꧗. ꦨꦴꦮꦤꦴꦱꦸꦠ꧀ꦠꦁ

꧗꧑. ‘‘ꦨꦴꦮꦤꦁ ꦄꦤꦤꦸꦪꦸꦠ꧀ꦠꦱ꧀ꦱ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦮꦶꦲꦫꦠꦺꦴ ꦏꦶꦚ꧀ꦕꦴꦥꦶ ꦌꦮꦁ ꦆꦕ꧀ꦖꦴ ꦈꦥ꧀ꦥꦗ꧀ꦗꦺꦪ꧀ꦪ – ‘ꦄꦲꦺꦴ ꦮꦠ ꦩꦺ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦺꦪ꧀ꦪꦴ’ꦠꦶ, ꦄꦡ ꦑ꧀ꦮꦱ꧀ꦱ ꦤꦺꦮ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ‘ꦄꦨꦴꦮꦶꦠꦠ꧀ꦠꦴ’ꦠꦶꦱ꧀ꦱ ꦮꦕꦤꦷꦪꦁ. ꦏꦶꦱ꧀ꦱ ꦄꦨꦴꦮꦶꦠꦠ꧀ꦠꦴ? ꦕꦠꦸꦤ꧀ꦤꦁ ꦱꦠꦶꦥꦛ꧀ꦜꦴꦤꦴꦤꦁ, ꦕꦠꦸꦤ꧀ꦤꦁ ꦱꦩ꧀ꦩꦥ꧀ꦥꦣꦴꦤꦴꦤꦁ, ꦕꦠꦸꦤ꧀ꦤꦁ ꦆꦢ꧀ꦣꦶꦥꦴꦢꦴꦤꦁ, ꦥꦚ꧀ꦕꦤ꧀ꦤꦁ ꦆꦤ꧀ꦢ꧀ꦫꦶꦪꦴꦤꦁ, ꦥꦚ꧀ꦕꦤ꧀ꦤꦁ ꦧꦭꦴꦤꦁ, ꦱꦠ꧀ꦠꦤ꧀ꦤꦁ ꦧꦺꦴꦗ꧀ꦙꦔ꧀ꦒꦴꦤꦁ, ꦄꦫꦶꦪꦱ꧀ꦱ ꦄꦛ꧀ꦜꦔ꧀ꦒꦶꦏꦱ꧀ꦱ ꦩꦒ꧀ꦒꦱ꧀ꦱ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦏꦸꦏ꧀ꦏꦸꦛꦶꦪꦴ ꦄꦟ꧀ꦝꦴꦤꦶ ꦄꦛ꧀ꦜ ꦮꦴ ꦢꦱ ꦮꦴ ꦢ꧀ꦮꦴꦢꦱ ꦮꦴ. ꦠꦴꦤꦱ꧀ꦱꦸ ꦏꦸꦏ꧀ꦏꦸꦛꦶꦪꦴ ꦤ ꦱꦩ꧀ꦩꦴ ꦄꦣꦶꦱꦪꦶꦠꦴꦤꦶ, ꦤ ꦱꦩ꧀ꦩꦴ ꦥꦫꦶꦱꦺꦢꦶꦠꦴꦤꦶ, ꦤ ꦱꦩ꧀ꦩꦴ ꦥꦫꦶꦨꦴꦮꦶꦠꦴꦤꦶ. ꦏꦶꦚ꧀ꦕꦴꦥꦶ ꦠꦱ꧀ꦱꦴ ꦏꦸꦏ꧀ꦏꦸꦛꦶꦪꦴ ꦌꦮꦁ ꦆꦕ꧀ꦖꦴ ꦈꦥ꧀ꦥꦗ꧀ꦗꦺꦪ꧀ꦪ – ‘ꦄꦲꦺꦴ ꦮꦠ ꦩꦺ ꦏꦸꦏ꧀ꦏꦸꦛꦥꦺꦴꦠꦏꦴ ꦥꦴꦢꦤꦑꦱꦶꦑꦴꦪ ꦮꦴ ꦩꦸꦑꦠꦸꦟ꧀ꦝꦏꦺꦤ ꦮꦴ ꦄꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦱꦺꦴꦠ꧀ꦡꦶꦤꦴ ꦄꦨꦶꦤꦶꦧ꧀ꦨꦶꦗ꧀ꦗꦺꦪ꧀ꦪꦸ’ꦤ꧀ꦠꦶ, ꦄꦡ ꦑꦺꦴ ꦄꦨꦧ꧀ꦧꦴꦮ ꦠꦺ ꦏꦸꦏ꧀ꦏꦸꦛꦥꦺꦴꦠꦏꦴ ꦥꦴꦢꦤꦑꦱꦶꦑꦴꦪ ꦮꦴ ꦩꦸꦑꦠꦸꦟ꧀ꦝꦏꦺꦤ ꦮꦴ ꦄꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦱꦺꦴꦠ꧀ꦡꦶꦤꦴ ꦄꦨꦶꦤꦶꦧ꧀ꦨꦶꦗ꧀ꦗꦶꦠꦸꦁ. ꦠꦁ ꦏꦶꦱ꧀ꦱ ꦲꦺꦠꦸ? ꦠꦡꦴ ꦲꦶ, ꦨꦶꦏ꧀ꦑꦮꦺ, ꦏꦸꦏ꧀ꦏꦸꦛꦶꦪꦴ ꦄꦟ꧀ꦝꦴꦤꦶ ꦤ ꦱꦩ꧀ꦩꦴ ꦄꦣꦶꦱꦪꦶꦠꦴꦤꦶ, ꦤ ꦱꦩ꧀ꦩꦴ ꦥꦫꦶꦱꦺꦢꦶꦠꦴꦤꦶ, ꦤ ꦱꦩ꧀ꦩꦴ ꦥꦫꦶꦨꦴꦮꦶꦠꦴꦤꦶ. ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦨꦴꦮꦤꦁ ꦄꦤꦤꦸꦪꦸꦠ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦮꦶꦲꦫꦠꦺꦴ ꦏꦶꦚ꧀ꦕꦴꦥꦶ ꦌꦮꦁ ꦆꦕ꧀ꦖꦴ ꦈꦥ꧀ꦥꦗ꧀ꦗꦺꦪ꧀ꦪ – ‘ꦄꦲꦺꦴ ꦮꦠ ꦩꦺ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦺꦪ꧀ꦪꦴ’ꦠꦶ, ꦄꦡ ꦑ꧀ꦮꦱ꧀ꦱ ꦤꦺꦮ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ‘ꦄꦨꦴꦮꦶꦠꦠ꧀ꦠꦴ’ꦠꦶꦱ꧀ꦱ ꦮꦕꦤꦷꦪꦁ. ꦏꦶꦱ꧀ꦱ ꦄꦨꦴꦮꦶꦠꦠ꧀ꦠꦴ? ꦕꦠꦸꦤ꧀ꦤꦁ ꦱꦠꦶꦥꦛ꧀ꦜꦴꦤꦴꦤꦁ, ꦕꦠꦸꦤ꧀ꦤꦁ ꦱꦩ꧀ꦩꦥ꧀ꦥꦣꦴꦤꦴꦤꦁ, ꦕꦠꦸꦤ꧀ꦤꦁ ꦆꦢ꧀ꦣꦶꦥꦴꦢꦴꦤꦁ, ꦥꦚ꧀ꦕꦤ꧀ꦤꦁ ꦆꦤ꧀ꦢ꧀ꦫꦶꦪꦴꦤꦁ, ꦥꦚ꧀ꦕꦤ꧀ꦤꦁ ꦧꦭꦴꦤꦁ, ꦱꦠ꧀ꦠꦤ꧀ꦤꦁ ꦧꦺꦴꦗ꧀ꦙꦔ꧀ꦒꦴꦤꦁ, ꦄꦫꦶꦪꦱ꧀ꦱ ꦄꦛ꧀ꦜꦔ꧀ꦒꦶꦏꦱ꧀ꦱ ꦩꦒ꧀ꦒꦱ꧀ꦱ.

