꧑. ꦮꦺꦫꦚ꧀ꦗꦱꦸꦠ꧀ꦠꦮꦟ꧀ꦟꦤꦴ

꧑꧑. ꦢꦸꦠꦶꦪꦱ꧀ꦱ ꦥꦜꦩꦺ ꦄꦨꦶꦮꦴꦢꦺꦠꦷꦠꦶ ꦌꦮꦩꦴꦢꦷꦤꦶ ꦤ ꦱꦩꦟꦺꦴ ꦒꦺꦴꦠꦩꦺꦴꦠꦶ ꦌꦠ꧀ꦡ ꦮꦸꦠ꧀ꦠꦤꦏꦴꦫꦺꦤ ꦪꦺꦴꦗꦺꦠ꧀ꦮꦴ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ ‘‘ꦤ ꦮꦤ꧀ꦢꦠꦶ ꦤꦴꦱꦤꦴ ꦮꦸꦛ꧀ꦜꦴꦠꦶ, ꦤꦴꦥꦶ ‘ꦆꦣ ꦨꦺꦴꦤ꧀ꦠꦺꦴ ꦤꦶꦱꦷꦢꦤ꧀ꦠꦹ’ꦠꦶ ꦌꦮꦁ ꦄꦴꦱꦤꦺꦤ ꦮꦴ ꦤꦶꦩꦤ꧀ꦠꦺꦠꦷ’’ꦠꦶ. ꦌꦠ꧀ꦡ ꦲꦶ ꦮꦴ-ꦱꦢ꧀ꦢꦺꦴ ꦮꦶꦨꦴꦮꦤꦺ ꦤꦴꦩ ꦄꦠ꧀ꦡꦺ ‘‘ꦫꦹꦥꦁ ꦤꦶꦕ꧀ꦕꦁ ꦮꦴ ꦄꦤꦶꦕ꧀ꦕꦁ ꦮꦴ’’ꦠꦶꦄꦴꦢꦷꦱꦸ ꦮꦶꦪ. ꦌꦮꦁ ꦮꦠ꧀ꦮꦴ ꦄꦡ ꦄꦠ꧀ꦠꦤꦺꦴ ꦄꦨꦶꦮꦴꦢꦤꦴꦢꦷꦤꦶ ꦄꦏꦫꦺꦴꦤ꧀ꦠꦁ ꦨꦒꦮꦤ꧀ꦠꦁ ꦢꦶꦱ꧀ꦮꦴ ꦄꦴꦲ – ꦠꦪꦶꦢꦁ, ꦨꦺꦴ ꦒꦺꦴꦠꦩ, ꦠꦡꦺꦮꦴꦠꦶ. ꦪꦁ ꦠꦁ ꦩꦪꦴ ꦱꦸꦠꦁ, ꦠꦁ ꦠꦡꦺꦮ, ꦠꦁ ꦱꦮꦤꦚ꧀ꦕ ꦩꦺ ꦢꦱ꧀ꦱꦤꦚ꧀ꦕ ꦱꦁꦱꦤ꧀ꦢꦠꦶ ꦱꦩꦺꦠꦶ, ꦄꦠ꧀ꦡꦠꦺꦴ ꦌꦏꦷꦨꦴꦮꦁ ꦒꦕ꧀ꦖꦠꦶ. ꦤ ꦲꦶ ꦨꦮꦁ ꦒꦺꦴꦠꦩꦺꦴ…ꦥꦺ… ꦄꦴꦱꦤꦺꦤ ꦮꦴ ꦤꦶꦩꦤ꧀ꦠꦺꦠꦷꦠꦶ. ꦌꦮꦁ ꦄꦠ꧀ꦠꦤꦴ ꦱꦸꦠꦁ ꦢꦶꦛ꧀ꦜꦺꦤ ꦤꦶꦒꦩꦺꦠ꧀ꦮꦴ ꦤꦶꦤ꧀ꦢꦤ꧀ꦠꦺꦴ ꦄꦴꦲ – ꦠꦪꦶꦢꦁ, ꦨꦺꦴ ꦒꦺꦴꦠꦩ, ꦤ ꦱꦩ꧀ꦥꦤ꧀ꦤꦩꦺꦮꦴꦠꦶ ꦠꦁ ꦄꦨꦶꦮꦴꦢꦤꦴꦢꦷꦤꦁ ꦄꦏꦫꦟꦁ ꦄꦪꦸꦠ꧀ꦠꦩꦺꦮꦴꦠꦶ.

ꦄꦡꦱ꧀ꦱ ꦨꦒꦮꦴ ꦄꦠ꧀ꦠꦸꦏ꧀ꦏꦁꦱꦤꦥꦫꦮꦩ꧀ꦨꦤꦢꦺꦴꦱꦁ ꦄꦤꦸꦥꦒꦩ꧀ꦩ ꦏꦫꦸꦟꦴꦱꦷꦠꦭꦺꦤ ꦲꦢꦪꦺꦤ ꦠꦁ ꦄꦚ꧀ꦚꦴꦟꦁ ꦮꦶꦣꦩꦶꦠ꧀ꦮꦴ ꦪꦸꦠ꧀ꦠꦨꦴꦮꦁ ꦢꦱ꧀ꦱꦺꦠꦸꦏꦴꦩꦺꦴ ꦤꦴꦲꦁ ꦠꦁ ꦧ꧀ꦫꦴꦲ꧀ꦩꦟꦴꦠꦶꦄꦴꦢꦶꦩꦴꦲ. ꦠꦠ꧀ꦫꦴꦪꦁ ꦱꦔ꧀ꦑꦺꦥꦠ꧀ꦡꦺꦴ – ꦄꦲꦁ, ꦧ꧀ꦫꦴꦲ꧀ꦩꦟ, ꦄꦥ꧀ꦥꦛꦶꦲꦠꦺꦤ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦕꦏ꧀ꦑꦸꦤꦴ ꦎꦭꦺꦴꦏꦺꦤ꧀ꦠꦺꦴꦥꦶ ꦠꦁ ꦥꦸꦒ꧀ꦒꦭꦁ ꦌꦠꦱ꧀ꦩꦶꦁ ꦱꦢꦺꦮꦏꦴꦢꦶꦨꦺꦢꦺ ꦭꦺꦴꦏꦺ ꦤ ꦥꦱ꧀ꦱꦴꦩꦶ, ꦪꦩꦲꦁ ꦄꦨꦶꦮꦴꦢꦺꦪ꧀ꦪꦁ ꦮꦴ ꦥꦕ꧀ꦕꦸꦛ꧀ꦜꦺꦪ꧀ꦪꦁ ꦮꦴ ꦄꦴꦱꦤꦺꦤ ꦮꦴ ꦤꦶꦩꦤ꧀ꦠꦺꦪ꧀ꦪꦁ. ꦄꦤꦕ꧀ꦖꦫꦶꦪꦁ ꦮꦴ ꦌꦠꦁ, ꦱ꧀ꦮꦴꦲꦁ ꦄꦗ꧀ꦗ ꦱꦧ꧀ꦧꦚ꧀ꦚꦸꦠꦁ ꦥꦠ꧀ꦠꦺꦴ ꦌꦮꦫꦹꦥꦁ ꦤꦶꦥꦕ꧀ꦕꦴꦏꦴꦫꦴꦫꦲꦁ ꦥꦸꦒ꧀ꦒꦭꦁ ꦤ ꦥꦱ꧀ꦱꦴꦩꦶ. ꦄꦥꦶꦕ ꦑꦺꦴ ꦪꦢꦴꦥꦴꦲꦁ ꦱꦩ꧀ꦥꦠꦶꦗꦴꦠꦺꦴꦮ ꦈꦠ꧀ꦠꦫꦺꦤ ꦩꦸꦑꦺꦴ ꦱꦠ꧀ꦠꦥꦢꦮꦷꦠꦶꦲꦴꦫꦺꦤ ꦒꦤ꧀ꦠ꧀ꦮꦴ ꦱꦏꦭꦁ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦁ ꦎꦭꦺꦴꦏꦺꦱꦶꦁ, ꦠꦢꦴꦥꦶ ꦌꦠꦱ꧀ꦩꦶꦁ ꦱꦢꦺꦮꦏꦴꦢꦶꦨꦺꦢꦺ ꦭꦺꦴꦏꦺ ꦠꦁ ꦥꦸꦒ꧀ꦒꦭꦁ ꦤ ꦥꦱ꧀ꦱꦴꦩꦶ, ꦪꦩꦲꦁ ꦌꦮꦫꦹꦥꦁ ꦤꦶꦥꦕ꧀ꦕꦏꦴꦫꦁ ꦏꦫꦺꦪ꧀ꦪꦁ. ꦄꦡ ꦑꦺꦴ ꦩꦁ ꦱꦺꦴꦭ꦳ꦱꦏꦥ꧀ꦥꦱꦲꦱ꧀ꦱꦴꦪꦸꦏꦺꦴ ꦑꦷꦟꦴꦱꦮꦩꦲꦴꦧ꧀ꦫꦲ꧀ꦩꦴꦥꦶ ꦄꦚ꧀ꦗꦭꦶꦁ ꦥꦒ꧀ꦒꦲꦺꦠ꧀ꦮꦴ ‘‘ꦠ꧀ꦮꦁ ꦭꦺꦴꦏꦺ ꦩꦲꦴꦥꦸꦫꦶꦱꦺꦴ, ꦠ꧀ꦮꦁ ꦱꦢꦺꦮꦏꦱ꧀ꦱ ꦭꦺꦴꦏꦱ꧀ꦱ ꦄꦒ꧀ꦒꦺꦴ ꦕ ꦗꦺꦛ꧀ꦜꦺꦴ ꦕ ꦱꦺꦛ꧀ꦜꦺꦴ ꦕ, ꦤꦠ꧀ꦡꦶ ꦠꦪꦴ ꦈꦠ꧀ꦠꦫꦶꦠꦫꦺꦴ’’ꦠꦶ ꦱꦚ꧀ꦗꦴꦠꦱꦺꦴꦩꦤꦱ꧀ꦱꦺꦴ ꦥꦠꦶꦩꦴꦤꦺꦱꦶ. ꦠꦢꦴꦥꦶ ꦕꦴꦲꦁ ꦄꦠ꧀ꦠꦤꦴ ꦈꦠ꧀ꦠꦫꦶꦠꦫꦁ ꦄꦥꦱ꧀ꦱꦤ꧀ꦠꦺꦴ ꦄꦴꦱꦨꦶꦁ ꦮꦴꦕꦁ ꦤꦶꦕ꧀ꦖꦴꦫꦺꦱꦶꦁ – ‘‘ꦄꦒ꧀ꦒꦺꦴꦲꦩꦱ꧀ꦩꦶ ꦭꦺꦴꦏꦱ꧀ꦱ, ꦗꦺꦛ꧀ꦜꦺꦴꦲꦩꦱ꧀ꦩꦶ ꦭꦺꦴꦏꦱ꧀ꦱ, ꦱꦺꦛ꧀ꦜꦺꦴꦲꦩꦱ꧀ꦩꦶ ꦭꦺꦴꦏꦱ꧀ꦱꦴ’’ꦠꦶ. ꦌꦮꦁ ꦱꦩ꧀ꦥꦠꦶꦗꦴꦠꦱ꧀ꦱꦴꦥꦶ ꦩꦪ꧀ꦲꦁ ꦄꦨꦶꦮꦴꦢꦤꦴꦢꦶꦫꦲꦺꦴ ꦥꦸꦒ꧀ꦒꦭꦺꦴ ꦤꦠ꧀ꦡꦶ, ꦱ꧀ꦮꦴꦲꦁ ꦆꦢꦴꦤꦶ ꦱꦧ꧀ꦧꦚ꧀ꦚꦸꦠꦁ ꦥꦠ꧀ꦠꦺꦴ ꦏꦁ ꦄꦨꦶꦮꦴꦢꦺꦪ꧀ꦪꦁ. ꦠꦱ꧀ꦩꦴ ꦠ꧀ꦮꦁ, ꦧ꧀ꦫꦴꦲ꧀ꦩꦟ, ꦩꦴ ꦠꦡꦴꦒꦠꦴ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦥꦠ꧀ꦡꦪꦶ. ꦪꦚ꧀ꦲꦶ, ꦧ꧀ꦫꦴꦲ꧀ꦩꦟ, ꦠꦡꦴꦒꦠꦺꦴ ꦄꦨꦶꦮꦴꦢꦺꦪ꧀ꦪ ꦮꦴ…ꦥꦺ… ꦄꦴꦱꦤꦺꦤ ꦮꦴ ꦤꦶꦩꦤ꧀ꦠꦺꦪ꧀ꦪ, ꦩꦸꦢ꧀ꦣꦴꦥꦶ ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦫꦠ꧀ꦠꦶꦥꦫꦶꦪꦺꦴꦱꦴꦤꦺ ꦥꦫꦶꦥꦴꦏꦱꦶꦡꦶꦭꦧꦤ꧀ꦣꦤꦁ ꦮꦟ꧀ꦛꦴ ꦩꦸꦠ꧀ꦠꦠꦴꦭꦦꦭꦁ ꦮꦶꦪ ꦒꦷꦮꦠꦺꦴ ꦖꦶꦗ꧀ꦗꦶꦠ꧀ꦮꦴ ꦱꦲꦱꦴꦮ ꦨꦹꦩꦶꦪꦁ ꦤꦶꦥꦠꦺꦪ꧀ꦪ.

ꦌꦮꦁ ꦮꦸꦠ꧀ꦠꦺꦥꦶ ꦧ꧀ꦫꦴꦲ꧀ꦩꦟꦺꦴ ꦢꦸꦥ꧀ꦥꦚ꧀ꦚꦠꦴꦪ ꦠꦡꦴꦒꦠꦱ꧀ꦱ ꦭꦺꦴꦏꦗꦺꦛ꧀ꦜꦨꦴꦮꦁ ꦄꦱꦭ꧀ꦭꦏ꧀ꦑꦺꦤ꧀ꦠꦺꦴ ꦏꦺꦮꦭꦁ ꦠꦁ ꦮꦕꦤꦁ ꦄꦱꦲꦩꦴꦤꦺꦴ ꦄꦴꦲ – ꦄꦫꦱꦫꦹꦥꦺꦴ ꦨꦮꦁ ꦒꦺꦴꦠꦩꦺꦴꦠꦶ. ꦄꦪꦁ ꦏꦶꦫꦱ꧀ꦱ ꦄꦣꦶꦥ꧀ꦥꦴꦪꦺꦴ – ꦪꦁ ꦭꦺꦴꦏꦺ ꦄꦨꦶꦮꦴꦢꦤꦥꦕ꧀ꦕꦸꦛ꧀ꦜꦴꦤꦄꦚ꧀ꦗꦭꦶꦏꦩ꧀ꦩꦱꦴꦩꦷꦕꦶꦏꦩ꧀ꦩꦁ ‘‘ꦱꦴꦩꦒ꧀ꦒꦶꦫꦱꦺꦴ’’ꦠꦶ ꦮꦸꦕ꧀ꦕꦠꦶ, ꦠꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦤꦠ꧀ꦡꦶ. ꦠꦱ꧀ꦩꦴ ꦄꦫꦱꦫꦹꦥꦺꦴ ꦨꦮꦁ ꦒꦺꦴꦠꦩꦺꦴ, ꦄꦫꦱꦗꦴꦠꦶꦏꦺꦴ ꦄꦫꦱꦱꦨꦴꦮꦺꦴꦠꦶ. ꦄꦡꦱ꧀ꦱ ꦨꦒꦮꦴ ꦕꦶꦠ꧀ꦠꦩꦸꦢꦸꦨꦴꦮꦗꦤꦤꦠ꧀ꦡꦁ ꦈꦗꦸꦮꦶꦥꦕ꧀ꦕꦤꦷꦏꦨꦴꦮꦁ ꦥꦫꦶꦲꦫꦤ꧀ꦠꦺꦴ ꦄꦚ꧀ꦚꦡꦴ ꦠꦱ꧀ꦱ ꦮꦕꦤꦱ꧀ꦱ ꦄꦠ꧀ꦡꦁ ꦄꦠ꧀ꦠꦤꦶ ꦱꦤ꧀ꦢꦱ꧀ꦱꦺꦤ꧀ꦠꦺꦴ ꦄꦠ꧀ꦡꦶ ꦑ꧀ꦮꦺꦱ, ꦧ꧀ꦫꦴꦲ꧀ꦩꦟ, ꦥꦫꦶꦪꦴꦪꦺꦴꦠꦶꦄꦴꦢꦶꦩꦴꦲ.

