꧗. ꦆꦕ꧀ꦖꦴꦱꦸꦠ꧀ꦠꦁ

꧗꧗. ꦠꦠ꧀ꦫ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦴꦮꦸꦱꦺꦴ ꦨꦶꦏ꧀ꦑꦮꦺꦴ’’ꦠꦶ! ‘‘ꦄꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦥꦕ꧀ꦕꦱ꧀ꦱꦺꦴꦱꦸꦁ. ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦌꦠꦢꦮꦺꦴꦕ –

[ꦄ. ꦤꦶ. ꧘.꧖꧑] ‘‘ꦄꦛ꧀ꦜꦶꦩꦺ, ꦄꦴꦮꦸꦱꦺꦴ, ꦥꦸꦒ꧀ꦒꦭꦴ ꦱꦤ꧀ꦠꦺꦴ ꦱꦁꦮꦶꦗ꧀ꦗꦩꦴꦤꦴ ꦭꦺꦴꦏꦱ꧀ꦩꦶꦁ. ꦏꦠꦩꦺ ꦄꦛ꧀ꦜ? ꦆꦣꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦮꦶꦮꦶꦠ꧀ꦠꦱ꧀ꦱ ꦮꦶꦲꦫꦠꦺꦴ ꦤꦶꦫꦴꦪꦠ꧀ꦠꦮꦸꦠ꧀ꦠꦶꦤꦺꦴ ꦆꦕ꧀ꦖꦴ ꦈꦥ꧀ꦥꦗ꧀ꦗꦠꦶ ꦭꦴꦨꦴꦪ. ꦱꦺꦴ ꦈꦛ꧀ꦜꦲꦠꦶ, ꦓꦛꦠꦶ, ꦮꦴꦪꦩꦠꦶ ꦭꦴꦨꦴꦪ. ꦠꦱ꧀ꦱ ꦈꦛ꧀ꦜꦲꦠꦺꦴ, ꦓꦛꦠꦺꦴ, ꦮꦴꦪꦩꦠꦺꦴ ꦭꦴꦨꦴꦪ ꦭꦴꦨꦺꦴ ꦤꦸꦥ꧀ꦥꦗ꧀ꦗꦠꦶ. ꦱꦺꦴ ꦠꦺꦤ ꦄꦭꦴꦨꦺꦤ ꦱꦺꦴꦕꦠꦶ ꦏꦶꦭꦩꦠꦶ ꦥꦫꦶꦢꦺꦮꦠꦶ, ꦈꦫꦠ꧀ꦠꦴꦭ꦳ꦶꦁ ꦏꦤ꧀ꦢꦠꦶ, ꦱꦩ꧀ꦩꦺꦴꦲꦁ ꦄꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ‘ꦨꦶꦏ꧀ꦑꦸ ꦆꦕ꧀ꦖꦺꦴ ꦮꦶꦲꦫꦠꦶ ꦭꦴꦨꦴꦪ, ꦈꦛ꧀ꦜꦲꦠꦶ, ꦓꦛꦠꦶ, ꦮꦴꦪꦩꦠꦶ ꦭꦴꦨꦴꦪ, ꦤ ꦕ ꦭꦴꦨꦷ, ꦱꦺꦴꦕꦷ ꦕ ꦥꦫꦶꦢꦺꦮꦷ ꦕ, ꦕꦸꦠꦺꦴ ꦕ ꦱꦢ꧀ꦣꦩ꧀ꦩꦴ’’’.

