꧖. ꦄꦥꦟ꧀ꦟꦏꦱꦸꦠ꧀ꦠꦮꦟ꧀ꦟꦤꦴ

꧑꧖. ꦖꦛ꧀ꦜꦺ ꦄꦥꦟ꧀ꦟꦏꦥꦛꦶꦥꦢꦤ꧀ꦠꦶ ꦄꦮꦶꦫꦢ꧀ꦣꦥꦛꦶꦥꦢꦁ ꦌꦏꦁꦱꦥꦛꦶꦥꦢꦁ ꦤꦶꦪ꧀ꦪꦴꦤꦶꦏꦥꦛꦶꦥꦢꦁ ꦏꦴꦫꦟꦥꦛꦶꦥꦢꦁ ꦱꦴꦫꦥꦛꦶꦥꦢꦁ ꦩꦟ꧀ꦝꦥꦛꦶꦥꦢꦁ ꦄꦥꦕ꧀ꦕꦤꦷꦏꦥꦛꦶꦥꦢꦁ ꦄꦤꦸꦭꦺꦴꦩꦥꦛꦶꦥꦢꦁ ꦣꦩ꧀ꦩꦴꦤꦸꦣꦩ꧀ꦩꦥꦛꦶꦥꦢꦁ ꦥꦛꦶꦥꦤ꧀ꦤꦺꦴ ꦲꦺꦴꦠꦶ, ꦤ ꦠꦏ꧀ꦏꦒ꧀ꦒꦴꦲꦺꦤ ꦮꦴ ꦤꦪꦒ꧀ꦒꦴꦲꦺꦤ ꦮꦴ. ꦌꦮꦁ ꦒꦲꦺꦠ꧀ꦮꦴ ꦥꦛꦶꦥꦤ꧀ꦤꦺꦴ ꦲꦶ ꦨꦶꦏ꧀ꦑꦸ ꦮꦴ ꦨꦶꦏ꧀ꦑꦸꦤꦷ ꦮꦴ ꦈꦥꦴꦱꦏꦺꦴ ꦮꦴ ꦈꦥꦴꦱꦶꦏꦴ ꦮꦴ ꦩꦤꦸꦱ꧀ꦱꦢꦺꦮꦤꦶꦧ꧀ꦧꦴꦤꦱꦩ꧀ꦥꦠ꧀ꦠꦷꦲꦶ ꦲꦴꦪꦠꦶ ꦥꦫꦶꦲꦴꦪꦠꦶ, ꦄꦥꦟ꧀ꦟꦏꦥꦛꦶꦥꦢꦁ ꦥꦛꦶꦥꦤ꧀ꦤꦺꦴ ꦥꦤ ꦠꦴꦲꦶ ꦱꦩ꧀ꦥꦠ꧀ꦠꦷꦲꦶ ꦤ ꦥꦫꦶꦲꦴꦪꦠꦶ. ꦄꦠꦷꦠꦺ ꦏꦤ꧀ꦠꦴꦫꦢ꧀ꦣꦴꦤꦩꦒ꧀ꦒꦁ ꦥꦛꦶꦥꦤ꧀ꦤꦺꦱꦸ ꦢ꧀ꦮꦷꦱꦸ ꦱꦠ꧀ꦡꦮꦴꦲꦺꦱꦸ ꦪꦏ꧀ꦑꦱ꧀ꦱ ꦮꦕꦤꦁ ꦒꦲꦺꦠ꧀ꦮꦴ ꦧꦴꦭꦱꦠ꧀ꦡꦮꦴꦲꦺꦴ ꦱꦢ꧀ꦣꦶꦁ ꦱꦠ꧀ꦡꦺꦤ ꦄꦤꦪꦧ꧀ꦪꦱꦤꦁ ꦥꦠ꧀ꦠꦺꦴ, ꦪꦏ꧀ꦑꦱ꧀ꦱ ꦮꦕꦤꦁ ꦄꦒ꧀ꦒꦲꦺꦠ꧀ꦮꦴ ‘‘ꦈꦢꦏꦢꦶꦛ꧀ꦜꦛ꧀ꦜꦴꦤꦺ ꦈꦢꦏꦁ ꦖꦝ꧀ꦝꦺꦱ꧀ꦱꦴꦩꦴ’’ꦠꦶ ꦱꦠ꧀ꦡꦏꦺ ꦱꦚ꧀ꦚꦴꦥꦺꦠ꧀ꦮꦴ ꦩꦒ꧀ꦒꦁ ꦥꦛꦶꦥꦤ꧀ꦤꦺꦴ ꦥꦟ꧀ꦝꦶꦠꦱꦠ꧀ꦡꦮꦴꦲꦺꦴ ꦮꦶꦪ. ꦪꦁ ꦱꦤ꧀ꦣꦴꦪ ꦮꦸꦠ꧀ꦠꦁ –

‘‘ꦄꦥꦟ꧀ꦟꦏꦁ ꦜꦴꦤꦩꦺꦏꦺ, ꦢꦸꦠꦶꦪꦁ ꦄꦴꦲꦸ ꦠꦏ꧀ꦏꦶꦏꦴ;

ꦌꦠꦢꦚ꧀ꦚꦴꦪ ꦩꦺꦣꦴꦮꦷ, ꦠꦁ ꦒꦟ꧀ꦲꦺ ꦪꦢꦥꦟ꧀ꦟꦏ’’ꦤ꧀ꦠꦶ. (ꦗꦴ. ꧑.꧑.꧑);