ꦠꦠ꧀ꦡ ꦄꦠ꧀ꦡꦶ ꦑ꧀ꦮꦺꦱꦴꦠꦶ ꦄꦠ꧀ꦡꦶ ꦑꦺꦴ ꦌꦱ. ꦥꦫꦶꦪꦴꦪꦺꦴꦠꦶ ꦏꦴꦫꦟꦁ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦄꦠ꧀ꦡꦶ ꦑꦺꦴ, ꦧ꧀ꦫꦴꦲ꧀ꦩꦟ, ꦌꦠꦁ ꦏꦴꦫꦟꦁ, ꦪꦺꦤ ꦏꦴꦫꦟꦺꦤ ꦩꦁ ‘‘ꦄꦫꦱꦫꦹꦥꦺꦴ ꦨꦮꦁ ꦒꦺꦴꦠꦩꦺꦴ’’ꦠꦶ ꦮꦢꦩꦴꦤꦺꦴ ꦥꦸꦒ꧀ꦒꦭꦺꦴ ꦱꦩ꧀ꦩꦴ ꦮꦢꦺꦪ꧀ꦪ, ꦄꦮꦶꦠꦡꦮꦴꦢꦷꦠꦶ ꦱꦔ꧀ꦑꦁ ꦒꦕ꧀ꦖꦺꦪ꧀ꦪ. ꦏꦠꦩꦺꦴ ꦥꦤ ꦱꦺꦴꦠꦶ? ꦪꦺ ꦠꦺ, ꦧ꧀ꦫꦴꦲ꧀ꦩꦟ, ꦫꦹꦥꦫꦱꦴ…ꦥꦺ… ꦦꦺꦴꦛ꧀ꦜꦧ꧀ꦧꦫꦱꦴ, ꦠꦺ ꦠꦡꦴꦒꦠꦱ꧀ꦱ ꦥꦲꦷꦤꦴꦠꦶ. ꦏꦶꦁ ꦮꦸꦠ꧀ꦠꦁ ꦲꦺꦴꦠꦶ? ꦪꦺ ꦠꦺ ꦗꦴꦠꦶꦮꦱꦺꦤ ꦮꦴ ꦈꦥꦥꦠ꧀ꦠꦶꦮꦱꦺꦤ ꦮꦴ ꦱꦺꦛ꧀ꦜꦱꦩ꧀ꦩꦠꦴꦤꦩ꧀ꦥꦶ ꦥꦸꦡꦸꦗ꧀ꦗꦤꦴꦤꦁ ꦫꦹꦥꦴꦫꦩ꧀ꦩꦟꦴꦢꦷꦤꦶ ꦄꦱ꧀ꦱꦴꦢꦺꦤ꧀ꦠꦴꦤꦁ ꦄꦨꦶꦤꦤ꧀ꦢꦤ꧀ꦠꦴꦤꦁ ꦫꦗ꧀ꦗꦤ꧀ꦠꦴꦤꦁ ꦈꦥ꧀ꦥꦗ꧀ꦗꦤ꧀ꦠꦶ ꦏꦴꦩꦱꦸꦑꦱ꧀ꦱꦴꦢꦱꦔ꧀ꦑꦴꦠꦴ ꦫꦹꦥꦫꦱꦴ, ꦱꦢ꧀ꦢꦫꦱꦴ, ꦒꦤ꧀ꦣꦫꦱꦴ, ꦫꦱꦫꦱꦴ, ꦦꦺꦴꦛ꧀ꦜꦧ꧀ꦧꦫꦱꦴ, ꦪꦺ ꦆꦩꦁ ꦭꦺꦴꦏꦁ ꦒꦷꦮꦴꦪ ꦧꦤ꧀ꦣꦶꦠ꧀ꦮꦴ ꦮꦶꦪ ꦄꦴꦮꦶꦚ꧀ꦖꦤ꧀ꦠꦶ, ꦮꦠ꧀ꦡꦴꦫꦩ꧀ꦩꦟꦴꦢꦶꦱꦴꦩꦒ꧀ꦒꦶꦪꦚ꧀ꦕ ꦈꦥ꧀ꦥꦤ꧀ꦤꦠ꧀ꦠꦴ ꦱꦴꦩꦒ꧀ꦒꦶꦫꦱꦴꦠꦶ ꦮꦸꦕ꧀ꦕꦤ꧀ꦠꦶ. ꦠꦺ ꦱꦧ꧀ꦧꦺꦥꦶ ꦠꦡꦴꦒꦠꦱ꧀ꦱ ꦥꦲꦷꦤꦴ. ‘‘ꦩꦪ꧀ꦲꦁ ꦥꦲꦷꦤꦴ’’ꦠꦶ ꦮꦠ꧀ꦠꦧ꧀ꦧꦺꦥꦶ ꦩꦩꦴꦏꦴꦫꦺꦤ ꦄꦠ꧀ꦠꦴꦤꦁ ꦄꦤꦸꦏ꧀ꦑꦶꦥꦤ꧀ꦠꦺꦴ ꦣꦩ꧀ꦩꦁ ꦢꦺꦱꦺꦠꦶ, ꦢꦺꦱꦤꦴꦮꦶꦭꦴꦱꦺꦴ ꦮꦴ ꦌꦱ ꦠꦡꦴꦒꦠꦱ꧀ꦱ.

ꦠꦠ꧀ꦡ ꦥꦲꦷꦤꦴꦠꦶ ꦕꦶꦠ꧀ꦠꦱꦤ꧀ꦠꦴꦤꦠꦺꦴ ꦮꦶꦒꦠꦴ, ꦥꦗꦲꦶꦠꦴ ꦮꦴ. ꦌꦠꦱ꧀ꦩꦶꦁ ꦥꦤꦠ꧀ꦡꦺ ꦏꦫꦟꦺ ꦱꦴꦩꦶꦮꦕꦤꦁ ꦢꦛ꧀ꦜꦧ꧀ꦧꦁ. ꦄꦫꦶꦪꦩꦒ꧀ꦒꦱꦠ꧀ꦡꦺꦤ ꦈꦕ꧀ꦖꦶꦤ꧀ꦤꦁ ꦠꦟ꧀ꦲꦴꦮꦶꦗ꧀ꦗꦴꦩꦪꦁ ꦩꦹꦭꦁ ꦌꦠꦺꦱꦤ꧀ꦠꦶ ꦈꦕ꧀ꦖꦶꦤ꧀ꦤꦩꦹꦭꦴ. ꦠꦴꦭꦮꦠ꧀ꦡꦸ ꦮꦶꦪ ꦤꦺꦱꦁ ꦮꦠ꧀ꦡꦸ ꦏꦠꦤ꧀ꦠꦶ ꦠꦴꦭꦴꦮꦠ꧀ꦡꦸꦏꦠꦴ. ꦪꦡꦴ ꦲꦶ ꦠꦴꦭꦫꦸꦏ꧀ꦑꦁ ꦱꦩꦹꦭꦁ ꦈꦢ꧀ꦣꦫꦶꦠ꧀ꦮꦴ ꦠꦱ꧀ꦱ ꦮꦠ꧀ꦡꦸꦩꦠ꧀ꦠꦺ ꦠꦱ꧀ꦩꦶꦁ ꦥꦢꦺꦱꦺ ꦏꦠꦺ ꦤ ꦥꦸꦤ ꦠꦱ꧀ꦱ ꦠꦴꦭꦱ꧀ꦱ ꦈꦥ꧀ꦥꦠ꧀ꦠꦶ ꦥꦚ꧀ꦚꦴꦪꦠꦶ, ꦌꦮꦁ ꦄꦫꦶꦪꦩꦒ꧀ꦒꦱꦠ꧀ꦡꦺꦤ ꦱꦩꦹꦭꦺ ꦫꦹꦥꦴꦢꦶꦫꦱꦺ ꦈꦢ꧀ꦣꦫꦶꦠ꧀ꦮꦴ ꦠꦺꦱꦁ ꦥꦸꦧ꧀ꦧꦺ ꦈꦥ꧀ꦥꦤ꧀ꦤꦥꦸꦧ꧀ꦧꦨꦴꦮꦺꦤ ꦮꦠ꧀ꦡꦸꦩꦠ꧀ꦠꦺ ꦕꦶꦠ꧀ꦠꦱꦤ꧀ꦠꦴꦤꦺ ꦏꦠꦺ ꦱꦧ꧀ꦧꦺꦥꦶ ꦠꦺ ꦠꦴꦭꦴꦮꦠ꧀ꦡꦸꦏꦠꦴꦠꦶ ꦮꦸꦕ꧀ꦕꦤ꧀ꦠꦶ. ꦄꦮꦶꦫꦸꦭ꦳꧀ꦲꦶꦣꦩ꧀ꦩꦠ꧀ꦠꦴ ꦮꦴ ꦩꦠ꧀ꦡꦏꦕ꧀ꦖꦶꦤ꧀ꦤꦠꦴꦭꦺꦴ ꦮꦶꦪ ꦏꦠꦴꦠꦶ ꦠꦴꦭꦴꦮꦠ꧀ꦡꦸꦏꦠꦴ. ꦪꦱ꧀ꦩꦴ ꦥꦤ ꦌꦮꦁ ꦠꦴꦭꦴꦮꦠ꧀ꦡꦸꦏꦠꦴ ꦄꦤꦨꦴꦮꦁꦏꦠꦴ ꦲꦺꦴꦤ꧀ꦠꦶ, ꦪꦡꦴ ꦤꦺꦱꦁ ꦥꦕ꧀ꦖꦴꦨꦴꦮꦺꦴ ꦤ ꦲꦺꦴꦠꦶ, ꦠꦡꦴ ꦏꦠꦴ ꦲꦺꦴꦤ꧀ꦠꦶ. ꦠꦱ꧀ꦩꦴ ꦄꦴꦲ – ꦄꦤꦨꦴꦮꦁꦏꦠꦴꦠꦶ. ꦄꦴꦪꦠꦶꦁ ꦄꦤꦸꦥ꧀ꦥꦴꦢꦣꦩ꧀ꦩꦴꦠꦶ ꦄꦤꦴꦒꦠꦺ ꦄꦤꦸꦥ꧀ꦥꦗ꧀ꦗꦤꦏꦱꦨꦴꦮꦴ.

ꦤꦺꦴ ꦕ ꦑꦺꦴ ꦪꦁ ꦠ꧀ꦮꦁ ꦱꦤ꧀ꦣꦴꦪ ꦮꦢꦺꦱꦷꦠꦶ ꦪꦚ꧀ꦕ ꦑꦺꦴ ꦠ꧀ꦮꦁ ꦱꦤ꧀ꦣꦴꦪ ꦮꦢꦺꦱꦶ, ꦱꦺꦴ ꦥꦫꦶꦪꦴꦪꦺꦴ ꦤ ꦲꦺꦴꦠꦶ. ꦤꦤꦸ ꦕ ꦌꦮꦁ ꦮꦸꦠ꧀ꦠꦺ ꦪꦺꦴ ꦧ꧀ꦫꦴꦲ꧀ꦩꦟꦺꦤ ꦮꦸꦠ꧀ꦠꦺꦴ ꦱꦴꦩꦒ꧀ꦒꦶꦫꦱꦺꦴ, ꦠꦱ꧀ꦱ ꦄꦠ꧀ꦠꦤꦶ ꦮꦶꦗ꧀ꦗꦩꦴꦤꦠꦴ ꦄꦤꦸꦚ꧀ꦚꦴꦠꦴ ꦲꦺꦴꦠꦷꦠꦶ? ꦤ ꦲꦺꦴꦠꦶ. ꦪꦺꦴ ꦲꦶ ꦤꦁ ꦱꦴꦩꦒ꧀ꦒꦶꦫꦱꦁ ꦏꦴꦠꦸꦁ ꦨꦧ꧀ꦧꦺꦴ ꦲꦸꦠ꧀ꦮꦴ ꦤ ꦏꦫꦺꦴꦠꦶ, ꦱꦺꦴ ꦠꦢꦨꦴꦮꦺꦤ ꦄꦫꦱꦫꦹꦥꦺꦴꦠꦶ ꦮꦠ꧀ꦠꦧ꧀ꦧꦠꦁ ꦄꦫꦲꦠꦶ. ꦨꦒꦮꦴ ꦥꦤ ꦄꦨꦧ꧀ꦧꦺꦴꦮ ꦌꦠꦁ ꦏꦴꦠꦸꦁ, ꦠꦺꦤꦱ꧀ꦱ ꦏꦴꦫꦟꦺ ꦄꦨꦧ꧀ꦧꦠꦁ ꦥꦏꦴꦱꦺꦤ꧀ꦠꦺꦴ ꦄꦴꦲ – ‘‘ꦤꦺꦴ ꦕ ꦑꦺꦴ ꦪꦁ ꦠ꧀ꦮꦁ ꦱꦤ꧀ꦣꦴꦪ ꦮꦢꦺꦱꦷ’’ꦠꦶ. ꦪꦁ ꦥꦫꦶꦪꦴꦪꦁ ꦱꦤ꧀ꦣꦴꦪ ꦠ꧀ꦮꦁ ꦩꦁ ‘‘ꦄꦫꦱꦫꦹꦥꦺꦴ’’ꦠꦶ ꦮꦢꦺꦱꦶ, ꦱꦺꦴ ꦄꦩ꧀ꦲꦺꦱꦸ ꦤꦺꦮ ꦮꦠ꧀ꦠꦧ꧀ꦧꦺꦴꦠꦶ.

