꧑. ꦑꦤ꧀ꦣꦥꦢꦮꦟ꧀ꦟꦤꦴ

꧖. ꦆꦢꦴꦤꦶ ꦥꦚ꧀ꦕꦏ꧀ꦑꦤ꧀ꦣꦴꦢꦶꦮꦱꦺꦤ ꦤꦶꦏ꧀ꦑꦶꦠ꧀ꦠꦩꦴꦠꦶꦏꦁ ‘ꦱꦔ꧀ꦒꦲꦺꦴ ꦄꦱꦔ꧀ꦒꦲꦺꦴ’ꦠꦶꦄꦴꦢꦷꦲꦶ ꦤꦪꦩꦴꦠꦶꦏꦴꦥꦢꦺꦲꦶ ꦱꦢ꧀ꦣꦶꦁ ꦪꦺꦴꦗꦺꦠ꧀ꦮꦴ ꦢꦱ꧀ꦱꦺꦠꦸꦁ ꦫꦹꦥꦏ꧀ꦑꦤ꧀ꦣꦺꦴ ꦏꦠꦶꦲꦶ ꦑꦤ꧀ꦣꦺꦲꦷꦠꦶꦄꦴꦢꦶꦤꦴ ꦤꦪꦺꦤ ꦤꦶꦢ꧀ꦢꦺꦱꦮꦴꦫꦺꦴ ꦄꦴꦫꦢ꧀ꦣꦺꦴ. ꦠꦠ꧀ꦡ ꦪꦱ꧀ꦩꦴ ‘‘ꦱꦔ꧀ꦒꦲꦺꦴ ꦄꦱꦔ꧀ꦒꦲꦺꦴꦠꦶꦄꦴꦢꦶꦏꦴꦪ ꦤꦪꦩꦴꦠꦶꦏꦴꦪ ‘‘ꦠꦷꦲꦶ ꦱꦔ꧀ꦒꦲꦺꦴ, ꦠꦷꦲꦶ ꦄꦱꦔ꧀ꦒꦲꦺꦴ’’ꦠꦶ ꦤꦪꦩꦸꦑꦩꦴꦠꦶꦏꦴ ꦜꦥꦶꦠꦴ, ꦠꦱ꧀ꦩꦴ ꦫꦹꦥꦏ꧀ꦑꦤ꧀ꦣꦴꦢꦷꦤꦁ ꦱꦔ꧀ꦒꦲꦁ ꦢꦱ꧀ꦱꦺꦠꦸꦁ ꦏꦠꦶꦲꦶ ꦑꦤ꧀ꦣꦺꦲꦶ ꦏꦠꦶꦲꦴꦪꦠꦤꦺꦲꦶ ꦏꦠꦶꦲꦶ ꦣꦴꦠꦹꦲꦷꦠꦶ ꦠꦷꦟꦶ ꦑꦤ꧀ꦣꦴꦪꦠꦤꦣꦴꦠꦸꦥꦢꦴꦤꦺꦮ ꦈꦢ꧀ꦣꦛꦴꦤꦶ. ‘ꦕꦠ꧀ꦠꦴꦫꦶ ꦱꦕ꧀ꦕꦴꦤꦷ’ꦠꦶꦄꦴꦢꦷꦱꦸ ꦌꦏꦩ꧀ꦥꦶ ꦤ ꦥꦫꦴꦩꦛ꧀ꦜꦁ. ꦪꦱ꧀ꦩꦴ ꦕ ‘‘ꦱꦨꦴꦒꦺꦴ ꦮꦶꦱꦨꦴꦒꦺꦴ’’ꦠꦶ ꦌꦮꦁ ꦭꦏ꧀ꦑꦟꦩꦴꦠꦶꦏꦴ ꦜꦥꦶꦠꦴ, ꦠꦱ꧀ꦩꦴ ꦆꦩꦱ꧀ꦱ ꦥꦚ꧀ꦲꦱ꧀ꦱ ꦮꦶꦱ꧀ꦱꦗ꧀ꦗꦤꦺ ꦫꦹꦥꦏ꧀ꦑꦤ꧀ꦣꦺꦴ ꦌꦏꦺꦤ ꦑꦤ꧀ꦣꦺꦤꦴꦠꦶꦄꦴꦢꦶ ꦮꦸꦠ꧀ꦠꦁ. ꦱꦨꦴꦒꦴ ꦲꦶ ꦠꦱ꧀ꦱ ꦌꦠꦺ ꦑꦤ꧀ꦣꦴꦢꦪꦺꦴꦠꦶ. ꦠꦠ꧀ꦡ ꦌꦏꦺꦤ ꦑꦤ꧀ꦣꦺꦤꦴꦠꦶ ꦫꦹꦥꦏ꧀ꦑꦤ꧀ꦣꦺꦤꦺꦮ. ꦪꦚ꧀ꦲꦶ ꦏꦶꦚ꧀ꦕꦶ ꦫꦹꦥꦁ ꦫꦹꦥꦏ꧀ꦑꦤ꧀ꦣꦱꦨꦴꦒꦠ꧀ꦠꦴ ꦫꦹꦥꦏ꧀ꦑꦤ꧀ꦣꦺꦴꦠ꧀ꦮꦺꦮ ꦱꦔ꧀ꦒꦲꦁ ꦒꦕ꧀ꦖꦠꦷꦠꦶ ꦫꦹꦥꦏ꧀ꦑꦤ꧀ꦣꦺꦤꦺꦮ ꦒꦟꦶꦠꦁ, ꦠꦁ ꦫꦹꦥꦏ꧀ꦑꦤ꧀ꦣꦺꦤꦺꦮ ꦥꦫꦶꦕ꧀ꦖꦶꦤ꧀ꦤꦁ. ꦌꦏꦴꦢꦱꦲꦴꦪꦠꦤꦺꦲꦷꦠꦶ ꦩꦤꦴꦪꦠꦤꦮꦗ꧀ꦗꦺꦲꦶ. ꦱꦧ꧀ꦧꦺꦴꦥꦶ ꦲꦶ ꦫꦹꦥꦏ꧀ꦑꦤ꧀ꦣꦺꦴ ꦢꦱꦴꦪꦠꦤꦴꦤꦶ ꦣꦩ꧀ꦩꦴꦪꦠꦤꦺꦏꦢꦺꦱꦺꦴ ꦕ ꦲꦺꦴꦠꦶ, ꦠꦱ꧀ꦩꦴ ꦌꦏꦴꦢꦱꦲꦴꦪꦠꦤꦺꦲꦶ ꦒꦟꦶꦠꦺꦴ, ꦥꦫꦶꦕ꧀ꦖꦶꦤ꧀ꦤꦺꦴ. ꦌꦏꦴꦢꦱꦲꦶ ꦣꦴꦠꦹꦲꦷꦠꦶ ꦱꦠ꧀ꦠꦮꦶꦚ꧀ꦚꦴꦟꦣꦴꦠꦸꦮꦗ꧀ꦗꦴꦲꦶ ꦌꦏꦴꦢꦱꦲꦶ ꦌꦠꦴꦱꦸ ꦲꦶ ꦄꦥꦫꦶꦪꦴꦥꦤ꧀ꦤꦁ ꦫꦹꦥꦁ ꦤꦴꦩ ꦤꦠ꧀ꦡꦶ.

