꧕. ꦥꦚ꧀ꦕꦩꦮꦒ꧀ꦒꦺꦴ

꧑. ꦮꦶꦩꦸꦠ꧀ꦠꦶꦏꦡꦴꦮꦟ꧀ꦟꦤꦴ

꧔꧑꧘. ꦆꦢꦴꦤꦶ ꦮꦶꦩꦸꦠ꧀ꦠꦶꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦮꦶꦥꦱ꧀ꦱꦤꦴ, ꦩꦒ꧀ꦒꦺꦴ, ꦦꦭꦁ, ꦥꦕ꧀ꦕꦮꦺꦏ꧀ꦑꦟꦤ꧀ꦠꦶ ꦕꦠꦸꦤ꧀ꦤꦁ ꦚꦴꦟꦴꦤꦁ ꦮꦶꦩꦸꦠ꧀ꦠꦶꦚꦴꦟꦤ꧀ꦠꦶ ꦤꦴꦩꦁ. ꦠꦺꦱꦸ ꦮꦶꦥꦱ꧀ꦱꦤꦴꦚꦴꦟꦁ ꦤꦶꦕ꧀ꦕꦤꦶꦩꦶꦠ꧀ꦠꦴꦢꦷꦲꦶ ꦮꦶꦩꦸꦠ꧀ꦠꦠ꧀ꦠꦴ, ꦠꦢꦔ꧀ꦒꦮꦶꦩꦸꦠ꧀ꦠꦶꦨꦴꦮꦺꦤ ꦮꦴ ꦮꦶꦩꦸꦠ꧀ꦠꦠ꧀ꦠꦴ ꦮꦶꦩꦸꦠ꧀ꦠꦶꦚꦴꦟꦁ. ꦩꦒ꧀ꦒꦺꦴ ꦱꦩꦸꦕ꧀ꦖꦺꦢꦮꦶꦩꦸꦠ꧀ꦠꦶ, ꦦꦭꦁ ꦥꦛꦶꦥ꧀ꦥꦱ꧀ꦱꦢ꧀ꦣꦶꦮꦶꦩꦸꦠ꧀ꦠꦶ, ꦥꦕ꧀ꦕꦮꦺꦏ꧀ꦑꦟꦚꦴꦟꦁ ꦥꦤ ꦮꦶꦩꦸꦠ꧀ꦠꦶꦁ ꦗꦴꦤꦴꦠꦷꦠꦶ ꦮꦶꦩꦸꦠ꧀ꦠꦶꦚꦴꦟꦁ. ꦌꦮꦁ ꦕꦠꦸꦧ꧀ꦧꦶꦣꦺ ꦮꦶꦩꦸꦠ꧀ꦠꦶꦚꦴꦟꦺ ꦤꦶꦥ꧀ꦥꦫꦶꦪꦴꦪꦺꦤ ꦦꦭꦚꦴꦟꦩꦺꦮ ꦮꦶꦩꦸꦠ꧀ꦠꦶ. ꦱꦺꦱꦴꦤꦶ ‘‘ꦮꦶꦩꦸꦠ꧀ꦠꦴꦤꦷ’’ꦠꦶ ꦮꦴ ‘‘ꦄꦮꦶꦩꦸꦠ꧀ꦠꦴꦤꦷ’’ꦠꦶ ꦮꦴ ꦤ ꦮꦠ꧀ꦠꦧ꧀ꦧꦴꦤꦶ. ꦠꦱ꧀ꦩꦴ ‘‘ꦆꦢꦁ ꦤꦴꦩ ꦮꦶꦩꦸꦠ꧀ꦠꦶꦚꦴꦟꦁ ꦮꦶꦩꦸꦠ꧀ꦠ’’ꦤ꧀ꦠꦶ ꦄꦮꦠ꧀ꦮꦴ ꦄꦮꦶꦱꦺꦱꦺꦤꦺꦮ ‘‘ꦮꦶꦩꦸꦠ꧀ꦠꦶꦚꦴꦟꦁ ꦮꦶꦩꦸꦠ꧀ꦠ’’ꦤ꧀ꦠꦶ ꦪꦺꦱꦁ ꦭꦢ꧀ꦣꦶ, ꦱꦺꦪ꧀ꦪꦡꦴꦥꦶ ꦄꦤ꧀ꦣꦏꦴꦤꦁ; ꦠꦺ ꦱꦤ꧀ꦣꦴꦪ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦥꦫꦮꦴꦢꦶꦱ꧀ꦱ. ꦥꦸꦤ ꦪꦁꦏꦶꦚ꧀ꦕꦷꦠꦶ ꦥꦸꦛ꧀ꦜꦺꦴ ꦥꦕ꧀ꦕꦮꦺꦏ꧀ꦑꦟꦴꦢꦷꦤꦶ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦠꦶ. ꦥꦛꦶꦥꦤ꧀ꦤꦱ꧀ꦱꦴꦠꦶ ꦥꦸꦛ꧀ꦜꦺꦴ ꦩꦒ꧀ꦒꦚꦴꦟꦱ꧀ꦱ ꦄꦤꦴꦱꦮꦠꦁ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ. ꦪꦱ꧀ꦩꦴ ꦥꦤ ꦠꦁ ꦱꦺꦴꦠꦴꦥꦤ꧀ꦤꦱ꧀ꦱ ꦦꦭꦺ ꦜꦶꦠꦱ꧀ꦱ ꦚꦴꦟꦁ ꦤ ꦲꦺꦴꦠꦶ, ꦠꦱ꧀ꦩꦴ ꦮꦶꦩꦸꦠ꧀ꦠꦁ ꦤꦴꦩ ꦤ ꦲꦺꦴꦠꦷꦠꦶ ꦕꦺꦴꦢꦤꦠ꧀ꦡꦁ ꦥꦸꦤ ꦱꦏꦮꦴꦢꦷ ꦱꦺꦴꦠꦴꦥꦤ꧀ꦤꦱ꧀ꦱꦴꦠꦶꦄꦴꦢꦶꦩꦴꦲ. ꦆꦩꦶꦤꦴ ꦈꦥꦴꦪꦺꦤ ꦱꦧ꧀ꦧꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦮꦶꦩꦸꦠ꧀ꦠꦶꦏꦡꦴꦮꦟ꧀ꦟꦤꦴ.

꧒. ꦄꦱꦺꦑꦚꦴꦟꦏꦡꦴꦮꦟ꧀ꦟꦤꦴ

꧔꧒꧑. ꦆꦢꦴꦤꦶ ꦄꦱꦺꦑꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦪꦱ꧀ꦩꦴ ꦄꦴꦤꦤ꧀ꦢꦠ꧀ꦡꦺꦫꦴꦢꦪꦺꦴ ꦱꦺꦑꦴ ‘‘ꦈꦭ꦳ꦴꦫꦺꦴ ꦨꦒꦮꦴ’’ꦠꦶꦄꦴꦢꦶꦤꦴ ꦤꦪꦺꦤ ꦄꦱꦺꦑꦺ ꦗꦴꦤꦤ꧀ꦠꦶ, ꦠꦱ꧀ꦩꦴ ‘‘ꦱꦺꦑꦱ꧀ꦱ ꦄꦱꦺꦑꦚꦴꦟꦁ ꦄꦠ꧀ꦡꦷ’’ꦠꦶ ꦪꦺꦱꦁ ꦭꦢ꧀ꦣꦶ, ꦱꦺꦪ꧀ꦪꦡꦴꦥꦶ ꦈꦠ꧀ꦠꦫꦴꦥꦡꦏꦴꦤꦁ; ꦠꦺ ꦱꦤ꧀ꦣꦴꦪ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦆꦠꦫꦱ꧀ꦱ. ꦗꦴꦤꦴꦠꦶ ꦥꦱ꧀ꦱꦠꦷꦠꦶ ꦆꦢꦁ ꦄꦠ꧀ꦠꦤꦴ ꦄꦣꦶꦒꦠꦱ꧀ꦱ ꦗꦴꦤꦤꦮꦱꦺꦤ ꦮꦸꦠ꧀ꦠꦁ. ꦒꦺꦴꦠ꧀ꦫꦨꦸꦤꦺꦴꦠꦶꦄꦴꦢꦶ ꦲꦺꦛ꧀ꦜꦶꦩꦴꦪ ꦨꦹꦩꦶꦪꦁ ꦜꦶꦠꦱ꧀ꦱ ꦈꦥꦫꦹꦥꦫꦶꦚꦴꦟꦱ꧀ꦱ ꦄꦨꦴꦮꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ. ꦤꦤꦸ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦱꦺꦑꦺꦴ ‘‘ꦈꦭ꦳ꦴꦫꦺꦴ ꦨꦒꦮꦴ’’ꦠꦶ ꦗꦴꦤꦴꦠꦷꦠꦶ ꦥꦫꦮꦴꦢꦷ ꦄꦱꦺꦑꦺ ꦨꦒꦮꦠꦶ ꦥꦮꦠ꧀ꦠꦠ꧀ꦠꦴ ꦠꦁ ꦄꦱꦺꦑꦚꦴꦟꦤ꧀ꦠꦶ ꦆꦕ꧀ꦖꦠꦶ, ꦤ ꦥꦤꦺꦠꦁ ꦄꦱꦺꦑꦁ. ꦠꦱ꧀ꦩꦴ ꦌꦮꦁ ꦥꦠꦶꦛ꧀ꦜꦴꦥꦶꦠꦴꦥꦶ ꦭꦢ꧀ꦣꦶ ꦄꦥ꧀ꦥꦠꦶꦛ꧀ꦜꦴꦥꦶꦠꦴꦮ ꦲꦺꦴꦠꦷꦠꦶ.

