ꦤꦶꦢ꧀ꦢꦺꦱꦺꦴ

꧑. ꦌꦏꦏꦥꦸꦒ꧀ꦒꦭꦥꦚ꧀ꦚꦠ꧀ꦠꦶ

꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦩꦪꦮꦶꦩꦸꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦏꦴꦭꦺꦤ ꦏꦴꦭꦁ ꦱꦩꦪꦺꦤ ꦱꦩꦪꦁ ꦄꦛ꧀ꦜ ꦮꦶꦩꦺꦴꦏ꧀ꦑꦺ ꦏꦴꦪꦺꦤ ꦦꦸꦱꦶꦠ꧀ꦮꦴ [ꦦꦱ꧀ꦱꦶꦠ꧀ꦮꦴ (ꦱꦷ. ꦥꦷ.)] ꦮꦶꦲꦫꦠꦶ, ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦌꦏꦕ꧀ꦕꦺ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦩꦪꦮꦶꦩꦸꦠ꧀ꦠꦺꦴ’’.

꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦱꦩꦪꦮꦶꦩꦸꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦤ ꦲꦺꦮ ꦑꦺꦴ ꦏꦴꦭꦺꦤ ꦏꦴꦭꦁ ꦱꦩꦪꦺꦤ ꦱꦩꦪꦁ ꦄꦛ꧀ꦜ ꦮꦶꦩꦺꦴꦏ꧀ꦑꦺ ꦏꦴꦪꦺꦤ ꦦꦸꦱꦶꦠ꧀ꦮꦴ ꦮꦶꦲꦫꦠꦶ, ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦱꦩꦪꦮꦶꦩꦸꦠ꧀ꦠꦺꦴ’’. ꦱꦧ꧀ꦧꦺꦥꦶ ꦄꦫꦶꦪꦥꦸꦒ꧀ꦒꦭꦴ ꦄꦫꦶꦪꦺ ꦮꦶꦩꦺꦴꦏ꧀ꦑꦺ ꦄꦱꦩꦪꦮꦶꦩꦸꦠ꧀ꦠꦴ.

꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦏꦸꦥ꧀ꦥꦣꦩ꧀ꦩꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦭꦴꦨꦷ ꦲꦺꦴꦠꦶ ꦫꦹꦥꦱꦲꦒꦠꦴꦤꦁ ꦮꦴ ꦄꦫꦹꦥꦱꦲꦒꦠꦴꦤꦁ ꦮꦴ ꦱꦩꦴꦥꦠ꧀ꦠꦷꦤꦁ. ꦱꦺꦴ ꦕ ꦑꦺꦴ ꦤ ꦤꦶꦏꦴꦩꦭꦴꦨꦷ ꦲꦺꦴꦠꦶ ꦤ ꦄꦏꦶꦕ꧀ꦖꦭꦴꦨꦷ ꦤ ꦄꦏꦱꦶꦫꦭꦴꦨꦷ; ꦤ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦱꦩꦴꦥꦗ꧀ꦗꦠꦶꦥꦶ ꦮꦸꦛ꧀ꦜꦴꦠꦶꦥꦶ. ꦜꦴꦤꦁ ꦑꦺꦴ ꦥꦤꦺꦠꦁ ꦮꦶꦗ꧀ꦗꦠꦶ, ꦪꦁ ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦥꦩꦴꦢꦩꦴꦒꦩ꧀ꦩ ꦠꦴ ꦱꦩꦴꦥꦠ꧀ꦠꦶꦪꦺꦴ ꦏꦸꦥ꧀ꦥꦺꦪ꧀ꦪꦸꦁ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦏꦸꦥ꧀ꦥꦣꦩ꧀ꦩꦺꦴ’’.

꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦏꦸꦥ꧀ꦥꦣꦩ꧀ꦩꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦭꦴꦨꦷ ꦲꦺꦴꦠꦶ ꦫꦹꦥꦱꦲꦒꦠꦴꦤꦁ ꦮꦴ ꦄꦫꦹꦥꦱꦲꦒꦠꦴꦤꦁ ꦮꦴ ꦱꦩꦴꦥꦠ꧀ꦠꦷꦤꦁ. ꦱꦺꦴ ꦕ ꦑꦺꦴ ꦤꦶꦏꦴꦩꦭꦴꦨꦷ ꦲꦺꦴꦠꦶ ꦄꦏꦶꦕ꧀ꦖꦭꦴꦨꦷ ꦄꦏꦱꦶꦫꦭꦴꦨꦷ; ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦱꦩꦴꦥꦗ꧀ꦗꦠꦶꦥꦶ ꦮꦸꦛ꧀ꦜꦴꦠꦶꦥꦶ. ꦄꦛ꧀ꦜꦴꦤꦩꦺꦠꦁ ꦄꦤꦮꦏꦴꦱꦺꦴ ꦪꦁ ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦥꦩꦴꦢꦩꦴꦒꦩ꧀ꦩ ꦠꦴ ꦱꦩꦴꦥꦠ꧀ꦠꦶꦪꦺꦴ ꦏꦸꦥ꧀ꦥꦺꦪ꧀ꦪꦸꦁ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦏꦸꦥ꧀ꦥꦣꦩ꧀ꦩꦺꦴ’’. ꦱꦧ꧀ꦧꦺꦥꦶ ꦄꦫꦶꦪꦥꦸꦒ꧀ꦒꦭꦴ ꦄꦫꦶꦪꦺ ꦮꦶꦩꦺꦴꦏ꧀ꦑꦺ ꦄꦏꦸꦥ꧀ꦥꦣꦩ꧀ꦩꦴ.

꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦫꦶꦲꦴꦤꦣꦩ꧀ꦩꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦭꦴꦨꦷ ꦲꦺꦴꦠꦶ ꦫꦹꦥꦱꦲꦒꦠꦴꦤꦁ ꦮꦴ ꦄꦫꦹꦥꦱꦲꦒꦠꦴꦤꦁ ꦮꦴ ꦱꦩꦴꦥꦠ꧀ꦠꦷꦤꦁ. ꦱꦺꦴ ꦕ ꦑꦺꦴ ꦤ ꦤꦶꦏꦴꦩꦭꦴꦨꦷ ꦲꦺꦴꦠꦶ ꦤ ꦄꦏꦶꦕ꧀ꦖꦭꦴꦨꦷ ꦤ ꦄꦏꦱꦶꦫꦭꦴꦨꦷ; ꦤ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦱꦩꦴꦥꦗ꧀ꦗꦠꦶꦥꦶ ꦮꦸꦛ꧀ꦜꦴꦠꦶꦥꦶ. ꦜꦴꦤꦁ ꦑꦺꦴ ꦥꦤꦺꦠꦁ ꦮꦶꦗ꧀ꦗꦠꦶ, ꦪꦁ ꦱꦺꦴ ꦥꦸꦒ꧀ꦒꦭꦺꦴ ꦥꦩꦴꦢꦩꦴꦒꦩ꧀ꦩ ꦠꦴꦲꦶ ꦱꦩꦴꦥꦠ꧀ꦠꦷꦲꦶ ꦥꦫꦶꦲꦴꦪꦺꦪ꧀ꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦫꦶꦲꦴꦤꦣꦩ꧀ꦩꦺꦴ’’.

꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦥꦫꦶꦲꦴꦤꦣꦩ꧀ꦩꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦭꦴꦨꦷ ꦲꦺꦴꦠꦶ ꦫꦹꦥꦱꦲꦒꦠꦴꦤꦁ ꦮꦴ ꦄꦫꦹꦥꦱꦲꦒꦠꦴꦤꦁ ꦮꦴ ꦱꦩꦴꦥꦠ꧀ꦠꦷꦤꦁ. ꦱꦺꦴ ꦕ ꦑꦺꦴ ꦤꦶꦏꦴꦩꦭꦴꦨꦷ ꦲꦺꦴꦠꦶ ꦄꦏꦶꦕ꧀ꦖꦭꦴꦨꦷ ꦄꦏꦱꦶꦫꦭꦴꦨꦷ; ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦱꦩꦴꦥꦗ꧀ꦗꦠꦶꦥꦶ ꦮꦸꦛ꧀ꦜꦴꦠꦶꦥꦶ. ꦄꦛ꧀ꦜꦴꦤꦩꦺꦠꦁ ꦄꦤꦮꦏꦴꦱꦺꦴ ꦪꦁ ꦱꦺꦴ ꦥꦸꦒ꧀ꦒꦭꦺꦴ ꦥꦩꦴꦢꦩꦴꦒꦩ꧀ꦩ ꦠꦴꦲꦶ ꦱꦩꦴꦥꦠ꧀ꦠꦷꦲꦶ ꦥꦫꦶꦲꦴꦪꦺꦪ꧀ꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦥꦫꦶꦲꦴꦤꦣꦩ꧀ꦩꦺꦴ’’. ꦱꦧ꧀ꦧꦺꦥꦶ ꦄꦫꦶꦪꦥꦸꦒ꧀ꦒꦭꦴ ꦄꦫꦶꦪꦺ ꦮꦶꦩꦺꦴꦏ꧀ꦑꦺ ꦄꦥꦫꦶꦲꦴꦤꦣꦩ꧀ꦩꦴ.

꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦕꦺꦠꦤꦴꦨꦧ꧀ꦧꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦭꦴꦨꦷ ꦲꦺꦴꦠꦶ ꦫꦹꦥꦱꦲꦒꦠꦴꦤꦁ ꦮꦴ ꦄꦫꦹꦥꦱꦲꦒꦠꦴꦤꦁ ꦮꦴ ꦱꦩꦴꦥꦠ꧀ꦠꦷꦤꦁ. ꦱꦺꦴ ꦕ ꦑꦺꦴ ꦤ ꦤꦶꦏꦴꦩꦭꦴꦨꦷ ꦲꦺꦴꦠꦶ ꦤ ꦄꦏꦶꦕ꧀ꦖꦭꦴꦨꦷ ꦤ ꦄꦏꦱꦶꦫꦭꦴꦨꦷ; ꦤ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦱꦩꦴꦥꦗ꧀ꦗꦠꦶꦥꦶ ꦮꦸꦛ꧀ꦜꦴꦠꦶꦥꦶ. ꦱꦕꦺ ꦄꦤꦸꦱꦚ꧀ꦕꦺꦠꦺꦠꦶ, ꦤ ꦥꦫꦶꦲꦴꦪꦠꦶ ꦠꦴꦲꦶ ꦱꦩꦴꦥꦠ꧀ꦠꦷꦲꦶ. ꦱꦕꦺ ꦤ ꦄꦤꦸꦱꦚ꧀ꦕꦺꦠꦺꦠꦶ, ꦥꦫꦶꦲꦴꦪꦠꦶ ꦠꦴꦲꦶ ꦱꦩꦴꦥꦠ꧀ꦠꦷꦲꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦕꦺꦠꦤꦴꦨꦧ꧀ꦧꦺꦴ’’.

꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦤꦸꦫꦏ꧀ꦑꦟꦴꦨꦧ꧀ꦧꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦭꦴꦨꦷ ꦲꦺꦴꦠꦶ ꦫꦹꦥꦱꦲꦒꦠꦴꦤꦁ ꦮꦴ ꦄꦫꦹꦥꦱꦲꦒꦠꦴꦤꦁ ꦮꦴ ꦱꦩꦴꦥꦠ꧀ꦠꦷꦤꦁ. ꦱꦺꦴ ꦕ ꦑꦺꦴ ꦤ ꦤꦶꦏꦴꦩꦭꦴꦨꦷ ꦲꦺꦴꦠꦶ ꦤ ꦄꦏꦶꦕ꧀ꦖꦭꦴꦨꦷ ꦤ ꦄꦏꦱꦶꦫꦭꦴꦨꦷ; ꦤ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦱꦩꦴꦥꦗ꧀ꦗꦠꦶꦥꦶ ꦮꦸꦛ꧀ꦜꦴꦠꦶꦥꦶ. ꦱꦕꦺ ꦄꦤꦸꦫꦏ꧀ꦑꦠꦶ, ꦤ ꦥꦫꦶꦲꦴꦪꦠꦶ ꦠꦴꦲꦶ ꦱꦩꦴꦥꦠ꧀ꦠꦷꦲꦶ. ꦱꦕꦺ ꦤ ꦄꦤꦸꦫꦏ꧀ꦑꦠꦶ, ꦥꦫꦶꦲꦴꦪꦠꦶ ꦠꦴꦲꦶ ꦱꦩꦴꦥꦠ꧀ꦠꦷꦲꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦤꦸꦫꦏ꧀ꦑꦟꦴꦨꦧ꧀ꦧꦺꦴ’’.

꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦸꦡꦸꦗ꧀ꦗꦤꦺꦴ? ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦠꦷꦟꦶ ꦱꦁꦪꦺꦴꦗꦤꦴꦤꦶ ꦄꦥ꧀ꦥꦲꦷꦤꦴꦤꦶ; ꦤ ꦕ ꦠꦺꦱꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦥꦛꦶꦥꦤ꧀ꦤꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦸꦡꦸꦗ꧀ꦗꦤꦺꦴ’’.

꧑꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦒꦺꦴꦠ꧀ꦫꦨꦹ? ꦪꦺꦱꦁ ꦣꦩ꧀ꦩꦴꦤꦁ ꦱꦩꦤꦤ꧀ꦠꦫꦴ ꦄꦫꦶꦪꦣꦩ꧀ꦩꦱ꧀ꦱ ꦄꦮꦏ꧀ꦏꦤ꧀ꦠꦶ ꦲꦺꦴꦠꦶ ꦠꦺꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦒꦺꦴꦠ꧀ꦫꦨꦹ’’.

꧑꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦨꦪꦹꦥꦫꦠꦺꦴ? ꦱꦠ꧀ꦠ ꦱꦺꦏ꧀ꦑꦴ ꦨꦪꦹꦥꦫꦠꦴ, ꦪꦺ ꦕ ꦥꦸꦡꦸꦗ꧀ꦗꦤꦴ ꦱꦷꦭꦮꦤ꧀ꦠꦺꦴ. ꦄꦫꦲꦴ ꦄꦨꦪꦹꦥꦫꦠꦺꦴ.

꧑꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦨꦧ꧀ꦧꦴꦒꦩꦤꦺꦴ? ꦪꦺ ꦠꦺ ꦥꦸꦒ꧀ꦒꦭꦴ ꦏꦩ꧀ꦩꦴꦮꦫꦟꦺꦤ ꦱꦩꦤ꧀ꦤꦴꦒꦠꦴ, ꦏꦶꦭꦺꦱꦴꦮꦫꦟꦺꦤ ꦱꦩꦤ꧀ꦤꦴꦒꦠꦴ, ꦮꦶꦥꦴꦏꦴꦮꦫꦟꦺꦤ ꦱꦩꦤ꧀ꦤꦴꦒꦠꦴ, ꦄꦱ꧀ꦱꦢ꧀ꦣꦴ ꦄꦕ꧀ꦖꦤ꧀ꦢꦶꦏꦴ ꦢꦸꦥ꧀ꦥꦚ꧀ꦚꦴ ꦌꦭ꦳ꦴ, ꦄꦨꦧ꧀ꦧꦴ ꦤꦶꦪꦴꦩꦁ ꦎꦏ꧀ꦏꦩꦶꦠꦸꦁ ꦏꦸꦱꦭꦺꦱꦸ ꦣꦩ꧀ꦩꦺꦱꦸ ꦱꦩ꧀ꦩꦠ꧀ꦠꦁ – ꦆꦩꦺ ꦮꦸꦕ꧀ꦕꦤ꧀ꦠꦶ ꦥꦸꦒ꧀ꦒꦭꦴ ‘‘ꦄꦨꦧ꧀ꦧꦴꦒꦩꦤꦴ’’.

꧑꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦨꦧ꧀ꦧꦴꦒꦩꦤꦺꦴ? ꦪꦺ ꦠꦺ ꦥꦸꦒ꧀ꦒꦭꦴ ꦤ ꦏꦩ꧀ꦩꦴꦮꦫꦟꦺꦤ ꦱꦩꦤ꧀ꦤꦴꦒꦠꦴ, ꦤ ꦏꦶꦭꦺꦱꦴꦮꦫꦟꦺꦤ ꦱꦩꦤ꧀ꦤꦴꦒꦠꦴ, ꦤ ꦮꦶꦥꦴꦏꦴꦮꦫꦟꦺꦤ ꦱꦩꦤ꧀ꦤꦴꦒꦠꦴ, ꦱꦢ꧀ꦣꦴ ꦖꦤ꧀ꦢꦶꦏꦴ ꦥꦚ꧀ꦚꦮꦤ꧀ꦠꦺꦴ [ꦥꦚ꧀ꦚꦮꦤ꧀ꦠꦴ (ꦱꦷ.)] ꦄꦤꦺꦭ꦳ꦴ, ꦨꦧ꧀ꦧꦴ ꦤꦶꦪꦴꦩꦁ ꦎꦏ꧀ꦏꦩꦶꦠꦸꦁ ꦏꦸꦱꦭꦺꦱꦸ ꦣꦩ꧀ꦩꦺꦱꦸ ꦱꦩ꧀ꦩꦠ꧀ꦠꦁ – ꦆꦩꦺ ꦮꦸꦕ꧀ꦕꦤ꧀ꦠꦶ ꦥꦸꦒ꧀ꦒꦭꦴ ‘‘ꦨꦧ꧀ꦧꦴꦒꦩꦤꦴ’’.

꧑꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦤꦶꦪꦠꦺꦴ? ꦥꦚ꧀ꦕ ꦥꦸꦒ꧀ꦒꦭꦴ ꦄꦴꦤꦤ꧀ꦠꦫꦶꦏꦴ, ꦪꦺ ꦕ ꦩꦶꦕ꧀ꦖꦴꦢꦶꦛ꧀ꦜꦶꦏꦴ ꦤꦶꦪꦠꦴ, ꦄꦛ꧀ꦜ ꦕ ꦄꦫꦶꦪꦥꦸꦒ꧀ꦒꦭꦴ ꦤꦶꦪꦠꦴ. ꦄꦮꦱꦺꦱꦴ ꦥꦸꦒ꧀ꦒꦭꦴ ꦄꦤꦶꦪꦠꦴ.

꧑꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦛꦶꦥꦤ꧀ꦤꦏꦺꦴ? ꦕꦠ꧀ꦠꦴꦫꦺꦴ ꦩꦒ꧀ꦒꦱꦩꦔ꧀ꦒꦶꦤꦺꦴ ꦥꦸꦒ꧀ꦒꦭꦴ ꦥꦛꦶꦥꦤ꧀ꦤꦏꦴ, ꦕꦠ꧀ꦠꦴꦫꦺꦴ ꦦꦭꦱꦩꦔ꧀ꦒꦶꦤꦺꦴ ꦥꦸꦒ꧀ꦒꦭꦴ ꦦꦭꦺ ꦜꦶꦠꦴ.

꧑꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦩꦱꦷꦱꦷ? ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦥꦸꦧ꧀ꦧꦁ ꦄꦕꦫꦶꦩꦁ ꦄꦴꦱꦮꦥꦫꦶꦪꦴꦢꦴꦤꦚ꧀ꦕ ꦲꦺꦴꦠꦶ ꦗꦷꦮꦶꦠꦥꦫꦶꦪꦴꦢꦴꦤꦚ꧀ꦕ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦩꦱꦷꦱꦷ’’.

꧑꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦜꦶꦠꦏꦥ꧀ꦥꦷ? ꦄꦪꦚ꧀ꦕ ꦥꦸꦒ꧀ꦒꦭꦺꦴ ꦱꦺꦴꦠꦴꦥꦠ꧀ꦠꦶꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦺꦴ ꦄꦱ꧀ꦱ, ꦏꦥ꧀ꦥꦱ꧀ꦱ ꦕ ꦈꦝ꧀ꦝꦪ꧀ꦲꦤꦮꦺꦭꦴ ꦄꦱ꧀ꦱ, ꦤꦺꦮ ꦠꦴꦮ ꦏꦥ꧀ꦥꦺꦴ ꦈꦝ꧀ꦝꦪ꧀ꦲꦺꦪ꧀ꦪ ꦪꦴꦮꦴꦪꦁ ꦥꦸꦒ꧀ꦒꦭꦺꦴ ꦤ ꦱꦺꦴꦠꦴꦥꦠ꧀ꦠꦶꦦꦭꦁ ꦱꦕ꧀ꦖꦶꦏꦫꦺꦴꦠꦶ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦜꦶꦠꦏꦥ꧀ꦥꦷ’’. ꦱꦧ꧀ꦧꦺꦥꦶ ꦩꦒ꧀ꦒꦱꦩꦔ꧀ꦒꦶꦤꦺꦴ ꦥꦸꦒ꧀ꦒꦭꦴ ꦜꦶꦠꦏꦥ꧀ꦥꦶꦤꦺꦴ.

꧑꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦫꦶꦪꦺꦴ? ꦄꦛ꧀ꦜ ꦄꦫꦶꦪꦥꦸꦒ꧀ꦒꦭꦴ ꦄꦫꦶꦪꦴ. ꦄꦮꦱꦺꦱꦴ ꦥꦸꦒ꧀ꦒꦭꦴ ꦄꦤꦫꦶꦪꦴ.

꧑꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦺꦏ꧀ꦑꦺꦴ? ꦕꦠ꧀ꦠꦴꦫꦺꦴ ꦩꦒ꧀ꦒꦱꦩꦔ꧀ꦒꦶꦤꦺꦴ ꦠꦪꦺꦴ ꦦꦭꦱꦩꦔ꧀ꦒꦶꦤꦺꦴ ꦥꦸꦒ꧀ꦒꦭꦴ ‘‘ꦱꦺꦏ꧀ꦑꦴ’’. ꦄꦫꦲꦴ ꦄꦱꦺꦏ꧀ꦑꦺꦴ. ꦄꦮꦱꦺꦱꦴ ꦥꦸꦒ꧀ꦒꦭꦴ ꦤꦺꦮꦱꦺꦏ꧀ꦑꦤꦴꦱꦺꦏ꧀ꦑꦴ.

꧒꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦠꦺꦮꦶꦗ꧀ꦗꦺꦴ? ꦠꦷꦲꦶ ꦮꦶꦗ꧀ꦗꦴꦲꦶ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦠꦺꦮꦶꦗ꧀ꦗꦺꦴ’’.

꧒꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦖꦭ꦳ꦨꦶꦚ꧀ꦚꦺꦴ? ꦖꦲꦶ ꦄꦨꦶꦚ꧀ꦚꦴꦲꦶ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦖꦭ꦳ꦨꦶꦚ꧀ꦚꦺꦴ’’.

꧒꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ ꦱꦴꦩꦁ ꦱꦕ꧀ꦕꦴꦤꦶ ꦄꦨꦶꦱꦩ꧀ꦧꦸꦗ꧀ꦙꦠꦶ; ꦠꦠ꧀ꦡ ꦕ ꦱꦧ꧀ꦧꦚ꧀ꦚꦸꦠꦁ ꦥꦴꦥꦸꦟꦴꦠꦶ, ꦧꦭꦺꦱꦸ ꦕ ꦮꦱꦷꦨꦴꦮꦁ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ’’.

꧒꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦕ꧀ꦕꦺꦏꦱꦩ꧀ꦧꦸꦢ꧀ꦣꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ ꦱꦴꦩꦁ ꦱꦕ꧀ꦕꦴꦤꦶ ꦄꦨꦶꦱꦩ꧀ꦧꦸꦗ꧀ꦙꦠꦶ; ꦤ ꦕ ꦠꦠ꧀ꦡ ꦱꦧ꧀ꦧꦚ꧀ꦚꦸꦠꦁ ꦥꦴꦥꦸꦟꦴꦠꦶ, ꦤ ꦕ ꦧꦭꦺꦱꦸ ꦮꦱꦷꦨꦴꦮꦁ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦕ꧀ꦕꦺꦏꦱꦩ꧀ꦧꦸꦢ꧀ꦣꦺꦴ’’.

꧒꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦛ꧀ꦜ ꦮꦶꦩꦺꦴꦏ꧀ꦑꦺ ꦏꦴꦪꦺꦤ ꦦꦸꦱꦶꦠ꧀ꦮꦴ ꦮꦶꦲꦫꦠꦶ; ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ’’.

꧒꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦚ꧀ꦚꦴꦮꦶꦩꦸꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦤ ꦲꦺꦮ ꦑꦺꦴ ꦄꦛ꧀ꦜ ꦮꦶꦩꦺꦴꦏ꧀ꦑꦺ ꦏꦴꦪꦺꦤ ꦦꦸꦱꦶꦠ꧀ꦮꦴ ꦮꦶꦲꦫꦠꦶ; ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦚ꧀ꦚꦴꦮꦶꦩꦸꦠ꧀ꦠꦺꦴ’’.

꧒꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦏꦴꦪꦱꦏ꧀ꦑꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦛ꧀ꦜ ꦮꦶꦩꦺꦴꦏ꧀ꦑꦺ ꦏꦴꦪꦺꦤ ꦦꦸꦱꦶꦠ꧀ꦮꦴ ꦮꦶꦲꦫꦠꦶ; ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦌꦏꦕ꧀ꦕꦺ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦏꦴꦪꦱꦏ꧀ꦑꦷ’’.

꧒꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦢꦶꦛ꧀ꦜꦶꦥ꧀ꦥꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ. ꦠꦡꦴꦒꦠꦥ꧀ꦥꦮꦺꦢꦶꦠꦴ ꦕꦱ꧀ꦱ ꦣꦩ꧀ꦩꦴ ꦥꦚ꧀ꦚꦴꦪ ꦮꦺꦴꦢꦶꦛ꧀ꦜꦴ ꦲꦺꦴꦤ꧀ꦠꦶ ꦮꦺꦴꦕꦫꦶꦠꦴ. ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦌꦏꦕ꧀ꦕꦺ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦢꦶꦛ꧀ꦜꦶꦥ꧀ꦥꦠ꧀ꦠꦺꦴ’’.

꧒꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦢ꧀ꦣꦴꦮꦶꦩꦸꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ. ꦠꦡꦴꦒꦠꦥ꧀ꦥꦮꦺꦢꦶꦠꦴ ꦕꦱ꧀ꦱ ꦣꦩ꧀ꦩꦴ ꦥꦚ꧀ꦚꦴꦪ ꦮꦺꦴꦢꦶꦛ꧀ꦜꦴ ꦲꦺꦴꦤ꧀ꦠꦶ ꦮꦺꦴꦕꦫꦶꦠꦴ. ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦌꦏꦕ꧀ꦕꦺ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ, ꦤꦺꦴ ꦕ ꦑꦺꦴ ꦪꦡꦴ ꦢꦶꦛ꧀ꦜꦶꦥ꧀ꦥꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦢ꧀ꦣꦴꦮꦶꦩꦸꦠ꧀ꦠꦺꦴ’’.

꧒꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦣꦩ꧀ꦩꦴꦤꦸꦱꦴꦫꦷ? ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦱꦺꦴꦠꦴꦥꦠ꧀ꦠꦶꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦱ꧀ꦱ ꦥꦚ꧀ꦚꦶꦤ꧀ꦢ꧀ꦫꦶꦪꦁ ꦄꦣꦶꦩꦠ꧀ꦠꦁ ꦲꦺꦴꦠꦶ, ꦥꦚ꧀ꦚꦴꦮꦴꦲꦶꦁ ꦥꦚ꧀ꦚꦴꦥꦸꦧ꧀ꦧꦔ꧀ꦒꦩꦁ ꦄꦫꦶꦪꦩꦒ꧀ꦒꦁ ꦨꦴꦮꦺꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦣꦩ꧀ꦩꦴꦤꦸꦱꦴꦫꦷ’’. ꦱꦺꦴꦠꦴꦥꦠ꧀ꦠꦶꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦺꦴ ꦥꦸꦒ꧀ꦒꦭꦺꦴ ꦣꦩ꧀ꦩꦴꦤꦸꦱꦴꦫꦷ ꦦꦭꦺ ꦜꦶꦠꦺꦴ ꦢꦶꦛ꧀ꦜꦶꦥ꧀ꦥꦠ꧀ꦠꦺꦴ.

