꧔. ꦱꦩꦴꦱꦏꦥ꧀ꦥ

ꦱꦠ꧀ꦠꦩꦏꦟ꧀ꦝ

꧓꧑꧖. , ꧓꧓꧑. ꦤꦴꦩꦴꦤꦁ ꦱꦩꦴꦱꦺꦴ ꦪꦸꦠ꧀ꦠꦠ꧀ꦡꦺꦴ.

ꦠꦺꦱꦁ ꦤꦴꦩꦴꦤꦁ ꦥꦪꦸꦗ꧀ꦗꦩꦴꦤꦥꦢꦠ꧀ꦡꦴꦤꦁ ꦪꦺꦴ ꦪꦸꦠ꧀ꦠꦠ꧀ꦡꦺꦴ, ꦱꦺꦴ ꦱꦩꦴꦱꦱꦚ꧀ꦚꦺꦴ ꦲꦺꦴꦠꦶ.

ꦏꦡꦶꦤꦢꦸꦱ꧀ꦱꦁ, ꦄꦴꦒꦤ꧀ꦠꦸꦏꦨꦠ꧀ꦠꦁ, ꦗꦷꦮꦶꦠꦶꦤ꧀ꦢ꧀ꦫꦶꦪꦁ, ꦱꦩꦟꦧ꧀ꦫꦴꦲ꧀ꦩꦟꦴ, ꦱꦴꦫꦶꦥꦸꦠ꧀ꦠꦩꦺꦴꦒ꧀ꦒꦭ꧀ꦭꦴꦤꦴ, ꦧ꧀ꦫꦴꦲ꧀ꦩꦟ ꦒꦲꦥꦠꦶꦏꦴ.

ꦤꦴꦩꦴꦤꦩꦶꦠꦶ ꦏꦶꦩꦠ꧀ꦡꦁ? ꦢꦺꦮꦢꦠ꧀ꦠꦺꦴ ꦥꦕꦠꦶ, ꦪꦚ꧀ꦚꦢꦠ꧀ꦠꦺꦴ ꦥꦕꦠꦶ.

ꦪꦸꦠ꧀ꦠꦠ꧀ꦡꦺꦴꦠꦶ ꦏꦶꦩꦠ꧀ꦡꦁ? ꦨꦠꦺꦴ ꦫꦚ꧀ꦚꦺꦴ ꦥꦸꦠ꧀ꦠꦺꦴ ꦢꦺꦮꦢꦠ꧀ꦠꦱ꧀ꦱ.

ꦱꦩꦴꦱꦆꦕ꧀ꦕꦤꦺꦤ ꦏ꧀ꦮꦠ꧀ꦡꦺꦴ? ꦏ꧀ꦮꦕꦶ ꦱꦩꦴꦱꦤ꧀ꦠꦒꦠꦴꦤꦩꦏꦴꦫꦤ꧀ꦠꦺꦴ.

꧓꧑꧗. , ꧓꧓꧒. ꦠꦺꦱꦁ ꦮꦶꦨꦠ꧀ꦠꦶꦪꦺꦴ ꦭꦺꦴꦥꦴ ꦕ.

ꦠꦺꦱꦁ ꦪꦸꦠ꧀ꦠꦠ꧀ꦡꦴꦤꦁ ꦱꦩꦴꦱꦴꦤꦁ ꦮꦶꦨꦠ꧀ꦠꦶꦪꦺꦴ ꦭꦺꦴꦥꦴ ꦕ ꦲꦺꦴꦤ꧀ꦠꦶ.

ꦏꦡꦶꦤꦢꦸꦱ꧀ꦱꦁ, ꦄꦴꦒꦤ꧀ꦠꦸꦏꦨꦠ꧀ꦠꦁ.

ꦠꦺꦱꦁꦒꦲꦟꦺꦤ ꦱꦩꦴꦱꦠꦢ꧀ꦣꦶꦠꦴꦑ꧀ꦪꦴꦠꦏꦶꦠꦏꦴꦤꦁ ꦮꦶꦨꦠ꧀ꦠꦶꦥꦕ꧀ꦕꦪꦥꦢꦏ꧀ꦑꦫꦴꦒꦩꦴ ꦕ ꦭꦺꦴꦥꦴ ꦲꦺꦴꦤ꧀ꦠꦶ. ꦮꦴꦱꦶꦛ꧀ꦜꦺꦴ, ꦮꦺꦤꦠꦺꦪ꧀ꦪꦺꦴ.

ꦕꦒ꧀ꦒꦲꦟ ꦩꦮꦣꦴꦫꦟꦠ꧀ꦡꦁ, ꦥꦨꦔ꧀ꦏꦫꦺꦴ, ꦄꦩꦠꦢ꧀ꦢꦢꦺꦴ, ꦩꦺꦣꦔ꧀ꦏꦫꦺꦴ, ꦢꦷꦥꦔ꧀ꦏꦫꦺꦴ.

꧓꧑꧘. , ꧓꧓꧓. ꦥꦏꦠꦶ ꦕꦱ꧀ꦱ ꦱꦫꦤ꧀ꦠꦱ꧀ꦱ.

ꦭꦸꦠ꧀ꦠꦴꦱꦸ ꦮꦶꦨꦠ꧀ꦠꦷꦱꦸ ꦄꦱ꧀ꦱ ꦱꦫꦤ꧀ꦠꦱ꧀ꦱ ꦭꦶꦔ꧀ꦒꦱ꧀ꦱ ꦥꦏꦠꦶꦫꦹꦥꦴꦤꦶ ꦲꦺꦴꦤ꧀ꦠꦶ.

ꦕꦏ꧀ꦑꦸꦱꦺꦴꦠꦁ, ꦩꦸꦑꦤꦴꦱꦶꦏꦁ, ꦫꦴꦗꦥꦸꦠ꧀ꦠꦺꦴ, ꦫꦴꦗꦥꦸꦫꦶꦱꦺꦴ.

꧓꧑꧙. , ꧓꧓꧐. ꦈꦥꦱꦒ꧀ꦒꦤꦶꦥꦴꦠꦥꦸꦧ꧀ꦧꦏꦺꦴ ꦄꦧ꧀ꦪꦪꦷꦨꦴꦮꦺꦴ.

ꦈꦥꦱꦒ꧀ꦒꦤꦶꦥꦴꦠꦥꦸꦧ꧀ꦧꦏꦺꦴ ꦱꦩꦴꦱꦺꦴ ꦄꦧ꧀ꦪꦪꦷꦨꦴꦮꦱꦚ꧀ꦚꦺꦴ ꦲꦺꦴꦠꦶ.

ꦤꦒꦫꦱ꧀ꦱ ꦱꦩꦷꦥꦺ ꦥꦮꦠ꧀ꦠꦠꦶ ꦏꦡꦴ ꦆꦠꦶ ꦈꦥꦤꦒꦫꦁ, ꦢꦫꦡꦴꦤꦁ ꦄꦨꦴꦮꦺꦴ ꦤꦶꦢ꧀ꦢꦫꦡꦁ, ꦩꦏꦱꦴꦤꦁ ꦄꦨꦴꦮꦺꦴ ꦤꦶꦩ꧀ꦩꦏꦱꦁ, ꦮꦸꦝ꧀ꦞꦴꦤꦁ ꦥꦛꦶꦥꦴꦛꦶ ꦪꦡꦴꦮꦸꦝ꧀ꦞꦁ, ꦪꦺ ꦪꦺ ꦮꦸꦝ꧀ꦞꦴ ꦮꦴ ꦪꦡꦴꦮꦸꦝ꧀ꦞꦁ, ꦗꦷꦮꦱ꧀ꦱ ꦪꦠ꧀ꦠꦏꦺꦴ ꦥꦫꦶꦕ꧀ꦖꦺꦢꦺꦴ ꦪꦴꦮꦗꦷꦮꦁ, ꦕꦶꦠ꧀ꦠꦩꦣꦶꦏꦶꦕ꧀ꦕ ꦥꦮꦠ꧀ꦠꦤ꧀ꦠꦶ ꦠꦺ ꦣꦩ꧀ꦩꦴꦠꦶ ꦄꦣꦶꦕꦶꦠ꧀ꦠꦁ, ꦥꦧ꧀ꦧꦠꦱ꧀ꦱ ꦠꦶꦫꦺꦴ ꦠꦶꦫꦺꦴꦥꦧ꧀ꦧꦠꦁ, ꦱꦺꦴꦠꦱ꧀ꦱ ꦥꦠꦶ ꦥꦮꦠ꧀ꦠꦠꦶ ꦤꦴꦮꦴ ꦆꦠꦶ ꦥꦠꦶꦱꦺꦴꦠꦁ, ꦥꦴꦱꦴꦢꦱ꧀ꦱ ꦄꦤ꧀ꦠꦺꦴ ꦄꦤ꧀ꦠꦺꦴꦥꦴꦱꦴꦢꦁ.

ꦄꦧ꧀ꦪꦪꦷꦨꦴꦮꦩꦶꦕ꧀ꦕꦤꦺꦤ ꦏ꧀ꦮꦠ꧀ꦡꦺꦴ? ꦄꦁꦮꦶꦨꦠ꧀ꦠꦷꦤ ꦩꦏꦴꦫꦤ꧀ꦠꦴ ꦄꦧ꧀ꦪꦪꦷꦨꦴꦮꦴ.

꧓꧒꧐. , ꧓꧓꧕. ꦱꦺꦴ ꦤꦥꦸꦁꦱꦏꦭꦶꦔ꧀ꦒꦺꦴ.

ꦱꦺꦴ ꦄꦧ꧀ꦪꦪꦷꦨꦴꦮꦱꦩꦴꦱꦺꦴ ꦤꦥꦸꦁꦱꦏꦭꦶꦔ꧀ꦒꦺꦴꦮ ꦢꦛ꧀ꦜꦧ꧀ꦧꦺꦴ.

ꦏꦸꦩꦴꦫꦷꦱꦸ ꦄꦣꦶꦏꦶꦕ꧀ꦕ ꦥꦮꦠ꧀ꦠꦠꦶ ꦏꦡꦴ ꦆꦠꦶ ꦄꦣꦶꦏꦸꦩꦴꦫꦶ, ꦮꦣꦸꦪꦴ ꦱꦩꦷꦥꦺ ꦥꦮꦠ꧀ꦠꦠꦶ ꦏꦡꦴ ꦆꦠꦶ ꦈꦥꦮꦣꦸ, ꦒꦔ꧀ꦒꦴꦪ ꦱꦩꦷꦥꦺ ꦥꦮꦠ꧀ꦠꦠꦶ ꦏꦡꦴ ꦆꦠꦶ ꦈꦥꦒꦔ꧀ꦒꦁ, ꦩꦟꦶꦏꦴꦪ ꦱꦩꦷꦥꦺ ꦥꦮꦠ꧀ꦠꦠꦶ ꦏꦡꦴ ꦆꦠꦶ ꦈꦥꦩꦟꦶꦏꦁ.

꧓꧒꧑. , ꧓꧔꧙. ꦢꦶꦒꦸꦱ꧀ꦱꦺꦏꦠ꧀ꦠꦁ.

ꦢꦶꦒꦸꦱ꧀ꦱ ꦱꦩꦴꦱꦱ꧀ꦱ ꦌꦏꦠ꧀ꦠꦁ ꦲꦺꦴꦠꦶ, ꦤꦥꦸꦁꦱꦏꦭꦶꦔ꧀ꦒꦠ꧀ꦠꦚ꧀ꦕ.

ꦠꦪꦺꦴ ꦭꦺꦴꦏꦴ ꦠꦶꦭꦺꦴꦏꦁ, ꦠꦪꦺꦴ ꦢꦟ꧀ꦝꦴ ꦠꦶꦢꦟ꧀ꦝꦁ, ꦠꦷꦟꦶ ꦤꦪꦤꦴꦤꦶ ꦠꦶꦤꦪꦤꦁ, ꦠꦪꦺꦴ ꦱꦶꦔ꧀ꦒꦴ ꦠꦶꦱꦶꦔ꧀ꦒꦁ. ꦕꦠꦱ꧀ꦱꦺꦴ ꦢꦶꦱꦴ ꦕꦠꦸꦢ꧀ꦢꦶꦱꦁ, ꦥꦚ꧀ꦕ ꦆꦤ꧀ꦢ꧀ꦫꦶꦪꦴꦤꦶ ꦥꦚ꧀ꦕꦶꦤ꧀ꦢ꧀ꦫꦶꦪꦁ.

꧓꧒꧒. , ꧓꧕꧙. ꦠꦡꦴ ꦢ꧀ꦮꦤ꧀ꦢꦺ ꦥꦴꦟꦶ ꦠꦹꦫꦶꦪ ꦪꦺꦴꦒ꧀ꦒꦱꦺꦤꦔ꧀ꦒꦑꦸꦢ꧀ꦢꦗꦤ꧀ꦠꦸꦏ ꦮꦶꦮꦶꦣꦮꦶꦫꦸꦢ꧀ꦣ ꦮꦶꦱꦨꦴꦒꦠ꧀ꦡꦴꦢꦷꦤꦚ꧀ꦕ.

