꧑꧗. ꦑꦸꦢ꧀ꦢꦏꦮꦠ꧀ꦡꦸꦮꦶꦨꦔ꧀ꦒꦺꦴ
꧑. ꦌꦏꦏꦩꦴꦠꦶꦏꦴ
꧘꧓꧒. (꧑)ꦗꦴꦠꦶꦩꦢꦺꦴ (꧒)ꦒꦺꦴꦠ꧀ꦠꦩꦢꦺꦴ (꧓)ꦄꦴꦫꦺꦴꦒ꧀ꦪꦩꦢꦺꦴ (꧔)ꦪꦺꦴꦧ꧀ꦧꦤꦩꦢꦺꦴ (꧕)ꦗꦷꦮꦶꦠꦩꦢꦺꦴ (꧖)ꦭꦴꦨꦩꦢꦺꦴ (꧗)ꦱꦏ꧀ꦏꦴꦫꦩꦢꦺꦴ (꧘) ꦒꦫꦸꦏꦴꦫꦩꦢꦺꦴ (꧙) ꦥꦸꦫꦺꦏ꧀ꦑꦴꦫꦩꦢꦺꦴ (꧑꧐) ꦥꦫꦶꦮꦴꦫꦩꦢꦺꦴ (꧑꧑) ꦨꦺꦴꦒꦩꦢꦺꦴ (꧑꧒) ꦮꦟ꧀ꦟꦩꦢꦺꦴ (꧑꧓) ꦱꦸꦠꦩꦢꦺꦴ (꧑꧔) ꦥꦛꦶꦨꦴꦤꦩꦢꦺꦴ (꧑꧕) ꦫꦠ꧀ꦠꦚ꧀ꦚꦸꦩꦢꦺꦴ (꧑꧖) ꦥꦶꦟ꧀ꦝꦥꦴꦠꦶꦏꦩꦢꦺꦴ (꧑꧗) ꦄꦤꦮꦚ꧀ꦚꦴꦠꦩꦢꦺꦴ (꧑꧘) ꦆꦫꦶꦪꦴꦥꦡꦩꦢꦺꦴ (꧑꧙) ꦆꦢ꧀ꦣꦶꦩꦢꦺꦴ (꧒꧐) ꦪꦱꦩꦢꦺꦴ (꧒꧑) ꦱꦷꦭꦩꦢꦺꦴ (꧒꧒) ꦙꦴꦤꦩꦢꦺꦴ (꧒꧓) ꦱꦶꦥ꧀ꦥꦩꦢꦺꦴ (꧒꧔) ꦄꦴꦫꦺꦴꦲꦩꦢꦺꦴ (꧒꧕) ꦥꦫꦶꦟꦴꦲꦩꦢꦺꦴ (꧒꧖) ꦱꦟ꧀ꦜꦴꦤꦩꦢꦺꦴ (꧒꧗) ꦥꦴꦫꦶꦥꦹꦫꦶꦩꦢꦺꦴ (꧒꧘)ꦩꦢꦺꦴ (꧒꧙) ꦥꦩꦴꦢꦺꦴ (꧓꧐) ꦡꦩ꧀ꦨꦺꦴ (꧓꧑) ꦱꦴꦫꦩ꧀ꦨꦺꦴ (꧓꧒) ꦄꦠ꧀ꦫꦶꦕ꧀ꦖꦠꦴ (꧓꧓)ꦩꦲꦶꦕ꧀ꦖꦠꦴ (꧓꧔) ꦥꦴꦥꦶꦕ꧀ꦖꦠꦴ (꧓꧕) ꦱꦶꦔ꧀ꦒꦁ (꧓꧖) ꦠꦶꦤ꧀ꦠꦶꦟꦁ (꧓꧗) ꦕꦴꦥꦭ꧀ꦪꦁ (꧓꧘)ꦄꦱꦨꦴꦒꦮꦸꦠ꧀ꦠꦶ (꧓꧙) ꦄꦫꦠꦶ (꧔꧐) ꦠꦤ꧀ꦢꦷ (꧔꧑) ꦮꦶꦗꦩ꧀ꦨꦶꦠꦴ (꧔꧒) ꦨꦠ꧀ꦠꦱꦩ꧀ꦩꦢꦺꦴ (꧔꧓) ꦕꦺꦠꦱꦺꦴ ꦕ ꦭꦷꦤꦠ꧀ꦠꦁ [ꦕꦺꦠꦱꦺꦴ ꦭꦷꦤꦠ꧀ꦠꦁ (ꦱ꧀ꦪꦴ.)] (꧔꧔) ꦏꦸꦲꦤꦴ (꧔꧕) ꦭꦥꦤꦴ (꧔꧖) ꦤꦺꦩꦶꦠ꧀ꦠꦶꦏꦠꦴ (꧔꧗)ꦤꦶꦥ꧀ꦥꦺꦱꦶꦏꦠꦴ (꧔꧘) ꦭꦴꦨꦺꦤ ꦭꦴꦨꦁ ꦤꦶꦗꦶꦒꦷꦱꦤꦠꦴ [ꦤꦶꦗꦶꦒꦶꦁꦱꦤꦠꦴ (ꦱꦷ.), ꦗꦶꦒꦶꦁꦱꦤꦠꦴ (ꦱ꧀ꦪꦴ.)] (꧔꧙) ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧐) ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧑) ꦲꦷꦤꦺꦴ ꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧒) ꦱꦺꦪ꧀ꦪꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧓) ꦱꦺꦪ꧀ꦪꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧔) ꦱꦺꦪ꧀ꦪꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧕) ꦱꦢꦶꦱꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧖) ꦱꦢꦶꦱꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧗) ꦱꦢꦶꦱꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧘) ꦲꦷꦤꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧕꧙) ꦲꦷꦤꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧖꧐) ꦲꦷꦤꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ (꧖꧑) ꦩꦴꦤꦺꦴ (꧖꧒) ꦄꦠꦶꦩꦴꦤꦺꦴ (꧖꧓) ꦩꦴꦤꦴꦠꦶꦩꦴꦤꦺꦴ (꧖꧔) ꦎꦩꦴꦤꦺꦴ (꧖꧕)ꦄꦣꦶꦩꦴꦤꦺꦴ (꧖꧖) ꦄꦱ꧀ꦩꦶꦩꦴꦤꦺꦴ (꧖꧗) ꦩꦶꦕ꧀ꦖꦴꦩꦴꦤꦺꦴ (꧖꧘) ꦚꦴꦠꦶꦮꦶꦠꦏ꧀ꦏꦺꦴ (꧖꧙)ꦗꦤꦥꦢꦮꦶꦠꦏ꧀ꦏꦺꦴ (꧗꧐) ꦄꦩꦫꦮꦶꦠꦏ꧀ꦏꦺꦴ (꧗꧑) ꦥꦫꦴꦤꦸꦢ꧀ꦢꦪꦠꦴꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ (꧗꧒) ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ (꧗꧓) ꦄꦤꦮꦚ꧀ꦚꦠ꧀ꦠꦶꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ
ꦌꦏꦏꦁ.
꧒. ꦢꦸꦏꦩꦴꦠꦶꦏꦴ
꧘꧓꧓. (꧑) ꦏꦺꦴꦣꦺꦴ ꦕ ꦈꦥꦤꦴꦲꦺꦴ ꦕ (꧒) ꦩꦏ꧀ꦑꦺꦴ ꦕ ꦥꦭ꦳ꦴꦱꦺꦴ [ꦥꦭꦴꦱꦺꦴ (ꦱꦷ. ꦱ꧀ꦪꦴ.)] ꦕ (꧓) ꦆꦱ꧀ꦱꦴ ꦕ ꦩꦕ꧀ꦖꦫꦶꦪꦚ꧀ꦕ (꧔) ꦩꦴꦪꦴ ꦕ ꦱꦴꦜꦺꦪ꧀ꦪꦚ꧀ꦕ (꧕) ꦄꦮꦶꦗ꧀ꦗꦴ ꦕ ꦨꦮꦠꦟ꧀ꦲꦴ ꦕ (꧖) ꦨꦮꦢꦶꦛ꧀ꦜꦶ ꦕ ꦮꦶꦨꦮꦢꦶꦛ꧀ꦜꦶ ꦕ (꧗) ꦱꦱ꧀ꦱꦠꦢꦶꦛ꧀ꦜꦶ ꦕ ꦈꦕ꧀ꦖꦺꦢꦢꦶꦛ꧀ꦜꦶ ꦕ (꧘) ꦄꦤ꧀ꦠꦮꦴꦢꦶꦛ꧀ꦜꦶ ꦕ ꦄꦤꦤ꧀ꦠꦮꦴꦢꦶꦛ꧀ꦜꦶ ꦕ (꧙) ꦥꦸꦧ꧀ꦧꦤ꧀ꦠꦴꦤꦸꦢꦶꦛ꧀ꦜꦶ ꦕ ꦄꦥꦫꦤ꧀ꦠꦴꦤꦸꦢꦶꦛ꧀ꦜꦶ ꦕ (꧑꧐) ꦄꦲꦶꦫꦶꦏꦚ꧀ꦕ ꦄꦤꦺꦴꦠ꧀ꦠꦥ꧀ꦥꦚ꧀ꦕ (꧑꧑) ꦢꦺꦴꦮꦕꦱ꧀ꦱꦠꦴ ꦕ ꦥꦴꦥꦩꦶꦠ꧀ꦠꦠꦴ ꦕ (꧑꧒) ꦄꦤꦗ꧀ꦗꦮꦺꦴ ꦕ ꦄꦩꦢ꧀ꦢꦮꦺꦴ ꦕ (꧑꧓) ꦄꦏ꧀ꦑꦤ꧀ꦠꦶ ꦕ ꦄꦱꦺꦴꦫꦕ꧀ꦕꦚ꧀ꦕ (꧑꧔) ꦄꦱꦴꦑꦭ꧀ꦪꦚ꧀ꦕ ꦄꦥ꧀ꦥꦛꦶꦱꦤ꧀ꦡꦴꦫꦺꦴ ꦕ (꧑꧕)ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦠꦴ ꦕ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦸꦠꦴ ꦕ (꧑꧖) ꦩꦸꦛ꧀ꦜꦱ꧀ꦱꦕ꧀ꦕꦚ꧀ꦕ ꦄꦱꦩ꧀ꦥꦗꦚ꧀ꦚꦚ꧀ꦕ (꧑꧗) ꦱꦷꦭꦮꦶꦥꦠ꧀ꦠꦶ ꦕ ꦢꦶꦛ꧀ꦜꦶꦮꦶꦥꦠ꧀ꦠꦶ ꦕ (꧑꧘) ꦄꦗ꧀ꦙꦠ꧀ꦠꦱꦁꦪꦺꦴꦗꦤꦚ꧀ꦕ ꦧꦲꦶꦢ꧀ꦣꦴꦱꦁꦪꦺꦴꦗꦤꦚ꧀ꦕ
ꦢꦸꦏꦁ.
