ꦤꦩꦺꦴ ꦠꦱ꧀ꦱ ꦨꦒꦮꦠꦺꦴ ꦄꦫꦲꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ

ꦏꦮꦶꦢꦥ꧀ꦥꦟꦤꦷꦠꦶ

ꦩꦴꦠꦶꦏꦴ

ꦪꦡꦴꦣꦩ꧀ꦩꦶꦏꦫꦴꦗꦹꦤꦁ, ꦄꦩꦕ꧀ꦕꦴ ꦕ ꦥꦸꦫꦺꦴꦲꦶꦠꦴ;

ꦤꦷꦠꦶꦱꦠ꧀ꦡꦁ ꦱꦸꦤꦶꦱ꧀ꦱꦴꦪ, ꦤꦶꦕ꧀ꦖꦪꦤ꧀ꦠꦶ ꦮꦶꦤꦶꦕ꧀ꦖꦪꦁ.

ꦄꦔ꧀ꦒꦴꦤꦶ ꦮꦺꦢꦴ ꦕꦠ꧀ꦠꦴꦫꦺꦴ, ꦩꦷꦩꦁꦱꦴꦤ꧀ꦪꦴꦪ ꦮꦶꦠ꧀ꦡꦴꦫꦺꦴ;

ꦣꦩ꧀ꦩꦱꦠ꧀ꦡꦁ ꦥꦸꦫꦴꦟꦚ꧀ꦕ, ꦮꦶꦗ꧀ꦗꦴ ꦲꦺꦠꦴ ꦕꦠꦸꦢ꧀ꦢꦱ.

ꦄꦴꦪꦸꦧ꧀ꦧꦺꦢꦺꦴ ꦩꦤꦸꦧ꧀ꦧꦺꦢꦺꦴ, ꦒꦤ꧀ꦣꦧ꧀ꦧꦺꦴ ꦕꦺꦠꦶ ꦠꦺ ꦠꦪꦺꦴ;

ꦄꦠ꧀ꦡꦱꦠ꧀ꦡꦁ ꦕꦠꦸꦠ꧀ꦡꦚ꧀ꦕ, ꦮꦶꦗ꧀ꦗꦴꦲ꧀ꦪꦴꦛ꧀ꦜꦫꦱ ꦩꦠꦴ.

ꦱꦸꦠꦶꦱꦩꦸꦠꦶꦱꦔ꧀ꦑ꧀ꦪꦴ ꦕ, ꦫꦺꦴꦒꦴꦤꦷꦠꦶ ꦮꦶꦱꦺꦱꦏꦴ;

ꦒꦤ꧀ꦣꦧ꧀ꦧꦴ ꦒꦟꦶꦏꦴ ꦕꦺꦮ, ꦣꦤꦸꦧ꧀ꦧꦺꦢꦴ ꦕ ꦥꦹꦫꦟꦴ.

ꦠꦶꦏꦶꦕ꧀ꦖꦴ ꦆꦠꦶꦲꦴꦱꦺꦴ ꦕ, ꦗꦺꦴꦠꦶꦩꦴꦪꦴ ꦕ ꦖꦤ꧀ꦢꦠꦶ;

ꦏꦺꦠꦸꦩꦤ꧀ꦠꦴ ꦕ ꦱꦢ꧀ꦢꦴ ꦕ, ꦱꦶꦥ꧀ꦥꦴꦛ꧀ꦜꦴꦫꦱꦏꦴ ꦆꦩꦺ.

ꦢꦩꦺꦴ ꦢꦟ꧀ꦝꦺꦴ ꦆꦠꦶꦑ꧀ꦪꦴꦠꦺꦴ, ꦠꦛ꧀ꦜꦴꦢꦟ꧀ꦝꦺꦴ ꦩꦲꦷꦥꦠꦶ;

ꦠꦱ꧀ꦱ ꦤꦷꦠꦶ ꦢꦟ꧀ꦝꦤꦷꦠꦶ, ꦤꦪꦤꦴꦤꦷꦠꦶ ꦮꦸꦕ꧀ꦕꦠꦶ.

ꦢꦟ꧀ꦝꦺꦤ ꦤꦷꦪꦠꦺ ꦕꦺꦢꦁ, ꦢꦟ꧀ꦝꦁ ꦤꦪꦠꦶ ꦮꦴ ꦥꦸꦤ;

ꦢꦟ꧀ꦝꦤꦷꦠꦶ ꦆꦠꦶꦑ꧀ꦪꦴꦠꦺꦴ, ꦠꦶꦭꦺꦴꦏꦴ ꦤꦠꦶ ꦮꦠ꧀ꦠꦠꦺ.

ꦤꦴꦤꦴꦱꦠ꧀ꦡꦺꦴꦢ꧀ꦣꦠꦁ ꦮꦏ꧀ꦑꦺ, ꦫꦴꦗꦤꦷꦠꦶ ꦱꦩꦸꦕ꧀ꦕꦪꦁ;

ꦱꦧ꧀ꦧꦧꦷꦗꦩꦶꦢꦸꦁ ꦱꦠ꧀ꦡꦁ, ꦕꦴꦟꦏ꧀ꦪ ꦱꦴꦫꦱꦔ꧀ꦒꦲꦁ.

ꦩꦹꦭꦱꦸꦠ꧀ꦠꦁ ꦥꦮꦏ꧀ꦑꦴꦩꦶ, ꦕꦴꦟꦏ꧀ꦪꦺꦤ ꦪꦡꦺꦴꦢꦶꦠꦁ;

ꦪꦱ꧀ꦱꦁ ꦮꦶꦚ꧀ꦚꦴꦠꦩꦠ꧀ꦠꦺꦤ, ꦩꦹꦭ꦳꧀ꦲꦺꦴ ꦨꦮꦠꦶ ꦥꦟ꧀ꦝꦶꦠꦺꦴ.

