꧑꧖. ꦆꦤ꧀ꦢ꧀ꦫꦶꦪꦥꦕ꧀ꦕꦪꦺꦴ

ꦠꦶꦮꦶꦣꦺꦴ ꦆꦤ꧀ꦢ꧀ꦫꦶꦪꦥꦕ꧀ꦕꦪꦺꦴ ꦱꦲꦗꦴꦠꦶꦤ꧀ꦢ꧀ꦫꦶꦪꦥꦕ꧀ꦕꦪꦺꦴ ꦥꦸꦫꦺ ꦗꦴꦠꦶꦤ꧀ꦢ꧀ꦫꦶꦪꦥꦕ꧀ꦕꦪꦺꦴ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦥꦕ꧀ꦕꦪꦺꦴ.

ꦠꦠ꧀ꦡ ꦥꦤ꧀ꦤꦫꦱꦶꦤ꧀ꦢ꧀ꦫꦶꦪꦣꦩ꧀ꦩꦴ ꦱꦲꦗꦴꦠꦶꦤ꧀ꦢ꧀ꦫꦶꦪꦥꦕ꧀ꦕꦪꦺꦴ ꦤꦴꦩ, ꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦩꦤꦶꦤ꧀ꦢ꧀ꦫꦶꦪꦁ ꦱꦸꦑꦶꦤ꧀ꦢ꧀ꦫꦶꦪꦁ ꦢꦸꦏ꧀ꦑꦶꦤ꧀ꦢ꧀ꦫꦶꦪꦁ ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦈꦥꦺꦏ꧀ꦑꦶꦤ꧀ꦢ꧀ꦫꦶꦪꦁ ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦮꦷꦫꦶꦪꦶꦤ꧀ꦢ꧀ꦫꦶꦪꦁ ꦱꦠꦶꦤ꧀ꦢ꧀ꦫꦶꦪꦁ ꦱꦩꦴꦣꦶꦤ꧀ꦢ꧀ꦫꦶꦪꦁ ꦥꦚ꧀ꦚꦶꦤ꧀ꦢ꧀ꦫꦶꦪꦁ ꦄꦤꦚ꧀ꦚꦴꦠꦚ꧀ꦚꦱ꧀ꦱꦴꦩꦷꦠꦶꦤ꧀ꦢ꧀ꦫꦶꦪꦁ ꦄꦚ꧀ꦚꦶꦤ꧀ꦢ꧀ꦫꦶꦪꦁ ꦄꦚ꧀ꦚꦴꦠꦴꦮꦶꦤ꧀ꦢ꧀ꦫꦶꦪꦤ꧀ꦠꦶ. ꦠꦺꦲꦶ ꦱꦲꦗꦴꦠꦴ ꦕꦶꦠ꧀ꦠꦕꦺꦠꦱꦶꦏꦣꦩ꧀ꦩꦴ ꦕ ꦫꦹꦥꦣꦩ꧀ꦩꦴ ꦕ ꦠꦱ꧀ꦱ ꦥꦕ꧀ꦕꦪꦸꦥ꧀ꦥꦤ꧀ꦤꦴ.

ꦥꦚ꧀ꦕꦶꦤ꧀ꦢ꧀ꦫꦶꦪꦫꦹꦥꦴꦤꦶ ꦥꦸꦫꦺꦗꦴꦠꦶꦤ꧀ꦢ꧀ꦫꦶꦪꦥꦕ꧀ꦕꦪꦺꦴ, ꦕꦏ꧀ꦑꦸꦤ꧀ꦢ꧀ꦫꦶꦪꦁ ꦱꦺꦴꦠꦶꦤ꧀ꦢ꧀ꦫꦶꦪꦁ ꦓꦴꦤꦶꦤ꧀ꦢ꧀ꦫꦶꦪꦁ ꦗꦶꦮ꧀ꦲꦶꦤ꧀ꦢ꧀ꦫꦶꦪꦁ ꦏꦴꦪꦶꦤ꧀ꦢ꧀ꦫꦶꦪꦁ. ꦥꦚ꧀ꦕꦮꦶꦚ꧀ꦚꦴꦟꦕꦶꦠ꧀ꦠ ꦕꦺꦠꦱꦶꦏ ꦣꦩ꧀ꦩꦴ ꦠꦱ꧀ꦱ ꦥꦕ꧀ꦕꦪꦸꦥ꧀ꦥꦤ꧀ꦤꦴ.

