ꦏꦶꦫꦶꦪꦴꦧ꧀ꦪꦴꦏꦠꦮꦟ꧀ꦟꦤꦴ

ꦩꦤꦺꦴꦣꦴꦠꦸꦕꦶꦠ꧀ꦠꦁ

꧕꧖꧖. ꦆꦢꦴꦤꦶ ꦏꦶꦫꦶꦪꦴꦧ꧀ꦪꦴꦏꦠꦁ ꦨꦴꦗꦺꦠ꧀ꦮꦴ ꦢꦱ꧀ꦱꦺꦠꦸꦁ ꦥꦸꦤ ꦏꦠꦩꦺ ꦣꦩ꧀ꦩꦴ ꦄꦧ꧀ꦪꦴꦏꦠꦴꦠꦶꦄꦴꦢꦶ ꦄꦴꦫꦢ꧀ꦣꦁ. ꦠꦠ꧀ꦡ ꦏꦶꦫꦶꦪꦴꦠꦶ ꦏꦫꦟꦩꦠ꧀ꦠꦁ. ꦱꦧ꧀ꦧꦺꦱꦸꦪꦺꦮ ꦲꦶ ꦏꦶꦫꦶꦪꦕꦶꦠ꧀ꦠꦺꦱꦸ ꦪꦁ ꦗꦮꦤꦨꦴꦮꦁ ꦄꦥ꧀ꦥꦠ꧀ꦠꦁ ꦠꦁ ꦮꦴꦠꦥꦸꦥ꧀ꦦꦁ ꦮꦶꦪ. ꦪꦁ ꦗꦮꦤꦨꦴꦮꦥ꧀ꦥꦠ꧀ꦠꦁ ꦠꦁ ꦖꦶꦤ꧀ꦤꦩꦹꦭꦏꦫꦸꦏ꧀ꦑꦥꦸꦥ꧀ꦦꦁ ꦮꦶꦪ ꦄꦦꦭꦁ ꦲꦺꦴꦠꦶ, ꦠꦁꦠꦁ ꦏꦶꦕ꧀ꦕꦱꦴꦣꦤꦮꦱꦺꦤ ꦥꦮꦠ꧀ꦠꦠ꧀ꦠꦴ ꦥꦤ ꦏꦫꦟꦩꦠ꧀ꦠꦩꦺꦮ ꦲꦺꦴꦠꦶ. ꦠꦱ꧀ꦩꦴ ꦏꦶꦫꦶꦪꦴꦠꦶ ꦮꦸꦠ꧀ꦠꦁ. ꦤꦺꦮꦏꦸꦱꦭꦴꦤꦴꦏꦸꦱꦭꦴꦠꦶꦄꦴꦢꦷꦱꦸ ꦏꦸꦱꦭꦩꦹꦭꦱꦔ꧀ꦑꦴꦠꦱ꧀ꦱ ꦏꦸꦱꦭꦲꦺꦠꦸꦤꦺꦴ ꦄꦨꦴꦮꦴ ‘ꦤꦺꦮꦏꦸꦱꦭꦴ’; ꦄꦏꦸꦱꦭꦩꦹꦭꦱꦔ꧀ꦑꦴꦠꦱ꧀ꦱ ꦄꦏꦸꦱꦭꦲꦺꦠꦸꦤꦺꦴ ꦄꦨꦴꦮꦴ ‘ꦤꦺꦮꦄꦏꦸꦱꦭꦴ’; ꦪꦺꦴꦤꦶꦱꦺꦴꦩꦤꦱꦶꦏꦴꦫꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦱꦔ꧀ꦑꦴꦠꦴꦤꦩ꧀ꦥꦶ ꦏꦸꦱꦭꦴꦏꦸꦱꦭꦥꦕ꧀ꦕꦪꦴꦤꦁ ꦄꦨꦴꦮꦴ ‘ꦤꦺꦮꦏꦸꦱꦭꦴꦤꦴꦏꦸꦱꦭꦴ’. ꦏꦸꦱꦭꦴꦏꦸꦱꦭꦱꦔ꧀ꦑꦴꦠꦱ꧀ꦱ ꦗꦤꦏꦲꦺꦠꦸꦤꦺꦴ ꦄꦨꦴꦮꦴ ꦤꦺꦮꦏꦩ꧀ꦩꦮꦶꦥꦴꦏꦴ.

