꧕. ꦥꦚ꧀ꦕꦩꦤꦪꦺꦴ ꦄꦱꦔ꧀ꦒꦲꦶꦠꦺꦤꦄꦱꦔ꧀ꦒꦲꦶꦠꦥꦢꦮꦟ꧀ꦟꦤꦴ

꧑꧙꧓. ꦆꦢꦴꦤꦶ ꦄꦱꦔ꧀ꦒꦲꦶꦠꦺꦤ ꦄꦱꦔ꧀ꦒꦲꦶꦠꦥꦢꦁ ꦨꦴꦗꦺꦠꦸꦁ ꦫꦹꦥꦏ꧀ꦑꦤ꧀ꦣꦺꦤꦴꦠꦶꦄꦴꦢꦶ ꦄꦴꦫꦢ꧀ꦣꦁ. ꦠꦠ꧀ꦡ ꦪꦁ ꦑꦤ꧀ꦣꦴꦢꦷꦲꦶ ꦄꦱꦔ꧀ꦒꦲꦶꦠꦺꦤ ꦑꦤ꧀ꦣꦴꦢꦶꦮꦱꦺꦤ ꦄꦱꦔ꧀ꦒꦲꦶꦠꦁ, ꦥꦸꦤ ꦠꦱ꧀ꦱꦺꦮ ꦑꦤ꧀ꦣꦴꦢꦷꦲꦶ ꦄꦱꦔ꧀ꦒꦲꦁ ꦥꦸꦕ꧀ꦖꦶꦠ꧀ꦮꦴ ꦮꦶꦱ꧀ꦱꦗ꧀ꦗꦤꦁ ꦏꦠꦁ. ꦠꦁ ꦥꦚ꧀ꦕꦏ꧀ꦑꦤ꧀ꦣꦒ꧀ꦒꦴꦲꦏꦺꦱꦸ ꦢꦸꦏ꧀ꦑꦱꦕ꧀ꦕꦴꦢꦷꦱꦸ ꦮꦶꦚ꧀ꦚꦴꦟꦺꦤ ꦱꦢ꧀ꦣꦶꦁ ꦱꦸꦑꦸꦩꦫꦹꦥꦒ꧀ꦒꦴꦲꦏꦺꦱꦸ ꦄꦤꦶꦢꦱ꧀ꦱꦤꦄꦥ꧀ꦥꦛꦶꦓꦴꦢꦷꦱꦸ ꦕ ꦥꦢꦺꦱꦸ ꦤ ꦪꦸꦗ꧀ꦗꦠꦶ. ꦠꦴꦢꦶꦱꦺꦤ ꦲꦶ ꦥꦢꦺꦤ ꦤꦶꦧ꧀ꦧꦴꦤꦁ ꦑꦤ꧀ꦣꦱꦔ꧀ꦒꦲꦩꦠ꧀ꦠꦁ ꦤ ꦒꦕ꧀ꦖꦺꦪ꧀ꦪ. ꦱꦺꦱꦴ ꦑꦤ꧀ꦣꦴꦢꦷꦲꦶ ꦄꦱꦔ꧀ꦒꦲꦶꦠꦣꦩ꧀ꦩꦴ ꦤꦴꦩ ꦤꦠ꧀ꦡꦶ. ꦠꦱ꧀ꦩꦴ ꦠꦡꦴꦫꦹꦥꦴꦤꦶ ꦥꦢꦴꦤꦶ ꦆꦩꦱ꧀ꦩꦶꦁ ꦮꦴꦫꦺ ꦤ ꦒꦲꦶꦠꦴꦤꦶ. ꦪꦴꦤꦶ ꦥꦤ ꦥꦚ꧀ꦕꦏ꧀ꦑꦤ꧀ꦣꦺ ꦮꦶꦚ꧀ꦚꦴꦟꦚ꧀ꦕ ꦱꦸꦑꦸꦩꦫꦹꦥꦺꦤ ꦱꦢ꧀ꦣꦶꦁ ꦌꦏꦠꦺꦴ ꦤ ꦢꦷꦥꦺꦤ꧀ꦠꦶ, ꦠꦴꦤꦶ ꦆꦣ ꦒꦲꦶꦠꦴꦤꦶ. ꦠꦺꦱꦁ ꦆꦢꦩꦸꦢ꧀ꦢꦴꦤꦁ –

