꧑꧐. ꦢꦸꦠꦶꦪꦆꦣꦭꦺꦴꦏꦶꦏꦱꦸꦠ꧀ꦠꦁ

꧕꧐. ‘‘ꦕꦠꦹꦲꦶ, ꦨꦶꦏ꧀ꦑꦮꦺ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦩꦴꦠꦸꦒꦴꦩꦺꦴ ꦆꦣꦭꦺꦴꦏꦮꦶꦗꦪꦴꦪ ꦥꦛꦶꦥꦤ꧀ꦤꦺꦴ ꦲꦺꦴꦠꦶ, ꦄꦪꦁꦱ ꦭꦺꦴꦏꦺꦴ ꦄꦴꦫꦢ꧀ꦣꦺꦴ ꦲꦺꦴꦠꦶ. ꦏꦠꦩꦺꦲꦶ ꦕꦠꦹꦲꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦸꦱꦁꦮꦶꦲꦶꦠꦏꦩ꧀ꦩꦤ꧀ꦠꦺꦴ ꦲꦺꦴꦠꦶ, ꦱꦔ꧀ꦒꦲꦶꦠꦥꦫꦶꦗꦤꦺꦴ, ꦨꦠ꧀ꦠꦸ ꦩꦤꦴꦥꦁ ꦕꦫꦠꦶ, ꦱꦩ꧀ꦨꦠꦁ ꦄꦤꦸꦫꦏ꧀ꦑꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦸꦱꦁꦮꦶꦲꦶꦠꦏꦩ꧀ꦩꦤ꧀ꦠꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦪꦺ ꦠꦺ ꦨꦠ꧀ꦠꦸ ꦄꦧ꧀ꦨꦤ꧀ꦠꦫꦴ ꦏꦩ꧀ꦩꦤ꧀ꦠꦴ…ꦥꦺ… ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦸꦱꦁꦮꦶꦲꦶꦠꦏꦩ꧀ꦩꦤ꧀ꦠꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦔ꧀ꦒꦲꦶꦠꦥꦫꦶꦗꦤꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦪꦺꦴ ꦱꦺꦴ ꦨꦠ꧀ꦠꦸ ꦄꦧ꧀ꦨꦤ꧀ꦠꦫꦺꦴ ꦄꦤ꧀ꦠꦺꦴꦗꦤꦺꦴ…ꦥꦺ… ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦔ꧀ꦒꦲꦶꦠꦥꦫꦶꦗꦤꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦨꦠ꧀ꦠꦸ ꦩꦤꦴꦥꦁ ꦕꦫꦠꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦪꦁ ꦨꦠ꧀ꦠꦸ ꦄꦩꦤꦴꦥꦱꦔ꧀ꦑꦴꦠꦁ ꦠꦁ ꦗꦷꦮꦶꦠꦲꦺꦠꦸꦥꦶ ꦤ ꦄꦗ꧀ꦙꦴꦕꦫꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦨꦠ꧀ꦠꦸ ꦩꦤꦴꦥꦁ ꦕꦫꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦩ꧀ꦨꦠꦁ ꦄꦤꦸꦫꦏ꧀ꦑꦠꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦪꦁ ꦨꦠ꧀ꦠꦴ ꦄꦴꦲꦫꦠꦶ…ꦥꦺ… ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦩ꧀ꦨꦠꦁ ꦄꦤꦸꦫꦏ꧀ꦑꦠꦶ. ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦕꦠꦹꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦩꦴꦠꦸꦒꦴꦩꦺꦴ ꦆꦣꦭꦺꦴꦏꦮꦶꦗꦪꦴꦪ ꦥꦛꦶꦥꦤ꧀ꦤꦺꦴ ꦲꦺꦴꦠꦶ, ꦄꦪꦁꦱ ꦭꦺꦴꦏꦺꦴ ꦄꦴꦫꦢ꧀ꦣꦺꦴ ꦲꦺꦴꦠꦶ.