ꦄꦱꦺꦑꦚꦴꦟꦏꦡꦴꦮꦟ꧀ꦟꦤꦴ.

꧓. ꦮꦶꦥꦫꦷꦠꦏꦡꦴꦮꦟ꧀ꦟꦤꦴ

꧔꧒꧔. ꦆꦢꦴꦤꦶ ꦮꦶꦥꦫꦷꦠꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ‘‘ꦪ꧀ꦮꦴꦪꦁ ꦥꦡꦮꦷꦏꦱꦶꦟꦺ ꦥꦡꦮꦷꦱꦚ꧀ꦚꦷ ꦱꦩꦴꦥꦗ꧀ꦗꦠꦶ, ꦠꦱ꧀ꦱ ꦠꦁ ꦚꦴꦟꦁ ꦮꦶꦥꦫꦷꦠꦚꦴꦟ’’ꦤ꧀ꦠꦶ ꦪꦺꦱꦁ ꦭꦢ꧀ꦣꦶ, ꦱꦺꦪ꧀ꦪꦡꦴꦥꦶ ꦄꦤ꧀ꦣꦏꦴꦤꦁ, ꦠꦺ ꦱꦤ꧀ꦣꦴꦪ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦆꦠꦫꦱ꧀ꦱ. ꦥꦡꦮꦶꦁ ꦤꦶꦱ꧀ꦱꦴꦪ ꦈꦥ꧀ꦥꦤ꧀ꦤꦤꦶꦩꦶꦠ꧀ꦠꦚ꧀ꦲꦶ ꦤ ꦥꦡꦮꦷꦪꦺꦮ, ꦠꦠ꧀ꦫ ꦕꦴꦪꦁ ꦥꦡꦮꦷꦱꦚ꧀ꦚꦷ. ꦠꦱ꧀ꦩꦴ ꦮꦶꦥꦫꦷꦠꦚꦴꦟꦤ꧀ꦠꦶ ꦄꦪꦩꦺꦠꦱ꧀ꦱ ꦄꦣꦶꦥ꧀ꦥꦴꦪꦺꦴ. ꦠꦠꦺꦴ ꦱꦏꦮꦴꦢꦷ ‘‘ꦭꦏ꧀ꦑꦟꦥꦡꦮꦷꦥꦶ ꦱꦱꦩ꧀ꦨꦴꦫꦥꦡꦮꦷꦥꦶ ꦤꦶꦩꦶꦠ꧀ꦠꦥꦡꦮꦷꦥꦶ ꦥꦡꦮꦷꦢꦺꦮꦠꦴꦥꦶ ꦱꦧ꧀ꦧꦴ ꦥꦡꦮꦷꦪꦺꦮ, ꦠꦴꦱꦸ ꦥꦡꦮꦷꦠꦶ ꦚꦴꦟꦁ ꦮꦶꦥꦫꦷꦠꦁ ꦤ ꦲꦺꦴꦠꦶ. ꦄꦤꦶꦕ꧀ꦕꦺ ꦤꦶꦕ꧀ꦕꦤ꧀ꦠꦶꦄꦴꦢꦶꦮꦶꦥꦫꦶꦪꦺꦱꦺꦴ ꦥꦤ ꦮꦶꦥꦫꦷꦠꦚꦴꦟꦁ ꦤꦴꦩ. ꦏꦶꦁ ꦠꦺ ꦆꦢꦁ ꦌꦠꦺꦱꦸ ꦄꦚ꧀ꦚꦠꦫ’’ꦤ꧀ꦠꦶ ꦕꦺꦴꦢꦺꦠꦸꦁ ꦄꦤꦶꦕ꧀ꦕꦺ ꦤꦶꦕ꧀ꦕꦤ꧀ꦠꦶꦄꦴꦢꦶꦩꦴꦲ. ꦆꦠꦫꦺꦴ ꦮꦶꦥꦭ꧀ꦭꦴꦱꦭꦏ꧀ꦑꦟꦴꦨꦴꦮꦁ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦠꦶ, ꦥꦡꦮꦷꦤꦶꦩꦶꦠ꧀ꦠꦁ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ.

ꦏꦸꦱꦭꦤ꧀ꦠꦶ ꦱꦺꦏ꧀ꦑꦥꦸꦡꦸꦗ꧀ꦗꦤꦴꦤꦁ ꦚꦴꦟꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦄꦠ꧀ꦡꦶ ꦄꦫꦲꦠꦺꦴꦠꦶ ꦥꦚ꧀ꦲꦺꦱꦸꦥꦶ ꦮꦶꦥꦭ꧀ꦭꦴꦱꦭꦏ꧀ꦑꦟꦴꦨꦴꦮꦺꦤ ꦥꦛꦶꦏ꧀ꦑꦶꦥꦠꦶ. ꦥꦡꦮꦷꦤꦶꦩꦶꦠ꧀ꦠꦁ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ. ꦱꦧ꧀ꦧꦺꦮ ꦥꦡꦮꦷꦠꦶ ꦱꦧ꧀ꦧꦁ ꦠꦁ ꦥꦡꦮꦷꦏꦱꦶꦟꦁ ꦭꦏ꧀ꦑꦟꦥꦡꦮꦷꦪꦺꦮ ꦲꦺꦴꦠꦷꦠꦶ ꦥꦸꦕ꧀ꦖꦠꦶ. ꦱꦏꦮꦴꦢꦷ ꦠꦡꦴ ꦄꦨꦴꦮꦠꦺꦴ ꦥꦛꦶꦏ꧀ꦑꦶꦥꦠꦶ. ꦤꦤꦸ ꦥꦡꦮꦷ ꦄꦠ꧀ꦡꦶ, ꦄꦠ꧀ꦡꦶ ꦕ ꦏꦺꦴꦕꦶ ꦥꦡꦮꦶꦁ ꦥꦡꦮꦶꦠꦺꦴ ꦱꦩꦴꦥꦗ꧀ꦗꦠꦷꦠꦶ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ. ꦠꦱ꧀ꦱꦠ꧀ꦡꦺꦴ – ꦤꦤꦸ ꦤꦶꦩꦶꦠ꧀ꦠꦥꦡꦮꦷ ꦄꦠ꧀ꦡꦶ, ꦄꦠ꧀ꦡꦶ ꦕ ꦏꦺꦴꦕꦶ ꦠꦁ ꦥꦡꦮꦶꦁ ꦥꦡꦮꦶꦠꦺꦴꦪꦺꦮ ꦱꦩꦴꦥꦗ꧀ꦗꦠꦶ, ꦤ ꦄꦴꦥꦠꦺꦴ ꦮꦴ ꦠꦺꦗꦠꦺꦴ ꦮꦴꦠꦶ. ꦥꦡꦮꦷ ꦄꦠ꧀ꦡꦷꦠꦶꦄꦴꦢꦶ ‘‘ꦪꦢꦶ ꦪꦁ ꦪꦡꦴ ꦄꦠ꧀ꦡꦶ, ꦠꦁ ꦠꦡꦴ ꦱꦩꦴꦥꦗ꧀ꦗꦤ꧀ꦠꦱ꧀ꦱ ꦚꦴꦟꦁ ꦮꦶꦥꦫꦷꦠꦁ ꦲꦺꦴꦠꦶ, ꦤꦶꦧ꧀ꦧꦴꦤꦁ ꦄꦠ꧀ꦡꦶ, ꦠꦩ꧀ꦥꦶ ꦱꦩꦴꦥꦗ꧀ꦗꦤ꧀ꦠꦱ꧀ꦱ ꦱꦧ꧀ꦧꦮꦶꦥꦫꦶꦪꦺꦱꦱꦩꦸꦒ꧀ꦓꦴꦠꦤꦁ ꦩꦒ꧀ꦒꦚꦴꦟꦩ꧀ꦥꦶ ꦠꦺ ꦮꦶꦥꦫꦷꦠꦁ ꦲꦺꦴꦠꦹ’’ꦠꦶ ꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦤ꧀ꦠꦶ.

