(꧒꧐) ꧕. ꦧ꧀ꦫꦴꦲ꧀ꦩꦟꦮꦒ꧀ꦒꦺꦴ

꧑. ꦱꦺꦴꦟꦱꦸꦠ꧀ꦠꦮꦟ꧀ꦟꦤꦴ

꧑꧙꧑. ꦥꦚ꧀ꦕꦩꦱ꧀ꦱ ꦥꦜꦩꦺ ꦧ꧀ꦫꦴꦲ꧀ꦩꦟꦣꦩ꧀ꦩꦴꦠꦶ ꦧ꧀ꦫꦴꦲ꧀ꦩꦟꦱꦨꦴꦮꦴ. ꦱꦸꦤꦑꦺꦱꦹꦠꦶ ꦏꦸꦏ꧀ꦏꦸꦫꦺꦱꦸ. ꦤꦺꦮ ꦏꦶꦟꦤ꧀ꦠꦶ ꦤ ꦮꦶꦏ꧀ꦏꦶꦟꦤ꧀ꦠꦷꦠꦶ ꦤ ꦒꦟ꧀ꦲꦤ꧀ꦠꦴ ꦏꦶꦟꦤ꧀ꦠꦶ, ꦤ ꦢꦢꦤ꧀ꦠꦴ ꦮꦶꦏ꧀ꦏꦶꦟꦤ꧀ꦠꦶ. ꦱꦩ꧀ꦥꦶꦪꦺꦤꦺꦮ ꦱꦁꦮꦴꦱꦁ ꦱꦁꦧꦤ꧀ꦣꦴꦪ ꦱꦩ꧀ꦥꦮꦠ꧀ꦠꦺꦤ꧀ꦠꦷꦠꦶ ꦥꦶꦪꦺꦴ ꦥꦶꦪꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦮꦺꦟꦶꦪꦴ ꦧꦤ꧀ꦣꦤꦠ꧀ꦡꦁ ꦱꦁꦮꦴꦱꦁ ꦥꦮꦠ꧀ꦠꦪꦤ꧀ꦠꦶ. ꦈꦢꦫꦴꦮꦢꦺꦲꦏꦤ꧀ꦠꦶ ꦈꦢꦫꦁ ꦄꦮꦢꦶꦲꦶꦠ꧀ꦮꦴ ꦈꦥꦕꦶꦤꦶꦠ꧀ꦮꦴ ꦥꦹꦫꦺꦠ꧀ꦮꦴ. ꦄꦮꦱꦺꦱꦁ ꦄꦴꦢꦴꦪ ꦥꦏ꧀ꦏꦩꦤ꧀ꦠꦷꦠꦶ ꦪꦁ ꦨꦸꦚ꧀ꦗꦶꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ, ꦠꦁ ꦨꦟ꧀ꦝꦶꦏꦁ ꦏꦠ꧀ꦮꦴ ꦒꦲꦺꦠ꧀ꦮꦴ ꦒꦕ꧀ꦖꦤ꧀ꦠꦶ. ꦆꦩꦱ꧀ꦩꦶꦁ ꦱꦸꦠ꧀ꦠꦺ ꦮꦛ꧀ꦛꦩꦺꦮ ꦏꦡꦶꦠꦁ.

꧒. ꦢꦺꦴꦟꦧ꧀ꦫꦴꦲ꧀ꦩꦟꦱꦸꦠ꧀ꦠꦮꦟ꧀ꦟꦤꦴ

꧑꧙꧒. ꦢꦸꦠꦶꦪꦺ ꦠ꧀ꦮꦩ꧀ꦥꦶ ꦤꦺꦴꦠꦶ ꦠ꧀ꦮꦩ꧀ꦥꦶ ꦤꦸ. ꦥꦮꦠ꧀ꦠꦴꦫꦺꦴꦠꦶ ꦥꦮꦠ꧀ꦠꦪꦶꦠꦴꦫꦺꦴ. ꦪꦺꦱꦤ꧀ꦠꦶ ꦪꦺꦱꦁ ꦱꦤ꧀ꦠꦏꦁ. ꦩꦤ꧀ꦠꦥꦢꦤ꧀ꦠꦶ ꦮꦺꦢꦱꦔ꧀ꦑꦴꦠꦁ ꦩꦤ꧀ꦠꦩꦺꦮ. ꦒꦷꦠꦤ꧀ꦠꦶ ꦄꦛ꧀ꦜꦏꦴꦢꦷꦲꦶ ꦢꦱꦲꦶ ꦥꦺꦴꦫꦴꦟꦏꦧ꧀ꦫꦴꦲ꧀ꦩꦟꦺꦲꦶ ꦱꦫꦱꦩ꧀ꦥꦠ꧀ꦠꦶꦮꦱꦺꦤ ꦱꦗ꧀ꦙꦴꦪꦶꦠꦁ. ꦥꦮꦸꦠ꧀ꦠꦤ꧀ꦠꦶ ꦄꦚ꧀ꦚꦺꦱꦁ ꦮꦸꦠ꧀ꦠꦁ, ꦮꦴꦕꦶꦠꦤ꧀ꦠꦶ ꦄꦠ꧀ꦡꦺꦴ. ꦱꦩꦷꦲꦶꦠꦤ꧀ꦠꦶ ꦱꦩꦸꦥꦧ꧀ꦪꦹꦭ꦳꧀ꦲꦁ ꦫꦴꦱꦶꦏꦠꦁ, ꦥꦶꦟ꧀ꦝꦁ ꦏꦠ꧀ꦮꦴ ꦜꦥꦶꦠꦤ꧀ꦠꦶ ꦄꦠ꧀ꦡꦺꦴ. ꦠꦢꦤꦸꦒꦴꦪꦤ꧀ꦠꦷꦠꦶ ꦌꦠꦫꦲꦶ ꦧ꧀ꦫꦴꦲ꧀ꦩꦟꦴ ꦠꦁ ꦠꦺꦲꦶ ꦥꦸꦧ꧀ꦧꦺꦲꦶ ꦒꦷꦠꦁ ꦄꦤꦸꦒꦴꦪꦤ꧀ꦠꦶ ꦄꦤꦸꦱꦗ꧀ꦙꦴꦪꦤ꧀ꦠꦶ. ꦠꦢꦤꦸꦨꦴꦱꦤ꧀ꦠꦷꦠꦶ ꦠꦁ ꦄꦤꦸꦨꦴꦱꦤ꧀ꦠꦶ. ꦆꦢꦁ ꦥꦸꦫꦶꦩꦱ꧀ꦱꦺꦮ ꦮꦺꦮꦕꦤꦁ. ꦨꦴꦱꦶꦠꦩꦤꦸꦨꦴꦱꦤ꧀ꦠꦷꦠꦶ ꦠꦺꦲꦶ ꦨꦴꦱꦶꦠꦁ ꦄꦤꦸꦨꦴꦱꦤ꧀ꦠꦶ. ꦱꦗ꧀ꦙꦴꦪꦶꦠꦩꦤꦸꦱꦗ꧀ꦙꦴꦪꦤ꧀ꦠꦷꦠꦶ ꦠꦺꦲꦶ ꦱꦗ꧀ꦙꦴꦪꦶꦠꦁ ꦄꦤꦸꦱꦗ꧀ꦙꦴꦪꦤ꧀ꦠꦶ. ꦮꦴꦕꦶꦠꦩꦤꦸꦮꦴꦕꦺꦤ꧀ꦠꦷꦠꦶ ꦠꦺꦲꦶ ꦄꦚ꧀ꦚꦺꦱꦁ ꦮꦴꦕꦶꦠꦁ ꦄꦤꦸꦮꦴꦕꦺꦤ꧀ꦠꦶ. ꦱꦺꦪ꧀ꦪꦡꦶꦢꦤ꧀ꦠꦶ ꦠꦺ ꦏꦠꦩꦺꦠꦶ ꦄꦠ꧀ꦡꦺꦴ. ꦄꦛ꧀ꦜꦏꦺꦴꦠꦶꦄꦴꦢꦷꦤꦶ ꦠꦺꦱꦁ ꦤꦴꦩꦴꦤꦶ. ꦠꦺ ꦏꦶꦫ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦎꦭꦺꦴꦏꦺꦠ꧀ꦮꦴ ꦥꦫꦹꦥꦓꦴꦠꦁ ꦄꦏꦠ꧀ꦮꦴ ꦏꦱ꧀ꦱꦥꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦨꦒꦮꦠꦺꦴ ꦥꦴꦮꦕꦤꦺꦤ ꦱꦲ ꦱꦁꦱꦤ꧀ꦢꦺꦠ꧀ꦮꦴ ꦩꦤ꧀ꦠꦺ ꦒꦤ꧀ꦡꦺꦱꦸꦁ. ꦄꦥꦫꦴꦥꦫꦺ ꦥꦤ ꦧ꧀ꦫꦴꦲ꧀ꦩꦟꦴ ꦥꦴꦟꦴꦠꦶꦥꦴꦠꦴꦢꦷꦤꦶ ꦥꦏ꧀ꦑꦶꦥꦶꦠ꧀ꦮꦴ ꦠꦪꦺꦴ ꦮꦺꦢꦺ ꦨꦶꦤ꧀ꦢꦶꦠ꧀ꦮꦴ ꦧꦸꦢ꧀ꦣꦮꦕꦤꦺꦤ ꦱꦢ꧀ꦣꦶꦁ ꦮꦶꦫꦸꦢ꧀ꦣꦺ ꦄꦏꦁꦱꦸ. ꦠ꧀ꦪꦴꦱ꧀ꦱꦸ’ꦩꦺꦠꦶ ꦌꦠ꧀ꦡ ꦄꦱ꧀ꦱꦹꦠꦶ ꦤꦶꦥꦴꦠꦩꦠ꧀ꦠꦁ, ꦠꦺ ꦧ꧀ꦫꦴꦲ꧀ꦩꦟꦴ ꦆꦩꦺ ꦥꦚ꧀ꦕ ꦧ꧀ꦫꦴꦲ꧀ꦩꦟꦺ ꦥꦚ꧀ꦚꦴꦥꦺꦤ꧀ꦠꦷꦠꦶ ꦄꦠ꧀ꦡꦺꦴ.

ꦩꦤ꧀ꦠꦺ ꦄꦣꦷꦪꦩꦴꦤꦺꦴꦠꦶ ꦮꦺꦢꦺ ꦱꦗ꧀ꦙꦴꦪꦤ꧀ꦠꦺꦴ ꦒꦟ꧀ꦲꦤ꧀ꦠꦺꦴ. ꦄꦴꦕꦫꦶꦪꦣꦤꦤ꧀ꦠꦶ ꦄꦴꦕꦫꦶꦪꦢꦏ꧀ꦑꦶꦟꦁ ꦄꦴꦕꦫꦶꦪꦨꦴꦒꦁ. ꦤ ꦆꦱ꧀ꦱꦠ꧀ꦡꦺꦤꦴꦠꦶ ꦤ ꦪꦺꦴꦣꦴꦗꦷꦮꦏꦩ꧀ꦩꦺꦤ ꦈꦥ꧀ꦥꦴꦢꦺꦠꦶ. ꦤ ꦫꦴꦗꦥꦺꦴꦫꦶꦱꦺꦤꦴꦠꦶ ꦤ ꦫꦴꦗꦸꦥꦛ꧀ꦜꦴꦏꦨꦴꦮꦺꦤ. ꦏꦺꦮꦭꦁ ꦨꦶꦏ꧀ꦑꦴꦕꦫꦶꦪꦴꦪꦴꦠꦶ ꦱꦸꦢ꧀ꦣꦴꦪ ꦨꦶꦏ꧀ꦑꦴꦕꦫꦶꦪꦴꦪ ꦌꦮ. ꦏꦥꦴꦭꦁ ꦄꦤꦠꦶꦩꦚ꧀ꦚꦩꦴꦤꦺꦴꦠꦶ ꦠꦁ ꦨꦶꦏ꧀ꦑꦴꦨꦴꦗꦤꦁ ꦄꦤꦠꦶꦩꦚ꧀ꦚꦩꦴꦤꦺꦴ. ꦱꦺꦴ ꦲꦶ ꦥꦸꦟ꧀ꦟꦥꦠ꧀ꦠꦁ ꦄꦴꦢꦴꦪ ꦱꦷꦱꦁ ꦤ꧀ꦲꦴꦠꦺꦴ ꦏꦸꦭꦢ꧀ꦮꦴꦫꦺꦱꦸ ꦜꦠ꧀ꦮꦴ ‘‘ꦄꦲꦁ ꦄꦛ꧀ꦜꦕꦠ꧀ꦠꦴꦭꦷꦱ ꦮꦱ꧀ꦱꦴꦤꦶ ꦏꦺꦴꦩꦴꦫꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦁ, ꦩꦤ꧀ꦠꦴꦥꦶ ꦩꦺ ꦒꦲꦶꦠꦴ, ꦄꦴꦕꦫꦶꦪꦱ꧀ꦱ ꦄꦴꦕꦫꦶꦪꦣꦤꦁ ꦢꦱ꧀ꦱꦴꦩꦶ, ꦣꦤꦁ ꦩꦺ ꦢꦺꦡꦴ’’ꦠꦶ ꦪꦴꦕꦠꦶ. ꦠꦁ ꦱꦸꦠ꧀ꦮꦴ ꦩꦤꦸꦱ꧀ꦱꦴ ꦪꦡꦴꦱꦠ꧀ꦠꦶ ꦪꦡꦴꦧꦭꦁ ꦄꦛ꧀ꦜꦥꦶ ꦱꦺꦴꦭ꦳ꦱꦥꦶ ꦱꦠꦩ꧀ꦥꦶ ꦱꦲꦱ꧀ꦱꦩ꧀ꦥꦶ ꦢꦺꦤ꧀ꦠꦶ. ꦌꦮꦁ ꦱꦏꦭꦒꦴꦩꦁ ꦕꦫꦶꦠ꧀ꦮꦴ ꦭꦢ꧀ꦣꦣꦤꦁ ꦄꦴꦕꦫꦶꦪꦱ꧀ꦱ ꦤꦶꦪ꧀ꦪꦴꦢꦺꦠꦶ. ꦠꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ. ꦌꦮꦁ ꦑꦺꦴ ꦢꦺꦴꦟ ꦧ꧀ꦫꦴꦲ꧀ꦩꦟꦺꦴ ꦧ꧀ꦫꦲ꧀ꦩꦱꦩꦺꦴ ꦲꦺꦴꦠꦷꦠꦶ ꦌꦮꦁ ꦧ꧀ꦫꦲ꧀ꦩꦮꦶꦲꦴꦫꦺꦲꦶ ꦱꦩꦤ꧀ꦤꦴꦒꦠꦠ꧀ꦠꦴ ꦧ꧀ꦫꦴꦲ꧀ꦩꦟꦺꦴ ꦧ꧀ꦫꦲ꧀ꦩꦱꦩꦺꦴ ꦤꦴꦩ ꦲꦺꦴꦠꦶ.