‘‘ꦕꦠꦹꦲꦶ, ꦨꦶꦏ꧀ꦑꦮꦺ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦩꦴꦠꦸꦒꦴꦩꦺꦴ ꦥꦫꦭꦺꦴꦏꦮꦶꦗꦪꦴꦪ ꦥꦛꦶꦥꦤ꧀ꦤꦺꦴ ꦲꦺꦴꦠꦶ, ꦥꦫꦭꦺꦴꦏꦺꦴ ꦄꦴꦫꦢ꧀ꦣꦺꦴ ꦲꦺꦴꦠꦶ. ꦏꦠꦩꦺꦲꦶ ꦕꦠꦹꦲꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦢ꧀ꦣꦴꦱꦩ꧀ꦥꦤ꧀ꦤꦺꦴ ꦲꦺꦴꦠꦶ, ꦱꦷꦭꦱꦩ꧀ꦥꦤ꧀ꦤꦺꦴ ꦲꦺꦴꦠꦶ, ꦕꦴꦒꦱꦩ꧀ꦥꦤ꧀ꦤꦺꦴ ꦲꦺꦴꦠꦶ, ꦥꦚ꧀ꦚꦴꦱꦩ꧀ꦥꦤ꧀ꦤꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦢ꧀ꦣꦴꦱꦩ꧀ꦥꦤ꧀ꦤꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦢ꧀ꦣꦺꦴ ꦲꦺꦴꦠꦶ…ꦥꦺ… ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦢ꧀ꦣꦴꦱꦩ꧀ꦥꦤ꧀ꦤꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦷꦭꦱꦩ꧀ꦥꦤ꧀ꦤꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦥꦴꦟꦴꦠꦶꦥꦴꦠꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ…ꦥꦺ… ꦱꦸꦫꦴꦩꦺꦫꦪꦩꦗ꧀ꦗꦥꦩꦴꦢꦛ꧀ꦜꦴꦤꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦱꦷꦭꦱꦩ꧀ꦥꦤ꧀ꦤꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦕꦴꦒꦱꦩ꧀ꦥꦤ꧀ꦤꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦮꦶꦒꦠꦩꦭꦩꦕ꧀ꦖꦺꦫꦺꦤ ꦕꦺꦠꦱꦴ ꦄꦒꦴꦫꦁ ꦄꦗ꧀ꦙꦴꦮꦱꦠꦶ…ꦥꦺ… ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦕꦴꦒꦱꦩ꧀ꦥꦤ꧀ꦤꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦥꦚ꧀ꦚꦴꦱꦩ꧀ꦥꦤ꧀ꦤꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦥꦚ꧀ꦚꦮꦴ ꦲꦺꦴꦠꦶ…ꦥꦺ… ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦥꦚ꧀ꦚꦴꦱꦩ꧀ꦥꦤ꧀ꦤꦺꦴ ꦲꦺꦴꦠꦶ. ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦕꦠꦹꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦩꦴꦠꦸꦒꦴꦩꦺꦴ ꦥꦫꦭꦺꦴꦏꦮꦶꦗꦪꦴꦪ ꦥꦛꦶꦥꦤ꧀ꦤꦺꦴ ꦲꦺꦴꦠꦶ, ꦥꦫꦭꦺꦴꦏꦺꦴ ꦄꦴꦫꦢ꧀ꦣꦺꦴ ꦲꦺꦴꦠꦷ’’ꦠꦶ.

‘‘ꦱꦸꦱꦁꦮꦶꦲꦶꦠꦏꦩ꧀ꦩꦤ꧀ꦠꦴ, ꦱꦔ꧀ꦒꦲꦶꦠꦥꦫꦶꦗ꧀ꦗꦤꦴ;

ꦨꦠ꧀ꦠꦸ ꦩꦤꦴꦥꦁ ꦕꦫꦠꦶ, ꦱꦩ꧀ꦨꦠꦁ ꦄꦤꦸꦫꦏ꧀ꦑꦠꦶ.

‘‘ꦱꦢ꧀ꦣꦴ ꦱꦷꦭꦺꦤ ꦱꦩ꧀ꦥꦤ꧀ꦤꦴ, ꦮꦢꦚ꧀ꦚꦹ ꦮꦷꦠꦩꦕ꧀ꦖꦫꦴ;

ꦤꦶꦕ꧀ꦕꦁ ꦩꦒ꧀ꦒꦁ ꦮꦶꦱꦺꦴꦣꦺꦠꦶ, ꦱꦺꦴꦠ꧀ꦡꦴꦤꦁ ꦱꦩ꧀ꦥꦫꦴꦪꦶꦏꦁ.

‘‘ꦆꦕ꧀ꦕꦺꦠꦺ ꦄꦛ꧀ꦜ ꦣꦩ꧀ꦩꦴ ꦕ, ꦪꦱ꧀ꦱꦴ ꦮꦶꦗ꧀ꦗꦤ꧀ꦠꦶ ꦤꦴꦫꦶꦪꦴ;

ꦠꦩ꧀ꦥꦶ ꦱꦷꦭꦮꦠꦶꦁ ꦄꦴꦲꦸ, ꦣꦩ꧀ꦩꦛ꧀ꦜꦁ ꦱꦕ꧀ꦕꦮꦴꦢꦶꦤꦶꦁ.

‘‘ꦱꦺꦴꦭ꦳ꦱꦴꦏꦴꦫꦱꦩ꧀ꦥꦤ꧀ꦤꦴ, ꦄꦛ꧀ꦜꦔ꧀ꦒꦱꦸꦱꦩꦴꦒꦠꦴ;

ꦠꦴꦢꦶꦱꦷ ꦱꦷꦭꦮꦠꦷ ꦈꦥꦴꦱꦶꦏꦴ, ꦈꦥꦥꦗ꧀ꦗꦠꦶ ꦢꦺꦮꦭꦺꦴꦏꦁ ꦩꦤꦴꦥ’’ꦤ꧀ꦠꦶ. ꦢꦱꦩꦁ;

ꦈꦥꦺꦴꦱꦡꦮꦒ꧀ꦒꦺꦴ ꦥꦚ꧀ꦕꦩꦺꦴ.