꧑꧔. ꦌꦠꦢꦒ꧀ꦒꦮꦒ꧀ꦒꦺꦴ

(꧑꧔) ꧒. ꦢꦸꦠꦶꦪꦌꦠꦢꦒ꧀ꦒꦮꦒ꧀ꦒꦺꦴ

ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦮꦠ꧀ꦡꦸ

꧑꧙꧘-꧒꧐꧐. ꦢꦸꦠꦶꦪꦱ꧀ꦱ ꦥꦜꦩꦺ ꦩꦤꦺꦴꦩꦪꦤ꧀ꦠꦶ ꦩꦤꦺꦤ ꦤꦶꦧ꧀ꦧꦠ꧀ꦠꦶꦠꦁ. ‘‘ꦩꦤꦺꦴꦩꦪꦺꦤ ꦏꦴꦪꦺꦤ, ꦆꦢ꧀ꦣꦶꦪꦴ ꦈꦥꦱꦔ꧀ꦏꦩꦷ’’ꦠꦶ (ꦡꦺꦫꦒꦴ. ꧙꧐꧑) ꦮꦸꦠ꧀ꦠꦛ꧀ꦜꦴꦤꦱ꧀ꦩꦶꦚ꧀ꦲꦶ ꦩꦤꦺꦤ ꦏꦠꦏꦴꦪꦺꦴ ꦩꦤꦺꦴꦩꦪꦏꦴꦪꦺꦴ ꦤꦴꦩ ꦗꦴꦠꦺꦴ. ‘‘ꦄꦚ꧀ꦚꦠꦫꦁ ꦩꦤꦺꦴꦩꦪꦁ ꦏꦴꦪꦁ ꦈꦥꦥꦗ꧀ꦗꦠꦷ’’ꦠꦶ (ꦕꦹꦭ꦳ꦮ. ꧓꧓꧓) ꦮꦸꦠ꧀ꦠꦛ꧀ꦜꦴꦤꦺ ꦩꦤꦺꦤ ꦤꦶꦧ꧀ꦧꦠ꧀ꦠꦶꦠꦏꦴꦪꦺꦴ ꦩꦤꦺꦴꦩꦪꦏꦴꦪꦺꦴ ꦤꦴꦩ ꦗꦴꦠꦺꦴ. ꦄꦪꦩꦶꦣ ꦄꦣꦶꦥ꧀ꦥꦺꦠꦺꦴ. ꦠꦠ꧀ꦡ ꦄꦚ꧀ꦚꦺ ꦨꦶꦏ꧀ꦑꦹ ꦩꦤꦺꦴꦩꦪꦁ ꦏꦴꦪꦁ ꦤꦶꦧ꧀ꦧꦠ꧀ꦠꦺꦤ꧀ꦠꦴ ꦠꦪꦺꦴ ꦮꦴ ꦕꦠ꧀ꦠꦴꦫꦺꦴ ꦮꦴ ꦤꦶꦧ꧀ꦧꦠ꧀ꦠꦺꦤ꧀ꦠꦶ, ꦤ ꦧꦲꦸꦏꦺ. ꦌꦏꦱꦢꦶꦱꦺꦪꦺꦮ ꦕ ꦏꦠ꧀ꦮꦴ ꦤꦶꦧ꧀ꦧꦠ꧀ꦠꦺꦤ꧀ꦠꦶ ꦌꦏꦮꦶꦣꦩꦺꦮ ꦏꦩ꧀ꦩꦁ ꦏꦸꦫꦸꦩꦴꦤꦺ. ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦺꦴ ꦥꦤ ꦌꦏꦴꦮꦗ꧀ꦗꦤꦺꦤ ꦱꦩꦟꦱꦲꦱ꧀ꦱꦁ ꦩꦴꦥꦺꦱꦶ. ꦢ꧀ꦮꦺꦥꦶ ꦕ ꦗꦤꦺ ꦤ ꦌꦏꦱꦢꦶꦱꦺ ꦄꦏꦴꦱꦶ ꦤ ꦌꦏꦮꦶꦣꦁ ꦏꦩ꧀ꦩꦁ ꦏꦸꦫꦸꦩꦴꦤꦺ. ꦠꦱ꧀ꦩꦴ ꦩꦤꦺꦴꦩꦪꦁ ꦏꦴꦪꦁ ꦄꦨꦶꦤꦶꦩ꧀ꦩꦶꦤꦤ꧀ꦠꦴꦤꦁ ꦄꦒ꧀ꦒꦺꦴ ꦤꦴꦩ ꦗꦴꦠꦺꦴ.

ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦴꦤꦩ꧀ꦥꦶ ꦕꦹꦭ꦳ꦥꦤ꧀ꦡꦏꦺꦴꦮ ꦄꦒ꧀ꦒꦺꦴ, ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦴꦤꦁ ꦥꦤ ꦩꦲꦴꦥꦤ꧀ꦡꦏꦠ꧀ꦡꦺꦫꦺꦴ ꦄꦒ꧀ꦒꦺꦴꦠꦶ ꦮꦸꦠ꧀ꦠꦺꦴ. ꦠꦠ꧀ꦡ ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦺꦴ ꦕꦠꦸꦤ꧀ꦤꦁ ꦫꦹꦥꦴꦮꦕꦫꦗ꧀ꦙꦴꦤꦴꦤꦁ ꦭꦴꦨꦶꦠꦴꦪ ‘‘ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦺꦴ’’ꦠꦶ ꦮꦸꦠ꧀ꦠꦺꦴ, ꦩꦲꦴꦥꦤ꧀ꦡꦏꦠ꧀ꦡꦺꦫꦺꦴ ꦕꦠꦸꦤ꧀ꦤꦁ ꦄꦫꦹꦥꦴꦮꦕꦫꦗ꧀ꦙꦴꦤꦴꦤꦁ ꦭꦴꦨꦶꦠꦴꦪ ‘‘ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦺꦴ’’ꦠꦶ ꦮꦸꦠ꧀ꦠꦺꦴ. ꦕꦹꦭ꦳ꦥꦤ꧀ꦡꦏꦺꦴ ꦕ ꦱꦩꦴꦣꦶꦏꦸꦱꦭꦠꦴꦪ ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦺꦴ ꦤꦴꦩ, ꦩꦲꦴꦥꦤ꧀ꦡꦏꦺꦴ ꦮꦶꦥꦱ꧀ꦱꦤꦴꦏꦸꦱꦭꦠꦴꦪ ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦺꦴ ꦤꦴꦩ. ꦌꦏꦺꦴ ꦕꦺꦠ꧀ꦡ ꦱꦩꦴꦣꦶꦭꦏ꧀ꦑꦟꦺ ꦖꦺꦏꦺꦴ, ꦌꦏꦺꦴ ꦮꦶꦥꦱ꧀ꦱꦤꦴꦭꦏ꧀ꦑꦟꦺ. ꦠꦡꦴ ꦌꦏꦺꦴ ꦱꦩꦴꦣꦶꦒꦴꦭ꦳꧀ꦲꦺꦴ, ꦌꦏꦺꦴ ꦮꦶꦥꦱ꧀ꦱꦤꦴꦒꦴꦭ꦳꧀ꦲꦺꦴ. ꦌꦏꦺꦴ ꦕꦺꦠ꧀ꦡ ꦄꦔ꧀ꦒꦱꦁꦑꦶꦠ꧀ꦠꦺ ꦖꦺꦏꦺꦴ, ꦌꦏꦺꦴ ꦄꦴꦫꦩ꧀ꦩꦟꦱꦁꦑꦶꦠ꧀ꦠꦺ. ꦠꦡꦴ ꦌꦏꦺꦴ ꦄꦔ꧀ꦒꦮꦮꦠ꧀ꦡꦴꦤꦺ ꦖꦺꦏꦺꦴ, ꦌꦏꦺꦴ ꦄꦴꦫꦩ꧀ꦩꦟꦮꦮꦠ꧀ꦡꦴꦤꦺꦠꦶ ꦌꦮꦩꦺꦠ꧀ꦡ ꦪꦺꦴꦗꦤꦴ ꦏꦴꦠꦧ꧀ꦧꦴ.

ꦄꦥꦶꦕ ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦺꦴ ꦫꦹꦥꦴꦮꦕꦫꦗ꧀ꦙꦴꦤꦭꦴꦨꦷ ꦲꦸꦠ꧀ꦮꦴ ꦙꦴꦤꦔ꧀ꦒꦺꦲꦶ ꦮꦸꦛ꧀ꦜꦴꦪ ꦄꦫꦲꦠ꧀ꦠꦁ ꦥꦠ꧀ꦠꦺꦴꦠꦶ ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦺꦴ, ꦩꦲꦴꦥꦤ꧀ꦡꦏꦺꦴ ꦄꦫꦹꦥꦴꦮꦕꦫꦗ꧀ꦙꦴꦤꦭꦴꦨꦷ ꦲꦸꦠ꧀ꦮꦴ ꦙꦴꦤꦔ꧀ꦒꦺꦲꦶ ꦮꦸꦛ꧀ꦜꦴꦪ ꦄꦫꦲꦠ꧀ꦠꦁ ꦥꦠ꧀ꦠꦺꦴꦠꦶ ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦺꦴ. ꦈꦨꦺꦴꦥꦶ ꦥꦤ꧀ꦡꦺ ꦗꦴꦠꦠ꧀ꦠꦴ ꦥꦤ꧀ꦡꦏꦴ ꦤꦴꦩ ꦗꦴꦠꦴ. ꦠꦺꦱꦁ ꦥꦜꦩꦗꦴꦠꦺꦴ ꦩꦲꦴꦥꦤ꧀ꦡꦏꦺꦴ ꦤꦴꦩ, ꦥꦕ꧀ꦖꦴꦗꦴꦠꦺꦴ ꦕꦹꦭ꦳ꦥꦤ꧀ꦡꦏꦺꦴ ꦤꦴꦩ.

ꦆꦩꦺꦱꦁ ꦥꦤ ꦈꦨꦶꦤ꧀ꦤꦩ꧀ꦥꦶ ꦥꦚ꧀ꦲꦏꦩ꧀ꦩꦺ ꦄꦪꦩꦤꦸꦥꦸꦧ꧀ꦧꦶꦏꦡꦴ – ꦄꦠꦷꦠꦺ ꦏꦶꦫ ꦥꦢꦸꦩꦸꦠ꧀ꦠꦫꦧꦸꦢ꧀ꦣꦏꦴꦭꦺ ꦲꦁꦱꦮꦠꦷꦤꦒꦫꦮꦴꦱꦶꦤꦺꦴ ꦢ꧀ꦮꦺ ꦨꦴꦠꦶꦏꦴ ꦏꦸꦛꦸꦩ꧀ꦧꦶꦏꦴ ꦱꦢ꧀ꦣꦴ ꦥꦱꦤ꧀ꦤꦴ ꦤꦶꦧꦢ꧀ꦣꦁ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦣꦩ꧀ꦩꦁ ꦱꦸꦟꦤ꧀ꦠꦶ. ꦠꦺꦱꦸ ꦌꦏꦢꦶꦮꦱꦁ ꦏꦤꦶꦛ꧀ꦜꦺꦴ ꦱꦠ꧀ꦡꦴꦫꦁ ꦢ꧀ꦮꦷꦲꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦁ ꦌꦏꦁ ꦨꦶꦏ꧀ꦑꦸꦁ ‘‘ꦩꦩ ꦱꦴꦱꦤꦺ ꦩꦤꦺꦴꦩꦪꦁ ꦏꦴꦪꦁ ꦄꦨꦶꦤꦶꦩ꧀ꦩꦶꦤꦤ꧀ꦠꦴꦤꦁ ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦴꦤꦚ꧀ꦕ ꦄꦪꦁ ꦨꦶꦏ꧀ꦑꦸ ꦄꦒ꧀ꦒꦺꦴ’’ꦠꦶ ꦌꦠꦢꦒ꧀ꦒꦛ꧀ꦜꦴꦤꦺ ꦜꦥꦺꦤ꧀ꦠꦁ ꦢꦶꦱ꧀ꦮꦴ ꦕꦶꦤ꧀ꦠꦺꦱꦶ – ‘‘ꦩꦲꦴ ꦮꦠꦴꦪꦁ ꦨꦶꦏ꧀ꦑꦸ ꦌꦏꦺꦴ ꦲꦸꦠ꧀ꦮꦴ ꦢ꧀ꦮꦺ ꦄꦔ꧀ꦒꦴꦤꦶ ꦥꦫꦶꦥꦹꦫꦺꦠ꧀ꦮꦴ ꦕꦫꦠꦶ, ꦩꦪꦴꦥꦶ ꦄꦤꦴꦒꦠꦺ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦄꦔ꧀ꦒꦢ꧀ꦮꦪꦥꦹꦫꦏꦺꦤ ꦲꦸꦠ꧀ꦮꦴ ꦮꦶꦕꦫꦶꦠꦸꦁ ꦮꦛ꧀ꦛꦠꦷ’’ꦠꦶ. ꦱꦺꦴ ꦥꦸꦫꦶꦩꦤꦪꦺꦤꦺꦮ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦠ꧀ꦮꦴ ꦱꦠ꧀ꦠꦴꦲꦁ ꦩꦲꦴꦢꦴꦤꦁ ꦢꦠ꧀ꦮꦴ ꦌꦮꦩꦴꦲ – ‘‘ꦪꦁ, ꦨꦤ꧀ꦠꦺ, ꦨꦶꦏ꧀ꦑꦸꦁ ꦠꦸꦩ꧀ꦲꦺ ꦆꦠꦺꦴ ꦱꦠ꧀ꦠꦢꦶꦮꦱꦩꦠ꧀ꦡꦏꦺ ꦩꦤꦺꦴꦩꦪꦔ꧀ꦒꦺꦤ ꦕ ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦔ꧀ꦒꦺꦤ ꦕ ‘ꦄꦪꦁ ꦩꦩ ꦱꦴꦱꦤꦺ ꦄꦒ꧀ꦒꦺꦴ’ꦠꦶ ꦌꦠꦢꦒ꧀ꦒꦺ ꦜꦥꦪꦶꦠ꧀ꦡ, ꦄꦲꦩ꧀ꦥꦶ ꦆꦩꦱ꧀ꦱ ꦄꦣꦶꦏꦴꦫꦏꦩ꧀ꦩꦱ꧀ꦱ ꦦꦭꦺꦤ ꦱꦺꦴ ꦨꦶꦏ꧀ꦑꦸ ꦮꦶꦪ ꦄꦔ꧀ꦒꦢ꧀ꦮꦪꦥꦹꦫꦏꦺꦴ ꦨꦮꦺꦪ꧀ꦪ’’ꦤ꧀ꦠꦶ ꦥꦠ꧀ꦡꦤꦁ ꦄꦏꦴꦱꦶ.

ꦱꦠ꧀ꦡꦴ ꦄꦤꦴꦒꦠꦁ ꦎꦭꦺꦴꦏꦺꦠ꧀ꦮꦴ ꦄꦤꦤ꧀ꦠꦫꦴꦪꦺꦤꦱ꧀ꦱ ꦥꦠ꧀ꦡꦤꦴꦪ ꦱꦩꦶꦗ꧀ꦙꦤꦨꦴꦮꦁ ꦢꦶꦱ꧀ꦮꦴ ‘‘ꦄꦤꦴꦒꦠꦺ ꦏꦥ꧀ꦥꦱꦠꦱꦲꦱ꧀ꦱꦴꦮꦱꦴꦤꦺ ꦒꦺꦴꦠꦩꦺꦴ ꦤꦴꦩ ꦧꦸꦢ꧀ꦣꦺꦴ ꦈꦥ꧀ꦥꦗ꧀ꦗꦶꦱ꧀ꦱꦠꦶ, ꦱꦺꦴ ꦠꦁ ꦆꦩꦱ꧀ꦩꦶꦁ ꦜꦴꦤꦢ꧀ꦮꦪꦺ ꦜꦥꦺꦱ꧀ꦱꦠꦷ’’ꦠꦶ ꦧ꧀ꦪꦴꦏꦫꦶꦠ꧀ꦮꦴ ꦄꦤꦸꦩꦺꦴꦢꦤꦁ ꦏꦠ꧀ꦮꦴ ꦥꦏ꧀ꦏꦴꦩꦶ. ꦨꦴꦠꦴꦥꦶꦱ꧀ꦱ ꦌꦏꦢꦶꦮꦱꦁ ꦱꦠ꧀ꦡꦴꦫꦁ ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦁ ꦨꦶꦏ꧀ꦑꦸꦁ ꦌꦠꦢꦒ꧀ꦒꦛ꧀ꦜꦴꦤꦺ ꦜꦥꦺꦤ꧀ꦠꦁ ꦢꦶꦱ꧀ꦮꦴ ꦠꦡꦺꦮ ꦄꦣꦶꦏꦴꦫꦁ ꦏꦠ꧀ꦮꦴ ꦥꦠ꧀ꦡꦤꦁ ꦄꦏꦴꦱꦶ, ꦱꦠ꧀ꦡꦴꦥꦶ ꦠꦁ ꦧ꧀ꦪꦴꦏꦴꦱꦶ.

ꦠꦺ ꦈꦨꦺꦴꦥꦶ ꦗꦤꦴ ꦱꦠ꧀ꦡꦫꦶ ꦣꦫꦩꦴꦤꦺ ꦏꦸꦱꦭꦏꦩ꧀ꦩꦁ ꦏꦫꦶꦠ꧀ꦮꦴ ꦱꦠ꧀ꦡꦸ ꦥꦫꦶꦤꦶꦧ꧀ꦧꦸꦠꦏꦴꦭꦺ ꦱꦫꦷꦫꦕꦺꦠꦶꦪꦺ ꦱꦸꦮꦟ꧀ꦟꦥꦹꦗꦁ ꦏꦠ꧀ꦮꦴ ꦠꦠꦺꦴ ꦕꦸꦠꦴ ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦴ. ꦠꦺꦱꦁ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦴꦤꦁꦪꦺꦮ ꦏꦥ꧀ꦥꦱꦠꦱꦲꦱ꧀ꦱꦁ ꦄꦠꦶꦏ꧀ꦏꦤ꧀ꦠꦁ. ꦠꦠ꧀ꦡ ꦩꦲꦴꦥꦤ꧀ꦡꦏꦱ꧀ꦱ ꦄꦤ꧀ꦠꦫꦴ ꦏꦠꦏꦭ꧀ꦪꦴꦟꦏꦩ꧀ꦩꦁ ꦤ ꦏꦡꦶꦪꦠꦶ, ꦕꦹꦭ꦳ꦥꦤ꧀ꦡꦏꦺꦴ ꦥꦤ ꦏꦱ꧀ꦱꦥꦨꦒꦮꦠꦺꦴ ꦱꦴꦱꦤꦺ ꦥꦧ꧀ꦧꦗꦶꦠ꧀ꦮꦴ ꦮꦷꦱꦠꦶ ꦮꦱ꧀ꦱꦱꦲꦱ꧀ꦱꦴꦤꦶ ꦎꦢꦴꦠꦏꦱꦶꦟꦏꦩ꧀ꦩꦁ ꦏꦠ꧀ꦮꦴ ꦢꦺꦮꦥꦸꦫꦺ ꦤꦶꦧ꧀ꦧꦠ꧀ꦠꦶ. ꦄꦡ ꦄꦩ꧀ꦲꦴꦏꦁ ꦱꦠ꧀ꦡꦴ ꦄꦨꦶꦱꦩ꧀ꦧꦺꦴꦣꦶꦁ ꦥꦠ꧀ꦮꦴ ꦥꦮꦠ꧀ꦠꦶꦠꦮꦫꦣꦩ꧀ꦩꦕꦏ꧀ꦏꦺꦴ ꦫꦴꦗꦒꦲꦁ ꦈꦥꦤꦶꦱ꧀ꦱꦴꦪ ꦮꦺꦭ꦳ꦸꦮꦤꦩꦲꦴꦮꦶꦲꦴꦫꦺ ꦥꦛꦶꦮꦱꦠꦶ.

ꦆꦩꦱ꧀ꦩꦶꦁ ꦜꦴꦤꦺ ꦜꦠ꧀ꦮꦴ ꦆꦩꦺꦱꦁ ꦢ꧀ꦮꦶꦤ꧀ꦤꦁ ꦤꦶꦧ꧀ꦧꦠ꧀ꦠꦶꦁ ꦏꦡꦺꦠꦸꦁ ꦮꦛ꧀ꦛꦠꦶ. ꦫꦴꦗꦒꦲꦺ ꦏꦶꦫ ꦣꦤꦱꦺꦛ꧀ꦜꦶꦏꦸꦭꦱ꧀ꦱ ꦣꦷꦠꦴ ꦄꦠ꧀ꦠꦤꦺꦴ ꦢꦴꦱꦺꦤꦺꦮ ꦱꦢ꧀ꦣꦶꦁ ꦱꦤ꧀ꦡꦮꦁ ꦏꦠ꧀ꦮꦴ ‘‘ꦄꦚ꧀ꦚꦺꦥꦶ ꦩꦺ ꦆꦩꦁ ꦏꦩ꧀ꦩꦁ ꦗꦴꦤꦺꦪ꧀ꦪꦸ’’ꦤ꧀ꦠꦶ ꦕꦶꦤ꧀ꦠꦺꦠ꧀ꦮꦴ ꦌꦮꦩꦴꦲ – ‘‘ꦄꦩ꧀ꦲꦺꦲꦶ ꦆꦩꦱ꧀ꦩꦶꦁ ꦜꦴꦤꦺ ꦮꦱꦶꦠꦸꦁ ꦤ ꦱꦏ꧀ꦏꦴ, ꦱꦕꦺ ꦩꦺ ꦩꦴꦠꦴꦥꦶꦠꦫꦺꦴ ꦆꦩꦁ ꦢꦺꦴꦱꦁ ꦗꦴꦤꦶꦱ꧀ꦱꦤ꧀ꦠꦶ, ꦑꦟ꧀ꦝꦴꦑꦟ꧀ꦝꦁ ꦏꦫꦶꦱ꧀ꦱꦤ꧀ꦠꦶ, ꦮꦶꦢꦺꦱꦁ ꦒꦤ꧀ꦠ꧀ꦮꦴ ꦮꦱꦶꦱ꧀ꦱꦴꦩꦴ’’ꦠꦶ ꦲꦠ꧀ꦡꦱꦴꦫꦁ ꦒꦲꦺꦠ꧀ꦮꦴ ꦄꦒ꧀ꦒꦢ꧀ꦮꦴꦫꦺꦤ ꦤꦶꦏ꧀ꦑꦩꦶꦠ꧀ꦮꦴ ‘‘ꦪꦠ꧀ꦡ ꦮꦴ ꦠꦠ꧀ꦡ ꦮꦴ ꦄꦚ꧀ꦚꦺꦲꦶ ꦄꦗꦴꦤꦤꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦮꦱꦶꦱ꧀ꦱꦴꦩꦴ’’ꦠꦶ ꦈꦨꦺꦴꦥꦶ ꦄꦒꦩꦁꦱꦸ.

ꦠꦺꦱꦁ ꦌꦏꦱ꧀ꦩꦶꦁ ꦜꦴꦤꦺ ꦮꦱꦤ꧀ꦠꦴꦤꦁ ꦱꦁꦮꦴꦱꦩꦤ꧀ꦮꦴꦪ ꦠꦱ꧀ꦱꦴ ꦏꦸꦕ꧀ꦖꦶꦪꦁ ꦒꦧ꧀ꦨꦺꦴ ꦥꦠꦶꦛ꧀ꦜꦴꦱꦶ. ꦱꦴ ꦒꦧ꧀ꦨꦱ꧀ꦱ ꦥꦫꦶꦥꦴꦏꦁ ꦄꦴꦒꦩ꧀ꦩ ꦱꦴꦩꦶꦏꦺꦤ ꦱꦢ꧀ꦣꦶꦁ ꦩꦤ꧀ꦠꦺꦱꦶ – ‘‘ꦒꦧ꧀ꦨꦺꦴ ꦩꦺ ꦥꦫꦶꦥꦴꦏꦁ ꦒꦠꦺꦴ, ꦚꦴꦠꦶꦩꦶꦠ꧀ꦠꦴꦢꦶꦮꦶꦫꦲꦶꦠꦺ ꦜꦴꦤꦺ ꦒꦧ꧀ꦨꦮꦸꦛ꧀ꦜꦴꦤꦁ ꦤꦴꦩ ꦈꦨꦶꦤ꧀ꦤꦩ꧀ꦥꦶ ꦄꦩ꧀ꦲꦴꦏꦁ ꦢꦸꦏ꧀ꦑꦩꦺꦮ, ꦏꦸꦭꦒꦺꦲꦩꦺꦮ ꦒꦕ꧀ꦖꦴꦩꦴ’’ꦠꦶ. ꦱꦺꦴ ‘‘ꦄꦗ꧀ꦗ ꦒꦕ꧀ꦖꦴꦩ, ꦱ꧀ꦮꦺ ꦒꦕ꧀ꦖꦴꦩꦴ’’ꦠꦶ ꦢꦶꦮꦱꦺ ꦄꦠꦶꦏ꧀ꦏꦩꦴꦥꦺꦱꦶ. ꦱꦴ ꦕꦶꦤ꧀ꦠꦺꦱꦶ – ‘‘ꦄꦪꦁ ꦧꦴꦭꦺꦴ ꦄꦠ꧀ꦠꦤꦺꦴ ꦢꦺꦴꦱꦩꦲꦤ꧀ꦠꦴꦪ ꦒꦤ꧀ꦠꦸꦁ ꦤ ꦈꦱ꧀ꦱꦲꦠꦶ, ꦩꦴꦠꦴꦥꦶꦠꦫꦺꦴ ꦕ ꦤꦴꦩ ꦌꦏꦤ꧀ꦠꦲꦶꦠꦴ, ꦄꦪꦁ ꦒꦕ꧀ꦖꦠꦸ ꦮꦴ ꦩꦴ ꦮꦴ, ꦩꦪꦴ ꦒꦤ꧀ꦠꦸꦁ ꦮꦛ꧀ꦛꦠꦷ’’ꦠꦶ. ꦠꦱ꧀ꦩꦶꦁ ꦒꦺꦲꦴ ꦤꦶꦏ꧀ꦑꦤ꧀ꦠꦺ ꦱꦴ ꦒꦺꦲꦺ ꦥꦫꦶꦏ꧀ꦑꦴꦫꦁ ꦥꦛꦶꦱꦴꦩꦺꦠ꧀ꦮꦴ ꦄꦠ꧀ꦠꦤꦺꦴ ꦏꦸꦭꦓꦫꦁ ꦒꦠꦨꦴꦮꦁ ꦄꦤꦤ꧀ꦠꦫꦒꦺꦲꦮꦴꦱꦷꦤꦁ ꦄꦴꦫꦺꦴꦕꦺꦠ꧀ꦮꦴ ꦩꦒ꧀ꦒꦁ ꦥꦛꦶꦥꦗ꧀ꦗꦶ.

ꦄꦡ ꦱꦺꦴ ꦥꦸꦫꦶꦱꦺꦴ ꦓꦫꦁ ꦄꦴꦒꦠꦺꦴ ꦠꦁ ꦄꦢꦶꦱ꧀ꦮꦴ ꦥꦛꦶꦮꦶꦱ꧀ꦱꦏꦺ ꦥꦸꦕ꧀ꦖꦶꦠ꧀ꦮꦴ ‘‘ꦏꦸꦭꦓꦫꦁ ꦒꦠꦴ’’ꦠꦶ ꦱꦸꦠ꧀ꦮꦴ ꦮꦺꦒꦺꦤ ꦄꦤꦸꦧꦤ꧀ꦣꦶꦠ꧀ꦮꦴ ꦄꦤ꧀ꦠꦫꦴꦩꦒ꧀ꦒꦺ ꦱꦩ꧀ꦥꦴꦥꦸꦟꦶ. ꦠꦱ꧀ꦱꦴꦥꦶ ꦠꦠ꧀ꦡꦺꦮ ꦒꦧ꧀ꦨꦮꦸꦛ꧀ꦜꦴꦤꦁ ꦄꦲꦺꦴꦱꦶ. ꦱꦺꦴ ‘‘ꦏꦶꦁ ꦆꦢꦁ ꦨꦢ꧀ꦢꦺ’’ꦠꦶ ꦥꦸꦕ꧀ꦖꦶ. ꦱꦴꦩꦶ ꦌꦏꦺꦴ ꦥꦸꦠ꧀ꦠꦺꦴ ꦗꦴꦠꦺꦴꦠꦶ. ꦆꦢꦴꦤꦶ ꦏꦶꦁ ꦏꦫꦶꦱ꧀ꦱꦴꦩꦴꦠꦶ? ꦪꦱ꧀ꦱ ꦄꦠ꧀ꦡꦴꦪ ꦩꦪꦁ ꦏꦸꦭꦓꦫꦁ ꦒꦕ꧀ꦖꦴꦩ, ꦠꦁ ꦏꦩ꧀ꦩꦁ ꦄꦤ꧀ꦠꦫꦴꦮ ꦤꦶꦥ꧀ꦦꦤ꧀ꦤꦁ, ꦠꦠ꧀ꦡ ꦒꦤ꧀ꦠ꧀ꦮꦴ ꦏꦶꦁ ꦏꦫꦶꦱ꧀ꦱꦴꦩ, ꦤꦶꦮꦠ꧀ꦠꦴꦩꦴꦠꦶ ꦢ꧀ꦮꦺꦥꦶ ꦌꦏꦕꦶꦠ꧀ꦠꦴ ꦲꦸꦠ꧀ꦮꦴ ꦤꦶꦮꦠ꧀ꦠꦶꦁꦱꦸ. ꦠꦱ꧀ꦱ ꦢꦴꦫꦏꦱ꧀ꦱ ꦕ ꦥꦤ꧀ꦡꦺ ꦗꦴꦠꦠ꧀ꦠꦴ ꦥꦤ꧀ꦡꦏꦺꦴꦠꦶ ꦤꦴꦩꦁ ꦄꦏꦁꦱꦸ. ꦠꦱ꧀ꦱꦴ ꦤꦕꦶꦫꦱ꧀ꦱꦺꦮ ꦄꦥꦫꦺꦴꦥꦶ ꦒꦧ꧀ꦨꦺꦴ ꦥꦠꦶꦛ꧀ꦜꦲꦶ. ꦱꦧ꧀ꦧꦁ ꦥꦸꦫꦶꦩꦤꦪꦺꦤꦺꦮ ꦮꦶꦠ꧀ꦡꦴꦫꦺꦠꦧ꧀ꦧꦁ. ꦠꦱ꧀ꦱꦥꦶ ꦢꦴꦫꦏꦱ꧀ꦱ ꦥꦤ꧀ꦡꦺ ꦗꦴꦠꦠ꧀ꦠꦴ ꦥꦜꦩꦗꦴꦠꦱ꧀ꦱ ꦩꦲꦴꦥꦤ꧀ꦡꦏꦺꦴꦠꦶ ꦤꦴꦩꦁ ꦏꦠ꧀ꦮꦴ ꦥꦕ꧀ꦖꦴꦗꦴꦠꦱ꧀ꦱ ꦕꦹꦭ꦳ꦥꦤ꧀ꦡꦏꦺꦴꦠꦶ ꦤꦴꦩꦁ ꦄꦏꦁꦱꦸ.

ꦠꦺ ꦢ꧀ꦮꦺꦥꦶ ꦢꦴꦫꦏꦺ ꦒꦲꦺꦠ꧀ꦮꦴ ꦄꦠ꧀ꦠꦤꦺꦴ ꦮꦱꦤꦛ꧀ꦜꦴꦤꦩꦺꦮ ꦒꦠꦴ. ꦠꦺꦱꦁ ꦠꦠ꧀ꦡ ꦮꦱꦤ꧀ꦠꦴꦤꦁ ꦄꦪꦁ ꦩꦲꦴꦥꦤ꧀ꦡꦏꦢꦴꦫꦏꦺꦴ ꦄꦚ꧀ꦚꦺ ꦢꦴꦫꦏꦗꦤꦺ ‘‘ꦕꦹꦭ꦳ꦥꦶꦠꦴ ꦩꦲꦴꦥꦶꦠꦴ ꦄꦪ꧀ꦪꦏꦺꦴ ꦄꦪ꧀ꦪꦶꦏꦴ’’ꦠꦶ ꦮꦢꦤ꧀ꦠꦺ ꦱꦸꦠ꧀ꦮꦴ ꦩꦴꦠꦫꦁ ꦥꦛꦶꦥꦸꦕ꧀ꦖꦶ – ‘‘ꦄꦩ꧀ꦩ, ꦄꦚ꧀ꦚꦺ ꦢꦴꦫꦏꦴ ꦏꦡꦺꦤ꧀ꦠꦶ ‘ꦄꦪ꧀ꦪꦏꦺꦴ ꦄꦪ꧀ꦪꦶꦏꦴ’ꦠꦶ, ꦏꦶꦁ ꦄꦩ꧀ꦲꦴꦏꦁ ꦚꦴꦠꦏꦴ ꦤꦠ꧀ꦡꦷ’’ꦠꦶ? ꦄꦴꦩ, ꦠꦴꦠ, ꦠꦸꦩ꧀ꦲꦴꦏꦁ ꦌꦠ꧀ꦡ ꦚꦴꦠꦏꦴ ꦤꦠ꧀ꦡꦶ, ꦫꦴꦗꦒꦲꦤꦒꦫꦺ ꦥꦤ ꦮꦺꦴ ꦣꦤꦱꦺꦛ꧀ꦜꦶ ꦤꦴꦩ ꦄꦪ꧀ꦪꦏꦺꦴ, ꦠꦠ꧀ꦡ ꦠꦸꦩ꧀ꦲꦴꦏꦁ ꦧꦲꦹ ꦚꦴꦠꦏꦴꦠꦶ. ꦏꦱ꧀ꦩꦴ ꦠꦠ꧀ꦡ ꦤ ꦒꦕ꧀ꦖꦡ ꦄꦩ꧀ꦩꦴꦠꦶ? ꦱꦴ ꦄꦠ꧀ꦠꦤꦺꦴ ꦄꦒꦩꦤꦏꦴꦫꦟꦁ ꦥꦸꦠ꧀ꦠꦱ꧀ꦱ ꦄꦏꦡꦺꦠ꧀ꦮꦴ ꦥꦸꦠ꧀ꦠꦺꦱꦸ ꦥꦸꦤꦥ꧀ꦥꦸꦤꦁ ꦏꦡꦺꦤ꧀ꦠꦺꦱꦸ ꦱꦴꦩꦶꦏꦩꦴꦲ – ‘‘ꦆꦩꦺ ꦢꦴꦫꦏꦴ ꦄꦠꦶꦮꦶꦪ ꦩꦁ ꦏꦶꦭꦩꦺꦤ꧀ꦠꦶ, ꦏꦶꦁ ꦤꦺꦴ ꦩꦴꦠꦴꦥꦶꦠꦫꦺꦴ ꦢꦶꦱ꧀ꦮꦴ ꦩꦁꦱꦁ ꦑꦴꦢꦶꦱ꧀ꦱꦤ꧀ꦠꦶ, ꦌꦲꦶ ꦢꦴꦫꦏꦴꦤꦁ ꦄꦪ꧀ꦪꦏꦏꦸꦭꦁ ꦢꦱ꧀ꦱꦺꦩꦴ’’ꦠꦶ. ꦄꦲꦁ ꦱꦩ꧀ꦩꦸꦑꦴ ꦨꦮꦶꦠꦸꦁ ꦤ ꦱꦏ꧀ꦑꦶꦱ꧀ꦱꦴꦩꦶ, ꦠꦁ ꦥꦤ ꦤꦪꦶꦱ꧀ꦱꦴꦩꦷꦠꦶ. ‘‘ꦱꦴꦣꦸ ꦱꦴꦩꦶ, ꦪꦺꦤ ꦏꦺꦤꦕꦶ ꦈꦥꦴꦪꦺꦤ ꦢꦴꦫꦏꦴꦤꦁ ꦄꦪ꧀ꦪꦏꦏꦸꦭꦩꦺꦮ ꦢꦛ꧀ꦜꦸꦁ ꦮꦛ꧀ꦛꦠꦷ’’ꦠꦶ ꦢ꧀ꦮꦺꦥꦶ ꦗꦤꦴ ꦢꦴꦫꦏꦺ ꦄꦴꦢꦴꦪ ꦄꦤꦸꦥꦸꦧ꧀ꦧꦺꦤ ꦫꦴꦗꦒꦲꦁ ꦥꦠ꧀ꦮꦴ ꦤꦒꦫꦢ꧀ꦮꦴꦫꦺ ꦌꦏꦶꦱ꧀ꦱꦴ ꦱꦴꦭꦴꦪ ꦤꦶꦮꦴꦱꦁ ꦏꦠ꧀ꦮꦴ ꦢꦴꦫꦏꦩꦴꦠꦴ ꦢ꧀ꦮꦺ ꦢꦴꦫꦏꦺ ꦒꦲꦺꦠ꧀ꦮꦴ ꦄꦴꦒꦠꦨꦴꦮꦁ ꦩꦴꦠꦴꦥꦶꦠꦹꦤꦁ ꦄꦴꦫꦺꦴꦕꦴꦥꦺꦱꦶ.

ꦠꦺ ꦠꦁ ꦱꦴꦱꦤꦁ ꦱꦸꦠ꧀ꦮꦴ ꦱꦁꦱꦴꦫꦺ ꦱꦁꦱꦫꦤ꧀ꦠꦴꦤꦁ ꦤ ꦥꦸꦠ꧀ꦠꦺꦴ ꦤ ꦣꦷꦠꦴ ꦤꦴꦩ ꦤꦠ꧀ꦡꦶ, ꦠꦺ ꦄꦩ꧀ꦲꦴꦏꦁ ꦩꦲꦴꦥꦫꦴꦣꦶꦏꦴ, ꦤ ꦱꦏ꧀ꦏꦴ ꦠꦺꦲꦶ ꦄꦩ꧀ꦲꦴꦏꦁ ꦕꦏ꧀ꦑꦸꦥꦡꦺ ꦜꦴꦠꦸꦁ. ꦌꦠ꧀ꦠꦏꦁ ꦥꦤ ꦣꦤꦁ ꦒꦲꦺꦠ꧀ꦮꦴ ꦢ꧀ꦮꦺꦥꦶ ꦗꦤꦴ ꦦꦴꦱꦸꦏꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦗꦷꦮꦤ꧀ꦠꦸ, ꦢꦴꦫꦏꦺ ꦥꦤ ꦆꦣ ꦥꦺꦱꦺꦤ꧀ꦠꦹꦠꦶ. ꦱꦺꦛ꧀ꦜꦶꦣꦷꦠꦴ ꦩꦴꦠꦴꦥꦶꦠꦹꦲꦶ ꦥꦺꦱꦶꦠꦁ ꦣꦤꦁ ꦒꦲꦺꦠ꧀ꦮꦴ ꦢꦴꦫꦏꦺ ꦄꦴꦒꦠꦢꦹꦠꦴꦤꦁ ꦲꦠ꧀ꦡꦺꦪꦺꦮ ꦢꦠ꧀ꦮꦴ ꦥꦺꦱꦺꦱꦶ. ꦢꦴꦫꦏꦴ ꦄꦪ꧀ꦪꦏꦏꦸꦭꦺ ꦮꦝ꧀ꦞꦤ꧀ꦠꦶ. ꦠꦺꦱꦸ ꦕꦹꦭ꦳ꦥꦤ꧀ꦡꦏꦺꦴ ꦄꦠꦶꦢꦲꦫꦺꦴ, ꦩꦲꦴꦥꦤ꧀ꦡꦏꦺꦴ ꦥꦤ ꦄꦪ꧀ꦪꦏꦺꦤ ꦱꦢ꧀ꦣꦶꦁ ꦢꦱꦧꦭꦱ꧀ꦱ ꦣꦩ꧀ꦩꦏꦡꦁ ꦱꦺꦴꦠꦸꦁ ꦒꦕ꧀ꦖꦠꦶ. ꦠꦱ꧀ꦱ ꦤꦶꦕ꧀ꦕꦁ ꦱꦠ꧀ꦡꦸ ꦱꦩ꧀ꦩꦸꦑꦺ ꦣꦩ꧀ꦩꦁ ꦱꦸꦟꦤ꧀ꦠꦱ꧀ꦱ ꦥꦧ꧀ꦧꦗ꧀ꦗꦴꦪ ꦕꦶꦠ꧀ꦠꦁ ꦤꦩꦶ. ꦱꦺꦴ ꦄꦪ꧀ꦪꦏꦁ ꦄꦴꦲ – ‘‘ꦱꦕꦺ ꦠꦸꦩ꧀ꦲꦺ ꦄꦤꦸꦗꦴꦤꦺꦪ꧀ꦪꦴꦡ, ꦄꦲꦁ ꦥꦧ꧀ꦧꦗ꧀ꦗꦺꦪ꧀ꦪ’’ꦤ꧀ꦠꦶ. ‘‘ꦏꦶꦁ ꦮꦢꦺꦱꦶ, ꦠꦴꦠ, ꦩꦪ꧀ꦲꦁ ꦱꦏꦭꦭꦺꦴꦏꦱ꧀ꦱꦥꦶ ꦥꦧ꧀ꦧꦗ꧀ꦗꦠꦺꦴ ꦠꦮꦺꦮ ꦥꦧ꧀ꦧꦗ꧀ꦗꦴ ꦨꦢ꧀ꦢꦶꦏꦴ. ꦱꦕꦺ ꦱꦏ꧀ꦏꦺꦴꦱꦶ, ꦥꦧ꧀ꦧꦗ, ꦠꦴꦠꦴ’’ꦠꦶ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦠꦺꦴ. ꦱꦠ꧀ꦡꦴ ‘‘ꦏꦶꦁ, ꦩꦲꦴꦱꦺꦛ꧀ꦜꦶ, ꦢꦴꦫꦏꦺꦴ ꦠꦺ ꦭꦢ꧀ꦣꦺꦴ’’ꦠꦶ? ‘‘ꦄꦴꦩ, ꦨꦤ꧀ꦠꦺ, ꦄꦪꦁ ꦢꦴꦫꦏꦺꦴ ꦩꦪ꧀ꦲꦁ ꦤꦠ꧀ꦠꦴ, ꦠꦸꦩ꧀ꦲꦴꦏꦁ ꦱꦤ꧀ꦠꦶꦏꦺ ꦥꦧ꧀ꦧꦗꦴꦩꦷꦠꦶ ꦮꦢꦠꦷ’’ꦠꦶ ꦄꦴꦲ.

ꦱꦠ꧀ꦡꦴ ꦄꦚ꧀ꦚꦠꦫꦁ ꦥꦶꦟ꧀ꦝꦕꦴꦫꦶꦏꦁ ‘‘ꦆꦩꦁ ꦢꦴꦫꦏꦁ ꦥꦧ꧀ꦧꦴꦗꦺꦲꦷ’’ꦠꦶ ꦄꦴꦟꦴꦥꦺꦱꦶ. ꦡꦺꦫꦺꦴ ꦠꦱ꧀ꦱ ꦠꦕꦥꦚ꧀ꦕꦏꦏꦩ꧀ꦩꦛ꧀ꦜꦴꦤꦁ ꦄꦴꦕꦶꦏ꧀ꦑꦶꦠ꧀ꦮꦴ ꦥꦧ꧀ꦧꦴꦗꦺꦱꦶ. ꦱꦺꦴ ꦧꦲꦸꦁ ꦧꦸꦢ꧀ꦣꦮꦕꦤꦁ ꦈꦒ꧀ꦒꦟ꧀ꦲꦶꦠ꧀ꦮꦴ ꦥꦫꦶꦥꦸꦟ꧀ꦟꦮꦱ꧀ꦱꦺꦴ ꦈꦥꦱꦩ꧀ꦥꦢꦁ ꦭꦨꦶ. ꦈꦥꦱꦩ꧀ꦥꦤ꧀ꦤꦺꦴ ꦲꦸꦠ꧀ꦮꦴ ꦪꦺꦴꦤꦶꦱꦺꦴꦩꦤꦱꦶꦏꦴꦫꦺ ꦏꦩ꧀ꦩꦁ ꦏꦫꦺꦴꦤ꧀ꦠꦺꦴ ꦕꦠꦸꦤ꧀ꦤꦁ ꦄꦫꦹꦥꦴꦮꦕꦫꦗ꧀ꦙꦴꦤꦴꦤꦁ ꦭꦴꦨꦷ ꦲꦸꦠ꧀ꦮꦴ ꦙꦴꦤꦔ꧀ꦒꦺꦲꦶ ꦮꦸꦛ꧀ꦜꦴꦪ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦆꦠꦶ ꦱꦺꦴ ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦴꦤꦁ ꦄꦒ꧀ꦒꦺꦴ ꦗꦴꦠꦺꦴ. ꦱꦺꦴ ꦙꦴꦤꦱꦸꦑꦺꦤ ꦦꦭꦱꦸꦑꦺꦤ ꦮꦷꦠꦶꦤꦴꦩꦺꦤ꧀ꦠꦺꦴ ꦕꦶꦤ꧀ꦠꦺꦱꦶ – ‘‘ꦱꦏ꧀ꦏꦴ ꦤꦸ ꦑꦺꦴ ꦆꦩꦁ ꦱꦸꦑꦁ ꦕꦹꦭ꦳ꦥꦤ꧀ꦡꦏꦱ꧀ꦱ ꦢꦴꦠꦸ’’ꦤ꧀ꦠꦶ. ꦠꦠꦺꦴ ꦄꦪ꧀ꦪꦏꦱꦺꦛ꧀ꦜꦶꦱ꧀ꦱ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ‘‘ꦩꦲꦴꦱꦺꦛ꧀ꦜꦶ ꦱꦕꦺ ꦠꦸꦩ꧀ꦲꦺ ꦱꦩ꧀ꦥꦛꦶꦕ꧀ꦖꦡ, ꦄꦲꦁ ꦕꦹꦭ꦳ꦥꦤ꧀ꦡꦏꦁ ꦥꦧ꧀ꦧꦴꦗꦺꦪ꧀ꦪ’’ꦤ꧀ꦠꦶ ꦄꦴꦲ. ꦥꦧ꧀ꦧꦴꦗꦺꦡ, ꦨꦤ꧀ꦠꦺꦠꦶ. ꦡꦺꦫꦺꦴ ꦕꦹꦭ꦳ꦥꦤ꧀ꦡꦏꦢꦴꦫꦏꦁ ꦥꦧ꧀ꦧꦴꦗꦺꦠ꧀ꦮꦴ ꦢꦱꦱꦸ ꦱꦷꦭꦺꦱꦸ ꦥꦠꦶꦛ꧀ꦜꦴꦥꦺꦱꦶ. ꦕꦹꦭ꦳ꦥꦤ꧀ꦡꦏꦱꦴꦩꦟꦺꦫꦺꦴ ꦨꦴꦠꦶꦏꦱ꧀ꦱ ꦱꦤ꧀ꦠꦶꦏꦺ.

