꧒. ꦥꦫꦶꦲꦴꦤꦶꦏꦡꦴ

꧑. ꦮꦴꦢꦪꦸꦠ꧀ꦠꦶꦥꦫꦶꦲꦴꦤꦶꦮꦟ꧀ꦟꦤꦴ

꧒꧓꧙. ꦆꦢꦴꦤꦶ ꦥꦫꦶꦲꦴꦤꦶꦏꦡꦴ ꦲꦺꦴꦠꦶ. ꦥꦫꦶꦲꦴꦤꦶꦣꦩ꧀ꦩꦺꦴ ꦄꦥꦫꦶꦲꦴꦤꦶꦣꦩ꧀ꦩꦺꦴ, ‘‘ꦢ꧀ꦮꦺꦩꦺ, ꦨꦶꦏ꧀ꦑꦮꦺ, ꦣꦩ꧀ꦩꦴ ꦱꦺꦏ꧀ꦑꦱ꧀ꦱ, ꦨꦶꦏ꧀ꦑꦸꦤꦺꦴ ꦥꦫꦶꦲꦴꦤꦴꦪ ꦱꦁꦮꦠ꧀ꦠꦤ꧀ꦠꦶ’’ (ꦄ. ꦤꦶ. ꧒.꧑꧘꧕), ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦣꦩ꧀ꦩꦴ ꦱꦩꦪꦮꦶꦩꦸꦠ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦥꦫꦶꦲꦴꦤꦴꦪ ꦱꦁꦮꦠ꧀ꦠꦤ꧀ꦠꦷ’’ꦠꦶ (ꦄ. ꦤꦶ. ꧕.꧑꧔꧙) ꦌꦮꦩꦴꦢꦷꦤꦶ ꦲꦶ ꦱꦸꦠ꧀ꦠꦴꦤꦶ ꦤꦶꦱ꧀ꦱꦴꦪ ꦱꦩ꧀ꦩꦶꦠꦶꦪꦴ ꦮꦗ꧀ꦗꦶꦥꦸꦠ꧀ꦠꦏꦴ ꦱꦧ꧀ꦧꦠ꧀ꦡꦶꦮꦴꦢꦶꦤꦺꦴ ꦌꦏꦕ꧀ꦕꦺ ꦕ ꦩꦲꦴꦱꦔ꧀ꦓꦶꦏꦴ ꦄꦫꦲꦠꦺꦴꦥꦶ ꦥꦫꦶꦲꦴꦤꦶꦁ ꦆꦕ꧀ꦖꦤ꧀ꦠꦶ, ꦠꦱ꧀ꦩꦴ ꦠꦺ ꦮꦴ ꦲꦺꦴꦤ꧀ꦠꦸ ꦄꦚ꧀ꦚꦺꦪꦺꦮ ꦮꦴ, ꦪꦺꦱꦁ ꦄꦪꦁ ꦭꦢ꧀ꦣꦶ, ꦠꦺꦱꦁ ꦭꦢ꧀ꦣꦶꦨꦶꦤ꧀ꦢꦤꦠ꧀ꦡꦁ ꦥꦫꦶꦲꦴꦪꦠꦶ ꦄꦫꦲꦴ ꦄꦫꦲꦠ꧀ꦠꦴꦠꦶ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ. ꦠꦠ꧀ꦫ ꦥꦫꦶꦲꦴꦪꦠꦷꦠꦶ ꦢ꧀ꦮꦺ ꦥꦫꦶꦲꦴꦤꦶꦪꦺꦴ ꦥꦠ꧀ꦠꦥꦫꦶꦲꦴꦤꦶ ꦕ ꦄꦥ꧀ꦥꦠ꧀ꦠꦥꦫꦶꦲꦴꦤꦶ ꦕ. ꦠꦠ꧀ꦡ ‘‘ꦢꦸꦠꦶꦪꦩ꧀ꦥꦶ ꦑꦺꦴ ꦄꦴꦪꦱ꧀ꦩꦴ ꦒꦺꦴꦣꦶꦏꦺꦴ ꦠꦩ꧀ꦲꦴ ꦱꦴꦩꦪꦶꦏꦴꦪ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦥꦫꦶꦲꦴꦪꦷ’’ꦠꦶ (ꦱꦁ. ꦤꦶ. ꧑.꧑꧕꧙) ꦄꦪꦁ ꦥꦠ꧀ꦠꦥꦫꦶꦲꦴꦤꦶ ꦤꦴꦩ. ‘‘ꦩꦴ ꦮꦺꦴ ꦱꦴꦩꦚ꧀ꦚꦠ꧀ꦡꦶꦏꦴꦤꦁ ꦱꦠꦁ ꦱꦴꦩꦚ꧀ꦚꦠ꧀ꦡꦺꦴ ꦥꦫꦶꦲꦴꦪꦷ’’ꦠꦶ (ꦩ. ꦤꦶ. ꧑.꧔꧑꧖-꧔꧑꧘) ꦄꦪꦁ ꦄꦥ꧀ꦥꦠ꧀ꦠꦥꦫꦶꦲꦴꦤꦶ. ꦠꦴꦱꦸ ꦆꦣ ꦥꦠ꧀ꦠꦥꦫꦶꦲꦴꦤꦶ ꦄꦣꦶꦥ꧀ꦥꦺꦠꦴ. ꦠꦚ꧀ꦲꦶ ꦱꦤ꧀ꦣꦴꦪ ꦄꦴꦩꦤ꧀ꦠꦴꦠꦶ ꦥꦛꦶꦚ꧀ꦚꦴ ꦥꦫꦮꦴꦢꦶꦱ꧀ꦱ. ꦱꦏꦱꦩꦪꦺ ꦥꦤ ꦆꦩꦁ ꦥꦠ꧀ꦠꦥꦫꦶꦲꦴꦤꦶꦁ ꦤꦴꦩ ꦭꦺꦴꦏꦶꦪꦱꦩꦴꦥꦠ꧀ꦠꦶꦪꦴꦮ ꦆꦕ꧀ꦖꦤ꧀ꦠꦶ, ꦤ ꦄꦫꦲꦠ꧀ꦠꦴꦢꦷꦲꦶ ꦱꦴꦩꦚ꧀ꦚꦦꦭꦺꦲꦶ. ꦥꦫꦱꦩꦪꦺꦥꦶ ꦤꦁ ꦱꦧ꧀ꦧꦱꦴꦩꦚ꧀ꦚꦦꦭꦺꦱꦸ ꦱꦧ꧀ꦧꦨꦮꦺꦱꦸ ꦱꦧ꧀ꦧꦏꦴꦭꦺꦱꦸ ꦱꦧ꧀ꦧꦺꦱꦚ꧀ꦕ ꦥꦸꦒ꧀ꦒꦭꦴꦤꦁ ꦤ ꦆꦕ꧀ꦖꦤ꧀ꦠꦶ. ꦠꦁ ꦥꦤ ꦠꦺꦱꦁ ꦭꦢ꧀ꦣꦶꦩꦠ꧀ꦠꦩꦺꦮꦴꦠꦶ ꦱꦧ꧀ꦧꦁ ꦭꦢ꧀ꦣꦶꦗꦴꦭꦁ ꦨꦶꦤ꧀ꦢꦶꦠꦸꦁ ꦥꦸꦤ ꦱꦧ꧀ꦧꦠ꧀ꦡꦴꦠꦶꦄꦴꦢꦶꦤꦴ ꦤꦪꦺꦤ ꦢꦺꦱꦤꦴ ꦮꦝ꧀ꦞꦶꦠꦴ.

