꧔. ꦕꦏ꧀ꦏꦮꦠ꧀ꦠꦶꦱꦸꦠ꧀ꦠꦮꦟ꧀ꦟꦤꦴ

꧑꧔. ꦕꦠꦸꦠ꧀ꦡꦺ ꦕꦠꦹꦲꦶ ꦱꦔ꧀ꦒꦲꦮꦠ꧀ꦡꦹꦲꦶ ꦗꦤꦁ ꦫꦚ꧀ꦗꦺꦠꦷꦠꦶ ꦫꦴꦗꦴ. ꦕꦏ꧀ꦏꦁ ꦮꦠ꧀ꦠꦺꦠꦷꦠꦶ ꦕꦏ꧀ꦏꦮꦠ꧀ꦠꦷ. ꦮꦠ꧀ꦠꦶꦠꦁ ꦮꦴ ꦄꦤꦺꦤ ꦕꦏ꧀ꦏꦤ꧀ꦠꦶ ꦕꦏ꧀ꦏꦮꦠ꧀ꦠꦷ. ꦣꦩ꧀ꦩꦺꦴ ꦄꦱ꧀ꦱ ꦄꦠ꧀ꦡꦷꦠꦶ ꦣꦩ꧀ꦩꦶꦏꦺꦴ. ꦣꦩ꧀ꦩꦺꦤꦺꦮ ꦢꦱꦮꦶꦣꦺꦤ ꦕꦏ꧀ꦏꦮꦠ꧀ꦠꦶꦮꦠ꧀ꦠꦺꦤ ꦫꦴꦗꦴ ꦗꦴꦠꦺꦴꦠꦶ ꦣꦩ꧀ꦩꦫꦴꦗꦴ. ꦱꦺꦴꦥꦶ ꦤ ꦄꦫꦴꦗꦏꦤ꧀ꦠꦶ ꦱꦺꦴꦥꦶ ꦄꦚ꧀ꦚꦁ ꦤꦶꦱ꧀ꦱꦪꦫꦴꦗꦴꦤꦁ ꦄꦭꦨꦶꦠ꧀ꦮꦴ ꦕꦏ꧀ꦏꦁ ꦤꦴꦩ ꦮꦠ꧀ꦠꦺꦠꦸꦁ ꦤ ꦱꦏ꧀ꦏꦺꦴꦠꦷꦠꦶ ꦄꦠ꧀ꦡꦺꦴ. ꦆꦠꦶ ꦱꦠ꧀ꦡꦴ ꦢꦺꦱꦤꦁ ꦥꦛ꧀ꦜꦥꦺꦠ꧀ꦮꦴ ꦪꦡꦴꦤꦸꦱꦤ꧀ꦣꦶꦁ ꦄꦥꦴꦥꦺꦠ꧀ꦮꦴꦮ ꦠꦸꦟ꧀ꦲꦷ ꦄꦲꦺꦴꦱꦶ. ꦏꦱ꧀ꦩꦴ? ꦄꦤꦸꦱꦤ꧀ꦣꦶꦏꦸꦱꦭꦴ ꦈꦛ꧀ꦜꦲꦶꦠ꧀ꦮꦴ ꦄꦤꦸꦱꦤ꧀ꦣꦶꦁ ꦥꦸꦕ꧀ꦖꦶꦱ꧀ꦱꦤ꧀ꦠꦶ, ꦧꦲꦹ ꦲꦶ ꦆꦩꦱ꧀ꦩꦶꦁ ꦜꦴꦤꦺ ꦠꦡꦴꦫꦹꦥꦴ ꦨꦶꦏ꧀ꦑꦹ, ꦄꦡꦴꦲꦁ ꦠꦺꦲꦶ ꦥꦸꦛ꧀ꦜꦺꦴ ꦢꦺꦱꦤꦁ ꦮꦝ꧀ꦞꦺꦱ꧀ꦱꦴꦩꦷꦠꦶ. ꦄꦡꦺꦏꦺꦴ ꦄꦤꦸꦱꦤ꧀ꦣꦶꦏꦸꦱꦭꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦥꦸꦕ꧀ꦖꦤ꧀ꦠꦺꦴ ꦏꦺꦴ ꦥꦤ, ꦨꦤ꧀ꦠꦺꦠꦶꦄꦴꦢꦶꦩꦴꦲ. ꦨꦒꦮꦴꦥꦶꦱ꧀ꦱ ꦧ꧀ꦪꦴꦏꦫꦺꦴꦤ꧀ꦠꦺꦴ ꦣꦩ꧀ꦩꦺꦴ ꦨꦶꦏ꧀ꦑꦹꦠꦶꦄꦴꦢꦶꦩꦴꦲ.

