꧑. ꦏꦴꦩꦣꦴꦠꦸ

꧙꧙꧑. ꦏꦴꦩꦣꦴꦠꦸꦪꦴ ꦏꦠꦶ ꦑꦤ꧀ꦣꦴ, ꦏꦠꦶ ꦄꦴꦪꦠꦤꦴꦤꦶ, ꦏꦠꦶ ꦣꦴꦠꦸꦪꦺꦴ, ꦏꦠꦶ ꦱꦕ꧀ꦕꦴꦤꦶ, ꦏꦠꦶ ꦆꦤ꧀ꦢ꧀ꦫꦶꦪꦴꦤꦶ, ꦏꦠꦶ ꦲꦺꦠꦹ, ꦏꦠꦶ ꦄꦴꦲꦴꦫꦴ, ꦏꦠꦶ ꦦꦱ꧀ꦱꦴ, ꦏꦠꦶ ꦮꦺꦢꦤꦴ, ꦏꦠꦶ ꦱꦚ꧀ꦚꦴ, ꦏꦠꦶ ꦕꦺꦠꦤꦴ, ꦏꦠꦶ ꦕꦶꦠ꧀ꦠꦴꦤꦶ?

ꦏꦴꦩꦣꦴꦠꦸꦪꦴ ꦥꦚ꧀ꦕꦏ꧀ꦑꦤ꧀ꦣꦴ, ꦢ꧀ꦮꦴꦢꦱꦴꦪꦠꦤꦴꦤꦶ, ꦄꦛ꧀ꦜꦴꦫꦱ ꦣꦴꦠꦸꦪꦺꦴ, ꦠꦷꦟꦶ ꦱꦕ꧀ꦕꦴꦤꦶ, ꦧꦴꦮꦷꦱꦠꦶꦤ꧀ꦢ꧀ꦫꦶꦪꦴꦤꦶ, ꦤꦮ ꦲꦺꦠꦹ, ꦕꦠ꧀ꦠꦴꦫꦺꦴ ꦄꦴꦲꦴꦫꦴ, ꦱꦠ꧀ꦠ ꦦꦱ꧀ꦱꦴ, ꦱꦠ꧀ꦠ ꦮꦺꦢꦤꦴ, ꦱꦠ꧀ꦠ ꦱꦚ꧀ꦚꦴ, ꦱꦠ꧀ꦠ ꦕꦺꦠꦤꦴ, ꦱꦠ꧀ꦠ ꦕꦶꦠ꧀ꦠꦴꦤꦶ.

꧙꧙꧒. ꦠꦠ꧀ꦡ ꦏꦠꦩꦺ ꦏꦴꦩꦣꦴꦠꦸꦪꦴ ꦥꦚ꧀ꦕꦏ꧀ꦑꦤ꧀ꦣꦴ? ꦫꦹꦥꦏ꧀ꦑꦤ꧀ꦣꦺꦴ, ꦮꦺꦢꦤꦴꦏ꧀ꦑꦤ꧀ꦣꦺꦴ, ꦱꦚ꧀ꦚꦴꦏ꧀ꦑꦤ꧀ꦣꦺꦴ, ꦱꦔ꧀ꦑꦴꦫꦏ꧀ꦑꦤ꧀ꦣꦺꦴ, ꦮꦶꦚ꧀ꦚꦴꦟꦏ꧀ꦑꦤ꧀ꦣꦺꦴ – ꦆꦩꦺ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦥꦚ꧀ꦕꦏ꧀ꦑꦤ꧀ꦣꦴ’’.