꧓꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦢ꧀ꦣꦴꦤꦸꦱꦴꦫꦷ? ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦱꦺꦴꦠꦴꦥꦠ꧀ꦠꦶꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦱ꧀ꦱ ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦄꦣꦶꦩꦠ꧀ꦠꦁ ꦲꦺꦴꦠꦶ, ꦱꦢ꧀ꦣꦴꦮꦴꦲꦶꦁ ꦱꦢ꧀ꦣꦴꦥꦸꦧ꧀ꦧꦔ꧀ꦒꦩꦁ ꦄꦫꦶꦪꦩꦒ꧀ꦒꦁ ꦨꦴꦮꦺꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦢ꧀ꦣꦴꦤꦸꦱꦴꦫꦷ’’. ꦱꦺꦴꦠꦴꦥꦠ꧀ꦠꦶꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦺꦴ ꦥꦸꦒ꧀ꦒꦭꦺꦴ ꦱꦢ꧀ꦣꦴꦤꦸꦱꦴꦫꦷ ꦦꦭꦺ ꦜꦶꦠꦺꦴ ꦱꦢ꧀ꦣꦴꦮꦶꦩꦸꦠ꧀ꦠꦺꦴ.

꧓꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦱꦺꦴꦠꦴꦥꦤ꧀ꦤꦺꦴ ꦲꦺꦴꦠꦶ ꦄꦮꦶꦤꦶꦥꦴꦠꦣꦩ꧀ꦩꦺꦴ ꦤꦶꦪꦠꦺꦴ ꦱꦩ꧀ꦧꦺꦴꦣꦶꦥꦫꦴꦪꦤꦺꦴ [ꦱꦩ꧀ꦧꦺꦴꦣꦶꦥꦫꦴꦪꦟꦺꦴ (ꦱꦷ. ꦏ.)]. ꦱꦺꦴ ꦱꦠ꧀ꦠꦏ꧀ꦑꦠ꧀ꦠꦸꦁ ꦢꦺꦮꦺ ꦕ ꦩꦴꦤꦸꦱꦺ ꦕ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦺꦴ’’.

꧓꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦏꦺꦴꦭꦔ꧀ꦏꦺꦴꦭꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦱꦺꦴꦠꦴꦥꦤ꧀ꦤꦺꦴ ꦲꦺꦴꦠꦶ ꦄꦮꦶꦤꦶꦥꦴꦠꦣꦩ꧀ꦩꦺꦴ ꦤꦶꦪꦠꦺꦴ ꦱꦩ꧀ꦧꦺꦴꦣꦶꦥꦫꦴꦪꦤꦺꦴ. ꦱꦺꦴ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦏꦸꦭꦴꦤꦶ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦏꦺꦴꦭꦔ꧀ꦏꦺꦴꦭꦺꦴ’’.

꧓꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦌꦏꦧꦷꦗꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦱꦺꦴꦠꦴꦥꦤ꧀ꦤꦺꦴ ꦲꦺꦴꦠꦶ ꦄꦮꦶꦤꦶꦥꦴꦠꦣꦩ꧀ꦩꦺꦴ ꦤꦶꦪꦠꦺꦴ ꦱꦩ꧀ꦧꦺꦴꦣꦶꦥꦫꦴꦪꦤꦺꦴ. ꦱꦺꦴ ꦌꦏꦁꦪꦺꦮ ꦩꦴꦤꦸꦱꦏꦁ ꦨꦮꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦌꦏꦧꦷꦗꦷ’’.

꧓꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦏꦢꦴꦒꦴꦩꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦫꦴꦒꦢꦺꦴꦱꦩꦺꦴꦲꦴꦤꦁ ꦠꦤꦸꦠ꧀ꦠꦴ ꦱꦏꦢꦴꦒꦴꦩꦷ ꦲꦺꦴꦠꦶ, ꦱꦏꦶꦢꦺꦮ ꦆꦩꦁ ꦭꦺꦴꦏꦁ ꦄꦴꦒꦤ꧀ꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦏꦢꦴꦒꦴꦩꦷ’’.

꧓꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦤꦴꦒꦴꦩꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ, ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦤꦴꦒꦴꦩꦷ’’.

꧓꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦤ꧀ꦠꦫꦴꦥꦫꦶꦤꦶꦧ꧀ꦧꦴꦪꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ, ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦱꦺꦴ ꦈꦥꦥꦤ꧀ꦤꦁ ꦮꦴ ꦱꦩꦤꦤ꧀ꦠꦫꦴ ꦄꦥ꧀ꦥꦠ꧀ꦠꦁ ꦮꦴ ꦮꦺꦩꦗ꧀ꦙꦁ ꦄꦴꦪꦸꦥ꧀ꦥꦩꦴꦟꦁ ꦄꦫꦶꦪꦩꦒ꧀ꦒꦁ ꦱꦚ꧀ꦗꦤꦺꦠꦶ ꦈꦥꦫꦶꦛ꧀ꦜꦶꦩꦴꦤꦁ ꦱꦁꦪꦺꦴꦗꦤꦴꦤꦁ ꦥꦲꦴꦤꦴꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦤ꧀ꦠꦫꦴꦥꦫꦶꦤꦶꦧ꧀ꦧꦴꦪꦷ’’.

꧓꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦈꦥꦲꦕ꧀ꦕꦥꦫꦶꦤꦶꦧ꧀ꦧꦴꦪꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ, ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦱꦺꦴ ꦄꦠꦶꦏ꧀ꦏꦩꦶꦠ꧀ꦮꦴ ꦮꦺꦩꦗ꧀ꦙꦁ ꦄꦴꦪꦸꦥ꧀ꦥꦩꦴꦟꦁ ꦈꦥꦲꦕ꧀ꦕ ꦮꦴ ꦏꦴꦭꦏꦶꦫꦶꦪꦁ [ꦏꦴꦭꦁ ꦏꦶꦫꦶꦪꦁ (ꦏ.)] ꦄꦫꦶꦪꦩꦒ꧀ꦒꦁ ꦱꦚ꧀ꦗꦤꦺꦠꦶ ꦈꦥꦫꦶꦛ꧀ꦜꦶꦩꦴꦤꦁ ꦱꦁꦪꦺꦴꦗꦤꦴꦤꦁ ꦥꦲꦴꦤꦴꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦈꦥꦲꦕ꧀ꦕꦥꦫꦶꦤꦶꦧ꧀ꦧꦴꦪꦷ’’.

꧓꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ, ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦱꦺꦴ ꦄꦱꦔ꧀ꦑꦴꦫꦺꦤ ꦄꦫꦶꦪꦩꦒ꧀ꦒꦁ ꦱꦚ꧀ꦗꦤꦺꦠꦶ ꦈꦥꦫꦶꦛ꧀ꦜꦶꦩꦴꦤꦁ ꦱꦁꦪꦺꦴꦗꦤꦴꦤꦁ ꦥꦲꦴꦤꦴꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ’’.

꧓꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ, ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦱꦺꦴ ꦱꦱꦔ꧀ꦑꦴꦫꦺꦤ ꦄꦫꦶꦪꦩꦒ꧀ꦒꦁ ꦱꦚ꧀ꦗꦤꦺꦠꦶ ꦈꦥꦫꦶꦛ꧀ꦜꦶꦩꦴꦤꦁ ꦱꦁꦪꦺꦴꦗꦤꦴꦤꦁ ꦥꦲꦴꦤꦴꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ’’.

꧔꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦈꦢ꧀ꦣꦁꦱꦺꦴꦠꦺꦴ ꦄꦏꦤꦶꦛ꧀ꦜꦒꦴꦩꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ, ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦱꦺꦴ ꦄꦮꦶꦲꦴ ꦕꦸꦠꦺꦴ ꦄꦠꦥ꧀ꦥꦁ ꦒꦕ꧀ꦖꦠꦶ, ꦄꦠꦥ꧀ꦥꦴ ꦕꦸꦠꦺꦴ ꦱꦸꦢꦱ꧀ꦱꦁ ꦒꦕ꧀ꦖꦠꦶ, ꦱꦸꦢꦱ꧀ꦱꦴ ꦕꦸꦠꦺꦴ ꦱꦸꦢꦱ꧀ꦱꦶꦁ ꦒꦕ꧀ꦖꦠꦶ, ꦱꦸꦢꦱ꧀ꦱꦶꦪꦴ ꦕꦸꦠꦺꦴ ꦄꦏꦤꦶꦛ꧀ꦜꦁ ꦒꦕ꧀ꦖꦠꦶ; ꦄꦏꦤꦶꦛ꧀ꦜꦺ ꦄꦫꦶꦪꦩꦒ꧀ꦒꦁ ꦱꦚ꧀ꦗꦤꦺꦠꦶ ꦈꦥꦫꦶꦛ꧀ꦜꦶꦩꦴꦤꦁ ꦱꦁꦪꦺꦴꦗꦤꦴꦤꦁ ꦥꦲꦴꦤꦴꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦈꦢ꧀ꦣꦁꦱꦺꦴꦠꦺꦴ ꦄꦏꦤꦶꦛ꧀ꦜꦒꦴꦩꦷ’’.

꧔꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦺꦴꦠꦴꦥꦤ꧀ꦤꦺꦴ ꦱꦺꦴꦠꦴꦥꦠ꧀ꦠꦶꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦺꦴ? ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦲꦴꦤꦴꦪ ꦥꦛꦶꦥꦤ꧀ꦤꦺꦴ ꦥꦸꦒ꧀ꦒꦭꦺꦴ ꦱꦺꦴꦠꦴꦥꦠ꧀ꦠꦶꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦠꦷꦟꦶ ꦱꦁꦪꦺꦴꦗꦤꦴꦤꦶ ꦥꦲꦷꦤꦴꦤꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦺꦴꦠꦴꦥꦤ꧀ꦤꦺꦴ’’.

꧔꧒. ꦏꦴꦩꦫꦴꦒꦧ꧀ꦪꦴꦥꦴꦢꦴꦤꦁ ꦠꦤꦸꦨꦴꦮꦴꦪ ꦥꦛꦶꦥꦤ꧀ꦤꦺꦴ ꦥꦸꦒ꧀ꦒꦭꦺꦴ ꦱꦏꦢꦴꦒꦴꦩꦶꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦏꦴꦩꦫꦴꦒꦧ꧀ꦪꦴꦥꦴꦢꦴ ꦠꦤꦸꦨꦹꦠꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦏꦢꦴꦒꦴꦩꦷ’’.

꧔꧓. ꦏꦴꦩꦫꦴꦒꦧ꧀ꦪꦴꦥꦴꦢꦴꦤꦁ ꦄꦤꦮꦱꦺꦱꦥ꧀ꦥꦲꦴꦤꦴꦪ ꦥꦛꦶꦥꦤ꧀ꦤꦺꦴ ꦥꦸꦒ꧀ꦒꦭꦺꦴ ꦄꦤꦴꦒꦴꦩꦶꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦏꦴꦩꦫꦴꦒꦧ꧀ꦪꦴꦥꦴꦢꦴ ꦄꦤꦮꦱꦺꦱꦴ ꦥꦲꦷꦤꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦤꦴꦒꦴꦩꦷ’’.

꧔꧔. ꦫꦹꦥꦫꦴꦒꦄꦫꦹꦥꦫꦴꦒꦩꦴꦤꦈꦢ꧀ꦣꦕ꧀ꦕꦄꦮꦶꦗ꧀ꦗꦴꦪ ꦄꦤꦮꦱꦺꦱꦥ꧀ꦥꦲꦴꦤꦴꦪ ꦥꦛꦶꦥꦤ꧀ꦤꦺꦴ ꦥꦸꦒ꧀ꦒꦭꦺꦴ ꦄꦫꦲꦠ꧀ꦠꦦꦭꦱꦕ꧀ꦖꦶꦏꦶꦫꦶꦪꦴꦪ ꦥꦛꦶꦥꦤ꧀ꦤꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦫꦹꦥꦫꦴꦒꦺꦴ ꦄꦫꦹꦥꦫꦴꦒꦺꦴ ꦩꦴꦤꦺꦴ ꦈꦢ꧀ꦣꦕ꧀ꦕꦁ ꦄꦮꦶꦗ꧀ꦗꦴ ꦄꦤꦮꦱꦺꦱꦴ ꦥꦲꦷꦤꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦫꦲꦴ’’.

ꦌꦏꦏꦤꦶꦢ꧀ꦢꦺꦱꦺꦴ.

꧒. ꦢꦸꦏꦥꦸꦒ꧀ꦒꦭꦥꦚ꧀ꦚꦠ꧀ꦠꦶ

꧔꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦏꦺꦴꦣꦤꦺꦴ? ꦠꦠ꧀ꦡ ꦏꦠꦩꦺꦴ ꦏꦺꦴꦣꦺꦴ? ꦪꦺꦴ ꦏꦺꦴꦣꦺꦴ ꦏꦸꦗ꧀ꦙꦤꦴ ꦏꦸꦗ꧀ꦙꦶꦠꦠ꧀ꦠꦁ ꦢꦺꦴꦱꦺꦴ ꦢꦸꦱ꧀ꦱꦤꦴ ꦢꦸꦱ꧀ꦱꦶꦠꦠ꧀ꦠꦁ [ꦢꦹꦱꦤꦴ ꦢꦹꦱꦶꦠꦠ꧀ꦠꦁ (ꦱ꧀ꦪꦴ.)] ꦧ꧀ꦪꦴꦥꦠ꧀ꦠꦶ ꦧ꧀ꦪꦴꦥꦗ꧀ꦗꦤꦴ ꦧ꧀ꦪꦴꦥꦗ꧀ꦗꦶꦠꦠ꧀ꦠꦁ ꦮꦶꦫꦺꦴꦣꦺꦴ ꦥꦛꦶꦮꦶꦫꦺꦴꦣꦺꦴ ꦕꦟ꧀ꦝꦶꦏ꧀ꦏꦁ ꦄꦱꦸꦫꦺꦴꦥꦺꦴ ꦄꦤꦠ꧀ꦠꦩꦤꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ꦏꦺꦴꦣꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦏꦺꦴꦣꦺꦴ ꦄꦥ꧀ꦥꦲꦷꦤꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦏꦺꦴꦣꦤꦺꦴ’’.

꧔꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦈꦥꦤꦴꦲꦷ? ꦠꦠ꧀ꦡ ꦏꦠꦩꦺꦴ ꦈꦥꦤꦴꦲꦺꦴ? ꦥꦸꦧ꧀ꦧꦏꦴꦭꦁ ꦏꦺꦴꦣꦺꦴ ꦄꦥꦫꦏꦴꦭꦁ ꦈꦥꦤꦴꦲꦺꦴ. ꦪꦺꦴ ꦌꦮꦫꦹꦥꦺꦴ ꦈꦥꦤꦴꦲꦺꦴ ꦈꦥꦤꦪ꧀ꦲꦤꦴ ꦈꦥꦤꦪ꧀ꦲꦶꦠꦠ꧀ꦠꦁ ꦄꦛ꧀ꦜꦥꦤꦴ [ꦄꦴꦜꦥꦤꦴ (ꦏ.) ꦮꦶꦨ. ꧘꧙꧑] ꦜꦥꦤꦴ ꦱꦟ꧀ꦜꦥꦤꦴ ꦄꦤꦸꦱꦁꦱꦤ꧀ꦢꦤꦴ ꦄꦤꦸꦥ꧀ꦥꦧꦤ꧀ꦣꦤꦴ ꦢꦭ꦳꧀ꦲꦷꦏꦩ꧀ꦩꦁ ꦏꦺꦴꦣꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ꦈꦥꦤꦴꦲꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦈꦥꦤꦴꦲꦺꦴ ꦄꦥ꧀ꦥꦲꦷꦤꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦈꦥꦤꦴꦲꦷ’’.

꧔꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦩꦏ꧀ꦑꦷ? ꦠꦠ꧀ꦡ ꦏꦠꦩꦺꦴ ꦩꦏ꧀ꦑꦺꦴ? ꦪꦺꦴ ꦩꦏ꧀ꦑꦺꦴ ꦩꦏ꧀ꦑꦴꦪꦤꦴ ꦩꦏ꧀ꦑꦴꦪꦶꦠꦠ꧀ꦠꦁ [ꦩꦏ꧀ꦑꦷꦪꦤꦴ ꦩꦏ꧀ꦑꦷꦪꦶꦠꦠ꧀ꦠꦁ (ꦱꦷ.), ꦩꦏ꧀ꦑꦶꦪꦤꦴ ꦩꦏ꧀ꦑꦶꦪꦶꦠꦠ꧀ꦠꦁ (ꦏ.)] ꦤꦶꦛ꧀ꦜꦸꦫꦶꦪꦁ ꦤꦶꦛ꧀ꦜꦸꦫꦶꦪꦏꦩ꧀ꦩꦁ – ꦄꦪꦁ ꦮꦸꦕ꧀ꦕꦠꦶ ꦩꦏ꧀ꦑꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦩꦏ꧀ꦑꦺꦴ ꦄꦥ꧀ꦥꦲꦷꦤꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦩꦏ꧀ꦑꦷ’’.

꧔꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦭ꦳ꦴꦱꦷ? ꦠꦠ꧀ꦡ ꦏꦠꦩꦺꦴ ꦥꦭ꦳ꦴꦱꦺꦴ? ꦪꦺꦴ ꦥꦭ꦳ꦴꦱꦺꦴ ꦥꦭ꦳ꦴꦱꦴꦪꦤꦴ ꦥꦭ꦳ꦴꦱꦴꦪꦶꦠꦠ꧀ꦠꦁ ꦥꦭ꦳ꦴꦱꦴꦲꦴꦫꦺꦴ ꦮꦶꦮꦴꦢꦛ꧀ꦜꦴꦤꦁ ꦪꦸꦒꦒ꧀ꦒꦴꦲꦺꦴ ꦄꦥ꧀ꦥꦛꦶꦤꦶꦱ꧀ꦱꦒ꧀ꦒꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦭ꦳ꦴꦱꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦥꦭ꦳ꦴꦱꦺꦴ ꦄꦥ꧀ꦥꦲꦷꦤꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦭ꦳ꦴꦱꦷ’’.

꧔꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦆꦱ꧀ꦱꦸꦏꦷ? ꦠꦠ꧀ꦡ ꦏꦠꦩꦴ ꦆꦱ꧀ꦱꦴ? ꦪꦴ ꦥꦫꦭꦴꦨꦱꦏ꧀ꦏꦴꦫꦒꦫꦸꦏꦴꦫꦩꦴꦤꦤꦮꦤ꧀ꦢꦤꦥꦹꦗꦤꦴꦱꦸ ꦆꦱ꧀ꦱꦴ ꦆꦱ꧀ꦱꦴꦪꦤꦴ ꦆꦱ꧀ꦱꦴꦪꦶꦠꦠ꧀ꦠꦁ ꦈꦱꦹꦪꦴ ꦈꦱꦹꦪꦤꦴ [ꦈꦱ꧀ꦱꦸꦪꦴ ꦈꦱ꧀ꦱꦸꦪꦤꦴ (ꦏ.) ꦮꦶꦨ. ꧘꧙꧓] ꦈꦱꦹꦪꦶꦠꦠ꧀ꦠꦁ – ꦄꦪꦁ ꦮꦸꦕ꧀ꦕꦠꦶ ꦆꦱ꧀ꦱꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦆꦱ꧀ꦱꦴ ꦄꦥ꧀ꦥꦲꦷꦤꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦆꦱ꧀ꦱꦸꦏꦷ’’.

꧕꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦩꦕ꧀ꦖꦫꦷ? ꦠꦠ꧀ꦡ ꦏꦠꦩꦁ ꦩꦕ꧀ꦖꦫꦶꦪꦁ? ꦥꦚ꧀ꦕ ꦩꦕ꧀ꦖꦫꦶꦪꦴꦤꦶ – ꦄꦴꦮꦴꦱꦩꦕ꧀ꦖꦫꦶꦪꦁ, ꦏꦸꦭꦩꦕ꧀ꦖꦫꦶꦪꦁ, ꦭꦴꦨꦩꦕ꧀ꦖꦫꦶꦪꦁ, ꦮꦟ꧀ꦟꦩꦕ꧀ꦖꦫꦶꦪꦁ, ꦣꦩ꧀ꦩꦩꦕ꧀ꦖꦫꦶꦪꦁ. ꦪꦁ ꦌꦮꦫꦹꦥꦁ ꦩꦕ꧀ꦖꦺꦫꦁ ꦩꦕ꧀ꦖꦫꦴꦪꦤꦴ ꦩꦕ꧀ꦖꦫꦴꦪꦶꦠꦠ꧀ꦠꦁ ꦮꦺꦮꦶꦕ꧀ꦖꦁ ꦏꦢꦫꦶꦪꦁ ꦏꦛꦸꦏꦚ꧀ꦕꦸꦏꦠꦴ ꦄꦒ꧀ꦒꦲꦶꦠꦠ꧀ꦠꦁ ꦕꦶꦠ꧀ꦠꦱ꧀ꦱ – ꦆꦢꦁ ꦮꦸꦕ꧀ꦕꦠꦶ ꦩꦕ꧀ꦖꦫꦶꦪꦁ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦆꦢꦁ ꦩꦕ꧀ꦖꦫꦶꦪꦁ ꦄꦥ꧀ꦥꦲꦷꦤꦁ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦩꦕ꧀ꦖꦫꦷ’’.

꧕꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦜꦺꦴ? ꦠꦠ꧀ꦡ ꦏꦠꦩꦁ ꦱꦴꦜꦺꦪ꧀ꦪꦁ? ꦆꦣꦺꦏꦕ꧀ꦕꦺꦴ ꦱꦜꦺꦴ ꦲꦺꦴꦠꦶ ꦥꦫꦶꦱꦜꦺꦴ. ꦪꦁ ꦠꦠ꧀ꦡ ꦱꦜꦁ ꦱꦜꦠꦴ ꦱꦴꦜꦺꦪ꧀ꦪꦁ ꦏꦏ꧀ꦏꦫꦠꦴ ꦏꦏ꧀ꦏꦫꦶꦪꦁ [ꦏꦏ꧀ꦑꦭ꦳ꦠꦴ ꦏꦏ꧀ꦑꦭ꦳ꦶꦪꦁ (ꦱ꧀ꦪꦴ.) ꦌꦮꦁ ꦑꦸꦢ꧀ꦢꦏꦮꦶꦨꦔ꧀ꦒꦢꦸꦏꦤꦶꦢ꧀ꦢꦺꦱꦺꦥꦶ] ꦥꦫꦶꦏ꧀ꦑꦠ꧀ꦠꦠ꧀ꦠꦴ ꦥꦴꦫꦶꦏ꧀ꦑꦠ꧀ꦠꦶꦪꦁ – ꦆꦢꦁ ꦮꦸꦕ꧀ꦕꦠꦶ ꦱꦴꦜꦺꦪ꧀ꦪꦁ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦆꦢꦁ ꦱꦴꦜꦺꦪ꧀ꦪꦁ ꦄꦥ꧀ꦥꦲꦷꦤꦁ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦜꦺꦴ’’.

꧕꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦩꦴꦪꦴꦮꦷ? ꦠꦠ꧀ꦡ ꦏꦠꦩꦴ ꦩꦴꦪꦴ? ꦆꦣꦺꦏꦕ꧀ꦕꦺꦴ ꦏꦴꦪꦺꦤ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦮꦴꦕꦴꦪ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦩꦤꦱꦴ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦠꦱ꧀ꦱ ꦥꦛꦶꦕ꧀ꦖꦴꦢꦤꦲꦺꦠꦸ ꦥꦴꦥꦶꦏꦁ ꦆꦕ꧀ꦖꦁ ꦥꦟꦶꦢꦲꦠꦶ – ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦆꦕ꧀ꦖꦠꦶ, ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦱꦔ꧀ꦏꦥ꧀ꦥꦠꦶ ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦮꦴꦕꦁ ꦨꦴꦱꦠꦶ, ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦏꦴꦪꦺꦤ ꦥꦫꦏ꧀ꦏꦩꦠꦶ. ꦪꦴ ꦌꦮꦫꦹꦥꦴ ꦩꦴꦪꦴ ꦩꦴꦪꦴꦮꦶꦠꦴ ꦄꦕ꧀ꦕꦴꦱꦫꦴ ꦮꦚ꧀ꦕꦤꦴ ꦤꦶꦏꦠꦶ ꦮꦶꦏꦶꦫꦟꦴ ꦥꦫꦶꦲꦫꦟꦴ ꦒꦹꦲꦤꦴ ꦥꦫꦶꦒꦹꦲꦤꦴ ꦖꦴꦢꦤꦴ ꦥꦛꦶꦕ꧀ꦖꦴꦢꦤꦴ ꦄꦤꦸꦠ꧀ꦠꦴꦤꦷꦏꦩ꧀ꦩꦁ ꦄꦤꦴꦮꦶꦏꦩ꧀ꦩꦁ ꦮꦺꦴꦕ꧀ꦖꦴꦢꦤꦴ ꦥꦴꦥꦏꦶꦫꦶꦪꦴ – ꦄꦪꦁ ꦮꦸꦕ꧀ꦕꦠꦶ ꦩꦴꦪꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦩꦴꦪꦴ ꦄꦥ꧀ꦥꦲꦷꦤꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦩꦴꦪꦴꦮꦷ’’.

꧕꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦲꦶꦫꦶꦏꦺꦴ? ꦠꦠ꧀ꦡ ꦏꦠꦩꦁ ꦄꦲꦶꦫꦶꦏꦁ? ꦪꦁ ꦤ ꦲꦶꦫꦷꦪꦠꦶ ꦲꦶꦫꦶꦪꦶꦠꦧ꧀ꦧꦺꦤ ꦤ ꦲꦶꦫꦷꦪꦠꦶ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦱꦩꦴꦥꦠ꧀ꦠꦶꦪꦴ – ꦆꦢꦁ ꦮꦸꦕ꧀ꦕꦠꦶ ꦄꦲꦶꦫꦶꦏꦁ. ꦆꦩꦶꦤꦴ ꦄꦲꦶꦫꦶꦏꦺꦤ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦄꦲꦶꦫꦶꦏꦺꦴ’’.

꧕꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦤꦺꦴꦠ꧀ꦠꦥ꧀ꦥꦷ? ꦠꦠ꧀ꦡ ꦏꦠꦩꦁ ꦄꦤꦺꦴꦠ꧀ꦠꦥ꧀ꦥꦁ? ꦪꦁ ꦤ ꦎꦠ꧀ꦠꦥ꧀ꦥꦠꦶ ꦎꦠ꧀ꦠꦥ꧀ꦥꦶꦠꦧ꧀ꦧꦺꦤ ꦤ ꦎꦠ꧀ꦠꦥ꧀ꦥꦠꦶ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦱꦩꦴꦥꦠ꧀ꦠꦶꦪꦴ – ꦆꦢꦁ ꦮꦸꦕ꧀ꦕꦠꦶ ꦄꦤꦺꦴꦠ꧀ꦠꦥ꧀ꦥꦁ. ꦆꦩꦶꦤꦴ ꦄꦤꦺꦴꦠ꧀ꦠꦥ꧀ꦥꦺꦤ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦄꦤꦺꦴꦠ꧀ꦠꦥ꧀ꦥꦷ’’.

꧕꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦢꦸꦧ꧀ꦧꦕꦺꦴ? ꦠꦠ꧀ꦡ ꦏꦠꦩꦺꦴ ꦢꦺꦴꦮꦕꦱ꧀ꦱꦠꦴ? ꦱꦲꦣꦩ꧀ꦩꦶꦏꦺ ꦮꦸꦕ꧀ꦕꦩꦴꦤꦺ ꦢꦺꦴꦮꦕꦱ꧀ꦱꦴꦪꦁ ꦢꦺꦴꦮꦕꦱ꧀ꦱꦶꦪꦁ ꦢꦺꦴꦮꦕꦱ꧀ꦱꦠꦴ ꦮꦶꦥ꧀ꦥꦛꦶꦏꦸꦭꦒ꧀ꦒꦴꦲꦶꦠꦴ ꦮꦶꦥꦕ꧀ꦕꦤꦷꦏꦱꦴꦠꦠꦴ ꦄꦤꦴꦢꦫꦶꦪꦁ ꦄꦤꦴꦢꦫꦶꦪꦠꦴ ꦄꦒꦴꦫꦮꦠꦴ ꦄꦥ꧀ꦥꦠꦶꦱ꧀ꦱꦮꦠꦴ – ꦄꦪꦁ ꦮꦸꦕ꧀ꦕꦠꦶ ꦢꦺꦴꦮꦕꦱ꧀ꦱꦠꦴ. ꦆꦩꦴꦪ ꦢꦺꦴꦮꦕꦱ꧀ꦱꦠꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦢꦸꦧ꧀ꦧꦕꦺꦴ’’.

