꧑. ꦨꦟ꧀ꦝꦒꦴꦩꦮꦒ꧀ꦒꦺꦴ

꧑. ꦄꦤꦸꦧꦸꦢ꧀ꦣꦱꦸꦠ꧀ꦠꦮꦟ꧀ꦟꦤꦴ

꧑. ꦕꦠꦸꦏ꧀ꦏꦤꦶꦥꦴꦠꦱ꧀ꦱ ꦥꦜꦩꦺ ꦄꦤꦤꦸꦧꦺꦴꦣꦴꦠꦶ ꦄꦧꦸꦗ꧀ꦙꦤꦺꦤ ꦄꦗꦴꦤꦤꦺꦤ. ꦄꦥ꧀ꦥꦛꦶꦮꦺꦣꦴꦠꦶ ꦄꦥ꧀ꦥꦛꦶꦮꦶꦗ꧀ꦙꦤꦺꦤ ꦄꦥꦕ꧀ꦕꦏ꧀ꦑꦏꦶꦫꦶꦪꦴꦪ. ꦢꦷꦓꦩꦢ꧀ꦣꦴꦤꦤ꧀ꦠꦶ ꦕꦶꦫꦏꦴꦭꦁ. ꦱꦤ꧀ꦣꦴꦮꦶꦠꦤ꧀ꦠꦶ ꦨꦮꦠꦺꦴ ꦨꦮꦁ ꦒꦩꦤꦮꦱꦺꦤ ꦱꦤ꧀ꦣꦴꦮꦶꦠꦁ. ꦱꦁꦱꦫꦶꦠꦤ꧀ꦠꦶ ꦥꦸꦤꦥ꧀ꦥꦸꦤꦁ ꦒꦩꦤꦴꦒꦩꦤꦮꦱꦺꦤ ꦱꦁꦱꦫꦶꦠꦁ. ꦩꦩꦚ꧀ꦕꦺꦮ ꦠꦸꦩ꧀ꦲꦴꦏꦚ꧀ꦕꦴꦠꦶ ꦩꦪꦴ ꦕ ꦠꦸꦩ꧀ꦲꦺꦲꦶ ꦕ. ꦄꦡ ꦮꦴ ꦱꦤ꧀ꦣꦴꦮꦶꦠꦁ ꦱꦁꦱꦫꦶꦠꦤ꧀ꦠꦶ ꦱꦤ꧀ꦣꦴꦮꦤꦁ ꦱꦁꦱꦫꦟꦁ ꦩꦩꦚ꧀ꦕꦺꦮ ꦠꦸꦩ꧀ꦲꦴꦏꦚ꧀ꦕ ꦄꦲꦺꦴꦱꦷꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦄꦫꦶꦪꦱ꧀ꦱꦴꦠꦶ ꦤꦶꦢ꧀ꦢꦺꦴꦱꦱ꧀ꦱ. ꦱꦷꦭꦁ ꦱꦩꦴꦣꦶ ꦥꦚ꧀ꦚꦴꦠꦶ ꦆꦩꦺ ꦥꦤ ꦠꦪꦺꦴ ꦣꦩ꧀ꦩꦴ ꦩꦒ꧀ꦒꦦꦭꦱꦩ꧀ꦥꦪꦸꦠ꧀ꦠꦴꦮ ꦮꦺꦢꦶꦠꦧ꧀ꦧꦴ, ꦮꦶꦩꦸꦠ꧀ꦠꦶꦤꦴꦩꦺꦤ ꦦꦭꦩꦺꦮ ꦤꦶꦢ꧀ꦢꦶꦛ꧀ꦜꦁ. ꦨꦮꦠꦟ꧀ꦲꦴꦠꦶ ꦨꦮꦺꦱꦸ ꦠꦟ꧀ꦲꦴ. ꦨꦮꦤꦺꦠ꧀ꦠꦷꦠꦶ ꦨꦮꦫꦗ꧀ꦗꦸ. ꦠꦟ꧀ꦲꦴꦪ ꦌꦮ ꦌꦠꦁ ꦤꦴꦩꦁ. ꦠꦴꦪ ꦲꦶ ꦱꦠ꧀ꦠꦴ ꦒꦺꦴꦟꦴ ꦮꦶꦪ ꦒꦷꦮꦴꦪ ꦧꦤ꧀ꦣꦶꦠ꧀ꦮꦴ ꦠꦁ ꦠꦁ ꦨꦮꦁ ꦤꦷꦪꦤ꧀ꦠꦶ, ꦠꦱ꧀ꦩꦴ ꦨꦮꦤꦺꦠ꧀ꦠꦷꦠꦶ ꦮꦸꦕ꧀ꦕꦠꦶ.

ꦄꦤꦸꦠ꧀ꦠꦫꦴꦠꦶ ꦭꦺꦴꦏꦸꦠ꧀ꦠꦫꦴ. ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴꦠꦶ ꦮꦛ꧀ꦛꦢꦸꦏ꧀ꦑꦱ꧀ꦱ ꦄꦤ꧀ꦠꦏꦫꦺꦴ. ꦕꦏ꧀ꦑꦸꦩꦴꦠꦶ ꦥꦚ꧀ꦕꦲꦶ ꦕꦏ꧀ꦑꦹꦲꦶ ꦕꦏ꧀ꦑꦸꦩꦴ. ꦥꦫꦶꦤꦶꦧ꧀ꦧꦸꦠꦺꦴꦠꦶ ꦏꦶꦭꦺꦱꦥꦫꦶꦤꦶꦧ꧀ꦧꦴꦤꦺꦤ ꦥꦫꦶꦤꦶꦧ꧀ꦧꦸꦠꦺꦴ. ꦆꦢꦩꦱ꧀ꦱ ꦧꦺꦴꦣꦶꦩꦟ꧀ꦝꦺ ꦥꦜꦩꦥꦫꦶꦤꦶꦧ꧀ꦧꦴꦤꦁ, ꦥꦕ꧀ꦖꦴ ꦥꦤ ꦪꦩꦏꦱꦴꦭꦴꦤꦩꦤ꧀ꦠꦫꦺ ꦄꦤꦸꦥꦴꦢꦶꦱꦺꦱꦴꦪ ꦤꦶꦧ꧀ꦧꦴꦤꦣꦴꦠꦸꦪꦴ ꦥꦫꦶꦤꦶꦧ꧀ꦧꦸꦠꦺꦴꦠꦶ ꦪꦡꦴꦤꦸꦱꦤ꧀ꦣꦶꦤꦴ ꦢꦺꦱꦤꦁ ꦤꦶꦛ꧀ꦜꦴꦥꦺꦱꦶ.

꧒. ꦥꦥꦠꦶꦠꦱꦸꦠ꧀ꦠꦮꦟ꧀ꦟꦤꦴ

꧒. ꦢꦸꦠꦶꦪꦺ ꦥꦥꦠꦶꦠꦺꦴꦠꦶ ꦥꦠꦶꦠꦺꦴ ꦕꦸꦠꦺꦴ. ꦄꦥ꧀ꦥꦥꦠꦶꦠꦺꦴꦠꦶ ꦄꦥꦠꦶꦠꦺꦴ ꦥꦠꦶꦛ꧀ꦜꦶꦠꦺꦴ. ꦠꦠ꧀ꦡ ꦭꦺꦴꦏꦶꦪꦩꦲꦴꦗꦤꦺꦴ ꦥꦠꦶꦠꦺꦴꦪꦺꦮ ꦤꦴꦩ, ꦱꦺꦴꦠꦴꦥꦤ꧀ꦤꦴꦢꦪꦺꦴ ꦏꦶꦭꦺꦱꦸꦥ꧀ꦥꦠ꧀ꦠꦶꦏ꧀ꦑꦟꦺ ꦥꦠꦶꦠꦴ ꦤꦴꦩ, ꦑꦷꦟꦴꦱꦮꦺꦴ ꦌꦏꦤ꧀ꦠꦥꦠꦶꦛ꧀ꦜꦶꦠꦺꦴ ꦤꦴꦩ.

ꦕꦸꦠꦴ ꦥꦠꦤ꧀ꦠꦷꦠꦶ ꦪꦺ ꦕꦸꦠꦴ, ꦠꦺ ꦥꦠꦤ꧀ꦠꦶ ꦤꦴꦩ. ꦥꦠꦶꦠꦴꦠꦶ ꦪꦺ ꦥꦠꦶꦠꦴ, ꦠꦺ ꦕꦸꦠꦴ ꦤꦴꦩ. ꦕꦸꦠꦠ꧀ꦠꦴ ꦥꦠꦶꦠꦴ, ꦥꦠꦶꦠꦠ꧀ꦠꦴ ꦕꦸꦠꦴꦠꦶ ꦄꦠ꧀ꦡꦺꦴ. ꦒꦶꦢ꧀ꦣꦴꦠꦶ ꦫꦴꦒꦫꦠ꧀ꦠꦴ. ꦥꦸꦤꦫꦴꦒꦠꦴꦠꦶ ꦥꦸꦤ ꦗꦴꦠꦶꦁ ꦥꦸꦤ ꦗꦫꦁ ꦥꦸꦤ ꦧ꧀ꦪꦴꦣꦶꦁ ꦥꦸꦤ ꦩꦫꦟꦁ ꦄꦴꦒꦠꦴ ꦤꦴꦩ ꦲꦺꦴꦤ꧀ꦠꦶ. ꦏꦠꦁ ꦏꦶꦕ꧀ꦕꦤ꧀ꦠꦶ ꦕꦠꦹꦲꦶ ꦩꦒ꧀ꦒꦺꦲꦶ ꦏꦠ꧀ꦠꦧ꧀ꦧꦏꦶꦕ꧀ꦕꦁ ꦏꦠꦁ. ꦫꦠꦁ ꦫꦩ꧀ꦩꦤ꧀ꦠꦶ ꦫꦩꦶꦠꦧ꧀ꦧꦪꦸꦠ꧀ꦠꦏꦺ ꦒꦸꦟꦗꦴꦠꦺ ꦫꦩꦶꦠꦁ. ꦱꦸꦑꦺꦤꦴꦤ꧀ꦮꦴꦒꦠꦁ ꦱꦸꦑꦤ꧀ꦠꦶ ꦱꦸꦑꦺꦤ ꦱꦸꦑꦁ ꦄꦤꦸꦄꦴꦒꦠꦁ ꦱꦩ꧀ꦥꦠ꧀ꦠꦁ. ꦩꦴꦤꦸꦱꦏꦱꦸꦑꦺꦤ ꦢꦶꦧ꧀ꦧꦱꦸꦑꦁ, ꦙꦴꦤꦱꦸꦑꦺꦤ ꦮꦶꦥꦱ꧀ꦱꦤꦴꦱꦸꦑꦁ, ꦮꦶꦥꦱ꧀ꦱꦤꦴꦱꦸꦑꦺꦤ ꦩꦒ꧀ꦒꦱꦸꦑꦁ, ꦩꦒ꧀ꦒꦱꦸꦑꦺꦤ ꦦꦭꦱꦸꦑꦁ, ꦦꦭꦱꦸꦑꦺꦤ ꦤꦶꦧ꧀ꦧꦴꦤꦱꦸꦑꦁ ꦱꦩ꧀ꦥꦠ꧀ꦠꦁ ꦄꦣꦶꦒꦠꦤ꧀ꦠꦶ ꦄꦠ꧀ꦡꦺꦴ.

꧓. ꦥꦜꦩꦑꦠꦱꦸꦠ꧀ꦠꦮꦟ꧀ꦟꦤꦴ

꧓. ꦠꦠꦶꦪꦁ ꦢꦸꦏꦤꦶꦥꦴꦠꦮꦟ꧀ꦟꦤꦴꦪꦁ ꦮꦸꦠ꧀ꦠꦩꦺꦮ. ꦒꦴꦡꦴꦱꦸ ꦥꦤ ꦤꦶꦤ꧀ꦢꦶꦪꦤ꧀ꦠꦶ ꦤꦶꦤ꧀ꦢꦶꦠꦧ꧀ꦧꦪꦸꦠ꧀ꦠꦏꦁ. ꦤꦶꦤ꧀ꦢꦠꦷꦠꦶ ꦒꦫꦲꦠꦶ. ꦥꦱꦁꦱꦶꦪꦺꦴꦠꦶ ꦥꦱꦁꦱꦶꦠꦧ꧀ꦧꦪꦸꦠ꧀ꦠꦺꦴ. ꦮꦶꦕꦶꦤꦴꦠꦶ ꦩꦸꦑꦺꦤ ꦱꦺꦴ ꦏꦭꦶꦤ꧀ꦠꦶ ꦪꦺꦴ ꦌꦮꦁ ꦥꦮꦠ꧀ꦠꦺꦴ, ꦠꦺꦤ ꦩꦸꦑꦺꦤ ꦏꦭꦶꦁ ꦮꦶꦕꦶꦤꦴꦠꦶ ꦤꦴꦩ. ꦏꦭꦶꦤꦴ ꦠꦺꦤ ꦱꦸꦑꦁ ꦤ ꦮꦶꦤ꧀ꦢꦠꦷꦠꦶ ꦠꦺꦤ ꦕ ꦏꦭꦶꦤꦴ ꦱꦸꦑꦁ ꦤ ꦥꦛꦶꦭꦨꦠꦶ. ꦱꦧ꧀ꦧꦱ꧀ꦱꦴꦥꦶ ꦱꦲꦴꦥꦶ ꦄꦠ꧀ꦠꦤꦴꦠꦶ ꦱꦧ꧀ꦧꦺꦤꦥꦶ ꦱꦏꦺꦤ ꦣꦤꦺꦤ ꦕꦺꦮ ꦄꦠ꧀ꦠꦤꦴ ꦕ ꦱꦢ꧀ꦣꦶꦁ ꦪꦺꦴ ꦥꦫꦴꦗꦪꦺꦴ, ꦱꦺꦴ ꦄꦥ꧀ꦥꦩꦠ꧀ꦠꦏꦺꦴꦮ ꦏꦭꦷꦠꦶ ꦄꦠ꧀ꦡꦺꦴ. ꦪꦺꦴ ꦱꦸꦒꦠꦺꦱꦹꦠꦶ ꦪꦺꦴ ꦥꦤ ꦱꦩ꧀ꦩꦒ꧀ꦒꦠꦺꦱꦸ ꦥꦸꦒ꧀ꦒꦭꦺꦱꦸ ꦕꦶꦠ꧀ꦠꦁ ꦥꦢꦸꦱ꧀ꦱꦺꦪ꧀ꦪ, ꦄꦪꦁ ꦕꦶꦠ꧀ꦠꦥꦢꦺꦴꦱꦺꦴꦮ ꦠꦠꦺꦴ ꦏꦭꦶꦠꦺꦴ ꦩꦲꦤ꧀ꦠꦠꦫꦺꦴ ꦏꦭꦶ. ꦆꦢꦴꦤꦶ ꦠꦱ꧀ꦱ ꦩꦲꦤ꧀ꦠꦠꦫꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ꦱꦠꦁ ꦱꦲꦱ꧀ꦱꦴꦤꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦠꦁ ꦱꦲꦱ꧀ꦱꦴꦤꦤ꧀ꦠꦶ ꦤꦶꦫꦧ꧀ꦧꦸꦢꦒꦟꦤꦴꦪ ꦱꦠꦱꦲꦱ꧀ꦱꦁ. ꦖꦠ꧀ꦠꦶꦁꦱꦠꦷꦠꦶ ꦄꦥꦫꦴꦤꦶ ꦕ ꦖꦠ꧀ꦠꦶꦁꦱꦠꦶ ꦤꦶꦫꦧ꧀ꦧꦸꦢꦴꦤꦶ. ꦥꦚ꧀ꦕ ꦕꦴꦠꦶ ꦄꦧ꧀ꦧꦸꦢꦒꦟꦤꦴꦪ ꦕ ꦥꦚ꧀ꦕ ꦄꦧ꧀ꦧꦸꦢꦴꦤꦶ. ꦪꦩꦫꦶꦪꦒꦫꦲꦷꦠꦶ ꦪꦁ ꦄꦫꦶꦪꦺ ꦒꦫꦲꦤ꧀ꦠꦺꦴ ꦤꦶꦫꦪꦁ ꦈꦥꦥꦗ꧀ꦗꦠꦶ, ꦠꦠ꧀ꦡ ꦌꦠ꧀ꦠꦏꦁ ꦄꦴꦪꦸꦥ꧀ꦥꦩꦴꦟꦤ꧀ꦠꦶ.

꧔. ꦢꦸꦠꦶꦪꦑꦠꦱꦸꦠ꧀ꦠꦮꦟ꧀ꦟꦤꦴ

꧔. ꦕꦠꦸꦠ꧀ꦡꦺ ꦩꦴꦠꦫꦶ ꦥꦶꦠꦫꦶ ꦕꦴꦠꦶꦄꦴꦢꦷꦱꦸ ꦩꦶꦠ꧀ꦠꦮꦶꦤ꧀ꦢꦏꦺꦴ ꦩꦴꦠꦫꦶ ꦩꦶꦕ꧀ꦖꦴꦥꦛꦶꦥꦤ꧀ꦤꦺꦴ ꦤꦴꦩ, ꦄꦗꦴꦠꦱꦠ꧀ꦠꦸ ꦥꦶꦠꦫꦶ ꦩꦶꦕ꧀ꦖꦴꦥꦛꦶꦥꦤ꧀ꦤꦺꦴ ꦤꦴꦩ, ꦢꦺꦮꦢꦠ꧀ꦠꦺꦴ ꦠꦡꦴꦒꦠꦺ ꦩꦶꦕ꧀ꦖꦴꦥꦛꦶꦥꦤ꧀ꦤꦺꦴ ꦤꦴꦩ, ꦏꦺꦴꦏꦴꦭꦶꦏꦺꦴ ꦠꦡꦴꦒꦠꦱꦴꦮꦏꦺ ꦩꦶꦕ꧀ꦖꦴꦥꦛꦶꦥꦤ꧀ꦤꦺꦴ ꦤꦴꦩ. ꦧꦲꦸꦚ꧀ꦕꦴꦠꦶ ꦧꦲꦸꦏꦩꦺꦮ. ꦥꦱꦮꦠꦷꦠꦶ ꦥꦛꦶꦭꦨꦠꦶ. ꦠꦴꦪꦴꦠꦶ ꦠꦴꦪ ꦩꦶꦕ꧀ꦖꦴꦥꦛꦶꦥꦠ꧀ꦠꦶꦱꦔ꧀ꦑꦴꦠꦴꦪ ꦄꦣꦩ꧀ꦩꦕꦫꦶꦪꦴꦪ. ꦥꦺꦕ꧀ꦕꦴꦠꦶ ꦆꦠꦺꦴ ꦒꦤ꧀ꦠ꧀ꦮꦴ. ꦄꦥꦴꦪꦁ ꦒꦕ꧀ꦖꦠꦷꦠꦶ ꦤꦶꦫꦪꦴꦢꦷꦱꦸ ꦄꦚ꧀ꦚꦠꦫꦱ꧀ꦩꦶꦁ ꦤꦶꦧ꧀ꦧꦠ꧀ꦠꦠꦶ. ꦱꦸꦏ꧀ꦏꦥꦏ꧀ꦑꦺꦥꦶ ꦌꦱꦺꦮ ꦤꦪꦺꦴ.

꧕. ꦄꦤꦸꦱꦺꦴꦠꦱꦸꦠ꧀ꦠꦮꦟ꧀ꦟꦤꦴ

꧕. ꦥꦚ꧀ꦕꦩꦺ ꦄꦤꦸꦱꦺꦴꦠꦁ ꦒꦕ꧀ꦖꦠꦷꦠꦶ ꦄꦤꦸꦱꦺꦴꦠꦒꦴꦩꦷ. ꦏꦶꦭꦺꦱꦱꦺꦴꦠꦱ꧀ꦱ ꦥꦕ꧀ꦕꦤꦷꦏꦥꦛꦶꦥꦠ꧀ꦠꦶꦪꦴ ꦥꦛꦶꦱꦺꦴꦠꦁ ꦒꦕ꧀ꦖꦠꦷꦠꦶ ꦥꦛꦶꦱꦺꦴꦠꦒꦴꦩꦷ. ꦜꦶꦠꦠ꧀ꦠꦺꦴꦠꦶ ꦜꦶꦠꦱꦨꦴꦮꦺꦴ. ꦠꦶꦟ꧀ꦟꦺꦴꦠꦶ ꦎꦓꦁ ꦠꦫꦶꦠ꧀ꦮꦴ ꦜꦶꦠꦺꦴ. ꦥꦴꦫꦔ꧀ꦒꦠꦺꦴꦠꦶ ꦥꦫꦠꦷꦫꦁ ꦒꦠꦺꦴ. ꦡꦭꦺ ꦠꦶꦛ꧀ꦜꦠꦷꦠꦶ ꦤꦶꦧ꧀ꦧꦴꦤꦡꦭꦺ ꦠꦶꦛ꧀ꦜꦠꦶ. ꦧ꧀ꦫꦴꦲ꧀ꦩꦟꦺꦴꦠꦶ ꦱꦺꦛ꧀ꦜꦺꦴ ꦤꦶꦢ꧀ꦢꦺꦴꦱꦺꦴ. ꦆꦣꦴꦠꦶ ꦆꦩꦱ꧀ꦩꦶꦁ ꦭꦺꦴꦏꦺ. ꦏꦴꦩꦺ ꦕ ꦥꦛꦶꦱꦺꦮꦠꦷꦠꦶ ꦏꦶꦭꦺꦱꦏꦴꦩꦺꦲꦶ ꦮꦠ꧀ꦡꦸꦏꦴꦩꦺ ꦥꦛꦶꦱꦺꦮꦠꦶ. ꦥꦴꦥꦚ꧀ꦕ ꦏꦩ꧀ꦩꦁ ꦏꦫꦺꦴꦠꦷꦠꦶ ꦥꦴꦥꦚ꧀ꦕ ꦥꦴꦟꦴꦠꦶꦥꦴꦠꦴꦢꦶꦏꦩ꧀ꦩꦁ ꦏꦫꦺꦴꦠꦶ. ꦥꦴꦥꦚ꧀ꦕ ꦏꦩ꧀ꦩꦁ ꦤ ꦏꦫꦺꦴꦠꦷꦠꦶ ꦥꦚ꧀ꦕꦮꦺꦫꦏꦩ꧀ꦩꦁ ꦤ ꦏꦫꦺꦴꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦜꦶꦠꦠ꧀ꦠꦺꦴꦠꦶ ꦄꦪꦁ ꦄꦤꦴꦒꦴꦩꦷ ꦥꦸꦒ꧀ꦒꦭꦺꦴ ꦠꦱ꧀ꦩꦴ ꦭꦺꦴꦏꦴ ꦥꦸꦤ ꦥꦛꦶꦱꦤ꧀ꦣꦶꦮꦱꦺꦤ ꦄꦤꦴꦒꦩꦤꦠꦺꦴ ꦜꦶꦠꦠ꧀ꦠꦺꦴ ꦤꦴꦩ.