ꦠꦡꦴ ꦢ꧀ꦮꦤ꧀ꦢꦺ ꦱꦩꦴꦱꦺ ꦥꦴꦟꦶ ꦠꦹꦫꦶꦪ ꦪꦺꦴꦒ꧀ꦒ ꦱꦺꦤꦔ꧀ꦒꦑꦸꦢ꧀ꦢꦗꦤ꧀ꦠꦸꦏ ꦮꦶꦮꦶꦣꦮꦶꦫꦸꦢ꧀ꦣ ꦮꦶꦱꦨꦴꦒꦠ꧀ꦡꦆꦕ꧀ꦕꦺꦮꦩꦴꦢꦷꦤꦁ ꦌꦏꦠ꧀ꦠꦁ ꦲꦺꦴꦠꦶ, ꦤꦥꦸꦁꦱꦏꦭꦶꦔ꧀ꦒꦠ꧀ꦠꦚ꧀ꦕ.

ꦠꦁ ꦪꦡꦴ? ꦕꦏ꧀ꦑꦸ ꦕ ꦱꦺꦴꦠꦚ꧀ꦕ ꦕꦏ꧀ꦑꦸꦱꦺꦴꦠꦁ, ꦩꦸꦑꦚ꧀ꦕ ꦤꦴꦱꦶꦏꦴ ꦕ ꦩꦸꦑꦤꦴꦱꦶꦏꦁ, ꦖꦮꦶ ꦕ ꦩꦁꦱꦚ꧀ꦕ ꦭꦺꦴꦲꦶꦠꦚ꧀ꦕ ꦖꦮꦶꦩꦁꦱꦭꦺꦴꦲꦶꦠꦁ. ꦌꦮꦁ ꦥꦴꦟ꧀ꦪꦔ꧀ꦒꦠ꧀ꦡꦺ.

ꦱꦔ꧀ꦑꦺꦴ ꦕ ꦥꦟꦮꦺꦴ ꦕ ꦱꦔ꧀ꦑꦥꦟꦮꦁ, ꦒꦷꦠꦚ꧀ꦕ ꦮꦴꦢꦶꦠꦚ꧀ꦕ ꦒꦷꦠꦮꦴꦢꦶꦠꦁ, ꦢꦢ꧀ꦢꦫꦶ ꦕ ꦝꦶꦟ꧀ꦝꦶꦩꦺꦴ ꦕ ꦢꦢ꧀ꦢꦫꦶꦝꦶꦟ꧀ꦝꦶꦩꦁ. ꦌꦮꦁ ꦠꦹꦫꦶꦪꦔ꧀ꦒꦠ꧀ꦡꦺ.

ꦦꦴꦭꦺꦴ ꦕ ꦥꦴꦕꦤꦚ꧀ꦕ ꦦꦴꦭꦥꦴꦕꦤꦁ, ꦪꦸꦒꦚ꧀ꦕ ꦤꦔ꧀ꦒꦭꦚ꧀ꦕ ꦪꦸꦒꦤꦔ꧀ꦒꦭꦁ. ꦌꦮꦁ ꦪꦺꦴꦒ꧀ꦒꦔ꧀ꦒꦠ꧀ꦡꦺ.

ꦄꦱꦶ ꦕ ꦕꦩ꧀ꦩꦚ꧀ꦕ ꦄꦱꦶꦕꦩ꧀ꦩꦁ, ꦣꦤꦸ ꦕ ꦏꦭꦴꦥꦺꦴ ꦕ ꦣꦤꦸꦏꦭꦴꦥꦁ, ꦲꦠ꧀ꦡꦷ ꦕ ꦄꦱ꧀ꦱꦺꦴ ꦕ ꦲꦠ꧀ꦡꦶꦄꦱ꧀ꦱꦁ, ꦫꦡꦺꦴ ꦕ ꦥꦠ꧀ꦠꦶꦏꦺꦴ ꦕ ꦫꦡꦥꦠ꧀ꦠꦶꦏꦁ. ꦌꦮꦁ ꦱꦺꦤꦔ꧀ꦒꦠ꧀ꦡꦺ.

ꦝꦁꦱꦴ ꦕ ꦩꦏꦱꦴ ꦕ ꦝꦁꦱꦩꦏꦱꦁ, ꦏꦸꦤ꧀ꦡꦺꦴ ꦕ ꦏꦶꦥꦶꦭ꧀ꦭꦶꦏꦺꦴ ꦕ ꦏꦸꦤ꧀ꦡꦏꦶꦥꦶꦭ꧀ꦭꦶꦏꦁ, ꦏꦷꦛꦺꦴ ꦕ ꦱꦫꦷꦱꦥꦺꦴ ꦕ ꦏꦷꦛꦱꦫꦷꦱꦥꦁ. ꦌꦮꦁ ꦑꦸꦢ꧀ꦢꦗꦤ꧀ꦠꦸꦏꦠ꧀ꦡꦺ.

ꦄꦲꦶ ꦕ ꦤꦏꦸꦭꦺꦴ ꦕ ꦄꦲꦶꦤꦏꦸꦭꦁ, ꦧꦶꦭ꦳ꦴꦫꦺꦴ ꦕ ꦩꦹꦱꦶꦏꦺꦴ ꦕ ꦧꦶꦭ꦳ꦴꦫꦩꦹꦱꦶꦏꦁ, ꦏꦴꦏꦺꦴ ꦕ ꦈꦭꦹꦏꦺꦴ ꦕ ꦏꦴꦏꦺꦴꦭꦹꦏꦁ. ꦌꦮꦁ ꦮꦶꦮꦶꦣꦮꦶꦫꦸꦢ꧀ꦣꦠ꧀ꦡꦺ.

ꦱꦷꦭꦚ꧀ꦕ ꦥꦚ꧀ꦚꦴꦟꦚ꧀ꦕ ꦱꦷꦭꦥꦚ꧀ꦚꦴꦟꦁ, ꦱꦩꦡꦺꦴ ꦕ ꦮꦶꦥꦱ꧀ꦱꦤꦴ ꦕ ꦱꦩꦡꦮꦶꦥꦱ꧀ꦱꦤꦁ, ꦮꦶꦗ꧀ꦗꦴ ꦕ ꦕꦫꦟꦚ꧀ꦕ ꦮꦶꦗ꧀ꦗꦴꦕꦫꦟꦁ. ꦌꦮꦁ ꦮꦶꦱꦨꦴꦒꦠ꧀ꦡꦺ.

ꦄꦴꦢꦶꦒ꧀ꦒꦲꦟꦁ ꦏꦶꦩꦠ꧀ꦡꦁ? ꦢꦴꦱꦷ ꦕ ꦢꦴꦱꦺꦴ ꦕ ꦢꦴꦱꦶꦢꦴꦱꦁ, ꦆꦠ꧀ꦡꦷ ꦕ ꦥꦸꦩꦴ ꦕ ꦆꦠ꧀ꦡꦶꦥꦸꦩꦁ, ꦥꦠ꧀ꦠꦺꦴ ꦕ ꦕꦷꦮꦫꦚ꧀ꦕ ꦥꦠ꧀ꦠꦕꦷꦮꦫꦁ, ꦖꦠ꧀ꦠꦚ꧀ꦕ ꦈꦥꦴꦲꦤꦴ ꦕ ꦖꦠ꧀ꦠꦸꦥꦴꦲꦤꦁ, ꦠꦶꦏꦚ꧀ꦕ ꦕꦠꦸꦏ꧀ꦏꦚ꧀ꦕ ꦠꦶꦏꦕꦠꦸꦏ꧀ꦏꦁ, ꦮꦺꦤꦺꦴ ꦕ ꦫꦡꦏꦴꦫꦺꦴ ꦕ ꦮꦺꦤꦫꦡꦏꦴꦫꦁ, ꦱꦴꦏꦸꦟꦶꦏꦺꦴ ꦕ ꦩꦴꦒꦮꦶꦏꦺꦴ ꦕ ꦱꦮꦏꦸꦟꦶꦏꦩꦴꦒꦮꦶꦏꦁ, ꦢꦷꦓꦺꦴ ꦕ ꦩꦗ꧀ꦙꦶꦩꦺꦴ ꦕ ꦢꦷꦓꦩꦗ꧀ꦙꦶꦩꦁ ꦆꦕ꧀ꦕꦺꦮꦩꦴꦢꦶ.

꧓꧒꧓. , ꧓꧖꧐. ꦮꦶꦨꦴꦱꦴ ꦫꦸꦏ꧀ꦑ ꦠꦶꦟ ꦥꦱꦸꦑ ꦤ ꦣꦚ꧀ꦚ ꦗꦤꦥꦢꦴꦢꦷꦤꦚ꧀ꦕ.

ꦫꦸꦏ꧀ꦑꦠꦶꦟ ꦥꦱꦸ ꦣꦤ ꦣꦚ꧀ꦚ ꦗꦤꦥꦢꦆꦕ꧀ꦕꦺꦮꦩꦴꦢꦷꦤꦁ ꦮꦶꦨꦴꦱꦴ ꦌꦏꦠ꧀ꦠꦁ ꦲꦺꦴꦠꦶ, ꦤꦥꦸꦁꦱꦏꦭꦶꦔ꧀ꦒꦠ꧀ꦠꦚ꧀ꦕ ꦢ꧀ꦮꦤ꧀ꦢꦺ ꦱꦩꦴꦱꦺ. ꦄꦱ꧀ꦱꦠ꧀ꦡꦺꦴ ꦕ ꦏꦥꦷꦠꦤꦺꦴ ꦕ ꦄꦱ꧀ꦱꦠ꧀ꦡꦏꦥꦷꦠꦤꦁ, ꦄꦱ꧀ꦱꦠ꧀ꦡꦏꦥꦷꦠꦤꦴ ꦮꦴ. ꦈꦱꦷꦫꦚ꧀ꦕ ꦧꦷꦫꦟꦚ꧀ꦕ ꦈꦱꦷꦫꦧꦷꦫꦟꦁ, ꦈꦱꦷꦫꦧꦷꦫꦟꦴ ꦮꦴ. ꦄꦗꦺꦴ ꦕ ꦌꦭ꦳ꦏꦺꦴ ꦕ ꦄꦗꦺꦭ꦳ꦏꦁ, ꦄꦗꦺꦭ꦳ꦏꦴ ꦮꦴ. ꦲꦶꦫꦚ꧀ꦚꦚ꧀ꦕ ꦱꦸꦮꦟ꧀ꦟꦚ꧀ꦕ ꦲꦶꦫꦚ꧀ꦚꦱꦸꦮꦟ꧀ꦟꦁ, ꦲꦶꦫꦚ꧀ꦚꦱꦸꦮꦟ꧀ꦟꦴ ꦮꦴ. ꦱꦴꦭꦶ ꦕ ꦪꦮꦺꦴ ꦕ ꦱꦴꦭꦶꦪꦮꦁ, ꦱꦴꦭꦶꦪꦮꦴ ꦮꦴ. ꦏꦴꦱꦷ ꦕ ꦏꦺꦴꦱꦭꦴ ꦕ ꦏꦴꦱꦶꦏꦺꦴꦱꦭꦁ, ꦏꦴꦱꦶꦏꦺꦴꦱꦭꦴ ꦮꦴ.

ꦄꦴꦢꦶꦒ꧀ꦒꦲꦟꦁ ꦏꦶꦩꦠ꧀ꦡꦁ? ꦱꦴꦮꦗ꧀ꦗꦚ꧀ꦕ ꦄꦤꦮꦗ꧀ꦗꦚ꧀ꦕ ꦱꦴꦮꦗ꧀ꦗꦴꦤꦮꦗ꧀ꦗꦁ, ꦱꦴꦮꦗ꧀ꦗꦴ ꦤꦮꦗ꧀ꦗꦴ ꦮꦴ. ꦲꦷꦤꦚ꧀ꦕ ꦥꦟꦷꦠꦚ꧀ꦕ ꦲꦷꦤꦥꦟꦷꦠꦁ. ꦲꦷꦤꦥꦟꦷꦠꦴ ꦮꦴ. ꦏꦟ꧀ꦲꦺꦴ ꦕ ꦱꦸꦏ꧀ꦏꦺꦴ ꦕ ꦏꦟ꧀ꦲꦱꦸꦏ꧀ꦏꦁ, ꦏꦟ꧀ꦲꦱꦸꦏ꧀ꦏꦴ ꦮꦴ.

꧓꧒꧔. , ꧓꧓꧙. ꦢ꧀ꦮꦶꦥꦢꦺ ꦠꦸꦭ꧀ꦪꦴꦣꦶꦏꦫꦟꦺ ꦏꦩ꧀ꦩꦣꦴꦫꦪꦺꦴ.

ꦢ꧀ꦮꦺ ꦥꦢꦴꦤꦶ ꦠꦸꦭ꧀ꦪꦴꦣꦶꦏꦫꦟꦴꦤꦶ ꦪꦢꦴ ꦱꦩꦱ꧀ꦪꦤ꧀ꦠꦺ, ꦠꦢꦴ ꦱꦺꦴ ꦱꦩꦴꦱꦺꦴ ꦏꦩ꧀ꦩꦣꦴꦫꦪꦱꦚ꧀ꦚꦺꦴ ꦲꦺꦴꦠꦶ.