ꦠꦠ꧀ꦡ ꦣꦩ꧀ꦩꦺꦴꦠꦶ ꦢꦱꦏꦸꦱꦭꦏꦩ꧀ꦩꦥꦡꦣꦩ꧀ꦩꦺꦴ. ꦣꦩ꧀ꦩꦤ꧀ꦠꦶ ꦠꦩꦺꦮ ꦮꦸꦠ꧀ꦠꦥ꧀ꦥꦏꦴꦫꦁ ꦣꦩ꧀ꦩꦁ. ꦤꦶꦱ꧀ꦱꦴꦪꦴꦠꦶ ꦠꦢꦣꦶꦛ꧀ꦜꦴꦤꦺꦤ ꦕꦺꦠꦱꦴ ꦠꦩꦺꦮ ꦤꦶꦱ꧀ꦱꦪꦁ ꦏꦠ꧀ꦮꦴ. ꦣꦩ꧀ꦩꦁ ꦱꦏ꧀ꦏꦫꦺꦴꦤ꧀ꦠꦺꦴꦠꦶ ꦪꦡꦴ ꦏꦠꦺꦴ ꦱꦺꦴ ꦣꦩ꧀ꦩꦺꦴ ꦱꦸꦛ꧀ꦜꦸ ꦏꦠꦺꦴ ꦲꦺꦴꦠꦶ, ꦌꦮꦩꦺꦠꦁ ꦏꦫꦺꦴꦤ꧀ꦠꦺꦴ. ꦣꦩ꧀ꦩꦁ ꦒꦫꦸꦁ ꦏꦫꦺꦴꦤ꧀ꦠꦺꦴꦠꦶ ꦠꦱ꧀ꦩꦶꦁ ꦒꦴꦫꦮꦸꦥ꧀ꦥꦠ꧀ꦠꦶꦪꦴ ꦠꦁ ꦒꦫꦸꦏꦫꦺꦴꦤ꧀ꦠꦺꦴ. ꦣꦩ꧀ꦩꦁ ꦄꦥꦕꦴꦪꦩꦴꦤꦺꦴꦠꦶ ꦠꦱ꧀ꦱꦺꦮ ꦣꦩ꧀ꦩꦱ꧀ꦱ ꦄꦚ꧀ꦗꦭꦶꦏꦫꦟꦴꦢꦷꦲꦶ ꦤꦷꦕꦮꦸꦠ꧀ꦠꦶꦠꦁ ꦏꦫꦺꦴꦤ꧀ꦠꦺꦴ. ꦣꦩ꧀ꦩꦢ꧀ꦣꦗꦺꦴ ꦣꦩ꧀ꦩꦏꦺꦠꦹꦠꦶ ꦠꦁ ꦣꦩ꧀ꦩꦁ ꦣꦗꦩꦶꦮ ꦥꦸꦫꦏ꧀ꦑꦠ꧀ꦮꦴ ꦏꦺꦠꦸꦩꦶꦮ ꦈꦏ꧀ꦑꦶꦥꦶꦠ꧀ꦮꦴ ꦥꦮꦠ꧀ꦠꦶꦪꦴ ꦣꦩ꧀ꦩꦢ꧀ꦣꦗꦺꦴ ꦣꦩ꧀ꦩꦏꦺꦠꦸ ꦕ ꦲꦸꦠ꧀ꦮꦴꦠꦶ ꦄꦠ꧀ꦡꦺꦴ. ꦣꦩ꧀ꦩꦴꦣꦶꦥꦠꦺꦪ꧀ꦪꦺꦴꦠꦶ ꦣꦩ꧀ꦩꦴꦣꦶꦥꦠꦶꦨꦹꦠꦴꦒꦠꦨꦴꦮꦺꦤ ꦣꦩ꧀ꦩꦮꦱꦺꦤꦺꦮ ꦕ ꦱꦧ꧀ꦧꦏꦶꦫꦶꦪꦴꦤꦁ ꦏꦫꦟꦺꦤ ꦣꦩ꧀ꦩꦴꦣꦶꦥꦠꦺꦪ꧀ꦪꦺꦴ ꦲꦸꦠ꧀ꦮꦴ. ꦣꦩ꧀ꦩꦶꦏꦁ ꦫꦏ꧀ꦑꦴꦮꦫꦟꦒꦸꦠ꧀ꦠꦶꦁ ꦱꦁꦮꦶꦢꦲꦠꦷꦠꦶ ꦣꦩ꧀ꦩꦺꦴ ꦄꦱ꧀ꦱꦴ ꦄꦠ꧀ꦡꦷꦠꦶ ꦣꦩ꧀ꦩꦶꦏꦴ, ꦫꦏ꧀ꦑꦴ ꦕ ꦄꦴꦮꦫꦟꦚ꧀ꦕ ꦒꦸꦠ꧀ꦠꦶ ꦕ ꦫꦏ꧀ꦑꦴꦮꦫꦟꦒꦸꦠ꧀ꦠꦶ. ꦠꦠ꧀ꦡ ‘‘ꦥꦫꦁ ꦫꦏ꧀ꦑꦤ꧀ꦠꦺꦴ ꦄꦠ꧀ꦠꦴꦤꦁ ꦫꦏ꧀ꦑꦠꦷ’’ꦠꦶ ꦮꦕꦤꦠꦺꦴ ꦑꦤ꧀ꦠꦶꦄꦴꦢꦪꦺꦴ ꦫꦏ꧀ꦑꦴ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦥꦫꦁ ꦫꦏ꧀ꦑꦤ꧀ꦠꦺꦴ ꦄꦠ꧀ꦠꦴꦤꦁ ꦫꦏ꧀ꦑꦠꦶ. ꦑꦤ꧀ꦠꦶꦪꦴ ꦄꦮꦶꦲꦶꦁꦱꦴꦪ ꦩꦺꦠ꧀ꦠꦕꦶꦠ꧀ꦠꦠꦴꦪ ꦄꦤꦸꦢ꧀ꦢꦪꦴꦪꦴ’’ꦠꦶ (ꦱꦁ. ꦤꦶ. ꧕.꧓꧘꧕). ꦤꦶꦮꦴꦱꦤꦥꦴꦫꦸꦥꦤꦒꦺꦲꦴꦢꦷꦤꦶ ꦄꦴꦮꦫꦟꦁ. ꦕꦺꦴꦫꦴꦢꦶꦈꦥꦢ꧀ꦢꦮꦤꦶꦮꦴꦫꦟꦠ꧀ꦡꦁ ꦒꦺꦴꦥꦴꦪꦤꦴ ꦒꦸꦠ꧀ꦠꦶ. ꦠꦁ ꦱꦧ꧀ꦧꦩ꧀ꦥꦶ ꦱꦸꦛ꧀ꦜꦸ ꦮꦶꦢꦲꦠꦶ ꦥꦮꦠ꧀ꦠꦺꦠꦶ ꦜꦥꦺꦠꦷꦠꦶ ꦄꦠ꧀ꦡꦺꦴ.