꧕꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦴꦥꦩꦶꦠ꧀ꦠꦺꦴ? ꦠꦠ꧀ꦡ ꦏꦠꦩꦴ ꦥꦴꦥꦩꦶꦠ꧀ꦠꦠꦴ? ꦪꦺ ꦠꦺ ꦥꦸꦒ꧀ꦒꦭꦴ ꦄꦱ꧀ꦱꦢ꧀ꦣꦴ ꦢꦸꦱ꧀ꦱꦷꦭꦴ ꦄꦥ꧀ꦥꦱ꧀ꦱꦸꦠꦴ ꦩꦕ꧀ꦖꦫꦶꦤꦺꦴ ꦢꦸꦥ꧀ꦥꦚ꧀ꦚꦴ, ꦪꦴ ꦠꦺꦱꦁ ꦱꦺꦮꦤꦴ ꦤꦶꦱꦺꦮꦤꦴ ꦱꦁꦱꦺꦮꦤꦴ ꦨꦗꦤꦴ ꦱꦩ꧀ꦨꦗꦤꦴ ꦨꦠ꧀ꦠꦶ ꦱꦩ꧀ꦨꦠ꧀ꦠꦶ ꦱꦩ꧀ꦥꦮꦔ꧀ꦏꦠꦴ – ꦄꦪꦁ ꦮꦸꦕ꧀ꦕꦠꦶ ꦥꦴꦥꦩꦶꦠ꧀ꦠꦠꦴ. ꦆꦩꦴꦪ ꦥꦴꦥꦩꦶꦠ꧀ꦠꦠꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦥꦴꦥꦩꦶꦠ꧀ꦠꦺꦴ’’.

꧕꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦺꦴ? ꦠꦠ꧀ꦡ ꦏꦠꦩꦴ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦠꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦕꦏ꧀ꦑꦸꦤꦴ ꦫꦹꦥꦁ ꦢꦶꦱ꧀ꦮꦴ ꦤꦶꦩꦶꦠ꧀ꦠꦒ꧀ꦒꦴꦲꦷ ꦲꦺꦴꦠꦶ ꦄꦤꦸꦧ꧀ꦪꦚ꧀ꦗꦤꦒ꧀ꦒꦴꦲꦷ; ꦪꦠ꧀ꦮꦴꦣꦶꦏꦫꦟꦩꦺꦤꦁ ꦕꦏ꧀ꦑꦸꦤ꧀ꦢ꧀ꦫꦶꦪꦁ ꦄꦱꦁꦮꦸꦠꦁ ꦮꦶꦲꦫꦤ꧀ꦠꦁ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤ꧀ꦮꦴꦱ꧀ꦱꦮꦺꦪ꧀ꦪꦸꦁ, ꦠꦱ꧀ꦱ ꦱꦁꦮꦫꦴꦪ ꦤ ꦥꦛꦶꦥꦗ꧀ꦗꦠꦶ, ꦤ ꦫꦏ꧀ꦑꦠꦶ ꦕꦏ꧀ꦑꦸꦤ꧀ꦢ꧀ꦫꦶꦪꦁ, ꦕꦏ꧀ꦑꦸꦤ꧀ꦢ꧀ꦫꦶꦪꦺ ꦤ ꦱꦁꦮꦫꦁ ꦄꦴꦥꦗ꧀ꦗꦠꦶ. ꦱꦺꦴꦠꦺꦤ ꦱꦢ꧀ꦢꦁ ꦱꦸꦠ꧀ꦮꦴ…ꦥꦺ… ꦓꦴꦤꦺꦤ ꦒꦤ꧀ꦣꦁ ꦓꦴꦪꦶꦠ꧀ꦮꦴ…ꦥꦺ… ꦗꦶꦮ꧀ꦲꦴꦪ ꦫꦱꦁ ꦱꦴꦪꦶꦠ꧀ꦮꦴ…ꦥꦺ… ꦏꦴꦪꦺꦤ ꦦꦺꦴꦛ꧀ꦜꦧ꧀ꦧꦁ ꦦꦸꦱꦶꦠ꧀ꦮꦴ…ꦥꦺ… ꦩꦤꦱꦴ ꦣꦩ꧀ꦩꦁ ꦮꦶꦚ꧀ꦚꦴꦪ ꦤꦶꦩꦶꦠ꧀ꦠꦒ꧀ꦒꦴꦲꦷ ꦲꦺꦴꦠꦶ ꦄꦤꦸꦧ꧀ꦪꦚ꧀ꦗꦤꦒ꧀ꦒꦴꦲꦷ; ꦪꦠ꧀ꦮꦴꦣꦶꦏꦫꦟꦩꦺꦤꦁ ꦩꦤꦶꦤ꧀ꦢ꧀ꦫꦶꦪꦁ ꦄꦱꦁꦮꦸꦠꦁ ꦮꦶꦲꦫꦤ꧀ꦠꦁ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤ꧀ꦮꦴꦱ꧀ꦱꦮꦺꦪ꧀ꦪꦸꦁ, ꦠꦱ꧀ꦱ ꦱꦁꦮꦫꦴꦪ ꦤ ꦥꦛꦶꦥꦗ꧀ꦗꦠꦶ, ꦤ ꦫꦏ꧀ꦑꦠꦶ ꦩꦤꦶꦤ꧀ꦢ꧀ꦫꦶꦪꦁ, ꦩꦤꦶꦤ꧀ꦢ꧀ꦫꦶꦪꦺ ꦤ ꦱꦁꦮꦫꦁ ꦄꦴꦥꦗ꧀ꦗꦠꦶ. ꦪꦴ ꦆꦩꦺꦱꦁ ꦖꦤ꧀ꦤꦁ ꦆꦤ꧀ꦢ꧀ꦫꦶꦪꦴꦤꦁ ꦄꦒꦸꦠ꧀ꦠꦶ ꦄꦒꦺꦴꦥꦤꦴ ꦄꦤꦴꦫꦏ꧀ꦑꦺꦴ ꦄꦱꦁꦮꦫꦺꦴ – ꦄꦪꦁ ꦮꦸꦕ꧀ꦕꦠꦶ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦠꦴ. ꦆꦩꦴꦪ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦠꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦺꦴ’’.

꧕꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦹ? ꦠꦠ꧀ꦡ ꦏꦠꦩꦴ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦸꦠꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦥ꧀ꦥꦛꦶꦱꦔ꧀ꦑꦴ ꦄꦪꦺꦴꦤꦶꦱꦺꦴ ꦄꦴꦲꦴꦫꦁ ꦄꦴꦲꦴꦫꦺꦠꦶ ꦢꦮꦴꦪ ꦩꦢꦴꦪ ꦩꦟ꧀ꦝꦤꦴꦪ ꦮꦶꦨꦹꦱꦤꦴꦪ, ꦪꦴ ꦠꦠ꧀ꦡ ꦄꦱꦤ꧀ꦠꦸꦛ꧀ꦜꦶꦠꦴ ꦄꦩꦠ꧀ꦠꦚ꧀ꦚꦸꦠꦴ ꦄꦥ꧀ꦥꦛꦶꦱꦔ꧀ꦑꦴ ꦨꦺꦴꦗꦤꦺ – ꦄꦪꦁ ꦮꦸꦕ꧀ꦕꦠꦶ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦸꦠꦴ. ꦆꦩꦴꦪ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦸꦠꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦹ’’.

꧕꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦩꦸꦛ꧀ꦜꦱ꧀ꦱꦠꦶ? ꦠꦠ꧀ꦡ ꦏꦠꦩꦁ ꦩꦸꦛ꧀ꦜꦱ꧀ꦱꦕ꧀ꦕꦁ? ꦪꦴ ꦄꦱ꧀ꦱꦠꦶ ꦄꦤꦤꦸꦱ꧀ꦱꦠꦶ ꦄꦥ꧀ꦥꦛꦶꦱ꧀ꦱꦠꦶ ꦄꦱ꧀ꦱꦠꦶ ꦄꦱ꧀ꦱꦫꦟꦠꦴ ꦄꦣꦴꦫꦟꦠꦴ ꦥꦶꦭꦴꦥꦤꦠꦴ ꦱꦩ꧀ꦩꦸꦱꦤꦠꦴ – ꦆꦢꦁ ꦮꦸꦕ꧀ꦕꦠꦶ ꦩꦸꦛ꧀ꦜꦱ꧀ꦱꦕ꧀ꦕꦁ. ꦆꦩꦶꦤꦴ ꦩꦸꦛ꧀ꦜꦱ꧀ꦱꦕ꧀ꦕꦺꦤ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦩꦸꦛ꧀ꦜꦱ꧀ꦱꦠꦶ’’.

꧖꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦱꦩ꧀ꦥꦗꦴꦤꦺꦴ? ꦠꦠ꧀ꦡ ꦏꦠꦩꦁ ꦄꦱꦩ꧀ꦥꦗꦚ꧀ꦚꦁ? ꦪꦁ ꦄꦚ꧀ꦚꦴꦟꦁ ꦄꦢꦱ꧀ꦱꦤꦁ ꦄꦤꦨꦶꦱꦩꦪꦺꦴ ꦄꦤꦤꦸꦧꦺꦴꦣꦺꦴ ꦄꦱꦩ꧀ꦧꦺꦴꦣꦺꦴ ꦄꦥ꧀ꦥꦛꦶꦮꦺꦣꦺꦴ ꦄꦱꦔ꧀ꦒꦴꦲꦟꦴ ꦄꦥꦫꦶꦪꦺꦴꦒꦴꦲꦟꦴ [ꦄꦱꦁꦒꦴꦲꦤꦴ ꦄꦥꦫꦶꦪꦺꦴꦒꦴꦲꦤꦴ (ꦱꦷ. ꦱ꧀ꦪꦴ. ꦏ.)] ꦄꦱꦩꦥꦺꦏ꧀ꦑꦟꦴ ꦄꦥꦕ꧀ꦕꦮꦺꦏ꧀ꦑꦟꦴ ꦄꦥꦕ꧀ꦕꦏ꧀ꦑꦏꦩ꧀ꦩꦁ ꦢꦸꦩ꧀ꦩꦺꦗ꧀ꦙꦁ ꦧꦴꦭ꧀ꦪꦁ ꦄꦱꦩ꧀ꦥꦗꦚ꧀ꦚꦁ ꦩꦺꦴꦲꦺꦴ ꦥꦩꦺꦴꦲꦺꦴ ꦱꦩ꧀ꦩꦺꦴꦲꦺꦴ ꦄꦮꦶꦗ꧀ꦗꦴ ꦄꦮꦶꦗ꧀ꦗꦺꦴꦓꦺꦴ ꦄꦮꦶꦗ꧀ꦗꦴꦪꦺꦴꦒꦺꦴ ꦄꦮꦶꦗ꧀ꦗꦴꦤꦸꦱꦪꦺꦴ ꦄꦮꦶꦗ꧀ꦗꦴꦥꦫꦶꦪꦸꦛ꧀ꦜꦴꦤꦁ ꦄꦮꦶꦗ꧀ꦗꦴꦭꦔ꧀ꦒꦷ ꦩꦺꦴꦲꦺꦴ ꦄꦏꦸꦱꦭꦩꦹꦭꦁ – ꦆꦢꦁ ꦮꦸꦕ꧀ꦕꦠꦶ ꦄꦱꦩ꧀ꦥꦗꦚ꧀ꦚꦁ. ꦆꦩꦶꦤꦴ ꦄꦱꦩ꧀ꦥꦗꦚ꧀ꦚꦺꦤ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦄꦱꦩ꧀ꦥꦗꦴꦤꦺꦴ’’.

꧖꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦷꦭꦮꦶꦥꦤ꧀ꦤꦺꦴ? ꦠꦠ꧀ꦡ ꦏꦠꦩꦴ ꦱꦷꦭꦮꦶꦥꦠ꧀ꦠꦶ? ꦏꦴꦪꦶꦏꦺꦴ ꦮꦷꦠꦶꦏ꧀ꦏꦩꦺꦴ ꦮꦴꦕꦱꦶꦏꦺꦴ ꦮꦷꦠꦶꦏ꧀ꦏꦩꦺꦴ ꦏꦴꦪꦶꦏꦮꦴꦕꦱꦶꦏꦺꦴ ꦮꦷꦠꦶꦏ꧀ꦏꦩꦺꦴ – ꦄꦪꦁ ꦮꦸꦕ꧀ꦕꦠꦶ ꦱꦷꦭꦮꦶꦥꦠ꧀ꦠꦶ. ꦱꦧ꧀ꦧꦩ꧀ꦥꦶ ꦢꦸꦱ꧀ꦱꦶꦭ꧀ꦪꦁ ꦱꦷꦭꦮꦶꦥꦠ꧀ꦠꦶ. ꦆꦩꦴꦪ ꦱꦷꦭꦮꦶꦥꦠ꧀ꦠꦶꦪꦴ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦱꦷꦭꦮꦶꦥꦤ꧀ꦤꦺꦴ’’.

꧖꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦢꦶꦛ꧀ꦜꦶꦮꦶꦥꦤ꧀ꦤꦺꦴ? ꦠꦠ꧀ꦡ ꦏꦠꦩꦴ ꦢꦶꦛ꧀ꦜꦶꦮꦶꦥꦠ꧀ꦠꦶ? ‘‘ꦤꦠ꧀ꦡꦶ ꦢꦶꦤ꧀ꦤꦁ, ꦤꦠ꧀ꦡꦶ ꦪꦶꦛ꧀ꦜꦁ, ꦤꦠ꧀ꦡꦶ ꦲꦸꦠꦁ, ꦤꦠ꧀ꦡꦶ ꦱꦸꦏꦠꦢꦸꦏ꧀ꦏꦛꦴꦤꦁ [ꦱꦸꦏꦛꦢꦸꦏ꧀ꦏꦛꦴꦤꦁ (ꦱꦷ.)] ꦏꦩ꧀ꦩꦴꦤꦁ ꦦꦭꦁ ꦮꦶꦥꦴꦏꦺꦴ, ꦤꦠ꧀ꦡꦶ ꦄꦪꦁ ꦭꦺꦴꦏꦺꦴ, ꦤꦠ꧀ꦡꦶ ꦥꦫꦺꦴ ꦭꦺꦴꦏꦺꦴ, ꦤꦠ꧀ꦡꦶ ꦩꦴꦠꦴ, ꦤꦠ꧀ꦡꦶ ꦥꦶꦠꦴ, ꦤꦠ꧀ꦡꦶ ꦱꦠ꧀ꦠꦴ ꦎꦥꦥꦴꦠꦶꦏꦴ, ꦤꦠ꧀ꦡꦶ ꦭꦺꦴꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦱꦩ꧀ꦩꦒ꧀ꦒꦠꦴ [ꦱꦩꦒ꧀ꦒꦠꦴ (ꦏ.)] ꦱꦩ꧀ꦩꦴꦥꦛꦶꦥꦤ꧀ꦤꦴ ꦪꦺ ꦆꦩꦚ꧀ꦕ ꦭꦺꦴꦏꦁ ꦥꦫꦚ꧀ꦕ ꦭꦺꦴꦏꦁ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦥꦮꦺꦢꦺꦤ꧀ꦠꦷ’’ꦠꦶ. ꦪꦴ ꦌꦮꦫꦹꦥꦴ ꦢꦶꦛ꧀ꦜꦶ ꦢꦶꦛ꧀ꦜꦶꦒꦠꦁ ꦢꦶꦛ꧀ꦜꦶꦒꦲꦤꦁ ꦢꦶꦛ꧀ꦜꦶꦏꦤ꧀ꦠꦴꦫꦺꦴ ꦢꦶꦛ꧀ꦜꦶꦮꦶꦱꦹꦏꦴꦪꦶꦏꦁ ꦢꦶꦛ꧀ꦜꦶꦮꦶꦥ꧀ꦦꦤ꧀ꦢꦶꦠꦁ ꦢꦶꦛ꧀ꦜꦶꦱꦁꦪꦺꦴꦗꦤꦁ ꦒꦴꦲꦺꦴ ꦥꦛꦶꦒ꧀ꦒꦴꦲꦺꦴ ꦄꦨꦶꦤꦶꦮꦺꦱꦺꦴ ꦥꦫꦴꦩꦴꦱꦺꦴ ꦏꦸꦩ꧀ꦩꦒ꧀ꦒꦺꦴ ꦩꦶꦕ꧀ꦖꦴꦥꦡꦺꦴ ꦩꦶꦕ꧀ꦖꦠ꧀ꦠꦁ ꦠꦶꦠ꧀ꦡꦴꦪꦠꦤꦁ ꦮꦶꦥꦫꦶꦪꦴꦱꦒ꧀ꦒꦴꦲꦺꦴ [ꦮꦶꦥꦫꦶꦪꦺꦱꦒ꧀ꦒꦴꦲꦺꦴ (ꦱꦧ꧀ꦧꦠ꧀ꦡ) ꦥꦢꦱꦶꦢ꧀ꦣꦶ ꦕꦶꦤ꧀ꦠꦺꦠꦧ꧀ꦧꦴ], ꦄꦪꦁ ꦮꦸꦕ꧀ꦕꦠꦶ ꦢꦶꦛ꧀ꦜꦶꦮꦶꦥꦠ꧀ꦠꦶ. ꦱꦧ꧀ꦧꦴꦥꦶ ꦩꦶꦕ꧀ꦖꦴꦢꦶꦛ꧀ꦜꦶ ꦢꦶꦛ꧀ꦜꦶꦮꦶꦥꦠ꧀ꦠꦶ. ꦆꦩꦴꦪ ꦢꦶꦛ꧀ꦜꦶꦮꦶꦥꦠ꧀ꦠꦶꦪꦴ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦢꦶꦛ꧀ꦜꦶꦮꦶꦥꦤ꧀ꦤꦺꦴ’’.

꧖꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦗ꧀ꦙꦠ꧀ꦠꦱꦁꦪꦺꦴꦗꦤꦺꦴ? ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦥꦚ꧀ꦕꦺꦴꦫꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ ꦄꦥ꧀ꦥꦲꦷꦤꦴꦤꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦗ꧀ꦙꦠ꧀ꦠꦱꦁꦪꦺꦴꦗꦤꦺꦴ’’.

꧖꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦧꦲꦶꦢ꧀ꦣꦴꦱꦁꦪꦺꦴꦗꦤꦺꦴ? ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦥꦚ꧀ꦕꦸꦢ꧀ꦣꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ ꦄꦥ꧀ꦥꦲꦷꦤꦴꦤꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦧꦲꦶꦢ꧀ꦣꦴꦱꦁꦪꦺꦴꦗꦤꦺꦴ’’.

꧖꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦏ꧀ꦏꦺꦴꦣꦤꦺꦴ? ꦠꦠ꧀ꦡ ꦏꦠꦩꦺꦴ ꦏꦺꦴꦣꦺꦴ? ꦪꦺꦴ ꦏꦺꦴꦣꦺꦴ ꦏꦸꦗ꧀ꦙꦤꦴ ꦏꦸꦗ꧀ꦙꦶꦠꦠ꧀ꦠꦁ ꦢꦺꦴꦱꦺꦴ ꦢꦸꦱ꧀ꦱꦤꦴ ꦢꦸꦱ꧀ꦱꦶꦠꦠ꧀ꦠꦁ ꦧ꧀ꦪꦴꦥꦠ꧀ꦠꦶ ꦧ꧀ꦪꦴꦥꦗ꧀ꦗꦤꦴ ꦧ꧀ꦪꦴꦥꦗ꧀ꦗꦶꦠꦠ꧀ꦠꦁ ꦮꦶꦫꦺꦴꦣꦺꦴ ꦥꦛꦶꦮꦶꦫꦺꦴꦣꦺꦴ ꦕꦟ꧀ꦝꦶꦏ꧀ꦏꦁ ꦄꦱꦸꦫꦺꦴꦥꦺꦴ ꦄꦤꦠ꧀ꦠꦩꦤꦠꦴ ꦕꦶꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ꦏꦺꦴꦣꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦏꦺꦴꦣꦺꦴ ꦥꦲꦷꦤꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦏ꧀ꦏꦺꦴꦣꦤꦺꦴ’’.

꧖꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦤꦸꦥꦤꦴꦲꦷ? ꦠꦠ꧀ꦡ ꦏꦠꦩꦺꦴ ꦈꦥꦤꦴꦲꦺꦴ? ꦥꦸꦧ꧀ꦧꦏꦴꦭꦁ ꦏꦺꦴꦣꦺꦴ ꦄꦥꦫꦏꦴꦭꦁ ꦈꦥꦤꦴꦲꦺꦴ ꦪꦺꦴ ꦌꦮꦫꦹꦥꦺꦴ ꦈꦥꦤꦴꦲꦺꦴ ꦈꦥꦤꦪ꧀ꦲꦤꦴ ꦈꦥꦤꦪ꧀ꦲꦶꦠꦠ꧀ꦠꦁ ꦄꦛ꧀ꦜꦥꦤꦴ ꦜꦥꦤꦴ ꦱꦟ꧀ꦜꦥꦤꦴ ꦄꦤꦸꦱꦁꦱꦤ꧀ꦢꦤꦴ ꦄꦤꦸꦥ꧀ꦥꦧꦤ꧀ꦣꦤꦴ ꦢꦭ꦳꧀ꦲꦷꦏꦩ꧀ꦩꦁ ꦏꦺꦴꦣꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ꦈꦥꦤꦴꦲꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦈꦥꦤꦴꦲꦺꦴ ꦥꦲꦷꦤꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦤꦸꦥꦤꦴꦲꦷ’’.

꧖꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦩꦏ꧀ꦑꦷ? ꦠꦠ꧀ꦡ ꦏꦠꦩꦺꦴ ꦩꦏ꧀ꦑꦺꦴ? ꦪꦺꦴ ꦩꦏ꧀ꦑꦺꦴ ꦩꦏ꧀ꦑꦴꦪꦤꦴ ꦩꦏ꧀ꦑꦴꦪꦶꦠꦠ꧀ꦠꦁ ꦤꦶꦛ꧀ꦜꦸꦫꦶꦪꦁ ꦤꦶꦛ꧀ꦜꦸꦫꦶꦪꦏꦩ꧀ꦩꦁ – ꦄꦪꦁ ꦮꦸꦕ꧀ꦕꦠꦶ ꦩꦏ꧀ꦑꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦩꦏ꧀ꦑꦺꦴ ꦥꦲꦷꦤꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦩꦏ꧀ꦑꦷ’’.

꧖꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦥꦭ꦳ꦴꦱꦷ? ꦠꦠ꧀ꦡ ꦏꦠꦩꦺꦴ ꦥꦭ꦳ꦴꦱꦺꦴ? ꦪꦺꦴ ꦥꦭ꦳ꦴꦱꦺꦴ ꦥꦭ꦳ꦴꦱꦴꦪꦤꦴ ꦥꦭ꦳ꦴꦱꦴꦪꦶꦠꦠ꧀ꦠꦁ ꦥꦭ꦳ꦴꦱꦴꦲꦴꦫꦺꦴ ꦮꦶꦮꦴꦢꦛ꧀ꦜꦴꦤꦁ ꦪꦸꦒꦒ꧀ꦒꦴꦲꦺꦴ ꦄꦥ꧀ꦥꦛꦶꦤꦶꦱ꧀ꦱꦒ꧀ꦒꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦭ꦳ꦴꦱꦺꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦥꦭ꦳ꦴꦱꦺꦴ ꦥꦲꦷꦤꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦥꦭ꦳ꦴꦱꦷ’’.

꧖꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦤꦶꦱ꧀ꦱꦸꦏꦷ? ꦠꦠ꧀ꦡ ꦏꦠꦩꦴ ꦆꦱ꧀ꦱꦴ? ꦪꦴ ꦥꦫꦭꦴꦨꦱꦏ꧀ꦏꦴꦫꦒꦫꦸꦏꦴꦫꦩꦴꦤꦤꦮꦤ꧀ꦢꦤꦥꦹꦗꦤꦴꦱꦸ ꦆꦱ꧀ꦱꦴ ꦆꦱ꧀ꦱꦴꦪꦤꦴ ꦆꦱ꧀ꦱꦴꦪꦶꦠꦠ꧀ꦠꦁ ꦈꦱꦹꦪꦴ ꦈꦱꦹꦪꦤꦴ ꦈꦱꦹꦪꦶꦠꦠ꧀ꦠꦁ – ꦄꦪꦁ ꦮꦸꦕ꧀ꦕꦠꦶ ꦆꦱ꧀ꦱꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦆꦱ꧀ꦱꦴ ꦥꦲꦷꦤꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦤꦶꦱ꧀ꦱꦸꦏꦷ’’.

꧗꧐. ꦏꦠꦩꦺꦴ ꦕ ꦥꦸꦒꦭꦺꦴ ꦄꦩꦕ꧀ꦖꦫꦷ? ꦠꦠ꧀ꦡ ꦏꦠꦩꦁ ꦩꦕ꧀ꦖꦫꦶꦪꦁ? ꦥꦚ꧀ꦕ ꦩꦕ꧀ꦖꦫꦶꦪꦴꦤꦶ – ꦄꦴꦮꦴꦱꦩꦕ꧀ꦖꦫꦶꦪꦁ, ꦏꦸꦭꦩꦕ꧀ꦖꦫꦶꦪꦁ, ꦭꦴꦨꦩꦕ꧀ꦖꦫꦶꦪꦁ, ꦮꦟ꧀ꦟꦩꦕ꧀ꦖꦫꦶꦪꦁ, ꦣꦩ꧀ꦩꦩꦕ꧀ꦖꦫꦶꦪꦁ. ꦪꦁ ꦌꦮꦫꦹꦥꦁ ꦩꦕ꧀ꦖꦺꦫꦁ ꦩꦕ꧀ꦖꦫꦴꦪꦤꦴ ꦩꦕ꧀ꦖꦫꦴꦪꦶꦠꦠ꧀ꦠꦁ ꦮꦺꦮꦶꦕ꧀ꦖꦁ ꦏꦢꦫꦶꦪꦁ ꦏꦛꦸꦏꦚ꧀ꦕꦸꦏꦠꦴ ꦄꦒ꧀ꦒꦲꦶꦠꦠ꧀ꦠꦁ ꦕꦶꦠ꧀ꦠꦱ꧀ꦱ – ꦆꦢꦁ ꦮꦸꦕ꧀ꦕꦠꦶ ꦩꦕ꧀ꦖꦫꦶꦪꦁ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦆꦢꦁ ꦩꦕ꧀ꦖꦫꦶꦪꦁ ꦥꦲꦷꦤꦁ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦩꦕ꧀ꦖꦫꦷ’’.

꧗꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦱꦜꦺꦴ? ꦠꦠ꧀ꦡ ꦏꦠꦩꦁ ꦱꦴꦜꦺꦪ꧀ꦪꦁ? ꦆꦣꦺꦏꦕ꧀ꦕꦺꦴ ꦱꦜꦺꦴ ꦲꦺꦴꦠꦶ ꦥꦫꦶꦱꦜꦺꦴ. ꦪꦁ ꦠꦠ꧀ꦡ ꦱꦜꦁ ꦱꦜꦠꦴ ꦱꦴꦜꦺꦪ꧀ꦪꦁ ꦏꦏ꧀ꦏꦫꦠꦴ ꦏꦏ꧀ꦏꦫꦶꦪꦁ ꦥꦫꦶꦏ꧀ꦑꦠ꧀ꦠꦠꦴ ꦥꦴꦫꦶꦏ꧀ꦑꦠ꧀ꦠꦶꦪꦁ – ꦆꦢꦁ ꦮꦸꦕ꧀ꦕꦠꦶ ꦱꦴꦜꦺꦪ꧀ꦪꦁ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦆꦢꦁ ꦱꦴꦜꦺꦪ꧀ꦪꦁ ꦥꦲꦷꦤꦁ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦱꦜꦺꦴ’’.