ꦌꦮꦁ ꦧ꧀ꦫꦴꦲ꧀ꦩꦟꦺꦴ ꦄꦠ꧀ꦠꦤꦴ ꦄꦣꦶꦥ꧀ꦥꦺꦠꦁ ꦄꦫꦱꦫꦹꦥꦠꦁ ꦄꦴꦫꦺꦴꦥꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦄꦡꦴꦥꦫꦁ ꦤꦶꦧ꧀ꦨꦺꦴꦒꦺꦴ ꦨꦮꦤ꧀ꦠꦶꦄꦴꦢꦶꦩꦴꦲ. ꦱꦧ꧀ꦧꦥꦫꦶꦪꦴꦪꦺꦱꦸ ꦕꦺꦠ꧀ꦡ ꦮꦸꦠ꧀ꦠꦤꦪꦺꦤꦺꦮ ꦪꦺꦴꦗꦤꦴꦏ꧀ꦏꦩꦁ ꦮꦶꦢꦶꦠ꧀ꦮꦴ ꦱꦤ꧀ꦣꦴꦪꦨꦴꦱꦶꦠꦩꦠ꧀ꦡꦁ ꦌꦮꦁ ꦮꦺꦢꦶꦠꦧ꧀ꦧꦁ – ꦧ꧀ꦫꦴꦲ꧀ꦩꦟꦺꦴ ꦠꦢꦺꦮ ꦮꦪꦺꦴꦮꦸꦢ꧀ꦣꦴꦤꦁ ꦄꦨꦶꦮꦴꦢꦤꦴꦢꦶꦏꦩ꧀ꦩꦁ ꦭꦺꦴꦏꦺ ‘‘ꦱꦴꦩꦒ꧀ꦒꦶꦥꦫꦶꦨꦺꦴꦒꦺꦴ’’ꦠꦶ ꦩꦚ꧀ꦚꦩꦴꦤꦺꦴ ꦠꦢꦨꦴꦮꦺꦤ ꦕ ꦨꦒꦮꦤ꧀ꦠꦁ ‘‘ꦤꦶꦧ꧀ꦨꦺꦴꦒꦺꦴ’’ꦠꦶꦄꦴꦢꦶꦩꦴꦲ. ꦨꦒꦮꦴ ꦕ ꦪ꧀ꦮꦴꦪꦁ ꦫꦹꦥꦴꦢꦷꦱꦸ ꦱꦠ꧀ꦠꦴꦤꦁ ꦖꦤ꧀ꦢꦫꦴꦒꦥꦫꦶꦨꦺꦴꦒꦺꦴ, ꦠꦢꦨꦴꦮꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦄꦥꦫꦁ ꦥꦫꦶꦪꦴꦪꦩꦤꦸꦗꦴꦤꦶ.

ꦥꦸꦤ ꦧ꧀ꦫꦴꦲ꧀ꦩꦟꦺꦴ ꦪꦁ ꦭꦺꦴꦏꦺ ꦮꦪꦺꦴꦮꦸꦢ꧀ꦣꦴꦤꦁ ꦄꦨꦶꦮꦴꦢꦤꦴꦢꦶꦏꦸꦭꦱꦩꦸꦢꦴꦕꦴꦫꦏꦩ꧀ꦩꦁ ꦭꦺꦴꦏꦶꦪꦴ ꦏꦫꦺꦴꦤ꧀ꦠꦶ, ꦠꦱ꧀ꦱ ꦄꦏꦶꦫꦶꦪꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦤ꧀ꦠꦁ ꦄꦏꦶꦫꦶꦪꦮꦴꦢꦺꦴꦠꦶ ꦄꦴꦲ. ꦨꦒꦮꦴ ꦥꦤ ꦪꦱ꧀ꦩꦴ ꦏꦴꦪꦢꦸꦕ꧀ꦕꦫꦶꦠꦴꦢꦷꦤꦁ ꦄꦏꦶꦫꦶꦪꦁ ꦮꦢꦠꦶ, ꦠꦱ꧀ꦩꦴ ꦠꦁ ꦄꦏꦶꦫꦶꦪꦮꦴꦢꦶꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦄꦥꦫꦁ ꦥꦫꦶꦪꦴꦪꦩꦤꦸꦗꦴꦤꦶ. ꦠꦠ꧀ꦡ ꦜꦥꦺꦠ꧀ꦮꦴ ꦏꦴꦪꦢꦸꦕ꧀ꦕꦫꦶꦠꦴꦢꦷꦤꦶ ꦄꦮꦱꦺꦱꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤꦺꦏꦮꦶꦲꦶꦠꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴꦠꦶ ꦮꦺꦢꦶꦠꦧ꧀ꦧꦴ.

ꦥꦸꦤ ꦧ꧀ꦫꦴꦲ꧀ꦩꦟꦺꦴ ꦠꦢꦺꦮ ꦄꦨꦶꦮꦴꦢꦤꦴꦢꦶꦏꦩ꧀ꦩꦁ ꦨꦒꦮꦠꦶ ꦄꦥꦱ꧀ꦱꦤ꧀ꦠꦺꦴ ‘‘ꦆꦩꦁ ꦄꦴꦒꦩ꧀ꦩ ꦄꦪꦁ ꦭꦺꦴꦏꦠꦤ꧀ꦠꦶ ꦭꦺꦴꦏꦥꦮꦺꦟꦷ ꦈꦕ꧀ꦖꦶꦗ꧀ꦗꦠꦷ’’ꦠꦶ ꦩꦚ꧀ꦚꦩꦴꦤꦺꦴ ꦨꦒꦮꦤ꧀ꦠꦁ ꦈꦕ꧀ꦖꦺꦢꦮꦴꦢꦺꦴꦠꦶ ꦄꦴꦲ. ꦨꦒꦮꦴ ꦥꦤ ꦪꦱ꧀ꦩꦴ ꦥꦚ꧀ꦕꦏꦴꦩꦒꦸꦟꦶꦏꦫꦴꦒꦱ꧀ꦱ ꦕꦺꦮ ꦄꦏꦸꦱꦭꦕꦶꦠ꧀ꦠꦢ꧀ꦮꦪꦱꦩ꧀ꦥꦪꦸꦠ꧀ꦠꦱ꧀ꦱ ꦕ ꦢꦺꦴꦱꦱ꧀ꦱ ꦄꦤꦴꦒꦴꦩꦶꦩꦒ꧀ꦒꦺꦤ ꦈꦕ꧀ꦖꦺꦢꦁ ꦮꦢꦠꦶ, ꦱꦧ꧀ꦧꦴꦏꦸꦱꦭꦱꦩ꧀ꦨꦮꦱ꧀ꦱ ꦥꦤ ꦩꦺꦴꦲꦱ꧀ꦱ ꦄꦫꦲꦠ꧀ꦠꦩꦒ꧀ꦒꦺꦤ ꦈꦕ꧀ꦖꦺꦢꦁ ꦮꦢꦠꦶ, ꦜꦥꦺꦠ꧀ꦮꦴ ꦠꦺ ꦠꦪꦺꦴ ꦄꦮꦱꦺꦱꦴꦤꦁ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦪꦡꦴꦤꦸꦫꦹꦥꦁ ꦕꦠꦹꦲꦶ ꦩꦒ꧀ꦒꦺꦲꦶ ꦈꦕ꧀ꦖꦺꦢꦁ ꦮꦢꦠꦶ, ꦠꦱ꧀ꦩꦴ ꦠꦁ ꦈꦕ꧀ꦖꦺꦢꦮꦴꦢꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦄꦥꦫꦁ ꦥꦫꦶꦪꦴꦪꦩꦤꦸꦗꦴꦤꦶ.

ꦥꦸꦤ ꦧ꧀ꦫꦴꦲ꧀ꦩꦟꦺꦴ ‘‘ꦗꦶꦒꦸꦕ꧀ꦖꦠꦶ ꦩꦚ꧀ꦚꦺ ꦱꦩꦟꦺꦴ ꦒꦺꦴꦠꦩꦺꦴ ꦆꦢꦁ ꦮꦪꦺꦴꦮꦸꦢ꧀ꦣꦴꦤꦁ ꦄꦨꦶꦮꦴꦢꦤꦴꦢꦶꦏꦸꦭꦱꦩꦸꦢꦴꦕꦴꦫꦏꦩ꧀ꦩꦁ, ꦠꦺꦤ ꦠꦁ ꦤ ꦏꦫꦺꦴꦠꦷ’’ꦠꦶ ꦩꦚ꧀ꦚꦩꦴꦤꦺꦴ ꦨꦒꦮꦤ꧀ꦠꦁ ꦗꦺꦒꦸꦕ꧀ꦖꦷꦠꦶ ꦄꦴꦲ. ꦨꦒꦮꦴ ꦥꦤ ꦪꦱ꧀ꦩꦴ ꦗꦶꦒꦸꦕ꧀ꦖꦠꦶ ꦏꦴꦪꦢꦸꦕ꧀ꦕꦫꦶꦠꦴꦢꦷꦲꦶ, ꦪꦴꦤꦶ ꦏꦴꦪꦮꦕꦷꦩꦤꦺꦴꦢꦸꦕ꧀ꦕꦫꦶꦠꦴꦤꦶ ꦕꦺꦮ ꦪꦴꦮ ꦕ ꦄꦏꦸꦱꦭꦴꦤꦁ ꦭꦴꦩꦏꦣꦩ꧀ꦩꦴꦤꦁ ꦱꦩꦴꦥꦠ꧀ꦠꦶ ꦱꦩꦴꦥꦗ꧀ꦗꦤꦴ ꦱꦩꦔ꧀ꦒꦶꦨꦴꦮꦺꦴ, ꦠꦁ ꦱꦧ꧀ꦧꦩ꧀ꦥꦶ ꦒꦹꦡꦁ ꦮꦶꦪ ꦩꦟ꧀ꦝꦤꦏꦗꦴꦠꦶꦏꦺꦴ ꦥꦸꦫꦶꦱꦺꦴ ꦗꦶꦒꦸꦕ꧀ꦖꦠꦶ ꦲꦶꦫꦷꦪꦠꦶ, ꦠꦱ꧀ꦩꦴ ꦠꦁ ꦗꦺꦒꦸꦕ꧀ꦖꦶꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦄꦥꦫꦁ ꦥꦫꦶꦪꦴꦪꦩꦤꦸꦗꦴꦤꦶ. ꦠꦠ꧀ꦡ ꦏꦴꦪꦢꦸꦕ꧀ꦕꦫꦶꦠꦺꦤꦴꦠꦶꦄꦴꦢꦶ ꦏꦫꦟꦮꦕꦤꦁ ꦈꦥꦪꦺꦴꦒꦠ꧀ꦡꦺ ꦢꦛ꧀ꦜꦧ꧀ꦧꦁ.

ꦥꦸꦤ ꦧ꧀ꦫꦴꦲ꧀ꦩꦟꦺꦴ ꦠꦢꦺꦮ ꦄꦨꦶꦮꦴꦢꦤꦴꦢꦶꦏꦩ꧀ꦩꦁ ꦨꦒꦮꦠꦶ ꦄꦥꦱ꧀ꦱꦤ꧀ꦠꦺꦴ ‘‘ꦄꦪꦁ ꦆꦢꦁ ꦭꦺꦴꦏꦗꦺꦛ꧀ꦜꦏꦏꦩ꧀ꦩꦁ ꦮꦶꦤꦺꦠꦶ ꦮꦶꦤꦴꦱꦺꦠꦶ, ꦄꦡ ꦮꦴ ꦪꦱ꧀ꦩꦴ ꦌꦠꦁ ꦱꦴꦩꦷꦕꦶꦏꦩ꧀ꦩꦁ ꦤ ꦏꦫꦺꦴꦠꦶ, ꦠꦱ꧀ꦩꦴ ꦄꦪꦁ ꦮꦶꦤꦺꦠꦧ꧀ꦧꦺꦴ ꦤꦶꦒ꧀ꦒꦟ꧀ꦲꦶꦠꦧ꧀ꦧꦺꦴ’’ꦠꦶ ꦩꦚ꧀ꦚꦩꦴꦤꦺꦴ ꦨꦒꦮꦤ꧀ꦠꦁ ꦮꦺꦤꦪꦶꦏꦺꦴꦠꦶ ꦄꦴꦲ. ꦠꦠ꧀ꦫꦴꦪꦁ ꦥꦢꦠ꧀ꦡꦺꦴ – ꦮꦶꦤꦪꦠꦷꦠꦶ ꦮꦶꦤꦪꦺꦴ, ꦮꦶꦤꦴꦱꦺꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦮꦶꦤꦪꦺꦴ ꦌꦮ ꦮꦺꦤꦪꦶꦏꦺꦴ. ꦮꦶꦤꦪꦁ ꦮꦴ ꦄꦫꦲꦠꦷꦠꦶ ꦮꦺꦤꦪꦶꦏꦺꦴ, ꦤꦶꦒ꧀ꦒꦲꦁ ꦄꦫꦲꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦨꦒꦮꦴ ꦥꦤ ꦪꦱ꧀ꦩꦴ ꦫꦴꦒꦴꦢꦷꦤꦁ ꦮꦶꦤꦪꦴꦪ ꦮꦹꦥꦱꦩꦴꦪ ꦣꦩ꧀ꦩꦁ ꦢꦺꦱꦺꦠꦶ, ꦠꦱ꧀ꦩꦴ ꦮꦺꦤꦪꦶꦏꦺꦴ ꦲꦺꦴꦠꦶ. ꦄꦪꦩꦺꦮ ꦕꦺꦠ꧀ꦡ ꦥꦢꦠ꧀ꦡꦺꦴ – ꦮꦶꦤꦪꦴꦪ ꦣꦩ꧀ꦩꦁ ꦢꦺꦱꦺꦠꦷꦠꦶ ꦮꦺꦤꦪꦶꦏꦺꦴ. ꦮꦶꦕꦶꦠ꧀ꦫꦴ ꦲꦶ ꦠꦢ꧀ꦣꦶꦠꦮꦸꦠ꧀ꦠꦶ. ꦱ꧀ꦮꦴꦪꦁ ꦠꦁ ꦮꦺꦤꦪꦶꦏꦨꦴꦮꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦄꦥꦫꦁ ꦥꦫꦶꦪꦴꦪꦩꦤꦸꦗꦴꦤꦶ.

