ꦜꦴꦪꦷꦨꦴꦮꦤꦶꦢ꧀ꦢꦺꦱ

ꦫꦠꦶꦜꦴꦪꦷꦨꦴꦮ

꧓꧕꧖. ꦫꦩ꧀ꦩꦢꦺꦱꦏꦭꦴꦏꦴꦭ-ꦮꦺꦱꦴꦢꦶꦥꦛꦶꦱꦺꦮꦤꦴ;

ꦪꦸꦮꦴꦤ’ꦚ꧀ꦚꦺꦴꦚ꧀ꦚꦫꦠ꧀ꦠꦴꦤꦁ, ꦥꦩꦺꦴꦢꦺꦴꦫꦠꦶ ꦫꦸꦕ꧀ꦕꦠꦺ.

꧓꧕꧖. ꦱꦶꦔ꧀ꦒꦴꦫꦴꦢꦪꦺꦴ ꦮꦶꦨꦴꦒꦠꦺꦴ ꦢꦱ꧀ꦱꦺꦠꦸꦩꦴꦲ ‘‘ꦫꦩ꧀ꦩꦺ’’ꦕ꧀ꦕꦴꦢꦶ. ꦠꦠ꧀ꦡ ‘‘ꦫꦩ꧀ꦩꦢꦺꦱ’’ꦆꦕ꧀ꦕꦴꦢꦶꦤꦴ ꦈꦢ꧀ꦢꦷꦥꦤꦮꦶꦨꦴꦮꦴ ꦢꦱ꧀ꦱꦶꦠꦴ. ‘‘ꦪꦸꦮꦴꦤ’’ꦤ꧀ꦠꦶ ꦆꦩꦶꦤꦴ ꦄꦴꦭꦩ꧀ꦧꦟꦮꦶꦨꦴꦮꦺꦴ. ꦆꦠ꧀ꦡꦷ ꦲꦶ ꦥꦸꦫꦶꦱꦱ꧀ꦱ, ꦥꦸꦫꦶꦱꦺꦴ ꦆꦠ꧀ꦡꦶꦪꦴ ꦄꦴꦭꦩ꧀ꦧꦟꦮꦶꦨꦴꦮꦺꦴ. ꦥꦩꦺꦴꦢꦺꦴꦠꦶ ꦄꦚ꧀ꦚꦩꦚ꧀ꦚꦴꦨꦶꦫꦩꦟꦮꦱꦺꦤ ꦄꦴꦩꦺꦴꦢꦫꦹꦥꦺꦴ.

꧓꧕꧖. ꦆꦢꦴꦤꦶ ꦱꦶꦔ꧀ꦒꦴꦫꦴꦢꦶꦤꦴꦩꦏꦺ ꦠꦺꦫꦠ꧀ꦪꦴꦢꦶꦏꦺ ꦏꦩꦺꦤ ꦤꦶꦢ꧀ꦢꦶꦱꦠꦶ ‘‘ꦫꦩ꧀ꦩ’’ꦆꦕ꧀ꦕꦴꦢꦶꦤꦴ. ꦫꦩ꧀ꦩꦢꦺꦱꦏꦭꦴꦏꦴꦭꦮꦺꦱꦴꦢꦶꦥꦛꦶꦱꦺꦮꦤꦴ ꦫꦩꦟꦷꦪꦤꦶꦫꦴꦮꦫꦟꦱꦸꦕꦶꦥꦮꦶꦠ꧀ꦠꦮꦴꦱꦴꦫꦲꦢꦺꦱꦺꦴ ꦫꦩ꧀ꦩꦒꦷꦠꦶꦏꦴꦢꦶꦏꦭꦴ ꦫꦠꦶꦗꦤꦏꦮꦱꦤ꧀ꦠꦴꦢꦶꦄꦤꦸꦫꦹꦥꦏꦴꦭꦺꦴ ꦩꦴꦭꦴꦒꦤ꧀ꦣꦴꦢꦶ ꦈꦥꦱꦺꦴꦨꦶꦠꦏꦶꦫꦶꦪꦴꦢꦶ ꦩꦤꦸꦚ꧀ꦚꦮꦺꦱꦺꦴ, ꦄꦴꦢꦶꦱꦢ꧀ꦢꦺꦤ ꦤꦶꦢ꧀ꦢꦶꦛ꧀ꦜꦨꦴꦱꦶꦠꦩꦶꦲꦶꦠꦴꦢꦶꦕꦺꦠꦶ ꦆꦩꦺꦱꦁ ꦢꦶꦛ꧀ꦜꦱꦸꦠꦩꦸꦠꦴꦢꦷꦱꦸ ꦢꦶꦛ꧀ꦜꦴꦢꦶꦩꦠ꧀ꦠꦩꦏꦠ꧀ꦮꦴ ꦥꦚ꧀ꦚꦴꦪ ꦠꦺꦤ ꦠꦺꦤꦴꦏꦴꦫꦺꦤ ꦥꦸꦤꦥ꧀ꦥꦸꦤꦴꦤꦸꦨꦮꦤꦺꦤ ꦄꦚ꧀ꦚꦺꦴꦚ꧀ꦚꦫꦠ꧀ꦠꦴꦤꦁ ꦄꦚ꧀ꦚꦩꦚ꧀ꦚꦁ ꦤꦶꦩꦶꦠ꧀ꦠꦴꦤꦸꦧ꧀ꦪꦚ꧀ꦗꦤꦱꦔ꧀ꦏꦥ꧀ꦥꦮꦱꦺꦤꦴꦠꦶꦫꦠ꧀ꦠꦴꦤꦁ ꦪꦸꦮꦴꦤꦁ ꦠꦫꦸꦟꦶꦠ꧀ꦡꦶ ꦥꦸꦫꦶꦱꦴꦤꦁ ꦥꦩꦺꦴꦢꦺꦴ ꦄꦨꦶꦫꦩꦟꦮꦱꦺꦤ ꦱꦤ꧀ꦠꦺꦴꦱꦺꦴ ꦥꦷꦠꦶ ꦫꦠꦶ ꦫꦸꦕ꧀ꦕꦠꦺ ꦫꦸꦕ꧀ꦕꦤꦠꦺꦴ ‘‘ꦫꦠꦷ’’ꦠꦶ ꦮꦸꦕ꧀ꦕꦠꦷꦠꦶ. ꦆꦩꦱ꧀ꦩꦶꦁ ꦥꦏ꧀ꦑꦺ ꦫꦏꦴꦫꦺꦴ ꦱꦤ꧀ꦣꦶꦗꦺꦴ. ꦢꦺꦱꦺꦴ ꦕ ꦏꦭꦴ ꦕ ꦏꦴꦭꦺꦴ ꦕ ꦮꦺꦱꦺꦴ ꦕꦺꦠꦶ ꦕ, ꦠꦺ ꦄꦴꦢꦪꦺꦴ ꦪꦺꦱꦩꦶꦠꦶ ꦕ, ꦫꦩ꧀ꦩꦴ ꦕ ꦠꦺ ꦢꦺꦱ…ꦥꦺ… ꦮꦺꦱꦴꦢꦪꦺꦴ ꦕꦺꦠꦶ ꦕ, ꦠꦺꦱꦁ ꦥꦛꦶ ꦥꦸꦤꦥ꧀ꦥꦸꦤꦁ ꦱꦺꦮꦤꦩꦶꦠꦶ ꦕ, ꦄꦚ꧀ꦚꦺꦴ ꦕ ꦄꦚ꧀ꦚꦺꦴ ꦕꦺꦠꦶ ꦕ, ꦠꦺꦱꦸ ꦫꦠ꧀ꦠꦴꦠꦶ ꦕ ꦮꦴꦏ꧀ꦪꦁ.

꧓꧕꧗. ꦪꦸꦠ꧀ꦪꦴ ꦨꦴꦮꦴꦤꦸꦨꦴꦮꦴ ꦠꦺ,

ꦤꦶꦧꦤ꧀ꦣꦴ ꦥꦺꦴꦱꦪꦤ꧀ꦠꦶ ꦤꦁ;

ꦱꦺꦴꦥ꧀ꦪꦴ’ꦪꦺꦴꦒꦮꦶꦥ꧀ꦥꦪꦺꦴꦒ-

ꦱꦩ꧀ꦨꦺꦴꦒꦴꦤꦁ ꦮꦱꦴ ꦠꦶꦣꦴ.

꧓꧕꧗. ‘‘ꦪꦸꦠ꧀ꦪꦴ’’ꦆꦕ꧀ꦕꦴꦢꦶ. ꦠꦺ ꦪꦡꦴꦮꦸꦠ꧀ꦠꦴ ꦨꦴꦮꦴꦤꦸꦨꦴꦮꦴ ꦪꦸꦠ꧀ꦪꦴ ꦄꦴꦭꦱꦶꦪꦈꦒ꧀ꦒꦠꦴꦗꦶꦒꦸꦕ꧀ꦖꦴꦮꦗ꧀ꦗꦶꦠꦴ ꦪꦺ ꦱꦔ꧀ꦏꦴꦈꦱ꧀ꦱꦸꦏ꧀ꦏꦴꦢꦪꦺꦴ ꦨꦴꦮꦴ ꦠꦁꦧ꧀ꦪꦚ꧀ꦗꦏꦴ ꦠꦢꦤꦸꦫꦹꦥꦴ ꦄꦤꦸꦨꦴꦮꦴ ꦕ ꦄꦪꦺꦴꦒꦴꦢꦶꦏꦺ ꦱꦶꦔ꧀ꦒꦴꦫꦺ ꦪꦡꦴ ꦪꦡꦴ ꦪꦸꦚ꧀ꦗꦤ꧀ꦠꦶ, ꦠꦴꦢꦶꦱꦶꦪꦴꦮ ꦪꦸꦠ꧀ꦠꦶꦪꦴ ꦤꦶꦧꦤ꧀ꦣꦴ ꦤꦁ ꦫꦠꦶꦁ ꦱꦩ꧀ꦥꦺꦴꦱꦪꦤ꧀ꦠꦶ, ꦱꦺꦴꦪꦺꦮꦩꦺꦮꦁ ꦥꦺꦴꦱꦶꦠꦺꦴ ꦱꦶꦔ꧀ꦒꦴꦫꦺꦴ ꦤꦴꦩ ꦫꦱꦺꦴ ꦱꦩ꧀ꦥꦗ꧀ꦗꦠꦺ. ꦱꦺꦴꦥꦶ ꦠꦶꦣꦴꦠꦶ ꦱꦩ꧀ꦧꦤ꧀ꦣꦺꦴ. ꦠꦠ꧀ꦡ ꦄꦪꦺꦴꦒꦺꦴ ꦤꦴꦩ ꦥꦸꦧ꧀ꦧꦺ ꦄꦱꦔ꧀ꦒꦠꦴꦤꦁ ꦄꦤꦸꦫꦴꦒꦺꦤ ꦱꦔ꧀ꦒꦩꦩꦶꦕ꧀ꦖꦤ꧀ꦠꦴꦤꦁ ꦆꦠ꧀ꦡꦶꦥꦸꦫꦶꦱꦴꦤꦩꦱꦔ꧀ꦒꦩꦺꦴ. ꦄꦠꦶꦱꦪꦮꦶꦫꦸꦭ꦳꧀ꦲꦥꦺꦩꦴꦤꦩꦸꦨꦶꦤ꧀ꦤꦩ꧀ꦥꦶ ꦱꦶꦭꦺꦱꦺꦴ ꦮꦶꦥ꧀ꦥꦪꦺꦴꦒꦺꦴ. ꦧꦭꦮꦏꦴꦩꦴꦮꦺꦱꦮꦶꦱꦺꦱꦴꦤꦁ ꦏꦴꦩꦷꦤꦁ ꦢꦱ꧀ꦱꦤꦴꦢꦶꦱꦩꦚ꧀ꦗꦤꦁ ꦱꦩ꧀ꦨꦺꦴꦒꦺꦴ.

꧓꧕꧗. ꦆꦢꦴꦤꦶ ꦫꦠꦶꦪꦴ ꦥꦸꦛ꧀ꦜꦏꦴꦫꦟꦁ ꦥꦸꦛ꧀ꦜꦥꦪꦺꦴꦒꦚ꧀ꦕ ꦢꦱ꧀ꦱꦺꦠꦶ ‘‘ꦪꦸꦠ꧀ꦪꦴ’’ꦆꦕ꧀ꦕꦴꦢꦶꦤꦴ. ꦠꦺ ꦨꦴꦮꦴꦤꦸꦨꦴꦮꦴ ꦤꦶꦢ꧀ꦢꦶꦛ꧀ꦜꦧ꧀ꦪꦨꦶꦕꦴꦫꦷꦨꦴꦮꦺꦱꦸ ꦫꦠ꧀ꦪꦴꦤꦸꦫꦹꦥꦧ꧀ꦪꦨꦶꦕꦴꦫꦷꦨꦴꦮꦺꦴ ꦠꦥ꧀ꦥꦏꦴꦱꦏꦺꦴ ꦄꦤꦸꦨꦴꦮꦺꦴ ꦕꦺꦠꦶ ꦆꦩꦺ ꦢ꧀ꦮꦺ ꦪꦸꦠ꧀ꦪꦴ ꦲꦺꦠꦸꦨꦹꦠꦴꦪ ꦄꦪꦺꦴꦒꦮꦶꦥ꧀ꦥꦪꦺꦴꦒꦱꦩ꧀ꦨꦺꦴꦒꦱꦔ꧀ꦑꦠꦴꦤꦁ ꦠꦶꦟ꧀ꦟꦁ ꦱꦶꦔ꧀ꦒꦴꦫꦴꦤꦁ ꦄꦤꦸꦏꦹꦭꦠ꧀ꦡꦺꦤ ꦫꦠꦶꦪꦴ ꦮꦶꦫꦸꦢ꧀ꦣꦠ꧀ꦠꦴ ꦄꦴꦭꦱꦶꦪꦈꦒ꧀ꦒꦗꦶꦒꦸꦕ꧀ꦖꦴꦢꦶꦏꦺ ꦥꦫꦶꦮꦗ꧀ꦗꦺꦠ꧀ꦮꦴ ꦱꦔ꧀ꦏꦴꦈꦱ꧀ꦱꦸꦏ꧀ꦏꦴꦢꦷꦤꦁ ꦫꦠ꧀ꦪꦴꦤꦸꦏꦹꦭꦨꦴꦮꦴꦤꦁ ꦮꦱꦺꦤ ꦪꦡꦴꦪꦺꦴꦒꦁ ꦤꦶꦧꦤ꧀ꦣꦴ ꦏꦮꦷꦲꦶ ꦧꦤ꧀ꦣꦴ ꦤꦁ ꦫꦠꦶꦁ ꦥꦺꦴꦱꦪꦤ꧀ꦠꦶ ꦪꦡꦴ ꦠꦥ꧀ꦥꦏꦴꦱꦤꦺꦤ ꦥꦹꦫꦺꦤ꧀ꦠꦶ ꦱꦗ꧀ꦗꦺꦤ꧀ꦠꦶ, ꦌꦮꦁ ꦱꦗ꧀ꦗꦶꦠꦺꦴ ꦫꦠꦶꦱꦶꦔ꧀ꦒꦴꦫꦺꦴ ꦤꦴꦩ ꦫꦱꦺꦴ ꦲꦺꦴꦠꦶ. ꦱꦺꦴꦥꦶ ꦱꦴꦩꦚ꧀ꦚꦺꦤ ꦤꦶꦢ꧀ꦢꦶꦛ꧀ꦜꦱꦶꦔ꧀ꦒꦴꦫꦫꦱꦺꦴꦥꦶ ꦄꦪꦺꦴꦒꦮꦶꦥ꧀ꦥꦪꦺꦴꦒꦱꦩ꧀ꦨꦺꦴꦒꦴꦤꦁ ꦱꦶꦔ꧀ꦒꦴꦫꦴꦤꦁ ꦮꦱꦴ ꦨꦺꦢꦺꦤ ꦠꦶꦣꦴ ꦨꦮꦠꦷꦠꦶ. ꦠꦠ꧀ꦡ ꦄꦪꦺꦴꦒꦺꦴ ꦤꦴꦩ ꦥꦸꦧ꧀ꦧꦺ ꦄꦚ꧀ꦚꦩꦚ꧀ꦚꦱꦔ꧀ꦒꦩꦫꦲꦶꦠꦴꦤꦁ ꦄꦨꦶꦤꦮꦴꦤꦸꦫꦴꦒꦧꦭꦺꦤ ꦱꦔ꧀ꦒꦩꦁ ꦥꦠ꧀ꦡꦺꦤ꧀ꦠꦴꦤꦁ ꦡꦷꦥꦸꦩꦴꦤꦁ ꦄꦱꦔ꧀ꦒꦩꦺꦴ. ꦮꦶꦥ꧀ꦥꦪꦺꦴꦒꦺꦴ ꦤꦴꦩ ꦱꦔ꧀ꦒꦩꦴꦠꦶꦱꦪꦺꦤ ꦮꦶꦫꦸꦭ꦳꧀ꦲꦥꦺꦩꦴꦤꦁ ꦡꦷꦥꦸꦩꦴꦤꦁ ꦄꦚ꧀ꦚꦩꦚ꧀ꦚꦮꦶꦱꦶꦭꦺꦱꦺꦴ. ꦱꦩ꧀ꦨꦺꦴꦒꦺꦴ ꦤꦴꦩ ꦧꦭꦮꦏꦴꦩꦠꦟ꧀ꦲꦴꦮꦶꦱꦺꦱꦮꦱꦺꦤ ꦪꦸꦠ꧀ꦠꦴꦤꦁ ꦏꦴꦩꦶꦤꦶꦏꦴꦩꦸꦏꦴꦤꦁ ꦄꦚ꧀ꦚꦩꦚ꧀ꦚꦁ ꦢꦱ꧀ꦱꦤꦴꦢꦶꦄꦱ꧀ꦱꦴꦢꦺꦴ. ꦨꦴꦮꦺꦴ ꦕ ꦄꦤꦸꦨꦴꦮꦺꦴ ꦕꦺꦠꦶ ꦕ, ꦄꦪꦺꦴꦒꦺꦴ ꦕ ꦮꦶꦥ꧀ꦥꦪꦺꦴꦒꦺꦴ ꦕ ꦱꦩ꧀ꦨꦺꦴꦒꦺꦴ ꦕꦺꦠꦶ ꦕ ꦮꦴꦏ꧀ꦪꦁ.

