꧓. ꦕꦶꦠ꧀ꦠꦴꦤꦸꦥꦱ꧀ꦱꦤꦴꦤꦶꦢ꧀ꦢꦺꦱꦺꦴ

꧓꧖꧕. ꦏꦡꦚ꧀ꦕ ꦨꦶꦏ꧀ꦑꦸ ꦄꦗ꧀ꦙꦠ꧀ꦠꦁ ꦕꦶꦠ꧀ꦠꦺ ꦕꦶꦠ꧀ꦠꦴꦤꦸꦥꦱ꧀ꦱꦷ ꦮꦶꦲꦫꦠꦶ? ꦆꦣ ꦨꦶꦏ꧀ꦑꦸ ꦱꦫꦴꦒꦁ ꦮꦴ ꦕꦶꦠ꧀ꦠꦁ ‘‘ꦱꦫꦴꦒꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦷꦠꦫꦴꦒꦁ ꦮꦴ ꦕꦶꦠ꧀ꦠꦁ ‘‘ꦮꦷꦠꦫꦴꦒꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦢꦺꦴꦱꦁ ꦮꦴ ꦕꦶꦠ꧀ꦠꦁ ‘‘ꦱꦢꦺꦴꦱꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦷꦠꦢꦺꦴꦱꦁ ꦮꦴ ꦕꦶꦠ꧀ꦠꦁ ‘‘ꦮꦷꦠꦢꦺꦴꦱꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦩꦺꦴꦲꦁ ꦮꦴ ꦕꦶꦠ꧀ꦠꦁ ‘‘ꦱꦩꦺꦴꦲꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦷꦠꦩꦺꦴꦲꦁ ꦮꦴ ꦕꦶꦠ꧀ꦠꦁ ‘‘ꦮꦷꦠꦩꦺꦴꦲꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦁꦑꦶꦠ꧀ꦠꦁ ꦮꦴ ꦕꦶꦠ꧀ꦠꦁ ‘‘ꦱꦁꦑꦶꦠ꧀ꦠꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦶꦏ꧀ꦑꦶꦠ꧀ꦠꦁ ꦮꦴ ꦕꦶꦠ꧀ꦠꦁ ‘‘ꦮꦶꦏ꧀ꦑꦶꦠ꧀ꦠꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦩꦲꦒ꧀ꦒꦠꦁ ꦮꦴ ꦕꦶꦠ꧀ꦠꦁ ‘‘ꦩꦲꦒ꧀ꦒꦠꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦩꦲꦒ꧀ꦒꦠꦁ ꦮꦴ ꦕꦶꦠ꧀ꦠꦁ ‘‘ꦄꦩꦲꦒ꧀ꦒꦠꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦈꦠ꧀ꦠꦫꦁ ꦮꦴ ꦕꦶꦠ꧀ꦠꦁ ‘‘ꦱꦈꦠ꧀ꦠꦫꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦤꦸꦠ꧀ꦠꦫꦁ ꦮꦴ ꦕꦶꦠ꧀ꦠꦁ ‘‘ꦄꦤꦸꦠ꧀ꦠꦫꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦩꦴꦲꦶꦠꦁ ꦮꦴ ꦕꦶꦠ꧀ꦠꦁ ‘‘ꦱꦩꦴꦲꦶꦠꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦱꦩꦴꦲꦶꦠꦁ ꦮꦴ ꦕꦶꦠ꧀ꦠꦁ ‘‘ꦄꦱꦩꦴꦲꦶꦠꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ‘‘ꦮꦶꦩꦸꦠ꧀ꦠꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ‘‘ꦄꦮꦶꦩꦸꦠ꧀ꦠꦁ ꦩꦺ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ. ꦱꦺꦴ ꦠꦁ ꦤꦶꦩꦶꦠ꧀ꦠꦁ ꦄꦴꦱꦺꦮꦠꦶ ꦨꦴꦮꦺꦠꦶ ꦧꦲꦸꦭꦷꦏꦫꦺꦴꦠꦶ ꦱ꧀ꦮꦴꦮꦠ꧀ꦡꦶꦠꦁ ꦮꦮꦠ꧀ꦡꦥꦺꦠꦶ. ꦱꦺꦴ ꦠꦁ ꦤꦶꦩꦶꦠ꧀ꦠꦁ ꦄꦴꦱꦺꦮꦶꦠ꧀ꦮꦴ ꦨꦴꦮꦺꦠ꧀ꦮꦴ ꦧꦲꦸꦭꦷꦏꦫꦶꦠ꧀ꦮꦴ ꦱ꧀ꦮꦴꦮꦠ꧀ꦡꦶꦠꦁ ꦮꦮꦠ꧀ꦡꦥꦺꦠ꧀ꦮꦴ ꦧꦲꦶꦢ꧀ꦣꦴ ꦕꦶꦠ꧀ꦠꦺ ꦕꦶꦠ꧀ꦠꦁ ꦈꦥꦱꦁꦲꦫꦠꦶ.

