ꦢꦸꦠꦶꦪꦥꦫꦶꦕ꧀ꦖꦺꦢ

ꦩꦲꦴꦱꦩ꧀ꦩꦠꦮꦁꦱ

꧑. ꦩꦲꦴꦱꦩ꧀ꦩꦠ ꦫꦴꦗꦱ꧀ꦱ, ꦮꦁꦱꦗꦺꦴ ꦲꦶ ꦩꦲꦴꦩꦸꦤꦶ;

ꦏꦥ꧀ꦥꦱ꧀ꦱꦴꦢꦶꦩ꧀ꦲꦶ ꦫꦴꦗꦴ’ꦱꦶ, ꦩꦲꦴꦱꦩ꧀ꦩꦠꦤꦴꦩꦏꦺꦴ.

꧒. ꦫꦺꦴꦗꦺꦴ ꦕ ꦮꦫꦫꦺꦴꦗꦺꦴ ꦕ, ꦠꦡꦴ ꦏꦭ꧀ꦪꦴꦟꦏꦴ ꦢꦸꦮꦺ;

ꦈꦥꦺꦴꦱꦡꦺꦴ ꦕ ꦩꦤ꧀ꦣꦴꦠꦴ, ꦕꦫꦏꦺꦴ’ꦥꦕꦫꦴ ꦢꦸꦮꦺ.

꧓. ꦕꦺꦠꦷꦪꦺꦴ ꦩꦸꦕꦭꦺꦴ ꦕꦺꦮ, ꦩꦲꦴꦩꦹꦕꦭꦤꦴꦩꦏꦺꦴ;

ꦩꦸꦕꦭꦶꦤ꧀ꦢꦺꦴ ꦱꦴꦒꦫꦺꦴ ꦕꦺꦮ, ꦱꦴꦒꦫꦺꦴ ꦢꦺꦮ ꦮꦤꦴꦩꦏꦺꦴ.

꧔. ꦨꦫꦠꦺꦴ ꦨꦒꦷꦫꦡꦺꦴ ꦕꦺꦮ, ꦫꦸꦕꦶ ꦕ ꦱꦸꦫꦸꦕꦶ ꦥꦶꦕ;

ꦥꦠꦴꦥꦺꦴ ꦩꦲꦴꦥꦠꦴꦥꦺꦴ, ꦥꦤꦴꦢꦴ ꦕ ꦠꦡꦴ ꦢꦸꦮꦺ.

꧕. ꦱꦸꦢꦱ꧀ꦱꦤꦺꦴ ꦕ ꦤꦺꦫꦸ ꦕ, ꦠꦡꦴ ꦌꦮ ꦢꦸꦮꦺ ꦢꦸꦮꦺ;

ꦥꦕ꧀ꦖꦶꦩꦴ ꦕꦴ’ꦠꦶ ꦫꦴꦗꦴꦤꦺꦴ, ꦠꦱ꧀ꦱ ꦥꦸꦠ꧀ꦠꦥꦥꦸꦠ꧀ꦠꦏꦴ.

꧖. ꦄꦱꦁꦑꦶꦪꦴꦪꦸꦏꦴ ꦌꦠꦺ, ꦄꦛ꧀ꦜꦮꦷꦱꦠꦶ ꦨꦹꦩꦶꦥꦴ;

ꦏꦸꦱꦴꦮꦠꦶꦁ ꦫꦴꦗꦒꦲꦁ, ꦩꦶꦡꦶꦭꦚ꧀ꦕꦴꦥꦶ ꦄꦴꦮꦱꦸꦁ.

꧗. ꦠꦠꦺꦴ ꦱꦠꦚ꧀ꦕ ꦫꦴꦗꦤꦺꦴ, ꦖꦥ꧀ꦥꦚ꧀ꦚꦴꦱ ꦕ ꦱꦛ꧀ꦜꦶ ꦕ;

ꦕꦠꦸꦫꦴꦱꦷꦠꦶ ꦱꦲꦱ꧀ꦱꦴꦤꦶ, ꦖꦠ꧀ꦠꦶꦁꦱꦴ ꦕ ꦠꦠꦺꦴ ꦥꦫꦺ.