꧗꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦩꦴꦪꦴꦮꦷ? ꦠꦠ꧀ꦡ ꦏꦠꦩꦴ ꦩꦴꦪꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦏꦴꦪꦺꦤ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦮꦴꦕꦴꦪ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦩꦤꦱꦴ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦠꦱ꧀ꦱ ꦥꦛꦶꦕ꧀ꦖꦴꦢꦤꦲꦺꦠꦸ ꦥꦴꦥꦶꦏꦁ ꦆꦕ꧀ꦖꦁ ꦥꦟꦶꦢꦲꦠꦶ – ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦆꦕ꧀ꦖꦠꦶ, ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦱꦔ꧀ꦏꦥ꧀ꦥꦠꦶ, ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦮꦴꦕꦁ ꦨꦴꦱꦠꦶ, ‘‘ꦩꦴ ꦩꦁ ꦗꦚ꧀ꦚꦴ’’ꦠꦶ ꦏꦴꦪꦺꦤ ꦥꦫꦏ꧀ꦏꦩꦠꦶ. ꦪꦴ ꦌꦮꦫꦹꦥꦴ ꦩꦴꦪꦴ ꦩꦴꦪꦴꦮꦶꦠꦴ ꦄꦕ꧀ꦕꦴꦱꦫꦴ ꦮꦚ꧀ꦕꦤꦴ ꦤꦶꦏꦠꦶ ꦮꦶꦏꦶꦫꦟꦴ ꦥꦫꦶꦲꦫꦟꦴ ꦒꦹꦲꦤꦴ ꦥꦫꦶꦒꦹꦲꦤꦴ ꦖꦴꦢꦤꦴ ꦥꦛꦶꦕ꧀ꦖꦴꦢꦤꦴ ꦄꦤꦸꦠ꧀ꦠꦴꦤꦷꦏꦩ꧀ꦩꦁ ꦄꦤꦴꦮꦶꦏꦩ꧀ꦩꦁ ꦮꦺꦴꦕ꧀ꦖꦴꦢꦤꦴ ꦥꦴꦥꦏꦶꦫꦶꦪꦴ – ꦄꦪꦁ ꦮꦸꦕ꧀ꦕꦠꦶ ꦩꦴꦪꦴ. ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦪꦁ ꦩꦴꦪꦴ ꦥꦲꦷꦤꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦩꦴꦪꦴꦮꦷ’’.

꧗꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦲꦶꦫꦶꦩꦴ? ꦠꦠ꧀ꦡ ꦏꦠꦩꦴ ꦲꦶꦫꦷ? ꦪꦁ ꦲꦶꦫꦷꦪꦠꦶ ꦲꦶꦫꦶꦪꦶꦠꦧ꧀ꦧꦺꦤ ꦲꦶꦫꦷꦪꦠꦶ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦱꦩꦴꦥꦠ꧀ꦠꦶꦪꦴ – ꦄꦪꦁ ꦮꦸꦕ꧀ꦕꦠꦶ ꦲꦶꦫꦷ. ꦆꦩꦴꦪ ꦲꦶꦫꦶꦪꦴ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦲꦶꦫꦶꦩꦴ’’.

꧗꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦎꦠ꧀ꦠꦥ꧀ꦥꦷ? ꦠꦠ꧀ꦡ ꦏꦠꦩꦁ ꦎꦠ꧀ꦠꦥ꧀ꦥꦁ? ꦪꦁ ꦎꦠ꧀ꦠꦥ꧀ꦥꦠꦶ ꦎꦠ꧀ꦠꦥ꧀ꦥꦶꦠꦧ꧀ꦧꦺꦤ ꦎꦠ꧀ꦠꦥ꧀ꦥꦠꦶ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦱꦩꦴꦥꦠ꧀ꦠꦶꦪꦴ – ꦆꦢꦁ ꦮꦸꦕ꧀ꦕꦠꦶ ꦎꦠ꧀ꦠꦥ꧀ꦥꦁ. ꦆꦩꦶꦤꦴ ꦎꦠ꧀ꦠꦥ꧀ꦥꦺꦤ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦎꦠ꧀ꦠꦥ꧀ꦥꦷ’’.

꧗꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦸꦮꦕꦺꦴ? ꦠꦠ꧀ꦡ ꦏꦠꦩꦴ ꦱꦺꦴꦮꦕꦱ꧀ꦱꦠꦴ? ꦱꦲꦣꦩ꧀ꦩꦶꦏꦺ ꦮꦸꦕ꧀ꦕꦩꦴꦤꦺ ꦱꦺꦴꦮꦕꦱ꧀ꦱꦴꦪꦁ ꦱꦺꦴꦮꦕꦱ꧀ꦱꦶꦪꦁ ꦱꦺꦴꦮꦕꦱ꧀ꦱꦠꦴ ꦄꦮꦶꦥ꧀ꦥꦛꦶꦏꦸꦭꦒ꧀ꦒꦴꦲꦶꦠꦴ ꦄꦮꦶꦥꦕ꧀ꦕꦤꦷꦏꦱꦴꦠꦠꦴ ꦱꦴꦢꦫꦶꦪꦁ ꦱꦴꦢꦫꦶꦪꦠꦴ ꦱꦒꦴꦫꦮꦠꦴ ꦱꦥ꧀ꦥꦠꦶꦱ꧀ꦱꦮꦠꦴ – ꦄꦪꦁ ꦮꦸꦕ꧀ꦕꦠꦶ ꦱꦺꦴꦮꦕꦱ꧀ꦱꦠꦴ. ꦆꦩꦴꦪ ꦱꦺꦴꦮꦕꦱ꧀ꦱꦠꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦱꦸꦮꦕꦺꦴ’’.

꧗꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦏꦭ꧀ꦪꦴꦟꦩꦶꦠ꧀ꦠꦺꦴ? ꦠꦠ꧀ꦡ ꦏꦠꦩꦴ ꦏꦭ꧀ꦪꦴꦟꦩꦶꦠ꧀ꦠꦠꦴ? ꦪꦺ ꦠꦺ ꦥꦸꦒ꧀ꦒꦭꦴ ꦱꦢ꧀ꦣꦴ ꦱꦷꦭꦮꦤ꧀ꦠꦺꦴ ꦧꦲꦸꦱ꧀ꦱꦸꦠꦴ ꦕꦴꦒꦮꦤ꧀ꦠꦺꦴ ꦥꦚ꧀ꦚꦮꦤ꧀ꦠꦺꦴ, ꦪꦴ ꦠꦺꦱꦁ ꦱꦺꦮꦤꦴ ꦤꦶꦱꦺꦮꦤꦴ ꦱꦁꦱꦺꦮꦤꦴ ꦨꦗꦤꦴ ꦱꦩ꧀ꦨꦗꦤꦴ ꦨꦠ꧀ꦠꦶ ꦱꦩ꧀ꦨꦠ꧀ꦠꦶ ꦱꦩ꧀ꦥꦮꦔ꧀ꦏꦠꦴ – ꦄꦪꦁ ꦮꦸꦕ꧀ꦕꦠꦶ ꦏꦭ꧀ꦪꦴꦟꦩꦶꦠ꧀ꦠꦠꦴ. ꦆꦩꦴꦪ ꦏꦭ꧀ꦪꦴꦟꦩꦶꦠ꧀ꦠꦠꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦏꦭ꧀ꦪꦴꦟꦩꦶꦠ꧀ꦠꦺꦴ’’.

꧗꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦺꦴ? ꦠꦠ꧀ꦡ ꦏꦠꦩꦴ ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦠꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦕꦏ꧀ꦑꦸꦤꦴ ꦫꦹꦥꦁ ꦢꦶꦱ꧀ꦮꦴ ꦤ ꦤꦶꦩꦶꦠ꧀ꦠꦒ꧀ꦒꦴꦲꦷ ꦲꦺꦴꦠꦶ ꦤꦴꦤꦸꦧ꧀ꦪꦚ꧀ꦗꦤꦒ꧀ꦒꦴꦲꦷ; ꦪꦠ꧀ꦮꦴꦣꦶꦏꦫꦟꦩꦺꦤꦁ ꦕꦏ꧀ꦑꦸꦤ꧀ꦢ꧀ꦫꦶꦪꦁ ꦄꦱꦁꦮꦸꦠꦁ ꦮꦶꦲꦫꦤ꧀ꦠꦁ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤ꧀ꦮꦴꦱ꧀ꦱꦮꦺꦪ꧀ꦪꦸꦁ, ꦠꦱ꧀ꦱ ꦱꦁꦮꦫꦴꦪ ꦥꦛꦶꦥꦗ꧀ꦗꦠꦶ, ꦫꦏ꧀ꦑꦠꦶ ꦕꦏ꧀ꦑꦸꦤ꧀ꦢ꧀ꦫꦶꦪꦁ ꦕꦏ꧀ꦑꦸꦤ꧀ꦢ꧀ꦫꦶꦪꦺ ꦱꦁꦮꦫꦁ ꦄꦴꦥꦗ꧀ꦗꦠꦶ. ꦱꦺꦴꦠꦺꦤ ꦱꦢ꧀ꦢꦁ ꦱꦸꦠ꧀ꦮꦴ…ꦥꦺ… ꦓꦴꦤꦺꦤ ꦒꦤ꧀ꦣꦁ ꦓꦴꦪꦶꦠ꧀ꦮꦴ…ꦥꦺ… ꦗꦶꦮ꧀ꦲꦴꦪ ꦫꦱꦁ ꦱꦴꦪꦶꦠ꧀ꦮꦴ…ꦥꦺ… ꦏꦴꦪꦺꦤ ꦦꦺꦴꦛ꧀ꦜꦧ꧀ꦧꦁ ꦦꦸꦱꦶꦠ꧀ꦮꦴ…ꦥꦺ… ꦩꦤꦱꦴ ꦣꦩ꧀ꦩꦁ ꦮꦶꦚ꧀ꦚꦴꦪ ꦤ ꦤꦶꦩꦶꦠ꧀ꦠꦒ꧀ꦒꦴꦲꦷ ꦲꦺꦴꦠꦶ ꦤꦴꦤꦸꦧ꧀ꦪꦚ꧀ꦗꦤꦒ꧀ꦒꦴꦲꦷ; ꦪꦠ꧀ꦮꦴꦣꦶꦏꦫꦟꦩꦺꦤꦁ ꦩꦤꦶꦤ꧀ꦢ꧀ꦫꦶꦪꦁ ꦄꦱꦁꦮꦸꦠꦁ ꦮꦶꦲꦫꦤ꧀ꦠꦁ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤ꧀ꦮꦴꦱ꧀ꦱꦮꦺꦪ꧀ꦪꦸꦁ, ꦠꦱ꧀ꦱ ꦱꦁꦮꦫꦴꦪ ꦥꦛꦶꦥꦗ꧀ꦗꦠꦶ, ꦫꦏ꧀ꦑꦠꦶ ꦩꦤꦶꦤ꧀ꦢ꧀ꦫꦶꦪꦁ, ꦩꦤꦶꦤ꧀ꦢ꧀ꦫꦶꦪꦺ ꦱꦁꦮꦫꦁ ꦄꦴꦥꦗ꧀ꦗꦠꦶ. ꦪꦴ ꦆꦩꦺꦱꦁ ꦖꦤ꧀ꦤꦁ ꦆꦤ꧀ꦢ꧀ꦫꦶꦪꦴꦤꦁ ꦒꦸꦠ꧀ꦠꦶ ꦒꦺꦴꦥꦤꦴ ꦄꦴꦫꦏ꧀ꦑꦺꦴ ꦱꦁꦮꦫꦺꦴ – ꦄꦪꦁ ꦮꦸꦕ꧀ꦕꦠꦶ ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦠꦴ. ꦆꦩꦴꦪ ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦠꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦺꦴ’’.

꧗꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦨꦺꦴꦗꦤꦺ ꦩꦠ꧀ꦠꦚ꧀ꦚꦹ? ꦠꦠ꧀ꦡ ꦏꦠꦩꦴ ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦠꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦄꦴꦲꦴꦫꦁ ꦄꦴꦲꦴꦫꦺꦠꦶ – ‘‘ꦤꦺꦮ ꦢꦮꦴꦪ, ꦤ ꦩꦢꦴꦪ, ꦤ ꦩꦟ꧀ꦝꦤꦴꦪ, ꦤ ꦮꦶꦨꦹꦱꦤꦴꦪ; ꦪꦴꦮꦢꦺꦮ ꦆꦩꦱ꧀ꦱ ꦏꦴꦪꦱ꧀ꦱ ꦜꦶꦠꦶꦪꦴ ꦪꦴꦥꦤꦴꦪ ꦮꦶꦲꦶꦁꦱꦹꦥꦫꦠꦶꦪꦴ ꦧ꧀ꦫꦲ꧀ꦩꦕꦫꦶꦪꦴꦤꦸꦒ꧀ꦒꦲꦴꦪ. ꦆꦠꦶ ꦥꦸꦫꦴꦟꦚ꧀ꦕ ꦮꦺꦢꦤꦁ ꦥꦛꦶꦲꦔ꧀ꦑꦴꦩꦶ, ꦤꦮꦚ꧀ꦕ ꦮꦺꦢꦤꦁ ꦤ ꦈꦥ꧀ꦥꦴꦢꦺꦱ꧀ꦱꦴꦩꦶ, ꦪꦴꦠ꧀ꦫꦴ ꦕ ꦩꦺ ꦨꦮꦶꦱ꧀ꦱꦠꦶ ꦄꦤꦮꦗ꧀ꦗꦠꦴ ꦕ ꦦꦴꦱꦸꦮꦶꦲꦴꦫꦺꦴ ꦕꦴ’’ꦠꦶ. ꦪꦴ ꦠꦠ꧀ꦡ ꦱꦤ꧀ꦠꦸꦛ꧀ꦜꦶꦠꦴ ꦩꦠ꧀ꦠꦚ꧀ꦚꦸꦠꦴ ꦥꦛꦶꦱꦔ꧀ꦑꦴ ꦨꦺꦴꦗꦤꦺ – ꦄꦪꦁ ꦮꦸꦕ꧀ꦕꦠꦶ ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦠꦴ. ꦆꦩꦴꦪ ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦠꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦨꦺꦴꦗꦤꦺ ꦩꦠ꧀ꦠꦚ꧀ꦚꦹ’’.

꧗꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦈꦥꦛ꧀ꦜꦶꦠꦱ꧀ꦱꦠꦶ? ꦠꦠ꧀ꦡ ꦏꦠꦩꦴ ꦱꦠꦶ? ꦪꦴ ꦱꦠꦶ ꦄꦤꦸꦱ꧀ꦱꦠꦶ ꦥꦛꦶꦱ꧀ꦱꦠꦶ ꦱꦠꦶ ꦱꦫꦟꦠꦴ ꦣꦴꦫꦟꦠꦴ ꦄꦥꦶꦭꦴꦥꦤꦠꦴ ꦄꦱꦩ꧀ꦩꦸꦱꦤꦠꦴ ꦱꦠꦶ ꦱꦠꦶꦤ꧀ꦢ꧀ꦫꦶꦪꦁ ꦱꦠꦶꦧꦭꦁ ꦱꦩ꧀ꦩꦴꦱꦠꦶ – ꦄꦪꦁ ꦮꦸꦕ꧀ꦕꦠꦶ ꦱꦠꦶ. ꦆꦩꦴꦪ ꦱꦠꦶꦪꦴ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦈꦥꦛ꧀ꦜꦶꦠꦱ꧀ꦱꦠꦶ’’.

꧘꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦩ꧀ꦥꦗꦴꦤꦺꦴ? ꦠꦠ꧀ꦡ ꦏꦠꦩꦁ ꦱꦩ꧀ꦥꦗꦚ꧀ꦚꦁ? ꦪꦴ ꦥꦚ꧀ꦚꦴ ꦥꦗꦴꦤꦤꦴ ꦮꦶꦕꦪꦺꦴ ꦥꦮꦶꦕꦪꦺꦴ ꦣꦩ꧀ꦩꦮꦶꦕꦪꦺꦴ ꦱꦭ꧀ꦭꦏ꧀ꦑꦟꦴ ꦈꦥꦭꦏ꧀ꦑꦟꦴ ꦥꦕ꧀ꦕꦸꦥꦭꦏ꧀ꦑꦟꦴ ꦥꦟ꧀ꦝꦶꦕ꧀ꦕꦁ ꦏꦺꦴꦱꦭ꧀ꦭꦁ ꦤꦺꦥꦸꦚ꧀ꦚꦁ ꦮꦺꦨꦧ꧀ꦪꦴ ꦕꦶꦤ꧀ꦠꦴ ꦈꦥꦥꦫꦶꦏ꧀ꦑꦴ ꦨꦹꦫꦷ ꦩꦺꦣꦴ ꦥꦫꦶꦟꦴꦪꦶꦏꦴ ꦮꦶꦥꦱ꧀ꦱꦤꦴ ꦱꦩ꧀ꦥꦗꦚ꧀ꦚꦁ ꦥꦠꦺꦴꦢꦺꦴ ꦥꦚ꧀ꦚꦴ ꦥꦚ꧀ꦚꦶꦤ꧀ꦢ꧀ꦫꦶꦪꦁ ꦥꦚ꧀ꦚꦴꦧꦭꦁ ꦥꦚ꧀ꦚꦴꦱꦠ꧀ꦡꦁ ꦥꦚ꧀ꦚꦴꦥꦴꦱꦴꦢꦺꦴ ꦥꦚ꧀ꦚꦴꦄꦴꦭꦺꦴꦏꦺꦴ ꦥꦚ꧀ꦚꦴꦎꦨꦴꦱꦺꦴ ꦥꦚ꧀ꦚꦴꦥꦗ꧀ꦗꦺꦴꦠꦺꦴ ꦥꦚ꧀ꦚꦴꦫꦠꦤꦁ ꦄꦩꦺꦴꦲꦺꦴ ꦣꦩ꧀ꦩꦮꦶꦕꦪꦺꦴ ꦱꦩ꧀ꦩꦴꦢꦶꦛ꧀ꦜꦶ – ꦆꦢꦁ ꦮꦸꦕ꧀ꦕꦠꦶ ꦱꦩ꧀ꦥꦗꦚ꧀ꦚꦁ. ꦆꦩꦶꦤꦴ ꦱꦩ꧀ꦥꦗꦚ꧀ꦚꦺꦤ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦱꦩ꧀ꦥꦗꦴꦤꦺꦴ’’.

꧘꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦷꦭꦱꦩ꧀ꦥꦤ꧀ꦤꦺꦴ? ꦠꦠ꧀ꦡ ꦏꦠꦩꦴ ꦱꦷꦭꦱꦩ꧀ꦥꦢꦴ? ꦏꦴꦪꦶꦏꦺꦴ ꦄꦮꦷꦠꦶꦏ꧀ꦏꦩꦺꦴ ꦮꦴꦕꦱꦶꦏꦺꦴ ꦄꦮꦷꦠꦶꦏ꧀ꦏꦩꦺꦴ ꦏꦴꦪꦶꦏꦮꦴꦕꦱꦶꦏꦺꦴ ꦄꦮꦷꦠꦶꦏ꧀ꦏꦩꦺꦴ – ꦄꦪꦁ ꦮꦸꦕ꧀ꦕꦠꦶ ꦱꦷꦭꦱꦩ꧀ꦥꦢꦴ. ꦱꦧ꧀ꦧꦺꦴꦥꦶ ꦱꦷꦭꦱꦁꦮꦫꦺꦴ ꦱꦷꦭꦱꦩ꧀ꦥꦢꦴ. ꦆꦩꦴꦪ ꦱꦷꦭꦱꦩ꧀ꦥꦢꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦱꦷꦭꦱꦩ꧀ꦥꦤ꧀ꦤꦺꦴ’’.

꧘꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦢꦶꦛ꧀ꦜꦶꦱꦩ꧀ꦥꦤ꧀ꦤꦺꦴ? ꦠꦠ꧀ꦡ ꦏꦠꦩꦴ ꦢꦶꦛ꧀ꦜꦶꦱꦩ꧀ꦥꦢꦴ? ‘‘ꦄꦠ꧀ꦡꦶ ꦢꦶꦤ꧀ꦤꦁ, ꦄꦠ꧀ꦡꦶ ꦪꦶꦛ꧀ꦜꦁ, ꦄꦠ꧀ꦡꦶ ꦲꦸꦠꦁ, ꦄꦠ꧀ꦡꦶ ꦱꦸꦏꦠꦢꦸꦏ꧀ꦏꦛꦴꦤꦁ ꦏꦩ꧀ꦩꦴꦤꦁ ꦦꦭꦁ ꦮꦶꦥꦴꦏꦺꦴ, ꦄꦠ꧀ꦡꦶ ꦄꦪꦁ ꦭꦺꦴꦏꦺꦴ, ꦄꦠ꧀ꦡꦶ ꦥꦫꦺꦴ ꦭꦺꦴꦏꦺꦴ, ꦄꦠ꧀ꦡꦶ ꦩꦴꦠꦴ, ꦄꦠ꧀ꦡꦶ ꦥꦶꦠꦴ, ꦄꦠ꧀ꦡꦶ ꦱꦠ꧀ꦠꦴ ꦎꦥꦥꦴꦠꦶꦏꦴ, ꦄꦠ꧀ꦡꦶ ꦭꦺꦴꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦱꦩ꧀ꦩꦒ꧀ꦒꦠꦴ ꦱꦩ꧀ꦩꦴꦥꦛꦶꦥꦤ꧀ꦤꦴ ꦪꦺ ꦆꦩꦚ꧀ꦕ ꦭꦺꦴꦏꦁ ꦥꦫꦚ꧀ꦕ ꦭꦺꦴꦏꦁ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦥꦮꦺꦢꦺꦤ꧀ꦠꦷ’’ꦠꦶ. ꦪꦴ ꦌꦮꦫꦹꦥꦴ ꦥꦚ꧀ꦚꦴ ꦥꦗꦴꦤꦤꦴ…ꦥꦺ… ꦄꦩꦺꦴꦲꦺꦴ ꦣꦩ꧀ꦩꦮꦶꦕꦪꦺꦴ ꦱꦩ꧀ꦩꦴꦢꦶꦛ꧀ꦜꦶ – ꦄꦪꦁ ꦮꦸꦕ꧀ꦕꦠꦶ ꦢꦶꦛ꧀ꦜꦶꦱꦩ꧀ꦥꦢꦴ. ꦱꦧ꧀ꦧꦴꦥꦶ ꦱꦩ꧀ꦩꦴꦢꦶꦛ꧀ꦜꦶ ꦢꦶꦛ꧀ꦜꦶꦱꦩ꧀ꦥꦢꦴ. ꦆꦩꦴꦪ ꦢꦶꦛ꧀ꦜꦶꦱꦩ꧀ꦥꦢꦴꦪ ꦱꦩꦤ꧀ꦤꦴꦒꦠꦺꦴ ꦥꦸꦒ꧀ꦒꦭꦺꦴ ‘‘ꦢꦶꦛ꧀ꦜꦶꦱꦩ꧀ꦥꦤ꧀ꦤꦺꦴ’’.

꧘꧓. ꦏꦠꦩꦺ ꦢ꧀ꦮꦺ ꦥꦸꦒ꧀ꦒꦭꦴ ꦢꦸꦭ꧀ꦭꦨꦴ ꦭꦺꦴꦏꦱ꧀ꦩꦶꦁ? ꦪꦺꦴ ꦕ ꦥꦸꦧ꧀ꦧꦏꦴꦫꦷ, ꦪꦺꦴ ꦕ ꦏꦠꦚ꧀ꦚꦹ ꦏꦠꦮꦺꦢꦷ – ꦆꦩꦺ ꦢ꧀ꦮꦺ ꦥꦸꦒ꧀ꦒꦭꦴ ꦢꦸꦭ꧀ꦭꦨꦴ ꦭꦺꦴꦏꦱ꧀ꦩꦶꦁ.

꧘꧔. ꦏꦠꦩꦺ ꦢ꧀ꦮꦺ ꦥꦸꦒ꧀ꦒꦭꦴ ꦢꦸꦠ꧀ꦠꦥ꧀ꦥꦪꦴ? ꦪꦺꦴ ꦕ ꦭꦢ꧀ꦣꦁ ꦭꦢ꧀ꦣꦁ ꦤꦶꦏ꧀ꦑꦶꦥꦠꦶ, ꦪꦺꦴ ꦕ ꦭꦢ꧀ꦣꦁ ꦭꦢ꧀ꦣꦁ ꦮꦶꦱ꧀ꦱꦗ꧀ꦗꦺꦠꦶ – ꦆꦩꦺ ꦢ꧀ꦮꦺ ꦥꦸꦒ꧀ꦒꦭꦴ ‘‘ꦢꦸꦠ꧀ꦠꦥ꧀ꦥꦪꦴ’’.

꧘꧕. ꦏꦠꦩꦺ ꦢ꧀ꦮꦺ ꦥꦸꦒ꧀ꦒꦭꦴ ꦱꦸꦠꦥ꧀ꦥꦪꦴ? ꦪꦺꦴ ꦕ ꦭꦢ꧀ꦣꦁ ꦭꦢ꧀ꦣꦁ ꦤ ꦤꦶꦏ꧀ꦑꦶꦥꦠꦶ, ꦪꦺꦴ ꦕ ꦭꦢ꧀ꦣꦁ ꦭꦢ꧀ꦣꦁ ꦤ ꦮꦶꦱ꧀ꦱꦗ꧀ꦗꦺꦠꦶ – ꦆꦩꦺ ꦢ꧀ꦮꦺ ꦥꦸꦒ꧀ꦒꦭꦴ ‘‘ꦱꦸꦠꦥ꧀ꦥꦪꦴ’’.

꧘꧖. ꦏꦠꦩꦺꦱꦁ ꦢ꧀ꦮꦶꦤ꧀ꦤꦁ ꦥꦸꦒ꧀ꦒꦭꦴꦤꦁ ꦄꦴꦱꦮꦴ ꦮꦝ꧀ꦞꦤ꧀ꦠꦶ? ꦪꦺꦴ ꦕ ꦤ ꦏꦸꦏ꧀ꦏꦸꦕ꧀ꦕꦴꦪꦶꦠꦧ꧀ꦧꦁ ꦏꦸꦏ꧀ꦏꦸꦕ꧀ꦕꦴꦪꦠꦶ, ꦪꦺꦴ ꦕ ꦏꦸꦏ꧀ꦏꦸꦕ꧀ꦕꦴꦪꦶꦠꦧ꧀ꦧꦁ ꦤ ꦏꦸꦏ꧀ꦏꦸꦕ꧀ꦕꦴꦪꦠꦶ – ꦆꦩꦺꦱꦁ ꦢ꧀ꦮꦶꦤ꧀ꦤꦁ ꦥꦸꦒ꧀ꦒꦭꦴꦤꦁ ꦄꦴꦱꦮꦴ ꦮꦝ꧀ꦞꦤ꧀ꦠꦶ.

꧘꧗. ꦏꦠꦩꦺꦱꦁ ꦢ꧀ꦮꦶꦤ꧀ꦤꦁ ꦥꦸꦒ꧀ꦒꦭꦴꦤꦁ ꦄꦴꦱꦮꦴ ꦤ ꦮꦝ꧀ꦞꦤ꧀ꦠꦶ? ꦪꦺꦴ ꦕ ꦤ ꦏꦸꦏ꧀ꦏꦸꦕ꧀ꦕꦴꦪꦶꦠꦧ꧀ꦧꦁ ꦤ ꦏꦸꦏ꧀ꦏꦸꦕ꧀ꦕꦴꦪꦠꦶ, ꦪꦺꦴ ꦕ ꦏꦸꦏ꧀ꦏꦸꦕ꧀ꦕꦴꦪꦶꦠꦧ꧀ꦧꦁ ꦏꦸꦏ꧀ꦏꦸꦕ꧀ꦕꦴꦪꦠꦶ – ꦆꦩꦺꦱꦁ ꦢ꧀ꦮꦶꦤ꧀ꦤꦁ ꦥꦸꦒ꧀ꦒꦭꦴꦤꦁ ꦄꦴꦱꦮꦴ ꦤ ꦮꦝ꧀ꦞꦤ꧀ꦠꦶ.