ꦠꦠ꧀ꦡ ꦏꦠꦩꦴꦤꦶ ꦏꦴꦩꦣꦴꦠꦸꦪꦴ ꦢ꧀ꦮꦴꦢꦱꦴꦪꦠꦤꦴꦤꦶ? ꦕꦏ꧀ꦑꦴꦪꦠꦤꦁ, ꦫꦹꦥꦴꦪꦠꦤꦁ, ꦱꦺꦴꦠꦴꦪꦠꦤꦁ, ꦱꦢ꧀ꦢꦴꦪꦠꦤꦁ, ꦓꦴꦤꦴꦪꦠꦤꦁ, ꦒꦤ꧀ꦣꦴꦪꦠꦤꦁ, ꦗꦶꦮ꧀ꦲꦴꦪꦠꦤꦁ, ꦫꦱꦴꦪꦠꦤꦁ, ꦏꦴꦪꦴꦪꦠꦤꦁ, ꦦꦺꦴꦛ꧀ꦜꦧ꧀ꦧꦴꦪꦠꦤꦁ, ꦩꦤꦴꦪꦠꦤꦁ, ꦣꦩ꧀ꦩꦴꦪꦠꦤꦁ – ꦆꦩꦴꦤꦶ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦢ꧀ꦮꦴꦢꦱꦴꦪꦠꦤꦴꦤꦶ’’.

ꦠꦠ꧀ꦡ ꦏꦠꦩꦴ ꦏꦴꦩꦣꦴꦠꦸꦪꦴ ꦄꦛ꧀ꦜꦴꦫꦱ ꦣꦴꦠꦸꦪꦺꦴ? ꦕꦏ꧀ꦑꦸꦣꦴꦠꦸ, ꦫꦹꦥꦣꦴꦠꦸ, ꦕꦏ꧀ꦑꦸꦮꦶꦚ꧀ꦚꦴꦟꦣꦴꦠꦸ, ꦱꦺꦴꦠꦣꦴꦠꦸ, ꦱꦢ꧀ꦢꦣꦴꦠꦸ, ꦱꦺꦴꦠꦮꦶꦚ꧀ꦚꦴꦟꦣꦴꦠꦸ, ꦓꦴꦤꦣꦴꦠꦸ, ꦒꦤ꧀ꦣꦣꦴꦠꦸ, ꦓꦴꦤꦮꦶꦚ꧀ꦚꦴꦟꦣꦴꦠꦸ, ꦗꦶꦮ꧀ꦲꦴꦣꦴꦠꦸ, ꦫꦱꦣꦴꦠꦸ, ꦗꦶꦮ꧀ꦲꦴꦮꦶꦚ꧀ꦚꦴꦟꦣꦴꦠꦸ, ꦏꦴꦪꦣꦴꦠꦸ, ꦦꦺꦴꦛ꧀ꦜꦧ꧀ꦧꦣꦴꦠꦸ, ꦏꦴꦪꦮꦶꦚ꧀ꦚꦴꦟꦣꦴꦠꦸ, ꦩꦤꦺꦴꦣꦴꦠꦸ, ꦣꦩ꧀ꦩꦣꦴꦠꦸ, ꦩꦤꦺꦴꦮꦶꦚ꧀ꦚꦴꦟꦣꦴꦠꦸ – ꦆꦩꦴ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦄꦛ꧀ꦜꦴꦫꦱ ꦣꦴꦠꦸꦪꦺꦴ’’.

ꦠꦠ꧀ꦡ ꦏꦠꦩꦴꦤꦶ ꦏꦴꦩꦣꦴꦠꦸꦪꦴ ꦠꦷꦟꦶ ꦱꦕ꧀ꦕꦴꦤꦶ? ꦢꦸꦏ꧀ꦑꦱꦕ꧀ꦕꦁ, ꦱꦩꦸꦢꦪꦱꦕ꧀ꦕꦁ, ꦩꦒ꧀ꦒꦱꦕ꧀ꦕꦁ – ꦆꦩꦴꦤꦶ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦠꦷꦟꦶ ꦱꦕ꧀ꦕꦴꦤꦶ’’.