ꦠꦟ꧀ꦲꦴꦣꦶꦥꦤ꧀ꦤꦴꦠꦶ ꦠꦟ꧀ꦲꦴꦪ ꦄꦣꦶꦥꦤ꧀ꦤꦴ ꦄꦗ꧀ꦙꦺꦴꦠ꧀ꦡꦛꦴ, ꦠꦟ꧀ꦲꦁ ꦮꦴ ꦄꦣꦶꦥꦤ꧀ꦤꦴ ꦄꦗ꧀ꦙꦺꦴꦒꦴꦭ꦳꧀ꦲꦴ. ꦥꦫꦶꦥꦸꦟ꧀ꦟꦱꦺꦑꦺꦴꦠꦶ ꦱꦶꦏ꧀ꦑꦴꦥꦴꦫꦶꦥꦹꦫꦶꦪꦴ ꦜꦶꦠꦺꦴ. ꦄꦥꦫꦶꦲꦴꦤꦣꦩ꧀ꦩꦺꦴꦠꦶ ꦄꦥꦫꦶꦲꦷꦤꦱꦨꦴꦮꦺꦴ. ꦕꦺꦠꦺꦴꦮꦱꦶꦥ꧀ꦥꦠ꧀ꦠꦺꦴꦠꦶ ꦕꦶꦠ꧀ꦠꦮꦱꦷꦨꦴꦮꦁ ꦥꦠ꧀ꦠꦺꦴ. ꦌꦮꦫꦹꦥꦺꦴ ꦑꦷꦟꦴꦱꦮꦺꦴ ꦲꦺꦴꦠꦶ, ꦆꦣ ꦥꦤ ꦄꦤꦴꦒꦴꦩꦷ ꦏꦡꦶꦠꦺꦴ. ꦱꦩꦴꦲꦶꦠꦶꦤ꧀ꦢ꧀ꦫꦶꦪꦺꦴꦠꦶ ꦱꦩꦴꦲꦶꦠꦖꦭ꦳ꦶꦤ꧀ꦢ꧀ꦫꦶꦪꦺꦴ. ꦥꦫꦺꦴꦥꦫꦴꦠꦶ ꦥꦫꦺꦴꦮꦫꦴ ꦈꦠ꧀ꦠꦩꦭꦴꦩꦏꦴ, ꦏꦸꦱꦭꦴꦏꦸꦱꦭꦴꦠꦶ ꦄꦠ꧀ꦡꦺꦴ. ꦱꦩꦺꦕ꧀ꦕꦴꦠꦶ ꦚꦴꦟꦺꦤ ꦱꦩꦴꦒꦤ꧀ꦠ꧀ꦮꦴ. ꦮꦶꦣꦹꦥꦶꦠꦴꦠꦶ ꦮꦶꦢ꧀ꦣꦁꦱꦶꦠꦴ ꦙꦴꦥꦶꦠꦴ ꦮꦴ. ꦮꦸꦱꦶꦠꦧ꧀ꦫꦲ꧀ꦩꦕꦫꦶꦪꦺꦴꦠꦶ ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦁ ꦮꦱꦶꦠ꧀ꦮꦴ ꦜꦶꦠꦺꦴ. ꦭꦺꦴꦏꦤ꧀ꦠꦒꦹꦠꦶ ꦠꦶꦮꦶꦣꦱ꧀ꦱꦴꦥꦶ ꦭꦺꦴꦏꦱ꧀ꦱ ꦄꦤ꧀ꦠꦁ ꦒꦠꦺꦴ. ꦥꦴꦫꦒꦠꦺꦴꦠꦶ ꦖꦲꦴꦏꦴꦫꦺꦲꦶ ꦥꦴꦫꦒꦠꦺꦴ. ꦆꦣ ꦑꦷꦟꦴꦱꦮꦺꦴꦮ ꦏꦡꦶꦠꦺꦴ. ꦆꦠꦶ ꦱꦸꦠ꧀ꦠꦺꦥꦶ ꦒꦴꦡꦴꦱꦸꦥꦶ ꦮꦛ꧀ꦛꦮꦶꦮꦛ꧀ꦛꦩꦺꦮ ꦏꦡꦶꦠꦁ.

꧖. ꦄꦥ꧀ꦥꦱ꧀ꦱꦸꦠꦱꦸꦠ꧀ꦠꦮꦟ꧀ꦟꦤꦴ

꧖. ꦖꦛ꧀ꦜꦺ ꦄꦤꦸꦥꦥꦤ꧀ꦤꦺꦴꦠꦶ ꦄꦤꦸꦥꦴꦒꦠꦺꦴ. ꦱꦸꦠ꧀ꦠꦤ꧀ꦠꦶꦄꦴꦢꦷꦱꦸ ꦈꦨꦠꦺꦴꦮꦶꦨꦔ꧀ꦒꦤꦶꦢ꧀ꦢꦺꦱꦑꦤ꧀ꦣꦏꦥꦫꦶꦮꦴꦫꦱꦸꦠ꧀ꦠꦤꦶꦥꦴꦠꦩꦔ꧀ꦒꦭꦱꦸꦠ꧀ꦠꦫꦠꦤꦱꦸꦠ꧀ꦠ- ꦤꦴꦭ꦳ꦏꦱꦸꦠ꧀ꦠꦠꦸꦮꦛꦏꦱꦸꦠ꧀ꦠꦴꦤꦶ, ꦄꦚ꧀ꦚꦩ꧀ꦥꦶ ꦕ ꦱꦸꦠ꧀ꦠꦤꦴꦩꦏꦁ ꦠꦡꦴꦒꦠꦮꦕꦤꦁ ꦱꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦱꦧ꧀ꦧꦩ꧀ꦥꦶ ꦱꦒꦴꦡꦏꦁ ꦱꦸꦠ꧀ꦠꦁ ꦒꦺꦪ꧀ꦪꦤ꧀ꦠꦶ ꦮꦺꦢꦶꦠꦧ꧀ꦧꦁ, ꦮꦶꦱꦺꦱꦺꦤ ꦱꦁꦪꦸꦠ꧀ꦠꦏꦺ ꦱꦏꦭꦺꦴꦥꦶ ꦱꦒꦴꦡꦴꦮꦒ꧀ꦒꦺꦴ. ꦱꦏꦭꦩ꧀ꦥꦶ ꦄꦨꦶꦣꦩ꧀ꦩꦥꦶꦛꦏꦁ, ꦤꦶꦒ꧀ꦒꦴꦡꦏꦱꦸꦠ꧀ꦠꦁ, ꦪꦚ꧀ꦕ ꦄꦚ꧀ꦚꦩ꧀ꦥꦶ ꦄꦛ꧀ꦜꦲꦶ ꦄꦔ꧀ꦒꦺꦲꦶ ꦄꦱꦔ꧀ꦒꦲꦶꦠꦁ ꦧꦸꦢ꧀ꦣꦮꦕꦤꦁ, ꦠꦁ ꦮꦺꦪ꧀ꦪꦴꦏꦫꦟꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦣꦩ꧀ꦩꦥꦢ-ꦡꦺꦫꦒꦴꦡꦴ-ꦡꦺꦫꦶꦒꦴꦡꦴ ꦱꦸꦠ꧀ꦠꦤꦶꦥꦴꦠꦺ ꦤꦺꦴꦱꦸꦠ꧀ꦠꦤꦴꦩꦶꦏꦴ ꦱꦸꦢ꧀ꦣꦶꦏꦒꦴꦡꦴ ꦕ ꦒꦴꦡꦴꦠꦶ ꦮꦺꦢꦶꦠꦧ꧀ꦧꦴ. ꦱꦺꦴꦩꦤꦱ꧀ꦱꦚꦴꦟꦩꦪꦶꦏꦒꦴꦡꦴꦥꦛꦶꦱꦁꦪꦸꦠ꧀ꦠꦴ ꦢ꧀ꦮꦺꦄꦱꦷꦠꦶ ꦱꦸꦠ꧀ꦠꦤ꧀ꦠꦴ ꦈꦢꦴꦤꦤ꧀ꦠꦶ ꦮꦺꦢꦶꦠꦧ꧀ꦧꦴ. ‘‘ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ’’ꦠꦶꦄꦴꦢꦶꦤꦪꦥ꧀ꦥꦮꦠ꧀ꦠꦴ ꦢꦱꦸꦠ꧀ꦠꦫꦱꦠꦱꦸꦠ꧀ꦠꦤ꧀ꦠꦴ ꦆꦠꦶꦮꦸꦠ꧀ꦠꦏꦤ꧀ꦠꦶ ꦮꦺꦢꦶꦠꦧ꧀ꦧꦴ. ꦄꦥꦟ꧀ꦟꦏꦗꦴꦠꦏꦴꦢꦷꦤꦶ ꦥꦚ꧀ꦚꦴꦱꦴꦣꦶꦏꦴꦤꦶ ꦥꦚ꧀ꦕ ꦗꦴꦠꦏꦱꦠꦴꦤꦶ ꦗꦴꦠꦏꦤ꧀ꦠꦶ ꦮꦺꦢꦶꦠꦧ꧀ꦧꦴꦤꦶ. ‘‘ꦕꦠ꧀ꦠꦴꦫꦺꦴꦩꦺ, ꦨꦶꦏ꧀ꦑꦮꦺ, ꦄꦕ꧀ꦖꦫꦶꦪꦴ ꦄꦧ꧀ꦨꦸꦠꦴ ꦣꦩ꧀ꦩꦴ ꦄꦴꦤꦤ꧀ꦢꦺ’’ꦠꦶꦄꦴꦢꦶꦤꦪꦥ꧀ꦥꦮꦠ꧀ꦠꦴ ꦱꦧ꧀ꦧꦺꦥꦶ ꦄꦕ꧀ꦖꦫꦶꦪꦄꦧ꧀ꦨꦸꦠꦣꦩ꧀ꦩꦥꦛꦶꦱꦁꦪꦸꦠ꧀ꦠꦴ ꦱꦸꦠ꧀ꦠꦤ꧀ꦠꦴ ꦄꦧ꧀ꦨꦸꦠꦣꦩ꧀ꦩꦤ꧀ꦠꦶ ꦮꦺꦢꦶꦠꦧ꧀ꦧꦴ. ꦕꦹꦭ꦳ꦮꦺꦢꦭ꧀ꦭꦩꦲꦴꦮꦺꦢꦭ꧀ꦭꦱꦩ꧀ꦩꦴꦢꦶꦛ꧀ꦜꦶꦱꦏ꧀ꦏꦥꦚ꧀ꦲꦱꦔ꧀ꦑꦴꦫꦨꦴꦗꦤꦶꦪꦩꦲꦴꦥꦸꦟ꧀ꦟꦩꦱꦸꦠ꧀ꦠꦴꦢꦪꦺꦴ ꦱꦧ꧀ꦧꦺꦥꦶ ꦮꦺꦢꦚ꧀ꦕ ꦠꦸꦛ꧀ꦜꦶꦚ꧀ꦕ ꦭꦢ꧀ꦣꦴ ꦭꦢ꧀ꦣꦴ ꦥꦸꦕ꧀ꦖꦶꦠꦴ ꦱꦸꦠ꧀ꦠꦤ꧀ꦠꦴ ꦮꦺꦢꦭ꧀ꦭꦤ꧀ꦠꦶ ꦮꦺꦢꦶꦠꦧ꧀ꦧꦴ. ꦤ ꦄꦠ꧀ꦡꦩꦚ꧀ꦚꦴꦪ ꦤ ꦣꦩ꧀ꦩꦩꦚ꧀ꦚꦴꦪꦴꦠꦶ ꦄꦛ꧀ꦜꦏꦡꦚ꧀ꦕ ꦥꦴꦭ꦳ꦶꦚ꧀ꦕ ꦄꦗꦴꦤꦶꦠ꧀ꦮꦴ. ꦣꦩ꧀ꦩꦴꦤꦸꦣꦩ꧀ꦩꦥ꧀ꦥꦛꦶꦥꦤ꧀ꦤꦺꦴꦠꦶ ꦤꦮꦭꦺꦴꦏꦸꦠ꧀ꦠꦫꦣꦩ꧀ꦩꦱ꧀ꦱ ꦄꦤꦸꦫꦹꦥꦣꦩ꧀ꦩꦁ ꦱꦲꦱꦷꦭꦁ ꦥꦸꦧ꧀ꦧꦨꦴꦒꦥꦛꦶꦥꦢꦁ ꦤ ꦥꦛꦶꦥꦤ꧀ꦤꦺꦴ ꦲꦺꦴꦠꦶ. ꦆꦩꦶꦤꦴ ꦈꦥꦴꦪꦺꦤ ꦱꦧ꧀ꦧꦮꦴꦫꦺꦱꦸ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦥꦜꦩꦮꦴꦫꦺ ꦥꦤꦺꦠ꧀ꦡ ꦄꦥ꧀ꦥꦱ꧀ꦱꦸꦠꦢꦸꦱ꧀ꦱꦷꦭꦺꦴ ꦏꦡꦶꦠꦺꦴ, ꦢꦸꦠꦶꦪꦺ ꦄꦥ꧀ꦥꦱ꧀ꦱꦸꦠꦑꦷꦟꦴꦱꦮꦺꦴ, ꦠꦠꦶꦪꦺ ꦧꦲꦸꦱ꧀ꦱꦸꦠꦢꦸꦱ꧀ꦱꦷꦭꦺꦴ, ꦕꦠꦸꦠ꧀ꦡꦺ ꦧꦲꦸꦱ꧀ꦱꦸꦠꦑꦷꦟꦴꦱꦮꦺꦴ.