ꦩꦶꦠ꧀ꦠꦭꦴꦨꦺꦴ ꦱꦸꦲꦢꦨꦺꦢꦺꦴ, ꦮꦶꦒ꧀ꦒꦲꦺꦴ ꦱꦤ꧀ꦣꦶꦫꦺꦮ ꦕ;

ꦥꦚ꧀ꦕꦠꦤ꧀ꦢ꧀ꦫꦴ ꦠꦡꦴꦚ꧀ꦚꦱ꧀ꦩꦴ, ꦒꦤ꧀ꦡꦴ ꦏꦱ꧀ꦱꦶꦪꦭꦶꦑ꧀ꦪꦠꦺ.

ꦭꦺꦴꦏꦤꦷꦠꦶꦩ꧀ꦲꦴ –

(꧑) ꦥꦟ꧀ꦝꦶꦠꦏꦟ꧀ꦝ. (꧒) ꦱꦸꦗꦤꦏꦟ꧀ꦝ. (꧓) ꦧꦴꦭꦢꦸꦗ꧀ꦗꦤ ꦏꦟ꧀ꦝ. (꧔) ꦩꦶꦠ꧀ꦠꦏꦟ꧀ꦝ. (꧕) ꦆꦠ꧀ꦡꦶꦏꦟ꧀ꦝ. (꧖) ꦫꦴꦗꦏꦟ꧀ꦝ. (꧗) ꦥꦏꦶꦟ꧀ꦟꦏ ꦏꦟ꧀ꦝ-

ꦭꦺꦴꦏꦤꦷꦠꦶ –

ꦥꦟ꧀ꦝꦶꦠꦺꦴ ꦱꦸꦗꦤꦺꦴ ꦏꦟ꧀ꦝꦺꦴ, ꦢꦸꦗ꧀ꦗꦤꦺꦴ ꦩꦶꦠ꧀ꦠꦆꦠ꧀ꦡꦷ ꦕ;

ꦫꦴꦗꦥꦏꦶꦟ꧀ꦟꦏꦺꦴ ꦕꦴꦠꦶ, ꦱꦠ꧀ꦠꦏꦟ꧀ꦝꦺ ꦮꦶꦨꦹꦱꦶꦤꦺꦴ.

ꦕꦏ꧀ꦏꦶꦤ꧀ꦢꦴꦨꦶꦱꦶꦫꦶꦤꦴꦪꦁ, ꦱꦺꦴꦣꦶꦠꦺꦴ ꦏꦴꦱꦶꦏꦺ ꦱꦴꦏꦺ;

ꦖꦤꦺꦴꦠ꧀ꦪꦁ ꦢꦸꦠꦶꦪꦴꦱꦭ꦳꧀ꦲꦺ, ꦏꦴꦭ꦳ꦱꦠ꧀ꦠꦩ ꦄꦴꦢꦶꦲꦺ.

ꦭꦺꦴꦏꦤꦷꦠꦶꦁ ꦥꦮꦏ꧀ꦑꦴꦩꦶ, ꦤꦴꦤꦴꦱꦠ꧀ꦡꦱꦩꦸꦢ꧀ꦣꦛꦁ;

ꦩꦴꦒꦣꦺꦤꦺꦮ ꦱꦔ꧀ꦑꦺꦥꦁ, ꦮꦤ꧀ꦢꦶꦠ꧀ꦮꦴ ꦫꦠꦤꦠ꧀ꦠꦪꦁ.

ꦤꦷꦠꦶ ꦭꦺꦴꦏꦺ ꦥꦸꦫꦶꦱꦱ꧀ꦱ ꦱꦴꦫꦺꦴ,

ꦩꦴꦠꦴ ꦥꦶꦠꦴ ꦄꦴꦕꦫꦶꦪꦺꦴ ꦩꦶꦠ꧀ꦠꦺꦴ;

ꦠꦱ꧀ꦩꦴ ꦲꦶ ꦤꦷꦠꦶꦁ ꦥꦸꦫꦶꦱꦺꦴ ꦮꦶꦗꦚ꧀ꦚꦴ,

ꦚꦴꦟꦷꦩꦲꦴ ꦲꦺꦴꦠꦶ ꦧꦲꦸꦱ꧀ꦱꦸꦠꦺꦴ.

ꦩꦲꦴꦫꦲꦤꦷꦠꦶ –

(꧑) ꦥꦟ꧀ꦝꦶꦠꦏꦡꦴ. (꧒) ꦱꦩ꧀ꦨꦺꦢꦏꦡꦴ. (꧓) ꦩꦶꦠ꧀ꦠꦏꦡꦴ. (꧔) ꦤꦴꦪꦏ ꦏꦡꦴ. (꧕) ꦆꦠ꧀ꦡꦶꦏꦡꦴ

ꦩꦲꦴꦫꦲ ꦫꦲꦁꦱꦏ꧀ꦪ-ꦩꦸꦤꦶꦁ ꦤꦷꦮꦫꦟꦴ ꦠꦟ꧀ꦲꦴ;

ꦩꦸꦠ꧀ꦠꦁ ꦩꦸꦠ꧀ꦠꦁ ꦱꦸꦢꦱ꧀ꦱꦤꦁ, ꦮꦤ꧀ꦢꦺ ꦧꦺꦴꦣꦶꦮꦫꦁ ꦮꦫꦁ.

ꦤꦷꦠꦶꦣ ꦗꦤ꧀ꦠꦹꦤꦁ ꦱꦴꦫꦺꦴ, ꦩꦶꦠ꧀ꦠꦴꦕꦫꦶꦪꦴ ꦕ ꦥꦶꦠꦫꦺꦴ;

ꦤꦷꦠꦶꦩꦴ ꦱꦸꦧꦸꦢ꧀ꦣꦶꦧ꧀ꦪꦠ꧀ꦠꦺꦴ, ꦱꦸꦠꦮꦴ ꦄꦠ꧀ꦡꦢꦱ꧀ꦱꦶꦩꦴ.