ꦥꦸꦤ ꦧ꧀ꦫꦴꦲ꧀ꦩꦟꦺꦴ ꦪꦱ꧀ꦩꦴ ꦄꦨꦶꦮꦴꦢꦤꦴꦢꦷꦤꦶ ꦱꦴꦩꦷꦕꦶꦏꦩ꧀ꦩꦴꦤꦶ ꦏꦫꦺꦴꦤ꧀ꦠꦴ ꦮꦪꦺꦴꦮꦸꦢ꧀ꦣꦺ ꦠꦺꦴꦱꦺꦤ꧀ꦠꦶ ꦲꦴꦱꦺꦤ꧀ꦠꦶ, ꦄꦏꦫꦺꦴꦤ꧀ꦠꦴ ꦥꦤ ꦠꦴꦥꦺꦤ꧀ꦠꦶ ꦮꦶꦲꦺꦱꦺꦤ꧀ꦠꦶ ꦢꦺꦴꦩꦤꦱ꧀ꦱꦁ ꦤꦺꦱꦁ ꦈꦥ꧀ꦥꦴꦢꦺꦤ꧀ꦠꦶ, ꦨꦒꦮꦴ ꦕ ꦠꦴꦤꦶ ꦤ ꦏꦫꦺꦴꦠꦶ, ꦠꦱ꧀ꦩꦴ ‘‘ꦄꦪꦁ ꦮꦪꦺꦴꦮꦸꦢ꧀ꦣꦺ ꦠꦥꦠꦷ’’ꦠꦶ ꦩꦚ꧀ꦚꦩꦴꦤꦺꦴ ꦱꦥ꧀ꦥꦸꦫꦶꦱꦴꦕꦴꦫꦮꦶꦫꦲꦶꦠꦠ꧀ꦠꦴ ꦮꦴ ‘‘ꦏꦥꦟꦥꦸꦫꦶꦱꦺꦴ ꦄꦪ’’ꦤ꧀ꦠꦶ ꦩꦚ꧀ꦚꦩꦴꦤꦺꦴ ꦨꦒꦮꦤ꧀ꦠꦁ ꦠꦥꦱ꧀ꦱꦷꦠꦶ ꦄꦴꦲ. ꦠꦠ꧀ꦫꦴꦪꦁ ꦥꦢꦠ꧀ꦡꦺꦴ – ꦠꦥꦠꦷꦠꦶ ꦠꦥꦺꦴ, ꦫꦺꦴꦱꦺꦠꦶ ꦮꦶꦲꦺꦱꦺꦠꦷꦠꦶ ꦄꦠ꧀ꦡꦺꦴ. ꦱꦴꦩꦷꦕꦶꦏꦩ꧀ꦩꦴꦏꦫꦟꦱ꧀ꦱꦺꦠꦁ ꦄꦣꦶꦮꦕꦤꦁ. ꦠꦥꦺꦴ ꦄꦱ꧀ꦱ ꦄꦠ꧀ꦡꦷꦠꦶ ꦠꦥꦱ꧀ꦱꦷ. ꦢꦸꦠꦶꦪꦺ ꦄꦠ꧀ꦡꦮꦶꦏꦥ꧀ꦥꦺ ꦧ꧀ꦪꦚ꧀ꦗꦤꦴꦤꦶ ꦄꦮꦶꦕꦴꦫꦺꦠ꧀ꦮꦴ ꦭꦺꦴꦏꦺ ꦏꦥꦟꦥꦸꦫꦶꦱꦺꦴ ꦠꦥꦱ꧀ꦱꦷꦠꦶ ꦮꦸꦕ꧀ꦕꦠꦶ. ꦨꦒꦮꦴ ꦥꦤ ꦪꦺ ꦄꦏꦸꦱꦭꦴ ꦣꦩ꧀ꦩꦴ ꦭꦺꦴꦏꦁ ꦠꦥꦤꦠꦺꦴ ꦠꦥꦤꦷꦪꦴꦤꦶ ꦮꦸꦕ꧀ꦕꦤ꧀ꦠꦶ, ꦠꦺꦱꦁ ꦥꦲꦷꦤꦠ꧀ꦠꦴ ꦪꦱ꧀ꦩꦴ ꦠꦥꦱ꧀ꦱꦷꦠꦶ ꦱꦔ꧀ꦑꦁ ꦒꦠꦺꦴ. ꦠꦱ꧀ꦩꦴ ꦠꦁ ꦠꦥꦱ꧀ꦱꦶꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦄꦥꦫꦁ ꦥꦫꦶꦪꦴꦪꦩꦤꦸꦗꦴꦤꦶ. ꦠꦠ꧀ꦫꦴꦪꦁ ꦮꦕꦤꦠ꧀ꦡꦺꦴ – ꦠꦥꦤ꧀ꦠꦷꦠꦶ ꦠꦥꦴ, ꦄꦏꦸꦱꦭꦣꦩ꧀ꦩꦴꦤꦩꦺꦠꦁ ꦄꦣꦶꦮꦕꦤꦁ. ꦠꦺ ꦠꦥꦺ ꦄꦱ꧀ꦱꦶ ꦤꦶꦫꦱ꧀ꦱꦶ ꦥꦲꦴꦱꦶ ꦮꦶꦢ꧀ꦣꦁꦱꦷꦠꦶ ꦠꦥꦱ꧀ꦱꦷ.

ꦥꦸꦤ ꦧ꧀ꦫꦴꦲ꧀ꦩꦟꦺꦴ ꦠꦁ ꦄꦨꦶꦮꦴꦢꦤꦴꦢꦶꦏꦩ꧀ꦩꦁ ꦢꦺꦮꦭꦺꦴꦏꦒꦧ꧀ꦨꦱꦩ꧀ꦥꦠ꧀ꦠꦶꦪꦴ ꦢꦺꦮꦭꦺꦴꦏꦥꦛꦶꦱꦤ꧀ꦣꦶꦥꦛꦶꦭꦴꦨꦴꦪ ꦱꦁꦮꦠ꧀ꦠꦠꦷꦠꦶ ꦩꦚ꧀ꦚꦩꦴꦤꦺꦴ ꦨꦒꦮꦠꦶ ꦕꦱ꧀ꦱ ꦄꦨꦴꦮꦁ ꦢꦶꦱ꧀ꦮꦴ ꦨꦒꦮꦤ꧀ꦠꦁ ꦄꦥꦒꦧ꧀ꦨꦺꦴꦠꦶ ꦄꦴꦲ. ꦏꦺꦴꦣꦮꦱꦺꦤ ꦮꦴ ꦨꦒꦮꦠꦺꦴ ꦩꦴꦠꦸꦏꦸꦕ꧀ꦖꦶꦱ꧀ꦩꦶꦁ ꦥꦛꦶꦱꦤ꧀ꦣꦶꦒ꧀ꦒꦲꦟꦺ ꦢꦺꦴꦱꦁ ꦢꦱ꧀ꦱꦺꦤ꧀ꦠꦺꦴꦥꦶ ꦌꦮꦩꦴꦲ. ꦠꦠ꧀ꦫꦴꦪꦁ ꦮꦕꦤꦠ꧀ꦡꦺꦴ – ꦒꦧ꧀ꦨꦠꦺꦴ ꦄꦥꦒꦠꦺꦴꦠꦶ ꦄꦥꦒꦧ꧀ꦨꦺꦴ, ꦄꦨꦧ꧀ꦧꦺꦴ ꦢꦺꦮꦭꦺꦴꦏꦹꦥꦥꦠ꧀ꦠꦶꦁ ꦥꦴꦥꦸꦟꦶꦠꦸꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦲꦷꦤꦺꦴ ꦮꦴ ꦒꦧ꧀ꦨꦺꦴ ꦄꦱ꧀ꦱꦴꦠꦶ ꦄꦥꦒꦧ꧀ꦨꦺꦴ. ꦢꦺꦮꦭꦺꦴꦏꦒꦧ꧀ꦨꦥꦫꦶꦧꦴꦲꦶꦫꦠ꧀ꦠꦴ ꦄꦴꦪꦠꦶꦁ ꦲꦷꦤꦒꦧ꧀ꦨꦥꦛꦶꦭꦴꦨꦨꦴꦒꦷꦠꦶ. ꦲꦷꦤꦺꦴ ꦮꦴꦱ꧀ꦱ ꦩꦴꦠꦸꦏꦸꦕ꧀ꦖꦶꦱ꧀ꦩꦶꦁ ꦒꦧ꧀ꦨꦮꦴꦱꦺꦴ ꦄꦲꦺꦴꦱꦷꦠꦶ ꦄꦣꦶꦥ꧀ꦥꦴꦪꦺꦴ. ꦨꦒꦮꦠꦺꦴ ꦥꦤ ꦪꦱ꧀ꦩꦴ ꦄꦴꦪꦠꦶꦁ ꦒꦧ꧀ꦨꦱꦺꦪ꧀ꦪꦴ ꦄꦥꦒꦠꦴ, ꦠꦱ꧀ꦩꦴ ꦱꦺꦴ ꦠꦁ ꦄꦥꦒꦧ꧀ꦨꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦄꦥꦫꦁ ꦥꦫꦶꦪꦴꦪꦩꦤꦸꦗꦴꦤꦶ. ꦠꦠ꧀ꦫ ꦕ ꦪꦱ꧀ꦱ ꦑꦺꦴ, ꦧ꧀ꦫꦴꦲ꧀ꦩꦟ, ꦄꦴꦪꦠꦶꦁ ꦒꦧ꧀ꦨꦱꦺꦪ꧀ꦪꦴ ꦥꦸꦤꦧ꧀ꦨꦮꦴꦨꦶꦤꦶꦧ꧀ꦧꦠ꧀ꦠꦶ ꦥꦲꦷꦤꦴꦠꦶ ꦌꦠꦺꦱꦁ ꦥꦢꦴꦤꦁ ꦌꦮꦩꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ – ‘‘ꦧ꧀ꦫꦴꦲ꧀ꦩꦟ, ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦤꦴꦒꦠꦺ ꦒꦧ꧀ꦨꦱꦺꦪ꧀ꦪꦴ ꦥꦸꦤꦧ꧀ꦨꦮꦺ ꦕ ꦄꦨꦶꦤꦶꦧ꧀ꦧꦠ꧀ꦠꦶ ꦄꦤꦸꦠ꧀ꦠꦫꦺꦤ ꦩꦒ꧀ꦒꦺꦤ ꦮꦶꦲꦠꦏꦴꦫꦟꦠ꧀ꦠꦴ ꦥꦲꦷꦤꦴ. ꦒꦧ꧀ꦨꦱꦺꦪ꧀ꦪꦴꦒꦲꦟꦺꦤ ꦕꦺꦠ꧀ꦡ ꦗꦭꦴꦧꦸꦗꦪꦺꦴꦤꦶ ꦒꦲꦶꦠꦴ, ꦥꦸꦤꦧ꧀ꦨꦮꦴꦨꦶꦤꦶꦧ꧀ꦧꦠ꧀ꦠꦶꦒ꧀ꦒꦲꦟꦺꦤ ꦆꦠꦫꦴ ꦠꦶꦱ꧀ꦱꦺꦴ’’ꦥꦶ.

ꦄꦥꦶꦕ ꦒꦧ꧀ꦨꦱ꧀ꦱ ꦱꦺꦪ꧀ꦪꦴ ꦒꦧ꧀ꦨꦱꦺꦪ꧀ꦪꦴ. ꦥꦸꦤꦧ꧀ꦨꦮꦺꦴ ꦌꦮ ꦄꦨꦶꦤꦶꦧ꧀ꦧꦠ꧀ꦠꦶ ꦥꦸꦤꦧ꧀ꦨꦮꦴꦨꦶꦤꦶꦧ꧀ꦧꦠ꧀ꦠꦷꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦪꦡꦴ ꦕ ꦮꦶꦚ꧀ꦚꦴꦟꦛ꧀ꦜꦶꦠꦷꦠꦶ ꦮꦸꦠ꧀ꦠꦺꦥꦶ ꦤ ꦮꦶꦚ꧀ꦚꦴꦟꦠꦺꦴ ꦄꦚ꧀ꦚꦴ ꦜꦶꦠꦶ ꦄꦠ꧀ꦡꦶ, ꦌꦮꦩꦶꦣꦴꦥꦶ ꦤ ꦒꦧ꧀ꦨꦠꦺꦴ ꦄꦚ꧀ꦚꦴ ꦱꦺꦪ꧀ꦪꦴ ꦮꦺꦢꦶꦠꦧ꧀ꦧꦴ. ꦄꦨꦶꦤꦶꦧ꧀ꦧꦠ꧀ꦠꦶ ꦕ ꦤꦴꦩ ꦪꦱ꧀ꦩꦴ ꦥꦸꦤꦧ꧀ꦨꦮꦨꦹꦠꦴꦥꦶ ꦄꦥꦸꦤꦧ꧀ꦨꦮꦨꦹꦠꦴꦥꦶ ꦄꦠ꧀ꦡꦶ, ꦆꦣ ꦕ ꦥꦸꦤꦧ꧀ꦨꦮꦨꦹꦠꦴ ꦄꦣꦶꦥ꧀ꦥꦺꦠꦴ, ꦠꦱ꧀ꦩꦴ ꦮꦸꦠ꧀ꦠꦁ – ‘‘ꦥꦸꦤꦧ꧀ꦨꦮꦺꦴ ꦌꦮ ꦄꦨꦶꦤꦶꦧ꧀ꦧꦠ꧀ꦠꦶ ꦥꦸꦤꦧ꧀ꦨꦮꦴꦨꦶꦤꦶꦧ꧀ꦧꦠ꧀ꦠꦷ’’ꦠꦶ.

