ꦢ꧀ꦮꦶꦥꦚ꧀ꦚꦴꦱꦠꦶꦩ ꦥꦫꦶꦕ꧀ꦖꦺꦢ

ꦠꦶꦫꦴꦗꦏꦺꦴꦤꦴꦩ

꧑. ꦠꦠꦺꦴ ꦭꦔ꧀ꦏꦴꦨꦶꦱꦺꦏꦁ ꦱꦺꦴ, ꦥꦠ꧀ꦮꦴ ꦱꦺꦤꦺꦴ ꦏꦩꦴꦒꦠꦁ;

ꦩꦲꦶꦤ꧀ꦢꦱ꧀ꦱꦴꦢꦶꦥꦴꦢꦱ꧀ꦱ, ꦪꦸꦮꦫꦴꦗꦥꦢꦁ ꦄꦢꦴ.

꧒. ꦥꦚ꧀ꦚꦺꦴ ꦩꦲꦴꦏꦮꦷ ꦧ꧀ꦪꦠ꧀ꦠꦺꦴ, ꦩꦗ꧀ꦙꦠ꧀ꦠꦺꦴ ꦩꦶꦠ꧀ꦠꦱꦠ꧀ꦠꦸꦱꦸ;

ꦪꦸꦠ꧀ꦠꦺꦴ ꦢꦪꦴꦪ ꦩꦺꦠ꧀ꦠꦴꦪ, ꦫꦴꦗꦴ ꦱꦺꦴ ꦱꦧ꧀ꦧꦢꦴ ꦄꦲꦸ.

꧓. ꦏꦴꦭꦁ ꦢꦺꦮꦺꦴ’ꦤꦠꦶꦏ꧀ꦏꦩ꧀ꦩ, ꦱꦩ꧀ꦩꦴ ꦣꦴꦫꦴꦨꦶꦮꦱ꧀ꦱꦠꦶ;

ꦫꦛ꧀ꦜꦺ ꦠꦱ꧀ꦩꦶꦁ ꦮꦱꦤ꧀ꦠꦴ’ꦱꦸꦁ, ꦱꦸꦑꦶꦠꦴ ꦤꦶꦧ꧀ꦨꦪꦴ ꦱꦢꦴ.

꧔. ꦱꦸꦠ꧀ꦠꦤ꧀ꦠꦁ ꦭꦺꦴꦲꦥꦴꦱꦴꦢꦺ, ꦤꦶꦱꦶꦤ꧀ꦤꦺꦴ ꦮꦟ꧀ꦟꦪꦷ ꦠꦢꦴ;

ꦤꦶꦏꦴꦪꦠ꧀ꦠꦪꦮꦴꦱꦷꦲꦶ, ꦫꦴꦗꦴ ꦱꦺꦴ ꦥꦫꦶꦮꦴꦫꦶꦠꦺꦴ.

꧕. ꦢꦴꦜꦣꦴꦠꦸꦏꦫꦟ꧀ꦝꦁ ꦱꦺꦴ, ꦤꦴꦤꦴꦫꦠꦤꦨꦹꦱꦶꦠꦁ;

ꦄꦏꦴ ꦕꦠꦸꦮꦶꦲꦴꦫꦺꦱꦸ, ꦣꦴꦠꦸꦥꦹꦗꦴ ꦕ’ꦤꦺꦏꦣꦴ.

꧖. ꦥꦫꦶꦮꦺꦟꦁ ꦱꦶꦠ꧀ꦡꦒꦴꦩꦁ, ꦏꦴꦫꦺꦠ꧀ꦮꦴ ꦮꦸꦠ꧀ꦡꦩꦠ꧀ꦠꦤꦴ;

ꦭꦺꦴꦏꦁ ꦥꦸꦠ꧀ꦠꦁꦮ ꦥꦴꦭꦺꦠ꧀ꦮꦴ, ꦠꦶꦮꦱ꧀ꦱꦺꦤ ꦢꦶꦮꦔ꧀ꦒꦠꦺꦴ.

꧗. ꦪꦸꦮꦫꦴꦗꦴ ꦩꦲꦶꦤ꧀ꦢꦺꦴ ꦱꦺꦴ, ꦫꦴꦗꦴꦱꦶ ꦠꦢꦤꦤ꧀ꦠꦫꦁ;

ꦩꦲꦴꦥꦸꦚ꧀ꦚꦺꦴ ꦩꦲꦴꦠꦺꦗꦺꦴ, ꦩꦲꦴꦱꦺꦤꦺꦴ ꦩꦲꦴꦪꦱꦺꦴ.

꧘. ꦌꦏꦕ꧀ꦖꦠ꧀ꦠꦁ ꦄꦏꦴ ꦭꦔ꧀ꦏꦁ, ꦓꦴꦠꦺꦠ꧀ꦮꦴ ꦕꦺꦴꦫꦸꦥꦢ꧀ꦢꦮꦁ;

ꦄꦏꦁꦱꦸ ꦠꦩꦸꦥꦛ꧀ꦜꦴꦤꦁ, ꦤꦶꦕ꧀ꦕꦩꦟ꧀ꦝꦭꦤꦴꦪꦏꦁ.

꧙. ꦮꦶꦗ꧀ꦗꦩꦴꦤꦺꦥꦶ ꦭꦔ꧀ꦏꦴꦪꦁ, ꦑꦠ꧀ꦠꦶꦪꦴꦤꦁ ꦤꦫꦴꦣꦶꦥꦺꦴ;

ꦏꦴꦭꦶꦔ꧀ꦒꦕꦏ꧀ꦏꦮꦠ꧀ꦠꦶꦱ꧀ꦱ, ꦮꦁꦱꦺ ꦗꦴꦠꦁ ꦏꦸꦩꦴꦫꦶꦏꦁ.

