꧗. ꦖꦄꦤꦸꦱ꧀ꦱꦠꦶꦤꦶꦢ꧀ꦢꦺꦱꦮꦟ꧀ꦟꦤꦴ

꧑. ꦧꦸꦢ꧀ꦣꦴꦤꦸꦱ꧀ꦱꦠꦶꦏꦡꦴꦮꦟ꧀ꦟꦤꦴ

꧑꧒꧓. ꦄꦱꦸꦨꦴꦤꦤ꧀ꦠꦫꦤ꧀ꦠꦶ ꦄꦱꦸꦨꦏꦩ꧀ꦩꦛ꧀ꦜꦴꦤꦴꦤꦤ꧀ꦠꦫꦁ. ꦄꦤꦸꦱ꧀ꦱꦠꦷꦱꦹꦠꦶ ꦄꦤꦸꦱ꧀ꦱꦠꦶꦏꦩ꧀ꦩꦛ꧀ꦜꦴꦤꦺꦱꦸ. ‘‘ꦄꦤꦸ ꦄꦤꦸ ꦱꦠꦶ ꦄꦤꦸꦱ꧀ꦱꦠꦷ’’ꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦸꦁ ‘‘ꦥꦸꦤꦥ꧀ꦥꦸꦤꦁ ꦈꦥ꧀ꦥꦗ꧀ꦗꦤꦠꦺꦴ’’ꦠꦶ ꦮꦠ꧀ꦮꦴ ꦤ ꦌꦠ꧀ꦡ ꦄꦤꦸ-ꦱꦢ꧀ꦢꦪꦺꦴꦒꦺꦤ ꦱꦠꦶ-ꦱꦢ꧀ꦢꦺꦴ ꦄꦠ꧀ꦡꦤ꧀ꦠꦫꦮꦴꦕꦏꦺꦴꦠꦶ ꦢꦱ꧀ꦱꦺꦠꦸꦁ ‘‘ꦱꦠꦶꦪꦺꦮ ꦄꦤꦸꦱ꧀ꦱꦠꦷ’’ꦠꦶ ꦮꦸꦠ꧀ꦠꦁ. ꦠꦺꦤ ꦤꦴꦪꦩꦤꦸ-ꦱꦢ꧀ꦢꦺꦴ ‘‘ꦈꦥꦭꦧ꧀ꦨꦠꦷ’’ꦠꦶꦄꦴꦢꦷꦱꦸ ꦈꦥ-ꦱꦢ꧀ꦢꦺꦴ ꦮꦶꦪ ꦄꦤꦠ꧀ꦡꦏꦺꦴ, ꦤꦴꦥꦶ ‘‘ꦱꦚ꧀ꦗꦴꦤꦤꦁ ꦥꦗꦴꦤꦤ’’ꦤ꧀ꦠꦶꦄꦴꦢꦷꦱꦸ ꦱꦁ-ꦱꦢ꧀ꦢꦴꦢꦪꦺꦴ ꦮꦶꦪ ꦄꦠ꧀ꦡꦤ꧀ꦠꦫꦢꦷꦥꦏꦺꦴꦠꦶ ꦢꦱ꧀ꦱꦺꦠꦶ. ‘‘ꦥꦮꦠ꧀ꦠꦶꦠꦧ꧀ꦧꦛ꧀ꦜꦴꦤꦩ꧀ꦲꦶꦪꦺꦮ ꦮꦴ ꦥꦮꦠ꧀ꦠꦠ꧀ꦠꦴ’’ꦠꦶ ꦆꦩꦶꦤꦴ ꦕ ꦄꦤꦸꦱ꧀ꦱꦠꦶꦪꦴ ꦄꦤꦸꦱ꧀ꦱꦫꦶꦠꦧ꧀ꦧꦴꦤꦸꦫꦹꦥꦠꦴ ꦮꦸꦠ꧀ꦠꦴ ꦲꦺꦴꦠꦷꦠꦶ ꦥꦮꦠ꧀ꦠꦏꦱ꧀ꦱꦺꦮ ꦄꦤꦸꦫꦹꦥꦠꦁ ꦢꦱ꧀ꦱꦺꦠꦸꦁ ‘‘ꦏꦸꦭꦥꦸꦠ꧀ꦠꦱ꧀ꦱ ꦄꦤꦸꦫꦹꦥꦴ’’ꦠꦶ ꦮꦸꦠ꧀ꦠꦁ, ꦱꦢ꧀ꦣꦴꦥꦧ꧀ꦧꦗꦶꦠꦱ꧀ꦱ ꦮꦴ ꦏꦸꦭꦥꦸꦠ꧀ꦠꦱ꧀ꦱ. ꦄꦤꦸꦫꦹꦥꦠꦴ ꦤꦴꦩ ꦥꦮꦠ꧀ꦠꦶꦠꦧ꧀ꦧꦛ꧀ꦜꦴꦤꦱ꧀ꦱ ꦄꦤꦸꦫꦹꦥꦠꦴꦪ ꦌꦮ ꦲꦺꦴꦠꦷꦠꦶ ꦥꦮꦠ꧀ꦠꦏꦱ꧀ꦱꦺꦮ ꦄꦤꦸꦫꦹꦥꦠꦴ ꦮꦸꦠ꧀ꦠꦴ, ꦤ ꦈꦨꦪꦱ꧀ꦱ. ꦄꦤꦸꦫꦹꦥꦴꦠꦶ ꦕ ꦪꦸꦠ꧀ꦠꦴꦠꦶ ꦄꦠ꧀ꦡꦺꦴ. ꦧꦸꦢ꧀ꦣꦤ꧀ꦠꦶ ꦪꦺ ꦒꦸꦟꦺ ꦈꦥꦴꦢꦴꦪ ꦨꦒꦮꦠꦶ ‘‘ꦧꦸꦢ꧀ꦣꦺꦴ’’ꦠꦶ ꦥꦚ꧀ꦚꦠ꧀ꦠꦶ, ꦠꦺ ꦒꦸꦟꦺ ꦌꦏꦗ꧀ꦙꦁ ꦒꦲꦺꦠ꧀ꦮꦴ ꦮꦸꦠ꧀ꦠꦁ. ꦠꦺꦤꦴꦲ ‘‘ꦧꦸꦢ꧀ꦣꦒꦸꦟꦴꦫꦩ꧀ꦩꦟꦴꦪ ꦱꦠꦶꦪꦴ ꦌꦠꦩꦣꦶꦮꦕꦤ’’ꦤ꧀ꦠꦶ. ꦄꦴꦫꦧ꧀ꦨꦴꦠꦶ ꦄꦴꦭꦩ꧀ꦧꦶꦠ꧀ꦮꦴ. ꦣꦩ꧀ꦩꦤ꧀ꦠꦶ ꦥꦫꦶꦪꦠ꧀ꦠꦶꦣꦩ꧀ꦩꦺꦤ ꦱꦢ꧀ꦣꦶꦁ ꦤꦮꦮꦶꦣꦩ꧀ꦥꦶ ꦭꦺꦴꦏꦸꦠ꧀ꦠꦫꦣꦩ꧀ꦩꦁ. ꦤꦤꦸ ꦕ ꦤꦶꦧ꧀ꦧꦴꦤꦁ ꦮꦶꦱꦸꦁ ꦏꦩ꧀ꦩꦛ꧀ꦜꦴꦤꦨꦴꦮꦺꦤ ꦮꦏ꧀ꦑꦠꦶ? ꦏꦶꦚ꧀ꦕꦴꦥꦶ ꦮꦏ꧀ꦑꦠꦶ, ꦣꦩ꧀ꦩꦨꦴꦮꦱꦴꦩꦚ꧀ꦚꦺꦤ ꦥꦤ ꦩꦒ꧀ꦒꦦꦭꦺꦲꦶ ꦱꦢ꧀ꦣꦶꦁ ꦆꦣ ꦥꦴꦭ꦳ꦶꦪꦴ ꦱꦔ꧀ꦒꦲꦶꦠꦠ꧀ꦠꦴ ꦠꦱ꧀ꦱꦴꦥꦶ ꦣꦩ꧀ꦩꦴꦤꦸꦱ꧀ꦱꦠꦶꦏꦩ꧀ꦩꦛ꧀ꦜꦴꦤꦺ ꦒꦲꦟꦁ ꦢꦛ꧀ꦜꦧ꧀ꦧꦁ, ꦄꦱꦔ꧀ꦑꦠꦴꦩꦠꦴꦢꦶꦨꦴꦮꦺꦤ ꦥꦤ ꦩꦒ꧀ꦒꦦꦭꦺꦲꦶ ꦮꦶꦱꦶꦛ꧀ꦜꦠꦴꦪ ꦠꦱ꧀ꦱ ꦮꦶꦱꦸꦁ ꦏꦩ꧀ꦩꦛ꧀ꦜꦴꦤꦨꦴꦮꦺꦤ ꦒꦲꦟꦁ ꦏꦠꦁ. ꦱꦷꦭꦴꦤꦸꦱ꧀ꦱꦠꦶꦄꦴꦢꦷꦤꦁ ꦥꦤ ꦠꦶꦱ꧀ꦱꦤ꧀ꦤꦁ ꦄꦤꦸꦱ꧀ꦱꦠꦷꦤꦁ ꦮꦶꦱꦸꦁ ꦏꦩ꧀ꦩꦛ꧀ꦜꦴꦤꦨꦴꦮꦺꦤ ꦒꦲꦟꦁ ꦪꦺꦴꦒꦴꦮꦕꦫꦱ꧀ꦱ ꦄꦠ꧀ꦠꦤꦺꦴ ꦌꦮ ꦱꦷꦭꦱ꧀ꦱ ꦕꦴꦒꦱ꧀ꦱ ꦱꦢ꧀ꦣꦴꦢꦷꦤꦚ꧀ꦕ ꦄꦤꦸꦱ꧀ꦱꦠꦶꦛ꧀ꦜꦴꦤꦨꦴꦮꦺꦤ ꦒꦲꦺꦠꦧ꧀ꦧꦠ꧀ꦠꦴ. ꦫꦹꦥꦏꦴꦪꦁ ꦒꦠꦴꦠꦶ ꦄꦠ꧀ꦠꦤꦺꦴ ꦏꦫꦗꦏꦴꦪꦁ ꦄꦴꦫꦧ꧀ꦨ ꦄꦴꦫꦩ꧀ꦩꦟꦏꦫꦟꦮꦱꦺꦤ ꦥꦮꦠ꧀ꦠꦴ. ꦏꦴꦪꦺꦠꦶ ꦏꦴꦪꦺ ꦮꦶꦱꦪꦨꦹꦠꦺ. ꦏꦺꦴꦛ꧀ꦜꦴꦱꦤꦶꦩꦶꦠ꧀ꦠꦴꦫꦩ꧀ꦩꦟꦴꦪꦴꦠꦶ ꦏꦺꦱꦴꦢꦶꦏꦺꦴꦛ꧀ꦜꦴꦱꦺꦱꦸ ꦥꦛꦶꦏ꧀ꦏꦹꦭꦤꦶꦩꦶꦠ꧀ꦠꦴꦫꦩ꧀ꦩꦟꦴꦪ. ꦆꦠꦺꦴ ꦥꦸꦫꦶꦩꦴꦱꦸ ꦱꦠ꧀ꦠꦱꦸ ꦄꦤꦸꦱ꧀ꦱꦠꦷꦱꦸ ꦤꦠ꧀ꦡꦶ ꦤꦶꦩꦶꦠ꧀ꦠꦸꦥ꧀ꦥꦠ꧀ꦠꦶ, ꦆꦣ ꦄꦠ꧀ꦡꦷꦠꦶ ꦢꦱ꧀ꦱꦤꦠ꧀ꦡꦁ ꦤꦶꦩꦶꦠ꧀ꦠ-ꦒ꧀ꦒꦲꦟꦁ. ꦠꦡꦴ ꦄꦱ꧀ꦱꦴꦱꦥꦱ꧀ꦱꦴꦱꦤꦶꦩꦶꦠ꧀ꦠꦴꦫꦩ꧀ꦩꦟꦴꦪꦴꦠꦶ ꦌꦠ꧀ꦡꦴꦥꦶ. ꦈꦥꦱꦩꦤ꧀ꦠꦶ ꦱꦧ꧀ꦧꦱꦔ꧀ꦑꦴꦫꦹꦥꦱꦩꦁ, ꦤꦶꦧ꧀ꦧꦴꦤꦤ꧀ꦠꦶ ꦄꦠ꧀ꦡꦺꦴ.

꧑꧒꧔. ꦄꦮꦺꦕ꧀ꦕ ꦧꦸꦢ꧀ꦣꦒꦸꦟꦺ ꦪꦴꦡꦴꦮꦠꦺꦴ ꦚꦠ꧀ꦮꦴ ꦈꦥ꧀ꦥꦤ꧀ꦤꦺꦴ ꦥꦱꦴꦢꦺꦴ ꦄꦮꦺꦕ꧀ꦕꦥ꧀ꦥꦱꦴꦢꦺꦴ, ꦄꦫꦶꦪꦩꦒ꧀ꦒꦺꦤ ꦄꦴꦒꦠꦥ꧀ꦥꦱꦴꦢꦺꦴ, ꦠꦁꦱꦢꦶꦱꦺꦴꦥꦶ ꦮꦴ ꦪꦺꦴ ꦢꦶꦛ꧀ꦜꦶꦒꦠꦮꦴꦠꦺꦲꦶ ꦄꦕꦭꦺꦴ ꦄꦱꦩ꧀ꦥꦏꦩ꧀ꦥꦶꦪꦺꦴ, ꦠꦺꦤ ꦱꦩꦤ꧀ꦤꦴꦒꦠꦺꦤ. ꦠꦴꦢꦶꦱꦱ꧀ꦱ ꦧꦸꦢ꧀ꦣꦴꦤꦸꦱ꧀ꦱꦠꦶꦨꦴꦮꦤꦴ ꦆꦗ꧀ꦙꦠꦶ, ꦤ ꦆꦠꦫꦱ꧀ꦱ. ꦥꦠꦶꦫꦹꦥꦱꦺꦤꦴꦱꦤꦺꦠꦶ ꦪꦡꦴꦮꦸꦠ꧀ꦠꦄꦛ꧀ꦜꦴꦫꦱꦢꦺꦴꦱꦮꦗ꧀ꦗꦶꦠꦺ ꦥꦚ꧀ꦕꦔ꧀ꦒꦱꦩꦤ꧀ꦤꦴꦒꦠꦺ ꦱꦺꦤꦴꦱꦤꦺ. ꦫꦲꦺꦴꦒꦠꦺꦤꦴꦠꦶ ꦫꦲꦱꦶ ꦒꦠꦺꦤ. ꦠꦺꦤ ꦏꦴꦪꦮꦶꦮꦺꦏꦁ ꦢꦱ꧀ꦱꦺꦠꦶ. ꦥꦛꦶꦱꦭ꧀ꦭꦷꦤꦺꦤꦴꦠꦶ ꦤꦴꦤꦴꦫꦩ꧀ꦩꦟꦠꦺꦴ ꦥꦛꦶꦱꦭ꧀ꦭꦷꦤꦺꦤ, ꦧꦲꦶꦢ꧀ꦣꦴ ꦥꦸꦡꦸꦠ꧀ꦠꦴꦫꦩ꧀ꦩꦟꦠꦺꦴ ꦥꦛꦶꦏ꧀ꦏꦩꦴꦥꦺꦠ꧀ꦮꦴ ꦏꦩ꧀ꦩꦛ꧀ꦜꦴꦤꦺ ꦱꦭ꧀ꦭꦷꦤꦺꦤ, ꦱꦸꦱꦶꦭꦶꦛ꧀ꦜꦕꦶꦠ꧀ꦠꦺꦤꦴꦠꦶ ꦄꦠ꧀ꦡꦺꦴ. ꦌꦮꦤ꧀ꦠꦶ ꦆꦩꦴꦪ ꦥꦴꦭ꦳ꦶꦪꦴ ꦄꦴꦒꦠꦤꦪꦺꦤ.

ꦱꦺꦴ ꦨꦒꦮꦴꦠꦶ ꦌꦠ꧀ꦡ ꦱꦺꦴꦠꦶ ꦪꦺꦴ ꦱꦺꦴ ꦱꦩꦠꦶꦁꦱ ꦥꦴꦫꦩꦶꦪꦺꦴ ꦥꦹꦫꦺꦠ꧀ꦮꦴ ꦱꦧ꧀ꦧꦏꦶꦭꦺꦱꦺ ꦨꦚ꧀ꦗꦶꦠ꧀ꦮꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴ ꦢꦺꦮꦴꦤꦁ ꦄꦠꦶꦢꦺꦮꦺꦴ ꦧ꧀ꦫꦲ꧀ꦩꦴꦤꦁ ꦄꦠꦶꦧ꧀ꦫꦲ꧀ꦩꦴ ꦭꦺꦴꦏꦤꦴꦡꦺꦴ ꦨꦴꦒ꧀ꦪꦮꦤ꧀ꦠꦠꦴꦢꦷꦲꦶ ꦏꦴꦫꦟꦺꦲꦶ ꦱꦢꦺꦮꦏꦺ ꦭꦺꦴꦏꦺ ‘‘ꦨꦒꦮꦴ’’ꦠꦶ ꦥꦠ꧀ꦡꦛꦏꦶꦠ꧀ꦠꦶꦱꦢ꧀ꦢꦺꦴ, ꦱꦺꦴ. ꦨꦒꦮꦴꦠꦶ ꦆꦢꦁ ꦱꦠ꧀ꦡꦸ ꦤꦴꦩꦏꦶꦠ꧀ꦠꦤꦁ. ꦠꦡꦴ ꦲꦶ ꦮꦸꦠ꧀ꦠꦁ ‘‘ꦨꦒꦮꦴꦠꦶ ꦤꦺꦠꦁ ꦤꦴꦩꦁ ꦩꦴꦠꦫꦴ ꦏꦠ’’ꦤ꧀ꦠꦶꦄꦴꦢꦶ (ꦩꦲꦴꦤꦶ. ꧑꧙꧘, ꧒꧑꧐; ꦕꦹꦭ꦳ꦤꦶ. ꦄꦗꦶꦠꦩꦴꦟꦮꦥꦸꦕ꧀ꦖꦴꦤꦶꦢ꧀ꦢꦺꦱ ꧒). ꦥꦫꦠꦺꦴ ꦥꦤ ꦨꦒꦮꦴꦠꦶ ꦒꦸꦟꦏꦶꦠ꧀ꦠꦤꦁ. ꦄꦫꦲꦤ꧀ꦠꦶꦄꦴꦢꦷꦱꦸ ꦤꦮꦱꦸ ꦜꦴꦤꦺꦱꦸ ꦥꦕ꧀ꦕꦺꦏꦁ ꦆꦠꦶꦥꦶ-ꦱꦢ꧀ꦢꦁ ꦪꦺꦴꦗꦺꦠ꧀ꦮꦴ ꦧꦸꦢ꧀ꦣꦒꦸꦟꦴ ꦄꦤꦸꦱ꧀ꦱꦫꦶꦠꦧ꧀ꦧꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦆꦠꦶꦥꦶ ꦄꦫꦲꦁ…ꦥꦺ… ꦆꦠꦶꦥꦶ ꦨꦒꦮꦴꦠꦶ ꦄꦤꦸꦱ꧀ꦱꦫꦠꦷ’’ꦠꦶ ꦄꦴꦲ. ‘‘ꦆꦠꦶꦥꦺꦠꦁ ꦨꦹꦠꦁ ꦆꦠꦶꦥꦺꦠꦁ ꦠꦕ꧀ꦖ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧖) ꦮꦶꦪ ꦆꦠꦶ-ꦱꦢ꧀ꦢꦺꦴ ꦄꦴꦱꦤ꧀ꦤꦥꦕ꧀ꦕꦏ꧀ꦑꦏꦫꦟꦠ꧀ꦡꦺꦴ, ꦥꦶ-ꦱꦢ꧀ꦢꦺꦴ ꦱꦩ꧀ꦥꦶꦟ꧀ꦝꦤꦠ꧀ꦡꦺꦴ. ꦠꦺꦤ ꦤꦺꦱꦁ ꦧꦲꦸꦨꦴꦮꦺꦴ ꦢꦷꦥꦶꦠꦺꦴ, ꦠꦴꦤꦶ ꦕ ꦒꦸꦟꦱꦭ꧀ꦭꦏ꧀ꦑꦟꦏꦴꦫꦟꦴꦤꦶ ꦨꦴꦮꦺꦤ꧀ꦠꦺꦤ ꦕꦶꦠ꧀ꦠꦱ꧀ꦱ ꦱꦩ꧀ꦩꦸꦑꦷꦨꦹꦠꦴꦤꦶ ꦏꦴꦠꦧ꧀ꦧꦴꦤꦷꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦆꦩꦶꦤꦴ ꦕ ꦆꦩꦶꦤꦴ ꦕ ꦏꦴꦫꦟꦺꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦷ’’ꦠꦶ ꦄꦴꦲ.

꧑꧒꧕. ꦢꦹꦫꦠꦴ ꦤꦴꦩ ꦄꦴꦱꦤ꧀ꦤꦠꦴ ꦮꦶꦪ ꦈꦥꦴꦢꦴꦪꦸꦥꦴꦢꦴꦪ ꦮꦸꦕ꧀ꦕꦠꦷꦠꦶ ꦥꦫꦩꦸꦏ꧀ꦏꦁꦱꦒꦠꦁ ꦢꦹꦫꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ‘‘ꦱꦸꦮꦶꦢꦹꦫꦮꦶꦢꦹꦫꦺ’’ꦠꦶ ꦄꦴꦲ, ꦱꦸꦛ꧀ꦜꦸ ꦮꦶꦢꦹꦫꦨꦴꦮꦺꦤꦺꦮ ꦮꦶꦢꦹꦫꦺꦠꦶ ꦄꦠ꧀ꦡꦺꦴ. ꦱꦴ ꦥꦤꦱ꧀ꦱ ꦏꦶꦭꦺꦱꦠꦺꦴ ꦢꦹꦫꦠꦴ ꦠꦺꦱꦁ ꦱꦧ꧀ꦧꦱꦺꦴ ꦥꦲꦷꦤꦠ꧀ꦠꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦩꦒ꧀ꦒꦺꦤ ꦏꦶꦭꦺꦱꦴꦤꦁ ꦮꦶꦢ꧀ꦣꦁꦱꦶꦠꦠ꧀ꦠꦴ’’ꦠꦶ. ꦤꦤꦸ ꦄꦚ꧀ꦚꦺꦱꦩ꧀ꦥꦶ ꦑꦷꦟꦴꦱꦮꦴꦤꦁ ꦠꦺ ꦥꦲꦷꦤꦴ ꦌꦮꦴꦠꦶ ꦄꦤꦸꦪꦺꦴꦒꦁ ꦩꦤꦱꦶ ꦏꦠ꧀ꦮꦴ ꦮꦸꦠ꧀ꦠꦁ ‘‘ꦱꦮꦴꦱꦤꦴꦤ’’ꦤ꧀ꦠꦶ. ꦤ ꦲꦶ ꦨꦒꦮꦤ꧀ꦠꦁ ꦜꦥꦺꦠ꧀ꦮꦴ ꦄꦚ꧀ꦚꦺ ꦱꦲ ꦮꦴꦱꦤꦴꦪ ꦏꦶꦭꦺꦱꦺ ꦥꦲꦴꦠꦸꦁ ꦱꦏ꧀ꦏꦺꦴꦤ꧀ꦠꦶ, ꦌꦠꦺꦤ ꦄꦚ꧀ꦚꦺꦲꦶ ꦄꦱꦴꦣꦴꦫꦟꦁ ꦨꦒꦮꦠꦺꦴ ꦄꦫꦲꦠ꧀ꦠꦤ꧀ꦠꦶ ꦢꦱ꧀ꦱꦶꦠꦁ ꦲꦺꦴꦠꦶ. ꦏꦴ ꦥꦤꦴꦪꦁ ꦮꦴꦱꦤꦴ ꦤꦴꦩ? ꦥꦲꦷꦤꦏꦶꦭꦺꦱꦱ꧀ꦱꦴꦥꦶ ꦄꦥ꧀ꦥꦲꦷꦤꦏꦶꦭꦺꦱꦱ꧀ꦱ ꦥꦪꦺꦴꦒꦱꦢꦶꦱꦥꦪꦺꦴꦒꦲꦺꦠꦸꦨꦹꦠꦺꦴ ꦏꦶꦭꦺꦱꦤꦶꦲꦶꦠꦺꦴ ꦱꦴꦩꦠ꧀ꦡꦶꦪꦮꦶꦱꦺꦱꦺꦴ ꦄꦴꦪꦱ꧀ꦩꦠꦺꦴ ꦥꦶꦭꦶꦤ꧀ꦢꦮꦕ꧀ꦖꦱ꧀ꦱ (ꦥꦴꦫꦴ. ꧖꧒꧑) ꦮꦱꦭꦱꦩꦸꦢꦴꦕꦴꦫꦤꦶꦩꦶꦠ꧀ꦠꦁ ꦮꦶꦪ. ꦏꦡꦁ ꦥꦤ ‘‘ꦄꦴꦫꦏꦴ’’ꦠꦶ ꦮꦸꦠ꧀ꦠꦺ ‘‘ꦏꦶꦭꦺꦱꦺꦲꦷ’’ꦠꦶ ꦄꦪꦩꦠ꧀ꦡꦺꦴ ꦭꦧ꧀ꦨꦠꦷꦠꦶ? ꦱꦴꦩꦚ꧀ꦚꦗꦺꦴꦠꦤꦴꦪ ꦮꦶꦱꦺꦱꦺ ꦄꦮꦛ꧀ꦜꦴꦤꦠꦺꦴ, ꦮꦶꦱꦺꦱꦠ꧀ꦡꦶꦤꦴ ꦕ ꦮꦶꦱꦺꦱꦱ꧀ꦱ ꦄꦤꦸꦥꦪꦺꦴꦗꦺꦠꦧ꧀ꦧꦠꦺꦴ, ‘‘ꦄꦴꦫꦏꦴꦱ꧀ꦱ ꦲꦺꦴꦤ꧀ꦠꦶ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ’’ꦠꦶꦄꦴꦢꦷꦤꦶ (ꦩ. ꦤꦶ. ꧑.꧔꧓꧔) ꦱꦸꦠ꧀ꦠꦥꦢꦴꦤꦺꦠ꧀ꦡ ꦈꦢꦴꦲꦫꦶꦠꦧ꧀ꦧꦴꦤꦶ. ꦄꦴꦫꦏꦴꦠꦶ ꦕꦺꦠ꧀ꦡ ꦄꦴ-ꦏꦴꦫꦱ꧀ꦱ ꦫꦱ꧀ꦱꦠ꧀ꦠꦁ, ꦏ-ꦏꦴꦫꦱ꧀ꦱ ꦕ ꦲ-ꦏꦴꦫꦁ, ꦱꦴꦤꦸꦱꦴꦫꦁ ꦏꦠ꧀ꦮꦴ ꦤꦶꦫꦸꦠ꧀ꦠꦶꦤꦪꦺꦤ ‘‘ꦄꦫꦲ’’ꦤ꧀ꦠꦶ ꦥꦢꦱꦶꦢ꧀ꦣꦶ ꦮꦺꦢꦶꦠꦧ꧀ꦧꦴ. ꦮꦸꦠ꧀ꦠꦩꦺꦮꦠ꧀ꦡꦁ ꦱꦸꦑꦒ꧀ꦒꦲꦟꦠ꧀ꦡꦁ ‘‘ꦱꦺꦴ ꦠꦠꦺꦴ ꦄꦴꦫꦏꦴ ꦤꦴꦩꦴ’’ꦠꦶ ꦒꦴꦡꦴꦧꦤ꧀ꦣꦩꦴꦲ. ꦠꦠ꧀ꦡ ꦱꦩꦚ꧀ꦗꦤꦱꦷꦭꦺꦴ ꦱꦩꦔ꧀ꦒꦷ, ꦤ ꦱꦩꦔ꧀ꦒꦶꦠꦴ ꦄꦱꦩꦔ꧀ꦒꦶꦠꦴ ꦄꦱꦩꦤ꧀ꦤꦴꦒꦩꦺꦴ ꦄꦱꦲꦮꦸꦠ꧀ꦠꦶꦠꦴ.

꧑꧒꧖. ꦄꦤꦠ꧀ꦡꦕꦫꦟꦺꦤ ꦏꦶꦭꦺꦱꦴ ꦌꦮ ꦄꦫꦪꦺꦴꦠꦶ ꦏꦶꦭꦺꦱꦴꦫꦪꦺꦴ. ‘‘ꦄꦫꦷꦤꦁ ꦲꦠꦠ꧀ꦠꦴ ꦄꦫꦶꦲꦴ’’ꦠꦶ ꦮꦠ꧀ꦠꦧ꧀ꦧꦺ ꦤꦶꦫꦸꦠ꧀ꦠꦶꦤꦪꦺꦤ ‘‘ꦄꦫꦲ’’ꦤ꧀ꦠꦶ ꦮꦸꦠ꧀ꦠꦁ.

꧑꧒꧗. ꦪꦚ꧀ꦕꦺꦠꦁ ꦱꦁꦱꦴꦫꦕꦏ꧀ꦏꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦫꦡꦕꦏ꧀ꦏꦱ꧀ꦱ ꦤꦴꦨꦶ ꦮꦶꦪ ꦩꦹꦭꦴꦮꦪꦮꦨꦹꦠꦁ ꦄꦤ꧀ꦠꦺꦴ, ꦧꦲꦶ ꦕ ꦱꦩꦮꦛ꧀ꦜꦶꦠꦁ ꦄꦮꦶꦗ꧀ꦗꦴꦨꦮꦠꦟ꧀ꦲꦴꦩꦪꦁ ꦢ꧀ꦮꦪꦤ꧀ꦠꦶ ꦮꦸꦠ꧀ꦠꦁ ‘‘ꦄꦮꦶꦗ꧀ꦗꦴꦨꦮꦠꦟ꧀ꦲꦴꦩꦪꦤꦴꦨꦷ’’ꦠꦶ. ꦤꦴꦨꦶꦪꦴ, ꦤꦺꦩꦶꦪꦴ ꦕ ꦱꦩ꧀ꦧꦤ꧀ꦣꦴ ꦄꦫꦱꦢꦶꦱꦴ ꦥꦕ꧀ꦕꦪꦦꦭꦨꦹꦠꦺꦲꦶ ꦄꦮꦶꦗ꧀ꦗꦴꦠꦟ꧀ꦲꦴꦗꦫꦴꦩꦫꦟꦺꦲꦶ ꦱꦩ꧀ꦧꦤ꧀ꦣꦴ ꦥꦸꦚ꧀ꦚꦴꦢꦶꦱꦔ꧀ꦑꦴꦫꦴꦠꦶ ꦮꦸꦠ꧀ꦠꦁ ‘‘ꦥꦸꦚ꧀ꦚꦴꦢꦶꦄꦨꦶꦱꦔ꧀ꦑꦴꦫꦴꦫ’’ꦤ꧀ꦠꦶ. ꦠꦠ꧀ꦡ ꦠꦠ꧀ꦡ ꦨꦮꦺ ꦥꦫꦶꦪꦤ꧀ꦠꦨꦴꦮꦺꦤ ꦥꦴꦏꦛꦁ ꦗꦫꦴꦩꦫꦟꦤ꧀ꦠꦶ ꦠꦁ ꦤꦺꦩꦶꦛ꧀ꦜꦴꦤꦶꦪꦁ ꦏꦠ꧀ꦮꦴ ꦄꦴꦲ ‘‘ꦗꦫꦴꦩꦫꦟꦤꦺꦩꦷ’’ꦠꦶ. ꦪꦡꦴ ꦕ ꦫꦡꦕꦏ꧀ꦏꦥꦮꦠ꧀ꦠꦶꦪꦴ ꦥꦣꦴꦤꦏꦴꦫꦟꦁ ꦄꦏ꧀ꦑꦺꦴ, ꦌꦮꦁ ꦱꦁꦱꦴꦫꦕꦏ꧀ꦏꦥꦮꦠ꧀ꦠꦶꦪꦴ ꦄꦴꦱꦮꦱꦩꦸꦢꦪꦺꦴꦠꦶ ꦄꦴꦲ ‘‘ꦄꦴꦱꦮꦱꦩꦸꦢꦪꦩꦪꦺꦤ ꦄꦏ꧀ꦑꦺꦤ ꦮꦶꦗ꧀ꦙꦶꦠ꧀ꦮꦴ’’ꦠꦶ. ꦄꦴꦱꦮꦴ ꦌꦮ ꦄꦮꦶꦗ꧀ꦗꦴꦢꦷꦤꦁ ꦏꦴꦫꦟꦠ꧀ꦠꦴ ꦄꦴꦱꦮꦱꦩꦸꦢꦪꦺꦴ. ꦪꦡꦴꦲ ‘‘ꦄꦴꦱꦮꦱꦩꦸꦢꦪꦴ ꦄꦮꦶꦗ꧀ꦗꦴꦱꦩꦸꦢꦪꦺꦴ’’ꦠꦶ (ꦩ. ꦤꦶ. ꧑.꧑꧐꧓). ꦮꦶꦥꦴꦏꦏꦛꦠ꧀ꦠꦴꦫꦹꦥꦥ꧀ꦥꦨꦺꦢꦺꦴ ꦏꦴꦩꦨꦮꦴꦢꦶꦏꦺꦴ ꦠꦶꦨꦮꦺꦴ ꦌꦮ ꦫꦡꦺꦴ, ꦠꦱ꧀ꦩꦶꦁ ꦠꦶꦨꦮꦫꦡꦺ. ꦄꦠ꧀ꦠꦤꦺꦴ ꦥꦕ꧀ꦕꦪꦺꦲꦶ ꦱꦩꦁ, ꦱꦧ꧀ꦧꦱꦺꦴ ꦮꦴ ꦄꦴꦢꦶꦠꦺꦴ ꦥꦛ꧀ꦜꦴꦪ ꦪꦺꦴꦗꦶꦠꦤ꧀ꦠꦶ ꦱꦩꦴꦪꦺꦴꦗꦶꦠꦁ. ꦄꦴꦢꦶꦫꦲꦶꦠꦁ ꦏꦴꦭꦁ ꦥꦮꦠ꧀ꦠꦠꦷꦠꦶ ꦏꦠ꧀ꦮꦴ ꦄꦤꦴꦢꦶꦏꦴꦭꦥ꧀ꦥꦮꦠ꧀ꦠꦁ.

‘‘ꦑꦤ꧀ꦣꦴꦤꦚ꧀ꦕ ꦥꦛꦶꦥꦴꦛꦶ, ꦣꦴꦠꦸꦄꦴꦪꦠꦤꦴꦤ ꦕ;

ꦄꦧ꧀ꦧꦺꦴꦕ꧀ꦖꦶꦤ꧀ꦤꦁ ꦮꦠ꧀ꦠꦩꦴꦤꦴ, ‘ꦱꦁꦱꦴꦫꦺꦴ’ꦠꦶ ꦥꦮꦸꦕ꧀ꦕꦠꦷ’’ꦠꦶ. (ꦢꦷ. ꦤꦶ. ꦄꦛ꧀ꦜ. ꧒.꧙꧕ ꦄꦥꦱꦴꦢꦤꦴꦮꦟ꧀ꦟꦤꦴ; ꦱꦁ. ꦤꦶ. ꦄꦛ꧀ꦜ. ꧒.꧒.꧖꧐; ꦄ. ꦤꦶ. ꦄꦛ꧀ꦜ. ꧒.꧔.꧑꧙꧙) –

ꦌꦮꦁ ꦮꦸꦠ꧀ꦠꦱꦁꦱꦴꦫꦺꦴꦮ ꦱꦁꦱꦴꦫꦕꦏ꧀ꦏꦁ. ꦄꦤꦺꦤꦴꦠꦶ ꦨꦒꦮꦠꦴ. ꦧꦺꦴꦣꦶꦩꦟ꧀ꦝꦺꦠꦶ ꦧꦺꦴꦣꦶꦱꦔ꧀ꦑꦴꦠꦱ꧀ꦱ ꦚꦴꦟꦱ꧀ꦱ ꦩꦟ꧀ꦝꦨꦴꦮꦥ꧀ꦥꦠ꧀ꦠꦺ ꦜꦴꦤꦺ, ꦏꦴꦭꦺ ꦮꦴ. ꦮꦷꦫꦶꦪꦥꦴꦢꦺꦲꦷꦠꦶ ꦱꦁꦏꦶꦭꦺꦱꦮꦺꦴꦢꦴꦤꦥꦏ꧀ꦑꦶꦪꦺꦱꦸ ꦱꦤ꧀ꦤꦶꦫꦸꦩ꧀ꦨꦤꦱꦤ꧀ꦤꦶꦏ꧀ꦑꦶꦥꦤꦏꦶꦕ꧀ꦕꦠꦴꦪ ꦢ꧀ꦮꦶꦣꦴ ꦥꦮꦠ꧀ꦠꦺꦲꦶ ꦄꦠ꧀ꦠꦤꦺꦴ ꦮꦷꦫꦶꦪꦱꦔ꧀ꦑꦴꦠꦺꦲꦶ ꦥꦴꦢꦺꦲꦶ. ꦱꦷꦭꦥꦡꦮꦶꦪꦤ꧀ꦠꦶ ꦥꦠꦶꦛ꧀ꦜꦛ꧀ꦜꦺꦤ ꦱꦷꦭꦩꦺꦮ ꦥꦡꦮꦷ, ꦠꦱ꧀ꦱꦁ. ꦥꦠꦶꦛ꧀ꦜꦴꦪꦴꦠꦶ ꦱꦩ꧀ꦥꦴꦢꦤꦮꦱꦺꦤ ꦥꦠꦶꦛ꧀ꦜꦲꦶꦠ꧀ꦮꦴ. ꦱꦢ꧀ꦣꦴꦲꦠ꧀ꦡꦺꦤꦴꦠꦶ ꦄꦤꦮꦗ꧀ꦗꦣꦩ꧀ꦩꦴꦢꦴꦤꦱꦴꦣꦤꦠꦺꦴ ꦱꦢ꧀ꦣꦴꦮ ꦲꦠ꧀ꦡꦺꦴ, ꦠꦺꦤ. ꦏꦩ꧀ꦩꦏ꧀ꦑꦪꦏꦫꦤ꧀ꦠꦶ ꦏꦴꦪꦏꦩ꧀ꦩꦴꦢꦶꦨꦺꦢꦱ꧀ꦱ ꦱꦧ꧀ꦧꦱ꧀ꦱꦥꦶ ꦏꦩ꧀ꦩꦱ꧀ꦱ ꦑꦪꦏꦫꦟꦠꦺꦴ ꦏꦩ꧀ꦩꦏ꧀ꦑꦪꦏꦫꦁ. ꦚꦴꦟꦦꦫꦱꦸꦤ꧀ꦠꦶ ꦱꦩꦴꦣꦶꦱꦶꦭꦴꦪꦁ ꦱꦸꦤꦶꦱꦶꦠꦩꦒ꧀ꦒꦚꦴꦟꦦꦫꦱꦸꦁ ꦒꦲꦺꦠ꧀ꦮꦴ.

꧑꧒꧘. ꦌꦮꦁ ‘‘ꦄꦫꦴꦤꦁ ꦲꦠꦠ꧀ꦠꦴ’’ꦠꦶ ꦌꦠ꧀ꦡ ꦮꦸꦠ꧀ꦠꦄꦫꦓꦴꦠꦺ ꦱꦁꦱꦴꦫꦁ ꦕꦏ꧀ꦏꦁ ꦮꦶꦪ ꦕꦏ꧀ꦏꦤ꧀ꦠꦶ ꦒꦲꦺꦠ꧀ꦮꦴ ꦄꦠ꧀ꦡꦪꦺꦴꦗꦤꦁ ꦏꦠ꧀ꦮꦴ ꦆꦢꦴꦤꦶ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦢꦺꦱꦤꦴꦏ꧀ꦏꦩꦺꦤꦥꦶ ꦠꦁ ꦢꦱ꧀ꦱꦺꦠꦸꦁ ‘‘ꦄꦡ ꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦤꦩꦠꦒ꧀ꦒꦁ ꦱꦁꦱꦴꦫꦮꦛ꧀ꦛꦤ꧀ꦠꦶ ꦄꦤꦸ ꦄꦤꦸ ꦄꦩꦠꦒ꧀ꦒꦁ ꦄꦮꦶꦚ꧀ꦚꦴꦠꦏꦺꦴꦛꦶꦏꦁ ꦱꦁꦱꦴꦫꦩꦟ꧀ꦝꦭꦁ. ꦱꦺꦱꦴ ꦢꦱ ꦣꦩ꧀ꦩꦴ ꦱꦔ꧀ꦑꦴꦫꦴꦢꦪꦺꦴ ꦗꦴꦠꦶꦥꦫꦶꦪꦺꦴꦱꦴꦤꦴ ꦄꦫꦴ. ꦏꦡꦁ? ꦤꦴꦨꦶꦪꦴ ꦄꦮꦶꦗ꧀ꦗꦴꦪ ꦩꦹꦭꦠꦺꦴ, ꦤꦺꦩꦶꦪꦴ ꦗꦫꦴꦩꦫꦟꦺꦤ ꦄꦤ꧀ꦠꦠꦺꦴ ꦱꦩ꧀ꦧꦤ꧀ꦣꦠ꧀ꦠꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦮꦶꦗ꧀ꦗꦴꦩꦹꦭꦏꦠ꧀ꦠꦴ ꦗꦫꦴꦩꦫꦟꦥꦫꦶꦪꦤ꧀ꦠꦠ꧀ꦠꦴ ꦕꦴ’’ꦠꦶ. ꦢꦸꦏ꧀ꦑꦴꦢꦷꦱꦹꦠꦶ ꦢꦸꦏ꧀ꦑꦱꦩꦸꦢꦪꦤꦶꦫꦺꦴꦣꦩꦒ꧀ꦒꦺꦱꦸ. ꦠꦠ꧀ꦡ ꦢꦸꦏ꧀ꦑꦺ ꦄꦚ꧀ꦚꦴꦟꦁ ꦠꦢꦤ꧀ꦠꦺꦴꦒꦣꦠ꧀ꦠꦴ, ꦠꦥ꧀ꦥꦛꦶꦕ꧀ꦖꦴꦢꦤꦠꦺꦴ ꦕ, ꦱꦺꦱꦺꦱꦸ ꦥꦛꦶꦕ꧀ꦖꦴꦢꦤꦠꦺꦴꦮ. ꦢꦸꦏ꧀ꦑꦤ꧀ꦠꦶ ꦕꦺꦠ꧀ꦡ ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦁ ꦄꦣꦶꦥ꧀ꦥꦺꦠꦤ꧀ꦠꦶ ꦠꦁ ꦏꦴꦩꦨꦮꦴꦢꦶꦮꦱꦺꦤ ꦠꦶꦣꦴ ꦨꦶꦤ꧀ꦢꦶꦠ꧀ꦮꦴ ꦠꦡꦴ ꦠꦥ꧀ꦥꦛꦶꦕ꧀ꦖꦴꦢꦶꦏꦁ ꦄꦮꦶꦗ꧀ꦗꦁ, ꦄꦮꦶꦗ꧀ꦗꦴꦢꦶꦥꦕ꧀ꦕꦪꦺ ꦠꦷꦱꦸ ꦨꦮꦺꦱꦸ ꦱꦔ꧀ꦑꦴꦫꦴꦢꦶꦏꦺ ꦕ ꦥꦛꦶꦥꦴꦛꦶꦪꦴ ꦢꦱ꧀ꦱꦺꦤ꧀ꦠꦺꦴ ‘‘ꦏꦴꦩꦨꦮꦺ ꦕ ꦄꦮꦶꦗ꧀ꦗꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦏꦴꦩꦨꦮꦺ ꦄꦮꦶꦗ꧀ꦗꦴꦠꦶ ꦏꦴꦩꦨꦮꦺ ꦄꦴꦢꦷꦤꦮꦥ꧀ꦥꦛꦶꦕ꧀ꦖꦴꦢꦶꦏꦴ ꦄꦮꦶꦗ꧀ꦗꦴ. ꦫꦹꦥꦨꦮꦺ ꦄꦫꦹꦥꦨꦮꦺ ꦄꦮꦶꦗ꧀ꦗꦴꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦏꦴꦩꦨꦮꦺ ꦱꦔ꧀ꦑꦴꦫꦴꦤꦤ꧀ꦠꦶ ꦏꦴꦩꦨꦹꦩꦶꦥꦫꦶꦪꦴꦥꦤ꧀ꦤꦴꦤꦁ ꦱꦔ꧀ꦑꦴꦫꦴꦤꦁ, ꦏꦴꦩꦨꦮꦺ ꦮꦴ ꦤꦶꦥ꧀ꦦꦴꦢꦺꦠꦧ꧀ꦧꦴ ꦪꦺ ꦱꦔ꧀ꦑꦴꦫꦴ, ꦠꦺꦱꦁ ꦏꦴꦩꦨꦮꦹꦥꦥꦠ꧀ꦠꦶꦤꦶꦧ꧀ꦧꦠ꧀ꦠꦏꦱꦔ꧀ꦑꦴꦫꦴꦤꦤ꧀ꦠꦶ ꦄꦠ꧀ꦡꦺꦴ. ꦥꦕ꧀ꦕꦪꦺꦴ ꦲꦺꦴꦠꦷꦠꦶ ꦥꦸꦚ꧀ꦚꦴꦨꦶꦱꦔ꧀ꦑꦴꦫꦴꦤꦁ ꦠꦴꦮ ꦄꦴꦫꦩ꧀ꦩꦟꦥꦕ꧀ꦕꦪꦺꦤ ꦕꦺꦮ ꦈꦥꦤꦶꦱ꧀ꦱꦪꦥꦕ꧀ꦕꦪꦺꦤ ꦕꦴꦠꦶ ꦢ꧀ꦮꦶꦣꦴ ꦥꦕ꧀ꦕꦪꦺꦴ ꦲꦺꦴꦠꦶ. ꦄꦥꦸꦚ꧀ꦚꦴꦨꦶꦱꦔ꧀ꦑꦴꦫꦺꦱꦸ ꦱꦲꦗꦴꦠꦱ꧀ꦱ ꦱꦲꦗꦴꦠꦴꦢꦶꦮꦱꦺꦤ, ꦄꦱꦲꦗꦴꦠꦱ꧀ꦱ ꦄꦤꦤ꧀ꦠꦫꦱꦩꦤꦤ꧀ꦠꦫꦴꦢꦶꦮꦱꦺꦤ, ꦤꦴꦤꦤ꧀ꦠꦫꦱ꧀ꦱ ꦥꦤ ꦄꦴꦫꦩ꧀ꦩꦟꦮꦱꦺꦤ ꦕꦺꦮ ꦈꦥꦤꦶꦱ꧀ꦱꦪꦮꦱꦺꦤ ꦕ ꦥꦕ꧀ꦕꦪꦺꦴ ꦲꦺꦴꦠꦶ. ꦄꦫꦹꦥꦨꦮꦺ ꦱꦔ꧀ꦑꦴꦫꦴꦤꦤ꧀ꦠꦶ ꦄꦴꦤꦺꦚ꧀ꦗꦴꦨꦶꦱꦔ꧀ꦑꦴꦫꦴꦤꦁ. ꦥꦕ꧀ꦕꦪꦺꦴ ꦲꦺꦴꦠꦶ ꦈꦥꦤꦶꦱ꧀ꦱꦪꦮꦱꦺꦤꦺꦮ. ꦆꦩꦱ꧀ꦩꦶꦁ ꦥꦤꦠ꧀ꦡꦺ ꦌꦠ꧀ꦡ ꦮꦶꦠ꧀ꦡꦴꦫꦶꦪꦩꦴꦤꦺ ꦄꦠꦶꦥ꧀ꦥꦥꦚ꧀ꦕꦺꦴ ꦲꦺꦴꦠꦶ, ꦱꦪꦩꦺꦮ ꦕ ꦥꦫꦠꦺꦴ ꦄꦴꦒꦩꦶꦱ꧀ꦱꦠꦷꦠꦶ ꦤ ꦤꦁ ꦮꦶꦠ꧀ꦡꦴꦫꦪꦴꦩ.