ꦆꦣꦴꦥꦶ ꦕꦶꦠ꧀ꦠꦱ꧀ꦱꦺꦏꦒ꧀ꦒꦠꦴꦤꦶꦢ꧀ꦢꦺꦱꦺ ꦥꦮꦠ꧀ꦠꦶꦛ꧀ꦜꦶꦠꦶꦩꦠ꧀ꦠꦩꦺꦮ ꦭꦧ꧀ꦨꦠꦶ. ꦢ꧀ꦮꦺ ꦥꦚ꧀ꦕꦮꦶꦚ꧀ꦚꦴꦟꦴꦤꦶ, ꦠꦶꦱ꧀ꦱꦺꦴ ꦩꦤꦺꦴꦣꦴꦠꦸꦪꦺꦴ, ꦠꦶꦱ꧀ꦱꦺꦴ ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦪꦺꦴ, ꦮꦶꦕꦶꦏꦶꦕ꧀ꦖꦴꦱꦲꦒꦠꦤ꧀ꦠꦶ ꦆꦩꦺꦱꦸ ꦱꦠ꧀ꦠꦫꦱꦱꦸ ꦕꦶꦠ꧀ꦠꦺꦱꦸ ꦢꦸꦧ꧀ꦧꦭꦠ꧀ꦠꦴ ꦱꦟ꧀ꦜꦶꦠꦶ ꦄꦮꦛ꧀ꦜꦶꦠꦶꦄꦴꦢꦷꦤꦶ ꦤ ꦭꦧ꧀ꦨꦤ꧀ꦠꦶ. ꦱꦺꦱꦁ ꦱꦧ꧀ꦧꦁ ꦮꦶꦥꦴꦏꦩꦤꦺꦴꦣꦴꦠꦸꦤꦶꦢ꧀ꦢꦺꦱꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ, ꦄꦚ꧀ꦚꦠ꧀ꦫ ꦈꦥ꧀ꦥꦠ꧀ꦠꦶꦛ꧀ꦜꦴꦤꦴ. ꦠꦚ꧀ꦲꦶ ꦕꦶꦠ꧀ꦠꦁ ꦥꦚ꧀ꦕꦮꦶꦚ꧀ꦚꦴꦟꦴꦤꦤ꧀ꦠꦫꦁ ꦈꦥ꧀ꦥꦗ꧀ꦗꦠꦶ. ꦆꦢꦁ ꦥꦤ ꦥꦚ꧀ꦕꦢ꧀ꦮꦴꦫꦺ ꦮꦭ꦳ꦚ꧀ꦗꦤꦏꦥ꧀ꦥꦮꦠ꧀ꦠꦶꦏꦴꦭꦺ ꦱꦧ꧀ꦧꦺꦱꦁ ꦥꦸꦫꦺ ꦈꦥ꧀ꦥꦗ꧀ꦗꦠꦶ. ꦏꦡꦁ? ꦕꦏ꧀ꦑꦸꦢ꧀ꦮꦴꦫꦺ ꦠꦴꦮ ꦆꦛ꧀ꦜꦆꦛ꧀ꦜꦩꦗ꧀ꦙꦠ꧀ꦠꦄꦤꦶꦛ꧀ꦜꦄꦤꦶꦛ꧀ꦜꦩꦗ꧀ꦙꦠ꧀ꦠꦺꦱꦸ ꦫꦹꦥꦴꦫꦩ꧀ꦩꦟꦺꦱꦸ ꦪꦺꦤ ꦏꦺꦤꦕꦶ ꦥꦱꦴꦢꦺ ꦓꦛ꧀ꦛꦶꦠꦺ ꦠꦁ ꦄꦴꦫꦩ꧀ꦩꦟꦁ ꦒꦲꦺꦠ꧀ꦮꦴ ꦄꦴꦮꦗ꧀ꦗꦤꦮꦱꦺꦤ ꦥꦸꦫꦺꦕꦴꦫꦶꦏꦁ ꦲꦸꦠ꧀ꦮꦴ ꦨꦮꦔ꧀ꦒꦁ ꦄꦴꦮꦛ꧀ꦛꦪꦩꦴꦤꦁ ꦈꦥ꧀ꦥꦗ꧀ꦗꦠꦶ. ꦱꦺꦴꦠꦢ꧀ꦮꦴꦫꦴꦢꦷꦱꦸꦥꦶ ꦌꦱꦺꦮ ꦤꦪꦺꦴꦠꦶ.