꧑꧐. ꦄꦴꦟꦴꦥꦺꦠ꧀ꦮꦴꦤ ꦠꦁ ꦄꦒ꧀ꦒ-ꦩꦲꦺꦱꦶꦁ ꦄꦠ꧀ꦠꦤꦺꦴ ꦄꦏꦴ;

ꦠꦱ꧀ꦱꦴ ꦥꦸꦠ꧀ꦠꦴ ꦢꦸꦮꦺ ꦗꦴꦠꦴ, ꦣꦷꦠꦴ ꦌꦏꦴ ꦩꦤꦺꦴꦫꦩꦴ.

꧑꧑. ꦄꦴꦢꦶꦥꦴꦢꦺ ꦄꦏꦴ ꦥꦸꦠ꧀ꦠꦺ, ꦣꦷꦠꦫꦁ ꦕꦺꦴꦥꦫꦴꦗꦶꦤꦶꦁ;

ꦆꦠꦶ ꦱꦷꦲꦭ꦳ꦮꦁꦱꦚ꧀ꦕ, ꦥꦛ꧀ꦜꦥꦺꦱꦶ ꦱꦨꦹꦥꦠꦶ.

꧑꧒. ꦧꦭꦏꦴꦪꦁ ꦆꦩꦁ ꦢꦺꦱꦁ, ꦩꦢ꧀ꦢꦤꦠ꧀ꦡꦴꦪ ꦮꦭ꧀ꦭꦨꦺꦴ;

ꦥꦺꦱꦺꦱꦶ ꦤꦴꦒꦢꦷꦥꦁ ꦱꦺꦴ, ꦱꦸꦠ꧀ꦮꦴ ꦠꦁ ꦨꦹꦥꦠꦶ ꦆꦣ.

꧑꧓. ꦧꦭꦁ ꦢꦠ꧀ꦮꦴꦤ ꦱꦺꦤꦮ꧀ꦲ-ꦫꦴꦗꦱꦺꦤꦴꦥꦠꦶꦁ ꦠꦢꦴ;

ꦮꦭ꧀ꦭꦨꦱ꧀ꦱ ꦧꦭꦺꦤꦺ’ꦱ, ꦪꦸꦗ꧀ꦙꦶꦠꦸꦁ ꦠꦠ꧀ꦡ ꦥꦺꦱꦪꦶ.

꧑꧔. ꦒꦤ꧀ꦠ꧀ꦮꦴ ꦱꦺꦤꦴꦥꦠꦷ ꦠꦠ꧀ꦡ, ꦧꦭꦺꦤꦺ’ꦠꦱ꧀ꦱ ꦫꦴꦗꦶꦤꦺꦴ;

ꦪꦸꦗ꧀ꦙꦶꦠ꧀ꦮꦴ ꦠꦁ ꦮꦶꦤꦴꦱꦺꦠ꧀ꦮꦴ, ꦒꦟ꧀ꦲꦶ ꦱꦺꦴ ꦪꦸꦢ꧀ꦣꦩꦟ꧀ꦝꦭꦺ.

꧑꧕. ꦄꦱꦏ꧀ꦏꦺꦤ꧀ꦠꦺꦴ ꦆꦩꦁ ꦗꦺꦠꦸꦁ, ꦫꦴꦗꦴ ꦤꦁ ꦮꦭ꧀ꦭꦨꦴꦢꦪꦺꦴ;

ꦫꦴꦗꦴꦤꦺꦴ ꦩꦶꦠ꧀ꦠꦱꦩ꧀ꦧꦤ꧀ꦣꦁ, ꦭꦁꦏꦶꦤ꧀ꦢꦺꦤ ꦄꦏꦁꦱꦸ ꦠꦺ.

꧑꧖. ꦆꦕ꧀ꦖꦺꦮꦁ ꦫꦴꦗꦶꦤꦺꦴ ꦠꦺꦗꦺꦴ, ꦗꦩ꧀ꦧꦸꦢꦷꦥꦩꦮꦠ꧀ꦡꦫꦶ;

ꦥꦠ꧀ꦡꦫꦶꦠ꧀ꦮꦴꦤ ꦭꦁꦏꦴꦪꦁ, ꦈꦭ꧀ꦭꦔ꧀ꦓꦶꦠ꧀ꦮꦴꦤ ꦱꦴꦒꦫꦁ.

꧑꧗. ꦱꦢ꧀ꦣꦩ꧀ꦩꦁ ꦏꦡꦴꦪꦤ꧀ꦠꦴꦤꦁ, ꦏꦠ꧀ꦮꦴ ꦱꦩ꧀ꦩꦴ ꦤ ꦩꦸꦠ꧀ꦠꦩꦁ;

ꦣꦩ꧀ꦩꦁ ꦱꦸꦠ꧀ꦮꦴꦤ ꦱꦺꦴ ꦫꦴꦗꦴ, ꦥꦱꦤ꧀ꦤꦺꦴ ꦧꦸꦢ꧀ꦣꦱꦴꦱꦤꦺ.

