꧑꧐. ꦢꦸꦠꦶꦪꦱꦶꦏ꧀ꦑꦠ꧀ꦠꦪꦱꦸꦠ꧀ꦠꦮꦟ꧀ꦟꦤꦴ

꧙꧑. ꦢꦱꦩꦺ ꦄꦴꦱꦮꦴꦤꦁ ꦑꦪꦴꦠꦶ ꦌꦠ꧀ꦡ ꦄꦫꦲꦠ꧀ꦠꦩꦒ꧀ꦒꦺꦴ ꦄꦣꦶꦥꦚ꧀ꦚꦴꦱꦶꦏ꧀ꦑꦴ ꦤꦴꦩ. ꦦꦭꦁ ꦥꦤ ꦱꦶꦏ꧀ꦑꦶꦠꦱꦶꦏ꧀ꦑꦱ꧀ꦱ ꦈꦥ꧀ꦥꦗ꧀ꦗꦤꦠꦺꦴ ꦱꦶꦏ꧀ꦑꦴꦠꦶ ꦤ ꦮꦠ꧀ꦠꦧ꧀ꦧꦁ.

ꦪꦡꦴ ꦥꦸꦫꦺ ꦠꦡꦴ ꦥꦕ꧀ꦖꦴꦠꦶ ꦪꦡꦴ ꦥꦜꦩꦁ ꦠꦷꦱꦸ ꦱꦶꦏ꧀ꦑꦴꦱꦸ ꦱꦶꦏ꧀ꦑꦠꦶ, ꦥꦕ꧀ꦖꦴ ꦠꦡꦺꦮ ꦱꦶꦏ꧀ꦑꦠꦷꦠꦶ ꦄꦠ꧀ꦡꦺꦴ. ꦢꦸꦠꦶꦪꦥꦢꦺꦥꦶ ꦌꦱꦺꦮ ꦤꦪꦺꦴ. ꦪꦡꦴ ꦄꦣꦺꦴ ꦠꦡꦴ ꦈꦢ꧀ꦣꦤ꧀ꦠꦶ ꦪꦡꦴ ꦲꦺꦛ꧀ꦜꦶꦩꦏꦴꦪꦁ ꦄꦱꦸꦨꦮꦱꦺꦤ ꦥꦱ꧀ꦱꦠꦶ, ꦈꦥꦫꦶꦩꦏꦴꦪꦩ꧀ꦥꦶ ꦠꦡꦺꦮ ꦦꦫꦠꦶ. ꦢꦸꦠꦶꦪꦥꦢꦺꦥꦶ ꦌꦱꦺꦮ ꦤꦪꦺꦴ. ꦪꦡꦴ ꦢꦶꦮꦴ ꦠꦡꦴ ꦫꦠ꧀ꦠꦶꦤ꧀ꦠꦶ ꦪꦡꦴ ꦢꦶꦮꦴ ꦠꦶꦱ꧀ꦱꦺꦴ ꦱꦶꦏ꧀ꦑꦴ ꦱꦶꦏ꧀ꦑꦠꦶ, ꦫꦠ꧀ꦠꦶꦩ꧀ꦥꦶ ꦠꦡꦺꦮ ꦱꦶꦏ꧀ꦑꦠꦷꦠꦶ ꦄꦠ꧀ꦡꦺꦴ. ꦄꦨꦶꦨꦸꦪ꧀ꦪ ꦢꦶꦱꦴ ꦱꦧ꧀ꦧꦴꦠꦶ ꦱꦧ꧀ꦧꦴ ꦢꦶꦱꦴ ꦄꦴꦫꦩ꧀ꦩꦟꦮꦱꦺꦤ ꦄꦨꦶꦨꦮꦶꦠ꧀ꦮꦴ. ꦄꦥ꧀ꦥꦩꦴꦟꦱꦩꦴꦣꦶꦤꦴꦠꦶ ꦄꦫꦲꦠ꧀ꦠꦩꦒ꧀ꦒꦱꦩꦴꦣꦶꦤꦴ.