ꦠꦠ꧀ꦡ ꦪꦱ꧀ꦩꦴ ꦥꦫꦮꦴꦢꦷ ꦏꦩꦺꦤ ꦥꦫꦶꦲꦴꦪꦶꦠ꧀ꦮꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦜꦶꦠꦱ꧀ꦱ ꦄꦫꦲꦠꦺꦴ ꦥꦫꦶꦲꦴꦤꦶꦁ ꦤ ꦆꦕ꧀ꦖꦠꦶ, ꦈꦥꦫꦶꦦꦭꦺꦱꦸ ꦜꦶꦠꦱ꧀ꦱꦺꦮ ꦆꦕ꧀ꦖꦠꦶ. ꦪꦱ꧀ꦩꦴ ꦕ ꦫꦹꦥꦴꦫꦹꦥꦨꦮꦺꦱꦸ ꦜꦶꦠꦱ꧀ꦱ ꦤ ꦆꦕ꧀ꦖꦠꦶ, ꦏꦩ꧀ꦩꦴꦫꦴꦩꦠꦴꦢꦷꦤꦁ ꦥꦤ ꦥꦫꦶꦲꦴꦤꦶꦪꦣꦩ꧀ꦩꦴꦤꦁ ꦨꦴꦮꦠꦺꦴ ꦏꦴꦩꦨꦮꦺ ꦜꦶꦠꦱ꧀ꦱꦺꦮ ꦆꦕ꧀ꦖꦠꦶ, ꦠꦱ꧀ꦩꦴ ‘‘ꦱꦧ꧀ꦧꦠ꧀ꦡꦴ’’ꦠꦶ ꦥꦸꦛ꧀ꦜꦺꦴ ꦥꦛꦶꦏ꧀ꦑꦶꦥꦠꦶ. ꦥꦸꦤ ꦢꦭ꦳꧀ꦲꦁ ꦏꦠ꧀ꦮꦴ ꦥꦸꦛ꧀ꦜꦺꦴ ꦏꦴꦩꦨꦮꦁ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ. ꦱꦧ꧀ꦧꦱ꧀ꦩꦶꦩ꧀ꦥꦶ ꦲꦶ ꦏꦴꦩꦨꦮꦺ ꦥꦫꦶꦲꦴꦤꦶꦏꦫꦴ ꦏꦴꦩꦒꦸꦟꦴ ꦄꦠ꧀ꦡꦶ, ꦠꦱ꧀ꦩꦴ ꦠꦠ꧀ꦡ ꦥꦫꦶꦲꦴꦪꦠꦷꦠꦶ ꦠꦱ꧀ꦱ ꦭꦢ꧀ꦣꦶ.

ꦠꦠꦶꦪꦥꦸꦕ꧀ꦖꦴꦪ ꦥꦫꦶꦲꦴꦤꦷꦠꦶ ꦥꦫꦶꦲꦴꦤꦶꦏꦫꦺ ꦣꦩ꧀ꦩꦺ ꦥꦸꦕ꧀ꦖꦠꦶ. ꦠꦠ꧀ꦡ ꦪꦱ꧀ꦩꦴ ꦥꦫꦶꦲꦴꦤꦶ ꦤꦴꦩ ꦏꦩ꧀ꦩꦴꦫꦴꦩꦠꦴꦢꦶꦣꦩ꧀ꦩꦴ, ꦮꦶꦱꦺꦱꦠꦺꦴ ꦮꦴ ꦏꦴꦩꦫꦴꦒꦧ꧀ꦪꦴꦥꦴꦢꦴ ꦌꦮ, ꦠꦺ ꦕ ꦫꦹꦥꦴꦫꦹꦥꦨꦮꦺ ꦤꦠ꧀ꦡꦶ, ꦠꦱ꧀ꦩꦴ ‘‘ꦤ ꦲꦺꦮ’’ꦤ꧀ꦠꦶ ꦥꦛꦶꦏ꧀ꦑꦺꦥꦺꦴ ꦥꦫꦮꦴꦢꦶꦱ꧀ꦱ.

ꦱꦧ꧀ꦧꦢꦴꦠꦶ ꦏꦴꦭꦥꦸꦕ꧀ꦖꦴ. ꦠꦠ꧀ꦡ ꦥꦜꦩꦥꦚ꧀ꦲꦺ ꦪꦺꦴꦤꦶꦱꦺꦴꦩꦤꦱꦶꦏꦴꦫꦏꦴꦭꦺ ꦄꦥꦫꦶꦲꦴꦪꦤꦠꦺꦴ ꦥꦛꦶꦏ꧀ꦑꦶꦥꦠꦶ. ꦢꦸꦠꦶꦪꦺ ꦄꦪꦺꦴꦤꦶꦱꦺꦴꦩꦤꦱꦶꦏꦫꦺꦴꦠꦺꦴ ꦫꦠ꧀ꦠꦶꦨꦴꦒꦺ ꦮꦴ ꦢꦶꦮꦱꦨꦴꦒꦺ ꦮꦴ ꦱꦧ꧀ꦧꦢꦴ ꦥꦫꦶꦲꦴꦪꦤꦠꦺꦴ ꦥꦛꦶꦗꦴꦤꦴꦠꦶ. ꦠꦠꦶꦪꦺ ꦥꦫꦶꦲꦴꦤꦶꦏꦫꦣꦩ꧀ꦩꦱꦩꦴꦪꦺꦴꦒꦺ ꦱꦠꦶ ꦩꦸꦲꦸꦠ꧀ꦠꦩꦺꦮ ꦥꦫꦶꦲꦴꦤꦶ ꦤꦴꦩ ꦲꦺꦴꦠꦶ, ꦠꦠꦺꦴ ꦥꦸꦧ꧀ꦧꦺ ꦄꦥꦫꦶꦲꦷꦤꦱ꧀ꦱ ꦥꦕ꧀ꦖꦴ ꦥꦫꦶꦲꦷꦤꦱ꧀ꦱ ꦕ ꦥꦫꦶꦲꦴꦤꦶ ꦤꦴꦩ ꦤꦠ꧀ꦡꦷꦠꦶ ꦥꦛꦶꦏ꧀ꦑꦶꦥꦠꦶ.

ꦱꦧ꧀ꦧꦺꦮ ꦄꦫꦲꦤ꧀ꦠꦺꦴꦠꦶ ꦥꦚ꧀ꦲꦴꦤꦁ ꦥꦜꦩꦱ꧀ꦩꦶꦁ ꦠꦶꦏ꧀ꦑꦶꦤ꧀ꦢ꧀ꦫꦶꦪꦺ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦠꦶ. ꦢꦸꦠꦶꦪꦱ꧀ꦩꦶꦁ ꦩꦸꦢꦶꦤ꧀ꦢ꧀ꦫꦶꦪꦺ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ. ꦠꦠꦶꦪꦱ꧀ꦩꦶꦩ꧀ꦥꦶ ꦠꦶꦏ꧀ꦑꦶꦤ꧀ꦢ꧀ꦫꦶꦪꦴꦮ ꦄꦣꦶꦥ꧀ꦥꦺꦠꦴ. ꦠꦺꦱꦚ꧀ꦲꦶ ꦱꦧ꧀ꦧꦺꦱꦩ꧀ꦥꦶ ꦥꦫꦶꦲꦴꦤꦶ ꦤ ꦲꦺꦴꦠꦷꦠꦶ ꦠꦱ꧀ꦱ ꦭꦢ꧀ꦣꦶ.