꧘꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦲꦷꦤꦴꦣꦶꦩꦸꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦢꦸꦱ꧀ꦱꦷꦭꦺꦴ ꦲꦺꦴꦠꦶ ꦥꦴꦥꦣꦩ꧀ꦩꦺꦴ, ꦱꦺꦴ ꦄꦚ꧀ꦚꦁ ꦢꦸꦱ꧀ꦱꦷꦭꦁ ꦥꦴꦥꦣꦩ꧀ꦩꦁ ꦱꦺꦮꦠꦶ ꦨꦗꦠꦶ ꦥꦪꦶꦫꦸꦥꦴꦱꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦲꦷꦤꦴꦣꦶꦩꦸꦠ꧀ꦠꦺꦴ’’.

꧘꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦟꦷꦠꦴꦣꦶꦩꦸꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦮꦴ ꦲꦺꦴꦠꦶ ꦏꦭ꧀ꦪꦴꦟꦣꦩ꧀ꦩꦺꦴ, ꦱꦺꦴ ꦄꦚ꧀ꦚꦁ ꦱꦷꦭꦮꦤ꧀ꦠꦁ ꦏꦭ꧀ꦪꦴꦟꦣꦩ꧀ꦩꦁ ꦱꦺꦮꦠꦶ ꦨꦗꦠꦶ ꦥꦪꦶꦫꦸꦥꦴꦱꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦟꦷꦠꦴꦣꦶꦩꦸꦠ꧀ꦠꦺꦴ’’.

꧙꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦠꦶꦠ꧀ꦠꦺꦴ? ꦥꦕ꧀ꦕꦺꦏꦱꦩ꧀ꦧꦸꦢ꧀ꦣꦴ [ꦥꦕ꧀ꦕꦺꦏꦧꦸꦢ꧀ꦣꦺꦴ (ꦱꦷ.)] ꦪꦺ ꦕ ꦠꦡꦴꦒꦠꦱ꧀ꦱ ꦱꦴꦮꦏꦴ ꦄꦫꦲꦤ꧀ꦠꦺꦴ ꦠꦶꦠ꧀ꦠꦴ. ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦠꦶꦠ꧀ꦠꦺꦴ ꦕ ꦠꦥ꧀ꦥꦺꦠꦴ ꦕ [ꦠꦥ꧀ꦥꦺꦠꦴ ꦕ, ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ꦠꦶꦠ꧀ꦠꦺꦴ (ꦱꦷ.)].

ꦢꦸꦏꦤꦶꦢ꧀ꦢꦺꦱꦺꦴ.

꧓. ꦠꦶꦏꦥꦸꦒ꧀ꦒꦭꦥꦚ꧀ꦚꦠ꧀ꦠꦶ

꧙꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦤꦶꦫꦴꦱꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦢꦸꦱ꧀ꦱꦷꦭꦺꦴ ꦲꦺꦴꦠꦶ ꦥꦴꦥꦣꦩ꧀ꦩꦺꦴ ꦄꦱꦸꦕꦶ ꦱꦔ꧀ꦏꦱ꧀ꦱꦫꦱꦩꦴꦕꦴꦫꦺꦴ ꦥꦛꦶꦕ꧀ꦖꦤ꧀ꦤꦏꦩ꧀ꦩꦤ꧀ꦠꦺꦴ ꦄꦱ꧀ꦱꦩꦟꦺꦴ ꦱꦩꦟꦥꦛꦶꦚ꧀ꦚꦺꦴ ꦄꦧ꧀ꦫꦲ꧀ꦩꦕꦴꦫꦷ ꦧ꧀ꦫꦲ꧀ꦩꦕꦴꦫꦶꦥꦛꦶꦚ꧀ꦚꦺꦴ ꦄꦤ꧀ꦠꦺꦴꦥꦹꦠꦶ ꦄꦮꦱ꧀ꦱꦸꦠꦺꦴ ꦏꦱꦩ꧀ꦧꦸꦗꦴꦠꦺꦴ. ꦱꦺꦴ ꦱꦸꦟꦴꦠꦶ – ‘‘ꦆꦠ꧀ꦡꦤ꧀ꦤꦴꦩꦺꦴ ꦏꦶꦫ ꦨꦶꦏ꧀ꦑꦸ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦷ’’ꦠꦶ. ꦠꦱ꧀ꦱ ꦤ ꦌꦮꦁ ꦲꦺꦴꦠꦶ – ‘‘ꦏꦸꦢꦴꦱ꧀ꦱꦸ ꦤꦴꦩꦴꦲꦩ꧀ꦥꦶ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦱ꧀ꦱꦴꦩꦷ’’ꦠꦶ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦤꦶꦫꦴꦱꦺꦴ’’.

꧙꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦴꦱꦁꦱꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦮꦴ ꦲꦺꦴꦠꦶ ꦏꦭ꧀ꦪꦴꦟꦣꦩ꧀ꦩꦺꦴ. ꦱꦺꦴ ꦱꦸꦟꦴꦠꦶ – ‘‘ꦆꦠ꧀ꦡꦤ꧀ꦤꦴꦩꦺꦴ ꦏꦶꦫ ꦨꦶꦏ꧀ꦑꦸ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦷ’’ꦠꦶ. ꦠꦱ꧀ꦱ ꦌꦮꦁ ꦲꦺꦴꦠꦶ – ‘‘ꦏꦸꦢꦴꦱ꧀ꦱꦸ ꦤꦴꦩꦴꦲꦩ꧀ꦥꦶ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦱ꧀ꦱꦴꦩꦷ’’ꦠꦶ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦴꦱꦁꦱꦺꦴ’’.

꧙꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦮꦶꦒꦠꦴꦱꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦱꦺꦴ ꦱꦸꦟꦴꦠꦶ – ‘‘ꦆꦠ꧀ꦡꦤ꧀ꦤꦴꦩꦺꦴ ꦏꦶꦫ ꦨꦶꦏ꧀ꦑꦸ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦷ’’ꦠꦶ. ꦠꦱ꧀ꦱ ꦤ ꦌꦮꦁ ꦲꦺꦴꦠꦶ – ‘‘ꦏꦸꦢꦴꦱ꧀ꦱꦸ ꦤꦴꦩꦴꦲꦩ꧀ꦥꦶ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦱ꧀ꦱꦴꦩꦷ’’ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦪꦴ ꦲꦶꦱ꧀ꦱ ꦥꦸꦧ꧀ꦧꦺ ꦄꦮꦶꦩꦸꦠ꧀ꦠꦱ꧀ꦱ ꦮꦶꦩꦸꦠ꧀ꦠꦴꦱꦴ, ꦱꦴ ꦥꦛꦶꦥ꧀ꦥꦱ꧀ꦱꦢ꧀ꦣꦴ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦮꦶꦒꦠꦴꦱꦺꦴ’’.

꧙꧔. ꦠꦠ꧀ꦡ ꦏꦠꦩꦺ ꦠꦪꦺꦴ ꦒꦶꦭꦴꦤꦹꦥꦩꦴ ꦥꦸꦒ꧀ꦒꦭꦴ? ꦠꦪꦺꦴ ꦒꦶꦭꦴꦤꦴ – ꦆꦣꦺꦏꦕ꧀ꦕꦺꦴ ꦒꦶꦭꦴꦤꦺꦴ ꦭꦨꦤ꧀ꦠꦺꦴ ꦮꦴ ꦱꦥ꧀ꦥꦴꦪꦴꦤꦶ ꦨꦺꦴꦗꦤꦴꦤꦶ ꦄꦭꦨꦤ꧀ꦠꦺꦴ ꦮꦴ ꦱꦥ꧀ꦥꦴꦪꦴꦤꦶ ꦨꦺꦴꦗꦤꦴꦤꦶ, ꦭꦨꦤ꧀ꦠꦺꦴ ꦮꦴ ꦱꦥ꧀ꦥꦴꦪꦴꦤꦶ ꦨꦺꦱꦗ꧀ꦗꦴꦤꦶ ꦄꦭꦨꦤ꧀ꦠꦺꦴ ꦮꦴ ꦱꦥ꧀ꦥꦴꦪꦴꦤꦶ ꦨꦺꦱꦗ꧀ꦗꦴꦤꦶ, ꦭꦨꦤ꧀ꦠꦺꦴ ꦮꦴ ꦥꦠꦶꦫꦹꦥꦁ ꦈꦥꦛ꧀ꦜꦴꦏꦁ ꦄꦭꦨꦤ꧀ꦠꦺꦴ ꦮꦴ ꦥꦠꦶꦫꦹꦥꦁ ꦈꦥꦛ꧀ꦜꦴꦏꦁ, ꦤꦺꦮ ꦮꦸꦛ꧀ꦜꦴꦠꦶ ꦠꦩ꧀ꦲꦴ ꦄꦴꦧꦴꦣꦴ. (꧑)

ꦆꦣ ꦥꦤꦺꦏꦕ꧀ꦕꦺꦴ ꦒꦶꦭꦴꦤꦺꦴ ꦭꦨꦤ꧀ꦠꦺꦴ ꦮꦴ ꦱꦥ꧀ꦥꦴꦪꦴꦤꦶ ꦨꦺꦴꦗꦤꦴꦤꦶ ꦄꦭꦨꦤ꧀ꦠꦺꦴ ꦮꦴ ꦱꦥ꧀ꦥꦴꦪꦴꦤꦶ ꦨꦺꦴꦗꦤꦴꦤꦶ, ꦭꦨꦤ꧀ꦠꦺꦴ ꦮꦴ ꦱꦥ꧀ꦥꦴꦪꦴꦤꦶ ꦨꦺꦱꦗ꧀ꦗꦴꦤꦶ ꦄꦭꦨꦤ꧀ꦠꦺꦴ ꦮꦴ ꦱꦥ꧀ꦥꦴꦪꦴꦤꦶ ꦨꦺꦱꦗ꧀ꦗꦴꦤꦶ, ꦭꦨꦤ꧀ꦠꦺꦴ ꦮꦴ ꦥꦠꦶꦫꦹꦥꦁ ꦈꦥꦛ꧀ꦜꦴꦏꦁ ꦄꦭꦨꦤ꧀ꦠꦺꦴ ꦮꦴ ꦥꦠꦶꦫꦹꦥꦁ ꦈꦥꦛ꧀ꦜꦴꦏꦁ, ꦮꦸꦛ꧀ꦜꦴꦠꦶ ꦠꦩ꧀ꦲꦴ ꦄꦴꦧꦴꦣꦴ. (꧒)

ꦆꦣ ꦥꦤꦺꦏꦕ꧀ꦕꦺꦴ ꦒꦶꦭꦴꦤꦺꦴ ꦭꦨꦤ꧀ꦠꦺꦴ ꦱꦥ꧀ꦥꦴꦪꦴꦤꦶ ꦨꦺꦴꦗꦤꦴꦤꦶ ꦤꦺꦴ ꦄꦭꦨꦤ꧀ꦠꦺꦴ, ꦭꦨꦤ꧀ꦠꦺꦴ ꦱꦥ꧀ꦥꦴꦪꦴꦤꦶ ꦨꦺꦱꦗ꧀ꦗꦴꦤꦶ ꦤꦺꦴ ꦄꦭꦨꦤ꧀ꦠꦺꦴ, ꦭꦨꦤ꧀ꦠꦺꦴ ꦥꦠꦶꦫꦹꦥꦁ ꦈꦥꦛ꧀ꦜꦴꦏꦁ ꦤꦺꦴ ꦄꦭꦨꦤ꧀ꦠꦺꦴ, ꦮꦸꦛ꧀ꦜꦴꦠꦶ ꦠꦩ꧀ꦲꦴ ꦄꦴꦧꦴꦣꦴ. (꧓)

ꦠꦠ꧀ꦫ ꦪ꧀ꦮꦴꦪꦁ ꦒꦶꦭꦴꦤꦺꦴ ꦭꦨꦤ꧀ꦠꦺꦴ ꦱꦥ꧀ꦥꦴꦪꦴꦤꦶ ꦨꦺꦴꦗꦤꦴꦤꦶ ꦤꦺꦴ ꦄꦭꦨꦤ꧀ꦠꦺꦴ, ꦭꦨꦤ꧀ꦠꦺꦴ ꦱꦥ꧀ꦥꦴꦪꦴꦤꦶ ꦨꦺꦱꦗ꧀ꦗꦴꦤꦶ ꦤꦺꦴ ꦄꦭꦨꦤ꧀ꦠꦺꦴ, ꦭꦨꦤ꧀ꦠꦺꦴ ꦥꦠꦶꦫꦹꦥꦁ ꦈꦥꦛ꧀ꦜꦴꦏꦁ ꦤꦺꦴ ꦄꦭꦨꦤ꧀ꦠꦺꦴ, ꦮꦸꦛ꧀ꦜꦴꦠꦶ ꦠꦩ꧀ꦲꦴ ꦄꦴꦧꦴꦣꦴ, ꦆꦩꦁ ꦒꦶꦭꦴꦤꦁ ꦥꦛꦶꦕ꧀ꦕ ꦨꦒꦮꦠꦴ ꦒꦶꦭꦴꦤꦨꦠ꧀ꦠꦁ ꦄꦤꦸꦚ꧀ꦚꦴꦠꦁ ꦒꦶꦭꦴꦤꦨꦺꦱꦗ꧀ꦗꦁ ꦄꦤꦸꦚ꧀ꦚꦴꦠꦁ ꦒꦶꦭꦴꦤꦸꦥꦛ꧀ꦜꦴꦏꦺꦴ ꦄꦤꦸꦚ꧀ꦚꦴꦠꦺꦴ. ꦆꦩꦚ꧀ꦕ ꦥꦤ ꦒꦶꦭꦴꦤꦁ ꦥꦛꦶꦕ꧀ꦕ ꦄꦚ꧀ꦚꦺꦥꦶ ꦒꦶꦭꦴꦤꦴ ꦈꦥꦛ꧀ꦜꦴꦠꦧ꧀ꦧꦴ.

ꦌꦮꦩꦺꦮꦁ [ꦌꦮꦩꦺꦮ (ꦱꦷ.)] ꦠꦪꦺꦴ ꦒꦶꦭꦴꦤꦹꦥꦩꦴ ꦥꦸꦒ꧀ꦒꦭꦴ ꦱꦤ꧀ꦠꦺꦴ ꦱꦁꦮꦶꦗ꧀ꦗꦩꦴꦤꦴ ꦭꦺꦴꦏꦱ꧀ꦩꦶꦁ. ꦏꦠꦩꦺ ꦠꦪꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦭꦨꦤ꧀ꦠꦺꦴ ꦮꦴ ꦠꦡꦴꦒꦠꦁ ꦢꦱ꧀ꦱꦤꦴꦪ ꦄꦭꦨꦤ꧀ꦠꦺꦴ ꦮꦴ ꦠꦡꦴꦒꦠꦁ ꦢꦱ꧀ꦱꦤꦴꦪ, ꦭꦨꦤ꧀ꦠꦺꦴ ꦮꦴ ꦠꦡꦴꦒꦠꦥ꧀ꦥꦮꦺꦢꦶꦠꦁ ꦣꦩ꧀ꦩꦮꦶꦤꦪꦁ ꦱꦮꦟꦴꦪ ꦄꦭꦨꦤ꧀ꦠꦺꦴ ꦮꦴ ꦠꦡꦴꦒꦠꦥ꧀ꦥꦮꦺꦢꦶꦠꦁ ꦣꦩ꧀ꦩꦮꦶꦤꦪꦁ ꦱꦮꦟꦴꦪ, ꦤꦺꦮ ꦎꦏ꧀ꦏꦩꦠꦶ ꦤꦶꦪꦴꦩꦁ ꦏꦸꦱꦭꦺꦱꦸ ꦣꦩ꧀ꦩꦺꦱꦸ ꦱꦩ꧀ꦩꦠ꧀ꦠꦁ. (꧑)

ꦆꦣ ꦥꦤꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦭꦨꦤ꧀ꦠꦺꦴ ꦮꦴ ꦠꦡꦴꦒꦠꦁ ꦢꦱ꧀ꦱꦤꦴꦪ ꦄꦭꦨꦤ꧀ꦠꦺꦴ ꦮꦴ ꦠꦡꦴꦒꦠꦁ ꦢꦱ꧀ꦱꦤꦴꦪ, ꦭꦨꦤ꧀ꦠꦺꦴ ꦮꦴ ꦠꦡꦴꦒꦠꦥ꧀ꦥꦮꦺꦢꦶꦠꦁ ꦣꦩ꧀ꦩꦮꦶꦤꦪꦁ ꦱꦮꦟꦴꦪ ꦄꦭꦨꦤ꧀ꦠꦺꦴ ꦮꦴ ꦠꦡꦴꦒꦠꦥ꧀ꦥꦮꦺꦢꦶꦠꦁ ꦣꦩ꧀ꦩꦮꦶꦤꦪꦁ ꦱꦮꦟꦴꦪ, ꦎꦏ꧀ꦏꦩꦠꦶ ꦤꦶꦪꦴꦩꦁ ꦏꦸꦱꦭꦺꦱꦸ ꦣꦩ꧀ꦩꦺꦱꦸ ꦱꦩ꧀ꦩꦠ꧀ꦠꦁ. (꧒)

ꦆꦣ ꦥꦤꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦭꦨꦤ꧀ꦠꦺꦴ ꦠꦡꦴꦒꦠꦁ ꦢꦱ꧀ꦱꦤꦴꦪ ꦤꦺꦴ ꦄꦭꦨꦤ꧀ꦠꦺꦴ, ꦭꦨꦤ꧀ꦠꦺꦴ ꦠꦡꦴꦒꦠꦥ꧀ꦥꦮꦺꦢꦶꦠꦁ ꦣꦩ꧀ꦩꦮꦶꦤꦪꦁ ꦱꦮꦟꦴꦪ ꦤꦺꦴ ꦄꦭꦨꦤ꧀ꦠꦺꦴ, ꦎꦏ꧀ꦏꦩꦠꦶ ꦤꦶꦪꦴꦩꦁ ꦏꦸꦱꦭꦺꦱꦸ ꦣꦩ꧀ꦩꦺꦱꦸ ꦱꦩ꧀ꦩꦠ꧀ꦠꦁ. (꧓)

ꦠꦠ꧀ꦫ ꦪ꧀ꦮꦴꦪꦁ ꦥꦸꦒ꧀ꦒꦭꦺꦴ ꦭꦨꦤ꧀ꦠꦺꦴ ꦠꦡꦴꦒꦠꦁ ꦢꦱ꧀ꦱꦤꦴꦪ ꦤꦺꦴ ꦄꦭꦨꦤ꧀ꦠꦺꦴ, ꦭꦨꦤ꧀ꦠꦺꦴ ꦠꦡꦴꦒꦠꦥ꧀ꦥꦮꦺꦢꦶꦠꦁ ꦣꦩ꧀ꦩꦮꦶꦤꦪꦁ ꦱꦮꦟꦴꦪ ꦤꦺꦴ ꦄꦭꦨꦤ꧀ꦠꦺꦴ, ꦎꦏ꧀ꦏꦩꦠꦶ ꦤꦶꦪꦴꦩꦁ ꦏꦸꦱꦭꦺꦱꦸ ꦣꦩ꧀ꦩꦺꦱꦸ ꦱꦩ꧀ꦩꦠ꧀ꦠꦁ, ꦆꦩꦁ ꦥꦸꦒ꧀ꦒꦭꦁ ꦥꦛꦶꦕ꧀ꦕ ꦨꦒꦮꦠꦴ ꦣꦩ꧀ꦩꦢꦺꦱꦤꦴ ꦄꦤꦸꦚ꧀ꦚꦴꦠꦴ, ꦆꦩꦚ꧀ꦕ ꦥꦸꦒ꧀ꦒꦭꦁ ꦥꦛꦶꦕ꧀ꦕ ꦄꦚ꧀ꦚꦺꦱꦩ꧀ꦥꦶ ꦣꦩ꧀ꦩꦺꦴ ꦢꦺꦱꦺꦠꦧ꧀ꦧꦺꦴ. ꦆꦩꦺ ꦠꦪꦺꦴ ꦒꦶꦭꦴꦤꦹꦥꦩꦴ ꦥꦸꦒ꧀ꦒꦭꦴ ꦱꦤ꧀ꦠꦺꦴ ꦱꦁꦮꦶꦗ꧀ꦗꦩꦴꦤꦴ ꦭꦺꦴꦏꦱ꧀ꦩꦶꦁ.

꧙꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦏꦴꦪꦱꦏ꧀ꦑꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦛ꧀ꦜ ꦮꦶꦩꦺꦴꦏ꧀ꦑꦺ ꦏꦴꦪꦺꦤ ꦦꦸꦱꦶꦠ꧀ꦮꦴ ꦮꦶꦲꦫꦠꦶ, ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦌꦏꦕ꧀ꦕꦺ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦏꦴꦪꦱꦏ꧀ꦑꦷ’’.

꧙꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦢꦶꦛ꧀ꦜꦶꦥ꧀ꦥꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ꦠꦡꦴꦒꦠꦥ꧀ꦥꦮꦺꦢꦶꦠꦴ ꦕꦱ꧀ꦱ ꦣꦩ꧀ꦩꦴ ꦥꦚ꧀ꦚꦴꦪ ꦮꦺꦴꦢꦶꦛ꧀ꦜꦴ ꦲꦺꦴꦤ꧀ꦠꦶ ꦮꦺꦴꦕꦫꦶꦠꦴ, ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦌꦏꦕ꧀ꦕꦺ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦢꦶꦛ꧀ꦜꦶꦥ꧀ꦥꦠ꧀ꦠꦺꦴ’’.

꧙꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦢ꧀ꦣꦴꦮꦶꦩꦸꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ…ꦥꦺ… ꦠꦡꦴꦒꦠꦥ꧀ꦥꦮꦺꦢꦶꦠꦴ ꦕꦱ꧀ꦱ ꦣꦩ꧀ꦩꦴ ꦥꦚ꧀ꦚꦴꦪ ꦮꦺꦴꦢꦶꦛ꧀ꦜꦴ ꦲꦺꦴꦤ꧀ꦠꦶ ꦮꦺꦴꦕꦫꦶꦠꦴ, ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦌꦏꦕ꧀ꦕꦺ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ, ꦤꦺꦴ ꦕ ꦑꦺꦴ ꦪꦡꦴꦢꦶꦛ꧀ꦜꦶꦥ꧀ꦥꦠ꧀ꦠꦱ꧀ꦱ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦢ꧀ꦣꦴꦮꦶꦩꦸꦠ꧀ꦠꦺꦴ’’.

꧙꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦒꦹꦡꦨꦴꦟꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦩꦸꦱꦴꦮꦴꦢꦷ ꦲꦺꦴꦠꦶ ꦱꦨꦒ꧀ꦒꦠꦺꦴ ꦮꦴ ꦥꦫꦶꦱꦒ꧀ꦒꦠꦺꦴ ꦮꦴ ꦚꦴꦠꦶꦩꦗ꧀ꦙꦒꦠꦺꦴ ꦮꦴ ꦥꦹꦒꦩꦗ꧀ꦙꦒꦠꦺꦴ ꦮꦴ ꦫꦴꦗꦏꦸꦭꦩꦗ꧀ꦙꦒꦠꦺꦴ ꦮꦴ ꦄꦨꦶꦤꦷꦠꦺꦴ ꦱꦏ꧀ꦑꦶꦥꦸꦛ꧀ꦜꦺꦴ – ‘‘ꦌꦲꦩ꧀ꦨꦺꦴ [ꦌꦲꦶ ꦨꦺꦴ (ꦱ꧀ꦪꦴ. ꦏ.) ꦩ. ꦤꦶ. ꧑.꧔꧔꧐; ꦄ. ꦤꦶ. ꧓.꧒꧘], ꦥꦸꦫꦶꦱ, ꦪꦁ ꦗꦴꦤꦴꦱꦶ ꦠꦁ ꦮꦢꦺꦲꦷ’’ꦠꦶ, ꦱꦺꦴ ꦄꦗꦴꦤꦁ ꦮꦴ ꦄꦴꦲ – ‘‘ꦗꦴꦤꦴꦩꦷ’’ꦠꦶ, ꦗꦴꦤꦁ ꦮꦴ ꦄꦴꦲ – ‘‘ꦤ ꦗꦴꦤꦴꦩꦷ’’ꦠꦶ, ꦄꦥꦱ꧀ꦱꦁ ꦮꦴ ꦄꦴꦲ – ‘‘ꦥꦱ꧀ꦱꦴꦩꦷ’’ꦠꦶ, ꦥꦱ꧀ꦱꦁ ꦮꦴ ꦄꦴꦲ – ‘‘ꦤ ꦥꦱ꧀ꦱꦴꦩꦷ’’ꦠꦶ. ꦆꦠꦶ ꦄꦠ꧀ꦠꦲꦺꦠꦸ ꦮꦴ ꦥꦫꦲꦺꦠꦸ ꦮꦴ ꦄꦴꦩꦶꦱꦏꦶꦚ꧀ꦕꦶꦏ꧀ꦑꦲꦺꦠꦸ ꦮꦴ ꦱꦩ꧀ꦥꦗꦴꦤꦩꦸꦱꦴ ꦨꦴꦱꦶꦠꦴ ꦲꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦒꦹꦡꦨꦴꦟꦷ’’.

꧙꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦸꦥ꧀ꦦꦨꦴꦟꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦩꦸꦱꦴꦮꦴꦢꦁ ꦥꦲꦴꦪ ꦩꦸꦱꦴꦮꦴꦢꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ ꦱꦨꦒ꧀ꦒꦠꦺꦴ ꦮꦴ ꦥꦫꦶꦱꦒ꧀ꦒꦠꦺꦴ ꦮꦴ ꦚꦴꦠꦶꦩꦗ꧀ꦙꦒꦠꦺꦴ ꦮꦴ ꦥꦹꦒꦩꦗ꧀ꦙꦒꦠꦺꦴ ꦮꦴ ꦫꦴꦗꦏꦸꦭꦩꦗ꧀ꦙꦒꦠꦺꦴ ꦮꦴ ꦄꦨꦶꦤꦷꦠꦺꦴ ꦱꦏ꧀ꦑꦶꦥꦸꦛ꧀ꦜꦺꦴ – ‘‘ꦌꦲꦩ꧀ꦨꦺꦴ, ꦥꦸꦫꦶꦱ, ꦪꦁ ꦗꦴꦤꦴꦱꦶ ꦠꦁ ꦮꦢꦺꦲꦷ’’ꦠꦶ, ꦱꦺꦴ ꦄꦗꦴꦤꦁ ꦮꦴ ꦄꦴꦲ – ‘‘ꦤ ꦗꦴꦤꦴꦩꦷ’’ꦠꦶ, ꦗꦴꦤꦁ ꦮꦴ ꦄꦴꦲ – ‘‘ꦗꦴꦤꦴꦩꦷ’’ꦠꦶ, ꦄꦥꦱ꧀ꦱꦁ ꦮꦴ ꦄꦴꦲ – ‘‘ꦤ ꦥꦱ꧀ꦱꦴꦩꦷ’’ꦠꦶ, ꦥꦱ꧀ꦱꦁ ꦮꦴ ꦄꦴꦲ – ‘‘ꦥꦱ꧀ꦱꦴꦩꦷ’’ꦠꦶ. ꦆꦠꦶ ꦄꦠ꧀ꦠꦲꦺꦠꦸ ꦮꦴ ꦥꦫꦲꦺꦠꦸ ꦮꦴ ꦄꦴꦩꦶꦱꦏꦶꦚ꧀ꦕꦶꦏ꧀ꦑꦲꦺꦠꦸ ꦮꦴ ꦤ ꦱꦩ꧀ꦥꦗꦴꦤꦩꦸꦱꦴ ꦨꦴꦱꦶꦠꦴ ꦲꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦸꦥ꧀ꦦꦨꦴꦟꦷ’’.

