꧕. ꦄꦫꦏ꧀ꦑꦺꦪ꧀ꦪꦱꦸꦠ꧀ꦠꦁ

꧕꧘. ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦠꦡꦴꦒꦠꦱ꧀ꦱ ꦄꦫꦏ꧀ꦑꦺꦪ꧀ꦪꦴꦤꦶ, ꦠꦷꦲꦶ ꦕ ꦄꦤꦸꦥꦮꦗ꧀ꦗꦺꦴ. ꦏꦠꦩꦴꦤꦶ ꦕꦠ꧀ꦠꦴꦫꦶ ꦠꦡꦴꦒꦠꦱ꧀ꦱ ꦄꦫꦏ꧀ꦑꦺꦪ꧀ꦪꦴꦤꦶ? ꦥꦫꦶꦱꦸꦢ꧀ꦣꦏꦴꦪꦱꦩꦴꦕꦴꦫꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦺꦴ; ꦤꦠ꧀ꦡꦶ ꦠꦡꦴꦒꦠꦱ꧀ꦱ ꦏꦴꦪꦢꦸꦕ꧀ꦕꦫꦶꦠꦁ ꦪꦁ ꦠꦡꦴꦒꦠꦺꦴ ꦫꦏ꧀ꦑꦺꦪ꧀ꦪ – ‘ꦩꦴ ꦩꦺ ꦆꦢꦁ ꦥꦫꦺꦴ ꦄꦚ꧀ꦚꦴꦱꦷ’ꦠꦶ. ꦥꦫꦶꦱꦸꦢ꧀ꦣꦮꦕꦷꦱꦩꦴꦕꦴꦫꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦺꦴ; ꦤꦠ꧀ꦡꦶ ꦠꦡꦴꦒꦠꦱ꧀ꦱ ꦮꦕꦷꦢꦸꦕ꧀ꦕꦫꦶꦠꦁ ꦪꦁ ꦠꦡꦴꦒꦠꦺꦴ ꦫꦏ꧀ꦑꦺꦪ꧀ꦪ – ‘ꦩꦴ ꦩꦺ ꦆꦢꦁ ꦥꦫꦺꦴ ꦄꦚ꧀ꦚꦴꦱꦷ’ꦠꦶ. ꦥꦫꦶꦱꦸꦢ꧀ꦣꦩꦤꦺꦴꦱꦩꦴꦕꦴꦫꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦺꦴ; ꦤꦠ꧀ꦡꦶ ꦠꦡꦴꦒꦠꦱ꧀ꦱ ꦩꦤꦺꦴꦢꦸꦕ꧀ꦕꦫꦶꦠꦁ ꦪꦁ ꦠꦡꦴꦒꦠꦺꦴ ꦫꦏ꧀ꦑꦺꦪ꧀ꦪ – ‘ꦩꦴ ꦩꦺ ꦆꦢꦁ ꦥꦫꦺꦴ ꦄꦚ꧀ꦚꦴꦱꦷ’ꦠꦶ. ꦥꦫꦶꦱꦸꦢ꧀ꦣꦴꦗꦷꦮꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦺꦴ; ꦤꦠ꧀ꦡꦶ ꦠꦡꦴꦒꦠꦱ꧀ꦱ ꦩꦶꦕ꧀ꦖꦴꦄꦴꦗꦷꦮꦺꦴ ꦪꦁ ꦠꦡꦴꦒꦠꦺꦴ ꦫꦏ꧀ꦑꦺꦪ꧀ꦪ – ‘ꦩꦴ ꦩꦺ ꦆꦢꦁ ꦥꦫꦺꦴ ꦄꦚ꧀ꦚꦴꦱꦷ’ꦠꦶ. ꦆꦩꦴꦤꦶ ꦕꦠ꧀ꦠꦴꦫꦶ ꦠꦡꦴꦒꦠꦱ꧀ꦱ ꦄꦫꦏ꧀ꦑꦺꦪ꧀ꦪꦴꦤꦶ.

