꧔. ꦄꦛ꧀ꦜꦏꦡꦴꦏꦟ꧀ꦝꦺꦴ

ꦠꦶꦏꦄꦠ꧀ꦡꦸꦢ꧀ꦣꦴꦫꦮꦟ꧀ꦟꦤꦴ

꧑꧓꧘꧔. ꦆꦢꦴꦤꦶ ꦤꦶꦏ꧀ꦑꦺꦥꦏꦟ꧀ꦝꦴꦤꦤ꧀ꦠꦫꦁ ꦜꦥꦶꦠꦱ꧀ꦱ ꦄꦛ꧀ꦜꦏꦡꦴꦏꦟ꧀ꦝꦱ꧀ꦱ ꦮꦟ꧀ꦟꦤꦴꦏ꧀ꦏꦩꦺꦴ ꦄꦤꦸꦥ꧀ꦥꦠ꧀ꦠꦺꦴ. ꦏꦱ꧀ꦩꦴ ꦥꦤꦺꦠꦁ ꦄꦛ꧀ꦜꦏꦡꦴꦏꦟ꧀ꦝꦁ ꦤꦴꦩ ꦗꦴꦠꦤ꧀ꦠꦶ? ꦠꦺꦥꦶꦛꦏꦱ꧀ꦱ ꦧꦸꦢ꧀ꦣꦮꦕꦤꦱ꧀ꦱ ꦄꦠ꧀ꦡꦁ ꦈꦢ꧀ꦣꦫꦶꦠ꧀ꦮꦴ ꦜꦥꦶꦠꦠ꧀ꦠꦴ. ꦠꦷꦱꦸꦥꦶ ꦲꦶ ꦥꦶꦛꦏꦺꦱꦸ ꦣꦩ꧀ꦩꦤ꧀ꦠꦫꦁ ꦄꦴꦒꦠꦁ ꦄꦛ꧀ꦜꦏꦡꦴꦏꦟ꧀ꦝꦺꦤꦺꦮ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦮꦶꦤꦶꦕ꧀ꦖꦶꦠꦁ ꦱꦸꦮꦶꦤꦶꦕ꧀ꦖꦶꦠꦁ ꦤꦴꦩ ꦲꦺꦴꦠꦶ. ꦱꦏꦭꦺ ꦄꦨꦶꦣꦩ꧀ꦩꦥꦶꦛꦏꦺ ꦤꦪꦩꦒ꧀ꦒꦁ ꦩꦲꦴꦥꦏꦫꦟꦺ ꦥꦚ꧀ꦲꦸꦢ꧀ꦣꦴꦫꦁ ꦒꦟꦤꦕꦴꦫꦁ ꦄꦱꦭ꧀ꦭꦏ꧀ꦑꦺꦤ꧀ꦠꦺꦤꦴꦥꦶ ꦄꦛ꧀ꦜꦏꦡꦴꦏꦟ꧀ꦝꦠꦺꦴꦪꦺꦮ ꦱꦩꦴꦤꦺꦠꦸꦁ ꦮꦛ꧀ꦛꦠꦶ.

ꦏꦸꦠꦺꦴ ꦥꦨꦮꦁ ꦥꦤ ꦌꦠꦤ꧀ꦠꦶ? ꦱꦴꦫꦶꦥꦸꦠ꧀ꦠꦠ꧀ꦡꦺꦫꦥ꧀ꦥꦨꦮꦁ. ꦱꦴꦫꦶꦥꦸꦠ꧀ꦠꦠ꧀ꦡꦺꦫꦺꦴ ꦲꦶ ꦌꦏꦱ꧀ꦱ ꦄꦠ꧀ꦠꦤꦺꦴ ꦱꦢ꧀ꦣꦶꦮꦶꦲꦴꦫꦶꦏꦱ꧀ꦱ ꦤꦶꦏ꧀ꦑꦺꦥꦏꦟ꧀ꦝꦺ ꦄꦠ꧀ꦡꦸꦢ꧀ꦣꦴꦫꦁ ꦱꦭ꧀ꦭꦏ꧀ꦑꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦱ꧀ꦱ ꦄꦛ꧀ꦜꦏꦡꦴꦏꦟ꧀ꦝꦁ ꦏꦡꦺꦠ꧀ꦮꦴ ꦄꦢꦴꦱꦶ. ꦆꦢꦁ ꦥꦤ ꦩꦲꦴꦄꦛ꧀ꦜꦏꦡꦴꦪꦁ ꦥꦛꦶꦏ꧀ꦑꦶꦥꦶꦠ꧀ꦮꦴ ꦆꦢꦁ ꦮꦸꦠ꧀ꦠꦁ – ꦄꦨꦶꦣꦩ꧀ꦩꦺꦴ ꦤꦴꦩ ꦤ ꦱꦴꦮꦏꦮꦶꦱꦪꦺꦴ, ꦤ ꦱꦴꦮꦏꦒꦺꦴꦕꦫꦺꦴ; ꦧꦸꦢ꧀ꦣꦮꦶꦱꦪꦺꦴ ꦌꦱ, ꦧꦸꦢ꧀ꦣꦒꦺꦴꦕꦫꦺꦴ. ꦣꦩ꧀ꦩꦱꦺꦤꦴꦥꦠꦶ ꦥꦤ ꦱꦢ꧀ꦣꦶꦮꦶꦲꦴꦫꦶꦏꦺꦤ ꦥꦸꦕ꧀ꦖꦶꦠꦺꦴ ꦠꦁ ꦄꦴꦢꦴꦪ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦏꦡꦺꦱꦶ. ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦄꦛ꧀ꦜꦏꦡꦴꦏꦟ꧀ꦝꦁ ꦏꦡꦺꦠ꧀ꦮꦴ ꦄꦢꦴꦱꦶ. ꦏꦡꦁ? ꦨꦒꦮꦴ ꦲꦶ ‘ꦏꦠꦩꦺ ꦣꦩ꧀ꦩꦴ ꦏꦸꦱꦭꦴ’ꦠꦶ ꦥꦸꦕ꧀ꦖꦶ. ‘ꦏꦸꦱꦭꦴ ꦣꦩ꧀ꦩꦴ ꦤꦴꦩ ꦏꦠꦩꦺ’ꦠꦶ ꦱꦭ꧀ꦭꦏ꧀ꦑꦺꦱꦷꦠꦶ ꦄꦠ꧀ꦡꦺꦴ. ꦄꦡꦱ꧀ꦱ ꦠꦸꦟ꧀ꦲꦷꦨꦹꦠꦱ꧀ꦱ ‘ꦤꦤꦸ ꦪꦁ ꦩꦪꦴ ꦏꦠꦩꦺ ꦣꦩ꧀ꦩꦴ ꦏꦸꦱꦭꦴ? ꦪꦱ꧀ꦩꦶꦁ ꦱꦩꦪꦺ ꦏꦴꦩꦴꦮꦕꦫꦁ ꦏꦸꦱꦭꦁ ꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦷꦠꦶꦄꦴꦢꦶꦤꦴ ꦤꦪꦺꦤ ꦨꦹꦩꦶꦨꦺꦢꦠꦺꦴ ꦏꦸꦱꦭꦁ ꦢꦱ꧀ꦱꦶꦠꦁ, ꦱꦧ꧀ꦧꦩ꧀ꦥꦶ ꦠꦁ ꦕꦠꦹꦱꦸ ꦨꦹꦩꦷꦱꦸ ꦏꦸꦱꦭꦁ, ꦆꦩꦺ ꦣꦩ꧀ꦩꦴ ꦏꦸꦱꦭꦴ’ꦠꦶ ꦆꦩꦶꦤꦴ ꦤꦪꦺꦤ ꦏꦟ꧀ꦟꦶꦏꦁ ꦏꦟ꧀ꦟꦶꦏꦁ ꦓꦛꦁ ꦓꦛꦁ ꦒꦺꦴꦕ꧀ꦖꦏꦁ ꦒꦺꦴꦕ꧀ꦖꦏꦁ ꦏꦠ꧀ꦮꦴ ꦄꦠ꧀ꦡꦸꦢ꧀ꦣꦴꦫꦮꦱꦺꦤ ꦏꦸꦱꦭꦴꦢꦶꦣꦩ꧀ꦩꦺ ꦢꦱ꧀ꦱꦺꦤ꧀ꦠꦺꦴ ꦏꦡꦺꦠ꧀ꦮꦴ ꦄꦢꦴꦱꦶ.

ꦠꦠ꧀ꦡ ꦕꦠꦹꦱꦹꦠꦶ ꦏꦴꦩꦴꦮꦕꦫꦫꦹꦥꦴꦮꦕꦫꦴꦫꦹꦥꦴꦮꦕꦫꦄꦥꦫꦶꦪꦴꦥꦤ꧀ꦤꦴꦱꦸ. ꦏꦸꦱꦭꦤ꧀ꦠꦶ ꦦꦱ꧀ꦱꦴꦢꦶꦨꦺꦢꦁ ꦏꦸꦱꦭꦁ. ꦆꦩꦺ ꦣꦩ꧀ꦩꦴ ꦏꦸꦱꦭꦴꦠꦶ ꦆꦩꦺ ꦱꦧ꧀ꦧꦺꦥꦶ ꦠꦴꦱꦸ ꦠꦴꦱꦸ ꦨꦹꦩꦷꦱꦸ ꦮꦸꦠ꧀ꦠꦴ ꦦꦱ꧀ꦱꦴꦢꦪꦺꦴ ꦣꦩ꧀ꦩꦴ ꦏꦸꦱꦭꦴ ꦤꦴꦩ.

꧑꧓꧘꧕. ꦄꦏꦸꦱꦭꦴꦤꦁ ꦥꦤ ꦨꦹꦩꦶꦮꦱꦺꦤ ꦨꦺꦢꦴꦨꦴꦮꦠꦺꦴ ꦢ꧀ꦮꦴꦢꦱ ꦄꦏꦸꦱꦭꦕꦶꦠ꧀ꦠꦸꦥ꧀ꦥꦴꦢꦴꦠꦶ ꦄꦴꦲ. ꦠꦠ꧀ꦡ ꦈꦥ꧀ꦥꦗ꧀ꦗꦠꦷꦠꦶ ꦈꦥ꧀ꦥꦴꦢꦺꦴ. ꦕꦶꦠ꧀ꦠꦩꦺꦮ ꦈꦥ꧀ꦥꦴꦢꦺꦴ ꦕꦶꦠ꧀ꦠꦸꦥ꧀ꦥꦴꦢꦺꦴ. ꦢꦺꦱꦤꦴꦱꦷꦱꦩꦺꦮ ꦕꦺꦠꦁ. ꦪꦡꦴ ꦥꦤ ‘ꦫꦴꦗꦴ ꦄꦴꦒꦠꦺꦴ’ꦠꦶ ꦮꦸꦠ꧀ꦠꦺ ꦄꦩꦕ꧀ꦕꦴꦢꦷꦤꦩ꧀ꦥꦶ ꦄꦴꦒꦩꦤꦁ ꦮꦸꦠ꧀ꦠꦩꦺꦮ ꦲꦺꦴꦠꦶ, ꦌꦮꦁ ‘ꦕꦶꦠ꧀ꦠꦸꦥ꧀ꦥꦴꦢꦴ’ꦠꦶ ꦮꦸꦠ꧀ꦠꦺ ꦠꦺꦲꦶ ꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦥꦶ ꦮꦸꦠ꧀ꦠꦴꦮ ꦲꦺꦴꦤ꧀ꦠꦷꦠꦶ. ꦱꦧ꧀ꦧꦠ꧀ꦡ ꦕꦶꦠ꧀ꦠꦸꦥ꧀ꦥꦴꦢꦒ꧀ꦒꦲꦟꦺꦤ ꦱꦱꦩ꧀ꦥꦪꦸꦠ꧀ꦠꦣꦩ꧀ꦩꦁ ꦕꦶꦠ꧀ꦠꦁ ꦒꦲꦶꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦆꦠꦺꦴ ꦥꦫꦁ ꦕꦠꦹꦱꦸ ꦨꦹꦩꦷꦱꦸ ꦮꦶꦥꦴꦏꦺꦴꦠꦶꦄꦴꦢꦷꦤꦁ ꦱꦧ꧀ꦧꦺꦱꦩ꧀ꦥꦶ ꦠꦶꦏꦢꦸꦏꦨꦴꦗꦤꦷꦪꦥꦢꦴꦤꦁ ꦄꦠ꧀ꦡꦺꦴ, ꦮꦺꦢꦤꦴꦠ꧀ꦠꦶꦏꦴꦢꦷꦱꦸ ꦕ ꦱꦸꦑꦴꦢꦷꦤꦁ ꦤꦮꦠ꧀ꦠꦧ꧀ꦧꦠꦴ ꦲꦺꦛ꧀ꦜꦴ ꦮꦸꦠ꧀ꦠꦤꦪꦺꦤꦺꦮ ꦥꦴꦭ꦳ꦶꦪꦠ꧀ꦡꦁ ꦮꦷꦩꦁꦱꦶꦠ꧀ꦮꦴ ꦮꦺꦢꦶꦠꦧ꧀ꦧꦴ. ꦮꦶꦱꦺꦱꦩꦠ꧀ꦠꦩꦺꦮ ꦥꦤ ꦮꦏ꧀ꦑꦴꦩ.

꧑꧔꧒꧐. ꦠꦠ꧀ꦡ ꦥꦫꦶꦠ꧀ꦠꦴꦫꦩ꧀ꦩꦟꦠ꧀ꦠꦶꦏꦺ ꦠꦴꦮ ꦱꦧ꧀ꦧꦺꦴ ꦏꦴꦩꦴꦮꦕꦫꦱ꧀ꦱ ꦮꦶꦥꦴꦏꦺꦴꦠꦶ ꦌꦠ꧀ꦡ ꦢ꧀ꦮꦶꦥꦚ꧀ꦕꦮꦶꦚ꧀ꦚꦴꦟꦴꦤꦶ ꦕꦏ꧀ꦑꦸꦥꦱꦴꦢꦴꦢꦪꦺꦴ ꦤꦶꦱ꧀ꦱꦴꦪ ꦤꦶꦪꦩꦺꦤꦺꦮ ꦆꦛ꧀ꦜꦴꦤꦶꦛ꧀ꦜꦴꦢꦶꦨꦺꦢꦺ ꦫꦹꦥꦱꦢ꧀ꦢꦒꦤ꧀ꦣꦫꦱꦦꦺꦴꦛ꧀ꦜꦧ꧀ꦧꦣꦩ꧀ꦩꦺ ꦄꦴꦫꦧ꧀ꦨ ꦥꦮꦠ꧀ꦠꦤ꧀ꦠꦷꦠꦶ ꦥꦫꦶꦠ꧀ꦠꦴꦫꦩ꧀ꦩꦟꦴꦤꦶ. ꦏꦸꦱꦭꦴꦏꦸꦱꦭꦮꦶꦥꦴꦏꦴ ꦥꦤ ꦢ꧀ꦮꦺ ꦩꦤꦺꦴꦣꦴꦠꦸꦪꦺꦴ ꦲꦢꦪꦮꦠ꧀ꦡꦸꦁ ꦤꦶꦱ꧀ꦱꦴꦪ ꦕꦏ꧀ꦑꦸꦮꦶꦚ꧀ꦚꦴꦟꦴꦢꦷꦤꦁ ꦄꦤꦤ꧀ꦠꦫꦴ ꦤꦶꦪꦩꦠꦺꦴ ꦫꦹꦥꦴꦢꦷꦤꦺꦮ ꦄꦴꦫꦧ꧀ꦨ ꦥꦮꦠ꧀ꦠꦤ꧀ꦠꦷꦠꦶ ꦥꦫꦶꦠ꧀ꦠꦴꦫꦩ꧀ꦩꦟꦴ. ꦏꦸꦱꦭꦮꦶꦥꦴꦏꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸ ꦱꦺꦴꦩꦤꦱ꧀ꦱꦱꦲꦒꦠꦴ ꦥꦚ꧀ꦕꦢ꧀ꦮꦴꦫꦺ ꦱꦤ꧀ꦠꦷꦫꦟꦮꦱꦺꦤ ꦖꦱꦸ ꦢ꧀ꦮꦴꦫꦺꦱꦸ ꦠꦢꦴꦫꦩ꧀ꦩꦟꦮꦱꦺꦤꦴꦠꦶ ꦤꦶꦪꦩꦠꦺꦴ ꦫꦹꦥꦴꦢꦷꦤꦶ ꦖ ꦥꦫꦶꦠ꧀ꦠꦴꦫꦩ꧀ꦩꦟꦴꦤꦺꦮ ꦄꦴꦫꦧ꧀ꦨ ꦥꦮꦠ꧀ꦠꦠꦷꦠꦶ ꦥꦫꦶꦠ꧀ꦠꦴꦫꦩ꧀ꦩꦟꦴ. ꦏꦸꦱꦭꦴꦏꦸꦱꦭꦮꦶꦥꦴꦏꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸꦢ꧀ꦮꦪꦁ ꦥꦚ꧀ꦕꦢ꧀ꦮꦴꦫꦺ ꦱꦤ꧀ꦠꦷꦫꦟꦮꦱꦺꦤ ꦖꦱꦸ ꦢ꧀ꦮꦴꦫꦺꦱꦸ ꦠꦢꦴꦫꦩ꧀ꦩꦟꦮꦱꦺꦤ ꦤꦶꦪꦩꦠꦺꦴ ꦫꦹꦥꦴꦢꦷꦤꦶ ꦖ ꦥꦫꦶꦠ꧀ꦠꦴꦫꦩ꧀ꦩꦟꦴꦤꦺꦮ ꦄꦴꦫꦧ꧀ꦨ ꦥꦮꦠ꧀ꦠꦠꦶ. ꦥꦛꦶꦱꦤ꧀ꦣꦶꦮꦱꦺꦤ ꦥꦮꦠ꧀ꦠꦩꦴꦤꦩ꧀ꦥꦶ ꦥꦫꦶꦠ꧀ꦠꦁ ꦏꦩ꧀ꦩꦁ ꦏꦩ꧀ꦩꦤꦶꦩꦶꦠ꧀ꦠꦁ ꦒꦠꦶꦤꦶꦩꦶꦠ꧀ꦠꦁ ꦮꦴ ꦄꦴꦫꦩ꧀ꦩꦟꦁ ꦏꦫꦺꦴꦠꦶ, ꦥꦮꦠ꧀ꦠꦶꦪꦁ ꦨꦮꦔ꧀ꦒꦮꦱꦺꦤ, ꦥꦫꦶꦪꦺꦴꦱꦴꦤꦺ ꦕꦸꦠꦶꦮꦱꦺꦤ ꦥꦮꦠ꧀ꦠꦩꦴꦤꦩ꧀ꦥꦶ ꦠꦢꦺꦮ ꦄꦴꦫꦩ꧀ꦩꦟꦁ ꦏꦫꦺꦴꦠꦷꦠꦶ ꦥꦫꦶꦠ꧀ꦠꦴꦫꦩ꧀ꦩꦟꦁ. ꦄꦛ꧀ꦜ ꦥꦤ ꦱꦲꦺꦠꦸꦏꦮꦶꦥꦴꦏꦕꦶꦠ꧀ꦠꦸꦥ꧀ꦥꦴꦢꦴ ꦌꦠ꧀ꦡ ꦮꦸꦠ꧀ꦠꦤꦪꦺꦤꦺꦮ ꦠꦢꦴꦫꦩ꧀ꦩꦟꦮꦱꦺꦤ ꦥꦛꦶꦱꦤ꧀ꦣꦶꦨꦮꦔ꧀ꦒꦕꦸꦠꦶꦮꦱꦺꦤ ꦕ ꦥꦫꦶꦠ꧀ꦠꦣꦩ꧀ꦩꦺꦪꦺꦮ ꦄꦴꦫꦧ꧀ꦨ ꦥꦮꦠ꧀ꦠꦤ꧀ꦠꦶ. ꦏꦶꦫꦶꦪꦩꦤꦺꦴꦣꦴꦠꦸ ꦥꦚ꧀ꦕꦢ꧀ꦮꦴꦫꦺ ꦫꦹꦥꦴꦢꦷꦤꦶ ꦄꦴꦫꦧ꧀ꦨ ꦥꦮꦠ꧀ꦠꦠꦶ. ꦱꦺꦴꦩꦤꦱ꧀ꦱꦱꦲꦒꦠꦴꦲꦺꦠꦸꦏꦏꦶꦫꦶꦪꦩꦤꦺꦴꦮꦶꦚ꧀ꦚꦴꦟꦣꦴꦠꦸ ꦖꦱꦸ ꦢ꧀ꦮꦴꦫꦺꦱꦸ ꦥꦕ꧀ꦕꦸꦥ꧀ꦥꦤ꧀ꦤꦺ ꦩꦤꦺꦴꦢ꧀ꦮꦴꦫꦺ ꦄꦠꦷꦠꦴꦤꦴꦒꦠꦺꦥꦶ ꦥꦫꦶꦠ꧀ꦠꦺ ꦫꦹꦥꦴꦢꦶꦣꦩ꧀ꦩꦺꦪꦺꦮ ꦄꦴꦫꦧ꧀ꦨ ꦑꦷꦟꦴꦱꦮꦴꦤꦁ ꦥꦲꦛ꧀ꦜꦴꦏꦴꦫꦁ ꦏꦸꦫꦸꦩꦴꦤꦴ ꦥꦮꦠ꧀ꦠꦠꦷꦠꦶ ꦥꦫꦶꦠ꧀ꦠꦴꦫꦩ꧀ꦩꦟꦴ. ꦌꦮꦩꦶꦩꦺ ꦥꦚ꧀ꦕꦮꦷꦱꦠꦶ ꦕꦶꦠ꧀ꦠꦸꦥ꧀ꦥꦴꦢꦴ ꦌꦏꦤ꧀ꦠꦺꦤꦺꦮ ꦥꦫꦶꦠ꧀ꦠꦴꦫꦩ꧀ꦩꦟꦴꦠꦶ ꦮꦺꦢꦶꦠꦧ꧀ꦧꦴ.

꧑꧔꧒꧑. ꦮꦶꦚ꧀ꦚꦴꦟꦚ꧀ꦕꦴꦪꦠꦤꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦣꦩ꧀ꦩꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦲꦺꦛ꧀ꦜꦶꦩꦁ ꦱꦩꦴꦥꦠ꧀ꦠꦶꦁ ꦄꦴꦫꦧ꧀ꦨ ꦥꦮꦠ꧀ꦠꦤꦠꦺꦴ ꦩꦲꦒ꧀ꦒꦠꦴꦫꦩ꧀ꦩꦟꦴ. ꦌꦮ ꦩꦒ꧀ꦒꦦꦭꦣꦩ꧀ꦩꦴ ꦤꦶꦧ꧀ꦧꦴꦤꦴꦫꦩ꧀ꦩꦟꦠ꧀ꦠꦴ ꦄꦥ꧀ꦥꦩꦴꦟꦴꦫꦩ꧀ꦩꦟꦴ.