ꦤꦺꦮ ꦏꦪꦺꦤ ꦤ ꦮꦶꦏ꧀ꦏꦪꦺꦤꦴꦠꦶ ꦤꦺꦮ ꦄꦠ꧀ꦠꦤꦴ ꦏꦪꦁ ꦏꦠ꧀ꦮꦴ ꦒꦟ꧀ꦲꦴꦠꦶ, ꦤ ꦥꦫꦺꦤ ꦮꦶꦏ꧀ꦏꦪꦁ ꦏꦠ꧀ꦮꦴ ꦢꦶꦤ꧀ꦤꦁ. ꦈꦢꦏꦹꦥꦱ꧀ꦱꦛ꧀ꦜꦤ꧀ꦠꦶ ꦈꦢꦏꦺꦤ ꦈꦥꦱ꧀ꦱꦛ꧀ꦜꦁ ꦥꦫꦶꦕ꧀ꦕꦠ꧀ꦠꦁ. ꦱꦺꦴ ꦲꦶ ꦪꦱ꧀ꦩꦶꦁ ꦏꦸꦭꦺ ꦮꦪꦥ꧀ꦥꦠ꧀ꦠꦴ ꦢꦴꦫꦶꦏꦴ ꦄꦠ꧀ꦡꦶ, ꦒꦤ꧀ꦠ꧀ꦮꦴ ꦠꦱ꧀ꦱ ꦢ꧀ꦮꦴꦫꦺ ꦠꦶꦛ꧀ꦜꦠꦶ. ‘‘ꦏꦱ꧀ꦩꦴ ꦜꦶꦠꦺꦴꦱꦷ’’ꦠꦶ ꦮꦸꦠ꧀ꦠꦺ ‘‘ꦄꦲꦁ ꦄꦛ꧀ꦜꦕꦠ꧀ꦠꦴꦭꦷꦱ ꦮꦱ꧀ꦱꦴꦤꦶ ꦏꦺꦴꦩꦴꦫꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦁ, ꦠꦁ ꦱꦧ꧀ꦧꦁ ꦠꦸꦩ꧀ꦲꦴꦏꦁ ꦢꦺꦩꦶ, ꦠꦸꦩ꧀ꦲꦺ ꦩꦪ꧀ꦲꦁ ꦢꦴꦫꦶꦏꦁ ꦢꦺꦡꦴ’’ꦠꦶ ꦮꦢꦠꦶ. ꦠꦺ ꦢꦴꦫꦶꦏꦁ ꦄꦴꦤꦺꦠ꧀ꦮꦴ ꦠꦱ꧀ꦱ ꦲꦠ꧀ꦡꦺ ꦈꦢꦏꦁ ꦥꦴꦠꦺꦠ꧀ꦮꦴ ꦢꦺꦤ꧀ꦠꦶ. ꦱꦺꦴ ꦠꦁ ꦈꦢꦏꦹꦥꦱ꧀ꦱꦛ꧀ꦜꦁ ꦨꦫꦶꦪꦁ ꦒꦟ꧀ꦲꦶꦠ꧀ꦮꦴ ꦒꦕ꧀ꦖꦠꦶ. ꦄꦠꦶꦩꦷꦭ꦳꧀ꦲꦗꦺꦴꦠꦶ ꦄꦠꦶꦩꦷꦭ꦳꧀ꦲꦺ ꦩꦲꦴꦒꦹꦡꦫꦴꦱꦶꦩ꧀ꦲꦶ ꦗꦴꦠꦺꦴ. ꦠꦱ꧀ꦱ ꦱꦴꦠꦶ ꦠꦱ꧀ꦱ ꦌꦱꦴ. ꦤ ꦢꦮꦠ꧀ꦡꦴꦠꦶ ꦤ ꦏꦷꦭ꦳ꦤꦠ꧀ꦡꦴ. ꦤ ꦫꦠꦠ꧀ꦡꦴꦠꦶ ꦤ ꦏꦴꦩꦫꦠꦶꦄꦠ꧀ꦡꦴ. ꦩꦺꦡꦸꦤꦁ ꦈꦥ꧀ꦥꦴꦢꦺꦠ꧀ꦮꦴꦠꦶ ꦣꦷꦠꦫꦁ ꦮꦴ ꦥꦸꦠ꧀ꦠꦁ ꦮꦴ ꦈꦥ꧀ꦥꦴꦢꦺꦠ꧀ꦮꦴ ‘‘ꦆꦢꦴꦤꦶ ꦥꦮꦺꦟꦶ ꦓꦛꦷꦪꦶꦱ꧀ꦱꦠꦷ’’ꦠꦶ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦠꦶ. ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦤ꧀ꦠꦶ ꦧ꧀ꦫꦲ꧀ꦩꦭꦺꦴꦏꦩꦺꦮ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ. ꦢꦺꦮꦱꦩꦺꦴ ꦲꦺꦴꦠꦷꦠꦶ ꦢꦶꦧ꧀ꦧꦮꦶꦲꦴꦫꦺꦲꦶ ꦱꦩꦤ꧀ꦤꦴꦒꦠꦠ꧀ꦠꦴ ꦢꦺꦮꦱꦩꦺꦴ ꦤꦴꦩ ꦲꦺꦴꦠꦶ.

ꦠꦩꦺꦮ ꦥꦸꦠ꧀ꦠꦱ꧀ꦱꦴꦢꦁ ꦤꦶꦏꦴꦩꦪꦩꦴꦤꦺꦴꦠꦶ ꦪ꧀ꦮꦴꦱ꧀ꦱ ꦣꦷꦠꦫꦁ ꦮꦴ ꦥꦸꦠ꧀ꦠꦁ ꦮꦴ ꦗꦴꦠꦁ ꦢꦶꦱ꧀ꦮꦴ ꦥꦸꦠ꧀ꦠꦥꦺꦩꦁ ꦥꦸꦠ꧀ꦠꦱ꧀ꦱꦴꦢꦺꦴ ꦈꦥ꧀ꦥꦗ꧀ꦗꦠꦶ, ꦠꦁ ꦥꦠ꧀ꦡꦪꦩꦴꦤꦺꦴ ꦆꦕ꧀ꦖꦩꦴꦤꦺꦴ. ꦏꦸꦛꦸꦩ꧀ꦧꦁ ꦄꦗ꧀ꦙꦴꦮꦱꦠꦷꦠꦶ ꦏꦸꦛꦸꦩ꧀ꦧꦁ ꦱꦟ꧀ꦜꦥꦺꦠ꧀ꦮꦴ ꦏꦸꦛꦸꦩ꧀ꦧꦩꦗ꧀ꦙꦺ ꦮꦱꦠꦶ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.

꧓. ꦱꦔ꧀ꦒꦴꦫꦮꦱꦸꦠ꧀ꦠꦮꦟ꧀ꦟꦤꦴ

꧑꧙꧓. ꦠꦠꦶꦪꦺ ꦥꦒꦺꦮꦴꦠꦶ ꦥꦜꦩꦚ꧀ꦚꦺꦮ. ꦏꦴꦩꦫꦴꦒꦥꦫꦶꦪꦸꦛ꧀ꦜꦶꦠꦺꦤꦴꦠꦶ ꦏꦴꦩꦫꦴꦒꦒ꧀ꦒꦲꦶꦠꦺꦤ. ꦏꦴꦩꦫꦴꦒꦥꦫꦺꦠꦺꦤꦴꦠꦶ ꦏꦴꦩꦫꦴꦒꦴꦤꦸꦒꦠꦺꦤ. ꦤꦶꦱ꧀ꦱꦫꦟꦤ꧀ꦠꦶ ꦠꦶꦮꦶꦣꦁ ꦏꦴꦩꦫꦴꦒꦱ꧀ꦱ ꦤꦶꦱ꧀ꦱꦫꦟꦁ ꦮꦶꦏ꧀ꦑꦩ꧀ꦨꦤꦤꦶꦱ꧀ꦱꦫꦟꦁ, ꦠꦢꦔ꧀ꦒꦤꦶꦱ꧀ꦱꦫꦟꦁ, ꦱꦩꦸꦕ꧀ꦖꦺꦢꦤꦶꦱ꧀ꦱꦫꦟꦤ꧀ꦠꦶ. ꦠꦠ꧀ꦡ ꦄꦱꦸꦨꦺ ꦥꦜꦩꦗ꧀ꦙꦴꦤꦁ ꦮꦶꦏ꧀ꦑꦩ꧀ꦨꦤꦤꦶꦱ꧀ꦱꦫꦟꦁ ꦤꦴꦩ, ꦮꦶꦥꦱ꧀ꦱꦤꦴ ꦠꦢꦔ꧀ꦒꦤꦶꦱ꧀ꦱꦫꦟꦁ ꦤꦴꦩ, ꦄꦫꦲꦠ꧀ꦠꦩꦒ꧀ꦒꦺꦴ ꦱꦩꦸꦕ꧀ꦖꦺꦢꦤꦶꦱ꧀ꦱꦫꦟꦁ ꦤꦴꦩ. ꦠꦁ ꦠꦶꦮꦶꦣꦩ꧀ꦥꦶ ꦤꦥ꧀ꦥꦗꦴꦤꦴꦠꦷꦠꦶ ꦄꦠ꧀ꦡꦺꦴ. ꦄꦠ꧀ꦠꦠ꧀ꦡꦩ꧀ꦥꦷꦠꦶꦄꦴꦢꦷꦱꦸ ꦄꦫꦲꦠ꧀ꦠꦱꦔ꧀ꦑꦴꦠꦺꦴ ꦄꦠ꧀ꦠꦤꦺꦴ ꦄꦠ꧀ꦡꦺꦴ ꦄꦠ꧀ꦠꦠ꧀ꦡꦺꦴ ꦤꦴꦩ, ꦥꦕ꧀ꦕꦪꦢꦴꦪꦏꦴꦤꦁ ꦄꦠ꧀ꦡꦺꦴ ꦥꦫꦠ꧀ꦡꦺꦴ ꦤꦴꦩ, ꦱ꧀ꦮꦺꦮ ꦢꦸꦮꦶꦣꦺꦴ ꦈꦨꦪꦠ꧀ꦡꦺꦴ ꦤꦴꦩ. ꦆꦩꦶꦤꦴ ꦤꦪꦺꦤ ꦱꦧ꧀ꦧꦮꦴꦫꦺꦱꦸ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦄꦪꦁ ꦥꦤ ꦮꦶꦱꦺꦱꦺꦴ – ꦧ꧀ꦪꦴꦥꦴꦢꦱ꧀ꦱ ꦤꦶꦱ꧀ꦱꦫꦟꦤ꧀ꦠꦶꦄꦴꦢꦷꦱꦸ ꦲꦶ ꦢ꧀ꦮꦺꦮ ꦤꦶꦱ꧀ꦱꦫꦟꦴꦤꦶ ꦮꦶꦏ꧀ꦑꦩ꧀ꦨꦤꦤꦶꦱ꧀ꦱꦫꦟꦚ꧀ꦕ ꦱꦩꦸꦕ꧀ꦖꦺꦢꦤꦶꦱ꧀ꦱꦫꦟꦚ꧀ꦕ. ꦠꦠ꧀ꦡ ꦧ꧀ꦪꦴꦥꦴꦢꦱ꧀ꦱ ꦠꦴꦮ ꦩꦺꦠ꧀ꦠꦴꦪ ꦥꦜꦩꦗ꧀ꦙꦴꦤꦁ ꦮꦶꦏ꧀ꦑꦩ꧀ꦨꦤꦤꦶꦱ꧀ꦱꦫꦟꦁ ꦤꦴꦩ, ꦄꦤꦴꦒꦴꦩꦶꦩꦒ꧀ꦒꦺꦴ ꦱꦩꦸꦕ꧀ꦖꦺꦢꦤꦶꦱ꧀ꦱꦫꦟꦁ, ꦡꦶꦤꦩꦶꦢ꧀ꦣꦱ꧀ꦱ ꦄꦴꦭꦺꦴꦏꦱꦚ꧀ꦚꦴ ꦮꦶꦏ꧀ꦑꦩ꧀ꦨꦤꦤꦶꦱ꧀ꦱꦫꦟꦁ, ꦄꦫꦲꦠ꧀ꦠꦩꦒ꧀ꦒꦺꦴ ꦱꦩꦸꦕ꧀ꦖꦺꦢꦤꦶꦱ꧀ꦱꦫꦟꦁ. ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦪꦺꦴ ꦏꦺꦴꦕꦶ ꦱꦩꦡꦺꦴ ꦮꦶꦏ꧀ꦑꦩ꧀ꦨꦤꦤꦶꦱ꧀ꦱꦫꦟꦁ, ꦈꦢ꧀ꦣꦕ꧀ꦕꦱ꧀ꦱ ꦥꦤꦺꦠ꧀ꦡ ꦄꦫꦲꦠ꧀ꦠꦩꦒ꧀ꦒꦺꦴ, ꦏꦸꦏ꧀ꦏꦸꦕ꧀ꦕꦱ꧀ꦱ ꦄꦤꦴꦒꦴꦩꦶꦩꦒ꧀ꦒꦺꦴ ꦱꦩꦸꦕ꧀ꦖꦺꦢꦤꦶꦱ꧀ꦱꦫꦟꦁ. ꦮꦶꦕꦶꦏꦶꦕ꧀ꦖꦴꦪ ꦣꦩ꧀ꦩꦮꦮꦠ꧀ꦡꦴꦤꦁ ꦮꦶꦏ꧀ꦑꦩ꧀ꦨꦤꦤꦶꦱ꧀ꦱꦫꦟꦁ, ꦥꦜꦩꦩꦒ꧀ꦒꦺꦴ ꦱꦩꦸꦕ꧀ꦖꦺꦢꦤꦶꦱ꧀ꦱꦫꦟꦁ.