ꦌꦮꦁ ꦄꦴꦒꦠꦏꦴꦭꦠꦺꦴ ꦥꦛ꧀ꦜꦴꦪ ꦄꦫꦱꦫꦹꦥꦠꦴꦢꦷꦲꦶ ꦄꦛ꧀ꦜꦲꦶ ꦄꦏ꧀ꦏꦺꦴꦱꦮꦠ꧀ꦡꦹꦲꦶ ꦄꦏ꧀ꦏꦺꦴꦱꦤ꧀ꦠꦩ꧀ꦥꦶ ꦧ꧀ꦫꦴꦲ꧀ꦩꦟꦁ ꦨꦒꦮꦴ ꦣꦩ꧀ꦩꦶꦱ꧀ꦱꦫꦺꦴ ꦣꦩ꧀ꦩꦫꦴꦗꦴ ꦣꦩ꧀ꦩꦱꦴꦩꦷ ꦠꦡꦴꦒꦠꦺꦴ ꦄꦤꦸꦏꦩ꧀ꦥꦴꦪ ꦱꦷꦠꦭꦺꦤꦺꦮ ꦕꦏ꧀ꦑꦸꦤꦴ ꦧ꧀ꦫꦴꦲ꧀ꦩꦟꦁ ꦎꦭꦺꦏꦺꦤ꧀ꦠꦺꦴ ꦪꦁ ꦣꦩ꧀ꦩꦣꦴꦠꦸꦁ ꦥꦛꦶꦮꦶꦗ꧀ꦙꦶꦠ꧀ꦮꦴ ꦢꦺꦱꦤꦴꦮꦶꦭꦴꦱꦥ꧀ꦥꦠ꧀ꦠꦴ ꦤꦴꦩ ꦲꦺꦴꦠꦶ, ꦠꦱ꧀ꦱꦴ ꦣꦩ꧀ꦩꦣꦴꦠꦸꦪꦴ ꦱꦸꦥ꧀ꦥꦛꦶꦮꦶꦢ꧀ꦣꦠ꧀ꦠꦴ ꦮꦶꦒꦠꦮꦭꦴꦲꦏꦺ ꦤꦨꦺ ꦥꦸꦟ꧀ꦟꦕꦤ꧀ꦢꦺꦴ ꦮꦶꦪ ꦕ ꦱꦫꦢꦏꦴꦭꦺ ꦱꦹꦫꦶꦪꦺꦴ ꦮꦶꦪ ꦕ ꦧ꧀ꦫꦴꦲ꧀ꦩꦟꦱ꧀ꦱ ꦲꦢꦪꦤ꧀ꦣꦏꦴꦫꦁ ꦮꦶꦣꦩꦺꦤ꧀ꦠꦺꦴ ꦠꦴꦤꦶꦪꦺꦮ ꦄꦏ꧀ꦏꦺꦴꦱꦮꦠ꧀ꦡꦹꦤꦶ ꦠꦺꦤ ꦠꦺꦤ ꦥꦫꦶꦪꦴꦪꦺꦤ ꦄꦚ꧀ꦚꦡꦴ ꦢꦱ꧀ꦱꦺꦠ꧀ꦮꦴ ꦥꦸꦤꦥꦶ ꦄꦠ꧀ꦠꦤꦺꦴ ꦏꦫꦸꦟꦴꦮꦶꦥ꧀ꦦꦴꦫꦁ ꦄꦛ꧀ꦜꦲꦶ ꦭꦺꦴꦏꦣꦩ꧀ꦩꦺꦲꦶ ꦄꦏꦩ꧀ꦥꦶꦪꦨꦴꦮꦺꦤ ꦥꦛꦶꦭꦢ꧀ꦣꦠꦴꦢꦶꦒꦸꦟꦭꦏ꧀ꦑꦟꦁ ꦥꦡꦮꦶꦱꦩꦕꦶꦠ꧀ꦠꦠꦁ ꦄꦏꦸꦥ꧀ꦥꦣꦩ꧀ꦩꦠꦚ꧀ꦕ ꦥꦏꦴꦱꦺꦤ꧀ꦠꦺꦴ ‘‘ꦄꦪꦁ ꦧ꧀ꦫꦴꦲ꧀ꦩꦟꦺꦴ ꦏꦺꦮꦭꦁ ꦥꦭꦶꦠꦱꦶꦫꦑꦟ꧀ꦝꦢꦤ꧀ꦠꦮꦭꦶꦠ꧀ꦠꦕꦠꦴꦢꦷꦲꦶ ꦄꦠ꧀ꦠꦤꦺꦴ ꦮꦸꦢ꧀ꦣꦨꦴꦮꦁ ꦱꦭ꧀ꦭꦏ꧀ꦑꦺꦠꦶ, ꦤꦺꦴ ꦕ ꦑꦺꦴ ꦗꦴꦤꦴꦠꦶ ꦄꦠ꧀ꦠꦴꦤꦁ ꦗꦴꦠꦶꦪꦴ ꦄꦤꦸꦒꦠꦁ ꦗꦫꦴꦪ ꦄꦤꦸꦱꦛꦁ ꦧ꧀ꦪꦴꦣꦶꦤꦺꦴ ꦄꦣꦶꦨꦹꦠꦁ ꦩꦫꦟꦺꦤ ꦄꦧ꧀ꦨꦴꦲꦠꦁ ꦄꦗ꧀ꦗ ꦩꦫꦶꦠ꧀ꦮꦴ ꦥꦸꦤ ꦱ꧀ꦮꦺꦮ ꦈꦠ꧀ꦠꦴꦤꦱꦺꦪ꧀ꦪꦢꦴꦫꦏꦨꦴꦮꦒꦩꦤꦷꦪꦁ. ꦩꦲꦤ꧀ꦠꦺꦤ ꦑꦺꦴ ꦥꦤ ꦈꦱ꧀ꦱꦴꦲꦺꦤ ꦩꦩ ꦱꦤ꧀ꦠꦶꦏꦁ ꦄꦴꦒꦠꦺꦴ, ꦠꦢꦱ꧀ꦱ ꦄꦴꦒꦩꦤꦁ ꦱꦴꦠ꧀ꦡꦏꦁ ꦲꦺꦴꦠꦹ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦆꦩꦱ꧀ꦩꦶꦁ ꦭꦺꦴꦏꦺ ꦄꦠ꧀ꦠꦤꦺꦴ ꦄꦥ꧀ꦥꦛꦶꦱꦩꦁ ꦥꦸꦫꦺꦗꦴꦠꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ꦱꦺꦪ꧀ꦪꦡꦴꦥꦶ, ꦧ꧀ꦫꦴꦲ꧀ꦩꦟꦴꦠꦶꦄꦴꦢꦶꦤꦴ ꦤꦪꦺꦤ ꦧ꧀ꦫꦴꦲ꧀ꦩꦟꦱ꧀ꦱ ꦣꦩ꧀ꦩꦢꦺꦱꦤꦁ ꦮꦝ꧀ꦞꦺꦱꦶ.

ꦠꦠ꧀ꦡ ꦱꦺꦪ꧀ꦪꦡꦴꦥꦷꦠꦶꦄꦴꦢꦷꦤꦁ ꦲꦺꦛ꧀ꦜꦴ ꦮꦸꦠꦤꦪꦺꦤꦺꦮ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦄꦪꦁ ꦥꦤ ꦮꦶꦱꦺꦱꦺꦴ – ꦲꦺꦛ꧀ꦜꦴ ꦮꦸꦠ꧀ꦠꦤꦪꦺꦤꦺꦮ ꦲꦶ ꦠꦺ ꦏꦸꦏ꧀ꦏꦸꦛꦥꦺꦴꦠꦏꦴ ꦥꦏ꧀ꦑꦺ ꦮꦶꦣꦸꦤꦤ꧀ꦠꦴ ꦠꦁꦑꦟꦴꦤꦸꦫꦹꦥꦁ ꦮꦶꦫꦮꦤ꧀ꦠꦴ ꦤꦶꦏ꧀ꦑꦩꦤ꧀ꦠꦶ. ꦌꦮꦁ ꦤꦶꦏ꧀ꦑꦩꦤ꧀ꦠꦴꦤꦚ꧀ꦕ ꦠꦺꦱꦁ ꦪꦺꦴ ꦥꦜꦩꦠꦫꦁ ꦤꦶꦏ꧀ꦑꦩꦠꦶ, ꦱꦺꦴ ꦗꦺꦛ꧀ꦜꦺꦴꦠꦶ ꦮꦸꦕ꧀ꦕꦠꦶ. ꦠꦱ꧀ꦩꦴ ꦨꦒꦮꦴ ꦠꦴꦪ ꦈꦥꦩꦴꦪ ꦄꦠ꧀ꦠꦤꦺꦴ ꦗꦺꦛ꧀ꦜꦨꦴꦮꦁ ꦱꦴꦣꦺꦠꦸꦏꦴꦩꦺꦴ ꦧ꧀ꦫꦴꦲ꧀ꦩꦟꦁ ꦥꦸꦕ꧀ꦖꦠꦶ – ꦪꦺꦴ ꦤꦸ ꦑꦺꦴ ꦠꦺꦱꦁ ꦏꦸꦏ꧀ꦏꦸꦛꦕ꧀ꦖꦴꦥꦺꦴꦠꦏꦴꦤꦁ…ꦥꦺ… ꦏꦶꦤ꧀ꦠꦶ ꦱ꧀ꦮꦴꦱ꧀ꦱ ꦮꦕꦤꦷꦪꦺꦴꦠꦶ. ꦠꦠ꧀ꦡ ꦏꦸꦏ꧀ꦏꦸꦛꦕ꧀ꦖꦴꦥꦏꦴꦤꦤ꧀ꦠꦶ ꦏꦸꦏ꧀ꦏꦸꦛꦥꦺꦴꦠꦏꦴꦤꦁ. ꦏꦶꦤ꧀ꦠꦶ ꦱ꧀ꦮꦴꦱ꧀ꦱ ꦮꦕꦤꦷꦪꦺꦴꦠꦶ ꦱꦺꦴ ꦏꦶꦤ꧀ꦠꦶ ꦮꦕꦤꦷꦪꦺꦴ ꦄꦱ꧀ꦱ, ꦏꦶꦁ ꦮꦠ꧀ꦠꦧ꧀ꦧꦺꦴ ꦨꦮꦺꦪ꧀ꦪ ꦗꦺꦛ꧀ꦜꦺꦴ ꦮꦴ ꦏꦤꦶꦛ꧀ꦜꦺꦴ ꦮꦴꦠꦶ.