ꦏꦸꦱꦭꦠꦺꦴ ꦕꦠ꧀ꦠꦴꦫꦺꦴ ꦏꦶꦫꦶꦪꦠꦺꦴ ꦕꦠ꧀ꦠꦴꦫꦺꦴꦠꦶ ꦄꦛ꧀ꦜ ꦚꦴꦟꦮꦶꦥ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦴ ꦱꦺꦏ꧀ꦑꦥꦸꦡꦸꦗ꧀ꦗꦤꦑꦷꦟꦴꦱꦮꦴꦤꦁ ꦄꦱꦏ꧀ꦏꦕ꧀ꦕꦢꦴꦤꦥꦕ꧀ꦕꦮꦺꦏ꧀ꦑꦟꦣꦩ꧀ꦩꦱꦮꦤꦴꦢꦷꦱꦸ ꦏꦴꦩꦴꦮꦕꦫꦣꦩ꧀ꦩꦺ ꦄꦴꦫꦧ꧀ꦨ ꦥꦮꦠ꧀ꦠꦶꦏꦴꦭꦺ ꦥꦫꦶꦠ꧀ꦠꦴꦫꦩ꧀ꦩꦟꦴ. ꦄꦠꦶꦥꦒꦸꦟꦴꦤꦁ ꦥꦜꦩꦗ꧀ꦙꦴꦤꦴꦢꦷꦤꦁ ꦥꦕ꧀ꦕꦮꦺꦏ꧀ꦑꦟꦏꦴꦭꦺ ꦩꦲꦒ꧀ꦒꦠꦴꦫꦩ꧀ꦩꦟꦴ. ꦏꦱꦶꦟꦤꦶꦩꦶꦠ꧀ꦠꦴꦢꦶꦥꦚ꧀ꦚꦠ꧀ꦠꦶꦥꦕ꧀ꦕꦮꦺꦏ꧀ꦑꦟꦏꦴꦭꦺ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴ. ꦄꦏꦸꦱꦭꦠꦺꦴ ꦕꦠ꧀ꦠꦴꦫꦺꦴ ꦢꦶꦛ꧀ꦜꦶꦒꦠꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦴ ꦥꦚ꧀ꦕꦥꦟ꧀ꦟꦴꦱꦴꦪ ꦏꦴꦩꦴꦮꦕꦫꦣꦩ꧀ꦩꦴꦤꦁ ‘ꦱꦠ꧀ꦠꦺꦴ ꦱꦠ꧀ꦠꦺꦴ’ꦠꦶ ꦥꦫꦴꦩꦱꦤꦄꦱ꧀ꦱꦴꦢꦤꦴꦨꦶꦤꦤ꧀ꦢꦤꦏꦴꦭꦺ ꦥꦫꦶꦠ꧀ꦠꦴꦫꦩ꧀ꦩꦟꦴ. ꦠꦺꦤꦺꦮꦴꦏꦴꦫꦺꦤ ꦱꦠ꧀ꦠꦮꦷꦱꦠꦶ ꦩꦲꦒ꧀ꦒꦠꦣꦩ꧀ꦩꦺ ꦄꦴꦫꦧ꧀ꦨ ꦥꦮꦠ꧀ꦠꦶꦏꦴꦭꦺ ꦩꦲꦒ꧀ꦒꦠꦴꦫꦩ꧀ꦩꦟꦴ. ꦥꦟ꧀ꦟꦠ꧀ꦠꦶꦣꦩ꧀ꦩꦺ ꦄꦴꦫꦧ꧀ꦨ ꦥꦮꦠ꧀ꦠꦤꦏꦴꦭꦺ ꦱꦶꦪꦴ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴ. ꦢꦶꦛ꧀ꦜꦶꦮꦶꦥ꧀ꦥꦪꦸꦠ꧀ꦠꦴꦤꦁ ꦠꦺꦪꦺꦮ ꦣꦩ꧀ꦩꦺ ꦄꦴꦫꦧ꧀ꦨ ꦏꦺꦮꦭꦁ ꦄꦱ꧀ꦱꦴꦢꦤꦴꦨꦶꦤꦤ꧀ꦢꦤꦮꦱꦺꦤ, ꦥꦮꦠ꧀ꦠꦶꦪꦁ ꦥꦛꦶꦓꦱꦩ꧀ꦥꦪꦸꦠ꧀ꦠꦴꦤꦁ ꦢꦺꦴꦩꦤꦱ꧀ꦱꦮꦱꦺꦤ, ꦮꦶꦕꦶꦏꦶꦕ꧀ꦖꦴꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦱ꧀ꦱ ꦄꦤꦶꦛ꧀ꦜꦔ꧀ꦒꦠꦮꦱꦺꦤ, ꦈꦢ꧀ꦣꦕ꧀ꦕꦱꦲꦒꦠꦱ꧀ꦱ ꦮꦶꦏ꧀ꦑꦺꦥꦮꦱꦺꦤ ꦄꦮꦹꦥꦱꦩꦮꦱꦺꦤ ꦕ ꦥꦮꦠ꧀ꦠꦶꦪꦁ ꦥꦫꦶꦠ꧀ꦠꦩꦲꦒ꧀ꦒꦠꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦠꦴ ꦮꦺꦢꦶꦠꦧ꧀ꦧꦴ. ꦌꦠꦺꦱꦸ ꦥꦤ ꦌꦏꦣꦩ꧀ꦩꦺꦴꦥꦶ ꦄꦥ꧀ꦥꦩꦴꦟꦺ ꦄꦴꦫꦧ꧀ꦨ ꦥꦮꦠ꧀ꦠꦶꦠꦸꦁ ꦤ ꦱꦏ꧀ꦏꦺꦴꦠꦶ, ꦠꦱ꧀ꦩꦴ ꦤ ꦄꦥ꧀ꦥꦩꦴꦟꦴꦫꦩ꧀ꦩꦟꦴ.

ꦏꦸꦱꦭꦠꦺꦴ ꦕꦠ꧀ꦠꦴꦫꦺꦴ ꦏꦶꦫꦶꦪꦠꦺꦴ ꦕꦠ꧀ꦠꦴꦫꦺꦴꦠꦶ ꦄꦛ꧀ꦜ ꦚꦴꦟꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦴ ꦱꦺꦏ꧀ꦑꦥꦸꦡꦸꦗ꧀ꦗꦤꦑꦷꦟꦴꦱꦮꦴꦤꦁ ꦱꦏ꧀ꦏꦕ꧀ꦕꦢꦴꦤꦥꦕ꧀ꦕꦮꦺꦏ꧀ꦑꦟꦣꦩ꧀ꦩꦱꦮꦤꦴꦢꦷꦱꦸ ꦪꦡꦴꦮꦸꦠ꧀ꦠꦥ꧀ꦥꦏꦴꦫꦺ ꦣꦩ꧀ꦩꦺ ꦄꦴꦫꦧ꧀ꦨ ꦥꦮꦠ꧀ꦠꦶꦏꦴꦭꦺ ꦥꦫꦶꦠ꧀ꦠꦩꦲꦒ꧀ꦒꦠꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴ ꦲꦺꦴꦤ꧀ꦠꦶ. ꦒꦺꦴꦠ꧀ꦫꦨꦸꦏꦴꦭꦺ ꦭꦺꦴꦏꦸꦠ꧀ꦠꦫꦣꦩ꧀ꦩꦺ ꦥꦕ꧀ꦕꦮꦺꦏ꧀ꦑꦟꦏꦴꦭꦺ ꦕ ꦤꦺꦱꦁ ꦄꦥ꧀ꦥꦩꦴꦟꦴꦫꦩ꧀ꦩꦟꦠꦴ ꦮꦺꦢꦶꦠꦧ꧀ꦧꦴ.

ꦪꦁ ꦥꦤꦺꦠꦁ ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦁ ꦠꦁ ꦱꦧ꧀ꦧꦠ꧀ꦡꦥꦴꦢꦏꦕꦠꦸꦠ꧀ꦡꦁ ꦄꦴꦏꦴꦱꦏꦱꦶꦟꦕꦠꦸꦠ꧀ꦡꦁ ꦄꦴꦭꦺꦴꦏꦏꦱꦶꦟꦕꦠꦸꦠ꧀ꦡꦁ ꦧ꧀ꦫꦲ꧀ꦩꦮꦶꦲꦴꦫꦕꦠꦸꦠ꧀ꦡꦁ ꦄꦴꦤꦴꦥꦴꦤꦕꦠꦸꦠ꧀ꦡꦁ ꦆꦢ꧀ꦣꦶꦮꦶꦣꦕꦠꦸꦠ꧀ꦡꦁ ꦢꦶꦧ꧀ꦧꦱꦺꦴꦠꦕꦠꦸꦠ꧀ꦡꦁ ꦕꦺꦠꦺꦴꦥꦫꦶꦪꦚꦴꦟꦕꦠꦸꦠ꧀ꦡꦁ ꦪꦡꦴꦏꦩ꧀ꦩꦸꦥꦒꦚꦴꦟꦕꦠꦸꦠ꧀ꦡꦁ ꦢꦶꦧ꧀ꦧꦕꦏ꧀ꦑꦸꦚꦴꦟꦕꦠꦸꦠ꧀ꦡꦁ ꦥꦸꦧ꧀ꦧꦺꦤꦶꦮꦴꦱꦚꦴꦟꦕꦠꦸꦠ꧀ꦡꦁ ꦄꦤꦴꦒꦠꦁꦱꦚꦴꦟꦕꦠꦸꦠ꧀ꦡꦤ꧀ꦠꦶ ꦏꦸꦱꦭꦠꦺꦴꦥꦶ ꦏꦶꦫꦶꦪꦠꦺꦴꦥꦶ ꦢ꧀ꦮꦴꦢꦱꦮꦶꦣꦁ ꦲꦺꦴꦠꦶ.

ꦠꦠ꧀ꦡ ‘ꦱꦧ꧀ꦧꦠ꧀ꦡꦥꦴꦢꦏꦕꦠꦸꦠ꧀ꦡꦁ’ ꦤꦴꦩ ꦄꦛ꧀ꦜꦱꦸ ꦏꦱꦶꦟꦺꦱꦸ ꦕꦠꦸꦠ꧀ꦡꦗ꧀ꦙꦴꦤꦁ. ꦠꦚ꧀ꦲꦶ ꦮꦶꦥꦱ꧀ꦱꦤꦴꦪꦥꦶ ꦥꦴꦢꦏꦁ ꦲꦺꦴꦠꦶ, ꦄꦨꦶꦚ꧀ꦚꦴꦤꦩ꧀ꦥꦶ, ꦤꦶꦫꦺꦴꦣꦱ꧀ꦱꦴꦥꦶ, ꦮꦛ꧀ꦛꦱ꧀ꦱꦴꦥꦶ ꦥꦴꦢꦏꦁ ꦲꦺꦴꦠꦶꦪꦺꦮꦴꦠꦶ ꦱꦧ꧀ꦧꦠ꧀ꦡꦥꦴꦢꦏꦤ꧀ꦠꦶ ꦮꦸꦠ꧀ꦠꦁ. ‘ꦄꦴꦏꦴꦱꦏꦱꦶꦟꦄꦴꦭꦺꦴꦏꦏꦱꦶꦟꦕꦠꦸꦠ꧀ꦡꦴꦤꦶ’ ꦥꦤ ꦮꦶꦥꦱ꧀ꦱꦤꦴꦪꦥꦶ ꦄꦨꦶꦚ꧀ꦚꦴꦤꦩ꧀ꦥꦶ ꦮꦛ꧀ꦛꦱ꧀ꦱꦴꦥꦶ ꦥꦴꦢꦏꦴꦤꦶ ꦲꦺꦴꦤ꧀ꦠꦶ, ꦤꦶꦫꦺꦴꦣꦥꦴꦢꦏꦴꦤꦺꦮ ꦤ ꦲꦺꦴꦤ꧀ꦠꦶ. ‘ꦧ꧀ꦫꦲ꧀ꦩꦮꦶꦲꦴꦫꦄꦴꦤꦴꦥꦴꦤꦕꦠꦸꦠ꧀ꦡꦴꦤꦶ’ ꦮꦶꦥꦱ꧀ꦱꦤꦴꦪ ꦕꦺꦮ ꦮꦛ꧀ꦛꦱ꧀ꦱ ꦕ ꦥꦴꦢꦏꦴꦤꦶ ꦲꦺꦴꦤ꧀ꦠꦶ, ꦄꦨꦶꦚ꧀ꦚꦴꦤꦁ ꦥꦤ ꦤꦶꦫꦺꦴꦣꦱ꧀ꦱ ꦕ ꦥꦴꦢꦏꦴꦤꦶ ꦤ ꦲꦺꦴꦤ꧀ꦠꦶ. ꦠꦠ꧀ꦡ ꦢꦱꦮꦶꦣꦩ꧀ꦥꦶ ꦏꦱꦶꦟꦗ꧀ꦙꦴꦤꦁ ꦏꦱꦶꦟꦥꦟ꧀ꦟꦠ꧀ꦠꦶꦁ ꦄꦴꦫꦧ꧀ꦨ ꦥꦮꦠ꧀ꦠꦠ꧀ꦠꦴ, ꦧ꧀ꦫꦲ꧀ꦩꦮꦶꦲꦴꦫꦕꦠꦸꦠ꧀ꦡꦁ ꦱꦠ꧀ꦠꦥꦟ꧀ꦟꦠ꧀ꦠꦶꦁ ꦄꦴꦫꦧ꧀ꦨ ꦥꦮꦠ꧀ꦠꦠ꧀ꦠꦴ, ꦄꦴꦤꦴꦥꦴꦤꦕꦠꦸꦠ꧀ꦡꦁ ꦤꦶꦩꦶꦠ꧀ꦠꦁ ꦄꦴꦫꦧ꧀ꦨ ꦥꦮꦠ꧀ꦠꦠ꧀ꦠꦴ ꦥꦫꦶꦠ꧀ꦠꦴꦢꦶꦮꦱꦺꦤ ꦤꦮꦠ꧀ꦠꦧ꧀ꦧꦣꦩ꧀ꦩꦴꦫꦩ꧀ꦩꦟꦠꦺꦴ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦁ ꦤꦴꦩ ꦲꦺꦴꦠꦶ.

‘ꦆꦢ꧀ꦣꦶꦮꦶꦣꦕꦠꦸꦠ꧀ꦡꦁ’ ꦥꦫꦶꦠ꧀ꦠꦩꦲꦒ꧀ꦒꦠꦴꦫꦩ꧀ꦩꦟꦁ ꦲꦺꦴꦠꦶ. ꦏꦡꦁ? ꦠꦚ꧀ꦲꦶ ꦪꦢꦴ ꦏꦴꦪꦁ ꦕꦶꦠ꧀ꦠꦱꦤ꧀ꦤꦶꦱ꧀ꦱꦶꦠꦁ ꦏꦠ꧀ꦮꦴ ꦄꦢꦶꦱ꧀ꦱꦩꦴꦤꦺꦤ ꦏꦴꦪꦺꦤ ꦒꦤ꧀ꦠꦸꦏꦴꦩꦺꦴ ꦕꦶꦠ꧀ꦠꦮꦱꦺꦤ ꦏꦴꦪꦁ ꦥꦫꦶꦟꦴꦩꦺꦠꦶ, ꦩꦲꦒ꧀ꦒꦠꦕꦶꦠ꧀ꦠꦺ ꦱꦩꦺꦴꦢꦲꦠꦶ, ꦱꦩꦴꦫꦺꦴꦥꦺꦠꦶ, ꦠꦢꦴ ꦈꦥꦪꦺꦴꦒꦭꦢ꧀ꦣꦁ ꦄꦴꦫꦩ꧀ꦩꦟꦁ ꦲꦺꦴꦠꦷꦠꦶ ꦏꦠ꧀ꦮꦴ ꦫꦹꦥꦏꦴꦪꦴꦫꦩ꧀ꦩꦟꦠꦺꦴ ꦥꦫꦶꦠ꧀ꦠꦴꦫꦩ꧀ꦩꦟꦁ ꦲꦺꦴꦠꦶ. ꦪꦢꦴ ꦕꦶꦠ꧀ꦠꦁ ꦏꦴꦪꦱꦤ꧀ꦤꦶꦱ꧀ꦱꦶꦠꦁ ꦏꦠ꧀ꦮꦴ ꦢꦶꦱ꧀ꦱꦩꦴꦤꦺꦤ ꦏꦴꦪꦺꦤ ꦒꦤ꧀ꦠꦸꦏꦴꦩꦺꦴ ꦏꦴꦪꦮꦱꦺꦤ ꦕꦶꦠ꧀ꦠꦁ ꦥꦫꦶꦟꦴꦩꦺꦠꦶ, ꦥꦴꦢꦏꦗ꧀ꦙꦴꦤꦕꦶꦠ꧀ꦠꦁ ꦫꦹꦥꦏꦴꦪꦺ ꦱꦩꦺꦴꦢꦲꦠꦶ, ꦱꦩꦴꦫꦺꦴꦥꦺꦠꦶ, ꦠꦢꦴ ꦈꦥꦪꦺꦴꦒꦭꦢ꧀ꦣꦁ ꦄꦴꦫꦩ꧀ꦩꦟꦁ ꦲꦺꦴꦠꦷꦠꦶ ꦏꦠ꧀ꦮꦴ ꦩꦲꦒ꧀ꦒꦠꦕꦶꦠ꧀ꦠꦴꦫꦩ꧀ꦩꦟꦠꦺꦴ ꦩꦲꦒ꧀ꦒꦠꦴꦫꦩ꧀ꦩꦟꦁ ꦲꦺꦴꦠꦶ.

‘ꦢꦶꦧ꧀ꦧꦱꦺꦴꦠꦕꦠꦸꦠ꧀ꦡꦁ’ ꦱꦢ꧀ꦢꦁ ꦄꦴꦫꦧ꧀ꦨ ꦥꦮꦠ꧀ꦠꦠ꧀ꦠꦴ ꦌꦏꦤ꧀ꦠꦥꦫꦶꦠ꧀ꦠꦴꦫꦩ꧀ꦩꦟꦩꦺꦮ. ‘ꦕꦺꦠꦺꦴꦥꦫꦶꦪꦚꦴꦟꦕꦠꦸꦠ꧀ꦡꦁ’ ꦥꦫꦶꦠ꧀ꦠꦩꦲꦒ꧀ꦒꦠꦄꦥ꧀ꦥꦩꦴꦟꦴꦫꦩ꧀ꦩꦟꦁ ꦲꦺꦴꦠꦶ. ꦏꦡꦁ? ꦠꦚ꧀ꦲꦶ ꦥꦫꦺꦱꦁ ꦏꦴꦩꦴꦮꦕꦫꦕꦶꦠ꧀ꦠꦗꦴꦤꦤꦏꦴꦭꦺ ꦥꦫꦶꦠ꧀ꦠꦴꦫꦩ꧀ꦩꦟꦁ ꦲꦺꦴꦠꦶ, ꦫꦹꦥꦴꦮꦕꦫꦴꦫꦹꦥꦴꦮꦕꦫꦕꦶꦠ꧀ꦠꦗꦴꦤꦤꦏꦴꦭꦺ ꦩꦲꦒ꧀ꦒꦠꦴꦫꦩ꧀ꦩꦟꦁ, ꦩꦒ꧀ꦒꦦꦭꦗꦴꦤꦤꦏꦴꦭꦺ ꦄꦥ꧀ꦥꦩꦴꦟꦴꦫꦩ꧀ꦩꦟꦁ ꦲꦺꦴꦠꦶ. ꦌꦠ꧀ꦡ ꦕ ꦥꦸꦡꦸꦗ꧀ꦗꦤꦺꦴ ꦱꦺꦴꦠꦴꦥꦤ꧀ꦤꦱ꧀ꦱ ꦕꦶꦠ꧀ꦠꦁ ꦤ ꦗꦴꦤꦴꦠꦶ, ꦱꦺꦴꦠꦴꦥꦤ꧀ꦤꦺꦴ ꦮꦴ ꦱꦏꦢꦴꦒꦴꦩꦶꦱ꧀ꦱꦴꦠꦶ ꦌꦮꦁ ꦪꦴꦮ ꦄꦫꦲꦠꦺꦴ ꦤꦺꦠꦧ꧀ꦧꦁ. ꦄꦫꦲꦴ ꦥꦤ ꦱꦧ꧀ꦧꦺꦱꦁ ꦕꦶꦠ꧀ꦠꦁ ꦗꦴꦤꦴꦠꦶ. ꦄꦚ꧀ꦚꦺꦴꦥꦶ ꦕ ꦈꦥꦫꦶꦩꦺꦴ ꦲꦺꦛ꧀ꦜꦶꦩꦱ꧀ꦱꦴꦠꦶ ꦄꦪꦁ ꦮꦶꦱꦺꦱꦺꦴ ꦮꦺꦢꦶꦠꦧ꧀ꦧꦺꦴ. ‘ꦪꦡꦴꦏꦩ꧀ꦩꦸꦥꦒꦚꦴꦟꦕꦠꦸꦠ꧀ꦡꦁ’ ꦏꦴꦩꦴꦮꦕꦫꦏꦩ꧀ꦩꦗꦴꦤꦤꦏꦴꦭꦺ ꦥꦫꦶꦠ꧀ꦠꦴꦫꦩ꧀ꦩꦟꦁ ꦲꦺꦴꦠꦶ, ꦫꦹꦥꦴꦮꦕꦫꦴꦫꦹꦥꦴꦮꦕꦫꦏꦩ꧀ꦩꦗꦴꦤꦤꦏꦴꦭꦺ ꦩꦲꦒ꧀ꦒꦠꦴꦫꦩ꧀ꦩꦟꦁ.

‘ꦢꦶꦧ꧀ꦧꦕꦏ꧀ꦑꦸꦚꦴꦟꦕꦠꦸꦠ꧀ꦡꦁ’ ꦫꦹꦥꦴꦫꦩ꧀ꦩꦟꦠ꧀ꦠꦴ ꦌꦏꦤ꧀ꦠꦥꦫꦶꦠ꧀ꦠꦴꦫꦩ꧀ꦩꦟꦩꦺꦮ. ‘ꦥꦸꦧ꧀ꦧꦺꦤꦶꦮꦴꦱꦚꦴꦟꦕꦠꦸꦠ꧀ꦡꦁ’ ꦥꦫꦶꦠ꧀ꦠꦩꦲꦒ꧀ꦒꦠꦄꦥ꧀ꦥꦩꦴꦟꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦁ ꦲꦺꦴꦠꦶ. ꦏꦡꦁ? ꦠꦚ꧀ꦲꦶ ꦏꦴꦩꦴꦮꦕꦫꦏ꧀ꦑꦤ꧀ꦣꦴꦤꦸꦱ꧀ꦱꦫꦟꦏꦴꦭꦺ ꦥꦫꦶꦠ꧀ꦠꦴꦫꦩ꧀ꦩꦟꦁ ꦲꦺꦴꦠꦶ. ꦫꦹꦥꦴꦮꦕꦫꦴꦫꦹꦥꦴꦮꦕꦫꦏ꧀ꦑꦤ꧀ꦣꦴꦤꦸꦱ꧀ꦱꦫꦟꦏꦴꦭꦺ ꦩꦲꦒ꧀ꦒꦠꦴꦫꦩ꧀ꦩꦟꦁ. ꦄꦠꦷꦠꦺ ꦄꦠ꧀ꦠꦤꦴ ꦮꦴ ꦥꦫꦺꦲꦶ ꦮꦴ ꦨꦴꦮꦶꦠꦩꦒ꧀ꦒꦁ ꦱꦕ꧀ꦖꦶꦏꦠꦦꦭꦚ꧀ꦕ ꦄꦤꦸꦱ꧀ꦱꦫꦟꦏꦴꦭꦺ ꦄꦥ꧀ꦥꦩꦴꦟꦴꦫꦩ꧀ꦩꦟꦁ. ꦄꦠꦷꦠꦺ ꦧꦸꦢ꧀ꦣꦴ ꦩꦒ꧀ꦒꦁ ꦨꦴꦮꦪꦶꦁꦱꦸ, ꦦꦭꦁ ꦱꦕ꧀ꦖꦴꦏꦁꦱꦸ, ꦤꦶꦧ꧀ꦧꦴꦤꦣꦴꦠꦸꦪꦴ ꦥꦫꦶꦤꦶꦧ꧀ꦧꦴꦪꦶꦁꦱꦹꦠꦶ ꦖꦶꦤ꧀ꦤꦮꦛꦸꦩꦏꦴꦤꦸꦱ꧀ꦱꦫꦟꦮꦱꦺꦤ ꦩꦒ꧀ꦒꦦꦭꦤꦶꦧ꧀ꦧꦴꦤꦥꦕ꧀ꦕꦮꦺꦏ꧀ꦑꦟꦠꦺꦴꦥꦶ ꦄꦥ꧀ꦥꦩꦴꦟꦴꦫꦩ꧀ꦩꦟꦁ. ꦄꦠꦷꦠꦺ ‘ꦮꦶꦥꦱ꧀ꦱꦷ ꦤꦴꦩ ꦨꦒꦮꦴ’ ꦄꦲꦺꦴꦱꦶ. ꦠꦱ꧀ꦱ ‘ꦧꦤ꧀ꦣꦸꦩꦠꦷ ꦤꦴꦩ ꦤꦒꦫꦁ ꦄꦲꦺꦴꦱꦶ, ꦧꦤ꧀ꦣꦸꦩꦴ ꦤꦴꦩ ꦫꦴꦗꦴ ꦥꦶꦠꦴ, ꦧꦤ꧀ꦣꦸꦩꦠꦷ ꦤꦴꦩ ꦩꦴꦠꦴ’ꦠꦶꦄꦴꦢꦶꦤꦴ ꦤꦪꦺꦤ ꦤꦴꦩꦒꦺꦴꦠ꧀ꦠꦥꦡꦮꦷꦤꦶꦩꦶꦠ꧀ꦠꦴꦢꦶꦄꦤꦸꦱ꧀ꦱꦫꦟꦏꦴꦭꦺ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦁ ꦲꦺꦴꦠꦶ.