ꦱꦷꦭꦺꦱꦸ ꦄꦱꦩꦴꦲꦶꦠꦺꦴꦠꦶ ꦱꦷꦭꦺꦱꦸ ꦄꦥꦫꦶꦥꦹꦫꦏꦴꦫꦷ. ꦱꦷꦭꦠꦺꦴ ꦕ ꦱꦸꦠꦺꦤ ꦕꦴꦠꦶ ꦱꦷꦭꦨꦴꦒꦺꦤ ꦕ ꦱꦸꦠꦨꦴꦒꦺꦤ ꦕ ‘‘ꦄꦪꦁ ꦢꦸꦱ꧀ꦱꦷꦭꦺꦴ ꦄꦥ꧀ꦥꦱ꧀ꦱꦸꦠꦺꦴ’’ꦠꦶ ꦌꦮꦁ ꦠꦁ ꦒꦫꦲꦤ꧀ꦠꦷꦠꦶ ꦄꦠ꧀ꦡꦺꦴ. ꦠꦱ꧀ꦱ ꦱꦩ꧀ꦥꦗ꧀ꦗꦠꦺ ꦱꦸꦠꦤ꧀ꦠꦶ ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦪꦱ꧀ꦩꦴ ꦠꦺꦤ ꦱꦸꦠꦺꦤ ꦱꦸꦠꦏꦶꦕ꧀ꦕꦁ ꦏꦠꦁ, ꦠꦱ꧀ꦩꦴ ꦠꦱ꧀ꦱ ꦱꦸꦠꦁ ꦱꦩ꧀ꦥꦗ꧀ꦗꦠꦶ ꦤꦴꦩ. ꦤꦴꦱ꧀ꦱ ꦱꦩ꧀ꦥꦗ꧀ꦗꦠꦺꦠꦶ ꦱꦸꦠꦏꦶꦕ꧀ꦕꦱ꧀ꦱ ꦄꦏꦠꦠ꧀ꦠꦴ ꦤ ꦱꦩ꧀ꦥꦗ꧀ꦗꦠꦶ. ꦣꦩ꧀ꦩꦣꦫꦤ꧀ꦠꦶ ꦱꦸꦠꦣꦩ꧀ꦩꦴꦤꦁ ꦄꦴꦣꦴꦫꦨꦹꦠꦁ. ꦱꦥ꧀ꦥꦚ꧀ꦚꦤ꧀ꦠꦶ ꦱꦸꦥꦚ꧀ꦚꦁ. ꦤꦺꦏ꧀ꦑꦁ ꦗꦩ꧀ꦧꦺꦴꦤꦢꦱ꧀ꦱꦺꦮꦴꦠꦶ ꦗꦩ꧀ꦧꦸꦤꦢꦁ ꦮꦸꦕ꧀ꦕꦠꦶ ꦗꦴꦠꦶꦱꦸꦮꦟ꧀ꦟꦁ, ꦠꦱ꧀ꦱ ꦗꦩ꧀ꦧꦸꦤꦢꦱ꧀ꦱ ꦤꦺꦏ꧀ꦑꦁ ꦮꦶꦪ, ꦥꦚ꧀ꦕꦱꦸꦮꦟ꧀ꦟꦥꦫꦶꦩꦴꦟꦁ ꦱꦸꦮꦟ꧀ꦟꦓꦛꦶꦏꦁ ꦮꦶꦪꦴꦠꦶ ꦄꦠ꧀ꦡꦺꦴ.

꧗. ꦱꦺꦴꦨꦤꦱꦸꦠ꧀ꦠꦮꦟ꧀ꦟꦤꦴ

꧗. ꦱꦠ꧀ꦠꦩꦺ ꦮꦶꦪꦠ꧀ꦠꦴꦠꦶ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪꦺꦤ ꦱꦩꦤ꧀ꦤꦴꦒꦠꦴ. ꦮꦶꦤꦷꦠꦴꦠꦶ ꦮꦶꦤꦪꦁ ꦈꦥꦺꦠꦴ ꦱꦸꦮꦶꦤꦷꦠꦴ. ꦮꦶꦱꦴꦫꦢꦴꦠꦶ ꦮꦺꦱꦴꦫꦗ꧀ꦗꦺꦤ ꦱꦺꦴꦩꦤꦱ꧀ꦱꦱꦲꦒꦠꦺꦤ ꦚꦴꦟꦺꦤ ꦱꦩꦤ꧀ꦤꦴꦒꦠꦴ. ꦣꦩ꧀ꦩꦣꦫꦴꦠꦶ ꦱꦸꦠꦣꦩ꧀ꦩꦴꦤꦁ ꦄꦴꦣꦴꦫꦨꦹꦠꦴ. ꦨꦶꦏ꧀ꦑꦸ ꦕ ꦱꦷꦭꦱꦩ꧀ꦥꦤ꧀ꦤꦺꦴꦠꦶ ꦒꦴꦡꦴꦪ ꦏꦶꦚ꧀ꦕꦴꦥꦶ ꦌꦏꦺꦏꦱ꧀ꦱꦺꦮ ꦌꦏꦺꦏꦺꦴ ꦒꦸꦟꦺꦴ ꦏꦡꦶꦠꦺꦴ, ꦱꦧ꧀ꦧꦺꦱꦁ ꦥꦤ ꦱꦧ꧀ꦧꦺꦥꦶ ꦮꦛ꧀ꦛꦤ꧀ꦠꦷꦠꦶ.

꧘. ꦮꦺꦱꦴꦫꦗ꧀ꦗꦱꦸꦠ꧀ꦠꦮꦟ꧀ꦟꦤꦴ

꧘. ꦄꦛ꧀ꦜꦩꦺ ꦮꦺꦱꦴꦫꦗ꧀ꦗꦴꦤꦷꦠꦶ ꦌꦠ꧀ꦡ ꦱꦴꦫꦗ꧀ꦗꦥꦛꦶꦥꦏ꧀ꦑꦺꦴ ꦮꦺꦱꦴꦫꦗ꧀ꦗꦁ, ꦕꦠꦹꦱꦸ ꦜꦴꦤꦺꦱꦸ ꦱꦴꦫꦗ꧀ꦗꦴꦨꦴꦮꦁ ꦥꦕ꧀ꦕꦮꦺꦏ꧀ꦑꦤ꧀ꦠꦱ꧀ꦱ ꦈꦥ꧀ꦥꦤ꧀ꦤꦱꦺꦴꦩꦤꦱ꧀ꦱꦩꦪꦚꦴꦟꦱ꧀ꦱꦺꦠꦁ ꦤꦴꦩꦁ. ꦄꦴꦱꦨꦁ ꦜꦴꦤꦤ꧀ꦠꦶ ꦱꦺꦛ꧀ꦜꦛ꧀ꦜꦴꦤꦁ ꦈꦠ꧀ꦠꦩꦛ꧀ꦜꦴꦤꦁ. ꦄꦴꦱꦨꦴ ꦮꦴ ꦥꦸꦧ꧀ꦧꦧꦸꦢ꧀ꦣꦴ, ꦠꦺꦱꦁ ꦜꦴꦤꦤ꧀ꦠꦶ ꦄꦠ꧀ꦡꦺꦴ. ꦄꦥꦶꦕ ꦒꦮꦱꦠꦗꦺꦛ꧀ꦜꦏꦺꦴ ꦈꦱꦨꦺꦴ, ꦒꦮꦱꦲꦱ꧀ꦱꦗꦺꦛ꧀ꦜꦏꦺꦴ ꦮꦱꦨꦺꦴ. ꦮꦗꦱꦠꦗꦺꦛ꧀ꦜꦏꦺꦴ ꦮꦴ ꦈꦱꦨꦺꦴ, ꦮꦗꦱꦲꦱ꧀ꦱꦗꦺꦛ꧀ꦜꦏꦺꦴ ꦮꦱꦨꦺꦴ, ꦱꦧ꧀ꦧꦒꦮꦱꦺꦛ꧀ꦜꦺꦴ ꦱꦧ꧀ꦧꦥꦫꦶꦱ꧀ꦱꦪꦱꦲꦺꦴ ꦱꦺꦠꦺꦴ ꦥꦴꦱꦴꦢꦶꦏꦺꦴ ꦩꦲꦴꦨꦴꦫꦮꦲꦺꦴ ꦄꦱꦤꦶꦱꦠꦱꦢ꧀ꦢꦺꦲꦶꦥꦶ ꦄꦱꦩ꧀ꦥꦏꦩ꧀ꦥꦶꦪꦺꦴ ꦤꦶꦱꦨꦺꦴ, ꦱꦺꦴ ꦆꦣ ꦈꦱꦨꦺꦴꦠꦶ ꦄꦣꦶꦥ꧀ꦥꦺꦠꦺꦴ. ꦆꦢꦩ꧀ꦥꦶ ꦲꦶ ꦠꦱ꧀ꦱ ꦥꦫꦶꦪꦴꦪꦮꦕꦤꦁ. ꦈꦱꦨꦱ꧀ꦱ ꦆꦢꦤ꧀ꦠꦶ ꦄꦴꦱꦨꦁ. ꦜꦴꦤꦤ꧀ꦠꦶ ꦕꦠꦹꦲꦶ ꦥꦴꦢꦺꦲꦶ ꦥꦡꦮꦶꦁ ꦈꦥ꧀ꦥꦷꦭ꦳ꦺꦠ꧀ꦮꦴ ꦮꦮꦠ꧀ꦡꦴꦤꦁ. ꦆꦢꦁ ꦥꦤ ꦄꦴꦱꦨꦁ ꦮꦶꦪꦴꦠꦶ ꦄꦴꦱꦨꦁ. ꦪꦡꦺꦮ ꦲꦶ ꦤꦶꦱꦨꦱꦔ꧀ꦑꦴꦠꦺꦴ ꦈꦱꦨꦺꦴ ꦕꦠꦹꦲꦶ ꦥꦴꦢꦺꦲꦶ ꦥꦡꦮꦶꦁ ꦈꦥ꧀ꦥꦷꦭ꦳ꦺꦠ꧀ꦮꦴ ꦄꦕꦭꦛ꧀ꦜꦴꦤꦺꦤ ꦠꦶꦛ꧀ꦜꦠꦶ, ꦌꦮꦁ ꦠꦡꦴꦒꦠꦺꦴꦥꦶ ꦕꦠꦹꦲꦶ ꦮꦺꦱꦴꦫꦗ꧀ꦗꦥꦴꦢꦺꦲꦶ ꦄꦛ꧀ꦜꦥꦫꦶꦱꦥꦡꦮꦶꦁ ꦈꦥ꧀ꦥꦷꦭ꦳ꦺꦠ꧀ꦮꦴ ꦱꦢꦺꦮꦏꦺ ꦭꦺꦴꦏꦺ ꦏꦺꦤꦕꦶ ꦥꦕ꧀ꦕꦠ꧀ꦡꦶꦏꦺꦤ ꦥꦕ꧀ꦕꦴꦩꦶꦠ꧀ꦠꦺꦤ ꦄꦏꦩ꧀ꦥꦶꦪꦺꦴ ꦄꦕꦭꦛ꧀ꦜꦴꦤꦺꦤ ꦠꦶꦛ꧀ꦜꦠꦶ. ꦌꦮꦁ ꦠꦶꦛ꧀ꦜꦩꦴꦤꦺꦴꦮ ꦠꦁ ꦄꦴꦱꦨꦁ ꦜꦴꦤꦁ ꦥꦛꦶꦗꦴꦤꦴꦠꦶ ꦈꦥꦒꦕ꧀ꦖꦠꦶ ꦤ ꦥꦕ꧀ꦕꦏ꧀ꦑꦴꦠꦶ, ꦄꦠ꧀ꦠꦤꦶ ꦄꦴꦫꦺꦴꦥꦺꦠꦶ. ꦠꦺꦤ ꦮꦸꦠ꧀ꦠꦁ ‘‘ꦄꦴꦱꦨꦁ ꦜꦴꦤꦁ ꦥꦛꦶꦗꦴꦤꦴꦠꦷ’’ꦠꦶ.