ꦪꦺꦴꦤꦶ ꦕꦱ꧀ꦱ ꦄꦴꦫꦢ꧀ꦣꦴ ꦲꦺꦴꦠꦷꦠꦶ ꦌꦠ꧀ꦡ ꦪꦺꦴꦤꦷꦠꦶ ꦑꦤ꧀ꦣꦏꦺꦴꦛ꧀ꦜꦴꦱꦱ꧀ꦱꦥꦶ ꦏꦴꦫꦟꦱ꧀ꦱꦥꦶ ꦥꦱ꧀ꦱꦴꦮꦩꦒ꧀ꦒꦱ꧀ꦱꦥꦶ ꦤꦴꦩꦁ. ‘‘ꦕꦠꦱ꧀ꦱꦺꦴ ꦑꦺꦴ ꦆꦩꦴ, ꦱꦴꦫꦶꦥꦸꦠ꧀ꦠ, ꦪꦺꦴꦤꦶꦪꦺꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧑꧕꧒) ꦲꦶ ꦑꦤ꧀ꦣꦏꦺꦴꦛ꧀ꦜꦴꦱꦺꦴ ꦪꦺꦴꦤꦶ ꦤꦴꦩ. ‘‘ꦪꦺꦴꦤꦶ ꦲꦺꦱꦴ ꦨꦹꦩꦶꦗ ꦦꦭꦱ꧀ꦱ ꦄꦣꦶꦒꦩꦴꦪꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧓.꧒꧒꧖) ꦏꦴꦫꦟꦁ. ‘‘ꦤ ꦕꦴꦲꦁ ꦧ꧀ꦫꦴꦲ꧀ꦩꦟꦁ ꦧ꧀ꦫꦹꦩꦶ, ꦪꦺꦴꦤꦶꦗꦁ ꦩꦠ꧀ꦠꦶꦱꦩ꧀ꦨꦮ’’ꦤ꧀ꦠꦶ (ꦩ. ꦤꦶ. ꧒.꧔꧕꧗; ꦣ. ꦥ. ꧓꧙꧖) ꦕ ‘‘ꦠꦩꦺꦤꦁ ꦏꦩ꧀ꦩꦗꦮꦴꦠꦴ ꦤꦶꦮꦠ꧀ꦠꦶꦠ꧀ꦮꦴ ꦈꦢ꧀ꦣꦁꦥꦴꦢꦁ ꦄꦣꦺꦴꦱꦶꦫꦁ ꦱꦩ꧀ꦥꦫꦶꦮꦠ꧀ꦠꦺꦠ꧀ꦮꦴ ꦩꦴꦠꦸ ꦪꦺꦴꦤꦶꦩꦸꦑꦺ ꦱꦩ꧀ꦥꦛꦶꦥꦴꦢꦺꦤ꧀ꦠꦷ’’ꦠꦶ ꦕ ꦄꦴꦢꦷꦱꦸ ꦥꦱ꧀ꦱꦴꦮꦩꦒ꧀ꦒꦺꦴ. ꦆꦣ ꦥꦤ ꦏꦴꦫꦟꦁ ꦄꦣꦶꦥ꧀ꦥꦺꦠꦁ. ꦄꦴꦫꦢ꧀ꦣꦴꦠꦶ ꦥꦒ꧀ꦒꦲꦶꦠꦴ ꦥꦫꦶꦥꦸꦟ꧀ꦟꦴ.