ꦣꦩ꧀ꦩꦤꦷꦠꦶ –

(꧑) ꦄꦴꦕꦫꦶꦪꦏꦡꦴ (꧒) ꦱꦶꦥ꧀ꦥꦏꦡꦴ (꧓) ꦥꦚ꧀ꦚꦴꦏꦡꦴ (꧔) ꦱꦸꦠꦏꦡꦴ (꧕) ꦏꦡꦴꦤꦏꦡꦴ (꧖) ꦣꦤꦏꦡꦴ (꧗) ꦢꦺꦱꦏꦡꦴ (꧘) ꦤꦶꦱ꧀ꦱꦪꦏꦡꦴ (꧙) ꦩꦶꦠ꧀ꦠꦏꦡꦴ (꧑꧐) ꦢꦸꦗ꧀ꦗꦤꦏꦡꦴ (꧑꧑) ꦱꦸꦗꦤꦏꦡꦴ (꧑꧒) ꦧꦭꦏꦡꦴ (꧑꧓) ꦆꦠ꧀ꦡꦶꦏꦡꦴ (꧑꧔) ꦪꦸꦠ꧀ꦠꦏꦡꦴ (꧑꧕) ꦢꦴꦱꦏꦡꦴ (꧑꧖) ꦓꦫꦴꦮꦴꦱꦏꦡꦴ (꧑꧗) ꦏꦴꦠꦧ꧀ꦧꦏꦡꦴ (꧑꧘) ꦄꦏꦴꦠꦧ꧀ꦧꦏꦡꦴ (꧑꧙) ꦚꦴꦠꦧ꧀ꦧꦏꦡꦴ (꧒꧐) ꦄꦭꦔ꧀ꦏꦴꦫꦏꦡꦴ (꧒꧑) ꦫꦴꦗꦣꦩ꧀ꦩꦏꦡꦴ (꧒꧒) ꦈꦥꦱꦺꦮꦏꦏꦡꦴ (꧒꧓) ꦢꦸꦏ꧀ꦑꦴꦢꦶꦩꦶꦱ꧀ꦱꦏꦏꦡꦴ (꧒꧔) ꦥꦏꦶꦟ꧀ꦟꦏꦏꦡꦴ

ꦕꦏ꧀ꦏꦴꦠꦶꦕꦏ꧀ꦏꦕꦏ꧀ꦏꦶꦤ꧀ꦢꦺꦴ, ꦢꦺꦮꦴꦠꦶꦢꦺꦮꦴꦢꦺꦮꦶꦤ꧀ꦢꦺꦴ,

ꦧ꧀ꦫꦲ꧀ꦩꦴꦠꦶ ꦧ꧀ꦫꦲ꧀ꦩꦧ꧀ꦫꦲ꧀ꦩꦶꦤ꧀ꦢꦺꦴ, ꦗꦶꦤꦺꦴ ꦥꦹꦫꦺꦠꦸ ꦩꦺ ꦨꦴꦮꦁ.

ꦕꦶꦫꦁ ꦠꦶꦛ꧀ꦜꦠꦸ ꦭꦺꦴꦏꦩ꧀ꦲꦶ, ꦣꦁꦱꦏꦁ ꦱꦧ꧀ꦧꦥꦴꦟꦶꦤꦁ;

ꦩꦲꦴꦩꦺꦴꦲꦠꦩꦁ ꦗꦪꦁ, ꦗꦺꦴꦠꦤ꧀ꦠꦁ ꦗꦶꦤꦱꦴꦱꦤꦁ.

ꦮꦤ꧀ꦢꦶꦠ꧀ꦮꦴ ꦫꦠꦤꦁ ꦱꦺꦛ꧀ꦜꦁ, ꦤꦶꦱ꧀ꦱꦴꦪ ꦥꦸꦧ꧀ꦧꦏꦺ ꦒꦫꦸ;

ꦤꦷꦠꦶꦣꦩ꧀ꦩꦁ ꦥꦮꦏ꧀ꦑꦴꦩꦶ, ꦱꦧ꧀ꦧꦭꦺꦴꦏ ꦱꦸꦑꦴꦮꦲꦁ.

ꦄꦴꦕꦫꦶꦪꦺꦴ ꦕ ꦱꦶꦥ꧀ꦥꦚ꧀ꦕ, ꦥꦚ꧀ꦚꦴꦱꦸꦠꦏꦡꦴꦣꦤꦁ;

ꦢꦺꦱꦚ꧀ꦕ ꦤꦶꦱ꧀ꦱꦪꦺꦴ ꦩꦶꦠ꧀ꦠꦁ, ꦢꦸꦗ꧀ꦗꦤꦺꦴ ꦱꦸꦗꦤꦺꦴ ꦧꦭꦁ.

ꦆꦠ꧀ꦡꦷ ꦥꦸꦠ꧀ꦠꦺꦴ ꦕ ꦢꦴꦱꦺꦴ ꦕ, ꦓꦫꦴꦮꦴꦱꦺꦴ ꦏꦠꦴꦏꦠꦺꦴ;

ꦚꦴꦠꦧ꧀ꦧꦺꦴ ꦕ ꦄꦭꦔ꧀ꦏꦴꦫꦺꦴ, ꦫꦴꦗꦣꦩ꧀ꦩꦴ ꦥꦱꦺꦮꦏꦺꦴ;

ꦢꦸꦏ꧀ꦑꦴꦢꦶꦩꦶꦱ꧀ꦱꦏꦺꦴ ꦕꦺꦮ, ꦥꦏꦶꦟ꧀ꦟꦏꦴꦠꦶ ꦩꦴꦠꦶꦏꦴ.