‘‘ꦆꦣ ꦥꦤꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦮꦶꦮꦶꦠ꧀ꦠꦱ꧀ꦱ ꦮꦶꦲꦫꦠꦺꦴ ꦤꦶꦫꦴꦪꦠ꧀ꦠꦮꦸꦠ꧀ꦠꦶꦤꦺꦴ ꦆꦕ꧀ꦖꦴ ꦈꦥ꧀ꦥꦗ꧀ꦗꦠꦶ ꦭꦴꦨꦴꦪ. ꦱꦺꦴ ꦈꦛ꧀ꦜꦲꦠꦶ, ꦓꦛꦠꦶ, ꦮꦴꦪꦩꦠꦶ ꦭꦴꦨꦴꦪ. ꦠꦱ꧀ꦱ ꦈꦛ꧀ꦜꦲꦠꦺꦴ ꦓꦛꦠꦺꦴ ꦮꦴꦪꦩꦠꦺꦴ ꦭꦴꦨꦴꦪ ꦭꦴꦨꦺꦴ ꦈꦥ꧀ꦥꦗ꧀ꦗꦠꦶ. ꦱꦺꦴ ꦠꦺꦤ ꦭꦴꦨꦺꦤ ꦩꦗ꧀ꦗꦠꦶ ꦥꦩꦗ꧀ꦗꦠꦶ ꦥꦩꦴꦢꦩꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ‘ꦨꦶꦏ꧀ꦑꦸ ꦆꦕ꧀ꦖꦺꦴ ꦮꦶꦲꦫꦠꦶ ꦭꦴꦨꦴꦪ, ꦈꦛ꧀ꦜꦲꦠꦶ ꦓꦛꦠꦶ ꦮꦴꦪꦩꦠꦶ ꦭꦴꦨꦴꦪ, ꦭꦴꦨꦷ ꦕ, ꦩꦢꦷ ꦕ ꦥꦩꦴꦢꦷ ꦕ, ꦕꦸꦠꦺꦴ ꦕ ꦱꦢ꧀ꦣꦩ꧀ꦩꦴ’’’.

‘‘ꦆꦣ ꦥꦤꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦮꦶꦮꦶꦠ꧀ꦠꦱ꧀ꦱ ꦮꦶꦲꦫꦠꦺꦴ ꦤꦶꦫꦴꦪꦠ꧀ꦠꦮꦸꦠ꧀ꦠꦶꦤꦺꦴ ꦆꦕ꧀ꦖꦴ ꦈꦥ꧀ꦥꦗ꧀ꦗꦠꦶ ꦭꦴꦨꦴꦪ. ꦱꦺꦴ ꦤ ꦈꦛ꧀ꦜꦲꦠꦶ, ꦤ ꦓꦛꦠꦶ, ꦤ ꦮꦴꦪꦩꦠꦶ ꦭꦴꦨꦴꦪ. ꦠꦱ꧀ꦱ ꦄꦤꦸꦛ꧀ꦜꦲꦠꦺꦴ, ꦄꦓꦛꦠꦺꦴ, ꦄꦮꦴꦪꦩꦠꦺꦴ ꦭꦴꦨꦴꦪ ꦭꦴꦨꦺꦴ ꦤꦸꦥ꧀ꦥꦗ꧀ꦗꦠꦶ. ꦱꦺꦴ ꦠꦺꦤ ꦄꦭꦴꦨꦺꦤ ꦱꦺꦴꦕꦠꦶ ꦏꦶꦭꦩꦠꦶ ꦥꦫꦶꦢꦺꦮꦠꦶ, ꦈꦫꦠ꧀ꦠꦴꦭ꦳ꦶꦁ ꦏꦤ꧀ꦢꦠꦶ, ꦱꦩ꧀ꦩꦺꦴꦲꦁ ꦄꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ‘ꦨꦶꦏ꧀ꦑꦸ ꦆꦕ꧀ꦖꦺꦴ ꦮꦶꦲꦫꦠꦶ ꦭꦴꦨꦴꦪ, ꦤ ꦈꦛ꧀ꦜꦲꦠꦶ, ꦤ ꦓꦛꦠꦶ, ꦤ ꦮꦴꦪꦩꦠꦶ ꦭꦴꦨꦴꦪ, ꦤ ꦕ ꦭꦴꦨꦷ, ꦱꦺꦴꦕꦷ ꦕ ꦥꦫꦶꦢꦺꦮꦷ ꦕ, ꦕꦸꦠꦺꦴ ꦕ ꦱꦢ꧀ꦣꦩ꧀ꦩꦴ’’’.