ꦏꦶꦫꦶꦪꦩꦤꦺꦴꦣꦴꦠꦸꦕꦶꦠ꧀ꦠꦁ ꦤꦶꦛ꧀ꦜꦶꦠꦁ.

ꦏꦶꦫꦶꦪꦩꦤꦺꦴꦮꦶꦚ꧀ꦚꦴꦟꦣꦴꦠꦸꦕꦶꦠ꧀ꦠꦴꦤꦶ

꧕꧖꧘. ꦩꦤꦺꦴꦮꦶꦚ꧀ꦚꦴꦟꦣꦴꦠꦸ ꦈꦥ꧀ꦥꦤ꧀ꦤꦴ ꦲꦺꦴꦠꦶ…ꦥꦺ… ꦱꦺꦴꦩꦤꦱ꧀ꦱꦱꦲꦒꦠꦴꦠꦶ, ꦆꦢꦁ ꦕꦶꦠ꧀ꦠꦁ ꦄꦚ꧀ꦚꦺꦱꦁ ꦄꦱꦴꦣꦴꦫꦟꦁ. ꦑꦷꦟꦴꦱꦮꦱ꧀ꦱꦺꦮ ꦥꦴꦛꦶꦥꦸꦒ꧀ꦒꦭꦶꦏꦁ. ꦖꦱꦸ ꦢ꧀ꦮꦴꦫꦺꦱꦸ ꦭꦧ꧀ꦨꦠꦶ. ꦕꦏ꧀ꦑꦸꦢ꧀ꦮꦴꦫꦺ ꦲꦶ ꦥꦣꦴꦤꦱꦴꦫꦸꦥ꧀ꦥꦁ ꦜꦴꦤꦁ ꦢꦶꦱ꧀ꦮꦴ ꦑꦷꦟꦴꦱꦮꦺꦴ ꦆꦩꦶꦤꦴ ꦕꦶꦠ꧀ꦠꦺꦤ ꦱꦺꦴꦩꦤꦱ꧀ꦱꦶꦠꦺꦴ ꦲꦺꦴꦠꦶ. ꦱꦺꦴꦠꦢ꧀ꦮꦴꦫꦺ ꦨꦟ꧀ꦝꦨꦴꦗꦤꦷꦪꦛ꧀ꦜꦴꦤꦁ ꦥꦠ꧀ꦮꦴ ꦩꦲꦴꦱꦢ꧀ꦢꦁ ꦏꦠ꧀ꦮꦴ ꦭꦸꦢ꧀ꦣꦭꦸꦢ꧀ꦣꦺꦱꦸ ꦒꦟ꧀ꦲꦤ꧀ꦠꦺꦱꦸ ‘ꦌꦮꦫꦹꦥꦴ ꦤꦴꦩ ꦩꦺ ꦭꦺꦴꦭꦸꦥ꧀ꦥꦠꦟ꧀ꦲꦴ ꦥꦲꦷꦤꦴ’ꦠꦶ ꦆꦩꦶꦤꦴ ꦕꦶꦠ꧀ꦠꦺꦤ ꦱꦺꦴꦩꦤꦱ꧀ꦱꦶꦠꦺꦴ ꦲꦺꦴꦠꦶ. ꦓꦴꦤꦢ꧀ꦮꦴꦫꦺ ꦒꦤ꧀ꦣꦺꦲꦶ ꦮꦴ ꦥꦸꦥ꧀ꦦꦺꦲꦶ ꦮꦴ ꦕꦺꦠꦶꦪꦁ ꦥꦹꦗꦺꦤ꧀ꦠꦺꦴ ꦆꦩꦶꦤꦴ ꦕꦶꦠ꧀ꦠꦺꦤ ꦱꦺꦴꦩꦤꦱ꧀ꦱꦶꦠꦺꦴ ꦲꦺꦴꦠꦶ. ꦗꦶꦮ꧀ꦲꦴꦢ꧀ꦮꦴꦫꦺ ꦫꦱꦱꦩ꧀ꦥꦤ꧀ꦤꦁ ꦥꦶꦟ꧀ꦝꦥꦴꦠꦁ ꦭꦢ꧀ꦣꦴ ꦨꦴꦗꦺꦠ꧀ꦮꦴ ꦥꦫꦶꦨꦸꦚ꧀ꦗꦤ꧀ꦠꦺꦴ ‘ꦱꦴꦫꦟꦷꦪꦣꦩ꧀ꦩꦺꦴ ꦮꦠ ꦩꦺ ꦥꦹꦫꦶꦠꦺꦴ’ꦠꦶ ꦆꦩꦶꦤꦴ ꦕꦶꦠ꧀ꦠꦺꦤ ꦱꦺꦴꦩꦤꦱ꧀ꦱꦶꦠꦺꦴ ꦲꦺꦴꦠꦶ. ꦏꦴꦪꦢ꧀ꦮꦴꦫꦺ ꦄꦨꦶꦱꦩꦴꦕꦴꦫꦶꦏꦮꦠ꧀ꦠꦁ ꦏꦫꦺꦴꦤ꧀ꦠꦺꦴ ‘ꦏꦴꦪꦢ꧀ꦮꦴꦫꦺ ꦩꦺ ꦮꦠ꧀ꦠꦁ ꦥꦹꦫꦶꦠ’ꦤ꧀ꦠꦶ ꦆꦩꦶꦤꦴ ꦕꦶꦠ꧀ꦠꦺꦤ ꦱꦺꦴꦩꦤꦱ꧀ꦱꦶꦠꦺꦴ ꦲꦺꦴꦠꦶ. ꦌꦮꦁ ꦠꦴꦮ ꦥꦚ꧀ꦕꦢ꧀ꦮꦴꦫꦺ ꦭꦧ꧀ꦨꦠꦶ.