꧑꧐꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦩꦣꦸꦨꦴꦟꦷ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦪꦴ ꦱꦴ ꦮꦴꦕꦴ ꦤꦺꦭꦴ ꦏꦟ꧀ꦟꦱꦸꦑꦴ ꦥꦺꦩꦤꦶꦪꦴ ꦲꦢꦪꦔ꧀ꦒꦩꦴ ꦥꦺꦴꦫꦷ ꦧꦲꦸꦗꦤꦏꦤ꧀ꦠꦴ ꦧꦲꦸꦗꦤꦩꦤꦴꦥꦴ, ꦠꦡꦴꦫꦹꦥꦶꦁ ꦮꦴꦕꦁ ꦨꦴꦱꦶꦠꦴ ꦲꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦩꦣꦸꦨꦴꦟꦷ’’.

꧑꧐꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦫꦸꦏꦹꦥꦩꦕꦶꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦏꦺꦴꦣꦤꦺꦴ ꦲꦺꦴꦠꦶ ꦈꦥꦴꦪꦴꦱꦧꦲꦸꦭꦺꦴ, ꦄꦥ꧀ꦥꦩ꧀ꦥꦶ ꦮꦸꦠ꧀ꦠꦺꦴ ꦱꦩꦴꦤꦺꦴ ꦄꦨꦶꦱꦗ꧀ꦗꦠꦶ ꦏꦸꦥ꧀ꦥꦠꦶ ꦧ꧀ꦪꦴꦥꦗ꧀ꦗꦠꦶ ꦥꦠꦶꦠ꧀ꦡꦷꦪꦠꦶ [ꦥꦠꦶꦛ꧀ꦜꦷꦪꦠꦶ (ꦱ꧀ꦪꦴ. ꦏ.) ꦄ. ꦤꦶ. ꧓.꧒꧕], ꦏꦺꦴꦥꦚ꧀ꦕ ꦢꦺꦴꦱꦚ꧀ꦕ ꦄꦥ꧀ꦥꦕ꧀ꦕꦪꦚ꧀ꦕ ꦥꦴꦠꦸꦏꦫꦺꦴꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦢꦸꦛ꧀ꦜꦴꦫꦸꦏꦺꦴ ꦏꦛ꧀ꦜꦺꦤ ꦮꦴ ꦏꦜꦭꦴꦪ [ꦏꦡꦭꦴꦪ (ꦏ.), ꦏꦡꦭꦺꦤ (ꦄꦛ꧀ꦜꦏꦡꦴ) ꦄ. ꦤꦶ. ꧓.꧒꧕] ꦮꦴ ꦓꦛ꧀ꦛꦶꦠꦺꦴ ꦨꦶꦪ꧀ꦪꦺꦴꦱꦺꦴ ꦩꦠ꧀ꦠꦴꦪ ꦄꦴꦱꦮꦁ ꦢꦺꦠꦶ [ꦄꦱ꧀ꦱꦮꦤꦺꦴꦠꦶ (ꦱꦷ.)], ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦏꦺꦴꦣꦤꦺꦴ ꦲꦺꦴꦠꦶ ꦈꦥꦴꦪꦴꦱꦧꦲꦸꦭꦺꦴ, ꦄꦥ꧀ꦥꦩ꧀ꦥꦶ ꦮꦸꦠ꧀ꦠꦺꦴ ꦱꦩꦴꦤꦺꦴ ꦄꦨꦶꦱꦗ꧀ꦗꦠꦶ ꦏꦸꦥ꧀ꦥꦠꦶ ꦧ꧀ꦪꦴꦥꦗ꧀ꦗꦠꦶ ꦥꦠꦶꦠ꧀ꦡꦷꦪꦠꦶ, ꦏꦺꦴꦥꦚ꧀ꦕ ꦢꦺꦴꦱꦚ꧀ꦕ ꦄꦥ꧀ꦥꦕ꧀ꦕꦪꦚ꧀ꦕ ꦥꦴꦠꦸꦏꦫꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦫꦸꦏꦹꦥꦩꦕꦶꦠ꧀ꦠꦺꦴ’’.

꧑꧐꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦮꦶꦗ꧀ꦗꦹꦥꦩꦕꦶꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦕꦏ꧀ꦑꦸꦩꦴ ꦥꦸꦫꦶꦱꦺꦴ ꦫꦠ꧀ꦠꦤ꧀ꦣꦏꦴꦫꦠꦶꦩꦶꦱꦴꦪ ꦮꦶꦗ꧀ꦗꦤ꧀ꦠꦫꦶꦏꦴꦪ ꦫꦹꦥꦴꦤꦶ ꦥꦱ꧀ꦱꦺꦪ꧀ꦪ, ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦮꦶꦗ꧀ꦗꦹꦥꦩꦕꦶꦠ꧀ꦠꦺꦴ’’.

꧑꧐꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦮꦗꦶꦫꦹꦥꦩꦕꦶꦠ꧀ꦠꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦮꦗꦶꦫꦱ꧀ꦱ ꦤꦠ꧀ꦡꦶ ꦏꦶꦚ꧀ꦕꦶ ꦄꦨꦺꦗ꧀ꦗꦁ ꦩꦟꦶ ꦮꦴ ꦥꦴꦱꦴꦟꦺꦴ ꦮꦴ, ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦮꦗꦶꦫꦹꦥꦩꦕꦶꦠ꧀ꦠꦺꦴ’’.

꧑꧐꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦤ꧀ꦣꦺꦴ? ꦆꦣꦺꦏꦕ꧀ꦕꦱ꧀ꦱ ꦥꦸꦒ꧀ꦒꦭꦱ꧀ꦱ ꦠꦡꦴꦫꦹꦥꦁ ꦕꦏ꧀ꦑꦸ ꦤ ꦲꦺꦴꦠꦶ ꦪꦡꦴꦫꦹꦥꦺꦤ ꦕꦏ꧀ꦑꦸꦤꦴ ꦄꦤꦣꦶꦒꦠꦁ ꦮꦴ ꦨꦺꦴꦒꦁ ꦄꦣꦶꦒꦕ꧀ꦖꦺꦪ꧀ꦪ, ꦄꦣꦶꦒꦠꦁ ꦮꦴ ꦨꦺꦴꦒꦁ ꦦꦴꦠꦶꦁ ꦏꦫꦺꦪ꧀ꦪ; ꦠꦡꦴꦫꦹꦥꦩ꧀ꦥꦶꦱ꧀ꦱ ꦕꦏ꧀ꦑꦸ ꦤ ꦲꦺꦴꦠꦶ ꦪꦡꦴꦫꦹꦥꦺꦤ ꦕꦏ꧀ꦑꦸꦤꦴ ꦏꦸꦱꦭꦴꦏꦸꦱꦭꦺ ꦣꦩ꧀ꦩꦺ ꦗꦴꦤꦺꦪ꧀ꦪ, ꦱꦴꦮꦗ꧀ꦗꦴꦤꦮꦗ꧀ꦗꦺ ꦣꦩ꧀ꦩꦺ ꦗꦴꦤꦺꦪ꧀ꦪ, ꦲꦷꦤꦥ꧀ꦥꦟꦷꦠꦺ ꦣꦩ꧀ꦩꦺ ꦗꦴꦤꦺꦪ꧀ꦪ, ꦏꦟ꧀ꦲꦱꦸꦏ꧀ꦏꦱꦥ꧀ꦥꦛꦶꦨꦴꦒꦺ ꦣꦩ꧀ꦩꦺ ꦗꦴꦤꦺꦪ꧀ꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦤ꧀ꦣꦺꦴ’’.

꧑꧐꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦌꦏꦕꦏ꧀ꦑꦸ? ꦆꦣꦺꦏꦕ꧀ꦕꦱ꧀ꦱ ꦥꦸꦒ꧀ꦒꦭꦱ꧀ꦱ ꦠꦡꦴꦫꦹꦥꦁ ꦕꦏ꧀ꦑꦸ ꦲꦺꦴꦠꦶ, ꦪꦡꦴꦫꦹꦥꦺꦤ ꦕꦏ꧀ꦑꦸꦤꦴ ꦄꦤꦣꦶꦒꦠꦁ ꦮꦴ ꦨꦺꦴꦒꦁ ꦄꦣꦶꦒꦕ꧀ꦖꦺꦪ꧀ꦪ, ꦄꦣꦶꦒꦠꦁ ꦮꦴ ꦨꦺꦴꦒꦁ ꦦꦴꦠꦶꦁ ꦏꦫꦺꦪ꧀ꦪ; ꦠꦡꦴꦫꦹꦥꦩ꧀ꦥꦶꦱ꧀ꦱ ꦕꦏ꧀ꦑꦸ ꦤ ꦲꦺꦴꦠꦶ ꦪꦡꦴꦫꦹꦥꦺꦤ ꦕꦏ꧀ꦑꦸꦤꦴ ꦏꦸꦱꦭꦴꦏꦸꦱꦭꦺ ꦣꦩ꧀ꦩꦺ ꦗꦴꦤꦺꦪ꧀ꦪ, ꦱꦴꦮꦗ꧀ꦗꦴꦤꦮꦗ꧀ꦗꦺ ꦣꦩ꧀ꦩꦺ ꦗꦴꦤꦺꦪ꧀ꦪ, ꦲꦷꦤꦥ꧀ꦥꦟꦷꦠꦺ ꦣꦩ꧀ꦩꦺ ꦗꦴꦤꦺꦪ꧀ꦪ, ꦏꦟ꧀ꦲꦱꦸꦏ꧀ꦏꦱꦥ꧀ꦥꦛꦶꦨꦴꦒꦺ ꦣꦩ꧀ꦩꦺ ꦗꦴꦤꦺꦪ꧀ꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦌꦏꦕꦏ꧀ꦑꦸ’’.

꧑꧐꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦢ꧀ꦮꦶꦕꦏ꧀ꦑꦸ? ꦆꦣꦺꦏꦕ꧀ꦕꦱ꧀ꦱ ꦥꦸꦒ꧀ꦒꦭꦱ꧀ꦱ ꦠꦡꦴꦫꦹꦥꦁ ꦕꦏ꧀ꦑꦸ ꦲꦺꦴꦠꦶ ꦪꦡꦴꦫꦹꦥꦺꦤ ꦕꦏ꧀ꦑꦸꦤꦴ ꦄꦤꦣꦶꦒꦠꦁ ꦮꦴ ꦨꦺꦴꦒꦁ ꦄꦣꦶꦒꦕ꧀ꦖꦺꦪ꧀ꦪ, ꦄꦣꦶꦒꦠꦁ ꦮꦴ ꦨꦺꦴꦒꦁ ꦦꦴꦠꦶꦁ ꦏꦫꦺꦪ꧀ꦪ; ꦠꦡꦴꦫꦹꦥꦩ꧀ꦥꦶꦱ꧀ꦱ ꦕꦏ꧀ꦑꦸ ꦲꦺꦴꦠꦶ ꦪꦡꦴꦫꦹꦥꦺꦤ ꦕꦏ꧀ꦑꦸꦤꦴ ꦏꦸꦱꦭꦴꦏꦸꦱꦭꦺ ꦣꦩ꧀ꦩꦺ ꦗꦴꦤꦺꦪ꧀ꦪ, ꦱꦴꦮꦗ꧀ꦗꦴꦤꦮꦗ꧀ꦗꦺ ꦣꦩ꧀ꦩꦺ ꦗꦴꦤꦺꦪ꧀ꦪ, ꦲꦷꦤꦥ꧀ꦥꦟꦷꦠꦺ ꦣꦩ꧀ꦩꦺ ꦗꦴꦤꦺꦪ꧀ꦪ, ꦏꦟ꧀ꦲꦱꦸꦏ꧀ꦏꦱꦥ꧀ꦥꦛꦶꦨꦴꦒꦺ ꦣꦩ꧀ꦩꦺ ꦗꦴꦤꦺꦪ꧀ꦪ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦢ꧀ꦮꦶꦕꦏ꧀ꦑꦸ’’.

꧑꧐꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦮꦏꦸꦗ꧀ꦗꦥꦚ꧀ꦚꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦫꦴꦩꦁ ꦒꦤ꧀ꦠꦴ [ꦒꦠꦺꦴ (ꦱꦷ.), ꦒꦤ꧀ꦠ꧀ꦮꦴ (ꦱ꧀ꦪꦴ.)] ꦲꦺꦴꦠꦶ ꦄꦨꦶꦏ꧀ꦑꦟꦁ ꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦺ ꦣꦩ꧀ꦩꦱ꧀ꦱꦮꦟꦴꦪ [ꦣꦩ꧀ꦩꦱ꧀ꦱꦮꦤꦴꦪ (ꦱ꧀ꦪꦴ.)]. ꦠꦱ꧀ꦱ ꦨꦶꦏ꧀ꦑꦹ ꦣꦩ꧀ꦩꦁ ꦢꦺꦱꦺꦤ꧀ꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦤ꧀ꦠꦶ. ꦱꦺꦴ ꦠꦱ꧀ꦩꦶꦁ ꦄꦴꦱꦤꦺ ꦤꦶꦱꦶꦤ꧀ꦤꦺꦴ ꦠꦱ꧀ꦱꦴ ꦏꦡꦴꦪ ꦤꦺꦮ ꦄꦴꦢꦶꦁ ꦩꦤꦱꦶ ꦏꦫꦺꦴꦠꦶ, ꦤ ꦩꦗ꧀ꦙꦁ ꦩꦤꦱꦶ ꦏꦫꦺꦴꦠꦶ, ꦤ ꦥꦫꦶꦪꦺꦴꦱꦴꦤꦁ ꦩꦤꦱꦶ ꦏꦫꦺꦴꦠꦶ. ꦮꦸꦛ꧀ꦜꦶꦠꦺꦴꦥꦶ ꦠꦩ꧀ꦲꦴ ꦄꦴꦱꦤꦴ ꦠꦱ꧀ꦱꦴ ꦏꦡꦴꦪ ꦤꦺꦮ ꦄꦴꦢꦶꦁ ꦩꦤꦱꦶ ꦏꦫꦺꦴꦠꦶ, ꦤ ꦩꦗ꧀ꦙꦁ ꦩꦤꦱꦶ ꦏꦫꦺꦴꦠꦶ, ꦤ ꦥꦫꦶꦪꦺꦴꦱꦴꦤꦁ ꦩꦤꦱꦶ ꦏꦫꦺꦴꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦏꦸꦩ꧀ꦨꦺꦴ ꦤꦶꦏ꧀ꦏꦸꦗ꧀ꦗꦺꦴ [ꦤꦶꦏꦸꦗ꧀ꦗꦺꦴ (ꦱ꧀ꦪꦴ.) ꦄ. ꦤꦶ. ꧓.꧓꧐] ꦠꦠ꧀ꦫ ꦈꦢꦏꦁ ꦄꦴꦱꦶꦠ꧀ꦠꦁ ꦮꦶꦮꦛ꧀ꦛꦠꦶ, ꦤꦺꦴ ꦱꦟ꧀ꦜꦴꦠꦶ; ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦫꦴꦩꦁ ꦒꦤ꧀ꦠꦴ ꦲꦺꦴꦠꦶ ꦄꦨꦶꦏ꧀ꦑꦟꦁ ꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦺ ꦣꦩ꧀ꦩꦱ꧀ꦱꦮꦟꦴꦪ. ꦠꦱ꧀ꦱ ꦨꦶꦏ꧀ꦑꦹ ꦣꦩ꧀ꦩꦁ ꦢꦺꦱꦺꦤ꧀ꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦤ꧀ꦠꦶ. ꦱꦺꦴ ꦠꦱ꧀ꦩꦶꦁ ꦄꦴꦱꦤꦺ ꦤꦶꦱꦶꦤ꧀ꦤꦺꦴ ꦠꦱ꧀ꦱꦴ ꦏꦡꦴꦪ ꦤꦺꦮ ꦄꦴꦢꦶꦁ ꦩꦤꦱꦶ ꦏꦫꦺꦴꦠꦶ, ꦤ ꦩꦗ꧀ꦙꦁ ꦩꦤꦱꦶ ꦏꦫꦺꦴꦠꦶ, ꦤ ꦥꦫꦶꦪꦺꦴꦱꦴꦤꦁ ꦩꦤꦱꦶ ꦏꦫꦺꦴꦠꦶ. ꦮꦸꦛ꧀ꦜꦶꦠꦺꦴꦥꦶ ꦠꦩ꧀ꦲꦴ ꦄꦴꦱꦤꦴ ꦠꦱ꧀ꦱꦴ ꦏꦡꦴꦪ ꦤꦺꦮ ꦄꦴꦢꦶꦁ ꦩꦤꦱꦶ ꦏꦫꦺꦴꦠꦶ, ꦤ ꦩꦗ꧀ꦙꦁ ꦩꦤꦱꦶ ꦏꦫꦺꦴꦠꦶ, ꦤ ꦥꦫꦶꦪꦺꦴꦱꦴꦤꦁ ꦩꦤꦱꦶ ꦏꦫꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦮꦏꦸꦗ꧀ꦗꦥꦚ꧀ꦚꦺꦴ’’.

꧑꧐꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦈꦕ꧀ꦖꦔ꧀ꦒꦥꦚ꧀ꦚꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦫꦴꦩꦁ ꦒꦤ꧀ꦠꦴ ꦲꦺꦴꦠꦶ ꦄꦨꦶꦏ꧀ꦑꦟꦁ ꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦺ ꦣꦩ꧀ꦩꦱ꧀ꦱꦮꦟꦴꦪ. ꦠꦱ꧀ꦱ ꦨꦶꦏ꧀ꦑꦹ ꦣꦩ꧀ꦩꦁ ꦢꦺꦱꦺꦤ꧀ꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦤ꧀ꦠꦶ. ꦱꦺꦴ ꦠꦱ꧀ꦩꦶꦁ ꦄꦴꦱꦤꦺ ꦤꦶꦱꦶꦤ꧀ꦤꦺꦴ ꦠꦱ꧀ꦱꦴ ꦏꦡꦴꦪ ꦄꦴꦢꦶꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦩꦗ꧀ꦙꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦥꦫꦶꦪꦺꦴꦱꦴꦤꦩ꧀ꦥꦶ ꦩꦤꦱꦶ ꦏꦫꦺꦴꦠꦶ. ꦮꦸꦛ꧀ꦜꦶꦠꦺꦴ ꦕ ꦑꦺꦴ ꦠꦩ꧀ꦲꦴ ꦄꦴꦱꦤꦴ ꦠꦱ꧀ꦱꦴ ꦏꦡꦴꦪ ꦤꦺꦮ ꦄꦴꦢꦶꦁ ꦩꦤꦱꦶ ꦏꦫꦺꦴꦠꦶ, ꦤ ꦩꦗ꧀ꦙꦁ ꦩꦤꦱꦶ ꦏꦫꦺꦴꦠꦶ, ꦤ ꦥꦫꦶꦪꦺꦴꦱꦴꦤꦁ ꦩꦤꦱꦶ ꦏꦫꦺꦴꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦥꦸꦫꦶꦱꦱ꧀ꦱ ꦈꦕ꧀ꦖꦔ꧀ꦒꦺ ꦤꦴꦤꦴꦑꦗ꧀ꦗꦏꦴꦤꦶ ꦄꦴꦏꦶꦟ꧀ꦟꦴꦤꦶ – ꦠꦶꦭꦴ ꦠꦟ꧀ꦝꦸꦭꦴ [ꦠꦶꦭꦠꦟ꧀ꦝꦸꦭꦴ (ꦏ.) ꦄ. ꦤꦶ. ꧓.꧓꧐] ꦩꦺꦴꦢꦏꦴ ꦧꦢꦫꦴ. ꦱꦺꦴ ꦠꦩ꧀ꦲꦴ ꦄꦴꦱꦤꦴ ꦮꦸꦛ꧀ꦜꦲꦤ꧀ꦠꦺꦴ ꦱꦠꦶꦱꦩ꧀ꦩꦺꦴꦱꦴ ꦥꦏꦶꦫꦺꦪ꧀ꦪ. ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦫꦴꦩꦁ ꦒꦤ꧀ꦠꦴ ꦲꦺꦴꦠꦶ ꦄꦨꦶꦏ꧀ꦑꦟꦁ ꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦺ ꦣꦩ꧀ꦩꦱ꧀ꦱꦮꦟꦴꦪ. ꦠꦱ꧀ꦱ ꦨꦶꦏ꧀ꦑꦹ ꦣꦩ꧀ꦩꦁ ꦢꦺꦱꦺꦤ꧀ꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦤ꧀ꦠꦶ. ꦱꦺꦴ ꦠꦱ꧀ꦩꦶꦁ ꦄꦴꦱꦤꦺ ꦤꦶꦱꦶꦤ꧀ꦤꦺꦴ ꦠꦱ꧀ꦱꦴ ꦏꦡꦴꦪ ꦄꦴꦢꦶꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦩꦗ꧀ꦙꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦥꦫꦶꦪꦺꦴꦱꦴꦤꦩ꧀ꦥꦶ ꦩꦤꦱꦶ ꦏꦫꦺꦴꦠꦶ. ꦮꦸꦛ꧀ꦜꦶꦠꦺꦴ ꦕ ꦑꦺꦴ ꦠꦩ꧀ꦲꦴ ꦄꦴꦱꦤꦴ ꦠꦱ꧀ꦱꦴ ꦏꦡꦴꦪ ꦤꦺꦮ ꦄꦴꦢꦶꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦤ ꦩꦗ꧀ꦙꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦤ ꦥꦫꦶꦪꦺꦴꦱꦴꦤꦩ꧀ꦥꦶ ꦩꦤꦱꦶ ꦏꦫꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦈꦕ꧀ꦖꦔ꧀ꦒꦥꦚ꧀ꦚꦺꦴ’’.

꧑꧐꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦸꦡꦸꦥꦚ꧀ꦚꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦫꦴꦩꦁ ꦒꦤ꧀ꦠꦴ ꦲꦺꦴꦠꦶ ꦄꦨꦶꦏ꧀ꦑꦟꦁ ꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦺ ꦣꦩ꧀ꦩꦱ꧀ꦱꦮꦟꦴꦪ. ꦠꦱ꧀ꦱ ꦨꦶꦏ꧀ꦑꦹ ꦣꦩ꧀ꦩꦁ ꦢꦺꦱꦺꦤ꧀ꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦤ꧀ꦠꦶ. ꦱꦺꦴ ꦠꦱ꧀ꦩꦶꦁ ꦄꦴꦱꦤꦺ ꦤꦶꦱꦶꦤ꧀ꦤꦺꦴ ꦠꦱ꧀ꦱꦴ ꦏꦡꦴꦪ ꦄꦴꦢꦶꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦩꦗ꧀ꦙꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦥꦫꦶꦪꦺꦴꦱꦴꦤꦩ꧀ꦥꦶ ꦩꦤꦱꦶ ꦏꦫꦺꦴꦠꦶ. ꦮꦸꦛ꧀ꦜꦶꦠꦺꦴꦥꦶ ꦠꦩ꧀ꦲꦴ ꦄꦴꦱꦤꦴ ꦠꦱ꧀ꦱꦴ ꦏꦡꦴꦪ ꦄꦴꦢꦶꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦩꦗ꧀ꦙꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦥꦫꦶꦪꦺꦴꦱꦴꦤꦩ꧀ꦥꦶ ꦩꦤꦱꦶ ꦏꦫꦺꦴꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦏꦸꦩ꧀ꦨꦺꦴ ꦈꦏ꧀ꦏꦸꦗ꧀ꦗꦺꦴ ꦠꦠ꧀ꦫ ꦈꦢꦏꦁ ꦄꦴꦱꦶꦠ꧀ꦠꦁ ꦱꦟ꧀ꦜꦴꦠꦶ, ꦤꦺꦴ ꦮꦶꦮꦛ꧀ꦛꦠꦶ; ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦫꦴꦩꦁ ꦒꦤ꧀ꦠꦴ ꦲꦺꦴꦤ꧀ꦠꦶ ꦄꦨꦶꦏ꧀ꦑꦟꦁ ꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦺ ꦣꦩ꧀ꦩꦱ꧀ꦱꦮꦟꦴꦪ. ꦠꦱ꧀ꦱ ꦨꦶꦏ꧀ꦑꦹ ꦣꦩ꧀ꦩꦁ ꦢꦺꦱꦺꦤ꧀ꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦤ꧀ꦠꦶ. ꦱꦺꦴ ꦠꦱ꧀ꦩꦶꦁ ꦄꦴꦱꦤꦺ ꦤꦶꦱꦶꦤ꧀ꦤꦺꦴ ꦠꦱ꧀ꦱꦴ ꦏꦡꦴꦪ ꦄꦴꦢꦶꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦩꦗ꧀ꦙꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦥꦫꦶꦪꦺꦴꦱꦴꦤꦩ꧀ꦥꦶ ꦩꦤꦱꦶ ꦏꦫꦺꦴꦠꦶ. ꦮꦸꦛ꧀ꦜꦶꦠꦺꦴꦥꦶ ꦠꦩ꧀ꦲꦴ ꦄꦴꦱꦤꦴ ꦠꦱ꧀ꦱꦴ ꦏꦡꦴꦪ ꦄꦴꦢꦶꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦩꦗ꧀ꦙꦩ꧀ꦥꦶ ꦩꦤꦱꦶ ꦏꦫꦺꦴꦠꦶ, ꦥꦫꦶꦪꦺꦴꦱꦴꦤꦩ꧀ꦥꦶ ꦩꦤꦱꦶ ꦏꦫꦺꦴꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦸꦡꦸꦥꦚ꧀ꦚꦺꦴ’’.

꧑꧑꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦏꦴꦩꦺꦱꦸ ꦕ ꦨꦮꦺꦱꦸ ꦕ ꦄꦮꦷꦠꦫꦴꦒꦺꦴ? ꦱꦺꦴꦠꦴꦥꦤ꧀ꦤꦱꦏꦢꦴꦒꦴꦩꦶꦤꦺꦴ – ꦆꦩꦺ ꦮꦸꦕ꧀ꦕꦤ꧀ꦠꦶ ꦥꦸꦒ꧀ꦒꦭꦴ ‘‘ꦏꦴꦩꦺꦱꦸ ꦕ ꦨꦮꦺꦱꦸ ꦕ ꦄꦮꦷꦠꦫꦴꦒꦴ’’.

꧑꧑꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦏꦴꦩꦺꦱꦸ ꦮꦷꦠꦫꦴꦒꦺꦴ, ꦨꦮꦺꦱꦸ ꦄꦮꦷꦠꦫꦴꦒꦺꦴ? ꦄꦤꦴꦒꦴꦩꦷ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦏꦴꦩꦺꦱꦸ ꦮꦷꦠꦫꦴꦒꦺꦴ, ꦨꦮꦺꦱꦸ ꦄꦮꦷꦠꦫꦴꦒꦺꦴ’’.

꧑꧑꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦏꦴꦩꦺꦱꦸ ꦕ ꦨꦮꦺꦱꦸ ꦕ ꦮꦷꦠꦫꦴꦒꦺꦴ? ꦄꦫꦲꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦏꦴꦩꦺꦱꦸ ꦕ ꦨꦮꦺꦱꦸ ꦕ ꦮꦷꦠꦫꦴꦒꦺꦴ’’.

꧑꧑꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦴꦱꦴꦟꦭꦺꦑꦹꦥꦩꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦨꦶꦟ꧀ꦲꦁ ꦏꦸꦗ꧀ꦙꦠꦶ. ꦱꦺꦴ ꦕ ꦑ꧀ꦮꦱ꧀ꦱ ꦏꦺꦴꦣꦺꦴ ꦕꦶꦫꦁ ꦢꦷꦓꦫꦠ꧀ꦠꦁ ꦄꦤꦸꦱꦺꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦥꦴꦱꦴꦟꦺ ꦭꦺꦑꦴ ꦤ ꦑꦶꦥ꧀ꦥꦁ ꦭꦸꦗ꧀ꦗꦠꦶ ꦮꦴꦠꦺꦤ ꦮꦴ ꦈꦢꦏꦺꦤ ꦮꦴ, ꦕꦶꦫꦛ꧀ꦜꦶꦠꦶꦏꦴ ꦲꦺꦴꦠꦶ; ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦨꦶꦟ꧀ꦲꦁ ꦏꦸꦗ꧀ꦙꦠꦶ. ꦱꦺꦴ ꦕ ꦑ꧀ꦮꦱ꧀ꦱ ꦏꦺꦴꦣꦺꦴ ꦕꦶꦫꦁ ꦢꦷꦓꦫꦠ꧀ꦠꦁ ꦄꦤꦸꦱꦺꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦴꦱꦴꦟꦭꦺꦑꦹꦥꦩꦺꦴ’’.