‘‘ꦗꦺꦛ꧀ꦜꦺꦴ’’ꦠꦶꦱ꧀ꦱ, ꦨꦺꦴ ꦒꦺꦴꦠꦩ, ꦮꦕꦤꦷꦪꦺꦴꦠꦶ, ꦨꦺꦴ ꦒꦺꦴꦠꦩ, ꦱꦺꦴ ꦗꦺꦛ꧀ꦜꦺꦴ ꦆꦠꦶ ꦄꦱ꧀ꦱ ꦮꦕꦤꦷꦪꦺꦴ. ꦏꦱ꧀ꦩꦴꦠꦶ ꦕꦺ? ꦱꦺꦴ ꦲꦶ ꦤꦺꦱꦁ ꦗꦺꦛ꧀ꦜꦺꦴꦠꦶ, ꦪꦱ꧀ꦩꦴ ꦱꦺꦴ ꦤꦺꦱꦁ ꦮꦸꦢ꧀ꦣꦠꦫꦺꦴꦠꦶ ꦄꦠ꧀ꦡꦺꦴ. ꦄꦡꦱ꧀ꦱ ꦨꦒꦮꦴ ꦎꦥꦩ꧀ꦩꦁ ꦱꦩ꧀ꦥꦛꦶꦥꦴꦢꦺꦤ꧀ꦠꦺꦴ ꦌꦮꦩꦺꦮ ꦑꦺꦴꦠꦶ ꦄꦴꦲ, ꦪꦡꦴ ꦱꦺꦴ ꦏꦸꦏ꧀ꦏꦸꦛꦥꦺꦴꦠꦏꦺꦴ, ꦌꦮꦁ ꦄꦲꦩ꧀ꦥꦶ. ꦄꦮꦶꦗ꧀ꦗꦴꦒꦠꦴꦪ ꦥꦗꦴꦪꦴꦠꦶ ꦄꦮꦶꦗ꧀ꦗꦴ ꦮꦸꦕ꧀ꦕꦠꦶ ꦄꦚ꧀ꦚꦴꦟꦁ, ꦠꦠ꧀ꦡ ꦒꦠꦴꦪ. ꦥꦗꦴꦪꦴꦠꦶ ꦱꦠ꧀ꦠꦣꦶꦮꦕꦤꦩꦺꦠꦁ, ꦄꦮꦶꦗ꧀ꦗꦴꦏꦺꦴꦱꦱ꧀ꦱ ꦄꦤ꧀ꦠꦺꦴ ꦥꦮꦶꦛ꧀ꦜꦺꦱꦸ ꦱꦠ꧀ꦠꦺꦱꦹꦥꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦟ꧀ꦝꦨꦹꦠꦴꦪꦴꦠꦶ ꦄꦟ꧀ꦝꦺ ꦨꦹꦠꦴꦪ ꦥꦗꦴꦠꦴꦪ ꦱꦚ꧀ꦗꦴꦠꦴꦪ. ꦪꦡꦴ ꦲꦶ ꦄꦟ꧀ꦝꦺ ꦤꦶꦧ꧀ꦧꦠ꧀ꦠꦴ ꦌꦏꦕ꧀ꦕꦺ ꦱꦠ꧀ꦠꦴ ꦄꦟ꧀ꦝꦨꦹꦠꦴꦠꦶ ꦮꦸꦕ꧀ꦕꦤ꧀ꦠꦶ, ꦌꦮꦩꦪꦁ ꦱꦧ꧀ꦧꦴꦥꦶ ꦥꦗꦴ ꦄꦮꦶꦗ꧀ꦗꦟ꧀ꦝꦏꦺꦴꦱꦺ ꦤꦶꦧ꧀ꦧꦠ꧀ꦠꦠ꧀ꦠꦴ ꦄꦟ꧀ꦝꦨꦹꦠꦴꦠꦶ ꦮꦸꦕ꧀ꦕꦠꦶ. ꦥꦫꦶꦪꦺꦴꦤꦢ꧀ꦣꦴꦪꦴꦠꦶ ꦠꦺꦤ ꦄꦮꦶꦗ꧀ꦗꦟ꧀ꦝꦏꦺꦴꦱꦺꦤ ꦱꦩꦤ꧀ꦠꦠꦺꦴ ꦎꦤꦢ꧀ꦣꦴꦪ ꦧꦢ꧀ꦣꦴꦪ ꦮꦺꦜꦶꦠꦴꦪ. ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴꦠꦶ ꦠꦁ ꦄꦮꦶꦗ꧀ꦗꦴꦩꦪꦁ ꦄꦟ꧀ꦝꦏꦺꦴꦱꦁ ꦨꦶꦤ꧀ꦢꦶꦠ꧀ꦮꦴ. ꦌꦏꦺꦴꦮ ꦭꦺꦴꦏꦺꦠꦶ ꦱꦏꦭꦺꦥꦶ ꦭꦺꦴꦏꦱꦤ꧀ꦤꦶꦮꦴꦱꦺ ꦄꦲꦩꦺꦮ ꦌꦏꦺꦴ ꦄꦢꦸꦠꦶꦪꦺꦴ. ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴꦠꦶ ꦈꦠ꧀ꦠꦫꦫꦲꦶꦠꦁ ꦱꦧ꧀ꦧꦱꦺꦛ꧀ꦜꦁ ꦱꦩ꧀ꦩꦴ ꦱꦴꦩꦚ꧀ꦕ ꦧꦺꦴꦣꦶꦁ, ꦄꦡ ꦮꦴ ꦥꦱꦠ꧀ꦡꦁ ꦱꦸꦤ꧀ꦢꦫꦚ꧀ꦕ ꦧꦺꦴꦣꦶꦁ. ꦄꦫꦲꦠ꧀ꦠꦩꦒ꧀ꦒꦚꦴꦟꦱ꧀ꦱꦺꦠꦁ ꦤꦴꦩꦁ, ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦱ꧀ꦱꦴꦥꦶ ꦤꦴꦩꦩꦺꦮ. ꦈꦨꦪꦩ꧀ꦥꦶ ꦮꦛ꧀ꦛꦠꦶ. ꦄꦚ꧀ꦚꦺꦱꦁ ꦄꦫꦲꦠ꧀ꦠꦩꦒ꧀ꦒꦺꦴ ꦄꦤꦸꦠ꧀ꦠꦫꦴ ꦧꦺꦴꦣꦶ ꦲꦺꦴꦠꦶ, ꦤ ꦲꦺꦴꦠꦷꦠꦶ? ꦤ ꦲꦺꦴꦠꦶ. ꦏꦱ꧀ꦩꦴ? ꦄꦱꦧ꧀ꦧꦒꦸꦟꦢꦴꦪꦏꦠ꧀ꦠꦴ. ꦠꦺꦱꦚ꧀ꦲꦶ ꦏꦱ꧀ꦱꦕꦶ ꦄꦫꦲꦠ꧀ꦠꦩꦒ꧀ꦒꦺꦴ ꦄꦫꦲꦠ꧀ꦠꦦꦭꦩꦺꦮ ꦢꦺꦠꦶ, ꦏꦱ꧀ꦱꦕꦶ ꦠꦶꦱ꧀ꦱꦺꦴ ꦮꦶꦗ꧀ꦗꦴ, ꦏꦱ꧀ꦱꦕꦶ ꦖ ꦄꦨꦶꦚ꧀ꦚꦴ, ꦏꦱ꧀ꦱꦕꦶ ꦕꦠꦱ꧀ꦱꦺꦴ ꦥꦛꦶꦱꦩ꧀ꦨꦶꦢꦴ, ꦏꦱ꧀ꦱꦕꦶ ꦱꦴꦮꦏꦥꦴꦫꦩꦶꦚꦴꦟꦁ. ꦥꦕ꧀ꦕꦺꦏꦧꦸꦢ꧀ꦣꦴꦤꦩ꧀ꦥꦶ ꦥꦕ꧀ꦕꦺꦏꦧꦺꦴꦣꦶꦚꦴꦟꦩꦺꦮ ꦢꦺꦠꦶ, ꦧꦸꦢ꧀ꦣꦴꦤꦁ ꦥꦤ ꦱꦧ꧀ꦧꦒꦸꦟꦱꦩ꧀ꦥꦠ꧀ꦠꦶꦁ ꦢꦺꦠꦶ ꦄꦨꦶꦱꦺꦏꦺꦴ ꦮꦶꦪ ꦫꦚ꧀ꦚꦺꦴ ꦱꦧ꧀ꦧꦭꦺꦴꦏꦶꦱ꧀ꦱꦫꦨꦴꦮꦁ. ꦠꦱ꧀ꦩꦴ ꦄꦚ꧀ꦚꦱ꧀ꦱ ꦏꦱ꧀ꦱꦕꦶꦥꦶ ꦄꦤꦸꦠ꧀ꦠꦫꦴ ꦧꦺꦴꦣꦶ ꦤ ꦲꦺꦴꦠꦷꦠꦶ. ꦄꦨꦶꦱꦩ꧀ꦧꦸꦢ꧀ꦣꦺꦴꦠꦶ ꦄꦧ꧀ꦨꦚ꧀ꦚꦴꦱꦶꦁ ꦥꦛꦶꦮꦶꦗ꧀ꦙꦶꦁ, ꦥꦠ꧀ꦠꦺꦴꦩ꧀ꦲꦶ ꦄꦣꦶꦒꦠꦺꦴꦩ꧀ꦲꦷꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦆꦢꦴꦤꦶ ꦪꦢꦺꦠꦁ ꦨꦒꦮꦠꦴ ‘‘ꦌꦮꦩꦺꦮ ꦑꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦁ ꦎꦥꦩ꧀ꦩꦱꦩ꧀ꦥꦛꦶꦥꦴꦢꦤꦁ, ꦠꦁ ꦌꦮꦁ ꦄꦠ꧀ꦡꦺꦤ ꦱꦁꦱꦤ꧀ꦢꦶꦠ꧀ꦮꦴ ꦮꦺꦢꦶꦠꦧ꧀ꦧꦁ – ꦪꦡꦴ ꦲꦶ ꦠꦱ꧀ꦱꦴ ꦏꦸꦏ꧀ꦏꦸꦛꦶꦪꦴ ꦄꦠ꧀ꦠꦤꦺꦴ ꦄꦟ꧀ꦝꦺꦱꦸ ꦄꦣꦶꦱꦪꦤꦴꦢꦶꦠꦶꦮꦶꦣꦏꦶꦫꦶꦪꦴꦏꦫꦟꦁ, ꦌꦮꦁ ꦧꦺꦴꦣꦶꦥꦭ꧀ꦭꦔ꧀ꦏꦺ ꦤꦶꦱꦶꦤ꧀ꦤꦱ꧀ꦱ ꦧꦺꦴꦣꦶꦱꦠ꧀ꦠꦨꦹꦠꦱ꧀ꦱ ꦨꦒꦮꦠꦺꦴ ꦄꦠ꧀ꦠꦤꦺꦴ ꦱꦤ꧀ꦠꦴꦤꦺ ꦄꦤꦶꦕ꧀ꦕꦁ, ꦢꦸꦏ꧀ꦑꦁ, ꦄꦤꦠ꧀ꦠꦴꦠꦶ ꦠꦶꦮꦶꦣꦴꦤꦸꦥꦱ꧀ꦱꦤꦴꦏꦫꦟꦁ. ꦏꦸꦏ꧀ꦏꦸꦛꦶꦪꦴ ꦠꦶꦮꦶꦣꦏꦶꦫꦶꦪꦴꦱꦩ꧀ꦥꦴꦢꦤꦺꦤ ꦄꦟ꧀ꦝꦴꦤꦁ ꦄꦥꦹꦠꦶꦨꦴꦮꦺꦴ ꦮꦶꦪ ꦧꦺꦴꦣꦶꦱꦠ꧀ꦠꦨꦹꦠꦱ꧀ꦱ ꦨꦒꦮꦠꦺꦴ ꦠꦶꦮꦶꦣꦴꦤꦸꦥꦱ꧀ꦱꦤꦴꦱꦩ꧀ꦥꦴꦢꦤꦺꦤ ꦮꦶꦥꦱ꧀ꦱꦤꦴꦚꦴꦟꦱ꧀ꦱ ꦄꦥꦫꦶꦲꦴꦤꦶ. ꦏꦸꦏ꧀ꦏꦸꦛꦶꦪꦴ ꦠꦶꦮꦶꦣꦏꦶꦫꦶꦪꦴꦏꦫꦟꦺꦤ ꦄꦟ꧀ꦝꦴꦤꦁ ꦄꦭ꧀ꦭꦱꦶꦤꦺꦲꦥꦫꦶꦪꦴꦢꦴꦤꦁ ꦮꦶꦪ ꦧꦺꦴꦣꦶꦱꦠ꧀ꦠꦨꦹꦠꦱ꧀ꦱ ꦨꦒꦮꦠꦺꦴ ꦠꦶꦮꦶꦣꦴꦤꦸꦥꦱ꧀ꦱꦤꦴꦱꦩ꧀ꦥꦴꦢꦤꦺꦤ ꦨꦮꦠ꧀ꦠꦪꦴꦤꦸꦒꦠꦤꦶꦏꦤ꧀ꦠꦶꦱꦶꦤꦺꦲꦥꦫꦶꦪꦴꦢꦴꦤꦁ. ꦏꦸꦏ꧀ꦏꦸꦛꦶꦪꦴ ꦠꦶꦮꦶꦣꦏꦶꦫꦶꦪꦴꦏꦫꦟꦺꦤ ꦄꦟ꧀ꦝꦏꦥꦴꦭꦴꦤꦁ ꦠꦤꦸꦨꦴꦮꦺꦴ ꦮꦶꦪ ꦧꦺꦴꦣꦶꦱꦠ꧀ꦠꦨꦹꦠꦱ꧀ꦱ ꦨꦒꦮꦠꦺꦴ ꦠꦶꦮꦶꦣꦴꦤꦸꦥꦱ꧀ꦱꦤꦴꦱꦩ꧀ꦥꦴꦢꦤꦺꦤ ꦄꦮꦶꦗ꧀ꦗꦟ꧀ꦝꦏꦺꦴꦱꦱ꧀ꦱ ꦠꦤꦸꦨꦴꦮꦺꦴ, ꦏꦸꦏ꧀ꦏꦸꦛꦶꦪꦴ ꦠꦶꦮꦶꦣꦏꦶꦫꦶꦪꦴꦏꦫꦟꦺꦤ ꦏꦸꦏ꧀ꦏꦸꦛꦥꦺꦴꦠꦏꦱ꧀ꦱ ꦥꦴꦢꦤꦑꦠꦸꦟ꧀ꦝꦏꦴꦤꦁ ꦡꦢ꧀ꦣꦑꦫꦨꦴꦮꦺꦴ ꦮꦶꦪ ꦧꦺꦴꦣꦶꦱꦠ꧀ꦠꦨꦹꦠꦱ꧀ꦱ ꦨꦒꦮꦠꦺꦴ ꦠꦶꦮꦶꦣꦴꦤꦸꦥꦱ꧀ꦱꦤꦴꦱꦩ꧀ꦥꦴꦢꦤꦺꦤ ꦮꦶꦥꦱ꧀ꦱꦤꦴꦚꦴꦟꦱ꧀ꦱ ꦠꦶꦏ꧀ꦑꦑꦫꦮꦶꦥ꧀ꦥꦱꦤ꧀ꦤꦱꦹꦫꦨꦴꦮꦺꦴ. ꦏꦸꦏ꧀ꦏꦸꦛꦶꦪꦴ ꦠꦶꦮꦶꦣꦏꦶꦫꦶꦪꦴꦏꦫꦟꦺꦤ ꦏꦸꦏ꧀ꦏꦸꦛꦥꦺꦴꦠꦏꦱ꧀ꦱ ꦥꦫꦶꦟꦴꦩꦏꦴꦭꦺꦴ ꦮꦶꦪ ꦧꦺꦴꦣꦶꦱꦠ꧀ꦠꦨꦹꦠꦱ꧀ꦱ ꦨꦒꦮꦠꦺꦴ ꦠꦶꦮꦶꦣꦴꦤꦸꦥꦱ꧀ꦱꦤꦴꦱꦩ꧀ꦥꦴꦢꦤꦺꦤ ꦮꦶꦥꦱ꧀ꦱꦤꦴꦚꦴꦟꦱ꧀ꦱ ꦥꦫꦶꦟꦴꦩꦏꦴꦭꦺꦴ ꦮꦝ꧀ꦞꦶꦏꦴꦭꦺꦴ ꦒꦧ꧀ꦨꦒ꧀ꦒꦲꦟꦏꦴꦭꦺꦴ. ꦏꦸꦏ꧀ꦏꦸꦛꦶꦪꦴ ꦠꦶꦮꦶꦣꦏꦶꦫꦶꦪꦴꦏꦫꦟꦺꦤ ꦏꦸꦏ꧀ꦏꦸꦛꦥꦺꦴꦠꦏꦱ꧀ꦱ ꦥꦴꦢꦤꦑꦱꦶꦑꦴꦪ ꦮꦴ ꦩꦸꦑꦠꦸꦟ꧀ꦝꦏꦺꦤ ꦮꦴ ꦄꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦥꦏ꧀ꦑꦺ ꦥꦥ꧀ꦦꦺꦴꦛꦺꦠ꧀ꦮꦴ ꦱꦺꦴꦠ꧀ꦡꦶꦤꦴ ꦄꦨꦶꦤꦶꦧ꧀ꦨꦶꦢꦴꦏꦴꦭꦺꦴ ꦮꦶꦪ ꦨꦒꦮꦠꦺꦴ ꦠꦶꦮꦶꦣꦴꦤꦸꦥꦱ꧀ꦱꦤꦴꦱꦩ꧀ꦥꦴꦢꦤꦺꦤ ꦮꦶꦥꦱ꧀ꦱꦤꦴꦚꦴꦟꦒꦧ꧀ꦨꦁ ꦒꦟ꧀ꦲꦴꦥꦺꦠ꧀ꦮꦴ ꦄꦤꦸꦥꦸꦧ꧀ꦧꦴꦣꦶꦒꦠꦺꦤ ꦄꦫꦲꦠ꧀ꦠꦩꦒ꧀ꦒꦺꦤ ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦄꦨꦶꦚ꧀ꦚꦴꦥꦏ꧀ꦑꦺ ꦥꦥ꧀ꦦꦺꦴꦛꦺꦠ꧀ꦮꦴ ꦱꦺꦴꦠ꧀ꦡꦶꦤꦴ ꦱꦏꦭꦧꦸꦢ꧀ꦣꦒꦸꦟꦱꦕ꧀ꦖꦶꦏꦠꦏꦴꦭꦺꦴ ꦮꦺꦢꦶꦠꦧ꧀ꦧꦺꦴ.

ꦄꦲꦚ꧀ꦲꦶ, ꦧ꧀ꦫꦴꦲ꧀ꦩꦟ, ꦗꦺꦛ꧀ꦜꦺꦴ ꦱꦺꦛ꧀ꦜꦺꦴ ꦭꦺꦴꦏꦱ꧀ꦱꦴꦠꦶ, ꦧ꧀ꦫꦴꦲ꧀ꦩꦟ, ꦪꦡꦴ ꦠꦺꦱꦁ ꦏꦸꦏ꧀ꦏꦸꦛꦥꦺꦴꦠꦏꦴꦤꦁ ꦥꦜꦩꦠꦫꦁ ꦄꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦄꦨꦶꦤꦶꦧ꧀ꦧꦠ꧀ꦠꦺꦴ ꦏꦸꦏ꧀ꦏꦸꦛꦥꦺꦴꦠꦏꦺꦴ ꦗꦺꦛ꧀ꦜꦺꦴ ꦲꦺꦴꦠꦶ, ꦌꦮꦁ ꦄꦮꦶꦗ꧀ꦗꦴꦒꦠꦴꦪ ꦥꦗꦴꦪ ꦠꦁ ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦥꦜꦩꦠꦫꦁ ꦄꦫꦶꦪꦴꦪ ꦗꦴꦠꦶꦪꦴ ꦗꦴꦠꦠ꧀ꦠꦴ ꦄꦲꦚ꧀ꦲꦶ ꦗꦺꦛ꧀ꦜꦺꦴ ꦮꦸꦢ꧀ꦣꦠꦩꦺꦴꦠꦶ ꦱꦔ꧀ꦑꦁ ꦒꦠꦺꦴ, ꦱꦧ꧀ꦧꦒꦸꦟꦺꦲꦶ ꦥꦤ ꦄꦥ꧀ꦥꦛꦶꦱꦩꦠ꧀ꦠꦴ ꦱꦺꦛ꧀ꦜꦺꦴꦠꦶ.