꧑꧘. ꦫꦴꦗꦴ ꦱꦺꦴ ꦱꦤ꧀ꦤꦶꦥꦴꦠꦺꦠ꧀ꦮꦴ, ꦥꦁꦱꦸꦏꦹꦭꦶꦏꦨꦶꦏ꧀ꦑꦮꦺꦴ;

ꦪꦴꦕꦶꦠ꧀ꦮꦴ ꦄꦠ꧀ꦠꦤꦺꦴ ꦒꦺꦲꦁ, ꦄꦴꦟꦴꦥꦺꦠ꧀ꦮꦴꦤ ꦱꦴꦣꦸꦏꦁ.

꧑꧙. ꦄꦴꦱꦤꦁ ꦥꦚ꧀ꦚꦥꦺꦠ꧀ꦮꦴꦤ, ꦤꦶꦱꦷꦢꦴꦥꦶꦪ ꦨꦺꦴꦗꦤꦁ;

ꦢꦴꦥꦺꦱꦶ ꦮꦶꦥꦸꦭꦁ ꦱꦸꦢ꧀ꦣꦁ, ꦱꦢꦴ ꦌꦏꦢꦶꦤꦺ ꦮꦶꦪ.

꧒꧐. ꦄꦤꦺꦏꦧ꧀ꦪꦚ꧀ꦗꦤꦁ ꦫꦴꦗꦴ-ꦫꦚ꧀ꦚꦏꦴꦤꦁ ꦠꦥꦱ꧀ꦱꦶꦤꦁ;

ꦥꦺꦱꦺꦱꦶ ꦨꦺꦴꦗꦤꦁ ꦱꦸꦢ꧀ꦣꦁ, ꦩꦲꦒ꧀ꦓꦁ ꦮꦶꦥꦸꦭꦁ ꦱꦢꦴ.

꧒꧑. ꦮꦺꦗ꧀ꦗꦺꦮ ꦥꦺꦱꦪꦶꦠ꧀ꦮꦴꦤ, ꦮꦶꦭꦴꦤꦴꦤꦁ ꦠꦥꦱ꧀ꦱꦶꦤꦁ;

ꦱꦤ꧀ꦠꦶꦏꦁ ꦱꦺꦴ ꦢꦪꦴꦮꦴꦱꦺꦴ, ꦠꦶꦏꦶꦕ꧀ꦖꦴꦥꦺꦱꦶ ꦤꦶꦕ꧀ꦕꦱꦺꦴ.

꧒꧒. ꦒꦸꦭ꦳ꦴꦤꦶ ꦓꦤꦥꦴꦏꦴꦤꦶ, ꦭꦱꦸꦟꦴꦤꦁ ꦫꦱꦴꦤꦶ ꦕ;

ꦠꦩ꧀ꦧꦸꦭꦩꦸꦑꦮꦴꦱꦚ꧀ꦕ, ꦥꦕ꧀ꦖꦨꦠ꧀ꦠꦺ ꦄꦢꦴ ꦱꦢꦴ.

꧒꧓. ꦥꦠ꧀ꦠꦺꦱꦸ ꦥꦹꦫꦪꦶꦠ꧀ꦮꦴꦤ, ꦭꦱꦸꦟꦁ ꦩꦫꦶꦕꦩ꧀ꦥꦶ ꦕ;

ꦥꦶꦥ꧀ꦦꦭꦶꦱꦔ꧀ꦒꦷꦮꦺꦫꦴꦤꦶ, ꦒꦸꦭ꦳ꦴꦤꦶ ꦠꦶꦦꦭꦴꦤꦶ ꦕ.

꧒꧔. ꦓꦠꦁ ꦠꦺꦭꦁ ꦩꦣꦸꦚ꧀ꦕꦴꦪ, ꦥꦴꦥꦸꦫꦠ꧀ꦡꦫꦟꦴꦤꦶ ꦕ;

ꦥꦁꦱꦸꦏꦹꦭꦶꦏꦨꦶꦏ꧀ꦑꦹꦤꦁ, ꦥꦕ꧀ꦕꦺꦏꦁ ꦱꦧ꧀ꦧꦢꦴ ꦄꦢꦴ.

꧒꧕. ꦕꦷꦮꦫꦴꦢꦷꦤꦶ ꦱꦧ꧀ꦧꦴꦤꦶ, ꦥꦫꦶꦏ꧀ꦑꦴꦫꦴꦤꦶ ꦨꦹꦥꦠꦶ;

ꦏꦴꦫꦴꦥꦺꦠ꧀ꦮꦴꦤ ꦢꦴꦥꦺꦱꦶ, ꦨꦶꦏ꧀ꦑꦹꦤꦁ ꦥꦁꦱꦸꦏꦸꦭꦶꦤꦁ.

꧒꧖. ꦫꦴꦗꦴ ꦩꦲꦴꦮꦶꦲꦴꦫꦱ꧀ꦩꦶꦁ, ꦌꦏꦺꦏꦱ꧀ꦱ ꦲꦶ ꦨꦶꦏ꧀ꦑꦸꦤꦺꦴ;

ꦥꦕ꧀ꦕꦺꦏꦁ ꦤꦮꦮꦠ꧀ꦡꦴꦤꦶ, ꦕꦷꦮꦫꦠ꧀ꦡꦴꦪ ꦢꦴꦥꦪꦶ.

꧒꧗. ꦤꦶꦏꦴꦪꦠ꧀ꦠꦪꦮꦴꦱꦷꦤꦁ, ꦨꦶꦏ꧀ꦑꦹꦤꦁ ꦭꦴꦨꦮꦴꦱꦶꦤꦁ;

ꦠꦸꦭꦴꦨꦴꦫꦩꦢꦴ ꦢ꧀ꦮꦷꦱꦸ, ꦮꦴꦫꦺꦱꦸ ꦱꦩꦲꦷꦥꦠꦶ.