ꦩꦤꦺꦴꦢ꧀ꦮꦴꦫꦺ ꦥꦤ ꦄꦠꦷꦠꦴꦤꦴꦒꦠꦩꦴꦫꦧ꧀ꦨ ꦈꦥ꧀ꦥꦗ꧀ꦗꦠꦶ. ꦗꦺꦴꦠꦶꦥꦴꦭꦩꦴꦟꦮ(ꦩ. ꦤꦶ. ꧒.꧒꧘꧒ ꦄꦴꦢꦪꦺꦴ) ꦩꦒ꧀ꦓꦢꦺꦮꦫꦴꦗ(ꦩ. ꦤꦶ. ꧒.꧓꧐꧘ ꦄꦴꦢꦪꦺꦴ) ꦏꦟ꧀ꦲꦠꦴꦥꦱꦴꦢꦶꦏꦴꦭꦱ꧀ꦩꦶꦚ꧀ꦲꦶ (ꦗꦴ. ꧑.꧑꧐.꧑꧑ ꦄꦴꦢꦪꦺꦴ) ꦏꦠꦁ ꦏꦴꦫꦟꦁ ꦄꦴꦮꦗ꧀ꦗꦺꦠ꧀ꦮꦴ ꦠꦡꦴꦒꦠꦺꦴ ꦱꦶꦠꦁ ꦥꦴꦠ꧀ꦮꦴꦏꦴꦱꦶ. ꦠꦁ ꦥꦤ ꦥꦸꦧ꧀ꦧꦺꦤꦶꦮꦴꦱꦚꦴꦟꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦴꦤꦁ ꦏꦶꦕ꧀ꦕꦁ. ꦠꦺꦱꦁ ꦥꦤ ꦢ꧀ꦮꦶꦤ꧀ꦤꦁ ꦚꦴꦟꦴꦤꦁ ꦕꦶꦟ꧀ꦟꦥꦫꦶꦪꦤ꧀ꦠꦺ ꦆꦢꦁ ꦕꦶꦠ꧀ꦠꦁ ꦲꦴꦱꦪꦩꦴꦤꦁ ꦈꦥ꧀ꦥꦗ꧀ꦗꦠꦶ. ꦄꦤꦴꦒꦠꦺ ‘ꦠꦤ꧀ꦠꦶꦱ꧀ꦱꦫꦺꦴ ꦩꦸꦢꦶꦔ꧀ꦒꦱ꧀ꦱꦫꦺꦴ ꦥꦕ꧀ꦕꦺꦏꦧꦸꦢ꧀ꦣꦺꦴ ꦨꦮꦶꦱ꧀ꦱꦠꦷ’ꦠꦶ ꦱꦶꦠꦁ ꦥꦴꦠ꧀ꦮꦴꦏꦴꦱꦶ. ꦠꦩ꧀ꦥꦶ ꦄꦤꦴꦒꦠꦁꦱꦚꦴꦟꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦴꦤꦁ ꦏꦶꦕ꧀ꦕꦁ. ꦠꦺꦱꦁ ꦥꦤ ꦢ꧀ꦮꦶꦤ꧀ꦤ ꦚꦴꦟꦴꦤꦁ ꦕꦶꦟ꧀ꦟꦥꦫꦶꦪꦤ꧀ꦠꦺ ꦆꦢꦁ ꦕꦶꦠ꧀ꦠꦁ ꦲꦴꦱꦪꦩꦴꦤꦁ ꦈꦥ꧀ꦥꦗ꧀ꦗꦠꦶ.

