤꦏ꧀ꦑꦤ꧀ꦣꦺꦱꦸ ꦮꦸꦠ꧀ꦠꦁ. ꦮꦺꦢꦤꦴꦢꦪꦺꦴ ꦥꦤ ꦄꦤꦴꦱꦮꦴꦮ ꦑꦤ꧀ꦣꦺꦱꦸ ꦮꦸꦠ꧀ꦠꦴ, ꦱꦴꦱꦮꦴ ꦈꦥꦴꦢꦴꦤꦏ꧀ꦑꦤ꧀ꦣꦺꦱꦸ. ‘ꦈꦥꦴꦢꦴꦤꦏ꧀ꦑꦤ꧀ꦣꦴ’ꦠꦶ ꦌꦠ꧀ꦡ ꦕ ꦈꦥꦴꦢꦴꦤꦒꦺꦴꦕꦫꦴ ꦑꦤ꧀ꦣꦴ ꦈꦥꦴꦢꦴꦤꦏ꧀ꦑꦤ꧀ꦣꦴꦠꦶ ꦌꦮꦩꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦆꦣ ꦥꦤ ꦱꦧ꧀ꦧꦺꦥꦺꦠꦺ ꦌꦏꦗ꧀ꦙꦁ ꦏꦠ꧀ꦮꦴ ꦑꦤ꧀ꦣꦴꦠꦶ ꦄꦣꦶꦥ꧀ꦥꦺꦠꦴ.

‘ꦄꦤꦹꦤꦴꦣꦶꦏꦠꦺꦴ’ꦠꦶ ꦏꦱ꧀ꦩꦴ ꦥꦤ ꦨꦒꦮꦠꦴ ꦥꦚ꧀ꦕꦺꦮ ꦑꦤ꧀ꦣꦴ ꦮꦸꦠ꧀ꦠꦴ ꦄꦤꦹꦤꦴ ꦄꦤꦣꦶꦏꦴꦠꦶ? ꦱꦧ꧀ꦧꦱꦔ꧀ꦑꦠꦱꦨꦴꦒꦺꦏꦱꦔ꧀ꦒꦲꦠꦺꦴ, ꦄꦠ꧀ꦠꦠ꧀ꦠꦤꦶꦪꦒ꧀ꦒꦴꦲꦮꦠ꧀ꦡꦸꦱ꧀ꦱ ꦌꦠꦥ꧀ꦥꦫꦩꦠꦺꦴ, ꦄꦚ꧀ꦚꦺꦱꦚ꧀ꦕ ꦠꦢꦮꦫꦺꦴꦣꦠꦺꦴ. ꦄꦤꦺꦏꦥ꧀ꦥꦨꦺꦢꦺꦱꦸ ꦲꦶ ꦱꦔ꧀ꦑꦠꦣꦩ꧀ꦩꦺꦱꦸ ꦱꦨꦴꦒꦮꦱꦺꦤ ꦱꦔ꧀ꦒꦪ꧀ꦲꦩꦴꦤꦺꦱꦸ ꦫꦹꦥꦁ ꦫꦹꦥꦱꦨꦴꦒꦱꦔ꧀ꦒꦲꦮꦱꦺꦤ ꦌꦏꦺꦴ ꦑꦤ꧀ꦣꦺꦴ ꦲꦺꦴꦠꦶ, ꦮꦺꦢꦤꦴ ꦮꦺꦢꦤꦴꦱꦨꦴꦒꦱꦔ꧀ꦒꦲꦮꦱꦺꦤ ꦌꦏꦺꦴ ꦑꦤ꧀ꦣꦺꦴ ꦲꦺꦴꦠꦶ. ꦌꦱ ꦤꦪꦺꦴ ꦱꦚ꧀ꦚꦴꦢꦷꦱꦸꦥꦶ. ꦠꦱ꧀ꦩꦴ ꦱꦧ꧀ꦧꦱꦔ꧀ꦑꦠꦱꦨꦴꦒꦱꦔ꧀ꦒꦲꦠꦺꦴ ꦥꦚ꧀ꦕꦺꦮ ꦮꦸꦠ꧀ꦠꦴ. ꦌꦠꦥꦫꦩꦚ꧀ꦕꦺꦠꦁ ꦄꦠ꧀ꦠꦠ꧀ꦠꦤꦶꦪꦒ꧀ꦒꦴꦲꦮꦠ꧀ꦡꦸ ꦪꦢꦶꦢꦁ ꦫꦹꦥꦴꦢꦪꦺꦴ ꦥꦚ꧀ꦕ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦫꦹꦥꦺ ꦑꦺꦴ, ꦨꦶꦏ꧀ꦑꦮꦺ, ꦱꦠꦶ ꦫꦹꦥꦁ ꦈꦥꦴꦢꦴꦪ ꦫꦹꦥꦁ ꦄꦨꦶꦤꦶꦮꦶꦱ꧀ꦱ ꦌꦮꦁ ꦢꦶꦛ꧀ꦜꦶ ꦈꦥ꧀ꦥꦗ꧀ꦗꦠꦶ – ‘ꦌꦠꦁ ꦩꦩ, ꦌꦱꦺꦴꦲꦩꦱ꧀ꦩꦶ, ꦌꦱꦺꦴ ꦩꦺ ꦄꦠ꧀ꦠꦴ’ꦠꦶ (ꦱꦁ. ꦤꦶ. ꧓.꧒꧐꧗). ꦮꦺꦢꦤꦴꦪ… ꦱꦚ꧀ꦚꦴꦪ… ꦱꦔ꧀ꦑꦴꦫꦺꦱꦸ…. ꦮꦶꦚ꧀ꦚꦴꦟꦺ ꦱꦠꦶ ꦮꦶꦚ꧀ꦚꦴꦟꦁ ꦈꦥꦴꦢꦴꦪ ꦮꦶꦚ꧀ꦚꦴꦟꦁ ꦄꦨꦶꦤꦶꦮꦶꦱ꧀ꦱ ꦌꦮꦁ ꦢꦶꦛ꧀ꦜꦶ ꦈꦥ꧀ꦥꦗ꧀ꦗꦠꦶ – ‘ꦌꦠꦁ ꦩꦩ, ꦌꦱꦺꦴꦲꦩꦱ꧀ꦩꦶ, ꦌꦱꦺꦴ ꦩꦺ ꦄꦠ꧀ꦠꦴ’’’ꦠꦶ. ꦠꦱ꧀ꦩꦴ ꦄꦠ꧀ꦠꦠ꧀ꦠꦤꦶꦪꦒ꧀ꦒꦴꦲꦮꦠ꧀ꦡꦸꦱ꧀ꦱ ꦌꦠꦥꦫꦩꦠꦺꦴꦥꦶ ꦥꦚ꧀ꦕꦺꦮ ꦮꦸꦠ꧀ꦠꦴ. ꦪꦺꦥꦶ ꦕꦚ꧀ꦚꦺ ꦱꦷꦭꦴꦢꦪꦺꦴ ꦥꦚ꧀ꦕ ꦣꦩ꧀ꦩꦏ꧀ꦑꦤ꧀ꦣꦴ ꦮꦸꦠ꧀ꦠꦴ, ꦠꦺꦥꦶ ꦱꦔ꧀ꦑꦴꦫꦏ꧀ꦑꦤ꧀ꦣꦥꦫꦶꦪꦴꦥꦤ꧀ꦤꦠ꧀ꦠꦴ ꦌꦠ꧀ꦡꦺꦮ ꦄꦮꦫꦺꦴꦣꦁ ꦒꦕ꧀ꦖꦤ꧀ꦠꦶ. ꦠꦱ꧀ꦩꦴ ꦄꦚ꧀ꦚꦺꦱꦁ ꦠꦢꦮꦫꦺꦴꦣꦠꦺꦴꦥꦶ ꦥꦚ꧀ꦕꦺꦮ ꦮꦸꦠ꧀ꦠꦴꦠꦶ. ꦌꦮꦁ ‘ꦄꦤꦹꦤꦴꦣꦶꦏꦠꦺꦴ’ ꦮꦶꦤꦶꦕ꧀ꦖꦪꦤꦪꦺꦴ ꦮꦶꦚ꧀ꦚꦴꦠꦧ꧀ꦧꦺꦴ.

‘ꦈꦥꦩꦴꦠꦺꦴ’ꦠꦶ ꦌꦠ꧀ꦡ ꦲꦶ ꦒꦶꦭꦴꦤꦱꦴꦭꦹꦥꦩꦺꦴ ꦫꦹꦥꦸꦥꦴꦢꦴꦤꦏ꧀ꦑꦤ꧀ꦣꦺꦴ ꦒꦶꦭꦴꦤꦹꦥꦩꦱ꧀ꦱ ꦮꦶꦚ꧀ꦚꦴꦟꦸꦥꦴꦢꦴꦤꦏ꧀ꦑꦤ꧀ꦣꦱ꧀ꦱ ꦮꦠ꧀ꦡꦸꦢ꧀ꦮꦴꦫꦴꦫꦩ꧀ꦩꦟꦮꦱꦺꦤ ꦤꦶꦮꦴꦱꦤꦛ꧀ꦜꦴꦤꦠꦺꦴ, ꦒꦺꦭꦚ꧀ꦚꦹꦥꦩꦺꦴ ꦮꦺꦢꦤꦸꦥꦴꦢꦴꦤꦏ꧀ꦑꦤ꧀ꦣꦺꦴ ꦄꦴꦧꦴꦣꦏꦠ꧀ꦠꦴ, ꦒꦺꦭꦚ꧀ꦚꦱꦩꦸꦛ꧀ꦜꦴꦤꦹꦥꦩꦺꦴ ꦱꦚ꧀ꦚꦸꦥꦴꦢꦴꦤꦏ꧀ꦑꦤ꧀ꦣꦺꦴ ꦏꦴꦩꦱꦚ꧀ꦚꦴꦢꦶꦮꦱꦺꦤ ꦫꦴꦒꦴꦢꦶꦱꦩ꧀ꦥꦪꦸꦠ꧀ꦠꦮꦺꦢꦤꦴꦱꦩ꧀ꦨꦮꦴ, ꦄꦱꦥ꧀ꦥꦴꦪꦱꦺꦮꦤꦹꦥꦩꦺꦴ ꦱꦔ꧀ꦑꦴꦫꦸꦥꦴꦢꦴꦤꦏ꧀ꦑꦤ꧀ꦣꦺꦴ ꦮꦺꦢꦤꦴꦒꦺꦭꦚ꧀ꦚꦱ꧀ꦱ ꦤꦶꦢꦴꦤꦠ꧀ꦠꦴ. ‘‘ꦮꦺꦢꦤꦁ ꦮꦺꦢꦤꦠ꧀ꦠꦴꦪ ꦱꦔ꧀ꦑꦠꦩꦨꦶꦱꦔ꧀ꦑꦫꦺꦴꦤ꧀ꦠꦷ’’ꦠꦶ (ꦱꦁ. ꦤꦶ. ꧓.꧗꧙) ꦲꦶ ꦮꦸꦠ꧀ꦠꦁ. ꦠꦡꦴ ‘‘ꦄꦏꦸꦱꦭꦱ꧀ꦱ ꦏꦩ꧀ꦩꦱ꧀ꦱ ꦏꦠꦠ꧀ꦠꦴ ꦈꦥꦕꦶꦠꦠ꧀ꦠꦴ ꦮꦶꦥꦴꦏꦁ ꦏꦴꦪꦮꦶꦚ꧀ꦚꦴꦟꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ ꦢꦸꦏ꧀ꦑꦱꦲꦒꦠ’’ꦤ꧀ꦠꦶ (ꦣ. ꦱ. ꧕꧕꧖). ꦒꦶꦭꦴꦤꦹꦥꦩꦺꦴ ꦮꦶꦚ꧀ꦚꦴꦟꦸꦥꦴꦢꦴꦤꦏ꧀ꦑꦤ꧀ꦣꦺꦴ ꦮꦺꦢꦤꦴꦒꦺꦭꦚ꧀ꦚꦺꦤ ꦄꦥꦫꦶꦩꦸꦠ꧀ꦠꦠ꧀ꦠꦴ. ꦄꦥꦶꦕ ꦕꦴꦫꦏꦏꦴꦫꦟꦄꦥꦫꦴꦣꦏꦴꦫꦟꦏꦴꦫꦏꦄꦥꦫꦴꦣꦶꦏꦹꦥꦩꦴ ꦌꦠꦺ ꦨꦴꦗꦤꦨꦺꦴꦗꦤꦧ꧀ꦪꦚ꧀ꦗꦤꦥꦫꦶꦮꦺꦱꦏꦨꦸꦚ꧀ꦗꦏꦹꦥꦩꦴ ꦕꦴꦠꦶ, ꦌꦮꦁ ‘ꦈꦥꦩꦴꦠꦺꦴ’ ꦮꦶꦤꦶꦕ꧀ꦖꦪꦤꦪꦺꦴ ꦮꦶꦚ꧀ꦚꦴꦠꦧ꧀ꦧꦺꦴ.