‘‘ꦱꦧ꧀ꦧꦺ ꦑꦤ꧀ꦣꦴ ꦠꦡꦴꦪꦠꦤꦣꦴꦠꦸꦪꦺꦴ ꦱꦕ꧀ꦕꦠꦺꦴ ꦠꦪꦺꦴ;

ꦆꦤ꧀ꦢ꧀ꦫꦶꦪꦴꦤꦶꦥꦶ ꦱꦧ꧀ꦧꦴꦤꦶ, ꦠꦺꦮꦷꦱꦠꦶ ꦥꦛꦶꦕ꧀ꦕꦠꦺꦴ.

‘‘ꦥꦫꦠꦺꦴ ꦱꦺꦴꦭ꦳ꦱ ꦥꦢꦴ, ꦠꦺꦕꦠ꧀ꦠꦴꦭꦷꦱꦏꦁ ꦠꦶꦏꦺ;

ꦒꦺꦴꦕ꧀ꦖꦏꦺ ꦱꦠ꧀ꦠꦠꦶ ꦢ꧀ꦮꦺ ꦕ, ꦱꦠ꧀ꦠ ꦕꦹꦭ꦳ꦤ꧀ꦠꦫꦺ ꦥꦢꦴ.

‘‘ꦩꦲꦤ꧀ꦠꦫꦺ ꦥꦢꦴ ꦮꦸꦠ꧀ꦠꦴ, ꦄꦛ꧀ꦜꦴꦫꦱ ꦠꦠꦺꦴ ꦥꦫꦁ;

ꦄꦛ꧀ꦜꦴꦫꦱꦺꦮ ꦚꦴꦠꦧ꧀ꦧꦴ, ꦱꦺꦱꦴ ꦆꦣ ꦤ ꦨꦴꦱꦶꦠꦴ’’ꦠꦶ.

ꦥꦚ꧀ꦲꦴ ꦥꦤꦺꦠ꧀ꦡ ꦱꦢꦶꦱꦮꦶꦱ꧀ꦱꦗ꧀ꦗꦤꦴꦤꦁ ꦮꦱꦺꦤ ꦱꦩꦺꦴꦣꦴꦤꦺꦠ꧀ꦮꦴ ꦏꦠꦶꦲꦶ ꦱꦢ꧀ꦣꦶꦁ ꦱꦧ꧀ꦧꦺꦥꦶ ꦕꦠꦸꦠ꧀ꦠꦶꦁꦱ ꦲꦺꦴꦤ꧀ꦠꦶ. ꦠꦠ꧀ꦡ ꦪꦁ ꦥꦸꦕ꧀ꦖꦴꦪ ꦈꦢ꧀ꦣꦛꦁ ꦥꦢꦁ, ꦠꦢꦺꦮ ꦪꦺꦲꦶ ꦑꦤ꧀ꦣꦴꦢꦷꦲꦶ ꦄꦱꦔ꧀ꦒꦲꦶꦠꦁ, ꦠꦺ ꦣꦩ꧀ꦩꦺ ꦱꦤ꧀ꦣꦴꦪ ꦌꦏꦺꦤ ꦑꦤ꧀ꦣꦺꦤꦴꦠꦶꦄꦴꦢꦶ ꦮꦸꦠ꧀ꦠꦁ.