ꦆꦩꦩꦭꦔ꧀ꦏꦴꦫꦁ ꦏꦫꦺꦴꦤ꧀ꦠꦺꦤ ꦄꦴꦕꦫꦶꦪꦱꦔ꧀ꦓꦫꦏ꧀ꦑꦶꦠꦩꦲꦴꦱꦴꦩꦶꦥꦴꦢꦺꦤ ꦥꦤ ꦥꦫꦩꦩꦣꦸꦫꦱꦢ꧀ꦣꦩ꧀ꦩꦴꦩꦠꦭꦸꦢ꧀ꦣꦱꦸꦢ꧀ꦣꦱꦤ꧀ꦠꦴꦤꦴꦤꦁ ꦠꦥꦺꦴꦣꦤꦴꦤꦁ ꦄꦚ꧀ꦚꦫꦱꦴꦮꦧꦺꦴꦣꦤꦺ ꦥꦪꦺꦴꦗꦤꦴꦨꦴꦮꦺꦥꦶ ꦭꦺꦴꦏꦶꦪꦺꦱꦸ ꦠꦺꦱꦸ ꦠꦺꦱꦸ ꦮꦺꦴꦲꦴꦫꦺꦱꦸ ꦄꦱꦩ꧀ꦩꦺꦴꦲꦠ꧀ꦡꦁ ꦱꦶꦔ꧀ꦒꦴꦫꦴꦢꦶꦤꦮꦮꦶꦣꦫꦱꦴꦤꦁ ꦭꦏ꧀ꦑꦟꦩꦠ꧀ꦠꦱ꧀ꦱꦺꦮ ꦢꦱ꧀ꦱꦶꦠꦠ꧀ꦠꦴ ꦠꦢꦤꦸꦫꦹꦥꦭꦏ꧀ꦑꦶꦪꦥꦫꦶꦒ꧀ꦒꦲꦺ ꦄꦱꦠꦶ ꦭꦏ꧀ꦑꦟꦴꦮꦧꦺꦴꦣꦱ꧀ꦱ ꦱꦸꦧ꧀ꦪꦠ꧀ꦠꦴꦨꦴꦮꦠꦺꦴ ꦮꦸꦠ꧀ꦠꦭꦏ꧀ꦑꦟꦴꦮꦧꦺꦴꦣꦠ꧀ꦡꦁ ꦠꦁꦠꦁꦭꦏ꧀ꦑꦟꦏꦡꦤꦴꦤꦤ꧀ꦠꦫꦁ ꦠꦱ꧀ꦱ ꦠꦱ꧀ꦱ ꦭꦏ꧀ꦑꦶꦪꦱ꧀ꦱ ꦩꦸꦑꦩꦠ꧀ꦠꦁ ꦢꦱ꧀ꦱꦺꦠꦧ꧀ꦧꦁ ꦲꦺꦴꦠꦶ. ꦲꦺꦛ꧀ꦜꦴ ‘‘ꦫꦴꦒꦴꦤꦠꦧ꧀ꦨꦸꦠꦱꦫꦺꦴꦗꦩꦸꦑꦁ ꦣꦫꦴꦪꦴ’’ꦠꦶꦄꦴꦢꦶꦤꦴ ꦤꦶꦢ꧀ꦢꦶꦛ꧀ꦜꦱꦩ꧀ꦨꦺꦴꦒꦱꦶꦔ꧀ꦒꦴꦫꦫꦱꦴꦨꦴꦱꦺꦤꦺꦮ ꦲꦱꦴꦨꦴꦱꦴꦢꦷꦤꦁ ꦄꦛ꧀ꦜꦤ꧀ꦤꦁ ꦫꦱꦴꦨꦴꦱꦫꦹꦥꦱ꧀ꦱ ꦨꦴꦮꦴꦨꦴꦱꦱ꧀ꦱ, ꦮꦶꦨꦴꦮꦴꦨꦴꦱꦱ꧀ꦱ, ꦄꦤꦸꦨꦴꦮꦴꦨꦴꦱꦱ꧀ꦱ ꦕ ꦚꦴꦠꦧ꧀ꦧꦠ꧀ꦠꦴ ꦱꦶꦔ꧀ꦒꦴꦫꦫꦱꦱ꧀ꦱ ꦭꦏ꧀ꦑꦶꦪꦩꦺꦮꦁ ꦮꦺꦢꦶꦠꦧ꧀ꦧꦁ.

ꦒꦷꦠꦱ꧀ꦱꦫꦺꦤ ꦈꦥꦏꦝ꧀ꦞꦶꦪ ꦤꦺꦠ꧀ꦠꦫꦱ꧀ꦩꦶ-

ꦧꦤ꧀ꦣꦁ ꦏꦫꦁꦮ ꦮꦶꦮꦱꦚ꧀ꦕ ꦏꦫꦒ꧀ꦒꦲꦺꦤ;

ꦪꦴ ꦠꦴꦢꦶꦱꦺꦥꦶ ꦮꦶꦤꦶꦪꦺꦴꦗꦪꦶ ꦢꦸꦏ꧀ꦏꦫꦺ ꦩꦁ,

ꦱꦺꦫꦤ꧀ꦢꦠꦷ ꦄꦣꦶꦒꦠꦴ ꦮꦶꦣꦶꦤꦴ ꦩꦪꦗ꧀ꦗꦴꦠꦶ.

ꦒꦷꦠꦱ꧀ꦱꦫꦺꦤ ꦲꦠ꧀ꦡꦷꦤꦁ ꦒꦷꦠꦶꦏꦴꦪ ꦥꦶꦪꦠ꧀ꦠꦴ ꦒꦷꦠꦶꦏꦴꦣꦤꦶꦤꦴ ꦈꦥꦏꦝ꧀ꦞꦶꦪ ꦄꦠ꧀ꦠꦤꦺꦴ ꦱꦩꦷꦥꦁ ꦄꦴꦏꦝ꧀ꦞꦶꦠ꧀ꦮꦴ ꦤꦺꦠ꧀ꦠꦫꦱ꧀ꦩꦶꦧꦤ꧀ꦣꦁ ꦤꦺꦠ꧀ꦠꦱꦔ꧀ꦑꦴꦠꦲꦠ꧀ꦡꦴꦕꦫꦶꦪꦱ꧀ꦱ ꦫꦗ꧀ꦗꦸꦤꦴ ꦧꦤ꧀ꦣꦁ ꦏꦫꦒ꧀ꦒꦲꦺꦤ ꦲꦠ꧀ꦡꦒ꧀ꦒꦴꦲꦺꦤ ꦱꦺꦴꦟ꧀ꦝꦒ꧀ꦒꦲꦟꦺꦤ ꦮꦶꦮꦱꦚ꧀ꦕ ꦄꦥꦒꦠꦆꦕ꧀ꦖꦴꦕꦴꦫꦁ ꦥꦫꦮꦱꦁ ꦏꦫꦁ ꦆꦮ ꦲꦠ꧀ꦡꦁ ꦆꦮ ꦒꦷꦠꦱ꧀ꦱꦫꦺꦤ ꦄꦠ꧀ꦠꦤꦺꦴ ꦭꦷꦭꦺꦴꦥꦺꦠꦒꦷꦠꦶꦏꦴꦣꦤꦶꦤꦴ ꦈꦥꦏꦝ꧀ꦞꦶꦪ ꦄꦠ꧀ꦠꦤꦺꦴ ꦱꦩꦷꦥꦁ ꦤꦺꦠ꧀ꦮꦴ ꦤꦺꦠ꧀ꦠꦫꦱ꧀ꦩꦶꦧꦤ꧀ꦣꦁ ꦄꦠ꧀ꦠꦤꦺꦴ ꦤꦪꦤꦏꦤ꧀ꦠꦶꦪꦴ ꦥꦛꦶꦧꦤ꧀ꦣꦁ ꦏꦫꦒ꧀ꦒꦲꦺꦤ ꦲꦠ꧀ꦡꦒ꧀ꦒꦴꦲꦺꦤ ꦮꦶꦮꦱꦚ꧀ꦕ ꦄꦥꦒꦠꦣꦶꦠꦶꦁ ꦩꦹꦭ꦳꧀ꦲꦁ ꦩꦁ ꦪꦴ ꦏꦤ꧀ꦠꦴ ꦠꦴꦢꦶꦱꦺꦥꦶ ꦢꦸꦏ꧀ꦏꦫꦺ ꦮꦶꦤꦶꦪꦺꦴꦗꦪꦶ, ꦱꦴ ꦆꦫꦤ꧀ꦢꦠꦷ ꦆꦫꦤ꧀ꦢꦠꦷ ꦤꦴꦩ ꦤꦴꦒꦩꦴꦤꦮꦶꦏꦴ ꦩꦪꦴ ꦄꦗ꧀ꦗ ꦮꦶꦣꦶꦤꦴ ꦨꦴꦒ꧀ꦪꦺꦤ ꦄꦣꦶꦒꦠꦴ ꦭꦢ꧀ꦣꦴꦠꦶ.

ꦌꦠ꧀ꦡ ꦒꦷꦠꦱ꧀ꦱꦫꦤꦺꦠ꧀ꦠꦫꦱ꧀ꦩꦶꦏꦫꦒ꧀ꦒꦲꦱꦔ꧀ꦑꦠꦴꦲꦶ ꦆꦩꦴꦲꦶ ꦥꦢꦴꦮꦭꦷꦲꦶ ꦈꦢ꧀ꦢꦷꦥꦤꦮꦶꦨꦴꦮꦺꦴ ꦢꦱ꧀ꦱꦶꦠꦺꦴ. ꦡꦶꦪꦴ ꦥꦸꦫꦶꦱꦺꦴ ꦕ, ꦥꦸꦫꦶꦱꦱ꧀ꦱ ꦡꦷ ꦕ ꦄꦴꦭꦩ꧀ꦧꦟꦁ ꦲꦺꦴꦠꦷꦠꦶ ‘‘ꦱꦴ ꦆꦫꦤ꧀ꦢꦠꦷ ꦩꦪꦴ’’ꦠꦶ ꦆꦩꦶꦤꦴ ꦄꦴꦫꦩ꧀ꦩꦟꦮꦶꦨꦴꦮꦺꦴ ꦢꦱ꧀ꦱꦶꦠꦺꦴ. ‘‘ꦈꦥꦏꦝ꧀ꦞꦶꦪ ꦧꦤ꧀ꦣꦁ ꦮꦶꦮꦱ’’ꦤ꧀ꦠꦶ ꦆꦩꦺꦲꦶ ꦏꦴꦩꦺꦤ ꦈꦢ꧀ꦢꦷꦥꦶꦠꦜꦴꦪꦷꦨꦴꦮꦱꦔ꧀ꦑꦠꦴ ꦫꦠꦶ ꦢꦱ꧀ꦱꦶꦠꦴ. ‘‘ꦠꦴꦢꦶꦱꦺꦥꦶ ꦢꦸꦏ꧀ꦏꦫꦺ ꦮꦶꦤꦶꦪꦺꦴꦗꦪꦷ’’ꦠꦶ ꦆꦩꦺꦲꦶ ꦈꦱ꧀ꦱꦴꦲꦴꦢꦶꦏꦴ ꦕ ‘‘ꦮꦶꦣꦶꦤꦴ ꦄꦣꦶꦒꦠꦴ ꦩꦪꦗ꧀ꦗꦴ’’ꦠꦶ ꦆꦩꦺꦲꦶ ꦲꦫꦶꦱꦴꦢꦶꦏꦴ ꦕ ꦧ꧀ꦪꦨꦶꦕꦴꦫꦷꦨꦴꦮꦴ ꦢꦱ꧀ꦱꦶꦠꦴ. ꦫꦠꦶꦪꦴ ꦮꦶꦫꦸꦢ꧀ꦣꦺ ꦤꦶꦧ꧀ꦧꦺꦢꦄꦴꦭꦱꦶꦪꦈꦒ꧀ꦒꦠꦗꦶꦒꦸꦕ꧀ꦖꦴꦢꦶꦏꦺ ꦧ꧀ꦪꦨꦶꦕꦴꦫꦷꦨꦴꦮꦺ ꦮꦗ꧀ꦗꦺꦠ꧀ꦮꦴ ꦮꦸꦠ꧀ꦠꦥ꧀ꦥꦏꦴꦫꦮꦶꦨꦴꦮꦴꦢꦶꦏꦺ ꦥꦏꦴꦱꦤ꧀ꦠꦺꦴ ‘‘ꦒꦷꦠꦱ꧀ꦱꦫꦺꦤꦺ’’ꦕ꧀ꦕꦴꦢꦶꦏꦴ ꦫꦠꦶꦥ꧀ꦥꦠꦷꦠꦶꦪꦴ ꦄꦤꦸꦫꦹꦥꦁ ꦥꦪꦸꦠ꧀ꦠꦴ ꦏꦮꦶꦥ꧀ꦥꦪꦺꦴꦒꦴ ꦆꦣ ꦄꦤꦸꦨꦴꦮꦴ ꦤꦴꦩ ꦲꦺꦴꦤ꧀ꦠꦶ. ꦤꦴꦛꦏꦴꦢꦶꦢꦱ꧀ꦱꦤꦷꦪꦱꦠ꧀ꦡꦺ ꦄꦨꦶꦤꦪꦺꦴ ꦄꦤꦸꦨꦴꦮꦺꦴ. ꦫꦩ꧀ꦩꦢꦺꦱꦫꦩ꧀ꦩꦏꦴꦭꦫꦩ꧀ꦩꦮꦺꦱꦴꦢꦪꦺꦴ ꦠꦢꦨꦴꦮꦺ ꦫꦠꦶꦪꦴ ꦄꦤꦸꦥ꧀ꦥꦗ꧀ꦗꦤꦠꦺꦴ ꦱꦴꦩꦠ꧀ꦡꦶꦪꦴ ꦒꦩ꧀ꦪꦴ ꦨꦮꦤ꧀ꦠꦷꦠꦶ ꦌꦮꦁ ꦭꦏ꧀ꦑꦟꦴꦤꦸꦒꦠꦭꦏ꧀ꦑꦶꦪꦥꦫꦶꦒ꧀ꦒꦴꦲꦺꦴ ꦱꦧ꧀ꦧꦠ꧀ꦡ ꦏꦴꦠꦧ꧀ꦧꦺꦴ. ꦌꦮꦁ ꦱꦠꦶꦧꦤ꧀ꦣꦠ꧀ꦡꦴꦮꦧꦺꦴꦣꦏꦴꦤꦁ ꦱꦧ꧀ꦨꦴꦤꦁ ꦈꦥ꧀ꦥꦗ꧀ꦗꦩꦴꦤꦴꦪꦥꦷꦠꦶꦪꦴ ꦏꦴꦫꦟꦠ꧀ꦠꦴ ꦏꦴꦫꦶꦪꦺꦴꦥꦕꦴꦫꦺꦤ ꦌꦱꦺꦴ ꦧꦤ꧀ꦣꦺꦴ ꦫꦱꦺꦴ ꦤꦴꦩ ꦲꦺꦴꦠꦷꦠꦶ. ꦈꦥꦫꦶꦥꦶ ꦌꦮꦩꦺꦮ.

ꦲꦱ꧀ꦱꦜꦴꦪꦷꦨꦴꦮ

꧓꧕꧘. ꦮꦶꦏꦴꦫꦴꦏꦠꦶꦄꦴꦢꦷꦲꦶ,

ꦄꦠ꧀ꦠꦤꦺꦴ’ꦡ ꦥꦫꦱ꧀ꦱ ꦮꦴ;

ꦲꦴꦱꦺꦴ ꦤꦶꦢ꧀ꦢꦴ ꦱꦩꦴꦭꦱ꧀ꦪ-

ꦩꦸꦕ꧀ꦖꦴꦢꦶꦧ꧀ꦪꦨꦶꦕꦴꦫꦶꦨꦶ;

ꦥꦫꦶꦥꦺꦴꦱꦺ ꦱꦶꦪꦴ ꦲꦱ꧀ꦱꦺꦴ,

ꦨꦶꦪ꧀ꦪꦺꦴ’ꦠ꧀ꦡꦶꦥꦨꦸꦠꦷꦤ ꦱꦺꦴ.

꧓꧕꧘. ‘‘ꦮꦶꦏꦴꦫꦺ’’ꦕ꧀ꦕꦴꦢꦶ. ꦮꦶꦏꦴꦫꦴꦏꦠꦶ ꦢꦺꦱꦮꦪꦴꦢꦷꦤꦁ ꦮꦶꦥꦫꦷꦠꦺꦴ ꦏꦺꦱꦧꦤ꧀ꦣꦤꦴꦢꦶ, ꦱꦺꦴ ꦄꦴꦢꦶ ꦪꦺꦱꦁ ꦄꦚ꧀ꦚꦴꦏꦠ꧀ꦪꦴꦢꦶꦤꦕ꧀ꦕꦤꦴꦢꦷꦤꦁ, ꦠꦺꦲꦶ ꦮꦶꦨꦴꦮꦺꦲꦶ ꦲꦴꦱꦺꦴ ꦕꦺꦠꦺꦴꦮꦶꦏꦴꦱꦺꦴ, ꦱꦺꦴꦥꦶ ꦄꦠ꧀ꦠꦤꦺꦴ ꦱꦩ꧀ꦧꦤ꧀ꦣꦷ ꦮꦴ ꦄꦡ ꦥꦫꦱ꧀ꦱ ꦱꦩ꧀ꦧꦤ꧀ꦣꦷ ꦮꦴ, ꦠꦠ꧀ꦡ ꦪꦺꦴ ꦮꦶꦨꦴꦮꦱꦴꦩꦠ꧀ꦡꦶꦪꦴꦪꦺꦮꦴꦨꦶꦧ꧀ꦪꦠ꧀ꦠꦶꦁ ꦪꦴꦠꦶ, ꦱꦺꦴ ꦄꦠ꧀ꦠꦛ꧀ꦜꦺꦴ. ꦪꦺꦴ ꦥꦤ ꦮꦶꦨꦴꦮꦢꦱ꧀ꦱꦤꦴ ꦈꦥ꧀ꦥꦤ꧀ꦤꦴꦥꦶ ꦥꦸꦫꦶꦱꦱ꧀ꦱ ꦒꦩ꧀ꦨꦷꦫꦠ꧀ꦠꦴꦢꦶꦤꦴ ꦖꦴꦢꦶꦠꦺꦴ ꦱꦩꦴꦤꦺꦴ ꦥꦸꦫꦶꦱꦤ꧀ꦠꦫꦺ ꦲꦱꦠ꧀ꦪꦴꦨꦶꦧ꧀ꦪꦠ꧀ꦠꦺꦴ, ꦱꦺꦴ ꦥꦫꦛ꧀ꦜꦺꦴ. ꦱꦺꦴ ꦲꦴꦱꦺꦴ ꦤꦶꦢ꧀ꦢꦴꦢꦷꦲꦶ ꦧ꧀ꦪꦨꦶꦕꦴꦫꦷꦲꦶꦪꦺꦮ, ꦄꦤꦸꦨꦴꦮꦥꦏ꧀ꦑꦺ ꦄꦴꦢꦶꦱꦢ꧀ꦢꦺꦤ ꦄꦏ꧀ꦑꦶꦦꦤ꧀ꦢꦤꦴꦢꦪꦺꦴ ꦒꦲꦶꦠꦴ. ꦥꦫꦶꦥꦺꦴꦱꦺ ꦱꦠꦶ ꦲꦱ꧀ꦱꦺꦴ ꦤꦴꦩ ꦫꦱꦺꦴ ꦱꦶꦪꦴ. ꦱꦺꦴ ꦲꦱ꧀ꦱꦺꦴ ꦨꦶꦪ꧀ꦪꦺꦴ ꦆꦠ꧀ꦡꦶꦥꦨꦸꦠꦷꦤꦁ ꦱꦶꦪꦴꦠꦶ ꦱꦩ꧀ꦧꦤ꧀ꦣꦺꦴ. ꦌꦠ꧀ꦡ ꦥꦨꦸꦠꦶꦱꦢ꧀ꦢꦺꦤ ꦤꦷꦕꦥꦏꦠꦪꦺꦴ ꦱꦔ꧀ꦒꦟ꧀ꦲꦤ꧀ꦠꦶ.