꧘. ꦢ꧀ꦮꦠ꧀ꦠꦶꦁꦱ ꦄꦛ꧀ꦜꦮꦷꦱꦴ ꦕ, ꦢ꧀ꦮꦴꦮꦷꦱꦠꦶ ꦠꦠꦺꦴ ꦥꦫꦺ;

ꦄꦛ꧀ꦜꦴꦫꦱ ꦱꦠ꧀ꦠꦫꦱ, ꦥꦚ꧀ꦕꦢꦱ ꦕꦠꦸꦢ꧀ꦢꦱ.

꧙. ꦤꦮ ꦱꦠ꧀ꦠ ꦢ꧀ꦮꦴꦢꦱ ꦕ, ꦥꦚ꧀ꦕꦮꦷꦱ ꦠꦠꦺꦴꦥꦫꦺ;

ꦥꦚ꧀ꦕꦮꦷꦱꦁ ꦢ꧀ꦮꦴꦢꦱ ꦕ, ꦢ꧀ꦮꦴꦢꦱꦚ꧀ꦕ ꦤꦮꦴ ꦥꦶꦕ.

꧑꧐. ꦕꦠꦸꦫꦴꦱꦷꦠꦶꦱꦲꦱ꧀ꦱꦴꦤꦶ, ꦩꦑꦴꦢꦺꦮꦴꦢꦶꦏꦴꦥꦶ ꦕ;

ꦕꦠꦸꦫꦴꦱꦷꦠꦶꦱꦲꦱ꧀ꦱꦴꦤꦶ, ꦏꦭ꦳ꦴꦫꦴꦗꦤꦏꦴꦢꦪꦺꦴ.

꧑꧑. ꦱꦺꦴꦭ꦳ꦱ ꦪꦴꦮ ꦎꦏ꧀ꦏꦴꦠꦁ, ꦥꦥꦸꦠ꧀ꦠꦴ ꦫꦴꦱꦶꦠꦺꦴ ꦆꦩꦺ;

ꦮꦶꦱꦸꦁ ꦮꦶꦱꦸꦁ ꦥꦸꦫꦺ ꦫꦗ꧀ꦗꦁ, ꦏꦩꦠꦺꦴ ꦄꦤꦸꦱꦴꦱꦶꦱꦸꦁ.

꧑꧒. ꦎꦏ꧀ꦏꦴꦩꦸꦑꦺꦴ ꦗꦺꦛ꧀ꦜꦥꦸꦠ꧀ꦠꦺꦴ, ꦎꦏ꧀ꦏꦴꦏꦱꦴ’ꦱꦶ ꦨꦹꦥꦠꦶ;

ꦤꦶꦥꦸꦫꦺꦴ ꦕꦤ꧀ꦢꦷꦩꦴ ꦕꦤ꧀ꦢꦁ-ꦩꦸꦑꦺꦴ ꦕ ꦱꦶꦮꦶ ꦱꦚ꧀ꦗꦪꦺꦴ.

꧑꧓. ꦮꦺꦱ꧀ꦱꦤ꧀ꦠꦫ ꦩꦲꦴꦫꦴꦗꦴ, ꦗꦴꦭꦷ ꦕ ꦱꦷꦲꦮꦴꦲꦤꦺꦴ;

ꦱꦷꦲꦱ꧀ꦱꦫꦺꦴ ꦕ ꦆꦕ꧀ꦕꦺꦠꦺ, ꦠꦱ꧀ꦱ ꦥꦸꦠ꧀ꦠ ꦥ ꦥꦸꦠ꧀ꦠꦏꦴ.

꧑꧔. ꦢ꧀ꦮꦺꦄꦱꦷꦠꦶ ꦱꦲꦱ꧀ꦱꦴꦤꦶ, ꦱꦷꦲꦱ꧀ꦱꦫꦱ꧀ꦱ ꦫꦴꦗꦶꦤꦺꦴ;

ꦥꦸꦠ꧀ꦠ ꦥ ꦥꦸꦠ꧀ꦠ ꦫꦴꦗꦴꦤꦺꦴ, ꦗꦪꦱꦺꦤꦺꦴ ꦠꦢꦤ꧀ꦠꦶꦩꦺꦴ.