꧒꧘. ꦫꦴꦗꦴ ꦱꦺꦴ ꦤꦴꦒꦠꦺꦨꦺꦴꦒꦁ,

ꦫꦴꦗꦴꦤꦺꦴ ꦱꦔ꧀ꦓꦨꦺꦴꦒꦠꦺꦴ;

ꦤ ꦒꦟ꧀ꦲꦤ꧀ꦠꦹꦤꦶ ꦥꦴꦱꦴꦟꦺ,

ꦭꦶꦑꦴꦥꦺꦠ꧀ꦮꦴ ꦤꦶꦣꦴꦥꦪꦶ.

꧒꧙. ꦏꦡꦴꦥꦺꦠ꧀ꦮꦴꦤ ꦧꦸꦢ꧀ꦣꦱ꧀ꦱ, ꦱꦫꦟꦴꦤꦶ ꦒꦸꦟꦺꦤꦮ;

ꦄꦤꦴꦡꦺꦲꦶ ꦕ ꦠꦺꦱꦚ꧀ꦕ, ꦨꦠ꧀ꦠꦮꦠ꧀ꦡꦴꦤꦶ ꦢꦴꦥꦪꦶ.

꧓꧐. ꦢꦴꦤꦱꦴꦭꦁ ꦏꦫꦶꦠ꧀ꦮꦴꦤ, ꦲꦠ꧀ꦡꦶꦱꦴꦭꦏꦨꦹꦩꦶꦪꦁ;

ꦪꦴꦕꦏꦴꦤꦁ ꦄꦢꦴ ꦢꦴꦤꦁ, ꦠꦺꦱꦚ꧀ꦕ ꦱꦪꦤꦴꦱꦤꦁ.

꧓꧑. ꦮꦺꦗ꧀ꦗꦱꦴꦭꦴꦱꦸ ꦱꦧ꧀ꦧꦴꦱꦸ, ꦨꦺꦱꦗ꧀ꦗꦁ ꦩꦚ꧀ꦕꦏꦚ꧀ꦕ ꦱꦺꦴ;

ꦕꦺꦴꦫꦴꦤꦁ ꦧꦤ꧀ꦣꦤꦴꦒꦴꦫꦺ, ꦤꦶꦕ꧀ꦕꦁ ꦨꦠ꧀ꦠꦴꦤꦶ ꦢꦴꦥꦪꦶ.

꧓꧒. ꦮꦴꦤꦫꦴꦤꦁ ꦮꦫꦲꦴꦤꦁ, ꦩꦶꦒꦴꦤꦁ ꦱꦸꦤꦑꦴꦤ ꦕ;

ꦨꦠ꧀ꦠꦁ ꦥꦹꦮꦚ꧀ꦕ ꦢꦴꦥꦺꦱꦶ, ꦢꦪꦴꦮꦴꦱꦺꦴ ꦪꦡꦶꦕ꧀ꦖꦏꦁ.

꧓꧓. ꦫꦴꦗꦴ ꦕꦠꦸꦮꦶꦲꦴꦫꦺꦱꦸ, ꦏꦠ꧀ꦮꦴ ꦱꦺꦴ ꦮꦷꦲꦶꦫꦴꦱꦪꦺꦴ;

ꦪꦡꦶꦕ꧀ꦖꦶꦠꦺꦤ ꦒꦟ꧀ꦲꦤ꧀ꦠꦸ, ꦄꦤꦴꦡꦴ ꦆꦠꦶ ꦢꦴꦥꦪꦶ.

꧓꧔. ꦤꦴꦤꦴꦥꦹꦗꦴꦲꦶ ꦥꦹꦗꦺꦠ꧀ꦮꦴ, ꦏꦠ꧀ꦮꦴ ꦩꦔ꧀ꦒꦭꦩꦸꦠ꧀ꦠꦩꦁ;

ꦏꦡꦴꦥꦺꦱꦶ ꦕ ꦨꦶꦏ꧀ꦑꦹꦲꦶ, ꦧ꧀ꦪꦠ꧀ꦠꦺꦲꦶ ꦮꦶꦤꦪꦁ ꦠꦢꦴ.

꧓꧕. ꦡꦺꦫꦺꦤ ꦣꦩ꧀ꦩꦩꦶꦠ꧀ꦠꦺꦤ-ꦱꦶꦠ꧀ꦡꦒꦴꦩꦏꦮꦴꦱꦶꦤꦴ;

ꦥꦹꦗꦪꦶꦠ꧀ꦮꦴꦤ ꦏꦴꦫꦺꦱꦶ, ꦄꦨꦶꦣꦩ꧀ꦩꦱ꧀ꦱ ꦮꦟ꧀ꦟꦤꦁ.

꧓꧖. ꦢꦴꦜꦴꦤꦴꦒꦴ’ꦨꦶꦣꦴꦤꦺꦤ, ꦡꦺꦫꦺꦤꦴ’ꦫꦚ꧀ꦚꦮꦴꦱꦶꦤꦴ;

ꦭꦁꦏꦴꦭꦁꦏꦴꦫꦨꦹꦠꦺꦤ, ꦄꦨꦶꦣꦩ꧀ꦩꦁ ꦏꦡꦴꦥꦪꦶ.