ꦪꦴ ꦥꦤꦺꦠ꧀ꦡ ꦱꦺꦪ꧀ꦪꦡꦴꦥꦶ, ꦧ꧀ꦫꦴꦲ꧀ꦩꦟ, ꦈꦢꦥꦠ꧀ꦠꦺꦴ ꦱꦁꦱꦛ꧀ꦜꦺꦴ ꦭꦴꦑꦴꦪ ꦮꦴꦠꦶꦄꦴꦢꦶꦏꦴ ꦈꦥꦩꦴ ꦮꦸꦠ꧀ꦠꦴ, ꦠꦴꦱꦸ ꦈꦢꦥꦠ꧀ꦠꦺꦴꦠꦶ ꦈꦢꦏꦨꦫꦶꦠꦴ ꦥꦴꦠꦶ. ꦱꦁꦱꦛ꧀ꦜꦺꦴꦠꦶ ꦮꦟ꧀ꦟꦨꦺꦢꦏꦫꦟꦮꦱꦺꦤ ꦱꦁꦱꦛ꧀ꦜꦺꦴ. ꦈꦏ꧀ꦏꦸꦣꦶꦠꦺꦴꦠꦶ ꦏꦸꦣꦶꦠꦺꦴ. ꦈꦱ꧀ꦱꦢꦏꦗꦴꦠꦺꦴꦠꦶ ꦈꦱꦸꦩꦏꦗꦴꦠꦺꦴ. ꦱꦺꦮꦴꦭꦥꦟꦏꦥꦫꦶꦪꦺꦴꦤꦢ꧀ꦣꦺꦴꦠꦶ ꦠꦶꦭꦧꦷꦗꦏꦴꦢꦶꦨꦺꦢꦺꦤ ꦱꦺꦮꦴꦭꦺꦤ ꦮꦴ ꦤꦷꦭꦩꦟ꧀ꦝꦹꦏꦥꦶꦛ꧀ꦜꦶꦮꦟ꧀ꦟꦺꦤ ꦮꦴ ꦈꦢꦏꦥꦶꦛ꧀ꦜꦶꦁ ꦖꦴꦢꦺꦠ꧀ꦮꦴ ꦤꦶꦧ꧀ꦧꦠ꧀ꦠꦺꦤ ꦥꦟꦏꦺꦤ ꦥꦫꦶꦪꦺꦴꦤꦢ꧀ꦣꦺꦴ. ꦮꦴꦠꦺꦫꦶꦠꦺꦴꦠꦶ ꦮꦴꦠꦺꦤ ꦌꦫꦶꦠꦺꦴ ꦏꦩ꧀ꦥꦶꦠꦺꦴ. ꦄꦴꦮꦶꦭꦺꦴꦠꦶ ꦄꦥ꧀ꦥꦱꦤ꧀ꦤꦺꦴ. ꦭꦸꦭ꦳ꦶꦠꦺꦴꦠꦶ ꦄꦱꦤ꧀ꦤꦶꦱꦶꦤ꧀ꦤꦺꦴ. ꦏꦭꦭꦷꦨꦹꦠꦺꦴꦠꦶ ꦏꦢ꧀ꦢꦩꦷꦨꦹꦠꦺꦴ. ꦄꦤ꧀ꦣꦏꦴꦫꦺ ꦤꦶꦏ꧀ꦑꦶꦠ꧀ꦠꦺꦴꦠꦶ ꦏꦺꦴꦛ꧀ꦜꦏꦤ꧀ꦠꦫꦴꦢꦶꦨꦺꦢꦺ ꦄꦤꦴꦭꦺꦴꦏꦛ꧀ꦜꦴꦤꦺ ꦜꦥꦶꦠꦺꦴ. ꦆꦩꦱ꧀ꦩꦶꦁ ꦱꦸꦠ꧀ꦠꦺ ꦨꦒꦮꦴ ꦠꦷꦲꦶ ꦨꦮꦺꦲꦶ ꦢꦺꦱꦤꦁ ꦤꦶꦮꦛ꧀ꦛꦺꦠ꧀ꦮꦴ ꦄꦫꦲꦠ꧀ꦠꦤꦶꦏꦹꦛꦺꦤ ꦤꦶꦛ꧀ꦜꦥꦺꦱꦶ, ꦧ꧀ꦫꦴꦲ꧀ꦩꦟꦺꦴ ꦥꦤ ꦱꦫꦟꦩꦠ꧀ꦠꦺ ꦥꦠꦶꦛ꧀ꦜꦶꦠꦺꦴꦠꦶ.

꧔. ꦏꦴꦫꦟꦥꦴꦭꦷꦱꦸꦠ꧀ꦠꦮꦟ꧀ꦟꦤꦴ

꧑꧙꧔. ꦕꦠꦸꦠ꧀ꦡꦺ ꦏꦴꦫꦟꦥꦴꦭꦷꦠꦶ ꦥꦴꦭꦺꦴꦠꦶ ꦠꦱ꧀ꦱ ꦤꦴꦩꦁ, ꦫꦴꦗꦏꦸꦭꦴꦤꦁ ꦥꦤ ꦏꦩ꧀ꦩꦤ꧀ꦠꦺ ꦏꦴꦫꦺꦠꦷꦠꦶ ꦏꦴꦫꦟꦥꦴꦭꦷ ꦤꦴꦩ ꦗꦴꦠꦺꦴ. ꦏꦩ꧀ꦩꦤ꧀ꦠꦁ ꦏꦴꦫꦺꦠꦷꦠꦶ ꦥꦴꦠꦺꦴꦮ ꦈꦛ꧀ꦜꦴꦪ ꦢ꧀ꦮꦴꦫꦛ꧀ꦛꦴꦭꦏꦥꦴꦏꦴꦫꦺ ꦄꦏꦠꦺ ꦏꦴꦫꦺꦠꦶ, ꦗꦶꦟ꧀ꦟꦺ ꦥꦛꦶꦗꦒ꧀ꦒꦴꦥꦺꦠꦶ. ꦥꦶꦔ꧀ꦒꦶꦪꦴꦤꦶꦁ ꦧ꧀ꦫꦴꦲ꧀ꦩꦟꦤ꧀ꦠꦶ ꦌꦮꦁꦤꦴꦩꦏꦁ ꦄꦤꦴꦒꦴꦩꦶꦦꦭꦺ ꦥꦠꦶꦛ꧀ꦜꦶꦠꦁ ꦄꦫꦶꦪꦱꦴꦮꦏꦁ ꦧ꧀ꦫꦴꦲ꧀ꦩꦟꦁ. ꦱꦺꦴ ꦏꦶꦫ ꦥꦴꦠꦺꦴꦮ ꦈꦛ꧀ꦜꦴꦪ ꦒꦤ꧀ꦣꦩꦴꦭꦴꦢꦷꦤꦶ ꦒꦴꦲꦴꦥꦺꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦮꦤ꧀ꦢꦶꦠ꧀ꦮꦴ ꦒꦤ꧀ꦣꦩꦴꦭꦴꦢꦷꦲꦶ ꦥꦹꦗꦺꦠ꧀ꦮꦴ ꦤꦒꦫꦁ ꦄꦴꦒꦕ꧀ꦖꦠꦶ, ꦆꦢꦁ ꦧ꧀ꦫꦴꦲ꧀ꦩꦟꦱ꧀ꦱ ꦢꦺꦮꦱꦶꦏꦁ ꦮꦠ꧀ꦠꦤ꧀ꦠꦶ. ꦠꦁ ꦱꦺꦴ ꦌꦮꦁ ꦮꦠ꧀ꦠꦁ ꦏꦠ꧀ꦮꦴ ꦄꦴꦒꦕ꧀ꦖꦤ꧀ꦠꦁ ꦄꦢ꧀ꦢꦱ. ꦌꦠꦢꦮꦺꦴꦕꦴꦠꦶ ‘‘ꦄꦪꦁ ꦧ꧀ꦫꦴꦲ꧀ꦩꦟꦺꦴ ꦥꦚ꧀ꦚꦮꦴ ꦚꦴꦟꦸꦠ꧀ꦠꦫꦺꦴ, ꦏꦲꦁ ꦤꦸ ꦑꦺꦴ ꦥꦴꦠꦺꦴꦮ ꦒꦤ꧀ꦠ꧀ꦮꦴ ꦄꦴꦒꦕ꧀ꦖꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦄꦤꦸꦏ꧀ꦏꦩꦺꦤ ꦱꦤ꧀ꦠꦶꦏꦁ ꦄꦴꦒꦠꦁ ꦱꦚ꧀ꦗꦴꦤꦶꦠ꧀ꦮꦴ ‘‘ꦲꦤ꧀ꦢ ꦏꦸꦠꦺꦴ ꦤꦹ’’ꦠꦶꦄꦴꦢꦶꦮꦕꦤꦁ ꦄꦮꦺꦴꦕ.

ꦠꦠ꧀ꦡ ꦢꦶꦮꦴ ꦢꦶꦮꦱ꧀ꦱꦴꦠꦶ ꦢꦶꦮꦱꦱ꧀ꦱꦴꦥꦶ ꦢꦶꦮꦴ, ꦩꦗ꧀ꦙꦤ꧀ꦲꦶꦏꦏꦴꦭꦺꦠꦶ ꦄꦠ꧀ꦡꦺꦴ. ꦥꦟ꧀ꦝꦶꦠꦺꦴ ꦩꦚ꧀ꦚꦺꦠꦶ ꦨꦮꦁ ꦥꦶꦔ꧀ꦒꦶꦪꦴꦤꦷ ꦱꦩꦟꦁ ꦒꦺꦴꦠꦩꦁ ꦥꦟ꧀ꦝꦶꦠꦺꦴꦠꦶ ꦩꦚ꧀ꦚꦠꦶ, ꦈꦢꦴꦲꦸ ꦤꦺꦴꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴ. ꦏꦺꦴ ꦕꦴꦲꦁ, ꦨꦺꦴꦠꦶ, ꦨꦺꦴ, ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪꦗꦴꦤꦤꦺ ꦄꦲꦁ ꦏꦺꦴ ꦤꦴꦩ? ꦏꦺꦴ ꦕ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪꦁ ꦗꦴꦤꦶꦱ꧀ꦱꦴꦩꦷꦠꦶ ꦏꦸꦠꦺꦴ ꦕꦴꦲꦁ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪꦁ ꦗꦴꦤꦶꦱ꧀ꦱꦴꦩꦶ, ꦏꦺꦤ ꦤꦴꦩ ꦏꦴꦫꦟꦺꦤ ꦗꦴꦤꦶꦱ꧀ꦱꦴꦩꦷꦠꦶ ꦌꦮꦁ ꦱꦧ꧀ꦧꦡꦴꦥꦶ ꦄꦠ꧀ꦠꦤꦺꦴ ꦄꦗꦴꦤꦤꦨꦴꦮꦁ ꦢꦷꦥꦺꦠꦶ. ꦱꦺꦴꦥꦶ ꦤꦹꦤꦱ꧀ꦱ ꦠꦴꦢꦶꦱꦺꦴꦮꦴꦠꦶ ꦪꦺꦴ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪꦁ ꦗꦴꦤꦺꦪ꧀ꦪ, ꦱꦺꦴꦥꦶ ꦤꦹꦤ ꦢꦱ ꦥꦴꦫꦩꦶꦪꦺꦴ ꦥꦹꦫꦺꦠ꧀ꦮꦴ ꦱꦧ꧀ꦧꦚ꧀ꦚꦸꦠꦁ ꦥꦠ꧀ꦠꦺꦴ ꦠꦴꦢꦶꦱꦺꦴ ꦧꦸꦢ꧀ꦣꦺꦴꦪꦺꦮ ꦨꦮꦺꦪ꧀ꦪ. ꦱꦶꦤꦺꦫꦸꦁ ꦮꦴ ꦲꦶ ꦥꦡꦮꦶꦁ ꦮꦴ ꦄꦴꦏꦴꦱꦁ ꦮꦴ ꦥꦩꦺꦠꦸꦏꦴꦩꦺꦤ ꦠꦥ꧀ꦥꦩꦴꦟꦺꦴ ꦢꦟ꧀ꦝꦺꦴ ꦮꦴ ꦫꦗ꧀ꦗꦸ ꦮꦴ ꦭꦢ꧀ꦣꦸꦁ ꦮꦛ꧀ꦛꦠꦶ, ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦥꦚ꧀ꦚꦁ ꦗꦴꦤꦤ꧀ꦠꦺꦤꦥꦶ ꦠꦱ꧀ꦱ ꦚꦴꦟꦱꦢꦶꦱꦩꦺꦮ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦭꦢ꧀ꦣꦸꦁ ꦮꦛ꧀ꦛꦠꦷꦠꦶ ꦢꦷꦥꦺꦠꦶ. ꦄꦴꦢꦫꦮꦱꦺꦤ ꦥꦤꦺꦠ꧀ꦡ ꦄꦴꦩꦺꦝꦶꦠꦁ ꦏꦠꦁ. ꦈꦭ꦳ꦴꦫꦴꦪꦴꦠꦶ ꦈꦠ꧀ꦠꦩꦴꦪ ꦱꦺꦛ꧀ꦜꦴꦪ. ꦏꦺꦴ ꦕꦴꦲꦁ, ꦨꦺꦴꦠꦶ, ꦨꦺꦴ, ꦄꦲꦁ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦥꦱꦁꦱꦤꦺ ꦏꦺꦴ ꦤꦴꦩ. ꦏꦺꦴ ꦕ ꦱꦩꦟꦁ ꦒꦺꦴꦠꦩꦁ ꦥꦱꦁꦱꦶꦱ꧀ꦱꦴꦩꦷꦠꦶ ꦏꦺꦤ ꦏꦴꦫꦟꦺꦤ ꦥꦱꦁꦱꦶꦱ꧀ꦱꦴꦩꦶ.

ꦥꦱꦠ꧀ꦡꦥ꧀ꦥꦱꦠ꧀ꦡꦺꦴꦠꦶ ꦱꦧ꧀ꦧꦒꦸꦟꦴꦤꦁ ꦈꦥꦫꦶ ꦕꦫꦺꦲꦶ ꦱꦧ꧀ꦧꦭꦺꦴꦏꦥꦱꦠ꧀ꦡꦺꦲꦶ ꦄꦠ꧀ꦠꦤꦺꦴ ꦒꦸꦟꦺꦲꦺꦮ ꦥꦱꦠ꧀ꦡꦺꦴ, ꦤ ꦠꦱ꧀ꦱ ꦄꦚ꧀ꦚꦺꦲꦶ ꦥꦱꦁꦱꦤꦏꦶꦕ꧀ꦕꦁ ꦄꦠ꧀ꦡꦶ. ꦪꦡꦴ ꦲꦶ ꦕꦩ꧀ꦥꦏꦥꦸꦥ꧀ꦦꦁ ꦮꦴ ꦤꦷꦭꦸꦥ꧀ꦥꦭꦁ ꦮꦴ ꦥꦢꦸꦩꦁ ꦮꦴ ꦭꦺꦴꦲꦶꦠꦕꦤ꧀ꦢꦤꦁ ꦮꦴ ꦄꦠ꧀ꦠꦤꦺꦴ ꦮꦟ꧀ꦟꦒꦤ꧀ꦣꦱꦶꦫꦶꦪꦴꦮ ꦥꦴꦱꦴꦢꦶꦏꦚ꧀ꦕꦺꦮ ꦱꦸꦒꦤ꧀ꦣꦚ꧀ꦕ, ꦤ ꦠꦱ꧀ꦱ ꦄꦴꦒꦤ꧀ꦠꦸꦏꦺꦲꦶ ꦮꦟ꧀ꦟꦒꦤ꧀ꦣꦺꦲꦶ ꦡꦺꦴꦩꦤꦏꦶꦕ꧀ꦕꦁ ꦄꦠ꧀ꦡꦶ. ꦪꦡꦴ ꦕ ꦩꦟꦶꦫꦠꦤꦁ ꦮꦴ ꦕꦤ꧀ꦢꦩꦟ꧀ꦝꦭꦁ ꦮꦴ ꦄꦠ꧀ꦠꦤꦺꦴ ꦄꦴꦭꦺꦴꦏꦺꦤꦺꦮ ꦎꦨꦴꦱꦠꦶ, ꦤ ꦠꦱ꧀ꦱ ꦄꦚ꧀ꦚꦺꦤ ꦎꦨꦴꦱꦤꦏꦶꦕ꧀ꦕꦁ ꦄꦠ꧀ꦡꦶ, ꦌꦮꦁ ꦱꦩꦟꦺꦴ ꦒꦺꦴꦠꦩꦺꦴ ꦱꦧ꧀ꦧꦭꦺꦴꦏꦥꦱꦠ꧀ꦡꦺꦲꦶ ꦄꦠ꧀ꦠꦤꦺꦴ ꦒꦸꦟꦺꦲꦺꦮ ꦥꦱꦠ꧀ꦡꦺꦴ ꦡꦺꦴꦩꦶꦠꦺꦴ, ꦱꦧ꧀ꦧꦭꦺꦴꦏꦱ꧀ꦱ ꦱꦺꦛ꧀ꦜꦠꦁ ꦥꦴꦥꦶꦠꦺꦴ. ꦤ ꦠꦱ꧀ꦱ ꦄꦚ꧀ꦚꦺꦤ ꦥꦱꦁꦱꦤꦏꦶꦕ꧀ꦕꦁ ꦄꦠ꧀ꦡꦶ.