‘ꦢꦛ꧀ꦜꦧ꧀ꦧꦠꦺꦴ ꦢ꧀ꦮꦶꦣꦴ’ꦠꦶ ꦱꦔ꧀ꦑꦺꦥꦠꦺꦴ ꦮꦶꦠ꧀ꦡꦴꦫꦠꦺꦴ ꦕꦴꦠꦶ ꦌꦮꦁ ꦢ꧀ꦮꦶꦣꦴ ꦢꦛ꧀ꦜꦧ꧀ꦧꦠꦺꦴ ꦥꦺꦠ꧀ꦡ ꦮꦶꦤꦶꦕ꧀ꦖꦪꦤꦪꦺꦴ ꦮꦶꦚ꧀ꦚꦴꦠꦧ꧀ꦧꦺꦴ. ꦱꦔ꧀ꦑꦺꦥꦠꦺꦴ ꦲꦶ ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴ ꦄꦴꦱꦶꦮꦶꦱꦹꦥꦩꦺ (ꦱꦁ. ꦤꦶ. ꧔.꧒꧓꧘) ꦮꦸꦠ꧀ꦠꦤꦪꦺꦤ ꦈꦏ꧀ꦑꦶꦠ꧀ꦠꦴꦱꦶꦏꦥꦕ꧀ꦕꦠ꧀ꦡꦶꦏꦠꦺꦴ, ꦨꦴꦫꦱꦸꦠ꧀ꦠꦮꦱꦺꦤ (ꦱꦁ. ꦤꦶ. ꧓.꧒꧒) ꦨꦴꦫꦠꦺꦴ, ꦑꦗ꧀ꦗꦤꦷꦪꦥꦫꦶꦪꦴꦪꦮꦱꦺꦤ (ꦱꦁ. ꦤꦶ. ꧓.꧗꧙) ꦑꦴꦢꦏꦠꦺꦴ, ꦪꦩꦏꦱꦸꦠ꧀ꦠꦮꦱꦺꦤ (ꦱꦁ. ꦤꦶ. ꧓.꧘꧕) ꦄꦤꦶꦕ꧀ꦕꦢꦸꦏ꧀ꦑꦴꦤꦠ꧀ꦠꦱꦔ꧀ꦑꦠꦮꦣꦏꦠꦺꦴ ꦢꦛ꧀ꦜꦧ꧀ꦧꦴ.

ꦮꦶꦠ꧀ꦡꦴꦫꦠꦺꦴ ꦥꦤꦺꦠ꧀ꦡ ꦦꦺꦟꦥꦶꦟ꧀ꦝꦺꦴ ꦮꦶꦪ ꦫꦹꦥꦁ ꦢꦛ꧀ꦜꦧ꧀ꦧꦁ, ꦈꦢꦏꦥꦸꦧ꧀ꦧꦸꦭ꦳ꦺꦴ ꦮꦶꦪ ꦮꦺꦢꦤꦴ, ꦩꦫꦷꦕꦶꦏꦴ ꦮꦶꦪ ꦱꦚ꧀ꦚꦴ, ꦏꦢꦭꦶꦏ꧀ꦑꦤ꧀ꦣꦺꦴ ꦮꦶꦪ ꦱꦔ꧀ꦑꦴꦫꦴ, ꦩꦴꦪꦴ ꦮꦶꦪ ꦮꦶꦚ꧀ꦚꦴꦟꦁ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦦꦺꦟꦥꦶꦟ꧀ꦝꦹꦥꦩꦁ ꦫꦹꦥꦁ, ꦮꦺꦢꦤꦴ ꦥꦸꦧ꧀ꦧꦸꦭ꦳ꦹꦥꦩꦴ;

ꦩꦫꦷꦕꦶꦏꦹꦥꦩꦴ ꦱꦚ꧀ꦚꦴ, ꦱꦔ꧀ꦑꦴꦫꦴ ꦏꦢꦭꦹꦥꦩꦴ;

ꦩꦴꦪꦹꦥꦩꦚ꧀ꦕ ꦮꦶꦚ꧀ꦚꦴꦟꦁ, ꦢꦺꦱꦶꦠꦴꦢꦶꦕ꧀ꦕꦧꦤ꧀ꦣꦸꦤꦴ’’ꦠꦶ. (ꦱꦁ. ꦤꦶ. ꧓.꧙꧕);

ꦠꦠ꧀ꦡ ꦫꦹꦥꦴꦢꦷꦤꦁ ꦦꦺꦟꦥꦶꦟ꧀ꦝꦴꦢꦷꦲꦶ ꦌꦮꦁ ꦱꦢꦶꦱꦠꦴ ꦮꦺꦢꦶꦠꦧ꧀ꦧꦴ – ꦪꦡꦴ ꦲꦶ ꦦꦺꦟꦥꦶꦟ꧀ꦝꦺꦴ ꦤꦶꦱ꧀ꦱꦴꦫꦺꦴꦮ ꦌꦮꦁ ꦫꦹꦥꦩ꧀ꦥꦶ ꦤꦶꦕ꧀ꦕꦱꦴꦫꦣꦸꦮꦱꦴꦫꦄꦠ꧀ꦠꦱꦴꦫꦮꦶꦫꦲꦺꦤ ꦤꦶꦱ꧀ꦱꦴꦫꦩꦺꦮ. ꦪꦡꦴ ꦕ ꦱꦺꦴ ‘ꦆꦩꦶꦤꦴ ꦥꦠ꧀ꦠꦁ ꦮꦴ ꦡꦴꦭꦏꦁ ꦮꦴ ꦏꦫꦶꦱ꧀ꦱꦴꦩꦷ’ꦠꦶ ꦒꦲꦺꦠꦸꦁ ꦤ ꦱꦏ꧀ꦏꦴ, ꦒꦲꦶꦠꦺꦴꦥꦶ ꦠꦩꦠ꧀ꦡꦁ ꦤ ꦱꦴꦣꦺꦠꦶ ꦨꦶꦗ꧀ꦗꦠꦺꦮ; ꦌꦮꦁ ꦫꦹꦥꦩ꧀ꦥꦶ ‘ꦤꦶꦕ꧀ꦕ’ꦤ꧀ꦠꦶ ꦮꦴ ‘ꦣꦸꦮ’ꦤ꧀ꦠꦶ ꦮꦴ ‘ꦄꦲ’ꦤ꧀ꦠꦶ ꦮꦴ ‘ꦩꦩ’ꦤ꧀ꦠꦶ ꦮꦴ ꦒꦲꦺꦠꦸꦁ ꦤ ꦱꦏ꧀ꦏꦴ, ꦒꦲꦶꦠꦩ꧀ꦥꦶ ꦤ ꦠꦡꦴ ꦠꦶꦛ꧀ꦜꦠꦶ, ꦄꦤꦶꦕ꧀ꦕꦁ ꦢꦸꦏ꧀ꦑꦁ ꦄꦤꦠ꧀ꦠꦴ ꦄꦱꦸꦨꦚ꧀ꦚꦺꦮ ꦲꦺꦴꦠꦷꦠꦶ. ꦌꦮꦁ ‘ꦦꦺꦟꦥꦶꦟ꧀ꦝꦱꦢꦶꦱꦩꦺꦮ’ ꦲꦺꦴꦠꦶ.

ꦪꦡꦴ ꦮꦴ ꦥꦤ ꦦꦺꦟꦥꦶꦟ꧀ꦝꦺꦴ ꦖꦶꦢ꧀ꦢꦴꦮꦖꦶꦢ꧀ꦢꦺꦴ ꦄꦤꦺꦏꦱꦤ꧀ꦣꦶꦓꦛꦶꦠꦺꦴ ꦧꦲꦹꦤ꧀ꦤꦁ ꦈꦢꦏꦱꦥ꧀ꦥꦴꦢꦷꦤꦁ ꦥꦴꦟꦴꦤꦁ ꦄꦴꦮꦴꦱꦺꦴ, ꦌꦮꦁ ꦫꦹꦥꦩ꧀ꦥꦶ ꦖꦶꦢ꧀ꦢꦴꦮꦖꦶꦢ꧀ꦢꦁ ꦄꦤꦺꦏꦱꦤ꧀ꦣꦶꦓꦛꦶꦠꦁ. ꦏꦸꦭꦮꦱꦺꦤ ꦕꦺꦠ꧀ꦡ ꦄꦱꦷꦠꦶ ꦏꦶꦩꦶꦏꦸꦭꦴꦤꦶ ꦮꦱꦤ꧀ꦠꦶ. ꦠꦢꦺꦮ ꦠꦺꦱꦁ ꦱꦹꦠꦶꦓꦫꦩ꧀ꦥꦶ ꦮꦕ꧀ꦕꦏꦸꦛꦶꦥꦶ ꦒꦶꦭꦴꦤꦱꦴꦭꦴꦥꦶ ꦱꦸꦱꦴꦤꦩ꧀ꦥꦶ. ꦤ ꦠꦺ ꦄꦚ꧀ꦚꦠ꧀ꦡ ꦒꦤ꧀ꦠ꧀ꦮꦴ ꦒꦧ꧀ꦨꦮꦸꦛ꧀ꦜꦴꦤꦴꦢꦷꦤꦶ ꦏꦫꦺꦴꦤ꧀ꦠꦶ. ꦌꦮꦩ꧀ꦥꦶ ꦦꦺꦟꦥꦶꦟ꧀ꦝꦱꦢꦶꦱꦁ. ꦪꦡꦴ ꦕ ꦦꦺꦟꦥꦶꦟ꧀ꦝꦺꦴ ꦄꦴꦢꦶꦠꦺꦴꦮ ꦧꦢꦫꦥꦏ꧀ꦏꦩꦠ꧀ꦠꦺꦴ ꦲꦸꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦥꦧ꧀ꦧꦠꦏꦹꦛꦩꦠ꧀ꦠꦺꦴꦥꦶ ꦲꦺꦴꦠꦶ, ꦌꦮꦁ ꦫꦹꦥꦩ꧀ꦥꦶ ꦄꦴꦢꦶꦠꦺꦴ ꦏꦭꦭꦩꦠ꧀ꦠꦁ ꦲꦸꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦧ꧀ꦪꦴꦩꦩꦠ꧀ꦠꦩ꧀ꦥꦶ ꦒꦺꦴꦩꦲꦶꦁꦱꦲꦠ꧀ꦡꦶꦄꦴꦢꦷꦤꦁ ꦮꦱꦺꦤ ꦥꦧ꧀ꦧꦠꦏꦹꦛꦩꦠ꧀ꦠꦩ꧀ꦥꦶ ꦲꦺꦴꦠꦶ, ꦩꦕ꧀ꦖꦏꦕ꧀ꦖꦥꦴꦢꦷꦤꦁ ꦮꦱꦺꦤ ꦄꦤꦺꦏꦪꦺꦴꦗꦤꦱꦠꦥ꧀ꦥꦩꦴꦟꦩ꧀ꦥꦶ. ꦌꦮꦩ꧀ꦥꦶ ꦦꦺꦟꦥꦶꦟ꧀ꦝꦱꦢꦶꦱꦁ. ꦪꦡꦴ ꦕ ꦦꦺꦟꦥꦶꦟ꧀ꦝꦺꦴ ꦈꦛ꧀ꦜꦶꦠꦩꦠ꧀ꦠꦺꦴꦥꦶ ꦨꦶꦗ꧀ꦗꦠꦶ, ꦡꦺꦴꦏꦁ ꦒꦤ꧀ꦠ꧀ꦮꦴꦥꦶ, ꦱꦩꦸꦢ꧀ꦢꦁ ꦥꦠ꧀ꦮꦴ ꦥꦤ ꦄꦮꦱ꧀ꦱꦩꦺꦮ ꦨꦶꦗ꧀ꦗꦠꦶ; ꦌꦮꦩꦺꦮ ꦫꦹꦥꦩ꧀ꦥꦶ ꦏꦭꦭꦨꦴꦮꦺꦥꦶ ꦨꦶꦗ꧀ꦗꦠꦶ, ꦄꦧ꧀ꦧꦸꦢꦴꦢꦶꦨꦴꦮꦺ, ꦄꦤ꧀ꦠꦫꦴ ꦥꦤ ꦄꦨꦺꦗ꧀ꦗꦩꦴꦤꦩ꧀ꦥꦶ ꦮꦱ꧀ꦱꦱꦠꦴꦪꦸꦏꦴꦤꦁ ꦮꦱ꧀ꦱꦱꦠꦁ ꦥꦠ꧀ꦮꦴ ꦄꦮꦱ꧀ꦱꦩꦺꦮ ꦨꦶꦗ꧀ꦗꦠꦶ, ꦩꦫꦟꦩꦸꦑꦺ ꦕꦸꦟ꧀ꦟꦮꦶꦕꦸꦟ꧀ꦟꦁ ꦲꦺꦴꦠꦶ. ꦌꦮꦩ꧀ꦥꦶ ꦦꦺꦟꦥꦶꦟ꧀ꦝꦱꦢꦶꦱꦁ.