ꦠꦶꦟ꧀ꦟꦁ ꦄꦴꦪꦠꦤꦴꦤꦤ꧀ꦠꦶ ꦕꦏ꧀ꦑꦸꦱꦺꦴꦠꦩꦤꦴꦪꦠꦤꦴꦤꦁ. ꦌꦏꦱ꧀ꦱꦴꦪꦠꦤꦱ꧀ꦱꦴꦠꦶ ꦩꦤꦴꦪꦠꦤꦱ꧀ꦱ. ꦆꦩꦶꦤꦴ ꦤꦪꦺꦤ ꦦꦱ꧀ꦱꦴꦢꦷꦤꦩ꧀ꦥꦶ ꦮꦶꦨꦴꦒꦺꦴ ꦮꦺꦢꦶꦠꦧ꧀ꦧꦺꦴ. ꦠꦠ꧀ꦡ ꦠꦠ꧀ꦡ ꦱꦴ ꦱꦴ ꦠꦟ꧀ꦲꦴꦠꦶ ꦫꦹꦥꦠꦟ꧀ꦲꦴꦢꦶꦨꦺꦢꦴ ꦠꦠ꧀ꦡ ꦠꦠ꧀ꦡ ꦏꦴꦩꦨꦮꦴꦢꦷꦱꦸ ꦈꦥ꧀ꦥꦗ꧀ꦗꦤꦏꦴ ꦠꦟ꧀ꦲꦴ.

ꦠꦟ꧀ꦲꦴꦢꦶꦩꦹꦭꦶꦏꦴ ꦏꦡꦴ ꦄꦠꦶꦱꦁꦑꦶꦠ꧀ꦠꦴꦠꦶ ꦠꦁ, ꦈꦥꦴꦢꦴꦤꦨꦮꦺ ꦕ ꦮꦶꦨꦗꦶꦠ꧀ꦮꦴ ꦮꦶꦠ꧀ꦡꦴꦫꦺꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦏꦡ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ‘‘ꦏꦴꦩꦺ ꦥꦫꦶꦨꦸꦚ꧀ꦗꦶꦱ꧀ꦱꦴꦩꦷ’’ꦠꦶ ꦆꦩꦶꦤꦴ ꦏꦴꦩꦠꦟ꧀ꦲꦴꦥꦮꦠ꧀ꦠꦶꦩꦴꦲ. ꦠꦡꦴ ‘‘ꦱꦒ꧀ꦒꦱꦩ꧀ꦥꦠ꧀ꦠꦶꦁ ꦄꦤꦸꦨꦮꦶꦱ꧀ꦱꦴꦩꦷ’’ꦠꦶꦄꦴꦢꦷꦲꦶ. ꦱꦴ ꦥꦤ ꦠꦟ꧀ꦲꦴ ꦪꦱ꧀ꦩꦴ ꦨꦸꦱꦩꦴꦢꦴꦤꦮꦱꦺꦤ ꦥꦮꦠ꧀ꦠꦩꦴꦤꦴ ꦏꦴꦩꦸꦥꦴꦢꦴꦤꦁ ꦤꦴꦩ ꦲꦺꦴꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦏꦴꦩꦸꦥꦴꦢꦴꦤꦥꦕ꧀ꦕꦪꦴ’’ꦠꦶ. ꦠꦡꦺꦮꦴꦠꦶ ꦏꦴꦩꦸꦥꦴꦢꦴꦤꦥꦕ꧀ꦕꦪꦴ ꦌꦮ.

ꦧ꧀ꦫꦲ꧀ꦩꦭꦺꦴꦏꦱꦩ꧀ꦥꦠ꧀ꦠꦶꦤ꧀ꦠꦶ ꦫꦹꦥꦷꦧ꧀ꦫꦲ꧀ꦩꦭꦺꦴꦏꦺ ꦱꦩ꧀ꦥꦠ꧀ꦠꦶꦁ. ‘‘ꦱꦧ꧀ꦧꦺꦥꦶ ꦠꦺꦨꦹꦩꦏꦴ ꦣꦩ꧀ꦩꦴ ꦏꦴꦩꦤꦷꦪꦛ꧀ꦜꦺꦤ ꦏꦴꦩꦴ’’ꦠꦶ (ꦩꦲꦴꦤꦶ. ꧑; ꦕꦹꦭ꦳ꦤꦶ. ꦄꦗꦶꦠꦩꦴꦟꦮꦥꦸꦕ꧀ꦖꦴꦤꦶꦢ꧀ꦢꦺꦱ ꧘ ꦡꦺꦴꦏ ꦮꦶꦱꦢꦶꦱꦁ) ꦮꦕꦤꦠꦺꦴ ꦨꦮꦫꦴꦒꦺꦴꦥꦶ ꦏꦴꦩꦸꦥꦴꦢꦴꦤꦩꦺꦮꦴꦠꦶ ꦏꦠ꧀ꦮꦴ ‘‘ꦏꦴꦩꦸꦥꦴꦢꦴꦤꦥꦕ꧀ꦕꦪꦴ ꦌꦮ ꦩꦺꦠ꧀ꦠꦁ ꦨꦴꦮꦺꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦺꦱꦸꦥꦴꦢꦴꦤꦩꦹꦭꦶꦏꦴꦱꦸꦥꦷꦠꦶ ꦌꦠ꧀ꦡꦴꦪꦁ ꦪꦺꦴꦗꦤꦴ – ꦆꦣꦺꦏꦕ꧀ꦕꦺꦴ ‘‘ꦤꦠ꧀ꦡꦶ ꦥꦫꦺꦴ ꦭꦺꦴꦏꦺꦴ’’ꦠꦶ ꦤꦠ꧀ꦡꦶꦏꦢꦶꦛ꧀ꦜꦶꦁ ꦒꦟ꧀ꦲꦴꦠꦶ, ꦱꦺꦴ ꦢꦶꦛ꧀ꦜꦸꦥꦴꦢꦴꦤꦥꦕ꧀ꦕꦪꦴ ꦏꦴꦪꦺꦤ ꦢꦸꦕ꧀ꦕꦫꦶꦠꦁ ꦕꦫꦠꦷꦠꦶꦄꦴꦢꦶ ꦮꦸꦠ꧀ꦠꦤꦪꦺꦤ ꦪꦺꦴꦗꦺꦠꦧ꧀ꦧꦁ. ꦄꦥꦫꦺꦴ ‘‘ꦄꦱꦸꦏꦱ꧀ꦩꦶꦁ ꦱꦩ꧀ꦥꦠ꧀ꦠꦶꦨꦮꦺ ꦄꦠ꧀ꦠꦴ ꦈꦕ꧀ꦖꦶꦗ꧀ꦗꦠꦷ’’ꦠꦶ ꦈꦕ꧀ꦖꦺꦢꦢꦶꦛ꧀ꦜꦶꦁ ꦒꦟ꧀ꦲꦴꦠꦶ, ꦱꦺꦴ ꦠꦠ꧀ꦫꦹꦥꦥꦠ꧀ꦠꦶꦪꦴ ꦏꦴꦪꦺꦤ ꦱꦸꦕꦫꦶꦠꦁ ꦕꦫꦠꦷꦠꦶꦄꦴꦢꦶ ꦮꦸꦠ꧀ꦠꦤꦪꦺꦤꦺꦮ ꦪꦺꦴꦗꦺꦠꦧ꧀ꦧꦁ. ꦄꦥꦫꦺꦴ ‘‘ꦫꦹꦥꦷ ꦩꦤꦺꦴꦩꦪꦺꦴ ꦲꦸꦠ꧀ꦮꦴ ꦄꦠ꧀ꦠꦴ ꦈꦕ꧀ꦖꦶꦗ꧀ꦗꦠꦷ’’ꦠꦶ ꦫꦹꦥꦹꦥꦥꦠ꧀ꦠꦶꦪꦴ ꦩꦒ꧀ꦒꦁ ꦨꦴꦮꦺꦠꦶ. ꦨꦴꦮꦤꦴꦥꦴꦫꦶꦥꦹꦫꦶꦪꦴꦠꦶ ꦱꦧ꧀ꦧꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦄꦥꦫꦺꦴ ‘‘ꦄꦫꦹꦥꦨꦮꦺ ꦈꦥ꧀ꦥꦗ꧀ꦗꦶꦠ꧀ꦮꦴ ꦄꦠ꧀ꦠꦴ ꦈꦕ꧀ꦖꦶꦗ꧀ꦗꦠꦷ’’ꦠꦶ ꦄꦫꦹꦥꦹꦥꦥꦠ꧀ꦠꦶꦪꦴ ꦩꦒ꧀ꦒꦁ ꦨꦴꦮꦺꦠꦶ. ꦨꦴꦮꦤꦴꦥꦴꦫꦶꦥꦹꦫꦶꦪꦴꦠꦶ ꦱꦧ꧀ꦧꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦌꦠꦴꦲꦶꦪꦺꦮ ꦄꦠ꧀ꦠꦮꦴꦢꦸꦥꦴꦢꦴꦤꦩꦹꦭꦶꦏꦴꦥꦶ ꦪꦺꦴꦗꦤꦴ ꦱꦁꦮꦟ꧀ꦟꦶꦠꦴꦠꦶ ꦢꦛ꧀ꦜꦧ꧀ꦧꦁ. ꦌꦮꦁ ꦢꦶꦛ꧀ꦜꦣꦩ꧀ꦩꦤꦶꦧ꧀ꦧꦴꦤꦮꦴꦢꦮꦱꦺꦤꦴꦥꦶ ꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ. ꦄꦥꦫꦺꦴ ‘‘ꦱꦷꦭꦺꦤ ꦱꦸꦢ꧀ꦣꦷ’’ꦠꦶ ‘‘ꦄꦱꦸꦢ꧀ꦣꦶꦩꦒ꧀ꦒꦁ ꦱꦸꦢ꧀ꦣꦶꦩꦒ꧀ꦒꦺꦴ’’ꦠꦶ ꦥꦫꦴꦩꦱꦤ꧀ꦠꦺꦴ ꦱꦷꦭꦧ꧀ꦧꦠꦸꦥꦴꦢꦴꦤꦥꦕ꧀ꦕꦪꦴ ꦏꦴꦪꦺꦤ ꦢꦸꦕ꧀ꦕꦫꦶꦠꦁ ꦕꦫꦠꦷꦠꦶꦄꦴꦢꦶꦤꦴ ꦱꦧ꧀ꦧꦁ ꦮꦸꦠ꧀ꦠꦤꦪꦺꦤꦺꦮ ꦪꦺꦴꦗꦺꦠꦧ꧀ꦧꦁ.

ꦆꦢꦴꦤꦶ ꦪ꧀ꦮꦴꦪꦁ ꦱꦁꦱꦴꦫꦕꦏ꧀ꦏꦁ ꦢꦱ꧀ꦱꦺꦤ꧀ꦠꦺꦤ ‘‘ꦏꦴꦩꦨꦮꦺ ꦄꦮꦶꦗ꧀ꦗꦴ ꦏꦴꦩꦨꦮꦺ ꦱꦔ꧀ꦑꦴꦫꦴꦤꦁ ꦥꦕ꧀ꦕꦪꦺꦴ ꦲꦺꦴꦠꦷ’’ꦠꦶꦄꦴꦢꦶꦤꦴ ꦄꦮꦶꦗ꧀ꦗꦴꦢꦷꦤꦁ ꦥꦕ꧀ꦕꦪꦨꦴꦮꦺꦴ, ꦱꦔ꧀ꦑꦴꦫꦴꦢꦷꦤꦁ ꦥꦕ꧀ꦕꦪꦸꦥ꧀ꦥꦤ꧀ꦤꦨꦴꦮꦺꦴ ꦕ ꦢꦱ꧀ꦱꦶꦠꦺꦴ, ꦠꦩꦺꦮ ꦥꦛꦶꦱꦩ꧀ꦨꦶꦢꦴꦩꦒ꧀ꦒꦥꦴꦭ꦳ꦶꦁ ꦄꦴꦤꦺꦠ꧀ꦮꦴ ꦤꦶꦒꦩꦤꦮꦱꦺꦤ ꦢꦱ꧀ꦱꦺꦤ꧀ꦠꦺꦴ ‘‘ꦌꦮꦁ ꦄꦪ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦪꦡꦴ ꦱꦔ꧀ꦑꦴꦫꦴ ꦲꦺꦠꦸꦤꦶꦧ꧀ꦧꦠ꧀ꦠꦴ, ꦌꦮꦁ ꦄꦮꦶꦗ꧀ꦗꦴꦥꦶ ꦏꦴꦩꦴꦱꦮꦴꦢꦶꦤꦴ ꦱꦲꦺꦠꦸꦏꦴ ꦌꦮꦴꦠꦶ ꦄꦴꦲ ‘‘ꦈꦨꦺꦴꦥꦺꦠꦺ ꦲꦺꦠꦸꦱꦩꦸꦥ꧀ꦥꦤ꧀ꦤꦴ’’ꦠꦶ. ꦥꦕ꧀ꦕꦪꦥꦫꦶꦒ꧀ꦒꦲꦺꦠꦶ ꦤꦴꦩꦫꦹꦥꦱ꧀ꦱ ꦥꦕ꧀ꦕꦪꦴꦤꦁ ꦄꦮꦶꦗ꧀ꦗꦴꦢꦷꦤꦁ ꦥꦫꦶꦕ꧀ꦖꦶꦗ꧀ꦗ ꦒꦲꦟꦺ, ꦤꦶꦥ꧀ꦦꦴꦢꦺꦠꦧ꧀ꦧꦺ ꦨꦸꦩ꧀ꦩꦁ. ꦥꦚ꧀ꦚꦴꦠꦶ ꦏꦔ꧀ꦑꦴꦮꦶꦠꦫꦟꦮꦶꦱꦸꦢ꧀ꦣꦶꦱꦔ꧀ꦑꦴꦠꦴ ꦥꦏꦴꦫꦠꦺꦴ ꦗꦴꦤꦤꦴ. ꦣꦩ꧀ꦩꦛ꧀ꦜꦶꦠꦶꦚꦴꦟꦤ꧀ꦠꦶ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦴꦮꦧꦺꦴꦣꦺꦴ. ꦆꦢꦚ꧀ꦕ ꦣꦩ꧀ꦩꦛ꧀ꦜꦶꦠꦶꦚꦴꦟꦁ ꦪꦱ꧀ꦩꦴ ꦄꦢ꧀ꦣꦴꦠ꧀ꦠꦪꦺ ꦏꦔ꧀ꦑꦴꦩꦭꦮꦶꦠꦫꦟꦮꦱꦺꦤ ꦥꦮꦠ꧀ꦠꦠꦶ, ꦠꦱ꧀ꦩꦴ ‘‘ꦄꦠꦷꦠꦩ꧀ꦥꦶ ꦄꦢ꧀ꦣꦴꦤ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦌꦠꦺꦤꦺꦮ ꦤꦪꦺꦤꦴꦠꦶ ꦌꦠꦺꦤ ‘‘ꦄꦮꦶꦗ꧀ꦗꦴ ꦲꦺꦠꦹ’’ꦠꦶꦄꦴꦢꦶꦤꦴ ꦄꦮꦶꦗ꧀ꦗꦴꦪꦁ ꦮꦸꦠ꧀ꦠꦺꦤ ꦤꦪꦺꦤ. ‘‘ꦱꦔ꧀ꦑꦴꦫꦴ ꦲꦺꦠꦸ, ꦮꦶꦚ꧀ꦚꦴꦟꦁ ꦲꦺꦠꦸꦱꦩꦸꦥ꧀ꦥꦤ꧀ꦤ’’ꦤ꧀ꦠꦶꦄꦴꦢꦶꦤꦴ (ꦥꦛꦶ. ꦩ. ꧑.꧔꧖) ꦱꦧ꧀ꦧꦥꦢꦴꦤꦶ ꦮꦶꦠ꧀ꦡꦴꦫꦺꦠꦧ꧀ꦧꦴꦤꦶ.

ꦱꦁꦑꦶꦥ꧀ꦥꦤ꧀ꦠꦶ ꦌꦠ꧀ꦡ ꦄꦮꦶꦗ꧀ꦗꦴꦢꦪꦺꦴ, ꦮꦶꦚ꧀ꦚꦴꦟꦴꦢꦪꦺꦴ ꦕꦴꦠꦶ ꦱꦔ꧀ꦑꦺꦥꦺꦴ, ꦲꦺꦠꦸ, ꦮꦶꦥꦴꦏꦺꦴ ꦕ. ꦲꦺꦠꦸ ꦮꦶꦥꦴꦏꦺꦴꦠꦶ ꦮꦴ ꦱꦁꦑꦶꦥ꧀ꦥꦠꦷꦠꦶ ꦱꦔ꧀ꦑꦺꦥꦺꦴ, ꦄꦮꦶꦗ꧀ꦗꦴꦢꦪꦺꦴ ꦮꦶꦚ꧀ꦚꦴꦟꦴꦢꦪꦺꦴ ꦕ. ꦱꦔ꧀ꦑꦺꦥꦨꦴꦮꦱꦴꦩꦚ꧀ꦚꦺꦤ ꦥꦤ ꦌꦏꦮꦕꦤꦁ ꦏꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦠꦺ ꦥꦤ ꦱꦔ꧀ꦑꦺꦥꦴ ꦄꦠꦷꦠꦺ ꦲꦺꦠꦸ, ꦌꦠꦫꦲꦶ ꦮꦶꦥꦴꦏꦺꦴ, ꦌꦠꦫꦲꦶ ꦲꦺꦠꦸ, ꦄꦴꦪꦠꦶꦁ ꦮꦶꦥꦴꦏꦺꦴꦠꦶ ꦌꦮꦁ ꦏꦴꦭꦮꦶꦨꦴꦒꦺꦤ ꦕꦠ꧀ꦠꦴꦫꦺꦴ ꦗꦴꦠꦴ. ꦠꦺꦤꦴꦲ ‘‘ꦥꦸꦫꦶꦩꦱꦔ꧀ꦑꦺꦥꦺꦴ ꦕꦺꦠ꧀ꦡ ꦄꦠꦷꦠꦺꦴ ꦄꦢ꧀ꦣꦴ’’ꦠꦶꦄꦴꦢꦶ. ꦱꦔ꧀ꦑꦺꦥ-ꦱꦢ꧀ꦢꦺꦴ ꦮꦴ ꦨꦴꦒꦴꦣꦶꦮꦕꦤꦤ꧀ꦠꦶ ꦄꦠꦷꦠꦺꦴ ꦲꦺꦠꦸꦨꦴꦒꦺꦴ ꦥꦜꦩꦺꦴ ꦱꦔ꧀ꦑꦺꦥꦺꦴ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ. ꦠꦟ꧀ꦲꦸꦥꦴꦢꦴꦤꦨꦮꦴ ꦒꦲꦶꦠꦴꦮ ꦲꦺꦴꦤ꧀ꦠꦶ ꦏꦶꦭꦺꦱꦏꦩ꧀ꦩꦨꦴꦮꦱꦴꦩꦚ꧀ꦚꦠꦺꦴ, ꦠꦺꦲꦶ ꦮꦶꦤꦴ ꦄꦮꦶꦗ꧀ꦗꦴꦱꦔ꧀ꦑꦴꦫꦴꦤꦁ ꦱꦏꦶꦕ꧀ꦕꦴꦏꦫꦟꦠꦺꦴ ꦕ. ꦏꦩ꧀ꦩꦁ ꦠꦟ꧀ꦲꦴ ꦕ ꦠꦱ꧀ꦱ ꦱꦲꦏꦴꦫꦷꦏꦴꦫꦟꦁ ꦲꦸꦠ꧀ꦮꦴ ꦮꦛ꧀ꦛꦤꦠ꧀ꦡꦺꦤ ꦏꦩ꧀ꦩꦮꦛ꧀ꦛꦁ.

ꦮꦶꦚ꧀ꦚꦴꦟꦤꦴꦩꦫꦹꦥꦱꦭ꦳ꦴꦪꦠꦤꦦꦱ꧀ꦱꦮꦺꦢꦤꦴꦤꦁ ꦗꦴꦠꦶꦗꦫꦴꦨꦔ꧀ꦒꦴꦮꦠ꧀ꦡꦴ ‘‘ꦗꦴꦠꦶꦗꦫꦴꦩꦫꦟ’’ꦤ꧀ꦠꦶ ꦮꦸꦠ꧀ꦠꦴꦠꦶ ꦄꦴꦲ ‘‘ꦗꦴꦠꦶꦗꦫꦴꦩꦫꦟꦴꦥꦢꦺꦱꦺꦤꦮꦶꦚ꧀ꦚꦴꦟꦴꦢꦷꦤꦁ ꦤꦶꦢ꧀ꦢꦶꦛ꧀ꦜꦠ꧀ꦠꦴ’’ꦠꦶ. ꦆꦩꦺꦠꦶ ꦮꦶꦚ꧀ꦚꦴꦟꦴꦢꦪꦺꦴ. ꦄꦴꦪꦠꦶꦁ ꦮꦶꦥꦴꦏꦮꦛ꧀ꦛꦁ ꦥꦕ꧀ꦕꦸꦥ꧀ꦥꦤ꧀ꦤꦲꦺꦠꦸꦠꦺꦴ ꦨꦴꦮꦷꦤꦁ ꦄꦤꦴꦒꦠꦴꦤꦁ ꦒꦲꦶꦠꦠ꧀ꦠꦴ. ꦠꦺꦠꦶ ꦄꦮꦶꦗ꧀ꦗꦴꦢꦪꦺꦴ. ꦄꦴꦏꦴꦫꦠꦺꦴꦠꦶ ꦱꦫꦹꦥꦠꦺꦴ ꦄꦮꦸꦠ꧀ꦠꦴꦥꦶ ꦠꦱ꧀ꦩꦶꦁ ꦠꦱ꧀ꦩꦶꦁ ꦱꦔ꧀ꦒꦲꦺ ꦄꦴꦏꦶꦫꦷꦪꦤ꧀ꦠꦶ ꦄꦮꦶꦗ꧀ꦗꦴꦱꦔ꧀ꦑꦴꦫꦴꦢꦶꦒ꧀ꦒꦲꦟꦺꦲꦶ ꦥꦏꦴꦱꦷꦪꦤ꧀ꦠꦷꦠꦶ ꦄꦴꦏꦴꦫꦴ, ꦄꦠꦷꦠꦲꦺꦠꦸꦄꦴꦢꦷꦤꦁ ꦮꦴ ꦥꦏꦴꦫꦴ ꦄꦴꦏꦴꦫꦴ, ꦠꦠꦺꦴ ꦄꦴꦏꦴꦫꦠꦺꦴ. ꦮꦷꦱꦠꦶꦮꦶꦣꦴ ꦲꦺꦴꦤ꧀ꦠꦶ ꦄꦠꦷꦠꦺꦲꦺꦠꦸꦥꦚ꧀ꦕꦏꦴꦢꦶꦨꦺꦢꦠꦺꦴ.

ꦱꦔ꧀ꦑꦴꦫꦮꦶꦚ꧀ꦚꦴꦟꦴꦤꦁ ꦄꦤ꧀ꦠꦫꦴ ꦌꦏꦺꦴ ꦱꦤ꧀ꦣꦷꦠꦶ ꦲꦺꦠꦸꦠꦺꦴ ꦦꦭꦱ꧀ꦱ ꦄꦮꦶꦕ꧀ꦖꦺꦢꦥ꧀ꦥꦮꦠ꧀ꦠꦶꦨꦴꦮꦠꦺꦴ ꦲꦺꦠꦸꦦꦭꦱꦩ꧀ꦧꦤ꧀ꦣꦨꦹꦠꦺꦴ ꦌꦏꦺꦴ ꦱꦤ꧀ꦣꦶ. ꦠꦡꦴ ꦨꦮꦗꦴꦠꦷꦤꦩꦤ꧀ꦠꦫꦴ. ꦮꦺꦢꦤꦴꦠꦟ꧀ꦲꦴꦤꦩꦤ꧀ꦠꦫꦴ ꦥꦤ ꦦꦭꦠꦺꦴ ꦲꦺꦠꦸꦤꦺꦴ ꦄꦮꦶꦕ꧀ꦖꦺꦢꦥ꧀ꦥꦮꦠ꧀ꦠꦶꦨꦴꦮꦠꦺꦴ ꦦꦭꦲꦺꦠꦸꦱꦩ꧀ꦧꦤ꧀ꦣꦨꦹꦠꦺꦴ ꦌꦏꦺꦴ ꦱꦤ꧀ꦣꦶ. ꦦꦭꦨꦹꦠꦺꦴꦥꦶ ꦲꦶ ꦣꦩ꧀ꦩꦺꦴ ꦄꦚ꧀ꦚꦱ꧀ꦱ ꦲꦺꦠꦸꦱꦨꦴꦮꦱ꧀ꦱ ꦣꦩ꧀ꦩꦱ꧀ꦱ ꦥꦕ꧀ꦕꦪꦺꦴ ꦲꦺꦴꦠꦷꦠꦶ.

ꦆꦠꦷꦠꦶ ꦮꦸꦠ꧀ꦠꦥ꧀ꦥꦏꦴꦫꦥꦫꦴꦩꦱꦤꦁ. ꦠꦺꦤꦴꦲ ‘‘ꦕꦠꦸꦱꦔ꧀ꦑꦺꦥ’’ꦤ꧀ꦠꦶꦄꦴꦢꦶ. ꦱꦧ꧀ꦧꦴꦏꦴꦫꦠꦺꦴꦠꦶ ꦆꦣ ꦮꦸꦠ꧀ꦠꦺꦲꦶ, ꦄꦮꦸꦠ꧀ꦠꦺꦲꦶ ꦕ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦮꦶꦨꦔ꧀ꦒꦺ (ꦮꦶꦨ. ꧒꧒꧕ ꦄꦴꦢꦪꦺꦴ), ꦄꦤꦤ꧀ꦠꦤꦪꦱꦩꦤ꧀ꦠꦥꦛ꧀ꦜꦴꦤꦴꦢꦷꦱꦸ ꦕ ꦄꦴꦒꦠꦺꦲꦶ ꦱꦧ꧀ꦧꦺꦲꦶ ꦄꦴꦏꦴꦫꦺꦲꦶ. ꦗꦴꦤꦴꦠꦷꦠꦶ ꦄꦮꦧꦸꦗ꧀ꦙꦠꦶ. ꦥꦱ꧀ꦱꦠꦷꦠꦶ ꦢꦱ꧀ꦱꦤꦨꦹꦠꦺꦤ ꦚꦴꦟꦕꦏ꧀ꦑꦸꦤꦴ ꦥꦕ꧀ꦕꦏ꧀ꦑꦠꦺꦴ ꦥꦱ꧀ꦱꦠꦶ. ꦄꦚ꧀ꦚꦴꦠꦶ ꦥꦛꦶꦮꦶꦗ꧀ꦙꦠꦷꦠꦶ ꦠꦺꦱꦁꦪꦺꦮ ꦮꦺꦮꦕꦤꦁ. ꦠꦤ꧀ꦠꦶ ꦠꦁ ꦗꦴꦤꦤꦁ. ꦚꦴꦠꦛ꧀ꦜꦺꦤꦴꦠꦶ ꦪꦡꦴꦱꦨꦴꦮꦠꦺꦴ ꦗꦴꦤꦤꦛ꧀ꦜꦺꦤ. ꦥꦗꦴꦤꦤꦛ꧀ꦜꦺꦤꦴꦠꦶ ꦄꦤꦶꦕ꧀ꦕꦴꦢꦷꦲꦶ ꦥꦏꦴꦫꦺꦲꦶ ꦥꦛꦶꦮꦶꦗ꧀ꦙꦤꦛ꧀ꦜꦺꦤ.

ꦆꦢꦴꦤꦶ ꦪꦢꦠ꧀ꦡꦩꦶꦢꦁ ꦨꦮꦕꦏ꧀ꦏꦁ ꦆꦣꦴꦤꦷꦠꦁ, ꦠꦁ ꦢꦱ꧀ꦱꦺꦠꦸꦁ ‘‘ꦆꦩꦶꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦠꦺ ꦣꦩ꧀ꦩꦺꦠꦶ ꦠꦺ ꦄꦮꦶꦗ꧀ꦗꦴꦢꦶꦏꦺ ꦣꦩ꧀ꦩꦺ. ꦪꦡꦴꦨꦹꦠꦁ ꦚꦠ꧀ꦮꦴꦠꦶ ꦩꦲꦴꦮꦗꦶꦫꦚꦴꦟꦺꦤ ꦪꦴꦡꦴꦮꦠꦺꦴ ꦗꦴꦤꦶꦠ꧀ꦮꦴ. ꦤꦶꦧ꧀ꦧꦶꦤ꧀ꦢꦤ꧀ꦠꦺꦴ ꦧꦭꦮꦮꦶꦥꦱ꧀ꦱꦤꦴꦪ ꦮꦶꦫꦗ꧀ꦗꦤ꧀ꦠꦺꦴ ꦮꦶꦩꦸꦕ꧀ꦕꦤ꧀ꦠꦺꦴ ꦄꦫꦶꦪꦩꦒ꧀ꦒꦺꦲꦶ ꦄꦫꦺ ꦲꦤꦷꦠꦶ ꦪꦺꦴꦗꦤꦴ. ꦠꦠ꧀ꦡ ꦪꦢꦴ ꦨꦒꦮꦴ ꦮꦶꦫꦗ꧀ꦗꦠꦶ ꦮꦶꦩꦸꦕ꧀ꦕꦠꦶ, ꦠꦢꦴ ꦄꦫꦺ ꦲꦤꦠꦶ ꦤꦴꦩ. ꦠꦠꦺꦴ ꦥꦫꦁ ꦥꦤ ꦄꦨꦶꦱꦩ꧀ꦧꦸꦢ꧀ꦣꦏ꧀ꦑꦟꦁ ꦒꦲꦺꦠ꧀ꦮꦴ ꦮꦸꦠ꧀ꦠꦁ ‘‘ꦲꦤꦶ ꦮꦶꦲꦤꦶ ꦮꦶꦢ꧀ꦣꦁꦱꦺꦱꦷ’’ꦠꦶ.

꧑꧒꧙. ꦕꦏ꧀ꦏꦮꦠ꧀ꦠꦶꦤꦺꦴ ꦄꦕꦺꦠꦤꦺ ꦕꦏ꧀ꦏꦫꦠꦤꦺ ꦈꦥ꧀ꦥꦤ꧀ꦤꦺ ꦠꦠ꧀ꦡꦺꦮ ꦭꦺꦴꦏꦺꦴ ꦥꦹꦗꦁ ꦏꦫꦺꦴꦠꦶ, ꦄꦚ꧀ꦚꦠ꧀ꦡ ꦥꦹꦗꦴꦮꦶꦱꦺꦱꦴ ꦥꦕ꧀ꦖꦶꦗ꧀ꦗꦤ꧀ꦠꦶ, ꦏꦶꦩꦔ꧀ꦒꦁ ꦥꦤ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺ ꦈꦥ꧀ꦥꦤ꧀ꦤꦺꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦈꦥ꧀ꦥꦤ꧀ꦤꦺ ꦠꦡꦴꦒꦠꦺ’’ꦠꦶꦄꦴꦢꦶꦩꦴꦲ. ꦏꦺꦴ ꦥꦤ ꦮꦴꦢꦺꦴ ꦄꦚ꧀ꦚꦺꦱꦁ ꦥꦹꦗꦴꦮꦶꦱꦺꦱꦴꦤꦤ꧀ꦠꦶ ꦪꦡꦴꦮꦸꦠ꧀ꦠꦠꦺꦴ ꦄꦚ꧀ꦚꦺꦱꦁ ꦄꦩꦲꦺꦱꦏ꧀ꦑꦺꦲꦶ ꦢꦺꦮꦩꦤꦸꦱ꧀ꦱꦺꦲꦶ ꦏꦫꦶꦪꦩꦴꦤꦴꦤꦁ ꦤꦴꦠꦶꦈꦭ꦳ꦴꦫꦴꦤꦁ ꦥꦹꦗꦴꦮꦶꦱꦺꦱꦴꦤꦁ ꦄꦫꦲꦨꦴꦮꦺ ꦏꦴ ꦤꦴꦩ ꦏꦡꦴ. ꦄꦠ꧀ꦡꦴꦤꦸꦫꦹꦥꦤ꧀ꦠꦶ ꦄꦫꦲꦠ꧀ꦠꦠ꧀ꦡꦱ꧀ꦱ ꦄꦤꦸꦫꦹꦥꦁ ꦄꦤ꧀ꦮꦠ꧀ꦡꦁ.

꧑꧓꧐. ꦄꦱꦶꦭꦺꦴꦏꦨꦪꦺꦤꦴꦠꦶ ꦄꦏꦶꦠ꧀ꦠꦶꦨꦪꦺꦤ. ꦫꦲꦺꦴ ꦥꦴꦥꦁ ꦏꦫꦺꦴꦤ꧀ꦠꦶ ‘‘ꦩꦴ ꦤꦁ ꦏꦺꦴꦕꦶ ꦗꦚ꧀ꦚꦴ’’ꦠꦶ ꦌꦱ ꦨꦒꦮꦴ ꦤ ꦏꦢꦴꦕꦶ ꦏꦫꦺꦴꦠꦶ ꦥꦴꦥꦲꦺꦠꦹꦤꦁ ꦧꦺꦴꦣꦶꦩꦟ꧀ꦝꦺ ꦌꦮ ꦱꦸꦥ꧀ꦥꦲꦷꦤꦠ꧀ꦠꦴ. ꦄꦥꦫꦺꦴ ꦤꦪꦺꦴ – ꦄꦴꦫꦏꦴꦠꦶ ꦄꦫꦲꦁ, ꦱꦸꦮꦶꦢꦹꦫꦨꦴꦮꦠꦺꦴꦆꦕ꧀ꦕꦺꦮ ꦄꦠ꧀ꦡꦺꦴ. ꦏꦸꦠꦺꦴ ꦥꦤ ꦱꦸꦮꦶꦢꦹꦫꦨꦴꦮꦠꦺꦴꦠꦶ? ꦪꦺ ꦄꦨꦴꦮꦶꦠꦏꦴꦪꦴ ꦄꦨꦴꦮꦶꦠꦱꦷꦭꦴ ꦄꦨꦴꦮꦶꦠꦕꦶꦠ꧀ꦠꦴ ꦄꦨꦴꦮꦶꦠꦥꦚ꧀ꦚꦴ, ꦠꦠꦺꦴ ꦌꦮ ꦄꦥ꧀ꦥꦲꦷꦤꦫꦴꦒꦢꦺꦴꦱꦩꦺꦴꦲꦴ ꦄꦫꦶꦪꦣꦩ꧀ꦩꦱ꧀ꦱ ꦄꦏꦺꦴꦮꦶꦢꦴ ꦄꦫꦶꦪꦣꦩ꧀ꦩꦺ ꦄꦮꦶꦤꦷꦠꦴ ꦄꦫꦶꦪꦣꦩ꧀ꦩꦱ꧀ꦱ ꦄꦢꦱ꧀ꦱꦴꦮꦶꦤꦺꦴ ꦄꦥ꧀ꦥꦛꦶꦥꦤ꧀ꦤꦴ ꦩꦶꦕ꧀ꦖꦴꦥꦛꦶꦥꦤ꧀ꦤꦴ ꦕ, ꦠꦠꦺꦴ ꦱꦸꦮꦶꦢꦹꦫꦨꦴꦮꦠꦺꦴ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ –

‘‘ꦱꦔ꧀ꦓꦴꦛꦶꦏꦟ꧀ꦟꦺꦕꦺꦥꦶ ꦩꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦒꦲꦺꦠ꧀ꦮꦴ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦄꦤꦸꦧꦤ꧀ꦣꦺꦴ ꦄꦱ꧀ꦱ ꦥꦴꦢꦺ ꦥꦴꦢꦁ ꦤꦶꦏ꧀ꦑꦶꦥꦤ꧀ꦠꦺꦴ, ꦱꦺꦴ ꦕ ꦲꦺꦴꦠꦶ ꦄꦨꦶꦗ꧀ꦙꦴꦭꦸ ꦏꦴꦩꦺꦱꦸ ꦠꦶꦧ꧀ꦧꦱꦴꦫꦴꦒꦺꦴ ꦧ꧀ꦪꦴꦥꦤ꧀ꦤꦕꦶꦠ꧀ꦠꦺꦴ ꦥꦢꦸꦛ꧀ꦜꦩꦤꦱꦔ꧀ꦏꦥ꧀ꦥꦺꦴ ꦩꦸꦛ꧀ꦜꦱ꧀ꦱꦠꦶ ꦄꦱꦩ꧀ꦥꦗꦴꦤꦺꦴ ꦄꦱꦩꦴꦲꦶꦠꦺꦴ ꦮꦶꦧ꧀ꦨꦤ꧀ꦠꦕꦶꦠ꧀ꦠꦺꦴ ꦥꦴꦏꦠꦶꦤ꧀ꦢ꧀ꦫꦶꦪꦺꦴ. ꦄꦡ ꦑꦺꦴ ꦱꦺꦴ ꦄꦴꦫꦏꦴꦮ ꦩꦪ꧀ꦲꦁ, ꦄꦲꦚ꧀ꦕ ꦠꦱ꧀ꦱ. ꦠꦁ ꦏꦶꦱ꧀ꦱ ꦲꦺꦠꦸ? ꦣꦩ꧀ꦩꦁ ꦲꦶ ꦱꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦤ ꦥꦱ꧀ꦱꦠꦶ, ꦣꦩ꧀ꦩꦁ ꦄꦥꦱ꧀ꦱꦤ꧀ꦠꦺꦴ ꦩꦁ ꦤ ꦥꦱ꧀ꦱꦠꦷ’’ꦠꦶ (ꦆꦠꦶꦮꦸ. ꧙꧒).

ꦪꦡꦴꦮꦸꦠ꧀ꦠꦥꦸꦒ꧀ꦒꦭꦴ ꦲꦶ ꦱꦕꦺꦥꦶ ꦱꦴꦪꦁ ꦥꦴꦠꦁ ꦱꦠ꧀ꦡꦸ ꦱꦤ꧀ꦠꦶꦏꦴꦮꦕꦫꦴꦮ ꦱꦶꦪꦸꦁ, ꦤ ꦠꦺ ꦠꦴꦮꦠꦴ ‘‘ꦱꦠ꧀ꦡꦸ ꦱꦤ꧀ꦠꦶꦏꦴ’’ꦠꦶ ꦮꦠ꧀ꦠꦧ꧀ꦧꦴ, ꦠꦡꦴ ꦱꦠ꧀ꦡꦴꦥꦶ ꦤꦺꦱꦁ. ꦆꦠꦶ ꦄꦱꦥ꧀ꦥꦸꦫꦶꦱꦴꦤꦁ ꦄꦴꦫꦏꦴ ꦢꦹꦫꦺꦠꦶ ꦄꦫꦲꦁ.

‘‘ꦱꦩ꧀ꦩꦴ ꦤ ꦥꦛꦶꦥꦗ꧀ꦗꦤ꧀ꦠꦶ, ꦪꦺ ꦤꦶꦲꦷꦤꦴꦱꦪꦴ ꦤꦫꦴ;

ꦄꦴꦫꦏꦴ ꦠꦺꦲꦶ ꦨꦒꦮꦴ, ꦢꦹꦫꦺ ꦠꦺꦤꦴꦫꦲꦁ ꦩꦠꦺꦴ’’ꦠꦶ.