‘‘ꦥꦢꦸꦩꦁ ꦪꦡꦴ ꦏꦺꦴꦏꦤꦢꦁ ꦱꦸꦒꦤ꧀ꦣꦁ,

ꦥꦴꦠꦺꦴ ꦱꦶꦪꦴ ꦦꦸꦭ꧀ꦭꦩꦮꦷꦠꦒꦤ꧀ꦣꦁ;

ꦄꦔ꧀ꦒꦷꦫꦱꦁ ꦥꦱ꧀ꦱ ꦮꦶꦫꦺꦴꦕꦩꦴꦤꦁ,

ꦠꦥꦤ꧀ꦠꦩꦴꦢꦶꦕ꧀ꦕꦩꦶꦮꦤ꧀ꦠꦭꦶꦏ꧀ꦑꦺ’’ꦠꦶ. (ꦱꦁ. ꦤꦶ. ꧑.꧑꧒꧓; ꦄ. ꦤꦶ. ꧕.꧑꧙꧕) –

ꦆꦩꦁ ꦒꦴꦡꦁ ꦒꦟ꧀ꦲꦴꦠꦶ. ꦒꦲꦶꦠꦒꦲꦶꦠꦥꦢꦁ ꦈꦥꦫꦹꦥꦫꦶꦥꦢꦁ ꦒꦟ꧀ꦲꦤ꧀ꦠꦱ꧀ꦱ ꦤꦱ꧀ꦱꦠꦶ. ꦠꦱ꧀ꦱ ꦆꦩꦁ ꦒꦴꦡꦁ ꦒꦲꦺꦠꦸꦁ ꦮꦴꦪꦩꦤ꧀ꦠꦱ꧀ꦱꦺꦮ ꦕꦠ꧀ꦠꦴꦫꦺꦴ ꦩꦴꦱꦴ ꦄꦠꦶꦏ꧀ꦏꦤ꧀ꦠꦴ. ꦄꦡ ꦤꦁ ꦩꦲꦴꦥꦤ꧀ꦡꦏꦺꦴ ꦄꦴꦲ – ‘‘ꦕꦹꦭ꦳ꦥꦤ꧀ꦡꦏ, ꦠ꧀ꦮꦁ ꦆꦩꦱ꧀ꦩꦶꦁ ꦱꦴꦱꦤꦺ ꦄꦨꦧ꧀ꦧꦺꦴ, ꦕꦠꦹꦲꦶ ꦩꦴꦱꦺꦲꦶ ꦌꦏꦒꦴꦡꦩ꧀ꦥꦶ ꦒꦲꦺꦠꦸꦁ ꦤ ꦱꦏ꧀ꦏꦺꦴꦱꦶ, ꦥꦧ꧀ꦧꦗꦶꦠꦏꦶꦕ꧀ꦕꦁ ꦥꦤ ꦠ꧀ꦮꦁ ꦏꦡꦁ ꦩꦠ꧀ꦡꦏꦁ ꦥꦴꦥꦺꦱ꧀ꦱꦱꦶ, ꦤꦶꦏ꧀ꦑꦩ ꦆꦠꦺꦴ’’ꦠꦶ. ꦱꦺꦴ ꦡꦺꦫꦺꦤ ꦥꦟꦴꦩꦶꦠꦺꦴ ꦮꦶꦲꦴꦫꦥꦕ꧀ꦕꦤ꧀ꦠꦺ ꦫꦺꦴꦢꦩꦴꦤꦺꦴ ꦄꦛ꧀ꦜꦴꦱꦶ.

ꦠꦺꦤ ꦱꦩꦪꦺꦤ ꦱꦠ꧀ꦡꦴ ꦫꦴꦗꦒꦲꦁ ꦈꦥꦤꦶꦱ꧀ꦱꦴꦪ ꦗꦷꦮꦏꦩ꧀ꦧꦮꦤꦺ ꦮꦶꦲꦫꦠꦶ. ꦠꦱ꧀ꦩꦶꦁ ꦱꦩꦪꦺ ꦗꦷꦮꦏꦺꦴ ꦥꦸꦫꦶꦱꦁ ꦥꦺꦱꦺꦱꦶ ‘‘ꦥꦚ꧀ꦕꦲꦶ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦲꦷ’’ꦠꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦩꦲꦴꦥꦤ꧀ꦡꦏꦺꦴ ꦨꦠ꧀ꦠꦸꦢ꧀ꦢꦺꦱꦏꦺꦴ ꦲꦺꦴꦠꦶ. ꦱꦺꦴ ‘‘ꦥꦚ꧀ꦕꦤ꧀ꦤꦁ ꦨꦶꦏ꧀ꦑꦸꦱꦠꦴꦤꦁ ꦨꦶꦏ꧀ꦑꦁ ꦱꦩ꧀ꦥꦛꦶꦕ꧀ꦖꦡ, ꦨꦤ꧀ꦠꦺ’’ꦠꦶ ꦮꦸꦠ꧀ꦠꦺꦴ ‘‘ꦕꦹꦭ꦳ꦥꦤ꧀ꦡꦏꦁ ꦜꦥꦺꦠ꧀ꦮꦴ ꦱꦺꦱꦴꦤꦁ ꦱꦩ꧀ꦥꦛꦶꦕ꧀ꦖꦴꦩꦷ’’ꦠꦶ ꦄꦴꦲ. ꦕꦹꦭ꦳ꦥꦤ꧀ꦡꦏꦺꦴ ꦠꦁ ꦏꦡꦁ ꦱꦸꦠ꧀ꦮꦴ ꦨꦶꦪ꧀ꦪꦺꦴꦱꦺꦴꦩꦠ꧀ꦠꦴꦪ ꦢꦺꦴꦩꦤꦱ꧀ꦱꦥ꧀ꦥꦠ꧀ꦠꦺꦴ ꦄꦲꦺꦴꦱꦶ. ꦱꦠ꧀ꦡꦴ ꦕꦹꦭ꦳ꦥꦤ꧀ꦡꦏꦱ꧀ꦱ ꦑꦺꦢꦁ ꦢꦶꦱ꧀ꦮꦴ ‘‘ꦕꦹꦭ꦳ꦥꦤ꧀ꦡꦏꦺꦴ ꦩꦪꦶ ꦒꦠꦺ ꦧꦸꦗ꧀ꦙꦶꦱ꧀ꦱꦠꦷ’’ꦠꦶ ꦒꦤ꧀ꦠ꧀ꦮꦴ ꦄꦮꦶꦢꦹꦫꦺ ꦜꦴꦤꦺ ꦄꦠ꧀ꦠꦴꦤꦁ ꦢꦱ꧀ꦱꦺꦠ꧀ꦮꦴ ‘‘ꦏꦶꦁ ꦠ꧀ꦮꦁ, ꦥꦤ꧀ꦡꦏ, ꦫꦺꦴꦢꦱꦷ’’ꦠꦶ ꦄꦴꦲ. ꦨꦴꦠꦴ ꦩꦁ, ꦨꦤ꧀ꦠꦺ, ꦥꦟꦴꦩꦺꦠꦷꦠꦶ. ꦥꦤ꧀ꦡꦏ, ꦠꦸꦪ꧀ꦲꦁ ꦨꦴꦠꦶꦏꦱ꧀ꦱ ꦥꦫꦥꦸꦒ꧀ꦒꦭꦴꦤꦁ ꦄꦴꦱꦪꦴꦤꦸꦱꦪꦚꦴꦟꦁ ꦤꦠ꧀ꦡꦶ, ꦠ꧀ꦮꦁ ꦧꦸꦢ꧀ꦣꦮꦺꦤꦺꦪ꧀ꦪꦥꦸꦒ꧀ꦒꦭꦺꦴ ꦤꦴꦩꦴꦠꦶ ꦆꦢ꧀ꦣꦶꦪꦴ ꦄꦨꦶꦱꦔ꧀ꦑꦫꦶꦠ꧀ꦮꦴ ꦱꦸꦢ꧀ꦣꦁ ꦕꦺꦴꦭ꦳ꦑꦟ꧀ꦝꦁ ꦄꦢꦴꦱꦶ ‘‘ꦆꦩꦁ ꦒꦲꦺꦠ꧀ꦮꦴ ‘ꦫꦗꦺꦴꦲꦫꦟꦁ ꦫꦗꦺꦴꦲꦫꦟ’ꦤ꧀ꦠꦶ ꦮꦠ꧀ꦮꦴ ꦨꦴꦮꦺꦲꦶ ꦥꦤ꧀ꦡꦏꦴ’’ꦠꦶ.

ꦱꦺꦴ ꦱꦠ꧀ꦡꦴꦫꦴ ꦢꦶꦤ꧀ꦤꦁ ꦕꦺꦴꦭ꦳ꦑꦟ꧀ꦝꦁ ‘‘ꦫꦗꦺꦴꦲꦫꦟꦁ ꦫꦗꦺꦴꦲꦫꦟ’’ꦤ꧀ꦠꦶ ꦲꦠ꧀ꦡꦺꦤ ꦥꦫꦶꦩꦗ꧀ꦗꦤ꧀ꦠꦺꦴ ꦤꦶꦱꦷꦢꦶ. ꦠꦱ꧀ꦱ ꦥꦫꦶꦩꦗ꧀ꦗꦤ꧀ꦠꦱ꧀ꦱ ꦭꦺꦴꦩꦴꦤꦶ ꦏꦶꦭꦶꦛ꧀ꦜꦣꦴꦠꦸꦏꦴꦤꦶ ꦗꦴꦠꦴꦤꦶ. ꦥꦸꦤ ꦥꦫꦶꦩꦗ꧀ꦗꦤ꧀ꦠꦱ꧀ꦱ ꦈꦏ꧀ꦑꦭꦶꦥꦫꦶꦥꦸꦚ꧀ꦖꦤꦱꦢꦶꦱꦁ ꦗꦴꦠꦁ. ꦱꦺꦴ ꦚꦴꦟꦥꦫꦶꦥꦴꦏꦁ ꦄꦴꦒꦩ꧀ꦩ ꦠꦠ꧀ꦡ ꦑꦪꦮꦪꦁ ꦥꦛ꧀ꦜꦥꦺꦠ꧀ꦮꦴ ꦕꦶꦤ꧀ꦠꦺꦱꦶ – ‘‘ꦆꦢꦁ ꦕꦺꦴꦭ꦳ꦑꦟ꧀ꦝꦁ ꦥꦏꦠꦶꦪꦴ ꦥꦟ꧀ꦝꦫꦁ ꦥꦫꦶꦱꦸꦢ꧀ꦣꦁ, ꦈꦥꦴꦢꦶꦤ꧀ꦤꦏꦱꦫꦷꦫꦁ ꦤꦶꦱ꧀ꦱꦴꦪ ꦏꦶꦭꦶꦛ꧀ꦜꦁ ꦗꦴꦠꦁ, ꦆꦢꦁ ꦕꦶꦠ꧀ꦠꦩ꧀ꦥꦶ ꦌꦮꦁꦒꦠꦶꦏꦩꦺꦮꦴ’’ꦠꦶ. ꦱꦩꦴꦣꦶꦁ ꦨꦴꦮꦺꦠ꧀ꦮꦴ ꦕꦠ꧀ꦠꦴꦫꦶ ꦫꦹꦥꦴꦮꦕꦫꦗ꧀ꦙꦴꦤꦴꦤꦶ ꦥꦴꦢꦏꦴꦤꦶ ꦏꦠ꧀ꦮꦴ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦱꦺꦴ ꦩꦤꦺꦴꦩꦪꦗ꧀ꦙꦴꦤꦭꦴꦨꦷ ꦲꦸꦠ꧀ꦮꦴ ꦌꦏꦺꦴ ꦲꦸꦠ꧀ꦮꦴ ꦧꦲꦸꦣꦴ, ꦧꦲꦸꦣꦴ ꦲꦸꦠ꧀ꦮꦴ ꦌꦏꦺꦴ ꦨꦮꦶꦠꦸꦁ ꦱꦩꦠ꧀ꦡꦺꦴ ꦄꦲꦺꦴꦱꦶ. ꦄꦫꦲꦠ꧀ꦠꦩꦒ꧀ꦒꦺꦤꦺꦮ ꦕꦱ꧀ꦱ ꦠꦺꦥꦶꦛꦏꦚ꧀ꦕ ꦖ ꦄꦨꦶꦚ꧀ꦚꦴ ꦕ ꦄꦴꦒꦩꦶꦁꦱꦸ.

ꦥꦸꦤꦢꦶꦮꦱꦺ ꦱꦠ꧀ꦡꦴ ꦌꦏꦹꦤꦺꦲꦶ ꦥꦚ꧀ꦕꦲꦶ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦒꦤ꧀ꦠ꧀ꦮꦴ ꦗꦷꦮꦏꦱ꧀ꦱ ꦤꦶꦮꦺꦱꦤꦺ ꦤꦶꦱꦷꦢꦶ. ꦕꦹꦭ꦳ꦥꦤ꧀ꦡꦏꦺꦴ ꦥꦤ ꦄꦠ꧀ꦠꦤꦺꦴ ꦨꦶꦏ꧀ꦑꦴꦪ ꦄꦱꦩ꧀ꦥꦛꦶꦕ꧀ꦖꦶꦠꦠ꧀ꦠꦴꦪꦺꦮ ꦤ ꦒꦠꦺꦴ. ꦗꦷꦮꦏꦺꦴ ꦪꦴꦒꦸꦁ ꦢꦴꦠꦸꦁ ꦄꦴꦫꦨꦶ, ꦱꦠ꧀ꦡꦴ ꦲꦠ꧀ꦡꦺꦤ ꦥꦠ꧀ꦠꦁ ꦥꦶꦢꦲꦶ. ꦏꦱ꧀ꦩꦴ, ꦨꦤ꧀ꦠꦺ, ꦤ ꦒꦟ꧀ꦲꦡꦴꦠꦶ? ꦮꦶꦲꦴꦫꦺ ꦌꦏꦺꦴ ꦨꦶꦏ꧀ꦑꦸ ꦄꦠ꧀ꦡꦶ ꦗꦷꦮꦏꦴꦠꦶ. ꦱꦺꦴ ꦥꦸꦫꦶꦱꦁ ꦥꦲꦶꦟꦶ ‘‘ꦒꦕ꧀ꦖ, ꦨꦟꦺ, ꦮꦶꦲꦴꦫꦺ ꦤꦶꦱꦶꦤ꧀ꦤꦁ ꦄꦪ꧀ꦪꦁ ꦒꦲꦺꦠ꧀ꦮꦴ ꦌꦲꦷ’’ꦠꦶ. ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦺꦴꦥꦶ ꦠꦱ꧀ꦱ ꦥꦸꦫꦶꦱꦱ꧀ꦱ ꦥꦸꦫꦺ ꦄꦴꦒꦩꦤꦴꦪꦺꦮ ꦨꦶꦏ꧀ꦑꦸꦱꦲꦱ꧀ꦱꦁ ꦤꦶꦩ꧀ꦩꦶꦤꦶꦠ꧀ꦮꦴ ꦌꦏꦩ꧀ꦥꦶ ꦌꦏꦺꦤ ꦄꦱꦢꦶꦱꦁ, ꦌꦏꦱ꧀ꦱꦥꦶ ꦕ ꦕꦷꦮꦫꦮꦶꦕꦴꦫꦟꦴꦢꦶꦱꦩꦟꦏꦩ꧀ꦩꦁ ꦄꦚ꧀ꦚꦺꦤ ꦄꦱꦢꦶꦱꦁ ꦄꦏꦴꦱꦶ. ꦱꦺꦴ ꦥꦸꦫꦶꦱꦺꦴ ꦮꦶꦲꦴꦫꦺ ꦨꦶꦏ꧀ꦑꦹꦤꦁ ꦧꦲꦸꦨꦴꦮꦁ ꦢꦶꦱ꧀ꦮꦴ ꦒꦤ꧀ꦠ꧀ꦮꦴ ꦗꦷꦮꦏꦱ꧀ꦱ ꦏꦡꦺꦱꦶ – ‘‘ꦨꦤ꧀ꦠꦺ, ꦆꦩꦱ꧀ꦩꦶꦁ ꦮꦶꦲꦴꦫꦺ ꦨꦶꦏ꧀ꦑꦸꦱꦔ꧀ꦓꦺꦴ ꦧꦲꦸꦠꦫꦺꦴ, ꦠꦠꦺꦴ ꦥꦏ꧀ꦏꦺꦴꦱꦶꦠꦧ꧀ꦧꦁ ꦨꦢꦤ꧀ꦠꦁ ꦤ ꦗꦴꦤꦴꦩꦷ’’ꦠꦶ. ꦗꦷꦮꦏꦺꦴ ꦱꦠ꧀ꦡꦴꦫꦁ ꦥꦛꦶꦥꦸꦕ꧀ꦖꦶ – ‘‘ꦏꦺꦴꦤꦴꦩꦺꦴ, ꦨꦤ꧀ꦠꦺ, ꦮꦶꦲꦴꦫꦺ ꦤꦶꦱꦶꦤ꧀ꦤꦨꦶꦏ꧀ꦑꦹ’’ꦠꦶ? ꦕꦹꦭ꦳ꦥꦤ꧀ꦡꦏꦺꦴ ꦤꦴꦩ ꦗꦷꦮꦏꦴꦠꦶ. ꦒꦕ꧀ꦖ ꦨꦺꦴ ‘‘ꦕꦹꦭ꦳ꦥꦤ꧀ꦡꦏꦺꦴ ꦤꦴꦩ ꦏꦠꦫꦺꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ꦄꦴꦤꦺꦲꦷꦠꦶ. ꦱꦺꦴ ꦮꦶꦲꦴꦫꦁ ꦒꦤ꧀ꦠ꧀ꦮꦴ ‘‘ꦕꦹꦭ꦳ꦥꦤ꧀ꦡꦏꦺꦴ ꦤꦴꦩ, ꦨꦤ꧀ꦠꦺ, ꦏꦠꦫꦺꦴ’’ꦠꦶ ꦥꦸꦕ꧀ꦖꦶ. ‘‘ꦄꦲꦁ ꦕꦹꦭ꦳ꦥꦤ꧀ꦡꦏꦺꦴ ꦄꦲꦁ ꦕꦹꦭ꦳ꦥꦤ꧀ꦡꦏꦺꦴ’’ꦠꦶ ꦨꦶꦏ꧀ꦑꦸꦱꦲꦱ꧀ꦱꦩ꧀ꦥꦶ ꦏꦡꦺꦱꦶ. ꦱꦺꦴ ꦥꦸꦤꦴꦒꦤ꧀ꦠ꧀ꦮꦴ ꦗꦷꦮꦏꦱ꧀ꦱ ꦏꦡꦺꦱꦶ ‘‘ꦱꦲꦱ꧀ꦱꦩꦠ꧀ꦠꦴ ꦨꦶꦏ꧀ꦑꦹ ꦱꦧ꧀ꦧꦺꦥꦶ ‘ꦄꦲꦁ ꦕꦹꦭ꦳ꦥꦤ꧀ꦡꦏꦺꦴ ꦄꦲꦁ ꦕꦹꦭ꦳ꦥꦤ꧀ꦡꦏꦺꦴ’ꦠꦶ ꦏꦡꦺꦤ꧀ꦠꦶ, ꦄꦲꦁ ‘ꦄꦱꦸꦏꦺꦴ ꦤꦴꦩ ꦥꦏ꧀ꦏꦺꦴꦱꦶꦠꦧ꧀ꦧꦺꦴ’ꦠꦶ ꦤ ꦗꦴꦤꦴꦩꦷ’’ꦠꦶ. ꦗꦷꦮꦏꦺꦴꦥꦶ ꦥꦛꦶꦮꦶꦢ꧀ꦣꦱꦕ꧀ꦕꦠꦴꦪ ‘‘ꦆꦢ꧀ꦣꦶꦩꦴ ꦨꦶꦏ꧀ꦑꦹ’’ꦠꦶ ꦤꦪꦠꦺꦴ ꦚꦠ꧀ꦮꦴ ‘‘ꦥꦜꦩꦁ ꦏꦡꦤꦨꦶꦏ꧀ꦑꦸꦩꦺꦮ ‘ꦠꦸꦩ꧀ꦲꦺ ꦱꦠ꧀ꦡꦴ ꦥꦏ꧀ꦏꦺꦴꦱꦠꦷ’ꦠꦶ ꦮꦠ꧀ꦮꦴ ꦕꦷꦮꦫꦏꦟ꧀ꦟꦺ ꦒꦟ꧀ꦲ ꦠꦴꦠꦴ’’ꦠꦶ ꦄꦴꦲ. ꦱꦺꦴ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦠꦡꦴ ꦄꦏꦴꦱꦶ, ꦠꦴꦮꦢꦺꦮ ꦱꦲꦱ꧀ꦱꦩꦠ꧀ꦠꦴ ꦨꦶꦏ꧀ꦑꦹ ꦄꦤ꧀ꦠꦫꦣꦴꦪꦶꦁꦱꦸ. ꦱꦺꦴ ꦡꦺꦫꦁ ꦒꦲꦺꦠ꧀ꦮꦴ ꦄꦒꦩꦴꦱꦶ. ꦱꦠ꧀ꦡꦴ ꦠꦱ꧀ꦩꦶꦁ ꦑꦟꦺ ꦪꦴꦒꦸꦁ ꦒꦟ꧀ꦲꦶ.

ꦢꦱꦧꦭꦺ ꦨꦠ꧀ꦠꦏꦶꦕ꧀ꦕꦁ ꦏꦠ꧀ꦮꦴ ꦮꦶꦲꦴꦫꦁ ꦒꦠꦺ ꦣꦩ꧀ꦩꦱꦨꦴꦪꦁ ꦏꦡꦴ ꦈꦢꦥꦴꦢꦶ ‘‘ꦪꦴꦮ ꦩꦲꦤ꧀ꦠꦴ ꦮꦠ ꦧꦸꦢ꧀ꦣꦴ ꦤꦴꦩ ꦕꦠ꧀ꦠꦴꦫꦺꦴ ꦩꦴꦱꦺ ꦌꦏꦒꦴꦡꦁ ꦒꦟ꧀ꦲꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦁ ꦨꦶꦏ꧀ꦑꦸꦁ ꦌꦮꦁꦩꦲꦶꦢ꧀ꦣꦶꦏꦁ ꦄꦏꦁꦱꦹ’’ꦠꦶ. ꦱꦠ꧀ꦡꦴ ꦠꦺꦱꦁ ꦨꦶꦏ꧀ꦑꦹꦤꦁ ꦕꦶꦠ꧀ꦠꦴꦕꦴꦫꦁ ꦚꦠ꧀ꦮꦴ ꦒꦤ꧀ꦠ꧀ꦮꦴ ꦥꦚ꧀ꦚꦠ꧀ꦠꦴꦱꦤꦺ ꦤꦶꦱꦗ꧀ꦗ ‘‘ꦏꦶꦁ ꦮꦢꦺꦡ, ꦨꦶꦏ꧀ꦑꦮꦺ’’ꦠꦶ ꦥꦸꦕ꧀ꦖꦶ. ꦤ ꦨꦒꦮꦴ ꦄꦚ꧀ꦚꦁ ꦏꦶꦚ꧀ꦕꦶ ꦏꦡꦺꦩ, ꦕꦹꦭ꦳ꦥꦤ꧀ꦡꦏꦺꦤ ꦠꦸꦩ꧀ꦲꦴꦏꦁ ꦱꦤ꧀ꦠꦶꦏꦴ ꦩꦲꦴꦭꦴꦨꦺꦴ ꦭꦢ꧀ꦣꦺꦴꦠꦶ ꦠꦸꦩ꧀ꦲꦴꦏꦁꦪꦺꦮ ꦒꦸꦟꦁ ꦏꦡꦺꦩꦴꦠꦶ. ꦄꦤꦕ꧀ꦖꦫꦶꦪꦁ, ꦨꦶꦏ꧀ꦑꦮꦺ, ꦆꦢꦴꦤꦶ ꦩꦪ꧀ꦲꦁ ꦎꦮꦴꦢꦁ ꦏꦠ꧀ꦮꦴ ꦭꦺꦴꦏꦸꦠ꧀ꦠꦫꦢꦴꦪꦗ꧀ꦗꦭꦴꦨꦺꦴ, ꦄꦪꦁ ꦄꦠꦷꦠꦺꦥꦶ ꦄꦥꦫꦶꦥꦏ꧀ꦏꦚꦴꦟꦺ ꦜꦶꦠꦱ꧀ꦱ ꦩꦪ꧀ꦲꦁ ꦎꦮꦴꦢꦁ ꦏꦠ꧀ꦮꦴ ꦭꦺꦴꦏꦶꦪꦢꦴꦪꦗ꧀ꦗꦁ ꦭꦨꦷꦠꦶ. ꦨꦶꦏ꧀ꦑꦹ ‘‘ꦏꦢꦴ, ꦨꦤ꧀ꦠꦺ’’ꦠꦶ ꦄꦴꦪꦴꦕꦶꦁꦱꦸ. ꦱꦠ꧀ꦡꦴ ꦠꦺꦱꦁ ꦨꦶꦏ꧀ꦑꦹꦤꦁ ꦄꦠꦷꦠꦁ ꦄꦴꦲꦫꦶꦠ꧀ꦮꦴ ꦢꦱ꧀ꦱꦺꦱꦶ.

ꦨꦶꦏ꧀ꦑꦮꦺ, ꦄꦠꦷꦠꦺ ꦧꦴꦫꦴꦟꦱꦷꦤꦒꦫꦺ ꦧ꧀ꦫꦲ꧀ꦩꦢꦠ꧀ꦠꦺꦴ ꦤꦴꦩ ꦫꦴꦗꦴ ꦫꦗ꧀ꦗꦁ ꦏꦴꦫꦺꦱꦶ. ꦠꦱ꧀ꦩꦶꦁ ꦱꦩꦪꦺ ꦕꦹꦭ꦳ꦏꦱꦺꦛ꧀ꦜꦶ ꦤꦴꦩ ꦥꦟ꧀ꦝꦶꦠꦺꦴ ꦧ꧀ꦪꦠ꧀ꦠꦺꦴ ꦱꦧ꧀ꦧꦤꦶꦩꦶꦠ꧀ꦠꦴꦤꦶ ꦗꦴꦤꦴꦠꦶ. ꦱꦺꦴ ꦌꦏꦢꦶꦮꦱꦁ ꦫꦴꦗꦹꦥꦛ꧀ꦜꦴꦤꦁ ꦒꦕ꧀ꦖꦤ꧀ꦠꦺꦴ ꦄꦤ꧀ꦠꦫꦮꦷꦡꦶꦪꦁ ꦩꦠꦩꦹꦱꦶꦏꦁ ꦢꦶꦱ꧀ꦮꦴ ꦠꦱ꧀ꦩꦶꦁ ꦑꦟꦺ ꦤꦏ꧀ꦑꦠ꧀ꦠꦁ ꦱꦩꦴꦤꦺꦠ꧀ꦮꦴ ꦆꦢꦩꦴꦲ – ‘‘ꦱꦏ꧀ꦏꦴ ꦕꦏ꧀ꦑꦸꦩꦠꦴ ꦏꦸꦭꦥꦸꦠ꧀ꦠꦺꦤ ꦆꦩꦁ ꦈꦤ꧀ꦢꦹꦫꦁ ꦒꦲꦺꦠ꧀ꦮꦴ ꦢꦴꦫꦨꦫꦟꦚ꧀ꦕ ꦏꦴꦠꦸꦁ ꦏꦩ꧀ꦩꦤ꧀ꦠꦺ ꦕ ꦥꦪꦺꦴꦗꦺꦠꦸ’’ꦤ꧀ꦠꦶ. ꦄꦚ꧀ꦚꦠꦫꦺꦴ ꦢꦸꦒ꧀ꦒꦠꦏꦸꦭꦥꦸꦠ꧀ꦠꦺꦴ ꦠꦁ ꦱꦺꦛ꧀ꦜꦶꦱ꧀ꦱ ꦮꦕꦤꦁ ꦱꦸꦠ꧀ꦮꦴ ‘‘ꦤꦴꦪꦁ ꦄꦗꦴꦤꦶꦠ꧀ꦮꦴ ꦏꦡꦺꦱ꧀ꦱꦠꦷ’’ꦠꦶ ꦩꦹꦱꦶꦏꦁ ꦒꦲꦺꦠ꧀ꦮꦴ ꦌꦏꦱ꧀ꦩꦶꦁ ꦄꦴꦥꦟꦺ ꦧꦶꦭ꦳ꦴꦫꦱ꧀ꦱꦠ꧀ꦡꦴꦪ ꦢꦠ꧀ꦮꦴ ꦏꦴꦏꦟꦶꦏꦁ ꦭꦨꦶ. ꦠꦴꦪ ꦏꦴꦏꦟꦶꦏꦴꦪ ꦦꦴꦟꦶꦠꦁ ꦏꦶꦟꦶꦠ꧀ꦮꦴ ꦌꦏꦺꦤ ꦏꦸꦛꦺꦤ ꦥꦴꦤꦷꦪꦁ ꦒꦟ꧀ꦲꦶꦠ꧀ꦮꦴ ꦄꦫꦚ꧀ꦚꦠꦺꦴ ꦄꦴꦒꦕ꧀ꦖꦤ꧀ꦠꦺ ꦩꦴꦭꦴꦏꦴꦫꦺ ꦢꦶꦱ꧀ꦮꦴ ꦡꦺꦴꦏꦁ ꦡꦺꦴꦏꦁ ꦦꦴꦟꦶꦠꦑꦟ꧀ꦝꦁ ꦢꦠ꧀ꦮꦴ ꦈꦭ꦳ꦸꦔ꧀ꦏꦺꦤ ꦥꦴꦤꦷꦪꦁ ꦄꦢꦴꦱꦶ. ꦠꦺ ꦠꦱ꧀ꦱ ꦌꦏꦺꦏꦁ ꦥꦸꦥ꧀ꦦꦩꦸꦛ꧀ꦜꦶꦁ ꦄꦢꦁꦱꦸ. ꦱꦺꦴ ꦠꦺꦤ ꦥꦸꦥ꧀ꦦꦩꦹꦭꦺꦤ ꦥꦸꦤꦢꦶꦮꦱꦺꦥꦶ ꦦꦴꦟꦶꦠꦚ꧀ꦕ ꦥꦴꦤꦷꦪꦓꦛꦚ꧀ꦕ ꦒꦲꦺꦠ꧀ꦮꦴ ꦥꦸꦥ꧀ꦦꦴꦫꦴꦩꦩꦺꦮ ꦒꦠꦺꦴ. ꦠꦱ꧀ꦱ ꦠꦁꦢꦶꦮꦱꦁ ꦩꦴꦭꦴꦏꦴꦫꦴ ꦄꦝ꧀ꦞꦎꦕꦶꦠꦏꦺ ꦥꦸꦥ꧀ꦦꦒꦕ꧀ꦖꦺ ꦢꦠ꧀ꦮꦴ ꦄꦒꦩꦁꦱꦸ. ꦱꦺꦴ ꦤꦕꦶꦫꦱ꧀ꦱꦺꦮ ꦆꦩꦶꦤꦴ ꦈꦥꦴꦪꦺꦤ ꦄꦛ꧀ꦜ ꦏꦲꦴꦥꦟꦺ ꦭꦨꦶ.

ꦥꦸꦤ ꦌꦏꦱ꧀ꦩꦶꦁ ꦮꦴꦠꦮꦸꦛ꧀ꦜꦶꦢꦶꦮꦱꦺ ꦖꦝ꧀ꦝꦶꦠꦈꦪ꧀ꦪꦴꦤꦁ ꦒꦤ꧀ꦠ꧀ꦮꦴ ꦥꦠꦶꦠꦢꦴꦫꦹꦤꦁ ꦫꦴꦱꦶꦁ ꦏꦠ꧀ꦮꦴ ꦤꦶꦱꦶꦤ꧀ꦤꦺꦴ ꦫꦴꦗꦏꦸꦩ꧀ꦨꦏꦴꦫꦱ꧀ꦱ ꦱꦤ꧀ꦠꦶꦏꦴ ꦱꦺꦴꦭ꦳ꦱ ꦏꦲꦴꦥꦟꦺ ꦭꦨꦶ. ꦱꦺꦴ ꦕꦠꦸꦮꦷꦱꦠꦶꦪꦴ ꦏꦲꦴꦥꦟꦺꦱꦸ ꦗꦴꦠꦺꦱꦸ ‘‘ꦄꦠ꧀ꦡꦶ ꦄꦪꦁ ꦈꦥꦴꦪꦺꦴ ꦩꦪ꧀ꦲ’’ꦤ꧀ꦠꦶ ꦤꦒꦫꦢ꧀ꦮꦴꦫꦠꦺꦴ ꦄꦮꦶꦢꦹꦫꦺ ꦜꦴꦤꦺ ꦌꦏꦁ ꦥꦴꦤꦷꦪꦕꦴꦛꦶꦁ ꦜꦥꦺꦠ꧀ꦮꦴ ꦥꦚ꧀ꦕꦱꦠꦺ ꦠꦶꦟꦲꦴꦫꦏꦺ ꦥꦴꦤꦷꦪꦺꦤ ꦈꦥꦛ꧀ꦜꦲꦶ. ꦠꦺ ꦄꦴꦲꦁꦱꦸ – ‘‘ꦠ꧀ꦮꦁ, ꦱꦩ꧀ꦩ, ꦄꦩ꧀ꦲꦴꦏꦁ ꦧꦲꦸꦥꦏꦴꦫꦺꦴ, ꦏꦶꦁ ꦠꦺ ꦏꦫꦺꦴꦩꦴ’’ꦠꦶ? ꦱꦺꦴꦥꦶ ‘‘ꦩꦪ꧀ꦲꦁ ꦏꦶꦕ꧀ꦕꦺ ꦈꦥ꧀ꦥꦤ꧀ꦤꦺ ꦏꦫꦶꦱ꧀ꦱꦡꦴ’’ꦠꦶ ꦮꦠ꧀ꦮꦴ ꦆꦠꦺꦴ ꦕꦶꦠꦺꦴ ꦕ ꦮꦶꦕꦫꦤ꧀ꦠꦺꦴ ꦡꦭꦥꦡꦏꦩ꧀ꦩꦶꦏꦺꦤ ꦕ ꦗꦭꦥꦡꦏꦩ꧀ꦩꦶꦏꦺꦤ ꦕ ꦱꦢ꧀ꦣꦶꦁ ꦩꦶꦠ꧀ꦠꦱꦤ꧀ꦡꦮꦁ ꦄꦏꦴꦱꦶ. ꦠꦱ꧀ꦱ ꦡꦭꦥꦡꦏꦩ꧀ꦩꦶꦏꦺꦴ ‘‘ꦱ꧀ꦮꦺ ꦆꦩꦁ ꦤꦒꦫꦁ ꦄꦱ꧀ꦱꦮꦴꦟꦶꦗꦏꦺꦴ ꦥꦚ꧀ꦕ ꦄꦱ꧀ꦱꦱꦠꦴꦤꦶ ꦒꦲꦺꦠ꧀ꦮꦴ ꦄꦴꦒꦩꦶꦱ꧀ꦱꦠꦷ’’ꦠꦶ ꦄꦴꦕꦶꦏ꧀ꦑꦶ. ꦱꦺꦴ ꦠꦱ꧀ꦱ ꦮꦕꦤꦁ ꦱꦸꦠ꧀ꦮꦴ ꦠꦶꦟꦲꦴꦫꦏꦴꦤꦁ ꦱꦚ꧀ꦚꦁ ꦢꦠ꧀ꦮꦴ ꦌꦏꦺꦏꦁ ꦠꦶꦟꦏꦭꦴꦥꦁ ꦢꦶꦒꦸꦟꦁ ꦏꦠ꧀ꦮꦴ ꦄꦴꦲꦫꦴꦥꦺꦱꦶ. ꦄꦡ ꦱꦺꦴ ꦄꦱ꧀ꦱꦴꦤꦁ ꦤꦒꦫꦁ ꦥꦮꦶꦛ꧀ꦜꦮꦺꦭꦴꦪ ꦠꦶꦟꦏꦭꦴꦥꦱꦲꦱ꧀ꦱꦁ ꦄꦤ꧀ꦠꦫꦢ꧀ꦮꦴꦫꦺ ꦫꦴꦱꦶꦁ ꦏꦠ꧀ꦮꦴ ꦤꦶꦱꦷꦢꦶ. ꦄꦱ꧀ꦱꦮꦴꦟꦶꦗꦺꦴ ꦱꦏꦭꦤꦒꦫꦺ ꦄꦱ꧀ꦱꦴꦤꦁ ꦕꦴꦫꦶꦁ ꦄꦭꦨꦶꦠ꧀ꦮꦴ ꦠꦱ꧀ꦱ ꦱꦲꦱ꧀ꦱꦁ ꦢꦠ꧀ꦮꦴ ꦠꦁ ꦠꦶꦟꦁ ꦒꦟ꧀ꦲꦶ.

ꦠꦠꦺꦴ ꦏꦠꦶꦥꦴꦲꦕ꧀ꦕꦪꦺꦤꦱ꧀ꦱ ꦱꦩꦸꦢ꧀ꦢꦏꦩ꧀ꦩꦶꦏꦱꦲꦴꦪꦏꦺꦴ ꦄꦴꦫꦺꦴꦕꦺꦱꦶ ‘‘ꦥꦛ꧀ꦛꦤꦁ ꦩꦲꦴꦤꦴꦮꦴ ꦄꦴꦒꦠꦴ’’ꦠꦶ. ꦱꦺꦴ ‘‘ꦄꦠ꧀ꦡꦶ ꦄꦪꦁ ꦈꦥꦴꦪꦺꦴ’’ꦠꦶ ꦄꦛ꧀ꦜꦲꦶ ꦏꦲꦴꦥꦟꦺꦲꦶ ꦱꦧ꧀ꦧꦥꦫꦶꦮꦴꦫꦱꦩ꧀ꦥꦤ꧀ꦤꦁ ꦠꦴꦮꦏꦴꦭꦶꦏꦁ ꦫꦡꦁ ꦒꦲꦺꦠ꧀ꦮꦴ ꦤꦴꦮꦴꦥꦛ꧀ꦛꦤꦁ ꦒꦤ꧀ꦠ꧀ꦮꦴ ꦌꦏꦁ ꦄꦔ꧀ꦒꦸꦭꦶꦩꦸꦢ꧀ꦢꦶꦏꦁ ꦤꦴꦮꦶꦏꦱ꧀ꦱ ꦱꦕ꧀ꦕꦏꦴꦫꦁ ꦢꦠ꧀ꦮꦴ ꦄꦮꦶꦢꦹꦫꦺ ꦜꦴꦤꦺ ꦱꦴꦟꦶꦁ ꦥꦫꦶꦏ꧀ꦑꦶꦥꦴꦥꦺꦠ꧀ꦮꦴ ꦠꦠ꧀ꦡ ꦤꦶꦱꦶꦤ꧀ꦤꦺꦴ ꦥꦸꦫꦶꦱꦺ ꦄꦴꦟꦴꦥꦺꦱꦶ ‘‘ꦧꦴꦲꦶꦫꦏꦺꦱꦸ ꦮꦴꦟꦶꦗꦺꦱꦸ ꦄꦴꦒꦠꦺꦱꦸ ꦠꦠꦶꦪꦺꦤ ꦥꦛꦶꦲꦴꦫꦺꦤ ꦄꦴꦫꦺꦴꦕꦺꦡꦴ’’ꦠꦶ. ‘‘ꦤꦴꦮꦴ ꦄꦴꦒꦠꦴ’’ꦠꦶ ꦱꦸꦠ꧀ꦮꦴ ꦧꦴꦫꦴꦟꦱꦶꦠꦺꦴ ꦱꦠꦩꦠ꧀ꦠꦴ ꦮꦴꦟꦶꦗꦴ ‘‘ꦨꦟ꧀ꦝꦁ ꦒꦟ꧀ꦲꦴꦩꦴ’’ꦠꦶ ꦄꦴꦒꦩꦁꦱꦸ. ꦨꦟ꧀ꦝꦁ ꦠꦸꦩ꧀ꦲꦺ ꦤ ꦭꦨꦶꦱ꧀ꦱꦡ, ꦄꦱꦸꦏꦛ꧀ꦜꦴꦤꦺ ꦤꦴꦩ ꦩꦲꦴꦮꦴꦟꦶꦗꦺꦤ ꦱꦕ꧀ꦕꦏꦴꦫꦺꦴ ꦢꦶꦤ꧀ꦤꦺꦴꦠꦶ. ꦠꦺ ꦠꦺꦱꦁ ꦱꦸꦠ꧀ꦮꦴ ꦠꦱ꧀ꦱ ꦱꦤ꧀ꦠꦶꦏꦁ ꦄꦴꦒꦠꦴ, ꦥꦴꦢꦩꦹꦭꦶꦏꦥꦸꦫꦶꦱꦴ ꦥꦸꦫꦶꦩꦱꦚ꧀ꦚꦴꦮꦱꦺꦤ ꦠꦠꦶꦪꦺꦤ ꦥꦴꦛꦶꦲꦴꦫꦺꦤ ꦠꦺꦱꦁ ꦄꦴꦒꦠꦨꦴꦮꦁ ꦄꦴꦫꦺꦴꦕꦺꦱꦸꦁ. ꦠꦺ ꦱꦠꦩꦠ꧀ꦠꦴꦥꦶ ꦮꦴꦟꦶꦗꦴ ꦌꦏꦺꦏꦁ ꦱꦲꦱ꧀ꦱꦁ ꦢꦠ꧀ꦮꦴ ꦠꦺꦤ ꦱꦢ꧀ꦣꦶꦁ ꦤꦴꦮꦴꦪ ꦥꦠ꧀ꦠꦶꦏꦴ ꦲꦸꦠ꧀ꦮꦴ ꦥꦸꦤ ꦌꦏꦺꦏꦁ ꦱꦲꦱ꧀ꦱꦁ ꦢꦠ꧀ꦮꦴ ꦥꦠ꧀ꦠꦶꦁ ꦮꦶꦱ꧀ꦱꦗ꧀ꦗꦴꦥꦺꦠ꧀ꦮꦴ ꦨꦟ꧀ꦝꦁ ꦄꦠ꧀ꦠꦤꦺꦴ ꦱꦤ꧀ꦠꦏꦁ ꦄꦏꦁꦱꦸ. ꦱꦺꦴ ꦥꦸꦫꦶꦱꦺꦴ ꦢ꧀ꦮꦺ ꦱꦠꦱꦲꦱ꧀ꦱꦴꦤꦶ ꦒꦲꦺꦠ꧀ꦮꦴ ꦧꦴꦫꦴꦟꦱꦶꦁ ꦄꦴꦒꦤ꧀ꦠ꧀ꦮꦴ ‘‘ꦏꦠꦚ꧀ꦚꦸꦤꦴ ꦨꦮꦶꦠꦸꦁ ꦮꦛ꧀ꦛꦠꦷ’’ꦠꦶ ꦌꦏꦁ ꦱꦠꦱꦲꦱ꧀ꦱꦁ ꦒꦲꦺꦠ꧀ꦮꦴ ꦕꦹꦭ꦳ꦱꦺꦛ꧀ꦜꦶꦱ꧀ꦱ ꦱꦤ꧀ꦠꦶꦏꦁ ꦒꦠꦺꦴ.