ꦫꦴꦗꦤꦷꦠꦶ –

ꦱꦷꦲꦴ ꦌꦏꦁ ꦧꦏꦴ ꦌꦏꦁ, ꦱꦶꦏ꧀ꦑꦺ ꦕꦠ꧀ꦠꦴꦫꦶ ꦏꦸꦏ꧀ꦏꦸꦛꦴ;

ꦥꦚ꧀ꦕ ꦏꦴꦏꦴ ꦫꦴꦗꦴ ꦤꦴꦩ, ꦖ ꦱꦸꦤꦏ꧀ꦑꦴ ꦠꦷꦟꦶ ꦒꦢ꧀ꦫꦨꦴ.

꧑. ꦩꦲꦴꦏꦩ꧀ꦩꦁ ꦑꦸꦢ꧀ꦢꦏꦁ ꦮꦴ, ꦪꦁ ꦏꦩ꧀ꦩꦁ ꦏꦴꦠꦸꦩꦶꦕ꧀ꦖꦠꦶ;

ꦱꦧ꧀ꦧꦴꦫꦩ꧀ꦨꦺꦤ ꦏꦴꦠꦧ꧀ꦧꦁ, ꦱꦷꦲꦴ ꦌꦏꦁ ꦠꦢꦴ ꦨꦮꦺ.

꧒. ꦆꦤ꧀ꦢ꧀ꦫꦶꦪꦴꦤꦶ ꦱꦸꦱꦁꦪꦩ, ꦧꦏꦺꦴꦮ ꦥꦟ꧀ꦝꦶꦠꦺꦴ ꦨꦮꦺ;

ꦢꦺꦱꦏ ꦭꦺꦴꦩꦥꦤ꧀ꦤꦴꦤꦶ, ꦱꦧ꧀ꦧꦏꦩ꧀ꦩꦴꦤꦶ ꦱꦴꦣꦪꦺ.

꧓. ꦥꦸꦧ꧀ꦧꦛ꧀ꦜꦴꦤꦚ꧀ꦕ ꦪꦸꦢ꧀ꦣꦚ꧀ꦕ, ꦱꦁꦮꦶꦨꦴꦒꦚ꧀ꦕ ꦧꦤ꧀ꦣꦸ ꦲꦶ;

ꦡꦶꦪꦴ ꦄꦏ꧀ꦏꦩ꧀ꦩ ꦨꦸꦠ꧀ꦠꦚ꧀ꦕ, ꦱꦶꦏ꧀ꦑꦺ ꦕꦠ꧀ꦠꦴꦫꦶ ꦏꦸꦏ꧀ꦏꦸꦛꦺꦴ.

꧔. ꦒꦸꦪ꧀ꦲꦺ ꦩꦺꦡꦸꦤꦁ ꦥꦺꦏ꧀ꦑꦶꦠ꧀ꦮꦴ, ꦨꦺꦴꦗꦤꦁ ꦚꦴꦠꦶꦱꦔ꧀ꦒꦲꦺꦴ;

ꦮꦶꦭꦺꦴꦏꦴ ꦥꦺꦏ꧀ꦑꦤꦴꦭꦱ꧀ꦪꦁ, ꦥꦚ꧀ꦕ ꦱꦶꦏ꧀ꦑꦺꦪ꧀ꦪ ꦮꦴꦪꦱꦴ.

꧕. ꦄꦤꦴꦭꦱ꧀ꦱꦁꦠꦶꦱꦮꦤ꧀ꦠꦴꦱꦺꦴ, ꦱꦸꦤꦶꦢ꧀ꦣꦴ ꦱꦸꦥ꧀ꦥꦧꦺꦴꦣꦤꦴ;

ꦢꦭ꦳꧀ꦲꦨꦠ꧀ꦠꦶ ꦕ ꦱꦹꦫꦚ꧀ꦕ, ꦖ ꦌꦠꦺꦱ꧀ꦮꦴꦤꦠꦺꦴ ꦒꦸꦟꦺꦴ.

꧖. ꦑꦶꦤ꧀ꦤꦺꦴꦮ ꦮꦲꦠꦺ ꦨꦴꦫꦁ, ꦱꦷꦠꦸꦟ꧀ꦲꦚ꧀ꦕ ꦤ ꦕꦶꦤ꧀ꦠꦪꦷ;

ꦱꦤ꧀ꦠꦸꦛ꧀ꦜꦺꦴ ꦕ ꦨꦮꦺ ꦤꦶꦕ꧀ꦕꦁ, ꦠꦷꦟꦶ ꦱꦶꦏ꧀ꦑꦺꦪ꧀ꦪ ꦒꦢ꧀ꦫꦨꦴ.

꧗. ꦮꦷꦱꦠꦶ ꦠꦴꦤꦶ ꦒꦸꦟꦴꦤꦶ, ꦕꦫꦺꦪ꧀ꦪ ꦆꦲ ꦥꦟ꧀ꦝꦶꦠꦺꦴ;

ꦮꦶꦗꦺꦪ꧀ꦪ ꦫꦶꦥꦹ ꦱꦧ꧀ꦧꦺꦥꦶ, ꦠꦺꦗꦱ꧀ꦱꦷ ꦱꦺꦴ ꦨꦮꦶꦱ꧀ꦱꦠꦶ.