ꦌꦏꦁ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦥꦕ꧀ꦕꦪꦺꦴ. ꦱꦧ꧀ꦧꦴꦤꦶ ꦏꦩ꧀ꦩꦗ ꦫꦹꦥꦴꦤꦶ ꦗꦷꦮꦶꦠꦫꦹꦥꦮꦗ꧀ꦗꦶꦠꦴꦤꦶ ꦠꦱ꧀ꦱ ꦥꦕ꧀ꦕꦪꦸꦥ꧀ꦥꦤ꧀ꦤꦴꦤꦶ.

ꦏꦺꦤꦛ꧀ꦜꦺꦤ ꦆꦤ꧀ꦢ꧀ꦫꦶꦪꦤ꧀ꦠꦶ. ꦆꦱ꧀ꦱꦫꦶꦪꦛ꧀ꦜꦺꦤ ꦆꦤ꧀ꦢ꧀ꦫꦶꦪꦁ. ꦠꦠ꧀ꦡ ꦏꦠ꧀ꦡ ꦆꦱ꧀ꦱꦫꦶꦪꦤ꧀ꦠꦶ. ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦺꦱꦸ ꦣꦩ꧀ꦩꦺꦱꦸ ꦆꦱ꧀ꦱꦫꦶꦪꦁ. ꦏꦱ꧀ꦩꦶꦁ ꦏꦱ꧀ꦩꦶꦁ ꦏꦶꦕ꧀ꦕꦺ ꦆꦱ꧀ꦱꦫꦶꦪꦤ꧀ꦠꦶ. ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦏꦶꦕ꧀ꦕꦺ ꦆꦱ꧀ꦱꦫꦶꦪꦁ. ꦤꦴꦩꦗꦷꦮꦶꦠꦁ ꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦤꦁ ꦗꦷꦮꦤꦏꦶꦕ꧀ꦕꦺ ꦆꦱ꧀ꦱꦫꦶꦪꦁ. ꦗꦷꦮꦤꦏꦶꦕ꧀ꦕꦺꦠꦶ ꦄꦴꦪꦸꦮꦝ꧀ꦞꦤꦏꦶꦕ꧀ꦕꦺ, ꦱꦤ꧀ꦠꦠꦶꦜꦶꦠꦶꦪꦴ ꦕꦶꦫꦏꦴꦭꦜꦶꦠꦶꦏꦶꦕ꧀ꦕꦺꦠꦶ ꦄꦠ꧀ꦡꦺꦴ. ꦩꦤꦶꦤ꧀ꦢ꧀ꦫꦶꦪꦁ ꦄꦴꦫꦩ꧀ꦩꦟꦒ꧀ꦒꦲꦟꦏꦶꦕ꧀ꦕꦺ ꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦤꦁ ꦆꦱ꧀ꦱꦫꦶꦪꦁ. ꦄꦮꦱꦺꦱꦺꦴ ꦆꦤ꧀ꦢ꧀ꦫꦶꦪꦛ꧀ꦜꦺꦴ ꦥꦸꦧ꧀ꦧꦺ ꦆꦤ꧀ꦢ꧀ꦫꦶꦪꦪꦩꦏꦢꦷꦥꦤꦶꦪꦁ ꦮꦸꦠ꧀ꦠꦺꦴꦪꦺꦮ.