ꦄꦡ ꦠꦁ ꦕꦹꦭ꦳ꦱꦺꦛ꧀ꦜꦶ ‘‘ꦏꦶꦁ ꦠꦺ, ꦠꦴꦠ, ꦏꦠ꧀ꦮꦴ ꦆꦢꦁ ꦣꦤꦁ ꦭꦢ꧀ꦣ’’ꦤ꧀ꦠꦶ ꦥꦸꦕ꧀ꦖꦶ. ꦱꦺꦴ ‘‘ꦠꦸꦩ꧀ꦲꦺꦲꦶ ꦏꦡꦶꦠꦈꦥꦴꦪꦺ ꦜꦠ꧀ꦮꦴ ꦕꦠꦸꦩꦴꦱꦧ꧀ꦨꦤ꧀ꦠꦫꦺꦪꦺꦮ ꦭꦢ꧀ꦣ’’ꦤ꧀ꦠꦶ ꦄꦴꦲ. ꦱꦺꦛ꧀ꦜꦶ ꦠꦱ꧀ꦱ ꦮꦕꦤꦁ ꦱꦸꦠ꧀ꦮꦴ ‘‘ꦆꦢꦴꦤꦶ ꦌꦮꦫꦹꦥꦁ ꦢꦴꦫꦏꦁ ꦥꦫꦱꦤ꧀ꦠꦏꦁ ꦏꦴꦠꦸꦁ ꦤ ꦮꦛ꧀ꦛꦠꦷ’’ꦠꦶ ꦮꦪꦥ꧀ꦥꦠ꧀ꦠꦁ ꦣꦷꦠꦫꦁ ꦢꦠ꧀ꦮꦴ ꦱꦏꦭꦏꦸꦛꦸꦩ꧀ꦧꦱ꧀ꦱ ꦱꦴꦩꦶꦏꦁ ꦄꦏꦴꦱꦶ. ꦱꦺꦴꦥꦶ ꦏꦸꦭꦥꦸꦠ꧀ꦠꦺꦴ ꦱꦺꦛ꧀ꦜꦶꦤꦺꦴ ꦄꦕ꧀ꦕꦪꦺꦤ ꦠꦱ꧀ꦩꦶꦁ ꦤꦒꦫꦺ ꦱꦺꦛ꧀ꦜꦶꦛ꧀ꦜꦴꦤꦁ ꦒꦲꦺꦠ꧀ꦮꦴ ꦪꦴꦮꦠꦴꦪꦸꦏꦁ ꦜꦠ꧀ꦮꦴ ꦪꦡꦴꦏꦩ꧀ꦩꦁ ꦒꦠꦺꦴ. ꦱꦠ꧀ꦡꦴ ꦢ꧀ꦮꦺ ꦮꦠ꧀ꦡꦹꦤꦶ ꦏꦡꦺꦠ꧀ꦮꦴ ꦄꦤꦸꦱꦤ꧀ꦣꦶꦁ ꦓꦛꦺꦠ꧀ꦮꦴ ꦄꦨꦶꦱꦩ꧀ꦧꦸꦢ꧀ꦣꦏꦴꦭꦺ ꦆꦩꦁ ꦒꦴꦡꦩꦴꦲ –

‘‘ꦄꦥ꧀ꦥꦏꦺꦤꦥꦶ ꦩꦺꦣꦴꦮꦷ, ꦥꦴꦨꦠꦺꦤ ꦮꦶꦕꦏ꧀ꦑꦟꦺꦴ;

ꦱꦩꦸꦛ꧀ꦜꦴꦥꦺꦠꦶ ꦄꦠ꧀ꦠꦴꦤꦁ, ꦄꦟꦸꦁ ꦄꦒ꧀ꦒꦶꦁꦮ ꦱꦤ꧀ꦣꦩ’’ꦤ꧀ꦠꦶ. (ꦗꦴ. ꧑.꧑.꧔);

ꦆꦠꦶ ꦱꦠ꧀ꦡꦴ ꦣꦩ꧀ꦩꦱꦨꦴꦪꦁ ꦱꦤ꧀ꦤꦶꦱꦶꦤ꧀ꦤꦴꦤꦁ ꦆꦩꦁ ꦏꦴꦫꦟꦁ ꦢꦱ꧀ꦱꦺꦱꦶ. ꦄꦪꦁ ꦢ꧀ꦮꦶꦤ꧀ꦤꦩ꧀ꦥꦶ ꦩꦲꦴꦱꦴꦮꦏꦴꦤꦁ ꦥꦸꦧ꧀ꦧꦥꦠ꧀ꦡꦤꦠꦺꦴ ꦥꦛ꧀ꦜꦴꦪ ꦄꦤꦸꦥꦸꦧ꧀ꦧꦶꦏꦡꦴ. ꦄꦥꦫꦨꦴꦒꦺ ꦥꦤ ꦱꦠ꧀ꦡꦴ ꦄꦫꦶꦪꦒꦟꦥꦫꦶꦮꦸꦠꦺꦴ ꦣꦩ꧀ꦩꦴꦱꦤꦺ ꦤꦶꦱꦶꦤ꧀ꦤꦺꦴ ꦩꦤꦺꦴꦩꦪꦁ ꦏꦴꦪꦁ ꦄꦨꦶꦤꦶꦩ꧀ꦩꦶꦤꦤ꧀ꦠꦴꦤꦁ ꦕꦺꦠꦺꦴꦮꦶꦮꦛ꧀ꦛꦏꦸꦱꦭꦴꦤꦚ꧀ꦕ ꦕꦹꦭ꦳ꦥꦤ꧀ꦡꦏꦠ꧀ꦡꦺꦫꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦱꦶ, ꦱꦚ꧀ꦚꦴꦮꦶꦮꦛ꧀ꦛꦏꦸꦱꦭꦴꦤꦁ ꦩꦲꦴꦥꦤ꧀ꦡꦏꦤ꧀ꦠꦶ.

ꦱꦸꦨꦹꦠꦶꦠ꧀ꦡꦺꦫꦮꦠ꧀ꦡꦸ

꧒꧐꧑. ꦠꦠꦶꦪꦺ ꦄꦫꦟꦮꦶꦲꦴꦫꦷꦤꦤ꧀ꦠꦶ ꦤꦶꦏ꧀ꦏꦶꦭꦺꦱꦮꦶꦲꦴꦫꦷꦤꦁ. ꦫꦟꦤ꧀ꦠꦶ ꦲꦶ ꦫꦴꦒꦴꦢꦪꦺꦴ ꦏꦶꦭꦺꦱꦴ ꦮꦸꦕ꧀ꦕꦤ꧀ꦠꦶ, ꦠꦺꦱꦁ ꦄꦨꦴꦮꦺꦤ ꦤꦶꦏ꧀ꦏꦶꦭꦺꦱꦮꦶꦲꦴꦫꦺꦴ ꦄꦫꦟꦮꦶꦲꦴꦫꦺꦴ ꦤꦴꦩ. ꦱꦺꦴ ꦪꦺꦱꦁ ꦄꦠ꧀ꦡꦶ, ꦠꦺ ꦄꦫꦟꦮꦶꦲꦴꦫꦶꦤꦺꦴ. ꦠꦺꦱꦁ ꦄꦫꦟꦮꦶꦲꦴꦫꦷꦤꦁ ꦱꦸꦨꦹꦠꦶꦠ꧀ꦡꦺꦫꦺꦴ ꦄꦒ꧀ꦒꦺꦴꦠꦶ. ꦏꦶꦚ꧀ꦕꦴꦥꦶ ꦲꦶ ꦄꦚ꧀ꦚꦺꦥꦶ ꦑꦷꦟꦴꦱꦮꦴ ꦄꦫꦟꦮꦶꦲꦴꦫꦶꦤꦺꦴꦮ, ꦡꦺꦫꦺꦤ ꦥꦤ ꦣꦩ꧀ꦩꦢꦺꦱꦤꦴꦪ ꦌꦠꦁ ꦤꦴꦩꦁ ꦭꦢ꧀ꦣꦁ. ꦄꦚ꧀ꦚꦺ ꦲꦶ ꦨꦶꦏ꧀ꦑꦹ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦈꦢ꧀ꦢꦶꦱ꧀ꦱꦏꦁ ꦏꦠ꧀ꦮꦴ ꦮꦟ꧀ꦟꦁ ꦮꦴ ꦄꦮꦟ꧀ꦟꦁ ꦮꦴ ꦏꦡꦺꦤ꧀ꦠꦶ, ꦡꦺꦫꦺꦴ ꦥꦤ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦱꦠ꧀ꦡꦴꦫꦴ ꦢꦺꦱꦶꦠꦤꦶꦪꦴꦩꦠꦺꦴ ꦄꦤꦺꦴꦏ꧀ꦏꦩꦶꦠ꧀ꦮꦴ ꦢꦺꦱꦺꦠꦶ, ꦠꦱ꧀ꦩꦴ ꦄꦫꦟꦮꦶꦲꦴꦫꦷꦤꦁ ꦄꦒ꧀ꦒꦺꦴ ꦤꦴꦩ ꦗꦴꦠꦺꦴ.

꧒꧐꧒. ꦕꦠꦸꦠ꧀ꦡꦺ ꦢꦏ꧀ꦑꦶꦟꦺꦪ꧀ꦪꦴꦤꦤ꧀ꦠꦶ ꦢꦏ꧀ꦑꦶꦟꦴꦫꦲꦴꦤꦁ. ꦠꦠ꧀ꦡ ꦏꦶꦚ꧀ꦕꦴꦥꦶ ꦄꦚ꧀ꦚꦺꦥꦶ ꦑꦷꦟꦴꦱꦮꦴ ꦄꦒ꧀ꦒꦢꦏ꧀ꦑꦶꦟꦺꦪ꧀ꦪꦴ, ꦡꦺꦫꦺꦴ ꦥꦤ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦓꦫꦺ ꦓꦫꦺ ꦩꦺꦠ꧀ꦠꦴꦙꦴꦤꦁ ꦱꦩꦴꦥꦗ꧀ꦗꦶꦠ꧀ꦮꦴ ꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦪ ꦨꦶꦏ꧀ꦑꦁ ꦒꦟ꧀ꦲꦴꦠꦶ ‘‘ꦌꦮꦁ ꦨꦶꦏ꧀ꦑꦴꦢꦴꦪꦏꦴꦤꦁ ꦩꦲꦥ꧀ꦦꦭꦁ ꦨꦮꦶꦱ꧀ꦱꦠꦷ’’ꦠꦶ. ꦠꦱ꧀ꦩꦴ ꦢꦏ꧀ꦑꦶꦟꦺꦪ꧀ꦪꦴꦤꦁ ꦄꦒ꧀ꦒꦺꦴꦠꦶ ꦮꦸꦠ꧀ꦠꦺꦴ. ꦄꦠ꧀ꦠꦨꦴꦮꦺꦴ ꦥꦤꦱ꧀ꦱ ꦱꦸꦱꦩꦶꦢ꧀ꦣꦺꦴ, ꦄꦭꦔ꧀ꦏꦠꦠꦺꦴꦫꦟꦁ ꦮꦶꦪ ꦕꦶꦠ꧀ꦠꦥꦛꦺꦴ ꦮꦶꦪ ꦕ ꦄꦠꦶꦮꦶꦪ ꦮꦶꦫꦺꦴꦕꦠꦶ. ꦠꦱ꧀ꦩꦴ ꦱꦸꦨꦹꦠꦷꦠꦶ ꦮꦸꦕ꧀ꦕꦠꦶ.

ꦠꦱ꧀ꦱ ꦥꦚ꧀ꦲꦏꦩ꧀ꦩꦺ ꦄꦪꦩꦤꦸꦥꦸꦧ꧀ꦧꦶꦏꦡꦴ – ꦄꦪꦁ ꦏꦶꦫ ꦥꦢꦸꦩꦸꦠ꧀ꦠꦫꦺ ꦨꦒꦮꦠꦶ ꦄꦤꦸꦥ꧀ꦥꦤ꧀ꦤꦺꦪꦺꦮ ꦲꦁꦱꦮꦠꦷꦤꦒꦫꦺ ꦧ꧀ꦫꦴꦲ꧀ꦩꦟꦩꦲꦴꦱꦴꦭꦏꦸꦭꦺ ꦤꦶꦧ꧀ꦧꦠ꧀ꦠꦶ, ꦤꦤ꧀ꦢꦩꦴꦟꦮꦺꦴꦠꦶꦱ꧀ꦱ ꦤꦴꦩꦁ ꦄꦏꦁꦱꦸ. ꦱꦺꦴ ꦮꦪꦥ꧀ꦥꦠ꧀ꦠꦺꦴ ꦠꦪꦺꦴ ꦮꦺꦢꦺ ꦈꦒ꧀ꦒꦟ꧀ꦲꦶꦠ꧀ꦮꦴ ꦠꦠ꧀ꦡ ꦱꦴꦫꦁ ꦄꦥꦱ꧀ꦱꦤ꧀ꦠꦺꦴ ꦄꦠ꧀ꦠꦤꦺꦴ ꦥꦫꦶꦮꦴꦫꦺꦲꦶ ꦕꦠꦸꦕꦠ꧀ꦠꦴꦭꦷꦱꦴꦪ ꦩꦴꦟꦮꦏꦱꦲꦱ꧀ꦱꦺꦲꦶ ꦱꦢ꧀ꦣꦶꦁ ꦥꦧ꧀ꦧꦠꦥꦴꦢꦺ ꦆꦱꦶꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦥꦚ꧀ꦕ ꦄꦨꦶꦚ꧀ꦚꦴ ꦄꦛ꧀ꦜ ꦱꦩꦴꦥꦠ꧀ꦠꦶꦪꦺꦴ ꦤꦶꦧ꧀ꦧꦠ꧀ꦠꦺꦱꦶ, ꦄꦤ꧀ꦠꦺꦮꦴꦱꦶꦏꦺꦥꦶ ꦙꦴꦤꦭꦴꦨꦶꦤꦺꦴ ꦄꦏꦴꦱꦶ.

ꦠꦱ꧀ꦩꦶꦁ ꦱꦩꦪꦺ ꦥꦢꦸꦩꦸꦠ꧀ꦠꦫꦺꦴ ꦨꦒꦮꦴ ꦭꦺꦴꦏꦺ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦲꦁꦱꦮꦠꦷꦤꦒꦫꦁ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦺꦴ ꦌꦏꦢꦶꦮꦱꦁ ꦥꦕ꧀ꦕꦹꦱꦱꦩꦪꦺ ꦭꦺꦴꦏꦁ ꦎꦭꦺꦴꦏꦺꦤ꧀ꦠꦺꦴ ꦤꦤ꧀ꦢꦠꦴꦥꦱꦱ꧀ꦱ ꦄꦤ꧀ꦠꦺꦮꦴꦱꦶꦏꦴꦤꦁ ꦗꦛꦶꦭꦴꦤꦁ ꦄꦫꦲꦠ꧀ꦠꦹꦥꦤꦶꦱ꧀ꦱꦪꦁ ꦤꦤ꧀ꦢꦠꦴꦥꦱꦱ꧀ꦱ ꦕ ꦢ꧀ꦮꦷꦲꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦱ꧀ꦱ ꦱꦴꦮꦏꦱ꧀ꦱ ꦜꦴꦤꦤ꧀ꦠꦫꦥꦠ꧀ꦡꦤꦁ ꦢꦶꦱ꧀ꦮꦴ ꦥꦴꦠꦺꦴꦮ ꦱꦫꦷꦫꦥꦛꦶꦗꦒ꧀ꦒꦤꦁ ꦏꦠ꧀ꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦴꦫꦶꦥꦸꦠ꧀ꦠꦠ꧀ꦡꦺꦫꦱ꧀ꦱ ꦮꦠ꧀ꦡꦸꦩ꧀ꦲꦶ ꦮꦸꦠ꧀ꦠꦤꦪꦺꦤꦺꦮ ꦤꦤ꧀ꦢꦠꦴꦥꦱꦱ꧀ꦱ ꦄꦱ꧀ꦱꦩꦁ ꦄꦒꦩꦴꦱꦶ. ꦠꦠ꧀ꦡ ꦦꦭꦴꦦꦭꦢꦴꦤꦚ꧀ꦕ ꦥꦸꦥ꧀ꦦꦴꦱꦤꦥꦚ꧀ꦚꦴꦥꦤꦚ꧀ꦕ ꦤꦶꦫꦺꦴꦣꦱꦩꦴꦥꦠ꧀ꦠꦶꦱꦩꦴꦥꦗ꧀ꦗꦤꦚ꧀ꦕ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ.

ꦱꦠ꧀ꦡꦴ ꦥꦤ ꦤꦶꦫꦺꦴꦣꦴ ꦮꦸꦛ꧀ꦜꦶꦠꦺꦴ ꦄꦫꦟꦮꦶꦲꦴꦫꦶꦄꦔ꧀ꦒꦺꦤ ꦕ ꦢꦏ꧀ꦑꦶꦟꦺꦪ꧀ꦪꦔ꧀ꦒꦺꦤ ꦕꦴꦠꦶ ꦢ꧀ꦮꦷꦲꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦁ ꦌꦏꦁ ꦱꦴꦮꦏꦁ ‘‘ꦆꦱꦶꦒꦟꦱ꧀ꦱ ꦥꦸꦥ꧀ꦦꦴꦱꦤꦴꦤꦸꦩꦺꦴꦢꦤꦁ ꦏꦫꦺꦴꦲꦷ’’ꦠꦶ ꦄꦴꦟꦴꦥꦺꦱꦶ. ꦱꦺꦴ ꦄꦠ꧀ꦠꦤꦺꦴ ꦮꦶꦱꦪꦺ ꦜꦠ꧀ꦮꦴ ꦠꦺꦥꦶꦛꦏꦁ ꦱꦩ꧀ꦩꦱꦶꦠ꧀ꦮꦴ ꦄꦤꦸꦩꦺꦴꦢꦤꦁ ꦄꦏꦴꦱꦶ. ꦠꦱ꧀ꦱ ꦢꦺꦱꦤꦴꦮꦱꦴꦤꦺ ꦱꦠ꧀ꦡꦴ ꦱꦪꦁ ꦣꦩ꧀ꦩꦁ ꦢꦺꦱꦺꦱꦶ. ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦱꦧ꧀ꦧꦺ ꦕꦠꦸꦕꦠ꧀ꦠꦴꦭꦷꦱꦱꦲꦱ꧀ꦱꦴꦥꦶ ꦠꦴꦥꦱꦴ ꦄꦫꦲꦠ꧀ꦠꦁ ꦥꦴꦥꦸꦟꦶꦁꦱꦸ. ꦤꦤ꧀ꦢꦠꦴꦥꦱꦺꦴ ꦥꦤ ꦄꦤꦸꦩꦺꦴꦢꦏꦱ꧀ꦱ ꦨꦶꦏ꧀ꦑꦸꦤꦺꦴ ꦤꦶꦩꦶꦠ꧀ꦠꦁ ꦒꦟ꧀ꦲꦶꦠ꧀ꦮꦴ ꦱꦠ꧀ꦡꦸ ꦢꦺꦱꦤꦴꦤꦸꦱꦴꦫꦺꦤ ꦚꦴꦟꦁ ꦥꦺꦱꦺꦠꦸꦁ ꦤꦴꦱꦏ꧀ꦑꦶ. ꦱꦠ꧀ꦡꦴ ‘‘ꦌꦡ, ꦨꦶꦏ꧀ꦑꦮꦺꦴ’’ꦠꦶ ꦱꦺꦱꦨꦶꦏ꧀ꦑꦹꦤꦁ ꦲꦠ꧀ꦡꦁ ꦥꦱꦴꦫꦺꦱꦶ. ꦱꦧ꧀ꦧꦺꦥꦶ ꦄꦤ꧀ꦠꦫꦲꦶꦠꦏꦺꦱꦩꦱ꧀ꦱꦹ ꦆꦢ꧀ꦣꦶꦩꦪꦥꦫꦶꦏ꧀ꦑꦴꦫꦴ ꦮꦱ꧀ꦱꦱꦛ꧀ꦜꦶꦏꦠ꧀ꦡꦺꦫꦴ ꦮꦶꦪ ꦄꦲꦺꦱꦸꦁ.

ꦤꦤ꧀ꦢꦠꦴꦥꦱꦺꦴ ꦠꦡꦴꦒꦠꦁ ꦮꦤ꧀ꦢꦶꦠ꧀ꦮꦴ ꦱꦩ꧀ꦩꦸꦑꦺ ꦜꦶꦠꦺꦴ ꦄꦴꦲ – ‘‘ꦨꦤ꧀ꦠꦺ, ꦪꦺꦤ ꦨꦶꦏ꧀ꦑꦸꦤꦴ ꦆꦱꦶꦒꦟꦱ꧀ꦱ ꦥꦸꦥ꧀ꦦꦴꦱꦤꦴꦤꦸꦩꦺꦴꦢꦤꦴ ꦏꦠꦴ, ꦏꦺꦴ ꦤꦴꦩꦺꦴꦪꦁ ꦠꦸꦩ꧀ꦲꦴꦏꦁ ꦱꦴꦱꦤꦺ’’ꦠꦶ? ꦄꦫꦟꦮꦶꦲꦴꦫꦶꦄꦔ꧀ꦒꦺꦤ ꦕ ꦢꦏ꧀ꦑꦶꦟꦺꦪ꧀ꦪꦔ꧀ꦒꦺꦤ ꦕ ꦌꦠꦢꦒ꧀ꦒꦁ ꦥꦠ꧀ꦠꦺꦴ ꦌꦱꦺꦴꦠꦶ. ‘‘ꦨꦤ꧀ꦠꦺ, ꦄꦲꦩ꧀ꦥꦶ ꦆꦩꦶꦤꦴ ꦱꦠ꧀ꦠꦴꦲꦏꦠꦺꦤ ꦄꦣꦶꦏꦴꦫꦏꦩ꧀ꦩꦺꦤ ꦄꦚ꧀ꦚꦁ ꦱꦩ꧀ꦥꦠ꧀ꦠꦶꦁ ꦤ ꦥꦠ꧀ꦡꦺꦩꦶ, ꦄꦤꦴꦒꦠꦺ ꦥꦤꦴꦲꦁ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦄꦪꦁ ꦡꦺꦫꦺꦴ ꦮꦶꦪ ꦢ꧀ꦮꦷꦲꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦨꦮꦺꦪ꧀ꦪ’’ꦤ꧀ꦠꦶ ꦥꦠ꧀ꦡꦤꦁ ꦄꦏꦴꦱꦶ. ꦱꦠ꧀ꦡꦴ ꦄꦤꦤ꧀ꦠꦫꦴꦪꦁ ꦢꦶꦱ꧀ꦮꦴ ꦧ꧀ꦪꦴꦏꦫꦶꦠ꧀ꦮꦴ ꦥꦏ꧀ꦏꦴꦩꦶ. ꦤꦤ꧀ꦢꦠꦴꦥꦱꦺꦴꦥꦶ ꦏꦴꦭꦺꦤ ꦏꦴꦭꦁ ꦢꦱꦧꦭꦱ꧀ꦱ ꦱꦤ꧀ꦠꦶꦏꦺ ꦣꦩ꧀ꦩꦁ ꦱꦸꦠ꧀ꦮꦴ ꦄꦥꦫꦶꦲꦷꦤꦗ꧀ꦙꦴꦤꦺꦴ ꦧ꧀ꦫꦲ꧀ꦩꦭꦺꦴꦏꦺ ꦤꦶꦧ꧀ꦧꦠ꧀ꦠꦺꦴ. ꦆꦢꦩꦱ꧀ꦱ ꦏꦭ꧀ꦪꦴꦟꦏꦩ꧀ꦩꦁ. ꦄꦤ꧀ꦠꦫꦴ ꦥꦤ ꦏꦩ꧀ꦩꦁ ꦤ ꦏꦡꦶꦪꦠꦶ.

ꦱꦺꦴ ꦏꦥ꧀ꦥꦱꦠꦱꦲꦱ꧀ꦱꦁ ꦄꦠꦶꦏ꧀ꦏꦩꦶꦠ꧀ꦮꦴ ꦱꦴꦮꦠ꧀ꦡꦶꦪꦁ ꦱꦸꦩꦤꦱꦺꦛ꧀ꦜꦶꦱ꧀ꦱ ꦒꦺꦲꦺ ꦤꦶꦧ꧀ꦧꦠ꧀ꦠꦶ, ꦱꦸꦨꦹꦠꦷꦠꦶꦱ꧀ꦱ ꦤꦴꦩꦁ ꦄꦏꦁꦱꦸ. ꦄꦥꦫꦨꦴꦒꦺ ꦄꦩ꧀ꦲꦴꦏꦁ ꦱꦠ꧀ꦡꦴ ꦭꦺꦴꦏꦺ ꦤꦶꦧ꧀ꦧꦠ꧀ꦠꦺꦴ ꦫꦴꦗꦒꦲꦁ ꦈꦥꦤꦶꦱ꧀ꦱꦴꦪ ꦮꦶꦲꦫꦠꦶ. ꦠꦢꦴ ꦄꦤꦴꦡꦥꦶꦟ꧀ꦝꦶꦏꦺꦴ ꦱꦺꦛ꧀ꦜꦶ ꦱꦴꦮꦠ꧀ꦡꦶꦪꦁ ꦈꦛ꧀ꦜꦴꦤꦏꦨꦟ꧀ꦝꦁ ꦒꦲꦺꦠ꧀ꦮꦴ ꦄꦠ꧀ꦠꦤꦺꦴ ꦱꦲꦴꦪꦏꦱ꧀ꦱ ꦫꦴꦗꦒꦲꦱꦺꦛ꧀ꦜꦶꦤꦺꦴ ꦓꦫꦁ ꦒꦠꦺꦴ ꦱꦠ꧀ꦡꦸ ꦈꦥ꧀ꦥꦤ꧀ꦤꦨꦴꦮꦁ ꦚꦠ꧀ꦮꦴ ꦱꦠ꧀ꦡꦴꦫꦁ ꦱꦷꦠꦮꦤꦺ ꦮꦶꦲꦫꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦜꦩꦢꦱ꧀ꦱꦤꦺꦤꦺꦮ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦪ ꦱꦠ꧀ꦡꦴꦫꦁ ꦱꦴꦮꦠ꧀ꦡꦶꦁ ꦄꦴꦒꦩꦤꦠ꧀ꦡꦴꦪ ꦪꦴꦕꦶꦠ꧀ꦮꦴ ꦥꦚ꧀ꦕꦕꦠ꧀ꦠꦴꦭꦷꦱꦪꦺꦴꦗꦤꦺ ꦩꦒ꧀ꦒꦺ ꦪꦺꦴꦗꦤꦺ ꦪꦺꦴꦗꦤꦺ ꦱꦠꦱꦲꦱ꧀ꦱꦥꦫꦶꦕ꧀ꦕꦴꦒꦺꦤ ꦮꦶꦲꦴꦫꦺ ꦥꦠꦶꦛ꧀ꦜꦴꦥꦺꦠ꧀ꦮꦴ ꦱꦴꦮꦠ꧀ꦡꦶꦪꦁ ꦫꦴꦗꦩꦴꦤꦺꦤ ꦄꦛ꧀ꦜꦏꦫꦷꦱꦥ꧀ꦥꦩꦴꦟꦁ ꦗꦺꦠꦫꦴꦗꦏꦸꦩꦴꦫꦱ꧀ꦱ ꦈꦪ꧀ꦪꦴꦤꦨꦹꦩꦶꦁ ꦏꦺꦴꦛꦶꦱꦤ꧀ꦡꦴꦫꦺꦤ ꦏꦶꦟꦶꦠ꧀ꦮꦴ ꦠꦠ꧀ꦡ ꦨꦒꦮꦠꦺꦴ ꦮꦶꦲꦴꦫꦁ ꦏꦴꦫꦺꦠ꧀ꦮꦴ ꦄꦢꦴꦱꦶ. ꦮꦶꦲꦴꦫꦩꦲꦢꦶꦮꦱꦺ ꦄꦪꦁ ꦱꦸꦨꦹꦠꦶꦏꦸꦛꦶꦩ꧀ꦧꦶꦏꦺꦴ ꦄꦤꦴꦡꦥꦶꦟ꧀ꦝꦶꦏꦱꦺꦛ꧀ꦜꦶꦤꦴ ꦱꦢ꧀ꦣꦶꦁ ꦒꦤ꧀ꦠ꧀ꦮꦴ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦱꦢ꧀ꦣꦁ ꦥꦛꦶꦭꦨꦶꦠ꧀ꦮꦴ ꦥꦧ꧀ꦧꦗꦶ. ꦱꦺꦴ ꦈꦥꦱꦩ꧀ꦥꦤ꧀ꦤꦺꦴ ꦢ꧀ꦮꦺ ꦩꦴꦠꦶꦏꦴ ꦥꦒꦸꦟꦁ ꦏꦠ꧀ꦮꦴ ꦏꦩ꧀ꦩꦛ꧀ꦜꦴꦤꦁ ꦏꦡꦴꦥꦺꦠ꧀ꦮꦴ ꦄꦫꦚ꧀ꦚꦺ ꦱꦩꦟꦣꦩ꧀ꦩꦁ ꦏꦫꦺꦴꦤ꧀ꦠꦺꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦩꦺꦠ꧀ꦠꦴꦙꦴꦤꦁ ꦥꦴꦢꦏꦁ ꦏꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦮꦸꦠ꧀ꦠꦤꦪꦺꦤꦺꦮ ꦣꦩ꧀ꦩꦁ ꦏꦡꦺꦠꦶ, ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦮꦸꦠ꧀ꦠꦤꦪꦺꦤꦺꦮ ꦩꦺꦠ꧀ꦠꦴꦙꦴꦤꦠꦺꦴ ꦮꦸꦛ꧀ꦜꦴꦪ ꦨꦶꦏ꧀ꦑꦁ ꦒꦟ꧀ꦲꦴꦠꦶ. ꦄꦡ ꦤꦁ ꦱꦠ꧀ꦡꦴ ꦆꦩꦁ ꦏꦴꦫꦟꦢ꧀ꦮꦪꦁ ꦥꦛꦶꦕ꧀ꦕ ꦄꦫꦟꦮꦶꦲꦴꦫꦷꦤꦚ꧀ꦕ ꦢꦏ꧀ꦑꦶꦟꦺꦪ꧀ꦪꦴꦤꦚ꧀ꦕ ꦨꦶꦏ꧀ꦑꦹꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦱꦷꦠꦶ.

ꦑꦢꦶꦫꦮꦤꦶꦪꦫꦺꦮꦠꦠ꧀ꦡꦺꦫꦮꦠ꧀ꦡꦸ

꧒꧐꧓. ꦥꦚ꧀ꦕꦩꦺ ꦄꦴꦫꦚ꧀ꦚꦏꦴꦤꦤ꧀ꦠꦶ ꦄꦫꦚ꧀ꦚꦮꦴꦱꦷꦤꦁ. ꦫꦺꦮꦠꦺꦴ ꦑꦢꦶꦫꦮꦤꦶꦪꦺꦴꦠꦶ ꦣꦩ꧀ꦩꦱꦺꦤꦴꦥꦠꦶꦠ꧀ꦡꦺꦫꦱ꧀ꦱ ꦏꦤꦶꦛ꧀ꦜꦨꦴꦠꦶꦏꦺꦴ. ꦱꦺꦴ ꦪꦡꦴ ꦄꦚ꧀ꦚꦺ ꦡꦺꦫꦴ ꦄꦫꦚ꧀ꦚꦺ ꦮꦱꦩꦴꦤꦴ ꦮꦤꦱꦨꦴꦒꦁ ꦈꦢꦏꦱꦨꦴꦒꦁ ꦨꦶꦏ꧀ꦑꦴꦕꦴꦫꦱꦨꦴꦒꦚ꧀ꦕ ꦱꦭ꧀ꦭꦏ꧀ꦑꦺꦠ꧀ꦮꦴ ꦄꦫꦚ꧀ꦚꦺ ꦮꦱꦤ꧀ꦠꦶ, ꦤ ꦌꦮꦁ ꦮꦱꦶ. ꦌꦠꦴꦤꦶ ꦥꦤ ꦱꦨꦴꦒꦴꦤꦶ ꦄꦤꦴꦢꦶꦪꦶꦠ꧀ꦮꦴ ꦈꦗ꧀ꦗꦔ꧀ꦒꦭꦱꦏ꧀ꦑꦫꦥꦴꦱꦴꦟꦮꦶꦱꦩꦺ ꦑꦢꦶꦫꦮꦤꦺ ꦥꦛꦶꦮꦱꦠꦶ. ꦠꦱ꧀ꦩꦴ ꦄꦴꦫꦚ꧀ꦚꦏꦴꦤꦁ ꦄꦒ꧀ꦒꦺꦴꦠꦶ ꦮꦸꦠ꧀ꦠꦺꦴ.

ꦠꦱ꧀ꦱ ꦥꦚ꧀ꦲꦏꦩ꧀ꦩꦺ ꦄꦪꦩꦤꦸꦥꦸꦧ꧀ꦧꦶꦏꦡꦴ – ꦄꦪꦁ ꦏꦶꦫ ꦄꦠꦷꦠꦺ ꦥꦢꦸꦩꦸꦠ꧀ꦠꦫꦧꦸꦢ꧀ꦣꦏꦴꦭꦺ ꦲꦁꦱꦮꦠꦷꦤꦒꦫꦺ ꦤꦶꦧ꧀ꦧꦠ꧀ꦠꦺꦴ ꦩꦲꦴꦒꦔ꧀ꦒꦴꦪ ꦥꦪꦴꦒꦥꦠꦶꦛ꧀ꦜꦴꦤꦠꦶꦠ꧀ꦡꦺ ꦤꦴꦮꦴꦏꦩ꧀ꦩꦁ ꦏꦫꦺꦴꦤ꧀ꦠꦺꦴ ꦥꦛꦶꦮꦱꦠꦶ. ꦠꦱ꧀ꦩꦶꦁ ꦱꦩꦪꦺ ꦱꦠ꧀ꦡꦴ ꦱꦠꦱꦲꦱ꧀ꦱꦨꦶꦏ꧀ꦑꦸꦥꦫꦶꦮꦴꦫꦺꦴ ꦕꦴꦫꦶꦏꦁ ꦕꦫꦤ꧀ꦠꦺꦴ ꦥꦪꦴꦒꦥꦠꦶꦛ꧀ꦜꦴꦤꦠꦶꦠ꧀ꦡꦁ ꦱꦩ꧀ꦥꦴꦥꦸꦟꦶ. ꦱꦺꦴ ꦢꦱꦧꦭꦁ ꦢꦶꦱ꧀ꦮꦴ ꦕꦶꦤ꧀ꦠꦺꦱꦶ – ‘‘ꦩꦪ꧀ꦲꦁ ꦏꦴꦭꦺꦤ ꦏꦴꦭꦁ ꦧꦸꦢ꧀ꦣꦢꦱ꧀ꦱꦤꦁ ꦤꦴꦩ ꦤꦠ꧀ꦡꦶ, ꦄꦪꦁ ꦩꦺ ꦏꦭ꧀ꦪꦴꦟꦏꦩ꧀ꦩꦴꦪꦹꦲꦤꦏ꧀ꦑꦟꦺꦴ’’ꦠꦶ ꦤꦴꦮꦴꦱꦔ꧀ꦓꦴꦛꦁ ꦧꦤ꧀ꦣꦴꦥꦺꦠ꧀ꦮꦴ ꦈꦥꦫꦶ ꦕꦺꦭꦮꦶꦠꦴꦤꦁ ꦏꦴꦫꦺꦠ꧀ꦮꦴ ꦒꦤ꧀ꦣꦩꦴꦭꦴꦢꦴꦩꦴꦤꦶ ꦎꦱꦴꦫꦺꦠ꧀ꦮꦴ ꦲꦺꦛ꧀ꦜꦴ ꦮꦫꦥꦺꦴꦠ꧀ꦡꦏꦁ ꦕꦶꦠ꧀ꦠꦠ꧀ꦡꦫꦟꦁ ꦄꦠ꧀ꦡꦫꦴꦥꦺꦠ꧀ꦮꦴ ꦱꦥꦫꦶꦮꦴꦫꦁ ꦱꦠ꧀ꦡꦴꦫꦁ ꦥꦫꦠꦷꦫꦁ ꦠꦴꦫꦺꦱꦶ.

ꦠꦱ꧀ꦩꦶꦁ ꦱꦩꦪꦺ ꦱꦠ꧀ꦡꦴ ꦌꦏꦁ ꦄꦴꦫꦚ꧀ꦚꦏꦁ ꦨꦶꦏ꧀ꦑꦸꦁ ꦌꦠꦢꦒ꧀ꦒꦺ ꦜꦥꦺꦱꦶ. ꦱꦺꦴ ꦤꦴꦮꦶꦏꦺꦴ ꦠꦁ ꦢꦶꦱ꧀ꦮꦴ ‘‘ꦩꦪꦴꦥꦶ ꦌꦮꦩꦺꦮꦁ ꦄꦤꦴꦒꦠꦺ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦄꦴꦫꦚ꧀ꦚꦏꦴꦤꦁ ꦄꦒ꧀ꦒꦺꦤ ꦨꦮꦶꦠꦸꦁ ꦮꦛ꧀ꦛꦠꦷ’’ꦠꦶ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦠ꧀ꦮꦴ ꦱꦠ꧀ꦠꦴꦲꦁ ꦩꦲꦴꦢꦴꦤꦁ ꦢꦠ꧀ꦮꦴ ꦱꦠ꧀ꦡꦸ ꦥꦴꦢꦩꦹꦭꦺ ꦤꦶꦥꦗ꧀ꦗꦶꦠ꧀ꦮꦴ, ‘‘ꦨꦤ꧀ꦠꦺ, ꦠꦸꦩ꧀ꦲꦺꦲꦶ ꦌꦠꦢꦒ꧀ꦒꦺ ꦜꦥꦶꦠꦺꦴ ꦱꦺꦴ ꦨꦶꦏ꧀ꦑꦸ ꦮꦶꦪ ꦄꦲꦩ꧀ꦥꦶ ꦄꦤꦴꦒꦠꦺ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦄꦴꦫꦚ꧀ꦚꦏꦴꦤꦁ ꦄꦒ꧀ꦒꦺꦴ ꦨꦮꦺꦪ꧀ꦪ’’ꦤ꧀ꦠꦶ ꦥꦠ꧀ꦡꦤꦁ ꦄꦏꦴꦱꦶ. ꦱꦠ꧀ꦡꦴ ꦄꦤꦤ꧀ꦠꦫꦴꦪꦁ ꦢꦶꦱ꧀ꦮꦴ ‘‘ꦄꦤꦴꦒꦠꦺ ꦒꦺꦴꦠꦩꦧꦸꦢ꧀ꦣꦱ꧀ꦱ ꦱꦴꦱꦤꦺ ꦠ꧀ꦮꦁ ꦄꦴꦫꦚ꧀ꦚꦏꦴꦤꦁ ꦄꦒ꧀ꦒꦺꦴ ꦨꦮꦶꦱ꧀ꦱꦱꦷ’’ꦠꦶ ꦧ꧀ꦪꦴꦏꦫꦶꦠ꧀ꦮꦴ ꦥꦏ꧀ꦏꦴꦩꦶ. ꦄꦤ꧀ꦠꦫꦴ ꦥꦤ ꦄꦚ꧀ꦚꦁ ꦏꦩ꧀ꦩꦁ ꦤ ꦏꦡꦶꦪꦠꦶ.

ꦱꦺꦴ ꦪꦴꦮꦗꦷꦮꦁ ꦏꦭ꧀ꦪꦴꦟꦏꦩ꧀ꦩꦁ ꦏꦠ꧀ꦮꦴ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦩꦒꦣꦏ꧀ꦑꦺꦠ꧀ꦠꦺ ꦤꦴꦭꦏꦧ꧀ꦫꦴꦲ꧀ꦩꦟꦒꦴꦩꦺ ꦱꦴꦫꦷꦧ꧀ꦫꦴꦲ꧀ꦩꦟꦶꦪꦴ ꦏꦸꦕ꧀ꦖꦶꦩ꧀ꦲꦶ ꦥꦛꦶꦱꦤ꧀ꦣꦶꦁ ꦒꦲꦺꦠ꧀ꦮꦴ ꦠꦶꦟ꧀ꦟꦁ ꦨꦴꦠꦶꦏꦴꦤꦁ ꦠꦶꦱ꧀ꦱꦤ꧀ꦤꦚ꧀ꦕ ꦨꦒꦶꦤꦷꦤꦁ ꦱꦧ꧀ꦧꦏꦤꦶꦛ꧀ꦜꦺꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶ, ꦫꦺꦮꦠꦺꦴꦠꦶꦱ꧀ꦱ ꦤꦴꦩꦁ ꦄꦏꦁꦱꦸ. ꦄꦡꦱ꧀ꦱ ꦩꦴꦠꦴꦥꦶꦠꦫꦺꦴ ꦕꦶꦤ꧀ꦠꦺꦱꦸꦁ – ‘‘ꦮꦝ꧀ꦞꦶꦠꦮꦝ꧀ꦞꦶꦠꦺ ꦢꦴꦫꦏꦺ ꦱꦩꦟꦴ ꦱꦏ꧀ꦪꦥꦸꦠ꧀ꦠꦶꦪꦴ ꦤꦺꦠ꧀ꦮꦴ ꦥꦧ꧀ꦧꦴꦗꦺꦤ꧀ꦠꦶ, ꦄꦩ꧀ꦲꦴꦏꦁ ꦥꦸꦠ꧀ꦠꦁ ꦫꦺꦮꦠꦁ ꦢꦲꦫꦩꦺꦮ ꦓꦫꦧꦤ꧀ꦣꦤꦺꦤ ꦧꦤ꧀ꦣꦶꦱ꧀ꦱꦴꦩꦴ’’ꦠꦶ ꦱꦩꦴꦤꦏꦸꦭꦠꦺꦴ ꦢꦴꦫꦶꦏꦁ ꦄꦴꦤꦺꦠ꧀ꦮꦴ ꦫꦺꦮꦠꦱ꧀ꦱ ꦄꦪ꧀ꦪꦶꦏꦁ ꦮꦤ꧀ꦢꦴꦥꦺꦠ꧀ꦮꦴ, ‘‘ꦄꦩ꧀ꦩ, ꦠꦮ ꦄꦪ꧀ꦪꦶꦏꦴꦪ ꦩꦲꦭ꧀ꦭꦏꦠꦫꦴ ꦲꦺꦴꦲꦷ’’ꦠꦶ ꦄꦴꦲꦁꦱꦸ. ꦫꦺꦮꦠꦺꦴ ꦠꦺꦱꦁ ꦏꦡꦁ ꦱꦸꦠ꧀ꦮꦴ ꦕꦶꦤ꧀ꦠꦺꦱꦶ – ‘‘ꦄꦪꦁ ꦢꦴꦫꦶꦏꦴ ꦢꦲꦫꦴ ꦥꦜꦩꦮꦪꦺ ꦜꦶꦠꦴ, ꦆꦩꦶꦱ꧀ꦱꦴ ꦏꦶꦫ ꦌꦮꦁꦮꦶꦣꦁ ꦫꦹꦥꦁ ꦩꦩ ꦄꦪ꧀ꦪꦶꦏꦴꦪ ꦫꦹꦥꦱꦢꦶꦱꦁ ꦨꦮꦶꦱ꧀ꦱꦠꦶ, ꦥꦸꦕ꧀ꦖꦶꦱ꧀ꦱꦴꦩꦶ ꦠꦴꦮ ꦤꦺꦱꦁ ꦄꦣꦶꦥ꧀ꦥꦴꦪ’’ꦤ꧀ꦠꦶ ꦕꦶꦤ꧀ꦠꦺꦠ꧀ꦮꦴ ꦄꦴꦲ – ‘‘ꦠꦸꦩ꧀ꦲꦺ ꦏꦶꦁ ꦏꦡꦺꦡꦴ’’ꦠꦶ? ꦠꦴꦠ, ‘‘ꦄꦪꦁ ꦢꦴꦫꦶꦏꦴ ꦄꦪ꧀ꦪꦶꦏꦴ ꦮꦶꦪ ꦠꦺ ꦗꦫꦁ ꦥꦴꦥꦸꦟꦴꦠꦹ’’ꦠꦶ ꦮꦢꦴꦩꦴꦠꦶ. ꦱꦺꦴ ‘‘ꦆꦩꦶꦱ꧀ꦱꦴ ꦫꦹꦥꦁ ꦌꦮꦁꦮꦶꦣꦁ ꦨꦮꦶꦱ꧀ꦱꦠꦷ’’ꦠꦶ ꦥꦸꦕ꧀ꦖꦶ. ꦠꦴꦠ, ꦏꦶꦁ ꦮꦢꦺꦱꦶ, ꦩꦲꦴꦥꦸꦚ꧀ꦚꦴ ꦌꦮꦁꦮꦶꦣꦴ ꦲꦺꦴꦤ꧀ꦠꦷꦠꦶ.

ꦱꦺꦴ ꦕꦶꦤ꧀ꦠꦺꦱꦶ – ‘‘ꦆꦢꦁ ꦏꦶꦫ ꦫꦹꦥꦁ ꦆꦩꦶꦤꦴ ꦤꦶꦪꦴꦩꦺꦤ ꦮꦭꦶꦠ꧀ꦠꦕꦁ ꦨꦮꦶꦱ꧀ꦱꦠꦶ ꦥꦭꦶꦠꦏꦺꦱꦁ ꦑꦟ꧀ꦝꦢꦤ꧀ꦠꦁ, ꦄꦲꦁ ꦌꦮꦫꦹꦥꦺ ꦫꦹꦥꦺ ꦫꦗ꧀ꦗꦶꦠ꧀ꦮꦴ ꦏꦶꦁ ꦏꦫꦶꦱ꧀ꦱꦴꦩꦶ, ꦩꦩ ꦨꦴꦠꦶꦏꦴꦤꦁ ꦒꦠꦩꦒ꧀ꦒꦩꦺꦮ ꦒꦩꦶꦱ꧀ꦱꦴꦩꦷ’’ꦠꦶ ꦏꦷꦭ꦳ꦤ꧀ꦠꦺꦴ ꦮꦶꦪ ꦲꦸꦠ꧀ꦮꦴ ꦱꦩꦮꦪꦺ ꦠꦫꦸꦟꦢꦴꦫꦏꦺ ꦄꦴꦲ – ‘‘ꦌꦡ, ꦨꦺꦴ, ꦮꦶꦣꦴꦮꦤꦶꦏꦁ ꦏꦫꦶꦱ꧀ꦱꦴꦩꦴ’’ꦠꦶ ꦤꦶꦏ꧀ꦑꦩꦶ. ꦠꦴꦠ, ꦩꦔ꧀ꦒꦭꦢꦶꦮꦱꦺ ꦩꦴ ꦧꦲꦶ ꦒꦕ꧀ꦖꦴꦠꦶ. ꦱꦺꦴ ꦢꦴꦫꦏꦺꦲꦶ ꦱꦢ꧀ꦣꦶꦁ ꦏꦷꦭ꦳ꦤ꧀ꦠꦺꦴ ꦮꦶꦪ ꦄꦠ꧀ꦠꦤꦺꦴ ꦣꦴꦮꦤꦮꦴꦫꦺ ꦱꦩ꧀ꦥꦠ꧀ꦠꦺ ꦡꦺꦴꦏꦁ ꦒꦤ꧀ꦠ꧀ꦮꦴ ꦥꦥꦚ꧀ꦕꦺꦠ꧀ꦮꦴ ꦄꦴꦒꦕ꧀ꦖꦠꦶ. ꦥꦸꦤ ꦢꦸꦠꦶꦪꦮꦴꦫꦺ ꦱꦩ꧀ꦥꦠ꧀ꦠꦺ ꦠꦠꦺꦴ ꦠꦸꦫꦶꦠꦁ ꦮꦶꦪ ꦒꦤ꧀ꦠ꧀ꦮꦴ ꦄꦴꦒꦠꦺꦴ, ꦠꦠꦶꦪꦮꦴꦫꦺ ꦱꦩ꧀ꦥꦠ꧀ꦠꦺ ‘‘ꦄꦪꦁ ꦩꦺ ꦏꦴꦭꦺꦴ’’ꦠꦶ ꦚꦠ꧀ꦮꦴ ꦱꦩ꧀ꦩꦸꦑꦛ꧀ꦜꦴꦤꦺꦤꦺꦮ ꦥꦭꦴꦪꦶꦠ꧀ꦮꦴ ꦥꦁꦱꦸꦏꦹꦭꦶꦏꦨꦶꦏ꧀ꦑꦹꦤꦁ ꦤꦶꦮꦴꦱꦛ꧀ꦜꦴꦤꦁ ꦄꦫꦚ꧀ꦚꦁ ꦒꦤ꧀ꦠ꧀ꦮꦴ ꦡꦺꦫꦺ ꦄꦨꦶꦮꦴꦢꦺꦠ꧀ꦮꦴ ꦥꦧ꧀ꦧꦗ꧀ꦗꦁ ꦪꦴꦕꦶ. ꦱꦥ꧀ꦥꦸꦫꦶꦱ ꦩꦪꦁ ꦠꦁ ꦤ ꦗꦴꦤꦴꦩ ‘‘ꦏꦱ꧀ꦱꦴꦱꦶ ꦥꦸꦠ꧀ꦠꦺꦴ’’ꦠꦶ, ꦠ꧀ꦮꦚ꧀ꦕ ꦄꦭꦔ꧀ꦏꦠꦤꦶꦪꦴꦩꦺꦤꦺꦮ ꦄꦴꦒꦠꦺꦴ, ꦏꦺꦴ ꦠꦁ ꦥꦧ꧀ꦧꦴꦗꦺꦠꦸꦁ ꦈꦱ꧀ꦱꦲꦶꦱ꧀ꦱꦠꦷꦠꦶ. ꦱꦺꦴ ꦈꦨꦺꦴ ꦧꦴꦲꦴ ꦥꦒ꧀ꦒꦪ꧀ꦲ ‘‘ꦮꦶꦭꦸꦩ꧀ꦥꦤ꧀ꦠꦶ ꦩꦁ ꦮꦶꦭꦸꦩ꧀ꦥꦤ꧀ꦠꦶ ꦩ’’ꦤ꧀ꦠꦶ ꦩꦲꦴꦫꦮꦁ ꦮꦶꦫꦮꦶ. ꦆꦠꦺꦴ ꦕꦶꦠꦺꦴ ꦕ ꦨꦶꦏ꧀ꦑꦹ ꦱꦤ꧀ꦤꦶꦥꦠꦶꦠ꧀ꦮꦴ ‘‘ꦱꦥ꧀ꦥꦸꦫꦶꦱ, ꦆꦩꦱ꧀ꦩꦶꦁ ꦜꦴꦤꦺ ꦠꦮ ꦮꦠ꧀ꦡꦁ ꦮꦴ ꦥꦶꦭ꦳ꦤ꧀ꦣꦤꦁ ꦮꦴ ꦏꦺꦴꦕꦶ ꦒꦟ꧀ꦲꦤ꧀ꦠꦺꦴ ꦤꦴꦩ ꦤꦠ꧀ꦡꦶ, ꦠ꧀ꦮꦚ꧀ꦕ ‘ꦮꦶꦭꦸꦩ꧀ꦥꦤ꧀ꦠꦷ’ꦠꦶ ꦮꦢꦱꦶ, ꦏꦶꦁ ꦱꦤ꧀ꦣꦴꦪ ꦮꦢꦱꦷ’’ꦠꦶ? ꦨꦤ꧀ꦠꦺ, ꦤꦴꦲꦁ ꦮꦠ꧀ꦡꦴꦭꦔ꧀ꦏꦴꦫꦁ ꦱꦤ꧀ꦣꦴꦪ ꦮꦢꦴꦩꦶ, ꦠꦶꦱ꧀ꦱꦤ꧀ꦤꦁ ꦥꦤ ꦩꦺ ꦱꦩ꧀ꦥꦠ꧀ꦠꦷꦤꦁ ꦮꦶꦭꦺꦴꦥꦺꦴ ꦮꦠ꧀ꦠꦠꦶ, ꦠꦁ ꦱꦤ꧀ꦣꦴꦪ ꦮꦢꦴꦩꦶ. ꦩꦁ ꦠꦴꦮ ꦠꦸꦩ꧀ꦲꦺ ꦩꦴ ꦥꦧ꧀ꦧꦴꦗꦪꦶꦠ꧀ꦡ, ꦨꦴꦠꦫꦁ ꦥꦤ ꦩꦺ ꦗꦴꦤꦴꦡꦴꦠꦶ. ꦏꦺꦴꦤꦴꦩꦺꦴ ꦥꦤ ꦠꦺ ꦨꦴꦠꦴꦠꦶ? ꦒꦶꦲꦶꦏꦴꦭꦺ ꦈꦥꦠꦶꦱ꧀ꦱꦺꦴ ꦤꦴꦩ, ꦆꦢꦴꦤꦶ ꦥꦤ ꦱꦴꦫꦶꦥꦸꦠ꧀ꦠꦺꦴ ꦤꦴꦩ ꦗꦴꦠꦺꦴꦠꦶ ꦮꦢꦤ꧀ꦠꦷꦠꦶ. ‘‘ꦄꦴꦮꦸꦱꦺꦴ, ꦌꦮꦁ ꦱꦤ꧀ꦠꦺ ꦄꦪꦁ ꦏꦸꦭꦥꦸꦠ꧀ꦠꦺꦴ ꦄꦩ꧀ꦲꦴꦏꦁ ꦏꦤꦶꦛ꧀ꦜꦨꦴꦠꦶꦏꦺꦴ ꦤꦴꦩ ꦲꦺꦴꦠꦶ, ꦗꦺꦛ꧀ꦜꦨꦴꦠꦶꦏꦺꦴ ꦤꦺꦴ ꦣꦩ꧀ꦩꦱꦺꦤꦴꦥꦠꦶ ꦥꦸꦫꦺꦠꦫꦁꦪꦺꦮ ꦄꦴꦲ – ‘ꦄꦩ꧀ꦲꦴꦏꦁ ꦚꦴꦠꦏꦴ ꦱꦧ꧀ꦧꦺꦮ ꦩꦶꦕ꧀ꦖꦴꦢꦶꦛ꧀ꦜꦶꦏꦴ, ꦪꦺꦴ ꦏꦺꦴꦕꦶ ꦄꦩ꧀ꦲꦴꦏꦁ ꦚꦴꦠꦷꦠꦶ ꦄꦴꦒꦕ꧀ꦖꦠꦶ, ꦠꦁ ꦪꦺꦤ ꦠꦺꦤꦸꦥꦴꦪꦺꦤ ꦥꦧ꧀ꦧꦴꦗꦺꦪ꧀ꦪꦡꦴ’ꦠꦶ. ꦄꦪꦁ ꦥꦤ ꦡꦺꦫꦱ꧀ꦱ ꦄꦗ꧀ꦙꦠ꧀ꦠꦨꦴꦠꦶꦏꦺꦴ, ꦥꦧ꧀ꦧꦴꦗꦺꦡ ꦤ’’ꦤ꧀ꦠꦶ ꦮꦠ꧀ꦮꦴ ꦠꦕꦥꦚ꧀ꦕꦏꦏꦩ꧀ꦩꦛ꧀ꦜꦴꦤꦁ ꦄꦴꦕꦶꦏ꧀ꦑꦶꦠ꧀ꦮꦴ ꦥꦧ꧀ꦧꦴꦗꦪꦶꦁꦱꦸ. ꦄꦡ ꦤꦁ ꦥꦫꦶꦥꦸꦟ꧀ꦟꦮꦱ꧀ꦱꦁ ꦈꦥꦱꦩ꧀ꦥꦴꦢꦺꦠ꧀ꦮꦴ ꦏꦩ꧀ꦩꦛ꧀ꦜꦴꦤꦺ ꦪꦺꦴꦗꦪꦶꦁꦱꦸ.

ꦡꦺꦫꦺꦴ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦄꦴꦕꦫꦶꦪꦸꦥꦗ꧀ꦙꦴꦪꦴꦤꦁ ꦄꦮꦶꦢꦹꦫꦺ ꦜꦴꦤꦺ ꦮꦸꦠ꧀ꦠꦥ꧀ꦥꦏꦴꦫꦁ ꦑꦢꦶꦫꦮꦤꦁ ꦥꦮꦶꦱꦶꦠ꧀ꦮꦴ ꦱꦩꦟꦣꦩ꧀ꦩꦁ ꦏꦫꦺꦴꦠꦶ. ꦠꦱ꧀ꦱ ‘‘ꦄꦫꦲꦠ꧀ꦠꦁ ꦄꦥ꧀ꦥꦠ꧀ꦮꦴ ꦢꦱꦧꦭꦁ ꦮꦴ ꦨꦴꦠꦶꦏꦠ꧀ꦡꦺꦫꦁ ꦮꦴ ꦤ ꦥꦱ꧀ꦱꦶꦱ꧀ꦱꦴꦩꦷ’’ꦠꦶ ꦮꦴꦪꦩꦤ꧀ꦠꦱ꧀ꦱꦺꦮ ꦠꦪꦺꦴ ꦩꦴꦱꦴ ꦄꦠꦶꦏ꧀ꦏꦤ꧀ꦠꦴ, ꦱꦸꦑꦸꦩꦴꦭꦏꦸꦭꦥꦸꦠ꧀ꦠꦱ꧀ꦱ ꦭꦹꦑꦨꦺꦴꦗꦤꦁ ꦨꦸꦚ꧀ꦗꦤ꧀ꦠꦱ꧀ꦱ ꦕꦶꦠ꧀ꦠꦁ ꦮꦭꦷꦠꦁ ꦤꦴꦩ ꦲꦺꦴꦠꦶ, ꦏꦩ꧀ꦩꦛ꧀ꦜꦴꦤꦁ ꦮꦶꦩꦺꦴꦏ꧀ꦑꦁ ꦤ ꦒꦠꦁ. ꦱꦺꦴ ꦠꦺꦩꦴꦱꦕ꧀ꦕꦪꦺꦤ ꦥꦮꦴꦫꦺꦠ꧀ꦮꦴ ꦮꦸꦠ꧀ꦡꦮꦱ꧀ꦱꦺꦴ ꦲꦸꦠ꧀ꦮꦴ ꦠꦱ꧀ꦩꦶꦁꦪꦺꦮ ꦜꦴꦤꦺ ꦱꦩꦟꦣꦩ꧀ꦩꦁ ꦏꦫꦺꦴꦠꦶ. ꦠꦱ꧀ꦱ ꦱꦩꦟꦣꦩ꧀ꦩꦁ ꦏꦫꦺꦴꦤ꧀ꦠꦱ꧀ꦱ ꦕꦶꦠ꧀ꦠꦁ ꦌꦏꦒ꧀ꦒꦁ ꦄꦲꦺꦴꦱꦶ, ꦱꦺꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦶ.

ꦄꦡꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦱꦠ꧀ꦡꦴꦫꦁ ꦄꦴꦲ – ‘‘ꦨꦤ꧀ꦠꦺ, ꦩꦪ꧀ꦲꦁ ꦏꦶꦫ ꦏꦤꦶꦛ꧀ꦜꦨꦴꦠꦴ ꦫꦺꦮꦠꦺꦴ ꦥꦧ꧀ꦧꦗꦶꦠꦺꦴ, ꦱꦺꦴ ꦄꦨꦶꦫꦩꦺꦪ꧀ꦪ ꦮꦴ ꦤ ꦮꦴ, ꦒꦤ꧀ꦠ꧀ꦮꦴ ꦤꦁ ꦥꦱ꧀ꦱꦶꦱ꧀ꦱꦴꦩꦷ’’ꦠꦶ. ꦨꦒꦮꦴ ꦫꦺꦮꦠꦱ꧀ꦱ ꦄꦴꦫꦢ꧀ꦣꦮꦶꦥꦱ꧀ꦱꦏꦨꦴꦮꦁ ꦚꦠ꧀ꦮꦴ ꦢ꧀ꦮꦺ ꦮꦴꦫꦺ ꦥꦛꦶꦏ꧀ꦑꦶꦥꦶꦠ꧀ꦮꦴ ꦠꦠꦶꦪꦮꦴꦫꦺ ꦪꦴꦕꦶꦠꦺꦴ ꦄꦫꦲꦠ꧀ꦠꦁ ꦥꦠ꧀ꦠꦨꦴꦮꦁ ꦚꦠ꧀ꦮꦴ, ‘‘ꦱꦴꦫꦶꦥꦸꦠ꧀ꦠ, ꦄꦲꦩ꧀ꦥꦶ ꦒꦩꦶꦱ꧀ꦱꦴꦩꦶ, ꦨꦶꦏ꧀ꦑꦹꦤꦁ ꦄꦴꦫꦺꦴꦕꦺꦲꦷ’’ꦠꦶ. ꦡꦺꦫꦺꦴ ꦨꦶꦏ꧀ꦑꦸꦱꦔ꧀ꦓꦁ ꦱꦤ꧀ꦤꦶꦥꦴꦠꦺꦠ꧀ꦮꦴ, ‘‘ꦄꦴꦮꦸꦱꦺꦴ, ꦱꦠ꧀ꦡꦴ ꦕꦴꦫꦶꦏꦁ ꦕꦫꦶꦠꦸꦏꦴꦩꦺꦴ, ꦒꦤ꧀ꦠꦸꦏꦴꦩꦴ ꦄꦴꦒꦕ꧀ꦖꦤ꧀ꦠꦹ’’ꦠꦶ ꦱꦧ꧀ꦧꦺꦱꦁꦪꦺꦮ ꦄꦴꦫꦺꦴꦕꦺꦱꦶ. ꦢꦱꦧꦭꦱ꧀ꦱ ꦕꦴꦫꦶꦏꦠ꧀ꦡꦴꦪ ꦒꦩꦤꦏꦴꦭꦺ ꦎꦲꦷꦤꦏꦨꦶꦏ꧀ꦑꦹ ꦤꦴꦩ ꦄꦥ꧀ꦥꦏꦴ ꦲꦺꦴꦤ꧀ꦠꦶ, ‘‘ꦱꦠ꧀ꦡꦸ ꦱꦸꦮꦟ꧀ꦟꦮꦟ꧀ꦟꦁ ꦱꦫꦷꦫꦁ ꦥꦱ꧀ꦱꦶꦱ꧀ꦱꦴꦩ, ꦩꦣꦸꦫꦣꦩ꧀ꦩꦏꦡꦁ ꦮꦴ ꦱꦸꦟꦶꦱ꧀ꦱꦴꦩꦴ’’ꦠꦶ ꦪꦺꦨꦸꦪ꧀ꦪꦺꦤ ꦒꦤ꧀ꦠꦸꦏꦴꦩꦴꦮ ꦧꦲꦸꦏꦴ ꦲꦺꦴꦤ꧀ꦠꦶ. ꦆꦠꦶ ꦱꦠ꧀ꦡꦴ ꦩꦲꦴꦨꦶꦏ꧀ꦑꦸꦱꦔ꧀ꦓꦥꦫꦶꦮꦴꦫꦺꦴ ‘‘ꦫꦺꦮꦠꦁ ꦥꦱ꧀ꦱꦶꦱ꧀ꦱꦴꦩꦷ’’ꦠꦶ ꦤꦶꦏ꧀ꦑꦤ꧀ꦠꦺꦴ.

ꦄꦡꦺꦏꦱ꧀ꦩꦶꦁ ꦥꦢꦺꦱꦺ ꦄꦴꦤꦤ꧀ꦢꦠ꧀ꦡꦺꦫꦺꦴ ꦢ꧀ꦮꦺꦣꦴꦥꦡꦁ ꦥꦠ꧀ꦮꦴ ꦨꦒꦮꦤ꧀ꦠꦁ ꦥꦸꦕ꧀ꦖꦶ – ‘‘ꦨꦤ꧀ꦠꦺ, ꦆꦩꦱ꧀ꦩꦶꦁ ꦜꦴꦤꦺ ꦢ꧀ꦮꦺ ꦩꦒ꧀ꦒꦴ, ꦏꦠꦫꦩꦒ꧀ꦒꦺꦤ ꦱꦔ꧀ꦓꦺꦴ ꦒꦕ꧀ꦖꦠꦹ’’ꦠꦶ. ꦏꦠꦫꦩꦒ꧀ꦒꦺꦴ, ꦄꦴꦤꦤ꧀ꦢ, ꦈꦗꦸꦏꦺꦴꦠꦶ? ꦨꦤ꧀ꦠꦺ, ꦈꦗꦸꦩꦒ꧀ꦒꦺꦴ ꦠꦶꦁꦱꦪꦺꦴꦗꦤꦺꦴ ꦄꦩꦤꦸꦱ꧀ꦱꦥꦡꦺꦴ, ꦥꦫꦶꦲꦴꦫꦩꦒ꧀ꦒꦺꦴ ꦥꦤ ꦱꦛ꧀ꦜꦶꦪꦺꦴꦗꦤꦶꦏꦺꦴ ꦑꦺꦩꦺꦴ ꦱꦸꦨꦶꦏ꧀ꦑꦺꦴꦠꦶ. ꦄꦴꦤꦤ꧀ꦢ, ꦱꦷꦮꦭꦶ ꦄꦩ꧀ꦲꦺꦲꦶ ꦱꦢ꧀ꦣꦶꦁ ꦄꦴꦒꦠꦺꦴꦠꦶ? ꦄꦴꦩ, ꦨꦤ꧀ꦠꦺ, ꦄꦴꦒꦠꦺꦴꦠꦶ. ꦠꦺꦤ ꦲꦶ ꦱꦔ꧀ꦓꦺꦴ ꦈꦗꦸꦩꦒ꧀ꦒꦩꦺꦮ ꦒꦟ꧀ꦲꦠꦸ, ꦱꦷꦮꦭꦶꦱ꧀ꦱ ꦥꦸꦚ꧀ꦚꦁ ꦮꦷꦩꦁꦱꦶꦱ꧀ꦱꦴꦩꦴꦠꦶ. ꦱꦠ꧀ꦡꦴ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦴꦫꦺꦴ ꦱꦷꦮꦭꦶꦠ꧀ꦡꦺꦫꦱ꧀ꦱ ꦥꦸꦚ꧀ꦚꦮꦷꦩꦁꦱꦤꦠ꧀ꦡꦁ ꦄꦛꦮꦶꦩꦒ꧀ꦒꦁ ꦄꦨꦶꦫꦸꦲꦶ. ꦩꦒ꧀ꦒꦁ ꦄꦨꦶꦫꦸꦲꦤꦛ꧀ꦜꦴꦤꦠꦺꦴ ꦥꦛ꧀ꦜꦴꦪ ꦢꦺꦮꦱꦔ꧀ꦓꦺꦴ ꦪꦺꦴꦗꦤꦺ ꦪꦺꦴꦗꦤꦺ ꦜꦴꦤꦺ ꦤꦒꦫꦁ ꦩꦴꦥꦺꦠ꧀ꦮꦴ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦮꦱꦤꦠ꧀ꦡꦴꦪ ꦮꦶꦲꦴꦫꦺ ꦥꦛꦶꦪꦴꦢꦺꦱꦶ. ꦢꦺꦮꦥꦸꦠ꧀ꦠꦴ ꦫꦚ꧀ꦚꦴ ꦥꦺꦱꦶꦠꦏꦩ꧀ꦩꦏꦴꦫꦴ ꦮꦶꦪ ꦲꦸꦠ꧀ꦮꦴ ꦪꦴꦒꦸꦑꦗ꧀ꦗꦏꦴꦢꦷꦤꦶ ꦒꦲꦺꦠ꧀ꦮꦴ ‘‘ꦏꦲꦁ ꦄꦪ꧀ꦪꦺꦴ ꦱꦷꦮꦭꦶ, ꦏꦲꦁ ꦄꦪ꧀ꦪꦺꦴ ꦱꦷꦮꦭꦷ’’ꦠꦶ ꦥꦸꦕ꧀ꦖꦤ꧀ꦠꦴ ꦒꦕ꧀ꦖꦤ꧀ꦠꦶ. ꦡꦺꦫꦺꦴ ꦠꦁ ꦱꦏ꧀ꦏꦴꦫꦱꦩ꧀ꦩꦴꦤꦁ ꦒꦟ꧀ꦲꦴꦥꦺꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦕ꧀ꦖꦠꦶ. ꦱꦠ꧀ꦡꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦥꦫꦶꦨꦸꦚ꧀ꦗꦶ.

ꦆꦩꦶꦤꦴꦮ ꦤꦶꦪꦴꦩꦺꦤ ꦱꦠ꧀ꦡꦴ ꦱꦏ꧀ꦏꦴꦫꦱꦩ꧀ꦩꦴꦤꦁ ꦄꦤꦸꦨꦮꦤ꧀ꦠꦺꦴ ꦢꦺꦮꦱꦶꦏꦁ ꦪꦺꦴꦗꦤꦥꦫꦩꦁ ꦒꦤ꧀ꦠ꧀ꦮꦴ ꦠꦶꦁꦱꦪꦺꦴꦗꦤꦶꦏꦁ ꦏꦤ꧀ꦠꦴꦫꦁ ꦄꦠꦶꦏ꧀ꦏꦩ꧀ꦩ ꦑꦢꦶꦫꦮꦤꦶꦪꦠ꧀ꦡꦺꦫꦱ꧀ꦱ ꦱꦨꦴꦒꦛ꧀ꦜꦴꦤꦁ ꦥꦠ꧀ꦠꦺꦴ. ꦡꦺꦫꦺꦴ ꦱꦠ꧀ꦡꦸ ꦄꦴꦒꦩꦤꦁ ꦚꦠ꧀ꦮꦴ ꦄꦠ꧀ꦠꦤꦺꦴ ꦮꦱꦤꦛ꧀ꦜꦴꦤꦺ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦥꦲꦺꦴꦤꦏꦮꦶꦲꦴꦫꦺ ꦢꦱꦧꦭꦱ꧀ꦱ ꦒꦤ꧀ꦣꦏꦸꦛꦶꦁ ꦫꦠ꧀ꦠꦶꦛ꧀ꦜꦴꦤꦢꦶꦮꦴꦛ꧀ꦜꦴꦤꦴꦢꦷꦤꦶ ꦕ ꦆꦢ꧀ꦣꦶꦪꦴ ꦩꦴꦥꦺꦠ꧀ꦮꦴ ꦠꦡꦴꦒꦠꦱ꧀ꦱ ꦥꦕ꧀ꦕꦸꦒ꧀ꦒꦩꦤꦁ ꦒꦠꦺꦴ. ꦱꦠ꧀ꦡꦴ ꦄꦭꦔ꧀ꦏꦠꦥꦛꦶꦪꦠ꧀ꦠꦺꦤ ꦩꦒ꧀ꦒꦺꦤ ꦮꦶꦲꦴꦫꦁ ꦥꦴꦮꦶꦱꦶ. ꦄꦡ ꦠꦡꦴꦒꦠꦺ ꦒꦤ꧀ꦣꦏꦸꦛꦶꦁ ꦥꦮꦶꦛ꧀ꦜꦺ ꦨꦶꦏ꧀ꦑꦹ ꦮꦱ꧀ꦱꦒ꧀ꦒꦺꦤ ꦥꦠ꧀ꦠꦱꦺꦤꦴꦱꦤꦴꦤꦶ ꦥꦮꦶꦱꦶꦁꦱꦸ. ꦢꦺꦮꦠꦴ ‘‘ꦄꦏꦴꦭꦺꦴ ꦄꦴꦲꦴꦫꦱ꧀ꦱꦴ’’ꦠꦶ ꦄꦛ꧀ꦜꦮꦶꦣꦁ ꦥꦴꦤꦏꦁ ꦄꦴꦲꦫꦶꦁꦱꦸ. ꦱꦠ꧀ꦡꦴ ꦱꦔ꧀ꦓꦺꦤ ꦱꦢ꧀ꦣꦶꦁ ꦥꦴꦤꦏꦁ ꦥꦶꦮꦶ. ꦆꦩꦶꦤꦴꦮ ꦤꦶꦪꦴꦩꦺꦤ ꦠꦡꦴꦒꦠꦱ꧀ꦱ ꦱꦏ꧀ꦏꦴꦫꦱꦩ꧀ꦩꦴꦤꦁ ꦄꦤꦸꦨꦮꦤ꧀ꦠꦱ꧀ꦱꦺꦮ ꦄꦢ꧀ꦣꦩꦴꦱꦺꦴ ꦄꦠꦶꦏ꧀ꦏꦤ꧀ꦠꦺꦴ.

ꦄꦡꦺꦏꦕ꧀ꦕꦺ ꦈꦏ꧀ꦏꦟ꧀ꦜꦶꦠꦨꦶꦏ꧀ꦑꦹ ꦌꦏꦱ꧀ꦩꦶꦁ ꦜꦴꦤꦺ ꦤꦶꦱꦷꦢꦶꦠ꧀ꦮꦴ ꦏꦡꦁ ꦈꦥ꧀ꦥꦴꦢꦪꦶꦁꦱꦸ ‘‘ꦱꦠ꧀ꦡꦴ ꦢꦱꦧꦭꦺꦴ ‘ꦩꦪ꧀ꦲꦁ ꦄꦒ꧀ꦒꦱꦴꦮꦏꦱ꧀ꦱ ꦏꦤꦶꦛ꧀ꦜꦨꦴꦠꦴ’ꦠꦶ ꦮꦠ꧀ꦮꦴ ꦌꦮꦫꦹꦥꦁ ꦤꦮꦏꦩ꧀ꦩꦶꦏꦨꦶꦏ꧀ꦑꦸꦁ ꦥꦱ꧀ꦱꦶꦠꦸꦁ ꦄꦴꦒꦠꦺꦴ, ꦆꦩꦱ꧀ꦱ ꦮꦶꦲꦴꦫꦱ꧀ꦱ ꦱꦤ꧀ꦠꦶꦏꦺ ꦗꦺꦠꦮꦤꦩꦲꦴꦮꦶꦲꦴꦫꦺꦴ ꦮꦴ ꦮꦺꦭ꦳ꦸꦮꦤꦮꦶꦲꦴꦫꦴꦢꦪꦺꦴ ꦮꦴ ꦏꦶꦁ ꦏꦫꦶꦱ꧀ꦱꦤ꧀ꦠꦶ. ꦄꦪꦩ꧀ꦥꦶ ꦨꦶꦏ꧀ꦑꦸ ꦌꦮꦫꦹꦥꦱ꧀ꦱ ꦤꦮꦏꦩ꧀ꦩꦱ꧀ꦱ ꦏꦴꦫꦏꦺꦴ, ꦏꦶꦁ ꦤꦴꦩ ꦱꦩꦟꦣꦩ꧀ꦩꦁ ꦏꦫꦶꦱ꧀ꦱꦠꦷ’’ꦠꦶ? ꦄꦡ ꦱꦠ꧀ꦡꦴ ꦕꦶꦤ꧀ꦠꦺꦱꦶ – ‘‘ꦩꦪꦶ ꦕꦶꦫꦁ ꦮꦱꦤ꧀ꦠꦺ ꦆꦢꦁ ꦜꦴꦤꦁ ꦄꦴꦏꦶꦟ꧀ꦟꦁ ꦨꦮꦶꦱ꧀ꦱꦠꦶ, ꦄꦴꦫꦚ꧀ꦚꦏꦴ ꦨꦶꦏ꧀ꦑꦹ ꦤꦴꦩ ꦥꦮꦶꦮꦺꦏꦠ꧀ꦡꦶꦏꦴ ꦲꦺꦴꦤ꧀ꦠꦶ, ꦫꦺꦮꦠꦱ꧀ꦱ ꦄꦦꦴꦱꦸꦮꦶꦲꦴꦫꦺꦴ ꦨꦮꦶꦱ꧀ꦱꦠꦷ’’ꦠꦶ ꦠꦠꦺꦴ ꦫꦺꦮꦠꦱ꧀ꦱ ꦢꦶꦮꦴꦛ꧀ꦜꦴꦤꦁ ꦒꦠꦺꦴ. ꦡꦺꦫꦺꦴ ꦌꦏꦏꦺꦴꦮ ꦕꦔ꧀ꦏꦩꦤꦏꦺꦴꦛꦶꦪꦁ ꦄꦴꦭꦩ꧀ꦧꦤꦦꦭꦏꦁ ꦤꦶꦱ꧀ꦱꦴꦪ ꦥꦴꦱꦴꦟꦦꦭꦏꦺ ꦤꦶꦱꦶꦤ꧀ꦤꦺꦴ ꦱꦠ꧀ꦡꦴꦫꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ꦥꦕ꧀ꦕꦸꦒ꧀ꦒꦤ꧀ꦠ꧀ꦮꦴ ꦮꦤ꧀ꦢꦶ.

ꦄꦡ ꦤꦁ ꦱꦠ꧀ꦡꦴ ꦥꦸꦕ꧀ꦖꦶ – ‘‘ꦫꦺꦮꦠ, ꦆꦩꦁ ꦮꦴꦭ꦳ꦩꦶꦒꦛ꧀ꦜꦴꦤꦁ, ꦕꦟ꧀ꦝꦴꦤꦁ ꦲꦠ꧀ꦡꦶꦄꦱ꧀ꦱꦴꦢꦷꦤꦁ ꦱꦢ꧀ꦢꦁ ꦱꦸꦠ꧀ꦮꦴ ꦏꦶꦤ꧀ꦠꦶ ꦏꦫꦺꦴꦱꦷ’’ꦠꦶ? ꦠꦺꦱꦁ ꦩꦺ, ꦨꦤ꧀ꦠꦺ, ꦱꦢ꧀ꦢꦁ ꦱꦸꦟꦠꦺꦴ ꦄꦫꦚ꧀ꦚꦫꦠꦶ ꦤꦴꦩ ꦈꦥ꧀ꦥꦗ꧀ꦗꦠꦷꦠꦶ. ꦱꦠ꧀ꦡꦴ ꦠꦱ꧀ꦩꦶꦁ ꦜꦴꦤꦺ ꦫꦺꦮꦠꦠ꧀ꦡꦺꦫꦱ꧀ꦱ ꦥꦚ꧀ꦕꦲꦶ ꦒꦴꦡꦴꦱꦠꦺꦲꦶ ꦄꦫꦚ꧀ꦚꦺ ꦤꦶꦮꦴꦱꦴꦤꦶꦱꦁꦱꦁ ꦤꦴꦩ ꦏꦡꦺꦠ꧀ꦮꦴ ꦥꦸꦤꦢꦶꦮꦱꦺ ꦄꦮꦶꦢꦹꦫꦺ ꦜꦴꦤꦺ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦫꦺꦮꦠꦠ꧀ꦡꦺꦫꦁ ꦤꦶꦮꦠ꧀ꦠꦺꦠ꧀ꦮꦴ ꦪꦺꦲꦶ ꦨꦶꦏ꧀ꦑꦹꦲꦶ ꦡꦺꦫꦱ꧀ꦱ ꦄꦮꦟ꧀ꦟꦺꦴ ꦏꦡꦶꦠꦺꦴ, ꦠꦺꦱꦁ ꦏꦠ꧀ꦠꦫꦪꦛ꧀ꦜꦶꦈꦥꦴꦲꦤꦴꦠꦺꦭꦤꦴꦭ꦳ꦶꦖꦠ꧀ꦠꦴꦤꦁ ꦥꦩꦸꦱ꧀ꦱꦤꦨꦴꦮꦁ ꦄꦏꦴꦱꦶ. ꦠꦺ ꦄꦠ꧀ꦠꦤꦺꦴ ꦥꦫꦶꦏ꧀ꦑꦴꦫꦠ꧀ꦡꦴꦪ ꦤꦶꦮꦠ꧀ꦠꦴ ꦄꦴꦒꦠꦩꦒ꧀ꦒꦺꦤꦺꦮ ꦒꦕ꧀ꦖꦤ꧀ꦠꦴꦥꦶ ꦠꦁ ꦜꦴꦤꦁ ꦱꦭ꧀ꦭꦏ꧀ꦑꦺꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ. ꦥꦜꦩꦁ ꦲꦶ ꦠꦺ ꦄꦭꦔ꧀ꦏꦠꦥꦛꦶꦪꦠ꧀ꦠꦺꦤ ꦩꦒ꧀ꦒꦺꦤ ꦒꦤ꧀ꦠ꧀ꦮꦴ ꦠꦁꦢꦶꦮꦱꦁ ꦥꦤ ꦮꦶꦱꦩꦩꦒ꧀ꦒꦺꦤ ꦒꦕ꧀ꦖꦤ꧀ꦠꦴ ꦠꦱ꧀ꦩꦶꦁ ꦠꦱ꧀ꦩꦶꦁ ꦜꦴꦤꦺ ꦈꦏ꧀ꦏꦸꦛꦶꦏꦁ ꦤꦶꦱꦷꦢꦤ꧀ꦠꦶ, ꦗꦴꦟꦸꦏꦺꦤ ꦒꦕ꧀ꦖꦤ꧀ꦠꦶ. ꦠꦺ ꦒꦸꦩ꧀ꦧꦺ ꦕ ꦒꦕ꧀ꦖꦺ ꦕ ꦏꦟ꧀ꦛꦏꦺ ꦕ ꦩꦢ꧀ꦢꦤ꧀ꦠꦴ ꦄꦠ꧀ꦠꦤꦺꦴ ꦮꦱꦶꦠꦱꦨꦴꦒꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦠꦱ꧀ꦩꦶꦁ ꦠꦱ꧀ꦩꦶꦁ ꦑꦢꦶꦫꦑꦴꦟꦸꦏꦺ ꦄꦠ꧀ꦠꦤꦺꦴ ꦖꦠ꧀ꦠꦁ ꦱꦚ꧀ꦗꦴꦤꦤ꧀ꦠꦶ, ꦈꦥꦴꦲꦤꦁ ꦏꦠ꧀ꦠꦫꦪꦛ꧀ꦜꦶꦁ ꦠꦺꦭꦤꦴꦭ꦳ꦶꦁ ꦱꦚ꧀ꦗꦴꦤꦤ꧀ꦠꦶ. ꦠꦺ ꦠꦱ꧀ꦩꦶꦁ ꦱꦩꦪꦺ ‘‘ꦆꦢ꧀ꦣꦶꦩꦴ ꦄꦪꦁ ꦨꦶꦏ꧀ꦑꦹ’’ꦠꦶ ꦚꦠ꧀ꦮꦴ ꦄꦠ꧀ꦠꦤꦺꦴ ꦥꦫꦶꦏ꧀ꦑꦴꦫꦺ ꦄꦴꦢꦴꦪ ‘‘ꦢꦱꦧꦭꦱ꧀ꦱ ꦥꦛꦶꦪꦠ꧀ꦠꦱꦏ꧀ꦏꦴꦫꦺꦴ ꦤꦴꦩ ꦌꦮꦫꦹꦥꦺꦴ ꦲꦺꦴꦠꦷ’’ꦠꦶ ꦮꦢꦤ꧀ꦠꦴ ꦄꦴꦒꦩꦁꦱꦸ.

ꦥꦸꦫꦠꦺꦴ ꦒꦠꦨꦶꦏ꧀ꦑꦹ, ꦮꦶꦱꦴꦑꦴ ꦈꦥꦴꦱꦶꦏꦴ, ꦄꦠ꧀ꦠꦤꦺꦴ ꦒꦺꦲꦺ ꦤꦶꦱꦶꦤ꧀ꦤꦏꦴꦭꦺ ꦥꦸꦕ꧀ꦖꦠꦶ – ‘‘ꦩꦤꦴꦥꦁ ꦤꦸ ꦑꦺꦴ, ꦨꦤ꧀ꦠꦺ, ꦫꦺꦮꦠꦠ꧀ꦡꦺꦫꦱ꧀ꦱ ꦮꦱꦤꦛ꧀ꦜꦴꦤ’’ꦤ꧀ꦠꦶ? ꦩꦤꦴꦥꦁ ꦈꦥꦴꦱꦶꦏꦺ ꦤꦤ꧀ꦢꦤꦮꦤꦕꦶꦠ꧀ꦠꦭꦠꦴꦢꦶꦥꦛꦶꦨꦴꦒꦁ ꦠꦁ ꦱꦺꦤꦴꦱꦤꦤ꧀ꦠꦶ. ꦄꦡ ꦤꦺꦱꦁ ꦱꦧ꧀ꦧꦥꦕ꧀ꦖꦠꦺꦴ ꦄꦴꦒꦠꦨꦶꦏ꧀ꦑꦹ ꦥꦸꦕ꧀ꦖꦶ – ‘‘ꦩꦤꦴꦥꦁ, ꦄꦪ꧀ꦪꦴ, ꦫꦺꦮꦠꦠ꧀ꦡꦺꦫꦱ꧀ꦱ ꦮꦱꦤꦛ꧀ꦜꦴꦤ’’ꦤ꧀ꦠꦶ. ꦩꦴ ꦥꦸꦕ꧀ꦖ ꦈꦥꦴꦱꦶꦏꦺ, ꦏꦡꦺꦠꦸꦁ ꦄꦪꦸꦠ꧀ꦠꦛ꧀ꦜꦴꦤꦩꦺꦠꦁ, ꦈꦗ꧀ꦗꦔ꧀ꦒꦭꦁ ꦱꦏ꧀ꦑꦫꦥꦴꦱꦴꦟꦮꦶꦱꦩꦁ ꦑꦢꦶꦫꦮꦤꦁ ꦌꦠꦁ, ꦠꦠ꧀ꦡ ꦱꦺꦴ ꦨꦶꦏ꧀ꦑꦸ ꦮꦶꦲꦫꦠꦷꦠꦶ. ꦮꦶꦱꦴꦑꦴ, ꦥꦸꦫꦶꦩꦴꦤꦚ꧀ꦕ ꦥꦕ꧀ꦖꦶꦩꦴꦤꦚ꧀ꦕ ꦨꦶꦏ꧀ꦑꦹꦤꦁ ꦏꦡꦁ ꦱꦸꦠ꧀ꦮꦴ ‘‘ꦏꦺꦱꦁ ꦤꦸ ꦑꦺꦴ ꦏꦡꦴ ꦱꦕ꧀ꦕꦴ’’ꦠꦶ ꦥꦕ꧀ꦖꦴꦨꦠ꧀ꦠꦺ ꦒꦤ꧀ꦣꦩꦴꦭꦁ ꦄꦴꦢꦴꦪ ꦢꦱꦧꦭꦱ꧀ꦱ ꦈꦥꦛ꧀ꦜꦴꦤꦁ ꦒꦤ꧀ꦠ꧀ꦮꦴ, ꦮꦤ꧀ꦢꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦱꦠ꧀ꦡꦴꦫꦁ ꦥꦸꦕ꧀ꦖꦶ – ‘‘ꦨꦤ꧀ꦠꦺ, ꦫꦺꦮꦠꦠ꧀ꦡꦺꦫꦱ꧀ꦱ ꦮꦱꦤꦛ꧀ꦜꦴꦤꦁ ꦌꦏꦕ꧀ꦕꦺ, ꦄꦪ꧀ꦪꦴ, ꦮꦟ꧀ꦟꦺꦤ꧀ꦠꦶ, ꦌꦏꦕ꧀ꦕꦺ ꦤꦶꦤ꧀ꦢꦤ꧀ꦠꦶ, ꦏꦶꦁ ꦤꦴꦩꦺꦠꦁ, ꦨꦤ꧀ꦠꦺ’’ꦠꦶ? ꦮꦶꦱꦴꦑꦺ ꦫꦩꦟꦷꦪꦁ ꦮꦴ ꦲꦺꦴꦠꦸ ꦩꦴ ꦮꦴ, ꦪꦱ꧀ꦩꦶꦁ ꦜꦴꦤꦺ ꦄꦫꦶꦪꦴꦤꦁ ꦕꦶꦠ꧀ꦠꦁ ꦫꦩꦠꦶ, ꦠꦢꦺꦮ ꦜꦴꦤꦁ ꦫꦩꦟꦷꦪꦁ ꦤꦴꦩꦴꦠꦶ ꦮꦠ꧀ꦮꦴ ꦆꦩꦁ ꦒꦴꦡꦩꦴꦲ –

‘‘ꦒꦴꦩꦺ ꦮꦴ ꦪꦢꦶ ꦮꦴꦫꦚ꧀ꦚꦺ, ꦤꦶꦤ꧀ꦤꦺ ꦮꦴ ꦪꦢꦶ ꦮꦴ ꦡꦭꦺ;

ꦪꦠ꧀ꦡ ꦄꦫꦲꦤ꧀ꦠꦺꦴ ꦮꦶꦲꦫꦤ꧀ꦠꦶ, ꦠꦁ ꦨꦹꦩꦶꦫꦴꦩꦟꦺꦪ꧀ꦪꦏ’’ꦤ꧀ꦠꦶ. (ꦣ. ꦥ. ꧙꧘; ꦱꦁ. ꦤꦶ. ꧑.꧒꧖꧑);

ꦄꦡ ꦱꦠ꧀ꦡꦴ ꦄꦥꦫꦨꦴꦒꦺ ꦗꦺꦠꦮꦤꦩꦲꦴꦮꦶꦲꦴꦫꦺ ꦄꦫꦶꦪꦒꦟꦩꦗ꧀ꦙꦺ ꦤꦶꦱꦶꦤ꧀ꦤꦺꦴ ꦡꦺꦫꦁ ꦄꦴꦫꦚ꧀ꦚꦏꦴꦤꦁ ꦨꦶꦏ꧀ꦑꦹꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦱꦷꦠꦶ.

ꦏꦔ꧀ꦑꦴꦫꦺꦮꦠꦠ꧀ꦡꦺꦫꦮꦠ꧀ꦡꦸ

꧒꧐꧔. ꦖꦛ꧀ꦜꦺ ꦙꦴꦪꦷꦤꦤ꧀ꦠꦶ ꦙꦴꦤꦭꦴꦨꦷꦤꦁ ꦙꦴꦤꦴꦨꦶꦫꦠꦴꦤꦁ. ꦱꦺꦴ ꦏꦶꦫ ꦡꦺꦫꦺꦴ ꦪꦴ ꦙꦴꦤꦱꦩꦴꦥꦠ꧀ꦠꦶꦪꦺꦴ ꦢꦱꦧꦭꦺꦴ ꦱꦩꦴꦥꦗ꧀ꦗꦠꦶ, ꦠꦠꦺꦴ ꦄꦥ꧀ꦥꦠꦫꦁ ꦜꦥꦺꦠ꧀ꦮꦴ ꦧꦲꦸꦠꦫꦴ ꦱꦩꦴꦥꦗ꧀ꦗꦠꦶ. ꦠꦱ꧀ꦩꦴ ꦙꦴꦪꦷꦤꦁ ꦄꦒ꧀ꦒꦺꦴ ꦤꦴꦩ ꦗꦴꦠꦺꦴ. ꦏꦔ꧀ꦑꦴꦪꦤꦨꦴꦮꦺꦤ ꦏꦔ꧀ꦑꦴꦫꦺꦮꦠꦺꦴꦠꦶ ꦮꦸꦕ꧀ꦕꦠꦶ. ꦏꦔ꧀ꦑꦴ ꦤꦴꦩ ꦏꦸꦏ꧀ꦏꦸꦕ꧀ꦕꦁ, ꦏꦸꦏ꧀ꦏꦸꦕ꧀ꦕꦏꦺꦴꦠꦶ ꦄꦠ꧀ꦡꦺꦴ. ꦏꦶꦁ ꦥꦤ ꦄꦚ꧀ꦚꦺ ꦏꦸꦏ꧀ꦏꦸꦕ꧀ꦕꦏꦴ ꦤꦠ꧀ꦡꦷꦠꦶ? ꦄꦠ꧀ꦡꦶ, ꦄꦪꦁ ꦥꦤ ꦡꦺꦫꦺꦴ ꦏꦥ꧀ꦥꦶꦪꦺꦥꦶ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦴꦢꦺꦱꦶ. ꦠꦺꦤꦱ꧀ꦱ ꦏꦸꦏ꧀ꦏꦸꦕ꧀ꦕꦏꦠꦴ ꦄꦠꦶꦥꦴꦏꦛꦴ ꦗꦴꦠꦴꦠꦶ ꦏꦔ꧀ꦑꦴꦫꦺꦮꦠꦺꦴꦠ꧀ꦮꦺꦮ ꦱꦔ꧀ꦑꦁ ꦒꦠꦺꦴ.

ꦠꦱ꧀ꦱ ꦥꦚ꧀ꦲꦏꦩ꧀ꦩꦺ ꦄꦪꦩꦤꦸꦥꦸꦧ꧀ꦧꦶꦏꦡꦴ – ꦄꦪꦁ ꦏꦶꦫ ꦥꦢꦸꦩꦸꦠ꧀ꦠꦫꦧꦸꦢ꧀ꦣꦏꦴꦭꦺ ꦥꦸꦫꦶꦩꦤꦪꦺꦤꦺꦮ ꦩꦲꦴꦗꦤꦺꦤ ꦱꦢ꧀ꦣꦶꦁ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦥꦫꦶꦱꦥꦫꦶꦪꦤ꧀ꦠꦺ ꦜꦶꦠꦺꦴ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦱꦠ꧀ꦡꦴꦫꦁ ꦌꦏꦁ ꦨꦶꦏ꧀ꦑꦸꦁ ꦙꦴꦤꦴꦨꦶꦫꦠꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦤ꧀ꦠꦁ ꦢꦶꦱ꧀ꦮꦴ ‘‘ꦩꦪꦴꦥꦶ ꦄꦤꦴꦒꦠꦺ ꦌꦮꦫꦹꦥꦺꦤ ꦨꦮꦶꦠꦸꦁ ꦮꦛ꧀ꦛꦠꦷ’’ꦠꦶ ꦢꦺꦱꦤꦴꦮꦱꦴꦤꦺ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦠ꧀ꦮꦴ ꦥꦸꦫꦶꦩꦤꦪꦺꦤꦺꦮ ꦱꦠ꧀ꦠꦴꦲꦁ ꦩꦲꦴꦱꦏ꧀ꦏꦴꦫꦁ ꦏꦠ꧀ꦮꦴ ꦨꦒꦮꦤ꧀ꦠꦁ ꦄꦴꦲ – ‘‘ꦨꦤ꧀ꦠꦺ, ꦄꦲꦁ ꦆꦩꦶꦤꦴ ꦄꦣꦶꦏꦴꦫꦏꦩ꧀ꦩꦺꦤ ꦤ ꦄꦚ꧀ꦚꦁ ꦱꦩ꧀ꦥꦠ꧀ꦠꦶꦁ ꦥꦠ꧀ꦡꦺꦩꦶ, ꦪꦡꦴ ꦥꦤ ꦱꦺꦴ ꦠꦸꦩ꧀ꦲꦺꦲꦶ ꦆꦠꦺꦴ ꦱꦠ꧀ꦠꦢꦶꦮꦱꦩꦠ꧀ꦡꦏꦺ ꦨꦶꦏ꧀ꦑꦸ ꦙꦴꦪꦷꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦶꦠꦺꦴ, ꦌꦮꦁ ꦄꦲꦩ꧀ꦥꦶ ꦄꦤꦴꦒꦠꦺ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦙꦴꦪꦷꦤꦁ ꦄꦒ꧀ꦒꦺꦴ ꦨꦮꦺꦪ꧀ꦪ’’ꦤ꧀ꦠꦶ ꦥꦠ꧀ꦡꦤꦁ ꦄꦏꦴꦱꦶ. ꦱꦠ꧀ꦡꦴ ꦄꦤꦴꦒꦠꦁ ꦎꦭꦺꦴꦏꦺꦠ꧀ꦮꦴ ꦱꦩꦶꦗ꧀ꦙꦤꦨꦴꦮꦁ ꦢꦶꦱ꧀ꦮꦴ ‘‘ꦄꦤꦴꦒꦠꦺ ꦏꦥ꧀ꦥꦱꦠꦱꦲꦱ꧀ꦱꦴꦮꦱꦴꦤꦺ ꦒꦺꦴꦠꦩꦺꦴ ꦤꦴꦩ ꦧꦸꦢ꧀ꦣꦺꦴ ꦈꦥ꧀ꦥꦗ꧀ꦗꦶꦱ꧀ꦱꦠꦶ, ꦠꦱ꧀ꦱ ꦱꦴꦱꦤꦺ ꦠ꧀ꦮꦁ ꦙꦴꦪꦷꦤꦁ ꦄꦒ꧀ꦒꦺꦴ ꦨꦮꦶꦱ꧀ꦱꦱꦷ’’ꦠꦶ ꦧ꧀ꦪꦴꦏꦫꦶꦠ꧀ꦮꦴ ꦥꦏ꧀ꦏꦴꦩꦶ.

ꦱꦺꦴ ꦪꦴꦮꦗꦷꦮꦁ ꦏꦭ꧀ꦪꦴꦟꦏꦩ꧀ꦩꦁ ꦏꦠ꧀ꦮꦴ ꦏꦥ꧀ꦥꦱꦠꦱꦲꦱ꧀ꦱꦁ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦶꦠ꧀ꦮꦴ ꦄꦩ꧀ꦲꦴꦏꦁ ꦨꦒꦮꦠꦺꦴ ꦏꦴꦭꦺ ꦱꦴꦮꦠ꧀ꦡꦶꦤꦒꦫꦺ ꦩꦲꦴꦨꦺꦴꦒꦏꦸꦭꦺ ꦤꦶꦧ꧀ꦧꦠ꧀ꦠꦺꦴ ꦥꦕ꧀ꦖꦴꦨꦠ꧀ꦠꦁ ꦣꦩ꧀ꦩꦱ꧀ꦱꦮꦤꦠ꧀ꦡꦁ ꦒꦕ꧀ꦖꦤ꧀ꦠꦺꦤ ꦩꦲꦴꦗꦤꦺꦤ ꦱꦢ꧀ꦣꦶꦁ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦥꦫꦶꦱꦥꦫꦶꦪꦤ꧀ꦠꦺ ꦜꦶꦠꦺꦴ ꦢꦱꦧꦭꦱ꧀ꦱ ꦣꦩ꧀ꦩꦏꦡꦁ ꦱꦸꦠ꧀ꦮꦴ ꦱꦢ꧀ꦣꦁ ꦥꦛꦶꦭꦨꦶꦠ꧀ꦮꦴ ꦥꦧ꧀ꦧꦗꦶꦠꦺꦴ ꦈꦥꦱꦩ꧀ꦥꦢꦁ ꦭꦨꦶꦠ꧀ꦮꦴ ꦏꦩ꧀ꦩꦛ꧀ꦜꦴꦤꦁ ꦏꦡꦴꦥꦺꦠ꧀ꦮꦴ ꦙꦴꦤꦥꦫꦶꦏꦩ꧀ꦩꦁ ꦏꦫꦺꦴꦤ꧀ꦠꦺꦴ ꦙꦴꦤꦭꦴꦨꦷ ꦲꦸꦠ꧀ꦮꦴ ꦙꦴꦤꦩꦺꦮ ꦥꦴꦢꦏꦁ ꦏꦠ꧀ꦮꦴ ꦄꦫꦲꦠ꧀ꦠꦦꦭꦁ ꦥꦴꦥꦸꦟꦶ. ꦱꦺꦴ ꦢꦱꦧꦭꦺꦤ ꦱꦩꦴꦥꦗ꧀ꦗꦶꦠꦧ꧀ꦧꦱꦩꦴꦥꦠ꧀ꦠꦷꦤꦁ ꦄꦥ꧀ꦥꦠꦫꦴ ꦜꦥꦺꦠ꧀ꦮꦴ ꦧꦲꦸꦠꦫꦴ ꦱꦩꦴꦥꦗ꧀ꦗꦤ꧀ꦠꦺꦴ ꦄꦲꦺꦴꦫꦠ꧀ꦠꦁ ꦙꦴꦤꦺꦱꦸ ꦕꦶꦟ꧀ꦟꦮꦱꦷ ꦄꦲꦺꦴꦱꦶ. ꦄꦡ ꦤꦁ ꦄꦥꦫꦨꦴꦒꦺ ꦱꦠ꧀ꦡꦴ ꦆꦩꦁ ꦒꦸꦟꦁ ꦒꦲꦺꦠ꧀ꦮꦴ ꦙꦴꦪꦷꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦱꦶ. ‘‘ꦄꦏꦥ꧀ꦥꦶꦪꦺꦴ, ꦄꦴꦮꦸꦱꦺꦴ ꦒꦸꦭ꦳ꦺꦴ, ꦄꦏꦥ꧀ꦥꦶꦪꦴ ꦩꦸꦒ꧀ꦒꦴ’’ꦠꦶ (ꦩꦲꦴꦮ. ꧒꧗꧒) ꦌꦮꦁ ꦥꦤ ꦏꦥ꧀ꦥꦶꦪꦺꦱ꧀ꦮꦺꦮ ꦮꦠ꧀ꦡꦹꦱꦸ ꦏꦸꦏ꧀ꦏꦸꦕ꧀ꦕꦱ꧀ꦱ ꦈꦥ꧀ꦥꦴꦢꦶꦠꦠꦴꦪ ꦏꦸꦏ꧀ꦏꦸꦕ꧀ꦕꦱꦔ꧀ꦑꦴꦠꦴꦪ ꦏꦔ꧀ꦑꦴꦪ ꦨꦴꦮꦺꦤ ꦏꦔ꧀ꦑꦴꦫꦺꦮꦠꦺꦴꦠꦶ ꦱꦔ꧀ꦑꦁ ꦒꦠꦺꦴꦠꦶ.

ꦱꦺꦴꦟꦏꦺꦴꦭ꦳ꦶꦮꦶꦱꦠ꧀ꦡꦺꦫꦮꦠ꧀ꦡꦸ

꧒꧐꧕. ꦱꦠ꧀ꦠꦩꦺ ꦄꦴꦫꦢ꧀ꦣꦮꦷꦫꦶꦪꦴꦤꦤ꧀ꦠꦶ ꦥꦒ꧀ꦒꦲꦶꦠꦮꦷꦫꦶꦪꦴꦤꦁ ꦥꦫꦶꦥꦸꦟ꧀ꦟꦮꦷꦫꦶꦪꦴꦤꦁ. ꦱꦺꦴꦟꦺꦴ ꦏꦺꦴꦭ꦳ꦶꦮꦶꦱꦺꦴꦠꦶ ꦱꦺꦴꦟꦺꦴꦠꦶ ꦠꦱ꧀ꦱ ꦤꦴꦩꦁ, ꦏꦺꦴꦭ꦳ꦶꦮꦶꦱꦺꦴꦠꦶ ꦒꦺꦴꦠ꧀ꦠꦁ. ꦏꦺꦴꦛꦶꦮꦺꦱ꧀ꦱꦺꦴꦠꦶ ꦮꦴ ꦄꦠ꧀ꦡꦺꦴ, ꦆꦱ꧀ꦱꦫꦶꦪꦺꦤ ꦏꦺꦴꦛꦶꦥ꧀ꦥꦠ꧀ꦠꦱ꧀ꦱ ꦮꦺꦱ꧀ꦱꦏꦸꦭꦱ꧀ꦱ ꦢꦴꦫꦏꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦪꦱ꧀ꦩꦴ ꦥꦤ ꦄꦚ꧀ꦚꦺꦱꦁ ꦨꦶꦏ꧀ꦑꦹꦤꦁ ꦮꦷꦫꦶꦪꦁ ꦤꦴꦩ ꦮꦝ꧀ꦞꦺꦠꦧ꧀ꦧꦁ ꦲꦺꦴꦠꦶ, ꦡꦺꦫꦱ꧀ꦱ ꦥꦤ ꦲꦴꦥꦺꦠꦧ꧀ꦧꦩꦺꦮ ꦄꦲꦺꦴꦱꦶ. ꦠꦱ꧀ꦩꦴ ꦌꦱ ꦄꦴꦫꦢ꧀ꦣꦮꦷꦫꦶꦪꦴꦤꦁ ꦄꦒ꧀ꦒꦺꦴ ꦤꦴꦩ ꦗꦴꦠꦺꦴ.

ꦠꦱ꧀ꦱ ꦥꦚ꧀ꦲꦏꦩ꧀ꦩꦺ ꦄꦪꦩꦤꦸꦥꦸꦧ꧀ꦧꦶꦏꦡꦴ – ꦄꦪꦁ ꦏꦶꦫ ꦄꦠꦷꦠꦺ ꦥꦢꦸꦩꦸꦠ꧀ꦠꦫꦧꦸꦢ꧀ꦣꦏꦴꦭꦺ ꦱꦺꦛ꧀ꦜꦶꦏꦸꦭꦺ ꦤꦶꦧ꧀ꦧꦠ꧀ꦠꦶ, ꦱꦶꦫꦶꦮꦝ꧀ꦞꦏꦸꦩꦴꦫꦺꦴꦠꦶꦱ꧀ꦱ ꦤꦴꦩꦁ ꦄꦏꦁꦱꦸ. ꦱꦺꦴ ꦮꦪꦥ꧀ꦥꦠ꧀ꦠꦺꦴ ꦥꦸꦫꦶꦩꦤꦪꦺꦤꦺꦮ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦥꦫꦶꦱꦥꦫꦶꦪꦤ꧀ꦠꦺ ꦜꦶꦠꦺꦴ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦱꦠ꧀ꦡꦴꦫꦁ ꦌꦏꦁ ꦨꦶꦏ꧀ꦑꦸꦁ ꦄꦴꦫꦢ꧀ꦣꦮꦷꦫꦶꦪꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦤ꧀ꦠꦁ ꦢꦶꦱ꧀ꦮꦴ ‘‘ꦩꦪꦴꦥꦶ ꦄꦤꦴꦒꦠꦺ ꦌꦮꦫꦹꦥꦺꦤ ꦨꦮꦶꦠꦸꦁ ꦮꦛ꧀ꦛꦠꦷ’’ꦠꦶ ꦢꦺꦱꦤꦴꦥꦫꦶꦪꦺꦴꦱꦴꦤꦺ ꦢꦱꦧꦭꦁ ꦤꦶꦩꦤ꧀ꦠꦺꦠ꧀ꦮꦴ ꦱꦠ꧀ꦠꦴꦲꦁ ꦩꦲꦴꦢꦴꦤꦁ ꦢꦠ꧀ꦮꦴ ꦮꦸꦠ꧀ꦠꦤꦪꦺꦤꦺꦮ ꦥꦠ꧀ꦡꦤꦁ ꦄꦏꦴꦱꦶ. ꦱꦠ꧀ꦡꦴ ꦠꦱ꧀ꦱ ꦥꦠ꧀ꦡꦤꦴꦪ ꦱꦩꦶꦗ꧀ꦙꦤꦨꦴꦮꦁ ꦢꦶꦱ꧀ꦮꦴ ꦥꦸꦫꦶꦩꦤꦪꦺꦤꦺꦮ ꦧ꧀ꦪꦴꦏꦫꦶꦠ꧀ꦮꦴ ꦮꦶꦲꦴꦫꦁ ꦒꦠꦺꦴ.

ꦱꦺꦴꦥꦶ ꦱꦶꦫꦶꦮꦝ꧀ꦞꦱꦺꦛ꧀ꦜꦶ ꦪꦴꦮꦗꦷꦮꦁ ꦏꦸꦱꦭꦁ ꦏꦠ꧀ꦮꦴ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦏꦥ꧀ꦥꦱꦠꦱꦲꦱ꧀ꦱꦁ ꦄꦠꦶꦏ꧀ꦏꦩꦶꦠ꧀ꦮꦴ ꦆꦩꦱ꧀ꦩꦶꦁ ꦏꦥ꧀ꦥꦺ ꦥꦫꦶꦤꦶꦧ꧀ꦧꦸꦠꦺ ꦏꦱ꧀ꦱꦥꦢꦱꦧꦭꦺ ꦄꦤꦸꦥ꧀ꦥꦤ꧀ꦤꦺ ꦄꦩ꧀ꦲꦴꦏꦁ ꦨꦒꦮꦠꦶ ꦧꦴꦫꦴꦟꦱꦶꦪꦁ ꦏꦸꦭꦒꦺꦲꦺ ꦥꦛꦶꦱꦤ꧀ꦣꦶꦁ ꦒꦟ꧀ꦲꦶ. ꦱꦺꦴ ꦄꦠ꧀ꦠꦤꦺꦴ ꦱꦲꦴꦪꦏꦺꦲꦶ ꦱꦢ꧀ꦣꦶꦁ ꦒꦔ꧀ꦒꦴꦪꦁ ꦏꦷꦭ꦳ꦠꦶ. ꦠꦱ꧀ꦩꦶꦁ ꦱꦩꦪꦺ ꦌꦏꦺꦴ ꦗꦶꦟ꧀ꦟꦕꦷꦮꦫꦶꦏꦺꦴ ꦥꦕ꧀ꦕꦺꦏꦧꦸꦢ꧀ꦣꦺꦴ ‘‘ꦧꦴꦫꦴꦟꦱꦶꦁ ꦈꦥꦤꦶꦱ꧀ꦱꦴꦪ ꦒꦔ꧀ꦒꦴꦠꦷꦫꦺ ꦥꦟ꧀ꦟꦱꦴꦭꦁ ꦏꦠ꧀ꦮꦴ ꦮꦱ꧀ꦱꦁ ꦈꦥꦒꦕ꧀ꦖꦶꦱ꧀ꦱꦴꦩꦷ’’ꦠꦶ ꦈꦢꦏꦺꦤ ꦱꦩꦸꦥꦧ꧀ꦪꦹꦭ꦳꧀ꦲꦺ ꦢꦟ꧀ꦝꦏꦺ ꦕ ꦮꦭ꧀ꦭꦶꦪꦺꦴ ꦕ ꦱꦁꦏꦝ꧀ꦞꦠꦶ. ꦄꦪꦁ ꦏꦸꦩꦴꦫꦺꦴ ꦱꦲꦴꦪꦏꦺꦲꦶ ꦱꦢ꧀ꦣꦶꦁ ꦒꦤ꧀ꦠ꧀ꦮꦴ ꦄꦨꦶꦮꦴꦢꦺꦠ꧀ꦮꦴ ꦜꦶꦠꦺꦴ, ‘‘ꦨꦤ꧀ꦠꦺ, ꦏꦶꦁ ꦏꦫꦺꦴꦡꦴ’’ꦠꦶ ꦥꦸꦕ꧀ꦖꦶ. ꦏꦸꦩꦴꦫ ꦈꦥꦏꦛ꧀ꦜꦺ ꦄꦤ꧀ꦠꦺꦴꦮꦱ꧀ꦱꦺ ꦥꦧ꧀ꦧꦗꦶꦠꦴꦤꦁ ꦮꦱꦤꦛ꧀ꦜꦴꦤꦁ ꦤꦴꦩ ꦭꦢ꧀ꦣꦸꦁ ꦮꦛ꧀ꦛꦠꦷꦠꦶ. ‘‘ꦨꦤ꧀ꦠꦺ, ꦄꦗ꧀ꦗꦺꦮ ꦌꦏꦢꦶꦮꦱꦁ ꦄꦪ꧀ꦪꦺꦴ ꦪꦡꦴ ꦠꦡꦴ ꦄꦴꦒꦩꦺꦠꦸ, ꦄꦲꦁ ꦱ꧀ꦮꦺ ꦄꦪ꧀ꦪꦱ꧀ꦱ ꦮꦱꦤꦛ꧀ꦜꦴꦤꦁ ꦏꦫꦶꦱ꧀ꦱꦴꦩꦷ’’ꦠꦶ ꦄꦴꦲ. ꦥꦕ꧀ꦕꦺꦏꦧꦸꦢ꧀ꦣꦺꦴ ‘‘ꦠꦱ꧀ꦱꦺꦮ ꦏꦸꦩꦴꦫꦱ꧀ꦱ ꦱꦔ꧀ꦒꦲꦁ ꦏꦫꦶꦱ꧀ꦱꦴꦩꦷ’’ꦠꦶ ꦄꦴꦒꦠꦠ꧀ꦠꦴ ꦄꦣꦶꦮꦴꦱꦺꦱꦶ. ꦱꦺꦴ ꦠꦱ꧀ꦱ ꦄꦣꦶꦮꦴꦱꦤꦁ ꦮꦶꦢꦶꦠ꧀ꦮꦴ ꦒꦠꦺꦴ ꦥꦸꦤꦢꦶꦮꦱꦺ ꦱꦏ꧀ꦏꦴꦫꦱꦩ꧀ꦩꦴꦤꦁ ꦱꦗ꧀ꦗꦺꦠ꧀ꦮꦴ ꦥꦕ꧀ꦕꦺꦏꦧꦸꦢ꧀ꦣꦱ꧀ꦱ ꦄꦴꦒꦩꦤꦁ ꦎꦭꦺꦴꦏꦺꦤ꧀ꦠꦺꦴ ꦄꦛ꧀ꦜꦴꦱꦶ. ꦥꦕ꧀ꦕꦺꦏꦧꦸꦢ꧀ꦣꦺꦴꦥꦶ ‘‘ꦏꦲꦁ ꦤꦸ ꦑꦺꦴ ꦄꦗ꧀ꦗ ꦨꦶꦏ꧀ꦑꦴꦕꦴꦫꦁ ꦭꦨꦶꦱ꧀ꦱꦴꦩꦷ’’ꦠꦶ ꦄꦴꦮꦗ꧀ꦗꦺꦤ꧀ꦠꦺꦴ ꦚꦠ꧀ꦮꦴ ꦠꦱ꧀ꦱꦺꦮ ꦒꦺꦲꦢ꧀ꦮꦴꦫꦁ ꦄꦒꦩꦴꦱꦶ.

ꦏꦸꦩꦴꦫꦺꦴ ꦥꦕ꧀ꦕꦺꦏꦧꦸꦢ꧀ꦣꦁ ꦢꦶꦱ꧀ꦮꦴ ꦱꦩ꧀ꦥꦶꦪꦴꦪꦩꦴꦤꦺꦴ ꦥꦠ꧀ꦠꦁ ꦄꦴꦢꦴꦪ ꦨꦶꦏ꧀ꦑꦁ ꦢꦠ꧀ꦮꦴ ‘‘ꦆꦩꦁ ꦄꦤ꧀ꦠꦺꦴꦮꦱ꧀ꦱꦁ ꦩꦪ꧀ꦲꦁ ꦒꦺꦲꦢ꧀ꦮꦴꦫꦩꦺꦮ ꦄꦴꦒꦕ꧀ꦖꦡ, ꦨꦤ꧀ꦠꦺ’’ꦠꦶ ꦥꦛꦶꦚ꧀ꦚꦁ ꦒꦲꦺꦠ꧀ꦮꦴ ꦥꦕ꧀ꦕꦺꦏꦧꦸꦢ꧀ꦣꦺ ꦨꦠ꧀ꦠꦏꦶꦕ꧀ꦕꦁ ꦏꦠ꧀ꦮꦴ ꦥꦏ꧀ꦏꦤ꧀ꦠꦺ ꦄꦠ꧀ꦠꦤꦺꦴ ꦱꦲꦴꦪꦏꦺꦲꦶ ꦱꦢ꧀ꦣꦶꦁ ꦒꦤ꧀ꦠ꧀ꦮꦴ ꦌꦏꦢꦶꦮꦱꦺꦤꦺꦮ ꦥꦕ꧀ꦕꦺꦏꦧꦸꦢ꧀ꦣꦱ꧀ꦱ ꦮꦱꦤꦥꦟ꧀ꦟꦱꦴꦭꦚ꧀ꦕ ꦕꦔ꧀ꦏꦩꦤꦚ꧀ꦕ ꦫꦠ꧀ꦠꦶꦛ꧀ꦜꦴꦤꦢꦶꦮꦴꦛ꧀ꦜꦴꦤꦴꦤꦶ ꦕ ꦏꦴꦫꦴꦥꦺꦠ꧀ꦮꦴ ꦄꦢꦴꦱꦶ. ꦠꦱ꧀ꦱꦺꦮ ꦥꦟ꧀ꦟꦱꦴꦭꦁ ꦥꦮꦶꦱꦤꦮꦺꦭꦴꦪ ꦲꦫꦶꦠꦹꦥꦭꦶꦠ꧀ꦠꦴꦪ ꦨꦹꦩꦶꦪꦴ ‘‘ꦥꦴꦢꦺꦱꦸ ꦏꦭꦭꦁ ꦩꦴ ꦭꦒ꧀ꦒꦷ’’ꦠꦶ ꦄꦠ꧀ꦠꦤꦺꦴ ꦥꦴꦫꦸꦥꦤꦁ ꦱꦠꦱꦲꦱ꧀ꦱꦒ꧀ꦓꦤꦏꦁ ꦫꦠ꧀ꦠꦏꦩ꧀ꦧꦭꦁ ꦨꦹꦩꦠ꧀ꦡꦫꦟꦁ ꦱꦤ꧀ꦡꦫꦶꦠ꧀ꦮꦴ ꦏꦩ꧀ꦧꦭꦱ꧀ꦱ ꦮꦟ꧀ꦟꦺꦤ ꦱꦢ꧀ꦣꦶꦁ ꦥꦕ꧀ꦕꦺꦏꦧꦸꦢ꧀ꦣꦱ꧀ꦱ ꦱꦫꦷꦫꦥ꧀ꦥꦨꦁ ꦌꦏꦱꦢꦶꦱꦁ ꦢꦶꦱ꧀ꦮꦴ ꦄꦠꦶꦮꦶꦪ ꦥꦱꦤ꧀ꦤꦺꦴ ꦲꦸꦠ꧀ꦮꦴ ꦄꦴꦲ – ‘‘ꦪꦡꦴ ꦠꦸꦩ꧀ꦲꦺꦲꦶ ꦄꦏ꧀ꦏꦤ꧀ꦠꦏꦴꦭꦠꦺꦴ ꦥꦛ꧀ꦜꦴꦪ ꦆꦩꦱ꧀ꦱ ꦏꦩ꧀ꦧꦭꦱ꧀ꦱ ꦄꦠꦶꦮꦶꦪ ꦥꦨꦴ ꦮꦶꦫꦺꦴꦕꦠꦶ, ꦌꦮꦩꦺꦮ ꦩꦪ꧀ꦲꦩ꧀ꦥꦶ ꦤꦶꦧ꧀ꦧꦠ꧀ꦠꦤꦶꦧ꧀ꦧꦠ꧀ꦠꦛ꧀ꦜꦴꦤꦺ ꦲꦠ꧀ꦡꦥꦴꦢꦴꦤꦁ ꦮꦟ꧀ꦟꦺꦴ ꦧꦤ꧀ꦣꦸꦗꦷꦮꦏꦥꦸꦥ꧀ꦦꦮꦟ꧀ꦟꦺꦴ ꦲꦺꦴꦠꦸ, ꦱꦠꦏ꧀ꦑꦠ꧀ꦠꦸꦁ ꦮꦶꦲꦠꦏꦥ꧀ꦥꦴꦱꦥꦛꦭꦦꦱ꧀ꦱꦱꦢꦶꦱꦺꦴꦮ ꦦꦱ꧀ꦱꦺꦴ ꦲꦺꦴꦠꦹ’’ꦠꦶ. ꦱꦺꦴ ꦠꦺꦩꦴꦱꦁ ꦥꦕ꧀ꦕꦺꦏꦧꦸꦢ꧀ꦣꦁ ꦈꦥꦛ꧀ꦜꦲꦶꦠ꧀ꦮꦴ ꦥꦮꦴꦫꦶꦠꦏꦴꦭꦺ ꦠꦶꦕꦷꦮꦫꦁ ꦄꦢꦴꦱꦶ. ꦥꦕ꧀ꦕꦺꦏꦧꦸꦢ꧀ꦣꦺꦴ ꦥꦫꦶꦥꦸꦟ꧀ꦟꦥꦠ꧀ꦠꦕꦷꦮꦫꦺꦴ ꦒꦤ꧀ꦣꦩꦴꦢꦤꦩꦺꦮ ꦒꦠꦺꦴ.

ꦱꦺꦴꦥꦶ ꦏꦸꦭꦥꦸꦠ꧀ꦠꦺꦴ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦄꦩ꧀ꦲꦴꦏꦁ ꦨꦒꦮꦠꦺꦴ ꦏꦴꦭꦺ ꦏꦴꦭ꦳ꦕꦩ꧀ꦥꦴꦤꦒꦫꦺ ꦈꦥꦱꦺꦛ꧀ꦜꦶꦱ꧀ꦱ ꦓꦫꦺ ꦥꦛꦶꦱꦤ꧀ꦣꦶꦁ ꦒꦟ꧀ꦲꦶ. ꦠꦱ꧀ꦱ ꦥꦛꦶꦱꦤ꧀ꦣꦶꦒ꧀ꦒꦲꦟꦏꦴꦭꦠꦺꦴ ꦥꦛ꧀ꦜꦴꦪ ꦱꦺꦛ꧀ꦜꦶꦏꦸꦭꦁ ꦄꦤꦺꦏꦴꦤꦶ ꦥꦟ꧀ꦟꦴꦏꦴꦫꦱꦲꦱ꧀ꦱꦴꦤꦶ ꦄꦴꦒꦕ꧀ꦖꦤ꧀ꦠꦶ. ꦗꦴꦠꦢꦶꦮꦱꦺ ꦕ ꦱꦏꦭꦤꦒꦫꦁ ꦌꦏꦱꦏ꧀ꦏꦴꦫꦱꦩ꧀ꦩꦴꦤꦁ ꦄꦲꦺꦴꦱꦶ. ꦄꦡꦱ꧀ꦱ ꦤꦴꦩꦒ꧀ꦒꦲꦟꦢꦶꦮꦱꦺ ꦩꦴꦠꦴꦥꦶꦠꦫꦺꦴ ‘‘ꦄꦩ꧀ꦲꦴꦏꦁ ꦥꦸꦠ꧀ꦠꦺꦴ ꦄꦠ꧀ꦠꦤꦺꦴ ꦤꦴꦩꦁ ꦒꦟ꧀ꦲꦶꦠ꧀ꦮꦴꦮ ꦄꦴꦒꦠꦺꦴ, ꦫꦠ꧀ꦠꦱꦸꦮꦟ꧀ꦟꦫꦱꦥꦫꦶꦱꦶꦠ꧀ꦠꦴ ꦮꦶꦪꦱ꧀ꦱ ꦱꦫꦷꦫꦕ꧀ꦖꦮꦷ’’ꦠꦶ ꦱꦺꦴꦟꦏꦸꦩꦴꦫꦺꦴꦠ꧀ꦮꦺꦮꦱ꧀ꦱ ꦤꦴꦩꦁ ꦄꦏꦁꦱꦸ.

ꦄꦡꦱ꧀ꦱ ꦱꦛ꧀ꦜꦶ ꦣꦴꦠꦶꦪꦺꦴ ꦈꦥꦤꦺꦠ꧀ꦮꦴ ꦢꦺꦮꦏꦸꦩꦴꦫꦁ ꦮꦶꦪ ꦤꦁ ꦱꦸꦑꦺꦤ ꦮꦝ꧀ꦞꦺꦱꦸꦁ. ꦠꦱ꧀ꦱ ꦌꦮꦫꦹꦥꦁ ꦄꦴꦲꦴꦫꦮꦶꦣꦴꦤꦁ ꦄꦲꦺꦴꦱꦶ – ꦱꦛ꧀ꦜꦶꦏꦫꦷꦱꦩꦠ꧀ꦠꦁ ꦜꦴꦤꦁ ꦏꦱꦶꦠ꧀ꦮꦴ ꦠꦶꦮꦶꦣꦺꦤ ꦈꦢꦏꦺꦤ ꦥꦺꦴꦱꦺꦤ꧀ꦠꦶ. ꦏꦺꦢꦴꦫꦺ ꦥꦮꦶꦱꦤ꧀ꦠꦷꦱꦸ ꦈꦢꦏꦩꦴꦠꦶꦏꦴꦱꦸ ꦑꦷꦫꦺꦴꦢꦏꦱ꧀ꦱ ꦕ ꦒꦤ꧀ꦣꦺꦴꦢꦏꦱ꧀ꦱ ꦕ ꦄꦤꦺꦏꦴꦤꦶ ꦕꦴꦛꦶꦱꦲꦱ꧀ꦱꦴꦤꦶ ꦄꦴꦱꦶꦚ꧀ꦕꦤ꧀ꦠꦶ. ꦱꦴꦭꦶꦱꦷꦱꦴꦤꦁ ꦑꦷꦫꦒ꧀ꦒꦲꦟꦏꦴꦭꦺ ꦱꦸꦏꦴꦢꦷꦤꦁ ꦥꦴꦟꦴꦤꦁ ꦈꦕ꧀ꦖꦶꦛ꧀ꦜꦏꦫꦟꦤꦶꦮꦴꦫꦟꦠ꧀ꦡꦁ ꦮꦷꦲꦶꦒꦧ꧀ꦨꦴꦤꦁ ꦱꦸꦑꦸꦩꦴꦭꦨꦴꦮꦠ꧀ꦡꦚ꧀ꦕ ꦥꦫꦶꦪꦤ꧀ꦠꦥꦫꦶꦏ꧀ꦑꦺꦥꦺ ꦕ ꦄꦤ꧀ꦠꦫꦤ꧀ꦠꦫꦴ ꦕ ꦡꦩ꧀ꦨꦺ ꦤꦶꦑꦤꦶꦠ꧀ꦮꦴ ꦈꦥꦫꦶ ꦢꦟ꧀ꦝꦏꦺ ꦢꦠ꧀ꦮꦴ ꦏꦶꦭꦚ꧀ꦗꦺꦲꦶ ꦖꦴꦢꦺꦠ꧀ꦮꦴ ꦱꦩꦤ꧀ꦠꦴ ꦱꦴꦟꦶꦪꦴ ꦥꦫꦶꦏ꧀ꦑꦶꦥꦶꦠ꧀ꦮꦴ ꦱꦧ꧀ꦧꦥꦫꦶꦪꦤ꧀ꦠꦺ ꦄꦴꦫꦏ꧀ꦑꦁ ꦒꦟ꧀ꦲꦤ꧀ꦠꦶ. ꦱꦱ꧀ꦱꦺ ꦤꦶꦥ꧀ꦦꦤ꧀ꦤꦺ ꦏꦺꦴꦛ꧀ꦜꦺ ꦕꦠꦸꦗꦴꦠꦶꦒꦤ꧀ꦣꦺꦲꦶ ꦥꦫꦶꦨꦟ꧀ꦝꦁ ꦏꦠ꧀ꦮꦴ ꦈꦥꦫꦶ ꦈꦠ꧀ꦠꦩꦒꦤ꧀ꦣꦺꦲꦶ ꦥꦫꦶꦨꦴꦮꦺꦤ꧀ꦠꦶ. ꦄꦤꦺꦏꦱꦲꦱ꧀ꦱꦥꦸꦫꦶꦱꦴ ꦑꦺꦠ꧀ꦠꦁ ꦎꦫꦸꦪ꧀ꦲ ꦱꦴꦭꦶꦱꦷꦱꦴꦤꦶ ꦮꦟ꧀ꦛꦺꦱꦸ ꦖꦶꦤ꧀ꦢꦶꦠ꧀ꦮꦴ ꦩꦸꦛ꧀ꦜꦶꦩꦸꦛ꧀ꦜꦶꦪꦺꦴ ꦏꦠ꧀ꦮꦴ ꦫꦗ꧀ꦗꦸꦏꦺꦲꦶ ꦧꦤ꧀ꦣꦶꦠ꧀ꦮꦴ ꦱꦸꦏ꧀ꦑꦴꦥꦺꦤ꧀ꦠꦶ. ꦠꦠꦺꦴ ꦏꦺꦴꦛ꧀ꦜꦏꦱ꧀ꦱ ꦲꦺꦛ꧀ꦜꦶꦩꦠꦭꦺ ꦒꦤ꧀ꦣꦺ ꦱꦤ꧀ꦡꦫꦶꦠ꧀ꦮꦴ ꦈꦥꦫꦶ ꦱꦴꦭꦶꦱꦷꦱꦴꦤꦶ ꦱꦤ꧀ꦡꦫꦤ꧀ꦠꦶ. ꦌꦮꦁ ꦌꦏꦤ꧀ꦠꦫꦶꦏꦁ ꦏꦠ꧀ꦮꦴ ꦱꦤ꧀ꦡꦫꦤ꧀ꦠꦴ ꦏꦺꦴꦛ꧀ꦜꦏꦁ ꦥꦹꦫꦺꦠ꧀ꦮꦴ ꦢ꧀ꦮꦴꦫꦁ ꦥꦶꦢꦲꦤ꧀ꦠꦶ, ꦠꦶꦮꦱ꧀ꦱꦱꦩ꧀ꦥꦠ꧀ꦠꦏꦴꦭꦺ ꦏꦺꦴꦛ꧀ꦜꦏꦁ ꦮꦶꦮꦫꦤ꧀ꦠꦶ. ꦮꦶꦮꦛꦏꦴꦭꦺ ꦱꦏꦭꦤꦒꦫꦁ ꦱꦸꦒꦤ꧀ꦣꦒꦤ꧀ꦣꦶꦏꦁ ꦲꦺꦴꦠꦶ. ꦱꦴꦭꦶꦩ꧀ꦲꦶ ꦥꦲꦠꦺ ꦣꦸꦠ꧀ꦠꦴ ꦡꦸꦱꦺ ꦏꦶꦟꦶꦠ꧀ꦮꦴ ꦒꦟ꧀ꦲꦤ꧀ꦠꦶ, ꦏꦸꦟ꧀ꦝꦏꦁ ꦥꦤ ꦕꦹꦭ꦳ꦸꦥꦛ꧀ꦜꦴꦏꦴ ꦭꦨꦤ꧀ꦠꦶ. ꦩꦸꦱꦭꦓꦛ꧀ꦛꦶꦠꦏꦺ ꦱꦴꦭꦶꦠꦟ꧀ꦝꦸꦭꦺ ꦮꦶꦕꦶꦤꦶꦠ꧀ꦮꦴ ꦒꦟ꧀ꦲꦤ꧀ꦠꦶ. ꦠꦺ ꦱꦸꦮꦟ꧀ꦟꦲꦷꦫꦏꦥꦕ꧀ꦖꦶꦪꦁ ꦥꦏ꧀ꦑꦶꦥꦶꦠ꧀ꦮꦴ ꦱꦠꦏꦴꦭꦁ ꦥꦫꦶꦱ꧀ꦱꦴꦮꦺꦠ꧀ꦮꦴ ꦒꦲꦶꦠꦺ ꦥꦏ꧀ꦏꦸꦡꦶꦠꦗꦴꦠꦶꦫꦱꦺ ꦌꦏꦮꦴꦫꦁ ꦥꦏ꧀ꦑꦶꦥꦶꦠ꧀ꦮꦴ ꦈꦢ꧀ꦣꦫꦤ꧀ꦠꦶ, ꦥꦩꦸꦑꦛ꧀ꦜꦴꦤꦁ ꦱꦸꦩꦤꦥꦸꦥ꧀ꦦꦱꦢꦶꦱꦁ ꦲꦺꦴꦠꦶ. ꦠꦁ ꦨꦺꦴꦗꦤꦁ ꦱꦸꦮꦟ꧀ꦟꦱꦫꦏꦺ ꦥꦏ꧀ꦑꦶꦥꦶꦠ꧀ꦮꦴ ꦥꦏ꧀ꦏꦸꦡꦶꦠꦄꦥ꧀ꦥꦺꦴꦢꦏꦩꦣꦸꦥꦴꦪꦴꦱꦥꦹꦫꦶꦠꦱ꧀ꦱ ꦫꦗꦠꦡꦴꦭꦱ꧀ꦱ ꦈꦥꦫꦶ ꦏꦠ꧀ꦮꦴ ꦄꦴꦢꦴꦪ ꦒꦤ꧀ꦠ꧀ꦮꦴ ꦱꦺꦛ꧀ꦜꦶꦥꦸꦠ꧀ꦠꦱ꧀ꦱ ꦥꦸꦫꦠꦺꦴ ꦜꦥꦺꦤ꧀ꦠꦶ.

ꦱꦺꦴ ꦄꦠ꧀ꦠꦤꦺꦴ ꦪꦴꦥꦤꦩꦠ꧀ꦠꦁ ꦨꦸꦚ꧀ꦗꦶꦠ꧀ꦮꦴ ꦒꦤ꧀ꦣꦮꦴꦱꦶꦠꦺꦤ ꦈꦢꦏꦺꦤ ꦩꦸꦑꦁ ꦮꦶꦏ꧀ꦑꦴꦭꦺꦠ꧀ꦮꦴ ꦲꦠ꧀ꦡꦥꦴꦢꦺ ꦣꦺꦴꦮꦠꦶ. ꦄꦡꦱ꧀ꦱ ꦣꦺꦴꦠꦲꦠ꧀ꦡꦥꦴꦢꦱ꧀ꦱ ꦤꦴꦤꦥ꧀ꦥꦏꦴꦫꦁ ꦩꦸꦑꦮꦴꦱꦁ ꦈꦥꦤꦺꦤ꧀ꦠꦶ. ꦠꦱ꧀ꦱ ꦄꦏ꧀ꦏꦩꦤꦛ꧀ꦜꦴꦤꦺ ꦮꦫꦥꦺꦴꦠ꧀ꦡꦏꦕꦶꦠ꧀ꦠꦠ꧀ꦡꦫꦟꦁ ꦄꦠ꧀ꦡꦫꦤ꧀ꦠꦶ. ꦲꦠ꧀ꦡꦥꦴꦢꦠꦭꦴꦤꦶꦱ꧀ꦱ ꦧꦤ꧀ꦣꦸꦗꦷꦮꦏꦥꦸꦥ꧀ꦦꦮꦟ꧀ꦟꦴꦤꦶ ꦲꦺꦴꦤ꧀ꦠꦶ, ꦱꦠꦏꦴꦭꦮꦶꦲꦠꦏꦥ꧀ꦥꦴꦱꦱ꧀ꦱ ꦮꦶꦪ ꦦꦱ꧀ꦱꦺꦴ, ꦥꦴꦢꦠꦭꦺꦱꦸ ꦩꦟꦶꦏꦸꦟ꧀ꦝꦭꦴꦮꦠ꧀ꦠꦮꦟ꧀ꦟꦴꦤꦶ ꦭꦺꦴꦩꦴꦤꦶ ꦗꦴꦪꦶꦁꦱꦸ. ꦱꦺꦴ ꦏꦱ꧀ꦱꦕꦶꦢꦺꦮ ꦏꦸꦗ꧀ꦙꦶꦠ꧀ꦮꦴ ‘‘ꦄꦴꦗꦴꦤꦴꦲꦶ ꦨꦹꦩꦶꦁ ꦄꦏ꧀ꦏꦩꦶꦱ꧀ꦱꦴꦩꦷ’’ꦠꦶ ꦮꦢꦠꦶ. ꦠꦱ꧀ꦱ ꦮꦪꦥ꧀ꦥꦠ꧀ꦠꦱ꧀ꦱ ꦠꦶꦟ꧀ꦟꦁ ꦈꦠꦹꦤꦁ ꦄꦤꦸꦕ꧀ꦖꦮꦶꦏꦺ ꦠꦪꦺꦴ ꦥꦴꦱꦴꦢꦺ ꦏꦴꦫꦺꦠ꧀ꦮꦴ ꦤꦴꦛꦏꦴꦤꦶ ꦕ ꦈꦥꦛ꧀ꦜꦴꦥꦺꦱꦸꦁ. ꦱꦺꦴ ꦩꦲꦴꦱꦩ꧀ꦥꦠ꧀ꦠꦶꦁ ꦄꦤꦸꦨꦮꦤ꧀ꦠꦺꦴ ꦢꦺꦮꦺꦴ ꦩꦚ꧀ꦚꦺ ꦥꦛꦶꦮꦱꦠꦶ.

ꦄꦡ ꦄꦩ꧀ꦲꦴꦏꦁ ꦱꦠ꧀ꦡꦫꦶ ꦱꦧ꧀ꦧꦚ꧀ꦚꦸꦠꦁ ꦥꦠ꧀ꦮꦴ ꦥꦮꦠ꧀ꦠꦶꦠꦮꦫꦣꦩ꧀ꦩꦕꦏ꧀ꦏꦺ ꦫꦴꦗꦒꦲꦁ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦺ ꦥꦴꦢꦭꦺꦴꦩꦢꦱ꧀ꦱꦤꦠ꧀ꦡꦁ ꦫꦚ꧀ꦚꦴ ꦩꦴꦒꦣꦺꦤ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦄꦱꦷꦠꦶꦪꦴ ꦒꦴꦩꦶꦪꦱꦲꦱ꧀ꦱꦺꦲꦶ ꦱꦢ꧀ꦣꦶꦁ ꦱꦠ꧀ꦡꦸ ꦱꦤ꧀ꦠꦶꦏꦁ ꦥꦲꦶꦠꦺꦴ ꦣꦩ꧀ꦩꦢꦺꦱꦤꦁ ꦱꦸꦠ꧀ꦮꦴ ꦥꦛꦶꦭꦢ꧀ꦣꦱꦢ꧀ꦣꦺꦴ ꦱꦠ꧀ꦡꦴꦫꦁ ꦥꦧ꧀ꦧꦗ꧀ꦗꦁ ꦪꦴꦕꦶ. ꦄꦡ ꦤꦁ ꦨꦒꦮꦴ ‘‘ꦄꦤꦸꦚ꧀ꦚꦴꦠꦺꦴꦱꦶ ꦩꦴꦠꦴꦥꦶꦠꦹꦲꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ꦄꦤꦤꦸꦚ꧀ꦚꦴꦠꦨꦴꦮꦁ ꦱꦸꦠ꧀ꦮꦴ ‘‘ꦤ ꦑꦺꦴ, ꦱꦺꦴꦟ, ꦠꦡꦴꦒꦠꦴ ꦩꦴꦠꦴꦥꦶꦠꦹꦲꦶ ꦄꦤꦤꦸꦚ꧀ꦚꦴꦠꦁ ꦥꦸꦠ꧀ꦠꦁ ꦥꦧ꧀ꦧꦴꦗꦺꦤ꧀ꦠꦷ’’ꦠꦶ ꦥꦛꦶꦏ꧀ꦑꦶꦥꦶ. ꦱꦺꦴ ‘‘ꦱꦴꦣꦸ ꦨꦒꦮꦴ’’ꦠꦶ ꦠꦡꦴꦒꦠꦱ꧀ꦱ ꦮꦕꦤꦁ ꦱꦶꦫꦱꦴ ꦱꦩ꧀ꦥꦛꦶꦕ꧀ꦖꦶꦠ꧀ꦮꦴ ꦩꦴꦠꦴꦥꦶꦠꦹꦤꦁ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦄꦤꦸꦗꦴꦤꦴꦥꦺꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦄꦴꦒꦩ꧀ꦩ ꦄꦚ꧀ꦚꦠꦫꦱ꧀ꦱ ꦨꦶꦏ꧀ꦑꦸꦤꦺꦴ ꦱꦤ꧀ꦠꦶꦏꦺ ꦥꦧ꧀ꦧꦗꦶ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ, ꦮꦶꦠ꧀ꦡꦴꦫꦠꦺꦴ ꦥꦤꦱ꧀ꦱ ꦥꦧ꧀ꦧꦗ꧀ꦗꦴꦮꦶꦣꦴꦤꦁ ꦥꦴꦭ꦳ꦶꦪꦁ (ꦩꦲꦴꦮ. ꧒꧔꧓) ꦄꦴꦒꦠꦩꦺꦮ.

ꦠꦱ꧀ꦱ ꦥꦧ꧀ꦧꦗ꧀ꦗꦚ꧀ꦕ ꦈꦥꦱꦩ꧀ꦥꦢꦚ꧀ꦕ ꦭꦨꦶꦠ꧀ꦮꦴ ꦫꦴꦗꦒꦲꦺ ꦮꦶꦲꦫꦤ꧀ꦠꦱ꧀ꦱ ꦱꦩ꧀ꦧꦲꦸꦭꦴ ꦚꦴꦠꦶꦱꦴꦭꦺꦴꦲꦶꦠꦴ ꦕ ꦱꦤ꧀ꦢꦶꦛ꧀ꦜꦱꦩ꧀ꦨꦠ꧀ꦠꦴ ꦕ ꦱꦏ꧀ꦏꦴꦫꦱꦩ꧀ꦩꦴꦤꦁ ꦄꦴꦲꦫꦤ꧀ꦠꦶ, ꦫꦹꦥꦤꦶꦥ꧀ꦦꦠ꧀ꦠꦶꦪꦴ ꦮꦟ꧀ꦟꦁ ꦏꦡꦺꦤ꧀ꦠꦶ, ꦄꦚ꧀ꦚꦺꦥꦶ ꦗꦤꦴ ꦥꦱ꧀ꦱꦶꦠꦸꦁ ꦄꦴꦒꦕ꧀ꦖꦤ꧀ꦠꦶ. ꦡꦺꦫꦺꦴ ꦕꦶꦤ꧀ꦠꦺꦱꦶ – ‘‘ꦩꦩ ꦱꦤ꧀ꦠꦶꦏꦁ ꦧꦲꦹ ꦗꦤꦴ ꦄꦴꦒꦕ꧀ꦖꦤ꧀ꦠꦶ, ꦏꦩ꧀ꦩꦛ꧀ꦜꦴꦤꦺ ꦮꦴ ꦮꦶꦥꦱ꧀ꦱꦤꦴꦪ ꦮꦴ ꦏꦩ꧀ꦩꦁ ꦏꦴꦠꦸꦁ ꦏꦡꦁ ꦱꦏ꧀ꦑꦶꦱ꧀ꦱꦴꦩꦶ, ꦪꦁꦤꦹꦤꦴꦲꦁ ꦱꦠ꧀ꦡꦸ ꦱꦤ꧀ꦠꦶꦏꦺ ꦏꦩ꧀ꦩꦛ꧀ꦜꦴꦤꦁ ꦏꦡꦴꦥꦺꦠ꧀ꦮꦴ ꦱꦷꦠꦮꦤꦱꦸꦱꦴꦤꦁ ꦒꦤ꧀ꦠ꧀ꦮꦴ ꦱꦩꦟꦣꦩ꧀ꦩꦁ ꦏꦫꦺꦪ꧀ꦪꦁ. ꦠꦠ꧀ꦫ ꦲꦶ ꦱꦸꦱꦴꦤꦤ꧀ꦠꦶ ꦗꦶꦒꦸꦕ꧀ꦖꦶꦠ꧀ꦮꦴ ꦧꦲꦹ ꦗꦤꦴ ꦤꦴꦒꦩꦶꦱ꧀ꦱꦤ꧀ꦠꦶ, ꦌꦮꦁꦱꦤ꧀ꦠꦺ ꦩꦩ ꦏꦶꦕ꧀ꦕꦁ ꦩꦠ꧀ꦡꦏꦁ ꦥꦴꦥꦸꦟꦶꦱ꧀ꦱꦠꦷ’’ꦠꦶ ꦱꦠ꧀ꦡꦸ ꦱꦤ꧀ꦠꦶꦏꦺ ꦏꦩ꧀ꦩꦛ꧀ꦜꦴꦤꦁ ꦏꦡꦴꦥꦺꦠ꧀ꦮꦴ ꦱꦷꦠꦮꦤꦁ ꦒꦤ꧀ꦠ꧀ꦮꦴ ꦱꦩꦟꦣꦩ꧀ꦩꦁ ꦏꦴꦠꦸꦁ ꦄꦴꦫꦨꦶ. ꦱꦺꦴ ꦕꦶꦤ꧀ꦠꦺꦱꦶ – ‘‘ꦩꦪ꧀ꦲꦁ ꦱꦫꦷꦫꦁ ꦥꦫꦩꦱꦸꦑꦸꦩꦴꦭꦁ, ꦤ ꦑꦺꦴ ꦥꦤ ꦱꦏ꧀ꦏꦴ ꦱꦸꦑꦺꦤꦺꦮ ꦱꦸꦑꦁ ꦥꦴꦥꦸꦟꦶꦠꦸꦁ, ꦏꦴꦪꦁ ꦏꦶꦭꦩꦺꦠ꧀ꦮꦴꦥꦶ ꦱꦩꦟꦣꦩ꧀ꦩꦁ ꦏꦴꦠꦸꦁ ꦮꦛ꧀ꦛꦠꦷ’’ꦠꦶ. ꦠꦠꦺꦴ ꦜꦴꦤꦕꦔ꧀ꦏꦩꦩꦺꦮ ꦄꦣꦶꦛ꧀ꦜꦴꦪ ꦥꦣꦴꦤꦩꦏꦴꦱꦶ. ꦠꦱ꧀ꦱ ꦱꦸꦑꦸꦩꦴꦭꦴꦤꦁ ꦥꦴꦢꦠꦭꦴꦤꦁ ꦄꦤ꧀ꦠꦤ꧀ꦠꦺꦲꦶ ꦦꦺꦴꦛꦴ ꦈꦛ꧀ꦜꦴꦪ ꦨꦶꦗ꧀ꦗꦶꦁꦱꦸ, ꦕꦔ꧀ꦏꦩꦺꦴ ꦌꦏꦭꦺꦴꦲꦶꦠꦺꦴꦮ ꦄꦲꦺꦴꦱꦶ. ꦥꦴꦢꦺꦱꦸ ꦄꦮꦲꦤ꧀ꦠꦺꦱꦸ ꦗꦟ꧀ꦟꦸꦏꦺꦲꦶꦥꦶ ꦲꦠ꧀ꦡꦺꦲꦶꦥꦶ ꦮꦴꦪꦩꦶꦠ꧀ꦮꦴ ꦕꦔ꧀ꦏꦩꦠꦶ. ꦌꦮꦁ ꦮꦷꦫꦶꦪꦁ ꦢꦭ꦳꧀ꦲꦁ ꦏꦫꦺꦴꦤ꧀ꦠꦺꦴꦥꦶ ꦎꦨꦴꦱꦩꦠ꧀ꦠꦩ꧀ꦥꦶ ꦤꦶꦧ꧀ꦧꦠ꧀ꦠꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦕꦶꦤ꧀ꦠꦺꦱꦶ – ‘‘ꦱꦕꦺ ꦄꦚ꧀ꦚꦺꦴꦥꦶ ꦄꦴꦫꦢ꧀ꦣꦮꦷꦫꦶꦪꦺꦴ ꦨꦮꦺꦪ꧀ꦪ, ꦩꦴꦢꦶꦱꦺꦴꦮ ꦨꦮꦺꦪ꧀ꦪ. ꦄꦲꦁ ꦑꦺꦴ ꦥꦤ ꦌꦮꦁ ꦮꦴꦪꦩꦤ꧀ꦠꦺꦴꦥꦶ ꦩꦒ꧀ꦒꦁ ꦮꦴ ꦦꦭꦁ ꦮꦴ ꦈꦥ꧀ꦥꦴꦢꦺꦠꦸꦁ ꦤ ꦱꦏ꧀ꦏꦺꦴꦩꦶ, ꦄꦢ꧀ꦣꦴ ꦤꦺꦮꦴꦲꦁ ꦈꦒ꧀ꦓꦛꦶꦠꦚ꧀ꦚꦹ, ꦤ ꦮꦶꦥꦚ꧀ꦕꦶꦠꦚ꧀ꦚꦹ, ꦤ ꦤꦺꦪ꧀ꦪꦺꦴ, ꦥꦢꦥꦫꦩꦺꦤ ꦩꦪꦴ ꦨꦮꦶꦠꦧ꧀ꦧꦁ. ꦏꦶꦁ ꦩꦺ ꦥꦧ꧀ꦧꦗ꧀ꦗꦴꦪ, ꦲꦷꦤꦴꦪꦴꦮꦠ꧀ꦠꦶꦠ꧀ꦮꦴ ꦨꦺꦴꦒꦺ ꦕ ꦨꦸꦚ꧀ꦗꦶꦱ꧀ꦱꦴꦩꦶ ꦥꦸꦚ꧀ꦚꦴꦤꦶ ꦕ ꦏꦫꦶꦱ꧀ꦱꦴꦩꦷ’’ꦠꦶ.

ꦠꦱ꧀ꦩꦶꦁ ꦱꦩꦪꦺ ꦱꦠ꧀ꦡꦴ ꦡꦺꦫꦱ꧀ꦱ ꦮꦶꦠꦏ꧀ꦏꦁ ꦚꦠ꧀ꦮꦴ ꦱꦴꦪꦤ꧀ꦲꦱꦩꦪꦺ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ ꦠꦠ꧀ꦡ ꦒꦤ꧀ꦠ꧀ꦮꦴ ꦭꦺꦴꦲꦶꦠꦺꦤ ꦦꦸꦛ꧀ꦜꦁ ꦕꦔ꧀ꦏꦩꦁ ꦢꦶꦱ꧀ꦮꦴ ꦡꦺꦫꦁ ꦮꦷꦟꦺꦴꦮꦴꦢꦺꦤ (ꦩꦲꦴꦮ. ꧒꧔꧓) ꦎꦮꦢꦶꦠ꧀ꦮꦴ ꦮꦷꦫꦶꦪꦱꦩꦡꦪꦺꦴꦗꦤꦠ꧀ꦡꦴꦪ ꦠꦱ꧀ꦱ ꦏꦩ꧀ꦩꦛ꧀ꦜꦴꦤꦁ ꦏꦡꦺꦠ꧀ꦮꦴ ꦒꦶꦗ꧀ꦙꦏꦹꦛꦩꦺꦮ ꦒꦠꦺꦴ. ꦱꦺꦴꦟꦠ꧀ꦡꦺꦫꦺꦴꦥꦶ ꦢꦱꦧꦭꦱ꧀ꦱ ꦱꦩ꧀ꦩꦸꦑꦴ ꦎꦮꦴꦢꦁ ꦭꦨꦶꦠ꧀ꦮꦴ ꦤꦕꦶꦫꦱ꧀ꦱꦺꦮ ꦄꦫꦲꦠ꧀ꦠꦺ ꦥꦠꦶꦛ꧀ꦜꦴꦱꦶ. ꦄꦡ ꦱꦠ꧀ꦡꦴ ꦄꦥꦫꦨꦴꦒꦺ ꦗꦺꦠꦮꦤꦺ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦡꦺꦫꦁ ꦄꦴꦫꦢ꧀ꦣꦮꦷꦫꦶꦪꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦱꦷꦠꦶ.

ꦱꦺꦴꦟꦏꦸꦛꦶꦏꦟ꧀ꦟꦠ꧀ꦡꦺꦫꦮꦠ꧀ꦡꦸ

꧒꧐꧖. ꦄꦛ꧀ꦜꦩꦺ ꦏꦭ꧀ꦪꦴꦟꦮꦴꦏ꧀ꦏꦫꦟꦴꦤꦤ꧀ꦠꦶ ꦮꦴꦏ꧀ꦏꦫꦟꦁ ꦮꦸꦕ꧀ꦕꦠꦶ ꦮꦕꦤꦏꦶꦫꦶꦪꦴ, ꦩꦣꦸꦫꦮꦕꦤꦴꦤꦤ꧀ꦠꦶ ꦄꦠ꧀ꦡꦺꦴ. ꦄꦪꦚ꧀ꦲꦶ ꦡꦺꦫꦺꦴ ꦢꦱꦧꦭꦺꦤ ꦱꦢ꧀ꦣꦶꦁ ꦌꦏꦒꦤ꧀ꦣꦏꦸꦛꦶꦪꦴ ꦠꦡꦴꦒꦠꦱ꧀ꦱ ꦩꦣꦸꦫꦺꦤ ꦱꦫꦺꦤ ꦣꦩ꧀ꦩꦏꦡꦁ ꦏꦡꦺꦱꦶ. ꦄꦡꦱ꧀ꦱ ꦱꦠ꧀ꦡꦴ ꦱꦴꦣꦸꦏꦴꦫꦁ ꦄꦢꦴꦱꦶ. ꦠꦱ꧀ꦩꦴ ꦱꦺꦴ ꦏꦭ꧀ꦪꦴꦟꦮꦴꦏ꧀ꦏꦫꦟꦴꦤꦁ ꦄꦒ꧀ꦒꦺꦴ ꦤꦴꦩ ꦗꦴꦠꦺꦴ. ꦱꦺꦴꦟꦺꦴꦠꦶ ꦠꦱ꧀ꦱ ꦤꦴꦩꦁ, ꦏꦺꦴꦛꦶꦄꦒ꧀ꦓꦤꦏꦁ ꦥꦤ ꦏꦟ꧀ꦟꦥꦶꦭ꦳ꦤ꧀ꦣꦤꦁ ꦣꦴꦫꦺꦱꦶ. ꦠꦱ꧀ꦩꦴ ꦏꦸꦛꦶꦏꦟ꧀ꦟꦺꦴꦠꦶ ꦮꦸꦕ꧀ꦕꦠꦶ, ꦏꦺꦴꦛꦶꦏꦟ꧀ꦟꦺꦴꦠꦶ ꦄꦠ꧀ꦡꦺꦴ.

ꦠꦱ꧀ꦱ ꦥꦚ꧀ꦲꦏꦩ꧀ꦩꦺ ꦄꦪꦩꦤꦸꦥꦸꦧ꧀ꦧꦶꦏꦡꦴ – ꦄꦪꦩ꧀ꦥꦶ ꦥꦢꦸꦩꦸꦠ꧀ꦠꦫꦧꦸꦢ꧀ꦣꦏꦴꦭꦺ ꦥꦸꦫꦶꦩꦤꦪꦺꦤꦺꦮ ꦩꦲꦴꦗꦤꦺꦤ ꦱꦢ꧀ꦣꦶꦁ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦥꦫꦶꦱꦥꦫꦶꦪꦤ꧀ꦠꦺ ꦜꦠ꧀ꦮꦴ ꦱꦠ꧀ꦡꦸ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦱꦠ꧀ꦡꦴꦫꦁ ꦌꦏꦁ ꦨꦶꦏ꧀ꦑꦸꦁ ꦏꦭ꧀ꦪꦴꦟꦮꦴꦏ꧀ꦏꦫꦟꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦤ꧀ꦠꦁ ꦢꦶꦱ꧀ꦮꦴ ‘‘ꦩꦪꦴꦥꦶ ꦄꦤꦴꦒꦠꦺ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦏꦭ꧀ꦪꦴꦟꦮꦴꦏ꧀ꦏꦫꦟꦴꦤꦁ ꦄꦒ꧀ꦒꦺꦤ ꦨꦮꦶꦠꦸꦁ ꦮꦛ꧀ꦛꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦢꦱꦧꦭꦁ ꦤꦶꦩꦤ꧀ꦠꦺꦠ꧀ꦮꦴ ꦱꦠ꧀ꦠꦴꦲꦁ ꦩꦲꦴꦢꦴꦤꦁ ꦢꦠ꧀ꦮꦴ, ‘‘ꦨꦤ꧀ꦠꦺ, ꦪꦁ ꦨꦶꦏ꧀ꦑꦸꦁ ꦠꦸꦩ꧀ꦲꦺ ꦆꦠꦺꦴ ꦱꦠ꧀ꦠꦢꦶꦮꦱꦩꦠ꧀ꦡꦏꦺ ꦏꦭ꧀ꦪꦴꦟꦮꦴꦏ꧀ꦏꦫꦟꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦪꦶꦠ꧀ꦡ, ꦄꦲꦩ꧀ꦥꦶ ꦆꦩꦱ꧀ꦱ ꦄꦣꦶꦏꦴꦫꦏꦩ꧀ꦩꦱ꧀ꦱ ꦦꦭꦺꦤ ꦄꦤꦴꦒꦠꦺ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦠꦡꦴꦫꦹꦥꦺꦴ ꦨꦮꦺꦪ꧀ꦪ’’ꦤ꧀ꦠꦶ ꦥꦠ꧀ꦡꦤꦁ ꦄꦏꦴꦱꦶ. ꦱꦠ꧀ꦡꦴ ꦠꦱ꧀ꦱ ꦄꦤꦤ꧀ꦠꦫꦴꦪꦁ ꦢꦶꦱ꧀ꦮꦴ ‘‘ꦄꦤꦴꦒꦠꦺ ꦒꦺꦴꦠꦩꦧꦸꦢ꧀ꦣꦱ꧀ꦱ ꦱꦴꦱꦤꦺ ꦏꦭ꧀ꦪꦴꦟꦮꦴꦏ꧀ꦏꦫꦟꦴꦤꦁ ꦄꦒ꧀ꦒꦺꦴ ꦨꦮꦶꦱ꧀ꦱꦱꦷ’’ꦠꦶ ꦧ꧀ꦪꦴꦏꦫꦶꦠ꧀ꦮꦴ ꦥꦏ꧀ꦏꦴꦩꦶ.

ꦱꦺꦴꦥꦶ ꦪꦴꦮꦗꦷꦮꦁ ꦏꦸꦱꦭꦁ ꦏꦠ꧀ꦮꦴ ꦏꦥ꧀ꦥꦱꦠꦱꦲꦱ꧀ꦱꦁ ꦢꦺꦮꦺꦱꦸ ꦕ ꦩꦤꦸꦱ꧀ꦱꦺꦱꦸ ꦕ ꦱꦁꦱꦫꦤ꧀ꦠꦺꦴ ꦄꦩ꧀ꦲꦴꦏꦁ ꦢꦱꦧꦭꦱ꧀ꦱ ꦈꦥ꧀ꦥꦠ꧀ꦠꦶꦠꦺꦴ ꦥꦸꦫꦺꦠꦫꦩꦺꦮ ꦢꦺꦮꦭꦺꦴꦏꦴ ꦕꦮꦶꦠ꧀ꦮꦴ ꦏꦴꦭ꦳ꦶꦪꦴ ꦤꦴꦩ ꦏꦸꦫꦫꦓꦫꦶꦏꦴꦪ ꦈꦥꦴꦱꦶꦏꦴꦪ ꦏꦸꦕ꧀ꦖꦶꦱ꧀ꦩꦶꦁ ꦥꦛꦶꦱꦤ꧀ꦣꦶꦁ ꦒꦟ꧀ꦲꦶ. ꦱꦴ ꦥꦫꦶꦥꦏ꧀ꦏꦺ ꦒꦧ꧀ꦨꦺ ꦫꦴꦗꦒꦲꦤꦒꦫꦺ ꦄꦠ꧀ꦠꦤꦺꦴ ꦏꦸꦭꦤꦶꦮꦺꦱꦤꦁ ꦄꦴꦒꦠꦴ.

ꦠꦱ꧀ꦩꦶꦁ ꦱꦩꦪꦺ ꦄꦩ꧀ꦲꦴꦏꦁ ꦱꦠ꧀ꦡꦴ ꦱꦧ꧀ꦧꦚ꧀ꦚꦸꦠꦁ ꦥꦠ꧀ꦠꦺꦴ ꦆꦱꦶꦥꦠꦤꦺ ꦣꦩ꧀ꦩꦕꦏ꧀ꦏꦁ ꦥꦮꦠ꧀ꦠꦺꦱꦶ. ꦣꦩ꧀ꦩꦕꦏ꧀ꦏꦥ꧀ꦥꦮꦠ꧀ꦠꦤꦺ ꦢꦱꦱꦲꦱ꧀ꦱꦕꦏ꧀ꦏꦮꦴꦭ꦳ꦢꦺꦮꦠꦴ ꦱꦤ꧀ꦤꦶꦥꦠꦶꦁꦱꦸ. ꦠꦠ꧀ꦡ ꦌꦏꦺꦴ ꦄꦛ꧀ꦜꦮꦷꦱꦠꦶꦪꦴ ꦪꦏ꧀ꦑꦱꦺꦤꦴꦥꦠꦷꦤꦁ ꦄꦧ꧀ꦨꦤ꧀ꦠꦫꦺ ꦱꦴꦠꦴꦒꦶꦫꦺꦴ ꦤꦴꦩ ꦪꦏ꧀ꦑꦺꦴ ꦢꦱꦧꦭꦱ꧀ꦱ ꦣꦩ꧀ꦩꦏꦡꦁ ꦱꦸꦠ꧀ꦮꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦪ ꦕꦶꦤ꧀ꦠꦺꦱꦶ – ‘‘ꦏꦶꦁ ꦤꦸ ꦑꦺꦴ ꦄꦪꦁ ꦌꦮꦁ ꦩꦣꦸꦫꦣꦩ꧀ꦩꦏꦡꦴ ꦩꦩ ꦱꦲꦴꦪꦺꦤ ꦲꦺꦩꦮꦠꦺꦤ ꦱꦸꦠꦴ ꦤ ꦱꦸꦠꦴ’’ꦠꦶ? ꦱꦺꦴ ꦢꦺꦮꦱꦔ꧀ꦓꦱ꧀ꦱ ꦄꦤ꧀ꦠꦫꦺ ꦎꦭꦺꦴꦏꦺꦤ꧀ꦠꦺꦴ ꦠꦁ ꦄꦥꦱ꧀ꦱꦶꦠ꧀ꦮꦴ ‘‘ꦄꦢ꧀ꦣꦴ ꦩꦩ ꦱꦲꦴꦪꦺꦴ ꦠꦶꦟ꧀ꦟꦁ ꦫꦠꦤꦴꦤꦁ ꦈꦥ꧀ꦥꦤ꧀ꦤꦨꦴꦮꦁ ꦤ ꦗꦴꦤꦴꦠꦶ, ꦒꦕ꧀ꦖꦴꦩꦶ ꦢꦱꦧꦭꦱ꧀ꦱ ꦕꦺꦮ ꦮꦟ꧀ꦟꦁ ꦏꦡꦺꦱ꧀ꦱꦴꦩꦶ, ꦥꦛꦶꦮꦶꦢ꧀ꦣꦣꦩ꧀ꦩꦚ꧀ꦕ ꦄꦴꦫꦺꦴꦕꦺꦱ꧀ꦱꦴꦩꦷ’’ꦠꦶ ꦄꦠ꧀ꦠꦤꦺꦴ ꦥꦫꦶꦱꦴꦪ ꦱꦢ꧀ꦣꦶꦁ ꦫꦴꦗꦒꦲꦩꦠ꧀ꦡꦏꦺꦤ ꦠꦱ꧀ꦱ ꦱꦤ꧀ꦠꦶꦏꦁ ꦥꦴꦪꦴꦱꦶ.

ꦲꦺꦩꦮꦠꦺꦴꦥꦶ ꦠꦶꦪꦺꦴꦗꦤꦱꦲꦱ꧀ꦱꦁ ꦲꦶꦩꦮꦤ꧀ꦠꦁ ꦄꦏꦴꦭꦥꦸꦥ꧀ꦦꦶꦠꦁ ꦢꦶꦱ꧀ꦮꦴ ‘‘ꦩꦩ ꦱꦲꦴꦪꦺꦤ ꦱꦴꦠꦴꦒꦶꦫꦺꦤ ꦱꦢ꧀ꦣꦶꦁ ꦲꦶꦩꦮꦤ꧀ꦠꦏꦷꦭ꦳ꦶꦠꦁ ꦏꦷꦭ꦳ꦶꦱ꧀ꦱꦴꦩꦷ’’ꦠꦶ ꦄꦠ꧀ꦠꦤꦺꦴ ꦥꦫꦶꦱꦴꦪ ꦱꦢ꧀ꦣꦶꦁ ꦫꦴꦗꦒꦲꦩꦠ꧀ꦡꦏꦺꦤꦺꦮ ꦥꦴꦪꦴꦱꦶ. ꦠꦺꦱꦁ ꦢ꧀ꦮꦶꦤ꧀ꦤꦩ꧀ꦥꦶ ꦄꦒ꧀ꦒꦧꦭꦏꦴꦪꦴ ꦏꦸꦭꦓꦫꦶꦏꦴꦪ ꦏꦴꦭ꦳ꦶꦈꦥꦴꦱꦶꦏꦴꦪ ꦤꦶꦮꦺꦱꦤꦩꦠ꧀ꦡꦏꦺ ꦱꦩꦴꦒꦤ꧀ꦠ꧀ꦮꦴ ‘‘ꦠꦸꦩ꧀ꦲꦺ ꦏꦱ꧀ꦱ ꦥꦫꦶꦱꦴ, ꦩꦪꦁ ꦱꦴꦠꦴꦒꦶꦫꦱ꧀ꦱ. ꦠꦸꦩ꧀ꦲꦺ ꦏꦱ꧀ꦱ ꦥꦫꦶꦱꦴ, ꦩꦪꦁ ꦲꦺꦩꦮꦠꦱ꧀ꦱꦴ’’ꦠꦶ ꦄꦴꦲꦁꦱꦸ. ꦠꦺ ꦲꦛ꧀ꦜꦠꦸꦛ꧀ꦜꦴꦮ ꦒꦤ꧀ꦠ꧀ꦮꦴ ꦠꦺꦱꦁ ꦪꦏ꧀ꦑꦱꦺꦤꦴꦥꦠꦷꦤꦁ ꦄꦴꦫꦺꦴꦕꦪꦶꦁꦱꦸ. ꦠꦺꦥꦶ ꦠꦁꦑꦟꦚ꧀ꦚꦺꦮ ꦈꦥꦴꦱꦶꦏꦴꦪ ꦤꦶꦮꦺꦱꦤꦩꦠ꧀ꦡꦏꦺ ꦱꦩꦴꦒꦕ꧀ꦖꦶꦁꦱꦸ. ꦱꦴꦠꦴꦒꦶꦫꦺꦴ ꦲꦺꦩꦮꦠꦁ ꦄꦴꦲ – ‘‘ꦏꦲꦁ, ꦱꦩ꧀ꦩ, ꦒꦕ꧀ꦖꦱꦷ’’ꦠꦶ? ꦠꦮ ꦱꦤ꧀ꦠꦶꦏꦁ ꦱꦩ꧀ꦩꦴꦠꦶ. ꦏꦶꦁꦏꦴꦫꦟꦴꦠꦶ? ꦲꦶꦩꦮꦤ꧀ꦠꦁ ꦥꦸꦥ꧀ꦦꦶꦠꦁ ꦢꦶꦱ꧀ꦮꦴ ꦠꦪꦴ ꦱꦢ꧀ꦣꦶꦁ ꦠꦠ꧀ꦡ ꦏꦷꦭ꦳ꦶꦱ꧀ꦱꦴꦩꦷꦠꦶ. ꦠ꧀ꦮꦁ ꦥꦤ, ꦱꦩ꧀ꦩ, ꦏꦲꦁ ꦒꦕ꧀ꦖꦱꦷꦠꦶ? ꦠꦮ ꦱꦤ꧀ꦠꦶꦏꦁ, ꦱꦩ꧀ꦩꦴꦠꦶ. ꦏꦶꦁꦏꦴꦫꦟꦴꦠꦶ? ꦠ꧀ꦮꦁ ꦲꦶꦩꦮꦤ꧀ꦠꦱ꧀ꦱ ꦏꦺꦤ ꦥꦸꦥ꧀ꦦꦶꦠꦨꦴꦮꦁ ꦗꦴꦤꦴꦱꦷꦠꦶ? ꦤ ꦗꦴꦤꦴꦩꦶ, ꦱꦩ꧀ꦩꦴꦠꦶ. ꦱꦸꦢ꧀ꦣꦺꦴꦢꦤꦩꦲꦴꦫꦴꦗꦱ꧀ꦱ ꦥꦸꦠ꧀ꦠꦺꦴ ꦱꦶꦢ꧀ꦣꦠ꧀ꦡꦏꦸꦩꦴꦫꦺꦴ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸꦁ ꦏꦩ꧀ꦥꦺꦠ꧀ꦮꦴ ꦥꦛꦶꦮꦶꦢ꧀ꦣꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦺꦴ ꦢꦱꦱꦲꦱ꧀ꦱꦕꦏ꧀ꦏꦮꦴꦭ꦳ꦢꦺꦮꦠꦴꦤꦁ ꦩꦗ꧀ꦙꦺ ꦄꦤꦸꦠ꧀ꦠꦫꦁ ꦣꦩ꧀ꦩꦕꦏ꧀ꦏꦁ ꦥꦮꦠ꧀ꦠꦺꦱꦶ. ꦠꦱ꧀ꦱ ꦥꦮꦠ꧀ꦠꦶꦠꦨꦴꦮꦁ ꦤ ꦗꦴꦤꦴꦱꦷꦠꦶ? ꦤ ꦗꦴꦤꦴꦩꦶ, ꦱꦩ꧀ꦩꦴꦠꦶ. ꦠ꧀ꦮꦁ ꦌꦠ꧀ꦠꦏꦩꦺꦮ ꦜꦴꦤꦁ ꦥꦸꦥ꧀ꦦꦶꦠꦤ꧀ꦠꦶ ꦄꦚ꧀ꦚꦴꦱꦶ, ꦠꦱ꧀ꦱ ꦥꦤ ꦥꦸꦫꦶꦱꦱ꧀ꦱ ꦱꦏ꧀ꦏꦴꦫꦠ꧀ꦡꦴꦪ ꦱꦏꦭꦢꦱꦱꦲꦱ꧀ꦱꦕꦏ꧀ꦏꦮꦴꦭ꦳ꦁ ꦌꦏꦩꦴꦭꦴꦒꦸꦭ꦳ꦱꦢꦶꦱꦁ ꦄꦗ꧀ꦗ ꦗꦴꦠꦁ ꦱꦩ꧀ꦩꦴꦠꦶ. ꦩꦴꦭꦴ ꦠꦴꦮ ꦥꦸꦥ꧀ꦦꦤ꧀ꦠꦸ, ꦠꦪꦴ ꦱꦺꦴ ꦱꦠ꧀ꦡꦴ ꦄꦏ꧀ꦑꦷꦤꦶ ꦥꦹꦫꦺꦠ꧀ꦮꦴ ꦢꦶꦛ꧀ꦜꦺꦴꦠꦶ. ꦄꦴꦩ, ꦱꦩ꧀ꦩ, ꦱꦠ꧀ꦡꦴ ꦕ ꦩꦺ ꦢꦶꦛ꧀ꦜꦺꦴ, ꦣꦩ꧀ꦩꦺꦴ ꦕ ꦱꦸꦠꦺꦴ, ꦄꦩꦠꦚ꧀ꦕ ꦥꦷꦠꦁ. ꦄꦲꦁ ‘‘ꦌꦠꦁ ꦄꦩꦠꦣꦩ꧀ꦩꦁ ꦠꦩ꧀ꦥꦶ ꦗꦴꦤꦴꦥꦺꦱ꧀ꦱꦴꦩꦷ’’ꦠꦶ ꦠꦮ ꦱꦤ꧀ꦠꦶꦏꦁ ꦄꦴꦒꦠꦺꦴꦱ꧀ꦩꦶ, ꦱꦩ꧀ꦩꦴꦠꦶ. ꦠꦺꦱꦁ ꦄꦚ꧀ꦚꦩꦚ꧀ꦚꦁ ꦏꦡꦺꦤ꧀ꦠꦴꦤꦁꦪꦺꦮ ꦈꦥꦴꦱꦶꦏꦴ ꦱꦶꦫꦶꦱꦪꦤꦠꦺꦴ ꦈꦛ꧀ꦜꦴꦪ ꦤꦶꦱꦶꦤ꧀ꦤꦴ ꦠꦁ ꦏꦡꦴꦱꦭ꧀ꦭꦴꦥꦁ ꦱꦸꦠ꧀ꦮꦴ ꦱꦢ꧀ꦢꦺ ꦤꦶꦩꦶꦠ꧀ꦠꦁ ꦒꦟ꧀ꦲꦶ. ‘‘ꦄꦪꦁ ꦱꦢ꧀ꦢꦺꦴ ꦈꦢ꧀ꦣꦁ, ꦤ ꦲꦺꦛ꧀ꦜꦴ, ꦄꦩꦤꦸꦱ꧀ꦱꦨꦴꦱꦶꦠꦺꦴ, ꦤꦺꦴ ꦩꦤꦸꦱ꧀ꦱꦨꦴꦱꦶꦠꦺꦴ’’ꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ꦎꦲꦶꦠꦱꦺꦴꦠꦴ ꦥꦒ꧀ꦒꦲꦶꦠꦩꦴꦤꦱꦴ ꦲꦸꦠ꧀ꦮꦴ ꦤꦶꦱꦷꦢꦶ. ꦠꦠꦺꦴ –

‘‘ꦄꦗ꧀ꦗ ꦥꦤ꧀ꦤꦫꦱꦺꦴ ꦈꦥꦺꦴꦱꦡꦺꦴ (ꦆꦠꦶ ꦱꦴꦠꦴꦒꦶꦫꦺꦴ ꦪꦏ꧀ꦑꦺꦴ),

ꦢꦶꦧ꧀ꦧꦴ ꦫꦠ꧀ꦠꦶ ꦈꦥꦛ꧀ꦜꦶꦠꦴ;

ꦄꦤꦺꦴꦩꦤꦴꦩꦁ ꦱꦠ꧀ꦡꦴꦫꦁ,

ꦲꦤ꧀ꦢ ꦥꦱ꧀ꦱꦴꦩ ꦒꦺꦴꦠꦩ’’ꦤ꧀ꦠꦶ. (ꦱꦸ. ꦤꦶ. ꧑꧕꧓) –

ꦌꦮꦁ ꦱꦴꦠꦴꦒꦶꦫꦺꦤ ꦮꦸꦠ꧀ꦠꦺ –

‘‘ꦏꦕ꧀ꦕꦶ ꦩꦤꦺꦴ ꦱꦸꦥꦟꦶꦲꦶꦠꦺꦴ (ꦆꦠꦶ ꦲꦺꦩꦮꦠꦺꦴ ꦪꦏ꧀ꦑꦺꦴ),

ꦱꦧ꧀ꦧꦨꦹꦠꦺꦱꦸ ꦠꦴꦢꦶꦤꦺꦴ;

ꦏꦕ꧀ꦕꦶ ꦆꦛ꧀ꦜꦺ ꦄꦤꦶꦛ꧀ꦜꦺ ꦕ,

ꦱꦔ꧀ꦏꦥ꧀ꦥꦱ꧀ꦱ ꦮꦱꦷꦏꦠꦴ’’ꦠꦶ. (ꦱꦸ. ꦤꦶ. ꧑꧕꧔);

ꦌꦮꦁ ꦲꦺꦩꦮꦠꦺꦴ ꦱꦠ꧀ꦡꦸ ꦏꦴꦪꦱꦩꦴꦕꦴꦫꦚ꧀ꦕ ꦄꦴꦗꦷꦮꦚ꧀ꦕ ꦩꦤꦺꦴꦱꦩꦴꦕꦴꦫꦚ꧀ꦕ ꦥꦸꦕ꧀ꦖꦶ. ꦥꦸꦕ꧀ꦖꦶꦠꦁ ꦥꦸꦕ꧀ꦖꦶꦠꦁ ꦱꦴꦠꦴꦒꦶꦫꦺꦴ ꦮꦶꦱ꧀ꦱꦗ꧀ꦗꦺꦱꦶ. ꦌꦮꦁ ꦱꦠ꧀ꦡꦸ ꦱꦫꦷꦫꦮꦟ꧀ꦟꦒꦸꦟꦮꦟ꧀ꦟꦏꦡꦤꦮꦱꦺꦤ ꦲꦺꦩꦮꦠꦱꦸꦠ꧀ꦠꦤ꧀ꦠꦺ ꦤꦶꦛ꧀ꦜꦶꦠꦺ ꦲꦺꦩꦮꦠꦺꦴ ꦱꦲꦴꦪꦏꦱ꧀ꦱ ꦣꦩ꧀ꦩꦢꦺꦱꦤꦴꦤꦸꦱꦴꦫꦺꦤ ꦚꦴꦟꦁ ꦥꦺꦱꦺꦠ꧀ꦮꦴ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦲꦶ.

ꦄꦡ, ꦏꦴꦭ꦳ꦷ ꦈꦥꦴꦱꦶꦏꦴ, ꦥꦫꦱ꧀ꦱ ꦣꦩ꧀ꦩꦺ ꦢꦺꦱꦷꦪꦩꦴꦤꦺ ꦠꦡꦴꦒꦠꦁ ꦄꦢꦶꦛ꧀ꦜꦥꦸꦧ꧀ꦧꦴꦮ ꦲꦸꦠ꧀ꦮꦴ ꦄꦤꦸꦱ꧀ꦱꦮꦥ꧀ꦥꦱꦴꦢꦁ ꦈꦥ꧀ꦥꦴꦢꦺꦠ꧀ꦮꦴ ꦥꦫꦱ꧀ꦱ ꦮꦝ꧀ꦞꦶꦠꦁ ꦨꦺꦴꦗꦤꦁ ꦨꦸꦚ꧀ꦗꦩꦴꦤꦴ ꦮꦶꦪ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦱꦶ. ꦱꦴ ꦱꦧ꧀ꦧꦩꦴꦠꦸꦒꦴꦩꦴꦤꦁ ꦄꦤ꧀ꦠꦫꦺ ꦥꦜꦩꦏꦱꦺꦴꦠꦴꦥꦤ꧀ꦤꦴ ꦱꦧ꧀ꦧꦗꦺꦛ꧀ꦜꦶꦏꦴ ꦄꦲꦺꦴꦱꦶ. ꦠꦱ꧀ꦱꦴ ꦱꦲ ꦱꦺꦴꦠꦴꦥꦠ꧀ꦠꦶꦨꦴꦮꦺꦤ ꦠꦩꦺꦮ ꦫꦠ꧀ꦠꦶꦁ ꦒꦧ꧀ꦨꦮꦸꦛ꧀ꦜꦴꦤꦁ ꦗꦴꦠꦁ, ꦥꦛꦶꦭꦢ꧀ꦣꦢꦴꦫꦏꦱ꧀ꦱ ꦤꦴꦩꦒ꧀ꦒꦲꦟꦢꦶꦮꦱꦺ ꦱꦺꦴꦟꦺꦴꦠꦶ ꦤꦴꦩꦁ ꦄꦏꦴꦱꦶ. ꦱꦴ ꦪꦡꦴꦫꦸꦕꦶꦪꦴ ꦏꦸꦭꦒꦺꦲꦺ ꦮꦱꦶꦠ꧀ꦮꦴ ꦏꦸꦭꦓꦫꦩꦺꦮ ꦄꦒꦩꦴꦱꦶ.