(꧑) ꦥꦟ꧀ꦝꦶꦠꦏꦟ꧀ꦝ (꧒) ꦱꦸꦗꦤꦏꦟ꧀ꦝ (꧓) ꦧꦴꦭꦢꦸꦗ꧀ꦗꦤꦏꦟ꧀ꦝ (꧔) ꦩꦶꦠ꧀ꦠꦏꦟ꧀ꦝ (꧕) ꦫꦴꦗꦏꦟ꧀ꦝ (꧖) ꦤꦴꦪꦏꦏꦟ꧀ꦝ (꧗) ꦥꦸꦠ꧀ꦠꦏꦟ꧀ꦝ (꧘) ꦮꦺꦗ꧀ꦗꦴꦕꦫꦶꦪꦏꦟ꧀ꦝ (꧙) ꦢꦴꦱꦏꦏꦟ꧀ꦝ (꧑꧐) ꦆꦠ꧀ꦡꦶꦏꦟ꧀ꦝ (꧑꧑) ꦥꦏꦶꦟ꧀ꦟꦏꦏꦟ꧀ꦝ

ꦏꦮꦶꦢꦥ꧀ꦥꦟꦤꦷꦠꦶꦁꦪꦺꦴ, ꦮꦴꦕꦸꦒ꧀ꦒꦠꦁ ꦏꦫꦺꦴꦠꦶ ꦕꦺ;

ꦨꦸꦮꦤꦩꦗ꧀ꦙꦺ ꦌꦱꦺꦴ ꦲꦶ, ꦮꦶꦚ꧀ꦚꦹ ꦥꦟ꧀ꦝꦶꦠꦗꦴꦠꦶꦏꦺꦴ.

ꦏꦮꦶꦢꦥ꧀ꦥꦟꦤꦷꦠꦶ

ꦤꦩꦺꦴ ꦠꦱ꧀ꦱ ꦨꦒꦮꦠꦺꦴ ꦄꦫꦲꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ

ꦫꦠꦤꦠ꧀ꦠꦪꦥꦟꦴꦩ

꧑. ꦩꦲꦴꦏꦮꦶꦮꦫꦁ ꦧꦸꦢ꧀ꦣꦁ, ꦣꦩ꧀ꦩꦚ꧀ꦕ ꦠꦺꦤ ꦱꦺꦮꦶꦠꦁ;

ꦱꦔ꧀ꦓꦁ ꦤꦶꦫꦔ꧀ꦒꦟꦚ꧀ꦕꦴꦥꦶ, ꦮꦤ꧀ꦢꦴꦩꦶ ꦱꦶꦫꦱꦴ ꦢꦫꦁ.

꧒. ꦏꦫꦶꦱ꧀ꦱꦴꦩꦶ ꦱꦩꦴꦱꦺꦤ, ꦤꦴꦤꦴꦱꦠ꧀ꦡ ꦱꦩꦸꦢ꧀ꦣꦛꦁ;

ꦲꦶꦠꦴꦪ ꦏꦮꦶꦤꦁ ꦤꦷꦠꦶꦁ, ꦏꦮꦶꦢꦥ꧀ꦥꦟꦤꦴꦩꦏꦁ.

ꦥꦟ꧀ꦝꦶꦠꦏꦟ꧀ꦝ

꧓. ꦤꦷꦠꦶ ꦱꦴꦫꦺꦴ ꦩꦤꦸꦱ꧀ꦱꦴꦤꦁ, ꦩꦶꦠ꧀ꦠꦺꦴ ꦄꦴꦕꦫꦶꦪꦺꦴꦥꦶ ꦕ;

ꦩꦴꦠꦴ ꦥꦶꦠꦴ ꦕ ꦤꦷꦠꦶꦩꦴ, ꦱꦸꦠꦮꦴ ꦒꦤ꧀ꦡꦏꦴꦫꦏꦺꦴ.

꧔. ꦄꦭꦱꦱ꧀ꦱ ꦏꦸꦠꦺꦴ ꦱꦶꦥ꧀ꦥꦁ, ꦄꦱꦶꦥ꧀ꦥꦱ꧀ꦱ ꦏꦸꦠꦺꦴ ꦣꦤꦁ;

ꦄꦣꦤꦱ꧀ꦱ ꦏꦸꦠꦺꦴ ꦩꦶꦠ꧀ꦠꦁ, ꦄꦩꦶꦠ꧀ꦠꦱ꧀ꦱ ꦏꦸꦠꦺꦴ ꦱꦸꦑꦁ;

ꦄꦱꦸꦑꦱ꧀ꦱ ꦏꦸꦠꦺꦴ ꦥꦸꦚ꧀ꦚꦁ, ꦄꦥꦸꦚ꧀ꦚꦱ꧀ꦱ ꦏꦸꦠꦺꦴ ꦮꦫꦁ.

꧕. ꦱꦸꦕꦶꦤ꧀ꦠꦶꦠꦕꦶꦤ꧀ꦠꦷ ꦕꦺꦮ, ꦱꦸꦨꦴꦱꦶꦠꦨꦴꦱꦷꦥꦶ ꦕ;

ꦱꦸꦏꦠꦏꦩ꧀ꦩꦏꦴꦫꦷ ꦕ, ꦥꦟ꧀ꦝꦶꦠꦺꦴ ꦱꦴꦣꦸꦩꦴꦤꦸꦱꦺꦴ.

꧖. ꦏꦮꦶꦲꦺꦫꦚ꧀ꦚꦏꦴ ꦏꦠ꧀ꦮꦴ, ꦈꦠ꧀ꦠꦠ꧀ꦠꦁ ꦱꦠ꧀ꦡꦏꦚ꧀ꦕꦤꦁ;

ꦨꦹꦱꦤꦁ ꦒꦗ꧀ꦗꦥꦗ꧀ꦗꦴꦢꦶꦁ, ꦏꦫꦺꦴꦤ꧀ꦠꦶ ꦕ ꦩꦤꦺꦴꦲꦫꦁ.

꧗. ꦧꦲꦸꦁ ꦭꦲꦸꦚ꧀ꦕ ꦒꦲꦟꦁ, ꦱꦩ꧀ꦩꦹꦥꦣꦴꦫꦟꦩ꧀ꦥꦶ ꦕ;

ꦒꦲꦶꦠ ꦄꦱꦩ꧀ꦩꦸꦱ꧀ꦱꦤꦁ, ꦌꦠꦁ ꦱꦸꦮꦶꦚ꧀ꦚꦸꦭꦏ꧀ꦑꦟꦁ.