‘‘ꦏꦠꦩꦺꦲꦶ ꦠꦷꦲꦶ ꦄꦤꦸꦥꦮꦗ꧀ꦗꦺꦴ? ꦱ꧀ꦮꦴꦏ꧀ꦑꦴꦠꦣꦩ꧀ꦩꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦺꦴ. ꦠꦠ꧀ꦫ ꦮꦠ ꦩꦁ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦢꦺꦮꦺꦴ ꦮꦴ ꦩꦴꦫꦺꦴ ꦮꦴ ꦧ꧀ꦫꦲ꧀ꦩꦴ ꦮꦴ ꦏꦺꦴꦕꦶ ꦮꦴ ꦭꦺꦴꦏꦱ꧀ꦩꦶꦁ ꦱꦲꦣꦩ꧀ꦩꦺꦤ ꦥꦛꦶꦕꦺꦴꦢꦺꦱ꧀ꦱꦠꦶ – ‘ꦆꦠꦶꦥꦶ ꦠ꧀ꦮꦁ ꦤ ꦱ꧀ꦮꦴꦏ꧀ꦑꦴꦠꦣꦩ꧀ꦩꦺꦴ’ꦠꦶ. ꦤꦶꦩꦶꦠ꧀ꦠꦩꦺꦠꦁ, ꦨꦶꦏ꧀ꦑꦮꦺ, ꦤ ꦱꦩꦤꦸꦥꦱ꧀ꦱꦴꦩꦶ. ꦌꦠꦩꦲꦁ [ꦌꦠꦁꦥꦲꦁ (ꦱꦷ. ꦱ꧀ꦪꦴ.)], ꦨꦶꦏ꧀ꦑꦮꦺ, ꦤꦶꦩꦶꦠ꧀ꦠꦁ ꦄꦱꦩꦤꦸꦥꦱ꧀ꦱꦤ꧀ꦠꦺꦴ ꦑꦺꦩꦥ꧀ꦥꦠ꧀ꦠꦺꦴ ꦄꦨꦪꦥ꧀ꦥꦠ꧀ꦠꦺꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦺꦴ ꦮꦶꦲꦫꦴꦩꦶ.

‘‘ꦱꦸꦥꦚ꧀ꦚꦠ꧀ꦠꦴ ꦑꦺꦴ ꦥꦤ ꦩꦺ, ꦨꦶꦏ꧀ꦑꦮꦺ, ꦱꦴꦮꦏꦴꦤꦁ ꦤꦶꦧ꧀ꦧꦴꦤꦒꦴꦩꦶꦤꦷ ꦥꦛꦶꦥꦢꦴ. ꦪꦡꦴꦥꦛꦶꦥꦤ꧀ꦤꦴ ꦩꦩ ꦱꦴꦮꦏꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦶ. ꦠꦠ꧀ꦫ ꦮꦠ ꦩꦁ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦢꦺꦮꦺꦴ ꦮꦴ ꦩꦴꦫꦺꦴ ꦮꦴ ꦧ꧀ꦫꦲ꧀ꦩꦴ ꦮꦴ ꦏꦺꦴꦕꦶ ꦮꦴ ꦭꦺꦴꦏꦱ꧀ꦩꦶꦁ ꦱꦲꦣꦩ꧀ꦩꦺꦤ ꦥꦛꦶꦕꦺꦴꦢꦺꦱ꧀ꦱꦠꦶ – ‘ꦆꦠꦶꦥꦶ ꦠꦺ ꦤ ꦱꦸꦥꦚ꧀ꦚꦠ꧀ꦠꦴ ꦱꦴꦮꦏꦴꦤꦁ ꦤꦶꦧ꧀ꦧꦴꦤꦒꦴꦩꦶꦤꦷ ꦥꦛꦶꦥꦢꦴ. ꦪꦡꦴꦥꦛꦶꦥꦤ꧀ꦤꦴ ꦠꦮ ꦱꦴꦮꦏꦴ ꦄꦴꦱꦮꦴꦤꦁ ꦑꦪꦴ…ꦥꦺ… ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦷ’ꦠꦶ. ꦤꦶꦩꦶꦠ꧀ꦠꦩꦺꦠꦁ, ꦨꦶꦏ꧀ꦑꦮꦺ, ꦤ ꦱꦩꦤꦸꦥꦱ꧀ꦱꦴꦩꦶ. ꦌꦠꦩꦲꦁ, ꦨꦶꦏ꧀ꦑꦮꦺ, ꦤꦶꦩꦶꦠ꧀ꦠꦁ ꦄꦱꦩꦤꦸꦥꦱ꧀ꦱꦤ꧀ꦠꦺꦴ ꦑꦺꦩꦥ꧀ꦥꦠ꧀ꦠꦺꦴ ꦄꦨꦪꦥ꧀ꦥꦠ꧀ꦠꦺꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦺꦴ ꦮꦶꦲꦫꦴꦩꦶ.