ꦱꦺꦛ꧀ꦜꦶꦈꦢꦴꦲꦫꦟꦺ ꦥꦜꦩꦥꦸꦕ꧀ꦖꦴ ꦥꦫꦮꦴꦢꦶꦱ꧀ꦱ, ꦢꦸꦠꦶꦪꦴ ꦱꦏꦮꦴꦢꦶꦱ꧀ꦱ. ꦠꦠ꧀ꦫꦴꦪꦁ ꦄꦣꦶꦥ꧀ꦥꦴꦪꦺꦴ – ꦪꦁ ꦩꦁ ꦠꦸꦩ꧀ꦲꦺ ꦥꦸꦕ꧀ꦖꦡ – ‘‘ꦄꦫꦲꦴ ꦄꦫꦲꦠ꧀ꦠꦴ ꦥꦫꦶꦲꦴꦪꦤ꧀ꦠꦺꦴ ꦕꦠꦹꦲꦶ ꦦꦭꦺꦲꦶ ꦥꦫꦶꦲꦴꦪꦠꦷ’’ꦠꦶ, ꦠꦠ꧀ꦫ ꦮꦺꦴ ꦥꦛꦶꦥꦸꦕ꧀ꦖꦴꦩꦶ – ‘‘ꦕꦠꦹꦲꦶ ꦱꦠꦱꦲꦱ꧀ꦱꦺꦲꦶ ꦱꦺꦛ꧀ꦜꦷ ꦱꦺꦛ꧀ꦜꦶꦠ꧀ꦠꦁ ꦏꦫꦺꦴꦤ꧀ꦠꦺꦴ ꦱꦠꦱꦲꦱ꧀ꦱꦺꦲꦶ ꦥꦫꦶꦲꦷꦤꦺ ꦱꦺꦛ꧀ꦜꦷ ꦱꦺꦛ꧀ꦜꦶꦠ꧀ꦠꦴ ꦥꦫꦶꦲꦷꦤꦺꦴ ꦲꦺꦴꦠꦷ’’ꦠꦶ. ꦠꦠꦺꦴ ꦱꦏꦮꦴꦢꦶꦤꦴ ꦌꦏꦢꦺꦱꦺꦤ ꦥꦫꦶꦲꦴꦤꦶꦁ ꦱꦤ꧀ꦣꦴꦪ ‘‘ꦄꦴꦩꦤ꧀ꦠꦴ’’ꦠꦶ ꦮꦸꦠ꧀ꦠꦺ ꦱꦧ꧀ꦧꦱꦴꦥꦠꦺꦪ꧀ꦪꦴ ꦥꦫꦶꦲꦷꦤꦺꦴ ꦲꦺꦴꦠꦷꦠꦶ ꦥꦸꦕ꧀ꦖꦠꦶ. ꦠꦡꦴ ꦄꦥꦫꦶꦲꦷꦤꦠ꧀ꦠꦴ ꦱꦏꦮꦴꦢꦷ ꦤ ꦲꦺꦮꦴꦠꦶ ꦮꦠ꧀ꦮꦴ ꦄꦡ ꦤꦁ ‘‘ꦌꦮꦩꦺꦮ ꦄꦫꦲꦴꦥꦶ ꦥꦫꦶꦲꦴꦪꦠꦶ ꦕ. ꦤ ꦕ ꦕꦠꦹꦲꦶ ꦦꦭꦺꦲꦷ’’ꦠꦶ ꦈꦥ꧀ꦥꦤ꧀ꦤꦭꦢ꧀ꦣꦶꦏꦁ ꦢꦸꦠꦶꦪꦁ ꦨꦧ꧀ꦧꦥꦚ꧀ꦲꦁ ꦥꦸꦕ꧀ꦖꦠꦶ. ꦥꦫꦮꦴꦢꦷ ꦱꦺꦛ꧀ꦜꦶꦤꦺꦴ ꦄꦨꦧ꧀ꦧꦠꦴꦪ ꦤꦶꦪꦩꦁ ꦄꦥꦱ꧀ꦱꦤ꧀ꦠꦺꦴ ꦥꦛꦶꦗꦴꦤꦶꦠ꧀ꦮꦴ ꦄꦫꦲꦠꦺꦴ ꦕꦠꦹꦲꦶ ꦦꦭꦺꦲꦶ ꦥꦫꦶꦲꦴꦤꦶꦨꦧ꧀ꦧꦠꦁ ꦥꦸꦛ꧀ꦜꦺꦴ ‘‘ꦤꦶꦪꦠꦺꦴ ꦱꦩ꧀ꦧꦺꦴꦣꦶꦥꦫꦴꦪꦟꦺꦴ’’ꦠꦶ (ꦄ. ꦤꦶ. ꧓.꧘꧗) ꦮꦕꦤꦱ꧀ꦱ ꦄꦪꦺꦴꦤꦶꦱꦺꦴ ꦄꦠ꧀ꦡꦁ ꦒꦲꦺꦠ꧀ꦮꦴ ꦭꦢ꧀ꦣꦶꦪꦁ ꦜꦶꦠꦺꦴ ꦱꦺꦴꦠꦴꦥꦠ꧀ꦠꦶꦦꦭꦠꦺꦴ ꦥꦫꦶꦲꦴꦪꦶꦠꦸꦁ ꦄꦨꦧ꧀ꦧꦠꦁ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦠꦶ. ꦠꦁ ꦥꦤꦱ꧀ꦱ ꦭꦢ꧀ꦣꦶꦩꦠ꧀ꦠꦩꦺꦮꦴꦠꦶ.

ꦌꦠ꧀ꦠꦴꦮꦠꦴ ꦮꦴꦢꦪꦸꦠ꧀ꦠꦶ ꦤꦴꦩ ꦤꦶꦛ꧀ꦜꦶꦠꦴ ꦲꦺꦴꦠꦶ.

