꧑. ꦄꦴꦤꦶꦱꦁꦱꦢꦱ꧀ꦱꦴꦮꦷꦏꦡꦴꦮꦟ꧀ꦟꦤꦴ

꧕꧔꧗. ꦆꦢꦴꦤꦶ ꦄꦴꦤꦶꦱꦁꦱꦢꦱ꧀ꦱꦴꦮꦷꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦱꦏꦱꦩꦪꦺ ꦱꦔ꧀ꦑꦴꦫꦺ ꦄꦴꦢꦷꦤꦮꦠꦺꦴ ꦤꦶꦧ꧀ꦧꦴꦤꦚ꧀ꦕ ꦄꦴꦤꦶꦱꦁꦱꦠꦺꦴ ꦥꦱ꧀ꦱꦤ꧀ꦠꦱ꧀ꦱ ꦱꦁꦪꦺꦴꦗꦤꦥ꧀ꦥꦲꦴꦤꦁ ꦲꦺꦴꦠꦷꦠꦶ ꦤꦶꦕ꧀ꦖꦪꦺꦴ. ꦪꦺꦱꦁ ꦥꦤ ꦠꦺꦱꦸ ꦢ꧀ꦮꦷꦱꦸꦥꦶ ꦌꦏꦁꦱꦶꦏꦮꦴꦢꦁ ꦒꦲꦺꦠ꧀ꦮꦴ ‘‘ꦄꦴꦤꦶꦱꦁꦱꦢꦱ꧀ꦱꦴꦮꦶꦤꦺꦴꦮ ꦱꦁꦪꦺꦴꦗꦤꦥ꧀ꦥꦲꦴꦤꦁ ꦲꦺꦴꦠꦷ’’ꦠꦶ ꦭꦢ꧀ꦣꦶ, ꦱꦺꦪ꧀ꦪꦡꦴꦥꦶ ꦄꦤ꧀ꦣꦏꦴꦤꦁ; ꦠꦺ ꦱꦤ꧀ꦣꦴꦪ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦆꦠꦫꦱ꧀ꦱ. ꦄꦡꦱ꧀ꦱ ‘‘ꦌꦏꦁꦱꦶꦏꦮꦴꦢꦺꦴ ꦠꦪꦴ ꦒꦲꦶꦠꦺꦴ, ꦄꦴꦢꦷꦤꦮꦺꦴꦥꦶ ꦢꦛ꧀ꦜꦧ꧀ꦧꦺꦴꦪꦺꦮꦴ’’ꦠꦶ ꦮꦶꦨꦴꦒꦢꦱ꧀ꦱꦤꦠ꧀ꦡꦁ ꦱꦏꦮꦴꦢꦷ ꦱꦔ꧀ꦑꦴꦫꦺꦠꦶꦄꦴꦢꦶꦩꦴꦲ.

ꦱꦔ꧀ꦑꦴꦫꦺ ꦕ ꦄꦤꦶꦕ꧀ꦕꦠꦺꦴ ꦩꦤꦱꦶꦏꦫꦺꦴꦠꦶ, ꦤꦶꦧ꧀ꦧꦴꦤꦺ ꦕ ꦄꦴꦤꦶꦱꦁꦱꦢꦱ꧀ꦱꦴꦮꦷ ꦲꦺꦴꦠꦷꦠꦶ ꦥꦚ꧀ꦲꦱ꧀ꦩꦶꦁ ꦄꦪꦩꦣꦶꦥ꧀ꦥꦴꦪꦺꦴ – ꦄꦴꦤꦶꦱꦁꦱꦢꦱ꧀ꦱꦴꦮꦶꦱ꧀ꦱ ꦱꦁꦪꦺꦴꦗꦤꦴꦤꦁ ꦥꦲꦴꦤꦁ ꦲꦺꦴꦠꦷꦠꦶ ꦠꦺꦱꦁ ꦭꦢ꧀ꦣꦶ. ꦤꦤꦸ ꦱꦔ꧀ꦑꦴꦫꦺ ꦄꦤꦶꦕ꧀ꦕꦠꦺꦴ ꦩꦤꦱꦶꦏꦫꦺꦴꦠꦺꦴ ꦱꦁꦪꦺꦴꦗꦤꦴ ꦥꦲꦷꦪꦤ꧀ꦠꦷꦠꦶ ꦕ ꦥꦸꦛ꧀ꦜꦺꦴ ꦄꦴꦩꦤ꧀ꦠꦴꦠꦶ ꦥꦛꦶꦗꦴꦤꦴꦠꦶ. ꦠꦺꦤ ꦠꦺ ꦱꦔ꧀ꦑꦴꦫꦺ ꦕ ꦄꦤꦶꦕ꧀ꦕꦠꦺꦴ ꦩꦤꦱꦶꦏꦫꦺꦴꦠꦶ, ꦤꦶꦧ꧀ꦧꦴꦤꦺ ꦕ ꦄꦴꦤꦶꦱꦁꦱꦢꦱ꧀ꦱꦴꦮꦷ ꦲꦺꦴꦠꦷꦠꦶ ꦆꦢꦁ ꦄꦴꦥꦗ꧀ꦗꦠꦶ, ꦏꦶꦁ ꦱꦩ꧀ꦥꦛꦶꦕ꧀ꦖꦱꦶ ꦌꦠꦤ꧀ꦠꦶ. ꦠꦠꦺꦴ ꦥꦫꦮꦴꦢꦷ ꦌꦏꦕꦶꦠ꧀ꦠꦏ꧀ꦑꦟꦁ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦠꦶ, ꦢꦸꦠꦶꦪꦁ ꦥꦸꦛ꧀ꦜꦺꦴ ꦤꦴꦤꦴꦕꦶꦠ꧀ꦠꦮꦱꦺꦤ ꦥꦛꦶꦗꦴꦤꦴꦠꦶ. ꦱꦏꦮꦴꦢꦷ ꦥꦤꦱ꧀ꦱ ꦄꦣꦶꦥ꧀ꦥꦴꦪꦁ ꦩꦢ꧀ꦢꦶꦠ꧀ꦮꦴ ꦄꦤꦶꦕ꧀ꦕꦩꦤꦱꦶꦏꦴꦫꦱ꧀ꦱ ꦄꦴꦤꦶꦱꦁꦱꦢꦱ꧀ꦱꦴꦮꦶꦠꦴꦪ ꦕ ꦌꦏꦠꦺꦴ ꦥꦛꦶꦚ꧀ꦚꦴꦠꦠ꧀ꦠꦴ ꦢ꧀ꦮꦶꦤ꧀ꦤꦁ ꦦꦱ꧀ꦱꦴꦤꦁ ꦢ꧀ꦮꦶꦤ꧀ꦤꦁ ꦕꦶꦠ꧀ꦠꦴꦤꦁ ꦱꦩꦺꦴꦣꦴꦤꦁ ꦲꦺꦴꦠꦷꦠꦶ ꦥꦸꦕ꧀ꦖꦠꦶ. ꦆꦠꦫꦺꦴ ꦢ꧀ꦮꦶꦤ꧀ꦤꦁ ꦱꦩꦺꦴꦣꦴꦤꦁ ꦄꦥꦱ꧀ꦱꦤ꧀ꦠꦺꦴ ꦥꦛꦶꦏ꧀ꦑꦶꦥꦠꦶ. ꦢꦸꦏ꧀ꦑꦠꦺꦴꦠꦶꦄꦴꦢꦶꦥꦚ꧀ꦲꦺꦱꦸꦥꦶ ꦌꦱꦺꦮ ꦤꦪꦺꦴ. ꦏꦶꦁ ꦥꦤꦺꦠ꧀ꦡ ꦱꦤ꧀ꦤꦶꦛ꧀ꦜꦴꦤꦁ, ꦏꦶꦁ ꦄꦤꦶꦕ꧀ꦕꦴꦢꦶꦠꦺꦴ ꦩꦤꦱꦶꦏꦫꦺꦴꦠꦺꦴ ꦱꦁꦪꦺꦴꦗꦤꦴ ꦥꦲꦷꦪꦤ꧀ꦠꦶ, ꦈꦢꦴꦲꦸ ꦤꦶꦧ꧀ꦧꦴꦤꦺ ꦄꦴꦤꦶꦱꦁꦱꦢꦱ꧀ꦱꦴꦮꦶꦱ꧀ꦱ, ꦈꦢꦴꦲꦸ ꦢ꧀ꦮꦺꦥꦶ ꦌꦏꦠꦺꦴ ꦏꦫꦺꦴꦤ꧀ꦠꦱ꧀ꦱꦴꦠꦶ. ꦪꦢꦶ ꦠꦴꦮ ꦄꦤꦶꦕ꧀ꦕꦴꦢꦶꦠꦺꦴ ꦩꦤꦱꦶꦏꦫꦺꦴꦠꦺꦴ ꦥꦲꦴꦤꦁ ꦨꦮꦺꦪ꧀ꦪ, ꦮꦶꦥꦱ꧀ꦱꦤꦴꦕꦶꦠ꧀ꦠꦺꦤꦺꦮ ꦨꦮꦺꦪ꧀ꦪ. ꦄꦡ ꦄꦴꦤꦶꦱꦁꦱꦢꦱ꧀ꦱꦴꦮꦶꦤꦺꦴ, ꦄꦤꦸꦱ꧀ꦱꦮꦮꦱꦺꦤ ꦤꦶꦧ꧀ꦧꦴꦤꦺ ꦄꦴꦤꦶꦱꦁꦱꦁ ꦥꦱ꧀ꦱꦤ꧀ꦠꦱ꧀ꦱ ꦮꦶꦥꦱ꧀ꦱꦤꦴꦕꦶꦠ꧀ꦠꦺꦤꦺꦮ ꦨꦮꦺꦪ꧀ꦪ, ꦄꦡ ꦢ꧀ꦮꦺꦥꦶ ꦌꦏꦠꦺꦴ ꦏꦫꦺꦴꦤ꧀ꦠꦱ꧀ꦱ ꦨꦮꦺꦪ꧀ꦪ, ꦢ꧀ꦮꦶꦤ꧀ꦤꦁ ꦦꦱ꧀ꦱꦴꦢꦷꦤꦁ ꦱꦩꦺꦴꦣꦴꦤꦁ ꦨꦮꦺꦪ꧀ꦪ. ꦪꦱ꧀ꦩꦴ ꦥꦤ ꦄꦫꦶꦪꦩꦒ꧀ꦒꦏ꧀ꦑꦟꦺ ꦄꦤꦶꦕ꧀ꦕꦴꦢꦶꦩꦤꦱꦶꦏꦴꦫꦱ꧀ꦱ ꦏꦶꦕ꧀ꦕꦁ ꦤꦶꦥ꧀ꦦꦠ꧀ꦠꦶꦁ ꦒꦕ꧀ꦖꦠꦶ ꦥꦸꦤ ꦤꦶꦕ꧀ꦕꦠꦺꦴꦠꦶꦄꦴꦢꦶꦒꦲꦟꦱ꧀ꦱ ꦄꦤꦸꦥ꧀ꦥꦠ꧀ꦠꦶꦣꦩ꧀ꦩꦨꦴꦮꦠꦺꦴ, ꦤꦶꦧ꧀ꦧꦴꦤꦺ ꦕ ꦥꦕ꧀ꦕꦏ꧀ꦑꦠꦺꦴꦮ ꦄꦴꦤꦶꦱꦁꦱꦢꦱ꧀ꦱꦤꦁ ꦆꦗ꧀ꦙꦠꦶ, ꦠꦱ꧀ꦩꦴ ꦏꦶꦕ꧀ꦕꦤꦶꦥ꧀ꦦꦠ꧀ꦠꦶꦮꦱꦺꦤ ꦄꦤꦶꦕ꧀ꦕꦴꦢꦶꦠꦺꦴ ꦩꦤꦱꦶꦏꦫꦺꦴꦠꦺꦴ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦥꦮꦠ꧀ꦠꦶꦮꦱꦺꦤ ꦕ ꦤꦶꦧ꧀ꦧꦴꦤꦺ ꦄꦴꦤꦶꦱꦁꦱꦢꦱ꧀ꦱꦴꦮꦶꦱ꧀ꦱ ꦱꦁꦪꦺꦴꦗꦤꦴꦤꦁ ꦥꦲꦴꦤꦁ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦁ.

꧕꧔꧘. ꦤꦶꦧ꧀ꦧꦴꦤꦺ ꦱꦸꦑꦴꦤꦸꦥꦱ꧀ꦱꦷꦠꦶ ꦱꦸꦠ꧀ꦠꦁ ꦤꦶꦧ꧀ꦧꦴꦤꦺ ꦱꦸꦑꦴꦤꦸꦥꦱ꧀ꦱꦤꦴꦢꦶꦨꦴꦮꦩꦺꦮ ꦱꦴꦣꦺꦠꦶ, ꦤ ꦄꦴꦤꦶꦱꦁꦱꦢꦱ꧀ꦱꦴꦮꦶꦠꦴꦩꦠ꧀ꦠꦺꦤ ꦱꦁꦪꦺꦴꦗꦤꦴꦤꦁ ꦥꦲꦴꦤꦁ. ꦠꦱ꧀ꦩꦴ ꦄꦴꦨꦠꦩ꧀ꦥꦶ ꦄꦤꦴꦨꦠꦱꦢꦶꦱꦩꦺꦮꦴꦠꦶ.

ꦄꦴꦤꦶꦱꦁꦱꦢꦱ꧀ꦱꦴꦮꦷꦏꦡꦴꦮꦟ꧀ꦟꦤꦴ.