꧖. ꦄꦤꦸꦫꦸꦢ꧀ꦣꦱꦸꦠ꧀ꦠꦁ

꧔꧖. ꦌꦏꦁ ꦱꦩꦪꦁ ꦨꦒꦮꦴ ꦏꦺꦴꦱꦩ꧀ꦧꦶꦪꦁ ꦮꦶꦲꦫꦠꦶ ꦓꦺꦴꦱꦶꦠꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦄꦤꦸꦫꦸꦢ꧀ꦣꦺꦴ ꦢꦶꦮꦴꦮꦶꦲꦴꦫꦁ ꦒꦠꦺꦴ ꦲꦺꦴꦠꦶ ꦥꦛꦶꦱꦭ꧀ꦭꦷꦤꦺꦴ. ꦄꦡ ꦑꦺꦴ ꦱꦩ꧀ꦧꦲꦸꦭꦴ ꦩꦤꦴꦥꦏꦴꦪꦶꦏꦴ ꦢꦺꦮꦠꦴ ꦪꦺꦤꦴꦪꦱ꧀ꦩꦴ ꦄꦤꦸꦫꦸꦢ꧀ꦣꦺꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦤꦸꦫꦸꦢ꧀ꦣꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦁꦱꦸ. ꦌꦏꦩꦤ꧀ꦠꦁ ꦜꦶꦠꦴ ꦑꦺꦴ ꦠꦴ ꦢꦺꦮꦠꦴ ꦄꦴꦪꦱ꧀ꦩꦤ꧀ꦠꦁ ꦄꦤꦸꦫꦸꦢ꧀ꦣꦁ ꦌꦠꦢꦮꦺꦴꦕꦸꦁ – ‘‘ꦩꦪꦁ, ꦨꦤ꧀ꦠꦺ ꦄꦤꦸꦫꦸꦢ꧀ꦣ, ꦩꦤꦴꦥꦏꦴꦪꦶꦏꦴ ꦤꦴꦩ ꦢꦺꦮꦠꦴ ꦠꦷꦱꦸ ꦜꦴꦤꦺꦱꦸ ꦆꦱ꧀ꦱꦫꦶꦪꦁ ꦏꦴꦫꦺꦩ ꦮꦱꦁ ꦮꦠ꧀ꦠꦺꦩ. ꦩꦪꦁ, ꦨꦤ꧀ꦠꦺ ꦄꦤꦸꦫꦸꦢ꧀ꦣ, ꦪꦴꦢꦶꦱꦏꦁ ꦮꦟ꧀ꦟꦁ ꦄꦴꦏꦔ꧀ꦑꦴꦩ ꦠꦴꦢꦶꦱꦏꦁ ꦮꦟ꧀ꦟꦁ ꦜꦴꦤꦱꦺꦴ ꦥꦛꦶꦭꦨꦴꦩ; ꦪꦴꦢꦶꦱꦏꦁ ꦱꦫꦁ ꦄꦴꦏꦔ꧀ꦑꦴꦩ ꦠꦴꦢꦶꦱꦏꦁ ꦱꦫꦁ ꦜꦴꦤꦱꦺꦴ ꦥꦛꦶꦭꦨꦴꦩ; ꦪꦴꦢꦶꦱꦏꦁ ꦱꦸꦑꦁ ꦄꦴꦏꦔ꧀ꦑꦴꦩ ꦠꦴꦢꦶꦱꦏꦁ ꦱꦸꦑꦁ ꦜꦴꦤꦱꦺꦴ ꦥꦛꦶꦭꦨꦴꦩ. ꦩꦪꦁ, ꦨꦤ꧀ꦠꦺ ꦄꦤꦸꦫꦸꦢ꧀ꦣ, ꦩꦤꦴꦥꦏꦴꦪꦶꦏꦴ ꦤꦴꦩ ꦢꦺꦮꦠꦴ ꦆꦩꦺꦱꦸ ꦠꦷꦱꦸ ꦜꦴꦤꦺꦱꦸ ꦆꦱ꧀ꦱꦫꦶꦪꦁ ꦏꦴꦫꦺꦩ ꦮꦱꦁ ꦮꦠ꧀ꦠꦺꦩꦴ’’ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦄꦤꦸꦫꦸꦢ꧀ꦣꦱ꧀ꦱ ꦌꦠꦢꦲꦺꦴꦱꦶ – ‘‘ꦄꦲꦺꦴ ꦮꦠꦶꦩꦴ ꦢꦺꦮꦠꦴ ꦱꦧ꧀ꦧꦴꦮ ꦤꦷꦭꦴ ꦄꦱ꧀ꦱꦸ ꦤꦷꦭꦮꦟ꧀ꦟꦴ ꦤꦷꦭꦮꦠ꧀ꦡꦴ ꦤꦷꦭꦴꦭꦔ꧀ꦏꦴꦫꦴ’’ꦠꦶ. ꦄꦡ ꦑꦺꦴ ꦠꦴ ꦢꦺꦮꦠꦴ ꦄꦴꦪꦱ꧀ꦩꦠꦺꦴ ꦄꦤꦸꦫꦸꦢ꧀ꦣꦱ꧀ꦱ ꦕꦶꦠ꧀ꦠꦩꦚ꧀ꦚꦴꦪ ꦱꦧ꧀ꦧꦴꦮ ꦤꦷꦭꦴ ꦄꦲꦺꦱꦸꦁ ꦤꦷꦭꦮꦟ꧀ꦟꦴ ꦤꦷꦭꦮꦠ꧀ꦡꦴ ꦤꦷꦭꦴꦭꦔ꧀ꦏꦴꦫꦴ.

ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦄꦤꦸꦫꦸꦢ꧀ꦣꦱ꧀ꦱ ꦌꦠꦢꦲꦺꦴꦱꦶ – ‘‘ꦄꦲꦺꦴ ꦮꦠꦶꦩꦴ ꦢꦺꦮꦠꦴ ꦱꦧ꧀ꦧꦴꦮ ꦥꦷꦠꦴ ꦄꦱ꧀ꦱꦸ…ꦥꦺ… ꦱꦧ꧀ꦧꦴꦮ ꦭꦺꦴꦲꦶꦠꦏꦴ ꦄꦱ꧀ꦱꦸ… ꦱꦧ꧀ꦧꦴꦮ ꦎꦢꦴꦠꦴ ꦄꦱ꧀ꦱꦸ ꦎꦢꦴꦠꦮꦟ꧀ꦟꦴ ꦎꦢꦴꦠꦮꦠ꧀ꦡꦴ ꦎꦢꦴꦠꦴꦭꦔ꧀ꦏꦴꦫꦴ’’ꦠꦶ. ꦄꦡ ꦑꦺꦴ ꦠꦴ ꦢꦺꦮꦠꦴ ꦄꦴꦪꦱ꧀ꦩꦠꦺꦴ ꦄꦤꦸꦫꦸꦢ꧀ꦣꦱ꧀ꦱ ꦕꦶꦠ꧀ꦠꦩꦚ꧀ꦚꦴꦪ ꦱꦧ꧀ꦧꦴꦮ ꦎꦢꦴꦠꦴ ꦄꦲꦺꦱꦸꦁ ꦎꦢꦴꦠꦮꦟ꧀ꦟꦴ ꦎꦢꦴꦠꦮꦠ꧀ꦡꦴ ꦎꦢꦴꦠꦴꦭꦔ꧀ꦏꦴꦫꦴ.

