꧒. ꦱꦈꦥꦴꦢꦶꦱꦺꦱꦱꦸꦠ꧀ꦠꦁ

꧑꧒. ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦄꦡ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦴꦮꦠ꧀ꦡꦶꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦌꦠꦢꦲꦺꦴꦱꦶ – ‘‘ꦄꦠꦶꦥ꧀ꦥꦒꦺꦴ ꦑꦺꦴ ꦠꦴꦮ ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠꦸꦁ, ꦪꦁꦤꦹꦤꦴꦲꦁ ꦪꦺꦤ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦺꦪ꧀ꦪ’’ꦤ꧀ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦪꦺꦤ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦺꦲꦶ ꦄꦚ꧀ꦚꦠꦶꦠ꧀ꦡꦶꦪꦺꦲꦶ ꦥꦫꦶꦧ꧀ꦧꦴꦗꦏꦺꦲꦶ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦱꦤ꧀ꦤꦶꦱꦶꦤ꧀ꦤꦴꦤꦁ ꦱꦤ꧀ꦤꦶꦥꦠꦶꦠꦴꦤꦁ ꦄꦪꦩꦤ꧀ꦠꦫꦴꦏꦡꦴ ꦈꦢꦥꦴꦢꦶ – ‘‘ꦪꦺꦴ ꦲꦶ ꦏꦺꦴꦕꦶ, ꦄꦴꦮꦸꦱꦺꦴ, ꦱꦈꦥꦴꦢꦶꦱꦺꦱꦺꦴ ꦏꦴꦭꦁ ꦏꦫꦺꦴꦠꦶ, ꦱꦧ꧀ꦧꦺꦴ ꦱꦺꦴ ꦄꦥꦫꦶꦩꦸꦠ꧀ꦠꦺꦴ ꦤꦶꦫꦪꦴ ꦄꦥꦫꦶꦩꦸꦠ꧀ꦠꦺꦴ ꦠꦶꦫꦕ꧀ꦖꦴꦤꦪꦺꦴꦤꦶꦪꦴ ꦄꦥꦫꦶꦩꦸꦠ꧀ꦠꦺꦴ ꦥꦺꦠ꧀ꦠꦶꦮꦶꦱꦪꦴ ꦄꦥꦫꦶꦩꦸꦠ꧀ꦠꦺꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦨꦴꦱꦶꦠꦁ ꦤꦺꦮ ꦄꦨꦶꦤꦤ꧀ꦢꦶ ꦤꦥ꧀ꦥꦛꦶꦏ꧀ꦏꦺꦴꦱꦶ. ꦄꦤꦨꦶꦤꦤ꧀ꦢꦶꦠ꧀ꦮꦴ ꦄꦥ꧀ꦥꦛꦶꦏ꧀ꦏꦺꦴꦱꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ – ‘‘ꦨꦒꦮꦠꦺꦴ ꦱꦤ꧀ꦠꦶꦏꦺ ꦌꦠꦱ꧀ꦱ ꦨꦴꦱꦶꦠꦱ꧀ꦱ ꦄꦠ꧀ꦡꦁ ꦄꦴꦗꦴꦤꦶꦱ꧀ꦱꦴꦩꦷ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ –

‘‘ꦆꦣꦴꦲꦁ, ꦨꦤ꧀ꦠꦺ, ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦴꦮꦠ꧀ꦡꦶꦁ ꦥꦶꦟ꧀ꦝꦴꦪ ꦥꦴꦮꦶꦱꦶꦁ. ꦠꦱ꧀ꦱ ꦩꦪ꧀ꦲꦁ, ꦨꦤ꧀ꦠꦺ, ꦌꦠꦢꦲꦺꦴꦱꦶ – ‘ꦄꦠꦶꦥ꧀ꦥꦒꦺꦴ ꦑꦺꦴ ꦠꦴꦮ ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠꦸꦁ; ꦪꦁꦤꦹꦤꦴꦲꦁ ꦪꦺꦤ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦺꦪ꧀ꦪ’ꦤ꧀ꦠꦶ. ꦄꦡ ꦑꦺꦴ ꦄꦲꦁ, ꦨꦤ꧀ꦠꦺ, ꦪꦺꦤ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦶꦁ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦺꦲꦶ ꦄꦚ꧀ꦚꦠꦶꦠ꧀ꦡꦶꦪꦺꦲꦶ ꦥꦫꦶꦧ꧀ꦧꦴꦗꦏꦺꦲꦶ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶꦁ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦱꦤ꧀ꦤꦶꦱꦶꦤ꧀ꦤꦴꦤꦁ ꦱꦤ꧀ꦤꦶꦥꦠꦶꦠꦴꦤꦁ ꦄꦪꦩꦤ꧀ꦠꦫꦴꦏꦡꦴ ꦈꦢꦥꦴꦢꦶ – ‘ꦪꦺꦴ ꦲꦶ ꦏꦺꦴꦕꦶ, ꦄꦴꦮꦸꦱꦺꦴ, ꦱꦈꦥꦴꦢꦶꦱꦺꦱꦺꦴ ꦏꦴꦭꦁ ꦏꦫꦺꦴꦠꦶ, ꦱꦧ꧀ꦧꦺꦴ ꦱꦺꦴ ꦄꦥꦫꦶꦩꦸꦠ꧀ꦠꦺꦴ ꦤꦶꦫꦪꦴ ꦄꦥꦫꦶꦩꦸꦠ꧀ꦠꦺꦴ ꦠꦶꦫꦕ꧀ꦖꦴꦤꦪꦺꦴꦤꦶꦪꦴ ꦄꦥꦫꦶꦩꦸꦠ꧀ꦠꦺꦴ ꦥꦺꦠ꧀ꦠꦶꦮꦶꦱꦪꦴ ꦄꦥꦫꦶꦩꦸꦠ꧀ꦠꦺꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ’ꦠꦶ. ꦄꦡ ꦑꦺꦴ ꦄꦲꦁ, ꦨꦤ꧀ꦠꦺ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦨꦴꦱꦶꦠꦁ ꦤꦺꦮ ꦄꦨꦶꦤꦤ꧀ꦢꦶꦁ ꦤꦥ꧀ꦥꦛꦶꦏ꧀ꦏꦺꦴꦱꦶꦁ. ꦄꦤꦨꦶꦤꦤ꧀ꦢꦶꦠ꧀ꦮꦴ ꦄꦥ꧀ꦥꦛꦶꦏ꧀ꦏꦺꦴꦱꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦩꦶꦁ – ‘ꦨꦒꦮꦠꦺꦴ ꦱꦤ꧀ꦠꦶꦏꦺ ꦌꦠꦱ꧀ꦱ ꦨꦴꦱꦶꦠꦱ꧀ꦱ ꦄꦠ꧀ꦡꦁ ꦄꦴꦗꦴꦤꦶꦱ꧀ꦱꦴꦩꦷ’’’ꦠꦶ.

‘‘ꦏꦺ ꦕ [ꦏꦺꦕꦶ (ꦱ꧀ꦪꦴ. ꦥꦷ.), ꦠꦺ ꦕ (ꦏ.)], ꦱꦴꦫꦶꦥꦸꦠ꧀ꦠ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦧꦴꦭꦴ ꦄꦧ꧀ꦪꦠ꧀ꦠꦴ, ꦏꦺ ꦕ [ꦏꦺꦕꦶ (ꦱ꧀ꦪꦴ. ꦥꦷ. ꦏ.) ꦄ. ꦤꦶ. ꧖.꧔꧔ ꦥꦴꦭ꦳ꦶꦪꦴ ꦱꦁꦱꦤ꧀ꦢꦺꦠꦧ꧀ꦧꦁ] ꦱꦈꦥꦴꦢꦶꦱꦺꦱꦁ ꦮꦴ ‘ꦱꦈꦥꦴꦢꦶꦱꦺꦱꦺꦴ’ꦠꦶ ꦗꦴꦤꦶꦱ꧀ꦱꦤ꧀ꦠꦶ, ꦄꦤꦸꦥꦴꦢꦶꦱꦺꦱꦁ ꦮꦴ ‘ꦄꦤꦸꦥꦴꦢꦶꦱꦺꦱꦺꦴ’ꦠꦶ ꦗꦴꦤꦶꦱ꧀ꦱꦤ꧀ꦠꦶ’’!