ꦥꦱꦠ꧀ꦡꦺꦲꦶ ꦮꦴ ꦥꦱꦠ꧀ꦡꦺꦴꦠꦶꦥꦶ ꦥꦱꦠ꧀ꦡꦥ꧀ꦥꦱꦠ꧀ꦡꦺꦴ. ꦏꦺ ꦥꦤ ꦥꦱꦠ꧀ꦡꦴ ꦤꦴꦩ? ꦫꦴꦗꦴ ꦥꦱꦺꦤꦢꦶ ꦏꦺꦴꦱꦭꦺꦴ ꦏꦴꦱꦶꦏꦺꦴꦱꦭꦮꦴꦱꦶꦏꦺꦲꦶ ꦥꦱꦠ꧀ꦡꦺꦴ, ꦧꦶꦩ꧀ꦧꦶꦱꦴꦫꦺꦴ ꦄꦔ꧀ꦒꦩꦒꦣꦮꦴꦱꦷꦲꦶ, ꦮꦺꦱꦴꦭꦶꦏꦴ ꦭꦶꦕ꧀ꦖꦮꦷ ꦮꦗ꧀ꦗꦶꦠꦛ꧀ꦜꦮꦴꦱꦷꦲꦶ ꦥꦱꦠ꧀ꦡꦴ, ꦥꦴꦮꦺꦪ꧀ꦪꦏꦴ ꦩꦭ꧀ꦭꦴ ꦏꦺꦴꦱꦶꦤꦴꦫꦏꦴ ꦩꦭ꧀ꦭꦴ ꦄꦚ꧀ꦚꦺꦥꦶ ꦠꦺ ꦠꦺ ꦑꦠ꧀ꦠꦶꦪꦴ ꦠꦺꦲꦶ ꦠꦺꦲꦶ ꦗꦴꦤꦥꦢꦺꦲꦶ ꦥꦱꦠ꧀ꦡꦴ, ꦕꦔ꧀ꦏꦶꦄꦴꦢꦪꦺꦴ ꦧ꧀ꦫꦴꦲ꧀ꦩꦟꦴ ꦧ꧀ꦫꦴꦲ꧀ꦩꦟꦒꦟꦺꦲꦶ, ꦄꦤꦴꦡꦥꦶꦟ꧀ꦝꦶꦏꦴꦢꦪꦺꦴ ꦈꦥꦴꦱꦏꦴ ꦈꦥꦴꦱꦏꦒꦟꦺꦲꦶ, ꦮꦶꦱꦴꦑꦴꦄꦴꦢꦶꦏꦴ ꦈꦥꦴꦱꦶꦏꦴ ꦄꦤꦺꦏꦱꦠꦴꦲꦶ ꦈꦥꦴꦱꦶꦏꦴꦲꦶ, ꦱꦏꦸꦭꦸꦢꦴꦪꦶꦄꦴꦢꦪꦺꦴ ꦥꦫꦶꦧ꧀ꦧꦴꦗꦏꦴ ꦄꦤꦺꦏꦺꦲꦶ ꦥꦫꦶꦧ꧀ꦧꦴꦗꦏꦱꦠꦺꦲꦶ, ꦈꦥ꧀ꦥꦭꦮꦟ꧀ꦟꦠ꧀ꦡꦺꦫꦶꦄꦴꦢꦶꦏꦴ ꦩꦲꦴꦱꦴꦮꦶꦏꦴ ꦄꦤꦺꦏꦺꦲꦶ ꦨꦶꦏ꧀ꦑꦸꦤꦶꦱꦠꦺꦲꦶ, ꦱꦴꦫꦶꦥꦸꦠ꧀ꦠꦠ꧀ꦡꦺꦫꦴꦢꦪꦺꦴ ꦩꦲꦴꦡꦺꦫꦴ ꦄꦤꦺꦏꦱꦠꦺꦲꦶ ꦨꦶꦏ꧀ꦑꦹꦲꦶ, ꦱꦏ꧀ꦏꦴꦢꦪꦺꦴ ꦢꦺꦮꦴ ꦄꦤꦺꦏꦱꦲꦱ꧀ꦱꦺꦲꦶ ꦢꦺꦮꦺꦲꦶ, ꦩꦲꦴꦧ꧀ꦫꦲ꧀ꦩꦴꦢꦪꦺꦴ ꦧ꧀ꦫꦲ꧀ꦩꦴꦤꦺꦴ ꦄꦤꦺꦏꦱꦲꦱ꧀ꦱꦺꦲꦶ ꦧ꧀ꦫꦲ꧀ꦩꦺꦲꦶ ꦥꦱꦠ꧀ꦡꦴ. ꦠꦺ ꦱꦧ꧀ꦧꦺꦥꦶ ꦢꦱꦧꦭꦁ ꦡꦺꦴꦩꦺꦤ꧀ꦠꦶ ꦮꦟ꧀ꦟꦺꦤ꧀ꦠꦶ ꦥꦱꦁꦱꦤ꧀ꦠꦷꦠꦶ ꦨꦒꦮꦴ ‘‘ꦥꦱꦠ꧀ꦡꦥ꧀ꦥꦱꦠ꧀ꦡꦺꦴ’’ꦠꦶ ꦮꦸꦕ꧀ꦕꦠꦶ. ꦄꦠ꧀ꦡꦮꦱꦤ꧀ꦠꦶ ꦄꦠ꧀ꦡꦴꦤꦶꦱꦁꦱꦁ.

ꦄꦡꦱ꧀ꦱ ꦱꦺꦴ ꦄꦠ꧀ꦠꦤꦺꦴ ꦥꦱꦴꦢꦏꦴꦫꦟꦁ ꦄꦴꦕꦶꦏ꧀ꦑꦤ꧀ꦠꦺꦴ ꦱꦺꦪ꧀ꦪꦡꦴꦥꦶ, ꦨꦺꦴ, ꦥꦸꦫꦶꦱꦺꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦒ꧀ꦒꦫꦱꦥꦫꦶꦠꦶꦠ꧀ꦠꦺꦴꦠꦶ ꦨꦺꦴꦗꦤꦫꦱꦺꦱꦸ ꦥꦴꦪꦴꦱꦺꦴ ꦱ꧀ꦤꦺꦲꦫꦱꦺꦱꦸ ꦒꦺꦴꦱꦥ꧀ꦥꦶ, ꦏꦱꦴꦮꦫꦱꦺꦱꦸ ꦑꦸꦢ꧀ꦢꦏꦩꦣꦸ ꦄꦤꦺꦭ꦳ꦏꦁ, ꦩꦣꦸꦫꦫꦱꦺꦱꦸ ꦱꦏ꧀ꦏꦫꦴꦠꦶ ꦌꦮꦩꦴꦢꦪꦺꦴ ꦄꦒ꧀ꦒꦫꦱꦴ ꦤꦴꦩ. ꦠꦺꦱꦸ ꦪꦺꦤ ꦏꦺꦤꦕꦶ ꦥꦫꦶꦠꦶꦠ꧀ꦠꦺꦴ ꦄꦴꦏꦟ꧀ꦜꦥ꧀ꦥꦩꦴꦟꦁ ꦨꦸꦚ꧀ꦗꦶꦠ꧀ꦮꦴ ꦜꦶꦠꦺꦴ. ꦄꦚ꧀ꦚꦺꦱꦁ ꦲꦷꦤꦴꦤꦤ꧀ꦠꦶ ꦄꦒ꧀ꦒꦫꦱꦺꦲꦶ ꦄꦚ꧀ꦚꦺꦱꦁ ꦲꦷꦤꦫꦱꦴꦤꦁ. ꦱꦸꦠ꧀ꦠꦱꦺꦴꦠꦶ ꦱꦸꦠ꧀ꦠꦠꦺꦴ, ꦱꦸꦠ꧀ꦠꦨꦴꦮꦺꦤꦴꦠꦶ ꦄꦠ꧀ꦡꦺꦴ. ꦱꦺꦱꦸꦥꦶ ꦌꦱꦺꦮ ꦤꦪꦺꦴ. ꦠꦠꦺꦴ ꦠꦠꦺꦴꦠꦶ ꦱꦸꦠ꧀ꦠꦴꦢꦷꦱꦸ ꦠꦠꦺꦴ ꦠꦠꦺꦴ. ꦄꦚ꧀ꦚꦺꦱꦁ ꦥꦸꦡꦸꦱꦩꦟꦧ꧀ꦫꦴꦲ꧀ꦩꦟꦴꦥ꧀ꦥꦮꦴꦢꦴꦤꦤ꧀ꦠꦶ ꦪꦺ ꦄꦚ꧀ꦚꦺꦱꦁ ꦥꦸꦡꦹꦤꦁ ꦱꦩꦟꦧ꧀ꦫꦴꦲ꧀ꦩꦟꦴꦤꦁ ꦭꦢ꧀ꦣꦶꦱꦔ꧀ꦑꦴꦠꦥ꧀ꦥꦮꦴꦢꦴ, ꦠꦺꦱꦁ. ꦤ ꦥꦶꦲꦺꦠꦷꦠꦶ ꦤ ꦥꦠ꧀ꦡꦺꦠꦶ, ꦠꦺ ꦏꦡꦶꦪꦩꦴꦤꦺ ꦱꦺꦴꦠꦸꦩ꧀ꦥꦶ ꦤ ꦆꦕ꧀ꦖꦠꦶ. ꦗꦶꦓꦕ꧀ꦖꦴꦢꦸꦧ꧀ꦧꦭ꧀ꦪꦥꦫꦺꦠꦺꦴꦠꦶ ꦗꦶꦓꦕ꧀ꦖꦴꦪ ꦕꦺꦮ ꦢꦸꦧ꧀ꦧꦭꦨꦴꦮꦺꦤ ꦕ ꦄꦤꦸꦒꦠꦺꦴ. ꦩꦣꦸꦥꦶꦟ꧀ꦝꦶꦏꦤ꧀ꦠꦶ ꦱꦴꦭꦶꦥꦶꦛ꧀ꦜꦁ ꦨꦗ꧀ꦗꦶꦠ꧀ꦮꦴ ꦕꦠꦸꦩꦣꦸꦫꦺꦤ ꦪꦺꦴꦗꦺꦠ꧀ꦮꦴ ꦏꦠꦁ ꦧꦢ꧀ꦣꦱꦠ꧀ꦠꦸꦥꦶꦟ꧀ꦝꦶꦏꦁ, ꦩꦣꦸꦫꦥꦹꦮꦩꦺꦮ ꦮꦴ. ꦄꦣꦶꦒꦕ꧀ꦖꦺꦪ꧀ꦪꦴꦠꦶ ꦭꦨꦺꦪ꧀ꦪ. ꦄꦱꦺꦕꦤꦏꦤ꧀ꦠꦶ ꦩꦣꦸꦫꦨꦴꦮꦏꦫꦟꦠ꧀ꦡꦴꦪ ꦄꦚ꧀ꦚꦺꦤ ꦫꦱꦺꦤ ꦄꦤꦴꦱꦶꦠ꧀ꦠꦏꦁ ꦎꦗꦮꦤ꧀ꦠꦁ ꦥꦟꦷꦠꦫꦱꦁ.

ꦲꦫꦶꦕꦤ꧀ꦢꦤꦱ꧀ꦱꦴꦠꦶ ꦱꦸꦮꦟ꧀ꦟꦮꦟ꧀ꦟꦕꦤ꧀ꦢꦤꦱ꧀ꦱ. ꦭꦺꦴꦲꦶꦠꦕꦤ꧀ꦢꦤꦱ꧀ꦱꦴꦠꦶ ꦫꦠ꧀ꦠꦮꦟ꧀ꦟꦕꦤ꧀ꦢꦤꦱ꧀ꦱ. ꦱꦸꦫꦨꦶꦒꦤ꧀ꦣꦤ꧀ꦠꦶ ꦱꦸꦒꦤ꧀ꦣꦁ. ꦢꦫꦡꦴꦢꦪꦺꦴ ꦮꦛ꧀ꦛꦢꦫꦡꦴ, ꦮꦛ꧀ꦛꦏꦶꦭꦩꦡꦴ, ꦮꦛ꧀ꦛꦥꦫꦶꦭ꦳ꦴꦲꦴ ꦌꦮ. ꦈꦢꦴꦤꦁ ꦈꦢꦴꦤꦺꦱꦷꦠꦶ ꦈꦢꦴꦲꦴꦫꦁ ꦈꦢꦴꦲꦫꦶ. ꦪꦡꦴ ꦲꦶ ꦪꦁ ꦠꦺꦭꦁ ꦩꦴꦤꦁ ꦒꦲꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦮꦶꦱ꧀ꦱꦤ꧀ꦢꦶꦠ꧀ꦮꦴ ꦒꦕ꧀ꦖꦠꦶ, ꦠꦁ ꦄꦮꦱꦺꦏꦺꦴꦠꦶ ꦮꦸꦕ꧀ꦕꦠꦶ. ꦪꦚ꧀ꦕ ꦗꦭꦁ ꦠꦭ꦳ꦴꦏꦁ ꦒꦲꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦄꦗ꧀ꦙꦺꦴꦠ꧀ꦡꦫꦶꦠ꧀ꦮꦴ ꦒꦕ꧀ꦖꦠꦶ, ꦠꦁ ꦎꦓꦺꦴꦠꦶ ꦮꦸꦕ꧀ꦕꦠꦶ. ꦌꦮꦩꦺꦮꦁ ꦪꦁ ꦥꦷꦠꦶꦮꦕꦤꦁ ꦲꦢꦪꦁ ꦒꦲꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦄꦣꦶꦏꦁ ꦲꦸꦠ꧀ꦮꦴ ꦄꦤ꧀ꦠꦺꦴ ꦄꦱꦟ꧀ꦜꦲꦶꦠ꧀ꦮꦴ ꦧꦲꦶ ꦤꦶꦏ꧀ꦑꦩꦠꦶ, ꦠꦁ ꦈꦢꦴꦤꦤ꧀ꦠꦶ ꦮꦸꦕ꧀ꦕꦠꦶ. ꦌꦮꦫꦹꦥꦁ ꦥꦷꦠꦶꦩꦪꦮꦕꦤꦁ ꦤꦶꦕ꧀ꦖꦴꦫꦺꦱꦷꦠꦶ ꦄꦠ꧀ꦡꦺꦴ.