ꦩꦲꦤ꧀ꦠꦺꦴ ꦕ ꦱꦺꦴ ꦥꦸꦫꦶꦱꦺꦴ ꦕꦴꦠꦶ ꦩꦲꦴꦥꦸꦫꦶꦱꦺꦴ, ꦏꦟ꧀ꦲꦺꦴ ꦕ ꦱꦺꦴ ꦱꦥ꧀ꦥꦺꦴ ꦕꦴꦠꦶ ꦏꦟ꧀ꦲꦱꦥ꧀ꦥꦺꦴ, ꦤꦷꦭꦚ꧀ꦕ ꦠꦁ ꦈꦥ꧀ꦥꦭꦚ꧀ꦕꦴꦠꦶ ꦤꦷꦭꦸꦥ꧀ꦥꦭꦁ, ꦭꦺꦴꦲꦶꦠꦚ꧀ꦕ ꦠꦁ ꦕꦤ꧀ꦢꦤꦚ꧀ꦕꦴꦠꦶ ꦭꦺꦴꦲꦶꦠꦕꦤ꧀ꦢꦤꦁ, ꦧ꧀ꦫꦴꦲ꧀ꦩꦟꦷ ꦕ ꦱꦴ ꦢꦴꦫꦶꦏꦴ ꦕꦴꦠꦶ ꦧ꧀ꦫꦴꦲ꧀ꦩꦟꦢꦴꦫꦶꦏꦴ, ꦑꦠ꧀ꦠꦶꦪꦴ ꦕ ꦱꦴ ꦏꦚ꧀ꦚꦴ ꦕꦴꦠꦶ ꦑꦠ꧀ꦠꦶꦪꦏꦚ꧀ꦚꦴ.

ꦏꦩ꧀ꦩꦣꦴꦫꦪꦆꦕ꧀ꦕꦤꦺꦤ ꦏ꧀ꦮꦠ꧀ꦡꦺꦴ? ꦏꦩ꧀ꦩꦣꦴꦫꦪꦱꦚ꧀ꦚꦺ ꦕ.

꧓꧒꧕. , ꧓꧔꧘. ꦱꦔ꧀ꦑ꧀ꦪꦴꦥꦸꦧ꧀ꦧꦺꦴ ꦢꦶꦒꦸ.

ꦱꦔ꧀ꦑ꧀ꦪꦴꦥꦸꦧ꧀ꦧꦺꦴ ꦏꦩ꧀ꦩꦣꦴꦫꦪꦱꦩꦴꦱꦺꦴ ꦢꦶꦒꦸꦱꦚ꧀ꦚꦺꦴ ꦲꦺꦴꦠꦶ.

ꦠꦷꦟꦶ ꦩꦭꦴꦤꦶ ꦠꦶꦩꦭꦁ, ꦠꦷꦟꦶ ꦦꦭꦴꦤꦶ ꦠꦶꦦꦭꦁ, ꦠꦪꦺꦴ ꦭꦺꦴꦏꦴ ꦠꦶꦭꦺꦴꦏꦁ, ꦠꦪꦺꦴ ꦢꦟ꧀ꦝꦴ ꦠꦶꦢꦟ꧀ꦝꦁ, ꦕꦠꦱ꧀ꦱꦺꦴ ꦢꦶꦱꦴ ꦕꦠꦸꦢ꧀ꦢꦶꦱꦁ, ꦥꦚ꧀ꦕ ꦆꦤ꧀ꦢ꧀ꦫꦶꦪꦴꦤꦶ ꦥꦚ꧀ꦕꦶꦤ꧀ꦢ꧀ꦫꦶꦪꦁ, ꦱꦠ꧀ꦠ ꦒꦺꦴꦢꦴꦮꦫꦶꦪꦺꦴ ꦱꦠ꧀ꦠꦒꦺꦴꦢꦴꦮꦫꦁ.

ꦢꦶꦒꦸꦆꦕ꧀ꦕꦤꦺꦤ ꦏ꧀ꦮꦠ꧀ꦡꦺꦴ? ꦢꦶꦒꦸꦱ꧀ꦱꦺ ꦏꦠ꧀ꦠꦁ.

꧓꧒꧖. , ꧓꧔꧑. ꦈꦨꦺ ꦠꦥ꧀ꦥꦸꦫꦶꦱꦴ.

ꦈꦨꦺ ꦢꦶꦒꦸꦏꦩ꧀ꦩꦣꦴꦫꦪꦱꦩꦴꦱꦴ ꦠꦥ꧀ꦥꦸꦫꦶꦱꦱꦚ꧀ꦚꦴ ꦲꦺꦴꦤ꧀ꦠꦶ.

ꦤ ꦧ꧀ꦫꦴꦲ꧀ꦩꦟꦺꦴ ꦄꦧ꧀ꦫꦴꦲ꧀ꦩꦟꦺꦴ, ꦤ ꦮꦱꦭꦺꦴ ꦄꦮꦱꦭꦺꦴ, ꦤ ꦨꦶꦏ꧀ꦑꦸ ꦄꦨꦶꦏ꧀ꦑꦸ, ꦤ ꦥꦚ꧀ꦕꦮꦱ꧀ꦱꦁ ꦄꦥꦚ꧀ꦕꦮꦱ꧀ꦱꦁ, ꦤ ꦥꦚ꧀ꦕꦥꦹꦭꦷ ꦄꦥꦚ꧀ꦕꦥꦹꦭꦷ, ꦤ ꦱꦠ꧀ꦠꦒꦺꦴꦢꦴꦮꦫꦁꦄꦱꦠ꧀ꦠꦒꦺꦴꦢꦴꦮꦫꦁ, ꦤ ꦢꦱꦒꦮꦁ ꦄꦢꦱꦒꦮꦁ, ꦤ ꦥꦚ꧀ꦕꦒꦮꦁ ꦄꦥꦚ꧀ꦕꦒꦮꦁ.

ꦠꦥ꧀ꦥꦸꦫꦶꦱꦆꦕ꧀ꦕꦤꦺꦤ ꦏ꧀ꦮꦠ꧀ꦡꦺꦴ? ꦄꦠ꧀ꦠꦁ ꦤꦱ꧀ꦱ ꦠꦥ꧀ꦥꦸꦫꦶꦱꦺ.

꧓꧒꧗. , ꧓꧕꧑. ꦄꦩꦴꦢꦪꦺꦴ ꦥꦫꦥꦢꦺꦨꦶ.

ꦠꦴ ꦄꦩꦴꦢꦪꦺꦴ ꦤꦴꦩꦺꦲꦶ ꦥꦫꦥꦢꦺꦨꦶ ꦪꦢꦴ ꦱꦩꦱ꧀ꦪꦤ꧀ꦠꦺ, ꦠꦢꦴ ꦱꦺꦴ ꦱꦩꦴꦱꦺꦴ ꦠꦥ꧀ꦥꦸꦫꦶꦱꦱꦚ꧀ꦚꦺꦴ ꦲꦺꦴꦠꦶ.

ꦨꦹꦩꦶꦁ ꦒꦠꦺꦴ ꦨꦹꦩꦶꦒꦠꦺꦴ, ꦱꦧ꧀ꦧꦫꦠ꧀ꦠꦶꦁ ꦱꦺꦴꦨꦟꦺꦴ ꦱꦧ꧀ꦧꦫꦠ꧀ꦠꦶꦱꦺꦴꦨꦟꦺꦴ. ꦄꦥꦴꦪꦁ ꦒꦠꦺꦴ ꦄꦥꦴꦪꦒꦠꦺꦴ, ꦆꦱ꧀ꦱꦫꦺꦤ ꦏꦠꦁ ꦆꦱ꧀ꦱꦫꦏꦠꦁ, ꦱꦭ꧀ꦭꦺꦤ ꦮꦶꦢ꧀ꦣꦺꦴ ꦱꦭ꧀ꦭꦮꦶꦢ꧀ꦣꦺꦴ, ꦏꦡꦶꦤꦱ꧀ꦱ ꦢꦸꦱ꧀ꦱꦁ ꦏꦡꦶꦤꦢꦸꦱ꧀ꦱꦁ, ꦄꦴꦒꦤ꧀ꦠꦸꦏꦱ꧀ꦱ ꦨꦠ꧀ꦠꦁ ꦄꦴꦒꦤ꧀ꦠꦸꦏꦨꦠ꧀ꦠꦁ, ꦩꦺꦡꦸꦤꦴ ꦄꦥꦺꦠꦺꦴ ꦩꦺꦡꦸꦤꦴꦥꦺꦠꦺꦴ, ꦕꦺꦴꦫꦴ ꦨꦪꦁ ꦕꦺꦴꦫꦨꦪꦁ, ꦫꦚ꧀ꦚꦺꦴ ꦥꦸꦠ꧀ꦠꦺꦴ ꦫꦴꦗꦥꦸꦠ꧀ꦠꦺꦴ, ꦣꦚ꧀ꦚꦴꦤꦁ ꦫꦴꦱꦶ ꦣꦚ꧀ꦚꦫꦴꦱꦶ, ꦫꦹꦥꦺ ꦱꦚ꧀ꦚꦴ ꦫꦹꦥꦱꦚ꧀ꦚꦴ, ꦱꦁꦱꦴꦫꦺ ꦢꦸꦏ꧀ꦑꦁ ꦱꦁꦱꦴꦫꦢꦸꦏ꧀ꦑꦁ.

꧓꧒꧘. , ꧓꧕꧒. ꦄꦚ꧀ꦚꦥꦢꦠ꧀ꦡꦺꦱꦸ ꦧꦲꦸꦧ꧀ꦧꦷꦲꦶ.

ꦄꦚ꧀ꦚꦺꦱꦁ ꦥꦢꦴꦤꦁ ꦄꦠ꧀ꦡꦺꦱꦸ ꦢ꧀ꦮꦺ ꦤꦴꦩꦴꦤꦶ ꦧꦲꦹꦤꦶ ꦤꦴꦩꦴꦤꦶ ꦪꦢꦴ ꦱꦩꦱ꧀ꦪꦤ꧀ꦠꦺ, ꦠꦢꦴ ꦱꦺꦴ ꦱꦩꦴꦱꦺꦴ ꦧꦲꦸꦧ꧀ꦧꦷꦲꦶ ꦱꦚ꧀ꦚꦺꦴ ꦲꦺꦴꦠꦶ.

ꦄꦴꦒꦠꦴ ꦱꦩꦟꦴ ꦆꦩꦁ ꦱꦔ꧀ꦓꦴꦫꦴꦩꦁ ꦱꦺꦴꦪꦁ ꦄꦴꦒꦠꦱꦩꦟꦺꦴ, ꦱꦔ꧀ꦓꦴꦫꦴꦩꦺꦴ. ꦗꦶꦠꦴꦤꦶ ꦆꦤ꧀ꦢ꧀ꦫꦶꦪꦴꦤꦶ ꦄꦤꦺꦤ ꦱꦩꦟꦺꦤ ꦱꦺꦴꦪꦁ ꦗꦶꦠꦶꦤ꧀ꦢ꧀ꦫꦶꦪꦺꦴ, ꦱꦩꦟꦺꦴ. ꦢꦶꦤ꧀ꦤꦺꦴ ꦱꦸꦔ꧀ꦏꦺꦴ ꦪꦱ꧀ꦱ ꦫꦚ꧀ꦚꦺꦴ ꦱꦺꦴꦪꦁ ꦢꦶꦤ꧀ꦤꦱꦸꦔ꧀ꦏꦺꦴ, ꦫꦴꦗꦴ. ꦤꦶꦒ꧀ꦒꦠꦴ ꦗꦤꦴ ꦄꦱ꧀ꦩꦴ ꦒꦴꦩꦴ ꦱꦺꦴꦪꦁ ꦤꦶꦒ꧀ꦒꦠꦗꦤꦺꦴ, ꦒꦴꦩꦺꦴ. ꦖꦶꦤ꧀ꦤꦺꦴ ꦲꦠ꧀ꦠꦺꦴ ꦪꦱ꧀ꦱ ꦥꦸꦫꦶꦱꦱ꧀ꦱ ꦱꦺꦴꦪꦁ ꦖꦶꦤ꧀ꦤꦲꦠ꧀ꦡꦺꦴ, ꦥꦸꦫꦶꦱꦺꦴ. ꦱꦩ꧀ꦥꦤ꧀ꦤꦴꦤꦶ ꦱꦱ꧀ꦱꦴꦤꦶ ꦪꦱ꧀ꦩꦶꦁ ꦗꦤꦥꦢꦺ ꦱꦺꦴꦪꦁ ꦱꦩ꧀ꦥꦤ꧀ꦤꦱꦱ꧀ꦱꦺꦴ, ꦗꦤꦥꦢꦺꦴ.