꧓. ꦠꦶꦏꦩꦴꦠꦶꦏꦴ
꧘꧓꧔. (꧑) ꦠꦷꦟꦶ ꦄꦏꦸꦱꦭꦩꦹꦭꦴꦤꦶ (꧒) ꦠꦪꦺꦴ ꦄꦏꦸꦱꦭꦮꦶꦠꦏ꧀ꦏꦴ (꧓) ꦠꦶꦱ꧀ꦱꦺꦴ ꦄꦏꦸꦱꦭꦱꦚ꧀ꦚꦴ (꧔) ꦠꦶꦱ꧀ꦱꦺꦴ ꦄꦏꦸꦱꦭꦣꦴꦠꦸꦪꦺꦴ (꧕) ꦠꦷꦟꦶ ꦢꦸꦕ꧀ꦕꦫꦶꦠꦴꦤꦶ (꧖) ꦠꦪꦺꦴ ꦄꦴꦱꦮꦴ (꧗) ꦠꦷꦟꦶ ꦱꦁꦪꦺꦴꦗꦤꦴꦤꦶ (꧘) ꦠꦶꦱ꧀ꦱꦺꦴ ꦠꦟ꧀ꦲꦴ (꧙) ꦄꦥꦫꦴꦥꦶ ꦠꦶꦱ꧀ꦱꦺꦴ ꦠꦟ꧀ꦲꦴ (꧑꧐) ꦄꦥꦫꦴꦥꦶ ꦠꦶꦱ꧀ꦱꦺꦴ ꦠꦟ꧀ꦲꦴ (꧑꧑) ꦠꦶꦱ꧀ꦱꦺꦴ ꦌꦱꦤꦴ (꧑꧒) ꦠꦶꦱ꧀ꦱꦺꦴ ꦮꦶꦣꦴ (꧑꧓) ꦠꦷꦟꦶ ꦨꦪꦴꦤꦶ (꧑꧔)ꦠꦷꦟꦶ ꦠꦩꦴꦤꦶ (꧑꧕) ꦠꦷꦟꦶ ꦠꦶꦠ꧀ꦡꦴꦪꦠꦤꦴꦤꦶ (꧑꧖) ꦠꦪꦺꦴ ꦏꦶꦚ꧀ꦕꦤꦴ (꧑꧗) ꦠꦷꦟꦶ ꦄꦔ꧀ꦒꦟꦴꦤꦶ (꧑꧘) ꦠꦷꦟꦶ ꦩꦭꦴꦤꦶ (꧑꧙) ꦠꦷꦟꦶ ꦮꦶꦱꦩꦴꦤꦶ (꧒꧐) ꦄꦥꦫꦴꦤꦶꦥꦶ ꦠꦷꦟꦶ ꦮꦶꦱꦩꦴꦤꦶ (꧒꧑) ꦠꦪꦺꦴ ꦄꦒ꧀ꦒꦷ (꧒꧒) ꦠꦪꦺꦴ ꦏꦱꦴꦮꦴ (꧒꧓) ꦄꦥꦫꦺꦥꦶ ꦠꦪꦺꦴ ꦏꦱꦴꦮꦴ (꧒꧔)ꦄꦱ꧀ꦱꦴꦢꦢꦶꦛ꧀ꦜꦶ, ꦄꦠ꧀ꦠꦴꦤꦸꦢꦶꦛ꧀ꦜꦶ, ꦩꦶꦕ꧀ꦖꦴꦢꦶꦛ꧀ꦜꦶ (꧒꧕) ꦄꦫꦠꦶ, ꦮꦶꦲꦺꦱꦴ, ꦄꦣꦩ꧀ꦩꦕꦫꦶꦪꦴ (꧒꧖)ꦢꦺꦴꦮꦕꦱ꧀ꦱꦠꦴ, ꦥꦴꦥꦩꦶꦠ꧀ꦠꦠꦴ, ꦤꦴꦤꦠ꧀ꦠꦱꦚ꧀ꦚꦴ (꧒꧗) ꦈꦢ꧀ꦣꦕ꧀ꦕꦁ, ꦏꦺꦴꦱꦗ꧀ꦗꦁ, ꦥꦩꦴꦢꦺꦴ (꧒꧘) ꦄꦱꦤ꧀ꦠꦸꦛ꧀ꦜꦶꦠꦴ, ꦄꦱꦩ꧀ꦥꦗꦚ꧀ꦚꦠꦴ, ꦩꦲꦶꦕ꧀ꦖꦠꦴ (꧒꧙) ꦄꦲꦶꦫꦶꦏꦁ, ꦄꦤꦺꦴꦠ꧀ꦠꦥ꧀ꦥꦁ, ꦥꦩꦴꦢꦺꦴ (꧓꧐)ꦄꦤꦴꦢꦫꦶꦪꦁ, ꦢꦺꦴꦮꦕꦱ꧀ꦱꦠꦴ, ꦥꦴꦥꦩꦶꦠ꧀ꦠꦠꦴ (꧓꧑) ꦄꦱ꧀ꦱꦢ꧀ꦣꦶꦪꦁ, ꦄꦮꦢꦚ꧀ꦚꦸꦠꦴ, ꦏꦺꦴꦱꦗ꧀ꦗꦁ (꧓꧒) ꦈꦢ꧀ꦣꦕ꧀ꦕꦁ, ꦄꦱꦁꦮꦫꦺꦴ, ꦢꦸꦱ꧀ꦱꦷꦭ꧀ꦪꦁ (꧓꧓) ꦄꦫꦶꦪꦴꦤꦁ ꦄꦢꦱ꧀ꦱꦤꦏꦩ꧀ꦪꦠꦴ, ꦱꦢ꧀ꦣꦩ꧀ꦩꦁ ꦄꦱꦺꦴꦠꦸꦏꦩ꧀ꦪꦠꦴ, ꦈꦥꦴꦫꦩ꧀ꦨꦕꦶꦠ꧀ꦠꦠꦴ (꧓꧔) ꦩꦸꦛ꧀ꦜꦱ꧀ꦱꦕ꧀ꦕꦁ, ꦄꦱꦩ꧀ꦥꦗꦚ꧀ꦚꦁ, ꦕꦺꦠꦱꦺꦴ ꦮꦶꦏ꧀ꦑꦺꦥꦺꦴ (꧓꧕)ꦄꦪꦺꦴꦤꦶꦱꦺꦴ ꦩꦤꦱꦶꦏꦴꦫꦺꦴ, ꦏꦸꦩ꧀ꦩꦒ꧀ꦒꦱꦺꦮꦤꦴ, ꦕꦺꦠꦱꦺꦴ ꦕ ꦭꦷꦤꦠ꧀ꦠꦁ
ꦠꦶꦏꦁ.
꧔. ꦕꦠꦸꦏ꧀ꦏꦩꦴꦠꦶꦏꦴ
꧘꧓꧕. (꧑) ꦕꦠ꧀ꦠꦴꦫꦺꦴ ꦄꦴꦱꦮꦴ (꧒) ꦕꦠ꧀ꦠꦴꦫꦺꦴ ꦒꦤ꧀ꦡꦴ (꧓) ꦕꦠ꧀ꦠꦴꦫꦺꦴ ꦎꦓꦴ (꧔) ꦕꦠ꧀ꦠꦴꦫꦺꦴ ꦪꦺꦴꦒꦴ (꧕) ꦕꦠ꧀ꦠꦴꦫꦶ ꦈꦥꦴꦢꦴꦤꦴꦤꦶ (꧖) ꦕꦠ꧀ꦠꦴꦫꦺꦴ ꦠꦟ꧀ꦲꦸꦥ꧀ꦥꦴꦢꦴ (꧗) ꦕꦠ꧀ꦠꦴꦫꦶ ꦄꦒꦠꦶꦒꦩꦤꦴꦤꦶ (꧘) ꦕꦠ꧀ꦠꦴꦫꦺꦴ ꦮꦶꦥꦫꦶꦪꦴꦱꦴ [ꦮꦶꦥꦫꦶꦪꦺꦱꦴ (ꦱꦷ. ꦱ꧀ꦪꦴ. ꦏ.)] (꧙) ꦕꦠ꧀ꦠꦴꦫꦺꦴ ꦄꦤꦫꦶꦪꦮꦺꦴꦲꦴꦫꦴ (꧑꧐) ꦄꦥꦫꦺꦥꦶ ꦕꦠ꧀ꦠꦴꦫꦺꦴ ꦄꦤꦫꦶꦪꦮꦺꦴꦲꦴꦫꦴ (꧑꧑) ꦕꦠ꧀ꦠꦴꦫꦶ ꦢꦸꦕ꧀ꦕꦫꦶꦠꦴꦤꦶ (꧑꧒) ꦄꦥꦫꦴꦤꦶꦥꦶ ꦕꦠ꧀ꦠꦴꦫꦶ ꦢꦸꦕ꧀ꦕꦫꦶꦠꦴꦤꦶ (꧑꧓)ꦕꦠ꧀ꦠꦴꦫꦶ ꦨꦪꦴꦤꦶ (꧑꧔) ꦄꦥꦫꦴꦤꦶꦥꦶ ꦕꦠ꧀ꦠꦴꦫꦶ ꦨꦪꦴꦤꦶ (꧑꧕) ꦕꦠꦱ꧀ꦱꦺꦴ ꦢꦶꦛ꧀ꦜꦶꦪꦺꦴ
ꦕꦠꦸꦏ꧀ꦏꦁ.
꧕. ꦥꦚ꧀ꦕꦏꦩꦴꦠꦶꦏꦴ
꧘꧓꧖. (꧑) ꦥꦚ꧀ꦕꦺꦴꦫꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ (꧒) ꦥꦚ꧀ꦕꦸꦢ꧀ꦣꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ (꧓) ꦥꦚ꧀ꦕ ꦩꦕ꧀ꦖꦫꦶꦪꦴꦤꦶ (꧔) ꦥꦚ꧀ꦕ ꦱꦔ꧀ꦒꦴ (꧕) ꦥꦚ꧀ꦕ ꦱꦭ꧀ꦭꦴ (꧖) ꦥꦚ꧀ꦕ ꦕꦺꦠꦺꦴꦑꦶꦭꦴ (꧗)ꦥꦚ꧀ꦕ ꦕꦺꦠꦱꦺꦴꦮꦶꦤꦶꦧꦤ꧀ꦣꦴ [ꦕꦺꦠꦱꦺꦴꦮꦶꦤꦶꦧꦢ꧀ꦣꦴ (ꦏ.)] (꧘) ꦥꦚ꧀ꦕ ꦤꦷꦮꦫꦟꦴꦤꦶ (꧙) ꦥꦚ꧀ꦕ ꦏꦩ꧀ꦩꦴꦤꦶ ꦄꦴꦤꦤ꧀ꦠꦫꦶꦏꦴꦤꦶ (꧑꧐) ꦥꦚ꧀ꦕ ꦢꦶꦛ꧀ꦜꦶꦪꦺꦴ (꧑꧑) ꦥꦚ꧀ꦕ ꦮꦺꦫꦴ (꧑꧒) ꦥꦚ꧀ꦕ ꦧ꧀ꦪꦱꦤꦴ (꧑꧓) ꦥꦚ꧀ꦕ ꦄꦏ꧀ꦑꦤ꧀ꦠꦶꦪꦴ ꦄꦴꦢꦷꦤꦮꦴ (꧑꧔) ꦥꦚ꧀ꦕ ꦨꦪꦴꦤꦶ (꧑꧕) ꦥꦚ꧀ꦕ ꦢꦶꦛ꧀ꦜꦣꦩ꧀ꦩꦤꦶꦧ꧀ꦧꦴꦤꦮꦴꦢꦴ
ꦥꦚ꧀ꦕꦏꦁ.
꧖. ꦖꦏ꧀ꦏꦩꦴꦠꦶꦏꦴ
꧘꧓꧗. (꧑) ꦖ ꦮꦶꦮꦴꦢꦩꦹꦭꦴꦤꦶ (꧒) ꦖ ꦖꦤ꧀ꦢꦫꦴꦒꦴ (꧓) ꦖ ꦮꦶꦫꦺꦴꦣꦮꦠ꧀ꦡꦹꦤꦶ (꧔) ꦖ ꦠꦟ꧀ꦲꦴꦏꦴꦪꦴ (꧕) ꦖ ꦄꦒꦴꦫꦮꦴ (꧖) ꦖ ꦥꦫꦶꦲꦴꦤꦶꦪꦴ ꦣꦩ꧀ꦩꦴ (꧗) ꦄꦥꦫꦺꦥꦶ ꦖ ꦥꦫꦶꦲꦴꦤꦶꦪꦴ ꦣꦩ꧀ꦩꦴ (꧘) ꦖ ꦱꦺꦴꦩꦤꦱ꧀ꦱꦸꦥꦮꦶꦕꦴꦫꦴ (꧙) ꦖ ꦢꦺꦴꦩꦤꦱ꧀ꦱꦸꦥꦮꦶꦕꦴꦫꦴ (꧑꧐) ꦖ ꦈꦥꦺꦏ꧀ꦑꦸꦥꦮꦶꦕꦴꦫꦴ (꧑꧑) ꦖ ꦒꦺꦲꦱꦶꦠꦴꦤꦶ ꦱꦺꦴꦩꦤꦱ꧀ꦱꦴꦤꦶ (꧑꧒) ꦖ ꦒꦺꦲꦱꦶꦠꦴꦤꦶ ꦢꦺꦴꦩꦤꦱ꧀ꦱꦴꦤꦶ (꧑꧓) ꦖ ꦒꦺꦲꦱꦶꦠꦴ ꦈꦥꦺꦏ꧀ꦑꦴ (꧑꧔) ꦖ ꦢꦶꦛ꧀ꦜꦶꦪꦺꦴ
ꦖꦏ꧀ꦏꦁ.
꧗. ꦱꦠ꧀ꦠꦏꦩꦴꦠꦶꦏꦴ
꧘꧓꧘. (꧑) ꦱꦠ꧀ꦠ ꦄꦤꦸꦱꦪꦴ (꧒) ꦱꦠ꧀ꦠ ꦱꦁꦪꦺꦴꦗꦤꦴꦤꦶ (꧓) ꦱꦠ꧀ꦠ ꦥꦫꦶꦪꦸꦛ꧀ꦜꦴꦤꦴꦤꦶ (꧔)ꦱꦠ꧀ꦠ ꦄꦱꦢ꧀ꦣꦩ꧀ꦩꦴ (꧕) ꦱꦠ꧀ꦠ ꦢꦸꦕ꧀ꦕꦫꦶꦠꦴꦤꦶ (꧖) ꦱꦠ꧀ꦠ ꦩꦴꦤꦴ (꧗) ꦱꦠ꧀ꦠ ꦢꦶꦛ꧀ꦜꦶꦪꦺꦴ
ꦱꦠ꧀ꦠꦏꦁ.
꧘. ꦄꦛ꧀ꦜꦏꦩꦴꦠꦶꦏꦴ
꧘꧓꧙. (꧑) ꦄꦛ꧀ꦜ ꦏꦶꦭꦺꦱꦮꦠ꧀ꦡꦹꦤꦶ (꧒) ꦄꦛ꧀ꦜ ꦏꦸꦱꦷꦠꦮꦠ꧀ꦡꦹꦤꦶ (꧓) ꦄꦛ꧀ꦜꦱꦸ ꦭꦺꦴꦏꦣꦩ꧀ꦩꦺꦱꦸ ꦕꦶꦠ꧀ꦠꦱ꧀ꦱ ꦥꦛꦶꦓꦴꦠꦺꦴ (꧔) ꦄꦛ꧀ꦜ ꦄꦤꦫꦶꦪꦮꦺꦴꦲꦴꦫꦴ (꧕) ꦄꦛ꧀ꦜ ꦩꦶꦕ꧀ꦖꦠ꧀ꦠꦴ (꧖) ꦄꦛ꧀ꦜ ꦥꦸꦫꦶꦱꦢꦺꦴꦱꦴ (꧗) ꦄꦛ꧀ꦜ ꦄꦱꦚ꧀ꦚꦶꦮꦴꦢꦴ (꧘) ꦄꦛ꧀ꦜ ꦤꦺꦮꦱꦚ꧀ꦚꦶꦤꦴꦱꦚ꧀ꦚꦶꦮꦴꦢꦴ
ꦄꦛ꧀ꦜꦏꦁ.
꧙. ꦤꦮꦏꦩꦴꦠꦶꦏꦴ
꧘꧔꧐. (꧑) ꦤꦮ ꦄꦴꦓꦴꦠꦮꦠ꧀ꦡꦹꦤꦶ (꧒) ꦤꦮ ꦥꦸꦫꦶꦱꦩꦭꦴꦤꦶ (꧓) ꦤꦮꦮꦶꦣꦴ ꦩꦴꦤꦴ (꧔)ꦤꦮ ꦠꦟ꧀ꦲꦴꦩꦹꦭꦏꦴ ꦣꦩ꧀ꦩꦴ (꧕) ꦤꦮ ꦆꦚ꧀ꦗꦶꦠꦴꦤꦶ (꧖) ꦤꦮ ꦩꦚ꧀ꦚꦶꦠꦴꦤꦶ (꧗) ꦤꦮ ꦦꦤ꧀ꦢꦶꦠꦴꦤꦶ (꧘) ꦤꦮ ꦥꦥꦚ꧀ꦕꦶꦠꦴꦤꦶ (꧙) ꦤꦮ ꦱꦔ꧀ꦑꦠꦴꦤꦶ
ꦤꦮꦏꦁ.
