꧙. ꦥꦲꦴꦫꦴꦢꦱꦸꦠ꧀ꦠꦮꦟ꧀ꦟꦤꦴ

꧑꧙. ꦤꦮꦩꦺ ꦥꦲꦴꦫꦴꦢꦺꦴꦠꦶ ꦌꦮꦁꦤꦴꦩꦏꦺꦴ. ꦄꦱꦸꦫꦶꦤ꧀ꦢꦺꦴꦠꦶ ꦄꦱꦸꦫꦗꦺꦛ꧀ꦜꦏꦺꦴ. ꦄꦱꦸꦫꦺꦱꦸ ꦲꦶ ꦮꦺꦥꦕꦶꦠ꧀ꦠꦶ ꦫꦴꦲꦸ ꦥꦲꦴꦫꦴꦢꦺꦴꦠꦶ ꦆꦩꦺ ꦠꦪꦺꦴ ꦗꦺꦛ꧀ꦜꦏꦴ. ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦷꦠꦶ ꦢꦱꦧꦭꦱ꧀ꦱ ꦄꦨꦶꦱꦩ꧀ꦧꦸꦢ꧀ꦣꦢꦶꦮꦱꦠꦺꦴ ꦥꦛ꧀ꦜꦴꦪ ‘‘ꦄꦗ꧀ꦗ ꦒꦩꦶꦱ꧀ꦱꦴꦩꦶ ꦱ꧀ꦮꦺ ꦒꦩꦶꦱ꧀ꦱꦴꦩꦷ’’ꦠꦶ ꦌꦏꦴꦢꦱ ꦮꦱ꧀ꦱꦴꦤꦶ ꦄꦠꦶꦏ꧀ꦏꦩꦶꦠ꧀ꦮꦴ ꦢ꧀ꦮꦴꦢꦱꦩꦺ ꦮꦱ꧀ꦱꦺ ꦱꦠ꧀ꦡꦸ ꦮꦺꦫꦚ꧀ꦗꦴꦪꦁ ꦮꦱꦤꦏꦴꦭꦺ ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦱꦤ꧀ꦠꦶꦏꦁ ꦒꦩꦶꦱ꧀ꦱꦴꦩꦷ’’ꦠꦶ ꦕꦶꦠ꧀ꦠꦁ ꦈꦥ꧀ꦥꦴꦢꦺꦠ꧀ꦮꦴ ‘‘ꦩꦩ ‘ꦄꦗ꧀ꦗ ꦱ꧀ꦮꦺ’ꦠꦶ ꦢ꧀ꦮꦴꦢꦱ ꦮꦱ꧀ꦱꦴꦤꦶ ꦗꦴꦠꦴꦤꦶ, ꦲꦤ꧀ꦢꦴꦲꦁ ꦆꦢꦴꦤꦺꦮ ꦒꦕ꧀ꦖꦴꦩꦷ’’ꦠꦶ ꦠꦔ꧀ꦑꦟꦁꦪꦺꦮ ꦄꦱꦸꦫꦒꦟꦥꦫꦶꦮꦸꦠꦺꦴ ꦄꦱꦸꦫꦨꦮꦤꦴ ꦤꦶꦏ꧀ꦑꦩꦶꦠ꧀ꦮꦴ ꦢꦶꦮꦴ ꦢꦶꦮꦱ꧀ꦱ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ, ꦌꦏꦩꦤ꧀ꦠꦁ ꦄꦛ꧀ꦜꦴꦱꦷꦠꦶ ꦱꦺꦴ ꦏꦶꦫ ‘‘ꦠꦡꦴꦒꦠꦁ ꦥꦚ꧀ꦲꦁ ꦥꦸꦕ꧀ꦖꦶꦠ꧀ꦮꦴ ꦌꦮ ꦣꦩ꧀ꦩꦁ ꦱꦸꦟꦶꦱ꧀ꦱꦴꦩꦷ’’ꦠꦶ ꦄꦴꦒꦠꦺꦴ, ꦠꦡꦴꦒꦠꦱ꧀ꦱ ꦥꦤ ꦢꦶꦛ꧀ꦜꦏꦴꦭꦠꦺꦴ ꦥꦛ꧀ꦜꦴꦪ ꦧꦸꦢ꧀ꦣꦒꦴꦫꦮꦺꦤ ꦥꦸꦕ꧀ꦖꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦄꦥꦶ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦴꦱꦶ. ꦠꦠꦺꦴ ꦱꦠ꧀ꦡꦴ ꦕꦶꦤ꧀ꦠꦺꦱꦶ – ‘‘ꦄꦪꦁ ꦥꦲꦴꦫꦴꦢꦺꦴ ꦩꦪꦶ ꦄꦏꦡꦺꦤ꧀ꦠꦺ ꦥꦜꦩꦠꦫꦁ ꦏꦡꦺꦠꦸꦁ ꦤ ꦱꦏ꧀ꦑꦶꦱ꧀ꦱꦠꦶ, ꦕꦶꦟ꧀ꦟꦮꦱꦶꦛ꧀ꦜꦴꦤꦺꦪꦺꦮ ꦤꦁ ꦏꦡꦴꦱꦩꦸꦛ꧀ꦜꦴꦥꦤꦠ꧀ꦡꦁ ꦌꦏꦁ ꦥꦚ꧀ꦲꦁ ꦥꦸꦕ꧀ꦖꦶꦱ꧀ꦱꦴꦩꦷ’’ꦠꦶ.