ꦄꦴꦱꦮꦴꦤꦁ ꦑꦪꦴꦪꦴꦠꦶ ꦌꦠ꧀ꦡ ꦄꦴꦱꦮꦤ꧀ꦠꦷꦠꦶ ꦄꦴꦱꦮꦴ, ꦕꦏ꧀ꦑꦸꦠꦺꦴꦥꦶ…ꦥꦺ… ꦩꦤꦠꦺꦴꦥꦶ ꦱꦤ꧀ꦢꦤ꧀ꦠꦶ ꦥꦮꦠ꧀ꦠꦤ꧀ꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦣꦩ꧀ꦩꦠꦺꦴ ꦪꦴꦮ ꦒꦺꦴꦠ꧀ꦫꦨꦸ, ꦎꦏꦴꦱꦠꦺꦴ ꦪꦴꦮ ꦨꦮꦒ꧀ꦒꦴ ꦱꦮꦤ꧀ꦠꦷꦠꦶ ꦮꦴ ꦄꦴꦱꦮꦴ, ꦌꦠꦺ ꦣꦩ꧀ꦩꦺ ꦌꦠꦚ꧀ꦕ ꦎꦏꦴꦱꦁ ꦄꦤ꧀ꦠꦺꦴꦏꦫꦶꦠ꧀ꦮꦴ ꦥꦮꦠ꧀ꦠꦤ꧀ꦠꦷꦠꦶ ꦄꦠ꧀ꦡꦺꦴ. ꦄꦤ꧀ꦠꦺꦴꦏꦫꦟꦠ꧀ꦡꦺꦴ ꦲꦶ ꦄꦪꦁ ꦄꦴꦏꦴꦫꦺꦴ. ꦕꦶꦫꦥꦴꦫꦶꦮꦴꦱꦶꦪꦛ꧀ꦜꦺꦤ ꦩꦢꦶꦫꦴꦢꦪꦺꦴ ꦄꦴꦱꦮꦴ, ꦄꦴꦱꦮꦴ ꦮꦶꦪꦴꦠꦶꦥꦶ ꦄꦴꦱꦮꦴ. ꦭꦺꦴꦏꦱ꧀ꦩꦶꦩ꧀ꦥꦶ ꦲꦶ ꦕꦶꦫꦥꦴꦫꦶꦮꦴꦱꦶꦏꦴ ꦩꦢꦶꦫꦴꦢꦪꦺꦴ ꦄꦴꦱꦮꦴꦠꦶ ꦮꦸꦕ꧀ꦕꦤ꧀ꦠꦶ, ꦪꦢꦶ ꦕ ꦕꦶꦫꦥꦴꦫꦶꦮꦴꦱꦶꦪꦛ꧀ꦜꦺꦤ ꦄꦴꦱꦮꦴ, ꦌꦠꦺꦪꦺꦮ ꦨꦮꦶꦠꦸꦩꦫꦲꦤ꧀ꦠꦶ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦥꦸꦫꦶꦩꦴ, ꦨꦶꦏ꧀ꦑꦮꦺ, ꦏꦺꦴꦛꦶ ꦤ ꦥꦚ꧀ꦚꦴꦪꦠꦶ ꦄꦮꦶꦗ꧀ꦗꦴꦪ, ꦆꦠꦺꦴ ꦥꦸꦧ꧀ꦧꦺ ꦄꦮꦶꦗ꧀ꦗꦴ ꦤꦴꦲꦺꦴꦱꦷ’’ꦠꦶꦄꦴꦢꦶ (ꦄ. ꦤꦶ. ꧑꧐.꧖꧑). ꦄꦴꦪꦠꦁ ꦮꦴ ꦱꦁꦱꦴꦫꦢꦸꦏ꧀ꦑꦁ ꦱꦮꦤ꧀ꦠꦶ ꦥꦱꦮꦤ꧀ꦠꦷꦠꦶꦥꦶ ꦄꦴꦱꦮꦴ. ꦥꦸꦫꦶꦩꦴꦤꦶ ꦕꦺꦠ꧀ꦡ ꦤꦶꦧ꧀ꦧꦕꦤꦴꦤꦶ ꦪꦠ꧀ꦡ ꦏꦶꦭꦺꦱꦴ ꦄꦴꦱꦮꦴꦠꦶ ꦄꦴꦒꦕ꧀ꦖꦤ꧀ꦠꦶ, ꦠꦠ꧀ꦡ ꦪꦸꦗ꧀ꦗꦤ꧀ꦠꦶ, ꦥꦕ꧀ꦖꦶꦩꦁ ꦏꦩ꧀ꦩꦺꦥꦶ. ꦤ ꦏꦺꦮꦭꦚ꧀ꦕ ꦏꦩ꧀ꦩꦏꦶꦭꦺꦱꦴꦪꦺꦮ ꦄꦴꦱꦮꦴ, ꦄꦥꦶꦕ ꦑꦺꦴ ꦤꦴꦤꦥ꧀ꦥꦏꦴꦫꦴ ꦈꦥꦢ꧀ꦢꦮꦴꦥꦶ. ꦱꦸꦠ꧀ꦠꦺꦱꦸ ꦲꦶ ‘‘ꦤꦴꦲꦁ, ꦕꦸꦤ꧀ꦢ, ꦢꦶꦛ꧀ꦜꦣꦩ꧀ꦩꦶꦏꦴꦤꦁꦪꦺꦮ ꦄꦴꦱꦮꦴꦤꦁ ꦱꦁꦮꦫꦴꦪ ꦣꦩ꧀ꦩꦁ ꦢꦺꦱꦺꦩꦷ’’ꦠꦶ (ꦢꦷ. ꦤꦶ. ꧓.꧑꧘꧒) ꦌꦠ꧀ꦡ ꦮꦶꦮꦴꦢꦩꦹꦭꦨꦹꦠꦴ ꦏꦶꦭꦺꦱꦴ ꦄꦴꦱꦮꦴꦠꦶ ꦄꦴꦒꦠꦴ.

‘‘ꦪꦺꦤ ꦢꦺꦮꦹꦥꦥꦠ꧀ꦪꦱ꧀ꦱ, ꦒꦤ꧀ꦣꦧ꧀ꦧꦺꦴ ꦮꦴ ꦮꦶꦲꦔ꧀ꦒꦩꦺꦴ;

ꦪꦏ꧀ꦑꦠ꧀ꦠꦁ ꦪꦺꦤ ꦒꦕ꧀ꦖꦺꦪ꧀ꦪꦁ, ꦩꦤꦸꦱ꧀ꦱꦠ꧀ꦠꦚ꧀ꦕ ꦄꦧ꧀ꦧꦗꦺ;

ꦠꦺ ꦩꦪ꧀ꦲꦁ ꦄꦴꦱꦮꦴ ꦑꦷꦟꦴ, ꦮꦶꦢ꧀ꦣꦱ꧀ꦠꦴ ꦮꦶꦤꦭ꦳ꦷꦏꦠꦴ’’ꦠꦶ. (ꦄ. ꦤꦶ. ꧔.꧓꧖) –

ꦌꦠ꧀ꦡ ꦠꦺꦨꦹꦩꦏꦁ ꦕ ꦏꦩ꧀ꦩꦁ ꦄꦮꦱꦺꦱꦴ ꦕ ꦄꦏꦸꦱꦭꦴ ꦣꦩ꧀ꦩꦴ. ‘‘ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪꦴ’’ꦠꦶ (ꦥꦴꦫꦴ. ꧓꧙; ꦄ. ꦤꦶ. ꧒.꧒꧐꧒-꧒꧓꧐) ꦌꦠ꧀ꦡ ꦥꦫꦹꦥꦮꦴꦢꦮꦶꦥ꧀ꦥꦛꦶꦱꦴꦫꦮꦣꦧꦤ꧀ꦣꦴꦢꦪꦺꦴ ꦕꦺꦮ ꦄꦥꦴꦪꦢꦸꦏ꧀ꦑꦨꦹꦠꦴ ꦕ ꦤꦴꦤꦥ꧀ꦥꦏꦴꦫꦴ ꦈꦥꦢ꧀ꦢꦮꦴ.

