(꧑꧔) ꧔. ꦫꦴꦗꦮꦒ꧀ꦒꦺꦴ

꧑. ꦥꦜꦩꦕꦏ꧀ꦏꦴꦤꦸꦮꦠ꧀ꦠꦤꦱꦸꦠ꧀ꦠꦮꦟ꧀ꦟꦤꦴ

꧑꧓꧑. ꦕꦠꦸꦠ꧀ꦡꦱ꧀ꦱ ꦥꦜꦩꦺ ꦣꦩ꧀ꦩꦺꦤꦴꦠꦶ ꦢꦱꦏꦸꦱꦭꦣꦩ꧀ꦩꦺꦤ. ꦕꦏ꧀ꦏꦤ꧀ꦠꦶ ꦄꦴꦟꦴꦕꦏ꧀ꦏꦁ. ꦄꦠ꧀ꦡꦚ꧀ꦚꦹꦠꦶ ꦫꦗ꧀ꦗꦠ꧀ꦡꦁ ꦗꦴꦤꦴꦠꦶ. ꦣꦩ꧀ꦩꦚ꧀ꦚꦹꦠꦶ ꦥꦮꦺꦟꦶꦣꦩ꧀ꦩꦁ ꦗꦴꦤꦴꦠꦶ. ꦩꦠ꧀ꦠꦚ꧀ꦚꦹꦠꦶ ꦢꦟ꧀ꦝꦺ ꦮꦴ ꦧꦭꦩ꧀ꦲꦶ ꦮꦴ ꦥꦩꦴꦟꦁ ꦗꦴꦤꦴꦠꦶ. ꦏꦴꦭꦚ꧀ꦚꦹꦠꦶ ꦫꦗ꧀ꦗꦱꦸꦑꦴꦤꦸꦨꦮꦤꦏꦴꦭꦁ, ꦮꦶꦤꦶꦕ꧀ꦖꦪꦏꦫꦟꦏꦴꦭꦁ, ꦗꦤꦥꦢꦕꦴꦫꦶꦏꦴꦏꦴꦭꦚ꧀ꦕ ꦗꦴꦤꦴꦠꦶ. ꦥꦫꦶꦱꦚ꧀ꦚꦹꦠꦶ ꦄꦪꦁ ꦥꦫꦶꦱꦴ ꦑꦠ꧀ꦠꦶꦪꦥꦫꦶꦱꦴ, ꦄꦪꦁ ꦧ꧀ꦫꦴꦲ꧀ꦩꦟꦮꦺꦱ꧀ꦱꦱꦸꦢ꧀ꦢꦱꦩꦟꦥꦫꦶꦱꦴꦠꦶ ꦗꦴꦤꦴꦠꦶ.

ꦠꦡꦴꦒꦠꦮꦴꦫꦺ ꦄꦠ꧀ꦡꦚ꧀ꦚꦹꦠꦶ ꦥꦚ꧀ꦕ ꦄꦠ꧀ꦡꦺ ꦗꦴꦤꦴꦠꦶ. ꦣꦩ꧀ꦩꦚ꧀ꦚꦹꦠꦶ ꦕꦠ꧀ꦠꦴꦫꦺꦴ ꦣꦩ꧀ꦩꦺ ꦗꦴꦤꦴꦠꦶ. ꦩꦠ꧀ꦠꦚ꧀ꦚꦹꦠꦶ ꦕꦠꦹꦱꦸ ꦥꦕ꧀ꦕꦪꦺꦱꦸ ꦥꦛꦶꦒ꧀ꦒꦲꦟꦥꦫꦶꦨꦺꦴꦒꦩꦠ꧀ꦠꦁ ꦗꦴꦤꦴꦠꦶ. ꦏꦴꦭꦚ꧀ꦚꦹꦠꦶ ꦄꦪꦁ ꦏꦴꦭꦺꦴ ꦥꦛꦶꦱꦭ꧀ꦭꦷꦤꦱ꧀ꦱ, ꦄꦪꦁ ꦱꦩꦴꦥꦠ꧀ꦠꦶꦪꦴ, ꦄꦪꦁ ꦣꦩ꧀ꦩꦢꦺꦱꦤꦴꦪ, ꦄꦪꦁ ꦗꦤꦥꦢꦕꦴꦫꦶꦏꦴꦪꦴꦠꦶ ꦌꦮꦁ ꦏꦴꦭꦁ ꦗꦴꦤꦴꦠꦶ. ꦥꦫꦶꦱꦚ꧀ꦚꦹꦠꦶ ꦄꦪꦁ ꦥꦫꦶꦱꦴ ꦑꦠ꧀ꦠꦶꦪꦥꦫꦶꦱꦴ…ꦥꦺ… ꦄꦪꦁ ꦱꦩꦟꦥꦫꦶꦱꦴꦠꦶ ꦗꦴꦤꦴꦠꦶ. ꦄꦤꦸꦠ꧀ꦠꦫꦤ꧀ꦠꦶ ꦤꦮꦲꦶ ꦭꦺꦴꦏꦸꦠ꧀ꦠꦫꦣꦩ꧀ꦩꦺꦲꦶ ꦄꦤꦸꦠ꧀ꦠꦫꦁ. ꦣꦩ꧀ꦩꦕꦏ꧀ꦏꦤ꧀ꦠꦶ ꦱꦺꦛ꧀ꦜꦕꦏ꧀ꦏꦁ.