꧕. ꦥꦶꦔ꧀ꦒꦶꦪꦴꦤꦷꦱꦸꦠ꧀ꦠꦮꦟ꧀ꦟꦤꦴ

꧑꧙꧕. ꦥꦚ꧀ꦕꦩꦺ ꦤꦷꦭꦴꦠꦶ ꦆꦢꦁ ꦱꦧ꧀ꦧꦱꦔ꧀ꦒꦴꦲꦶꦏꦁ. ꦤꦷꦭꦮꦟ꧀ꦟꦴꦠꦶꦄꦴꦢꦶ ꦠꦱ꧀ꦱꦺꦮ ꦮꦶꦨꦴꦒꦢꦱ꧀ꦱꦤꦁ. ꦠꦠ꧀ꦡ ꦤ ꦠꦺꦱꦁ ꦥꦏꦠꦶꦮꦟ꧀ꦟꦺꦴ ꦤꦷꦭꦺꦴ, ꦤꦷꦭꦮꦶꦭꦺꦥꦤꦮꦶꦭꦶꦠ꧀ꦠꦠ꧀ꦠꦴ ꦥꦤꦺꦠꦁ ꦮꦸꦠ꧀ꦠꦁ. ꦤꦷꦭꦮꦠ꧀ꦡꦴꦠꦶ ꦥꦛꦢꦸꦏꦹꦭꦏꦺꦴꦱꦺꦪ꧀ꦪꦴꦢꦷꦤꦶꦥꦶ ꦠꦺꦱꦁ ꦤꦷꦭꦴꦤꦺꦮ ꦲꦺꦴꦤ꧀ꦠꦶ. ꦤꦷꦭꦴꦭꦔ꧀ꦏꦴꦫꦴꦠꦶ ꦤꦷꦭꦩꦟꦷꦲꦶ ꦤꦷꦭꦥꦸꦥ꧀ꦦꦺꦲꦶ ꦄꦭꦔ꧀ꦏꦠꦴ, ꦠꦺꦱꦁ ꦲꦠ꧀ꦡꦴꦭꦔ꧀ꦏꦴꦫ-ꦄꦱ꧀ꦱꦴꦭꦔ꧀ꦏꦴꦫ-ꦫꦡꦴꦭꦔ꧀ꦏꦴꦫ-ꦱꦴꦟꦶꦮꦶꦠꦴꦤꦏꦚ꧀ꦕꦸꦏꦴꦥꦶ ꦱꦧ꧀ꦧꦺ ꦤꦷꦭꦴꦪꦺꦮ ꦲꦺꦴꦤ꧀ꦠꦶ. ꦆꦩꦶꦤꦴ ꦤꦪꦺꦤ ꦱꦧ꧀ꦧꦥꦢꦺꦱꦸ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦥꦢꦸꦩꦁ ꦪꦡꦴꦠꦶ ꦪꦡꦴ ꦱꦠꦥꦠ꧀ꦠꦁ ꦫꦠ꧀ꦠꦥꦢꦸꦩꦁ. ꦏꦺꦴꦏꦤꦢꦤ꧀ꦠꦶ ꦠꦱ꧀ꦱꦺꦮ ꦮꦺꦮꦕꦤꦁ. ꦥꦴꦠꦺꦴꦠꦶ ꦥꦒꦺꦮ ꦱꦸꦫꦶꦪꦸꦒ꧀ꦒꦩꦤꦏꦴꦭꦺ. ꦱꦶꦪꦴꦠꦶ ꦨꦮꦺꦪ꧀ꦪ. ꦄꦮꦷꦠꦒꦤ꧀ꦣꦤ꧀ꦠꦶ ꦄꦮꦶꦒꦠꦒꦤ꧀ꦣꦁ. ꦄꦔ꧀ꦒꦷꦫꦱꦤ꧀ꦠꦶ ꦨꦒꦮꦠꦺꦴ ꦄꦔ꧀ꦒꦩꦔ꧀ꦒꦺꦲꦶ ꦫꦱ꧀ꦩꦶꦪꦺꦴ ꦤꦶꦕ꧀ꦖꦫꦤ꧀ꦠꦶ, ꦠꦱ꧀ꦩꦴ ꦄꦔ꧀ꦒꦷꦫꦱꦺꦴꦠꦶ ꦮꦸꦕ꧀ꦕꦠꦶ. ꦠꦥꦤ꧀ꦠꦩꦴꦢꦶꦕ꧀ꦕꦩꦶꦮꦤ꧀ꦠꦭꦶꦏ꧀ꦑꦺꦠꦶ ꦢ꧀ꦮꦶꦱꦲꦱ꧀ꦱꦢꦷꦥꦥꦫꦶꦮꦴꦫꦺꦱꦸ ꦕꦠꦹꦱꦸ ꦩꦲꦴꦢꦷꦥꦺꦱꦸ ꦄꦴꦭꦺꦴꦏꦏꦫꦟꦮꦱꦺꦤ ꦄꦤ꧀ꦠꦭꦶꦏ꧀ꦑꦺ ꦠꦥꦤ꧀ꦠꦁ ꦄꦴꦢꦶꦕ꧀ꦕꦁ ꦮꦶꦪ ꦮꦶꦫꦺꦴꦕꦩꦴꦤꦁ. ꦄꦔ꧀ꦒꦷꦫꦱꦁ ꦥꦱ꧀ꦱꦴꦠꦶ ꦄꦠ꧀ꦠꦴꦤꦩꦺꦮ ꦮꦴ ꦩꦲꦴꦗꦤꦁ ꦮꦴ ꦱꦤ꧀ꦣꦴꦪ ꦌꦮꦁ ꦮꦢꦠꦶ.

꧖. ꦩꦲꦴꦱꦸꦥꦶꦤꦱꦸꦠ꧀ꦠꦮꦟ꧀ꦟꦤꦴ

꧑꧙꧖. ꦖꦛ꧀ꦜꦺ ꦩꦲꦴꦱꦸꦥꦶꦤꦴꦠꦶ ꦩꦲꦤ꧀ꦠꦺꦲꦶ ꦥꦸꦫꦶꦱꦺꦲꦶ ꦥꦱ꧀ꦱꦶꦠꦧ꧀ꦧꦠꦺꦴ ꦩꦲꦤ꧀ꦠꦴꦤꦚ꧀ꦕ ꦄꦠ꧀ꦡꦴꦤꦁ ꦤꦶꦩꦶꦠ꧀ꦠꦨꦴꦮꦠꦺꦴ ꦩꦲꦴꦱꦸꦥꦶꦤꦴ. ꦥꦴꦠꦸꦫꦲꦺꦱꦸꦤ꧀ꦠꦶ ꦥꦴꦏꦛꦴ ꦄꦲꦺꦱꦸꦁ. ꦠꦠ꧀ꦡ ꦱꦸꦥꦶꦤꦁ ꦥꦱ꧀ꦱꦤ꧀ꦠꦺꦴ ꦕꦠꦹꦲꦶ ꦏꦴꦫꦟꦺꦲꦶ ꦥꦱ꧀ꦱꦠꦶ ꦣꦴꦠꦸꦏ꧀ꦑꦺꦴꦨꦠꦺꦴ ꦮꦴ ꦄꦤꦸꦨꦹꦠꦥꦸꦧ꧀ꦧꦠꦺꦴ ꦮꦴ ꦢꦺꦮꦠꦺꦴꦥꦱꦁꦲꦴꦫꦠꦺꦴ ꦮꦴ ꦥꦸꦧ꧀ꦧꦤꦶꦩꦶꦠ꧀ꦠꦠꦺꦴ ꦮꦴꦠꦶ.

ꦠꦠ꧀ꦡ ꦥꦶꦠ꧀ꦠꦴꦢꦷꦤꦁ ꦑꦺꦴꦨꦏꦫꦟꦥꦕ꧀ꦕꦪꦥ꧀ꦥꦪꦺꦴꦒꦺꦤ ꦑꦸꦨꦶꦠꦣꦴꦠꦸꦏꦺꦴ ꦣꦴꦠꦸꦏ꧀ꦑꦺꦴꦨꦠꦺꦴ ꦱꦸꦥꦶꦤꦁ ꦥꦱ꧀ꦱꦠꦶ. ꦥꦱ꧀ꦱꦤ꧀ꦠꦺꦴ ꦕ ꦤꦴꦤꦴꦮꦶꦣꦁ ꦱꦸꦥꦶꦤꦁ ꦥꦱ꧀ꦱꦠꦶ ꦥꦧ꧀ꦧꦠꦴ ꦥꦠꦤ꧀ꦠꦺꦴ ꦮꦶꦪ, ꦄꦴꦏꦴꦱꦺꦤ ꦒꦕ꧀ꦖꦤ꧀ꦠꦺꦴ ꦮꦶꦪ, ꦮꦴꦭ꦳ꦩꦶꦒꦲꦠ꧀ꦡꦶꦕꦺꦴꦫꦴꦢꦷꦲꦶ ꦄꦤꦸꦧꦢ꧀ꦣꦺꦴ ꦮꦶꦪ ꦕ. ꦄꦤꦸꦨꦹꦠꦥꦸꦧ꧀ꦧꦠꦺꦴ ꦥꦱ꧀ꦱꦤ꧀ꦠꦺꦴ ꦥꦸꦧ꧀ꦧꦺ ꦄꦤꦸꦨꦹꦠꦥꦸꦧ꧀ꦧꦁ ꦄꦴꦫꦩ꧀ꦩꦟꦁ ꦥꦱ꧀ꦱꦠꦶ. ꦢꦺꦮꦠꦺꦴꦥꦱꦁꦲꦴꦫꦠꦺꦴ ꦥꦱ꧀ꦱꦤ꧀ꦠꦱ꧀ꦱ ꦢꦺꦮꦠꦴ ꦄꦠ꧀ꦡꦏꦴꦩꦠꦴꦪ ꦮꦴ ꦄꦤꦠ꧀ꦡꦏꦴꦩꦠꦴꦪ ꦮꦴ ꦄꦠ꧀ꦡꦴꦪ ꦮꦴ ꦄꦤꦠ꧀ꦡꦴꦪ ꦮꦴ ꦤꦴꦤꦴꦮꦶꦣꦴꦤꦶ ꦄꦴꦫꦩ꧀ꦩꦟꦴꦤꦶ ꦈꦥꦱꦁꦲꦫꦤ꧀ꦠꦶ. ꦱꦺꦴ ꦠꦴꦱꦁ ꦢꦺꦮꦠꦴꦤꦁ ꦄꦴꦤꦸꦨꦴꦮꦺꦤ ꦠꦴꦤꦶ ꦄꦴꦫꦩ꧀ꦩꦟꦴꦤꦶ ꦥꦱ꧀ꦱꦠꦶ. ꦥꦸꦧ꧀ꦧꦤꦶꦩꦶꦠ꧀ꦠꦠꦺꦴ ꦥꦱ꧀ꦱꦤ꧀ꦠꦺꦴ ꦥꦸꦚ꧀ꦚꦴꦥꦸꦚ꧀ꦚꦮꦱꦺꦤ ꦈꦥ꧀ꦥꦗ꧀ꦗꦶꦠꦸꦏꦴꦩꦱ꧀ꦱ ꦄꦠ꧀ꦡꦱ꧀ꦱ ꦮꦴ ꦄꦤꦠ꧀ꦡꦱ꧀ꦱ ꦮꦴ ꦥꦸꦧ꧀ꦧꦤꦶꦩꦶꦠ꧀ꦠꦨꦹꦠꦁ ꦱꦸꦥꦶꦤꦁ ꦥꦱ꧀ꦱꦠꦶ ꦧꦺꦴꦣꦶꦱꦠ꧀ꦠꦩꦴꦠꦴ ꦮꦶꦪ ꦥꦸꦠ꧀ꦠꦥꦛꦶꦭꦴꦨꦤꦶꦩꦶꦠ꧀ꦠꦁ, ꦏꦺꦴꦱꦭꦫꦴꦗꦴ ꦮꦶꦪ ꦱꦺꦴꦭ꦳ꦱ ꦱꦸꦥꦶꦤꦺ, ꦄꦪꦩꦺꦮ ꦨꦒꦮꦴ ꦧꦺꦴꦣꦶꦱꦠ꧀ꦠꦨꦹꦠꦺꦴ ꦆꦩꦺ ꦥꦚ꧀ꦕ ꦩꦲꦴꦱꦸꦥꦶꦤꦺ ꦮꦶꦪ ꦕꦴꦠꦶ.

ꦠꦠ꧀ꦡ ꦪꦁ ꦣꦴꦠꦸꦏ꧀ꦑꦺꦴꦨꦠꦺꦴ ꦄꦤꦸꦨꦹꦠꦥꦸꦧ꧀ꦧꦠꦺꦴ ꦕ ꦱꦸꦥꦶꦤꦺ ꦥꦱ꧀ꦱꦠꦶ, ꦤ ꦠꦁ ꦱꦕ꧀ꦕꦁ ꦲꦺꦴꦠꦶ. ꦪꦁ ꦢꦺꦮꦠꦺꦴꦥꦱꦁꦲꦴꦫꦠꦺꦴ ꦥꦱ꧀ꦱꦠꦶ, ꦠꦁ ꦱꦕ꧀ꦕꦁ ꦮꦴ ꦲꦺꦴꦠꦶ ꦄꦭꦶꦏꦁ ꦮꦴ. ꦏꦸꦢ꧀ꦣꦴ ꦲꦶ ꦢꦺꦮꦠꦴ ꦈꦥꦴꦪꦺꦤ ꦮꦶꦤꦴꦱꦺꦠꦸꦏꦴꦩꦴ ꦮꦶꦥꦫꦷꦠꦩ꧀ꦥꦶ ꦏꦠ꧀ꦮꦴ ꦢꦱ꧀ꦱꦺꦤ꧀ꦠꦶ. ꦪꦁ ꦥꦤ ꦥꦸꦧ꧀ꦧꦤꦶꦩꦶꦠ꧀ꦠꦠꦺꦴ ꦥꦱ꧀ꦱꦠꦶ, ꦠꦁ ꦌꦏꦤ꧀ꦠꦁ ꦱꦕ꧀ꦕꦩꦺꦮ ꦲꦺꦴꦠꦶ. ꦌꦠꦺꦱꦁ ꦕꦠꦸꦤ꧀ꦤꦁ ꦩꦹꦭꦏꦴꦫꦟꦴꦤꦁ ꦱꦁꦱꦒ꧀ꦒꦨꦺꦢꦠꦺꦴꦥꦶ ꦱꦸꦥꦶꦤꦨꦺꦢꦺꦴ ꦲꦺꦴꦠꦶꦪꦺꦮ.