ꦠꦡꦴ ꦄꦴꦫꦏꦴꦠꦶ ꦄꦫꦲꦁ, ꦄꦴꦱꦤ꧀ꦤꦨꦴꦮꦠꦺꦴꦠꦶ ꦄꦠ꧀ꦡꦺꦴ. ꦏꦸꦠꦺꦴ ꦥꦤ ꦄꦴꦱꦤ꧀ꦤꦨꦴꦮꦠꦺꦴꦠꦶ? ꦪꦺ ꦨꦴꦮꦶꦠꦏꦴꦪꦴ ꦨꦴꦮꦶꦠꦱꦷꦭꦴ ꦨꦴꦮꦶꦠꦕꦶꦠ꧀ꦠꦴ ꦨꦴꦮꦶꦠꦥꦚ꧀ꦚꦴ, ꦠꦠꦺꦴ ꦌꦮ ꦥꦲꦷꦤꦫꦴꦒꦢꦺꦴꦱꦩꦺꦴꦲꦴ ꦄꦫꦶꦪꦣꦩ꧀ꦩꦱ꧀ꦱ ꦏꦺꦴꦮꦶꦢꦴ ꦄꦫꦶꦪꦣꦩ꧀ꦩꦺ ꦱꦸꦮꦶꦤꦷꦠꦴ ꦄꦫꦶꦪꦣꦩ꧀ꦩꦱ꧀ꦱ ꦢꦱ꧀ꦱꦴꦮꦶꦤꦺꦴ ꦱꦩ꧀ꦩꦴꦥꦛꦶꦥꦤ꧀ꦤꦴ, ꦠꦠꦺꦴ ꦄꦴꦱꦤ꧀ꦤꦨꦴꦮꦠꦺꦴ. ꦮꦸꦠ꧀ꦠꦩ꧀ꦥꦶ ꦕꦺꦠꦁ ꦨꦒꦮꦠꦴ –

‘‘ꦪꦺꦴꦗꦤꦱꦠꦺ ꦕꦺꦥꦶ ꦩꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦮꦶꦲꦫꦺꦪ꧀ꦪ, ꦱꦺꦴ ꦕ ꦲꦺꦴꦠꦶ ꦄꦤꦨꦶꦗ꧀ꦙꦴꦭꦸ ꦏꦴꦩꦺꦱꦸ ꦤ ꦠꦶꦧ꧀ꦧꦱꦴꦫꦴꦒꦺꦴ ꦄꦧ꧀ꦪꦴꦥꦤ꧀ꦤꦕꦶꦠ꧀ꦠꦺꦴ ꦄꦥ꧀ꦥꦢꦸꦛ꧀ꦜꦩꦤꦱꦔ꧀ꦏꦥ꧀ꦥꦺꦴ ꦈꦥꦛ꧀ꦜꦶꦠꦱ꧀ꦱꦠꦶ ꦱꦩ꧀ꦥꦗꦴꦤꦺꦴ ꦱꦩꦴꦲꦶꦠꦺꦴ ꦌꦏꦒ꧀ꦒꦕꦶꦠ꧀ꦠꦺꦴ ꦱꦁꦮꦸꦠꦶꦤ꧀ꦢ꧀ꦫꦶꦪꦺꦴ. ꦄꦡ ꦑꦺꦴ ꦱꦺꦴ ꦱꦤ꧀ꦠꦶꦏꦺꦮ ꦩꦪ꧀ꦲꦁ, ꦄꦲꦚ꧀ꦕ ꦠꦱ꧀ꦱ. ꦠꦁ ꦏꦶꦱ꧀ꦱ ꦲꦺꦠꦸ? ꦣꦩ꧀ꦩꦁ ꦲꦶ ꦱꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦱ꧀ꦱꦠꦶ, ꦣꦩ꧀ꦩꦁ ꦥꦱ꧀ꦱꦤ꧀ꦠꦺꦴ ꦩꦁ ꦥꦱ꧀ꦱꦠꦷ’’ꦠꦶ (ꦆꦠꦶꦮꦸ. ꧙꧒).

ꦠꦡꦴꦫꦹꦥꦴ ꦲꦶ ꦥꦸꦒ꧀ꦒꦭꦴ ꦱꦠ꧀ꦡꦸ ꦪꦺꦴꦗꦤꦱꦲꦱ꧀ꦱꦤ꧀ꦠꦫꦶꦏꦴꦥꦶ ꦲꦺꦴꦤ꧀ꦠꦶ, ꦤ ꦠꦴꦮꦠꦴ ꦠꦺ ‘‘ꦱꦠ꧀ꦡꦸ ꦢꦹꦫꦕꦴꦫꦶꦤꦺꦴ’’ꦠꦶ ꦮꦠ꧀ꦠꦧ꧀ꦧꦴ, ꦠꦡꦴ ꦱꦠ꧀ꦡꦴꦥꦶ ꦤꦺꦱꦁ. ꦆꦠꦶ ꦱꦥ꧀ꦥꦸꦫꦶꦱꦴꦤꦁ ꦄꦴꦫꦏꦴ ꦄꦴꦱꦤ꧀ꦤꦺꦠꦶ ꦄꦫꦲꦁ.

ꦪꦺ ꦱꦩ꧀ꦩꦴ ꦥꦛꦶꦥꦗ꧀ꦗꦤ꧀ꦠꦶ, ꦱꦸꦥ꧀ꦥꦟꦷꦠꦴꦣꦶꦩꦸꦠ꧀ꦠꦶꦏꦴ;

ꦄꦴꦫꦏꦴ ꦠꦺꦲꦶ ꦄꦴꦱꦤ꧀ꦤꦺ, ꦠꦺꦤꦴꦥꦶ ꦄꦫꦲꦁ ꦗꦶꦤꦺꦴ.

ꦪꦺ ꦆꦩꦺ ꦫꦴꦒꦴꦢꦪꦺꦴ ꦥꦴꦥꦣꦩ꧀ꦩꦴ ꦪꦱ꧀ꦩꦶꦁ ꦱꦤ꧀ꦠꦴꦤꦺ ꦈꦥ꧀ꦥꦗ꧀ꦗꦤ꧀ꦠꦶ, ꦠꦱ꧀ꦱ ꦢꦶꦛ꧀ꦜꦣꦩ꧀ꦩꦶꦏꦩ꧀ꦥꦶ ꦱꦩ꧀ꦥꦫꦴꦪꦶꦏꦩ꧀ꦥꦶ ꦄꦤꦠ꧀ꦡꦁ ꦄꦴꦮꦲꦤ꧀ꦠꦶ. ꦤꦶꦧ꧀ꦧꦴꦤꦒꦴꦩꦶꦤꦶꦪꦴ ꦥꦛꦶꦥꦢꦴꦪ ꦌꦏꦁꦱꦺꦤꦺꦮ ꦈꦗꦸꦮꦶꦥꦕ꧀ꦕꦤꦷꦏꦨꦹꦠꦴ ꦕ, ꦠꦺ ꦄꦠ꧀ꦠꦲꦶꦠꦁ, ꦥꦫꦲꦶꦠꦚ꧀ꦕ ꦥꦫꦶꦥꦹꦫꦺꦠꦸꦁ ꦱꦩ꧀ꦩꦴ ꦥꦛꦶꦥꦗ꧀ꦗꦤ꧀ꦠꦺꦲꦶ ꦱꦴꦣꦹꦲꦶ ꦢꦹꦫꦠꦺꦴ ꦫꦲꦶꦠꦧ꧀ꦧꦴ ꦥꦫꦶꦕ꧀ꦕꦗꦶꦠꦧ꧀ꦧꦴ ꦥꦲꦴꦠꦧ꧀ꦧꦴꦠꦶ ꦫꦲꦴ ꦤꦴꦩ, ꦠꦺ ꦕ ꦪꦱ꧀ꦩꦴ ꦨꦒꦮꦠꦺꦴ ꦧꦺꦴꦣꦶꦩꦹꦭꦺꦪꦺꦮ ꦄꦫꦶꦪꦩꦒ꧀ꦒꦺꦤ ꦱꦧ꧀ꦧꦱꦺꦴ ꦥꦲꦷꦤꦴ ꦱꦩꦸꦕ꧀ꦖꦶꦤ꧀ꦤꦴ. ꦪꦡꦴꦲ –

‘‘ꦠꦡꦴꦒꦠꦱ꧀ꦱ ꦑꦺꦴ, ꦧ꧀ꦫꦴꦲ꧀ꦩꦟ, ꦫꦴꦒꦺꦴ ꦥꦲꦷꦤꦺꦴ ꦢꦺꦴꦱꦺꦴ ꦩꦺꦴꦲꦺꦴ, ꦱꦧ꧀ꦧꦺꦥꦶ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦥꦲꦷꦤꦴ ꦈꦕ꧀ꦖꦶꦤ꧀ꦤꦩꦹꦭꦴ ꦠꦴꦭꦴꦮꦠ꧀ꦡꦸꦏꦠꦴ ꦄꦤꦨꦴꦮꦁꦏꦠꦴ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦣꦩ꧀ꦩꦴ’’ꦠꦶ (ꦥꦴꦫꦴ. ꧙-꧑꧐ ꦄꦠ꧀ꦡꦠꦺꦴ ꦱꦩꦴꦤꦁ).

ꦠꦱ꧀ꦩꦴ ꦱꦧ꧀ꦧꦱꦺꦴ ꦤ ꦱꦤ꧀ꦠꦶ ꦌꦠꦱ꧀ꦱ ꦫꦲꦴꦠꦶ ꦄꦫꦲꦺꦴꦠꦶ ꦮꦠ꧀ꦠꦧ꧀ꦧꦺ ꦎꦏꦴꦫꦱ꧀ꦱ ꦱꦴꦤꦸꦱꦴꦫꦁ ꦄ-ꦏꦴꦫꦴꦢꦺꦱꦁ ꦏꦠ꧀ꦮꦴ ‘‘ꦄꦫꦲ’’ꦤ꧀ꦠꦶ ꦮꦸꦠ꧀ꦠꦁ.

ꦥꦴꦥꦣꦩ꧀ꦩꦴ ꦫꦲꦴ ꦤꦴꦩ, ꦱꦴꦣꦹꦲꦶ ꦫꦲꦶꦠꦧ꧀ꦧꦠꦺꦴ;

ꦠꦺꦱꦁ ꦱꦸꦛ꧀ꦜꦸ ꦥꦲꦷꦤꦠ꧀ꦠꦴ, ꦨꦒꦮꦴ ꦄꦫꦲꦁ ꦩꦠꦺꦴ.

ꦪꦺ ꦠꦺ ꦱꦧ꧀ꦧꦱꦺꦴ ꦥꦫꦶꦚ꧀ꦚꦴꦠꦏ꧀ꦑꦤ꧀ꦣꦴ ꦥꦲꦷꦤꦏꦶꦭꦺꦱꦴ ꦨꦴꦮꦶꦠꦩꦒ꧀ꦒꦴ ꦱꦕ꧀ꦖꦶꦏꦠꦤꦶꦫꦺꦴꦣꦴ ꦄꦫꦲꦤ꧀ꦠꦺꦴ ꦑꦷꦟꦴꦱꦮꦴ, ꦪꦺ ꦕ ꦱꦺꦏ꧀ꦑꦴ ꦄꦥ꧀ꦥꦠ꧀ꦠꦩꦴꦤꦱꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦥꦠ꧀ꦡꦪꦩꦴꦤꦴ ꦮꦶꦲꦫꦤ꧀ꦠꦶ, ꦪꦺ ꦕ ꦥꦫꦶꦱꦸꦢ꧀ꦣꦥꦪꦺꦴꦒꦴ ꦏꦭ꧀ꦪꦴꦟꦗ꧀ꦙꦴꦱꦪꦴ ꦱꦢ꧀ꦣꦴꦱꦷꦭꦱꦸꦠꦴꦢꦶꦒꦸꦟꦱꦩ꧀ꦥꦤ꧀ꦤꦴ ꦥꦸꦒ꧀ꦒꦭꦴ, ꦠꦺꦲꦶ ꦤ ꦫꦲꦶꦠꦧ꧀ꦧꦺꦴ ꦤ ꦥꦫꦶꦕ꧀ꦕꦗꦶꦠꦧ꧀ꦧꦺꦴ, ꦠꦺ ꦕ ꦨꦒꦮꦠꦴꦠꦶ ꦄꦫꦲꦁ. ꦠꦡꦴ ꦲꦶ ꦄꦫꦶꦪꦥꦸꦒ꧀ꦒꦭꦴ ꦱꦠ꧀ꦡꦴꦫꦴ ꦢꦶꦛ꧀ꦜꦣꦩ꧀ꦩꦱ꧀ꦱ ꦥꦕ꧀ꦕꦏ꧀ꦑꦏꦫꦟꦠꦺꦴ ꦱꦠ꧀ꦡꦸ ꦣꦩ꧀ꦩꦱꦫꦷꦫꦺꦤ ꦄꦮꦶꦫꦲꦶꦠꦴ ꦌꦮ ꦲꦺꦴꦤ꧀ꦠꦶ. ꦪꦡꦴꦲ ꦄꦴꦪꦱ꧀ꦩꦴ ꦥꦶꦔ꧀ꦒꦶꦪꦺꦴ –

‘‘ꦥꦱ꧀ꦱꦴꦩꦶ ꦤꦁ ꦩꦤꦱꦴ ꦕꦏ꧀ꦑꦸꦤꦴꦮ,

ꦫꦠ꧀ꦠꦶꦤ꧀ꦢꦶꦮꦁ ꦧ꧀ꦫꦴꦲ꧀ꦩꦟ ꦄꦥ꧀ꦥꦩꦠ꧀ꦠꦺꦴ;

ꦤꦩꦱ꧀ꦱꦩꦴꦤꦺꦴ ꦮꦶꦮꦱꦺꦩꦶ ꦫꦠ꧀ꦠꦶꦁ,

ꦠꦺꦤꦺꦮ ꦩꦚ꧀ꦚꦴꦩꦶ ꦄꦮꦶꦥ꧀ꦥꦮꦴꦱꦁ.

‘‘ꦱꦢ꧀ꦣꦴ ꦕ ꦥꦷꦠꦶ ꦕ ꦩꦤꦺꦴ ꦱꦠꦶ ꦕ,

ꦤꦴꦥꦺꦤ꧀ꦠꦶꦩꦺ ꦒꦺꦴꦠꦩꦱꦴꦱꦤꦩ꧀ꦲꦴ;

ꦪꦁ ꦪꦁ ꦢꦶꦱꦁ ꦮꦗꦠꦶ ꦨꦹꦫꦶꦥꦚ꧀ꦚꦺꦴ,

ꦱ ꦠꦺꦤ ꦠꦺꦤꦺꦮ ꦤꦠꦺꦴꦲꦩꦱ꧀ꦩꦷ’’ꦠꦶ. (ꦱꦸ. ꦤꦶ. ꧑꧑꧔꧘-꧑꧑꧔꧙);

ꦠꦺꦤꦺꦮ ꦕ ꦠꦺ ꦄꦚ꧀ꦚꦁ ꦱꦠ꧀ꦡꦴꦫꦁ ꦤ ꦈꦢ꧀ꦢꦶꦱꦤ꧀ꦠꦶ. ꦪꦡꦴꦲ –

‘‘ꦄꦛ꧀ꦜꦴꦤꦩꦺꦠꦁ, ꦨꦶꦏ꧀ꦑꦮꦺ, ꦄꦤꦮꦏꦴꦱꦺꦴ, ꦪꦁ ꦢꦶꦛ꧀ꦜꦶꦱꦩ꧀ꦥꦤ꧀ꦤꦺꦴ ꦥꦸꦒ꧀ꦒꦭꦺꦴ ꦄꦚ꧀ꦚꦁ ꦱꦠ꧀ꦡꦴꦫꦁ ꦈꦢ꧀ꦢꦶꦱꦺꦪ꧀ꦪꦴꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦷ’’ꦠꦶ (ꦩ. ꦤꦶ. ꧓.꧑꧒꧘; ꦄ. ꦤꦶ. ꧑.꧒꧗꧖).

ꦏꦭ꧀ꦪꦴꦟꦥꦸꦡꦸꦗ꧀ꦗꦤꦴꦥꦶ ꦪꦺꦨꦸꦪ꧀ꦪꦺꦤ ꦱꦠ꧀ꦡꦫꦶ ꦤꦶꦕ꧀ꦕꦭꦱꦢ꧀ꦣꦴ ꦌꦮ ꦲꦺꦴꦤ꧀ꦠꦶ. ꦆꦠꦶ ꦱꦸꦥ꧀ꦥꦛꦶꦥꦤ꧀ꦤꦺꦲꦶ ꦥꦸꦫꦶꦱꦮꦶꦱꦺꦱꦺꦲꦶ ꦄꦮꦶꦫꦲꦶꦠꦧ꧀ꦧꦠꦺꦴ, ꦠꦺꦱꦚ꧀ꦕ ꦄꦮꦶꦫꦲꦤꦠꦺꦴ ꦤ ꦱꦤ꧀ꦠꦶ ꦌꦠꦱ꧀ꦱ ꦫꦲꦴ ꦥꦫꦶꦕ꧀ꦕꦗꦤꦏꦴ, ꦤꦠ꧀ꦡꦶ ꦮꦴ ꦌꦠꦱ꧀ꦱ ꦫꦲꦺꦴ ꦱꦴꦣꦹꦲꦶ ꦥꦫꦶꦕ꧀ꦕꦗꦶꦠꦧ꧀ꦧꦠꦴꦠꦶ ꦄꦫꦲꦁ.

‘‘ꦪꦺ ꦱꦕ꧀ꦖꦶꦏꦠꦱꦢ꧀ꦣꦩ꧀ꦩꦴ, ꦄꦫꦶꦪꦴ ꦱꦸꦢ꧀ꦣꦒꦺꦴꦕꦫꦴ;

ꦤ ꦠꦺꦲꦶ ꦫꦲꦶꦠꦺꦴ ꦲꦺꦴꦠꦶ, ꦤꦴꦡꦺꦴ ꦠꦺꦤꦴꦫꦲꦁ ꦩꦠꦺꦴ’’ꦠꦶ.

ꦫꦲꦺꦴꦠꦶ ꦕ ꦒꦩꦤꦁ ꦮꦸꦕ꧀ꦕꦠꦶ, ꦨꦒꦮꦠꦺꦴ ꦕ ꦤꦴꦤꦴꦒꦠꦷꦱꦸ ꦥꦫꦶꦧ꧀ꦨꦩꦤꦱꦔ꧀ꦑꦴꦠꦁ ꦱꦁꦱꦴꦫꦺ ꦒꦩꦤꦁ ꦤꦠ꧀ꦡꦶ ꦏꦩ꧀ꦩꦏ꧀ꦑꦪꦏꦫꦺꦤ ꦄꦫꦶꦪꦩꦒ꧀ꦒꦺꦤ ꦧꦺꦴꦣꦶꦩꦹꦭꦺꦪꦺꦮ ꦱꦧ꧀ꦧꦱꦺꦴ ꦱꦱꦩ꧀ꦨꦴꦫꦱ꧀ꦱ ꦏꦩ꧀ꦩꦮꦛ꧀ꦛꦱ꧀ꦱ ꦮꦶꦢ꧀ꦣꦁꦱꦶꦠꦠ꧀ꦠꦴ. ꦪꦡꦴꦲ –

‘‘ꦪꦺꦤ ꦢꦺꦮꦹꦥꦥꦠ꧀ꦪꦱ꧀ꦱ, ꦒꦤ꧀ꦣꦧ꧀ꦧꦺꦴ ꦮꦴ ꦮꦶꦲꦔ꧀ꦒꦩꦺꦴ;

ꦪꦏ꧀ꦑꦠ꧀ꦠꦁ ꦪꦺꦤ ꦒꦕ꧀ꦖꦺꦪ꧀ꦪꦁ, ꦩꦤꦸꦱ꧀ꦱꦠ꧀ꦠꦚ꧀ꦕ ꦄꦧ꧀ꦧꦗꦺ;

ꦠꦺ ꦩꦪ꧀ꦲꦁ ꦄꦴꦱꦮꦴ ꦑꦷꦟꦴ, ꦮꦶꦢ꧀ꦣꦱ꧀ꦠꦴ ꦮꦶꦤꦭ꦳ꦷꦏꦠꦴ’’ꦠꦶ. (ꦄ. ꦤꦶ. ꧔.꧓꧖);

ꦌꦮꦁ ꦤꦠ꧀ꦡꦶ ꦌꦠꦱ꧀ꦱ ꦫꦲꦺꦴꦒꦩꦤꦁ ꦒꦠꦷꦱꦸ ꦥꦕ꧀ꦕꦴꦗꦴꦠꦷꦠꦶꦥꦶ ꦄꦫꦲꦁ.

ꦫꦲꦺꦴ ꦮꦴ ꦒꦩꦤꦁ ꦪꦱ꧀ꦱ, ꦱꦁꦱꦴꦫꦺ ꦤꦠ꧀ꦡꦶ ꦱꦧ꧀ꦧꦱꦺꦴ;

ꦥꦲꦷꦤꦗꦴꦠꦶꦩꦫꦟꦺꦴ, ꦄꦫꦲꦁ ꦱꦸꦒꦠꦺꦴ ꦩꦠꦺꦴ.

ꦥꦴꦱꦁꦱꦠ꧀ꦠꦴ ꦮꦴ ꦨꦒꦮꦴ ꦄꦫꦲꦁ. ꦄꦏ꧀ꦑꦫꦕꦶꦤ꧀ꦠꦏꦴ ꦲꦶ ꦥꦱꦁꦱꦴꦪꦁ ꦄꦫꦲ-ꦱꦢ꧀ꦢꦁ ꦮꦟ꧀ꦟꦺꦤ꧀ꦠꦶ. ꦥꦴꦱꦁꦱꦨꦴꦮꦺꦴ ꦕ ꦨꦒꦮꦠꦺꦴ ꦄꦤꦚ꧀ꦚꦱꦴꦣꦴꦫꦟꦺꦴ ꦪꦡꦴꦨꦸꦕ꧀ꦕꦒꦸꦟꦴꦣꦶꦒꦠꦺꦴ ꦱꦢꦺꦮꦏꦺ ꦭꦺꦴꦏꦺ ꦱꦸꦥ꧀ꦥꦠꦶꦛ꧀ꦜꦶꦠꦺꦴ. ꦠꦡꦴ ꦲꦺꦱ ꦄꦤꦸꦠ꧀ꦠꦫꦺꦤ ꦱꦷꦭꦺꦤ ꦄꦤꦸꦠ꧀ꦠꦫꦺꦤ ꦱꦩꦴꦣꦶꦤꦴ ꦄꦤꦸꦠ꧀ꦠꦫꦴꦪ ꦥꦚ꧀ꦚꦴꦪ ꦄꦤꦸꦠ꧀ꦠꦫꦴꦪ ꦮꦶꦩꦸꦠ꧀ꦠꦶꦪꦴ ꦄꦱꦩꦺꦴ ꦄꦱꦩꦱꦩꦺꦴ ꦄꦥ꧀ꦥꦛꦶꦩꦺꦴ ꦄꦥ꧀ꦥꦛꦶꦨꦴꦒꦺꦴ ꦄꦥ꧀ꦥꦛꦶꦥꦸꦒ꧀ꦒꦭꦺꦴꦠꦶ ꦌꦮꦁ ꦠꦱ꧀ꦩꦶꦁ ꦠꦱ꧀ꦩꦶꦁ ꦒꦸꦟꦺ ꦮꦶꦨꦗꦶꦠ꧀ꦮꦴ ꦮꦸꦕ꧀ꦕꦩꦴꦤꦺ ꦥꦟ꧀ꦝꦶꦠꦥꦸꦫꦶꦱꦺꦲꦶ ꦢꦺꦮꦺꦲꦶ ꦧ꧀ꦫꦲ꧀ꦩꦺꦲꦶ ꦨꦒꦮꦠꦴ ꦮꦴ ꦥꦤ ꦥꦫꦶꦪꦺꦴꦱꦴꦥꦺꦠꦸꦁ ꦄꦱꦏ꧀ꦏꦸꦟꦺꦪ꧀ꦪꦫꦹꦥꦺꦴ. ꦆꦠꦶ ꦥꦴꦱꦁꦱꦠ꧀ꦠꦴꦥꦶ ꦨꦒꦮꦴ ꦄꦫꦲꦁ.

ꦒꦸꦟꦺꦲꦶ ꦱꦢꦶꦱꦺꦴ ꦤꦠ꧀ꦡꦶ, ꦪꦱ꧀ꦩꦴ ꦭꦺꦴꦏꦺ ꦱꦢꦺꦮꦏꦺ;

ꦠꦱ꧀ꦩꦴ ꦥꦴꦱꦁꦱꦶꦪꦠ꧀ꦠꦴꦥꦶ, ꦄꦫꦲꦁ ꦢ꧀ꦮꦶꦥꦢꦸꦠ꧀ꦠꦩꦺꦴ.

ꦌꦮꦁ ꦱꦧ꧀ꦧꦡꦴꦥꦶ –

‘‘ꦄꦴꦫꦏꦴ ꦩꦤ꧀ꦢꦧꦸꦢ꧀ꦣꦷꦤꦁ, ꦄꦴꦫꦏꦴ ꦕ ꦮꦶꦗꦴꦤꦠꦁ;

ꦫꦲꦴꦤꦁ ꦱꦸꦥ꧀ꦥꦲꦷꦤꦠ꧀ꦠꦴ, ꦮꦶꦢꦹꦤꦩꦫꦲꦺꦪ꧀ꦪꦠꦺꦴ;

ꦨꦮꦺꦱꦸ ꦕ ꦫꦲꦴꦨꦴꦮꦴ, ꦥꦴꦱꦁꦱꦴ ꦄꦫꦲꦁ ꦗꦶꦤꦺꦴ’’ꦠꦶ.

꧑꧓꧑. ꦱꦩ꧀ꦩꦴꦠꦶ ꦄꦮꦶꦥꦫꦷꦠꦁ. ꦱꦴꦩꦤ꧀ꦠꦶ ꦱꦪꦩꦺꦮ. ꦱꦩ꧀ꦧꦸꦢ꧀ꦣꦺꦴꦠꦶ ꦲꦶ ꦌꦠ꧀ꦡ ꦱꦁ-ꦱꦢ꧀ꦢꦺꦴ ‘‘ꦱꦪ’’ꦤ꧀ꦠꦶ ꦌꦠꦱ꧀ꦱ ꦄꦠ꧀ꦡꦱ꧀ꦱ ꦧꦺꦴꦣꦏꦺꦴ ꦢꦛ꧀ꦜꦧ꧀ꦧꦺꦴ. ꦱꦧ꧀ꦧꦣꦩ꧀ꦩꦴꦤꦤ꧀ꦠꦶ ꦄꦤꦮꦱꦺꦱꦴꦤꦁ ꦚꦺꦪ꧀ꦪꦣꦩ꧀ꦩꦴꦤꦁ. ꦏꦡꦁ ꦥꦤꦺꦠ꧀ꦡ ꦱꦧ꧀ꦧꦣꦩ꧀ꦩꦴꦮꦧꦺꦴꦣꦺꦴ ꦭꦧ꧀ꦨꦠꦷꦠꦶ? ꦌꦏꦢꦺꦱꦱ꧀ꦱ ꦄꦒ꧀ꦒꦲꦟꦠꦺꦴ. ꦥꦢꦺꦱꦒ꧀ꦒꦲꦟꦺ ꦲꦶ ꦄꦱꦠꦶ ꦒꦲꦺꦠꦧ꧀ꦧꦱ꧀ꦱ ꦤꦶꦥ꧀ꦥꦢꦺꦱꦠꦴꦮ ꦮꦶꦚ꧀ꦚꦴꦪꦠꦶ ꦪꦡꦴ ‘‘ꦢꦶꦏ꧀ꦑꦶꦠꦺꦴ ꦤ ꦢꦢꦴꦠꦷ’’ꦠꦶ. ꦌꦮꦚ꧀ꦕ ꦏꦠ꧀ꦮꦴ ꦄꦠ꧀ꦡꦮꦶꦱꦺꦱꦴꦤꦥꦺꦏ꧀ꦑꦴ ꦏꦠ꧀ꦠꦫꦶ ꦌꦮ ꦧꦸꦢ꧀ꦣꦱꦢ꧀ꦢꦱꦶꦢ꧀ꦣꦶ ꦮꦺꦢꦶꦠꦧ꧀ꦧꦴ ꦏꦩ꧀ꦩꦮꦕꦤꦶꦕ꧀ꦖꦴꦪ ꦄꦨꦴꦮꦠꦺꦴ. ‘‘ꦱꦩ꧀ꦩꦴ ꦱꦴꦩꦁ ꦧꦸꦢ꧀ꦣꦠ꧀ꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ’’ꦠꦶ ꦌꦠ꧀ꦠꦏꦩꦺꦮ ꦲꦶ ꦆꦣ ꦱꦢ꧀ꦢꦠꦺꦴ ꦭꦧ꧀ꦨꦠꦶ, ‘‘ꦱꦧ꧀ꦧꦣꦩ꧀ꦩꦴꦤ’’ꦤ꧀ꦠꦶ ꦥꦤ ꦄꦠ꧀ꦡꦠꦺꦴ ꦭꦧ꧀ꦨꦩꦴꦤꦁ ꦒꦲꦺꦠ꧀ꦮꦴ ꦮꦸꦠ꧀ꦠꦁ. ꦤ ꦲꦶ ꦧꦸꦗ꧀ꦙꦤꦏꦶꦫꦶꦪꦴ ꦄꦮꦶꦱꦪꦴ ꦪꦸꦗ꧀ꦗꦠꦶ.

ꦆꦢꦴꦤꦶ ꦠꦱ꧀ꦱꦴ ꦮꦶꦱꦪꦁ ‘‘ꦱꦧ꧀ꦧꦣꦩ꧀ꦩꦺ’’ꦠꦶ ꦱꦴꦩꦚ꧀ꦚꦠꦺꦴ ꦮꦸꦠ꧀ꦠꦁ ꦮꦶꦨꦗꦶꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦄꦨꦶꦚ꧀ꦚꦺꦪ꧀ꦪꦺ ꦣꦩ꧀ꦩꦺ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦨꦶꦚ꧀ꦚꦺꦪ꧀ꦪꦺꦠꦶ ꦄꦨꦶꦮꦶꦱꦶꦛ꧀ꦜꦺꦤ ꦚꦴꦟꦺꦤ ꦗꦴꦤꦶꦠꦧ꧀ꦧꦺ. ꦏꦺ ꦥꦤ ꦠꦺꦠꦶ? ꦕꦠꦸꦱꦕ꧀ꦕꦣꦩ꧀ꦩꦺ. ꦄꦨꦶꦚ꧀ꦚꦺꦪ꧀ꦪꦠꦺꦴ ꦧꦸꦢ꧀ꦣꦺꦴꦠꦶ ꦄꦨꦶꦚ꧀ꦚꦺꦪ꧀ꦪꦨꦴꦮꦠꦺꦴ ꦧꦸꦗ꧀ꦙꦶ. ꦥꦸꦧ꧀ꦧꦨꦴꦒꦺ ꦮꦶꦥꦱ꧀ꦱꦤꦴꦥꦚ꧀ꦚꦴꦪ, ꦄꦣꦶꦒꦩꦏ꧀ꦑꦟꦺ ꦩꦒ꧀ꦒꦥꦚ꧀ꦚꦴꦪ, ꦄꦥꦫꦨꦴꦒꦺ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦴꦢꦷꦲꦶ ꦄꦚ꧀ꦚꦴꦱꦷꦠꦶ ꦄꦠ꧀ꦡꦺꦴ. ꦆꦠꦺꦴ ꦥꦫꦺꦱꦸꦥꦶ ꦌꦱꦺꦮ ꦤꦪꦺꦴ. ꦥꦫꦶꦚ꧀ꦚꦺꦪ꧀ꦪꦺ ꦣꦩ꧀ꦩꦺꦠꦶ ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦩꦴꦲ. ꦥꦲꦴꦠꦧ꧀ꦧꦺꦠꦶ ꦱꦩꦸꦢꦪꦥꦏ꧀ꦑꦶꦪꦺ. ꦱꦕ꧀ꦖꦶꦏꦴꦠꦧ꧀ꦧꦺꦠꦶ ꦤꦶꦧ꧀ꦧꦴꦤꦁ ꦱꦤ꧀ꦣꦴꦪꦴꦲ. ꦧꦲꦸꦮꦕꦤꦤꦶꦢ꧀ꦢꦺꦱꦺꦴ ꦥꦤ ꦱꦺꦴꦥꦴꦢꦶꦱꦺꦱꦴꦢꦶꦏꦁ ꦥꦫꦶꦪꦴꦪꦱꦶꦢ꧀ꦣꦁ ꦨꦺꦢꦁ ꦒꦲꦺꦠ꧀ꦮꦴ ꦏꦠꦺꦴ, ꦈꦢ꧀ꦢꦺꦱꦺꦴ ꦮꦴ ꦄꦪꦁ ꦕꦠꦸꦱꦕ꧀ꦕꦣꦩ꧀ꦩꦴꦤꦤ꧀ꦠꦶ. ꦠꦡꦴ ꦲꦶ ꦮꦏ꧀ꦑꦠꦶ ‘‘ꦕꦏ꧀ꦑꦸꦁ ꦢꦸꦏ꧀ꦑꦱꦕ꧀ꦕ’’ꦤ꧀ꦠꦶꦄꦴꦢꦶ. ꦈꦢ꧀ꦢꦺꦱꦺꦴ ꦕ ꦄꦮꦶꦤꦶꦕ꧀ꦖꦶꦠꦠ꧀ꦡꦥꦫꦶꦕ꧀ꦖꦺꦢꦱ꧀ꦱ ꦣꦩ꧀ꦩꦱ꧀ꦱ ꦮꦱꦺꦤ ꦏꦫꦷꦪꦠꦶ. ꦈꦢ꧀ꦢꦺꦱꦺꦤ ꦲꦶ ꦈꦢ꧀ꦢꦶꦱꦶꦪꦩꦴꦤꦴꦤꦁ ꦣꦩ꧀ꦩꦴꦤꦁ ꦄꦠ꧀ꦡꦶꦠꦴꦩꦠ꧀ꦠꦁ ꦮꦸꦕ꧀ꦕꦠꦶ, ꦤ ꦥꦫꦶꦕ꧀ꦖꦺꦢꦺꦴꦠꦶ ꦄꦥꦫꦶꦕ꧀ꦖꦺꦢꦺꦤ ꦧꦲꦸꦮꦕꦤꦺꦤ ꦮꦸꦠ꧀ꦠꦁ ꦪꦡꦴ ‘‘ꦄꦥ꧀ꦥꦕ꧀ꦕꦪꦴ ꦣꦩ꧀ꦩꦴ, ꦄꦱꦔ꧀ꦑꦠꦴ ꦣꦩ꧀ꦩꦴ’’ꦠꦶ (ꦣ. ꦱ. ꦢꦸꦏꦩꦴꦠꦶꦏꦴ ꧗-꧘). ꦱꦕ꧀ꦖꦶꦏꦴꦠꦧ꧀ꦧꦺꦠꦶ ꦮꦴ ꦦꦭꦮꦶꦩꦸꦠ꧀ꦠꦷꦤꦩ꧀ꦥꦶ ꦒꦲꦟꦁ, ꦤ ꦤꦶꦧ꧀ꦧꦴꦤꦱ꧀ꦱꦺꦮꦴꦠꦶ ꦧꦲꦸꦮꦕꦤꦤꦶꦢ꧀ꦢꦺꦱꦺꦴ ꦏꦠꦺꦴ. ꦌꦮꦚ꧀ꦕ ꦨꦴꦮꦺꦠꦧ꧀ꦧꦺꦠꦶ ꦌꦠ꧀ꦡ ꦙꦴꦤꦴꦤꦩ꧀ꦥꦶ ꦒꦲꦟꦁ ꦢꦛ꧀ꦜꦧ꧀ꦧꦁ.

ꦒꦴꦡꦴꦪꦁ ꦨꦴꦮꦺꦠꦧ꧀ꦧꦚ꧀ꦕꦴꦠꦶ ꦌꦠ꧀ꦡ ꦕ-ꦱꦢ꧀ꦢꦺꦴ ꦄꦮꦸꦠ꧀ꦠꦱꦩꦸꦕ꧀ꦕꦪꦠ꧀ꦡꦺꦴ, ꦠꦺꦤ ꦱꦕ꧀ꦖꦶꦏꦴꦠꦧ꧀ꦧꦱ꧀ꦱ ꦒꦲꦟꦁ ꦮꦺꦢꦶꦠꦧ꧀ꦧꦁ. ꦠꦱ꧀ꦩꦴ ꦧꦸꦢ꧀ꦣꦺꦴꦱ꧀ꦩꦷꦠꦶ ꦪꦱ꧀ꦩꦴ ꦕꦠ꧀ꦠꦴꦫꦶ ꦱꦕ꧀ꦕꦴꦤꦶ ꦩꦪꦴ ꦧꦸꦢ꧀ꦣꦴꦤꦶ, ꦱꦕ꧀ꦕꦮꦶꦤꦶꦩꦸꦠ꧀ꦠꦚ꧀ꦕ ꦏꦶꦚ꧀ꦕꦶ ꦚꦺꦪ꧀ꦪꦁ ꦤꦠ꧀ꦡꦶ, ꦠꦱ꧀ꦩꦴ ꦱꦧ꧀ꦧꦩ꧀ꦥꦶ ꦚꦺꦪ꧀ꦪꦁ ꦧꦸꦢ꧀ꦣꦺꦴꦱ꧀ꦩꦶ, ꦄꦧ꧀ꦨꦚ꧀ꦚꦴꦱꦶꦤ꧀ꦠꦶ ꦄꦠ꧀ꦡꦺꦴ.

꧑꧓꧒. ꦌꦮꦁ ꦱꦕ꧀ꦕꦮꦱꦺꦤ ꦱꦴꦩꦚ꧀ꦚꦠꦺꦴ ꦮꦸꦠ꧀ꦠꦩꦠ꧀ꦡꦁ ꦢ꧀ꦮꦴꦫꦴꦫꦩ꧀ꦩꦟꦺꦲꦶ ꦱꦢ꧀ꦣꦶꦁ ꦢ꧀ꦮꦴꦫꦥ꧀ꦥꦮꦠ꧀ꦠꦣꦩ꧀ꦩꦺꦲꦶ, ꦑꦤ꧀ꦣꦴꦢꦷꦲꦶ ꦕ ꦱꦕ꧀ꦕꦮꦱꦺꦤꦺꦮ ꦮꦶꦨꦗꦶꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦄꦥꦶ ꦕꦴ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦠꦠ꧀ꦡ ꦩꦹꦭꦏꦴꦫꦟꦨꦴꦮꦺꦤꦴꦠꦶ ꦱꦤ꧀ꦠꦺꦱꦸꦥꦶ ꦄꦮꦶꦗ꧀ꦗꦴꦢꦷꦱꦸ ꦄꦚ꧀ꦚꦺꦱꦸ ꦏꦴꦫꦟꦺꦱꦸ ꦠꦺꦱꦩ꧀ꦥꦶ ꦩꦹꦭꦨꦹꦠꦏꦴꦫꦟꦨꦴꦮꦺꦤ. ꦠꦟ꧀ꦲꦴ ꦲꦶ ꦏꦩ꧀ꦩꦱ꧀ꦱ ꦮꦶꦕꦶꦠ꧀ꦠꦨꦴꦮꦲꦺꦠꦸꦠꦺꦴ, ꦱꦲꦴꦪꦨꦴꦮꦹꦥꦒꦩꦤꦠꦺꦴ ꦕ ꦢꦸꦏ꧀ꦑꦮꦶꦕꦶꦠ꧀ꦠꦠꦴꦪ ꦥꦣꦴꦤꦏꦴꦫꦟꦁ. ꦱꦩꦸꦛ꧀ꦜꦴꦥꦶꦏꦴꦠꦶ ꦈꦥ꧀ꦥꦴꦢꦶꦏꦴ. ꦥꦸꦫꦶꦩꦠꦟ꧀ꦲꦴꦠꦶ ꦥꦸꦫꦶꦩꦨꦮꦱꦶꦢ꧀ꦣꦴ ꦠꦟ꧀ꦲꦴ. ꦈꦨꦶꦤ꧀ꦤꦤ꧀ꦠꦶ ꦕꦏ꧀ꦑꦸꦱ꧀ꦱ, ꦠꦁꦱꦩꦸꦢꦪꦱ꧀ꦱ ꦕ. ꦄꦥ꧀ꦥꦮꦠ꧀ꦠꦷꦠꦶ ꦄꦥ꧀ꦥꦮꦠ꧀ꦠꦶꦤꦶꦩꦶꦠ꧀ꦠꦁ. ꦤꦶꦫꦺꦴꦣꦥꦗꦴꦤꦤꦴꦠꦶ ꦱꦕ꧀ꦖꦶꦏꦶꦫꦶꦪꦴꦨꦶꦱꦩꦪꦮꦱꦺꦤ ꦤꦶꦫꦺꦴꦣꦱ꧀ꦱ ꦥꦛꦶꦮꦶꦗ꧀ꦙꦤꦴ. ꦌꦏꦺꦏꦥꦢꦸꦢ꧀ꦣꦴꦫꦺꦤꦴꦠꦶ ‘‘ꦕꦏ꧀ꦑꦸꦁ ꦕꦏ꧀ꦑꦸꦱꦩꦸꦢꦪꦺꦴ’’ꦠꦶꦄꦴꦢꦶꦤꦴ ꦌꦏꦺꦏꦏꦺꦴꦛ꧀ꦜꦴꦱꦤꦶꦢ꧀ꦣꦴꦫꦟꦺꦤ. ꦠꦟ꧀ꦲꦴꦪꦥꦶ ꦥꦫꦶꦚ꧀ꦚꦺꦪ꧀ꦪꦨꦴꦮꦱꦧ꧀ꦨꦴꦮꦠꦺꦴ, ꦈꦥꦴꦢꦴꦤꦏ꧀ꦑꦤ꧀ꦣꦤ꧀ꦠꦺꦴꦒꦣꦠ꧀ꦠꦴ ꦕ ꦢꦸꦏ꧀ꦑꦱꦕ꧀ꦕꦱꦔ꧀ꦒꦲꦁ ꦢꦱ꧀ꦱꦺꦠꦸꦁ ‘‘ꦫꦹꦥꦠꦟ꧀ꦲꦴꦢꦪꦺꦴ ꦖ ꦠꦟ꧀ꦲꦴꦏꦴꦪꦴ’’ꦠꦶ ꦮꦸꦠ꧀ꦠꦁ.

ꦏꦱꦶꦟꦴꦤꦷꦠꦶ ꦏꦱꦶꦟꦗ꧀ꦙꦴꦤꦴꦤꦶ. ꦢ꧀ꦮꦠ꧀ꦠꦶꦁꦱꦴꦏꦴꦫꦴꦠꦶ ꦢ꧀ꦮꦠ꧀ꦠꦶꦁꦱ ꦏꦺꦴꦛ꧀ꦜꦴꦱꦴ, ꦠꦢꦴꦫꦩ꧀ꦩꦟꦗ꧀ꦙꦴꦤꦴꦤꦶ ꦕ. ꦤꦮ ꦨꦮꦴꦠꦶ ꦏꦴꦩꦨꦮꦴꦢꦪꦺꦴ ꦠꦪꦺꦴ, ꦱꦚ꧀ꦚꦷꦨꦮꦴꦢꦪꦺꦴ ꦠꦪꦺꦴ, ꦌꦏꦮꦺꦴꦏꦴꦫꦨꦮꦴꦢꦪꦺꦴ ꦠꦪꦺꦴꦠꦶ ꦤꦮ ꦨꦮꦴ. ꦕꦠ꧀ꦠꦴꦫꦶ ꦙꦴꦤꦴꦤꦷꦠꦶ ꦄꦒ꧀ꦒꦲꦶꦠꦴꦫꦩ꧀ꦩꦟꦮꦶꦱꦺꦱꦴꦤꦶ ꦕꦠ꧀ꦠꦴꦫꦶ ꦫꦹꦥꦴꦮꦕꦫꦗ꧀ꦙꦴꦤꦴꦤꦶ, ꦮꦶꦥꦴꦏꦗ꧀ꦙꦴꦤꦴꦤꦁ ꦮꦴ ꦌꦠꦁ ꦒꦲꦟꦁ. ꦌꦠ꧀ꦡ ꦕ ꦏꦸꦱꦭꦣꦩ꧀ꦩꦴꦤꦁ ꦈꦥꦤꦶꦱ꧀ꦱꦪꦨꦹꦠꦴ ꦠꦟ꧀ꦲꦴ ꦱꦩꦸꦛ꧀ꦜꦴꦥꦶꦏꦴ ꦥꦸꦫꦶꦩꦠꦟ꧀ꦲꦴꦠꦶ ꦮꦺꦢꦶꦠꦧ꧀ꦧꦴ. ꦏꦶꦫꦶꦪꦣꦩ꧀ꦩꦴꦤꦁ ꦥꦤ ꦪꦠ꧀ꦡ ꦠꦺ ꦠꦱ꧀ꦱ ꦄꦠ꧀ꦠꦨꦴꦮꦱ꧀ꦱ ꦏꦴꦫꦟꦨꦹꦠꦴ.