꧒. ꦢꦸꦠꦶꦪꦕꦏ꧀ꦏꦴꦤꦸꦮꦠ꧀ꦠꦤꦱꦸꦠ꧀ꦠꦮꦟ꧀ꦟꦤꦴ

꧑꧓꧒. ꦢꦸꦠꦶꦪꦺ ꦥꦶꦠꦫꦴ ꦥꦮꦠ꧀ꦠꦶꦠꦁ ꦕꦏ꧀ꦏꦤ꧀ꦠꦶ ꦕꦏ꧀ꦏꦮꦠ꧀ꦠꦶꦩ꧀ꦲꦶ ꦥꦧ꧀ꦧꦗꦶꦠꦺ ꦮꦴ ꦏꦴꦭꦏꦠꦺ ꦮꦴ ꦕꦏ꧀ꦏꦫꦠꦤꦁ ꦱꦠ꧀ꦠꦴꦲꦩꦠ꧀ꦠꦁ ꦜꦠ꧀ꦮꦴ ꦄꦤ꧀ꦠꦫꦣꦴꦪꦠꦶ, ꦏꦡꦩꦺꦱ ꦠꦁ ꦄꦤꦸꦥ꧀ꦥꦮꦠ꧀ꦠꦺꦠꦶ ꦤꦴꦩ? ꦥꦶꦠꦸ ꦥꦮꦺꦟꦶꦪꦁ ꦜꦠ꧀ꦮꦴ ꦕꦏ꧀ꦏꦮꦠ꧀ꦠꦶꦮꦠ꧀ꦠꦁ ꦥꦹꦫꦺꦠ꧀ꦮꦴ ꦕꦏ꧀ꦏꦮꦠ꧀ꦠꦶꦫꦗ꧀ꦗꦁ ꦏꦴꦫꦺꦤ꧀ꦠꦺꦴꦥꦶ ꦥꦶꦠꦫꦴ ꦥꦮꦠ꧀ꦠꦶꦠꦩꦺꦮ ꦄꦤꦸꦥ꧀ꦥꦮꦠ꧀ꦠꦺꦠꦶ ꦤꦴꦩ.

꧓. ꦣꦩ꧀ꦩꦫꦴꦗꦴꦱꦸꦠ꧀ꦠꦮꦟ꧀ꦟꦤꦴ

꧑꧓꧓. ꦠꦠꦶꦪꦁ ꦠꦶꦏꦤꦶꦥꦴꦠꦺ ꦮꦸꦠ꧀ꦠꦤꦪꦩꦺꦮ. ꦱꦺꦮꦶꦠꦧ꧀ꦧꦴꦱꦺꦮꦶꦠꦧ꧀ꦧꦺ ꦥꦤꦺꦠ꧀ꦡ ꦥꦕ꧀ꦖꦶꦩꦥꦢꦢ꧀ꦮꦪꦩꦺꦮ ꦮꦶꦱꦺꦱꦺꦴ. ꦠꦠ꧀ꦡ ꦱꦩ꧀ꦩꦴꦄꦴꦗꦷꦮꦺꦴ ꦱꦺꦮꦶꦠꦧ꧀ꦧꦺꦴ, ꦩꦶꦕ꧀ꦖꦴꦄꦴꦗꦷꦮꦺꦴ ꦤ ꦱꦺꦮꦶꦠꦧ꧀ꦧꦺꦴ. ꦱꦥ꧀ꦥꦴꦪꦺꦴ ꦒꦴꦩꦤꦶꦒꦩꦺꦴ ꦱꦺꦮꦶꦠꦧ꧀ꦧꦺꦴ, ꦄꦱꦥ꧀ꦥꦴꦪꦺꦴ ꦤ ꦱꦺꦮꦶꦠꦧ꧀ꦧꦺꦴ.