꧓꧗. ꦥꦛ꧀ꦛꦏꦚ꧀ꦕꦸꦏꦥꦹꦗꦴꦲꦶ, ꦲꦺꦩꦩꦴꦭꦶꦏꦕꦺꦠꦶꦪꦁ;

ꦤꦕ꧀ꦕꦒꦷꦠꦺꦲꦶ ꦒꦤ꧀ꦣꦺꦲꦶ, ꦥꦸꦥ꧀ꦦꦺꦲꦶ ꦮꦶꦮꦶꦣꦺꦲꦶ ꦕ.

꧓꧘. ꦢꦷꦥꦩꦴꦭꦴꦲꦶ ꦣꦹꦥꦺꦲꦶ, ꦥꦹꦗꦪꦶꦠ꧀ꦮꦴꦤ’ꦤꦺꦏꦣꦴ;

ꦠꦱ꧀ꦱ ꦮꦠ꧀ꦡꦴꦤꦶ ꦨꦴꦗꦺꦠ꧀ꦮꦴ, ꦨꦶꦏ꧀ꦑꦹꦤꦁ ꦢꦴꦥꦪꦷ ꦱꦪꦁ.

꧓꧙. ꦱꦢꦴ ꦱꦺꦴ ꦄꦠ꧀ꦠꦤꦺꦴ ꦫꦗ꧀ꦗꦺ, ꦈꦪ꧀ꦪꦴꦤꦺꦱꦸ ꦠꦲꦶꦁꦠꦲꦶꦁ;

ꦄꦴꦟꦴꦥꦺꦠ꧀ꦮꦴꦤ ꦥꦸꦥ꧀ꦦꦴꦤꦶ, ꦥꦹꦗꦺꦱꦶ ꦫꦠꦤꦠ꧀ꦠꦪꦁ.

꧔꧐. ꦥꦴꦱꦴꦢꦁ ꦕꦤ꧀ꦢꦤꦁ ꦤꦴꦩ, ꦏꦴꦠꦸꦁ ꦩꦫꦶꦕꦮꦛ꧀ꦛꦶꦪꦁ;

ꦄꦏꦴꦫꦩ꧀ꦨꦚ꧀ꦕ ꦨꦶꦏ꧀ꦑꦹꦤꦁ ꦨꦺꦴꦒꦒꦴꦩꦺ ꦕ ꦢꦴꦥꦪꦶ.

꧔꧑. ꦏꦺꦱꦣꦴꦠꦸꦁ ꦤꦶꦣꦴꦥꦺꦠ꧀ꦮꦴ, ꦏꦫꦟ꧀ꦝꦁ ꦫꦠꦤꦺꦲꦶ ꦱꦺꦴ;

ꦏꦴꦫꦪꦶꦠ꧀ꦮꦴꦤ ꦥꦹꦗꦺꦱꦶ, ꦜꦥꦺꦠ꧀ꦮꦴ ꦠꦠ꧀ꦡ ꦨꦹꦥꦠꦶ.

꧔꧒. ꦱꦺꦴꦟ꧀ꦟꦫꦗꦠꦥꦛ꧀ꦛꦺꦲꦶ, ꦡꦹꦥꦴꦫꦴꦩꦩ꧀ꦲꦶ ꦕꦺꦠꦶꦪꦁ;

ꦖꦴꦢꦴꦥꦺꦠ꧀ꦮꦴ ꦪꦡꦴꦫꦗ꧀ꦗꦁ, ꦥꦹꦗꦁ ꦏꦴꦫꦺꦱꦶ ꦨꦹꦥꦠꦶ.

꧔꧓. ꦠꦱ꧀ꦩꦶꦁ ꦣꦴꦠꦸꦓꦫꦺ ꦫꦴꦗꦴ, ꦱꦺꦴꦟ꧀ꦟꦢ꧀ꦮꦴꦫꦩꦏꦴꦫꦪꦶ;

ꦥꦗ꧀ꦗꦭꦤ꧀ꦠꦁ ꦱꦶꦤꦺꦫꦸꦁꦮ, ꦫꦁꦱꦷꦲꦶ ꦱꦹꦫꦶꦪꦱ꧀ꦱ ꦱꦺꦴ.

꧔꧔. ꦙꦴꦥꦶꦠꦁ ꦕꦺꦴꦭ꦳ꦫꦴꦗꦱ꧀ꦱ, ꦧꦭꦺꦤ ꦥꦢꦭꦚ꧀ꦖꦤꦺ;

ꦕꦠꦸꦤ꧀ꦤꦁ ꦕꦺꦠꦶꦪꦴꦤꦁ ꦱꦺꦴ, ꦫꦩꦤꦷꦪꦁ ꦓꦫꦁ ꦄꦏꦴ.

꧔꧕. ꦙꦴꦠꦁ ꦤꦒꦫꦩꦗ꧀ꦙꦩ꧀ꦲꦶ, ꦢꦴꦜꦴꦣꦴꦠꦸꦓꦫꦁ ꦄꦏꦴ;

ꦣꦩ꧀ꦩꦱꦔ꧀ꦒꦟꦷꦒꦺꦲꦚ꧀ꦕ, ꦩꦲꦴꦥꦴꦭ꦳ꦶꦚ꧀ꦕ ꦨꦹꦥꦠꦶ.