ꦄꦡ ꦤꦁ ꦥꦸꦕ꧀ꦖꦤ꧀ꦠꦺꦴ ꦄꦥꦶ ꦥꦤ ꦥꦲꦴꦫꦴꦢꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦨꦶꦫꦩꦤ꧀ꦠꦷꦠꦶ ꦫꦠꦶꦁ ꦮꦶꦤ꧀ꦢꦤ꧀ꦠꦶ, ꦄꦤꦸꦏ꧀ꦏꦟ꧀ꦜꦩꦴꦤꦴ ꦮꦱꦤ꧀ꦠꦷꦠꦶ ꦄꦠ꧀ꦡꦺꦴ. ꦱꦺꦴ ‘‘ꦥꦫꦶꦕꦶꦟ꧀ꦟꦛ꧀ꦜꦴꦤꦺꦪꦺꦮ ꦩꦁ ꦨꦒꦮꦴ ꦥꦸꦕ꧀ꦖꦠꦷ’’ꦠꦶ ꦄꦠ꧀ꦠꦩꦤꦺꦴ ꦲꦸꦠ꧀ꦮꦴ ꦄꦨꦶꦫꦩꦤ꧀ꦠꦶ, ꦨꦤ꧀ꦠꦺꦠꦶ ꦄꦴꦲ. ꦄꦤꦸꦥꦸꦧ꧀ꦧꦤꦶꦤ꧀ꦤꦺꦴꦠꦶꦄꦴꦢꦷꦤꦶ ꦱꦧ꧀ꦧꦴꦤꦶ ꦄꦤꦸꦥꦛꦶꦥꦴꦛꦶꦪꦴ ꦤꦶꦤ꧀ꦤꦨꦴꦮꦱ꧀ꦱ ꦮꦺꦮꦕꦤꦴꦤꦶ. ꦤ ꦄꦴꦪꦠꦏꦺꦤꦺꦮ ꦥꦥꦴꦠꦺꦴꦠꦶ ꦤ ꦖꦶꦤ꧀ꦤꦠꦛꦩꦲꦴꦱꦺꦴꦧ꧀ꦨꦺꦴ ꦮꦶꦪ ꦄꦴꦢꦶꦠꦺꦴꦮ ꦥꦥꦴꦠꦺꦴ. ꦱꦺꦴ ꦲꦶ ꦠꦷꦫꦠꦺꦴ ꦥꦛ꧀ꦜꦴꦪ ꦌꦏꦔ꧀ꦒꦸꦭꦢ꧀ꦮꦔ꧀ꦒꦸꦭꦮꦶꦢꦠ꧀ꦡꦶꦫꦠꦤꦪꦛ꧀ꦜꦶꦈꦱꦨꦄꦝ꧀ꦞꦒꦴꦮꦸꦠꦒꦴꦮꦸꦠꦄꦝ꧀ꦞꦪꦺꦴꦗꦤꦴꦢꦶꦮꦱꦺꦤ ꦒꦩ꧀ꦨꦷꦫꦺꦴ ꦲꦸꦠ꧀ꦮꦴ ꦒꦕ꧀ꦖꦤ꧀ꦠꦺꦴ ꦱꦶꦤꦺꦫꦸꦥꦴꦢꦩꦹꦭꦺ ꦕꦠꦸꦫꦴꦱꦷꦠꦶꦪꦺꦴꦗꦤꦱꦲꦱ꧀ꦱꦒꦩ꧀ꦨꦷꦫꦺꦴ ꦲꦸꦠ꧀ꦮꦴ ꦜꦶꦠꦺꦴꦠꦶ ꦢꦱ꧀ꦱꦺꦠꦶ.

ꦜꦶꦠꦣꦩ꧀ꦩꦺꦴꦠꦶ ꦜꦶꦠꦱꦨꦴꦮꦺꦴ. ꦏꦸꦟꦥꦺꦤꦴꦠꦶ ꦪꦺꦤ ꦏꦺꦤꦕꦶ ꦲꦠ꧀ꦡꦶꦄꦱ꧀ꦱꦴꦢꦷꦤꦁ ꦏꦭ꦳ꦺꦮꦫꦺꦤ. ꦡꦭꦁ ꦈꦱ꧀ꦱꦴꦫꦺꦠꦷꦠꦶ ꦲꦠ꧀ꦡꦺꦤ ꦒꦲꦺꦠ꧀ꦮꦴ ꦮꦶꦪ ꦮꦷꦕꦶꦥꦲꦴꦫꦺꦤꦺꦮ ꦡꦭꦁ ꦑꦶꦥꦠꦶ.