꧓꧕꧘. ꦆꦢꦴꦤꦶ ꦲꦱ꧀ꦱꦫꦱꦱ꧀ꦱ ꦥꦺꦴꦱꦤꦴꦏꦴꦫꦁ ꦢꦱ꧀ꦱꦺꦠꦸꦩꦴꦲ ‘‘ꦮꦶꦏꦴꦫ’’ꦆꦕ꧀ꦕꦴꦢꦶ. ꦮꦶꦏꦴꦫꦴꦏꦠꦶꦄꦴꦢꦷꦲꦶ ꦢꦺꦱꦮꦪꦺꦴꦭꦶꦔ꧀ꦒꦴꦤꦁ ꦮꦶꦥꦫꦷꦠꦺꦲꦶ ꦏꦺꦱꦧꦤ꧀ꦣꦒꦠꦶꦛ꧀ꦜꦶꦠꦶꦄꦴꦢꦶꦏꦺꦲꦶ, ꦤꦕ꧀ꦕꦒꦷꦠꦄꦴꦢꦶꦏꦺꦲꦶ ꦕ ꦢꦸꦮꦶꦣꦺꦲꦶ ꦄꦴꦏꦠꦶꦱꦔ꧀ꦑꦠꦺꦲꦶ ꦲꦺꦠꦸꦨꦹꦠꦺꦲꦶ ꦄꦠ꧀ꦠꦤꦺꦴ ꦮꦴ ꦄꦡ ꦥꦫꦱ꧀ꦱ ꦮꦴ ꦱꦩ꧀ꦧꦤ꧀ꦣꦷ ꦱꦺꦴ ꦲꦴꦱꦺꦴ ꦕꦺꦠꦺꦴ ꦮꦶꦏꦴꦱꦭꦏ꧀ꦑꦟꦺꦴ ꦤꦶꦢ꧀ꦢꦴꦱꦩꦴꦭꦱ꧀ꦪꦩꦸꦕ꧀ꦖꦴꦢꦶꦧ꧀ꦪꦨꦶꦕꦴꦫꦶꦨꦶ ꦤꦶꦢ꧀ꦢꦴꦱꦩꦄꦴꦭꦱ꧀ꦪꦩꦸꦕ꧀ꦖꦴꦄꦏ꧀ꦑꦶꦦꦤ꧀ꦢꦤꦴꦢꦷꦲꦶ ꦄꦤꦸꦨꦴꦮꦺꦲꦶ ꦱꦸꦠꦱꦩ꧀ꦧꦤ꧀ꦣꦺꦤ ꦠꦺꦲꦺꦮ ꦤꦶꦢ꧀ꦢꦴꦱꦩꦴꦭꦱ꧀ꦪꦩꦸꦕ꧀ꦖꦴꦱꦔ꧀ꦑꦠꦧ꧀ꦪꦨꦶꦕꦴꦫꦷꦲꦶ ꦏꦫꦟꦨꦹꦠꦺꦲꦶ ꦥꦫꦶꦥꦺꦴꦱꦺ ꦱꦠꦶ ꦲꦱ꧀ꦱꦺꦴ ꦲꦱ꧀ꦱꦺꦴ ꦤꦴꦩ ꦫꦱꦺꦴ ꦱꦶꦪꦴ, ꦱꦺꦴ ꦲꦱ꧀ꦱꦺꦴ ꦨꦶꦪ꧀ꦪꦺꦴ ꦆꦠ꧀ꦡꦶꦥꦨꦸꦠꦷꦤꦁ, ꦤꦷꦕꦥꦏꦠꦷꦤꦚ꧀ꦕ ꦱꦶꦪꦴꦠꦶ. ꦮꦶꦏꦴꦫꦴ ꦕ ꦱꦴ ꦄꦴꦏꦠꦶ ꦕꦺꦠꦶ ꦕ, ꦱꦺꦴ ꦄꦴꦢꦶ ꦪꦺꦱꦤ꧀ꦠꦶ ꦕ, ꦤꦶꦢ꧀ꦢꦴ ꦕ ꦱꦩꦺꦴ ꦕ ꦄꦴꦭꦱ꧀ꦪꦚ꧀ꦕ ꦩꦸꦕ꧀ꦖꦴ ꦕꦺꦠꦶ ꦕ, ꦠꦺ ꦄꦴꦢꦶ ꦪꦺꦱꦁ ꦄꦏ꧀ꦑꦶꦦꦤ꧀ꦢꦤꦴꦢꦷꦤꦁ ꦄꦤꦸꦨꦴꦮꦴꦤꦤ꧀ꦠꦶ ꦕ, ꦠꦺ ꦕ ꦧ꧀ꦪꦨꦶꦕꦴꦫꦶꦤꦺꦴ ꦕꦺꦠꦶ ꦕ, ꦆꦠ꧀ꦡꦷ ꦥꦨꦸꦠꦶ ꦪꦺꦱꦁ ꦤꦷꦕꦥꦏꦠꦷꦤꦤ꧀ꦠꦶ ꦕ ꦮꦴꦏ꧀ꦪꦁ.

ꦲꦱ꧀ꦱꦥ꧀ꦥꦨꦺꦢ

꧓꧕꧙. ꦱꦶꦠꦩꦶꦲ ꦮꦶꦏꦴꦱꦶꦤꦪꦤꦁ,

ꦏꦶꦚ꧀ꦕꦴ’ꦭꦏ꧀ꦑꦶꦪꦢꦶꦗꦤ꧀ꦠꦸ ꦠꦁ ꦲꦱꦶꦠꦁ;

ꦩꦣꦸꦫꦱ꧀ꦱꦫꦁ ꦮꦶꦲꦱꦶꦠꦁ,

ꦱꦁꦱꦱꦶꦫꦺꦴꦏꦩ꧀ꦥꦩꦸꦥꦲꦱꦶꦠꦁ.

꧓꧖꧐. ꦄꦥꦲꦱꦶꦠꦁ ꦱꦚ꧀ꦗꦭ’ꦏ꧀ꦑꦶ,

ꦮꦶꦏ꧀ꦑꦶꦠ꧀ꦠꦔ꧀ꦒꦁ ꦨꦮꦠ꧀ꦪ’ꦠꦶꦲꦱꦶꦠꦁ;

ꦢ꧀ꦮꦺ ꦢ꧀ꦮꦺ ꦲꦱ꧀ꦱꦴ ꦏꦡꦶꦠꦴ ꦕꦺ’ꦱꦁ,

ꦗꦺꦛ꧀ꦜꦺ ꦩꦗ꧀ꦙꦺ’ꦣꦩꦺꦥꦶ ꦕ ꦏꦩꦱꦺꦴ.

꧓꧕꧙-꧓꧖꧐. ꦲꦱ꧀ꦱꦺ ꦨꦺꦢꦩꦴꦲ ‘‘ꦱꦶꦠ’’ꦩꦶꦕ꧀ꦕꦴꦢꦶꦤꦴ. ꦆꦲ ꦲꦱ꧀ꦱꦺ ꦮꦶꦏꦴꦱꦷꦤꦶ ꦤꦪꦤꦴꦤꦶ ꦪꦱ꧀ꦱ ꦠꦁ ꦱꦶꦠꦁ, ꦏꦶꦚ꧀ꦕꦶ ꦄꦴꦭꦏ꧀ꦑꦶꦪꦴ ꦢꦶꦗꦴ ꦢꦤ꧀ꦠꦴ ꦪꦱ꧀ꦱ ꦠꦁ ꦲꦱꦶꦠꦁ. ꦌꦮꦁ ꦩꦣꦸꦫꦺꦴ ꦱꦫꦺꦴ ꦱꦢ꧀ꦢꦺꦴ ꦪꦱ꧀ꦱ ꦠꦁ ꦮꦶꦲꦱꦶꦠꦁ. ꦄꦁꦱꦱꦶꦫꦺꦴꦏꦩ꧀ꦥꦺꦤ ꦱꦲ ꦮꦠ꧀ꦠꦩꦴꦤꦁ ꦈꦥꦲꦱꦶꦠꦁ, ꦱꦲ ꦗꦭꦺꦤ ꦄꦱ꧀ꦱꦸꦤꦴ ꦮꦠ꧀ꦠꦩꦴꦤꦴꦤꦶ ꦄꦏ꧀ꦑꦷꦤꦶ ꦪꦱ꧀ꦱ ꦠꦁ ꦄꦥꦲꦱꦶꦠꦁ. ꦮꦶꦏ꧀ꦑꦶꦠ꧀ꦠꦴꦤꦶ ꦆꦠꦺꦴ ꦠꦠꦺꦴ ꦥꦱꦴꦫꦶꦠꦴꦤꦶ ꦄꦔ꧀ꦒꦴꦤꦶ ꦪꦱ꧀ꦱ ꦠꦁ ꦄꦠꦶꦲꦱꦶꦠꦁ ꦤꦴꦩ. ꦌꦱꦚ꧀ꦕ ꦱꦶꦠꦴꦢꦷꦤꦁ ꦩꦗ꧀ꦙꦺ ꦢ꧀ꦮꦺ ꦢ꧀ꦮꦺ ꦲꦱ꧀ꦱꦴ ꦄꦴꦢꦶꦠꦺꦴ ꦥꦛ꧀ꦜꦴꦪ ꦏꦩꦱꦺꦴ ꦪꦡꦴꦏ꧀ꦏꦩꦺꦤ ꦗꦺꦛ꧀ꦜꦺ ꦩꦗ꧀ꦙꦺ ꦄꦣꦩꦺꦥꦶ ꦕ ꦏꦡꦶꦠꦴꦠꦶ ꦱꦩ꧀ꦧꦤ꧀ꦣꦺꦴ. ꦥꦸꦫꦴꦠꦤꦺꦲꦷꦠꦶ ꦮꦶꦚ꧀ꦚꦴꦪꦠꦶ.

꧓꧕꧙-꧓꧖꧐. ꦆꦢꦴꦤꦶ ꦲꦱ꧀ꦱꦨꦺꦢꦁ ꦢꦱ꧀ꦱꦺꦠꦶ ‘‘ꦱꦶꦠ’’ꦩꦶꦕ꧀ꦕꦴꦢꦶꦤꦴ. ꦆꦲ ꦆꦩꦱ꧀ꦩꦶꦁ ꦲꦱ꧀ꦱꦮꦶꦱꦪꦺ ꦮꦶꦏꦴꦱꦶꦤꦪꦤꦁ ꦮꦶꦮꦛꦤꦪꦤꦁ ꦱꦶꦠꦁ ꦤꦴꦩ. ꦏꦶꦚ꧀ꦕꦶ ꦄꦴꦭꦏ꧀ꦑꦶꦪꦢꦶꦗꦁ ꦠꦸ ꦏꦶꦚ꧀ꦕꦶ ꦢꦶꦱ꧀ꦱꦩꦴꦤꦢꦤ꧀ꦠꦁ, ꦠꦁ ꦲꦱꦶꦠꦁ ꦤꦴꦩ. ꦩꦣꦸꦫꦱ꧀ꦱꦫꦁ ꦩꦣꦸꦫꦤꦴꦢꦁ ꦮꦶꦲꦱꦶꦠꦁ ꦤꦴꦩ. ꦱꦁꦱꦱꦶꦫꦺꦴꦏꦩ꧀ꦥꦁ ꦄꦁꦱꦱꦶꦫꦺꦴꦏꦩ꧀ꦥꦱꦲꦶꦠꦁ ꦈꦥꦲꦱꦶꦠꦁ ꦤꦴꦩ. ꦱꦗꦭꦏ꧀ꦑꦶ ꦄꦱ꧀ꦱꦸꦮꦶꦭꦺꦴꦕꦤꦱꦲꦶꦠꦁ ꦄꦥꦲꦱꦶꦠꦁ ꦤꦴꦩ. ꦮꦶꦏ꧀ꦑꦶꦠ꧀ꦠꦔ꧀ꦒꦁ ꦄꦛ꧀ꦜꦴꦤꦺ ꦥꦱꦴꦫꦟꦮꦱꦺꦤ ꦮꦶꦏ꧀ꦑꦶꦠ꧀ꦠꦲꦠ꧀ꦡꦥꦴꦢꦴꦢꦶꦄꦮꦪꦮꦮꦤ꧀ꦠꦁ ꦄꦠꦶꦲꦱꦶꦠꦁ ꦤꦴꦩ ꦨꦮꦠꦶ. ꦌꦱꦁ ꦖꦤ꧀ꦤꦁ ꦏꦩꦱꦺꦴ ꦏꦩꦺꦤ ꦢ꧀ꦮꦺ ꦢ꧀ꦮꦺ ꦗꦺꦛ꧀ꦜꦺ ꦩꦗ꧀ꦙꦺ ꦄꦣꦩꦺꦥꦶ ꦮꦶꦱꦪꦺ ꦏꦡꦶꦠꦴ ꦥꦸꦫꦴꦠꦤꦺꦲꦶ ꦨꦴꦱꦶꦠꦴꦠꦶ. ꦮꦶꦏꦴꦱꦷꦤꦶ ꦤꦪꦤꦴꦤꦶ ꦄꦱ꧀ꦱꦺꦠꦶ ꦕ, ꦏꦶꦚ꧀ꦕꦶ ꦇꦱꦏꦁ ꦄꦴꦭꦏ꧀ꦑꦶꦪꦴ ꦢꦶꦗꦴ ꦪꦱ꧀ꦱꦺꦠꦶ ꦕ, ꦩꦣꦸꦫꦺꦴ ꦱꦫꦺꦴ ꦄꦱ꧀ꦱꦺꦠꦶ ꦕ, ꦄꦁꦱꦺꦴ ꦕ ꦱꦶꦫꦺꦴ ꦕꦺꦠꦶ ꦕ, ꦄꦁꦱꦱꦶꦫꦱꦺꦴ ꦏꦩ꧀ꦥꦺꦴꦠꦶ ꦕ, ꦠꦺꦤ ꦱꦲ ꦮꦠ꧀ꦠꦠꦷꦠꦶ ꦕ, ꦱꦲ ꦗꦭꦺꦤ ꦮꦠ꧀ꦠꦩꦴꦤꦴꦤꦶ ꦄꦏ꧀ꦑꦷꦤꦶ ꦪꦱ꧀ꦱꦺꦠꦶ ꦕ, ꦄꦤꦸꦱ꧀ꦮꦫꦴꦒꦩꦺꦴ. ꦮꦶꦏ꧀ꦑꦶꦠ꧀ꦠꦴꦤꦶ ꦄꦔ꧀ꦒꦴꦤꦶ ꦪꦱ꧀ꦱꦺꦠꦶ ꦕ ꦮꦴꦏ꧀ꦪꦁ. ꦱꦶꦠꦲꦱꦶꦠꦢ꧀ꦮꦪꦁ ꦈꦠ꧀ꦠꦩꦺ, ꦮꦶꦲꦱꦶꦠꦈꦥꦲꦱꦶꦠꦢ꧀ꦮꦪꦁ ꦩꦗ꧀ꦙꦶꦩꦺ, ꦄꦥꦲꦱꦶꦠꦄꦠꦶꦲꦱꦶꦠꦢ꧀ꦮꦪꦁ ꦄꦣꦩꦺ ꦮꦠ꧀ꦠꦠꦺ. ꦌꦮꦁ ꦱꦶꦠꦴꦢꦪꦺꦴ ꦄꦤꦸꦫꦹꦥꦮꦶꦨꦴꦮꦴꦢꦶꦤꦴ ꦥꦪꦸꦠ꧀ꦠꦴ ꦆꦩꦺ ꦫꦱꦴ’ꦮꦠ꧀ꦡꦁ ꦥꦴꦥꦸꦟꦤ꧀ꦠꦷꦠꦶ ꦄꦣꦶꦥ꧀ꦥꦴꦪꦺꦴ.

ꦲꦱ꧀ꦱꦫꦱꦱ꧀ꦱ ꦌꦮꦩꦸꦢꦴꦲꦫꦟꦁ ꦚꦴꦠꦧ꧀ꦧꦁ –

ꦥꦹꦗꦺꦱꦶ ꦏꦟ꧀ꦜꦩꦟꦶꦤꦴ ꦄꦥꦶ ꦪꦺꦴ ꦥꦱꦤ꧀ꦤꦺꦴ,

ꦣꦩ꧀ꦩꦺ ꦥꦸꦫꦴ’ꦱꦩꦣꦸꦫꦁ ꦮꦶꦣꦸꦫꦁ ꦱ ꦲꦤ꧀ꦠꦸꦁ;

ꦒꦺꦴꦥꦺꦤ꧀ꦠꦶꦪꦴꦥꦶ ꦮꦕꦤꦺꦤ ꦡꦶꦪꦴ ꦱꦨꦴꦮꦁ;

ꦨꦠ꧀ꦠꦶꦁ ꦄꦏꦴꦱꦶ ꦦꦫꦸꦱꦺ ꦩꦪꦶ ꦤꦴꦒꦫꦴꦗꦴꦠꦶ.

ꦪꦺꦴ ꦥꦸꦫꦴ ꦥꦸꦧ꧀ꦧꦺ ꦣꦩ꧀ꦩꦺ ꦠꦱ꧀ꦱ ꦣꦩ꧀ꦩꦏꦡꦤꦺ ꦥꦱꦤ꧀ꦤꦺꦴ ꦏꦟ꧀ꦜꦩꦟꦶꦤꦴ ꦄꦥꦶ ꦄꦠ꧀ꦠꦤꦺꦴ ꦄꦤꦒ꧀ꦓꦏꦟ꧀ꦜꦩꦟꦶꦤꦴꦥꦶ ꦠꦁ ꦥꦹꦗꦺꦱꦶ, ꦱꦺꦴ ꦤꦴꦒꦫꦴꦗꦴ ꦱꦨꦴꦮꦁ ꦄꦠ꧀ꦠꦤꦺꦴ ꦄꦣꦶꦥ꧀ꦥꦴꦪꦁ ꦒꦺꦴꦥꦺꦤ꧀ꦠꦶꦪꦴ ꦄꦥꦶ ꦡꦶꦪꦴ ꦮꦕꦤꦺꦤ ꦆꦠ꧀ꦡꦶꦪꦴ ꦮꦕꦤꦺꦤ ꦄꦱꦩꦣꦸꦫꦁ ꦠꦸꦭ꧀ꦪꦫꦲꦶꦠꦁ ꦮꦶꦣꦸꦫꦁ ꦮꦶꦣꦸꦫꦥꦟ꧀ꦝꦶꦠꦁ ꦲꦤ꧀ꦠꦸꦁ ꦮꦶꦤꦴꦱꦤꦠ꧀ꦡꦁ ꦦꦫꦸꦱꦺ ꦕꦟ꧀ꦝꦺ ꦩꦪꦶ ꦨꦠ꧀ꦠꦶꦁ ꦄꦏꦴꦱꦷꦠꦶ. ꦆꦲ ꦌꦏꦱ꧀ꦩꦶꦁꦪꦺꦮ ꦮꦠ꧀ꦡꦸꦤꦶ ꦤꦴꦒꦫꦴꦗꦱ꧀ꦱ ꦥꦱꦴꦢꦮꦣꦮꦶꦣꦴꦤꦴꦢꦶꦮꦶꦥꦫꦷꦠꦥ꧀ꦥꦮꦠ꧀ꦠꦶ ꦄꦴꦭꦩ꧀ꦧꦟꦮꦶꦨꦴꦮꦺꦴ, ꦥꦜꦩꦁ ꦄꦤꦒ꧀ꦓꦥꦶꦪꦮꦠ꧀ꦡꦹꦲꦶ ꦥꦹꦗꦶꦠꦨꦴꦮꦺꦴ ꦕ ꦧꦺꦴꦣꦶꦱꦠ꧀ꦠꦱ꧀ꦱ ꦄꦠꦸꦭ꧀ꦪꦨꦴꦮꦺꦴ ꦕ ꦆꦠ꧀ꦡꦶꦮꦕꦤꦱ꧀ꦱ ꦱꦩ꧀ꦥꦛꦶꦕ꧀ꦖꦤꦨꦴꦮꦺꦴ ꦕ ꦠꦱ꧀ꦱꦴꦣꦶꦥ꧀ꦥꦴꦪꦱ꧀ꦱ ꦄꦚ꧀ꦚꦴꦠꦨꦴꦮꦺꦴ ꦕ ꦥꦸꦟ꧀ꦟꦏꦱ꧀ꦱ ꦕꦟ꧀ꦝꦨꦴꦮꦺꦴ ꦕꦺꦠꦶ ꦆꦩꦺꦲꦶ ꦱꦧ꧀ꦧꦮꦕꦤꦺꦲꦶ ꦈꦢ꧀ꦢꦷꦥꦤꦮꦶꦨꦴꦮꦺꦴ ꦢꦱ꧀ꦱꦶꦠꦺꦴ. ꦆꦩꦺꦲꦶ ꦈꦢ꧀ꦢꦷꦥꦶꦠꦜꦴꦪꦷꦨꦴꦮꦱꦔ꧀ꦑꦠꦺꦴ ꦲꦴꦱꦺꦴ ꦮꦴꦏ꧀ꦪꦱꦴꦩꦠ꧀ꦡꦶꦪꦴ ꦥꦏꦴꦱꦶꦠꦺꦴ ꦲꦴꦱꦮꦶꦫꦺꦴꦣꦶꦤꦶꦧ꧀ꦧꦺꦢꦴꦢꦶꦮꦗ꧀ꦗꦶꦠꦴ ꦱꦩꦴꦭꦱꦶꦪꦱꦤ꧀ꦠꦺꦴꦱꦄꦱ꧀ꦱꦸꦮꦺꦥꦡꦴꦢꦶꦏꦴ ꦧ꧀ꦪꦨꦶꦕꦴꦫꦷꦨꦴꦮꦴ ꦱꦴꦠ꧀ꦠꦶꦏꦴꦨꦴꦮꦴ ꦕ ꦌꦮꦁ ꦱꦴꦩꦠ꧀ꦡꦶꦪꦺꦤ ꦢꦷꦥꦶꦠꦴ. ꦠꦢꦤꦸꦫꦹꦥꦮꦶꦨꦴꦮꦴꦢꦶꦥꦏꦴꦱꦏꦴ ꦪꦡꦴꦮꦸꦠ꧀ꦠꦏꦮꦶꦥ꧀ꦥꦪꦺꦴꦒꦴ ꦄꦤꦸꦨꦴꦮꦴ ꦤꦴꦩ ꦲꦺꦴꦤ꧀ꦠꦶ. ꦲꦱ꧀ꦱꦨꦺꦢꦺꦤ ꦩꦗ꧀ꦙꦶꦩꦺ ꦥꦸꦫꦶꦱꦺ ꦮꦠ꧀ꦠꦧ꧀ꦧꦴꦥꦶ ꦲꦱꦶꦠꦈꦥꦲꦱꦶꦠꦴ ꦢ꧀ꦮꦺ ꦆꦩꦴ ꦢꦛ꧀ꦜꦧ꧀ꦧꦴ.