ꦌꦠ꧀ꦡ ꦮꦢꦺꦪ꧀ꦪ, ꦢ꧀ꦮꦺ ꦆꦠ꧀ꦡꦶꦤ꧀ꦢ꧀ꦫꦶꦪꦥꦸꦫꦶꦱꦶꦤ꧀ꦢ꧀ꦫꦶꦪꦣꦩ꧀ꦩꦴ ꦆꦤ꧀ꦢ꧀ꦫꦶꦪꦨꦹꦠꦴ ꦱꦩꦴꦤꦴꦥꦶ ꦏꦱ꧀ꦩꦴ ꦆꦤ꧀ꦢ꧀ꦫꦶꦪꦥꦕ꧀ꦕꦪꦺ ꦮꦶꦱꦸꦁ ꦤ ꦒꦲꦶꦠꦴꦠꦶ. ꦥꦕ꧀ꦕꦪꦏꦶꦕ꧀ꦕꦱ꧀ꦱ ꦄꦨꦴꦮꦠꦺꦴ. ꦠꦶꦮꦶꦣꦚ꧀ꦲꦶ ꦥꦕ꧀ꦕꦪꦏꦶꦕ꧀ꦕꦁ ꦗꦤꦤꦏꦶꦕ꧀ꦕꦚ꧀ꦕ ꦈꦥꦠ꧀ꦡꦩ꧀ꦨꦤꦏꦶꦕ꧀ꦕꦚ꧀ꦕ ꦄꦤꦸꦥꦴꦭꦤꦏꦶꦕ꧀ꦕꦚ꧀ꦕ. ꦠꦠ꧀ꦡ ꦪꦺꦴ ꦥꦕ꧀ꦕꦪꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦣꦩ꧀ꦩꦱ꧀ꦱ ꦈꦥ꧀ꦥꦴꦢꦴꦪ ꦥꦕ꧀ꦕꦪꦺꦴ ꦲꦺꦴꦠꦶ, ꦪꦱ꧀ꦩꦶꦁ ꦄꦱꦠꦶ ꦥꦕ꧀ꦕꦪꦸꦥ꧀ꦥꦤ꧀ꦤꦺꦴ ꦣꦩ꧀ꦩꦺꦴ ꦤ ꦈꦥ꧀ꦥꦗ꧀ꦗꦠꦶ, ꦠꦱ꧀ꦱ ꦥꦕ꧀ꦕꦪꦏꦶꦕ꧀ꦕꦁ ꦗꦤꦤꦏꦶꦕ꧀ꦕꦁ ꦤꦴꦩ. ꦪꦡꦴ ꦄꦤꦤ꧀ꦠꦫꦥꦕ꧀ꦕꦪꦺꦴ. ꦪꦺꦴ ꦥꦕ꧀ꦕꦪꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦣꦩ꧀ꦩꦱ꧀ꦱ ꦜꦶꦠꦶꦪꦴ ꦕ ꦮꦸꦝ꧀ꦞꦶꦪꦴ ꦕ ꦮꦶꦫꦸꦭ꦳꧀ꦲꦶꦪꦴ ꦕ ꦥꦕ꧀ꦕꦪꦺꦴ ꦲꦺꦴꦠꦶ, ꦪꦱ꧀ꦩꦶꦁ ꦄꦱꦠꦶ ꦥꦕ꧀ꦕꦪꦸꦥ꧀ꦥꦤ꧀ꦤꦺꦴ ꦣꦩ꧀ꦩꦺꦴ ꦤ ꦠꦶꦛ꧀ꦜꦠꦶ ꦤ ꦮꦝ꧀ꦞꦠꦶ ꦤ ꦮꦶꦫꦹꦲꦠꦶ, ꦠꦱ꧀ꦱ ꦥꦕ꧀ꦕꦪꦏꦶꦕ꧀ꦕꦁ ꦈꦥꦠ꧀ꦡꦩ꧀ꦨꦤꦏꦶꦕ꧀ꦕꦁ ꦤꦴꦩ. ꦪꦡꦴ ꦥꦕ꧀ꦖꦴꦗꦴꦠꦥꦕ꧀ꦕꦪꦺꦴ. ꦪꦺꦴ ꦥꦕ꧀ꦕꦪꦺꦴ ꦥꦕ꧀ꦕꦪꦸꦥ꧀ꦥꦤ꧀ꦤꦱ꧀ꦱ ꦣꦩ꧀ꦩꦱ꧀ꦱ ꦥꦮꦠ꧀ꦠꦶꦪꦴ ꦥꦕ꧀ꦕꦪꦺꦴ ꦲꦺꦴꦠꦶ, ꦪꦺꦤ ꦮꦶꦤꦴ ꦥꦕ꧀ꦕꦪꦸꦥ꧀ꦥꦤ꧀ꦤꦺꦴ ꦣꦩ꧀ꦩꦺꦴ ꦕꦶꦫꦏꦴꦭꦁ ꦤ ꦥꦮꦠ꧀ꦠꦠꦶ, ꦱꦤ꧀ꦠꦠꦶ ꦒꦩꦤꦁ ꦖꦶꦗ꧀ꦗꦠꦶ, ꦠꦱ꧀ꦱ ꦥꦕ꧀ꦕꦪ ꦏꦶꦕ꧀ꦕꦁ ꦄꦤꦸꦥꦴꦭꦤꦏꦶꦕ꧀ꦕꦁ ꦤꦴꦩ. ꦪꦡꦴ ꦫꦹꦥ ꦗꦷꦮꦶꦠꦶꦤ꧀ꦢ꧀ꦫꦶꦪꦥꦕ꧀ꦕꦪꦺꦴ. ꦌꦠꦺ ꦥꦤ ꦢ꧀ꦮꦺ ꦆꦤ꧀ꦢ꧀ꦫꦶꦪꦣꦩ꧀ꦩꦴ ꦠꦺꦱꦸ ꦠꦷꦱꦸ ꦥꦕ꧀ꦕꦪ ꦏꦶꦕ꧀ꦕꦺꦱꦸ ꦌꦏꦏꦶꦕ꧀ꦕꦁꦥꦶ ꦤꦱꦴꦣꦺꦤ꧀ꦠꦶ, ꦠꦱ꧀ꦩꦴ ꦌꦠꦺ ꦢ꧀ꦮꦺ ꦣꦩ꧀ꦩꦴ ꦆꦤ꧀ꦢ꧀ꦫꦶꦪ ꦥꦕ꧀ꦕꦪꦺ ꦮꦶꦱꦸꦁ ꦤ ꦒꦲꦶꦠꦴꦠꦶ.