‘ꦄꦤꦴꦒꦠꦁꦱꦚꦴꦟꦕꦠꦸꦠ꧀ꦡꦺ’ꦥꦶ ꦌꦱꦺꦮ ꦤꦪꦺꦴ. ꦠꦩ꧀ꦥꦶ ꦄꦪꦁ ꦄꦤꦴꦒꦠꦺ ‘ꦏꦴꦩꦴꦮꦕꦫꦺ ꦤꦶꦧ꧀ꦧꦠ꧀ꦠꦶꦱ꧀ꦱꦠꦷ’ꦠꦶ ꦗꦴꦤꦤꦏꦴꦭꦺ ꦥꦫꦶꦠ꧀ꦠꦴꦫꦩ꧀ꦩꦟꦁ ꦲꦺꦴꦠꦶ. ‘ꦫꦹꦥꦴꦮꦕꦫꦺ ꦮꦴ ꦄꦫꦹꦥꦴꦮꦕꦫꦺ ꦮꦴ ꦤꦶꦧ꧀ꦧꦠ꧀ꦠꦶꦱ꧀ꦱꦠꦷ’ꦠꦶ ꦗꦴꦤꦤꦏꦴꦭꦺ ꦩꦲꦒ꧀ꦒꦠꦴꦫꦩ꧀ꦩꦟꦁ. ‘ꦩꦒ꧀ꦒꦁ ꦨꦴꦮꦺꦱ꧀ꦱꦠꦶ ꦦꦭꦁ ꦱꦕ꧀ꦖꦶꦏꦫꦶꦱ꧀ꦱꦠꦶ’ ‘ꦤꦶꦧ꧀ꦧꦴꦤꦣꦴꦠꦸꦪꦴ ꦥꦫꦶꦤꦶꦧ꧀ꦧꦴꦪꦶꦱ꧀ꦱꦠꦷ’ꦠꦶ ꦗꦴꦤꦤꦏꦴꦭꦺ ꦄꦥ꧀ꦥꦩꦴꦟꦴꦫꦩ꧀ꦩꦟꦁ. ꦄꦤꦴꦒꦠꦺ ‘‘ꦩꦺꦠ꧀ꦠꦺꦪ꧀ꦪꦺꦴ ꦤꦴꦩ ꦨꦒꦮꦴ ꦈꦥ꧀ꦥꦗ꧀ꦗꦶꦱ꧀ꦱꦠꦶ, ꦱꦸꦧ꧀ꦫꦲ꧀ꦩꦴ ꦤꦴꦩꦱ꧀ꦱ ꦧ꧀ꦫꦴꦲ꧀ꦩꦟꦺꦴ ꦥꦶꦠꦴ ꦨꦮꦶꦱ꧀ꦱꦠꦶ, ꦧ꧀ꦫꦲ꧀ꦩꦮꦠꦷ ꦤꦴꦩ ꦧ꧀ꦫꦴꦲ꧀ꦩꦟꦷ ꦩꦴꦠꦴ ꦨꦮꦶꦱ꧀ꦱꦠꦷ’’ꦠꦶꦄꦴꦢꦶꦤꦴ ꦤꦪꦺꦤ ꦤꦴꦩꦒꦺꦴꦠ꧀ꦠꦗꦴꦤꦤꦏꦴꦭꦺ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦁ ꦲꦺꦴꦠꦶ.

ꦄꦫꦹꦥꦴꦮꦕꦫꦕꦠꦸꦠ꧀ꦡꦁ ꦥꦤ ꦄꦴꦱꦮꦴꦤꦁ ꦑꦪꦕꦠꦸꦠ꧀ꦡꦚ꧀ꦕ ꦥꦴꦭ꦳ꦶꦪꦁ ꦄꦴꦒꦠꦛ꧀ꦜꦴꦤꦺꦪꦺꦮ ꦏꦡꦺꦱ꧀ꦱꦴꦩꦶ. ꦏꦶꦫꦶꦪꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸ ꦈꦥꦺꦏ꧀ꦑꦴꦱꦲꦒꦠꦴ ꦱꦧ꧀ꦧꦺꦱꦩ꧀ꦥꦶ ꦌꦠꦺꦱꦁ ꦏꦸꦱꦭꦴꦏꦸꦱꦭꦏꦶꦫꦶꦪꦕꦶꦠ꧀ꦠꦴꦤꦁ ꦥꦸꦫꦺꦕꦴꦫꦶꦏꦴ. ꦠꦱ꧀ꦱꦴ ꦠꦺꦱꦸ ꦮꦸꦠ꧀ꦠꦤꦪꦺꦤꦺꦮ ꦄꦴꦫꦩ꧀ꦩꦟꦨꦺꦢꦺꦴ ꦮꦺꦢꦶꦠꦧ꧀ꦧꦺꦴ. ꦥꦚ꧀ꦕꦢ꧀ꦮꦴꦫꦺ ꦥꦤ ꦮꦺꦴꦛ꧀ꦜꦧ꧀ꦧꦤꦮꦱꦺꦤ ꦥꦮꦠ꧀ꦠꦶꦪꦁ ꦌꦏꦤ꧀ꦠꦥꦫꦶꦠ꧀ꦠꦴꦫꦩ꧀ꦩꦟꦴꦮ ꦲꦺꦴꦠꦶ. ꦫꦹꦥꦴꦮꦕꦫꦠꦶꦏꦕꦠꦸꦏ꧀ꦏꦗ꧀ꦙꦴꦤꦴꦢꦷꦤꦶ ꦥꦫꦶꦠ꧀ꦠꦴꦢꦶꦨꦴꦮꦺꦤ ꦤꦮꦠ꧀ꦠꦧ꧀ꦧꦣꦩ꧀ꦩꦁ ꦄꦴꦫꦧ꧀ꦨ ꦥꦮꦠ꧀ꦠꦶꦠꦺꦴ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴꦤꦶ. ꦌꦠ꧀ꦡ ꦲꦶ ꦫꦹꦥꦴꦮꦕꦫꦴꦤꦶ ꦥꦡꦮꦷꦏꦱꦶꦟꦴꦢꦷꦱꦸ ꦥꦮꦠ꧀ꦠꦤ꧀ꦠꦶ, ꦄꦴꦏꦴꦱꦴꦤꦚ꧀ꦕꦴꦪꦠꦤꦁ ꦈꦒ꧀ꦓꦴꦛꦶꦩꦴꦏꦴꦱꦺ, ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦮꦶꦚ꧀ꦚꦴꦟꦴꦥꦒꦩꦺꦠꦶ.

꧑꧔꧒꧙. ꦩꦒ꧀ꦒꦴꦫꦩ꧀ꦩꦟꦠ꧀ꦠꦶꦏꦺ ꦄꦴꦢꦶꦩ꧀ꦲꦶ ꦮꦸꦠ꧀ꦠꦴ ꦄꦛ꧀ꦜ ꦚꦴꦟꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦴ ꦱꦺꦏ꧀ꦑꦴꦱꦺꦏ꧀ꦑꦴꦤꦁ ꦄꦠ꧀ꦠꦤꦴ ꦥꦛꦶꦮꦶꦢ꧀ꦣꦩꦒ꧀ꦒꦴꦤꦁ ꦥꦕ꧀ꦕꦮꦺꦏ꧀ꦑꦟꦏꦴꦭꦺ ꦩꦒ꧀ꦒꦴꦫꦩ꧀ꦩꦟꦴ, ꦩꦒ꧀ꦒꦺꦤ ꦥꦤ ꦄꦱꦲꦗꦴꦠꦠ꧀ꦠꦴ ꦤ ꦩꦒ꧀ꦒꦲꦺꦠꦸꦏꦴ, ꦄꦠ꧀ꦠꦤꦴ ꦥꦛꦶꦮꦶꦢ꧀ꦣꦩꦒ꧀ꦒꦁ ꦒꦫꦸꦁ ꦏꦠ꧀ꦮꦴ ꦥꦕ꧀ꦕꦮꦺꦏ꧀ꦑꦟꦏꦴꦭꦺ ꦄꦴꦫꦩ꧀ꦩꦟꦴꦣꦶꦥꦠꦶꦮꦱꦺꦤ ꦩꦒ꧀ꦒꦴꦣꦶꦥꦠꦶꦤꦺꦴ, ꦄꦚ꧀ꦚꦣꦩ꧀ꦩꦴꦫꦩ꧀ꦩꦟꦏꦴꦭꦺ ꦤ ꦮꦠ꧀ꦠꦧ꧀ꦧꦴ ꦩꦒ꧀ꦒꦴꦫꦩ꧀ꦩꦟꦴꦠꦶꦥꦶ ꦩꦒ꧀ꦒꦴꦣꦶꦥꦠꦶꦤꦺꦴꦠꦶꦥꦶ. ꦕꦠ꧀ꦠꦴꦫꦺꦴ ꦄꦫꦶꦪꦩꦒ꧀ꦒꦴ ꦩꦒ꧀ꦒꦱꦔ꧀ꦑꦴꦠꦱ꧀ꦱ ꦩꦒ꧀ꦒꦱꦩ꧀ꦥꦪꦸꦠ꧀ꦠꦱ꧀ꦱ ꦮꦴ ꦲꦺꦠꦸꦤꦺꦴ ꦄꦠ꧀ꦡꦶꦠꦴꦪ ꦌꦏꦤ꧀ꦠꦠꦺꦴ ꦩꦒ꧀ꦒꦲꦺꦠꦸꦏꦴꦮ. ꦮꦷꦫꦶꦪꦁ ꦥꦤ ꦮꦷꦩꦁꦱꦁ ꦮꦴ ꦗꦺꦛ꧀ꦜꦏꦁ ꦏꦠ꧀ꦮꦴ ꦩꦒ꧀ꦒꦨꦴꦮꦤꦴꦏꦴꦭꦺ ꦱꦲꦗꦴꦠꦴꦣꦶꦥꦠꦶꦤꦴ ꦱꦶꦪꦴ ꦩꦒ꧀ꦒꦴꦣꦶꦥꦠꦶꦤꦺꦴ, ꦖꦤ꧀ꦢꦕꦶꦠ꧀ꦠꦴꦤꦁ ꦄꦚ꧀ꦚꦠꦫꦗꦺꦛ꧀ꦜꦏꦏꦴꦭꦺ ꦱꦶꦪꦴ ꦤ ꦮꦠ꧀ꦠꦧ꧀ꦧꦴ ꦩꦒ꧀ꦒꦴꦣꦶꦥꦠꦶꦤꦺꦴꦠꦶ.

ꦢ꧀ꦮꦴꦢꦱꦮꦶꦣꦺ ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦺ ꦱꦧ꧀ꦧꦠ꧀ꦡꦥꦴꦢꦏꦕꦠꦸꦠ꧀ꦡꦴꦢꦷꦤꦶ ꦤꦮ ꦙꦴꦤꦴꦤꦶ ꦤꦺꦮ ꦩꦒ꧀ꦒꦴꦫꦩ꧀ꦩꦟꦴꦤꦶ ꦤ ꦩꦒ꧀ꦒꦲꦺꦠꦸꦏꦴꦤꦶ ꦤ ꦩꦒ꧀ꦒꦴꦣꦶꦥꦠꦷꦤꦶ. ꦕꦺꦠꦺꦴꦥꦫꦶꦪꦚꦴꦟꦥꦸꦧ꧀ꦧꦺꦤꦶꦮꦴꦱꦚꦴꦟꦄꦤꦴꦒꦠꦁꦱꦚꦴꦟꦕꦠꦸꦠ꧀ꦡꦴꦤꦶ ꦥꦤ ꦄꦫꦶꦪꦴꦤꦁ ꦩꦒ꧀ꦒꦕꦶꦠ꧀ꦠꦗꦴꦤꦤꦏꦴꦭꦺ ꦩꦒ꧀ꦒꦴꦫꦩ꧀ꦩꦟꦴꦤꦶ ꦲꦺꦴꦤ꧀ꦠꦶ, ꦩꦒ꧀ꦒꦺꦤ ꦥꦤ ꦄꦱꦲꦗꦴꦠꦠ꧀ꦠꦴ ꦤ ꦩꦒ꧀ꦒꦲꦺꦠꦸꦏꦴꦤꦶ, ꦩꦒ꧀ꦒꦁ ꦒꦫꦸꦁ ꦏꦠ꧀ꦮꦴ ꦄꦥ꧀ꦥꦮꦠ꧀ꦠꦶꦠꦺꦴ ꦤ ꦩꦒ꧀ꦒꦴꦣꦶꦥꦠꦷꦤꦶ. ꦏꦱ꧀ꦩꦴ ꦥꦤꦺꦠꦴꦤꦶ ꦤ ꦩꦒ꧀ꦒꦁ ꦒꦫꦸꦁ ꦏꦫꦺꦴꦤ꧀ꦠꦷꦠꦶ? ꦄꦠ꧀ꦠꦤꦺꦴ ꦩꦲꦒ꧀ꦒꦠꦠꦴꦪ. ꦪꦡꦴ ꦲꦶ ꦫꦴꦗꦴꦤꦁ ꦱꦧ꧀ꦧꦺꦴ ꦭꦺꦴꦏꦺꦴ ꦒꦫꦸꦁ ꦏꦫꦺꦴꦠꦶ, ꦩꦴꦠꦴꦥꦶꦠꦫꦺꦴ ꦥꦤ ꦤ ꦏꦫꦺꦴꦤ꧀ꦠꦶ. ꦤ ꦲꦶ ꦠꦺ ꦫꦴꦗꦴꦤꦁ ꦢꦶꦱ꧀ꦮꦴ ꦄꦴꦱꦤꦴ ꦮꦸꦛ꧀ꦜꦲꦤ꧀ꦠꦶ, ꦤ ꦄꦚ꧀ꦗꦭꦶꦏꦩ꧀ꦩꦴꦢꦷꦤꦶ ꦏꦫꦺꦴꦤ꧀ꦠꦶ, ꦢꦲꦫꦏꦴꦭꦺ ꦮꦺꦴꦲꦫꦶꦠꦤꦪꦺꦤꦺꦮ ꦮꦺꦴꦲꦫꦤ꧀ꦠꦶ. ꦌꦮꦩꦺꦠꦴꦤꦶꦥꦶ ꦄꦠ꧀ꦠꦤꦺꦴ ꦩꦲꦒ꧀ꦒꦠꦠꦴꦪ ꦤ ꦩꦒ꧀ꦒꦁ ꦒꦫꦸꦁ ꦏꦫꦺꦴꦤ꧀ꦠꦶ.

ꦏꦶꦫꦶꦪꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸꦥꦶ ꦄꦫꦶꦪꦴꦤꦁ ꦩꦒ꧀ꦒꦥꦕ꧀ꦕꦮꦺꦏ꧀ꦑꦟꦏꦴꦭꦺ ꦥꦕ꧀ꦕꦮꦺꦏ꧀ꦑꦟꦥꦸꦫꦺꦕꦴꦫꦶꦏꦠ꧀ꦠꦴ ꦩꦒ꧀ꦒꦴꦫꦩ꧀ꦩꦟꦴ ꦲꦺꦴꦠꦶ, ꦩꦒ꧀ꦒꦺꦤ ꦄꦱꦲꦗꦴꦠꦠ꧀ꦠꦴ ꦥꦤ ꦤ ꦩꦒ꧀ꦒꦲꦺꦠꦸꦏꦴ, ꦩꦒ꧀ꦒꦁ ꦒꦫꦸꦁ ꦏꦠ꧀ꦮꦴ ꦄꦥ꧀ꦥꦮꦠ꧀ꦠꦶꦠꦺꦴ ꦤ ꦩꦒ꧀ꦒꦴꦣꦶꦥꦠꦶ. ꦏꦱ꧀ꦩꦴ ꦒꦫꦸꦁ ꦤ ꦏꦫꦺꦴꦠꦷꦠꦶ? ꦄꦠ꧀ꦠꦤꦺꦴ ꦄꦲꦺꦠꦸꦏꦠꦴꦪ ꦲꦷꦤꦠꦴꦪ ꦗꦭ꦳ꦠꦴꦪ. ꦪꦡꦴ ꦲꦶ ꦫꦴꦗꦴꦤꦁ ꦱꦧ꧀ꦧꦺꦴ ꦭꦺꦴꦏꦺꦴ ꦒꦫꦸꦁ ꦏꦫꦺꦴꦠꦶ, ꦄꦠ꧀ꦠꦤꦺꦴ ꦥꦫꦶꦗꦤꦴ ꦥꦤ ꦑꦸꦗ꧀ꦗꦮꦴꦩꦤꦏꦕꦺꦛꦏꦴꦢꦪꦺꦴ ꦄꦠ꧀ꦠꦤꦺꦴ ꦄꦚ꧀ꦚꦴꦟꦠꦴꦪ ꦥꦟ꧀ꦝꦶꦠꦩꦤꦸꦱ꧀ꦱꦴ ꦮꦶꦪ ꦤꦴꦠꦶꦒꦫꦸꦁ ꦏꦫꦺꦴꦤ꧀ꦠꦶ, ꦌꦮꦩꦺꦮ ꦆꦢꦩ꧀ꦥꦶ ꦕꦶꦠ꧀ꦠꦁ ꦄꦠ꧀ꦠꦤꦺꦴ ꦄꦲꦺꦠꦸꦏꦠꦴꦪ ꦲꦷꦤꦠꦴꦪ ꦗꦭ꦳ꦠꦴꦪ ꦩꦒ꧀ꦒꦁ ꦒꦫꦸꦁ ꦤ ꦏꦫꦺꦴꦠꦶ.

ꦚꦴꦟꦮꦶꦥ꧀ꦥꦪꦸꦠ꧀ꦠꦏꦸꦱꦭꦴꦢꦷꦤꦶ ꦚꦴꦟꦴꦨꦴꦮꦺꦤ ꦕꦺꦮ ꦭꦺꦴꦏꦶꦪꦣꦩ꧀ꦩꦴꦫꦩ꧀ꦩꦟꦠꦴꦪ ꦕ ꦩꦒ꧀ꦒꦴꦫꦩ꧀ꦩꦟꦴꦢꦶꦨꦴꦮꦁ ꦤ ꦭꦨꦤ꧀ꦠꦶ, ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴꦤꦺꦮ ꦲꦺꦴꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦴꦤꦷꦠꦶ.

꧑꧔꧓꧒. ꦄꦠꦷꦠꦴꦫꦩ꧀ꦩꦟꦠ꧀ꦠꦶꦏꦺ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦣꦩ꧀ꦩꦴ ꦲꦺꦛ꧀ꦜꦴ ꦄꦠꦷꦠꦱꦩꦴꦥꦠ꧀ꦠꦶꦁ ꦄꦴꦫꦧ꧀ꦨ ꦥꦮꦠ꧀ꦠꦶꦠꦴ ꦌꦏꦤ꧀ꦠꦺꦤ ꦄꦠꦷꦠꦴꦫꦩ꧀ꦩꦟꦴꦮ.

꧑꧔꧓꧓. ꦤꦶꦪꦺꦴꦒꦴ ꦄꦤꦴꦒꦠꦴꦫꦩ꧀ꦩꦟꦴ ꦤꦠ꧀ꦡꦷꦠꦶ ꦤꦶꦪꦩꦺꦤ ꦥꦴꦛꦶꦪꦺꦏ꧀ꦏꦁ ꦕꦶꦠ꧀ꦠꦁ ꦄꦤꦴꦒꦠꦴꦫꦩ꧀ꦩꦟꦁ ꦤꦴꦩ ꦤꦠ꧀ꦡꦶ. ꦤꦤꦸ ꦕ ꦄꦤꦴꦒꦠꦁꦱꦚꦴꦟꦁ ꦌꦏꦤ꧀ꦠꦺꦤ ꦄꦤꦴꦒꦠꦴꦫꦩ꧀ꦩꦟꦁ, ꦕꦺꦠꦺꦴꦥꦫꦶꦪꦚꦴꦟꦩ꧀ꦥꦶ ꦄꦤꦴꦒꦠꦁ ꦄꦴꦫꦧ꧀ꦨ ꦥꦮꦠ꧀ꦠꦠꦷꦠꦶ? ꦤꦺꦴ ꦤ ꦥꦮꦠ꧀ꦠꦠꦶ. ꦥꦴꦛꦶꦪꦺꦏ꧀ꦏꦁ ꦥꦤ ꦌꦠꦁ ꦌꦏꦁ ꦕꦶꦠ꧀ꦠꦁ ꦤꦴꦩ ꦤꦠ꧀ꦡꦶ. ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦺꦤ ꦱꦔ꧀ꦒꦲꦶꦠꦠ꧀ꦠꦴ ꦄꦚ꧀ꦚꦺꦲꦶ ꦩꦲꦒ꧀ꦒꦠꦕꦶꦠ꧀ꦠꦺꦲꦶ ꦩꦶꦱ꧀ꦱꦏꦁ ꦲꦺꦴꦠꦶ. ꦠꦺꦤ ꦮꦸꦠ꧀ꦠꦁ ‘ꦤꦶꦪꦺꦴꦒꦴ ꦄꦤꦴꦒꦠꦴꦫꦩ꧀ꦩꦟꦴ ꦤꦠ꧀ꦡꦷ’ꦠꦶ.