ꦠꦺ ꦥꦤꦺꦠꦺ ꦄꦴꦱꦮꦴ ꦪꦠ꧀ꦡ ꦪꦡꦴ ꦄꦴꦒꦠꦴ, ꦠꦠ꧀ꦡ ꦠꦡꦴ ꦮꦺꦢꦶꦠꦧ꧀ꦧꦴ. ꦌꦠꦺ ꦲꦶ ꦮꦶꦤꦪꦺ ꦠꦴꦮ ‘‘ꦢꦶꦛ꧀ꦜꦣꦩ꧀ꦩꦶꦏꦴꦤꦁ ꦄꦴꦱꦮꦴꦤꦁ ꦱꦁꦮꦫꦴꦪ, ꦱꦩ꧀ꦥꦫꦴꦪꦶꦏꦴꦤꦁ ꦄꦴꦱꦮꦴꦤꦁ ꦥꦛꦶꦓꦴꦠꦴꦪꦴ’’ꦠꦶ (ꦥꦴꦫꦴ. ꧓꧙; ꦄ. ꦤꦶ. ꧒.꧒꧐꧒-꧒꧓꧐) ꦢ꧀ꦮꦺꦣꦴ ꦄꦴꦒꦠꦴ. ꦱꦭ꦳ꦴꦪꦠꦤꦺ ‘‘ꦠꦪꦺꦴ ꦩꦺ, ꦄꦴꦮꦸꦱꦺꦴ, ꦄꦴꦱꦮꦴ ꦏꦴꦩꦴꦱꦮꦺꦴ ꦨꦮꦴꦱꦮꦺꦴ ꦄꦮꦶꦗ꧀ꦗꦴꦱꦮꦺꦴ’’ꦠꦶ (ꦱꦁ. ꦤꦶ. ꧔.꧓꧒꧑) ꦠꦶꦣꦴ ꦄꦴꦒꦠꦴ. ꦄꦚ꧀ꦚꦺꦱꦸ ꦕ ꦱꦸꦠ꧀ꦠꦤ꧀ꦠꦺꦱꦸ (ꦕꦹꦭ꦳ꦤꦶ. ꦗꦠꦸꦏꦟ꧀ꦟꦶꦩꦴꦟꦮꦥꦸꦕ꧀ꦖꦴꦤꦶꦢ꧀ꦢꦺꦱꦺꦴ ꧖꧙; ꦥꦛꦶ. ꦩ. ꧑.꧑꧐꧗) ꦄꦨꦶꦣꦩ꧀ꦩꦺ (ꦣ. ꦱ. ꧑꧑꧐꧒-꧑꧑꧐꧖; ꦮꦶꦨ. ꧙꧓꧗) ꦕ ꦠꦺꦪꦺꦮ ꦢꦶꦛ꧀ꦜꦴꦱꦮꦺꦤ ꦱꦲ ꦕꦠꦸꦣꦴ ꦄꦴꦒꦠꦴ. ꦤꦶꦧ꧀ꦧꦺꦣꦶꦏꦥꦫꦶꦪꦴꦪꦺꦤ ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦤꦶꦫꦪꦒꦴꦩꦶꦤꦶꦪꦴ, ꦄꦠ꧀ꦡꦶ ꦄꦴꦱꦮꦴ ꦠꦶꦫꦕ꧀ꦖꦴꦤꦪꦺꦴꦤꦶꦒꦴꦩꦶꦤꦶꦪꦴ, ꦄꦠ꧀ꦡꦶ ꦄꦴꦱꦮꦴ ꦥꦺꦠ꧀ꦠꦶꦮꦶꦱꦪꦒꦴꦩꦶꦤꦶꦪꦴ, ꦄꦠ꧀ꦡꦶ ꦄꦴꦱꦮꦴ ꦩꦤꦸꦱ꧀ꦱꦭꦺꦴꦏꦒꦴꦩꦶꦤꦶꦪꦴ, ꦄꦠ꧀ꦡꦶ ꦄꦴꦱꦮꦴ ꦢꦺꦮꦭꦺꦴꦏꦒꦴꦩꦶꦤꦶꦪꦴ’’ꦠꦶ (ꦄ. ꦤꦶ. ꧖.꧖꧓) ꦥꦚ꧀ꦕꦣꦴ ꦄꦴꦒꦠꦴ. ꦏꦩ꧀ꦩꦩꦺꦮ ꦕꦺꦠ꧀ꦡ ꦄꦴꦱꦮꦴꦠꦶ ꦮꦸꦠ꧀ꦠꦁ. ꦖꦏ꧀ꦏꦤꦶꦥꦴꦠꦺ ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦱꦁꦮꦫꦴꦥꦲꦴꦠꦧ꧀ꦧꦴ’’ꦠꦶꦄꦴꦢꦶꦤꦴ (ꦄ. ꦤꦶ. ꧖.꧕꧘) ꦤꦪꦺꦤ ꦖꦣꦴ ꦄꦴꦒꦠꦴ. ꦱꦧ꧀ꦧꦴꦱꦮꦥꦫꦶꦪꦴꦪꦺ (ꦩ. ꦤꦶ. ꧑.꧑꧔ ꦄꦴꦢꦪꦺꦴ) ꦠꦺꦪꦺꦮ ꦢꦱ꧀ꦱꦤꦺꦤ ꦥꦲꦴꦠꦧ꧀ꦧꦺꦲꦶ ꦱꦢ꧀ꦣꦶꦁ ꦱꦠ꧀ꦠꦣꦴ ꦄꦴꦒꦠꦴ. ꦆꦣ ꦥꦤ ꦄꦨꦶꦣꦩ꧀ꦩꦤꦪꦺꦤ ꦕꦠ꧀ꦠꦴꦫꦺꦴ ꦄꦴꦱꦮꦴ ꦄꦣꦶꦥ꧀ꦥꦺꦠꦴꦠꦶ ꦮꦺꦢꦶꦠꦧ꧀ꦧꦴ.