ꦠꦁ ꦥꦤꦺꦠꦁ ꦕꦠꦸꦧ꧀ꦧꦶꦣꦩ꧀ꦥꦶ ꦱꦸꦥꦶꦤꦁ ꦱꦺꦑꦥꦸꦡꦸꦗ꧀ꦗꦤꦴꦮ ꦥꦱ꧀ꦱꦤ꧀ꦠꦶ ꦄꦥ꧀ꦥꦲꦷꦤꦮꦶꦥꦭ꧀ꦭꦴꦱꦠ꧀ꦠꦴ, ꦄꦱꦺꦑꦴ ꦤ ꦥꦱ꧀ꦱꦤ꧀ꦠꦶ ꦥꦲꦷꦤꦮꦶꦥꦭ꧀ꦭꦴꦱꦠ꧀ꦠꦴ. ꦏꦶꦁ ꦥꦤꦺꦠꦁ ꦥꦱ꧀ꦱꦤ꧀ꦠꦺꦴ ꦱꦸꦠ꧀ꦠꦺꦴ ꦥꦱ꧀ꦱꦠꦶ ꦥꦛꦶꦧꦸꦢ꧀ꦣꦺꦴ, ꦈꦢꦴꦲꦸ ꦤꦺꦮ ꦱꦸꦠ꧀ꦠꦺꦴ ꦤ ꦥꦛꦶꦧꦸꦢ꧀ꦣꦺꦴꦠꦶ? ꦏꦶꦚ꧀ꦕꦺꦠ꧀ꦡ ꦪꦢꦶ ꦠꦴꦮ ꦱꦸꦠ꧀ꦠꦺꦴ ꦥꦱ꧀ꦱꦠꦶ, ꦄꦨꦶꦣꦩ꧀ꦩꦮꦶꦫꦺꦴꦣꦺꦴ ꦄꦴꦥꦗ꧀ꦗꦠꦶ. ꦨꦮꦔ꧀ꦒꦕꦶꦠ꧀ꦠꦺꦤ ꦲꦶ ꦱꦸꦥꦠꦶ, ꦠꦁ ꦫꦹꦥꦤꦶꦩꦶꦠ꧀ꦠꦴꦢꦶꦄꦴꦫꦩ꧀ꦩꦟꦁ ꦫꦴꦒꦴꦢꦶꦱꦩ꧀ꦥꦪꦸꦠ꧀ꦠꦁ ꦮꦴ ꦤ ꦲꦺꦴꦠꦶ. ꦱꦸꦥꦶꦤꦁ ꦥꦱ꧀ꦱꦤ꧀ꦠꦱ꧀ꦱ ꦕ ꦇꦢꦶꦱꦴꦤꦶ ꦕꦶꦠ꧀ꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ. ꦄꦡ ꦥꦛꦶꦧꦸꦢ꧀ꦣꦺꦴ ꦥꦱ꧀ꦱꦠꦶ, ꦮꦶꦤꦪꦮꦶꦫꦺꦴꦣꦺꦴ ꦄꦴꦥꦗ꧀ꦗꦠꦶ. ꦪꦚ꧀ꦲꦶ ꦥꦛꦶꦧꦸꦢ꧀ꦣꦺꦴ ꦥꦱ꧀ꦱꦠꦶ, ꦠꦁ ꦱꦧ꧀ꦧꦺꦴꦲꦴꦫꦶꦏꦕꦶꦠ꧀ꦠꦺꦤ ꦥꦱ꧀ꦱꦠꦶ. ꦱꦧ꧀ꦧꦺꦴꦲꦴꦫꦶꦏꦕꦶꦠ꧀ꦠꦺꦤ ꦕ ꦏꦠꦺ ꦮꦷꦠꦶꦏ꧀ꦏꦩꦺ ꦄꦤꦴꦥꦠ꧀ꦠꦶ ꦤꦴꦩ ꦤꦠ꧀ꦡꦶ. ꦱꦸꦥꦶꦤꦁ ꦥꦱ꧀ꦱꦤ꧀ꦠꦺꦤ ꦥꦤ ꦏꦠꦺꦥꦶ ꦮꦷꦠꦶꦏ꧀ꦏꦩꦺ ꦌꦏꦤ꧀ꦠꦁ ꦄꦤꦴꦥꦠ꧀ꦠꦶ ꦌꦮ. ꦄꦡ ꦤꦺꦮ ꦱꦸꦠ꧀ꦠꦺꦴ ꦤ ꦥꦛꦶꦧꦸꦢ꧀ꦣꦺꦴ ꦥꦱ꧀ꦱꦠꦶ, ꦤ ꦤꦴꦩ ꦥꦱ꧀ꦱꦠꦶ. ꦌꦮꦚ꧀ꦕ ꦱꦠꦶ ꦱꦸꦥꦶꦤꦱ꧀ꦱ ꦄꦨꦴꦮꦺꦴ ꦕ ꦄꦴꦥꦗ꧀ꦗꦠꦶ? ꦤ ꦄꦨꦴꦮꦺꦴ. ꦏꦱ꧀ꦩꦴ? ꦪꦱ꧀ꦩꦴ ꦏꦥꦶꦩꦶꦢ꧀ꦣꦥꦫꦺꦠꦺꦴ ꦥꦱ꧀ꦱꦠꦶ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦏꦥꦶꦩꦶꦢ꧀ꦣꦥꦫꦺꦠꦺꦴ ꦑꦺꦴ, ꦩꦲꦴꦫꦴꦗ, ꦱꦸꦥꦶꦤꦁ ꦥꦱ꧀ꦱꦠꦷ’’ꦠꦶ.

ꦏꦥꦶꦩꦶꦢ꧀ꦣꦥꦫꦺꦠꦺꦴꦠꦶ ꦩꦏ꧀ꦏꦛꦤꦶꦢ꧀ꦢꦴꦪ ꦪꦸꦠ꧀ꦠꦺꦴ. ꦪꦡꦴ ꦲꦶ ꦩꦏ꧀ꦏꦛꦱ꧀ꦱ ꦤꦶꦢ꧀ꦢꦴ ꦭꦲꦸꦥꦫꦶꦮꦠ꧀ꦠꦴ ꦲꦺꦴꦠꦶ, ꦌꦮꦁ ꦪꦴ ꦤꦶꦢ꧀ꦢꦴ ꦥꦸꦤꦥ꧀ꦥꦸꦤꦁ ꦏꦸꦱꦭꦴꦢꦶꦕꦶꦠ꧀ꦠꦮꦺꦴꦏꦶꦟ꧀ꦟꦠ꧀ꦠꦴ ꦭꦲꦸꦥꦫꦶꦮꦠ꧀ꦠꦴ, ꦪꦱ꧀ꦱꦴ ꦥꦮꦠ꧀ꦠꦶꦪꦁ ꦥꦸꦤꦥ꧀ꦥꦸꦤꦁ ꦨꦮꦔ꧀ꦒꦠꦺꦴ ꦈꦠ꧀ꦠꦫꦟꦁ ꦲꦺꦴꦠꦶ, ꦠꦴꦪ ꦪꦸꦠ꧀ꦠꦺꦴ ꦱꦸꦥꦶꦤꦁ ꦥꦱ꧀ꦱꦠꦶ. ꦠꦺꦤꦴꦪꦁ ꦱꦸꦥꦶꦤꦺꦴ ꦏꦸꦱꦭꦺꦴꦥꦶ ꦲꦺꦴꦠꦶ ꦄꦏꦸꦱꦭꦺꦴꦥꦶ ꦄꦧ꧀ꦪꦴꦏꦠꦺꦴꦥꦶ. ꦠꦠ꧀ꦡ ꦱꦸꦥꦶꦤꦤ꧀ꦠꦺ ꦕꦺꦠꦶꦪꦮꦤ꧀ꦢꦤꦣꦩ꧀ꦩꦱ꧀ꦱꦮꦤꦣꦩ꧀ꦩꦢꦺꦱꦤꦴꦢꦷꦤꦶ ꦏꦫꦺꦴꦤ꧀ꦠꦱ꧀ꦱ ꦏꦸꦱꦭꦺꦴ, ꦥꦴꦟꦴꦠꦶꦥꦴꦠꦴꦢꦷꦤꦶ ꦏꦫꦺꦴꦤ꧀ꦠꦱ꧀ꦱ ꦄꦏꦸꦱꦭꦺꦴ, ꦢ꧀ꦮꦷꦲꦶ ꦄꦤ꧀ꦠꦺꦲꦶ ꦩꦸꦠ꧀ꦠꦺꦴ ꦄꦴꦮꦗ꧀ꦗꦤꦠꦢꦴꦫꦩ꧀ꦩꦟꦏ꧀ꦑꦟꦺ ꦄꦧ꧀ꦪꦴꦏꦠꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦱ꧀ꦮꦴꦪꦁ ꦢꦸꦧ꧀ꦧꦭꦮꦠ꧀ꦡꦸꦏꦠ꧀ꦠꦴ ꦕꦺꦠꦤꦴꦪ ꦥꦛꦶꦱꦤ꧀ꦣꦶꦁ ꦄꦴꦏꦝ꧀ꦞꦶꦠꦸꦁ ꦄꦱꦩꦠ꧀ꦡꦺꦴ. ꦥꦮꦠ꧀ꦠꦺ ꦥꦤ ꦄꦚ꧀ꦚꦺꦲꦶ ꦏꦸꦱꦭꦴꦏꦸꦱꦭꦺꦲꦶ ꦈꦥꦠ꧀ꦡꦩ꧀ꦨꦶꦠꦺꦴ ꦮꦶꦥꦴꦏꦁ ꦢꦺꦠꦶ. ꦏꦶꦚ꧀ꦕꦴꦥꦶ ꦮꦶꦥꦴꦏꦁ ꦢꦺꦠꦶ, ꦄꦡ ꦑꦺꦴ ꦄꦮꦶꦱꦪꦺ ꦈꦥ꧀ꦥꦤ꧀ꦤꦠ꧀ꦠꦴ ꦄꦧ꧀ꦧꦺꦴꦲꦴꦫꦶꦏꦴꦮ ꦱꦸꦥꦶꦤꦤ꧀ꦠꦕꦺꦠꦤꦴ. ꦱꦺꦴ ꦥꦤꦺꦱ ꦱꦸꦥꦶꦤꦺꦴ ꦏꦴꦭꦮꦱꦺꦤꦥꦶ ꦢꦶꦮꦴ ꦠꦴꦮ ꦢꦶꦛ꧀ꦜꦺꦴ ꦤ ꦱꦩꦺꦠꦶ, ꦠꦡꦴ ꦥꦜꦩꦪꦴꦩꦺ ꦩꦗ꧀ꦙꦶꦩꦪꦴꦩꦺ ꦥꦕ꧀ꦖꦶꦩꦪꦴꦩꦺ ꦕ. ꦧꦭꦮꦥꦕ꧀ꦕꦹꦱꦺ ꦥꦤ ꦄꦱꦶꦠꦥꦷꦠꦑꦴꦪꦶꦠꦺ ꦱꦩ꧀ꦩꦴ ꦥꦫꦶꦟꦴꦩꦁ ꦒꦠꦺ ꦏꦴꦪꦱ꧀ꦩꦶꦁ ꦎꦗꦴꦪ ꦥꦠꦶꦛ꧀ꦜꦶꦠꦴꦪ ꦄꦫꦸꦟꦺ ꦈꦒ꧀ꦒꦕ꧀ꦖꦩꦴꦤꦺꦮ ꦢꦶꦛ꧀ꦜꦺꦴ ꦱꦸꦥꦶꦤꦺꦴ ꦱꦩꦺꦠꦶ. ꦆꦛ꧀ꦜꦤꦶꦩꦶꦠ꧀ꦠꦁ ꦱꦸꦥꦶꦤꦁ ꦥꦱ꧀ꦱꦤ꧀ꦠꦺꦴ ꦆꦛ꧀ꦜꦁ ꦥꦛꦶꦭꦨꦠꦶ, ꦄꦤꦶꦛ꧀ꦜꦤꦶꦩꦶꦠ꧀ꦠꦁ ꦥꦱ꧀ꦱꦤ꧀ꦠꦺꦴ ꦄꦤꦶꦛ꧀ꦜꦁ.

ꦆꦩꦺ ꦥꦤ ꦥꦚ꧀ꦕ ꦩꦲꦴꦱꦸꦥꦶꦤꦺ ꦤꦺꦮ ꦭꦺꦴꦏꦶꦪꦩꦲꦴꦗꦤꦺꦴ ꦥꦱ꧀ꦱꦠꦶ, ꦤ ꦩꦲꦴꦫꦴꦗꦴꦤꦺꦴ, ꦤ ꦕꦏ꧀ꦏꦮꦠ꧀ꦠꦶꦫꦴꦗꦴꦤꦺꦴ, ꦤ ꦄꦒ꧀ꦒꦱꦴꦮꦏꦴ, ꦤ ꦥꦕ꧀ꦕꦺꦏꦧꦸꦢ꧀ꦣꦴ, ꦤ ꦱꦩ꧀ꦩꦴꦱꦩ꧀ꦧꦸꦢ꧀ꦣꦴ, ꦌꦏꦺꦴ ꦱꦧ꧀ꦧꦚ꧀ꦚꦸꦧꦺꦴꦣꦶꦱꦠ꧀ꦠꦺꦴꦪꦺꦮ ꦥꦱ꧀ꦱꦠꦶ. ꦄꦩ꧀ꦲꦴꦏꦁ ꦥꦤ ꦧꦺꦴꦣꦶꦱꦠ꧀ꦠꦺꦴ ꦏꦢꦴ ꦆꦩꦺ ꦱꦸꦥꦶꦤꦺ ꦥꦱ꧀ꦱꦷꦠꦶ? ‘‘ꦱ꧀ꦮꦺ ꦧꦸꦢ꧀ꦣꦺꦴ ꦨꦮꦶꦱ꧀ꦱꦴꦩꦷ’’ꦠꦶ ꦕꦴꦠꦸꦢ꧀ꦢꦱꦶꦪꦁ ꦥꦏ꧀ꦑꦱ꧀ꦱ ꦫꦠ꧀ꦠꦶꦮꦶꦨꦴꦪꦤꦏꦴꦭꦺ ꦥꦱ꧀ꦱꦶ. ꦠꦺꦫꦱꦶꦪꦤ꧀ꦠꦶꦥꦶ ꦮꦢꦤ꧀ꦠꦶꦪꦺꦮ. ꦱꦺꦴ ꦆꦩꦺ ꦱꦸꦥꦶꦤꦺ ꦢꦶꦱ꧀ꦮꦴ ꦈꦛ꧀ꦜꦴꦪ ꦥꦭ꧀ꦭꦔ꧀ꦏꦁ ꦄꦴꦨꦸꦚ꧀ꦗꦶꦠ꧀ꦮꦴ ꦤꦶꦱꦶꦤ꧀ꦤꦺꦴ ꦕꦶꦤ꧀ꦠꦺꦱꦶ – ‘‘ꦱꦕꦺ ꦩꦪꦴ ꦏꦥꦶꦭꦮꦠ꧀ꦡꦸꦤꦒꦫꦺ ꦆꦩꦺ ꦱꦸꦥꦶꦤꦴ ꦢꦶꦛ꧀ꦜꦴ ꦄꦱ꧀ꦱꦸ, ꦥꦶꦠꦸ ꦩꦲꦴꦫꦴꦗꦱ꧀ꦱ ꦏꦡꦺꦪ꧀ꦪꦁ. ꦱꦕꦺ ꦥꦤ ꦩꦺ ꦩꦴꦠꦴ ꦗꦷꦮꦺꦪ꧀ꦪ, ꦠꦱ꧀ꦱꦴ ꦏꦡꦺꦪ꧀ꦪꦁ. ꦆꦩꦱ꧀ꦩꦶꦁ ꦑꦺꦴ ꦥꦤ ꦜꦴꦤꦺ ꦆꦩꦺꦱꦁ ꦥꦛꦶꦒ꧀ꦒꦴꦲꦏꦺꦴ ꦤꦴꦩ ꦤꦠ꧀ꦡꦶ, ꦄꦲꦩꦺꦮ ꦥꦛꦶꦒꦟ꧀ꦲꦶꦱ꧀ꦱꦴꦩꦷ’’ꦠꦶ. ꦠꦠꦺꦴ ‘‘ꦆꦢꦁ ꦆꦩꦱ꧀ꦱ ꦥꦸꦧ꧀ꦧꦤꦶꦩꦶꦠ꧀ꦠꦁ ꦆꦢꦁ ꦆꦩꦱ꧀ꦱꦴ’’ꦠꦶ ꦱꦪꦩꦺꦮ ꦱꦸꦥꦶꦤꦺ ꦥꦛꦶꦒ꧀ꦒꦟ꧀ꦲꦶꦠ꧀ꦮꦴ ꦈꦫꦸꦮꦺꦭꦒꦴꦩꦺ ꦱꦸꦗꦴꦠꦴꦪ ꦢꦶꦤ꧀ꦤꦁ ꦥꦴꦪꦴꦱꦁ ꦥꦫꦶꦨꦸꦚ꧀ꦗꦶꦠ꧀ꦮꦴ ꦧꦺꦴꦣꦶꦩꦟ꧀ꦝꦁ ꦄꦴꦫꦸꦪ꧀ꦲ ꦧꦺꦴꦣꦶꦁ ꦥꦠ꧀ꦮꦴ ꦄꦤꦸꦏ꧀ꦏꦩꦺꦤ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦄꦠ꧀ꦠꦤꦺꦴ ꦩꦏꦸꦭꦧꦸꦢ꧀ꦣꦏꦴꦭꦺ ꦢꦶꦛ꧀ꦜꦺ ꦥꦚ꧀ꦕ ꦩꦲꦴꦱꦸꦥꦶꦤꦺ ꦮꦶꦠ꧀ꦡꦴꦫꦺꦠꦸꦁ ꦨꦶꦏ꧀ꦑꦹ ꦄꦴꦩꦤ꧀ꦠꦺꦠ꧀ꦮꦴ ꦆꦩꦁ ꦢꦺꦱꦤꦁ ꦄꦴꦫꦨꦶ.