ꦪꦡꦴ ꦥꦤ ꦥꦸꦧ꧀ꦧꦸꦭ꦳ꦺꦴ ꦄꦱꦴꦫꦺꦴ, ꦌꦮꦁ ꦮꦺꦢꦤꦴꦥꦶ. ꦪꦡꦴ ꦕ ꦱꦺꦴ ꦄꦧꦭꦺꦴ, ꦄꦒꦪ꧀ꦲꦸꦥꦒꦺꦴ, ꦤ ꦱꦏ꧀ꦏꦴ ꦠꦁ ꦒꦲꦺꦠ꧀ꦮꦴ ꦦꦭꦏꦁ ꦮꦴ ꦄꦴꦱꦤꦁ ꦮꦴ ꦏꦴꦠꦸꦁ, ꦒꦲꦶꦠꦒ꧀ꦒꦲꦶꦠꦺꦴꦥꦶ ꦨꦶꦗ꧀ꦗꦠꦺꦮ; ꦌꦮꦁ ꦮꦺꦢꦤꦴꦥꦶ ꦄꦧꦭꦴ, ꦄꦒꦪ꧀ꦲꦸꦥꦒꦴ, ꦤ ꦱꦏ꧀ꦏꦴ ‘ꦤꦶꦕ꧀ꦕꦴ’ꦠꦶ ꦮꦴ ‘ꦣꦸꦮꦴ’ꦠꦶ ꦮꦴ ꦒꦲꦺꦠꦸꦁ, ꦒꦲꦶꦠꦴꦥꦶ ꦤ ꦠꦡꦴ ꦠꦶꦛ꧀ꦜꦠꦶ. ꦌꦮꦁ ꦄꦒꦪ꧀ꦲꦸꦥꦒꦠꦴꦪꦥꦶ ꦮꦺꦢꦤꦴ ‘ꦥꦸꦧ꧀ꦧꦸꦭ꦳ꦱꦢꦶꦱꦴ’. ꦪꦡꦴ ꦥꦤ ꦠꦱ꧀ꦩꦶꦁ ꦠꦱ꧀ꦩꦶꦁ ꦈꦢꦏꦧꦶꦤ꧀ꦢꦸꦩ꧀ꦲꦶ ꦥꦸꦧ꧀ꦧꦸꦭ꦳ꦺꦴ ꦈꦥ꧀ꦥꦗ꧀ꦗꦠꦶ ꦕꦺꦮ ꦤꦶꦫꦸꦗ꧀ꦙꦠꦶ ꦕ, ꦤ ꦕꦶꦫꦛ꧀ꦜꦶꦠꦶꦏꦺꦴ ꦲꦺꦴꦠꦶ; ꦌꦮꦁ ꦮꦺꦢꦤꦴꦥꦶ ꦈꦥ꧀ꦥꦗ꧀ꦗꦠꦶ ꦕꦺꦮ ꦤꦶꦫꦸꦗ꧀ꦙꦠꦶ ꦕ, ꦤ ꦕꦶꦫꦛ꧀ꦜꦶꦠꦶꦏꦴ ꦲꦺꦴꦠꦶ, ꦌꦏꦕ꧀ꦖꦫꦏ꧀ꦑꦟꦺ ꦏꦺꦴꦛꦶꦱꦠꦱꦲꦱ꧀ꦱꦱꦔ꧀ꦑ꧀ꦪꦴ ꦈꦥ꧀ꦥꦗ꧀ꦗꦶꦠ꧀ꦮꦴ ꦤꦶꦫꦸꦗ꧀ꦙꦠꦶ. ꦪꦡꦴ ꦕ ꦥꦸꦧ꧀ꦧꦸꦭ꦳ꦺꦴ ꦈꦢꦏꦠꦭꦁ, ꦈꦢꦏꦧꦶꦤ꧀ꦢꦸꦁ, ꦈꦢꦏꦗꦭ꧀ꦭꦏꦁ ꦱꦔ꧀ꦏꦝ꧀ꦞꦶꦠ꧀ꦮꦴ ꦥꦸꦛꦁ ꦏꦠ꧀ꦮꦴ ꦒꦲꦟꦮꦴꦠꦚ꧀ꦕꦴꦠꦶ ꦕꦠ꧀ꦠꦴꦫꦶ ꦏꦴꦫꦟꦴꦤꦶ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦠꦶ; ꦌꦮꦁ ꦮꦺꦢꦤꦴꦥꦶ ꦮꦠ꧀ꦡꦸꦁ, ꦄꦴꦫꦩ꧀ꦩꦟꦁ, ꦏꦶꦭꦺꦱꦗꦴꦭꦁ, ꦦꦱ꧀ꦱꦱꦔ꧀ꦓꦛ꧀ꦛꦤꦚ꧀ꦕꦴꦠꦶ ꦕꦠ꧀ꦠꦴꦫꦶ ꦏꦴꦫꦟꦴꦤꦶ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦠꦶ. ꦌꦮꦩ꧀ꦥꦶ ꦮꦺꦢꦤꦴ ꦥꦸꦧ꧀ꦧꦸꦭ꦳ꦱꦢꦶꦱꦴ.

ꦱꦚ꧀ꦚꦴꦥꦶ ꦄꦱꦴꦫꦏꦛ꧀ꦜꦺꦤ ‘ꦩꦫꦷꦕꦶꦱꦢꦶꦱꦴ’. ꦠꦡꦴ ꦄꦒꦪ꧀ꦲꦸꦥꦒꦛ꧀ꦜꦺꦤ; ꦤ ꦲꦶ ꦱꦏ꧀ꦏꦴ ꦠꦁ ꦒꦲꦺꦠ꧀ꦮꦴ ꦥꦶꦮꦶꦠꦸꦁ ꦮꦴ ꦤ꧀ꦲꦴꦪꦶꦠꦸꦁ ꦮꦴ ꦨꦴꦗꦤꦁ ꦮꦴ ꦥꦹꦫꦺꦠꦸꦁ. ꦄꦥꦶꦕ ꦪꦡꦴ ꦩꦫꦷꦕꦶ ꦮꦶꦥ꧀ꦦꦤ꧀ꦢꦠꦶ, ꦱꦚ꧀ꦗꦴꦠꦹꦩꦶꦮꦺꦒꦺꦴ ꦮꦶꦪ ꦑꦴꦪꦠꦶ; ꦌꦮꦁ ꦤꦷꦭꦱꦚ꧀ꦚꦴꦢꦶꦨꦺꦢꦴ ꦱꦚ꧀ꦚꦴꦥꦶ ꦤꦷꦭꦴꦢꦶꦄꦤꦸꦨꦮꦤꦠ꧀ꦡꦴꦪ ꦦꦤ꧀ꦢꦠꦶ ꦮꦶꦥ꧀ꦦꦤ꧀ꦢꦠꦶ. ꦪꦡꦴ ꦕ ꦩꦫꦷꦕꦶ ꦩꦲꦴꦗꦤꦁ ꦮꦶꦥ꧀ꦥꦭꦩ꧀ꦨꦺꦠꦶ, ‘ꦥꦫꦶꦥꦸꦟ꧀ꦟꦮꦴꦥꦷ ꦮꦶꦪ ꦥꦫꦶꦥꦸꦟ꧀ꦟꦤꦢꦷ ꦮꦶꦪ ꦢꦶꦱ꧀ꦱꦠꦷ’ꦠꦶ ꦮꦢꦴꦥꦺꦠꦶ; ꦌꦮꦁ ꦱꦚ꧀ꦚꦴꦥꦶ ꦮꦶꦥ꧀ꦥꦭꦩ꧀ꦨꦺꦠꦶ, ‘ꦆꦢꦁ ꦤꦷꦭꦏꦁ ꦱꦸꦨꦁ ꦱꦸꦑꦁ ꦤꦶꦕ꧀ꦕ’ꦤ꧀ꦠꦶ ꦮꦢꦴꦥꦺꦠꦶ. ꦥꦷꦠꦏꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦌꦮꦁ ꦮꦶꦥ꧀ꦥꦭꦩ꧀ꦨꦤꦺꦤꦴꦥꦶ ꦩꦫꦷꦕꦶꦱꦢꦶꦱꦴ.

ꦱꦔ꧀ꦑꦴꦫꦴꦥꦶ ꦄꦱꦴꦫꦏꦛ꧀ꦜꦺꦤ ‘ꦏꦢꦭꦶꦏ꧀ꦑꦤ꧀ꦣꦱꦢꦶꦱꦴ’. ꦠꦡꦴ ꦄꦒꦪ꧀ꦲꦸꦥꦒꦛ꧀ꦜꦺꦤ. ꦪꦡꦺꦮ ꦲꦶ ꦏꦢꦭꦶꦏ꧀ꦑꦤ꧀ꦣꦠꦺꦴ ꦏꦶꦚ꧀ꦕꦶ ꦒꦲꦺꦠ꧀ꦮꦴ ꦤ ꦱꦏ꧀ꦏꦴ ꦒꦺꦴꦥꦴꦤꦱꦷꦄꦴꦢꦷꦤꦩꦠ꧀ꦡꦴꦪ ꦈꦥꦤꦺꦠꦸꦁ, ꦈꦥꦤꦷꦠꦩ꧀ꦥꦶ ꦤ ꦠꦡꦴ ꦲꦺꦴꦠꦶ; ꦌꦮꦁ ꦱꦔ꧀ꦑꦴꦫꦴꦥꦶ ꦤ ꦱꦏ꧀ꦏꦴ ꦤꦶꦕ꧀ꦕꦴꦢꦶꦮꦱꦺꦤ ꦒꦲꦺꦠꦸꦁ, ꦒꦲꦶꦠꦴꦥꦶ ꦤ ꦠꦡꦴ ꦲꦺꦴꦤ꧀ꦠꦶ. ꦪꦡꦴ ꦕ ꦏꦢꦭꦶꦏ꧀ꦑꦤ꧀ꦣꦺꦴ ꦧꦲꦸꦮꦛ꧀ꦛꦶꦱꦩꦺꦴꦣꦴꦤꦺꦴ ꦲꦺꦴꦠꦶ, ꦌꦮꦁ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴꦥꦶ ꦧꦲꦸꦣꦩ꧀ꦩꦱꦩꦺꦴꦣꦴꦤꦺꦴ. ꦪꦡꦴ ꦕ ꦏꦢꦭꦶꦏ꧀ꦑꦤ꧀ꦣꦺꦴ ꦤꦴꦤꦴꦭꦏ꧀ꦑꦟꦺꦴ, ꦄꦚ꧀ꦚꦺꦴꦪꦺꦮ ꦲꦶ ꦧꦴꦲꦶꦫꦴꦪ ꦥꦠ꧀ꦠꦮꦛ꧀ꦛꦶꦪꦴ ꦮꦟ꧀ꦟꦺꦴ, ꦄꦚ꧀ꦚꦺꦴ ꦠꦠꦺꦴ ꦄꦧ꧀ꦨꦤ꧀ꦠꦫꦧ꧀ꦨꦤ꧀ꦠꦫꦴꦤꦁ; ꦌꦮꦩꦺꦮ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴꦥꦶ ꦄꦚ꧀ꦚꦢꦺꦮ ꦦꦱ꧀ꦱꦱ꧀ꦱ ꦭꦏ꧀ꦑꦟꦁ, ꦄꦚ꧀ꦚꦁ ꦕꦺꦠꦤꦴꦢꦷꦤꦁ. ꦱꦩꦺꦴꦣꦴꦤꦺꦠ꧀ꦮꦴ ꦥꦤ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴꦠ꧀ꦮꦺꦮ ꦮꦸꦕ꧀ꦕꦠꦷꦠꦶ. ꦌꦮꦩ꧀ꦥꦶ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ ꦏꦢꦭꦶꦏ꧀ꦑꦤ꧀ꦣꦱꦢꦶꦱꦺꦴ.