ꦮꦶꦥꦫꦷꦠꦏꦡꦴꦮꦟ꧀ꦟꦤꦴ.

꧔. ꦤꦶꦪꦴꦩꦏꦡꦴꦮꦟ꧀ꦟꦤꦴ

꧔꧒꧘-꧔꧓꧑. ꦆꦢꦴꦤꦶ ꦤꦶꦪꦴꦩꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦪꦺꦴ ꦥꦸꦒ꧀ꦒꦭꦺꦴ ꦱꦩ꧀ꦩꦠ꧀ꦠꦤꦶꦪꦴꦩꦁ ꦎꦏ꧀ꦏꦩꦶꦱ꧀ꦱꦠꦶ, ꦠꦁ ‘‘ꦨꦧ꧀ꦧꦺꦴ ꦌꦱ ꦣꦩ꧀ꦩꦁ ꦄꦨꦶꦱꦩꦺꦠꦸ’’ꦤ꧀ꦠꦶ ꦪꦱ꧀ꦩꦴ ꦨꦒꦮꦴ ꦗꦴꦤꦴꦠꦶ, ꦠꦱ꧀ꦩꦴ ‘‘ꦄꦤꦶꦪꦠꦱ꧀ꦱ ꦥꦸꦡꦸꦗ꧀ꦗꦤꦱ꧀ꦱꦺꦮ ꦱꦠꦺꦴ ꦥꦸꦒ꧀ꦒꦭꦱ꧀ꦱ ꦤꦶꦪꦴꦩꦒꦩꦤꦴꦪ ꦚꦴꦟꦁ ꦄꦠ꧀ꦡꦷ’’ꦠꦶ ꦪꦺꦱꦁ ꦭꦢ꧀ꦣꦶ, ꦱꦺꦪ꧀ꦪꦡꦴꦥꦶ ꦌꦠꦫꦲꦶ ꦈꦠ꧀ꦠꦫꦴꦥꦡꦏꦴꦤꦁ; ꦠꦺ ꦱꦤ꧀ꦣꦴꦪ ꦄꦤꦶꦪꦠꦱ꧀ꦱꦴꦠꦶ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ. ꦠꦠ꧀ꦡ ꦤꦶꦪꦴꦩꦒꦩꦤꦴꦪꦴꦠꦶ ꦤꦶꦪꦴꦩꦺꦴ ꦮꦸꦕ꧀ꦕꦠꦶ ꦩꦒ꧀ꦒꦺꦴ, ꦩꦒ꧀ꦒꦒꦩꦤꦴꦪ ꦩꦒ꧀ꦒꦺꦴꦏ꧀ꦏꦩꦤꦴꦪꦴꦠꦶ ꦄꦠ꧀ꦡꦺꦴ. ꦪꦁ ꦥꦤꦱ꧀ꦱ ꦚꦴꦟꦁ ꦢꦶꦱ꧀ꦮꦴ ꦨꦒꦮꦴ ‘‘ꦨꦧ꧀ꦧꦺꦴ ꦄꦪ’’ꦤ꧀ꦠꦶ ꦗꦴꦤꦴꦠꦶ, ꦠꦁ ꦱꦤ꧀ꦣꦴꦪ ꦥꦛꦶꦚ꧀ꦚꦴ ꦥꦫꦮꦴꦢꦶꦱ꧀ꦱ.

ꦄꦡꦱ꧀ꦱ ꦱꦏꦮꦴꦢꦷ ꦄꦪꦸꦠ꧀ꦠꦮꦴꦢꦶꦠꦁ ꦢꦷꦥꦺꦠꦸꦁ ꦤꦶꦪꦠꦱ꧀ꦱꦴꦠꦶ ꦮꦶꦥꦫꦷꦠꦴꦤꦸꦪꦺꦴꦒꦩꦴꦲ. ꦠꦠ꧀ꦡ ꦥꦜꦩꦥꦚ꧀ꦲꦺ ꦩꦒ꧀ꦒꦺꦤ ꦤꦶꦪꦠꦱ꧀ꦱ ꦄꦤꦶꦪꦴꦩꦒꦩꦤꦴꦪ ꦚꦴꦟꦁ ꦤꦴꦩ ꦤꦠ꧀ꦡꦷꦠꦶ ꦥꦛꦶꦏ꧀ꦑꦶꦥꦠꦶ. ꦢꦸꦠꦶꦪꦺ ꦤꦠ꧀ꦡꦶꦨꦴꦮꦺꦤ ꦥꦛꦶꦗꦴꦤꦴꦠꦶ. ꦠꦠꦶꦪꦺ ꦄꦤꦶꦪꦠꦱ꧀ꦱ ꦤꦠ꧀ꦡꦷꦠꦶ ꦥꦸꦛ꧀ꦜꦠ꧀ꦠꦴ ꦭꦢ꧀ꦣꦶꦮꦶꦫꦺꦴꦣꦺꦤ ꦥꦛꦶꦏ꧀ꦑꦶꦥꦠꦶ. ꦥꦸꦤ ꦥꦜꦩꦥꦚ꧀ꦲꦩꦺꦮ ꦕꦠꦸꦠ꧀ꦡꦁ ꦏꦠ꧀ꦮꦴ ꦤꦶꦪꦠꦱ꧀ꦱ ꦤꦶꦪꦴꦩꦒꦩꦤꦴꦢꦶꦮꦱꦺꦤ ꦠꦪꦺꦴ ꦥꦚ꧀ꦲꦴ ꦏꦠꦴ. ꦠꦺꦱꦸ ꦥꦜꦩꦺ ꦪꦱ꧀ꦩꦴ ꦄꦴꦢꦶꦩꦒ꧀ꦒꦺꦤ ꦤꦶꦪꦠꦱ꧀ꦱ ꦥꦸꦤ ꦠꦢꦠ꧀ꦡꦴꦪ ꦚꦴꦟꦁ ꦤꦠ꧀ꦡꦶ, ꦠꦱ꧀ꦩꦴ ꦥꦛꦶꦏ꧀ꦑꦶꦥꦠꦶ. ꦢꦸꦠꦶꦪꦺ ꦤꦠ꧀ꦡꦶꦨꦴꦮꦺꦤꦺꦮ ꦥꦛꦶꦗꦴꦤꦴꦠꦶ. ꦠꦠꦶꦪꦺ ꦭꦢ꧀ꦣꦶꦮꦶꦫꦺꦴꦣꦺꦤꦺꦮ ꦥꦛꦶꦏ꧀ꦑꦶꦥꦠꦶ. ꦥꦸꦤ ꦥꦜꦩꦥꦚ꧀ꦲꦁ ꦄꦛ꧀ꦜꦩꦁ ꦏꦠ꧀ꦮꦴ ꦄꦤꦶꦪꦠꦱ꧀ꦱ ꦄꦤꦶꦪꦴꦩꦒꦩꦤꦴꦢꦶꦮꦱꦺꦤ ꦠꦪꦺꦴ ꦥꦚ꧀ꦲꦴ ꦏꦠꦴ. ꦠꦺꦱꦁ ꦄꦠ꧀ꦡꦺꦴ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ. ꦥꦸꦤ ꦥꦜꦩꦥꦚ꧀ꦲꦩꦺꦮ ꦢ꧀ꦮꦴꦢꦱꦩꦁ ꦏꦠ꧀ꦮꦴ ꦠꦁꦩꦹꦭꦏꦴ ꦄꦠ꧀ꦡꦶ ꦤꦶꦪꦴꦩꦺꦴꦠꦶꦄꦴꦢꦪꦺꦴ ꦥꦚ꧀ꦲꦴ ꦏꦠꦴ. ꦠꦠ꧀ꦡ ꦪꦱ꧀ꦩꦴ ꦤꦶꦪꦴꦩꦒꦩꦤꦴꦪ ꦚꦴꦟꦁ ꦤꦴꦩ ꦩꦒ꧀ꦒꦚꦴꦟꦩꦺꦮ ꦲꦺꦴꦠꦶ, ꦠꦱ꧀ꦩꦴ ꦠꦁ ꦱꦤ꧀ꦣꦴꦪ ꦄꦠ꧀ꦡꦶ ꦤꦶꦪꦴꦩꦺꦴꦠꦶ ꦮꦸꦠ꧀ꦠꦁ. ꦆꦠꦫꦺꦴ ꦥꦤ ꦤꦶꦪꦴꦩꦺꦴꦠꦶ ꦮꦸꦠ꧀ꦠꦺ ꦥꦛꦶꦏ꧀ꦑꦶꦥꦠꦶ, ꦚꦴꦟꦤ꧀ꦠꦶ ꦮꦸꦠ꧀ꦠꦺ ꦥꦛꦶꦗꦴꦤꦴꦠꦶ. ꦱꦠꦶꦥꦛ꧀ꦜꦴꦤꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦥꦕ꧀ꦕꦤꦷꦏꦁ ꦈꦠ꧀ꦠꦴꦤꦠ꧀ꦡꦩꦺꦮ. ꦒꦺꦴꦠ꧀ꦫꦨꦸꦤꦺꦴꦠꦶꦄꦴꦢꦶ ꦪꦺꦤ ꦪꦁ ꦄꦥ꧀ꦥꦠ꧀ꦠꦁ, ꦠꦱ꧀ꦱ ꦠꦁ ꦤꦠ꧀ꦡꦷꦠꦶ ꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ. ꦨꦒꦮꦴ ꦗꦴꦤꦴꦠꦷꦠꦶ ꦄꦠ꧀ꦠꦤꦺꦴ ꦚꦴꦟꦧꦭꦺꦤ ꦗꦴꦤꦴꦠꦶ, ꦤ ꦠꦱ꧀ꦱ ꦤꦶꦪꦴꦩꦒꦩꦤꦚꦴꦟꦱꦧ꧀ꦨꦴꦮꦠꦺꦴ. ꦠꦱ꧀ꦩꦴ ꦆꦩꦶꦤꦴ ꦏꦴꦫꦟꦺꦤ ꦥꦠꦶꦛ꧀ꦜꦶꦠꦴꦥꦶꦱ꧀ꦱ ꦭꦢ꧀ꦣꦶ ꦄꦥ꧀ꦥꦠꦶꦛ꧀ꦜꦶꦠꦴꦪꦺꦮꦴꦠꦶ.

ꦤꦶꦪꦴꦩꦏꦡꦴꦮꦟ꧀ꦟꦤꦴ.

꧕. ꦥꦛꦶꦱꦩ꧀ꦨꦶꦢꦴꦏꦡꦴꦮꦟ꧀ꦟꦤꦴ

꧔꧓꧒-꧔꧓꧓. ꦆꦢꦴꦤꦶ ꦥꦛꦶꦱꦩ꧀ꦨꦶꦢꦴꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦪꦺꦱꦁ ‘‘ꦪꦁꦏꦶꦚ꧀ꦕꦶ ꦄꦫꦶꦪꦴꦤꦁ ꦚꦴꦟꦁ, ꦱꦧ꧀ꦧꦁ ꦭꦺꦴꦏꦸꦠ꧀ꦠꦫꦩꦺꦮꦴ’’ꦠꦶ ꦒꦲꦺꦠ꧀ꦮꦴ ‘‘ꦱꦧ꧀ꦧꦁ ꦚꦴꦟꦁ ꦥꦛꦶꦱꦩ꧀ꦨꦶꦢꦴ’’ꦠꦶ ꦭꦢ꧀ꦣꦶ, ꦱꦺꦪ꧀ꦪꦡꦴꦥꦶ ꦄꦤ꧀ꦣꦏꦴꦤꦁ; ꦠꦺ ꦱꦤ꧀ꦣꦴꦪ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦆꦠꦫꦱ꧀ꦱ. ꦱꦩ꧀ꦩꦸꦠꦶꦚꦴꦟꦥꦚ꧀ꦲꦺꦱꦸ ꦥꦡꦮꦷꦏꦱꦶꦟꦱꦩ꧀ꦩꦸꦠꦶꦪꦁ ꦱꦩꦴꦥꦠ꧀ꦠꦶꦚꦴꦟꦁ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦠꦶ, ꦤꦶꦫꦸꦠ꧀ꦠꦶꦚꦴꦟꦁ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ. ꦪꦺ ꦏꦺꦕꦶ ꦱꦩ꧀ꦩꦸꦠꦶꦤ꧀ꦠꦶ ꦥꦚ꧀ꦲꦺ ꦥꦸꦡꦸꦗ꧀ꦗꦤꦺ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦠꦶ. ꦕꦺꦠꦺꦴꦥꦫꦶꦪꦴꦪꦥꦚ꧀ꦲꦺꦱꦸ ꦥꦸꦡꦸꦗ꧀ꦗꦤꦱ꧀ꦱ ꦚꦴꦟꦁ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦠꦶ, ꦄꦫꦶꦪꦱ꧀ꦱ ꦚꦴꦟꦁ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ. ꦱꦧ꧀ꦧꦴ ꦥꦚ꧀ꦚꦴꦠꦶꦥꦚ꧀ꦲꦺꦱꦸ ꦏꦱꦶꦟꦱꦩꦴꦥꦠ꧀ꦠꦶꦥꦚ꧀ꦲꦁ ꦱꦤ꧀ꦣꦴꦪ ꦥꦛꦶꦏ꧀ꦑꦶꦥꦠꦶ, ꦭꦺꦴꦏꦸꦠ꧀ꦠꦫꦁ ꦱꦤ꧀ꦣꦴꦪ ꦥꦛꦶꦗꦴꦤꦴꦠꦶ. ꦥꦡꦮꦷꦏꦱꦶꦟꦱꦩꦴꦥꦠ꧀ꦠꦶꦤ꧀ꦠꦶꦄꦴꦢꦶ ‘‘ꦪꦴ ꦌꦠꦺꦱꦸ ꦌꦠ꧀ꦠꦏꦺꦱꦸ ꦜꦴꦤꦺꦱꦸ ꦥꦚ꧀ꦚꦴ, ꦏꦶꦁ ꦱꦧ꧀ꦧꦴ ꦱꦴ ꦥꦛꦶꦱꦩ꧀ꦨꦶꦢꦴ’’ꦠꦶ ꦥꦸꦕ꧀ꦖꦤꦠ꧀ꦡꦁ ꦮꦸꦠ꧀ꦠꦁ. ꦠꦺꦤ ꦲꦶ ꦱꦧ꧀ꦧꦁ ꦚꦴꦟꦤ꧀ꦠꦶ ꦪꦱ꧀ꦩꦴ ꦱꦧ꧀ꦧꦴ ꦭꦺꦴꦏꦸꦠ꧀ꦠꦫꦥꦚ꧀ꦚꦴ ꦥꦛꦶꦱꦩ꧀ꦨꦶꦢꦴ, ꦠꦱ꧀ꦩꦴ ꦱꦧ꧀ꦧꦤ꧀ꦠꦶ ꦮꦕꦤꦁ ꦱꦴꦩꦚ꧀ꦚꦦꦭꦺꦤ ꦱꦢ꧀ꦣꦶꦁ ꦥꦠꦶꦛ꧀ꦜꦴꦥꦺꦠꦷꦠꦶ.

ꦥꦛꦶꦱꦩ꧀ꦨꦶꦢꦴꦏꦡꦴꦮꦟ꧀ꦟꦤꦴ.