꧔. ꦪꦱ꧀ꦱꦁꦢꦶꦱꦁꦱꦸꦠ꧀ꦠꦮꦟ꧀ꦟꦤꦴ

꧑꧓꧔. ꦕꦠꦸꦠ꧀ꦡꦺ ꦈꦨꦠꦺꦴꦠꦶ ꦢ꧀ꦮꦷꦲꦶꦥꦶ ꦥꦏ꧀ꦑꦺꦲꦶ. ꦩꦴꦠꦶꦠꦺꦴ ꦕ ꦥꦶꦠꦶꦠꦺꦴ ꦕꦴꦠꦶ ꦪꦱ꧀ꦱ ꦲꦶ ꦩꦴꦠꦴ ꦑꦠ꧀ꦠꦶꦪꦴ, ꦩꦴꦠꦸꦩꦴꦠꦴ ꦑꦠ꧀ꦠꦶꦪꦴ, ꦠꦱ꧀ꦱꦴꦥꦶ ꦩꦴꦠꦴ ꦑꦠ꧀ꦠꦶꦪꦴ. ꦥꦶꦠꦴ ꦑꦠ꧀ꦠꦶꦪꦺꦴ, ꦥꦶꦠꦸꦥꦶꦠꦴ ꦑꦠ꧀ꦠꦶꦪꦺꦴ, ꦠꦱ꧀ꦱꦥꦶ ꦥꦶꦠꦴ ꦑꦠ꧀ꦠꦶꦪꦺꦴ. ꦱꦺꦴ ꦈꦨꦠꦺꦴ ꦱꦸꦗꦴꦠꦺꦴ ꦩꦴꦠꦶꦠꦺꦴ ꦕ ꦥꦶꦠꦶꦠꦺꦴ ꦕ. ꦱꦁꦱꦸꦢ꧀ꦣꦒꦲꦟꦶꦏꦺꦴꦠꦶ ꦱꦁꦱꦸꦢ꧀ꦣꦴꦪ ꦩꦴꦠꦸꦏꦸꦕ꧀ꦖꦶꦪꦴ ꦱꦩꦤ꧀ꦤꦴꦒꦠꦺꦴ. ‘‘ꦱꦩꦮꦺꦥꦴꦏꦶꦤꦶꦪꦴ ꦒꦲꦟꦶꦪꦴ’’ꦠꦶ ꦌꦠ꧀ꦡ ꦥꦤ ꦏꦩ꧀ꦩꦗꦠꦺꦗꦺꦴꦣꦴꦠꦸ ꦒꦲꦟꦷꦠꦶ ꦮꦸꦕ꧀ꦕꦠꦶ. ꦪꦴꦮ ꦱꦠ꧀ꦠꦩꦴ ꦥꦶꦠꦴꦩꦲꦪꦸꦒꦴꦠꦶ ꦌꦠ꧀ꦡ ꦥꦶꦠꦸꦥꦶꦠꦴ ꦥꦶꦠꦴꦩꦲꦺꦴ, ꦥꦶꦠꦴꦩꦲꦱ꧀ꦱ ꦪꦸꦒꦁ ꦥꦶꦠꦴꦩꦲꦪꦸꦒꦁ. ꦪꦸꦒꦤ꧀ꦠꦶ ꦄꦴꦪꦸꦥ꧀ꦥꦩꦴꦟꦁ ꦮꦸꦕ꧀ꦕꦠꦶ. ꦄꦨꦶꦭꦴꦥꦩꦠ꧀ꦠꦩꦺꦮ ꦕꦺꦠꦁ, ꦄꦠ꧀ꦡꦠꦺꦴ ꦥꦤ ꦥꦶꦠꦴꦩꦲꦺꦴꦪꦺꦮ ꦥꦶꦠꦴꦩꦲꦪꦸꦒꦁ. ꦠꦠꦺꦴ ꦈꦢ꧀ꦣꦁ ꦱꦧ꧀ꦧꦺꦥꦶ ꦥꦸꦧ꧀ꦧꦥꦸꦫꦶꦱꦴ ꦥꦶꦠꦴꦩꦲꦒ꧀ꦒꦲꦟꦺꦤꦺꦮ ꦒꦲꦶꦠꦴ. ꦌꦮꦁ ꦪꦴꦮ ꦱꦠ꧀ꦠꦩꦺꦴ ꦥꦸꦫꦶꦱꦺꦴ, ꦠꦴꦮ ꦱꦁꦱꦸꦢ꧀ꦣꦒꦲꦟꦶꦏꦺꦴ, ꦄꦡ ꦮꦴ ꦄꦏ꧀ꦑꦶꦠ꧀ꦠꦺꦴ ꦄꦤꦸꦥꦏ꧀ꦏꦸꦛ꧀ꦜꦺꦴ ꦗꦴꦠꦶꦮꦴꦢꦺꦤꦴꦠꦶ ꦢꦱ꧀ꦱꦺꦠꦶ. ꦄꦏ꧀ꦑꦶꦠ꧀ꦠꦺꦴꦠꦶ ‘‘ꦄꦥꦤꦺꦡ ꦌꦠꦁ, ꦏꦶꦁ ꦆꦩꦶꦤꦴ’’ꦠꦶ ꦌꦮꦁ ꦄꦏ꧀ꦑꦶꦠ꧀ꦠꦺꦴ ꦄꦤꦮꦏ꧀ꦑꦶꦠ꧀ꦠꦺꦴ. ꦄꦤꦸꦥꦏ꧀ꦏꦸꦛ꧀ꦜꦺꦴꦠꦶ ꦤ ꦈꦥꦏ꧀ꦏꦸꦛ꧀ꦜꦺꦴ ꦤ ꦄꦏ꧀ꦏꦺꦴꦱꦁ ꦮꦴ ꦤꦶꦤ꧀ꦢꦁ ꦮꦴ ꦥꦠ꧀ꦠꦥꦸꦧ꧀ꦧꦺꦴ. ꦏꦺꦤ ꦏꦴꦫꦟꦺꦤꦴꦠꦶ? ꦗꦴꦠꦶꦮꦴꦢꦺꦤ, ‘‘ꦆꦠꦶꦥꦶ ꦲꦷꦤꦗꦴꦠꦶꦏꦺꦴ ꦌꦱꦺꦴ’’ꦠꦶ ꦌꦮꦫꦹꦥꦺꦤ ꦮꦕꦤꦺꦤꦴꦠꦶ ꦄꦠ꧀ꦡꦺꦴ.