꧑꧑꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦥꦡꦮꦶꦭꦺꦑꦹꦥꦩꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦨꦶꦟ꧀ꦲꦁ ꦏꦸꦗ꧀ꦙꦠꦶ. ꦱꦺꦴ ꦕ ꦑ꧀ꦮꦱ꧀ꦱ ꦏꦺꦴꦣꦺꦴ ꦤ ꦕꦶꦫꦁ ꦢꦷꦓꦫꦠ꧀ꦠꦁ ꦄꦤꦸꦱꦺꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦥꦡꦮꦶꦪꦴ [ꦥꦜꦮꦶꦪꦴ (ꦱꦷ. ꦱ꧀ꦪꦴ.)] ꦭꦺꦑꦴ ꦑꦶꦥ꧀ꦥꦁ ꦭꦸꦗ꧀ꦗꦠꦶ ꦮꦴꦠꦺꦤ ꦮꦴ ꦈꦢꦏꦺꦤ ꦮꦴ, ꦤ ꦕꦶꦫꦛ꧀ꦜꦶꦠꦶꦏꦴ ꦲꦺꦴꦠꦶ; ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦨꦶꦟ꧀ꦲꦁ ꦏꦸꦗ꧀ꦙꦠꦶ. ꦱꦺꦴ ꦕ ꦑ꧀ꦮꦱ꧀ꦱ ꦏꦺꦴꦣꦺꦴ ꦤ ꦕꦶꦫꦁ ꦢꦷꦓꦫꦠ꧀ꦠꦁ ꦄꦤꦸꦱꦺꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦥꦡꦮꦶꦭꦺꦑꦹꦥꦩꦺꦴ’’.

꧑꧑꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦈꦢꦏꦭꦺꦑꦹꦥꦩꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦒꦴꦭ꦳꧀ꦲꦺꦤꦥꦶ ꦮꦸꦕ꧀ꦕꦩꦴꦤꦺꦴ ꦦꦫꦸꦱꦺꦤꦥꦶ ꦮꦸꦕ꧀ꦕꦩꦴꦤꦺꦴ ꦄꦩꦤꦴꦥꦺꦤꦥꦶ ꦮꦸꦕ꧀ꦕꦩꦴꦤꦺꦴ ꦱꦁꦱꦤ꧀ꦢꦠꦶꦩꦺꦮ [… ꦕꦺꦮ (ꦱ꧀ꦪꦴ.) ꦄ. ꦤꦶ. ꧓.꧑꧓꧓] ꦱꦤ꧀ꦣꦶꦪꦠꦶꦩꦺꦮ [… ꦕꦺꦮ (ꦱ꧀ꦪꦴ.) ꦄ. ꦤꦶ. ꧓.꧑꧓꧓] ꦱꦩ꧀ꦩꦺꦴꦢꦠꦶꦩꦺꦮ [… ꦕꦺꦮ (ꦱ꧀ꦪꦴ.) ꦄ. ꦤꦶ. ꧓.꧑꧓꧓]. ꦱꦺꦪ꧀ꦪꦡꦴꦥꦶ ꦤꦴꦩ ꦈꦢꦏꦺ ꦭꦺꦑꦴ ꦑꦶꦥ꧀ꦥꦁ ꦭꦸꦗ꧀ꦗꦠꦶ, ꦤ ꦕꦶꦫꦛ꧀ꦜꦶꦠꦶꦏꦴ ꦲꦺꦴꦠꦶ; ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦒꦴꦭ꦳꧀ꦲꦺꦤꦥꦶ ꦮꦸꦕ꧀ꦕꦩꦴꦤꦺꦴ ꦦꦫꦸꦱꦺꦤꦥꦶ ꦮꦸꦕ꧀ꦕꦩꦴꦤꦺꦴ ꦄꦩꦤꦴꦥꦺꦤꦥꦶ ꦮꦸꦕ꧀ꦕꦩꦴꦤꦺꦴ ꦱꦁꦱꦤ꧀ꦢꦠꦶꦩꦺꦮ ꦱꦤ꧀ꦣꦶꦪꦠꦶꦩꦺꦮ ꦱꦩ꧀ꦩꦺꦴꦢꦠꦶꦩꦺꦮ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦈꦢꦏꦭꦺꦑꦹꦥꦩꦺꦴ’’.

꧑꧑꧖. ꦠꦠ꧀ꦡ ꦏꦠꦩꦺ ꦠꦪꦺꦴ ꦥꦺꦴꦠ꧀ꦡꦏꦹꦥꦩꦴ ꦥꦸꦒ꧀ꦒꦭꦴ? ꦠꦪꦺꦴ ꦥꦺꦴꦠ꧀ꦡꦏꦴ – ꦤꦮꦺꦴꦥꦶ ꦥꦺꦴꦠ꧀ꦡꦏꦺꦴ ꦢꦸꦧ꧀ꦧꦟ꧀ꦟꦺꦴ ꦕꦺꦮ ꦲꦺꦴꦠꦶ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ ꦕ ꦄꦥ꧀ꦥꦒ꧀ꦓꦺꦴ ꦕ, ꦩꦗ꧀ꦙꦶꦩꦺꦴꦥꦶ ꦥꦺꦴꦠ꧀ꦡꦏꦺꦴ ꦢꦸꦧ꧀ꦧꦟ꧀ꦟꦺꦴ ꦕꦺꦮ ꦲꦺꦴꦠꦶ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ ꦕ ꦄꦥ꧀ꦥꦒ꧀ꦓꦺꦴ ꦕ, ꦗꦶꦟ꧀ꦟꦺꦴꦥꦶ ꦥꦺꦴꦠ꧀ꦡꦏꦺꦴ ꦢꦸꦧ꧀ꦧꦟ꧀ꦟꦺꦴ ꦕꦺꦮ ꦲꦺꦴꦠꦶ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ ꦕ ꦄꦥ꧀ꦥꦒ꧀ꦓꦺꦴ ꦕ. ꦗꦶꦟ꧀ꦟꦩ꧀ꦥꦶ ꦥꦺꦴꦠ꧀ꦡꦏꦁ ꦈꦏ꧀ꦑꦭꦶꦥꦫꦶꦩꦗ꧀ꦗꦤꦁ ꦮꦴ ꦏꦫꦺꦴꦤ꧀ꦠꦶ ꦱꦔ꧀ꦏꦴꦫꦏꦹꦛꦺ ꦮꦴ ꦤꦁ ꦖꦝ꧀ꦝꦺꦤ꧀ꦠꦶ. ꦌꦮꦩꦺꦮꦁ ꦠꦪꦺꦴꦩꦺ ꦥꦺꦴꦠ꧀ꦡꦏꦹꦥꦩꦴ ꦥꦸꦒ꧀ꦒꦭꦴ ꦱꦤ꧀ꦠꦺꦴ ꦱꦁꦮꦶꦗ꧀ꦗꦩꦴꦤꦴ ꦨꦶꦏ꧀ꦑꦹꦱꦸ. ꦏꦠꦩꦺ ꦠꦪꦺꦴ? ꦤꦮꦺꦴ ꦕꦺꦥꦶ ꦨꦶꦏ꧀ꦑꦸ ꦲꦺꦴꦠꦶ ꦢꦸꦱ꧀ꦱꦷꦭꦺꦴ ꦥꦴꦥꦣꦩ꧀ꦩꦺꦴ, ꦆꦢꦩꦱ꧀ꦱ ꦢꦸꦧ꧀ꦧꦟ꧀ꦟꦠꦴꦪ. ꦱꦺꦪ꧀ꦪꦡꦴꦥꦶ ꦱꦺꦴ ꦥꦺꦴꦠ꧀ꦡꦏꦺꦴ ꦢꦸꦧ꧀ꦧꦟ꧀ꦟꦺꦴ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ. ꦪꦺ ꦑꦺꦴ ꦥꦤꦱ꧀ꦱ ꦱꦺꦮꦤ꧀ꦠꦶ ꦨꦗꦤ꧀ꦠꦶ ꦥꦪꦶꦫꦸꦥꦴꦱꦤ꧀ꦠꦶ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦤ꧀ꦠꦶ, ꦠꦺꦱꦁ ꦠꦁ ꦲꦺꦴꦠꦶ ꦢꦷꦓꦫꦠ꧀ꦠꦁ ꦄꦲꦶꦠꦴꦪ ꦢꦸꦏ꧀ꦑꦴꦪ. ꦆꦢꦩꦱ꧀ꦱ ꦢꦸꦏ꧀ꦑꦱꦩ꧀ꦦꦱ꧀ꦱꦠꦴꦪ. ꦱꦺꦪ꧀ꦪꦡꦴꦥꦶ ꦱꦺꦴ ꦥꦺꦴꦠ꧀ꦡꦏꦺꦴ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ. ꦪꦺꦱꦁ ꦑꦺꦴ ꦥꦤ ꦱꦺꦴ ꦥꦛꦶꦒ꧀ꦒꦟ꧀ꦲꦴꦠꦶ ꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦁ, ꦠꦺꦱꦁ ꦠꦁ ꦤ ꦩꦲꦥ꧀ꦦꦭꦁ ꦲꦺꦴꦠꦶ ꦤ ꦩꦲꦴꦤꦶꦱꦁꦱꦁ. ꦆꦢꦩꦱ꧀ꦱ ꦄꦥ꧀ꦥꦒ꧀ꦓꦠꦴꦪ. ꦱꦺꦪ꧀ꦪꦡꦴꦥꦶ ꦱꦺꦴ ꦥꦺꦴꦠ꧀ꦡꦏꦺꦴ ꦄꦥ꧀ꦥꦒ꧀ꦓꦺꦴ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ.

ꦩꦗ꧀ꦙꦶꦩꦺꦴ ꦕꦺꦥꦶ ꦨꦶꦏ꧀ꦑꦸ ꦲꦺꦴꦠꦶ…ꦥꦺ… ꦡꦺꦫꦺꦴ ꦕꦺꦥꦶ ꦨꦶꦏ꧀ꦑꦸ ꦲꦺꦴꦠꦶ ꦢꦸꦱ꧀ꦱꦷꦭꦺꦴ ꦥꦴꦥꦣꦩ꧀ꦩꦺꦴ, ꦆꦢꦩꦱ꧀ꦱ ꦢꦸꦧ꧀ꦧꦟ꧀ꦟꦠꦴꦪ. ꦱꦺꦪ꧀ꦪꦡꦴꦥꦶ ꦱꦺꦴ ꦥꦺꦴꦠ꧀ꦡꦏꦺꦴ ꦢꦸꦧ꧀ꦧꦟ꧀ꦟꦺꦴ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ. ꦪꦺ ꦑꦺꦴ ꦥꦤꦱ꧀ꦱ ꦱꦺꦮꦤ꧀ꦠꦶ ꦨꦗꦤ꧀ꦠꦶ ꦥꦪꦶꦫꦸꦥꦴꦱꦤ꧀ꦠꦶ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦤ꧀ꦠꦶ, ꦠꦺꦱꦁ ꦠꦁ ꦲꦺꦴꦠꦶ ꦢꦷꦓꦫꦠ꧀ꦠꦁ ꦄꦲꦶꦠꦴꦪ ꦢꦸꦏ꧀ꦑꦴꦪ. ꦆꦢꦩꦱ꧀ꦱ ꦢꦸꦏ꧀ꦑꦱꦩ꧀ꦦꦱ꧀ꦱꦠꦴꦪ. ꦱꦺꦪ꧀ꦪꦡꦴꦥꦶ ꦱꦺꦴ ꦥꦺꦴꦠ꧀ꦡꦏꦺꦴ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ. ꦪꦺꦱꦁ ꦑꦺꦴ ꦥꦤ ꦱꦺꦴ ꦥꦛꦶꦒ꧀ꦒꦟ꧀ꦲꦴꦠꦶ ꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦁ, ꦠꦺꦱꦁ ꦠꦁ ꦤ ꦩꦲꦥ꧀ꦦꦭꦁ ꦲꦺꦴꦠꦶ ꦤ ꦩꦲꦴꦤꦶꦱꦁꦱꦁ. ꦆꦢꦩꦱ꧀ꦱ ꦄꦥ꧀ꦥꦒ꧀ꦓꦠꦴꦪ. ꦱꦺꦪ꧀ꦪꦡꦴꦥꦶ ꦱꦺꦴ ꦥꦺꦴꦠ꧀ꦡꦏꦺꦴ ꦄꦥ꧀ꦥꦒ꧀ꦓꦺꦴ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ.

ꦌꦮꦫꦹꦥꦺꦴ ꦕꦺ ꦡꦺꦫꦺꦴ ꦨꦶꦏ꧀ꦑꦸ ꦱꦔ꧀ꦓꦩꦗ꧀ꦙꦺ ꦨꦟꦠꦶ. ꦠꦩꦺꦤꦁ ꦨꦶꦏ꧀ꦑꦹ ꦌꦮꦩꦴꦲꦁꦱꦸ – ‘‘ꦏꦶꦁ ꦤꦸ ꦑꦺꦴ ꦠꦸꦪ꧀ꦲꦁ ꦧꦴꦭꦱ꧀ꦱ ꦄꦧ꧀ꦪꦠ꧀ꦠꦱ꧀ꦱ ꦨꦟꦶꦠꦺꦤ, ꦠ꧀ꦮꦩ꧀ꦥꦶ ꦤꦴꦩ ꦨꦟꦶꦠꦧ꧀ꦧꦁ ꦩꦚ꧀ꦚꦱꦷ’’ꦠꦶ! ꦱꦺꦴ ꦏꦸꦥꦶꦠꦺꦴ ꦄꦤꦠ꧀ꦠꦩꦤꦺꦴ ꦠꦡꦴꦫꦹꦥꦶꦁ ꦮꦴꦕꦁ ꦤꦶꦕ꧀ꦖꦴꦫꦺꦠꦶ ꦪꦡꦴꦫꦹꦥꦴꦪ ꦮꦴꦕꦴꦪ ꦱꦔ꧀ꦓꦺꦴ ꦠꦁ ꦈꦏ꧀ꦑꦶꦥꦠꦶ, ꦱꦔ꧀ꦏꦴꦫꦏꦹꦛꦺꦮ ꦤꦁ ꦥꦺꦴꦠ꧀ꦡꦏꦁ. ꦆꦩꦺ ꦠꦪꦺꦴ ꦥꦺꦴꦠ꧀ꦡꦏꦹꦥꦩꦴ ꦥꦸꦒ꧀ꦒꦭꦴ ꦱꦤ꧀ꦠꦺꦴ ꦱꦁꦮꦶꦗ꧀ꦗꦩꦴꦤꦴ ꦨꦶꦏ꧀ꦑꦹꦱꦸ.

꧑꧑꧗. ꦠꦠ꧀ꦡ ꦏꦠꦩꦺ ꦠꦪꦺꦴ ꦏꦴꦱꦶꦏꦮꦠ꧀ꦡꦹꦥꦩꦴ ꦥꦸꦒ꧀ꦒꦭꦴ? ꦠꦷꦟꦶ ꦏꦴꦱꦶꦏꦮꦠ꧀ꦡꦴꦤꦶ – ꦤꦮꦩ꧀ꦥꦶ ꦏꦴꦱꦶꦏꦮꦠ꧀ꦡꦁ ꦮꦟ꧀ꦟꦮꦤ꧀ꦠꦚ꧀ꦕꦺꦮ ꦲꦺꦴꦠꦶ ꦱꦸꦑꦱꦩ꧀ꦦꦱ꧀ꦱꦚ꧀ꦕ ꦩꦲꦒ꧀ꦓꦚ꧀ꦕ, ꦩꦗ꧀ꦙꦶꦩꦩ꧀ꦥꦶ ꦏꦴꦱꦶꦏꦮꦠ꧀ꦡꦁ ꦮꦟ꧀ꦟꦮꦤ꧀ꦠꦚ꧀ꦕꦺꦮ ꦲꦺꦴꦠꦶ ꦱꦸꦑꦱꦩ꧀ꦦꦱ꧀ꦱꦚ꧀ꦕ ꦩꦲꦒ꧀ꦓꦚ꧀ꦕ, ꦗꦶꦟ꧀ꦟꦩ꧀ꦥꦶ ꦏꦴꦱꦶꦏꦮꦠ꧀ꦡꦁ ꦮꦟ꧀ꦟꦮꦤ꧀ꦠꦚ꧀ꦕꦺꦮ ꦲꦺꦴꦠꦶ ꦱꦸꦑꦱꦩ꧀ꦦꦱ꧀ꦱꦚ꧀ꦕ ꦩꦲꦒ꧀ꦓꦚ꧀ꦕ. ꦗꦶꦟ꧀ꦟꦩ꧀ꦥꦶ ꦏꦴꦱꦶꦏꦮꦠ꧀ꦡꦁ ꦫꦠꦤꦥꦭꦶꦮꦺꦜꦤꦁ ꦮꦴ ꦏꦫꦺꦴꦤ꧀ꦠꦶ ꦒꦤ꧀ꦣꦏꦫꦟ꧀ꦝꦏꦺ ꦮꦴ ꦤꦁ ꦤꦶꦏ꧀ꦑꦶꦥꦤ꧀ꦠꦶ.

ꦌꦮꦩꦺꦮꦁ ꦠꦪꦺꦴꦩꦺ ꦏꦴꦱꦶꦏꦮꦠ꧀ꦡꦹꦥꦩꦴ ꦥꦸꦒ꧀ꦒꦭꦴ ꦱꦤ꧀ꦠꦺꦴ ꦱꦁꦮꦶꦗ꧀ꦗꦩꦴꦤꦴ ꦨꦶꦏ꧀ꦑꦹꦱꦸ. ꦏꦠꦩꦺ ꦠꦪꦺꦴ? ꦤꦮꦺꦴ ꦕꦺꦥꦶ ꦨꦶꦏ꧀ꦑꦸ ꦲꦺꦴꦠꦶ ꦱꦷꦭꦮꦴ ꦏꦭ꧀ꦪꦴꦟꦣꦩ꧀ꦩꦺꦴ, ꦆꦢꦩꦱ꧀ꦱ ꦱꦸꦮꦟ꧀ꦟꦠꦴꦪ. ꦱꦺꦪ꧀ꦪꦡꦴꦥꦶ ꦠꦁ ꦏꦴꦱꦶꦏꦮꦠ꧀ꦡꦁ ꦮꦟ꧀ꦟꦮꦤ꧀ꦠꦁ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ. ꦪꦺ ꦑꦺꦴ ꦥꦤꦱ꧀ꦱ ꦱꦺꦮꦤ꧀ꦠꦶ ꦨꦗꦤ꧀ꦠꦶ ꦥꦪꦶꦫꦸꦥꦴꦱꦤ꧀ꦠꦶ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦤ꧀ꦠꦶ, ꦠꦺꦱꦁ ꦠꦁ ꦲꦺꦴꦠꦶ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪ. ꦆꦢꦩꦱ꧀ꦱ ꦱꦸꦑꦱꦩ꧀ꦦꦱ꧀ꦱꦠꦴꦪ. ꦱꦺꦪ꧀ꦪꦡꦴꦥꦶ ꦠꦁ ꦏꦴꦱꦶꦏꦮꦠ꧀ꦡꦁ ꦱꦸꦑꦱꦩ꧀ꦦꦱ꧀ꦱꦁ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ. ꦪꦺꦱꦁ ꦑꦺꦴ ꦥꦤ ꦱꦺꦴ [ꦪꦺꦱꦁ ꦑꦺꦴ ꦥꦤ (ꦱꦧ꧀ꦧꦠ꧀ꦡ) ꦄ. ꦤꦶ. ꧓.꧑꧐꧐] ꦥꦛꦶꦒ꧀ꦒꦟ꧀ꦲꦴꦠꦶ [ꦥꦠꦶꦒꦟ꧀ꦲꦴꦠꦶ (ꦱꦷ.) ꦫꦹꦥꦱꦶꦢ꧀ꦣꦶꦛꦷꦏꦴꦪ ꦥꦤ ꦱꦩꦺꦠꦶ] ꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦁ, ꦠꦺꦱꦁ ꦠꦁ ꦩꦲꦥ꧀ꦦꦭꦁ ꦲꦺꦴꦠꦶ ꦩꦲꦴꦤꦶꦱꦁꦱꦁ. ꦆꦢꦩꦱ꧀ꦱ ꦩꦲꦒ꧀ꦓꦠꦴꦪ. ꦱꦺꦪ꧀ꦪꦡꦴꦥꦶ ꦠꦁ ꦏꦴꦱꦶꦏꦮꦠ꧀ꦡꦁ ꦩꦲꦒ꧀ꦓꦁ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ.

ꦩꦗ꧀ꦙꦶꦩꦺꦴ ꦕꦺꦥꦶ ꦨꦶꦏ꧀ꦑꦸ…ꦥꦺ… ꦡꦺꦫꦺꦴ ꦕꦺꦥꦶ ꦨꦶꦏ꧀ꦑꦸ ꦲꦺꦴꦠꦶ ꦱꦷꦭꦮꦴ ꦏꦭ꧀ꦪꦴꦟꦣꦩ꧀ꦩꦺꦴ, ꦆꦢꦩꦱ꧀ꦱ ꦱꦸꦮꦟ꧀ꦟꦠꦴꦪ. ꦱꦺꦪ꧀ꦪꦡꦴꦥꦶ ꦠꦁ ꦏꦴꦱꦶꦏꦮꦠ꧀ꦡꦁ ꦮꦟ꧀ꦟꦮꦤ꧀ꦠꦁ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ. ꦪꦺ ꦑꦺꦴ ꦥꦤꦱ꧀ꦱ ꦱꦺꦮꦤ꧀ꦠꦶ ꦨꦗꦤ꧀ꦠꦶ ꦥꦪꦶꦫꦸꦥꦴꦱꦤ꧀ꦠꦶ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦤ꧀ꦠꦶ, ꦠꦺꦱꦁ ꦠꦁ ꦲꦺꦴꦠꦶ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪ. ꦆꦢꦩꦱ꧀ꦱ ꦱꦸꦑꦱꦩ꧀ꦦꦱ꧀ꦱꦠꦴꦪ. ꦱꦺꦪ꧀ꦪꦡꦴꦥꦶ ꦠꦁ ꦏꦴꦱꦶꦏꦮꦠ꧀ꦡꦁ ꦱꦸꦑꦱꦩ꧀ꦦꦱ꧀ꦱꦁ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ. ꦪꦺꦱꦁ ꦑꦺꦴ ꦥꦤ ꦱꦺꦴ ꦥꦛꦶꦒ꧀ꦒꦟ꧀ꦲꦴꦠꦶ ꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦁ, ꦠꦺꦱꦁ ꦠꦁ ꦩꦲꦥ꧀ꦦꦭꦁ ꦲꦺꦴꦠꦶ ꦩꦲꦴꦤꦶꦱꦁꦱꦁ. ꦆꦢꦩꦱ꧀ꦱ ꦩꦲꦒ꧀ꦓꦠꦴꦪ. ꦱꦺꦪ꧀ꦪꦡꦴꦥꦶ ꦠꦁ ꦏꦴꦱꦶꦏꦮꦠ꧀ꦡꦁ ꦩꦲꦒ꧀ꦓꦁ, ꦠꦡꦹꦥꦩꦺꦴ ꦄꦪꦁ ꦥꦸꦒ꧀ꦒꦭꦺꦴ.

ꦌꦮꦫꦹꦥꦺꦴ ꦕꦺ ꦡꦺꦫꦺꦴ ꦨꦶꦏ꧀ꦑꦸ ꦱꦔ꧀ꦓꦩꦗ꧀ꦙꦺ ꦨꦟꦠꦶ, ꦠꦩꦺꦤꦁ ꦨꦶꦏ꧀ꦑꦹ ꦌꦮꦩꦴꦲꦁꦱꦸ – ‘‘ꦄꦥ꧀ꦥꦱꦢ꧀ꦢꦴ ꦄꦴꦪꦱ꧀ꦩꦤ꧀ꦠꦺꦴ ꦲꦺꦴꦡ, ꦡꦺꦫꦺꦴ ꦨꦶꦏ꧀ꦑꦸ ꦣꦩ꧀ꦩꦚ꧀ꦕ ꦮꦶꦤꦪꦚ꧀ꦕ ꦨꦟꦠꦷ’’ꦠꦶ. ꦠꦱ꧀ꦱ ꦠꦁ ꦮꦕꦤꦁ ꦄꦴꦣꦺꦪ꧀ꦪꦁ ꦒꦕ꧀ꦖꦠꦶ, ꦒꦤ꧀ꦣꦏꦫꦟ꧀ꦝꦏꦺꦮ ꦤꦁ ꦏꦴꦱꦶꦏꦮꦠ꧀ꦡꦁ. ꦆꦩꦺ ꦠꦪꦺꦴ ꦏꦴꦱꦶꦏꦮꦠ꧀ꦡꦹꦥꦩꦴ ꦥꦸꦒ꧀ꦒꦭꦴ ꦱꦤ꧀ꦠꦺꦴ ꦱꦁꦮꦶꦗ꧀ꦗꦩꦴꦤꦴ ꦨꦶꦏ꧀ꦑꦹꦱꦸ.

꧑꧑꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦸꦥ꧀ꦥꦩꦺꦪ꧀ꦪꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦈꦢ꧀ꦣꦠꦺꦴ ꦲꦺꦴꦠꦶ ꦈꦤ꧀ꦤꦭ꦳ꦺꦴ ꦕꦥꦭꦺꦴ ꦩꦸꦑꦫꦺꦴ ꦮꦶꦏꦶꦟ꧀ꦟꦮꦴꦕꦺꦴ ꦩꦸꦛ꧀ꦜꦱ꧀ꦱꦠꦶ ꦄꦱꦩ꧀ꦥꦗꦴꦤꦺꦴ ꦄꦱꦩꦴꦲꦶꦠꦺꦴ ꦮꦶꦧ꧀ꦨꦤ꧀ꦠꦕꦶꦠ꧀ꦠꦺꦴ ꦥꦴꦏꦛꦶꦤ꧀ꦢ꧀ꦫꦶꦪꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦱꦸꦥ꧀ꦥꦩꦺꦪ꧀ꦪꦺꦴ’’.

꧑꧑꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦢꦸꦥ꧀ꦥꦩꦺꦪ꧀ꦪꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦤꦸꦢ꧀ꦣꦠꦺꦴ ꦲꦺꦴꦠꦶ ꦄꦤꦸꦤ꧀ꦤꦭ꦳ꦺꦴ ꦄꦕꦥꦭꦺꦴ ꦄꦩꦸꦑꦫꦺꦴ ꦄꦮꦶꦏꦶꦟ꧀ꦟꦮꦴꦕꦺꦴ ꦈꦥꦛ꧀ꦜꦶꦠꦱ꧀ꦱꦠꦶ ꦱꦩ꧀ꦥꦗꦴꦤꦺꦴ ꦱꦩꦴꦲꦶꦠꦺꦴ ꦌꦏꦒ꧀ꦒꦕꦶꦠ꧀ꦠꦺꦴ ꦱꦁꦮꦸꦠꦶꦤ꧀ꦢ꧀ꦫꦶꦪꦺꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦢꦸꦥ꧀ꦥꦩꦺꦪ꧀ꦪꦺꦴ’’.

꧑꧒꧐. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦥ꧀ꦥꦩꦺꦪ꧀ꦪꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ‘‘ꦄꦥ꧀ꦥꦩꦺꦪ꧀ꦪꦺꦴ’’.