꧑꧐. ꦢꦱꦏꦩꦴꦠꦶꦏꦴ
꧘꧔꧑. (꧑) ꦢꦱ ꦏꦶꦭꦺꦱꦮꦠ꧀ꦡꦹꦤꦶ (꧒) ꦢꦱ ꦄꦴꦓꦴꦠꦮꦠ꧀ꦡꦹꦤꦶ (꧓) ꦢꦱ ꦄꦏꦸꦱꦭꦏꦩ꧀ꦩꦥꦡꦴ (꧔) ꦢꦱ ꦱꦁꦪꦺꦴꦗꦤꦴꦤꦶ (꧕) ꦢꦱ ꦩꦶꦕ꧀ꦖꦠ꧀ꦠꦴ (꧖) ꦢꦱꦮꦠ꧀ꦡꦸꦏꦴ ꦩꦶꦕ꧀ꦖꦴꦢꦶꦛ꧀ꦜꦶ (꧗) ꦢꦱꦮꦠ꧀ꦡꦸꦏꦴ ꦄꦤ꧀ꦠꦒ꧀ꦒꦴꦲꦶꦏꦴ ꦢꦶꦛ꧀ꦜꦶ
ꦢꦱꦏꦁ.
꧘꧔꧒. ꦄꦛ꧀ꦜꦴꦫꦱ ꦠꦟ꧀ꦲꦴꦮꦶꦕꦫꦶꦠꦴꦤꦶ ꦄꦗ꧀ꦙꦠ꧀ꦠꦶꦏꦱ꧀ꦱ ꦈꦥꦴꦢꦴꦪ, ꦄꦛ꧀ꦜꦴꦫꦱ ꦠꦟ꧀ꦲꦴꦮꦶꦕꦫꦶꦠꦴꦤꦶ ꦧꦴꦲꦶꦫꦱ꧀ꦱ ꦈꦥꦴꦢꦴꦪ, ꦠꦢꦺꦏꦗ꧀ꦙꦁ ꦄꦨꦶꦱꦚ꧀ꦚꦹꦲꦶꦠ꧀ꦮꦴ ꦄꦨꦶꦱꦔ꧀ꦑꦶꦥꦶꦠ꧀ꦮꦴ ꦖꦠ꧀ꦠꦶꦁꦱ ꦠꦟ꧀ꦲꦴꦮꦶꦕꦫꦶꦠꦴꦤꦶ ꦲꦺꦴꦤ꧀ꦠꦶ. ꦆꦠꦶ ꦄꦠꦷꦠꦴꦤꦶ ꦖꦠ꧀ꦠꦶꦁꦱ ꦠꦟ꧀ꦲꦴꦮꦶꦕꦫꦶꦠꦴꦤꦶ, ꦄꦤꦴꦒꦠꦴꦤꦶ ꦖꦠ꧀ꦠꦶꦁꦱ ꦠꦟ꧀ꦲꦴꦮꦶꦕꦫꦶꦠꦴꦤꦶ, ꦥꦕ꧀ꦕꦸꦥ꧀ꦥꦤ꧀ꦤꦴꦤꦶ ꦖꦠ꧀ꦠꦶꦁꦱ ꦠꦟ꧀ꦲꦴꦮꦶꦕꦫꦶꦠꦴꦤꦶ, ꦠꦢꦺꦏꦗ꧀ꦙꦁ ꦄꦨꦶꦱꦚ꧀ꦚꦹꦲꦶꦠ꧀ꦮꦴ ꦄꦨꦶꦱꦔ꧀ꦑꦶꦥꦶꦠ꧀ꦮꦴ ꦄꦛ꧀ꦜ ꦠꦟ꧀ꦲꦴꦮꦶꦕꦫꦶꦠꦱꦠꦁ ꦲꦺꦴꦠꦶ. ꦪꦴꦤꦶ ꦕ ꦢ꧀ꦮꦴꦱꦛ꧀ꦜꦶ ꦢꦶꦛ꧀ꦜꦶꦒꦠꦴꦤꦶ ꦧ꧀ꦫꦲ꧀ꦩꦗꦴꦭꦺ ꦮꦺꦪ꧀ꦪꦴꦏꦫꦟꦺ ꦮꦸꦠ꧀ꦠꦴꦤꦶ ꦨꦒꦮꦠꦴ.
ꦩꦴꦠꦶꦏꦴ.
꧑. ꦌꦏꦏꦤꦶꦢ꧀ꦢꦺꦱꦺꦴ
(꧑) ꦗꦴꦠꦶꦩꦢꦺꦴ
꧘꧔꧓. ꦠꦠ꧀ꦡ ꦏꦠꦩꦺꦴ ꦗꦴꦠꦶꦩꦢꦺꦴ? ꦗꦴꦠꦶꦁ ꦥꦛꦶꦕ꧀ꦕ ꦩꦢꦺꦴ ꦩꦗ꧀ꦗꦤꦴ ꦩꦗ꧀ꦗꦶꦠꦠ꧀ꦠꦁ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ [ꦈꦟ꧀ꦟꦠꦶ ꦈꦟ꧀ꦟꦴꦩꦺꦴ (ꦱ꧀ꦪꦴ. ꦏ.) ꦣ. ꦱ. ꧑꧑꧒꧑] ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦗꦴꦠꦶꦩꦢꦺꦴ’’.
(꧒-꧒꧗) ꦒꦺꦴꦠ꧀ꦠꦩꦢꦴꦢꦷ
꧘꧔꧔. ꦠꦠ꧀ꦡ ꦏꦠꦩꦺꦴ ꦒꦺꦴꦠ꧀ꦠꦩꦢꦺꦴ? ꦒꦺꦴꦠ꧀ꦠꦁ ꦥꦛꦶꦕ꧀ꦕ…ꦥꦺ… ꦄꦴꦫꦺꦴꦒ꧀ꦪꦁ ꦥꦛꦶꦕ꧀ꦕ…ꦥꦺ… ꦪꦺꦴꦧ꧀ꦧꦤꦁ ꦥꦛꦶꦕ꧀ꦕ…ꦥꦺ… ꦗꦷꦮꦶꦠꦁ ꦥꦛꦶꦕ꧀ꦕ…ꦥꦺ… ꦭꦴꦨꦁ ꦥꦛꦶꦕ꧀ꦕ…ꦥꦺ… ꦱꦏ꧀ꦏꦴꦫꦁ ꦥꦛꦶꦕ꧀ꦕ…ꦥꦺ… ꦒꦫꦸꦏꦴꦫꦁ ꦥꦛꦶꦕ꧀ꦕ…ꦥꦺ… ꦥꦸꦫꦺꦏ꧀ꦑꦴꦫꦁ ꦥꦛꦶꦕ꧀ꦕ…ꦥꦺ… ꦥꦫꦶꦮꦴꦫꦁ ꦥꦛꦶꦕ꧀ꦕ…ꦥꦺ… ꦨꦺꦴꦒꦁ ꦥꦛꦶꦕ꧀ꦕ…ꦥꦺ… ꦮꦟ꧀ꦟꦁ ꦥꦛꦶꦕ꧀ꦕ…ꦥꦺ… ꦱꦸꦠꦁ ꦥꦛꦶꦕ꧀ꦕ…ꦥꦺ… ꦥꦛꦶꦨꦴꦤꦁ ꦥꦛꦶꦕ꧀ꦕ…ꦥꦺ… ꦫꦠ꧀ꦠꦚ꧀ꦚꦸꦠꦁ ꦥꦛꦶꦕ꧀ꦕ…ꦥꦺ… ꦥꦶꦟ꧀ꦝꦥꦴꦠꦶꦏꦠ꧀ꦠꦁ ꦥꦛꦶꦕ꧀ꦕ…ꦥꦺ… ꦄꦤꦮꦚ꧀ꦚꦴꦠꦁ ꦥꦛꦶꦕ꧀ꦕ…ꦥꦺ… ꦆꦫꦶꦪꦴꦥꦡꦁ ꦥꦛꦶꦕ꧀ꦕ…ꦥꦺ… ꦆꦢ꧀ꦣꦶꦁ ꦥꦛꦶꦕ꧀ꦕ…ꦥꦺ… ꦪꦱꦁ ꦥꦛꦶꦕ꧀ꦕ…ꦥꦺ… ꦱꦷꦭꦁ ꦥꦛꦶꦕ꧀ꦕ…ꦥꦺ… ꦙꦴꦤꦁ ꦥꦛꦶꦕ꧀ꦕ…ꦥꦺ… ꦱꦶꦥ꧀ꦥꦁ ꦥꦛꦶꦕ꧀ꦕ…ꦥꦺ… ꦄꦴꦫꦺꦴꦲꦁ ꦥꦛꦶꦕ꧀ꦕ…ꦥꦺ… ꦥꦫꦶꦟꦴꦲꦁ ꦥꦛꦶꦕ꧀ꦕ…ꦥꦺ… ꦱꦟ꧀ꦜꦴꦤꦁ ꦥꦛꦶꦕ꧀ꦕ…ꦥꦺ… ꦥꦴꦫꦶꦥꦹꦫꦶꦁ ꦥꦛꦶꦕ꧀ꦕ ꦩꦢꦺꦴ ꦩꦗ꧀ꦗꦤꦴ ꦩꦗ꧀ꦗꦶꦠꦠ꧀ꦠꦁ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦥꦴꦫꦶꦥꦹꦫꦶꦩꦢꦺꦴ’’.
(꧒꧘) ꦩꦢꦺꦴ
꧘꧔꧕. ꦠꦠ꧀ꦡ ꦏꦠꦩꦺꦴ ꦩꦢꦺꦴ? ꦪꦺꦴ ꦩꦢꦺꦴ ꦩꦗ꧀ꦗꦤꦴ ꦩꦗ꧀ꦗꦶꦠꦠ꧀ꦠꦁ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦩꦢꦺꦴ’’.
(꧒꧙) ꦥꦩꦴꦢꦺꦴ
꧘꧔꧖. ꦠꦠ꧀ꦡ ꦏꦠꦩꦺꦴ ꦥꦩꦴꦢꦺꦴ? ꦏꦴꦪꦢꦸꦕ꧀ꦕꦫꦶꦠꦺ ꦮꦴ ꦮꦕꦷꦢꦸꦕ꧀ꦕꦫꦶꦠꦺ ꦮꦴ ꦩꦤꦺꦴꦢꦸꦕ꧀ꦕꦫꦶꦠꦺ ꦮꦴ ꦥꦚ꧀ꦕꦱꦸ ꦮꦴ ꦏꦴꦩꦒꦸꦟꦺꦱꦸ ꦕꦶꦠ꧀ꦠꦱ꧀ꦱ ꦮꦺꦴꦱ꧀ꦱꦒ꧀ꦒꦺꦴ ꦮꦺꦴꦱ꧀ꦱꦒ꧀ꦒꦴꦤꦸꦥ꧀ꦥꦢꦴꦤꦁ ꦏꦸꦱꦭꦴꦤꦁ ꦮꦴ ꦣꦩ꧀ꦩꦴꦤꦁ ꦨꦴꦮꦤꦴꦪ ꦄꦱꦏ꧀ꦏꦕ꧀ꦕꦏꦶꦫꦶꦪꦠꦴ ꦄꦱꦴꦠꦕ꧀ꦕꦏꦶꦫꦶꦪꦠꦴ ꦄꦤꦛ꧀ꦜꦶꦠꦏꦶꦫꦶꦪꦠꦴ ꦎꦭꦷꦤꦮꦸꦠ꧀ꦠꦶꦠꦴ ꦤꦶꦏ꧀ꦑꦶꦠ꧀ꦠꦖꦤ꧀ꦢꦠꦴ ꦤꦶꦏ꧀ꦑꦶꦠ꧀ꦠꦣꦸꦫꦠꦴ ꦄꦤꦴꦱꦺꦮꦤꦴ ꦄꦨꦴꦮꦤꦴ ꦄꦧꦲꦸꦭꦷꦏꦩ꧀ꦩꦁ ꦄꦤꦣꦶꦛ꧀ꦜꦴꦤꦁ ꦄꦤꦤꦸꦪꦺꦴꦒꦺꦴ ꦥꦩꦴꦢꦺꦴ, ꦪꦺꦴ ꦌꦮꦫꦹꦥꦺꦴ ꦥꦩꦴꦢꦺꦴ ꦥꦩꦗ꧀ꦗꦤꦴ ꦥꦩꦗ꧀ꦗꦶꦠꦠ꧀ꦠꦁ – ꦄꦪꦁ ꦮꦸꦕ꧀ꦕꦠꦶ ‘‘ꦥꦩꦴꦢꦺꦴ’’.
(꧓꧐) ꦡꦩ꧀ꦨꦺꦴ
꧘꧔꧗. ꦠꦠ꧀ꦡ ꦏꦠꦩꦺꦴ ꦡꦩ꧀ꦨꦺꦴ? ꦪꦺꦴ ꦡꦩ꧀ꦨꦺꦴ ꦡꦩ꧀ꦨꦤꦴ ꦡꦩ꧀ꦨꦶꦠꦠ꧀ꦠꦁ ꦏꦏ꧀ꦑꦭ꦳ꦶꦪꦁ ꦦꦴꦫꦸꦱꦶꦪꦁ ꦈꦗꦸꦕꦶꦠ꧀ꦠꦠꦴ ꦄꦩꦸꦢꦸꦠꦴ – ꦄꦪꦁ ꦮꦸꦕ꧀ꦕꦠꦶ ‘‘ꦡꦩ꧀ꦨꦺꦴ’’.
