꧔. ꦩꦒ꧀ꦒꦱꦕ꧀ꦕꦁ

꧒꧐꧕. ꦠꦠ꧀ꦡ ꦏꦠꦩꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ ꦄꦫꦶꦪꦱꦕ꧀ꦕꦁ? ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ, ꦱꦩ꧀ꦩꦴꦱꦔ꧀ꦏꦥ꧀ꦥꦺꦴ, ꦱꦩ꧀ꦩꦴꦮꦴꦕꦴ, ꦱꦩ꧀ꦩꦴꦏꦩ꧀ꦩꦤ꧀ꦠꦺꦴ, ꦱꦩ꧀ꦩꦴꦄꦴꦗꦷꦮꦺꦴ, ꦱꦩ꧀ꦩꦴꦮꦴꦪꦴꦩꦺꦴ, ꦱꦩ꧀ꦩꦴꦱꦠꦶ, ꦱꦩ꧀ꦩꦴꦱꦩꦴꦣꦶ.

ꦠꦠ꧀ꦡ ꦏꦠꦩꦴ ꦱꦩ꧀ꦩꦴꦢꦶꦛ꧀ꦜꦶ? ꦢꦸꦏ꧀ꦑꦺ ꦚꦴꦟꦁ, ꦢꦸꦏ꧀ꦑꦱꦩꦸꦢꦪꦺ ꦚꦴꦟꦁ, ꦢꦸꦏ꧀ꦑꦤꦶꦫꦺꦴꦣꦺ ꦚꦴꦟꦁ, ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦪꦴ ꦥꦛꦶꦥꦢꦴꦪ ꦚꦴꦟꦁ – ꦄꦪꦁ ꦮꦸꦕ꧀ꦕꦠꦶ ‘‘ꦱꦩ꧀ꦩꦴꦢꦶꦛ꧀ꦜꦶ’’.

ꦠꦠ꧀ꦡ ꦏꦠꦩꦺꦴ ꦱꦩ꧀ꦩꦴꦱꦔ꧀ꦏꦥ꧀ꦥꦺꦴ? ꦤꦺꦏ꧀ꦑꦩ꧀ꦩꦱꦔ꧀ꦏꦥ꧀ꦥꦺꦴ, ꦄꦧ꧀ꦪꦴꦥꦴꦢꦱꦔ꧀ꦏꦥ꧀ꦥꦺꦴ, ꦄꦮꦶꦲꦶꦁꦱꦴꦱꦔ꧀ꦏꦥ꧀ꦥꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦱꦩ꧀ꦩꦴꦱꦔ꧀ꦏꦥ꧀ꦥꦺꦴ’’.

ꦠꦠ꧀ꦡ ꦏꦠꦩꦴ ꦱꦩ꧀ꦩꦴꦮꦴꦕꦴ? ꦩꦸꦱꦴꦮꦴꦢꦴ ꦮꦺꦫꦩꦟꦷ, ꦥꦶꦱꦸꦟꦴꦪ ꦮꦴꦕꦴꦪ ꦮꦺꦫꦩꦟꦷ, ꦦꦫꦸꦱꦴꦪ ꦮꦴꦕꦴꦪ ꦮꦺꦫꦩꦟꦷ, ꦱꦩ꧀ꦦꦥ꧀ꦥꦭꦴꦥꦴ ꦮꦺꦫꦩꦟꦷ – ꦄꦪꦁ ꦮꦸꦕ꧀ꦕꦠꦶ ‘‘ꦱꦩ꧀ꦩꦴꦮꦴꦕꦴ’’.

ꦠꦠ꧀ꦡ ꦏꦠꦩꦺꦴ ꦱꦩ꧀ꦩꦴꦏꦩ꧀ꦩꦤ꧀ꦠꦺꦴ? ꦥꦴꦟꦴꦠꦶꦥꦴꦠꦴ ꦮꦺꦫꦩꦟꦷ, ꦄꦢꦶꦤ꧀ꦤꦴꦢꦴꦤꦴ ꦮꦺꦫꦩꦟꦷ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦷ – ꦄꦪꦁ ꦮꦸꦕ꧀ꦕꦠꦶ ‘‘ꦱꦩ꧀ꦩꦴꦏꦩ꧀ꦩꦤ꧀ꦠꦺꦴ’’.