ꦑꦪꦴꦪꦴꦠꦶ ꦌꦠ꧀ꦡ ꦥꦤ ꦄꦴꦱꦮꦴꦤꦁ ꦱꦫꦱꦨꦺꦢꦺꦴꦥꦶ ꦑꦷꦟꦴꦏꦴꦫꦺꦴꦥꦶ ꦩꦒ꧀ꦒꦦꦭꦤꦶꦧ꧀ꦧꦴꦤꦴꦤꦶꦥꦶ ‘‘ꦄꦴꦱꦮꦏ꧀ꦑꦪꦺꦴ’’ꦠꦶ ꦮꦸꦕ꧀ꦕꦠꦶ. ‘‘ꦪꦺꦴ ꦄꦴꦱꦮꦴꦤꦁ ꦑꦪꦺꦴ ꦮꦪꦺꦴ ꦨꦺꦢꦺꦴ ꦥꦫꦶꦨꦺꦢꦺꦴ ꦄꦤꦶꦕ꧀ꦕꦠꦴ ꦄꦤ꧀ꦠꦫꦣꦴꦤ’’ꦤ꧀ꦠꦶ ꦌꦠ꧀ꦡ ꦲꦶ ꦄꦴꦱꦮꦴꦤꦁ ꦱꦫꦱꦨꦺꦢꦺꦴ ‘‘ꦄꦴꦱꦮꦏ꧀ꦑꦪꦺꦴ’’ꦠꦶ ꦮꦸꦠ꧀ꦠꦺꦴ. ‘‘ꦗꦴꦤꦠꦺꦴ ꦄꦲꦁ, ꦨꦶꦏ꧀ꦑꦮꦺ, ꦥꦱ꧀ꦱꦠꦺꦴ ꦄꦴꦱꦮꦴꦤꦁ ꦑꦪꦁ ꦮꦢꦴꦩꦷ’’ꦠꦶ (ꦩ. ꦤꦶ. ꧑.꧑꧕; ꦱꦁ. ꦤꦶ. ꧒.꧒꧓; ꦆꦠꦶꦮꦸ. ꧑꧐꧒) ꦌꦠ꧀ꦡ ꦄꦴꦱꦮꦥ꧀ꦥꦲꦴꦤꦁ ꦄꦴꦱꦮꦴꦤꦁ ꦄꦕ꧀ꦕꦤ꧀ꦠꦏ꧀ꦑꦪꦺꦴ ꦄꦱꦩꦸꦥ꧀ꦥꦴꦢꦺꦴ ꦑꦷꦟꦴꦏꦴꦫꦺꦴ ꦤꦠ꧀ꦡꦶꦨꦴꦮꦺꦴ ‘‘ꦄꦴꦱꦮꦏ꧀ꦑꦪꦺꦴ’’ꦠꦶ ꦮꦸꦠ꧀ꦠꦺꦴ.

‘‘ꦱꦺꦑꦱ꧀ꦱ ꦱꦶꦏ꧀ꦑꦩꦴꦤꦱ꧀ꦱ, ꦈꦗꦸꦩꦒ꧀ꦒꦴꦤꦸꦱꦴꦫꦶꦤꦺꦴ;

ꦑꦪꦱ꧀ꦩꦶꦁ ꦥꦜꦩꦁ ꦚꦴꦟꦁ, ꦠꦠꦺꦴ ꦄꦚ꧀ꦚꦴ ꦄꦤꦤ꧀ꦠꦫꦴ’’ꦠꦶ. (ꦆꦠꦶꦮꦸ. ꧖꧒) –

ꦌꦠ꧀ꦡ ꦩꦒ꧀ꦒꦺꦴ ‘‘ꦄꦴꦱꦮꦏ꧀ꦑꦪꦺꦴ’’ꦠꦶ ꦮꦸꦠ꧀ꦠꦺꦴ. ‘‘ꦄꦴꦱꦮꦴꦤꦁ ꦑꦪꦴ ꦱꦩꦟꦺꦴ ꦲꦺꦴꦠꦷ’’ꦠꦶ (ꦩ. ꦤꦶ. ꧑.꧔꧓꧘) ꦌꦠ꧀ꦡ ꦦꦭꦁ.

‘‘ꦥꦫꦮꦗ꧀ꦗꦴꦤꦸꦥꦱ꧀ꦱꦶꦱ꧀ꦱ, ꦤꦶꦕ꧀ꦕꦁ ꦈꦗ꧀ꦙꦴꦤꦱꦚ꧀ꦚꦶꦤꦺꦴ;

ꦄꦴꦱꦮꦴ ꦠꦱ꧀ꦱ ꦮꦝ꧀ꦞꦤ꧀ꦠꦶ, ꦄꦴꦫꦴ ꦱꦺꦴ ꦄꦴꦱꦮꦏ꧀ꦑꦪꦴ’’ꦠꦶ. (ꦣ. ꦥ. ꧒꧕꧓) –

ꦌꦠ꧀ꦡ ꦤꦶꦧ꧀ꦧꦴꦤꦁ. ꦆꦩꦱ꧀ꦩꦶꦁ ꦥꦤ ꦱꦸꦠ꧀ꦠꦺ ꦦꦭꦁ ꦱꦤ꧀ꦣꦴꦪ ‘‘ꦄꦴꦱꦮꦴꦤꦁ ꦑꦪꦴꦪꦴ’’ꦠꦶ ꦄꦴꦲ, ꦄꦫꦲꦠ꧀ꦠꦦꦭꦠ꧀ꦡꦴꦪꦴꦠꦶ ꦄꦠ꧀ꦡꦺꦴ.

ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦺꦴꦠꦶ ꦩꦤꦕ꧀ꦖꦛ꧀ꦜꦺꦱꦸ ꦆꦤ꧀ꦢ꧀ꦫꦶꦪꦺꦱꦸ ꦥꦶꦲꦶꦠꦢ꧀ꦮꦴꦫꦺꦴ. ꦨꦺꦴꦗꦤꦺ ꦩꦠ꧀ꦠꦚ꧀ꦚꦹꦠꦶ ꦨꦺꦴꦗꦤꦱ꧀ꦩꦶꦁ ꦥꦩꦴꦟꦚ꧀ꦚꦹ, ꦥꦛꦶꦒ꧀ꦒꦲꦟꦥꦫꦶꦨꦺꦴꦒꦥꦕ꧀ꦕꦮꦺꦏ꧀ꦑꦟꦩꦠ꧀ꦠꦁ ꦗꦴꦤꦴꦠꦶ ꦥꦗꦴꦤꦴꦠꦷꦠꦶ ꦄꦠ꧀ꦡꦺꦴ. ꦗꦴꦒꦫꦶꦪꦁ ꦄꦤꦸꦪꦸꦠ꧀ꦠꦺꦴꦠꦶ ꦫꦠ꧀ꦠꦶꦤ꧀ꦢꦶꦮꦁ ꦖ ꦏꦺꦴꦛ꧀ꦜꦴꦱꦺ ꦏꦠ꧀ꦮꦴ ꦥꦚ꧀ꦕꦱꦸ ꦏꦺꦴꦛ꧀ꦜꦴꦱꦺꦱꦸ ꦗꦴꦒꦫꦟꦨꦴꦮꦁ ꦄꦤꦸꦪꦸꦠ꧀ꦠꦺꦴ, ꦗꦴꦒꦫꦟꦺꦪꦺꦮ ꦪꦸꦠ꧀ꦠꦥ꧀ꦥꦪꦸꦠ꧀ꦠꦺꦴꦠꦶ ꦄꦠ꧀ꦡꦺꦴ.

ꦌꦮꦁ ꦩꦴꦠꦶꦏꦁ ꦜꦥꦺꦠ꧀ꦮꦴ ꦆꦢꦴꦤꦶ ꦠꦩꦺꦮ ꦜꦥꦶꦠꦥꦛꦶꦥꦴꦛꦶꦪꦴ ꦮꦶꦨꦗꦤ꧀ꦠꦺꦴ ꦏꦡꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦠꦶꦄꦴꦢꦶꦩꦴꦲ. ꦠꦠ꧀ꦡ ꦕꦏ꧀ꦑꦸꦤꦴ ꦫꦹꦥꦁ ꦢꦶꦱ꧀ꦮꦴꦠꦶꦄꦴꦢꦷꦤꦁ ꦄꦠ꧀ꦡꦺꦴ ꦮꦶꦱꦸꦢ꧀ꦣꦶꦩꦒ꧀ꦒꦺ (ꦮꦶꦱꦸꦢ꧀ꦣꦶ. ꧑.꧑꧕) ꦮꦶꦠ꧀ꦡꦴꦫꦶꦠꦺꦴ, ꦠꦡꦴ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦄꦴꦲꦴꦫꦁ ꦄꦴꦲꦴꦫꦺꦠꦶ ꦤꦺꦮ ꦢꦮꦴꦪꦴꦠꦶꦄꦴꦢꦷꦤꦁ (ꦮꦶꦱꦸꦢ꧀ꦣꦶ. ꧑.꧑꧘). ꦄꦴꦮꦫꦟꦷꦪꦺꦲꦶ ꦣꦩ꧀ꦩꦺꦲꦷꦠꦶ ꦥꦚ꧀ꦕꦲꦶ ꦤꦷꦮꦫꦟꦺꦲꦶ ꦣꦩ꧀ꦩꦺꦲꦶ. ꦤꦷꦮꦫꦟꦴꦤꦶ ꦲꦶ ꦕꦶꦠ꧀ꦠꦁ ꦄꦴꦮꦫꦶꦠ꧀ꦮꦴ ꦠꦶꦛ꧀ꦜꦤ꧀ꦠꦶ, ꦠꦱ꧀ꦩꦴ ꦄꦴꦮꦫꦟꦷꦪꦴ ꦣꦩ꧀ꦩꦴꦠꦶ ꦮꦸꦕ꧀ꦕꦤ꧀ꦠꦶ. ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦠꦷꦠꦶ ꦱꦷꦲꦺꦴ ꦮꦶꦪ ꦱꦺꦪ꧀ꦪꦁ ꦏꦥ꧀ꦥꦺꦠꦶ. ꦥꦴꦢꦺ ꦥꦴꦢꦁ ꦄꦕ꧀ꦕꦴꦣꦴꦪꦴꦠꦶ ꦮꦴꦩꦥꦴꦢꦁ ꦢꦏ꧀ꦑꦶꦟꦥꦴꦢꦺ ꦄꦠꦶꦄꦴꦣꦴꦪ. ꦱꦩꦁ ꦜꦥꦶꦠꦺ ꦲꦶ ꦥꦴꦢꦺ ꦗꦴꦟꦸꦏꦺꦤ ꦗꦴꦟꦸꦏꦁ ꦒꦺꦴꦥ꧀ꦦꦏꦺꦤ ꦕ ꦒꦺꦴꦥ꧀ꦦꦏꦁ ꦓꦛꦷꦪꦠꦶ, ꦠꦠꦺꦴ ꦮꦺꦢꦤꦴ ꦈꦛ꧀ꦜꦲꦤ꧀ꦠꦶ. ꦠꦱ꧀ꦩꦴ ꦠꦱ꧀ꦱ ꦢꦺꦴꦱꦱ꧀ꦱ ꦥꦫꦶꦮꦗ꧀ꦗꦤꦠ꧀ꦡꦁ ꦡꦺꦴꦏꦁ ꦄꦠꦶꦏ꧀ꦏꦩꦶꦠ꧀ꦮꦴ ꦌꦱ ꦥꦴꦢꦁ ꦜꦥꦺꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦥꦴꦢꦺ ꦥꦴꦢꦁ ꦄꦕ꧀ꦕꦴꦣꦴꦪꦴ’’ꦠꦶ.