ꦠꦠ꧀ꦡ ꦩꦲꦴꦥꦡꦮꦷꦠꦶ ꦕꦏ꧀ꦏꦮꦴꦭ꦳ꦒꦧ꧀ꦨꦁ ꦥꦹꦫꦺꦠ꧀ꦮꦴ ꦜꦶꦠꦴ ꦩꦲꦴꦥꦡꦮꦷ. ꦩꦲꦴꦱꦪꦤꦁ ꦄꦲꦺꦴꦱꦷꦠꦶ ꦱꦶꦫꦶꦱꦪꦤꦁ ꦄꦲꦺꦴꦱꦶ. ꦎꦲꦶꦠꦺꦴꦠꦶ ꦜꦥꦶꦠꦺꦴ. ꦱꦺꦴ ꦥꦤ ꦤ ꦈꦢꦏꦱ꧀ꦩꦶꦁꦪꦺꦮ ꦜꦥꦶꦠꦺꦴ ꦄꦲꦺꦴꦱꦶ, ꦄꦡ ꦑꦺꦴ ꦥꦴꦕꦷꦤꦱꦩꦸꦢ꧀ꦢꦱ꧀ꦱ ꦈꦥꦫꦹꦥꦫꦶꦨꦴꦒꦺꦤ ꦒꦤ꧀ꦠ꧀ꦮꦴ ꦥꦴꦕꦷꦤꦕꦏ꧀ꦏꦮꦴꦭ꦳ꦩꦠ꧀ꦡꦏꦺ ꦜꦥꦶꦠꦺꦴ ꦄꦲꦺꦴꦱꦷꦠꦶ ꦮꦺꦢꦶꦠꦧ꧀ꦧꦺꦴ. ꦥꦕ꧀ꦖꦶꦩꦺ ꦱꦩꦸꦢ꧀ꦢꦺ ꦢꦏ꧀ꦑꦶꦟꦺ ꦱꦩꦸꦢ꧀ꦢꦺꦠꦶ ꦌꦠꦺꦱꦸꦥꦶ ꦌꦱꦺꦮ ꦤꦪꦺꦴ. ꦠꦶꦫꦶꦪꦴ ꦤꦴꦩ ꦠꦶꦟꦗꦴꦠꦷꦠꦶ ꦢꦧ꧀ꦧꦠꦶꦟꦁ ꦮꦸꦕ꧀ꦕꦠꦶ. ꦤꦴꦨꦶꦪꦴ ꦈꦒ꧀ꦒꦤ꧀ꦠ꧀ꦮꦴ ꦤꦨꦁ ꦄꦴꦲꦕ꧀ꦕ ꦜꦶꦠꦴ ꦄꦲꦺꦴꦱꦷꦠꦶ ꦤꦔ꧀ꦒꦭꦩꦠ꧀ꦠꦺꦤ ꦫꦠ꧀ꦠꦢꦟ꧀ꦝꦺꦤ ꦤꦴꦨꦶꦠꦺꦴ ꦈꦒ꧀ꦒꦤ꧀ꦠ꧀ꦮꦴ ꦥꦱ꧀ꦱꦤ꧀ꦠꦱ꧀ꦱ ꦥꦱ꧀ꦱꦤ꧀ꦠꦱ꧀ꦱꦺꦮ ꦮꦶꦢꦠ꧀ꦡꦶꦩꦠ꧀ꦠꦁ ꦫꦠꦤꦩꦠ꧀ꦠꦁ ꦧ꧀ꦪꦴꦩꦩꦠ꧀ꦠꦁ ꦪꦛ꧀ꦜꦶꦩꦠ꧀ꦠꦁ ꦒꦴꦮꦸꦠꦩꦠ꧀ꦠꦁ ꦄꦝ꧀ꦞꦪꦺꦴꦗꦤꦩꦠ꧀ꦠꦁ ꦪꦺꦴꦗꦤꦩꦠ꧀ꦠꦤ꧀ꦠꦶ ꦌꦮꦁ ꦈꦒ꧀ꦒꦤ꧀ꦠ꧀ꦮꦴ ꦈꦒ꧀ꦒꦤ꧀ꦠ꧀ꦮꦴ ꦄꦤꦺꦏꦪꦺꦴꦗꦤꦱꦲꦱ꧀ꦱꦁ ꦤꦨꦁ ꦄꦴꦲꦕ꧀ꦕ ꦜꦶꦠꦴ ꦄꦲꦺꦴꦱꦶ. ꦥꦴꦢꦺꦲꦶ ꦈꦱ꧀ꦱꦏ꧀ꦏꦶꦠ꧀ꦮꦴꦠꦶ ꦄꦒ꧀ꦒꦤꦑꦠꦺꦴ ꦥꦛ꧀ꦜꦴꦪ ꦥꦴꦢꦺꦲꦶ ꦄꦨꦶꦫꦸꦲꦶꦠ꧀ꦮꦴ. ꦤꦴꦤꦴꦮꦟ꧀ꦟꦴꦠꦶ ꦌꦏꦺꦴ ꦤꦷꦭꦮꦟ꧀ꦟꦺꦴ, ꦌꦏꦺꦴ ꦥꦷꦠꦮꦟ꧀ꦟꦺꦴ, ꦌꦏꦺꦴ ꦭꦺꦴꦲꦶꦠꦮꦟ꧀ꦟꦺꦴ, ꦌꦏꦺꦴ ꦥꦟ꧀ꦝꦸꦥꦭꦴꦱꦮꦟ꧀ꦟꦺꦴꦠꦶ ꦌꦮꦁ ꦤꦴꦤꦴꦮꦟ꧀ꦟꦴ. ꦱꦺꦠꦴꦠꦶ ꦥꦟ꧀ꦝꦫꦴ ꦥꦫꦶꦱꦸꦢ꧀ꦣꦴ. ꦩꦲꦠꦺꦴ ꦩꦷꦭ꦳꧀ꦲꦥꦧ꧀ꦧꦠꦱ꧀ꦱꦴꦠꦶ ꦠꦶꦪꦺꦴꦗꦤꦸꦧ꧀ꦧꦺꦣꦱ꧀ꦱ ꦒꦹꦡꦥꦧ꧀ꦧꦠꦱ꧀ꦱ. ꦈꦥꦫꦹꦥꦫꦶ ꦕꦔ꧀ꦏꦩꦠꦷꦠꦶ ꦩꦠ꧀ꦡꦏꦩꦠ꧀ꦡꦏꦺ ꦕꦔ꧀ꦏꦩꦠꦶ. ꦢꦷꦓꦴꦪꦸꦏꦧꦸꦢ꧀ꦣꦴ ꦥꦤ ꦠꦶꦪꦺꦴꦗꦤꦶꦏꦺ ꦩꦷꦭ꦳꧀ꦲꦥꦧ꧀ꦧꦠꦺ ꦄꦤꦸꦥꦮꦶꦱꦶꦠ꧀ꦮꦴ ꦤꦶꦱꦶꦤ꧀ꦤꦴ ꦮꦶꦪ ꦲꦺꦴꦤ꧀ꦠꦶ.

ꦌꦮꦁ ꦌꦠ꧀ꦠꦏꦺꦤ ꦜꦴꦤꦺꦤ ꦥꦸꦧ꧀ꦧꦤꦶꦩꦶꦠ꧀ꦠꦴꦤꦶ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦱꦲ ꦥꦸꦧ꧀ꦧꦤꦶꦩꦶꦠ꧀ꦠꦺꦲꦶ ꦥꦛꦶꦭꦴꦨꦁ ꦢꦱ꧀ꦱꦺꦠꦸꦁ ꦪꦩ꧀ꦥꦶ, ꦨꦶꦏ꧀ꦑꦮꦺꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦧ꧀ꦧꦒꦸꦟꦢꦴꦪꦏꦠ꧀ꦠꦴ ꦧꦸꦢ꧀ꦣꦴꦤꦁ ꦄꦫꦲꦠ꧀ꦠꦩꦒ꧀ꦒꦺꦴ ꦄꦤꦸꦠ꧀ꦠꦫꦴ ꦱꦩ꧀ꦩꦴꦱꦩ꧀ꦧꦺꦴꦣꦶ ꦤꦴꦩ. ꦠꦱ꧀ꦩꦴ ꦪꦁ ꦱꦺꦴ ꦕꦏ꧀ꦏꦮꦴꦭ꦳ꦩꦲꦴꦥꦡꦮꦶꦁ ꦱꦶꦫꦶꦱꦪꦤꦨꦹꦠꦁ ꦄꦢ꧀ꦢꦱ, ꦠꦁ ꦧꦸꦢ꧀ꦣꦨꦴꦮꦱ꧀ꦱ ꦥꦸꦧ꧀ꦧꦤꦶꦩꦶꦠ꧀ꦠꦁ. ꦪꦁ ꦲꦶꦩꦮꦤ꧀ꦠꦥꦧ꧀ꦧꦠꦫꦴꦗꦴꦤꦁ ꦧꦶꦩ꧀ꦧꦺꦴꦲꦤꦁ ꦄꦢ꧀ꦢꦱ, ꦠꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦧꦶꦩ꧀ꦧꦺꦴꦲꦤꦱ꧀ꦱ ꦥꦸꦧ꧀ꦧꦤꦶꦩꦶꦠ꧀ꦠꦁ. ꦪꦁ ꦕꦠ꧀ꦠꦴꦫꦺꦴ ꦲꦠ꧀ꦡꦥꦴꦢꦺ ꦕꦏ꧀ꦏꦮꦴꦭ꦳ꦩꦠ꧀ꦡꦏꦺ ꦜꦶꦠꦺ ꦄꦢ꧀ꦢꦱ, ꦠꦁ ꦣꦩ꧀ꦩꦕꦏ꧀ꦏꦱ꧀ꦱ ꦄꦥ꧀ꦥꦛꦶꦮꦠ꧀ꦠꦶꦪꦨꦴꦮꦺ ꦥꦸꦧ꧀ꦧꦤꦶꦩꦶꦠ꧀ꦠꦁ. ꦪꦁ ꦄꦠ꧀ꦠꦴꦤꦁ ꦈꦠ꧀ꦠꦴꦤꦏꦁ ꦤꦶꦥꦤ꧀ꦤꦁ ꦄꦢ꧀ꦢꦱ, ꦠꦁ ꦠꦷꦱꦸ ꦨꦮꦺꦱꦸ ꦄꦮꦏꦸꦗ꧀ꦗꦴꦤꦁ ꦱꦠ꧀ꦠꦴꦤꦁ ꦈꦠ꧀ꦠꦴꦤꦩꦸꦑꦨꦴꦮꦱ꧀ꦱ ꦥꦸꦧ꧀ꦧꦤꦶꦩꦶꦠ꧀ꦠꦁ. ꦪꦁ ꦄꦏ꧀ꦑꦷꦤꦶ ꦈꦩ꧀ꦩꦷꦭꦺꦠ꧀ꦮꦴ ꦥꦱ꧀ꦱꦤ꧀ꦠꦺꦴ ꦮꦶꦪ ꦄꦲꦺꦴꦱꦶ, ꦠꦁ ꦢꦶꦧ꧀ꦧꦕꦏ꧀ꦑꦸꦥꦛꦶꦭꦴꦨꦱ꧀ꦱ ꦥꦸꦧ꧀ꦧꦤꦶꦩꦶꦠ꧀ꦠꦁ. ꦪꦁ ꦪꦴꦮ ꦨꦮꦒ꧀ꦒꦴ ꦌꦏꦴꦭꦺꦴꦏꦁ ꦄꦲꦺꦴꦱꦶ, ꦠꦁ ꦄꦤꦴꦮꦫꦟꦚꦴꦟꦱ꧀ꦱ ꦥꦸꦧ꧀ꦧꦤꦶꦩꦶꦠ꧀ꦠꦁ. ꦱꦺꦱꦁ ꦥꦴꦭ꦳ꦶꦮꦱꦺꦤꦺꦮ ꦮꦺꦢꦶꦠꦧ꧀ꦧꦤ꧀ꦠꦶ.