꧔꧖. ꦠꦩ꧀ꦧꦹꦭꦩꦟ꧀ꦝꦥꦁ ꦏꦠ꧀ꦮꦴ, ꦠꦠ꧀ꦡ ꦱꦸꦔ꧀ꦏꦁ ꦩꦲꦷꦥꦠꦶ;

ꦨꦶꦏ꧀ꦑꦹꦤꦁ ꦡꦺꦫꦮꦁꦱꦺ ꦱꦺꦴ, ꦨꦺꦱꦗ꧀ꦗꦠ꧀ꦡꦴꦪ ꦢꦴꦥꦪꦶ.

꧔꧗. ꦈꦥꦱ꧀ꦱꦪꦁ ꦏꦫꦶꦠ꧀ꦮꦴꦤ, ꦩꦲꦴꦩꦔ꧀ꦒꦭꦤꦴꦩꦏꦁ;

ꦡꦺꦫꦮꦁꦱꦩ꧀ꦲꦶ ꦗꦴꦠꦴꦤꦁ, ꦨꦶꦏ꧀ꦑꦸꦤꦷꦤꦁ ꦄꦢꦴꦥꦪꦶ.

꧔꧘. ꦩꦴꦠꦸꦭꦺꦴꦢꦪꦫꦴꦗꦺꦤ, ꦄꦴꦫꦢ꧀ꦣꦁ ꦱꦴꦣꦸꦤꦴ ꦠꦢꦴ;

ꦤꦶꦛ꧀ꦜꦴꦥꦺꦱꦶ ꦩꦲꦷꦥꦴꦭꦺꦴ, ꦥꦴꦱꦴꦢꦁ ꦩꦟꦶꦤꦴꦩꦏꦁ.

꧔꧙. ꦥꦫꦶꦮꦺꦟꦴꦤꦶ ꦕꦠ꧀ꦠꦴꦫꦶ, ꦠꦱ꧀ꦩꦶꦁ ꦗꦺꦠꦮꦤꦺ ꦠꦢꦴ;

ꦏꦴꦫꦴꦥꦪꦶꦁꦱꦸ ꦕꦠ꧀ꦠꦴꦫꦺꦴ, ꦄꦩꦕ꧀ꦕꦴ ꦠꦱ꧀ꦱ ꦫꦴꦗꦶꦤꦺꦴ.

꧕꧐. ꦫꦚ꧀ꦚꦺꦴ ꦏꦶꦠ꧀ꦠꦶꦱꦩꦴꦢꦺꦮꦷ, ꦏꦶꦠ꧀ꦠꦶꦤꦴꦩꦴ ꦩꦤꦺꦴꦫꦩꦴ;

ꦥꦫꦶꦮꦺꦟꦁ ꦄꦏꦴꦫꦴꦩꦁ, ꦡꦹꦥꦴꦫꦴꦩꦱ꧀ꦱ ꦥꦕ꧀ꦖꦠꦺꦴ.

꧕꧑. ꦱꦴ ꦠꦱ꧀ꦩꦶꦁ ꦥꦫꦶꦮꦺꦟꦺ ꦕ, ꦄꦏꦴ ꦏꦥ꧀ꦥꦴꦱꦒꦴꦩꦏꦺ;

ꦕꦷꦮꦫꦕꦺꦠꦶꦪꦺ ꦕꦺꦮ, ꦠꦶꦱ꧀ꦱꦺꦴ ꦥꦺꦴꦏ꧀ꦑꦫꦟꦷ ꦱꦸꦕꦶ.

꧕꧒. ꦢ꧀ꦮꦴꦢꦱꦫꦠꦤꦴꦪꦴꦩꦁ, ꦣꦗꦁ ꦱꦺꦴꦟ꧀ꦟꦩꦪꦚ꧀ꦕ ꦱꦴ;

ꦥꦹꦗꦺꦱꦶ ꦥꦸꦚ꧀ꦚꦱꦩ꧀ꦨꦴꦫꦁ, ꦲꦺꦩꦩꦴꦭꦶꦏ ꦕꦺꦠꦶꦪꦺ.

꧕꧓. ꦒꦶꦲꦷꦤꦁ ꦮꦗ꧀ꦗꦱꦴꦭꦚ꧀ꦕ, ꦥꦸꦠ꧀ꦠꦺꦴ ꦠꦱ꧀ꦱꦴ ꦥꦸꦫꦺꦄꦏꦴ;

ꦒꦸꦟꦮꦴꦱꦏ꧀ꦏꦱꦺꦤꦴꦤꦷ, ꦨꦶꦏ꧀ꦑꦹꦤꦚ꧀ꦕ ꦥꦸꦫꦴꦧꦲꦶ.

꧕꧔. ꦫꦴꦗꦴ ꦕꦠꦸꦮꦶꦲꦴꦫꦺꦱꦸ, ꦢꦶꦧ꧀ꦧꦥꦴꦱꦴꦢꦱꦤ꧀ꦤꦶꦨꦺ;

ꦩꦟ꧀ꦝꦥꦺ ꦏꦴꦫꦪꦶꦠ꧀ꦮꦴꦤ, ꦣꦴꦠꦸꦥꦹꦗꦴ ꦄꦤꦺꦏꦣꦴ.

꧕꧕. ꦮꦱ꧀ꦱꦩꦺꦏꦩꦠꦶꦏ꧀ꦏꦩ꧀ꦩ, ꦏꦴꦫꦴꦥꦺꦠ꧀ꦮꦴ ꦩꦲꦷꦥꦠꦶ;

ꦕꦴꦫꦶꦠ꧀ꦠꦁ ꦥꦸꦧ꧀ꦧꦫꦴꦗꦹꦤꦁ, ꦥꦫꦶꦥꦴꦭꦺꦱꦶ ꦱꦴꦣꦸꦏꦁ.