ꦮꦶꦚ꧀ꦚꦴꦟꦩ꧀ꦥꦶ ꦄꦱꦴꦫꦏꦛ꧀ꦜꦺꦤ ‘ꦩꦴꦪꦴꦱꦢꦶꦱꦁ’. ꦠꦡꦴ ꦄꦒꦪ꧀ꦲꦸꦥꦒꦛ꧀ꦜꦺꦤ. ꦪꦡꦴ ꦕ ꦩꦴꦪꦴ ꦆꦠ꧀ꦠꦫꦴ ꦭꦲꦸꦥꦕ꧀ꦕꦸꦥꦛ꧀ꦜꦴꦤꦴ, ꦌꦮꦁ ꦮꦶꦚ꧀ꦚꦴꦟꦁ. ꦠꦚ꧀ꦲꦶ ꦠꦠꦺꦴꦥꦶ ꦆꦠ꧀ꦠꦫꦠꦫꦚ꧀ꦕꦺꦮ ꦭꦲꦸꦥꦕ꧀ꦕꦸꦥꦛ꧀ꦜꦴꦤꦠꦫꦚ꧀ꦕ. ꦠꦺꦤꦺꦮ ꦲꦶ ꦕꦶꦠ꧀ꦠꦺꦤ ꦥꦸꦫꦶꦱꦺꦴ ꦄꦴꦒꦠꦺꦴ ꦮꦶꦪ, ꦒꦠꦺꦴ ꦮꦶꦪ, ꦜꦶꦠꦺꦴ ꦮꦶꦪ, ꦤꦶꦱꦶꦤ꧀ꦤꦺꦴ ꦮꦶꦪ ꦲꦺꦴꦠꦶ. ꦄꦚ꧀ꦚꦢꦺꦮ ꦕꦴꦒꦩꦤꦏꦴꦭꦺ ꦕꦶꦠ꧀ꦠꦁ, ꦄꦚ꧀ꦚꦁ ꦒꦩꦤꦏꦴꦭꦴꦢꦷꦱꦸ. ꦌꦮꦩ꧀ꦥꦶ ꦮꦶꦚ꧀ꦚꦴꦟꦁ ꦩꦴꦪꦴꦱꦢꦶꦱꦁ. ꦩꦴꦪꦴ ꦕ ꦩꦲꦴꦗꦤꦁ ꦮꦚ꧀ꦕꦺꦠꦶ, ꦪꦁ ꦏꦶꦚ꧀ꦕꦶꦢꦺꦮ ‘ꦆꦢꦁ ꦱꦸꦮꦟ꧀ꦟꦁ ꦫꦗꦠꦁ ꦩꦸꦠ꧀ꦠꦴ’ꦠꦶꦥꦶ ꦒꦲꦴꦥꦺꦠꦶ. ꦮꦶꦚ꧀ꦚꦴꦟꦩ꧀ꦥꦶ ꦩꦲꦴꦗꦤꦁ ꦮꦚ꧀ꦕꦺꦠꦶ, ꦠꦺꦤꦺꦮ ꦕꦶꦠ꧀ꦠꦺꦤ ꦄꦴꦒꦕ꧀ꦖꦤ꧀ꦠꦁ ꦮꦶꦪ, ꦒꦕ꧀ꦖꦤ꧀ꦠꦁ ꦮꦶꦪ, ꦜꦶꦠꦁ ꦮꦶꦪ, ꦤꦶꦱꦶꦤ꧀ꦤꦁ ꦮꦶꦪ ꦏꦠ꧀ꦮꦴ ꦒꦴꦲꦴꦥꦺꦠꦶ. ꦄꦚ꧀ꦚꦢꦺꦮ ꦕ ꦄꦴꦒꦩꦤꦺ ꦕꦶꦠ꧀ꦠꦁ, ꦄꦚ꧀ꦚꦁ ꦒꦩꦤꦴꦢꦷꦱꦸ. ꦌꦮꦩ꧀ꦥꦶ ꦮꦶꦚ꧀ꦚꦴꦟꦁ ꦩꦴꦪꦴꦱꦢꦶꦱꦁ. ꦮꦶꦱꦺꦱꦠꦺꦴ ꦕ ꦱꦸꦨꦴꦫꦩ꧀ꦩꦟꦩ꧀ꦥꦶ ꦎꦭ꦳ꦴꦫꦶꦏꦩ꧀ꦥꦶ ꦄꦗ꧀ꦙꦠ꧀ꦠꦶꦏꦫꦹꦥꦁ ꦄꦱꦸꦨꦤ꧀ꦠꦶ ꦢꦛ꧀ꦜꦧ꧀ꦧꦁ. ꦮꦺꦢꦤꦴ ꦠꦷꦲꦶ ꦢꦸꦏ꧀ꦑꦠꦴꦲꦶ ꦄꦮꦶꦤꦶꦩꦸꦠ꧀ꦠꦠꦺꦴ ꦢꦸꦏ꧀ꦑꦴꦠꦶ ꦱꦚ꧀ꦚꦴꦱꦔ꧀ꦑꦴꦫꦴ ꦄꦮꦶꦣꦺꦪ꧀ꦪꦠꦺꦴ ꦄꦤꦠ꧀ꦠꦴꦠꦶ ꦮꦶꦚ꧀ꦚꦴꦟꦁ ꦈꦢꦪꦧ꧀ꦧꦪꦣꦩ꧀ꦩꦠꦺꦴ ꦄꦤꦶꦕ꧀ꦕꦤ꧀ꦠꦶ ꦢꦛ꧀ꦜꦧ꧀ꦧꦁ.

‘ꦌꦮꦁ ꦥꦱ꧀ꦱꦤ꧀ꦠꦱ꧀ꦱꦠ꧀ꦡꦱꦶꦢ꧀ꦣꦶꦠꦺꦴ’ꦠꦶ ꦌꦮꦚ꧀ꦕ ꦱꦔ꧀ꦑꦺꦥꦮꦶꦠ꧀ꦡꦴꦫꦮꦱꦺꦤ ꦢ꧀ꦮꦶꦣꦴ ꦥꦱ꧀ꦱꦠꦺꦴ ꦪꦴ ꦄꦠ꧀ꦡꦱꦶꦢ꧀ꦣꦶ ꦲꦺꦴꦠꦶ, ꦠꦠꦺꦴꦥꦶ ꦮꦶꦤꦶꦕ꧀ꦖꦪꦤꦪꦺꦴ ꦮꦶꦚ꧀ꦚꦴꦠꦧ꧀ꦧꦺꦴ, ꦱꦺꦪ꧀ꦪꦡꦶꦢꦁ – ꦱꦔ꧀ꦑꦺꦥꦠꦺꦴ ꦠꦴꦮ ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦺꦱꦸ ꦈꦏ꧀ꦑꦶꦠ꧀ꦠꦴꦱꦶꦏꦥꦕ꧀ꦕꦠ꧀ꦡꦶꦏꦴꦢꦶꦨꦴꦮꦺꦤ ꦥꦱ꧀ꦱꦤ꧀ꦠꦺꦴ ꦑꦤ꧀ꦣꦺꦲꦶ ꦤ ꦮꦶꦲꦚ꧀ꦚꦠꦶ. ꦮꦶꦠ꧀ꦡꦴꦫꦠꦺꦴ ꦥꦤ ꦫꦹꦥꦴꦢꦷꦤꦶ ꦦꦺꦟꦥꦶꦟ꧀ꦝꦴꦢꦶꦱꦢꦶꦱꦨꦴꦮꦺꦤ ꦥꦱ꧀ꦱꦤ꧀ꦠꦺꦴ ꦤ ꦄꦱꦴꦫꦺꦱꦸ ꦱꦴꦫꦢꦱ꧀ꦱꦷ ꦲꦺꦴꦠꦶ. ꦮꦶꦱꦺꦱꦠꦺꦴ ꦕ ꦄꦗ꧀ꦙꦠ꧀ꦠꦶꦏꦫꦹꦥꦁ ꦄꦱꦸꦨꦠꦺꦴ ꦥꦱ꧀ꦱꦤ꧀ꦠꦺꦴ ꦏꦧꦭ꦳ꦷꦏꦴꦫꦴꦲꦴꦫꦁ ꦥꦫꦶꦗꦴꦤꦴꦠꦶ, ꦄꦱꦸꦨꦺ ꦱꦸꦨꦤ꧀ꦠꦶ ꦮꦶꦥꦭ꧀ꦭꦴꦱꦁ ꦥꦗꦲꦠꦶ, ꦏꦴꦩꦺꦴꦓꦁ ꦈꦠ꧀ꦠꦫꦠꦶ, ꦏꦴꦩꦪꦺꦴꦒꦺꦤ ꦮꦶꦱꦁꦪꦸꦗ꧀ꦗꦠꦶ, ꦏꦴꦩꦴꦱꦮꦺꦤ ꦄꦤꦴꦱꦮꦺꦴ ꦲꦺꦴꦠꦶ, ꦄꦨꦶꦗ꧀ꦙꦴꦏꦴꦪꦒꦤ꧀ꦡꦁ ꦨꦶꦤ꧀ꦢꦠꦶ, ꦏꦴꦩꦸꦥꦴꦢꦴꦤꦁ ꦤ ꦈꦥꦴꦢꦶꦪꦠꦶ. ꦮꦺꦢꦤꦁ ꦢꦸꦏ꧀ꦑꦠꦺꦴ ꦥꦱ꧀ꦱꦤ꧀ꦠꦺꦴ ꦦꦱ꧀ꦱꦴꦲꦴꦫꦁ ꦥꦫꦶꦗꦴꦤꦴꦠꦶ, ꦢꦸꦏ꧀ꦑꦺ ꦱꦸꦑꦤ꧀ꦠꦶ ꦮꦶꦥꦭ꧀ꦭꦴꦱꦁ ꦥꦗꦲꦠꦶ, ꦨꦮꦺꦴꦓꦁ ꦈꦠ꧀ꦠꦫꦠꦶ, ꦨꦮꦪꦺꦴꦒꦺꦤ ꦮꦶꦱꦁꦪꦸꦗ꧀ꦗꦠꦶ, ꦨꦮꦴꦱꦮꦺꦤ ꦄꦤꦴꦱꦮꦺꦴ ꦲꦺꦴꦠꦶ, ꦧ꧀ꦪꦴꦥꦴꦢꦏꦴꦪꦒꦤ꧀ꦡꦁ ꦨꦶꦤ꧀ꦢꦠꦶ, ꦱꦷꦭꦧ꧀ꦧꦠꦸꦥꦴꦢꦴꦤꦁ ꦤ ꦈꦥꦴꦢꦶꦪꦠꦶ. ꦱꦚ꧀ꦚꦁ ꦱꦔ꧀ꦑꦴꦫꦺ ꦕ ꦄꦤꦠ꧀ꦠꦠꦺꦴ ꦥꦱ꧀ꦱꦤ꧀ꦠꦺꦴ ꦩꦤꦺꦴꦱꦚ꧀ꦕꦺꦠꦤꦴꦲꦴꦫꦁ ꦥꦫꦶꦗꦴꦤꦴꦠꦶ, ꦄꦤꦠ꧀ꦠꦤꦶ ꦄꦠ꧀ꦠꦴꦠꦶ ꦮꦶꦥꦭ꧀ꦭꦴꦱꦁ ꦥꦗꦲꦠꦶ, ꦢꦶꦛ꧀ꦜꦺꦴꦓꦁ ꦈꦠ꧀ꦠꦫꦠꦶ, ꦢꦶꦛ꧀ꦜꦶꦪꦺꦴꦒꦺꦤ ꦮꦶꦱꦁꦪꦸꦗ꧀ꦗꦠꦶ, ꦢꦶꦛ꧀ꦜꦴꦱꦮꦺꦤ ꦄꦤꦴꦱꦮꦺꦴ ꦲꦺꦴꦠꦶ, ꦆꦢꦁ ꦱꦕ꧀ꦕꦴꦨꦶꦤꦶꦮꦺꦱꦏꦴꦪꦒꦤ꧀ꦡꦁ ꦨꦶꦤ꧀ꦢꦠꦶ, ꦄꦠ꧀ꦠꦮꦴꦢꦸꦥꦴꦢꦴꦤꦁ ꦤ ꦈꦥꦴꦢꦶꦪꦠꦶ. ꦮꦶꦚ꧀ꦚꦴꦟꦁ ꦄꦤꦶꦕ꧀ꦕꦠꦺꦴ ꦥꦱ꧀ꦱꦤ꧀ꦠꦺꦴ ꦮꦶꦚ꧀ꦚꦴꦟꦴꦲꦴꦫꦁ ꦥꦫꦶꦗꦴꦤꦴꦠꦶ, ꦄꦤꦶꦕ꧀ꦕꦺ ꦤꦶꦕ꧀ꦕꦤ꧀ꦠꦶ ꦮꦶꦥꦭ꧀ꦭꦴꦱꦁ ꦥꦗꦲꦠꦶ, ꦄꦮꦶꦗ꧀ꦗꦺꦴꦓꦁ ꦈꦠ꧀ꦠꦫꦠꦶ, ꦄꦮꦶꦗ꧀ꦗꦴꦪꦺꦴꦒꦺꦤ ꦮꦶꦱꦁꦪꦸꦗ꧀ꦗꦠꦶ, ꦄꦮꦶꦗ꧀ꦗꦴꦱꦮꦺꦤ ꦄꦤꦴꦱꦮꦺꦴ ꦲꦺꦴꦠꦶ, ꦱꦷꦭꦧ꧀ꦧꦠꦥꦫꦴꦩꦴꦱꦏꦴꦪꦒꦤ꧀ꦡꦁ ꦨꦶꦤ꧀ꦢꦠꦶ, ꦢꦶꦛ꧀ꦜꦸꦥꦴꦢꦴꦤꦁ ꦤ ꦈꦥꦴꦢꦶꦪꦠꦶ.