ꦥꦫꦶꦱꦴꦱꦹꦠꦶ ꦄꦛ꧀ꦜꦱꦸ ꦥꦫꦶꦱꦴꦱꦸ. ꦱꦷꦲꦤꦴꦢꦁ ꦤꦢꦠꦷꦠꦶ ꦱꦺꦛ꧀ꦜꦤꦴꦢꦁ ꦄꦨꦷꦠꦤꦴꦢꦁ ꦤꦢꦠꦶ, ꦱꦷꦲꦤꦴꦢꦱꦢꦶꦱꦁ ꦮꦴ ꦤꦴꦢꦁ ꦤꦢꦠꦶ. ꦄꦪꦩꦠ꧀ꦡꦺꦴ ꦱꦷꦲꦤꦴꦢꦱꦸꦠ꧀ꦠꦺꦤ ꦢꦱ꧀ꦱꦺꦠꦧ꧀ꦧꦺꦴ. ꦪꦡꦴ ꦮꦴ ꦱꦷꦲꦺꦴ ꦱꦲꦤꦠꦺꦴ ꦕ ꦲꦤꦤꦠꦺꦴ ꦕ ꦱꦷꦲꦺꦴꦠꦶ ꦮꦸꦕ꧀ꦕꦠꦶ, ꦌꦮꦁ ꦠꦡꦴꦒꦠꦺꦴ ꦭꦺꦴꦏꦣꦩ꧀ꦩꦴꦤꦁ ꦱꦲꦤꦠꦺꦴ ꦥꦫꦥ꧀ꦥꦮꦴꦢꦴꦤꦚ꧀ꦕ ꦲꦤꦤꦠꦺꦴ ꦱꦷꦲꦺꦴꦠꦶ ꦮꦸꦕ꧀ꦕꦠꦶ. ꦌꦮꦁ ꦮꦸꦠ꧀ꦠꦱ꧀ꦱ ꦱꦷꦲꦱ꧀ꦱ ꦤꦴꦢꦁ ꦱꦷꦲꦤꦴꦢꦁ. ꦠꦠ꧀ꦡ ꦪꦡꦴ ꦱꦷꦲꦺꦴ ꦱꦷꦲꦧꦭꦺꦤ ꦱꦩꦤ꧀ꦤꦴꦒꦠꦺꦴ ꦱꦧ꧀ꦧꦠ꧀ꦡ ꦮꦶꦱꦴꦫꦢꦺꦴ ꦮꦶꦒꦠꦭꦺꦴꦩꦲꦁꦱꦺꦴ ꦱꦷꦲꦤꦴꦢꦁ ꦤꦢꦠꦶ, ꦌꦮꦁ ꦠꦡꦴꦒꦠꦱꦷꦲꦺꦴꦥꦶ ꦠꦡꦴꦒꦠꦧꦭꦺꦲꦶ ꦱꦩꦤ꧀ꦤꦴꦒꦠꦺꦴ ꦄꦛ꧀ꦜꦱꦸ ꦥꦫꦶꦱꦴꦱꦸ ꦮꦶꦱꦴꦫꦢꦺꦴ ꦮꦶꦒꦠꦭꦺꦴꦩꦲꦁꦱꦺꦴ ‘‘ꦆꦠꦶ ꦫꦹꦥ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦤꦴꦤꦴꦮꦶꦣꦢꦺꦱꦤꦴꦮꦶꦭꦴꦱꦱꦩ꧀ꦥꦤ꧀ꦤꦁ ꦱꦷꦲꦤꦴꦢꦁ ꦤꦢꦠꦶ. ꦠꦺꦤ ꦮꦸꦠ꧀ꦠꦁ ‘‘ꦥꦫꦶꦱꦴꦱꦸ ꦱꦷꦲꦤꦴꦢꦁ ꦤꦢꦠꦷ’’ꦠꦶ.

ꦧ꧀ꦫꦲ꧀ꦩꦕꦏ꧀ꦏꦁ ꦥꦮꦠ꧀ꦠꦺꦠꦷꦠꦶ ꦌꦠ꧀ꦡ ꦧ꧀ꦫꦲ꧀ꦩꦤ꧀ꦠꦶ ꦱꦺꦛ꧀ꦜꦁ ꦈꦠ꧀ꦠꦩꦁ ꦮꦶꦱꦸꦢ꧀ꦣꦁ. ꦕꦏ꧀ꦏꦱꦢ꧀ꦢꦺꦴ ꦥꦤꦴꦪꦁ –

‘‘ꦱꦩ꧀ꦥꦠ꧀ꦠꦶꦪꦁ ꦭꦏ꧀ꦑꦟꦺ ꦕ, ꦫꦡꦔ꧀ꦒꦺ ꦆꦫꦶꦪꦴꦥꦡꦺ;

ꦢꦴꦤꦺ ꦫꦠꦤꦣꦩ꧀ꦩꦹꦫ-ꦕꦏ꧀ꦏꦴꦢꦷꦱꦸ ꦕ ꦢꦶꦱ꧀ꦱꦠꦶ;

ꦣꦩ꧀ꦩꦕꦏ꧀ꦏꦺ ꦆꦣ ꦩꦠꦺꦴ, ꦠꦚ꧀ꦕ ꦢ꧀ꦮꦺꦣꦴ ꦮꦶꦨꦴꦮꦪꦺ’’.

‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦕꦏ꧀ꦏꦴꦤꦶ, ꦪꦺꦲꦶ ꦱꦩꦤ꧀ꦤꦴꦒꦠꦴꦤꦁ ꦢꦺꦮꦩꦤꦸꦱ꧀ꦱꦴꦤ’’ꦤ꧀ꦠꦶꦄꦴꦢꦷꦱꦸ (ꦄ. ꦤꦶ. ꧔.꧓꧑) ꦲꦶ ꦄꦪꦁ ꦱꦩ꧀ꦥꦠ꧀ꦠꦶꦪꦁ ꦢꦶꦱ꧀ꦱꦠꦶ. ‘‘ꦥꦴꦢꦠꦭꦺꦱꦸ ꦕꦏ꧀ꦏꦴꦤꦶ ꦗꦴꦠꦴꦤꦷ’’ꦠꦶ (ꦢꦷ. ꦤꦶ. ꧒.꧓꧕) ꦌꦠ꧀ꦡ ꦭꦏ꧀ꦑꦟꦺ. ‘‘ꦕꦏ꧀ꦏꦁꦮ ꦮꦲꦠꦺꦴ ꦥꦢ’’ꦤ꧀ꦠꦶ (ꦣ. ꦥ. ꧑) ꦌꦠ꧀ꦡ ꦫꦡꦔ꧀ꦒꦺ. ‘‘ꦕꦠꦸꦕꦏ꧀ꦏꦁ ꦤꦮꦢ꧀ꦮꦴꦫ’’ꦤ꧀ꦠꦶ (ꦱꦁ. ꦤꦶ. ꧑.꧒꧙) ꦌꦠ꧀ꦡ ꦆꦫꦶꦪꦴꦥꦡꦺ. ‘‘ꦢꦢꦁ ꦨꦸꦚ꧀ꦗ ꦩꦴ ꦕ ꦥꦩꦴꦢꦺꦴ, ꦕꦏ꧀ꦏꦁ ꦮꦠ꧀ꦠꦪ ꦱꦧ꧀ꦧꦥꦴꦟꦶꦤ’’ꦤ꧀ꦠꦶ (ꦗꦴ. ꧑.꧗.꧑꧔꧙) ꦌꦠ꧀ꦡ ꦢꦴꦤꦺ. ‘‘ꦢꦶꦧ꧀ꦧꦁ ꦕꦏ꧀ꦏꦫꦠꦤꦁ ꦥꦴꦠꦸꦫꦲꦺꦴꦱꦷ’’ꦠꦶ (ꦢꦷ. ꦤꦶ. ꧒.꧒꧔꧓; ꦩ. ꦤꦶ. ꧓.꧒꧕꧖) ꦌꦠ꧀ꦡ ꦫꦠꦤꦕꦏ꧀ꦏꦺ. ‘‘ꦩꦪꦴ ꦥꦮꦠ꧀ꦠꦶꦠꦁ ꦕꦏ꧀ꦏ’’ꦤ꧀ꦠꦶ (ꦱꦸ. ꦤꦶ. ꧕꧖꧒) ꦌꦠ꧀ꦡ ꦣꦩ꧀ꦩꦕꦏ꧀ꦏꦺ. ‘‘ꦆꦕ꧀ꦖꦴꦲꦠꦱ꧀ꦱ ꦥꦺꦴꦱꦱ꧀ꦱ, ꦕꦏ꧀ꦏꦁ ꦨꦩꦠꦶ ꦩꦠ꧀ꦡꦏꦺ’’ꦠꦶ (ꦗꦴ. ꧑.꧑.꧑꧐꧔; ꧑.꧕.꧑꧐꧓) ꦌꦠ꧀ꦡ ꦈꦫꦕꦏ꧀ꦏꦺ. ‘‘ꦑꦸꦫꦥꦫꦶꦪꦤ꧀ꦠꦺꦤ ꦕꦺꦥꦶ ꦕꦏ꧀ꦏꦺꦤꦴ’’ꦠꦶ (ꦢꦷ. ꦤꦶ. ꧑.꧑꧖꧖) ꦌꦠ꧀ꦡ ꦥꦲꦫꦟꦕꦏ꧀ꦏꦺ. ‘‘ꦄꦱꦤꦶꦮꦶꦕꦏ꧀ꦏ’’ꦤ꧀ꦠꦶ (ꦢꦷ. ꦤꦶ. ꧓.꧖꧑; ꦱꦁ. ꦤꦶ. ꧒.꧑꧖꧒) ꦌꦠ꧀ꦡ ꦄꦱꦤꦶꦩꦟ꧀ꦝꦭꦺ. ꦆꦣ ꦥꦤꦴꦪꦁ ꦣꦩ꧀ꦩꦕꦏ꧀ꦏꦺ ꦩꦠꦺꦴ.

ꦠꦁ ꦥꦤꦺꦠꦁ ꦣꦩ꧀ꦩꦕꦏ꧀ꦏꦁ ꦢꦸꦮꦶꦣꦁ ꦲꦺꦴꦠꦶ ꦥꦛꦶꦮꦺꦣꦚꦴꦟꦚ꧀ꦕ ꦢꦺꦱꦤꦴꦚꦴꦟꦚ꧀ꦕ. ꦠꦠ꧀ꦡ ꦥꦚ꧀ꦚꦴꦥꦨꦴꦮꦶꦠꦁ ꦄꦠ꧀ꦠꦤꦺꦴ ꦄꦫꦶꦪꦦꦭꦴꦮꦲꦁ ꦥꦛꦶꦮꦺꦣꦚꦴꦟꦁ, ꦏꦫꦸꦟꦴꦥꦨꦴꦮꦶꦠꦁ ꦱꦴꦮꦏꦴꦤꦁ ꦄꦫꦶꦪꦦꦭꦴꦮꦲꦁ ꦢꦺꦱꦤꦴꦚꦴꦟꦁ. ꦠꦠ꧀ꦡ ꦥꦛꦶꦮꦺꦣꦚꦴꦟꦁ ꦈꦥ꧀ꦥꦗ꧀ꦗꦩꦴꦤꦁ ꦈꦥ꧀ꦥꦤ꧀ꦤꦤ꧀ꦠꦶ ꦢꦸꦮꦶꦣꦁ. ꦠꦚ꧀ꦲꦶ ꦄꦨꦶꦤꦶꦏ꧀ꦑꦩꦤꦠꦺꦴ ꦪꦴꦮ ꦄꦫꦲꦠ꧀ꦠꦩꦒ꧀ꦒꦴ ꦈꦥ꧀ꦥꦗ꧀ꦗꦩꦴꦤꦁ, ꦦꦭꦏ꧀ꦑꦟꦺ ꦈꦥ꧀ꦥꦤ꧀ꦤꦁ ꦤꦴꦩ. ꦠꦸꦱꦶꦠꦨꦮꦤꦠꦺꦴ ꦮꦴ ꦪꦴꦮ ꦩꦲꦴꦧꦺꦴꦣꦶꦥꦭ꧀ꦭꦔ꧀ꦏꦺ ꦄꦫꦲꦠ꧀ꦠꦩꦒ꧀ꦒꦴ ꦈꦥ꧀ꦥꦗ꧀ꦗꦩꦴꦤꦁ, ꦦꦭꦏ꧀ꦑꦟꦺ ꦈꦥ꧀ꦥꦤ꧀ꦤꦁ ꦤꦴꦩ. ꦢꦷꦥꦔ꧀ꦏꦫꦠꦺꦴ ꦥꦛ꧀ꦜꦴꦪ ꦮꦴ ꦪꦴꦮ ꦧꦺꦴꦣꦶꦥꦭ꧀ꦭꦔ꧀ꦏꦺ ꦄꦫꦲꦠ꧀ꦠꦩꦒ꧀ꦒꦴ ꦈꦥ꧀ꦥꦗ꧀ꦗꦩꦴꦤꦁ, ꦦꦭꦏ꧀ꦑꦟꦺ ꦈꦥ꧀ꦥꦤ꧀ꦤꦁ ꦤꦴꦩ. ꦢꦺꦱꦤꦴꦚꦴꦟꦩ꧀ꦥꦶ ꦥꦮꦠ꧀ꦠꦩꦴꦤꦁ ꦥꦮꦠ꧀ꦠꦤ꧀ꦠꦶ ꦢꦸꦮꦶꦣꦁ. ꦠꦚ꧀ꦲꦶ ꦪꦴꦮ ꦄꦚ꧀ꦚꦴꦱꦶꦏꦺꦴꦟ꧀ꦝꦚ꧀ꦚꦱ꧀ꦱ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦴ ꦥꦮꦠ꧀ꦠꦩꦴꦤꦁ, ꦦꦭꦏ꧀ꦑꦟꦺ ꦥꦮꦠ꧀ꦠꦁ ꦤꦴꦩ. ꦠꦺꦱꦸ ꦥꦛꦶꦮꦺꦣꦚꦴꦟꦁ ꦭꦺꦴꦏꦸꦠ꧀ꦠꦫꦁ, ꦢꦺꦱꦤꦴꦚꦴꦟꦁ ꦭꦺꦴꦏꦶꦪꦁ. ꦈꦨꦪꦩ꧀ꦥꦶ ꦥꦤꦺꦠꦁ ꦄꦚ꧀ꦚꦺꦲꦶ ꦄꦱꦴꦣꦴꦫꦟꦁ, ꦧꦸꦢ꧀ꦣꦴꦤꦁꦪꦺꦮ ꦎꦫꦱꦚꦴꦟꦁ.

ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦠꦺ ꦥꦛꦶꦗꦴꦤꦠꦺꦴꦠꦶ ‘‘ꦄꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ, ꦱꦧ꧀ꦧꦺ ꦣꦩ꧀ꦩꦴ ꦩꦪꦴ ꦄꦨꦶꦱꦩ꧀ꦧꦸꦢ꧀ꦣꦴ’’ꦠꦶ ꦌꦮꦁ ꦥꦛꦶꦗꦴꦤꦠꦺꦴ ꦠꦮ. ꦄꦤꦨꦶꦱꦩ꧀ꦧꦸꦢ꧀ꦣꦴꦠꦶ ꦆꦩꦺ ꦤꦴꦩ ꦣꦩ꧀ꦩꦴ ꦠꦪꦴ ꦄꦤꦨꦶꦱꦩ꧀ꦧꦸꦢ꧀ꦣꦴ. ꦠꦠ꧀ꦫ ꦮꦠꦴꦠꦶ ꦠꦺꦱꦸ ‘‘ꦄꦤꦨꦶꦱꦩ꧀ꦧꦸꦢ꧀ꦣꦴ’’ꦠꦶ ꦌꦮꦁ ꦢꦱ꧀ꦱꦶꦠꦣꦩ꧀ꦩꦺꦱꦸ. ꦱꦲꦣꦩ꧀ꦩꦺꦤꦴꦠꦶ ꦱꦲꦺꦠꦸꦤꦴ ꦱꦏꦴꦫꦟꦺꦤ ꦮꦕꦤꦺꦤ. ꦤꦶꦩꦶꦠ꧀ꦠꦩꦺꦠꦤ꧀ꦠꦶ ꦌꦠ꧀ꦡ ꦥꦸꦒ꧀ꦒꦭꦺꦴꦥꦶ ꦣꦩ꧀ꦩꦺꦴꦥꦶ ꦤꦶꦩꦶꦠ꧀ꦠꦤ꧀ꦠꦶ ꦄꦣꦶꦥ꧀ꦥꦺꦠꦺꦴ. ꦠꦁ ꦥꦸꦒ꧀ꦒꦭꦁ ꦤ ꦥꦱ꧀ꦱꦴꦩꦶ, ꦪꦺꦴ ꦩꦁ ꦥꦛꦶꦕꦺꦴꦢꦺꦱ꧀ꦱꦠꦶ. ꦠꦁ ꦣꦩ꧀ꦩꦁ ꦤ ꦥꦱ꧀ꦱꦴꦩꦶ, ꦪꦁ ꦢꦱ꧀ꦱꦺꦠ꧀ꦮꦴ ‘‘ꦄꦪꦁ ꦤꦴꦩ ꦣꦩ꧀ꦩꦺꦴ ꦠꦪꦴ ꦄꦤꦨꦶꦱꦩ꧀ꦧꦸꦢ꧀ꦣꦺꦴ’’ꦠꦶ ꦩꦁ ꦥꦛꦶꦕꦺꦴꦢꦺꦱ꧀ꦱꦠꦷꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴ. ꦑꦺꦩꦥ꧀ꦥꦠ꧀ꦠꦺꦴꦠꦶ ꦑꦺꦩꦁ ꦥꦠ꧀ꦠꦺꦴ. ꦱꦺꦱꦥꦢꦢ꧀ꦮꦪꦁ ꦆꦩꦱ꧀ꦱꦺꦮ ꦮꦺꦮꦕꦤꦁ. ꦱꦧ꧀ꦧꦩ꧀ꦥꦺꦠꦁ ꦮꦺꦱꦴꦫꦗ꧀ꦗꦚꦴꦟꦩꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ. ꦢꦱꦧꦭꦱ꧀ꦱ ꦲꦶ ‘‘ꦄꦪꦁ ꦤꦴꦩ ꦣꦩ꧀ꦩꦺꦴ ꦠꦪꦴ ꦄꦤꦨꦶꦱꦩ꧀ꦧꦸꦢ꧀ꦣꦺꦴ’’ꦠꦶ ꦕꦺꦴꦢꦏꦁ ꦥꦸꦒ꧀ꦒꦭꦁ ꦮꦴ ꦕꦺꦴꦢꦤꦴꦏꦴꦫꦟꦁ ꦄꦤꦨꦶꦱꦩ꧀ꦧꦸꦢ꧀ꦣꦣꦩ꧀ꦩꦁ ꦮꦴ ꦄꦥꦱ꧀ꦱꦠꦺꦴ ‘‘ꦱꦨꦴꦮꦧꦸꦢ꧀ꦣꦺꦴꦪꦺꦮ ꦮꦠ ꦱꦩꦴꦤꦺꦴ ꦄꦲꦁ ꦧꦸꦢ꧀ꦣꦺꦴꦱ꧀ꦩꦷꦠꦶ ꦮꦢꦴꦩꦷ’’ꦠꦶ ꦥꦕ꧀ꦕꦮꦺꦏ꧀ꦑꦤ꧀ꦠꦱ꧀ꦱ ꦧꦭꦮꦠꦫꦁ ꦱꦺꦴꦩꦤꦱ꧀ꦱꦁ ꦈꦥ꧀ꦥꦗ꧀ꦗꦠꦶ, ꦠꦺꦤ ꦱꦩ꧀ꦥꦪꦸꦠ꧀ꦠꦁ ꦚꦴꦟꦁ ꦮꦺꦱꦴꦫꦗ꧀ꦗꦁ ꦤꦴꦩ. ꦠꦁ ꦱꦤ꧀ꦣꦴꦪ ‘‘ꦑꦺꦩꦥ꧀ꦥꦠ꧀ꦠꦺꦴ’’ꦠꦶꦄꦴꦢꦶꦩꦴꦲ. ꦌꦮꦁ ꦱꦧ꧀ꦧꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦄꦤ꧀ꦠꦫꦴꦪꦶꦏꦴ ꦣꦩ꧀ꦩꦴꦠꦶ ꦌꦠ꧀ꦡ ꦥꦤ ꦄꦤ꧀ꦠꦫꦴꦪꦁ ꦏꦫꦺꦴꦤ꧀ꦠꦷꦠꦶ ꦄꦤ꧀ꦠꦫꦴꦪꦶꦏꦴ. ꦠꦺ ꦄꦠ꧀ꦡꦠꦺꦴ ꦱꦚ꧀ꦕꦶꦕ꧀ꦕ ꦮꦷꦠꦶꦏ꧀ꦏꦤ꧀ꦠꦴ ꦱꦠ꧀ꦠ ꦄꦴꦥꦠ꧀ꦠꦶꦏ꧀ꦑꦤ꧀ꦣꦴ. ꦱꦚ꧀ꦕꦶꦕ꧀ꦕ ꦮꦷꦠꦶꦏ꧀ꦏꦤ꧀ꦠꦁ ꦲꦶ ꦄꦤ꧀ꦠꦩꦱꦺꦴ ꦢꦸꦏ꧀ꦏꦛꦢꦸꦧ꧀ꦨꦴꦱꦶꦠꦩ꧀ꦥꦶ ꦩꦒ꧀ꦒꦦꦭꦴꦤꦁ ꦄꦤ꧀ꦠꦫꦴꦪꦁ ꦏꦫꦺꦴꦠꦶ. ꦆꦣ ꦥꦤ ꦩꦺꦡꦸꦤꦣꦩ꧀ꦩꦺꦴ ꦄꦣꦶꦥ꧀ꦥꦺꦠꦺꦴ. ꦩꦺꦡꦸꦤꦁ ꦱꦺꦮꦠꦺꦴ ꦲꦶ ꦪꦱ꧀ꦱ ꦏꦱ꧀ꦱꦕꦶ ꦤꦶꦱ꧀ꦱꦁꦱꦪꦩꦺꦮ ꦩꦒ꧀ꦒꦦꦭꦴꦤꦁ ꦄꦤ꧀ꦠꦫꦴꦪꦺꦴ ꦲꦺꦴꦠꦶ.

ꦪꦱ꧀ꦱ ꦑꦺꦴ ꦥꦤ ꦠꦺ ꦄꦠ꧀ꦡꦴꦪꦴꦠꦶ ꦫꦴꦒꦏ꧀ꦑꦪꦴꦢꦷꦱꦸ ꦪꦱ꧀ꦱ ꦄꦠ꧀ꦡꦴꦪ. ꦣꦩ꧀ꦩꦺꦴ ꦢꦺꦱꦶꦠꦺꦴꦠꦶ ꦄꦱꦸꦨꦨꦴꦮꦤꦴꦢꦶꦣꦩ꧀ꦩꦺꦴ ꦏꦡꦶꦠꦺꦴ. ꦠꦠ꧀ꦫ ꦮꦠ ꦩꦤ꧀ꦠꦶ ꦠꦱ꧀ꦩꦶꦁ ꦄꦤꦶꦪ꧀ꦪꦴꦤꦶꦏꦣꦩ꧀ꦩꦺ ꦩꦁ. ꦱꦺꦱꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ.

ꦮꦴꦢꦥꦡꦴꦠꦶ ꦮꦴꦢꦴꦪꦺꦮ. ꦥꦸꦡꦹꦠꦶ ꦧꦲꦹ. ꦱꦶꦠꦴꦠꦶ ꦈꦥꦤꦶꦧꦢ꧀ꦣꦴ ꦄꦨꦶꦱꦔ꧀ꦑꦠꦴ. ꦄꦡ ꦮꦴ ꦥꦸꦡꦸꦱ꧀ꦱꦶꦠꦴꦠꦶ ꦥꦸꦡꦸꦨꦴꦮꦁ ꦱꦶꦠꦴ ꦈꦥꦒꦠꦴ, ꦥꦸꦡꦹꦲꦶ ꦮꦴ ꦱꦶꦠꦴꦠꦶꦥꦶ ꦥꦸꦡꦸꦱ꧀ꦱꦶꦠꦴ. ꦪꦁ ꦤꦶꦱ꧀ꦱꦶꦠꦴꦠꦶ ꦌꦠꦫꦲꦶꦥꦶ ꦪꦁ ꦮꦴꦢꦥꦡꦁ ꦤꦶꦱ꧀ꦱꦶꦠꦴ. ꦤ ꦠꦺ ꦨꦮꦤ꧀ꦠꦷꦠꦶ ꦠꦺ ꦮꦴꦢꦥꦡꦴ ꦤ ꦨꦮꦤ꧀ꦠꦶ ꦨꦶꦗ꧀ꦗꦤ꧀ꦠꦶ ꦮꦶꦤꦱ꧀ꦱꦤ꧀ꦠꦶ. ꦣꦩ꧀ꦩꦕꦏ꧀ꦏꦤ꧀ꦠꦶ ꦢꦺꦱꦤꦴꦚꦴꦟꦱ꧀ꦱꦥꦶ ꦥꦛꦶꦮꦺꦣꦚꦴꦟꦱ꧀ꦱꦥꦶ ꦌꦠꦁ ꦤꦴꦩꦁ. ꦠꦺꦱꦸ ꦢꦺꦱꦤꦴꦚꦴꦟꦁ ꦭꦺꦴꦏꦶꦪꦁ, ꦥꦛꦶꦮꦺꦣꦚꦴꦟꦁ ꦭꦺꦴꦏꦸꦠ꧀ꦠꦫꦁ. ꦏꦺꦮꦭꦷꦠꦶ ꦱꦏꦭꦒꦸꦟꦱꦩꦤ꧀ꦤꦴꦒꦠꦺꦴ. ꦠꦴꦢꦶꦱꦤ꧀ꦠꦶ ꦠꦡꦴꦮꦶꦣꦁ.