ꦤꦶꦒ꧀ꦫꦺꦴꦣꦱ꧀ꦱ ꦥꦫꦶꦩꦟ꧀ꦝꦭꦺꦴ ꦤꦶꦒ꧀ꦫꦺꦴꦣꦥꦫꦶꦩꦟ꧀ꦝꦭꦺꦴ, ꦤꦶꦒ꧀ꦫꦺꦴꦣꦥꦫꦶꦩꦟ꧀ꦝꦭꦺꦴ ꦆꦮ ꦥꦫꦶꦩꦟ꧀ꦝꦭꦺꦴ ꦪꦺꦴ ꦫꦴꦗꦏꦸꦩꦴꦫꦺꦴ ꦱꦺꦴꦪꦁ ꦤꦶꦒ꧀ꦫꦺꦴꦣꦥꦫꦶꦩꦟ꧀ꦝꦭꦺꦴ. ꦄꦡ ꦮꦴ ꦤꦶꦒ꧀ꦫꦺꦴꦣꦥꦫꦶꦩꦟ꧀ꦝꦭꦺꦴ ꦆꦮ ꦥꦫꦶꦩꦟ꧀ꦝꦭꦺꦴ ꦪꦱ꧀ꦱ ꦫꦴꦗꦏꦸꦩꦴꦫꦱ꧀ꦱ ꦱꦺꦴꦪꦁ ꦤꦶꦒ꧀ꦫꦺꦴꦣꦥꦫꦶꦩꦟ꧀ꦝꦭꦺꦴ, ꦫꦴꦗꦏꦸꦩꦴꦫꦺꦴ.

ꦕꦏ꧀ꦑꦸꦤꦺꦴ ꦨꦹꦠꦺꦴ ꦕꦏ꧀ꦑꦸꦨꦹꦠꦺꦴ, ꦕꦏ꧀ꦑꦸꦨꦹꦠꦺꦴ ꦆꦮ ꦨꦹꦠꦺꦴ ꦪꦺꦴ ꦨꦒꦮꦴ ꦱꦺꦴꦪꦁ ꦕꦏ꧀ꦑꦸꦨꦹꦠꦺꦴ, ꦨꦒꦮꦴ.

ꦱꦸꦮꦟ꧀ꦟꦱ꧀ꦱ ꦮꦟ꧀ꦟꦺꦴ ꦱꦸꦮꦟ꧀ꦟꦮꦟ꧀ꦟꦺꦴ, ꦱꦸꦮꦟ꧀ꦟꦮꦟ꧀ꦟꦺꦴ ꦮꦶꦪ ꦮꦟ꧀ꦟꦺꦴ ꦪꦱ꧀ꦱ ꦨꦒꦮꦠꦺꦴ ꦱꦺꦴꦪꦁ ꦱꦸꦮꦟ꧀ꦟꦮꦟ꧀ꦟꦺꦴ, ꦨꦒꦮꦴ.

ꦧ꧀ꦫꦲ꧀ꦩꦸꦤꦺꦴ ꦱꦫꦺꦴ ꦧ꧀ꦫꦲ꧀ꦩꦱ꧀ꦱꦫꦺꦴ, ꦧ꧀ꦫꦲ꧀ꦩꦱ꧀ꦱꦫꦺꦴ ꦮꦶꦪ ꦱꦫꦺꦴ ꦪꦱ꧀ꦱ ꦨꦒꦮꦠꦺꦴ ꦱꦺꦴꦪꦁ ꦧ꧀ꦫꦲ꧀ꦩꦱ꧀ꦱꦫꦺꦴ, ꦨꦒꦮꦴ.

ꦱꦪꦁ ꦥꦠꦶꦠ ꦥꦟ꧀ꦟ ꦥꦸꦥ꧀ꦦꦦꦭꦮꦴꦪꦸꦠꦺꦴꦪꦴꦲꦴꦫꦴꦠꦶ ꦥꦟ꧀ꦟꦚ꧀ꦕ ꦥꦸꦥ꧀ꦦꦚ꧀ꦕ ꦦꦭꦚ꧀ꦕ ꦥꦟ꧀ꦟꦥꦸꦥ꧀ꦦꦦꦭꦴꦤꦶ, ꦱꦪꦩꦺꦮ ꦥꦠꦶꦠꦴꦤꦶ ꦱꦪꦁꦥꦠꦶꦠꦴꦤꦶ, ꦱꦪꦁꦥꦠꦶꦠꦴꦤꦶ ꦕ ꦠꦴꦤꦶ ꦥꦟ꧀ꦟꦥꦸꦥ꧀ꦦꦦꦭꦴꦤꦶ ꦕꦺꦠꦶ ꦱꦪꦁꦥꦠꦶꦠꦥꦟ꧀ꦟꦥꦸꦥ꧀ꦦꦦꦭꦴꦤꦶ ꦮꦴꦪꦸ ꦕ ꦠꦺꦴꦪꦚ꧀ꦕ ꦮꦴꦪꦸꦠꦺꦴꦪꦴꦤꦶ, ꦱꦪꦁꦥꦠꦶꦠꦥꦟ꧀ꦟꦥꦸꦥ꧀ꦦꦦꦭꦴꦤꦶ ꦕ ꦮꦴꦪꦸꦠꦺꦴꦪꦴꦤꦶ ꦕ ꦱꦪꦁꦥꦠꦶꦠꦥꦟ꧀ꦟꦥꦸꦥ꧀ꦦꦦꦭꦮꦴꦪꦸꦠꦺꦴꦪꦴꦤꦶ. ꦱꦪꦁꦥꦠꦶꦠꦥꦟ꧀ꦟꦥꦸꦥ꧀ꦦꦦꦭꦮꦴꦪꦸꦠꦺꦴꦪꦴꦤꦶ ꦄꦴꦲꦴꦫꦴ ꦪꦺꦱꦁ ꦠꦺ ꦱꦪꦁꦥꦠꦶꦠꦥꦟ꧀ꦟꦥꦸꦥ꧀ꦦꦦꦭꦮꦴꦪꦸꦠꦺꦴꦪꦴꦲꦴꦫꦴ, ꦆꦱꦪꦺꦴ. ꦪꦩꦺꦠ꧀ꦡ ꦮꦠ꧀ꦠꦧ꧀ꦧꦁ, ꦠꦁ ꦲꦺꦛ꧀ꦜꦴ ꦮꦸꦠ꧀ꦠꦩꦺꦮ. ꦄꦪꦁ ꦥꦤ ꦢ꧀ꦮꦤ꧀ꦢꦏꦩ꧀ꦩꦣꦴꦫꦪꦒꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦥꦲꦸꦧ꧀ꦧꦷꦲꦶ.