ꦌꦮꦁ ꦩꦲꦴꦤꦶꦱꦁꦱꦁ, ꦮꦣꦏꦴꦢꦶꦮꦱꦺꦤ ꦢꦱ꧀ꦱꦤꦁ ꦪꦱ꧀ꦩꦴ;

ꦠꦱ꧀ꦩꦴ ꦑꦤ꧀ꦣꦺ ꦣꦷꦫꦺꦴ, ꦮꦣꦏꦴꦢꦶꦮꦱꦺꦤ ꦥꦱ꧀ꦱꦺꦪ꧀ꦪꦴꦠꦶ.

ꦱꦸꦠ꧀ꦠꦤ꧀ꦠꦨꦴꦗꦤꦷꦪꦮꦟ꧀ꦟꦤꦴ.

꧒. ꦄꦨꦶꦣꦩ꧀ꦩꦨꦴꦗꦤꦷꦪꦮꦟ꧀ꦟꦤꦴ

꧓꧒. ꦆꦢꦴꦤꦶ ꦄꦨꦶꦣꦩ꧀ꦩꦨꦴꦗꦤꦷꦪꦁ ꦲꦺꦴꦠꦶ. ꦠꦠ꧀ꦡ ꦫꦹꦥꦏ꧀ꦑꦤ꧀ꦣꦤꦶꦢ꧀ꦢꦺꦱꦺꦴ ꦲꦺꦛ꧀ꦜꦴ ꦫꦹꦥꦏꦟ꧀ꦝꦺ ꦮꦶꦠ꧀ꦡꦴꦫꦶꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ.

꧓꧔. ꦮꦺꦢꦤꦴꦏ꧀ꦑꦤ꧀ꦣꦤꦶꦢ꧀ꦢꦺꦱꦺ ꦌꦏꦮꦶꦣꦺꦤꦴꦠꦶ ꦌꦏꦏꦺꦴꦛ꧀ꦜꦴꦱꦺꦤ. ꦦꦱ꧀ꦱꦱꦩ꧀ꦥꦪꦸꦠ꧀ꦠꦺꦴꦠꦶ ꦦꦱ꧀ꦱꦺꦤ ꦱꦩ꧀ꦥꦪꦸꦠ꧀ꦠꦺꦴ. ꦱꦧ꧀ꦧꦴꦥꦶ ꦕꦠꦸꦨꦹꦩꦶꦏꦮꦺꦢꦤꦴ. ꦱꦲꦺꦠꦸꦏꦢꦸꦏꦺ ꦱꦲꦺꦠꦸꦏꦴ ꦕꦠꦸꦨꦹꦩꦶꦏꦮꦺꦢꦤꦴ, ꦄꦲꦺꦠꦸꦏꦴ ꦏꦴꦩꦴꦮꦕꦫꦴꦮ. ꦆꦩꦶꦤꦴ ꦈꦥꦴꦪꦺꦤ ꦏꦸꦱꦭꦥꦢꦴꦢꦷꦲꦶ ꦮꦸꦠ꧀ꦠꦴ ꦮꦺꦢꦤꦴ ꦗꦴꦤꦶꦠꦧ꧀ꦧꦴ. ꦄꦥꦶꦕꦴꦪꦁ ꦮꦺꦢꦤꦴꦏ꧀ꦑꦤ꧀ꦣꦺꦴ ꦌꦏꦮꦶꦣꦺꦤ ꦦꦱ꧀ꦱꦱꦩ꧀ꦥꦪꦸꦠ꧀ꦠꦠꦺꦴ ꦢꦱ꧀ꦱꦶꦠꦺꦴ, ꦢꦸꦮꦶꦣꦺꦤ ꦱꦲꦺꦠꦸꦏꦴꦲꦺꦠꦸꦏꦠꦺꦴ, ꦠꦶꦮꦶꦣꦺꦤ ꦗꦴꦠꦶꦠꦺꦴ, ꦕꦠꦸꦧ꧀ꦧꦶꦣꦺꦤ ꦨꦹꦩꦤ꧀ꦠꦫꦠꦺꦴ, ꦥꦚ꧀ꦕꦮꦶꦣꦺꦤ ꦆꦤ꧀ꦢ꧀ꦫꦶꦪꦠꦺꦴ. ꦠꦠ꧀ꦡ ꦱꦸꦑꦶꦤ꧀ꦢ꧀ꦫꦶꦪꦢꦸꦏ꧀ꦑꦶꦤ꧀ꦢ꧀ꦫꦶꦪꦴꦤꦶ ꦏꦴꦪꦥ꧀ꦥꦱꦴꦢꦮꦠ꧀ꦡꦸꦏꦴꦤꦶ ꦏꦴꦩꦴꦮꦕꦫꦴꦤꦺꦮ. ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦖꦛ꧀ꦜꦮꦠ꧀ꦡꦸꦏꦁ ꦮꦴ ꦄꦮꦠ꧀ꦡꦸꦏꦁ ꦮꦴ ꦠꦺꦨꦹꦩꦏꦁ. ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦖꦛ꧀ꦜꦮꦠ꧀ꦡꦸꦏꦁ ꦏꦴꦩꦴꦮꦕꦫꦁ. ꦈꦥꦺꦏ꧀ꦑꦶꦤ꧀ꦢ꧀ꦫꦶꦪꦁ ꦕꦏ꧀ꦑꦴꦢꦶꦕꦠꦸꦥ꧀ꦥꦱꦴꦢꦮꦠ꧀ꦡꦸꦏꦁ ꦖꦛ꧀ꦜꦮꦠ꧀ꦡꦸꦏꦁ ꦄꦮꦠ꧀ꦡꦸꦏꦚ꧀ꦕ ꦕꦠꦸꦨꦹꦩꦏꦁ. ꦖꦧ꧀ꦧꦶꦣꦺꦤ ꦮꦠ꧀ꦡꦸꦠꦺꦴ ꦢꦱ꧀ꦱꦶꦠꦺꦴ. ꦠꦠ꧀ꦡ ꦥꦸꦫꦶꦩꦴ ꦥꦚ꧀ꦕ ꦮꦺꦢꦤꦴ ꦥꦚ꧀ꦕꦥ꧀ꦥꦱꦴꦢꦮꦠ꧀ꦡꦸꦏꦴ ꦏꦴꦩꦴꦮꦕꦫꦴꦮ ꦖꦛ꧀ꦜꦴ ꦄꦮꦠ꧀ꦡꦸꦏꦴ ꦮꦴ ꦱꦮꦠ꧀ꦡꦸꦏꦴ ꦮꦴ ꦕꦠꦸꦨꦹꦩꦶꦏꦴ.

ꦱꦠ꧀ꦠꦮꦶꦣꦺꦤ ꦠꦠ꧀ꦡ ꦩꦤꦺꦴꦱꦩ꧀ꦦꦱ꧀ꦱꦗꦴ ꦨꦺꦢꦠꦺꦴ ꦢꦱ꧀ꦱꦶꦠꦴ, ꦄꦛ꧀ꦜꦮꦶꦣꦺꦤ ꦠꦠ꧀ꦡ ꦏꦴꦪꦱꦩ꧀ꦦꦱ꧀ꦱꦗꦴ ꦨꦺꦢꦠꦺꦴ, ꦤꦮꦮꦶꦣꦺꦤ ꦱꦠ꧀ꦠꦮꦶꦣꦨꦺꦢꦺ ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦱꦩ꧀ꦦꦱ꧀ꦱꦗꦴ ꦨꦺꦢꦠꦺꦴ, ꦢꦱꦮꦶꦣꦺꦤ ꦄꦛ꧀ꦜꦮꦶꦣꦨꦺꦢꦺ ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦱꦩ꧀ꦦꦱ꧀ꦱꦗꦴ ꦨꦺꦢꦠꦺꦴ. ꦌꦠꦺꦱꦸ ꦲꦶ ꦱꦠ꧀ꦠꦮꦶꦣꦨꦺꦢꦺ ꦩꦤꦺꦴꦱꦩ꧀ꦦꦱ꧀ꦱꦗꦴ ꦩꦤꦺꦴꦣꦴꦠꦸꦱꦩ꧀ꦦꦱ꧀ꦱꦗꦴ, ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦱꦩ꧀ꦦꦱ꧀ꦱꦗꦴꦠꦶ ꦢ꧀ꦮꦶꦣꦴ ꦨꦶꦤ꧀ꦤꦴ. ꦄꦛ꧀ꦜꦮꦶꦣꦨꦺꦢꦺ ꦠꦴꦪ ꦱꦢ꧀ꦣꦶꦁ ꦏꦴꦪꦱꦩ꧀ꦦꦱ꧀ꦱꦗꦴꦥꦶ ꦱꦸꦑꦴ ꦢꦸꦏ꧀ꦑꦴꦠꦶ ꦢ꧀ꦮꦶꦣꦴ ꦨꦶꦤ꧀ꦤꦴ. ꦤꦮꦮꦶꦣꦨꦺꦢꦺ ꦱꦠ꧀ꦠꦮꦶꦣꦺ ꦮꦸꦠ꧀ꦠꦴ ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦱꦩ꧀ꦦꦱ꧀ꦱꦗꦴ ꦏꦸꦱꦭꦴꦢꦶꦮꦱꦺꦤ ꦠꦶꦣꦴ ꦨꦶꦤ꧀ꦤꦴ. ꦢꦱꦮꦶꦣꦨꦺꦢꦺ ꦄꦛ꧀ꦜꦮꦶꦣꦺ ꦮꦸꦠ꧀ꦠꦴ ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦱꦩ꧀ꦦꦱ꧀ꦱꦗꦴ ꦏꦸꦱꦭꦴꦢꦶꦮꦱꦺꦤꦺꦮ ꦠꦶꦣꦴ ꦨꦶꦤ꧀ꦤꦴ.