ꦄꦤꦸꦧꦸꦢ꧀ꦣꦺꦴꦠꦶ ꦧꦸꦗ꧀ꦙꦶꦠꦧ꧀ꦧꦣꦩ꧀ꦩꦱ꧀ꦱ ꦄꦤꦸꦫꦹꦥꦠꦺꦴ ꦧꦸꦢ꧀ꦣꦺꦴ. ꦠꦺꦤꦴꦠꦶ ꦠꦱ꧀ꦩꦴ. ꦪꦱ꧀ꦩꦴ ꦱꦴꦩꦚ꧀ꦚꦠꦺꦴ, ꦮꦶꦱꦺꦱꦠꦺꦴ ꦕ ꦌꦏꦺꦏꦥꦢꦸꦢ꧀ꦣꦴꦫꦺꦤ ꦱꦧ꧀ꦧꦣꦩ꧀ꦩꦺ ꦧꦸꦢ꧀ꦣꦺꦴ, ꦠꦱ꧀ꦩꦴ ꦮꦸꦠ꧀ꦠꦁ. ꦏꦶꦤ꧀ꦠꦶ ꦄꦴꦲ ‘‘ꦱꦩ꧀ꦩꦴ ꦱꦴꦩꦚ꧀ꦕ ꦱꦧ꧀ꦧꦣꦩ꧀ꦩꦴꦤꦁ ꦧꦸꦢ꧀ꦣꦠ꧀ꦠꦴ’’ꦠꦶ, ꦱꦧ꧀ꦧꦱ꧀ꦱꦥꦶ ꦚꦺꦪ꧀ꦪꦱ꧀ꦱ ꦱꦧ꧀ꦧꦴꦏꦴꦫꦠꦺꦴ ꦄꦮꦶꦥꦫꦷꦠꦁ ꦱꦪꦩꦺꦮ ꦄꦨꦶꦱꦩ꧀ꦧꦸꦢ꧀ꦣꦠ꧀ꦠꦴꦠꦶ ꦄꦠ꧀ꦡꦺꦴ. ꦆꦩꦶꦤꦴꦱ꧀ꦱ ꦥꦫꦺꦴꦥꦢꦺꦱꦫꦲꦶꦠꦱ꧀ꦱ ꦱꦧ꧀ꦧꦴꦏꦴꦫꦺꦤ ꦱꦧ꧀ꦧꦣꦩ꧀ꦩꦴꦮꦧꦺꦴꦣꦤꦱꦩꦠ꧀ꦡꦱ꧀ꦱ ꦄꦴꦏꦔ꧀ꦑꦥ꧀ꦥꦛꦶꦧꦢ꧀ꦣꦮꦸꦠ꧀ꦠꦶꦤꦺꦴ ꦄꦤꦴꦮꦫꦟꦚꦴꦟꦱꦔ꧀ꦑꦴꦠꦱ꧀ꦱ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦱ꧀ꦱ ꦄꦣꦶꦒꦩꦺꦴ ꦢꦱ꧀ꦱꦶꦠꦺꦴ.

ꦤꦤꦸ ꦕ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦠꦺꦴ ꦄꦚ꧀ꦚꦁ ꦄꦤꦴꦮꦫꦟꦚꦴꦟꦁ, ꦄꦚ꧀ꦚꦡꦴ ‘‘ꦖ ꦄꦱꦴꦣꦴꦫꦟꦚꦴꦟꦴꦤꦶ ꦧꦸꦢ꧀ꦣꦚꦴꦟꦴꦤꦷ’’ꦠꦶ (ꦥꦛꦶ. ꦩ. ꦩꦴꦠꦶꦏꦴ ꧑.꧗꧓) ꦮꦕꦤꦁ ꦮꦶꦫꦸꦗ꧀ꦙꦺꦪ꧀ꦪꦴꦠꦶ? ꦤ ꦮꦶꦫꦸꦗ꧀ꦙꦠꦶ, ꦮꦶꦱꦪꦥꦮꦠ꧀ꦠꦶꦨꦺꦢꦮꦱꦺꦤ ꦄꦚ꧀ꦚꦺꦲꦶ ꦄꦱꦴꦣꦴꦫꦟꦨꦴꦮꦢꦱ꧀ꦱꦤꦠ꧀ꦡꦁ ꦌꦏꦱ꧀ꦱꦺꦮ ꦚꦴꦟꦱ꧀ꦱ ꦢ꧀ꦮꦶꦣꦴ ꦮꦸꦠ꧀ꦠꦠ꧀ꦠꦴ. ꦌꦏꦩꦺꦮ ꦲꦶ ꦠꦁ ꦚꦴꦟꦁ ꦄꦤꦮꦱꦺꦱꦱꦔ꧀ꦑꦠꦴꦱꦔ꧀ꦑꦠꦱꦩ꧀ꦩꦸꦠꦶꦣꦩ꧀ꦩꦮꦶꦱꦪꦠꦴꦪ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ, ꦠꦠ꧀ꦡ ꦕ ꦄꦴꦮꦫꦟꦴꦨꦴꦮꦠꦺꦴ ꦤꦶꦱ꧀ꦱꦔ꧀ꦒꦕꦴꦫꦩꦸꦥꦴꦢꦴꦪ ‘‘ꦄꦤꦴꦮꦫꦟꦚꦴꦟ’’ꦤ꧀ꦠꦶ ꦮꦸꦠ꧀ꦠꦁ. ꦪꦡꦴꦲ ꦥꦛꦶꦱꦩ꧀ꦨꦶꦢꦴꦪꦁ ‘‘ꦱꦧ꧀ꦧꦁ ꦱꦔ꧀ꦑꦠꦩꦱꦔ꧀ꦑꦠꦁ ꦄꦤꦮꦱꦺꦱꦁ ꦗꦴꦤꦴꦠꦷꦠꦶ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ, ꦠꦠ꧀ꦡ ꦄꦴꦮꦫꦟꦁ ꦤꦠ꧀ꦡꦷꦠꦶ ꦄꦤꦴꦮꦫꦟꦚꦴꦟ’’ꦤ꧀ꦠꦶꦄꦴꦢꦶ (ꦥꦛꦶ. ꦩ. ꧑.꧑꧑꧙). ꦠꦱ꧀ꦩꦴ ꦤꦠ꧀ꦡꦶ ꦤꦺꦱꦁ ꦄꦠ꧀ꦡꦠꦺꦴ ꦨꦺꦢꦺꦴ, ꦌꦏꦤ꧀ꦠꦺꦤ ꦕꦺꦠꦁ ꦌꦮꦩꦶꦕ꧀ꦖꦶꦠꦧ꧀ꦧꦁ. ꦄꦚ꧀ꦚꦡꦴ ꦱꦧ꧀ꦧꦚ꧀ꦚꦸꦠꦴꦤꦴꦮꦫꦟꦚꦴꦟꦴꦤꦁ ꦱꦴꦣꦴꦫꦟꦠꦴ, ꦄꦱꦧ꧀ꦧꦣꦩ꧀ꦩꦴꦫꦩ꧀ꦩꦟꦠꦴ ꦕ ꦄꦴꦥꦗ꧀ꦗꦺꦪ꧀ꦪ. ꦤ ꦲꦶ ꦨꦒꦮꦠꦺꦴ ꦚꦴꦟꦱ꧀ꦱ ꦄꦟꦸꦩꦠ꧀ꦠꦩ꧀ꦥꦶ ꦄꦴꦮꦫꦟꦁ ꦄꦠ꧀ꦡꦶ, ꦄꦤꦴꦮꦫꦟꦚꦴꦟꦱ꧀ꦱ ꦕ ꦄꦱꦧ꧀ꦧꦣꦩ꧀ꦩꦴꦫꦩ꧀ꦩꦟꦨꦴꦮꦺ ꦪꦠ꧀ꦡ ꦠꦁ ꦤ ꦥꦮꦠ꧀ꦠꦠꦶ, ꦠꦠ꧀ꦡꦴꦮꦫꦟꦱꦧ꧀ꦨꦴꦮꦠꦺꦴ ꦄꦤꦴꦮꦫꦟꦨꦴꦮꦺꦴꦪꦺꦮ ꦤ ꦱꦶꦪꦴ. ꦄꦡ ꦮꦴ ꦥꦤ ꦲꦺꦴꦠꦸ ꦄꦚ꧀ꦚꦩꦺꦮ ꦄꦤꦴꦮꦫꦟꦚꦴꦟꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦠꦺꦴ, ꦆꦣ ꦥꦤ ꦱꦧ꧀ꦧꦠ꧀ꦡ ꦄꦥ꧀ꦥꦛꦶꦲꦠꦮꦸꦠ꧀ꦠꦶꦠꦴꦪ ꦄꦤꦴꦮꦫꦟꦚꦴꦟꦤ꧀ꦠꦶ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦩꦺꦮ ꦄꦣꦶꦥ꧀ꦥꦺꦠꦁ. ꦠꦱ꧀ꦱ ꦕꦴꦣꦶꦒꦩꦺꦤ ꦨꦒꦮꦴ ‘‘ꦱꦧ꧀ꦧꦚ꧀ꦚꦹ, ꦱꦧ꧀ꦧꦮꦶꦢꦹ, ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ’’ꦠꦶ ꦕ ꦮꦸꦕ꧀ꦕꦠꦶ ꦤ ꦱꦏꦶꦁꦪꦺꦮ ꦱꦧ꧀ꦧꦣꦩ꧀ꦩꦴꦮꦧꦺꦴꦣꦠꦺꦴ. ꦠꦡꦴ ꦕ ꦮꦸꦠ꧀ꦠꦁ ꦥꦛꦶꦱꦩ꧀ꦨꦶꦢꦴꦪꦁ (ꦥꦛꦶ. ꦩ. ꧑.꧑꧖꧒) ‘‘ꦮꦶꦩꦺꦴꦏ꧀ꦑꦤ꧀ꦠꦶꦏꦩꦺꦠꦁ ꦧꦸꦢ꧀ꦣꦴꦤꦁ ꦨꦒꦮꦤ꧀ꦠꦴꦤꦁ ꦧꦺꦴꦣꦶꦪꦴ ꦩꦹꦭꦺ ꦱꦲ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦱ꧀ꦱ ꦥꦛꦶꦭꦴꦨꦴ ꦱꦕ꧀ꦖꦶꦏꦴ ꦥꦚ꧀ꦚꦠ꧀ꦠꦶ ꦪꦢꦶꦢꦁ ‘‘ꦧꦸꦢ꧀ꦣꦺꦴ’’ꦠꦶ. ꦱꦧ꧀ꦧꦣꦩ꧀ꦩꦴꦮꦧꦺꦴꦣꦤꦱꦩꦠ꧀ꦡꦚꦴꦟꦱꦩꦣꦶꦒꦩꦺꦤ ꦲꦶ ꦨꦒꦮꦠꦺꦴ ꦱꦤ꧀ꦠꦴꦤꦺ ꦄꦤꦮꦱꦺꦱꦣꦩ꧀ꦩꦺ ꦥꦛꦶꦮꦶꦗ꧀ꦙꦶꦠꦸꦁ ꦱꦩꦠ꧀ꦡꦠꦴ ꦄꦲꦺꦴꦱꦷꦠꦶ.

ꦌꦠ꧀ꦡꦴꦲ – ꦏꦶꦁ ꦥꦤꦶꦢꦁ ꦚꦴꦟꦁ ꦥꦮꦠ꧀ꦠꦩꦴꦤꦁ ꦱꦏꦶꦁꦪꦺꦮ ꦱꦧ꧀ꦧꦱ꧀ꦩꦶꦁ ꦮꦶꦱꦪꦺ ꦥꦮꦠ꧀ꦠꦠꦶ, ꦈꦢꦴꦲꦸ ꦏꦩꦺꦤꦴꦠꦶ? ꦏꦶꦚ꧀ꦕꦺꦠ꧀ꦡ – ꦪꦢꦶ ꦠꦴꦮ ꦱꦏꦶꦁꦪꦺꦮ ꦱꦧ꧀ꦧꦱ꧀ꦩꦶꦁ ꦮꦶꦱꦪꦺ ꦥꦮꦠ꧀ꦠꦠꦶ, ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦢꦶꦨꦺꦢꦨꦶꦤ꧀ꦤꦴꦤꦁ ꦱꦔ꧀ꦑꦠꦣꦩ꧀ꦩꦴꦤꦁ, ꦄꦱꦔ꧀ꦑꦠꦱꦩ꧀ꦩꦸꦠꦶꦣꦩ꧀ꦩꦴꦤꦚ꧀ꦕ ꦌꦏꦗ꧀ꦙꦁ ꦈꦥꦛ꧀ꦜꦴꦤꦺ ꦢꦹꦫꦠꦺꦴ ꦕꦶꦠ꧀ꦠꦥꦛꦁ ꦥꦺꦏ꧀ꦑꦤ꧀ꦠꦱ꧀ꦱ ꦮꦶꦪ ꦥꦛꦶꦮꦶꦨꦴꦒꦺꦤꦴꦮꦧꦺꦴꦣꦺꦴ ꦤ ꦱꦶꦪꦴ, ꦠꦡꦴ ꦕ ꦱꦠꦶ ‘‘ꦱꦧ꧀ꦧꦺ ꦣꦩ꧀ꦩꦴ ꦄꦤꦠ꧀ꦠꦴ’’ꦠꦶ ꦮꦶꦥꦱ꧀ꦱꦤ꧀ꦠꦴꦤꦁ ꦄꦤꦠ꧀ꦠꦴꦏꦴꦫꦺꦤ ꦮꦶꦪ ꦱꦧ꧀ꦧꦣꦩ꧀ꦩꦴ ꦄꦤꦶꦫꦹꦥꦶꦠꦫꦹꦥꦺꦤ ꦨꦒꦮꦠꦺꦴ ꦚꦴꦟꦱ꧀ꦱ ꦮꦶꦱꦪꦴ ꦲꦺꦴꦤ꧀ꦠꦷꦠꦶ ꦄꦴꦥꦗ꧀ꦗꦠꦶ. ꦪꦺꦥꦶ ‘‘ꦱꦧ꧀ꦧꦚꦺꦪ꧀ꦪꦣꦩ꧀ꦩꦴꦤꦁ ꦜꦶꦠꦭꦏ꧀ꦑꦟꦮꦶꦱꦪꦁ ꦮꦶꦏꦥ꧀ꦥꦫꦲꦶꦠꦁ ꦱꦧ꧀ꦧꦏꦴꦭꦁ ꦧꦸꦢ꧀ꦣꦴꦤꦁ ꦚꦴꦟꦁ ꦥꦮꦠ꧀ꦠꦠꦶ, ꦠꦺꦤ ꦠꦺ ‘ꦱꦧ꧀ꦧꦮꦶꦢꦹ’ꦠꦶ ꦮꦸꦕ꧀ꦕꦤ꧀ꦠꦶ, ꦌꦮꦚ꧀ꦕ ꦏꦠ꧀ꦮꦴ ‘ꦕꦫꦁ ꦱꦩꦴꦲꦶꦠꦺꦴ ꦤꦴꦒꦺꦴ, ꦠꦶꦛ꧀ꦜꦤ꧀ꦠꦺꦴꦥꦶ ꦱꦩꦴꦲꦶꦠꦺꦴ’ꦠꦶ ꦆꦢꦩ꧀ꦥꦶ ꦮꦕꦤꦁ ꦱꦸꦮꦸꦠ꧀ꦠꦁ ꦲꦺꦴꦠꦷ’’ꦠꦶ ꦮꦢꦤ꧀ꦠꦶ, ꦠꦺꦱꦩ꧀ꦥꦶ ꦮꦸꦠ꧀ꦠꦢꦺꦴꦱꦴꦤꦴꦠꦶꦮꦠ꧀ꦠꦶ, ꦜꦶꦠꦭꦏ꧀ꦑꦟꦴꦫꦩ꧀ꦩꦟꦠꦴꦪ ꦕ ꦄꦠꦷꦠꦴꦤꦴꦒꦠꦱꦩ꧀ꦩꦸꦠꦶꦣꦩ꧀ꦩꦴꦤꦁ ꦠꦢꦨꦴꦮꦠꦺꦴ ꦌꦏꦢꦺꦱꦮꦶꦱꦪꦩꦺꦮ ꦨꦒꦮꦠꦺꦴ ꦚꦴꦟꦁ ꦱꦶꦪꦴ. ꦠꦱ꧀ꦩꦴ ꦱꦏꦶꦁꦪꦺꦮ ꦚꦴꦟꦁ ꦥꦮꦠ꧀ꦠꦠꦷꦠꦶ ꦤ ꦪꦸꦗ꧀ꦗꦠꦶ.

ꦄꦡ ꦏꦩꦺꦤ ꦱꦧ꧀ꦧꦱ꧀ꦩꦶꦁ ꦮꦶꦱꦪꦺ ꦚꦴꦟꦁ ꦥꦮꦠ꧀ꦠꦠꦶ? ꦌꦮꦩ꧀ꦥꦶ ꦤ ꦪꦸꦗ꧀ꦗꦠꦶ. ꦤ ꦲꦶ ꦗꦴꦠꦶꦨꦹꦩꦶꦱꦨꦴꦮꦴꦢꦶꦮꦱꦺꦤ, ꦢꦶꦱꦴꦢꦺꦱꦏꦴꦭꦴꦢꦶꦮꦱꦺꦤ ꦕ ꦄꦤꦺꦏꦨꦺꦢꦨꦶꦤ꧀ꦤꦺ ꦚꦺꦪ꧀ꦪꦺ ꦏꦩꦺꦤ ꦒꦪ꧀ꦲꦩꦴꦤꦺ ꦠꦱ꧀ꦱ ꦄꦤꦮꦱꦺꦱꦥꦛꦶꦮꦺꦣꦺꦴ ꦱꦩ꧀ꦨꦮꦠꦶ, ꦄꦥꦫꦶꦪꦤ꧀ꦠꦨꦴꦮꦠꦺꦴ ꦚꦺꦪ꧀ꦪꦱ꧀ꦱ. ꦪꦺ ꦥꦤ ‘‘ꦄꦠ꧀ꦡꦱ꧀ꦱ ꦄꦮꦶꦱꦁꦮꦴꦢꦤꦠꦺꦴ ꦚꦺꦪ꧀ꦪꦱ꧀ꦱ ꦌꦏꦢꦺꦱꦁ ꦥꦕ꧀ꦕꦏ꧀ꦑꦁ ꦏꦠ꧀ꦮꦴ ‘ꦱꦺꦱꦺꦥꦶ ꦌꦮ’ꦤ꧀ꦠꦶ ꦄꦣꦶꦩꦸꦕ꧀ꦕꦶꦠ꧀ꦮꦴ ꦮꦮꦠ꧀ꦡꦴꦥꦤꦺꦤ ꦱꦧ꧀ꦧꦚ꧀ꦚꦹ ꦨꦒꦮꦴ, ꦠꦚ꧀ꦕ ꦚꦴꦟꦁ ꦤ ꦄꦤꦸꦩꦴꦤꦶꦏꦁ ꦱꦁꦱꦪꦴꦨꦴꦮꦠꦺꦴ. ꦱꦁꦱꦪꦴꦤꦸꦧꦢ꧀ꦣꦁ ꦲꦶ ꦭꦺꦴꦏꦺ ꦄꦤꦸꦩꦴꦤꦚꦴꦟ’’ꦤ꧀ꦠꦶ ꦮꦢꦤ꧀ꦠꦶ, ꦠꦺꦱꦩ꧀ꦥꦶ ꦠꦁ ꦤ ꦪꦸꦠ꧀ꦠꦁ. ꦱꦧ꧀ꦧꦱ꧀ꦱ ꦲꦶ ꦄꦥ꧀ꦥꦕ꧀ꦕꦏ꧀ꦑꦨꦴꦮꦺ ꦄꦠ꧀ꦡꦴꦮꦶꦱꦁꦮꦴꦢꦤꦺꦤ ꦚꦺꦪ꧀ꦪꦱ꧀ꦱ ꦌꦏꦢꦺꦱꦁ ꦥꦕ꧀ꦕꦏ꧀ꦑꦁ ꦏꦠ꧀ꦮꦴ ‘‘ꦱꦺꦱꦺꦥꦶ ꦌꦮ’’ꦤ꧀ꦠꦶ ꦄꦣꦶꦩꦸꦕ꧀ꦕꦶꦠ꧀ꦮꦴ ꦮꦮꦠ꧀ꦡꦴꦥꦤꦱ꧀ꦱ ꦄꦱꦩ꧀ꦨꦮꦠꦺꦴ. ꦪꦚ꧀ꦲꦶ ꦠꦁ ꦱꦺꦱꦁ, ꦠꦁ ꦄꦥ꧀ꦥꦕ꧀ꦕꦏ꧀ꦑꦤ꧀ꦠꦶ.

ꦄꦡ ꦠꦩ꧀ꦥꦶ ꦥꦕ꧀ꦕꦏ꧀ꦑꦁ, ꦠꦱ꧀ꦱ ꦱꦺꦱꦨꦴꦮꦺꦴ ꦌꦮ ꦤ ꦱꦶꦪꦴꦠꦶ? ꦱꦧ꧀ꦧꦩꦺꦠꦁ ꦄꦏꦴꦫꦟꦁ. ꦏꦱ꧀ꦩꦴ? ꦄꦮꦶꦱꦪꦮꦶꦕꦴꦫꦟꦨꦴꦮꦠꦺꦴ. ꦮꦸꦠ꧀ꦠꦁ ꦲꦺꦠꦁ ꦨꦒꦮꦠꦴ ‘‘ꦧꦸꦢ꧀ꦣꦮꦶꦱꦪꦺꦴ, ꦨꦶꦏ꧀ꦑꦮꦺ, ꦄꦕꦶꦤ꧀ꦠꦺꦪ꧀ꦪꦺꦴ ꦤ ꦕꦶꦤ꧀ꦠꦺꦠꦧ꧀ꦧꦺꦴ. ꦪꦺꦴ ꦕꦶꦤ꧀ꦠꦺꦪ꧀ꦪ, ꦈꦩ꧀ꦩꦴꦢꦱ꧀ꦱ ꦮꦶꦓꦴꦠꦱ꧀ꦱ ꦨꦴꦒꦷ ꦄꦱ꧀ꦱꦴ’’ꦠꦶ (ꦄ. ꦤꦶ. ꧔.꧗꧗). ꦆꦢꦁ ꦥꦤꦺꦠ꧀ꦡ ꦱꦤ꧀ꦤꦶꦛ꧀ꦜꦴꦤꦁ – ꦪꦁꦏꦶꦚ꧀ꦕꦶ ꦨꦒꦮꦠꦴ ꦚꦴꦠꦸꦁ ꦆꦕ꧀ꦖꦶꦠꦁ ꦱꦏꦭꦁ, ꦌꦏꦢꦺꦱꦺꦴ ꦮꦴ, ꦠꦠ꧀ꦡ ꦄꦥ꧀ꦥꦛꦶꦲꦠꦮꦸꦠ꧀ꦠꦶꦠꦴꦪ ꦥꦕ꧀ꦕꦏ꧀ꦑꦠꦺꦴ ꦚꦴꦟꦁ ꦥꦮꦠ꧀ꦠꦠꦶ, ꦤꦶꦕ꧀ꦕꦱꦩꦴꦣꦴꦤꦚ꧀ꦕ ꦮꦶꦏ꧀ꦑꦺꦥꦴꦨꦴꦮꦠꦺꦴ. ꦚꦴꦠꦸꦁ ꦆꦕ꧀ꦖꦶꦠꦱ꧀ꦱ ꦕ ꦱꦏꦭꦱ꧀ꦱ ꦄꦮꦶꦱꦪꦨꦴꦮꦺ ꦠꦱ꧀ꦱ ꦄꦴꦏꦔ꧀ꦑꦥ꧀ꦥꦛꦶꦧꦢ꧀ꦣꦮꦸꦠ꧀ꦠꦶꦠꦴ ꦤ ꦱꦶꦪꦴ, ꦌꦏꦤ꧀ꦠꦺꦤꦺꦮ ꦱꦴ ꦆꦕ꧀ꦖꦶꦠꦧ꧀ꦧꦴ ‘‘ꦱꦧ꧀ꦧꦺ ꦣꦩ꧀ꦩꦴ ꦧꦸꦢ꧀ꦣꦱ꧀ꦱ ꦨꦒꦮꦠꦺꦴ ꦄꦴꦮꦗ꧀ꦗꦤꦥ꧀ꦥꦛꦶꦧꦢ꧀ꦣꦴ ꦄꦴꦏꦔ꧀ꦑꦥ꧀ꦥꦛꦶꦧꦢ꧀ꦣꦴ ꦩꦤꦱꦶꦏꦴꦫꦥ꧀ꦥꦛꦶꦧꦢ꧀ꦣꦴ ꦕꦶꦠ꧀ꦠꦸꦥ꧀ꦥꦴꦢꦥ꧀ꦥꦛꦶꦧꦢ꧀ꦣꦴ’’ꦠꦶ ꦮꦕꦤꦠꦺꦴ. ꦄꦠꦷꦠꦴꦤꦴꦒꦠꦮꦶꦱꦪꦩ꧀ꦥꦶ ꦨꦒꦮꦠꦺꦴ ꦚꦴꦟꦁ ꦄꦤꦸꦩꦴꦤꦴꦒꦩꦠꦏ꧀ꦏꦒ꧀ꦒꦲꦟꦮꦶꦫꦲꦶꦠꦠ꧀ꦠꦴ ꦥꦕ꧀ꦕꦏ꧀ꦑꦩꦺꦮ.

ꦤꦤꦸ ꦕ ꦌꦠꦱ꧀ꦩꦶꦁ ꦥꦏ꧀ꦑꦺ ꦪꦢꦴ ꦱꦏꦭꦁ ꦚꦴꦠꦸꦁ ꦆꦕ꧀ꦖꦶꦠꦁ, ꦠꦢꦴ ꦱꦏꦶꦁꦪꦺꦮ ꦱꦏꦭꦮꦶꦱꦪꦠꦴꦪ ꦄꦤꦶꦫꦹꦥꦶꦠꦫꦹꦥꦺꦤ ꦨꦒꦮꦠꦺꦴ ꦚꦴꦟꦁ ꦥꦮꦠ꧀ꦠꦺꦪ꧀ꦪꦴꦠꦶ ꦮꦸꦠ꧀ꦠꦢꦺꦴꦱꦴꦤꦴꦠꦶꦮꦠ꧀ꦠꦶꦪꦺꦮꦴꦠꦶ? ꦤ, ꦠꦱ꧀ꦱ ꦮꦶꦱꦺꦴꦣꦶꦠꦠ꧀ꦠꦴ. ꦮꦶꦱꦺꦴꦣꦶꦠꦺꦴ ꦲꦶ ꦱꦺꦴ ꦧꦸꦢ꧀ꦣꦮꦶꦱꦪꦺꦴ ꦄꦕꦶꦤ꧀ꦠꦺꦪ꧀ꦪꦺꦴꦠꦶ. ꦄꦚ꧀ꦚꦡꦴ ꦥꦕꦸꦫꦗꦤꦚꦴꦟꦱꦩꦴꦤꦮꦸꦠ꧀ꦠꦶꦠꦴꦪ ꦧꦸꦢ꧀ꦣꦴꦤꦁ ꦨꦒꦮꦤ꧀ꦠꦴꦤꦁ ꦚꦴꦟꦱ꧀ꦱ ꦄꦕꦶꦤ꧀ꦠꦺꦪ꧀ꦪꦠꦴ ꦤ ꦱꦶꦪꦴ. ꦠꦱ꧀ꦩꦴ ꦱꦏꦭꦣꦩ꧀ꦩꦴꦫꦩ꧀ꦩꦟꦩ꧀ꦥꦶ ꦠꦁ ꦌꦏꦣꦩ꧀ꦩꦴꦫꦩ꧀ꦩꦟꦁ ꦮꦶꦪ ꦱꦸꦮꦮꦠ꧀ꦡꦴꦥꦶꦠꦺꦪꦺꦮ ꦠꦺ ꦣꦩ꧀ꦩꦺ ꦏꦠ꧀ꦮꦴ ꦥꦮꦠ꧀ꦠꦠꦷꦠꦶ ꦆꦢꦩꦺꦠ꧀ꦡ ꦄꦕꦶꦤ꧀ꦠꦺꦪ꧀ꦪꦁ. ꦮꦸꦠ꧀ꦠꦚ꧀ꦲꦺꦠꦁ ‘‘ꦪꦴꦮꦠꦏꦁ ꦚꦺꦪ꧀ꦪꦁ, ꦠꦴꦮꦠꦏꦁ ꦚꦴꦟꦁ. ꦪꦴꦮꦠꦏꦁ ꦚꦴꦟꦁ, ꦠꦴꦮꦠꦏꦁ ꦚꦺꦪ꧀ꦪꦁ. ꦚꦺꦪ꧀ꦪꦥꦫꦶꦪꦤ꧀ꦠꦶꦏꦁ ꦚꦴꦟꦁ, ꦚꦴꦟꦥꦫꦶꦪꦤ꧀ꦠꦶꦏꦁ ꦚꦺꦪ꧀ꦪ’’ꦤ꧀ꦠꦶ (ꦩꦲꦴꦤꦶ. ꧖꧙; ꦕꦹꦭ꦳ꦤꦶ. ꦩꦺꦴꦓꦫꦴꦗꦩꦴꦟꦮꦥꦸꦕ꧀ꦖꦴꦤꦶꦢ꧀ꦢꦺꦱ ꧘꧕; ꦥꦛꦶ. ꦩ. ꧓.꧕). ꦌꦮꦩꦺꦏꦗ꧀ꦙꦁ, ꦮꦶꦱꦸꦁ, ꦱꦏꦶꦁ, ꦏꦩꦺꦤ ꦮꦴ ꦆꦕ꧀ꦖꦴꦤꦸꦫꦹꦥꦁ ꦱꦩ꧀ꦩꦴ ꦱꦴꦩꦚ꧀ꦕ ꦱꦧ꧀ꦧꦣꦩ꧀ꦩꦴꦤꦁ ꦧꦸꦢ꧀ꦣꦠ꧀ꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ.

꧑꧓꧓. ꦮꦶꦗ꧀ꦗꦴꦲꦷꦠꦶ ꦌꦠ꧀ꦡ ꦮꦶꦤ꧀ꦢꦶꦪꦁ ꦮꦶꦤ꧀ꦢꦠꦷꦠꦶ ꦮꦶꦗ꧀ꦗꦴ, ꦪꦴꦡꦴꦮꦠꦺꦴ ꦈꦥꦭꦧ꧀ꦨꦠꦷꦠꦶ ꦄꦠ꧀ꦡꦺꦴ. ꦄꦠ꧀ꦠꦤꦺꦴ ꦮꦴ ꦥꦛꦶꦥꦏ꧀ꦑꦱ꧀ꦱ ꦮꦶꦗ꧀ꦙꦤꦛ꧀ꦜꦺꦤ ꦮꦶꦗ꧀ꦗꦴ, ꦠꦩꦺꦴꦏ꧀ꦑꦤ꧀ꦣꦴꦢꦶꦏꦱ꧀ꦱ ꦥꦢꦴꦭꦤꦛ꧀ꦜꦺꦤꦴꦠꦶ ꦄꦠ꧀ꦡꦺꦴ. ꦠꦠꦺꦴ ꦌꦮ ꦄꦠ꧀ꦠꦤꦺꦴ ꦮꦶꦱꦪꦱ꧀ꦱ ꦮꦶꦢꦶꦠꦏꦫꦟꦛ꧀ꦜꦺꦤꦥꦶ ꦮꦶꦗ꧀ꦗꦴ. ꦱꦩ꧀ꦥꦤ꧀ꦤꦠ꧀ꦠꦴꦠꦶ ꦱꦩꦤ꧀ꦤꦴꦒꦠꦠ꧀ꦠꦴ, ꦥꦫꦶꦥꦸꦟ꧀ꦟꦠ꧀ꦠꦴ ꦮꦴ, ꦄꦮꦶꦏꦭꦠ꧀ꦠꦴꦠꦶ ꦄꦠ꧀ꦡꦺꦴ. ꦠꦶꦱ꧀ꦱꦤ꧀ꦤꦁ, ꦄꦛ꧀ꦜꦤ꧀ꦤꦁ ꦕ ꦮꦶꦗ꧀ꦗꦴꦤꦁ ꦠꦠ꧀ꦡ ꦠꦠ꧀ꦡ ꦱꦸꦠ꧀ꦠꦺ ꦒꦲꦟꦁ ꦮꦶꦤꦺꦪ꧀ꦪꦗ꧀ꦙꦴꦱꦪꦮꦱꦺꦤꦴꦠꦶ ꦢꦛ꧀ꦜꦧ꧀ꦧꦁ. ꦱꦠ꧀ꦠ ꦱꦢ꧀ꦣꦩ꧀ꦩꦴ ꦤꦴꦩ ꦱꦢ꧀ꦣꦴ ꦲꦶꦫꦷ ꦎꦠ꧀ꦠꦥ꧀ꦥꦁ ꦧꦴꦲꦸꦱꦕ꧀ꦕꦁ ꦮꦷꦫꦶꦪꦁ ꦱꦠꦶ ꦥꦚ꧀ꦚꦴ ꦕ. ꦪꦺ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦆꦣ ꦨꦶꦏ꧀ꦑꦸ ꦱꦢ꧀ꦣꦺꦴ ꦲꦺꦴꦠꦷ’’ꦠꦶꦄꦴꦢꦶ (ꦄ. ꦤꦶ. ꧑꧐.꧑꧑). ꦕꦠ꧀ꦠꦴꦫꦶ ꦙꦴꦤꦴꦤꦷꦠꦶ ꦪꦴꦤꦶ ꦏꦴꦤꦶꦕꦶ ꦕꦠ꧀ꦠꦴꦫꦶ ꦫꦹꦥꦴꦮꦕꦫꦗ꧀ꦙꦴꦤꦴꦤꦶ.

ꦏꦱ꧀ꦩꦴ ꦥꦤꦺꦠ꧀ꦡ ꦱꦷꦭꦴꦢꦪꦺꦴ ꦥꦤ꧀ꦤꦫꦱꦺꦮ ‘‘ꦕꦫꦟ’’ꦤ꧀ꦠꦶ ꦮꦸꦠ꧀ꦠꦴꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦆꦩꦺꦪꦺꦮ ꦲꦷ’’ꦠꦶꦄꦴꦢꦶ. ꦠꦺꦤ ꦠꦺꦱꦁ ꦱꦶꦏ꧀ꦑꦠ꧀ꦠꦪꦱꦔ꧀ꦒꦲꦠꦺꦴ ꦤꦶꦧ꧀ꦧꦴꦤꦸꦥꦒꦩꦤꦺ ꦌꦏꦁꦱꦠꦺꦴ ꦱꦴꦣꦤꦨꦴꦮꦩꦴꦲ. ꦆꦢꦴꦤꦶ ꦠꦢꦠ꧀ꦡꦱꦴꦣꦤꦴꦪ ꦄꦴꦒꦩꦁ ꦢꦱ꧀ꦱꦺꦤ꧀ꦠꦺꦴ ‘‘ꦪꦡꦴꦲꦴ’’ꦠꦶꦄꦴꦢꦶꦩꦴꦲ. ꦨꦒꦮꦴꦠꦶꦄꦴꦢꦶ ꦮꦸꦠ꧀ꦠꦱ꧀ꦱꦺꦮꦠ꧀ꦡꦱ꧀ꦱ ꦤꦶꦒꦩꦤꦮꦱꦺꦤ ꦮꦸꦠ꧀ꦠꦁ.

ꦤꦤꦸ ꦕꦴꦪꦁ ꦮꦶꦗ꧀ꦗꦴꦕꦫꦟꦱꦩ꧀ꦥꦢꦴ ꦱꦴꦮꦏꦺꦱꦸꦥꦶ ꦭꦧ꧀ꦨꦠꦷꦠꦶ? ꦏꦶꦚ꧀ꦕꦴꦥꦶ ꦭꦧ꧀ꦨꦠꦶ, ꦤ ꦥꦤ ꦠꦡꦴ, ꦪꦡꦴ ꦨꦒꦮꦠꦺꦴꦠꦶ ꦢꦱ꧀ꦱꦺꦠꦸꦁ ‘‘ꦠꦠ꧀ꦡ ꦮꦶꦗ꧀ꦗꦴꦱꦩ꧀ꦥꦢꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦕꦫꦟꦣꦩ꧀ꦩꦥꦫꦶꦪꦴꦥꦤ꧀ꦤꦠ꧀ꦠꦴ ꦏꦫꦸꦟꦴꦧ꧀ꦫꦲ꧀ꦩꦮꦶꦲꦴꦫꦱ꧀ꦱ, ꦱꦺꦴ ꦕꦺꦠ꧀ꦡ ꦩꦲꦒ꧀ꦒꦠꦨꦴꦮꦥ꧀ꦥꦠ꧀ꦠꦴ ꦱꦴꦣꦴꦫꦟꦨꦴꦮꦺꦴꦠꦶ ꦄꦴꦲ ‘‘ꦕꦫꦟꦱꦩ꧀ꦥꦢꦴ ꦩꦲꦴꦏꦴꦫꦸꦟꦶꦏꦠꦁ ꦥꦹꦫꦺꦠ꧀ꦮꦴ ꦜꦶꦠꦴ’’ꦠꦶ. ꦪꦡꦴ ꦱꦠ꧀ꦠꦴꦤꦁ ꦄꦤꦠ꧀ꦡꦁ ꦥꦫꦶꦮꦗ꧀ꦗꦺꦠ꧀ꦮꦴ ꦄꦠ꧀ꦡꦺ ꦤꦶꦪꦺꦴꦗꦤꦁ ꦥꦚ꧀ꦚꦴꦪ ꦮꦶꦤꦴ ꦤ ꦲꦺꦴꦠꦶ, ꦌꦮꦁ ꦤꦺꦱꦁ ꦄꦠ꧀ꦡꦴꦤꦠ꧀ꦡꦗꦴꦤꦤꦁ ꦱꦠ꧀ꦡꦸ ꦏꦫꦸꦟꦴꦪ ꦮꦶꦤꦴ ꦤ ꦲꦺꦴꦠꦷꦠꦶ ꦈꦨꦪꦩ꧀ꦥꦶ ꦈꦨꦪꦠ꧀ꦡ ꦱꦏꦶꦕ꧀ꦕꦏꦩꦺꦮ ꦱꦶꦪꦴ. ꦪꦠ꧀ꦡ ꦥꦤ ꦪꦱ꧀ꦱꦴ ꦥꦣꦴꦤꦨꦴꦮꦺꦴ, ꦠꦁ ꦢꦱ꧀ꦱꦺꦠꦸꦁ ‘‘ꦱꦺꦴ ꦱꦧ꧀ꦧꦚ꧀ꦚꦸꦠꦴꦪꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦪꦡꦴ ꦠꦁ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴꦠꦶ ꦪꦡꦴ ꦄꦚ꧀ꦚꦺꦴꦥꦶ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ, ꦠꦺꦤ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦱ꧀ꦱꦺꦮꦴꦪꦁ ꦄꦴꦮꦺꦟꦶꦏꦴ ꦥꦛꦶꦥꦠ꧀ꦠꦷꦠꦶ ꦢꦱ꧀ꦱꦺꦠꦶ. ꦱꦴ ꦥꦤꦴꦪꦁ ꦱꦠ꧀ꦡꦸ ꦮꦶꦗ꧀ꦗꦴꦕꦫꦟꦱꦩ꧀ꦥꦢꦴ ꦱꦴꦱꦤꦱ꧀ꦱ ꦤꦶꦪ꧀ꦪꦴꦤꦶꦏꦠꦴꦪ ꦱꦴꦮꦏꦴꦤꦁ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ ꦌꦏꦤ꧀ꦠꦏꦴꦫꦟꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦠꦺꦤꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦌꦠ꧀ꦡ ꦕ ꦮꦶꦗ꧀ꦗꦴꦱꦩ꧀ꦥꦢꦴꦪ ꦱꦠ꧀ꦡꦸ ꦥꦚ꧀ꦚꦴꦩꦲꦠ꧀ꦠꦁ ꦥꦏꦴꦱꦶꦠꦁ ꦲꦺꦴꦠꦶ, ꦕꦫꦟꦱꦩ꧀ꦥꦢꦴꦪ ꦏꦫꦸꦟꦴꦩꦲꦠ꧀ꦠꦁ. ꦠꦺꦱꦸ ꦥꦚ꧀ꦚꦴꦪ ꦨꦒꦮꦠꦺꦴ ꦣꦩ꧀ꦩꦫꦗ꧀ꦗꦥ꧀ꦥꦠ꧀ꦠꦶ, ꦏꦫꦸꦟꦴꦪ ꦣꦩ꧀ꦩꦱꦁꦮꦶꦨꦴꦒꦺꦴ. ꦥꦚ꧀ꦚꦴꦪ ꦱꦁꦱꦴꦫꦢꦸꦏ꧀ꦑꦤꦶꦧ꧀ꦧꦶꦢꦴ, ꦏꦫꦸꦟꦴꦪ ꦱꦁꦱꦴꦫꦢꦸꦏ꧀ꦑꦱꦲꦤꦁ. ꦥꦚ꧀ꦚꦴꦪ ꦥꦫꦢꦸꦏ꧀ꦑꦥꦫꦶꦗꦴꦤꦤꦁ, ꦏꦫꦸꦟꦴꦪ ꦥꦫꦢꦸꦏ꧀ꦑꦥꦠꦶꦏꦴꦫꦴꦫꦩ꧀ꦨꦺꦴ. ꦥꦚ꧀ꦚꦴꦪ ꦥꦫꦶꦤꦶꦧ꧀ꦧꦴꦤꦴꦨꦶꦩꦸꦑꦨꦴꦮꦺꦴ, ꦏꦫꦸꦟꦴꦪ ꦠꦢꦣꦶꦒꦩꦺꦴ. ꦥꦚ꧀ꦚꦴꦪ ꦱꦪꦁ ꦠꦫꦟꦁ, ꦏꦫꦸꦟꦴꦪ ꦥꦫꦺꦱꦁ ꦠꦴꦫꦟꦁ. ꦥꦚ꧀ꦚꦴꦪ ꦧꦸꦢ꧀ꦣꦨꦴꦮꦱꦶꦢ꧀ꦣꦶ, ꦏꦫꦸꦟꦴꦪ ꦧꦸꦢ꧀ꦣꦏꦶꦕ꧀ꦕꦱꦶꦢ꧀ꦣꦶ. ꦏꦫꦸꦟꦴꦪ ꦮꦴ ꦧꦺꦴꦣꦶꦱꦠ꧀ꦠꦨꦹꦩꦶꦪꦁ ꦱꦁꦱꦴꦫꦴꦨꦶꦩꦸꦑꦨꦴꦮꦺꦴ, ꦥꦚ꧀ꦚꦴꦪ ꦠꦠ꧀ꦡ ꦄꦤꦨꦶꦫꦠꦶ. ꦠꦡꦴ ꦏꦫꦸꦟꦴꦪ ꦥꦫꦺꦱꦁ ꦄꦨꦶꦁꦱꦴꦥꦤꦁ, ꦥꦚ꧀ꦚꦴꦪ ꦱꦪꦁ ꦥꦫꦺꦲꦶ ꦄꦨꦴꦪꦤꦁ. ꦏꦫꦸꦟꦴꦪ ꦥꦫꦁ ꦫꦏ꧀ꦑꦤ꧀ꦠꦺꦴ ꦄꦠ꧀ꦠꦴꦤꦁ ꦫꦏ꧀ꦑꦠꦶ, ꦥꦚ꧀ꦚꦴꦪ ꦄꦠ꧀ꦠꦴꦤꦁ ꦫꦏ꧀ꦑꦤ꧀ꦠꦺꦴ ꦥꦫꦁ ꦫꦏ꧀ꦑꦠꦶ. ꦠꦡꦴ ꦏꦫꦸꦟꦴꦪ ꦄꦥꦫꦤ꧀ꦠꦥꦺꦴ, ꦥꦚ꧀ꦚꦴꦪ ꦄꦤꦠ꧀ꦠꦤ꧀ꦠꦥꦺꦴ. ꦠꦺꦤ ꦄꦠ꧀ꦠꦲꦶꦠꦴꦪ ꦥꦛꦶꦥꦤ꧀ꦤꦴꦢꦷꦱꦸ ꦕꦠꦹꦱꦸ ꦥꦸꦒ꧀ꦒꦭꦺꦱꦸ ꦕꦠꦸꦠ꧀ꦡꦥꦸꦒ꧀ꦒꦭꦨꦴꦮꦺꦴ ꦱꦶꦢ꧀ꦣꦺꦴ ꦲꦺꦴꦠꦶ. ꦠꦡꦴ ꦏꦫꦸꦟꦴꦪ ꦭꦺꦴꦏꦤꦴꦡꦠꦴ, ꦥꦚ꧀ꦚꦴꦪ ꦄꦠ꧀ꦠꦤꦴꦡꦠꦴ. ꦏꦫꦸꦟꦴꦪ ꦕꦱ꧀ꦱ ꦤꦶꦤ꧀ꦤꦠꦴꦨꦴꦮꦺꦴ, ꦥꦚ꧀ꦚꦴꦪ ꦈꦤ꧀ꦤꦩꦴꦨꦴꦮꦺꦴ. ꦠꦡꦴ ꦏꦫꦸꦟꦴꦪ ꦱꦧ꧀ꦧꦱꦠ꧀ꦠꦺꦱꦸ ꦗꦤꦶꦠꦴꦤꦸꦒ꧀ꦒꦲꦺꦴ ꦥꦚ꧀ꦚꦴꦤꦸꦒꦠꦠ꧀ꦠꦴ ꦤ ꦕ ꦤ ꦱꦧ꧀ꦧꦠ꧀ꦡ ꦮꦶꦫꦠ꧀ꦠꦕꦶꦠ꧀ꦠꦺꦴ, ꦥꦚ꧀ꦚꦴꦪ ꦱꦧ꧀ꦧꦣꦩ꧀ꦩꦺꦱꦸ ꦮꦶꦫꦠ꧀ꦠꦕꦶꦠ꧀ꦠꦺꦴ ꦏꦫꦸꦟꦴꦤꦸꦒꦠꦠ꧀ꦠꦴ ꦤ ꦕ ꦤ ꦱꦧ꧀ꦧꦱꦠ꧀ꦠꦴꦤꦸꦒ꧀ꦒꦲꦴꦪ ꦥꦮꦠ꧀ꦠꦺꦴ. ꦪꦡꦴ ꦲꦶ ꦏꦫꦸꦟꦴ ꦨꦒꦮꦠꦺꦴ ꦱꦶꦤꦺꦲꦱꦺꦴꦏꦮꦶꦫꦲꦶꦠꦴ, ꦌꦮꦁ ꦥꦚ꧀ꦚꦴ ꦄꦲꦁꦏꦴꦫꦩꦩꦁꦏꦴꦫꦮꦶꦤꦶꦩꦸꦠ꧀ꦠꦴꦠꦶ ꦄꦚ꧀ꦚꦩꦚ꧀ꦚꦮꦶꦱꦺꦴꦣꦶꦠꦴ ꦥꦫꦩꦮꦶꦱꦸꦢ꧀ꦣꦴ ꦒꦸꦟꦮꦶꦱꦺꦱꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦢꦴꦲꦶ ꦥꦏꦴꦱꦶꦠꦴꦠꦶ ꦢꦛ꧀ꦜꦧ꧀ꦧꦁ.

