꧗. ꦢꦺꦮꦢꦠ꧀ꦠꦮꦶꦥꦠ꧀ꦠꦶꦱꦸꦠ꧀ꦠꦁ

꧗. ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ ꦄꦕꦶꦫꦥꦏ꧀ꦏꦤ꧀ꦠꦺ ꦢꦺꦮꦢꦠ꧀ꦠꦺ. ꦠꦠ꧀ꦫ ꦨꦒꦮꦴ ꦢꦺꦮꦢꦠ꧀ꦠꦁ ꦄꦴꦫꦧ꧀ꦨ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦱꦴꦣꦸ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦏꦴꦭꦺꦤ ꦏꦴꦭꦁ ꦄꦠ꧀ꦠꦮꦶꦥꦠ꧀ꦠꦶꦁ ꦥꦕ꧀ꦕꦮꦺꦏ꧀ꦑꦶꦠꦴ ꦲꦺꦴꦠꦶ. ꦱꦴꦣꦸ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦏꦴꦭꦺꦤ ꦏꦴꦭꦁ ꦥꦫꦮꦶꦥꦠ꧀ꦠꦶꦁ ꦥꦕ꧀ꦕꦮꦺꦏ꧀ꦑꦶꦠꦴ ꦲꦺꦴꦠꦶ. ꦱꦴꦣꦸ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦏꦴꦭꦺꦤ ꦏꦴꦭꦁ ꦄꦠ꧀ꦠꦱꦩ꧀ꦥꦠ꧀ꦠꦶꦁ ꦥꦕ꧀ꦕꦮꦺꦏ꧀ꦑꦶꦠꦴ ꦲꦺꦴꦠꦶ. ꦱꦴꦣꦸ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦏꦴꦭꦺꦤ ꦏꦴꦭꦁ ꦥꦫꦱꦩ꧀ꦥꦠ꧀ꦠꦶꦁ ꦥꦕ꧀ꦕꦮꦺꦏ꧀ꦑꦶꦠꦴ ꦲꦺꦴꦠꦶ. ꦄꦛ꧀ꦜꦲꦶ, ꦨꦶꦏ꧀ꦑꦮꦺ, ꦄꦱꦢ꧀ꦣꦩ꧀ꦩꦺꦲꦶ ꦄꦨꦶꦨꦹꦠꦺꦴ ꦥꦫꦶꦪꦴꦢꦶꦤ꧀ꦤꦕꦶꦠ꧀ꦠꦺꦴ ꦢꦺꦮꦢꦠ꧀ꦠꦺꦴ ꦄꦴꦥꦴꦪꦶꦏꦺꦴ ꦤꦺꦫꦪꦶꦏꦺꦴ ꦏꦥ꧀ꦥꦛ꧀ꦜꦺꦴ ꦄꦠꦺꦏꦶꦕ꧀ꦖꦺꦴ’’.