ꦏꦫꦸꦟꦴꦜꦴꦪꦷꦨꦴꦮ

꧓꧖꧑. ꦱꦺꦴꦏꦫꦹꦥꦺꦴ ꦠꦸ ꦏꦫꦸꦟꦺꦴ-

ꦤꦶꦛ꧀ꦜꦥꦠ꧀ꦠꦶꦛ꧀ꦜꦤꦴꦱꦠꦺꦴ;

ꦠꦠ꧀ꦡꦴ’ꦤꦸꦨꦴꦮꦴ ꦫꦸꦢꦶꦠ-

ꦥꦭꦪꦠ꧀ꦡꦩ꧀ꦨꦏꦴꦢꦪꦺꦴ;

ꦮꦶꦱꦴꦢꦴꦭꦱ꧀ꦪꦩꦫꦟ-

ꦕꦶꦤ꧀ꦠꦴꦢꦷ ꦧ꧀ꦪꦨꦶꦕꦴꦫꦶꦤꦺꦴ.

꧓꧖꧑. ‘‘ꦱꦺꦴꦏꦺ’’ꦕ꧀ꦕꦴꦢꦶ. ꦄꦤꦶꦛ꧀ꦜꦱ꧀ꦱ ꦥꦸꦠ꧀ꦠꦮꦶꦪꦺꦴꦒꦴꦢꦶꦤꦺꦴ ꦢꦺꦱꦤꦶꦏ꧀ꦏꦝ꧀ꦞꦤꦴꦢꦶꦤꦺꦴ ꦥꦠ꧀ꦠꦶ ꦕ ꦆꦛ꧀ꦜꦱ꧀ꦱ ꦣꦩ꧀ꦩꦱ꧀ꦱ, ꦣꦤꦴꦢꦶꦤꦺꦴ ꦮꦴ ꦤꦴꦱꦺꦴ ꦕ ꦠꦠꦺꦴ ꦮꦶꦨꦴꦮꦨꦹꦠꦺꦲꦶ ꦱꦩ꧀ꦥꦤ꧀ꦤꦺꦴ ꦱꦺꦴꦏꦫꦹꦥꦺꦴ ꦱꦺꦴꦏꦱꦨꦴꦮꦺꦴ ꦠꦸ ꦏꦫꦸꦟꦺꦴ ꦫꦱꦺꦴ ꦤꦴꦩ. ꦠꦠ꧀ꦡ ꦈꦠ꧀ꦠꦩꦴꦤꦁ ꦱꦺꦴꦏꦺꦴ ꦥꦸꦠ꧀ꦠꦮꦶꦪꦺꦴꦒꦴꦢꦶꦄꦤꦶꦛ꧀ꦜꦸꦥ꧀ꦥꦠ꧀ꦠꦶꦠꦺꦴ, ꦣꦩ꧀ꦩꦴꦢꦶꦆꦛ꧀ꦜꦤꦴꦱꦠꦺꦴ ꦕ ꦗꦴꦪꦠꦺ. ꦤꦷꦕꦴꦤꦁ ꦠꦸ ꦢꦺꦱꦤꦶꦏ꧀ꦏꦝ꧀ꦞꦤꦴꦢꦶꦄꦤꦶꦛ꧀ꦜꦸꦥ꧀ꦥꦠ꧀ꦠꦶꦠꦺꦴ, ꦣꦤꦴꦢꦶꦆꦛ꧀ꦜꦤꦴꦱꦠꦺꦴ ꦕ, ꦥꦫꦺꦱꦁ ꦣꦤꦴꦢꦶꦤꦴꦱꦠꦺꦴ ꦠꦸ ꦈꦠ꧀ꦠꦩꦱ꧀ꦱꦺꦮ ꦩꦲꦴꦏꦴꦫꦸꦟꦶꦏꦠ꧀ꦠꦴ, ꦱꦺꦱꦁ ꦱꦸꦧꦺꦴꦣꦁ. ꦄꦤꦸꦨꦴꦮꦺꦴ ꦥꦤꦺꦠ꧀ꦡ ꦪꦡꦺꦴꦕꦶꦠ꧀ꦪꦁ ꦤꦶꦫꦹꦥꦪꦶꦠꦧ꧀ꦧꦺꦴ.

꧓꧖꧑. ꦆꦢꦴꦤꦶ ꦏꦫꦸꦟꦴꦫꦱꦥꦺꦴꦱꦤꦏ꧀ꦏꦩꦁ ꦢꦱ꧀ꦱꦺꦠꦶ ‘‘ꦱꦺꦴꦏ’’ꦆꦕ꧀ꦕꦴꦢꦶꦤꦴ. ꦄꦤꦶꦛ꧀ꦜꦥ꧀ꦥꦠ꧀ꦠꦶꦛ꧀ꦜꦤꦴꦱꦠꦺꦴ ꦥꦸꦠ꧀ꦠꦮꦶꦪꦺꦴꦒꦴꦢꦶꦤꦺꦴ, ꦢꦺꦱꦕꦴꦒꦴꦢꦶꦤꦺꦴ ꦮꦴ ꦄꦤꦶꦛ꧀ꦜꦱ꧀ꦱ ꦈꦥ꧀ꦥꦠ꧀ꦠꦶ ꦕ ꦱꦷꦭꦴꦢꦶꦤꦺꦴ, ꦣꦤꦴꦢꦶꦤꦺꦴ ꦮꦴ ꦆꦛ꧀ꦜꦱ꧀ꦱ ꦏꦤ꧀ꦠꦶꦮꦠ꧀ꦡꦸꦤꦺꦴ ꦮꦶꦤꦴꦱꦺꦴ ꦕꦴꦠꦶ ꦆꦩꦺꦲꦶ ꦄꦴꦭꦩ꧀ꦧꦟꦮꦶꦨꦴꦮꦺꦲꦶ ꦏꦫꦟꦨꦹꦠꦺꦲꦶ ꦈꦥ꧀ꦥꦤ꧀ꦤꦺꦴ ꦱꦺꦴꦏꦫꦹꦥꦺꦴ ꦠꦸ ꦱꦺꦴꦏꦱꦨꦴꦮꦺꦴ ꦥꦤ ꦏꦫꦸꦟꦺꦴ ꦏꦫꦸꦟꦴꦫꦱꦺꦴ ꦤꦴꦩ ꦲꦺꦴꦠꦶ. ꦠꦠ꧀ꦡ ꦏꦫꦸꦟꦴꦫꦱꦺ ꦫꦸꦢꦶꦠꦥꦭꦪꦠ꧀ꦡꦩ꧀ꦨꦏꦴꦢꦪꦺꦴ ꦫꦸꦢꦶꦠꦺꦴ ꦥꦭꦪꦺꦴ ꦡꦩ꧀ꦨꦺꦴꦠꦶꦄꦴꦢꦪꦺꦴ ꦄꦤꦸꦨꦴꦮꦴ ꦤꦴꦩ ꦨꦮꦤ꧀ꦠꦷꦠꦶ. ꦡꦩ꧀ꦨꦴꦢꦷꦤꦁ ꦱꦫꦹꦥꦺꦴ ꦲꦺꦛ꧀ꦜꦴ ꦮꦸꦠ꧀ꦠꦺꦴꦮ. ꦮꦶꦱꦴꦢꦄꦴꦭꦱ꧀ꦪꦩꦫꦟꦕꦶꦤ꧀ꦠꦴꦢꦪꦺꦴ ꦧ꧀ꦪꦨꦶꦕꦴꦫꦶꦤꦺꦴ ꦠꦱ꧀ꦩꦶꦁꦪꦺꦮ ꦧ꧀ꦪꦨꦶꦕꦴꦫꦶꦤꦺꦴ ꦨꦮꦤ꧀ꦠꦶ. ꦆꦲ ꦥꦸꦠ꧀ꦠꦮꦶꦪꦺꦴꦒꦴꦢꦶꦄꦤꦶꦛ꧀ꦜꦥ꧀ꦥꦠ꧀ꦠꦶꦪꦴ ꦕ ꦱꦷꦭꦣꦩ꧀ꦩꦴꦢꦶꦆꦛ꧀ꦜꦤꦴꦱꦤꦺꦤ ꦕ ꦈꦠ꧀ꦠꦩꦴꦤꦁ ꦱꦺꦴꦏꦺꦴ ꦈꦥ꧀ꦥꦗ꧀ꦗꦠꦶ, ꦢꦺꦱꦕꦴꦒꦴꦢꦶꦄꦤꦶꦛ꧀ꦜꦥ꧀ꦥꦠ꧀ꦠꦶꦪꦴ ꦕ ꦣꦤꦴꦢꦶꦆꦛ꧀ꦜꦤꦴꦱꦤꦺꦤ ꦕ ꦤꦷꦕꦴꦤꦁ. ꦄꦚ꧀ꦚꦺꦱꦁ ꦣꦤꦴꦢꦶꦮꦶꦤꦴꦱꦤꦺꦤ ꦥꦤ ꦩꦲꦴꦏꦫꦸꦟꦶꦏꦠ꧀ꦠꦴ ꦈꦠ꧀ꦠꦩꦱ꧀ꦱꦺꦮ ꦈꦥ꧀ꦥꦗ꧀ꦗꦠꦶ. ꦠꦱ꧀ꦩꦶꦁ ꦮꦶꦱꦪꦺ ꦱꦺꦴ ꦱꦺꦴꦏꦺꦴ ꦱꦺꦱꦴꦤꦁ ꦤꦸꦥ꧀ꦥꦗ꧀ꦗꦠꦶ. ꦠꦱ꧀ꦩꦴ ꦪꦡꦴꦫꦲꦁ ꦥꦪꦺꦴꦒꦺꦴ ꦏꦴꦠꦧ꧀ꦧꦺꦴ. ꦱꦺꦴꦏꦱ꧀ꦱ ꦫꦹꦥꦺꦴ ꦱꦨꦴꦮꦺꦴꦠꦶ ꦕ, ꦄꦤꦶꦛ꧀ꦜꦱ꧀ꦱ ꦥꦠ꧀ꦠꦷꦠꦶ ꦕ, ꦆꦛ꧀ꦜꦱ꧀ꦱ ꦤꦴꦱꦺꦴꦠꦶ ꦕ, ꦄꦤꦶꦛ꧀ꦜꦥ꧀ꦥꦠ꧀ꦠꦶ ꦕ ꦆꦛ꧀ꦜꦤꦴꦱꦺꦴ ꦕꦺꦠꦶ ꦕ, ꦫꦸꦢꦶꦠꦚ꧀ꦕ ꦥꦭꦪꦺꦴ ꦕ ꦡꦩ꧀ꦨꦏꦺꦴ ꦕꦺꦠꦶ ꦕ, ꦠꦺ ꦄꦴꦢꦶ ꦪꦺꦱꦩꦶꦠꦶ ꦕ, ꦮꦶꦱꦴꦢꦺꦴ ꦕ ꦄꦴꦭꦱ꧀ꦪꦚ꧀ꦕ ꦩꦫꦟꦚ꧀ꦕ ꦕꦶꦤ꧀ꦠꦴ ꦕꦺꦠꦶ ꦕ, ꦠꦴ ꦄꦴꦢꦶ ꦪꦺꦱꦩꦶꦠꦶ ꦕ ꦮꦴꦏ꧀ꦪꦁ. ꦆꦩꦱ꧀ꦱ ꦏꦫꦸꦟꦴꦫꦱꦱ꧀ꦱ ꦭꦏ꧀ꦑꦶꦪꦩꦺꦮꦁ ꦢꦛ꧀ꦜꦧ꧀ꦧꦁ –

ꦄꦴꦏꦝ꧀ꦞꦶꦠꦺ’ꦏꦱꦠꦫꦴꦗꦥꦸꦫꦏ꧀ꦑꦠꦺꦴ ꦪꦺꦴ,

ꦣꦩ꧀ꦩꦺꦤ ꦄꦴꦱꦤꦩꦭꦁꦏꦸꦫꦸꦠꦺ ꦗꦶꦤꦺꦴꦮ;

ꦱꦺꦴ ꦄꦱ꧀ꦱꦮꦴꦭꦩꦮꦭꦩ꧀ꦧꦶꦪ ꦢꦴꦤꦶ ꦤꦷꦠꦺꦴ,

ꦪꦏ꧀ꦑꦺꦤ ꦭꦺꦴꦏꦠꦶꦭꦏꦺꦴ ꦏꦸꦫꦸꦠꦺ ꦏꦶꦩꦺꦏꦺꦴꦠꦶ.

ꦪꦺꦴ ꦌꦏꦱꦠꦫꦴꦗꦥꦸꦫꦏ꧀ꦑꦠꦺꦴ ꦫꦴꦗꦹꦤꦁ ꦌꦏꦱꦠꦺꦤ ꦥꦫꦶꦮꦴꦫꦶꦠꦺꦴ ꦗꦶꦤꦺꦴ ꦆꦮ ꦧꦸꦢ꧀ꦣꦺꦴ ꦆꦮ ꦣꦩ꧀ꦩꦺꦤ ꦩꦣꦸꦫꦣꦩ꧀ꦩꦏꦡꦤꦺꦤ ꦄꦴꦱꦤꦁ ꦣꦩ꧀ꦩꦴꦱꦤꦁ ꦄꦭꦁꦏꦸꦫꦸꦠꦺ ꦱꦗ꧀ꦗꦺꦠꦶ, ꦭꦺꦴꦏꦠꦶꦭꦏꦺꦴ ꦭꦺꦴꦏꦱ꧀ꦱ ꦥꦶꦪꦠꦴꦪ ꦠꦶꦭꦏꦴꦭꦔ꧀ꦏꦴꦫꦨꦹꦠꦺꦴ ꦱꦺꦴ ꦮꦶꦣꦸꦫꦥꦟ꧀ꦝꦶꦠꦺꦴ ꦪꦏ꧀ꦑꦺꦤ ꦥꦸꦟ꧀ꦟꦏꦺꦤ ꦄꦴꦏꦝ꧀ꦞꦶꦠꦺꦴ ꦲꦸꦠ꧀ꦮꦴ ꦤꦷꦠꦺꦴ ꦄꦱ꧀ꦱꦮꦴꦭꦁ ꦄꦮꦭꦩ꧀ꦧꦶꦪ ꦆꦢꦴꦤꦶ ꦌꦏꦺꦴ ꦏꦶꦁ ꦏꦸꦫꦸꦠꦺꦠꦶ. ꦆꦲꦴꦤꦷꦠꦺꦴꦠꦶ ꦢꦱ꧀ꦱꦶꦠꦥꦶꦪꦮꦠ꧀ꦡꦸꦮꦶꦪꦺꦴꦒꦺꦴ ꦱꦺꦴꦏꦱ꧀ꦱ ꦄꦴꦭꦩ꧀ꦧꦟꦮꦶꦨꦴꦮꦺꦴ ꦲꦺꦴꦠꦶ. ‘‘ꦄꦴꦏꦝ꧀ꦞꦶꦠꦺꦏꦱꦠꦫꦴꦗꦺ’’ꦕ꧀ꦕꦴꦢꦶꦤꦴ ꦱꦏꦭꦺꦤ ꦮꦴꦏ꧀ꦪꦺꦤ ꦈꦢ꧀ꦢꦷꦥꦤꦮꦶꦨꦴꦮꦺꦴ ꦢꦱ꧀ꦱꦶꦠꦺꦴ, ꦈꦢ꧀ꦢꦷꦥꦶꦠꦱꦺꦴꦏꦱꦔ꧀ꦑꦴꦠꦜꦴꦪꦷꦨꦴꦮꦺꦴ ꦕ ꦮꦶꦱꦴꦢꦴꦭꦱ꧀ꦪꦕꦶꦤ꧀ꦠꦴꦢꦶꦏꦺꦴ ꦧ꧀ꦪꦨꦶꦕꦴꦫꦷꦨꦴꦮꦺꦴ ꦕ ꦫꦸꦢꦶꦠꦥꦭꦪꦡꦩ꧀ꦨꦏꦴꦢꦶꦏꦴ ꦮꦶꦨꦴꦮꦴꦢꦶꦧꦺꦴꦣꦏꦄꦤꦸꦨꦴꦮꦴ ꦕ ꦮꦴꦏ꧀ꦪꦱꦴꦩꦠ꧀ꦡꦶꦪꦺꦤ ꦢꦷꦥꦶꦠꦴ ꦲꦺꦴꦤ꧀ꦠꦶ.

ꦫꦸꦢ꧀ꦢꦜꦴꦪꦷꦨꦴꦮ

꧓꧖꧒. ꦏꦺꦴꦣꦺꦴ ꦩꦕ꧀ꦖꦫꦶꦪꦴꦢꦷꦲꦶ, ꦥꦺꦴꦱꦺ ꦠꦴꦱꦩꦢꦴꦢꦶꦨꦶ;

ꦤꦪꦤꦴꦫꦸꦟꦠꦴꦢꦷꦲꦶ, ꦫꦸꦢ꧀ꦢꦺꦴ ꦤꦴꦩ ꦫꦱꦺꦴ ꦨꦮꦺ.

꧓꧖꧒. ‘‘ꦏꦺꦴꦣꦺꦴ’’ꦆꦕ꧀ꦕꦴꦢꦶ, ꦱꦸꦧꦺꦴꦣꦁ. ꦌꦠ꧀ꦡ ꦥꦜꦩꦺꦤ ꦄꦴꦢꦶꦱꦢ꧀ꦢꦺꦤ ꦄꦮꦶꦏ꧀ꦑꦺꦥꦈꦥꦲꦴꦱꦴꦢꦪꦺꦴ ꦮꦶꦨꦴꦮꦴ ꦒꦲꦶꦠꦴ, ꦢꦸꦠꦶꦪꦺꦤ ꦈꦒ꧀ꦒꦱꦩ꧀ꦨꦩꦴꦢꦪꦺꦴ ꦧ꧀ꦪꦨꦶꦕꦴꦫꦶꦤꦺꦴ, ꦠꦠꦶꦪꦺꦤ ꦨꦹꦏꦸꦛꦶꦥꦸꦫꦟꦎꦛ꧀ꦜꦤꦶꦥ꧀ꦥꦷꦭ꦳ꦤꦴꦢꦪꦺꦴ ꦄꦤꦸꦨꦴꦮꦴ.

꧓꧖꧒. ꦆꦢꦴꦤꦶ ꦫꦸꦢ꧀ꦢꦫꦱꦱ꧀ꦱ ꦥꦺꦴꦱꦤꦏ꧀ꦏꦩꦁ ꦢꦱ꧀ꦱꦺꦠꦶ ‘‘ꦏꦺꦴꦣꦺꦴ’’ꦆꦕ꧀ꦕꦴꦢꦶꦤꦴ. ꦏꦺꦴꦣꦺꦴ ꦩꦕ꧀ꦖꦫꦶꦪꦴꦢꦷꦲꦶ ꦩꦕ꧀ꦖꦫꦶꦪꦄꦮꦶꦏ꧀ꦑꦺꦥꦈꦥꦲꦴꦱꦴꦢꦷꦲꦶ ꦄꦴꦭꦩ꧀ꦧꦟꦴꦢꦷꦲꦶ ꦮꦶꦨꦴꦮꦺꦲꦶ ꦕ ꦲꦺꦠꦸꦨꦹꦠꦺꦲꦶ ꦠꦴꦱꦩꦢꦴꦢꦷꦲꦶ ꦠꦴꦱꦩꦢꦈꦒ꧀ꦒꦠꦱꦩ꧀ꦨꦩꦴꦢꦷꦲꦶ ꦧ꧀ꦪꦨꦶꦕꦴꦫꦷꦨꦴꦮꦺꦲꦶ ꦕ ꦤꦪꦤꦴꦫꦸꦟꦠꦴꦢꦷꦲꦶ ꦤꦺꦠ꧀ꦠꦫꦠ꧀ꦠꦱꦸꦨꦔ꧀ꦒꦎꦛ꧀ꦜꦥꦷꦭ꦳ꦤꦴꦢꦷꦲꦶ ꦄꦤꦸꦨꦴꦮꦺꦲꦶ ꦕ ꦏꦫꦟꦨꦹꦠꦺꦲꦶ ꦥꦺꦴꦱꦺ ꦱꦠꦶ ꦫꦸꦢ꧀ꦢꦺꦴ ꦤꦴꦩ ꦫꦱꦺꦴ ꦨꦮꦺꦠꦶ. ꦩꦕ꧀ꦖꦫꦶꦪꦁ ꦄꦴꦢꦶ ꦪꦺꦱꦤ꧀ꦠꦶ ꦕ, ꦠꦴꦱꦺꦴ ꦕ ꦩꦢꦺꦴ ꦕꦺꦠꦶ ꦕ, ꦠꦺ ꦄꦴꦢꦶ ꦪꦺꦱꦩꦶꦠꦶ ꦕ, ꦤꦪꦤꦴꦤꦶ ꦕ ꦠꦴꦤꦶ ꦄꦫꦸꦟꦴꦤꦶ ꦕꦴꦠꦶ ꦕ, ꦠꦺꦱꦁ ꦨꦴꦮꦺꦴꦠꦶ ꦕ, ꦱꦴ ꦄꦴꦢꦶ ꦪꦺꦱꦩꦶꦠꦶ ꦕ ꦮꦴꦏ꧀ꦪꦁ.