ꦆꦢꦴꦤꦶ ꦪꦠ꧀ꦡ ꦱꦴ ꦱꦁꦮꦶꦢꦲꦶꦠꦧ꧀ꦧꦴ, ꦠꦁ ꦢꦱ꧀ꦱꦺꦤ꧀ꦠꦺꦴ ꦄꦤ꧀ꦠꦺꦴꦗꦤꦱ꧀ꦩꦶꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦫꦴꦪꦁ ꦱꦔ꧀ꦑꦺꦥꦠ꧀ꦡꦺꦴ – ꦄꦤ꧀ꦠꦺꦴꦗꦤꦱꦔ꧀ꦑꦴꦠꦁ ꦥꦸꦠ꧀ꦠꦢꦴꦫꦁ ꦱꦷꦭꦱꦁꦮꦫꦺ ꦥꦠꦶꦛ꧀ꦜꦴꦥꦺꦤ꧀ꦠꦺꦴ ꦮꦠ꧀ꦡꦒꦤ꧀ꦣꦩꦴꦭꦴꦢꦷꦤꦶ ꦕꦱ꧀ꦱ ꦢꦢꦩꦴꦤꦺꦴ ꦱꦧ꧀ꦧꦺꦴꦥꦢ꧀ꦢꦮꦺ ꦕꦱ꧀ꦱ ꦤꦶꦮꦴꦫꦪꦩꦴꦤꦺꦴ ꦣꦩ꧀ꦩꦶꦏꦁ ꦫꦏ꧀ꦑꦴꦮꦫꦟꦒꦸꦠ꧀ꦠꦶꦁ ꦱꦁꦮꦶꦢꦲꦠꦶ ꦤꦴꦩ. ꦑꦠ꧀ꦠꦶꦪꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦄꦪꦁ ꦥꦤ ꦮꦶꦱꦺꦱꦺꦴ – ꦄꦨꦶꦱꦶꦠ꧀ꦠꦑꦠ꧀ꦠꦶꦪꦴ ꦨꦢ꧀ꦫꦄꦱ꧀ꦱꦴꦗꦴꦤꦷꦪꦴꦢꦶꦫꦠꦤꦱꦩ꧀ꦥꦢꦴꦤꦺꦤꦥꦶ ꦈꦥꦒꦟ꧀ꦲꦶꦠꦧ꧀ꦧꦴ, ꦄꦤꦸꦪꦤ꧀ꦠꦴ ꦑꦠ꧀ꦠꦶꦪꦴ ꦠꦺꦱꦁ ꦄꦤꦸꦫꦹꦥꦪꦴꦤꦮꦴꦲꦤꦱꦩ꧀ꦥꦢꦴꦤꦺꦤꦥꦶ ꦥꦫꦶꦠꦺꦴꦱꦺꦠꦧ꧀ꦧꦴ, ꦧꦭꦏꦴꦪꦺꦴ ꦏꦴꦭꦁ ꦄꦤꦠꦶꦏ꧀ꦏꦩꦺꦠ꧀ꦮꦴ ꦨꦠ꧀ꦠꦮꦺꦠꦤꦱꦩ꧀ꦥꦢꦴꦤꦺꦤꦥꦶ ꦄꦤꦸꦒ꧀ꦒꦲꦺꦠꦧ꧀ꦧꦺꦴ, ꦧ꧀ꦫꦴꦲ꧀ꦩꦟꦴ ꦄꦤ꧀ꦤꦥꦴꦤꦮꦠ꧀ꦡꦴꦢꦶꦤꦴ ꦢꦺꦪ꧀ꦪꦣꦩ꧀ꦩꦺꦤ, ꦒꦲꦥꦠꦶꦏꦴ ꦨꦠ꧀ꦠꦧꦷꦗꦤꦔ꧀ꦒꦭꦧꦭꦶꦧꦢ꧀ꦢꦴꦢꦶꦱꦩ꧀ꦥꦢꦴꦤꦺꦤ, ꦠꦡꦴ ꦤꦶꦒꦩꦮꦴꦱꦶꦤꦺꦴ ꦤꦺꦒꦩꦴ ꦗꦤꦥꦢꦮꦴꦱꦶꦤꦺꦴ ꦕ ꦗꦴꦤꦥꦢꦴ. ꦱꦩꦶꦠꦥꦴꦥꦧꦴꦲꦶꦠꦥꦴꦥꦴ ꦥꦤ ꦱꦩꦟꦧ꧀ꦫꦴꦲ꧀ꦩꦟꦴ ꦱꦩꦟꦥꦫꦶꦏ꧀ꦑꦴꦫꦱꦩ꧀ꦥꦢꦴꦤꦺꦤ ꦱꦏ꧀ꦏꦴꦠꦧ꧀ꦧꦴ, ꦩꦶꦒꦥꦏ꧀ꦑꦶꦤꦺꦴ ꦄꦨꦪꦢꦴꦤꦺꦤ ꦱꦩꦱ꧀ꦱꦴꦱꦺꦠꦧ꧀ꦧꦴ.