꧖. ꦱꦩ꧀ꦩꦸꦠꦶꦚꦴꦟꦏꦡꦴꦮꦟ꧀ꦟꦤꦴ

꧔꧓꧔-꧔꧓꧕. ꦆꦢꦴꦤꦶ ꦱꦩ꧀ꦩꦸꦠꦶꦚꦴꦟꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦱꦩ꧀ꦩꦸꦠꦶꦱꦕ꧀ꦕꦁ ꦥꦫꦩꦠ꧀ꦡꦱꦕ꧀ꦕꦤ꧀ꦠꦶ ꦢ꧀ꦮꦺ ꦱꦕ꧀ꦕꦴꦤꦶ. ꦪꦺ ꦥꦤ ꦌꦮꦁ ꦮꦶꦨꦴꦒꦁ ꦄꦏꦠ꧀ꦮꦴ ꦱꦕ꧀ꦕꦤ꧀ꦠꦶ ꦮꦕꦤꦱꦴꦩꦚ꧀ꦚꦺꦤ ꦱꦩ꧀ꦩꦸꦠꦶꦚꦴꦟꦩ꧀ꦥꦶ ‘‘ꦱꦕ꧀ꦕꦴꦫꦩ꧀ꦩꦟꦩꦺꦮꦴ’’ꦠꦶ ꦮꦢꦤ꧀ꦠꦶ, ꦱꦺꦪ꧀ꦪꦡꦴꦥꦶ ꦄꦤ꧀ꦣꦏꦴ; ꦠꦺ ꦄꦪꦸꦠ꧀ꦠꦮꦴꦢꦶꦤꦺꦴꦠꦶ ꦠꦺꦱꦁ ꦮꦴꦢꦮꦶꦱꦺꦴꦣꦤꦠ꧀ꦡꦁ ꦄꦪꦁ ꦏꦡꦴ ꦄꦴꦫꦢ꧀ꦣꦴ. ꦠꦠ꧀ꦡ ꦤ ꦮꦠ꧀ꦠꦧ꧀ꦧꦤ꧀ꦠꦶ ꦥꦸꦕ꧀ꦖꦴ ꦥꦫꦮꦴꦢꦶꦱ꧀ꦱ, ꦥꦫꦩꦠ꧀ꦡꦱꦕ꧀ꦕꦁ ꦱꦤ꧀ꦣꦴꦪ ꦥꦛꦶꦚ꧀ꦚꦴ ꦱꦏꦮꦴꦢꦶꦱ꧀ꦱ. ꦱꦩ꧀ꦩꦸꦠꦶꦱꦕ꧀ꦕꦩ꧀ꦲꦷꦠꦶ ꦱꦩ꧀ꦩꦸꦠꦶꦁ ꦄꦤꦸꦥꦮꦶꦛ꧀ꦜꦺ ꦱꦕ꧀ꦕꦩ꧀ꦲꦶ. ꦥꦕ꧀ꦕꦠ꧀ꦠꦺ ꦮꦴ ꦨꦸꦩ꧀ꦩꦮꦕꦤꦁ, ꦱꦩ꧀ꦩꦸꦠꦶꦱꦕ꧀ꦕꦤ꧀ꦠꦶ ꦄꦠ꧀ꦡꦺꦴ. ꦱꦩ꧀ꦩꦸꦠꦶꦚꦴꦟꦁ ꦱꦕ꧀ꦕꦴꦫꦩ꧀ꦩꦟꦚ꧀ꦚꦺꦮꦴꦠꦶ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦆꦠꦫꦱ꧀ꦱ. ꦠꦠꦺꦴ ꦤꦁ ‘‘ꦪꦢꦶ ꦠꦁ ꦄꦮꦶꦱꦺꦱꦺꦤ ꦱꦕ꧀ꦕꦴꦫꦩ꧀ꦩꦟꦚ꧀ꦚꦺꦮ, ꦠꦺꦤ ꦚꦴꦟꦺꦤ ꦢꦸꦏ꧀ꦑꦥꦫꦶꦚ꧀ꦚꦴꦢꦷꦤꦶ ꦏꦫꦺꦪ꧀ꦪꦴ’’ꦠꦶ ꦕꦺꦴꦢꦺꦠꦸꦁ ꦠꦺꦤ ꦚꦴꦟꦺꦤꦴꦠꦶꦄꦴꦢꦶꦩꦴꦲ.

ꦱꦩ꧀ꦩꦸꦠꦶꦚꦴꦟꦏꦡꦴꦮꦟ꧀ꦟꦤꦴ.

꧗. ꦕꦶꦠ꧀ꦠꦴꦫꦩ꧀ꦩꦟꦏꦡꦴꦮꦟ꧀ꦟꦤꦴ

꧔꧓꧖-꧔꧓꧘. ꦆꦢꦴꦤꦶ ꦕꦶꦠ꧀ꦠꦴꦫꦩ꧀ꦩꦟꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦕꦺꦠꦺꦴꦥꦫꦶꦪꦴꦪꦺ ꦚꦴꦟꦤ꧀ꦠꦶ ꦮꦕꦤꦩꦠ꧀ꦠꦩꦺꦮ ꦒꦲꦺꦠ꧀ꦮꦴ ‘‘ꦠꦁ ꦚꦴꦟꦁ ꦕꦶꦠ꧀ꦠꦴꦫꦩ꧀ꦩꦟꦩꦺꦮꦴ’’ꦠꦶ ꦪꦺꦱꦁ ꦭꦢ꧀ꦣꦶ, ꦱꦺꦪ꧀ꦪꦡꦴꦥꦶ ꦌꦠꦫꦲꦶ ꦄꦤ꧀ꦣꦏꦴꦤꦁ; ꦠꦺ ꦱꦤ꧀ꦣꦴꦪ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦆꦠꦫꦱ꧀ꦱ. ꦄꦡꦱ꧀ꦱ ‘‘ꦪꦺꦴ ꦱꦫꦴꦒꦴꦢꦶꦮꦱꦺꦤ ꦕꦶꦠ꧀ꦠꦁ ꦗꦴꦤꦴꦠꦶ, ꦠꦱ꧀ꦱ ꦫꦴꦒꦴꦢꦪꦺꦴꦥꦶ ꦄꦴꦫꦩ꧀ꦩꦟꦴ ꦲꦺꦴꦤ꧀ꦠꦶ, ꦠꦱ꧀ꦩꦴ ꦤ ꦮꦠ꧀ꦠꦧ꧀ꦧꦁ ꦠꦁ ꦕꦶꦠ꧀ꦠꦴꦫꦩ꧀ꦩꦟꦚ꧀ꦚꦺꦮꦴ’’ꦠꦶ ꦕꦺꦴꦢꦤꦠ꧀ꦡꦁ ꦤꦤꦸ ꦄꦠ꧀ꦡꦶ ꦏꦺꦴꦕꦷꦠꦶꦄꦴꦢꦶ ꦄꦴꦫꦢ꧀ꦣꦁ. ꦦꦱ꧀ꦱꦴꦫꦩ꧀ꦩꦟꦺꦠꦶ ꦦꦱ꧀ꦱꦱꦔ꧀ꦑꦴꦠꦺ ꦄꦴꦫꦩ꧀ꦩꦟꦺ. ꦮꦺꦢꦤꦴꦫꦩ꧀ꦩꦟꦺꦠꦶꦄꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦥꦸꦤ ꦦꦱ꧀ꦱꦴꦫꦩ꧀ꦩꦟꦺ ꦚꦴꦟꦁ ꦤ ꦮꦠ꧀ꦠꦧ꧀ꦧꦤ꧀ꦠꦶ ꦥꦸꦛ꧀ꦜꦺꦴ ꦦꦱ꧀ꦱꦱ꧀ꦱ ꦦꦸꦱꦤꦭꦏ꧀ꦑꦟꦁ ꦩꦤꦱꦶꦏꦫꦺꦴꦠꦺꦴ ꦦꦱ꧀ꦱꦺꦴꦮꦴꦫꦩ꧀ꦩꦟꦁ ꦲꦺꦴꦠꦷꦠꦶ ꦥꦛꦶꦗꦴꦤꦴꦠꦶ. ꦏꦶꦁ ꦥꦤꦺꦠꦁ ꦦꦱ꧀ꦱꦥꦫꦶꦪꦴꦪꦺ ꦚꦴꦟꦤ꧀ꦠꦶ ꦥꦸꦛ꧀ꦜꦺꦴ ꦥꦤ ꦠꦴꦢꦶꦱꦱ꧀ꦱ ꦱꦸꦠ꧀ꦠꦥꦢꦱ꧀ꦱ ꦄꦨꦴꦮꦴ ꦥꦛꦶꦏ꧀ꦑꦶꦥꦠꦶ. ꦮꦺꦢꦤꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦆꦢꦴꦤꦶ ꦪꦁ ꦤꦶꦱ꧀ꦱꦴꦪ ꦭꦢ꧀ꦣꦶ, ꦠꦢꦺꦮ ꦢꦱ꧀ꦱꦺꦠ꧀ꦮꦴ ꦭꦢ꧀ꦣꦶꦁ ꦥꦠꦶꦛ꧀ꦜꦴꦥꦺꦠꦸꦁ ꦤꦤꦸ ꦕꦺꦠꦺꦴꦥꦫꦶꦪꦴꦪꦺ ꦚꦴꦟꦤ꧀ꦠꦶꦄꦴꦢꦶꦩꦴꦲ. ꦱꦴ ꦥꦤꦺꦱꦴ ꦮꦕꦤꦩꦠ꧀ꦠꦴꦨꦶꦤꦶꦮꦺꦱꦺꦤ ꦥꦠꦶꦛ꧀ꦜꦴꦥꦶꦠꦴꦥꦶ ꦄꦥ꧀ꦥꦠꦶꦛ꧀ꦜꦴꦥꦶꦠꦴꦮ ꦲꦺꦴꦠꦷꦠꦶ.