꧙. ꦠꦟ꧀ꦲꦸꦥ꧀ꦥꦴꦢꦱꦸꦠ꧀ꦠꦮꦟ꧀ꦟꦤꦴ

꧙. ꦤꦮꦩꦺ ꦈꦥ꧀ꦥꦗ꧀ꦗꦠꦶ ꦌꦠꦺꦱꦹꦠꦶ ꦈꦥ꧀ꦥꦴꦢꦴ. ꦏꦴ ꦈꦥ꧀ꦥꦗ꧀ꦗꦠꦶ? ꦠꦟ꧀ꦲꦴ. ꦠꦟ꧀ꦲꦴꦪ ꦈꦥ꧀ꦥꦴꦢꦴ ꦠꦟ꧀ꦲꦸꦥ꧀ꦥꦴꦢꦴ, ꦠꦟ꧀ꦲꦴꦮꦠ꧀ꦡꦹꦤꦶ ꦠꦟ꧀ꦲꦴꦏꦴꦫꦟꦴꦤꦷꦠꦶ ꦄꦠ꧀ꦡꦺꦴ. ꦕꦷꦮꦫꦲꦺꦠꦹꦠꦶ ‘‘ꦏꦠ꧀ꦡ ꦩꦤꦴꦥꦁ ꦕꦷꦮꦫꦁ ꦭꦨꦶꦱ꧀ꦱꦴꦩꦷ’’ꦠꦶ ꦕꦷꦮꦫꦏꦴꦫꦟꦴ ꦈꦥ꧀ꦥꦗ꧀ꦗꦠꦶ. ꦆꦠꦶꦨꦮꦴꦨꦮꦲꦺꦠꦹꦠꦶ ꦌꦠ꧀ꦡ ꦆꦠꦷꦠꦶ ꦤꦶꦢꦱ꧀ꦱꦤꦠ꧀ꦡꦺ ꦤꦶꦥꦴꦠꦺꦴ. ꦪꦡꦴ ꦕꦷꦮꦫꦴꦢꦶꦲꦺꦠꦸ, ꦌꦮꦁ ꦨꦮꦴꦨꦮꦲꦺꦠꦸꦥꦷꦠꦶ ꦄꦠ꧀ꦡꦺꦴ. ꦨꦮꦴꦨꦮꦺꦴꦠꦶ ꦕꦺꦠ꧀ꦡ ꦥꦟꦷꦠꦠꦫꦴꦤꦶ ꦱꦥ꧀ꦥꦶꦤꦮꦤꦷꦠꦴꦢꦷꦤꦶ ꦄꦣꦶꦥ꧀ꦥꦺꦠꦴꦤꦶ. ꦱꦩ꧀ꦥꦠ꧀ꦠꦶꦨꦮꦺꦱꦸ ꦥꦟꦷꦠꦠꦫꦥꦟꦷꦠꦠꦩꦨꦮꦺꦴꦠꦶꦥꦶ ꦮꦢꦤ꧀ꦠꦶꦪꦺꦮ.

ꦠꦟ꧀ꦲꦴꦢꦸꦠꦶꦪꦺꦴꦠꦶ ꦄꦪꦚ꧀ꦲꦶ ꦱꦠ꧀ꦠꦺꦴ ꦄꦤꦩꦠꦒ꧀ꦒꦺ ꦱꦁꦱꦴꦫꦮꦛ꧀ꦛꦺ ꦱꦁꦱꦫꦤ꧀ꦠꦺꦴ ꦤ ꦌꦏꦏꦺꦴꦮ ꦱꦁꦱꦫꦠꦶ, ꦠꦟ꧀ꦲꦁ ꦥꦤ ꦢꦸꦠꦶꦪꦶꦏꦁ ꦭꦨꦤ꧀ꦠꦺꦴꦮ ꦱꦁꦱꦫꦠꦶ. ꦠꦺꦤ ꦮꦸꦠ꧀ꦠꦁ ‘‘ꦠꦟ꧀ꦲꦴꦢꦸꦠꦶꦪꦺꦴ’’ꦠꦶ. ꦆꦠ꧀ꦡꦨꦴꦮꦚ꧀ꦚꦡꦴꦨꦴꦮꦤ꧀ꦠꦶ ꦌꦠ꧀ꦡ ꦆꦠ꧀ꦡꦨꦴꦮꦺꦴ ꦤꦴꦩ ꦄꦪꦁ ꦄꦠ꧀ꦠꦨꦴꦮꦺꦴ, ꦄꦚ꧀ꦚꦡꦴꦨꦴꦮꦺꦴ ꦤꦴꦩ ꦄꦤꦴꦒꦠꦠ꧀ꦠꦨꦴꦮꦺꦴ. ꦌꦮꦫꦹꦥꦺꦴ ꦮꦴ ꦄꦚ꧀ꦚꦺꦴꦥꦶ ꦄꦠ꧀ꦠꦨꦴꦮꦺꦴ ꦆꦠ꧀ꦡꦨꦴꦮꦺꦴ ꦤꦴꦩ, ꦤ ꦌꦮꦫꦹꦥꦺꦴ ꦄꦚ꧀ꦚꦡꦴꦨꦴꦮꦺꦴ ꦤꦴꦩ. ꦠꦁ ꦆꦠ꧀ꦡꦨꦴꦮꦚ꧀ꦚꦡꦴꦨꦴꦮꦁ. ꦱꦁꦱꦴꦫꦤ꧀ꦠꦶ ꦑꦤ꧀ꦣꦣꦴꦠꦸꦄꦴꦪꦠꦤꦴꦤꦁ ꦥꦛꦶꦥꦴꦛꦶꦁ. ꦤꦴꦠꦶꦮꦠ꧀ꦠꦠꦷꦠꦶ ꦤꦴꦠꦶꦏ꧀ꦏꦩꦠꦶ. ꦌꦮꦩꦴꦢꦷꦤꦮꦁ ꦚꦠ꧀ꦮꦴꦠꦶ ꦌꦮꦁ ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦺꦱꦸ ꦑꦤ꧀ꦣꦺꦱꦸ ꦄꦴꦢꦷꦤꦮꦁ ꦗꦴꦤꦶꦠ꧀ꦮꦴ. ꦠꦟ꧀ꦲꦁ ꦢꦸꦏ꧀ꦑꦱ꧀ꦱ ꦱꦩ꧀ꦨꦮꦤ꧀ꦠꦶ ꦠꦟ꧀ꦲꦁ ꦕ ‘‘ꦄꦪꦁ ꦮꦛ꧀ꦛꦢꦸꦏ꧀ꦑꦱꦩ꧀ꦨꦹꦠꦺꦴ ꦱꦨꦴꦮꦺꦴ ꦏꦴꦫꦟ’’ꦤ꧀ꦠꦶ ꦌꦮꦁ ꦗꦴꦤꦶꦠ꧀ꦮꦴ. ꦌꦠ꧀ꦠꦴꦮꦠꦴ ꦆꦩꦱ꧀ꦱ ꦨꦶꦏ꧀ꦑꦸꦤꦺꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦨꦴꦮꦺꦴ ꦢꦱ꧀ꦱꦶꦠꦺꦴ. ꦆꦢꦴꦤꦶ ꦠꦁ ꦑꦷꦟꦴꦱꦮꦁ ꦡꦺꦴꦩꦺꦤ꧀ꦠꦺꦴ ꦮꦷꦠꦠꦟ꧀ꦲꦺꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦤꦴꦢꦴꦤꦺꦴꦠꦶ ꦤꦶꦒ꧀ꦒꦲꦟꦺꦴ. ꦱꦠꦺꦴ ꦨꦶꦏ꧀ꦑꦸ ꦥꦫꦶꦧ꧀ꦧꦗꦺꦠꦶ ꦱꦠꦶꦱꦩ꧀ꦥꦗꦚ꧀ꦚꦺ ꦮꦺꦥꦸꦭ꧀ꦭꦥ꧀ꦥꦠ꧀ꦠꦺꦴ ꦑꦷꦟꦴꦱꦮꦺꦴ ꦨꦶꦏ꧀ꦑꦸ ꦱꦠꦺꦴ ꦱꦩ꧀ꦥꦗꦴꦤꦺꦴ ꦕꦫꦺꦪ꧀ꦪ ꦮꦶꦲꦫꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦆꦠꦶ ꦱꦸꦠ꧀ꦠꦤ꧀ꦠꦺ ꦮꦛ꧀ꦛꦁ ꦏꦡꦺꦠ꧀ꦮꦴ ꦒꦴꦡꦴꦱꦸ ꦮꦛ꧀ꦛꦮꦶꦮꦛ꧀ꦛꦁ ꦏꦡꦶꦠꦤ꧀ꦠꦶ.

꧑꧐. ꦪꦺꦴꦒꦱꦸꦠ꧀ꦠꦮꦟ꧀ꦟꦤꦴ

꧑꧐. ꦢꦱꦩꦺ ꦮꦛ꧀ꦛꦱ꧀ꦩꦶꦁ ꦪꦺꦴꦗꦺꦤ꧀ꦠꦷꦠꦶ ꦪꦺꦴꦒꦴ. ꦏꦴꦩꦪꦺꦴꦒꦺꦴꦠꦶꦄꦴꦢꦷꦱꦸ ꦥꦚ꧀ꦕꦏꦴꦩꦒꦸꦟꦶꦏꦺꦴ ꦫꦴꦒꦺꦴ ꦏꦴꦩꦪꦺꦴꦒꦺꦴ. ꦫꦹꦥꦴꦫꦹꦥꦨꦮꦺꦱꦸ ꦖꦤ꧀ꦢꦫꦴꦒꦺꦴ ꦨꦮꦪꦺꦴꦒꦺꦴ, ꦠꦡꦴ ꦙꦴꦤꦤꦶꦏꦤ꧀ꦠꦶ. ꦱꦱ꧀ꦱꦠꦢꦶꦛ꧀ꦜꦶꦱꦲꦒꦠꦺꦴ ꦕ ꦫꦴꦒꦺꦴ ꦢ꧀ꦮꦴꦱꦛ꧀ꦜꦶ ꦢꦶꦛ꧀ꦜꦶꦪꦺꦴ ꦕ ꦢꦶꦛ꧀ꦜꦶꦪꦺꦴꦒꦺꦴ. ꦕꦠꦹꦱꦸ ꦱꦕ꧀ꦕꦺꦱꦸ ꦄꦚ꧀ꦚꦴꦟꦁ ꦄꦮꦶꦗ꧀ꦗꦴꦪꦺꦴꦒꦺꦴ. ꦏꦴꦩꦺꦱꦸ ꦮꦴ ꦪꦺꦴꦗꦺꦠꦷꦠꦶ ꦏꦴꦩꦪꦺꦴꦒꦺꦴ. ꦨꦮꦺꦱꦸ ꦪꦺꦴꦗꦺꦠꦷꦠꦶ ꦨꦮꦪꦺꦴꦒꦺꦴ. ꦢꦶꦛ꧀ꦜꦷꦱꦸ ꦪꦺꦴꦗꦺꦠꦷꦠꦶ ꦢꦶꦛ꧀ꦜꦶꦪꦺꦴꦒꦺꦴ. ꦄꦮꦶꦗ꧀ꦗꦴꦪ ꦪꦺꦴꦗꦺꦠꦷꦠꦶ ꦄꦮꦶꦗ꧀ꦗꦴꦪꦺꦴꦒꦺꦴꦠꦶ ꦲꦺꦛ꧀ꦜꦴ ꦮꦸꦠ꧀ꦠꦣꦩ꧀ꦩꦴꦤꦁꦪꦺꦮꦺꦠꦁ ꦄꦣꦶꦮꦕꦤꦁ.