ꦄꦡ ꦑꦺꦴ ꦠꦴ ꦢꦺꦮꦠꦴ ꦌꦏꦴ ꦕ [ꦏꦺꦴ (ꦱꦷ.), ꦌꦏꦴꦮ (ꦱ꧀ꦪꦴ. ꦥꦷ.)] ꦒꦴꦪꦶ ꦌꦏꦴ ꦕ [ꦌꦏꦴ ꦥꦤ (ꦱꦷ.), ꦌꦏꦴꦮ (ꦱ꧀ꦪꦴ. ꦥꦷ.)] ꦤꦕ꧀ꦕꦶ ꦌꦏꦴ ꦕ [ꦌꦏꦴ (ꦱꦷ.), ꦌꦏꦴꦮ (ꦱ꧀ꦪꦴ. ꦥꦷ.)] ꦄꦕ꧀ꦖꦫꦁ ꦮꦴꦢꦺꦱꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦥꦚ꧀ꦕꦔ꧀ꦒꦶꦏꦱ꧀ꦱ ꦠꦹꦫꦶꦪꦱ꧀ꦱ [ꦠꦸꦫꦶꦪꦱ꧀ꦱ (ꦱꦷ. ꦱ꧀ꦪꦴ. ꦥꦷ.)] ꦱꦸꦮꦶꦤꦷꦠꦱ꧀ꦱ ꦱꦸꦥ꧀ꦥꦛꦶꦥꦠꦴꦭ꦳ꦶꦠꦱ꧀ꦱ ꦏꦸꦱꦭꦺꦲꦶ ꦱꦸꦱꦩꦤ꧀ꦤꦴꦲꦠꦱ꧀ꦱ ꦱꦢ꧀ꦢꦺꦴ ꦲꦺꦴꦠꦶ ꦮꦒ꧀ꦒꦸ ꦕ ꦫꦗꦤꦷꦪꦺꦴ ꦕ ꦏꦩꦤꦷꦪꦺꦴ ꦕ ꦥꦺꦩꦤꦷꦪꦺꦴ ꦕ ꦩꦢꦤꦷꦪꦺꦴ ꦕ; ꦌꦮꦩꦺꦮꦁ ꦠꦴꦱꦁ ꦢꦺꦮꦠꦴꦤꦁ ꦄꦭꦔ꧀ꦏꦴꦫꦴꦤꦁ ꦱꦢ꧀ꦢꦺꦴ ꦲꦺꦴꦠꦶ ꦮꦒ꧀ꦒꦸ ꦕ ꦫꦗꦤꦷꦪꦺꦴ ꦕ ꦏꦩꦤꦷꦪꦺꦴ ꦕ ꦥꦺꦩꦤꦷꦪꦺꦴ ꦕ ꦩꦢꦤꦷꦪꦺꦴ ꦕ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦤꦸꦫꦸꦢ꧀ꦣꦺꦴ ꦆꦤ꧀ꦢ꧀ꦫꦶꦪꦴꦤꦶ ꦎꦏ꧀ꦑꦶꦥꦶ.

ꦄꦡ ꦑꦺꦴ ꦠꦴ ꦢꦺꦮꦠꦴ ‘‘ꦤ ꦑ꧀ꦮꦪ꧀ꦪꦺꦴ ꦄꦤꦸꦫꦸꦢ꧀ꦣꦺꦴ ꦱꦴꦢꦶꦪꦠꦷ’’ꦠꦶ [ꦱꦴꦢꦪꦠꦷꦠꦶ (ꦱꦢ꧀ꦢꦤꦷꦠꦶꦣꦴꦠꦸꦩꦴꦭꦴ)] ꦠꦠ꧀ꦡꦺꦮꦤ꧀ꦠꦫꦣꦴꦪꦶꦁꦱꦸ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦤꦸꦫꦸꦢ꧀ꦣꦺꦴ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦄꦤꦸꦫꦸꦢ꧀ꦣꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ –

‘‘ꦆꦣꦴꦲꦁ, ꦨꦤ꧀ꦠꦺ, ꦢꦶꦮꦴꦮꦶꦲꦴꦫꦁ ꦒꦠꦺꦴ ꦲꦺꦴꦩꦶ ꦥꦛꦶꦱꦭ꧀ꦭꦷꦤꦺꦴ. ꦄꦡ ꦑꦺꦴ, ꦨꦤ꧀ꦠꦺ, ꦱꦩ꧀ꦧꦲꦸꦭꦴ ꦩꦤꦴꦥꦏꦴꦪꦶꦏꦴ ꦢꦺꦮꦠꦴ ꦪꦺꦤꦴꦲꦁ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦩꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦁꦱꦸ. ꦌꦏꦩꦤ꧀ꦠꦁ ꦜꦶꦠꦴ ꦑꦺꦴ, ꦨꦤ꧀ꦠꦺ, ꦠꦴ ꦢꦺꦮꦠꦴ ꦩꦁ ꦌꦠꦢꦮꦺꦴꦕꦸꦁ – ‘ꦩꦪꦁ, ꦨꦤ꧀ꦠꦺ ꦄꦤꦸꦫꦸꦢ꧀ꦣ, ꦩꦤꦴꦥꦏꦴꦪꦶꦏꦴ ꦤꦴꦩ ꦢꦺꦮꦠꦴ ꦠꦷꦱꦸ ꦜꦴꦤꦺꦱꦸ ꦆꦱ꧀ꦱꦫꦶꦪꦁ ꦏꦴꦫꦺꦩ ꦮꦱꦁ ꦮꦠ꧀ꦠꦺꦩ. ꦩꦪꦁ, ꦨꦤ꧀ꦠꦺ ꦄꦤꦸꦫꦸꦢ꧀ꦣ, ꦪꦴꦢꦶꦱꦏꦁ ꦮꦟ꧀ꦟꦁ ꦄꦴꦏꦔ꧀ꦑꦴꦩ ꦠꦴꦢꦶꦱꦏꦁ ꦮꦟ꧀ꦟꦁ ꦜꦴꦤꦱꦺꦴ ꦥꦛꦶꦭꦨꦴꦩ; ꦪꦴꦢꦶꦱꦏꦁ ꦱꦫꦁ ꦄꦴꦏꦔ꧀ꦑꦴꦩ ꦠꦴꦢꦶꦱꦏꦁ ꦱꦫꦁ ꦜꦴꦤꦱꦺꦴ ꦥꦛꦶꦭꦨꦴꦩ; ꦪꦴꦢꦶꦱꦏꦁ ꦱꦸꦑꦁ ꦄꦴꦏꦔ꧀ꦑꦴꦩ ꦠꦴꦢꦶꦱꦏꦁ ꦱꦸꦑꦁ ꦜꦴꦤꦱꦺꦴ ꦥꦛꦶꦭꦨꦴꦩ. ꦩꦪꦁ, ꦨꦤ꧀ꦠꦺ ꦄꦤꦸꦫꦸꦢ꧀ꦣ, ꦩꦤꦴꦥꦏꦴꦪꦶꦏꦴ ꦤꦴꦩ ꦢꦺꦮꦠꦴ ꦆꦩꦺꦱꦸ ꦠꦷꦱꦸ ꦜꦴꦤꦺꦱꦸ ꦆꦱ꧀ꦱꦫꦶꦪꦁ ꦏꦴꦫꦺꦩ ꦮꦱꦁ ꦮꦠ꧀ꦠꦺꦩꦴ’ꦠꦶ. ꦠꦱ꧀ꦱ ꦩꦪ꧀ꦲꦁ, ꦨꦤ꧀ꦠꦺ, ꦌꦠꦢꦲꦺꦴꦱꦶ – ‘ꦄꦲꦺꦴ ꦮꦠꦶꦩꦴ ꦢꦺꦮꦠꦴ ꦱꦧ꧀ꦧꦴꦮ ꦤꦷꦭꦴ ꦄꦱ꧀ꦱꦸ ꦤꦷꦭꦮꦟ꧀ꦟꦴ ꦤꦷꦭꦮꦠ꧀ꦡꦴ ꦤꦷꦭꦴꦭꦔ꧀ꦏꦴꦫꦴ’ꦠꦶ. ꦄꦡ ꦑꦺꦴ, ꦨꦤ꧀ꦠꦺ, ꦠꦴ ꦢꦺꦮꦠꦴ ꦩꦩ ꦕꦶꦠ꧀ꦠꦩꦚ꧀ꦚꦴꦪ ꦱꦧ꧀ꦧꦴꦮ ꦤꦷꦭꦴ ꦄꦲꦺꦱꦸꦁ ꦤꦷꦭꦮꦟ꧀ꦟꦴ ꦤꦷꦭꦮꦠ꧀ꦡꦴ ꦤꦷꦭꦴꦭꦔ꧀ꦏꦴꦫꦴ.

‘‘ꦠꦱ꧀ꦱ ꦩꦪ꧀ꦲꦁ, ꦨꦤ꧀ꦠꦺ, ꦌꦠꦢꦲꦺꦴꦱꦶ – ‘ꦄꦲꦺꦴ ꦮꦠꦶꦩꦴ ꦢꦺꦮꦠꦴ ꦱꦧ꧀ꦧꦴꦮ ꦥꦷꦠꦴ ꦄꦱ꧀ꦱꦸ…ꦥꦺ… ꦱꦧ꧀ꦧꦴꦮ ꦭꦺꦴꦲꦶꦠꦏꦴ ꦄꦱ꧀ꦱꦸ…ꦥꦺ… ꦱꦧ꧀ꦧꦴꦮ ꦎꦢꦴꦠꦴ ꦄꦱ꧀ꦱꦸ ꦎꦢꦴꦠꦮꦟ꧀ꦟꦴ ꦎꦢꦴꦠꦮꦠ꧀ꦡꦴ ꦎꦢꦴꦠꦴꦭꦔ꧀ꦏꦴꦫꦴ’ꦠꦶ. ꦄꦡ ꦑꦺꦴ, ꦨꦤ꧀ꦠꦺ, ꦠꦴ ꦢꦺꦮꦠꦴ ꦩꦩ ꦕꦶꦠ꧀ꦠꦩꦚ꧀ꦚꦴꦪ ꦱꦧ꧀ꦧꦴꦮ ꦎꦢꦴꦠꦴ ꦄꦲꦺꦱꦸꦁ ꦎꦢꦴꦠꦮꦟ꧀ꦟꦴ ꦎꦢꦴꦠꦮꦠ꧀ꦡꦴ ꦎꦢꦴꦠꦴꦭꦔ꧀ꦏꦴꦫꦴ.