ꦒꦔ꧀ꦒꦴꦪꦩꦸꦤꦴꦠꦶ ꦆꦣ ꦜꦠ꧀ꦮꦴ ꦆꦩꦴꦱꦁ ꦤꦢꦷꦤꦁ ꦈꦥ꧀ꦥꦠ꧀ꦠꦶꦏꦡꦁ ꦏꦡꦺꦠꦸꦁ ꦮꦛ꧀ꦛꦠꦶ. ꦄꦪꦁ ꦠꦴꦮ ꦗꦩ꧀ꦧꦸꦢꦷꦥꦺꦴ ꦢꦱꦱꦲꦱ꧀ꦱꦪꦺꦴꦗꦤꦥꦫꦶꦩꦴꦟꦺꦴ, ꦠꦠ꧀ꦡ ꦕꦠꦸꦱꦲꦱ꧀ꦱꦪꦺꦴꦗꦤꦥꦫꦶꦩꦴꦟꦺꦴ ꦥꦢꦺꦱꦺꦴ ꦈꦢꦏꦺꦤ ꦄꦗ꧀ꦙꦺꦴꦠ꧀ꦡꦛꦺꦴ ꦩꦲꦴꦱꦩꦸꦢ꧀ꦢꦺꦴꦠꦶ ꦱꦔ꧀ꦑꦁ ꦒꦠꦺꦴ, ꦠꦶꦱꦲꦱ꧀ꦱꦪꦺꦴꦗꦤꦥ꧀ꦥꦩꦴꦟꦺ ꦩꦤꦸꦱ꧀ꦱꦴ ꦮꦱꦤ꧀ꦠꦶ, ꦠꦶꦱꦲꦱ꧀ꦱꦪꦺꦴꦗꦤꦥ꧀ꦥꦩꦴꦟꦺ ꦲꦶꦩꦮꦴ ꦥꦠꦶꦛ꧀ꦜꦶꦠꦺꦴ ꦈꦧ꧀ꦧꦺꦣꦺꦤ ꦥꦚ꧀ꦕꦪꦺꦴꦗꦤꦱꦠꦶꦏꦺꦴ ꦕꦠꦸꦫꦴꦱꦷꦠꦶꦏꦹꦛꦱꦲꦱ꧀ꦱꦥꦛꦶꦩꦟ꧀ꦝꦶꦠꦺꦴ ꦱꦩꦤ꧀ꦠꦠꦺꦴ ꦱꦤ꧀ꦢꦩꦴꦤꦥꦚ꧀ꦕꦱꦠꦤꦢꦷꦮꦶꦕꦶꦠ꧀ꦠꦺꦴ, ꦪꦠ꧀ꦡ ꦄꦴꦪꦴꦩꦮꦶꦠ꧀ꦡꦴꦫꦺꦤ ꦕ ꦒꦩ꧀ꦨꦷꦫꦠꦺꦴ ꦕ ꦥꦟ꧀ꦟꦴꦱꦥꦟ꧀ꦟꦴꦱꦪꦺꦴꦗꦤꦴ ꦢꦶꦪꦝ꧀ꦞꦪꦺꦴꦗꦤꦱꦠꦥꦫꦶꦩꦟ꧀ꦝꦭꦴ ꦄꦤꦺꦴꦠꦠ꧀ꦠꦢꦲꦺꦴ ꦏꦟ꧀ꦟꦩꦸꦟ꧀ꦝꦢꦲꦺꦴ ꦫꦡꦏꦴꦫꦢꦲꦺꦴ ꦖꦢ꧀ꦢꦤ꧀ꦠꦢꦲꦺꦴ ꦏꦸꦟꦴꦭꦢꦲꦺꦴ ꦩꦤ꧀ꦢꦴꦏꦶꦤꦶꦢꦲꦺꦴ ꦱꦷꦲꦥ꧀ꦥꦥꦴꦠꦢꦲꦺꦴꦠꦶ ꦱꦠ꧀ꦠ ꦩꦲꦴꦱꦫꦴ ꦥꦠꦶꦛ꧀ꦜꦲꦤ꧀ꦠꦶ.

ꦠꦺꦱꦸ ꦄꦤꦺꦴꦠꦠ꧀ꦠꦺꦴ ꦱꦸꦢꦱ꧀ꦱꦤꦏꦹꦛꦁ ꦕꦶꦠ꧀ꦠꦏꦹꦛꦁ ꦏꦴꦭ꦳ꦏꦹꦛꦁ ꦒꦤ꧀ꦣꦩꦴꦢꦤꦏꦹꦛꦁ ꦏꦺꦭꦴꦱꦏꦹꦛꦤ꧀ꦠꦶ ꦆꦩꦺꦲꦶ ꦥꦚ꧀ꦕꦲꦶ ꦥꦧ꧀ꦧꦠꦺꦲꦶ ꦥꦫꦶꦏ꧀ꦑꦶꦠ꧀ꦠꦺꦴ. ꦠꦠ꧀ꦡ ꦱꦸꦢꦱ꧀ꦱꦤꦏꦹꦛꦁ ꦱꦺꦴꦮꦟ꧀ꦟꦩꦪꦁ ꦢ꧀ꦮꦶꦪꦺꦴꦗꦤꦱꦠꦸꦧ꧀ꦧꦺꦣꦁ ꦄꦤ꧀ꦠꦺꦴꦮꦔ꧀ꦏꦁ ꦏꦴꦏꦩꦸꦑꦱꦟ꧀ꦜꦴꦤꦁ ꦠꦩꦺꦮ ꦱꦫꦁ ꦥꦛꦶꦕ꧀ꦖꦴꦢꦺꦠ꧀ꦮꦴ ꦠꦶꦛ꧀ꦜꦠꦶ, ꦕꦶꦠ꧀ꦠꦏꦹꦛꦁ ꦱꦧ꧀ꦧꦫꦠꦤꦩꦪꦁ, ꦏꦴꦭ꦳ꦏꦹꦛꦁ ꦄꦚ꧀ꦗꦤꦩꦪꦁ, ꦒꦤ꧀ꦣꦩꦴꦢꦤꦏꦹꦛꦁ ꦱꦴꦤꦸꦩꦪꦁ ꦄꦧ꧀ꦨꦤ꧀ꦠꦫꦺ ꦩꦸꦒ꧀ꦒꦮꦟ꧀ꦟꦁ, ꦩꦹꦭꦒꦤ꧀ꦣꦺꦴ ꦱꦴꦫꦒꦤ꧀ꦣꦺꦴ ꦦꦺꦒ꧀ꦒꦸꦒꦤ꧀ꦣꦺꦴ ꦠꦕꦒꦤ꧀ꦣꦺꦴ ꦥꦥꦛꦶꦏꦴꦒꦤ꧀ꦣꦺꦴ ꦫꦱꦒꦤ꧀ꦣꦺꦴ ꦥꦠ꧀ꦠꦒꦤ꧀ꦣꦺꦴ ꦥꦸꦥ꧀ꦦꦒꦤ꧀ꦣꦺꦴ ꦦꦭꦒꦤ꧀ꦣꦺꦴ ꦒꦤ꧀ꦣꦒꦤ꧀ꦣꦺꦴꦠꦶ ꦆꦩꦺꦲꦶ ꦢꦱꦲꦶ ꦒꦤ꧀ꦣꦺꦲꦶ ꦈꦱ꧀ꦱꦤ꧀ꦤꦁ, ꦤꦴꦤꦥ꧀ꦥꦏꦴꦫꦎꦱꦣꦱꦚ꧀ꦖꦤ꧀ꦤꦁ ꦏꦴꦭ꦳ꦥꦏ꧀ꦑꦈꦥꦺꦴꦱꦡꦢꦶꦮꦱꦺ ꦄꦴꦢꦶꦠ꧀ꦠꦩꦶꦮ ꦄꦔ꧀ꦒꦴꦫꦁ ꦗꦭꦤ꧀ꦠꦁ ꦠꦶꦛ꧀ꦜꦠꦶ, ꦏꦺꦭꦴꦱꦏꦹꦛꦁ ꦫꦗꦠꦩꦪꦁ. ꦱꦧ꧀ꦧꦴꦤꦶ ꦱꦸꦢꦱ꧀ꦱꦤꦺꦤ ꦱꦩꦴꦤꦸꦧ꧀ꦧꦺꦣꦱꦟ꧀ꦜꦴꦤꦴꦤꦶ ꦠꦩꦺꦮ ꦱꦫꦁ ꦥꦛꦶꦕ꧀ꦖꦴꦢꦺꦠ꧀ꦮꦴ ꦜꦶꦠꦴꦤꦶ. ꦠꦴꦤꦶ ꦱꦧ꧀ꦧꦴꦤꦶ ꦢꦺꦮꦴꦤꦸꦨꦴꦮꦺꦤ ꦤꦴꦒꦴꦤꦸꦨꦴꦮꦺꦤ ꦕ ꦮꦱ꧀ꦱꦤ꧀ꦠꦶ, ꦤꦢꦶꦪꦺꦴ ꦕꦺꦠꦺꦱꦸ ꦱꦤ꧀ꦢꦤ꧀ꦠꦶ. ꦠꦁ ꦱꦧ꧀ꦧꦩ꧀ꦥꦶ ꦈꦢꦏꦁ ꦄꦤꦺꦴꦠꦠ꧀ꦠꦩꦺꦮ ꦥꦮꦶꦱꦠꦶ. ꦕꦤ꧀ꦢꦶꦩꦱꦹꦫꦶꦪꦴ ꦢꦏ꧀ꦑꦶꦟꦺꦤ ꦮꦴ ꦈꦠ꧀ꦠꦫꦺꦤ ꦮꦴ ꦒꦕ꧀ꦖꦤ꧀ꦠꦴ ꦥꦧ꧀ꦧꦠꦤ꧀ꦠꦫꦺꦤ ꦠꦠ꧀ꦡ ꦎꦨꦴꦱꦁ ꦏꦫꦺꦴꦤ꧀ꦠꦶ, ꦈꦗꦸꦁ ꦒꦕ꧀ꦖꦤ꧀ꦠꦴ ꦤ ꦏꦫꦺꦴꦤ꧀ꦠꦶ. ꦠꦺꦤꦺꦮꦱ꧀ꦱ ꦄꦤꦺꦴꦠꦠ꧀ꦠꦺꦴ ꦠꦶꦱꦔ꧀ꦑꦴ ꦈꦢꦥꦴꦢꦶ.

ꦠꦠ꧀ꦡ ꦩꦤꦺꦴꦲꦫꦱꦶꦭꦴꦠꦭꦴꦤꦶ ꦤꦶꦩ꧀ꦩꦕ꧀ꦖꦏꦕ꧀ꦖꦥꦴꦤꦶ ꦦꦭꦶꦏꦱꦢꦶꦱꦤꦶꦩ꧀ꦩꦭꦺꦴꦢꦏꦴꦤꦶ ꦤ꧀ꦲꦴꦤꦠꦶꦠ꧀ꦡꦴꦤꦶ ꦱꦸꦥꦛꦶꦪꦠ꧀ꦠꦴꦤꦶ ꦲꦺꦴꦤ꧀ꦠꦶ, ꦪꦺꦱꦸ ꦧꦸꦢ꧀ꦣꦴ ꦑꦷꦟꦴꦱꦮꦴ ꦕ ꦥꦕ꧀ꦕꦺꦏꦧꦸꦢ꧀ꦣꦴ ꦕ ꦆꦢ꧀ꦣꦶꦩꦤ꧀ꦠꦴ ꦕ ꦆꦱꦪꦺꦴ ꦤ꧀ꦲꦴꦪꦤ꧀ꦠꦶ, ꦢꦺꦮꦪꦏ꧀ꦑꦴꦢꦪꦺꦴ ꦈꦢꦏꦏꦷꦭ꦳ꦁ ꦏꦷꦭ꦳ꦤ꧀ꦠꦶ.