ꦤꦶꦢ꧀ꦢꦺꦱꦮꦴꦫꦺ ꦥꦤꦱ꧀ꦱ ꦱꦺꦱꦄꦲꦺꦠꦸꦏꦕꦶꦠ꧀ꦠꦺꦲꦶ ꦧꦭꦮꦠꦫꦠꦴꦪ ꦕꦶꦠ꧀ꦠꦺꦏꦒ꧀ꦒꦠꦴ ꦱꦩꦴꦣꦶꦧꦭꦁ ꦥꦴꦥꦺꦠ꧀ꦮꦴ ꦜꦥꦶꦠꦴ. ꦮꦷꦫꦶꦪꦩ꧀ꦥꦶ ꦮꦷꦫꦶꦪꦧꦭꦁ ꦥꦴꦥꦺꦠ꧀ꦮꦴ. ꦈꦢ꧀ꦢꦺꦱꦮꦴꦫꦺ ꦥꦤ ‘ꦱꦩꦴꦣꦶꦧꦭꦁ ꦲꦺꦴꦠꦶ ꦮꦷꦫꦶꦪꦧꦭꦁ ꦲꦺꦴꦠꦷ’ꦠꦶ ꦄꦤꦴꦒꦠꦠ꧀ꦠꦴ ꦥꦫꦶꦥꦸꦟ꧀ꦟꦺꦤ ꦧꦭꦛ꧀ꦜꦺꦤꦺꦠꦁ ꦢ꧀ꦮꦪꦁ ꦧꦭꦁ ꦤꦴꦩ ꦤ ꦲꦺꦴꦠꦶ. ꦪꦱ꧀ꦩꦴ ꦥꦤ ‘ꦤꦺꦮ ꦏꦸꦱꦭꦁ ꦤꦴꦏꦸꦱꦭꦁ’ ꦠꦱ꧀ꦩꦴ ꦧꦭꦤ꧀ꦠꦶ ꦮꦠ꧀ꦮꦴꦤ ꦜꦥꦶꦠꦁ. ꦪꦱ꧀ꦩꦴ ꦕ ꦤ ꦤꦶꦥ꧀ꦥꦫꦶꦪꦴꦪꦺꦤ ꦧꦭꦁ, ꦠꦱ꧀ꦩꦴ ꦱꦔ꧀ꦒꦲꦮꦴꦫꦺꦥꦶ ‘ꦢ꧀ꦮꦺ ꦧꦭꦴꦤꦶ ꦲꦺꦴꦤ꧀ꦠꦷ’ꦠꦶ ꦤ ꦮꦸꦠ꧀ꦠꦁ. ꦱꦺꦱꦁ ꦱꦧ꧀ꦧꦁ ꦱꦺꦴꦩꦤꦱ꧀ꦱꦱꦲꦒꦠꦴꦲꦺꦠꦸꦏꦩꦤꦺꦴꦮꦶꦚ꧀ꦚꦴꦟꦣꦴꦠꦸꦤꦶꦢ꧀ꦢꦺꦱꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ.