‘‘ꦆꦣ ꦥꦤꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦮꦶꦮꦶꦠ꧀ꦠꦱ꧀ꦱ ꦮꦶꦲꦫꦠꦺꦴ ꦤꦶꦫꦴꦪꦠ꧀ꦠꦮꦸꦠ꧀ꦠꦶꦤꦺꦴ ꦆꦕ꧀ꦖꦴ ꦈꦥ꧀ꦥꦗ꧀ꦗꦠꦶ ꦭꦴꦨꦴꦪ. ꦱꦺꦴ ꦤ ꦈꦛ꧀ꦜꦲꦠꦶ, ꦤ ꦓꦛꦠꦶ, ꦤ ꦮꦴꦪꦩꦠꦶ ꦭꦴꦨꦴꦪ. ꦠꦱ꧀ꦱ ꦄꦤꦸꦛ꧀ꦜꦲꦠꦺꦴ, ꦄꦓꦛꦠꦺꦴ, ꦄꦮꦴꦪꦩꦠꦺꦴ ꦭꦴꦨꦴꦪ ꦭꦴꦨꦺꦴ ꦈꦥ꧀ꦥꦗ꧀ꦗꦠꦶ. ꦱꦺꦴ ꦠꦺꦤ ꦭꦴꦨꦺꦤ ꦩꦗ꧀ꦗꦠꦶ ꦥꦩꦗ꧀ꦗꦠꦶ ꦥꦩꦴꦢꦩꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ‘ꦨꦶꦏ꧀ꦑꦸ ꦆꦕ꧀ꦖꦺꦴ ꦮꦶꦲꦫꦠꦶ ꦭꦴꦨꦴꦪ, ꦤ ꦈꦛ꧀ꦜꦲꦠꦶ ꦤ ꦓꦛꦠꦶ ꦤ ꦮꦴꦪꦩꦠꦶ ꦭꦴꦨꦴꦪ, ꦭꦴꦨꦷ ꦕ, ꦩꦢꦷ ꦕ ꦥꦩꦴꦢꦷ ꦕ, ꦕꦸꦠꦺꦴ ꦕ ꦱꦢ꧀ꦣꦩ꧀ꦩꦴ’’’.

‘‘ꦆꦣ ꦥꦤꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦮꦶꦮꦶꦠ꧀ꦠꦱ꧀ꦱ ꦮꦶꦲꦫꦠꦺꦴ ꦤꦶꦫꦴꦪꦠ꧀ꦠꦮꦸꦠ꧀ꦠꦶꦤꦺꦴ ꦆꦕ꧀ꦖꦴ ꦈꦥ꧀ꦥꦗ꧀ꦗꦠꦶ ꦭꦴꦨꦴꦪ. ꦱꦺꦴ ꦈꦛ꧀ꦜꦲꦠꦶ, ꦓꦛꦠꦶ, ꦮꦴꦪꦩꦠꦶ ꦭꦴꦨꦴꦪ. ꦠꦱ꧀ꦱ ꦈꦛ꧀ꦜꦲꦠꦺꦴ, ꦓꦛꦠꦺꦴ, ꦮꦴꦪꦩꦠꦺꦴ ꦭꦴꦨꦴꦪ, ꦭꦴꦨꦺꦴ ꦤꦸꦥ꧀ꦥꦗ꧀ꦗꦠꦶ. ꦱꦺꦴ ꦠꦺꦤ ꦄꦭꦴꦨꦺꦤ ꦤ ꦱꦺꦴꦕꦠꦶ ꦤ ꦏꦶꦭꦩꦠꦶ ꦤ ꦥꦫꦶꦢꦺꦮꦠꦶ, ꦤ ꦈꦫꦠ꧀ꦠꦴꦭ꦳ꦶꦁ ꦏꦤ꧀ꦢꦠꦶ, ꦤ ꦱꦩ꧀ꦩꦺꦴꦲꦁ ꦄꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ‘ꦨꦶꦏ꧀ꦑꦸ ꦆꦕ꧀ꦖꦺꦴ ꦮꦶꦲꦫꦠꦶ ꦭꦴꦨꦴꦪ, ꦈꦛ꧀ꦜꦲꦠꦶ ꦓꦛꦠꦶ ꦮꦴꦪꦩꦠꦶ ꦭꦴꦨꦴꦪ, ꦤ ꦕ ꦭꦴꦨꦷ, ꦤ ꦕ ꦱꦺꦴꦕꦷ ꦤ ꦕ ꦥꦫꦶꦢꦺꦮꦷ, ꦄꦕ꧀ꦕꦸꦠꦺꦴ ꦕ ꦱꦢ꧀ꦣꦩ꧀ꦩꦴ’’’.