ꦠꦱ꧀ꦱ ꦕꦠꦹꦱꦸ ꦥꦱ꧀ꦱꦺꦱꦸ ꦱꦷꦲꦩꦸꦑꦁ, ꦲꦠ꧀ꦡꦶꦩꦸꦑꦁ, ꦄꦱ꧀ꦱꦩꦸꦑꦁ, ꦈꦱꦨꦩꦸꦑꦤ꧀ꦠꦶ ꦕꦠ꧀ꦠꦴꦫꦶ ꦩꦸꦑꦴꦤꦶ ꦲꦺꦴꦤ꧀ꦠꦶ, ꦪꦺꦲꦶ ꦕꦠꦱ꧀ꦱꦺꦴ ꦤꦢꦶꦪꦺꦴ ꦱꦤ꧀ꦢꦤ꧀ꦠꦶ. ꦱꦷꦲꦩꦸꦑꦺꦤ ꦤꦶꦏ꧀ꦑꦤ꧀ꦠꦤꦢꦷꦠꦷꦫꦺ ꦱꦷꦲꦴ ꦧꦲꦸꦠꦫꦴ ꦲꦺꦴꦤ꧀ꦠꦶ, ꦲꦠ꧀ꦡꦶꦩꦸꦑꦴꦢꦷꦲꦶ ꦲꦠ꧀ꦡꦶꦄꦱ꧀ꦱꦈꦱꦨꦴ. ꦥꦸꦫꦠ꧀ꦡꦶꦩꦢꦶꦱꦠꦺꦴ ꦤꦶꦏ꧀ꦑꦤ꧀ꦠꦤꦢꦷ ꦄꦤꦺꦴꦠꦠ꧀ꦠꦁ ꦠꦶꦏ꧀ꦑꦠ꧀ꦠꦸꦁ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦆꦠꦫꦴ ꦠꦶꦱ꧀ꦱꦺꦴ ꦤꦢꦶꦪꦺꦴ ꦄꦤꦸꦥꦒꦩ꧀ꦩ ꦥꦴꦕꦷꦤꦲꦶꦩꦮꦤ꧀ꦠꦺꦤꦺꦮ ꦄꦩꦤꦸꦱ꧀ꦱꦥꦡꦁ ꦒꦤ꧀ꦠ꧀ꦮꦴ ꦩꦲꦴꦱꦩꦸꦢ꧀ꦢꦁ ꦥꦮꦶꦱꦠꦶ. ꦥꦕ꧀ꦖꦶꦩꦢꦶꦱꦠꦺꦴ ꦕ ꦈꦠ꧀ꦠꦫꦢꦶꦱꦠꦺꦴ ꦕ ꦤꦶꦏ꧀ꦑꦤ꧀ꦠꦤꦢꦶꦪꦺꦴꦥꦶ ꦠꦡꦺꦮ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦕ꧀ꦖꦶꦩꦲꦶꦩꦮꦤ꧀ꦠꦺꦤꦺꦮ ꦈꦠ꧀ꦠꦫꦲꦶꦩꦮꦤ꧀ꦠꦺꦤꦺꦮ ꦕ ꦄꦩꦤꦸꦱ꧀ꦱꦥꦡꦁ ꦒꦤ꧀ꦠ꧀ꦮꦴ ꦩꦲꦴꦱꦩꦸꦢ꧀ꦢꦁ ꦥꦮꦶꦱꦤ꧀ꦠꦶ. ꦢꦏ꧀ꦑꦶꦟꦩꦸꦑꦠꦺꦴ ꦤꦶꦏ꧀ꦑꦤ꧀ꦠꦤꦢꦷ ꦥꦤ ꦠꦁ ꦠꦶꦏ꧀ꦑꦠ꧀ꦠꦸꦁ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦈꦠ꧀ꦠꦫꦺꦤ ꦈꦗꦸꦏꦁ ꦥꦴꦱꦴꦟꦥꦶꦛ꧀ꦜꦺꦤꦺꦮ ꦱꦛ꧀ꦜꦶ ꦪꦺꦴꦗꦤꦴꦤꦶ ꦒꦤ꧀ꦠ꧀ꦮꦴ ꦥꦧ꧀ꦧꦠꦁ ꦥꦲꦫꦶꦠ꧀ꦮꦴ ꦈꦛ꧀ꦜꦴꦪ ꦥꦫꦶꦏ꧀ꦑꦺꦥꦺꦤ ꦠꦶꦒꦴꦮꦸꦠꦥ꧀ꦥꦩꦴꦟꦴ ꦈꦢꦏꦣꦴꦫꦴ ꦲꦸꦠ꧀ꦮꦴ ꦄꦴꦏꦴꦱꦺꦤ ꦱꦛ꧀ꦜꦶ ꦪꦺꦴꦗꦤꦴꦤꦶ ꦒꦤ꧀ꦠ꧀ꦮꦴ ꦠꦶꦪꦒ꧀ꦒꦭ꦳ꦺ ꦤꦴꦩ ꦥꦴꦱꦴꦟꦺ ꦥꦠꦶꦠꦴ, ꦥꦴꦱꦴꦟꦺꦴ ꦈꦢꦏꦣꦴꦫꦴꦮꦺꦒꦺꦤ ꦨꦶꦤ꧀ꦤꦺꦴ. ꦠꦠ꧀ꦡ ꦥꦚ꧀ꦚꦴꦱꦪꦺꦴꦗꦤꦥ꧀ꦥꦩꦴꦟꦴ ꦠꦶꦪꦒ꧀ꦒꦭ꦳ꦴ ꦤꦴꦩ ꦩꦲꦴꦥꦺꦴꦏ꧀ꦑꦫꦟꦷ ꦗꦴꦠꦴ, ꦥꦺꦴꦏ꧀ꦑꦫꦟꦶꦪꦴ ꦏꦹꦭꦁ ꦨꦶꦤ꧀ꦢꦶꦠ꧀ꦮꦴ ꦥꦴꦱꦴꦟꦁ ꦥꦮꦶꦱꦶꦠ꧀ꦮꦴ ꦱꦛ꧀ꦜꦶ ꦪꦺꦴꦗꦤꦴꦤꦶ ꦒꦠꦴ. ꦠꦠꦺꦴ ꦓꦤꦥꦡꦮꦶꦁ ꦨꦶꦤ꧀ꦢꦶꦠ꧀ꦮꦴ ꦈꦩ꧀ꦩꦔ꧀ꦒꦺꦤ ꦱꦛ꧀ꦜꦶ ꦪꦺꦴꦗꦤꦴꦤꦶ ꦒꦤ꧀ꦠ꧀ꦮꦴ ꦒꦶꦚ꧀ꦙꦁ ꦤꦴꦩ ꦠꦶꦫꦕ꧀ꦖꦴꦤꦥꦧ꧀ꦧꦠꦁ ꦥꦲꦫꦶꦠ꧀ꦮꦴ ꦲꦠ꧀ꦡꦠꦭꦺ ꦥꦚ꧀ꦕꦔ꧀ꦒꦸꦭꦶꦱꦢꦶꦱꦴ ꦥꦚ꧀ꦕ ꦣꦴꦫꦴ ꦲꦸꦠ꧀ꦮꦴ ꦥꦮꦠ꧀ꦠꦠꦶ. ꦱꦴ ꦠꦶꦏ꧀ꦑꦠ꧀ꦠꦸꦁ ꦄꦤꦺꦴꦠꦠ꧀ꦠꦁ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦒꦠꦛ꧀ꦜꦴꦤꦺ ꦄꦴꦮꦠ꧀ꦠꦒꦔ꧀ꦒꦴꦠꦶ ꦮꦸꦕ꧀ꦕꦠꦶ. ꦈꦗꦸꦏꦁ ꦥꦴꦱꦴꦟꦥꦶꦛ꧀ꦜꦺꦤ ꦱꦛ꧀ꦜꦶ ꦪꦺꦴꦗꦤꦴꦤꦶ ꦒꦠꦛ꧀ꦜꦴꦤꦺ ꦏꦟ꧀ꦲꦒꦔ꧀ꦒꦴ, ꦄꦴꦏꦴꦱꦺꦤ ꦱꦛ꧀ꦜꦶ ꦪꦺꦴꦗꦤꦴꦤꦶ ꦒꦠꦛ꧀ꦜꦴꦤꦺ ꦄꦴꦏꦴꦱꦒꦔ꧀ꦒꦴ, ꦠꦶꦪꦒ꧀ꦒꦭ꦳ꦥꦴꦱꦴꦟꦺ ꦥꦚ꧀ꦚꦴꦱꦪꦺꦴꦗꦤꦺꦴꦏꦴꦱꦺ ꦜꦶꦠꦴ ꦠꦶꦪꦒ꧀ꦒꦭ꦳ꦥꦺꦴꦏ꧀ꦑꦫꦟꦷ, ꦏꦹꦭꦁ ꦨꦶꦤ꧀ꦢꦶꦠ꧀ꦮꦴ ꦥꦴꦱꦴꦟꦁ ꦥꦮꦶꦱꦶꦠ꧀ꦮꦴ ꦱꦛ꧀ꦜꦶ ꦪꦺꦴꦗꦤꦴꦤꦶ ꦒꦠꦛ꧀ꦜꦴꦤꦺ ꦧꦲꦭꦒꦔ꧀ꦒꦴꦠꦶ, ꦈꦩꦔ꧀ꦒꦺꦤ ꦱꦛ꧀ꦜꦶ ꦪꦺꦴꦗꦤꦴꦤꦶ ꦒꦠꦛ꧀ꦜꦴꦤꦺ ꦈꦩꦔ꧀ꦒꦒꦔ꧀ꦒꦴꦠꦶ ꦮꦸꦕ꧀ꦕꦠꦶ. ꦮꦶꦚ꧀ꦙꦁ ꦤꦴꦩ ꦠꦶꦫꦕ꧀ꦖꦴꦤꦥꦧ꧀ꦧꦠꦁ ꦥꦲꦫꦶꦠ꧀ꦮꦴ ꦥꦚ꧀ꦕ ꦣꦴꦫꦴ ꦲꦸꦠ꧀ꦮꦴ ꦥꦮꦠ꧀ꦠꦤꦛ꧀ꦜꦴꦤꦺ ꦥꦤ ꦒꦔ꧀ꦒꦴ, ꦪꦩꦸꦤꦴ, ꦄꦕꦶꦫꦮꦠꦷ, ꦱꦫꦨꦹ, ꦩꦲꦷꦠꦶ ꦥꦚ꧀ꦕ ꦱꦔ꧀ꦑꦁ ꦒꦠꦴ. ꦌꦮꦩꦺꦠꦴ ꦥꦚ꧀ꦕ ꦩꦲꦴꦤꦢꦶꦪꦺꦴ ꦲꦶꦩꦮꦤ꧀ꦠꦠꦺꦴ ꦥꦮꦠ꧀ꦠꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦴ.