ꦠꦱ꧀ꦩꦶꦁ ꦱꦩꦪꦺ ꦩꦲꦴꦏꦕ꧀ꦕꦴꦤꦠ꧀ꦡꦺꦫꦺꦴ ꦠꦁ ꦤꦒꦫꦁ ꦈꦥꦤꦶꦱ꧀ꦱꦴꦪ ꦈꦥꦮꦠ꧀ꦠꦺ ꦥꦧ꧀ꦧꦠꦺ ꦥꦛꦶꦮꦱꦠꦶ. ꦈꦥꦴꦱꦶꦏꦴ ꦡꦺꦫꦁ ꦈꦥꦛ꧀ꦜꦴꦠꦶ. ꦡꦺꦫꦺꦴ ꦤꦶꦧꦢ꧀ꦣꦁ ꦠꦱ꧀ꦱꦴ ꦤꦶꦮꦺꦱꦤꦁ ꦒꦕ꧀ꦖꦠꦶ. ꦱꦺꦴꦟꦢꦴꦫꦏꦺꦴꦥꦶ ꦤꦶꦧꦢ꧀ꦣꦁ ꦡꦺꦫꦱ꧀ꦱ ꦱꦤ꧀ꦠꦶꦏꦺ ꦮꦶꦕꦫꦤ꧀ꦠꦺꦴ ꦮꦶꦱ꧀ꦱꦴꦱꦶꦏꦺꦴ ꦄꦲꦺꦴꦱꦶ. ꦱꦺꦴ ꦄꦥꦫꦺꦤ ꦱꦩꦪꦺꦤ ꦡꦺꦫꦱ꧀ꦱ ꦱꦤ꧀ꦠꦶꦏꦺ ꦥꦧ꧀ꦧꦗꦶ. ꦡꦺꦫꦺꦴ ꦠꦁ ꦈꦥꦱꦩ꧀ꦥꦴꦢꦺꦠꦸꦏꦴꦩꦺꦴ ꦠꦷꦟꦶ ꦮꦱ꧀ꦱꦴꦤꦶ ꦒꦟꦁ ꦥꦫꦶꦪꦺꦱꦶꦠ꧀ꦮꦴ ꦈꦥꦱꦩ꧀ꦥꦴꦢꦺꦱꦶ. ꦱꦺꦴ ꦈꦥꦱꦩ꧀ꦥꦤ꧀ꦤꦺꦴ ꦏꦩ꧀ꦩꦛ꧀ꦜꦴꦤꦁ ꦏꦡꦴꦥꦺꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦡꦺꦫꦱ꧀ꦱꦺꦮ ꦱꦤ꧀ꦠꦶꦏꦺ ꦱꦸꦠ꧀ꦠꦤꦶꦥꦴꦠꦁ ꦈꦒ꧀ꦒꦟ꧀ꦲꦶꦠ꧀ꦮꦴ ꦮꦸꦠ꧀ꦡꦮꦱ꧀ꦱꦺꦴ ꦥꦮꦴꦫꦺꦠ꧀ꦮꦴ ꦱꦠ꧀ꦡꦴꦫꦁ ꦥꦱ꧀ꦱꦶꦠꦸꦏꦴꦩꦺꦴ ꦲꦸꦠ꧀ꦮꦴ ꦈꦥꦗ꧀ꦙꦴꦪꦁ ꦄꦴꦥꦸꦕ꧀ꦖꦶ. ꦡꦺꦫꦺꦴ ꦄꦴꦲ – ‘‘ꦱꦺꦴꦟ, ꦠꦪꦶ ꦒꦠꦺ ꦱꦠ꧀ꦡꦴ ꦠꦁ ꦌꦏꦒꦤ꧀ꦣꦏꦸꦛꦶꦪꦁ ꦮꦱꦴꦥꦺꦠ꧀ꦮꦴ ꦣꦩ꧀ꦩꦁ ꦄꦗ꧀ꦙꦺꦱꦶꦱ꧀ꦱꦠꦶ, ꦠ꧀ꦮꦁ ꦣꦩ꧀ꦩꦁ ꦏꦡꦺꦱ꧀ꦱꦱꦶ. ꦱꦠ꧀ꦡꦴ ꦠꦮ ꦣꦩ꧀ꦩꦏꦡꦴꦪ ꦥꦱꦷꦢꦶꦠ꧀ꦮꦴ ꦠꦸꦪ꧀ꦲꦁ ꦮꦫꦁ ꦢꦱ꧀ꦱꦠꦶ. ꦠ꧀ꦮꦁ ꦮꦫꦁ ꦒꦟ꧀ꦲꦤ꧀ꦠꦺꦴ ꦆꦩꦚ꧀ꦕ ꦆꦩꦚ꧀ꦕ ꦒꦟ꧀ꦲꦴꦲꦶ, ꦩꦩ ꦮꦕꦤꦺꦤ ꦢꦱꦧꦭꦱ꧀ꦱ ꦥꦴꦢꦺ ꦮꦤ꧀ꦢꦴꦲꦷ’’ꦠꦶ. ꦱꦺꦴ ꦈꦥꦗ꧀ꦙꦴꦪꦺꦤ ꦄꦤꦸꦚ꧀ꦚꦴꦠꦺꦴ ꦩꦴꦠꦸꦈꦥꦴꦱꦶꦏꦴꦪ ꦒꦺꦲꦁ ꦒꦤ꧀ꦠ꧀ꦮꦴ ꦄꦴꦫꦺꦴꦕꦺꦱꦶ. ꦱꦴꦥꦶ ‘‘ꦱꦴꦣꦸ, ꦠꦴꦠ, ꦠ꧀ꦮꦁ ꦢꦱꦧꦭꦁ ꦥꦱ꧀ꦱꦶꦠꦸꦁ ꦒꦕ꧀ꦖꦤ꧀ꦠꦺꦴ ꦆꦩꦁ ꦏꦩ꧀ꦧꦭꦁ ꦄꦴꦲꦫꦶꦠ꧀ꦮꦴ ꦱꦠ꧀ꦡꦸ ꦮꦱꦤꦒꦤ꧀ꦣꦏꦸꦛꦶꦪꦴ ꦨꦹꦩꦠ꧀ꦡꦫꦟꦁ ꦏꦠ꧀ꦮꦴ ꦄꦠ꧀ꦡꦫꦴꦲꦷ’’ꦠꦶ ꦏꦩ꧀ꦧꦭꦁ ꦄꦢꦴꦱꦶ. ꦱꦺꦴꦟꦠ꧀ꦡꦺꦫꦺꦴ ꦠꦁ ꦄꦴꦢꦴꦪ ꦱꦺꦤꦴꦱꦤꦁ ꦱꦁꦱꦴꦩꦺꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦱꦠ꧀ꦡꦸ ꦮꦱꦤꦛ꧀ꦜꦴꦤꦁ ꦒꦤ꧀ꦠ꧀ꦮꦴ ꦢꦱꦧꦭꦱ꧀ꦱ ꦧꦸꦢ꧀ꦣꦴꦱꦤꦺ ꦤꦶꦱꦶꦤ꧀ꦤꦮꦺꦭꦴꦪꦩꦺꦮ ꦈꦥꦱꦔ꧀ꦏꦩꦶꦠ꧀ꦮꦴ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦴꦱꦶ. ꦱꦠ꧀ꦡꦴ ꦠꦺꦤ ꦱꦢ꧀ꦣꦶꦁ ꦥꦛꦶꦱꦤ꧀ꦡꦴꦫꦁ ꦏꦠ꧀ꦮꦴ ꦄꦴꦤꦤ꧀ꦢꦠ꧀ꦡꦺꦫꦁ ꦄꦴꦩꦤ꧀ꦠꦺꦱꦶ – ‘‘ꦄꦴꦤꦤ꧀ꦢ, ꦆꦩꦱ꧀ꦱ ꦨꦶꦏ꧀ꦑꦸꦱ꧀ꦱ ꦱꦺꦤꦴꦱꦤꦁ ꦗꦴꦤꦴꦲꦷ’’ꦠꦶ. ꦡꦺꦫꦺꦴ ꦱꦠ꧀ꦡꦸ ꦄꦣꦶꦥ꧀ꦥꦴꦪꦁ ꦚꦠ꧀ꦮꦴ ꦄꦤ꧀ꦠꦺꦴꦒꦤ꧀ꦣꦏꦸꦛꦶꦪꦁꦪꦺꦮ ꦨꦹꦩꦠ꧀ꦡꦫꦟꦁ ꦈꦱ꧀ꦱꦴꦫꦺꦤ꧀ꦠꦺꦴ ꦮꦶꦪ ꦄꦠ꧀ꦡꦫꦶ.

ꦄꦡ ꦑꦺꦴ ꦨꦒꦮꦴ ꦧꦲꦸꦢꦺꦮꦫꦠ꧀ꦠꦶꦁ ꦄꦗ꧀ꦙꦺꦴꦏꦴꦱꦺ ꦮꦷꦠꦶꦤꦴꦩꦺꦠ꧀ꦮꦴ ꦮꦶꦲꦴꦫꦁ ꦥꦴꦮꦶꦱꦶ, ꦄꦴꦪꦱ꧀ꦩꦴꦥꦶ ꦑꦺꦴ ꦱꦺꦴꦟꦺꦴ ꦧꦲꦸꦢꦺꦮꦫꦠ꧀ꦠꦶꦁ ꦄꦗ꧀ꦙꦺꦴꦏꦴꦱꦺ ꦮꦷꦠꦶꦤꦴꦩꦺꦠ꧀ꦮꦴ ꦮꦶꦲꦴꦫꦁ ꦥꦴꦮꦶꦱꦶ. ꦱꦠ꧀ꦡꦴ ꦥꦕ꧀ꦖꦶꦩꦪꦴꦩꦺ ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦠ꧀ꦮꦴ ꦥꦕ꧀ꦕꦹꦱꦱꦩꦪꦺ ꦮꦸꦛ꧀ꦜꦴꦪ ꦤꦶꦱꦷꦢꦶꦠ꧀ꦮꦴ ‘‘ꦌꦠ꧀ꦠꦏꦺꦤ ꦏꦴꦭꦺꦤ ꦱꦺꦴꦟꦱ꧀ꦱ ꦏꦴꦪꦢꦫꦡꦺꦴ ꦥꦛꦶꦥ꧀ꦥꦱ꧀ꦱꦢ꧀ꦣꦺꦴ ꦨꦮꦶꦱ꧀ꦱꦠꦷ’’ꦠꦶ ꦚꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦱꦺꦴꦟꦁ ꦄꦗ꧀ꦙꦺꦱꦶ – ‘‘ꦥꦛꦶꦨꦴꦠꦸ ꦠꦁ ꦨꦶꦏ꧀ꦑꦸ ꦣꦩ꧀ꦩꦺꦴ ꦨꦴꦱꦶꦠꦸ’’ꦤ꧀ꦠꦶ. ꦱꦺꦴꦟꦠ꧀ꦡꦺꦫꦺꦴ ꦩꦣꦸꦫꦱ꧀ꦱꦫꦺꦤ ꦌꦏꦧ꧀ꦪꦚ꧀ꦗꦤꦩ꧀ꦥꦶ ꦄꦮꦶꦤꦴꦱꦺꦤ꧀ꦠꦺꦴ ꦄꦛ꧀ꦜꦏꦮꦒ꧀ꦒꦶꦪꦴꦤꦶ ꦱꦸꦠ꧀ꦠꦴꦤꦶ (ꦱꦸ. ꦤꦶ. ꧗꧗꧒ ꦄꦴꦢꦪꦺꦴ) ꦄꦨꦴꦱꦶ. ꦏꦡꦴꦥꦫꦶꦪꦺꦴꦱꦴꦤꦺ ꦨꦒꦮꦴ ꦱꦴꦣꦸꦏꦴꦫꦁ ꦢꦠ꧀ꦮꦴ ‘‘ꦱꦸꦒ꧀ꦒꦲꦶꦠꦺꦴ ꦠꦺ ꦨꦶꦏ꧀ꦑꦸ ꦣꦩ꧀ꦩꦺꦴ, ꦩꦪꦴ ꦢꦺꦱꦶꦠꦏꦴꦭꦺ ꦕ ꦄꦗ꧀ꦗ ꦕ ꦌꦏꦱꦢꦶꦱꦴꦮ ꦢꦺꦱꦤꦴ, ꦏꦶꦚ꧀ꦕꦶ ꦈꦴꦤꦁ ꦮꦴ ꦄꦣꦶꦏꦁ ꦮꦴ ꦤꦠ꧀ꦡꦷ’’ꦠꦶ ꦥꦱꦤ꧀ꦤꦨꦴꦮꦁ ꦥꦏꦴꦱꦺꦱꦶ. ꦱꦺꦴꦟꦠ꧀ꦡꦺꦫꦺꦴꦥꦶ ‘‘ꦄꦪꦁ ꦎꦏꦴꦱꦺꦴ’’ꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ꦈꦥꦗ꧀ꦙꦴꦪꦱ꧀ꦱ ꦮꦕꦤꦺꦤ ꦢꦱꦧꦭꦁ ꦮꦤ꧀ꦢꦶꦠ꧀ꦮꦴ ꦮꦶꦤꦪꦣꦫꦥꦚ꧀ꦕꦩꦺꦤ ꦒꦟꦺꦤ ꦈꦥꦱꦩ꧀ꦥꦢꦁ ꦄꦴꦢꦶꦁ ꦏꦠ꧀ꦮꦴ ꦱꦧ꧀ꦧꦺ ꦮꦫꦺ ꦪꦴꦕꦶ, ꦱꦠ꧀ꦡꦴ ꦄꦢꦴꦱꦶ. ꦥꦸꦤ ꦡꦺꦫꦺꦴ ꦩꦴꦠꦸꦈꦥꦴꦱꦶꦏꦴꦪ ꦮꦕꦤꦺꦤ ꦮꦤ꧀ꦢꦶꦠ꧀ꦮꦴ ‘‘ꦄꦪꦁ, ꦨꦤ꧀ꦠꦺ, ꦈꦥꦴꦱꦶꦏꦴꦪ ꦠꦸꦩ꧀ꦲꦴꦏꦁ ꦮꦱꦤꦒꦤ꧀ꦣꦏꦸꦛꦶꦪꦁ ꦨꦹꦩꦠ꧀ꦡꦫꦟꦠ꧀ꦡꦁ ꦏꦩ꧀ꦧꦭꦺꦴ ꦥꦲꦶꦠꦺꦴ’’ꦠꦶ ꦏꦩ꧀ꦧꦭꦁ ꦢꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦱꦠ꧀ꦡꦴꦫꦁ ꦮꦤ꧀ꦢꦶꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦏ꧀ꦏꦴꦩꦶ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ, ꦮꦶꦠ꧀ꦡꦴꦫꦠꦺꦴ ꦥꦤ ꦡꦺꦫꦱ꧀ꦱ ꦥꦧ꧀ꦧꦗ꧀ꦗꦁ ꦄꦴꦢꦶꦁ ꦏꦠ꧀ꦮꦴ ꦱꦧ꧀ꦧꦁ ꦱꦸꦠ꧀ꦠꦺ ꦄꦴꦒꦠꦩꦺꦮ.

ꦆꦠꦶ ꦡꦺꦫꦺꦴ ꦱꦠ꧀ꦡꦸ ꦱꦤ꧀ꦠꦶꦏꦴ ꦄꦛ꧀ꦜ ꦮꦫꦺ ꦭꦨꦶꦠ꧀ꦮꦴ ꦈꦥꦗ꧀ꦙꦴꦪꦱ꧀ꦱ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦱꦧ꧀ꦧꦁ ꦠꦁ ꦥꦮꦠ꧀ꦠꦶꦁ ꦄꦴꦫꦺꦴꦕꦺꦱꦶ. ꦥꦸꦤꦢꦶꦮꦱꦺ ꦩꦴꦠꦸꦈꦥꦴꦱꦶꦏꦴꦪ ꦤꦶꦮꦺꦱꦤꦢ꧀ꦮꦴꦫꦁ ꦒꦤ꧀ꦠ꧀ꦮꦴ ꦨꦶꦏ꧀ꦑꦴꦪ ꦄꦛ꧀ꦜꦴꦱꦶ. ꦈꦥꦴꦱꦶꦏꦴ ‘‘ꦥꦸꦠ꧀ꦠꦺꦴ ꦏꦶꦫ ꦩꦺ ꦢ꧀ꦮꦴꦫꦺ ꦜꦶꦠꦺꦴ’’ꦠꦶ ꦱꦸꦠ꧀ꦮꦴ ꦮꦺꦒꦺꦤ ꦄꦴꦒꦤ꧀ꦠ꧀ꦮꦴ ꦄꦨꦶꦮꦴꦢꦺꦠ꧀ꦮꦴ ꦲꦠ꧀ꦡꦠꦺꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦄꦤ꧀ꦠꦺꦴꦤꦶꦮꦺꦱꦤꦺ ꦤꦶꦱꦷꦢꦴꦥꦺꦠ꧀ꦮꦴ ꦨꦺꦴꦗꦤꦁ ꦄꦢꦴꦱꦶ. ꦄꦡ ꦤꦁ ꦨꦠ꧀ꦠꦏꦶꦕ꧀ꦕꦥꦫꦶꦪꦺꦴꦱꦴꦤꦺ ꦄꦴꦲ – ‘‘ꦢꦶꦛ꧀ꦜꦺꦴ ꦠꦺ, ꦠꦴꦠ, ꦢꦱꦧꦭꦺꦴ’’ꦠꦶ? ꦄꦴꦩ ꦈꦥꦴꦱꦶꦏꦺꦠꦶ. ꦮꦤ꧀ꦢꦶꦠꦺꦴ ꦠꦺ ꦩꦩ ꦮꦕꦤꦺꦤꦴꦠꦶ? ꦄꦴꦩ ꦮꦤ꧀ꦢꦶꦠꦺꦴ, ꦱꦺꦴꦥꦶ ꦕ ꦩꦺ ꦏꦩ꧀ꦧꦭꦺꦴ ꦠꦡꦴꦒꦠꦱ꧀ꦱ ꦮꦱꦤꦛ꧀ꦜꦴꦤꦺ ꦨꦹꦩꦠ꧀ꦡꦫꦟꦁ ꦏꦠ꧀ꦮꦴ ꦄꦠ꧀ꦡꦠꦺꦴꦠꦶ. ꦏꦶꦁ, ꦠꦴꦠ, ꦠꦪꦴ ꦏꦶꦫ ꦱꦠ꧀ꦡꦸ ꦣꦩ꧀ꦩꦏꦡꦴ ꦏꦡꦶꦠꦴ, ꦱꦠ꧀ꦡꦴꦫꦴ ꦕ ꦠꦺ ꦱꦴꦣꦸꦏꦴꦫꦺꦴ ꦢꦶꦤ꧀ꦤꦺꦴꦠꦶ? ꦠꦪꦴ ꦏꦡꦁ ꦚꦴꦠꦁ ꦈꦥꦴꦱꦶꦏꦺꦠꦶ? ꦠꦴꦠ, ꦩꦪ꧀ꦲꦁ ꦒꦺꦲꦺ ꦄꦣꦶꦮꦠ꧀ꦡꦴ ꦢꦺꦮꦠꦴ ꦢꦱꦧꦭꦺꦤ ꦠꦸꦪ꧀ꦲꦁ ꦱꦴꦣꦸꦏꦴꦫꦁ ꦢꦶꦤ꧀ꦤꦢꦶꦮꦱꦺ ‘‘ꦱꦏꦭꦢꦱꦱꦲꦱ꧀ꦱꦕꦏ꧀ꦏꦮꦴꦭ꦳ꦺ ꦢꦺꦮꦠꦴ ꦱꦴꦣꦸꦏꦴꦫꦁ ꦄꦢꦁꦱꦹ’’ꦠꦶ ꦄꦴꦲ – ꦠꦴꦠ, ꦠꦪꦴ ꦏꦡꦶꦠꦣꦩ꧀ꦩꦏꦡꦁ ꦧꦸꦢ꧀ꦣꦴꦤꦁ ꦏꦡꦶꦠꦤꦶꦪꦴꦩꦺꦤꦺꦮ ꦩꦪ꧀ꦲꦩ꧀ꦥꦶ ꦏꦡꦺꦠꦸꦁ ꦥꦕ꧀ꦕꦴꦱꦷꦱꦴꦩꦷꦠꦶ. ꦡꦺꦫꦺꦴ ꦩꦴꦠꦸ ꦏꦡꦁ ꦱꦩ꧀ꦥꦛꦶꦕ꧀ꦖꦶ. ꦱꦴ ꦠꦱ꧀ꦱ ꦄꦣꦶꦮꦴꦱꦤꦁ ꦮꦶꦢꦶꦠ꧀ꦮꦴ ꦢ꧀ꦮꦴꦫꦺ ꦩꦟ꧀ꦝꦥꦁ ꦏꦴꦫꦺꦠ꧀ꦮꦴ ꦢꦱꦧꦭꦱ꧀ꦱ ꦏꦡꦶꦠꦤꦶꦪꦴꦩꦺꦤꦺꦮ ꦄꦠ꧀ꦠꦤꦺꦴ ꦣꦩ꧀ꦩꦏꦡꦁ ꦏꦡꦴꦥꦺꦱꦷꦠꦶ ꦮꦠ꧀ꦡꦸ ꦌꦠ꧀ꦡ ꦱꦩꦸꦛ꧀ꦜꦶꦠꦁ. ꦱꦠ꧀ꦡꦴ ꦄꦥꦫꦨꦴꦒꦺ ꦄꦫꦶꦪꦒꦟꦩꦗ꧀ꦙꦺ ꦤꦶꦱꦶꦤ꧀ꦤꦺꦴ ꦡꦺꦫꦁ ꦏꦭ꧀ꦪꦴꦟꦮꦴꦏ꧀ꦏꦫꦟꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦱꦷꦠꦶ.

ꦱꦷꦮꦭꦶꦠ꧀ꦡꦺꦫꦮꦠ꧀ꦡꦸ

꧒꧐꧗. ꦤꦮꦩꦺ ꦭꦴꦨꦷꦤꦁ ꦪꦢꦶꦢꦁ ꦱꦷꦮꦭꦷꦠꦶ ꦜꦥꦺꦠ꧀ꦮꦴ ꦠꦡꦴꦒꦠꦁ ꦭꦴꦨꦷꦤꦁ ꦨꦶꦏ꧀ꦑꦹꦤꦁ ꦱꦷꦮꦭꦶꦠ꧀ꦡꦺꦫꦺꦴ ꦄꦒ꧀ꦒꦺꦴꦠꦶ ꦢꦱ꧀ꦱꦺꦠꦶ. ꦠꦱ꧀ꦱ ꦥꦚ꧀ꦲꦏꦩ꧀ꦩꦺ ꦄꦪꦩꦤꦸꦥꦸꦧ꧀ꦧꦶꦏꦡꦴ – ꦄꦪꦩ꧀ꦥꦶ ꦄꦠꦷꦠꦺ ꦥꦢꦸꦩꦸꦠ꧀ꦠꦫꦧꦸꦢ꧀ꦣꦏꦴꦭꦺ ꦮꦸꦠ꧀ꦠꦤꦪꦺꦤꦺꦮ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦥꦫꦶꦱꦥꦫꦶꦪꦤ꧀ꦠꦺ ꦜꦶꦠꦺꦴ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦱꦠ꧀ꦡꦴꦫꦁ ꦌꦏꦁ ꦨꦶꦏ꧀ꦑꦸꦁ ꦭꦴꦨꦷꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦤ꧀ꦠꦁ ꦢꦶꦱ꧀ꦮꦴ ‘‘ꦩꦪꦴꦥꦶ ꦄꦤꦴꦒꦠꦺ ꦌꦮꦫꦹꦥꦺꦤ ꦨꦮꦶꦠꦸꦁ ꦮꦛ꧀ꦛꦠꦷ’’ꦠꦶ ꦢꦱꦧꦭꦁ ꦤꦶꦩꦤ꧀ꦠꦺꦠ꧀ꦮꦴ ꦥꦸꦫꦶꦩꦤꦪꦺꦤꦺꦮ ꦱꦠ꧀ꦠꦴꦲꦁ ꦩꦲꦴꦢꦴꦤꦁ ꦢꦠ꧀ꦮꦴ ‘‘ꦨꦒꦮꦴ ꦄꦲꦩ꧀ꦥꦶ ꦆꦩꦶꦤꦴ ꦄꦣꦶꦏꦴꦫꦏꦩ꧀ꦩꦺꦤ ꦄꦚ꧀ꦚꦁ ꦱꦩ꧀ꦥꦠ꧀ꦠꦶꦁ ꦤ ꦥꦠ꧀ꦡꦺꦩꦶ, ꦄꦤꦴꦒꦠꦺ ꦥꦤ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦄꦲꦩ꧀ꦥꦶ ꦠꦸꦩ꧀ꦲꦺꦲꦶ ꦱꦺꦴ ꦌꦠꦢꦒ꧀ꦒꦺ ꦜꦥꦶꦠꦨꦶꦏ꧀ꦑꦸ ꦮꦶꦪ ꦭꦴꦨꦷꦤꦁ ꦄꦒ꧀ꦒꦺꦴ ꦨꦮꦺꦪ꧀ꦪ’’ꦤ꧀ꦠꦶ ꦥꦠ꧀ꦡꦤꦁ ꦄꦏꦴꦱꦶ. ꦱꦠ꧀ꦡꦴ ꦄꦤꦤ꧀ꦠꦫꦴꦪꦁ ꦢꦶꦱ꧀ꦮꦴ ‘‘ꦄꦪꦁ ꦠꦺ ꦥꦠ꧀ꦡꦤꦴ ꦄꦤꦴꦒꦠꦺ ꦒꦺꦴꦠꦩꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦱꦩꦶꦗ꧀ꦙꦶꦱ꧀ꦱꦠꦷ’’ꦠꦶ ꦧ꧀ꦪꦴꦏꦫꦶꦠ꧀ꦮꦴ ꦥꦏ꧀ꦏꦴꦩꦶ.

ꦱꦺꦴꦥꦶ ꦏꦸꦭꦥꦸꦠ꧀ꦠꦺꦴ ꦪꦴꦮꦗꦷꦮꦁ ꦏꦸꦱꦭꦁ ꦏꦠ꧀ꦮꦴ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦮꦶꦥꦱ꧀ꦱꦷꦧꦸꦢ꧀ꦣꦏꦴꦭꦺ ꦧꦤ꧀ꦣꦸꦩꦠꦷꦤꦒꦫꦠꦺꦴ ꦄꦮꦶꦢꦹꦫꦺ ꦌꦏꦱ꧀ꦩꦶꦁ ꦒꦴꦩꦺ ꦥꦛꦶꦱꦤ꧀ꦣꦶꦁ ꦒꦟ꧀ꦲꦶ. ꦠꦱ꧀ꦩꦶꦁ ꦱꦩꦪꦺ ꦧꦤ꧀ꦣꦸꦩꦠꦷꦤꦒꦫꦮꦴꦱꦶꦤꦺꦴ ꦫꦚ꧀ꦚꦴ ꦱꦢ꧀ꦣꦶꦁ ꦱꦴꦏꦕ꧀ꦖꦶꦠ꧀ꦮꦴ ꦱꦴꦏꦕ꧀ꦖꦶꦠ꧀ꦮꦴ ꦢꦱꦧꦭꦱ꧀ꦱ ꦢꦴꦤꦁ ꦢꦺꦤ꧀ꦠꦶ. ꦠꦺ ꦌꦏꦢꦶꦮꦱꦁ ꦱꦧ꧀ꦧꦺꦮ ꦌꦏꦠꦺꦴ ꦲꦸꦠ꧀ꦮꦴ ꦢꦴꦤꦁ ꦢꦺꦤ꧀ꦠꦴ ‘‘ꦏꦶꦁ ꦤꦸ ꦑꦺꦴ ꦄꦩ꧀ꦲꦴꦏꦁ ꦢꦴꦤꦩꦸꦑꦺ ꦤꦠ꧀ꦡꦷ’’ꦠꦶ ꦩꦣꦸꦚ꧀ꦕ ꦒꦸꦭ꦳ꦢꦣꦶꦚ꧀ꦕ ꦤ ꦄꦢ꧀ꦢꦱꦁꦱꦸ. ꦠꦺ ‘‘ꦪꦠꦺꦴ ꦏꦸꦠꦺꦴꦕꦶ ꦄꦴꦲꦫꦶꦱ꧀ꦱꦴꦩꦴ’’ꦠꦶ ꦗꦤꦥꦢꦠꦺꦴ ꦤꦒꦫꦁ ꦥꦮꦶꦱꦤꦩꦒ꧀ꦒꦺ ꦥꦸꦫꦶꦱꦁ ꦜꦥꦺꦱꦸꦁ. ꦠꦢꦴ ꦌꦱ ꦏꦸꦭꦥꦸꦠ꧀ꦠꦺꦴ ꦄꦠ꧀ꦠꦤꦺꦴ ꦒꦴꦩꦠꦺꦴ ꦒꦸꦭ꦳ꦢꦣꦶꦮꦴꦫꦏꦁ ꦒꦲꦺꦠ꧀ꦮꦴ ‘‘ꦏꦶꦚ꧀ꦕꦶꦢꦺꦮ ꦄꦴꦲꦫꦶꦱ꧀ꦱꦴꦩꦷ’’ꦠꦶ ꦤꦒꦫꦁ ꦒꦕ꧀ꦖꦤ꧀ꦠꦺꦴ ꦩꦸꦑꦁ ꦣꦺꦴꦮꦶꦠ꧀ꦮꦴ ‘‘ꦣꦺꦴꦠꦲꦠ꧀ꦡꦥꦴꦢꦺꦴ ꦥꦮꦶꦱꦶꦱ꧀ꦱꦴꦩꦷ’’ꦠꦶ ꦦꦴꦱꦸꦏꦛ꧀ꦜꦴꦤꦁ ꦎꦭꦺꦴꦏꦺꦤ꧀ꦠꦺꦴ ꦤꦔ꧀ꦒꦭꦱꦷꦱꦩꦠ꧀ꦠꦁ ꦤꦶꦩ꧀ꦩꦏ꧀ꦑꦶꦏꦁ ꦢꦟ꧀ꦝꦏꦩꦣꦸꦁ ꦢꦶꦱ꧀ꦮꦴ ‘‘ꦥꦸꦚ꧀ꦚꦺꦤ ꦩꦺ ꦆꦢꦁ ꦈꦥ꧀ꦥꦤ꧀ꦤ’’ꦤ꧀ꦠꦶ ꦒꦲꦺꦠ꧀ꦮꦴ ꦤꦒꦫꦁ ꦥꦮꦶꦱꦠꦶ. ꦤꦴꦒꦫꦺꦲꦶ ꦜꦥꦶꦠꦥꦸꦫꦶꦱꦺꦴ ꦠꦁ ꦢꦶꦱ꧀ꦮꦴ, ‘‘ꦨꦺꦴ ꦥꦸꦫꦶꦱ, ꦏꦱ꧀ꦱꦶꦩꦁ ꦄꦴꦲꦫꦱꦷ’’ꦠꦶ ꦥꦸꦕ꧀ꦖꦶ. ꦤ ꦏꦱ꧀ꦱꦕꦶ ꦱꦴꦩꦶ, ꦮꦶꦏ꧀ꦏꦶꦟꦶꦠꦸꦁ ꦥꦤ ꦩꦺ ꦆꦢꦁ ꦄꦴꦤꦷꦠꦤ꧀ꦠꦶ. ꦠꦺꦤ ꦲꦶ, ꦨꦺꦴ ꦥꦸꦫꦶꦱ, ꦆꦩꦁ ꦏꦲꦴꦥꦟꦁ ꦒꦲꦺꦠ꧀ꦮꦴ ꦌꦠꦁ ꦩꦣꦸꦚ꧀ꦕ ꦒꦸꦭ꦳ꦢꦣꦶꦚ꧀ꦕ ꦢꦺꦲꦷꦠꦶ.

ꦱꦺꦴ ꦕꦶꦤ꧀ꦠꦺꦱꦶ – ‘‘ꦆꦢꦁ ꦤ ꦧꦲꦸꦩꦹꦭꦁ, ꦄꦪꦚ꧀ꦕ ꦌꦏꦥ꧀ꦥꦲꦴꦫꦺꦤꦺꦮ ꦧꦲꦸꦁ ꦢꦺꦠꦶ, ꦮꦷꦩꦁꦱꦶꦠꦸꦁ ꦮꦛ꧀ꦛꦠꦷ’’ꦠꦶ. ꦠꦠꦺꦴ ꦤꦁ ‘‘ꦤꦴꦲꦁ ꦌꦏꦏꦲꦴꦥꦟꦺꦤ ꦢꦺꦩꦷ’’ꦠꦶ ꦄꦴꦲ. ꦪꦢꦶ ꦌꦮꦁ, ꦢ꧀ꦮꦺ ꦒꦲꦺꦠ꧀ꦮꦴ ꦢꦺꦲꦷꦠꦶ. ꦢ꧀ꦮꦷꦲꦶꦥꦶ ꦤ ꦢꦺꦩꦷꦠꦶ. ꦌꦠꦺꦤꦸꦥꦴꦪꦺꦤ ꦮꦝ꧀ꦞꦤ꧀ꦠꦁ ꦮꦝ꧀ꦞꦤ꧀ꦠꦁ ꦱꦲꦱ꧀ꦱꦁ ꦥꦴꦥꦸꦟꦶ. ꦱꦺꦴ ꦕꦶꦤ꧀ꦠꦺꦱꦶ – ‘‘ꦄꦠꦶꦄꦚ꧀ꦖꦶꦠꦸꦁ ꦤ ꦮꦛ꧀ꦛꦠꦶ, ꦲꦺꦴꦠꦸ ꦠꦴꦮ, ꦆꦩꦱ꧀ꦱ ꦏꦠ꧀ꦠꦧ꧀ꦧꦏꦶꦕ꧀ꦕꦁ ꦥꦸꦕ꧀ꦖꦶꦱ꧀ꦱꦴꦩꦷ’’ꦠꦶ. ꦄꦡ ꦤꦁ ꦄꦴꦲ – ‘‘ꦆꦢꦁ ꦤ ꦧꦲꦸꦄꦒ꧀ꦓꦤꦏꦁ, ꦠ꧀ꦮꦚ꧀ꦕ ꦧꦲꦸꦁ ꦢꦺꦱꦶ, ꦏꦺꦤ ꦏꦩ꧀ꦩꦺꦤ ꦆꦢꦁ ꦒꦟ꧀ꦲꦴꦱꦷ’’ꦠꦶ? ꦆꦣ, ꦨꦺꦴ, ꦤꦒꦫꦮꦴꦱꦶꦤꦺꦴ ꦫꦚ꧀ꦚꦴ ꦱꦢ꧀ꦣꦶꦁ ꦥꦛꦶꦮꦶꦫꦸꦗ꧀ꦙꦶꦠ꧀ꦮꦴ ꦮꦶꦥꦱ꧀ꦱꦷꦢꦱꦧꦭꦱ꧀ꦱ ꦢꦴꦤꦁ ꦢꦺꦤ꧀ꦠꦴ ꦆꦢꦁ ꦢ꧀ꦮꦪꦁ ꦢꦴꦤꦩꦸꦑꦺ ꦄꦥꦱ꧀ꦱꦤ꧀ꦠꦴ ꦥꦫꦶꦪꦺꦱꦤ꧀ꦠꦶ. ꦱꦕꦺ ꦆꦢꦁ ꦢ꧀ꦮꦪꦁ ꦤ ꦭꦨꦶꦱ꧀ꦱꦤ꧀ꦠꦶ, ꦤꦴꦒꦫꦴꦤꦁ ꦥꦫꦴꦗꦪꦺꦴ ꦨꦮꦶꦱ꧀ꦱꦠꦶ. ꦠꦱ꧀ꦩꦴ ꦱꦲꦱ꧀ꦱꦁ ꦢꦠ꧀ꦮꦴ ꦒꦟ꧀ꦲꦴꦩꦷꦠꦶ. ꦏꦶꦁ ꦥꦤꦺꦠꦁ ꦤꦴꦒꦫꦴꦤꦩꦺꦮ ꦮꦛ꧀ꦛꦠꦶ, ꦤ ꦄꦚ꧀ꦚꦺꦱꦁ ꦢꦴꦠꦸꦁ ꦮꦛ꧀ꦛꦠꦷꦠꦶ? ꦪꦱ꧀ꦱ ꦏꦱ꧀ꦱꦕꦶ ꦢꦴꦠꦸꦁ ꦄꦮꦴꦫꦶꦠꦩꦺꦠꦤ꧀ꦠꦶ. ꦄꦠ꧀ꦡꦶ ꦥꦤ ꦠꦺ ꦏꦺꦴꦕꦶ ꦤꦴꦒꦫꦴꦤꦁ ꦢꦴꦤꦺ ꦌꦏꦢꦶꦮꦱꦁ ꦱꦲꦱ꧀ꦱꦁ ꦢꦴꦠꦴꦠꦶ? ꦤꦠ꧀ꦡꦶ ꦱꦩ꧀ꦩꦴꦠꦶ. ꦆꦩꦺꦱꦁ ꦥꦤ ꦢ꧀ꦮꦶꦤ꧀ꦤꦁ ꦱꦲꦱ꧀ꦱꦒ꧀ꦓꦤꦏꦨꦴꦮꦁ ꦗꦴꦤꦴꦱꦷꦠꦶ? ꦄꦴꦩ ꦗꦴꦤꦴꦩꦷꦠꦶ. ꦠꦺꦤ ꦲꦶ ꦒꦕ꧀ꦖ, ꦤꦴꦒꦫꦴꦤꦁ ꦄꦴꦕꦶꦏ꧀ꦑ – ‘‘ꦌꦏꦺꦴ ꦥꦸꦫꦶꦱꦺꦴ ꦆꦩꦴꦤꦶ ꦢ꧀ꦮꦺ ꦩꦹꦭꦺꦤ ꦤ ꦢꦺꦠꦶ, ꦱꦲꦠ꧀ꦡꦺꦤꦺꦮ ꦢꦴꦠꦸꦏꦴꦩꦺꦴ, ꦠꦸꦩ꧀ꦲꦺ ꦆꦩꦺꦱꦁ ꦢ꧀ꦮꦶꦤ꧀ꦤꦁ ꦏꦴꦫꦟꦴ ꦤꦶꦫꦸꦱ꧀ꦱꦸꦏ꧀ꦏꦴ ꦲꦺꦴꦡꦴ’’ꦠꦶ. ꦠ꧀ꦮꦁ ꦥꦤ ꦩꦺ ꦆꦩꦱ꧀ꦩꦶꦁ ꦢꦴꦤꦩꦸꦑꦺ ꦗꦺꦛ꧀ꦜꦏꦨꦴꦮꦱ꧀ꦱ ꦏꦴꦪꦱꦏ꧀ꦑꦷ ꦲꦺꦴꦲꦷꦠꦶ.

ꦱꦺꦴ ꦒꦴꦩꦮꦴꦱꦷ ꦥꦫꦶꦧ꧀ꦧꦪꦠ꧀ꦡꦁ ꦒꦲꦶꦠꦩꦴꦱꦏꦺꦤ ꦥꦚ꧀ꦕꦏꦛꦸꦏꦁ ꦒꦲꦺꦠ꧀ꦮꦴ ꦕꦸꦟ꧀ꦟꦁ ꦏꦠ꧀ꦮꦴ ꦢꦣꦶꦠꦺꦴ ꦏꦚ꧀ꦗꦶꦪꦁ ꦮꦴꦲꦺꦠ꧀ꦮꦴ ꦠꦠ꧀ꦡ ꦩꦣꦸꦥꦛꦭꦁ ꦥꦷꦭ꦳ꦺꦠ꧀ꦮꦴ ꦥꦚ꧀ꦕꦏꦛꦸꦏꦕꦸꦟ꧀ꦟꦺꦤ ꦪꦺꦴꦗꦺꦠ꧀ꦮꦴ ꦌꦏꦱ꧀ꦩꦶꦁ ꦥꦢꦸꦩꦶꦤꦶꦥꦠ꧀ꦠꦺ ꦥꦏ꧀ꦑꦶꦥꦶꦠ꧀ꦮꦴ ꦠꦁ ꦱꦁꦮꦶꦢꦲꦶꦠ꧀ꦮꦴ ꦄꦴꦢꦴꦪ ꦢꦱꦧꦭꦱ꧀ꦱ ꦄꦮꦶꦢꦹꦫꦺ ꦜꦴꦤꦺ ꦤꦶꦱꦷꦢꦶ. ꦩꦲꦴꦗꦤꦺꦤ ꦄꦴꦲꦫꦶꦪꦩꦴꦤꦱ꧀ꦱ ꦱꦏ꧀ꦏꦴꦫꦱ꧀ꦱ ꦄꦤ꧀ꦠꦫꦺ ꦄꦠ꧀ꦠꦤꦺꦴ ꦥꦠ꧀ꦠꦮꦴꦫꦁ ꦎꦭꦺꦴꦏꦪꦩꦴꦤꦺꦴ ꦎꦏꦴꦱꦁ ꦚꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ‘‘ꦨꦒꦮꦴ ꦄꦪꦁ ꦩꦪ꧀ꦲꦁ ꦢꦸꦒ꧀ꦒꦠꦥꦟ꧀ꦟꦴꦏꦴꦫꦺꦴ, ꦆꦩꦁ ꦩꦺ ꦄꦤꦸꦏꦩ꧀ꦥꦁ ꦥꦛꦶꦕ꧀ꦕ ꦒꦟ꧀ꦲꦡꦴ’’ꦠꦶ. ꦱꦠ꧀ꦡꦴ ꦠꦱ꧀ꦱ ꦄꦤꦸꦏꦩ꧀ꦥꦁ ꦥꦛꦶꦕ꧀ꦕ ꦕꦠꦸꦩꦲꦴꦫꦴꦗꦢꦠ꧀ꦠꦶꦪꦺꦤ ꦱꦺꦭꦩꦪꦺꦤ ꦥꦠ꧀ꦠꦺꦤ ꦠꦁ ꦥꦛꦶꦒ꧀ꦒꦲꦺꦠ꧀ꦮꦴ ꦪꦡꦴ ꦄꦛ꧀ꦜꦱꦛ꧀ꦜꦶꦨꦶꦏ꧀ꦑꦸꦱꦠꦱꦲꦱ꧀ꦱꦱ꧀ꦱ ꦢꦶꦪ꧀ꦪꦩꦴꦤꦁ ꦤ ꦑꦷꦪꦠꦶ, ꦌꦮꦁ ꦄꦣꦶꦛ꧀ꦜꦴꦱꦶ. ꦱꦺꦴꦥꦶ ꦏꦸꦭꦥꦸꦠ꧀ꦠꦺꦴ ꦤꦶꦛ꧀ꦜꦶꦠꦨꦠ꧀ꦠꦏꦶꦕ꧀ꦕꦁ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦜꦶꦠꦺꦴ ꦄꦴꦲ – ‘‘ꦢꦶꦛ꧀ꦜꦺꦴ ꦩꦺ ꦨꦒꦮꦴ ꦄꦗ꧀ꦗ ꦧꦤ꧀ꦣꦸꦩꦠꦷꦤꦒꦫꦮꦴꦱꦶꦏꦺꦲꦶ ꦠꦸꦩ꧀ꦲꦴꦏꦁ ꦱꦏ꧀ꦏꦴꦫꦺꦴ ꦄꦴꦲꦫꦶꦪꦩꦴꦤꦺꦴ, ꦄꦲꦩ꧀ꦥꦶ ꦆꦩꦱ꧀ꦱ ꦏꦩ꧀ꦩꦱ꧀ꦱ ꦤꦶꦱ꧀ꦱꦤ꧀ꦢꦺꦤ ꦤꦶꦧ꧀ꦧꦠ꧀ꦠꦤꦶꦧ꧀ꦧꦠ꧀ꦠꦨꦮꦺ ꦭꦴꦨꦒ꧀ꦒꦪꦱꦒ꧀ꦒꦥ꧀ꦥꦠ꧀ꦠꦺꦴ ꦨꦮꦺꦪ꧀ꦪ’’ꦤ꧀ꦠꦶ. ꦱꦠ꧀ꦡꦴ ‘‘ꦌꦮꦁ ꦲꦺꦴꦠꦸ ꦏꦸꦭꦥꦸꦠ꧀ꦠꦴ’’ꦠꦶ ꦮꦠ꧀ꦮꦴ ꦠꦱ꧀ꦱ ꦕ ꦤꦒꦫꦮꦴꦱꦷꦤꦚ꧀ꦕ ꦨꦠ꧀ꦠꦴꦤꦸꦩꦺꦴꦢꦤꦁ ꦏꦠ꧀ꦮꦴ ꦥꦏ꧀ꦏꦴꦩꦶ.

ꦱꦺꦴꦥꦶ ꦏꦸꦭꦥꦸꦠ꧀ꦠꦺꦴ ꦪꦴꦮꦗꦷꦮꦁ ꦏꦸꦱꦭꦁ ꦏꦠ꧀ꦮꦴ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦱꦸꦥ꧀ꦥꦮꦴꦱꦴꦪ ꦫꦴꦗꦣꦷꦠꦴꦪ ꦏꦸꦕ꧀ꦖꦶꦱ꧀ꦩꦶꦁ ꦥꦛꦶꦱꦤ꧀ꦣꦶꦁ ꦒꦟ꧀ꦲꦶ. ꦥꦛꦶꦱꦤ꧀ꦣꦶꦒ꧀ꦒꦲꦟꦠꦺꦴ ꦥꦛ꧀ꦜꦴꦪ ꦱꦴꦪꦁ ꦥꦴꦠꦚ꧀ꦕ ꦥꦟ꧀ꦟꦴꦏꦴꦫꦱꦠꦴꦤꦶ ꦥꦴꦥꦸꦟꦤ꧀ꦠꦶ, ꦱꦸꦥ꧀ꦥꦮꦴꦱꦴ ꦱꦩ꧀ꦥꦠ꧀ꦠꦶꦁ ꦒꦕ꧀ꦖꦠꦶ. ꦄꦡ ꦤꦁ ꦥꦸꦚ꧀ꦚꦮꦷꦩꦁꦱꦤꦠ꧀ꦡꦁ ꦲꦠ꧀ꦡꦺꦤ ꦧꦷꦗꦥꦕ꧀ꦖꦶꦁ ꦦꦸꦱꦴꦥꦺꦤ꧀ꦠꦶ, ꦌꦏꦺꦏꦧꦷꦗꦠꦺꦴ ꦱꦭꦴꦏꦱꦠꦩ꧀ꦥꦶ ꦱꦭꦴꦏꦱꦲꦱ꧀ꦱꦩ꧀ꦥꦶ ꦤꦶꦒꦕ꧀ꦖꦠꦶ. ꦌꦏꦏꦫꦷꦱꦑꦺꦠ꧀ꦠꦠꦺꦴ ꦥꦚ꧀ꦚꦴꦱꦩ꧀ꦥꦶ ꦱꦛ꧀ꦜꦶꦥꦶ ꦱꦏꦛꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ. ꦏꦺꦴꦛ꧀ꦜꦥꦹꦫꦟꦏꦴꦭꦺꦥꦶ ꦏꦺꦴꦛ꧀ꦜꦢ꧀ꦮꦴꦫꦁ ꦲꦠ꧀ꦡꦺꦤ ꦦꦸꦱꦴꦥꦺꦤ꧀ꦠꦶ, ꦫꦴꦗꦣꦷꦠꦴꦪ ꦥꦸꦚ꧀ꦚꦺꦤ ꦒꦟ꧀ꦲꦤ꧀ꦠꦴꦤꦁ ꦒꦲꦶꦠꦒꦲꦶꦠꦛ꧀ꦜꦴꦤꦁ ꦥꦸꦤ ꦥꦹꦫꦠꦶ. ꦥꦫꦶꦥꦸꦟ꧀ꦟꦨꦠ꧀ꦠꦏꦸꦩ꧀ꦨꦶꦠꦺꦴꦥꦶ ‘‘ꦫꦴꦗꦣꦷꦠꦴꦪ ꦥꦸꦚ꧀ꦚ’’ꦤ꧀ꦠꦶ ꦮꦠ꧀ꦮꦴ ꦪꦱ꧀ꦱ ꦏꦱ꧀ꦱꦕꦶ ꦢꦺꦤ꧀ꦠꦴꦤꦁ ꦪꦴꦮ ꦤ ꦈꦏ꧀ꦏꦝ꧀ꦞꦤ꧀ꦠꦶ, ꦤ ꦠꦴꦮ ꦨꦠ꧀ꦠꦁ ꦑꦷꦪꦠꦶ. ꦢꦴꦫꦏꦺ ꦏꦸꦕ꧀ꦖꦶꦒꦠꦺꦪꦺꦮ ꦱꦠ꧀ꦠ ꦮꦱ꧀ꦱꦴꦤꦶ ꦄꦠꦶꦏ꧀ꦏꦩꦶꦁꦱꦸ.