(꧓꧑) ꦱꦴꦫꦩ꧀ꦨꦺꦴ
꧘꧔꧘. ꦠꦠ꧀ꦡ ꦏꦠꦩꦺꦴ ꦱꦴꦫꦩ꧀ꦨꦺꦴ? ꦪꦺꦴ ꦱꦴꦫꦩ꧀ꦨꦺꦴ ꦥꦛꦶꦱꦴꦫꦩ꧀ꦨꦺꦴ ꦱꦴꦫꦩ꧀ꦨꦤꦴ ꦥꦛꦶꦱꦴꦫꦩ꧀ꦨꦤꦴ ꦥꦛꦶꦱꦴꦫꦩ꧀ꦨꦶꦠꦠ꧀ꦠꦁ – ꦄꦪꦁ ꦮꦸꦕ꧀ꦕꦠꦶ ‘‘ꦱꦴꦫꦩ꧀ꦨꦺꦴ’’.
(꧓꧒) ꦄꦠ꧀ꦫꦶꦕ꧀ꦖꦠꦴ
꧘꧔꧙. ꦠꦠ꧀ꦡ ꦏꦠꦩꦴ ꦄꦠ꧀ꦫꦶꦕ꧀ꦖꦠꦴ? ꦆꦠꦫꦷꦠꦫꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥ꧀ꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦺꦲꦶ ꦥꦚ꧀ꦕꦲꦶ ꦮꦴ ꦏꦴꦩꦒꦸꦟꦺꦲꦶ ꦄꦱꦤ꧀ꦠꦸꦛ꧀ꦜꦱ꧀ꦱ ꦨꦶꦪ꧀ꦪꦺꦴꦏꦩ꧀ꦪꦠꦴ, ꦪꦴ ꦌꦮꦫꦹꦥꦴ ꦆꦕ꧀ꦖꦴ ꦆꦕ꧀ꦖꦴꦒꦠꦴ ꦄꦠ꧀ꦫꦶꦕ꧀ꦖꦠꦴ ꦫꦴꦒꦺꦴ ꦱꦴꦫꦴꦒꦺꦴ ꦕꦶꦠ꧀ꦠꦱ꧀ꦱ ꦱꦴꦫꦴꦒꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦄꦠ꧀ꦫꦶꦕ꧀ꦖꦠꦴ’’.
(꧓꧓) ꦩꦲꦶꦕ꧀ꦖꦠꦴ
꧘꧕꧐. ꦠꦠ꧀ꦡ ꦏꦠꦩꦴ ꦩꦲꦶꦕ꧀ꦖꦠꦴ? ꦆꦠꦫꦷꦠꦫꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥ꧀ꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦺꦲꦶ ꦥꦚ꧀ꦕꦲꦶ ꦮꦴ ꦏꦴꦩꦒꦸꦟꦺꦲꦶ ꦄꦱꦤ꧀ꦠꦸꦛ꧀ꦜꦱ꧀ꦱ ꦨꦶꦪ꧀ꦪꦺꦴꦏꦩ꧀ꦪꦠꦴ, ꦪꦴ ꦌꦮꦫꦹꦥꦴ ꦆꦕ꧀ꦖꦴ ꦆꦕ꧀ꦖꦴꦒꦠꦴ ꦩꦲꦶꦕ꧀ꦖꦠꦴ ꦫꦴꦒꦺꦴ ꦱꦴꦫꦴꦒꦺꦴ ꦕꦶꦠ꧀ꦠꦱ꧀ꦱ ꦱꦴꦫꦴꦒꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦩꦲꦶꦕ꧀ꦖꦠꦴ’’.
(꧓꧔) ꦥꦴꦥꦶꦕ꧀ꦖꦠꦴ
꧘꧕꧑. ꦠꦠ꧀ꦡ ꦏꦠꦩꦴ ꦥꦴꦥꦶꦕ꧀ꦖꦠꦴ? ꦆꦣꦺꦏꦕ꧀ꦕꦺꦴ ꦄꦱ꧀ꦱꦢ꧀ꦣꦺꦴ ꦱꦩꦴꦤꦺꦴ ‘‘ꦱꦢ꧀ꦣꦺꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶ ꦆꦕ꧀ꦖꦠꦶ, ꦢꦸꦱ꧀ꦱꦷꦭꦺꦴ ꦱꦩꦴꦤꦺꦴ ‘‘ꦱꦷꦭꦮꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶ ꦆꦕ꧀ꦖꦠꦶ, ꦄꦥ꧀ꦥꦱ꧀ꦱꦸꦠꦺꦴ ꦱꦩꦴꦤꦺꦴ ‘‘ꦧꦲꦸꦱ꧀ꦱꦸꦠꦺꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶ ꦆꦕ꧀ꦖꦠꦶ, ꦱꦔ꧀ꦒꦟꦶꦏꦴꦫꦴꦩꦺꦴ ꦱꦩꦴꦤꦺꦴ ‘‘ꦥꦮꦶꦮꦶꦠ꧀ꦠꦺꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶ ꦆꦕ꧀ꦖꦠꦶ, ꦏꦸꦱꦷꦠꦺꦴ ꦱꦩꦴꦤꦺꦴ ‘‘ꦄꦴꦫꦢ꧀ꦣꦮꦷꦫꦶꦪꦺꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶ ꦆꦕ꧀ꦖꦠꦶ, ꦩꦸꦛ꧀ꦜꦱ꧀ꦱꦠꦷ ꦱꦩꦴꦤꦺꦴ ‘‘ꦈꦥꦛ꧀ꦜꦶꦠꦱ꧀ꦱꦠꦷꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶ ꦆꦕ꧀ꦖꦠꦶ, ꦄꦱꦩꦴꦲꦶꦠꦺꦴ ꦱꦩꦴꦤꦺꦴ ‘‘ꦱꦩꦴꦲꦶꦠꦺꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶ ꦆꦕ꧀ꦖꦠꦶ, ꦢꦸꦥ꧀ꦥꦚ꧀ꦚꦺꦴ ꦱꦩꦴꦤꦺꦴ ‘‘ꦥꦚ꧀ꦚꦮꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶ ꦆꦕ꧀ꦖꦠꦶ, ꦄꦑꦷꦟꦴꦱꦮꦺꦴ ꦱꦩꦴꦤꦺꦴ ‘‘ꦑꦷꦟꦴꦱꦮꦺꦴꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶ ꦆꦕ꧀ꦖꦠꦶ – ꦪꦴ ꦌꦮꦫꦹꦥꦴ ꦆꦕ꧀ꦖꦴ ꦆꦕ꧀ꦖꦴꦒꦠꦴ ꦥꦴꦥꦶꦕ꧀ꦖꦠꦴ ꦫꦴꦒꦺꦴ ꦱꦴꦫꦴꦒꦺꦴ ꦕꦶꦠ꧀ꦠꦱ꧀ꦱ ꦱꦴꦫꦴꦒꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦥꦴꦥꦶꦕ꧀ꦖꦠꦴ’’.
(꧓꧕) ꦱꦶꦔ꧀ꦒꦁ
꧘꧕꧒. ꦠꦠ꧀ꦡ ꦏꦠꦩꦁ ꦱꦶꦔ꧀ꦒꦁ? ꦪꦁ ꦱꦶꦔ꧀ꦒꦁ ꦱꦶꦔ꧀ꦒꦴꦫꦠꦴ ꦕꦴꦠꦸꦫꦠꦴ ꦕꦴꦠꦸꦫꦶꦪꦁ ꦥꦫꦶꦏ꧀ꦑꦠ꧀ꦠꦠꦴ ꦥꦴꦫꦶꦏ꧀ꦑꦠ꧀ꦠꦶꦪꦁ – ꦆꦢꦁ ꦮꦸꦕ꧀ꦕꦠꦶ ‘‘ꦱꦶꦔ꧀ꦒꦁ’’.
(꧓꧖) ꦠꦶꦤ꧀ꦠꦶꦟꦁ
꧘꧕꧓. ꦠꦠ꧀ꦡ ꦏꦠꦩꦁ ꦠꦶꦤ꧀ꦠꦶꦟꦁ? ꦪꦁ ꦠꦶꦤ꧀ꦠꦶꦟꦁ ꦠꦶꦤ꧀ꦠꦶꦟꦴꦪꦤꦴ ꦠꦶꦤ꧀ꦠꦶꦟꦴꦪꦶꦠꦠ꧀ꦠꦁ ꦭꦺꦴꦭꦸꦥ꧀ꦥꦁ ꦭꦺꦴꦭꦸꦥ꧀ꦥꦴꦪꦤꦴ ꦭꦺꦴꦭꦸꦥ꧀ꦥꦴꦪꦶꦠꦠ꧀ꦠꦁ ꦥꦸꦕ꧀ꦖꦚ꧀ꦗꦶꦏꦠꦴ ꦱꦴꦣꦸꦏꦩ꧀ꦪꦠꦴ – ꦆꦢꦁ ꦮꦸꦕ꧀ꦕꦠꦶ ‘‘ꦠꦶꦤ꧀ꦠꦶꦟꦁ’’.
(꧓꧗) ꦕꦴꦥꦭ꧀ꦪꦁ
꧘꧕꧔. ꦠꦠ꧀ꦡ ꦏꦠꦩꦁ ꦕꦴꦥꦭ꧀ꦪꦁ? ꦕꦷꦮꦫꦩꦟ꧀ꦝꦤꦴ ꦥꦠ꧀ꦠꦩꦟ꧀ꦝꦤꦴ ꦱꦺꦤꦴꦱꦤꦩꦟ꧀ꦝꦤꦴ ꦆꦩꦱ꧀ꦱ ꦮꦴ ꦥꦹꦠꦶꦏꦴꦪꦱ꧀ꦱ ꦧꦴꦲꦶꦫꦴꦤꦁ ꦮꦴ ꦥꦫꦶꦏ꧀ꦑꦴꦫꦴꦤꦁ ꦩꦟ꧀ꦝꦤꦴ ꦮꦶꦨꦹꦱꦤꦴ ꦏꦺꦭ꦳ꦤꦴ ꦥꦫꦶꦏꦺꦭ꦳ꦤꦴ ꦒꦶꦢ꧀ꦣꦶꦏꦠꦴ ꦒꦶꦢ꧀ꦣꦶꦏꦠ꧀ꦠꦁ ꦕꦥꦭꦠꦴ ꦕꦴꦥꦭ꧀ꦪꦁ – ꦆꦢꦁ ꦮꦸꦕ꧀ꦕꦠꦶ ‘‘ꦕꦴꦥꦭ꧀ꦪꦁ’’.
(꧓꧘) ꦄꦱꦨꦴꦒꦮꦸꦠ꧀ꦠꦶ
꧘꧕꧕. ꦠꦠ꧀ꦡ ꦏꦠꦩꦁ ꦄꦱꦨꦴꦒꦮꦸꦠ꧀ꦠꦶ? ꦩꦴꦠꦫꦶ ꦮꦴ ꦥꦶꦠꦫꦶ ꦮꦴ ꦗꦺꦛ꧀ꦜꦺ ꦮꦴ ꦨꦴꦠꦫꦶ ꦮꦴ ꦄꦴꦕꦫꦶꦪꦺꦱꦸ ꦮꦴ ꦈꦥꦗ꧀ꦙꦴꦪꦺ ꦮꦴ ꦧꦸꦢ꧀ꦣꦺ ꦮꦴ ꦱꦴꦮꦏꦺꦱꦸ ꦮꦴ ꦄꦚ꧀ꦚꦠꦫꦚ꧀ꦚꦠꦫꦺꦱꦸ ꦒꦫꦸꦛ꧀ꦜꦴꦤꦶꦪꦺꦱꦸ ꦮꦶꦥ꧀ꦥꦛꦶꦏꦹꦭꦒ꧀ꦒꦴꦲꦶꦠꦴ ꦮꦶꦥꦕ꧀ꦕꦤꦷꦏꦱꦴꦠꦠꦴ ꦄꦤꦴꦢꦫꦶꦪꦁ ꦄꦤꦴꦢꦫꦶꦪꦠꦴ ꦄꦒꦴꦫꦮꦠꦴ ꦄꦥ꧀ꦥꦠꦶꦱ꧀ꦱꦮꦠꦴ – ꦄꦪꦁ ꦮꦸꦕ꧀ꦕꦠꦶ ‘‘ꦄꦱꦨꦴꦒꦮꦸꦠ꧀ꦠꦶ’’.
(꧓꧙) ꦄꦫꦠꦶ
꧘꧕꧖. ꦠꦠ꧀ꦡ ꦏꦠꦩꦴ ꦄꦫꦠꦶ? ꦥꦤ꧀ꦠꦺꦱꦸ ꦮꦴ ꦱꦺꦤꦴꦱꦤꦺꦱꦸ ꦄꦚ꧀ꦚꦠꦫꦚ꧀ꦚꦠꦫꦺꦱꦸ ꦮꦴ ꦄꦣꦶꦏꦸꦱꦭꦺꦱꦸ ꦣꦩ꧀ꦩꦺꦱꦸ ꦄꦫꦠꦶ ꦄꦫꦠꦶꦠꦴ ꦄꦤꦨꦶꦫꦠꦶ ꦄꦤꦨꦶꦫꦩꦟꦴ ꦈꦏ꧀ꦏꦟ꧀ꦜꦶꦠꦴ ꦥꦫꦶꦠꦱ꧀ꦱꦶꦠꦴ – ꦄꦪꦁ ꦮꦸꦕ꧀ꦕꦠꦶ ‘‘ꦄꦫꦠꦶ’’.