ꦄꦱꦔ꧀ꦒꦲꦤꦪꦤꦶꦢ꧀ꦢꦺꦱꦺ ꦏꦠꦶꦲꦶ ꦄꦱꦔ꧀ꦒꦲꦶꦠꦺꦴꦠꦶ ꦱꦔ꧀ꦑꦺꦥꦺꦤꦺꦮ ꦥꦸꦕ꧀ꦖꦴ ꦏꦠꦴ. ꦮꦶꦱ꧀ꦱꦗ꧀ꦗꦤꦺ ꦥꦤꦱ꧀ꦱ ꦪꦱ꧀ꦩꦴ ꦫꦹꦥꦏ꧀ꦑꦤ꧀ꦣꦱ꧀ꦱ ꦮꦶꦱꦨꦴꦒꦴ ꦕꦠ꧀ꦠꦴꦫꦺꦴ ꦄꦫꦹꦥꦏ꧀ꦑꦤ꧀ꦣꦴ, ꦌꦏꦁ ꦩꦤꦴꦪꦠꦤꦁ, ꦱꦠ꧀ꦠ ꦮꦶꦚ꧀ꦚꦴꦟꦣꦴꦠꦸꦪꦺꦴ; ꦠꦱ꧀ꦩꦴ ꦕꦠꦹꦲꦶ ꦑꦤ꧀ꦣꦺꦲꦷꦠꦶꦄꦴꦢꦶ ꦮꦸꦠ꧀ꦠꦁ. ꦆꦩꦶꦤꦴ ꦤꦪꦺꦤ ꦱꦧ꧀ꦧꦥꦢꦺꦱꦸ ꦱꦔ꧀ꦒꦲꦴꦱꦔ꧀ꦒꦲꦺꦴ ꦮꦺꦢꦶꦠꦧ꧀ꦧꦺꦴ. ꦆꦩꦱ꧀ꦩꦶꦁ ꦥꦤ ꦑꦤ꧀ꦣꦤꦶꦢ꧀ꦢꦺꦱꦺ – ‘‘ꦫꦹꦥꦏ꧀ꦑꦤ꧀ꦣꦺꦴ ꦏꦠꦶꦲꦶ ꦑꦤ꧀ꦣꦺꦲꦷ’’ꦠꦶꦄꦴꦢꦶꦩ꧀ꦲꦶ ꦠꦴꦮ ꦌꦏꦩꦹꦭꦏꦺ ꦱꦔ꧀ꦒꦲꦤꦪꦺ ꦱꦫꦹꦥꦺꦤꦺꦮ ꦢꦱ꧀ꦱꦶꦠꦴ ꦥꦚ꧀ꦕ ꦥꦸꦕ꧀ꦖꦴ, ꦥꦚ꧀ꦕ ꦮꦶꦱ꧀ꦱꦗ꧀ꦗꦤꦴꦤꦶ. ꦄꦱꦔ꧀ꦒꦲꦤꦪꦺ ꦱꦔ꧀ꦑꦺꦥꦺꦤ ꦢꦱ꧀ꦱꦶꦠꦴ ꦥꦚ꧀ꦕ ꦥꦸꦕ꧀ꦖꦴ, ꦥꦚ꧀ꦕ ꦮꦶꦱ꧀ꦱꦗ꧀ꦗꦤꦴꦤꦶ. ꦆꦩꦶꦤꦴ ꦈꦥꦴꦪꦺꦤ ꦢꦸꦏꦩꦹꦭꦏꦴꦢꦷꦱꦸꦥꦶ ꦥꦸꦕ꧀ꦖꦴꦮꦶꦱ꧀ꦱꦗ꧀ꦗꦤꦴꦤꦶ ꦮꦺꦢꦶꦠꦧ꧀ꦧꦴꦤꦶ. ꦫꦹꦥꦏ꧀ꦑꦤ꧀ꦣꦩꦹꦭꦏꦴꦪꦺꦮ ꦕꦺꦠ꧀ꦡ ꦢꦸꦏꦠꦶꦏꦕꦠꦸꦏ꧀ꦏꦴ ꦢꦱ꧀ꦱꦶꦠꦴ. ꦥꦚ꧀ꦕꦏꦺ ꦥꦤ ‘‘ꦫꦹꦥꦏ꧀ꦑꦤ꧀ꦣꦺꦴ ꦕ…ꦥꦺ… ꦮꦶꦚ꧀ꦚꦴꦟꦏ꧀ꦑꦤ꧀ꦣꦺꦴ ꦕꦴ’’ꦠꦶ ꦌꦮꦁ ꦨꦺꦢꦠꦺꦴ ꦕ, ‘‘ꦥꦚ꧀ꦕꦏ꧀ꦑꦤ꧀ꦣꦴ ꦏꦠꦶꦲꦶ ꦑꦤ꧀ꦣꦺꦲꦷ’’ꦠꦶ ꦌꦮꦁ ꦄꦨꦺꦢꦠꦺꦴ ꦕꦴꦠꦶ ꦢ꧀ꦮꦶꦣꦴ ꦥꦸꦕ꧀ꦖꦴꦮꦶꦱ꧀ꦱꦗ꧀ꦗꦤꦴꦤꦶ ꦏꦠꦴꦤꦶ. ꦌꦮꦁ ꦥꦴꦭ꦳ꦶꦤꦪꦺꦴ ꦮꦺꦢꦶꦠꦧ꧀ꦧꦺꦴꦠꦶ.