꧑꧓꧔. ꦒꦩꦤꦩ꧀ꦥꦶ ꦲꦶ ꦒꦠꦤ꧀ꦠꦶ ꦮꦸꦕ꧀ꦕꦠꦶ ‘‘ꦒꦠꦺ ꦜꦶꦠꦺ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧒꧑꧔; ꧒.꧓꧗꧖). ꦱꦺꦴꦨꦤꦤ꧀ꦠꦶ ꦱꦸꦨꦁ. ꦱꦸꦨꦨꦴꦮꦺꦴ ꦮꦶꦱꦸꦢ꧀ꦣꦠꦴꦪ, ꦮꦶꦱꦸꦢ꧀ꦣꦠꦴ ꦢꦺꦴꦱꦮꦶꦒꦩꦺꦤꦴꦠꦶ ꦄꦴꦲ ‘‘ꦥꦫꦶꦱꦸꦢ꧀ꦣꦩꦤꦮꦗ꧀ꦗ’’ꦤ꧀ꦠꦶ. ꦒꦩꦤꦚ꧀ꦕ ꦤꦴꦩ ꦧꦲꦸꦮꦶꦣꦤ꧀ꦠꦶ ꦆꦣꦴꦣꦶꦥ꧀ꦥꦺꦠꦁ ꦒꦩꦤꦁ ꦢꦱ꧀ꦱꦺꦤ꧀ꦠꦺꦴ ‘‘ꦄꦫꦶꦪꦩꦒ꧀ꦒꦺꦴ’’ꦠꦶ ꦄꦴꦲ. ꦱꦺꦴ ꦲꦶ ꦤꦶꦧ꧀ꦧꦴꦤꦱ꧀ꦱ ꦒꦠꦶ ꦄꦣꦶꦒꦩꦺꦴꦠꦶ ꦏꦠ꧀ꦮꦴ ‘‘ꦒꦠꦁ, ꦒꦩꦤ’’ꦤ꧀ꦠꦶ ꦕ ꦮꦸꦕ꧀ꦕꦠꦶ. ꦆꦢꦴꦤꦶ ꦠꦱ꧀ꦱꦺꦮ ꦒꦲꦟꦺ ꦏꦴꦫꦟꦁ ꦢꦱ꧀ꦱꦺꦠꦸꦁ ‘‘ꦠꦺꦤ ꦲꦺꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦑꦺꦩꦁ ꦢꦶꦱꦤ꧀ꦠꦶ ꦤꦶꦧ꧀ꦧꦴꦤꦁ. ꦄꦱꦗ꧀ꦗꦩꦴꦤꦺꦴꦠꦶ ꦥꦫꦶꦥꦤ꧀ꦡꦴꦨꦴꦮꦺꦤ ꦱꦸꦒꦠꦶꦒꦩꦤꦺꦥꦶ ꦄꦱꦗ꧀ꦗꦤ꧀ꦠꦺꦴ ꦱꦔ꧀ꦒꦁ ꦄꦏꦫꦺꦴꦤ꧀ꦠꦺꦴ, ꦥꦒꦺꦮ ꦆꦠꦫꦠ꧀ꦡ. ꦄꦡ ꦮꦴ ꦌꦏꦴꦱꦤꦺ ꦤꦶꦱꦷꦢꦶꦠ꧀ꦮꦴ ꦑꦶꦥ꧀ꦥꦨꦶꦚ꧀ꦚꦴꦮꦱꦺꦤꦺꦮ ꦕꦠꦸꦤ꧀ꦤꦩ꧀ꦥꦶ ꦩꦒ꧀ꦒꦴꦤꦁ ꦥꦛꦶꦭꦢ꧀ꦣꦨꦴꦮꦠꦺꦴ ꦄꦱꦗ꧀ꦗꦩꦴꦤꦺꦴ ꦄꦱꦗ꧀ꦗꦤ꧀ꦠꦺꦴ ꦒꦠꦺꦴ. ꦪꦁ ꦒꦩꦤꦁ ꦒꦕ꧀ꦖꦤ꧀ꦠꦺꦴ ꦱꦧ꧀ꦧꦩꦤꦠ꧀ꦡꦁ ꦄꦥꦲꦫꦠꦶ, ꦱꦧ꧀ꦧꦚ꧀ꦕ ꦄꦤꦸꦠ꧀ꦠꦫꦁ ꦱꦩ꧀ꦥꦠ꧀ꦠꦶꦁ ꦄꦴꦮꦲꦠꦶ, ꦠꦢꦺꦮ ꦱꦺꦴꦨꦤꦁ ꦤꦴꦩ. ꦠꦺꦤ ꦕ ꦨꦒꦮꦴ ꦒꦠꦺꦴꦠꦶ ꦄꦴꦲ ‘‘ꦆꦠꦶ ꦱꦺꦴꦨꦤꦒꦩꦤꦠ꧀ꦠꦴ ꦱꦸꦒꦠꦺꦴ’’ꦠꦶ ꦱꦺꦴꦨꦤꦠ꧀ꦡꦺꦴ ꦱꦸ-ꦱꦢ꧀ꦢꦺꦴꦠꦶ ꦏꦠ꧀ꦮꦴ.

ꦄꦱꦸꦤ꧀ꦢꦫꦴꦤꦁ ꦢꦸꦏ꧀ꦑꦴꦤꦁ ꦱꦔ꧀ꦑꦴꦫꦥ꧀ꦥꦮꦠ꧀ꦠꦷꦤꦁ ꦄꦨꦴꦮꦠꦺꦴ ꦄꦕ꧀ꦕꦤ꧀ꦠꦱꦸꦑꦠ꧀ꦠꦴ ꦌꦏꦤ꧀ꦠꦠꦺꦴ ꦱꦸꦤ꧀ꦢꦫꦁ ꦤꦴꦩ ꦄꦱꦔ꧀ꦑꦠꦴ ꦣꦴꦠꦹꦠꦶ ꦄꦴꦲ ‘‘ꦱꦸꦤ꧀ꦢꦫꦚ꧀ꦕꦺꦱ ꦜꦴꦤꦁ ꦒꦠꦺꦴ ꦄꦩꦠꦁ ꦤꦶꦧ꧀ꦧꦴꦤ’’ꦤ꧀ꦠꦶ. ꦠꦺꦤꦴꦲ ꦨꦒꦮꦴ ‘‘ꦤꦶꦧ꧀ꦧꦴꦤꦁ ꦥꦫꦩꦁ ꦱꦸꦑ’’ꦤ꧀ꦠꦶ (ꦩ. ꦤꦶ. ꧒.꧒꧑꧕; ꦣ. ꦥ. ꧒꧐꧓-꧒꧐꧔). ꦱꦩ꧀ꦩꦴꦠꦶ ꦱꦸꦛ꧀ꦜꦸ. ꦱꦸꦛ꧀ꦜꦸ ꦒꦩꦤꦚ꧀ꦕ ꦤꦴꦩ ꦥꦛꦶꦥꦏ꧀ꦑꦺꦤ ꦄꦤꦨꦶꦨꦹꦠꦱ꧀ꦱ ꦒꦩꦤꦤ꧀ꦠꦶ ꦄꦴꦲ ‘‘ꦥꦲꦷꦤꦺ ꦏꦶꦭꦺꦱꦺ ꦥꦸꦤ ꦄꦥꦕ꧀ꦕꦴꦒꦕ꧀ꦖꦤ꧀ꦠꦺꦴ’’ꦠꦶ. ꦆꦢꦚ꧀ꦕ ꦱꦶꦑꦴꦥ꧀ꦥꦠ꧀ꦠꦁ ꦱꦩ꧀ꦩꦴꦒꦩꦤꦁ, ꦪꦴꦪ ꦄꦴꦒꦩꦤꦷꦪꦥꦛꦶꦥꦢꦴꦪ ꦱꦶꦢ꧀ꦣꦁ, ꦱꦴꦥꦶ ꦱꦩ꧀ꦩꦴꦒꦩꦤꦩꦺꦮꦴꦠꦶ ꦌꦮꦩ꧀ꦥꦶ ꦨꦒꦮꦴ ꦱꦸꦒꦠꦺꦴꦠꦶ ꦢꦱ꧀ꦱꦺꦠꦸꦁ ‘‘ꦱꦩ꧀ꦩꦴ ꦮꦴ ꦒꦠꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴꦠꦶ ꦱꦩ꧀ꦩꦴꦱꦩ꧀ꦧꦺꦴꦣꦶꦪꦴ ꦱꦩ꧀ꦥꦴꦥꦤꦺ ꦄꦮꦶꦥꦫꦷꦠꦥꦛꦶꦥꦠ꧀ꦠꦶꦪꦴ. ‘‘ꦱꦧ꧀ꦧꦭꦺꦴꦏꦱ꧀ꦱ ꦲꦶꦠꦱꦸꦑꦩꦺꦮ ꦏꦫꦺꦴꦤ꧀ꦠꦺꦴ’’ꦠꦶ ꦌꦠꦺꦤ ꦩꦲꦴꦧꦺꦴꦣꦶꦪꦴ ꦥꦛꦶꦥꦢꦴ ꦄꦮꦶꦨꦴꦒꦺꦤ ꦱꦧ꧀ꦧꦱꦠ꧀ꦠꦴꦤꦁ ꦱꦧ꧀ꦧꦢꦴ ꦲꦶꦠꦱꦸꦑꦴꦮꦲꦨꦴꦮꦺꦤꦺꦮ ꦥꦮꦠ꧀ꦠꦠꦷꦠꦶ ꦢꦱ꧀ꦱꦺꦠꦶ. ‘‘ꦱꦱ꧀ꦱꦠꦁ ꦈꦕ꧀ꦖꦺꦢꦤ꧀ꦠꦶ ꦆꦩꦺ ꦄꦤ꧀ꦠꦺ ꦄꦤꦸꦥꦒꦕ꧀ꦖꦤ꧀ꦠꦺꦴ ꦒꦠꦺꦴ’’ꦠꦶ ꦌꦠꦺꦤ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦒꦠꦶꦁ ꦢꦱ꧀ꦱꦺꦠꦶ. ‘‘ꦏꦴꦩꦱꦸꦑꦁ ꦄꦠ꧀ꦠꦏꦶꦭꦩꦡꦤ꧀ꦠꦶ ꦆꦩꦺ ꦄꦤꦸꦥꦒꦕ꧀ꦖꦤ꧀ꦠꦺꦴ ꦒꦠꦺꦴ’’ꦠꦶ ꦌꦠꦺꦤ ꦄꦫꦶꦪꦩꦒ꧀ꦒꦒꦠꦶꦁ ꦢꦱ꧀ꦱꦺꦠꦶ.

ꦠꦠ꧀ꦫꦴꦠꦶ ꦪꦸꦠ꧀ꦠꦛ꧀ꦜꦴꦤꦺ ꦪꦸꦠ꧀ꦠꦱ꧀ꦱꦺꦮ ꦨꦴꦱꦤꦺ ꦤꦶꦥ꧀ꦦꦴꦢꦺꦠꦧ꧀ꦧꦺ, ꦱꦴꦣꦺꦠꦧ꧀ꦧꦺ ꦕꦺꦠꦁ ꦨꦸꦩ꧀ꦩꦁ. ꦄꦨꦹꦠꦤ꧀ꦠꦶ ꦄꦨꦹꦠꦠ꧀ꦡꦁ. ꦄꦠ꧀ꦡꦩꦸꦑꦺꦤ ꦲꦶ ꦮꦴꦕꦴꦪ ꦄꦨꦹꦠꦠꦴ, ꦨꦹꦠꦠꦴ ꦮꦴ. ꦄꦠꦕ꧀ꦖꦤ꧀ꦠꦶ ꦠꦱ꧀ꦱꦺꦮ ꦮꦺꦮꦕꦤꦁ. ꦄꦨꦹꦠꦤ꧀ꦠꦶ ꦮꦴ ꦄꦱꦤ꧀ꦠꦁ ꦄꦮꦶꦗ꧀ꦗꦩꦴꦤꦁ. ꦄꦠꦕ꧀ꦖꦤ꧀ꦠꦶ ꦄꦠꦡꦴꦏꦴꦫꦁ ꦄꦚ꧀ꦚꦡꦴꦱꦤ꧀ꦠꦁ. ꦄꦤꦠ꧀ꦡꦱꦚ꧀ꦲꦶꦠꦤ꧀ꦠꦶ ꦢꦶꦛ꧀ꦜꦣꦩ꧀ꦩꦶꦏꦺꦤ, ꦱꦩ꧀ꦥꦫꦴꦪꦶꦏꦺꦤ ꦮꦴ ꦄꦤꦠ꧀ꦡꦺꦤ ꦱꦚ꧀ꦲꦶꦠꦁ, ꦄꦤꦠ꧀ꦡꦴꦮꦲꦁ. ꦤ ꦄꦠ꧀ꦡꦺꦴꦠꦶ ꦄꦤꦠ꧀ꦡꦺꦴ, ꦄꦠ꧀ꦡꦱ꧀ꦱ ꦥꦛꦶꦥꦏ꧀ꦑꦺꦴ, ꦄꦨꦴꦮꦺꦴ ꦕ, ꦠꦺꦤ ꦱꦚ꧀ꦲꦶꦠꦁ, ꦥꦶꦱꦸꦟꦮꦴꦕꦁ, ꦱꦩ꧀ꦦꦥ꧀ꦥꦭꦴꦥꦚ꧀ꦕꦴꦠꦶ ꦄꦠ꧀ꦡꦺꦴ. ꦌꦮꦩꦺꦠ꧀ꦡ ꦕꦠꦸꦧ꧀ꦧꦶꦣꦱ꧀ꦱꦴꦥꦶ ꦮꦕꦷꦢꦸꦕ꧀ꦕꦫꦶꦠꦱ꧀ꦱ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦌꦠ꧀ꦡ ꦕ ꦥꦜꦩꦴ ꦮꦴꦕꦴ ꦱꦷꦭꦮꦤ꧀ꦠꦁ ‘‘ꦢꦸꦱ꧀ꦱꦷꦭꦺꦴ’’ꦠꦶ, ꦄꦕꦟ꧀ꦝꦴꦭꦴꦢꦶꦩꦺꦮ ‘‘ꦕꦟ꧀ꦝꦴꦭꦺꦴ’’ꦠꦶꦄꦴꦢꦶꦤꦴ ꦨꦴꦱꦩꦴꦤꦱ꧀ꦱ ꦢꦛ꧀ꦜꦧ꧀ꦧꦴ. ꦢꦸꦠꦶꦪꦴ ꦢꦸꦱ꧀ꦱꦷꦭꦁ ‘‘ꦢꦸꦱ꧀ꦱꦷꦭꦺꦴ’’ꦠꦶ, ꦕꦟ꧀ꦝꦴꦭꦴꦢꦶꦩꦺꦮ ‘‘ꦕꦟ꧀ꦝꦴꦭꦺꦴ’’ꦠꦶꦄꦴꦢꦶꦤꦴ ꦄꦮꦶꦤꦪꦺꦤ ꦨꦴꦱꦩꦴꦤꦱ꧀ꦱ. ꦠꦠꦶꦪꦴ ꦤꦺꦫꦪꦶꦏꦴꦢꦶꦏꦱ꧀ꦱ ꦤꦺꦫꦪꦶꦏꦴꦢꦶꦨꦴꦮꦮꦶꦨꦴꦮꦤꦷꦏꦡꦴ ꦪꦡꦴ ‘‘ꦄꦴꦥꦴꦪꦶꦏꦺꦴ ꦢꦺꦮꦢꦠ꧀ꦠꦺꦴ ꦤꦺꦫꦪꦶꦏꦺꦴ’’ꦠꦶꦄꦴꦢꦶꦏꦴ (ꦕꦹꦭ꦳ꦮ. ꧓꧔꧘). ꦕꦠꦸꦠ꧀ꦡꦷ ‘‘ꦮꦺꦢꦮꦶꦲꦶꦠꦺꦤ ꦪꦚ꧀ꦚꦮꦶꦣꦶꦤꦴ ꦥꦴꦟꦴꦠꦶꦥꦴꦠꦴꦢꦶꦏꦠꦁ ꦱꦸꦒꦠꦶꦁ ꦄꦴꦮꦲꦠꦷ’’ꦠꦶ ꦭꦺꦴꦏꦱ꧀ꦱ ꦧ꧀ꦪꦴꦩꦺꦴꦲꦤꦏꦡꦴ. ꦥꦚ꧀ꦕꦩꦷ ꦨꦹꦠꦺꦤ ꦥꦺꦱꦸꦚ꧀ꦚꦹꦥꦱꦁꦲꦴꦫꦴꦢꦶꦏꦡꦴ. ꦖꦛ꧀ꦜꦴ ꦪꦸꦠ꧀ꦠꦥ꧀ꦥꦠ꧀ꦠꦛ꧀ꦜꦴꦤꦺ ꦥꦮꦠ꧀ꦠꦶꦠꦴ ꦢꦴꦤꦱꦷꦭꦴꦢꦶꦏꦡꦴ ꦮꦺꦢꦶꦠꦧ꧀ꦧꦴ. ꦌꦮꦁ ꦱꦩ꧀ꦩꦴ ꦒꦢꦠ꧀ꦠꦴꦠꦶ ꦪꦡꦴꦮꦸꦠ꧀ꦠꦁ ꦄꦨꦹꦠꦴꦢꦶꦁ ꦮꦗ꧀ꦗꦺꦠ꧀ꦮꦴ ꦨꦹꦠꦁ ꦠꦕ꧀ꦖꦁ ꦄꦠ꧀ꦡꦱꦚ꧀ꦲꦶꦠꦁ ꦥꦶꦪꦁ ꦩꦤꦴꦥꦁ ꦠꦠꦺꦴ ꦌꦮ ꦱꦩ꧀ꦩꦴ ꦱꦸꦛ꧀ꦜꦸ ꦒꦢꦤꦠꦺꦴ ꦱꦸꦒꦠꦺꦴ ꦢ-ꦏꦴꦫꦱ꧀ꦱ ꦠ-ꦏꦴꦫꦁ ꦏꦠ꧀ꦮꦴ. ꦄꦴꦥꦴꦡꦒꦩꦤꦩꦠ꧀ꦠꦺꦤ ꦏꦱ꧀ꦱꦕꦶ ꦄꦥ꧀ꦥꦶꦪꦩ꧀ꦥꦶ ꦲꦶ ꦨꦒꦮꦠꦺꦴ ꦮꦕꦤꦁ ꦥꦶꦪꦁ ꦩꦤꦴꦥꦩꦺꦮ ꦄꦠ꧀ꦡꦱꦶꦢ꧀ꦣꦶꦪꦴ ꦭꦺꦴꦏꦱ꧀ꦱ ꦲꦶꦠꦱꦸꦑꦴꦮꦲꦠ꧀ꦠꦴ.

ꦄꦥꦶꦕ ꦱꦺꦴꦨꦤꦁ ꦒꦠꦁ ꦒꦩꦤꦁ ꦌꦠꦱ꧀ꦱꦴꦠꦶ ꦱꦸꦒꦠꦺꦴ. ꦨꦒꦮꦠꦺꦴ ꦲꦶ ꦮꦺꦤꦺꦪ꧀ꦪꦗꦤꦸꦥꦱꦔ꧀ꦏꦩꦤꦁ ꦌꦏꦤ꧀ꦠꦺꦤ ꦠꦺꦱꦁ ꦲꦶꦠꦱꦸꦑꦤꦶꦥ꧀ꦦꦴꦢꦤꦠꦺꦴ ꦱꦺꦴꦨꦤꦁ ꦨꦢ꧀ꦢꦏꦁ. ꦠꦡꦴ ꦭꦏ꧀ꦑꦟꦴꦤꦸꦧ꧀ꦪꦚ꧀ꦗꦤꦥꦛꦶꦩꦟ꧀ꦝꦶꦠꦫꦹꦥꦏꦴꦪꦠꦴꦪ ꦢꦸꦠꦮꦶꦭꦩ꧀ꦧꦶꦠꦑꦭꦶꦠꦴꦤꦸꦏꦝ꧀ꦞꦤꦤꦶꦥ꧀ꦥꦷꦭ꦳ꦤꦸꦏ꧀ꦏꦸꦛꦶꦏꦏꦸꦛꦶꦭꦴꦏꦸꦭꦠꦴꦢꦶꦢꦺꦴꦱꦫꦲꦶꦠꦮꦶꦭꦴꦱꦶꦠꦫꦴꦗꦲꦁꦱꦮꦱꦨꦮꦴꦫꦟꦩꦶꦒꦫꦴꦗꦒꦩꦤꦁ ꦏꦴꦪꦒꦩꦤꦁ, ꦚꦴꦟꦒꦩꦤꦚ꧀ꦕ ꦮꦶꦥꦸꦭꦤꦶꦩ꧀ꦩꦭꦏꦫꦸꦟꦴꦱꦠꦶꦮꦷꦫꦶꦪꦴꦢꦶꦒꦸꦟꦮꦶꦱꦺꦱꦱꦲꦶꦠꦁ ꦄꦨꦶꦤꦷꦲꦴꦫꦠꦺꦴ ꦪꦴꦮ ꦩꦲꦴꦧꦺꦴꦣꦶ ꦄꦤꦮꦗ꧀ꦗꦠꦴꦪ, ꦱꦠ꧀ꦠꦴꦤꦁ ꦲꦶꦠꦱꦸꦑꦴꦮꦲꦠꦴꦪ ꦕ ꦱꦺꦴꦨꦤꦩꦺꦮ. ꦄꦡ ꦮꦴ ꦱꦪꦩ꧀ꦨꦹꦚꦴꦟꦺꦤ ꦱꦏꦭꦩ꧀ꦥꦶ ꦭꦺꦴꦏꦁ ꦥꦫꦶꦚ꧀ꦚꦴꦨꦶꦱꦩꦪꦮꦱꦺꦤ ꦥꦫꦶꦗꦴꦤꦤ꧀ꦠꦺꦴ ꦱꦩ꧀ꦩꦴ ꦒꦠꦺꦴ ꦄꦮꦒꦠꦺꦴꦠꦶ ꦱꦸꦒꦠꦺꦴ. ꦠꦡꦴ ꦭꦺꦴꦏꦱꦩꦸꦢꦪꦁ ꦥꦲꦴꦤꦴꦨꦶꦱꦩꦪꦮꦱꦺꦤ ꦥꦗꦲꦤ꧀ꦠꦺꦴ ꦄꦤꦸꦥ꧀ꦥꦠ꧀ꦠꦶꦣꦩ꧀ꦩꦠꦁ ꦄꦴꦥꦴꦢꦺꦤ꧀ꦠꦺꦴ ꦱꦩ꧀ꦩꦴ ꦒꦠꦺꦴ ꦄꦠꦷꦠꦺꦴꦠꦶ ꦱꦸꦒꦠꦺꦴ. ꦭꦺꦴꦏꦤꦶꦫꦺꦴꦣꦁ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦶꦫꦶꦪꦴꦨꦶꦱꦩꦪꦮꦱꦺꦤ ꦱꦩ꧀ꦩꦴ ꦒꦠꦺꦴ ꦄꦣꦶꦒꦠꦺꦴꦠꦶ ꦱꦸꦒꦠꦺꦴ. ꦭꦺꦴꦏꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦨꦴꦮꦤꦴꦨꦶꦱꦩꦪꦮꦱꦺꦤ ꦱꦩ꧀ꦩꦴ ꦒꦠꦺꦴ ꦥꦛꦶꦥꦤ꧀ꦤꦺꦴꦠꦶ ꦱꦸꦒꦠꦺꦴ. ꦠꦡꦴ ꦪꦁ ꦆꦩꦱ꧀ꦱ ꦱꦢꦺꦮꦏꦱ꧀ꦱ ꦭꦺꦴꦏꦱ꧀ꦱ ꦢꦶꦛ꧀ꦜꦁ ꦱꦸꦠꦁ ꦩꦸꦠꦁ ꦮꦶꦚ꧀ꦚꦴꦠꦁ ꦥꦠ꧀ꦠꦁ ꦥꦫꦶꦪꦺꦱꦶꦠꦁ ꦄꦤꦸꦮꦶꦕꦫꦶꦠꦁ ꦩꦤꦱꦴ, ꦱꦧ꧀ꦧꦁ ꦠꦁ ꦲꦠ꧀ꦡꦠꦭꦺ ꦄꦴꦩꦭꦏꦁ ꦮꦶꦪ ꦱꦩ꧀ꦩꦴ ꦥꦕ꧀ꦕꦏ꧀ꦑꦠꦺꦴ ꦒꦠꦺꦴ ꦄꦧ꧀ꦨꦚ꧀ꦚꦴꦱꦷꦠꦶ ꦱꦸꦒꦠꦺꦴ.

꧑꧓꧕. ꦱꦧ꧀ꦧꦡꦴꦠꦶ ꦱꦧ꧀ꦧꦥ꧀ꦥꦏꦴꦫꦺꦤ. ꦪꦺꦴ ꦪꦺꦴ ꦭꦺꦴꦏꦺꦴ ꦪꦡꦴ ꦪꦡꦴ ꦮꦺꦢꦶꦠꦧ꧀ꦧꦺꦴ, ꦠꦡꦴ ꦠꦡꦴ. ꦠꦺ ꦥꦤ ꦥꦏꦴꦫꦺ ꦢꦱ꧀ꦱꦺꦠꦸꦁ ‘‘ꦱꦨꦴꦮꦠꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦨꦴꦮꦠꦺꦴꦠꦶ ꦢꦸꦏ꧀ꦑꦱꦨꦴꦮꦠꦺꦴ. ꦱꦧ꧀ꦧꦺꦴ ꦲꦶ ꦭꦺꦴꦏꦺꦴ ꦢꦸꦏ꧀ꦑꦱꦨꦴꦮꦺꦴ. ꦪꦡꦴꦲ ‘‘ꦱꦁꦑꦶꦠ꧀ꦠꦺꦤ ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴ ꦢꦸꦏ꧀ꦑꦴ’’ꦠꦶ (ꦩꦲꦴꦮ. ꧑꧔; ꦢꦷ. ꦤꦶ. ꧒.꧓꧘꧗). ꦱꦩꦸꦢꦪꦠꦺꦴꦠꦶ ꦪꦠꦺꦴ ꦱꦺꦴ ꦱꦩꦸꦢꦺꦠꦶ, ꦠꦠꦺꦴ ꦠꦟ꧀ꦲꦴꦢꦶꦠꦺꦴ. ꦤꦶꦫꦺꦴꦣꦠꦺꦴꦠꦶ ꦪꦠ꧀ꦡ ꦱꦺꦴ ꦤꦶꦫꦸꦗ꧀ꦙꦠꦶ, ꦠꦠꦺꦴ ꦮꦶꦱꦔ꧀ꦑꦴꦫꦠꦺꦴ. ꦤꦶꦫꦺꦴꦣꦹꦥꦴꦪꦠꦺꦴꦠꦶ ꦪꦺꦤ ꦮꦶꦣꦶꦤꦴ ꦱꦺꦴ ꦤꦶꦫꦺꦴꦣꦺꦴ ꦥꦠ꧀ꦠꦧ꧀ꦧꦺꦴ, ꦠꦠꦺꦴ ꦄꦫꦶꦪꦩꦒ꧀ꦒꦠꦺꦴ, ꦆꦠꦺꦴ ꦄꦚ꧀ꦚꦱ꧀ꦱ ꦥꦏꦴꦫꦱ꧀ꦱ ꦄꦨꦴꦮꦴ.

ꦆꦠꦶ ‘‘ꦱꦧ꧀ꦧꦡꦴ ꦭꦺꦴꦏꦁ ꦄꦮꦺꦢꦷ’’ꦠꦶ ꦮꦠ꧀ꦮꦴ ꦠꦢꦠ꧀ꦡꦱꦴꦣꦏꦁ ꦱꦸꦠ꧀ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦪꦠ꧀ꦡ ꦑꦺꦴ ꦄꦴꦮꦸꦱꦺꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ‘‘ꦤ ꦗꦴꦪꦠꦷ’’ꦠꦶꦄꦴꦢꦶꦤꦴ ꦈꦗꦸꦏꦁ ꦗꦴꦠꦶꦄꦴꦢꦷꦤꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ‘‘ꦤ ꦕꦮꦠꦶ ꦤ ꦈꦥꦥꦗ꧀ꦗꦠꦷ’’ꦠꦶ ꦥꦢꦢ꧀ꦮꦪꦺꦤ ꦄꦥꦫꦴꦥꦫꦁ ꦕꦮꦤꦸꦥꦥꦗ꧀ꦗꦤꦴꦤꦶ ꦥꦛꦶꦏ꧀ꦑꦶꦥꦠꦶ. ꦏꦺꦕꦶ ꦥꦤ ‘‘ꦤ ꦗꦴꦪꦠꦷꦠꦶꦄꦴꦢꦶ ꦒꦧ꧀ꦨꦱꦺꦪ꧀ꦪꦏꦮꦱꦺꦤ ꦮꦸꦠ꧀ꦠꦁ, ꦆꦠꦫꦁ ꦎꦥꦥꦴꦠꦶꦏꦮꦱꦺꦤꦴ’’ꦠꦶ ꦮꦢꦤ꧀ꦠꦶ. ꦠꦤ꧀ꦠꦶ ꦗꦴꦠꦶꦄꦴꦢꦶꦫꦲꦶꦠꦁ. ꦒꦩꦤꦺꦤꦴꦠꦶ ꦥꦢꦱꦴ ꦒꦩꦤꦺꦤ. ꦚꦴꦠꦺꦪ꧀ꦪꦤ꧀ꦠꦶ ꦗꦴꦤꦶꦠꦧ꧀ꦧꦁ. ‘‘ꦚꦴꦠꦴꦪ’’ꦤ꧀ꦠꦶ ꦮꦴ ꦥꦴꦜꦺꦴ, ꦚꦴꦠꦴ ꦄꦪꦁ ꦤꦶꦧ꧀ꦧꦴꦤꦠ꧀ꦡꦶꦏꦺꦴꦠꦶ ꦄꦣꦶꦥ꧀ꦥꦴꦪꦺꦴ.

ꦏꦴꦩꦁ ꦥꦴꦢꦒꦩꦤꦺꦤ ꦒꦤ꧀ꦠ꧀ꦮꦴ ꦭꦺꦴꦏꦱ꧀ꦱꦤ꧀ꦠꦁ ꦚꦴꦠꦸꦁ, ꦢꦛ꧀ꦜꦸꦁ, ꦥꦠ꧀ꦠꦸꦁ ꦮꦴ ꦤ ꦱꦏ꧀ꦏꦴ, ꦄꦥꦶꦕ ꦥꦫꦶꦩꦶꦠꦥꦫꦶꦕ꧀ꦖꦶꦤ꧀ꦤꦛ꧀ꦜꦴꦤꦺ ꦠꦁ ꦥꦚ꧀ꦚꦴꦥꦺꦠ꧀ꦮꦴ ꦢꦱ꧀ꦱꦺꦩꦷꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦄꦥꦶꦕꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦱꦚ꧀ꦚꦶꦩ꧀ꦲꦷꦠꦶ ꦱꦚ꧀ꦚꦴꦱꦲꦶꦠꦺ. ꦠꦠꦺꦴ ꦌꦮ ꦱꦩꦤꦏꦺ ꦱꦮꦶꦚ꧀ꦚꦴꦟꦏꦺ. ꦄꦮꦶꦚ꧀ꦚꦴꦟꦏꦺ ꦥꦤ ꦈꦠꦸꦱꦩꦸꦛ꧀ꦜꦴꦤꦫꦹꦥꦱꦩꦸꦢꦴꦪꦩꦠ꧀ꦠꦺ ꦥꦚ꧀ꦚꦴꦥꦺꦠꦸꦁ ꦤ ꦱꦏ꧀ꦏꦴꦠꦶ ꦄꦣꦶꦥ꧀ꦥꦴꦪꦺꦴ. ꦭꦺꦴꦏꦤ꧀ꦠꦶ ꦑꦤ꧀ꦣꦴꦢꦶꦭꦺꦴꦏꦁ. ꦭꦺꦴꦏꦤꦶꦫꦺꦴꦣꦤ꧀ꦠꦶ ꦠꦱ꧀ꦱ ꦭꦺꦴꦏꦱ꧀ꦱ ꦤꦶꦫꦸꦗ꧀ꦙꦤꦁ, ꦤꦶꦧ꧀ꦧꦴꦤꦩꦺꦮ ꦮꦴ. ꦄꦢꦺꦱꦩ꧀ꦥꦶ ꦲꦶ ꦠꦁ ꦪꦺꦱꦁ ꦤꦶꦫꦺꦴꦣꦺꦴ, ꦠꦺꦱꦁ ꦮꦱꦺꦤ ꦈꦥꦕꦴꦫꦠꦺꦴ, ꦢꦺꦱꦠꦺꦴꦥꦶ ꦤꦶꦢ꧀ꦢꦶꦱꦷꦪꦠꦶ ꦪꦡꦴ ‘‘ꦕꦏ꧀ꦑꦸꦁ ꦭꦺꦴꦏꦺ ꦥꦶꦪꦫꦹꦥꦁ ꦱꦴꦠꦫꦹꦥꦁ, ꦌꦠ꧀ꦡꦺꦱꦴ ꦠꦟ꧀ꦲꦴ ꦥꦲꦷꦪꦩꦴꦤꦴ ꦥꦲꦷꦪꦠꦶ, ꦌꦠ꧀ꦡ ꦤꦶꦫꦸꦗ꧀ꦙꦩꦴꦤꦴ ꦤꦶꦫꦸꦗ꧀ꦙꦠꦷ’’ꦠꦶ (ꦢꦷ. ꦤꦶ. ꧒.꧔꧐꧑; ꦩ. ꦤꦶ. ꧑.꧑꧓꧔; ꦮꦶꦨ. ꧒꧐꧔).

ꦒꦩꦤꦺꦤꦴꦠꦶ ꦥꦴꦏꦠꦶꦏꦒꦩꦤꦺꦤ. ꦭꦺꦴꦏꦱ꧀ꦱꦤ꧀ꦠꦺꦴꦠꦶ ꦱꦔ꧀ꦑꦴꦫꦭꦺꦴꦏꦱ꧀ꦱ ꦄꦤ꧀ꦠꦺꦴ ꦄꦤ꧀ꦠꦏꦶꦫꦶꦪꦴꦲꦺꦠꦸꦨꦹꦠꦁ ꦤꦶꦧ꧀ꦧꦴꦤꦁ. ꦏꦸꦢꦴꦕꦤꦤ꧀ꦠꦶ ꦏꦢꦴꦕꦶꦥꦶ. ꦄꦥꦠ꧀ꦮꦴꦠꦶ ꦄꦒ꧀ꦒꦩꦒ꧀ꦒꦺꦤ ꦄꦤꦣꦶꦒꦤ꧀ꦠ꧀ꦮꦴ. ꦥꦩꦺꦴꦕꦤꦤ꧀ꦠꦶ ꦥꦩꦸꦠ꧀ꦠꦶ ꦤꦶꦱ꧀ꦱꦫꦟꦁ. ꦠꦱ꧀ꦩꦴꦠꦶ ꦪꦱ꧀ꦩꦴ ꦭꦺꦴꦏꦱ꧀ꦱꦤ꧀ꦠꦁ ꦄꦥꦠ꧀ꦮꦴ ꦮꦛ꧀ꦛꦢꦸꦏ꧀ꦑꦠꦺꦴ ꦩꦸꦠ꧀ꦠꦶ ꦤꦠ꧀ꦡꦶ, ꦠꦱ꧀ꦩꦴ. ꦲꦮꦺꦠꦶ ꦤꦶꦥꦴꦠꦩꦠ꧀ꦠꦁ. ꦭꦺꦴꦏꦮꦶꦢꦹꦠꦶ ꦱꦨꦴꦮꦴꦢꦶꦠꦺꦴ ꦱꦧ꧀ꦧꦁ ꦭꦺꦴꦏꦁ ꦗꦴꦤꦤ꧀ꦠꦺꦴ. ꦱꦸꦩꦺꦣꦺꦴꦠꦶ ꦱꦸꦤ꧀ꦢꦫꦥꦚ꧀ꦚꦺꦴ. ꦭꦺꦴꦏꦤ꧀ꦠꦒꦹꦠꦶ ꦥꦫꦶꦚ꧀ꦚꦴꦨꦶꦱꦩꦪꦺꦤ ꦭꦺꦴꦏꦁ ꦮꦶꦢꦶꦠ꧀ꦮꦴ ꦥꦲꦴꦤꦴꦨꦶꦱꦩꦪꦺꦤ ꦭꦺꦴꦏꦤ꧀ꦠꦒꦹ. ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦮꦴꦱꦱ꧀ꦱ ꦥꦫꦶꦤꦶꦛ꧀ꦜꦶꦠꦠ꧀ꦠꦴ ꦮꦸꦱꦶꦠꦧ꧀ꦫꦲ꧀ꦩꦕꦫꦶꦪꦺꦴ. ꦱꦧ꧀ꦧꦺꦱꦁ ꦏꦶꦭꦺꦱꦴꦤꦁ ꦱꦩꦶꦠꦠ꧀ꦠꦴ, ꦕꦠꦸꦱꦕ꧀ꦕꦣꦩ꧀ꦩꦴꦤꦁ ꦮꦴ ꦄꦨꦶꦱꦩꦶꦠꦠ꧀ꦠꦴ ꦱꦩꦶꦠꦴꦮꦷ. ꦤꦴꦱꦷꦱꦠꦶ ꦤ ꦥꦠ꧀ꦡꦺꦠꦶ. ꦪꦡꦴ ꦆꦩꦁ ꦭꦺꦴꦏꦁ, ꦌꦮꦁ ꦥꦫꦚ꧀ꦕ ꦭꦺꦴꦏꦁ ꦄꦥ꧀ꦥꦛꦶꦱꦤ꧀ꦣꦶꦏꦠ꧀ꦠꦴ.