ꦱꦮꦤ꧀ꦠꦶꦪꦺꦴꦠꦶ ꦪꦴ ꦏꦴꦕꦶ ꦱꦮꦩꦴꦤꦴ ꦒꦕ꧀ꦖꦤ꧀ꦠꦷ ꦩꦲꦴꦤꦢꦶꦪꦺꦴ ꦮꦴ ꦏꦸꦤ꧀ꦤꦢꦶꦪꦺꦴ ꦮꦴ. ꦄꦥ꧀ꦥꦺꦤ꧀ꦠꦷꦠꦶ ꦄꦭ꧀ꦭꦷꦪꦤ꧀ꦠꦶ ꦎꦱꦫꦤ꧀ꦠꦶ. ꦣꦴꦫꦴꦠꦶ ꦮꦸꦛ꧀ꦜꦶꦣꦴꦫꦴ. ꦥꦹꦫꦠ꧀ꦠꦤ꧀ꦠꦶ ꦥꦸꦟ꧀ꦟꦨꦴꦮꦺꦴ. ꦩꦲꦴꦱꦩꦸꦢ꧀ꦢꦱ꧀ꦱ ꦲꦶ ꦄꦪꦁ ꦣꦩ꧀ꦩꦠꦴ – ‘‘ꦆꦩꦱ꧀ꦩꦶꦁ ꦏꦴꦭꦺ ꦢꦺꦮꦺꦴ ꦩꦤ꧀ꦢꦺꦴ ꦗꦴꦠꦺꦴ, ꦗꦴꦭꦏ꧀ꦑꦶꦥꦴꦢꦷꦤꦶ ꦄꦴꦢꦴꦪ ꦩꦕ꧀ꦖꦏꦕ꧀ꦖꦥꦺ ꦒꦟ꧀ꦲꦶꦱ꧀ꦱꦴꦩꦴ’’ꦠꦶ ꦮꦴ ‘‘ꦆꦩꦱ꧀ꦩꦶꦁ ꦏꦴꦭꦺ ꦩꦲꦤ꧀ꦠꦴ ꦮꦸꦛ꧀ꦜꦶ, ꦭꦨꦶꦱ꧀ꦱꦴꦩ ꦤꦸ ꦑꦺꦴ ꦥꦶꦛ꧀ꦜꦶꦥꦱꦴꦫꦟꦛ꧀ꦜꦴꦤ’’ꦤ꧀ꦠꦶ ꦮꦴ ꦮꦠ꧀ꦠꦸꦁ ꦤ ꦱꦏ꧀ꦏꦴ. ꦥꦜꦩꦏꦥ꧀ꦥꦶꦏꦏꦴꦭꦠꦺꦴ ꦥꦛ꧀ꦜꦴꦪ ꦲꦶ ꦪꦁ ꦱꦶꦤꦺꦫꦸꦩꦺꦑꦭꦁ ꦄꦴꦲꦕ꧀ꦕ ꦈꦢꦏꦁ ꦜꦶꦠꦁ, ꦠꦠꦺꦴ ꦌꦏꦔ꧀ꦒꦸꦭꦩꦠ꧀ꦠꦩ꧀ꦥꦶ ꦈꦢꦏꦁ ꦤꦺꦮ ꦲꦺꦛ꧀ꦜꦴ ꦎꦱꦷꦢꦠꦶ, ꦤ ꦈꦢ꧀ꦣꦁ ꦈꦠ꧀ꦠꦫꦠꦶ. ꦌꦏꦫꦱꦺꦴꦠꦶ ꦄꦱꦩ꧀ꦨꦶꦤ꧀ꦤꦫꦱꦺꦴ.

ꦩꦸꦠ꧀ꦠꦴꦠꦶ ꦑꦸꦢ꧀ꦢꦏꦩꦲꦤ꧀ꦠꦮꦛ꧀ꦛꦢꦷꦓꦴꦢꦶꦨꦺꦢꦴ ꦄꦤꦺꦏꦮꦶꦣꦴ. ꦩꦟꦷꦠꦶ ꦫꦠ꧀ꦠꦤꦷꦭꦴꦢꦶꦨꦺꦢꦺꦴ ꦄꦤꦺꦏꦮꦶꦣꦺꦴ. ꦮꦺꦭ꦳ꦸꦫꦶꦪꦺꦴꦠꦶ ꦮꦁꦱꦮꦟ꧀ꦟꦱꦶꦫꦷꦱꦥꦸꦥ꧀ꦦꦮꦟ꧀ꦟꦴꦢꦶꦨꦺꦢꦺꦴ ꦄꦤꦺꦏꦮꦶꦣꦺꦴ. ꦱꦔ꧀ꦑꦺꦴꦠꦶ ꦢꦏ꧀ꦑꦶꦟꦴꦮꦛ꧀ꦛꦠꦩ꧀ꦧꦏꦸꦕ꧀ꦖꦶꦏꦣꦩꦤꦱꦔ꧀ꦑꦴꦢꦶꦨꦺꦢꦺꦴ ꦄꦤꦺꦏꦮꦶꦣꦺꦴ. ꦱꦶꦭꦴꦠꦶ ꦱꦺꦠꦏꦴꦭ꦳ꦩꦸꦒ꧀ꦒꦮꦟ꧀ꦟꦴꦢꦶꦨꦺꦢꦺꦴ ꦄꦤꦺꦏꦮꦶꦣꦴ. ꦥꦮꦴꦭ꦳ꦤ꧀ꦠꦶ ꦑꦸꦢ꧀ꦢꦏꦩꦲꦤ꧀ꦠꦫꦠ꧀ꦠꦓꦤꦫꦠ꧀ꦠꦴꦢꦶꦨꦺꦢꦁ ꦄꦤꦺꦏꦮꦶꦣꦁ. ꦩꦱꦴꦫꦒꦭ꧀ꦭꦤ꧀ꦠꦶ ꦏꦧꦫꦩꦟꦶ. ꦤꦴꦒꦴꦠꦶ ꦈꦴꦩꦶꦥꦶꦛ꧀ꦜꦮꦴꦱꦶꦤꦺꦴꦥꦶ ꦮꦶꦩꦴꦤꦛ꧀ꦜꦏꦴ ꦤꦴꦒꦴꦥꦶ.