꧑꧒꧑. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦤ ꦱꦺꦮꦶꦠꦧ꧀ꦧꦺꦴ ꦤ ꦨꦗꦶꦠꦧ꧀ꦧꦺꦴ ꦤ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦲꦷꦤꦺꦴ ꦲꦺꦴꦠꦶ ꦱꦷꦭꦺꦤ ꦱꦩꦴꦣꦶꦤꦴ ꦥꦚ꧀ꦚꦴꦪ. ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦤ ꦱꦺꦮꦶꦠꦧ꧀ꦧꦺꦴ ꦤ ꦨꦗꦶꦠꦧ꧀ꦧꦺꦴ ꦤ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ, ꦄꦚ꧀ꦚꦠ꧀ꦫ ꦄꦤꦸꦢ꧀ꦢꦪꦴ ꦄꦚ꧀ꦚꦠ꧀ꦫ ꦄꦤꦸꦏꦩ꧀ꦥꦴ.

꧑꧒꧒. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦺꦮꦶꦠꦧ꧀ꦧꦺꦴ ꦨꦗꦶꦠꦧ꧀ꦧꦺꦴ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦢꦶꦱꦺꦴ ꦲꦺꦴꦠꦶ ꦱꦷꦭꦺꦤ ꦱꦩꦴꦣꦶꦤꦴ ꦥꦚ꧀ꦚꦴꦪ. ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦱꦺꦮꦶꦠꦧ꧀ꦧꦺꦴ ꦨꦗꦶꦠꦧ꧀ꦧꦺꦴ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ. ꦠꦁ ꦏꦶꦱ꧀ꦱ ꦲꦺꦠꦸ? ‘‘ꦱꦷꦭꦱꦴꦩꦚ꧀ꦚꦒꦠꦴꦤꦁ ꦱꦠꦁ ꦱꦷꦭꦏꦡꦴ ꦕ ꦤꦺꦴ ꦨꦮꦶꦱ꧀ꦱꦠꦶ, ꦱꦴ ꦕ ꦤꦺꦴ ꦦꦴꦱꦸ ꦨꦮꦶꦱ꧀ꦱꦠꦶ, ꦱꦴ ꦕ ꦤꦺꦴ ꦥꦮꦠ꧀ꦠꦶꦤꦷ ꦨꦮꦶꦱ꧀ꦱꦠꦶ; ꦱꦩꦴꦣꦶꦱꦴꦩꦚ꧀ꦚꦒꦠꦴꦤꦁ ꦱꦠꦁ ꦱꦩꦴꦣꦶꦏꦡꦴ ꦕ ꦤꦺꦴ ꦨꦮꦶꦱ꧀ꦱꦠꦶ, ꦱꦴ ꦕ ꦤꦺꦴ ꦦꦴꦱꦸ ꦨꦮꦶꦱ꧀ꦱꦠꦶ, ꦱꦴ ꦕ ꦤꦺꦴ ꦥꦮꦠ꧀ꦠꦶꦤꦷ [ꦥꦮꦠ꧀ꦠꦤꦷ (ꦱꦷ.) ꦄ. ꦤꦶ. ꧓.꧒꧖] ꦨꦮꦶꦱ꧀ꦱꦠꦶ; ꦥꦚ꧀ꦚꦴꦱꦴꦩꦚ꧀ꦚꦒꦠꦴꦤꦁ ꦱꦠꦁ ꦥꦚ꧀ꦚꦴꦏꦡꦴ ꦕ ꦤꦺꦴ ꦨꦮꦶꦱ꧀ꦱꦠꦶ, ꦱꦴ ꦕ ꦤꦺꦴ ꦦꦴꦱꦸ ꦨꦮꦶꦱ꧀ꦱꦠꦶ, ꦱꦴ ꦕ ꦤꦺꦴ ꦥꦮꦠ꧀ꦠꦶꦤꦷ ꦨꦮꦶꦱ꧀ꦱꦠꦷ’’ꦠꦶ. ꦠꦱ꧀ꦩꦴ ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦱꦺꦮꦶꦠꦧ꧀ꦧꦺꦴ ꦨꦗꦶꦠꦧ꧀ꦧꦺꦴ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ.

꧑꧒꧓. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦱꦺꦮꦶꦠꦧ꧀ꦧꦺꦴ ꦨꦗꦶꦠꦧ꧀ꦧꦺꦴ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦣꦶꦏꦺꦴ ꦲꦺꦴꦠꦶ ꦱꦷꦭꦺꦤ ꦱꦩꦴꦣꦶꦤꦴ ꦥꦚ꧀ꦚꦴꦪ. ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦱꦺꦮꦶꦠꦧ꧀ꦧꦺꦴ ꦨꦗꦶꦠꦧ꧀ꦧꦺꦴ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ. ꦠꦁ ꦏꦶꦱ꧀ꦱ ꦲꦺꦠꦸ? ‘‘ꦄꦥꦫꦶꦥꦹꦫꦁ ꦮꦴ ꦱꦷꦭꦏ꧀ꦑꦤ꧀ꦣꦁ ꦥꦫꦶꦥꦹꦫꦺꦱ꧀ꦱꦴꦩꦶ, ꦥꦫꦶꦥꦹꦫꦁ ꦮꦴ ꦱꦷꦭꦏ꧀ꦑꦤ꧀ꦣꦁ ꦠꦠ꧀ꦡ ꦠꦠ꧀ꦡ ꦥꦚ꧀ꦚꦴꦪ ꦄꦤꦸꦒ꧀ꦒꦲꦺꦱ꧀ꦱꦴꦩꦶ; ꦄꦥꦫꦶꦥꦹꦫꦁ ꦮꦴ ꦱꦩꦴꦣꦶꦏ꧀ꦑꦤ꧀ꦣꦁ ꦥꦫꦶꦥꦹꦫꦺꦱ꧀ꦱꦴꦩꦶ, ꦥꦫꦶꦥꦹꦫꦁ ꦮꦴ ꦱꦩꦴꦣꦶꦏ꧀ꦑꦤ꧀ꦣꦁ ꦠꦠ꧀ꦡ ꦠꦠ꧀ꦡ ꦥꦚ꧀ꦚꦴꦪ ꦄꦤꦸꦒ꧀ꦒꦲꦺꦱ꧀ꦱꦴꦩꦶ; ꦄꦥꦫꦶꦥꦹꦫꦁ ꦮꦴ ꦥꦚ꧀ꦚꦴꦏ꧀ꦑꦤ꧀ꦣꦁ ꦥꦫꦶꦥꦹꦫꦺꦱ꧀ꦱꦴꦩꦶ, ꦥꦫꦶꦥꦹꦫꦁ ꦮꦴ ꦥꦚ꧀ꦚꦴꦏ꧀ꦑꦤ꧀ꦣꦁ ꦠꦠ꧀ꦡ ꦠꦠ꧀ꦡ ꦥꦚ꧀ꦚꦴꦪ ꦄꦤꦸꦒ꧀ꦒꦲꦺꦱ꧀ꦱꦴꦩꦷ’’ꦠꦶ. ꦠꦱ꧀ꦩꦴ ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦱꦺꦮꦶꦠꦧ꧀ꦧꦺꦴ ꦨꦗꦶꦠꦧ꧀ꦧꦺꦴ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ.

꧑꧒꧔. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦗꦶꦒꦸꦕ꧀ꦖꦶꦠꦧ꧀ꦧꦺꦴ ꦤ ꦱꦺꦮꦶꦠꦧ꧀ꦧꦺꦴ ꦤ ꦨꦗꦶꦠꦧ꧀ꦧꦺꦴ ꦤ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦢꦸꦱ꧀ꦱꦷꦭꦺꦴ ꦲꦺꦴꦠꦶ ꦥꦴꦥꦣꦩ꧀ꦩꦺꦴ ꦄꦱꦸꦕꦶ ꦱꦔ꧀ꦏꦱ꧀ꦱꦫꦱꦩꦴꦕꦴꦫꦺꦴ ꦥꦛꦶꦕ꧀ꦖꦤ꧀ꦤꦏꦩ꧀ꦩꦤ꧀ꦠꦺꦴ ꦄꦱ꧀ꦱꦩꦟꦺꦴ ꦱꦩꦟꦥꦛꦶꦚ꧀ꦚꦺꦴ ꦄꦧ꧀ꦫꦲ꧀ꦩꦕꦴꦫꦷ ꦧ꧀ꦫꦲ꧀ꦩꦕꦴꦫꦶꦥꦛꦶꦚ꧀ꦚꦺꦴ ꦄꦤ꧀ꦠꦺꦴꦥꦹꦠꦶ ꦄꦮꦱ꧀ꦱꦸꦠꦺꦴ ꦏꦱꦩ꧀ꦧꦸꦗꦴꦠꦺꦴ. ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦗꦶꦒꦸꦕ꧀ꦖꦶꦠꦧ꧀ꦧꦺꦴ ꦤ ꦱꦺꦮꦶꦠꦧ꧀ꦧꦺꦴ ꦤ ꦨꦗꦶꦠꦧ꧀ꦧꦺꦴ ꦤ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦏꦶꦚ꧀ꦕꦴꦥꦶ ꦌꦮꦫꦹꦥꦱ꧀ꦱ ꦥꦸꦒ꧀ꦒꦭꦱ꧀ꦱ ꦤ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦠꦶ, ꦄꦡ ꦑꦺꦴ ꦤꦁ ꦥꦴꦥꦏꦺꦴ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦕ꧀ꦖꦠꦶ – ‘‘ꦥꦴꦥꦩꦶꦠ꧀ꦠꦺꦴ ꦥꦸꦫꦶꦱꦥꦸꦒ꧀ꦒꦭꦺꦴ ꦥꦴꦥꦱꦲꦴꦪꦺꦴ ꦥꦴꦥꦱꦩ꧀ꦥꦮꦔ꧀ꦏꦺꦴ’’ꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦄꦲꦶ ꦒꦹꦡꦒꦠꦺꦴ ꦏꦶꦚ꧀ꦕꦴꦥꦶ ꦤ ꦝꦁꦱꦠꦶ, ꦄꦡ ꦑꦺꦴ ꦤꦁ ꦩꦏ꧀ꦑꦺꦠꦶ; ꦌꦮꦩꦺꦮꦁ ꦏꦶꦚ꧀ꦕꦴꦥꦶ ꦌꦮꦫꦹꦥꦱ꧀ꦱ ꦥꦸꦒ꧀ꦒꦭꦱ꧀ꦱ ꦤ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦠꦶ, ꦄꦡ ꦑꦺꦴ ꦤꦁ ꦥꦴꦥꦏꦺꦴ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦕ꧀ꦖꦠꦶ – ‘‘ꦥꦴꦥꦩꦶꦠ꧀ꦠꦺꦴ ꦥꦸꦫꦶꦱꦥꦸꦒ꧀ꦒꦭꦺꦴ ꦥꦴꦥꦱꦲꦴꦪꦺꦴ ꦥꦴꦥꦱꦩ꧀ꦥꦮꦔ꧀ꦏꦺꦴ’’ꦠꦶ! ꦠꦱ꧀ꦩꦴ ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦗꦶꦒꦸꦕ꧀ꦖꦶꦠꦧ꧀ꦧꦺꦴ ꦤ ꦱꦺꦮꦶꦠꦧ꧀ꦧꦺꦴ ꦤ ꦨꦗꦶꦠꦧ꧀ꦧꦺꦴ ꦤ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ.

꧑꧒꧕. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦄꦗ꧀ꦙꦸꦥꦺꦏ꧀ꦑꦶꦠꦧ꧀ꦧꦺꦴ ꦤ ꦱꦺꦮꦶꦠꦧ꧀ꦧꦺꦴ ꦤ ꦨꦗꦶꦠꦧ꧀ꦧꦺꦴ ꦤ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦏꦺꦴꦣꦤꦺꦴ ꦲꦺꦴꦠꦶ ꦈꦥꦴꦪꦴꦱꦧꦲꦸꦭꦺꦴ, ꦄꦥ꧀ꦥꦩ꧀ꦥꦶ ꦮꦸꦠ꧀ꦠꦺꦴ ꦱꦩꦴꦤꦺꦴ ꦄꦨꦶꦱꦗ꧀ꦗꦠꦶ ꦏꦸꦥ꧀ꦥꦠꦶ ꦧ꧀ꦪꦴꦥꦗ꧀ꦗꦠꦶ ꦥꦠꦶꦠ꧀ꦡꦷꦪꦠꦶ, ꦏꦺꦴꦥꦚ꧀ꦕ ꦢꦺꦴꦱꦚ꧀ꦕ ꦄꦥ꧀ꦥꦕ꧀ꦕꦪꦚ꧀ꦕ ꦥꦴꦠꦸꦏꦫꦺꦴꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦢꦸꦛ꧀ꦜꦴꦫꦸꦏꦺꦴ ꦏꦛ꧀ꦜꦺꦤ ꦮꦴ ꦏꦜꦭꦴꦪ ꦮꦴ ꦓꦛ꧀ꦛꦶꦠꦺꦴ ꦨꦶꦪ꧀ꦪꦺꦴꦱꦺꦴ ꦩꦠ꧀ꦠꦴꦪ ꦄꦴꦱꦮꦁ ꦢꦺꦠꦶ, ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦏꦺꦴꦣꦤꦺꦴ ꦲꦺꦴꦠꦶ ꦈꦥꦴꦪꦴꦱꦧꦲꦸꦭꦺꦴ, ꦄꦥ꧀ꦥꦩ꧀ꦥꦶ ꦮꦸꦠ꧀ꦠꦺꦴ ꦱꦩꦴꦤꦺꦴ ꦄꦨꦶꦱꦗ꧀ꦗꦠꦶ ꦏꦸꦥ꧀ꦥꦠꦶ ꦧ꧀ꦪꦴꦥꦗ꧀ꦗꦠꦶ ꦥꦠꦶꦠ꧀ꦡꦷꦪꦠꦶ, ꦏꦺꦴꦥꦚ꧀ꦕ ꦢꦺꦴꦱꦚ꧀ꦕ ꦄꦥ꧀ꦥꦕ꧀ꦕꦪꦚ꧀ꦕ ꦥꦴꦠꦸꦏꦫꦺꦴꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦠꦶꦤ꧀ꦢꦸꦏꦴꦭꦴꦠꦁ ꦏꦛ꧀ꦜꦺꦤ ꦮꦴ ꦏꦜꦭꦴꦪ ꦮꦴ ꦓꦛ꧀ꦛꦶꦠꦁ ꦨꦶꦪ꧀ꦪꦺꦴꦱꦺꦴ ꦩꦠ꧀ꦠꦴꦪ ꦕꦶꦕ꧀ꦕꦶꦛꦴꦪꦠꦶ ꦕꦶꦛꦶꦕꦶꦛꦴꦪꦠꦶ, ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦏꦺꦴꦣꦤꦺꦴ ꦲꦺꦴꦠꦶ ꦈꦥꦴꦪꦴꦱꦧꦲꦸꦭꦺꦴ, ꦄꦥ꧀ꦥꦩ꧀ꦥꦶ ꦮꦸꦠ꧀ꦠꦺꦴ ꦱꦩꦴꦤꦺꦴ ꦄꦨꦶꦱꦗ꧀ꦗꦠꦶ ꦏꦸꦥ꧀ꦥꦠꦶ ꦧ꧀ꦪꦴꦥꦗ꧀ꦗꦠꦶ ꦥꦠꦶꦠ꧀ꦡꦷꦪꦠꦶ, ꦏꦺꦴꦥꦚ꧀ꦕ ꦢꦺꦴꦱꦚ꧀ꦕ ꦄꦥ꧀ꦥꦕ꧀ꦕꦪꦚ꧀ꦕ ꦥꦴꦠꦸꦏꦫꦺꦴꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦒꦹꦡꦏꦹꦥꦺꦴ ꦏꦛ꧀ꦜꦺꦤ ꦮꦴ ꦏꦜꦭꦴꦪ ꦮꦴ ꦓꦛ꧀ꦛꦶꦠꦺꦴ ꦨꦶꦪ꧀ꦪꦺꦴꦱꦺꦴ ꦩꦠ꧀ꦠꦴꦪ ꦢꦸꦒ꧀ꦒꦤ꧀ꦣꦺꦴ ꦲꦺꦴꦠꦶ, ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦏꦺꦴꦣꦤꦺꦴ ꦲꦺꦴꦠꦶ ꦈꦥꦴꦪꦴꦱꦧꦲꦸꦭꦺꦴ, ꦄꦥ꧀ꦥꦩ꧀ꦥꦶ ꦮꦸꦠ꧀ꦠꦺꦴ ꦱꦩꦴꦤꦺꦴ ꦄꦨꦶꦱꦗ꧀ꦗꦠꦶ ꦏꦸꦥ꧀ꦥꦠꦶ ꦧ꧀ꦪꦴꦥꦗ꧀ꦗꦠꦶ ꦥꦠꦶꦠ꧀ꦡꦷꦪꦠꦶ, ꦏꦺꦴꦥꦚ꧀ꦕ ꦢꦺꦴꦱꦚ꧀ꦕ ꦄꦥ꧀ꦥꦕ꧀ꦕꦪꦚ꧀ꦕ ꦥꦴꦠꦸꦏꦫꦺꦴꦠꦶ; ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦄꦗ꧀ꦙꦸꦥꦺꦏ꧀ꦑꦶꦠꦧ꧀ꦧꦺꦴ ꦤ ꦱꦺꦮꦶꦠꦧ꧀ꦧꦺꦴ ꦤ ꦨꦗꦶꦠꦧ꧀ꦧꦺꦴ ꦤ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ. ꦠꦁ ꦏꦶꦱ꧀ꦱ ꦲꦺꦠꦸ? ‘‘ꦄꦏ꧀ꦏꦺꦴꦱꦺꦪ꧀ꦪꦥꦶ ꦩꦁ ꦥꦫꦶꦨꦴꦱꦺꦪ꧀ꦪꦥꦶ ꦩꦁ ꦄꦤꦠ꧀ꦡꦩ꧀ꦥꦶ ꦩꦺ ꦏꦫꦺꦪ꧀ꦪꦴ’’ꦠꦶ! ꦠꦱ꧀ꦩꦴ ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦄꦗ꧀ꦙꦸꦥꦺꦏ꧀ꦑꦶꦠꦧ꧀ꦧꦺꦴ ꦤ ꦱꦺꦮꦶꦠꦧ꧀ꦧꦺꦴ ꦤ ꦨꦗꦶꦠꦧ꧀ꦧꦺꦴ ꦤ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ.

꧑꧒꧖. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦺꦮꦶꦠꦧ꧀ꦧꦺꦴ ꦨꦗꦶꦠꦧ꧀ꦧꦺꦴ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦮꦴ ꦲꦺꦴꦠꦶ ꦏꦭ꧀ꦪꦴꦟꦣꦩ꧀ꦩꦺꦴ – ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦱꦺꦮꦶꦠꦧ꧀ꦧꦺꦴ ꦨꦗꦶꦠꦧ꧀ꦧꦺꦴ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦏꦶꦚ꧀ꦕꦴꦥꦶ ꦌꦮꦫꦹꦥꦱ꧀ꦱ ꦥꦸꦒ꧀ꦒꦭꦱ꧀ꦱ ꦤ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦠꦶ, ꦄꦡ ꦑꦺꦴ ꦤꦁ ꦏꦭ꧀ꦪꦴꦟꦺꦴ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦕ꧀ꦖꦠꦶ – ‘‘ꦏꦭ꧀ꦪꦴꦟꦩꦶꦠ꧀ꦠꦺꦴ ꦥꦸꦫꦶꦱꦥꦸꦒ꧀ꦒꦭꦺꦴ ꦏꦭ꧀ꦪꦴꦟꦱꦲꦴꦪꦺꦴ ꦏꦭ꧀ꦪꦴꦟꦱꦩ꧀ꦥꦮꦔ꧀ꦏꦺꦴ’’ꦠꦶ! ꦠꦱ꧀ꦩꦴ ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦱꦺꦮꦶꦠꦧ꧀ꦧꦺꦴ ꦨꦗꦶꦠꦧ꧀ꦧꦺꦴ ꦥꦪꦶꦫꦸꦥꦴꦱꦶꦠꦧ꧀ꦧꦺꦴ.

꧑꧒꧗. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ, ꦱꦩꦴꦣꦶꦱ꧀ꦩꦶꦁ ꦩꦠ꧀ꦠꦱꦺꦴ ꦏꦴꦫꦷ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ? ꦱꦺꦴꦠꦴꦥꦤ꧀ꦤꦱꦏꦢꦴꦒꦴꦩꦶꦤꦺꦴ – ꦆꦩꦺ ꦮꦸꦕ꧀ꦕꦤ꧀ꦠꦶ ꦥꦸꦒ꧀ꦒꦭꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦶꦤꦺꦴ, ꦱꦩꦴꦣꦶꦱ꧀ꦩꦶꦁ ꦩꦠ꧀ꦠꦱꦺꦴ ꦏꦴꦫꦶꦤꦺꦴ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦶꦤꦺꦴ.

꧑꧒꧘. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦕ ꦥꦫꦶꦥꦹꦫꦏꦴꦫꦷ, ꦱꦩꦴꦣꦶꦱ꧀ꦩꦶꦚ꧀ꦕ ꦥꦫꦶꦥꦹꦫꦏꦴꦫꦷ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ? ꦄꦤꦴꦒꦴꦩꦷ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦕ ꦥꦫꦶꦥꦹꦫꦏꦴꦫꦷ, ꦱꦩꦴꦣꦶꦱ꧀ꦩꦶꦚ꧀ꦕ ꦥꦫꦶꦥꦹꦫꦏꦴꦫꦷ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ.

꧑꧒꧙. ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦕ ꦥꦫꦶꦥꦹꦫꦏꦴꦫꦷ, ꦱꦩꦴꦣꦶꦱ꧀ꦩꦶꦚ꧀ꦕ ꦥꦫꦶꦥꦹꦫꦏꦴꦫꦷ, ꦥꦚ꧀ꦚꦴꦪ ꦕ ꦥꦫꦶꦥꦹꦫꦏꦴꦫꦷ? ꦄꦫꦲꦴ – ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦕ ꦥꦫꦶꦥꦹꦫꦏꦴꦫꦷ, ꦱꦩꦴꦣꦶꦱ꧀ꦩꦶꦚ꧀ꦕ ꦥꦫꦶꦥꦹꦫꦏꦴꦫꦷ, ꦥꦚ꧀ꦚꦴꦪ ꦕ ꦥꦫꦶꦥꦹꦫꦏꦴꦫꦷ.

꧑꧓꧐. ꦠꦠ꧀ꦡ ꦏꦠꦩꦺ ꦠꦪꦺꦴ ꦱꦠ꧀ꦡꦴꦫꦺꦴ? ꦆꦣꦺꦏꦕ꧀ꦕꦺꦴ ꦱꦠ꧀ꦡꦴ ꦏꦴꦩꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ [ꦥꦚ꧀ꦚꦴꦥꦺꦠꦶ (ꦱꦷ. ꦱ꧀ꦪꦴ.)], ꦤ ꦫꦹꦥꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦤ ꦮꦺꦢꦤꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ. ꦆꦣ ꦥꦤꦺꦏꦕ꧀ꦕꦺꦴ ꦱꦠ꧀ꦡꦴ ꦏꦴꦩꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦫꦹꦥꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦤ ꦮꦺꦢꦤꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ. ꦆꦣ ꦥꦤꦺꦏꦕ꧀ꦕꦺꦴ ꦱꦠ꧀ꦡꦴ ꦏꦴꦩꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦫꦹꦥꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦮꦺꦢꦤꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ.

ꦠꦠ꧀ꦫ ꦪ꧀ꦮꦴꦪꦁ ꦱꦠ꧀ꦡꦴ ꦏꦴꦩꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦤ ꦫꦹꦥꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦤ ꦮꦺꦢꦤꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦫꦹꦥꦴꦮꦕꦫꦱꦩꦴꦥꦠ꧀ꦠꦶꦪꦴ ꦭꦴꦨꦷ ꦱꦠ꧀ꦡꦴ ꦠꦺꦤ ꦢꦛ꧀ꦜꦧ꧀ꦧꦺꦴ. ꦠꦠ꧀ꦫ ꦪ꧀ꦮꦴꦪꦁ ꦱꦠ꧀ꦡꦴ ꦏꦴꦩꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦫꦹꦥꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦤ ꦮꦺꦢꦤꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦄꦫꦹꦥꦴꦮꦕꦫꦱꦩꦴꦥꦠ꧀ꦠꦶꦪꦴ ꦭꦴꦨꦷ ꦱꦠ꧀ꦡꦴ ꦠꦺꦤ ꦢꦛ꧀ꦜꦧ꧀ꦧꦺꦴ. ꦠꦠ꧀ꦫ ꦪ꧀ꦮꦴꦪꦁ ꦱꦠ꧀ꦡꦴ ꦏꦴꦩꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦫꦹꦥꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦮꦺꦢꦤꦴꦤꦚ꧀ꦕ ꦥꦫꦶꦚ꧀ꦚꦁ ꦥꦚ꧀ꦚꦥꦺꦠꦶ, ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦱꦠ꧀ꦡꦴ ꦠꦺꦤ ꦢꦛ꧀ꦜꦧ꧀ꦧꦺꦴ. ꦆꦩꦺ ꦠꦪꦺꦴ ꦱꦠ꧀ꦡꦴꦫꦺꦴ.

꧑꧓꧑. ꦠꦠ꧀ꦡ ꦏꦠꦩꦺ ꦄꦥꦫꦺꦥꦶ ꦠꦪꦺꦴ ꦱꦠ꧀ꦡꦴꦫꦺꦴ? ꦆꦣꦺꦏꦕ꧀ꦕꦺꦴ ꦱꦠ꧀ꦡꦴ ꦢꦶꦛ꧀ꦜꦺ ꦕꦺꦮ ꦣꦩ꧀ꦩꦺ ꦄꦠ꧀ꦠꦴꦤꦁ ꦱꦕ꧀ꦕꦠꦺꦴ ꦡꦺꦠꦠꦺꦴ ꦥꦚ꧀ꦚꦥꦺꦠꦶ, ꦄꦨꦶꦱꦩ꧀ꦥꦫꦴꦪꦚ꧀ꦕ ꦄꦠ꧀ꦠꦴꦤꦁ ꦱꦕ꧀ꦕꦠꦺꦴ ꦡꦺꦠꦠꦺꦴ ꦥꦚ꧀ꦚꦥꦺꦠꦶ. ꦆꦣ ꦥꦤꦺꦏꦕ꧀ꦕꦺꦴ ꦱꦠ꧀ꦡꦴ ꦢꦶꦛ꧀ꦜꦺ ꦕꦺꦮ ꦣꦩ꧀ꦩꦺ ꦄꦠ꧀ꦠꦴꦤꦁ ꦱꦕ꧀ꦕꦠꦺꦴ ꦡꦺꦠꦠꦺꦴ ꦥꦚ꧀ꦚꦥꦺꦠꦶ, ꦤꦺꦴ ꦕ ꦑꦺꦴ ꦄꦨꦶꦱꦩ꧀ꦥꦫꦴꦪꦁ ꦄꦠ꧀ꦠꦴꦤꦁ ꦱꦕ꧀ꦕꦠꦺꦴ ꦡꦺꦠꦠꦺꦴ ꦥꦚ꧀ꦚꦥꦺꦠꦶ. ꦆꦣ ꦥꦤꦺꦏꦕ꧀ꦕꦺꦴ ꦱꦠ꧀ꦡꦴ ꦢꦶꦛ꧀ꦜꦺ ꦕꦺꦮ ꦣꦩ꧀ꦩꦺ ꦄꦠ꧀ꦠꦴꦤꦁ ꦱꦕ꧀ꦕꦠꦺꦴ ꦡꦺꦠꦠꦺꦴ ꦤ ꦥꦚ꧀ꦚꦥꦺꦠꦶ, ꦄꦨꦶꦱꦩ꧀ꦥꦫꦴꦪꦚ꧀ꦕ ꦄꦠ꧀ꦠꦴꦤꦁ ꦱꦕ꧀ꦕꦠꦺꦴ ꦡꦺꦠꦠꦺꦴ ꦤ ꦥꦚ꧀ꦚꦥꦺꦠꦶ.