ꦏꦡꦚ꧀ꦕ ꦨꦶꦏ꧀ꦑꦸ ꦧꦲꦶꦢ꧀ꦣꦴ ꦕꦶꦠ꧀ꦠꦺ ꦕꦶꦠ꧀ꦠꦴꦤꦸꦥꦱ꧀ꦱꦷ ꦮꦶꦲꦫꦠꦶ? ꦆꦣ ꦨꦶꦏ꧀ꦑꦸ ꦱꦫꦴꦒꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦱꦫꦴꦒꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦷꦠꦫꦴꦒꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦮꦷꦠꦫꦴꦒꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦢꦺꦴꦱꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦱꦢꦺꦴꦱꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦷꦠꦢꦺꦴꦱꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦮꦷꦠꦢꦺꦴꦱꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦩꦺꦴꦲꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦱꦩꦺꦴꦲꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦷꦠꦩꦺꦴꦲꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦮꦷꦠꦩꦺꦴꦲꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦁꦑꦶꦠ꧀ꦠꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦱꦁꦑꦶꦠ꧀ꦠꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦶꦏ꧀ꦑꦶꦠ꧀ꦠꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦮꦶꦏ꧀ꦑꦶꦠ꧀ꦠꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦩꦲꦒ꧀ꦒꦠꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦩꦲꦒ꧀ꦒꦠꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦩꦲꦒ꧀ꦒꦠꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦄꦩꦲꦒ꧀ꦒꦠꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦈꦠ꧀ꦠꦫꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦱꦈꦠ꧀ꦠꦫꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦤꦸꦠ꧀ꦠꦫꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦄꦤꦸꦠ꧀ꦠꦫꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦩꦴꦲꦶꦠꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦱꦩꦴꦲꦶꦠꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦱꦩꦴꦲꦶꦠꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦄꦱꦩꦴꦲꦶꦠꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦶꦩꦸꦠ꧀ꦠꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦮꦶꦩꦸꦠ꧀ꦠꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦮꦶꦩꦸꦠ꧀ꦠꦁ ꦮꦴꦱ꧀ꦱ ꦕꦶꦠ꧀ꦠꦁ ‘‘ꦄꦮꦶꦩꦸꦠ꧀ꦠꦩꦱ꧀ꦱ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ. ꦱꦺꦴ ꦠꦁ ꦤꦶꦩꦶꦠ꧀ꦠꦁ ꦄꦴꦱꦺꦮꦠꦶ ꦨꦴꦮꦺꦠꦶ ꦧꦲꦸꦭꦷꦏꦫꦺꦴꦠꦶ ꦱ꧀ꦮꦴꦮꦠ꧀ꦡꦶꦠꦁ ꦮꦮꦠ꧀ꦡꦥꦺꦠꦶ. ꦱꦺꦴ ꦠꦁ ꦤꦶꦩꦶꦠ꧀ꦠꦁ ꦄꦴꦱꦺꦮꦶꦠ꧀ꦮꦴ ꦨꦴꦮꦺꦠ꧀ꦮꦴ ꦧꦲꦸꦭꦷꦏꦫꦶꦠ꧀ꦮꦴ ꦱ꧀ꦮꦴꦮꦠ꧀ꦡꦶꦠꦁ ꦮꦮꦠ꧀ꦡꦥꦺꦠ꧀ꦮꦴ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦕꦶꦠ꧀ꦠꦺ ꦕꦶꦠ꧀ꦠꦁ ꦈꦥꦱꦁꦲꦫꦠꦶ.

ꦏꦡꦚ꧀ꦕ ꦨꦶꦏ꧀ꦑꦸ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦕꦶꦠ꧀ꦠꦺ ꦕꦶꦠ꧀ꦠꦴꦤꦸꦥꦱ꧀ꦱꦷ ꦮꦶꦲꦫꦠꦶ? ꦆꦣ ꦨꦶꦏ꧀ꦑꦸ ꦱꦫꦴꦒꦁ ꦮꦴ ꦕꦶꦠ꧀ꦠꦁ ‘‘ꦱꦫꦴꦒꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦷꦠꦫꦴꦒꦁ ꦮꦴ ꦕꦶꦠ꧀ꦠꦁ ‘‘ꦮꦷꦠꦫꦴꦒꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦢꦺꦴꦱꦁ ꦮꦴ ꦕꦶꦠ꧀ꦠꦁ ‘‘ꦱꦢꦺꦴꦱꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦷꦠꦢꦺꦴꦱꦁ ꦮꦴ ꦕꦶꦠ꧀ꦠꦁ ‘‘ꦮꦷꦠꦢꦺꦴꦱꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦩꦺꦴꦲꦁ ꦮꦴ ꦕꦶꦠ꧀ꦠꦁ ‘‘ꦱꦩꦺꦴꦲꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦷꦠꦩꦺꦴꦲꦁ ꦮꦴ ꦕꦶꦠ꧀ꦠꦁ ‘‘ꦮꦷꦠꦩꦺꦴꦲꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦁꦑꦶꦠ꧀ꦠꦁ ꦮꦴ ꦕꦶꦠ꧀ꦠꦁ ‘‘ꦱꦁꦑꦶꦠ꧀ꦠꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦶꦏ꧀ꦑꦶꦠ꧀ꦠꦁ ꦮꦴ ꦕꦶꦠ꧀ꦠꦁ ‘‘ꦮꦶꦏ꧀ꦑꦶꦠ꧀ꦠꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦩꦲꦒ꧀ꦒꦠꦁ ꦮꦴ ꦕꦶꦠ꧀ꦠꦁ ‘‘ꦩꦲꦒ꧀ꦒꦠꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦩꦲꦒ꧀ꦒꦠꦁ ꦮꦴ ꦕꦶꦠ꧀ꦠꦁ ‘‘ꦄꦩꦲꦒ꧀ꦒꦠꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦈꦠ꧀ꦠꦫꦁ ꦮꦴ ꦕꦶꦠ꧀ꦠꦁ ‘‘ꦱꦈꦠ꧀ꦠꦫꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦤꦸꦠ꧀ꦠꦫꦁ ꦮꦴ ꦕꦶꦠ꧀ꦠꦁ ‘‘ꦄꦤꦸꦠ꧀ꦠꦫꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦱꦩꦴꦲꦶꦠꦁ ꦮꦴ ꦕꦶꦠ꧀ꦠꦁ ‘‘ꦱꦩꦴꦲꦶꦠꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦱꦩꦴꦲꦶꦠꦁ ꦮꦴ ꦕꦶꦠ꧀ꦠꦁ ‘‘ꦄꦱꦩꦴꦲꦶꦠꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ‘‘ꦮꦶꦩꦸꦠ꧀ꦠꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ, ꦄꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ‘‘ꦄꦮꦶꦩꦸꦠ꧀ꦠꦁ ꦕꦶꦠ꧀ꦠ’’ꦤ꧀ꦠꦶ ꦥꦗꦴꦤꦴꦠꦶ. ꦌꦮꦁ ꦨꦶꦏ꧀ꦑꦸ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦕꦶꦠ꧀ꦠꦺ ꦕꦶꦠ꧀ꦠꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ.

