꧔. ꦒꦴꦮꦷꦈꦥꦩꦴꦱꦸꦠ꧀ꦠꦮꦟ꧀ꦟꦤꦴ

꧓꧕. ꦕꦠꦸꦠ꧀ꦡꦺ ꦥꦧ꧀ꦧꦠꦺꦪ꧀ꦪꦴꦠꦶ ꦥꦧ꧀ꦧꦠꦕꦴꦫꦶꦤꦷ. ꦤ ꦱꦸꦥ꧀ꦥꦠꦶꦛ꧀ꦜꦶꦠꦁ ꦥꦠꦶꦛ꧀ꦜꦴꦥꦺꦠ꧀ꦮꦴꦠꦶ ꦪꦡꦴ ꦱꦸꦥ꧀ꦥꦠꦶꦛ꧀ꦜꦶꦠꦴ ꦲꦺꦴꦠꦶ, ꦌꦮꦁ ꦤ ꦥꦠꦶꦛ꧀ꦜꦴꦥꦺꦠ꧀ꦮꦴ. ꦠꦁ ꦤꦶꦩꦶꦠ꧀ꦠꦤ꧀ꦠꦶ ꦠꦁ ꦥꦜꦩꦗ꧀ꦙꦴꦤꦱꦔ꧀ꦑꦴꦠꦁ ꦤꦶꦩꦶꦠ꧀ꦠꦁ. ꦤ ꦱ꧀ꦮꦴꦣꦶꦛ꧀ꦜꦶꦠꦁ ꦄꦣꦶꦛ꧀ꦜꦴꦠꦷꦠꦶ ꦪꦡꦴ ꦱꦸꦛ꧀ꦜꦸ ꦄꦣꦶꦛ꧀ꦜꦶꦠꦁ ꦲꦺꦴꦠꦶ, ꦤ ꦌꦮꦁ ꦄꦣꦶꦛ꧀ꦜꦴꦠꦶ. ꦄꦤꦨꦶꦲꦶꦁꦱꦩꦴꦤꦺꦴꦠꦶ ꦄꦥꦺꦴꦡꦺꦤ꧀ꦠꦺꦴ ꦄꦮꦶꦲꦺꦜꦺꦤ꧀ꦠꦺꦴ. ꦩꦸꦢꦸ ꦕꦶꦠ꧀ꦠꦁ ꦲꦺꦴꦠꦶ ꦏꦩ꧀ꦩꦚ꧀ꦚꦤ꧀ꦠꦶ ꦪꦡꦴ ꦮꦶꦥꦱ꧀ꦱꦤꦴꦕꦶꦠ꧀ꦠꦁ ꦭꦺꦴꦏꦸꦠ꧀ꦠꦫꦩꦒ꧀ꦒꦏ꧀ꦑꦟꦺ ꦩꦸꦢꦸ ꦏꦩ꧀ꦩꦏ꧀ꦑꦩꦁ ꦏꦩ꧀ꦩꦪꦺꦴꦒ꧀ꦒꦁ ꦲꦺꦴꦠꦶ, ꦌꦮꦩꦱ꧀ꦱ ꦄꦨꦶꦚ꧀ꦚꦴꦥꦴꦢꦏꦁ ꦕꦠꦸꦠ꧀ꦡꦗ꧀ꦙꦴꦤꦕꦶꦠ꧀ꦠꦁ ꦩꦸꦢꦸ ꦲꦺꦴꦠꦶ ꦏꦩ꧀ꦩꦚ꧀ꦚꦁ. ꦄꦥ꧀ꦥꦩꦴꦟꦺꦴ ꦱꦩꦴꦣꦷꦠꦶ ꦕꦠꦸꦧ꧀ꦫꦲ꧀ꦩꦮꦶꦲꦴꦫꦱꦩꦴꦣꦶꦥꦶ ꦩꦒ꧀ꦒꦦꦭꦱꦩꦴꦣꦶꦥꦶ ꦄꦥ꧀ꦥꦩꦴꦟꦺꦴ ꦱꦩꦴꦣꦶ ꦤꦴꦩ, ꦆꦣ ꦥꦤ ‘‘ꦄꦥ꧀ꦥꦩꦴꦟꦁ ꦄꦥ꧀ꦥꦩꦴꦟꦴꦫꦩ꧀ꦩꦟ’’ꦤ꧀ꦠꦶ ꦆꦩꦶꦤꦴ ꦥꦫꦶꦪꦴꦪꦺꦤ ꦱꦸꦥ꧀ꦥꦒꦸꦟꦱꦩꦴꦣꦶ ꦄꦥ꧀ꦥꦩꦴꦟꦱꦩꦴꦣꦷꦠꦶ ꦢꦛ꧀ꦜꦧ꧀ꦧꦺꦴ. ꦱꦺꦴ ꦄꦥ꧀ꦥꦩꦴꦟꦺꦤ ꦱꦩꦴꦣꦶꦤꦴ ꦱꦸꦨꦴꦮꦶꦠꦺꦤꦴꦠꦶ ꦆꦩꦱ꧀ꦩꦶꦁ ꦜꦴꦤꦺ ꦄꦪꦁ ꦨꦶꦏ꧀ꦑꦸ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦺꦴ. ꦆꦢꦴꦤꦶ ꦑꦷꦟꦴꦱꦮꦱ꧀ꦱ ꦄꦨꦶꦚ꧀ꦚꦴꦥꦛꦶꦥꦴꦛꦶꦁ ꦢꦱ꧀ꦱꦺꦤ꧀ꦠꦺꦴ ꦪꦱ꧀ꦱ ꦪꦱ꧀ꦱ ꦕꦴꦠꦶꦄꦴꦢꦶꦩꦴꦲ.