‘‘ꦆꦣ ꦥꦤꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦮꦶꦮꦶꦠ꧀ꦠꦱ꧀ꦱ ꦮꦶꦲꦫꦠꦺꦴ ꦤꦶꦫꦴꦪꦠ꧀ꦠꦮꦸꦠ꧀ꦠꦶꦤꦺꦴ ꦆꦕ꧀ꦖꦴ ꦈꦥ꧀ꦥꦗ꧀ꦗꦠꦶ ꦭꦴꦨꦴꦪ. ꦱꦺꦴ ꦈꦛ꧀ꦜꦲꦠꦶ, ꦓꦛꦠꦶ, ꦮꦴꦪꦩꦠꦶ ꦭꦴꦨꦴꦪ. ꦠꦱ꧀ꦱ ꦈꦛ꧀ꦜꦲꦠꦺꦴ, ꦓꦛꦠꦺꦴ, ꦮꦴꦪꦩꦠꦺꦴ ꦭꦴꦨꦴꦪ, ꦭꦴꦨꦺꦴ ꦈꦥ꧀ꦥꦗ꧀ꦗꦠꦶ. ꦱꦺꦴ ꦠꦺꦤ ꦭꦴꦨꦺꦤ ꦤ ꦩꦗ꧀ꦗꦠꦶ ꦤ ꦥꦩꦗ꧀ꦗꦠꦶ ꦤ ꦥꦩꦴꦢꦩꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ‘ꦨꦶꦏ꧀ꦑꦸ ꦆꦕ꧀ꦖꦺꦴ ꦮꦶꦲꦫꦠꦶ ꦭꦴꦨꦴꦪ, ꦈꦛ꧀ꦜꦲꦠꦶ, ꦓꦛꦠꦶ, ꦮꦴꦪꦩꦠꦶ ꦭꦴꦨꦴꦪ, ꦭꦴꦨꦷ ꦕ, ꦤ ꦕ ꦩꦢꦷ ꦤ ꦕ ꦥꦩꦴꦢꦷ, ꦄꦕ꧀ꦕꦸꦠꦺꦴ ꦕ ꦱꦢ꧀ꦣꦩ꧀ꦩꦴ’’’.

‘‘ꦆꦣ ꦥꦤꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦮꦶꦮꦶꦠ꧀ꦠꦱ꧀ꦱ ꦮꦶꦲꦫꦠꦺꦴ ꦤꦶꦫꦴꦪꦠ꧀ꦠꦮꦸꦠ꧀ꦠꦶꦤꦺꦴ ꦆꦕ꧀ꦖꦴ ꦈꦥ꧀ꦥꦗ꧀ꦗꦠꦶ ꦭꦴꦨꦴꦪ. ꦱꦺꦴ ꦤ ꦈꦛ꧀ꦜꦲꦠꦶ, ꦤ ꦓꦛꦠꦶ, ꦤ ꦮꦴꦪꦩꦠꦶ ꦭꦴꦨꦴꦪ. ꦠꦱ꧀ꦱ ꦄꦤꦸꦛ꧀ꦜꦲꦠꦺꦴ, ꦄꦓꦛꦠꦺꦴ, ꦄꦮꦴꦪꦩꦠꦺꦴ ꦭꦴꦨꦴꦪ, ꦭꦴꦨꦺꦴ ꦤꦸꦥ꧀ꦥꦗ꧀ꦗꦠꦶ. ꦱꦺꦴ ꦠꦺꦤ ꦄꦭꦴꦨꦺꦤ ꦤ ꦱꦺꦴꦕꦠꦶ ꦤ ꦏꦶꦭꦩꦠꦶ ꦤ ꦥꦫꦶꦢꦺꦮꦠꦶ, ꦤ ꦈꦫꦠ꧀ꦠꦴꦭ꦳ꦶꦁ ꦏꦤ꧀ꦢꦠꦶ, ꦤ ꦱꦩ꧀ꦩꦺꦴꦲꦁ ꦄꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ‘ꦨꦶꦏ꧀ꦑꦸ ꦆꦕ꧀ꦖꦺꦴ ꦮꦶꦲꦫꦠꦶ ꦭꦴꦨꦴꦪ, ꦤ ꦈꦛ꧀ꦜꦲꦠꦶ, ꦤ ꦓꦛꦠꦶ, ꦤ ꦮꦴꦪꦩꦠꦶ ꦭꦴꦨꦴꦪ, ꦤ ꦕ ꦭꦴꦨꦷ, ꦤ ꦕ ꦱꦺꦴꦕꦷ ꦤ ꦕ ꦥꦫꦶꦢꦺꦮꦷ, ꦄꦕ꧀ꦕꦸꦠꦺꦴ ꦕ ꦱꦢ꧀ꦣꦩ꧀ꦩꦴ’’’.