ꦄꦡ ꦮꦴ – ꦱꦪꦁꦥꦠꦶꦠꦥꦟ꧀ꦟꦥꦸꦥ꧀ꦦꦦꦭꦮꦴꦪꦸꦠꦺꦴꦪꦺꦲꦶ ꦄꦴꦲꦴꦫꦴ ꦪꦺꦱꦁ ꦠꦺ ꦱꦪꦁꦥꦠꦶꦠꦥꦟ꧀ꦟꦥꦸꦥ꧀ꦦꦦꦭꦮꦴꦪꦸꦠꦺꦴꦪꦴꦲꦴꦫꦴ. ꦄꦪꦁ ꦥꦤ ꦨꦶꦤ꧀ꦤꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦤꦴꦤꦴ ꦢꦸꦩꦥꦠꦶꦠ ꦥꦸꦥ꧀ꦦꦮꦴꦱꦶꦠ ꦱꦴꦤꦹꦠꦶ ꦤꦴꦤꦴꦥꦏꦴꦫꦴ ꦢꦸꦩꦴ ꦤꦴꦤꦴꦢꦸꦩꦴ, ꦤꦴꦤꦴꦢꦸꦩꦺꦲꦶ ꦥꦠꦶꦠꦴꦤꦶ ꦤꦴꦤꦴꦢꦸꦩꦥꦠꦶ ꦠꦴꦤꦶ, ꦤꦴꦤꦴꦢꦸꦩꦥꦠꦶꦠꦴꦤꦶ ꦕ ꦠꦴꦤꦶ ꦥꦸꦥ꧀ꦦꦴꦤꦶ ꦕꦺꦠꦶ ꦤꦴꦤꦴꦢꦸꦩꦥꦠꦶꦠꦥꦸꦥ꧀ꦦꦴꦤꦶ, ꦤꦴꦤꦴꦢꦸꦩꦥꦠꦶꦠꦥꦸꦥ꧀ꦦꦺꦲꦶ ꦮꦴꦱꦶꦠꦴ ꦤꦴꦤꦴꦢꦸꦩꦥꦠꦶꦠꦥꦸꦥ꧀ꦦꦮꦴꦱꦶꦠꦴ, ꦤꦴꦤꦴꦢꦸꦩꦥꦠꦶꦠꦥꦸꦥ꧀ꦦꦮꦴꦱꦶꦠꦴ ꦱꦴꦤꦹ ꦪꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦱꦺꦴꦪꦁ ꦤꦴꦤꦴꦢꦸꦩꦥꦠꦶꦠꦥꦸꦥ꧀ꦦꦮꦴꦱꦶꦠꦱꦴꦤꦸ, ꦥꦧ꧀ꦧꦠꦫꦴꦗꦴ. ꦄꦪꦁ ꦥꦤ ꦏꦩ꧀ꦩꦣꦴꦫꦪꦠꦥ꧀ꦥꦸꦫꦶꦱꦒꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦄꦡ ꦮꦴ – ꦮꦴꦱꦶꦠꦴ ꦱꦴꦤꦹ ꦮꦴꦱꦶꦠꦱꦴꦤꦸ, ꦱꦴꦥꦺꦏ꧀ꦑꦠ꧀ꦠꦺ ꦱꦠꦶꦥꦶ ꦒꦩꦏꦠ꧀ꦠꦴ ꦱꦩꦴꦱꦺꦴ. ꦤꦴꦤꦴꦢꦸꦩꦥꦠꦶꦠꦥꦸꦥ꧀ꦦꦺꦲꦶ ꦮꦴꦱꦶꦠꦱꦴꦤꦹ ꦪꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦱꦺꦴꦪꦁ ꦤꦴꦤꦴꦢꦸꦩꦥꦠꦶꦠꦥꦸꦥ꧀ꦦꦮꦴꦱꦶꦠꦱꦴꦤꦸ, ꦥꦧ꧀ꦧꦠꦫꦴꦗꦴ. ꦄꦪꦁ ꦥꦤ ꦨꦶꦤ꧀ꦤꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦧ꧀ꦪꦴꦭꦩ꧀ꦧꦩ꧀ꦧꦸꦣꦫꦧꦶꦤ꧀ꦢꦸꦕꦸꦩ꧀ꦧꦶꦠꦏꦹꦛꦺꦴꦠꦶ ꦄꦩ꧀ꦧꦸꦁ ꦣꦴꦫꦺꦠꦷꦠꦶ ꦄꦩ꧀ꦧꦸꦣꦫꦺꦴ, ꦏꦺꦴ ꦱꦺꦴ? ꦥꦗ꧀ꦗꦸꦤ꧀ꦤꦺꦴ. ꦮꦶꦮꦶꦣꦴ ꦄꦴꦭꦩ꧀ꦧꦺꦴ ꦧ꧀ꦪꦴꦭꦩ꧀ꦧꦺꦴ, ꦧ꧀ꦪꦴꦭꦩ꧀ꦧꦺꦴ ꦕ ꦱꦺꦴ ꦄꦩ꧀ꦧꦸꦣꦫꦺꦴ ꦕꦴꦠꦶ ꦧ꧀ꦪꦴꦭꦩ꧀ꦧꦩ꧀ꦧꦸꦣꦫꦺꦴ, ꦧ꧀ꦪꦴꦭꦩ꧀ꦧꦩ꧀ꦧꦸꦣꦫꦱ꧀ꦱ ꦧꦶꦤ꧀ꦢꦹ ꦧ꧀ꦪꦴꦭꦩ꧀ꦧꦩ꧀ꦧꦸꦣꦫꦧꦶꦤ꧀ꦢꦹ, ꦧ꧀ꦪꦴꦭꦩ꧀ꦧꦩ꧀ꦧꦸꦣꦫꦧꦶꦤ꧀ꦢꦹꦲꦶ ꦕꦸꦩ꧀ꦧꦶꦠꦺꦴ ꦧ꧀ꦪꦴꦭꦩ꧀ꦧꦩ꧀ꦧꦸꦣꦫꦧꦶꦤ꧀ꦢꦸꦕꦸꦩ꧀ꦧꦶꦠꦺꦴ, ꦧ꧀ꦪꦴꦭꦩ꧀ꦧꦩ꧀ꦧꦸꦫꦺꦧꦶꦤ꧀ꦢꦸꦕꦸꦩ꧀ꦧꦶꦠꦺꦴ ꦏꦹꦛꦺꦴ ꦪꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦱꦺꦴꦪꦁ ꦧ꧀ꦪꦴꦭꦩ꧀ꦧꦩ꧀ꦧꦸꦣꦫꦧꦶꦤ꧀ꦢꦸꦕꦸꦩ꧀ꦧꦶꦠꦏꦹꦛꦺꦴ. ꦄꦪꦁ ꦥꦤ ꦏꦩ꧀ꦩꦣꦴꦫꦪꦠꦥ꧀ꦥꦸꦫꦶꦱꦒꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦄꦡ ꦮꦴ – ꦕꦸꦩ꧀ꦧꦶꦠꦺꦴ ꦏꦹꦛꦺꦴ ꦕꦸꦩ꧀ꦧꦶꦠꦏꦹꦛꦺꦴ, ꦱꦴꦥꦺꦏ꧀ꦑꦠ꧀ꦠꦺ ꦱꦠꦶꦥꦶ ꦒꦩꦏꦠ꧀ꦠꦴ ꦱꦩꦴꦱꦺꦴ. ꦧ꧀ꦪꦴꦭꦩ꧀ꦧꦩ꧀ꦧꦸꦣꦫꦧꦶꦤ꧀ꦢꦹꦲꦶ ꦕꦸꦩ꧀ꦧꦶꦠꦏꦹꦛꦺꦴ ꦪꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦱꦺꦴꦪꦁ ꦧ꧀ꦪꦴꦭꦩ꧀ꦧꦩ꧀ꦧꦸꦣꦫꦧꦶꦤ꧀ꦢꦸꦕꦸꦩ꧀ꦧꦶꦠꦏꦹꦛꦺꦴ. ꦄꦪꦁ ꦥꦤ ꦨꦶꦤ꧀ꦤꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦄꦩꦶꦠ ꦧꦭ ꦥꦫꦏ꧀ꦏꦩꦗꦸꦠꦷꦠꦶ ꦤ ꦩꦶꦠꦴ ꦄꦩꦶꦠꦴ, ꦧꦭꦚ꧀ꦕ ꦥꦫꦏ꧀ꦏꦩꦺꦴ ꦕ ꦗꦸꦠꦶ ꦕ ꦧꦭꦥꦫꦏ꧀ꦏꦩꦗꦸꦠꦶꦪꦺꦴ, ꦄꦩꦶꦠꦴ ꦧꦭꦥꦫꦏ꧀ꦏꦩꦗꦸꦠꦶꦪꦺꦴ ꦪꦱ꧀ꦱ ꦱꦺꦴꦪꦁ ꦄꦩꦶꦠꦧꦭꦥꦫꦏ꧀ꦏꦩꦗꦸꦠꦶ, ꦄꦪꦁ ꦥꦤ ꦏꦩ꧀ꦩꦣꦴꦫꦪꦢ꧀ꦮꦤ꧀ꦢꦒꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦥꦷꦟꦺꦴꦫꦏ꧀ꦑꦁꦱ ꦧꦴꦲꦹꦠꦶ ꦈꦫꦺꦴ ꦕ ꦄꦏ꧀ꦑꦚ꧀ꦕ ꦄꦁꦱꦺꦴ ꦕ ꦧꦴꦲꦸ ꦕ ꦈꦫꦏ꧀ꦑꦁꦱꦧꦴꦲꦮꦺꦴ, ꦥꦷꦟꦴ ꦈꦫꦏ꧀ꦑꦁꦱꦧꦴꦲꦮꦺꦴ ꦪꦱ꧀ꦱ ꦨꦒꦮꦠꦺꦴ ꦱꦺꦴꦪꦁ ꦥꦷꦟꦺꦴꦫꦏ꧀ꦑꦁꦱꦧꦴꦲꦸ. ꦄꦪꦁ ꦥꦤ ꦢ꧀ꦮꦤ꧀ꦢꦮꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦥꦷꦟ ꦒꦟ꧀ꦝ ꦮꦢꦤ ꦡꦤꦹꦫꦸꦗꦓꦤꦴꦠꦶ ꦒꦟ꧀ꦝꦺꦴ ꦕ ꦮꦢꦤꦚ꧀ꦕ ꦡꦤꦺꦴ ꦕ ꦈꦴꦫꦸ ꦕ ꦗꦓꦤꦚ꧀ꦕ ꦒꦟ꧀ꦝꦮꦢꦤꦡꦤꦹꦫꦸꦗꦓꦤꦴ, ꦥꦷꦟꦴ ꦒꦟ꧀ꦝꦮꦢꦤꦡꦤꦹꦫꦸꦗꦓꦤꦴ ꦪꦱ꧀ꦱꦴ ꦱꦴꦪꦁ ꦥꦷꦟꦒꦟ꧀ꦝꦮꦢꦤꦡꦤꦹꦫꦸꦗꦓꦤꦴ. ꦄꦪꦩ꧀ꦥꦶ ꦢ꧀ꦮꦤ꧀ꦢꦒꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦮꦮꦫ ꦱꦸꦫꦴꦱꦸꦫ ꦒꦫꦸꦝ ꦩꦤꦸꦗ ꦨꦸꦗꦒ ꦒꦤ꧀ꦣꦧ꧀ꦧ ꦩꦏꦸꦛ ꦏꦹꦛ ꦕꦸꦩ꧀ꦧꦶꦠ ꦱꦺꦭꦱꦔ꧀ꦓꦛ꧀ꦛꦶꦠ ꦕꦫꦟꦺꦴꦠꦶ ꦱꦸꦫꦴ ꦕ ꦄꦱꦸꦫꦴ ꦕ ꦒꦫꦸꦝꦴ ꦕ ꦩꦤꦸꦗꦴ ꦕ ꦨꦸꦗꦒꦴ ꦕ ꦒꦤ꧀ꦣꦧ꧀ꦧꦴ ꦕ ꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦴ, ꦥꦮꦫꦴ ꦕ ꦠꦺ ꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒ ꦒꦤ꧀ꦣꦧ꧀ꦧꦴ ꦕꦺꦠꦶ ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦴ, ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦴꦤꦁ ꦩꦏꦸꦛꦴꦤꦶ ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦴꦤꦶ, ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦴꦤꦁ ꦏꦹꦛꦴꦤꦶ ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦏꦹꦛꦴꦤꦶ, ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦏꦹꦛꦺꦱꦸ ꦕꦸꦩ꧀ꦧꦶꦠꦴ ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦏꦹꦛꦕꦸꦩ꧀ꦧꦶꦠꦴ, ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦏꦹꦛꦕꦸꦩ꧀ꦧꦶꦠꦴ ꦕ ꦠꦺ ꦱꦺꦭꦴ ꦕꦴꦠꦶ ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦏꦹꦛꦕꦸꦩ꧀ꦧꦶꦠꦱꦺꦭꦴ, ꦥꦮꦫꦱꦸꦫꦴꦱꦸꦫ ꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦏꦹꦛꦕꦸꦩ꧀ꦧꦶꦠꦱꦺꦭꦺꦲꦶ ꦱꦔ꧀ꦓꦛ꧀ꦛꦶꦠꦴ ꦥꦮꦫꦱꦸꦫꦴꦱꦸꦫ ꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦏꦹꦛꦕꦸꦩ꧀ꦧꦶꦠꦱꦺꦭꦱꦔ꧀ꦓꦛ꧀ꦛꦶꦠꦴ, ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦏꦹꦛꦕꦸꦩ꧀ꦧꦶꦠꦱꦺꦭꦱꦔ꧀ꦓꦛ꧀ꦛꦶꦠꦴ ꦕꦫꦟꦴ ꦪꦱ꧀ꦱ ꦠꦡꦴꦒꦠꦱ꧀ꦱ ꦱꦺꦴꦪꦁ ꦥꦮꦫꦱꦸꦫꦴꦱꦸꦫꦒꦫꦸꦝꦩꦤꦸꦗꦨꦸꦗꦒꦒꦤ꧀ꦣꦧ꧀ꦧꦩꦏꦸꦛꦏꦹꦛꦕꦸꦩ꧀ꦧꦶꦠꦱꦺꦭꦱꦔ꧀ꦓꦛ꧀ꦛꦶꦠꦕꦫꦟꦺꦴ, ꦠꦡꦴꦒꦠꦺꦴ, ꦄꦪꦁ ꦥꦤ ꦢ꧀ꦮꦤ꧀ꦢꦏꦩ꧀ꦩꦣꦴꦫꦪꦠꦥ꧀ꦥꦸꦫꦶꦱꦒꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦄꦡ ꦮꦴ–ꦱꦔ꧀ꦓꦛ꧀ꦛꦶꦠꦴ ꦕꦫꦟꦴ ꦱꦔ꧀ꦓꦛ꧀ꦛꦶꦠꦕꦫꦟꦴ, ꦱꦴꦥꦺꦏ꧀ꦑꦠ꧀ꦠꦺ ꦱꦠꦶꦥꦶ ꦒꦩꦏꦠ꧀ꦠꦴ ꦱꦩꦴꦱꦺꦴ. ꦥꦮꦫꦱꦸꦫꦴꦱꦸꦫ ꦒꦫꦸꦝꦩꦤꦸꦗꦨꦸꦗꦒ ꦒꦤ꧀ꦣꦧ꧀ꦧꦩꦏꦸꦛꦏꦹꦛꦕꦸꦩ꧀ꦧꦶꦠꦱꦺꦭꦺꦲꦶ ꦱꦔ꧀ꦓꦛ꧀ꦛꦶꦠꦕꦫꦟꦴ ꦪꦱ꧀ꦱ ꦠꦡꦴꦒꦠꦱ꧀ꦱ ꦱꦺꦴꦪꦁ ꦥꦮꦫꦱꦸꦫꦴꦱꦸꦫꦒꦫꦸꦝ ꦩꦤꦸꦗꦨꦸꦗꦒ ꦒꦤ꧀ꦣꦧ꧀ꦧꦩꦏꦸꦛꦏꦹꦛꦕꦸꦩ꧀ꦧꦶꦠꦱꦺꦭꦱꦔ꧀ꦓꦛ꧀ꦛꦶꦠ ꦕꦫꦟꦺꦴ. ꦄꦪꦁ ꦥꦤ ꦨꦶꦤ꧀ꦤꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦕꦠꦸꦢ꧀ꦢꦶꦱꦺꦴꦠꦶ ꦕꦠꦱ꧀ꦱꦺꦴ ꦢꦶꦱꦴ ꦪꦱ꧀ꦱ ꦱꦺꦴꦪꦁ ꦕꦠꦸꦢ꧀ꦢꦶꦱꦺꦴ, ꦨꦒꦮꦴ.

ꦥꦚ꧀ꦕꦕꦏ꧀ꦑꦹꦠꦶ ꦥꦚ꧀ꦕ ꦕꦏ꧀ꦑꦹꦤꦶ ꦪꦱ꧀ꦱ ꦠꦡꦴꦒꦠꦱ꧀ꦱ ꦱꦺꦴꦪꦁ ꦥꦚ꧀ꦕꦕꦏ꧀ꦑꦸ, ꦠꦡꦴꦒꦠꦺꦴ.

ꦢꦱꦧꦭꦺꦴꦠꦶ ꦢꦱ ꦧꦭꦴꦤꦶ ꦪꦱ꧀ꦱ ꦱꦺꦴꦪꦁ ꦢꦱꦧꦭꦺꦴ, ꦨꦒꦮꦴ.

ꦄꦤꦤ꧀ꦠꦚꦴꦟꦺꦴꦠꦶ ꦤꦱ꧀ꦱ ꦄꦤ꧀ꦠꦺꦴ ꦄꦤꦤ꧀ꦠꦁ, ꦄꦤꦤ꧀ꦠꦁ ꦚꦴꦟꦁ ꦪꦱ꧀ꦱ ꦠꦡꦴꦒꦠꦱ꧀ꦱ ꦱꦺꦴꦪꦁ ꦄꦤꦤ꧀ꦠꦚꦴꦟꦺꦴ, ꦠꦡꦴꦒꦠꦺꦴ.

ꦄꦩꦶꦠ ꦓꦤ ꦱꦫꦷꦫꦺꦴꦠꦶ ꦤ ꦩꦶꦠꦁ ꦄꦩꦶꦠꦁ, ꦓꦤꦁ ꦌꦮ ꦱꦫꦷꦫꦁ ꦓꦤꦱꦫꦷꦫꦁ, ꦄꦩꦶꦠꦁ ꦓꦤꦱꦫꦷꦫꦁ ꦪꦱ꧀ꦱ ꦠꦡꦴꦒꦠꦱ꧀ꦱ ꦱꦺꦴꦪꦁ ꦄꦩꦶꦠꦓꦤꦱꦫꦷꦫꦺꦴ, ꦠꦡꦴꦒꦠꦺꦴ.