ꦫꦸꦢ꧀ꦢꦫꦱꦱ꧀ꦱ ꦈꦢꦴꦲꦫꦟꦩꦺꦮꦁ ꦢꦛ꧀ꦜꦧ꧀ꦧꦁ –

ꦪꦏ꧀ꦑꦺꦤ ꦨꦺꦴ ꦄꦣꦶꦒꦠꦺꦴꦱꦶ ꦩꦤꦸꦱ꧀ꦱꦨꦏ꧀ꦑꦺ,

ꦤꦴ’ꦱ꧀ꦱꦱ꧀ꦱ ꦮꦴꦭ’ꦩꦮꦭꦩ꧀ꦧ ꦥꦸꦫꦁ ꦄꦮꦺꦏ꧀ꦑ;

ꦮꦺꦫꦩ꧀ꦨꦮꦴꦠꦩꦸꦑꦕꦸꦟ꧀ꦟꦶꦠꦱꦧ꧀ꦧꦒꦠ꧀ꦠꦺꦴ,

ꦩꦕ꧀ꦕꦺꦴ ꦏꦡꦁ ꦥꦸꦤꦥꦶ ꦥꦱ꧀ꦱꦠꦶ ꦗꦷꦮꦭꦺꦴꦏꦤ꧀ꦠꦶ.

ꦨꦺꦴ ꦩꦤꦸꦱ꧀ꦱꦨꦏ꧀ꦑꦺꦤ ꦪꦏ꧀ꦑꦺꦤ ꦄꦣꦶꦒꦠꦺꦴꦱꦶ ꦒꦲꦶꦠꦺꦴ ꦄꦱꦶ, ꦄꦱ꧀ꦱꦱ꧀ꦱ ꦮꦴꦭꦩꦮꦭꦩ꧀ꦧ ꦮꦴꦭꦣꦶꦁ ꦒꦲꦺꦠ꧀ꦮꦴ ꦆꦢꦴꦤꦺꦮ ꦥꦸꦫꦁ ꦄꦮꦺꦏ꧀ꦑ ꦠꦸꦪ꧀ꦲꦁ ꦤꦒꦫꦁ ꦎꦭꦺꦴꦏꦺꦲꦶ, ꦠꦡꦺꦮ ꦲꦶ ꦮꦺꦫꦩ꧀ꦨꦮꦴꦠꦩꦸꦑꦕꦸꦟ꧀ꦟꦶꦠꦱꦧ꧀ꦧꦒꦠ꧀ꦠꦺꦴ ꦮꦺꦫꦩ꧀ꦨꦮꦴꦠꦱ꧀ꦱ ꦄꦨꦶꦩꦸꦑꦶꦕꦸꦟ꧀ꦟꦶꦠꦱꦏꦭꦱꦫꦷꦫꦺꦴ ꦩꦕ꧀ꦕꦺꦴ ꦩꦤꦸꦱ꧀ꦱꦺꦴ ꦗꦷꦮꦭꦺꦴꦏꦁ ꦱꦠ꧀ꦠꦭꦺꦴꦏꦁ ꦥꦸꦤꦥꦶ ꦏꦡꦁ ꦥꦱ꧀ꦱꦠꦷꦠꦶ. ꦆꦲ ꦩꦕ꧀ꦖꦫꦶꦪꦴꦢꦶꦮꦶꦨꦴꦮꦴ ꦕ ꦏꦺꦴꦣꦴꦢꦶꦱꦔ꧀ꦑꦴꦠꦺꦴ ꦜꦴꦪꦷꦨꦴꦮꦺꦴ ꦕ ꦮꦴꦏ꧀ꦪꦱꦴꦩꦠ꧀ꦡꦶꦪꦴ ꦢꦷꦥꦶꦠꦴ ꦲꦺꦴꦤ꧀ꦠꦶ, ꦄꦥꦫꦢ꧀ꦣꦺꦤ ꦠꦴꦱꦩꦢꦈꦒ꧀ꦒꦠꦴꦢꦶꦧ꧀ꦪꦨꦶꦕꦴꦫꦷꦨꦴꦮꦴ ꦮꦶꦨꦴꦮꦶꦠꦴ ꦲꦺꦴꦤ꧀ꦠꦶ. ꦱꦩꦸꦢꦴꦪꦺꦤ ꦤꦪꦤꦴꦫꦸꦟꦠꦴꦢꦪꦺꦴ ꦄꦤꦸꦨꦴꦮꦴ ꦱꦹꦕꦶꦠꦴ ꦲꦺꦴꦤ꧀ꦠꦶ.

ꦮꦷꦫꦜꦴꦪꦷꦨꦴꦮ

꧓꧖꧓. ꦥꦠꦴꦥꦮꦶꦏ꧀ꦏꦩꦴꦢꦷꦲꦸ-ꦱ꧀ꦱꦴꦲꦺꦴ ꦮꦶꦫꦺꦴꦠꦶ ꦱꦚ꧀ꦚꦶꦠꦺꦴ;

ꦫꦟꦢꦴꦤꦢꦪꦴꦪꦺꦴꦒꦴ, ꦮꦷꦫꦺꦴ’ꦪꦁ ꦠꦶꦮꦶꦣꦺꦴ ꦨꦮꦺ;

ꦠꦺꦮꦴ’ꦤꦸꦨꦴꦮꦴ ꦣꦶꦠꦶꦩ-ꦠ꧀ꦪꦴꦢꦪꦺꦴ ꦧ꧀ꦪꦨꦶꦕꦴꦫꦶꦤꦺꦴ.

꧓꧖꧓. ‘‘ꦥꦠꦴꦥꦶ’’ꦕ꧀ꦕꦴꦢꦶ. ꦥꦠꦴꦥꦺꦴ ꦱꦠ꧀ꦠꦸꦱꦤ꧀ꦠꦴꦥꦏꦴꦫꦷ ꦠꦺꦗꦺꦴ, ꦮꦶꦏ꧀ꦏꦩꦺꦴ ꦥꦫꦩꦟ꧀ꦝꦭꦏ꧀ꦏꦩꦤ꧀ꦠꦁ, ꦠꦺ ꦄꦴꦢꦪꦺꦴ ꦪꦺꦱꦁ ꦧꦭꦴꦮꦶꦏ꧀ꦑꦺꦥꦴꦢꦷꦤꦁ ꦥꦛꦶꦥꦸꦒ꧀ꦒꦭꦒꦠꦴꦤꦁ ꦮꦶꦨꦴꦮꦴꦤꦁ, ꦠꦺꦲꦶ ꦗꦴꦠꦺꦴ ꦈꦱ꧀ꦱꦴꦲꦺꦴ ꦫꦱꦠ꧀ꦠꦩꦴꦥꦤ꧀ꦤꦺꦴ ꦮꦷꦫꦺꦴ ꦫꦱꦺꦴꦠꦶ ꦱꦚ꧀ꦚꦶꦠꦺꦴ, ꦄꦪꦁ ꦮꦷꦫꦺꦴ ꦫꦟꦢꦴꦤꦢꦪꦴꦪꦺꦴꦒꦴ ꦠꦶꦮꦶꦣꦺꦴ ꦨꦮꦺ ꦪꦸꦢ꧀ꦣꦮꦷꦫꦺꦴ ꦢꦴꦤꦮꦷꦫꦺꦴ ꦢꦪꦴꦮꦷꦫꦺꦴꦠꦶ, ꦠꦺ ꦪꦸꦢ꧀ꦣꦏꦫꦟꦴꦢꦪꦺꦴ ꦌꦮ ꦠꦠ꧀ꦡ ꦄꦤꦸꦨꦴꦮꦴ ꦨꦮꦤ꧀ꦠꦶ. ꦣꦶꦠꦶꦩꦠꦶꦈꦒ꧀ꦒꦠꦴꦢꦪꦺꦴ ꦧ꧀ꦪꦨꦶꦕꦴꦫꦶꦤꦺꦴ ꦨꦮꦤ꧀ꦠꦷꦠꦶ.

꧓꧖꧓. ꦆꦢꦴꦤꦶ ꦮꦷꦫꦫꦱꦨꦺꦢꦁ, ꦥꦺꦴꦱꦤꦏ꧀ꦏꦩꦚ꧀ꦕ ꦢꦱ꧀ꦱꦺꦠꦶ ‘‘ꦥꦠꦴꦥ’’ꦆꦕ꧀ꦕꦴꦢꦶꦤꦴ. ꦥꦠꦴꦥꦮꦶꦏ꧀ꦏꦩꦴꦢꦷꦲꦶ ꦄꦚ꧀ꦚꦫꦴꦗꦹꦤꦁ ꦢꦟ꧀ꦝꦗꦠꦺꦗꦱꦔ꧀ꦑꦠꦥꦠꦴꦥꦺꦴ, ꦠꦺꦱꦩꦺꦮ ꦥꦫꦩꦟ꧀ꦝꦭꦏ꧀ꦏꦩꦤꦱꦔ꧀ꦑꦴꦠꦮꦶꦏ꧀ꦏꦩꦺꦴ ꦦꦭꦨꦺꦢꦺꦴ ꦕꦺꦠꦶꦄꦴꦢꦷꦲꦶ ꦈꦥ꧀ꦥꦤ꧀ꦤꦺꦴ ꦈꦱ꧀ꦱꦴꦲꦺꦴ ꦮꦷꦫꦺꦴꦠꦶ ꦮꦷꦫꦫꦱꦺꦴꦠꦶ ꦱꦚ꧀ꦚꦶꦠꦺꦴ ꦏꦮꦷꦲꦶ ꦚꦴꦠꦺꦴ, ꦄꦪꦁ ꦮꦷꦫꦫꦱꦺꦴ ꦫꦟꦢꦴꦤꦢꦪꦴꦪꦺꦴꦒꦴ ꦪꦸꦢ꧀ꦣꦕꦴꦒꦏꦫꦸꦟꦴꦪꦺꦴꦒꦺꦤ ꦲꦺꦠꦸꦨꦹꦠꦺꦤ ꦠꦶꦮꦶꦣꦺꦴ ꦨꦮꦺ. ꦠꦺ ꦌꦮ ꦫꦟꦢꦴꦤꦢꦪꦴ ꦌꦮ ꦆꦩꦴ ꦄꦤꦸꦨꦴꦮꦴ ꦤꦴꦩ ꦲꦺꦴꦤ꧀ꦠꦶ. ꦣꦶꦠꦶꦩꦠ꧀ꦪꦴꦢꦪꦺꦴ ꦣꦶꦠꦶꦩꦠꦶꦈꦒ꧀ꦒꦠꦒꦧ꧀ꦧꦴꦢꦪꦺꦴ ꦧ꧀ꦪꦨꦶꦕꦴꦫꦶꦤꦺꦴ ꦨꦴꦮꦴ ꦲꦺꦴꦤ꧀ꦠꦷꦠꦶ. ꦪꦸꦢ꧀ꦣꦮꦷꦫꦢꦴꦤꦮꦷꦫꦢꦪꦴꦮꦷꦫꦮꦱꦺꦤ ꦮꦷꦫꦫꦱꦺꦴ ꦠꦶꦮꦶꦣꦺꦴ ꦲꦺꦴꦠꦶ. ꦥꦠꦴꦥꦺꦴ ꦕ ꦮꦶꦏ꧀ꦏꦩꦺꦴ ꦕꦺꦠꦶ ꦕ, ꦠꦺ ꦄꦴꦢꦶ ꦪꦺꦱꦩꦶꦠꦶ ꦕ, ꦫꦟꦺꦴ ꦕ ꦢꦴꦤꦚ꧀ꦕ ꦢꦪꦴ ꦕꦺꦠꦶ ꦕ, ꦠꦴꦲꦶ ꦪꦺꦴꦒꦺꦴꦠꦶ ꦕ, ꦠꦪꦺꦴ ꦮꦶꦣꦴ ꦥꦏꦴꦫꦴ ꦄꦱ꧀ꦱꦴꦠꦶ ꦕ, ꦣꦶꦠꦶ ꦕ ꦩꦠꦶ ꦕꦺꦠꦶ ꦕ, ꦠꦴ ꦄꦴꦢꦶ ꦪꦺꦱꦩꦶꦠꦶ ꦕ ꦮꦴꦏ꧀ꦪꦁ.

ꦮꦷꦫꦫꦱꦱ꧀ꦱ ꦈꦢꦴꦲꦫꦟꦩꦺꦮꦁ ꦢꦛ꧀ꦜꦧ꧀ꦧꦁ –

ꦮꦶꦚ꧀ꦚꦴꦥꦺꦠ꧀ꦮꦴ ꦏꦸꦮꦺꦫꦁ ꦱꦸꦩꦲꦠꦶ-

ꦩꦥꦶ ꦕꦺ’ꦏꦺꦴꦮꦏꦸꦩ꧀ꦨꦟ꧀ꦝꦱꦺꦤꦁ,

ꦈꦠ꧀ꦠꦴꦱꦺꦠ꧀ꦮꦴ ꦒꦲꦺꦠ꧀ꦮꦴ ꦩꦟꦶꦫꦠꦤꦮꦫꦁ

ꦭꦏ꧀ꦑꦩꦴꦣꦴꦪ ꦗꦹꦠꦺ;

ꦗꦺꦠ꧀ꦮꦴ ꦏꦺꦴꦫꦧ꧀ꦪꦫꦴꦗꦁ ꦱꦕꦶꦮꦫꦠꦤ-

ꦩꦸꦢ꧀ꦣꦕ꧀ꦕ ꦫꦚ꧀ꦚꦁ ꦱꦠꦩ꧀ꦲꦴ,

ꦌꦠ꧀ꦡꦴꦤꦺꦠ꧀ꦮꦴ’ꦢꦶꦪꦶꦱ꧀ꦱꦁ ꦱꦸꦪꦸꦮꦠꦶꦫꦠꦤꦁ

ꦏꦺꦴ ꦩꦩꦺ’ꦠ꧀ꦡ’ꦠ꧀ꦡꦶ ꦨꦴꦫꦺꦴꦠꦶ.

ꦏꦸꦮꦺꦫꦁ ꦮꦺꦱ꧀ꦱꦮꦟꦩꦲꦴꦫꦴꦗꦁ ꦮꦶꦚ꧀ꦚꦴꦥꦺꦠ꧀ꦮꦴ ꦧꦺꦴꦣꦺꦠ꧀ꦮꦴ ꦱꦸꦩꦲꦠꦶꦩꦥꦶ ꦏꦸꦩ꧀ꦨꦟ꧀ꦝꦱꦺꦤꦁ ꦄꦠꦶꦩꦲꦤ꧀ꦠꦶꦁ ꦏꦸꦩ꧀ꦨꦟ꧀ꦝꦱꦺꦤꦁ ꦌꦏꦺꦴꦮ ꦈꦠ꧀ꦠꦴꦱꦺꦠ꧀ꦮꦴ ꦨꦪꦁ ꦗꦤꦺꦠ꧀ꦮꦴ ꦩꦟꦶꦫꦠꦤꦮꦫꦁ ꦒꦲꦺꦠ꧀ꦮꦴ ꦗꦹꦠꦺ ꦄꦏ꧀ꦑꦏꦷꦭ꦳ꦴꦪꦁ ꦭꦏ꧀ꦑꦁ ꦄꦴꦣꦴꦪ ꦜꦥꦺꦠ꧀ꦮꦴ ꦏꦺꦴꦫꦧ꧀ꦪꦫꦴꦗꦁ ꦗꦺꦠ꧀ꦮꦴ ꦫꦚ꧀ꦚꦁ ꦱꦠꦩ꧀ꦲꦴ ꦫꦴꦗꦱꦩ꧀ꦧꦤ꧀ꦣꦶꦤꦴ ꦱꦠꦺꦤ ꦱꦕꦶꦮꦫꦠꦤꦁ ꦄꦩꦕ꧀ꦕꦫꦠꦤꦁ ꦈꦢ꧀ꦣꦕ꧀ꦕ ꦈꦢ꧀ꦣꦫꦶꦠ꧀ꦮꦴ ꦌꦠ꧀ꦡꦴꦤꦺꦠ꧀ꦮꦴ ꦱꦸꦪꦸꦮꦠꦶꦫꦠꦤꦁ ꦱꦺꦴꦨꦤꦆꦠ꧀ꦡꦶꦫꦠꦤꦁ ꦄꦴꦢꦶꦪꦶꦱ꧀ꦱꦁ ꦒꦟ꧀ꦲꦶꦱ꧀ꦱꦴꦩꦶ, ꦌꦠ꧀ꦡ ꦪꦡꦴꦮꦸꦠ꧀ꦠꦺꦱꦸ ꦩꦩ ꦏꦺꦴ ꦨꦴꦫꦺꦴ ꦄꦠ꧀ꦡꦷꦠꦶ. ꦌꦠ꧀ꦡ ‘‘ꦏꦺꦴ ꦩꦩꦺꦠ꧀ꦡꦠ꧀ꦡꦶ ꦨꦴꦫꦺꦴ’’ꦠꦶ ꦆꦩꦶꦤꦴ ꦈꦱ꧀ꦱꦴꦲꦱꦔ꧀ꦑꦴꦠꦺꦴ ꦜꦴꦪꦷꦨꦴꦮꦺꦴ ꦥꦏꦴꦱꦶꦠꦺꦴ. ꦌꦠꦱ꧀ꦱ ꦈꦥ꧀ꦥꦠ꧀ꦠꦶꦈꦢ꧀ꦢꦷꦥꦤꦺꦱꦸ ꦏꦴꦫꦟꦨꦹꦠꦱ꧀ꦱ ꦆꦠ꧀ꦡꦶꦫꦠꦤꦱ꧀ꦱ ꦄꦴꦢꦴꦤꦑ꧀ꦪꦴꦠꦤꦴꦒꦫꦴꦗꦒꦠꦥꦠꦴꦥꦮꦶꦏ꧀ꦏꦩꦴꦢꦶꦮꦶꦨꦴꦮꦺꦴ ꦕ, ꦠꦁꦠꦁꦫꦹꦥꦥ꧀ꦥꦏꦴꦱꦏꦏꦮꦶꦮꦕꦤꦱꦔ꧀ꦑꦴꦠꦴꦤꦸꦨꦴꦮꦺꦴ ꦕ ‘‘ꦮꦶꦚ꧀ꦚꦴꦥꦺꦠ꧀ꦮꦴ’’ꦆꦕ꧀ꦕꦴꦢꦶꦤꦴ ꦮꦴꦏ꧀ꦪꦱꦴꦩꦠ꧀ꦡꦶꦪꦺꦤ ꦥꦛꦶꦥꦴꦢꦤꦷꦪꦴ ꦲꦺꦴꦤ꧀ꦠꦶ. ‘‘ꦱꦸꦩꦲꦠꦶꦩꦥꦶ ꦏꦸꦩ꧀ꦨꦟ꧀ꦝꦱꦺꦤꦁ ꦌꦏꦺꦴ’’ꦠꦶ ꦕ, ‘‘ꦫꦚ꧀ꦚꦁ ꦱꦠꦩ꧀ꦲꦴ ꦱꦕꦶꦮꦫꦠꦤꦩꦸꦢ꧀ꦣꦕ꧀ꦕꦴ’’ꦠꦶ ꦕ ꦆꦩꦺꦲꦶ ꦣꦶꦠꦶꦈꦒ꧀ꦒꦠꦒꦧ꧀ꦧꦴꦢꦪꦺꦴ ꦕ, ‘‘ꦮꦶꦚ꧀ꦚꦴꦥꦺꦠ꧀ꦮꦴ ꦏꦸꦮꦺꦫ’’ꦤ꧀ꦠꦶ ꦕ, ‘‘ꦈꦠ꧀ꦠꦴꦱꦺꦠ꧀ꦮꦴ ꦏꦺꦴꦫꦧ꧀ꦪꦫꦴꦗ’’ꦤ꧀ꦠꦶ ꦕ, ‘‘ꦌꦠ꧀ꦡꦴꦤꦺꦠ꧀ꦮꦴ ꦆꦕ꧀ꦕꦴꦢꦪꦺꦴ’’ꦠꦶ ꦕ ꦆꦩꦺꦲꦶ ꦩꦠ꧀ꦪꦴꦢꦪꦺꦴ ꦕ ꦧ꧀ꦪꦨꦶꦕꦴꦫꦶꦤꦺꦴ ꦨꦴꦮꦴ ꦮꦶꦨꦴꦮꦶꦠꦴ ꦲꦺꦴꦤ꧀ꦠꦶ. ꦆꦩꦺꦲꦶ ꦮꦶꦨꦴꦮꦴꦤꦸꦨꦴꦮꦧ꧀ꦪꦨꦶꦕꦴꦫꦷꦨꦴꦮꦺꦲꦶ ꦪꦸꦢ꧀ꦣꦮꦷꦫꦫꦱꦺꦴ ꦥꦺꦴꦱꦶꦠꦺꦴꦠꦶ ꦢꦛ꧀ꦜꦧ꧀ꦧꦺꦴ. ꦆꦩꦶꦤꦴꦪꦺꦮ ꦤꦪꦺꦤ ꦢꦴꦤꦮꦷꦫꦴꦢꦪꦺꦴ ꦮꦶꦚ꧀ꦚꦴꦠꦧ꧀ꦧꦴ.