ꦆꦢꦴꦤꦶ ꦠꦺ ꦮꦶꦠ꧀ꦡꦴꦫꦺꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ꦏꦠꦩꦺꦴ ꦕ, ꦨꦶꦏ꧀ꦑꦮꦺꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦩꦸꦢꦪꦤ꧀ꦠꦶ ꦈꦥ꧀ꦥꦠ꧀ꦠꦶꦁ. ꦄꦠ꧀ꦡꦔ꧀ꦒꦩꦤ꧀ꦠꦶ ꦨꦺꦢꦁ. ꦄꦱ꧀ꦱꦴꦢꦤ꧀ꦠꦶ ꦩꦣꦸꦫꦨꦴꦮꦁ. ꦄꦴꦢꦷꦤꦮꦤ꧀ꦠꦶ ꦄꦩꦣꦸꦫꦨꦴꦮꦁ ꦢꦺꦴꦱꦁ. ꦤꦶꦱ꧀ꦱꦫꦟꦤ꧀ꦠꦶ ꦤꦶꦱ꧀ꦱꦛꦨꦴꦮꦁ. ꦏꦴꦩꦺꦱꦹꦠꦶ ꦮꦠ꧀ꦡꦸꦏꦴꦩꦺꦱꦸ. ꦏꦴꦩꦫꦴꦒꦺꦴꦠꦶ ꦏꦴꦩꦺ ꦄꦴꦫꦧ꧀ꦨ ꦈꦥ꧀ꦥꦤ꧀ꦤꦫꦴꦒꦺꦴ. ꦱꦺꦱꦥꦢꦺꦱꦸꦥꦶ ꦌꦱꦺꦮ ꦤꦪꦺꦴ. ꦄꦤꦸꦱꦺꦠꦷꦠꦶ ꦤꦶꦧ꧀ꦧꦠ꧀ꦠꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦏꦴꦩꦪꦺꦴꦒꦺꦴꦠꦶ, ꦨꦶꦏ꧀ꦑꦮꦺ, ꦆꦢꦁ ꦏꦴꦩꦺꦱꦸ ꦪꦺꦴꦗꦤꦏꦴꦫꦟꦁ ꦧꦤ꧀ꦣꦤꦏꦴꦫꦟꦁ ꦮꦸꦕ꧀ꦕꦠꦷꦠꦶ ꦌꦮꦁ ꦱꦧ꧀ꦧꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦦꦱ꧀ꦱꦴꦪꦠꦤꦴꦤꦤ꧀ꦠꦶ ꦕꦏ꧀ꦑꦴꦢꦷꦤꦁ ꦕꦏ꧀ꦑꦸꦱꦩ꧀ꦦꦱ꧀ꦱꦴꦢꦶꦏꦴꦫꦟꦴꦤꦁ. ꦄꦮꦶꦗ꧀ꦗꦴ ꦄꦚ꧀ꦚꦴꦟꦤ꧀ꦠꦶ ꦚꦴꦟꦥꦛꦶꦥꦏ꧀ꦑꦨꦴꦮꦺꦤ ꦄꦚ꧀ꦚꦴꦟꦱꦔ꧀ꦑꦴꦠꦴ ꦄꦮꦶꦗ꧀ꦗꦴ. ꦆꦠꦶ ꦏꦴꦩꦪꦺꦴꦒꦺꦴꦠꦶ ꦌꦠ꧀ꦡ ꦆꦠꦶ ꦱꦢ꧀ꦢꦺꦴ ꦕꦠꦹꦲꦶꦥꦶ ꦪꦺꦴꦒꦺꦲꦶ ꦱꦢ꧀ꦣꦶꦁ ꦪꦺꦴꦗꦺꦠꦧ꧀ꦧꦺꦴ ‘‘ꦌꦮꦁ ꦏꦴꦩꦪꦺꦴꦒꦺꦴ, ꦌꦮꦁ ꦨꦮꦪꦺꦴꦒꦺꦴ’’ꦠꦶ. ꦱꦁꦪꦸꦠ꧀ꦠꦺꦴꦠꦶ ꦥꦫꦶꦮꦴꦫꦶꦠꦺꦴ. ꦥꦴꦥꦏꦺꦲꦷꦠꦶ ꦭꦴꦩꦏꦺꦲꦶ. ꦄꦏꦸꦱꦭꦺꦲꦷꦠꦶ ꦄꦏꦺꦴꦱꦭ꧀ꦭꦱꦩ꧀ꦨꦹꦠꦺꦲꦶ. ꦱꦁꦏꦶꦭꦺꦱꦶꦏꦺꦲꦷꦠꦶ ꦱꦁꦏꦶꦭꦺꦱꦤꦏꦺꦲꦶ, ꦥꦱꦤ꧀ꦤꦱ꧀ꦱ ꦕꦶꦠ꧀ꦠꦱ꧀ꦱ ꦥꦱꦤ꧀ꦤꦨꦴꦮꦢꦹꦱꦏꦺꦲꦷꦠꦶ ꦄꦠ꧀ꦡꦺꦴ. ꦥꦺꦴꦤꦺꦴꦧ꧀ꦨꦮꦶꦏꦺꦲꦷꦠꦶ ꦥꦸꦤꦧ꧀ꦨꦮꦤꦶꦧ꧀ꦧꦠ꧀ꦠꦏꦺꦲꦶ. ꦱꦢꦫꦺꦲꦷꦠꦶ ꦱꦢꦫꦡꦺꦲꦶ. ꦢꦸꦏ꧀ꦑꦮꦶꦥꦴꦏꦺꦲꦷꦠꦶ ꦮꦶꦥꦴꦏꦏꦴꦭꦺ ꦢꦸꦏ꧀ꦑꦸꦥ꧀ꦥꦴꦢꦏꦺꦲꦶ. ꦄꦴꦪꦠꦶꦁ ꦗꦴꦠꦶꦗꦫꦴꦩꦫꦟꦶꦏꦺꦲꦷꦠꦶ ꦄꦤꦴꦒꦠꦺ ꦥꦸꦤꦥ꧀ꦥꦸꦤꦁ ꦗꦴꦠꦶꦗꦫꦴꦩꦫꦟꦤꦶꦧ꧀ꦧꦠ꧀ꦠꦏꦺꦲꦶ. ꦠꦱ꧀ꦩꦴ ꦄꦪꦺꦴꦒꦏ꧀ꦑꦺꦩꦷꦠꦶ ꦮꦸꦕ꧀ꦕꦠꦷꦠꦶ ꦪꦱ꧀ꦩꦴ ꦄꦥ꧀ꦥꦲꦷꦤꦪꦺꦴꦒꦺꦴ ꦥꦸꦒ꧀ꦒꦭꦺꦴ ꦌꦠꦺꦲꦶ ꦣꦩ꧀ꦩꦺꦲꦶ ꦱꦩ꧀ꦥꦪꦸꦠ꧀ꦠꦺꦴ ꦲꦺꦴꦠꦶ, ꦠꦱ꧀ꦩꦴ ꦕꦠꦹꦲꦶ ꦪꦺꦴꦒꦺꦲꦶ ꦑꦺꦩꦁ ꦤꦶꦧ꧀ꦧꦴꦤꦁ ꦄꦤꦣꦶꦒꦠꦠ꧀ꦠꦴ ꦤ ꦪꦺꦴꦒꦏ꧀ꦑꦺꦩꦷꦠꦶ ꦮꦸꦕ꧀ꦕꦠꦶ.

ꦮꦶꦱꦁꦪꦺꦴꦒꦺꦴꦠꦶ ꦮꦶꦱꦁꦪꦺꦴꦗꦤꦏꦴꦫꦟꦴꦤꦶ. ꦏꦴꦩꦪꦺꦴꦒꦮꦶꦱꦁꦪꦺꦴꦒꦺꦴꦠꦶ ꦏꦴꦩꦪꦺꦴꦒꦠꦺꦴ ꦮꦶꦱꦁꦪꦺꦴꦗꦤꦏꦴꦫꦟꦁ. ꦱꦺꦱꦥꦢꦺꦱꦸꦥꦶ ꦌꦱꦺꦮ ꦤꦪꦺꦴ. ꦠꦠ꧀ꦡ ꦄꦱꦸꦨꦗ꧀ꦙꦴꦤꦁ ꦏꦴꦩꦪꦺꦴꦒꦮꦶꦱꦁꦪꦺꦴꦒꦺꦴ, ꦠꦁ ꦥꦴꦢꦏꦁ ꦏꦠ꧀ꦮꦴ ꦄꦣꦶꦒꦠꦺꦴ ꦄꦤꦴꦒꦴꦩꦶꦩꦒ꧀ꦒꦺꦴ ꦌꦏꦤ꧀ꦠꦺꦤꦺꦮ ꦏꦴꦩꦪꦺꦴꦒꦮꦶꦱꦁꦪꦺꦴꦒꦺꦴ ꦤꦴꦩ. ꦄꦫꦲꦠ꧀ꦠꦩꦒ꧀ꦒꦺꦴ ꦨꦮꦪꦺꦴꦒꦮꦶꦱꦁꦪꦺꦴꦒꦺꦴ ꦤꦴꦩ, ꦱꦺꦴꦠꦴꦥꦠ꧀ꦠꦶꦩꦒ꧀ꦒꦺꦴ ꦢꦶꦛ꧀ꦜꦶꦪꦺꦴꦒꦮꦶꦱꦁꦪꦺꦴꦒꦺꦴ ꦤꦴꦩ, ꦄꦫꦲꦠ꧀ꦠꦩꦒ꧀ꦒꦺꦴ ꦄꦮꦶꦗ꧀ꦗꦴꦪꦺꦴꦒꦮꦶꦱꦁꦪꦺꦴꦒꦺꦴ ꦤꦴꦩ. ꦆꦢꦴꦤꦶ ꦠꦺ ꦮꦶꦠ꧀ꦡꦴꦫꦮꦱꦺꦤ ꦢꦱ꧀ꦱꦺꦤ꧀ꦠꦺꦴ ꦏꦠꦩꦺꦴ ꦕ, ꦨꦶꦏ꧀ꦑꦮꦺꦠꦶꦄꦴꦢꦶꦩꦴꦲ. ꦠꦱ꧀ꦱꦠ꧀ꦡꦺꦴ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ.

ꦨꦮꦪꦺꦴꦒꦺꦤ ꦕꦹꦨꦪꦤ꧀ꦠꦶ ꦨꦮꦪꦺꦴꦒꦺꦤ ꦕ ꦱꦁꦪꦸꦠ꧀ꦠꦴ, ꦏꦶꦚ꧀ꦕꦶ ꦨꦶꦪ꧀ꦪꦺꦴ ꦈꦨꦪꦺꦤꦴꦥꦶ ꦱꦩ꧀ꦥꦪꦸꦠ꧀ꦠꦴ, ꦪꦺꦤ ꦏꦺꦤꦕꦶ ꦪꦺꦴꦒꦺꦤ ꦱꦩꦤ꧀ꦤꦴꦒꦠꦴꦠꦶ ꦄꦠ꧀ꦡꦺꦴ. ꦥꦸꦫꦏ꧀ꦑꦠꦴꦠꦶ ꦥꦸꦫꦠꦺꦴ ꦏꦠꦴ, ꦥꦫꦶꦮꦴꦫꦶꦠꦴ ꦮꦴ. ꦏꦴꦩꦺ ꦥꦫꦶꦚ꧀ꦚꦴꦪꦴꦠꦶ ꦢꦸꦮꦶꦣꦺꦥꦶ ꦏꦴꦩꦺ ꦥꦫꦶꦗꦴꦤꦶꦠ꧀ꦮꦴ. ꦨꦮꦪꦺꦴꦒꦚ꧀ꦕ ꦱꦧ꧀ꦧꦱꦺꦴꦠꦶ ꦨꦮꦪꦺꦴꦒꦚ꧀ꦕ ꦱꦧ꧀ꦧꦩꦺꦮ ꦥꦫꦶꦗꦴꦤꦶꦠ꧀ꦮꦴ. ꦱꦩꦹꦲꦕ꧀ꦕꦴꦠꦶ ꦱꦩꦹꦲꦤꦶꦠ꧀ꦮꦴ. ꦮꦶꦫꦴꦗꦪꦤ꧀ꦠꦶ ꦮꦶꦫꦴꦗꦺꦤ꧀ꦠꦺꦴ, ꦮꦶꦫꦴꦗꦺꦠ꧀ꦮꦴ ꦮꦴ. ‘‘ꦮꦶꦫꦴꦗꦺꦤ꧀ꦠꦺꦴ’’ꦠꦶ ꦲꦶ ꦮꦸꦠ꧀ꦠꦺ ꦩꦒ꧀ꦒꦺꦴ ꦏꦡꦶꦠꦺꦴ ꦲꦺꦴꦠꦶ, ‘‘ꦮꦶꦫꦴꦗꦺꦠ꧀ꦮꦴ’’ꦠꦶ ꦮꦸꦠ꧀ꦠꦺ ꦦꦭꦁ. ꦩꦸꦤꦷꦠꦶ ꦑꦷꦟꦴꦱꦮꦩꦸꦤꦶ. ꦆꦠꦶ ꦆꦩꦱ꧀ꦩꦶꦁ ꦱꦸꦠ꧀ꦠꦺꦥꦶ ꦒꦴꦡꦴꦱꦸꦥꦶ ꦮꦛ꧀ꦛꦮꦶꦮꦛ꧀ꦛꦩꦺꦮ ꦏꦡꦶꦠꦤ꧀ꦠꦶ.

ꦨꦟ꧀ꦝꦒꦴꦩꦮꦒ꧀ꦒꦺꦴ ꦥꦜꦩꦺꦴ.