꧕꧖. ꦌꦮꦩꦴꦢꦷꦤꦶ ꦥꦸꦚ꧀ꦚꦴꦤꦶ, ꦈꦭ꦳ꦴꦫꦴꦤꦶ ꦄꦤꦺꦏꦣꦴ;

ꦏꦠ꧀ꦮꦴ ꦱꦺꦴꦭ꦳ꦱꦩꦺ ꦮꦱ꧀ꦱꦺ, ꦫꦴꦗꦴ ꦱꦺꦴ ꦠꦶꦢꦶꦮꦁ ꦒꦠꦺꦴ.

꧕꧗. ꦗꦴꦠꦺꦴ ꦥꦛꦶꦕ꧀ꦕ ꦠꦁ ꦫꦴꦗꦁ, ꦱꦺꦤꦴ ꦢ꧀ꦮꦴꦢꦱꦮꦱ꧀ꦱꦶꦏꦺꦴ;

ꦏꦴꦭꦶꦔ꧀ꦒꦢꦺꦮꦶꦪꦴ ꦥꦸꦠ꧀ꦠꦺꦴ, ꦥꦠ꧀ꦠꦫꦗ꧀ꦗꦺꦴ ꦠꦢꦴ ꦄꦲꦸ.

꧕꧘. ꦈꦢꦪꦱ꧀ꦱ ꦏꦤꦶꦛ꧀ꦜꦱ꧀ꦱ, ꦪꦸꦮꦫꦴꦗꦥꦢꦁ ꦄꦢꦴ;

ꦥꦶꦠꦸ ꦱꦺꦤꦴꦥꦠꦶ ꦱꦺꦤꦺꦴ, ꦠꦱ꧀ꦱ ꦱꦺꦤꦴꦥꦠꦶ ꦄꦲꦸ.

꧕꧙. ꦥꦕ꧀ꦕꦤ꧀ꦠꦁ ꦧꦭꦩꦴꦢꦴꦪ, ꦒꦠꦺ ꦱꦺꦤꦴꦥꦠꦶꦩ꧀ꦲꦶ ꦱꦺꦴ;

ꦩꦴꦠꦫꦴ ꦱꦲ ꦮꦠ꧀ꦠꦤ꧀ꦠꦁ, ꦏꦟꦶꦛ꧀ꦜꦁ ꦠꦱ꧀ꦱ ꦨꦴꦠꦫꦁ.

꧖꧐. ꦩꦴꦫꦴꦥꦺꦠ꧀ꦮꦴ ꦩꦲꦴꦩꦭ꧀ꦭꦁ, ꦄꦏꦴ ꦱꦺꦤꦴꦥꦠꦶꦁ ꦠꦢꦴ;

ꦄꦩꦕ꧀ꦕꦁ ꦈꦢꦪꦁ ꦤꦴꦩ, ꦱꦏꦁ ꦮꦕꦤꦏꦴꦫꦏꦁ.

꧖꧑. ꦠꦁ ꦱꦸꦠ꧀ꦮꦴ ꦏꦸꦥꦶꦠꦺꦴ ꦲꦸꦠ꧀ꦮꦴ, ꦱꦺꦤꦺꦴ ꦱꦺꦤꦴꦥꦠꦶ ꦠꦢꦴ;

ꦧꦭꦩꦴꦢꦴꦪ ꦄꦴꦒꦚ꧀ꦖꦶ, ꦒꦟ꧀ꦲꦶꦱ꧀ꦱꦴꦩꦷꦠꦶ ꦱꦠ꧀ꦠꦮꦺꦴ.

꧖꧒. ꦱꦸꦠ꧀ꦮꦴꦤ ꦠꦁ ꦩꦲꦷꦥꦴꦭꦺꦴ, ꦏꦠꦮꦤ꧀ꦠꦁ ꦮꦴꦕꦩꦠ꧀ꦠꦤꦺꦴ;

ꦫꦏ꧀ꦑꦴꦩꦶ ꦠꦁ ꦄꦩꦕ꧀ꦕꦤ꧀ꦠꦶ, ꦒꦠꦺꦴ ꦤꦶꦏ꧀ꦑꦩ꧀ꦩ ꦫꦺꦴꦲꦟꦁ.

꧖꧓. ꦠꦱ꧀ꦱ ꦩꦴꦪꦴ ꦤꦶꦮꦠ꧀ꦠꦶꦠ꧀ꦮꦴ, ꦪꦸꦮꦫꦴꦗꦚ꧀ꦕ ꦫꦴꦗꦶꦤꦶꦁ;

ꦄꦴꦢꦴꦪ ꦏꦸꦥꦶꦠꦴ ꦠꦺꦤ ꦄꦴꦟꦴꦥꦺꦱꦶ ꦕꦩꦹꦥꦠꦶꦁ.

꧖꧔. ꦠꦴꦪ ꦱꦺꦴ ꦱꦔ꧀ꦒꦲꦷꦠꦺꦴꦮ, ꦢꦩꦶꦭ꦳ꦺ ꦱꦤ꧀ꦤꦶꦥꦴꦠꦶꦪ;

ꦢꦠ꧀ꦮꦴ ꦗꦤꦥꦢꦁ ꦠꦺꦱꦁ, ꦥꦸꦛꦠ꧀ꦡꦶꦤꦒꦫꦺ ꦮꦱꦷ.