ꦱꦺꦏ꧀ꦑꦤ꧀ꦠꦶ ꦱꦶꦏ꧀ꦑꦩꦴꦤꦁ ꦱꦏꦫꦟꦷꦪꦁ. ꦥꦛꦶꦥꦢꦤ꧀ꦠꦶ ꦥꦛꦶꦥꦤ꧀ꦤꦏꦁ. ꦱꦁꦱꦸꦢ꧀ꦣꦕꦴꦫꦶꦪꦤ꧀ꦠꦶ ꦱꦁꦱꦸꦢ꧀ꦣꦕꦫꦟꦁ ꦥꦫꦶꦱꦸꦢ꧀ꦣꦱꦷꦭꦁ. ꦱꦩ꧀ꦧꦸꦢ꧀ꦣꦤ꧀ꦠꦶ ꦕꦠꦸꦱꦕ꧀ꦕꦧꦸꦢ꧀ꦣꦁ. ꦣꦷꦫꦁ ꦥꦛꦶꦥꦢꦤ꧀ꦠꦒꦸꦤ꧀ꦠꦶ ꦑꦤ꧀ꦣꦣꦷꦫꦄꦴꦪꦠꦤꦣꦷꦫꦮꦱꦺꦤ ꦣꦷꦫꦁ ꦣꦶꦠꦶꦱꦩ꧀ꦥꦤ꧀ꦤꦁ ꦥꦛꦶꦥꦠ꧀ꦠꦶꦪꦴ ꦄꦤ꧀ꦠꦁ ꦒꦠꦁ. ꦮꦶꦚ꧀ꦚꦴꦟꦱ꧀ꦱꦴꦠꦶ ꦕꦫꦶꦩꦏꦮꦶꦚ꧀ꦚꦴꦟꦱ꧀ꦱ. ꦠꦟ꧀ꦲꦴꦏ꧀ꦑꦪꦮꦶꦩꦸꦠ꧀ꦠꦶꦤꦺꦴꦠꦶ ꦠꦟ꧀ꦲꦴꦏ꧀ꦑꦪꦮꦶꦩꦸꦠ꧀ꦠꦶꦱꦔ꧀ꦑꦴꦠꦴꦪ ꦄꦫꦲꦠ꧀ꦠꦦꦭꦮꦶꦩꦸꦠ꧀ꦠꦶꦪꦴ ꦱꦩꦤ꧀ꦤꦴꦒꦠꦱ꧀ꦱ. ꦥꦗ꧀ꦗꦺꦴꦠꦱ꧀ꦱꦺꦮ ꦤꦶꦧ꧀ꦧꦴꦤꦤ꧀ꦠꦶ ꦥꦢꦷꦥꦤꦶꦧ꧀ꦧꦴꦤꦁ ꦮꦶꦪ. ꦮꦶꦩꦺꦴꦏ꧀ꦑꦺꦴ ꦲꦺꦴꦠꦶ ꦕꦺꦠꦱꦺꦴꦠꦶ ꦕꦶꦠ꧀ꦠꦱ꧀ꦱ ꦮꦶꦩꦸꦠ꧀ꦠꦶ ꦮꦶꦩꦸꦕ꧀ꦕꦤꦴ ꦄꦥ꧀ꦥꦮꦠ꧀ꦠꦶꦨꦴꦮꦺꦴ ꦲꦺꦴꦠꦶ. ꦠꦟ꧀ꦲꦴꦏ꧀ꦑꦪꦮꦶꦩꦸꦠ꧀ꦠꦶꦤꦺꦴ ꦲꦶ ꦑꦷꦟꦴꦱꦮꦱ꧀ꦱ ꦕꦫꦶꦩꦏꦮꦶꦚ꧀ꦚꦴꦟꦤꦶꦫꦺꦴꦣꦺꦤ ꦥꦫꦶꦤꦶꦧ꧀ꦧꦴꦤꦁ ꦮꦶꦪ ꦕꦺꦠꦱꦺꦴ ꦮꦶꦩꦺꦴꦏ꧀ꦑꦺꦴ ꦲꦺꦴꦠꦶ, ꦤ ꦒꦠꦛ꧀ꦜꦴꦤꦁ ꦥꦚ꧀ꦚꦴꦪꦠꦶ, ꦄꦥꦟ꧀ꦟꦠ꧀ꦠꦶꦏꦨꦴꦮꦹꦥꦒꦩꦺꦴꦪꦺꦮ ꦲꦺꦴꦠꦷꦠꦶ ꦄꦠ꧀ꦡꦺꦴ.