ꦌꦮꦁ ꦨꦒꦮꦴ ꦄꦠ꧀ꦠꦤꦺꦴ ꦄꦤꦸꦠ꧀ꦠꦫꦁ ꦗꦺꦛ꧀ꦜꦱꦺꦛ꧀ꦜꦨꦴꦮꦁ ꦧ꧀ꦫꦴꦲ꧀ꦩꦟꦱ꧀ꦱ ꦥꦏꦴꦱꦺꦠ꧀ꦮꦴ ꦆꦢꦴꦤꦶ ꦪꦴꦪ ꦥꦛꦶꦥꦢꦴꦪ ꦠꦁ ꦄꦣꦶꦒꦠꦺꦴ, ꦠꦁ ꦥꦛꦶꦥꦢꦁ ꦥꦸꦧ꧀ꦧꦨꦴꦒꦠꦺꦴ ꦥꦨꦸꦠꦶ ꦢꦱ꧀ꦱꦺꦠꦸꦁ ꦄꦴꦫꦢ꧀ꦣꦁ ꦑꦺꦴ ꦥꦤ ꦩꦺ, ꦧ꧀ꦫꦴꦲ꧀ꦩꦟꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦴꦫꦢ꧀ꦣꦁ ꦑꦺꦴ ꦥꦤ ꦩꦺ, ꦧ꧀ꦫꦴꦲ꧀ꦩꦟ, ꦮꦷꦫꦶꦪꦁ ꦄꦲꦺꦴꦱꦷꦠꦶ, ꦧ꧀ꦫꦴꦲ꧀ꦩꦟ, ꦤ ꦩꦪꦴ ꦄꦪꦁ ꦄꦤꦸꦠ꧀ꦠꦫꦺꦴ ꦗꦺꦛ꧀ꦜꦱꦺꦛ꧀ꦜꦨꦴꦮꦺꦴ ꦏꦸꦱꦷꦠꦺꦤ ꦩꦸꦛ꧀ꦜꦱ꧀ꦱꦠꦶꦤꦴ ꦱꦴꦫꦢ꧀ꦣꦏꦴꦪꦺꦤ ꦮꦶꦏ꧀ꦑꦶꦠ꧀ꦠꦕꦶꦠꦺꦤ ꦄꦣꦶꦒꦠꦺꦴ, ꦄꦥꦶꦕ ꦑꦺꦴ ꦠꦢꦣꦶꦒꦩꦴꦪ ꦄꦴꦫꦢ꧀ꦣꦁ ꦑꦺꦴ ꦥꦤ ꦩꦺ ꦮꦷꦫꦶꦪꦁ ꦄꦲꦺꦴꦱꦶ. ꦧꦺꦴꦣꦶꦩꦟ꧀ꦝꦺ ꦤꦶꦱꦶꦤ꧀ꦤꦺꦤ ꦩꦪꦴ ꦕꦠꦸꦱꦩ꧀ꦩꦥ꧀ꦥꦣꦴꦤꦨꦺꦢꦁ ꦮꦷꦫꦶꦪꦁ ꦄꦴꦫꦢ꧀ꦣꦁ ꦄꦲꦺꦴꦱꦶ, ꦥꦒ꧀ꦒꦲꦶꦠꦁ ꦄꦱꦶꦡꦶꦭꦥ꧀ꦥꦮꦠ꧀ꦠꦶꦠꦁ. ꦄꦴꦫꦢ꧀ꦣꦠ꧀ꦠꦴꦪꦺꦮ ꦕ ꦩꦺ ꦠꦁ ꦄꦱꦭ꧀ꦭꦷꦤꦁ ꦄꦲꦺꦴꦱꦶ. ꦤ ꦏꦺꦮꦭꦚ꧀ꦕ ꦮꦷꦫꦶꦪꦩꦺꦮ, ꦱꦠꦶꦥꦶ ꦩꦺ ꦄꦴꦫꦩ꧀ꦩꦟꦴꦨꦶꦩꦸꦑꦨꦴꦮꦺꦤ ꦈꦥꦛ꧀ꦜꦶꦠꦴ ꦄꦲꦺꦴꦱꦶ, ꦈꦥꦛ꧀ꦜꦶꦠꦠ꧀ꦠꦴꦪꦺꦮ ꦕ ꦄꦱꦩ꧀ꦩꦸꦛ꧀ꦜꦴ. ꦥꦱ꧀ꦱꦢ꧀ꦣꦺꦴ ꦏꦴꦪꦺꦴ ꦄꦱꦴꦫꦢ꧀ꦣꦺꦴꦠꦶ ꦏꦴꦪꦕꦶꦠ꧀ꦠꦥ꧀ꦥꦱ꧀ꦱꦢ꧀ꦣꦶꦮꦱꦺꦤ ꦏꦴꦪꦺꦴꦥꦶ ꦩꦺ ꦥꦱ꧀ꦱꦢ꧀ꦣꦺꦴ ꦄꦲꦺꦴꦱꦶ. ꦠꦠ꧀ꦡ ꦪꦱ꧀ꦩꦴ ꦤꦴꦩꦏꦴꦪꦺ ꦥꦱ꧀ꦱꦢ꧀ꦣꦺ ꦫꦹꦥꦏꦴꦪꦺꦴꦥꦶ ꦥꦱ꧀ꦱꦢ꧀ꦣꦺꦴꦪꦺꦮ ꦲꦺꦴꦠꦶ, ꦠꦱ꧀ꦩꦴ ‘‘ꦤꦴꦩꦏꦴꦪꦺꦴ ꦫꦹꦥꦏꦴꦪꦺꦴ’’ꦠꦶ ꦄꦮꦶꦱꦺꦱꦺꦠ꧀ꦮꦴꦮ ‘‘ꦥꦱ꧀ꦱꦢ꧀ꦣꦺꦴ ꦏꦴꦪꦺꦴ’’ꦠꦶ ꦮꦸꦠ꧀ꦠꦁ. ꦄꦱꦴꦫꦢ꧀ꦣꦺꦴꦠꦶ ꦱꦺꦴ ꦕ ꦑꦺꦴ ꦥꦱ꧀ꦱꦢ꧀ꦣꦠ꧀ꦠꦴꦪꦺꦮ ꦄꦱꦴꦫꦢ꧀ꦣꦺꦴ, ꦮꦶꦒꦠꦢꦫꦡꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱꦩꦴꦲꦶꦠꦁ ꦕꦶꦠ꧀ꦠꦁ ꦌꦏꦒ꧀ꦒꦤ꧀ꦠꦶ ꦕꦶꦠ꧀ꦠꦩ꧀ꦥꦶ ꦩꦺ ꦱꦩ꧀ꦩꦴ ꦄꦴꦲꦶꦠꦁ ꦱꦸꦛ꧀ꦜꦸ ꦜꦥꦶꦠꦁ ꦄꦥ꧀ꦥꦶꦠꦁ ꦮꦶꦪ ꦄꦲꦺꦴꦱꦶ, ꦱꦩꦴꦲꦶꦠꦠ꧀ꦠꦴ ꦌꦮ ꦕ ꦌꦏꦒ꧀ꦒꦁ ꦄꦕꦭꦁ ꦤꦶꦥ꧀ꦦꦤ꧀ꦢꦤꦤ꧀ꦠꦶ. ꦌꦠ꧀ꦠꦴꦮꦠꦴ ꦙꦴꦤꦱ꧀ꦱ ꦥꦸꦧ꧀ꦧꦨꦴꦒꦥꦛꦶꦥꦢꦴ ꦏꦡꦶꦠꦴ ꦲꦺꦴꦠꦶ.

ꦆꦢꦴꦤꦶ ꦆꦩꦴꦪ ꦥꦛꦶꦥꦢꦴꦪ ꦄꦣꦶꦒꦠꦁ ꦥꦜꦩꦗ꧀ꦙꦴꦤꦁ ꦄꦴꦢꦶꦁ ꦏꦠ꧀ꦮꦴ ꦮꦶꦗ꧀ꦗꦴꦠ꧀ꦠꦪꦥꦫꦶꦪꦺꦴꦱꦴꦤꦁ ꦮꦶꦱꦺꦱꦁ ꦢꦱ꧀ꦱꦺꦤ꧀ꦠꦺꦴ ꦱꦺꦴ ꦑꦺꦴ ꦄꦲꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦪꦁ ꦪꦴꦮ ꦮꦶꦤꦶꦕ꧀ꦖꦪꦤꦪꦺꦤ ꦮꦠ꧀ꦠꦧ꧀ꦧꦁ ꦱꦶꦪꦴ, ꦠꦁ ꦮꦶꦱꦸꦢ꧀ꦣꦶꦩꦒ꧀ꦒꦺ (ꦮꦶꦱꦸꦢ꧀ꦣꦶ. ꧑.꧖꧙) ꦮꦸꦠ꧀ꦠꦩꦺꦮ.

ꦄꦪꦁ ꦑꦺꦴ ꦩꦺ, ꦧ꧀ꦫꦴꦲ꧀ꦩꦟꦴꦠꦶꦄꦴꦢꦷꦱꦸ ꦥꦤ ꦮꦶꦗ꧀ꦗꦴꦠꦶ ꦮꦶꦢꦶꦠꦏꦫꦟꦛ꧀ꦜꦺꦤ ꦮꦶꦗ꧀ꦗꦴ. ꦏꦶꦁ ꦮꦶꦢꦶꦠꦁ ꦏꦫꦺꦴꦠꦶ? ꦥꦸꦧ꧀ꦧꦺꦤꦶꦮꦴꦱꦁ. ꦄꦮꦶꦗ꧀ꦗꦴꦠꦶ ꦠꦱ꧀ꦱꦺꦮ ꦥꦸꦧ꧀ꦧꦺꦤꦶꦮꦴꦱꦱ꧀ꦱ ꦄꦮꦶꦢꦶꦠꦏꦫꦟꦛ꧀ꦜꦺꦤ ꦠꦥ꧀ꦥꦛꦶꦕ꧀ꦖꦴꦢꦏꦩꦺꦴꦲꦺꦴ. ꦠꦩꦺꦴꦠꦶ ꦱ꧀ꦮꦺꦮ ꦩꦺꦴꦲꦺꦴ ꦠꦥ꧀ꦥꦛꦶꦕ꧀ꦖꦴꦢꦏꦛ꧀ꦜꦺꦤ ꦠꦩꦺꦴ ꦤꦴꦩ. ꦄꦴꦭꦺꦴꦏꦺꦴꦠꦶ ꦱꦴ ꦌꦮ ꦮꦶꦗ꧀ꦗꦴ ꦎꦨꦴꦱꦏꦫꦟꦛ꧀ꦜꦺꦤ ꦄꦴꦭꦺꦴꦏꦺꦴꦠꦶ. ꦌꦠ꧀ꦡ ꦕ ꦮꦶꦗ꧀ꦗꦴ ꦄꦣꦶꦒꦠꦴꦠꦶ ꦄꦠ꧀ꦡꦺꦴ, ꦱꦺꦱꦁ ꦥꦱꦁꦱꦴꦮꦕꦤꦁ. ꦪꦺꦴꦗꦤꦴ ꦥꦤꦺꦠ꧀ꦡ – ꦄꦪꦁ ꦑꦺꦴ ꦩꦺ ꦮꦶꦗ꧀ꦗꦴ ꦄꦣꦶꦒꦠꦴ, ꦠꦱ꧀ꦱ ꦩꦺ ꦄꦣꦶꦒꦠꦮꦶꦗ꧀ꦗꦱ꧀ꦱ ꦄꦮꦶꦗ꧀ꦗꦴ ꦮꦶꦲꦠꦴ, ꦮꦶꦤꦛ꧀ꦜꦴꦠꦶ ꦄꦠ꧀ꦡꦺꦴ. ꦏꦱ꧀ꦩꦴ? ꦪꦱ꧀ꦩꦴ ꦮꦶꦗ꧀ꦗꦴ ꦈꦥ꧀ꦥꦤ꧀ꦤꦴ. ꦌꦱ ꦤꦪꦺꦴ ꦆꦠꦫꦱ꧀ꦩꦶꦩ꧀ꦥꦶ ꦥꦢꦢ꧀ꦮꦪꦺ. ꦪꦡꦴ ꦠꦤ꧀ꦠꦶ ꦌꦠ꧀ꦡ ꦠꦤ꧀ꦠꦶ ꦤꦶꦥꦴꦠꦩꦠ꧀ꦠꦁ. ꦱꦠꦶꦪꦴ ꦄꦮꦶꦥ꧀ꦥꦮꦴꦱꦺꦤ ꦄꦥ꧀ꦥꦩꦠ꧀ꦠꦱ꧀ꦱ ꦮꦷꦫꦶꦪꦴꦠꦴꦥꦺꦤ ꦄꦴꦠꦴꦥꦶꦤꦺꦴ ꦏꦴꦪꦺ ꦕ ꦗꦷꦮꦶꦠꦺ ꦕ ꦄꦤꦥꦺꦏ꧀ꦑꦴꦠꦴꦪ ꦥꦲꦶꦠꦠ꧀ꦠꦱ꧀ꦱ ꦥꦺꦱꦶꦠꦠ꧀ꦠꦱ꧀ꦱꦴꦠꦶ ꦄꦠ꧀ꦡꦺꦴ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦪꦡꦴ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ ꦄꦮꦶꦗ꧀ꦗꦴ ꦮꦶꦲꦚ꧀ꦚꦺꦪ꧀ꦪ, ꦮꦶꦗ꧀ꦗꦴ ꦈꦥ꧀ꦥꦗ꧀ꦗꦺꦪ꧀ꦪ ꦠꦩꦺꦴ ꦮꦶꦲꦚ꧀ꦚꦺꦪ꧀ꦪ, ꦄꦴꦭꦺꦴꦏꦺꦴ ꦈꦥ꧀ꦥꦗ꧀ꦗꦺꦪ꧀ꦪ, ꦌꦮꦩꦺꦮ ꦩꦩ ꦄꦮꦶꦗ꧀ꦗꦴ ꦮꦶꦲꦠꦴ, ꦮꦶꦗ꧀ꦗꦴ ꦈꦥ꧀ꦥꦤ꧀ꦤꦴ, ꦠꦩꦺꦴ ꦮꦶꦲꦠꦺꦴ, ꦄꦴꦭꦺꦴꦏꦺꦴ ꦈꦥ꧀ꦥꦤ꧀ꦤꦺꦴ. ꦌꦠꦱ꧀ꦱ ꦩꦺ ꦥꦣꦴꦤꦴꦤꦸꦪꦺꦴꦒꦱ꧀ꦱ ꦄꦤꦸꦫꦹꦥꦩꦺꦮ ꦦꦭꦁ ꦭꦢ꧀ꦣꦤ꧀ꦠꦶ.

ꦄꦪꦁ ꦑꦺꦴ ꦩꦺ, ꦧ꧀ꦫꦴꦲ꧀ꦩꦟ, ꦥꦜꦩꦴ ꦄꦨꦶꦤꦶꦧ꧀ꦨꦶꦢꦴ ꦄꦲꦺꦴꦱꦶ ꦏꦸꦏ꧀ꦏꦸꦛꦕ꧀ꦖꦴꦥꦏꦱ꧀ꦱꦺꦮ ꦄꦟ꧀ꦝꦏꦺꦴꦱꦩ꧀ꦲꦴꦠꦶ ꦄꦪꦁ ꦑꦺꦴ ꦩꦩ, ꦧ꧀ꦫꦴꦲ꧀ꦩꦟ, ꦥꦸꦧ꧀ꦧꦺꦤꦶꦮꦴꦱꦴꦤꦸꦱ꧀ꦱꦠꦶꦚꦴꦟꦩꦸꦑꦠꦸꦟ꧀ꦝꦏꦺꦤ ꦥꦸꦧ꧀ꦧꦺ ꦤꦶꦮꦸꦠ꧀ꦡꦑꦤ꧀ꦣꦥ꧀ꦥꦛꦶꦕ꧀ꦖꦴꦢꦏꦁ ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦥꦜꦩꦴ ꦄꦨꦶꦤꦶꦧ꧀ꦨꦶꦢꦴ ꦥꦜꦩꦴ ꦤꦶꦏ꧀ꦑꦤ꧀ꦠꦶ ꦥꦜꦩꦴ ꦄꦫꦶꦪꦴꦗꦴꦠꦶ ꦄꦲꦺꦴꦱꦶ ꦏꦸꦏ꧀ꦏꦸꦛꦕ꧀ꦖꦴꦥꦏꦱ꧀ꦱꦺꦮ ꦩꦸꦑꦠꦸꦟ꧀ꦝꦏꦺꦤ ꦮꦴ ꦥꦴꦢꦤꦑꦱꦶꦑꦴꦪ ꦮꦴ ꦄꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦠꦩ꧀ꦲꦴ ꦄꦟ꧀ꦝꦏꦺꦴꦱꦩ꧀ꦲꦴ ꦄꦨꦶꦤꦶꦧ꧀ꦨꦶꦢꦴ ꦤꦶꦏ꧀ꦑꦤ꧀ꦠꦶ ꦏꦸꦏ꧀ꦏꦸꦛꦤꦶꦏꦴꦪꦺ ꦥꦕ꧀ꦕꦴꦗꦴꦠꦷꦠꦶ. ꦄꦪꦁ ꦠꦴꦮ ꦥꦸꦧ꧀ꦧꦺꦤꦶꦮꦴꦱꦏꦡꦴꦪꦁ ꦤꦪꦺꦴ.