‘‘ꦤꦮꦪꦶꦩꦺ, ꦱꦴꦫꦶꦥꦸꦠ꧀ꦠ, ꦥꦸꦒ꧀ꦒꦭꦴ ꦱꦈꦥꦴꦢꦶꦱꦺꦱꦴ ꦏꦴꦭꦁ ꦏꦸꦫꦸꦩꦴꦤꦴ ꦥꦫꦶꦩꦸꦠ꧀ꦠꦴ ꦤꦶꦫꦪꦴ ꦥꦫꦶꦩꦸꦠ꧀ꦠꦴ ꦠꦶꦫꦕ꧀ꦖꦴꦤꦪꦺꦴꦤꦶꦪꦴ ꦥꦫꦶꦩꦸꦠ꧀ꦠꦴ ꦥꦺꦠ꧀ꦠꦶꦮꦶꦱꦪꦴ ꦥꦫꦶꦩꦸꦠ꧀ꦠꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ. ꦏꦠꦩꦺ ꦤꦮ? ꦆꦣ, ꦱꦴꦫꦶꦥꦸꦠ꧀ꦠ, ꦌꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ ꦲꦺꦴꦠꦶ, ꦱꦩꦴꦣꦶꦱ꧀ꦩꦶꦁ ꦥꦫꦶꦥꦹꦫꦏꦴꦫꦷ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ. ꦱꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦄꦤ꧀ꦠꦫꦴꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ. ꦄꦪꦁ, ꦱꦴꦫꦶꦥꦸꦠ꧀ꦠ, ꦥꦜꦩꦺꦴ ꦥꦸꦒ꧀ꦒꦭꦺꦴ ꦱꦈꦥꦴꦢꦶꦱꦺꦱꦺꦴ ꦏꦴꦭꦁ ꦏꦸꦫꦸꦩꦴꦤꦺꦴ ꦥꦫꦶꦩꦸꦠ꧀ꦠꦺꦴ ꦤꦶꦫꦪꦴ ꦥꦫꦶꦩꦸꦠ꧀ꦠꦺꦴ ꦠꦶꦫꦕ꧀ꦖꦴꦤꦪꦺꦴꦤꦶꦪꦴ ꦥꦫꦶꦩꦸꦠ꧀ꦠꦺꦴ ꦥꦺꦠ꧀ꦠꦶꦮꦶꦱꦪꦴ ꦥꦫꦶꦩꦸꦠ꧀ꦠꦺꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ.

‘‘ꦥꦸꦤ ꦕꦥꦫꦁ, ꦱꦴꦫꦶꦥꦸꦠ꧀ꦠ, ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ ꦲꦺꦴꦠꦶ, ꦱꦩꦴꦣꦶꦱ꧀ꦩꦶꦁ ꦥꦫꦶꦥꦹꦫꦏꦴꦫꦷ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ. ꦱꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦈꦥꦲꦕ꧀ꦕꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ…ꦥꦺ… ꦄꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ…ꦥꦺ… ꦱꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ…ꦥꦺ… ꦈꦢ꧀ꦣꦁꦱꦺꦴꦠꦺꦴ ꦲꦺꦴꦠꦶ ꦄꦏꦤꦶꦛ꧀ꦜꦒꦴꦩꦷ. ꦄꦪꦁ, ꦱꦴꦫꦶꦥꦸꦠ꧀ꦠ, ꦥꦚ꧀ꦕꦩꦺꦴ ꦥꦸꦒ꧀ꦒꦭꦺꦴ ꦱꦈꦥꦴꦢꦶꦱꦺꦱꦺꦴ ꦏꦴꦭꦁ ꦏꦸꦫꦸꦩꦴꦤꦺꦴ ꦥꦫꦶꦩꦸꦠ꧀ꦠꦺꦴ ꦤꦶꦫꦪꦴ ꦥꦫꦶꦩꦸꦠ꧀ꦠꦺꦴ ꦠꦶꦫꦕ꧀ꦖꦴꦤꦪꦺꦴꦤꦶꦪꦴ ꦥꦫꦶꦩꦸꦠ꧀ꦠꦺꦴ ꦥꦺꦠ꧀ꦠꦶꦮꦶꦱꦪꦴ ꦥꦫꦶꦩꦸꦠ꧀ꦠꦺꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ.

