꧙. ꦱꦢ꧀ꦣꦱꦸꦠ꧀ꦠꦮꦟ꧀ꦟꦤꦴ

꧙. ꦤꦮꦩꦺ ꦢꦺꦴꦟꦶꦪꦴ ꦧꦢ꧀ꦣꦺꦴꦠꦶ ꦪꦮꦱꦱ꧀ꦱꦢꦺꦴꦟꦶꦪꦴ ꦱꦩꦷꦥꦺ ꦧꦢ꧀ꦣꦺꦴ. ꦄꦤ꧀ꦠꦫꦁ ꦏꦫꦶꦠ꧀ꦮꦴꦠꦶ ꦄꦧ꧀ꦨꦤ꧀ꦠꦫꦺ ꦏꦠ꧀ꦮꦴ. ꦙꦴꦪꦠꦷꦠꦶ ꦕꦶꦤ꧀ꦠꦺꦠꦶ. ꦥꦗ꧀ꦙꦴꦪꦠꦷꦠꦶ ꦆꦠꦺꦴ ꦕꦶꦠꦺꦴ ꦕ ꦤꦴꦤꦥ꧀ꦥꦏꦴꦫꦏꦁ ꦙꦴꦪꦠꦶ. ꦤꦶꦗ꧀ꦙꦴꦪꦠꦷꦠꦶ ꦤꦶꦫꦤ꧀ꦠꦫꦮꦱꦺꦤ ꦤꦶꦧꦢ꧀ꦣꦁ ꦙꦴꦪꦠꦶ. ꦥꦡꦮꦶꦩ꧀ꦥꦶ ꦤꦶꦱ꧀ꦱꦴꦪ ꦙꦴꦪꦠꦷꦠꦶ ꦱꦩꦴꦥꦠ꧀ꦠꦶꦪꦁ ꦱꦤꦶꦏꦤ꧀ꦠꦶꦏꦮꦱꦺꦤꦺꦠꦁ ꦮꦸꦠ꧀ꦠꦁ. ꦱꦩꦴꦥꦠ꧀ꦠꦶꦪꦚ꧀ꦲꦶ ꦱꦤꦶꦏꦤ꧀ꦠꦶꦏꦠ꧀ꦠꦴ ꦌꦱ ꦑꦭ꦳ꦸꦔ꧀ꦏꦺꦴ ꦤꦴꦩ ꦏꦠꦺꦴ. ꦄꦴꦥꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ.

ꦏꦡꦚ꧀ꦕ ꦱꦢ꧀ꦣ ꦄꦴꦗꦴꦤꦷꦪꦙꦴꦪꦶꦠꦁ ꦲꦺꦴꦠꦷꦠꦶ ꦏꦡꦁ ꦏꦴꦫꦟꦴꦏꦴꦫꦟꦁ ꦗꦴꦤꦤ꧀ꦠꦱ꧀ꦱ ꦱꦶꦤ꧀ꦣꦮꦱ꧀ꦱ ꦙꦴꦪꦶꦠꦁ ꦲꦺꦴꦠꦶ. ꦪꦡꦴ ꦆꦟꦤ꧀ꦠꦶꦄꦴꦢꦷꦱꦸ ꦆꦟꦱꦢꦶꦱꦁ ꦧꦤ꧀ꦣꦤꦱꦢꦶꦱꦁ ꦣꦤꦗꦴꦤꦶꦱꦢꦶꦱꦁ ꦏꦭꦶꦱꦔ꧀ꦑꦴꦠꦩꦲꦴꦥꦫꦴꦣꦱꦢꦶꦱꦚ꧀ꦕ ꦏꦠ꧀ꦮꦴ ꦄꦠ꧀ꦠꦤꦺꦴ ꦄꦨꦶꦩꦸꦑꦱ꧀ꦱ ꦥꦠꦺꦴꦢꦱ꧀ꦱ ꦄꦗ꧀ꦙꦺꦴꦲꦫꦟꦱꦔ꧀ꦑꦴꦠꦁ ꦥꦠꦤꦁ ꦮꦶꦥꦱ꧀ꦱꦠꦷꦠꦶ ꦄꦠ꧀ꦡꦺꦴ. ꦤꦺꦮ ꦥꦡꦮꦶꦁ ꦤꦶꦱ꧀ꦱꦴꦪ ꦙꦴꦪꦠꦷꦠꦶ ꦱꦩꦴꦥꦠ꧀ꦠꦶꦱꦸꦑꦤꦶꦏꦤ꧀ꦠꦶꦪꦴ ꦄꦨꦴꦮꦺꦤ ꦥꦡꦮꦶꦄꦴꦫꦩ꧀ꦩꦟꦴꦪ ꦕꦠꦸꦏ꧀ꦏꦥꦚ꧀ꦕꦏꦗ꧀ꦙꦴꦤꦱꦚ꧀ꦚꦴꦪ ꦤ ꦙꦴꦪꦠꦶ, ꦤꦶꦪꦤ꧀ꦠꦶꦪꦴ ꦄꦨꦴꦮꦺꦤꦺꦮ ꦱꦺꦴ ꦄꦴꦗꦴꦤꦷꦪꦺꦴ ꦤꦴꦩ ꦲꦺꦴꦠꦷꦠꦶ. ꦙꦴꦪꦠꦶ ꦕ ꦥꦤꦴꦠꦶ ꦤꦶꦧ꧀ꦧꦴꦤꦴꦫꦩ꧀ꦩꦟꦴꦪ ꦦꦭꦱꦩꦴꦥꦠ꧀ꦠꦶꦪꦴ ꦙꦴꦪꦠꦶ. ꦥꦡꦮꦶꦪꦁ ꦥꦡꦮꦶꦱꦚ꧀ꦚꦴ ꦮꦶꦨꦹꦠꦴ ꦲꦺꦴꦠꦷꦠꦶ ꦥꦡꦮꦴꦫꦩ꧀ꦩꦟꦺ ꦈꦥ꧀ꦥꦤ꧀ꦤꦴ ꦕꦠꦸꦏ꧀ꦏꦥꦚ꧀ꦕꦏꦗ꧀ꦙꦴꦤꦱꦚ꧀ꦚꦴ ꦮꦶꦨꦹꦠꦴ ꦥꦴꦏꦛꦴ ꦲꦺꦴꦠꦶ. ‘‘ꦮꦶꦨꦹꦠꦴ, ꦨꦤ꧀ꦠꦺ, ꦫꦹꦥꦱꦚ꧀ꦚꦴ ꦄꦮꦶꦨꦹꦠꦴ ꦄꦛ꧀ꦜꦶꦏꦱꦚ꧀ꦚꦴ’’ꦠꦶ ꦆꦩꦱ꧀ꦩꦶꦚ꧀ꦲꦶ ꦱꦸꦠ꧀ꦠꦺ ꦱꦩꦠꦶꦏ꧀ꦏꦩꦱ꧀ꦱ ꦄꦠ꧀ꦡꦶꦠꦴꦪ ꦮꦶꦨꦹꦠꦠꦴ ꦮꦸꦠ꧀ꦠꦴ, ꦆꦣ ꦥꦤ ꦮꦶꦥꦱ꧀ꦱꦤꦴꦮꦱꦺꦤ ꦄꦤꦶꦕ꧀ꦕꦢꦸꦏ꧀ꦑꦴꦤꦠ꧀ꦠꦠꦺꦴ ꦢꦶꦛ꧀ꦜꦠ꧀ꦠꦴ ꦮꦶꦨꦹꦠꦴ ꦤꦴꦩ ꦗꦴꦠꦴ. ꦄꦴꦥꦺꦴꦱꦚ꧀ꦚꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦌꦮꦩꦺꦠ꧀ꦡ ꦲꦺꦛ꧀ꦜꦴ ꦮꦶꦪ ꦱꦩꦴꦥꦠ꧀ꦠꦶꦮꦱꦺꦤ ꦱꦩꦠꦶꦏ꧀ꦏꦩꦁ ꦄꦮꦠ꧀ꦮꦴ ꦮꦶꦥꦱ꧀ꦱꦤꦴꦕꦴꦫꦮꦱꦺꦤ ꦱꦩꦠꦶꦏ꧀ꦏꦩꦺꦴ ꦮꦸꦠ꧀ꦠꦺꦴ. ꦌꦮꦁ ꦙꦴꦪꦷꦠꦶ ꦌꦮꦁ ꦮꦶꦥꦱ꧀ꦱꦤꦴꦥꦛꦶꦥꦴꦛꦶꦪꦴ ꦄꦴꦒꦤ꧀ꦠ꧀ꦮꦴ ꦈꦥ꧀ꦥꦴꦢꦶꦠꦴꦪ ꦦꦭꦱꦩꦴꦥꦠ꧀ꦠꦶꦪꦴ ꦙꦴꦪꦤ꧀ꦠꦺꦴ.