‘‘ꦄꦡ ꦑꦺꦴ, ꦨꦤ꧀ꦠꦺ, ꦠꦴ ꦢꦺꦮꦠꦴ ꦌꦏꦴ ꦕ ꦒꦴꦪꦶ ꦌꦏꦴ ꦕ ꦤꦕ꧀ꦕꦶ ꦌꦏꦴ ꦕ ꦄꦕ꧀ꦖꦫꦁ ꦮꦴꦢꦺꦱꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦥꦚ꧀ꦕꦔ꧀ꦒꦶꦏꦱ꧀ꦱ ꦠꦹꦫꦶꦪꦱ꧀ꦱ ꦱꦸꦮꦶꦤꦷꦠꦱ꧀ꦱ ꦱꦸꦥ꧀ꦥꦛꦶꦥꦠꦴꦭ꦳ꦶꦠꦱ꧀ꦱ ꦏꦸꦱꦭꦺꦲꦶ ꦱꦸꦱꦩꦤ꧀ꦤꦴꦲꦠꦱ꧀ꦱ ꦱꦢ꧀ꦢꦺꦴ ꦲꦺꦴꦠꦶ ꦮꦒ꧀ꦒꦸ ꦕ ꦫꦗꦤꦷꦪꦺꦴ ꦕ ꦏꦩꦤꦷꦪꦺꦴ ꦕ ꦥꦺꦩꦤꦷꦪꦺꦴ ꦕ ꦩꦢꦤꦷꦪꦺꦴ ꦕ; ꦌꦮꦩꦺꦮꦁ ꦠꦴꦱꦁ ꦢꦺꦮꦠꦴꦤꦁ ꦄꦭꦔ꧀ꦏꦴꦫꦴꦤꦁ ꦱꦢ꧀ꦢꦺꦴ ꦲꦺꦴꦠꦶ ꦮꦒ꧀ꦒꦸ ꦕ ꦫꦗꦤꦷꦪꦺꦴ ꦕ ꦏꦩꦤꦷꦪꦺꦴ ꦕ ꦥꦺꦩꦤꦷꦪꦺꦴ ꦕ ꦩꦢꦤꦷꦪꦺꦴ ꦕ. ꦄꦡ ꦑ꧀ꦮꦴꦲꦁ, ꦨꦤ꧀ꦠꦺ, ꦆꦤ꧀ꦢ꧀ꦫꦶꦪꦴꦤꦶ ꦎꦏ꧀ꦑꦶꦥꦶꦁ.

‘‘ꦄꦡ ꦑꦺꦴ, ꦨꦤ꧀ꦠꦺ, ꦠꦴ ꦢꦺꦮꦠꦴ ‘ꦤ ꦑ꧀ꦮꦪ꧀ꦪꦺꦴ ꦄꦤꦸꦫꦸꦢ꧀ꦣꦺꦴ ꦱꦴꦢꦶꦪꦠꦷ’ꦠꦶ ꦠꦠ꧀ꦡꦺꦮꦤ꧀ꦠꦫꦣꦴꦪꦶꦁꦱꦸ. ꦏꦠꦶꦲꦶ ꦤꦸ ꦑꦺꦴ, ꦨꦤ꧀ꦠꦺ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦩꦴꦠꦸꦒꦴꦩꦺꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦩꦤꦴꦥꦏꦴꦪꦶꦏꦴꦤꦁ ꦢꦺꦮꦴꦤꦁ ꦱꦲꦧ꧀ꦪꦠꦁ ꦈꦥꦥꦗ꧀ꦗꦠꦷ’’ꦠꦶ?