ꦏꦸꦱꦭꦠ꧀ꦠꦶꦏꦺꦴ ꦕꦺꦠ꧀ꦡ ꦏꦺꦮꦭꦁ ꦥꦹꦫꦟꦠ꧀ꦡꦩꦺꦮ ꦮꦸꦠ꧀ꦠꦺꦴ. ꦱꦠ꧀ꦠꦮꦶꦣꦄꦛ꧀ꦜꦮꦶꦣꦤꦮꦮꦶꦣꦨꦺꦢꦺꦱꦸ ꦥꦤ ꦤꦪꦁ ꦢꦴꦠꦸꦁ ꦪꦸꦠ꧀ꦠꦛ꧀ꦜꦴꦤꦺ ꦤꦪꦺꦴ ꦢꦶꦤ꧀ꦤꦺꦴ. ꦄꦨꦶꦣꦩ꧀ꦩꦚ꧀ꦲꦶ ꦥꦠ꧀ꦮꦴ ꦠꦡꦴꦒꦠꦺꦤ ꦤꦪꦁ ꦢꦴꦠꦸꦁ ꦪꦸꦠ꧀ꦠꦛ꧀ꦜꦴꦤꦺ ꦤꦪꦺꦴ ꦄꦢꦶꦤ꧀ꦤꦺꦴ ꦤꦴꦩ ꦤꦠ꧀ꦡꦶ. ꦄꦪꦁ ꦠꦴꦮ ꦢꦸꦏꦩꦹꦭꦏꦺ ꦌꦏꦺꦴ ꦮꦴꦫꦺꦴ.

ꦱꦠ꧀ꦡꦴ ꦲꦶ ꦆꦩꦱ꧀ꦩꦶꦁ ꦄꦨꦶꦣꦩ꧀ꦩꦨꦴꦗꦤꦷꦪꦺ ꦮꦺꦢꦤꦴꦏ꧀ꦑꦤ꧀ꦣꦁ ꦨꦴꦗꦺꦤ꧀ꦠꦺꦴ ꦠꦶꦏꦺ ꦒꦲꦺꦠ꧀ꦮꦴ ꦢꦸꦏꦺꦱꦸ ꦥꦏ꧀ꦑꦶꦥꦶ, ꦢꦸꦏꦺ ꦒꦲꦺꦠ꧀ꦮꦴ ꦠꦶꦏꦺꦱꦸ ꦥꦏ꧀ꦑꦶꦥꦶ, ꦠꦶꦏꦺ ꦕ ꦢꦸꦏꦺ ꦕ ꦈꦨꦠꦺꦴꦮꦝ꧀ꦞꦤꦤꦷꦲꦴꦫꦺꦤ ꦄꦴꦲꦫꦶ; ꦱꦠ꧀ꦠꦮꦶꦣꦺꦤ, ꦕꦠꦸꦮꦷꦱꦠꦶꦮꦶꦣꦺꦤ, ꦠꦶꦁꦱꦮꦶꦣꦺꦤ, ꦧꦲꦸꦮꦶꦣꦺꦤꦴꦠꦶ ꦱꦧ꧀ꦧꦡꦴꦥꦶ ꦧꦲꦸꦮꦶꦣꦺꦤ ꦮꦺꦢꦤꦴꦏ꧀ꦑꦤ꧀ꦣꦁ ꦢꦱ꧀ꦱꦺꦱꦶ. ꦏꦱ꧀ꦩꦴ? ꦥꦸꦒ꧀ꦒꦭꦗ꧀ꦙꦴꦱꦪꦺꦤ ꦕꦺꦮ ꦢꦺꦱꦤꦴꦮꦶꦭꦴꦱꦺꦤ ꦕ. ꦣꦩ꧀ꦩꦁ ꦱꦺꦴꦠꦸꦁ ꦤꦶꦱꦶꦤ꧀ꦤꦢꦺꦮꦥꦫꦶꦱꦴꦪ ꦲꦶ ꦪꦺ ꦢꦺꦮꦥꦸꦠ꧀ꦠꦴ ꦠꦶꦏꦺ ꦄꦴꦢꦴꦪ ꦢꦸꦏꦺꦱꦸ ꦥꦏ꧀ꦑꦶꦥꦶꦠ꧀ꦮꦴ ꦏꦡꦶꦪꦩꦴꦤꦁ ꦥꦛꦶꦮꦶꦗ꧀ꦙꦶꦠꦸꦁ ꦱꦏ꧀ꦏꦺꦴꦤ꧀ꦠꦶ, ꦠꦺꦱꦁ ꦱꦥ꧀ꦥꦴꦪꦮꦱꦺꦤ ꦠꦡꦴ ꦏꦠ꧀ꦮꦴ ꦢꦺꦱꦺꦱꦶ. ꦪꦺ ꦆꦠꦫꦺꦲꦶ ꦄꦴꦏꦴꦫꦺꦲꦶ ꦏꦡꦶꦪꦩꦴꦤꦁ ꦥꦛꦶꦮꦶꦗ꧀ꦙꦶꦠꦸꦁ ꦱꦏ꧀ꦏꦺꦴꦤ꧀ꦠꦶ, ꦠꦺꦱꦁ ꦠꦺꦲꦴꦏꦴꦫꦺꦲꦶ ꦢꦺꦱꦺꦱꦷꦠꦶ. ꦄꦪꦩꦺꦠ꧀ꦡ ‘ꦥꦸꦒ꧀ꦒꦭꦗ꧀ꦙꦴꦱꦪꦺꦴ’. ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦥꦤ ꦄꦠ꧀ꦠꦤꦺꦴ ꦩꦲꦴꦮꦶꦱꦪꦠꦴꦪ ꦠꦶꦏꦺ ꦮꦴ ꦢꦸꦏꦺꦱꦸ ꦥꦏ꧀ꦑꦶꦥꦶꦠ꧀ꦮꦴ, ꦢꦸꦏꦺ ꦮꦴ ꦠꦶꦏꦺꦱꦸ ꦈꦨꦠꦺꦴꦮꦝ꧀ꦞꦤꦺꦤ ꦮꦴ, ꦱꦠ꧀ꦠꦮꦶꦣꦴꦢꦶꦤꦪꦺꦤ ꦮꦴ, ꦪꦡꦴ ꦪꦡꦴ ꦆꦕ꧀ꦖꦠꦶ ꦠꦡꦴ ꦠꦡꦴ ꦢꦺꦱꦺꦠꦸꦁ ꦱꦏ꧀ꦏꦺꦴꦠꦶ. ꦠꦱ꧀ꦩꦴꦥꦶ ꦆꦩꦺꦲꦴꦏꦴꦫꦺꦲꦶ ꦢꦺꦱꦺꦱꦷꦠꦶ ꦄꦪꦩꦱ꧀ꦱ ‘ꦢꦺꦱꦤꦴꦮꦶꦭꦴꦱꦺꦴ’.

ꦠꦠ꧀ꦡ ꦠꦶꦏꦺ ꦄꦴꦢꦴꦪ ꦢꦸꦏꦺꦱꦸ ꦥꦏ꧀ꦑꦶꦥꦶꦠ꧀ꦮꦴ ꦢꦺꦱꦶꦠꦮꦴꦫꦺꦴ ꦢꦸꦏꦩꦹꦭꦏꦺꦴ ꦤꦴꦩ. ꦢꦸꦏꦺ ꦄꦴꦢꦴꦪ ꦠꦶꦏꦺꦱꦸ ꦥꦏ꧀ꦑꦶꦥꦶꦠ꧀ꦮꦴ ꦢꦺꦱꦶꦠꦮꦴꦫꦺꦴ ꦠꦶꦏꦩꦹꦭꦏꦺꦴ ꦤꦴꦩ. ꦠꦶꦏꦺ ꦕ ꦢꦸꦏꦺ ꦕ ꦈꦨꦠꦺꦴ ꦮꦝ꧀ꦞꦺꦠ꧀ꦮꦴ ꦢꦺꦱꦶꦠꦮꦴꦫꦺꦴ ꦈꦨꦠꦺꦴꦮꦝ꧀ꦞꦶꦠꦏꦺꦴ ꦤꦴꦩ. ꦄꦮꦱꦴꦤꦺ ꦱꦠ꧀ꦠꦮꦶꦣꦺꦤꦴꦠꦶꦄꦴꦢꦶꦮꦴꦫꦺꦴ ꦧꦲꦸꦮꦶꦣꦮꦴꦫꦺꦴ ꦤꦴꦩꦴꦠꦶ ꦆꦩꦺ ꦠꦴꦮ ꦕꦠ꧀ꦠꦴꦫꦺꦴ ꦩꦲꦴꦮꦴꦫꦴ.

ꦠꦠ꧀ꦡ ꦢꦸꦏꦩꦹꦭꦏꦺ ꦢꦸꦏꦺꦱꦸ ꦭꦧ꧀ꦨꦩꦴꦤꦺꦤ ꦌꦏꦺꦏꦺꦤ ꦢꦸꦏꦺꦤ ꦱꦢ꧀ꦣꦶꦁ ꦠꦶꦏꦺꦱꦸ ꦄꦭꦧ꧀ꦨꦩꦴꦤꦺ ꦮꦺꦢꦤꦴꦠ꧀ꦠꦶꦏꦥꦷꦠꦶꦠ꧀ꦠꦶꦏꦱꦤꦶꦢꦱ꧀ꦱꦤꦠ꧀ꦠꦶꦏꦺ ꦄꦥꦤꦺꦠ꧀ꦮꦴ, ꦱꦺꦱꦺ ꦭꦧ꧀ꦨꦩꦴꦤꦏꦺ ꦌꦏꦹꦤꦮꦷꦱꦠꦶ ꦠꦶꦏꦺ ꦪꦺꦴꦗꦺꦠ꧀ꦮꦴ, ꦢꦸꦠꦶꦪꦢꦸꦏꦥꦜꦩꦠ꧀ꦠꦶꦏꦪꦺꦴꦗꦤꦮꦴꦫꦴꦢꦷꦤꦶ ꦤꦮꦮꦴꦫꦱꦠꦴꦤꦶ ꦥꦚ꧀ꦚꦴꦱꦚ꧀ꦕ ꦮꦴꦫꦴ ꦲꦺꦴꦤ꧀ꦠꦶ. ꦠꦺ ꦱꦧ꧀ꦧꦺꦥꦶ ꦥꦴꦭ꦳ꦶꦪꦁ ꦱꦁꦑꦶꦥꦶꦠ꧀ꦮꦴ ꦠꦠ꧀ꦡ ꦠꦠ꧀ꦡ ꦢꦱ꧀ꦱꦺꦠꦧ꧀ꦧꦪꦸꦠ꧀ꦠꦏꦁ ꦢꦱ꧀ꦱꦺꦠ꧀ꦮꦴ ꦮꦸꦠ꧀ꦠꦴ. ꦄꦱꦩ꧀ꦩꦸꦪ꧀ꦲꦤ꧀ꦠꦺꦤ ꦥꦤ ꦮꦶꦠ꧀ꦡꦴꦫꦠꦺꦴ ꦮꦺꦢꦶꦠꦧ꧀ꦧꦴ.