[ꦕꦹꦭ꦳ꦮ. ꧓꧔꧘] ‘‘ꦏꦠꦩꦺꦲꦶ ꦄꦛ꧀ꦜꦲꦶ? ꦭꦴꦨꦺꦤ ꦲꦶ, ꦨꦶꦏ꧀ꦑꦮꦺ, ꦄꦨꦶꦨꦹꦠꦺꦴ ꦥꦫꦶꦪꦴꦢꦶꦤ꧀ꦤꦕꦶꦠ꧀ꦠꦺꦴ ꦢꦺꦮꦢꦠ꧀ꦠꦺꦴ ꦄꦴꦥꦴꦪꦶꦏꦺꦴ ꦤꦺꦫꦪꦶꦏꦺꦴ ꦏꦥ꧀ꦥꦛ꧀ꦜꦺꦴ ꦄꦠꦺꦏꦶꦕ꧀ꦖꦺꦴ. ꦄꦭꦴꦨꦺꦤ, ꦨꦶꦏ꧀ꦑꦮꦺ…ꦥꦺ… ꦪꦱꦺꦤ, ꦨꦶꦏ꧀ꦑꦮꦺ… ꦄꦪꦱꦺꦤ, ꦨꦶꦏ꧀ꦑꦮꦺ… ꦱꦏ꧀ꦏꦴꦫꦺꦤ, ꦨꦶꦏ꧀ꦑꦮꦺ… ꦄꦱꦏ꧀ꦏꦴꦫꦺꦤ, ꦨꦶꦏ꧀ꦑꦮꦺ… ꦥꦴꦥꦶꦕ꧀ꦖꦠꦴꦪ, ꦨꦶꦏ꧀ꦑꦮꦺ… ꦥꦴꦥꦩꦶꦠ꧀ꦠꦠꦴꦪ, ꦨꦶꦏ꧀ꦑꦮꦺ, ꦄꦨꦶꦨꦹꦠꦺꦴ ꦥꦫꦶꦪꦴꦢꦶꦤ꧀ꦤꦕꦶꦠ꧀ꦠꦺꦴ ꦢꦺꦮꦢꦠ꧀ꦠꦺꦴ ꦄꦴꦥꦴꦪꦶꦏꦺꦴ ꦤꦺꦫꦪꦶꦏꦺꦴ ꦏꦥ꧀ꦥꦛ꧀ꦜꦺꦴ ꦄꦠꦺꦏꦶꦕ꧀ꦖꦺꦴ. ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦄꦛ꧀ꦜꦲꦶ ꦄꦱꦢ꧀ꦣꦩ꧀ꦩꦺꦲꦶ ꦄꦨꦶꦨꦹꦠꦺꦴ ꦥꦫꦶꦪꦴꦢꦶꦤ꧀ꦤꦕꦶꦠ꧀ꦠꦺꦴ ꦢꦺꦮꦢꦠ꧀ꦠꦺꦴ ꦄꦴꦥꦴꦪꦶꦏꦺꦴ ꦤꦺꦫꦪꦶꦏꦺꦴ ꦏꦥ꧀ꦥꦛ꧀ꦜꦺꦴ ꦄꦠꦺꦏꦶꦕ꧀ꦖꦺꦴ.

‘‘ꦱꦴꦣꦸ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦈꦥ꧀ꦥꦤ꧀ꦤꦁ ꦭꦴꦨꦁ ꦄꦨꦶꦨꦸꦪ꧀ꦪ ꦄꦨꦶꦨꦸꦪ꧀ꦪ ꦮꦶꦲꦫꦺꦪ꧀ꦪ, ꦈꦥ꧀ꦥꦤ꧀ꦤꦁ ꦄꦭꦴꦨꦁ…ꦥꦺ… ꦈꦥ꧀ꦥꦤ꧀ꦤꦁ ꦪꦱꦁ… ꦈꦥ꧀ꦥꦤ꧀ꦤꦁ ꦄꦪꦱꦁ… ꦈꦥ꧀ꦥꦤ꧀ꦤꦁ ꦱꦏ꧀ꦏꦴꦫꦁ … ꦈꦥ꧀ꦥꦤ꧀ꦤꦁ ꦄꦱꦏ꧀ꦏꦴꦫꦁ… ꦈꦥ꧀ꦥꦤ꧀ꦤꦁ ꦥꦴꦥꦶꦕ꧀ꦖꦠꦁ… ꦈꦥ꧀ꦥꦤ꧀ꦤꦁ ꦥꦴꦥꦩꦶꦠ꧀ꦠꦠꦁ ꦄꦨꦶꦨꦸꦪ꧀ꦪ ꦄꦨꦶꦨꦸꦪ꧀ꦪ ꦮꦶꦲꦫꦺꦪ꧀ꦪ.