꧘. ꦄꦗꦫꦴꦩꦫꦁꦮ ꦥꦚ꧀ꦚꦺꦴ, ꦮꦶꦗ꧀ꦗꦩꦠ꧀ꦡꦚ꧀ꦕ ꦕꦶꦤ꧀ꦠꦪꦺ;

ꦒꦲꦶꦠꦺꦴ ꦆꦮ ꦏꦺꦱꦺꦱꦸ, ꦩꦕ꧀ꦕꦸꦤꦴ ꦣꦩ꧀ꦩꦩꦴꦕꦫꦺ.

꧙. ꦱꦶꦥ꧀ꦥꦱꦩꦁ ꦣꦤꦁ ꦤꦠ꧀ꦡꦶ, ꦱꦶꦥ꧀ꦥꦁ ꦕꦺꦴꦫꦴ ꦤ ꦒꦟ꧀ꦲꦫꦺ;

ꦆꦣ ꦭꦺꦴꦏꦺ ꦱꦶꦥ꧀ꦥꦁ ꦩꦶꦠ꧀ꦠꦁ, ꦥꦫꦭꦺꦴꦏꦺ ꦱꦸꦑꦴꦮꦲꦁ.

꧑꧐. ꦨꦸꦚ꧀ꦗꦤꦠ꧀ꦡꦁ ꦏꦡꦤꦠ꧀ꦡꦁ, ꦩꦸꦑꦁ ꦲꦺꦴꦠꦷꦠꦶ ꦤꦺꦴ ꦮꦢꦺ;

ꦪꦁ ꦮꦴꦠꦁ ꦮꦴ ꦩꦸꦑꦴꦫꦸꦭ꦳꧀ꦲꦁ, ꦮꦕꦤꦁ ꦥꦟ꧀ꦝꦶꦠꦺꦴ ꦤꦫꦺꦴ.

꧑꧑. ꦢꦸꦩ꧀ꦩꦺꦣꦺꦲꦶ ꦥꦱꦁꦱꦴ ꦕ, ꦮꦶꦚ꧀ꦚꦹꦲꦶ ꦒꦫꦲꦴ ꦕ ꦪꦴ;

ꦒꦫꦲꦴꦮ ꦱꦺꦪ꧀ꦪꦺꦴ ꦮꦶꦚ꧀ꦚꦹꦲꦶ, ꦪꦚ꧀ꦕꦺ ꦧꦴꦭꦥ꧀ꦥꦱꦁꦱꦤꦴ.

꧑꧒. ꦄꦕꦶꦤ꧀ꦠꦶꦪꦺ ꦱꦴꦛ꧀ꦜꦏꦡꦺ, ꦥꦟ꧀ꦝꦶꦠꦺꦴ ꦗꦶꦤꦨꦴꦱꦶꦠꦺ;

ꦈꦥꦢꦺꦱꦁ ꦱꦢꦴ ꦒꦟ꧀ꦲꦺ, ꦒꦫꦸꦁ ꦱꦩ꧀ꦩꦴ ꦈꦥꦛ꧀ꦜꦲꦁ.

ꦠꦱ꧀ꦩꦴ ꦱꦴꦛ꧀ꦜꦏꦡꦺ ꦣꦷꦫꦺꦴ, ꦒꦩ꧀ꦨꦷꦫꦺ ꦗꦶꦤꦨꦴꦱꦶꦠꦺ;

ꦈꦥꦢꦺꦱꦁ ꦱꦢꦴ ꦒꦟ꧀ꦲꦺ, ꦒꦫꦸꦁ ꦱꦩ꧀ꦩꦴ ꦈꦥꦛ꧀ꦜꦲꦁ.

꧑꧓. ꦒꦫꦹꦥꦢꦺꦱꦲꦷꦤꦺꦴ ꦲꦶ, ꦄꦠ꧀ꦡꦱꦴꦫꦁ ꦤ ꦮꦶꦤ꧀ꦢꦠꦶ;

ꦄꦠ꧀ꦡꦱꦴꦫꦮꦶꦲꦷꦤꦺꦴ ꦱꦺꦴ, ꦱꦢ꧀ꦣꦩ꧀ꦩꦴ ꦥꦫꦶꦲꦴꦪꦠꦶ.

꧑꧔. ꦒꦫꦹꦥꦢꦺꦱꦭꦴꦨꦷ ꦕ, ꦄꦠ꧀ꦡꦱꦴꦫꦱꦩꦴꦪꦸꦠꦺꦴ;

ꦱꦢ꧀ꦣꦩ꧀ꦩꦁ ꦥꦫꦶꦥꦴꦭꦺꦤ꧀ꦠꦺꦴ, ꦱꦢ꧀ꦣꦩ꧀ꦩꦱ꧀ꦩꦴ ꦤ ꦲꦴꦪꦠꦶ.

꧑꧕. ꦱꦧ꧀ꦧꦢꦧ꧀ꦧꦺꦱꦸ ꦮꦶꦗ꧀ꦗꦺꦮ, ꦢꦧ꧀ꦧꦩꦴꦲꦸ ꦄꦤꦸꦠ꧀ꦠꦫꦁ;

ꦄꦲꦴꦫꦠ꧀ꦠꦴ ꦄꦤꦒ꧀ꦓꦠ꧀ꦠꦴ, ꦄꦏ꧀ꦑꦪꦠ꧀ꦠꦴ ꦕ ꦱꦧ꧀ꦧꦢꦴ.