ꦣꦩ꧀ꦩꦺꦤꦺꦮ ꦕꦏ꧀ꦏꦁ ꦮꦠ꧀ꦠꦺꦠꦷꦠꦶ ꦢꦱꦏꦸꦱꦭꦏꦩ꧀ꦩꦥꦡꦣꦩ꧀ꦩꦺꦤꦺꦮ ꦕꦏ꧀ꦏꦁ ꦥꦮꦠ꧀ꦠꦺꦠꦶ. ꦠꦁ ꦲꦺꦴꦠꦶ ꦕꦏ꧀ꦏꦁ ꦄꦥ꧀ꦥꦛꦶꦮꦠ꧀ꦠꦶꦪꦤ꧀ꦠꦶ ꦠꦁ ꦠꦺꦤ ꦌꦮꦁ ꦥꦮꦠ꧀ꦠꦶꦠꦁ ꦄꦴꦟꦴꦕꦏ꧀ꦏꦁ ꦄꦥ꧀ꦥꦛꦶꦮꦠ꧀ꦠꦶꦪꦁ ꦲꦺꦴꦠꦶ. ꦏꦺꦤꦕꦶ ꦩꦤꦸꦱ꧀ꦱꦨꦹꦠꦺꦤꦴꦠꦶ ꦢꦺꦮꦠꦴ ꦤꦴꦩ ꦄꦠ꧀ꦠꦤꦴ ꦆꦕ꧀ꦖꦶꦠꦶꦕ꧀ꦖꦶꦠꦩꦺꦮ ꦏꦫꦺꦴꦤ꧀ꦠꦶ, ꦠꦱ꧀ꦩꦴ ꦠꦴ ꦄꦒ꧀ꦒꦟ꧀ꦲꦶꦠ꧀ꦮꦴ ‘‘ꦩꦤꦸꦱ꧀ꦱꦨꦹꦠꦺꦤꦴ’’ꦠꦶ ꦮꦸꦠ꧀ꦠꦁ. ꦥꦕ꧀ꦕꦠ꧀ꦡꦶꦏꦺꦤꦴꦠꦶ ꦥꦛꦶꦄꦠ꧀ꦡꦶꦏꦺꦤ, ꦥꦛꦶꦱꦠ꧀ꦠꦸꦤꦴꦠꦶ ꦄꦠ꧀ꦡꦺꦴ. ꦣꦩ꧀ꦩꦶꦏꦺꦴꦠꦶ ꦕꦏ꧀ꦏꦮꦠ꧀ꦠꦷ ꦢꦱꦏꦸꦱꦭꦏꦩ꧀ꦩꦥꦡꦮꦱꦺꦤ ꦣꦩ꧀ꦩꦶꦏꦺꦴ, ꦠꦡꦴꦒꦠꦺꦴ ꦥꦤ ꦤꦮꦭꦺꦴꦏꦸꦠ꧀ꦠꦫꦣꦩ꧀ꦩꦮꦱꦺꦤ. ꦣꦩ꧀ꦩꦫꦴꦗꦴꦠꦶ ꦤꦮꦲꦶ ꦭꦺꦴꦏꦸꦠ꧀ꦠꦫꦣꦩ꧀ꦩꦺꦲꦶ ꦩꦲꦴꦗꦤꦁ ꦫꦚ꧀ꦗꦺꦠꦷꦠꦶ ꦣꦩ꧀ꦩꦫꦴꦗꦴ. ꦣꦩ꧀ꦩꦁꦪꦺꦮꦴꦠꦶ ꦤꦮꦭꦺꦴꦏꦸꦠ꧀ꦠꦫꦣꦩ꧀ꦩꦩꦺꦮ ꦤꦶꦱ꧀ꦱꦴꦪ ꦠꦩꦺꦮ ꦱꦏ꧀ꦏꦫꦺꦴꦤ꧀ꦠꦺꦴ ꦠꦁ ꦒꦫꦸꦏꦫꦺꦴꦤ꧀ꦠꦺꦴ ꦠꦁ ꦄꦥꦕꦴꦪꦩꦴꦤꦺꦴ. ꦱꦺꦴꦮꦱ꧀ꦱ ꦣꦩ꧀ꦩꦺꦴ ꦄꦧ꧀ꦨꦸꦒ꧀ꦒꦠꦛ꧀ꦜꦺꦤ ꦣꦗꦺꦴꦠꦶ ꦣꦩ꧀ꦩꦢ꧀ꦣꦗꦺꦴ. ꦱꦺꦴꦮꦱ꧀ꦱ ꦏꦺꦠꦹꦠꦶ ꦣꦩ꧀ꦩꦏꦺꦠꦸ. ꦠꦩꦺꦮ ꦄꦣꦶꦥꦠꦶꦁ ꦗꦺꦛ꧀ꦜꦏꦁ ꦏꦠ꧀ꦮꦴ ꦮꦶꦲꦫꦠꦷꦠꦶ ꦣꦩ꧀ꦩꦴꦣꦶꦥꦠꦺꦪ꧀ꦪꦺꦴ. ꦣꦩ꧀ꦩꦶꦏꦁ ꦫꦏ꧀ꦑꦴꦮꦫꦟꦒꦸꦠ꧀ꦠꦶꦤ꧀ꦠꦶ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦣꦩ꧀ꦩꦢꦴꦪꦶꦏꦫꦏ꧀ꦑꦚ꧀ꦕ ꦄꦴꦮꦫꦟꦚ꧀ꦕ ꦒꦸꦠ꧀ꦠꦶꦚ꧀ꦕ. ꦱꦁꦮꦶꦢꦲꦠꦷꦠꦶ ꦜꦥꦺꦠꦶ ꦥꦚ꧀ꦚꦥꦺꦠꦶ. ꦌꦮꦫꦹꦥꦤ꧀ꦠꦶ ꦠꦶꦮꦶꦣꦁ ꦏꦴꦪꦢꦸꦕ꧀ꦕꦫꦶꦠꦁ ꦤ ꦱꦺꦮꦶꦠꦧ꧀ꦧꦁ, ꦱꦸꦕꦫꦶꦠꦁ ꦱꦺꦮꦶꦠꦧ꧀ꦧꦤ꧀ꦠꦶ ꦌꦮꦁ ꦱꦧ꧀ꦧꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦱꦁꦮꦶꦢꦲꦶꦠ꧀ꦮꦴꦠꦶ ꦜꦥꦺꦠ꧀ꦮꦴ ꦏꦡꦺꦠ꧀ꦮꦴ. ꦣꦩ꧀ꦩꦺꦤꦺꦮ ꦄꦤꦸꦠ꧀ꦠꦫꦁ ꦣꦩ꧀ꦩꦕꦏ꧀ꦏꦁ ꦥꦮꦠ꧀ꦠꦺꦠꦷꦠꦶ ꦤꦮꦭꦺꦴꦏꦸꦠ꧀ꦠꦫꦣꦩ꧀ꦩꦺꦤꦺꦮ ꦄꦱꦢꦶꦱꦁ ꦣꦩ꧀ꦩꦕꦏ꧀ꦏꦁ ꦥꦮꦠ꧀ꦠꦺꦠꦶ. ꦠꦁ ꦲꦺꦴꦠꦶ ꦕꦏ꧀ꦏꦁ ꦄꦥ꧀ꦥꦛꦶꦮꦠ꧀ꦠꦶꦪꦤ꧀ꦠꦶ ꦠꦁ ꦌꦮꦁ ꦥꦮꦠ꧀ꦠꦶꦠꦁ ꦣꦩ꧀ꦩꦕꦏ꧀ꦏꦁ ꦌꦠꦺꦱꦸ ꦱꦩꦟꦴꦢꦷꦱꦸ ꦌꦏꦺꦤꦥꦶ ꦥꦛꦶꦮꦠ꧀ꦠꦺꦠꦸꦁ ꦥꦛꦶꦧꦴꦲꦶꦠꦸꦁ ꦤ ꦱꦏ꧀ꦏꦴ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.