ꦄꦝ꧀ꦞꦺꦴꦠꦶꦄꦴꦢꦷꦱꦸ ꦪꦺꦴ ꦏꦺꦴꦕꦶ ꦄꦠ꧀ꦠꦤꦺꦴ ꦱꦤ꧀ꦠꦏꦺꦤ ꦮꦶꦨꦮꦺꦤ ꦄꦝ꧀ꦞꦺꦴ ꦲꦺꦴꦠꦶ. ꦆꦣ ꦥꦤ ꦤ ꦏꦺꦮꦭꦁ ꦄꦝ꧀ꦞꦺꦴꦪꦺꦮ, ꦩꦲꦢ꧀ꦣꦤꦺꦴ ꦩꦲꦠꦴ ꦄꦥꦫꦶꦩꦴꦟꦱꦔ꧀ꦑꦺꦤ ꦣꦤꦺꦤ ꦱꦩꦤ꧀ꦤꦴꦒꦠꦺꦴꦠꦶ ꦄꦠ꧀ꦡꦺꦴ. ꦥꦚ꧀ꦕꦏꦴꦩꦒꦸꦟꦮꦱꦺꦤ ꦩꦲꦤ꧀ꦠꦴ ꦈꦭ꦳ꦴꦫꦴ ꦨꦺꦴꦒꦴ ꦄꦱ꧀ꦱꦴꦠꦶ ꦩꦲꦴꦨꦺꦴꦒꦺꦴ. ꦥꦫꦶꦥꦸꦟ꧀ꦟꦏꦺꦴꦱꦏꦺꦴꦛ꧀ꦜꦴꦒꦴꦫꦺꦴꦠꦶ ꦏꦺꦴꦱꦺꦴ ꦮꦸꦕ꧀ꦕꦠꦶ ꦨꦟ꧀ꦝꦴꦒꦴꦫꦁ, ꦤꦶꦢꦲꦶꦠ꧀ꦮꦴ ꦜꦥꦶꦠꦺꦤ ꦣꦤꦺꦤ ꦥꦫꦶꦥꦸꦟ꧀ꦟꦏꦺꦴꦱꦺꦴ, ꦣꦚ꧀ꦚꦺꦤ ꦕ ꦥꦫꦶꦥꦸꦟ꧀ꦟꦏꦺꦴꦛ꧀ꦜꦴꦒꦴꦫꦺꦴꦠꦶ ꦄꦠ꧀ꦡꦺꦴ. ꦄꦡ ꦮꦴ ꦕꦠꦸꦧ꧀ꦧꦶꦣꦺꦴ ꦏꦺꦴꦱꦺꦴ ꦲꦠ꧀ꦡꦷ ꦄꦱ꧀ꦱꦴ ꦫꦡꦴ ꦫꦛ꧀ꦜꦤ꧀ꦠꦶ, ꦠꦶꦮꦶꦣꦁ ꦏꦺꦴꦛ꧀ꦜꦴꦒꦴꦫꦁ ꦣꦤꦏꦺꦴꦛ꧀ꦜꦴꦒꦴꦫꦁ ꦣꦚ꧀ꦚꦏꦺꦴꦛ꧀ꦜꦴꦒꦴꦫꦁ ꦮꦠ꧀ꦡꦏꦺꦴꦛ꧀ꦜꦴꦒꦴꦫꦤ꧀ꦠꦶ. ꦠꦁ ꦱꦧ꧀ꦧꦩ꧀ꦥꦶ ꦥꦫꦶꦥꦸꦟ꧀ꦟꦩꦱ꧀ꦱꦴꦠꦶ ꦥꦫꦶꦥꦸꦟ꧀ꦟꦏꦺꦴꦱꦏꦺꦴꦛ꧀ꦜꦴꦒꦴꦫꦺꦴ. ꦄꦱ꧀ꦱꦮꦴꦪꦴꦠꦶ ꦏꦱ꧀ꦱꦕꦶ ꦧꦲꦸꦩ꧀ꦥꦶ ꦣꦤꦁ ꦢꦺꦤ꧀ꦠꦱ꧀ꦱ ꦱꦺꦤꦴ ꦤ ꦱꦸꦟꦴꦠꦶ, ꦱꦴ ꦄꦤꦱ꧀ꦱꦮꦴ ꦤꦴꦩ ꦲꦺꦴꦠꦶ. ꦏꦱ꧀ꦱꦕꦶ ꦄꦢꦺꦤ꧀ꦠꦱ꧀ꦱꦴꦥꦶ ꦱꦸꦟꦴꦠꦶꦪꦺꦮ, ꦄꦪꦁ ꦄꦱ꧀ꦱꦮꦴ ꦤꦴꦩ. ꦎꦮꦴꦢꦥꦛꦶꦏꦫꦴꦪꦴꦠꦶ ‘‘ꦆꦢꦁ ꦮꦺꦴ ꦏꦠ꧀ꦠꦧ꧀ꦧ, ꦆꦢꦁ ꦤ ꦏꦠ꧀ꦠꦧ꧀ꦧ’’ꦤ꧀ꦠꦶ ꦢꦶꦤ꧀ꦤꦎꦮꦴꦢꦏꦫꦴꦪ. ꦥꦟ꧀ꦝꦶꦠꦺꦴꦠꦶ ꦥꦟ꧀ꦝꦶꦕ꧀ꦕꦺꦤ ꦱꦩꦤ꧀ꦤꦴꦒꦠꦺꦴ. ꦧ꧀ꦪꦠ꧀ꦠꦺꦴꦠꦶ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪꦺꦤ ꦪꦸꦠ꧀ꦠꦺꦴ. ꦩꦺꦣꦴꦮꦷꦠꦶ ꦜꦴꦤꦸꦥ꧀ꦥꦠ꧀ꦠꦶꦏꦥꦚ꧀ꦚꦴꦪ ꦱꦩꦤ꧀ꦤꦴꦒꦠꦺꦴ. ꦥꦛꦶꦧꦭꦺꦴꦠꦶ ꦱꦩꦠ꧀ꦡꦺꦴ. ꦄꦠ꧀ꦡꦺ ꦕꦶꦤ꧀ꦠꦺꦠꦸꦤ꧀ꦠꦶ ꦮꦝ꧀ꦞꦶꦄꦠ꧀ꦡꦺ ꦕꦶꦤ꧀ꦠꦺꦠꦸꦁ. ꦱꦺꦴ ꦲꦶ ꦥꦕ꧀ꦕꦸꦥ꧀ꦥꦤ꧀ꦤꦄꦠ꧀ꦡꦮꦱꦺꦤꦺꦮ ‘‘ꦄꦠꦷꦠꦺꦥꦶ ꦌꦮꦁ ꦄꦲꦺꦱꦸꦁ, ꦄꦤꦴꦒꦠꦺꦥꦶ ꦌꦮꦁ ꦨꦮꦶꦱ꧀ꦱꦤ꧀ꦠꦷ’’ꦠꦶ ꦕꦶꦤ꧀ꦠꦺꦠꦶ. ꦮꦶꦗꦶꦠꦴꦮꦷꦤꦤ꧀ꦠꦶ ꦮꦶꦗꦶꦠꦮꦶꦗꦪꦴꦤꦁ, ꦩꦲꦤ꧀ꦠꦺꦤ ꦮꦴ ꦮꦶꦗꦪꦺꦤ ꦱꦩꦤ꧀ꦤꦴꦒꦠꦴꦤꦁ. ꦮꦶꦩꦸꦠ꧀ꦠꦕꦶꦠ꧀ꦠꦴꦤꦤ꧀ꦠꦶ ꦥꦚ꧀ꦕꦲꦶ ꦮꦶꦩꦸꦠ꧀ꦠꦷꦲꦶ ꦮꦶꦩꦸꦠ꧀ꦠꦩꦴꦤꦱꦴꦤꦁ.