꧑꧖. ꦄꦥ꧀ꦥꦏꦺꦤꦥꦶ ꦩꦺꦣꦴꦮꦷ, ꦥꦴꦨꦠꦺꦤ ꦮꦶꦕꦏ꧀ꦑꦟꦺꦴ;

ꦱꦩꦸꦛ꧀ꦜꦴꦥꦺꦠꦶ ꦄꦠ꧀ꦠꦴꦤꦁ, ꦄꦟꦸꦁ ꦄꦒ꧀ꦒꦶꦁꦮ ꦱꦤ꧀ꦣꦩꦁ.

꧑꧗. ꦥꦟ꧀ꦝꦶꦠꦺ ꦕ ꦒꦸꦟꦴ ꦱꦧ꧀ꦧꦺ, ꦩꦹꦭ꦳꧀ꦲꦺ ꦢꦺꦴꦱꦴ ꦲꦶ ꦏꦺꦮꦭꦁ;

ꦠꦱ꧀ꦩꦴ ꦩꦹꦭ꦳꧀ꦲꦱꦲꦱ꧀ꦱꦺꦱꦸ, ꦥꦚ꧀ꦚꦺꦴ ꦌꦏꦺꦴ ꦮꦶꦱꦺꦱꦶꦪꦠꦺ.

꧑꧘. ꦧꦴꦭꦴ ꦆꦱ꧀ꦱꦤ꧀ꦠꦶ ꦢꦸꦩ꧀ꦩꦺꦣꦴ, ꦒꦸꦟꦷ ꦤꦶꦢ꧀ꦢꦺꦴꦱꦏꦴꦫꦶꦤꦺꦴ;

ꦒꦫꦸꦏꦺꦴ ꦥꦟ꧀ꦝꦶꦠꦺꦴ ꦌꦠꦱ-ꦩꦶꦱ꧀ꦱꦁ ꦠꦺꦲ꧀ꦪꦮꦶꦢ꧀ꦮꦴ ꦱꦩꦺꦴ.

꧑꧙. ꦩꦤꦸꦚ꧀ꦚꦩꦺꦮ ꦨꦴꦱꦺꦪ꧀ꦪ, ꦤꦴꦩꦤꦸꦚ꧀ꦚꦁ ꦏꦸꦢꦴꦕꦤꦁ;

ꦩꦤꦸꦚ꧀ꦚꦁ ꦨꦴꦱꦩꦴꦤꦱ꧀ꦱ, ꦒꦫꦸꦁ ꦨꦴꦫꦁ ꦈꦢꦢ꧀ꦣꦫꦶ;

ꦣꦤꦚ꧀ꦕ ꦤꦁ ꦄꦭꦴꦨꦺꦱꦶ, ꦠꦺꦤ ꦕꦠ꧀ꦠꦩꦤꦺꦴ ꦄꦲꦸ.

꧒꧐. ꦮꦶꦗ꧀ꦗꦴ ꦢꦢꦴꦠꦶ ꦮꦶꦤꦪꦁ, ꦮꦶꦤꦪꦴ ꦪꦴꦠꦶ ꦥꦠ꧀ꦠꦠꦁ;

ꦥꦠ꧀ꦠꦠ꧀ꦠꦴ ꦣꦤꦁ ꦥꦥ꧀ꦥꦺꦴꦠꦶ, ꦣꦤꦴ ꦣꦩ꧀ꦩꦁ ꦠꦠꦺꦴ ꦱꦸꦑꦁ.

꧒꧑. ꦪꦺ ꦮꦸꦝ꧀ꦞꦩꦥꦕꦪꦤ꧀ꦠꦶ, ꦤꦫꦴ ꦣꦩ꧀ꦩꦱ꧀ꦱ ꦏꦺꦴꦮꦶꦢꦴ;

ꦢꦶꦛ꧀ꦜꦺꦮ ꦣꦩ꧀ꦩꦺ ꦥꦴꦱꦁꦱꦴ, ꦱꦩ꧀ꦥꦫꦴꦪꦺ ꦕ ꦱꦸꦒ꧀ꦒꦠꦶꦁ.

꧒꧒. ꦩꦴꦠꦫꦶꦮ ꦥꦫꦢꦴꦫꦺꦱꦸ, ꦥꦫꦢꦧ꧀ꦧꦺꦱꦸ ꦭꦺꦢ꧀ꦢꦸꦁꦮ;

ꦄꦠ꧀ꦠꦤꦷꦮ ꦱꦧ꧀ꦧꦨꦹꦠꦺꦱꦸ, ꦪꦺꦴ ꦥꦱ꧀ꦱꦠꦶ ꦱꦺꦴ ꦥꦟ꧀ꦝꦶꦠꦺꦴ.

꧒꧓. ꦄꦴꦱꦷꦱꦺꦡꦺꦮ ꦥꦸꦫꦶꦱꦺꦴ, ꦤ ꦤꦶꦧ꧀ꦧꦶꦤ꧀ꦢꦺꦪ꧀ꦪ ꦥꦟ꧀ꦝꦶꦠꦺꦴ;

ꦄꦤꦮꦗ꧀ꦗꦺꦱꦸ ꦏꦩ꧀ꦩꦺꦱꦸ, ꦥꦱꦁꦱꦶꦠꦺꦱꦸ ꦱꦴꦣꦸꦨꦶ.

ꦄꦴꦱꦷꦱꦺꦡꦺꦮ ꦥꦸꦫꦶꦱꦺꦴ, ꦤ ꦤꦶꦧ꧀ꦧꦶꦤ꧀ꦢꦺꦪ꧀ꦪ ꦥꦟ꧀ꦝꦶꦠꦺꦴ;

ꦥꦱ꧀ꦱꦴꦩꦶ ꦮꦺꦴꦲꦁ ꦄꦠ꧀ꦠꦴꦤꦁ, ꦪꦡꦴ ꦆꦕ꧀ꦖꦶꦁ ꦠꦡꦴ ꦄꦲꦸ.