꧒. ꦄꦫꦶꦪꦥꦸꦒ꧀ꦒꦭꦱꦁꦱꦤ꧀ꦢꦤꦥꦫꦶꦲꦴꦤꦶꦮꦟ꧀ꦟꦤꦴ

꧒꧔꧐. ꦆꦢꦴꦤꦶ ꦄꦫꦶꦪꦥꦸꦒ꧀ꦒꦭꦱꦁꦱꦤ꧀ꦢꦤꦴ ꦄꦴꦫꦢ꧀ꦣꦴ. ꦠꦠ꧀ꦡ ꦪꦱ꧀ꦩꦴ ꦏꦺꦕꦶ ꦄꦫꦲꦠꦺꦴꦮ ꦥꦫꦶꦲꦴꦤꦶꦁ ꦆꦕ꧀ꦖꦤ꧀ꦠꦶ, ꦏꦺꦕꦶ ꦄꦤꦴꦒꦴꦩꦶꦤꦺꦴꦥꦶ, ꦏꦺꦕꦶ ꦱꦏꦢꦴꦒꦴꦩꦶꦱ꧀ꦱꦥꦶ. ꦱꦺꦴꦠꦴꦥꦤ꧀ꦤꦱ꧀ꦱ ꦥꦤ ꦱꦧ꧀ꦧꦺꦥꦶ ꦤ ꦆꦕ꧀ꦖꦤ꧀ꦠꦶꦪꦺꦮ. ꦪꦺ ꦄꦫꦲꦠ꧀ꦠꦴ ꦥꦫꦶꦲꦴꦪꦶꦠ꧀ꦮꦴ ꦄꦤꦴꦒꦴꦩꦶꦱꦏꦢꦴꦒꦴꦩꦶꦨꦴꦮꦺ ꦜꦶꦠꦴ, ꦠꦺꦱꦁ ꦥꦫꦶꦲꦴꦤꦶꦁ ꦆꦕ꧀ꦖꦤ꧀ꦠꦶ, ꦤ ꦆꦠꦫꦺꦱꦁ ꦄꦤꦴꦒꦴꦩꦶꦱꦏꦢꦴꦒꦴꦩꦷꦤꦁ. ꦱꦺꦴꦠꦴꦥꦤ꧀ꦤꦱ꧀ꦱ ꦥꦤ ꦠꦺꦥꦶ ꦱꦧ꧀ꦧꦡꦴꦥꦶ ꦤ ꦆꦕ꧀ꦖꦤ꧀ꦠꦶꦪꦺꦮ, ꦠꦱ꧀ꦩꦴ ꦥꦺꦪ꧀ꦪꦴꦭꦩꦸꦑꦺꦤ ꦥꦸꦕ꧀ꦖꦴ ꦏꦠꦴ. ꦠꦠ꧀ꦡ ꦠꦺꦱꦁ ꦭꦢ꧀ꦣꦶꦮꦱꦺꦤ ꦥꦛꦶꦚ꧀ꦚꦴ ꦕ ꦥꦛꦶꦏ꧀ꦑꦺꦥꦺꦴ ꦕ ꦮꦺꦢꦶꦠꦧ꧀ꦧꦴ. ‘‘ꦥꦫꦶꦲꦴꦪꦠꦶ ꦄꦤꦴꦒꦴꦩꦷ ꦄꦤꦴꦒꦴꦩꦶꦦꦭꦴ’’ꦠꦶ ꦲꦶ ꦥꦚ꧀ꦲꦱ꧀ꦩꦶꦁ ꦪꦺ ꦄꦤꦴꦒꦴꦩꦶꦤꦺꦴ ꦥꦫꦶꦲꦴꦤꦶꦁ ꦤ ꦆꦕ꧀ꦖꦤ꧀ꦠꦶ, ꦠꦺꦱꦁ ꦮꦱꦺꦤ ꦥꦛꦶꦏ꧀ꦑꦺꦥꦺꦴ. ꦪꦺ ꦥꦏꦠꦶꦄꦤꦴꦒꦴꦩꦶꦤꦺꦴ ꦮꦴ ꦄꦫꦲꦠ꧀ꦠꦴ ꦥꦫꦶꦲꦴꦪꦶꦠ꧀ꦮꦴ ꦜꦶꦠꦄꦤꦴꦒꦴꦩꦶꦤꦺꦴ ꦮꦴ ꦥꦫꦶꦲꦴꦤꦶꦁ ꦆꦕ꧀ꦖꦤ꧀ꦠꦶ, ꦠꦺꦱꦁ ꦮꦱꦺꦤ ꦥꦛꦶꦚ꧀ꦚꦴꦠꦶ ꦆꦢꦩꦺꦠ꧀ꦡ ꦤꦪꦩꦸꦑꦁ. ꦠꦱ꧀ꦱꦴꦤꦸꦱꦴꦫꦺꦤ ꦱꦧ꧀ꦧꦥꦺꦪ꧀ꦪꦴꦭꦴ ꦄꦠ꧀ꦡꦠꦺꦴ ꦮꦺꦢꦶꦠꦧ꧀ꦧꦴ.

꧒꧔꧑. ꦪꦁ ꦥꦤꦺꦠ꧀ꦡ ‘‘ꦱꦺꦴꦠꦴꦥꦠ꧀ꦠꦶꦦꦭꦱ꧀ꦱ ꦄꦤꦤ꧀ꦠꦫꦴ ꦄꦫꦲꦠ꧀ꦠꦁꦪꦺꦮ ꦱꦕ꧀ꦖꦶꦏꦫꦺꦴꦠꦷ’’ꦠꦶ ꦮꦸꦠ꧀ꦠꦁ, ꦠꦁ ꦥꦫꦶꦲꦷꦤꦱ꧀ꦱ ꦥꦸꦤ ꦮꦴꦪꦩꦠꦺꦴ ꦄꦫꦲꦠ꧀ꦠꦥ꧀ꦥꦠ꧀ꦠꦶꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦆꦠꦫꦺꦴ ꦱꦺꦴꦠꦴꦥꦠ꧀ꦠꦶꦦꦭꦴꦤꦤ꧀ꦠꦫꦁ ꦄꦫꦲꦠ꧀ꦠꦱ꧀ꦱ ꦄꦨꦴꦮꦴ ꦥꦛꦶꦏ꧀ꦑꦶꦥꦠꦶ.