꧕-꧖. ꦥꦠ꧀ꦡꦤꦴꦱꦸꦠ꧀ꦠꦢ꧀ꦮꦪꦮꦟ꧀ꦟꦤꦴ

꧑꧓꧕-꧑꧓꧖. ꦥꦚ꧀ꦕꦩꦺ ꦤꦺꦒꦩꦗꦴꦤꦥꦢꦱ꧀ꦱꦴꦠꦶ ꦤꦶꦒꦩꦮꦴꦱꦶꦤꦺꦴ ꦕ ꦫꦛ꧀ꦜꦮꦴꦱꦶꦤꦺꦴ ꦕ ꦗꦤꦱ꧀ꦱ. ꦲꦠ꧀ꦡꦶꦱ꧀ꦩꦶꦤ꧀ꦠꦶꦄꦴꦢꦷꦲꦶ ꦲꦠ꧀ꦡꦶꦄꦱ꧀ꦱꦫꦡꦡꦫꦸꦣꦤꦸꦭꦺꦑꦩꦸꦢ꧀ꦢꦴꦒꦟꦤꦴꦢꦷꦤꦶ ꦱꦺꦴꦭ꦳ꦱ ꦩꦲꦴꦱꦶꦥ꧀ꦥꦴꦤꦶ ꦢꦱ꧀ꦱꦶꦠꦴꦤꦶ. ꦄꦤꦮꦪꦺꦴꦠꦶ ꦱꦩꦠ꧀ꦡꦺꦴ ꦥꦫꦶꦥꦸꦟ꧀ꦟꦺꦴ. ꦱꦺꦱꦩꦺꦠ꧀ꦡ ꦲꦺꦛ꧀ꦜꦴ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦖꦛ꧀ꦜꦺ ꦎꦥꦫꦗ꧀ꦗꦤ꧀ꦠꦶ ꦈꦥꦫꦴꦗꦨꦴꦮꦁ.

꧗. ꦄꦥ꧀ꦥꦁꦱꦸꦥꦠꦶꦱꦸꦠ꧀ꦠꦮꦟ꧀ꦟꦤꦴ

꧑꧓꧗. ꦱꦠ꧀ꦠꦩꦺ ꦥꦸꦫꦶꦱꦴꦣꦶꦥ꧀ꦥꦴꦪꦴꦠꦶ ꦄꦱ꧀ꦱꦢ꧀ꦣꦩ꧀ꦩꦮꦱꦺꦤ ꦥꦸꦫꦶꦱꦺ ꦈꦥ꧀ꦥꦤ꧀ꦤꦴꦣꦶꦥ꧀ꦥꦴꦪꦴ ꦥꦸꦫꦶꦱꦗ꧀ꦙꦴꦱꦪꦴ. ꦄꦴꦢꦴꦤꦴꦣꦶꦥ꧀ꦥꦴꦪꦺꦴꦠꦶ ꦆꦢꦴꦤꦶ ꦒꦲꦺꦠꦸꦁ ꦱꦏ꧀ꦑꦶꦱ꧀ꦱꦴꦩꦶ, ꦆꦢꦴꦤꦶ ꦱꦏ꧀ꦑꦶꦱ꧀ꦱꦴꦩꦷꦠꦶ ꦌꦮꦁ ꦒꦲꦟꦴꦣꦶꦥ꧀ꦥꦴꦪꦺꦴ. ꦮꦶꦱꦁꦪꦺꦴꦒꦴꦣꦶꦥ꧀ꦥꦴꦪꦺꦴꦠꦶ ꦆꦢꦴꦤꦶ ꦤꦶꦧ꧀ꦧꦴꦤꦁ ꦥꦴꦥꦸꦟꦶꦱ꧀ꦱꦴꦩꦶ, ꦆꦢꦴꦤꦶ ꦥꦴꦥꦸꦟꦶꦱ꧀ꦱꦴꦩꦷꦠꦶ ꦌꦮꦁ ꦤꦶꦧ꧀ꦧꦴꦤꦗ꧀ꦙꦴꦱꦪꦺꦴ.