꧖꧕. ꦪꦸꦗ꧀ꦙꦶꦠꦸꦁ ꦠꦺꦤ ꦱꦺꦴ ꦫꦴꦗꦴ, ꦧꦭꦁ ꦥꦺꦱꦺꦱꦶ ꦫꦺꦴꦲꦟꦴ;

ꦱꦺꦤꦴꦥꦠꦶ ꦮꦶꦤꦴꦱꦺꦱꦶ, ꦱꦧ꧀ꦧꦁ ꦠꦁ ꦫꦴꦗꦶꦤꦺꦴ ꦧꦭꦁ.

꧖꧖. ꦢꦩꦶꦭ꦳ꦴ ꦠꦺ ꦗꦤꦥꦢꦁ, ꦥꦷꦭ꦳ꦺꦠ꧀ꦮꦴ ꦫꦏ꧀ꦑꦱꦴ ꦮꦶꦪ;

ꦮꦶꦭꦸꦩ꧀ꦥꦶꦠ꧀ꦮꦴꦤ ꦒꦟ꧀ꦲꦤ꧀ꦠꦶ, ꦤꦫꦴꦤꦁ ꦱꦤ꧀ꦠꦏꦁ ꦠꦢꦴ.

꧖꧗. ꦑꦶꦠ꧀ꦠꦴ ꦩꦤꦸꦱ꧀ꦱꦴ ꦒꦤ꧀ꦠ꧀ꦮꦴꦤ, ꦫꦺꦴꦲꦟꦁ ꦫꦴꦗꦱꦤ꧀ꦠꦶꦏꦁ;

ꦤꦶꦮꦺꦢꦺꦱꦸꦁ ꦥꦮꦠ꧀ꦠꦶꦁ ꦠꦁ, ꦩꦤ꧀ꦠꦺꦠ꧀ꦮꦴ ꦱꦕꦷꦮꦺꦲꦶ ꦱꦺꦴ.

꧖꧘. ꦫꦏ꧀ꦑꦶꦠꦸꦁ ꦱꦴꦱꦤꦁ ꦫꦛ꧀ꦜꦁ, ꦠꦩ꧀ꦥꦲꦴꦪ ꦕꦩꦹꦥꦠꦶꦁ;

ꦱꦤ꧀ꦣꦶꦁ ꦏꦠ꧀ꦮꦴꦤ ꦱꦺꦤꦺꦤ, ꦥꦸꦭ꦳ꦠ꧀ꦡꦶꦤꦒꦫꦁ ꦄꦒꦴ.

꧖꧙. ꦩꦲꦺꦱꦶꦁ ꦄꦠ꧀ꦠꦗꦁ ꦏꦠ꧀ꦮꦴ, ꦥꦴꦭꦺꦠꦸꦁ ꦮꦁꦱꦩꦠ꧀ꦠꦤꦺꦴ;

ꦥꦸꦠ꧀ꦠꦁ ꦈꦥ꧀ꦥꦴꦢꦪꦶꦠ꧀ꦮꦴꦤ, ꦏꦱ꧀ꦱꦥꦁ ꦤꦴꦩ ꦈꦠ꧀ꦠꦩꦁ.

꧗꧐. ꦮꦱꦤ꧀ꦠꦺ ꦠꦠ꧀ꦡ ꦭꦁꦏꦶꦤ꧀ꦢꦺ, ꦄꦲꦶꦠꦴ ꦮꦭ꧀ꦭꦨꦴ ꦗꦤꦴ;

ꦄꦭꦨꦤ꧀ꦠꦴ ꦱꦸꦫꦁ ꦥꦴꦠꦸ-ꦩꦴꦫꦶꦪꦴ ꦠꦱ꧀ꦱ ꦱꦤ꧀ꦠꦶꦏꦺ.

꧗꧑. ꦩꦗ꧀ꦗꦥꦴꦤꦺ ꦒꦸꦟꦁ ꦮꦠ꧀ꦮꦴ, ꦥꦴꦪꦺꦱꦸꦁ ꦠꦁ ꦩꦲꦷꦥꦠꦶꦁ;

ꦥꦶꦮꦶꦠ꧀ꦮꦴ ꦩꦗ꧀ꦗꦥꦴꦤꦁ ꦱꦺꦴ, ꦩꦠ꧀ꦠꦧ꧀ꦪꦴꦭ꦳ꦺꦴ ꦄꦲꦸ ꦠꦢꦴ.

꧗꧒. ꦄꦴꦲꦴꦫꦴꦤꦁ ꦑꦪꦁ ꦥꦠ꧀ꦮꦴ, ꦕꦗꦶꦠ꧀ꦮꦴ ꦢꦸꦭ꧀ꦭꦨꦁ ꦥꦢꦁ;

ꦩꦠꦺꦴ ꦱꦺꦴ ꦢꦱꦩꦺ ꦮꦱ꧀ꦱꦺ, ꦠꦫꦸꦟꦺꦴꦪꦺꦮ ꦨꦹꦥꦠꦶ.

꧗꧓. ꦆꦠꦺꦴ ꦮꦶꦢꦶꦠ꧀ꦮꦴ ꦑꦭꦸꦥꦴꦥꦩꦶꦠ꧀ꦠ-

ꦮꦶꦣꦺꦪ꧀ꦪꦨꦴꦮꦁ ꦥꦫꦶꦲꦴꦤꦶ ꦲꦺꦠꦸꦁ;