ꦱꦠꦺꦴ ꦱꦩ꧀ꦥꦗꦴꦤꦺꦴꦠꦶ ꦱꦠꦶꦪꦴ ꦕꦺꦮ ꦱꦩ꧀ꦥꦗꦚ꧀ꦚꦺꦤ ꦕ ꦱꦩꦤ꧀ꦤꦴꦒꦠꦺꦴ. ꦏꦡꦁ ꦥꦤꦺꦱ ꦤꦶꦢ꧀ꦢꦴꦪꦤ꧀ꦠꦺꦴ ꦱꦠꦺꦴ ꦱꦩ꧀ꦥꦗꦴꦤꦺꦴ ꦤꦴꦩ ꦲꦺꦴꦠꦷꦠꦶ? ꦥꦸꦫꦶꦩꦥ꧀ꦥꦮꦠ꧀ꦠꦶꦮꦱꦺꦤ. ꦄꦪꦁ ꦲꦶ ꦕꦔ꧀ꦏꦩꦺ ꦕꦔ꧀ꦏꦩꦤ꧀ꦠꦺꦴ ꦤꦶꦢ꧀ꦢꦴꦪ ꦎꦏ꧀ꦏꦩꦤꦨꦴꦮꦁ ꦚꦠ꧀ꦮꦴ ꦥꦮꦠ꧀ꦠꦩꦴꦤꦁ ꦏꦩ꧀ꦩꦛ꧀ꦜꦴꦤꦁ ꦜꦥꦺꦠ꧀ꦮꦴ ꦩꦚ꧀ꦕꦺ ꦮꦴ ꦦꦭꦏꦺ ꦮꦴ ꦤꦶꦥꦤ꧀ꦤꦺꦴ ꦤꦶꦢ꧀ꦢꦁ ꦈꦥꦒꦤ꧀ꦠ꧀ꦮꦴ ꦥꦸꦤ ꦥꦧꦸꦗ꧀ꦙꦩꦴꦤꦺꦴ ꦏꦩ꧀ꦩꦛ꧀ꦜꦴꦤꦁ ꦜꦶꦠꦛ꧀ꦜꦴꦤꦺ ꦒꦟ꧀ꦲꦤ꧀ꦠꦺꦴꦪꦺꦮ ꦥꦧꦸꦗ꧀ꦙꦠꦶ. ꦠꦱ꧀ꦩꦴ ꦤꦶꦢ꧀ꦢꦴꦪꦤ꧀ꦠꦺꦴꦥꦶ ꦱꦠꦺꦴ ꦱꦩ꧀ꦥꦗꦴꦤꦺꦴ ꦤꦴꦩ ꦲꦺꦴꦠꦶ. ꦄꦪꦁ ꦠꦴꦮ ꦩꦹꦭꦏꦩ꧀ꦩꦛ꧀ꦜꦴꦤꦺ ꦤꦪꦺꦴꦮ. ꦥꦫꦶꦒ꧀ꦒꦲꦏꦩ꧀ꦩꦛ꧀ꦜꦴꦤꦮꦱꦺꦤꦴꦥꦶ ꦥꦤꦺꦱ ꦱꦠꦺꦴ ꦱꦩ꧀ꦥꦗꦴꦤꦺꦴ ꦤꦴꦩ ꦲꦺꦴꦠꦶ. ꦏꦡꦁ? ꦄꦪꦁ ꦲꦶ ꦕꦔ꧀ꦏꦩꦤ꧀ꦠꦺꦴ ꦤꦶꦢ꧀ꦢꦴꦪ ꦎꦏ꧀ꦏꦩꦤꦨꦴꦮꦁ ꦚꦠ꧀ꦮꦴ ꦥꦴꦱꦴꦟꦦꦭꦏꦺ ꦮꦴ ꦩꦚ꧀ꦕꦺ ꦮꦴ ꦢꦏ꧀ꦑꦶꦟꦺꦤ ꦥꦱ꧀ꦱꦺꦤ ꦤꦶꦥꦗ꧀ꦗꦶꦠ꧀ꦮꦴ ꦥꦕ꧀ꦕꦮꦺꦏ꧀ꦑꦠꦶ – ‘‘ꦄꦕꦺꦠꦤꦺꦴ ꦏꦴꦪꦺꦴ ꦄꦕꦺꦠꦤꦺ ꦩꦚ꧀ꦕꦺ ꦥꦠꦶꦛ꧀ꦜꦶꦠꦺꦴ, ꦄꦕꦺꦠꦤꦺꦴ ꦩꦚ꧀ꦕꦺꦴ ꦄꦕꦺꦠꦤꦴꦪ ꦥꦡꦮꦶꦪꦴ, ꦄꦕꦺꦠꦤꦴ ꦥꦡꦮꦷ ꦄꦕꦺꦠꦤꦺ ꦈꦢꦏꦺ, ꦄꦕꦺꦠꦤꦁ ꦈꦢꦏꦁ ꦄꦕꦺꦠꦤꦺ ꦮꦴꦠꦺ, ꦄꦕꦺꦠꦤꦺꦴ ꦮꦴꦠꦺꦴ ꦄꦕꦺꦠꦤꦺ ꦄꦴꦏꦴꦱꦺ ꦥꦠꦶꦛ꧀ꦜꦶꦠꦺꦴ. ꦠꦠ꧀ꦡ ꦄꦴꦏꦴꦱꦩ꧀ꦥꦶ ‘ꦄꦲꦁ ꦮꦴꦠꦁ ꦈꦏ꧀ꦑꦶꦥꦶꦠ꧀ꦮꦴ ꦜꦶꦠ’ꦤ꧀ꦠꦶ ꦤ ꦗꦴꦤꦴꦠꦶ, ꦮꦴꦠꦺꦴꦥꦶ ‘ꦄꦲꦁ ꦄꦴꦏꦴꦱꦺ ꦥꦠꦶꦛ꧀ꦜꦶꦠꦺꦴ’ꦠꦶ ꦤ ꦗꦴꦤꦴꦠꦶ. ꦠꦡꦴ ꦮꦴꦠꦺꦴ ꦤ ꦗꦴꦤꦴꦠꦶ. ‘ꦄꦲꦁ ꦈꦢꦏꦁ ꦈꦏ꧀ꦑꦶꦥꦶꦠ꧀ꦮꦴ ꦜꦶꦠꦺꦴ’ꦠꦶ…ꦥꦺ… ꦩꦚ꧀ꦕꦺꦴ ꦤ ꦗꦴꦤꦴꦠꦶ, ‘ꦄꦲꦁ ꦏꦴꦪꦁ ꦈꦏ꧀ꦑꦶꦥꦶꦠ꧀ꦮꦴ ꦜꦶꦠꦺꦴ’ꦠꦶ, ꦏꦴꦪꦺꦴ ꦤ ꦗꦴꦤꦴꦠꦶ ‘ꦄꦲꦁ ꦩꦚ꧀ꦕꦺ ꦥꦠꦶꦛ꧀ꦜꦶꦠꦺꦴ’ꦠꦶ. ꦤ ꦲꦶ ꦠꦺꦱꦁ ꦄꦚ꧀ꦚꦩꦚ꧀ꦚꦁ ꦄꦴꦨꦺꦴꦒꦺꦴ ꦮꦴ ꦱꦩꦤ꧀ꦤꦴꦲꦴꦫꦺꦴ ꦮꦴ ꦩꦤꦱꦶꦏꦴꦫꦺꦴ ꦮꦴ ꦕꦺꦠꦤꦴ ꦮꦴ ꦥꦠ꧀ꦡꦤꦴ ꦮꦴ ꦄꦠ꧀ꦡꦷ’’ꦠꦶ. ꦠꦱ꧀ꦱ ꦌꦮꦁ ꦥꦕ꧀ꦕꦮꦺꦏ꧀ꦑꦠꦺꦴ ꦠꦁ ꦥꦕ꧀ꦕꦮꦺꦏ꧀ꦑꦟꦕꦶꦠ꧀ꦠꦁ ꦨꦮꦔ꧀ꦒꦺ ꦎꦠꦫꦠꦶ. ꦌꦮꦁ ꦤꦶꦢ꧀ꦢꦴꦪꦤ꧀ꦠꦺꦴꦥꦶ ꦱꦠꦺꦴ ꦱꦩ꧀ꦥꦗꦴꦤꦺꦴ ꦤꦴꦩ ꦲꦺꦴꦠꦷꦠꦶ.