꧘. ꦨꦠ꧀ꦠꦴꦢꦏꦱꦸꦠ꧀ꦠꦮꦟ꧀ꦟꦤꦴ

꧑꧓꧘. ꦄꦛ꧀ꦜꦩꦺ ꦨꦠ꧀ꦠꦴꦢꦏꦺꦴꦠꦶ ꦨꦠ꧀ꦠꦏ꧀ꦑꦴꦢꦏꦺꦴ, ꦧꦲꦸꦨꦠ꧀ꦠꦨꦸꦚ꧀ꦗꦺꦴꦠꦶ ꦄꦠ꧀ꦡꦺꦴ. ꦎꦏꦴꦱꦦꦫꦟꦺꦴꦠꦶ ꦎꦏꦴꦱꦁ ꦦꦫꦶꦠ꧀ꦮꦴ ꦄꦚ꧀ꦚꦺꦱꦁ ꦱꦩ꧀ꦧꦴꦣꦁ ꦏꦠ꧀ꦮꦴ ꦜꦴꦤꦺꦤ ꦎꦏꦴꦱꦦꦫꦟꦺꦴ. ꦠꦠ꧀ꦡ ꦠꦠ꧀ꦡ ꦭꦟ꧀ꦝꦁ ꦱꦴꦫꦺꦠꦶ ꦥꦴꦠꦺꦠꦷꦠꦶ ꦭꦟ꧀ꦝꦱꦴꦫꦟꦺꦴ. ꦌꦠ꧀ꦠꦏꦴ ꦲꦠ꧀ꦡꦷꦠꦶ ꦒꦟꦤꦏꦴꦭꦺ ꦱꦭꦴꦏꦁ ꦒꦟ꧀ꦲꦴꦠꦷꦠꦶ ꦱꦭꦴꦏꦒ꧀ꦒꦴꦲꦷ. ꦤꦶꦱꦷꦢꦤꦱꦪꦤꦮꦱꦺꦤ ꦩꦚ꧀ꦕꦥꦷꦜꦁ ꦩꦢ꧀ꦢꦠꦷꦠꦶ ꦩꦚ꧀ꦕꦥꦷꦜꦩꦢ꧀ꦢꦤꦺꦴ. ꦨꦶꦏ꧀ꦑꦸꦒꦟꦤꦏꦴꦭꦺ ꦱꦭꦴꦏꦁ ꦒꦟ꧀ꦲꦴꦠꦷꦠꦶ ꦱꦭꦴꦏꦒ꧀ꦒꦴꦲꦷ.

꧙. ꦄꦏ꧀ꦑꦩꦱꦸꦠ꧀ꦠꦮꦟ꧀ꦟꦤꦴ

꧑꧓꧙. ꦤꦮꦩꦺ ꦲꦠ꧀ꦡꦶꦏꦴꦪꦤ꧀ꦠꦶ ꦲꦠ꧀ꦡꦶꦓꦛꦁ. ꦱꦺꦱꦺꦱꦸꦥꦶ ꦌꦱꦺꦮ ꦤꦪꦺꦴ. ꦱꦔ꧀ꦒꦴꦩꦺ ꦄꦮꦕꦫꦤ꧀ꦠꦷꦠꦶ ꦱꦔ꧀ꦒꦴꦩꦴꦮꦕꦫꦴ. ꦌꦏꦶꦱ꧀ꦱꦴ ꦮꦴ ꦠꦶꦟꦺꦴꦢꦏꦢꦠ꧀ꦠꦶꦪꦴ ꦮꦶꦩꦴꦤꦶꦠꦺꦴꦠꦶ ꦌꦏꦢꦶꦮꦱꦁ ꦌꦏꦺꦤ ꦠꦶꦟꦺꦴꦢꦏꦢꦴꦤꦺꦤ ꦮꦶꦩꦴꦤꦶꦠꦺꦴ, ꦌꦏꦢꦶꦮꦱꦩꦠ꧀ꦠꦁ ꦄꦭꦢ꧀ꦣꦠꦶꦟꦺꦴꦢꦏꦺꦴꦠꦶ ꦄꦠ꧀ꦡꦺꦴ. ꦆꦠꦺꦴ ꦥꦫꦩ꧀ꦥꦶ ꦌꦱꦺꦮ ꦤꦪꦺꦴ. ꦤ ꦱꦏ꧀ꦏꦺꦴꦠꦶ ꦕꦶꦠ꧀ꦠꦁ ꦱꦩꦴꦢꦲꦶꦠꦸꦤ꧀ꦠꦶ ꦄꦴꦫꦩ꧀ꦩꦟꦺ ꦕꦶꦠ꧀ꦠꦁ ꦱꦩ꧀ꦩꦴ ꦜꦥꦺꦠꦸꦁ ꦤ ꦱꦏ꧀ꦏꦺꦴꦠꦶ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦩꦺꦮ. ꦆꦩꦱ꧀ꦩꦶꦁ ꦥꦤ ꦱꦸꦠ꧀ꦠꦺ ꦮꦛ꧀ꦛꦮꦶꦮꦛ꧀ꦛꦁ ꦏꦡꦶꦠꦤ꧀ꦠꦶ ꦮꦺꦢꦶꦠꦧ꧀ꦧꦁ.