ꦕꦶꦠ꧀ꦠꦴꦫꦩ꧀ꦩꦟꦏꦡꦴꦮꦟ꧀ꦟꦤꦴ.

꧘. ꦄꦤꦴꦒꦠꦚꦴꦟꦏꦡꦴꦮꦟ꧀ꦟꦤꦴ

꧔꧓꧙-꧔꧔꧐. ꦆꦢꦴꦤꦶ ꦄꦤꦴꦒꦠꦚꦴꦟꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦄꦤꦴꦒꦠꦁ ꦤꦴꦩ ꦄꦤ꧀ꦠꦫꦩ꧀ꦥꦶ ꦄꦠ꧀ꦡꦶ, ꦄꦤꦤ꧀ꦠꦫꦩ꧀ꦥꦶ. ꦠꦺꦱꦸ ꦄꦤꦤ꧀ꦠꦫꦺ ꦌꦏꦤ꧀ꦠꦺꦤꦺꦮ ꦚꦴꦟꦁ ꦤꦠ꧀ꦡꦶ. ꦪꦡꦴ ꦕ ꦄꦤꦤ꧀ꦠꦫꦺ, ꦠꦡꦴ ꦌꦏꦮꦷꦡꦶꦌꦏꦗꦮꦤꦥꦫꦶꦪꦴꦥꦤ꧀ꦤꦺꦥꦶ. ꦠꦠ꧀ꦡ ꦪꦺ ꦱꦧ꧀ꦧꦱ꧀ꦩꦶꦩ꧀ꦥꦶ ꦄꦤꦴꦒꦠꦺ ꦚꦴꦟꦁ ꦆꦕ꧀ꦖꦤ꧀ꦠꦶ, ꦱꦺꦪ꧀ꦪꦡꦴꦥꦶ ꦄꦤ꧀ꦣꦏꦴ; ꦠꦺ ꦱꦤ꧀ꦣꦴꦪ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦆꦠꦫꦱ꧀ꦱ. ꦄꦡ ꦤꦁ ‘‘ꦪꦁ ꦠꦺ ꦄꦤꦴꦒꦠꦺ ꦚꦴꦟꦁ, ꦏꦶꦁ ꦠꦺꦤ ꦄꦤꦤ꧀ꦠꦫꦁ ꦄꦤꦴꦒꦠꦁ ꦩꦹꦭꦴꦢꦶꦮꦱꦺꦤ ꦗꦴꦤꦴꦠꦷ’’ꦠꦶ ꦕꦺꦴꦢꦺꦠꦸꦁ ꦄꦤꦴꦒꦠꦁ ꦩꦹꦭꦠꦺꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦩꦹꦭꦠꦺꦴꦠꦶꦄꦴꦢꦷꦤꦶ ꦱꦧ꧀ꦧꦴꦤꦶ ꦏꦴꦫꦟꦮꦺꦮꦕꦤꦴꦤꦺꦮ. ꦏꦴꦫꦟꦚ꧀ꦲꦶ ꦪꦁ ꦄꦠ꧀ꦠꦤꦺꦴ ꦦꦭꦁ ꦏꦫꦺꦴꦠꦶ, ꦠꦁ ꦠꦠ꧀ꦡ ꦩꦹꦭꦪꦠꦶ ꦥꦠꦶꦛ꧀ꦜꦴꦠꦷꦠꦶ ꦩꦹꦭꦁ. ꦠꦠꦺꦴ ꦕ ꦠꦁ ꦲꦶꦤꦺꦴꦠꦶ ꦥꦮꦠ꧀ꦠꦪꦠꦷꦠꦶ ꦲꦺꦠꦸ. ꦠꦢꦺꦮ ꦠꦁ ꦤꦶꦢꦺꦠꦶ ‘‘ꦲꦤ꧀ꦢ ꦤꦁ ꦒꦟ꧀ꦲꦡꦴ’’ꦠꦶ. ꦤꦶꦪ꧀ꦪꦴꦠꦺꦠꦶ ꦮꦶꦪꦴꦠꦶ ꦤꦶꦢꦴꦤꦁ. ꦠꦠꦺꦴ ꦠꦁ ꦱꦩ꧀ꦨꦮꦠꦷꦠꦶ ꦱꦩ꧀ꦨꦮꦺꦴ. ꦥꦨꦮꦠꦷꦠꦶ ꦥꦨꦮꦺꦴ. ꦠꦠ꧀ꦡ ꦕ ꦠꦁ ꦱꦩꦸꦛ꧀ꦜꦴꦠꦶ, ꦠꦁ ꦮꦴ ꦤꦁ ꦱꦩꦸꦛ꧀ꦜꦴꦥꦺꦠꦷꦠꦶ ꦱꦩꦸꦛ꧀ꦜꦴꦤꦁ. ꦠꦢꦺꦮ ꦤꦁ ꦄꦴꦲꦫꦠꦷꦠꦶ ꦄꦴꦲꦴꦫꦺꦴ. ꦠꦚ꧀ꦕꦱ꧀ꦱ ꦄꦥꦫꦶꦕ꧀ꦕꦗꦶꦠꦧ꧀ꦧꦛ꧀ꦜꦺꦤ ꦄꦴꦫꦩ꧀ꦩꦟꦁ. ꦠꦢꦺꦮ ꦕꦺꦠꦁ ꦥꦛꦶꦕ꧀ꦕ ꦌꦠꦷꦠꦶ ꦥꦕ꧀ꦕꦪꦺꦴ. ꦠꦠꦺꦴ ꦤꦁ ꦱꦩꦸꦢꦺꦠꦷꦠꦶ ꦱꦩꦸꦢꦪꦺꦴꦠꦶ ꦮꦸꦕ꧀ꦕꦠꦶ. ꦪꦱ꧀ꦩꦴ ꦥꦤ ꦄꦤꦤ꧀ꦠꦫꦁ ꦕꦶꦠ꧀ꦠꦁ ꦌꦠꦺꦲꦴꦏꦴꦫꦺꦲꦶ ꦤ ꦱꦏ꧀ꦏꦴ ꦗꦴꦤꦶꦠꦸꦁ, ꦠꦱ꧀ꦩꦴ ꦤ ꦲꦺꦮꦤ꧀ꦠꦶ ꦥꦛꦶꦏ꧀ꦑꦶꦥꦠꦶ. ꦄꦤꦴꦒꦠꦁ ꦲꦺꦠꦸꦥꦕ꧀ꦕꦪꦠꦤ꧀ꦠꦶ ꦪꦴ ꦄꦤꦤ꧀ꦠꦫꦴꦤꦴꦒꦠꦺ ꦕꦶꦠ꧀ꦠꦺ ꦲꦺꦠꦸꦥꦕ꧀ꦕꦪꦠꦴ, ꦠꦁ ꦗꦴꦤꦴꦠꦶ. ꦪꦺ ꦠꦠ꧀ꦡ ꦣꦩ꧀ꦩꦴ ꦲꦺꦠꦸꦥꦕ꧀ꦕꦪꦴ ꦲꦺꦴꦤ꧀ꦠꦶ, ꦠꦺ ꦗꦴꦤꦴꦠꦷꦠꦶ ꦄꦠ꧀ꦡꦺꦴ. ꦱꦺꦱꦥꦢꦺꦱꦸꦥꦶ ꦌꦱꦺꦮ ꦤꦪꦺꦴ. ꦒꦺꦴꦠ꧀ꦫꦨꦸꦤꦺꦴꦠꦶꦄꦴꦢꦶ ꦪꦱ꧀ꦩꦶꦁ ꦄꦤꦴꦒꦠꦺ ꦚꦴꦟꦁ ꦤ ꦈꦥ꧀ꦥꦗ꧀ꦗꦠꦶ, ꦠꦁ ꦱꦫꦹꦥꦠꦺꦴ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ. ꦥꦴꦛꦭꦶꦥꦸꦠ꧀ꦠꦱ꧀ꦱꦴꦠꦶ ꦱꦸꦠ꧀ꦠꦁ ꦪꦱ꧀ꦩꦶꦁ ꦄꦤꦴꦒꦠꦺ ꦚꦴꦟꦁ ꦈꦥ꧀ꦥꦗ꧀ꦗꦠꦶ, ꦠꦁ ꦢꦱ꧀ꦱꦺꦠꦸꦁ ꦄꦴꦲꦛꦁ. ꦪꦱ꧀ꦩꦴ ꦥꦤꦺꦠꦁ ꦤ ꦱꦧ꧀ꦧꦱ꧀ꦩꦶꦁ ꦄꦤꦴꦒꦠꦺ ꦚꦴꦟꦱ꧀ꦱ ꦱꦴꦣꦏꦁ; ꦠꦱ꧀ꦩꦴ ꦄꦤꦴꦲꦛꦩꦺꦮꦴꦠꦶ.