ꦄꦩꦶꦠ ꦧꦭ ꦥꦫꦏ꧀ꦏꦩ ꦥꦠ꧀ꦠꦺꦴꦠꦶ ꦤ ꦩꦶꦠꦴ ꦄꦩꦶꦠꦴ, ꦧꦭꦚ꧀ꦕ ꦥꦫꦏ꧀ꦏꦩꦺꦴ ꦕ ꦧꦭꦥꦫꦏ꧀ꦏꦩꦴ, ꦄꦩꦶꦠꦴ ꦌꦮ ꦧꦭꦥꦫꦏ꧀ꦏꦩꦴ ꦄꦩꦶꦠꦧꦭꦥꦫꦏ꧀ꦏꦩꦴ, ꦄꦩꦶꦠꦧꦭꦥꦫꦏ꧀ꦏꦩꦴ ꦥꦠ꧀ꦠꦴ ꦪꦺꦤ ꦱꦺꦴꦪꦁ ꦄꦩꦶꦠꦧꦭꦥꦫꦏ꧀ꦏꦩꦥꦠ꧀ꦠꦺꦴ, ꦨꦒꦮꦴ. ꦄꦪꦁ ꦥꦤ ꦏꦩ꧀ꦩꦣꦴꦫꦪꦢ꧀ꦮꦤ꧀ꦢꦒꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦩꦠ꧀ꦠ ꦨꦩꦫ ꦒꦟ ꦕꦸꦩ꧀ꦧꦶꦠ ꦮꦶꦏꦱꦶꦠꦥꦸꦥ꧀ꦦꦮꦭ꧀ꦭꦶꦤꦴꦒꦫꦸꦏ꧀ꦑꦺꦴ ꦥꦱꦺꦴꦨꦶꦠ ꦏꦤ꧀ꦢꦫꦺꦴꦠꦶ ꦩꦠ꧀ꦠꦴ ꦌꦮ ꦨꦩꦫꦴ ꦩꦠ꧀ꦠꦨꦩꦫꦴ, ꦩꦠ꧀ꦠꦨꦩꦫꦴꦤꦁ ꦒꦟꦴ ꦩꦠ꧀ꦠꦨꦩꦫꦒꦟꦴ, ꦩꦠ꧀ꦠꦨꦩꦫꦒꦟꦺꦲꦶ ꦕꦸꦩ꧀ꦧꦶꦠꦴꦤꦶ ꦩꦠ꧀ꦠꦨꦩꦫꦟꦕꦸꦩ꧀ꦧꦶꦠꦴꦤꦶ, ꦮꦶꦏꦱꦶꦠꦴꦤꦶ ꦌꦮ ꦥꦸꦥ꧀ꦦꦴꦤꦶ ꦮꦶꦏꦱꦶꦠꦥꦸꦥ꧀ꦦꦴꦤꦶ, ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦴꦤꦶ ꦮꦶꦏꦱꦶꦠꦥꦸꦥ꧀ꦦꦴꦤꦶ ꦪꦺꦱꦁ ꦠꦺꦲꦶ ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦮꦶꦏꦱꦶꦠꦥꦸꦥ꧀ꦦꦴ, ꦮꦭ꧀ꦭꦶ ꦕ ꦤꦴꦒꦫꦸꦏ꧀ꦑꦺꦴ ꦕ ꦩꦭ꧀ꦭꦶꦤꦴꦒꦫꦸꦏ꧀ꦑꦴ, ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦮꦶꦏꦱꦶꦠꦥꦸꦥ꧀ꦦꦴ ꦕ ꦠꦺ ꦮꦭ꧀ꦭꦶꦤꦴꦒꦫꦸꦏ꧀ꦑꦴ ꦕꦺꦠꦶ ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦮꦶꦏꦱꦶꦠꦥꦸꦥ꧀ꦦꦮꦭ꧀ꦭꦶꦤꦴꦒꦫꦸꦏ꧀ꦑꦴ, ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦮꦶꦏꦱꦶꦠꦥꦸꦥ꧀ꦦꦮꦭ꧀ꦭꦶꦤꦴꦒꦫꦸꦏ꧀ꦑꦺꦲꦶ ꦈꦥꦱꦺꦴꦨꦶꦠꦴꦤꦶ ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦮꦶꦏꦱꦶꦠꦥꦸꦥ꧀ꦦꦮꦭ꧀ꦭꦶꦤꦴꦒꦫꦸꦏ꧀ꦑꦺꦴ ꦥꦱꦺꦴꦨꦶꦠꦴꦤꦶ, ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦮꦶꦏꦱꦶꦠꦥꦸꦥ꧀ꦦꦮꦭ꧀ꦭꦶꦤꦴꦒꦫꦸꦏ꧀ꦑꦺꦴ ꦥꦱꦺꦴꦨꦶꦠꦴꦤꦶ ꦏꦤ꧀ꦢꦫꦴꦤꦶ ꦪꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦱꦺꦴꦪꦁ ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦮꦶꦏꦱꦶꦠꦥꦸꦥ꧀ꦦ ꦮꦭ꧀ꦭꦶꦤꦴꦒꦫꦸꦏ꧀ꦑꦺꦴ ꦥꦱꦺꦴ ꦨꦶꦠꦏꦤ꧀ꦢꦫꦺꦴ, ꦥꦧ꧀ꦧꦠꦫꦴꦗꦴ. ꦄꦪꦁ ꦥꦤ ꦢ꧀ꦮꦤ꧀ꦢꦏꦩ꧀ꦩꦣꦴꦫꦪꦠꦥ꧀ꦥꦸꦫꦶꦱꦒꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦄꦡ ꦮꦴ–ꦈꦥꦱꦺꦴꦨꦶꦠꦴꦤꦶ ꦏꦤ꧀ꦢꦫꦴꦤꦶ ꦈꦥꦱꦺꦴꦨꦶꦠꦏꦤ꧀ꦢꦫꦴꦤꦶ, ꦱꦴꦥꦺꦏ꧀ꦑꦠ꧀ꦠꦺ ꦱꦠꦶꦥꦶ ꦒꦩꦏꦠ꧀ꦠꦴ ꦱꦩꦴꦱꦺꦴ. ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦮꦶꦏꦱꦶꦠꦥꦸꦥ꧀ꦦꦮꦭ꧀ꦭꦶꦤꦴꦒꦫꦸꦏ꧀ꦑꦺꦲꦶ ꦈꦥꦱꦺꦴꦨꦶꦠꦏꦤ꧀ꦢꦫꦴꦤꦶ ꦪꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦱꦺꦴꦪꦁ ꦩꦠ꧀ꦠꦨꦩꦫꦒꦟꦕꦸꦩ꧀ꦧꦶꦠꦮꦶꦏꦱꦶꦠꦥꦸꦥ꧀ꦦꦮꦭ꧀ꦭꦶꦤꦴꦒꦫꦸꦏ꧀ꦑꦺꦴ ꦥꦱꦺꦴꦨꦶꦠꦏꦤ꧀ꦢꦫꦺꦴ, ꦥꦧ꧀ꦧꦠꦫꦴꦗꦴ. ꦄꦪꦁ ꦥꦤ ꦨꦶꦤ꧀ꦤꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦤꦴꦤꦴ ꦫꦸꦏ꧀ꦑ ꦠꦶꦟ ꦥꦠꦶꦠ ꦥꦸꦥ꧀ꦦꦺꦴꦥꦱꦺꦴꦨꦶꦠ ꦏꦤ꧀ꦢꦫꦺꦴꦠꦶ ꦫꦸꦏ꧀ꦑꦺꦴ ꦕ ꦠꦶꦟꦚ꧀ꦕ ꦫꦸꦏ꧀ꦑꦠꦶꦟꦴꦤꦶ, ꦤꦴꦤꦴ ꦥꦏꦴꦫꦴꦤꦶ ꦌꦮ ꦫꦸꦏ꧀ꦑꦠꦶꦟꦴꦤꦶ ꦤꦴꦤꦴꦫꦸꦏ꧀ꦑꦠꦶꦟꦴꦤꦶ, ꦤꦴꦤꦴꦫꦸꦏ꧀ꦑꦠꦶꦟꦺꦲꦶ ꦥꦠꦶꦠꦴꦤꦶ ꦤꦴꦤꦴꦫꦸꦏ꧀ꦑꦠꦶꦟꦥꦠꦶꦠꦴꦤꦶ, ꦤꦴꦤꦴꦫꦸꦏ꧀ꦑꦠꦶꦟꦥꦠꦶꦠꦴꦤꦶ ꦕ ꦠꦴꦤꦶ ꦥꦸꦥ꧀ꦦꦴꦤꦶ ꦕꦺꦠꦶ ꦤꦴꦤꦴꦫꦸꦏ꧀ꦑꦠꦶꦟꦥꦠꦶꦠꦥꦸꦥ꧀ꦦꦴꦤꦶ, ꦤꦴꦤꦴꦫꦸꦏ꧀ꦑꦠꦶꦟꦥꦠꦶꦠꦥꦸꦥ꧀ꦦꦺꦲꦶ ꦈꦥꦱꦺꦴꦨꦶꦠꦴꦤꦶ ꦤꦴꦤꦴꦫꦸꦏ꧀ꦑꦠꦶꦟꦥꦠꦶꦠ ꦥꦸꦥ꧀ꦦꦺꦴꦥꦱꦺꦴꦨꦶꦠꦴꦤꦶ, ꦤꦴꦤꦴꦫꦸꦏ꧀ꦑꦠꦶꦟꦥꦠꦶꦠꦥꦸꦥ꧀ꦦꦺꦴꦥꦱꦺꦴꦨꦶꦠꦴꦤꦶ ꦏꦤ꧀ꦢꦫꦴꦤꦶ ꦪꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦱꦺꦴꦪꦁ ꦤꦴꦤꦴꦫꦸꦏ꧀ꦑꦠꦶꦟꦥꦠꦶꦠꦥꦸꦥ꧀ꦦꦺꦴꦥꦱꦺꦴꦨꦶꦠꦏꦤ꧀ꦢꦫꦺꦴ, ꦥꦧ꧀ꦧꦠꦫꦴꦗꦴ. ꦄꦪꦁ ꦥꦤ ꦢ꧀ꦮꦤ꧀ꦢꦏꦩ꧀ꦩꦣꦴꦫꦪꦠꦥ꧀ꦥꦸꦫꦶꦱꦒꦧ꧀ꦨꦺꦴ ꦠꦸꦭ꧀ꦪꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦄꦡ ꦮꦴ–ꦈꦥꦱꦺꦴꦨꦶꦠꦴꦤꦶ ꦌꦮ ꦏꦤ꧀ꦢꦫꦴꦤꦶ ꦈꦥꦱꦺꦴꦨꦶꦠꦏꦤ꧀ꦢꦫꦴꦤꦶ, (ꦱꦴꦥꦺꦏ꧀ꦑꦠ꧀ꦠꦺ ꦱꦠꦶꦥꦶ ꦒꦩꦏꦠ꧀ꦠꦴ ꦱꦩꦴꦱꦺꦴ.) ꦤꦴꦤꦴꦫꦸꦏ꧀ꦑꦠꦶꦟꦥꦠꦶꦠꦥꦸꦥ꧀ꦦꦺꦲꦶ ꦈꦥꦱꦺꦴꦨꦶꦠꦏꦤ꧀ꦢꦫꦴꦤꦶ ꦪꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦱꦺꦴꦪꦁ ꦤꦴꦤꦴꦫꦸꦏ꧀ꦑꦠꦶꦟꦥꦠꦶꦠꦥꦸꦥ꧀ꦦꦺꦴꦥꦱꦺꦴꦨꦶꦠꦏꦤ꧀ꦢꦫꦺꦴ, ꦥꦧ꧀ꦧꦠꦫꦴꦗꦴ. ꦄꦪꦁ ꦥꦤ ꦨꦶꦤ꧀ꦤꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦤꦴꦤꦴ ꦩꦸꦱꦭ ꦦꦴꦭ ꦥꦧ꧀ꦧꦠ ꦠꦫꦸ ꦏꦭꦶꦔ꧀ꦒꦫ ꦱꦫ ꦣꦤꦸꦒꦢꦴꦱꦶ ꦠꦺꦴꦩꦫꦲꦠ꧀ꦡꦴꦠꦶ ꦩꦸꦱꦭꦺꦴ ꦕ ꦦꦴꦭꦺꦴ ꦕ ꦥꦧ꧀ꦧꦠꦺꦴ ꦕ ꦠꦫꦸ ꦕ ꦏꦭꦶꦔ꧀ꦒꦫꦺꦴ ꦕ ꦱꦫꦺꦴ ꦕ ꦣꦤꦸ ꦕ ꦒꦢꦴ ꦕꦄꦱꦶ ꦕ ꦠꦺꦴꦩꦫꦺꦴ, ꦕ ꦩꦸꦱꦭꦦꦴꦭꦥꦧ꧀ꦧꦠꦠꦫꦸꦏꦭꦶꦔ꧀ꦒꦫꦱꦫꦣꦤꦸꦒꦢꦴꦱꦶꦠꦺꦴꦩꦫꦴ, ꦤꦴꦤꦴ ꦥꦏꦴꦫꦴ ꦌꦮ ꦩꦸꦱꦭꦦꦴꦭꦥꦧ꧀ꦧꦠꦠꦫꦸꦏꦭꦶꦔ꧀ꦒꦫꦱꦫꦣꦤꦸꦒꦢꦴꦱꦶꦠꦺꦴꦩꦫꦴ ꦤꦴꦤꦴꦩꦸꦱꦭꦦꦴꦭꦥꦧ꧀ꦧꦠꦠꦫꦸꦏꦭꦶꦔ꧀ꦒꦫꦱꦫꦣꦤꦸꦒꦢꦴꦱꦶꦠꦺꦴꦩꦫꦴ, ꦤꦴꦤꦴꦩꦸꦱꦭꦦꦴꦭꦥꦧ꧀ꦧꦠꦠꦫꦸꦏꦭꦶꦔ꧀ꦒꦫꦱꦫꦣꦤꦸꦒꦢꦴꦱꦶꦠꦺꦴꦩꦫꦴ ꦲꦠ꧀ꦡꦺꦱꦸ ꦪꦺꦱꦁ ꦠꦺ ꦤꦴꦤꦴꦩꦸꦱꦭꦦꦴꦭꦥꦧ꧀ꦧꦠꦠꦫꦸꦏꦭꦶꦔ꧀ꦒꦫ ꦱꦫꦣꦤꦸꦒꦢꦴꦱꦶꦠꦺꦴꦩꦫꦲꦠ꧀ꦡꦴ. ꦄꦪꦁ ꦥꦤ ꦢ꧀ꦮꦤ꧀ꦢꦏꦩ꧀ꦩꦣꦴꦫꦪꦒꦧ꧀ꦨꦺꦴ ꦨꦶꦤ꧀ꦤꦴꦣꦶꦏꦫꦟꦧꦲꦸꦧ꧀ꦧꦷꦲꦶ.