꧑꧐. ꦱꦺꦴꦠꦱꦸꦠ꧀ꦠꦮꦟ꧀ꦟꦤꦴ

꧑꧔꧐. ꦢꦱꦩꦺ ꦢꦸꦫꦸꦠ꧀ꦠꦴꦤꦤ꧀ꦠꦶ ꦤ ꦱꦸꦛ꧀ꦜꦸ ꦮꦸꦠ꧀ꦠꦴꦤꦁ ꦢꦺꦴꦱꦮꦱꦺꦤ ꦥꦮꦠ꧀ꦠꦶꦠꦴꦤꦁ ꦦꦫꦸꦱꦮꦕꦤꦴꦤꦁ. ꦢꦸꦫꦴꦒꦠꦴꦤꦤ꧀ꦠꦶ ꦢꦸꦏ꧀ꦑꦸꦥ꧀ꦥꦴꦢꦤꦴꦏꦴꦫꦺꦤ ꦱꦺꦴꦠꦢ꧀ꦮꦴꦫꦁ ꦄꦴꦒꦠꦴꦤꦁ. ꦮꦕꦤꦥꦡꦴꦤꦤ꧀ꦠꦶ ꦮꦕꦤꦴꦤꦁ. ꦢꦸꦏ꧀ꦑꦴꦤꦤ꧀ꦠꦶ ꦢꦸꦏ꧀ꦑꦩꦴꦤꦁ. ꦠꦶꦧ꧀ꦧꦴꦤꦤ꧀ꦠꦶ ꦧꦲꦭꦴꦤꦁ ꦠꦴꦥꦤꦱꦨꦴꦮꦴꦤꦁ ꦮꦴ. ꦑꦫꦴꦤꦤ꧀ꦠꦶ ꦦꦫꦸꦱꦴꦤꦁ. ꦏꦛꦸꦏꦴꦤꦤ꧀ꦠꦶ ꦠꦶꦑꦶꦟꦴꦤꦁ. ꦄꦱꦴꦠꦴꦤꦤ꧀ꦠꦶ ꦄꦩꦣꦸꦫꦴꦤꦁ. ꦄꦩꦤꦴꦥꦴꦤꦤ꧀ꦠꦶ ꦩꦤꦁ ꦄꦥ꧀ꦥꦴꦪꦶꦠꦸꦁ ꦮꦝ꧀ꦞꦺꦠꦸꦁ ꦄꦱꦩꦠ꧀ꦡꦴꦤꦁ. ꦥꦴꦟꦲꦫꦴꦤꦤ꧀ꦠꦶ ꦗꦷꦮꦶꦠꦲꦫꦴꦤꦁ. ꦪꦴ ꦱꦴ ꦢꦶꦱꦴꦠꦶ ꦱꦧ꧀ꦧꦱꦔ꧀ꦑꦴꦫꦱꦩꦡꦴꦢꦶꦮꦱꦺꦤ ꦢꦶꦱ꧀ꦱꦠꦶ ꦄꦥꦢꦶꦱ꧀ꦱꦠꦷꦠꦶ ꦤꦶꦧ꧀ꦧꦴꦤꦁ ꦢꦶꦱꦴꦠꦶ ꦮꦺꦢꦶꦠꦧ꧀ꦧꦁ. ꦪꦱ꧀ꦩꦴ ꦥꦤ ꦠꦁ ꦄꦴꦒꦩ꧀ꦩ ꦱꦧ꧀ꦧꦺ ꦱꦔ꧀ꦑꦴꦫꦴ ꦱꦩꦡꦁ ꦒꦕ꧀ꦖꦤ꧀ꦠꦶ, ꦠꦱ꧀ꦩꦴ ꦱꦧ꧀ꦧꦱꦔ꧀ꦑꦴꦫꦱꦩꦡꦺꦴꦠꦶ ꦮꦸꦠ꧀ꦠꦁ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮ. ꦆꦩꦱ꧀ꦩꦶꦁ ꦥꦤ ꦱꦸꦠ꧀ꦠꦺ ꦱꦷꦭꦱꦩꦴꦣꦶꦥꦚ꧀ꦚꦴ ꦩꦶꦱ꧀ꦱꦶꦏꦴ ꦏꦡꦶꦠꦴꦠꦶ.

ꦫꦴꦗꦮꦒ꧀ꦒꦺꦴ ꦕꦠꦸꦠ꧀ꦡꦺꦴ.