꧑꧓꧖. ꦌꦮꦁ ꦪꦢꦶꦥꦶ ꦭꦺꦴꦏꦮꦶꦢꦸꦠꦴ ꦄꦤꦮꦱꦺꦱꦠꦺꦴ ꦢꦱ꧀ꦱꦶꦠꦴ ꦱꦨꦴꦮꦠꦺꦴ ꦢꦱ꧀ꦱꦶꦠꦠ꧀ꦠꦴ, ꦭꦺꦴꦏꦺꦴ ꦥꦤ ꦌꦏꦢꦺꦱꦺꦤꦺꦮ ꦮꦸꦠ꧀ꦠꦺꦴꦠꦶ ꦠꦁ ꦄꦤꦮꦱꦺꦱꦠꦺꦴ ꦢꦱ꧀ꦱꦺꦠꦸꦁ ‘‘ꦄꦥꦶꦕ ꦠꦪꦺꦴ ꦭꦺꦴꦏꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦆꦤ꧀ꦢ꧀ꦫꦶꦪꦧꦢ꧀ꦣꦴꦤꦁ ꦑꦤ꧀ꦣꦴꦤꦁ ꦱꦩꦹꦲꦺꦴ, ꦱꦤ꧀ꦠꦴꦤꦺꦴ ꦕ ꦱꦠ꧀ꦠꦭꦺꦴꦏꦺꦴ. ꦫꦹꦥꦴꦢꦷꦱꦸ ꦱꦠ꧀ꦠꦮꦶꦱꦠ꧀ꦠꦠꦴꦪ ꦱꦠ꧀ꦠꦺꦴ, ꦭꦺꦴꦏꦷꦪꦤ꧀ꦠꦶ ꦌꦠ꧀ꦡ ꦏꦸꦱꦭꦴꦏꦸꦱꦭꦁ, ꦠꦧ꧀ꦧꦶꦥꦴꦏꦺꦴ ꦕꦴꦠꦶ ꦭꦺꦴꦏꦺꦴꦠꦶ. ꦄꦤꦶꦤ꧀ꦢ꧀ꦫꦶꦪꦧꦢ꧀ꦣꦴꦤꦁ ꦫꦹꦥꦴꦢꦷꦤꦁ ꦱꦩꦹꦲꦺꦴ, ꦱꦤ꧀ꦠꦴꦤꦺꦴ ꦕ ꦎꦏꦴꦱꦭꦺꦴꦏꦺꦴ ꦭꦺꦴꦏꦶꦪꦤ꧀ꦠꦶ ꦌꦠ꧀ꦡ ꦠꦱꦴ, ꦡꦴꦮꦫꦴ ꦕ, ꦠꦺꦱꦚ꧀ꦕ ꦎꦏꦴꦱꦨꦹꦠꦺꦴꦠꦶ. ꦠꦢꦴꦣꦴꦫꦠꦴꦪ ꦲꦺꦱ ‘‘ꦨꦴꦗꦤꦭꦺꦴꦏꦺꦴ’’ꦠꦶꦥꦶ ꦮꦸꦕ꧀ꦕꦠꦶ. ꦈꦨꦪꦺꦥꦶ ꦑꦤ꧀ꦣꦴ ꦱꦔ꧀ꦑꦴꦫꦭꦺꦴꦏꦺꦴ ꦥꦕ꧀ꦕꦪꦺꦲꦶ ꦱꦔ꧀ꦑꦫꦷꦪꦤ꧀ꦠꦶ, ꦭꦸꦗ꧀ꦗꦤ꧀ꦠꦶ ꦥꦭꦸꦗ꧀ꦗꦤ꧀ꦠꦶ ꦕꦴꦠꦶ. ꦄꦴꦲꦴꦫꦛ꧀ꦜꦶꦠꦶꦏꦴꦠꦶ ꦥꦕ꧀ꦕꦪꦛ꧀ꦜꦶꦠꦶꦏꦴ, ꦥꦕ꧀ꦕꦪꦴꦪꦠ꧀ꦠꦮꦸꦠ꧀ꦠꦶꦏꦴꦠꦶ ꦄꦠ꧀ꦡꦺꦴ. ꦥꦕ꧀ꦕꦪꦠ꧀ꦡꦺꦴ ꦲꦺꦠ꧀ꦡ ꦄꦴꦲꦴꦫ-ꦱꦢ꧀ꦢꦺꦴ ‘‘ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦏꦴꦩꦕ꧀ꦖꦤ꧀ꦢꦱ꧀ꦱ ꦈꦥ꧀ꦥꦴꦢꦴꦪꦴ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧕.꧒꧓꧒) ꦮꦶꦪ. ꦌꦮꦁ ꦲꦶ ‘‘ꦱꦧ꧀ꦧꦺ ꦱꦠ꧀ꦠꦴ’’ꦠꦶ ꦆꦩꦶꦤꦴ ꦄꦱꦚ꧀ꦚꦱꦠ꧀ꦠꦴꦥꦶ ꦥꦫꦶꦒ꧀ꦒꦲꦶꦠꦴ ꦲꦺꦴꦤ꧀ꦠꦶ. ꦱꦴ ꦥꦤꦴꦪꦁ ꦄꦴꦲꦴꦫꦛ꧀ꦜꦶꦠꦶꦏꦠꦴ ꦤꦶꦥ꧀ꦥꦫꦶꦪꦴꦪꦠꦺꦴ ꦱꦔ꧀ꦑꦴꦫꦣꦩ꧀ꦩꦺꦴ, ꦤ ꦱꦠ꧀ꦠꦣꦩ꧀ꦩꦺꦴꦠꦶ ꦄꦴꦲ ‘‘ꦄꦴꦲꦴꦫꦛ꧀ꦜꦶꦠꦶꦏꦴꦠꦶ ꦄꦴꦒꦠꦛ꧀ꦜꦴꦤꦺ ꦱꦔ꧀ꦑꦴꦫꦭꦺꦴꦏꦺꦴ ꦮꦺꦢꦶꦠꦧ꧀ꦧꦺꦴ’’ꦠꦶ.

ꦪꦢꦶ ꦌꦮꦁ ‘‘ꦱꦧ꧀ꦧꦺ ꦱꦠ꧀ꦠꦴ’’ꦠꦶ ꦆꦢꦁ ꦏꦡꦤ꧀ꦠꦶ? ꦥꦸꦒ꧀ꦒꦭꦴꦣꦶꦛ꧀ꦜꦴꦤꦴ ꦢꦺꦱꦤꦴꦠꦶ ꦤꦴꦪꦁ ꦢꦺꦴꦱꦺꦴ. ꦪꦡꦴ ꦄꦚ꧀ꦚꦠ꧀ꦡꦴꦥꦶ ‘‘ꦌꦏꦣꦩ꧀ꦩꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦱ꧀ꦩꦶꦁ ꦌꦏꦣꦩ꧀ꦩꦺ? ꦱꦧ꧀ꦧꦺ ꦱꦠ꧀ꦠꦴ ꦄꦴꦲꦴꦫꦛ꧀ꦜꦶꦠꦶꦏꦴ’’ꦠꦶ (ꦄ. ꦤꦶ. ꧑꧐.꧒꧗). ꦢꦶꦛ꧀ꦜꦶꦒꦠꦶꦏꦴꦤꦁ ꦱꦱ꧀ꦱꦠꦴꦢꦶꦮꦱꦺꦤ ‘‘ꦄꦠ꧀ꦠꦴ, ꦭꦺꦴꦏꦺꦴ’’ꦠꦶ ꦕ ꦥꦫꦶꦏꦥ꧀ꦥꦤꦴ ꦪꦺꦨꦸꦪ꧀ꦪꦺꦤ ꦱꦠ꧀ꦠꦮꦶꦱꦪꦴ, ꦤ ꦱꦔ꧀ꦑꦴꦫꦮꦶꦱꦪꦴꦠꦶ ꦄꦴꦲ ‘‘ꦱꦱ꧀ꦱꦠꦺꦴ ꦭꦺꦴꦏꦺꦴꦠꦶ ꦮꦴ ꦄꦱꦱ꧀ꦱꦠꦺꦴ ꦭꦺꦴꦏꦺꦴꦠꦶ ꦮꦴ ꦄꦴꦒꦠꦛ꧀ꦜꦴꦤꦺ ꦱꦠ꧀ꦠꦭꦺꦴꦏꦺꦴ ꦮꦺꦢꦶꦠꦧ꧀ꦧꦺꦴ’’ꦠꦶ.

ꦪꦴꦮꦠꦴ ꦕꦤ꧀ꦢꦶꦩꦱꦹꦫꦶꦪꦴ ꦥꦫꦶꦲꦫꦤ꧀ꦠꦷꦠꦶ ꦪꦠ꧀ꦠꦏꦺ ꦜꦴꦤꦺ ꦕꦤ꧀ꦢꦶꦩꦱꦹꦫꦶꦪꦴ ꦥꦫꦶꦮꦠ꧀ꦠꦤ꧀ꦠꦶ ꦥꦫꦶꦧ꧀ꦨꦩꦤ꧀ꦠꦶ. ꦢꦶꦱꦴ ꦨꦤ꧀ꦠꦶ ꦮꦶꦫꦺꦴꦕꦩꦴꦤꦴꦠꦶ ꦠꦺꦱꦁ ꦥꦫꦶꦧ꧀ꦨꦩꦤꦺꦤꦺꦮ ꦠꦴ ꦢꦶꦱꦴ ꦥꦨꦱ꧀ꦱꦫꦴ ꦲꦸꦠ꧀ꦮꦴ ꦮꦶꦫꦺꦴꦕꦤ꧀ꦠꦶ. ꦠꦴꦮ ꦱꦲꦱ꧀ꦱꦣꦴ ꦭꦺꦴꦏꦺꦴꦠꦶ ꦠꦠ꧀ꦠꦏꦁ ꦱꦲꦱ꧀ꦱꦥ꧀ꦥꦏꦴꦫꦺꦴ ꦎꦏꦴꦱꦭꦺꦴꦏꦺꦴ, ꦱꦲꦱ꧀ꦱꦭꦺꦴꦏꦣꦴꦠꦸꦪꦺꦴꦠꦶ ꦄꦠ꧀ꦡꦺꦴ. ‘‘ꦠꦴꦮ ꦱꦲꦱ꧀ꦱꦮꦴ’’ꦠꦶ ꦮꦴ ꦥꦴꦜꦺꦴ.

ꦠꦩ꧀ꦥꦷꦠꦶ ꦠꦁ ꦠꦶꦮꦶꦣꦩ꧀ꦥꦶ ꦭꦺꦴꦏꦁ. ꦠꦡꦴ ꦲꦶꦱ꧀ꦱ ꦱꦧ꧀ꦧꦡꦴꦥꦶ ꦮꦶꦢꦶꦠꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦌꦏꦺꦴ ꦭꦺꦴꦏꦺꦴꦠꦶ ‘‘ꦱꦧ꧀ꦧꦺ ꦱꦠ꧀ꦠꦴ ꦄꦴꦲꦴꦫꦛ꧀ꦜꦶꦠꦶꦏꦴ’’ꦠꦶ ꦪꦴꦪ ꦥꦸꦒ꧀ꦒꦭꦴꦣꦶꦛ꧀ꦜꦴꦤꦴꦪ ꦏꦡꦴꦪ ꦱꦧ꧀ꦧꦺꦱꦁ ꦱꦔ꧀ꦑꦴꦫꦴꦤꦁ ꦥꦕ꧀ꦕꦪꦴꦪꦠ꧀ꦠꦮꦸꦠ꧀ꦠꦶꦠꦴ ꦮꦸꦠ꧀ꦠꦴ, ꦠꦴꦪ ꦱꦧ꧀ꦧꦺꦴ ꦱꦔ꧀ꦑꦴꦫꦭꦺꦴꦏꦺꦴ ꦌꦏꦺꦴ ꦌꦏꦮꦶꦣꦺꦴ ꦥꦏꦴꦫꦤ꧀ꦠꦫꦱ꧀ꦱ ꦄꦨꦴꦮꦠꦺꦴ. ꦢ꧀ꦮꦺ ꦭꦺꦴꦏꦴꦠꦶꦄꦴꦢꦷꦱꦸꦥꦶ ꦆꦩꦶꦤꦴ ꦤꦪꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦤꦴꦩ-ꦒ꧀ꦒꦲꦟꦺꦤ ꦕꦺꦠ꧀ꦡ ꦤꦶꦧ꧀ꦧꦴꦤꦱ꧀ꦱ ꦄꦒ꧀ꦒꦲꦟꦁ, ꦠꦱ꧀ꦱ ꦄꦭꦺꦴꦏꦱꦨꦴꦮꦠ꧀ꦠꦴ. ꦤꦤꦸ ꦕ ‘‘ꦄꦴꦲꦴꦫꦛ꧀ꦜꦶꦠꦶꦏꦴ’’ꦠꦶ ꦌꦠ꧀ꦡ ꦥꦕ꧀ꦕꦪꦴꦪꦠ꧀ꦠꦮꦸꦠ꧀ꦠꦶꦠꦴꦪ ꦩꦒ꧀ꦒꦦꦭꦣꦩ꧀ꦩꦴꦤꦩ꧀ꦥꦶ ꦭꦺꦴꦏꦠꦴ ꦄꦴꦥꦗ꧀ꦗꦠꦷꦠꦶ? ꦤꦴꦥꦗ꧀ꦗꦠꦶ, ꦥꦫꦶꦚ꧀ꦚꦺꦪ꧀ꦪꦴꦤꦁ ꦢꦸꦏ꧀ꦑꦱꦕ꧀ꦕꦣꦩ꧀ꦩꦴꦤꦁ ꦆꦣ ‘‘ꦭꦺꦴꦏꦺꦴ’’ꦠꦶ ꦄꦣꦶꦥ꧀ꦥꦺꦠꦠ꧀ꦠꦴ. ꦄꦡ ꦮꦴ ‘‘ꦤ ꦭꦸꦗ꧀ꦗꦠꦶ ꦤ ꦥꦭꦸꦗ꧀ꦗꦠꦷ’’ꦠꦶ ꦪꦺꦴ ꦒꦲꦶꦠꦺꦴ ꦠꦡꦴ ꦤ ꦲꦺꦴꦠꦶ, ꦱꦺꦴ ꦭꦺꦴꦏꦺꦴꦠꦶ ꦠꦁꦒꦲꦟꦫꦲꦶꦠꦴꦤꦁ ꦭꦺꦴꦏꦸꦠ꧀ꦠꦫꦴꦤꦁ ꦤꦠ꧀ꦡꦶ ꦭꦺꦴꦏꦠꦴ. ꦈꦥꦴꦢꦴꦤꦴꦤꦁ ꦄꦴꦫꦩ꧀ꦩꦟꦨꦹꦠꦴ ꦑꦤ꧀ꦣꦴ ꦈꦥꦴꦢꦴꦤꦏ꧀ꦑꦤ꧀ꦣꦴ. ꦢꦱꦴꦪꦠꦤꦴꦤꦷꦠꦶ ꦢꦱ ꦫꦹꦥꦴꦪꦠꦤꦴꦤꦶ.

ꦌꦠ꧀ꦡ ꦕ ‘‘ꦄꦴꦲꦴꦫꦛ꧀ꦜꦶꦠꦶꦏꦴ’’ꦠꦶ ꦥꦕ꧀ꦕꦪꦴꦪꦠ꧀ꦠꦮꦸꦠ꧀ꦠꦶꦠꦴꦮꦕꦤꦺꦤ ꦱꦔ꧀ꦑꦴꦫꦴꦤꦁ ꦄꦤꦶꦕ꧀ꦕꦠꦴ. ꦠꦴꦪ ꦕ ‘‘ꦪꦢꦤꦶꦕ꧀ꦕꦁ, ꦠꦁ ꦢꦸꦏ꧀ꦑꦁ. ꦪꦁ ꦢꦸꦏ꧀ꦑꦁ, ꦠꦢꦤꦠ꧀ꦠꦴ’’ꦠꦶ (ꦱꦁ. ꦤꦶ. ꧓.꧑꧕) ꦮꦕꦤꦠꦺꦴ ꦢꦸꦏ꧀ꦑꦴꦤꦠ꧀ꦠꦠꦴ ꦕ ꦥꦏꦴꦱꦶꦠꦴ ꦲꦺꦴꦤ꧀ꦠꦷꦠꦶ ꦠꦷꦟꦶꦥꦶ ꦱꦴꦩꦚ꧀ꦚꦭꦏ꧀ꦑꦟꦴꦤꦶ ꦒꦲꦶꦠꦴꦤꦶ. ꦤꦴꦩꦤ꧀ꦠꦶ ꦕꦠ꧀ꦠꦴꦫꦺꦴ ꦄꦫꦹꦥꦶꦤꦺꦴ ꦑꦤ꧀ꦣꦴ, ꦠꦺ ꦕ ꦄꦠ꧀ꦡꦠꦺꦴ ꦦꦱ꧀ꦱꦴꦢꦪꦺꦴ. ꦫꦹꦥꦤ꧀ꦠꦶ ꦨꦹꦠꦸꦥꦴꦢꦴꦪꦫꦹꦥꦴꦤꦶ, ꦠꦴꦤꦶ ꦕ ꦄꦠ꧀ꦡꦠꦺꦴ ꦥꦡꦮꦷꦄꦴꦢꦪꦺꦴꦠꦶ ꦄꦮꦶꦱꦺꦱꦺꦤꦺꦮ ꦱꦭꦏ꧀ꦑꦟꦠꦺꦴ ꦱꦔ꧀ꦑꦴꦫꦴ ꦒꦲꦶꦠꦴ. ꦠꦒ꧀ꦒꦲꦟꦺꦤꦺꦮ ꦪꦺ ꦠꦺꦱꦁ ꦮꦶꦱꦺꦱꦴ ꦏꦸꦱꦭꦴꦢꦪꦺꦴ, ꦲꦺꦠꦸꦄꦴꦢꦪꦺꦴ ꦕ, ꦠꦺꦥꦶ ꦒꦲꦶꦠꦴ ꦌꦮ ꦲꦺꦴꦤ꧀ꦠꦷꦠꦶ ꦄꦴꦲ ‘‘ꦆꦠꦶ ꦄꦪꦁ ꦱꦔ꧀ꦑꦴꦫꦭꦺꦴꦏꦺꦴꦥꦶ ꦱꦧ꧀ꦧꦡꦴ ꦮꦶꦢꦶꦠꦺꦴ’’ꦠꦶ.

ꦄꦴꦒꦩ꧀ꦩ ꦕꦶꦠ꧀ꦠꦁ ꦱꦺꦠꦶ ꦌꦠ꧀ꦡꦴꦠꦶ ꦄꦴꦱꦪꦺꦴ ꦩꦶꦒꦴꦱꦪꦺꦴ ꦮꦶꦪ. ꦪꦡꦴ ꦩꦶꦒꦺꦴ ꦒꦺꦴꦕꦫꦴꦪ ꦒꦤ꧀ꦠ꧀ꦮꦴ ꦥꦕ꧀ꦕꦴꦒꦤ꧀ꦠ꧀ꦮꦴ ꦠꦠ꧀ꦡꦺꦮ ꦮꦤꦒꦲꦤꦺ ꦱꦪꦠꦷꦠꦶ ꦱꦺꦴ ꦠꦱ꧀ꦱ ꦄꦴꦱꦪꦺꦴ, ꦌꦮꦁ ꦄꦚ꧀ꦚꦡꦴ ꦥꦮꦠ꧀ꦠꦶꦠ꧀ꦮꦴꦥꦶ ꦕꦶꦠ꧀ꦠꦁ ꦄꦴꦒꦩ꧀ꦩ ꦪꦠ꧀ꦡ ꦱꦺꦠꦶ, ꦱꦺꦴ ꦠꦱ꧀ꦱ ꦄꦴꦱꦪꦺꦴꦠꦶ ꦮꦸꦕ꧀ꦕꦠꦶ. ꦱꦺꦴ ꦥꦤ ꦱꦱ꧀ꦱꦠꦢꦶꦛ꧀ꦜꦶꦄꦴꦢꦶꦮꦱꦺꦤ ꦕꦠꦸꦧ꧀ꦧꦶꦣꦺꦴ. ꦮꦸꦠ꧀ꦠꦚ꧀ꦕ –

‘‘ꦱꦱ꧀ꦱꦠꦸꦕ꧀ꦖꦺꦢꦢꦶꦛ꧀ꦜꦶ ꦕ, ꦑꦤ꧀ꦠꦶ ꦕꦺꦮꦴꦤꦸꦭꦺꦴꦩꦶꦏꦴ;

ꦪꦡꦴꦨꦹꦠꦚ꧀ꦕ ꦪꦁ ꦚꦴꦟꦁ, ꦌꦠꦁ ꦄꦴꦱꦪꦱꦢ꧀ꦢꦶꦠ’’ꦤ꧀ꦠꦶ.

ꦠꦠ꧀ꦡ ꦱꦧ꧀ꦧꦢꦶꦛ꧀ꦜꦷꦤꦁ ꦱꦱ꧀ꦱꦠꦸꦕ꧀ꦖꦺꦢꦢꦶꦛ꧀ꦜꦷꦲꦶ ꦱꦔ꧀ꦒꦲꦶꦠꦠ꧀ꦠꦴ ꦱꦧ꧀ꦧꦺꦥꦶ ꦢꦶꦛ꧀ꦜꦶꦒꦠꦶꦏꦴ ꦱꦠ꧀ꦠꦴ ꦆꦩꦴ ꦌꦮ ꦢ꧀ꦮꦺ ꦢꦶꦛ꧀ꦜꦶꦪꦺꦴ ꦱꦤ꧀ꦤꦶꦱ꧀ꦱꦶꦠꦴ. ꦪꦡꦴꦲ ‘‘ꦢ꧀ꦮꦪꦤꦶꦱ꧀ꦱꦶꦠꦺꦴ ꦑ꧀ꦮꦴꦪꦁ, ꦏꦕ꧀ꦕꦴꦤ, ꦭꦺꦴꦏꦺꦴ ꦪꦺꦨꦸꦪ꧀ꦪꦺꦤ ꦄꦠ꧀ꦡꦶꦠꦚ꧀ꦕ ꦤꦠ꧀ꦡꦶꦠꦚ꧀ꦕꦴ’’ꦠꦶ (ꦱꦁ. ꦤꦶ. ꧒.꧑꧕). ꦄꦠ꧀ꦡꦶꦠꦴꦠꦶ ꦲꦶ ꦱꦱ꧀ꦱꦠꦒ꧀ꦒꦴꦲꦺꦴ ꦄꦣꦶꦥ꧀ꦥꦺꦠꦺꦴ, ꦤꦠ꧀ꦡꦶꦠꦴꦠꦶ ꦈꦕ꧀ꦖꦺꦢꦒ꧀ꦒꦴꦲꦺꦴ. ꦄꦪꦁ ꦠꦴꦮ ꦮꦛ꧀ꦛꦤꦶꦱ꧀ꦱꦶꦠꦴꦤꦁ ꦥꦸꦡꦸꦗ꧀ꦗꦤꦴꦤꦁ ꦄꦴꦱꦪꦺꦴ. ꦮꦶꦮꦛ꧀ꦛꦤꦶꦱ꧀ꦱꦶꦠꦴꦤꦁ ꦥꦤ ꦱꦸꦢ꧀ꦣꦱꦠ꧀ꦠꦴꦤꦁ ꦄꦤꦸꦭꦺꦴꦩꦶꦏꦴ ꦑꦤ꧀ꦠꦶ, ꦪꦡꦴꦨꦹꦠꦚꦴꦟꦤ꧀ꦠꦶ ꦢꦸꦮꦶꦣꦺꦴ ꦄꦴꦱꦪꦺꦴ.

ꦄꦴꦱꦪꦁ ꦗꦴꦤꦴꦠꦷꦠꦶ ꦕꦠꦸꦧ꧀ꦧꦶꦣꦩ꧀ꦥꦶ ꦱꦠ꧀ꦠꦴꦤꦁ ꦄꦴꦱꦪꦁ ꦗꦴꦤꦴꦠꦶ. ꦗꦴꦤꦤ꧀ꦠꦺꦴ ꦕ ꦠꦺꦱꦁ ꦢꦶꦛ꧀ꦜꦶꦒꦠꦴꦤꦁ, ꦠꦺꦱꦚ꧀ꦕ ꦚꦴꦟꦴꦤꦁ ꦄꦥ꧀ꦥꦮꦠ꧀ꦠꦶꦏ꧀ꦑꦟꦺꦥꦶ ꦗꦴꦤꦴꦠꦶ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦏꦴꦩꦁ ꦱꦺꦮꦤ꧀ꦠꦚ꧀ꦚꦺꦮ ꦗꦴꦤꦴꦠꦶ ‘ꦄꦪꦁ ꦥꦸꦒ꧀ꦒꦭꦺꦴ ꦏꦴꦩꦒꦫꦸꦏꦺꦴ ꦏꦴꦩꦴꦱꦪꦺꦴ ꦏꦴꦩꦴꦣꦶꦩꦸꦠ꧀ꦠꦺꦴ’ꦠꦶ, ꦏꦴꦩꦁ ꦱꦺꦮꦤ꧀ꦠꦚ꧀ꦚꦺꦮ ꦗꦴꦤꦴꦠꦶ ‘ꦄꦪꦁ ꦥꦸꦒ꧀ꦒꦭꦺꦴ ꦤꦺꦏ꧀ꦑꦩ꧀ꦩꦒꦫꦸꦏꦺꦴ ꦤꦺꦏ꧀ꦑꦩ꧀ꦩꦴꦱꦪꦺꦴ ꦤꦺꦏ꧀ꦑꦩ꧀ꦩꦴꦣꦶꦩꦸꦠ꧀ꦠꦺꦴ’ꦠꦶ’’ꦄꦴꦢꦶ (ꦥꦛꦶ. ꦩ. ꧑.꧑꧑꧓).

ꦄꦥ꧀ꦥꦲꦷꦤꦨꦴꦮꦺꦤ ꦱꦤ꧀ꦠꦴꦤꦺ ꦄꦤꦸ ꦄꦤꦸ ꦱꦪꦤ꧀ꦠꦷꦠꦶ ꦄꦤꦸꦱꦪꦴ, ꦄꦤꦸꦫꦹꦥꦁ ꦏꦴꦫꦟꦁ ꦭꦨꦶꦠ꧀ꦮꦴ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦄꦠ꧀ꦡꦺꦴ. ꦌꦠꦺꦤ ꦤꦺꦱꦁ ꦏꦴꦫꦟꦭꦴꦨꦺ ꦈꦥ꧀ꦥꦗ꧀ꦗꦤꦴꦫꦲꦠꦁ ꦢꦱ꧀ꦱꦺꦠꦶ. ꦄꦥ꧀ꦥꦲꦷꦤꦴ ꦲꦶ ꦏꦶꦭꦺꦱꦴ ꦏꦴꦫꦟꦭꦴꦨꦺ ꦱꦠꦶ ꦈꦥ꧀ꦥꦗ꧀ꦗꦤ꧀ꦠꦶ. ꦏꦺ ꦥꦤ ꦠꦺ? ꦫꦴꦒꦴꦢꦪꦺꦴ ꦱꦠ꧀ꦠ ꦄꦤꦴꦒꦠꦴ ꦏꦶꦭꦺꦱꦴ, ꦄꦠꦷꦠꦴ, ꦥꦕ꧀ꦕꦸꦥ꧀ꦥꦤ꧀ꦤꦴ ꦕ ꦠꦁꦱꦨꦴꦮꦠ꧀ꦠꦴ ꦠꦡꦴ ꦮꦸꦕ꧀ꦕꦤ꧀ꦠꦶ. ꦤ ꦲꦶ ꦣꦩ꧀ꦩꦴꦤꦁ ꦏꦴꦭꦨꦺꦢꦺꦤ ꦱꦨꦴꦮꦨꦺꦢꦺꦴ ꦄꦠ꧀ꦡꦶ. ꦠꦁ ꦱꦠ꧀ꦠꦮꦶꦣꦁ ꦄꦤꦸꦱꦪꦁ ꦠꦱ꧀ꦱ ꦠꦱ꧀ꦱ ꦱꦠ꧀ꦠꦱ꧀ꦱ ꦱꦤ꧀ꦠꦴꦤꦺ ꦥꦫꦺꦴꦥꦫꦨꦴꦮꦺꦤ ꦥꦮꦠ꧀ꦠꦩꦴꦤꦁ ꦗꦴꦤꦴꦠꦶ.

ꦕꦫꦶꦠꦤ꧀ꦠꦶ ꦱꦸꦕꦫꦶꦠꦢꦸꦕ꧀ꦕꦫꦶꦠꦁ. ꦠꦁ ꦲꦶ ꦮꦶꦨꦔ꧀ꦒꦺ (ꦮꦶꦨ. ꧘꧑꧔, ꧘꧑꧗) ꦕꦫꦶꦠꦤꦶꦢ꧀ꦢꦺꦱꦺ ꦤꦶꦢ꧀ꦢꦶꦛ꧀ꦜꦁ. ꦄꦡ ꦮꦴ ꦕꦫꦶꦠꦤ꧀ꦠꦶ ꦕꦫꦶꦪꦴ ꦮꦺꦢꦶꦠꦧ꧀ꦧꦴ. ꦠꦴ ꦥꦤ ꦫꦴꦒꦢꦺꦴꦱꦩꦺꦴꦲꦱꦢ꧀ꦣꦴꦧꦸꦢ꧀ꦣꦶꦮꦶꦠꦏ꧀ꦏꦮꦱꦺꦤ ꦖ ꦩꦹꦭꦕꦫꦶꦪꦴ, ꦠꦴꦱꦁ ꦄꦥꦫꦶꦪꦤ꧀ꦠꦺꦴ ꦄꦤ꧀ꦠꦫꦨꦺꦢꦺꦴ, ꦱꦁꦱꦒ꧀ꦒꦨꦺꦢꦺꦴ ꦥꦤ ꦠꦺꦱꦛ꧀ꦜꦶꦮꦶꦣꦺꦴ. ꦠꦁ ꦕꦫꦶꦠꦁ ꦱꦨꦴꦮꦠꦺꦴ ꦱꦁꦏꦶꦭꦺꦱꦮꦺꦴꦢꦴꦤꦠꦺꦴ ꦱꦩꦸꦛ꧀ꦜꦴꦤꦠꦺꦴ ꦦꦭꦠꦺꦴ ꦤꦶꦱ꧀ꦱꦤ꧀ꦢꦠꦺꦴꦠꦶ ꦌꦮꦩꦴꦢꦶꦤꦴ ꦥꦏꦴꦫꦺꦤ ꦗꦴꦤꦴꦠꦶ.

ꦄꦣꦶꦩꦸꦠ꧀ꦠꦶ ꦄꦗ꧀ꦙꦴꦱꦪꦣꦴꦠꦸ. ꦱꦴ ꦢꦸꦮꦶꦣꦴ ꦲꦷꦤꦴꦣꦶꦩꦸꦠ꧀ꦠꦶ ꦥꦟꦷꦠꦴꦣꦶꦩꦸꦠ꧀ꦠꦷꦠꦶ. ꦪꦴꦪ ꦲꦷꦤꦴꦣꦶꦩꦸꦠ꧀ꦠꦶꦏꦴ ꦱꦠ꧀ꦠꦴ ꦲꦷꦤꦴꦣꦶꦩꦸꦠ꧀ꦠꦶꦏꦺꦪꦺꦮ ꦱꦺꦮꦤ꧀ꦠꦶ, ꦥꦟꦷꦠꦴꦣꦶꦩꦸꦠ꧀ꦠꦶꦏꦴ ꦕ ꦥꦟꦷꦠꦴꦣꦶꦩꦸꦠ꧀ꦠꦶꦏꦺꦪꦺꦮ. ꦱꦴ ꦄꦗ꧀ꦙꦴꦱꦪꦣꦴꦠꦸ ꦄꦗ꧀ꦙꦴꦱꦪꦱꦨꦴꦮꦺꦴ ꦄꦣꦶꦩꦸꦠ꧀ꦠꦶ. ꦠꦁ ꦄꦣꦶꦩꦸꦠ꧀ꦠꦶꦁ ꦗꦴꦤꦴꦠꦶ ‘‘ꦆꦩꦱ꧀ꦱ ꦄꦣꦶꦩꦸꦠ꧀ꦠꦶ ꦲꦷꦤꦴ, ꦆꦩꦱ꧀ꦱ ꦥꦟꦷꦠꦴ’’ꦠꦶ, ꦠꦠ꧀ꦡꦴꦥꦶ ‘‘ꦆꦩꦱ꧀ꦱ ꦩꦸꦢꦸ, ꦆꦩꦱ꧀ꦱ ꦩꦸꦢꦸꦠꦫꦴ, ꦆꦩꦱ꧀ꦱ ꦩꦸꦢꦸꦠꦩꦴ’’ꦠꦶꦄꦴꦢꦶꦤꦴ. ꦆꦤ꧀ꦢ꧀ꦫꦶꦪꦴꦤꦁ ꦲꦶ ꦠꦶꦏ꧀ꦑꦩꦸꦢꦸꦨꦴꦮꦴꦢꦶꦤꦴ ꦪꦡꦴꦫꦲꦁ ꦄꦣꦶꦩꦸꦠ꧀ꦠꦶꦪꦴ ꦠꦶꦏ꧀ꦑꦩꦸꦢꦸꦨꦴꦮꦴꦢꦶꦏꦺꦴ ꦮꦺꦢꦶꦠꦧ꧀ꦧꦺꦴ. ꦠꦡꦴ ꦲꦶ ꦮꦸꦠ꧀ꦠꦁ ꦱꦩ꧀ꦩꦺꦴꦲꦮꦶꦤꦺꦴꦢꦤꦷꦪꦁ (ꦮꦶꦨ. ꦄꦛ꧀ꦜ. ꧘꧑꧘, ꧘꧒꧐) ‘‘ꦲꦺꦛ꧀ꦜꦴ ꦒꦲꦶꦠꦴꦥꦶ ꦄꦣꦶꦩꦸꦠ꧀ꦠꦶ ꦆꦣ ꦱꦠ꧀ꦠꦴꦤꦁ ꦠꦶꦏ꧀ꦑꦶꦤ꧀ꦢ꧀ꦫꦶꦪꦩꦸꦢꦶꦤ꧀ꦢ꧀ꦫꦶꦪꦨꦴꦮꦢꦱ꧀ꦱꦤꦠ꧀ꦡꦁ ꦥꦸꦤ ꦒꦲꦶꦠꦴ’’ꦠꦶ.

ꦄꦥ꧀ꦥꦫꦗꦁ ꦄꦏ꧀ꦑꦁ ꦌꦠꦺꦱꦤ꧀ꦠꦶ ꦄꦥ꧀ꦥꦫꦗꦏ꧀ꦑꦴ, ꦄꦥ꧀ꦥꦁ ꦮꦴ ꦫꦗꦁ ꦥꦚ꧀ꦚꦴꦩꦪꦺ ꦄꦏ꧀ꦑꦶꦩ꧀ꦲꦶ ꦌꦠꦺꦱꦤ꧀ꦠꦶ ꦄꦥ꧀ꦥꦫꦗꦏ꧀ꦑꦴ, ꦄꦤꦸꦱ꧀ꦱꦢꦫꦴꦒꦴꦢꦶꦫꦗꦴ ꦱꦠ꧀ꦠꦴ, ꦠꦺ ꦄꦥ꧀ꦥꦫꦗꦏ꧀ꦑꦺ. ꦩꦲꦴꦫꦗꦏ꧀ꦑꦺꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦈꦱ꧀ꦱꦢꦫꦴꦒꦴꦢꦶꦫꦗꦴ ꦩꦲꦴꦫꦗꦏ꧀ꦑꦴ.

ꦠꦶꦏ꧀ꦑꦶꦤ꧀ꦢ꧀ꦫꦶꦪꦺꦠꦶ ꦠꦶꦑꦶꦟꦺꦲꦶ ꦱꦢ꧀ꦣꦴꦢꦷꦲꦶ ꦆꦤ꧀ꦢ꧀ꦫꦶꦪꦺꦲꦶ ꦱꦩꦤ꧀ꦤꦴꦒꦠꦺ. ꦩꦸꦢꦶꦤ꧀ꦢ꧀ꦫꦶꦪꦺꦠꦶ ꦩꦸꦢꦸꦏꦺꦲꦶ ꦱꦢ꧀ꦣꦴꦢꦷꦲꦶ ꦆꦤ꧀ꦢ꧀ꦫꦶꦪꦺꦲꦶ ꦱꦩꦤ꧀ꦤꦴꦒꦠꦺ. ꦈꦥꦤꦶꦱ꧀ꦱꦪꦆꦤ꧀ꦢ꧀ꦫꦶꦪꦴꦤꦶ ꦤꦴꦩ ꦆꦣꦴꦣꦶꦥ꧀ꦥꦺꦠꦴꦤꦶ. ꦱ꧀ꦮꦴꦏꦴꦫꦺꦠꦶ ꦱꦸꦤ꧀ꦢꦫꦴꦏꦴꦫꦺ ꦏꦭ꧀ꦪꦴꦟꦥꦏꦠꦶꦏꦺ, ꦮꦶꦮꦛ꧀ꦛꦗ꧀ꦙꦴꦱꦪꦺꦠꦶ ꦄꦠ꧀ꦡꦺꦴ. ꦱꦸꦮꦶꦚ꧀ꦚꦴꦥꦪꦺꦠꦶ ꦱꦩ꧀ꦩꦠ꧀ꦠꦤꦶꦪꦴꦩꦁ ꦮꦶꦚ꧀ꦚꦴꦥꦺꦠꦸꦁ ꦱꦸꦏꦫꦺ ꦱꦢ꧀ꦣꦺ, ꦥꦚ꧀ꦚꦮꦤ꧀ꦠꦺ ꦕ. ꦨꦧ꧀ꦧꦺ ꦄꦨꦧ꧀ꦧꦺꦠꦶ ꦌꦠ꧀ꦡ ꦨꦧ꧀ꦧꦺꦠꦶ ꦏꦩ꧀ꦩꦴꦮꦫꦟꦏꦶꦭꦺꦱꦴꦮꦫꦟꦮꦶꦥꦴꦏꦴꦮꦫꦟꦫꦲꦶꦠꦺ. ꦮꦸꦠ꧀ꦠꦮꦶꦥꦫꦶꦪꦴꦪꦺꦤ ꦢ꧀ꦮꦴꦏꦴꦫꦢꦸꦮꦶꦚ꧀ꦚꦴꦥꦪꦴꦨꦧ꧀ꦧꦴ ꦮꦺꦢꦶꦠꦧ꧀ꦧꦴ. ꦌꦠ꧀ꦡ ꦕ ‘‘ꦆꦩꦱ꧀ꦱ ꦫꦴꦒꦫꦗꦺꦴ ꦄꦥ꧀ꦥꦺꦴ, ꦆꦩꦱ꧀ꦱ ꦢꦺꦴꦱꦫꦗꦺꦴ ꦄꦥ꧀ꦥꦺꦴ’’ꦠꦶꦄꦴꦢꦶꦤꦴ ꦄꦥ꧀ꦥꦫꦗꦏ꧀ꦑꦺꦱꦸ ꦗꦴꦤꦤꦁ ꦮꦺꦢꦶꦠꦧ꧀ꦧꦁ. ꦱꦺꦱꦺꦱꦸꦥꦶ ꦌꦱꦺꦮ ꦤꦪꦺꦴ. ꦠꦱ꧀ꦩꦴꦠꦶ ꦪꦱ꧀ꦩꦴ ꦨꦒꦮꦴ ꦄꦥꦫꦶꦩꦴꦟꦺ ꦱꦠ꧀ꦠꦺ ꦄꦴꦱꦪꦴꦢꦶꦠꦺꦴ ꦄꦤꦮꦱꦺꦱꦺꦠ꧀ꦮꦴ ꦗꦴꦤꦴꦠꦶ, ꦠꦱ꧀ꦩꦴ ꦄꦱ꧀ꦱ ꦨꦒꦮꦠꦺꦴ ꦱꦠ꧀ꦠꦭꦺꦴꦏꦺꦴꦥꦶ ꦱꦧ꧀ꦧꦡꦴ ꦮꦶꦢꦶꦠꦺꦴ.

ꦤꦤꦸ ꦕ ꦱꦠ꧀ꦠꦺꦱꦸ ꦥꦩꦴꦟꦴꦢꦶꦥꦶ ꦗꦴꦤꦶꦠꦧ꧀ꦧꦺꦴ ꦄꦠ꧀ꦡꦷꦠꦶ? ꦄꦠ꧀ꦡꦶ. ꦠꦱ꧀ꦱ ꦥꦤ ꦗꦴꦤꦤꦁ ꦤ ꦤꦶꦧ꧀ꦧꦶꦢꦴꦪ ꦮꦶꦫꦴꦒꦴꦪ ꦤꦶꦫꦺꦴꦣꦴꦪꦴꦠꦶ ꦆꦣ ꦤ ꦒꦲꦶꦠꦁ, ꦨꦒꦮꦠꦺꦴ ꦥꦤ ꦠꦩ꧀ꦥꦶ ꦱꦸꦮꦶꦢꦶꦠꦁ ꦱꦸꦮꦮꦠ꧀ꦡꦴꦥꦶꦠꦩꦺꦮ, ꦥꦪꦺꦴꦗꦤꦴꦨꦴꦮꦴ ꦢꦺꦱꦤꦁ ꦤꦴꦫꦸꦭ꦳꧀ꦲꦁ. ꦠꦺꦤ ꦮꦸꦠ꧀ꦠꦁ –

‘‘ꦄꦡ ꦑꦺꦴ ꦨꦒꦮꦴ ꦥꦫꦶꦠ꧀ꦠꦁ ꦤꦑꦱꦶꦑꦴꦪꦁ ꦥꦁꦱꦸꦁ ꦄꦴꦫꦺꦴꦥꦺꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ ‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦺꦴ ꦮꦴꦪꦁ ꦩꦪꦴ ꦥꦫꦶꦠ꧀ꦠꦺꦴ ꦤꦑꦱꦶꦑꦴꦪꦁ ꦥꦁꦱꦸ ꦄꦴꦫꦺꦴꦥꦶꦠꦺꦴ, ꦄꦪꦁ ꦮꦴ ꦩꦲꦴꦥꦡꦮꦷ’’’ꦠꦶꦄꦴꦢꦶ (ꦱꦁ. ꦤꦶ. ꧕.꧑꧑꧒꧑).

꧑꧓꧗. ꦎꦏꦴꦱꦭꦺꦴꦏꦺꦴꦥꦶ ꦱꦧ꧀ꦧꦡꦴ ꦮꦶꦢꦶꦠꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦕꦏ꧀ꦏꦮꦴꦭ꦳ꦤ꧀ꦠꦶ ꦭꦺꦴꦏꦣꦴꦠꦸ. ꦱꦴ ꦲꦶ ꦤꦺꦩꦶꦩꦟ꧀ꦝꦭꦱꦢꦶꦱꦺꦤ ꦕꦏ꧀ꦏꦮꦴꦭ꦳ꦥꦧ꧀ꦧꦠꦺꦤ ꦱꦩꦤ꧀ꦠꦠꦺꦴ ꦥꦫꦶꦏ꧀ꦑꦶꦠ꧀ꦠꦠ꧀ꦠꦴ ‘‘ꦕꦏ꧀ꦏꦮꦴꦭ꦳’’ꦤ꧀ꦠꦶ ꦮꦸꦕ꧀ꦕꦠꦶ. ꦕꦠꦸꦠꦶꦁꦱꦱꦠꦴꦤꦶ ꦕꦴꦠꦶ ꦕꦠꦸꦄꦣꦶꦏꦴꦤꦶ ꦠꦶꦁꦱꦱꦠꦴꦤꦶ, ꦠꦷꦟꦶꦱꦲꦱ꧀ꦱꦴꦤꦶ, ꦕꦠ꧀ꦠꦴꦫꦶꦱꦠꦴꦤꦶ ꦕꦴꦠꦶ ꦄꦠ꧀ꦡꦺꦴ. ꦄꦝ꧀ꦞꦸꦝ꧀ꦞꦴꦤꦷꦠꦶ ꦈꦥꦝ꧀ꦞꦕꦠꦸꦠ꧀ꦡꦴꦤꦶ, ꦠꦷꦟꦶꦱꦠꦴꦤꦶ, ꦥꦚ꧀ꦚꦴꦱꦚ꧀ꦕꦴꦠꦶ ꦄꦠ꧀ꦡꦺꦴ. ꦤꦲꦸꦠꦴꦤꦷꦠꦶ ꦢꦱꦱꦲꦱ꧀ꦱꦴꦤꦶ. ꦱꦔ꧀ꦑꦴꦠꦴꦠꦶ ꦏꦡꦶꦠꦴ. ꦱꦟ꧀ꦜꦶꦠꦷꦠꦶ ꦲꦺꦛ꧀ꦜꦴ, ꦈꦥꦫꦶꦠꦺꦴ ꦕꦴꦠꦶ ꦱꦧ꧀ꦧꦱꦺꦴ ꦜꦶꦠꦶ.