꧑꧔꧓꧔. ꦢ꧀ꦮꦶꦥꦚ꧀ꦕꦮꦶꦚ꧀ꦚꦴꦟꦴꦤꦶ, ꦠꦶꦱ꧀ꦱꦺꦴ ꦩꦤꦺꦴꦣꦴꦠꦸꦪꦺꦴ ꦕ ꦥꦕ꧀ꦕꦸꦥ꧀ꦥꦤ꧀ꦤꦺꦱꦸ ꦫꦹꦥꦴꦢꦷꦱꦸ ꦥꦮꦠ꧀ꦠꦶꦠꦺꦴ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴ ꦤꦴꦩ. ꦢꦱ ꦕꦶꦠ꧀ꦠꦸꦥ꧀ꦥꦴꦢꦴꦠꦶ ꦌꦠ꧀ꦡ ꦄꦛ꧀ꦜ ꦠꦴꦮ ꦱꦲꦺꦠꦸꦏꦴ ꦢꦺꦮꦩꦤꦸꦱ꧀ꦱꦴꦤꦁ ꦥꦛꦶꦱꦤ꧀ꦣꦶꦒ꧀ꦒꦲꦟꦏꦴꦭꦺ ꦏꦩ꧀ꦩꦁ ꦮꦴ ꦏꦩ꧀ꦩꦤꦶꦩꦶꦠ꧀ꦠꦁ ꦮꦴ ꦄꦴꦫꦧ꧀ꦨ ꦥꦮꦠ꧀ꦠꦶꦪꦁ ꦄꦠꦷꦠꦴꦫꦩ꧀ꦩꦟꦴ. ꦨꦮꦔ꧀ꦒꦕꦸꦠꦶꦏꦴꦭꦺꦱꦸꦥꦶ ꦌꦱꦺꦮ ꦤꦪꦺꦴ. ꦒꦠꦶꦤꦶꦩꦶꦠ꧀ꦠꦁ ꦥꦤ ꦄꦴꦫꦧ꧀ꦨ ꦥꦛꦶꦱꦤ꧀ꦣꦶꦒ꧀ꦒꦲꦟꦏꦴꦭꦺ ꦠꦠꦺꦴ ꦥꦫꦁ ꦨꦮꦔ꧀ꦒꦏꦴꦭꦺ ꦕ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴ. ꦠꦡꦴ ꦥꦚ꧀ꦕꦢ꧀ꦮꦴꦫꦺ ꦠꦢꦴꦫꦩ꧀ꦩꦟꦮꦱꦺꦤ ꦥꦮꦠ꧀ꦠꦶꦪꦁ. ꦩꦤꦺꦴꦢ꧀ꦮꦴꦫꦺ ꦥꦤ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴꦤꦁ ꦗꦮꦤꦴꦤꦁ ꦄꦴꦫꦩ꧀ꦩꦟꦁ ꦒꦲꦺꦠ꧀ꦮꦴ ꦥꦮꦠ꧀ꦠꦶꦠꦺꦴ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴ. ‘ꦏꦸꦱꦭꦮꦶꦥꦴꦏꦴꦲꦺꦠꦸꦏꦈꦥꦺꦏ꧀ꦑꦴꦱꦲꦒꦠꦩꦤꦺꦴꦮꦶꦚ꧀ꦚꦴꦟꦣꦴꦠꦸꦪ’ꦩ꧀ꦥꦶ ꦌꦱꦺꦮ ꦤꦪꦺꦴ. ꦏꦺꦮꦭꦚ꧀ꦲꦶ ꦱꦴ ꦩꦤꦸꦱ꧀ꦱꦺꦱꦸ ꦗꦕ꧀ꦕꦤ꧀ꦣꦴꦢꦷꦤꦁ ꦥꦛꦶꦱꦤ꧀ꦣꦶ ꦲꦺꦴꦠꦶ. ꦥꦚ꧀ꦕꦢ꧀ꦮꦴꦫꦺ ꦕ ꦱꦤ꧀ꦠꦷꦫꦟꦮꦱꦺꦤꦴꦥꦶ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴ ꦲꦺꦴꦠꦷꦠꦶ ꦄꦪꦩꦺꦠ꧀ꦡ ꦮꦶꦱꦺꦱꦺꦴ. ‘ꦱꦺꦴꦩꦤꦱ꧀ꦱꦱꦲꦒꦠꦴ’ ꦥꦤ ꦥꦚ꧀ꦕꦢ꧀ꦮꦴꦫꦺ ꦱꦤ꧀ꦠꦷꦫꦟꦮꦱꦺꦤ ꦠꦢꦴꦫꦩ꧀ꦩꦟꦮꦱꦺꦤ ꦕ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴ ꦲꦺꦴꦠꦶ. ꦩꦤꦺꦴꦢ꧀ꦮꦴꦫꦺ ꦠꦢꦴꦫꦩ꧀ꦩꦟꦮꦱꦺꦤ ꦱꦲꦺꦠꦸꦏꦮꦶꦥꦴꦏꦴ ꦮꦶꦪ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴꦠꦶ ꦮꦺꦢꦶꦠꦧ꧀ꦧꦴ.

‘ꦄꦏꦸꦱꦭꦮꦶꦥꦴꦏꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸ’ ꦥꦤ ꦏꦸꦱꦭꦮꦶꦥꦴꦏꦴꦪ ꦈꦥꦺꦏ꧀ꦑꦴꦱꦲꦒꦠꦴꦲꦺꦠꦸꦏꦴꦪ ꦱꦩꦴꦤꦒꦠꦶꦏꦴ ꦌꦮ. ꦏꦺꦮꦭꦚ꧀ꦲꦶ ꦱꦴ ꦄꦴꦥꦴꦪꦶꦏꦴꦤꦁ ꦥꦛꦶꦱꦤ꧀ꦣꦶꦨꦮꦔ꧀ꦒꦕꦸꦠꦶꦮꦱꦺꦤ ꦥꦮꦠ꧀ꦠꦠꦷꦠꦶ ꦄꦪꦩꦺꦠ꧀ꦡ ꦮꦶꦱꦺꦱꦺꦴ. ‘ꦏꦶꦫꦶꦪꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸ’ ꦱꦺꦴꦩꦤꦱ꧀ꦱꦱꦲꦒꦠꦴ ꦑꦷꦟꦴꦱꦮꦴꦤꦁ ꦥꦚ꧀ꦕꦢ꧀ꦮꦴꦫꦺ ꦥꦲꦛ꧀ꦜꦴꦏꦴꦫꦁ ꦏꦸꦫꦸꦩꦴꦤꦴ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴ ꦲꦺꦴꦠꦶ. ꦩꦤꦺꦴꦢ꧀ꦮꦴꦫꦺ ꦄꦠꦷꦠꦴꦢꦶꦨꦺꦢꦺ ꦣꦩ꧀ꦩꦺ ꦄꦴꦫꦧ꧀ꦨ ꦲꦱꦶꦠꦸꦥ꧀ꦥꦴꦢꦮꦱꦺꦤ ꦥꦮꦠ꧀ꦠꦶꦪꦁ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴ ꦲꦺꦴꦠꦶ.

ꦏꦴꦩꦴꦮꦕꦫꦏꦸꦱꦭꦤ꧀ꦠꦶꦄꦴꦢꦷꦱꦸ ꦏꦸꦱꦭꦠꦺꦴ ꦠꦴꦮ ꦕꦠ꧀ꦠꦴꦫꦺꦴ ꦚꦴꦟꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦴ. ꦱꦺꦏ꧀ꦑꦥꦸꦡꦸꦗ꧀ꦗꦤꦴꦤꦁ ꦄꦠꦷꦠꦴꦢꦶꦨꦺꦢꦴꦤꦶ ꦑꦤ꧀ꦣꦣꦴꦠꦸꦄꦴꦪꦠꦤꦴꦤꦶ ꦱꦩ꧀ꦩꦱꦤ꧀ꦠꦴꦤꦁ ꦥꦕ꧀ꦕꦮꦺꦏ꧀ꦑꦤ꧀ꦠꦴꦤꦁ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴ ꦲꦺꦴꦤ꧀ꦠꦶ. ꦥꦟ꧀ꦟꦠ꧀ꦠꦶꦤꦶꦧ꧀ꦧꦴꦤꦥꦕ꧀ꦕꦮꦺꦏ꧀ꦑꦟꦺ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴ. ꦚꦴꦟꦮꦶꦥ꧀ꦥꦪꦸꦠ꧀ꦠꦺꦱꦸꦥꦶ ꦌꦱꦺꦮ ꦤꦪꦺꦴ. ꦏꦺꦮꦭꦚ꧀ꦲꦶ ꦠꦺꦲꦶ ꦩꦒ꧀ꦒꦦꦭꦤꦶꦧ꧀ꦧꦴꦤꦥꦕ꧀ꦕꦮꦺꦏ꧀ꦑꦟꦴ ꦤꦠ꧀ꦡꦶ. ꦄꦪꦩꦺꦮꦺꦠ꧀ꦡ ꦮꦶꦱꦺꦱꦺꦴ.

ꦄꦏꦸꦱꦭꦠꦺꦴ ꦕꦠ꧀ꦠꦴꦫꦺꦴ ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦴ ꦄꦠꦷꦠꦴꦢꦶꦨꦺꦢꦴꦤꦁ ꦑꦤ꧀ꦣꦣꦴꦠꦸꦄꦴꦪꦠꦤꦴꦤꦁ ꦄꦱ꧀ꦱꦴꦢꦤꦴꦨꦶꦤꦤ꧀ꦢꦤꦥꦫꦴꦩꦴꦱꦏꦴꦭꦺ ꦄꦠꦷꦠꦴꦢꦶꦄꦴꦫꦩ꧀ꦩꦟꦴ ꦲꦺꦴꦤ꧀ꦠꦶ. ꦥꦟ꧀ꦟꦠ꧀ꦠꦶꦁ ꦄꦴꦫꦧ꧀ꦨ ꦄꦱ꧀ꦱꦴꦢꦺꦤ꧀ꦠꦱ꧀ꦱ ꦄꦨꦶꦤꦤ꧀ꦢꦤ꧀ꦠꦱ꧀ꦱ ‘ꦱꦠ꧀ꦠꦺꦴ ꦱꦠ꧀ꦠꦺꦴ’ꦠꦶ ꦥꦫꦴꦩꦱꦶꦠ꧀ꦮꦴ ꦒꦟ꧀ꦲꦤ꧀ꦠꦱ꧀ꦱ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴ ꦲꦺꦴꦤ꧀ꦠꦶ. ꦢꦶꦛ꧀ꦜꦶꦮꦶꦥ꧀ꦥꦪꦸꦠ꧀ꦠꦺꦱꦸꦥꦶ ꦌꦱꦺꦮ ꦤꦪꦺꦴ. ꦏꦺꦮꦭꦚ꧀ꦲꦶ ꦠꦺꦲꦶ ꦥꦫꦴꦩꦴꦱꦒ꧀ꦒꦲꦟꦁ ꦤꦠ꧀ꦡꦶ. ꦢ꧀ꦮꦺ ꦥꦛꦶꦓꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦴ ꦄꦠꦷꦠꦴꦢꦶꦨꦺꦢꦺ ꦣꦩ꧀ꦩꦺ ꦄꦴꦫꦧ꧀ꦨ ꦢꦺꦴꦩꦤꦱ꧀ꦱꦶꦠꦴꦤꦁ ꦄꦠꦷꦠꦴꦢꦶꦄꦴꦫꦩ꧀ꦩꦟꦴ, ꦥꦟ꧀ꦟꦠ꧀ꦠꦶꦁ ꦄꦴꦫꦧ꧀ꦨ ꦢꦺꦴꦩꦤꦱ꧀ꦱꦶꦠꦴꦤꦁ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴ. ꦮꦶꦕꦶꦏꦶꦕ꧀ꦖꦸꦢ꧀ꦣꦕ꧀ꦕꦱꦩ꧀ꦥꦪꦸꦠ꧀ꦠꦴ ꦠꦺꦱꦸ ꦌꦮ ꦣꦩ꧀ꦩꦺꦱꦸ ꦄꦤꦶꦛ꧀ꦜꦔ꧀ꦒꦠꦨꦴꦮꦺꦤ ꦕꦺꦮ ꦈꦢ꧀ꦣꦠꦨꦴꦮꦺꦤ ꦕ ꦥꦮꦠ꧀ꦠꦶꦪꦁ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴ. ꦏꦶꦫꦶꦪꦠꦺꦴ ꦄꦛ꧀ꦜ ꦱꦲꦺꦠꦸꦏꦕꦶꦠ꧀ꦠꦸꦥ꧀ꦥꦴꦢꦴ ꦏꦸꦱꦭꦕꦶꦠ꧀ꦠꦸꦥ꧀ꦥꦴꦢꦒꦠꦶꦏꦴ ꦌꦮ. ꦏꦶꦫꦶꦪꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸ ꦈꦥꦺꦏ꧀ꦑꦴꦱꦲꦒꦠꦴ ꦥꦚ꧀ꦕꦢ꧀ꦮꦴꦫꦺ ꦮꦺꦴꦛ꧀ꦜꦧ꧀ꦧꦤꦮꦱꦺꦤ ꦥꦮꦠ꧀ꦠꦶꦪꦁ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴꦮ. ꦩꦤꦺꦴꦢ꧀ꦮꦴꦫꦺ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦴꦤꦚ꧀ꦕꦺꦮ ꦥꦟ꧀ꦟꦠ꧀ꦠꦶꦤꦶꦧ꧀ꦧꦴꦤꦴꦫꦩ꧀ꦩꦟꦴꦤꦚ꧀ꦕ ꦗꦮꦤꦴꦤꦁ ꦥꦸꦫꦺꦕꦴꦫꦶꦏꦏꦴꦭꦺ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴ.

ꦪꦡꦴꦮꦸꦠ꧀ꦠꦥ꧀ꦥꦨꦺꦢꦺ ꦫꦹꦥꦴꦮꦕꦫꦗ꧀ꦙꦴꦤꦺ ꦱꦧ꧀ꦧꦠ꧀ꦡꦥꦴꦢꦏꦕꦠꦸꦠ꧀ꦡꦁ ꦄꦴꦏꦴꦱꦏꦱꦶꦟꦕꦠꦸꦠ꧀ꦡꦁ ꦄꦴꦭꦺꦴꦏꦏꦱꦶꦟꦕꦠꦸꦠ꧀ꦡꦁ ꦧ꧀ꦫꦲ꧀ꦩꦮꦶꦲꦴꦫꦕꦠꦸꦠ꧀ꦡꦁ ꦄꦴꦤꦴꦥꦴꦤꦕꦠꦸꦠ꧀ꦡꦤ꧀ꦠꦶ ꦆꦩꦴꦤꦶ ꦥꦚ꧀ꦕ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴꦤꦺꦮ. ‘ꦆꦢ꧀ꦣꦶꦮꦶꦣꦕꦠꦸꦠ꧀ꦡꦁ’ ꦏꦴꦪꦮꦱꦺꦤ ꦕꦶꦠ꧀ꦠꦁ ꦥꦫꦶꦟꦴꦩꦺꦤ꧀ꦠꦱ꧀ꦱ ꦄꦠꦷꦠꦥꦴꦢꦏꦗ꧀ꦙꦴꦤꦕꦶꦠ꧀ꦠꦁ ꦄꦴꦫꦧ꧀ꦨ ꦥꦮꦠ꧀ꦠꦤꦠꦺꦴ ꦄꦠꦷꦠꦴꦫꦩ꧀ꦩꦟꦁ. ꦩꦲꦴꦣꦴꦠꦸꦤꦶꦣꦴꦤꦺ ꦩꦲꦴꦏꦱ꧀ꦱꦥꦠ꧀ꦡꦺꦫꦴꦢꦷꦤꦁ ꦮꦶꦪ ꦄꦤꦴꦒꦠꦁ ꦄꦣꦶꦛ꧀ꦜꦲꦤ꧀ꦠꦴꦤꦁ ꦄꦤꦴꦒꦠꦴꦫꦩ꧀ꦩꦟꦁ ꦲꦺꦴꦠꦶ. ꦩꦲꦴꦏꦱ꧀ꦱꦥꦠ꧀ꦡꦺꦫꦺꦴ ꦏꦶꦫ ꦩꦲꦴꦣꦴꦠꦸꦤꦶꦣꦴꦤꦁ ꦏꦫꦺꦴꦤ꧀ꦠꦺꦴ ꦄꦤꦴꦒꦠꦺ ꦄꦛ꧀ꦜꦴꦫꦱꦮꦱ꧀ꦱꦴꦣꦶꦏꦴꦤꦶ ꦢ꧀ꦮꦺ ꦮꦱ꧀ꦱꦱꦠꦴꦤꦶ ꦆꦩꦺ ꦒꦤ꧀ꦣꦴ ꦩꦴ ꦱꦸꦱ꧀ꦱꦶꦁꦱꦸ, ꦥꦸꦥ꧀ꦦꦴꦤꦶ ꦩꦴ ꦩꦶꦭꦴꦪꦶꦁꦱꦸ, ꦢꦷꦥꦴ ꦩꦴ ꦤꦶꦧ꧀ꦧꦴꦪꦶꦁꦱꦹꦠꦶ ꦄꦣꦶꦛ꧀ꦜꦲꦶ. ꦱꦧ꧀ꦧꦁ ꦠꦡꦺꦮ ꦄꦲꦺꦴꦱꦶ. ꦄꦱ꧀ꦱꦒꦸꦠ꧀ꦠꦠ꧀ꦡꦺꦫꦺꦴ ꦮꦠ꧀ꦠꦤꦶꦪꦱꦺꦤꦴꦱꦤꦺ ꦨꦶꦏ꧀ꦑꦸꦱꦔ꧀ꦓꦁ ꦱꦸꦏ꧀ꦑꦨꦠ꧀ꦠꦁ ꦨꦸꦚ꧀ꦗꦩꦴꦤꦁ ꦢꦶꦱ꧀ꦮꦴ ‘ꦈꦢꦏꦱꦺꦴꦟ꧀ꦝꦶ ꦢꦶꦮꦱꦺ ꦢꦶꦮꦱꦺ, ꦥꦸꦫꦺꦨꦠ꧀ꦠꦁ ꦢꦣꦶꦫꦱꦴ ꦲꦺꦴꦠꦹ’ꦠꦶ ꦄꦣꦶꦛ꧀ꦜꦲꦶ. ꦥꦸꦫꦺꦨꦠ꧀ꦠꦁ ꦒꦲꦶꦠꦁ ꦢꦣꦶꦫꦱꦁ ꦲꦺꦴꦠꦶ ꦥꦕ꧀ꦖꦴꦨꦠ꧀ꦠꦺ ꦥꦴꦏꦠꦶꦏꦩꦺꦮ. ꦏꦴꦪꦁ ꦥꦤ ꦕꦶꦠ꧀ꦠꦱꦤ꧀ꦤꦶꦱ꧀ꦱꦶꦠꦁ ꦏꦠ꧀ꦮꦴ ꦄꦢꦶꦱ꧀ꦱꦩꦴꦤꦺꦤ ꦏꦴꦪꦺꦤ ꦒꦩꦤꦏꦴꦭꦺ, ꦄꦚ꧀ꦚꦱ꧀ꦱ ꦮꦴ ꦥꦴꦛꦶꦲꦴꦫꦶꦪꦱ꧀ꦱ ꦏꦫꦟꦏꦴꦭꦺ, ꦏꦴꦪꦁ ꦄꦴꦫꦧ꧀ꦨ ꦥꦮꦠ꧀ꦠꦠ꧀ꦠꦴ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦁ ꦲꦺꦴꦠꦶ.

‘ꦢꦶꦧ꧀ꦧꦱꦺꦴꦠꦕꦠꦸꦠ꧀ꦡꦁ’ ꦮꦶꦗ꧀ꦗꦩꦴꦤꦱꦢ꧀ꦢꦩꦺꦮ ꦄꦴꦫꦧ꧀ꦨ ꦥꦮꦠ꧀ꦠꦶꦠꦺꦴ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦁ ꦲꦺꦴꦠꦶ. ꦕꦺꦠꦺꦴꦥꦫꦶꦪꦚꦴꦟꦕꦠꦸꦠ꧀ꦡꦁ ꦄꦠꦷꦠꦺ ꦱꦠ꧀ꦠꦢꦶꦮꦱꦧ꧀ꦨꦤ꧀ꦠꦫꦺ ꦄꦤꦴꦒꦠꦺ ꦱꦠ꧀ꦠꦢꦶꦮꦱꦧ꧀ꦨꦤ꧀ꦠꦫꦺ ꦥꦫꦺꦱꦁ ꦕꦶꦠ꧀ꦠꦁ ꦗꦴꦤꦤ꧀ꦠꦱ꧀ꦱ ꦄꦠꦷꦠꦴꦫꦩ꧀ꦩꦟꦁ ꦄꦤꦴꦒꦠꦴꦫꦩ꧀ꦩꦟꦚ꧀ꦕ ꦲꦺꦴꦠꦶ. ꦱꦠ꧀ꦠꦢꦶꦮꦱꦴꦠꦶꦏ꧀ꦏꦩꦺ ꦥꦤ ꦠꦁ ꦗꦴꦤꦶꦠꦸꦁ ꦤ ꦱꦏ꧀ꦏꦺꦴꦠꦶ. ꦄꦠꦷꦠꦴꦤꦴꦒꦠꦁꦱꦚꦴꦟꦴꦤꦚ꧀ꦲꦶ ꦌꦱ ꦮꦶꦱꦪꦺꦴ. ꦤ ꦌꦠꦱ꧀ꦱ ꦥꦕ꧀ꦕꦸꦥ꧀ꦥꦤ꧀ꦤꦗꦴꦤꦤꦏꦴꦭꦺ ꦥꦤ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦁ ꦲꦺꦴꦠꦶ.