꧕꧗꧔. ꦈꦥꦺꦏ꧀ꦑꦴꦱꦲꦒꦠꦴꦠꦶ ꦆꦢꦁ ꦕꦶꦠ꧀ꦠꦁ ꦠꦷꦱꦸ ꦨꦮꦺꦱꦸ ꦱꦧ꧀ꦧꦺꦱꦁ ꦱꦕꦶꦠ꧀ꦠꦏꦱꦠ꧀ꦠꦴꦤꦁ ꦱꦴꦣꦴꦫꦟꦁ, ꦤ ꦏꦱ꧀ꦱꦕꦶ ꦱꦕꦶꦠ꧀ꦠꦏꦱ꧀ꦱ ꦤꦸꦥ꧀ꦥꦗ꧀ꦗꦠꦶ ꦤꦴꦩ. ꦈꦥ꧀ꦥꦗ꧀ꦗꦩꦴꦤꦁ ꦥꦤ ꦥꦚ꧀ꦕꦢ꧀ꦮꦴꦫꦺ ꦮꦺꦴꦛ꧀ꦜꦧ꧀ꦧꦤꦁ ꦲꦺꦴꦠꦶ, ꦩꦤꦺꦴꦢ꧀ꦮꦴꦫꦺ ꦄꦴꦮꦗ꧀ꦗꦤꦁ. ꦖ ꦄꦱꦴꦣꦴꦫꦟꦚꦴꦟꦴꦤꦶꦥꦶ ꦆꦩꦶꦤꦴ ꦒꦲꦶꦠꦴꦫꦩ꧀ꦩꦟꦩꦺꦮ ꦒꦟ꧀ꦲꦤ꧀ꦠꦶ. ꦩꦲꦴꦒꦗꦁ ꦤꦴꦩꦺꦠꦁ ꦕꦶꦠ꧀ꦠꦁ; ꦆꦩꦱ꧀ꦱ ꦄꦤꦴꦫꦩ꧀ꦩꦟꦁ ꦤꦴꦩ ꦤꦠ꧀ꦡꦶ. ‘ꦄꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦒꦠꦶꦏꦁ ꦤꦴꦩ ꦏꦠꦩ’ꦤ꧀ꦠꦶ ꦮꦸꦠ꧀ꦠꦺ ‘ꦆꦢ’ꦤ꧀ꦠꦶ ꦮꦠ꧀ꦠꦧ꧀ꦧꦁ. ꦱꦺꦱꦩꦺꦠ꧀ꦡ ꦥꦸꦫꦶꦩꦕꦶꦠ꧀ꦠꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦏꦺꦮꦭꦚ꧀ꦲꦶ ꦠꦠ꧀ꦡ ꦱꦥ꧀ꦥꦷꦠꦶꦏꦠ꧀ꦠꦴ ꦤꦮꦔ꧀ꦒꦶꦏꦺꦴ ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ ꦮꦶꦨꦠ꧀ꦠꦺꦴ. ꦆꦣ ꦤꦶꦥ꧀ꦥꦷꦠꦶꦏꦠ꧀ꦠꦴ ꦄꦛ꧀ꦜꦔ꧀ꦒꦶꦏꦺꦴ.

ꦆꦢꦴꦤꦶ ꦪꦴꦤꦶ ꦏꦸꦱꦭꦠꦺꦴ ꦄꦛ꧀ꦜ ꦩꦲꦴꦕꦶꦠ꧀ꦠꦴꦤꦺꦮ ꦑꦷꦟꦴꦱꦮꦱ꧀ꦱ ꦈꦥ꧀ꦥꦗ꧀ꦗꦤꦠꦴꦪ ꦏꦶꦫꦶꦪꦴꦤꦶ ꦗꦴꦠꦴꦤꦶ, ꦠꦱ꧀ꦩꦴ ꦠꦴꦤꦶ ꦏꦸꦱꦭꦤꦶꦢ꧀ꦢꦺꦱꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦴꦤꦶ.