ꦈꦛ꧀ꦜꦴꦤꦱꦚ꧀ꦚꦁ ꦩꦤꦱꦶꦏꦫꦶꦠ꧀ꦮꦴꦠꦶ ‘‘ꦌꦠ꧀ꦠꦏꦁ ꦜꦴꦤꦁ ꦒꦠꦺ ꦕꦤ꧀ꦢꦺ ꦮꦴ ꦠꦴꦫꦏꦴꦪ ꦮꦴ ꦈꦛ꧀ꦜꦲꦶꦱ꧀ꦱꦴꦩꦷ’’ꦠꦶ ꦈꦛ꧀ꦜꦴꦤꦏꦴꦭꦥꦫꦶꦕ꧀ꦖꦺꦢꦶꦏꦁ ꦱꦚ꧀ꦚꦁ ꦩꦤꦱꦶꦏꦫꦶꦠ꧀ꦮꦴ, ꦕꦶꦠ꧀ꦠꦺ ꦜꦥꦺꦠ꧀ꦮꦴꦠꦶ ꦄꦠ꧀ꦡꦺꦴ. ꦌꦮꦁ ꦏꦫꦶꦠ꧀ꦮꦴ ꦱꦪꦶꦠꦺꦴ ꦲꦶ ꦪꦡꦴꦥꦫꦶꦕ꧀ꦖꦶꦤ꧀ꦤꦺꦪꦺꦮ ꦏꦴꦭꦺ ꦈꦛ꧀ꦜꦲꦠꦶ.