ꦥꦕ꧀ꦕꦸꦥ꧀ꦥꦤ꧀ꦤꦚ꧀ꦕ ꦤꦴꦩꦺꦠꦁ ꦠꦶꦮꦶꦣꦁ – ꦑꦟꦥꦕ꧀ꦕꦸꦥ꧀ꦥꦤ꧀ꦤꦁ ꦱꦤ꧀ꦠꦠꦶꦥꦕ꧀ꦕꦸꦥ꧀ꦥꦤ꧀ꦤꦁ ꦄꦢ꧀ꦣꦴꦥꦕ꧀ꦕꦸꦥ꧀ꦥꦤ꧀ꦤꦚ꧀ꦕ. ꦠꦠ꧀ꦡ ꦈꦥ꧀ꦥꦴꦢꦛ꧀ꦜꦶꦠꦶꦨꦔ꧀ꦒꦥ꧀ꦥꦠ꧀ꦠꦁ ‘ꦑꦟꦥꦕ꧀ꦕꦸꦥ꧀ꦥꦤ꧀ꦤꦁ’. ꦌꦏꦢ꧀ꦮꦶꦱꦤ꧀ꦠꦠꦶꦮꦴꦫꦥꦫꦶꦪꦴꦥꦤ꧀ꦤꦁ ‘ꦱꦤ꧀ꦠꦠꦶꦥꦕ꧀ꦕꦸꦥ꧀ꦥꦤ꧀ꦤꦁ’. ꦠꦠ꧀ꦡ ꦄꦤ꧀ꦣꦏꦴꦫꦺ ꦤꦶꦱꦷꦢꦶꦠ꧀ꦮꦴ ꦄꦴꦭꦺꦴꦏꦛ꧀ꦜꦴꦤꦁ ꦒꦠꦱ꧀ꦱ ꦤ ꦠꦴꦮ ꦄꦴꦫꦩ꧀ꦩꦟꦁ ꦥꦴꦏꦛꦁ ꦲꦺꦴꦠꦶ; ꦪꦴꦮ ꦥꦤ ꦠꦁ ꦥꦴꦏꦛꦁ ꦲꦺꦴꦠꦶ, ꦌꦠ꧀ꦡꦤ꧀ꦠꦫꦺ ꦌꦏꦢ꧀ꦮꦶꦱꦤ꧀ꦠꦠꦶꦮꦴꦫꦴ ꦮꦺꦢꦶꦠꦧ꧀ꦧꦴ. ꦄꦴꦭꦺꦴꦏꦛ꧀ꦜꦴꦤꦺ ꦮꦶꦕꦫꦶꦠ꧀ꦮꦴ ꦎꦮꦫꦏꦁ ꦥꦮꦶꦛ꧀ꦜꦱ꧀ꦱꦴꦥꦶ ꦤ ꦠꦴꦮ ꦱꦲꦱꦴ ꦫꦹꦥꦁ ꦥꦴꦏꦛꦁ ꦲꦺꦴꦠꦶ; ꦪꦴꦮ ꦠꦁ ꦥꦴꦏꦛꦁ ꦲꦺꦴꦠꦶ, ꦌꦠ꧀ꦡꦤ꧀ꦠꦫꦺ ꦌꦏꦢ꧀ꦮꦶꦱꦤ꧀ꦠꦠꦶꦮꦴꦫꦴ ꦮꦺꦢꦶꦠꦧ꧀ꦧꦴ. ꦢꦹꦫꦺ ꦜꦠ꧀ꦮꦴ ꦥꦤ ꦫꦗꦏꦴꦤꦁ ꦲꦠ꧀ꦡꦮꦶꦏꦴꦫꦁ ꦓꦟ꧀ꦝꦶꦨꦺꦫꦷꦄꦴꦢꦶꦄꦴꦏꦺꦴꦛꦤꦮꦶꦏꦴꦫꦚ꧀ꦕ ꦢꦶꦱ꧀ꦮꦴꦥꦶ ꦤ ꦠꦴꦮ ꦱꦢ꧀ꦢꦁ ꦱꦸꦟꦴꦠꦶ; ꦪꦴꦮ ꦥꦤ ꦠꦁ ꦱꦸꦟꦴꦠꦶ, ꦌꦠꦱ꧀ꦩꦶꦩ꧀ꦥꦶ ꦄꦤ꧀ꦠꦫꦺ ꦌꦏꦢ꧀ꦮꦶꦱꦤ꧀ꦠꦠꦶꦮꦴꦫꦴ ꦮꦺꦢꦶꦠꦧ꧀ꦧꦴ. ꦌꦮꦁ ꦠꦴꦮ ꦩꦗ꧀ꦙꦶꦩꦨꦴꦟꦏꦴ. ꦱꦁꦪꦸꦠ꧀ꦠꦨꦴꦟꦏꦴ ꦥꦤ ‘ꦫꦹꦥꦱꦤ꧀ꦠꦠꦶ ꦄꦫꦹꦥꦱꦤ꧀ꦠꦠꦷ’ꦠꦶ ꦢ꧀ꦮꦺ ꦱꦤ꧀ꦠꦠꦶꦪꦺꦴ ꦮꦠ꧀ꦮꦴ, ‘ꦈꦢꦏꦁ ꦄꦏ꧀ꦏꦩꦶꦠ꧀ꦮꦴ ꦒꦠꦱ꧀ꦱ ꦪꦴꦮ ꦠꦷꦫꦺ ꦄꦏ꧀ꦏꦤ꧀ꦠꦈꦢꦏꦭꦺꦑꦴ ꦤ ꦮꦶꦥ꧀ꦥꦱꦷꦢꦠꦶ, ꦄꦢ꧀ꦣꦴꦤꦠꦺꦴ ꦄꦴꦒꦠꦱ꧀ꦱ ꦪꦴꦮ ꦏꦴꦪꦺ ꦈꦱꦸꦩꦨꦴꦮꦺꦴ ꦤ ꦮꦹꦥꦱꦩ꧀ꦩꦠꦶ, ꦄꦴꦠꦥꦴ ꦄꦴꦒꦤ꧀ꦠ꧀ꦮꦴ ꦒꦧ꧀ꦨꦁ ꦥꦮꦶꦛ꧀ꦜꦱ꧀ꦱ ꦪꦴꦮ ꦄꦤ꧀ꦣꦏꦴꦫꦨꦴꦮꦺꦴ ꦤ ꦮꦶꦒꦕ꧀ꦖꦠꦶ, ꦄꦤ꧀ꦠꦺꦴꦒꦧ꧀ꦨꦺ ꦏꦩ꧀ꦩꦛ꧀ꦜꦴꦤꦁ ꦩꦤꦱꦶꦏꦫꦶꦠ꧀ꦮꦴ ꦢꦶꦮꦴ ꦮꦴꦠꦥꦴꦤꦁ ꦮꦶꦮꦫꦶꦠ꧀ꦮꦴ ꦎꦭꦺꦴꦏꦺꦤ꧀ꦠꦱ꧀ꦱ ꦪꦴꦮ ꦄꦏ꧀ꦑꦷꦤꦁ ꦦꦤ꧀ꦢꦤꦨꦴꦮꦺꦴ ꦤ ꦮꦹꦥꦱꦩ꧀ꦩꦠꦶ, ꦄꦪꦁ ꦫꦹꦥꦱꦤ꧀ꦠꦠꦶ ꦤꦴꦩ; ꦢ꧀ꦮꦺ ꦠꦪꦺꦴ ꦗꦮꦤꦮꦴꦫꦴ ꦄꦫꦹꦥꦱꦤ꧀ꦠꦠꦶ ꦤꦴꦩꦴ’ꦠꦶ ꦮꦠ꧀ꦮꦴ ‘ꦠꦢꦸꦨꦪꦩ꧀ꦥꦶ ꦱꦤ꧀ꦠꦠꦶꦥꦕ꧀ꦕꦸꦥ꧀ꦥꦤ꧀ꦤꦁ ꦤꦴꦩꦴ’ꦠꦶ ꦮꦢꦤ꧀ꦠꦶ.

ꦌꦏꦨꦮꦥꦫꦶꦕ꧀ꦖꦶꦤ꧀ꦤꦁ ꦥꦤ ꦄꦢ꧀ꦣꦴꦥꦕ꧀ꦕꦸꦥ꧀ꦥꦤ꧀ꦤꦁ ꦤꦴꦩ. ꦪꦁ ꦱꦤ꧀ꦣꦴꦪ ꦨꦢ꧀ꦢꦺꦏꦫꦠ꧀ꦠꦱꦸꦠ꧀ꦠꦺ ‘‘ꦪꦺꦴ ꦕꦴꦮꦸꦱꦺꦴ, ꦩꦤꦺꦴ ꦪꦺ ꦕ ꦣꦩ꧀ꦩꦴ ꦈꦨꦪꦩꦺꦠꦁ ꦥꦕ꧀ꦕꦸꦥ꧀ꦥꦤ꧀ꦤꦁ. ꦠꦱ꧀ꦩꦶꦁ ꦕꦺ ꦥꦕ꧀ꦕꦸꦥ꧀ꦥꦤ꧀ꦤꦺ ꦖꦤ꧀ꦢꦫꦴꦒꦥꦛꦶꦧꦢ꧀ꦣꦁ ꦲꦺꦴꦠꦶ ꦮꦶꦚ꧀ꦚꦴꦟꦁ, ꦖꦤ꧀ꦢꦫꦴꦒꦥꦛꦶꦧꦢ꧀ꦣꦠ꧀ꦠꦴ ꦮꦶꦚ꧀ꦚꦴꦟꦱ꧀ꦱ ꦠꦢꦨꦶꦤꦤ꧀ꦢꦠꦶ, ꦠꦢꦨꦶꦤꦤ꧀ꦢꦤ꧀ꦠꦺꦴ ꦥꦕ꧀ꦕꦸꦥ꧀ꦥꦤ꧀ꦤꦺꦱꦸ ꦣꦩ꧀ꦩꦺꦱꦸ ꦱꦁꦲꦷꦫꦠꦷ’’ꦠꦶ (ꦩ. ꦤꦶ. ꧓.꧒꧘꧔) ꦮꦸꦠ꧀ꦠꦁ. ꦱꦤ꧀ꦠꦠꦶꦥꦕ꧀ꦕꦸꦥ꧀ꦥꦤ꧀ꦤꦚ꧀ꦕꦺꦠ꧀ꦡ ꦄꦛ꧀ꦜꦏꦡꦴꦱꦸ ꦄꦴꦒꦠꦁ. ꦄꦢ꧀ꦣꦴꦥꦕ꧀ꦕꦸꦥ꧀ꦥꦤ꧀ꦤꦁ ꦱꦸꦠ꧀ꦠꦺ.

ꦠꦠ꧀ꦡ ꦏꦺꦕꦶ ‘ꦑꦟꦥꦕ꧀ꦕꦸꦥ꧀ꦥꦤ꧀ꦤꦁ ꦕꦶꦠ꧀ꦠꦁ ꦕꦺꦠꦺꦴꦥꦫꦶꦪꦚꦴꦟꦱ꧀ꦱ ꦄꦴꦫꦩ꧀ꦩꦟꦁ ꦲꦺꦴꦠꦷ’ꦠꦶ ꦮꦢꦤ꧀ꦠꦶ. ꦏꦶꦁꦏꦴꦫꦟꦴ? ꦪꦱ꧀ꦩꦴ ꦆꦢ꧀ꦣꦶꦩꦱ꧀ꦱ ꦕ ꦥꦫꦱ꧀ꦱ ꦕ ꦌꦏꦏ꧀ꦑꦟꦺ ꦕꦶꦠ꧀ꦠꦁ ꦈꦥ꧀ꦥꦗ꧀ꦗꦠꦷꦠꦶ. ꦆꦢꦚ꧀ꦕ ꦤꦺꦱꦁ ꦎꦥꦩ꧀ꦩꦁ – ꦪꦡꦴ ꦄꦴꦏꦴꦱꦺ ꦑꦶꦠ꧀ꦠꦺ ꦥꦸꦥ꧀ꦦꦩꦸꦛ꧀ꦜꦶꦩ꧀ꦲꦶ ꦄꦮꦱ꧀ꦱꦁ ꦌꦏꦁ ꦥꦸꦥ꧀ꦦꦁ ꦌꦏꦱ꧀ꦱ ꦮꦟ꧀ꦛꦁ ꦥꦛꦶꦮꦶꦗ꧀ꦙꦠꦶ ꦮꦟ꧀ꦛꦺꦤ ꦮꦟ꧀ꦛꦁ ꦥꦛꦶꦮꦶꦗ꧀ꦙꦠꦶ, ꦌꦮꦁ ꦥꦫꦱ꧀ꦱ ꦕꦶꦠ꧀ꦠꦁ ꦗꦴꦤꦶꦱ꧀ꦱꦴꦩꦷꦠꦶ ꦫꦴꦱꦶꦮꦱꦺꦤ ꦩꦲꦴꦗꦤꦱ꧀ꦱ ꦕꦶꦠ꧀ꦠꦺ ꦄꦴꦮꦗ꧀ꦗꦶꦠꦺ ꦄꦮꦱ꧀ꦱꦁ ꦌꦏꦱ꧀ꦱ ꦕꦶꦠ꧀ꦠꦁ ꦌꦏꦺꦤ ꦕꦶꦠ꧀ꦠꦺꦤ ꦈꦥ꧀ꦥꦴꦢꦏ꧀ꦑꦟꦺ ꦮꦴ ꦜꦶꦠꦶꦏ꧀ꦑꦟꦺ ꦮꦴ ꦨꦔ꧀ꦒꦏ꧀ꦑꦟꦺ ꦮꦴ ꦥꦛꦶꦮꦶꦗ꧀ꦙꦠꦷꦠꦶ. ꦠꦁ ꦥꦤ ꦮꦱ꧀ꦱꦱꦠꦩ꧀ꦥꦶ ꦮꦱ꧀ꦱꦱꦲꦱ꧀ꦱꦩ꧀ꦥꦶ ꦄꦴꦮꦗ꧀ꦗꦤ꧀ꦠꦺꦴ ꦪꦺꦤ ꦕꦶꦠ꧀ꦠꦺꦤ ꦄꦴꦮꦗ꧀ꦗꦺꦠꦶ, ꦪꦺꦤ ꦕ ꦗꦴꦤꦴꦠꦶ ꦠꦺꦱꦁ ꦢ꧀ꦮꦶꦤ꧀ꦤꦁ ꦱꦲꦛ꧀ꦜꦴꦤꦴꦨꦴꦮꦠꦺꦴ ꦄꦴꦮꦗ꧀ꦗꦤꦗꦮꦤꦴꦤꦚ꧀ꦕ ꦄꦤꦶꦛ꧀ꦜꦺ ꦜꦴꦤꦺ ꦤꦴꦤꦴꦫꦩ꧀ꦩꦟꦨꦴꦮꦥ꧀ꦥꦠ꧀ꦠꦶꦢꦺꦴꦱꦠꦺꦴ ꦄꦪꦸꦠ꧀ꦠꦤ꧀ꦠꦶ ꦄꦛ꧀ꦜꦏꦡꦴꦱꦸ ꦥꦛꦶꦏ꧀ꦑꦶꦠ꧀ꦠꦁ. ꦱꦤ꧀ꦠꦠꦶꦥꦕ꧀ꦕꦸꦥ꧀ꦥꦤ꧀ꦤꦁ ꦥꦤ ꦄꦢ꧀ꦣꦴꦥꦕ꧀ꦕꦸꦥ꧀ꦥꦤ꧀ꦤꦚ꧀ꦕ ꦄꦴꦫꦩ꧀ꦩꦟꦁ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦁ.

ꦠꦠ꧀ꦡ ꦪꦁ ꦮꦠ꧀ꦠꦩꦴꦤꦗꦮꦤꦮꦷꦡꦶꦠꦺꦴ ꦄꦠꦷꦠꦴꦤꦴꦒꦠꦮꦱꦺꦤ ꦢ꧀ꦮꦶꦠꦶꦗꦮꦤꦮꦷꦡꦶꦥꦫꦶꦩꦴꦟꦏꦴꦭꦺ ꦥꦫꦱ꧀ꦱ ꦕꦶꦠ꧀ꦠꦁ, ꦠꦁ ꦱꦧ꧀ꦧꦩ꧀ꦥꦶ ꦱꦤ꧀ꦠꦠꦶꦥꦕ꧀ꦕꦸꦥ꧀ꦥꦤ꧀ꦤꦁ ꦤꦴꦩ. ꦄꦢ꧀ꦣꦴꦥꦕ꧀ꦕꦸꦥ꧀ꦥꦤ꧀ꦤꦁ ꦥꦤ ꦗꦮꦤꦮꦴꦫꦺꦤ ꦢꦷꦥꦺꦠꦧ꧀ꦧꦤ꧀ꦠꦶ ꦪꦁ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ ꦠꦁ ꦱꦸꦮꦸꦠ꧀ꦠꦁ. ꦠꦠ꧀ꦫꦴꦪꦁ ꦢꦷꦥꦤꦴ – ꦆꦢ꧀ꦣꦶꦩꦴ ꦥꦫꦱ꧀ꦱ ꦕꦶꦠ꧀ꦠꦁ ꦗꦴꦤꦶꦠꦸꦏꦴꦩꦺꦴ ꦄꦴꦮꦗ꧀ꦗꦺꦠꦶ. ꦄꦴꦮꦗ꧀ꦗꦤꦁ ꦑꦟꦥꦕ꧀ꦕꦸꦥ꧀ꦥꦤ꧀ꦤꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦠꦺꦤꦺꦮ ꦱꦲ ꦤꦶꦫꦸꦗ꧀ꦙꦠꦶ. ꦠꦠꦺꦴ ꦕꦠ꧀ꦠꦴꦫꦶ ꦥꦚ꧀ꦕ ꦗꦮꦤꦴꦤꦶ ꦪꦺꦱꦁ ꦥꦕ꧀ꦖꦶꦩꦁ ꦆꦢ꧀ꦣꦶꦕꦶꦠ꧀ꦠꦁ, ꦱꦺꦱꦴꦤꦶ ꦏꦴꦩꦴꦮꦕꦫꦴꦤꦶ. ꦠꦺꦱꦁ ꦱꦧ꧀ꦧꦺꦱꦩ꧀ꦥꦶ ꦠꦢꦺꦮ ꦤꦶꦫꦸꦢ꧀ꦣꦁ ꦕꦶꦠ꧀ꦠꦩꦴꦫꦩ꧀ꦩꦟꦁ ꦲꦺꦴꦠꦶ. ꦤ ꦕ ꦠꦴꦤꦶ ꦤꦴꦤꦴꦫꦩ꧀ꦩꦟꦴꦤꦶ ꦲꦺꦴꦤ꧀ꦠꦶ. ꦄꦢ꧀ꦣꦴꦥꦕ꧀ꦕꦸꦥ꧀ꦥꦤ꧀ꦤꦮꦱꦺꦤ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦠ꧀ꦠꦴ ꦌꦏꦴꦫꦩ꧀ꦩꦟꦴꦤꦶ. ꦌꦏꦴꦫꦩ꧀ꦩꦟꦠ꧀ꦠꦺꦥꦶ ꦕ ꦆꦢ꧀ꦣꦶꦕꦶꦠ꧀ꦠꦩꦺꦮ ꦥꦫꦱ꧀ꦱ ꦕꦶꦠ꧀ꦠꦁ ꦥꦗꦴꦤꦴꦠꦶ, ꦤ ꦆꦠꦫꦴꦤꦶ; ꦪꦡꦴ ꦕꦏ꧀ꦑꦸꦢ꧀ꦮꦴꦫꦺ ꦕꦏ꧀ꦑꦸꦮꦶꦚ꧀ꦚꦴꦟꦩꦺꦮ ꦫꦹꦥꦁ ꦥꦱ꧀ꦱꦠꦶ, ꦤ ꦆꦠꦫꦴꦤꦷꦠꦶ. ꦆꦠꦶ ꦆꦢꦁ ꦱꦤ꧀ꦠꦠꦶꦥꦕ꧀ꦕꦸꦥ꧀ꦥꦤ꧀ꦤꦱ꧀ꦱ ꦕꦺꦮ ꦄꦢ꧀ꦣꦴꦥꦕ꧀ꦕꦸꦥ꧀ꦥꦤ꧀ꦤꦱ꧀ꦱ ꦕ ꦮꦱꦺꦤ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦁ ꦲꦺꦴꦠꦶ. ꦪꦱ꧀ꦩꦴ ꦮꦴ ꦱꦤ꧀ꦠꦠꦶꦥꦕ꧀ꦕꦸꦥ꧀ꦥꦤ꧀ꦤꦩ꧀ꦥꦶ ꦄꦢ꧀ꦣꦴꦥꦕ꧀ꦕꦸꦥ꧀ꦥꦤ꧀ꦤꦺꦪꦺꦮ ꦥꦠꦠꦶ, ꦠꦱ꧀ꦩꦴ ꦄꦢ꧀ꦣꦴꦥꦕ꧀ꦕꦸꦥ꧀ꦥꦤ꧀ꦤꦮꦱꦺꦤꦺꦠꦁ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦤ꧀ꦠꦶ ꦮꦺꦢꦶꦠꦧ꧀ꦧꦁ.

‘ꦥꦸꦧ꧀ꦧꦺꦤꦶꦮꦴꦱꦚꦴꦟꦕꦠꦸꦠ꧀ꦡꦁ’ ꦤꦴꦩꦒꦺꦴꦠ꧀ꦠꦴꦤꦸꦱ꧀ꦱꦫꦟꦺ ꦤꦶꦧ꧀ꦧꦴꦤꦤꦶꦩꦶꦠ꧀ꦠꦥꦕ꧀ꦕꦮꦺꦏ꧀ꦑꦟꦺ ꦕ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦁ, ꦱꦺꦱꦏꦴꦭꦺ ꦄꦠꦷꦠꦴꦫꦩ꧀ꦩꦟꦩꦺꦮ. ꦪꦡꦴꦏꦩ꧀ꦩꦸꦥꦒꦚꦴꦟꦕꦠꦸꦠ꧀ꦡꦩ꧀ꦥꦶ ꦄꦠꦷꦠꦴꦫꦩ꧀ꦩꦟꦩꦺꦮ. ꦠꦠ꧀ꦡ ꦏꦶꦚ꧀ꦕꦴꦥꦶ ꦥꦸꦧ꧀ꦧꦺꦤꦶꦮꦴꦱꦕꦺꦠꦺꦴꦥꦫꦶꦪꦚꦴꦟꦴꦤꦶꦥꦶ ꦄꦠꦷꦠꦴꦫꦩ꧀ꦩꦟꦴꦤꦶ ꦲꦺꦴꦤ꧀ꦠꦶ, ꦄꦡ ꦑꦺꦴ ꦠꦺꦱꦁ ꦥꦸꦧ꧀ꦧꦺꦤꦶꦮꦴꦱꦚꦴꦟꦱ꧀ꦱ ꦄꦠꦷꦠꦏ꧀ꦑꦤ꧀ꦣꦴ ꦑꦤ꧀ꦣꦥꦛꦶꦧꦢ꧀ꦣꦚ꧀ꦕ ꦏꦶꦚ꧀ꦕꦶ ꦄꦤꦴꦫꦩ꧀ꦩꦟꦁ ꦤꦴꦩ ꦤꦠ꧀ꦡꦶ. ꦠꦚ꧀ꦲꦶ ꦄꦠꦷꦠꦏ꧀ꦑꦤ꧀ꦣꦑꦤ꧀ꦣꦥꦛꦶꦧꦢ꧀ꦣꦺꦱꦸ ꦣꦩ꧀ꦩꦺꦱꦸ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦱꦩꦒꦠꦶꦏꦁ ꦲꦺꦴꦠꦶ. ꦕꦺꦠꦺꦴꦥꦫꦶꦪꦚꦴꦟꦱ꧀ꦱ ꦕ ꦱꦠ꧀ꦠꦢꦶꦮꦱꦧ꧀ꦨꦤ꧀ꦠꦫꦴꦠꦷꦠꦁ ꦕꦶꦠ꧀ꦠꦩꦺꦮ ꦄꦴꦫꦩ꧀ꦩꦟꦁ. ꦠꦚ꧀ꦲꦶ ꦄꦚ꧀ꦚꦁ ꦑꦤ꧀ꦣꦁ ꦮꦴ ꦑꦤ꧀ꦣꦥꦛꦶꦧꦢ꧀ꦣꦁ ꦮꦴ ꦤ ꦗꦴꦤꦴꦠꦶ, ꦩꦒ꧀ꦒꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦴꦫꦩ꧀ꦩꦟꦠ꧀ꦠꦴ ꦥꦤ ꦥꦫꦶꦪꦴꦪꦠꦺꦴ ꦩꦒ꧀ꦒꦴꦫꦩ꧀ꦩꦟꦤ꧀ꦠꦶ ꦮꦸꦠ꧀ꦠꦁ. ꦪꦡꦴꦏꦩ꧀ꦩꦸꦥꦒꦚꦴꦟꦱ꧀ꦱ ꦕ ꦄꦠꦷꦠꦕꦺꦠꦤꦴꦩꦠ꧀ꦠꦩꦺꦮꦴꦫꦩ꧀ꦩꦟꦤ꧀ꦠꦶ. ꦄꦪꦁ ꦮꦶꦱꦺꦱꦺꦴ ꦮꦺꦢꦶꦠꦧ꧀ꦧꦺꦴ. ꦄꦪꦩꦺꦠ꧀ꦡ ꦄꦛ꧀ꦜꦏꦡꦴꦤꦪꦺꦴ. ꦪꦱ꧀ꦩꦴ ꦥꦤ ‘‘ꦏꦸꦱꦭꦴ ꦑꦤ꧀ꦣꦴ ꦆꦢ꧀ꦣꦶꦮꦶꦣꦚꦴꦟꦱ꧀ꦱ ꦕꦺꦠꦺꦴꦥꦫꦶꦪꦚꦴꦟꦱ꧀ꦱ ꦥꦸꦧ꧀ꦧꦺꦤꦶꦮꦴꦱꦴꦤꦸꦱ꧀ꦱꦠꦶꦚꦴꦟꦱ꧀ꦱ ꦪꦡꦴꦏꦩ꧀ꦩꦸꦥꦒꦚꦴꦟꦱ꧀ꦱ ꦄꦤꦴꦒꦠꦁꦱꦚꦴꦟꦱ꧀ꦱ ꦄꦴꦫꦩ꧀ꦩꦟꦥꦕ꧀ꦕꦪꦺꦤ ꦥꦕ꧀ꦕꦪꦺꦴ’’ꦠꦶ (ꦥꦛ꧀ꦜꦴ. ꧑.꧑.꧔꧐꧔) ꦥꦛ꧀ꦜꦴꦤꦺ ꦮꦸꦠ꧀ꦠꦁ, ꦠꦱ꧀ꦩꦴ ꦕꦠ꧀ꦠꦴꦫꦺꦴꦥꦶ ꦑꦤ꧀ꦣꦴ ꦕꦺꦠꦺꦴꦥꦫꦶꦪꦚꦴꦟꦪꦡꦴꦏꦩ꧀ꦩꦸꦥꦒꦚꦴꦟꦴꦤꦁ ꦄꦴꦫꦩ꧀ꦩꦟꦁ ꦲꦺꦴꦤ꧀ꦠꦶ. ꦠꦠ꧀ꦫꦴꦥꦶ ꦪꦡꦴꦏꦩ꧀ꦩꦸꦥꦒꦚꦴꦟꦱ꧀ꦱ ꦏꦸꦱꦭꦴꦏꦸꦱꦭꦴ ꦌꦮꦴꦠꦶ.