ꦄꦛ꧀ꦜ ꦥꦲꦴꦫꦴꦢꦴꦠꦶ ꦱꦠ꧀ꦡꦴ ꦄꦛ꧀ꦜꦥꦶ ꦣꦩ꧀ꦩꦺ ꦮꦠ꧀ꦠꦸꦁ ꦱꦏ꧀ꦏꦺꦴꦠꦶ, ꦱꦺꦴꦭ꦳ꦱꦥꦶ ꦧꦴꦠ꧀ꦠꦶꦁꦱꦥꦶ ꦕꦠꦸꦱꦛ꧀ꦜꦶꦥꦶ ꦱꦲꦱ꧀ꦱꦩ꧀ꦥꦶ, ꦥꦲꦴꦫꦴꦢꦺꦤ ꦥꦤ ꦄꦛ꧀ꦜ ꦏꦡꦶꦠꦴ, ꦄꦲꦩ꧀ꦥꦶ ꦠꦺꦲꦺꦮ ꦱꦫꦶꦏ꧀ꦑꦏꦺ ꦏꦠ꧀ꦮꦴ ꦏꦡꦺꦱ꧀ꦱꦴꦩꦷꦠꦶ ꦕꦶꦤ꧀ꦠꦺꦠ꧀ꦮꦴ ꦌꦮꦩꦴꦲ. ꦄꦤꦸꦥꦸꦧ꧀ꦧꦱꦶꦏ꧀ꦑꦴꦠꦶꦄꦴꦢꦷꦱꦸ ꦄꦤꦸꦥꦸꦧ꧀ꦧꦱꦶꦏ꧀ꦑꦴꦪ ꦠꦶꦱ꧀ꦱꦺꦴ ꦱꦶꦏ꧀ꦑꦴ ꦒꦲꦶꦠꦴ, ꦄꦤꦸꦥꦸꦧ꧀ꦧꦏꦶꦫꦶꦪꦴꦪ ꦠꦺꦫꦱ ꦣꦸꦠꦔ꧀ꦒꦴꦤꦶ, ꦄꦤꦸꦥꦸꦧ꧀ꦧꦥꦛꦶꦥꦢꦴꦪ ꦱꦠ꧀ꦠ ꦄꦤꦸꦥꦱ꧀ꦱꦤꦴ ꦄꦛ꧀ꦜꦴꦫꦱ ꦩꦲꦴꦮꦶꦥꦱ꧀ꦱꦤꦴ ꦄꦛ꧀ꦜꦠꦶꦁꦱ ꦄꦴꦫꦩ꧀ꦩꦟꦮꦶꦨꦠ꧀ꦠꦶꦪꦺꦴ ꦱꦠ꧀ꦠꦠꦶꦁꦱ ꦧꦺꦴꦣꦥꦏ꧀ꦑꦶꦪꦣꦩ꧀ꦩꦴ. ꦤ ꦄꦴꦪꦠꦏꦺꦤꦺꦮ ꦄꦚ꧀ꦚꦴꦥꦛꦶꦮꦺꦣꦺꦴꦠꦶ ꦩꦟ꧀ꦝꦹꦏꦱ꧀ꦱ ꦈꦥ꧀ꦥꦠꦶꦠ꧀ꦮꦴ ꦒꦩꦤꦁ ꦮꦶꦪ ꦄꦴꦢꦶꦠꦺꦴꦮ ꦱꦷꦭꦥꦹꦫꦟꦴꦢꦶꦁ ꦄꦏꦠ꧀ꦮꦴ ꦄꦫꦲꦠ꧀ꦠꦥ꧀ꦥꦛꦶꦮꦺꦣꦺꦴ ꦤꦴꦩ ꦤꦠ꧀ꦡꦶ, ꦥꦛꦶꦥꦴꦛꦶꦪꦴ ꦥꦤ ꦱꦷꦭꦱꦩꦴꦣꦶꦥꦚ꧀ꦚꦴꦪꦺꦴ ꦥꦹꦫꦺꦠ꧀ꦮꦴꦮ ꦱꦏ꧀ꦏꦴ ꦄꦫꦲꦠ꧀ꦠꦁ ꦥꦠ꧀ꦠꦸꦤ꧀ꦠꦶ ꦄꦠ꧀ꦡꦺꦴ.

ꦄꦴꦫꦏꦴꦮꦴꦠꦶ ꦢꦹꦫꦺꦪꦺꦮ. ꦤ ꦠꦺꦤ ꦤꦶꦧ꧀ꦧꦴꦤꦣꦴꦠꦸꦪꦴ ꦈꦴꦤꦠ꧀ꦠꦁ ꦮꦴ ꦥꦹꦫꦠ꧀ꦠꦁ ꦮꦴꦠꦶ ꦄꦱꦔ꧀ꦑ꧀ꦪꦺꦪ꧀ꦪꦺꦥꦶ ꦏꦥ꧀ꦥꦺ ꦧꦸꦢ꧀ꦣꦺꦱꦸ ꦄꦤꦸꦥ꧀ꦥꦤ꧀ꦤꦺꦱꦸ ꦌꦏꦱꦠ꧀ꦠꦺꦴꦥꦶ ꦥꦫꦶꦤꦶꦧ꧀ꦧꦴꦠꦸꦁ ꦤ ꦱꦏ꧀ꦏꦺꦴꦠꦶ, ꦠꦢꦴꦥꦶ ‘‘ꦠꦸꦕ꧀ꦖꦴ ꦤꦶꦧ꧀ꦧꦴꦤꦣꦴꦠꦹ’’ꦠꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ. ꦧꦸꦢ꧀ꦣꦏꦴꦭꦺ ꦕ ꦥꦤ ꦌꦏꦺꦏꦱ꧀ꦩꦶꦁ ꦱꦩꦴꦒꦩꦺ ꦄꦱꦔ꧀ꦑ꧀ꦪꦺꦪ꧀ꦪꦴꦥꦶ ꦱꦠ꧀ꦠꦴ ꦄꦩꦠꦁ ꦄꦴꦫꦴꦣꦺꦤ꧀ꦠꦶ, ꦠꦢꦴꦥꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ – ‘‘ꦥꦹꦫꦴ ꦤꦶꦧ꧀ꦧꦴꦤꦣꦴꦠꦹ’’ꦠꦶ.