ꦌꦮꦁ ꦱꦟ꧀ꦜꦶꦠꦺꦠꦶ ꦌꦮꦩꦮꦛ꧀ꦜꦶꦠꦺ. ꦌꦠ꧀ꦡꦴꦠꦶ ꦕꦏ꧀ꦏꦮꦴꦭ꦳ꦺ. ꦄꦕ꧀ꦕꦸꦒ꧀ꦒꦠꦺꦴ ꦠꦴꦮꦢꦺꦮꦴꦠꦶ ꦠꦠ꧀ꦠꦏꦩꦺꦮ ꦕꦠꦸꦫꦴꦱꦷꦠꦶ ꦪꦺꦴꦗꦤꦱꦲꦱ꧀ꦱꦴꦤꦶꦪꦺꦮ ꦈꦧ꧀ꦧꦺꦣꦺꦴ. ꦤ ꦏꦺꦮꦭꦁ ꦕꦺꦠ꧀ꦡ ꦈꦧ꧀ꦧꦺꦣꦺꦴꦮ, ꦄꦡ ꦑꦺꦴ ꦄꦴꦪꦴꦩꦮꦶꦠ꧀ꦡꦴꦫꦴꦥꦶꦱ꧀ꦱ ꦠꦠ꧀ꦠꦏꦴꦪꦺꦮ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦱꦶꦤꦺꦫꦸ, ꦨꦶꦏ꧀ꦑꦮꦺ, ꦥꦧ꧀ꦧꦠꦫꦴꦗꦴ ꦕꦠꦸꦫꦴꦱꦷꦠꦶ ꦪꦺꦴꦗꦤꦱꦲꦱ꧀ꦱꦴꦤꦶ ꦄꦴꦪꦴꦩꦺꦤ, ꦕꦠꦸꦫꦴꦱꦷꦠꦶ ꦪꦺꦴꦗꦤꦱꦲꦱ꧀ꦱꦴꦤꦶ ꦮꦶꦠ꧀ꦡꦴꦫꦺꦤꦴ’’ꦠꦶ (ꦄ. ꦤꦶ. ꧗.꧖꧖).

ꦠꦠꦺꦴꦠꦶ ꦱꦶꦤꦺꦫꦸꦱ꧀ꦱ ꦲꦺꦛ꧀ꦜꦴ, ꦈꦥꦫꦶ ꦕ ꦮꦸꦠ꧀ꦠꦥ꧀ꦥꦩꦴꦟꦠꦺꦴ. ꦈꦥꦝ꧀ꦞꦸꦥꦝ꧀ꦞꦺꦤꦴꦠꦶ ꦈꦥꦝ꧀ꦞꦺꦤ ꦈꦥꦝ꧀ꦞꦺꦤ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦢ꧀ꦮꦴꦕꦠ꧀ꦠꦴꦭꦷꦱ ꦪꦺꦴꦗꦤꦱꦲꦱ꧀ꦱꦴꦤꦶ ꦱꦩꦸꦢ꧀ꦢꦺ ꦄꦗ꧀ꦙꦺꦴꦒꦴꦭ꦳꧀ꦲꦺꦴ ꦠꦠ꧀ꦠꦏꦩꦺꦮ ꦕ ꦈꦥꦫꦶ ꦈꦒ꧀ꦒꦠꦺꦴ ꦪꦸꦒꦤ꧀ꦣꦫꦥꦧ꧀ꦧꦠꦺꦴ, ꦌꦏꦮꦷꦱ ꦪꦺꦴꦗꦤꦱꦲꦱ꧀ꦱꦴꦤꦶ ꦱꦩꦸꦢ꧀ꦢꦺ ꦄꦗ꧀ꦙꦺꦴꦒꦴꦭ꦳꧀ꦲꦺꦴ ꦠꦠ꧀ꦠꦏꦩꦺꦮ ꦕ ꦈꦥꦫꦶ ꦈꦒ꧀ꦒꦠꦺꦴ ꦇꦱꦣꦫꦺꦴ ꦥꦧ꧀ꦧꦠꦺꦴꦠꦶ ꦆꦩꦶꦤꦴ ꦤꦪꦺꦤ ꦱꦺꦱꦺꦱꦸꦥꦶ ꦈꦥꦝ꧀ꦞꦸꦥꦝ꧀ꦞꦥꦩꦴꦟꦠꦴ ꦮꦺꦢꦶꦠꦧ꧀ꦧꦴ. ꦪꦡꦴ ꦩꦲꦴꦱꦩꦸꦢ꧀ꦢꦺꦴ ꦪꦴꦮ ꦕꦏ꧀ꦏꦮꦴꦭ꦳ꦥꦴꦢꦩꦹꦭꦴ ꦄꦤꦸꦥꦸꦧ꧀ꦧꦤꦶꦤ꧀ꦤꦺꦴ, ꦌꦮꦁ ꦪꦴꦮ ꦱꦶꦤꦺꦫꦸꦥꦴꦢꦩꦹꦭꦴꦠꦶ ꦲꦺꦛ꧀ꦜꦴ ꦱꦶꦤꦺꦫꦸꦥꦩꦴꦟꦠꦺꦴ ꦈꦥꦝ꧀ꦞꦥꦩꦴꦟꦺꦴꦥꦶ ꦪꦸꦒꦤ꧀ꦣꦫꦥꦧ꧀ꦧꦠꦺꦴ ꦥꦡꦮꦶꦪꦁ ꦱꦸꦥ꧀ꦥꦠꦶꦛ꧀ꦜꦶꦠꦺꦴ, ꦌꦮꦁ ꦇꦱꦣꦫꦴꦢꦪꦺꦴꦥꦷꦠꦶ ꦢꦛ꧀ꦜꦧ꧀ꦧꦁ. ꦮꦸꦠ꧀ꦠꦁ ꦲꦺꦠꦁ ‘‘ꦩꦲꦴꦱꦩꦸꦢ꧀ꦢꦺꦴ, ꦨꦶꦏ꧀ꦑꦮꦺ, ꦄꦤꦸꦥꦸꦧ꧀ꦧꦤꦶꦤ꧀ꦤꦺꦴ ꦄꦤꦸꦥꦸꦧ꧀ꦧꦥꦺꦴꦟꦺꦴ ꦄꦤꦸꦥꦸꦧ꧀ꦧꦥꦧ꧀ꦨꦴꦫꦺꦴ’’ꦠꦶ (ꦈꦢꦴ. ꧔꧕; ꦕꦹꦭ꦳ꦮ. ꧓꧘꧔; ꦄ. ꦤꦶ. ꧘.꧑꧙). ꦱꦶꦤꦺꦫꦸꦪꦸꦒꦤ꧀ꦣꦫꦴꦢꦷꦤꦁ ꦄꦤ꧀ꦠꦫꦺ ꦱꦷꦢꦤ꧀ꦠꦫꦱꦩꦸꦢ꧀ꦢꦴ ꦤꦴꦩ. ꦠꦺ ꦮꦶꦠ꧀ꦡꦴꦫꦠꦺꦴ ꦪꦡꦴꦏ꧀ꦏꦩꦁ ꦱꦶꦤꦺꦫꦸꦄꦴꦢꦷꦤꦁ ꦄꦕ꧀ꦕꦸꦒ꧀ꦒꦠꦱꦩꦴꦤꦥꦫꦶꦩꦴꦟꦴꦠꦶ ꦮꦢꦤ꧀ꦠꦶ. ꦧ꧀ꦫꦲꦴꦠꦶ ꦩꦲꦤ꧀ꦠꦺꦴ.

ꦱꦶꦤꦺꦫꦸꦱ꧀ꦱ ꦱꦩꦤ꧀ꦠꦠꦺꦴꦠꦶ ꦥꦫꦶꦏ꧀ꦑꦶꦥꦤꦮꦱꦺꦤ ꦱꦶꦤꦺꦫꦸꦱ꧀ꦱ ꦱꦩꦤ꧀ꦠꦠꦺꦴ ꦜꦶꦠꦴ. ꦱꦶꦤꦺꦫꦸꦁ ꦠꦴꦮ ꦥꦫꦶꦏ꧀ꦑꦶꦥꦶꦠ꧀ꦮꦴ ꦜꦶꦠꦺꦴ ꦪꦸꦒꦤ꧀ꦣꦫꦺꦴ, ꦠꦁ ꦥꦫꦶꦏ꧀ꦑꦶꦥꦶꦠ꧀ꦮꦴ ꦇꦱꦣꦫꦺꦴ. ꦌꦮꦁ ꦠꦁ ꦠꦁ ꦥꦫꦶꦏ꧀ꦑꦶꦥꦶꦠ꧀ꦮꦴ ꦜꦶꦠꦴ ‘‘ꦱꦶꦤꦺꦫꦸꦱ꧀ꦱ ꦱꦩꦤ꧀ꦠꦠꦺꦴ’’ꦠꦶ ꦮꦸꦠ꧀ꦠꦴ.

ꦪꦺꦴꦗꦤꦴꦤꦁ ꦱꦠꦴꦤꦸꦕ꧀ꦕꦺꦴ, ꦲꦶꦩꦮꦴ ꦥꦚ꧀ꦕ ꦥꦧ꧀ꦧꦠꦺꦴꦠꦶ ꦲꦶꦩꦮꦴ ꦥꦧ꧀ꦧꦠꦺꦴ ꦥꦚ꧀ꦕ ꦪꦺꦴꦗꦤꦴꦤꦁ ꦱꦠꦴꦤꦶ ꦈꦕ꧀ꦕꦺꦴ ꦈꦧ꧀ꦧꦺꦣꦺꦴ. ꦤꦒꦮ꧀ꦲꦪꦴꦠꦶ ꦤꦒ-ꦱꦢ꧀ꦢꦺꦤ ꦄꦮ꧀ꦲꦴꦠꦧ꧀ꦧꦴ ꦫꦸꦏ꧀ꦑꦴꦨꦶꦣꦴꦤꦴ. ꦥꦚ꧀ꦚꦴꦱꦪꦺꦴꦗꦤꦏ꧀ꦑꦤ꧀ꦣꦱꦴꦑꦴꦪꦴꦩꦴꦠꦶ’ ꦈꦧ꧀ꦧꦺꦣꦠꦺꦴ ꦥꦚ꧀ꦚꦴꦱꦪꦺꦴꦗꦤꦏ꧀ꦑꦤ꧀ꦣꦴꦪꦴꦩꦴ, ꦈꦧ꧀ꦧꦺꦣꦠꦺꦴ, ꦱꦩꦤ꧀ꦠꦠꦺꦴ ꦕ ꦥꦚ꧀ꦚꦴꦱꦪꦺꦴꦗꦤꦱꦴꦑꦴꦪꦴꦩꦴ ꦕ. ꦠꦠꦺꦴ ꦌꦮ ꦱꦠꦪꦺꦴꦗꦤꦮꦶꦠ꧀ꦡꦶꦟ꧀ꦟꦴ, ꦠꦴꦮꦢꦺꦮ ꦕ ꦈꦒ꧀ꦒꦠꦴ. ꦪꦱ꧀ꦱꦴꦤꦸꦨꦴꦮꦺꦤꦴꦠꦶ ꦪꦱ꧀ꦱꦴ ꦩꦲꦤ꧀ꦠꦠꦴ ꦏꦥ꧀ꦥꦛ꧀ꦜꦴꦪꦶꦠꦴꦢꦶꦥ꧀ꦥꦏꦴꦫꦺꦤ ꦥꦨꦴꦮꦺꦤ.

ꦒꦫꦸꦭ꦳ꦴꦤꦁ ꦱꦶꦩ꧀ꦧꦭꦶꦫꦸꦏ꧀ꦑꦺꦴ ꦱꦶꦤꦺꦫꦸꦱ꧀ꦱ ꦢꦸꦠꦶꦪꦥꦫꦶꦨꦟ꧀ꦝꦺ ꦥꦠꦶꦛ꧀ꦜꦶꦠꦺꦴ.

ꦱꦶꦫꦷꦱꦺꦤꦴꦠꦶ ꦥꦕ꧀ꦕꦠ꧀ꦠꦺ ꦏꦫꦟꦮꦕꦤꦁ. ꦱꦠ꧀ꦠꦩꦤ꧀ꦠꦶ ꦭꦶꦔ꧀ꦒꦮꦶꦥꦭ꧀ꦭꦴꦱꦺꦤ ꦮꦸꦠ꧀ꦠꦁ, ꦱꦶꦫꦷꦱꦺꦴ ꦨꦮꦠꦶ ꦱꦠ꧀ꦠꦩꦺꦴꦠꦶ ꦄꦠ꧀ꦡꦺꦴ.

ꦠꦠ꧀ꦡ ꦕꦟ꧀ꦝꦩꦟ꧀ꦝꦭꦁ ꦲꦺꦛ꧀ꦜꦴ, ꦱꦹꦫꦶꦪꦩꦟ꧀ꦝꦭꦁ ꦈꦥꦫꦶ. ꦠꦱ꧀ꦱ ꦄꦴꦱꦤ꧀ꦤꦨꦴꦮꦺꦤ ꦕꦤ꧀ꦢꦩꦟ꧀ꦝꦭꦁ ꦄꦠ꧀ꦠꦤꦺꦴ ꦖꦴꦪꦴꦪ ꦮꦶꦏꦭꦨꦴꦮꦺꦤ ꦈꦥꦛ꧀ꦜꦴꦠꦶ. ꦠꦴꦤꦶ ꦪꦺꦴꦗꦤꦤ꧀ꦠꦫꦶꦏꦴꦤꦶ ꦪꦸꦒꦤ꧀ꦣꦫꦒ꧀ꦒꦥꦩꦴꦟꦺ ꦄꦴꦏꦴꦱꦺ ꦮꦶꦕꦫꦤ꧀ꦠꦶ. ꦄꦱꦸꦫꦨꦮꦤꦁ ꦱꦶꦤꦺꦫꦸꦱ꧀ꦱ ꦲꦺꦛ꧀ꦜꦴ. ꦄꦮꦷꦕꦶ ꦗꦩ꧀ꦧꦸꦢꦷꦥꦱ꧀ꦱ. ꦗꦩ꧀ꦧꦸꦢꦷꦥꦺꦴ ꦱꦏꦛꦱꦟ꧀ꦜꦴꦤꦺꦴ. ꦄꦥꦫꦒꦺꦴꦪꦴꦤꦁ ꦄꦴꦢꦴꦱꦱꦟ꧀ꦜꦴꦤꦺꦴ. ꦥꦸꦧ꧀ꦧꦮꦶꦢꦺꦲꦺꦴ ꦄꦢ꧀ꦣꦕꦤ꧀ꦢꦱꦟ꧀ꦜꦴꦤꦺꦴ. ꦈꦠ꧀ꦠꦫꦏꦸꦫꦸ ꦥꦷꦜꦱꦟ꧀ꦜꦴꦤꦺꦴ. ꦠꦁꦠꦁꦤꦶꦮꦴꦱꦷꦤꦁ, ꦠꦁꦠꦁꦥꦫꦶꦮꦴꦫꦢꦷꦥꦮꦴꦱꦷꦤꦚ꧀ꦕ ꦩꦤꦸꦱ꧀ꦱꦴꦤꦁ ꦩꦸꦑꦩ꧀ꦥꦶ ꦠꦁꦠꦁꦱꦟ꧀ꦜꦴꦤꦤ꧀ꦠꦶ ꦮꦢꦤ꧀ꦠꦶ. ꦠꦢꦤ꧀ꦠꦫꦺꦱꦹꦠꦶ ꦠꦺꦱꦁ ꦕꦏ꧀ꦏꦮꦴꦭ꦳ꦴꦤꦁ ꦄꦤ꧀ꦠꦫꦺꦱꦸ. ꦠꦶꦟ꧀ꦟꦁ ꦲꦶ ꦥꦠ꧀ꦠꦴꦤꦁ ꦄꦚ꧀ꦚꦩꦚ꧀ꦚꦄꦴꦱꦤ꧀ꦤꦨꦴꦮꦺꦤ ꦜꦥꦶꦠꦴꦤꦁ ꦄꦤ꧀ꦠꦫꦱꦢꦶꦱꦺ ꦠꦶꦟ꧀ꦟꦁ ꦠꦶꦟ꧀ꦟꦁ ꦕꦏ꧀ꦏꦮꦴꦭ꦳ꦴꦤꦁ ꦄꦤ꧀ꦠꦫꦺ ꦌꦏꦺꦏꦺꦴ ꦭꦺꦴꦏꦤ꧀ꦠꦫꦤꦶꦫꦪꦺꦴ.

ꦄꦤꦤ꧀ꦠꦴꦤꦷꦠꦶ ꦄꦥꦫꦶꦩꦴꦟꦴꦤꦶ, ‘‘ꦌꦠ꧀ꦠꦏꦴꦤꦷ’’ꦠꦶ ꦄꦚ꧀ꦚꦺꦲꦶ ꦩꦶꦤꦶꦠꦸꦁ ꦄꦱꦏ꧀ꦏꦸꦟꦺꦪ꧀ꦪꦴꦤꦶ. ꦨꦒꦮꦴ ꦄꦤꦤ꧀ꦠꦺꦤ ꦧꦸꦢ꧀ꦣꦚꦴꦟꦺꦤ ꦄꦮꦺꦢꦶ ‘‘ꦄꦤꦤ꧀ꦠꦺꦴ ꦄꦴꦏꦴꦱꦺꦴ, ꦄꦤꦤ꧀ꦠꦺꦴ ꦱꦠ꧀ꦠꦤꦶꦏꦴꦪꦺꦴ, ꦄꦤꦤ꧀ꦠꦴꦤꦶ ꦕꦏ꧀ꦏꦮꦴꦭ꦳ꦴꦤꦷ’’ꦠꦶ ꦠꦶꦮꦶꦣꦩ꧀ꦥꦶ ꦄꦤꦤ꧀ꦠꦁ ꦧꦸꦢ꧀ꦣꦚꦴꦟꦁ ꦥꦫꦶꦕ꧀ꦖꦶꦤ꧀ꦢꦠꦶ ꦱꦪꦩ꧀ꦥꦶ ꦄꦤꦤ꧀ꦠꦠ꧀ꦠꦴ. ꦪꦴꦮꦠꦏꦁ ꦲꦶ ꦚꦺꦪ꧀ꦪꦁ, ꦠꦴꦮꦠꦏꦁ ꦚꦴꦟꦁ. ꦪꦴꦮꦠꦏꦁ ꦚꦴꦟꦁ, ꦠꦴꦮꦠꦏꦁ ꦚꦺꦪ꧀ꦪꦁ. ꦚꦺꦪ꧀ꦪꦥꦫꦶꦪꦤ꧀ꦠꦶꦏꦁ ꦚꦴꦟꦁ, ꦚꦴꦟꦥꦫꦶꦪꦤ꧀ꦠꦶꦏꦁ ꦚꦺꦪ꧀ꦪꦤ꧀ꦠꦶ. ꦠꦺꦤ ꦮꦸꦠ꧀ꦠꦁ ‘‘ꦄꦤꦤ꧀ꦠꦺꦤ ꦧꦸꦢ꧀ꦣꦚꦴꦟꦺꦤ ꦄꦮꦺꦢꦷ’’ꦠꦶ. ꦄꦤꦤ꧀ꦠꦠꦴ ꦕꦱ꧀ꦱ ꦄꦤꦤ꧀ꦠꦚꦺꦪ꧀ꦪꦥꦛꦶꦮꦶꦗ꧀ꦙꦤꦺꦤꦺꦮ ꦮꦺꦢꦶꦠꦧ꧀ꦧꦴ ꦠꦠ꧀ꦡ ꦄꦥ꧀ꦥꦛꦶꦲꦠꦕꦴꦫꦠ꧀ꦠꦴ. ꦤꦤꦸ ꦕꦺꦠ꧀ꦡ ꦮꦶꦮꦛ꧀ꦛꦴꦢꦷꦤꦩ꧀ꦥꦶ ꦮꦶꦢꦶꦠꦠꦴ ꦮꦠ꧀ꦠꦧ꧀ꦧꦴꦠꦶ? ꦱꦕ꧀ꦕꦁ ꦮꦠ꧀ꦠꦧ꧀ꦧꦁ, ꦱꦴ ꦥꦤ ꦥꦫꦠꦺꦴ ꦄꦨꦶꦚ꧀ꦚꦴꦏꦡꦴꦪꦁ ꦄꦴꦒꦩꦶꦱ꧀ꦱꦠꦷꦠꦶ ꦆꦣ ꦤ ꦒꦲꦶꦠꦴ.

꧑꧓꧘. ꦄꦠ꧀ꦠꦤꦴꦠꦶ ꦤꦶꦱ꧀ꦱꦏ꧀ꦏꦮꦕꦤꦩꦺꦠꦁ. ꦒꦸꦟꦺꦲꦶ ꦄꦠ꧀ꦠꦤꦴ ꦮꦶꦱꦶꦛ꧀ꦜꦠꦫꦱ꧀ꦱꦴꦠꦶ ꦱꦩ꧀ꦧꦤ꧀ꦣꦺꦴ. ꦠꦫ-ꦒ꧀ꦒꦲꦟꦁ ꦕꦺꦠ꧀ꦡ ‘‘ꦄꦤꦸꦠ꧀ꦠꦫꦺꦴ’’ꦠꦶ ꦥꦢꦱ꧀ꦱ ꦄꦠ꧀ꦡꦤꦶꦢ꧀ꦢꦺꦱꦠꦴꦪ ꦏꦠꦁ, ꦤ ꦮꦶꦱꦶꦛ꧀ꦜꦱ꧀ꦱ ꦏꦱ꧀ꦱꦕꦶ ꦄꦠ꧀ꦡꦶꦠꦴꦪ. ꦱꦢꦺꦮꦏꦺ ꦲꦶ ꦭꦺꦴꦏꦺ ꦱꦢꦶꦱꦏꦥ꧀ꦥꦺꦴꦥꦶ ꦤꦴꦩ ꦏꦺꦴꦕꦶ ꦠꦡꦴꦒꦠꦱ꧀ꦱ ꦤꦠ꧀ꦡꦶ, ꦏꦸꦠꦺꦴ ꦱꦢꦶꦱꦺꦴ. ꦮꦶꦱꦶꦛ꧀ꦜꦺ ꦥꦤ ꦏꦴ ꦏꦡꦴ. ꦏꦱ꧀ꦱꦕꦷꦠꦶ ꦏꦱ꧀ꦱꦕꦶꦥꦶ. ꦄꦨꦶꦨꦮꦠꦷꦠꦶ ꦱꦷꦭꦱꦩ꧀ꦥꦢꦴꦪ ꦈꦥꦤꦶꦱ꧀ꦱꦪꦨꦹꦠꦴꦤꦁ ꦲꦶꦫꦺꦴꦠ꧀ꦠꦥ꧀ꦥꦩꦺꦠ꧀ꦠꦴꦏꦫꦸꦟꦴꦤꦁ, ꦮꦶꦱꦺꦱꦥꦕ꧀ꦕꦪꦴꦤꦁ ꦱꦢ꧀ꦣꦴꦱꦠꦶꦮꦷꦫꦶꦪꦥꦚ꧀ꦚꦴꦤꦚ꧀ꦕ ꦈꦏ꧀ꦏꦁꦱꦥ꧀ꦥꦠ꧀ꦠꦶꦪꦴ ꦱꦩꦸꦢꦴꦒꦩꦠꦺꦴ ꦥꦛ꧀ꦜꦴꦪ ꦄꦤꦚ꧀ꦚꦱꦴꦣꦴꦫꦟꦺꦴ ꦱꦮꦴꦱꦤꦥꦛꦶꦥꦏ꧀ꦑꦱ꧀ꦱ ꦥꦲꦷꦤꦠ꧀ꦠꦴ ꦈꦏ꧀ꦏꦁꦱꦥꦴꦫꦩꦶꦥ꧀ꦥꦠ꧀ꦠꦺꦴ ꦱꦠ꧀ꦡꦸ ꦱꦷꦭꦒꦸꦟꦺꦴ. ꦠꦺꦤ ꦨꦒꦮꦴ ꦱꦢꦺꦮꦏꦁ ꦭꦺꦴꦏꦁ ꦄꦚ꧀ꦚꦢꦠ꧀ꦡꦸ ꦄꦨꦶꦨꦸꦪ꧀ꦪ ꦥꦮꦠ꧀ꦠꦠꦶ, ꦤ ꦱꦪꦁ ꦏꦺꦤꦕꦶ ꦄꦨꦶꦨꦸꦪ꧀ꦪꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦌꦮꦁ ꦱꦩꦴꦣꦶꦒꦸꦟꦴꦢꦷꦱꦸꦥꦶ ꦪꦡꦴꦫꦲꦁ ꦮꦠ꧀ꦠꦧ꧀ꦧꦁ. ꦱꦷꦭꦴꦢꦪꦺꦴ ꦕꦺꦠꦺ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦩꦶꦱ꧀ꦱꦏꦴ ꦮꦺꦢꦶꦠꦧ꧀ꦧꦴ. ꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦁ ꦥꦤ ꦭꦺꦴꦏꦶꦪꦁ ꦏꦴꦩꦴꦮꦕꦫꦩꦺꦮ.

ꦪꦢꦶ ꦌꦮꦁ, ꦏꦡꦁ ꦠꦺꦤ ꦱꦢꦺꦮꦏꦁ ꦭꦺꦴꦏꦁ ꦄꦨꦶꦨꦮꦠꦷꦠꦶ? ꦠꦱ꧀ꦱꦴꦥꦶ ꦄꦴꦤꦸꦨꦴꦮꦠꦺꦴ ꦄꦱꦢꦶꦱꦠ꧀ꦠꦴ. ꦠꦩ꧀ꦥꦶ ꦲꦶ ꦮꦶꦱꦪꦠꦺꦴ, ꦥꦮꦠ꧀ꦠꦶꦠꦺꦴ, ꦥꦮꦠ꧀ꦠꦶ ꦄꦴꦏꦴꦫꦠꦺꦴ ꦕ ꦈꦠ꧀ꦠꦫꦶꦠꦫꦩꦺꦮ. ꦠꦁ ꦲꦶ ꦄꦤꦚ꧀ꦚꦱꦴꦣꦴꦫꦟꦁ ꦱꦠ꧀ꦡꦸ ꦮꦶꦩꦸꦠ꧀ꦠꦶꦒꦸꦟꦁ ꦄꦴꦫꦧ꧀ꦨ ꦥꦮꦠ꧀ꦠꦠꦶ, ꦥꦮꦠ꧀ꦠꦩꦴꦤꦚ꧀ꦕ ꦄꦠꦏ꧀ꦏꦴꦮꦕꦫꦁ ꦥꦫꦩꦒꦩ꧀ꦨꦷꦫꦁ ꦱꦟ꧀ꦲꦱꦸꦑꦸꦩꦁ ꦱꦮꦶꦱꦪꦁ ꦥꦛꦶꦥꦏ꧀ꦑꦣꦩ꧀ꦩꦴꦤꦁ ꦱꦸꦥ꧀ꦥꦲꦷꦤꦠ꧀ꦠꦴ ꦱꦸꦛ꧀ꦜꦸ ꦥꦴꦏꦛꦁ ꦮꦶꦨꦹꦠꦠꦫꦁ ꦏꦠ꧀ꦮꦴ ꦥꦮꦠ꧀ꦠꦠꦶ, ꦱꦩ꧀ꦩꦢꦺꦮ ꦕ ꦮꦱꦷꦨꦴꦮꦱ꧀ꦱ ꦥꦴꦥꦶꦠꦠ꧀ꦠꦴ, ꦨꦮꦔ꧀ꦒꦥꦫꦶꦮꦴꦱꦱ꧀ꦱ ꦕ ꦄꦠꦶꦥꦫꦶꦠ꧀ꦠꦏꦠ꧀ꦠꦴ ꦭꦲꦸꦁ ꦭꦲꦸꦁ ꦥꦮꦠ꧀ꦠꦠꦷꦠꦶ.

ꦌꦮꦁ ꦱꦷꦭꦴꦢꦶꦒꦸꦟꦺꦲꦶ ꦨꦒꦮꦠꦺꦴ ꦈꦠ꧀ꦠꦫꦶꦠꦫꦱ꧀ꦱ ꦄꦨꦴꦮꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦱꦢꦶꦱꦱ꧀ꦱꦴꦥꦶ ꦄꦨꦴꦮꦁ ꦢꦱ꧀ꦱꦺꦠꦸꦁ ‘‘ꦄꦱꦩꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦱꦩꦺꦴꦠꦶ ꦌꦏꦱ꧀ꦩꦶꦁ ꦏꦴꦭꦺ ꦤꦠ꧀ꦡꦶ ꦌꦠꦱ꧀ꦱ ꦱꦷꦭꦴꦢꦶꦒꦸꦟꦺꦤ ꦱꦩꦴ ꦱꦢꦶꦱꦴꦠꦶ ꦄꦱꦩꦺꦴ. ꦠꦡꦴ ꦄꦱꦩꦺꦲꦶ ꦄꦠꦷꦠꦴꦤꦴꦒꦠꦧꦸꦢ꧀ꦣꦺꦲꦶ ꦱꦩꦺꦴ, ꦄꦱꦩꦴ ꦮꦴ ꦱꦩꦴ ꦌꦠꦱ꧀ꦱꦴꦠꦶ ꦄꦱꦩꦱꦩꦺꦴ. ꦱꦷꦭꦴꦢꦶꦒꦸꦟꦺꦤ ꦤꦠ꧀ꦡꦶ ꦌꦠꦱ꧀ꦱ ꦥꦛꦶꦩꦴꦠꦶ ꦄꦥ꧀ꦥꦛꦶꦩꦺꦴ. ꦱꦺꦱꦥꦢꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ. ꦠꦠ꧀ꦡ ꦈꦥꦩꦴꦩꦠ꧀ꦠꦁ ꦥꦛꦶꦩꦴ, ꦱꦢꦶꦱꦹꦥꦩꦴ ꦥꦛꦶꦨꦴꦒꦺꦴ, ꦪꦸꦒꦒ꧀ꦒꦴꦲꦮꦱꦺꦤ ꦜꦶꦠꦺꦴ ꦥꦛꦶꦥꦸꦒ꧀ꦒꦭꦺꦴ ꦮꦺꦢꦶꦠꦧ꧀ꦧꦺꦴ.

ꦤ ꦑꦺꦴ ꦥꦤꦴꦲꦁ ꦱꦩꦤꦸꦥꦱ꧀ꦱꦴꦩꦷꦠꦶ ꦩꦩ ꦱꦩꦤ꧀ꦠꦕꦏ꧀ꦑꦸꦤꦴ ꦲꦠ꧀ꦡꦠꦭꦺ ꦄꦴꦩꦭꦏꦁ ꦮꦶꦪ ꦱꦧ꧀ꦧꦭꦺꦴꦏꦁ ꦥꦱ꧀ꦱꦤ꧀ꦠꦺꦴꦥꦶ ꦠꦠ꧀ꦡ ꦱꦢꦺꦮꦏꦺ…ꦥꦺ… ꦥꦗꦴꦪ ꦄꦠ꧀ꦠꦤꦴ ꦄꦠ꧀ꦠꦠꦺꦴ ꦱꦷꦭꦱꦩ꧀ꦥꦤ꧀ꦤꦠꦫꦁ ꦱꦩ꧀ꦥꦤ꧀ꦤꦠꦫꦱꦷꦭꦁ ꦏꦚ꧀ꦕꦶ ꦥꦸꦒ꧀ꦒꦭꦁ ꦤ ꦑꦺꦴ ꦥꦤ ꦥꦱ꧀ꦱꦴꦩꦶ, ꦠꦴꦢꦶꦱꦱ꧀ꦱ ꦄꦨꦴꦮꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦄꦒ꧀ꦒꦥ꧀ꦥꦱꦴꦢꦱꦸꦠ꧀ꦠꦴꦢꦷꦤꦷꦠꦶ ꦌꦠ꧀ꦡ –

‘‘ꦪꦴꦮꦠꦴ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦄꦥꦢꦴ ꦮꦴ ꦢ꧀ꦮꦶꦥꦢꦴ ꦮꦴ ꦕꦠꦸꦥ꧀ꦥꦢꦴ ꦮꦴ ꦧꦲꦸꦥ꧀ꦥꦢꦴ ꦮꦴ ꦫꦹꦥꦶꦤꦺꦴ ꦮꦴ ꦄꦫꦹꦥꦶꦤꦺꦴ ꦮꦴ ꦱꦚ꧀ꦚꦶꦤꦺꦴ ꦮꦴ ꦄꦱꦚ꧀ꦚꦶꦤꦺꦴ ꦮꦴ ꦤꦺꦮꦱꦚ꧀ꦚꦶꦤꦴꦱꦚ꧀ꦚꦶꦤꦺꦴ ꦮꦴ, ꦠꦡꦴꦒꦠꦺꦴ ꦠꦺꦱꦁ ꦄꦒ꧀ꦒꦩꦏ꧀ꦑꦴꦪꦠꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ. ꦪꦺ, ꦨꦶꦏ꧀ꦑꦮꦺ, ꦧꦸꦢ꧀ꦣꦺ ꦥꦱꦤ꧀ꦤꦴ, ꦄꦒ꧀ꦒꦺ ꦠꦺ ꦥꦱꦤ꧀ꦤꦴ. ꦄꦒ꧀ꦒꦺ ꦑꦺꦴ ꦥꦤ ꦥꦱꦤ꧀ꦤꦴꦤꦁ ꦄꦒ꧀ꦒꦺꦴ ꦮꦶꦥꦴꦏꦺꦴ ꦲꦺꦴꦠꦷ’’ꦠꦶ (ꦄ. ꦤꦶ. ꧔.꧓꧔; ꧕.꧓꧒; ꧑꧐.꧑꧕; ꦆꦠꦶꦮꦸ꧙꧐) –

ꦆꦢꦁ ꦄꦒ꧀ꦒꦥ꧀ꦥꦱꦴꦢꦱꦸꦠ꧀ꦠꦁ. ꦄꦴꦢꦶ-ꦱꦢ꧀ꦢꦺꦤ –

‘‘ꦱꦢꦺꦮꦏꦺ…ꦥꦺ… ꦱꦢꦺꦮꦩꦤꦸꦱ꧀ꦱꦴꦪ ꦠꦡꦴꦒꦠꦺꦴ ꦄꦨꦶꦨꦹ ꦄꦤꦨꦶꦨꦹꦠꦺꦴ ꦄꦚ꧀ꦚꦢꦠ꧀ꦡꦸꦢꦱꦺꦴ ꦮꦱꦮꦠ꧀ꦠꦷ, ꦠꦱ꧀ꦩꦴ ‘ꦠꦡꦴꦒꦠꦺꦴ’ꦠꦶ ꦮꦸꦕ꧀ꦕꦠꦷ’’ꦠꦶ (ꦄ. ꦤꦶ. ꧔.꧒꧔; ꦢꦷ. ꦤꦶ. ꧓.꧑꧘꧘) –

ꦌꦮꦩꦴꦢꦷꦤꦶ ꦱꦸꦠ꧀ꦠꦥꦢꦴꦤꦶ ꦮꦺꦢꦶꦠꦧ꧀ꦧꦴꦤꦶ. ꦄꦴꦢꦶꦏꦴ ꦒꦴꦡꦴꦪꦺꦴꦠꦶ ꦌꦠ꧀ꦡ –

‘‘ꦄꦲꦁ ꦲꦶ ꦄꦫꦲꦴ ꦭꦺꦴꦏꦺ, ꦄꦲꦁ ꦱꦠ꧀ꦡꦴ ꦄꦤꦸꦠ꧀ꦠꦫꦺꦴ;

ꦌꦏꦺꦴꦩ꧀ꦲꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ, ꦱꦷꦠꦶꦨꦹꦠꦺꦴꦱ꧀ꦩꦶ ꦤꦶꦧ꧀ꦧꦸꦠꦺꦴ. (ꦩꦲꦴꦮ. ꧑꧑; ꦩ. ꦤꦶ. ꧑.꧒꧘꧕; ꧒.꧓꧔꧑);

‘‘ꦢꦤ꧀ꦠꦺꦴ ꦢꦩꦪꦠꦁ ꦱꦺꦛ꧀ꦜꦺꦴ, ꦱꦤ꧀ꦠꦺꦴ ꦱꦩꦪꦠꦁ ꦆꦱꦶ;

ꦩꦸꦠ꧀ꦠꦺꦴ ꦩꦺꦴꦕꦪꦠꦁ ꦄꦒ꧀ꦒꦺꦴ, ꦠꦶꦟ꧀ꦟꦺꦴ ꦠꦴꦫꦪꦠꦁ ꦮꦫꦺꦴ. (ꦆꦠꦶꦮꦸ. ꧑꧑꧒);

‘‘ꦤꦪꦶꦩꦱ꧀ꦩꦶꦁ ꦭꦺꦴꦏꦺ ꦥꦫꦱ꧀ꦩꦶꦁ ꦮꦴ ꦥꦤ,

ꦧꦸꦢ꧀ꦣꦺꦤ ꦱꦺꦛ꧀ꦜꦺꦴ ꦱꦢꦶꦱꦺꦴ ꦕ ꦮꦶꦗ꧀ꦗꦠꦶ;

ꦪꦩꦴꦲꦸ ꦢꦏ꧀ꦑꦶꦟꦺꦪ꧀ꦪꦴꦤꦁ ꦄꦒ꧀ꦒꦠꦁ ꦒꦠꦺꦴ,

ꦥꦸꦚ꧀ꦚꦠ꧀ꦡꦶꦏꦴꦤꦁ ꦮꦶꦥꦸꦭꦦꦭꦺꦱꦶꦤ’’ꦤ꧀ꦠꦶ. (ꦮꦶ. ꦮ. ꧑꧐꧔꧗; ꦏꦡꦴ. ꧗꧙꧙) –

ꦌꦮꦩꦴꦢꦶꦏꦴ ꦒꦴꦡꦴ ꦮꦶꦠ꧀ꦡꦴꦫꦺꦠꦧ꧀ꦧꦴ.

꧑꧓꧙. ꦢꦩꦺꦠꦷꦠꦶ ꦱꦩꦺꦠꦶ, ꦏꦴꦪꦱꦩꦴꦢꦷꦲꦶ ꦪꦺꦴꦗꦺꦠꦷꦠꦶ ꦄꦠ꧀ꦡꦺꦴ. ꦠꦁ ꦥꦤ ꦏꦴꦪꦱꦩꦴꦢꦷꦲꦶ ꦪꦺꦴꦗꦤꦁ ꦪꦡꦴꦫꦲꦁ ꦠꦢꦔ꧀ꦒꦮꦶꦤꦪꦴꦢꦷꦱꦸ ꦥꦠꦶꦛ꧀ꦜꦴꦥꦤꦁ ꦲꦺꦴꦠꦷꦠꦶ ꦄꦴꦲ ‘‘ꦮꦶꦤꦺꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦷ’’ꦠꦶ. ꦢꦩꦺꦠꦸꦁ ꦪꦸꦠ꧀ꦠꦴꦠꦶ ꦢꦩꦤꦴꦫꦲꦴ. ꦄꦩꦤꦸꦱ꧀ꦱꦥꦸꦫꦶꦱꦴꦠꦶ ꦌꦠ꧀ꦡ ꦤ ꦩꦤꦸꦱ꧀ꦱꦴꦠꦶ ꦄꦩꦤꦸꦱ꧀ꦱꦴ. ꦠꦁꦱꦢꦶꦱꦠꦴ ꦌꦠ꧀ꦡ ꦗꦺꦴꦠꦷꦪꦠꦶ, ꦠꦺꦤ ꦩꦤꦸꦱ꧀ꦱꦠ꧀ꦠꦩꦠ꧀ꦠꦁ ꦤꦠ꧀ꦡꦶ, ꦄꦚ꧀ꦚꦁ ꦱꦩꦴꦤꦤ꧀ꦠꦶ ꦪꦏ꧀ꦑꦴꦢꦪꦺꦴ ‘‘ꦄꦩꦤꦸꦱ꧀ꦱꦴ’’ꦠꦶ ꦄꦣꦶꦥ꧀ꦥꦺꦠꦴ, ꦤ ꦪꦺ ꦏꦺꦕꦶ ꦩꦤꦸꦱ꧀ꦱꦺꦲꦶ ꦄꦚ꧀ꦚꦺ. ꦠꦡꦴ ꦲꦶ ꦠꦶꦫꦕ꧀ꦖꦴꦤꦥꦸꦫꦶꦱꦴꦤꦁ ꦮꦶꦱꦸꦁ ꦒꦲꦟꦁ ꦏꦠꦁ, ꦪꦏ꧀ꦑꦴꦢꦪꦺꦴ ꦌꦮ ꦕ ꦤꦶꦢ꧀ꦢꦶꦛ꧀ꦜꦴ. ꦄꦥꦭꦴꦭꦺꦴ ꦲꦶꦩꦮꦤ꧀ꦠꦮꦴꦱꦷ. ꦕꦹꦭ꦳ꦺꦴꦢꦫꦩꦲꦺꦴꦢꦫꦴ ꦤꦴꦒꦢꦷꦥꦮꦴꦱꦶꦤꦺꦴ. ꦄꦒ꧀ꦒꦶꦱꦶꦑꦣꦹꦩꦱꦶꦑꦴ ꦱꦷꦲꦭ꦳ꦢꦷꦥꦮꦴꦱꦶꦤꦺꦴ. ꦤꦶꦧ꧀ꦧꦶꦱꦴ ꦏꦠꦴ ꦢꦺꦴꦱꦮꦶꦱꦱ꧀ꦱ ꦮꦶꦤꦺꦴꦢꦤꦺꦤ. ꦠꦺꦤꦴꦲ ‘‘ꦱꦫꦟꦺꦱꦸ ꦕ ꦱꦷꦭꦺꦱꦸ ꦕ ꦥꦠꦶꦛ꧀ꦜꦴꦥꦶꦠꦴ’’ꦠꦶ. ꦏꦹꦛꦢꦤ꧀ꦠꦴꦢꦪꦺꦴꦠꦶ ꦄꦴꦢꦶ-ꦱꦢ꧀ꦢꦺꦤ ꦓꦺꦴꦛꦩꦸꦑꦈꦥꦴꦭꦶꦒꦲꦥꦠꦶꦄꦴꦢꦷꦤꦁ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦱꦏ꧀ꦏꦢꦺꦮꦫꦴꦗꦴꦢꦪꦺꦴꦠꦶ ꦄꦴꦢꦶ-ꦱꦢ꧀ꦢꦺꦤ ꦄꦗꦏꦭꦴꦥꦪꦏ꧀ꦑꦧꦏꦧ꧀ꦫꦲ꧀ꦩꦴꦢꦷꦤꦁ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦆꦢꦁ ꦕꦺꦠ꧀ꦡ ꦱꦸꦠ꧀ꦠꦤ꧀ꦠꦶ ꦆꦢꦁ ꦏꦺꦱꦶꦱꦸꦠ꧀ꦠꦁ. ꦮꦶꦤꦷꦠꦴ ꦮꦶꦕꦶꦠ꧀ꦫꦺꦲꦶ ꦮꦶꦤꦪꦤꦹꦥꦴꦪꦺꦲꦷꦠꦶ ꦌꦠꦱ꧀ꦩꦶꦁ ꦄꦠ꧀ꦡꦺ ꦮꦶꦠ꧀ꦡꦴꦫꦺꦠꦧ꧀ꦧꦁ ꦪꦡꦴꦫꦲꦁ ꦱꦟ꧀ꦲꦴꦢꦷꦲꦶ ꦈꦥꦴꦪꦺꦲꦶ ꦮꦶꦤꦪꦱ꧀ꦱ ꦢꦷꦥꦤꦠꦺꦴ.