ꦨꦪꦜꦴꦪꦷꦨꦴꦮ

꧓꧖꧔. ꦮꦶꦏꦴꦫꦶꦱꦤꦱꦠ꧀ꦠꦴꦢꦶ-

ꦨꦪꦸꦏ꧀ꦏꦁꦱꦺꦴ ꦨꦪꦴꦤꦏꦺꦴ;

ꦱꦺꦢꦴꦢꦪꦺꦴ’ꦤꦸꦨꦴꦮꦺ’ꦠ꧀ꦡ,

ꦠꦴꦱꦴꦢꦷ ꦧ꧀ꦪꦨꦶꦕꦴꦫꦶꦤꦺꦴ.

꧓꧖꧔. ‘‘ꦮꦶꦏꦴꦫꦶ’’ꦕ꧀ꦕꦴꦢꦶ. ꦮꦶꦏꦴꦫꦶ ꦄꦱꦨꦴꦮꦥ꧀ꦥꦮꦠ꧀ꦠꦺꦴ ꦮꦶꦫꦸꦢ꧀ꦣꦺꦴ ꦱꦤꦺꦴ ꦱꦢ꧀ꦢꦺꦴ ꦱꦠ꧀ꦠꦺꦴ ꦕ, ꦠꦺ ꦄꦴꦢꦪꦺꦴ ꦪꦺꦱꦁ ꦱꦸꦚ꧀ꦚꦴꦫꦚ꧀ꦚꦴꦢꦷꦤꦁ ꦆꦠ꧀ꦡꦶꦤꦷꦕꦥ꧀ꦥꦏꦠꦶꦱꦩ꧀ꦨꦮꦤ꧀ꦠꦴꦤꦁ, ꦮꦶꦨꦴꦮꦴꦤꦁ, ꦒꦸꦫꦸꦄꦴꦢꦷꦤꦁ ꦮꦴ ꦈꦠ꧀ꦠꦩꦴꦤꦁ, ꦠꦺꦲꦶ ꦗꦴꦠꦱ꧀ꦱ ꦨꦪꦱ꧀ꦱ, ꦏꦶꦠ꧀ꦠꦶꦩꦱ꧀ꦱ ꦮꦴ ꦈꦏ꧀ꦏꦁꦱꦺꦴ ꦨꦪꦴꦤꦏꦺꦴ ꦤꦴꦩ ꦫꦱꦺꦴ. ꦌꦠ꧀ꦡ ꦱꦺꦢꦏꦩ꧀ꦥꦤꦥꦴꦢꦕꦭꦤꦴꦢꦪꦺꦴ ꦄꦤꦸꦨꦴꦮꦴ, ꦠꦴꦱꦴꦢꦪꦺꦴ ꦧ꧀ꦪꦨꦶꦕꦴꦫꦶꦤꦺꦴ.

꧓꧖꧔. ꦆꦢꦴꦤꦶ ꦨꦪꦴꦤꦏꦫꦱꦱ꧀ꦱ ꦥꦺꦴꦱꦤꦏ꧀ꦏꦩꦁ ꦢꦱ꧀ꦱꦺꦠꦶ ‘‘ꦮꦶꦏꦴꦫꦶ’’ꦕ꧀ꦕꦴꦢꦶꦤꦴ. ꦮꦶꦏꦴꦫꦶꦱꦤꦱꦠ꧀ꦠꦴꦢꦶꦨꦪꦸꦏ꧀ꦏꦁꦱꦺꦴ ꦥꦏꦠꦶꦮꦶꦫꦲꦺꦤ ꦮꦶꦏꦴꦫꦮꦤ꧀ꦠꦺꦲꦶ ꦮꦶꦫꦸꦢ꧀ꦣꦺꦲꦶ ꦄꦱꦤꦶꦱꦢ꧀ꦢꦴꦢꦶꦱꦢ꧀ꦢꦺꦲꦶ, ꦫꦏ꧀ꦑꦱꦴꦢꦶꦱꦠ꧀ꦠꦺꦲꦶ ꦮꦴ ꦮꦶꦨꦴꦮꦺꦲꦶ ꦲꦺꦠꦸꦨꦹꦠꦺꦲꦶ ꦱꦚ꧀ꦗꦴꦠꦺꦴ ꦱꦴꦨꦴꦮꦶꦏꦺꦴ, ꦏꦶꦠ꧀ꦠꦶꦩꦺꦴ ꦮꦴ ꦨꦪꦥꦛꦶꦧꦤ꧀ꦣꦺꦴ ꦈꦏ꧀ꦏꦁꦱꦺꦴ ꦨꦪꦴꦤꦏꦫꦱꦺꦴ ꦤꦴꦩ ꦲꦺꦴꦠꦶ. ꦌꦠ꧀ꦡ ꦨꦪꦴꦤꦏꦫꦱꦮꦶꦱꦪꦺ ꦱꦺꦢꦴꦢꦪꦺꦴ ꦢꦴꦲꦱꦫꦷꦫꦏꦩ꧀ꦥꦤꦴꦢꦪꦺꦴ ꦄꦤꦸꦨꦴꦮꦴ ꦏꦴꦪꦶꦏꦮꦴꦕꦱꦶꦏꦥ꧀ꦥꦪꦺꦴꦒꦱꦔ꧀ꦑꦠꦴ ꦄꦤꦸꦨꦴꦮꦴ ꦲꦺꦴꦤ꧀ꦠꦶ. ꦠꦴꦱꦴꦢꦷ ꦧ꧀ꦪꦨꦶꦕꦴꦫꦶꦤꦺꦴ ꦠꦴꦱꦱꦔ꧀ꦏꦴꦢꦪꦺꦴ ꦆꦲ ꦧ꧀ꦪꦨꦶꦕꦴꦫꦷꦨꦴꦮꦴ ꦲꦺꦴꦤ꧀ꦠꦷꦠꦶ. ꦱꦤꦺꦴ ꦕ ꦱꦠ꧀ꦠꦺꦴ ꦕꦺꦠꦶ ꦕ, ꦮꦶꦏꦴꦫꦺꦴ ꦌꦠꦺꦱꦁ ꦄꦠ꧀ꦡꦷꦠꦶ ꦕ, ꦮꦶꦏꦴꦫꦶꦤꦺꦴ ꦕ ꦠꦺ ꦱꦤꦱꦠ꧀ꦠꦴ ꦕꦺꦠꦶ ꦕ, ꦠꦺ ꦄꦴꦢꦪꦺꦴ ꦪꦺꦱꦁ ꦱꦸꦚ꧀ꦚꦴꦫꦚ꧀ꦚꦴꦢꦷꦤꦩꦶꦠꦶ ꦕ, ꦠꦺꦲꦶ ꦗꦴꦠꦁ ꦨꦪꦩꦶꦠꦶ ꦕ, ꦩꦗ꧀ꦙꦺ ꦥꦢꦭꦺꦴꦥꦺꦴ, ꦠꦱ꧀ꦱ ꦈꦏ꧀ꦏꦁꦱꦺꦴꦠꦶ ꦕ, ꦱꦺꦢꦺꦴ ꦄꦴꦢꦶ ꦪꦺꦱꦁ ꦏꦩ꧀ꦥꦤꦴꦢꦷꦤꦩꦶꦠꦶ ꦕ, ꦠꦴꦱꦺꦴ ꦄꦴꦢꦶ ꦪꦺꦱꦁ ꦱꦔ꧀ꦏꦴꦢꦷꦤꦩꦶꦠꦶ ꦕ ꦮꦴꦏ꧀ꦪꦁ. ꦆꦠ꧀ꦡꦶꦤꦷꦕꦥ꧀ꦥꦏꦠꦶꦏꦴꦤꦁ ꦨꦪꦲꦺꦠꦸ ꦮꦶꦏꦴꦫꦶꦱꦤꦱꦠ꧀ꦠꦴꦢꦶ, ꦈꦠ꧀ꦠꦩꦴꦤꦁ ꦒꦸꦫꦸꦄꦴꦢꦶ.

ꦌꦠ꧀ꦡ ꦭꦏ꧀ꦑꦶꦪꦩꦺꦮꦁ ꦮꦺꦢꦶꦠꦧ꧀ꦧꦁ –

ꦪꦁ ꦢꦶꦛ꧀ꦜꦶꦱꦠ꧀ꦡꦥꦠꦤꦺꦤ ꦥꦫꦶꦥ꧀ꦦꦸꦫꦤ꧀ꦠꦷ,

ꦏꦸꦩ꧀ꦨꦟ꧀ꦝꦫꦏ꧀ꦑꦱꦕꦩꦹ ꦒꦩꦶꦠꦴ ꦱꦩꦤ꧀ꦠꦴ;

ꦄꦴꦕꦏ꧀ꦏꦮꦴꦭ꦳ꦤꦒ’ꦩꦱ꧀ꦱꦒꦠꦁ ꦥꦸꦫꦷꦮ,

ꦨꦺꦴꦠꦺꦴ ꦩꦸꦲꦸꦁ ꦩꦸꦲꦸ’ꦩꦥꦱ꧀ꦱꦶ ꦱ ꦥꦸꦟ꧀ꦟꦏꦺꦴ’ꦲꦤ꧀ꦠꦶ.

ꦢꦶꦛ꧀ꦜꦶꦱꦠ꧀ꦡꦥꦠꦤꦺꦤ ꦢꦶꦛ꧀ꦜꦶꦱꦭ꧀ꦭꦱꦩ꧀ꦥꦴꦠꦤꦺꦤ ꦥꦫꦶꦥ꧀ꦦꦸꦫꦤ꧀ꦠꦷ ꦏꦩ꧀ꦥꦩꦴꦤꦴ ꦱꦩꦤ꧀ꦠꦴ ꦥꦫꦶꦱꦩꦤ꧀ꦠꦠꦺꦴ ꦄꦴꦕꦏ꧀ꦏꦮꦴꦭ꦳ꦤꦒꦁ ꦕꦏ꧀ꦏꦮꦴꦭ꦳ꦥꦧ꧀ꦧꦠꦴꦮꦣꦶ ꦒꦩꦶꦠꦴ ꦥꦭꦴꦥꦶꦠꦴ ꦏꦸꦩ꧀ꦨꦟ꧀ꦝꦫꦏ꧀ꦑꦱꦕꦩꦹ ꦏꦸꦩ꧀ꦨꦟ꧀ꦝꦫꦏ꧀ꦑꦱꦴꦤꦁ ꦱꦺꦤꦴ ꦪꦁ ꦄꦱ꧀ꦱꦒꦠꦁ ꦄꦱ꧀ꦱꦥꦶꦛ꧀ꦜꦺ ꦤꦶꦱꦶꦤ꧀ꦤꦏꦁ ꦨꦺꦴꦠꦺꦴ ꦨꦮꦠꦁ ꦠꦸꦩ꧀ꦲꦴꦏꦁ ꦥꦸꦫꦷ ꦆꦮ ꦥꦸꦫꦶꦪꦴ ꦢꦱ꧀ꦱꦤꦩꦶꦮ ꦩꦸꦲꦸꦁ ꦩꦸꦲꦸꦁ ꦄꦥꦱ꧀ꦱꦶ ꦑꦟꦺ ꦑꦟꦺ ꦄꦥꦱ꧀ꦱꦶꦠ꧀ꦡ, ꦱꦺꦴ ꦄꦲꦁ ꦥꦸꦟ꧀ꦟꦏꦺꦴ ꦤꦴꦩ ꦪꦏ꧀ꦑꦺꦴꦠꦶ. ꦌꦠ꧀ꦡ ‘‘ꦢꦶꦛ꧀ꦜꦶꦱꦠ꧀ꦡꦥꦠꦤꦺꦤꦴ’’ꦠꦶ ꦢꦶꦛ꧀ꦜꦶꦱꦠ꧀ꦡꦴꦫꦺꦴꦥꦤꦺꦤ ꦕ ‘‘ꦱ ꦥꦸꦟ꧀ꦟꦏꦺꦴ ꦄꦲ’’ꦤ꧀ꦠꦶ ꦆꦩꦶꦤꦴ ꦕ ꦨꦪꦗꦤꦤꦱ꧀ꦱ ꦲꦺꦠꦸꦨꦹꦠꦮꦶꦫꦸꦢ꧀ꦣꦱꦠ꧀ꦠꦱꦔ꧀ꦑꦴꦠꦴ ꦮꦶꦨꦴꦮꦴ ꦤꦶꦢ꧀ꦢꦶꦛ꧀ꦜꦴ, ‘‘ꦩꦸꦲꦸꦁ ꦩꦸꦲꦸ’ꦩꦥꦱ꧀ꦱꦷ’’ꦠꦶ ꦫꦱꦴꦮꦠ꧀ꦡꦱꦩ꧀ꦥꦠ꧀ꦠꦨꦪꦸꦏ꧀ꦏꦁꦱꦱꦔ꧀ꦑꦠꦺꦴ ꦜꦴꦪꦷꦨꦴꦮꦺꦴ ꦮꦶꦨꦴꦮꦶꦠꦺꦴ, ‘‘ꦏꦸꦩ꧀ꦨꦟ꧀ꦝꦫꦏ꧀ꦑꦱꦕꦩꦹ ꦒꦩꦶꦠꦴ ꦱꦩꦤ꧀ꦠꦴ ꦄꦴꦕꦏ꧀ꦏꦮꦴꦭ꦳ꦤꦒ’’ꦤ꧀ꦠꦶ ꦠꦴꦱꦱꦔ꧀ꦏꦴꦢꦶꦏꦴ ꦧ꧀ꦪꦨꦶꦕꦴꦫꦶꦤꦺꦴ ꦨꦴꦮꦴ ꦗꦺꦴꦠꦶꦠꦴ. ‘‘ꦥꦫꦶꦥ꧀ꦦꦸꦫꦤ꧀ꦠꦷ’’ꦠꦶ ꦱꦺꦢꦏꦩ꧀ꦥꦴꦢꦪꦺꦴ ꦄꦤꦸꦨꦴꦮꦴ ꦢꦱ꧀ꦱꦶꦠꦴ ꦲꦺꦴꦤ꧀ꦠꦶ.

ꦗꦶꦒꦸꦕ꧀ꦖꦴꦜꦴꦪꦷꦨꦴꦮ

꧓꧖꧕. ꦗꦶꦒꦸꦕ꧀ꦖꦴ ꦫꦸꦣꦶꦫꦴꦢꦷꦲꦶ,

ꦥꦹꦠ꧀ꦪꦴꦢꦷꦲꦶ ꦮꦶꦫꦴꦒꦠꦺꦴ;

ꦧꦷꦨꦕ꧀ꦖꦺꦴ ꦑꦺꦴꦨꦤꦸ’ꦧ꧀ꦧꦺꦒꦷ,

ꦏꦩꦺꦤ ꦏꦫꦸꦟꦴꦪꦸꦠꦺꦴ;

ꦤꦴꦱꦴꦮꦶꦏꦸꦤꦤꦴꦢꦷꦲꦶ,

ꦱꦔ꧀ꦏꦴꦢꦷꦲꦶ’ꦱ꧀ꦱ ꦥꦺꦴꦱꦤꦁ.

꧓꧖꧕. ‘‘ꦗꦶꦒꦸꦕ꧀ꦖꦴ’’ꦆꦕ꧀ꦕꦴꦢꦶ. ꦫꦸꦣꦶꦫꦤ꧀ꦠꦴꦢꦷꦲꦶ ꦥꦹꦠꦶꦏꦶꦩꦶꦄꦴꦢꦷꦲꦶ ꦮꦶꦫꦴꦒꦠꦺꦴ ꦕ ꦗꦴꦠꦴ ꦗꦶꦒꦸꦕ꧀ꦖꦴ ꦒꦫꦲꦴ ꦏꦩꦺꦤ ꦑꦺꦴꦨꦤꦺꦴ ꦈꦧ꧀ꦧꦺꦒꦷ ꦏꦫꦸꦟꦴꦪꦸꦠꦺꦴ ꦕ ꦧꦷꦨꦕ꧀ꦖꦺꦴ ꦨꦮꦠꦶ, ꦤꦴꦱꦴꦮꦶꦏꦸꦤꦤꦩꦸꦑꦕ꧀ꦖꦢꦤꦴꦢꦷꦲꦶ ꦄꦤꦸꦨꦴꦮꦺꦲꦶ, ꦱꦔ꧀ꦏꦴꦮꦺꦒꦴꦢꦷꦲꦶ ꦧ꧀ꦪꦨꦶꦕꦴꦫꦷꦲꦶ ꦕ ꦄꦱ꧀ꦱ ꦥꦺꦴꦱꦤꦁ ꦨꦮꦠꦷꦠꦶ.