꧑꧕. ꦌꦠꦺ ꦏꦥꦶꦭꦮꦠ꧀ꦡꦸꦱ꧀ꦩꦶꦁ, ꦱꦏ꧀ꦪꦫꦴꦗꦴꦠꦶ ꦮꦶꦱ꧀ꦱꦸꦠꦴ;

ꦱꦷꦲꦲꦤꦸ ꦩꦲꦴꦫꦴꦗꦴ, ꦗꦪꦱꦺꦤꦱ꧀ꦱ ꦄꦠ꧀ꦫꦗꦺꦴ.

꧑꧖. ꦗꦪꦱꦺꦤꦱ꧀ꦱ ꦣꦷꦠꦴ ꦕ, ꦤꦴꦩꦺꦤꦴ’ꦱꦶ ꦪꦱꦺꦴꦣꦫꦴ;

ꦢꦺꦮꦢꦪꦺ ꦢꦺꦮꦢꦲ-ꦱꦏ꧀ꦏꦺꦴ ꦤꦴꦩꦴ’ꦱꦶ ꦨꦹꦥꦠꦶ.

꧑꧗. ꦄꦚ꧀ꦗꦤꦺꦴ ꦕꦴ’ꦡ ꦏꦕ꧀ꦕꦴꦤꦴ, ꦄꦴꦱꦸꦁ ꦠꦱ꧀ꦱ ꦱꦸꦠꦴ ꦢꦸꦮꦺ;

ꦩꦲꦺꦱꦷꦕꦴ’ꦱꦶ ꦏꦕ꧀ꦕꦴꦤꦴ, ꦫꦚ꧀ꦚꦺꦴ ꦱꦷꦲꦲꦤꦸꦱ꧀ꦱ ꦱꦴ.

꧑꧘. ꦄꦴꦱꦷ ꦄꦚ꧀ꦗꦤꦱꦏ꧀ꦏꦱ꧀ꦱ, ꦩꦲꦺꦱꦷ ꦱꦴ ꦪꦱꦺꦴꦣꦫꦴ;

ꦄꦚ꧀ꦗꦤꦱ꧀ꦱ ꦢꦸꦮꦺ ꦣꦷꦠꦴ, ꦩꦴꦪꦴ ꦕꦴꦡ ꦥꦗꦴꦥꦠꦶ.

꧑꧙. ꦥꦸꦠ꧀ꦠꦴ ꦢꦸꦮꦺ ꦢꦟ꧀ꦝꦥꦴꦟꦷ, ꦱꦸꦥ꧀ꦥꦧꦸꦢ꧀ꦣꦺꦴ ꦕ ꦱꦴꦏꦶꦪꦺꦴ;

ꦥꦚ꧀ꦕ ꦥꦸꦠ꧀ꦠꦴ ꦢꦸꦮꦺ ꦣꦷꦠꦴ, ꦄꦴꦱꦸꦁ ꦱꦷꦲꦲꦤꦸꦱ꧀ꦱꦫꦺ.

꧒꧐. ꦱꦸꦢ꧀ꦣꦺꦴꦢꦤꦺꦴ ꦣꦺꦴꦠꦺꦴꦢꦤꦺꦴ, ꦱꦏ꧀ꦏꦱꦸꦏ꧀ꦏꦩꦶꦠꦺꦴꦢꦤꦺꦴ;

ꦄꦩꦶꦠꦴ ꦥꦩꦶꦠꦴꦕꦴ’ꦠꦶ, ꦆꦩꦺ ꦥꦚ꧀ꦕ ꦆꦩꦴ ꦢꦸꦮꦺ.

꧒꧑. ꦱꦸꦥ꧀ꦥꦧꦸꦢ꧀ꦣꦱ꧀ꦱ ꦱꦏ꧀ꦏꦱ꧀ꦱ, ꦩꦲꦺꦱꦷ ꦄꦩꦶꦠꦴ ꦄꦲꦸ;

ꦠꦱ꧀ꦱꦴ’ꦱꦸꦁ ꦨꦢ꧀ꦢꦏꦕ꧀ꦕꦴꦤꦴ, ꦢꦺꦮꦢꦠ꧀ꦠꦺꦴ ꦢꦸꦮꦺ ꦱꦸꦠꦴ.

꧒꧒. ꦩꦴꦪꦴ ꦩꦲꦴꦥꦗꦴꦥꦠꦶ ꦕꦺꦮ, ꦱꦸꦢ꧀ꦣꦺꦴꦢꦤ ꦩꦲꦺꦱꦷꦪꦺꦴ;

ꦱꦸꦢ꧀ꦣꦺꦴꦢꦤ ꦩꦲꦴꦫꦚ꧀ꦚꦺꦴ, ꦥꦸꦠ꧀ꦠꦺꦴ ꦩꦴꦪꦴꦪ ꦱꦺꦴ ꦗꦶꦤꦺꦴ.

꧒꧓. ꦩꦲꦴ ꦱꦩ꧀ꦩꦠꦮꦁꦱꦩ꧀ꦲꦶ, ꦄꦱꦩ꧀ꦨꦶꦤ꧀ꦤꦺ ꦩꦲꦴꦩꦸꦤꦶ;

ꦌꦮꦁ ꦥꦮꦠ꧀ꦠꦺ ꦱꦚ꧀ꦗꦴꦠꦺꦴ, ꦱꦧ꧀ꦧ ꦑꦠ꧀ꦡꦶꦪ ꦩꦸꦢ꧀ꦣꦤꦶ.

꧒꧔. ꦱꦶꦢ꧀ꦣꦠ꧀ꦡꦱ꧀ꦱ ꦏꦸꦩꦴꦫꦱ꧀ꦱ, ꦧꦺꦴꦣꦶꦱꦠ꧀ꦠꦱ꧀ꦱ ꦱꦴ ꦄꦲꦸ;

ꦩꦲꦺꦱꦷ ꦨꦢ꧀ꦢꦏꦕ꧀ꦕꦴꦤꦴ, ꦥꦸꦠ꧀ꦠꦺꦴ ꦠꦱ꧀ꦱꦴ’ꦱꦶ ꦫꦴꦲꦸꦭꦺꦴ.

꧒꧕. ꦧꦶꦩ꧀ꦧꦶꦱꦴꦫꦺꦴ ꦕ ꦱꦶꦢ꧀ꦣꦠ꧀ꦡ-ꦏꦸꦩꦴꦫꦺꦴ ꦕ ꦱꦲꦴꦪꦏꦴ;

ꦈꦨꦶꦤ꧀ꦤꦁ ꦥꦶꦠꦫꦺꦴ ꦕꦴꦥꦶ, ꦱꦲꦴꦪꦴꦌꦮ ꦠꦺ ꦄꦲꦸꦁ.

꧒꧖. ꦧꦺꦴꦣꦶꦱꦠ꧀ꦠꦺꦴ ꦧꦶꦩ꧀ꦧꦶꦱꦴꦫꦴ, ꦥꦚ꧀ꦕꦮꦱ꧀ꦱꦴꦣꦶꦏꦺꦴ ꦄꦲꦸ;

ꦌꦏꦹꦤꦠꦶꦁꦱꦺꦴ ꦮꦪꦱꦴ, ꦧꦺꦴꦣꦶꦱꦠ꧀ꦠꦺꦴ’ꦨꦶꦤꦶꦏ꧀ꦑꦩꦶ.

꧒꧗. ꦥꦢꦲꦶꦠ꧀ꦮꦴꦤ ꦖꦧ꧀ꦧꦱ꧀ꦱꦁ, ꦧꦺꦴꦣꦶꦁ ꦥꦠ꧀ꦮꦴ ꦏꦩꦺꦤ ꦕ;

ꦥꦚ꧀ꦕꦠꦶꦁꦱꦺꦴ ꦡ ꦮꦪꦱꦴ, ꦧꦶꦩ꧀ꦧꦶꦱꦴꦫꦩꦸꦥꦴꦒꦩꦶ.

