꧑꧐. ꦈꦥꦺꦴꦱꦡꦱꦸꦠ꧀ꦠꦮꦟ꧀ꦟꦤꦴ

꧑꧙꧐. ꦢꦱꦩꦺ ꦠꦸꦟ꧀ꦲꦷꦨꦹꦠꦁ ꦠꦸꦟ꧀ꦲꦷꦨꦹꦠꦤ꧀ꦠꦶ ꦪꦠꦺꦴ ꦪꦠꦺꦴ ꦄꦤꦸꦮꦶꦭꦺꦴꦏꦺꦠꦶ, ꦠꦠꦺꦴ ꦠꦠꦺꦴ ꦠꦸꦟ꧀ꦲꦷꦨꦹꦠꦩꦺꦮ. ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦷꦠꦶ ꦥꦛꦶꦥꦠ꧀ꦠꦶꦱꦩ꧀ꦥꦤ꧀ꦤꦺ ꦨꦶꦏ꧀ꦑꦹ ꦥꦱꦤ꧀ꦤꦺꦲꦶ ꦕꦏ꧀ꦑꦹꦲꦶ ꦄꦤꦸꦮꦶꦭꦺꦴꦏꦺꦠ꧀ꦮꦴ ꦈꦥ꧀ꦥꦤ꧀ꦤꦣꦩ꧀ꦩꦥꦴꦩꦺꦴꦗ꧀ꦗꦺꦴ ꦡꦺꦴꦩꦺꦠꦸꦏꦴꦩꦠꦴꦪ ꦄꦴꦩꦤ꧀ꦠꦺꦱꦶ. ꦄꦥꦭꦴꦥꦴꦠꦶ ꦥꦭꦴꦥꦫꦲꦶꦠꦴ. ꦆꦠꦫꦁ ꦠꦱ꧀ꦱꦺꦮ ꦮꦺꦮꦕꦤꦁ. ꦱꦸꦢ꧀ꦣꦴꦠꦶ ꦤꦶꦩ꧀ꦩꦭꦴ. ꦱꦴꦫꦺ ꦥꦠꦶꦛ꧀ꦜꦶꦠꦴꦠꦶ ꦱꦷꦭꦴꦢꦶꦱꦴꦫꦺ ꦥꦠꦶꦛ꧀ꦜꦶꦠꦴ. ꦄꦭꦤ꧀ꦠꦶ ꦪꦸꦠ꧀ꦠꦁ. ꦪꦺꦴꦗꦤꦒꦟꦤꦴꦤꦷꦠꦶ ꦌꦏꦁ ꦪꦺꦴꦗꦤꦁ ꦪꦺꦴꦗꦤꦩꦺꦮ, ꦢꦱꦥꦶ ꦪꦺꦴꦗꦤꦴꦤꦶ ꦪꦺꦴꦗꦤꦴꦤꦺꦮ. ꦠꦠꦺꦴ ꦈꦢ꧀ꦣꦁ ‘‘ꦪꦺꦴꦗꦤꦒꦟꦤꦴꦤꦷ’’ꦠꦶ ꦮꦸꦕ꧀ꦕꦠꦶ. ꦆꦣ ꦥꦤ ꦪꦺꦴꦗꦤꦱꦠꦩ꧀ꦥꦶ ꦪꦺꦴꦗꦤꦱꦲꦱ꧀ꦱꦩ꧀ꦥꦶ ꦄꦣꦶꦥ꧀ꦥꦺꦠꦁ. ꦥꦸꦛꦺꦴꦱꦺꦤꦴꦥꦷꦠꦶ ꦥꦸꦛꦺꦴꦱꦁ ꦮꦸꦕ꧀ꦕꦠꦶ ꦥꦴꦡꦺꦪ꧀ꦪꦁ, ꦥꦴꦡꦺꦪ꧀ꦪꦁ ꦒꦲꦺꦠ꧀ꦮꦴꦥꦶ ꦈꦥꦱꦔ꧀ꦏꦩꦶꦠꦸꦁ ꦪꦸꦠ꧀ꦠꦩꦺꦮꦴꦠꦶ ꦄꦠ꧀ꦡꦺꦴ. ꦥꦸꦛꦁꦱꦺꦤꦴꦠꦶꦥꦶ ꦥꦴꦜꦺꦴ. ꦠꦱ꧀ꦱꦠ꧀ꦡꦺꦴ – ꦥꦸꦛꦺꦴ ꦄꦁꦱꦺ ꦄꦱ꧀ꦱꦴꦠꦶ ꦥꦸꦛꦁꦱꦺꦴ, ꦠꦺꦤ ꦥꦸꦛꦁꦱꦺꦤ, ꦄꦁꦱꦺꦤ ꦥꦴꦡꦺꦪ꧀ꦪꦥꦸꦛꦁ ꦮꦲꦤ꧀ꦠꦺꦤꦴꦥꦷꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦆꦢꦴꦤꦶ ꦌꦮꦫꦹꦥꦺꦲꦶ ꦌꦮꦫꦹꦥꦺꦲꦶ ꦕ ꦒꦸꦟꦺꦲꦶ ꦱꦩꦤ꧀ꦤꦴꦒꦠꦴ ꦌꦠ꧀ꦡ ꦨꦶꦏ꧀ꦑꦹ ꦄꦠ꧀ꦡꦷꦠꦶ ꦢꦱ꧀ꦱꦺꦠꦸꦁ ꦱꦤ꧀ꦠꦶ ꦨꦶꦏ꧀ꦑꦮꦺꦠꦶꦄꦴꦢꦶꦩꦴꦲ. ꦠꦠ꧀ꦡ ꦢꦺꦮꦥ꧀ꦥꦠ꧀ꦠꦴꦠꦶ ꦈꦥꦥꦠ꧀ꦠꦶꦢꦺꦮꦤꦶꦧ꧀ꦧꦠ꧀ꦠꦏꦁ ꦢꦶꦧ꧀ꦧꦮꦶꦲꦴꦫꦁ ꦢꦶꦧ꧀ꦧꦮꦶꦲꦴꦫꦺꦤ ꦕ ꦄꦫꦲꦠ꧀ꦠꦁ ꦥꦠ꧀ꦠꦴ. ꦧ꧀ꦫꦲ꧀ꦩꦥ꧀ꦥꦠ꧀ꦠꦴꦠꦶ ꦤꦶꦢ꧀ꦢꦺꦴꦱꦛ꧀ꦜꦺꦤ ꦧ꧀ꦫꦲ꧀ꦩꦨꦴꦮꦱꦴꦣꦏꦁ ꦧ꧀ꦫꦲ꧀ꦩꦮꦶꦲꦴꦫꦁ ꦧ꧀ꦫꦲ꧀ꦩꦮꦶꦲꦴꦫꦺꦤ ꦕ ꦄꦫꦲꦠ꧀ꦠꦁ ꦥꦠ꧀ꦠꦴ. ꦄꦴꦤꦺꦚ꧀ꦗꦥ꧀ꦥꦠ꧀ꦠꦴꦠꦶ ꦄꦤꦶꦚ꧀ꦗꦤꦨꦴꦮꦱꦴꦣꦏꦁ ꦄꦴꦤꦺꦚ꧀ꦗꦁ ꦄꦴꦤꦺꦚ꧀ꦗꦺꦤ ꦕ ꦄꦫꦲꦠ꧀ꦠꦁ ꦥꦠ꧀ꦠꦴ. ꦄꦫꦶꦪꦥ꧀ꦥꦠ꧀ꦠꦴꦠꦶ ꦥꦸꦡꦸꦗ꧀ꦗꦤꦨꦴꦮꦁ ꦄꦠꦶꦏ꧀ꦏꦩ꧀ꦩ ꦄꦫꦶꦪꦨꦴꦮꦁ ꦥꦠ꧀ꦠꦴ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦢꦺꦮꦥ꧀ꦥꦠ꧀ꦠꦺꦴ ꦲꦺꦴꦠꦷꦠꦶꦄꦴꦢꦷꦱꦸ ꦌꦮꦁ ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦺ ꦜꦠ꧀ꦮꦴ ꦕꦶꦠ꧀ꦠꦁ ꦮꦶꦮꦛ꧀ꦛꦺꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦺꦴ ꦢꦺꦮꦥ꧀ꦥꦠ꧀ꦠꦺꦴ ꦤꦴꦩ ꦲꦺꦴꦠꦶ, ꦕꦠꦹꦱꦸ ꦧ꧀ꦫꦲ꧀ꦩꦮꦶꦲꦴꦫꦺꦱꦸ ꦜꦠ꧀ꦮꦴ ꦕꦶꦠ꧀ꦠꦁ ꦮꦶꦮꦛ꧀ꦛꦺꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦺꦴ ꦧ꧀ꦫꦲ꧀ꦩꦥ꧀ꦥꦠ꧀ꦠꦺꦴ ꦤꦴꦩ, ꦕꦠꦹꦱꦸ ꦄꦫꦹꦥꦗ꧀ꦙꦴꦤꦺꦱꦸ ꦜꦠ꧀ꦮꦴ ꦕꦶꦠ꧀ꦠꦁ ꦮꦶꦮꦛ꧀ꦛꦺꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦺꦴ ꦄꦴꦤꦺꦚ꧀ꦗꦥ꧀ꦥꦠ꧀ꦠꦺꦴ ꦤꦴꦩ. ꦆꦢꦁ ꦢꦸꦏ꧀ꦑꦤ꧀ꦠꦶꦄꦴꦢꦷꦲꦶ ꦕꦠꦹꦲꦶ ꦱꦕ꧀ꦕꦺꦲꦶ ꦕꦠ꧀ꦠꦴꦫꦺꦴ ꦩꦒ꧀ꦒꦴ ꦠꦷꦟꦶ ꦕ ꦦꦭꦴꦤꦶ ꦏꦡꦶꦠꦴꦤꦶ. ꦠꦱ꧀ꦩꦴ ꦆꦩꦁ ꦄꦫꦶꦪꦣꦩ꧀ꦩꦁ ꦥꦠ꧀ꦠꦺꦴ ꦨꦶꦏ꧀ꦑꦸ ꦄꦫꦶꦪꦥ꧀ꦥꦠ꧀ꦠꦺꦴ ꦤꦴꦩ ꦲꦺꦴꦠꦷꦠꦶ.

ꦧ꧀ꦫꦴꦲ꧀ꦩꦟꦮꦒ꧀ꦒꦺꦴ ꦕꦠꦸꦠ꧀ꦡꦺꦴ.