ꦄꦤꦴꦒꦠꦚꦴꦟꦏꦡꦴꦮꦟ꧀ꦟꦤꦴ.

꧙. ꦥꦛꦸꦥ꧀ꦥꦤ꧀ꦤꦚꦴꦟꦏꦡꦴꦮꦟ꧀ꦟꦤꦴ

꧔꧔꧑-꧔꧔꧒. ꦆꦢꦴꦤꦶ ꦥꦛꦸꦥ꧀ꦥꦤ꧀ꦤꦚꦴꦟꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦪꦺꦱꦁ ‘‘ꦱꦧ꧀ꦧꦱꦔ꧀ꦑꦴꦫꦺꦱꦸ ꦄꦤꦶꦕ꧀ꦕꦠꦺꦴ ꦢꦶꦛ꧀ꦜꦺꦱꦸ ꦠꦩ꧀ꦥꦶ ꦚꦴꦟꦁ ꦄꦤꦶꦕ꧀ꦕꦠꦺꦴ ꦢꦶꦛ꧀ꦜꦁ ꦲꦺꦴꦠꦷ’’ꦠꦶ ꦮꦕꦤꦁ ꦤꦶꦱ꧀ꦱꦴꦪ ‘‘ꦄꦮꦶꦱꦺꦱꦺꦤ ꦱꦧ꧀ꦧꦱ꧀ꦩꦶꦁ ꦥꦕ꧀ꦕꦸꦥ꧀ꦥꦤ꧀ꦤꦺ ꦚꦴꦟꦁ ꦄꦠ꧀ꦡꦷ’’ꦠꦶ ꦭꦢ꧀ꦣꦶ, ꦱꦺꦪ꧀ꦪꦡꦴꦥꦶ ꦄꦤ꧀ꦣꦏꦴꦤꦁ; ꦠꦺ ꦱꦤ꧀ꦣꦴꦪ ꦥꦛꦸꦥ꧀ꦥꦤ꧀ꦤꦺꦠꦶ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦆꦠꦫꦱ꧀ꦱ. ꦄꦡ ꦤꦁ ‘‘ꦪꦢꦶ ꦄꦮꦶꦱꦺꦱꦺꦤ ꦥꦛꦸꦥ꧀ꦥꦤ꧀ꦤꦺ ꦚꦴꦟꦁ ꦄꦠ꧀ꦡꦶ, ꦑꦟꦥꦕ꧀ꦕꦸꦥ꧀ꦥꦤ꧀ꦤꦺꦥꦶ ꦠꦺꦤ ꦨꦮꦶꦠꦧ꧀ꦧꦁ. ꦌꦮꦁ ꦱꦤ꧀ꦠꦺ ꦢ꧀ꦮꦶꦤ꧀ꦤꦁ ꦚꦴꦟꦴꦤꦁ ꦌꦏꦠꦺꦴ ꦄꦨꦴꦮꦴ ꦠꦺꦤꦺꦮ ꦚꦴꦟꦺꦤ ꦠꦁ ꦗꦴꦤꦶꦠꦧ꧀ꦧꦁ ꦲꦺꦴꦠꦷ’’ꦠꦶ ꦕꦺꦴꦢꦤꦠ꧀ꦡꦁ ꦠꦺꦤꦴꦠꦶ ꦄꦤꦸꦪꦺꦴꦒꦺꦴ ꦱꦏꦮꦴꦢꦶꦱ꧀ꦱ. ꦠꦠ꧀ꦡ ꦥꦜꦩꦥꦚ꧀ꦲꦺ ꦠꦺꦤꦺꦮ ꦠꦁ ꦗꦴꦤꦶꦠꦸꦁ ꦤ ꦱꦏ꧀ꦏꦴꦠꦶ ꦥꦛꦶꦏ꧀ꦑꦺꦥꦺꦴ ꦆꦠꦫꦱ꧀ꦱ. ꦢꦸꦠꦶꦪꦥꦚ꧀ꦲꦺ ꦱꦤ꧀ꦠꦠꦶꦁ ꦱꦤ꧀ꦣꦴꦪ ꦥꦛꦶꦚ꧀ꦚꦴ ꦠꦱ꧀ꦱꦺꦮ. ꦥꦛꦶꦥꦴꦛꦶꦠꦺꦴ ꦨꦔ꧀ꦒꦁ ꦥꦱ꧀ꦱꦤ꧀ꦠꦺꦴ ꦨꦔ꧀ꦒꦴꦤꦸꦥꦱ꧀ꦱꦤꦺꦤꦺꦮ ꦨꦔ꧀ꦒꦴꦤꦸꦥꦱ꧀ꦱꦤꦴꦚꦴꦟꦁ ꦥꦱ꧀ꦱꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦤ ꦚꦴꦟꦺꦤ ꦠꦁ ꦚꦴꦟꦁ ꦗꦴꦤꦴꦠꦷꦠꦶꦄꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦠꦺꦤ ꦦꦱ꧀ꦱꦺꦤ ꦠꦁ ꦦꦱ꧀ꦱꦤ꧀ꦠꦶꦄꦴꦢꦷꦤꦶꦱ꧀ꦱ ꦭꦺꦱꦺꦴꦏꦴꦱꦤꦶꦮꦴꦫꦟꦠ꧀ꦡꦁ ꦮꦸꦠ꧀ꦠꦴꦤꦶ. ꦪꦁ ꦥꦤꦺꦠꦺꦤ ꦭꦢ꧀ꦣꦶꦥꦠꦶꦛ꧀ꦜꦴꦥꦤꦠ꧀ꦡꦁ ꦤꦤꦸ ꦱꦧ꧀ꦧꦱꦔ꧀ꦑꦴꦫꦺꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦤꦪꦠꦺꦴ ꦠꦁ ꦚꦴꦟꦁ ꦢꦶꦛ꧀ꦜꦁ ꦲꦺꦴꦠꦶ, ꦤ ꦄꦴꦫꦩ꧀ꦩꦟꦠꦺꦴꦠꦶ ꦄꦣꦶꦥ꧀ꦥꦴꦪꦺꦤ ꦥꦛꦶꦚ꧀ꦚꦴ ꦱꦏꦮꦴꦢꦶꦱ꧀ꦱ. ꦠꦱ꧀ꦩꦴ ꦌꦮꦁ ꦥꦠꦶꦛ꧀ꦜꦶꦠꦴꦥꦶꦱ꧀ꦱ ꦭꦢ꧀ꦣꦶ ꦄꦥ꧀ꦥꦠꦶꦛ꧀ꦜꦶꦠꦴꦮ ꦲꦺꦴꦠꦶ.

ꦥꦛꦸꦥ꧀ꦥꦤ꧀ꦤꦚꦴꦟꦏꦡꦴꦮꦟ꧀ꦟꦤꦴ.