‘ꦢꦶꦧ꧀ꦧꦕꦏ꧀ꦑꦸꦚꦴꦟꦕꦠꦸꦠ꧀ꦡꦁ’ ꦮꦶꦗ꧀ꦗꦩꦴꦤꦮꦟ꧀ꦟꦴꦫꦩ꧀ꦩꦟꦠ꧀ꦠꦴ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦩꦺꦮ. ꦄꦤꦴꦒꦠꦁꦱꦚꦴꦟꦕꦠꦸꦠ꧀ꦡꦁ ꦄꦤꦴꦒꦠꦴꦫꦩ꧀ꦩꦟꦩꦺꦮ. ꦠꦚ꧀ꦲꦶ ꦄꦤꦴꦒꦠꦏ꧀ꦑꦤ꧀ꦣꦑꦤ꧀ꦣꦥꦛꦶꦧꦢ꧀ꦣꦺꦱꦸ ꦣꦩ꧀ꦩꦺꦱꦸ ꦥꦸꦧ꧀ꦧꦺꦤꦶꦮꦴꦱꦚꦴꦟꦁ ꦮꦶꦪ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦱꦩꦒꦠꦶꦏꦁ ꦲꦺꦴꦠꦶ. ꦠꦠ꧀ꦡ ꦏꦶꦚ꧀ꦕꦴꦥꦶ ꦕꦺꦠꦺꦴꦥꦫꦶꦪꦚꦴꦟꦩ꧀ꦥꦶ ꦄꦤꦴꦒꦠꦴꦫꦩ꧀ꦩꦟꦁ ꦲꦺꦴꦠꦶ, ꦠꦁ ꦥꦤ ꦱꦠ꧀ꦠꦢꦶꦮꦱꦧ꧀ꦨꦤ꧀ꦠꦫꦺ ꦈꦥ꧀ꦥꦗ꧀ꦗꦤꦏꦕꦶꦠ꧀ꦠꦩꦺꦮ ꦄꦴꦫꦩ꧀ꦩꦟꦁ ꦏꦫꦺꦴꦠꦶ. ꦆꦢꦁ ꦄꦤꦴꦒꦠꦺ ꦏꦥ꧀ꦥꦱꦠꦱꦲꦱ꧀ꦱꦺ ꦈꦥ꧀ꦥꦗ꧀ꦗꦤꦏꦕꦶꦠ꧀ꦠꦩ꧀ꦥꦶ ꦑꦤ꧀ꦣꦺꦥꦶ ꦑꦤ꧀ꦣꦥꦛꦶꦧꦢ꧀ꦣꦩ꧀ꦥꦶ. ꦫꦹꦥꦴꦮꦕꦫꦠꦶꦏꦕꦠꦸꦏ꧀ꦏꦗ꧀ꦙꦴꦤꦴꦢꦷꦤꦶ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦺꦱꦸ ꦌꦏꦣꦩ꧀ꦩꦩ꧀ꦥꦶ ꦄꦴꦫꦧ꧀ꦨ ꦄꦥ꧀ꦥꦮꦠ꧀ꦠꦶꦠꦺꦴ ꦌꦏꦤ꧀ꦠꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴꦤꦺꦮꦴꦠꦶ ꦮꦺꦢꦶꦠꦧ꧀ꦧꦴꦤꦶ.

꧑꧔꧓꧕. ꦄꦗ꧀ꦙꦠ꧀ꦠꦠ꧀ꦠꦶꦏꦺ ꦄꦤꦶꦤ꧀ꦢ꧀ꦫꦶꦪꦧꦢ꧀ꦣꦫꦹꦥꦚ꧀ꦕ ꦤꦶꦧ꧀ꦧꦴꦤꦚ꧀ꦕ ꦧꦲꦶꦢ꧀ꦣꦴꦠꦶ ꦆꦢꦁ ꦪꦡꦴ ꦆꦤ꧀ꦢ꧀ꦫꦶꦪꦧꦢ꧀ꦣꦁ ꦥꦫꦥꦸꦒ꧀ꦒꦭꦱꦤ꧀ꦠꦴꦤꦺ ꦧꦲꦶꦢ꧀ꦣꦴꦠꦶ ꦮꦸꦕ꧀ꦕꦩꦴꦤꦩ꧀ꦥꦶ ꦠꦱ꧀ꦱ ꦄꦠ꧀ꦠꦤꦺꦴ ꦱꦤ꧀ꦠꦴꦤꦥꦫꦶꦪꦴꦥꦤ꧀ꦤꦠ꧀ꦠꦴ ꦤꦶꦪꦏꦗ꧀ꦙꦠ꧀ꦠꦁ ꦲꦺꦴꦠꦶ, ꦌꦮꦁ ꦤ ꦏꦺꦤꦕꦶ ꦥꦫꦶꦪꦴꦪꦺꦤ ꦄꦗ꧀ꦙꦠ꧀ꦠꦁ ꦲꦺꦴꦠꦷꦠꦶ ꦤꦶꦪꦏꦗ꧀ꦙꦠ꧀ꦠꦥꦫꦶꦪꦴꦪꦱ꧀ꦱ ꦄꦨꦴꦮꦺꦤ ꦧꦲꦶꦢ꧀ꦣꦴꦠꦶ ꦮꦸꦠ꧀ꦠꦁ, ꦤ ꦤꦶꦪꦏꦗ꧀ꦙꦠ꧀ꦠꦩꦠ꧀ꦠꦱ꧀ꦱ ꦄꦱꦩ꧀ꦨꦮꦠꦺꦴ. ꦤꦶꦪꦏꦗ꧀ꦙꦠ꧀ꦠꦩꦠ꧀ꦠꦱ꧀ꦱ ꦥꦤ ꦄꦱꦩ꧀ꦨꦮꦩꦠ꧀ꦠꦁ ꦱꦤ꧀ꦣꦴꦪ ꦄꦗ꧀ꦙꦠ꧀ꦠꦴꦫꦩ꧀ꦩꦟꦠ꧀ꦠꦶꦏꦺ ꦧꦲꦶꦢ꧀ꦣꦴꦫꦩ꧀ꦩꦟꦠꦴ ꦮꦸꦠ꧀ꦠꦴ. ꦄꦗ꧀ꦙꦠ꧀ꦠꦣꦩ꧀ꦩꦴꦥꦒꦩꦩꦠ꧀ꦠꦠꦺꦴꦮ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦴꦫꦩ꧀ꦩꦟꦱ꧀ꦱ ꦄꦗ꧀ꦙꦠ꧀ꦠꦨꦴꦮꦩ꧀ꦥꦶ ꦧꦲꦶꦢ꧀ꦣꦴꦨꦴꦮꦩ꧀ꦥꦶ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦨꦴꦮꦩ꧀ꦥꦶ ꦄꦤꦤꦸꦗꦴꦤꦶꦠ꧀ꦮꦴ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦤ ꦮꦠ꧀ꦠꦧ꧀ꦧꦁ ꦄꦗ꧀ꦙꦠ꧀ꦠꦴꦫꦩ꧀ꦩꦟꦤ꧀ꦠꦶꦥꦷꦠꦶꦄꦴꦢꦶ ꦮꦸꦠ꧀ꦠꦁ.

ꦠꦠ꧀ꦡ ꦤ ꦏꦺꦮꦭꦁ ꦠꦢꦺꦮ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦁ, ꦠꦱ꧀ꦱ ꦥꦤ ꦄꦴꦮꦗ꧀ꦗꦤꦩ꧀ꦥꦶ, ꦈꦥꦕꦴꦫꦕꦶꦠ꧀ꦠꦴꦤꦶꦥꦶ, ꦠꦱ꧀ꦱꦴꦫꦩ꧀ꦩꦟꦱ꧀ꦱ ꦥꦕ꧀ꦕꦮꦺꦏ꧀ꦑꦟꦕꦶꦠ꧀ꦠꦴꦤꦶꦥꦶ, ꦠꦱ꧀ꦱꦺꦮ ꦄꦱ꧀ꦱꦴꦢꦤꦴꦢꦶꦮꦱꦺꦤ ꦥꦮꦠ꧀ꦠꦴꦤꦶ ꦄꦏꦸꦱꦭꦕꦶꦠ꧀ꦠꦴꦤꦶꦥꦶ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴꦤꦺꦮꦴꦠꦶ. ꦠꦴꦤꦶ ꦥꦤ ꦠꦱ꧀ꦩꦶꦁ ꦮꦸꦠ꧀ꦠꦺ ꦮꦸꦠ꧀ꦠꦴꦤꦺꦮ ꦲꦺꦴꦤ꧀ꦠꦷꦠꦶ ꦮꦶꦱꦸꦁ ꦤ ꦮꦸꦠ꧀ꦠꦴꦤꦶ. ꦏꦡꦁ ꦮꦸꦠ꧀ꦠꦴꦤꦺꦮ ꦲꦺꦴꦤ꧀ꦠꦷꦠꦶ? ꦌꦠꦚ꧀ꦲꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ, ꦪꦚ꧀ꦕ ꦠꦱ꧀ꦱ ꦥꦸꦫꦺꦕꦴꦫꦶꦏꦁ ꦄꦴꦮꦗ꧀ꦗꦤꦈꦥꦕꦴꦫꦴꦢꦶꦮꦱꦺꦤ ꦥꦮꦠ꧀ꦠꦁ, ꦠꦺꦤ ꦱꦲ ꦌꦏꦴꦫꦩ꧀ꦩꦟꦁ ꦨꦮꦺꦪ꧀ꦪ. ꦠꦁ ꦱꦧ꧀ꦧꦁ ꦄꦠꦷꦠꦴꦫꦩ꧀ꦩꦟꦠ꧀ꦠꦶꦏꦺ ‘ꦏꦴꦩꦴꦮꦕꦫꦏꦸꦱꦭꦁ, ꦄꦏꦸꦱꦭꦁ, ꦏꦶꦫꦶꦪꦠꦺꦴ ꦤꦮ ꦕꦶꦠ꧀ꦠꦸꦥ꧀ꦥꦴꦢꦴ, ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤ’ꦤ꧀ꦠꦶ ꦌꦮꦁ ꦮꦸꦠ꧀ꦠꦴꦤꦁ ꦌꦠꦺꦱꦁ ꦕꦶꦠ꧀ꦠꦸꦥ꧀ꦥꦴꦢꦴꦤꦁ ‘ꦱꦶꦪꦴ ꦤ ꦮꦠ꧀ꦠꦧ꧀ꦧꦴ ꦄꦠꦷꦠꦴꦫꦩ꧀ꦩꦟꦴꦠꦶꦥꦷ’ꦠꦶꦄꦴꦢꦶꦤꦴ ꦤꦪꦺꦤ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦨꦴꦮꦱ꧀ꦱ ꦄꦤꦸꦚ꧀ꦚꦴꦠꦠ꧀ꦠꦴ, ꦄꦴꦏꦶꦚ꧀ꦕꦚ꧀ꦚꦴꦪꦠꦤꦱ꧀ꦱ ꦕ ‘ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ, ꦕꦠ꧀ꦠꦴꦫꦺꦴ ꦩꦒ꧀ꦒꦴ ꦄꦥꦫꦶꦪꦴꦥꦤ꧀ꦤꦴ, ꦕꦠ꧀ꦠꦴꦫꦶ ꦕ ꦱꦴꦩꦚ꧀ꦚꦦꦭꦴꦤꦶ, ꦆꦩꦺ ꦣꦩ꧀ꦩꦴ ꦤ ꦮꦠ꧀ꦠꦧ꧀ꦧꦴ ꦄꦠꦷꦠꦴꦫꦩ꧀ꦩꦟꦴꦠꦶꦥꦷ’ꦠꦶ ꦌꦮꦁ ꦌꦏꦤ꧀ꦠꦺꦤ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦠ꧀ꦠꦮꦕꦤꦠꦺꦴ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦤ꧀ꦠꦶ ꦮꦸꦠ꧀ꦠꦁ. ꦆꦢꦴꦤꦶ ꦠꦁ ꦄꦗ꧀ꦙꦠ꧀ꦠꦴꦫꦩ꧀ꦩꦟꦠ꧀ꦠꦶꦏꦺ ꦌꦏꦩ꧀ꦥꦶ ꦮꦸꦕ꧀ꦕꦩꦴꦤꦁ ꦪꦱ꧀ꦩꦴ ꦲꦺꦛ꧀ꦜꦴ ꦠꦺꦤ ꦱꦲ ꦌꦏꦴꦫꦩ꧀ꦩꦟꦨꦴꦮꦩ꧀ꦥꦶ ꦱꦤ꧀ꦣꦴꦪ ꦏꦴꦩꦴꦮꦕꦫꦏꦸꦱꦭꦴꦢꦷꦤꦁ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦠꦴ ꦮꦸꦠ꧀ꦠꦴ, ꦠꦱ꧀ꦩꦴ ꦆꦣꦴꦥꦶ ꦠꦺꦱꦁ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦨꦴꦮꦁ ꦢꦷꦥꦺꦠꦶ. ꦏꦺꦴ ꦲꦶ ꦠꦺꦤ ꦱꦲ ꦌꦏꦴꦫꦩ꧀ꦩꦟꦴꦤꦁ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦨꦴꦮꦺ ꦄꦤ꧀ꦠꦫꦴꦪꦺꦴꦠꦶ? ꦌꦮꦁ ꦠꦱ꧀ꦩꦶꦁ ꦮꦸꦠ꧀ꦠꦺ ‘ꦮꦸꦠ꧀ꦠꦴꦤꦺꦮ ꦲꦺꦴꦤ꧀ꦠꦷ’ꦠꦶ ꦮꦺꦢꦶꦠꦧ꧀ꦧꦴꦤꦶ. ꦱꦺꦱꦩꦺꦠ꧀ꦡ ꦄꦗ꧀ꦙꦠ꧀ꦠꦴꦫꦩ꧀ꦩꦟꦠ꧀ꦠꦶꦏꦺ ꦥꦴꦭ꦳ꦶꦠꦺꦴ ꦈꦠ꧀ꦠꦴꦤꦩꦺꦮ.

ꦄꦴꦫꦩ꧀ꦩꦟꦮꦶꦨꦴꦒꦺ ꦥꦤ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦤ꧀ꦠꦶ ꦆꦩꦺꦱꦁ ꦠꦴꦮ ꦏꦸꦱꦭꦮꦶꦥꦴꦏꦏꦶꦫꦶꦪꦮꦱꦺꦤ ꦖꦤ꧀ꦤꦁ ꦕꦶꦠ꧀ꦠꦸꦥ꧀ꦥꦴꦢꦴꦤꦁ ꦄꦠ꧀ꦠꦤꦺꦴ ꦱꦤ꧀ꦠꦴꦤꦱꦩ꧀ꦧꦤ꧀ꦣꦁ ꦲꦺꦛ꧀ꦜꦶꦩꦱꦩꦴꦥꦠ꧀ꦠꦶꦁ ꦄꦴꦫꦧ꧀ꦨ ꦥꦮꦠ꧀ꦠꦶꦠꦺꦴ ꦄꦗ꧀ꦙꦠ꧀ꦠꦴꦫꦩ꧀ꦩꦟꦠꦴ ꦮꦺꦢꦶꦠꦧ꧀ꦧꦴ. ꦌꦠ꧀ꦡ ꦕ ꦏꦶꦫꦶꦪꦄꦴꦏꦴꦱꦴꦤꦚ꧀ꦕꦴꦪꦠꦤꦁ ꦏꦶꦫꦶꦪꦮꦶꦚ꧀ꦚꦴꦟꦚ꧀ꦕꦴꦪꦠꦤꦱ꧀ꦱꦺꦮ ꦄꦴꦫꦩ꧀ꦩꦟꦁ ꦲꦺꦴꦠꦶ, ꦤ ꦆꦠꦫꦱ꧀ꦱ. ꦏꦱ꧀ꦩꦴ? ꦄꦴꦏꦴꦱꦴꦤꦚ꧀ꦕꦴꦪꦠꦤꦏꦶꦫꦶꦪꦱꦩꦔ꧀ꦒꦶꦤꦺꦴ ꦏꦸꦱꦭꦱ꧀ꦱ ꦮꦴ ꦮꦶꦥꦴꦏꦱ꧀ꦱ ꦮꦴ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦱ꧀ꦱ ꦄꦨꦴꦮꦠꦺꦴ. ꦏꦸꦱꦭꦁ ꦥꦤ ꦏꦸꦱꦭꦮꦶꦥꦴꦏꦏꦶꦫꦶꦪꦴꦤꦁ ꦠꦶꦟ꧀ꦟꦩ꧀ꦥꦶ ꦄꦴꦫꦩ꧀ꦩꦟꦁ ꦲꦺꦴꦠꦶ. ꦏꦱ꧀ꦩꦴ? ꦄꦴꦏꦴꦱꦴꦤꦚ꧀ꦕꦴꦪꦠꦤꦏꦸꦱꦭꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦜꦶꦠꦱ꧀ꦱ ꦠꦠꦺꦴ ꦈꦢ꧀ꦣꦁ ꦠꦶꦮꦶꦣꦱ꧀ꦱꦥꦶ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦱ꧀ꦱ ꦈꦥ꧀ꦥꦠ꧀ꦠꦶꦱꦩ꧀ꦨꦮꦠꦺꦴ. ꦮꦶꦥꦴꦏꦁ ꦥꦤ ꦤ ꦏꦱ꧀ꦱꦕꦶ ꦄꦴꦫꦩ꧀ꦩꦟꦁ ꦲꦺꦴꦠꦶ. ꦏꦱ꧀ꦩꦴ? ꦮꦶꦥꦴꦏꦠꦺꦴ ꦮꦸꦛ꧀ꦜꦲꦶꦠ꧀ꦮꦴ ꦕꦶꦠ꧀ꦠꦱ꧀ꦱ ꦄꦨꦶꦤꦷꦲꦴꦫꦴꦱꦩ꧀ꦨꦮꦠꦺꦴ. ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦱ꧀ꦱ ꦄꦴꦫꦩ꧀ꦩꦟꦏꦫꦟꦺꦥꦶ ꦌꦱꦺꦮ ꦤꦪꦺꦴ. ꦫꦹꦥꦴꦮꦕꦫꦠ꧀ꦠꦶꦏꦕꦠꦸꦏ꧀ꦏꦗ꧀ꦙꦴꦤꦴꦢꦷꦤꦁ ꦱꦧ꧀ꦧꦺꦱꦩ꧀ꦥꦶ ꦤꦶꦪꦏꦗ꧀ꦙꦠ꧀ꦠꦠꦺꦴ ꦧꦲꦶꦢ꧀ꦣꦴꦨꦴꦮꦺꦤ ꦧꦲꦶꦢ꧀ꦣꦴꦨꦹꦠꦴꦤꦶ ꦥꦡꦮꦷꦏꦱꦶꦟꦴꦢꦷꦤꦶ ꦄꦴꦫꦧ꧀ꦨ ꦥꦮꦠ꧀ꦠꦶꦠꦺꦴ ꦧꦲꦶꦢ꧀ꦣꦴꦫꦩ꧀ꦩꦟꦠꦴ ꦮꦺꦢꦶꦠꦧ꧀ꦧꦴ.

ꦱꦧ꧀ꦧꦺꦮ ꦏꦴꦩꦴꦮꦕꦫꦴ ꦏꦸꦱꦭꦴꦏꦸꦱꦭꦴꦧ꧀ꦪꦴꦏꦠꦴ ꦣꦩ꧀ꦩꦴ, ꦫꦹꦥꦴꦮꦕꦫꦁ ꦕꦠꦸꦠ꧀ꦡꦁ ꦙꦴꦤꦤ꧀ꦠꦶ ꦌꦠ꧀ꦡ ꦏꦸꦱꦭꦠꦺꦴ ꦠꦴꦮ ꦕꦠ꧀ꦠꦴꦫꦺꦴ ꦚꦴꦟꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦴ ꦄꦠ꧀ꦠꦤꦺꦴ ꦑꦤ꧀ꦣꦴꦢꦷꦤꦶ ꦥꦕ꧀ꦕꦮꦺꦏ꧀ꦑꦤ꧀ꦠꦱ꧀ꦱ ꦄꦗ꧀ꦙꦠ꧀ꦠꦴꦫꦩ꧀ꦩꦟꦴ. ꦥꦫꦺꦱꦁ ꦑꦤ꧀ꦣꦴꦢꦶꦥꦕ꧀ꦕꦮꦺꦏ꧀ꦑꦟꦺ ꦥꦟ꧀ꦟꦠ꧀ꦠꦶꦤꦶꦧ꧀ꦧꦴꦤꦥꦕ꧀ꦕꦮꦺꦏ꧀ꦑꦟꦺ ꦕ ꦧꦲꦶꦢ꧀ꦣꦴꦫꦩ꧀ꦩꦟꦴ. ꦠꦢꦸꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦴ. ꦚꦴꦟꦮꦶꦥ꧀ꦥꦪꦸꦠ꧀ꦠꦺꦱꦸꦥꦶ ꦌꦱꦺꦮ ꦤꦪꦺꦴ. ꦏꦺꦮꦭꦚ꧀ꦲꦶ ꦠꦺꦱꦁ ꦤꦶꦧ꧀ꦧꦴꦤꦥꦕ꧀ꦕꦮꦺꦏ꧀ꦑꦟꦁ ꦤꦠ꧀ꦡꦶ. ꦄꦏꦸꦱꦭꦠꦺꦴ ꦕꦠ꧀ꦠꦴꦫꦺꦴ ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦸꦥ꧀ꦥꦴꦢꦴ ꦄꦠ꧀ꦠꦤꦺꦴ ꦑꦤ꧀ꦣꦴꦢꦷꦤꦁ ꦄꦱ꧀ꦱꦴꦢꦤꦴꦨꦶꦤꦤ꧀ꦢꦤꦥꦫꦴꦩꦴꦱꦒꦲꦟꦏꦴꦭꦺ ꦄꦗ꧀ꦙꦠ꧀ꦠꦴꦫꦩ꧀ꦩꦟꦴ, ꦥꦫꦱ꧀ꦱ ꦑꦤ꧀ꦣꦴꦢꦷꦱꦸ ꦕꦺꦮ ꦄꦤꦶꦤ꧀ꦢ꧀ꦫꦶꦪꦧꦢ꧀ꦣꦫꦹꦥꦏꦱꦶꦟꦴꦢꦷꦱꦸ ꦕ ꦠꦡꦺꦮ ꦥꦮꦠ꧀ꦠꦶꦏꦴꦭꦺ ꦧꦲꦶꦢ꧀ꦣꦴꦫꦩ꧀ꦩꦟꦴ, ꦠꦢꦸꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦴ. ꦢꦶꦛ꧀ꦜꦶꦮꦶꦥ꧀ꦥꦪꦸꦠ꧀ꦠꦺꦱꦸꦥꦶ ꦌꦱꦺꦮ ꦤꦪꦺꦴ. ꦏꦺꦮꦭꦚ꧀ꦲꦶ ꦠꦺꦱꦁ ꦥꦫꦴꦩꦴꦱꦒꦲꦟꦁ ꦤꦠ꧀ꦡꦶ. ꦢ꧀ꦮꦺꦥꦶ ꦥꦛꦶꦓꦱꦩ꧀ꦥꦪꦸꦠ꧀ꦠꦴ ꦄꦠ꧀ꦠꦤꦺꦴ ꦑꦤ꧀ꦣꦴꦢꦷꦱꦸ ꦢꦺꦴꦩꦤꦱ꧀ꦱꦶꦠꦱ꧀ꦱ ꦄꦗ꧀ꦙꦠ꧀ꦠꦴꦫꦩ꧀ꦩꦟꦴ, ꦥꦫꦱ꧀ꦱ ꦑꦤ꧀ꦣꦴꦢꦷꦱꦸ ꦕꦺꦮ ꦄꦤꦶꦤ꧀ꦢ꧀ꦫꦶꦪꦧꦢ꧀ꦣꦫꦹꦥꦥꦟ꧀ꦟꦠ꧀ꦠꦷꦱꦸ ꦕ ꦧꦲꦶꦢ꧀ꦣꦴꦫꦩ꧀ꦩꦟꦴ, ꦠꦢꦸꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦴ. ꦮꦶꦕꦶꦏꦶꦕ꧀ꦖꦸꦢ꧀ꦣꦕ꧀ꦕꦱꦩ꧀ꦥꦪꦸꦠ꧀ꦠꦴꦤꦩ꧀ꦥꦶ ꦮꦸꦠ꧀ꦠꦥꦏꦴꦫꦺꦱꦸ ꦣꦩ꧀ꦩꦺꦱꦸ ꦮꦶꦕꦶꦏꦶꦕ꧀ꦖꦤꦦꦤ꧀ꦢꦤꦨꦴꦮꦮꦱꦺꦤ ꦥꦮꦠ꧀ꦠꦶꦪꦁ ꦄꦗ꧀ꦙꦠ꧀ꦠꦴꦢꦶꦄꦴꦫꦩ꧀ꦩꦟꦠꦴ ꦮꦺꦢꦶꦠꦧ꧀ꦧꦴ.

ꦢ꧀ꦮꦶꦥꦚ꧀ꦕꦮꦶꦚ꧀ꦚꦴꦟꦴꦤꦶ, ꦠꦶꦱ꧀ꦱꦺꦴ ꦕ ꦩꦤꦺꦴꦣꦴꦠꦸꦪꦺꦴꦠꦶ, ꦆꦩꦺ ꦠꦺꦫꦱ ꦕꦶꦠ꧀ꦠꦸꦥ꧀ꦥꦴꦢꦴ ꦄꦠ꧀ꦠꦤꦺꦴ ꦫꦹꦥꦴꦢꦷꦤꦶ ꦄꦴꦫꦧ꧀ꦨ ꦥꦮꦠ꧀ꦠꦶꦪꦁ ꦄꦗ꧀ꦙꦠ꧀ꦠꦴꦫꦩ꧀ꦩꦟꦴ, ꦥꦫꦱ꧀ꦱ ꦫꦹꦥꦴꦢꦷꦱꦸ ꦥꦮꦠ꧀ꦠꦴ ꦧꦲꦶꦢ꧀ꦣꦴꦫꦩ꧀ꦩꦟꦴ, ꦠꦢꦸꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦴ. ꦱꦺꦴꦩꦤꦱ꧀ꦱꦱꦲꦒꦠꦄꦲꦺꦠꦸꦏꦮꦶꦥꦴꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸ ꦥꦚ꧀ꦕꦢ꧀ꦮꦴꦫꦺ ꦱꦤ꧀ꦠꦷꦫꦟꦠꦢꦴꦫꦩ꧀ꦩꦟꦮꦱꦺꦤ ꦄꦠ꧀ꦠꦤꦺꦴ ꦥꦚ꧀ꦕ ꦫꦹꦥꦴꦢꦶꦣꦩ꧀ꦩꦺ, ꦩꦤꦺꦴꦢ꧀ꦮꦴꦫꦺ ꦠꦢꦴꦫꦩ꧀ꦩꦟꦮꦱꦺꦤꦺꦮ ꦄꦚ꧀ꦚꦺꦥꦶ ꦄꦗ꧀ꦙꦠ꧀ꦠꦶꦏꦺ ꦏꦴꦩꦴꦮꦕꦫꦣꦩ꧀ꦩꦺ ꦄꦴꦫꦧ꧀ꦨ ꦥꦮꦠ꧀ꦠꦶꦪꦁ ꦄꦗ꧀ꦙꦠ꧀ꦠꦴꦫꦩ꧀ꦩꦟꦴ, ꦥꦫꦺꦱꦁ ꦣꦩ꧀ꦩꦺꦱꦸ ꦥꦮꦠ꧀ꦠꦩꦴꦤꦴ ꦧꦲꦶꦢ꧀ꦣꦴꦫꦩ꧀ꦩꦟꦴ, ꦈꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦴ. ꦈꦥꦺꦏ꧀ꦑꦴꦱꦲꦒꦠꦮꦶꦥꦴꦏꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ. ꦏꦺꦮꦭꦁ ꦥꦤꦺꦠꦴ ꦱꦸꦒꦠꦶꦪꦁ ꦢꦸꦒ꧀ꦒꦠꦶꦪꦚ꧀ꦕ ꦥꦛꦶꦱꦤ꧀ꦣꦶꦨꦮꦔ꧀ꦒꦕꦸꦠꦶꦮꦱꦺꦤꦴꦥꦶ ꦄꦗ꧀ꦙꦠ꧀ꦠꦴꦢꦶꦨꦺꦢꦺꦱꦸ ꦏꦩ꧀ꦩꦴꦢꦷꦱꦸ ꦥꦮꦠ꧀ꦠꦤ꧀ꦠꦶ.

ꦄꦛ꧀ꦜ ꦩꦲꦴꦮꦶꦥꦴꦏꦕꦶꦠ꧀ꦠꦴꦤꦶꦥꦶ ꦠꦴꦱꦁꦪꦺꦮ ꦢ꧀ꦮꦶꦤ꧀ꦤꦁ ꦱꦩꦴꦤꦒꦠꦶꦏꦴꦤꦶ. ꦏꦺꦮꦭꦁ ꦥꦤꦺꦠꦴꦤꦶ ꦱꦤ꧀ꦠꦷꦫꦟꦮꦱꦺꦤ ꦤ ꦥꦮꦠ꧀ꦠꦤ꧀ꦠꦶ. ꦥꦛꦶꦱꦤ꧀ꦣꦶꦨꦮꦔ꧀ꦒꦕꦸꦠꦶꦮꦱꦺꦤꦺꦮ ꦌꦠꦴꦤꦶ ꦱꦸꦒꦠꦶꦪꦁꦪꦺꦮ ꦥꦮꦠ꧀ꦠꦤ꧀ꦠꦶ. ꦱꦺꦴꦩꦤꦱ꧀ꦱꦱꦲꦒꦠꦴꦲꦺꦠꦸꦏꦏꦶꦫꦶꦪꦴ ꦥꦚ꧀ꦕꦢ꧀ꦮꦴꦫꦺ ꦄꦠ꧀ꦠꦤꦺꦴ ꦫꦹꦥꦴꦢꦷꦤꦶ ꦄꦴꦫꦧ꧀ꦨ ꦥꦲꦛ꧀ꦜꦴꦏꦴꦫꦏꦫꦟꦮꦱꦺꦤ ꦥꦮꦠ꧀ꦠꦶꦪꦁ ꦄꦗ꧀ꦙꦠ꧀ꦠꦴꦫꦩ꧀ꦩꦟꦴ, ꦥꦫꦱ꧀ꦱ ꦫꦹꦥꦴꦢꦷꦱꦸ ꦥꦮꦠ꧀ꦠꦴ ꦧꦲꦶꦢ꧀ꦣꦴꦫꦩ꧀ꦩꦟꦴ. ꦩꦤꦺꦴꦢ꧀ꦮꦴꦫꦺ ꦠꦡꦴꦒꦠꦱ꧀ꦱ ꦗꦺꦴꦠꦶꦥꦴꦭꦩꦴꦟꦮꦩꦓꦢꦺꦮꦫꦴꦗꦏꦟ꧀ꦲꦠꦴꦥꦱꦴꦢꦶꦏꦴꦭꦺꦱꦸ ꦄꦠ꧀ꦠꦤꦴ ꦏꦠꦏꦶꦫꦶꦪꦁ ꦥꦕ꧀ꦕꦮꦺꦏ꧀ꦑꦤ꧀ꦠꦱ꧀ꦱ ꦲꦱꦶꦠꦸꦥ꧀ꦥꦴꦢꦮꦱꦺꦤ ꦥꦮꦠ꧀ꦠꦴ ꦄꦗ꧀ꦙꦠ꧀ꦠꦴꦫꦩ꧀ꦩꦟꦴ.

ꦩꦭ꧀ꦭꦶꦏꦴꦪ ꦢꦺꦮꦶꦪꦴ ꦱꦤ꧀ꦠꦠꦶꦩꦲꦴꦩꦠ꧀ꦠꦱ꧀ꦱ ꦱꦸꦩꦤꦩꦴꦭꦴꦏꦴꦫꦱ꧀ꦱꦴꦠꦶ ꦌꦮꦩꦴꦢꦷꦤꦁ ꦏꦶꦫꦶꦪꦴꦏꦫꦟꦁ ꦄꦴꦫꦧ꧀ꦨ ꦥꦮꦠ꧀ꦠꦶꦏꦴꦭꦺ ꦧꦲꦶꦢ꧀ꦣꦴꦫꦩ꧀ꦩꦟꦴ. ꦈꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦴ. ꦈꦥꦺꦏ꧀ꦑꦴꦱꦲꦒꦠꦏꦶꦫꦶꦪꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸ ꦥꦚ꧀ꦕꦢ꧀ꦮꦴꦫꦺ ꦮꦺꦴꦛ꧀ꦜꦧ꧀ꦧꦤꦮꦱꦺꦤ ꦩꦤꦺꦴꦢ꧀ꦮꦴꦫꦺ ꦕ ꦄꦴꦮꦗ꧀ꦗꦤꦮꦱꦺꦤ ꦥꦮꦠ꧀ꦠꦶꦪꦁ ꦄꦗ꧀ꦙꦠ꧀ꦠꦴꦢꦶꦄꦴꦫꦩ꧀ꦩꦟꦴ. ꦄꦛ꧀ꦜ ꦩꦲꦴꦏꦶꦫꦶꦪꦴ ꦏꦸꦱꦭꦕꦶꦠ꧀ꦠꦒꦠꦶꦏꦴ ꦌꦮ. ꦏꦺꦮꦭꦚ꧀ꦲꦶ ꦠꦴ ꦑꦷꦟꦴꦱꦮꦴꦤꦁ ꦈꦥ꧀ꦥꦗ꧀ꦗꦤ꧀ꦠꦶ, ꦏꦸꦱꦭꦴꦤꦶ ꦱꦺꦏ꧀ꦑꦥꦸꦡꦸꦗ꧀ꦗꦤꦴꦤꦤ꧀ꦠꦶ ꦌꦠ꧀ꦠꦏꦩꦺꦮꦺꦠ꧀ꦡ ꦤꦴꦤꦴꦏꦫꦟꦁ.

ꦮꦸꦠ꧀ꦠꦥ꧀ꦥꦏꦴꦫꦺ ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦺ ꦱꦧ꧀ꦧꦠ꧀ꦡꦥꦴꦢꦏꦕꦠꦸꦠ꧀ꦡꦴꦢꦷꦤꦶ ꦥꦚ꧀ꦕ ꦙꦴꦤꦴꦤꦶ ꦆꦩꦱ꧀ꦩꦶꦁ ꦠꦶꦏꦺ ꦎꦏꦴꦱꦁ ꦭꦨꦤ꧀ꦠꦶ. ꦌꦠꦴꦤꦶ ꦲꦶ ꦏꦱꦶꦟꦥꦟ꧀ꦟꦠ꧀ꦠꦶꦤꦶꦩꦶꦠ꧀ꦠꦴꦫꦩ꧀ꦩꦟꦠ꧀ꦠꦴ ꦧꦲꦶꦢ꧀ꦣꦴꦫꦩ꧀ꦩꦟꦴꦤꦶ.

‘ꦆꦢ꧀ꦣꦶꦮꦶꦣꦕꦠꦸꦠ꧀ꦡꦁ’ ꦏꦴꦪꦮꦱꦺꦤ ꦕꦶꦠ꧀ꦠꦁ, ꦕꦶꦠ꧀ꦠꦮꦱꦺꦤ ꦮꦴ ꦏꦴꦪꦁ ꦥꦫꦶꦟꦴꦩꦤꦏꦴꦭꦺ ꦄꦠ꧀ꦠꦤꦺꦴ ꦏꦸꦩꦴꦫꦏꦮꦟ꧀ꦟꦴꦢꦶꦤꦶꦩ꧀ꦩꦴꦤꦏꦴꦭꦺ ꦕ ꦱꦏꦴꦪꦕꦶꦠ꧀ꦠꦴꦤꦁ ꦄꦴꦫꦩ꧀ꦩꦟꦏꦫꦟꦠꦺꦴ ꦄꦗ꧀ꦙꦠ꧀ꦠꦴꦫꦩ꧀ꦩꦟꦁ, ꦧꦲꦶꦢ꧀ꦣꦴ ꦲꦠ꧀ꦡꦶꦄꦱ꧀ꦱꦴꦢꦶꦢꦱ꧀ꦱꦤꦏꦴꦭꦺ ꦧꦲꦶꦢ꧀ꦣꦴꦫꦩ꧀ꦩꦟꦁ, ꦏꦴꦭꦺꦤ ꦄꦗ꧀ꦙꦠ꧀ꦠꦁ ꦏꦴꦭꦺꦤ ꦧꦲꦶꦢ꧀ꦣꦴ, ꦥꦮꦠ꧀ꦠꦶꦪꦁ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦁ.

‘ꦢꦶꦧ꧀ꦧꦱꦺꦴꦠꦕꦠꦸꦠ꧀ꦡꦁ’ ꦄꦠ꧀ꦠꦤꦺꦴ ꦏꦸꦕ꧀ꦖꦶꦱꦢ꧀ꦢꦱꦮꦤꦏꦴꦭꦺ ꦄꦗ꧀ꦙꦠ꧀ꦠꦴꦫꦩ꧀ꦩꦟꦁ, ꦥꦫꦺꦱꦁ ꦱꦢ꧀ꦢꦱꦮꦤꦏꦴꦭꦺ ꦧꦲꦶꦢ꧀ꦣꦴꦫꦩ꧀ꦩꦟꦁ, ꦈꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦁ. ‘ꦕꦺꦠꦺꦴꦥꦫꦶꦪꦚꦴꦟꦕꦠꦸꦠ꧀ꦡꦁ’ ꦥꦫꦺꦱꦁ ꦕꦶꦠ꧀ꦠꦴꦫꦩ꧀ꦩꦟꦠꦺꦴ ꦧꦲꦶꦢ꧀ꦣꦴꦫꦩ꧀ꦩꦟꦩꦺꦮ. ꦄꦠ꧀ꦠꦤꦺꦴ ꦕꦶꦠ꧀ꦠꦗꦴꦤꦤꦺ ꦥꦤ ꦠꦺꦤ ꦥꦪꦺꦴꦗꦤꦁ ꦤꦠ꧀ꦡꦶ. ‘ꦥꦸꦧ꧀ꦧꦺꦤꦶꦮꦴꦱꦕꦠꦸꦠ꧀ꦡꦁ’ ꦄꦠ꧀ꦠꦤꦺꦴ ꦑꦤ꧀ꦣꦴꦤꦸꦱ꧀ꦱꦫꦟꦏꦴꦭꦺ ꦄꦗ꧀ꦙꦠ꧀ꦠꦴꦫꦩ꧀ꦩꦟꦁ, ꦥꦫꦱ꧀ꦱ ꦑꦤ꧀ꦣꦺ, ꦄꦤꦶꦢ꧀ꦫꦶꦪꦧꦢ꧀ꦣꦫꦹꦥꦁ, ꦠꦶꦱ꧀ꦱꦺꦴ ꦕ ꦥꦟ꧀ꦟꦠ꧀ꦠꦶꦪꦺꦴ ꦄꦤꦸꦱ꧀ꦱꦫꦟꦠꦺꦴ ꦧꦲꦶꦢ꧀ꦣꦴꦫꦩ꧀ꦩꦟꦁ, ꦈꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦁ.

‘ꦢꦶꦧ꧀ꦧꦕꦏ꧀ꦑꦸꦕꦠꦸꦠ꧀ꦡꦁ’ ꦄꦠ꧀ꦠꦤꦺꦴ ꦏꦸꦕ꧀ꦖꦶꦒꦠꦴꦢꦶꦫꦹꦥꦢꦱ꧀ꦱꦤꦏꦴꦭꦺ ꦄꦗ꧀ꦙꦠ꧀ꦠꦴꦫꦩ꧀ꦩꦟꦁ, ꦄꦮꦱꦺꦱꦫꦹꦥꦢꦱ꧀ꦱꦤꦏꦴꦭꦺ ꦧꦲꦶꦢ꧀ꦣꦴꦫꦩ꧀ꦩꦟꦁ, ꦈꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦁ. ‘ꦄꦤꦴꦒꦠꦁꦱꦚꦴꦟꦕꦠꦸꦠ꧀ꦡꦁ’ ꦄꦠ꧀ꦠꦤꦺꦴ ꦄꦤꦴꦒꦠꦏ꧀ꦑꦤ꧀ꦣꦴꦤꦸꦱ꧀ꦱꦫꦟꦏꦴꦭꦺ ꦄꦗ꧀ꦙꦠ꧀ꦠꦴꦫꦩ꧀ꦩꦟꦁ, ꦥꦫꦱ꧀ꦱ ꦄꦤꦴꦒꦠꦏ꧀ꦑꦤ꧀ꦣꦴꦤꦁ ꦮꦴ ꦄꦤꦶꦤ꧀ꦢ꧀ꦫꦶꦪꦧꦢ꧀ꦣꦱ꧀ꦱ ꦮꦴ ꦫꦹꦥꦱ꧀ꦱ ꦄꦤꦸꦱ꧀ꦱꦫꦟꦏꦴꦭꦺ ꦧꦲꦶꦢ꧀ꦣꦴꦫꦩ꧀ꦩꦟꦁ, ꦈꦨꦪꦮꦱꦺꦤ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦫꦩ꧀ꦩꦟꦁ. ꦄꦴꦏꦶꦚ꧀ꦕꦚ꧀ꦚꦴꦪꦠꦤꦱ꧀ꦱ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦠꦴꦪ ꦏꦴꦫꦟꦁ ꦲꦺꦛ꧀ꦜꦴ ꦮꦸꦠ꧀ꦠꦩꦺꦮ.

ꦢꦸꦏꦄꦠ꧀ꦡꦸꦢ꧀ꦣꦴꦫꦮꦟ꧀ꦟꦤꦴ

꧑꧔꧔꧑. ꦲꦺꦠꦸꦒꦺꦴꦕ꧀ꦖꦏꦤꦶꦢ꧀ꦢꦺꦱꦺ ꦠꦪꦺꦴ ꦏꦸꦱꦭꦲꦺꦠꦹꦠꦶꦄꦴꦢꦶꦤꦴ ꦤꦪꦺꦤ ꦲꦺꦠꦹ ꦢꦱ꧀ꦱꦺꦠ꧀ꦮꦴ ꦥꦸꦤ ꦠꦺꦪꦺꦮ ꦈꦥ꧀ꦥꦠ꧀ꦠꦶꦛ꧀ꦜꦴꦤꦠꦺꦴ ꦢꦱ꧀ꦱꦺꦠꦸꦁ ꦕꦠꦹꦱꦸ ꦨꦹꦩꦷꦱꦸ ꦏꦸꦱꦭꦺꦱꦸ ꦈꦥ꧀ꦥꦗ꧀ꦗꦤ꧀ꦠꦷꦠꦶꦄꦴꦢꦶ ꦮꦸꦠ꧀ꦠꦁ. ꦆꦩꦶꦤꦴ ꦈꦥꦴꦪꦺꦤ ꦱꦺꦱꦒꦺꦴꦕ꧀ꦖꦏꦺꦱꦸꦥꦶ ꦢꦺꦱꦤꦴꦤꦪꦺꦴ ꦮꦺꦢꦶꦠꦧ꧀ꦧꦺꦴ.

꧑꧔꧗꧓. ꦪꦠ꧀ꦡ ꦢ꧀ꦮꦺ ꦠꦪꦺꦴ ꦄꦴꦱꦮꦴ ꦌꦏꦠꦺꦴ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦌꦠ꧀ꦡ ꦠꦶꦮꦶꦣꦺꦤ ꦄꦴꦱꦮꦴꦤꦁ ꦌꦏꦠꦺꦴ ꦈꦥ꧀ꦥꦠ꧀ꦠꦶ ꦮꦺꦢꦶꦠꦧ꧀ꦧꦴ. ꦠꦠ꧀ꦡ ꦕꦠꦹꦱꦸ ꦢꦶꦛ꧀ꦜꦶꦮꦶꦥ꧀ꦥꦪꦸꦠ꧀ꦠꦺꦱꦸ ꦄꦮꦶꦗ꧀ꦗꦴꦱꦮꦺꦤ, ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦺꦱꦸ ꦢꦶꦛ꧀ꦜꦴꦱꦮꦄꦮꦶꦗ꧀ꦗꦴꦱꦮꦺꦲꦶ ꦱꦢ꧀ꦣꦶꦤ꧀ꦠꦶ ꦏꦴꦩꦴꦱꦮꦺꦴ ꦢꦸꦮꦶꦣꦺꦤ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦨꦮꦴꦱꦮꦺꦴ ꦕꦠꦹꦱꦸ ꦢꦶꦛ꧀ꦜꦶꦮꦶꦥ꧀ꦥꦪꦸꦠ꧀ꦠꦺꦱꦸ ꦄꦮꦶꦗ꧀ꦗꦴꦱꦮꦺꦤ ꦱꦢ꧀ꦣꦶꦤ꧀ꦠꦶ ꦌꦏꦣꦴꦮ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦪꦡꦴ ꦕꦺꦠ꧀ꦡ ꦌꦮꦁ ꦪꦠ꧀ꦡ ꦢ꧀ꦮꦺ ꦠꦷꦟꦶ ꦱꦁꦪꦺꦴꦗꦤꦴꦤꦶ ꦌꦏꦠꦺꦴ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦌꦠ꧀ꦡꦴꦥꦶ ꦱꦁꦪꦺꦴꦗꦤꦴꦤꦁ ꦈꦥ꧀ꦥꦠ꧀ꦠꦶ ꦌꦏꦠꦺꦴ ꦢꦱꦣꦴ ꦨꦮꦺ. ꦠꦠ꧀ꦡ ꦏꦴꦩꦫꦴꦒꦺꦴ ꦕꦠꦸꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ, ꦥꦛꦶꦓꦺꦴ ꦠꦶꦣꦴ, ꦩꦴꦤꦺꦴ ꦌꦏꦣꦴ. ꦠꦡꦴ ꦮꦶꦕꦶꦏꦶꦕ꧀ꦖꦴ ꦕꦺꦮ ꦨꦮꦫꦴꦒꦺꦴ ꦕ. ꦏꦡꦁ? ꦏꦴꦩꦫꦴꦒꦺꦴ ꦠꦴꦮ ꦩꦴꦤꦱꦁꦪꦺꦴꦗꦤꦄꦮꦶꦗ꧀ꦗꦴꦱꦁꦪꦺꦴꦗꦤꦺꦲꦶ ꦕꦺꦮ, ꦢꦶꦛ꧀ꦜꦶꦱꦁꦪꦺꦴꦗꦤꦄꦮꦶꦗ꧀ꦗꦴꦱꦁꦪꦺꦴꦗꦤꦺꦲꦶ ꦕ, ꦱꦷꦭꦧ꧀ꦧꦠꦥꦫꦴꦩꦴꦱꦄꦮꦶꦗ꧀ꦗꦴꦱꦁꦪꦺꦴꦗꦤꦺꦲꦶ ꦕ, ꦄꦮꦶꦗ꧀ꦗꦴꦱꦁꦪꦺꦴꦗꦤꦩꦠ꧀ꦠꦺꦤꦺꦮ ꦕ ꦱꦢ꧀ꦣꦶꦤ꧀ꦠꦶ ꦌꦮꦁ ꦕꦠꦸꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦥꦛꦶꦓꦺꦴ ꦥꦤ ꦆꦱ꧀ꦱꦴꦱꦁꦪꦺꦴꦗꦤꦄꦮꦶꦗ꧀ꦗꦴꦱꦁꦪꦺꦴꦗꦤꦺꦲꦶ ꦕꦺꦮ, ꦩꦕ꧀ꦖꦫꦶꦪꦱꦁꦪꦺꦴꦗꦤꦄꦮꦶꦗ꧀ꦗꦴꦱꦁꦪꦺꦴꦗꦤꦺꦲꦶ ꦕ, ꦄꦮꦶꦗ꧀ꦗꦴꦱꦁꦪꦺꦴꦗꦤꦩꦠ꧀ꦠꦺꦤꦺꦮ ꦕ ꦱꦢ꧀ꦣꦶꦤ꧀ꦠꦶ ꦌꦮꦁ ꦠꦶꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦩꦴꦤꦺꦴ ꦨꦮꦫꦴꦒꦴꦮꦶꦗ꧀ꦗꦴꦱꦁꦪꦺꦴꦗꦤꦺꦲꦶ ꦱꦢ꧀ꦣꦶꦁ ꦌꦏꦣꦴꦮ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦠꦡꦴ ꦮꦶꦕꦶꦏꦶꦕ꧀ꦖꦴ. ꦱꦴ ꦲꦶ ꦄꦮꦶꦗ꧀ꦗꦴꦱꦁꦪꦺꦴꦗꦤꦺꦤ ꦱꦢ꧀ꦣꦶꦁ ꦌꦏꦣꦴ ꦈꦥ꧀ꦥꦗ꧀ꦗꦠꦶ. ꦨꦮꦫꦴꦒꦺꦥꦶ ꦌꦱꦺꦮ ꦤꦪꦺꦴꦠꦶ. ꦌꦮꦩꦺꦠ꧀ꦡ ꦢ꧀ꦮꦺ ꦠꦷꦟꦶ ꦱꦁꦪꦺꦴꦗꦤꦴꦤꦶ ꦌꦏꦠꦺꦴ ꦈꦥ꧀ꦥꦗ꧀ꦗꦤ꧀ꦠꦶ.