꧒꧘. ꦧꦶꦩ꧀ꦧꦶꦱꦴꦫꦺꦴ ꦥꦤ꧀ꦤꦫꦱ-ꦮꦱ꧀ꦱꦺꦴ’ꦡ ꦥꦷꦠꦫꦁ ꦱꦪꦁ;

ꦄꦨꦶꦱꦶꦠ꧀ꦠꦺꦴ ꦩꦲꦴꦥꦚ꧀ꦚꦺꦴ, ꦥꦠ꧀ꦠꦺꦴ ꦫꦗ꧀ꦗꦱ꧀ꦱ ꦠꦱ꧀ꦱ ꦠꦸ.

꧒꧙. ꦥꦠ꧀ꦠꦺ ꦱꦺꦴꦭ꦳ꦱꦩꦺ ꦮꦱ꧀ꦱꦺ, ꦱꦠ꧀ꦡꦴ ꦣꦩ꧀ꦩꦩꦢꦺꦱꦪꦶ;

ꦢ꧀ꦮꦴꦥꦚ꧀ꦚꦴꦱꦺꦮ ꦮꦱ꧀ꦱꦴꦤꦶ, ꦫꦗ꧀ꦗꦁ ꦏꦴꦫꦺꦱꦶ ꦱꦺꦴ ꦥꦤ.

꧓꧐. ꦫꦗ꧀ꦗꦺ ꦱꦩꦴ ꦥꦤ꧀ꦤꦫꦱ, ꦥꦸꦧ꧀ꦧꦺ ꦗꦶꦤꦱꦩꦴꦒꦩꦴ;

ꦱꦠ꧀ꦠꦠꦶꦁꦱ ꦱꦩꦴ ꦠꦱ꧀ꦱ, ꦣꦫꦩꦴꦤꦺ ꦠꦡꦴꦒꦠꦺ.

꧓꧑. ꦧꦶꦩ꧀ꦧꦶꦱꦴꦫꦱꦸꦠꦺꦴ’ꦗꦴꦠ-ꦱꦠ꧀ꦠꦸꦠꦁ ꦓꦴꦠꦷꦪꦴ’ꦩꦠꦶ;

ꦫꦗ꧀ꦗꦁ ꦢ꧀ꦮꦠ꧀ꦠꦶꦁꦱꦮꦱ꧀ꦱꦴꦤꦶ, ꦩꦲꦴꦩꦶꦠ꧀ꦠꦢ꧀ꦢꦸꦏꦴꦫꦪꦷ.

꧓꧒. ꦄꦗꦴꦠꦱꦠ꧀ꦠꦸꦤꦺꦴ ꦮꦱ꧀ꦱꦺ, ꦄꦛ꧀ꦜꦩꦺ ꦩꦸꦤꦶ ꦤꦶꦧ꧀ꦧꦸꦠꦺꦴ;

ꦥꦕ꧀ꦖꦴ ꦱꦺꦴ ꦏꦴꦫꦪꦷ ꦫꦗ꧀ꦗꦁ, ꦮꦱ꧀ꦱꦴꦤꦶ ꦕꦠꦸꦮꦷꦱꦠꦶ.

꧓꧓. ꦠꦡꦴꦒꦠꦺꦴ ꦱꦏꦭꦭꦺꦴꦏꦒ꧀ꦒꦠꦁ ꦒꦠꦺꦴ;

ꦄꦤꦶꦕ꧀ꦕꦠꦴꦮ ꦱꦩꦮꦱꦺꦴ ꦈꦥꦴꦒꦠꦺꦴ;

ꦆꦠꦶ’ꦣ ꦪꦺꦴ ꦨꦪꦗꦤꦤꦶꦁ ꦄꦤꦶꦕ꧀ꦕꦠꦁ,

ꦄꦮꦺꦏ꧀ꦑꦠꦺ ꦱ ꦨꦮꦠꦶ ꦢꦸꦏ꧀ꦑꦥꦴꦫꦒꦹꦠꦶ.

ꦱꦸꦗꦤꦥ꧀ꦥꦱꦴꦢꦱꦁꦮꦺꦒꦠ꧀ꦡꦴꦪ ꦏꦠꦺ ꦩꦲꦴꦮꦁꦱꦺ

ꦩꦲꦴꦱꦩ꧀ꦩꦠꦮꦁꦱꦺꦴ ꦤꦴꦩ

ꦢꦸꦠꦶꦪꦺꦴ ꦥꦫꦶꦕ꧀ꦖꦺꦢꦺꦴ.