‘‘ꦨꦴꦮꦤꦁ ꦄꦤꦸꦪꦸꦠ꧀ꦠꦱ꧀ꦱ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦮꦶꦲꦫꦠꦺꦴ ꦏꦶꦚ꧀ꦕꦴꦥꦶ ꦤ ꦌꦮꦁ ꦆꦕ꧀ꦖꦴ ꦈꦥ꧀ꦥꦗ꧀ꦗꦺꦪ꧀ꦪ – ‘ꦄꦲꦺꦴ ꦮꦠ ꦩꦺ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦺꦪ꧀ꦪꦴ’ꦠꦶ, ꦄꦡ ꦑ꧀ꦮꦱ꧀ꦱ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ‘ꦨꦴꦮꦶꦠꦠ꧀ꦠꦴ’ꦠꦶꦱ꧀ꦱ ꦮꦕꦤꦷꦪꦁ. ꦏꦶꦱ꧀ꦱ ꦨꦴꦮꦶꦠꦠ꧀ꦠꦴ? ꦕꦠꦸꦤ꧀ꦤꦁ ꦱꦠꦶꦥꦛ꧀ꦜꦴꦤꦴꦤꦁ, ꦕꦠꦸꦤ꧀ꦤꦁ ꦱꦩ꧀ꦩꦥ꧀ꦥꦣꦴꦤꦴꦤꦁ, ꦕꦠꦸꦤ꧀ꦤꦁ ꦆꦢ꧀ꦣꦶꦥꦴꦢꦴꦤꦁ, ꦥꦚ꧀ꦕꦤ꧀ꦤꦁ ꦆꦤ꧀ꦢ꧀ꦫꦶꦪꦴꦤꦁ, ꦥꦚ꧀ꦕꦤ꧀ꦤꦁ ꦧꦭꦴꦤꦁ, ꦱꦠ꧀ꦠꦤ꧀ꦤꦁ ꦧꦺꦴꦗ꧀ꦙꦔ꧀ꦒꦴꦤꦁ, ꦄꦫꦶꦪꦱ꧀ꦱ ꦄꦛ꧀ꦜꦔ꧀ꦒꦶꦏꦱ꧀ꦱ ꦩꦒ꧀ꦒꦱ꧀ꦱ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦏꦸꦏ꧀ꦏꦸꦛꦶꦪꦴ ꦄꦟ꧀ꦝꦴꦤꦶ ꦄꦛ꧀ꦜ ꦮꦴ ꦢꦱ ꦮꦴ ꦢ꧀ꦮꦴꦢꦱ ꦮꦴ. ꦠꦴꦤꦱ꧀ꦱꦸ ꦏꦸꦏ꧀ꦏꦸꦛꦶꦪꦴ ꦱꦩ꧀ꦩꦴ ꦄꦣꦶꦱꦪꦶꦠꦴꦤꦶ, ꦱꦩ꧀ꦩꦴ ꦥꦫꦶꦱꦺꦢꦶꦠꦴꦤꦶ, ꦱꦩ꧀ꦩꦴ ꦥꦫꦶꦨꦴꦮꦶꦠꦴꦤꦶ. ꦏꦶꦚ꧀ꦕꦴꦥꦶ ꦠꦱ꧀ꦱꦴ ꦏꦸꦏ꧀ꦏꦸꦛꦶꦪꦴ ꦤ ꦌꦮꦁ ꦆꦕ꧀ꦖꦴ ꦈꦥ꧀ꦥꦗ꧀ꦗꦺꦪ꧀ꦪ – ‘ꦄꦲꦺꦴ ꦮꦠ ꦩꦺ ꦏꦸꦏ꧀ꦏꦸꦛꦥꦺꦴꦠꦏꦴ ꦥꦴꦢꦤꦑꦱꦶꦑꦴꦪ ꦮꦴ ꦩꦸꦑꦠꦸꦟ꧀ꦝꦏꦺꦤ ꦮꦴ ꦄꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦱꦺꦴꦠ꧀ꦡꦶꦤꦴ ꦄꦨꦶꦤꦶꦧ꧀ꦨꦶꦗ꧀ꦗꦺꦪ꧀ꦪꦸ’ꦤ꧀ꦠꦶ, ꦄꦡ ꦑꦺꦴ ꦨꦧ꧀ꦧꦴꦮ ꦠꦺ ꦏꦸꦏ꧀ꦏꦸꦛꦥꦺꦴꦠꦏꦴ ꦥꦴꦢꦤꦑꦱꦶꦑꦴꦪ ꦮꦴ ꦩꦸꦑꦠꦸꦟ꧀ꦝꦏꦺꦤ ꦮꦴ ꦄꦟ꧀ꦝꦏꦺꦴꦱꦁ ꦥꦢꦴꦭꦺꦠ꧀ꦮꦴ ꦱꦺꦴꦠ꧀ꦡꦶꦤꦴ ꦄꦨꦶꦤꦶꦧ꧀ꦨꦶꦗ꧀ꦗꦶꦠꦸꦁ. ꦠꦁ ꦏꦶꦱ꧀ꦱ ꦲꦺꦠꦸ? ꦠꦡꦴ ꦲꦶ, ꦨꦶꦏ꧀ꦑꦮꦺ, ꦏꦸꦏ꧀ꦏꦸꦛꦶꦪꦴ ꦄꦟ꧀ꦝꦴꦤꦶ ꦱꦩ꧀ꦩꦴ ꦄꦣꦶꦱꦪꦶꦠꦴꦤꦶ, ꦱꦩ꧀ꦩꦴ ꦥꦫꦶꦱꦺꦢꦶꦠꦴꦤꦶ, ꦱꦩ꧀ꦩꦴ ꦥꦫꦶꦨꦴꦮꦶꦠꦴꦤꦶ. ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦨꦴꦮꦤꦁ ꦄꦤꦸꦪꦸꦠ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦮꦶꦲꦫꦠꦺꦴ ꦏꦶꦚ꧀ꦕꦴꦥꦶ ꦤ ꦌꦮꦁ ꦆꦕ꧀ꦖꦴ ꦈꦥ꧀ꦥꦗ꧀ꦗꦺꦪ꧀ꦪ – ‘ꦄꦲꦺꦴ ꦮꦠ ꦩꦺ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦺꦪ꧀ꦪꦴ’ꦠꦶ, ꦄꦡ ꦑ꧀ꦮꦱ꧀ꦱ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ‘ꦨꦴꦮꦶꦠꦠ꧀ꦠꦴ’ꦠꦶꦱ꧀ꦱ ꦮꦕꦤꦷꦪꦁ. ꦏꦶꦱ꧀ꦱ ꦨꦴꦮꦶꦠꦠ꧀ꦠꦴ? ꦕꦠꦸꦤ꧀ꦤꦁ ꦱꦠꦶꦥꦛ꧀ꦜꦴꦤꦴꦤꦁ…ꦥꦺ… ꦄꦫꦶꦪꦱ꧀ꦱ ꦄꦛ꧀ꦜꦔ꧀ꦒꦶꦏꦱ꧀ꦱ ꦩꦒ꧀ꦒꦱ꧀ꦱ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦦꦭꦒꦟ꧀ꦝꦱ꧀ꦱ [ꦥꦭꦒꦟ꧀ꦝꦱ꧀ꦱ (?)] ꦮꦴ ꦦꦭꦒꦟ꧀ꦝꦤ꧀ꦠꦺꦮꦴꦱꦶꦏꦱ꧀ꦱ ꦮꦴ ꦢꦶꦱ꧀ꦱꦤ꧀ꦠꦺꦮ [ꦑꦷꦪꦤ꧀ꦠꦺ (ꦏ.)] ꦮꦴꦱꦶꦗꦛꦺ [ꦢꦶꦱ꧀ꦱꦤ꧀ꦠꦶ ꦄꦔ꧀ꦒꦸꦭꦶꦥꦢꦴꦤꦶ (ꦱꦷ.), ꦄꦔ꧀ꦒꦸꦭꦥꦢꦴꦤꦶ ꦢꦶꦱ꧀ꦱꦤ꧀ꦠꦶ ꦄꦔ꧀ꦒꦸꦭꦥꦢꦁ (ꦏ.)] ꦄꦔ꧀ꦒꦸꦭꦶꦥꦢꦴꦤꦶ ꦢꦶꦱ꧀ꦱꦠꦶ [ꦢꦶꦱ꧀ꦱꦤ꧀ꦠꦶ (ꦱ꧀ꦪꦴ.)] ꦄꦔ꧀ꦒꦸꦛ꧀ꦜꦥꦢꦁ [ꦢꦶꦱ꧀ꦱꦤ꧀ꦠꦶ ꦄꦔ꧀ꦒꦸꦭꦶꦥꦢꦴꦤꦶ (ꦱꦷ.), ꦄꦔ꧀ꦒꦸꦭꦥꦢꦴꦤꦶ ꦢꦶꦱ꧀ꦱꦤ꧀ꦠꦶ ꦄꦔ꧀ꦒꦸꦭꦥꦢꦁ (ꦏ.)]