‘‘ꦄꦛ꧀ꦜꦲꦶ ꦑꦺꦴ, ꦄꦤꦸꦫꦸꦢ꧀ꦣ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦩꦴꦠꦸꦒꦴꦩꦺꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦩꦤꦴꦥꦏꦴꦪꦶꦏꦴꦤꦁ ꦢꦺꦮꦴꦤꦁ ꦱꦲꦧ꧀ꦪꦠꦁ ꦈꦥꦥꦗ꧀ꦗꦠꦶ. ꦏꦠꦩꦺꦲꦶ ꦄꦛ꧀ꦜꦲꦶ? ꦆꦣ, ꦄꦤꦸꦫꦸꦢ꧀ꦣ, ꦩꦴꦠꦸꦒꦴꦩꦺꦴ ꦪꦱ꧀ꦱ ꦩꦴꦠꦴꦥꦶꦠꦫꦺꦴ ꦨꦠ꧀ꦠꦸꦤꦺꦴ ꦢꦺꦤ꧀ꦠꦶ ꦄꦠ꧀ꦡꦏꦴꦩꦴ ꦲꦶꦠꦺꦱꦶꦤꦺꦴ ꦄꦤꦸꦏꦩ꧀ꦥꦏꦴ ꦄꦤꦸꦏꦩ꧀ꦥꦁ ꦈꦥꦴꦢꦴꦪ ꦠꦱ꧀ꦱ ꦲꦺꦴꦠꦶ ꦥꦸꦧ꧀ꦧꦸꦛ꧀ꦜꦴꦪꦶꦤꦷ ꦥꦕ꧀ꦖꦴꦤꦶꦥꦴꦠꦶꦤꦷ ꦏꦶꦔ꧀ꦏꦴꦫꦥꦛꦶꦱ꧀ꦱꦴꦮꦶꦤꦷ ꦩꦤꦴꦥꦕꦴꦫꦶꦤꦷ ꦥꦶꦪꦮꦴꦢꦶꦤꦷ.

‘‘ꦪꦺ ꦠꦺ ꦨꦠ꧀ꦠꦸ ꦒꦫꦸꦤꦺꦴ [ꦒꦸꦫꦸꦤꦺꦴ (ꦏ.)] ꦲꦺꦴꦤ꧀ꦠꦶ – ꦩꦴꦠꦴꦠꦶ ꦮꦴ ꦥꦶꦠꦴꦠꦶ ꦮꦴ ꦱꦩꦟꦧ꧀ꦫꦴꦲ꧀ꦩꦟꦴꦠꦶ ꦮꦴ – ꦠꦺ ꦱꦏ꧀ꦏꦫꦺꦴꦠꦶ, ꦒꦫꦸꦁ ꦏꦫꦺꦴꦠꦶ [ꦒꦫꦸꦏꦫꦺꦴꦠꦶ (ꦱꦷ. ꦱ꧀ꦪꦴ. ꦥꦷ.)], ꦩꦴꦤꦺꦠꦶ, ꦥꦹꦗꦺꦠꦶ, ꦄꦧ꧀ꦨꦴꦒꦠꦺ ꦕ ꦄꦴꦱꦤꦺꦴꦢꦏꦺꦤ ꦥꦛꦶꦥꦹꦗꦺꦠꦶ.

‘‘ꦪꦺ ꦠꦺ ꦨꦠ꧀ꦠꦸ ꦄꦧ꧀ꦨꦤ꧀ꦠꦫꦴ ꦏꦩ꧀ꦩꦤ꧀ꦠꦴ – ꦈꦟ꧀ꦟꦴꦠꦶ ꦮꦴ ꦏꦥ꧀ꦥꦴꦱꦴꦠꦶ ꦮꦴ – ꦠꦠ꧀ꦡ ꦢꦏ꧀ꦑꦴ ꦲꦺꦴꦠꦶ ꦄꦤꦭꦱꦴ ꦠꦠ꧀ꦫꦸꦥꦴꦪꦴꦪ [ꦠꦠ꧀ꦫꦹꦥꦴꦪꦴꦪ (ꦱꦷ.), ꦄ. ꦤꦶ. ꧔.꧓꧕; ꧑꧑.꧑꧔] ꦮꦷꦩꦁꦱꦴꦪ ꦱꦩꦤ꧀ꦤꦴꦒꦠꦴ ꦄꦭꦁ ꦏꦴꦠꦸꦁ ꦄꦭꦁ ꦱꦁꦮꦶꦣꦴꦠꦸꦁ.

‘‘ꦪꦺꦴ ꦱꦺꦴ ꦨꦠ꧀ꦠꦸ ꦄꦧ꧀ꦨꦤ꧀ꦠꦫꦺꦴ ꦄꦤ꧀ꦠꦺꦴꦗꦤꦺꦴ – ꦢꦴꦱꦴꦠꦶ ꦮꦴ ꦥꦺꦱ꧀ꦱꦴꦠꦶ ꦮꦴ ꦏꦩ꧀ꦩꦏꦫꦴꦠꦶ ꦮꦴ – ꦠꦺꦱꦁ ꦏꦠꦚ꧀ꦕ ꦏꦠꦠꦺꦴ ꦗꦴꦤꦴꦠꦶ ꦄꦏꦠꦚ꧀ꦕ ꦄꦏꦠꦠꦺꦴ ꦗꦴꦤꦴꦠꦶ, ꦒꦶꦭꦴꦤꦏꦴꦤꦚ꧀ꦕ ꦧꦭꦴꦧꦭꦁ ꦗꦴꦤꦴꦠꦶ ꦑꦴꦢꦤꦷꦪꦁ ꦨꦺꦴꦗꦤꦷꦪꦚ꧀ꦕꦱ꧀ꦱ ꦥꦕ꧀ꦕꦁꦱꦺꦤ [ꦥꦕ꧀ꦕꦪꦺꦤ (ꦱ꧀ꦪꦴ.), ꦥꦕ꧀ꦕꦠ꧀ꦠꦁꦱꦺꦤ (ꦏ.) ꦄ. ꦤꦶ. ꧕.꧓꧓] ꦱꦁꦮꦶꦨꦗꦠꦶ.

‘‘ꦪꦁ ꦨꦠ꧀ꦠꦸ ꦄꦴꦲꦫꦠꦶ ꦣꦤꦁ ꦮꦴ ꦣꦚ꧀ꦚꦁ ꦮꦴ ꦗꦴꦠꦫꦹꦥꦁ ꦮꦴ ꦠꦁ ꦄꦴꦫꦏ꧀ꦑꦺꦤ ꦒꦸꦠ꧀ꦠꦶꦪꦴ ꦱꦩ꧀ꦥꦴꦢꦺꦠꦶ, ꦠꦠ꧀ꦡ ꦕ ꦲꦺꦴꦠꦶ ꦄꦣꦸꦠ꧀ꦠꦷ ꦄꦡꦺꦤꦷ ꦄꦱꦺꦴꦟ꧀ꦝꦷ ꦄꦮꦶꦤꦴꦱꦶꦏꦴ.

‘‘ꦈꦥꦴꦱꦶꦏꦴ ꦑꦺꦴ ꦥꦤ ꦲꦺꦴꦠꦶ ꦧꦸꦢ꧀ꦣꦁ ꦱꦫꦟꦁ ꦒꦠꦴ ꦣꦩ꧀ꦩꦁ ꦱꦫꦟꦁ ꦒꦠꦴ ꦱꦔ꧀ꦓꦁ ꦱꦫꦟꦁ ꦒꦠꦴ.

‘‘ꦱꦷꦭꦮꦠꦷ ꦑꦺꦴ ꦥꦤ ꦲꦺꦴꦠꦶ – ꦥꦴꦟꦴꦠꦶꦥꦴꦠꦴ ꦥꦛꦶꦮꦶꦫꦠꦴ, ꦄꦢꦶꦤ꧀ꦤꦴꦢꦴꦤꦴ ꦥꦛꦶꦮꦶꦫꦠꦴ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦥꦛꦶꦮꦶꦫꦠꦴ, ꦩꦸꦱꦴꦮꦴꦢꦴ ꦥꦛꦶꦮꦶꦫꦠꦴ, ꦱꦸꦫꦴꦩꦺꦫꦪꦩꦗ꧀ꦗꦥꦩꦴꦢꦛ꧀ꦜꦴꦤꦴ ꦥꦛꦶꦮꦶꦫꦠꦴ.

‘‘ꦕꦴꦒꦮꦠꦷ ꦑꦺꦴ ꦥꦤ ꦲꦺꦴꦠꦶ. ꦮꦶꦒꦠꦩꦭꦩꦕ꧀ꦖꦺꦫꦺꦤ ꦕꦺꦠꦱꦴ ꦄꦒꦴꦫꦁ ꦄꦗ꧀ꦙꦴꦮꦱꦠꦶ ꦩꦸꦠ꧀ꦠꦕꦴꦒꦴ [ꦩꦸꦠ꧀ꦠꦕꦴꦒꦷ (ꦱ꧀ꦪꦴ.)] ꦥꦪꦠꦥꦴꦟꦶꦤꦷ [ꦥꦪꦠꦥꦴꦟꦶ (ꦱꦷ.), ꦥꦪꦠꦥꦴꦟꦷ (ꦱ꧀ꦪꦴ. ꦥꦷ. ꦏ.)] ꦮꦺꦴꦱ꧀ꦱꦒ꧀ꦒꦫꦠꦴ ꦪꦴꦕꦪꦺꦴꦒꦴ ꦢꦴꦤꦱꦁꦮꦶꦨꦴꦒꦫꦠꦴ.

‘‘ꦆꦩꦺꦲꦶ ꦑꦺꦴ, ꦄꦤꦸꦫꦸꦢ꧀ꦣ, ꦄꦛ꧀ꦜꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦩꦴꦠꦸꦒꦴꦩꦺꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦩꦤꦴꦥꦏꦴꦪꦶꦏꦴꦤꦁ ꦢꦺꦮꦴꦤꦁ ꦱꦲꦧ꧀ꦪꦠꦁ ꦈꦥꦥꦗ꧀ꦗꦠꦷ’’ꦠꦶ.

‘‘ꦪꦺꦴ ꦤꦁ ꦨꦫꦠꦶ ꦱꦧ꧀ꦧꦢꦴ, ꦤꦶꦕ꧀ꦕꦁ ꦄꦴꦠꦴꦥꦶ ꦈꦱ꧀ꦱꦸꦏꦺꦴ;

ꦠꦁ ꦱꦧ꧀ꦧꦏꦴꦩꦢꦁ [ꦠꦁ ꦱꦧ꧀ꦧꦏꦴꦩꦲꦫꦁ (ꦱꦷ. ꦱ꧀ꦪꦴ. ꦥꦷ.) ꦱꦧ꧀ꦧꦏꦴꦩꦲꦫꦁ (ꦄ. ꦤꦶ. ꧕.꧓꧓] ꦥꦺꦴꦱꦁ, ꦨꦠ꧀ꦠꦴꦫꦁ ꦤꦴꦠꦶꦩꦚ꧀ꦚꦠꦶ.

‘‘ꦤ ꦕꦴꦥꦶ ꦱꦺꦴꦠ꧀ꦡꦶ ꦨꦠ꧀ꦠꦴꦫꦁ, ꦆꦱ꧀ꦱꦴꦮꦴꦢꦺꦤ ꦫꦺꦴꦱꦪꦺ;

ꦨꦠ꧀ꦠꦸ ꦕ ꦒꦫꦸꦤꦺꦴ ꦱꦧ꧀ꦧꦺ, ꦥꦛꦶꦥꦹꦗꦺꦠꦶ ꦥꦟ꧀ꦝꦶꦠꦴ.

‘‘ꦈꦛ꧀ꦜꦴꦲꦶꦏꦴ [ꦈꦛ꧀ꦜꦴꦪꦶꦏꦴ (ꦏ.)] ꦄꦤꦭꦱꦴ, ꦱꦔ꧀ꦒꦲꦶꦠꦥꦫꦶꦗ꧀ꦗꦤꦴ;

ꦨꦠ꧀ꦠꦸ ꦩꦤꦴꦥꦁ ꦕꦫꦠꦶ, ꦱꦩ꧀ꦨꦠꦁ ꦄꦤꦸꦫꦏ꧀ꦑꦠꦶ.

‘‘ꦪꦴ ꦌꦮꦁ ꦮꦠ꧀ꦠꦠꦶ ꦤꦴꦫꦷ, ꦨꦠ꧀ꦠꦸ ꦖꦤ꧀ꦢꦮꦱꦴꦤꦸꦒꦴ;

ꦩꦤꦴꦥꦴ ꦤꦴꦩ ꦠꦺ [ꦩꦤꦴꦥꦏꦴꦪꦶꦏꦴ (ꦱꦷ. ꦏ.)] ꦢꦺꦮꦴ, ꦪꦠ꧀ꦡ ꦱꦴ ꦈꦥꦥꦗ꧀ꦗꦠꦷ’’ꦠꦶ. ꦖꦛ꧀ꦜꦁ;