ꦒꦧ꧀ꦨꦺ ꦥꦤ ꦥꦫꦶꦥꦏ꧀ꦏꦺ ꦱꦠ꧀ꦠꦴꦲꦁ ꦩꦲꦴꦢꦸꦏ꧀ꦑꦁ ꦄꦤꦸꦨꦺꦴꦱꦶ. ꦱꦴ ꦱꦴꦩꦶꦏꦁ ꦄꦴꦩꦤ꧀ꦠꦺꦠ꧀ꦮꦴ ‘‘ꦥꦸꦫꦺ ꦩꦫꦟꦴ ꦗꦷꦮꦩꦴꦤꦴꦮ ꦢꦴꦤꦁ ꦢꦱ꧀ꦱꦴꦩꦷ’’ꦠꦶ ꦱꦠ꧀ꦡꦸ ꦱꦤ꧀ꦠꦶꦏꦁ ꦥꦺꦱꦺꦱꦶ – ‘‘ꦒꦕ꧀ꦖ ꦆꦩꦁ ꦥꦮꦠ꧀ꦠꦶꦁ ꦱꦠ꧀ꦡꦸ ꦄꦴꦫꦺꦴꦕꦺꦠ꧀ꦮꦴ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦲꦶ, ꦪꦚ꧀ꦕ ꦱꦠ꧀ꦡꦴ ꦮꦢꦺꦠꦶ, ꦠꦁ ꦱꦴꦣꦸꦏꦁ ꦈꦥꦭꦏ꧀ꦑꦺꦠ꧀ꦮꦴ ꦄꦴꦒꦤ꧀ꦠ꧀ꦮꦴ ꦩꦪ꧀ꦲꦁ ꦏꦡꦺꦲꦷ’’ꦠꦶ. ꦱꦺꦴ ꦒꦤ꧀ꦠ꧀ꦮꦴ ꦠꦱ꧀ꦱꦴ ꦱꦴꦱꦤꦁ ꦨꦒꦮꦠꦺꦴ ꦄꦴꦫꦺꦴꦕꦺꦱꦶ. ꦱꦠ꧀ꦡꦴ ‘‘ꦱꦸꦑꦶꦤꦷ ꦲꦺꦴꦠꦸ ꦱꦸꦥ꧀ꦥꦮꦴꦱꦴ ꦏꦺꦴꦭꦶꦪꦣꦷꦠꦴ, ꦱꦸꦑꦶꦤꦷ ꦄꦫꦺꦴꦒꦴ ꦄꦫꦺꦴꦒꦁ ꦥꦸꦠ꧀ꦠꦁ ꦮꦶꦗꦴꦪꦠꦹ’’ꦠꦶ ꦄꦴꦲ. ꦫꦴꦗꦴ ꦠꦁ ꦱꦸꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦄꦤ꧀ꦠꦺꦴꦒꦴꦩꦴꦨꦶꦩꦸꦑꦺꦴ ꦥꦴꦪꦴꦱꦶ. ꦠꦱ꧀ꦱ ꦥꦸꦫꦺ ꦄꦴꦒꦩꦤꦴꦪꦺꦮ ꦱꦸꦥ꧀ꦥꦮꦴꦱꦴꦪ ꦏꦸꦕ꧀ꦖꦶꦠꦺꦴ ꦣꦩꦏꦫꦟꦴ ꦈꦢꦏꦁ ꦮꦶꦪ ꦒꦧ꧀ꦨꦺꦴ ꦤꦶꦏ꧀ꦑꦩꦶ, ꦥꦫꦶꦮꦴꦫꦺꦠ꧀ꦮꦴ ꦤꦶꦱꦶꦤ꧀ꦤꦗꦤꦺꦴ ꦄꦱ꧀ꦱꦸꦩꦸꦑꦺꦴꦮ ꦲꦱꦶꦠꦸꦁ ꦄꦴꦫꦢ꧀ꦣꦺꦴ. ꦲꦛ꧀ꦜꦠꦸꦛ꧀ꦜꦺꦴ ꦩꦲꦴꦗꦤꦺꦴ ꦫꦚ꧀ꦚꦺꦴ ꦥꦸꦠ꧀ꦠꦱꦴꦱꦤꦁ ꦄꦴꦫꦺꦴꦕꦺꦠꦸꦁ ꦄꦒꦩꦴꦱꦶ.

ꦫꦴꦗꦴ ꦠꦺꦱꦁ ꦆꦔ꧀ꦒꦶꦠꦁ ꦢꦶꦱ꧀ꦮꦴꦮ ‘‘ꦢꦱꦧꦭꦺꦤ ꦏꦡꦶꦠꦏꦡꦴ ꦤꦶꦥ꧀ꦦꦤ꧀ꦤꦴ ꦩꦚ꧀ꦚꦺ’’ꦠꦶ ꦕꦶꦤ꧀ꦠꦺꦱꦶ. ꦱꦺꦴ ꦄꦴꦒꦤ꧀ꦠ꧀ꦮꦴ ꦱꦠ꧀ꦡꦸ ꦱꦴꦱꦤꦁ ꦫꦴꦗꦣꦷꦠꦴꦪ ꦄꦴꦫꦺꦴꦕꦺꦱꦶ. ꦫꦴꦗꦣꦷꦠꦴ ‘‘ꦠꦪꦴ ꦤꦶꦩꦤ꧀ꦠꦶꦠꦁ ꦗꦷꦮꦶꦠꦨꦠ꧀ꦠꦩꦺꦮ ꦩꦔ꧀ꦒꦭꦨꦠ꧀ꦠꦁ ꦨꦮꦶꦱ꧀ꦱꦠꦶ, ꦒꦕ꧀ꦖ ꦱꦠ꧀ꦠꦴꦲꦁ ꦢꦱꦧꦭꦁ ꦤꦶꦩꦤ꧀ꦠꦺꦲꦷ’’ꦠꦶ. ꦫꦴꦗꦴ ꦠꦡꦴ ꦄꦏꦴꦱꦶ. ꦱꦠ꧀ꦠꦴꦲꦁ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦩꦲꦴꦢꦴꦤꦁ ꦥꦮꦠ꧀ꦠꦪꦶꦁꦱꦸ. ꦢꦴꦫꦏꦺꦴ ꦱꦧ꧀ꦧꦺꦱꦁ ꦚꦴꦠꦷꦤꦁ ꦱꦤ꧀ꦠꦠ꧀ꦠꦕꦶꦠ꧀ꦠꦁ ꦤꦶꦧ꧀ꦧꦴꦥꦺꦤ꧀ꦠꦺꦴ ꦗꦴꦠꦺꦴꦠꦶ ꦱꦷꦮꦭꦶꦢꦴꦫꦏꦺꦴꦠ꧀ꦮꦺꦮꦱ꧀ꦱ ꦤꦴꦩꦁ ꦄꦏꦁꦱꦸ. ꦱꦺꦴ ꦱꦠ꧀ꦠ ꦮꦱ꧀ꦱꦴꦤꦶ ꦒꦧ꧀ꦨꦺ ꦮꦱꦶꦠꦠ꧀ꦠꦴ ꦗꦴꦠꦏꦴꦭꦠꦺꦴ ꦥꦛ꧀ꦜꦴꦪ ꦱꦧ꧀ꦧꦏꦩ꧀ꦩꦏ꧀ꦑꦩꦺꦴ ꦄꦲꦺꦴꦱꦶ. ꦣꦩ꧀ꦩꦱꦺꦤꦴꦥꦠꦶ ꦱꦴꦫꦶꦥꦸꦠ꧀ꦠꦺꦴ ꦱꦠ꧀ꦠꦩꦺ ꦢꦶꦮꦱꦺ ꦠꦺꦤ ꦱꦢ꧀ꦣꦶꦁ ꦏꦡꦴꦱꦭ꧀ꦭꦴꦥꦁ ꦄꦏꦴꦱꦶ. ꦱꦠ꧀ꦡꦴꦥꦶ ꦣꦩ꧀ꦩꦥꦢꦺ ꦒꦴꦡꦁ ꦄꦨꦴꦱꦶ –

‘‘ꦪꦺꦴꦩꦁ ꦥꦭꦶꦥꦡꦁ ꦢꦸꦒ꧀ꦒꦁ, ꦱꦁꦱꦴꦫꦁ ꦩꦺꦴꦲꦩꦕ꧀ꦕꦒꦴ;

ꦠꦶꦟ꧀ꦟꦺꦴ ꦥꦴꦫꦔ꧀ꦒꦠꦺꦴ ꦙꦴꦪꦷ, ꦄꦤꦺꦗꦺꦴ ꦄꦏꦡꦁꦏꦡꦷ;

ꦄꦤꦸꦥꦴꦢꦴꦪ ꦤꦶꦧ꧀ꦧꦸꦠꦺꦴ, ꦠꦩꦲꦁ ꦧ꧀ꦫꦹꦩꦶ ꦧ꧀ꦫꦴꦲ꧀ꦩꦟ’’ꦤ꧀ꦠꦶ. (ꦣ. ꦥ. ꧔꧑꧔);

ꦄꦡ ꦤꦁ ꦡꦺꦫꦺꦴ ꦌꦮꦩꦴꦲ – ‘‘ꦏꦶꦁ ꦥꦤ ꦠꦪꦴ ꦌꦮꦫꦹꦥꦁ ꦢꦸꦏ꧀ꦑꦫꦴꦱꦶꦁ ꦄꦤꦸꦨꦮꦶꦠ꧀ꦮꦴ ꦥꦧ꧀ꦧꦗꦶꦠꦸꦁ ꦤ ꦮꦛ꧀ꦛꦠꦷ’’ꦠꦶ? ꦭꦨꦩꦴꦤꦺꦴ ꦥꦧ꧀ꦧꦗꦺꦪ꧀ꦪꦁ, ꦨꦤ꧀ꦠꦺꦠꦶ. ꦱꦸꦥ꧀ꦥꦮꦴꦱꦴ ꦠꦁ ꦢꦴꦫꦏꦁ ꦡꦺꦫꦺꦤ ꦱꦢ꧀ꦣꦶꦁ ꦏꦡꦺꦤ꧀ꦠꦁ ꦢꦶꦱ꧀ꦮꦴ ‘‘ꦏꦶꦁ ꦤꦸ ꦑꦺꦴ ꦩꦺ ꦥꦸꦠ꧀ꦠꦺꦴ ꦣꦩ꧀ꦩꦱꦺꦤꦴꦥꦠꦶꦤꦴ ꦱꦢ꧀ꦣꦶꦁ ꦏꦡꦺꦠꦷ’’ꦠꦶ ꦡꦺꦫꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦸꦕ꧀ꦖꦶ – ‘‘ꦩꦪ꧀ꦲꦁ ꦥꦸꦠ꧀ꦠꦺꦴ ꦠꦸꦩ꧀ꦲꦺꦲꦶ ꦱꦢ꧀ꦣꦶꦁ ꦏꦶꦁ ꦏꦡꦺꦠꦶ, ꦨꦢꦤ꧀ꦠꦺ’’ꦠꦶ? ꦄꦠ꧀ꦠꦤꦴ ꦄꦤꦸꦨꦹꦠꦁ ꦒꦧ꧀ꦨꦮꦴꦱꦢꦸꦏ꧀ꦑꦁ ꦏꦡꦺꦠ꧀ꦮꦴ ꦠꦸꦩ꧀ꦲꦺꦲꦶ ꦄꦤꦸꦚ꧀ꦚꦴꦠꦺꦴ ꦥꦧ꧀ꦧꦗꦶꦱ꧀ꦱꦴꦩꦷꦠꦶ ꦮꦢꦠꦷꦠꦶ. ꦱꦴꦣꦸ, ꦨꦤ꧀ꦠꦺ, ꦥꦧ꧀ꦧꦴꦗꦺꦡ ꦤꦤ꧀ꦠꦶ. ꦡꦺꦫꦺꦴ ꦠꦁ ꦮꦶꦲꦴꦫꦁ ꦤꦺꦠ꧀ꦮꦴ ꦠꦕꦥꦚ꧀ꦕꦏꦏꦩ꧀ꦩꦛ꧀ꦜꦴꦤꦁ ꦢꦠ꧀ꦮꦴ ꦥꦧ꧀ꦧꦴꦗꦺꦤ꧀ꦠꦺꦴ, ‘‘ꦱꦷꦮꦭꦶ, ꦤ ꦠꦸꦪ꧀ꦲꦁ ꦄꦚ꧀ꦚꦺꦤ ꦎꦮꦴꦢꦺꦤ ꦏꦩ꧀ꦩꦁ ꦄꦠ꧀ꦡꦶ, ꦠꦪꦴ ꦱꦠ꧀ꦠ ꦮꦱ꧀ꦱꦴꦤꦶ ꦄꦤꦸꦨꦹꦠꦢꦸꦏ꧀ꦑꦩꦺꦮ ꦥꦕ꧀ꦕꦮꦺꦏ꧀ꦑꦴꦲꦷ’’ꦠꦶ. ꦨꦤ꧀ꦠꦺ, ꦥꦧ꧀ꦧꦴꦗꦤꦩꦺꦮ ꦠꦸꦩ꧀ꦲꦴꦏꦁ ꦨꦴꦫꦺꦴ, ꦪꦁ ꦥꦤ ꦩꦪꦴ ꦏꦴꦠꦸꦁ ꦱꦏ꧀ꦏꦴ, ꦠꦩꦲꦁ ꦗꦴꦤꦶꦱ꧀ꦱꦴꦩꦷꦠꦶ. ꦱꦺꦴ ꦥꦜꦩꦏꦺꦱꦮꦛ꧀ꦛꦶꦪꦴ ꦎꦲꦴꦫꦶꦠꦏ꧀ꦑꦟꦺꦪꦺꦮ ꦱꦺꦴꦠꦴꦥꦠ꧀ꦠꦶꦦꦭꦺ ꦥꦠꦶꦛ꧀ꦜꦴꦱꦶ, ꦢꦸꦠꦶꦪꦴꦪ ꦎꦲꦴꦫꦶꦠꦏ꧀ꦑꦟꦺ ꦱꦏꦢꦴꦒꦴꦩꦶꦦꦭꦺ, ꦠꦠꦶꦪꦴꦪ ꦄꦤꦴꦒꦴꦩꦶꦦꦭꦺ. ꦱꦧ꧀ꦧꦺꦱꦁꦪꦺꦮ ꦥꦤ ꦏꦺꦱꦴꦤꦁ ꦎꦫꦺꦴꦥꦤꦚ꧀ꦕ ꦄꦫꦲꦠ꧀ꦠꦱꦕ꧀ꦖꦶꦏꦶꦫꦶꦪꦴ ꦕ ꦄꦥꦕ꧀ꦖꦴ ꦄꦥꦸꦫꦶꦩꦴ ꦄꦲꦺꦴꦱꦶ. ꦠꦱ꧀ꦱ ꦥꦧ꧀ꦧꦗꦶꦠꦢꦶꦮꦱꦠꦺꦴ ꦥꦛ꧀ꦜꦴꦪ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦕꦠ꧀ꦠꦴꦫꦺꦴ ꦥꦕ꧀ꦕꦪꦴ ꦪꦢꦶꦕ꧀ꦖꦏꦁ ꦈꦥ꧀ꦥꦗ꧀ꦗꦤ꧀ꦠꦶ. ꦌꦮꦁ ꦌꦠ꧀ꦡ ꦮꦠ꧀ꦡꦸ ꦱꦩꦸꦛ꧀ꦜꦶꦠꦁ.

ꦄꦥꦫꦨꦴꦒꦺ ꦱꦠ꧀ꦡꦴ ꦱꦴꦮꦠ꧀ꦡꦶꦁ ꦄꦒꦩꦴꦱꦶ. ꦡꦺꦫꦺꦴ ꦱꦠ꧀ꦡꦴꦫꦁ ꦄꦨꦶꦮꦴꦢꦺꦠ꧀ꦮꦴ, ‘‘ꦨꦤ꧀ꦠꦺ, ꦩꦪ꧀ꦲꦁ ꦥꦸꦚ꧀ꦚꦁ ꦮꦷꦩꦁꦱꦶꦱ꧀ꦱꦴꦩꦶ, ꦥꦚ꧀ꦕ ꦩꦺ ꦨꦶꦏ꧀ꦑꦸꦱꦠꦴꦤꦶ ꦢꦺꦡꦴ’’ꦠꦶ ꦄꦴꦲ. ꦒꦟ꧀ꦲ, ꦱꦷꦮꦭꦷꦠꦶ. ꦱꦺꦴ ꦥꦚ꧀ꦕꦱꦠꦺ ꦨꦶꦏ꧀ꦑꦹ ꦒꦲꦺꦠ꧀ꦮꦴ ꦲꦶꦩꦮꦤ꧀ꦠꦴꦨꦶꦩꦸꦑꦁ ꦒꦕ꧀ꦖꦤ꧀ꦠꦺꦴ ꦄꦛꦮꦶꦩꦒ꧀ꦒꦁ ꦒꦕ꧀ꦖꦠꦶ. ꦠꦱ꧀ꦱ ꦥꦜꦩꦁ ꦢꦶꦛ꧀ꦜꦴ ꦤꦶꦒ꧀ꦫꦺꦴꦣꦺ ꦄꦣꦶꦮꦠ꧀ꦡꦴ ꦢꦺꦮꦠꦴ ꦱꦠ꧀ꦠ ꦢꦶꦮꦱꦴꦤꦶ ꦢꦴꦤꦁ ꦄꦢꦴꦱꦶ. ꦆꦠꦶ ꦱꦺꦴ –

‘‘ꦤꦶꦒ꧀ꦫꦺꦴꦣꦁ ꦥꦜꦩꦁ ꦥꦱ꧀ꦱꦶ, ꦢꦸꦠꦶꦪꦁ ꦥꦟ꧀ꦝꦮꦥꦧ꧀ꦧꦠꦁ;

ꦠꦠꦶꦪꦁ ꦄꦕꦶꦫꦮꦠꦶꦪꦁ, ꦕꦠꦸꦠ꧀ꦡꦁ ꦮꦫꦱꦴꦒꦫꦁ.

‘‘ꦥꦚ꧀ꦕꦩꦁ ꦲꦶꦩꦮꦤ꧀ꦠꦁ ꦱꦺꦴ, ꦖꦛ꧀ꦜꦁ ꦖꦢ꧀ꦢꦤ꧀ꦠꦸꦥꦴꦒꦩꦶ;

ꦱꦠ꧀ꦠꦩꦁ ꦒꦤ꧀ꦣꦩꦴꦢꦤꦁ, ꦄꦛ꧀ꦜꦩꦁ ꦄꦡ ꦫꦺꦮꦠ’’ꦤ꧀ꦠꦶ.

ꦱꦧ꧀ꦧꦛ꧀ꦜꦴꦤꦺꦱꦸ ꦱꦠ꧀ꦠ ꦱꦠ꧀ꦠ ꦢꦶꦮꦱꦴꦤꦺꦮ ꦢꦴꦤꦁ ꦄꦢꦁꦱꦸ. ꦒꦤ꧀ꦣꦩꦴꦢꦤꦥꦧ꧀ꦧꦠꦺ ꦥꦤ ꦤꦴꦒꦢꦠ꧀ꦠꦢꦺꦮꦫꦴꦗꦴ ꦤꦴꦩ ꦱꦠ꧀ꦠꦢꦶꦮꦱꦺꦱꦸ ꦌꦏꦢꦶꦮꦱꦁ ꦑꦷꦫꦥꦶꦟ꧀ꦝꦥꦴꦠꦁ ꦄꦢꦴꦱꦶ, ꦌꦏꦢꦶꦮꦱꦁ ꦱꦥ꧀ꦥꦶꦥꦶꦟ꧀ꦝꦥꦴꦠꦁ ꦄꦢꦴꦱꦶ. ꦨꦶꦏ꧀ꦑꦸꦱꦔ꧀ꦓꦺꦴ ꦄꦴꦲ – ‘‘ꦄꦴꦮꦸꦱꦺꦴ, ꦆꦩꦱ꧀ꦱ ꦢꦺꦮꦫꦚ꧀ꦚꦺꦴ ꦤꦺꦮ ꦣꦺꦤꦸꦪꦺꦴ ꦢꦸꦪ꧀ꦲꦩꦴꦤꦴ ꦥꦚ꧀ꦚꦴꦪꦤ꧀ꦠꦶ, ꦤ ꦢꦣꦶꦤꦶꦩ꧀ꦩꦡꦤꦁ, ꦏꦸꦠꦺꦴ ꦠꦺ, ꦢꦺꦮꦫꦴꦗ, ꦆꦩꦁ ꦈꦥ꧀ꦥꦗ꧀ꦗꦠꦷ’’ꦠꦶ? ‘‘ꦨꦤ꧀ꦠꦺ, ꦏꦱ꧀ꦱꦥꦢꦱꦧꦭꦱ꧀ꦱ ꦏꦴꦭꦺ ꦑꦷꦫꦱꦭꦴꦏꦨꦠ꧀ꦠꦢꦴꦤꦱ꧀ꦱꦺꦠꦁ ꦦꦭ’’ꦤ꧀ꦠꦶ ꦢꦺꦮꦫꦴꦗꦴ ꦄꦴꦲ. ꦄꦥꦫꦨꦴꦒꦺ ꦱꦠ꧀ꦡꦴ ꦑꦢꦶꦫꦮꦤꦶꦪꦫꦺꦮꦠꦱ꧀ꦱ ꦥꦕ꧀ꦕꦸꦒ꧀ꦒꦩꦤꦁ ꦄꦛ꧀ꦜꦸꦥ꧀ꦥꦠ꧀ꦠꦶꦁ ꦏꦠ꧀ꦮꦴ ꦡꦺꦫꦁ ꦄꦠ꧀ꦠꦤꦺꦴ ꦱꦴꦱꦤꦺ ꦭꦴꦨꦒ꧀ꦒꦪꦱꦒ꧀ꦒꦥ꧀ꦥꦠ꧀ꦠꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦱꦷꦠꦶ.

ꦮꦏ꧀ꦏꦭꦶꦠ꧀ꦡꦺꦫꦮꦠ꧀ꦡꦸ

꧒꧐꧘. ꦢꦱꦩꦺ ꦱꦢ꧀ꦣꦴꦣꦶꦩꦸꦠ꧀ꦠꦴꦤꦤ꧀ꦠꦶ ꦱꦢ꧀ꦣꦴꦪ ꦄꦣꦶꦩꦸꦠ꧀ꦠꦴꦤꦁ, ꦧꦭꦮꦱꦢ꧀ꦣꦴꦤꦁ ꦨꦶꦏ꧀ꦑꦹꦤꦁ ꦮꦏ꧀ꦏꦭꦶꦠ꧀ꦡꦺꦫꦺꦴ ꦄꦒ꧀ꦒꦺꦴꦠꦶ ꦢꦱ꧀ꦱꦺꦠꦶ. ꦄꦚ꧀ꦚꦺꦱꦁ ꦲꦶ ꦱꦢ꧀ꦣꦴ ꦮꦝ꧀ꦞꦺꦠꦧ꧀ꦧꦴ ꦲꦺꦴꦠꦶ, ꦡꦺꦫꦱ꧀ꦱ ꦥꦤ ꦲꦴꦥꦺꦠꦧ꧀ꦧꦴ ꦗꦴꦠꦴ. ꦠꦱ꧀ꦩꦴ ꦱꦺꦴ ꦱꦢ꧀ꦣꦴꦣꦶꦩꦸꦠ꧀ꦠꦴꦤꦁ ꦄꦒ꧀ꦒꦺꦴꦠꦶ ꦮꦸꦠ꧀ꦠꦺꦴ. ꦮꦏ꧀ꦏꦭꦷꦠꦶ ꦥꦤꦱ꧀ꦱ ꦤꦴꦩꦁ.

ꦠꦱ꧀ꦱ ꦥꦚ꧀ꦲꦏꦩ꧀ꦩꦺ ꦄꦪꦩꦤꦸꦥꦸꦧ꧀ꦧꦶꦏꦡꦴ – ꦄꦪꦩ꧀ꦥꦶ ꦲꦶ ꦄꦠꦷꦠꦺ ꦥꦢꦸꦩꦸꦠ꧀ꦠꦫꦧꦸꦢ꧀ꦣꦏꦴꦭꦺ ꦮꦸꦠ꧀ꦠꦤꦪꦺꦤꦺꦮ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦥꦫꦶꦱꦥꦫꦶꦪꦤ꧀ꦠꦺ ꦜꦶꦠꦺꦴ ꦣꦩ꧀ꦩꦁ ꦱꦸꦟꦤ꧀ꦠꦺꦴ ꦱꦠ꧀ꦡꦴꦫꦁ ꦌꦏꦁ ꦨꦶꦏ꧀ꦑꦸꦁ ꦱꦢ꧀ꦣꦴꦣꦶꦩꦸꦠ꧀ꦠꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦤ꧀ꦠꦁ ꦢꦶꦱ꧀ꦮꦴ ‘‘ꦩꦪꦴꦥꦶ ꦄꦤꦴꦒꦠꦺ ꦌꦮꦫꦹꦥꦺꦤ ꦨꦮꦶꦠꦸꦁ ꦮꦛ꧀ꦛꦠꦷ’’ꦠꦶ ꦮꦸꦠ꧀ꦠꦤꦪꦺꦤꦺꦮ ꦱꦠ꧀ꦡꦴꦫꦁ ꦤꦶꦩꦤ꧀ꦠꦺꦠ꧀ꦮꦴ ꦱꦠ꧀ꦠꦴꦲꦁ ꦩꦲꦴꦢꦴꦤꦁ ꦢꦠ꧀ꦮꦴ ꦢꦱꦧꦭꦁ ꦮꦤ꧀ꦢꦶꦠ꧀ꦮꦴ, ‘‘ꦨꦤ꧀ꦠꦺ, ꦄꦲꦩ꧀ꦥꦶ ꦆꦩꦶꦤꦴ ꦄꦣꦶꦏꦴꦫꦏꦩ꧀ꦩꦺꦤ ꦠꦸꦩ꧀ꦲꦺꦲꦶ ꦱꦢ꧀ꦣꦴꦣꦶꦩꦸꦠ꧀ꦠꦴꦤꦁ ꦌꦠꦢꦒ꧀ꦒꦺ ꦜꦥꦶꦠꦨꦶꦏ꧀ꦑꦸ ꦮꦶꦪ ꦄꦤꦴꦒꦠꦺ ꦌꦏꦱ꧀ꦱ ꦧꦸꦢ꧀ꦣꦱ꧀ꦱ ꦱꦴꦱꦤꦺ ꦱꦢ꧀ꦣꦴꦣꦶꦩꦸꦠ꧀ꦠꦴꦤꦁ ꦄꦒ꧀ꦒꦺꦴ ꦨꦮꦺꦪ꧀ꦪ’’ꦤ꧀ꦠꦶ ꦥꦠ꧀ꦡꦤꦁ ꦄꦏꦴꦱꦶ. ꦱꦠ꧀ꦡꦴ ꦠꦱ꧀ꦱ ꦄꦤꦤ꧀ꦠꦫꦴꦪꦁ ꦢꦶꦱ꧀ꦮꦴ ꦧ꧀ꦪꦴꦏꦫꦶꦠ꧀ꦮꦴ ꦥꦏ꧀ꦏꦴꦩꦶ.

ꦱꦺꦴꦥꦶ ꦪꦴꦮꦗꦷꦮꦁ ꦏꦸꦱꦭꦁ ꦏꦠ꧀ꦮꦴ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦄꦩ꧀ꦲꦴꦏꦁ ꦱꦠ꧀ꦡꦸꦏꦴꦭꦺ ꦱꦴꦮꦠ꧀ꦡꦶꦪꦁ ꦧ꧀ꦫꦴꦲ꧀ꦩꦟꦏꦸꦭꦺ ꦥꦛꦶꦱꦤ꧀ꦣꦶꦁ ꦒꦟ꧀ꦲꦶ, ꦮꦏ꧀ꦏꦭꦷꦠꦶꦱ꧀ꦱ ꦤꦴꦩꦁ ꦄꦏꦁꦱꦸ. ꦱꦺꦴ ꦮꦸꦢ꧀ꦣꦶꦥ꧀ꦥꦠ꧀ꦠꦺꦴ ꦠꦪꦺꦴ ꦮꦺꦢꦺ ꦈꦒ꧀ꦒꦟ꧀ꦲꦶꦠ꧀ꦮꦴ ꦢꦱꦧꦭꦁ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦁ ꦱꦴꦮꦠ꧀ꦡꦶꦪꦁ ꦕꦫꦤ꧀ꦠꦁ ꦢꦶꦱ꧀ꦮꦴ ꦱꦠ꧀ꦡꦸ ꦱꦫꦷꦫꦱꦩ꧀ꦥꦠ꧀ꦠꦶꦁ ꦎꦭꦺꦴꦏꦺꦤ꧀ꦠꦺꦴ ꦱꦫꦷꦫꦱꦩ꧀ꦥꦠ꧀ꦠꦶꦢꦱ꧀ꦱꦤꦺꦤ ꦄꦠꦶꦠ꧀ꦠꦺꦴ ꦢꦱꦧꦭꦺꦤ ꦱꦢ꧀ꦣꦶꦁꦪꦺꦮ ꦮꦶꦕꦫꦠꦶ. ꦮꦶꦲꦴꦫꦁ ꦒꦕ꧀ꦖꦤ꧀ꦠꦺꦤ ꦱꦢ꧀ꦣꦶꦁ ꦮꦶꦲꦴꦫꦁ ꦒꦤ꧀ꦠ꧀ꦮꦴ ꦱꦫꦷꦫꦤꦶꦥ꧀ꦦꦠ꧀ꦠꦶꦁ ꦎꦭꦺꦴꦏꦺꦤ꧀ꦠꦺꦴꦮ ꦠꦶꦛ꧀ꦜꦠꦶ. ꦣꦩ꧀ꦩꦱꦨꦴꦪꦁ ꦤꦶꦱꦷꦢꦶꦠ꧀ꦮꦴ ꦣꦩ꧀ꦩꦁ ꦏꦡꦺꦤ꧀ꦠꦱ꧀ꦱ ꦱꦩ꧀ꦩꦸꦑꦛ꧀ꦜꦴꦤꦺ ꦜꦶꦠꦺꦴ ꦣꦩ꧀ꦩꦁ ꦱꦸꦟꦴꦠꦶ. ꦱꦺꦴ ꦱꦢ꧀ꦣꦁ ꦥꦛꦶꦭꦨꦶꦠ꧀ꦮꦴ ‘‘ꦄꦒꦴꦫꦩꦗ꧀ꦙꦺ ꦮꦱꦤ꧀ꦠꦺꦴ ꦤꦶꦧꦢ꧀ꦣꦁ ꦢꦱꦧꦭꦱ꧀ꦱ ꦢꦱ꧀ꦱꦤꦁ ꦤ ꦭꦨꦶꦱ꧀ꦱꦴꦩꦷ’’ꦠꦶ ꦥꦧ꧀ꦧꦗ꧀ꦗꦁ ꦪꦴꦕꦶꦠ꧀ꦮꦴ ꦱꦠ꧀ꦡꦸ ꦱꦤ꧀ꦠꦶꦏꦺ ꦥꦧ꧀ꦧꦗꦶ.

ꦠꦠꦺꦴ ꦥꦛ꧀ꦜꦴꦪ ꦜꦥꦺꦠ꧀ꦮꦴ ꦄꦴꦲꦴꦫꦏꦫꦟꦮꦺꦭꦁ ꦄꦮꦱꦺꦱꦏꦴꦭꦺ ꦪꦠ꧀ꦡ ꦜꦶꦠꦺꦤ ꦱꦏ꧀ꦏꦴ ꦢꦱꦧꦭꦁ ꦥꦱ꧀ꦱꦶꦠꦸꦁ, ꦠꦠ꧀ꦡ ꦜꦶꦠꦺꦴ ꦪꦺꦴꦤꦶꦱꦺꦴꦩꦤꦱꦶꦏꦴꦫꦁ ꦥꦲꦴꦪ ꦢꦱꦧꦭꦁ ꦎꦭꦺꦴꦏꦺꦤ꧀ꦠꦺꦴꦮ ꦮꦶꦲꦫꦠꦶ. ꦱꦠ꧀ꦡꦴ ꦠꦱ꧀ꦱ ꦚꦴꦟꦥꦫꦶꦥꦴꦏꦁ ꦄꦴꦒꦩꦺꦤ꧀ꦠꦺꦴ ꦢꦷꦓꦩ꧀ꦥꦶ ꦄꦢ꧀ꦣꦴꦤꦁ ꦠꦱ꧀ꦩꦶꦁ ꦫꦹꦥꦢꦱ꧀ꦱꦤꦮꦱꦺꦤꦺꦮ ꦮꦶꦕꦫꦤ꧀ꦠꦺ ꦏꦶꦚ꧀ꦕꦶ ꦄꦮꦠ꧀ꦮꦴ ‘‘ꦆꦢꦴꦤꦶꦱ꧀ꦱ ꦚꦴꦟꦁ ꦥꦫꦶꦥꦴꦏꦒꦠꦁ, ꦱꦏ꧀ꦏꦴ ꦌꦠꦁ ꦧꦺꦴꦣꦺꦠꦸ’’ꦤ꧀ꦠꦶ ꦚꦠ꧀ꦮꦴ ꦌꦮꦩꦴꦲ – ‘‘ꦏꦶꦁ ꦠꦺ, ꦮꦏ꧀ꦏꦭꦶ, ꦆꦩꦶꦤꦴ ꦥꦹꦠꦶꦏꦴꦪꦺꦤ ꦢꦶꦛ꧀ꦜꦺꦤ, ꦪꦺꦴ ꦑꦺꦴ, ꦮꦏ꧀ꦏꦭꦶ, ꦣꦩ꧀ꦩꦁ ꦥꦱ꧀ꦱꦠꦶ, ꦱꦺꦴ ꦩꦁ ꦥꦱ꧀ꦱꦠꦶ. ꦪꦺꦴ ꦩꦁ ꦥꦱ꧀ꦱꦠꦶ, ꦱꦺꦴ ꦣꦩ꧀ꦩꦁ ꦥꦱ꧀ꦱꦠꦶ. ꦣꦩ꧀ꦩꦚ꧀ꦲꦶ, ꦮꦏ꧀ꦏꦭꦶ, ꦥꦱ꧀ꦱꦤ꧀ꦠꦺꦴ ꦩꦁ ꦥꦱ꧀ꦱꦠꦶ, ꦩꦁ ꦥꦱ꧀ꦱꦤ꧀ꦠꦺꦴ ꦣꦩ꧀ꦩꦁ ꦥꦱ꧀ꦱꦠꦷ’’ꦠꦶ.

ꦱꦠ꧀ꦡꦫꦶ ꦌꦮꦁ ꦎꦮꦢꦤ꧀ꦠꦺꦥꦶ ꦡꦺꦫꦺꦴ ꦢꦱꦧꦭꦱ꧀ꦱ ꦢꦱ꧀ꦱꦤꦁ ꦥꦲꦴꦪ ꦤꦺꦮ ꦄꦚ꧀ꦚꦠ꧀ꦡ ꦒꦤ꧀ꦠꦸꦁ ꦱꦏ꧀ꦏꦺꦴꦠꦶ. ꦠꦠꦺꦴ ꦱꦠ꧀ꦡꦴ ‘‘ꦤꦴꦪꦁ ꦨꦶꦏ꧀ꦑꦸ ꦱꦁꦮꦺꦒꦁ ꦄꦭꦨꦶꦠ꧀ꦮꦴ ꦧꦸꦗ꧀ꦙꦶꦱ꧀ꦱꦠꦷ’’ꦠꦶ ꦈꦥꦏꦛ꧀ꦜꦴꦪ ꦮꦱ꧀ꦱꦹꦥꦤꦴꦪꦶꦏꦴꦪ ꦫꦴꦗꦒꦲꦁ ꦒꦤ꧀ꦠ꧀ꦮꦴ ꦮꦱ꧀ꦱꦹꦥꦤꦴꦪꦶꦏꦢꦶꦮꦱꦺ ‘‘ꦄꦥꦺꦲꦶ, ꦮꦏ꧀ꦏꦭꦷ’’ꦠꦶ ꦡꦺꦫꦁ ꦥꦟꦴꦩꦺꦠꦶ. ꦧꦸꦢ꧀ꦣꦴ ꦕ ꦤꦴꦩ ꦄꦴꦢꦺꦪ꧀ꦪꦮꦕꦤꦴ ꦲꦺꦴꦤ꧀ꦠꦶ, ꦠꦱ꧀ꦩꦴ ꦡꦺꦫꦺꦴ ꦱꦠ꧀ꦡꦴꦫꦁ ꦥꦛꦶꦥ꧀ꦦꦫꦶꦠ꧀ꦮꦴ ꦜꦴꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦠꦺꦩꦴꦱꦁ ꦢꦱꦧꦭꦱ꧀ꦱ ꦱꦩ꧀ꦩꦸꦑꦺ ꦄꦴꦒꦤ꧀ꦠꦸꦁ ꦄꦮꦶꦱꦲꦤ꧀ꦠꦺꦴ ‘‘ꦏꦶꦁ ꦢꦴꦤꦶ ꦱꦏ꧀ꦏꦴ ꦏꦴꦠꦸꦁ, ꦠꦡꦴꦒꦠꦺꦤꦩ꧀ꦲꦶ ꦥꦟꦴꦩꦶꦠꦺꦴ, ꦱꦩ꧀ꦩꦸꦑꦷꦨꦴꦮꦁ ꦤ ꦭꦨꦴꦩꦶ, ꦏꦶꦁ ꦩꦪ꧀ꦲꦁ ꦗꦷꦮꦶꦠꦺꦤꦴ’’ꦠꦶ ꦒꦶꦗ꧀ꦙꦏꦹꦛꦥꦧ꧀ꦧꦠꦺ ꦥꦥꦴꦠꦛ꧀ꦜꦴꦤꦁ ꦄꦨꦶꦫꦸꦲꦶ. ꦱꦠ꧀ꦡꦴ ꦠꦱ꧀ꦱ ꦏꦶꦭꦩꦤꦨꦴꦮꦁ ꦚꦠ꧀ꦮꦴ ‘‘ꦄꦪꦁ ꦨꦶꦏ꧀ꦑꦸ ꦩꦩ ꦱꦤ꧀ꦠꦶꦏꦴ ꦄꦱ꧀ꦱꦴꦱꦁ ꦄꦭꦨꦤ꧀ꦠꦺꦴ ꦩꦒ꧀ꦒꦦꦭꦴꦤꦁ ꦈꦥꦤꦶꦱ꧀ꦱꦪꦁ ꦤꦴꦱꦺꦪ꧀ꦪꦴ’’ꦠꦶ ꦄꦠ꧀ꦠꦴꦤꦁ ꦢꦱ꧀ꦱꦺꦠꦸꦁ ꦎꦨꦴꦱꦁ ꦮꦶꦱ꧀ꦱꦗ꧀ꦗꦺꦱꦶ. ꦄꦡꦱ꧀ꦱ ꦱꦠ꧀ꦡꦸ ꦢꦶꦛ꧀ꦜꦏꦴꦭꦠꦺꦴ ꦥꦛ꧀ꦜꦴꦪ ꦌꦮ ꦩꦲꦤ꧀ꦠꦁ ꦱꦺꦴꦏꦱꦭ꧀ꦭꦁ ꦥꦲꦷꦤꦁ. ꦱꦠ꧀ꦡꦴ ꦱꦸꦏ꧀ꦑꦠꦭ꦳ꦴꦏꦺ ꦎꦓꦁ ꦄꦴꦲꦫꦤ꧀ꦠꦺꦴ ꦮꦶꦪ ꦮꦏ꧀ꦏꦭꦶꦠ꧀ꦡꦺꦫꦱ꧀ꦱ ꦧꦭꦮꦥꦷꦠꦶꦱꦺꦴꦩꦤꦱ꧀ꦱꦁ ꦈꦥ꧀ꦥꦴꦢꦺꦠꦸꦁ ꦣꦩ꧀ꦩꦥꦢꦺ ꦆꦩꦁ ꦒꦴꦡꦩꦴꦲ –

‘‘ꦥꦴꦩꦺꦴꦗ꧀ꦗꦧꦲꦸꦭꦺꦴ ꦨꦶꦏ꧀ꦑꦸ, ꦥꦱꦤ꧀ꦤꦺꦴ ꦧꦸꦢ꧀ꦣꦱꦴꦱꦤꦺ;

ꦄꦣꦶꦒꦕ꧀ꦖꦺ ꦥꦢꦁ ꦱꦤ꧀ꦠꦁ, ꦱꦔ꧀ꦑꦴꦫꦹꦥꦱꦩꦁ ꦱꦸꦑ’’ꦤ꧀ꦠꦶ. (ꦣ. ꦥ. ꧓꧘꧑);

ꦮꦏ꧀ꦏꦭꦶꦠ꧀ꦡꦺꦫꦱ꧀ꦱ ꦕ ‘‘ꦌꦲꦶ, ꦮꦏ꧀ꦏꦭꦷ’’ꦠꦶ ꦲꦠ꧀ꦡꦁ ꦥꦱꦴꦫꦺꦱꦶ. ꦡꦺꦫꦺꦴ ‘‘ꦢꦱꦧꦭꦺꦴ ꦩꦺ ꦢꦶꦛ꧀ꦜꦺꦴ, ꦌꦲꦷꦠꦶ ꦄꦮ꧀ꦲꦴꦪꦤꦩ꧀ꦥꦶ ꦭꦢ꧀ꦣ’’ꦤ꧀ꦠꦶ ꦧꦭꦮꦥꦷꦠꦶꦁ ꦈꦥ꧀ꦥꦴꦢꦺꦠ꧀ꦮꦴ ‘‘ꦏꦸꦠꦺꦴ ꦒꦕ꧀ꦖꦴꦩꦷ’’ꦠꦶ ꦄꦠ꧀ꦠꦤꦺꦴ ꦒꦩꦤꦨꦴꦮꦁ ꦄꦗꦴꦤꦶꦠ꧀ꦮꦴꦮ ꦢꦱꦧꦭꦱ꧀ꦱ ꦱꦩ꧀ꦩꦸꦑꦺ ꦄꦴꦏꦴꦱꦺ ꦥꦏ꧀ꦑꦤ꧀ꦢꦶꦠ꧀ꦮꦴ ꦥꦜꦩꦥꦴꦢꦺꦤ ꦥꦧ꧀ꦧꦠꦺ ꦜꦶꦠꦺꦴꦪꦺꦮ ꦱꦠ꧀ꦡꦴꦫꦴ ꦮꦸꦠ꧀ꦠꦒꦴꦡꦁ ꦄꦴꦮꦗ꧀ꦗꦺꦤ꧀ꦠꦺꦴ ꦄꦴꦏꦴꦱꦺꦪꦺꦮ ꦥꦷꦠꦶꦁ ꦮꦶꦏ꧀ꦑꦩ꧀ꦨꦺꦠ꧀ꦮꦴ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦠ꧀ꦮꦴ ꦠꦡꦴꦒꦠꦁ ꦮꦤ꧀ꦢꦩꦴꦤꦺꦴꦮ ꦎꦠꦫꦶ. ꦄꦥꦫꦨꦴꦒꦺ ꦱꦠ꧀ꦡꦴ ꦄꦫꦶꦪꦒꦟꦩꦗ꧀ꦙꦺ ꦤꦶꦱꦶꦤ꧀ꦤꦺꦴ ꦡꦺꦫꦁ ꦱꦢ꧀ꦣꦴꦣꦶꦩꦸꦠ꧀ꦠꦴꦤꦁ ꦄꦒ꧀ꦒꦛ꧀ꦜꦴꦤꦺ ꦜꦥꦺꦱꦷꦠꦶ.

ꦢꦸꦠꦶꦪꦮꦒ꧀ꦒꦮꦟ꧀ꦟꦤꦴ.