‘‘ꦄꦤꦺꦏꦱꦠꦴ ꦑꦺꦴ ꦥꦤ ꦩꦺ, ꦨꦶꦏ꧀ꦑꦮꦺ, ꦱꦴꦮꦏꦥꦫꦶꦱꦴ ꦄꦴꦱꦮꦴꦤꦁ ꦑꦪꦴ…ꦥꦺ… ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦶ. ꦠꦠ꧀ꦫ ꦮꦠ ꦩꦁ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦢꦺꦮꦺꦴ ꦮꦴ ꦩꦴꦫꦺꦴ ꦮꦴ ꦧ꧀ꦫꦲ꧀ꦩꦴ ꦮꦴ ꦏꦺꦴꦕꦶ ꦮꦴ ꦭꦺꦴꦏꦱ꧀ꦩꦶꦁ ꦱꦲꦣꦩ꧀ꦩꦺꦤ ꦥꦛꦶꦕꦺꦴꦢꦺꦱ꧀ꦱꦠꦶ – ‘ꦆꦠꦶꦥꦶ ꦠꦺ ꦤ ꦄꦤꦺꦏꦱꦠꦴ ꦱꦴꦮꦏꦥꦫꦶꦱꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦷ’ꦠꦶ. ꦤꦶꦩꦶꦠ꧀ꦠꦩꦺꦠꦁ, ꦨꦶꦏ꧀ꦑꦮꦺ, ꦤ ꦱꦩꦤꦸꦥꦱ꧀ꦱꦴꦩꦶ. ꦌꦠꦩꦲꦁ, ꦨꦶꦏ꧀ꦑꦮꦺ, ꦤꦶꦩꦶꦠ꧀ꦠꦁ ꦄꦱꦩꦤꦸꦥꦱ꧀ꦱꦤ꧀ꦠꦺꦴ ꦑꦺꦩꦥ꧀ꦥꦠ꧀ꦠꦺꦴ ꦄꦨꦪꦥ꧀ꦥꦠ꧀ꦠꦺꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦺꦴ ꦮꦶꦲꦫꦴꦩꦶ. ꦆꦩꦺꦲꦶ ꦠꦷꦲꦶ ꦄꦤꦸꦥꦮꦗ꧀ꦗꦺꦴ.

‘‘ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦠꦡꦴꦒꦠꦱ꧀ꦱ ꦄꦫꦏ꧀ꦑꦺꦪ꧀ꦪꦴꦤꦶ, ꦆꦩꦺꦲꦶ ꦕ ꦠꦷꦲꦶ ꦄꦤꦸꦥꦮꦗ꧀ꦗꦺꦴ’’ꦠꦶ. ꦥꦚ꧀ꦕꦩꦁ.