(꧔꧐) ꦠꦤ꧀ꦢꦷ
꧘꧕꧗. ꦠꦠ꧀ꦡ ꦏꦠꦩꦴ ꦠꦤ꧀ꦢꦷ? ꦪꦴ ꦠꦤ꧀ꦢꦷ ꦠꦤ꧀ꦢꦶꦪꦤꦴ ꦠꦤ꧀ꦢꦶꦩꦤꦏꦠꦴ ꦄꦴꦭꦱ꧀ꦪꦁ ꦄꦴꦭꦱ꧀ꦪꦴꦪꦤꦴ ꦄꦴꦭꦱ꧀ꦪꦴꦪꦶꦠꦠ꧀ꦠꦁ – ꦄꦪꦁ ꦮꦸꦕ꧀ꦕꦠꦶ ‘‘ꦠꦤ꧀ꦢꦷ’’.
(꧔꧑) ꦮꦶꦗꦩ꧀ꦨꦶꦠꦴ
꧘꧕꧘. ꦠꦠ꧀ꦡ ꦏꦠꦩꦴ ꦮꦶꦗꦩ꧀ꦨꦶꦠꦴ? ꦪꦴ ꦏꦴꦪꦱ꧀ꦱ ꦗꦩ꧀ꦨꦤꦴ ꦮꦶꦗꦩ꧀ꦨꦤꦴ ꦄꦴꦤꦩꦤꦴ ꦮꦶꦤꦩꦤꦴ ꦱꦤ꧀ꦤꦩꦤꦴ ꦥꦟꦩꦤꦴ ꦧ꧀ꦪꦴꦣꦶꦪꦏꦁ – ꦄꦪꦁ ꦮꦸꦕ꧀ꦕꦠꦶ ‘‘ꦮꦶꦗꦩ꧀ꦨꦶꦠꦴ’’.
(꧔꧒) ꦨꦠ꧀ꦠꦱꦩ꧀ꦩꦢꦺꦴ
꧘꧕꧙. ꦠꦠ꧀ꦡ ꦏꦠꦩꦺꦴ ꦨꦠ꧀ꦠꦱꦩ꧀ꦩꦢꦺꦴ? ꦪꦴ ꦨꦸꦠ꧀ꦠꦴꦮꦶꦱ꧀ꦱ ꦨꦠ꧀ꦠꦩꦸꦕ꧀ꦖꦴ ꦨꦠ꧀ꦠꦏꦶꦭꦩꦡꦺꦴ ꦨꦠ꧀ꦠꦥꦫꦶꦭ꦳ꦴꦲꦺꦴ ꦏꦴꦪꦢꦸꦛ꧀ꦜꦸꦭ꧀ꦭꦁ – ꦄꦪꦁ ꦮꦸꦕ꧀ꦕꦠꦶ ‘‘ꦨꦠ꧀ꦠꦱꦩ꧀ꦩꦢꦺꦴ’’.
(꧔꧓) ꦕꦺꦠꦱꦺꦴ ꦕ ꦭꦷꦤꦠ꧀ꦠꦁ
꧘꧖꧐. ꦠꦠ꧀ꦡ ꦏꦠꦩꦁ ꦕꦺꦠꦱꦺꦴ ꦕ ꦭꦷꦤꦠ꧀ꦠꦁ? ꦪꦴ ꦕꦶꦠ꧀ꦠꦱ꧀ꦱ ꦄꦏꦭ꧀ꦪꦠꦴ ꦄꦏꦩ꧀ꦩꦚ꧀ꦚꦠꦴ ꦎꦭꦷꦪꦤꦴ ꦱꦭ꧀ꦭꦷꦪꦤꦴ ꦭꦷꦤꦁ ꦭꦷꦪꦤꦴ ꦭꦷꦪꦶꦠꦠ꧀ꦠꦁ ꦡꦶꦤꦁ ꦡꦷꦪꦤꦴ ꦡꦷꦪꦶꦠꦠ꧀ꦠꦁ ꦕꦶꦠ꧀ꦠꦱ꧀ꦱ – ꦆꦢꦁ ꦮꦸꦕ꧀ꦕꦠꦶ ‘‘ꦕꦺꦠꦱꦺꦴ ꦕ ꦭꦷꦤꦠ꧀ꦠꦁ’’.
(꧔꧔) ꦏꦸꦲꦤꦴ
꧘꧖꧑. ꦠꦠ꧀ꦡ ꦏꦠꦩꦴ ꦏꦸꦲꦤꦴ? ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦱꦤ꧀ꦤꦶꦱ꧀ꦱꦶꦠꦱ꧀ꦱ ꦥꦴꦥꦶꦕ꧀ꦖꦱ꧀ꦱ ꦆꦕ꧀ꦖꦴꦥꦏꦠꦱ꧀ꦱ ꦥꦕ꧀ꦕꦪꦥꦛꦶꦱꦺꦮꦤꦱꦔ꧀ꦑꦴꦠꦺꦤ [ꦥꦕ꧀ꦕꦪꦥꦛꦶꦱꦺꦣꦤꦱꦔ꧀ꦑꦴꦠꦺꦤ (ꦱꦷ.)] ꦮꦴ ꦱꦴꦩꦤ꧀ꦠꦗꦥ꧀ꦥꦶꦠꦺꦤ ꦮꦴ ꦆꦫꦶꦪꦴꦥꦡꦱ꧀ꦱ ꦮꦴ ꦄꦜꦥꦤꦴ [ꦄꦴꦜꦥꦤꦴ (ꦏ.)] ꦜꦥꦤꦴ ꦱꦟ꧀ꦜꦥꦤꦴ ꦨꦴꦏꦸꦛꦶꦠꦴ ꦨꦴꦏꦸꦛꦶꦪꦁ ꦏꦸꦲꦤꦴ ꦏꦸꦲꦴꦪꦤꦴ ꦏꦸꦲꦶꦠꦠ꧀ꦠꦁ – ꦄꦪꦁ ꦮꦸꦕ꧀ꦕꦠꦶ ‘‘ꦏꦸꦲꦤꦴ’’.
(꧔꧕) ꦭꦥꦤꦴ
꧘꧖꧒. ꦠꦠ꧀ꦡ ꦏꦠꦩꦴ ꦭꦥꦤꦴ? ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦱꦤ꧀ꦤꦶꦱ꧀ꦱꦶꦠꦱ꧀ꦱ ꦥꦴꦥꦶꦕ꧀ꦖꦱ꧀ꦱ ꦆꦕ꧀ꦖꦴꦥꦏꦠꦱ꧀ꦱ ꦪꦴ ꦥꦫꦺꦱꦁ ꦄꦴꦭꦥꦤꦴ ꦭꦥꦤꦴ ꦱꦭ꧀ꦭꦥꦤꦴ ꦈꦭ꧀ꦭꦥꦤꦴ ꦱꦩꦸꦭ꧀ꦭꦥꦤꦴ ꦈꦤ꧀ꦤꦲꦤꦴ ꦱꦩꦸꦤ꧀ꦤꦲꦤꦴ ꦈꦏ꧀ꦏꦴꦕꦤꦴ ꦱꦩꦸꦏ꧀ꦏꦴꦕꦤꦴ ꦄꦤꦸꦥ꧀ꦥꦶꦪꦨꦴꦟꦶꦠꦴ ꦕꦴꦛꦸꦏꦩ꧀ꦪꦠꦴ ꦩꦸꦒ꧀ꦒꦱꦹꦥ꧀ꦪꦠꦴ ꦥꦴꦫꦶꦨꦛꦪꦠꦴ – ꦄꦪꦁ ꦮꦸꦕ꧀ꦕꦠꦶ ‘‘ꦭꦥꦤꦴ’’.
(꧔꧖) ꦤꦺꦩꦶꦠ꧀ꦠꦶꦏꦠꦴ
꧘꧖꧓. ꦠꦠ꧀ꦡ ꦏꦠꦩꦴ ꦤꦺꦩꦶꦠ꧀ꦠꦶꦏꦠꦴ? ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦱꦤ꧀ꦤꦶꦱ꧀ꦱꦶꦠꦱ꧀ꦱ ꦥꦴꦥꦶꦕ꧀ꦖꦱ꧀ꦱ ꦆꦕ꧀ꦖꦴꦥꦏꦠꦱ꧀ꦱ ꦪꦁ ꦥꦫꦺꦱꦁ ꦤꦶꦩꦶꦠ꧀ꦠꦁ ꦤꦶꦩꦶꦠ꧀ꦠꦏꦩ꧀ꦩꦁ ꦎꦨꦴꦱꦺꦴ ꦎꦨꦴꦱꦏꦩ꧀ꦩꦁ ꦱꦴꦩꦤ꧀ꦠꦗꦥ꧀ꦥꦴ ꦥꦫꦶꦏꦡꦴ – ꦄꦪꦁ ꦮꦸꦕ꧀ꦕꦠꦶ ‘‘ꦤꦺꦩꦶꦠ꧀ꦠꦶꦏꦠꦴ’’.
(꧔꧗) ꦤꦶꦥ꧀ꦥꦺꦱꦶꦏꦠꦴ
꧘꧖꧔. ꦠꦠ꧀ꦡ ꦏꦠꦩꦴ ꦤꦶꦥ꧀ꦥꦺꦱꦶꦏꦠꦴ? ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦱꦤ꧀ꦤꦶꦱ꧀ꦱꦶꦠꦱ꧀ꦱ ꦥꦴꦥꦶꦕ꧀ꦖꦱ꧀ꦱ ꦆꦕ꧀ꦖꦴꦥꦏꦠꦱ꧀ꦱ ꦪꦴ ꦥꦫꦺꦱꦁ ꦄꦏ꧀ꦏꦺꦴꦱꦤꦴ ꦮꦩ꧀ꦨꦤꦴ ꦒꦫꦲꦟꦴ ꦈꦏ꧀ꦑꦺꦥꦤꦴ ꦱꦩꦸꦏ꧀ꦑꦺꦥꦤꦴ ꦑꦶꦥꦤꦴ ꦱꦔ꧀ꦑꦶꦥꦤꦴ ꦥꦴꦥꦤꦴ ꦱꦩ꧀ꦥꦴꦥꦤꦴ ꦄꦮꦟ꧀ꦟꦲꦴꦫꦶꦏꦴ ꦥꦫꦥꦶꦛ꧀ꦜꦶꦩꦁꦱꦶꦏꦠꦴ – ꦄꦪꦁ ꦮꦸꦕ꧀ꦕꦠꦶ ‘‘ꦤꦶꦥ꧀ꦥꦺꦱꦶꦏꦠꦴ’’.
(꧔꧘) ꦭꦴꦨꦺꦤ ꦭꦴꦨꦁ ꦤꦶꦗꦶꦒꦷꦱꦤꦠꦴ
꧘꧖꧕. ꦠꦠ꧀ꦡ ꦏꦠꦩꦴ ꦭꦴꦨꦺꦤ ꦭꦴꦨꦁ ꦤꦶꦗꦶꦒꦷꦱꦤꦠꦴ? ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦱꦤ꧀ꦤꦶꦱ꧀ꦱꦶꦠꦺꦴ ꦥꦴꦥꦶꦕ꧀ꦖꦺꦴ ꦆꦕ꧀ꦖꦴꦥꦏꦠꦺꦴ ꦆꦠꦺꦴ ꦭꦢ꧀ꦣꦁ ꦄꦴꦩꦶꦱꦁ ꦄꦩꦸꦠ꧀ꦫ ꦲꦫꦠꦶ ꦄꦩꦸꦠ꧀ꦫ ꦮꦴ ꦭꦢ꧀ꦣꦁ ꦄꦴꦩꦶꦱꦁ ꦆꦣ ꦄꦴꦲꦫꦠꦶ, ꦪꦴ ꦌꦮꦫꦹꦥꦴ ꦄꦴꦩꦶꦱꦱ꧀ꦱ ꦌꦛ꧀ꦜꦶ ꦒꦮꦺꦛ꧀ꦜꦶ ꦥꦫꦶꦪꦺꦛ꧀ꦜꦶ ꦌꦱꦤꦴ ꦒꦮꦺꦱꦤꦴ ꦥꦫꦶꦪꦺꦱꦤꦴ – ꦄꦪꦁ ꦮꦸꦕ꧀ꦕꦠꦶ ‘‘ꦭꦴꦨꦺꦤ ꦭꦴꦨꦁ ꦤꦶꦗꦶꦒꦷꦱꦤꦠꦴ’’.