꧒꧔. ꦮꦴꦪꦩꦺꦡꦺꦮ ꦥꦸꦫꦶꦱꦺꦴ, ꦤ ꦤꦶꦧ꧀ꦧꦶꦤ꧀ꦢꦺꦪ꧀ꦪ ꦥꦟ꧀ꦝꦶꦠꦺꦴ;

ꦥꦸꦚ꧀ꦚꦏ꧀ꦫꦶꦪꦮꦠ꧀ꦡꦹꦱꦸ, ꦥꦱꦁꦱꦶꦠꦺꦱꦸ ꦮꦶꦚ꧀ꦚꦸꦨꦶ.

꧒꧕. ꦭꦺꦴꦏꦺ ꦈꦱ꧀ꦱꦴꦲꦮꦤ꧀ꦠꦴꦤꦁ, ꦗꦤꦴꦤꦁ ꦏꦶꦩꦱꦴꦣꦶꦪꦁ;

ꦱꦴꦒꦫꦺꦥꦶ ꦩꦲꦴꦱꦺꦠꦸꦁ, ꦏꦥꦶꦪꦹꦡꦺꦲꦶ ꦧꦤ꧀ꦣꦠꦶ.

꧒꧖. ꦏꦶꦁ ꦏꦸꦭꦺꦤ ꦮꦶꦱꦴꦭꦺꦤ, ꦒꦸꦟꦲꦷꦤꦺꦴ ꦠꦸ ꦪꦺꦴ ꦤꦫꦺꦴ;

ꦄꦏꦸꦭꦶꦤꦺꦴꦥꦶ ꦱꦠ꧀ꦡꦚ꧀ꦚꦺꦴ, ꦢꦺꦮꦠꦴꦲꦶꦥꦶ ꦥꦸꦗ꧀ꦗꦠꦺ.

꧒꧗. ꦈꦏ꧀ꦏꦛ꧀ꦜꦺ ꦱꦹꦫꦩꦶꦕ꧀ꦖꦤ꧀ꦠꦶ, ꦩꦤ꧀ꦠꦷꦱꦸ ꦄꦏꦸꦠꦹꦲꦭꦁ;

ꦥꦶꦪꦚ꧀ꦕ ꦄꦤ꧀ꦤꦥꦴꦤꦩ꧀ꦲꦶ, ꦄꦠ꧀ꦡꦺ ꦗꦴꦠꦺ ꦕ ꦥꦟ꧀ꦝꦶꦠꦁ.

꧒꧘. ꦫꦹꦥꦪꦺꦴꦧ꧀ꦧꦤ꧀ꦤꦱꦩ꧀ꦥꦤ꧀ꦤꦴ, ꦮꦶꦱꦴꦭꦏꦸꦭꦱꦩ꧀ꦨꦮꦴ;

ꦮꦶꦗ꧀ꦗꦴꦲꦷꦤꦴ ꦤ ꦱꦺꦴꦨꦤ꧀ꦠꦺ, ꦤꦶꦒ꧀ꦒꦤ꧀ꦣꦴ ꦆꦮ ꦏꦶꦁ ꦱꦸꦏꦴ.

꧒꧙. ꦮꦸꦠ꧀ꦪꦁ ꦮꦶꦱꦢꦚꦴꦟꦱ꧀ꦱ, ꦚꦴꦠꦺꦴ ꦄꦠ꧀ꦡꦺꦴ ꦠꦫꦱ꧀ꦱꦤ;

ꦱꦹꦫꦥ꧀ꦥꦨꦴꦪ ꦄꦴꦢꦴꦱꦺꦴ, ꦖꦴꦪꦁ ꦢꦶꦱ꧀ꦱꦺ ꦤ ꦩꦴꦏꦫꦺ.

꧓꧐. ꦄꦮꦺꦪ꧀ꦪꦴꦏꦫꦟꦺꦴ ꦠ꧀ꦮꦤ꧀ꦣꦺꦴ, ꦧꦣꦶꦫꦺꦴ ꦏꦺꦴꦱꦮꦗ꧀ꦗꦶꦠꦺꦴ;

ꦱꦴꦲꦶꦕ꧀ꦕꦫꦲꦶꦠꦺꦴ ꦥꦔ꧀ꦒꦸ, ꦩꦹꦒꦺꦴ ꦠꦏ꧀ꦏꦮꦶꦮꦗ꧀ꦗꦶꦠꦺꦴ.

꧓꧑. ꦣꦷꦫꦺꦴ ꦕ ꦮꦶꦮꦶꦣꦴꦤꦚ꧀ꦚꦹ, ꦥꦫꦺꦱꦁ ꦮꦶꦮꦫꦴꦤꦸꦒꦹ;

ꦱꦧ꧀ꦧꦴꦩꦶꦠ꧀ꦠꦺ ꦮꦱꦷꦏꦠ꧀ꦮꦴ, ꦏꦺꦴꦱꦶꦪꦺꦴꦮ ꦱꦸꦑꦷ ꦱꦶꦪꦴ.

꧓꧒. ꦩꦲꦴꦠꦺꦗꦺꦴꦥꦶ ꦠꦺꦗꦺꦴꦪꦁ, ꦩꦠ꧀ꦠꦶꦏꦁ ꦤ ꦩꦸꦢꦸꦁ ꦏꦫꦺ;

ꦄꦴꦥꦺꦴ ꦄꦴꦥꦺꦱꦶ ꦩꦸꦢꦸꦏꦁ, ꦱꦴꦣꦸꦮꦴꦕꦴꦮ ꦏꦏ꧀ꦑꦭ꦳ꦁ.

꧓꧓. ꦏꦺꦴꦠ꧀ꦡꦺꦴ ꦥꦸꦠ꧀ꦠꦺꦤ ꦗꦴꦠꦺꦤ, ꦪꦺꦴ ꦤ ꦮꦶꦢꦹ ꦤ ꦣꦩ꧀ꦩꦶꦏꦺꦴ;