꧒꧔꧒. ꦠꦠꦺꦴ ꦥꦫꦁ ‘‘ꦥꦫꦶꦲꦴꦤꦶ ꦤꦴꦩꦺꦱꦴ ꦏꦶꦭꦺꦱꦥ꧀ꦥꦲꦴꦤꦱ꧀ꦱ ꦮꦴ ꦩꦤ꧀ꦢꦠꦴꦪ ꦨꦮꦺꦪ꧀ꦪ, ꦩꦒ꧀ꦒꦨꦴꦮꦤꦴꦢꦷꦤꦁ ꦮꦴ ꦄꦤꦣꦶꦩꦠ꧀ꦠꦠꦴꦪ, ꦱꦕ꧀ꦕꦴꦤꦁ ꦮꦴ ꦄꦢꦱ꧀ꦱꦤꦺꦤꦴ’’ꦠꦶ ꦌꦮꦩꦴꦢꦷꦤꦁ ꦮꦱꦺꦤ ꦄꦤꦸꦪꦸꦚ꧀ꦗꦶꦠꦸꦁ ꦏꦱ꧀ꦱ ꦧꦲꦸꦠꦫꦴ ꦏꦶꦭꦺꦱꦴ ꦥꦲꦷꦤꦴꦠꦶꦄꦴꦢꦶ ꦮꦸꦠ꧀ꦠꦁ. ꦠꦁ ꦱꦧ꧀ꦧꦁ ꦈꦠ꧀ꦠꦴꦤꦴꦣꦶꦥ꧀ꦥꦴꦪꦩꦺꦮ ꦱꦸꦠ꧀ꦠꦴꦤꦁ ꦥꦤꦠ꧀ꦡꦺꦴ ꦄꦴꦒꦩꦛ꧀ꦜꦏꦡꦴꦱꦸ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ.

꧒꧖꧒. ꦱꦩꦪꦮꦶꦩꦸꦠ꧀ꦠꦺꦴ ꦄꦫꦲꦴ ꦄꦫꦲꦠ꧀ꦠꦴ ꦥꦫꦶꦲꦴꦪꦠꦷꦠꦶ ꦌꦠ꧀ꦡ ꦩꦸꦢꦶꦤ꧀ꦢ꧀ꦫꦶꦪꦺꦴ ꦱꦩꦪꦮꦶꦩꦸꦠ꧀ꦠꦺꦴ, ꦠꦶꦏ꧀ꦑꦶꦤ꧀ꦢ꧀ꦫꦶꦪꦺꦴ ꦄꦱꦩꦪꦮꦶꦩꦸꦠ꧀ꦠꦺꦴꦠꦶ ꦠꦺꦱꦁ ꦭꦢ꧀ꦣꦶ. ꦱꦏꦱꦩꦪꦺ ꦥꦤ ꦄꦮꦱꦶꦥ꧀ꦥꦠ꧀ꦠꦺꦴ ꦙꦴꦤꦭꦴꦨꦷ ꦱꦩꦪꦮꦶꦩꦸꦠ꧀ꦠꦺꦴ, ꦮꦱꦶꦥ꧀ꦥꦠ꧀ꦠꦺꦴ ꦙꦴꦤꦭꦴꦨꦷ ꦕꦺꦮ ꦱꦧ꧀ꦧꦺ ꦕ ꦄꦫꦶꦪꦥꦸꦒ꧀ꦒꦭꦴ ꦄꦫꦶꦪꦺ ꦮꦶꦩꦺꦴꦏ꧀ꦑꦺ ꦄꦱꦩꦪꦮꦶꦩꦸꦠ꧀ꦠꦴꦠꦶ ꦱꦤ꧀ꦤꦶꦛ꧀ꦜꦴꦤꦁ. ꦱꦺꦴ ꦥꦤ ꦠꦁ ꦄꦠ꧀ꦠꦤꦺꦴ ꦭꦢ꧀ꦣꦶꦁ ꦒꦲꦺꦠ꧀ꦮꦴ ꦱꦩꦪꦮꦶꦩꦸꦠ꧀ꦠꦺꦴ ꦥꦫꦶꦲꦴꦪꦠꦶ, ꦆꦠꦫꦺꦴ ꦤ ꦥꦫꦶꦲꦴꦪꦠꦷ’’ꦠꦶ ꦄꦴꦲ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮ.

ꦄꦫꦶꦪꦥꦸꦒ꧀ꦒꦭꦱꦁꦱꦤ꧀ꦢꦤꦥꦫꦶꦲꦴꦤꦶꦮꦟ꧀ꦟꦤꦴ.