ꦠꦠ꧀ꦡ ꦏꦠꦩꦴꦤꦶ ꦏꦴꦩꦣꦴꦠꦸꦪꦴ ꦧꦴꦮꦷꦱꦠꦶꦤ꧀ꦢ꧀ꦫꦶꦪꦴꦤꦶ? ꦕꦏ꧀ꦑꦸꦤ꧀ꦢ꧀ꦫꦶꦪꦁ, ꦱꦺꦴꦠꦶꦤ꧀ꦢ꧀ꦫꦶꦪꦁ…ꦥꦺ… ꦄꦚ꧀ꦚꦴꦠꦴꦮꦶꦤ꧀ꦢ꧀ꦫꦶꦪꦁ – ꦆꦩꦴꦤꦶ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦧꦴꦮꦷꦱꦠꦶꦤ꧀ꦢ꧀ꦫꦶꦪꦴꦤꦶ’’.

ꦠꦠ꧀ꦡ ꦏꦠꦩꦺ ꦏꦴꦩꦣꦴꦠꦸꦪꦴ ꦤꦮ ꦲꦺꦠꦹ? ꦠꦪꦺꦴ ꦏꦸꦱꦭꦲꦺꦠꦹ, ꦠꦪꦺꦴ ꦄꦏꦸꦱꦭꦲꦺꦠꦹ, ꦠꦪꦺꦴ ꦄꦧ꧀ꦪꦴꦏꦠꦲꦺꦠꦹ…ꦥꦺ… ꦆꦩꦺ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦤꦮ ꦲꦺꦠꦹ’’.

ꦠꦠ꧀ꦡ ꦏꦠꦩꦺ ꦏꦴꦩꦣꦴꦠꦸꦪꦴ ꦕꦠ꧀ꦠꦴꦫꦺꦴ ꦄꦴꦲꦴꦫꦴ? ꦏꦧꦭ꦳ꦷꦏꦴꦫꦴꦲꦴꦫꦺꦴ, ꦦꦱ꧀ꦱꦴꦲꦴꦫꦺꦴ, ꦩꦤꦺꦴꦱꦚ꧀ꦕꦺꦠꦤꦴꦲꦴꦫꦺꦴ, ꦮꦶꦚ꧀ꦚꦴꦟꦴꦲꦴꦫꦺꦴ – ꦆꦩꦺ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦕꦠ꧀ꦠꦴꦫꦺꦴ ꦄꦴꦲꦴꦫꦴ’’.

ꦠꦠ꧀ꦡ ꦏꦠꦩꦺ ꦏꦴꦩꦣꦴꦠꦸꦪꦴ ꦱꦠ꧀ꦠ ꦦꦱ꧀ꦱꦴ? ꦕꦏ꧀ꦑꦸꦱꦩ꧀ꦦꦱ꧀ꦱꦺꦴ ꦱꦺꦴꦠꦱꦩ꧀ꦦꦱ꧀ꦱꦺꦴ, ꦓꦴꦤꦱꦩ꧀ꦦꦱ꧀ꦱꦺꦴ, ꦗꦶꦮ꧀ꦲꦴꦱꦩ꧀ꦦꦱ꧀ꦱꦺꦴ, ꦏꦴꦪꦱꦩ꧀ꦦꦱ꧀ꦱꦺꦴ, ꦩꦤꦺꦴꦣꦴꦠꦸꦱꦩ꧀ꦦꦱ꧀ꦱꦺꦴ, ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦱꦩ꧀ꦦꦱ꧀ꦱꦺꦴ – ꦆꦩꦺ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦱꦠ꧀ꦠ ꦦꦱ꧀ꦱꦴ’’.