ꦮꦶꦱꦸꦢ꧀ꦣꦱꦷꦭꦴꦢꦷꦤꦁ ꦥꦜꦩꦗ꧀ꦙꦴꦤꦴꦢꦷꦤꦷꦠꦶ ‘‘ꦮꦶꦱꦸꦢ꧀ꦣꦱꦷꦭꦱ꧀ꦱ ꦥꦜꦩꦗ꧀ꦙꦴꦤꦁ, ꦥꦜꦩꦗ꧀ꦙꦴꦤꦭꦴꦨꦶꦤꦺꦴ ꦢꦸꦠꦶꦪꦗ꧀ꦙꦴꦤ’’ꦤ꧀ꦠꦶꦄꦴꦢꦶꦤꦴ ꦠꦱ꧀ꦱ ꦠꦱ꧀ꦱ ꦈꦥꦫꦹꦥꦫꦶ ꦮꦶꦱꦺꦱꦁ ꦄꦴꦕꦶꦏ꧀ꦑꦤ꧀ꦠꦺꦴꦠꦶ ꦱꦩ꧀ꦧꦤ꧀ꦣꦺꦴ. ꦱꦺꦴꦠꦴꦥꦤ꧀ꦤꦴꦢꦷꦤꦤ꧀ꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ‘‘ꦢꦤ꧀ꦠꦺꦥꦶ ꦢꦩꦺꦠꦶꦪꦺꦮꦴ’’ꦠꦶ ꦆꦢꦁ ꦥꦸꦧ꧀ꦧꦺ ‘‘ꦱꦧ꧀ꦧꦺꦤ ꦱꦧ꧀ꦧꦁ ꦢꦩꦡꦁ ꦄꦤꦸꦥꦒꦠꦴ ꦥꦸꦫꦶꦱꦢꦩ꧀ꦩꦴ’’ꦠꦶ ꦮꦸꦠ꧀ꦠꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ. ꦪꦺ ꦥꦤ ꦮꦶꦥ꧀ꦥꦏꦠꦢꦩ꧀ꦩꦨꦴꦮꦴ ꦱꦧ꧀ꦧꦡꦴ ꦢꦩꦺꦠꦧ꧀ꦧꦠꦁ ꦤꦴꦠꦶꦮꦠ꧀ꦠꦴ, ꦠꦺ ꦱꦠ꧀ꦠꦺ ꦱꦤ꧀ꦣꦴꦪ ‘‘ꦢꦤ꧀ꦠꦺꦥꦶ ꦢꦩꦺꦠꦶꦪꦺꦮꦴ’’ꦠꦶ ꦮꦸꦠ꧀ꦠꦁ. ꦠꦺꦥꦶ ꦲꦶ ꦥꦸꦫꦶꦱꦢꦩ꧀ꦩꦴ ꦌꦮꦴꦠꦶ, ꦪꦠꦺꦴ ꦤꦺ ꦱꦠ꧀ꦡꦴ ꦢꦩꦺꦠꦶ.

ꦄꦠ꧀ꦡꦥꦢꦤ꧀ꦠꦶ ꦄꦠ꧀ꦡꦴꦨꦶꦧ꧀ꦪꦚ꧀ꦗꦏꦥꦢꦁ, ꦮꦴꦏ꧀ꦪꦤ꧀ꦠꦶ ꦄꦠ꧀ꦡꦺꦴ. ꦮꦴꦏ꧀ꦪꦺꦤ ꦲꦶ ꦄꦠ꧀ꦡꦴꦨꦶꦧ꧀ꦪꦠ꧀ꦠꦶ, ꦤ ꦤꦴꦩꦴꦢꦶꦥꦢꦩꦠ꧀ꦠꦺꦤ. ꦌꦏꦥꦢꦨꦴꦮꦺꦤ ꦕ ꦄꦤꦚ꧀ꦚꦱꦴꦣꦴꦫꦟꦺꦴ ꦱꦠ꧀ꦡꦸ ꦥꦸꦫꦶꦱꦢꦩ꧀ꦩꦱꦴꦫꦡꦶꦨꦴꦮꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ. ꦠꦺꦤꦴꦲ ‘‘ꦨꦒꦮꦴ ꦲꦷ’’ꦠꦶꦄꦴꦢꦶ. ꦄꦛ꧀ꦜ ꦢꦶꦱꦴꦠꦶ ꦄꦛ꧀ꦜ ꦱꦩꦴꦥꦠ꧀ꦠꦶꦪꦺꦴ. ꦠꦴ ꦲꦶ ꦄꦚ꧀ꦚꦩꦚ꧀ꦚꦱꦩ꧀ꦧꦤ꧀ꦣꦴꦥꦶ ꦄꦱꦁꦏꦶꦟ꧀ꦟꦨꦴꦮꦺꦤ ꦢꦶꦱ꧀ꦱꦤ꧀ꦠꦶ ꦄꦥꦢꦶꦱ꧀ꦱꦤ꧀ꦠꦷꦠꦶ ꦢꦶꦱꦴ, ꦢꦶꦱꦴ ꦮꦶꦪꦴꦠꦶ ꦮꦴ ꦢꦶꦱꦴ. ꦄꦱꦗ꧀ꦗꦩꦴꦤꦴꦠꦶ ꦤ ꦱꦗ꧀ꦗꦩꦴꦤꦴ ꦮꦱꦷꦨꦴꦮꦥ꧀ꦥꦠ꧀ꦠꦶꦪꦴ ꦤꦶꦱ꧀ꦱꦔ꧀ꦒꦕꦴꦫꦴ. ꦣꦴꦮꦤ꧀ꦠꦶ ꦗꦮꦤꦮꦸꦠ꧀ꦠꦶꦪꦺꦴꦒꦠꦺꦴ. ꦌꦏꦁꦪꦺꦮ ꦢꦶꦱꦁ ꦣꦴꦮꦠꦶ, ꦄꦠ꧀ꦠꦤꦺꦴ ꦏꦴꦪꦁ ꦄꦥꦫꦶꦮꦠ꧀ꦠꦺꦤ꧀ꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦱꦠ꧀ꦡꦴꦫꦴ ꦥꦤ ꦢꦩꦶꦠꦴ ꦥꦸꦫꦶꦱꦢꦩ꧀ꦩꦴ ꦌꦏꦶꦫꦶꦪꦴꦥꦡꦺꦤꦺꦮ ꦄꦛ꧀ꦜ ꦢꦶꦱꦴ ꦣꦴꦮꦤ꧀ꦠꦶ. ꦠꦺꦤꦴꦲ ‘‘ꦌꦏꦥꦭ꧀ꦭꦔ꧀ꦏꦺꦤꦺꦮ ꦤꦶꦱꦶꦤ꧀ꦤꦴ’’ꦠꦶ. ꦄꦛ꧀ꦜ ꦢꦶꦱꦴꦠꦶ ꦕ ꦤꦶꦢꦱ꧀ꦱꦤꦩꦠ꧀ꦠꦩꦺꦠꦁ, ꦭꦺꦴꦏꦶꦪꦺꦲꦶ ꦄꦒꦠꦥꦸꦧ꧀ꦧꦁ ꦤꦶꦫꦺꦴꦣꦱꦩꦴꦥꦠ꧀ꦠꦶꦢꦶꦱꦁ, ꦄꦩꦠꦢꦶꦱꦚ꧀ꦕ ꦥꦏ꧀ꦑꦤ꧀ꦢꦤꦠꦺꦴ.

꧑꧔꧐. ꦢꦶꦛ꧀ꦜꦣꦩ꧀ꦩꦺꦴ ꦮꦸꦕ꧀ꦕꦠꦶ ꦥꦕ꧀ꦕꦏ꧀ꦑꦺꦴ ꦄꦠ꧀ꦠꦨꦴꦮꦺꦴ, ꦠꦠ꧀ꦡ ꦤꦶꦪꦸꦠ꧀ꦠꦺꦴꦠꦶ ꦢꦶꦛ꧀ꦜꦣꦩ꧀ꦩꦶꦏꦺꦴ, ꦆꦣꦭꦺꦴꦏꦠ꧀ꦡꦺꦴ. ꦏꦩ꧀ꦩꦏꦶꦭꦺꦱꦮꦱꦺꦤ ꦱꦩ꧀ꦥꦫꦺꦠꦧ꧀ꦧꦠꦺꦴ ꦱꦩ꧀ꦩꦴ ꦒꦤ꧀ꦠꦧ꧀ꦧꦠꦺꦴ ꦱꦩ꧀ꦥꦫꦴꦪꦺꦴ, ꦥꦫꦭꦺꦴꦏꦺꦴ, ꦠꦠ꧀ꦡ ꦤꦶꦪꦸꦠ꧀ꦠꦺꦴꦠꦶ ꦱꦩ꧀ꦥꦫꦴꦪꦶꦏꦺꦴ, ꦥꦫꦭꦺꦴꦏꦠ꧀ꦡꦺꦴ. ꦥꦫꦩꦺꦴ ꦈꦠ꧀ꦠꦩꦺꦴ ꦄꦠ꧀ꦡꦺꦴ ꦥꦫꦩꦠ꧀ꦡꦺꦴ, ꦤꦶꦧ꧀ꦧꦴꦤꦁ. ꦠꦺꦲꦶ ꦢꦶꦛ꧀ꦜꦣꦩ꧀ꦩꦶꦏꦱꦩ꧀ꦥꦫꦴꦪꦶꦏꦥꦫꦩꦠ꧀ꦡꦺꦲꦶ. ꦪꦡꦴꦫꦲꦤ꧀ꦠꦶ ꦪꦡꦴꦤꦸꦫꦹꦥꦁ. ꦠꦺꦱꦸ ꦄꦠ꧀ꦡꦺꦱꦸ ꦪꦺꦴ ꦪꦺꦴ ꦥꦸꦒ꧀ꦒꦭꦺꦴ ꦪꦁ ꦪꦁ ꦄꦫꦲꦠꦶ, ꦠꦢꦤꦸꦫꦹꦥꦁ. ꦄꦤꦸꦱꦴꦱꦠꦷꦠꦶ ꦮꦶꦤꦺꦠꦶ ꦠꦱ꧀ꦩꦶꦁ ꦄꦠ꧀ꦡꦺ ꦥꦠꦶꦛ꧀ꦜꦥꦺꦠꦶ, ꦱꦲ ꦄꦠ꧀ꦡꦺꦤ ꦮꦠ꧀ꦠꦠꦷꦠꦶ ꦱꦠ꧀ꦡꦺꦴ, ꦨꦟ꧀ꦝꦩꦹꦭꦺꦤ ꦮꦴꦟꦶꦗ꧀ꦗꦴꦪ ꦢꦺꦱꦤ꧀ꦠꦫꦁ ꦒꦕ꧀ꦖꦤ꧀ꦠꦺꦴ ꦗꦤꦱꦩꦹꦲꦺꦴ. ꦲꦶꦠꦸꦥꦢꦺꦱꦴꦢꦶꦮꦱꦺꦤ ꦥꦫꦶꦥꦴꦭꦺꦠꦧ꧀ꦧꦺꦴ ꦱꦴꦱꦶꦠꦧ꧀ꦧꦺꦴ ꦱꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦱꦠ꧀ꦡꦴ, ꦱꦠ꧀ꦡꦮꦴꦲꦺꦴ. ꦱꦺꦴ ꦮꦶꦪ ꦨꦒꦮꦴꦠꦶ ꦄꦴꦲ ‘‘ꦱꦠ꧀ꦡꦴ ꦮꦶꦪꦴꦠꦶ ꦱꦠ꧀ꦡꦴ, ꦨꦒꦮꦴ ꦱꦠ꧀ꦡꦮꦴꦲꦺꦴ’’ꦠꦶ.

ꦆꦢꦴꦤꦶ ꦠꦩꦠ꧀ꦡꦁ ꦤꦶꦢ꧀ꦢꦺꦱꦥꦴꦭ꦳ꦶꦤꦪꦺꦤ ꦢꦱ꧀ꦱꦺꦠꦸꦁ ‘‘ꦪꦡꦴ ꦱꦠ꧀ꦡꦮꦴꦲꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦠ꧀ꦡꦺꦠꦶ ꦱꦠ꧀ꦡꦶꦏꦺ ꦗꦤꦺ. ꦏꦁ ꦠꦴꦫꦺꦤ꧀ꦠꦶ ꦌꦠ꧀ꦡꦴꦠꦶ ꦏꦤ꧀ꦠꦴꦫꦺꦴ, ꦤꦶꦫꦸꦢꦏꦺꦴ ꦄꦫꦚ꧀ꦚꦥ꧀ꦥꦢꦺꦱꦺꦴ. ꦫꦸꦭ꦳꧀ꦲꦷꦮꦱꦺꦤ ꦥꦤ ꦆꦠꦫꦺꦴꦥꦶ ꦄꦫꦚ꧀ꦚꦥ꧀ꦥꦢꦺꦱꦺꦴ ꦠꦡꦴ ꦮꦸꦕ꧀ꦕꦠꦶ. ꦕꦺꦴꦫꦏꦤ꧀ꦠꦴꦫꦤ꧀ꦠꦶ ꦕꦺꦴꦫꦺꦲꦶ ꦄꦣꦶꦛ꧀ꦜꦶꦠꦏꦤ꧀ꦠꦴꦫꦁ. ꦠꦡꦴ ꦮꦴꦭ꦳ꦏꦤ꧀ꦠꦴꦫꦁ. ꦢꦸꦧ꧀ꦨꦶꦏ꧀ꦑꦏꦤ꧀ꦠꦴꦫꦤ꧀ꦠꦶ ꦢꦸꦭ꧀ꦭꦨꦨꦶꦏ꧀ꦑꦁ ꦏꦤ꧀ꦠꦴꦫꦁ. ꦠꦴꦫꦺꦠꦷꦠꦶ ꦄꦑꦺꦩꦤ꧀ꦠꦛ꧀ꦜꦴꦤꦁ ꦄꦠꦶꦏ꧀ꦏꦴꦩꦺꦠꦶ. ꦈꦠ꧀ꦠꦴꦫꦺꦠꦷꦠꦶꦄꦴꦢꦶ ꦈꦥꦱꦒ꧀ꦒꦺꦤ ꦥꦢꦁ ꦮꦝ꧀ꦞꦺꦠ꧀ꦮꦴ ꦮꦸꦠ꧀ꦠꦁ. ꦄꦡ ꦮꦴ ꦈꦠ꧀ꦠꦴꦫꦺꦠꦷꦠꦶ ꦑꦺꦩꦤ꧀ꦠꦨꦹꦩꦶꦁ ꦈꦥꦤꦺꦤ꧀ꦠꦺꦴ ꦠꦴꦫꦺꦠꦶ. ꦤꦶꦠ꧀ꦠꦴꦫꦺꦠꦷꦠꦶ ꦄꦑꦺꦩꦤ꧀ꦠꦛ꧀ꦜꦴꦤꦠꦺꦴ ꦤꦶꦏ꧀ꦑꦴꦩꦺꦤ꧀ꦠꦺꦴ ꦠꦴꦫꦺꦠꦶ. ꦥꦠꦴꦫꦺꦠꦷꦠꦶ ꦥꦫꦶꦒ꧀ꦒꦲꦺꦠ꧀ꦮꦴ ꦠꦴꦫꦺꦠꦶ, ꦲꦠ꧀ꦡꦺꦤ ꦥꦫꦶꦒ꧀ꦒꦲꦺꦠ꧀ꦮꦴ ꦮꦶꦪ ꦠꦴꦫꦺꦠꦷꦠꦶ ꦄꦠ꧀ꦡꦺꦴ. ꦱꦧ꧀ꦧꦩ꧀ꦥꦺꦠꦁ ꦠꦴꦫꦟꦸꦠ꧀ꦠꦴꦫꦟꦴꦢꦶꦑꦺꦩꦛ꧀ꦜꦴꦤꦺ ꦜꦥꦤꦩꦺꦮꦴꦠꦶ ꦄꦴꦲ ‘‘ꦑꦺꦩꦤ꧀ꦠꦨꦹꦩꦶꦁ ꦱꦩ꧀ꦥꦴꦥꦺꦠꦷ’’ꦠꦶ. ꦱꦠ꧀ꦠꦺꦠꦶ ꦮꦺꦤꦺꦪ꧀ꦪꦱꦠ꧀ꦠꦺ. ꦩꦲꦴꦒꦲꦤꦠꦴꦪ, ꦩꦲꦴꦤꦠ꧀ꦡꦠꦴꦪ, ꦢꦸꦤ꧀ꦤꦶꦠ꧀ꦡꦫꦟꦠꦴꦪ ꦕ ꦗꦴꦠꦶꦪꦺꦮ ꦏꦤ꧀ꦠꦴꦫꦺꦴ ꦗꦴꦠꦶꦏꦤ꧀ꦠꦴꦫꦺꦴ, ꦠꦁ ꦗꦴꦠꦶꦏꦤ꧀ꦠꦴꦫꦁ.

ꦈꦏ꧀ꦏꦛ꧀ꦜꦥꦫꦶꦕ꧀ꦖꦺꦢꦮꦱꦺꦤꦴꦠꦶ ꦈꦏ꧀ꦏꦛ꧀ꦜꦱꦠ꧀ꦠꦥꦫꦶꦕ꧀ꦖꦺꦢꦮꦱꦺꦤ. ꦢꦺꦮꦩꦤꦸꦱ꧀ꦱꦴ ꦌꦮ ꦲꦶ ꦈꦏ꧀ꦏꦛ꧀ꦜꦱꦠ꧀ꦠꦴ, ꦤ ꦠꦶꦫꦕ꧀ꦖꦴꦤꦴꦢꦪꦺꦴ. ꦨꦧ꧀ꦧꦥꦸꦒ꧀ꦒꦭꦥꦫꦶꦕ꧀ꦖꦺꦢꦮꦱꦺꦤꦴꦠꦶ ꦱꦩ꧀ꦩꦠ꧀ꦠꦤꦶꦪꦴꦩꦺꦴꦏ꧀ꦏꦩꦤꦱ꧀ꦱ ꦪꦺꦴꦒ꧀ꦪꦥꦸꦒ꧀ꦒꦭꦱ꧀ꦱ ꦥꦫꦶꦕ꧀ꦖꦶꦤ꧀ꦢꦤꦮꦱꦺꦤ. ꦌꦠꦤ꧀ꦠꦶ ‘‘ꦢꦺꦮꦩꦤꦸꦱ꧀ꦱꦴꦤ’’ꦤ꧀ꦠꦶ ꦌꦠꦁ ꦮꦕꦤꦁ. ꦨꦒꦮꦠꦺꦴꦠꦶ ꦤꦶꦱ꧀ꦱꦏ꧀ꦏꦮꦕꦤꦁ ꦪꦡꦴ ‘‘ꦈꦥꦗ꧀ꦙꦴꦪꦠꦺꦴ ꦄꦗ꧀ꦙꦺꦠꦷ’’ꦠꦶ, ꦨꦒꦮꦠꦺꦴ ꦱꦤ꧀ꦠꦶꦏꦺꦠꦶ ꦮꦴ ꦄꦠ꧀ꦡꦺꦴ. ꦈꦥꦤꦶꦱ꧀ꦱꦪꦱꦩ꧀ꦥꦠ꧀ꦠꦶꦤ꧀ꦠꦶ ꦠꦶꦲꦺꦠꦸꦏꦥꦛꦶꦱꦤ꧀ꦣꦶꦄꦴꦢꦶꦏꦁ ꦩꦒ꧀ꦒꦦꦭꦴꦣꦶꦒꦩꦱ꧀ꦱ ꦧꦭꦮꦏꦴꦫꦟꦁ.

ꦒꦒ꧀ꦒꦫꦴꦪꦴꦠꦶ ꦒꦒ꧀ꦒꦫꦴꦪ ꦤꦴꦩ ꦫꦚ꧀ꦚꦺꦴ ꦢꦺꦮꦶꦪꦴ, ꦠꦴꦪ ꦮꦴ ꦏꦴꦫꦶꦠꦠ꧀ꦠꦴ ‘‘ꦒꦒ꧀ꦒꦫꦴ’’ꦠꦶ ꦭꦢ꧀ꦣꦤꦴꦩꦴꦪ. ꦱꦫꦺ ꦤꦶꦩꦶꦠ꧀ꦠꦁ ꦄꦒ꧀ꦒꦲꦺꦱꦷꦠꦶ ‘‘ꦣꦩ꧀ꦩꦺꦴ ꦌꦱꦺꦴ ꦮꦸꦕ꧀ꦕꦠꦷ’’ꦠꦶ ꦣꦩ꧀ꦩꦱꦚ꧀ꦚꦴꦪ ꦱꦫꦺ ꦤꦶꦩꦶꦠ꧀ꦠꦁ ꦒꦟ꧀ꦲꦶ, ꦒꦟ꧀ꦲꦤ꧀ꦠꦺꦴ ꦕ ꦥꦱꦤ꧀ꦤꦕꦶꦠ꧀ꦠꦺꦴ ꦥꦫꦶꦱꦥꦫꦶꦪꦤ꧀ꦠꦺ ꦤꦶꦥꦗ꧀ꦗꦶ. ꦱꦤ꧀ꦤꦶꦫꦸꦩ꧀ꦨꦶꦠ꧀ꦮꦴ ꦄꦛ꧀ꦜꦴꦱꦷꦠꦶ ꦠꦱ꧀ꦱ ꦱꦷꦱꦺ ꦢꦟ꧀ꦝꦱ꧀ꦱ ꦜꦥꦶꦠꦨꦴꦮꦁ ꦄꦥꦱ꧀ꦱꦤ꧀ꦠꦺꦴ ꦠꦠ꧀ꦡ ꦢꦟ꧀ꦝꦁ ꦈꦥ꧀ꦥꦷꦭ꦳ꦺꦠ꧀ꦮꦴ ꦄꦛ꧀ꦜꦴꦱꦶ. ꦩꦟ꧀ꦝꦹꦏꦺꦴꦥꦶ ꦢꦟ꧀ꦝꦺ ꦜꦥꦶꦠꦺꦥꦶ ꦈꦥ꧀ꦥꦷꦭ꦳ꦶꦠꦺꦥꦶ ꦣꦩ꧀ꦩꦒꦠꦺꦤ ꦥꦱꦴꦢꦺꦤ ꦮꦶꦱ꧀ꦱꦫꦩꦏꦫꦺꦴꦤ꧀ꦠꦺꦴꦮ ꦏꦴꦭꦩꦏꦴꦱꦶ. ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦱꦠ꧀ꦠꦴꦤꦁ ꦄꦪꦁ ꦣꦩ꧀ꦩꦠꦴ, ꦪꦴ ‘‘ꦏꦸꦠꦺꦴꦲꦁ ꦆꦣ ꦤꦶꦧ꧀ꦧꦠ꧀ꦠꦺꦴ, ꦠꦠ꧀ꦡ ꦏꦶꦁ ꦤꦸ ꦑꦺꦴ ꦏꦩ꧀ꦩꦩꦏꦴꦱꦶ’’ꦤ꧀ꦠꦶ ꦄꦴꦮꦗ꧀ꦗꦤꦴ. ꦠꦱ꧀ꦩꦴ ꦄꦠ꧀ꦠꦤꦺꦴ ꦥꦸꦫꦶꦩꦨꦮꦱ꧀ꦱ ꦢꦶꦛ꧀ꦜꦠ꧀ꦠꦴ ꦄꦴꦲ ‘‘ꦄꦫꦺ ꦄꦲꦩ꧀ꦥꦶ ꦤꦴꦩ ꦆꦣꦤꦶꦧ꧀ꦧꦠ꧀ꦠꦺꦴ’’ꦠꦶ. ꦨꦒꦮꦠꦺꦴ ꦥꦴꦢꦺ ꦮꦤ꧀ꦢꦶ ꦏꦠꦚ꧀ꦚꦸꦠꦴꦱꦁꦮꦝ꧀ꦞꦶꦠꦺꦤ ꦥꦺꦩꦒꦴꦫꦮꦧꦲꦸꦩꦴꦤꦺꦤ.

ꦨꦒꦮꦴ ꦗꦴꦤꦤ꧀ꦠꦺꦴꦮ ꦩꦲꦴꦗꦤꦱ꧀ꦱ ꦏꦩ꧀ꦩꦦꦭꦁ, ꦧꦸꦢ꧀ꦣꦴꦤꦸꦨꦴꦮꦚ꧀ꦕ ꦥꦕ꧀ꦕꦏ꧀ꦑꦁ ꦏꦴꦠꦸꦏꦴꦩꦺꦴ ‘‘ꦏꦺꦴ ꦩꦺ ꦮꦤ꧀ꦢꦠꦷ’’ꦠꦶ ꦒꦴꦡꦴꦪ ꦥꦸꦕ꧀ꦖꦶ. ꦠꦠ꧀ꦡ ꦏꦺꦴꦠꦶ ꦢꦺꦮꦤꦴꦒꦪꦏ꧀ꦑꦒꦤ꧀ꦣꦧ꧀ꦧꦴꦢꦷꦱꦸ ꦏꦺꦴ, ꦏꦠꦩꦺꦴꦠꦶ ꦄꦠ꧀ꦡꦺꦴ. ꦩꦺꦠꦶ ꦩꦩ. ꦥꦴꦢꦴꦤꦷꦠꦶ ꦥꦴꦢꦺ. ꦆꦢ꧀ꦣꦶꦪꦴꦠꦶ ꦆꦩꦴꦪ ꦌꦮꦫꦹꦥꦴꦪ ꦢꦺꦮꦶꦢ꧀ꦣꦶꦪꦴ. ‘‘ꦪꦱꦱꦴ’’ꦠꦶ ꦆꦩꦶꦤꦴ ꦌꦢꦶꦱꦺꦤ ꦥꦫꦶꦮꦴꦫꦺꦤ, ꦥꦫꦶꦕ꧀ꦖꦺꦢꦺꦤ ꦕ. ꦗꦭꦤ꧀ꦠꦶ ꦮꦶꦗ꧀ꦗꦺꦴꦠꦩꦴꦤꦺꦴ. ꦄꦨꦶꦏ꧀ꦏꦤ꧀ꦠꦺꦤꦴꦠꦶ ꦄꦠꦶꦮꦶꦪ ꦏꦤ꧀ꦠꦺꦤ ꦏꦩꦤꦷꦪꦺꦤ ꦱꦸꦤ꧀ꦢꦫꦺꦤ. ꦮꦟ꧀ꦟꦺꦤꦴꦠꦶ ꦖꦮꦶꦮꦟ꧀ꦟꦺꦤ ꦱꦫꦷꦫꦮꦟ꧀ꦟꦤꦶꦨꦴꦪ. ꦱꦧ꧀ꦧꦴ ꦎꦨꦴꦱꦪꦁ ꦢꦶꦱꦴꦠꦶ ꦱꦧ꧀ꦧꦴ ꦢꦱꦥꦶ ꦢꦶꦱꦴ ꦥꦨꦴꦱꦺꦤ꧀ꦠꦺꦴ, ꦕꦤ꧀ꦢꦺꦴ ꦮꦶꦪ, ꦱꦹꦫꦶꦪꦺꦴ ꦮꦶꦪ ꦕ ꦌꦏꦺꦴꦨꦴꦱꦁ ꦌꦏꦴꦭꦺꦴꦏꦁ ꦏꦫꦺꦴꦤ꧀ꦠꦺꦴꦠꦶ ꦄꦠ꧀ꦡꦺꦴ.

ꦌꦮꦁ ꦥꦤ ꦨꦒꦮꦠꦴ ꦥꦸꦕ꧀ꦖꦶꦠꦺꦴ ꦢꦺꦮꦥꦸꦠ꧀ꦠꦺꦴ ꦄꦠ꧀ꦠꦴꦤꦁ ꦥꦮꦺꦢꦺꦤ꧀ꦠꦺꦴ ‘‘ꦩꦟ꧀ꦝꦹꦏꦺꦴꦲꦁ ꦥꦸꦫꦺ ꦄꦴꦱꦶ’’ꦤ꧀ꦠꦶ ꦒꦴꦡꦩꦴꦲ. ꦠꦠ꧀ꦡ ꦥꦸꦫꦺꦠꦶ ꦥꦸꦫꦶꦩꦗꦴꦠꦶꦪꦁ. ‘‘ꦈꦢꦏꦺ’’ꦠꦶ ꦆꦢꦁ ꦠꦢꦴ ꦄꦠ꧀ꦠꦤꦺꦴ ꦈꦥ꧀ꦥꦠ꧀ꦠꦶꦛ꧀ꦜꦴꦤꦢꦱ꧀ꦱꦤꦁ. ‘‘ꦈꦢꦏꦺ ꦩꦟ꧀ꦝꦹꦏꦺꦴ’’ꦠꦶ ꦌꦠꦺꦤ ꦈꦢ꧀ꦣꦩꦴꦪꦶꦏꦴꦢꦶꦏꦱ꧀ꦱ ꦡꦭꦺ ꦩꦟ꧀ꦝꦹꦏꦱ꧀ꦱ ꦤꦶꦮꦠ꧀ꦠꦤꦁ ꦏꦠꦁ ꦲꦺꦴꦠꦶ. ꦒꦴꦮꦺꦴ ꦕꦫꦤ꧀ꦠꦶ ꦌꦠ꧀ꦡꦴꦠꦶ ꦒꦺꦴꦕꦫꦺꦴ, ꦒꦸꦤ꧀ꦤꦁ ꦓꦴꦱꦺꦱꦤꦛ꧀ꦜꦴꦤꦁ. ꦆꦣ ꦥꦤ ꦒꦺꦴꦕꦫꦺꦴ ꦮꦶꦪꦴꦠꦶ ꦒꦺꦴꦕꦫꦺꦴ, ꦮꦴꦫꦶ ꦈꦢꦏꦁ ꦒꦺꦴꦕꦫꦺꦴ ꦌꦠꦱ꧀ꦱꦴꦠꦶ ꦮꦴꦫꦶꦒꦺꦴꦕꦫꦺꦴ. ꦈꦢꦏꦕꦴꦫꦷꦥꦶ ꦲꦶ ꦏꦺꦴꦕꦶ ꦏꦕ꧀ꦖꦥꦴꦢꦶ ꦄꦮꦴꦫꦶꦒꦺꦴꦕꦫꦺꦴꦥꦶ ꦲꦺꦴꦠꦷꦠꦶ ‘‘ꦮꦴꦫꦶꦒꦺꦴꦕꦫꦺꦴ’’ꦠꦶ ꦮꦶꦱꦺꦱꦺꦠ꧀ꦮꦴ ꦮꦸꦠ꧀ꦠꦁ. ꦠꦮ ꦣꦩ꧀ꦩꦁ ꦱꦸꦟꦤ꧀ꦠꦱ꧀ꦱꦴꦠꦶ ꦧ꧀ꦫꦲ꧀ꦩꦱ꧀ꦱꦫꦺꦤ ꦏꦫꦮꦷꦏꦫꦸꦠꦩꦚ꧀ꦗꦸꦤꦴ ꦢꦺꦱꦺꦤ꧀ꦠꦱ꧀ꦱ ꦠꦮ ꦣꦩ꧀ꦩꦁ ‘‘ꦣꦩ꧀ꦩꦺꦴ ꦌꦱꦺꦴ ꦮꦸꦕ꧀ꦕꦠꦷ’’ꦠꦶ ꦱꦫꦺ ꦤꦶꦩꦶꦠ꧀ꦠꦒ꧀ꦒꦴꦲꦮꦱꦺꦤ ꦱꦸꦟꦤ꧀ꦠꦱ꧀ꦱ. ꦄꦤꦴꦢꦫꦺ ꦕꦺꦠꦁ ꦱꦴꦩꦶꦮꦕꦤꦁ. ꦄꦮꦣꦶ ꦮꦕ꧀ꦖꦥꦴꦭꦏꦺꦴꦠꦶ ꦮꦕ꧀ꦖꦺ ꦫꦏ꧀ꦑꦤ꧀ꦠꦺꦴ ꦒꦺꦴꦥꦴꦭꦢꦴꦫꦏꦺꦴ ꦩꦩ ꦱꦩꦷꦥꦁ ꦄꦴꦒꦤ꧀ꦠ꧀ꦮꦴ ꦢꦟ꧀ꦝꦩꦺꦴꦭꦸꦧ꧀ꦨ ꦠꦶꦛ꧀ꦜꦤ꧀ꦠꦺꦴ ꦩꦩ ꦱꦷꦱꦺ ꦢꦟ꧀ꦝꦁ ꦱꦤ꧀ꦤꦶꦫꦸꦩ꧀ꦨꦶꦠ꧀ꦮꦴ ꦩꦁ ꦩꦴꦫꦺꦱꦷꦠꦶ ꦄꦠ꧀ꦡꦺꦴ.

ꦱꦶꦠꦁ ꦏꦠ꧀ꦮꦴꦠꦶ ‘‘ꦠꦡꦴ ꦥꦫꦶꦠ꧀ꦠꦠꦫꦺꦤꦴꦥꦶ ꦥꦸꦚ꧀ꦚꦴꦤꦸꦨꦴꦮꦺꦤ ꦌꦮꦁ ꦄꦠꦶꦮꦶꦪ ꦈꦭ꦳ꦴꦫꦴ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴ ꦱꦩ꧀ꦥꦠ꧀ꦠꦶꦪꦺꦴ ꦭꦧ꧀ꦨꦤ꧀ꦠꦷ’’ꦠꦶ ꦥꦷꦠꦶꦱꦺꦴꦩꦤꦱ꧀ꦱꦗꦴꦠꦺꦴ ꦨꦴꦱꦸꦫꦠꦫꦣꦮꦭꦮꦶꦥ꧀ꦦꦸꦫꦤ꧀ꦠꦢꦱ꧀ꦱꦤꦏꦶꦫꦟꦴꦮꦭꦷꦲꦶ ꦨꦶꦪ꧀ꦪꦺꦴꦱꦺꦴ ꦩꦠ꧀ꦠꦴꦪ ꦠꦁ ꦥꦢꦺꦱꦁ ꦎꦨꦴꦱꦺꦤ꧀ꦠꦺꦴ ꦱꦶꦠꦁ ꦏꦠ꧀ꦮꦴ. ꦥꦷꦠꦶꦱꦺꦴꦩꦤꦱ꧀ꦱꦮꦱꦺꦤ ꦲꦶ ꦱꦺꦴ –

‘‘ꦩꦸꦲꦸꦠ꧀ꦠꦁ ꦕꦶꦠ꧀ꦠꦥꦱꦴꦢꦱ꧀ꦱ, ꦆꦢ꧀ꦣꦶꦁ ꦥꦱ꧀ꦱ ꦪꦱꦚ꧀ꦕ ꦩꦺ;

ꦄꦴꦤꦸꦨꦴꦮꦚ꧀ꦕ ꦩꦺ ꦥꦱ꧀ꦱ, ꦮꦟ꧀ꦟꦁ ꦥꦱ꧀ꦱ ꦗꦸꦠꦶꦚ꧀ꦕ ꦩꦺ.

‘‘ꦪꦺ ꦕ ꦠꦺ ꦢꦷꦓꦩꦢ꧀ꦣꦴꦤꦁ, ꦣꦩ꧀ꦩꦁ ꦄꦱ꧀ꦱꦺꦴꦱꦸꦁ ꦒꦺꦴꦠꦩ;

ꦥꦠ꧀ꦠꦴ ꦠꦺ ꦄꦕꦭꦛ꧀ꦜꦴꦤꦁ, ꦪꦠ꧀ꦡ ꦒꦤ꧀ꦠ꧀ꦮꦴ ꦤ ꦱꦺꦴꦕꦫꦺ’’ꦠꦶ. (ꦮꦶ. ꦮ. ꧘꧕꧙-꧘꧖꧐);

ꦆꦩꦴ ꦢ꧀ꦮꦺ ꦒꦴꦡꦴ ꦮꦠ꧀ꦮꦴ ꦥꦏ꧀ꦏꦴꦩꦶ.

꧑꧔꧑. ꦪꦁ ꦥꦤ ꦏꦶꦚ꧀ꦕꦷꦠꦶ ꦌꦠ꧀ꦡ ꦪꦤ꧀ꦠꦶ ꦄꦤꦶꦪꦩꦶꦠꦮꦕꦤꦁ. ꦠꦡꦴ ꦏꦶꦚ꧀ꦕꦷꦠꦶ. ꦥꦤꦴꦠꦶ ꦮꦕꦤꦴꦭꦔ꧀ꦏꦴꦫꦩꦠ꧀ꦠꦁ. ꦠꦱ꧀ꦩꦴ ꦪꦁ ꦏꦶꦚ꧀ꦕꦷꦠꦶ ꦚꦺꦪ꧀ꦪꦱ꧀ꦱ ꦄꦤꦮꦱꦺꦱꦥꦫꦶꦪꦴꦢꦴꦤꦁ ꦏꦠꦁ ꦲꦺꦴꦠꦶ. ꦥꦤꦴꦠꦶ ꦮꦴ ꦮꦶꦱꦺꦱꦠ꧀ꦡꦢꦷꦥꦏꦺꦴ ꦤꦶꦥꦴꦠꦺꦴ. ꦠꦺꦤ ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ’’ꦠꦶ ꦆꦩꦶꦤꦴ ꦱꦔ꧀ꦑꦺꦥꦠꦺꦴ, ꦮꦶꦠ꧀ꦡꦴꦫꦠꦺꦴ ꦕ ꦱꦠ꧀ꦡꦸ ꦕꦠꦸꦱꦕ꧀ꦕꦴꦨꦶꦱꦩ꧀ꦧꦺꦴꦣꦺꦴ ꦮꦸꦠ꧀ꦠꦺꦴ. ‘‘ꦧꦸꦢ꧀ꦣꦺꦴ’’ꦠꦶ ꦥꦤ ꦆꦩꦶꦤꦴ ꦠꦢꦚ꧀ꦚꦱ꧀ꦱꦥꦶ ꦚꦺꦪ꧀ꦪꦱ꧀ꦱꦴꦮꦧꦺꦴꦣꦺꦴ. ꦥꦸꦫꦶꦩꦺꦤ ꦮꦴ ꦱꦠ꧀ꦡꦸ ꦥꦛꦶꦮꦺꦣꦚꦴꦟꦴꦤꦸꦨꦴꦮꦺꦴ, ꦥꦕ꧀ꦖꦶꦩꦺꦤ ꦢꦺꦱꦤꦴꦚꦴꦟꦴꦤꦸꦨꦴꦮꦺꦴ. ꦥꦷꦠꦶ ꦈꦥꦫꦶ ꦮꦸꦕ꧀ꦕꦩꦴꦤꦺꦴ ꦮꦶꦱꦺꦱꦺꦴ ꦗꦺꦴꦠꦷꦪꦠꦶ. ꦱꦧ꧀ꦧꦱꦺꦴ ꦥꦛꦶꦥꦏ꧀ꦑꦺꦲꦶ ꦮꦶꦩꦸꦕ꧀ꦕꦠꦷꦠꦶ ꦮꦶꦩꦺꦴꦏ꧀ꦑꦺꦴ, ꦄꦒ꧀ꦒꦩꦒ꧀ꦒꦺꦴ. ꦠꦱ꧀ꦱ ꦄꦤ꧀ꦠꦺꦴ ꦄꦒ꧀ꦒꦦꦭꦁ, ꦠꦠ꧀ꦡ ꦨꦮꦁ ꦠꦱ꧀ꦩꦶꦁ ꦭꦢ꧀ꦣꦺ ꦭꦢ꧀ꦣꦧ꧀ꦧꦠꦺꦴ ꦮꦶꦩꦺꦴꦏ꧀ꦑꦤ꧀ꦠꦶꦏꦚꦴꦟꦁ, ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦺꦤ ꦱꦢ꧀ꦣꦶꦁ ꦱꦧ꧀ꦧꦩ꧀ꦥꦶ ꦧꦸꦢ꧀ꦣꦚꦴꦟꦁ. ꦌꦮꦁ ꦥꦮꦠ꧀ꦠꦺꦴꦠꦶ ꦌꦠ꧀ꦡ –

‘‘ꦱꦧ꧀ꦧꦚ꧀ꦚꦸꦠꦴꦪ ꦧꦸꦢ꧀ꦣꦺꦴ, ꦱꦧ꧀ꦧꦢꦱ꧀ꦱꦴꦮꦶꦠꦴꦪ ꦧꦸꦢ꧀ꦣꦺꦴ, ꦄꦤꦚ꧀ꦚꦤꦺꦪ꧀ꦪꦠꦴꦪ ꦧꦸꦢ꧀ꦣꦺꦴ, ꦮꦶꦱꦮꦶꦠꦴꦪ ꦧꦸꦢ꧀ꦣꦺꦴ, ꦑꦷꦟꦴꦱꦮꦱꦔ꧀ꦑꦴꦠꦺꦤ ꦧꦸꦢ꧀ꦣꦺꦴ, ꦤꦶꦫꦸꦥꦭꦺꦥꦱꦔ꧀ꦑꦴꦠꦺꦤ ꦧꦸꦢ꧀ꦣꦺꦴ, ꦌꦏꦤ꧀ꦠꦮꦷꦠꦫꦴꦒꦺꦴꦠꦶ ꦧꦸꦢ꧀ꦣꦺꦴ, ꦌꦏꦤ꧀ꦠꦮꦷꦠꦢꦺꦴꦱꦺꦴꦠꦶ ꦧꦸꦢ꧀ꦣꦺꦴ, ꦌꦏꦤ꧀ꦠꦮꦷꦠꦩꦺꦴꦲꦺꦴꦠꦶ ꦧꦸꦢ꧀ꦣꦺꦴ, ꦌꦏꦤ꧀ꦠꦤꦶꦏ꧀ꦏꦶꦭꦺꦱꦺꦴꦠꦶ ꦧꦸꦢ꧀ꦣꦺꦴ, ꦌꦏꦴꦪꦤꦩꦒ꧀ꦒꦁ ꦒꦠꦺꦴꦠꦶ ꦧꦸꦢ꧀ꦣꦺꦴ, ꦌꦏꦺꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴꦠꦶ ꦧꦸꦢ꧀ꦣꦺꦴ, ꦄꦧꦸꦢ꧀ꦣꦶꦮꦶꦲꦠꦠ꧀ꦠꦴ ꦧꦸꦢ꧀ꦣꦶꦥꦛꦶꦭꦴꦨꦴ ꦧꦸꦢ꧀ꦣꦺꦴ. ꦧꦸꦢ꧀ꦣꦺꦴꦠꦶ ꦤꦺꦠꦁ ꦤꦴꦩꦁ ꦩꦴꦠꦫꦴ ꦏꦠꦁ, ꦤ ꦥꦶꦠꦫꦴ ꦏꦠꦁ, ꦤ ꦨꦴꦠꦫꦴ ꦏꦠꦁ, ꦤ ꦨꦒꦶꦤꦶꦪꦴ ꦏꦠꦁ, ꦤ ꦩꦶꦠ꧀ꦠꦴꦩꦕ꧀ꦕꦺꦲꦶꦏꦠꦁ, ꦤ ꦚꦴꦠꦶꦱꦴꦭꦺꦴꦲꦶꦠꦺꦲꦶ ꦏꦠꦁ, ꦤ ꦱꦩꦟꦧ꧀ꦫꦴꦲ꧀ꦩꦟꦺꦲꦶ ꦏꦠꦁ, ꦤ ꦢꦺꦮꦠꦴꦲꦶ ꦏꦠꦁ. ꦮꦶꦩꦺꦴꦏ꧀ꦑꦤ꧀ꦠꦶꦏꦩꦺꦠꦁ ꦧꦸꦢ꧀ꦣꦴꦤꦁ ꦨꦒꦮꦤ꧀ꦠꦴꦤꦁ ꦧꦺꦴꦣꦶꦪꦴ ꦩꦹꦭꦺ ꦱꦲ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦱ꧀ꦱ ꦥꦛꦶꦭꦴꦨꦴ ꦱꦕ꧀ꦖꦶꦏꦴ ꦥꦚ꧀ꦚꦠ꧀ꦠꦶ ꦪꦢꦶꦢꦁ ꦧꦸꦢ꧀ꦣꦺꦴ’’ꦠꦶ (ꦩꦲꦴꦤꦶ. ꧑꧙꧒) –