ꦆꦣ ꦜꦠ꧀ꦮꦴ ꦲꦱꦤꦏꦕꦶꦠ꧀ꦠꦴꦤꦶ ꦱꦩꦺꦴꦣꦴꦤꦺꦠꦧ꧀ꦧꦴꦤꦶ. ꦏꦠꦶ ꦥꦤꦺꦠꦴꦤꦶ ꦲꦺꦴꦤ꧀ꦠꦷꦠꦶ? ꦮꦸꦕ꧀ꦕꦠꦺ ꦠꦺꦫꦱ. ꦥꦸꦡꦸꦗ꧀ꦗꦤꦴ ꦲꦶ ꦏꦸꦱꦭꦠꦺꦴ ꦕꦠꦹꦲꦶ ꦱꦺꦴꦩꦤꦱ꧀ꦱꦱꦲꦒꦠꦺꦲꦶ, ꦄꦏꦸꦱꦭꦠꦺꦴ ꦕꦠꦹꦲꦷꦠꦶ, ꦄꦛ꧀ꦜꦲꦶ ꦕꦶꦠ꧀ꦠꦺꦲꦶ ꦲꦱꦤ꧀ꦠꦶ. ꦱꦺꦏ꧀ꦑꦴ ꦏꦸꦱꦭꦠꦺꦴ ꦕꦠꦹꦲꦶ ꦱꦺꦴꦩꦤꦱ꧀ꦱꦱꦲꦒꦠꦺꦲꦶ, ꦄꦏꦸꦱꦭꦠꦺꦴ ꦢ꧀ꦮꦷꦲꦶ ꦢꦶꦛ꧀ꦜꦶꦒꦠꦮꦶꦥ꧀ꦥꦪꦸꦠ꧀ꦠꦺꦲꦶ ꦱꦺꦴꦩꦤꦱ꧀ꦱꦱꦲꦒꦠꦺꦲꦷꦠꦶ, ꦖꦲꦶ ꦕꦶꦠ꧀ꦠꦺꦲꦶ ꦲꦱꦤ꧀ꦠꦶ. ꦑꦷꦟꦴꦱꦮꦴ ꦏꦶꦫꦶꦪꦠꦺꦴ ꦥꦚ꧀ꦕꦲꦶ ꦱꦺꦴꦩꦤꦱ꧀ꦱꦱꦲꦒꦠꦺꦲꦶ ꦲꦱꦤ꧀ꦠꦷꦠꦶ.

ꦫꦹꦥꦴꦮꦕꦫꦴꦫꦹꦥꦴꦮꦕꦫꦏꦶꦫꦶꦪꦁ

꧕꧗꧗. ꦫꦹꦥꦴꦮꦕꦫꦴꦫꦹꦥꦴꦮꦕꦫꦏꦶꦫꦶꦪꦤꦶꦢ꧀ꦢꦺꦱꦺꦱꦸ ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦤ꧀ꦠꦶ ꦢꦶꦛ꧀ꦜꦣꦩ꧀ꦩꦺ, ꦆꦩꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ, ꦱꦸꦑꦮꦶꦲꦴꦫꦩꦠ꧀ꦠꦁ. ꦠꦠ꧀ꦡ ꦑꦷꦟꦴꦱꦮꦱ꧀ꦱ ꦥꦸꦡꦸꦗ꧀ꦗꦤꦏꦴꦭꦺ ꦤꦶꦧ꧀ꦧꦠ꧀ꦠꦶꦠꦴ ꦱꦩꦴꦥꦠ꧀ꦠꦶ ꦪꦴꦮ ꦤ ꦤꦁ ꦱꦩꦴꦥꦗ꧀ꦗꦠꦶ ꦠꦴꦮ ꦏꦸꦱꦭꦴꦮ ꦱꦩꦴꦥꦤ꧀ꦤꦏꦴꦭꦺ ꦏꦶꦫꦶꦪꦴ ꦲꦺꦴꦠꦶ. ꦑꦷꦟꦴꦱꦮꦏꦴꦭꦺ ꦥꦤꦱ꧀ꦱ ꦤꦶꦧ꧀ꦧꦠ꧀ꦠꦶꦠꦴ ꦱꦩꦴꦥꦠ꧀ꦠꦶ ꦏꦶꦫꦶꦪꦴꦮ ꦲꦺꦴꦠꦶ. ꦱꦺꦱꦁ ꦱꦧ꧀ꦧꦁ ꦠꦁꦱꦢꦶꦱꦠ꧀ꦠꦴ ꦏꦸꦱꦭꦤꦶꦢ꧀ꦢꦺꦱꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦤ꧀ꦠꦶ.

ꦄꦛ꧀ꦜꦱꦴꦭꦶꦤꦶꦪꦴ ꦣꦩ꧀ꦩꦱꦔ꧀ꦒꦲꦄꦛ꧀ꦜꦏꦡꦴꦪ

ꦕꦶꦠ꧀ꦠꦸꦥ꧀ꦥꦴꦢꦏꦟ꧀ꦝꦏꦡꦴ ꦤꦶꦛ꧀ꦜꦶꦠꦴ.

ꦄꦧ꧀ꦪꦴꦏꦠꦥꦢꦁ ꦥꦤ ꦤꦺꦮ ꦠꦴꦮ ꦤꦶꦛ꧀ꦜꦶꦠꦤ꧀ꦠꦶ.

ꦕꦶꦠ꧀ꦠꦸꦥ꧀ꦥꦴꦢꦏꦟ꧀ꦝꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.