꧑꧕꧑꧑. ꦪꦁ ꦥꦤꦺꦠꦁ ꦤꦷꦮꦫꦟꦒꦺꦴꦕ꧀ꦖꦏꦺ ꦪꦠ꧀ꦡ ꦢ꧀ꦮꦺ ꦠꦷꦟꦶ ꦤꦷꦮꦫꦟꦴꦤꦶ ꦌꦏꦠꦺꦴ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦮꦸꦠ꧀ꦠꦁ, ꦠꦠ꧀ꦡꦴꦥꦶ ꦄꦛ꧀ꦜꦣꦴ ꦤꦷꦮꦫꦟꦴꦤꦁ ꦌꦏꦠꦺꦴ ꦈꦥ꧀ꦥꦠ꧀ꦠꦶ ꦮꦺꦢꦶꦠꦧ꧀ꦧꦴ. ꦌꦠꦺꦱꦸ ꦲꦶ ꦏꦴꦩꦕ꧀ꦖꦤ꧀ꦢꦺꦴ ꦢꦸꦮꦶꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ, ꦧ꧀ꦪꦴꦥꦴꦢꦺꦴ ꦕꦠꦸꦣꦴ, ꦈꦢ꧀ꦣꦕ꧀ꦕꦁ ꦌꦏꦣꦴ. ꦠꦡꦴ ꦮꦶꦕꦶꦏꦶꦕ꧀ꦖꦴ. ꦏꦡꦁ? ꦏꦴꦩꦕ꧀ꦖꦤ꧀ꦢꦺꦴ ꦠꦴꦮ ꦄꦱꦔ꧀ꦑꦴꦫꦶꦏꦕꦶꦠ꧀ꦠꦺꦱꦸ ꦈꦢ꧀ꦣꦕ꧀ꦕꦤꦷꦮꦫꦟꦄꦮꦶꦗ꧀ꦗꦴꦤꦷꦮꦫꦟꦺꦲꦶ, ꦱꦱꦔ꧀ꦑꦴꦫꦶꦏꦺꦱꦸ ꦡꦶꦤꦩꦶꦢ꧀ꦣꦈꦢ꧀ꦣꦕ꧀ꦕꦄꦮꦶꦗ꧀ꦗꦴꦤꦷꦮꦫꦟꦺꦲꦶ ꦱꦢ꧀ꦣꦶꦁ ꦢꦸꦮꦶꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦪꦁ ꦥꦤꦺꦠꦁ ꦢ꧀ꦮꦺ ꦠꦷꦟꦷꦠꦶ ꦮꦸꦠ꧀ꦠꦁ, ꦠꦁ ꦲꦺꦛ꧀ꦜꦶꦩꦥꦫꦶꦕ꧀ꦖꦺꦢꦮꦱꦺꦤ ꦮꦸꦠ꧀ꦠꦁ. ꦠꦱ꧀ꦩꦴ ꦕꦠꦸꦤ꧀ꦤꦩ꧀ꦥꦶ ꦌꦏꦠꦺꦴ ꦈꦥ꧀ꦥꦗ꧀ꦗꦠꦷꦠꦶ ꦮꦕꦤꦁ ꦪꦸꦗ꧀ꦗꦠꦶ ꦌꦮ. ꦧ꧀ꦪꦴꦥꦴꦢꦺꦴ ꦥꦤ ꦄꦱꦔ꧀ꦑꦴꦫꦶꦏꦕꦶꦠ꧀ꦠꦺ ꦈꦢ꧀ꦣꦕ꧀ꦕꦄꦮꦶꦗ꧀ꦗꦴꦤꦷꦮꦫꦟꦺꦲꦶ, ꦱꦱꦔ꧀ꦑꦴꦫꦶꦏꦺ ꦡꦶꦤꦩꦶꦢ꧀ꦣꦈꦢ꧀ꦣꦕ꧀ꦕꦄꦮꦶꦗ꧀ꦗꦴꦤꦷꦮꦫꦟꦺꦲꦶ, ꦄꦱꦔ꧀ꦑꦴꦫꦶꦏꦺꦪꦺꦮ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦄꦮꦶꦗ꧀ꦗꦴꦤꦷꦮꦫꦟꦺꦲꦶ, ꦱꦱꦔ꧀ꦑꦴꦫꦶꦏꦺꦪꦺꦮ ꦡꦶꦤꦩꦶꦢ꧀ꦣꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦄꦮꦶꦗ꧀ꦗꦴꦤꦷꦮꦫꦟꦺꦲꦶ ꦱꦢ꧀ꦣꦶꦤ꧀ꦠꦶ ꦕꦠꦸꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦈꦢ꧀ꦣꦕ꧀ꦕꦁ ꦥꦤ ꦄꦮꦶꦗ꧀ꦗꦴꦤꦷꦮꦫꦟꦩꦠ꧀ꦠꦺꦤ ꦱꦢ꧀ꦣꦶꦁ ꦌꦏꦣꦴꦮ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦮꦶꦕꦶꦏꦶꦕ꧀ꦖꦸꦢ꧀ꦣꦕ꧀ꦕꦄꦮꦶꦗ꧀ꦗꦴꦤꦷꦮꦫꦟꦺꦲꦶ ꦱꦢ꧀ꦣꦶꦁ ꦌꦏꦣꦴꦮ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ.

꧑꧕꧗꧗. ꦪꦩ꧀ꦥꦶꦢꦁ ꦏꦶꦭꦺꦱꦒꦺꦴꦕ꧀ꦖꦏꦺ ꦪꦠ꧀ꦡ ꦢ꧀ꦮꦺ ꦠꦪꦺꦴ ꦏꦶꦭꦺꦱꦴ ꦌꦏꦠꦺꦴ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦮꦸꦠ꧀ꦠꦁ, ꦠꦠ꧀ꦡ ‘ꦢ꧀ꦮꦺ ꦏꦶꦭꦺꦱꦴ ꦄꦚ꧀ꦚꦺꦲꦶ, ꦠꦪꦺꦴ ꦮꦴ ꦏꦶꦭꦺꦱꦴ ꦄꦚ꧀ꦚꦺꦲꦶ ꦏꦶꦭꦺꦱꦺꦲꦶ ꦱꦢ꧀ꦣꦶꦁ ꦈꦥ꧀ꦥꦗ꧀ꦗꦤ꧀ꦠꦷ’ꦠꦶ ꦌꦮꦩꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦏꦱ꧀ꦩꦴ? ꦢ꧀ꦮꦶꦤ꧀ꦤꦁ ꦠꦶꦟ꧀ꦟꦁꦪꦺꦮ ꦮꦴ ꦌꦏꦠꦺꦴ ꦈꦥ꧀ꦥꦠ꧀ꦠꦶꦪꦴ ꦄꦱꦩ꧀ꦨꦮꦠꦺꦴ.

ꦠꦠ꧀ꦡ ꦢꦱꦣꦴ ꦏꦶꦭꦺꦱꦴꦤꦁ ꦌꦏꦠꦺꦴ ꦈꦥ꧀ꦥꦠ꧀ꦠꦶ ꦲꦺꦴꦠꦶ. ꦌꦠ꧀ꦡ ꦲꦶ ꦭꦺꦴꦨꦺꦴ ꦖꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦥꦛꦶꦓꦺꦴ ꦢ꧀ꦮꦶꦣꦴ. ꦠꦡꦴ ꦩꦺꦴꦲꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦏꦡꦁ? ꦭꦺꦴꦨꦺꦴ ꦠꦴꦮ ꦄꦱꦔ꧀ꦑꦴꦫꦶꦏꦺ ꦢꦶꦛ꧀ꦜꦶꦮꦶꦥ꧀ꦥꦪꦸꦠ꧀ꦠꦺ ꦩꦺꦴꦲꦈꦢ꧀ꦣꦕ꧀ꦕꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ, ꦱꦱꦔ꧀ꦑꦴꦫꦶꦏꦺ ꦩꦺꦴꦲꦡꦶꦤꦈꦢ꧀ꦣꦕ꧀ꦕꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ, ꦄꦱꦔ꧀ꦑꦴꦫꦶꦏꦺꦪꦺꦮ ꦩꦺꦴꦲꦩꦴꦤꦸꦢ꧀ꦣꦕ꧀ꦕꦴꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ, ꦱꦱꦔ꧀ꦑꦴꦫꦶꦏꦺꦪꦺꦮ ꦩꦺꦴꦲꦩꦴꦤꦡꦶꦤꦈꦢ꧀ꦣꦕ꧀ꦕꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ, ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦺ ꦥꦤ ꦄꦱꦔ꧀ꦑꦴꦫꦶꦏꦺ ꦩꦺꦴꦲꦈꦢ꧀ꦣꦕ꧀ꦕꦢꦶꦛ꧀ꦜꦶꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ, ꦱꦱꦔ꧀ꦑꦴꦫꦶꦏꦺ ꦩꦺꦴꦲꦢꦶꦛ꧀ꦜꦶꦡꦶꦤꦈꦢ꧀ꦣꦕ꧀ꦕꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ ꦱꦢ꧀ꦣꦶꦤ꧀ꦠꦶ ꦖꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ.

ꦥꦛꦶꦓꦺꦴ ꦥꦤ ꦄꦱꦔ꧀ꦑꦴꦫꦶꦏꦺ ꦩꦺꦴꦲꦈꦢ꧀ꦣꦕ꧀ꦕꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ, ꦱꦱꦔ꧀ꦑꦴꦫꦶꦏꦺ ꦩꦺꦴꦲꦡꦶꦤꦈꦢ꧀ꦣꦕ꧀ꦕꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ ꦱꦢ꧀ꦣꦶꦤ꧀ꦠꦶ ꦌꦮꦁ ꦢ꧀ꦮꦶꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦩꦺꦴꦲꦺꦴ ꦥꦤ ꦮꦶꦕꦶꦏꦶꦕ꧀ꦖꦴꦱꦩ꧀ꦥꦪꦸꦠ꧀ꦠꦺ ꦮꦶꦕꦶꦏꦶꦕ꧀ꦖꦸꦢ꧀ꦣꦕ꧀ꦕꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ, ꦈꦢ꧀ꦣꦕ꧀ꦕꦱꦩ꧀ꦥꦪꦸꦠ꧀ꦠꦺ ꦈꦢ꧀ꦣꦕ꧀ꦕꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦺꦲꦶ ꦱꦢ꧀ꦣꦶꦤ꧀ꦠꦶ ꦌꦮꦁ ꦢ꧀ꦮꦶꦣꦴ ꦌꦏꦠꦺꦴ ꦈꦥ꧀ꦥꦗ꧀ꦗꦠꦶ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮꦴꦠꦶ.

ꦄꦛ꧀ꦜꦱꦴꦭꦶꦤꦶꦪꦴ ꦣꦩ꧀ꦩꦱꦔ꧀ꦒꦲꦄꦛ꧀ꦜꦏꦡꦴꦪ

ꦄꦛ꧀ꦜꦏꦡꦴꦏꦟ꧀ꦝꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦤꦶꦒꦩꦤꦏꦡꦴ

ꦌꦠ꧀ꦠꦴꦮꦠꦴ ꦕ –

ꦕꦶꦠ꧀ꦠꦁ ꦫꦹꦥꦚ꧀ꦕ ꦤꦶꦏ꧀ꦑꦺꦥꦁ, ꦄꦠ꧀ꦡꦸꦢ꧀ꦣꦴꦫꦁ ꦩꦤꦺꦴꦫꦩꦁ;

ꦪꦁ ꦭꦺꦴꦏꦤꦴꦡꦺꦴ ꦨꦴꦗꦺꦤ꧀ꦠꦺꦴ, ꦢꦺꦱꦺꦱꦶ ꦣꦩ꧀ꦩꦱꦔ꧀ꦒꦟꦶꦁ.

ꦄꦨꦶꦣꦩ꧀ꦩꦱ꧀ꦱ ꦱꦔ꧀ꦒꦪ꧀ꦲ, ꦣꦩ꧀ꦩꦺ ꦄꦤꦮꦱꦺꦱꦠꦺꦴ;

ꦜꦶꦠꦴꦪ ꦠꦱ꧀ꦱꦴ ꦄꦴꦫꦢ꧀ꦣꦴ, ꦪꦴ ꦩꦪꦴ ꦄꦠ꧀ꦡꦮꦟ꧀ꦟꦤꦴ.

ꦄꦤꦴꦏꦸꦭꦴꦤꦩꦠ꧀ꦡꦴꦤꦁ, ꦱꦩ꧀ꦨꦮꦴ ꦄꦛ꧀ꦜꦱꦴꦭꦶꦤꦷ;

ꦆꦠꦶ ꦤꦴꦩꦺꦤ ꦱꦴ ꦌꦱꦴ, ꦱꦤ꧀ꦤꦶꦛ꧀ꦜꦴꦤꦩꦸꦥꦴꦒꦠꦴ.

ꦌꦏꦹꦤꦕꦠ꧀ꦠꦴꦭꦷꦱꦴꦪ, ꦥꦴꦭ꦳ꦶꦪꦴ ꦨꦴꦟꦮꦴꦫꦠꦺꦴ;

ꦕꦶꦫꦛ꧀ꦜꦶꦠꦠ꧀ꦡꦁ ꦣꦩ꧀ꦩꦱ꧀ꦱ, ꦤꦶꦛ꧀ꦜꦴꦥꦺꦤ꧀ꦠꦺꦤ ꦠꦁ ꦩꦪꦴ.

ꦪꦁ ꦥꦠ꧀ꦠꦁ ꦏꦸꦱꦭꦁ ꦠꦱ꧀ꦱ, ꦄꦴꦤꦸꦨꦴꦮꦺꦤ ꦥꦴꦟꦶꦤꦺꦴ;

ꦱꦧ꧀ꦧꦺ ꦱꦢ꧀ꦣꦩ꧀ꦩꦫꦴꦗꦱ꧀ꦱ, ꦚꦠ꧀ꦮꦴ ꦣꦩ꧀ꦩꦁ ꦱꦸꦑꦴꦮꦲꦁ.

ꦥꦴꦥꦸꦟꦤ꧀ꦠꦸ ꦮꦶꦱꦸꦢ꧀ꦣꦴꦪ, ꦱꦸꦑꦴꦪ ꦥꦛꦶꦥꦠ꧀ꦠꦶꦪꦴ;

ꦄꦱꦺꦴꦏꦩꦤꦸꦥꦴꦪꦴꦱꦁ, ꦤꦶꦧ꧀ꦧꦴꦤꦱꦸꦑꦩꦸꦠ꧀ꦠꦩꦁ.

ꦕꦶꦫꦁ ꦠꦶꦛ꧀ꦜꦠꦸ ꦱꦢ꧀ꦣꦩ꧀ꦩꦺꦴ, ꦣꦩ꧀ꦩꦺ ꦲꦺꦴꦤ꧀ꦠꦸ ꦱꦒꦴꦫꦮꦴ;

ꦱꦧ꧀ꦧꦺꦥꦶ ꦱꦠ꧀ꦠꦴ ꦏꦴꦭꦺꦤ, ꦱꦩ꧀ꦩꦴ ꦢꦺꦮꦺꦴ ꦥꦮꦱ꧀ꦱꦠꦸ.

ꦪꦡꦴ ꦫꦏ꧀ꦑꦶꦁꦱꦸ ꦥꦺꦴꦫꦴꦟꦴ, ꦱꦸꦫꦴꦗꦴꦤꦺꦴ ꦠꦡꦺꦮꦶꦩꦁ;

ꦫꦴꦗꦴ ꦫꦏ꧀ꦑꦠꦸ ꦣꦩ꧀ꦩꦺꦤ, ꦄꦠ꧀ꦠꦤꦺꦴꦮ ꦥꦗꦁ ꦥꦗꦤ꧀ꦠꦶ.

ꦥꦫꦩꦮꦶꦱꦸꦢ꧀ꦣꦱꦢ꧀ꦣꦴꦧꦸꦢ꧀ꦣꦶꦮꦷꦫꦶꦪꦥꦛꦶꦩꦟ꧀ꦝꦶꦠꦺꦤ ꦱꦷꦭꦴꦕꦴꦫꦗ꧀ꦗꦮꦩꦢ꧀ꦢꦮꦴꦢꦶꦒꦸꦟꦱꦩꦸꦢꦪꦱꦩꦸꦢꦶꦠꦺꦤ ꦱꦏꦱꦩꦪꦱꦩꦪꦤ꧀ꦠꦫꦒꦲꦤꦗ꧀ꦙꦺꦴꦒꦴꦲꦟꦱꦩꦠ꧀ꦡꦺꦤ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪꦱꦩꦤ꧀ꦤꦴꦒꦠꦺꦤ ꦠꦶꦥꦶꦛꦏꦥꦫꦶꦪꦠ꧀ꦠꦶꦥ꧀ꦥꦨꦺꦢꦺ ꦱꦴꦛ꧀ꦜꦏꦡꦺ ꦱꦠ꧀ꦡꦸꦱꦴꦱꦤꦺ ꦄꦥ꧀ꦥꦛꦶꦲꦠꦚꦴꦟꦥ꧀ꦥꦨꦴꦮꦺꦤ ꦩꦲꦴꦮꦺꦪ꧀ꦪꦴꦏꦫꦟꦺꦤ ꦏꦫꦟꦱꦩ꧀ꦥꦠ꧀ꦠꦶꦗꦤꦶꦠꦱꦸꦑꦮꦶꦤꦶꦒ꧀ꦒꦠꦩꦣꦸꦫꦺꦴꦢꦴꦫꦮꦕꦤꦭꦴꦮꦟ꧀ꦟꦪꦸꦠ꧀ꦠꦺꦤ ꦪꦸꦠ꧀ꦠꦩꦸꦠ꧀ꦠꦮꦴꦢꦶꦤꦴ ꦮꦴꦢꦷꦮꦫꦺꦤ ꦩꦲꦴꦏꦮꦶꦤꦴ ꦥꦨꦶꦤ꧀ꦤꦥꦛꦶꦱꦩ꧀ꦨꦶꦢꦴꦥꦫꦶꦮꦴꦫꦺ ꦖꦭ꦳ꦨꦶꦚ꧀ꦚꦴꦢꦶꦥ꧀ꦥꦨꦺꦢꦒꦸꦟꦥꦛꦶꦩꦟ꧀ꦝꦶꦠꦺ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺ ꦱꦸꦥ꧀ꦥꦠꦶꦛ꧀ꦜꦶꦠꦧꦸꦢ꧀ꦣꦷꦤꦁ ꦡꦺꦫꦮꦁꦱꦥ꧀ꦥꦢꦷꦥꦴꦤꦁ ꦡꦺꦫꦴꦤꦁ ꦩꦲꦴꦮꦶꦲꦴꦫꦮꦴꦱꦷꦤꦁ ꦮꦁꦱꦴꦭꦔ꧀ꦏꦴꦫꦨꦹꦠꦺꦤ ꦮꦶꦥꦸꦭꦮꦶꦱꦸꦢ꧀ꦣꦧꦸꦢ꧀ꦣꦶꦤꦴ ꦧꦸꦢ꧀ꦣꦓꦺꦴꦱꦺꦴꦠꦶ ꦒꦫꦹꦲꦶ ꦒꦲꦶꦠꦤꦴꦩꦣꦺꦪ꧀ꦪꦺꦤ ꦡꦺꦫꦺꦤ ꦏꦠꦴ ꦄꦪꦁ ꦄꦛ꧀ꦜꦱꦴꦭꦶꦤꦷ ꦤꦴꦩ ꦣꦩ꧀ꦩꦱꦔ꧀ꦒꦲꦛ꧀ꦜꦏꦡꦴ.

ꦠꦴꦮ ꦠꦶꦛ꧀ꦜꦠꦸ ꦭꦺꦴꦏꦱ꧀ꦩꦶꦁ, ꦭꦺꦴꦏꦤꦶꦠ꧀ꦡꦫꦟꦺꦱꦶꦤꦁ;

ꦢꦱ꧀ꦱꦺꦤ꧀ꦠꦷ ꦏꦸꦭꦥꦸꦠ꧀ꦠꦴꦤꦁ, ꦤꦪꦁ ꦥꦚ꧀ꦚꦴꦮꦶꦱꦸꦢ꧀ꦣꦶꦪꦴ.

ꦪꦴꦮ ‘ꦧꦸꦢ꧀ꦣꦺꦴ’ꦠꦶ ꦤꦴꦩꦩ꧀ꦥꦶ, ꦱꦸꦢ꧀ꦣꦕꦶꦠ꧀ꦠꦱ꧀ꦱ ꦠꦴꦢꦶꦤꦺꦴ;

ꦭꦺꦴꦏꦩ꧀ꦲꦶ ꦭꦺꦴꦏꦗꦺꦛ꧀ꦜꦱ꧀ꦱ, ꦥꦮꦠ꧀ꦠꦠꦶ ꦩꦲꦺꦱꦶꦤꦺꦴꦠꦶ.

ꦄꦛ꧀ꦜꦱꦴꦭꦶꦤꦷ ꦤꦴꦩ

ꦣꦩ꧀ꦩꦱꦔ꧀ꦒꦲ-ꦄꦛ꧀ꦜꦏꦡꦴ ꦤꦶꦛ꧀ꦜꦶꦠꦴ.