. ꦤꦺꦴ ꦕ ꦑ꧀ꦮꦱ꧀ꦱ ꦌꦮꦁ ꦚꦴꦟꦁ ꦲꦺꦴꦠꦶ – ‘ꦌꦠ꧀ꦠꦏꦁ ꦩꦺ ꦄꦗ꧀ꦗ ꦮꦴꦱꦶꦗꦛꦱ꧀ꦱ ꦑꦷꦟꦁ, ꦌꦠ꧀ꦠꦏꦁ ꦲꦶꦪ꧀ꦪꦺꦴ, ꦌꦠ꧀ꦠꦏꦁ ꦥꦫꦺ’ꦠꦶ, ꦄꦡ ꦑ꧀ꦮꦱ꧀ꦱ ꦑꦷꦟꦺ ‘ꦑꦷꦟ’ꦤ꧀ꦠꦺꦮ ꦚꦴꦟꦁ ꦲꦺꦴꦠꦶ. ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦨꦴꦮꦤꦁ ꦄꦤꦸꦪꦸꦠ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦮꦶꦲꦫꦠꦺꦴ ꦏꦶꦚ꧀ꦕꦴꦥꦶ ꦤ ꦌꦮꦁ ꦚꦴꦟꦁ ꦲꦺꦴꦠꦶ – ‘ꦌꦠ꧀ꦠꦏꦁ ꦩꦺ ꦄꦗ꧀ꦗ ꦄꦴꦱꦮꦴꦤꦁ ꦑꦷꦟꦁ, ꦌꦠ꧀ꦠꦏꦁ ꦲꦶꦪ꧀ꦪꦺꦴ, ꦌꦠ꧀ꦠꦏꦁ ꦥꦫꦺ’ꦠꦶ, ꦄꦡ ꦑ꧀ꦮꦱ꧀ꦱ ꦑꦷꦟꦺ ‘ꦑꦷꦟ’ꦤ꧀ꦠꦺꦮ ꦚꦴꦟꦁ ꦲꦺꦴꦠꦶ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦱꦴꦩꦸꦢ꧀ꦢꦶꦏꦴꦪ ꦤꦴꦮꦴꦪ ꦮꦺꦠ꧀ꦠꦧꦤ꧀ꦣꦤꦧꦢ꧀ꦣꦴꦪ [ꦮꦺꦠ꧀ꦠꦧꦤ꧀ꦣꦴꦪ (ꦏ.)] ꦖ ꦩꦴꦱꦴꦤꦶ ꦈꦢꦏꦺ ꦥꦫꦶꦪꦴꦢꦴꦪ ꦲꦺꦩꦤ꧀ꦠꦶꦏꦺꦤ ꦡꦭꦺ ꦈꦏ꧀ꦑꦶꦠ꧀ꦠꦴꦪ ꦮꦴꦠꦴꦠꦥꦥꦫꦺꦠꦴꦤꦶ ꦧꦤ꧀ꦣꦤꦴꦤꦶ, ꦠꦴꦤꦶ ꦥꦴꦮꦸꦱ꧀ꦱꦏꦺꦤ ꦩꦺꦓꦺꦤ ꦄꦨꦶꦥ꧀ꦥꦮꦸꦛ꧀ꦜꦴꦤꦶ ꦄꦥ꧀ꦥꦏꦱꦶꦫꦺꦤꦺꦮ ꦥꦫꦶꦲꦴꦪꦤ꧀ꦠꦶ [ꦥꦛꦶꦥ꧀ꦥꦱ꧀ꦱꦩ꧀ꦨꦤ꧀ꦠꦶ (ꦱꦷ. ꦱ꧀ꦪꦴ.)], ꦥꦹꦠꦶꦏꦴꦤꦶ ꦨꦮꦤ꧀ꦠꦶ. ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦨꦴꦮꦤꦁ ꦄꦤꦸꦪꦸꦠ꧀ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦮꦶꦲꦫꦠꦺꦴ ꦄꦥ꧀ꦥꦏꦱꦶꦫꦺꦤꦺꦮ ꦱꦁꦪꦺꦴꦗꦤꦴꦤꦶ ꦥꦛꦶꦥ꧀ꦥꦱ꧀ꦱꦩ꧀ꦨꦤ꧀ꦠꦶ, ꦥꦹꦠꦶꦏꦴꦤꦶ ꦨꦮꦤ꧀ꦠꦷ’’ꦠꦶ. ꦱꦠ꧀ꦠꦩꦁ.