꧗. ꦮꦱ꧀ꦱꦱꦸꦠ꧀ꦠꦮꦟ꧀ꦟꦤꦴ

꧑꧙꧗. ꦱꦠ꧀ꦠꦩꦺ ꦤꦺꦩꦶꦠ꧀ꦠꦴꦠꦶ ꦤꦶꦩꦶꦠ꧀ꦠꦥꦴꦜꦏꦴ. ꦠꦺꦗꦺꦴꦣꦴꦠꦸ ꦥꦏꦸꦥ꧀ꦥꦠꦷꦠꦶ ꦩꦲꦴꦄꦒ꧀ꦒꦶꦏ꧀ꦑꦤ꧀ꦣꦺꦴ ꦈꦥ꧀ꦥꦗ꧀ꦗꦠꦶ. ꦥꦴꦟꦶꦤꦴ ꦈꦢꦏꦁ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴꦠꦶ ꦈꦥ꧀ꦥꦤ꧀ꦤꦁ ꦈꦠꦸꦱꦩꦸꦛ꧀ꦜꦴꦤꦁ ꦈꦢꦏꦁ ꦠꦶꦪꦺꦴꦗꦤꦱꦠꦺꦤ ꦲꦠ꧀ꦡꦺꦤ ꦥꦛꦶꦒ꧀ꦒꦲꦺꦠ꧀ꦮꦴ. ꦥꦩꦠ꧀ꦠꦴ ꦲꦺꦴꦤ꧀ꦠꦷꦠꦶ ꦄꦠ꧀ꦠꦤꦺꦴ ꦏꦷꦭ꦳ꦴꦪ ꦥꦩꦠ꧀ꦠꦴ ꦲꦺꦴꦤ꧀ꦠꦶ ꦮꦶꦥ꧀ꦥꦮꦸꦛ꧀ꦜꦱꦠꦶꦤꦺꦴ. ꦠꦺꦱꦚ꧀ꦲꦶ ꦱꦏꦴꦪ ꦫꦠꦶꦪꦴ ‘‘ꦫꦩꦴꦩꦴ’’ꦠꦶ ꦕꦶꦠ꧀ꦠꦺ ꦈꦥ꧀ꦥꦤ꧀ꦤꦺ ꦄꦏꦴꦭꦺꦥꦶ ꦢꦺꦮꦺꦴ ꦮꦱ꧀ꦱꦠꦶ, ꦠꦢꦨꦴꦮꦺ ꦤ ꦮꦱ꧀ꦱꦠꦶ. ꦠꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ – ‘‘ꦤ ꦏꦴꦭꦮꦱ꧀ꦱ’’ꦤ꧀ꦠꦶ. ꦄꦛ꧀ꦜꦩꦤꦮꦩꦴꦤꦶ ꦈꦠ꧀ꦠꦴꦤꦠ꧀ꦡꦴꦤꦺꦮ.

꧑꧐. ꦤꦶꦱ꧀ꦱꦴꦫꦟꦷꦪꦱꦸꦠ꧀ꦠꦮꦟ꧀ꦟꦤꦴ

꧒꧐꧐. ꦢꦱꦩꦺ ꦤꦶꦱ꧀ꦱꦴꦫꦟꦷꦪꦴꦠꦶ ꦤꦶꦱ꧀ꦱꦛꦴ ꦮꦶꦱꦚ꧀ꦚꦸꦠ꧀ꦠꦴ. ꦣꦴꦠꦸꦪꦺꦴꦠꦶ ꦄꦠ꧀ꦠꦱꦸꦚ꧀ꦚꦱꦨꦴꦮꦴ. ꦏꦴꦩꦁ ꦩꦤꦱꦶꦏꦫꦺꦴꦠꦺꦴꦠꦶ ꦏꦴꦩꦁ ꦩꦤꦱꦶꦏꦫꦺꦴꦤ꧀ꦠꦱ꧀ꦱ, ꦄꦱꦸꦨꦗ꧀ꦙꦴꦤꦠꦺꦴ ꦮꦸꦛ꧀ꦜꦴꦪ ꦄꦒꦢꦁ ꦒꦲꦺꦠ꧀ꦮꦴ ꦮꦶꦱꦁ ꦮꦷꦩꦁꦱꦤ꧀ꦠꦺꦴ ꦮꦶꦪ ꦮꦷꦩꦁꦱꦤꦠ꧀ꦡꦁ ꦏꦴꦩꦴꦨꦶꦩꦸꦑꦁ ꦕꦶꦠ꧀ꦠꦁ ꦥꦺꦱꦺꦤ꧀ꦠꦱ꧀ꦱꦴꦠꦶ ꦄꦠ꧀ꦡꦺꦴ. ꦤ ꦥꦏ꧀ꦑꦤ꧀ꦢꦠꦷꦠꦶ ꦤꦥ꧀ꦥꦮꦶꦱꦠꦶ. ꦤꦥ꧀ꦥꦱꦷꦢꦠꦷꦠꦶ ꦥꦱꦴꦢꦁ ꦤꦴꦥꦗ꧀ꦗꦠꦶ. ꦤ ꦱꦤ꧀ꦠꦶꦛ꧀ꦜꦠꦷꦠꦶ ꦤꦥ꧀ꦥꦠꦶꦛ꧀ꦜꦲꦠꦶ. ꦤ ꦮꦶꦩꦸꦕ꧀ꦕꦠꦷꦠꦶ ꦤ ꦄꦣꦶꦩꦸꦕ꧀ꦕꦠꦶ. ꦪꦡꦴ ꦥꦤ ꦏꦸꦏ꧀ꦏꦸꦛꦥꦠ꧀ꦠꦁ ꦮꦴ ꦤ꧀ꦲꦴꦫꦸꦢꦢ꧀ꦢꦸꦭꦁ ꦮꦴ ꦄꦒ꧀ꦒꦶꦩ꧀ꦲꦶ ꦥꦏ꧀ꦑꦶꦠ꧀ꦠꦁ ꦥꦛꦶꦭꦷꦪꦠꦶ ꦥꦠꦶꦏꦸꦛꦠꦶ ꦥꦠꦶꦮꦛ꧀ꦛꦠꦶ ꦤ ꦱꦁꦥꦱꦴꦫꦷꦪꦠꦶ, ꦌꦮꦁ ꦥꦛꦶꦭꦷꦪꦠꦶ ꦤ ꦱꦁꦥꦱꦴꦫꦷꦪꦠꦶ. ꦤꦺꦏ꧀ꦑꦩ꧀ꦩꦁ ꦑꦺꦴ ꦥꦤꦴꦠꦶ ꦆꦣ ꦤꦺꦏ꧀ꦑꦩ꧀ꦩꦁ ꦤꦴꦩ ꦄꦱꦸꦨꦺꦱꦸ ꦥꦜꦩꦗ꧀ꦙꦴꦤꦁ, ꦠꦢꦱ꧀ꦱ ꦩꦤꦱꦶꦏꦫꦺꦴꦠꦺꦴ ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦶ. ꦠꦱ꧀ꦱ ꦠꦁ ꦕꦶꦠ꧀ꦠꦤ꧀ꦠꦶ ꦠꦱ꧀ꦱ ꦠꦁ ꦄꦱꦸꦨꦗ꧀ꦙꦴꦤꦕꦶꦠ꧀ꦠꦁ. ꦱꦸꦒꦠꦤ꧀ꦠꦶ ꦒꦺꦴꦕꦫꦺ ꦒꦠꦠ꧀ꦠꦴ ꦱꦸꦛ꧀ꦜꦸ ꦒꦠꦁ. ꦱꦸꦨꦴꦮꦶꦠꦤ꧀ꦠꦶ ꦄꦲꦴꦤꦨꦴꦒꦶꦪꦠ꧀ꦠꦴ ꦱꦸꦛ꧀ꦜꦸ ꦨꦴꦮꦶꦠꦁ. ꦱꦸꦮꦸꦛ꧀ꦜꦶꦠꦤ꧀ꦠꦶ ꦏꦴꦩꦠꦺꦴ ꦮꦸꦛ꧀ꦜꦶꦠꦁ. ꦱꦸꦮꦶꦩꦸꦠ꧀ꦠꦤ꧀ꦠꦶ ꦏꦴꦩꦺꦲꦶ ꦱꦸꦛ꧀ꦜꦸ ꦮꦶꦩꦸꦠ꧀ꦠꦁ. ꦏꦴꦩꦥꦕ꧀ꦕꦪꦴ ꦄꦴꦱꦮꦴ ꦤꦴꦩ ꦏꦴꦩꦲꦺꦠꦸꦏꦴ ꦕꦠ꧀ꦠꦴꦫꦺꦴ ꦄꦴꦱꦮꦴ. ꦮꦶꦓꦴꦠꦴꦠꦶ ꦢꦸꦏ꧀ꦑꦴ. ꦥꦫꦶꦭ꦳ꦴꦲꦴꦠꦶ ꦏꦴꦩꦫꦴꦒꦥꦫꦶꦭ꦳ꦴꦲꦴ. ꦤ ꦱꦺꦴ ꦠꦁ ꦮꦺꦢꦤꦁ ꦮꦺꦢꦶꦪꦠꦷꦠꦶ ꦱꦺꦴ ꦠꦁ ꦏꦴꦩꦮꦺꦢꦤꦁ ꦮꦶꦓꦴꦠꦥꦫꦶꦭ꦳ꦴꦲꦮꦺꦢꦤꦚ꧀ꦕ ꦤ ꦮꦺꦢꦶꦪꦠꦶ. ꦆꦢꦩꦏ꧀ꦑꦴꦠꦁ ꦏꦴꦩꦴꦤꦁ ꦤꦶꦱ꧀ꦱꦫꦟꦤ꧀ꦠꦶ ꦆꦢꦁ ꦄꦱꦸꦨꦗ꧀ꦙꦴꦤꦁ ꦏꦴꦩꦺꦲꦶ ꦤꦶꦱ꧀ꦱꦛꦠ꧀ꦠꦴ ꦏꦴꦩꦴꦤꦁ ꦤꦶꦱ꧀ꦱꦫꦟꦤ꧀ꦠꦶ ꦄꦏ꧀ꦑꦴꦠꦁ. ꦪꦺꦴ ꦥꦤ ꦠꦁ ꦙꦴꦤꦁ ꦥꦴꦢꦏꦁ ꦏꦠ꧀ꦮꦴ ꦱꦔ꧀ꦑꦴꦫꦺ ꦱꦩ꧀ꦩꦱꦤ꧀ꦠꦺꦴ ꦠꦠꦶꦪꦩꦒ꧀ꦒꦁ ꦥꦠ꧀ꦮꦴ ꦄꦤꦴꦒꦴꦩꦶꦦꦭꦺꦤ ꦤꦶꦧ꧀ꦧꦴꦤꦁ ꦢꦶꦱ꧀ꦮꦴ ‘‘ꦥꦸꦤ ꦏꦴꦩꦴ ꦤꦴꦩ ꦤꦠ꧀ꦡꦷ’’ꦠꦶ ꦗꦴꦤꦴꦠꦶ. ꦠꦱ꧀ꦱ ꦕꦶꦠ꧀ꦠꦁ ꦄꦕ꧀ꦕꦤ꧀ꦠꦤꦶꦱ꧀ꦱꦫꦟꦩꦺꦮ. ꦱꦺꦱꦥꦢꦺꦱꦸꦥꦶ ꦌꦱꦺꦮ ꦤꦪꦺꦴ.

ꦄꦪꦁ ꦥꦤ ꦮꦶꦱꦺꦱꦺꦴ – ꦢꦸꦠꦶꦪꦮꦴꦫꦺ ꦩꦺꦠ꧀ꦠꦴꦙꦴꦤꦴꦤꦶ ꦧ꧀ꦪꦴꦥꦴꦢꦱ꧀ꦱ ꦤꦶꦱ꧀ꦱꦫꦟꦁ ꦤꦴꦩ. ꦠꦠꦶꦪꦮꦴꦫꦺ ꦏꦫꦸꦟꦴꦙꦴꦤꦴꦤꦶ ꦮꦶꦲꦶꦁꦱꦴꦪ ꦤꦶꦱ꧀ꦱꦫꦟꦁ ꦤꦴꦩ. ꦕꦠꦸꦠ꧀ꦡꦮꦴꦫꦺ ꦄꦫꦹꦥꦗ꧀ꦙꦴꦤꦴꦤꦶ ꦫꦹꦥꦴꦤꦁ ꦤꦶꦱ꧀ꦱꦫꦟꦁ ꦤꦴꦩ. ꦄꦕ꧀ꦕꦤ꧀ꦠꦤꦶꦱ꧀ꦱꦫꦟꦚ꧀ꦕꦺꦠ꧀ꦡ ꦄꦫꦲꦠ꧀ꦠꦦꦭꦁ ꦪꦺꦴꦗꦺꦠꦧ꧀ꦧꦁ. ꦥꦚ꧀ꦕꦩꦮꦴꦫꦺ ꦱꦏ꧀ꦏꦴꦪꦁ ꦩꦤꦱꦶꦏꦫꦺꦴꦠꦺꦴꦠꦶ ꦱꦸꦢ꧀ꦣꦱꦔ꧀ꦑꦴꦫꦺ ꦥꦫꦶꦒ꧀ꦒꦟ꧀ꦲꦶꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦱ꧀ꦱ ꦱꦸꦏ꧀ꦑꦮꦶꦥꦱ꧀ꦱꦏꦱ꧀ꦱ ꦦꦭꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦪ ꦮꦷꦩꦁꦱꦤꦠ꧀ꦡꦁ ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴꦨꦶꦩꦸꦑꦁ ꦕꦶꦠ꧀ꦠꦁ ꦥꦺꦱꦺꦤ꧀ꦠꦱ꧀ꦱ. ꦆꦢꦩꦏ꧀ꦑꦴꦠꦁ ꦱꦏ꧀ꦏꦴꦪꦱ꧀ꦱ ꦤꦶꦱ꧀ꦱꦫꦟꦤ꧀ꦠꦶ ꦆꦢꦁ ꦄꦫꦲꦠ꧀ꦠꦩꦒ꧀ꦒꦺꦤ ꦕ ꦦꦭꦺꦤ ꦕ ꦤꦶꦧ꧀ꦧꦴꦤꦁ ꦢꦶꦱ꧀ꦮꦴ ꦜꦶꦠꦱ꧀ꦱ ꦨꦶꦏ꧀ꦑꦸꦤꦺꦴ ‘‘ꦥꦸꦤ ꦱꦏ꧀ꦏꦴꦪꦺꦴ ꦤꦠ꧀ꦡꦷ’’ꦠꦶ ꦈꦥ꧀ꦥꦤ꧀ꦤꦁ ꦄꦫꦲꦠ꧀ꦠꦦꦭꦱꦩꦴꦥꦠ꧀ꦠꦶꦕꦶꦠ꧀ꦠꦁ ꦱꦏ꧀ꦏꦴꦪꦱ꧀ꦱ ꦤꦶꦱ꧀ꦱꦫꦟꦤ꧀ꦠꦶ ꦄꦏ꧀ꦑꦴꦠꦁ. ꦆꦢꦴꦤꦶ ꦌꦮꦁ ꦱꦏ꧀ꦏꦴꦪꦤꦶꦱ꧀ꦱꦫꦟꦁ ꦤꦶꦫꦺꦴꦣꦁ ꦥꦠ꧀ꦮꦴ ꦜꦶꦠꦱ꧀ꦱ ꦑꦷꦟꦴꦱꦮꦱ꧀ꦱ ꦮꦟ꧀ꦟꦁ ꦏꦡꦺꦤ꧀ꦠꦺꦴ ꦠꦱ꧀ꦱ ꦏꦴꦩꦤꦤ꧀ꦢꦷꦥꦶ ꦤꦴꦤꦸꦱꦺꦠꦷꦠꦶꦄꦴꦢꦶꦩꦴꦲ. ꦠꦠ꧀ꦡ ꦤꦴꦤꦸꦱꦺꦠꦷꦠꦶ ꦤ ꦤꦶꦧ꧀ꦧꦠ꧀ꦠꦠꦶ. ꦄꦤꦤꦸꦱꦪꦴꦠꦶ ꦄꦤꦶꦧ꧀ꦧꦠ꧀ꦠꦶꦪꦴ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮꦴꦠꦶ.

ꦧ꧀ꦫꦴꦲ꧀ꦩꦟꦮꦒ꧀ꦒꦺꦴ ꦥꦚ꧀ꦕꦩꦺꦴ.