ꦧꦲꦸꦧ꧀ꦧꦷꦲꦶ ꦆꦕ꧀ꦕꦤꦺꦤ ꦏ꧀ꦮꦠ꧀ꦡꦺꦴ? ꦧꦲꦸꦧ꧀ꦧꦷꦲꦶꦩ꧀ꦲꦶ ꦕ.

꧓꧒꧙. , ꧓꧕꧗. ꦤꦴꦩꦴꦤꦁ ꦱꦩꦸꦕ꧀ꦕꦪꦺꦴ ꦢ꧀ꦮꦤ꧀ꦢꦺꦴ.

ꦤꦴꦩꦴꦤꦁ ꦌꦏꦮꦶꦨꦠ꧀ꦠꦶꦏꦴꦤꦁ ꦪꦺꦴ ꦱꦩꦸꦕ꧀ꦕꦪꦺꦴ, ꦱꦺꦴ ꦢ꧀ꦮꦤ꧀ꦢꦱꦚ꧀ꦚꦺꦴ ꦲꦺꦴꦠꦶ.

ꦕꦤ꧀ꦢꦶꦩꦴ ꦕ ꦱꦹꦫꦶꦪꦺꦴ ꦕ ꦕꦤ꧀ꦢꦶꦩꦱꦹꦫꦶꦪꦴ, ꦱꦩꦟꦺꦴ ꦕ ꦧ꧀ꦫꦴꦲ꧀ꦩꦟꦺꦴ ꦕ ꦱꦩꦟꦧ꧀ꦫꦴꦲ꧀ꦩꦟꦴ, ꦱꦴꦫꦶꦥꦸꦠ꧀ꦠꦺꦴ ꦕ ꦩꦺꦴꦒ꧀ꦒꦭ꧀ꦭꦴꦤꦺꦴ ꦕ ꦱꦴꦫꦶꦥꦸꦠ꧀ꦠꦩꦺꦴꦒ꧀ꦒꦭ꧀ꦭꦴꦤꦴ, ꦧ꧀ꦫꦴꦲ꧀ꦩꦟꦺꦴ ꦕ ꦒꦲꦥꦠꦶꦏꦺꦴ ꦕ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ, ꦪꦩꦺꦴ ꦕ ꦮꦫꦸꦟꦺꦴ ꦕ ꦪꦩꦮꦫꦸꦟꦴ, ꦏꦸꦮꦺꦫꦺꦴ ꦕ ꦮꦴꦱꦮꦺꦴ ꦕ ꦏꦸꦮꦺꦫꦮꦴꦱꦮꦴ.

ꦢ꧀ꦮꦤ꧀ꦢꦆꦕ꧀ꦕꦤꦺꦤ ꦏ꧀ꦮꦠ꧀ꦡꦺꦴ? ꦢ꧀ꦮꦤ꧀ꦢꦛ꧀ꦜꦴ ꦮꦴ.

꧓꧓꧐. , ꧓꧔꧐. ꦩꦲꦠꦁ ꦩꦲꦴ ꦠꦸꦭ꧀ꦪꦴꦣꦶꦏꦫꦟꦺ ꦥꦢꦺ.

ꦠꦺꦱꦁ ꦩꦲꦤ꧀ꦠꦱꦢ꧀ꦢꦴꦤꦁ ꦩꦲꦴꦄꦴꦢꦺꦱꦺꦴ ꦲꦺꦴꦠꦶ ꦠꦸꦭ꧀ꦪꦴꦣꦶꦏꦫꦟꦺ ꦥꦢꦺ.

ꦩꦲꦤ꧀ꦠꦺꦴ ꦕ ꦱꦺꦴ ꦥꦸꦫꦶꦱꦺꦴ ꦕꦴꦠꦶ ꦩꦲꦴꦥꦸꦫꦶꦱꦺꦴ, ꦩꦲꦤ꧀ꦠꦷ ꦕ ꦱꦴ ꦢꦺꦮꦷ ꦕꦴꦠꦶ ꦩꦲꦴꦢꦺꦮꦷ, ꦩꦲꦤ꧀ꦠꦚ꧀ꦕ ꦠꦁ ꦧꦭꦚ꧀ꦕꦴꦠꦶ ꦩꦲꦴꦧꦭꦁ, ꦩꦲꦤ꧀ꦠꦺꦴ ꦕ ꦱꦺꦴ ꦤꦴꦒꦺꦴ ꦕꦴꦠꦶ ꦩꦲꦴꦤꦴꦒꦺꦴ, ꦩꦲꦤ꧀ꦠꦺꦴ ꦕ ꦱꦺꦴ ꦪꦱꦺꦴ ꦕꦴꦠꦶ ꦩꦲꦴꦪꦱꦺꦴ, ꦩꦲꦤ꧀ꦠꦚ꧀ꦕ ꦠꦁ ꦥꦢꦸꦩꦮꦤꦚ꧀ꦕꦴꦠꦶ ꦩꦲꦴꦥꦢꦸꦩꦮꦤꦁ, ꦩꦲꦤ꧀ꦠꦷ ꦕ ꦱꦴ ꦤꦢꦷ ꦕꦴꦠꦶ ꦩꦲꦴꦤꦢꦷ, ꦩꦲꦤ꧀ꦠꦺꦴ ꦕ ꦱꦺꦴ ꦩꦟꦶ ꦕꦴꦠꦶ ꦩꦲꦴꦩꦟꦶ, ꦩꦲꦤ꧀ꦠꦺꦴ ꦕ ꦱꦺꦴ ꦒꦲꦥꦠꦶꦏꦺꦴ ꦕꦴꦠꦶ ꦩꦲꦴꦒꦲꦥꦠꦶꦏꦺꦴ, ꦩꦲꦤ꧀ꦠꦚ꧀ꦕ ꦠꦁ ꦣꦤꦚ꧀ꦕꦴꦠꦶ ꦩꦲꦴꦣꦤꦁ, ꦩꦲꦤ꧀ꦠꦺꦴ ꦕ ꦱꦺꦴ ꦥꦸꦚ꧀ꦚꦺꦴ ꦕꦴꦠꦶ ꦩꦲꦴꦥꦸꦚ꧀ꦚꦺꦴ.

ꦧꦲꦸꦮꦕꦤꦒ꧀ꦒꦲꦟꦺꦤ ꦏ꧀ꦮꦕꦶ ꦩꦲꦤ꧀ꦠ ꦱꦢ꧀ꦢꦱ꧀ꦱ ꦩꦲꦴꦢꦺꦱꦺꦴ ꦲꦺꦴꦠꦶ. ꦩꦲꦤ꧀ꦠꦚ꧀ꦕ ꦠꦁ ꦦꦭꦚ꧀ꦕꦴꦠꦶ ꦩꦲꦥ꧀ꦦꦭꦁ, ꦩꦲꦧ꧀ꦧꦭꦁ, ꦌꦮꦁ ꦩꦲꦢ꧀ꦣꦤꦁ, ꦩꦲꦧ꧀ꦨꦪꦁ.

꧓꧓꧑. , ꧓꧕꧓. ꦆꦠ꧀ꦡꦶꦪꦁ ꦨꦴꦱꦶꦠꦥꦸꦩꦶꦠ꧀ꦡꦷ ꦥꦸꦩꦴꦮ ꦕꦺ.

ꦆꦠ꧀ꦡꦶꦪꦁ ꦠꦸꦭ꧀ꦪꦴꦣꦶꦏꦫꦟꦺ ꦥꦢꦺ ꦕꦺ ꦨꦴꦱꦶꦠꦥꦸꦩꦶꦠ꧀ꦡꦷ ꦥꦸꦩꦴꦮ ꦢꦛ꧀ꦜꦧ꧀ꦧꦴ.

ꦢꦷꦓꦴ ꦗꦔ꧀ꦓꦴ ꦪꦱ꧀ꦱ ꦱꦺꦴꦪꦁ ꦢꦷꦓꦗꦔ꧀ꦓꦺꦴ, ꦏꦭ꧀ꦪꦴꦟꦨꦫꦶꦪꦺꦴ, ꦥꦲꦹꦠꦥꦚ꧀ꦚꦺꦴ.

ꦨꦴꦱꦶꦠꦥꦸꦥꦺꦠꦶ ꦏꦶꦩꦠ꧀ꦡꦁ? ꦧ꧀ꦫꦴꦲ꧀ꦩꦟꦧꦤ꧀ꦣꦸ ꦕ ꦱꦴ ꦨꦫꦶꦪꦴ ꦕꦴꦠꦶꦧ꧀ꦫꦴꦲ꧀ꦩꦟꦧꦤ꧀ꦣꦸꦨꦫꦶꦪꦴ.

꧓꧓꧒. , ꧓꧔꧓. ꦏꦩ꧀ꦩꦣꦴꦫꦪꦱꦚ꧀ꦚꦺ ꦕ.

ꦏꦩ꧀ꦩꦣꦴꦫꦪꦱꦚ꧀ꦚꦺ ꦕ ꦱꦩꦴꦱꦺ ꦆꦠ꧀ꦡꦶꦪꦁ ꦠꦸꦭ꧀ꦪꦴꦣꦶꦏꦫꦟꦺ ꦥꦢꦺ ꦥꦸꦧ꧀ꦧꦺ ꦨꦴꦱꦶꦠꦥꦸꦩꦶꦠ꧀ꦡꦷ ꦕꦺ, ꦥꦸꦩꦴꦮ ꦢꦛ꧀ꦜꦧ꧀ꦧꦴ. ꦧ꧀ꦫꦴꦲ꧀ꦩꦟꦢꦴꦫꦶꦏꦴ, ꦑꦠ꧀ꦠꦶꦪꦏꦚ꧀ꦚꦴ, ꦑꦠ꧀ꦠꦶꦪꦏꦸꦩꦴꦫꦶꦏꦴ.

ꦨꦴꦱꦶꦠꦥꦸꦩꦺꦠꦶ ꦏꦶꦩꦠ꧀ꦡꦁ? ꦑꦠ꧀ꦠꦶꦪꦧꦤ꧀ꦣꦸꦢꦴꦫꦶꦏꦴ, ꦧ꧀ꦫꦴꦲ꧀ꦩꦟꦧꦤ꧀ꦣꦸꦢꦴꦫꦶꦏꦴ.

꧓꧓꧓. , ꧓꧔꧔. ꦄꦠ꧀ꦠꦁ ꦤꦱ꧀ꦱ ꦠꦥ꧀ꦥꦸꦫꦶꦱꦺ.

ꦤꦱ꧀ꦱ ꦥꦢꦱ꧀ꦱ ꦠꦥ꧀ꦥꦸꦫꦶꦱꦺ ꦈꦠ꧀ꦠꦫꦥꦢꦺ ꦄꦠ꧀ꦠꦁ ꦲꦺꦴꦠꦶ.

ꦤꦧ꧀ꦫꦴꦲ꧀ꦩꦟꦺꦴ ꦄꦧ꧀ꦫꦴꦲ꧀ꦩꦟꦺꦴ, ꦄꦮꦱꦭꦺꦴ, ꦄꦨꦶꦏ꧀ꦑꦸ, ꦄꦥꦚ꧀ꦕꦮꦱ꧀ꦱꦁ, ꦄꦥꦚ꧀ꦕꦒꦮꦁ.

꧓꧓꧔. , ꧓꧔꧕. ꦱꦫꦺ ꦄꦤ.

ꦤꦱ꧀ꦱ ꦥꦢꦱ꧀ꦱ ꦠꦥ꧀ꦥꦸꦫꦶꦱꦺ ꦄꦤ ꦄꦴꦢꦺꦱꦺꦴ ꦲꦺꦴꦠꦶ ꦱꦫꦺ ꦥꦫꦺ.

ꦤ ꦄꦱ꧀ꦱꦺꦴ ꦄꦤꦱ꧀ꦱꦺꦴ, ꦄꦤꦶꦱ꧀ꦱꦫꦺꦴ, ꦄꦤꦫꦶꦪꦺꦴ.

꧓꧓꧕. , ꧓꧔꧖. ꦏꦢ ꦏꦸꦱ꧀ꦱ.

ꦏꦸꦆꦕ꧀ꦕꦺꦠꦱ꧀ꦱ ꦏꦢ ꦲꦺꦴꦠꦶ ꦱꦫꦺ ꦥꦫꦺ.

ꦏꦸꦕ꧀ꦖꦶꦠꦁ ꦄꦤ꧀ꦤꦁ ꦏꦢꦤ꧀ꦤꦁ, ꦏꦸꦕ꧀ꦖꦶꦠꦁ ꦄꦱꦤꦁ ꦏꦢꦱ꧀ꦱꦤꦁ.