ꦠꦶꦏꦩꦹꦭꦏꦺꦥꦶ ꦠꦶꦏꦺꦱꦸ ꦭꦧ꧀ꦨꦩꦴꦤꦺꦤ ꦌꦏꦺꦏꦺꦤ ꦠꦶꦏꦺꦤ ꦱꦢ꧀ꦣꦶꦁ ꦢꦸꦏꦺꦱꦸ ꦄꦭꦧ꧀ꦨꦩꦴꦤꦺ ꦥꦜꦩꦢꦸꦏꦴꦢꦪꦺꦴ ꦢꦸꦏꦺ ꦄꦥꦤꦺꦠ꧀ꦮꦴ, ꦱꦺꦱꦺ ꦭꦧ꧀ꦨꦩꦴꦤꦏꦺ ꦱꦲꦺꦠꦸꦏꦢꦸꦏꦴꦢꦪꦺꦴ ꦥꦚ꧀ꦚꦴꦱ ꦢꦸꦏꦺ ꦪꦺꦴꦗꦺꦠ꧀ꦮꦴ, ꦥꦜꦩꦠ꧀ꦠꦶꦏꦢꦸꦠꦶꦪꦢꦸꦏꦪꦺꦴꦗꦤꦮꦴꦫꦴꦢꦷꦤꦶ ꦤꦮꦮꦴꦫꦱꦠꦴꦤꦶ ꦥꦚ꧀ꦚꦴꦱꦚ꧀ꦕ ꦮꦴꦫꦴ ꦲꦺꦴꦤ꧀ꦠꦶ. ꦠꦺꦥꦶ ꦱꦧ꧀ꦧꦺ ꦥꦴꦭ꦳ꦶꦪꦁ ꦱꦔ꧀ꦑꦶꦥꦶꦠ꧀ꦮꦴ ꦠꦠ꧀ꦡ ꦠꦠ꧀ꦡ ꦢꦱ꧀ꦱꦺꦠꦧ꧀ꦧꦪꦸꦠ꧀ꦠꦏꦁ ꦢꦱ꧀ꦱꦺꦠ꧀ꦮꦴ ꦮꦸꦠ꧀ꦠꦴ. ꦄꦱꦩ꧀ꦩꦸꦪ꧀ꦲꦤ꧀ꦠꦺꦤ ꦥꦤ ꦮꦶꦠ꧀ꦡꦴꦫꦠꦺꦴ ꦮꦺꦢꦶꦠꦧ꧀ꦧꦴ.

ꦈꦨꦠꦺꦴꦮꦝ꧀ꦞꦶꦠꦏꦺ ꦢꦸꦮꦶꦣꦨꦺꦢꦺ ꦢꦸꦠꦶꦪꦢꦸꦏꦁ ꦠꦶꦮꦶꦣꦨꦺꦢꦺ ꦕ ꦥꦜꦩꦠꦶꦏꦁ ꦄꦴꦢꦶꦁ ꦏꦠ꧀ꦮꦴ ꦭꦧ꧀ꦨꦩꦴꦤꦺꦲꦶ ꦌꦏꦹꦤꦮꦷꦱꦠꦶꦪꦴ ꦢꦸꦏꦺꦲꦶ ꦭꦧ꧀ꦨꦩꦴꦤꦺ ꦌꦏꦹꦤꦮꦷꦱꦠꦶꦠꦶꦏꦺ ꦪꦺꦴꦗꦺꦠ꧀ꦮꦴ ꦢꦸꦠꦶꦪꦢꦸꦏꦥꦜꦩꦠꦶꦏꦪꦺꦴꦗꦤꦮꦴꦫꦴꦢꦪꦺꦴ ꦌꦏꦹꦤꦮꦷꦱꦠꦶꦮꦴꦫꦴ ꦮꦸꦠ꧀ꦠꦴ. ꦌꦱ ꦢꦸꦏꦠꦶꦏꦴꦤꦁ ꦮꦱꦺꦤ ꦈꦨꦠꦺꦴꦮꦝ꧀ꦞꦶꦠꦠ꧀ꦠꦴ ꦈꦨꦠꦺꦴꦮꦝ꧀ꦞꦶꦠꦏꦺꦴ ꦤꦴꦩ ꦠꦠꦶꦪꦺꦴ ꦩꦲꦴꦮꦴꦫꦺꦴ.

ꦧꦲꦸꦮꦶꦣꦮꦴꦫꦱ꧀ꦱ ꦱꦠ꧀ꦠꦮꦶꦣꦤꦶꦢ꧀ꦢꦺꦱꦺ ꦄꦴꦢꦶꦠꦺꦴ ꦥꦛ꧀ꦜꦴꦪ ꦭꦧ꧀ꦨꦩꦴꦤꦺꦱꦸ ꦌꦏꦹꦤꦮꦷꦱꦠꦶꦪꦴ ꦠꦶꦏꦺꦱꦸ ꦌꦏꦺꦏꦺꦤ ꦱꦢ꧀ꦣꦶꦁ ꦕꦠꦱ꧀ꦱꦺꦴ ꦨꦹꦩꦶꦪꦺꦴ ꦪꦺꦴꦗꦺꦠ꧀ꦮꦴ ꦌꦏꦹꦤꦮꦷꦱꦠꦶ ꦱꦠ꧀ꦠꦮꦶꦣꦮꦴꦫꦴ ꦮꦸꦠ꧀ꦠꦴ. ꦕꦠꦸꦮꦷꦱꦠꦶꦮꦶꦣꦤꦶꦢ꧀ꦢꦺꦱꦺꦥꦶ ꦠꦺꦱꦁꦪꦺꦮ ꦠꦶꦏꦴꦤꦁ ꦮꦱꦺꦤ ꦌꦏꦹꦤꦮꦷꦱꦠꦶꦮꦴꦫꦴ ꦮꦸꦠ꧀ꦠꦴ. ꦠꦡꦴ ꦧꦲꦸꦮꦶꦣꦮꦴꦫꦺ ꦕꦴꦠꦶ. ꦠꦶꦁꦱꦮꦶꦣꦮꦴꦫꦺꦴ ꦌꦏꦺꦴꦪꦺꦮꦴꦠꦶ ꦱꦧ꧀ꦧꦺꦥꦶ ꦄꦛ꧀ꦜꦥꦚ꧀ꦚꦴꦱ ꦮꦴꦫꦴ ꦲꦺꦴꦤ꧀ꦠꦶ. ꦄꦪꦁ ꦠꦴꦮꦺꦠ꧀ꦡ ꦮꦴꦫꦥꦫꦶꦕ꧀ꦖꦺꦢꦮꦱꦺꦤ ꦥꦴꦭ꦳ꦶꦮꦟ꧀ꦟꦤꦴ.

ꦆꦢꦴꦤꦶ ꦄꦠ꧀ꦡꦮꦟ꧀ꦟꦤꦴ ꦲꦺꦴꦠꦶ. ꦠꦠ꧀ꦡ ꦱꦠ꧀ꦠꦮꦶꦣꦤꦶꦢ꧀ꦢꦺꦱꦺꦴ ꦠꦴꦮ ꦈꦠ꧀ꦠꦴꦤꦠ꧀ꦡꦺꦴꦪꦺꦮ. ꦕꦠꦸꦮꦷꦱꦠꦶꦮꦶꦣꦤꦶꦢ꧀ꦢꦺꦱꦺ ꦕꦏ꧀ꦑꦸꦱꦩ꧀ꦦꦱ꧀ꦱꦥꦕ꧀ꦕꦪꦴ ꦮꦺꦢꦤꦴꦏ꧀ꦑꦤ꧀ꦣꦺꦴ ꦄꦠ꧀ꦡꦶ ꦏꦸꦱꦭꦺꦴꦠꦶ ꦏꦴꦩꦴꦮꦕꦫꦄꦛ꧀ꦜꦏꦸꦱꦭꦕꦶꦠ꧀ꦠꦮꦱꦺꦤ ꦮꦺꦢꦶꦠꦧ꧀ꦧꦺꦴ. ꦄꦠ꧀ꦡꦶ ꦄꦏꦸꦱꦭꦺꦴꦠꦶ ꦢ꧀ꦮꦴꦢꦱꦄꦏꦸꦱꦭꦕꦶꦠ꧀ꦠꦮꦱꦺꦤ ꦮꦺꦢꦶꦠꦧ꧀ꦧꦺꦴ. ꦄꦠ꧀ꦡꦶ ꦄꦧ꧀ꦪꦴꦏꦠꦺꦴꦠꦶ ꦠꦶꦱ꧀ꦱꦺꦴ ꦩꦤꦺꦴꦣꦴꦠꦸꦪꦺꦴ, ꦠꦶꦱ꧀ꦱꦺꦴ ꦄꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸꦪꦺꦴ, ꦄꦛ꧀ꦜ ꦩꦲꦴꦮꦶꦥꦴꦏꦴꦤꦶ, ꦢꦱ ꦏꦴꦩꦴꦮꦕꦫꦏꦶꦫꦶꦪꦴꦠꦶ ꦕꦠꦸꦮꦷꦱꦠꦶꦪꦴ ꦕꦶꦠ꧀ꦠꦴꦤꦁ ꦮꦱꦺꦤ ꦮꦺꦢꦶꦠꦧ꧀ꦧꦺꦴ.

ꦠꦠ꧀ꦡ ꦄꦛ꧀ꦜ ꦏꦸꦱꦭꦴꦤꦶ ꦢ꧀ꦮꦴꦢꦱ ꦄꦏꦸꦱꦭꦴꦤꦶ ꦕ ꦗꦮꦤꦮꦱꦺꦤ ꦭꦧ꧀ꦨꦤ꧀ꦠꦶ. ꦏꦶꦫꦶꦪꦩꦤꦺꦴꦣꦴꦠꦸ ꦄꦴꦮꦗ꧀ꦗꦤꦮꦱꦺꦤ ꦭꦧ꧀ꦨꦠꦶ. ꦢ꧀ꦮꦺ ꦮꦶꦥꦴꦏꦩꦤꦺꦴꦣꦴꦠꦸꦪꦺꦴ ꦱꦩ꧀ꦥꦛꦶꦕ꧀ꦖꦤꦮꦱꦺꦤ, ꦠꦶꦱ꧀ꦱꦺꦴ ꦮꦶꦥꦴꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸꦪꦺꦴ ꦱꦤ꧀ꦠꦷꦫꦟꦠꦢꦴꦫꦩ꧀ꦩꦟꦮꦱꦺꦤ, ꦏꦶꦫꦶꦪꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸ ꦮꦺꦴꦛ꧀ꦜꦧ꧀ꦧꦤꦮꦱꦺꦤ, ꦄꦛ꧀ꦜ ꦩꦲꦴꦮꦶꦥꦴꦏꦕꦶꦠ꧀ꦠꦴꦤꦶ ꦠꦢꦴꦫꦩ꧀ꦩꦟꦮꦱꦺꦤ, ꦤꦮ ꦏꦶꦫꦶꦪꦕꦶꦠ꧀ꦠꦴꦤꦶ ꦗꦮꦤꦮꦱꦺꦤ ꦭꦧ꧀ꦨꦤ꧀ꦠꦶ. ꦱꦺꦴꦠꦓꦴꦤꦗꦶꦮ꧀ꦲꦴꦏꦴꦪꦢ꧀ꦮꦴꦫꦺꦱꦸꦥꦶ ꦌꦱꦺꦮ ꦤꦪꦺꦴ.