‘‘ꦆꦣ ꦥꦤꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦮꦶꦮꦶꦠ꧀ꦠꦱ꧀ꦱ ꦮꦶꦲꦫꦠꦺꦴ ꦤꦶꦫꦴꦪꦠ꧀ꦠꦮꦸꦠ꧀ꦠꦶꦤꦺꦴ ꦆꦕ꧀ꦖꦴ ꦈꦥ꧀ꦥꦗ꧀ꦗꦠꦶ ꦭꦴꦨꦴꦪ. ꦱꦺꦴ ꦤ ꦈꦛ꧀ꦜꦲꦠꦶ, ꦤ ꦓꦛꦠꦶ, ꦤ ꦮꦴꦪꦩꦠꦶ ꦭꦴꦨꦴꦪ. ꦠꦱ꧀ꦱ ꦄꦤꦸꦛ꧀ꦜꦲꦠꦺꦴ, ꦄꦓꦛꦠꦺꦴ, ꦄꦮꦴꦪꦩꦠꦺꦴ ꦭꦴꦨꦴꦪ, ꦭꦴꦨꦺꦴ ꦈꦥ꧀ꦥꦗ꧀ꦗꦠꦶ. ꦱꦺꦴ ꦠꦺꦤ ꦭꦴꦨꦺꦤ ꦤ ꦩꦗ꧀ꦗꦠꦶ ꦤ ꦥꦩꦗ꧀ꦗꦠꦶ ꦤ ꦥꦩꦴꦢꦩꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ‘ꦨꦶꦏ꧀ꦑꦸ ꦆꦕ꧀ꦖꦺꦴ ꦮꦶꦲꦫꦠꦶ ꦭꦴꦨꦴꦪ, ꦤ ꦈꦛ꧀ꦜꦲꦠꦶ, ꦤ ꦓꦛꦠꦶ, ꦤ ꦮꦴꦪꦩꦠꦶ ꦭꦴꦨꦴꦪ, ꦭꦴꦨꦷ ꦕ, ꦤ ꦕ ꦩꦢꦷ ꦤ ꦕ ꦥꦩꦴꦢꦷ, ꦄꦕ꧀ꦕꦸꦠꦺꦴ ꦕ ꦱꦢ꧀ꦣꦩ꧀ꦩꦴ’. ꦆꦩꦺ ꦑꦺꦴ, ꦄꦴꦮꦸꦱꦺꦴ, ꦄꦛ꧀ꦜ ꦥꦸꦒ꧀ꦒꦭꦴ ꦱꦤ꧀ꦠꦺꦴ ꦱꦁꦮꦶꦗ꧀ꦗꦩꦴꦤꦴ ꦭꦺꦴꦏꦱ꧀ꦩꦶ’’ꦤ꧀ꦠꦶ. ꦱꦠ꧀ꦠꦩꦁ.