‘‘ꦥꦸꦤ ꦕꦥꦫꦁ, ꦱꦴꦫꦶꦥꦸꦠ꧀ꦠ, ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ ꦲꦺꦴꦠꦶ, ꦱꦩꦴꦣꦶꦱ꧀ꦩꦶꦁ ꦩꦠ꧀ꦠꦱꦺꦴ ꦏꦴꦫꦷ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ. ꦱꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦫꦴꦒꦢꦺꦴꦱꦩꦺꦴꦲꦴꦤꦁ ꦠꦤꦸꦠ꧀ꦠꦴ ꦱꦏꦢꦴꦒꦴꦩꦷ ꦲꦺꦴꦠꦶ, ꦱꦏꦶꦢꦺꦮ ꦆꦩꦁ ꦭꦺꦴꦏꦁ ꦄꦴꦒꦤ꧀ꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ. ꦄꦪꦁ, ꦱꦴꦫꦶꦥꦸꦠ꧀ꦠ, ꦖꦛ꧀ꦜꦺꦴ ꦥꦸꦒ꧀ꦒꦭꦺꦴ ꦱꦈꦥꦴꦢꦶꦱꦺꦱꦺꦴ ꦏꦴꦭꦁ ꦏꦸꦫꦸꦩꦴꦤꦺꦴ ꦥꦫꦶꦩꦸꦠ꧀ꦠꦺꦴ ꦤꦶꦫꦪꦴ…ꦥꦺ… ꦥꦫꦶꦩꦸꦠ꧀ꦠꦺꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ.

‘‘ꦥꦸꦤ ꦕꦥꦫꦁ, ꦱꦴꦫꦶꦥꦸꦠ꧀ꦠ, ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ ꦲꦺꦴꦠꦶ, ꦱꦩꦴꦣꦶꦱ꧀ꦩꦶꦁ ꦩꦠ꧀ꦠꦱꦺꦴ ꦏꦴꦫꦷ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ. ꦱꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦌꦏꦧꦷꦗꦷ ꦲꦺꦴꦠꦶ, ꦌꦏꦁꦪꦺꦮ ꦩꦴꦤꦸꦱꦏꦁ ꦨꦮꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ. ꦄꦪꦁ, ꦱꦴꦫꦶꦥꦸꦠ꧀ꦠ, ꦱꦠ꧀ꦠꦩꦺꦴ ꦥꦸꦒ꧀ꦒꦭꦺꦴ ꦱꦈꦥꦴꦢꦶꦱꦺꦱꦺꦴ ꦏꦴꦭꦁ ꦏꦸꦫꦸꦩꦴꦤꦺꦴ ꦥꦫꦶꦩꦸꦠ꧀ꦠꦺꦴ ꦤꦶꦫꦪꦴ…ꦥꦺ… ꦥꦫꦶꦩꦸꦠ꧀ꦠꦺꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ.

‘‘ꦥꦸꦤ ꦕꦥꦫꦁ, ꦱꦴꦫꦶꦥꦸꦠ꧀ꦠ, ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ ꦲꦺꦴꦠꦶ, ꦱꦩꦴꦣꦶꦱ꧀ꦩꦶꦁ ꦩꦠ꧀ꦠꦱꦺꦴ ꦏꦴꦫꦷ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ. ꦱꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦏꦺꦴꦭꦁꦏꦺꦴꦭꦺꦴ ꦲꦺꦴꦠꦶ, ꦢ꧀ꦮꦺ ꦮꦴ ꦠꦷꦟꦶ ꦮꦴ ꦏꦸꦭꦴꦤꦶ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ. ꦄꦪꦁ, ꦱꦴꦫꦶꦥꦸꦠ꧀ꦠ, ꦄꦛ꧀ꦜꦩꦺꦴ ꦥꦸꦒ꧀ꦒꦭꦺꦴ ꦱꦈꦥꦴꦢꦶꦱꦺꦱꦺꦴ ꦏꦴꦭꦁ ꦏꦸꦫꦸꦩꦴꦤꦺꦴ ꦥꦫꦶꦩꦸꦠ꧀ꦠꦺꦴ ꦤꦶꦫꦪꦴ…ꦥꦺ… ꦥꦫꦶꦩꦸꦠ꧀ꦠꦺꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ.

‘‘ꦥꦸꦤ ꦕꦥꦫꦁ, ꦱꦴꦫꦶꦥꦸꦠ꧀ꦠ, ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ ꦲꦺꦴꦠꦶ, ꦱꦩꦴꦣꦶꦱ꧀ꦩꦶꦁ ꦩꦠ꧀ꦠꦱꦺꦴ ꦏꦴꦫꦷ, ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ. ꦱꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦺꦴ ꦲꦺꦴꦠꦶ, ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦁ ꦢꦺꦮꦺ ꦕ ꦩꦤꦸꦱ꧀ꦱꦺ ꦕ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ. ꦄꦪꦁ, ꦱꦴꦫꦶꦥꦸꦠ꧀ꦠ, ꦤꦮꦩꦺꦴ ꦥꦸꦒ꧀ꦒꦭꦺꦴ ꦱꦈꦥꦴꦢꦶꦱꦺꦱꦺꦴ ꦏꦴꦭꦁ ꦏꦸꦫꦸꦩꦴꦤꦺꦴ ꦥꦫꦶꦩꦸꦠ꧀ꦠꦺꦴ ꦤꦶꦫꦪꦴ ꦥꦫꦶꦩꦸꦠ꧀ꦠꦺꦴ ꦠꦶꦫꦕ꧀ꦖꦴꦤꦪꦺꦴꦤꦶꦪꦴ ꦥꦫꦶꦩꦸꦠ꧀ꦠꦺꦴ ꦥꦺꦠ꧀ꦠꦶꦮꦶꦱꦪꦴ ꦥꦫꦶꦩꦸꦠ꧀ꦠꦺꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ.