꧓. ꦱꦸꦠ꧀ꦠꦱꦴꦣꦤꦥꦫꦶꦲꦴꦤꦶꦮꦟ꧀ꦟꦤꦴ

꧒꧖꧕. ꦆꦢꦴꦤꦶ ꦱꦸꦠ꧀ꦠꦱꦴꦣꦤꦴ ꦲꦺꦴꦠꦶ. ꦠꦠ꧀ꦡ ꦈꦕ꧀ꦕꦴꦮꦕꦴꦠꦶ ꦈꦠ꧀ꦠꦩꦲꦷꦤꦨꦺꦢꦠꦺꦴ ꦈꦕ꧀ꦕꦴ ꦕ ꦄꦮꦕꦴ ꦕ. ꦥꦛꦶꦥꦴꦢꦴꦠꦶ ꦥꦛꦶꦥꦢꦴ. ꦱꦩꦟꦺꦤ ꦥꦏꦴꦱꦶꦠꦴꦠꦶ ꦧꦸꦢ꧀ꦣꦱꦩꦟꦺꦤ ꦗꦺꦴꦠꦶꦠꦴ. ꦱꦸꦑꦴꦥꦛꦶꦥꦢꦴ ꦲꦶ ꦑꦶꦥ꧀ꦥꦴꦨꦶꦚ꧀ꦚꦴ ꦈꦕ꧀ꦕꦴ. ꦢꦸꦏ꧀ꦑꦴꦥꦛꦶꦥꦢꦴ ꦢꦤ꧀ꦣꦴꦨꦶꦚ꧀ꦚꦴ ꦄꦮꦕꦴ. ꦆꦠꦫꦴ ꦢ꧀ꦮꦺ ꦌꦏꦺꦤꦔ꧀ꦒꦺꦤ ꦈꦕ꧀ꦕꦴ, ꦌꦏꦺꦤ ꦄꦮꦕꦴ. ꦥꦜꦩꦁ ꦮꦸꦠ꧀ꦠꦴ ꦌꦮ ꦮꦴ ꦈꦕ꧀ꦕꦴ, ꦆꦠꦫꦺꦴ ꦠꦶꦱ꧀ꦱꦺꦴꦥꦶ ꦄꦮꦕꦴ. ꦠꦴꦪ ꦕꦺꦠꦴꦪ ꦈꦕ꧀ꦕꦴꦮꦕꦴꦪ ꦥꦛꦶꦥꦢꦴꦪ ꦤ ꦥꦴꦫꦁ ꦢꦶꦒꦸꦟꦁ ꦪꦤ꧀ꦠꦶ, ꦌꦏꦩꦒ꧀ꦒꦺꦤ ꦢ꧀ꦮꦶꦏ꧀ꦑꦠ꧀ꦠꦸꦁ ꦤꦶꦧ꧀ꦧꦴꦤꦁ ꦤ ꦒꦕ꧀ꦖꦤ꧀ꦠꦷꦠꦶ ꦄꦠ꧀ꦡꦺꦴ. ꦏꦱ꧀ꦩꦴ? ꦪꦺꦤ ꦩꦒ꧀ꦒꦺꦤ ꦪꦺ ꦏꦶꦭꦺꦱꦴ ꦥꦲꦷꦤꦴ, ꦠꦺꦤ ꦠꦺꦱꦁ ꦥꦸꦤ ꦄꦥ꧀ꦥꦲꦴꦠꦧ꧀ꦧꦠꦺꦴ. ꦌꦠꦺꦤ ꦥꦫꦶꦲꦴꦤꦶꦣꦩ꧀ꦩꦴꦨꦴꦮꦁ ꦢꦷꦥꦺꦠꦶ. ꦤꦪꦶꦢꦁ ꦌꦏꦒꦸꦟꦁ ꦩꦸꦠꦤ꧀ꦠꦶ ꦠꦚ꧀ꦕ ꦆꦢꦁ ꦥꦴꦫꦁ ꦌꦏꦮꦴꦫꦁꦪꦺꦮ ꦦꦸꦱꦤꦴꦫꦲꦁ ꦤ ꦲꦺꦴꦠꦶ. ꦏꦱ꧀ꦩꦴ? ꦌꦏꦺꦤ ꦩꦒ꧀ꦒꦺꦤ ꦱꦧ꧀ꦧꦏꦶꦭꦺꦱꦴꦤꦁ ꦄꦥ꧀ꦥꦲꦴꦤꦠꦺꦴ. ꦌꦠꦺꦤ ꦌꦏꦩꦒ꧀ꦒꦺꦤꦺꦮ ꦄꦫꦲꦠ꧀ꦠꦴꦨꦴꦮꦁ ꦢꦷꦥꦺꦠꦶ.

ꦄꦠ꧀ꦡꦶ ꦖꦶꦤ꧀ꦤꦱ꧀ꦱ ꦖꦺꦢꦶꦪꦤ꧀ꦠꦶ ꦖꦶꦤ꧀ꦤꦱ꧀ꦱ ꦏꦶꦭꦺꦱꦮꦛ꧀ꦛꦱ꧀ꦱ ꦥꦸꦤ ꦖꦶꦤ꧀ꦢꦶꦠꦧ꧀ꦧꦁ ꦏꦶꦚ꧀ꦕꦶ ꦄꦠ꧀ꦡꦷꦠꦶ ꦥꦸꦕ꧀ꦖꦠꦶ. ꦆꦠꦫꦺꦴ ꦠꦶꦏ꧀ꦑꦶꦤ꧀ꦢ꧀ꦫꦶꦪꦁ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦶꦠ꧀ꦮꦴ ꦥꦸꦤ ꦥꦸꦛ꧀ꦜꦺꦴ ꦩꦸꦢꦶꦤ꧀ꦢ꧀ꦫꦶꦪꦁ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ. ꦱꦏꦮꦴꦢꦷ ꦱꦸꦠ꧀ꦠꦁ ꦄꦴꦲꦫꦶꦠ꧀ꦮꦴ ꦤꦠ꧀ꦡꦶꦨꦴꦮꦁ ꦢꦱ꧀ꦱꦺꦠꦶ. ꦠꦠ꧀ꦡ ꦎꦓꦥꦴꦱꦺꦴꦠꦶ ꦏꦶꦭꦺꦱꦺꦴꦓꦺꦴ ꦕꦺꦮ ꦏꦶꦭꦺꦱꦥꦴꦱꦺꦴ ꦕ.

꧒꧖꧖. ꦏꦠꦱ꧀ꦱ ꦥꦛꦶꦕꦪꦺꦴꦠꦶ ꦨꦴꦮꦶꦠꦱ꧀ꦱ ꦩꦒ꧀ꦒꦱ꧀ꦱ ꦥꦸꦤ ꦨꦴꦮꦤꦴ. ꦆꦣꦴꦥꦶ ꦥꦛꦶꦏ꧀ꦑꦺꦥꦥꦛꦶꦗꦴꦤꦤꦴꦤꦶ ꦥꦸꦫꦶꦩꦤꦪꦺꦤꦺꦮ ꦮꦺꦢꦶꦠꦧ꧀ꦧꦴꦤꦶ.