‘‘ꦏꦶꦚ꧀ꦕ [ꦏꦡꦚ꧀ꦕ (ꦏ.)], ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦄꦠ꧀ꦡꦮꦱꦁ ꦥꦛꦶꦕ꧀ꦕ ꦈꦥ꧀ꦥꦤ꧀ꦤꦁ ꦭꦴꦨꦁ ꦄꦨꦶꦨꦸꦪ꧀ꦪ ꦄꦨꦶꦨꦸꦪ꧀ꦪ ꦮꦶꦲꦫꦺꦪ꧀ꦪ, ꦈꦥ꧀ꦥꦤ꧀ꦤꦁ ꦄꦭꦴꦨꦁ…ꦥꦺ… ꦈꦥ꧀ꦥꦤ꧀ꦤꦁ ꦪꦱꦁ… ꦈꦥ꧀ꦥꦤ꧀ꦤꦁ ꦄꦪꦱꦁ… ꦈꦥ꧀ꦥꦤ꧀ꦤꦁ ꦱꦏ꧀ꦏꦴꦫꦁ… ꦈꦥ꧀ꦥꦤ꧀ꦤꦁ ꦄꦱꦏ꧀ꦏꦴꦫꦁ… ꦈꦥ꧀ꦥꦤ꧀ꦤꦁ ꦥꦴꦥꦶꦕ꧀ꦖꦠꦁ… ꦈꦥ꧀ꦥꦤ꧀ꦤꦁ ꦥꦴꦥꦩꦶꦠ꧀ꦠꦠꦁ ꦄꦨꦶꦨꦸꦪ꧀ꦪ ꦄꦨꦶꦨꦸꦪ꧀ꦪ ꦮꦶꦲꦫꦺꦪ꧀ꦪ?

‘‘ꦪꦁ ꦲꦶꦱ꧀ꦱ, ꦨꦶꦏ꧀ꦑꦮꦺ, ꦈꦥ꧀ꦥꦤ꧀ꦤꦁ ꦭꦴꦨꦁ ꦄꦤꦨꦶꦨꦸꦪ꧀ꦪ [ꦄꦤꦨꦶꦨꦹꦪ꧀ꦪ ꦄꦤꦨꦶꦨꦹꦪ꧀ꦪ (ꦏ.)] ꦮꦶꦲꦫꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ, ꦈꦥ꧀ꦥꦤ꧀ꦤꦁ ꦭꦴꦨꦁ ꦄꦨꦶꦨꦸꦪ꧀ꦪ [ꦄꦨꦶꦨꦹꦪ꧀ꦪ ꦄꦨꦶꦨꦹꦪ꧀ꦪ (ꦏ.)] ꦮꦶꦲꦫꦠꦺꦴ ꦌꦮꦁꦱ ꦠꦺ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ ꦤ ꦲꦺꦴꦤ꧀ꦠꦶ. ꦪꦁ ꦲꦶꦱ꧀ꦱ, ꦨꦶꦏ꧀ꦑꦮꦺ, ꦈꦥ꧀ꦥꦤ꧀ꦤꦁ ꦄꦭꦴꦨꦁ…ꦥꦺ… ꦈꦥ꧀ꦥꦤ꧀ꦤꦁ ꦪꦱꦁ… ꦈꦥ꧀ꦥꦤ꧀ꦤꦁ ꦄꦪꦱꦁ… ꦈꦥ꧀ꦥꦤ꧀ꦤꦁ ꦱꦏ꧀ꦏꦴꦫꦁ… ꦈꦥ꧀ꦥꦤ꧀ꦤꦁ ꦄꦱꦏ꧀ꦏꦴꦫꦁ… ꦈꦥ꧀ꦥꦤ꧀ꦤꦁ ꦥꦴꦥꦶꦕ꧀ꦖꦠꦁ… ꦈꦥ꧀ꦥꦤ꧀ꦤꦁ ꦥꦴꦥꦩꦶꦠ꧀ꦠꦠꦁ ꦄꦤꦨꦶꦨꦸꦪ꧀ꦪ ꦮꦶꦲꦫꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ, ꦈꦥ꧀ꦥꦤ꧀ꦤꦁ ꦥꦴꦥꦩꦶꦠ꧀ꦠꦠꦁ ꦄꦨꦶꦨꦸꦪ꧀ꦪ ꦮꦶꦲꦫꦠꦺꦴ ꦌꦮꦁꦱ ꦠꦺ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ ꦤ ꦲꦺꦴꦤ꧀ꦠꦶ. ꦆꦢꦁ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦄꦠ꧀ꦡꦮꦱꦁ ꦥꦛꦶꦕ꧀ꦕ ꦈꦥ꧀ꦥꦤ꧀ꦤꦁ ꦭꦴꦨꦁ ꦄꦨꦶꦨꦸꦪ꧀ꦪ ꦄꦨꦶꦨꦸꦪ꧀ꦪ ꦮꦶꦲꦫꦺꦪ꧀ꦪ, ꦈꦥ꧀ꦥꦤ꧀ꦤꦁ ꦄꦭꦴꦨꦁ…ꦥꦺ… ꦈꦥ꧀ꦥꦤ꧀ꦤꦁ ꦪꦱꦁ… ꦈꦥ꧀ꦥꦤ꧀ꦤꦁ ꦄꦪꦱꦁ … ꦈꦥ꧀ꦥꦤ꧀ꦤꦁ ꦱꦏ꧀ꦏꦴꦫꦁ… ꦈꦥ꧀ꦥꦤ꧀ꦤꦁ ꦄꦱꦏ꧀ꦏꦴꦫꦁ… ꦈꦥ꧀ꦥꦤ꧀ꦤꦁ ꦥꦴꦥꦶꦕ꧀ꦖꦠꦁ… ꦈꦥ꧀ꦥꦤ꧀ꦤꦁ ꦥꦴꦥꦩꦶꦠ꧀ꦠꦠꦁ ꦄꦨꦶꦨꦸꦪ꧀ꦪ ꦄꦨꦶꦨꦸꦪ꧀ꦪ ꦮꦶꦲꦫꦺꦪ꧀ꦪ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦌꦮꦁ ꦱꦶꦏ꧀ꦑꦶꦠꦧ꧀ꦧꦁ – ‘ꦈꦥ꧀ꦥꦤ꧀ꦤꦁ ꦭꦴꦨꦁ ꦄꦨꦶꦨꦸꦪ꧀ꦪ ꦄꦨꦶꦨꦸꦪ꧀ꦪ ꦮꦶꦲꦫꦶꦱ꧀ꦱꦴꦩ, ꦈꦥ꧀ꦥꦤ꧀ꦤꦁ ꦄꦭꦴꦨꦁ…ꦥꦺ… ꦈꦥ꧀ꦥꦤ꧀ꦤꦁ ꦪꦱꦁ… ꦈꦥ꧀ꦥꦤ꧀ꦤꦁ ꦄꦪꦱꦁ… ꦈꦥ꧀ꦥꦤ꧀ꦤꦁ ꦱꦏ꧀ꦏꦴꦫꦁ… ꦈꦥ꧀ꦥꦤ꧀ꦤꦁ ꦄꦱꦏ꧀ꦏꦴꦫꦁ… ꦈꦥ꧀ꦥꦤ꧀ꦤꦁ ꦥꦴꦥꦶꦕ꧀ꦖꦠꦁ… ꦈꦥ꧀ꦥꦤ꧀ꦤꦁ ꦥꦴꦥꦩꦶꦠ꧀ꦠꦠꦁ ꦄꦨꦶꦨꦸꦪ꧀ꦪ ꦄꦨꦶꦨꦸꦪ꧀ꦪ ꦮꦶꦲꦫꦶꦱ꧀ꦱꦴꦩꦴ’ꦠꦶ. ꦌꦮꦚ꧀ꦲꦶ ꦮꦺꦴ, ꦨꦶꦏ꧀ꦑꦮꦺ, ꦱꦶꦏ꧀ꦑꦶꦠꦧ꧀ꦧ’’ꦤ꧀ꦠꦶ. ꦱꦠ꧀ꦠꦩꦁ.