‘‘ꦏꦺ ꦕ, ꦱꦴꦫꦶꦥꦸꦠ꧀ꦠ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦧꦴꦭꦴ ꦄꦧ꧀ꦪꦠ꧀ꦠꦴ, ꦏꦺ ꦕ ꦱꦈꦥꦴꦢꦶꦱꦺꦱꦁ ꦮꦴ ‘ꦱꦈꦥꦴꦢꦶꦱꦺꦱꦺꦴ’ꦠꦶ ꦗꦴꦤꦶꦱ꧀ꦱꦤ꧀ꦠꦶ, ꦄꦤꦸꦥꦴꦢꦶꦱꦺꦱꦁ ꦮꦴ ‘ꦄꦤꦸꦥꦴꦢꦶꦱꦺꦱꦺꦴ’ꦠꦶ ꦗꦴꦤꦶꦱ꧀ꦱꦤ꧀ꦠꦶ! ꦆꦩꦺ ꦑꦺꦴ, ꦱꦴꦫꦶꦥꦸꦠ꧀ꦠ, ꦤꦮ ꦥꦸꦒ꧀ꦒꦭꦴ ꦱꦈꦥꦴꦢꦶꦱꦺꦱꦴ ꦏꦴꦭꦁ ꦏꦸꦫꦸꦩꦴꦤꦴ ꦥꦫꦶꦩꦸꦠ꧀ꦠꦴ ꦤꦶꦫꦪꦴ ꦥꦫꦶꦩꦸꦠ꧀ꦠꦴ ꦠꦶꦫꦕ꧀ꦖꦴꦤꦪꦺꦴꦤꦶꦪꦴ ꦥꦫꦶꦩꦸꦠ꧀ꦠꦴ ꦥꦺꦠ꧀ꦠꦶꦮꦶꦱꦪꦴ ꦥꦫꦶꦩꦸꦠ꧀ꦠꦴ ꦄꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦴ. ꦤ ꦠꦴꦮꦴꦪꦁ, ꦱꦴꦫꦶꦥꦸꦠ꧀ꦠ, ꦣꦩ꧀ꦩꦥꦫꦶꦪꦴꦪꦺꦴ ꦥꦛꦶꦨꦴꦱꦶ ꦨꦶꦏ꧀ꦑꦹꦤꦁ ꦨꦶꦏ꧀ꦑꦸꦤꦷꦤꦁ ꦈꦥꦴꦱꦏꦴꦤꦁ ꦈꦥꦴꦱꦶꦏꦴꦤꦁ. ꦠꦁ ꦏꦶꦱ꧀ꦱ ꦲꦺꦠꦸ? ꦩꦴꦪꦶꦩꦁ ꦣꦩ꧀ꦩꦥꦫꦶꦪꦴꦪꦁ ꦱꦸꦠ꧀ꦮꦴ ꦥꦩꦴꦢꦁ ꦄꦴꦲꦫꦶꦁꦱꦹꦠꦶ [ꦄꦴꦲꦫꦶꦁꦱꦸ (ꦱꦷ. ꦥꦷ.)]. ꦄꦥꦶ ꦕ ꦩꦪꦴ [ꦄꦥꦶ ꦕꦴꦪꦁ (?)], ꦱꦴꦫꦶꦥꦸꦠ꧀ꦠ, ꦣꦩ꧀ꦩꦥꦫꦶꦪꦴꦪꦺꦴ ꦥꦚ꧀ꦲꦴꦣꦶꦥ꧀ꦥꦴꦪꦺꦤ ꦨꦴꦱꦶꦠꦺꦴ’’ꦠꦶ. ꦢꦸꦠꦶꦪꦁ.