꧖. ꦥꦭꦺꦴꦏꦱꦸꦠ꧀ꦠꦮꦟ꧀ꦟꦤꦴ

꧕꧗. ꦖꦛ꧀ꦜꦺ ꦄꦴꦕꦫꦶꦪꦥꦴꦕꦫꦶꦪꦴꦤꦤ꧀ꦠꦶ ꦄꦴꦕꦫꦶꦪꦴꦤꦚ꧀ꦕꦺꦮ ꦄꦴꦕꦫꦶꦪꦴꦕꦫꦶꦪꦴꦤꦚ꧀ꦕ. ꦄꦮꦷꦕꦶ ꦩꦚ꧀ꦚꦺ ꦦꦸꦛꦺꦴ ꦄꦲꦺꦴꦱꦷꦠꦶ ꦪꦡꦴ ꦄꦮꦷꦕꦶ ꦩꦲꦴꦤꦶꦫꦪꦺꦴ ꦤꦶꦫꦤ꧀ꦠꦫꦦꦸꦛꦺꦴ ꦤꦺꦫꦪꦶꦏꦱꦠ꧀ꦠꦺꦲꦶ ꦥꦫꦶꦥꦸꦟ꧀ꦟꦺꦴ, ꦩꦤꦸꦱ꧀ꦱꦺꦲꦶ ꦌꦮꦁ ꦥꦫꦶꦥꦸꦟ꧀ꦟꦺꦴ ꦲꦺꦴꦠꦶ. ꦏꦸꦏ꧀ꦏꦸꦛꦱꦁꦥꦴꦠꦶꦏꦴꦠꦶ ꦌꦏꦒꦴꦩꦱ꧀ꦱ ꦖꦢꦤꦥꦶꦛ꧀ꦜꦶꦠꦺꦴ ꦈꦥ꧀ꦥꦠꦶꦠ꧀ꦮꦴ ꦆꦠꦫꦒꦴꦩꦱ꧀ꦱ ꦖꦢꦤꦥꦶꦛ꧀ꦜꦺ ꦥꦠꦤꦱꦔ꧀ꦑꦴꦠꦺꦴ ꦏꦸꦏ꧀ꦏꦸꦛꦱꦁꦥꦴꦠꦺꦴ ꦌꦠꦴꦱꦸ ꦄꦠ꧀ꦡꦷꦠꦶ ꦏꦸꦏ꧀ꦏꦸꦛꦱꦁꦥꦴꦠꦶꦏꦴ. ꦏꦸꦏ꧀ꦏꦸꦛꦱꦁꦥꦴꦢꦶꦏꦴꦠꦶꦥꦶ ꦥꦴꦜꦺꦴ, ꦒꦴꦩꦤ꧀ꦠꦫꦠꦺꦴ ꦒꦴꦩꦤ꧀ꦠꦫꦁ ꦏꦸꦏ꧀ꦏꦸꦛꦴꦤꦁ ꦥꦢꦱꦴ ꦒꦩꦤꦱꦔ꧀ꦑꦴꦠꦺꦴ ꦏꦸꦏ꧀ꦏꦸꦛꦱꦁꦥꦴꦢꦺꦴ ꦌꦠꦴꦱꦸ ꦄꦠ꧀ꦡꦷꦠꦶ ꦄꦠ꧀ꦡꦺꦴ. ꦈꦨꦪꦩ꧀ꦥꦺꦠꦁ ꦓꦤꦤꦶꦮꦴꦱꦠꦁꦪꦺꦮ ꦢꦷꦥꦺꦠꦶ. ꦄꦣꦩ꧀ꦩꦫꦴꦒꦫꦠ꧀ꦠꦴꦠꦶ ꦫꦴꦒꦺꦴ ꦤꦴꦩ ꦌꦏꦤ꧀ꦠꦺꦤꦺꦮ ꦄꦣꦩ꧀ꦩꦺꦴ, ꦄꦠ꧀ꦠꦤꦺꦴ ꦥꦫꦶꦏ꧀ꦑꦴꦫꦺꦱꦸ ꦥꦤ ꦈꦥ꧀ꦥꦗ꧀ꦗꦩꦴꦤꦺꦴ ꦤ ꦄꦣꦩ꧀ꦩꦫꦴꦒꦺꦴꦠꦶ ꦄꦣꦶꦥ꧀ꦥꦺꦠꦺꦴ, ꦥꦫꦥꦫꦶꦏ꧀ꦑꦴꦫꦺꦱꦸ ꦈꦥ꧀ꦥꦗ꧀ꦗꦩꦴꦤꦺꦴꦮ ꦄꦣꦩ꧀ꦩꦫꦴꦒꦺꦴꦠꦶ. ꦮꦶꦱꦩꦭꦺꦴꦨꦴꦨꦶꦨꦹꦠꦴꦠꦶ ꦭꦺꦴꦨꦱ꧀ꦱ ꦱꦩꦏꦴꦭꦺꦴ ꦤꦴꦩ ꦤꦠ꧀ꦡꦶ, ꦌꦏꦤ꧀ꦠꦁ ꦮꦶꦱꦩꦺꦴꦮ ꦌꦱ. ꦄꦠ꧀ꦠꦤꦴ ꦥꦫꦶꦒ꧀ꦒꦲꦶꦠꦮꦠ꧀ꦡꦸꦩ꧀ꦲꦶ ꦥꦤ ꦈꦥ꧀ꦥꦗ꧀ꦗꦩꦴꦤꦺꦴ ꦱꦩꦭꦺꦴꦨꦺꦴ ꦤꦴꦩ, ꦥꦫꦥꦫꦶꦒ꧀ꦒꦲꦶꦠꦮꦠ꧀ꦡꦸꦩ꧀ꦲꦶ ꦈꦥ꧀ꦥꦗ꧀ꦗꦩꦴꦤꦺꦴꦮ ꦮꦶꦱꦩꦺꦴꦠꦶ ꦄꦣꦶꦥ꧀ꦥꦺꦠꦺꦴ. ꦩꦶꦕ꧀ꦖꦴꦣꦩ꧀ꦩꦥꦫꦺꦠꦴꦠꦶ ꦄꦮꦠ꧀ꦡꦸꦥꦛꦶꦱꦺꦮꦤꦱꦔ꧀ꦑꦴꦠꦺꦤ ꦩꦶꦕ꧀ꦖꦴꦣꦩ꧀ꦩꦺꦤ ꦱꦩꦤ꧀ꦤꦴꦒꦠꦴ. ꦢꦺꦮꦺꦴ ꦤ ꦱꦩ꧀ꦩꦴ ꦣꦴꦫꦁ ꦄꦤꦸꦥ꧀ꦥꦮꦺꦕ꧀ꦖꦠꦷꦠꦶ ꦮꦱ꧀ꦱꦶꦠꦧ꧀ꦧꦪꦸꦠ꧀ꦠꦺ ꦏꦴꦭꦺ ꦮꦱ꧀ꦱꦁ ꦤ ꦮꦱ꧀ꦱꦠꦶ. ꦢꦸꦧ꧀ꦨꦶꦏ꧀ꦑꦤ꧀ꦠꦶ ꦢꦸꦭ꧀ꦭꦨꦨꦶꦏ꧀ꦑꦁ. ꦢꦸꦱ꧀ꦱꦱ꧀ꦱꦤ꧀ꦠꦶ ꦮꦶꦮꦶꦣꦱꦱ꧀ꦱꦴꦤꦁ ꦄꦱꦩ꧀ꦥꦗ꧀ꦗꦤꦺꦤ ꦢꦸꦱ꧀ꦱꦱ꧀ꦱꦁ. ꦱꦺꦠꦛ꧀ꦜꦶꦏꦤ꧀ꦠꦶ ꦱꦱ꧀ꦱꦺ ꦱꦩ꧀ꦥꦗ꧀ꦗꦩꦴꦤꦺ ꦥꦴꦟꦏꦴ ꦥꦠꦤ꧀ꦠꦶ, ꦠꦺꦲꦶ ꦢꦛ꧀ꦜꦠ꧀ꦠꦴ ꦤꦶꦏ꧀ꦑꦤ꧀ꦠꦤꦶꦏ꧀ꦑꦤ꧀ꦠꦴꦤꦶ ꦱꦴꦭꦶꦱꦷꦱꦴꦤꦶ ꦱꦺꦠꦮꦟ꧀ꦟꦴꦤꦶ ꦲꦺꦴꦤ꧀ꦠꦶ ꦤꦶꦱ꧀ꦱꦴꦫꦴꦤꦶ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦱꦺꦠꦛ꧀ꦜꦶꦏ’’ꦤ꧀ꦠꦶ. ꦱꦭꦴꦏꦴꦮꦸꦠ꧀ꦠꦤ꧀ꦠꦶ ꦮꦥꦶꦠꦁ ꦮꦥꦶꦠꦁ ꦱꦱ꧀ꦱꦁ ꦱꦭꦴꦏꦴꦩꦠ꧀ꦠꦩꦺꦮ ꦱꦩ꧀ꦥꦗ꧀ꦗꦠꦶ, ꦦꦭꦁ ꦤ ꦢꦺꦠꦷꦠꦶ ꦄꦠ꧀ꦡꦺꦴ. ꦪꦏ꧀ꦑꦴꦠꦶ ꦪꦏ꧀ꦑꦴꦣꦶꦥꦠꦶꦤꦺꦴ. ꦮꦴꦭ꦳ꦺ ꦄꦩꦤꦸꦱ꧀ꦱꦺ ꦎꦱ꧀ꦱꦗ꧀ꦗꦤ꧀ꦠꦷꦠꦶ ꦕꦟ꧀ꦝꦪꦏ꧀ꦑꦺ ꦩꦤꦸꦱ꧀ꦱꦥꦡꦺ ꦮꦶꦱ꧀ꦱꦗ꧀ꦗꦺꦤ꧀ꦠꦶ, ꦠꦺ ꦭꦢ꧀ꦣꦺꦴꦏꦴꦱꦴ ꦩꦲꦴꦗꦤꦁ ꦗꦷꦮꦶꦠꦏ꧀ꦑꦪꦁ ꦥꦴꦥꦺꦤ꧀ꦠꦶ.