ꦠꦠ꧀ꦫꦴꦪꦁ ꦤꦪꦺꦴ – ꦫꦹꦥꦏ꧀ꦑꦤ꧀ꦣꦺꦤ ꦲꦶ ꦕꦠ꧀ꦠꦴꦫꦺꦴ ꦑꦤ꧀ꦣꦴ ꦤꦶꦧ꧀ꦧꦴꦤꦚ꧀ꦕ ꦑꦤ꧀ꦣꦱꦔ꧀ꦒꦲꦺꦤ ꦄꦱꦔ꧀ꦒꦲꦶꦠꦴ. ꦄꦴꦪꦠꦤꦣꦴꦠꦸꦱꦔ꧀ꦒꦲꦺꦤ ꦥꦤ ꦜꦥꦺꦠ꧀ꦮꦴ ꦮꦶꦚ꧀ꦚꦴꦟꦁ ꦄꦮꦱꦺꦱꦴ ꦱꦔ꧀ꦒꦲꦶꦠꦴꦠꦶ ꦮꦶꦚ꧀ꦚꦴꦟꦩꦺꦮ ꦠꦷꦲꦶꦥꦶ ꦑꦤ꧀ꦣꦱꦔ꧀ꦒꦲꦴꦢꦷꦲꦶ ꦄꦱꦔ꧀ꦒꦲꦶꦠꦁ ꦤꦴꦩ. ꦥꦸꦤ ꦠꦺꦤ ꦮꦶꦚ꧀ꦚꦴꦟꦺꦤ ꦱꦢ꧀ꦣꦶꦁ ꦤꦶꦧ꧀ꦧꦴꦤꦺꦤ ꦕꦠ꧀ꦠꦴꦫꦺꦴ ꦑꦤ꧀ꦣꦴ ꦑꦤ꧀ꦣꦴꦢꦶꦱꦔ꧀ꦒꦲꦺꦤ ꦄꦱꦔ꧀ꦒꦲꦶꦠꦴ. ꦠꦺ ꦱꦧ꧀ꦧꦺꦥꦶ ꦥꦸꦤ ꦮꦶꦚ꧀ꦚꦴꦟꦺꦤꦺꦮ ꦑꦤ꧀ꦣꦴꦢꦶꦱꦔ꧀ꦒꦲꦺꦤ ꦄꦱꦔ꧀ꦒꦲꦶꦠꦴꦠꦶ ꦌꦏꦺꦤ ꦑꦤ꧀ꦣꦺꦤ, ꦌꦏꦺꦤꦴꦪꦠꦤꦺꦤ, ꦱꦠ꧀ꦠꦲꦶ ꦣꦴꦠꦹꦲꦶ ꦄꦱꦔ꧀ꦒꦲꦶꦠꦴ ꦤꦴꦩ ꦲꦺꦴꦤ꧀ꦠꦶ. ꦄꦡ ꦮꦴ – ꦪꦢꦺꦠꦁ ꦫꦹꦥꦏ꧀ꦑꦤ꧀ꦣꦺꦤ ꦮꦶꦚ꧀ꦚꦴꦟꦩꦺꦮ ꦠꦷꦲꦶ ꦑꦤ꧀ꦣꦴꦢꦶꦱꦔ꧀ꦒꦲꦺꦲꦶ ꦄꦱꦔ꧀ꦒꦲꦶꦠꦁ, ꦠꦺꦲꦶꦥꦶ ꦮꦶꦚ꧀ꦚꦴꦟꦣꦩ꧀ꦩꦺꦲꦶ ꦠꦺ ꦫꦹꦥꦣꦩ꧀ꦩꦴꦮ ꦠꦷꦲꦶ ꦱꦔ꧀ꦒꦲꦺꦲꦶ ꦄꦱꦔ꧀ꦒꦲꦶꦠꦴ. ꦥꦸꦤ ꦠꦺ ꦫꦹꦥꦣꦩ꧀ꦩꦴ ꦮꦶꦚ꧀ꦚꦴꦟꦺꦤꦺꦮ ꦠꦷꦲꦶ ꦱꦔ꧀ꦒꦲꦺꦲꦶ ꦄꦱꦔ꧀ꦒꦲꦶꦠꦴ. ꦮꦶꦚ꧀ꦚꦴꦟꦚ꧀ꦕ ꦑꦤ꧀ꦣꦠꦺꦴ ꦌꦏꦺꦴ ꦮꦶꦚ꧀ꦚꦴꦟꦏ꧀ꦑꦤ꧀ꦣꦺꦴ ꦲꦺꦴꦠꦶ, ꦄꦴꦪꦠꦤꦠꦺꦴ ꦌꦏꦁ ꦩꦤꦴꦪꦠꦤꦁ, ꦣꦴꦠꦸꦠꦺꦴ ꦱꦠ꧀ꦠ ꦮꦶꦚ꧀ꦚꦴꦟꦣꦴꦠꦸꦪꦺꦴ. ꦠꦱ꧀ꦩꦴ ‘‘ꦌꦏꦺꦤ ꦑꦤ꧀ꦣꦺꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦆꦩꦶꦤꦴ ꦈꦥꦴꦪꦺꦤ ꦱꦧ꧀ꦧꦠ꧀ꦡ ꦪꦁ ꦥꦸꦕ꧀ꦖꦴꦪ ꦈꦢ꧀ꦣꦛꦁ ꦥꦢꦁ, ꦠꦢꦺꦮ ꦪꦺꦲꦶ ꦣꦩ꧀ꦩꦺꦲꦶ ꦑꦤ꧀ꦣꦴꦢꦶꦮꦱꦺꦤ ꦄꦱꦔ꧀ꦒꦲꦶꦠꦁ, ꦠꦺꦱꦁ ꦣꦩ꧀ꦩꦴꦤꦁ ꦮꦱꦺꦤ ꦑꦤ꧀ꦣꦴꦢꦪꦺꦴ ꦮꦺꦢꦶꦠꦧ꧀ꦧꦴ. ꦠꦠ꧀ꦡ ꦢꦸꦠꦶꦪꦥꦚ꧀ꦲꦺ ꦠꦴꦮ – ꦫꦹꦥꦮꦶꦚ꧀ꦚꦴꦟꦴꦤꦁ ꦮꦱꦺꦤ ꦮꦺꦢꦶꦠꦧ꧀ꦧꦴ. ꦮꦺꦢꦤꦴꦢꦪꦺꦴ ꦲꦶ ꦫꦹꦥꦮꦶꦚ꧀ꦚꦴꦟꦺꦲꦺꦮ ꦑꦤ꧀ꦣꦴꦢꦶꦱꦔ꧀ꦒꦲꦺꦤ ꦄꦱꦔ꧀ꦒꦲꦶꦠꦴ. ꦠꦺ ꦕ ꦢ꧀ꦮꦺ ꦑꦤ꧀ꦣꦴ ꦌꦏꦴꦢꦱꦴꦪꦠꦤꦴꦤꦶ ꦱꦠ꧀ꦠꦫꦱ ꦣꦴꦠꦸꦪꦺꦴ ꦲꦺꦴꦤ꧀ꦠꦶ.