ꦠꦠ꧀ꦡ ꦏꦠꦩꦴ ꦏꦴꦩꦣꦴꦠꦸꦪꦴ ꦱꦠ꧀ꦠ ꦮꦺꦢꦤꦴ? ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦱꦺꦴꦠꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦓꦴꦤꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦗꦶꦮ꧀ꦲꦴꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦏꦴꦪꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦩꦤꦺꦴꦣꦴꦠꦸꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦱꦩ꧀ꦦꦱ꧀ꦱꦗꦴ ꦮꦺꦢꦤꦴ – ꦆꦩꦴ ꦮꦸꦕ꧀ꦕꦠ꧀ꦠꦶ ‘‘ꦏꦴꦩꦣꦴꦠꦸꦪꦴ ꦱꦠ꧀ꦠ ꦮꦺꦢꦤꦴ’’.

ꦠꦠ꧀ꦡ ꦏꦠꦩꦴ ꦏꦴꦩꦣꦴꦠꦸꦪꦴ ꦱꦠ꧀ꦠ ꦱꦚ꧀ꦚꦴ? ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ, ꦱꦺꦴꦠꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ, ꦓꦴꦤꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ, ꦗꦶꦮ꧀ꦲꦴꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ, ꦏꦴꦪꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ, ꦩꦤꦺꦴꦣꦴꦠꦸꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ, ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦱꦩ꧀ꦦꦱ꧀ꦱꦗꦴ ꦱꦚ꧀ꦚꦴ – ꦆꦩꦴ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦱꦠ꧀ꦠ ꦱꦚ꧀ꦚꦴ’’.

ꦠꦠ꧀ꦡ ꦏꦠꦩꦴ ꦏꦴꦩꦣꦴꦠꦸꦪꦴ ꦱꦠ꧀ꦠ ꦕꦺꦠꦤꦴ? ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦕꦺꦠꦤꦴ, ꦱꦺꦴꦠꦱꦩ꧀ꦦꦱ꧀ꦱꦗꦴ ꦕꦺꦠꦤꦴ, ꦓꦴꦤꦱꦩ꧀ꦦꦱ꧀ꦱꦗꦴ ꦕꦺꦠꦤꦴ, ꦗꦶꦮ꧀ꦲꦴꦱꦩ꧀ꦦꦱ꧀ꦱꦗꦴ ꦕꦺꦠꦤꦴ, ꦏꦴꦪꦱꦩ꧀ꦦꦱ꧀ꦱꦗꦴ ꦕꦺꦠꦤꦴ, ꦩꦤꦺꦴꦣꦴꦠꦸꦱꦩ꧀ꦦꦱ꧀ꦱꦗꦴ ꦕꦺꦠꦤꦴ, ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦱꦩ꧀ꦦꦱ꧀ꦱꦗꦴ ꦕꦺꦠꦤꦴ – ꦆꦩꦴ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦱꦠ꧀ꦠ ꦕꦺꦠꦤꦴ’’.

ꦠꦠ꧀ꦡ ꦏꦠꦩꦴꦤꦶ ꦏꦴꦩꦣꦴꦠꦸꦪꦴ ꦱꦠ꧀ꦠ ꦕꦶꦠ꧀ꦠꦴꦤꦶ? ꦕꦏ꧀ꦑꦸꦮꦶꦚ꧀ꦚꦴꦟꦁ, ꦱꦺꦴꦠꦮꦶꦚ꧀ꦚꦴꦟꦁ, ꦓꦴꦤꦮꦶꦚ꧀ꦚꦴꦟꦁ, ꦗꦶꦮ꧀ꦲꦴꦮꦶꦚ꧀ꦚꦴꦟꦁ, ꦏꦴꦪꦮꦶꦚ꧀ꦚꦴꦟꦁ, ꦩꦤꦺꦴꦣꦴꦠꦸ, ꦩꦤꦺꦴꦮꦶꦚ꧀ꦚꦴꦟꦣꦴꦠꦸ – ꦆꦩꦴꦤꦶ ꦮꦸꦕ꧀ꦕꦤ꧀ꦠꦶ ‘‘ꦏꦴꦩꦣꦴꦠꦸꦪꦴ ꦱꦠ꧀ꦠ ꦕꦶꦠ꧀ꦠꦴꦤꦶ’’.