꧓꧖꧕. ꦆꦢꦴꦤꦶ ꦧꦷꦨꦕ꧀ꦖꦫꦱꦱ꧀ꦱ ꦥꦺꦴꦱꦤꦏ꧀ꦏꦩꦁ ꦢꦱ꧀ꦱꦺꦠꦶ ‘‘ꦗꦶꦒꦸꦕ꧀ꦖꦴ’’ꦆꦕ꧀ꦕꦴꦢꦶꦤꦴ. ꦫꦸꦣꦶꦫꦴꦢꦷꦲꦶ ꦫꦠ꧀ꦠꦤ꧀ꦠꦒꦸꦟꦴꦢꦷꦲꦶ ꦕ, ꦥꦹꦠ꧀ꦪꦴꦢꦷꦲꦶ ꦥꦹꦠꦶꦏꦶꦩꦶꦄꦴꦢꦷꦲꦶ ꦕ, ꦮꦶꦫꦴꦒꦠꦺꦴ ꦮꦶꦫꦠ꧀ꦠꦨꦴꦮꦺꦤ ꦕꦴꦠꦶ ꦆꦩꦺꦲꦶ ꦠꦷꦲꦶ ꦮꦶꦨꦴꦮꦺꦲꦶ ꦲꦺꦠꦸꦨꦹꦠꦺꦲꦶ ꦈꦥ꧀ꦥꦗ꧀ꦗꦩꦴꦤꦴ ꦗꦶꦒꦸꦕ꧀ꦖꦴ ꦏꦩꦺꦤ ꦫꦸꦣꦶꦫꦴꦢꦷꦤꦁ ꦠꦶꦟ꧀ꦟꦁ ꦮꦶꦨꦴꦮꦴꦤꦁ ꦥꦛꦶꦥꦴꦛꦶꦪꦴ ꦑꦺꦴꦨꦤꦺꦴ ꦄꦤꦮꦛ꧀ꦜꦴꦤꦺꦴ ꦄꦱꦩꦴꦲꦶꦠꦺꦴ ꦈꦧ꧀ꦧꦺꦒꦷ ꦈꦧ꧀ꦧꦺꦒꦮꦴ ꦏꦫꦸꦟꦴꦪꦸꦠꦺꦴ ꦱꦺꦴꦏꦫꦹꦥꦺꦤ ꦱꦲꦶꦠꦺꦴ ꦕꦴꦠꦶ ꦌꦮꦁ ꦧꦷꦨꦕ꧀ꦖꦺꦴ ꦫꦱꦺꦴ ꦤꦴꦩ ꦲꦺꦴꦠꦶ. ꦤꦴꦱꦴꦮꦶꦏꦸꦤꦤꦴꦢꦷꦲꦶ ꦤꦴꦱꦱꦔ꧀ꦏꦺꦴꦕꦤꦩꦸꦑꦥꦶꦢꦲꦤꦴꦢꦷꦲꦶ ꦄꦤꦸꦨꦴꦮꦺꦲꦶ ꦕ ꦱꦔ꧀ꦏꦴꦢꦷꦲꦶ ꦕ ꦱꦔ꧀ꦏꦴꦄꦴꦮꦺꦒꦴꦢꦷꦲꦶ ꦧ꧀ꦪꦨꦶꦕꦴꦫꦷꦨꦴꦮꦺꦲꦶ ꦕ ꦏꦫꦟꦨꦹꦠꦺꦲꦶ ꦄꦱ꧀ꦱ ꦧꦷꦨꦕ꧀ꦖꦫꦱꦱ꧀ꦱ ꦥꦺꦴꦱꦤꦁ ꦲꦺꦴꦠꦷꦠꦶ. ꦫꦸꦣꦶꦫꦴꦢꦷꦱꦸ ꦠꦷꦱꦸ ꦥꦢꦺꦱꦸ, ꦑꦺꦴꦨꦤꦴꦢꦷꦱꦸ ꦠꦷꦱꦸ ꦕ ꦒꦩ꧀ꦪꦩꦴꦤꦠ꧀ꦠꦴ ꦄꦮꦸꦠ꧀ꦠꦺꦴꦥꦶ ꦕꦱꦢ꧀ꦢꦺꦴ ꦪꦺꦴꦗꦺꦠꦧ꧀ꦧꦺꦴ, ꦠꦱ꧀ꦩꦴ ꦑꦺꦴꦨꦤꦴꦢꦷꦲꦶ ꦠꦷꦲꦶ ꦪꦸꦠ꧀ꦠꦺꦴꦮ ꦧꦷꦨꦕ꧀ꦖꦫꦱꦺꦴ ꦤꦴꦩꦴꦠꦶ ꦢꦛ꧀ꦜꦧ꧀ꦧꦺꦴ. ꦫꦸꦣꦶꦫꦁ ꦄꦴꦢꦶ ꦪꦺꦱꦁ ꦄꦤ꧀ꦠꦴꦢꦷꦤꦩꦶꦠꦶ ꦕ, ꦥꦹꦠꦶꦄꦴꦢꦶ ꦪꦺꦱꦁ ꦏꦶꦩꦶꦄꦴꦢꦷꦤꦩꦶꦠꦶ ꦕ, ꦈꦧ꧀ꦧꦺꦒꦺꦴ ꦄꦱ꧀ꦱ ꦧꦷꦨꦕ꧀ꦖꦱ꧀ꦱ ꦄꦠ꧀ꦡꦷꦠꦶ ꦕ, ꦏꦫꦸꦟꦺꦤ ꦄꦴꦪꦸꦠꦺꦴꦠꦶ ꦕ, ꦤꦴꦱꦴꦪ ꦮꦶꦏꦸꦤꦤꦁ ꦱꦔ꧀ꦏꦺꦴꦕꦤꦩꦶꦠꦶ ꦕ, ꦠꦁ ꦄꦴꦢꦶ ꦪꦺꦱꦁ ꦩꦸꦑꦕ꧀ꦖꦴꦢꦤꦴꦢꦷꦤꦩꦶꦠꦶ ꦕ, ꦱꦔ꧀ꦏꦴ ꦄꦴꦢꦶ ꦪꦺꦱꦁ ꦄꦴꦮꦺꦒꦴꦢꦷꦤꦩꦶꦠꦶ ꦕ ꦮꦴꦏ꧀ꦪꦁ.

ꦆꦩꦱ꧀ꦱ ꦧꦷꦨꦕ꧀ꦖꦱ꧀ꦱꦺꦴꦢꦴꦲꦫꦟꦩꦺꦮꦁ ꦮꦺꦢꦶꦠꦧ꧀ꦧꦁ –

ꦪꦏ꧀ꦑꦴ ꦩꦕ꧀ꦕꦏꦫꦔ꧀ꦏꦏꦔ꧀ꦏꦤꦣꦫꦴ ꦪꦺ ꦤꦶꦩ꧀ꦩꦶꦠꦴ ꦥꦸꦟ꧀ꦟꦏꦺ-

ꦤꦸ’ꦠ꧀ꦠꦁꦱꦷꦏꦠꦥꦴꦟꦶꦥꦭ꧀ꦭꦮꦣꦫꦴ ꦲꦴꦫꦷꦏꦠꦤ꧀ꦠꦺꦴꦫꦒꦴ;

ꦭꦶꦠ꧀ꦠꦴ ꦭꦺꦴꦲꦶꦠꦏꦸꦔ꧀ꦏꦸꦩꦺꦲꦶ ꦮꦶꦣꦸꦫꦺꦤꦺ’ꦠꦺ ꦥꦶꦮꦤ꧀ꦠꦴ ꦮꦱꦴ-

ꦩꦗ꧀ꦗꦁ ꦱꦷꦱꦏꦥꦴꦭꦥꦴꦠꦶꦲꦶ ꦥꦸꦫꦺ ꦣꦸꦠ꧀ꦠꦴ ꦮꦶꦪꦺꦴ’ꦥꦺꦏ꧀ꦑꦶꦠꦴꦠꦶ.

ꦥꦸꦟ꧀ꦟꦏꦺꦤ ꦪꦏ꧀ꦑꦺꦤ ꦤꦶꦩ꧀ꦩꦶꦠꦴ ꦩꦕ꧀ꦕꦏꦫꦔ꧀ꦏꦏꦔ꧀ꦏꦤꦣꦫꦴ ꦩꦤꦸꦱ꧀ꦱꦛ꧀ꦜꦶꦱꦔ꧀ꦑꦴꦠꦏꦫꦨꦹꦱꦤꦣꦴꦫꦶꦤꦺꦴ ꦈꦠ꧀ꦠꦁꦱꦷꦏꦠꦥꦴꦟꦶꦥꦭ꧀ꦭꦮꦣꦫꦴ ꦩꦠ꧀ꦡꦏꦩꦴꦭꦶꦏꦠꦲꦠ꧀ꦡꦠꦭꦱꦔ꧀ꦑꦠꦥꦭ꧀ꦭꦮꦣꦴꦫꦶꦤꦺꦴ ꦲꦴꦫꦷꦏꦠꦤ꧀ꦠꦺꦴꦫꦒꦴ ꦩꦸꦠ꧀ꦠꦴꦲꦴꦫꦷꦏꦠꦩꦤꦸꦱ꧀ꦱꦤ꧀ꦠꦱꦔ꧀ꦑꦴꦠꦈꦫꦒꦱꦩ꧀ꦥꦪꦸꦠ꧀ꦠꦴ ꦭꦺꦴꦲꦶꦠꦏꦸꦔ꧀ꦏꦸꦩꦺꦲꦶ ꦫꦸꦣꦶꦫꦱꦔ꧀ꦑꦴꦠꦏꦸꦔ꧀ꦏꦸꦩꦏꦏ꧀ꦏꦺꦲꦶ ꦭꦶꦠ꧀ꦠꦴ ꦱꦷꦱꦏꦥꦴꦭꦥꦴꦠꦶꦲꦶ ꦱꦷꦱꦏꦥꦴꦭꦱꦔ꧀ꦑꦴꦠꦺꦲꦶ ꦱꦫꦴꦮꦺꦲꦶ ꦮꦱꦴꦩꦗ꧀ꦗꦁ ꦮꦱꦴꦱꦔ꧀ꦑꦴꦠꦱꦸꦫꦁ ꦥꦸꦫꦺ ꦄꦨꦶꦩꦸꦑꦺ ꦥꦶꦮꦤ꧀ꦠꦴ ꦪꦺ ꦪꦏ꧀ꦑꦴ ꦱꦶꦪꦸꦁ, ꦌꦠꦺ ꦪꦏ꧀ꦑꦴ ꦮꦶꦣꦸꦫꦺꦤ ꦥꦟ꧀ꦝꦶꦠꦺꦤ ꦣꦸꦠ꧀ꦠꦴ ꦮꦶꦪ ꦤꦒꦫꦺ ꦱꦸꦫꦴꦣꦸꦠ꧀ꦠꦴ ꦮꦶꦪ ꦈꦥꦺꦏ꧀ꦑꦶꦠꦴ ꦲꦺꦴꦤ꧀ꦠꦷꦠꦶ. ꦆꦲ ‘‘ꦭꦶꦠ꧀ꦠꦴ ꦭꦺꦴꦲꦶꦠꦏꦸꦔ꧀ꦏꦸꦩꦺꦲꦷ’’ꦠꦶ ꦕ ‘‘ꦈꦠ꧀ꦠꦁꦱꦷꦏꦠꦥꦴꦟꦶꦥꦭ꧀ꦭꦮꦣꦫꦴ’’ꦠꦶ ꦕ ‘‘ꦲꦴꦫꦷꦏꦠꦤ꧀ꦠꦺꦴꦫꦒꦴ’’ꦠꦶ ꦕ ꦆꦩꦺꦲꦶ ꦕꦶꦠ꧀ꦠꦏ꧀ꦑꦺꦴꦨꦏꦴꦫꦟꦨꦹꦠꦺꦴ ꦫꦸꦣꦶꦫꦴꦢꦶꦮꦶꦨꦴꦮꦺꦴ ꦕ, ‘‘ꦩꦕ꧀ꦕꦏꦫꦔ꧀ꦏꦏꦔ꧀ꦏꦤꦫꦺꦴ’’ꦠꦶ ꦕ ‘‘ꦱꦷꦱꦏꦥꦴꦭꦥꦴꦠꦶꦲꦶ ꦮꦱꦴꦩꦗ꧀ꦗꦁ ꦥꦶꦮꦤ꧀ꦠꦴ’’ꦠꦶ ꦕ ꦆꦩꦺꦲꦶ ꦈꦧ꧀ꦧꦺꦒꦮꦤ꧀ꦠꦱꦨꦴꦮꦱ꧀ꦱ ꦲꦺꦠꦸꦨꦹꦠꦺꦴ ꦥꦹꦠ꧀ꦪꦴꦢꦶꦮꦶꦨꦴꦮꦺꦴ ꦕ ꦥꦏꦴꦱꦶꦠꦺꦴ. ꦏꦫꦸꦟꦴꦪꦸꦠꦱꦨꦴꦮꦱ꧀ꦱ ꦏꦴꦫꦟꦨꦹꦠꦮꦶꦫꦗ꧀ꦗꦤꦮꦶꦨꦴꦮꦺꦴ ꦕ ꦤꦴꦱꦴꦮꦶꦏꦸꦤꦤꦴꦢꦶꦄꦤꦸꦨꦴꦮꦺꦴ ꦕ ꦱꦔ꧀ꦏꦴꦮꦺꦒꦴꦢꦶꦧ꧀ꦪꦨꦶꦕꦴꦫꦷꦨꦴꦮꦺꦴ ꦕ ꦧꦷꦨꦕ꧀ꦖꦱꦔ꧀ꦑꦴꦠꦜꦴꦪꦷꦨꦴꦮꦺꦴ ꦕꦴꦠꦶ ꦆꦩꦺ ꦱꦧ꧀ꦧꦺ ꦮꦴꦏ꧀ꦪꦱꦴꦩꦠ꧀ꦡꦶꦪꦺꦤ ꦒꦩ꧀ꦩꦴꦠꦶ ꦮꦺꦢꦶꦠꦧ꧀ꦧꦴ.

ꦮꦶꦩ꧀ꦲꦪꦜꦴꦪꦷꦨꦴꦮ

꧓꧖꧖. ꦄꦠꦶꦭꦺꦴꦏꦥꦢꦠ꧀ꦡꦺꦲꦶ,

ꦮꦶꦩ꧀ꦲꦪꦺꦴ’ꦪꦁ ꦫꦱꦺꦴ’ꦧ꧀ꦨꦸꦠꦺꦴ;

ꦠꦱ꧀ꦱꦴ’ꦤꦸꦨꦴꦮꦴ ꦱꦺꦢꦱ꧀ꦱꦸ-

ꦱꦴꦣꦸꦮꦴꦢꦴꦢꦪꦺꦴ ꦱꦶꦪꦸꦁ;

ꦠꦴꦱꦴꦮꦺꦒꦣꦶꦠꦶꦥ꧀ꦥꦚ꧀ꦚꦴ,

ꦲꦺꦴꦤ꧀ꦠꦺ’ꦠ꧀ꦡ ꦧ꧀ꦪꦨꦶꦕꦴꦫꦶꦤꦺꦴ.

꧓꧖꧖. ‘‘ꦄꦠꦶ’’ꦕ꧀ꦕꦴꦢꦶ. ꦄꦠꦶꦭꦺꦴꦏꦺꦲꦶ ꦭꦺꦴꦏꦴꦠꦶꦮꦸꦠ꧀ꦠꦷꦲꦶ ꦩꦴꦪꦴꦢꦶꦧ꧀ꦧꦒꦺꦲꦴꦫꦴꦩꦴꦢꦷꦲꦶ ꦥꦢꦠ꧀ꦡꦺꦲꦶ ꦗꦴꦠꦺꦴ ꦄꦪꦁ ꦮꦶꦩ꧀ꦲꦪꦺꦴ ꦕꦶꦠ꧀ꦠꦮꦶꦏꦴꦫꦱꦔ꧀ꦑꦴꦠꦺꦴ ꦜꦴꦪꦷꦨꦴꦮꦺꦴ ꦄꦧ꧀ꦨꦸꦠꦺꦴ ꦫꦱꦺꦴ ꦤꦴꦩ. ꦱꦺꦢꦄꦱ꧀ꦱꦸꦱꦴꦣꦸꦮꦴꦢꦫꦺꦴꦩꦚ꧀ꦕꦴꦢꦪꦺꦴ ꦠꦱ꧀ꦱ ꦄꦤꦸꦨꦴꦮꦴ ꦱꦶꦪꦸꦁ, ꦠꦴꦱꦴꦢꦪꦺꦴ ꦧ꧀ꦪꦨꦶꦕꦴꦫꦶꦤꦺꦴ ꦲꦺꦴꦤ꧀ꦠꦷꦠꦶ.

꧓꧖꧖. ꦆꦢꦴꦤꦶ ꦮꦶꦩ꧀ꦲꦪꦫꦱꦱ꧀ꦱ ꦥꦺꦴꦱꦤꦏ꧀ꦏꦩꦁ ꦢꦱ꧀ꦱꦺꦠꦶ ‘‘ꦄꦠꦶ’’ꦆꦕ꧀ꦕꦴꦢꦶꦤꦴ. ꦄꦠꦶꦭꦺꦴꦏꦥꦢꦠ꧀ꦡꦺꦲꦶ ꦭꦺꦴꦏꦛ꧀ꦜꦶꦠꦶꦩꦠꦶꦏ꧀ꦏꦩ꧀ꦩ ꦥꦮꦠ꧀ꦠꦺꦲꦶ ꦩꦴꦪꦴꦢꦶꦧ꧀ꦧꦨꦮꦤꦄꦴꦫꦴꦩꦮꦶꦩꦴꦤꦴꦢꦶꦥꦢꦠ꧀ꦡꦺꦲꦶ ꦲꦺꦠꦸꦨꦹꦠꦺꦲꦶ ꦈꦥ꧀ꦥꦗ꧀ꦗꦩꦴꦤꦺꦴ ꦄꦪꦁ ꦮꦶꦩ꧀ꦲꦪꦺꦴ ꦕꦶꦠ꧀ꦠꦧ꧀ꦪꦴꦥꦤꦱꦔ꧀ꦑꦴꦠꦺꦴ ꦜꦴꦪꦷꦨꦴꦮꦺꦴ ꦄꦧ꧀ꦨꦸꦠꦺꦴ ꦫꦱꦺꦴ ꦄꦧ꧀ꦨꦸꦠꦫꦱꦺꦴ ꦤꦴꦩ ꦨꦮꦺ, ꦱꦺꦢꦱ꧀ꦱꦸꦱꦴꦣꦸꦮꦴꦢꦴꦢꦪꦺꦴ ꦠꦱ꧀ꦱ ꦄꦧ꧀ꦨꦸꦠꦫꦱꦱ꧀ꦱ ꦄꦤꦸꦨꦴꦮꦴ ꦱꦶꦪꦸꦁ, ꦠꦴꦱꦴꦮꦺꦒꦣꦶꦠꦶꦥ꧀ꦥꦚ꧀ꦚꦴ ꦌꦠ꧀ꦡ ꦄꦧ꧀ꦨꦸꦠꦫꦱꦮꦶꦱꦪꦺ ꦧ꧀ꦪꦨꦶꦕꦴꦫꦶꦤꦺꦴ ꦨꦴꦮꦴ ꦲꦺꦴꦤ꧀ꦠꦷꦠꦶ. ꦄꦠꦶꦏ꧀ꦏꦤ꧀ꦠꦴ ꦭꦺꦴꦏꦩꦶꦠꦶ ꦕ, ꦠꦺ ꦕ ꦠꦺ ꦥꦢꦠ꧀ꦡꦴ ꦕꦺꦠꦶ ꦕ, ꦱꦴꦣꦸꦆꦠꦶ ꦮꦴꦢꦺꦴꦠꦶ ꦕ, ꦱꦺꦢꦺꦴ ꦕ ꦄꦱ꧀ꦱꦸ ꦕ ꦱꦴꦣꦸꦮꦴꦢꦺꦴ ꦕꦺꦠꦶ ꦕ, ꦠꦺ ꦄꦴꦢꦶ ꦪꦺꦱꦁ ꦫꦺꦴꦩꦚ꧀ꦕꦴꦢꦷꦤꦩꦶꦠꦶ ꦕ, ꦠꦴꦱꦺꦴ ꦕ ꦄꦴꦮꦺꦒꦺꦴ ꦕ ꦣꦶꦠꦶ ꦕ ꦥꦚ꧀ꦚꦴ ꦕꦺꦠꦶ ꦕ ꦮꦴꦏ꧀ꦪꦁ.

ꦆꦩꦱ꧀ꦱ ꦄꦧ꧀ꦨꦸꦠꦫꦱꦱ꧀ꦱꦺꦴꦢꦴꦲꦫꦟꦩꦺꦮꦁ ꦢꦛ꧀ꦜꦧ꧀ꦧꦁ –

ꦱ ꦥꦸꦟ꧀ꦟꦏꦺꦤꦴ’ꦲꦛꦤꦺꦏꦨꦶꦁꦱꦤꦺ-

ꦱ꧀ꦮ’ꦲꦺꦴ ꦤꦛꦺꦤꦺꦮ ꦱꦸꦤꦶꦕ꧀ꦕꦭꦺꦴ’ꦕꦭꦴ;

ꦤꦶꦥꦴꦠꦶꦠꦺꦴ ꦠꦺꦤ ꦄꦮꦁꦱꦶꦫꦺꦴꦥꦠꦁ,

ꦄꦱꦤ꧀ꦠꦱꦁ ꦠꦁ ꦩꦶꦤꦶ ꦢꦶꦛ꧀ꦜꦶꦪꦛ꧀ꦜꦶꦪꦴꦠꦶ.