꧑꧐. ꦦꦭꦚꦴꦟꦏꦡꦴꦮꦟ꧀ꦟꦤꦴ

꧔꧔꧓-꧔꧔꧔. ꦆꦢꦴꦤꦶ ꦦꦭꦺ ꦚꦴꦟꦏꦡꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ‘‘ꦧꦸꦢ꧀ꦣꦴꦥꦶ ꦱꦠ꧀ꦠꦴꦤꦁ ꦄꦫꦶꦪꦦꦭꦥ꧀ꦥꦠ꧀ꦠꦶꦪꦴ ꦣꦩ꧀ꦩꦁ ꦢꦺꦱꦺꦤ꧀ꦠꦶ ꦱꦴꦮꦏꦴꦥꦶ, ꦆꦠꦶ ꦆꦩꦶꦤꦴ ꦱꦴꦩꦚ꧀ꦚꦺꦤ ꦧꦸꦢ꧀ꦣꦴꦤꦁ ꦮꦶꦪ ꦱꦴꦮꦏꦴꦤꦩ꧀ꦥꦶ ꦠꦺꦤ ꦠꦺꦤ ꦱꦠ꧀ꦠꦺꦤ ꦥꦠ꧀ꦠꦧ꧀ꦧꦺ ꦦꦭꦺ ꦚꦴꦟꦁ ꦄꦠ꧀ꦡꦷ’’ꦠꦶ ꦪꦺꦱꦁ ꦭꦢ꧀ꦣꦶ, ꦱꦺꦪ꧀ꦪꦡꦴꦥꦶ ꦄꦤ꧀ꦣꦏꦴꦤꦁ; ꦠꦺ ꦱꦤ꧀ꦣꦴꦪ ꦱꦴꦮꦏꦱ꧀ꦱꦴꦠꦶ ꦥꦸꦕ꧀ꦖꦴ ꦱꦏꦮꦴꦢꦶꦱ꧀ꦱ, ꦥꦛꦶꦚ꧀ꦚꦴ ꦆꦠꦫꦱ꧀ꦱ. ꦄꦡ ꦤꦁ ‘‘ꦪꦢꦶ ꦱꦴꦮꦏꦱ꧀ꦱ ꦦꦭꦺ ꦚꦴꦟꦁ ꦄꦠ꧀ꦡꦶ, ꦪꦡꦴ ꦧꦸꦢ꧀ꦣꦴ ꦱꦩꦴꦤꦺꦥꦶ ꦱꦺꦴꦠꦴꦥꦠ꧀ꦠꦶꦦꦭꦺ ꦄꦠ꧀ꦠꦤꦺꦴ ꦚꦴꦟꦧꦭꦺꦤ ‘ꦄꦪꦁ ꦌꦏꦧꦷꦗꦷ, ꦄꦪꦁ ꦏꦺꦴꦭꦁꦏꦺꦴꦭꦺꦴ, ꦄꦪꦁ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦺꦴ’ꦠꦶ ꦦꦭꦱ꧀ꦱꦏꦠꦁ ꦥꦚ꧀ꦚꦥꦺꦤ꧀ꦠꦶ, ꦏꦶꦁ ꦠꦺ ꦌꦮꦁ ꦱꦴꦮꦏꦺꦴꦥꦷ’’ꦠꦶ ꦕꦺꦴꦢꦺꦠꦸꦁ ꦱꦴꦮꦏꦺꦴ ꦦꦭꦱ꧀ꦱ ꦏꦠꦁ ꦥꦚ꧀ꦚꦥꦺꦠꦷꦠꦶ ꦄꦴꦲ. ꦆꦠꦫꦺꦴ ꦥꦛꦶꦏ꧀ꦑꦶꦥꦠꦶ.

ꦄꦠ꧀ꦡꦶ ꦱꦴꦮꦏꦱ꧀ꦱ ꦦꦭꦥꦫꦺꦴꦥꦫꦶꦪꦠ꧀ꦠꦷꦠꦶꦄꦴꦢꦶ ꦦꦭꦺ ꦚꦴꦟꦱ꧀ꦱ ꦄꦠ꧀ꦡꦶꦠꦴꦪ ꦥꦕ꧀ꦕꦪꦥꦸꦕ꧀ꦖꦤꦠ꧀ꦡꦁ ꦮꦸꦠ꧀ꦠꦁ. ꦄꦪꦚ꧀ꦲꦺꦠ꧀ꦡ ꦄꦣꦶꦥ꧀ꦥꦴꦪꦺꦴ – ꦧꦸꦢ꧀ꦣꦴꦤꦁ ‘‘ꦆꦢꦁ ꦦꦭꦁ ꦥꦫꦁ, ꦆꦢꦁ ꦎꦥꦫ’’ꦤ꧀ꦠꦶ ꦌꦮꦁ ꦦꦭꦴꦤꦁ ꦈꦕ꧀ꦕꦴꦮꦕꦨꦴꦮꦗꦴꦤꦤꦱꦔ꧀ꦑꦴꦠꦴ ꦦꦭꦺ ꦥꦫꦺꦴꦥꦫꦶꦪꦠ꧀ꦠꦶ ꦤꦴꦩ ꦄꦠ꧀ꦡꦶ. ꦠꦡꦴ ꦆꦤ꧀ꦢ꧀ꦫꦶꦪꦥꦸꦒ꧀ꦒꦭꦥꦫꦺꦴꦥꦫꦶꦪꦠ꧀ꦠꦶꦪꦺꦴ, ꦠꦴꦱꦁ ꦄꦠ꧀ꦡꦶꦠꦴꦪ ꦠꦱ꧀ꦱ ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦠꦺꦱꦁ ꦠꦺꦱꦁ ꦆꦤ꧀ꦢ꧀ꦫꦶꦪꦴꦤꦁ ꦮꦱꦺꦤ ꦠꦁ ꦠꦁ ꦦꦭꦁ ꦗꦴꦤꦤ꧀ꦠꦶ, ꦏꦶꦁ ꦠꦺ ꦱꦴꦮꦏꦱ꧀ꦱꦴꦥꦶ ꦌꦠꦴ ꦥꦫꦺꦴꦥꦫꦶꦪꦠ꧀ꦠꦶꦪꦺꦴ ꦄꦠ꧀ꦡꦷꦠꦶ.

ꦄꦠ꧀ꦡꦶ ꦱꦴꦮꦏꦱ꧀ꦱ ꦑꦤ꧀ꦣꦥꦚ꧀ꦚꦠ꧀ꦠꦷꦠꦶꦄꦴꦢꦷꦤꦶꦥꦶ ‘‘ꦪꦢꦶ ꦠꦺ ꦱꦴꦮꦏꦱ꧀ꦱ ꦧꦸꦢ꧀ꦣꦴꦤꦁ ꦮꦶꦪ ꦦꦭꦺ ꦚꦴꦟꦁ ꦄꦠ꧀ꦡꦶ, ꦆꦩꦴ ꦲꦶ ꦥꦶꦱ꧀ꦱ ꦥꦚ꧀ꦚꦠ꧀ꦠꦷꦲꦶ ꦨꦮꦶꦠꦧ꧀ꦧꦁ. ꦏꦶꦩꦱ꧀ꦱ ꦠꦴ ꦄꦠ꧀ꦡꦶ, ꦱꦏ꧀ꦏꦺꦴꦠꦶ ꦱꦺꦴ ꦌꦠꦴ ꦥꦚ꧀ꦚꦠ꧀ꦠꦶꦪꦺꦴ ꦄꦠ꧀ꦠꦤꦺꦴ ꦧꦭꦺꦤ ꦗꦴꦤꦶꦠꦸꦁ ꦮꦴ ꦥꦚ꧀ꦚꦥꦺꦠꦸꦁ ꦮꦴ’’ꦠꦶ ꦕꦺꦴꦢꦤꦠ꧀ꦡꦁ ꦮꦸꦠ꧀ꦠꦴꦤꦶ. ꦱꦴꦮꦏꦺꦴ ꦗꦶꦤꦺꦴꦠꦶꦄꦴꦢꦶ ‘‘ꦪꦢꦶ ꦱꦴꦮꦏꦱ꧀ꦱ ꦧꦸꦢ꧀ꦣꦴꦤꦁ ꦮꦶꦪ ꦦꦭꦺ ꦚꦴꦟꦁ ꦄꦠ꧀ꦡꦶ, ꦌꦮꦁ ꦱꦤ꧀ꦠꦺ ꦱ꧀ꦮꦺꦮ ꦗꦶꦤꦺꦴ’’ꦠꦶ ꦕꦺꦴꦢꦤꦠ꧀ꦡꦁ ꦮꦸꦠ꧀ꦠꦁ. ꦱꦴꦮꦏꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱꦴꦠꦶ ꦥꦚ꧀ꦲꦺꦥꦶ ꦄꦪꦩꦺꦮ ꦤꦪꦺꦴ. ꦄꦚ꧀ꦚꦴꦟꦷꦠꦶ ꦥꦚ꧀ꦲꦺ ꦄꦮꦶꦗ꧀ꦗꦴꦱꦔ꧀ꦑꦴꦠꦱ꧀ꦱ ꦄꦚ꧀ꦚꦴꦟꦱ꧀ꦱ ꦮꦶꦲꦠꦠ꧀ꦠꦴ ꦥꦛꦶꦏ꧀ꦑꦶꦠ꧀ꦠꦺꦴ, ꦤ ꦥꦤꦱ꧀ꦱ ꦧꦸꦢ꧀ꦣꦴꦤꦁ ꦮꦶꦪ ꦦꦭꦺ ꦚꦴꦟꦁ ꦄꦠ꧀ꦡꦶ. ꦠꦱ꧀ꦩꦴ ꦄꦥ꧀ꦥꦠꦶꦛ꧀ꦜꦶꦠꦺꦴꦮ ꦥꦫꦮꦴꦢꦷꦮꦴꦢꦺꦴꦠꦶ.

ꦦꦭꦚꦴꦟꦏꦡꦴꦮꦟ꧀ꦟꦤꦴ.

ꦥꦚ꧀ꦕꦩꦺꦴ ꦮꦒ꧀ꦒꦺꦴ.

ꦩꦲꦴꦥꦟ꧀ꦟꦴꦱꦏꦺꦴ ꦱꦩꦠ꧀ꦠꦺꦴ.