꧒꧖꧗. ꦥꦫꦶꦲꦴꦤꦴꦪ ꦱꦁꦮꦠ꧀ꦠꦤ꧀ꦠꦷꦠꦶ ꦥꦫꦮꦴꦢꦶꦤꦴ ꦄꦴꦨꦠꦺ ꦱꦸꦠ꧀ꦠꦺ ꦥꦚ꧀ꦕ ꦣꦩ꧀ꦩꦴ ꦄꦥ꧀ꦥꦠ꧀ꦠꦥꦫꦶꦲꦴꦤꦴꦪ ꦕꦺꦮ ꦭꦺꦴꦏꦶꦪꦱꦩꦴꦥꦠ꧀ꦠꦶꦥꦫꦶꦲꦴꦤꦴꦪ ꦕ ꦱꦁꦮꦠ꧀ꦠꦤ꧀ꦠꦶ. ꦱꦺꦴ ꦥꦤ ꦥꦠ꧀ꦠꦱ꧀ꦱ ꦄꦫꦲꦠ꧀ꦠꦦꦭꦱ꧀ꦱ ꦥꦫꦶꦲꦴꦤꦴꦪ ꦱꦭ꧀ꦭꦏ꧀ꦑꦺꦠꦶ. ꦠꦺꦤꦺꦮ ꦄꦠ꧀ꦡꦶ ꦄꦫꦲꦠꦺꦴ ꦏꦩ꧀ꦩꦴꦫꦴꦩꦠꦴꦠꦶ ꦄꦴꦲ. ꦆꦠꦫꦺꦴꦥꦶ ꦄꦱꦩꦪꦮꦶꦩꦸꦠ꧀ꦠꦁ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦶꦠ꧀ꦮꦴ ꦆꦠꦫꦁ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ. ꦏꦴꦩꦫꦴꦒꦮꦱꦺꦤ ꦮꦴ ꦥꦮꦠ꧀ꦠꦩꦴꦤꦁ ꦠꦁ ꦥꦛꦶꦏ꧀ꦑꦶꦥꦶꦠ꧀ꦮꦴ ꦆꦠꦫꦡꦴ ꦥꦮꦠ꧀ꦠꦩꦴꦤꦁ ꦥꦛꦶꦗꦴꦤꦴꦠꦶ. ꦫꦴꦒꦴꦢꦷꦤꦁ ꦥꦤ ꦄꦠ꧀ꦡꦶꦠꦁ ꦥꦸꦛ꧀ꦜꦺꦴ ꦥꦛꦶꦗꦴꦤꦶꦠꦸꦁ ꦤ ꦱꦏ꧀ꦏꦺꦴꦠꦶ.

꧒꧖꧘. ꦏꦶꦁ ꦥꦫꦶꦪꦸꦛ꧀ꦜꦶꦠꦺꦴꦠꦶ ꦏꦺꦤ ꦥꦫꦶꦪꦸꦛ꧀ꦜꦶꦠꦺꦴ ꦄꦤꦸꦧꦢ꧀ꦣꦺꦴ ꦄꦗ꧀ꦙꦺꦴꦠ꧀ꦡꦠꦺꦴ ꦮꦴ ꦲꦸꦠ꧀ꦮꦴꦠꦶ ꦄꦠ꧀ꦡꦺꦴ. ꦄꦤꦸꦱꦪꦥꦸꦕ꧀ꦖꦴꦪꦥꦶ ꦠꦶꦏ꧀ꦑꦶꦤ꧀ꦢ꧀ꦫꦶꦪꦩꦸꦢꦶꦤ꧀ꦢ꧀ꦫꦶꦪꦮꦱꦺꦤꦺꦮ ꦥꦛꦶꦏ꧀ꦑꦺꦥꦥꦛꦶꦗꦴꦤꦤꦴꦤꦶ ꦮꦺꦢꦶꦠꦧ꧀ꦧꦴꦤꦶ. ꦏꦭ꧀ꦪꦴꦟꦴꦤꦸꦱꦪꦺꦴꦠꦶ ꦮꦕꦤꦩꦠ꧀ꦠꦱꦴꦩꦚ꧀ꦚꦺꦤ ꦮꦴ ꦥꦛꦶꦗꦴꦤꦴꦠꦶ. ꦫꦴꦒꦺꦴ ꦈꦥꦕꦪꦁ ꦒꦕ꧀ꦖꦠꦷꦠꦶ ꦨꦴꦮꦤꦴꦪ ꦥꦲꦷꦤꦁ ꦱꦤ꧀ꦣꦴꦪꦴꦲ. ꦥꦫꦠꦺꦴ ꦢꦺꦴꦱꦩꦺꦴꦲꦺꦱꦸꦥꦶ ꦌꦱꦺꦮ ꦤꦪꦺꦴ. ꦱꦏ꧀ꦏꦴꦪꦢꦶꦛ꧀ꦜꦶꦄꦴꦢꦷꦤꦁ ꦥꦤ ꦢꦱ꧀ꦱꦤꦺꦤ ꦥꦲꦷꦤꦠ꧀ꦠꦴ ꦈꦥꦕꦪꦁ ꦤ ꦆꦕ꧀ꦖꦠꦶ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮꦴꦠꦶ.

ꦱꦸꦠ꧀ꦠꦱꦴꦣꦤꦴ.

ꦥꦫꦶꦲꦴꦤꦶꦏꦡꦴ ꦤꦶꦛ꧀ꦜꦶꦠꦴ.