꧑꧙꧕. ꦠꦠꦶꦪꦥꦚ꧀ꦲꦺ – ꦮꦶꦚ꧀ꦚꦴꦟꦁ ꦫꦹꦥꦴꦢꦷꦲꦶ ꦕꦠꦹꦲꦶ ꦄꦱꦔ꧀ꦒꦲꦶꦠꦤ꧀ꦠꦶ ꦠꦺꦱꦁ ꦮꦱꦺꦤ ꦑꦤ꧀ꦣꦴꦢꦪꦺꦴ ꦮꦺꦢꦶꦠꦧ꧀ꦧꦴ.

꧑꧙꧖. ꦕꦠꦸꦠ꧀ꦡꦥꦚ꧀ꦲꦺ – ꦕꦏ꧀ꦑꦴꦪꦠꦤꦁ ꦮꦺꦢꦤꦴꦢꦷꦲꦶ ꦕꦠꦹꦲꦷꦠꦶ ꦆꦩꦶꦤꦴ ꦤꦪꦺꦤ ꦱꦧ꧀ꦧꦠ꧀ꦡ ꦑꦤ꧀ꦣꦴꦢꦪꦺꦴ ꦮꦺꦢꦶꦠꦧ꧀ꦧꦴ. ꦥꦫꦶꦪꦺꦴꦱꦴꦤꦺ – ꦫꦹꦥꦚ꧀ꦕ ꦣꦩ꧀ꦩꦴꦪꦠꦤꦤ꧀ꦠꦶ ꦈꦢ꧀ꦢꦴꦤꦒꦴꦡꦴꦪ ꦢꦱ꧀ꦱꦶꦠꦣꦩ꧀ꦩꦴꦪꦺꦮ ꦄꦚ꧀ꦚꦺꦤꦴꦏꦴꦫꦺꦤ ꦱꦔ꧀ꦑꦶꦥꦶꦠ꧀ꦮꦴ ꦢꦱ꧀ꦱꦶꦠꦴꦠꦶ.

ꦄꦱꦔ꧀ꦒꦲꦶꦠꦺꦤꦄꦱꦔ꧀ꦒꦲꦶꦠꦥꦢꦮꦟ꧀ꦟꦤꦴ.