ꦕꦸꦠꦸꦥꦥꦴꦠꦏꦡꦴꦪ ꦥꦤ ꦮꦶꦗ꧀ꦗꦴꦠꦶ ꦢꦶꦧ꧀ꦧꦕꦏ꧀ꦑꦸꦚꦴꦟꦮꦶꦗ꧀ꦗꦴ. ꦄꦮꦶꦗ꧀ꦗꦴꦠꦶ ꦕꦸꦠꦸꦥꦥꦴꦠꦥ꧀ꦥꦛꦶꦕ꧀ꦖꦴꦢꦶꦏꦴ ꦄꦮꦶꦗ꧀ꦗꦴ. ꦪꦡꦴ ꦥꦤ ꦥꦸꦧ꧀ꦧꦺꦤꦶꦮꦴꦱꦏꦡꦴꦪꦁ ‘‘ꦥꦸꦧ꧀ꦧꦺꦤꦶꦮꦴꦱꦴꦤꦸꦱ꧀ꦱꦠꦶꦚꦴꦟꦩꦸꦑꦠꦸꦟ꧀ꦝꦏꦺꦤ ꦥꦸꦧ꧀ꦧꦺ ꦤꦶꦮꦸꦠ꧀ꦡꦏ꧀ꦑꦤ꧀ꦣꦥ꧀ꦥꦛꦶꦕ꧀ꦖꦴꦢꦏꦁ ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ’’ꦠꦶ ꦮꦸꦠ꧀ꦠꦁ, ꦌꦮꦩꦶꦣ ‘‘ꦕꦸꦠꦸꦥꦥꦴꦠꦚꦴꦟꦩꦸꦑꦠꦸꦟ꧀ꦝꦏꦺꦤ ꦕꦸꦠꦸꦥꦥꦴꦠꦥ꧀ꦥꦛꦶꦕ꧀ꦖꦴꦢꦏꦁ ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ’’ꦠꦶ ꦮꦠ꧀ꦠꦧ꧀ꦧꦁ.

ꦪꦁ ꦥꦤꦺꦠꦁ ꦥꦕ꧀ꦕꦮꦺꦏ꧀ꦑꦟꦚꦴꦟꦥꦫꦶꦒ꧀ꦒꦲꦶꦠꦁ ꦄꦴꦱꦮꦴꦤꦁ ꦑꦪꦚꦴꦟꦴꦣꦶꦒꦩꦁ ꦧ꧀ꦫꦴꦲ꧀ꦩꦟꦱ꧀ꦱ ꦢꦱ꧀ꦱꦺꦤ꧀ꦠꦺꦴ ꦄꦪꦁ ꦑꦺꦴ ꦩꦺ, ꦧ꧀ꦫꦴꦲ꧀ꦩꦟ, ꦠꦠꦶꦪꦴ ꦮꦶꦗ꧀ꦗꦴꦠꦶꦄꦴꦢꦶꦩꦴꦲ, ꦠꦠ꧀ꦡ ꦮꦶꦗ꧀ꦗꦴꦠꦶ ꦄꦫꦲꦠ꧀ꦠꦩꦒ꧀ꦒꦮꦶꦗ꧀ꦗꦴ. ꦄꦮꦶꦗ꧀ꦗꦴꦠꦶ ꦕꦠꦸꦱꦕ꧀ꦕꦥ꧀ꦥꦛꦶꦕ꧀ꦖꦴꦢꦶꦏꦴ ꦄꦮꦶꦗ꧀ꦗꦴ. ꦄꦪꦁ ꦑꦺꦴ ꦩꦺ, ꦧ꧀ꦫꦴꦲ꧀ꦩꦟ, ꦠꦠꦶꦪꦴ ꦄꦨꦶꦤꦶꦧ꧀ꦨꦶꦢꦴ ꦄꦲꦺꦴꦱꦷꦠꦶ ꦌꦠ꧀ꦡ ꦄꦪꦁ ꦑꦺꦴ ꦩꦩ, ꦧ꧀ꦫꦴꦲ꧀ꦩꦟ, ꦄꦴꦱꦮꦴꦤꦁ ꦑꦪꦚꦴꦟꦩꦸꦑꦠꦸꦟ꧀ꦝꦏꦺꦤ ꦕꦠꦸꦱꦕ꧀ꦕꦥꦛꦶꦕ꧀ꦖꦴꦢꦏꦁ ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦠꦠꦶꦪꦴ ꦄꦨꦶꦤꦶꦧ꧀ꦨꦶꦢꦴ ꦠꦠꦶꦪꦴ ꦤꦶꦏ꧀ꦑꦤ꧀ꦠꦶ ꦠꦠꦶꦪꦴ ꦄꦫꦶꦪꦗꦴꦠꦶ ꦄꦲꦺꦴꦱꦶ ꦏꦸꦏ꧀ꦏꦸꦛꦕ꧀ꦖꦴꦥꦏꦱ꧀ꦱꦺꦮ ꦩꦸꦑꦠꦸꦟ꧀ꦝꦏꦺꦤ ꦮꦴ ꦥꦴꦢꦤꦑꦱꦶꦑꦴꦪ ꦮꦴ ꦄꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦠꦩ꧀ꦲꦴ ꦄꦟ꧀ꦝꦏꦺꦴꦱꦩ꧀ꦲꦴ ꦄꦨꦶꦤꦶꦧ꧀ꦨꦶꦢꦴ ꦤꦶꦏ꧀ꦑꦤ꧀ꦠꦶ ꦏꦸꦏ꧀ꦏꦸꦛꦤꦶꦏꦴꦪꦺ ꦥꦕ꧀ꦕꦴꦗꦴꦠꦷꦠꦶ.

ꦌꦠ꧀ꦠꦴꦮꦠꦴ ꦏꦶꦁ ꦢꦱ꧀ꦱꦺꦱꦷꦠꦶ? ꦱꦺꦴ ꦲꦶ, ꦧ꧀ꦫꦴꦲ꧀ꦩꦟ, ꦏꦸꦏ꧀ꦏꦸꦛꦕ꧀ꦖꦴꦥꦏꦺꦴ ꦄꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦠꦠꦺꦴ ꦤꦶꦏ꧀ꦑꦩꦤ꧀ꦠꦺꦴ ꦱꦏꦶꦩꦺꦮ ꦗꦴꦪꦠꦶ, ꦄꦲꦁ ꦥꦤ ꦥꦸꦧ꧀ꦧꦺꦤꦶꦮꦸꦠ꧀ꦡꦏ꧀ꦑꦤ꧀ꦣꦥ꧀ꦥꦛꦶꦕ꧀ꦖꦴꦢꦏꦁ ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦨꦶꦤ꧀ꦢꦶꦠ꧀ꦮꦴ ꦥꦜꦩꦁ ꦠꦴꦮ ꦥꦸꦧ꧀ꦧꦺꦤꦶꦮꦴꦱꦴꦤꦸꦱ꧀ꦱꦠꦶꦚꦴꦟꦮꦶꦗ꧀ꦗꦴꦪ ꦗꦴꦠꦺꦴ. ꦠꦠꦺꦴ ꦱꦠ꧀ꦠꦴꦤꦁ ꦕꦸꦠꦶꦥꦛꦶꦱꦤ꧀ꦣꦶꦥ꧀ꦥꦛꦶꦕ꧀ꦖꦴꦢꦏꦁ ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦢꦸꦠꦶꦪꦁ ꦢꦶꦧ꧀ꦧꦕꦏ꧀ꦑꦸꦚꦴꦟꦮꦶꦗ꧀ꦗꦴꦪ ꦗꦴꦠꦺꦴ, ꦥꦸꦤ ꦕꦠꦸꦱꦕ꧀ꦕꦥ꧀ꦥꦛꦶꦕ꧀ꦖꦴꦢꦏꦁ ꦄꦮꦶꦗ꧀ꦗꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦠꦠꦶꦪꦁ ꦄꦴꦱꦮꦴꦤꦁ ꦑꦪꦚꦴꦟꦮꦶꦗ꧀ꦗꦴꦪ ꦗꦴꦠꦺꦴ. ꦌꦮꦁ ꦠꦷꦲꦶ ꦮꦶꦗ꧀ꦗꦴꦲꦶ ꦠꦶꦏ꧀ꦑꦠ꧀ꦠꦸꦁ ꦗꦴꦠꦺꦴꦩ꧀ꦲꦶ. ꦱꦴ ꦕ ꦩꦺ ꦗꦴꦠꦶ ꦄꦫꦶꦪꦴ ꦱꦸꦥꦫꦶꦱꦸꦢ꧀ꦣꦴꦠꦶ ꦆꦢꦁ ꦢꦱ꧀ꦱꦺꦠꦶ. ꦌꦮꦁꦢꦱ꧀ꦱꦺꦤ꧀ꦠꦺꦴ ꦕ ꦥꦸꦧ꧀ꦧꦺꦤꦶꦮꦴꦱꦚꦴꦟꦺꦤ ꦄꦠꦷꦠꦁꦱꦚꦴꦟꦁ, ꦢꦶꦧ꧀ꦧꦕꦏ꧀ꦑꦸꦤꦴ ꦥꦕ꧀ꦕꦸꦥ꧀ꦥꦤ꧀ꦤꦴꦤꦴꦒꦠꦁꦱꦚꦴꦟꦁ, ꦄꦴꦱꦮꦏ꧀ꦑꦪꦺꦤ ꦱꦏꦭꦭꦺꦴꦏꦶꦪꦭꦺꦴꦏꦸꦠ꧀ꦠꦫꦒꦸꦟꦤ꧀ꦠꦶ ꦌꦮꦁ ꦠꦷꦲꦶ ꦮꦶꦗ꧀ꦗꦴꦲꦶ ꦱꦧ꧀ꦧꦺꦥꦶ ꦱꦧ꧀ꦧꦚ꧀ꦚꦸꦒꦸꦟꦺ ꦥꦏꦴꦱꦺꦠ꧀ꦮꦴ ꦄꦠ꧀ꦠꦤꦺꦴ ꦄꦫꦶꦪꦴꦪ ꦗꦴꦠꦶꦪꦴ ꦗꦺꦛ꧀ꦜꦱꦺꦛ꧀ꦜꦨꦴꦮꦁ ꦧ꧀ꦫꦴꦲ꧀ꦩꦟꦱ꧀ꦱ ꦢꦱ꧀ꦱꦺꦱꦶ.

ꦌꦮꦁ ꦮꦸꦠ꧀ꦠꦺ ꦮꦺꦫꦚ꧀ꦗꦺꦴ ꦧ꧀ꦫꦴꦲ꧀ꦩꦟꦺꦴꦠꦶ ꦌꦮꦁ ꦨꦒꦮꦠꦴ ꦭꦺꦴꦏꦴꦤꦸꦏꦩ꧀ꦥꦏꦺꦤ ꦧ꧀ꦫꦴꦲ꧀ꦩꦟꦁ ꦄꦤꦸꦏꦩ꧀ꦥꦩꦴꦤꦺꦤ ꦤꦶꦒꦸꦲꦶꦠꦧ꧀ꦧꦺꦥꦶ ꦄꦠ꧀ꦠꦤꦺꦴ ꦄꦫꦶꦪꦴꦪ ꦗꦴꦠꦶꦪꦴ ꦗꦺꦛ꧀ꦜꦱꦺꦛ꧀ꦜꦨꦴꦮꦺ ꦮꦶꦗ꧀ꦗꦴꦠ꧀ꦠꦪꦥꦏꦴꦱꦶꦏꦴꦪ ꦣꦩ꧀ꦩꦢꦺꦱꦤꦴꦪ ꦮꦸꦠ꧀ꦠꦺ ꦥꦷꦠꦶꦮꦶꦥ꧀ꦦꦴꦫꦥꦫꦶꦥꦸꦟ꧀ꦟꦒꦠ꧀ꦠꦕꦶꦠ꧀ꦠꦺꦴ ꦮꦺꦫꦚ꧀ꦗꦺꦴ ꦧ꧀ꦫꦴꦲ꧀ꦩꦟꦺꦴ ꦠꦁ ꦨꦒꦮꦠꦺꦴ ꦄꦫꦶꦪꦴꦪ ꦗꦴꦠꦶꦪꦴ ꦗꦺꦛ꧀ꦜꦱꦺꦛ꧀ꦜꦨꦴꦮꦁ ꦮꦶꦢꦶꦠ꧀ꦮꦴ ‘‘ꦇꦢꦶꦱꦁ ꦤꦴꦩꦴꦲꦁ ꦱꦧ꧀ꦧꦭꦺꦴꦏꦗꦺꦛ꧀ꦜꦁ ꦱꦧ꧀ꦧꦒꦸꦟꦱꦩꦤ꧀ꦤꦴꦒꦠꦁ ꦱꦧ꧀ꦧꦚ꧀ꦚꦸꦁ ‘ꦄꦚ꧀ꦚꦺꦱꦁ ꦄꦨꦶꦮꦴꦢꦤꦴꦢꦶꦏꦩ꧀ꦩꦁ ꦤ ꦏꦫꦺꦴꦠꦷ’ꦠꦶ ꦄꦮꦕꦁ, ꦣꦶꦫꦠ꧀ꦡꦸ ꦮꦠ, ꦨꦺꦴ, ꦄꦚ꧀ꦚꦴꦟ’’ꦤ꧀ꦠꦶ ꦄꦠ꧀ꦠꦴꦤꦁ ꦒꦫꦲꦶꦠ꧀ꦮꦴ ‘‘ꦄꦪꦁ ꦢꦴꦤꦶ ꦭꦺꦴꦏꦺ ꦄꦫꦶꦪꦴꦪ ꦗꦴꦠꦶꦪꦴ ꦥꦸꦫꦺꦗꦴꦠꦛ꧀ꦜꦺꦤ ꦗꦺꦛ꧀ꦜꦺꦴ, ꦱꦧ꧀ꦧꦒꦸꦟꦺꦲꦶ ꦄꦥ꧀ꦥꦛꦶꦱꦩꦛ꧀ꦜꦺꦤ ꦱꦺꦛ꧀ꦜꦺꦴ’’ꦠꦶ ꦤꦶꦛ꧀ꦜꦁ ꦒꦤ꧀ꦠ꧀ꦮꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ꦗꦺꦛ꧀ꦜꦺꦴ ꦨꦮꦁ ꦒꦺꦴꦠꦩꦺꦴ ꦱꦺꦛ꧀ꦜꦺꦴ ꦨꦮꦁ ꦒꦺꦴꦠꦩꦺꦴꦠꦶ. ꦌꦮꦚ꧀ꦕ ꦥꦤ ꦮꦠ꧀ꦮꦴ ꦥꦸꦤ ꦠꦁ ꦨꦒꦮꦠꦺꦴ ꦣꦩ꧀ꦩꦢꦺꦱꦤꦁ ꦄꦧ꧀ꦨꦤꦸꦩꦺꦴꦢꦩꦴꦤꦺꦴ ꦄꦨꦶꦏ꧀ꦏꦤ꧀ꦠꦁ ꦨꦺꦴ ꦒꦺꦴꦠꦩꦴꦠꦶꦄꦴꦢꦶꦩꦴꦲ. ꦠꦁ ꦮꦸꦠ꧀ꦠꦠ꧀ꦡꦩꦺꦮꦴꦠꦶ.