꧖. ꦮꦶꦩꦸꦠ꧀ꦠꦴꦪꦠꦤꦱꦸꦠ꧀ꦠꦮꦟ꧀ꦟꦤꦴ

꧒꧖. ꦖꦛ꧀ꦜꦺ ꦮꦶꦩꦸꦠ꧀ꦠꦴꦪꦠꦤꦴꦤꦷꦠꦶ ꦮꦶꦩꦸꦕ꧀ꦕꦤꦏꦴꦫꦟꦴꦤꦶ. ꦪꦠ꧀ꦡꦴꦠꦶ ꦪꦺꦱꦸ ꦮꦶꦩꦸꦠ꧀ꦠꦴꦪꦠꦤꦺꦱꦸ. ꦱꦠ꧀ꦡꦴ ꦣꦩ꧀ꦩꦁ ꦢꦺꦱꦺꦠꦷꦠꦶ ꦕꦠꦸꦱꦕ꧀ꦕꦣꦩ꧀ꦩꦁ ꦢꦺꦱꦺꦠꦶ. ꦄꦠ꧀ꦡꦥꦛꦶꦱꦁꦮꦺꦢꦶꦤꦺꦴꦠꦶ ꦥꦴꦭ꦳ꦶꦄꦠ꧀ꦡꦁ ꦗꦴꦤꦤ꧀ꦠꦱ꧀ꦱ. ꦣꦩ꧀ꦩꦥꦛꦶꦱꦁꦮꦺꦢꦶꦤꦺꦴꦠꦶ ꦥꦴꦭ꦳ꦶꦁ ꦗꦴꦤꦤ꧀ꦠꦱ꧀ꦱ. ꦥꦴꦩꦺꦴꦗ꧀ꦗꦤ꧀ꦠꦶ ꦠꦫꦸꦟꦥꦷꦠꦶ. ꦥꦷꦠꦷꦠꦶ ꦠꦸꦛ꧀ꦜꦴꦏꦴꦫꦨꦹꦠꦴ ꦧꦭꦮꦥꦷꦠꦶ. ꦏꦴꦪꦺꦴꦠꦶ ꦤꦴꦩꦏꦴꦪꦺꦴ. ꦥꦱ꧀ꦱꦩ꧀ꦨꦠꦷꦠꦶ ꦥꦛꦶꦥ꧀ꦥꦱ꧀ꦱꦩ꧀ꦨꦠꦶ. ꦱꦸꦑꦁ ꦮꦺꦢꦺꦠꦷꦠꦶ ꦱꦸꦑꦁ ꦥꦛꦶꦭꦨꦠꦶ. ꦕꦶꦠ꧀ꦠꦁ ꦱꦩꦴꦣꦶꦪꦠꦷꦠꦶ ꦄꦫꦲꦠ꧀ꦠꦦꦭꦱꦩꦴꦣꦶꦤꦴ ꦱꦩꦴꦣꦶꦪꦠꦶ. ꦄꦪꦚ꧀ꦲꦶ ꦠꦁ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦄꦴꦒꦠꦴꦒꦠꦛ꧀ꦜꦴꦤꦺ ꦙꦴꦤꦮꦶꦥꦱ꧀ꦱꦤꦴꦩꦒ꧀ꦒꦦꦭꦴꦤꦶ ꦗꦴꦤꦴꦠꦶ, ꦠꦱ꧀ꦱ ꦌꦮꦁ ꦗꦴꦤꦠꦺꦴ ꦥꦷꦠꦶ ꦈꦥ꧀ꦥꦗ꧀ꦗꦠꦶ. ꦱꦺꦴ ꦠꦱ꧀ꦱꦴ ꦥꦷꦠꦶꦪꦴ ꦄꦤ꧀ꦠꦫꦴ ꦎꦱꦏ꧀ꦏꦶꦠꦸꦁ ꦤ ꦢꦺꦤ꧀ꦠꦺꦴ ꦈꦥꦕꦴꦫꦏꦩ꧀ꦩꦛ꧀ꦜꦴꦤꦶꦏꦺꦴ ꦲꦸꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦴꦠꦶ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ – ‘‘ꦕꦶꦠ꧀ꦠꦁ ꦱꦩꦴꦣꦶꦪꦠꦷ’’ꦠꦶ. ꦱꦺꦱꦺꦱꦸꦥꦶ ꦌꦱꦺꦮ ꦤꦪꦺꦴ. ꦄꦪꦁ ꦥꦤ ꦮꦶꦱꦺꦱꦺꦴ – ꦱꦩꦴꦣꦶꦤꦶꦩꦶꦠ꧀ꦠꦤ꧀ꦠꦶ ꦄꦛ꧀ꦜꦠꦶꦁꦱꦴꦪ ꦄꦴꦫꦩ꧀ꦩꦟꦺꦱꦸ ꦄꦚ꧀ꦚꦠꦫꦺꦴ ꦱꦩꦴꦣꦶꦪꦺꦮ ꦱꦩꦴꦣꦶꦤꦶꦩꦶꦠ꧀ꦠꦁ. ꦱꦸꦒ꧀ꦒꦲꦶꦠꦁ ꦲꦺꦴꦠꦷꦠꦶꦄꦴꦢꦶꦱꦸ ꦄꦴꦕꦫꦶꦪꦱ꧀ꦱ ꦱꦤ꧀ꦠꦶꦏꦺ ꦏꦩ꧀ꦩꦛ꧀ꦜꦴꦤꦁ ꦈꦒ꧀ꦒꦟ꧀ꦲꦤ꧀ꦠꦺꦤ ꦱꦸꦛ꧀ꦜꦸ ꦒꦲꦶꦠꦁ ꦲꦺꦴꦠꦶ ꦱꦸꦛ꧀ꦜꦸ ꦩꦤꦱꦶꦏꦠꦁ ꦱꦸꦛ꧀ꦜꦸ ꦈꦥꦣꦴꦫꦶꦠꦁ. ꦱꦸꦥ꧀ꦥꦛꦶꦮꦶꦢ꧀ꦣꦁ ꦥꦚ꧀ꦚꦴꦪꦴꦠꦶ ꦥꦚ꧀ꦚꦴꦪ ꦱꦸꦛ꧀ꦜꦸ ꦥꦕ꧀ꦕꦏ꧀ꦑꦁ ꦏꦠꦁ. ꦠꦱ꧀ꦩꦶꦁ ꦣꦩ꧀ꦩꦺꦠꦶ ꦠꦱ꧀ꦩꦶꦁ ꦏꦩ꧀ꦩꦛ꧀ꦜꦴꦤꦥꦴꦭ꦳ꦶꦣꦩ꧀ꦩꦺ. ꦆꦠꦶ ꦆꦩꦱ꧀ꦩꦶꦁ ꦱꦸꦠ꧀ꦠꦺ ꦥꦚ꧀ꦕꦥꦶ ꦮꦶꦩꦸꦠ꧀ꦠꦴꦪꦠꦤꦴꦤꦶ ꦄꦫꦲꦠ꧀ꦠꦁ ꦥꦴꦥꦺꦠ꧀ꦮꦴ ꦏꦡꦶꦠꦴꦤꦷꦠꦶ.