ꦱꦺꦴ ꦮꦶꦣꦸꦫꦥꦟ꧀ꦝꦶꦠꦺꦴ ꦥꦸꦟ꧀ꦟꦏꦺꦤ ꦪꦏ꧀ꦑꦺꦤ ꦤꦛꦺꦤ ꦆꦮ ꦄꦤꦺꦏꦮꦶꦏꦴꦫꦢꦱ꧀ꦱꦤꦏꦺꦤ ꦤꦴꦛꦏꦺꦤ ꦮꦶꦪ ꦄꦴꦲꦛꦤꦺꦏꦨꦶꦁꦱꦤꦺꦱꦸ ꦨꦪꦠ꧀ꦠꦩꦴꦤꦷꦠꦴꦤꦺꦏꦮꦶꦣꦨꦶꦁꦱꦤꦺꦱꦸ ꦮꦠ꧀ꦠꦩꦴꦤꦺꦱꦸ ꦱꦸꦤꦶꦕ꧀ꦕꦭꦺꦴ ꦠꦺꦤ ꦥꦸꦟ꧀ꦟꦏꦺꦤ ꦄꦕꦭꦴ ꦱꦛ꧀ꦜꦶꦪꦺꦴꦗꦤꦸꦧ꧀ꦧꦺꦣꦏꦴꦭ꦳ꦴꦒꦶꦫꦶꦥꦧ꧀ꦧꦠꦩꦠ꧀ꦡꦏꦠꦺꦴ ꦤꦶꦥꦴꦠꦶꦠꦺꦴ ꦄꦮꦁꦱꦶꦫꦺꦴꦥꦠꦁ ꦄꦣꦺꦴꦱꦷꦱꦁ ꦥꦠꦤ꧀ꦠꦺꦴ ꦄꦱꦤ꧀ꦠꦱꦁ ꦌꦮꦁ ꦄꦥ꧀ꦥꦠꦶꦛ꧀ꦜꦺꦥꦶ ꦄꦤꦸꦠ꧀ꦠꦱꦤ꧀ꦠꦺꦴ ꦠꦁ ꦥꦧ꧀ꦧꦠꦁ ꦢꦶꦛ꧀ꦜꦶꦪꦛ꧀ꦜꦶꦪꦴ ꦩꦶꦤꦶ ꦥꦩꦴꦟꦩꦏꦴꦱꦶ, ꦄꦲꦺꦴ ꦄꦕ꧀ꦖꦫꦶꦪꦤ꧀ꦠꦶ. ꦌꦠ꧀ꦡ ꦨꦪꦲꦺꦠꦸꦩ꧀ꦲꦶ ꦱꦠꦶ ꦨꦷꦠꦶꦪꦴ ꦕ ꦠꦠ꧀ꦡ ꦥꦫꦶꦗꦴꦤꦤꦴꦨꦴꦮꦱ꧀ꦱ ꦕ ꦭꦺꦴꦏꦱꦨꦴꦮꦠ꧀ꦠꦴ ꦠꦩꦠꦶꦏ꧀ꦏꦩ꧀ꦩ ꦨꦪꦏꦫꦟꦺ ꦄꦱꦤ꧀ꦠꦴꦱꦱ꧀ꦱ ꦕ ꦢꦶꦛ꧀ꦜꦶꦪꦴ ꦥꦧ꧀ꦧꦠꦩꦶꦤꦤꦱ꧀ꦱ ꦕ ꦥꦮꦠ꧀ꦠꦨꦴꦮꦏꦡꦤꦺꦤ ꦭꦺꦴꦏꦴꦠꦶꦏ꧀ꦏꦤ꧀ꦠꦥꦢꦠ꧀ꦡꦱꦔ꧀ꦑꦴꦠꦺꦴ ꦮꦶꦨꦴꦮꦺꦴ ‘‘ꦄꦱꦤ꧀ꦠꦱꦁ ꦠꦁ ꦩꦶꦤꦶ ꦢꦶꦛ꧀ꦜꦶꦪꦛ꧀ꦜꦶꦪꦴ’’ꦠꦶ ꦆꦩꦶꦤꦴ ꦥꦏꦴꦱꦶꦠꦺꦴ. ‘‘ꦄꦲꦺꦴ’’ꦠꦶ ꦮꦕꦤꦺꦤ, ꦠꦱ꧀ꦱ ꦱꦴꦩꦠ꧀ꦡꦶꦪꦺꦤ ꦕ ꦱꦴꦣꦸꦮꦴꦢꦱꦺꦢꦄꦱ꧀ꦱꦸꦄꦴꦢꦪꦺꦴ ꦄꦤꦸꦨꦴꦮꦴ ꦮꦶꦨꦴꦮꦶꦠꦴ. ꦠꦴꦱꦄꦴꦮꦺꦒꦣꦶꦠꦶꦕ꧀ꦕꦴꦢꦶꦧ꧀ꦪꦨꦶꦕꦴꦫꦷꦨꦴꦮꦴ, ꦮꦶꦩ꧀ꦲꦪꦱꦔ꧀ꦑꦴꦠꦜꦴꦪꦷꦨꦴꦮꦺꦴ ꦕ ꦱꦩꦸꦢꦶꦠꦮꦴꦏ꧀ꦪꦱꦴꦩꦠ꧀ꦡꦶꦪꦺꦤ ꦗꦺꦴꦠꦶꦠꦺꦴ.

ꦱꦩꦜꦴꦪꦷꦨꦴꦮ

꧓꧖꧗. ꦜꦴꦪꦷꦨꦴꦮꦺꦴ ꦱꦩꦺꦴ ꦩꦺꦠ꧀ꦠꦴ-

ꦢꦪꦴꦩꦺꦴꦢꦴꦢꦶꦱꦩ꧀ꦨꦮꦺꦴ;

ꦨꦴꦮꦴꦢꦷꦲꦶ ꦠꦢꦸ’ꦏ꧀ꦏꦁꦱꦺꦴ,

ꦱꦤ꧀ꦠꦺꦴ ꦱꦤ꧀ꦠꦤꦶꦱꦺꦮꦶꦠꦺꦴ.

ꦆꦠꦶ ꦱꦔ꧀ꦓꦫꦏ꧀ꦑꦶꦠꦩꦲꦴꦱꦴꦩꦶꦥꦴꦢꦮꦶꦫꦕꦶꦠꦺ

ꦱꦸꦧꦺꦴꦣꦴꦭꦔ꧀ꦏꦴꦫꦺ

ꦫꦱꦨꦴꦮꦴꦮꦧꦺꦴꦣꦺꦴ ꦤꦴꦩ ꦥꦚ꧀ꦕꦩꦺꦴ ꦥꦫꦶꦕ꧀ꦖꦺꦢꦺꦴ.

ꦱꦸꦧꦺꦴꦣꦴꦭꦔ꧀ꦏꦴꦫꦺꦴ ꦱꦩꦠ꧀ꦠꦺꦴ.

꧓꧖꧗. ‘‘ꦜꦴꦪꦶ’’ꦕ꧀ꦕꦴꦢꦶ. ꦩꦺꦠ꧀ꦠꦴꦢꦶꦱꦩ꧀ꦨꦮꦺꦴ ꦱꦩꦺꦴ ꦈꦥꦱꦩꦱꦔ꧀ꦑꦴꦠꦺꦴ ꦜꦴꦪꦷꦨꦴꦮꦺꦴ ꦨꦮꦠꦶ, ꦠꦢꦤꦸꦫꦹꦥꦺꦲꦶ ꦨꦴꦮꦴꦤꦸꦨꦴꦮꦺꦲꦶ ꦠꦱ꧀ꦱ ꦈꦏ꧀ꦏꦁꦱꦺꦴ ꦪꦱ꧀ꦱ, ꦱꦺꦴ ꦱꦤ꧀ꦠꦺꦴ ꦤꦴꦩ ꦫꦱꦺꦴ ꦨꦮꦠꦶ, ꦱꦺꦴ ꦕ ꦱꦤ꧀ꦠꦤꦶꦱꦺꦮꦶꦠꦺꦴꦠꦶ.

ꦆꦠꦶ ꦱꦸꦧꦺꦴꦣꦴꦭꦔ꧀ꦏꦴꦫꦺ ꦩꦲꦴꦱꦴꦩꦶꦤꦴꦩꦶꦏꦴꦪꦁ ꦛꦷꦏꦴꦪꦁ

ꦫꦱꦨꦴꦮꦴꦮꦧꦺꦴꦣꦺꦴ ꦥꦚ꧀ꦕꦩꦺꦴ ꦥꦫꦶꦕ꧀ꦖꦺꦢꦺꦴ.

꧓꧖꧗. ꦆꦢꦴꦤꦶ ꦱꦤ꧀ꦠꦫꦱꦱ꧀ꦱ ꦥꦺꦴꦱꦤꦏ꧀ꦏꦩꦁ ꦢꦱ꧀ꦱꦺꦠꦶ ‘‘ꦜꦴꦪꦶ’’ꦕ꧀ꦕꦴꦢꦶꦤꦴ. ꦩꦺꦠ꧀ꦠꦴꦢꦪꦴꦩꦺꦴꦢꦴꦢꦶꦱꦩ꧀ꦨꦮꦺꦴ ꦩꦺꦠ꧀ꦠꦴꦏꦫꦸꦟꦴꦥꦷꦠꦶꦄꦴꦢꦶꦮꦶꦨꦴꦮꦺꦲꦶ ꦱꦩ꧀ꦨꦹꦠꦺꦴ ꦱꦩꦺꦴ ꦏꦴꦪꦕꦶꦠ꧀ꦠꦺꦴꦥꦱꦩꦺꦴ ꦜꦴꦪꦷꦨꦴꦮꦺꦴ ꦤꦴꦩ ꦲꦺꦴꦠꦶ, ꦨꦴꦮꦴꦢꦷꦲꦶ ꦧ꧀ꦪꦨꦶꦕꦴꦫꦷꦨꦴꦮꦴꦢꦷꦲꦶ ꦏꦫꦟꦨꦹꦠꦺꦲꦶ, ꦄꦥꦶꦕ ꦠꦱ꧀ꦱ ꦱꦩꦱ꧀ꦱ ꦄꦤꦸꦫꦹꦥꦺꦲꦶ ꦧ꧀ꦪꦨꦶꦕꦴꦫꦷꦨꦴꦮꦴꦤꦸꦨꦴꦮꦺꦲꦶ ꦠꦢꦸꦏ꧀ꦏꦁꦱꦺꦴ ꦠꦱ꧀ꦱ ꦜꦴꦪꦷꦨꦴꦮꦱ꧀ꦱ ꦈꦏ꧀ꦏꦁꦱꦪꦸꦠ꧀ꦠꦺꦴ ꦱꦤ꧀ꦠꦤꦶꦱꦺꦮꦶꦠꦺꦴ ꦱꦴꦣꦹꦲꦶ ꦱꦺꦮꦶꦠꦺꦴ ꦱꦤ꧀ꦠꦺꦴ ꦱꦤ꧀ꦠꦫꦱꦺꦴ ꦤꦴꦩ ꦲꦺꦴꦠꦷꦠꦶ. ꦩꦺꦠ꧀ꦠꦴ ꦕ ꦢꦪꦴ ꦕ ꦩꦺꦴꦢꦺꦴ ꦕꦺꦠꦶ ꦕ, ꦠꦺ ꦄꦴꦢꦪꦺꦴ ꦪꦺꦱꦩꦶꦠꦶ ꦕ, ꦠꦺꦲꦶ ꦱꦩ꧀ꦨꦮꦺꦴ ꦪꦱ꧀ꦱꦺꦠꦶ ꦕ, ꦠꦱ꧀ꦱ ꦈꦏ꧀ꦏꦁꦱꦺꦴ ꦄꦱ꧀ꦱ ꦱꦤ꧀ꦠꦱ꧀ꦱꦺꦠꦶ ꦕ, ꦱꦠꦁ ꦤꦶꦱꦺꦮꦶꦠꦺꦴꦠꦶ ꦕ ꦮꦴꦏ꧀ꦪꦁ.

ꦄꦱ꧀ꦱ ꦱꦤ꧀ꦠꦫꦱꦱ꧀ꦱꦺꦴꦢꦴꦲꦫꦟꦩꦺꦮꦁ ꦢꦛ꧀ꦜꦧ꧀ꦧꦁ –

ꦌꦤ꧀ꦠꦺꦱꦸ ꦏꦺꦱꦫꦶꦏꦫꦷꦱ꧀ꦮ’ꦥꦶ ꦮꦺꦜꦪꦤ꧀ꦠꦺ,

ꦤꦴꦒꦺ ꦤꦒꦁ ꦩꦢꦒꦗꦺ ꦮꦶꦪ ꦮꦺꦭ꦳ꦸꦒꦸꦩ꧀ꦧꦁ;

ꦪꦏ꧀ꦑꦺ ꦮꦶꦕꦴꦭꦪꦠꦶ ꦤꦺꦴꦕꦭꦶ ꦇꦱꦏꦩ꧀ꦥꦶ,

ꦱꦤ꧀ꦠꦶꦁ ꦒꦠꦺꦴꦮ ꦮꦶꦣꦸꦫꦺꦴ ꦩꦣꦸꦫꦴꦥꦶ ꦨꦴꦮꦺꦴꦠꦶ.

ꦏꦺꦱꦫꦶꦏꦫꦷꦱꦸ ꦱꦷꦲꦲꦠ꧀ꦡꦷꦱꦸ ꦌꦤ꧀ꦠꦺꦱꦸ ꦄꦥꦶ ꦨꦶꦁꦱꦤꦴꦏꦴꦫꦺꦤ ꦱꦩꦷꦥꦩꦴꦒꦕ꧀ꦖꦤ꧀ꦠꦺꦱꦸꦥꦶ ꦤꦴꦒꦺ ꦮꦺꦜꦪꦤ꧀ꦠꦺꦥꦶ ꦤꦴꦒꦺꦱꦸ ꦱꦫꦷꦫꦁ ꦮꦺꦜꦪꦤ꧀ꦠꦺꦱꦸꦥꦶ. ꦗꦴꦠ꧀ꦪꦴꦥꦺꦏ꧀ꦑꦴꦪꦺꦏꦮꦕꦤꦁ, ꦮꦺꦭ꦳ꦸꦒꦸꦩ꧀ꦧꦁ ꦩꦢꦒꦗꦺ ꦮꦶꦪ ꦮꦶꦕꦴꦭꦪꦠꦶ ꦩꦢꦒꦭ꦳ꦶꦠꦲꦠ꧀ꦡꦶꦩ꧀ꦲꦶ ꦕꦴꦭꦺꦤ꧀ꦠꦺ ꦆꦮ ꦪꦏ꧀ꦑꦺ ꦥꦸꦟ꧀ꦟꦏꦺ ꦤꦒꦁ ꦏꦴꦭ꦳ꦴꦒꦶꦫꦶꦥꦧ꧀ꦧꦠꦁ ꦮꦶꦕꦴꦭꦪꦠꦶꦥꦶ ꦄꦤꦺꦏꦥ꧀ꦥꦏꦴꦫꦺ ꦕꦴꦭꦺꦤ꧀ꦠꦺꦥꦶ ꦮꦶꦣꦸꦫꦺꦴ ꦥꦟ꧀ꦝꦶꦠꦺꦴ ꦱꦤ꧀ꦠꦶꦁ ꦒꦠꦺꦴꦮ ꦤꦶꦧ꧀ꦧꦴꦤꦁ ꦄꦴꦭꦩ꧀ꦧꦟꦏꦫꦟꦮꦱꦺꦤ ꦱꦩ꧀ꦥꦠ꧀ꦠꦺꦴ ꦮꦶꦪ ꦦꦭꦱꦩꦴꦥꦠ꧀ꦠꦶꦱꦩꦴꦥꦤ꧀ꦤꦺꦴ ꦆꦮ ꦄꦡ ꦮꦴ ꦢꦶꦛ꧀ꦜꦣꦩ꧀ꦩꦤꦶꦧ꧀ꦧꦴꦤꦱꦔ꧀ꦑꦠꦤꦶꦫꦺꦴꦣꦱꦩꦴꦥꦠ꧀ꦠꦶꦱꦩꦴꦥꦤ꧀ꦤꦺꦴ ꦮꦶꦪ ꦇꦱꦏꦩ꧀ꦥꦶ ꦄꦥ꧀ꦥꦏꦩ꧀ꦥꦶ ꦩꦣꦸꦫꦴ ꦨꦴꦮꦴ ꦄꦥꦶ ꦩꦣꦸꦫꦱꦨꦴꦮꦠꦺꦴꦥꦶ ꦤꦺꦴ ꦕꦭꦶ, ꦤꦶꦱꦶꦤ꧀ꦤꦛ꧀ꦜꦴꦤꦠꦺꦴ ꦥꦒꦺꦮꦴꦠꦶ ꦄꦣꦶꦥ꧀ꦥꦴꦪꦺꦴ. ꦌꦠ꧀ꦡ ꦣꦴꦮꦤꦫꦺꦴꦢꦤꦏꦩ꧀ꦥꦤꦴꦢꦷꦤꦁ ꦏꦫꦟꦨꦹꦠꦁ ꦱꦷꦲꦴꦢꦷꦤꦩꦴꦒꦩꦤꦁ ꦤꦴꦒꦮꦺꦜꦤꦁ ꦥꦧ꧀ꦧꦠꦏꦩ꧀ꦥꦤꦤ꧀ꦠꦶꦄꦴꦢꦷꦱꦸ ꦮꦠ꧀ꦠꦩꦴꦤꦺꦱꦸꦥꦶ ꦤꦶꦧ꧀ꦧꦶꦏꦴꦫꦠ꧀ꦠꦺꦤ ꦱꦤ꧀ꦠꦶꦁ ꦒꦠꦺꦴꦠꦶ ꦆꦩꦶꦤꦴ ꦱꦤ꧀ꦠꦫꦱꦱ꧀ꦱ ꦥꦏꦠꦶꦨꦹꦠꦺ ꦈꦢ꧀ꦢꦺꦱꦺ ꦢꦱ꧀ꦱꦶꦠꦺꦴ ꦤꦮꦩꦺꦴ ꦜꦴꦪꦷꦨꦴꦮꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ, ꦌꦠꦱ꧀ꦱ ꦈꦥ꧀ꦥꦠ꧀ꦠꦶꦈꦢ꧀ꦢꦷꦥꦤꦴꦤꦁ ꦏꦴꦫꦟꦨꦹꦠꦴ ꦩꦺꦠ꧀ꦠꦴꦢꦪꦴꦩꦺꦴꦢꦴꦢꦶꦮꦶꦨꦴꦮꦴ ꦱꦴꦩꦠ꧀ꦡꦶꦪꦴ ꦢꦱ꧀ꦱꦶꦠꦴ ꦲꦺꦴꦤ꧀ꦠꦷꦠꦶ. ꦣꦶꦠꦶꦩꦠꦶꦱꦠꦶꦄꦴꦢꦪꦺꦴ ꦠꦢꦤꦸꦫꦹꦥꦧ꧀ꦪꦨꦶꦕꦴꦫꦷꦨꦴꦮꦴ ꦕ ꦠꦴꦢꦶꦱꦴꦤꦸꦨꦴꦮꦴ ꦕ ‘‘ꦌꦤ꧀ꦠꦺꦱꦸ ꦮꦺꦜꦪꦤ꧀ꦠꦺ ꦮꦶꦕꦴꦭꦪꦠꦷ’’ꦠꦶ ꦆꦩꦶꦤꦴ, ꦱꦏꦭꦮꦴꦏ꧀ꦪꦱꦴꦩꦠ꧀ꦡꦶꦪꦺꦤ ꦕ ꦥꦏꦴꦱꦶꦠꦴꦠꦶ ꦢꦛ꧀ꦜꦧ꧀ꦧꦴ.

ꦆꦠꦶ ꦱꦸꦧꦺꦴꦣꦴꦭꦔ꧀ꦏꦴꦫꦤꦶꦱ꧀ꦱꦪꦺ

ꦫꦱꦨꦴꦮꦴꦮꦧꦺꦴꦣꦺꦴ ꦤꦴꦩ ꦥꦚ꧀ꦕꦩꦺꦴ ꦥꦫꦶꦕ꧀ꦖꦺꦢꦺꦴ.