(꧔꧙) ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧖꧖. ꦠꦠ꧀ꦡ ꦏꦠꦩꦺꦴ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦮꦴ ꦣꦤꦺꦤ ꦮꦴ ꦄꦗ꧀ꦙꦺꦤꦺꦤ ꦮꦴ ꦏꦩ꧀ꦩꦴꦪꦠꦤꦺꦤ ꦮꦴ ꦱꦶꦥ꧀ꦥꦴꦪꦠꦤꦺꦤ ꦮꦴ ꦮꦶꦗ꧀ꦗꦴꦛ꧀ꦜꦴꦤꦺꦤ [ꦮꦶꦗ꧀ꦗꦛ꧀ꦜꦴꦤꦺꦤ (ꦱ꧀ꦪꦴ.)] ꦮꦴ ꦱꦸꦠꦺꦤ ꦮꦴ ꦥꦛꦶꦨꦴꦤꦺꦤ ꦮꦴ ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦩꦴꦤꦁ ꦗꦥ꧀ꦥꦺꦠꦶ, ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧐) ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧖꧗. ꦠꦠ꧀ꦡ ꦏꦠꦩꦺꦴ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦮꦴ ꦣꦤꦺꦤ ꦮꦴ ꦄꦗ꧀ꦙꦺꦤꦺꦤ ꦮꦴ ꦏꦩ꧀ꦩꦴꦪꦠꦤꦺꦤ ꦮꦴ ꦱꦶꦥ꧀ꦥꦴꦪꦠꦤꦺꦤ ꦮꦴ ꦮꦶꦗ꧀ꦗꦴꦛ꧀ꦜꦴꦤꦺꦤ ꦮꦴ ꦱꦸꦠꦺꦤ ꦮꦴ ꦥꦛꦶꦨꦴꦤꦺꦤ ꦮꦴ ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦩꦴꦤꦁ ꦗꦥ꧀ꦥꦺꦠꦶ, ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧑) ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧖꧘. ꦠꦠ꧀ꦡ ꦏꦠꦩꦺꦴ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦮꦴ ꦣꦤꦺꦤ ꦮꦴ ꦄꦗ꧀ꦙꦺꦤꦺꦤ ꦮꦴ ꦏꦩ꧀ꦩꦴꦪꦠꦤꦺꦤ ꦮꦴ ꦱꦶꦥ꧀ꦥꦴꦪꦠꦤꦺꦤ ꦮꦴ ꦮꦶꦗ꧀ꦗꦴꦛ꧀ꦜꦴꦤꦺꦤ ꦮꦴ ꦱꦸꦠꦺꦤ ꦮꦴ ꦥꦛꦶꦨꦴꦤꦺꦤ ꦮꦴ ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦎꦩꦴꦤꦁ ꦗꦥ꧀ꦥꦺꦠꦶ, ꦪꦺꦴ ꦌꦮꦫꦹꦥꦺꦴ ꦎꦩꦴꦤꦺꦴ ꦎꦩꦚ꧀ꦚꦤꦴ ꦎꦩꦚ꧀ꦚꦶꦠꦠ꧀ꦠꦁ ꦲꦷꦭ꦳ꦤꦴ ꦎꦲꦷꦭ꦳ꦤꦴ ꦎꦲꦷꦭ꦳ꦶꦠꦠ꧀ꦠꦁ ꦄꦠ꧀ꦠꦸꦚ꧀ꦚꦴ ꦄꦠ꧀ꦠꦮꦚ꧀ꦚꦴ ꦄꦠ꧀ꦠꦥꦫꦶꦨꦮꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧒) ꦱꦺꦪ꧀ꦪꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧖꧙. ꦠꦠ꧀ꦡ ꦏꦠꦩꦺꦴ ꦱꦺꦪ꧀ꦪꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦱꦺꦪ꧀ꦪꦺꦴ ꦲꦺꦴꦠꦶ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦮꦴ ꦣꦤꦺꦤ ꦮꦴ ꦄꦗ꧀ꦙꦺꦤꦺꦤ ꦮꦴ ꦏꦩ꧀ꦩꦴꦪꦠꦤꦺꦤ ꦮꦴ ꦱꦶꦥ꧀ꦥꦴꦪꦠꦤꦺꦤ ꦮꦴ ꦮꦶꦗ꧀ꦗꦴꦛ꧀ꦜꦴꦤꦺꦤ ꦮꦴ ꦱꦸꦠꦺꦤ ꦮꦴ ꦥꦛꦶꦨꦴꦤꦺꦤ ꦮꦴ ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦱꦺꦪ꧀ꦪꦁ ꦄꦠ꧀ꦠꦴꦤꦁ ꦢꦲꦠꦶ; ꦱꦺꦴ ꦠꦁ ꦤꦶꦱ꧀ꦱꦴꦪ ꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦱꦺꦪ꧀ꦪꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧓) ꦱꦺꦪ꧀ꦪꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧗꧐. ꦠꦠ꧀ꦡ ꦏꦠꦩꦺꦴ ꦱꦺꦪ꧀ꦪꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦱꦺꦪ꧀ꦪꦺꦴ ꦲꦺꦴꦠꦶ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦮꦴ ꦣꦤꦺꦤ ꦮꦴ ꦄꦗ꧀ꦙꦺꦤꦺꦤ ꦮꦴ ꦏꦩ꧀ꦩꦴꦪꦠꦤꦺꦤ ꦮꦴ ꦱꦶꦥ꧀ꦥꦴꦪꦠꦤꦺꦤ ꦮꦴ ꦮꦶꦗ꧀ꦗꦴꦛ꧀ꦜꦴꦤꦺꦤ ꦮꦴ ꦱꦸꦠꦺꦤ ꦮꦴ ꦥꦛꦶꦨꦴꦤꦺꦤ ꦮꦴ ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦱꦢꦶꦱꦁ ꦄꦠ꧀ꦠꦴꦤꦁ ꦢꦲꦠꦶ; ꦱꦺꦴ ꦠꦁ ꦤꦶꦱ꧀ꦱꦴꦪ ꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦱꦺꦪ꧀ꦪꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧔) ꦱꦺꦪ꧀ꦪꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧗꧑. ꦠꦠ꧀ꦡ ꦏꦠꦩꦺꦴ ꦱꦺꦪ꧀ꦪꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦱꦺꦪ꧀ꦪꦺꦴ ꦲꦺꦴꦠꦶ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦮꦴ ꦣꦤꦺꦤ ꦮꦴ ꦄꦗ꧀ꦙꦺꦤꦺꦤ ꦮꦴ ꦏꦩ꧀ꦩꦴꦪꦠꦤꦺꦤ ꦮꦴ ꦱꦶꦥ꧀ꦥꦴꦪꦠꦤꦺꦤ ꦮꦴ ꦮꦶꦗ꧀ꦗꦴꦛ꧀ꦜꦴꦤꦺꦤ ꦮꦴ ꦱꦸꦠꦺꦤ ꦮꦴ ꦥꦛꦶꦨꦴꦤꦺꦤ ꦮꦴ ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦲꦷꦤꦁ ꦄꦠ꧀ꦠꦴꦤꦁ ꦢꦲꦠꦶ; ꦱꦺꦴ ꦠꦁ ꦤꦶꦱ꧀ꦱꦴꦪ ꦎꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦎꦩꦴꦤꦺꦴ ꦎꦩꦚ꧀ꦚꦤꦴ ꦎꦩꦚ꧀ꦚꦶꦠꦠ꧀ꦠꦁ ꦲꦷꦭ꦳ꦤꦴ ꦎꦲꦷꦭ꦳ꦤꦴ ꦎꦲꦷꦭ꦳ꦶꦠꦠ꧀ꦠꦁ ꦄꦠ꧀ꦠꦸꦚ꧀ꦚꦴ ꦄꦠ꧀ꦠꦮꦚ꧀ꦚꦴ ꦄꦠ꧀ꦠꦥꦫꦶꦨꦮꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦱꦺꦪ꧀ꦪꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧕) ꦱꦢꦶꦱꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧗꧒. ꦠꦠ꧀ꦡ ꦏꦠꦩꦺꦴ ꦱꦢꦶꦱꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦱꦢꦶꦱꦺꦴ ꦲꦺꦴꦠꦶ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ…ꦥꦺ… ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦱꦺꦪ꧀ꦪꦁ ꦄꦠ꧀ꦠꦴꦤꦁ ꦢꦲꦠꦶ; ꦱꦺꦴ ꦠꦁ ꦤꦶꦱ꧀ꦱꦴꦪ ꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ…ꦥꦺ… ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦱꦢꦶꦱꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧖) ꦱꦢꦶꦱꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧗꧓. ꦠꦠ꧀ꦡ ꦏꦠꦩꦺꦴ ꦱꦢꦶꦱꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦱꦢꦶꦱꦺꦴ ꦲꦺꦴꦠꦶ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ…ꦥꦺ… ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦱꦢꦶꦱꦁ ꦄꦠ꧀ꦠꦴꦤꦁ ꦢꦲꦠꦶ; ꦱꦺꦴ ꦠꦁ ꦤꦶꦱ꧀ꦱꦴꦪ ꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦱꦢꦶꦱꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧗) ꦱꦢꦶꦱꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧗꧔. ꦠꦠ꧀ꦡ ꦏꦠꦩꦺꦴ ꦱꦢꦶꦱꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦱꦢꦶꦱꦺꦴ ꦲꦺꦴꦠꦶ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ…ꦥꦺ… ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦲꦷꦤꦁ ꦄꦠ꧀ꦠꦴꦤꦁ ꦢꦲꦠꦶ; ꦱꦺꦴ ꦠꦁ ꦤꦶꦱ꧀ꦱꦴꦪ ꦎꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦎꦩꦴꦤꦺꦴ ꦎꦩꦚ꧀ꦚꦤꦴ ꦎꦩꦚ꧀ꦚꦶꦠꦠ꧀ꦠꦁ ꦲꦷꦭ꦳ꦤꦴ ꦎꦲꦷꦭ꦳ꦤꦴ ꦎꦲꦷꦭ꦳ꦶꦠꦠ꧀ꦠꦁ ꦄꦠ꧀ꦠꦸꦚ꧀ꦚꦴ ꦄꦠ꧀ꦠꦮꦚ꧀ꦚꦴ ꦄꦠ꧀ꦠꦥꦫꦶꦨꦮꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦱꦢꦶꦱꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧘) ꦲꦷꦤꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧗꧕. ꦠꦠ꧀ꦡ ꦏꦠꦩꦺꦴ ꦲꦷꦤꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦲꦷꦤꦺꦴ ꦲꦺꦴꦠꦶ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ…ꦥꦺ… ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦱꦺꦪ꧀ꦪꦁ ꦄꦠ꧀ꦠꦴꦤꦁ ꦢꦲꦠꦶ; ꦱꦺꦴ ꦠꦁ ꦤꦶꦱ꧀ꦱꦴꦪ ꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦲꦷꦤꦱ꧀ꦱ ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧕꧙) ꦲꦷꦤꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧗꧖. ꦠꦠ꧀ꦡ ꦏꦠꦩꦺꦴ ꦲꦷꦤꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦲꦷꦤꦺꦴ ꦲꦺꦴꦠꦶ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ…ꦥꦺ… ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦱꦢꦶꦱꦁ ꦄꦠ꧀ꦠꦴꦤꦁ ꦢꦲꦠꦶ; ꦱꦺꦴ ꦠꦁ ꦤꦶꦱ꧀ꦱꦴꦪ ꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦲꦷꦤꦱ꧀ꦱ ꦱꦢꦶꦱꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧖꧐) ꦲꦷꦤꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ
꧘꧗꧗. ꦠꦠ꧀ꦡ ꦏꦠꦩꦺꦴ ꦲꦷꦤꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦲꦷꦤꦺꦴ ꦲꦺꦴꦠꦶ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ…ꦥꦺ… ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦱꦢꦶꦱꦁ ꦄꦠ꧀ꦠꦴꦤꦁ ꦢꦲꦠꦶ; ꦱꦺꦴ ꦠꦁ ꦤꦶꦱ꧀ꦱꦴꦪ ꦎꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦎꦩꦴꦤꦺꦴ ꦎꦩꦚ꧀ꦚꦤꦴ ꦎꦩꦚ꧀ꦚꦶꦠꦠ꧀ꦠꦁ ꦲꦷꦭ꦳ꦤꦴ ꦎꦲꦷꦭ꦳ꦤꦴ ꦎꦲꦷꦭ꦳ꦶꦠꦠ꧀ꦠꦁ ꦄꦠ꧀ꦠꦸꦚ꧀ꦚꦴ ꦄꦠ꧀ꦠꦮꦚ꧀ꦚꦴ ꦄꦠ꧀ꦠꦥꦫꦶꦨꦮꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦲꦷꦤꦱ꧀ꦱ ꦲꦷꦤꦺꦴꦲꦩꦱ꧀ꦩꦷꦠꦶ ꦩꦴꦤꦺꦴ’’.
(꧖꧑) ꦩꦴꦤꦺꦴ
꧘꧗꧘. ꦠꦠ꧀ꦡ ꦏꦠꦩꦺꦴ ꦩꦴꦤꦺꦴ? ꦪꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦩꦴꦤꦺꦴ’’.
(꧖꧒) ꦄꦠꦶꦩꦴꦤꦺꦴ
꧘꧗꧙. ꦠꦠ꧀ꦡ ꦏꦠꦩꦺꦴ ꦄꦠꦶꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ…ꦥꦺ… ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦫꦺꦲꦶ ꦄꦠ꧀ꦠꦴꦤꦁ ꦄꦠꦶꦩꦚ꧀ꦚꦠꦶ. ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦄꦠꦶꦩꦴꦤꦺꦴ’’.
(꧖꧓) ꦩꦴꦤꦴꦠꦶꦩꦴꦤꦺꦴ
꧘꧘꧐. ꦠꦠ꧀ꦡ ꦏꦠꦩꦺꦴ ꦩꦴꦤꦴꦠꦶꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ…ꦥꦺ… ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦥꦸꦧ꧀ꦧꦏꦴꦭꦁ ꦥꦫꦺꦲꦶ ꦱꦢꦶꦱꦁ ꦄꦠ꧀ꦠꦴꦤꦁ ꦢꦲꦠꦶ, ꦄꦥꦫꦏꦴꦭꦁ ꦄꦠ꧀ꦠꦴꦤꦁ ꦱꦺꦪ꧀ꦪꦁ ꦢꦲꦠꦶ. ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦩꦴꦤꦴꦠꦶꦩꦴꦤꦺꦴ’’.
(꧖꧔) ꦎꦩꦴꦤꦺꦴ
꧘꧘꧑. ꦠꦠ꧀ꦡ ꦏꦠꦩꦺꦴ ꦎꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦮꦴ ꦣꦤꦺꦤ ꦮꦴ ꦄꦗ꧀ꦙꦺꦤꦺꦤ ꦮꦴ ꦏꦩ꧀ꦩꦴꦪꦠꦤꦺꦤ ꦮꦴ ꦱꦶꦥ꧀ꦥꦴꦪꦠꦤꦺꦤ ꦮꦴ ꦮꦶꦗ꧀ꦗꦴꦛ꧀ꦜꦴꦤꦺꦤ ꦮꦴ ꦱꦸꦠꦺꦤ ꦮꦴ ꦥꦛꦶꦨꦴꦤꦺꦤ ꦮꦴ ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦎꦩꦴꦤꦁ ꦗꦥ꧀ꦥꦺꦠꦶ. ꦪꦺꦴ ꦌꦮꦫꦹꦥꦺꦴ ꦎꦩꦴꦤꦺꦴ ꦎꦩꦚ꧀ꦚꦤꦴ ꦎꦩꦚ꧀ꦚꦶꦠꦠ꧀ꦠꦁ ꦲꦷꦭ꦳ꦤꦴ ꦎꦲꦷꦭ꦳ꦤꦴ ꦎꦲꦷꦭ꦳ꦶꦠꦠ꧀ꦠꦁ ꦄꦠ꧀ꦠꦸꦚ꧀ꦚꦴ ꦄꦠ꧀ꦠꦮꦚ꧀ꦚꦴ ꦄꦠ꧀ꦠꦥꦫꦶꦨꦮꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦎꦩꦴꦤꦺꦴ’’.
(꧖꧕) ꦄꦣꦶꦩꦴꦤꦺꦴ
꧘꧘꧒. ꦠꦠ꧀ꦡ ꦏꦠꦩꦺꦴ ꦄꦣꦶꦩꦴꦤꦺꦴ? ꦄꦥ꧀ꦥꦠ꧀ꦠꦺ ꦥꦠ꧀ꦠꦱꦚ꧀ꦚꦶꦠꦴ, ꦄꦏꦠꦺ ꦏꦠꦱꦚ꧀ꦚꦶꦠꦴ, ꦄꦤꦣꦶꦒꦠꦺ ꦄꦣꦶꦒꦠꦱꦚ꧀ꦚꦶꦠꦴ, ꦄꦱꦕ꧀ꦖꦶꦏꦠꦺ ꦱꦕ꧀ꦖꦶꦏꦠꦱꦚ꧀ꦚꦶꦠꦴ, ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦄꦣꦶꦩꦴꦤꦺꦴ’’.
(꧖꧖) ꦄꦱ꧀ꦩꦶꦩꦴꦤꦺꦴ
꧘꧘꧓. ꦠꦠ꧀ꦡ ꦏꦠꦩꦺꦴ ꦄꦱ꧀ꦩꦶꦩꦴꦤꦺꦴ? ꦫꦹꦥꦁ ꦄꦱ꧀ꦩꦷꦠꦶ ꦩꦴꦤꦺꦴ, ꦄꦱ꧀ꦩꦷꦠꦶ ꦖꦤ꧀ꦢꦺꦴ, ꦄꦱ꧀ꦩꦷꦠꦶ ꦄꦤꦸꦱꦪꦺꦴ, ꦮꦺꦢꦤꦴ…ꦥꦺ… ꦱꦚ꧀ꦚꦴ…ꦥꦺ… ꦱꦔ꧀ꦑꦴꦫꦴ…ꦥꦺ… ꦮꦶꦚ꧀ꦚꦴꦟꦁ ꦄꦱ꧀ꦩꦷꦠꦶ ꦩꦴꦤꦺꦴ, ꦄꦱ꧀ꦩꦷꦠꦶ ꦖꦤ꧀ꦢꦺꦴ, ꦄꦱ꧀ꦩꦷꦠꦶ ꦄꦤꦸꦱꦪꦺꦴ, ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦄꦱ꧀ꦩꦶꦩꦴꦤꦺꦴ’’.
(꧖꧗) ꦩꦶꦕ꧀ꦖꦴꦩꦴꦤꦺꦴ
꧘꧘꧔. ꦠꦠ꧀ꦡ ꦏꦠꦩꦺꦴ ꦩꦶꦕ꧀ꦖꦴꦩꦴꦤꦺꦴ? ꦆꦣꦺꦏꦕ꧀ꦕꦺꦴ ꦥꦴꦥꦏꦺꦤ ꦮꦴ ꦏꦩ꧀ꦩꦴꦪꦠꦤꦺꦤ ꦥꦴꦥꦏꦺꦤ ꦮꦴ ꦱꦶꦥ꧀ꦥꦴꦪꦠꦤꦺꦤ ꦥꦴꦥꦏꦺꦤ ꦮꦴ ꦮꦶꦗ꧀ꦗꦴꦛ꧀ꦜꦴꦤꦺꦤ ꦥꦴꦥꦏꦺꦤ ꦮꦴ ꦱꦸꦠꦺꦤ ꦥꦴꦥꦏꦺꦤ ꦮꦴ ꦥꦛꦶꦨꦴꦤꦺꦤ ꦥꦴꦥꦏꦺꦤ ꦮꦴ ꦱꦷꦭꦺꦤ ꦥꦴꦥꦏꦺꦤ ꦮꦴ ꦮꦠꦺꦤ ꦥꦴꦥꦏꦺꦤ ꦮꦴ ꦱꦷꦭꦧ꧀ꦧꦠꦺꦤ ꦥꦴꦥꦶꦏꦴꦪ ꦮꦴ ꦢꦶꦛ꧀ꦜꦶꦪꦴ ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦩꦴꦤꦁ ꦗꦥ꧀ꦥꦺꦠꦶ, ꦪꦺꦴ ꦌꦮꦫꦹꦥꦺꦴ ꦩꦴꦤꦺꦴ ꦩꦚ꧀ꦚꦤꦴ ꦩꦚ꧀ꦚꦶꦠꦠ꧀ꦠꦁ ꦈꦤ꧀ꦤꦠꦶ ꦈꦤ꧀ꦤꦴꦩꦺꦴ ꦣꦗꦺꦴ ꦱꦩ꧀ꦥꦒ꧀ꦒꦴꦲꦺꦴ ꦏꦺꦠꦸꦏꦩ꧀ꦪꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦩꦶꦕ꧀ꦖꦴꦩꦴꦤꦺꦴ’’.
(꧖꧘) ꦚꦴꦠꦶꦮꦶꦠꦏ꧀ꦏꦺꦴ
꧘꧘꧕. ꦠꦠ꧀ꦡ ꦏꦠꦩꦺꦴ ꦚꦴꦠꦶꦮꦶꦠꦏ꧀ꦏꦺꦴ? ꦚꦴꦠꦏꦺ ꦄꦴꦫꦧ꧀ꦨ ꦒꦺꦲꦱꦶꦠꦺꦴ ꦠꦏ꧀ꦏꦺꦴ ꦮꦶꦠꦏ꧀ꦏꦺꦴ ꦩꦶꦕ꧀ꦖꦴꦱꦔ꧀ꦏꦥ꧀ꦥꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦚꦴꦠꦶꦮꦶꦠꦏ꧀ꦏꦺꦴ’’.
(꧖꧙) ꦗꦤꦥꦢꦮꦶꦠꦏ꧀ꦏꦺꦴ
꧘꧘꧖. ꦠꦠ꧀ꦡ ꦏꦠꦩꦺꦴ ꦗꦤꦥꦢꦮꦶꦠꦏ꧀ꦏꦺꦴ? ꦗꦤꦥꦢꦁ ꦄꦴꦫꦧ꧀ꦨ ꦒꦺꦲꦱꦶꦠꦺꦴ ꦠꦏ꧀ꦏꦺꦴ ꦮꦶꦠꦏ꧀ꦏꦺꦴ ꦩꦶꦕ꧀ꦖꦴꦱꦔ꧀ꦏꦥ꧀ꦥꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦗꦤꦥꦢꦮꦶꦠꦏ꧀ꦏꦺꦴ’’.
(꧗꧐) ꦄꦩꦫꦮꦶꦠꦏ꧀ꦏꦺꦴ
꧘꧘꧗. ꦠꦠ꧀ꦡ ꦏꦠꦩꦺꦴ ꦄꦩꦫꦮꦶꦠꦏ꧀ꦏꦺꦴ? ꦢꦸꦏ꧀ꦏꦫꦏꦴꦫꦶꦠꦴꦥꦛꦶꦱꦁꦪꦸꦠ꧀ꦠꦺꦴ ꦮꦴ ꦢꦶꦛ꧀ꦜꦶꦒꦠꦥꦛꦶꦱꦁꦪꦸꦠ꧀ꦠꦺꦴ ꦮꦴ ꦒꦺꦲꦱꦶꦠꦺꦴ ꦠꦏ꧀ꦏꦺꦴ ꦮꦶꦠꦏ꧀ꦏꦺꦴ ꦩꦶꦕ꧀ꦖꦴꦱꦔ꧀ꦏꦥ꧀ꦥꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦄꦩꦫꦮꦶꦠꦏ꧀ꦏꦺꦴ’’.
(꧗꧑) ꦥꦫꦴꦤꦸꦢ꧀ꦢꦪꦠꦴꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ
꧘꧘꧘. ꦠꦠ꧀ꦡ ꦏꦠꦩꦺꦴ ꦥꦫꦴꦤꦸꦢ꧀ꦢꦪꦠꦴꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ? ꦆꦣꦺꦏꦕ꧀ꦕꦺꦴ ꦒꦶꦲꦷꦲꦶ ꦱꦁꦱꦛ꧀ꦜꦺꦴ ꦮꦶꦲꦫꦠꦶ ꦱꦲꦤꦤ꧀ꦢꦷ ꦱꦲꦱꦺꦴꦏꦷ, ꦱꦸꦑꦶꦠꦺꦱꦸ ꦱꦸꦑꦶꦠꦺꦴ, ꦢꦸꦏ꧀ꦑꦶꦠꦺꦱꦸ ꦢꦸꦏ꧀ꦑꦶꦠꦺꦴ, ꦈꦥ꧀ꦥꦤ꧀ꦤꦺꦱꦸ ꦏꦶꦕ꧀ꦕꦏꦫꦟꦷꦪꦺꦱꦸ ꦄꦠ꧀ꦠꦤꦴ ꦮꦴ ꦪꦺꦴꦒꦁ ꦄꦴꦥꦗ꧀ꦗꦠꦶ. ꦪꦺꦴ ꦠꦠ꧀ꦡ ꦒꦺꦲꦱꦶꦠꦺꦴ ꦠꦏ꧀ꦏꦺꦴ ꦮꦶꦠꦏ꧀ꦏꦺꦴ ꦩꦶꦕ꧀ꦖꦴꦱꦔ꧀ꦏꦥ꧀ꦥꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦥꦫꦴꦤꦸꦢ꧀ꦢꦪꦠꦴꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ’’.
(꧗꧒) ꦭꦴꦨꦴꦢꦶꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ
꧘꧘꧙. ꦠꦠ꧀ꦡ ꦏꦠꦩꦺꦴ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ? ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦁ ꦄꦴꦫꦧ꧀ꦨ ꦒꦺꦲꦱꦶꦠꦺꦴ ꦠꦏ꧀ꦏꦺꦴ ꦮꦶꦠꦏ꧀ꦏꦺꦴ ꦩꦶꦕ꧀ꦖꦴꦱꦔ꧀ꦏꦥ꧀ꦥꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ’’.
(꧗꧓) ꦄꦤꦮꦚ꧀ꦚꦠ꧀ꦠꦶꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ
꧘꧙꧐. ꦠꦠ꧀ꦡ ꦏꦠꦩꦺꦴ ꦄꦤꦮꦚ꧀ꦚꦠ꧀ꦠꦶꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ? ꦆꦣꦺꦏꦕ꧀ꦕꦺꦴ ꦗꦴꦠꦶꦪꦴ ꦮꦴ ꦒꦺꦴꦠ꧀ꦠꦺꦤ ꦮꦴ ꦏꦺꦴꦭꦥꦸꦠ꧀ꦠꦶꦪꦺꦤ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦮꦴ ꦣꦤꦺꦤ ꦮꦴ ꦄꦗ꧀ꦙꦺꦤꦺꦤ ꦮꦴ ꦏꦩ꧀ꦩꦴꦪꦠꦤꦺꦤ ꦮꦴ ꦱꦶꦥ꧀ꦥꦴꦪꦠꦤꦺꦤ ꦮꦴ ꦮꦶꦗ꧀ꦗꦴꦛ꧀ꦜꦴꦤꦺꦤ ꦮꦴ ꦱꦸꦠꦺꦤ ꦮꦴ ꦥꦛꦶꦨꦴꦤꦺꦤ ꦮꦴ ꦄꦚ꧀ꦚꦠꦫꦚ꧀ꦚꦠꦫꦺꦤ ꦮꦠ꧀ꦡꦸꦤꦴ ꦩꦴ ꦩꦁ ꦥꦫꦺ ꦄꦮꦗꦴꦤꦶꦁꦱꦹꦠꦶ. ꦪꦺꦴ ꦠꦠ꧀ꦡ ꦒꦺꦲꦱꦶꦠꦺꦴ ꦠꦏ꧀ꦏꦺꦴ ꦮꦶꦠꦏ꧀ꦏꦺꦴ ꦩꦶꦕ꧀ꦖꦴꦱꦔ꧀ꦏꦥ꧀ꦥꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦄꦤꦮꦚ꧀ꦚꦠ꧀ꦠꦶꦥꦛꦶꦱꦁꦪꦸꦠ꧀ꦠꦺꦴ ꦮꦶꦠꦏ꧀ꦏꦺꦴ’’.
ꦌꦏꦏꦁ.
꧒. ꦢꦸꦏꦤꦶꦢ꧀ꦢꦺꦱꦺꦴ
(꧑) ꦏꦺꦴꦣꦺꦴ ꦕ ꦈꦥꦤꦴꦲꦺꦴ ꦕ
꧘꧙꧑. (ꦏ) ꦠꦠ꧀ꦡ ꦏꦠꦩꦺꦴ ꦏꦺꦴꦣꦺꦴ? ꦪꦺꦴ ꦏꦺꦴꦣꦺꦴ ꦏꦸꦗ꧀ꦙꦤꦴ ꦏꦸꦗ꧀ꦙꦶꦠꦠ꧀ꦠꦁ ꦢꦺꦴꦱꦺꦴ ꦢꦸꦱ꧀ꦱꦤꦴ ꦢꦸꦱ꧀ꦱꦶꦠꦠ꧀ꦠꦁ ꦧ꧀ꦪꦴꦥꦠ꧀ꦠꦶ ꦧ꧀ꦪꦴꦥꦗ꧀ꦗꦤꦴ ꦧ꧀ꦪꦴꦥꦗ꧀ꦗꦶꦠꦠ꧀ꦠꦁ ꦮꦶꦫꦺꦴꦣꦺꦴ ꦥꦛꦶꦮꦶꦫꦺꦴꦣꦺꦴ ꦕꦟ꧀ꦝꦶꦏ꧀ꦏꦁ ꦄꦱꦸꦫꦺꦴꦥꦺꦴ ꦄꦤꦠ꧀ꦠꦩꦤꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦏꦺꦴꦣꦺꦴ’’.
(ꦑ) ꦠꦠ꧀ꦡ ꦏꦠꦩꦺꦴ ꦈꦥꦤꦴꦲꦺꦴ? ꦥꦸꦧ꧀ꦧꦏꦴꦭꦁ ꦏꦺꦴꦣꦺꦴ, ꦄꦥꦫꦏꦴꦭꦁ ꦈꦥꦤꦴꦲꦺꦴ. ꦪꦺꦴ ꦌꦮꦫꦹꦥꦺꦴ ꦈꦥꦤꦴꦲꦺꦴ ꦈꦥꦤꦪ꧀ꦲꦤꦴ ꦈꦥꦤꦪ꧀ꦲꦶꦠꦠ꧀ꦠꦁ ꦄꦛ꧀ꦜꦥꦤꦴ ꦜꦥꦤꦴ ꦱꦟ꧀ꦜꦥꦤꦴ ꦄꦤꦸꦱꦁꦱꦤ꧀ꦢꦤꦴ ꦄꦤꦸꦥ꧀ꦥꦧꦤ꧀ꦣꦤꦴ ꦢꦭ꦳꧀ꦲꦷꦏꦩ꧀ꦩꦁ ꦏꦺꦴꦣꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ‘‘ꦈꦥꦤꦴꦲꦺꦴ’’.
(꧒) ꦩꦏ꧀ꦑꦺꦴ ꦕ ꦥꦭ꦳ꦴꦱꦺꦴ ꦕ
꧘꧙꧒. (ꦏ) ꦠꦠ꧀ꦡ ꦏꦠꦩꦺꦴ ꦩꦏ꧀ꦑꦺꦴ? ꦪꦺꦴ ꦩꦏ꧀ꦑꦺꦴ ꦩꦏ꧀ꦑꦴꦪꦤꦴ ꦩꦏ꧀ꦑꦴꦪꦶꦠꦠ꧀ꦠꦁ [ꦩꦏ꧀ꦑꦶꦪꦤꦴ ꦩꦏ꧀ꦑꦶꦪꦶꦠꦠ꧀ꦠꦁ (ꦱꦷ. ꦏ.)] ꦤꦶꦛ꧀ꦜꦸꦫꦶꦪꦁ ꦤꦶꦛ꧀ꦜꦸꦫꦶꦪꦏꦩ꧀ꦩꦁ – ꦄꦪꦁ ꦮꦸꦕ꧀ꦕꦠꦶ ‘‘ꦩꦏ꧀ꦑꦺꦴ’’.
(ꦑ) ꦠꦠ꧀ꦡ ꦏꦠꦩꦺꦴ ꦥꦭ꦳ꦴꦱꦺꦴ? ꦪꦺꦴ ꦥꦭ꦳ꦴꦱꦺꦴ ꦥꦭ꦳ꦴꦱꦴꦪꦤꦴ [ꦥꦭꦴꦱꦴꦪꦤꦴ ꦥꦭꦴꦱꦴꦪꦶꦠꦠ꧀ꦠꦁ (ꦱ꧀ꦪꦴ.)] ꦥꦭ꦳ꦴꦱꦴꦲꦴꦫꦺꦴ ꦮꦶꦮꦴꦢꦛ꧀ꦜꦴꦤꦁ ꦪꦸꦒꦒ꧀ꦒꦴꦲꦺꦴ ꦄꦥ꧀ꦥꦛꦶꦤꦶꦱ꧀ꦱꦒ꧀ꦒꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦥꦭ꦳ꦴꦱꦺꦴ’’.
(꧓) ꦆꦱ꧀ꦱꦴ ꦕ ꦩꦕ꧀ꦖꦫꦶꦪꦚ꧀ꦕ
꧘꧙꧓. (ꦏ) ꦠꦠ꧀ꦡ ꦏꦠꦩꦴ ꦆꦱ꧀ꦱꦴ? ꦪꦴ ꦥꦫꦭꦴꦨꦱꦏ꧀ꦏꦴꦫꦒꦫꦸꦏꦴꦫꦩꦴꦤꦤꦮꦤ꧀ꦢꦤꦥꦹꦗꦤꦴꦱꦸ ꦆꦱ꧀ꦱꦴ ꦆꦱ꧀ꦱꦴꦪꦤꦴ ꦆꦱ꧀ꦱꦴꦪꦶꦠꦠ꧀ꦠꦁ ꦈꦱꦹꦪꦴ ꦈꦱꦹꦪꦤꦴ ꦈꦱꦹꦪꦶꦠꦠ꧀ꦠꦁ – ꦄꦪꦁ ꦮꦸꦕ꧀ꦕꦠꦶ ‘‘ꦆꦱ꧀ꦱꦴ’’.
(ꦑ) ꦠꦠ꧀ꦡ ꦏꦠꦩꦁ ꦩꦕ꧀ꦖꦫꦶꦪꦁ? ꦥꦚ꧀ꦕ ꦩꦕ꧀ꦖꦫꦶꦪꦴꦤꦶ – ꦄꦴꦮꦴꦱꦩꦕ꧀ꦖꦫꦶꦪꦁ, ꦏꦸꦭꦩꦕ꧀ꦖꦫꦶꦪꦁ, ꦭꦴꦨꦩꦕ꧀ꦖꦫꦶꦪꦁ, ꦮꦟ꧀ꦟꦩꦕ꧀ꦖꦫꦶꦪꦁ, ꦣꦩ꧀ꦩꦩꦕ꧀ꦖꦫꦶꦪꦁ. ꦪꦁ ꦌꦮꦫꦹꦥꦁ ꦩꦕ꧀ꦖꦺꦫꦁ ꦩꦕ꧀ꦖꦫꦴꦪꦤꦴ ꦩꦕ꧀ꦖꦫꦴꦪꦶꦠꦠ꧀ꦠꦁ ꦮꦺꦮꦶꦕ꧀ꦖꦁ ꦏꦢꦫꦶꦪꦁ ꦏꦛꦸꦏꦚ꧀ꦕꦸꦏꦠꦴ ꦄꦒ꧀ꦒꦲꦶꦠꦠ꧀ꦠꦁ [ꦥꦒ꧀ꦒꦲꦶꦠꦠ꧀ꦠꦁ (ꦱꦷ. ꦏ.) ꦣ. ꦱ. ꧑꧑꧒꧗] ꦕꦶꦠ꧀ꦠꦱ꧀ꦱ – ꦆꦢꦁ ꦮꦸꦕ꧀ꦕꦠꦶ ‘‘ꦩꦕ꧀ꦖꦫꦶꦪꦁ’’.
(꧔) ꦩꦴꦪꦴ ꦕ ꦱꦴꦜꦺꦪ꧀ꦪꦚ꧀ꦕ
꧘꧙꧔. (ꦏ) ꦠꦠ꧀ꦡ ꦏꦠꦩꦴ ꦩꦴꦪꦴ? ꦆꦣꦺꦏꦕ꧀ꦕꦺꦴ ꦏꦴꦪꦺꦤ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ, ꦮꦴꦕꦴꦪ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ, ꦩꦤꦱꦴ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦠꦱ꧀ꦱ ꦥꦛꦶꦕ꧀ꦖꦴꦢꦤꦲꦺꦠꦸꦁ ꦥꦴꦥꦶꦏꦁ ꦆꦕ꧀ꦖꦁ ꦥꦟꦶꦢꦲꦠꦶ. ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦆꦕ꧀ꦖꦠꦶ. ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦱꦔ꧀ꦏꦥ꧀ꦥꦺꦠꦶ. ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦮꦴꦕꦁ ꦨꦴꦱꦠꦶ. ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦏꦴꦪꦺꦤ ꦥꦫꦏ꧀ꦏꦩꦠꦶ. ꦪꦴ ꦌꦮꦫꦹꦥꦴ ꦩꦴꦪꦴ ꦩꦴꦪꦴꦮꦶꦠꦴ ꦄꦕ꧀ꦕꦴꦱꦫꦴ ꦮꦚ꧀ꦕꦤꦴ ꦤꦶꦏꦠꦶ ꦮꦶꦏꦶꦫꦟꦴ ꦥꦫꦶꦲꦫꦟꦴ ꦒꦹꦲꦤꦴ ꦥꦫꦶꦒꦹꦲꦤꦴ ꦖꦴꦢꦤꦴ ꦥꦛꦶꦕ꧀ꦖꦴꦢꦤꦴ ꦄꦤꦸꦠ꧀ꦠꦴꦤꦷꦏꦩ꧀ꦩꦁ ꦄꦤꦴꦮꦶꦏꦩ꧀ꦩꦁ ꦮꦺꦴꦕ꧀ꦖꦴꦢꦤꦴ ꦥꦴꦥꦏꦶꦫꦶꦪꦴ – ꦄꦪꦁ ꦮꦸꦕ꧀ꦕꦠꦶ ‘‘ꦩꦴꦪꦴ’’.
(ꦑ) ꦠꦠ꧀ꦡ ꦏꦠꦩꦁ ꦱꦴꦜꦺꦪ꧀ꦪꦁ? ꦆꦣꦺꦏꦕ꧀ꦕꦺꦴ ꦱꦜꦺꦴ ꦲꦺꦴꦠꦶ ꦥꦫꦶꦱꦜꦺꦴ. ꦪꦁ ꦠꦠ꧀ꦡ ꦱꦜꦁ ꦱꦜꦠꦴ ꦱꦴꦜꦺꦪ꧀ꦪꦁ ꦏꦏ꧀ꦏꦫꦠꦴ ꦏꦏ꧀ꦏꦫꦶꦪꦁ [ꦏꦏ꧀ꦑꦭ꦳ꦠꦴ ꦏꦏ꧀ꦑꦭ꦳ꦶꦪꦁ (ꦱ꧀ꦪꦴ.)] ꦥꦫꦶꦏ꧀ꦑꦠ꧀ꦠꦠꦴ ꦥꦴꦫꦶꦏ꧀ꦑꦠ꧀ꦠꦶꦪꦁ – ꦆꦢꦁ ꦮꦸꦕ꧀ꦕꦠꦶ ‘‘ꦱꦴꦜꦺꦪ꧀ꦪꦁ’’.
(꧕) ꦄꦮꦶꦗ꧀ꦗꦴ ꦕ ꦨꦮꦠꦟ꧀ꦲꦴ ꦕ
꧘꧙꧕. (ꦏ) ꦠꦠ꧀ꦡ ꦏꦠꦩꦴ ꦄꦮꦶꦗ꧀ꦗꦴ? ꦪꦁ ꦄꦚ꧀ꦚꦴꦟꦁ ꦄꦢꦱ꧀ꦱꦤꦁ…ꦥꦺ… ꦄꦮꦶꦗ꧀ꦗꦴꦭꦔ꧀ꦒꦷ ꦩꦺꦴꦲꦺꦴ ꦄꦏꦸꦱꦭꦩꦹꦭꦁ – ꦄꦪꦁ ꦮꦸꦕ꧀ꦕꦠꦶ ‘‘ꦄꦮꦶꦗ꧀ꦗꦴ’’.
(ꦑ) ꦠꦠ꧀ꦡ ꦏꦠꦩꦴ ꦨꦮꦠꦟ꧀ꦲꦴ? ꦪꦺꦴ ꦨꦮꦺꦱꦸ ꦨꦮꦕ꧀ꦖꦤ꧀ꦢꦺꦴ ꦨꦮꦫꦴꦒꦺꦴ ꦨꦮꦤꦤ꧀ꦢꦷ ꦨꦮꦠꦟ꧀ꦲꦴ ꦨꦮꦱꦶꦤꦺꦲꦺꦴ ꦨꦮꦥꦫꦶꦭ꦳ꦴꦲꦺꦴ ꦨꦮꦩꦸꦕ꧀ꦖꦴ ꦨꦮꦗ꧀ꦙꦺꦴꦱꦴꦤꦁ – ꦄꦪꦁ ꦮꦸꦕ꧀ꦕꦠꦶ ‘‘ꦨꦮꦠꦟ꧀ꦲꦴ’’.
(꧖) ꦨꦮꦢꦶꦛ꧀ꦜꦶ ꦕ ꦮꦶꦨꦮꦢꦶꦛ꧀ꦜꦶ ꦕ
꧘꧙꧖. (ꦏ) ꦠꦠ꧀ꦡ ꦏꦠꦩꦴ ꦨꦮꦢꦶꦛ꧀ꦜꦶ? ‘‘ꦨꦮꦶꦱ꧀ꦱꦠꦶ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴ’’ꦠꦶ – ꦪꦴ ꦌꦮꦫꦹꦥꦴ ꦢꦶꦛ꧀ꦜꦶ ꦢꦶꦛ꧀ꦜꦶꦒꦠꦁ…ꦥꦺ… ꦮꦶꦥꦫꦶꦪꦴꦱꦒ꧀ꦒꦴꦲꦺꦴ – ꦄꦪꦁ ꦮꦸꦕ꧀ꦕꦠꦶ ‘‘ꦨꦮꦢꦶꦛ꧀ꦜꦶ’’.
(ꦑ) ꦠꦠ꧀ꦡ ꦏꦠꦩꦴ ꦮꦶꦨꦮꦢꦶꦛ꧀ꦜꦶ? ‘‘ꦤ ꦨꦮꦶꦱ꧀ꦱꦠꦶ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴ’’ꦠꦶ – ꦪꦴ ꦌꦮꦫꦹꦥꦴ ꦢꦶꦛ꧀ꦜꦶ ꦢꦶꦛ꧀ꦜꦶꦒꦠꦁ…ꦥꦺ… ꦮꦶꦥꦫꦶꦪꦴꦱꦒ꧀ꦒꦴꦲꦺꦴ – ꦄꦪꦁ ꦮꦸꦕ꧀ꦕꦠꦶ ꦮꦶꦨꦮꦢꦶꦛ꧀ꦜꦶ.