ꦩꦤꦺꦴꦢ꧀ꦮꦴꦫꦺ ꦥꦤ ꦄꦠ꧀ꦡꦶ ꦏꦸꦱꦭꦺꦴꦠꦶ ꦕꦠꦸꦨꦹꦩꦏꦏꦸꦱꦭꦮꦱꦺꦤ ꦏꦡꦶꦠꦁ, ꦄꦠ꧀ꦡꦶ ꦄꦏꦸꦱꦭꦺꦴꦠꦶ ꦢ꧀ꦮꦴꦢꦱꦄꦏꦸꦱꦭꦮꦱꦺꦤ. ꦄꦠ꧀ꦡꦶ ꦄꦧ꧀ꦪꦴꦏꦠꦺꦴꦠꦶ ꦌꦏꦴꦢꦱꦤ꧀ꦤꦁ ꦏꦴꦩꦴꦮꦕꦫꦮꦶꦥꦴꦏꦴꦤꦁ, ꦢꦱꦤ꧀ꦤꦁ ꦏꦶꦫꦶꦪꦴꦤꦁ, ꦤꦮꦤ꧀ꦤꦁ ꦫꦹꦥꦴꦮꦕꦫꦴꦫꦹꦥꦴꦮꦕꦫꦏꦶꦫꦶꦪꦴꦤꦁ, ꦕꦠꦸꦤ꧀ꦤꦁ ꦱꦴꦩꦚ꧀ꦚꦦꦭꦴꦤꦤ꧀ꦠꦶ ꦕꦠꦸꦠ꧀ꦠꦶꦁꦱꦕꦶꦠ꧀ꦠꦸꦥ꧀ꦥꦴꦢꦮꦱꦺꦤ ꦏꦡꦶꦠꦁ. ꦠꦠ꧀ꦡ ꦕꦠꦸꦨꦹꦩꦏꦏꦸꦱꦭꦚ꧀ꦕꦺꦮ ꦄꦏꦸꦱꦭꦚ꧀ꦕ ꦗꦮꦤꦮꦱꦺꦤ ꦭꦧ꧀ꦨꦠꦶ. ꦏꦶꦫꦶꦪꦠꦺꦴ ꦄꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸ ꦄꦴꦮꦗ꧀ꦗꦤꦮꦱꦺꦤ, ꦌꦏꦴꦢꦱ ꦮꦶꦥꦴꦏꦕꦶꦠ꧀ꦠꦴꦤꦶ ꦠꦢꦴꦫꦩ꧀ꦩꦟꦮꦱꦺꦤ, ꦠꦺꦨꦹꦩꦏꦏꦶꦫꦶꦪꦴ ꦕꦺꦮ ꦱꦴꦩꦚ꧀ꦚꦦꦭꦴꦤꦶ ꦕ ꦗꦮꦤꦮꦱꦺꦤꦺꦮ ꦭꦧ꧀ꦨꦤ꧀ꦠꦶ. ꦠꦴꦤꦶ ꦱꦠ꧀ꦠꦮꦶꦣꦴꦢꦷꦱꦸ ꦪꦠ꧀ꦡ ꦏꦠ꧀ꦡꦕꦶ ꦜꦠ꧀ꦮꦴ ꦏꦡꦺꦠꦸꦁ ꦮꦛ꧀ꦛꦤ꧀ꦠꦶ. ꦠꦶꦁꦱꦮꦶꦣꦺ ꦥꦤ ꦜꦠ꧀ꦮꦴ ꦢꦷꦥꦶꦪꦩꦴꦤꦴꦤꦶ ꦱꦸꦑꦢꦷꦥꦤꦴꦤꦶ ꦲꦺꦴꦤ꧀ꦠꦷꦠꦶ ꦠꦶꦁꦱꦮꦶꦣꦱ꧀ꦩꦶꦁꦪꦺꦮ ꦜꦠ꧀ꦮꦴ ꦢꦷꦥꦪꦶꦁꦱꦸ.

ꦌꦠꦴꦤꦶ ꦲꦶ ꦱꦧ꧀ꦧꦴꦤꦶꦥꦶ ꦕꦶꦠ꧀ꦠꦴꦤꦶ ꦕꦏ꧀ꦑꦸꦢ꧀ꦮꦴꦫꦺ ꦈꦥꦤꦶꦱ꧀ꦱꦪꦏꦺꦴꦛꦶꦪꦴ, ꦱꦩꦠꦶꦏ꧀ꦏꦩꦮꦱꦺꦤ, ꦨꦴꦮꦤꦴꦮꦱꦺꦤꦴꦠꦶ ꦠꦷꦲꦴꦏꦴꦫꦺꦲꦶ ꦭꦧ꧀ꦨꦤ꧀ꦠꦶ. ꦠꦡꦴ ꦱꦺꦴꦠꦢ꧀ꦮꦴꦫꦩꦤꦺꦴꦢ꧀ꦮꦴꦫꦺꦱꦸꦥꦶ. ꦓꦴꦤꦗꦶꦮ꧀ꦲꦴꦏꦴꦪꦢ꧀ꦮꦴꦫꦺꦱꦸ ꦥꦤ ꦱꦩꦠꦶꦏ꧀ꦏꦩꦮꦱꦺꦤ, ꦨꦴꦮꦤꦴꦮꦱꦺꦤꦴꦠꦶ ꦢ꧀ꦮꦷꦲꦺꦮꦴꦏꦴꦫꦺꦲꦶ ꦭꦧ꧀ꦨꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦴꦤꦶ. ꦏꦡꦁ? ꦆꦣ ꦨꦶꦏ꧀ꦑꦸ ꦮꦶꦲꦴꦫꦕꦴꦫꦶꦏꦁ ꦕꦫꦩꦴꦤꦺꦴ ꦏꦱꦶꦟꦩꦟ꧀ꦝꦭꦁ ꦢꦶꦱ꧀ꦮꦴ ‘ꦏꦶꦁ ꦤꦴꦩꦺꦠ’ꦤ꧀ꦠꦶ ꦥꦸꦕ꧀ꦖꦶꦠ꧀ꦮꦴ ‘ꦏꦱꦶꦟꦩꦟ꧀ꦝꦭ’ꦤ꧀ꦠꦶ ꦮꦸꦠ꧀ꦠꦺ ꦥꦸꦤ ‘ꦏꦶꦁ ꦆꦩꦶꦤꦴ ꦏꦫꦺꦴꦤ꧀ꦠꦷ’ꦠꦶ ꦥꦸꦕ꧀ꦖꦠꦶ. ꦄꦡꦱ꧀ꦱ ꦄꦴꦕꦶꦏ꧀ꦑꦤ꧀ꦠꦶ – ‘ꦌꦮꦁ ꦨꦴꦮꦺꦠ꧀ꦮꦴ ꦙꦴꦤꦴꦤꦶ ꦈꦥ꧀ꦥꦴꦢꦺꦠ꧀ꦮꦴ, ꦱꦩꦴꦥꦠ꧀ꦠꦶꦥꦢꦛ꧀ꦜꦴꦤꦁ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ, ꦄꦫꦲꦠ꧀ꦠꦁ ꦥꦴꦥꦸꦟꦤ꧀ꦠꦷ’ꦠꦶ. ꦄꦗ꧀ꦙꦴꦱꦪꦱꦩ꧀ꦥꦤ꧀ꦤꦺꦴ ꦏꦸꦭꦥꦸꦠ꧀ꦠꦺꦴ ‘ꦨꦴꦫꦶꦪꦁ ꦌꦠ’ꦤ꧀ꦠꦶ ꦄꦱꦭ꧀ꦭꦏ꧀ꦑꦺꦠ꧀ꦮꦴ ‘ꦩꦪꦴꦥꦶ ꦌꦱ ꦒꦸꦟꦺꦴ ꦤꦶꦧ꧀ꦧꦠ꧀ꦠꦺꦠꦸꦁ ꦮꦛ꧀ꦛꦠꦶ, ꦤ ꦑꦺꦴ ꦥꦤ ꦱꦏ꧀ꦏꦴ ꦌꦱ ꦤꦶꦥꦗ꧀ꦗꦶꦠ꧀ꦮꦴ ꦤꦶꦢ꧀ꦢꦴꦪꦤ꧀ꦠꦺꦤ ꦤꦶꦧ꧀ꦧꦠ꧀ꦠꦺꦠꦸꦁ, ꦄꦴꦢꦶꦠꦺꦴꦮ ꦮꦷꦫꦶꦪꦁ ꦏꦴꦠꦸꦁ ꦱꦷꦭꦁ ꦱꦺꦴꦣꦺꦠꦸꦁ ꦮꦛ꧀ꦛꦠꦷ’ꦠꦶ ꦕꦶꦤ꧀ꦠꦺꦠ꧀ꦮꦴ ꦱꦷꦭꦁ ꦱꦺꦴꦣꦺꦠꦶ. ꦠꦠꦺꦴ ꦱꦷꦭꦺ ꦥꦠꦶꦛ꧀ꦜꦴꦪ ꦢꦱ ꦥꦭꦶꦧꦺꦴꦣꦺ ꦈꦥꦕ꧀ꦖꦶꦤ꧀ꦢꦶꦠ꧀ꦮꦴ, ꦠꦶꦕꦷꦮꦫꦥꦫꦩꦺꦤ ꦱꦤ꧀ꦠꦺꦴꦱꦺꦤ ꦱꦤ꧀ꦠꦸꦛ꧀ꦜꦺꦴ, ꦄꦴꦕꦫꦶꦪꦸꦥꦗ꧀ꦙꦴꦪꦴꦤꦁ ꦮꦠ꧀ꦠꦥꦛꦶꦮꦠ꧀ꦠꦁ ꦏꦠ꧀ꦮꦴ, ꦏꦩ꧀ꦩꦛ꧀ꦜꦴꦤꦁ ꦈꦒ꧀ꦒꦟ꧀ꦲꦶꦠ꧀ꦮꦴ, ꦏꦱꦶꦟꦥꦫꦶꦏꦩ꧀ꦩꦁ ꦏꦠ꧀ꦮꦴ, ꦱꦩꦴꦥꦠ꧀ꦠꦶꦪꦺꦴ ꦈꦥ꧀ꦥꦴꦢꦺꦠ꧀ꦮꦴ, ꦱꦩꦴꦥꦠ꧀ꦠꦶꦥꦢꦛ꧀ꦜꦴꦤꦁ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ, ꦄꦫꦲꦠ꧀ꦠꦁ ꦥꦴꦥꦸꦟꦴꦠꦶ. ꦠꦠ꧀ꦡ ꦱꦧ꧀ꦧꦴꦥꦶ ꦥꦫꦶꦏꦩ꧀ꦩꦮꦺꦢꦤꦴ ꦏꦴꦩꦴꦮꦕꦫꦴ, ꦄꦛ꧀ꦜꦱꦩꦴꦥꦠ꧀ꦠꦶꦮꦺꦢꦤꦴ ꦫꦹꦥꦴꦮꦕꦫꦴꦫꦹꦥꦴꦮꦕꦫꦴ, ꦩꦒ꧀ꦒꦦꦭꦮꦺꦢꦤꦴ ꦭꦺꦴꦏꦸꦠ꧀ꦠꦫꦴꦠꦶ ꦌꦮꦁ ꦕꦏ꧀ꦑꦸꦮꦶꦚ꧀ꦚꦴꦟꦁ ꦕꦠꦸꦨꦹꦩꦶꦏꦮꦺꦢꦤꦴꦤꦶꦧ꧀ꦧꦠ꧀ꦠꦶꦪꦴ ꦧꦭꦮꦥꦕ꧀ꦕꦪꦺꦴ ꦲꦺꦴꦠꦷꦠꦶ ꦕꦠꦸꦨꦹꦩꦶꦏꦮꦺꦢꦤꦴ ꦕꦏ꧀ꦑꦸꦱꦩ꧀ꦦꦱ꧀ꦱꦥꦕ꧀ꦕꦪꦴ ꦤꦴꦩ ꦗꦴꦠꦴ. ꦌꦮꦁ ꦠꦴꦮ ‘ꦈꦥꦤꦶꦱ꧀ꦱꦪꦮꦱꦺꦤ’ ꦭꦧ꧀ꦨꦤ꧀ꦠꦶ.