ꦱꦫꦺꦠꦶ ꦏꦶꦩꦠ꧀ꦡꦁ? ꦏꦸꦕ꧀ꦖꦶꦠꦴ ꦢꦴꦫꦴ ꦪꦺꦱꦁ (ꦄꦥꦸꦚ꧀ꦚꦏꦴꦫꦴꦤꦁ) ꦠꦺ ꦲꦺꦴꦤ꧀ꦠꦷꦠꦶ ꦏꦸꦢꦴꦫꦴ, ꦏꦸꦗꦤꦴ. ꦌꦮꦁ ꦏꦸꦥꦸꦠ꧀ꦠꦴ, ꦏꦸꦒꦺꦲꦴ, ꦏꦸꦮꦠ꧀ꦡꦴ, ꦏꦸꦢꦴꦱꦴ.

꧓꧓꧖. , ꧓꧔꧗. ꦏꦴ’ꦥ꧀ꦥꦠ꧀ꦡꦺꦱꦸ ꦕ.

ꦏꦸꦆꦕ꧀ꦕꦺꦠꦱ꧀ꦱ ꦏꦴ ꦲꦺꦴꦠꦶ ꦄꦥ꧀ꦥꦠ꧀ꦡꦺꦱꦸ ꦕ.

ꦏꦴꦭꦮꦟꦁ, ꦏꦴꦥꦸꦥ꧀ꦦꦁ.

ꦧꦲꦸꦮꦕꦤꦒ꧀ꦒꦲꦟꦁ ꦏꦶꦩꦠ꧀ꦡꦁ? ꦏꦸꦆꦕ꧀ꦕꦺꦠꦱ꧀ꦱ ꦄꦤꦥ꧀ꦥꦠꦠ꧀ꦡꦺꦱꦸꦥꦶ ꦏ꧀ꦮꦕꦶ ꦏꦴ ꦲꦺꦴꦠꦶ, ꦏꦴꦥꦸꦫꦶꦱꦴ.

꧓꧓꧗. , ꧓꧕꧐. ꦏ꧀ꦮꦕꦶ ꦱꦩꦴꦱꦤ꧀ꦠꦒꦠꦴꦤꦩꦏꦴꦫꦤ꧀ꦠꦺꦴ.

ꦱꦩꦴꦱꦤ꧀ꦠꦒꦠꦴꦤꦁ ꦤꦴꦩꦴꦤꦩꦤ꧀ꦠꦺꦴ ꦱꦫꦺꦴ ꦏ꧀ꦮꦕꦶ ꦄꦏꦴꦫꦺꦴ ꦲꦺꦴꦠꦶ.

ꦢꦺꦮꦴꦤꦁ ꦫꦴꦗꦴ ꦢꦺꦮꦫꦴꦗꦺꦴ, ꦢꦺꦮꦫꦴꦗꦴ, ꦢꦺꦮꦴꦤꦁ ꦱꦑꦴ ꦢꦺꦮꦱꦑꦺꦴ, ꦢꦺꦮꦱꦑꦴ, ꦥꦚ꧀ꦕ ꦄꦲꦴꦤꦶ ꦥꦚ꧀ꦕꦴꦲꦁ, ꦱꦠ꧀ꦠꦴꦲꦁ, ꦥꦚ꧀ꦕꦒꦮꦁ, ꦖꦠ꧀ꦠꦸꦥꦴꦲꦤꦁ, ꦈꦥꦱꦫꦢꦁ, ꦮꦶꦱꦴꦭꦏ꧀ꦑꦺꦴ, ꦮꦶꦩꦸꦑꦺꦴ.

ꦏꦴꦫꦒ꧀ꦒꦲꦟꦁ ꦏꦶꦩꦠ꧀ꦡꦁ? ꦄꦴꦏꦴꦫꦤ꧀ꦠ ꦆꦏꦴꦫꦤ꧀ꦠꦴ ꦕ ꦲꦺꦴꦤ꧀ꦠꦶ, ꦥꦕ꧀ꦕꦏ꧀ꦑꦴ ꦣꦩ꧀ꦩꦴ ꦪꦱ꧀ꦱ ꦱꦺꦴꦪꦤ꧀ꦠꦶ ꦥꦕ꧀ꦕꦏ꧀ꦑꦣꦩ꧀ꦩꦴ, ꦱꦸꦫꦨꦶꦤꦺꦴ ꦒꦤ꧀ꦣꦺꦴ ꦱꦸꦫꦨꦶꦒꦤ꧀ꦣꦶ, ꦱꦸꦤ꧀ꦢꦫꦺꦴ ꦒꦤ꧀ꦣꦺꦴ ꦱꦸꦒꦤ꧀ꦣꦶ, ꦥꦹꦠꦶꦤꦺꦴ ꦒꦤ꧀ꦣꦺꦴ ꦥꦹꦠꦶꦒꦤ꧀ꦣꦶ, ꦏꦸꦕ꧀ꦖꦶꦠꦺꦴ ꦒꦤ꧀ꦣꦺꦴ ꦏꦸꦒꦤ꧀ꦣꦶ, ꦢꦸꦛ꧀ꦜꦸ ꦒꦤ꧀ꦣꦺꦴ ꦪꦱ꧀ꦱ ꦱꦺꦴꦪꦤ꧀ꦠꦶ ꦢꦸꦒꦤ꧀ꦣꦶ, ꦥꦹꦠꦶ ꦌꦮ ꦒꦤ꧀ꦣꦺꦴ ꦥꦹꦠꦶꦒꦤ꧀ꦣꦶ.

ꦤꦢꦷꦄꦤ꧀ꦠꦴ ꦕ ꦏꦠ꧀ꦠꦸꦄꦤ꧀ꦠꦴ ꦕ ꦏꦥꦕ꧀ꦕꦪꦺꦴ ꦲꦺꦴꦠꦶ ꦱꦩꦴꦱꦤ꧀ꦠꦺ.

ꦧꦲꦹ ꦤꦢꦶꦪꦺꦴ ꦪꦱ꧀ꦩꦶꦁ ꦱꦺꦴꦪꦁ ꦧꦲꦸꦤꦢꦶꦏꦺꦴ, ꦗꦤꦥꦢꦺꦴ. ꦧꦲꦮꦺꦴ ꦏꦠ꧀ꦠꦴꦫꦺꦴ ꦪꦱ꧀ꦱ ꦱꦺꦴꦪꦁ ꦧꦲꦸꦏꦠ꧀ꦠꦸꦏꦺꦴ, ꦥꦸꦫꦶꦱꦺꦴ.

꧓꧓꧘. , ꧓꧕꧖. ꦤꦢꦶꦩ꧀ꦲꦴ ꦕ.

ꦤꦢꦶꦩ꧀ꦲꦴ ꦕ ꦏꦥꦕ꧀ꦕꦪꦺꦴ ꦲꦺꦴꦠꦶ ꦱꦩꦴꦱꦤ꧀ꦠꦺ.

ꦧꦲꦹ ꦤꦢꦶꦪꦺꦴ ꦪꦱ꧀ꦩꦶꦁ ꦱꦺꦴꦪꦤ꧀ꦠꦶ ꦧꦲꦸꦤꦢꦶꦏꦺꦴ. ꦧꦲꦹ ꦏꦤ꧀ꦠꦶꦪꦺꦴ ꦪꦱ꧀ꦱ ꦱꦺꦴꦪꦤ꧀ꦠꦶ ꦧꦲꦸꦏꦤ꧀ꦠꦶꦏꦺꦴ. ꦧꦲꦸꦤꦴꦫꦶꦏꦺꦴ.

꧓꧓꧙. , ꧓꧕꧘. ꦗꦴꦪꦴꦪ ꦠꦸꦢꦁ ꦗꦴꦤꦶ ꦥꦠꦶꦩ꧀ꦲꦶ.

ꦗꦴꦪꦴꦆꦕ꧀ꦕꦺꦠꦴꦪ ꦠꦸꦢꦁ ꦗꦴꦤꦶꦆꦕ꧀ꦕꦺꦠꦺ ꦄꦴꦢꦺꦱꦴ ꦲꦺꦴꦤ꧀ꦠꦶ ꦥꦠꦶꦩ꧀ꦲꦶ ꦥꦫꦺ.

ꦠꦸꦢꦁꦥꦠꦷ, ꦗꦴꦤꦶꦥꦠꦷ.

꧓꧔꧐. , ꧓꧕꧕. ꦣꦤꦸꦩ꧀ꦲꦴ ꦕ.

ꦣꦤꦸꦩ꧀ꦲꦴ ꦕ ꦄꦴꦥꦕ꧀ꦕꦪꦺꦴ ꦲꦺꦴꦠꦶ ꦱꦩꦴꦱꦤ꧀ꦠꦺ.

ꦒꦴꦟ꧀ꦝꦷꦮꦺꦴ ꦣꦤꦸ ꦪꦱ꧀ꦱ ꦱꦺꦴꦪꦁ ꦒꦴꦟ꧀ꦝꦷꦮꦣꦤ꧀ꦮꦴ.

꧓꧔꧑. , ꧓꧓꧖. ꦄꦁ ꦮꦶꦨꦠ꧀ꦠꦷꦤꦩꦏꦴꦫꦤ꧀ꦠꦴ ꦄꦧ꧀ꦪꦪꦷꦨꦴꦮꦴ.

ꦠꦱ꧀ꦩꦴ ꦄꦏꦴꦫꦤ꧀ꦠꦴ ꦄꦧ꧀ꦪꦪꦷꦨꦴꦮꦱꦩꦴꦱꦴ ꦥꦫꦴꦱꦁ ꦮꦶꦨꦠ꧀ꦠꦷꦤꦁ ꦏ꧀ꦮꦕꦶ ꦄꦁ ꦲꦺꦴꦠꦶ.

ꦄꦣꦶꦕꦶꦠ꧀ꦠꦁ, ꦪꦡꦴꦮꦸꦝ꧀ꦞꦁ, ꦈꦥꦏꦸꦩ꧀ꦨꦁ, ꦪꦴꦮꦗꦷꦮꦁ, ꦠꦶꦫꦺꦴꦥꦧ꧀ꦧꦠꦁ, ꦠꦶꦫꦺꦴꦥꦴꦏꦴꦫꦁ, ꦠꦶꦫꦺꦴꦏꦸꦛ꧀ꦛꦁ, ꦄꦤ꧀ꦠꦺꦴꦥꦴꦱꦴꦢꦁ.

ꦏ꧀ꦮꦕꦷꦠꦶ ꦏꦶꦩꦠ꧀ꦡꦁ? ꦄꦣꦶꦕꦶꦠ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ.

꧓꧔꧒. , ꧓꧓꧗. ꦱꦫꦺꦴ ꦫꦱ꧀ꦱꦺꦴ ꦤꦥꦸꦁꦱꦏꦺ.

ꦤꦥꦸꦁꦱꦏꦺ ꦮꦠ꧀ꦠꦩꦴꦤꦱ꧀ꦱ ꦄꦧ꧀ꦪꦪꦷꦨꦴꦮꦱꦩꦴꦱꦱ꧀ꦱ ꦭꦶꦔ꧀ꦒꦱ꧀ꦱ ꦱꦫꦺꦴ ꦫꦱ꧀ꦱꦺꦴ ꦲꦺꦴꦠꦶ.

ꦏꦸꦩꦴꦫꦷꦱꦸ ꦄꦣꦶꦏꦶꦕ꧀ꦕ ꦥꦮꦠ꧀ꦠꦠꦶ ꦏꦡꦴ ꦆꦠꦶ ꦄꦣꦶꦏꦸꦩꦴꦫꦶ. ꦈꦥꦮꦣꦸ, ꦈꦥꦒꦔ꧀ꦒꦁ, ꦈꦥꦩꦟꦶꦏꦁ.

꧓꧔꧓. , ꧓꧓꧘. ꦄꦚ꧀ꦚꦱ꧀ꦩꦴ ꦭꦺꦴꦥꦺꦴ ꦕ.

ꦄꦚ꧀ꦚꦱ꧀ꦩꦴ ꦄꦧ꧀ꦪꦪꦷꦨꦴꦮꦱꦩꦴꦱꦴ ꦄꦤꦏꦴꦫꦤ꧀ꦠꦴ ꦥꦫꦴꦱꦁ ꦮꦶꦨꦠ꧀ꦠꦷꦤꦁ ꦭꦺꦴꦥꦺꦴ ꦕ ꦲꦺꦴꦠꦶ.

ꦄꦣꦶꦠ꧀ꦡꦶ, ꦄꦣꦶꦏꦸꦩꦴꦫꦶ, ꦈꦥꦮꦣꦸ.

ꦆꦠꦶ ꦤꦴꦩꦏꦥ꧀ꦥꦺ ꦱꦩꦴꦱꦏꦥ꧀ꦥꦺꦴ ꦱꦠ꧀ꦠꦩꦺꦴ ꦏꦟ꧀ꦝꦺꦴ.

ꦱꦩꦴꦱꦏꦥ꧀ꦥꦺꦴ ꦤꦶꦛ꧀ꦜꦶꦠꦺꦴ.