꧓꧖꧖. ꦄꦤꦸꦥꦱ꧀ꦱꦷꦠꦶ…ꦥꦺ… ꦮꦶꦲꦫꦠꦷꦠꦶ…ꦥꦺ… ꦄꦴꦠꦴꦥꦷꦠꦶ…ꦥꦺ… ꦱꦩ꧀ꦥꦗꦴꦤꦺꦴꦠꦶ…ꦥꦺ… ꦱꦠꦶꦩꦴꦠꦶ…ꦥꦺ… ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦤ꧀ꦠꦶ. ꦠꦠ꧀ꦡ ꦏꦠꦩꦺꦴ ꦭꦺꦴꦏꦺꦴ? ꦠꦁꦪꦺꦮ ꦕꦶꦠ꧀ꦠꦁ ꦭꦺꦴꦏꦺꦴ. ꦥꦚ꧀ꦕꦥꦶ ꦈꦥꦴꦢꦴꦤꦏ꧀ꦑꦤ꧀ꦣꦴ ꦭꦺꦴꦏꦺꦴ – ꦠꦠ꧀ꦡ ꦏꦠꦩꦴ ꦄꦨꦶꦗ꧀ꦙꦴ? ꦪꦺꦴ ꦫꦴꦒꦺꦴ ꦱꦴꦫꦴꦒꦺꦴ…ꦥꦺ… ꦕꦶꦠ꧀ꦠꦱ꧀ꦱ ꦱꦴꦫꦴꦒꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦄꦨꦶꦗ꧀ꦙꦴ’’. ꦠꦠ꧀ꦡ ꦏꦠꦩꦁ ꦢꦺꦴꦩꦤꦱ꧀ꦱꦁ? ꦪꦁ ꦕꦺꦠꦱꦶꦏꦁ ꦄꦱꦴꦠꦁ ꦕꦺꦠꦱꦶꦏꦁ ꦢꦸꦏ꧀ꦑꦁ ꦕꦺꦠꦺꦴꦱꦩ꧀ꦦꦱ꧀ꦱꦗꦁ ꦄꦱꦴꦠꦁ ꦢꦸꦏ꧀ꦑꦁ ꦮꦺꦢꦪꦶꦠꦁ ꦕꦺꦠꦺꦴꦱꦩ꧀ꦦꦱ꧀ꦱꦗꦴ ꦄꦱꦴꦠꦴ ꦢꦸꦏ꧀ꦑꦴ ꦮꦺꦢꦤꦴ – ꦆꦢꦁ ꦮꦸꦕ꧀ꦕꦠꦶ ‘‘ꦢꦺꦴꦩꦤꦱ꧀ꦱꦁ’’. ꦆꦠꦶ ꦄꦪꦚ꧀ꦕ ꦄꦨꦶꦗ꧀ꦙꦴ ꦆꦢꦚ꧀ꦕ ꦢꦺꦴꦩꦤꦱ꧀ꦱꦁ ꦆꦩꦩ꧀ꦲꦶ ꦭꦺꦴꦏꦺ ꦮꦶꦤꦷꦠꦴ ꦲꦺꦴꦤ꧀ꦠꦶ ꦥꦛꦶꦮꦶꦤꦷꦠꦴ ꦱꦤ꧀ꦠꦴ ꦱꦩꦶꦠꦴ ꦮꦹꦥꦱꦤ꧀ꦠꦴ ꦄꦠ꧀ꦡꦔ꧀ꦒꦠꦴ ꦄꦧ꧀ꦨꦠ꧀ꦡꦔ꧀ꦒꦠꦴ ꦄꦥ꧀ꦥꦶꦠꦴ ꦧ꧀ꦪꦥ꧀ꦥꦶꦠꦴ ꦱꦺꦴꦱꦶꦠꦴ ꦮꦶꦱꦺꦴꦱꦶꦠꦴ ꦧ꧀ꦪꦤ꧀ꦠꦷꦏꦠꦴ. ꦠꦺꦤ ꦮꦸꦕ꧀ꦕꦠꦶ ‘‘ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱ’’ꦤ꧀ꦠꦶ.

ꦕꦶꦠ꧀ꦠꦴꦤꦸꦥꦱ꧀ꦱꦤꦴꦤꦶꦢ꧀ꦢꦺꦱꦺꦴ.