ꦌꦠꦁ ꦱꦤ꧀ꦠꦺ ꦌꦠꦺ ꦢ꧀ꦮꦺ ꦣꦩ꧀ꦩꦴ ꦆꦤ꧀ꦢ꧀ꦫꦶꦪꦴꦠꦶꦥꦶ ꦤ ꦮꦠ꧀ꦠꦧ꧀ꦧꦴꦠꦶ. ꦤꦺꦴ ꦤ ꦮꦠ꧀ꦠꦧ꧀ꦧꦴ. ꦏꦱ꧀ꦩꦴ. ꦆꦤ꧀ꦢ꧀ꦫꦶꦪꦏꦶꦕ꧀ꦕꦱꦧ꧀ꦨꦴꦮꦠꦺꦴꦠꦶ. ꦏꦶꦁ ꦥꦤ ꦌꦠꦺꦱꦁ ꦆꦤ꧀ꦢ꧀ꦫꦶꦪꦏꦶꦕ꧀ꦕꦤ꧀ꦠꦶ. ꦭꦶꦔ꧀ꦒꦤꦶꦩꦶꦠ꧀ꦠꦏꦸꦠ꧀ꦠꦄꦴꦏꦥ꧀ꦥꦺꦱꦸ ꦆꦱ꧀ꦱꦫꦠꦴ ꦆꦤ꧀ꦢ꧀ꦫꦶꦪ ꦏꦶꦕ꧀ꦕꦁ. ꦠꦡꦴ ꦲꦶ ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦥꦛꦶꦱꦤ꧀ꦣꦶꦏ꧀ꦑꦟꦺ ꦆꦠ꧀ꦡꦶꦤ꧀ꦢ꧀ꦫꦶꦪꦫꦹꦥꦁ ꦈꦥ꧀ꦥꦗ꧀ꦗꦠꦶ, ꦠꦱ꧀ꦱ ꦱꦤ꧀ꦠꦴꦤꦺ ꦕꦠꦹꦲꦶ ꦏꦩ꧀ꦩꦴꦢꦷꦲꦶ ꦥꦕ꧀ꦕꦪꦺꦲꦶ ꦈꦥ꧀ꦥꦤ꧀ꦤꦴ ꦥꦚ꧀ꦕꦏ꧀ꦑꦤ꧀ꦣ ꦣꦩ꧀ꦩꦴ ꦆꦠ꧀ꦡꦶꦨꦴꦮꦴꦪ ꦥꦫꦶꦟꦩꦤ꧀ꦠꦶ, ꦱꦺꦴ ꦄꦠ꧀ꦠꦨꦴꦮꦺꦴ ꦌꦏꦤ꧀ꦠꦺꦤ ꦆꦠ꧀ꦡꦶꦭꦶꦔ꧀ꦒ ꦆꦠ꧀ꦡꦶꦤꦶꦩꦶꦠ꧀ꦠ ꦆꦠ꧀ꦡꦶꦏꦸꦠ꧀ꦠ ꦆꦠ꧀ꦡꦴꦏꦥ꧀ꦥꦪꦸꦠ꧀ꦠꦺꦴ ꦲꦺꦴꦠꦶ, ꦤꦺꦴ ꦄꦚ꧀ꦚꦡꦴ. ꦤ ꦕ ꦆꦠ꧀ꦡꦶꦤ꧀ꦢ꧀ꦫꦶꦪꦫꦹꦥꦁ ꦠꦺ ꦥꦚ꧀ꦕꦏ꧀ꦑꦤ꧀ꦣꦣꦩ꧀ꦩꦺ ꦗꦤꦺꦠꦶ, ꦤ ꦕ ꦈꦥꦠ꧀ꦡꦩ꧀ꦨꦠꦶ, ꦤꦴꦥꦶ ꦄꦤꦸꦥꦴꦭꦺꦠꦶ, ꦄꦡ ꦑꦺꦴ ꦠꦺ ꦣꦩ꧀ꦩꦴ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦥꦕ꧀ꦕꦪꦺꦲꦶ ꦈꦥ꧀ꦥꦗ꧀ꦗꦩꦴꦤꦴ ꦌꦮꦚ꧀ꦕꦺꦮꦚ꧀ꦕ ꦈꦥ꧀ꦥꦗ꧀ꦗꦤ꧀ꦠꦹꦠꦶ ꦄꦴꦟꦁ ꦜꦥꦺꦤ꧀ꦠꦁ ꦮꦶꦪ ꦠꦺꦱꦸ ꦄꦠ꧀ꦠꦤꦺꦴ ꦄꦤꦸꦨꦴꦮꦁ ꦥꦮꦠ꧀ꦠꦺꦠꦶ. ꦠꦺ ꦕ ꦣꦩ꧀ꦩꦴ ꦠꦡꦺꦮ ꦈꦥ꧀ꦥꦗ꧀ꦗꦤ꧀ꦠꦶ, ꦤꦺꦴ ꦄꦚ꧀ꦚꦡꦴꦠꦶ. ꦄꦪꦁ ꦆꦠ꧀ꦡꦶꦤ꧀ꦢ꧀ꦫꦶꦪꦫꦹꦥꦱ꧀ꦱ ꦆꦠ꧀ꦡꦶꦭꦶꦔ꧀ꦒꦴꦢꦷꦱꦸ ꦆꦱ꧀ꦱꦫꦠꦴ. ꦌꦱ ꦤꦪꦺꦴ ꦥꦸꦫꦶꦱꦶꦤ꧀ꦢ꧀ꦫꦶꦪꦫꦹꦥꦱ꧀ꦱ ꦥꦸꦫꦶꦱꦭꦶꦔ꧀ꦒꦴꦢꦷꦱꦸ ꦆꦱ꧀ꦱꦫꦠꦴꦪꦁ. ꦌꦮꦁ ꦌꦠꦺ ꦢ꧀ꦮꦺ ꦣꦩ꧀ꦩꦴ ꦭꦶꦔ꧀ꦒꦴꦢꦷꦱꦸ ꦆꦤ꧀ꦢ꧀ꦫꦶꦪꦏꦶꦕ꧀ꦕ ꦱꦧ꧀ꦨꦴꦮꦠꦺꦴ ꦆꦤ꧀ꦢ꧀ꦫꦶꦪꦴ ꦤꦴꦩ ꦲꦺꦴꦤ꧀ꦠꦷꦠꦶ.

ꦲꦢꦪꦮꦠ꧀ꦡꦸꦫꦹꦥꦁ ꦥꦤ ꦢ꧀ꦮꦶꦤ꧀ꦤꦁ ꦮꦶꦚ꧀ꦚꦴꦟꦣꦴꦠꦹꦤꦁ ꦤꦶꦱ꧀ꦱꦪꦮꦠ꧀ꦡꦸꦏꦶꦕ꧀ꦕꦁ ꦱꦴꦣꦪꦩꦴꦤꦁꦥꦶ ꦠꦴꦱꦸ ꦆꦤ꧀ꦢ꧀ꦫꦶꦪꦏꦶꦕ꧀ꦕꦁ ꦤ ꦱꦴꦣꦺꦠꦶ. ꦤ ꦲꦶ ꦨꦴꦮꦶꦠ ꦕꦶꦠ꧀ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦲꦢꦪꦫꦹꦥꦺ ꦥꦱꦤ꧀ꦤꦺꦮꦴ ꦄꦥ꧀ꦥꦱꦤ꧀ꦤꦺ ꦮꦴ ꦗꦴꦠꦺꦥꦶ ꦩꦤꦺꦴꦮꦶꦚ꧀ꦚꦴꦟꦣꦴꦠꦸꦪꦺꦴ ꦠꦢꦤꦸꦮꦠ꧀ꦠꦶꦏꦴ ꦲꦺꦴꦤ꧀ꦠꦷꦠꦶ. ꦆꦤ꧀ꦢ꧀ꦫꦶꦪ ꦥꦕ꧀ꦕꦪꦢꦷꦥꦤꦴ ꦤꦶꦛ꧀ꦜꦶꦠꦴ.