ꦠꦠ꧀ꦡ ꦏꦠꦩꦺꦴ ꦱꦩ꧀ꦩꦴꦄꦴꦗꦷꦮꦺꦴ? ꦆꦣ ꦄꦫꦶꦪꦱꦴꦮꦏꦺꦴ ꦩꦶꦕ꧀ꦖꦴꦄꦴꦗꦷꦮꦁ ꦥꦲꦴꦪ ꦱꦩ꧀ꦩꦴꦄꦴꦗꦷꦮꦺꦤ ꦗꦷꦮꦶꦏꦁ ꦏꦥ꧀ꦥꦺꦠꦶ – ꦄꦪꦁ ꦮꦸꦕ꧀ꦕꦠꦶ ‘‘ꦱꦩ꧀ꦩꦴꦄꦴꦗꦷꦮꦺꦴ’’.

ꦠꦠ꧀ꦡ ꦏꦠꦩꦺꦴ ꦱꦩ꧀ꦩꦴꦮꦴꦪꦴꦩꦺꦴ? ꦆꦣ ꦨꦶꦏ꧀ꦑꦸ ꦄꦤꦸꦥ꧀ꦥꦤ꧀ꦤꦴꦤꦁ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦄꦤꦸꦥ꧀ꦥꦴꦢꦴꦪ ꦖꦤ꧀ꦢꦁ ꦗꦤꦺꦠꦶ, ꦮꦴꦪꦩꦠꦶ, ꦮꦷꦫꦶꦪꦁ ꦄꦴꦫꦨꦠꦶ, ꦕꦶꦠ꧀ꦠꦁ ꦥꦒ꧀ꦒꦟ꧀ꦲꦴꦠꦶ, ꦥꦢꦲꦠꦶ. ꦈꦥ꧀ꦥꦤ꧀ꦤꦴꦤꦁ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦖꦤ꧀ꦢꦁ ꦗꦤꦺꦠꦶ, ꦮꦴꦪꦩꦠꦶ, ꦮꦷꦫꦶꦪꦁ ꦄꦴꦫꦨꦠꦶ, ꦕꦶꦠ꧀ꦠꦁ ꦥꦒ꧀ꦒꦟ꧀ꦲꦴꦠꦶ, ꦥꦢꦲꦠꦶ. ꦄꦤꦸꦥ꧀ꦥꦤ꧀ꦤꦴꦤꦁ ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦈꦥ꧀ꦥꦴꦢꦴꦪ ꦖꦤ꧀ꦢꦁ ꦗꦤꦺꦠꦶ, ꦮꦴꦪꦩꦠꦶ, ꦮꦷꦫꦶꦪꦁ ꦄꦴꦫꦨꦠꦶ, ꦕꦶꦠ꧀ꦠꦁ ꦥꦒ꧀ꦒꦟ꧀ꦲꦴꦠꦶ, ꦥꦢꦲꦠꦶ. ꦈꦥ꧀ꦥꦤ꧀ꦤꦴꦤꦁ ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦜꦶꦠꦶꦪꦴ ꦄꦱꦩ꧀ꦩꦺꦴꦱꦴꦪ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ ꦖꦤ꧀ꦢꦁ ꦗꦤꦺꦠꦶ, ꦮꦴꦪꦩꦠꦶ, ꦮꦷꦫꦶꦪꦁ ꦄꦴꦫꦨꦠꦶ, ꦕꦶꦠ꧀ꦠꦁ ꦥꦒ꧀ꦒꦟ꧀ꦲꦴꦠꦶ, ꦥꦢꦲꦠꦶ. ꦄꦪꦁ ꦮꦸꦕ꧀ꦕꦠꦶ ‘‘ꦱꦩ꧀ꦩꦴꦮꦴꦪꦴꦩꦺꦴ’’.

ꦠꦠ꧀ꦡ ꦏꦠꦩꦴ ꦱꦩ꧀ꦩꦴꦱꦠꦶ? ꦆꦣ ꦨꦶꦏ꧀ꦑꦸ ꦏꦴꦪꦺ ꦏꦴꦪꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦮꦺꦢꦤꦴꦱꦸ…ꦥꦺ… ꦕꦶꦠ꧀ꦠꦺ…ꦥꦺ… ꦣꦩ꧀ꦩꦺꦱꦸ ꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦄꦪꦁ ꦮꦸꦕ꧀ꦕꦠꦶ ‘‘ꦱꦩ꧀ꦩꦴꦱꦠꦶ’’.

ꦠꦠ꧀ꦡ ꦏꦠꦩꦺꦴ ꦱꦩ꧀ꦩꦴꦱꦩꦴꦣꦶ? ꦆꦣ ꦨꦶꦏ꧀ꦑꦸ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ, ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ, ꦱꦮꦶꦠꦏ꧀ꦏꦁ ꦱꦮꦶꦕꦴꦫꦁ ꦮꦶꦮꦺꦏꦗꦁ ꦥꦷꦠꦶꦱꦸꦑꦁ ꦥꦜꦩꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ, ꦄꦗ꧀ꦙꦠ꧀ꦠꦁ ꦱꦩ꧀ꦥꦱꦴꦢꦤꦁ, ꦕꦺꦠꦱꦺꦴ ꦌꦏꦺꦴꦢꦶꦨꦴꦮꦁ ꦄꦮꦶꦠꦏ꧀ꦏꦁ ꦄꦮꦶꦕꦴꦫꦁ ꦱꦩꦴꦣꦶꦗꦁ ꦥꦷꦠꦶꦱꦸꦑꦁ ꦢꦸꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦥꦷꦠꦶꦪꦴ ꦕ ꦮꦶꦫꦴꦒꦴ, ꦈꦥꦺꦏ꧀ꦑꦏꦺꦴ ꦕ ꦮꦶꦲꦫꦠꦶ, ꦱꦠꦺꦴ ꦕ ꦱꦩ꧀ꦥꦗꦴꦤꦺꦴ, ꦱꦸꦑꦚ꧀ꦕ ꦏꦴꦪꦺꦤ ꦥꦛꦶꦱꦁꦮꦺꦢꦺꦠꦶ, ꦪꦁ ꦠꦁ ꦄꦫꦶꦪꦴ ꦄꦴꦕꦶꦏ꧀ꦑꦤ꧀ꦠꦶ – ‘‘ꦈꦥꦺꦏ꧀ꦑꦏꦺꦴ ꦱꦠꦶꦩꦴ ꦱꦸꦑꦮꦶꦲꦴꦫꦷ’’ꦠꦶ, ꦠꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦱꦸꦑꦱ꧀ꦱ ꦕ ꦥꦲꦴꦤꦴ, ꦢꦸꦏ꧀ꦑꦱ꧀ꦱ ꦕ ꦥꦲꦴꦤꦴ, ꦥꦸꦧ꧀ꦧꦺꦮ ꦱꦺꦴꦩꦤꦱ꧀ꦱꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴ, ꦄꦢꦸꦏ꧀ꦑꦩꦱꦸꦑꦁ ꦈꦥꦺꦏ꧀ꦑꦴꦱꦠꦶꦥꦴꦫꦶꦱꦸꦢ꧀ꦣꦶꦁ ꦕꦠꦸꦠ꧀ꦡꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦄꦪꦁ ꦮꦸꦕ꧀ꦕꦠꦶ ‘‘ꦱꦩ꧀ꦩꦴꦱꦩꦴꦣꦶ’’.

ꦆꦢꦁ ꦮꦸꦕ꧀ꦕꦠꦶ ‘‘ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ ꦄꦫꦶꦪꦱꦕ꧀ꦕꦁ’’.

ꦱꦸꦠ꧀ꦠꦤ꧀ꦠꦨꦴꦗꦤꦷꦪꦁ.